ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ- ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ᠂ᠭᠤᠷᠪᠠᠳᠤᠭᠠᠷ ᠪᠦᠯᠦᠭ 〔ᠬᠣᠷᠢᠨ ᠭᠤᠷᠪᠠ〕 Цаг төрийн үймээн – Д ᠂ Намдаг - Цаг төрийн үймээн ᠂ гуравдугаар бүлэг - 23
70ᠡᠴᠦᠰ ᠦ᠋ᠨ ᠬᠥᠮᠦᠨ
ᠥᠨᠳᠥᠷ ᠳᠠᠮᠫᠢᠯ ᠠ᠋ᠴᠠ ᠬᠣᠢᠰᠢ ᠲᠠᠪᠤᠨ ᠬᠣᠨᠣᠭ ᠤ᠋ᠨ ᠳᠠᠷᠠᠭᠠ ᠳᠣᠷᠵᠢ ᠳᠠᠷᠤᠭᠠ ᠲᠠᠢ ᠪᠢᠴᠢᠬᠠᠨ ᠠᠩᠭᠢ ᠳᠠᠢᠰᠤᠨ ᠤ᠋ ᠲᠠᠯᠠ ᠶ᠋ᠢᠨ ᠨᠢᠭᠡ ᠬᠥᠮᠦᠨ ᠢ᠋ ᠪᠠᠷᠢᠵᠤ ᠠᠪᠤᠯᠠ᠃ ᠲᠡᠷᠡ ᠡᠷᠡ ᠶ᠋ᠢᠨ ᠭᠠᠳᠠᠭᠠᠳᠤ ᠪᠠᠢᠳᠠᠯ ᠪᠦᠳᠦᠭᠦᠨ ᠪᠣᠯᠬᠢ᠂ ᠪᠢᠷᠠ ᠴᠢᠳᠠᠯ ᠢ᠋ᠶ᠋ᠠᠷ ᠪᠠᠭᠠᠪᠠᠭᠠᠢ ᠰᠢᠭ᠋ ᠪᠠᠢᠪᠠᠴᠤ ᠵᠠᠩ ᠴᠢᠨᠠᠷ ᠨᠢ ᠬᠣᠨᠢ ᠰᠢᠭ᠋ ᠨᠣᠮᠣᠬᠠᠨ ᠪᠥᠭᠡᠳ ᠬᠣᠨᠢᠨ ᠬᠡᠯᠪᠡᠷᠢ ᠶ᠋ᠢᠨ ᠬᠦᠷᠡᠩ ᠰᠢᠷᠭᠠᠯ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠡᠨᠡ ᠲᠡᠷᠡ ᠶ᠋ᠢ ᠭᠥᠯᠢᠷᠡᠨ ᠰᠢᠷᠲᠡᠨᠡ᠃ ᠬᠡᠯᠡᠬᠦ ᠬᠥᠳᠡᠯᠬᠦ ᠴᠥᠮ ᠤᠳᠠᠭᠠᠨ᠂ ᠦᠢᠯᠡ ᠬᠡᠷᠡᠭ ᠢ᠋ᠶ᠋ᠡᠨ ᠬᠥᠰᠢᠭᠦᠨ ᠬᠡᠯᠡ ᠪᠡᠷ ᠦᠭᠡ ᠪᠦᠷᠢ ᠶ᠋ᠢ ᠵᠥᠭᠡᠭᠡᠵᠦ ᠲᠠᠯᠪᠢᠨ ᠲᠣᠳᠣᠷᠬᠠᠢᠯᠠᠭᠰᠠᠨ ᠠ᠋ᠴᠠ ᠨᠢ ᠦᠵᠡᠬᠦ ᠳ᠋ᠦ᠍ ᠪᠢᠳᠡᠨ ᠦ᠌ ᠴᠡᠷᠢᠭ ᠲᠦ᠍ ᠪᠠᠷᠢᠭᠳᠠᠨ ᠣᠷᠣᠭᠰᠠᠭᠠᠷ ᠵᠢᠯ ᠰᠢᠬᠠᠵᠤ ᠪᠠᠢᠭᠠ ᠠᠵᠢ᠃ ᠬᠥᠮᠦᠨ ᠪᠣᠯᠤᠭᠰᠠᠭᠠᠷ ᠡᠴᠦᠰ ᠦ᠋ᠨ ᠡᠳᠦᠷ ᠦ᠋ᠳ ᠢ᠋ ᠬᠦᠷᠲᠡᠯᠡ ᠬᠤᠪᠢ ᠵᠠᠶᠠᠭᠠ ᠪᠠᠨ ᠪᠤᠰᠤᠳ ᠲᠤ ᠮᠡᠳᠡᠭᠦᠯᠦᠨ ᠶᠠᠪᠤᠭᠰᠠᠨ ᠠ᠋ᠴᠠ ᠥᠭᠡᠷᠡ ᠶᠠᠭᠤ ᠴᠦ᠍ ᠦᠭᠡᠢ ᠠᠲᠠᠯᠠ《ᠨᠠᠳᠠ ᠳᠠᠷᠤᠯᠠᠭᠳᠠᠵᠤ ᠶᠠᠪᠤᠭᠰᠠᠨ ᠤᠳᠠᠭᠠ ᠦᠭᠡᠢ》 ᠭᠡᠵᠦ ᠥᠴᠢᠭ ᠮᠡᠳᠡᠭᠦᠯᠦᠨᠡ᠃ ᠡᠭᠦᠨᠴᠢᠯᠡᠨ ᠬᠠᠷᠠ ᠪᠠᠭᠠ ᠠ᠋ᠴᠠ ᠪᠠᠨ ᠪᠤᠰᠤᠳ ᠲᠤ ᠵᠠᠷᠤᠴᠠᠯᠠᠭᠳᠠᠭᠠᠳ ᠦᠰᠦ ᠲᠡᠢ ᠳᠡᠪᠡᠯ ᠳᠡᠭᠡᠷᠡ ᠲᠠᠲᠠᠬᠤ᠂ ᠭᠠᠭᠴᠠ ᠳᠡᠪᠡᠯ ᠦ᠋ᠨ ᠥᠩᠭᠡ ᠣᠯᠵᠤ ᠪᠠᠢᠭᠰᠠᠨ ᠤᠳᠠᠭᠠ ᠦᠭᠡᠢ ᠪᠠᠢᠬᠤ ᠠᠲᠠᠯᠠ《ᠪᠢ ᠪᠤᠰᠤᠳ ᠲᠤ ᠮᠥᠯᠵᠢᠭᠳᠡᠵᠦ ᠶᠠᠪᠤᠭᠰᠠᠨ ᠤᠳᠠᠭᠠ ᠦᠭᠡᠢ》 ᠭᠡᠵᠦ ᠮᠡᠳᠡᠭᠦᠯᠦᠨᠡ᠃
— ᠢᠩᠭᠢᠬᠦ ᠳ᠋ᠦ᠍ ᠴᠢ ᠴᠣᠬᠣᠮ ᠬᠡᠨ ᠦ᠌ ᠲᠥᠯᠥᠭᠡ ᠭᠡᠵᠦ᠂ ᠪᠢᠳᠡᠨ ᠦ᠌ ᠡᠰᠡᠷᠭᠦ ᠶᠠᠪᠤᠵᠤ ᠪᠠᠢᠪᠠ? ᠭᠡᠬᠦ ᠳ᠋ᠦ᠍᠂
— ᠶᠠᠭᠠᠬᠢᠬᠤᠪ᠂ ᠳᠡᠭᠡᠳᠦ ᠳᠠᠷᠤᠭᠠ ᠨᠣᠶᠠᠳ ᠤ᠋ᠨ ᠢ᠋ᠶ᠋ᠠᠨ ᠲᠥᠯᠥᠭᠡ ᠭᠡᠵᠦ ᠬᠡᠨᠡᠭ ᠦᠭᠡᠢ ᠬᠠᠷᠢᠭᠤᠯᠤᠨᠠ᠃
— ᠲᠡᠭᠡᠭᠡᠳ ᠴᠢ ᠬᠡᠴᠢᠨᠡᠭᠡᠨ ᠬᠥᠮᠦᠨ ᠠᠯᠠᠪᠠ? ᠭᠡᠬᠦ ᠳ᠋ᠦ᠍᠄
— ᠮᠡᠳᠡᠬᠦ ᠦᠭᠡᠢ᠃
— ᠶᠠᠭᠠᠬᠢᠭᠠᠳ ᠮᠡᠳᠡᠳᠡᠭ ᠦᠭᠡᠢ ᠶᠦᠮ ᠪᠣᠢ? ᠭᠡᠬᠦ ᠳ᠋ᠦ᠍ ᠳᠣᠷᠣᠭᠰᠢ ᠰᠢᠷᠳᠡᠨ ᠬᠠᠮᠠᠷ ᠱᠤᠤᠬᠢᠲᠤᠨᠠᠭᠤᠯᠤᠨ ᠪᠣᠳᠣᠭᠠᠳ᠂
— ᠪᠢ ᠪᠤᠰᠤᠳ ᠤ᠋ᠨ ᠠᠳᠠᠯᠢ ᠫᠤᠤᠳᠠᠵᠤ ᠶᠠᠪᠤᠭᠰᠠᠨ ᠪᠣᠯᠪᠠᠴᠤ ᠬᠠᠷᠠᠭᠠ ᠲᠣᠬᠢᠷᠠᠭᠤᠯᠤᠨ ᠱᠠᠬᠠᠢᠵᠤ ᠦᠵᠡᠭᠡ ᠦᠭᠡᠢ ᠪᠣᠯᠤᠭᠠᠳ ᠮᠡᠳᠡᠬᠦ ᠦᠭᠡᠢ ᠪᠠᠢᠨᠠ ᠭᠡᠵᠦ ᠬᠠᠷᠢᠭᠤᠯᠪᠠ᠃
— ᠵᠠ ᠴᠢᠮᠠ ᠳ᠋ᠤ᠌ ᠲᠤᠯᠭᠠᠨ ᠬᠡᠯᠡᠯᠴᠡᠬᠦ ᠶᠠᠯᠠ ᠠᠯᠠᠭᠠ᠂ ᠴᠢ ᠵᠦᠭᠡᠷ ᠡᠨᠳᠡ ᠡᠴᠡ ᠪᠡᠨ ᠣᠷᠣᠨ ᠨᠤᠲᠤᠭ ᠤᠷᠤᠭᠤ ᠪᠠᠨ ᠲᠣᠨᠢᠯ! ᠭᠡᠬᠦ ᠳ᠋ᠦ᠍᠄
— ᠡᠵᠡᠳ ᠮᠢᠨᠢ ᠥᠷᠥᠰᠢᠶᠡ! ᠲᠥᠷᠥ ᠶ᠋ᠢᠨ ᠡᠮᠦᠨᠡ ᠬᠢᠭᠰᠡᠨ ᠬᠡᠷᠡᠭ ᠢ᠋ᠶ᠋ᠡᠨ ᠡᠰᠡ ᠬᠡᠯᠡᠪᠡᠯ ᠬᠥᠮᠦᠨ ᠦ᠌ ᠦᠢᠯᠡᠰ ᠬᠡᠵᠢᠶᠡᠳᠡ ᠨᠠᠰᠤᠨ ᠳ᠋ᠤ᠌ ᠮᠠᠭᠤ ᠶᠠᠪᠤᠳᠠᠭ ᠶᠤᠮ ᠭᠡᠨᠡ ᠪᠢᠯᠡ᠃ ᠪᠢ ᠴᠦ᠍ ᠪᠠᠰᠠ ᠬᠥᠮᠦᠨ ᠠᠯᠠᠭᠰᠠᠨ ᠶᠡᠬᠡ ᠨᠢᠭᠦᠯ ᠲᠡᠢ ᠬᠥᠮᠦᠨ ᠰᠢᠦ ᠭᠡᠳ ᠬᠡᠳᠦᠨ ᠬᠣᠨᠣᠭ ᠤ᠋ᠨ ᠡᠮᠦᠨᠡ ᠠᠭᠤᠯᠠᠨ ᠳ᠋ᠤ᠌ ᠬᠠᠷᠠ ᠪᠠᠭᠠ ᠶ᠋ᠢᠨ ᠲᠠᠨᠢᠯ ᠬᠥᠮᠦᠨ ᠢ᠋ᠶ᠋ᠡᠨ ᠴᠣᠬᠢᠨ ᠠᠯᠠᠭᠰᠠᠨ ᠢ᠋ᠶ᠋ᠠᠨ ᠥᠭᠦᠯᠡᠨ ᠭᠡᠮᠰᠢᠵᠦ᠂ ᠪᠣᠯᠬᠢ ᠪᠣᠷᠭᠢᠯ ᠬᠣᠭᠣᠯᠠᠢ ᠪᠠᠷ ᠮᠡᠭᠰᠢᠨ ᠤᠬᠢᠯᠠᠪᠠ᠃
ᠲᠡᠭᠦᠰᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠲᠩᠷᠢ ᠡᠵᠢ
2026᠂3᠂3