ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ- ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ᠂ᠭᠤᠷᠪᠠᠳᠤᠭᠠᠷ ᠪᠦᠯᠦᠭ 〔ᠬᠣᠷᠢᠨ ᠬᠣᠶᠠᠷ〕 Цаг төрийн үймээн – Д ᠂ Намдаг - Цаг төрийн үймээн ᠂ гуравдугаар бүлэг - 22
61ᠳᠠᠢᠰᠤᠨ ᠤ᠋ ᠰᠢᠪᠲᠤᠷᠠᠭᠠ
ᠳᠠᠢᠰᠤᠨ ᠭᠣᠣᠵᠣᠣ ᠪᠠᠭᠠᠲᠤᠷ ᠠ᠋ᠴᠠ ᠬᠠᠭᠠᠴᠠᠭᠰᠠᠨ ᠤ᠋ ᠪᠠᠨ ᠳᠠᠷᠠᠭᠠ ᠡᠪᠲᠦ ᠨᠥᠬᠥᠳ ᠦ᠋ᠨ ᠶᠣᠰᠣᠭᠠᠷ ᠪᠡᠶᠡ ᠪᠡᠶᠡ ᠪᠡᠨ ᠡᠷᠢᠨ ᠴᠤᠭᠯᠠᠷᠠᠵᠠᠢ᠃ ᠭᠡᠪᠡᠴᠦ ᠬᠣᠢᠰᠢᠳᠠ ᠶ᠋ᠢᠨ ᠬᠡᠷᠡᠭ ᠢ᠋ ᠬᠡᠷᠬᠢᠬᠦ ᠳᠡᠭᠡᠷᠡ ᠡᠪᠳᠡᠷᠡᠯᠴᠡᠵᠦ ᠡᠬᠢᠯᠡᠪᠡ᠃ ᠨᠢᠭᠡ ᠨᠢ ᠡᠬᠢᠯᠡᠭᠡᠳ᠄
— ᠣᠳᠣ ᠪᠢᠳᠡ ᠶᠠᠭᠠᠬᠢᠶᠠ ᠭᠡᠬᠦ ᠪᠣᠢ᠂ ᠥᠪᠥᠷ ᠮᠣᠩᠭᠣᠯ ᠣᠷᠣᠬᠤ ᠭᠡᠰᠡᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠰᠢᠭᠤᠳ ᠣᠷᠣᠶᠠ ᠭᠡᠬᠦ ᠳ᠋ᠦ᠍ ᠬᠠᠵᠠᠭᠤ ᠠ᠋ᠴᠠ ᠨᠢ ᠨᠢᠭᠡ ᠨᠢ᠄
— ᠲᠡᠷᠡ ᠳᠡᠮᠡᠢ᠂ ᠭᠣᠣᠵᠣᠣ ᠪᠠᠭᠠᠲᠤᠷ ᠨᠢᠭᠡᠨᠲᠡ ᠥᠩᠭᠡᠷᠡᠭᠰᠡᠨ ᠡᠴᠡ ᠬᠣᠢᠰᠢ ᠪᠢᠳᠡᠨ ᠳ᠋ᠦ᠍ ᠲᠡᠷᠡ ᠬᠥᠮᠦᠨ ᠦ᠌ ᠭᠠᠵᠠᠷ ᠶᠠᠪᠤᠭᠰᠠᠨ ᠴᠦ᠍ ᠥᠯᠵᠡᠢ ᠪᠣᠯᠬᠤ ᠦᠭᠡᠢ᠂ ᠵᠦᠭᠡᠷ ᠪᠠᠭᠤᠵᠤ ᠥᠭᠭᠦᠶᠡ᠃
— ᠪᠠᠭᠤᠵᠤ ᠥᠭᠬᠦ ᠶ᠋ᠢ? ᠭᠡᠵᠦ ᠭᠤᠷᠪᠠᠳᠠᠬᠢ ᠡᠲᠡᠭᠡᠳ ᠵᠠᠨᠤᠯᠬᠢᠯᠠᠨ ᠠᠭᠤᠷᠯᠠᠵᠤ᠄
— ᠪᠢᠳᠡᠨ ᠦ᠌ ᠲᠣᠭᠠ ᠠᠷᠪᠠ᠂ ᠬᠥᠭᠡᠭᠡᠭᠰᠡᠳ ᠳᠣᠯᠣᠭᠠ ᠨᠠᠢ᠍ᠮᠠ ᠠ᠋ᠴᠠ ᠬᠡᠲᠦᠷᠡᠬᠦ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠪᠠᠭᠤᠵᠤ ᠥᠭᠬᠦ ᠨᠢ ᠶᠠᠭᠤᠲᠠᠢ ᠰᠢᠪᠰᠢᠭᠲᠡᠢ ᠬᠡᠷᠡᠭ ᠪᠣᠢ?
— ᠦᠭᠡᠢ᠂ ᠦᠭᠡᠢ ᠪᠢᠳᠡ ᠭᠣᠣᠵᠣᠣ ᠪᠠᠭᠠᠲᠤᠷ ᠤ᠋ᠨ ᠪᠠᠢᠬᠤ ᠳ᠋ᠤ᠌ ᠠᠷᠪᠠ ᠪᠠᠢᠭᠰᠠᠨ᠂ ᠣᠳᠣ ᠶᠢᠰᠦᠭᠦᠯᠡ ᠭᠡᠵᠦ ᠪᠠᠰᠠ ᠨᠢᠭᠡᠨ ᠦ᠌ ᠪᠡᠨ ᠬᠡᠯᠡᠬᠦ ᠳ᠋ᠦ᠍᠂ ᠥᠭᠡᠷᠡ ᠨᠢᠭᠡ ᠨᠢ᠂
— ᠦᠭᠡᠢ᠂ ᠲᠠ ᠮᠢᠨᠢ ᠬᠥᠮᠦᠨ ᠦ᠌ ᠲᠣᠭᠠ ᠶᠠᠭᠤᠨ ᠤ᠋ ᠬᠠᠮᠢᠶᠠ᠂ ᠡᠭᠦᠨ ᠦ᠌ ᠣᠷᠣᠨ ᠳ᠋ᠤ᠌ ᠮᠠᠨ ᠤ᠋ ᠶᠠᠪᠤᠳᠠᠯ ᠳᠡᠭᠡᠷᠡ ᠡᠴᠡ ᠪᠡᠨ ᠳᠣᠣᠷᠠ ᠪᠠᠨ ᠬᠦᠷᠲᠡᠯᠡ ᠨᠤᠷᠠᠭᠰᠠᠨ ᠢ᠋ ᠪᠤᠳᠤᠵᠠᠭᠠᠶᠠ᠃
— ᠲᠡᠭᠡᠭᠡᠳ ᠶᠠᠭᠠᠬᠢᠬᠤ ᠭᠡᠵᠢ?
— ᠶᠠᠭᠠᠬᠢᠬᠤ ᠶᠠᠭᠤ ᠪᠠᠢᠬᠤ ᠪᠣᠢ᠂ ᠵᠦᠭᠡᠷ ᠡᠨᠳᠡᠴᠡ ᠪᠡᠨ ᠵᠦᠭ ᠵᠦᠭ ᠤᠷᠤᠭᠤ ᠪᠠᠨ ᠳᠠᠷᠬᠠᠨ ᠭᠡᠷ ᠣᠷᠣᠨ ᠢ᠋ᠶ᠋ᠠᠨ ᠪᠠᠷᠠᠳᠠᠶᠠ᠃
ᠡᠢᠨᠬᠦ ᠭᠤᠷᠪᠠᠨ ᠰᠠᠨᠠᠯ ᠭᠠᠷᠤᠨ᠂ ᠭᠤᠷᠪᠠᠨ ᠲᠠᠢᠰᠢ ᠵᠢᠳᠬᠦᠨ ᠲᠡᠮᠡᠴᠡᠯᠳᠦᠬᠦ ᠳ᠋ᠦ᠍ ᠬᠦᠷᠦᠭᠰᠡᠨ ᠪᠥᠭᠡᠳ ᠪᠠᠭᠤᠵᠤ ᠥᠭᠬᠦ ᠶ᠋ᠢ ᠬᠦᠰᠡᠬᠦ ᠨᠢ ᠭᠠᠭᠴᠠᠬᠠᠨ᠃
— ᠵᠠ ᠲᠠ ᠨᠠᠷ ᠶᠠᠭᠠᠬᠢᠳᠠᠭ ᠯᠠ ᠰᠠᠨᠵᠢ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠪᠣᠯ! ᠪᠢ ᠯᠡ ᠪᠠᠭᠤᠵᠤ ᠥᠭᠭᠦᠨ ᠠᠵᠠ ᠪᠠᠨ ᠦᠵᠡᠨᠡ ᠭᠡᠳ ᠪᠣᠰᠬᠤ ᠳ᠋ᠤᠨᠢ ᠳᠡᠭᠡᠷᠡᠬᠢ ᠨᠢ
— ᠪᠢ ᠴᠦ᠍᠁ ᠭᠡᠳ ᠥᠨᠳᠡᠰᠬᠢᠪᠡ᠃
ᠡᠨᠡ ᠳᠠᠷᠤᠢ ᠫᠤᠤ ᠲᠡᠰᠬᠢᠨ ᠳᠤᠤᠭᠠᠷᠴᠤ ᠲᠦᠷᠦᠭᠦᠴᠢ ᠶ᠋ᠢᠨ ᠬᠥᠮᠦᠨ ᠭᠠᠵᠠᠷ ᠤᠨᠠᠪᠠ᠃ ᠵᠡᠭᠦᠨ ᠠᠢᠮᠠᠭ ᠰᠠᠩ ᠪᠡᠢᠰᠡ ᠶ᠋ᠢᠨ ᠬᠤᠰᠢᠭᠤᠨ ᠤ᠋ ᠳᠡᠴᠢᠨ ᠭᠡᠭᠴᠢ ᠫᠤᠤᠳᠠᠵᠠᠢ᠃ ᠡᠨᠡ ᠡᠷᠡ ᠨᠠᠰᠤ ᠵᠠᠯᠠᠭᠤ ᠪᠠᠷᠤᠨ ᠤᠩᠭᠸᠷᠡᠨ ᠦ᠌ ᠴᠡᠷᠢᠭ ᠲᠦ᠍ ᠲᠠᠲᠠᠭᠳᠠᠭᠰᠠᠨ ᠡᠳᠦᠷ ᠡᠴᠡ ᠪᠡᠨ ᠡᠬᠢᠯᠡᠨ ᠬᠠᠮᠢᠭᠠ ᠶᠠᠪᠤᠭᠰᠠᠨ ᠭᠠᠵᠠᠷ ᠫᠤᠤ ᠶ᠋ᠢᠨ ᠵᠠᠮᠤᠭ ᠲᠠᠴᠢᠭᠢᠨᠠᠭᠤᠯᠤᠨ ᠠᠮᠢᠳᠤ ᠬᠥᠮᠦᠨ ᠢ᠋ ᠳᠡᠭᠡᠷᠡᠮᠳᠡᠵᠦ᠂ ᠬᠠᠵᠠᠭᠤ ᠶ᠋ᠢᠨ ᠢ᠋ᠶ᠋ᠡᠨ ᠬᠥᠮᠦᠰ ᠲᠦ᠍ ᠪᠠᠭᠠᠲᠤᠷ ᠵᠣᠷᠢᠭᠲᠠᠨ ᠭᠡᠵᠦ ᠠᠯᠳᠠᠷᠰᠢᠭᠠᠳ᠂ ᠥᠪᠡᠷ ᠢ᠋ ᠪᠡᠨ ᠴᠦ᠍ ᠨᠡᠭᠡᠷᠡᠨ ᠰᠦᠷᠡᠬᠡᠢ ᠡᠷᠡ ᠪᠣᠯᠭᠠᠵᠤ ᠡᠯᠳᠡᠪ ᠠᠶᠤᠮᠰᠢᠭ ᠢ᠋ ᠰᠢᠳᠦ ᠬᠠᠪᠢᠷᠤᠨ ᠬᠥᠮᠥᠭᠡᠢ ᠵᠠᠭᠤᠨ ᠬᠢ ᠬᠢᠭᠰᠡᠭᠡᠷ ᠬᠥᠮᠦᠨ ᠲᠥᠷᠬᠦ ᠪᠡᠨ ᠠᠯᠳᠠᠭᠰᠠᠨ ᠡᠷᠡ ᠪᠠᠢᠵᠠᠢ᠃ ᠰᠠᠶᠢ ᠶ᠋ᠢᠨ ᠢ᠋ᠶ᠋ᠡᠨ ᠫᠤᠤᠳᠠᠭᠰᠠᠨ ᠰᠤᠮᠤᠨ ᠤ᠋ ᠬᠣᠩᠬᠢᠶᠠ ᠶ᠋ᠢ ᠵᠠᠮᠤᠭ ᠲᠡᠳᠡᠨ ᠬᠠᠶᠠᠵᠤ᠂ ᠬᠣᠶᠠᠳᠠᠬᠢ ᠪᠠᠨ ᠴᠡᠨᠡᠭᠯᠡᠪᠡ᠃
— ᠪᠠᠰᠠ ᠬᠡᠨ ᠪᠠᠭᠤᠵᠤ ᠥᠭᠬᠦ ᠭᠡᠵᠦ ᠪᠠᠢᠨᠠ ᠪᠣᠢ? ᠭᠡᠵᠦ ᠳᠠᠪᠰᠢᠯᠠᠨ ᠬᠠᠰᠬᠢᠷᠪᠠ᠃
ᠣᠳᠣ ᠪᠣᠯᠬᠣᠷ ᠬᠠᠷᠢᠭᠤ ᠠᠯᠠᠭᠠ᠃ ᠢᠩᠭᠢᠭᠡᠳ ᠲᠡᠷᠡ ᠳᠡᠴᠢᠨ ᠥᠪᠡᠷ ᠢ᠋ᠶ᠋ᠡᠨ ᠥᠪᠡᠷ ᠢ᠋ ᠪᠡᠨ ᠳᠠᠷᠤᠭᠠ ᠪᠣᠯᠭᠠᠵᠤ ᠠᠪᠴᠠᠢ᠃
ᠪᠢᠳᠡ ᠬᠡᠳᠦᠢᠪᠡᠷ ᠳᠡᠢᠯᠦᠭᠳᠡᠨ ᠵᠢᠭᠤᠲᠠᠵᠤ ᠶᠠᠪᠤᠭᠠ ᠪᠣᠯᠪᠠᠴᠤ ᠡᠷᠭᠢᠨ ᠲᠤᠯᠤᠯᠳᠤᠬᠤ ᠳ᠋ᠤ᠌ ᠤᠨᠤᠬᠤ ᠮᠣᠷᠢᠳ᠂ ᠪᠠᠷᠢᠬᠤ ᠵᠡᠪᠰᠡᠭ ᠪᠡᠯᠡᠨ᠃ ᠲᠡᠷᠡ ᠪᠠᠢᠲᠤᠭᠠᠢ ᠨᠤᠲᠤᠭ ᠤ᠋ᠨ ᠬᠥᠮᠦᠰ ᠢ᠋ ᠳᠠᠢᠴᠢᠯᠠᠨ ᠪᠡᠷᠢᠯᠡᠵᠦ᠂ ᠬᠠᠨᠢ ᠨᠥᠬᠥᠳ ᠣᠯᠠᠨ ᠲᠠᠢ ᠴᠦ᠍ ᠪᠣᠯᠵᠤ ᠪᠣᠯᠤᠨᠠ ᠭᠡᠬᠦ ᠳ᠋ᠦ᠍ᠨᠢ ᠬᠡᠨ ᠴᠦ᠍ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃《ᠡᠨᠡ ᠰᠠᠭᠰᠠᠭᠤ ᠶᠠᠮᠠᠷ ᠶᠠᠭᠤᠮᠠ ᠪᠠᠨ ᠳᠣᠩᠭᠣᠳᠤᠨᠠ ᠪᠣᠢ》 ᠭᠡᠵᠦ ᠲᠤᠰ ᠪᠦᠷᠢ ᠪᠡᠨ ᠪᠣᠳᠣᠨ ᠪᠡᠶᠡ ᠪᠡᠶᠡ ᠪᠡᠨ ᠰᠢᠷᠲᠡᠭᠡᠳ ᠡᠴᠦᠰ ᠲᠦ᠋ᠨᠢ《ᠲᠡᠢᠮᠦ ᠠ᠋ ᠡᠨᠡ ᠴᠦ᠍ ᠬᠠᠷᠢᠨ ᠴᠢᠨᠦ ᠳᠣᠯᠣᠭᠠᠨ ᠵᠥᠪ!》 ᠭᠡᠰᠡᠨ ᠳ᠋ᠦ᠍ ᠪᠤᠰᠤᠳ ᠨᠢ ᠳᠠᠭᠠᠯᠳᠤᠨ《ᠲᠡᠢᠮᠦ᠂ ᠴᠢᠨᠦ ᠵᠥᠪ!》 ᠭᠡᠵᠡᠭᠡᠵᠠᠢ᠃
ᠢᠩᠭᠢᠭᠰᠡᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠲᠡᠳᠡ ᠲᠡᠷᠡ ᠳᠡᠴᠢᠨ ᠢ᠋ ᠪᠦᠷ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠡᠨ ᠭᠠᠷᠭᠠᠵᠠᠢ᠃《ᠪᠣᠰᠤᠭᠠᠳ!》 ᠭᠡᠬᠦ ᠳ᠋ᠦ᠍ᠨᠢ ᠲᠡᠷᠡᠬᠡᠨ ᠪᠣᠰᠴᠠᠭᠠᠨᠠ᠃《ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠭᠠᠳ!》 ᠭᠡᠵᠦ ᠬᠠᠰᠬᠢᠷᠬᠤ ᠳ᠋ᠤᠨᠢ ᠮᠥᠨ ᠯᠡ ᠦᠭᠡ ᠳᠠᠭᠤ ᠦᠭᠡᠢ ᠮᠣᠷᠳᠠᠨ᠂ ᠡᠷᠭᠢᠨ ᠲᠤᠯᠤᠯᠳᠤᠬᠤ ᠵᠠᠮ ᠳ᠋ᠤ᠌ ᠣᠷᠣᠪᠠ᠃ ᠳᠡᠴᠢᠨ ᠦ᠌ ᠰᠡᠳᠬᠢᠯ ᠳ᠋ᠦ᠍ ᠢᠯᠠᠨ ᠳᠡᠢᠯᠬᠦ ᠪᠠ ᠬᠥᠮᠦᠰ ᠢ᠋ ᠳᠠᠢᠴᠢᠯᠠᠨ ᠲᠠᠲᠠᠵᠤ ᠦᠢ ᠣᠯᠠᠨ ᠪᠣᠯᠭᠠᠬᠤ ᠲᠡᠭᠡᠭᠡᠳ ᠬᠦᠷᠢᠶᠡ ᠶ᠋ᠢ ᠡᠵᠡᠯᠡᠬᠦ᠂ ᠴᠠᠭᠠᠰᠢ ᠪᠦᠬᠦ ᠬᠠᠯᠬᠠ ᠶ᠋ᠢ ᠭᠠᠷ ᠲᠠᠭᠠᠨ ᠠᠪᠤᠨ ᠰᠢᠨᠡ ᠤᠯᠤᠰ᠂ ᠰᠢᠨᠡ ᠣᠷᠣᠨ ᠢ᠋ ᠪᠠᠢᠭᠤᠯᠤᠨ ᠲᠣᠭᠲᠠᠭᠠᠬᠤ ᠲᠤᠬᠠᠢ ᠶ᠋ᠢᠨ ᠭᠠᠢᠬᠠᠮᠰᠢᠭᠲᠤ ᠲᠥᠯᠥᠪᠯᠡᠭᠡ ᠨᠦ᠍ᠭᠦᠳ ᠤᠳᠠᠭᠠ ᠳᠠᠷᠠᠭᠠᠯᠠᠨ ᠣᠷᠣᠵᠤ ᠢᠷᠡᠨ ᠤᠷᠮᠠ ᠵᠣᠷᠢᠭ ᠪᠠᠳᠠᠷᠠᠬᠤ ᠠᠵᠢ᠃ ᠠᠷᠤ ᠳ᠋ᠤᠨᠢ ᠶᠠᠪᠤᠭᠠ ᠬᠥᠮᠦᠰ ᠲᠦ᠍᠂ ᠬᠠᠮᠢᠭᠠ ᠪᠣᠯ ᠬᠠᠮᠢᠭᠠ ᠬᠠᠪᠴᠢᠭᠳᠠᠨ ᠵᠢᠭᠰᠢᠭᠳᠡᠬᠦ ᠡᠴᠡ ᠥᠭᠡᠷᠡ ᠶᠠᠭᠤᠮᠠ ᠦᠭᠡᠢ ᠪᠣᠯᠤᠭᠰᠠᠨ ᠪᠡᠶᠡᠰ ᠢ᠋ ᠬᠡᠷᠬᠢᠬᠦ ᠪᠢᠯᠡ? ᠭᠡᠬᠦ ᠡᠴᠡ ᠥᠭᠡᠷᠡ ᠵᠦᠢᠯ ᠠᠯᠠᠭᠠ᠃ ᠭᠡᠪᠡᠴᠦ ᠪᠡᠶᠡ ᠪᠡᠶᠡ ᠪᠡᠨ ᠢᠳᠡᠭᠡᠨ ᠦᠭᠡ ᠬᠡᠯᠡ ᠠᠪᠤᠯᠴᠠᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠬᠠᠷᠠᠳᠠᠨ ᠰᠡᠵᠢᠭᠯᠡᠬᠦ ᠪᠥᠭᠡᠳ ᠶᠡᠷᠦ ᠲᠡᠭᠡᠬᠦ ᠶ᠋ᠢᠨ ᠬᠦᠴᠦᠨ ᠳ᠋ᠦ᠍ ᠠᠮᠢ ᠪᠡᠶᠡ ᠪᠡᠨ ᠲᠡᠭᠡᠭᠡᠵᠦ ᠶᠠᠪᠤᠭᠠᠳ ᠪᠣᠳᠣᠨᠠ᠃ ᠭᠡᠲᠡᠯᠡ ᠳᠡᠴᠢᠨ ᠳᠠᠢᠰᠤᠨ ᠤ᠋ ᠪᠠᠷᠠ ᠬᠠᠷᠠᠮᠠᠭᠴᠠ ᠬᠥᠮᠦᠰ ᠢ᠋ᠶ᠋ᠡᠨ ᠳᠠᠷᠤᠢ ᠳᠠᠷᠬᠠᠨ ᠲᠤᠯᠤᠯᠳᠤᠬᠤ ᠶ᠋ᠢ ᠥᠨᠳᠥᠷ ᠳᠠᠭᠤ ᠪᠠᠷ ᠰᠦᠷ ᠪᠠᠳᠠᠷᠠᠭᠤᠯᠤᠨ ᠥᠭᠪᠡ᠃ ᠲᠡᠷᠡ ᠨᠢ ᠥᠪᠡᠷ ᠲᠤᠨᠢ ᠮᠠᠰᠢ ᠲᠠᠭᠠᠯᠠᠮᠵᠢᠲᠠᠢ ᠪᠠᠢᠭᠰᠠᠨ ᠪᠥᠭᠡᠳ ᠠᠷᠤ ᠶ᠋ᠢᠨ ᠢ᠋ᠶ᠋ᠡᠨ ᠨᠢᠭᠡ ᠬᠥᠮᠦᠨ ᠳ᠋ᠦ᠍ ᠮᠣᠷᠢ ᠪᠠᠨ ᠪᠠᠷᠢᠭᠤᠯᠤᠨ ᠦᠯᠡᠳᠡᠭᠡᠵᠦ ᠤᠷᠤᠭᠰᠢ ᠳᠠᠪᠰᠢᠨ ᠬᠡᠳᠦᠨ ᠰᠤᠮᠤ ᠲᠠᠯᠪᠢᠬᠤ ᠳ᠋ᠤ᠌ ᠬᠥᠮᠦᠰ ᠨᠢ ᠴᠦ᠍ ᠮᠥᠨ ᠡᠨᠳᠡ ᠲᠡᠨᠳᠡ ᠲᠠᠷᠬᠠᠭᠰᠠᠭᠠᠷ ᠫᠤᠤ ᠳᠤᠤᠭᠠᠷᠴᠤ ᠪᠠᠢᠵᠠᠢ᠃ ᠶᠡᠬᠡ ᠦᠢᠯᠡ ᠶ᠋ᠢᠨ ᠵᠠᠬᠠ ᠰᠡᠵᠢᠭᠦᠷ ᠢ᠋ ᠳᠡᠴᠢᠨ ᠣᠳᠣ ᠡᠨᠳᠡ ᠡᠴᠡ ᠡᠬᠢᠯᠡᠵᠦ ᠪᠣᠢ ᠲᠤᠯᠠ ᠵᠣᠷᠢᠭ ᠵᠢᠷᠦᠬᠡ ᠨᠢ ᠶᠣᠰᠣᠲᠠᠢ ᠯᠠ ᠪᠠᠭᠠᠲᠤᠷ ᠡᠷᠡ ᠶ᠋ᠢᠨ ᠬᠠᠯᠠᠭᠤᠨ ᠢ᠋ᠶ᠋ᠠᠷ ᠰᠢᠳᠡᠵᠦ ᠪᠠᠢᠯᠠ᠃ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠳᠠᠢᠰᠤᠨ ᠤ᠋ ᠲᠠᠯᠠ ᠳᠠᠷᠬᠠᠨ ᠳᠠᠪᠰᠢᠵᠤ ᠡᠬᠢᠯᠡᠭᠰᠡᠨ ᠢ᠋ᠶ᠋ᠡᠨ ᠣᠷᠬᠢᠨ ᠪᠡᠶᠡ ᠪᠡᠶᠡ ᠪᠡᠨ ᠳᠠᠯᠠᠯᠤᠨ ᠨᠢᠭᠡ ᠳᠣᠣᠷᠠ ᠴᠤᠭᠯᠠᠷᠠᠵᠤ ᠪᠠᠢᠭᠠ ᠦᠵᠡᠭᠳᠡᠪᠡ(ᠡᠨᠡ ᠨᠢ ᠳᠠᠮᠫᠢᠯ ᠤ᠋ᠨ ᠭᠡᠨᠡᠳᠲᠡ ᠶ᠋ᠢᠨ ᠣᠰᠣᠯᠳᠠᠭᠰᠠᠨ ᠠ᠋ᠴᠠ ᠪᠠᠢᠵᠠᠢ)᠃ ᠳᠡᠴᠢᠨ ᠣᠳᠣ《ᠡᠳᠡᠨ ᠢ᠋ ᠴᠢᠨᠢ ᠳᠠᠭᠠᠷᠢᠨ ᠰᠥᠨᠥᠭᠡᠲᠦᠭᠡᠢ!》 ᠭᠡᠵᠦ ᠪᠣᠰᠤᠨ ᠬᠠᠷᠠᠢᠲᠠᠯᠠ ᠪᠤᠰᠤᠳ ᠨᠥᠬᠥᠳ ᠨᠢ ᠠᠯᠠᠭᠠ᠃ ᠲᠤᠰ ᠪᠦᠷᠢ ᠶ᠋ᠢᠨ ᠢ᠋ᠶ᠋ᠡᠨ ᠮᠣᠷᠢ ᠪᠠᠨ ᠬᠥᠭᠡᠭᠡᠨ ᠣᠳᠤᠭᠰᠠᠨ ᠨᠢ ᠮᠠᠯ ᠴᠠᠭᠠᠨ ᠲᠠᠯᠠ ᠶ᠋ᠢᠨ ᠶᠡᠬᠡ ᠵᠡᠷᠭᠡᠯᠭᠡᠨ ᠳ᠋ᠦ᠍ ᠦᠶᠡᠯᠵᠡᠨ ᠬᠠᠷᠠᠭᠳᠠᠬᠤ ᠠᠵᠢ᠃ ᠡᠢᠨᠬᠦ ᠲᠡᠭᠦᠨ ᠦ᠌ ᠬᠦᠰᠡᠯ ᠵᠡᠭᠦᠳᠦ ᠪᠣᠯᠤᠨ ᠵᠠᠮᠬᠠᠷᠠᠭᠰᠠᠨ ᠳ᠋ᠤ᠌ ᠠᠷᠤ ᠳ᠋ᠠᠬᠢ ᠮᠣᠷᠢ ᠤᠷᠤᠭᠤ ᠪᠠᠨ ᠶᠣᠰᠣᠲᠠᠢ ᠲᠠᠤᠯᠠᠢ ᠰᠢᠭ᠋ ᠬᠠᠷᠠᠢᠯᠭᠠᠪᠠ᠃ ᠦᠯᠡᠳᠡᠭᠰᠡᠨ ᠡᠴᠡ ᠭᠠᠭᠴᠠᠬᠠᠨ ᠮᠣᠷᠢ ᠶ᠋ᠢ ᠨᠢ ᠪᠠᠷᠢᠨ ᠬᠣᠴᠣᠷᠤᠭᠰᠠᠨ ᠬᠥᠮᠦᠨ ᠪᠠᠢᠯᠠ᠃ ᠳᠡᠴᠢᠨ ᠲᠡᠭᠦᠨ ᠲᠡᠢ ᠪᠡᠨ ᠤᠬᠠᠭᠠᠨ ᠵᠢᠯᠣᠭᠣ ᠦᠭᠡᠢ ᠵᠢᠭᠤᠲᠠᠨ ᠠᠯᠤᠰ ᠤ᠋ᠨ ᠠᠭᠤᠯᠠᠨ ᠳ᠋ᠤ᠌ ᠭᠠᠷᠴᠠᠢ᠃ ᠠᠷᠤ ᠠ᠋ᠴᠠ ᠨᠢ ᠴᠣᠬᠣᠮ ᠬᠡᠨ ᠴᠦ᠍ ᠬᠥᠬᠡᠭᠡ ᠦᠭᠡᠢ ᠠᠲᠠᠯᠠ ᠰᠡᠳᠬᠢᠯ ᠠᠭᠤᠵᠢᠷᠠᠭᠰᠠᠨ ᠵᠦᠢᠯ ᠦᠭᠡᠢ᠃ ᠬᠠᠶᠠᠨ ᠣᠳᠤᠭᠰᠠᠳ ᠲᠤ ᠬᠣᠷᠣᠰᠤᠨ᠂ ᠦᠢᠯᠡ ᠬᠡᠷᠡᠭ ᠪᠦᠷᠢᠮᠦᠰᠦᠨ ᠪᠠᠯᠠᠷᠠᠭᠰᠠᠨ ᠳ᠋ᠤ᠌ ᠪᠤᠬᠢᠨᠢᠳᠤᠨᠠ᠃ ᠲᠡᠭᠡᠭᠡᠳ ᠣᠳᠣ ᠢᠷᠡᠭᠡᠳᠦᠢ ᠳ᠋ᠡᠭᠡᠨ ᠬᠡᠷᠬᠢᠬᠦ ᠪᠢᠯᠡ! ᠭᠡᠬᠦ ᠡᠴᠡ ᠭᠠᠵᠠᠷ ᠳᠡᠯᠡᠬᠡᠢ ᠬᠡᠴᠢᠨᠡᠭᠡᠨ ᠠᠭᠤᠳᠠᠮ ᠪᠠᠢᠪᠠᠴᠤ ᠭᠢᠰᠬᠢᠬᠦ ᠭᠠᠵᠠᠷ ᠦᠭᠡᠢ ᠪᠣᠯᠤᠭᠰᠠᠨ ᠢ᠋ ᠰᠠᠨᠠᠬᠤ ᠳ᠋ᠤ᠌ ᠳᠠᠷᠤᠢ ᠲᠣᠯᠣᠭᠠᠢ ᠪᠠᠨ ᠴᠣᠬᠢᠨ ᠪᠠᠷᠬᠢᠷᠠᠮᠠᠷ ᠠᠵᠢ᠃ ᠭᠡᠪᠡᠴᠦ ᠳᠡᠴᠢᠨ ᠬᠠᠵᠠᠭᠤ ᠶ᠋ᠢᠨ ᠢ᠋ᠶ᠋ᠡᠨ ᠬᠥᠮᠦᠨ ᠡᠴᠡ ᠢᠴᠢᠨ ᠨᠡᠷᠡᠯᠬᠡᠬᠦ ᠲᠤᠯᠠ ᠰᠢᠳᠦ ᠬᠠᠪᠢᠷᠤᠨ《ᠠᠯᠠᠨᠠ᠂ ᠬᠢᠳᠤᠨᠠ ᠦᠨᠡᠰᠦᠨ ᠳᠣᠪᠣᠷᠬᠠᠭ ᠪᠣᠯᠭᠠᠨᠠ》 ᠭᠡᠵᠦ ᠳᠡᠮᠡᠢ ᠬᠠᠰᠬᠢᠷᠤᠨ ᠰᠡᠳᠬᠢᠯ ᠢ᠋ᠶ᠋ᠡᠨ ᠵᠣᠭᠣᠭᠬᠢᠵᠤ ᠪᠠᠢᠯᠠ᠃
ᠬᠠᠵᠠᠭᠤ ᠶ᠋ᠢᠨ ᠬᠥᠮᠦᠨ ᠭᠡᠪᠡᠯ᠂ ᠬᠠᠷᠠ ᠪᠠᠭᠠ ᠶ᠋ᠢᠨ ᠬᠢᠨᠢ ᠨᠤᠲᠤᠭ ᠤ᠋ᠨ ᠲᠠᠨᠢᠯ ᠬᠥᠮᠦᠨ ᠪᠠᠢᠯᠠ᠃ ᠲᠡᠭᠦᠨ ᠳ᠋ᠦ᠍ ᠥᠪᠡᠷ ᠦ᠋ᠨ ᠪᠡᠶᠡ ᠶ᠋ᠢ ᠥᠨᠳᠥᠷ ᠲᠦ᠍ ᠠᠪᠠᠴᠢᠨ᠂ ᠥᠭᠡᠷᠡ ᠪᠤᠰᠤᠳ ᠢ᠋ ᠳᠠᠷᠤᠨ ᠵᠠᠬᠢᠷᠬᠤ ᠶ᠋ᠢᠨ ᠬᠡᠨᠡᠷᠬᠡᠯ ᠪᠣᠯᠤᠭᠰᠠᠨ ᠳᠡᠴᠢᠨ ᠢ᠋ ᠡᠭᠳᠡᠭᠦᠴᠡᠬᠦ ᠰᠡᠳᠬᠢᠯ ᠪᠠᠢᠭᠰᠠᠨ ᠦᠭᠡᠢ᠂ ᠪᠠᠰᠠ ᠡᠭᠡᠭᠦᠯᠦᠨ ᠬᠥᠭᠡᠭᠡᠴᠢ ᠳᠠᠢᠰᠤᠨ ᠤ᠋ ᠭᠠᠷ ᠠ᠋ᠴᠠ ᠬᠡᠷᠬᠢᠨ ᠮᠤᠯᠲᠤᠷᠠᠨ ᠭᠠᠷᠬᠤ ᠪᠠᠨ ᠴᠦ᠍ ᠪᠣᠳᠣᠬᠤ ᠶᠠᠭᠤᠮᠠ ᠦᠭᠡᠢ ᠳᠦᠯᠢ ᠳᠦᠮᠪᠦ ᠣᠷᠬᠢᠨ ᠣᠪᠣᠢᠨ ᠰᠠᠭᠤᠨᠠ᠃
— ᠬᠠᠷᠠ ᠲᠡᠨᠡᠭ! ᠴᠢ ᠶᠠᠭᠤᠨ ᠳ᠋ᠤ᠌ ᠬᠠᠮᠠᠷ ᠱᠤᠤᠬᠢᠲᠤᠨᠠᠭᠤᠯᠤᠨ ᠭᠠᠵᠠᠷ ᠰᠢᠷᠳᠡᠨᠡ ᠪᠣᠢ? ᠠᠷᠠᠳ ᠤ᠋ᠨ ᠨᠠᠮ ᠤ᠋ᠨ ᠬᠢᠨ ᠡᠴᠡ ᠠᠶᠤᠬᠤ ᠳ᠋ᠠᠭᠠᠨ ᠡᠨᠡ ᠤᠤ? ᠦᠬᠦᠭᠰᠡᠨ ᠬᠣᠢᠨᠠ ᠪᠠᠨ! ᠵᠠᠶᠠᠭᠠ ᠨᠢ ᠣᠷᠬᠢᠭᠰᠠᠨ ᠴᠢᠮᠠᠶ᠋ᠢ ᠲᠡᠳᠡ ᠬᠥᠮᠦᠨ ᠭᠡᠵᠦ ᠦᠵᠡᠬᠦ ᠦᠭᠡᠢ ᠭᠡᠵᠦ ᠠᠭᠰᠤᠷᠬᠤ ᠳ᠋ᠤ᠌ ᠴᠦ᠍ ᠮᠥᠨ ᠯᠡ ᠳᠤᠭᠤᠢ᠃
ᠦᠯᠦ ᠳᠤᠤᠭᠠᠷᠬᠤ ᠪᠠᠷ ᠢ᠋ᠶ᠋ᠠᠨ ᠲᠡᠷᠡ᠂ ᠳᠡᠴᠢᠨ ᠦ᠌ ᠡᠭᠳᠡᠭᠦᠦ ᠶ᠋ᠢ ᠤᠯᠠᠮ ᠢ᠋ᠶ᠋ᠠᠷ ᠬᠦᠷᠭᠡᠬᠦ ᠠᠵᠢ᠃《ᠭᠠᠬᠠᠢ ᠨᠣᠬᠠᠢ᠂ ᠨᠣᠪᠰᠢ᠂ ᠪᠢ ᠮᠡᠳᠡᠵᠦ ᠪᠠᠢᠨᠠ᠂ ᠴᠢ ᠨᠠᠮᠠᠶ᠋ᠢ ᠳᠠᠢᠰᠤᠨ ᠳ᠋ᠤ᠌ ᠪᠠᠷᠢᠵᠤ ᠥᠭᠬᠦ ᠭᠡᠵᠦ ᠪᠠᠢᠭᠠ ᠪᠠᠢᠯᠭᠦᠢ》 ᠭᠡᠵᠦ ᠢᠰᠬᠦᠯᠦᠨ ᠠᠪᠬᠤ ᠳ᠋ᠤ᠌《ᠶᠣᠣ》 ᠭᠡᠵᠦ ᠬᠡᠯᠡᠨ ᠰᠣᠴᠢᠨ ᠥᠭᠡᠳᠡ ᠡᠴᠡ ᠨᠢ ᠭᠥᠯᠢᠷᠡᠪᠡ᠃《ᠢᠩᠭᠢᠭᠡᠳ ᠪᠢ ᠴᠢᠮᠠᠶ᠋ᠢ ᠠᠯᠠᠨᠠ ᠳᠠ》 ᠭᠡᠵᠦ ᠬᠣᠭᠣᠰᠣᠨ ᠣᠮᠣᠭ ᠢ᠋ᠶ᠋ᠠᠷ ᠪᠠᠭᠠᠯᠵᠠᠭᠤᠷᠳᠠᠨ ᠠᠪᠬᠤ ᠳ᠋ᠤ᠌ ᠰᠠᠶᠢ ᠪᠣᠰᠤᠨ ᠬᠠᠷᠠᠢᠵᠤ ᠬᠠᠮᠠᠷ ᠱᠤᠤᠬᠢᠲᠤᠨᠠᠭᠤᠯᠤᠨ ᠪᠠᠷᠠᠭᠤᠨ ᠭᠠᠷ ᠢ᠋ᠶ᠋ᠠᠨ ᠳᠡᠭᠡᠷᠡ ᠡᠷᠭᠦᠨ ᠳᠠᠯᠠᠢᠵᠤ ᠭᠠᠭᠴᠠᠬᠠᠨ ᠴᠣᠬᠢᠬᠤ ᠳ᠋ᠠᠭᠠᠨ ᠨᠠᠮ ᠴᠣᠬᠢᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠡᠭᠷᠢ ᠡᠵᠢ