ᠪᠦᠯᠵᠢᠬᠢᠨ ᠬᠠᠲᠤᠨ– [ᠮᠣᠩᠭᠣᠯ] ᠳᠠᠮᠪᠠ ᠶᠢᠨ ᠲᠥᠷᠥᠪᠠᠲᠤ <ᠲᠠᠪᠤᠳᠤᠭᠠᠷ ᠪᠦᠯᠦᠭ 6-7> Бүлжхэн хатан– [монгол] Дамбын Төрбат <тавдугаар бүлэг 6-7>
79ᠪᠦᠯᠵᠢᠬᠢᠨ ᠬᠠᠲᠤᠨ– <ᠲᠠᠪᠤᠳᠤᠭᠠᠷ ᠪᠦᠯᠦᠭ 6-7>
6
ᠦᠬᠡᠷ ᠵᠢᠯ ᠢ᠋ ᠥᠩ ᠲᠡᠢ ᠤᠭᠲᠤᠵᠤ ᠶᠢᠰᠦᠭᠡᠢ᠂ ᠡᠴᠢᠭᠡ ᠶ᠋ᠢᠨ ᠬᠠᠶᠠᠭᠠᠨ ᠳ᠋ᠤ᠌ ᠨᠠᠮ ᠵᠢᠮᠬᠡᠨ ᠡᠪᠦᠯᠵᠢᠪᠡ᠃ ᠰᠢᠨᠡ ᠬᠠᠲᠤᠨ ᠤ᠋ ᠴᠠᠢ ᠶ᠋ᠢᠨ ᠳᠡᠭᠡᠵᠢ ᠶ᠋ᠢ ᠭᠡᠷ ᠲᠡᠷᠢᠭᠦᠯᠡᠬᠦ ᠶ᠋ᠢᠨ ᠵᠢᠷᠭᠠᠯ ᠲᠠᠢ ᠴᠣᠭ ᠠᠮᠰᠠᠵᠤ ᠠᠮᠤᠷ ᠵᠢᠮᠦᠷ ᠰᠠᠭᠤᠵᠤ ᠠᠲᠠᠯᠠ ᠨᠢᠭᠡᠨ ᠤᠳᠠᠭᠠ ᠦᠷ ᠴᠥᠷ ᠢ᠋ᠶ᠋ᠡᠷ ᠨᠢᠳᠦ ᠶ᠋ᠢ ᠨᠢ ᠪᠣᠭᠣᠵᠤ᠂ ᠨᠢᠭᠤᠷ ᠢ᠋ ᠨᠢ ᠪᠦᠲᠡᠭᠡᠭᠰᠡᠨ ᠡᠯᠴᠢ ᠳᠣᠪᠲᠣᠯᠭᠠᠨ ᠢᠷᠡᠵᠦ᠂
— ᠶᠢᠰᠦᠭᠡᠢ ᠪᠠᠭᠠᠲᠤᠷ ᠲᠤ᠌ ᠪᠠᠷᠠᠯᠬᠠᠨᠠ! ᠭᠡᠮᠡᠨ ᠨᠡᠷᠡ ᠵᠢᠭᠠᠵᠠᠢ᠃
— ᠬᠠᠨ ᠶᠢᠰᠦᠭᠡᠢ᠂ ᠲᠠᠨ ᠳ᠋ᠤ᠌ ᠪᠠᠷᠠᠯᠬᠠᠨᠠ ᠭᠡᠨᠡ᠃
— ᠶᠠᠭᠤᠨ ᠤ᠋ ᠬᠥᠮᠦᠨ ᠪᠣᠯ? ᠶᠠᠭᠤ ᠴᠦ᠍ ᠡᠰᠡ ᠬᠡᠯᠡᠪᠡ᠃ ᠬᠠᠨ ᠲᠠᠨ ᠲᠠᠢ ᠨᠢᠭᠤᠷ ᠲᠤᠯᠵᠤ᠂ ᠨᠢᠳᠦ ᠰᠢᠷᠲᠡᠵᠦ ᠠᠢᠯᠠᠳᠬᠠᠨᠠ ᠭᠡᠪᠡ ᠭᠡᠬᠦ ᠳ᠋ᠦ᠍ ᠥᠭᠡᠯᠦᠨ ᠦᠵᠢᠨ ᠦᠷᠭᠦᠭᠰᠡᠨ ᠰᠤᠭᠤ ᠮᠡᠲᠦ ᠰᠡᠷᠲᠡᠰᠬᠢᠨ ᠬᠠᠷᠠᠵᠤ᠂
— ᠶᠠᠭᠤᠨ ᠵᠢᠭᠲᠡᠢ ᠬᠥᠮᠦᠨ ᠡᠢᠨ ᠠᠢᠯᠠᠳᠳᠠᠭ ᠪᠢᠯᠡ᠃ ᠴᠠᠭ ᠤ᠋ᠨ ᠠᠶᠠᠰ ᠣᠷᠣᠭᠠ ᠪᠣᠰᠬᠠᠭᠠ᠂ ᠬᠥᠮᠦᠨ ᠦ᠌ ᠠᠭᠠᠰᠢ ᠠᠶᠠᠭ ᠡᠷᠢᠶᠡᠨ ᠪᠠᠷᠠᠭᠠᠨ ᠪᠠᠢᠭᠠ ᠪᠢᠯᠡ᠃ ᠬᠠᠨ ᠲᠠᠨ ᠳ᠋ᠤ᠌ ᠪᠣᠯᠭᠣᠮᠵᠢ ᠰᠠᠨᠠᠭᠤᠯᠬᠤ ᠨᠢ ᠢᠯᠡᠭᠦᠦ ᠪᠢᠵᠡ! ᠭᠡᠪᠡ᠃ ᠶᠢᠰᠦᠭᠡᠢ ᠵᠠᠯᠠᠭᠤ ᠬᠠᠲᠤᠨ ᠢ᠋ᠶ᠋ᠠᠨ ᠲᠠᠭᠠᠰᠢᠶᠠᠨ ᠬᠠᠷᠠᠵᠤ᠂
— ᠬᠠᠲᠤᠨ ᠲᠠ ᠵᠥᠪ ᠠᠢᠯᠠᠳᠪᠠ ᠭᠡᠳ ᠬᠠᠷᠠᠭᠤᠯ ᠤ᠋ᠨ ᠴᠡᠷᠢᠭ ᠲᠦ᠍ ᠬᠠᠨᠳᠤᠨ᠂
— ᠬᠣᠷᠣᠮᠰᠠᠭᠠ ᠦᠭᠡᠢ ᠪᠠᠷᠠᠯᠬᠠᠭᠤᠯ! ᠬᠡᠮᠡᠪᠡ᠃
ᠡᠨᠡ ᠨᠢ ᠵᠠᠷ ᠵᠡᠪᠰᠡᠭ ᠦᠭᠡᠢ ᠭᠠᠷ ᠨᠢᠴᠦᠭᠦᠨ ᠠᠪᠴᠢᠷᠠ ᠭᠡᠰᠡᠨ ᠦᠭᠡ ᠪᠣᠯᠠᠢ᠃ ᠵᠠᠯᠠᠭᠤ ᠥᠭᠡᠯᠦᠨ ᠰᠡᠪᠬᠢᠨ ᠪᠣᠰᠴᠤ ᠲᠤᠯᠭᠠᠨ ᠳ᠋ᠠᠭᠠᠨ ᠬᠠᠭᠤᠷᠠᠢ ᠮᠥᠴᠢᠷ ᠵᠡᠷᠭᠡᠯᠡᠨ ᠪᠠᠳᠠᠷᠠᠭᠠᠵᠤ᠂ ᠭᠠᠯ ᠤ᠋ᠨ ᠬᠠᠶᠠᠭᠠᠨ ᠳ᠋ᠠᠬᠢ ᠭᠠᠤᠯᠢᠨ ᠳᠠᠩᠬᠤ ᠪᠠᠨ ᠭᠢᠯᠠᠯᠵᠠᠲᠠᠯᠠ ᠠᠷᠴᠢᠭᠰᠠᠨ ᠨᠢ ᠡᠯᠴᠢ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍ ᠥᠩᠭᠡᠯᠢᠭ ᠪᠠᠢᠶᠠ ᠭᠡᠰᠡᠨ ᠰᠠᠨᠠᠭᠠ ᠶᠤᠮ᠃ ᠡᠨᠡ ᠬᠢᠷᠢ ᠲᠣᠯᠣᠭᠠᠢ ᠨᠢᠴᠦᠭᠦᠨ᠂ ᠭᠠᠷ ᠬᠣᠭᠣᠰᠣᠨ ᠡᠯᠴᠢ ᠣᠷᠣᠵᠤ ᠢᠷᠡᠵᠦ᠂
— ᠬᠠᠨ ᠲᠠᠨ ᠤ᠋ ᠲᠦᠮᠡᠨ ᠠᠮᠤᠭᠤᠯᠠᠩ ᠢ᠋ ᠡᠷᠢᠵᠦ ᠬᠠᠭᠠᠨ ᠲᠤᠭᠤᠷᠢᠯ ᠨᠠᠮᠠᠶ᠋ᠢ ᠢᠯᠡᠭᠡᠪᠡ᠃ ᠡᠷᠬᠡᠲᠦ ᠲᠩᠷᠢ ᠶ᠋ᠢᠨ ᠬᠥᠪᠡᠭᠦᠨ ᠡᠴᠢᠭᠡ ᠪᠣᠶᠣᠷᠣᠭ ᠨᠠᠰᠤᠨ ᠠ᠋ᠴᠠ ᠨᠥᠭᠴᠢᠵᠦ᠂ ᠨᠥᠮᠥᠭᠡᠨ ᠡᠷᠡᠰ ᠥᠷᠭᠥᠭᠡ ᠭᠣᠷᠢᠶᠠᠯᠠᠵᠤ᠂ ᠨᠢᠴᠦᠭᠦᠨ ᠡᠮᠡᠰ ᠱᠠᠷᠢᠯ ᠬᠦᠷᠢᠶᠡᠯᠡᠵᠦ ᠪᠠᠢᠨᠠ᠃ ᠴᠢᠨ ᠲᠣᠯᠣᠭᠠᠢ ᠶ᠋ᠢ ᠬᠥᠮᠦᠨ ᠲᠣᠯᠣᠭᠠᠢ ᠪᠠᠷ ᠲᠠᠬᠢᠬᠰᠠᠨ ᠡᠷᠲᠡ ᠴᠠᠭ ᠠ᠋ᠴᠠ ᠡᠳᠦᠭᠡ ᠴᠠᠭ ᠢ᠋ ᠬᠦᠷᠲᠡᠯᠡ ᠨᠢᠭᠡᠨ ᠮᠥᠷᠥ ᠶ᠋ᠢᠨ ᠬᠦᠴᠦᠨ ᠪᠣᠯᠵᠤ ᠶᠠᠪᠤᠭᠰᠠᠨ ᠤᠯᠤᠰ ᠤ᠋ᠨ ᠬᠠᠨ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠴᠢ ᠢᠷᠡᠵᠦ ᠣᠢᠲᠤ ᠡᠳᠦᠷ ᠢ᠋ ᠬᠤᠪᠢᠶᠠᠵᠤ᠂ ᠣᠢᠲᠤ ᠣᠩᠭᠣᠨ ᠢ᠋ ᠲᠠᠬᠢᠯᠴᠠᠵᠤ ᠥᠭᠭᠦᠨᠡ ᠤᠤ ᠭᠡᠮᠡᠨ ᠢᠯᠡᠭᠡᠪᠡ ᠭᠡᠵᠡᠢ᠃ ᠡᠯᠴᠢ ᠳ᠋ᠦ᠍ ᠴᠡᠭᠡᠵᠢᠯᠡᠭᠦᠯᠦᠭᠰᠡᠨ ᠡᠮᠡᠭᠡᠯ ᠦ᠋ᠨ ᠳᠠᠭᠤᠨ ᠡᠢᠨ ᠳᠠᠭᠤᠷᠢᠰᠴᠤ ᠠᠬᠤᠢ ᠳ᠋ᠤ᠌ ᠥᠭᠡᠯᠦᠨ ᠥᠵᠢᠨ ᠨᠢᠭᠤᠷ ᠬᠠᠷᠠᠭᠳᠠᠲᠠᠯᠠ ᠵᠦᠯᠭᠦᠭᠰᠡᠨ ᠭᠠᠤᠯᠢᠨ ᠲᠣᠮᠪᠣᠨ ᠠ᠋ᠴᠠ ᠰᠦ ᠪᠣᠯᠤᠭᠰᠠᠨ ᠴᠠᠢ ᠠᠶᠠᠭᠠᠯᠠᠨ ᠡᠯᠴᠢ ᠳ᠋ᠦ᠍ ᠪᠠᠷᠢᠪᠠ᠃
— ᠬᠠᠲᠤᠨ ᠲᠠᠨ ᠳ᠋ᠤ᠌ ᠭᠢᠯᠠᠢᠪᠠ ᠭᠡᠳ ᠠᠩᠭᠠᠵᠤ ᠴᠠᠩᠭᠠᠭᠰᠠᠨ ᠬᠡᠳᠦᠢ ᠴᠦ᠍ ᠡᠯᠴᠢ ᠠᠶᠠᠭᠠᠨ ᠳ᠋ᠤ᠌ ᠠᠮᠠ ᠦᠯᠦ ᠬᠦᠷᠴᠦ᠂ ᠬᠠᠷᠢᠭᠤ ᠬᠦᠯᠢᠶᠡᠵᠦ ᠲᠦᠳᠡᠭᠡᠯᠵᠡᠬᠦ ᠳ᠋ᠦ᠍ ᠶᠢᠰᠦᠭᠡᠢ᠂
— ᠬᠠᠷᠠ ᠨᠢᠯᠬᠠ ᠠ᠋ᠴᠠ ᠬᠠᠶᠠᠭᠠ ᠪᠠᠷᠠᠳᠠᠨ ᠠᠮᠢ ᠵᠢᠭᠤᠵᠤ᠂ ᠬᠠᠭᠠᠨ ᠡᠴᠢᠭᠡ ᠡᠴᠡ ᠬᠠᠷᠢᠶᠠᠯ ᠢᠷᠦᠭᠡᠯ ᠬᠣᠶᠠᠷ ᠢ᠋ ᠨᠢ ᠡᠩ ᠲᠡᠩᠴᠡᠭᠦᠦ ᠰᠣᠨᠣᠰᠴᠤ ᠶᠠᠪᠤᠭᠰᠠᠨ ᠤᠯᠤᠰ ᠪᠢᠯᠡ᠂ ᠪᠢᠳᠡ!
ᠣᠢᠲᠤ ᠡᠳᠦᠷ ᠦ᠋ᠳ ᠲᠦ᠍ ᠴᠢᠨᠢ ᠤᠷᠤᠭ ᠪᠣᠯᠤᠶᠠ᠂ ᠰᠠᠭᠠᠷᠠᠯ ᠡᠳᠦᠷ ᠦ᠋ᠳ ᠲᠦ᠍ ᠴᠢᠨᠢ ᠰᠠᠳᠤᠨ ᠪᠣᠯᠤᠶᠠ! ᠭᠡᠵᠦ ᠠᠢᠯᠠᠳᠬᠤ ᠳ᠋ᠤ᠌ ᠳᠣᠣᠷᠠ ᠮᠡᠬᠦᠢᠨ ᠭᠦᠨ ᠲᠠᠯᠠᠷᠬᠠᠯ ᠢᠯᠡᠳᠬᠡᠭᠡᠳ ᠰᠠᠶᠢ ᠴᠠᠢ ᠳ᠋ᠤ᠌ ᠠᠮᠠ ᠬᠦᠷᠴᠦ᠂ ᠢᠳᠡᠭᠡᠨ ᠳ᠋ᠦ᠍ ᠭᠠᠷ ᠬᠦᠷᠴᠦ ᠪᠥᠯᠥᠭᠡ᠃ ᠡᠢᠨ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠲᠣᠷᠯᠣᠭ ᠲᠣᠭᠣᠷᠢᠯ ᠤ᠋ᠨ ᠣᠢ ᠶ᠋ᠢ ᠬᠤᠪᠢᠶᠠᠬᠤ ᠤᠷᠤᠭ ᠪᠣᠯᠵᠤ ᠢᠷᠡᠭᠰᠡᠨ ᠠᠪᠠᠢ᠃
ᠭᠡᠲᠡᠯᠡ ᠬᠡᠷᠡᠢᠳ ᠠᠢᠮᠠᠭ ᠤ᠋ᠨ ᠬᠡᠢᠮᠣᠷᠢ ᠯᠤᠨᠳᠠᠭᠠ ᠲᠦᠳᠡ ᠦᠭᠡᠢ ᠰᠠᠨᠠᠭᠳᠠᠵᠠᠢ᠃ ᠶᠡᠷᠦ ᠮᠠᠷᠬᠤᠰ ᠪᠣᠶᠣᠷᠤᠭ ᠯᠠ ᠡᠯᠡ ᠠᠢᠮᠠᠭ ᠵᠤᠨ ᠢ᠋ ᠥᠩᠭᠡ ᠲᠡᠢ᠂ ᠥᠭᠡᠳᠡ ᠲᠡᠢ ᠠᠪᠴᠤ ᠶᠠᠪᠤᠭᠰᠠᠨ ᠮᠡᠲᠦ ᠲᠡᠭᠦᠨ ᠢ᠋ ᠮᠣᠳᠣᠨ ᠡᠯᠵᠢᠭᠡᠨ ᠳ᠋ᠦ᠍ ᠬᠠᠳᠠᠭᠤᠯᠵᠤ ᠦᠬᠦᠭᠦᠯᠦᠭᠰᠡᠨ ᠭᠤᠨᠢᠭᠲᠤ ᠶᠠᠪᠤᠳᠠᠯ ᠠ᠋ᠴᠠ ᠬᠣᠢᠰᠢ ᠡᠳᠦᠷ ᠢᠷᠡᠬᠦ ᠲᠣᠰᠤᠮ ᠭᠤᠨᠳᠠᠵᠤ ᠪᠥᠯᠥᠭᠡ᠃ ᠬᠣᠷᠵᠠᠬᠤᠰ ᠪᠣᠶᠣᠷᠤᠭ ᠭᠤᠴᠢᠨ ᠲᠠᠲᠠᠪᠤᠷᠢ ᠬᠠᠲᠤᠨ ᠢ᠋ᠶ᠋ᠠᠨ ᠨᠤᠲᠤᠭ ᠳᠠᠶᠠᠭᠠᠷ ᠬᠦᠷᠢᠶᠡ ᠪᠣᠯᠭᠠᠨ ᠲᠠᠷᠠᠭᠠᠵᠤ ᠪᠠᠭᠤᠯᠭᠠᠭᠠᠳ ᠰᠠᠷᠠ ᠳ᠋ᠠᠭᠠᠨ ᠨᠢᠭᠡ ᠡᠷᠭᠢᠵᠦ ᠬᠣᠨᠣᠭᠯᠠᠵᠤ ᠶᠠᠪᠤᠳᠠᠭ ᠪᠠᠢᠪᠠ᠃ ᠡᠪᠦᠭᠡᠨ ᠨᠠᠰᠤᠲᠠᠢ ᠵᠣᠯᠭᠠᠭᠰᠠᠨ ᠬᠡᠳᠦᠢ ᠴᠦ᠍《ᠰᠢᠷᠠ ᠰᠡᠮᠡᠵᠡᠯᠡᠭᠰᠡᠨ》 ᠭᠡᠬᠦ ᠨᠡᠷᠡ ᠲᠤᠭᠤᠯᠤᠨ ᠵᠢᠳᠬᠦᠵᠦ ᠵᠠᠯᠠᠭᠤ ᠲᠠᠲᠠᠪᠤᠷᠢ ᠬᠠᠲᠤᠨ ᠨᠡᠮᠡᠵᠦ ᠲᠣᠳᠣᠷᠠᠭᠤᠯᠤᠭᠰᠠᠭᠠᠷ ᠶᠠᠪᠤᠵᠤ ᠪᠥᠯᠥᠭᠡ᠃ ᠡᠢᠨ ᠬᠠᠮᠤᠭ ᠰᠡᠭᠦᠯᠴᠢ ᠶ᠋ᠢᠨ ᠭᠤᠸᠠ ᠡᠮᠡ ᠶ᠋ᠢ ᠭᠤᠷᠪᠠᠨ ᠮᠡᠷᠭᠢᠳ ᠡᠴᠡ ᠲᠣᠳᠣᠷᠠᠭᠤᠯᠵᠤ᠂ ᠦᠷᠭᠦᠭᠰᠡᠨ ᠵᠡᠭᠡᠷᠡ ᠶ᠋ᠢᠨ ᠢᠨᠵᠠᠭᠠ ᠮᠡᠲᠦ ᠪᠦᠯᠲᠡᠭᠡᠨᠡᠬᠦ ᠲᠡᠷᠡ ᠠᠮᠢᠲᠠᠨ ᠤ᠋ ᠪᠠᠨ ᠪᠦᠯᠢᠶᠡᠨ ᠡᠪᠦᠳᠦᠭ ᠢ᠋ ᠳᠡᠷᠡᠯᠡᠨ ᠥᠭᠡᠳᠡ ᠪᠣᠯᠵᠠᠢ᠃ ᠠᠮᠢᠰᠬᠤᠯ ᠣᠳᠬᠣᠯᠠᠬᠤ ᠳ᠋ᠤ᠌ ᠲᠠᠢ ᠲᠡᠮᠦᠷ᠂ ᠪᠤᠬᠠ ᠲᠡᠮᠦᠷ ᠬᠣᠶᠠᠷ ᠬᠦᠦ ᠨᠢ ᠴᠦ᠍᠂ ᠬᠠᠮᠤᠭ ᠤ᠋ᠨ ᠬᠠᠢᠷᠠᠲᠠᠢ ᠲᠣᠷᠯᠣᠭ ᠲᠣᠭᠣᠷᠢᠯ ᠬᠥᠪᠡᠭᠦᠨ ᠴᠣ ᠪᠠᠢᠭᠰᠠᠨ ᠦᠭᠡᠢ ᠠᠵᠢ᠃ ᠡᠢᠨ ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠬᠠᠶᠠᠭᠠ ᠨᠡᠢᠯᠡᠵᠦ ᠣᠷᠣᠰᠢᠳᠠᠭ ᠡᠷᠲᠡᠨ ᠦ᠌ ᠬᠣᠯᠪᠣᠭᠠᠲᠠᠨ ᠲᠡᠦᠬᠡᠲᠦ ᠬᠡᠷᠡᠢᠳ ᠦ᠋ᠨ ᠲᠣᠯᠣᠭᠠᠢᠯᠠᠭᠴᠢ ᠪᠣᠶᠣᠷᠣᠭ᠋ ᠦᠭᠡᠢ ᠪᠣᠯᠪᠠ᠃ ᠬᠡᠷᠡᠢᠳ ᠳᠠᠶᠠᠭᠠᠷ ᠪᠦᠲᠦᠨ ᠰᠠᠷᠠ ᠣᠢ ᠵᠠᠷᠯᠠᠵᠤ ᠡᠮᠡᠰ ᠦᠰᠦ ᠪᠡᠨ ᠡᠰᠡ ᠰᠦᠯᠵᠢᠵᠦ᠂ ᠪᠦᠰᠡ ᠪᠡᠨ ᠡᠰᠡ ᠪᠦᠰᠡᠯᠡᠵᠦ ᠭᠠᠰᠢᠭᠤᠳᠠᠪᠠ᠃ ᠬᠢᠯᠢ ᠵᠠᠯᠭᠠᠭᠠ ᠠᠢᠮᠠᠭ ᠬᠣᠰᠢᠭᠤᠳ ᠠ᠋ᠴᠠ ᠡᠯᠡ ᠣᠢ ᠶ᠋ᠢ ᠬᠤᠪᠢᠶᠠᠬᠤ ᠶᠡᠬᠡᠰ ᠦ᠋ᠨ ᠦᠷᠡᠰ ᠬᠤᠷᠠᠨ ᠮᠣᠷᠢᠯᠠᠨ ᠠᠪᠠᠢ᠃ ᠬᠠᠭᠠᠨ ᠨᠠᠰᠤᠨ ᠠ᠋ᠴᠠ ᠨᠥᠭᠴᠢᠭᠰᠡᠨ ᠦ᠌ ᠤᠴᠢᠷ ᠬᠠᠶᠠᠭᠠ ᠠᠢᠮᠠᠭ ᠤ᠋ᠨ ᠬᠠᠭᠠᠳ ᠡᠰᠡ ᠢᠷᠡᠬᠦ ᠵᠠᠶᠢᠭ ᠪᠣᠢ ᠶᠤᠮ᠃ ᠡᠯᠡ ᠵᠣᠪᠠᠯᠠᠩ ᠬᠠᠭᠠᠨ ᠳ᠋ᠤ᠌ ᠪᠤᠰᠤ᠂ ᠬᠠᠨ ᠬᠥᠪᠡᠭᠦᠨ ᠳ᠋ᠦ᠍ ᠨᠢᠭᠤᠷᠯᠠᠭᠰᠠᠨ ᠭᠠᠢ ᠭᠠᠮᠰᠢᠭ ᠭᠡᠮᠡᠨ ᠦᠵᠡᠬᠦ ᠪᠢᠴᠢᠭᠳᠡᠭᠡ ᠦᠭᠡᠢ ᠬᠠᠤᠯᠢ ᠪᠠᠢᠬᠤ ᠠᠭᠠᠳ ᠡᠨᠡ ᠶᠣᠰᠣ ᠪᠠᠨ ᠳᠠᠭᠠᠵᠤ ᠨᠠᠢ᠍ᠮᠠᠨ ᠤ᠋ ᠵᠠᠯᠠᠭᠤ ᠳᠠᠶᠠᠨ᠂ ᠮᠡᠷᠭᠢᠳ ᠡᠴᠡ ᠲᠣᠬᠲᠣᠭᠠ ᠪᠡᠬᠢ ᠬᠦᠷᠦᠯᠴᠡᠨ ᠢᠷᠡᠵᠡᠢ᠃ ᠲᠡᠳᠡ ᠲᠡᠢ ᠲᠡᠮᠦᠷ᠂ ᠪᠤᠬᠠ ᠲᠡᠮᠦᠷ ᠬᠣᠶᠠᠷ ᠤ᠋ᠨ ᠣᠢ ᠭᠠᠰᠢᠭᠤ ᠶ᠋ᠢ ᠬᠤᠪᠢᠶᠠᠬᠤ ᠪᠠᠷ ᠢᠷᠡᠭᠰᠡᠨ ᠤᠤ᠂ ᠲᠣᠷᠯᠣᠭ ᠲᠣᠭᠣᠷᠢᠯ ᠭᠡᠮᠡᠨ ᠵᠣᠪᠠᠨᠢᠵᠤ ᠵᠣᠷᠢᠪᠠ ᠤᠤ ᠭᠡᠵᠦ ᠠᠬᠢᠨ ᠳᠠᠩᠳᠠᠬᠤ ᠬᠥᠮᠦᠨ ᠴᠥᠭᠡᠨ ᠦᠭᠡᠢ ᠪᠣᠯᠠᠢ᠃ ᠶᠢᠰᠦᠭᠡᠢ ᠴᠣ ᠥᠪᠡᠷ ᠢ᠋ᠶ᠋ᠡᠨ ᠳᠣᠲᠣᠷᠠ ᠪᠠᠨ ᠡᠢᠨ ᠪᠣᠳᠣᠵᠤ᠂ ᠰᠠᠮ ᠠᠵᠢᠭᠯᠠᠵᠤ ᠵᠣᠭᠰᠣᠪᠠ᠃ ᠲᠡᠷᠡ ᠪᠡᠷ ᠲᠣᠷᠯᠣᠭ ᠲᠣᠭᠣᠷᠢᠯ ᠤ᠋ᠨ ᠨᠥᠬᠥᠷ ᠭᠡᠮᠡᠨ ᠢᠷᠡᠭᠰᠡᠨ ᠶᠦ᠍ᠮ᠃ ᠬᠠᠶᠠᠭᠠ ᠬᠠᠳᠬᠤᠭᠰᠠᠨ ᠤᠯᠤᠰ ᠤ᠋ᠨ ᠬᠠᠨ ᠬᠥᠪᠡᠭᠦᠳ ᠬᠡᠨ ᠦ᠌ ᠬᠢᠨᠢ ᠣᠢ ᠭᠠᠰᠢᠭᠤ ᠳ᠋ᠤ᠌ ᠲᠦᠯᠬᠢᠭᠦᠦ ᠢᠷᠡᠵᠦ ᠪᠣᠢ ᠭᠡᠵᠦ ᠪᠢᠲᠡᠭᠦᠬᠡᠨ ᠠᠵᠢᠭᠯᠠᠬᠤ ᠨᠢ ᠢᠷᠡᠭᠡᠳᠦᠢ ᠶ᠋ᠢᠨ ᠶᠡᠬᠡ ᠣᠷᠣ ᠰᠠᠭᠤᠬᠤ ᠡᠵᠡᠨ ᠢ᠋ ᠰᠡᠮᠬᠡᠨ ᠲᠣᠳᠣᠷᠠᠭᠤᠯᠵᠤ ᠪᠣᠢ ᠭᠡᠰᠡᠨ ᠦᠭᠡ ᠶᠦ᠍ᠮ᠃ ᠡᠨᠡ ᠬᠢᠷᠢ ᠨᠠᠢ᠍ᠮᠠᠨ ᠤ᠋ ᠳᠠᠶᠠᠨ᠂
— ᠨᠠᠷᠭᠢᠰᠢ ᠳᠠᠶᠠᠨ ᠡᠴᠢᠭᠡ ᠶ᠋ᠢᠨ ᠵᠠᠷᠯᠢᠭ ᠢ᠋ᠶ᠋ᠠᠷ ᠲᠣᠷᠯᠣᠭ ᠲᠣᠭᠣᠷᠢᠯ ᠲᠠᠨ ᠳ᠋ᠤ᠌ ᠭᠡᠵᠦ ᠢᠷᠡᠯᠡ᠁ᠭᠡᠮᠡᠨ ᠠᠢᠯᠠᠳᠬᠠᠵᠤ᠂ ᠮᠡᠷᠭᠢᠳ ᠦ᠋ᠨ ᠳᠣᠲᠣᠷ ᠪᠢᠯᠭᠡ ᠨᠣᠶᠠᠨ᠂
— ᠲᠣᠷᠯᠣᠭ ᠲᠣᠭᠣᠷᠢᠯ ᠪᠢᠳᠡ ᠭᠤᠷᠪᠠ ᠴᠢᠨ ᠲᠣᠯᠣᠭᠠᠢ ᠶ᠋ᠢᠨ ᠥᠪᠥᠷ ᠪᠠᠯ ᠳ᠋ᠤ᠌᠂ ᠶᠧᠯᠢᠦᠢ ᠳᠠᠰᠢ ᠶ᠋ᠢᠨ ᠲᠣᠭᠣᠰᠣᠨ ᠳᠣᠲᠣᠷᠠ ᠲᠣᠭᠯᠠᠵᠤ ᠲᠠᠨᠢᠯᠴᠠᠭᠰᠠᠨ ᠤᠯᠤᠰ! ᠲᠡᠢᠮᠦ ᠪᠢᠵᠡ᠂ ᠬᠠᠲᠠᠭᠠᠨ ᠠᠨᠳᠠ ᠠ᠋! ᠭᠡᠵᠦ ᠨᠤᠲᠠᠯᠠᠵᠠᠢ᠃ ᠠᠮᠪᠠᠭᠠᠢ ᠬᠠᠭᠠᠨ ᠬᠥᠪᠡᠭᠦᠨ ᠬᠠᠲᠠᠭᠠᠨ ᠢ᠋ᠶ᠋ᠠᠨ ᠪᠠᠰᠠ ᠬᠦ᠌ ᠣᠢ ᠬᠤᠪᠢᠶᠠᠯᠴᠠ! ᠭᠡᠮᠡᠨ ᠢᠷᠡᠭᠦᠯᠦᠭᠰᠡᠨ ᠶᠦᠮ ᠰᠠᠨᠵᠠᠢ᠃ ᠶᠡᠷᠦ ᠮᠡᠷᠭᠢᠳ ᠦ᠋ᠨ ᠠᠭᠡ ᠨᠣᠶᠠᠨ ᠳᠣᠲᠣᠷ ᠪᠢᠯᠭᠡ᠂ ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠬᠠᠭᠠᠨ ᠠᠮᠪᠠᠭᠠᠢ ᠶ᠋ᠢᠨ ᠬᠠᠲᠠᠭᠠᠨ ᠬᠥᠪᠡᠭᠦᠨ ᠬᠣᠶᠠᠷ ᠣᠷᠣᠪᠠᠴᠤ ᠭᠠᠷᠪᠠᠴᠤ ᠬᠠᠮᠲᠤ ᠶᠠᠪᠤᠬᠤ ᠪᠥᠯᠥᠭᠡ᠃ ᠡᠨᠡ ᠤᠳᠠᠭᠠ ᠴᠤ᠌ ᠲᠡᠷᠡ ᠪᠡᠷ ᠭᠤᠷᠪᠠᠨ ᠮᠡᠷᠭᠢᠳ ᠦ᠋ᠨ ᠢᠨᠠᠨᠴᠢ ᠪᠢᠯᠭᠡ ᠬᠠᠨ ᠤ᠋ ᠳ᠋ᠤ᠌ ᠡᠪᠦᠯ ᠦ᠋ᠨ ᠠᠪᠠ ᠬᠣᠮᠣᠷᠭᠠ ᠳ᠋ᠤ᠌ ᠣᠷᠣᠯᠴᠠᠬᠤ ᠨᠡᠷᠡ ᠪᠡᠷ ᠨᠠᠮᠤᠷ ᠣᠴᠢᠭᠠᠳ ᠯᠠ ᠬᠠᠭᠠᠨ ᠡᠴᠢᠭᠡ ᠳ᠋ᠡᠭᠡᠨ ᠬᠠᠷᠢᠵᠤ ᠣᠴᠢᠯ ᠦᠭᠡᠢ ᠡᠨᠡ ᠪᠣᠯᠵᠠᠢ᠃ ᠬᠠᠭᠠᠨ ᠬᠥᠪᠡᠭᠦᠳ ᠡᠢᠨ ᠬᠤᠷᠠᠨ ᠮᠣᠷᠢᠯᠠᠭᠰᠠᠨ ᠨᠢ ᠲᠣᠷᠯᠣᠭ ᠲᠤᠭᠤᠷᠢᠯ ᠤ᠋ᠨ ᠬᠤᠪᠢ ᠳ᠋ᠤ᠌ ᠪᠠᠶᠠᠷ ᠪᠠᠢᠪᠠ᠃ ᠬᠠᠷᠢᠨ ᠲᠠᠢ ᠲᠡᠮᠦᠷ᠂ ᠪᠤᠬᠠ ᠲᠡᠮᠦᠷ ᠬᠣᠶᠠᠷ ᠤ᠋ᠨ ᠨᠡᠷᠡ ᠵᠢᠭᠠᠬᠤ ᠬᠠᠨ ᠬᠥᠪᠡᠭᠦᠳ ᠡᠰᠡ ᠣᠯᠳᠠᠵᠠᠢ᠃ ᠪᠠᠰᠤᠳ ᠬᠢᠭᠡᠳ ᠣᠯᠬᠤᠨᠤᠳ᠂ ᠬᠣᠩᠭᠢᠷᠠᠳ ᠬᠢᠭᠡᠳ ᠪᠠᠭᠠᠷᠢᠨ ᠣᠪᠣᠭᠲᠠᠨ ᠲᠣᠮᠣ ᠠᠢᠮᠠᠭ ᠤ᠋ᠨ ᠠᠮᠠ ᠳᠠᠭᠠᠭᠤᠯᠵᠤ᠂ ᠬᠤᠢᠯᠠᠭᠠ ᠶ᠋ᠢᠨ ᠨᠠᠢᠷ ᠢ᠋ ᠴᠢᠮᠡᠭᠡ ᠦᠭᠡᠢ ᠥᠨᠳᠥᠷᠯᠡᠬᠦ ᠶ᠋ᠢ ᠡᠷᠬᠢᠮ ᠳ᠋ᠦ᠍ ᠦᠵᠡᠵᠦ ᠠᠪᠠᠢ᠃ ᠲᠤᠤᠯᠠ ᠶ᠋ᠢᠨ ᠬᠠᠷᠠ ᠰᠢᠭᠤᠢ ᠠ᠋ᠴᠠ ᠦᠷ ᠢ᠋ᠶ᠋ᠡᠷ ᠬᠥᠳᠡᠯᠦᠭᠰᠡᠨ ᠬᠤᠢᠯᠠᠭᠠ ᠶ᠋ᠢᠨ ᠶᠡᠬᠡ ᠴᠤᠪᠤᠭᠠᠨ ᠤ᠋ ᠲᠡᠷᠢᠭᠦᠨ ᠳ᠋ᠦ᠍ ᠵᠠᠢᠷᠠᠩ ᠪᠡᠶᠡ ᠪᠡᠷ ᠵᠠᠯᠠᠷᠠᠵᠤ ᠪᠢᠯᠡ᠃ ᠲᠡᠭᠦᠨ ᠦ᠌ ᠳᠠᠷᠠᠭᠠ ᠡᠬᠡ ᠡᠴᠡ ᠪᠡᠨ ᠲᠥᠷᠥᠭᠰᠡᠨ ᠪᠡᠶᠡ ᠪᠡᠨ ᠦᠵᠡᠭᠦᠯᠵᠦ᠂ ᠡᠷᠡ ᠶ᠋ᠢᠨ ᠠᠮᠢᠰᠬᠤᠭᠠ ᠠᠩᠬᠠ ᠮᠡᠳᠡᠷᠡᠭᠰᠡᠨ ᠶᠡᠬᠡ ᠬᠠᠲᠤᠨ ᠢᠯᠮᠠ ᠠᠰᠬᠠᠷᠠᠲᠠᠯᠠ ᠤᠬᠢᠯᠠᠵᠤ᠂ ᠬᠠᠷᠢ ᠠ᠋ᠴᠠ ᠳᠠᠭᠠᠵᠤ ᠢᠷᠡᠭᠰᠡᠨ ᠡᠯᠵᠢᠭᠡᠳᠡᠢ ᠨᠣᠶᠠᠨ᠂
一 ᠬᠠᠲᠤᠨ ᠲᠠ ᠰᠡᠳᠬᠢᠯ ᠢ᠋ᠶ᠋ᠡᠨ ᠪᠡᠷᠢ! ᠭᠡᠮᠡᠨ ᠲᠣᠬᠣᠢ ᠲᠦᠰᠢᠵᠦ ᠶᠠᠪᠤᠪᠠ᠃ ᠬᠥᠮᠦᠰ ᠦ᠋ᠨ ᠬᠡᠯᠡᠯᠴᠡᠬᠦ ᠨᠢ ᠬᠠᠭᠠᠨ ᠬᠣᠷᠵᠠᠬᠤᠰ ᠠᠮᠢᠰᠬᠤᠯ ᠣᠳᠬᠣᠯᠠᠭᠠ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠳᠡᠷᠡ ᠨᠡᠢᠯᠡᠭᠰᠡᠨ ᠤᠯᠤᠰ ᠬᠡᠮᠡᠨᠡ᠃ ᠭᠡᠪᠡᠴᠦ ᠰᠣᠨᠢᠨ ᠪᠣᠯᠭᠠᠨ ᠶᠠᠷᠢᠬᠤ ᠠ᠋ᠴᠠ ᠪᠤᠰᠤ ᠢᠯᠮᠠ ᠬᠠᠲᠤᠨ ᠢ᠋ ᠵᠦᠬᠡᠭᠰᠡᠨ ᠵᠠᠨᠤᠭᠰᠠᠨ᠂ ᠡᠯᠵᠢᠭᠡᠳᠡᠢ ᠨᠣᠶᠠᠨ ᠢ᠋ ᠬᠠᠷᠢᠶᠠᠭᠰᠠᠨ᠂ ᠡᠨᠳᠡ ᠱᠣᠣ ᠦᠵᠡᠭᠰᠡᠨ ᠠᠶᠠᠯᠭᠤ ᠦᠭᠡᠢ ᠠᠵᠢ᠃ ᠡᠨᠡ ᠨᠢ ᠲᠩᠷᠢ ᠪᠣᠯᠤᠭᠠᠴᠢ ᠪᠣᠶᠣᠷᠤᠭ ᠬᠠᠭᠠᠨ ᠤ᠋ ᠲᠠᠲᠠᠪᠤᠷᠢ ᠡᠮᠡᠰ ᠦ᠋ᠨ ᠲᠣᠭᠠ ᠠᠯᠳᠠᠭᠰᠠᠨ ᠲᠠᠢ ᠴᠤ᠌ ᠬᠣᠯᠪᠣᠭᠠ ᠲᠠᠢ ᠪᠠᠢᠵᠤ ᠮᠡᠳᠡᠬᠦ ᠪᠥᠯᠥᠭᠡ᠃ ᠮᠥᠨᠥᠬᠡᠨ ᠬᠣᠶᠠᠷ ᠤ᠋ᠨ ᠠᠷᠤ ᠠ᠋ᠴᠠ ᠬᠡᠨ ᠨᠢ ᠴᠦ᠍ ᠶᠡᠬᠡ ᠣᠷᠣ ᠰᠠᠭᠤᠵᠤ ᠪᠦᠷᠢᠨᠡ ᠪᠣᠯᠬᠤ ᠭᠤᠷᠪᠠᠨ ᠬᠠᠨ ᠬᠥᠪᠡᠭᠦᠳ ᠢᠵᠢᠯᠢ ᠵᠢᠰᠦᠮ ᠦ᠋ᠨ ᠮᠣᠷᠢ ᠲᠠᠢ ᠰᠠᠵᠢᠯᠠᠵᠤ ᠶᠠᠪᠤᠪᠠ᠃ ᠡᠢᠨ ᠬᠡᠯᠲᠦᠷᠢᠬᠦ ᠨᠢ ᠭᠤᠨᠢᠭ ᠲᠤ᠌ ᠠᠪᠲᠠᠭᠰᠠᠨ ᠤ᠋ ᠬᠢ ᠪᠤᠰᠤ᠂ ᠪᠣᠳᠣᠯ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠤ᠋ ᠬᠢ ᠪᠢᠵᠡ᠃ ᠲᠤᠯᠭᠠ ᠶ᠋ᠢᠨ ᠭᠤᠷᠪᠠᠨ ᠴᠢᠯᠠᠭᠤ ᠰᠢᠭ᠋ ᠠᠬᠠ ᠳᠡᠭᠦᠦᠰ ᠦ᠋ᠨ ᠰᠢᠯᠢ ᠳᠠᠷᠤᠨ ᠶᠣᠰᠣᠯᠠᠵᠤ ᠠᠪᠤᠭᠰᠠᠨ ᠶᠢᠰᠦᠨ ᠬᠠᠲᠤᠨ᠂ ᠲᠡᠭᠡᠭᠡᠳ ᠡᠩᠭᠡᠷ ᠵᠥᠷᠢᠭᠦᠯᠡᠵᠦ ᠴᠡᠩᠭᠡᠯ ᠡᠳ᠋ᠯᠡᠳᠡᠭ ᠭᠠᠵᠠᠷ ᠭᠠᠵᠠᠷ ᠤ᠋ᠨ ᠲᠠᠲᠠᠪᠤᠷᠢ ᠡᠮᠡᠰ ᠦ᠋ᠨ ᠴᠤᠪᠤᠭᠠ ᠦᠷᠭᠦᠯᠵᠢᠯᠡᠬᠦ ᠠᠪᠠᠢ᠃ ᠬᠣᠷᠵᠠᠬᠤᠰ ᠪᠣᠶᠣᠷᠤᠭ ᠮᠠᠨᠠᠨ ᠮᠡᠲᠦ ᠣᠯᠠᠨ ᠡᠮᠡ ᠲᠡᠢ᠂ ᠪᠤᠳᠠᠩ ᠮᠡᠲᠦ ᠣᠯᠠᠨ ᠦᠷᠡ ᠲᠡᠢ ᠭᠡᠳᠡᠭ ᠣᠷᠣ ᠲᠠᠢ ᠦᠭᠡ ᠪᠠᠢᠪᠠ᠃ ᠵᠠᠢᠷᠠᠩ ᠲᠣᠯᠣᠭᠠᠢᠯᠠᠭᠰᠠᠨ ᠬᠤᠢᠯᠠᠭᠠ ᠶ᠋ᠢᠨ ᠶᠡᠬᠡ ᠴᠤᠪᠤᠭᠠ ᠶᠡᠬᠡ ᠦᠳᠡ ᠶ᠋ᠢᠨ ᠠᠯᠲᠠ ᠳ᠋ᠤ᠌ ᠲᠡᠷᠢᠭᠦᠨ ᠥᠨᠳᠥᠷᠯᠢᠭ ᠦ᠋ᠨ ᠣᠷᠣᠢ ᠳ᠋ᠤ᠌ ᠭᠠᠷᠴᠤ ᠢᠷᠡᠯᠡ᠃ ᠡᠪᠦᠯ ᠦ᠋ᠨ ᠡᠳᠦᠷ ᠪᠣᠭᠣᠨᠢᠬᠠᠨ ᠲᠤᠯᠠ ᠨᠠᠷᠠ ᠪᠠᠷᠠᠭᠤᠨᠠ ᠬᠡᠯᠪᠡᠢᠵᠦ᠂ ᠣᠷᠣᠢ ᠶ᠋ᠢᠨ ᠵᠢᠪᠠᠷ ᠬᠠᠴᠠᠷ ᠠᠯᠠᠭᠠᠳᠠᠬᠤ ᠵᠢᠪᠡᠭᠦᠨ ᠳ᠋ᠦ᠍ ᠣᠮᠣᠭᠲᠤ ᠪᠣᠶᠣᠷᠤᠭ ᠤ᠋ᠨ ᠱᠠᠷᠢᠯ ᠢ᠋ ᠬᠠᠭᠤᠷᠠᠢ ᠮᠥᠴᠢᠷ ᠴᠤᠭᠯᠠᠭᠤᠯᠵᠤ ᠪᠡᠯᠡᠳᠦᠭᠰᠡᠨ ᠳᠠᠢᠯᠭᠠ ᠶ᠋ᠢᠨ ᠣᠪᠤᠭᠠᠨᠠ ᠲᠠᠯᠪᠢᠪᠠ᠃ ᠴᠢᠩᠭᠢᠭᠡᠳ ᠨᠠᠷᠠ ᠵᠥᠪ ᠭᠤᠷᠪᠠ ᠲᠣᠭᠣᠷᠢᠨ ᠰᠠᠯᠬᠤ ᠶᠣᠰᠣ ᠬᠢᠭᠡᠳ ᠰᠠᠯᠬᠢᠨ ᠳᠡᠭᠡᠷᠡ ᠨᠢ ᠭᠠᠷᠴᠤ ᠪᠦᠭᠦᠳᠡ ᠴᠢᠮᠡᠭᠡ ᠦᠭᠡᠢ ᠰᠥᠭᠥᠳᠴᠦ ᠠᠪᠠᠢ᠃ ᠡᠢᠨ ᠨᠠᠮ ᠭᠦᠮ ᠪᠣᠯᠬᠤ ᠳ᠋ᠤ᠌ ᠵᠠᠢᠷᠠᠩ ᠪᠥᠬᠡ ᠶ᠋ᠢᠨ ᠬᠡᠴᠡ ᠬᠡᠩᠭᠡᠷᠭᠡ ᠰᠦᠷᠳᠡᠶᠡ ᠨᠦᠷᠭᠢᠯᠡᠨ ᠬᠠᠳᠠ ᠳᠠᠮᠵᠢᠨ ᠴᠤᠤᠷᠢᠶᠠᠯᠠᠵᠤ᠂
ᠬᠥᠮᠦᠨ ᠦ᠌ ᠮᠢᠬᠠᠨ
ᠬᠦᠨᠡᠰᠦᠲᠡᠨ ᠨᠦ᠍ᠭᠦᠳ
ᠬᠦᠷᠡᠯ ᠴᠢᠯᠠᠭᠤᠨ
ᠵᠢᠷᠦᠬᠡᠲᠡᠨ ᠨᠦ᠍ᠭᠦᠳ
ᠤᠯᠠᠭᠠᠨ ᠴᠢᠰᠤᠨ
ᠤᠮᠳᠠᠲᠠᠨ ᠨᠤᠭᠤᠳ
ᠤᠷᠤᠭ ᠰᠠᠳᠤᠨ
ᠢᠳᠡᠰᠢᠲᠡᠨ ᠨᠦ᠍ᠭᠦᠳ
ᠲᠠᠨᠢᠵᠤ ᠬᠠᠢᠷᠠᠯᠠ
ᠳᠠᠭᠠᠵᠤ ᠬᠠᠢᠷᠠᠯᠠ
ᠰᠣᠯᠢᠵᠤ ᠬᠠᠢᠷᠠᠯᠠ
ᠰᠣᠶᠣᠷᠬᠠᠵᠤ ᠬᠠᠢᠷᠠᠯᠠ
ᠬᠠᠨᠠᠲᠤ ᠭᠡᠷ ᠲᠦ᠍ ᠲᠥᠷᠥᠪᠡ ᠭᠡᠨᠡ
ᠬᠠᠳᠠᠨ ᠭᠡᠷ ᠲᠦ᠍ ᠬᠠᠷᠢᠪᠠ ᠭᠡᠨᠡ
ᠴᠢᠰᠤ ᠠᠳᠬᠤᠵᠤ ᠲᠥᠷᠥᠪᠡ ᠭᠡᠨᠡ
ᠭᠠᠯ ᠬᠥᠯᠭᠡᠯᠡᠵᠦ ᠪᠤᠴᠠᠪᠠ ᠭᠡᠨᠡ
ᠡᠷᠭᠢᠵᠦ ᠢᠷᠡᠭᠦᠯ!
ᠡᠯᠪᠡᠵᠦ ᠲᠥᠷᠥᠭᠦᠯ!
ᠠᠷᠢᠭᠤᠰᠤᠨ ᠶᠠᠪᠤᠭᠤᠯ!
ᠠᠬᠢᠵᠤ ᠳᠦᠷᠦᠭᠦᠯ!
ᠴᠡᠴᠡᠨ ᠨᠣᠶᠠᠨ
ᠢᠷᠡᠬᠦ ᠦᠭᠡᠢ ᠪᠣᠯ
ᠴᠡᠴᠡᠭᠲᠦ ᠠᠭᠤᠯᠠ ᠶ᠋ᠢᠨ
ᠴᠡᠭᠡᠵᠢ ᠪᠡᠲᠡᠭᠢᠷᠡᠨᠡ
ᠤᠬᠠᠭᠠᠨᠲᠤ ᠨᠣᠶᠠᠨ
ᠲᠥᠷᠥᠬᠦ ᠦᠭᠡᠢ ᠪᠣᠯ
ᠰᠦᠵᠢᠭᠲᠦ ᠣᠯᠠᠨ ᠤ᠋
ᠰᠡᠭᠦᠳᠡᠷ ᠪᠡᠲᠡᠭᠢᠷᠡᠨᠡ
ᠢᠷᠡᠭᠦᠯ ᠢᠷᠡᠭᠦᠯ ᠲᠥᠷᠥᠭᠦᠯ ᠲᠥᠷᠥᠭᠦᠯ᠁ ᠭᠡᠮᠡᠨ ᠬᠥᠬᠡ ᠴᠢᠯᠠᠭᠤ ᠢᠯᠢᠨ ᠰᠡᠪᠡᠯᠵᠡᠬᠦ ᠰᠠᠯᠬᠢᠨ ᠳᠤᠮᠳᠠ ᠬᠥᠬᠡ ᠳᠠᠢᠯᠭᠠ ᠣᠯᠢᠵᠤ ᠳᠠᠭᠤᠳᠠᠪᠠ ᠠ᠋᠃ ᠡᠨᠡ ᠬᠢᠷᠢ ᠵᠠᠢᠷᠠᠩ ᠬᠥᠬᠡ ᠴᠠᠬᠢᠭᠤᠷ ᠴᠠᠬᠢᠵᠤ ᠣᠴᠢ ᠬᠦᠷᠭᠡᠬᠦ ᠳ᠋ᠦ᠍ ᠬᠠᠭᠤᠷᠠᠢ ᠮᠥᠴᠢᠷ ᠳᠦᠷᠡᠯᠵᠡᠨ ᠠᠰᠠᠵᠤ᠂ ᠭᠠᠯ ᠬᠦᠯᠦᠭᠯᠡᠭᠰᠡᠨ ᠬᠣᠷᠵᠠᠬᠤᠰ ᠪᠤᠶᠤᠷᠣᠭ᠋ ᠬᠥᠬᠡ ᠲᠡᠭᠷᠢ ᠥᠭᠡᠳᠡ ᠣᠳᠬᠤ ᠨᠢ ᠡᠨᠡ ᠪᠥᠯᠥᠭᠡ᠃ ᠬᠣᠩᠭᠣᠷ ᠴᠠᠰᠤᠨ ᠳᠡᠭᠡᠷᠡ ᠰᠥᠬᠥᠷᠡᠨ ᠰᠠᠭᠤᠭᠰᠠᠨ ᠣᠯᠠᠨ᠂
— ᠬᠤᠷᠤᠢ᠁ ᠬᠤᠷᠤᠢ᠁ ᠬᠤᠷᠤᠢ᠁ ᠭᠡᠵᠦ ᠳᠠᠭᠤ ᠨᠡᠢᠯᠡᠨ ᠠᠬᠤᠢ ᠳ᠋ᠤ᠌ ᠶᠡᠬᠡ ᠭᠠᠯ ᠤ᠋ᠨ ᠳᠡᠷᠭᠡᠳᠡ ᠬᠦᠯᠦᠭ ᠢ᠋ ᠨᠢ ᠣᠩᠭᠣᠯᠠᠵᠤ᠂ ᠪᠠᠰᠠ ᠬᠦ᠌ ᠦᠰᠦ ᠪᠡᠨ ᠥᠭᠲᠡᠭᠡᠨ ᠴᠢᠷᠠᠯᠠᠬᠤ ᠭᠤᠷᠪᠠᠨ ᠵᠠᠯᠠᠭᠤ ᠥᠬᠢᠨ ᠢ᠋ ᠳᠠᠢᠯᠭᠠ ᠲᠠᠭᠠᠯᠠᠵᠤ᠂ ᠲᠩᠷᠢ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠬᠠᠭᠠᠨ ᠤ᠋ ᠰᠢᠪᠡᠭᠴᠢᠨ ᠢ᠋ᠶ᠋ᠡᠷ ᠢᠯᠡᠭᠡᠵᠦ ᠠᠪᠠᠢ᠃ ᠬᠡᠷᠡᠢᠳ ᠶᠡᠷᠦ ᠲᠣᠭᠰᠢᠨ ᠲᠦᠮᠡᠨ ᠶᠦ᠍ᠮ᠃ ᠲᠡᠷᠡ ᠬᠦ᠌ ᠠᠳᠠᠪᠠᠰᠢ ᠴᠢᠨᠠᠷ ᠨᠢ ᠬᠤᠢᠯᠠᠭᠠ᠂ ᠳᠠᠢᠯᠭᠠ ᠶ᠋ᠢᠨ ᠨᠠᠢᠷ ᠠ᠋ᠴᠠ ᠴᠤ᠌ ᠬᠠᠷᠠᠭᠳᠠᠬᠤ ᠪᠣᠯᠠᠢ᠃ ᠡᠢᠨ ᠠᠵᠢᠭᠯᠠᠵᠤ ᠵᠣᠭᠰᠣᠬᠤ ᠳ᠋ᠤ᠌ ᠲᠡᠷᠡ ᠬᠦ ᠭᠠᠯ ᠳᠥᠯᠥ᠂ ᠭᠠᠰᠢᠭᠤᠳᠠᠯ ᠣᠢ ᠠ᠋ᠴᠠ ᠲᠣᠷᠯᠣᠭ ᠲᠤᠭᠤᠷᠢᠯ ᠤ᠋ᠨ ᠬᠢᠯᠢᠩᠲᠦ ᠨᠢᠳᠦ᠂ ᠲᠡᠢ ᠲᠡᠮᠦᠷ ᠦ᠋ᠨ ᠬᠡᠮᠡᠯᠢᠬᠦ ᠤᠷᠤᠭᠤᠯ᠂ ᠪᠤᠬᠠ ᠲᠡᠮᠦᠷ ᠦ᠋ᠨ ᠲᠠᠰᠤ ᠵᠠᠩᠭᠢᠳᠤᠭᠰᠠᠨ ᠭᠠᠷ ᠠ᠋ᠴᠠ ᠴᠡᠭᠡᠵᠢᠨ ᠳ᠋ᠦ᠍ ᠪᠤᠴᠠᠯᠵᠤ ᠪᠣᠢ ᠲᠣᠭᠰᠢᠨ ᠠᠶᠢᠭ ᠵᠠᠩ ᠢ᠋ ᠮᠡᠳᠡᠷᠡᠵᠦ ᠪᠣᠯᠬᠤ ᠪᠣᠯᠠᠢ᠃ ᠶᠢᠰᠦᠭᠡᠢ ᠬᠡᠷᠡᠢᠳ ᠦ᠋ᠨ ᠨᠤᠲᠤᠭ ᠠ᠋ᠴᠠ ᠰᠡᠳᠬᠢᠯ ᠬᠠᠷᠠ ᠲᠠᠢ᠂ ᠵᠣᠪᠬᠢ ᠤᠷᠤᠭᠤ ᠪᠠᠨ ᠢᠷᠡᠵᠡᠢ᠃ ᠪᠣᠶᠣᠷᠣᠭ᠋ ᠡᠴᠢᠭᠡ ᠳ᠋ᠦ᠍ ᠵᠠᠶᠠᠭᠠᠭᠰᠠᠨ ᠲᠤᠯᠭᠠ ᠶ᠋ᠢᠨ ᠴᠢᠯᠠᠭᠤ ᠰᠢᠭ᠋ ᠭᠤᠷᠪᠠᠨ ᠰᠠᠢᠬᠠᠨ ᠬᠥᠪᠡᠭᠦᠨ ᠨᠢ ᠲᠠᠩᠭᠠᠷᠢᠭ ᠲᠠᠰᠤᠷᠠᠵᠤ ᠮᠡᠳᠡᠬᠦ ᠨᠢ ᠠ᠋᠃ ᠡᠯᠡ ᠪᠣᠳᠣᠯ ᠶᠢᠰᠦᠭᠡᠢ ᠶ᠋ᠢ ᠵᠣᠪᠠᠭᠠᠵᠤ《ᠪᠢᠳᠡ ᠪᠦᠷ ᠵᠢᠷᠭᠤᠭᠤᠯᠠ ᠪᠢᠯᠡ》ᠭᠡᠬᠦ ᠲᠦᠭᠰᠢᠯ ᠥᠷᠭᠥᠭᠡ ᠭᠡᠷ ᠦ᠋ᠨ ᠵᠦᠭ ᠶᠠᠭᠠᠷᠠᠨ ᠰᠠᠨᠳᠤᠷᠤᠨ ᠵᠢᠯᠣᠭᠣ ᠵᠠᠯᠠᠬᠤ ᠳ᠋ᠤ᠌ ᠬᠦᠷᠭᠡᠵᠡᠢ᠃
ᠪᠠᠷᠠᠳᠠᠨᠪᠠᠭᠠᠲᠤᠷ ᠨᠣᠶᠠᠨ ᠤ᠋ ᠬᠦᠷᠢᠶᠡ ᠬᠡᠷᠡᠢᠳ ᠨᠤᠲᠤᠭ ᠤ᠋ᠨ ᠬᠠᠶᠠᠭᠠ ᠰᠢᠬᠠᠵᠤ᠂ ᠬᠡᠷᠦᠯᠦᠨ ᠦ᠌ ᠳᠣᠣᠷᠠᠲᠤ ᠤᠷᠤᠭᠤ᠂ ᠪᠤᠷᠬᠠᠨ ᠬᠠᠯᠳᠤᠨ ᠠᠭᠤᠯᠠ ᠶ᠋ᠢᠨ ᠪᠠᠷᠠᠭᠤᠨ ᠬᠣᠷᠮᠣᠢ ᠳᠠᠷᠤᠵᠤ ᠡᠪᠦᠯᠵᠢᠭᠰᠡᠨ ᠪᠥᠯᠥᠭᠡ᠃ ᠡᠴᠢᠭᠡ ᠨᠣᠶᠠᠨ ᠤ᠋ ᠬᠦᠷᠢᠶᠡ ᠪᠠᠭᠤᠴᠠᠨ ᠤ᠋ ᠪᠠᠷᠠ ᠬᠠᠷᠠᠭᠳᠠᠬᠤ ᠳ᠋ᠤ᠌ ᠮᠣᠷᠢᠨ ᠤ᠋ ᠵᠢᠯᠣᠭᠣ ᠲᠠᠲᠠᠰᠬᠢᠨ ᠬᠡᠯᠲᠦᠷᠢᠭᠦᠯᠪᠡ᠃ ᠬᠥᠯᠳᠡᠭᠦᠦ ᠭᠠᠵᠠᠷ ᠪᠥᠮᠪᠥᠷᠳᠡᠵᠦ ᠠᠭᠰᠠᠨ ᠣᠯᠠᠨ ᠮᠣᠷᠢᠳ ᠤ᠋ᠨ ᠲᠤᠭᠤᠷᠠᠢ ᠶ᠋ᠢᠨ ᠴᠢᠮᠡᠭᠡ ᠨᠠᠮᠳᠠᠬᠤ ᠦᠶᠡᠰ ᠠᠮᠪᠠᠭᠠᠢ ᠬᠠᠭᠠᠨ ᠤ᠋ ᠳᠠᠭᠤᠨ ᠠᠬᠢᠨ ᠰᠣᠨᠣᠰᠳᠠᠵᠤ᠂
— ᠠᠭᠤᠤ ᠶᠡᠬᠡ ᠰᠦᠯᠳᠡ ᠬᠡᠢ ᠮᠣᠷᠢ ᠠᠢᠰᠤᠢ ᠶ᠋ᠢ ᠪᠢ ᠮᠡᠳᠡᠷᠡᠵᠦ ᠪᠠᠢᠨᠠ! ᠭᠡᠮᠡᠨ ᠥᠭᠦᠯᠡᠵᠦ ᠠᠪᠠᠢ᠃ ᠶᠡᠷᠦ ᠥᠬᠢᠨᠪᠠᠷᠬᠠᠭ ᠠᠪᠠᠭᠠ ᠶ᠋ᠢᠨ ᠱᠠᠷᠢᠯ ᠤ᠋ᠨ ᠳᠡᠷᠭᠡᠳᠡ ᠰᠣᠨᠣᠰᠤᠭᠰᠠᠨ ᠡᠨᠡ ᠦᠭᠡ ᠵᠡᠭᠦᠳᠦᠨ ᠳ᠋ᠦ᠍ᠨᠢ ᠬᠠᠷᠠᠭᠳᠠᠵᠤ᠂ ᠴᠢᠬᠢᠨ ᠳ᠋ᠦ᠍ᠨᠢ ᠰᠣᠨᠣᠰᠳᠠᠨ ᠪᠠᠢᠬᠤ ᠪᠣᠯᠵᠠᠢ᠃
— ᠠᠭᠤᠤ ᠶᠡᠬᠡ ᠰᠦᠯᠳᠡ ᠬᠡᠢ ᠮᠣᠷᠢ ᠠᠢᠰᠤᠢ ᠶ᠋ᠢ ᠪᠢ ᠮᠡᠳᠡᠷᠡᠵᠦ ᠪᠠᠢᠨᠠ᠃
ᠡᠴᠢᠭᠡ ᠨᠣᠶᠠᠨ᠂ ᠶᠢᠰᠦᠭᠡᠢ ᠬᠦᠦ ᠳ᠋ᠡᠭᠡᠨ ᠲᠤᠰᠬᠠᠢ ᠥᠷᠭᠥᠭᠡ ᠪᠠᠢᠭᠤᠯᠵᠤ᠂ ᠥᠭᠡᠯᠦᠨ ᠦᠵᠢᠨ ᠲᠡᠢ ᠳᠡᠷᠡ ᠨᠢᠭᠡᠳᠬᠦ ᠶ᠋ᠢᠨ ᠬᠤᠷᠢᠮ ᠬᠢᠵᠦ ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠬᠠᠭᠠᠳ ᠨᠣᠶᠠᠳ ᠬᠤᠷᠠᠨ ᠴᠢᠭᠤᠯᠵᠤ ᠶᠣᠰᠣᠯᠠᠭᠰᠠᠨ ᠨᠢ ᠪᠣᠢ᠃ ᠬᠠᠷᠢᠨ ᠬᠠᠯᠠᠭᠤᠨ ᠨᠠᠮᠤᠷ ᠢ᠋ᠶ᠋ᠠᠷ ᠶᠢᠰᠦᠨ ᠲᠠᠲ᠋ᠠᠷ ᠢ᠋ ᠳᠠᠢᠯᠠᠷᠠ ᠮᠣᠷᠳᠠᠭᠰᠠᠨ ᠬᠤᠲᠤᠭᠲᠤ ᠮᠣᠩᠬᠣᠷ ᠬᠦᠷᠦᠯᠴᠡᠨ ᠢᠷᠡᠵᠦ ᠡᠰᠡ ᠴᠢᠳᠠᠭᠰᠠᠨ ᠠᠵᠤᠭᠤ᠃ ᠲᠡᠭᠦᠨ ᠦ᠌ ᠴᠡᠷᠢᠭ ᠦ᠋ᠳ ᠶᠡᠬᠡ ᠡᠯᠡᠰᠦᠨ ᠦ᠌ ᠨᠠᠭᠠᠨᠠ ᠬᠣᠷᠣᠭᠠᠯᠠᠨ ᠰᠢᠪᠡᠭᠡᠯᠡᠵᠦ᠂ ᠬᠦᠯᠦᠭ ᠮᠣᠷᠢᠳ ᠢ᠋ᠶ᠋ᠠᠨ ᠠᠮᠠᠷᠠᠭᠠᠵᠤ᠂ ᠬᠦᠯᠦᠭ ᠪᠠᠭᠠᠲᠤᠷ ᠤ᠋ᠳ ᠢ᠋ᠶ᠋ᠠᠨ ᠲᠡᠩᠬᠡᠷᠡᠭᠦᠯᠵᠦ ᠪᠣᠢ ᠰᠠᠨᠵᠠᠢ᠃ ᠬᠠᠷᠢᠨ ᠵᠡᠭᠦᠨ ᠭᠠᠷ ᠢ᠋ ᠲᠡᠷᠢᠭᠦᠯᠡᠨ ᠮᠣᠷᠳᠠᠭᠰᠠᠨ ᠬᠤᠯᠠᠨ ᠠᠪᠠᠭᠠ ᠴᠡᠷᠢᠭ ᠢ᠋ᠶ᠋ᠡᠨ ᠲᠠᠲᠠᠵᠤ ᠲᠦᠩᠬᠡᠯᠢᠭ ᠭᠣᠷᠤᠬᠠᠨᠠ ᠬᠦᠷᠢᠶᠡ ᠡᠭᠦᠰᠬᠡᠨ ᠪᠠᠭᠤᠳᠠᠯᠯᠠᠵᠤ ᠠᠪᠠᠢ᠃ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠴᠡᠷᠢᠭ ᠢ᠋ ᠠᠬᠠᠯᠠᠨ ᠮᠣᠷᠳᠠᠭᠰᠠᠨ ᠵᠠᠯᠠᠭᠤ ᠲᠣᠳᠣᠢᠨ ᠶᠡᠬᠡ ᠡᠯᠡᠰᠦ ᠶ᠋ᠢ ᠭᠠᠲᠤᠯᠵᠤ᠂ ᠶᠢᠰᠦᠨ ᠲᠠᠲ᠋ᠠᠷ ᠤ᠋ᠨ ᠪᠣᠱᠣᠭᠠ ᠵᠦᠭ ᠲᠦ᠍ ᠡᠪᠦᠯᠵᠢᠵᠦ ᠪᠣᠢ ᠭᠡᠯᠴᠡᠨᠡ᠃ ᠭᠡᠪᠡᠴᠦ ᠲᠥᠷᠥᠭᠰᠡᠨ ᠳᠡᠭᠦᠦ ᠡᠴᠡ ᠰᠤᠷᠠᠭ ᠠᠵᠢᠭ ᠦᠭᠡᠢ ᠳ᠋ᠦ᠍ ᠡᠴᠢᠭᠡ ᠦᠨᠡᠨ ᠰᠡᠳᠬᠢᠯ ᠲᠠᠪᠠ ᠦᠭᠡᠢᠷᠬᠡᠨ᠂ ᠴᠠᠭ ᠤ᠋ᠨ ᠴᠠᠭ ᠲᠤ᠌ ᠤᠴᠠᠭᠠᠷ ᠪᠠᠢᠬᠤ ᠪᠣᠯᠵᠠᠢ᠃ ᠲᠡᠷᠡ ᠪᠡᠷ ᠶᠡᠬᠡ ᠦᠷᠭᠦᠭᠡᠨ ᠡᠴᠡ ᠴᠤᠬᠤᠢᠬᠤ ᠨᠢ ᠴᠦ᠍ ᠬᠣᠪᠣᠷ ᠪᠣᠯᠵᠤ᠂ ᠶᠡᠷᠦ ᠬᠠᠷᠯᠢ ᠺᠤ ᠡᠵᠢ ᠳ᠋ᠦ᠍ ᠣᠴᠢᠵᠤ ᠵᠣᠯᠭᠠᠭᠰᠠᠨ ᠠ᠋ᠴᠠ ᠬᠣᠢᠰᠢ ᠭᠡᠷ ᠡᠴᠡ ᠴᠤᠬᠤᠢᠭᠰᠠᠨ ᠦᠭᠡᠢ᠃ ᠬᠠᠷᠠ ᠲᠣᠯᠣᠭᠠᠢ ᠲᠠᠢ ᠨᠣᠶᠠᠨ ᠠ᠋ᠴᠠ ᠴᠠᠭᠠᠨ ᠲᠡᠷᠢᠭᠦᠨ ᠲᠡᠢ ᠪᠣᠯᠲᠠᠯᠠ ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠲᠥᠯᠥᠭᠡ ᠵᠢᠳᠬᠦᠭᠰᠡᠨ ᠡᠪᠦᠭᠡᠨ ᠨᠣᠶᠠᠨ ᠤ᠋ ᠴᠢᠬᠢᠨ ᠳ᠋ᠦ᠍᠂
— ᠠᠭᠤᠤ ᠶᠡᠬᠡ ᠰᠦᠯᠳᠡ ᠬᠡᠢ ᠮᠣᠷᠢ ᠠᠢᠰᠤᠢ ᠶ᠋ᠢ ᠪᠢ ᠮᠡᠳᠡᠷᠡᠵᠦ ᠪᠠᠢᠨᠠ! ᠭᠡᠬᠦ ᠦᠭᠡ ᠰᠣᠨᠣᠰᠳᠠᠭᠰᠠᠭᠠᠷ ᠴᠤ᠌ ᠬᠡᠯᠡ ᠠᠮᠠ ᠪᠠᠨ ᠦᠯᠦ ᠣᠯᠤᠯᠴᠠᠭᠰᠠᠨ ᠠᠬᠠᠨ ᠲᠡᠭᠦᠰ ᠢᠷᠡᠵᠦ ᠶᠠᠪᠤᠭᠠ ᠰᠠᠢᠨ ᠴᠠᠭ ᠢ᠋ ᠦᠷᠭᠦᠭᠡᠴᠢᠬᠡᠬᠦ ᠭᠡᠳ ᠪᠠᠢᠬᠤ ᠰᠢᠭ᠋ ᠰᠠᠨᠠᠭᠳᠠᠵᠠᠢ᠃ ᠶᠢᠰᠦᠭᠡᠢ ᠳ᠋ᠦ᠍ ᠴᠦ᠍ ᠪᠠᠰᠠ ᠡᠢᠮᠦ ᠪᠣᠳᠣᠯ ᠲᠥᠷᠥᠭᠰᠡᠨ ᠨᠢ ᠪᠣᠢ᠃ ᠶᠢᠰᠦᠨ ᠲᠠᠲ᠋ᠠᠷ ᠬᠢᠭᠡᠳ ᠠᠯᠲᠠᠨ ᠤᠯᠤᠰ ᠠ᠋ᠴᠠ ᠢᠯᠡᠭᠦᠦ ᠳᠣᠲᠣᠭᠠᠳᠤ ᠶ᠋ᠢᠨ ᠦᠢᠮᠡᠭᠡᠨ ᠰᠠᠮᠠᠭᠤᠨ᠂ ᠪᠤᠰᠤᠷᠮᠠᠭ ᠰᠠᠨᠠᠭᠠ ᠥᠪᠡᠷ ᠢ᠋ ᠪᠡᠨ ᠶᠡᠭᠦᠳᠬᠡᠬᠦ ᠨᠢ ᠬᠠᠯᠠᠭ ᠪᠣᠯᠤᠭᠠᠳ ᠪᠠᠢᠪᠠ᠃
ᠠᠮᠪᠠᠭᠠᠢ ᠬᠠᠭᠠᠨ ᠤ᠋ ᠵᠣᠷᠢᠮᠠᠭ ᠰᠢᠢᠳ ᠪᠦᠭᠦᠳᠡ ᠶ᠋ᠢ ᠰᠣᠴᠢᠭᠠᠪᠠ᠃ ᠮᠥᠨᠥᠬᠡᠨ ᠳᠡᠯᠡᠬᠡᠢ ᠳᠡᠯᠡᠩᠨᠡᠭᠰᠡᠨ ᠬᠤᠷᠠ ᠲᠠᠢ ᠵᠤᠨ ᠤ᠋ ᠬᠡᠰᠢᠭ ᠭᠡᠮᠡᠨ ᠤᠷᠤᠭᠤᠯ ᠴᠢᠮᠴᠢᠭᠡᠨᠡᠭᠰᠡᠨ ᠡᠰᠦᠭ ᠵᠠᠯᠭᠢᠯᠠᠵᠤ᠂ ᠤᠬᠠᠭᠠᠨ ᠰᠡᠯᠪᠢᠬᠦ ᠬᠣᠣᠷᠠᠵᠠ ᠠᠮᠰᠠᠨ ᠢᠨᠢᠶᠡᠳᠦ ᠬᠥᠷ ᠪᠣᠯᠵᠤ ᠠᠭᠰᠠᠨ ᠶᠡᠬᠡᠰ ᠳᠡᠭᠡᠳᠦᠰ ᠪᠦᠯᠡᠬᠡ ᠵᠠᠯᠭᠢᠭᠰᠠᠨ ᠮᠡᠲᠦ ᠪᠣᠯᠵᠠᠢ᠂ ᠳᠡᠯᠭᠡᠷ ᠤᠯᠠᠷᠢᠯ ᠤ᠋ᠨ ᠴᠡᠴᠡᠭ ᠦ᠋ᠨ ᠳᠤᠮᠳᠠ ᠭᠠᠳᠠᠭᠠᠯᠠᠵᠤ᠂ ᠳᠡᠨᠵᠢ ᠳᠡᠪᠰᠡᠭ ᠳᠡᠭᠡᠷᠡ ᠢᠯᠡ ᠵᠠᠰᠠᠭᠰᠠᠨ ᠢᠳᠡᠭᠡ ᠪᠤᠳᠠᠭᠠ᠂ ᠠᠮᠲᠠᠲᠤ ᠵᠢᠮᠢᠰ ᠲᠡᠷᠢᠭᠦᠲᠡᠨ ᠳ᠋ᠦ᠍ ᠰᠢᠯᠦᠩᠭᠢᠲᠦᠨ ᠬᠣᠷᠭᠣᠳᠠᠵᠤ ᠳᠦᠩᠭᠢᠨᠡᠨ ᠡᠷᠭᠢᠯᠳᠦᠬᠦ ᠢᠯᠠᠭᠠᠨ ᠤ᠋ ᠴᠢᠮᠡᠭᠡᠨ ᠡᠴᠡ ᠥᠭᠡᠷᠡ ᠠᠨᠢᠷ ᠦᠭᠡᠢ ᠠᠵᠢ᠃ ᠠᠮᠪᠠᠭᠠᠢ ᠬᠠᠭᠠᠨ ᠲᠥᠷᠥᠭᠦᠯᠵᠦ ᠥᠰᠬᠡᠭᠰᠡᠨ ᠭᠤᠷᠪᠠᠨ ᠬᠦᠦ ᠪᠣᠢ ᠠᠲᠠᠯᠠ᠂ ᠲᠡᠭᠦᠨ ᠦ᠌ ᠳᠤᠮᠳᠠ ᠠ᠋ᠴᠠ ᠲᠡᠪᠡᠷᠢᠵᠦ ᠥᠰᠬᠡᠭᠰᠡᠨ ᠬᠠᠲᠠᠭᠠᠨ ᠬᠥᠪᠡᠭᠦᠨ ᠪᠠᠢᠬᠤ ᠠᠲᠠᠯᠠ ᠦᠰᠦ ᠪᠡᠨ ᠬᠠᠭᠠᠯᠵᠤ ᠬᠠᠷᠢ ᠳ᠋ᠤ᠌ ᠣᠴᠢᠬᠤ᠂ ᠡᠪᠦᠷ ᠢ᠋ᠶ᠋ᠡᠨ ᠨᠡᠭᠡᠭᠡᠵᠦ ᠬᠥᠮᠦᠨ ᠳ᠋ᠦ᠍ ᠣᠴᠢᠬᠤ ᠭᠦᠩᠵᠦ ᠪᠡᠨ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠬᠦᠷᠭᠡᠵᠦ ᠥᠭᠰᠦ ᠬᠡᠮᠡᠵᠡᠢ᠃ ᠵᠣᠷᠢᠭ ᠨᠢ ᠰᠠᠢᠬᠠᠨ ᠶᠤᠮ᠃ ᠭᠡᠪᠡᠴᠦ ᠡᠷᠲᠡᠨ ᠦ᠌ ᠥᠰᠲᠦ ᠶᠢᠰᠦᠨ ᠲᠠᠲ᠋ᠠᠷ ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠬᠠᠭᠠᠨ ᠠᠮᠪᠠᠭᠠᠢ ᠶ᠋ᠢ ᠤᠷᠤᠭ ᠪᠠᠷᠢᠯᠳᠤᠪᠠ ᠭᠡᠮᠡᠨ ᠤᠷᠢᠵᠤ ᠠᠪᠠᠴᠢᠭᠠᠳ ᠠᠮᠢᠳᠤ ᠶᠠᠪᠤᠭᠤᠯᠬᠤ ᠨᠢ ᠶᠠᠭᠤ ᠯᠠ ᠪᠣᠯ ᠭᠡᠮᠡᠨ ᠡᠷᠡᠭᠡᠯᠵᠡᠵᠦ ᠠᠪᠠᠢ᠃ ᠾᠦᠩᠨᠦ ᠭᠦᠷᠦᠨ ᠦ᠌ ᠶᠡᠬᠡ ᠪᠠᠭᠤᠷᠢᠨ ᠳᠡᠭᠡᠷᠡ ᠴᠣᠭ ᠲᠠᠢ ᠨᠣᠷᠮᠠ ᠶ᠋ᠢ ᠨᠢ ᠲᠣᠭᠣᠷᠢᠨ ᠲᠣᠭᠯᠠᠵᠤ ᠦᠯᠡᠳᠡᠭᠰᠡᠨ ᠬᠡᠳᠦᠨ ᠬᠡᠦᠬᠡᠳ ᠰᠢᠭ ᠴᠥᠭᠡᠪᠦᠷᠢ ᠨᠢᠯᠬᠠ ᠠᠢᠮᠠᠭ ᠨᠢᠭᠡᠨ ᠶᠠᠷᠢᠶᠠᠨ ᠦᠭᠡᠢ ᠲᠠᠲ᠋ᠠᠷ ᠠᠢᠮᠠᠭ ᠮᠥᠨ ᠪᠢᠯᠡ᠃ ᠭᠡᠪᠡᠴᠦ ᠥᠰᠴᠦ ᠥᠨᠳᠡᠢᠬᠦ ᠴᠠᠭ ᠲᠤ᠌ ᠬᠠᠶᠠᠭᠠ ᠪᠠᠨ ᠬᠠᠳᠤᠷᠴᠤ᠂ ᠵᠠᠶᠢᠭ ᠪᠤᠳᠠᠩᠲᠤᠭᠤᠯᠵᠤ ᠠᠬᠠ ᠳᠡᠭᠦᠦ ᠠᠢᠮᠠᠭ ᠲᠠᠭᠠᠨ ᠠᠳᠠ ᠪᠣᠯᠵᠤ ᠪᠤᠢᠷ ᠨᠠᠭᠤᠷ ᠤ᠋ᠨ ᠰᠣᠯᠣᠩᠭᠣᠳ ᠲᠡᠢᠰᠢ ᠨᠤᠲᠤᠭ ᠭᠤᠶᠤᠵᠤ ᠣᠴᠢᠬᠤ ᠳ᠋ᠤ᠌ ᠬᠦᠷᠦᠭᠰᠡᠨ ᠵᠤᠨ ᠶᠤᠮ᠃ ᠶᠡᠷᠦ ᠶᠠᠮᠠᠷ ᠰᠠᠢᠨ ᠳ᠋ᠠᠭᠠᠨ ᠲᠠᠲᠠᠪᠤᠷᠢ ᠡᠷᠡ ᠬᠡᠮᠡᠬᠦ ᠮᠠᠭᠤ ᠨᠡᠷᠡ ᠵᠡᠭᠦᠪᠡ ᠭᠡᠵᠦ᠃ ᠮᠥᠨᠥᠬᠡᠨ ᠲᠤᠯᠭᠠ ᠪᠠᠨ ᠠᠴᠢᠵᠤ ᠲᠤᠭᠤᠷᠭᠠ ᠪᠠᠨ ᠡᠪᠬᠡᠵᠦ ᠲᠤᠭᠤᠷᠠᠢ ᠲᠠᠢ ᠪᠣᠯᠲᠠᠯᠠ ᠶᠠᠪᠠᠭᠠᠨ ᠨᠢᠴᠦᠭᠦᠨ ᠮᠠᠴᠤᠨ ᠣᠴᠢᠭᠰᠠᠨ ᠲᠠᠲᠠᠪᠤᠷᠢ ᠡᠷᠡᠰ ᠲᠦ᠍ ᠵᠦᠷᠴᠢᠳ ᠴᠦ᠍᠂ ᠰᠣᠯᠣᠩᠭᠣᠳ ᠠᠢᠮᠠᠭ ᠴᠤ᠌ ᠨᠢᠭᠤᠷ ᠥᠭᠭᠦᠭᠰᠡᠨ ᠦᠭᠡᠢ ᠭᠡᠬᠦ ᠪᠥᠯᠥᠭᠡ᠃ ᠰᠠᠭᠤᠬᠤ ᠨᠤᠲᠤᠭ ᠪᠠᠭᠤᠬᠤ ᠭᠠᠵᠠᠷ ᠵᠢᠭᠠᠵᠤ ᠥᠭᠬᠦ ᠨᠢ ᠪᠠᠢᠲᠤᠭᠠᠢ ᠠᠶᠠᠭᠠᠨ ᠤ᠋ ᠠᠮᠠᠰᠠᠷ ᠵᠠᠭᠤᠯᠭᠠᠭᠠ ᠦᠭᠡᠢ ᠤᠤᠭᠠᠯ ᠣᠯᠠᠨ ᠳ᠋ᠤ᠌ ᠲᠠᠲᠠᠪᠤᠷᠢ ᠡᠷᠡᠰ ᠭᠣᠮᠣᠳᠠᠨ ᠴᠥᠬᠥᠬᠦ ᠳ᠋ᠡᠭᠡᠨ ᠠᠯᠲᠠᠨ ᠤᠯᠤᠰ ᠲᠤ᠌ ᠬᠠᠨᠳᠤᠭᠰᠠᠨ ᠭᠡᠳᠡᠭ ᠶᠦᠮ᠃ ᠡᠷᠲᠡᠨ ᠦ᠌ ᠤᠳᠤᠮᠲᠤ ᠶᠡᠬᠡ ᠭᠦᠷᠦᠨ ᠳᠣᠯᠣᠭᠠ ᠨᠤᠭᠤᠯᠤᠨ ᠪᠣᠳᠣᠵᠤ ᠭᠠᠭᠴᠠᠬᠠᠨ ᠪᠣᠯᠵᠣᠯ ᠲᠠᠯᠪᠢᠭᠰᠠᠨ ᠶᠤᠮ ᠰᠠᠨᠵᠢ᠃ ᠲᠦᠮᠡᠨ ᠱᠠᠯᠠᠭᠠᠨ ᠳ᠋ᠤ᠌ ᠣᠷᠣᠨᠠ ᠭᠡᠮᠡᠨ ᠲᠦᠭᠰᠢᠵᠦ ᠠᠭᠰᠠᠨ ᠲᠠᠲᠠᠪᠤᠷᠢ ᠡᠷᠡᠰ ᠲᠦ᠍ ᠬᠠᠨᠳᠤᠨ᠂
— ᠪᠢᠳᠡ ᠭᠠᠭᠴᠠᠬᠠᠨ ᠪᠣᠯᠵᠣᠯ ᠲᠠᠯᠪᠢᠨᠠ᠃ ᠲᠡᠭᠦᠨ ᠢ᠋ ᠦᠶᠡ ᠶ᠋ᠢᠨ ᠦᠶᠡ ᠳ᠋ᠦ᠍᠂ ᠦᠷᠡ ᠳ᠋ᠦ᠍ ᠪᠡᠶᠡᠯᠡᠭᠦᠯᠵᠦ ᠠᠪᠠᠰᠤ ᠡᠵᠡᠮᠰᠢᠨ ᠰᠠᠭᠤᠬᠤ ᠨᠤᠲᠤᠭ᠂ ᠡᠷᠡᠮᠰᠢᠨ ᠥᠨᠳᠡᠢᠬᠦ ᠬᠡᠷᠬᠡᠮ ᠵᠡᠷᠭᠡ ᠣᠯᠭᠣᠰᠤᠭᠠᠢ ᠬᠡᠮᠡᠵᠡᠢ᠃ ᠲᠠᠲᠠᠪᠤᠷᠢ ᠡᠷᠡ ᠶ᠋ᠢᠨ ᠬᠢᠨ ᠪᠡᠶᠡᠰᠦᠨ ᠳᠠᠭᠠᠵᠤ ᠰᠥᠰᠥᠯᠡᠨ ᠮᠥᠷᠭᠥᠵᠦ ᠰᠣᠨᠣᠰᠪᠠᠯ᠂
— ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠬᠠᠭᠠᠳ ᠢ᠋ ᠪᠠᠷᠢᠨ ᠠᠪᠴᠢᠷᠠᠵᠤ᠂ ᠠᠯᠠᠨ ᠲᠤᠰᠢᠶᠠᠵᠤ ᠪᠠᠢᠰᠤᠭᠠᠢ ᠭᠡᠵᠦ ᠭᠠᠭᠴᠠ ᠯᠠ ᠪᠣᠯᠵᠣᠯ ᠲᠤᠯᠭᠠᠭᠰᠠᠨ ᠭᠡᠬᠦ ᠪᠢᠯᠡ᠃ ᠡᠯᠡ ᠬᠠᠲᠠᠭᠤ ᠱᠠᠯᠠᠭᠠ ᠶ᠋ᠢ ᠡᠰᠡ ᠳᠠᠭᠠᠵᠤ ᠬᠡᠮᠡᠨᠡ ᠬᠠᠨᠠ ᠰᠢᠭᠢᠷᠡᠯᠡᠬᠦ ᠪᠠᠭᠤᠷᠢ ᠦᠭᠡᠢ᠂ ᠬᠠᠶᠠᠭᠠ ᠪᠠᠨ ᠴᠣᠨᠳᠣᠭᠯᠠᠬᠤ ᠪᠤᠷᠭᠠᠰᠤ ᠦᠭᠡᠢ ᠪᠣᠯᠴᠢᠬᠠᠬᠤ ᠭᠡᠳ ᠪᠠᠢᠵᠠᠢ᠃ ᠡᠢᠨ ᠠᠮᠢ ᠵᠢᠭᠤᠬᠤ ᠶ᠋ᠢᠨ ᠡᠷᠬᠡᠨ ᠳ᠋ᠦ᠍ ᠡᠷᠲᠡᠨ ᠦ᠌ ᠶᠡᠬᠡ ᠭᠦᠷᠦᠨ ᠠᠯᠲᠠᠨ ᠤᠯᠤᠰ ᠤ᠋ᠨ ᠴᠢᠰᠤ ᠲᠠᠢ ᠪᠣᠯᠵᠣᠯ ᠢ᠋ ᠲᠣᠯᠣᠭᠠᠢ ᠭᠣᠳᠣᠢᠨ ᠳᠠᠭᠠᠬᠤ ᠪᠣᠯᠤᠭᠰᠠᠨ ᠦᠦᠬᠡ ᠲᠡᠦᠬᠡ ᠪᠣᠢ ᠶᠤᠮ᠃ ᠬᠥᠩᠬᠥᠷ ᠬᠣᠷᠴᠢ ᠡᠢᠨ ᠬᠤᠨ ᠬᠤᠭᠤᠷ ᠤ᠋ᠨ ᠴᠢᠪᠠᠭᠳᠠᠰᠤ ᠲᠡᠮᠲᠡᠷᠢᠨ ᠳᠣᠮᠣᠭ ᠪᠡᠳᠡᠷᠢᠵᠦ《ᠶᠠᠷᠢ ᠭᠡᠪᠡᠯ ᠶᠠᠷᠢᠰᠤ》 ᠭᠡᠮᠡᠨ ᠦᠭᠡ ᠪᠡᠨ ᠬᠦᠯᠬᠦᠨ ᠡᠪᠯᠡᠭᠦᠯᠵᠦ ᠰᠠᠭᠤᠲᠠᠯᠠ ᠬᠤᠲᠤᠭᠲᠤ ᠮᠣᠩᠬᠣᠷ᠂
— ᠬᠠᠭᠠᠨ ᠲᠠ ᠥᠬᠢᠨ ᠢ᠋ᠶ᠋ᠡᠨ ᠥᠭᠭᠦᠶᠡ ᠭᠡᠵᠦ ᠭᠤᠶᠤᠭᠰᠠᠨ ᠶᠤᠮ ᠤᠤ? ᠭᠡᠯᠡ᠃ ᠪᠠᠰᠠ ᠴᠤ᠌ ᠬᠡᠯᠡᠬᠦ ᠯᠡ ᠦᠭᠡ ᠪᠠᠢᠪᠠ᠃ ᠶᠢᠰᠦᠨ ᠲᠠᠲ᠋ᠠᠷ ᠭᠦᠩᠵᠦ ᠶ᠋ᠢ ᠨᠢ ᠠᠪᠤᠶᠠ ᠭᠡᠵᠦ ᠭᠤᠶᠤᠭᠰᠠᠨ ᠪᠣᠯ ᠢᠷᠡᠵᠦ ᠵᠠᠯᠠᠬᠤ ᠶᠣᠰᠣᠲᠠᠢ ᠰᠠᠨᠠᠭᠳᠠᠨᠠ᠃ ᠬᠠᠷᠢᠨ ᠬᠠᠭᠠᠨ ᠠᠮᠪᠠᠭᠠᠢ ᠥᠪᠡᠷ ᠢ᠋ᠶ᠋ᠡᠨ ᠬᠠᠲᠤᠨ ᠰᠠᠭᠤᠳᠠᠯ ᠳ᠋ᠤ᠌ ᠴᠢᠨᠢ ᠡᠵᠡᠨ ᠪᠣᠯᠭᠠᠶᠠ ᠭᠡᠵᠦ ᠭᠤᠶᠤᠭᠰᠠᠨ ᠪᠣᠯ ᠥᠬᠢᠨ ᠢ᠋ᠶ᠋ᠡᠨ ᠬᠦᠷᠭᠡᠵᠦ ᠥᠭᠬᠦ ᠨᠢ ᠵᠥᠪ ᠪᠣᠳᠣᠭᠳᠠᠨᠠ᠃
— ᠬᠤᠲᠤᠭᠲᠤ ᠬᠥᠪᠡᠭᠦᠨ ᠲᠠ ᠪᠣᠯᠭᠣᠭᠠᠨ ᠰᠣᠶᠣᠷᠬᠠ! ᠶᠢᠰᠦᠨ ᠲᠠᠲ᠋ᠠᠷ ᠤ᠋ᠨ ᠬᠤᠳᠤᠨ ᠪᠠᠷᠠᠭ ᠨᠣᠶᠠᠨ ᠤ᠋ ᠠᠮᠢᠨ ᠰᠢᠳᠠᠷ᠂ ᠵᠠᠯᠢᠪᠤᠬᠠ ᠵᠠᠩᠵᠤᠨ ᠤ᠋ ᠰᠠᠳᠤᠨ ᠰᠦᠯᠪᠡᠭᠡ ᠢᠯᠭᠤᠮᠵᠢ ᠪᠠᠭᠠᠲᠤᠷ ᠢᠷᠡᠵᠦ ᠭᠤᠶᠤᠭᠠᠳ ᠶᠠᠪᠤᠭᠰᠠᠨ ᠪᠢᠯᠡ᠃ ᠮᠢᠨᠦ ᠪᠣᠳᠣᠬᠤ ᠳ᠋ᠤ᠌ ᠣᠴᠢᠬᠤ ᠨᠢ ᠵᠥᠪ ᠶᠦᠮ᠃
— ᠡᠨᠡ ᠶᠡᠬᠡ ᠵᠣᠷᠢᠭ ᠮᠥᠨ ᠪᠢᠯᠡ᠃
— ᠲᠡᠨᠡᠭ ᠬᠥᠮᠦᠨ ᠦ᠌ ᠵᠣᠷᠢᠭ ᠨᠢ ᠶᠡᠬᠡ ᠭᠡᠳᠡᠭ ᠢ᠋ ᠭᠠᠳᠠᠷᠯᠠᠨᠠ᠃ ᠭᠡᠪᠡᠴᠦ ᠬᠠᠪᠤᠯ ᠰᠡᠴᠡᠨ ᠬᠠᠭᠠᠨ ᠤ᠋ ᠡᠶᠡ ᠪᠡᠷ ᠵᠠᠰᠠᠬᠤ ᠤᠬᠠᠭᠠᠨ ᠢ᠋ ᠶᠡᠬᠡᠳᠡ ᠳᠡᠭᠡᠳᠦᠯᠡᠳᠡᠭ ᠦ᠋ᠨ ᠤᠴᠢᠷ ᠬᠥᠯ ᠳ᠋ᠦ᠍ᠨᠢ ᠰᠠᠭᠤᠬᠤ ᠨᠡᠭᠦᠳᠡᠯ ᠬᠢᠵᠦ ᠪᠠᠢᠭᠠ ᠶᠤᠮ᠃
— ᠬᠠᠭᠠᠨᠲᠠᠨ ᠮᠢᠨᠢ᠂ ᠥᠬᠢᠨ ᠦ᠌ ᠪᠡᠨ ᠠᠮᠢᠨ ᠳᠡᠭᠡᠷᠡ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠨᠡᠮᠡᠵᠦ ᠠᠯᠳᠠᠪᠠ ᠳᠠ᠂ ᠪᠢ ᠥᠭᠡᠷᠡ ᠶᠠᠭᠤ ᠬᠡᠯᠡᠬᠦ ᠪᠣᠢ?
— ᠪᠤᠲᠠ ᠬᠠᠶᠠᠵᠤ ᠨᠡᠭᠦᠬᠦ ᠳ᠋ᠦ᠍ ᠬᠣᠵᠢᠯ ᠣᠢᠷᠠ ᠪᠠᠢᠳᠠᠭ ᠶᠣᠰᠣ ᠴᠤ᠌ ᠪᠣᠢ᠃ ᠮᠢᠨᠦ ᠪᠣᠳᠣᠬᠤ ᠳ᠋ᠤ᠌ ᠠᠯᠲᠠᠨ ᠤᠯᠤᠰ ᠤ᠋ᠨ ᠠᠷᠭᠠ ᠶ᠋ᠢ ᠥᠪᠡᠷ ᠲᠦ᠋ᠨᠢ ᠡᠷᠭᠢᠭᠦᠯᠵᠦ ᠬᠡᠷᠡᠭᠯᠡᠵᠦ ᠪᠣᠢ ᠨᠢ ᠵᠥᠪ ᠮᠡᠲᠦ ᠰᠠᠨᠠᠭᠳᠠᠨᠠ ᠭᠡᠳ ᠠᠮᠪᠠᠭᠠᠢ ᠬᠠᠭᠠᠨ ᠥᠪᠡᠷ ᠦ᠋ᠨ ᠪᠣᠳᠣᠯ ᠳ᠋ᠤ᠌ ᠨᠤᠲᠠ ᠪᠠᠲᠤ ᠢᠲᠡᠭᠡᠭᠰᠡᠨ ᠬᠥᠮᠦᠨ ᠦ᠌ ᠲᠠᠯᠪᠢᠭᠤᠨ ᠴᠢᠷᠠᠢ ᠪᠠᠷ ᠪᠦᠭᠦᠳᠡ ᠶ᠋ᠢ ᠲᠣᠭᠣᠷᠢᠭᠤᠯᠤᠨ ᠬᠠᠷᠠᠵᠤ᠂
— ᠲᠦᠮᠡᠨ ᠵᠢᠯ ᠦ᠋ᠨ ᠲᠡᠷᠲᠡᠭᠡ ᠲᠥᠷᠥᠭᠰᠡᠨ ᠪᠡᠶᠡ ᠶ᠋ᠢᠨ ᠮᠢᠨᠢ ᠬᠡᠯᠲᠡᠷᠬᠡᠢ ᠶᠢᠰᠦᠨ ᠲᠠᠲ᠋ᠠᠷ ᠲᠠᠢ ᠪᠢᠳᠡ ᠦᠭᠡᠰᠡᠨ ᠨᠢᠭᠡᠳᠴᠦ ᠪᠣᠯᠬᠤ ᠦᠭᠡᠢ ᠨᠢ ᠶᠠᠭᠤ ᠪᠢᠯᠡ᠃ ᠬᠠᠷᠢ ᠬᠣᠯᠠ ᠶ᠋ᠢᠨ ᠠᠯᠲᠠᠨ ᠤᠯᠤᠰ᠂ ᠬᠠᠷᠠ ᠡᠯᠢᠭᠡ ᠶ᠋ᠢᠨ ᠰᠠᠭᠤᠷᠢᠨ ᠢᠷᠭᠡᠳ ᠬᠠᠮᠢᠶᠠᠲᠠᠨ ᠰᠠᠳᠤᠨ ᠳ᠋ᠤ᠌ ᠮᠢᠨᠢ ᠢᠯᠳᠦ ᠪᠠᠷᠢᠭᠤᠯᠤᠭᠠᠳ ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠡᠰᠡᠷᠭᠦ ᠲᠤᠷᠬᠢᠷᠠᠭᠠᠳ ᠪᠠᠢᠨᠠ ᠪᠤᠰᠤ ᠤᠤ? ᠭᠡᠯᠡ᠃
ᠬᠠᠭᠠᠨ ᠬᠥᠪᠡᠭᠦᠳ ᠪᠡᠶᠡ ᠪᠡᠶᠡ ᠪᠡᠨ ᠪᠦᠷᠢᠳᠬᠡᠬᠦ ᠮᠡᠲᠦ ᠬᠠᠷᠠᠪᠠ᠃ ᠬᠤᠲᠤᠭᠲᠤ ᠮᠣᠩᠬᠣᠷ᠂
— ᠳᠣᠯᠣᠭᠤᠯᠠ ᠲᠥᠷᠥᠭᠡᠳ ᠪᠢᠳᠡ ᠲᠠᠪᠤᠭᠤᠯᠠ ᠦᠯᠡᠳᠡᠵᠡᠢ! ᠭᠡᠲᠡᠯᠡ ᠠᠮᠪᠠᠭᠠᠢ ᠬᠠᠭᠠᠨ ᠥᠪᠡᠷ ᠦ᠋ᠨ ᠰᠠᠨᠠᠭᠠ ᠵᠥᠪ ᠲᠦ᠍ ᠡᠷᠡᠭᠡᠯᠵᠡᠬᠦ ᠶ᠋ᠢ ᠪᠣᠯᠢᠵᠤ᠂
— ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠬᠠᠭᠠᠳ ᠪᠢᠳᠡ ᠪᠣᠳᠣᠯ ᠲᠠᠮᠤᠵᠤ᠂ ᠰᠠᠨᠠᠭᠠ ᠰᠦᠯᠵᠢᠵᠦ ᠶᠢᠰᠦᠨ ᠲᠠᠲ᠋ᠠᠷ ᠲᠤ᠌ ᠪᠠᠷᠢᠭᠤᠯᠬᠤ ᠪᠤᠭᠤᠢᠯᠢ ᠪᠠᠨ ᠬᠢᠬᠦ ᠴᠠᠭ ᠪᠣᠯᠤᠭᠰᠠᠨ ᠰᠠᠨᠠᠭᠳᠠᠨᠠ᠃ ᠴᠢᠰᠤᠨ ᠤᠷᠤᠭ ᠤ᠋ᠨ ᠲᠡᠳᠡᠨ ᠢ᠋ ᠤᠰᠤᠨ ᠲᠥᠷᠥᠯ ᠦ᠋ᠨ ᠬᠢᠲᠠᠳ ᠢᠷᠭᠡᠳ ᠠᠰᠢᠭᠯᠠᠭᠠᠳ ᠪᠠᠢᠬᠤ ᠳ᠋ᠤ᠌ ᠪᠢᠳᠡ ᠶᠠᠭᠤᠨ ᠳᠤᠲᠠᠬᠤ ᠪᠢᠯᠡ᠃ ᠭᠦᠩᠵᠦ ᠪᠡᠨ ᠬᠠᠨ ᠬᠥᠪᠡᠭᠦᠨ ᠳ᠋ᠦ᠍ ᠥᠭᠬᠦ ᠪᠣᠯᠤᠭᠰᠠᠨ ᠮᠢᠨᠢ ᠡᠪᠦᠭᠡᠨ ᠬᠠᠭᠠᠨ ᠤ᠋ ᠦᠭᠡ ᠪᠡᠷ ᠨᠢᠭᠤᠷ ᠦᠭᠡᠢ ᠬᠦᠦ ᠲᠦᠯᠬᠢᠵᠦ ᠪᠣᠢ ᠬᠡᠷᠡᠭ᠃ ᠥᠪᠡᠷ ᠢ᠋ᠶ᠋ᠡᠨ ᠠᠷᠤ ᠠ᠋ᠴᠠ ᠨᠢ ᠬᠥᠰᠬᠡᠯᠡᠨ ᠮᠣᠷᠳᠠᠵᠤ ᠪᠠᠢᠭᠠ ᠮᠢᠨᠢ ᠪᠡᠷᠰᠡ ᠬᠥᠳᠡᠯᠵᠦ ᠪᠣᠢ ᠬᠡᠷᠡᠭ᠃ ᠡᠢᠨ ᠴᠠᠭ ᠤ᠋ᠨ ᠰᠠᠯᠬᠢ ᠨᠠᠭᠠᠰᠢ ᠪᠠᠨ ᠡᠷᠭᠢᠪᠡᠰᠦ ᠶᠢᠰᠦᠨ ᠲᠠᠲ᠋ᠠᠷ ᠤ᠋ᠳ ᠠᠯᠲᠠᠨ ᠤᠯᠤᠰ ᠤ᠋ᠨ ᠬᠠᠭᠠᠳ ᠢ᠋ ᠪᠤᠭᠤᠢᠯᠢᠳᠠᠨ ᠠᠪᠴᠢᠷᠠᠵᠤ ᠰᠥᠭᠦᠳᠦᠭᠦᠯᠵᠦ ᠥᠭᠬᠦ ᠪᠤᠰᠤ ᠤᠤ? ᠮᠢᠨᠦ ᠨᠡᠭᠦᠳᠡᠯ ᠡᠢᠨ ᠪᠢᠯᠡ᠃ ᠮᠡᠷᠭᠡᠳ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠲᠤᠩᠭᠠᠭᠲᠤᠨ! ᠭᠡᠪᠡ᠃ ᠬᠤᠷᠠᠯᠳᠠᠢ ᠴᠢᠭᠤᠯᠤᠭᠰᠠᠨ ᠶᠡᠬᠡ ᠲᠠᠯᠠ ᠳ᠋ᠤ᠌ ᠨᠠᠮ ᠬᠦᠮᠬᠡᠨ ᠪᠣᠯᠵᠤ᠂ ᠠᠬᠢᠭᠠᠳ ᠠᠮᠲᠠᠲᠠᠨ ᠤ᠋ ᠳᠡᠭᠡᠵᠢ᠂ ᠠᠷᠢᠬᠢᠨ ᠤ᠋ ᠳᠡᠭᠡᠳᠦ ᠠᠯᠠᠭᠯᠠᠬᠤ ᠰᠢᠷᠡᠭᠡᠨᠡ ᠡᠷᠬᠢᠮᠰᠦᠨ ᠬᠣᠷᠭᠣᠳᠠᠬᠤ ᠢᠯᠠᠭᠠᠨ ᠤ᠋ ᠳᠠᠭᠤ ᠳᠦᠩᠭᠢᠨᠡᠵᠦ ᠡᠬᠢᠯᠡᠪᠡ᠃ ᠠᠮᠪᠠᠭᠠᠢ ᠬᠠᠭᠠᠨ ᠥᠪᠡᠷ ᠦ᠋ᠨ ᠰᠢᠳᠡᠷᠡ ᠶ᠋ᠢ ᠳᠡᠯᠭᠡᠵᠦ ᠪᠡᠷᠰᠡ ᠬᠥᠯ ᠲᠡᠢ ᠪᠡᠷᠢ ᠶ᠋ᠢᠨ ᠨᠡᠭᠦᠳᠡᠯ ᠢ᠋ᠶ᠋ᠡᠨ ᠲᠠᠢᠯᠤᠨ ᠠᠢᠯᠠᠳᠬᠠᠯᠠ᠃ ᠬᠠᠨ ᠬᠥᠪᠡᠭᠦᠳ ᠳᠣᠣᠷᠠ ᠳᠣᠣᠷᠠ ᠪᠠᠨ ᠪᠣᠳᠣᠯ ᠳ᠋ᠤ᠌ ᠠᠪᠲᠠᠪᠠ᠃ ᠶᠡᠷᠦ ᠬᠤᠷᠠᠯᠲᠠᠢ ᠳ᠋ᠤ᠌ ᠬᠤᠷᠠᠵᠤ᠂ ᠬᠤᠪᠢ ᠲᠠᠢ ᠲᠥᠷᠥ ᠶ᠋ᠢᠨ ᠪᠠᠭᠠᠨᠠ ᠳ᠋ᠤ᠌ ᠦᠭᠡ ᠢᠪᠡᠵᠦ ᠦᠵᠡᠭᠡ ᠦᠭᠡᠢ ᠲᠣᠳᠣᠢᠨ ᠣᠳᠴᠢᠬᠢᠨ᠂
— ᠬᠠᠭᠠᠨ ᠠᠬᠠ ᠶ᠋ᠢᠨ ᠵᠥᠪ ᠰᠠᠨᠵᠠᠢ! ᠭᠡᠯᠡ᠃ ᠴᠢᠩᠭᠢᠭᠡᠳ ᠲᠥᠷᠥ ᠶ᠋ᠢᠨ ᠬᠤᠷᠠᠯᠲᠠᠢ ᠳ᠋ᠤ᠌ ᠥᠪᠡᠷ ᠦ᠋ᠨ ᠦᠭᠡ ᠶ᠋ᠢ ᠬᠡᠯᠡᠭᠰᠡᠨ ᠳ᠋ᠡᠭᠡᠨ ᠪᠠᠶᠠᠷ ᠲᠠᠢ ᠬᠠᠩᠬᠠᠯᠵᠠᠨ ᠡᠰᠦᠭ ᠰᠢᠮᠡᠵᠦ᠂ ᠴᠢᠪᠠᠭᠠ ᠠᠮᠲᠠᠷᠬᠠᠵᠤ ᠰᠠᠭᠤᠪᠠ᠃ ᠬᠠᠷᠯᠢ ᠺᠤ ᠢᠵᠢᠢ ᠦᠬᠦᠵᠦ ᠦᠬᠦᠵᠦ ᠦᠯᠡᠳᠡᠭᠰᠡᠨ ᠲᠠᠪᠤᠨ ᠬᠦᠦ ᠪᠡᠨ ᠪᠦᠷᠢᠳᠬᠡᠬᠦ ᠮᠡᠲᠦ ᠨᠢᠳᠦ ᠭᠦᠶᠦᠯᠭᠡᠨ ᠬᠠᠷᠠᠵᠤ᠂
— ᠮᠢᠨᠦ ᠪᠣᠳᠣᠬᠤ ᠳ᠋ᠤ᠌ ᠬᠠᠭᠠᠨ ᠲᠠᠨ ᠤ᠋ ᠵᠥᠪ ᠮᠡᠲᠦ ᠠ᠋! ᠬᠠᠷᠢᠨ ᠭᠦᠩᠵᠦ ᠬᠡᠮᠡᠨᠡ ᠭᠦᠩᠵᠦ ᠪᠡᠨ ᠶᠠᠪᠤᠭᠤᠯᠬᠤ ᠤᠤ? ᠭᠡᠵᠦ ᠠᠰᠠᠭᠤᠯᠠ᠃《ᠢᠵᠢᠢ ᠬᠠᠲᠤᠨ ᠶᠠᠭᠤ ᠬᠡᠯᠡᠴᠢᠬᠡᠪᠡ》 ᠭᠡᠰᠡᠨ ᠰᠢᠭ ᠬᠠᠨ ᠬᠥᠪᠡᠭᠦᠳ ᠰᠡᠷᠲᠡᠰᠬᠢᠨ ᠬᠠᠷᠠᠵᠤ᠂ ᠬᠠᠶᠠᠭᠠ ᠨᠡᠢᠯᠡᠭᠰᠡᠨ ᠨᠤᠲᠤᠭ ᠵᠠᠶᠠᠭᠠ ᠨᠢᠭᠡᠳᠦᠭᠰᠡᠨ ᠪᠠᠢᠳᠠᠭ ᠭᠡᠮᠡᠨ ᠬᠤᠷᠠᠯᠲᠠᠢ ᠳ᠋ᠤ᠌ ᠮᠣᠷᠢᠯᠠᠳᠠᠭ ᠳᠣᠲᠣᠷ ᠪᠢᠯᠭᠡ ᠨᠣᠶᠠᠨ᠂ ᠳᠠᠶᠠᠨ ᠬᠠᠨ᠂ ᠲᠣᠷᠯᠣᠭ ᠲᠣᠭᠣᠷᠢᠯ ᠭᠤᠷᠪᠠ ᠳᠡᠮᠡᠢ ᠯᠡ ᠪᠡᠶᠡ ᠪᠡᠶᠡ ᠶ᠋ᠢ ᠭᠠᠢᠬᠠᠨ ᠰᠢᠷᠲᠡᠵᠡᠢ᠃ ᠪᠦᠭᠦᠳᠡ ᠶ᠋ᠢᠨ ᠭᠠᠢᠬᠠᠰᠢ ᠲᠠᠲᠠᠭᠰᠠᠨ ᠬᠠᠷᠯᠢ ᠺᠤ ᠬᠠᠲᠤᠨ᠂
— ᠬᠥᠩᠬᠥᠷ ᠬᠣᠷᠴᠢ ᠠ᠋᠂ ᠬᠤᠨ ᠬᠤᠭᠤᠷ ᠤ᠋ᠨ ᠤᠴᠢᠷᠯᠠᠯ ᠢ᠋ ᠰᠣᠨᠣᠰᠬᠠᠵᠤ ᠬᠠᠢᠷᠠᠯᠠ ᠭᠡᠵᠦ ᠨᠠᠮᠪᠠᠭᠠ ᠲᠠᠢ ᠥᠭᠦᠯᠡᠪᠡ᠃ ᠴᠡᠴᠡᠭ ᠦ᠋ᠨ ᠳᠤᠮᠳᠠᠬᠢ ᠡᠷᠢᠶᠡᠨ ᠣᠯᠪᠣᠭ ᠲᠤ᠌ ᠵᠠᠯᠠᠭᠰᠠᠨ ᠬᠤᠨ ᠬᠤᠭᠤᠷ ᠢ᠋ᠶ᠋ᠠᠨ ᠠᠪᠴᠤ ᠡᠪᠦᠳᠦᠭ ᠳᠡᠭᠡᠷᠡ ᠪᠡᠨ ᠲᠠᠯᠪᠢᠭᠠᠳ᠂
— ᠵᠠ᠁ ᠭᠡᠰᠡᠨ ᠢ᠋ᠶ᠋ᠡᠨ ᠬᠥᠪᠴᠢ ᠶ᠋ᠢ ᠨᠢ ᠲᠡᠳᠡᠨ᠂ ᠴᠢᠪᠬᠠᠳᠠᠰᠤᠨ ᠳᠡᠭᠡᠭᠦᠷ ᠬᠡᠳᠦᠨᠲᠡ ᠳᠡᠭᠳᠡᠰᠬᠢᠯᠭᠡᠳ ᠲᠩᠷᠢ ᠶ᠋ᠢᠨ ᠬᠠᠶᠠᠭᠠ ᠰᠢᠷᠳᠡᠪᠡ᠃ ᠲᠡᠨᠳᠡ ᠡᠴᠡ ᠶᠡᠬᠡ ᠬᠡᠢᠮᠣᠷᠢ ᠶ᠋ᠢᠨ ᠡᠭᠦᠯᠡᠨ ᠠᠢᠰᠤᠨ ᠶᠠᠪᠤᠬᠤ ᠰᠢᠭ᠋ ᠰᠠᠨᠠᠭᠳᠠᠵᠤ ᠠᠪᠠᠢ᠃ ᠬᠣᠷᠴᠢ ᠬᠣᠭᠣᠯᠠᠢ ᠪᠠᠨ ᠵᠠᠰᠠᠨ ᠨᠢᠳᠦ ᠪᠡᠨ ᠠᠨᠢᠰᠬᠢᠨ ᠠᠶᠠᠯᠭᠤᠯᠪᠠ ᠠ᠋᠃
ᠨᠠᠷᠠᠨ ᠰᠠᠷᠠᠨ ᠲᠠᠢ ᠡᠩ ᠵᠢᠨᠳᠠᠭᠠᠷᠬᠠᠵᠤ
ᠨᠠᠢ᠍ᠮᠠᠨ ᠵᠣᠪᠬᠢᠰ ᠤ᠋ᠨ ᠵᠢᠯᠣᠭᠣ ᠠᠳᠬᠤᠭᠰᠠᠨ
ᠮᠣᠳᠣᠨ ᠴᠡᠨ ᠢᠦᠢ ᠶᠡᠷᠦ ᠬᠦᠴᠦᠷᠬᠡᠭ
ᠮᠣᠷᠢᠲᠠᠨ ᠠᠯᠪᠠᠲᠤ ᠨᠤᠭᠤᠳ ᠪᠦᠷ ᠬᠦᠴᠦᠷᠬᠡᠭ
ᠬᠦᠴᠦᠷᠬᠡᠭ ᠦ᠋ᠨ ᠡᠮᠦᠨᠡ ᠮᠥᠷᠭᠥᠵᠦ ᠳᠠᠭᠠᠭᠰᠠᠨ
ᠾᠦᠩᠨᠦ ᠡᠪᠦᠳᠦᠭ ᠲᠦ᠍ ᠰᠥᠭᠥᠳᠴᠦ ᠳᠠᠭᠠᠭᠰᠠᠨ
ᠬᠠᠨ ᠤᠯᠤᠰ ᠬᠠᠷᠠ ᠬᠣᠣᠷ ᠢ᠋ ᠢᠰᠬᠡᠪᠡ
ᠬᠠᠷᠢ ᠲᠥᠷᠥ ᠬᠠᠳᠠᠨ ᠨᠤᠮᠤ ᠶ᠋ᠢ ᠥᠰᠬᠡᠪᠡ
ᠲᠠᠪᠤᠨ ᠰᠠᠭᠠᠬᠠᠯᠲᠠ ᠶ᠋ᠢᠨ ᠭᠠᠵᠠᠷ ᠠ᠋ᠴᠠ ᠭᠡᠲᠡᠯᠡ
ᠲᠠᠯᠪᠢᠭᠰᠠᠨ ᠰᠤᠮᠤ ᠰᠢᠭ᠋ ᠡᠯᠴᠢ ᠢᠷᠡᠪᠡ
ᠶᠢᠰᠦᠨ ᠣᠪᠣᠭᠠᠨ ᠤ᠋ ᠳᠠᠢᠲᠠᠢ ᠭᠡᠲᠡᠯᠡ
ᠢᠷᠦᠭᠡᠯ ᠦ᠋ᠨ ᠶᠡᠬᠡ ᠪᠡᠯᠡᠭ ᠢᠷᠡᠪᠡ᠃
ᠥᠯᠵᠡᠢ ᠲᠡᠭᠦᠰ ᠮᠡᠷᠭᠡᠨ ᠴᠠᠨ ᠢᠦᠢ ᠶ᠋ᠢᠨ
ᠥᠯᠮᠡᠢ ᠶᠠᠭᠤᠨ ᠳ᠋ᠤ᠌ ᠰᠥᠬᠥᠷᠡᠨ ᠪᠠᠢᠵᠤ
ᠭᠦᠷᠦᠨ ᠲᠡᠷᠢᠭᠦᠯᠡᠭᠰᠡᠨ ᠮᠣᠳᠣᠨ ᠲᠠᠨᠠ
ᠭᠦᠩᠵᠦ ᠪᠡᠨ ᠦᠵᠡᠭᠦᠯᠦᠶᠡ! ᠭᠡᠵᠦ ᠭᠤᠶᠤᠪᠠ ᠭᠡᠨᠡ
ᠮᠡᠨᠲᠦ ᠶ᠋ᠢᠨ ᠰᠢᠯᠦᠭ ᠲᠡᠢ ᠴᠡᠴᠡᠨ ᠲᠦᠰᠢᠮᠡᠯ
ᠮᠡᠯᠮᠡᠢ ᠶ᠋ᠢᠨ ᠬᠢᠨᠢ ᠡᠮᠦᠨᠡ ᠰᠥᠭᠥᠳᠦᠨ ᠰᠠᠭᠤᠵᠤ
ᠡᠳᠦᠷ ᠦ᠋ᠨ ᠰᠣᠯᠣᠩᠭᠠ ᠰᠢᠭ᠋ ᠠᠮᠢᠲᠠᠨ ᠲᠠᠨ ᠳ᠋ᠤ᠌
ᠡᠪᠦᠷ ᠢ᠋ᠶ᠋ᠡᠨ ᠨᠡᠭᠡᠭᠡᠨᠡ! ᠭᠡᠵᠦ ᠱᠠᠯᠠᠪᠠ ᠭᠡᠨᠡ
ᠳᠡᠪᠡᠯ ᠦ᠋ᠨ ᠪᠠᠷᠢᠨᠲᠠᠭ ᠲᠠᠢ ᠪᠤᠷᠬᠠᠳ ᠰᠢᠭ᠋
ᠳᠡᠷᠭᠡᠳᠡ ᠶ᠋ᠢᠨ ᠨᠣᠶᠠᠳ ᠬᠠᠷᠠᠭᠰᠠᠭᠠᠷ ᠠᠲᠠᠯᠠ
ᠴᠡᠩᠭᠡᠯ ᠲᠡᠢ ᠰᠢᠳᠠᠷᠯᠠᠭᠰᠠᠨ ᠮᠣᠳᠣᠨ
ᠴᠡᠴᠡᠭ ᠲᠡᠢ ᠢᠬᠡᠷᠡᠯᠡᠭᠰᠡᠨ ᠭᠦᠩᠵᠦ ᠶ᠋ᠢ ᠬᠠᠷᠠᠪᠠ
ᠬᠠᠩᠭᠠᠢ ᠶ᠋ᠢᠨ ᠰᠤᠭᠤ ᠰᠢᠭ᠋ ᠭᠦᠩᠵᠦ ᠴᠦ᠍ ᠪᠣᠢ
ᠬᠠᠷᠠᠭᠠᠳ ᠠᠪᠤᠶᠠ ᠭᠡᠵᠦ ᠰᠠᠨᠠᠪᠠ ᠭᠡᠨᠡ
ᠲᠠᠯᠠ ᠶ᠋ᠢᠨ ᠢᠨᠵᠠᠭᠠ ᠰᠢᠭ᠋ ᠥᠬᠢᠳ ᠣᠯᠠᠨ ᠴᠦ᠍
ᠳᠠᠭᠠᠯᠠᠭᠠᠳ ᠦᠵᠡᠶᠡ ᠭᠡᠵᠦ ᠪᠣᠳᠣᠪᠠ ᠭᠡᠨᠡ
ᠬᠠᠨ ᠤᠯᠤᠰ ᠤ᠋ᠨ ᠬᠠᠭᠠᠳ ᠪᠠᠶᠠᠷᠯᠠᠵᠤ
ᠬᠠᠲᠤᠨ ᠵᠢᠶᠣᠤᠰᠡ ᠶ᠋ᠢ ᠳᠠᠷᠬᠠᠯᠠᠪᠠ ᠭᠡᠨᠡ
ᠲᠥᠷᠥ ᠶ᠋ᠢᠨ ᠭᠦᠩᠵᠦ ᠪᠡᠨ ᠵᠠᠯᠠᠨᠠ ᠭᠡᠵᠦ
ᠲᠦᠮᠡᠨ ᠣᠯᠠᠨ ᠳ᠋ᠠᠭᠠᠨ ᠵᠠᠷᠯᠠᠪᠠ ᠭᠡᠨᠡ
ᠴᠠᠭᠠᠨ ᠬᠡᠷᠡᠮ ᠦ᠋ᠨ ᠴᠠᠭᠠᠨᠠ ᠠ᠋ᠴᠠ
ᠴᠢᠷᠠᠢ ᠵᠢᠰᠦ ᠶ᠋ᠢ ᠨᠢ ᠮᠠᠭᠲᠠᠪᠠ ᠭᠡᠨᠡ
ᠨᠤᠭᠤᠨ ᠦᠷᠡᠰ ᠦ᠋ᠨ ᠴᠢᠬᠢ ᠳᠡᠯᠡᠰᠲᠡᠯᠡ
ᠨᠢᠷᠤᠭᠤ ᠳᠣᠷᠣᠭᠣ ᠶ᠋ᠢ ᠨᠢ ᠱᠠᠭᠰᠢᠪᠠ ᠭᠡᠨᠡ
ᠬᠦᠰᠡᠵᠦ ᠶᠠᠳᠠᠭᠰᠠᠨ ᠴᠠᠨ ᠢᠦᠢ ᠮᠣᠳᠣᠨ
ᠬᠦᠯᠢᠶᠡᠵᠦ ᠴᠥᠬᠥᠷᠡᠲᠡᠯᠡ ᠱᠠᠭᠰᠢᠪᠠ ᠭᠡᠨᠡ
ᠳᠠᠰᠤᠨ ᠶᠠᠳᠠᠭᠰᠠᠨ ᠮᠣᠳᠣᠨ ᠴᠡᠨ ᠢᠦᠢ
ᠲᠡᠪᠡᠷᠢᠵᠦ ᠵᠡᠭᠦᠳᠦᠯᠡᠲᠡᠯᠡ ᠮᠠᠭᠲᠠᠪᠠ ᠭᠡᠨᠡ
ᠲᠡᠭᠡᠵᠦ ᠲᠡᠭᠡᠵᠦ ᠨᠠᠮᠤᠷ ᠤ᠋ᠨ ᠥᠷᠯᠥᠭᠡ
ᠲᠩᠷᠢ ᠶ᠋ᠢᠨ ᠭᠦᠩᠵᠦ ᠰᠢᠭ ᠵᠠᠯᠠᠷᠠᠪᠠ ᠭᠡᠨᠡ
ᠠᠭᠤᠯᠠᠰ ᠳᠠᠭᠠᠵᠤ ᠴᠤᠪᠤᠮᠠᠷ
ᠤᠷᠲᠤ ᠶ᠋ᠢᠨ ᠤᠷᠲᠤ ᠵᠢᠩ ᠢᠷᠡᠵᠦ ᠭᠡᠨᠡ
ᠢᠩᠭᠢᠵᠦ ᠢᠩᠭᠢᠵᠦ ᠨᠠᠮᠤᠷ ᠤ᠋ᠨ ᠥᠷᠯᠥᠭᠡ
ᠢᠵᠢᠢ ᠲᠩᠷᠢ ᠰᠢᠭ ᠵᠠᠯᠠᠷᠠᠪᠠ ᠭᠡᠨᠡ
ᠤᠯᠤᠰ ᠳᠠᠭᠠᠵᠤ ᠴᠤᠪᠤᠮᠠᠷ
ᠤᠶᠠᠩᠭᠠ ᠳᠠᠭᠤ ᠲᠠᠢ ᠵᠢᠩ ᠢᠷᠡᠪᠡ ᠭᠡᠨᠡ
ᠵᠢᠷᠭᠠᠯ ᠲᠠᠢ ᠵᠣᠯᠭᠠᠭᠰᠠᠨ ᠮᠣᠳᠣᠨ ᠬᠠᠭᠠᠨ
ᠵᠢᠪᠠᠷ ᠲᠠᠢ ᠲᠩᠷᠢ ᠶ᠋ᠢᠨ ᠡᠭᠦᠯᠡᠨ ᠳᠣᠣᠷᠠ
ᠶᠠᠭᠠᠨ ᠳᠠᠭᠢᠨᠢ ᠪᠠᠨ ᠬᠠᠷᠠᠪᠠ ᠭᠡᠨᠡ
ᠢᠨᠠᠭ ᠤ᠋ᠨ ᠪᠥᠵᠢᠭ ᠢ᠋ᠶ᠋ᠡᠨ ᠲᠢᠭᠯᠡᠪᠡ ᠭᠡᠨᠡ
ᠵᠠᠭᠠᠮᠠ ᠶ᠋ᠢᠨ ᠲᠣᠪᠴᠢ ᠪᠠᠨ ᠲᠠᠢᠯᠬᠤ ᠳ᠋ᠤ᠌
ᠽᠠᠮᠪᠤᠯᠢᠩ ᠤ᠋ᠨ ᠴᠡᠴᠡᠭᠡᠰ ᠢᠴᠢᠮᠡᠷ ᠭᠡᠨᠡ
ᠡᠩᠭᠡᠷ ᠦ᠋ᠨ ᠲᠣᠪᠴᠢ ᠪᠠᠨ ᠲᠠᠢᠯᠬᠤ ᠳ᠋ᠤ᠌
ᠲᠡᠭᠷᠢ ᠶ᠋ᠢᠨ ᠣᠳᠣ ᠭᠢᠯᠪᠠᠮᠠᠷ ᠭᠡᠨᠡ
ᠲᠠᠰᠢᠶᠠᠨ ᠤ᠋ ᠲᠣᠪᠴᠢ ᠪᠠᠨ ᠮᠤᠯᠲᠤᠯᠬᠤ ᠳ᠋ᠤ᠌
ᠲᠠᠯᠠ ᠶ᠋ᠢᠨ ᠲᠤᠯᠤᠭᠠᠳ ᠱᠠᠭᠰᠢᠷᠠᠵᠤ ᠭᠡᠨᠡ
ᠰᠣᠪᠤᠳᠤᠨ ᠳᠠᠷᠤᠭᠤᠯᠭᠠ ᠪᠠᠨ ᠠᠪᠬᠤ ᠳ᠋ᠤ᠌
ᠰᠠᠭᠰᠠᠷᠠᠭᠰᠠᠨ ᠦᠰᠦ ᠨᠢ ᠠᠰᠬᠠᠷᠠᠵᠤ ᠭᠡᠨᠡ
ᠵᠤᠯᠵᠠᠭᠠᠨ ᠤᠬᠠᠭᠠᠨ ᠢ᠋ ᠨᠢ ᠲᠦᠰᠢᠵᠦ ᠥᠰᠬᠡᠭᠰᠡᠨ
ᠵᠢᠭᠤᠷᠠᠭᠠᠨ ᠦᠭᠡ ᠦᠭᠡᠢ ᠮᠡᠷᠭᠡᠨ ᠲᠦᠰᠢᠮᠡᠯ
—ᠬᠠᠭᠠᠨ ᠣᠷᠳᠣᠨ ᠳ᠋ᠤ᠌ ᠡᠢᠮᠦ ᠥᠬᠢᠨ
ᠬᠠᠮᠢᠭᠠ ᠠ᠋ᠴᠠ ᠵᠠᠶᠠᠭᠠᠬᠤ ᠪᠣᠢ ᠳᠠ ᠭᠡᠪᠡ ᠭᠡᠨᠡ ᠁
ᠢᠰᠢᠭᠡᠨ ᠨᠠᠰᠤᠨ ᠠ᠋ᠴᠠ ᠨᠢ ᠡᠪᠡᠢᠯᠡᠵᠦ ᠪᠣᠰᠬᠠᠭᠰᠠᠨ
ᠢᠯᠡᠭᠦᠦ ᠦᠭᠡ ᠦᠭᠡᠢ ᠴᠡᠴᠡᠨ ᠲᠦᠰᠢᠮᠡᠯ
— ᠭᠦᠩᠵᠦ ᠶ᠋ᠢᠨ ᠵᠠᠶᠠᠭᠠᠨ ᠠ᠋ᠴᠠ ᠢᠯᠡᠭᠦᠦ ᠲᠥᠷᠥᠭᠰᠡᠨ
ᠭᠦᠶᠦᠬᠦ ᠤᠬᠠᠭᠠᠨ ᠲᠠᠢ ᠥᠬᠢᠨ ᠪᠠᠢᠨᠠ᠁ ᠭᠡᠪᠡ ᠭᠡᠨᠡ
ᠵᠢᠷᠭᠠᠯ ᠠᠮᠰᠠᠭᠰᠠᠨ ᠴᠠᠨ ᠢᠦᠢ ᠨᠣᠶᠠᠨ
ᠵᠠᠩᠵᠤᠨ ᠰᠠᠢᠳ ᠢ᠋ᠶ᠋ᠠᠨ ᠪᠤᠷᠤᠭᠤᠳᠬᠠᠵᠤ
ᠴᠠᠭᠠᠵᠠ ᠲᠠᠢ ᠲᠥᠷᠥ ᠶ᠋ᠢᠨ ᠬᠠᠭᠠᠨ ᠡᠷᠬᠡ ᠪᠡᠷ
ᠴᠠᠭᠠᠰᠢ ᠨᠢ ᠬᠠᠷᠠᠭᠤᠯᠵᠤ ᠰᠠᠨᠠᠭᠠ ᠠᠮᠠᠷᠠᠪᠠ
ᠦᠨᠡᠨᠴᠢ ᠰᠢᠳᠠᠷ ᠤ᠋ᠨ ᠢ᠋ᠶ᠋ᠠᠨ ᠪᠤᠯᠠᠰᠢᠨ ᠳᠡᠭᠡᠷᠡ
ᠦᠵᠡᠰᠬᠦᠯᠡᠩᠲᠦ ᠭᠦᠩᠵᠦ ᠪᠡᠨ ᠲᠡᠪᠡᠷᠢᠨ ᠬᠣᠴᠣᠷᠴᠤ
ᠾᠦᠩᠨᠦ ᠭᠦᠷᠦᠨ ᠦ᠌ ᠬᠣᠢᠮᠣᠷ ᠵᠢᠷᠭᠠᠪᠠ
ᠬᠦᠰᠡᠯ ᠪᠦᠬᠦᠨ ᠢ᠋ᠶ᠋ᠡᠨ ᠭᠦᠢᠴᠡᠭᠡᠵᠦ ᠴᠡᠩᠭᠡᠪᠡ
ᠨᠣᠣᠯᠠᠨ ᠨᠣᠣᠯᠠᠨ ᠵᠢᠷᠭᠠᠬᠤ ᠳ᠋ᠤᠨᠢ
ᠨᠣᠮᠣᠬᠠᠨ ᠲᠤᠯᠤᠭᠠᠳ ᠭᠠᠰᠠᠯᠵᠤ ᠪᠠᠢᠪᠠ
ᠥᠩᠭᠡᠨ ᠥᠩᠭᠡᠨ ᠲᠤᠰᠢᠶᠠᠬᠤ ᠳ᠋ᠤ᠌ ᠬᠠᠷᠢᠨ
ᠦᠨᠡᠭᠡᠨ ᠲᠦᠰᠢᠮᠡᠳ ᠪᠡᠶᠡᠰᠴᠦ ᠪᠠᠢᠪᠠ
ᠬᠠᠨ ᠤᠯᠤᠰ ᠤᠬᠠᠭᠠᠨ ᠭᠦᠶᠦᠯᠭᠡᠵᠦ
ᠬᠠᠷᠠᠴᠤ ᠶ᠋ᠢᠨ ᠥᠬᠢᠨ ᠲᠡᠪᠡᠷᠢᠭᠦᠯᠦᠭᠰᠡᠨ ᠪᠢᠯᠡ
ᠬᠠᠷᠠ ᠮᠥᠷ ᠦ᠋ᠨ ᠨᠢᠭᠦᠯ ᠱᠦᠭᠯᠡᠵᠦ
ᠬᠠᠭᠠᠨ ᠰᠦᠯᠳᠡ ᠭᠤᠳᠤᠢᠭᠰᠠᠨ ᠭᠡᠳᠡᠭ ᠪᠢᠯᠡ
ᠵᠢᠷᠣᠭᠠ ᠶᠠᠪᠤᠲᠠᠯᠳᠤ ᠬᠠᠨ ᠭᠦᠩᠵᠦ
ᠵᠢᠯᠣᠭᠣ ᠶᠠᠭᠤ ᠶ᠋ᠢ ᠨᠢ ᠠᠳᠬᠤᠭᠰᠠᠨ ᠴᠠᠭ ᠠ᠋ᠴᠠ
ᠬᠠᠳᠠ ᠰᠠᠭᠤᠭᠰᠠᠨ ᠾᠦᠩᠨᠦ ᠤᠬᠠᠭᠠᠨ
ᠬᠠᠵᠠᠭᠠᠷ ᠲᠠᠢ ᠮᠣᠷᠢ ᠰᠢᠭ᠋ ᠪᠣᠯᠤᠭᠰᠠᠨ ᠪᠢᠯᠡ
ᠦᠯᠡᠮᠵᠢ ᠬᠦᠴᠦᠷᠬᠡᠭ ᠦ᠋ᠨ ᠵᠠᠶᠠᠭᠠ ᠰᠣᠶᠣᠷᠬᠠᠭᠰᠠᠨ
ᠡᠭᠦᠳᠡᠨ ᠰᠦᠯᠳᠡ ᠭᠣᠳᠣᠢᠨ ᠭᠣᠳᠣᠢᠭᠰᠠᠭᠠᠷ
ᠲᠡᠮᠡᠴᠡᠵᠦ ᠪᠣᠰᠤᠭᠰᠠᠨ ᠾᠦᠩᠨᠦ ᠭᠦᠷᠦᠨ ᠦ᠌
ᠲᠩᠷᠢ ᠨᠢ ᠬᠡᠭᠡᠷᠡ ᠬᠣᠨᠣᠭᠰᠠᠨ ᠪᠢᠯᠡ ᠁
ᠬᠤᠭᠤᠷ ᠤ᠋ᠨ ᠠᠶᠠᠯᠭᠤ ᠵᠤᠭᠤᠤᠬᠠᠨ ᠰᠠᠷᠨᠢᠵᠤ᠂ ᠨᠠᠮᠳᠠᠭᠤᠬᠠᠨ ᠠᠨᠢᠷᠯᠠᠪᠠ᠃ ᠬᠥᠩᠬᠥᠷ ᠬᠣᠷᠴᠢ ᠶ᠋ᠢᠨ ᠡᠪᠦᠷ ᠳᠡᠭᠡᠷᠡᠬᠢ ᠬᠤᠨ ᠬᠤᠭᠤᠷ ᠤ᠋ᠨ ᠴᠢᠪᠬᠠᠳᠠᠰᠤᠨᠠ ᠬᠥᠪᠴᠢ ᠨᠢ ᠨᠤᠲᠤᠭ ᠭᠦᠶᠦᠭᠰᠡᠨ ᠬᠦᠯᠦᠭ ᠮᠣᠷᠢ ᠰᠢᠭ᠋ ᠳᠡᠭᠳᠡᠰᠬᠢᠭᠡᠳ ᠵᠣᠭᠰᠣᠯᠠ᠃ ᠶᠡᠬᠡ ᠬᠤᠷᠠᠯᠲᠠᠢ ᠴᠢᠭᠤᠯᠵᠤ ᠠᠭᠰᠠᠨ ᠬᠣᠷᠬᠤᠨᠤᠭ ᠵᠢᠪᠦᠷ ᠦ᠋ᠨ ᠠᠭᠤᠳᠠᠮ ᠬᠥᠨᠳᠡᠢ ᠬᠡᠨ ᠨᠢ ᠶᠠᠭᠤ ᠬᠡᠯᠡᠬᠦ ᠶ᠋ᠢ ᠴᠢᠩᠨᠠᠬᠤ ᠮᠡᠲᠦ ᠨᠠᠮ ᠬᠦᠮᠬᠡᠨ ᠪᠣᠯᠤᠯᠠ᠃ ᠪᠠᠷᠠᠳᠠᠨᠪᠠᠭᠠᠲᠤᠷ ᠤ᠋ᠨ ᠴᠡᠯ ᠪᠤᠭᠤᠷᠤᠯ ᠦᠰᠦ ᠰᠠᠯᠬᠢᠨ ᠳ᠋ᠤ᠌ ᠨᠠᠮᠢᠷᠠᠵᠤ᠂ ᠬᠤᠲᠤᠭᠲᠤ ᠮᠣᠩᠭᠣᠷ ᠤ᠋ᠨ ᠳᠡᠪᠡᠯ ᠦ᠋ᠨ ᠮᠥᠩᠭᠥᠨ ᠲᠣᠪᠴᠢ ᠡᠳᠦᠷ ᠦ᠋ᠨ ᠣᠳᠣ ᠰᠢᠭ᠋ ᠪᠣᠳᠣᠯᠭᠠᠰᠢᠷᠠᠨ ᠭᠢᠯᠠᠯᠵᠠᠵᠤ ᠪᠠᠢᠪᠠ᠃ ᠬᠣᠲᠣᠯᠠ᠂ ᠬᠠᠭᠠᠨ ᠡᠵᠡᠨ ᠦ᠌ ᠪᠣᠳᠣᠯ ᠤ᠋ᠨ ᠨᠡᠭᠦᠳᠡᠯ ᠳ᠋ᠦ᠍ ᠵᠥᠪ ᠢ᠋ ᠥᠭᠴᠦ ᠡᠰᠡ ᠵᠢᠷᠦᠬᠡᠯᠡᠨ ᠰᠠᠭᠤᠯᠠ᠃ ᠠᠮᠠ ᠨᠡᠭᠡᠭᠡᠬᠦ ᠬᠥᠮᠦᠨ ᠡᠰᠡ ᠣᠯᠳᠠᠨᠠ᠃ ᠬᠤᠯᠠᠨ ᠪᠠᠭᠠᠲᠤᠷ ᠬᠡᠦᠬᠡᠳ ᠨᠠᠰᠤ ᠪᠠᠨ ᠰᠠᠨᠠᠭᠠᠯᠵᠠᠬᠤ ᠮᠡᠲᠦ ᠪᠡᠭᠡᠪᠡᠩ ᠪᠠᠭᠠᠪᠠᠩ ᠲᠠᠰᠤᠯᠤᠨ ᠡᠮᠬᠦᠯᠡᠪᠡᠴᠦ ᠰᠠᠨᠠᠭᠠ ᠨᠢ ᠣᠭᠲᠣ ᠥᠭᠡᠷᠡ ᠭᠠᠵᠠᠷ ᠣᠳᠤᠭᠰᠠᠨ ᠮᠡᠲᠦ ᠠᠭᠠᠳ ᠲᠣᠳᠣᠢᠨ ᠣᠳᠴᠢᠬᠢᠨ ᠲᠣᠮᠣ ᠬᠤᠯᠤ ᠲᠠᠢ ᠴᠡᠭᠡ ᠰᠢᠮᠡᠵᠦ ᠵᠤᠭᠠᠴᠠᠨ ᠰᠠᠭᠤᠪᠠ᠃ ᠬᠠᠷᠯᠢ ᠺᠤ ᠡᠬᠡ ᠲᠠᠪᠤᠨ ᠬᠦᠦ ᠡᠴᠡ ᠪᠡᠨ ᠬᠠᠷᠢᠭᠤ ᠬᠦᠯᠢᠶᠡᠨ ᠲᠡᠪᠴᠢᠶᠡᠷᠢ ᠲᠡᠢ ᠰᠢᠷᠲᠡᠬᠦ ᠠᠪᠠᠢ᠃ ᠶᠢᠰᠦᠭᠡᠢ ᠡᠯᠡ ᠲᠦᠭᠰᠢᠭᠦᠷᠢᠲᠦ ᠨᠠᠮ ᠭᠦᠮ ᠦ᠋ᠨ ᠳᠤᠮᠳᠠ᠂ ᠮᠥᠨᠥᠬᠡᠨ ᠬᠣᠯᠠ ᠶ᠋ᠢᠨ ᠬᠣᠯᠠ ᠳ᠋ᠤ᠌ ᠲᠩᠷᠢ ᠶ᠋ᠢᠨ ᠬᠠᠶᠠᠭᠠᠨ ᠠ᠋ᠴᠠ ᠠᠢᠰᠤᠬᠤ ᠬᠡᠢ ᠮᠣᠷᠢ ᠶ᠋ᠢᠨ ᠴᠠᠭᠠᠨ ᠡᠭᠦᠯᠡ ᠶ᠋ᠢ ᠥᠨᠳᠡᠯᠵᠡᠨ ᠬᠠᠷᠠᠭᠠᠴᠢᠯᠠᠵᠤ ᠰᠠᠭᠤᠪᠠ᠃ ᠴᠢᠩᠭᠢᠲᠡᠯᠡ ᠭᠡᠨᠡᠳᠲᠡ ᠨᠠᠮ ᠭᠦᠮ ᠢ᠋ ᠮᠣᠷᠢᠨ ᠲᠦᠪᠡᠷᠭᠡᠨ ᠴᠣᠴᠢᠭᠠᠵᠤ᠂ ᠡᠨᠡ ᠰᠠᠴᠠᠭᠤ᠂
一 ᠬᠣᠲᠣᠯᠠ᠁ ᠬᠠᠨ ᠬᠣᠲᠣᠯᠠ ᠰᠣᠶᠣᠷᠬᠠ! ᠲᠠᠲᠠᠪᠤᠷᠢ ᠬᠠᠲᠤᠨ ᠲᠠᠨᠢ ᠨᠢᠷᠠᠢᠯᠠᠬᠤ ᠨᠢ᠁ ᠭᠡᠬᠦ ᠳᠠᠭᠤᠨ ᠬᠡᠢ ᠮᠣᠷᠢ ᠶ᠋ᠢᠨ ᠴᠠᠭᠠᠨ ᠡᠭᠦᠯᠡ ᠬᠡᠢᠰᠦᠨ ᠨᠡᠭᠦᠬᠦ ᠮᠥᠩᠬᠡ ᠲᠡᠭᠷᠢ ᠶ᠋ᠢᠨ ᠳᠣᠣᠭᠤᠷ ᠴᠤᠤᠷᠢᠶᠠ ᠲᠠᠲᠠᠭᠤᠯᠤᠨ ᠰᠣᠨᠣᠰᠳᠠᠪᠠ ᠠ᠋᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠤᠷᠠᠨᠴᠢᠮᠡᠭ᠂ ᠡᠩᠬᠡᠪᠠᠲᠤ᠂ ᠡᠷᠳᠡᠨᠢᠭᠤᠸᠠ᠂
ᠮᠥᠩᠭᠥᠨ᠂ ᠣᠶᠤᠨᠴᠢᠮᠡᠭ᠂ ᠠᠯᠲᠠᠨᠴᠡᠴᠡᠭ᠂ ᠬᠡᠷᠡᠢᠳ ᠵᠣᠯ᠂
ᠬᠡᠷᠡᠢᠳ ᠮᠥᠩᠬᠡᠨᠠᠰᠤᠨ᠂ ᠨᠠᠷᠠᠨᠲᠤᠶᠠᠭᠠ᠂ ᠡᠭᠦᠯᠡᠩᠬᠤᠸᠠᠷ᠂
ᠬᠡᠯᠰᠤᠶᠤᠯ᠂ ᠣᠶᠤᠨᠪᠢᠯᠢᠭ᠌᠂ ᠬᠠᠨ ᠱᠢ ᠵᠢᠶᠦ᠋ᠨ᠂ ᠳᠡᠭᠦᠦᠳᠠᠭᠤᠯᠠ
ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ᠂ ᠭᠠᠷᠮᠠ᠂ ᠬᠡᠷᠡᠢᠳ·ᠵᠣᠯ᠂ ᠡᠭᠦᠯᠡᠩᠬᠤᠸᠠᠷ᠂ ᠪᠠᠯ