ᠬᠥᠯᠥᠭ ᠪᠠᠭᠠᠲᠤᠷ ᠪᠤᠭᠤᠷᠴᠢ - ᠪ᠂ ᠦᠯᠵᠡᠢᠰᠦ᠋ᠷᠦᠩ <ᠳᠡᠳ᠋ ᠪᠦᠯᠦᠭ - 23> Хүлэг баатар буурч - Б. Өлзийсүрэн <Дэд бүлэг-23>
80ᠥᠪᠡᠷ ᠦᠨ ᠵᠠᠮ ᠮᠥᠷ ᠢᠶᠡᠷ ᠲᠡᠮᠲᠡᠷᠢᠵᠦ ᠡᠷᠡ ᠬᠥᠮᠥᠨ ᠦ ᠡᠷᠴᠢ ᠬᠦᠴᠦ ᠶᠢ ᠣᠯᠵᠤ ᠬᠦᠷᠲᠡᠭᠰᠡᠨ ᠳᠡᠳ᠋ ᠪᠦᠯᠦᠭ
ᠬᠣᠷᠢᠨ ᠭᠤᠷᠪᠠ
ᠬᠣᠷᠢᠨ ᠭᠤᠷᠪᠠ
ᠰᠤᠮᠤ ᠣᠨᠢᠯᠠᠭᠰᠠᠨ ᠳᠠᠢᠰᠤᠨ ᠤ᠋ ᠥᠭᠡᠳᠡ ᠡᠴᠡ
ᠠᠩᠬᠠ ᠰᠥᠷᠦᠨ ᠳᠠᠢᠯᠠᠯᠳᠤᠬᠤ ᠳ᠋ᠤ᠌ ᠵᠢᠷᠦᠬᠡ ᠰᠢᠮᠰᠢᠷᠡᠳᠡᠭ ᠯᠡ ᠶᠦᠮ᠂
ᠴᠢᠰᠤ ᠦᠵᠡᠭᠡᠳ ᠳᠤᠮᠳᠠ ᠨᠢ ᠣᠷᠣᠭᠠᠳ ᠬᠠᠳᠬᠤᠯᠳᠤᠴᠢᠬᠠᠬᠤ ᠪᠠᠷ
ᠠᠶᠤᠬᠤ ᠭᠡᠳᠡᠭ ᠠᠯᠠᠭᠠ ᠪᠣᠯᠴᠢᠬᠠᠳᠠᠭ ᠶᠤᠮ᠃
ᠥᠷᠥᠨᠡ ᠶ᠋ᠢᠨ ᠲᠩᠷᠢ ᠬᠠᠶᠠᠭᠠ ᠪᠠᠷ ᠢ᠋ᠶ᠋ᠠᠨ ᠤᠯᠠᠢᠵᠤ ᠶᠠᠭᠠᠷᠠᠨ ᠨᠠᠷᠠᠨ ᠠᠭᠤᠯᠠ ᠶ᠋ᠢᠨ ᠲᠣᠯᠣᠭᠠᠢ ᠰᠢᠷᠭᠤᠲᠠᠯᠠ ᠲᠡᠭᠦᠨ ᠦ᠌ ᠪᠥᠮᠪᠥᠭᠡᠯᠢᠭ ᠭᠤᠷᠪᠠᠨ ᠪᠡᠶᠡ ᠶ᠋ᠢᠨ ᠵᠠᠢ ᠦᠯᠡᠲᠡᠯᠡ᠃
— ᠴᠡᠷᠢᠭ ᠦ᠋ᠳ ᠵᠢᠭᠰᠠᠭᠠᠳ! ᠵᠢᠭᠰᠠᠭᠠᠳ! ᠭᠡᠰᠡᠨ ᠲᠤᠰᠢᠶᠠᠯ ᠪᠠᠭᠤᠯᠠ᠃ ᠴᠡᠷᠢᠭ ᠦ᠋ᠳ ᠮᠣᠷᠢ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠨ ᠲᠠᠪᠤᠲᠤ᠂ ᠠᠷᠪᠠᠲᠤ ᠪᠠᠷ ᠢ᠋ᠶ᠋ᠠᠨ ᠥᠪᠡᠷ ᠥᠪᠡᠷᠰᠡᠳ ᠦ᠋ᠨ ᠪᠠᠢᠷᠢ ᠶ᠋ᠢ ᠡᠵᠡᠯᠡᠪᠡ᠃ ᠲᠤᠭ ᠰᠦᠯᠳᠡ ᠶ᠋ᠢᠨ ᠲᠢᠲᠢᠮ ᠦᠵᠦᠭᠦᠷ ᠳᠡᠭᠡᠭᠰᠢ ᠪᠡᠨ ᠰᠡᠷᠡᠯᠵᠡᠨ᠂ ᠴᠠᠴᠤᠭ ᠬᠢᠭᠢᠷᠢ ᠨᠠᠮᠢᠷᠠᠨ ᠪᠦᠷ ᠴᠦ᠍ ᠰᠦᠷ ᠴᠢᠮᠡᠭ ᠲᠡᠢ ᠠᠵᠤᠭᠤ᠃
ᠬᠢᠯᠤᠭᠤ ᠭᠣᠣᠯ ᠤ᠋ᠨ ᠪᠠᠷᠠᠭᠤᠨ ᠪᠡᠶᠡ ᠳ᠋ᠦ᠍ ᠳᠡᠭᠡᠷᠡ ᠡᠴᠡ ᠨᠢ ᠬᠠᠷᠠᠪᠠᠯ ᠵᠠᠬᠠ ᠬᠠᠮᠪᠤ᠂ ᠲᠣᠭᠣᠷᠢᠯ᠂ ᠲᠡᠮᠦᠵᠢᠨ᠂ ᠵᠠᠮᠤᠬᠠ ᠤᠳᠤᠷᠢᠳᠤᠭᠰᠠᠨ ᠴᠡᠷᠢᠭ ᠦ᠋ᠳ ᠡᠮᠦᠨᠡ ᠡᠴᠡ ᠪᠡᠨ ᠤᠮᠠᠷᠠ ᠤᠷᠤᠭᠤ ᠬᠡᠰᠡᠭ ᠬᠡᠰᠡᠭ ᠢ᠋ᠶ᠋ᠡᠷ ᠵᠢᠭᠰᠠᠨ ᠳᠥᠷᠪᠡᠯᠵᠢᠨ ᠬᠡᠯᠪᠡᠷᠢ ᠶ᠋ᠢᠨ ᠡᠷᠢᠶᠡᠯᠵᠢᠯᠡᠵᠦ ᠠᠯᠠᠭᠯᠠᠭᠰᠠᠨ ᠬᠡ ᠠᠶᠠᠲᠠᠢ ᠬᠠᠷᠠᠭᠳᠠᠬᠤ ᠪᠤᠶᠤ᠃ ᠲᠡᠳᠡ ᠬᠣᠭᠣᠷᠣᠨᠳᠣ ᠪᠠᠨ ᠬᠤᠭᠤᠰ ᠮᠣᠳᠣ ᠵᠠᠢ ᠲᠠᠢ᠂ ᠪᠡᠶᠡ ᠪᠡᠶᠡᠰ ᠦ᠋ᠨ ᠬᠠᠰᠬᠢᠷᠬᠤ ᠦᠭᠡ ᠲᠤᠰᠢᠶᠠᠯ ᠪᠡᠶᠡ ᠪᠡᠶᠡ ᠳ᠋ᠡᠭᠡᠨ ᠲᠡᠳᠦᠢ ᠯᠡ ᠳᠤᠭᠤᠯᠳᠠᠬᠤ ᠪᠠᠷ ᠦᠭᠡᠢ ᠵᠢᠭᠰᠠᠭᠰᠠᠨ ᠠᠵᠢ᠃
ᠲᠡᠮᠦᠵᠢᠨ ᠥᠪᠡᠷᠦᠨ ᠴᠡᠷᠢᠭ ᠦ᠋ᠨ ᠤᠷᠢᠳᠤ ᠭᠠᠷᠴᠤ ᠰᠡᠯᠡᠮᠡ ᠪᠡᠨ ᠰᠤᠭᠤᠯᠵᠤ ᠳᠡᠭᠡᠭᠰᠢ ᠡᠷᠭᠦᠭᠡᠳ᠄
— ᠮᠢᠨᠦ ᠨᠥᠬᠥᠳ ᠴᠡᠷᠢᠭ ᠦ᠋ᠳ᠂ ᠪᠦᠬᠦ ᠴᠡᠷᠢᠭ ᠡᠷᠡᠰ ᠲᠤᠭᠤᠯᠵᠤ ᠪᠠᠢ᠃ ᠲᠤᠰᠢᠶᠠᠬᠤ ᠨᠢ᠄ ᠲᠠ ᠪᠢᠳᠡ ᠥᠭᠡᠳᠡ ᠡᠴᠡ ᠰᠤᠮᠤ ᠣᠨᠢᠯᠠᠵᠤ᠂ ᠰᠡᠯᠡᠮᠡ ᠳᠠᠢᠯᠠᠭᠰᠠᠨ ᠬᠦᠴᠦᠲᠡᠢ ᠳᠠᠢᠰᠤᠨ ᠲᠠᠢ ᠰᠥᠷᠦᠨ ᠪᠠᠢᠯᠳᠤᠬᠤ ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠣᠷᠣᠬᠤ ᠴᠠᠭ ᠪᠣᠯᠤᠯᠠ᠃ ᠪᠢᠳᠡᠨ ᠳ᠋ᠦ᠍ ᠣᠷᠣᠭᠰᠢ ᠪᠠᠨ ᠲᠠᠪᠰᠢᠬᠤ ᠠ᠋ᠴᠠ ᠥᠭᠡᠷᠡ ᠤᠬᠤᠷᠢᠬᠤ ᠵᠠᠮ ᠪᠠᠢᠬᠤ ᠦᠭᠡᠢ᠃ ᠳᠠᠢᠰᠤᠨ ᠢ᠋ ᠢᠯᠠᠵᠤ ᠤᠰᠠᠳᠬᠠᠬᠤ ᠠ᠋ᠴᠠ ᠥᠭᠡᠷᠡ ᠠᠮᠢ ᠪᠠᠨ ᠠᠯᠳᠠᠬᠤ ᠡᠷᠬᠡ ᠪᠠᠢᠬᠤ ᠦᠭᠡᠢ᠃ ᠠᠮᠢ ᠪᠣᠯ ᠬᠠᠮᠤᠭ ᠠ᠋ᠴᠠ ᠦᠨᠡᠲᠡᠢ᠃ ᠡᠢᠮᠦ ᠳ᠋ᠦ᠍ ᠪᠡᠶᠡ ᠪᠡᠶᠡ ᠪᠡᠨ ᠬᠣᠢᠮᠣᠰᠣᠵᠤ᠂ ᠭᠤᠷᠮᠤᠰᠤᠯᠠᠵᠤ ᠬᠠᠮᠠᠭᠠᠯᠠᠨ᠂ ᠠᠯᠢᠪᠠ ᠠᠶᠤᠯ ᠢ᠋ ᠬᠠᠮᠰᠠᠵᠤ ᠳᠠᠪᠠᠪᠠᠯ ᠵᠣᠬᠢᠨᠠ᠃ ᠣᠶᠤᠨ ᠤᠬᠠᠭᠠᠨ᠂ ᠡᠷᠡ ᠵᠣᠷᠢᠭ᠂ ᠠᠷᠭᠠ ᠰᠠᠮᠪᠠᠭᠠ᠂ ᠬᠦᠴᠦ ᠴᠢᠳᠠᠯ ᠢ᠋ᠶ᠋ᠠᠨ ᠬᠤᠷᠴᠠ ᠵᠡᠪᠰᠡᠭ ᠲᠡᠢ ᠪᠡᠨ ᠬᠣᠣᠰᠯᠠᠭᠤᠯᠵᠤ ᠴᠢᠳᠠᠪᠠᠯ ᠶᠠᠮᠠᠷ ᠴᠦ᠍ ᠳᠠᠢᠰᠤᠨ ᠢ᠋ ᠢᠯᠠᠵᠤ ᠴᠢᠳᠠᠨᠠ᠃ ᠢᠯᠠᠯᠲᠠ ᠶ᠋ᠢᠨ ᠲᠥᠯᠥᠭᠡ! ᠮᠥᠩᠬᠡ ᠲᠩᠷᠢ ᠢᠪᠡᠭᠡᠲᠦᠭᠡᠢ! ᠬᠤᠷᠤᠢ! ᠬᠤᠷᠤᠢ! ᠭᠡᠵᠦ ᠤᠷᠠᠢ ᠬᠠᠰᠬᠢᠷᠤᠮᠠᠭᠴᠠ ᠪᠦᠬᠦ ᠴᠡᠷᠢᠭ《ᠬᠤᠷᠤᠢ! ᠬᠤᠷᠤᠢ! ᠬᠤᠷᠤᠢ!》 ᠭᠡᠮᠡᠨ ᠭᠠᠵᠠᠷ ᠳᠡᠯᠡᠬᠡᠢ ᠳᠣᠷᠭᠢᠲᠠᠯᠠ ᠴᠤᠤᠷᠢᠶᠠᠲᠤᠭᠤᠯᠪᠠᠢ᠃
ᠲᠡᠮᠦᠵᠢᠨ ᠮᠣᠷᠢᠨ ᠤ᠋ ᠪᠠᠨ ᠠᠮᠠ ᠶ᠋ᠢ ᠡᠷᠭᠢᠭᠦᠯᠵᠦ《ᠤᠷᠤᠭᠰᠢ ᠪᠠᠨ ᠳᠠᠪᠰᠢᠭᠠᠳ!》 ᠭᠡᠮᠡᠨ ᠬᠠᠰᠬᠢᠷᠤᠭᠠᠳ ᠥᠪᠡᠷ ᠢ᠋ᠶ᠋ᠡᠨ ᠲᠦᠷᠦᠭᠦᠯᠡᠨ ᠠᠯᠬᠤᠭᠤᠯᠤᠯᠠ᠃ ᠰᠢᠷᠭᠠ ᠮᠣᠷᠢ ᠨᠢ ᠳᠡᠭᠦᠭᠡᠯᠵᠡᠨ ᠬᠣᠶᠠᠷ ᠲᠡᠰᠢᠶᠡ ᠨᠢ ᠬᠣᠯᠪᠢᠯᠵᠠᠨ ᠡᠮᠡᠭᠡᠯ ᠳᠡᠭᠡᠷᠡ ᠪᠡᠨ ᠰᠣᠨᠳᠣᠭᠣᠢ ᠰᠠᠭᠤᠵᠤ ᠲᠠᠰᠢᠶᠠ ᠲᠤᠯᠤᠨ ᠶᠠᠪᠤᠭᠠ ᠵᠠᠯᠠᠭᠤ ᠵᠠᠩᠵᠤᠨ ᠤ᠋ ᠨᠠᠷᠢᠨ ᠥᠨᠳᠥᠷ ᠪᠡᠶᠡ ᠭᠤᠸᠠᠯᠢᠭ ᠴᠡᠮᠴᠡᠭᠡᠷ ᠦᠵᠡᠭᠳᠡᠨᠡ᠃ ᠲᠡᠷᠡ ᠡᠷᠡ ᠶ᠋ᠢᠨ ᠲᠣᠯᠣᠭᠠᠢ ᠳ᠋ᠤ᠌ ᠲᠣᠭᠲᠣᠭᠠ ᠪᠡᠬᠢ ᠶ᠋ᠢ ᠭᠡᠨᠡᠳᠡᠭᠦᠯᠦᠨ ᠳᠠᠭᠠᠷᠢᠵᠤ ᠡᠭᠦᠷ ᠲᠦ᠋ᠨᠢ ᠪᠠᠷᠢᠵᠤ ᠬᠠᠢᠷᠠᠲᠤ ᠬᠠᠨᠢ ᠪᠥᠷᠲᠡ ᠪᠡᠨ ᠣᠯᠵᠤ ᠠᠪᠬᠤ ᠭᠡᠰᠡᠨ ᠪᠣᠳᠣᠯ᠁ ᠳᠠᠢᠰᠤᠨ ᠤ᠋ ᠥᠭᠡᠳᠡ ᠡᠴᠡ ᠰᠤᠮᠤ ᠣᠨᠢᠯᠠᠵᠤ᠂ ᠰᠡᠯᠡᠮᠡ ᠳᠠᠯᠠᠢᠵᠤ ᠦᠵᠡᠭᠡ ᠦᠭᠡᠢ ᠠᠷᠳᠠᠭ ᠣᠩᠭᠣᠨ ᠵᠠᠯᠠᠭᠤ ᠡᠷᠡ ᠳ᠋ᠦ᠍ ᠭᠠᠭᠴᠠᠬᠠᠨ ᠢᠯᠠᠬᠤ ᠯᠠ ᠵᠣᠷᠢᠯᠭᠠ᠂ ᠭᠡᠬᠦ ᠳ᠋ᠡᠭᠡᠨ ᠶᠠᠭᠠᠬᠢᠵᠤ ᠭᠡᠳᠡᠭ ᠨᠢ ᠲᠣᠳᠣᠷᠬᠠᠢ ᠦᠭᠡᠢ᠃ ᠠᠷᠤ ᠳ᠋ᠤᠨᠢ ᠶᠠᠪᠤᠭᠠ ᠪᠣᠭᠤᠷᠴᠢ ᠮᠠᠩᠭᠤᠰ ᠤ᠋ᠨ ᠠᠮᠠᠨ ᠳ᠋ᠤ᠌ ᠣᠷᠣᠵᠤ᠂ ᠲᠡᠭᠦᠰᠬᠡᠨ ᠦ᠌ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠮᠠ ᠦᠭᠡᠢ ᠪᠢᠴᠢᠬᠠᠨ ᠠᠷᠭᠠ ᠤᠬᠠᠭᠠᠨ ᠤ᠋ ᠠᠴᠢ ᠪᠠᠷ ᠲᠡᠳᠡᠨ ᠦ᠌ ᠭᠠᠷ ᠠ᠋ᠴᠠ ᠮᠣᠯᠲᠣᠷᠴᠤ ᠰᠥᠨᠥᠭᠡᠭᠰᠡᠨ᠂ ᠪᠤᠲᠠᠯᠠᠭᠰᠠᠨ᠃ ᠡᠳᠦᠭᠡ ᠤᠷᠢᠳᠠ ᠠ᠋ᠴᠠ ᠤᠭᠲᠤᠬᠤ ᠳᠠᠢᠰᠤᠨ ᠲᠡᠳᠡᠨ ᠲᠡᠢ ᠠᠳᠠᠯᠢ ᠪᠤᠰᠤ᠃ ᠵᠢᠩᠬᠢᠨᠢ ᠵᠡᠪᠰᠡᠭ ᠪᠠᠷᠢᠭᠰᠠᠨ ᠳᠠᠢᠰᠤᠨ᠃ ᠲᠡᠮᠦᠵᠢᠨ ᠦ᠌ ᠠᠷᠤ ᠠ᠋ᠴᠠ ᠵᠢᠭᠰᠠᠵᠤ ᠶᠠᠪᠤᠭᠠ ᠵᠠᠯᠠᠭᠤᠰ ᠳᠠᠢᠰᠤᠨ᠂ ᠲᠡᠢᠨ ᠭᠡᠳᠡᠭ ᠢ᠋ ᠮᠡᠳᠡᠬᠦ ᠦᠭᠡᠢ᠂ ᠦᠵᠡᠭᠡ ᠦᠭᠡᠢ᠂ ᠲᠡᠢᠨ ᠭᠡᠳᠡᠭ ᠢ᠋ ᠦᠯᠢᠭᠡᠷ ᠲᠤᠤᠯᠢ᠂ ᠤᠷᠢᠳ ᠬᠣᠵᠢᠳ ᠳᠠᠢᠳᠤᠵᠤ ᠶᠠᠪᠤᠭᠰᠠᠨ ᠡᠪᠦᠭᠡᠳ ᠬᠥᠭᠰᠢᠳ ᠦ᠋ᠨ ᠠᠮᠠᠨ ᠠ᠋ᠴᠠ ᠯᠠ ᠰᠣᠨᠣᠰᠤᠭᠰᠠᠨ᠃ ᠠᠮᠢ ᠨᠠᠰᠤᠨ ᠤ᠋ ᠥᠷᠢᠰᠦᠯᠳᠦᠭᠡᠨ᠂ ᠠᠢᠳᠠᠰ ᠬᠦᠢᠲᠡᠰ᠃ ᠲᠡᠢᠨ ᠳ᠋ᠦ᠍ ᠣᠷᠣᠭᠰᠠᠨ ᠬᠥᠮᠦᠨ ᠠᠮᠢᠳᠤ ᠭᠠᠷᠤᠨᠠ ᠭᠡᠬᠦ ᠪᠠᠲᠤᠯᠠᠭᠠ ᠦᠭᠡᠢ᠃ ᠭᠡᠬᠦ ᠳ᠋ᠡᠭᠡᠨ ᠦᠬᠦᠨᠡ ᠭᠡᠵᠦ ᠣᠷᠣᠳᠠᠭ ᠦᠭᠡᠢ᠂ ᠢᠯᠠᠨᠠ᠂ ᠳᠡᠢᠯᠦᠨᠡ᠂ ᠠᠮᠢᠳᠤ ᠮᠡᠨᠳᠦ ᠡᠷᠭᠢᠵᠦ ᠢᠷᠡᠨᠡ ᠭᠡᠵᠦ ᠪᠣᠳᠣᠵᠤ ᠣᠷᠣᠳᠠᠭ᠃ ᠳᠠᠢᠰᠤᠨ ᠲᠠᠢ ᠲᠤᠯᠤᠯᠳᠤᠬᠤ ᠮᠥᠴᠡ ᠲᠤᠩ ᠣᠢᠷᠠᠬᠠᠨ᠃ ᠭᠤᠷᠪᠠᠨ ᠶᠡᠬᠡ ᠬᠦᠴᠦ ᠮᠥᠨ ᠭᠤᠷᠪᠠᠨ ᠶᠡᠬᠡ ᠬᠦᠴᠦᠨ ᠦ᠌ ᠥᠭᠡᠳᠡ ᠡᠴᠡ ᠳᠠᠪᠰᠢᠵᠤ ᠶᠠᠪᠤᠭᠠ᠃ ᠲᠡᠢᠷ ᠤᠰᠤᠨ᠂ ᠲᠣᠭᠲᠣᠭᠠ ᠪᠡᠬᠢ᠂ ᠬᠠᠲᠠᠢ ᠳᠠᠷᠮᠠᠯᠠ ᠶ᠋ᠢᠨ ᠬᠦᠷᠢᠶᠡ ᠥᠷᠭᠥᠭᠡ ᠶ᠋ᠢ50—60 ᠮᠣᠳᠣ ᠬᠢᠷᠢ ᠭᠡᠵᠦ ᠪᠠᠭᠴᠠᠭᠠᠯᠠᠵᠤ ᠶᠠᠷᠢᠯᠴᠠᠭᠰᠠᠨ᠃ ᠲᠡᠷᠡ ᠬᠦᠷᠬᠦ ᠳ᠋ᠦ᠍ ᠰᠥᠨᠢ ᠳᠦᠯᠢ ᠥᠩᠭᠡᠷᠡᠬᠦ ᠪᠣᠯᠤᠨᠠ᠃ ᠳᠠᠢᠰᠤᠨ ᠶᠠᠮᠠᠷ ᠨᠢᠭᠡᠨ ᠮᠡᠳᠡᠭᠡ ᠠᠪᠤᠭᠰᠠᠨ ᠪᠣᠯ ᠥᠭᠡᠳᠡ ᠡᠴᠡ ᠤᠭᠲᠤᠨ ᠢᠷᠡᠬᠦ ᠤᠴᠢᠷ ᠲᠠᠢ᠃ ᠲᠡᠭᠡᠪᠡᠯ ᠡᠨᠡ ᠡᠮᠦᠨᠡᠬᠢ ᠥᠭᠡᠳᠡ ᠶ᠋ᠢᠨ ᠴᠠᠭᠠᠨᠠ ᠴᠦ᠍ ᠲᠤᠯᠭᠠᠷᠠᠵᠤ ᠪᠣᠯᠵᠣᠰᠢ ᠦᠭᠡᠢ᠃ ᠬᠤᠭᠤᠰ ᠮᠥᠴᠡ ᠬᠢᠷᠢ ᠶᠠᠪᠤᠭᠠᠳ ᠲᠡᠮᠦᠵᠢᠨ《ᠪᠠᠭ᠂ ᠬᠡᠰᠡᠭ ᠪᠦᠯᠦᠭ ᠦ᠋ᠳ᠂ ᠪᠠᠢᠷᠢ ᠪᠠᠨ ᠡᠵᠡᠯᠡᠭᠡᠳ!》 ᠭᠡᠮᠡᠨ ᠲᠤᠰᠢᠶᠠᠵᠤ ᠴᠤᠪᠤᠭᠠ ᠵᠢᠭᠰᠠᠭᠠᠯ᠂ ᠡᠩᠨᠡᠭᠡ ᠵᠢᠭᠰᠠᠭᠠᠯ ᠳ᠋ᠤ᠌ ᠣᠷᠣᠵᠤ ᠪᠣᠭᠤᠷᠴᠢ ᠲᠡᠮᠦᠵᠢᠨ ᠲᠡᠢ ᠶᠠᠷᠢᠯᠴᠠᠵᠤ ᠲᠣᠬᠢᠷᠠᠭᠰᠠᠨ ᠶᠣᠰᠣᠭᠠᠷ ᠬᠣᠷᠢᠨ ᠴᠡᠷᠢᠭ ᠲᠡᠢ ᠶᠡᠬᠡ ᠴᠡᠷᠢᠭ ᠦ᠋ᠨ ᠲᠦᠷᠦᠭᠦᠦ ᠬᠣᠰᠢᠭᠤᠴᠢᠯᠠᠨ ᠶᠠᠪᠤᠵᠤ ᠳᠠᠢᠰᠤᠨ ᠤᠭᠲᠤᠨ ᠢᠷᠡᠪᠡᠯ ᠮᠡᠳᠡᠭᠡᠯᠡᠬᠦ ᠵᠣᠷᠢᠯᠭᠠ ᠪᠠᠷ ᠬᠥᠮᠦᠨ ᠪᠦᠷᠢ ᠲᠣᠬᠣᠮ ᠣᠯᠤᠮᠠᠯᠠᠭᠰᠠᠨ ᠬᠥᠲᠥᠯᠦᠭᠡ ᠮᠣᠷᠢ ᠲᠠᠢ ᠲᠦᠷᠦᠭᠦᠯᠡᠨ ᠴᠣᠢᠯᠠᠵᠤ ᠭᠠᠷᠪᠠ᠃ ᠴᠣᠬᠣᠮ ᠳ᠋ᠠᠭᠠᠨ ᠪᠣᠭᠤᠷᠴᠢ ᠶ᠋ᠢᠨ ᠪᠣᠳᠣᠯ ᠳ᠋ᠤ᠌ ᠬᠡᠷᠡᠢᠳ ᠦ᠋ᠨ ᠬᠠᠭᠠᠨ ᠠ᠋ᠴᠠ ᠲᠦᠷᠦᠭᠦᠯᠡᠵᠦ ᠬᠠᠲᠠᠢ ᠳᠠᠷᠮᠠᠯᠠ ᠶ᠋ᠢ ᠪᠠᠷᠢᠬᠤ ᠬᠣᠷᠣᠬᠠᠢ ᠬᠦᠷᠴᠦ᠂ ᠡᠢᠨᠬᠦ ᠶᠠᠪᠤᠭᠠ ᠵᠠᠯᠠᠭᠤ ᠡᠷᠡ ᠶ᠋ᠢᠨ ᠣᠮᠣᠭᠯᠠᠩ ᠰᠡᠳᠬᠢᠯ᠂ ᠬᠥᠬᠡ ᠡᠪᠦᠭᠡᠨ ᠦ᠌ ᠥᠭᠭᠦᠭᠰᠡᠨ ᠥᠴᠢᠭ ᠦᠨᠡᠨ ᠪᠣᠯᠵᠤ ᠪᠡᠶᠡᠯᠡᠬᠦ᠂ ᠬᠤᠳᠠᠯ ᠪᠣᠯ ᠳᠠᠢᠰᠤᠨ ᠤ᠋ ᠤᠲᠤᠭᠠᠨ(ᠪᠦᠭᠭᠦᠯᠲᠡ) ᠳ᠋ᠦ᠍ ᠣᠷᠣᠵᠤ ᠪᠣᠯᠬᠤ ᠮᠡᠲᠦ ᠪᠣᠳᠣᠯ ᠤ᠋ᠳ ᠡᠷᠭᠢᠯᠳᠦᠵᠦ ᠪᠠᠢᠯᠠ᠃ ᠭᠡᠪᠡᠴᠦ ᠵᠣᠷᠢᠭ ᠰᠢᠨᠲᠠᠷᠠᠭᠰᠠᠨ ᠦᠭᠡᠢ᠃ ᠶᠡᠬᠡ ᠴᠡᠷᠢᠭ ᠡᠴᠡ ᠪᠡᠨ ᠬᠣᠯᠠ ᠲᠠᠰᠤᠷᠠᠯᠠ᠃ ᠬᠡᠯᠲᠡᠭᠡᠢ ᠰᠠᠷᠠᠨ ᠮᠠᠨᠳᠤᠭᠠᠳ ᠨᠡᠯᠢᠶᠡᠳ ᠠᠯᠤᠰ ᠢ᠋ ᠬᠠᠷᠠᠬᠤ ᠮᠥᠩᠭᠥᠨ ᠲᠤᠶᠠᠭᠠ ᠪᠠᠨ ᠰᠠᠴᠤᠯᠠ᠃ ᠡᠨᠡ ᠴᠦ᠍ ᠪᠠᠰᠠ ᠲᠡᠳᠡᠨ ᠳ᠋ᠦ᠍ ᠨᠢᠭᠡᠨ ᠵᠦᠢᠯ ᠦ᠋ᠨ ᠲᠦᠰᠢᠭ ᠬᠠᠨᠢ᠃ ᠬᠣᠢᠲᠤ ᠤᠷᠢᠳᠤ ᠬᠣᠶᠠᠷ ᠠᠭᠤᠯᠠ ᠶ᠋ᠢᠨ ᠬᠡᠴᠡ ᠶ᠋ᠢ ᠪᠠᠷᠢᠵᠤ ᠪᠠᠷᠢᠮᠵᠢᠶᠠᠯᠠᠨ ᠡᠮᠦᠨᠡᠬᠢ ᠵᠠᠮ ᠣᠭᠰᠢᠨ᠂ ᠳᠠᠢᠰᠤᠨ ᠤ᠋ ᠡᠭᠦᠷ ᠣᠢᠷᠠᠳᠬᠤ ᠲᠣᠰᠤᠮ ᠰᠡᠳᠬᠢᠯ ᠲᠦᠭᠰᠢᠨ᠂ ᠵᠢᠷᠦᠬᠡ ᠪᠤᠯᠭᠢᠯᠠᠬᠤ ᠠᠪᠠᠴᠤ ᠪᠤᠴᠠᠬᠤ ᠰᠢᠨᠲᠠᠷᠠᠬᠤ ᠠᠷᠭᠠ ᠦᠭᠡᠢ᠂ ᠰᠠᠨᠠᠭᠠ ᠴᠦ᠍ ᠦᠭᠡᠢ᠃ ᠭᠠᠵᠠᠷ ᠤ᠋ᠨ ᠳᠤᠮᠳᠠ ᠬᠦᠷᠪᠡᠦ? ᠭᠡᠬᠦ ᠪᠠᠷᠢᠮᠵᠢᠶᠠᠨ ᠳ᠋ᠤ᠌ ᠮᠣᠷᠢᠨ ᠠ᠋ᠴᠠ ᠪᠠᠨ ᠮᠣᠷᠢᠨ ᠳ᠋ᠤ᠌ ᠦᠰᠦᠷᠦᠨ ᠮᠣᠷᠳᠠᠵᠤ ᠰᠣᠯᠢᠵᠤ ᠴᠡᠷᠢᠭ ᠦ᠋ᠳ ᠪᠠᠰᠠ ᠴᠦ᠍ ᠬᠥᠭᠵᠢᠶᠡᠨ ᠲᠡᠢ᠂ ᠬᠥᠭᠡᠷᠦᠭᠡᠨ ᠲᠡᠢ ᠦᠭᠡ ᠰᠣᠯᠢᠯᠴᠠᠨ ᠳᠠᠪᠬᠢᠯᠳᠤᠨᠠ᠃ ᠴᠢᠭ ᠪᠠᠷᠢᠵᠤ ᠶᠠᠪᠤᠭᠰᠠᠨ ᠠᠷᠤ ᠶ᠋ᠢᠨ ᠱᠣᠪᠬᠣ ᠣᠷᠭᠢᠯ ᠦᠵᠡᠭᠳᠡᠬᠦ ᠪᠡᠨ ᠪᠣᠯᠢᠵᠤ ᠵᠢᠷᠦᠬᠡᠨ ᠱᠣᠪᠬᠣ ᠠᠭᠤᠯᠠ ᠶ᠋ᠢᠨ ᠪᠠᠷᠠᠭᠤᠨ ᠰᠤᠭᠤ ᠤᠷᠤᠭᠤ ᠣᠷᠣᠯᠠ᠃ ᠠᠯᠤᠰ ᠲᠤ ᠠᠢᠯ ᠬᠣᠲᠠ ᠨᠤᠭᠤᠳ ᠦᠵᠡᠭᠳᠡᠵᠦ ᠠᠭᠤᠯᠠ ᠪᠠᠯ ᠢ᠋ᠶ᠋ᠠᠷ ᠡᠪᠦᠯᠵᠢᠶᠡ ᠣᠲᠣᠭ ᠤ᠋ᠳ ᠵᠠᠮ ᠵᠠᠭᠤᠷᠠ ᠳᠠᠭᠠᠷᠢᠯᠳᠤᠵᠤ ᠥᠩᠭᠡᠷᠡᠭᠰᠡᠭᠡᠷ᠃ ᠲᠡᠷᠡ ᠪᠦᠷᠢ ᠨᠣᠬᠠᠢ ᠶ᠋ᠢᠨ ᠳᠠᠭᠤ ᠴᠢᠮᠡᠭᠡ ᠠᠨᠢᠷ ᠭᠠᠷᠴᠤ ᠪᠠᠢᠪᠠ᠃ ᠠᠭᠤᠯᠠ ᠥᠩᠭᠡᠷᠡᠵᠦ ᠶᠡᠬᠡ ᠬᠥᠨᠳᠡᠢ ᠤᠷᠤᠭᠤ ᠣᠷᠣᠬᠤ ᠨᠢ ᠬᠥᠬᠡ ᠡᠪᠦᠭᠡᠨ ᠦ᠌ ᠥᠭᠭᠦᠭᠰᠡᠨ ᠮᠡᠳᠡᠭᠦᠯᠭᠡ ᠪᠡᠷ ᠪᠣᠯ ᠶᠡᠷᠦ ᠨᠢ ᠪᠠᠷᠠᠭᠤᠨ ᠳᠠᠰᠢ ᠪᠠᠨ ᠬᠠᠲᠠᠢ ᠲᠠᠷᠮᠠᠯᠠ ᠶ᠋ᠢᠨ ᠬᠦᠷᠢᠶᠡ ᠲᠤᠩ ᠴᠦ᠍ ᠣᠢᠷᠠᠲᠤᠭᠰᠠᠨ ᠤ᠋ ᠲᠡᠮᠳᠡᠭ ᠭᠡᠯᠲᠡᠢ᠃ ᠲᠡᠭᠦᠨ ᠦ᠌ ᠬᠡᠯᠡᠭᠰᠡᠨ ᠢ᠋ᠶ᠋ᠡᠷ ᠵᠢᠷᠦᠬᠡᠨ ᠱᠣᠪᠬᠣ ᠠᠭᠤᠯᠠ ᠪᠠᠷᠠᠭᠤᠨ ᠲᠠᠰᠢ ᠪᠠᠨ ᠨᠠᠮᠰᠠᠨ ᠨᠠᠮᠰᠠᠭᠰᠠᠭᠠᠷ ᠬᠣᠰᠢᠭᠤ ᠪᠠᠷ ᠰᠢᠪᠲᠤᠷᠠᠨᠠ᠃ ᠲᠡᠷᠡ ᠰᠢᠪᠲᠤᠷᠠᠭᠠᠨ ᠳ᠋ᠤ᠌ ᠬᠠᠷᠠᠭᠤᠯ ᠤ᠋ᠨ ᠴᠥᠭᠡᠪᠲᠦᠷ ᠴᠡᠷᠢᠭ ᠪᠣᠢ᠃ ᠡᠢᠮᠦ ᠬᠠᠷᠠᠭᠤᠯ ᠬᠣᠭᠣᠷᠣᠨᠳᠣ ᠪᠠᠨ ᠲᠠᠪᠤ ᠠ᠋ᠴᠠ ᠵᠢᠷᠭᠤᠭᠠᠨ ᠬᠢᠷᠢ ᠮᠣᠳᠣ ᠵᠠᠢᠲᠠᠢ ᠬᠡᠳᠦ ᠬᠡᠳᠦ ᠪᠠᠢᠳᠠᠭ᠃ ᠪᠤᠰᠤᠳ ᠬᠣᠶᠠᠷ ᠲᠤ ᠴᠦ᠍ ᠪᠣᠢ ᠭᠡᠰᠡᠨ᠃ ᠬᠠᠷᠠᠭᠤᠯ ᠠ᠋ᠴᠠ ᠶᠡᠬᠡ ᠬᠦᠷᠢᠶᠡ ᠬᠦᠷᠲᠡᠯᠡ ᠳᠥᠷᠪᠡ ᠡᠴᠡ ᠲᠠᠪᠤᠨ ᠮᠣᠳᠣ᠃ ᠦᠨᠡᠬᠡᠷ ᠳᠠᠢᠰᠤᠨ ᠤ᠋ ᠬᠦᠷᠢᠶᠡ ᠲᠦᠨᠡᠷᠡᠨ ᠬᠠᠷᠠᠭᠳᠠᠵᠤ᠂ ᠭᠠᠵᠠᠷ ᠤ᠋ᠨ ᠥᠩᠭᠡᠨ ᠳ᠋ᠦ᠍ ᠬᠠᠷᠠᠭᠳᠠᠬᠤ ᠪᠠᠨ ᠪᠠᠢᠨ ᠬᠠᠷᠠᠭᠤᠯ ᠤ᠋ᠨ ᠴᠡᠷᠢᠭ ᠦ᠋ᠳ ᠲᠠᠢᠪᠤᠩ ᠨᠣᠢᠷᠰᠤᠭᠰᠠᠨ ᠪᠣᠯᠤᠯᠲᠠᠢ᠃《ᠬᠠᠷᠠᠭᠤᠯ ᠢ᠋ ᠳᠠᠭᠠᠷᠢᠬᠤ ᠤᠤ? ᠪᠠᠢᠬᠤ ᠤᠤ?》 ᠭᠡᠯᠴᠡᠵᠦ《ᠪᠠᠢᠬᠤ》 ᠲᠠᠯᠠ ᠳ᠋ᠠᠭᠠᠨ ᠰᠢᠢᠳᠪᠦᠷᠢ ᠭᠠᠷᠪᠠ᠃ ᠤᠴᠢᠷ ᠨᠢ ᠡᠳᠡ ᠡᠰᠡᠷᠭᠦᠴᠡᠭᠡ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠥᠳᠥᠭᠡᠵᠦ ᠳᠠᠭᠤ ᠴᠢᠮᠡᠭᠡ ᠭᠠᠷᠭᠠᠬᠤ ᠠ᠋ᠴᠠ ᠪᠣᠯᠭᠣᠮᠵᠢᠯᠠᠪᠠ᠃ ᠠᠮᠢ ᠨᠠᠰᠤᠨ ᠤ᠋ ᠥᠷᠢᠰᠦᠯᠳᠦᠬᠦ ᠳᠠᠭᠤᠨ ᠬᠠᠰᠬᠢᠷᠤᠭᠠᠨ ᠭᠠᠰᠠᠯᠠᠩ ᠪᠣᠯᠪᠠᠯ ᠰᠥᠨᠢ ᠶ᠋ᠢᠨ ᠴᠢᠮᠡᠭᠡ ᠰᠣᠷᠭᠣᠭ ᠲᠤᠯᠠ ᠲᠣᠭᠣᠷᠢᠵᠤ ᠭᠠᠷᠤᠭᠠᠳ ᠬᠦᠷᠢᠶᠡ ᠤᠷᠤᠭᠤ ᠳᠣᠪᠲᠣᠯᠵᠤ ᠭᠣᠣᠯ ᠵᠦᠢᠯ ᠢ᠋ᠶ᠋ᠡᠨ ᠪᠡᠶᠡᠯᠡᠭᠦᠯᠬᠦ ᠨᠢ ᠵᠥᠪ ᠭᠡᠵᠦ ᠦᠵᠡᠵᠡᠢ᠃ ᠲᠡᠳᠡ ᠨᠡᠯᠢᠶᠡᠳ ᠪᠠᠷᠠᠭᠤᠨ ᠢ᠋ᠶ᠋ᠠᠷ ᠲᠡᠶᠠᠯᠠᠨ ᠲᠣᠭᠣᠷᠢᠵᠤ ᠭᠠᠷᠤᠭᠠᠳ ᠶᠡᠬᠡ ᠬᠦᠷᠢᠶᠡᠨ ᠦ᠌ ᠡᠮᠦᠨᠡᠭᠦᠷ ᠰᠠᠵᠢᠯᠠᠭᠤᠯᠤᠨ ᠵᠡᠭᠦᠨ ᠲᠡᠰᠢ ᠡᠷᠭᠢᠵᠦ ᠵᠡᠭᠦᠨ ᠬᠣᠢᠲᠤ ᠲᠠᠯᠠ ᠳ᠋ᠤ᠌ ᠦᠵᠡᠭᠳᠡᠬᠦ ᠥᠨᠳᠥᠷ ᠥᠨᠳᠥᠷ ᠲᠣᠮᠣ ᠥᠷᠭᠥᠭᠡ ᠶ᠋ᠢ ᠴᠢᠭᠯᠡᠨ ᠣᠢᠷᠠᠲᠤᠭᠠᠳ ᠬᠦᠷᠢᠶᠡᠨ ᠦ᠌ ᠵᠠᠬᠠ ᠬᠦᠷᠦᠮᠡᠭᠴᠡ ᠮᠣᠷᠢᠨ ᠤ᠋ ᠬᠤᠷᠳᠤ ᠪᠠᠷ ᠭᠠᠭᠴᠠᠬᠦ ᠮᠣᠷᠢᠨ ᠲᠦᠪᠡᠷᠭᠡᠨ ᠢ᠋ᠶ᠋ᠡᠷ ᠭᠡᠷ ᠦ᠋ᠳ ᠳᠤᠮᠳᠠᠭᠤᠷ ᠳᠠᠭᠠᠷᠢᠨ ᠣᠷᠣᠨᠠ᠃ ᠵᠠᠮ ᠳ᠋ᠤ᠌ ᠲᠣᠬᠢᠶᠠᠯᠳᠤᠬᠤ ᠡᠲᠡᠭᠡᠳ ᠢ᠋ ᠤᠰᠠᠳᠬᠠᠬᠤ ᠪᠣᠯᠤᠨᠠ᠃ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠳᠠᠭᠤ ᠤᠷᠠᠢ᠂ ᠬᠤᠷᠤᠢ᠂ ᠬᠢᠭ ᠭᠣᠭ᠋ ᠬᠠᠰᠬᠢᠷᠬᠤ ᠦᠭᠡᠢ᠂ ᠪᠣᠭᠣᠷᠴᠢ ᠨᠡᠷᠡ ᠳᠤᠷᠠᠳᠤᠭᠰᠠᠨ ᠨᠠᠢ᠍ᠮᠠᠨ ᠴᠡᠷᠢᠭ ᠦ᠋ᠨ ᠬᠠᠮᠲᠤ ᠲᠣᠮᠣ ᠥᠷᠥᠭᠡᠨ ᠦ᠌ ᠢᠰᠡᠭᠡᠢ ᠡᠭᠦᠳᠡ ᠶ᠋ᠢ ᠭᠡᠷ ᠳᠡᠭᠡᠷ ᠰᠡᠬᠦᠨ ᠬᠠᠶᠠᠵᠤ ᠬᠠᠭᠠᠯᠭᠠ ᠶ᠋ᠢ ᠬᠡᠮᠬᠡ ᠲᠡᠳᠡᠨ ᠵᠢᠳᠠ ᠪᠠᠷᠢᠭᠰᠠᠨ ᠴᠡᠷᠢᠭ ᠲᠦᠷᠦᠭᠦᠯᠡᠨ ᠪᠠᠮᠪᠠᠷ ᠠᠰᠠᠭᠠᠭᠰᠠᠨ ᠴᠡᠷᠢᠭ ᠳᠠᠭᠠᠯᠳᠤᠨ ᠴᠤᠪᠤᠷᠠᠨ ᠣᠷᠣᠬᠤ᠂ ᠨᠥᠭᠦᠭᠡ ᠠᠷᠪᠠᠨ ᠬᠣᠶᠠᠷ ᠴᠡᠷᠢᠭ ᠲᠡᠳᠡᠨ ᠢ᠋ ᠬᠠᠮᠠᠭᠠᠯᠠᠨ ᠬᠥᠲᠥᠯᠭᠡ ᠮᠣᠷᠢᠳ ᠪᠣᠯᠤᠨ ᠣᠯᠵᠠᠯᠠᠭᠳᠠᠭᠰᠠᠳ ᠢ᠋ᠶ᠋ᠠᠷ ᠬᠠᠯᠬᠠᠪᠴᠢ ᠬᠢᠵᠦ ᠳᠠᠢᠳᠤᠵᠤ ᠡᠰᠡᠷᠭᠦᠴᠡᠯ ᠢ᠋ ᠨᠢᠴᠤᠭᠠᠬᠤ ᠠᠷᠭᠠ ᠲᠥᠯᠥᠪᠯᠡᠭᠡ ᠪᠣᠯᠪᠠᠰᠤᠷᠠᠭᠤᠯᠤᠭᠰᠠᠨ ᠠᠵᠢ᠃ ᠪᠣᠳᠣᠵᠤ ᠲᠥᠯᠥᠪᠯᠡᠭᠰᠡᠨ ᠶᠣᠰᠣᠭᠠᠷ ᠪᠦᠬᠦᠨ ᠢ᠋ ᠬᠢᠪᠡ᠃ ᠬᠠᠲᠠᠢ ᠳᠠᠷᠮᠠᠯᠠ ᠡᠬᠡᠨᠡᠷ ᠲᠡᠢ ᠪᠡᠨ ᠶᠡᠬᠡ ᠴᠢᠮᠡᠭᠡ ᠱᠤᠤᠭᠢᠶᠠᠨ ᠢ᠋ᠶ᠋ᠠᠷ ᠳᠥᠩᠭᠡᠵᠦ ᠰᠡᠷᠡᠭᠡᠳ ᠪᠣᠰᠴᠤ ᠬᠤᠪᠴᠠᠰᠤᠯᠠᠵᠤ ᠪᠠᠢᠪᠠ᠃ ᠬᠠᠮᠠᠭᠠᠯᠠᠯᠲᠠ ᠶ᠋ᠢᠨ ᠴᠡᠷᠢᠭ ᠦ᠋ᠳ ᠨᠢ ᠲᠤᠯᠭᠠᠮᠳᠠᠵᠤ ᠳᠠᠭᠠᠷᠢᠯᠲᠠ ᠳ᠋ᠤ᠌ ᠬᠢᠯᠪᠠᠷᠬᠠᠨ ᠥᠷᠲᠥᠨ ᠦᠷᠡᠭᠳᠡᠵᠡᠢ᠃ ᠪᠣᠭᠤᠷᠴᠢ ᠥᠪᠡᠷ ᠲᠡᠭᠡᠨ ᠭᠤᠷᠪᠠᠨ ᠴᠡᠷᠢᠭ ᠢ᠋ ᠦᠯᠡᠳᠡᠭᠡᠵᠦ ᠪᠤᠰᠤᠳ ᠲᠠᠪᠤᠨ ᠴᠡᠷᠢᠭ ᠢ᠋ ᠭᠠᠷᠭᠠᠵᠤ ᠨᠥᠭᠦᠭᠡ ᠭᠡᠷ ᠡᠴᠡ ᠣᠢᠷᠠ ᠳᠣᠲᠣᠨᠣ ᠬᠥᠮᠦᠰ ᠢ᠋ ᠨᠢ ᠣᠯᠵᠠᠯᠠᠨ ᠠᠪᠬᠤ ᠶ᠋ᠢ ᠲᠤᠰᠢᠶᠠᠪᠠ᠃ ᠬᠠᠮᠠᠭᠠᠯᠠᠯᠲᠠ ᠳ᠋ᠤ᠌ ᠲᠠᠯᠪᠢᠭᠰᠠᠨ ᠴᠡᠷᠢᠭ ᠦ᠋ᠳ ᠳᠣᠪᠲᠣᠯᠤᠭᠰᠠᠳ ᠢ᠋ ᠨᠢᠴᠤᠭᠠᠨ ᠳᠠᠷᠤᠵᠤ ᠰᠡᠯᠡᠮᠡ ᠶ᠋ᠢᠨ ᠬᠠᠷᠰᠢᠯᠳᠤᠭᠠᠨ᠂ ᠰᠢᠷᠬᠠᠳᠤᠭᠰᠡᠳ ᠦ᠋ᠨ ᠤᠷᠢᠯᠭᠠᠨ ᠪᠠᠷᠬᠢᠷᠠᠭᠠᠨ᠂ ᠬᠠᠷᠢᠶᠠᠯ ᠤ᠋ᠨ ᠮᠠᠭᠤ ᠦᠭᠡᠰ ᠤᠯᠠᠮ ᠤᠯᠠᠮ ᠶᠡᠬᠡᠰᠴᠦ᠂ ᠪᠠᠷᠢᠪᠴᠢᠯᠠᠭᠳᠠᠭᠰᠠᠨ ᠡᠷᠡ ᠡᠮᠡ᠂ ᠥᠬᠢᠳ ᠬᠡᠦᠬᠡᠳ ᠢ᠋ ᠬᠣᠶᠠᠷ ᠲᠣᠬᠣᠢ ᠪᠠᠷ ᠨᠢ ᠠᠷᠤ ᠳ᠋ᠤᠨᠢ ᠬᠣᠯᠪᠣᠵᠤ᠂ ᠥᠪᠡᠷᠰᠡᠳ ᠢ᠋ᠶ᠋ᠡᠷ ᠨᠢ ᠡᠮᠡᠭᠡᠯ ᠢ᠋ ᠨᠢ ᠡᠭᠦᠷᠦᠭᠦᠯᠦᠨ ᠭᠠᠷᠭᠠᠵᠤ《ᠮᠣᠷᠢ ᠡᠮᠡᠭᠡᠯᠯᠡ!》 ᠭᠡᠵᠦ ᠲᠤᠰᠢᠶᠠᠭᠠᠳ ᠥᠪᠡᠷ ᠢ᠋ᠶ᠋ᠡᠨ ᠭᠡᠷ ᠳᠣᠲᠣᠷᠠ ᠲᠣᠢᠮᠣ ᠲᠠᠢ ᠵᠠᠷᠢᠮ ᠡᠳ᠋ᠯᠡᠯ ᠢ᠋ ᠠᠪᠤᠶᠠ ᠭᠡᠰᠡᠨ ᠢ᠋ᠶ᠋ᠡᠨ ᠪᠣᠯᠢᠪᠠ᠃ ᠪᠣᠭᠤᠷᠴᠢ ᠳ᠋ᠤ᠌ ᠡᠳ᠋ ᠶᠠᠭᠤᠮᠠ ᠪᠤᠰᠤ ᠬᠥᠮᠦᠨ ᠪᠠᠷᠢᠬᠤ ᠴᠢᠬᠤᠯᠠ ᠵᠣᠷᠢᠯᠭᠠ ᠪᠠᠢᠭᠰᠠᠨ᠃《 ᠲᠡᠷᠡ ᠲᠡᠢ ᠲᠡᠷᠡ ᠦᠭᠡᠢ ᠡᠳ᠋ ᠶᠠᠭᠤᠮᠠᠰ ᠢ᠋ ᠬᠡᠷᠡᠢᠳ ᠦ᠋ᠨ ᠬᠢᠨ ᠣᠯᠵᠠᠯᠠᠬᠤ ᠪᠤᠢᠠ》 ᠭᠡᠮᠡᠨ ᠪᠣᠳᠣᠨ ᠭᠠᠷᠬᠤᠢ ᠳ᠋ᠤ᠌ ᠨᠥᠭᠦᠭᠡ ᠬᠡᠰᠡᠭ ᠡᠴᠡ ᠬᠡᠳᠦᠨ ᠪᠠᠯᠮᠠᠭᠳᠠᠭᠰᠠᠨ ᠬᠥᠮᠦᠨ ᠳᠠᠭᠤᠨ ᠭᠠᠷᠭᠠᠵᠤ ᠪᠠᠢᠪᠠ᠃ ᠲᠡᠳᠡᠨ ᠳ᠋ᠦ᠍ ᠮᠣᠷᠢ ᠡᠮᠡᠭᠡᠯᠯᠡᠨ ᠤᠨᠤᠭᠤᠯᠵᠤ ᠬᠦᠷᠢᠶᠡᠨ ᠡᠴᠡ ᠭᠠᠷᠬᠤ ᠶ᠋ᠢ ᠶᠠᠭᠠᠷᠠᠪᠴᠢᠯᠠᠵᠠᠢ᠃ ᠲᠡᠷᠡ ᠵᠠᠪᠰᠠᠷ ᠣᠯᠵᠠᠯᠠᠭᠳᠠᠭᠰᠠᠳ ᠢ᠋ᠶ᠋ᠠᠷ ᠪᠠᠮᠪᠠᠢ ᠬᠢᠵᠦ ᠪᠠᠢᠯᠳᠤᠭᠰᠠᠭᠠᠷ ᠨᠥᠭᠦᠭᠡ ᠬᠡᠳᠦ ᠶ᠋ᠢ ᠮᠣᠷᠢᠨ ᠳ᠋ᠤ᠌ ᠮᠣᠷᠳᠠᠭᠤᠯᠵᠤ᠂ ᠥᠪᠡᠷ ᠢ᠋ᠶ᠋ᠡᠨ ᠲᠦᠷᠦᠭᠦᠯᠡᠵᠦ ᠵᠡᠭᠦᠨ ᠵᠦᠭ ᠳᠣᠪᠲᠣᠯᠭᠠᠪᠠ᠃ ᠲᠡᠭᠡᠬᠦ ᠳ᠋ᠡᠭᠡᠨ《ᠴᠢᠷᠦᠦᠪ᠂ ᠴᠢᠷᠦᠪ》 ᠭᠡᠮᠡᠨ ᠳᠠᠭᠤᠳᠠᠬᠤ ᠳ᠋ᠤ᠌ ᠲᠡᠭᠦᠨ ᠢ᠋ ᠳᠠᠭᠠᠯᠳᠤᠭᠰᠠᠳ ᠮᠣᠷᠳᠠᠵᠤ ᠠᠷᠤ ᠠ᠋ᠴᠠ ᠨᠢ ᠳᠠᠭᠠᠵᠤ ᠳᠠᠪᠬᠢᠯᠳᠤᠨ᠂ ᠡᠷᠭᠢᠵᠦ ᠬᠠᠷᠪᠤᠯᠳᠤᠨ᠂ ᠵᠠᠮ ᠳ᠋ᠤ᠌ ᠲᠣᠬᠢᠶᠠᠯᠳᠤᠭᠰᠠᠨ ᠪᠦᠬᠦᠨ ᠢ᠋ ᠴᠠᠪᠴᠢᠨ ᠤᠨᠠᠭᠠᠭᠰᠠᠭᠠᠷ ᠬᠦᠷᠢᠶᠡᠨ ᠡᠴᠡ ᠭᠠᠷᠴᠤ ᠳᠠᠪᠬᠢᠯᠳᠤᠨ ᠵᠠᠢ ᠳ᠋ᠤ᠌ ᠭᠠᠷᠴᠤ ᠬᠥᠮᠦᠨ ᠢ᠋ᠶ᠋ᠡᠨ ᠪᠦᠷᠢᠳᠬᠡᠨ ᠦᠵᠡᠪᠡᠰᠦ ᠲᠣᠭᠠ ᠪᠦᠷᠢᠨ ᠪᠠᠢᠪᠠ᠃ ᠨᠢᠭᠡ ᠴᠡᠷᠢᠭ ᠬᠦᠨᠳᠦᠬᠡᠨ ᠰᠢᠷᠬᠠᠲᠤᠵᠤ᠂ ᠲᠡᠭᠦᠨ ᠢ᠋ ᠰᠤᠨᠳᠠᠯᠠᠨ ᠢᠷᠡᠵᠡᠢ᠃ ᠳᠥᠷᠪᠡᠨ ᠴᠡᠷᠢᠭ ᠭᠠᠢᠭᠤᠢ ᠬᠥᠩᠭᠡᠪᠲᠦᠷ ᠰᠢᠷᠬᠠᠳᠤᠭᠰᠠᠨ ᠪᠠᠢᠪᠠ᠃ ᠮᠣᠷᠢᠳ ᠨᠡᠯᠢᠶᠡᠳ ᠬᠡᠳᠦ ᠪᠡᠷ ᠬᠣᠷᠣᠭᠳᠠᠵᠠᠢ᠃ ᠣᠯᠵᠠᠯᠠᠭᠳᠠᠭᠰᠠᠳ ᠠ᠋ᠴᠠ ᠡᠷᠡ ᠡᠮᠡ ᠬᠣᠶᠠᠷ ᠬᠥᠮᠦᠨ ᠰᠢᠷᠬᠠᠳᠤᠭᠰᠠᠨ ᠠᠵᠢ᠃
ᠪᠣᠭᠣᠷᠴᠢ ᠲᠦᠳᠡᠯ ᠦᠭᠡᠢ ᠥᠪᠡᠷᠰᠡᠳ ᠦ᠋ᠨ ᠬᠢᠨ ᠲᠡᠢ ᠪᠡᠨ ᠨᠡᠢᠯᠡᠯᠡ᠃ ᠬᠠᠰᠠᠷ ᠲᠠᠢ ᠠᠭᠤᠯᠵᠠᠪᠠᠯ ᠲᠣᠭᠳᠤᠭᠠ ᠪᠡᠬᠢ ᠶ᠋ᠢᠨ ᠨᠡᠯᠢᠶᠡᠳ ᠴᠡᠷᠢᠭ ᠤᠭᠲᠤᠨ ᠪᠠᠢᠯᠳᠤᠭᠰᠠᠨ ᠴᠦ᠍ ᠬᠦᠴᠦᠨ ᠮᠡᠬᠦᠰ ᠳᠤᠲᠠᠭᠤ ᠤᠴᠢᠷ ᠲᠡᠷᠡ ᠵᠢᠭᠤᠲᠠᠭᠰᠠᠨ᠂ ᠵᠠᠷᠢᠮ ᠬᠡᠰᠡᠭ ᠨᠢ ᠲᠡᠨᠳᠡ ᠦᠷᠡᠭᠳᠡᠭᠰᠡᠨ ᠭᠡᠨᠡᠮ᠃ ᠲᠡᠮᠦᠵᠢᠨ ᠪᠥᠷᠲᠡ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ᠂ ᠪᠡᠯᠭᠦᠳᠡᠢ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠣᠢᠨᠠ ᠠ᠋ᠴᠠ ᠨᠡᠬᠡᠨ ᠣᠳᠤᠭᠰᠠᠨ᠃ ᠲᠣᠭᠳᠤᠭᠠ ᠪᠡᠬᠢ ᠶᠡᠬᠡ ᠴᠡᠷᠢᠭ ᠠᠢᠰᠤᠢ ᠮᠡᠳᠡᠭᠡ ᠠᠪᠤᠭᠠᠳ ᠥᠪᠡᠷᠦᠨ ᠪᠦᠯᠦᠭ ᠢ᠋ ᠠᠪᠴᠤ ᠬᠡᠰᠡᠭ ᠴᠡᠷᠢᠭ ᠲᠡᠢ ᠠᠯᠢ ᠡᠷᠲᠡ ᠰᠡᠯᠡᠩᠭᠡ ᠤᠷᠤᠭᠤᠳᠠᠭᠰᠠᠨ ᠲᠤᠬᠠᠢ ᠡᠨᠳᠡᠬᠢ ᠬᠥᠮᠦᠰ ᠥᠴᠢᠭ ᠥᠭᠴᠡᠢ᠃
ᠲᠡᠮᠦᠵᠢᠨ ᠶᠠᠪᠤᠬᠤ ᠳ᠋ᠠᠭᠠᠨ ᠬᠠᠰᠠᠷ ᠲᠤ᠄
— ᠪᠣᠭᠣᠷᠴᠢ ᠶ᠋ᠢ ᠢᠷᠡᠮᠡᠭᠴᠡ ᠲᠠ ᠬᠣᠶᠠᠷ ᠡᠨᠡ ᠲᠣᠭᠳᠤᠭᠠ ᠪᠡᠬᠢ ᠶ᠋ᠢᠨ ᠬᠦᠷᠢᠶᠡ ᠶ᠋ᠢ ᠡᠵᠡᠯᠡᠨ ᠡᠮᠬᠢᠯᠡ! ᠭᠡᠰᠡᠨ ᠠᠵᠢ᠃ ᠪᠣᠭᠤᠷᠴᠢ ᠰᠢᠷᠬᠠᠲᠤᠭᠰᠠᠨ ᠴᠡᠷᠢᠭ ᠢ᠋ᠶ᠋ᠡᠨ ᠶᠠᠭᠠᠬᠢᠵᠤ ᠪᠠᠢᠷᠢᠯᠠᠭᠤᠯᠬᠤ ᠲᠤᠬᠠᠢ ᠶᠠᠷᠢᠲᠠᠯᠠ ᠬᠠᠰᠠᠷ᠄
— ᠪᠢᠳᠡ ᠰᠢᠷᠬᠠᠲᠤᠭᠰᠠᠳ ᠢ᠋ ᠪᠠᠢᠷᠢᠯᠠᠭᠤᠯᠤᠨ ᠠᠰᠠᠷᠠᠬᠤ᠂ ᠣᠯᠵᠠᠯᠠᠭᠰᠠᠳ ᠢ᠋ ᠬᠣᠷᠢᠬᠤ ᠭᠡᠷ ᠦ᠋ᠳ ᠪᠡᠯᠡᠳᠬᠡᠭᠦᠯᠵᠦ ᠪᠠᠢᠭᠠ ᠭᠡᠵᠦ ᠳᠠᠰᠢ ᠣᠴᠢᠵᠤ ᠪᠦᠭᠦᠳᠡ ᠶ᠋ᠢ ᠵᠢᠷᠤᠮᠯᠠᠵᠠᠭᠠᠪᠠ᠃
ᠡᠵᠡᠯᠡᠭᠳᠡᠭᠰᠡᠨ ᠬᠦᠷᠢᠶᠡᠨ ᠳ᠋ᠦ᠍ ᠠᠯᠪᠠᠲᠤ ᠵᠠᠷᠤᠴᠠ ᠨᠠᠷ ᠯᠠ ᠦᠯᠡᠳᠡᠵᠦ᠂ ᠲᠡᠳᠡᠭᠡᠷ ᠬᠥᠮᠦᠰ ᠢ᠋ ᠥᠪᠡᠷ ᠥᠪᠡᠷᠰᠡᠳ ᠦ᠋ᠨ ᠪᠠᠢᠷᠢᠨ ᠳ᠋ᠤ᠌ ᠨᠣᠮᠣᠬᠠᠨ ᠬᠦᠯᠢᠴᠡᠩᠭᠦᠢ ᠪᠠᠢᠬᠤ ᠶ᠋ᠢ ᠲᠤᠰᠢᠶᠠᠵᠤ ᠮᠠᠨᠠᠭᠠ ᠬᠦᠯᠢᠶᠡ ᠶ᠋ᠢ ᠴᠢᠩᠭᠠᠳᠬᠠᠨ ᠬᠠᠰᠠᠷ ᠲᠡᠷᠡ ᠬᠣᠶᠠᠷ ᠨᠢᠭᠡ ᠭᠡᠷ ᠵᠡᠭᠡᠭᠯᠡᠵᠦ ᠪᠠᠢᠷᠢᠯᠠᠭᠠᠳ ᠪᠠᠢᠲᠠᠯᠠ ᠲᠡᠮᠦᠵᠢᠨ ᠡᠴᠡ ᠬᠥᠮᠦᠨ ᠢᠷᠡᠭᠦᠯᠵᠦ᠄
— ᠡᠷᠢᠭᠰᠡᠨ ᠬᠥᠮᠦᠨ ᠢ᠋ᠶ᠋ᠡᠨ ᠣᠯᠪᠠ᠃ ᠳᠣᠣᠷᠠ ᠳᠣᠣᠷᠠ ᠪᠠᠨ ᠪᠠᠢᠷᠢᠯᠠᠵᠤ ᠬᠣᠨᠣᠭᠯᠠ! ᠭᠡᠰᠡᠨ ᠲᠤᠰᠢᠶᠠᠯ ᠥᠭᠭᠦᠭᠰᠡᠨ ᠪᠥᠭᠡᠳ ᠬᠠᠰᠠᠷ ᠢ᠋ ᠲᠣᠭᠣᠷᠢᠯ ᠬᠠᠨ ᠳ᠋ᠤ᠌ ᠣᠴᠢᠵᠤ ᠡᠨᠡ ᠲᠤᠬᠠᠢ ᠮᠡᠳᠡᠭᠳᠡ! ᠮᠠᠷᠭᠠᠰᠢ ᠦᠳᠡ ᠡᠴᠡ ᠤᠷᠢᠳᠠ ᠵᠠᠮᠤᠬᠠ ᠪᠢᠳᠡ ᠣᠴᠢᠵᠤ ᠲᠠᠨ ᠳ᠋ᠤ᠌ ᠪᠠᠷᠠᠭᠠᠯᠠᠨ ᠶᠠᠷᠢᠶᠠ ᠬᠡᠯᠡᠯᠴᠡᠭᠡᠷ ᠬᠢᠶᠡ ᠭᠡᠵᠦ ᠬᠡᠯᠡ ᠬᠦᠷᠭᠡ! ᠭᠡᠰᠡᠨ ᠠᠵᠤᠭᠤ᠃ ᠡᠭᠦᠨ ᠦ᠌ ᠲᠤᠯᠠ ᠬᠠᠰᠠᠷ ᠬᠡᠳᠦᠨ ᠴᠡᠷᠢᠭ ᠳᠠᠭᠠᠭᠤᠯᠤᠨ ᠮᠡᠳᠡᠭᠡ ᠬᠦᠷᠭᠡᠬᠦ ᠪᠡᠷ ᠳᠣᠪᠲᠣᠯᠭᠠᠪᠠ᠃
ᠪᠣᠭᠣᠷᠴᠢ ᠲᠡᠮᠦᠵᠢᠨ ᠳ᠋ᠦ᠍ ᠬᠠᠲᠠᠢ ᠳᠡᠷᠮᠠᠯᠠ ᠶ᠋ᠢ ᠣᠢᠷᠠ ᠳᠣᠲᠣᠨᠣ ᠶ᠋ᠢᠨ ᠬᠢᠨᠢ ᠬᠥᠮᠦᠰ ᠲᠡᠢ ᠣᠯᠵᠠᠯᠠᠵᠤ ᠠᠪᠴᠢᠷᠠᠭᠠᠳ ᠪᠠᠢᠭᠠ ᠪᠠᠨ ᠪᠤᠴᠠᠭᠰᠠᠨ ᠮᠡᠳᠡᠭᠡᠴᠢᠨ ᠴᠡᠷᠢᠭ ᠢ᠋ᠶ᠋ᠡᠷ ᠮᠡᠳᠡᠭᠡᠯᠡᠵᠢ᠃
ᠪᠣᠭᠤᠷᠴᠢ ᠭᠡᠨᠡᠳᠲᠡ ᠨᠣᠢᠷ ᠠ᠋ᠴᠠ ᠪᠠᠨ ᠰᠡᠷᠡᠪᠡᠯ ᠭᠡᠷ ᠦ᠋ᠨ ᠳᠣᠲᠣᠷᠠ ᠬᠠᠪ ᠬᠠᠷᠠᠩᠭᠤᠢ᠂ ᠵᠢᠬᠡᠭᠦᠨ ᠠᠵᠢ᠃ ᠭᠡᠷᠡᠯ ᠠᠰᠠᠭᠠᠭᠠᠳ ᠬᠠᠷᠠᠪᠠᠯ ᠰᠥᠨᠢ ᠬᠡᠷᠡᠢᠳ ᠦ᠋ᠨ ᠬᠠᠨ ᠤᠷᠤᠭᠤ ᠶᠠᠪᠤᠭᠰᠠᠨ ᠬᠠᠰᠠᠷ ᠢᠷᠡᠴᠢᠬᠡᠭᠡᠳ ᠪᠥᠬᠡ ᠭᠡᠭᠴᠢ ᠨᠢ ᠬᠤᠷᠬᠢᠷᠠᠵᠤ ᠪᠠᠢᠨᠠ᠃ ᠲᠡᠭᠦᠨ ᠦ᠌ ᠣᠷᠣᠵᠤ ᠢᠷᠡᠬᠦ ᠶ᠋ᠢ ᠮᠡᠳᠡᠭᠰᠡᠨ ᠦᠭᠡᠢ ᠶ᠋ᠢ ᠪᠣᠳᠣᠬᠤ ᠳ᠋ᠤ᠌ ᠥᠪᠡᠷ ᠢ᠋ᠶ᠋ᠡᠨ ᠴᠦ᠍ ᠶᠡᠬᠡ ᠯᠡ ᠪᠥᠬᠡ ᠤᠨᠲᠠᠵᠠᠢ᠃ ᠨᠣᠢᠷᠤᠨ ᠳᠤᠮᠳᠠ ᠭᠠᠰᠠᠯᠠᠩ᠂ ᠱᠤᠤᠭᠢᠶᠠᠨ᠂ ᠬᠠᠩᠭᠢᠷ ᠵᠢᠩᠭᠢᠷ ᠭᠡᠬᠦ ᠵᠡᠪᠰᠡᠭ᠂ ᠠᠯᠠᠭᠠᠨ ᠬᠢᠲᠤᠭᠠᠨ ᠪᠣᠯᠤᠭᠠᠳ ᠪᠠᠢᠭᠰᠠᠨ᠃ ᠲᠡᠷᠡ ᠪᠣᠯ ᠵᠡᠭᠦᠳᠦ ᠪᠠᠢᠵᠤ ᠯᠠ ᠳᠠ᠃ ᠭᠡᠬᠦ ᠳ᠋ᠡᠭᠡᠨ ᠯᠡ ᠬᠠᠰᠠᠷ ᠢ᠋ ᠣᠷᠣᠵᠤ ᠢᠷᠡᠬᠦ ᠶ᠋ᠢ ᠮᠡᠳᠡᠳᠡᠭ ᠦᠭᠡᠢ᠃ ᠲᠡᠷᠡ ᠨᠠᠮᠠ ᠶ᠋ᠢ ᠤᠨᠲᠠᠭ! ᠭᠡᠵᠦ ᠶᠡᠬᠡ ᠰᠡᠮᠡᠭᠡᠷᠬᠡᠨ ᠣᠷᠣᠵᠤ ᠢᠷᠡᠵᠦ ᠳᠠ᠃ ᠲᠡᠭᠡᠪᠡᠯ ᠪᠢ ᠪᠠᠰᠠ ᠰᠡᠮᠡᠭᠡᠷᠬᠡᠨ ᠪᠣᠰᠤᠭᠠᠳ ᠶᠠᠪᠤᠶᠠ᠃ ᠲᠡᠷᠡ ᠤᠨᠲᠠᠭ᠂ ᠤᠨᠲᠠᠭ! ᠭᠡᠵᠦ ᠪᠣᠳᠣᠪᠠ᠃ ᠭᠠᠳᠠᠭᠠ ᠴᠠᠬᠠᠷ ᠴᠠᠬᠠᠷ ᠬᠢᠭᠰᠡᠨ ᠬᠥᠯ ᠦ᠋ᠨ ᠴᠢᠮᠡᠭᠡ ᠭᠠᠷᠬᠤ ᠨᠢ ᠶᠠᠭᠤ ᠪᠣᠯᠪᠠ? ᠴᠠᠰᠤ ᠣᠷᠣᠵᠤ ᠰᠢᠦ᠃ ᠰᠥᠨᠢ ᠲᠤᠯᠤᠯᠳᠤᠭᠠᠨ ᠰᠢᠪᠲᠤᠷᠠᠬᠤ ᠦᠶᠡ ᠪᠡᠷ ᠡᠭᠦᠯᠡ ᠪᠦᠷᠬᠦᠢᠵᠦ ᠠᠭᠠᠷ ᠲᠩᠷᠢ ᠳ᠋ᠦ᠍ ᠭᠡᠷᠡᠯ ᠢ᠋ᠶ᠋ᠡᠨ ᠰᠠᠴᠤᠨ ᠭᠡᠢᠭᠦᠯᠵᠦ ᠪᠠᠢᠭᠰᠠᠨ ᠰᠠᠷᠠᠨ ᠠᠪᠠᠬᠠᠢ ᠶ᠋ᠢ ᠬᠠᠯᠬᠠᠯᠠᠨ ᠬᠠᠷᠠᠩᠭᠤᠢᠯᠠᠵᠤ ᠠᠭᠰᠠᠨ ᠨᠢ ᠴᠠᠰᠤ ᠣᠷᠣᠬᠤ ᠪᠣᠯᠤᠭᠠ ᠤᠤ᠃ ᠶᠡᠷᠦ ᠨᠢ ᠰᠡᠯᠡᠩᠭᠡ ᠶ᠋ᠢᠨ ᠵᠡᠭᠦᠨ ᠪᠡᠶᠡ ᠨᠢᠮᠭᠡᠪᠲᠦᠷ ᠴᠠᠰᠤ ᠲᠠᠢ ᠪᠠᠢᠭᠰᠠᠨ ᠬᠢᠷᠢᠨᠡ ᠬᠦᠷᠢᠶᠡ ᠰᠠᠭᠤᠷᠢᠨ ᠭᠠᠵᠠᠷ ᠲᠠᠭᠠᠨ ᠬᠥᠮᠦᠨ ᠠᠮᠢᠲᠠᠨ ᠤ᠋ ᠬᠥᠯ ᠳ᠋ᠦ᠍ ᠴᠠᠰᠤ ᠦᠷᠡᠭᠳᠡᠵᠦ ᠲᠦᠨᠡᠷ ᠬᠠᠷᠠ ᠪᠠᠷᠠᠭᠠᠨ ᠦᠵᠡᠭᠳᠡᠵᠦ ᠪᠠᠢᠭᠰᠠᠨ᠃
ᠪᠣᠭᠣᠷᠴᠢ ᠨᠢᠭᠡ ᠰᠤᠨᠢᠶᠠᠭᠠᠳ ᠭᠠᠳᠠᠭᠰᠢ ᠭᠠᠷᠪᠠᠯ ᠴᠠᠰᠤ ᠣᠷᠣᠨ ᠰᠢᠭᠤᠷᠴᠤ ᠲᠩᠷᠢ ᠮᠠᠭᠤᠬᠠᠢᠷᠠᠵᠠᠢ᠃ ᠰᠥᠨᠢ ᠨᠢ ᠭᠠᠯ ᠮᠡᠰᠡᠨ ᠦ᠌ ᠠᠶᠤᠯ ᠳ᠋ᠤ᠌ ᠥᠷᠲᠥᠵᠦ ᠡᠳᠦᠷ ᠲᠩᠷᠢ ᠬᠤᠢᠰᠠᠭᠠᠨᠠᠨ ᠮᠡᠷᠭᠢᠳ ᠦ᠋ᠨ ᠨᠤᠲᠤᠭ ᠲᠤ᠌ ᠮᠠᠭᠤ ᠶᠠᠭᠤᠮᠠ ᠨᠢᠭᠤᠷᠯᠠᠵᠠᠢ᠃ ᠮᠣᠷᠢ ᠠᠪᠴᠢᠷᠠᠭᠤᠯᠵᠤ ᠨᠢᠭᠡ ᠴᠡᠷᠢᠭ ᠦ᠋ᠨ ᠬᠠᠮᠲᠤ ᠬᠦᠷᠢᠶᠡᠨ ᠦ᠌ ᠳᠤᠮᠳᠠᠭᠤᠷ ᠰᠢᠭᠤᠷᠭᠠ ᠲᠠᠢ ᠴᠦ᠍ ᠭᠡᠰᠡᠨ ᠡᠳᠦᠷ ᠦ᠋ᠨ ᠭᠡᠷᠡᠯ ᠭᠡᠭᠡ ᠲᠡᠢ ᠴᠠᠭ ᠢ᠋ᠶ᠋ᠠᠷ ᠶᠠᠪᠤᠵᠤ ᠦᠵᠡᠪᠡ᠃ ᠮᠡᠷᠭᠢᠳ ᠦ᠋ᠨ ᠬᠡᠭᠦᠷ ᠡᠨᠳᠡ ᠲᠡᠨᠳᠡ ᠦᠭᠡᠢ᠂ ᠪᠠᠷᠤᠭ ᠯᠠ ᠴᠠᠰᠤᠨ ᠳ᠋ᠤ᠌ ᠳᠠᠷᠤᠭᠳᠠᠨ ᠠᠯᠳᠠᠵᠤ ᠠᠲᠤᠷᠢᠵᠤ ᠰᠤᠨᠵᠤ᠂ ᠠᠮᠠ ᠪᠠᠨ ᠠᠩᠭᠠᠢᠵᠤ᠂ ᠨᠢᠳᠦ ᠪᠡᠨ ᠬᠠᠷᠠᠵᠤ᠂ ᠵᠠᠷᠢᠮ ᠨᠢ ᠥᠷᠥᠭᠡᠰᠦᠨ ᠨᠢᠳᠦ ᠪᠡᠨ ᠠᠨᠢᠵᠤ ᠬᠡᠪᠲᠡᠭᠡ ᠨᠢ ᠦᠨᠡᠬᠡᠷ ᠠᠢᠳᠠᠰ ᠬᠦᠢᠲᠡᠰ ᠲᠥᠷᠥᠮᠡ᠃ ᠲᠡᠢᠨ ᠭᠡᠵᠦ ᠡᠢᠮᠦ ᠡᠨᠡᠷᠢᠯ ᠦᠭᠡᠢ᠂ ᠡᠯᠡᠭ ᠳᠣᠭᠣᠭᠢ ᠠᠵᠢ᠃ ᠵᠠᠬᠠᠳᠠᠭᠤᠬᠠᠨ ᠦᠬᠦᠭᠰᠡᠨ ᠨᠢᠭᠡ ᠴᠡᠷᠢᠭ ᠦ᠋ᠨ ᠨᠢᠳᠦ ᠶ᠋ᠢ ᠬᠡᠷᠢᠶᠡ ᠳᠤᠩᠰᠢᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠬᠥᠮᠦᠨ ᠦ᠌ ᠪᠠᠷᠠ ᠪᠠᠷ ᠨᠢᠰᠦᠨ ᠣᠳᠪᠠ᠃ ᠬᠦᠷᠢᠶᠡ ᠶ᠋ᠢ ᠲᠣᠭᠣᠷᠢᠵᠤ ᠳᠤᠮᠳᠠᠭᠤᠷ ᠨᠢ ᠰᠦᠯᠵᠢᠨ ᠦᠵᠡᠵᠦ ᠳᠠᠭᠤᠰᠤᠭᠠᠳ ᠰᠢᠷᠬᠠ ᠲᠠᠢ ᠴᠡᠷᠢᠭ ᠦ᠋ᠳ ᠳᠡᠭᠡᠷᠡ ᠪᠡᠨ ᠣᠷᠣᠪᠠ᠃ ᠬᠠᠲᠠᠢ ᠳᠠᠷᠮᠠᠯᠠ ᠶ᠋ᠢ ᠣᠯᠵᠠᠯᠠᠬᠤ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠬᠦᠨᠳᠦ ᠰᠢᠷᠬᠠᠲᠤᠭᠰᠠᠨ ᠴᠡᠷᠢᠭ ᠨᠠᠰᠤ ᠪᠠᠷᠠᠵᠤ᠂ ᠬᠥᠩᠭᠡᠨ ᠰᠢᠷᠬᠠ ᠲᠠᠢ ᠨᠢ ᠭᠠᠢᠭᠤᠢ ᠪᠠᠢᠪᠠ᠃
ᠲᠡᠨᠳᠡ ᠡᠴᠡ ᠭᠠᠷᠴᠤ ᠬᠠᠲᠠᠢ ᠳᠠᠷᠮᠠᠯᠠ ᠤᠷᠤᠭᠤ ᠣᠷᠣᠪᠠ᠃ ᠲᠡᠳᠡ ᠪᠣᠰᠤᠨ ᠮᠡᠬᠦᠯᠵᠡᠨ ᠰᠥᠬᠥᠳᠦᠵᠡᠭᠡᠪᠡ᠃ ᠭᠠᠯ ᠦᠭᠡᠢ ᠭᠡᠷ ᠲᠦ᠍ ᠵᠢᠬᠡᠭᠦᠴᠡᠨ ᠵᠣᠳᠤᠷᠭᠤᠬᠠᠨ ᠶᠠᠩᠵᠤ ᠲᠠᠢ ᠦᠵᠡᠭᠳᠡᠨᠡ᠃ ᠪᠣᠭᠤᠷᠴᠢ᠄
— ᠡᠳᠡᠨ ᠳ᠋ᠦ᠍ ᠭᠠᠯ ᠲᠦᠯᠡᠵᠦ ᠥᠭ! ᠲᠣᠭᠲᠣᠭᠠ ᠪᠡᠬᠢ ᠶ᠋ᠢᠨ ᠵᠣᠭᠣᠷᠢᠨ ᠠ᠋ᠴᠠ ᠮᠢᠬᠠ ᠠᠪᠴᠢᠷᠠᠵᠤ ᠡᠪᠳᠡᠵᠦ ᠵᠢᠷᠭᠢᠵᠦ ᠥᠭ᠃ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠴᠢᠨᠠᠵᠤ ᠪᠣᠷᠣᠯᠠᠭᠤᠯᠵᠤ ᠢᠳᠡᠭ᠃ ᠬᠠᠷᠢᠨ ᠬᠢᠲᠤᠭᠠ ᠰᠡᠯᠡᠮᠡ ᠪᠤᠤ ᠥᠭ᠃ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠷᠢᠭᠠᠳ ᠰᠢᠳᠦ ᠪᠡᠷ ᠢ᠋ᠶ᠋ᠡᠨ ᠵᠣᠯᠭᠠᠭᠠᠳ ᠢᠳᠡᠨᠡ ᠪᠢᠵᠡ ᠭᠡᠪᠡ᠃
ᠬᠠᠲᠠᠢ ᠳᠠᠷᠮᠠᠯᠠ ᠭᠡᠳᠡᠭ ᠨᠠᠰᠤ ᠬᠡᠪᠡᠢᠵᠦ ᠶᠠᠪᠤᠭᠠ ᠨᠠᠮᠪᠠᠵᠢᠭᠤ ᠬᠥᠮᠦᠨ ᠪᠣᠰᠴᠤ ᠪᠣᠭᠤᠷᠴᠢ ᠤᠷᠤᠭᠤ ᠣᠢᠷᠠᠲᠤᠨ ᠢᠷᠡᠵᠦ ᠰᠥᠬᠥᠷᠡᠨ᠄
— ᠲᠠ ᠪᠢᠳᠡᠨ ᠢ᠋ ᠶᠠᠭᠠᠬᠢᠬᠤ ᠭᠡᠵᠦ ᠪᠠᠢᠨᠠ? ᠨᠢᠭᠦᠯᠡᠰᠴᠦ ᠥᠷᠥᠰᠢᠶᠡᠮᠦ? ᠭᠡᠮᠡᠨ ᠳᠣᠷᠣᠢ ᠳᠠᠭᠤ ᠪᠠᠷ ᠥᠭᠦᠯᠡᠬᠦ ᠨᠢ ᠶᠠᠭᠠᠬᠢᠬᠤ ᠠᠷᠭᠠ ᠦᠭᠡᠢ ᠢᠯᠠᠭᠳᠠᠵᠤ ᠠᠷᠭᠠ ᠪᠠᠨ ᠪᠠᠷᠠᠭᠰᠠᠨ ᠬᠥᠮᠦᠨ ᠦ᠌ ᠰᠢᠨᠵᠢ ᠲᠥᠷᠬᠦ ᠠᠵᠤᠭᠤ᠃
— ᠲᠡᠮᠦᠵᠢᠨ ᠡᠵᠡᠨ ᠮᠡᠳᠡᠨᠡ ᠭᠡᠵᠦ ᠲᠣᠪᠴᠢᠬᠠᠨ ᠬᠠᠷᠢᠭᠤ ᠥᠭᠬᠦ ᠳ᠋ᠦ᠍ ᠨᠥᠭᠥᠭᠡᠳᠡᠬᠢ᠄
— ᠲᠠ ᠲᠡᠮᠦᠵᠢᠨ ᠪᠢᠰᠢ ᠶᠦᠮ ᠤᠤ? ᠭᠡᠪᠡᠯ ᠪᠣᠭᠤᠷᠴᠢ᠄
— ᠪᠢᠰᠢ ᠠ᠋ ᠪᠢᠰᠢ ᠭᠡᠳ ᠭᠠᠷᠴᠤ ᠣᠳᠬᠤ ᠳ᠋ᠤ᠌ ᠴᠠᠭᠠᠨᠠ ᠨᠢ᠄
— ᠡᠨᠡ ᠲᠡᠮᠦᠵᠢᠨ ᠦ᠌ ᠶᠠᠭᠤ ᠨᠢ ᠶᠦᠮ ᠪᠣᠯ?
— ᠶᠡᠬᠡ ᠮᠠᠲᠠᠯ ᠤ᠋ᠨ ᠠᠮᠢᠲᠠᠨ ᠶᠤᠮ᠃ ᠡᠳᠦᠢ ᠵᠢᠭᠠᠬᠠᠨ ᠠ᠋ᠴᠠ ᠪᠠᠨ᠁
— ᠶᠠᠭ ᠦᠭᠡᠢ ᠶᠠᠰᠤᠨ ᠬᠡᠳᠡᠷᠭᠡ ᠳᠡ᠃
— ᠵᠠ ᠪᠣᠯᠢ᠂ ᠪᠣᠯᠢ! ᠳᠤᠭᠤᠯᠴᠢᠬᠠᠪᠠᠯ ᠶᠠᠭᠠᠬᠢᠨᠠ ᠭᠡᠯᠴᠡᠬᠦ ᠶ᠋ᠢ ᠬᠠᠭᠠᠯᠭᠠᠨ ᠤ᠋ ᠴᠠᠭᠠᠨᠠ ᠪᠣᠭᠤᠷᠴᠢ ᠥᠷᠥᠭᠡᠰᠦᠨ ᠬᠥᠯ ᠢ᠋ᠶ᠋ᠡᠨ ᠥᠯᠮᠡᠢᠳᠡᠨ ᠴᠢᠩᠨᠠᠵᠤ ᠰᠣᠨᠣᠰᠤᠭᠠᠳ ᠢᠨᠢᠶᠡᠳᠦ ᠪᠡᠨ ᠪᠠᠷᠢᠵᠤ ᠶᠠᠳᠠᠨ ᠴᠠᠭᠠᠰᠢ ᠶᠠᠪᠤᠪᠠ᠃
ᠲᠡᠷᠡ ᠥᠪᠡᠷᠦᠨ ᠪᠣᠯᠤᠨ ᠬᠠᠰᠠᠷ ᠤ᠋ᠨ ᠠᠩᠭᠢ ᠠ᠋ᠴᠠ ᠲᠠᠪᠤ ᠲᠠᠪᠤᠨ ᠳᠠᠷᠤᠭᠠ ᠨᠠᠷ ᠢ᠋ ᠳᠠᠭᠤᠳᠠᠵᠤ ᠲᠣᠭᠳᠤᠭᠠ ᠶ᠋ᠢᠨ ᠥᠷᠥᠭᠡᠨ ᠳ᠋ᠦ᠍ ᠣᠴᠢᠭᠠᠳ ᠲᠡᠳᠡᠨ ᠳ᠋ᠦ᠍᠄
— ᠡᠭᠦᠨ ᠢ᠋ ᠵᠠᠰᠠᠵᠤ ᠢᠳᠡᠭᠡ ᠵᠠᠭᠤᠰᠢ ᠲᠠᠯᠪᠢᠬᠤ ᠲᠠᠪᠴᠠᠩ ᠰᠠᠭᠤᠳᠠᠯ ᠪᠡᠯᠡᠳᠭᠡ! ᠣᠳᠣᠬᠠᠨ ᠲᠡᠮᠦᠵᠢᠨ ᠵᠠᠮᠤᠬᠠ ᠨᠠᠷ ᠢᠷᠡᠨᠡ᠃ ᠡᠨᠳᠡᠬᠢ ᠶ᠋ᠢᠨ ᠰᠠᠩ ᠠ᠋ᠴᠠ ᠬᠣᠭᠣᠯᠠ ᠬᠦᠨᠡᠰᠦᠨ ᠦ᠌ ᠵᠦᠢᠯ ᠠᠪᠴᠢᠷᠠᠵᠤ ᠡᠳᠡᠨ ᠦ᠌ ᠲᠣᠭᠣᠭᠠᠴᠢ ᠵᠠᠷᠤᠴᠠ ᠨᠠᠷ ᠢ᠋ᠶ᠋ᠠᠷ ᠤᠤᠭᠤᠰᠢ ᠵᠠᠭᠤᠰᠢ ᠪᠡᠯᠡᠳᠬᠡᠭᠦᠯ! ᠲᠠ ᠨᠠᠷ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠴᠦ᠍ ᠢᠳᠡᠵᠦ ᠤᠤᠭᠤ! ᠬᠠᠷᠢᠨ ᠬᠢᠭᠰᠡᠨ ᠡᠲᠡᠭᠡᠳ ᠢ᠋ᠶ᠋ᠡᠷ ᠥᠪᠡᠷᠰᠡᠳ ᠢ᠋ᠶ᠋ᠡᠷ ᠨᠢ ᠠᠮᠰᠠᠭᠤᠯᠵᠤ᠂ ᠵᠥᠭᠡᠭᠡᠵᠦ ᠪᠠᠷᠢᠬᠤ ᠠᠵᠢᠯ ᠳ᠋ᠤ᠌ ᠲᠠ ᠨᠠᠷ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠬᠥᠳᠡᠯᠭᠡᠭᠡᠷᠡᠢ! ᠭᠡᠵᠦ ᠲᠤᠰᠢᠶᠠᠭᠠᠳ ᠭᠠᠷᠴᠤ ᠪᠠᠰᠠ ᠬᠡᠳᠦᠨ ᠴᠡᠷᠢᠭ ᠳᠠᠷᠤᠭᠠ ᠨᠠᠷ ᠢ᠋ ᠳᠠᠭᠤᠳᠠᠵᠤ᠄
— ᠮᠡᠷᠭᠢᠳ ᠦ᠋ᠨ ᠦᠬᠦᠭᠰᠡᠨ ᠴᠡᠷᠢᠭ᠂ ᠵᠡᠪᠰᠡᠭ ᠮᠡᠰᠡ ᠶ᠋ᠢ ᠴᠤᠭᠯᠠᠭᠤᠯᠵᠤ ᠬᠠᠳᠠᠭᠠᠯᠠ ᠭᠡᠵᠦ ᠲᠤᠰᠢᠶᠠᠪᠠ᠃ ᠲᠡᠭᠡᠲᠡᠯᠡ《ᠲᠤᠭᠤᠷᠢᠯ ᠬᠠᠨ ᠢᠷᠡᠯᠡ》 ᠭᠡᠯᠴᠡᠵᠦ ᠲᠡᠳᠡᠨ ᠢ᠋ ᠬᠦᠨᠳᠦᠳᠬᠡᠨ ᠬᠦᠯᠢᠶᠡᠨ ᠠᠪᠤᠭᠠᠳ ᠪᠡᠯᠡᠳᠬᠡᠭᠰᠡᠨ ᠥᠷᠥᠭᠡᠨ ᠳ᠋ᠦ᠍ ᠣᠷᠣᠭᠤᠯᠵᠤ ᠬᠠᠰᠠᠷ ᠢ᠋ ᠳᠠᠭᠤᠳᠠᠨ《ᠬᠠᠨ ᠵᠣᠴᠢᠯᠠᠵᠤ ᠢᠷᠡᠯᠡ》 ᠭᠡᠵᠦ ᠪᠤᠰᠬᠠᠪᠠ᠃
ᠲᠦᠳᠡᠯ ᠦᠭᠡᠢ《ᠲᠡᠮᠦᠵᠢᠨ ᠵᠠᠮᠤᠬᠠ ᠬᠣᠶᠠᠷ ᠢᠷᠡᠵᠦ ᠶᠠᠪᠤᠨᠠ》 ᠭᠡᠰᠡᠨ ᠮᠡᠳᠡᠭᠡ ᠢᠷᠡᠬᠦ ᠳ᠋ᠦ᠍ ᠪᠣᠭᠣᠷᠴᠢ ᠲᠣᠰᠣᠨ ᠤᠭᠲᠤᠵᠤ᠂ ᠥᠩᠭᠡᠷᠡᠭᠰᠡᠨ ᠰᠥᠨᠢ ᠬᠢᠭᠡᠳ ᠥᠷᠯᠥᠭᠡᠨ ᠦ᠌ ᠪᠦᠬᠦᠢᠯᠡ ᠶᠠᠪᠤᠳᠠᠯ᠂ ᠲᠣᠭᠣᠷᠢᠯ ᠬᠠᠨ ᠬᠥᠪᠡᠭᠦᠨ ᠪᠣᠯᠤᠨ ᠳᠡᠭᠦᠦ ᠨᠠᠷ ᠤ᠋ᠨ ᠬᠠᠮᠲᠤ ᠢᠷᠡᠭᠰᠡᠨ ᠢ᠋ ᠢᠯᠡᠳᠬᠡᠵᠦ ᠮᠡᠳᠡᠭᠡᠯᠡᠯᠡ᠃ ᠲᠡᠮᠦᠵᠢᠨ᠄
— ᠬᠠᠲᠠᠢ ᠲᠠᠷᠮᠠᠯᠠ ᠬᠠᠮᠢᠭᠠ ᠪᠠᠢᠨᠠ ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌᠄
— ᠲᠡᠨᠳᠡ᠂ ᠭᠡᠷ ᠲᠦ᠍᠁ ᠭᠡᠵᠦ ᠲᠠᠰᠢᠭᠤᠷ ᠢ᠋ᠶ᠋ᠠᠨ ᠡᠷᠭᠦᠨ ᠵᠢᠭᠠᠪᠠᠯ᠄
— ᠣᠴᠢᠵᠤ ᠦᠵᠡᠶᠡ᠃ ᠶᠠᠮᠠᠷ ᠶᠠᠩᠵᠤ ᠶ᠋ᠢᠨ ᠡᠲᠡᠭᠡᠳ ᠪᠣᠯ? ᠭᠡᠳ ᠲᠡᠷᠡ ᠲᠡᠢᠰᠢ ᠮᠣᠷᠢᠨ ᠤ᠋ ᠠᠮᠠ ᠶ᠋ᠢ ᠡᠷᠭᠢᠭᠦᠯᠦᠯᠡ᠃ ᠲᠡᠮᠦᠵᠢᠨ ᠭᠡᠨᠡᠳᠲᠡ ᠨᠢᠭᠡ ᠵᠦᠢᠯ ᠰᠠᠨᠠᠬᠤ ᠰᠢᠭ᠋᠄
— ᠬᠠᠨ ᠡᠴᠢᠭᠡ ᠶ᠋ᠢ ᠮᠣᠷᠢᠯᠠᠵᠤ ᠢᠷᠡᠭᠡᠳ ᠪᠠᠢᠬᠤ ᠳ᠋ᠤ᠌ ᠬᠠᠲᠠᠢ ᠳᠠᠷᠮᠠᠯᠠ ᠳ᠋ᠤ᠌ ᠪᠠᠷᠠᠯᠠᠬᠤ ᠭᠡᠵᠦ ᠶᠠᠭᠤ ᠪᠢᠯᠡ᠃ ᠳᠠᠷᠠᠭᠠ ᠪᠣᠯᠤᠶᠠ᠃ ᠲᠡᠷᠡ ᠬᠠᠮᠢᠭᠠ ᠣᠴᠢᠬᠤ ᠪᠣᠢ? ᠨᠢᠭᠡᠨᠲᠡ ᠯᠡ ᠭᠠᠷ ᠲᠤ᠌ ᠣᠷᠣᠭᠰᠠᠨ ᠠ᠋ᠴᠠ ᠬᠣᠢᠰᠢ ᠭᠡᠳ ᠢᠨᠢᠶᠡᠭᠡᠳ ᠰᠢᠭᠤᠳ ᠲᠣᠭᠲᠤᠭᠠ ᠶ᠋ᠢᠨ ᠥᠷᠥᠭᠡ ᠤᠷᠤᠭᠤ ᠬᠡᠷᠡᠢᠳ ᠦ᠋ᠨ ᠬᠠᠨ ᠢ᠋ ᠵᠣᠷᠢᠵᠤ ᠣᠴᠢᠨ ᠭᠡᠷ ᠲᠦ᠍ ᠣᠷᠣᠪᠠᠰᠤ ᠲᠣᠭᠣᠷᠢᠯ ᠬᠣᠢᠮᠣᠷ ᠭᠣᠯᠯᠠᠨ ᠨᠠᠮᠪᠠᠯᠢᠭ ᠰᠠᠭᠤᠵᠤ ᠪᠠᠢᠯᠠ᠃ ᠲᠡᠮᠦᠵᠢᠨ ᠵᠠᠮᠤᠬᠠ ᠬᠣᠶᠠᠷ ᠮᠡᠬᠦᠢᠨ ᠶᠣᠰᠣᠯᠠᠵᠤ ᠬᠦᠨᠳᠦᠳᠬᠡᠯ ᠦᠢᠯᠡᠳᠦᠭᠡᠳ ᠲᠡᠮᠦᠵᠢᠨ ᠡᠪᠦᠭᠡᠨ ᠬᠠᠨ ᠤ᠋ ᠪᠠᠷᠠᠭᠤᠨ ᠲᠠᠯᠠ ᠳ᠋ᠤ᠌᠂ ᠵᠠᠮᠤᠬᠠ ᠵᠡᠭᠦᠨ ᠭᠠᠷ ᠲᠤ᠌ ᠣᠴᠢᠵᠤ ᠰᠠᠭᠤᠪᠠ᠃ ᠲᠤᠭᠤᠷᠢᠯ ᠬᠠᠨ᠄
— ᠵᠠ᠂ ᠬᠥᠪᠡᠭᠦᠳ ᠳᠡᠭᠦᠦ ᠨᠠᠷ᠂ ᠳᠠᠢᠰᠤᠨ ᠢ᠋ᠶ᠋ᠠᠨ ᠳᠠᠷᠤᠵᠤ ᠳᠠᠷᠬᠠᠨ ᠴᠣᠯᠠ ᠪᠠᠨ ᠮᠠᠨᠳᠤᠭᠤᠯᠵᠤ᠂ ᠦᠰᠲᠡᠨ ᠢ᠋ᠶ᠋ᠡᠨ ᠳᠠᠷᠤᠵᠤ ᠥᠷᠭᠡᠨ ᠴᠣᠯᠠ ᠪᠠᠨ ᠮᠠᠨᠳᠤᠭᠤᠯᠵᠤ ᠶᠠᠪᠤᠨᠠ ᠤᠤ? ᠭᠡᠮᠡᠨ ᠡᠷᠲᠡᠨ ᠦ᠌ ᠦᠭᠡᠰ ᠡᠴᠡ ᠡᠰᠢ ᠲᠡᠳᠡᠨ ᠮᠡᠨᠳᠦᠯᠡᠯᠡ᠃
ᠲᠡᠳᠡ ᠡᠢᠨᠬᠦ ᠪᠡᠯᠭᠡ ᠲᠡᠢ ᠰᠠᠢᠬᠠᠨ ᠦᠭᠡ ᠪᠡᠷ ᠬᠠᠷᠢᠯᠴᠠᠨ ᠢᠷᠥᠭᠡᠯᠴᠡᠵᠦ᠂ ᠮᠡᠷᠭᠢᠳ ᠢ᠋ ᠭᠡᠨᠡᠳᠡᠭᠦᠯᠦᠨ ᠬᠡᠷᠬᠢᠨ ᠳᠠᠭᠠᠷᠢᠭᠰᠠᠨ᠂ ᠢᠯᠠᠭᠰᠠᠨ ᠢ᠋ᠶ᠋ᠠᠨ ᠢᠳᠡ ᠬᠠᠪᠤ ᠪᠣᠯᠭᠠᠨ ᠶᠠᠷᠢᠶᠠ ᠡᠬᠢᠯᠡᠵᠦ ᠢᠳᠡᠭᠡ ᠵᠣᠭᠣᠭ ᠪᠠᠷᠢᠭᠰᠠᠨ ᠳᠠᠷᠤᠭᠠ ᠨᠠᠷ ᠣᠷᠣᠵᠤ ᠢᠷᠡᠵᠦ ᠲᠡᠳᠡᠨ ᠦ᠌ ᠡᠮᠦᠨᠡ ᠠᠭᠤᠷ ᠰᠠᠪᠰᠠᠭᠤᠯᠤᠨ ᠥᠷᠥᠵᠦ ᠲᠠᠯᠪᠢᠪᠠ᠃
ᠳᠠᠢᠰᠤᠨ ᠢ᠋ᠶ᠋ᠠᠨ ᠳᠠᠷᠤᠭᠰᠠᠨ ᠪᠠᠭᠠᠲᠤᠷ ᠤ᠋ᠳ ᠢᠯᠠᠯᠲᠠ ᠪᠠᠨ ᠲᠡᠮᠳᠡᠭᠯᠡᠨ ᠢᠳᠡᠭᠡ ᠪᠤᠳᠠᠭᠠ ᠤᠷᠤᠭᠤ ᠪᠠᠨ ᠣᠷᠣᠵᠤ ᠬᠤᠨᠳᠠᠭᠠ ᠡᠷᠭᠦᠨ ᠲᠠᠮᠰᠢᠶᠠᠯᠵᠠᠭᠠᠨᠠ᠃ ᠲᠡᠭᠡᠲᠡᠯᠡ ᠭᠠᠳᠠᠨᠠ ᠠ᠋ᠴᠠ ᠠᠭᠤᠷ ᠴᠠᠩ ᠰᠠᠪᠰᠠᠭᠤᠯᠤᠨ ᠪᠡᠯᠭᠦᠳᠡᠢ ᠣᠷᠣᠵᠤ ᠢᠷᠡᠯᠡ᠃ ᠲᠡᠭᠦᠨ ᠦ᠌ ᠮᠠᠯᠠᠭᠠᠢ ᠪᠣᠯᠤᠨ ᠵᠢᠷᠪᠢᠬᠡᠷ ᠲᠠᠴᠢᠷ ᠰᠠᠬᠠᠯ ᠳ᠋ᠤ᠌ ᠴᠠᠰᠤ ᠴᠠᠩ ᠬᠤᠷᠠᠵᠠᠢ᠃ ᠲᠡᠷᠡ ᠪᠡᠷ ᠮᠡᠬᠦᠢᠨ ᠶᠣᠰᠣᠯᠠᠵᠤ ᠪᠦᠭᠦᠳᠡ ᠶ᠋ᠢᠨ ᠠᠮᠤᠷ ᠢ᠋ ᠮᠡᠳᠡᠬᠦᠢ ᠳ᠋ᠦ᠍ ᠲᠡᠮᠦᠵᠢᠨ᠄
— ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠰᠤᠷᠠᠭ ᠢ᠋ ᠭᠠᠷᠭᠠᠪᠠᠤ? ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌ ᠪᠡᠯᠭᠦᠳᠡᠢ᠄
— ᠡᠵᠢ ᠮᠢᠨᠢ ᠪᠢᠳᠡᠨ ᠡᠴᠡ ᠨᠢᠭᠤᠷ ᠪᠤᠷᠤᠭᠤᠯᠠᠵᠤ ᠡᠨᠡ ᠭᠠᠵᠠᠷ ᠤ᠋ᠨ ᠨᠢᠭᠡ ᠳᠤᠮᠳᠠ ᠵᠡᠷᠭᠡ ᠶ᠋ᠢᠨ ᠲᠤᠰᠢᠶᠠᠯ ᠤ᠋ᠨ ᠨᠣᠶᠠᠨ ᠢ᠋ ᠳᠠᠭᠠᠭᠠᠳ ᠶᠠᠪᠤᠭᠰᠠᠨ ᠰᠤᠷᠠᠭ ᠪᠠᠢᠨᠠ ᠭᠡᠵᠦ ᠭᠤᠲᠤᠷᠠᠩᠭᠤᠢ ᠬᠡᠯᠡᠪᠡ᠃ ᠲᠡᠮᠦᠵᠢᠨ᠄
— ᠵᠠ ᠶᠠᠭᠠᠬᠢᠬᠤᠪ ᠳᠠ᠃ ᠵᠠᠮ ᠢ᠋ᠶ᠋ᠠᠨ ᠣᠯᠵᠤ ᠵᠠᠶᠠᠭᠠ ᠪᠠᠨ ᠲᠦᠰᠢᠬᠦ ᠬᠠᠨᠢ ᠳᠠᠭᠠᠭᠰᠠᠨ ᠪᠣᠯ ᠰᠠᠢᠨ᠃ ᠬᠣᠵᠢᠮ ᠤ᠋ᠨ ᠨᠢᠭᠡ ᠡᠳᠦᠷ᠂ ᠬᠣᠢᠴᠢ ᠶ᠋ᠢᠨ ᠮᠠᠷᠭᠠᠰᠢ ᠬᠤᠪᠢ ᠵᠠᠶᠠᠭᠠᠨ ᠤ᠋ ᠡᠷᠬᠡ ᠪᠡᠷ ᠪᠢᠳᠡᠨ ᠲᠡᠢ ᠪᠡᠨ ᠠᠭᠤᠯᠵᠠᠵᠤ ᠤᠴᠠᠷᠠᠬᠤ ᠶ᠋ᠢ ᠬᠡᠨ ᠪᠠᠢᠭ ᠭᠡᠬᠦ ᠪᠣᠢ᠃ ᠳᠡᠭᠦᠦ ᠮᠢᠨᠢ ᠰᠠᠨᠠᠭᠠ ᠠᠮᠤᠷ ᠪᠠᠢ᠃ ᠰᠠᠭᠤᠵᠤ ᠢᠳᠡᠭᠡ ᠪᠤᠳᠠᠭᠠᠨ ᠳ᠋ᠤ᠌ ᠬᠥᠷ ᠭᠡᠪᠡᠰᠦ ᠪᠠᠷᠠᠭᠤᠨ ᠵᠢᠭᠦᠷ ᠦ᠋ᠨ ᠠᠳᠠᠭ ᠲᠤ ᠰᠠᠭᠤᠵᠤ ᠪᠠᠢᠭᠰᠠᠨ ᠪᠣᠭᠤᠷᠴᠢ ᠪᠣᠰᠴᠤ ᠥᠪᠡᠷ ᠡᠴᠡ ᠪᠡᠨ ᠳᠡᠭᠡᠭᠰᠢ ᠰᠠᠭᠤᠯᠭᠠᠭᠠᠳ ᠥᠪᠡᠷ ᠢ᠋ᠶ᠋ᠡᠨ ᠠᠳᠠᠭ ᠲᠤ ᠰᠠᠭᠤᠪᠠ᠃ ᠡᠨᠡ ᠨᠢ ᠴᠦ᠍ ᠵᠥᠪ᠃ ᠬᠡᠳᠦᠢᠪᠡᠷ ᠪᠣᠭᠤᠷᠴᠢ ᠪᠦᠬᠦ ᠴᠡᠷᠢᠭ ᠦ᠋ᠨ ᠶᠡᠷᠦᠩᠬᠡᠢᠯᠡᠨ ᠵᠠᠬᠢᠷᠬᠤ ᠬᠦᠯᠦᠭ ᠪᠣᠯᠪᠠᠴᠤ ᠶᠡᠬᠡ ᠤᠷᠤᠭ ᠤ᠋ᠨ ᠳᠡᠭᠡᠷᠡ ᠰᠠᠭᠤᠳᠠᠯ ᠡᠵᠡᠯᠡᠬᠦ ᠶᠣᠰᠣ ᠦᠭᠡᠢ ᠭᠡᠰᠡᠨ ᠳ᠋ᠡᠭᠡᠨ ᠲᠡᠭᠡᠭᠰᠡᠨ ᠪᠠᠢᠵᠠᠢ᠃
ᠲᠣᠭᠣᠷᠢᠯ ᠤᠯᠤᠰ ᠤ᠋ᠨ ᠬᠠᠨ᠂ ᠪᠦᠭᠦᠳᠡ ᠶ᠋ᠢᠨ ᠠᠬᠠᠮᠠᠳ ᠤ᠋ᠨ ᠬᠤᠪᠢ ᠳ᠋ᠤ᠌ ᠠᠮᠠ ᠨᠡᠭᠡᠭᠡᠵᠦ᠄
— ᠪᠢᠳᠡ ᠨᠢᠭᠡᠨᠲᠡ ᠳᠠᠢᠰᠤᠨ ᠢ᠋ᠶ᠋ᠠᠨ ᠳᠠᠷᠤᠵᠤ ᠦᠰᠲᠡᠨ ᠢ᠋ᠶ᠋ᠡᠨ ᠥᠷᠥᠯᠡᠯᠡ᠃ ᠣᠳᠣ ᠴᠠᠭᠠᠰᠢ ᠶᠠᠭᠠᠬᠢᠬᠤ ᠪᠣᠢ? ᠭᠡᠳᠡᠭ ᠢ᠋ᠶ᠋ᠡᠨ ᠵᠥᠪᠯᠡᠨ ᠬᠡᠯᠡᠯᠴᠡᠵᠦ ᠲᠣᠭᠲᠠᠬᠤ ᠨᠢ ᠵᠦᠢ᠃ ᠬᠡᠯᠡᠯᠴᠡᠬᠦ ᠬᠡᠷᠡᠭ ᠦ᠋ᠨ ᠡᠬᠢᠨ ᠳ᠋ᠦ᠍ ᠲᠡᠢᠨ ᠢ᠋ᠶ᠋ᠡᠨ ᠦᠷᠭᠦᠯᠵᠢᠯᠡᠬᠦ ᠤᠤ? ᠵᠣᠭᠰᠣᠭᠠᠬᠤ ᠤᠤ? ᠭᠡᠳᠡᠭ ᠪᠣᠳᠣᠯ ᠣᠷᠣᠵᠤ ᠪᠠᠢᠨᠠ ᠭᠡᠪᠡ᠃ ᠪᠦᠭᠦᠳᠡ ᠠᠮᠠᠨ ᠳ᠋ᠠᠭᠠᠨ ᠭᠡᠭᠰᠡᠨ ᠢ᠋ᠶ᠋ᠡᠨ ᠬᠦᠯᠬᠦᠵᠦ ᠪᠠᠷᠢᠭᠰᠠᠨ ᠴᠠᠢ ᠪᠠᠨ ᠣᠭᠣᠴᠢᠯᠠᠭᠰᠠᠨ ᠢ᠋ᠶ᠋ᠠᠨ ᠪᠣᠳᠣᠯᠭᠠ ᠪᠣᠯᠤᠨ ᠬᠡᠰᠡᠭ ᠰᠠᠭᠤᠲᠠᠯᠠ ᠵᠠᠮᠤᠬᠠ᠄
— ᠢᠮᠠᠭᠠᠨ ᠤ᠋ ᠮᠢᠬᠠ ᠬᠠᠯᠠᠭᠤᠨ ᠳᠡᠭᠡᠷᠡ ᠪᠡᠨ ᠭᠡᠳᠡᠭ᠃ ᠮᠡᠷᠭᠢᠳ ᠢ᠋ ᠨᠢᠭᠡᠮᠦᠰᠦᠨ ᠳᠠᠭᠤᠰᠬᠠᠴᠢᠬᠠᠬᠤ ᠨᠢ ᠵᠥᠪ ᠪᠤᠶᠤ ᠭᠡᠪᠡᠯ᠄
— ᠠᠵᠢᠯ ᠬᠢᠪᠡᠯ ᠳᠠᠭᠤᠰᠲᠠᠯᠠ᠂ ᠳᠠᠪᠤᠰᠤ ᠬᠢᠪᠡᠯ ᠠᠭᠤᠰᠲᠠᠯᠠ ᠭᠡᠯᠴᠡᠳᠡᠭ᠃ ᠪᠢ ᠵᠠᠮᠤᠬᠠ ᠠᠨᠳᠠ ᠶ᠋ᠢᠨ ᠵᠥᠪ ᠭᠡᠮᠡᠨ ᠪᠣᠳᠣᠨᠠᠮ ᠭᠡᠵᠦ ᠪᠡᠯᠭᠦᠳᠡᠢ ᠨᠡᠯᠢᠶᠡᠳ ᠶᠡᠬᠡ ᠶ᠋ᠢᠨ ᠰᠢᠭᠢᠷᠡ ᠭᠠᠷᠭᠠᠨ ᠬᠡᠯᠡᠯᠡ᠃
— ᠪᠢ ᠰᠠᠨᠠᠯ ᠨᠢᠭᠡ ᠪᠠᠢᠨᠠ ᠭᠡᠵᠦ ᠬᠠᠰᠠᠷ ᠲᠣᠪᠴᠢᠬᠠᠨ ᠪᠣᠪᠲᠤᠨᠠᠪᠠ᠃ ᠵᠠᠬᠠ ᠬᠠᠮᠪᠤ ᠠᠪᠠᠭᠠ ᠪᠠᠨ ᠳᠠᠷᠠᠭᠠᠯᠠᠨ ᠰᠠᠭᠤᠵᠤ ᠪᠠᠢᠭᠰᠠᠨ ᠰᠡᠩᠭᠦᠮ ᠳᠣᠣᠷᠠ ᠪᠠᠨ ᠥᠨᠳᠡᠯᠵᠡᠨ᠄
— ᠵᠥᠪ᠂ ᠵᠥᠪ! ᠲᠣᠭᠲᠣᠭᠠ ᠪᠡᠬᠢ᠂ ᠲᠡᠢᠷ ᠤᠰᠤᠨ ᠢ᠋ ᠪᠦᠷᠢᠮᠦᠰᠦᠨ ᠤᠰᠠᠳᠬᠠᠵᠤ᠂ ᠮᠡᠷᠭᠢᠳ ᠢ᠋ ᠰᠥᠨᠥᠭᠡᠬᠦ ᠬᠡᠷᠡᠭᠲᠡᠢ ᠲᠡᠳᠡᠨ ᠦ᠌ ᠤᠷᠢᠳᠤ ᠦᠶᠡ ᠶ᠋ᠢᠨ ᠬᠢᠨ ᠬᠠᠨ ᠠᠪᠤ ᠶ᠋ᠢ ᠠᠷᠪᠠ ᠬᠦᠷᠬᠦ ᠦᠭᠡᠢ ᠨᠠᠰᠤᠨ ᠳ᠋ᠤ᠌ ᠨᠢ ᠣᠯᠵᠠᠯᠠᠵᠤ ᠪᠠᠢᠭᠰᠠᠨ ᠭᠡᠳᠡᠭ᠃ ᠣᠳᠣ ᠦᠰ ᠬᠣᠨᠵᠢᠶᠠ ᠪᠠᠨ ᠠᠪᠬᠤ ᠴᠠᠭ ᠪᠣᠯᠤᠭᠰᠠᠨ ᠭᠡᠯᠡ᠃
ᠵᠠᠬᠠ ᠬᠠᠮᠪᠤ ᠬᠣᠭᠣᠯᠠᠢ ᠪᠠᠨ ᠵᠠᠰᠠᠵᠤ ᠪᠠᠭᠤᠷᠢᠲᠠᠢᠬᠠᠨ ᠳᠦᠷᠢ ᠦᠵᠡᠭᠦᠯᠵᠦ᠄
— ᠳᠡᠭᠦᠦ ᠨᠠᠷ᠂ ᠵᠠᠯᠠᠭᠤᠰ ᠤ᠋ᠨ ᠴᠢᠰᠤ ᠰᠢᠩᠭᠡᠨ᠂ ᠰᠥᠰᠥ ᠣᠷᠭᠢᠯᠤᠭᠤᠨ ᠪᠣᠯᠬᠣᠷ ᠲᠠ ᠨᠠᠷ ᠤ᠋ᠨ ᠪᠣᠳᠣᠯ ᠰᠠᠨᠠᠭᠠ ᠶ᠋ᠢ ᠪᠢ ᠪᠤᠷᠤᠭᠤ ᠭᠡᠬᠦ ᠦᠭᠡᠢ᠃ ᠭᠡᠬᠦ ᠳ᠋ᠡᠭᠡᠨ ᠣᠳᠣ ᠭᠠᠳᠠᠭᠠ ᠴᠠᠰᠤ ᠬᠠᠶᠠᠯᠠᠵᠤ ᠪᠠᠢᠨᠠ᠃ ᠴᠠᠭ ᠤ᠋ᠨ ᠬᠠᠲᠠᠭᠤ᠂ ᠴᠠᠰᠤᠨ ᠤ᠋ ᠬᠠᠢᠷᠭᠤ ᠢᠷᠡᠯᠡ᠃ ᠡᠢᠮᠦ ᠦᠷᠡ ᠳ᠋ᠦ᠍ ᠳᠠᠢᠳᠤᠬᠤ ᠭᠡᠳᠡᠭ ᠠᠮᠠᠷ ᠦᠭᠡᠢ᠃ ᠮᠡᠷᠭᠢᠳ ᠦ᠋ᠨ ᠳᠡᠭᠡᠳᠦ ᠡᠷᠬᠡ ᠮᠡᠳᠡᠯᠲᠡᠨ ᠡᠳᠦᠢ ᠳ᠋ᠦ᠍ ᠭᠣᠣᠯ ᠤ᠋ᠨ ᠴᠠᠭᠠᠳᠤ ᠭᠠᠷᠤᠭᠰᠠᠨ ᠭᠡᠵᠦ ᠪᠢ ᠪᠣᠳᠣᠵᠤ ᠪᠠᠢᠨᠠ᠃ ᠲᠡᠳᠡ ᠰᠡᠯᠡᠩᠭᠡ ᠮᠥᠷᠡᠨ ᠢ᠋ ᠭᠠᠲᠤᠯᠬᠤ ᠲᠣᠮᠣ ᠵᠠᠪᠢ ᠣᠩᠭᠣᠴᠠ ᠲᠠᠢ᠂ ᠲᠡᠳᠡᠨ ᠢ᠋ ᠰᠡᠯᠢᠭᠦᠷᠳᠡᠬᠦ ᠤᠰᠤᠴᠢᠨ ᠰᠡᠯᠢᠭᠦᠷᠴᠢᠨ ᠲᠡᠢ᠃ ᠲᠡᠢᠮᠦ ᠡᠴᠡ ᠪᠢᠳᠡ ᠲᠡᠳᠡᠨ ᠢ᠋ ᠬᠥᠭᠡᠭᠡᠵᠦ ᠮᠥᠷᠡᠨ ᠭᠠᠲᠤᠯᠤᠶᠠ ᠭᠡᠬᠦ ᠳ᠋ᠦ᠍ ᠵᠠᠪᠢ ᠣᠩᠭᠣᠴᠠ ᠬᠢᠬᠦ᠂ ᠬᠡᠵᠢᠶᠡ ᠲᠡᠭᠦᠨ ᠢ᠋ ᠡᠵᠡᠮᠰᠢᠵᠦ ᠵᠢᠯᠣᠭᠣᠳᠬᠤ ᠬᠡᠨ ᠪᠢᠯᠡ? ᠰᠡᠯᠡᠩᠭᠡ ᠶ᠋ᠢᠨ ᠮᠥᠰᠥ ᠬᠥᠯᠳᠡᠬᠦ ᠶ᠋ᠢ ᠬᠦᠯᠢᠶᠡᠪᠡᠯ ᠪᠠᠷᠤᠭ ᠰᠠᠷᠠ ᠶ᠋ᠢᠨ ᠵᠠᠢ ᠪᠠᠢᠨᠠ᠃ ᠡᠢᠮᠦ ᠡᠴᠡ ᠡᠨᠡ ᠤᠳᠠᠭᠠ ᠲᠡᠢᠨ ᠢ᠋ ᠦᠷᠭᠦᠯᠵᠢᠯᠡᠭᠦᠯᠬᠦ ᠪᠡᠨ ᠲᠦᠳᠡᠭᠡᠯᠵᠡᠬᠦ ᠨᠢ ᠵᠥᠪ ᠭᠡᠮᠡᠨ ᠮᠤᠩᠬᠠᠭᠯᠠᠨ ᠪᠣᠳᠣᠵᠤ ᠰᠠᠭᠤᠨᠠ᠃ ᠪᠦᠭᠦᠳᠡ ᠣᠯᠠᠨ ᠢ᠋ᠶ᠋ᠠᠨ《ᠳᠣᠪᠲᠣᠯᠤᠶᠠ᠂ ᠳᠠᠪᠰᠢᠶᠠ》 ᠭᠡᠪᠡᠯ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠬᠣᠴᠣᠷᠬᠤ ᠨᠢ ᠴᠦ᠍ ᠶᠠᠭᠤᠨ ᠭᠡᠮᠡᠨ ᠲᠣᠯᠣᠭᠠᠢ ᠳᠣᠬᠢᠯᠵᠠᠨ ᠮᠡᠬᠦᠢᠪᠡ᠃
ᠣᠳᠣ ᠶᠠᠭᠠᠬᠢᠬᠤ ᠴᠦ᠍ ᠠᠷᠭᠠ ᠦᠭᠡᠢ ᠲᠡᠮᠦᠵᠢᠨ ᠦ᠌ ᠦᠭᠡ ᠳᠤᠤᠭᠠᠷᠬᠤ ᠡᠭᠡᠯᠵᠢ ᠲᠤᠯᠭᠠᠷᠠᠪᠠ᠃
ᠲᠡᠮᠦᠵᠢᠨ ᠳᠣᠣᠷᠠ ᠪᠠᠨ ᠰᠠᠭᠤᠳᠠᠯ ᠢ᠋ᠶ᠋ᠠᠨ ᠵᠠᠰᠠᠵᠤ᠂ ᠢᠨᠢᠶᠡᠮᠰᠦᠭᠯᠡᠭᠰᠡᠨ ᠢ᠋ᠶ᠋ᠡᠨ ᠨᠢᠭᠤᠷ ᠢ᠋ᠶ᠋ᠠᠨ ᠢᠯᠢᠵᠦ ᠪᠢᠴᠢᠬᠠᠨ ᠰᠠᠬᠠᠯ ᠢ᠋ᠶ᠋ᠠᠨ ᠢᠮᠡᠷᠦᠨ᠄
— ᠬᠠᠨ ᠡᠴᠢᠭᠡ᠂ ᠵᠠᠬᠠ ᠠᠬᠠ᠂ ᠵᠠᠮᠤᠬᠠ ᠠᠨᠳᠠ᠂ ᠲᠠ ᠨᠠᠷ ᠮᠢᠨᠢ ᠨᠠᠮᠠ ᠶ᠋ᠢ ᠡᠬᠡᠨᠡᠷ ᠢ᠋ᠶ᠋ᠡᠨ ᠣᠯᠵᠤ ᠠᠪᠤᠭᠠᠳ ᠰᠠᠨᠠᠭᠠ ᠠᠮᠤᠷᠴᠤ᠂ ᠰᠠᠢᠬᠠᠨ ᠵᠢᠷᠭᠠᠵᠤ ᠰᠠᠭᠤᠬᠤ ᠶ᠋ᠢ ᠪᠣᠳᠣᠯᠠ ᠭᠡᠬᠦ ᠦᠭᠡᠢ ᠪᠣᠢ ᠭᠡᠮᠡᠨ ᠥᠴᠢᠰᠦ᠃ ᠨᠠᠳᠠ ᠪᠣᠯ ᠡᠴᠢᠭᠡ ᠶ᠋ᠢᠨ ᠭᠠᠯ ᠭᠣᠯᠣᠮᠲᠠ ᠶ᠋ᠢ ᠰᠠᠬᠢᠵᠤ᠂ ᠲᠤᠭ ᠰᠦᠯᠳᠡ ᠶ᠋ᠢ ᠨᠢ ᠥᠭᠡᠳᠡ ᠮᠠᠨᠳᠤᠭᠤᠯᠬᠤ ᠭᠠᠭᠴᠠᠬᠠᠨ ᠵᠣᠷᠢᠯᠭᠠ ᠪᠣᠢ᠃ ᠡᠴᠢᠭᠡ ᠶ᠋ᠢᠨ ᠬᠠᠷᠢᠶᠠᠨ ᠳ᠋ᠤ᠌ ᠪᠠᠢᠭᠰᠠᠨ ᠪᠣᠷᠵᠢᠭᠢᠨ ᠣᠪᠣᠭ ᠤ᠋ᠨ ᠲᠠᠷᠬᠠᠵᠤ ᠪᠤᠲᠠᠷᠠᠭᠰᠠᠨ ᠣᠪᠣᠭ ᠤ᠋ᠳ᠂ ᠠᠯᠪᠠᠲᠤ ᠠᠷᠠᠳ ᠤ᠋ᠳ ᠢ᠋ ᠨᠢ ᠡᠴᠢᠭᠡ ᠶ᠋ᠢᠨ ᠲᠤᠭ ᠰᠦᠯᠳᠡ ᠳ᠋ᠦ᠍ ᠮᠥᠷᠭᠥᠭᠦᠯᠵᠦ᠂ ᠬᠠᠭᠠᠰ ᠬᠤᠭᠤᠰ ᠵᠠᠬᠢᠷᠭᠠᠨ ᠳ᠋ᠠᠭᠠᠨ ᠣᠷᠣᠭᠤᠯᠵᠤ᠂ ᠴᠡᠷᠢᠭ ᠳᠠᠢᠴᠢᠯᠠᠵᠤ ᠭᠠᠷᠤᠭᠰᠠᠨ᠃ ᠡᠢᠮᠦ ᠳ᠋ᠦ᠍ ᠠᠷᠤ ᠲᠠᠯᠠ ᠪᠠᠨ ᠣᠷᠬᠢᠭᠠᠳ ᠳᠠᠢᠳᠤᠬᠤ ᠶ᠋ᠢ ᠮᠥᠩᠬᠡ ᠲᠩᠷᠢ ᠲᠠᠭᠠᠰᠢᠶᠠᠬᠤ ᠦᠭᠡᠢ ᠪᠤᠶᠤ ᠭᠡᠯᠡ᠃
ᠲᠣᠭᠣᠷᠢᠯ ᠲᠡᠮᠦᠵᠢᠨ ᠦ᠌ ᠦᠭᠡ ᠶ᠋ᠢ ᠠᠩᠬᠠᠷᠤᠯ ᠲᠠᠢ ᠰᠣᠨᠣᠰᠴᠤ᠂ ᠲᠣᠯᠣᠭᠠᠢ ᠳᠣᠬᠢᠨ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ᠄
— ᠲᠡᠮᠦᠵᠢᠨ ᠬᠦᠦ ᠶ᠋ᠢᠨ ᠵᠥᠪ᠃ ᠪᠢ ᠴᠦ᠍ ᠭᠡᠯᠡ ᠠᠷᠤ ᠲᠠᠯᠠ ᠪᠠᠲᠤ ᠪᠡᠬᠢ ᠭᠡᠬᠦ ᠶᠠᠭᠤ ᠪᠢᠯᠡ? ᠨᠠᠢ᠍ᠮᠠᠨ ᠨᠤᠭᠤᠳ ᠨᠠᠮᠠ ᠶ᠋ᠢ ᠦᠷᠭᠦᠯᠵᠢ ᠲᠦᠭᠰᠢᠶᠡᠳᠡᠭ᠃ ᠡᠢᠮᠦ ᠡᠴᠡ ᠮᠡᠷᠭᠢᠳ ᠲᠡᠢ ᠦᠷᠭᠦᠯᠵᠢᠯᠡᠭᠦᠯᠦᠨ ᠳᠠᠢᠳᠤᠬᠤ ᠠ᠋ᠴᠠ ᠣᠭᠣᠷᠬᠤ ᠨᠢ ᠵᠥᠪ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ ᠭᠡᠪᠡᠰᠦ ᠬᠦᠦ ᠰᠡᠩᠭᠦᠮ ᠥᠨᠳᠡᠯᠵᠡᠨ《ᠠᠪᠤ ᠠ᠋》 ᠭᠡᠬᠦ ᠶ᠋ᠢ ᠲᠣᠭᠣᠷᠢᠯ ᠲᠣᠭᠣᠮᠰᠠᠷᠯᠠᠭᠰᠠᠨ ᠦᠭᠡᠢ᠄
— ᠪᠤᠴᠠᠬᠤ ᠨᠢ ᠵᠥᠪ ᠪᠤᠶᠡ ᠭᠡᠪᠡ᠃ ᠰᠡᠩᠭᠦᠮ ᠳᠠᠭᠵᠠ᠄
— ᠠᠪᠤ ᠠ᠋᠂ ᠠᠪᠤ ᠠ᠋ ᠭᠡᠬᠦ ᠳ᠋ᠦ᠍ᠨᠢ ᠡᠴᠢᠭᠡ ᠨᠢ᠄
— ᠶᠠᠭᠤ ᠭᠡᠪᠡ? ᠭᠡᠵᠦ ᠤᠴᠠᠭᠠᠷᠯᠠᠩᠭᠤᠢ ᠬᠥᠮᠥᠰᠬᠡ ᠪᠡᠨ ᠵᠠᠩᠭᠢᠳᠪᠠ᠃ ᠰᠡᠩᠭᠦᠮ᠄
— ᠲᠠ ᠠᠪᠠᠭᠠ ᠠᠬᠠ ᠲᠠᠢ ᠪᠤᠴᠠ ᠯᠠ ᠳᠠ᠃ ᠨᠠᠳᠠᠳᠤ ᠳ᠋ᠤ᠌ ᠴᠡᠷᠢᠭ ᠦ᠋ᠨ ᠢ᠋ᠶ᠋ᠡᠨ ᠬᠠᠭᠠᠰ ᠢ᠋ ᠦᠯᠡᠳᠡᠭᠡ᠃ ᠲᠡᠮᠦᠵᠢᠨ᠂ ᠵᠠᠮᠤᠬᠠ ᠠᠨᠳᠠ ᠨᠠᠷ ᠴᠦ᠍ ᠪᠠᠰᠠ ᠴᠡᠷᠢᠭ ᠬᠤᠪᠢᠶᠠᠵᠤ ᠪᠠᠢᠯᠳᠤᠬᠤ ᠨᠢ ᠪᠠᠢᠯᠳᠤᠵᠤ ᠦᠯᠡᠳᠡᠬᠦ ᠨᠢ ᠦᠯᠡᠳᠡᠵᠦ ᠪᠣᠯᠬᠤ ᠪᠢᠰᠢᠦ? ᠭᠡᠪᠡ᠃ ᠲᠣᠭᠣᠷᠢᠯ ᠬᠠᠨ《ᠬᠡᠩ》 ᠭᠡᠵᠦ ᠰᠡᠭᠦᠷᠡᠰᠦ ᠠᠯᠲᠠᠨ᠄
— ᠪᠢ ᠴᠢᠮᠠᠶ᠋ᠢ ᠴᠡᠷᠢᠭ ᠦ᠋ᠨ ᠢ᠋ᠶ᠋ᠡᠨ ᠬᠠᠭᠠᠰ ᠲᠠᠢ ᠣᠷᠬᠢᠴᠢᠬᠠᠭᠠᠳ ᠶᠠᠭᠤ ᠪᠣᠳᠣᠵᠤ ᠰᠠᠭᠤᠬᠤ ᠪᠢᠯᠡ? ᠬᠠᠨ ᠰᠢᠷᠡᠭᠡ ᠥᠪᠯᠡᠭᠦᠯᠬᠦ ᠭᠠᠭᠴᠠ ᠬᠥᠪᠡᠭᠦᠨ ᠲᠡᠢ ᠬᠥᠮᠦᠨ ᠪᠢ᠃ ᠨᠠᠰᠤ ᠮᠢᠨᠢ ᠲᠠᠪᠢ ᠭᠠᠷᠤᠯᠠ᠃ ᠮᠢᠨᠦ ᠡᠴᠢᠭᠡ ᠬᠤᠷᠴᠠᠬᠤᠰ ᠪᠣᠢᠷᠤᠭ ᠳᠥᠴᠢᠨ ᠬᠥᠪᠡᠭᠦᠨ ᠲᠡᠢ ᠪᠥᠯᠥᠭᠡ᠃ ᠲᠡᠳᠡ ᠣᠯᠠᠨ ᠡᠬᠡ ᠶ᠋ᠢᠨ ᠬᠥᠪᠡᠭᠦᠨ ᠪᠣᠯᠬᠣᠷ ᠵᠥᠷᠢᠴᠡᠯ ᠲᠡᠮᠡᠴᠡᠯ ᠡᠴᠡ ᠪᠡᠨ ᠪᠣᠯᠤᠭᠠᠳ ᠲᠤᠩ ᠴᠥᠭᠡᠨ ᠦᠯᠡᠳᠡᠵᠦ ᠭᠡᠮ᠃ ᠨᠠᠳᠠᠳᠤ ᠠᠷᠠᠢᠭᠡᠵᠦ ᠵᠠᠶᠠᠭᠠᠭᠰᠠᠨ ᠨᠢ ᠴᠢ᠃ ᠶᠠᠳᠠᠵᠤ ᠳᠥᠷᠪᠡᠨ ᠬᠥᠪᠡᠭᠦᠨ ᠲᠡᠢ ᠪᠣᠯ ᠥᠭᠡᠷᠡ ᠭᠡᠬᠦ ᠰᠠᠨ᠃ ᠪᠣᠯᠳᠠᠭ ᠦᠭᠡᠢ ᠶᠦᠮ᠂ ᠬᠦᠦ ᠮᠢᠨᠢ ᠭᠡᠪᠡᠰᠦ ᠵᠠᠮᠤᠬᠠ᠄
— ᠬᠠᠨ ᠠᠬᠠ ᠳᠠᠢᠳᠤᠬᠤ ᠳᠤᠷᠠ ᠦᠭᠡᠢ ᠪᠣᠯ ᠪᠢ ᠴᠦ᠍ ᠭᠡᠰᠡᠨ ᠳ᠋ᠡᠭᠠᠨ ᠪᠢᠰᠢᠷᠡᠶᠡ᠃ ᠨᠠᠳᠠ ᠴᠦ᠍ ᠭᠡᠰᠡᠨ ᠠᠷᠤ ᠲᠠᠯᠠ ᠪᠥᠬᠡ ᠪᠠᠲᠤ ᠭᠡᠬᠦ ᠶᠠᠭᠤᠮᠠ ᠮᠡᠬᠦᠰ᠃ ᠪᠤᠴᠠᠶᠠ᠂ ᠪᠤᠴᠠᠶᠠ ᠭᠡᠪᠡ᠃
— ᠵᠠ ᠲᠡᠭᠡᠪᠡᠯ ᠪᠤᠴᠠᠬᠤ ᠪᠠᠷ ᠰᠢᠢᠳᠬᠦ ᠰᠢᠦ ᠳᠡ᠃ ᠲᠡᠷᠡ ᠨᠢ ᠴᠦ᠍ ᠵᠥᠪ ᠪᠤᠶᠤ ᠲᠤᠭᠤᠷᠢᠯ ᠬᠠᠨ ᠳ᠋ᠦᠩᠨᠡᠯᠲᠡ ᠮᠠᠶᠢᠭᠲᠠᠢ ᠬᠡᠯᠡᠪᠡ᠃ ᠭᠠᠳᠠᠨᠠ ᠠ᠋ᠴᠠ ᠠᠭᠤᠷ ᠰᠠᠪᠰᠠᠭᠰᠠᠨ ᠬᠠᠯᠠᠭᠤᠨ ᠪᠤᠤᠵᠠ᠂ ᠵᠠᠭᠤᠰᠢ ᠣᠷᠣᠵᠤ ᠢᠷᠡᠵᠦ᠂ ᠲᠡᠳᠡ ᠬᠡᠰᠡᠭ ᠵᠠᠭᠤᠷᠠ ᠶᠠᠷᠢᠶᠠ ᠵᠠᠪᠰᠠᠷᠯᠠᠪᠠ᠃ ᠡᠨᠡ ᠬᠠᠨ ᠠ᠋ᠴᠠ ᠭᠠᠳᠠᠨᠠ ᠵᠠᠬᠠ ᠬᠠᠮᠪᠤ᠂ ᠵᠠᠮᠤᠬᠠ ᠶ᠋ᠢᠨ ᠰᠢᠳᠠᠷ ᠲᠤᠰᠠᠯᠠᠬᠤ ᠵᠠᠳᠠᠷᠠᠨ ᠤ᠋ ᠮᠣᠯᠠᠭᠯᠠᠬᠤ ᠬᠣᠶᠠᠷ ᠠᠬᠠᠮᠠᠳ ᠤ᠋ᠨ ᠲᠣᠭᠠᠨ ᠳ᠋ᠤ᠌ ᠣᠷᠣᠬᠤ ᠪᠠᠷ ᠪᠥᠯᠥᠭᠡ᠃ ᠲᠡᠢᠮᠦ ᠡᠴᠡ ᠲᠤᠭᠤᠷᠢᠯ ᠬᠠᠨ ᠬᠤᠨᠳᠠᠭᠠ ᠡᠷᠭᠦᠬᠦ ᠳ᠋ᠡᠭᠡᠨ ᠵᠥᠪᠬᠡᠨ ᠡᠨᠡ ᠬᠣᠶᠠᠷ ᠤᠷᠤᠭᠤ ᠳᠣᠬᠢᠵᠤ ᠰᠠᠷᠬᠤᠳ ᠪᠠᠯᠭᠤᠵᠤ ᠪᠠᠢᠪᠠ᠃ ᠪᠤᠰᠤᠳ ᠨᠢ ᠴᠥᠮ ᠬᠣᠷᠢ ᠬᠦᠷᠬᠦ ᠦᠭᠡᠢ ᠨᠠᠰᠤᠨ ᠤ᠋ ᠪᠠᠭᠠ ᠵᠠᠯᠠᠭᠤᠰ ᠲᠤᠯᠠ ᠠᠷᠢᠬᠢ ᠰᠠᠷᠬᠤᠳ ᠲᠤ ᠡᠬᠢᠨ ᠦ᠌ ᠬᠤᠨᠳᠠᠭᠠ ᠠ᠋ᠴᠠ ᠬᠣᠢᠰᠢ ᠠᠮᠠ ᠬᠦᠷᠭᠡᠭᠰᠡᠨ ᠦᠭᠡᠢ ᠪᠣᠯᠠᠢ᠃ ᠲᠣᠭᠣᠷᠢᠯ ᠬᠠᠨ᠄
— ᠳᠠᠷᠠᠭᠠ ᠶ᠋ᠢᠨ ᠶᠠᠷᠢᠶᠠᠨ ᠳ᠋ᠠᠭᠠᠨ ᠣᠷᠣᠬᠤ ᠤᠤ ᠳᠠ? ᠲᠡᠢᠨ ᠦ᠌ ᠣᠯᠵᠠ ᠪᠠᠨ ᠬᠡᠷᠬᠢᠨ ᠬᠤᠪᠢᠶᠠᠬᠤ ᠲᠠᠯᠠ ᠪᠠᠷ ᠶᠠᠷᠢᠯᠴᠠᠬᠤ ᠨᠢ ᠵᠦᠢ ᠪᠤᠶᠡ? ᠭᠡᠬᠦ ᠳ᠋ᠦ᠍᠄
— ᠭᠤᠷᠪᠠᠨ ᠬᠦᠴᠦᠨ ᠳ᠋ᠡᠭᠡᠨ ᠤᠤ? ᠡᠰᠡᠪᠡᠯ ᠬᠤᠪᠢ ᠲᠡᠩᠴᠡᠭᠦᠯᠬᠦ ᠤᠤ? ᠭᠡᠵᠦ ᠵᠠᠬᠠ ᠬᠠᠮᠪᠤ ᠳᠤᠤᠭᠠᠷᠪᠠ᠃
— ᠠᠯᠢ ᠨᠢ ᠴᠦ᠍ ᠪᠣᠯᠬᠤ ᠶᠤᠮ ᠭᠡᠵᠦ ᠵᠠᠮᠤᠬᠠ ᠮᠢᠰᠢᠯᠵᠡᠪᠡ᠃
ᠲᠡᠮᠦᠵᠢᠨ ᠰᠠᠭᠤᠳᠠᠯ ᠠ᠋ᠴᠠ ᠪᠠᠨ ᠪᠣᠰᠴᠤ ᠡᠮᠦᠨᠡᠬᠢ ᠲᠠᠭᠱᠠ ᠲᠠᠢ ᠠᠷᠢᠬᠢ ᠪᠠᠨ ᠡᠷᠭᠦᠨ ᠪᠠᠷᠢᠵᠤ᠄
ᠥᠴᠦᠬᠡᠨ ᠮᠢᠨᠦ ᠬᠦᠰᠡᠯ ᠪᠣᠯ
ᠡᠷᠦᠬᠡ ᠭᠡᠷ ᠢ᠋ᠶ᠋ᠡᠨ ᠪᠦᠷᠢᠨ ᠪᠣᠯᠭᠠᠬᠤ ᠪᠥᠯᠥᠭᠡ
ᠡᠴᠢᠭᠡ ᠬᠠᠨ ᠲᠣᠭᠣᠷᠢᠯ
ᠡᠷᠬᠢᠮ ᠠᠨᠳᠠ ᠵᠠᠮᠤᠬᠠ ᠨᠠᠷ
ᠡᠪ ᠬᠦᠴᠦ ᠶ᠋ᠢ ᠨᠢᠭᠡᠳᠬᠡᠵᠦ
ᠡᠷᠬᠡᠲᠦ ᠲᠩᠷᠢ ᠶ᠋ᠢᠨ ᠥᠷᠥᠰᠢᠶᠡᠯ ᠢ᠋ᠶ᠋ᠡᠷ
ᠡᠬᠡ ᠳᠡᠯᠡᠬᠡᠢ ᠶ᠋ᠢᠨ ᠢᠪᠡᠭᠡᠯ ᠢ᠋ᠶ᠋ᠡᠷ
ᠡᠷᠲᠡᠨ ᠦ᠌ ᠥᠰᠢᠶᠡᠲᠦ ᠮᠡᠷᠭᠢᠳ ᠦ᠋ᠨ
ᠡᠯᠢᠭᠡ ᠵᠢᠷᠦᠬᠡ ᠶ᠋ᠢ ᠡᠮᠲᠡᠯᠵᠦ
ᠡᠷᠬᠢᠮ ᠲᠥᠷᠥ ᠶ᠋ᠢ ᠨᠢ ᠰᠥᠨᠥᠭᠡᠵᠦ
ᠡᠵᠡᠮᠰᠢᠬᠦ ᠭᠡᠷ ᠢ᠋ ᠨᠢ ᠬᠣᠭᠣᠰᠣᠯᠠᠵᠤ
ᠡᠯᠪᠡᠭ ᠵᠦᠢᠯ ᠢ᠋ ᠨᠢ ᠣᠯᠵᠠᠯᠠᠪᠠ
ᠣᠯᠵᠠ ᠠᠰᠢᠭ ᠢ᠋ ᠬᠤᠪᠢᠶᠠᠬᠤ ᠳ᠋ᠤ᠌
ᠣᠯᠠᠨ ᠴᠥᠭᠡᠨ ᠳ᠋ᠡᠭᠡᠨ ᠲᠡᠩᠴᠡᠭᠦᠯᠦᠶᠡ ᠬᠡᠮᠡᠭᠡᠳ ᠪᠠᠷᠢᠭᠰᠠᠨ ᠪᠠᠷᠢᠭᠰᠠᠨ ᠢ᠋ᠶ᠋ᠠᠨ ᠬᠦᠷᠲᠡᠬᠦ ᠶ᠋ᠢ ᠬᠦᠰᠡᠪᠡ᠃《ᠣᠯᠠᠨ ᠴᠥᠭᠡᠨ ᠳ᠋ᠡᠭᠡᠨ》 ᠭᠡᠳᠡᠭ ᠨᠢ ᠵᠠᠬᠠ ᠬᠠᠮᠪᠤ ᠶ᠋ᠢᠨ ᠰᠠᠨᠠᠯ ᠶᠣᠰᠣᠭᠠᠷ ᠴᠡᠷᠢᠭ ᠦ᠋ᠨ ᠲᠣᠭᠠᠨ ᠳ᠋ᠠᠭᠠᠨ ᠬᠤᠪᠢᠶᠠᠶᠠ ᠭᠡᠰᠡᠨ ᠰᠠᠨᠠᠭᠠ ᠶᠤᠮ᠃ ᠲᠡᠮᠦᠵᠢᠨ ᠡᠴᠡ ᠴᠠᠭᠠᠳᠤᠭᠤᠯᠠ ᠨᠢ ᠲᠤᠰ ᠲᠤᠰ ᠲᠠᠭᠠᠨ ᠬᠣᠶᠠᠷ ᠳᠠᠭᠵᠠ ᠢᠯᠡᠭᠦᠦ ᠪᠥᠯᠥᠭᠡ᠃ ᠣᠯᠵᠠᠯᠠᠭᠰᠠᠨ ᠬᠥᠮᠦᠨ᠂ ᠮᠠᠯ᠂ ᠡᠳ᠋ ᠬᠥᠷᠥᠩᠭᠡ ᠶ᠋ᠢ ᠬᠠᠮᠢᠭᠠ ᠶᠠᠭᠠᠬᠢᠵᠤ ᠬᠤᠪᠢᠶᠠᠬᠤ ᠪᠠᠨ ᠶᠠᠷᠢᠯᠴᠠᠭᠠᠳ ᠠᠭᠤᠵᠢᠮ ᠲᠡᠨᠢᠭᠦᠨ ᠪᠣᠢᠳᠠ ᠵᠡᠯᠢᠭᠦᠳ ᠲᠠᠯᠬᠤᠨ ᠠᠷᠠᠯ ᠳ᠋ᠤ᠌ ᠪᠥᠭᠡᠮᠨᠡᠷᠡᠭᠦᠯᠦᠶᠡ ᠭᠡᠯᠴᠡᠵᠦ ᠲᠣᠭᠲᠠᠭᠠᠳ ᠲᠠᠷᠬᠠᠬᠤ ᠭᠡᠲᠡᠯᠡ ᠪᠤᠭᠤᠷᠴᠢ ᠭᠡᠷ ᠦ᠋ᠨ ᠪᠠᠷᠠᠭᠤᠨ ᠤᠷᠲᠤ ᠵᠢᠭᠦᠷ ᠡᠴᠡ ᠪᠣᠰᠴᠤ ᠮᠡᠬᠦᠢᠨ᠄
— ᠨᠠᠳᠠᠳᠤ ᠠᠢᠯᠠᠳᠬᠠᠬᠤ ᠦᠭᠡ ᠪᠠᠢᠨᠠ ᠭᠡᠮᠡᠨ ᠮᠡᠬᠦᠢᠬᠦ ᠳ᠋ᠦ᠍ᠨᠢ᠄
— ᠠᠢᠯᠠᠳᠬᠠ᠂ ᠠᠢᠯᠠᠳᠬᠠ! ᠭᠡᠯᠴᠡᠪᠡ᠃
— ᠡᠨᠡ ᠬᠦᠷᠢᠶᠡᠨ ᠳᠤᠮᠳᠠᠭᠤᠷ ᠶᠠᠪᠤᠬᠤ ᠳ᠋ᠤ᠌ ᠠᠯᠠᠭᠳᠠᠭᠰᠠᠨ ᠴᠡᠷᠢᠭ ᠢᠷᠭᠡᠳ ᠦ᠋ᠨ ᠬᠡᠭᠦᠷ ᠣᠯᠠᠨ ᠪᠣᠢ᠃ ᠪᠤᠰᠤᠳ ᠬᠦᠷᠢᠶᠡᠨ ᠳ᠋ᠦ᠍ ᠴᠦ᠍ ᠪᠠᠢᠵᠤ ᠯᠠ ᠲᠠᠭᠠᠷᠠᠨᠠ᠃ ᠲᠡᠭᠦᠨ ᠢ᠋ ᠶᠠᠭᠠᠬᠢᠬᠤ ᠪᠣᠢ? ᠭᠡᠷ ᠣᠷᠣᠨ ᠢ᠋ ᠨᠢ ᠠᠴᠢᠭᠠᠳ ᠬᠥᠳᠡᠯᠬᠦ ᠳ᠋ᠦ᠍ ᠵᠤᠳ ᠲᠤ᠌ ᠦᠬᠦᠭᠰᠡᠨ ᠮᠠᠯ ᠤ᠋ᠨ ᠰᠡᠭ ᠰᠢᠭ ᠨᠤᠲᠤᠭ ᠳᠡᠭᠡᠷᠡ ᠪᠡᠨ ᠦᠯᠡᠳᠡᠬᠦ ᠡᠪ ᠦᠭᠡᠢ ᠶᠦᠮ᠃ ᠡᠳᠡ ᠨᠠᠷ ᠴᠢᠨᠢ ᠬᠥᠮᠦᠨ ᠶᠦᠮ ᠳᠡ᠃ ᠠᠮᠢᠳᠤ ᠪᠠᠷ ᠦᠬᠦᠭᠰᠡᠨ ᠢ᠋ ᠨᠢ ᠣᠷᠣᠰᠢᠭᠤᠯᠪᠠᠯ ᠵᠣᠬᠢᠯᠲᠠᠢ ᠪᠤᠰᠤ ᠤᠤ? ᠭᠡᠪᠡᠯ᠄
— ᠥ᠂ ᠲᠡᠷᠡ ᠵᠥᠪ! ᠭᠡᠯᠴᠡᠵᠦ ᠲᠠᠷᠬᠠᠪᠠ᠃