ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ- ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ᠂ᠭᠤᠷᠪᠠᠳᠤᠭᠠᠷ ᠪᠦᠯᠦᠭ 〔ᠬᠣᠷᠢᠨ ᠨᠢᠭᠡ〕 Цаг төрийн үймээн – Д ᠂ Намдаг - Цаг төрийн үймээн ᠂ гуравдугаар бүлэг - 21
56ᠡᠨᠡ ᠵᠠᠭᠤᠷᠠ ᠶᠠᠭᠤ ᠪᠣᠯᠪᠠ
ᠡᠳᠦᠷ ᠦ᠋ᠨ ᠬᠠᠯᠠᠭᠤᠨ《ᠰᠢᠨᠧᠯ》 ᠬᠡᠮᠡᠬᠦ ᠠᠷᠤ ᠳ᠋ᠠᠭᠠᠨ ᠣᠨᠣᠭᠣᠲᠠᠢ ᠤᠷᠢ ᠥᠷᠮᠥᠭ ᠳᠠᠨᠽᠠᠨ ᠳᠡᠪᠡᠯ ᠢ᠋ᠶ᠋ᠡᠨ ᠲᠣᠨᠲᠣᠢᠯᠭᠠᠨ ᠴᠡᠭᠡᠵᠢᠨ ᠪᠡᠶᠡ ᠳ᠋ᠡᠭᠡᠨ ᠣᠷᠢᠶᠠᠨ ᠪᠠᠭᠯᠠᠵᠤ ᠫᠤᠤ ᠪᠠᠨ ᠮᠥᠷᠥᠪᠴᠢᠯᠡᠨ ᠵᠢᠷᠤᠮᠲᠤ ᠴᠡᠷᠢᠭ ᠦ᠋ᠨ ᠮᠣᠷᠢᠲᠠᠨ ᠠᠩᠭᠢ ᠲᠠᠢ ᠠᠨᠠ ᠮᠠᠨᠠ ᠭᠢᠰᠬᠢᠯᠡᠨ ᠶᠠᠪᠤᠨᠠ᠃
ᠡᠮᠦᠨᠡᠬᠢ ᠵᠠᠮ ᠤ᠋ᠨ ᠳᠠᠢᠰᠤᠨ ᠨᠤᠭᠤᠳ ᠠ᠋ᠴᠠ ᠰᠡᠷᠭᠡᠢᠯᠡᠭᠰᠡᠨ ᠬᠠᠢᠭᠤᠯ ᠤ᠋ᠳ ᠪᠤᠶᠤ ᠬᠠᠵᠠᠭᠤ ᠬᠠᠪᠢᠷᠭᠠ ᠶ᠋ᠢ ᠰᠡᠷᠭᠡᠢᠯᠡᠬᠦ ᠳ᠋ᠦ᠍ ᠭᠠᠷᠤᠭᠰᠠᠨ ᠣᠷᠣᠰ ᠴᠡᠷᠢᠭ ᠦ᠋ᠳ ᠡᠴᠡ ᠮᠣᠩᠭᠣᠯ ᠠᠢᠯ ᠤ᠋ᠳ ᠤᠷᠤᠭᠤ ᠣᠴᠢᠬᠤ ᠳ᠋ᠤ᠌᠂ ᠣᠷᠣᠰ ᠯᠠ ᠭᠡᠪᠡᠯ ᠪᠠᠷᠤᠨ ᠣᠩᠭᠸᠷᠠᠨ ᠤ᠋ ᠬᠢᠨ ᠰᠢᠭ ᠢ᠋ᠶ᠋ᠡᠷ ᠦᠵᠡᠬᠦ ᠪᠣᠯᠤᠭᠰᠠᠨ ᠬᠥᠮᠦᠰ᠄《ᠣᠷᠣᠰ ᠣᠷᠣᠰ》 ᠭᠡᠵᠦ ᠠᠶᠤᠨ ᠱᠤᠤᠭᠢᠯᠳᠤᠭᠠᠳ ᠬᠦᠷᠦᠯᠴᠡᠨ ᠢᠷᠡᠵᠦ ᠤᠤᠭᠤᠬᠤ ᠶᠠᠭᠤᠮᠠ ᠭᠤᠶᠤᠬᠤ ᠳ᠋ᠤᠨᠢ ᠠᠶᠤᠬᠤ ᠪᠠᠨ ᠪᠠᠢᠨ ᠭᠠᠢᠬᠠᠭᠠᠳ᠂ ᠰᠦ ᠲᠠᠷᠠᠭ ᠠ᠋ᠴᠠ ᠪᠠᠨ ᠡᠬᠢᠯᠡᠨ ᠥᠪᠡᠷᠰᠡᠳ ᠦ᠋ᠨ ᠢ᠋ᠶ᠋ᠡᠨ ᠠᠯᠢ ᠡᠷᠬᠢᠮᠯᠡᠳᠡᠭ ᠢ᠋ᠶ᠋ᠡᠷ ᠵᠣᠴᠢᠯᠠᠨᠠ᠃ ᠣᠴᠢᠭᠰᠠᠨ ᠣᠷᠣᠰ ᠴᠡᠷᠢᠭ ᠬᠠᠷᠢᠭᠤ ᠪᠠᠶᠠᠷᠯᠠᠭᠰᠠᠨ ᠢ᠋ᠶ᠋ᠠᠨ ᠭᠠᠷ ᠬᠤᠷᠤᠭᠤᠨ ᠤ᠋ ᠪᠠᠨ ᠳᠣᠬᠢᠶᠠ ᠪᠠᠷ ᠡᠷᠭᠦᠨ ᠬᠠᠮᠤᠭ ᠲᠦᠷᠦᠭᠦᠨ ᠭᠦᠶᠦᠯᠳᠦᠨ ᠢᠷᠡᠭᠰᠡᠨ ᠡᠯᠢᠭᠡᠨ ᠲᠠᠯᠠ ᠪᠠᠨ ᠴᠠᠭᠠᠨ ᠢᠳᠡᠭᠡ ᠪᠡᠷ ᠬᠠᠯᠲᠠᠷᠳᠠᠭᠤᠯᠤᠭᠰᠠᠨ ᠳᠡᠪᠡᠯ ᠲᠡᠢ᠂ ᠳᠡᠪᠡᠯ ᠦᠭᠡᠢ ᠪᠢᠴᠢᠬᠠᠨ ᠪᠠᠭᠠᠴᠤᠳ ᠲᠤᠨᠢ ᠫᠤᠤᠳᠠᠭᠰᠠᠨ ᠰᠤᠮᠤ ᠶ᠋ᠢᠨ ᠢ᠋ᠶ᠋ᠡᠨ ᠬᠥᠨᠳᠡᠢ ᠬᠣᠩᠬᠢᠶᠠ ᠪᠡᠯᠡᠭᠯᠡᠨ ᠶᠠᠪᠤᠨᠠ᠃ ᠠᠷᠤ ᠳ᠋ᠤᠨᠢ ᠪᠠᠶᠠᠷᠯᠠᠭᠰᠠᠨ ᠬᠡᠦᠬᠡᠳ ᠲᠡᠭᠠᠨ ᠨᠣᠬᠠᠢ ᠬᠣᠷᠢᠵᠤ ᠥᠭᠭᠦᠨᠡ᠃ ᠡᠮᠡᠭᠡᠳ ᠬᠥᠭᠰᠢᠳ《ᠡᠰᠢ ᠬᠥᠭᠡᠷᠦᠬᠦᠢ》 ᠭᠡᠵᠦ ᠳᠠᠭᠤ ᠠᠯᠲᠠᠨ ᠠᠷᠤ ᠳ᠋ᠠᠭᠠᠨ ᠠᠪᠤ ᠲᠠᠢ ᠡᠬᠡ ᠲᠡᠢ᠂ ᠭᠡᠷ ᠣᠷᠣᠨ᠂ ᠠᠬᠠ ᠳᠡᠭᠦᠦ ᠨᠠᠷ ᠲᠠᠢ ᠠᠮᠢᠲᠠᠨ ᠤ᠋ ᠦᠷᠡ ᠶᠠᠪᠤᠭᠠ ᠨᠢ ᠮᠡᠳᠡᠭᠡᠵᠢ ᠶ᠋ᠢᠨ ᠬᠡᠷᠡᠭ ᠭᠡᠵᠦ ᠨᠢᠳᠦᠨ ᠦ᠌ ᠨᠢᠯᠪᠤᠰᠤ ᠳᠤᠰᠤᠯᠠᠭᠤᠯᠤᠭᠠᠳ᠂ ᠢᠷᠡᠭᠡᠳᠦᠢ ᠶ᠋ᠢᠨ ᠦᠢᠯᠡ ᠬᠡᠷᠡᠭ ᠰᠦ ᠴᠠᠭᠠᠨ ᠪᠠᠢᠲᠤᠭᠠᠢ ᠭᠡᠵᠦ ᠰᠦ ᠡᠷᠭᠦᠨᠡ᠃ ᠬᠣᠢᠰᠢᠳᠠ ᠪᠠᠨ ᠤᠯᠠᠭᠠᠨ ᠠᠷᠮᠢ ᠶ᠋ᠢᠨ ᠬᠢᠨ ᠡᠴᠡ ᠢᠷᠡᠨᠡ ᠪᠠᠢᠬᠤ ᠭᠡᠵᠦ ᠰᠦ ᠪᠡᠨ ᠪᠡᠯᠡᠳᠬᠡᠨ ᠵᠡᠬᠡᠨᠡ᠃ ᠬᠡᠷᠪᠡ ᠬᠣᠷᠢ ᠭᠤᠴᠢᠭᠠᠳ ᠢᠷᠡᠪᠡᠯ ᠨᠢᠭᠡ ᠬᠣᠲᠠ ᠶ᠋ᠢᠨ ᠠᠢᠯ ᠡᠯᠪᠡᠭ ᠬᠠᠩᠭᠠᠵᠤ ᠴᠢᠳᠠᠨᠠ᠃ ᠳᠥᠴᠢ ᠲᠠᠪᠢ ᠶ᠋ᠢ ᠴᠦ᠍ ᠴᠢᠳᠠᠨᠠ᠃ ᠬᠠᠷᠢᠨ ᠳᠠᠯᠠ ᠨᠠᠶᠠ ᠪᠠᠷ ᠢᠷᠡᠪᠡᠯ ᠠᠷᠭᠠ ᠪᠤᠶᠤ ᠦᠨᠢᠶᠡ ᠮᠠᠯ ᠢ᠋ᠶ᠋ᠠᠨ ᠬᠥᠭᠡᠭᠡᠵᠦ ᠠᠪᠴᠢᠷᠠᠬᠤ ᠳ᠋ᠤ᠌ ᠬᠦᠷᠬᠦ ᠪᠣᠢ ᠊ᠶᠡ᠃ ᠭᠡᠲᠡᠯᠡ ᠤᠯᠠᠭᠠᠨ ᠠᠷᠮᠢ ᠶ᠋ᠢᠨ ᠬᠢᠨ ᠠᠢᠯ ᠤ᠋ᠳ ᠢᠶᠠᠷ ᠣᠷᠣᠬᠤ ᠨᠢ ᠲᠤᠩ ᠬᠣᠪᠣᠷ᠂ ᠣᠯᠠᠭᠤᠯᠠ ᠪᠠᠨ ᠪᠣᠯ ᠪᠦᠷ ᠴᠦ᠍ ᠦᠭᠡᠢ᠂ ᠭᠠᠭᠴᠠᠬᠠᠨ ᠵᠢᠷᠤᠮᠲᠤ ᠴᠡᠷᠢᠭ ᠦ᠋ᠳ ᠲᠡᠢ ᠮᠥᠷᠥ ᠵᠡᠷᠭᠡᠴᠡᠨ ᠶᠠᠪᠤᠭᠠ ᠶ᠋ᠢᠨ ᠢ᠋ᠶ᠋ᠡᠨ ᠬᠤᠪᠢ ᠳ᠋ᠤ᠌ ᠶᠠᠮᠠᠷ ᠨᠢᠭᠡ ᠵᠥᠪ ᠵᠠᠪᠰᠢᠶᠠᠨ ᠭᠠᠷᠪᠠᠯ ᠬᠦᠷᠦᠯᠴᠡᠨ ᠠᠭᠤᠯᠵᠠᠯᠳᠤᠬᠤ ᠨᠢ ᠮᠠᠰᠢ ᠣᠯᠠᠨ᠃ ᠲᠡᠭᠡᠬᠦ ᠳ᠋ᠡᠭᠡᠨ ᠬᠡᠨ ᠨᠢ ᠪᠣᠯᠪᠠᠴᠤ ᠨᠢᠭᠡ ᠵᠦᠢᠯ ᠢ᠋ ᠡᠷᠢᠬᠦ ᠶ᠋ᠢᠨ ᠡᠭᠦᠳᠡ ᠡᠴᠡ ᠪᠢᠰᠢ᠂ ᠪᠦᠳᠦᠭᠦᠨ ᠰᠢᠷᠬᠡᠭᠲᠦ ᠮᠠᠬᠤᠷ ᠬᠡᠮᠡᠬᠦ ᠲᠠᠮᠠᠬᠢ ᠪᠠᠷ ᠢ᠋ᠶ᠋ᠠᠨ ᠵᠣᠴᠢᠯᠠᠬᠤ ᠪᠠ ᠲᠠᠨᠢᠯᠴᠠᠬᠤ᠂ ᠢᠷᠡᠩᠭᠦᠲᠡ ᠪᠡᠨ ᠪᠠᠶᠠᠷ ᠪᠠᠬᠠᠳᠤᠯ ᠲᠠᠢ ᠪᠠᠷ ᠢᠨᠢᠶᠡᠨ《ᠳ᠋ᠷᠠᠰ᠂ ᠪᠷᠢᠰ》 ᠥᠭᠦᠯᠡᠨ ᠭᠠᠷ ᠢ᠋ᠶ᠋ᠠᠨ ᠰᠤᠩᠭᠠᠨ ᠪᠠᠷᠠᠭᠤᠨ ᠭᠠᠷ ᠢ᠋ ᠴᠢᠩᠭᠠᠳᠠ ᠠᠳᠬᠤᠭᠠᠳ ᠪᠣᠷᠣ ᠨᠣᠭᠣᠭᠠᠨ ᠳᠠᠪᠤᠤ ᠴᠠᠮᠴᠠ ᠶ᠋ᠢᠨ ᠢ᠋ᠶ᠋ᠡᠨ ᠳᠡᠭᠡᠳᠦ ᠡᠩᠭᠡᠷ ᠦ᠋ᠨ ᠤᠭᠤᠲᠠ ᠰᠠᠪᠠ ᠠ᠋ᠴᠠ ᠵᠤᠷᠪᠤᠰ ᠴᠠᠭᠠᠰᠤ ᠭᠠᠷᠭᠠᠨ ᠪᠠᠷᠢᠭᠤᠯᠤᠭᠠᠳ ᠳᠡᠭᠡᠷᠡ ᠡᠴᠡ ᠨᠢ ᠪᠦᠳᠦᠭᠦᠨ ᠰᠢᠷᠬᠡᠭᠲᠦ ᠮᠠᠬᠤᠷ ᠠ᠋ᠴᠠ ᠪᠠᠨ ᠴᠢᠮᠬᠢᠨ ᠠᠪᠴᠤ ᠫᠢᠵᠢᠭᠢᠨᠡᠭᠦᠯᠦᠨ ᠠᠰᠠᠭᠠᠨᠠ᠃ ᠥᠪᠡᠷ ᠢ᠋ᠶ᠋ᠡᠨ ᠲᠡᠷᠡ ᠲᠠᠮᠠᠬᠢ ᠶ᠋ᠢ ᠪᠣᠷᠣᠯᠠᠭᠤᠯᠬᠤ ᠳ᠋ᠠᠭᠠᠨ ᠲᠤᠩ ᠴᠢᠳᠠᠮᠠᠭᠠᠢ᠂ ᠴᠠᠭᠠᠰᠤᠨ ᠤ᠋ ᠨᠢᠭᠡ ᠵᠠᠬᠠ ᠶ᠋ᠢ ᠬᠡᠯᠡᠨ ᠦ᠌ ᠪᠡᠨ ᠦᠵᠦᠭᠦᠷ ᠢ᠋ᠶ᠋ᠡᠷ ᠰᠢᠯᠡᠮᠡᠳᠡᠨ ᠭᠠᠭᠴᠠᠬᠠᠨ ᠢᠮᠡᠷᠬᠦ ᠳ᠋ᠡᠭᠡᠨ ᠱᠠᠪ ᠬᠢᠭᠰᠡᠨ ᠶᠠᠩᠵᠤᠤᠷ ᠪᠣᠯᠭᠠᠨᠠ᠃ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠬᠢᠭᠰᠡᠨ ᠲᠡᠷᠡ ᠶᠠᠩᠵᠤᠤᠷ ᠢ᠋ ᠲᠠᠲᠠᠬᠤ ᠵᠠᠭᠤᠷᠠ ᠨᠠᠢᠷᠰᠠᠭ ᠳᠣᠲᠣᠨᠣ ᠶ᠋ᠢᠨ ᠰᠡᠳᠬᠢᠯ ᠢ᠋ᠶ᠋ᠡᠷ ᠣᠯᠠᠨ ᠢ᠋ ᠶᠠᠷᠢᠨᠠ᠃ ᠡᠮᠦᠨᠡ ᠪᠡᠨ ᠬᠡᠯᠡ ᠮᠡᠳᠡᠬᠦ ᠦᠭᠡᠢ ᠬᠥᠮᠦᠨ ᠪᠠᠢᠭᠠ ᠶ᠋ᠢ ᠰᠠᠢᠨ ᠮᠡᠳᠡᠵᠦ ᠪᠠᠢᠪᠠᠴᠤ ᠶᠠᠷᠢᠨᠠ᠃
ᠭᠡᠪᠡᠴᠦ ᠵᠢᠷᠤᠮᠲᠤ ᠴᠡᠷᠢᠭ ᠦ᠋ᠨ ᠲᠦᠷᠦᠭᠦᠨ ᠪᠠᠷᠤᠨ ᠤᠩᠬᠸᠷᠡᠨ ᠢ᠋ ᠬᠠᠮᠲᠤᠷᠠᠨ ᠴᠣᠬᠢᠭᠰᠠᠨ ᠤ᠋ ᠳᠠᠷᠠᠭᠠᠬᠠᠨ ᠲᠠᠢ ᠠᠩᠬᠠ ᠤᠳᠠᠭᠠ ᠶ᠋ᠢᠨ ᠠᠭᠤᠯᠵᠠᠯᠳᠤᠬᠤ ᠶᠡᠬᠡ ᠪᠠᠶᠠᠷ ᠳᠡᠭᠡᠷᠡ ᠮᠥᠨ ᠡᠢᠨᠬᠦ ᠶᠠᠷᠢᠭᠰᠠᠨ ᠢ᠋ ᠬᠡᠯᠡᠮᠥᠷᠴᠢᠨ ᠣᠷᠴᠢᠭᠤᠯᠤᠭᠰᠠᠨ ᠢ᠋ᠶ᠋ᠠᠷ《ᠲᠠᠨ ᠤ᠋ ᠤᠯᠤᠰ ᠲᠤᠰᠠᠭᠠᠷ ᠲᠣᠭᠲᠠᠨᠢᠨᠠ᠃ ᠠᠷᠠᠳ ᠲᠦᠮᠡᠨ ᠴᠢᠨᠢ ᠴᠥᠮ ᠡᠷᠬᠡ ᠴᠢᠯᠥᠭᠡ ᠣᠯᠵᠤ᠂ ᠰᠢᠨᠡ ᠶᠣᠰᠣ᠂ ᠰᠢᠨᠡ ᠵᠠᠮ ᠢ᠋ᠶ᠋ᠠᠷ ᠰᠠᠢᠬᠠᠨ ᠬᠥᠭᠵᠢᠨᠡ᠃ ᠯᠧᠨᠢᠨ ᠢ᠋ ᠮᠡᠳᠡᠨᠡ ᠤᠤ? ᠪᠢᠳᠡᠨ ᠢ᠋ ᠯᠧᠨᠢᠨ ᠲᠠ ᠨᠠᠷ ᠲᠤ ᠲᠤᠰᠠᠯᠠ ᠭᠡᠵᠦ ᠶᠠᠪᠤᠭᠤᠯᠤᠭᠰᠠᠨ ᠶᠤᠮ ᠰᠢᠦ》 ᠭᠡᠵᠦ ᠪᠠᠢᠨᠠ ᠭᠡᠵᠦ ᠣᠢᠯᠠᠭᠠᠭᠤᠯᠤᠭᠰᠠᠨ ᠢ᠋ᠶ᠋ᠠᠷ ᠣᠢᠯᠠᠭᠠᠨ《ᠠ᠂ ᠵᠠ᠂ ᠵᠠ》 ᠭᠡᠵᠦ ᠲᠣᠯᠣᠭᠠᠢ ᠳᠣᠬᠢᠨ ᠢᠨᠢᠶᠡᠨᠡ᠃
ᠠᠷᠠᠳ ᠤ᠋ᠨ ᠵᠢᠷᠤᠮᠲᠤ ᠴᠡᠷᠢᠭ ᠦ᠋ᠳ ᠦ᠋ᠨ ᠮᠠᠩᠯᠠᠢ ᠳ᠋ᠤ᠌ ᠰᠦᠬᠡᠪᠠᠭᠠᠲᠤᠷ᠂ ᠪᠣᠳᠤᠤ ᠲᠦᠷᠦᠭᠦᠦ ᠲᠡᠢ ᠬᠡᠰᠡᠭ ᠤᠯᠤᠰ ᠶᠠᠪᠤᠭᠠ ᠪᠢᠯᠡ᠃ ᠲᠤᠬᠠᠢᠯᠠᠪᠠᠯ ᠲᠡᠳᠡᠨ ᠦ᠌ ᠳᠤᠮᠳᠠ ᠪᠠᠯᠳᠠᠨᠴᠡᠷᠢᠩ ᠡᠪᠦᠷ ᠲᠡᠭᠡᠨ ᠮᠥᠩᠭᠥᠨ ᠳᠤᠭᠲᠤᠢᠲᠤ ᠬᠣᠣᠰ ᠪᠢᠷ᠂ ᠲᠣᠮᠣ ᠭᠠᠤᠯᠢᠨ ᠶᠠᠩᠲᠠᠢ ᠲᠠᠢ ᠪᠥᠭᠡᠳ ᠠᠷᠤ ᠳ᠋ᠤ᠌ ᠪᠠᠨ ᠲᠣᠮᠣ ᠸᠠᠳᠠᠩ ᠲᠠᠢ ᠠᠯᠪᠠᠨ ᠪᠢᠴᠢᠭ ᠪᠦᠰᠡᠯᠡᠵᠡᠢ᠃ ᠰᠡᠳᠬᠢᠯ ᠦ᠋ᠨ ᠪᠠᠢᠳᠠᠯ ᠮᠠᠰᠢ ᠲᠡᠨᠢᠭᠦᠨ᠂ ᠡᠷᠡ ᠬᠥᠮᠦᠨ ᠪᠣᠯᠵᠤ ᠡᠯᠳᠡᠪ ᠢ᠋ ᠵᠣᠷᠢᠨ ᠶᠠᠪᠤᠭᠰᠠᠨ ᠤ᠋ ᠡᠴᠦᠰ ᠦ᠋ᠨ ᠵᠣᠷᠢᠯᠭᠠ ᠠᠱ᠌ᠢᠭᠦᠢ ᠨᠢᠭᠡ ᠵᠥᠪᠲᠦᠨ᠂ ᠵᠢᠪᠬᠤᠯᠠᠩᠲᠠᠢ ᠪᠡᠶᠡᠯᠡᠭᠰᠡᠨ ᠢ᠋ ᠬᠤᠪᠢ ᠵᠠᠶᠠᠭᠠ ᠭᠡᠵᠦ ᠪᠣᠳᠣᠨᠠ᠃ ᠬᠣᠶᠠᠷ ᠲᠤ᠂ ᠥᠪᠡᠷ ᠦ᠋ᠨ ᠳᠤᠷᠠ ᠮᠡᠳᠡᠨ ᠳᠠᠭᠠᠭᠤᠯᠤᠨ ᠭᠠᠷᠤᠭᠰᠠᠨ ᠠᠷᠪᠠᠭᠠᠢ ᠶ᠋ᠢᠨ ᠢ᠋ᠶ᠋ᠡᠨ ᠤᠳᠠᠭᠠ ᠳᠠᠷᠠᠭᠠ ᠶ᠋ᠢᠨ ᠲᠡᠢᠨ ᠢ᠋ ᠠᠮᠢ ᠪᠡᠶᠡ ᠮᠡᠨᠳᠦ ᠪᠡᠷ ᠪᠠᠷᠠᠬᠤ ᠦᠭᠡᠢ᠂ ᠨᠡᠷᠡ ᠲᠥᠷᠥ ᠲᠡᠢ ᠳᠠᠪᠠᠨ ᠲᠤᠭᠤᠯᠤᠭᠰᠠᠨ ᠢ᠋ ᠮᠥᠨ ᠲᠡᠭᠦᠨ ᠦ᠌ ᠬᠤᠪᠢ ᠵᠠᠶᠠᠭᠠ ᠭᠡᠵᠦ ᠦᠵᠡᠨ ᠪᠠᠶᠠᠷᠯᠠᠨᠠ᠃
ᠡᠭᠦᠨᠴᠢᠯᠡᠨ ᠪᠠᠯᠳᠠᠨᠴᠡᠷᠢᠩ᠂ ᠬᠥᠮᠦᠨ ᠪᠦᠷᠢ ᠶ᠋ᠢᠨ ᠲᠡᠭᠦᠰᠬᠡᠯ ᠦ᠋ᠨ ᠬᠤᠪᠢ ᠵᠠᠶᠠᠭᠠ ᠳᠡᠭᠡᠷᠡ ᠠᠪᠠᠴᠢᠨ ᠪᠣᠳᠣᠵᠤ ᠦᠵᠡᠬᠦ ᠳ᠋ᠦ᠍ ᠪᠠᠷᠤᠨ ᠤᠩᠬᠸᠷᠡᠨ ᠦ᠌ ᠬᠢᠨ ᠰᠢᠭ ᠭᠤᠨᠢᠭᠲᠤ ᠬᠤᠪᠢ ᠵᠠᠶᠠᠭᠠ ᠦᠭᠡᠢ ᠠᠵᠢ᠃ ᠪᠠᠷᠤᠨ ᠤᠩᠬᠸᠷᠡᠨ ᠪᠣᠯ ᠶᠡᠷᠦ ᠪᠢᠰᠢ ᠶ᠋ᠢᠨ ᠬᠥᠮᠦᠨ᠃ ᠶᠡᠷᠦ ᠪᠢᠰᠢ ᠪᠡᠷ ᠢ᠋ᠶ᠋ᠡᠨ ᠴᠦ᠍ ᠪᠣᠭᠳᠠ ᠶ᠋ᠢᠨ ᠬᠦᠷᠢᠶᠡ ᠶ᠋ᠢ ᠡᠵᠡᠮᠰᠢᠵᠦ ᠪᠠᠢᠭᠰᠠᠨ ᠠᠷᠪᠠᠨ ᠮᠢᠩᠭᠠᠨ ᠭᠠᠮᠢᠩ ᠢ᠋ ᠪᠤᠲᠠ ᠴᠣᠬᠢᠭᠰᠠᠨ᠂ ᠬᠣᠷᠢᠨ ᠮᠢᠩᠭᠠ ᠪᠠᠢᠯᠠ ᠴᠦ᠍ ᠭᠡᠰᠡᠨ ᠥᠭᠡᠷᠡ ᠴᠦ᠍ ᠦᠭᠡᠢ ᠪᠠᠷᠰ ᠮᠡᠲᠦ ᠪᠠᠷᠢᠵᠤ ᠢᠳᠡᠬᠦ ᠪᠠᠢᠯᠠ᠃ ᠲᠡᠭᠡᠭᠡᠳ ᠮᠥᠨ ᠶᠡᠷᠦ ᠪᠤᠰᠤ ᠶ᠋ᠢᠨ ᠪᠢᠰᠢ ᠪᠡᠷ ᠢ᠋ᠶ᠋ᠡᠨ ᠮᠣᠩᠭᠣᠯ ᠣᠷᠣᠨ ᠢ᠋ ᠲᠡᠷᠡ ᠠᠶᠠ ᠪᠠᠷ ᠥᠪᠡᠷ ᠲᠡᠭᠡᠨ ᠲᠡᠳᠡᠨ ᠠᠪᠴᠤ ᠴᠢᠳᠠᠪᠠ᠃ ᠭᠡᠲᠡᠯᠡ ᠴᠣᠬᠣᠮ ᠬᠦ᠌ ᠡᠴᠦᠰ ᠨᠢ ᠭᠡᠪᠡᠯ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ᠃ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠡᠷᠢᠨ ᠰᠢᠯᠢᠵᠦ ᠳᠠᠷᠢ ᠡᠬᠡ ᠯᠠᠮᠠ ᠨᠢ ᠬᠡᠷᠡᠭ ᠪᠢᠰᠢᠳᠡᠭᠰᠡᠨ ᠢ᠋ ᠮᠡᠳᠡᠬᠦ ᠲᠡᠢ ᠪᠡᠨ ᠵᠡᠷᠭᠡ ᠬᠠᠶᠠᠨ ᠵᠢᠭᠤᠳᠠᠵᠠᠢ᠃ ᠲᠡᠭᠦᠪᠡᠷ ᠦᠯᠦ ᠪᠠᠷᠠᠮ ᠮᠥᠨ ᠥᠪᠡᠷ ᠦ᠋ᠨ ᠥᠪᠡᠷ ᠦ᠋ᠨ ᠬᠢᠨᠢ ᠰᠣᠩᠭᠣᠨ ᠡᠷᠢᠵᠦ ᠣᠯᠤᠭᠰᠠᠨ ᠰᠤᠩᠳᠣᠢ ᠬᠦᠩ ᠬᠠᠷᠢᠨ ᠥᠪᠡᠷ ᠢ᠋ ᠨᠢ ᠪᠠᠷᠢᠵᠤ ᠠᠪᠤᠨ ᠵᠥᠪᠯᠡᠯᠲᠦ ᠶ᠋ᠢᠨ ᠠᠷᠮᠢ ᠳ᠋ᠤ᠌ ᠲᠤᠰᠢᠶᠠᠭᠰᠠᠨ ᠪᠠᠢᠬᠤ ᠪᠥᠭᠡᠳ ᠦᠨᠡᠨ ᠴᠢᠨᠠᠷ ᠲᠠᠭᠠᠨ ᠭᠡᠪᠡᠯ ᠪᠠᠷᠤᠨ ᠤᠩᠬᠸᠷᠡᠨ ᠬᠤᠪᠢ ᠵᠠᠶᠠᠭᠠ ᠪᠠᠨ ᠬᠡᠷᠬᠢᠨ ᠲᠡᠭᠦᠰᠬᠡᠬᠦ ᠶ᠋ᠢ ᠵᠥᠪᠬᠡᠨ ᠥᠪᠡᠷ ᠢ᠋ᠶ᠋ᠡᠨ ᠡᠷᠢᠨ ᠰᠤᠷᠪᠤᠯᠵᠢᠯᠠᠵᠤ ᠪᠦᠷᠢᠯᠳᠦᠭᠦᠯᠦᠭᠰᠡᠨ ᠡᠴᠡ ᠥᠭᠡᠷᠡ ᠶᠠᠭᠤ ᠴᠦ᠍ ᠦᠭᠡᠢ ᠪᠣᠯᠵᠠᠢ᠃
ᠡᠳᠦᠭᠡ ᠬᠢᠶᠠᠭᠲᠤ(ᠠᠯᠲᠠᠨᠪᠤᠯᠠᠭ) ᠠ᠋ᠴᠠ ᠬᠦᠷᠢᠶᠡ ᠴᠢᠭᠯᠡᠨ ᠶᠠᠪᠤᠭᠠ ᠵᠢᠷᠤᠮᠲᠤ ᠴᠡᠷᠢᠭ ᠦ᠋ᠳ ᠦ᠋ᠨ ᠥᠷᠯᠥᠭᠡ ᠪᠦᠷᠢ ᠮᠣᠷᠲᠠᠨ ᠬᠥᠳᠡᠯᠬᠦ ᠳ᠋ᠦ᠍ ᠥᠭᠡᠳᠡ ᠡᠴᠡ ᠨᠢ ᠨᠠᠷᠠᠨ ᠤ᠋ ᠲᠤᠰᠬᠠᠯ ᠡᠯᠢᠭᠡᠨ ᠲᠠᠯᠠ ᠠ᠋ᠴᠠ ᠨᠢ ᠤᠭᠲᠤᠨ ᠲᠤᠰᠬᠤ ᠳ᠋ᠤ᠌ ᠪᠠᠯᠳᠠᠨᠴᠡᠷᠢᠩ《ᠨᠠᠷᠠ ᠪᠢᠳᠠᠨ ᠢ ᠤᠭᠲᠤᠪᠠ》 ᠭᠡᠵᠦ ᠰᠡᠳᠬᠢᠯ ᠲᠠᠭᠠᠯᠠᠨᠠ᠃ ᠣᠷᠣᠢ ᠠᠷᠤ ᠲᠠᠯᠠ ᠠ᠋ᠴᠠ ᠡᠭᠡᠭᠡᠨ ᠡᠭᠡᠭᠡᠭᠰᠡᠭᠡᠷ ᠰᠢᠩᠭᠡᠬᠦ ᠳ᠋ᠦ᠍ᠨᠢ《ᠮᠠᠷᠭᠠᠰᠢ ᠪᠠᠰᠠ ᠯᠠ ᠥᠭᠡᠳᠡ ᠡᠴᠡ ᠭᠠᠷᠤᠨ ᠪᠢᠳᠡᠨ ᠢ᠋ ᠤᠭᠲᠤᠨᠠ》 ᠭᠡᠵᠦ ᠪᠣᠳᠣᠨᠠ᠃
《ᠪᠠᠷᠠᠭᠤᠨ ᠬᠠᠷᠠᠭᠠ》 ᠬᠡᠮᠡᠬᠦ ᠭᠠᠵᠠᠷ ᠢ᠋ ᠬᠢᠶᠠᠭᠲᠤ᠂ ᠬᠦᠷᠢᠶᠡ ᠬᠣᠶᠠᠷ ᠤ᠋ᠨ ᠳᠤᠮᠳᠠ ᠶ᠋ᠢᠨ ᠭᠠᠵᠠᠷ ᠭᠡᠳᠡᠭ᠃ ᠡᠨᠳᠡ ᠵᠢᠷᠤᠮᠲᠤ ᠴᠡᠷᠢᠭ ᠲᠡᠢ ᠮᠥᠷᠥ ᠵᠡᠷᠭᠡᠴᠡᠨ ᠶᠠᠪᠤᠭᠠ ᠤᠯᠠᠭᠠᠨ ᠠᠷᠮᠢ ᠶ᠋ᠢᠨ ᠲᠦᠷᠦᠭᠦᠴᠢ ᠬᠡᠰᠡᠭ ᠣᠷᠣᠵᠤ ᠢᠷᠡᠪᠡ᠃ ᠡᠨᠳᠡ ᠨᠤᠲᠤᠭ ᠤ᠋ᠨ ᠠᠢᠯ ᠤ᠋ᠳ ᠣᠯᠠᠨ᠃ ᠤᠯᠤᠰ ᠠᠮᠢᠲᠠᠨ ᠣᠷᠣᠰ ᠯᠠ ᠭᠡᠪᠡᠯ ᠥᠨᠥᠬᠢ ᠪᠠᠷᠤᠨ ᠤᠩᠬᠸᠷᠠᠨ ᠤ᠋ ᠬᠢᠨ ᠰᠢᠭ ᠦᠵᠡᠳᠡᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠰᠣᠴᠢᠨ᠂ ᠮᠣᠷᠢᠨ ᠳ᠋ᠠᠭᠠᠨ ᠲᠠᠰᠢᠭᠤᠷ ᠥᠭᠭᠦᠨ ᠳᠠᠪᠬᠢᠯᠳᠤᠵᠤ ᠪᠡᠶᠡ ᠪᠡᠶᠡ ᠳ᠋ᠡᠭᠡᠨ ᠳᠠᠮᠵᠢᠭᠤᠯᠤᠨ ᠮᠡᠳᠡᠭᠳᠡᠪᠡ᠃ ᠡᠨᠡ ᠮᠡᠳᠡᠭᠡ ᠶ᠋ᠢ ᠭᠡᠯᠢᠭ ᠦ᠋ᠨ ᠬᠣᠲᠠᠨ ᠳ᠋ᠤ᠌ ᠢᠷᠡᠬᠦ ᠳ᠋ᠦ᠍ ᠠᠶᠤᠨ ᠰᠣᠴᠢᠬᠤ ᠦᠭᠡᠢ ᠬᠥᠮᠦᠨ ᠭᠠᠭᠴᠠ ᠭᠡᠯᠢᠭ ᠯᠡ ᠪᠠᠢᠯᠠ᠃ ᠠ ᠲᠠ ᠮᠢᠨᠢ ᠤᠯᠠᠭᠠᠨ ᠣᠷᠣᠰ ᠪᠠᠢᠯᠭᠦᠢ᠃ ᠲᠡᠢᠮᠦ ᠳᠡ᠂ ᠡᠳᠦᠢ ᠳ᠋ᠦ᠍ ᠤᠯᠠᠭᠠᠨ ᠨᠢ ᠴᠠᠭᠠᠨ ᠣᠷᠣᠰ ᠢ᠋ ᠳᠡᠢᠯᠦᠭᠰᠡᠨ ᠪᠠᠢᠬᠤ ᠶᠣᠰᠣᠲᠠᠢ! ᠭᠡᠵᠦ ᠵᠢᠪᠡᠭᠦᠴᠡᠨ ᠰᠣᠴᠢᠬᠴᠢᠳ ᠢ᠋ ᠲᠠᠢᠪᠤᠰᠢᠷᠠᠭᠤᠯᠤᠨ ᠭᠡᠷ ᠡᠴᠡ ᠭᠠᠷᠴᠤ᠂ ᠢᠷᠡᠬᠦ ᠵᠠᠮ ᠢ᠋ ᠭᠠᠷ ᠡᠷᠭᠦᠨ ᠰᠠᠷᠠᠪᠴᠢᠯᠠᠨ ᠠᠵᠢᠨᠠ᠃ ᠡᠳᠡᠨ ᠦ᠌ ᠬᠢ ᠴᠠᠭ ᠲᠥᠷᠥ ᠶ᠋ᠢᠨ ᠦᠢᠮᠡᠭᠡᠨ ᠳ᠋ᠦ᠍ ᠰᠦᠷᠡᠬᠡᠢ ᠦᠷᠡᠭᠳᠡᠭᠰᠡᠨ ᠪᠣᠯᠪᠠᠴᠤ ᠪᠠᠰᠠ ᠭᠠᠳᠠᠨᠠ ᠪᠠᠨ ᠠᠷᠪᠠ ᠲᠠᠪᠤᠨ ᠤᠨᠤᠭᠠ ᠤᠶᠠᠵᠤ᠂ ᠶᠢᠰᠦᠨ ᠭᠡᠭᠦᠦ ᠰᠠᠭᠠᠨᠠ᠃ ᠪᠠᠰᠠ ᠳᠥᠷᠪᠡᠨ ᠦᠨᠢᠶᠡ ᠰᠠᠭᠠᠬᠤ ᠲᠤᠯᠠ ᠰᠦ ᠲᠠᠷᠠᠭ ᠥᠷᠥᠮᠡ ᠲᠡᠢ᠃
ᠲᠦᠷᠦᠭᠦᠴᠢ ᠠᠩᠭᠢ ᠶ᠋ᠢᠨ ᠬᠢᠨ ᠤᠷᠲᠤ ᠭᠣᠣᠯ ᠤ᠋ᠨ ᠵᠠᠬᠠ ᠳ᠋ᠤ᠌ ᠪᠠᠭᠤᠳᠠᠯᠯᠠᠨ ᠦᠳᠡᠯᠡᠯᠲᠡ ᠶ᠋ᠢᠨ ᠢ᠋ᠶ᠋ᠡᠨ ᠭᠠᠯ ᠢ᠋ ᠲᠦᠯᠡᠵᠦ ᠡᠬᠢᠯᠡᠬᠦ ᠳ᠋ᠦ᠍ ᠬᠡᠯᠢᠭ《ᠬᠥᠶᠢ ᠲᠠ ᠮᠢᠨᠢ ᠡᠳᠡᠨ ᠳ᠋ᠦ᠍ ᠴᠠᠢ ᠶ᠋ᠢᠨ ᠰᠦ! ᠪᠠᠰᠠ ᠤᠮᠳᠠ ᠪᠠᠨ ᠪᠣᠯᠬᠤ ᠶ᠋ᠢᠨ ᠢ᠋ᠶ᠋ᠡᠨ ᠡᠮᠦᠨᠡ ᠠᠮᠠᠨ ᠤ᠋ ᠪᠠᠨ ᠴᠠᠩᠭᠠᠭᠠ ᠶ᠋ᠢ ᠭᠠᠷᠭᠠᠬᠤ ᠠᠢᠷᠠᠭ ᠲᠠᠷᠠᠭ ᠠᠪᠠᠴᠢ!》 ᠭᠡᠵᠡᠢ᠃
ᠪᠦᠬᠦ ᠬᠣᠲᠠ ᠶ᠋ᠢᠨ ᠡᠮᠡᠭᠲᠡᠢᠴᠦᠳ ᠬᠤᠪᠢᠩ ᠰᠠᠪᠠ ᠲᠠᠢ ᠶᠠᠭᠤᠮᠠᠰ ᠪᠠᠷᠢᠨ ᠶᠠᠭᠠᠷᠠᠨ ᠭᠦᠶᠦᠯᠳᠦᠪᠡ᠃ ᠬᠡᠦᠬᠡᠳ ᠪᠠᠭᠠᠴᠤᠳ ᠨᠢ ᠳᠠᠭᠠᠨ ᠬᠠᠷᠠᠢᠯᠭᠠᠪᠠ᠃
ᠮᠣᠩᠭᠣᠯ ᠬᠥᠮᠦᠰ ᠪᠣᠯ ᠥᠭᠭᠦᠭᠡᠴᠢᠳ ᠪᠥᠭᠡᠳ ᠥᠭᠭᠦᠭᠰᠡᠨ ᠦ᠌ ᠪᠡᠨ ᠬᠠᠷᠢᠭᠤ ᠶ᠋ᠢ ᠭᠣᠷᠢᠳᠠᠭᠴᠢᠳ ᠪᠢᠰᠢ ᠪᠢᠯᠡ᠃ ᠭᠡᠪᠡᠴᠦ ᠥᠭᠭᠦᠭᠰᠡᠨ ᠢ᠋ ᠵᠠᠪᠠᠯ ᠠᠪᠳᠠᠭ ᠶᠣᠰᠣᠲᠠᠢ᠃ ᠬᠡᠯᠢᠭ ᠦ᠋ᠨ ᠪᠡᠷᠢ ᠬᠠᠨᠳᠠᠨᠰᠦᠷᠦᠩ᠂ ᠬᠦᠦ ᠥᠬᠢᠨ ᠳᠤᠯᠮᠠ ᠬᠣᠶᠠᠷ《 ᠡᠨᠡ ᠤᠯᠠᠭᠠᠨ ᠣᠷᠣᠰ ᠭᠡᠳᠡᠭ ᠴᠢᠨᠢ ᠴᠠᠭᠠᠨ ᠣᠷᠣᠰ ᠲᠠᠢ ᠪᠠᠨ ᠠᠪ ᠠᠳᠠᠯᠢᠬᠠᠨ ᠴᠢᠷᠠᠢ ᠵᠢᠰᠦ ᠲᠡᠢ ᠶᠦᠮ᠃ ᠰᠦ ᠪᠡᠷ ᠴᠦ᠍ ᠰᠦᠯᠡᠭᠰᠡᠨ ᠦᠭᠡᠢ ᠬᠤᠪᠢᠶᠠᠨ ᠤᠤᠭᠤᠴᠢᠬᠠᠯᠠ᠂ ᠠᠢᠷᠠᠭ ᠢ᠋ ᠶᠡᠷᠦ ᠮᠡᠳᠡᠳᠡᠭ ᠦᠭᠡᠢ᠂ ᠬᠤᠯᠤ ᠪᠠᠷ ᠴᠦ᠍ ᠤᠤᠭᠤᠭᠰᠠᠨ ᠦᠭᠡᠢ᠂ ᠬᠤᠪᠢ ᠬᠣᠪᠢᠨ ᠤ᠋ ᠪᠠᠨ ᠲᠡᠮᠦᠷ ᠠᠶᠠᠭᠠ ᠪᠠᠷ ᠤᠤᠭᠤᠨ ᠶᠡᠬᠡᠳᠡ ᠬᠠᠴᠢᠷᠬᠠᠨ ᠱᠤᠤᠭᠢᠯᠳᠤᠪᠠ》 ᠭᠡᠰᠡᠨ ᠰᠣᠨᠢᠨ ᠲᠠᠢ ᠢᠷᠡᠬᠦ ᠶ᠋ᠢᠨ ᠢ᠋ᠶ᠋ᠡᠨ ᠵᠡᠷᠭᠡᠴᠡᠭᠡ ᠪᠡᠷ ᠲᠣᠮᠣ ᠲᠠᠪᠠᠭ ᠤ᠋ᠨ ᠬᠢᠷᠢ ᠲᠡᠢ ᠳᠤᠭᠤᠢ ᠪᠥᠨᠲᠥᠭᠡᠷ ᠪᠣᠷᠣ ᠶᠠᠭᠤᠮᠠ ᠠᠪᠴᠢᠷᠠᠵᠠᠢ᠃
— ᠵᠠ ᠲᠠ ᠮᠢᠨᠢ᠂ ᠡᠨᠡ ᠴᠢᠨᠢ ᠶᠠᠭᠤ ᠭᠡᠭᠴᠢ ᠪᠣᠢ?
— ᠢᠳᠡᠳᠡᠭ ᠶᠠᠭᠤᠮᠠ᠂ ᠠᠪᠤ ᠠ᠋! ᠴᠥᠮ ᠡᠢᠮᠦ ᠶᠠᠭᠤᠮᠠ ᠢᠳᠡᠵᠦ ᠪᠠᠢᠨᠠ ᠭᠡᠵᠦ ᠬᠦᠦ ᠬᠡᠦᠬᠡᠨ ᠦ᠌ ᠪᠡᠨ ᠬᠠᠷᠢᠭᠤᠯᠬᠤ ᠳ᠋ᠤ᠌ ᠬᠡᠯᠢᠭ ᠬᠦᠨᠳᠦᠳᠬᠡᠨ ᠬᠣᠷᠮᠣᠢ ᠳᠡᠪᠢᠰᠦᠨ ᠲᠠᠯᠪᠢᠵᠤ ᠵᠦᠰᠦᠬᠦ ᠳ᠋ᠡᠭᠡᠨ ᠡᠷᠬᠡ ᠦᠭᠡᠢ ᠭᠤᠯᠢᠷ ᠢ᠋ᠶ᠋ᠠᠷ ᠬᠢᠭᠳᠡᠭᠰᠡᠨ ᠢ᠋ ᠨᠢ ᠮᠡᠳᠡᠯᠡ᠃ ᠭᠡᠪᠡᠴᠦ ᠶᠠᠮᠠᠷ ᠭᠤᠯᠢᠷ ᠲᠡᠢᠮᠦ ᠪᠦᠳᠦᠭᠦᠨ᠂ ᠬᠠᠷᠠ ᠪᠣᠷᠣ ᠥᠩᠭᠡ ᠲᠡᠢ ᠪᠠᠢᠳᠠᠭ ᠢ᠋ ᠮᠡᠳᠡᠬᠦ ᠦᠭᠡᠢ ᠳ᠋ᠡᠭᠡᠨ ᠭᠠᠢᠬᠠᠨᠠ᠃ ᠡᠬᠢᠨ ᠦ᠌ ᠵᠦᠰᠦᠮ ᠢ᠋ ᠪᠤᠷᠬᠠᠨ ᠳ᠋ᠠᠭᠠᠨ ᠲᠠᠯᠪᠢᠪᠠ᠃ ᠳᠠᠷᠠᠭᠠᠴᠢ ᠶ᠋ᠢᠨ ᠵᠦᠰᠦᠮ ᠢ᠋ ᠪᠡᠷᠢ ᠬᠡᠦᠬᠡᠨ ᠬᠣᠶᠠᠷ ᠲᠠᠭᠠᠨ᠂ ᠲᠡᠭᠡᠭᠡᠳ ᠥᠪᠡᠷ ᠢ᠋ᠶ᠋ᠡᠨ ᠠᠪᠤᠪᠠ᠃ ᠢᠩᠭᠢᠬᠦ ᠳ᠋ᠦ᠍ ᠬᠠᠷᠠ ᠲᠠᠯᠬᠠ ᠶ᠋ᠢ ᠠᠩᠬᠠ ᠢᠳᠡᠵᠦ ᠦᠵᠡᠬᠦ ᠳ᠋ᠦ᠍ ᠰᠦᠷᠡᠬᠡᠢ ᠰᠢᠷᠦᠭᠦᠨ ᠭᠠᠰᠢᠭᠤᠨ ᠪᠠᠢᠬᠤ ᠨᠢ ᠮᠡᠳᠡᠭᠡᠵᠢ ᠶ᠋ᠢᠨ ᠬᠡᠷᠡᠭ᠃ ᠭᠡᠪᠡᠴᠦ ᠬᠡᠯᠢᠭ ᠰᠠᠢᠲᠤᠷ ᠰᠢᠯᠭᠠᠨ ᠠᠮᠲᠠᠯᠠᠵᠤ ᠦᠵᠡᠭᠡᠳ《 ᠠ᠋ ᠬᠡᠦᠬᠡᠳ ᠦ᠋ᠳ ᠮᠢᠨᠢ ᠠ᠋᠂ ᠡᠨᠡ ᠴᠢᠨᠢ ᠡᠷᠡ ᠬᠥᠮᠦᠨ ᠳ᠋ᠦ᠍ ᠲᠠᠮᠢᠷ᠂ ᠵᠣᠷᠢᠭ ᠴᠢᠳᠠᠯ ᠨᠡᠮᠡᠭᠳᠡᠬᠦᠢᠴᠡ ᠠᠮᠲᠠ ᠲᠠᠢ ᠢᠳᠡᠭᠡ ᠪᠠᠢᠬᠤ ᠨᠢ ᠶᠠᠭᠤ ᠪᠣᠢ》 ᠭᠡᠳ ᠳᠠᠬᠢᠨ ᠠᠮᠲᠠᠯᠠᠬᠤ ᠳ᠋ᠠᠭᠠᠨ ᠮᠥᠨ ᠳᠡ᠂ ᠤᠬᠠᠭᠠᠨ ᠰᠠᠨᠠᠭᠠ ᠴᠦ᠍ ᠰᠢᠯᠤᠭᠤᠨ ᠰᠢᠳᠤᠷᠭᠤ ᠪᠣᠯᠳᠠᠭ ᠪᠢᠵᠡ ᠭᠡᠵᠦ ᠴᠡᠴᠡᠷᠬᠡᠪᠡ᠃ ᠲᠡᠭᠡᠭᠡᠳ ᠪᠦᠬᠦ ᠬᠣᠲᠠ ᠶ᠋ᠢᠨ ᠬᠥᠮᠦᠨ ᠨᠢᠭᠡᠪᠦᠷᠢ ᠳ᠋ᠦ᠍ ᠬᠦᠷᠦᠯᠴᠡᠭᠦᠯᠦᠨ ᠠᠮᠰᠠᠭᠤᠯᠬᠤ ᠳ᠋ᠠᠭᠠᠨ《 ᠮᠠᠢ! ᠤᠯᠠᠭᠠᠨ ᠣᠷᠣᠰ ᠤ᠋ᠨ ᠢᠳᠡᠭᠡ᠂ ᠠᠮᠰᠠᠭᠰᠠᠨ ᠬᠥᠮᠦᠨ ᠳ᠋ᠦ᠍ ᠪᠠᠶᠠᠷ ᠴᠢᠳᠠᠯ᠂ ᠤᠬᠠᠭᠠᠨ ᠰᠠᠨᠠᠭᠠ ᠨᠡᠮᠡᠭᠳᠡᠨᠡ》 ᠭᠡᠵᠦ ᠪᠠᠢᠯᠠ᠃
ᠵᠢᠷᠤᠮᠲᠤ ᠴᠡᠷᠢᠭ ᠦ᠋ᠳ ᠦ᠋ᠨ ᠡᠨᠳᠡ ᠢᠷᠡᠮᠡᠭᠴᠡ ᠭᠤᠷᠪᠠᠨ ᠬᠥᠮᠦᠨ ᠲᠡᠰᠦᠷᠦᠨ ᠭᠡᠯᠢᠭ ᠦ᠋ᠨ ᠬᠣᠲᠠ ᠤᠷᠤᠭᠤ ᠴᠢᠭᠯᠡᠨ ᠳᠠᠪᠬᠢᠯᠠ᠃ ᠡᠳᠡᠨ ᠦ᠌ ᠨᠢᠭᠡ ᠨᠢ ᠬᠦᠷᠡᠯ ᠦ᠋ᠨ ᠬᠦᠦ ᠴᠡᠷᠢᠨᠳᠣᠷᠵᠢ᠂ ᠲᠡᠷᠡ ᠬᠦᠦ ᠭᠣᠣᠯ ᠭᠠᠲᠤᠯᠤᠭᠰᠠᠨ ᠢ᠋ᠶ᠋ᠠᠨ ᠨᠥᠭᠦᠭᠡ ᠬᠣᠶᠠᠷ ᠠ᠋ᠴᠠ ᠪᠠᠨ ᠲᠠᠰᠤᠷᠠᠨ ᠭᠣᠣᠯ ᠥᠭᠰᠥᠨ ᠣᠳᠪᠠ᠃ ᠬᠣᠶᠠᠳᠠᠬᠢ ᠨᠢ ᠪᠠᠭᠠᠰᠠᠩ᠂ ᠭᠡᠷ ᠣᠷᠣᠨ ᠳ᠋ᠠᠭᠠᠨ ᠦᠯᠡᠳᠡᠬᠦ ᠪᠡᠷ ᠪᠦᠷᠢᠮᠦᠰᠦᠨ ᠴᠢᠯᠥᠭᠡ ᠠᠪᠴᠠᠢ᠃ ᠬᠥᠮᠦᠰ ᠲᠡᠭᠦᠨ ᠢ᠋ ᠠᠯᠤᠰ ᠤ᠋ᠨ ᠪᠠᠷᠠ ᠠ᠋ᠴᠠ ᠨᠢ ᠲᠠᠨᠢᠨ ᠭᠡᠷ ᠤᠷᠤᠭᠤ ᠨᠢ ᠭᠦᠶᠦᠯᠳᠦᠨ ᠬᠦᠷᠴᠦ ᠤᠭᠲᠤᠨ ᠠᠪᠤᠯᠠ᠃ ᠪᠠᠭᠠᠰᠠᠩ ᠴᠦ᠍ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠬᠥᠮᠦᠰ ᠲᠣᠭᠠ ᠲᠣᠯᠣᠭᠠᠢ ᠪᠦᠷᠢᠨ ᠪᠠᠢᠭᠠ ᠶ᠋ᠢ ᠣᠯᠵᠤ ᠬᠠᠷᠠᠨ ᠰᠡᠳᠬᠢᠯ ᠠᠮᠤᠰᠬᠢᠬᠰᠡᠨ ᠲᠡᠳᠦᠢ ᠦᠭᠡᠢ᠂ ᠪᠢᠴᠢᠬᠠᠨ ᠪᠡᠶᠡᠲᠦ ᠬᠥᠭᠡᠷᠦᠬᠦᠢ ᠡᠬᠡᠨᠡᠷ ᠦ᠋ᠨ ᠢ᠋ᠶ᠋ᠡᠨ ᠨᠢᠯᠬᠠ ᠬᠡᠦᠬᠡᠳ ᠲᠡᠪᠡᠷᠢᠨ ᠵᠣᠭᠰᠣᠵᠤ ᠪᠠᠢᠬᠤ ᠶ᠋ᠢ ᠦᠵᠡᠭᠡᠳ ᠵᠢᠷᠦᠬᠡ ᠴᠣᠬᠢᠯᠠᠨ ᠪᠠᠶᠠᠷᠯᠠᠪᠠ᠃ ᠭᠤᠷᠪᠠᠳᠠᠬᠢ ᠬᠥᠮᠦᠨ ᠳ᠋ᠠᠨᠽᠠᠨ᠃ ᠳ᠋ᠠᠨᠽᠠᠨ ᠢ᠋ ᠢᠷᠡᠨᠡ ᠭᠡᠵᠦ ᠬᠦᠯᠢᠶᠡᠭᠰᠡᠨ ᠬᠡᠨ ᠴᠦ᠍ ᠦᠭᠡᠢ᠂ ᠥᠪᠡᠷ ᠢ᠋ᠶ᠋ᠡᠨ ᠭᠡᠯᠢᠭ ᠦ᠋ᠨ ᠬᠣᠢᠲᠤᠬᠢ ᠪᠢᠴᠢᠬᠠᠨ ᠭᠡᠷ ᠢ᠋ ᠲᠠᠨᠢᠨ ᠭᠠᠳᠠᠨᠠ ᠨᠢ ᠣᠴᠢᠨ ᠪᠠᠭᠤᠵᠤ ᠭᠡᠷ ᠲᠡᠭᠡᠨ ᠣᠷᠣᠬᠤ ᠳ᠋ᠤ᠌ ᠬᠡᠨ ᠴᠦ᠍ ᠦᠭᠡᠢ᠂ ᠭᠠᠭᠴᠠᠬᠠᠨ ᠣᠷᠣᠨ ᠳᠡᠭᠡᠷᠡ ᠡᠮᠡᠭᠲᠡᠢ ᠬᠥᠮᠦᠨ ᠦ᠌ ᠳᠡᠪᠡᠯ ᠬᠤᠪᠴᠠᠰᠤ ᠬᠤᠷᠢᠶᠠᠯᠲᠠ ᠲᠠᠢ ᠪᠠᠢᠭᠠ ᠠ᠋ᠴᠠ ᠡᠭᠡᠴᠢ ᠶ᠋ᠢᠨ ᠢ᠋ᠶ᠋ᠡᠨ ᠡᠷᠡᠭᠦᠯ ᠮᠡᠨᠳᠦ ᠰᠡᠳᠬᠢᠯ ᠪᠠᠢᠭᠠ ᠶ᠋ᠢ ᠮᠡᠳᠡᠨ ᠰᠡᠳᠬᠢᠯ ᠲᠡᠨᠢᠢᠨ ᠪᠠᠶᠠᠷᠯᠠᠨᠠ᠃ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠶᠠᠭᠤ ᠪᠣᠯᠤᠭᠰᠠᠨ ᠢ᠋ ᠠᠯᠢ ᠬᠡᠳᠦᠢᠨ ᠲᠣᠳᠣᠷᠬᠠᠢ ᠣᠯᠵᠤ ᠰᠣᠨᠣᠰᠤᠭᠰᠠᠨ ᠲᠤᠯᠠ ᠲᠡᠷᠡ ᠲᠤᠬᠠᠢ ᠣᠨᠴᠠᠯᠠᠨ ᠪᠣᠳᠣᠬᠤ ᠶᠠᠭᠤᠮᠠ ᠠᠯᠠᠭᠠ᠃ ᠭᠡᠲᠡᠯᠡ ᠰᠡᠳᠬᠢᠯ ᠳ᠋ᠦ᠍ᠨᠢ ᠨᠢᠭᠡ ᠵᠦᠢᠯ ᠪᠣᠳᠣᠭᠳᠠᠨ ᠰᠣᠴᠢᠪᠠ᠃ ᠳᠡᠮᠡᠢ ᠰᠠᠨᠳᠤᠷᠤᠨ ᠡᠪᠦᠷ ᠢ᠋ᠶ᠋ᠡᠨ ᠲᠡᠮᠲᠡᠷᠢᠪᠡ᠃ ᠡᠨᠡ ᠨᠢ ᠥᠨᠥᠬᠢ ᠬᠡᠳᠦᠨ ᠰᠢᠷᠠ ᠬᠤᠪᠠ ᠠᠯᠲᠠᠨ ᠰᠢᠷᠠᠮᠠᠯ ᠰᠠᠭᠰᠠᠭᠠᠷ ᠡᠭᠡᠮᠦᠭ᠃ ᠳᠣᠲᠣᠷᠠ ᠨᠢ ᠫᠠᠯ ᠬᠢᠵᠦ ᠶᠠᠭᠠᠬᠢᠭᠰᠠᠨ ᠢ᠋ᠶ᠋ᠠᠨ ᠡᠷᠭᠢᠴᠡᠭᠦᠯᠦᠨ ᠰᠠᠨᠠᠬᠤ ᠳ᠋ᠤ᠌ ᠬᠢᠶᠠᠭᠲᠤ ᠳ᠋ᠤ᠌ ᠪᠠᠷᠤᠨ ᠤᠩᠺᠸᠷᠠᠨ ᠤ᠋ ᠬᠢᠨ ᠲᠡᠢ ᠢᠳᠡ ᠰᠢᠷᠦᠭᠦᠨ ᠲᠤᠯᠤᠯᠳᠤᠵᠤ ᠪᠠᠢᠬᠤ ᠳ᠋ᠤ᠌ ᠰᠤᠮᠤ ᠳᠠᠭᠤᠰᠦᠨ ᠰᠠᠨᠳᠤᠷᠬᠤ ᠳ᠋ᠠᠭᠠᠨ ᠡᠪᠦᠷ ᠲᠦ᠍ ᠭᠠᠷ ᠢ᠋ᠶ᠋ᠠᠨ ᠬᠢᠨ ᠠᠯᠴᠢᠭᠤᠷ ᠲᠤ᠌ ᠪᠣᠭᠤᠳᠠᠯ ᠲᠠᠢ ᠬᠡᠪ ᠢ᠋ᠶ᠋ᠡᠷ ᠨᠢ ᠭᠠᠷᠭᠠᠨ ᠭᠠᠵᠠᠷ ᠲᠤ᠌ ᠲᠠᠯᠪᠢᠵᠤ ᠳᠠᠷᠠᠭᠠ ᠨᠢ ᠬᠡᠳᠦᠨ ᠰᠤᠮᠤ ᠠᠪᠤᠭᠰᠠᠨ ᠰᠠᠨᠠᠭᠳᠠᠨᠠ᠃ ᠲᠡᠭᠡᠭᠡᠳ ᠲᠡᠨᠳᠡ ᠡᠴᠡ ᠤᠷᠤᠭᠰᠢ ᠳᠠᠪᠬᠢᠬᠤ ᠳ᠋ᠠᠭᠠᠨ ᠠᠪᠬᠤ ᠪᠠᠨ ᠮᠠᠷᠲᠠᠭᠰᠠᠨ ᠨᠢ ᠲᠣᠳᠣᠷᠬᠠᠢ ᠪᠣᠯᠵᠤ ᠢᠷᠡᠪᠡ᠃
ᠭᠡᠷ ᠦ᠋ᠨ ᠡᠭᠦᠳᠡ ᠰᠡᠪᠬᠢᠨ ᠡᠷᠭᠦᠭᠳᠡᠵᠦ ᠡᠮᠡᠭᠲᠡᠢ ᠬᠥᠮᠦᠨ ᠴᠢᠰᠬᠢᠨ ᠪᠠᠷᠬᠢᠷᠠᠨ ᠣᠷᠣᠵᠤ ᠢᠷᠡᠵᠦ ᠳ᠋ᠠᠨᠽᠠᠨ ᠢ᠋ ᠵᠢᠭᠤᠷᠠᠨ ᠠᠪᠤᠪᠠ᠃ ᠡᠨᠡ ᠪᠣᠯ ᠡᠭᠡᠴᠢ ᠨᠢ ᠪᠠᠭᠠᠰᠠᠩ ᠠ᠋ᠴᠠ ᠳ᠋ᠠᠨᠽᠠᠨ ᠤ᠋ ᠢᠷᠡᠭᠰᠡᠨ ᠢ᠋ ᠭᠡᠨᠡᠳᠲᠡ ᠰᠣᠨᠣᠰᠤᠨ ᠤᠬᠠᠭᠠᠨ ᠦᠭᠡᠢ ᠪᠠᠶᠠᠷᠯᠠᠬᠤ ᠶ᠋ᠢᠨ ᠳᠡᠭᠡᠷᠡ ᠥᠩᠭᠡᠷᠡᠭᠰᠡᠨ ᠳ᠋ᠦ᠍ ᠪᠦᠬᠦ ᠵᠦᠳᠡᠭᠦᠷᠡᠯ ᠨᠢ ᠨᠢᠭᠡᠮᠦᠰᠦᠨ ᠪᠣᠳᠣᠭᠳᠠᠨ ᠪᠠᠬᠠᠷᠤᠨ ᠪᠠᠯᠠᠷᠳᠠᠬᠤ ᠠᠵᠢ᠃《ᠡᠪᠡᠢ ᠮᠢᠨᠢ᠂ ᠳᠡᠭᠦᠦ ᠮᠢᠨᠢ᠂ ᠡᠨᠡ ᠳᠡᠯᠡᠬᠡᠢ ᠳ᠋ᠦ᠍ ᠪᠢ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ》ᠴᠦ᠍ ᠭᠡᠬᠦ ᠰᠢᠭ《ᠣᠳᠣ ᠬᠣᠶᠠᠭᠤᠯᠠ ᠪᠠᠨ》ᠴᠦ᠍ ᠭᠡᠬᠦ ᠰᠢᠭ《ᠴᠢᠮᠠ ᠲᠠᠢ ᠪᠠᠨ ᠢᠩᠭᠢᠵᠦ ᠠᠭᠤᠯᠵᠠᠨᠠ ᠭᠡᠵᠦ ᠣᠭᠲᠣ ᠰᠠᠨᠠᠭᠠ ᠦᠭᠡᠢ》ᠴᠦ᠍ ᠭᠡᠬᠦ ᠰᠢᠭ ᠤᠴᠢᠷ ᠨᠡᠴᠢᠷ ᠦᠭᠡᠢ ᠣᠯᠠᠨ ᠢ᠋ ᠥᠭᠦᠯᠡᠨ ᠥᠭᠦᠯᠡᠭᠰᠡᠭᠡᠷ ᠰᠡᠳᠬᠢᠯ ᠠᠭᠤᠵᠢᠷᠠᠪᠠ᠃
ᠤᠳᠠᠵᠤ ᠲᠦᠳᠡᠯ ᠦᠭᠡᠢ ᠬᠣᠲᠠ ᠶ᠋ᠢᠨ ᠬᠥᠮᠦᠰ ᠳ᠋ᠠᠨᠽᠠᠨ ᠤ᠋ ᠭᠡᠷ ᠲᠦ᠍ ᠣᠷᠣᠵᠤ ᠢᠷᠡᠨ ᠪᠢᠴᠢᠬᠠᠨ ᠭᠡᠷ ᠲᠦ᠍ ᠴᠢᠬᠢᠴᠡᠯᠳᠦᠨᠡ᠃ ᠲᠡᠳᠡᠨ ᠳ᠋ᠦ᠍ ᠳ᠋ᠠᠨᠽᠠᠨ ᠭᠠᠵᠠᠷ ᠳᠣᠣᠷᠠ ᠠ᠋ᠴᠠ ᠭᠠᠷᠴᠤ ᠢᠷᠡᠭᠰᠡᠨ ᠰᠢᠭ ᠰᠠᠨᠠᠭᠳᠠᠬᠤ ᠠᠵᠢ᠃ ᠣᠷᠴᠢᠯᠠᠩ ᠤ᠋ᠨ ᠦᠬᠦᠯ ᠬᠠᠭᠠᠴᠠᠯ ᠣᠯᠠᠨ ᠢ᠋ ᠦᠵᠡᠭᠰᠡᠨ ᠡᠮᠡᠭᠡᠳ ᠠᠬᠠᠢ ᠨᠠᠷ《ᠠᠮᠢᠳᠤ ᠶᠠᠭᠤᠮᠠ ᠰᠠᠢᠬᠨᠨᠡ》 ᠭᠡᠳ ᠥᠩᠭᠡᠷᠡᠭᠰᠡᠨ ᠪᠠᠯᠠᠷᠠᠭᠰᠠᠨ ᠢ᠋ᠶ᠋ᠠᠨ ᠰᠠᠨᠠᠨ ᠳᠤᠷᠠᠰᠤᠨ ᠨᠢᠯᠪᠤᠰᠤ ᠲᠤᠰᠠᠯᠠᠭᠤᠯᠤᠨᠠ᠃ ᠡᠪᠦᠭᠡᠳ ᠨᠠᠰᠤᠲᠠᠢ ᠡᠷᠡᠰ ᠦ᠋ᠳ《ᠠ᠋ ᠳᠠ ᠠᠮᠢ ᠮᠡᠨᠳᠦ ᠶᠠᠪᠤᠵᠤ ᠢᠷᠡᠭᠰᠡᠨ ᠴᠢᠨᠢ ᠪᠤᠷᠬᠠᠨ ᠭᠣᠨᠴᠣᠭᠰᠤᠮ ᠤ᠋ᠨ ᠠᠪᠤᠷᠠᠯ ᠰᠢᠦ ᠳᠡ》 ᠬᠡᠮᠡᠯᠴᠡᠨᠡ᠃ ᠬᠠᠷᠢᠭᠤ ᠳ᠋ᠤᠨᠢ ᠳ᠋ᠠᠨᠽᠠᠨ《ᠠ᠋ ᠳᠠ ᠲᠠ ᠮᠢᠨᠢ ᠬᠢᠲᠠᠳ ᠣᠷᠣᠨ ᠨᠦᠰᠡᠷ ᠬᠦᠨᠳᠦ ᠣᠷᠣᠨ ᠪᠠᠢᠨᠠ ᠰᠢᠦ᠃ ᠨᠣᠶᠠᠳ᠂ ᠪᠠᠶᠠᠳ᠂᠂ ᠫᠦᠰᠡ ᠳᠡᠯᠭᠡᠭᠦᠷ ᠦ᠋ᠨ ᠳᠠᠩᠵᠢᠶᠠᠳ ᠨᠤᠭᠤᠳ ᠭᠠᠵᠠᠷ ᠤ᠋ᠨ ᠡᠵᠡᠳ ᠨᠠᠷ ᠨᠢ ᠳᠣᠣᠷᠠᠲᠤ ᠬᠥᠮᠦᠰ ᠢ᠋ᠶ᠋ᠡᠨ ᠬᠥᠮᠦᠨ ᠳ᠋ᠦ᠍ ᠪᠠᠢᠲᠤᠭᠠᠢ ᠲᠠᠪᠤ ᠠᠷᠪᠠᠨ ᠮᠥᠩᠭᠥᠨ ᠡᠴᠡ ᠳᠣᠣᠷᠠ ᠦᠵᠡᠬᠦ ᠶᠦᠮ᠃ ᠭᠡᠲᠡᠯᠡ ᠳᠣᠣᠷᠠᠲᠤ ᠬᠥᠮᠦᠰ ᠨᠢ ᠬᠥᠮᠦᠨ ᠢ᠋ ᠡᠨᠡᠷᠢᠨ ᠲᠡᠳᠬᠦᠬᠦ ᠬᠠᠢᠷᠠᠯᠠᠨ ᠬᠦᠨᠳᠦᠳᠬᠡᠬᠦ ᠨᠢ ᠰᠠᠨᠠᠭᠠᠨ ᠳ᠋ᠤ᠌ ᠪᠠᠭᠲᠠᠰᠢ ᠦᠭᠡᠢ ᠰᠠᠢᠬᠠᠨ ᠠᠷᠢᠭᠤᠨ ᠰᠢᠳᠤᠷᠭᠤ ᠤᠯᠤᠰ ᠪᠠᠢᠬᠤ ᠶᠤᠮ》 ᠭᠡᠬᠦ ᠳ᠋ᠦ᠍ ᠨᠢᠭᠡ ᠨᠢ
— ᠠᠬᠠᠢ ᠪᠠᠰᠠ ᠲᠡᠢᠮᠦ ᠪᠠᠢᠨᠠ ᠪᠣᠢ! ᠭᠡᠵᠦ ᠭᠠᠢᠬᠠᠭᠰᠠᠨ ᠴᠢᠷᠠᠢ ᠭᠠᠷᠭᠠᠨᠠ᠃
— ᠲᠡᠭᠡᠯᠭᠦᠢ ᠶᠠᠭᠠᠬᠢᠬᠤᠪ᠃ ᠪᠢ ᠴᠣᠬᠣᠮ ᠲᠡᠢᠮᠦ ᠬᠥᠮᠦᠰ ᠦ᠋ᠨ ᠠᠴᠢ ᠢᠪᠡᠭᠡᠯ ᠢ᠋ᠶ᠋ᠡᠷ ᠠᠮᠢ ᠪᠡᠶᠡ ᠮᠡᠨᠳᠦ ᠶᠠᠪᠤᠵᠤ ᠣᠷᠣᠨ ᠨᠤᠲᠤᠭ ᠲᠠᠭᠠᠨ ᠢᠷᠡᠭᠰᠡᠨ ᠰᠢᠦ ᠭᠡᠳ ᠵᠠᠯᠠᠭᠤ ᠨᠠᠢᠵᠠ ᠸᠠᠩ ᠬᠠᠢ ᠲᠤᠤ᠂ ᠡᠪᠦᠭᠡᠨ ᠲᠠᠷᠢᠶᠠᠴᠢᠨ ᠯᠤᠤ ᠯᠢ᠂ ᠲᠡᠭᠦᠨ ᠦ᠌ ᠭᠡᠷ ᠪᠦᠯᠢ ᠶ᠋ᠢᠨ ᠬᠥᠮᠦᠰ᠂ ᠲᠡᠳᠡᠭᠡᠷ ᠦ᠋ᠨ ᠬᠡᠷᠬᠢᠨ ᠠᠴᠢ ᠲᠤᠰᠠ ᠪᠣᠯᠤᠭᠰᠠᠨ ᠢ᠋ ᠰᠡᠳᠬᠢᠯ ᠬᠥᠳᠡᠯᠦᠨ ᠶᠠᠷᠢᠵᠤ ᠭᠠᠷᠪᠠ᠃ ᠲᠣᠭᠣᠷᠢᠨ ᠰᠠᠭᠤᠭᠴᠢᠳ᠄
— ᠵᠠ ᠵᠠ ᠭᠡᠵᠦ ᠳᠥᠭᠥᠨ ᠰᠠᠭᠤᠵᠤ ᠴᠢᠬᠢ ᠲᠠᠯᠪᠢᠨ ᠴᠢᠩᠨᠠᠨᠠ᠃ ᠬᠡᠯᠢᠭ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠲᠡᠳᠦᠢ ᠯᠡ ᠣᠢᠰᠢᠶᠠᠬᠤ ᠦᠭᠡᠢ ᠪᠥᠭᠡᠳ ᠬᠢᠲᠠᠳ ᠢᠷᠭᠡᠳ ᠢ᠋ ᠪᠠᠬᠠᠳᠤᠨ ᠰᠠᠢᠰᠢᠶᠠᠬᠤ ᠶ᠋ᠢ ᠡᠰᠡᠷᠭᠦᠴᠡᠬᠦ ᠰᠢᠨᠵᠢᠲᠡᠢ᠄ ᠵᠠ ᠲᠡᠷᠡ ᠴᠦ᠍ ᠲᠡᠢᠮᠦ ᠯᠡ ᠪᠠᠢᠵᠠᠢ᠃ ᠭᠡᠪᠡᠴᠦ ᠴᠢ ᠬᠢᠲᠠᠳ ᠬᠥᠮᠦᠨ᠂ ᠬᠥᠮᠦᠨ ᠢ᠋ ᠬᠡᠴᠢᠨᠡᠭᠡᠨ ᠮᠠᠭᠤᠬᠠᠢ ᠠᠷᠤ ᠪᠠᠷ ᠨᠢ ᠲᠠᠯᠪᠢᠬᠤ ᠶ᠋ᠢᠨ ᠡᠮᠦᠨᠡ ᠲᠡᠴᠢᠨᠡᠨ ᠰᠠᠢᠬᠠᠨ ᠢᠨᠢᠶᠡᠭᠰᠡᠨ ᠴᠢᠷᠠᠢ ᠪᠠᠷ ᠬᠦᠨᠳᠦᠳᠬᠡᠨ ᠮᠡᠬᠡᠯᠡᠳᠡᠭ ᠢ᠋ ᠣᠯᠵᠤ ᠬᠠᠷᠠᠪᠠᠤ? ᠡᠴᠦᠰ ᠲᠦ᠋ᠨᠢ ᠬᠥᠮᠦᠨ ᠬᠡᠴᠢᠨᠡᠭᠡᠨ ᠨᠣᠮᠣᠬᠠᠨ ᠳᠠᠷᠤᠤ ᠪᠠᠢᠬᠤ ᠶ᠋ᠢᠨ ᠬᠢᠷᠢ ᠪᠡᠷ ᠳᠡᠴᠢᠨᠡᠨ ᠣᠮᠣᠭ ᠪᠠᠷᠳᠠᠮ ᠪᠠᠢᠳᠠᠭ ᠢ᠋ ᠣᠯᠵᠤ ᠠᠵᠢᠪᠠᠤ ᠳᠠ? ᠭᠡᠬᠦ ᠳ᠋ᠦ᠍ᠨᠢ ᠳ᠋ᠠᠨᠽᠠᠨ ᠠᠩᠬᠠ ᠰᠠᠨᠠᠭᠠ ᠠᠪᠤᠨ᠂ ᠲᠡᠢᠮᠦ ᠠ᠋ ᠭᠡᠳ ᠴᠠᠭᠠᠨᠳᠠᠯᠠᠢ ᠳᠠᠩᠵᠢᠶᠠᠳ᠂ ᠭᠠᠵᠠᠷ ᠤ᠋ᠨ ᠡᠵᠡᠨ ᠳᠡ ᠯᠣᠣᠶᠧ ᠨᠠᠷ ᠤ᠋ᠨ ᠬᠡᠷᠬᠡᠭᠰᠡᠨ ᠢ᠋ ᠶᠠᠷᠢᠪᠠ᠃ ᠡᠭᠦᠨ ᠳ᠋ᠦ᠍ ᠭᠡᠯᠢᠭ ᠤᠤᠬᠠᠢ ᠭᠡᠰᠡᠨ ᠰᠢᠭ ᠰᠠᠬᠠᠯ ᠢ᠋ᠶ᠋ᠠᠨ ᠢᠯᠢᠨ ᠢᠨᠢᠶᠡᠮᠰᠦᠭᠯᠡᠵᠦ᠄ ᠵᠠ ᠪᠣᠯᠵᠠᠢ᠃ ᠴᠢ ᠣᠯᠵᠠ ᠣᠮᠣᠭ ᠣᠯᠤᠭᠠ ᠦᠭᠡᠢ ᠪᠣᠯᠪᠠᠴᠤ ᠲᠡᠭᠦᠨ ᠡᠴᠡ ᠳᠤᠲᠠᠭᠤ ᠦᠭᠡᠢ ᠶᠡᠬᠡ ᠶᠠᠭᠤᠮᠠ ᠦᠵᠡᠵᠦ ᠬᠠᠰᠢᠷ ᠰᠠᠭᠤᠭᠠᠳ ᠢᠷᠡᠵᠡᠢ᠃ ᠡᠨᠡ ᠴᠢᠨᠢ ᠴᠢᠮᠠ ᠳ᠋ᠤ᠌ ᠡᠭᠦᠷᠢᠳᠡ ᠬᠡᠷᠡᠭ ᠪᠣᠯᠤᠨᠠ᠃ ᠬᠠᠷᠢᠨ ᠮᠠᠨ ᠤ᠋ ᠳᠣᠷᠵᠢ ᠮᠥᠨ ᠪᠠᠭᠠ ᠦᠭᠡᠢ ᠶᠠᠭᠤᠮᠠ ᠦᠵᠡᠭᠰᠡᠨ ᠪᠠᠢᠬᠤ ᠠᠲᠠᠯᠠ ᠶᠡᠷᠦ ᠬᠠᠯᠠ ᠳᠥᠯᠥ ᠦᠵᠡᠭᠰᠡᠨ ᠰᠢᠨᠵᠢ ᠦᠭᠡᠢ ᠪᠠᠢᠭᠰᠠᠨ ᠳᠠ᠃ ᠬᠠᠷᠢᠨ ᠣᠳᠣ ᠠᠮᠤᠷ ᠮᠡᠨᠳᠦ ᠶᠠᠪᠤᠭᠠ ᠪᠣᠯ ᠡᠷᠬᠡ ᠦᠭᠡᠢ ᠨᠢᠭᠡ ᠬᠥᠮᠦᠨ ᠪᠣᠯᠬᠤ ᠲᠠᠢᠰᠢ ᠪᠠᠨ ᠬᠠᠨᠳᠤᠭᠠᠳ ᠢᠷᠡᠬᠦ ᠪᠣᠯ ᠤᠤ ᠭᠡᠵᠦ ᠭᠣᠷᠢᠳᠠᠵᠤ ᠪᠠᠢᠨᠠ ᠭᠡᠳ ᠪᠤᠷᠭᠠᠰᠤᠨ ᠲᠠᠶᠠᠭ ᠢ᠋ᠶ᠋ᠠᠨ ᠲᠤᠯᠤᠨ ᠪᠣᠰᠴᠤ ᠭᠠᠷᠴᠤ ᠣᠳᠪᠠ᠃ ᠪᠤᠰᠤᠳ ᠬᠥᠮᠦᠰ ᠴᠦ᠍ ᠣᠷᠣᠢ ᠶ᠋ᠢᠨ ᠮᠠᠯ ᠰᠠᠭᠠᠯᠢ ᠰᠦᠨ ᠦ᠌ ᠪᠡᠨ ᠠᠵᠢᠯ ᠳ᠋ᠤ᠌ ᠬᠠᠪᠴᠢᠭᠳᠠᠨ ᠭᠠᠷᠴᠠᠢ᠃
ᠳ᠋ᠠᠨᠽᠠᠨ ᠭᠡᠷ ᠲᠦ᠍ ᠭᠠᠭᠴᠠᠭᠠᠷ ᠦᠯᠡᠳᠡᠪᠡ᠃ ᠰᠡᠳᠬᠢᠯ ᠦ᠋ᠨ ᠪᠠᠢᠳᠠᠯ ᠨᠢᠭᠡ ᠯᠡ ᠲᠠᠪᠠ ᠦᠭᠡᠢ᠂ ᠡᠨᠡ ᠨᠢ ᠬᠡᠯᠢᠭ ᠦ᠋ᠨ ᠶᠠᠷᠢᠶᠠ ᠲᠤᠩ ᠰᠦᠷᠡᠬᠡᠢ ᠤᠬᠠᠭᠠᠨ ᠲᠠᠢ ᠪᠠᠢᠪᠠᠴᠤ ᠪᠦᠬᠦ ᠬᠢᠲᠠᠳ ᠢᠷᠭᠡᠳ ᠢ᠋ ᠣᠢᠰᠢᠶᠠᠵᠤ ᠦᠵᠡᠬᠦ ᠦᠭᠡᠢ ᠪᠠᠢᠭᠠ ᠠ᠋ᠴᠠ ᠪᠣᠯᠵᠠᠢ᠃《ᠬᠥᠭᠡᠷᠦᠬᠦᠢ ᠬᠢᠲᠠᠳ ᠢᠷᠭᠡᠳ ᠮᠠᠰᠢ ᠬᠦᠨᠳᠦ ᠪᠡᠷ ᠳᠠᠷᠤᠯᠠᠭᠳᠠᠨ ᠮᠥᠯᠵᠢᠭᠳᠡᠵᠦ ᠪᠠᠢᠨᠠ ᠳᠠ᠃ ᠲᠡᠷᠡ ᠵᠣᠪᠠᠯᠠᠩ ᠠ᠋ᠴᠠ ᠰᠠᠯᠪᠠᠯ ᠬᠡᠴᠢᠨᠡᠭᠡᠨ ᠰᠠᠢᠬᠠᠨ ᠪᠢᠯᠡ᠃ ᠡᠳᠡᠨ ᠢ᠋ ᠮᠣᠩᠭᠣᠯ ᠪᠢᠳᠡ ᠶᠠᠭᠠᠬᠢᠵᠤ ᠪᠣᠯᠬᠤ ᠪᠣᠢ?》 ᠭᠡᠬᠦ ᠶ᠋ᠢᠨ ᠳᠡᠭᠡᠷᠡ ᠣᠳᠣ ᠪᠠᠷ ᠬᠡᠯᠢᠭ ᠦ᠋ᠨ ᠰᠠᠨᠠᠭᠠ ᠰᠡᠳᠬᠢᠯ ᠢ᠋ ᠡᠷᠭᠢᠭᠦᠯᠵᠦ ᠴᠢᠳᠠᠬᠤ ᠬᠦᠴᠦ ᠦᠭᠡᠢ ᠳ᠋ᠡᠭᠡᠨ ᠭᠤᠲᠤᠷᠠᠬᠤ ᠠᠵᠢ᠃ ᠭᠡᠲᠡᠯᠡ ᠠᠷᠠᠳ ᠤ᠋ᠨ ᠨᠠᠮ ᠤ᠋ᠨ《ᠤᠯᠤᠰ ᠣᠷᠣᠨ ᠪᠦᠬᠦᠨ ᠦ᠌ ᠳᠠᠷᠤᠯᠠᠭᠳᠠᠭᠰᠠᠨ ᠠᠷᠠᠳ ᠲᠦᠮᠡᠨ ᠲᠡᠢ ᠬᠠᠨᠢ ᠨᠥᠬᠥᠳ ᠪᠣᠯᠤᠯᠴᠠᠨᠠ》 ᠭᠡᠰᠡᠨ ᠪᠠᠲᠤ ᠵᠣᠷᠢᠯᠭᠠ ᠰᠠᠨᠠᠭᠠᠨ ᠳ᠋ᠤᠨᠢ ᠣᠷᠣᠵᠠᠢ᠃ ᠲᠡᠭᠡᠭᠡᠳ ᠢᠷᠡᠭᠡᠳᠦᠢ ᠳ᠋ᠦ᠍ ᠬᠢᠲᠠᠳ ᠢᠷᠭᠡᠳ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠡᠷᠬᠡ ᠴᠢᠯᠥᠭᠡᠨ ᠦ᠌ ᠪᠡᠨ ᠲᠥᠯᠥᠭᠡ ᠲᠡᠮᠡᠴᠡᠨ ᠪᠣᠰᠬᠤ᠂ ᠲᠡᠭᠦᠨ ᠢ᠋ ᠬᠡᠨ ᠴᠦ᠍ ᠵᠣᠭᠰᠣᠭᠠᠵᠤ ᠦᠯᠦ ᠴᠢᠳᠠᠬᠤ ᠬᠢᠭᠡᠳ ᠬᠥᠮᠦᠨ ᠪᠠᠰᠠ ᠲᠡᠭᠦᠨ ᠳ᠋ᠦ᠍ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠲᠠᠲᠠᠭᠳᠠᠨ ᠣᠷᠣᠯᠴᠠᠬᠤ ᠨᠢ ᠵᠠᠢᠯᠠᠰᠢ ᠦᠭᠡᠢ ᠰᠢᠦ ᠳᠡ ᠭᠡᠬᠦ ᠶ᠋ᠢᠨ ᠰᠠᠴᠠᠭᠤ ᠪᠠᠷ ᠲᠡᠷᠡ ᠴᠠᠭ ᠲᠤ ᠮᠥᠨ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠲᠦᠮᠡᠨ᠂ ᠬᠢᠲᠠᠳ ᠤ᠋ᠨ ᠠᠷᠠᠳ ᠲᠦᠮᠡᠨ ᠲᠡᠢ ᠨᠠᠢᠷᠰᠠᠭ ᠨᠥᠬᠥᠷᠯᠡᠬᠦ ᠶ᠋ᠢ ᠭᠡᠯᠢᠭ ᠪᠠᠢᠲᠤᠭᠠᠢ ᠬᠡᠨ ᠴᠦ᠍ ᠬᠣᠢᠰᠢ ᠲᠠᠲᠠᠵᠤ ᠴᠢᠳᠠᠬᠤ ᠦᠭᠡᠢ ᠰᠢᠦ ᠳᠡ ᠭᠡᠵᠦ ᠪᠣᠳᠣᠭᠳᠠᠭᠰᠠᠨ ᠨᠢ ᠰᠡᠳᠬᠢᠯ ᠢ᠋ ᠠᠱ᠌ᠢᠭᠦᠢ ᠠᠭᠤᠵᠢᠷᠠᠭᠤᠯᠵᠠᠢ᠃
ᠡᠭᠡᠴᠢ ᠰᠥᠷᠦᠮᠡ ᠨᠢ ᠬᠡᠳᠦᠨ ᠢᠮᠠᠭᠠ ᠪᠠᠨ ᠰᠠᠭᠠᠵᠤ ᠳᠠᠭᠤᠰᠤᠨ ᠣᠷᠣᠵᠤ ᠢᠷᠡᠪᠡ᠃ ᠬᠤᠪᠢᠩ ᠪᠢᠴᠢᠬᠠᠨ ᠪᠣᠯᠪᠠᠴᠤ ᠳᠦᠭᠦᠷᠡᠩ ᠰᠦ ᠮᠡᠯᠲᠡᠯᠵᠡᠨᠡ᠃ ᠣᠷᠣᠢ ᠶ᠋ᠢᠨ ᠬᠣᠭᠣᠯᠠᠨ ᠳ᠋ᠤ᠌ ᠳ᠋ᠠᠨᠽᠠᠨ ᠰᠢᠨᠡᠬᠡᠨ ᠪᠦᠷᠢᠭᠰᠡᠨ ᠢᠮᠠᠭᠠᠨ ᠲᠠᠷᠠᠭ ᠢᠳᠡᠪᠡ᠃
ᠬᠣᠶᠠᠷ ᠵᠢᠯ ᠢᠳᠡᠭᠡ ᠦᠭᠡᠢ ᠲᠡᠷᠡ ᠢᠳᠡᠭᠡᠨ ᠦ᠌ ᠠᠮᠲᠠ ᠰᠢᠮᠲᠡ ᠬᠡᠴᠢᠨᠡᠭᠡᠨ ᠰᠠᠢᠬᠠᠨ ᠪᠠᠢᠭᠰᠠᠨ ᠢ᠋ ᠡᠨᠳᠡ ᠥᠭᠦᠯᠡᠬᠦ ᠶᠠᠭᠤᠨ᠃ ᠬᠣᠶᠠᠷ ᠵᠢᠯ ᠣᠷᠣᠵᠤ ᠢᠷᠡᠭᠡ ᠦᠭᠡᠢ ᠭᠡᠷ ᠲᠡᠭᠡᠨ ᠢᠷᠡᠭᠡᠳ ᠮᠥᠨ ᠪᠦᠲᠦᠨ ᠵᠢᠯ ᠳᠡᠭᠡᠷᠡ ᠨᠢ ᠬᠡᠪᠲᠡᠭᠡ ᠦᠭᠡᠢ ᠵᠥᠭᠡᠯᠡᠨ ᠢᠰᠡᠭᠡᠢ ᠳᠡᠪᠢᠰᠬᠡᠷ ᠳᠡᠭᠡᠷᠡ ᠬᠡᠪᠲᠡᠨ ᠪᠡᠶᠡ ᠠᠮᠠᠷᠠᠬᠤ ᠳ᠋ᠤ᠌ ᠶᠣᠰᠣᠲᠠᠢ ᠪᠣᠷᠣ ᠭᠡᠷ ᠲᠡᠭᠡᠨ ᠪᠣᠭᠳᠠ᠂ ᠬᠠᠷᠠ ᠭᠡᠷ ᠲᠡᠭᠡᠨ ᠬᠠᠭᠠᠨ ᠭᠡᠭᠴᠢ ᠪᠠᠢᠯᠠ᠃ ᠡᠭᠡᠴᠢ ᠳᠡᠭᠦᠦ ᠬᠣᠶᠠᠷ ᠨᠢ ᠥᠩᠭᠡᠷᠡᠭᠰᠡᠨ ᠬᠣᠶᠠᠷ ᠵᠢᠯ ᠳ᠋ᠦ᠍ ᠦᠵᠡᠭᠰᠡᠨ ᠲᠤᠭᠤᠯᠤᠭᠰᠠᠨ ᠵᠣᠪᠠᠯᠠᠩ ᠵᠦᠳᠡᠷᠡᠯ ᠢ᠋ᠶ᠋ᠡᠨ ᠳᠦᠩᠭᠡᠷ ᠲᠠᠩᠭᠠᠷ ᠶᠠᠷᠢᠯᠴᠠᠨᠠ᠃ ᠲᠡᠷᠡ ᠵᠠᠭᠤᠷᠠ ᠳ᠋ᠠᠨᠽᠠᠠ ᠳ᠋ᠤ᠌ ᠥᠨᠥᠬᠢ ᠨᠢᠭᠤᠴᠠ ᠠᠮᠠᠷᠠᠭ ᠡᠮᠡᠭᠲᠡᠢ᠂ ᠲᠡᠷᠡ ᠨᠢ ᠨᠠᠰᠤ ᠪᠡᠶᠡ ᠥᠪᠡᠷ ᠲᠡᠢ ᠨᠢ ᠰᠠᠴᠠᠭᠤ᠂ ᠭᠡᠷ ᠣᠷᠣᠨ ᠨᠢ ᠪᠣᠯᠪᠠᠴᠤ ᠳ᠋ᠠᠨᠽᠠᠨ ᠤ᠋ ᠬᠢ ᠡᠴᠡ ᠲᠡᠳᠦᠢ ᠯᠡ ᠳᠠᠪᠠᠭᠤ ᠲᠠᠢ ᠶᠠᠭᠤᠮᠠ ᠲᠠᠢ ᠪᠢᠰᠢ᠃ ᠡᠴᠢᠭᠡ ᠡᠬᠡ ᠬᠣᠶᠠᠷ ᠤ᠋ᠨ ᠭᠠᠷ ᠳᠡᠭᠡᠷᠡ ᠡᠷᠬᠡ ᠲᠠᠩᠬᠢᠯ ᠥᠰᠦᠭᠰᠡᠨ ᠪᠣᠷᠣᠬᠠᠨ ᠬᠠᠴᠠᠷ ᠲᠠᠢ ᠬᠠᠷᠠᠬᠠᠨ ᠬᠥᠮᠥᠰᠬᠡ ᠲᠡᠢ ᠲᠣᠷᠮᠣᠭᠣᠷᠬᠠᠨ ᠨᠢᠳᠦ ᠲᠡᠢ ᠥᠨᠳᠥᠷᠬᠡᠨ ᠪᠡᠶᠡ ᠲᠡᠢ ᠬᠡᠦᠬᠡᠨ᠃ ᠬᠥᠮᠦᠰ ᠲᠡᠭᠦᠨ ᠢ᠋ ᠭᠤᠸᠠ ᠰᠠᠢᠬᠠᠨ ᠳ᠋ᠤ᠌ ᠣᠷᠣᠭᠤᠯᠤᠨ ᠦᠵᠡᠳᠡᠭ ᠪᠣᠯᠪᠠᠴᠤ ᠳ᠋ᠠᠨᠽᠠᠨ ᠳ᠋ᠤ᠌ ᠲᠡᠭᠦᠨ ᠰᠢᠭ ᠰᠠᠢᠬᠠᠨ ᠠᠮᠢᠲᠠᠨ ᠡᠨᠡ ᠳᠡᠯᠡᠬᠡᠢ ᠳ᠋ᠦ᠍ ᠪᠠᠢᠳᠠᠭ ᠦᠭᠡᠢ ᠪᠠᠢᠵᠠᠢ᠃ ᠴᠣᠬᠣᠮ ᠬᠦ᠌ ᠬᠣᠯᠪᠣᠭᠳᠠᠯ ᠭᠡᠪᠡᠯ ᠠᠩᠬᠠ ᠱᠣᠬᠣᠭᠣᠷᠬᠠᠨ ᠰᠣᠨᠢᠷᠬᠠᠵᠤ ᠡᠬᠢᠯᠡᠭᠰᠡᠨ ᠦ᠌ ᠪᠡᠨ ᠵᠢᠯ᠂ ᠵᠤᠨ ᠴᠠᠭ ᠤ᠋ᠨ ᠵᠤᠭᠠᠲᠦ ᠨᠠᠭᠠᠳᠤᠮ《ᠦᠳᠡᠰᠢ ᠶ᠋ᠢᠨ ᠴᠠᠭᠠᠨ ᠮᠣᠳᠣ ᠬᠠᠶᠠᠯᠲᠠ》 ᠡᠷᠡᠭᠲᠡᠢ᠂ ᠡᠮᠡᠭᠲᠡᠢ ᠵᠠᠯᠠᠭᠤᠰ ᠬᠣᠶᠠᠷ ᠲᠠᠯᠠᠴᠠᠨ ᠮᠣᠳᠣ ᠰᠢᠳᠡᠭᠡᠳ ᠲᠡᠭᠦᠨ ᠢ᠋ ᠪᠤᠯᠢᠶᠠᠯᠳᠤᠬᠤ ᠵᠠᠪᠰᠢᠶᠠᠨ ᠳ᠋ᠤ᠌ ᠳ᠋ᠠᠨᠽᠠᠨ ᠬᠡᠦᠬᠡᠨ ᠦ᠌ ᠴᠡᠭᠡᠵᠢᠨ ᠪᠡᠶᠡ ᠶ᠋ᠢ ᠰᠠᠨᠠᠮᠰᠠᠷ ᠦᠭᠡᠢ ᠲᠡᠪᠡᠷᠢᠬᠦ ᠳ᠋ᠦ᠍ ᠡᠷᠡᠭᠦᠯ ᠴᠢᠭᠢᠷᠠᠭ ᠬᠣᠶᠠᠷ ᠰᠠᠢᠬᠠᠨ ᠠᠲᠠᠷ ᠮᠥᠮᠥ ᠨᠢ ᠪᠠᠷᠢᠭᠳᠠᠵᠤ ᠰᠡᠳᠬᠢᠯ ᠪᠤᠯᠢᠶᠠᠭᠰᠠᠨ ᠨᠢᠭᠡ ᠶᠠᠪᠤᠳᠠᠯ ᠪᠣᠢ᠃ ᠳᠠᠷᠠᠭᠠ ᠰᠥᠨᠢ᠂ ᠮᠣᠳᠣ ᠬᠠᠶᠠᠯᠲᠠ ᠳ᠋ᠤ᠌ ᠳ᠋ᠠᠨᠽᠠᠨ ᠲᠦᠷᠦᠭᠦᠴᠢ ᠶ᠋ᠢᠨ ᠰᠡᠳᠬᠢᠯ ᠪᠤᠯᠢᠶᠠᠭᠳᠠᠭᠰᠠᠨ ᠳ᠋ᠤ᠌ ᠠᠪᠲᠠᠭᠳᠠᠨ ᠥᠨᠥᠬᠢ ᠬᠡᠦᠬᠡᠨ ᠢ᠋ ᠵᠣᠷᠢᠭᠤᠳᠠ ᠲᠡᠪᠡᠷᠢᠨ ᠳᠡᠭᠡᠷᠡ ᠡᠷᠭᠦᠭᠰᠡᠨ ᠪᠥᠭᠡᠳ ᠡᠮᠡᠭᠲᠡᠢ ᠭᠠᠵᠠᠷ ᠬᠠᠶᠠᠭᠳᠠᠬᠤ ᠠ᠋ᠴᠠ ᠠᠶᠤᠨ ᠬᠦᠵᠦᠭᠦᠦ ᠪᠡᠷ ᠨᠢ ᠬᠣᠶᠠᠷ ᠭᠠᠷ ᠵᠥᠷᠢᠭᠦᠯᠦᠨ ᠴᠢᠩᠭᠠᠳᠠ ᠲᠡᠪᠡᠷᠢᠵᠡᠢ᠃ ᠲᠡᠭᠡᠬᠦ ᠳ᠋ᠦ᠍ᠨᠢ ᠲᠡᠭᠦᠨ ᠡᠴᠡ ᠬᠣᠣᠰ ᠦᠭᠡᠢ ᠰᠠᠢᠬᠠᠨ ᠬᠠᠯᠠᠭᠤᠨ ᠠᠮᠢᠰᠬᠤᠯ᠂ ᠵᠦᠢᠷᠯᠡᠰᠢ ᠦᠭᠡᠢ ᠵᠥᠭᠡᠯᠡᠨ ᠡᠶᠡᠯᠳᠡᠭ ᠦᠨᠦᠷ ᠬᠠᠩᠬᠤᠯᠵᠠᠢ᠃ ᠭᠤᠷᠪᠠᠳᠠᠬᠢ ᠤᠴᠠᠷᠠᠯ ᠨᠢ ᠳ᠋ᠠᠨᠽᠠᠨ ᠢ᠋ ᠵᠠᠩᠴᠢᠬᠦᠦ ᠣᠷᠣᠨᠠ ᠭᠡᠵᠦ ᠢᠳᠡ ᠬᠥᠷ ᠪᠠᠬᠠᠷᠬᠠᠯ ᠪᠣᠯᠤᠨ ᠳᠠᠪᠬᠢᠵᠤ ᠶᠠᠪᠤᠬᠤ ᠳ᠋ᠤ᠌ ᠬᠡᠦᠬᠡᠨ ᠥᠪᠡᠷ ᠢ᠋ᠶ᠋ᠡᠨ ᠲᠡᠭᠰᠢᠬᠡᠨ ᠰᠠᠢᠬᠠᠨ ᠴᠠᠭᠠᠨ ᠰᠢᠳᠦᠨ ᠦ᠌ ᠪᠡᠨ ᠵᠠᠪᠰᠠᠷ ᠢ᠋ᠶ᠋ᠠᠷ《ᠰᠠᠢᠨ ᠶᠠᠪᠤᠭᠠᠷᠠᠢ》 ᠭᠡᠵᠦ ᠰᠠᠮ ᠰᠢᠪᠡᠨᠡᠭᠡᠳ ᠨᠢᠭᠤᠷ ᠨᠢ ᠴᠢᠰ ᠤᠯᠠᠭᠠᠨ ᠪᠣᠯᠤᠭᠰᠠᠨ ᠶᠠᠪᠤᠳᠠᠯ ᠪᠣᠢ ᠠᠵᠢ᠃ ᠣᠳᠣ ᠲᠡᠷᠡ ᠪᠦᠬᠦᠨ ᠴᠡᠭᠡᠵᠢᠨ ᠳ᠋ᠦ᠍ᠨᠢ ᠲᠣᠪ ᠲᠣᠳᠣᠬᠠᠨ ᠡᠷᠭᠢᠯᠳᠦᠬᠦ ᠳᠣᠳᠣᠮ ᠥᠭᠬᠦ ᠭᠡᠰᠡᠨ ᠪᠡᠯᠡᠭ ᠢ᠋ᠶ᠋ᠡᠨ ᠭᠡᠭᠡᠴᠢᠭᠰᠡᠨ ᠶᠠᠪᠤᠳᠠᠯ ᠤᠯᠠᠮ ᠢ᠋ᠶ᠋ᠠᠷ ᠬᠠᠷᠠᠰᠠᠭᠳᠠᠨᠠ᠃ ᠲᠡᠭᠡᠭᠡᠳ᠄ ᠡᠭᠡᠴᠢ ᠠ᠋ ᠰᠢᠷᠣᠪ ᠭᠤᠸᠠᠢ ᠬᠢ ᠬᠠᠮᠢᠭᠠ ᠪᠣᠢ? ᠨᠢᠩᠪᠤᠤ ᠡᠪᠦᠭᠡᠨ ᠦ᠌ ᠬᠢ ᠰᠠᠢᠨ ᠪᠠᠢᠳᠠᠭ ᠤᠤ? ᠭᠡᠬᠦᠴᠢᠯᠡᠨ ᠠᠢᠯ ᠤ᠋ᠳ ᠢ᠋ ᠠᠰᠠᠭᠤᠬᠤ ᠨᠢ ᠦᠨᠡᠨ ᠳ᠋ᠡᠭᠡᠨ ᠲᠡᠳᠡᠨ ᠦ᠌ ᠬᠢ ᠶ᠋ᠢ ᠰᠣᠨᠢᠷᠬᠠᠬᠤ ᠳ᠋ᠠᠭᠠᠨ ᠪᠢᠰᠢ᠂ ᠥᠨᠥᠬᠢ ᠡᠮᠡᠭᠲᠡᠢ ᠪᠡᠨ ᠰᠤᠷᠠᠭᠯᠠᠬᠤ ᠶ᠋ᠢᠨ ᠪᠡᠯᠡᠳᠬᠡᠯ ᠪᠠᠢᠪᠠ᠃
ᠵᠠ ᠲᠡᠭᠡᠭᠡᠳ ᠥᠨᠥᠬᠢ ᠬᠡᠨ ᠦ᠌ ᠬᠢ ᠪᠢᠯᠡ ᠳᠠ? ᠠ ᠲᠡᠢᠮᠦ ᠳᠡᠯᠭᠡᠷ ᠦ᠋ᠨ ᠬᠢ ᠬᠠᠮᠢᠭᠠ ᠪᠣᠢ? ᠭᠡᠬᠦ ᠳ᠋ᠦ᠍ᠨᠢ ᠡᠭᠡᠴᠢ᠄
— ᠦ ᠲᠡᠳᠡᠨ ᠦ᠌ ᠬᠢ ᠰᠠᠢᠨ᠂ ᠣᠳᠣ ᠡᠨᠡᠭᠦᠬᠡᠨ ᠭᠣᠣᠯ ᠤ᠋ᠨ ᠲᠡᠷᠲᠡᠭᠡ ᠰᠢᠦ ᠳᠡ᠃
— ᠶᠠᠭᠠᠮᠠᠢ ᠳᠠ᠂ ᠭᠡᠷ ᠲᠡᠭᠡᠨ ᠭᠤᠷᠪᠠᠭᠤᠯᠠ ᠪᠠᠢᠳᠠᠭ ᠪᠢᠯᠢᠤ ᠳᠠ᠃
— ᠲᠡᠢᠮᠦ ᠠ᠋ ᠭᠤᠷᠪᠠᠭᠤᠯᠠ ᠪᠠᠨ᠂ ᠬᠠᠷᠢᠨ ᠣᠳᠣ ᠡᠪᠦᠭᠡᠨ ᠡᠮᠡᠭᠡᠨ ᠬᠣᠶᠠᠷ ᠬᠣᠶᠠᠭᠤᠯᠠᠬᠠᠨ ᠢ᠋ᠶ᠋ᠠᠨ ᠪᠣᠯᠤᠭᠰᠠᠨ ᠭᠡᠵᠦ ᠳᠤᠭᠤᠯᠳᠠᠨᠠ ᠪᠢᠯᠡ᠃ ᠳ᠋ᠠᠨᠽᠠᠨ ᠰᠣᠴᠢᠨ ᠬᠠᠷᠠᠩᠭᠤᠢ ᠶ᠋ᠢᠨ ᠳᠤᠮᠳᠠ ᠥᠨᠳᠡᠰᠬᠢᠵᠦ
— ᠵᠠ ᠶᠠᠭᠠᠬᠢᠭᠠᠳ ᠲᠡᠷᠡ ᠪᠢᠯᠡ?
— ᠥᠨᠥᠬᠢ ᠬᠡᠦᠬᠡᠨ ᠳᠠᠵᠢᠳ ᠢ᠋ ᠨᠢ ᠨᠢᠮᠠᠬᠦᠦ ᠪᠣᠰᠬᠠᠨ ᠠᠪᠤᠭᠠᠳ ᠶᠠᠪᠤᠴᠢᠬᠠᠭᠰᠠᠨ ᠭᠡᠨᠡ ᠪᠢᠯᠡ᠃ ᠲᠡᠷᠡ ᠬᠣᠶᠠᠷ ᠴᠦ᠍ ᠶᠠᠭᠠᠬᠢᠬᠤᠪ ᠳᠠ ᠲᠡᠭᠡᠭᠡᠳ ᠯᠡ ᠰᠠᠭᠤᠬᠤ ᠯᠠ ᠪᠣᠯᠤᠨᠠ᠃
ᠳ᠋ᠠᠨᠽᠠᠨ ᠭᠡᠳᠡᠷᠭᠦ ᠰᠤᠨᠤᠨ ᠤᠨᠠᠪᠠ᠃ ᠳᠠᠬᠢᠨ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠂ ᠰᠡᠳᠬᠢᠯ ᠳ᠋ᠦ᠍ᠨᠢ ᠪᠥᠭᠡᠮ ᠬᠠᠷᠠ ᠶᠠᠭᠤᠮᠠ ᠡᠷᠭᠢᠯᠳᠦᠨ ᠬᠦᠨᠳᠦ ᠪᠡᠷ ᠠᠮᠢᠰᠬᠤᠯᠯᠠᠨᠠ᠃
ᠬᠥᠮᠦᠨ ᠠᠮᠢᠲᠠᠨ ᠠᠮᠤᠷ ᠵᠢᠮᠦᠷ ᠠᠮᠢᠳᠤᠷᠠᠯ ᠲᠠᠢ ᠵᠣᠯᠭᠠᠭᠰᠠᠨ ᠳ᠋ᠠᠭᠠᠨ ᠰᠡᠳᠬᠢᠯ ᠲᠡᠨᠢᠭᠦᠨ ᠰᠠᠢᠬᠠᠨ ᠨᠣᠢᠷᠰᠤᠵᠤ ᠪᠠᠢᠬᠤ ᠳ᠋ᠤ᠌ ᠳ᠋ᠠᠨᠽᠠᠨ ᠲᠡᠭᠦᠨ ᠦ᠌ ᠪᠦᠬᠦ ᠢᠷᠡᠭᠡᠳᠦᠢ ᠶ᠋ᠢᠨ ᠬᠦᠰᠡᠯ ᠮᠥᠷᠥᠭᠡᠳᠦᠯ ᠡᠴᠡ ᠨᠢ ᠠᠩᠭᠢᠳᠠ ᠪᠣᠯᠤᠨ ᠲᠠᠰᠤᠷᠠᠭᠰᠠᠨ ᠤ᠋ ᠬᠤᠪᠢ ᠳ᠋ᠤ᠌ ᠤᠨᠲᠠᠬᠤ ᠨᠣᠢᠷ ᠨᠢ ᠳᠡᠮᠡᠢ ᠪᠠᠯᠠᠷᠲᠤᠨ ᠬᠤᠯᠵᠢᠵᠠᠢ᠃ ᠭᠡᠲᠡᠯᠡ ᠡᠨᠡ ᠬᠣᠲᠠ ᠳᠤ ᠪᠠᠰᠠ ᠳ᠋ᠠᠨᠽᠠᠨ ᠤ᠋ ᠠᠳᠠᠯᠢ ᠤᠨᠲᠠᠵᠤ ᠦᠯᠦ ᠴᠢᠳᠠᠭᠴᠢ ᠨᠢᠭᠡ ᠬᠥᠮᠦᠨ ᠪᠠᠢᠨᠠ᠃ ᠲᠡᠷᠡ ᠪᠣᠯ ᠭᠡᠯᠢᠭ ᠦ᠋ᠨ ᠪᠡᠷᠢ ᠬᠠᠨᠳᠠᠨᠰᠦᠷᠦᠩ᠃《ᠬᠥᠮᠦᠨ ᠠᠮᠢᠲᠠᠨ ᠭᠡᠷ ᠣᠷᠣᠨ ᠡᠬᠡᠨᠡᠷ ᠬᠡᠦᠬᠡᠳ ᠭᠡᠵᠦ ᠡᠷᠭᠢᠵᠦ ᠢᠷᠡᠨ ᠪᠠᠶᠠᠷ ᠪᠠᠶᠠᠰᠬᠤᠯᠠᠩ ᠪᠣᠯᠵᠤ ᠪᠠᠢᠬᠤ ᠳ᠋ᠤ᠌ ᠮᠢᠨᠦ ᠡᠷᠡ ᠶᠠᠭᠠᠬᠢᠭᠠᠳ ᠢᠷᠡᠳᠡᠭ ᠦᠭᠡᠢ ᠪᠣᠢ? ᠲᠡᠷᠡ ᠮᠢᠨᠢ ᠲᠡᠨᠡᠭ ᠮᠤᠩᠬᠠᠭ ᠲᠠᠭᠠᠨ ᠡᠨᠡ ᠤᠤ᠂ ᠡᠰᠡᠪᠡᠯ ᠨᠠᠮᠠᠶ᠋ᠢ ᠬᠠᠨᠢᠯᠠᠭᠰᠠᠨ ᠬᠠᠨᠢ ᠪᠠᠨ ᠭᠡᠵᠦ ᠦᠵᠡᠳᠡᠭ ᠦᠭᠡᠢ ᠳ᠋ᠡᠭᠡᠨ ᠤᠤ?》 ᠭᠡᠵᠦ ᠣᠯᠠᠨ ᠢ᠋ ᠪᠣᠳᠣᠨ ᠤᠷᠤᠰᠬᠤ ᠨᠢᠯᠪᠤᠰᠤ ᠪᠠᠷ ᠳᠡᠷᠡ ᠪᠡᠨ ᠨᠡᠪᠲᠡ ᠰᠢᠪᠲᠤ ᠨᠤᠷᠠᠭᠠᠨᠠ᠃
ᠮᠠᠷᠭᠠᠰᠢ ᠨᠢ ᠳ᠋ᠠᠨᠽᠠᠨ ᠡᠷᠲᠡ ᠭᠡᠭᠴᠢ ᠶ᠋ᠢᠨ ᠪᠣᠰᠴᠤ ᠠᠷᠭᠠᠮᠵᠢᠶᠠᠲᠦ ᠮᠣᠷᠢ ᠪᠠᠨ ᠠᠪᠴᠢᠷᠠᠭᠠᠳ ᠡᠭᠡᠴᠢ ᠳ᠋ᠡᠭᠡᠨ ᠲᠤᠬᠠᠲᠠᠢᠬᠠᠨ ᠬᠡᠳᠦᠨ ᠦᠭᠡ ᠵᠠᠬᠢᠨ ᠦᠯᠡᠳᠡᠭᠡᠳ ᠮᠣᠷᠳᠠᠨ ᠶᠠᠪᠤᠵᠠᠢ᠃ ᠲᠡᠭᠦᠨ ᠦ᠌ ᠳᠠᠷᠠᠭᠠ ᠬᠣᠯᠠ ᠣᠢᠷᠠ ᠶ᠋ᠢᠨ ᠬᠥᠮᠦᠰ ᠳ᠋ᠠᠨᠽᠠᠨ ᠲᠠᠢ ᠠᠭᠤᠯᠵᠠᠬᠤ᠂ ᠦᠵᠡᠭᠰᠡᠨ ᠬᠠᠷᠠᠭᠰᠠᠨ᠂ ᠲᠤᠭᠤᠯᠤᠭᠰᠠᠨ ᠪᠦᠬᠦᠨ ᠢ᠋ ᠨᠢ ᠶᠠᠷᠢᠭᠤᠯᠤᠨ ᠰᠣᠨᠢᠷᠬᠠᠬᠤ ᠪᠠᠷ ᠪᠥᠭᠡᠮ ᠪᠥᠭᠡᠮ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠢᠷᠡᠪᠡ᠃ ᠢᠩᠭᠢᠬᠦ ᠳ᠋ᠦ᠍ ᠡᠭᠡᠴᠢ ᠨᠢ᠄
— ᠳ᠋ᠠᠨᠽᠠᠨ ᠪᠠᠢᠬᠤ ᠦᠭᠡᠢ ᠠ᠋᠂ ᠠᠷᠠᠳ ᠤ᠋ᠨ ᠵᠢᠷᠤᠮᠲᠤ ᠴᠡᠷᠢᠭ ᠦ᠋ᠳ ᠳᠡᠭᠡᠷᠡ ᠪᠡᠨ ᠣᠴᠢᠨ ᠪᠣᠭᠳᠠ ᠶ᠋ᠢᠨ ᠬᠦᠷᠢᠶᠡ ᠶ᠋ᠢ ᠴᠢᠯᠥᠭᠡᠯᠡᠬᠦ ᠳ᠋ᠦ᠍ ᠣᠷᠣᠯᠴᠠᠬᠤ ᠪᠠᠷ ᠶᠠᠪᠤᠭᠰᠠᠨ᠃ ᠡᠴᠦᠰ ᠲᠦ᠋ᠨᠢ ᠨᠠᠮᠠᠶ᠋ᠢ ᠴᠦ᠍ ᠠᠪᠠᠴᠢᠨ ᠬᠦᠷᠢᠶᠡᠨ ᠦ᠌ ᠠᠢᠯ ᠪᠣᠯᠭᠠᠬᠤ ᠭᠡᠨᠡ ᠪᠢᠯᠡ᠃ ᠢᠩᠭᠢᠬᠦ ᠪᠡᠷ ᠲᠠ ᠨᠠᠷ ᠳ᠋ᠠᠨᠽᠠᠨ ᠲᠠᠢ ᠮᠥᠳᠳᠥ ᠳ᠋ᠡᠭᠡᠨ ᠠᠭᠤᠯᠵᠠᠬᠤ ᠦᠭᠡᠢ ᠪᠣᠢ ᠊ᠶᠠ ᠬᠡᠮᠡᠬᠦ ᠠᠵᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ ᠄ ᠲᠡᠭᠷᠢ ᠡᠵᠢ