ᠬᠥᠯᠥᠭ ᠪᠠᠭᠠᠲᠤᠷ ᠪᠤᠭᠤᠷᠴᠢ - ᠪ᠂ ᠦᠯᠵᠡᠢᠰᠦ᠋ᠷᠦᠩ < ᠳᠡᠳ᠋ ᠪᠦᠯᠦᠭ - 21> Хүлэг баатар буурч - Б. Өлзийсүрэн <Дэд бүлэг-21>
104ᠥᠪᠡᠷ ᠦᠨ ᠵᠠᠮ ᠮᠥᠷ ᠢᠶᠡᠷ ᠲᠡᠮᠲᠡᠷᠢᠵᠦ ᠡᠷᠡ ᠬᠥᠮᠥᠨ ᠦ ᠡᠷᠴᠢ ᠬᠦᠴᠦ ᠶᠢ ᠣᠯᠵᠤ ᠬᠦᠷᠲᠡᠭᠰᠡᠨ ᠳᠡᠳ᠋ ᠪᠦᠯᠦᠭ
ᠬᠣᠷᠢᠨ ᠨᠢᠭᠡ
ᠬᠥᠮᠦᠨ ᠬᠣᠶᠠᠷ ᠪᠣᠯ ᠨᠢᠭᠡ ᠨᠢ ᠠᠬᠠᠯᠠᠨᠠ
ᠨᠣᠬᠠᠢ ᠬᠣᠶᠠᠷ ᠪᠣᠯ ᠬᠣᠭᠣᠯᠠ ᠪᠠᠨ ᠪᠤᠯᠢᠶᠠᠯᠳᠤᠨᠠ
ᠨᠠᠮᠤᠷ ᠤ᠋ᠨ ᠠᠳᠠᠭ ᠰᠠᠷᠠ ᠪᠠᠷᠤᠭ ᠳᠤᠮᠳᠠ ᠪᠠᠨ ᠣᠷᠣᠵᠤ ᠠᠭᠤᠯᠠᠨ ᠳ᠋ᠤ᠌ ᠴᠠᠰᠤ ᠲᠣᠭᠲᠠᠭᠰᠠᠨ ᠦᠶᠡ᠃ ᠲᠡᠮᠦᠵᠢᠨ ᠡᠨᠡ ᠨᠠᠮᠤᠷ ᠲᠠᠷᠬᠠᠮᠠᠯ ᠣᠪᠣᠭ ᠠᠢᠮᠠᠭ ᠤ᠋ᠳ ᠢ᠋ ᠨᠢᠭᠡᠳᠬᠡᠭᠰᠡᠨ ᠦ᠌ ᠦᠷᠡ ᠳ᠋ᠦᠩ ᠳ᠋ᠦ᠍ ᠶᠡᠬᠡᠬᠡᠨ ᠭᠠᠵᠠᠷ ᠨᠤᠲᠤᠭ ᠢ᠋ ᠬᠠᠮᠤᠷᠤᠭᠰᠠᠨ ᠢᠷᠭᠡᠳ ᠦ᠋ᠳ ᠢ᠋ ᠵᠠᠬᠢᠷᠭᠠᠨ ᠳ᠋ᠠᠭᠠᠨ ᠣᠷᠣᠭᠤᠯᠵᠠᠢ᠃ ᠴᠡᠷᠢᠭ ᠨᠢ ᠭᠡᠬᠦ ᠳ᠋ᠦ᠍ ᠮᠢᠩᠭᠠ ᠭᠡᠳᠡᠭ ᠦᠭᠡᠢ ᠶᠦᠮ ᠠ᠋ ᠭᠡᠬᠦ ᠳ᠋ᠦ᠍ ᠪᠠᠭᠰᠢᠷᠠᠭᠰᠠᠨ ᠴᠡᠷᠢᠭ ᠡᠷᠡᠰ ᠴᠤᠭᠯᠠᠷᠠᠬᠤ ᠪᠣᠯᠵᠤ᠂ ᠲᠡᠳᠡᠨ ᠢ᠋ ᠲᠠᠪᠤ᠂ ᠠᠷᠪᠠ ᠪᠠᠷ ᠪᠠᠭ ᠨᠢᠭᠡᠴᠢ ᠳ᠋ᠦ᠍ ᠬᠤᠪᠢᠶᠠᠵᠤ ᠲᠤᠰ ᠪᠦᠷᠢ ᠳ᠋ᠦ᠍ ᠳᠠᠷᠤᠭᠠ᠂ ᠠᠬᠠᠯᠠᠭᠴᠢ ᠲᠣᠮᠢᠯᠠᠵᠤ ᠤᠯᠠᠮ ᠢ᠋ᠶ᠋ᠠᠷ ᠪᠠᠭ᠂ ᠬᠡᠰᠡᠭ᠂ ᠪᠦᠯᠦᠭ ᠪᠣᠯᠤᠨ ᠲᠣᠮᠣᠷᠠᠬᠤ ᠪᠣᠯᠠᠢ᠃ ᠪᠣᠭᠣᠷᠴᠢ ᠳ᠋ᠤ᠌ ᠨᠡᠯᠢᠶᠡᠳ ᠲᠣᠮᠣᠬᠠᠨ ᠪᠦᠯᠦᠭ ᠣᠨᠣᠭᠠᠵᠠᠢ᠃ ᠴᠡᠷᠢᠭ ᠦ᠋ᠳ ᠲᠡᠢ ᠪᠡᠨ ᠲᠠᠨᠢᠯᠴᠠᠬᠤ᠂ ᠠᠵᠢᠯ ᠰᠤᠷᠭᠠᠭᠤᠯᠢᠯᠠᠯ ᠵᠣᠬᠢᠶᠠᠨ ᠪᠠᠢᠭᠤᠯᠬᠤ ᠵᠡᠷᠭᠡ ᠪᠡᠷ ᠬᠡᠰᠡᠭ ᠬᠤᠭᠤᠴᠠᠭᠠ ᠥᠩᠭᠡᠷᠡᠵᠦ ᠪᠦᠷ ᠴᠡᠷᠢᠭ ᠦ᠋ᠳ ᠦ᠋ᠨ ᠳᠤᠮᠳᠠ ᠣᠷᠣᠵᠤ ᠬᠠᠮᠲᠤ ᠠᠮᠢᠳᠤᠷᠠᠬᠤ ᠪᠣᠯᠪᠠ᠃ ᠴᠡᠷᠢᠭ ᠦ᠋ᠨ ᠳᠤᠮᠳᠠ ᠲᠣᠭᠲᠠᠭᠠᠭᠰᠠᠨ ᠬᠠᠲᠠᠭᠤ ᠲᠢᠭ ᠵᠢᠷᠤᠮ《ᠳᠡᠭᠡᠷᠡ ᠡᠴᠡ ᠳᠣᠭᠣᠭᠰᠢ ᠱᠠᠲᠤ ᠳᠠᠷᠠᠭᠠᠯᠠᠨ ᠵᠠᠬᠢᠷᠬᠤ᠂ ᠠᠬᠠᠯᠠᠬᠤ ᠬᠥᠮᠦᠨ ᠦ᠌ ᠲᠤᠰᠢᠶᠠᠯ ᠢ᠋ ᠦᠭᠡ ᠳᠠᠭᠤ ᠦᠭᠡᠢ ᠪᠡᠶᠡᠯᠡᠭᠦᠯᠬᠦ᠃ ᠠᠮᠢ ᠡᠷᠡᠰᠳᠡᠵᠦ ᠪᠣᠯᠬᠤ ᠣᠰᠤᠯᠲᠠᠢ ᠵᠦᠢᠯ ᠥᠭᠡᠳᠡ ᠭᠠᠭᠴᠠᠭᠠᠷ ᠲᠡᠮᠡᠦᠯᠵᠦ ᠪᠣᠯᠬᠤ ᠦᠭᠡᠢ᠃ ᠠᠮᠢ ᠪᠣᠯ ᠴᠢᠨᠦ ᠬᠠᠮᠤᠭ ᠤ᠋ᠨ ᠦᠨᠡᠲᠦ ᠴᠢᠬᠤᠯᠠ ᠡᠷᠳᠡᠨᠢ᠃ ᠲᠡᠢᠮᠦ ᠵᠦᠢᠯ ᠳ᠋ᠦ᠍ ᠬᠣᠶᠠᠷ ᠪᠣᠯᠤᠨ ᠲᠡᠭᠦᠨ ᠡᠴᠡ ᠳᠡᠭᠡᠭᠰᠢ ᠲᠣᠭᠠ ᠪᠠᠷ ᠬᠠᠮᠲᠤᠷᠠᠬᠤ᠃ ᠴᠡᠷᠢᠭ ᠦ᠋ᠨ ᠬᠥᠮᠦᠨ ᠬᠣᠶᠠᠷ ᠪᠣᠯᠤᠨ ᠲᠡᠭᠦᠨ ᠡᠴᠡ ᠳᠡᠭᠡᠭᠰᠢ ᠲᠣᠭᠠ ᠪᠠᠷ ᠶᠠᠪᠤᠬᠤ ᠳ᠋ᠤ᠌ ᠵᠠᠪᠠᠯ ᠲᠤᠰᠢᠶᠠᠯ ᠲᠠᠢ᠂ ᠴᠢᠳᠠᠪᠤᠷᠢᠲᠠᠢ ᠬᠥᠮᠦᠨ ᠨᠢ ᠠᠬᠠᠯᠠᠬᠤ᠃ ᠴᠡᠷᠢᠭ ᠦ᠋ᠨ ᠬᠥᠮᠦᠨ ᠮᠣᠷᠢ ᠪᠣᠯᠤᠨ ᠵᠡᠪᠰᠡᠭ ᠢ᠋ᠶ᠋ᠡᠨ ᠠᠮᠢ ᠪᠡᠶᠡ ᠠᠳᠠᠯᠢ ᠬᠠᠮᠠᠭᠠᠯᠠᠬᠤ᠂ ᠮᠣᠷᠢ ᠮᠠᠯ ᠲᠠᠢ ᠬᠠᠲᠠᠭᠤ ᠰᠢᠷᠦᠭᠦᠨ ᠬᠠᠷᠢᠴᠠᠪᠠᠯ ᠰᠢᠢᠳᠬᠡᠬᠦ᠃ ᠣᠯᠵᠠᠨ ᠤ᠋ ᠵᠦᠢᠯ ᠢ᠋ ᠳᠠᠩ ᠢ᠋ᠶ᠋ᠠᠷ ᠳᠤᠷᠠ ᠮᠡᠳᠡᠨ ᠠᠪᠴᠤ ᠪᠣᠯᠬᠤ ᠦᠭᠡᠢ᠂ ᠳᠡᠭᠡᠷᠡ ᠡᠴᠡ ᠳᠣᠭᠣᠭᠰᠢ ᠬᠤᠪᠢᠶᠠᠷᠢᠯᠠᠵᠤ ᠬᠦᠷᠲᠡᠭᠡᠨᠡ᠃ ᠣᠯᠵᠠᠯᠠᠭᠳᠠᠭᠰᠠᠨ ᠡᠩ ᠦ᠋ᠨ ᠨᠣᠮᠣᠬᠠᠨ ᠬᠥᠮᠦᠰ ᠢ᠋ ᠳᠠᠷᠤᠯᠠᠵᠤ ᠬᠡᠷᠴᠡᠭᠡᠢᠯᠡᠵᠦ ᠪᠣᠯᠬᠤ ᠦᠭᠡᠢ᠃ ᠡᠯᠡ ᠵᠢᠷᠤᠮ ᠢ᠋ ᠴᠡᠷᠢᠭ ᠡᠴᠡ ᠡᠬᠢᠯᠡᠭᠡᠳ ᠳᠡᠭᠡᠳᠦ ᠲᠤᠰᠢᠶᠠᠯᠲᠠ ᠪᠦᠭᠦᠳᠡ ᠴᠡᠭᠡᠵᠢᠯᠡᠨ ᠬᠠᠲᠠᠭᠤ ᠳᠠᠭᠠᠵᠤ ᠮᠣᠷᠳᠠᠨᠠ》 ᠭᠡᠬᠦ ᠵᠡᠷᠭᠡ ᠲᠣᠭᠲᠠᠭᠠᠵᠠᠢ᠃
ᠴᠡᠷᠢᠭ ᠦ᠋ᠨ ᠲᠠᠯᠠ ᠪᠠᠷ ᠬᠢ ᠪᠦᠬᠦᠢ ᠯᠡ ᠬᠡᠷᠡᠭ ᠶᠠᠪᠤᠳᠠᠯ ᠳ᠋ᠤ᠌ ᠪᠤᠭᠤᠷᠴᠢ᠂ ᠵᠠᠯᠠᠮᠠ᠂ ᠬᠠᠰᠠᠷ᠂ ᠪᠡᠯᠭᠦᠳᠡᠢ ᠨᠠᠷ ᠵᠥᠪᠯᠡᠭᠴᠢ ᠪᠣᠯᠵᠤ ᠪᠤᠭᠤᠷᠴᠢ ᠶ᠋ᠢ ᠴᠡᠷᠢᠭ ᠦ᠋ᠨ ᠬᠡᠷᠡᠭ ᠮᠡᠳᠡᠭᠴᠢ ᠪᠡᠷ ᠳᠠᠪᠬᠤᠷ ᠲᠣᠮᠢᠯᠠᠵᠠᠢ᠃
ᠢᠷᠭᠡᠳ ᠦ᠋ᠨ ᠬᠡᠷᠡᠭ ᠢ᠋ ᠮᠡᠳᠡᠬᠦ ᠵᠠᠬᠢᠷᠤᠭᠴᠢ ᠪᠠᠷ ᠰᠢᠯᠦᠬᠡᠢ ᠶ᠋ᠢ ᠲᠣᠮᠢᠯᠠᠯᠠ᠃
ᠲᠡᠮᠦᠵᠢᠨ ᠢ᠋ ᠡᠮᠦᠨᠡ ᠵᠦᠭ ᠠᠶᠠᠯᠠᠯ ᠵᠣᠬᠢᠶᠠᠵᠤ ᠬᠠᠷᠢᠶᠠᠲᠤ ᠨᠠᠷ ᠢ᠋ᠶ᠋ᠠᠨ ᠡᠮᠬᠢᠯᠡᠨ ᠪᠠᠢᠭᠤᠯᠬᠤ ᠦᠶᠡ ᠳ᠋ᠦ᠍ ᠪᠤᠭᠤᠷᠴᠢ ᠠᠷᠤ ᠶ᠋ᠢᠨ ᠬᠢᠨ ᠤᠷᠤᠭᠤ ᠡᠷᠭᠢᠵᠦ ᠶᠠᠪᠤᠭᠰᠠᠨ ᠶᠤᠮ᠃ ᠲᠡᠭᠦᠨ ᠢ᠋ ᠣᠴᠢᠬᠤ ᠳ᠋ᠤ᠌ ᠬᠣᠷᠢᠭᠠᠳ ᠡᠷᠡᠴᠦᠳ《ᠠᠭᠤᠯᠠ ᠶ᠋ᠢᠨ ᠮᠠᠩᠭᠤᠰ》 ᠢ᠋ ᠳᠠᠷᠤᠬᠤ ᠪᠠᠷ ᠵᠡᠪᠰᠡᠭᠯᠡᠨ ᠮᠣᠷᠳᠠᠭᠠᠳ ᠲᠡᠳᠡ ᠡᠷᠭᠢᠵᠦ ᠢᠷᠡᠭᠡ ᠦᠭᠡᠢ ᠲᠦᠭᠰᠢᠭᠦᠷᠢᠲᠡᠢ ᠪᠠᠢᠪᠠ᠃ ᠲᠡᠭᠦᠰᠬᠡᠨ ᠲᠡᠢ ᠠᠮᠢᠨᠴᠢᠯᠠᠨ ᠶᠠᠷᠢᠶᠠ ᠪᠣᠯᠬᠤ ᠢᠯᠳᠠᠮ ᠳ᠋ᠤ᠌ ᠡᠨᠡ ᠨᠤᠲᠤᠭ ᠤ᠋ᠨ ᠬᠢᠨ ᠦ᠌ ᠳᠤᠮᠳᠠ《ᠥᠨᠥ ᠥᠷᠯᠥᠭᠡ ᠲᠡᠭᠦᠨ ᠦ᠌ ᠠᠬᠠ ᠳᠠᠷᠬᠢ ᠶ᠋ᠢ ᠲᠠᠨᠢᠬᠤ ᠮᠡᠳᠡᠬᠦ ᠬᠥᠮᠦᠰ ᠬᠠᠷᠠᠵᠤ᠂ ᠲᠡᠭᠦᠨ ᠢ᠋ ᠨᠢᠭᠡ ᠬᠡᠦᠬᠡᠨ᠂ ᠬᠣᠶᠠᠷ ᠨᠣᠬᠠᠢ ᠳᠠᠭᠠᠭᠤᠯᠤᠭᠠᠳ ᠬᠥᠲᠥᠯᠦᠭᠡ ᠮᠣᠷᠢᠨ ᠠᠴᠢᠶᠠ ᠲᠠᠢ ᠪᠠᠷᠠᠭᠤᠨ ᠬᠣᠢᠲᠤ ᠵᠦᠭ ᠶᠠᠪᠤᠴᠢᠬᠠᠯᠠ᠃ ᠡᠴᠢᠭᠡ ᠨᠢ ᠣᠴᠢᠭᠠᠳ ᠶᠠᠪᠤᠭᠤᠯᠤᠭᠰᠠᠨ ᠮᠠᠭᠠᠳ ᠦᠭᠡᠢ》 ᠭᠡᠰᠡᠨ ᠴᠤᠤᠭᠢᠶᠠᠨ ᠭᠠᠷᠤᠭᠠᠳ ᠪᠠᠢᠭᠠ ᠶ᠋ᠢ ᠰᠣᠨᠣᠰᠪᠠ᠃
ᠰᠢᠯᠦᠬᠡᠢ ᠶ᠋ᠢᠨ ᠢᠷᠡᠬᠦ ᠶ᠋ᠢ ᠬᠦᠯᠢᠶᠡᠵᠦ ᠪᠠᠢᠲᠠᠯᠠ ᠲᠡᠷᠡ ᠪᠡᠷ ᠢᠷᠡᠵᠦ᠂ ᠠᠭᠤᠯᠠ ᠶ᠋ᠢᠨ《ᠰᠡᠭᠦᠯ ᠦᠭᠡᠢ ᠴᠢᠨᠣᠠ》 ᠨᠤᠭᠤᠳ ᠳᠣᠲᠣᠷᠠ ᠪᠠᠨ ᠡᠪᠳᠡᠷᠡᠯᠴᠡᠵᠦ ᠭᠤᠷᠪᠠ ᠶ᠋ᠢ ᠪᠡᠨ ᠨᠤᠬᠤᠵᠤ ᠰᠢᠲᠠᠭᠠᠭᠠᠳ ᠪᠤᠰᠤᠳ ᠨᠢ ᠠᠯᠠᠭᠠ ᠪᠣᠯᠵᠠᠢ᠃ ᠬᠠᠯᠠᠭᠤᠨ ᠨᠣᠷᠮᠠ ᠨᠢ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ᠂ ᠰᠢᠲᠠᠭᠰᠠᠨ ᠬᠡᠭᠦᠷ ᠳᠤᠮᠳᠠ ᠮᠠᠨ ᠤ᠋ ᠮᠠᠭᠤ ᠬᠦᠦ ᠪᠠᠢᠭᠠ ᠡᠰᠡᠬᠦ ᠶ᠋ᠢ ᠨᠢ ᠲᠠᠨᠢᠭᠰᠠᠨ ᠦᠭᠡᠢ᠃ ᠬᠠᠷᠢᠨ ᠡᠨᠳᠡ ᠢᠷᠡᠭᠡᠳ ᠲᠡᠭᠦᠨ ᠢ᠋ ᠠᠮᠢᠳᠤ ᠮᠡᠨᠳᠦ ᠪᠣᠯᠤᠯᠲᠠᠢ ᠭᠡᠳᠡᠭ ᠢ᠋ ᠰᠣᠨᠣᠰᠤᠯᠠ ᠭᠡᠪᠡ᠃ ᠴᠣᠬᠣᠮ ᠦᠨᠡᠨ ᠢ᠋ ᠪᠤᠭᠤᠷᠴᠢ᠂ ᠲᠡᠭᠦᠰᠬᠡᠨ ᠬᠣᠶᠠᠷ ᠯᠠ ᠮᠡᠳᠡᠬᠦ ᠪᠥᠭᠡᠳ ᠲᠡᠳᠡ ᠡᠭᠦᠨ ᠢ᠋ ᠨᠢᠭᠤᠴᠠᠯᠠᠭᠰᠠᠨ ᠲᠤᠯᠠ ᠪᠤᠰᠤᠳ ᠲᠤ᠌ ᠪᠠ ᠡᠨᠡ ᠨᠤᠲᠤᠭ ᠤ᠋ᠨ ᠬᠢᠨ ᠳ᠋ᠦ᠍ ᠴᠤᠤ ᠶᠠᠷᠢᠶᠠ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠦᠯᠡᠳᠡᠵᠡᠢ᠃
ᠪᠣᠭᠣᠷᠴᠢ ᠪᠤᠴᠠᠵᠤ ᠢᠷᠡᠭᠡᠳ ᠵᠠᠯᠠᠮᠠ ᠶ᠋ᠢᠨ ᠬᠠᠮᠲᠤ ᠦᠯᠡᠳᠡᠭᠰᠡᠨ ᠠᠷᠪᠠ ᠭᠠᠷᠤᠢ ᠴᠡᠷᠢᠭ ᠢ᠋ᠶ᠋ᠡᠨ ᠰᠤᠷᠭᠠᠭᠤᠯᠢᠯᠠᠨ᠂ ᠠᠩ ᠬᠥᠷᠥᠭᠡᠨ ᠳ᠋ᠦ᠍ ᠶᠠᠪᠤᠭᠤᠯᠵᠤ ᠬᠣᠭᠣᠯᠠ ᠬᠦᠨᠡᠰᠦᠨ ᠳ᠋ᠦ᠍ ᠮᠢᠬᠠ ᠤᠲᠤᠵᠤ᠂ ᠬᠠᠲᠠᠭᠠᠵᠤ ᠪᠣᠷᠴᠠᠯᠠᠨ᠂ ᠠᠩ ᠤ᠋ᠨ ᠠᠷᠠᠰᠤ ᠡᠯᠳᠡᠭᠦᠯᠵᠦ ᠮᠠᠢᠬᠠᠨ ᠬᠢᠯᠭᠡᠨ᠂ ᠪᠦᠷ ᠵᠠᠷᠢᠮ ᠭᠠᠷ ᠤ᠋ᠨ ᠤᠷᠠ ᠲᠠᠢ ᠪᠠᠷ ᠨᠢ ᠨᠤᠮᠤ ᠰᠤᠮᠤ ᠬᠦᠷᠲᠡᠯᠡ ᠬᠢᠯᠭᠡᠪᠡ᠃ ᠡᠨᠡ ᠵᠠᠪᠰᠠᠷ ᠪᠣᠭᠣᠷᠴᠢ ᠶ᠋ᠢᠨ ᠠᠷᠤ ᠠ᠋ᠴᠠ ᠰᠢᠯᠦᠬᠡᠢ ᠶ᠋ᠢᠨ ᠬᠢ ᠬᠠᠶᠠᠭᠠ ᠠᠢᠯ ᠲᠠᠢ ᠪᠠᠨ ᠨᠡᠭᠦᠵᠦ ᠢᠷᠡᠪᠡ᠃ ᠲᠡᠳᠡᠨ ᠢ᠋ ᠢᠷᠡᠭᠰᠡᠨ ᠦ᠌ ᠬᠡᠳᠦ ᠬᠣᠨᠣᠭ ᠤ᠋ᠨ ᠳᠠᠷᠠᠭᠠ ᠲᠡᠳᠡᠨ ᠦ᠌ ᠠᠷᠤ ᠠ᠋ᠴᠠ ᠪᠠᠰᠠ ᠬᠣᠶᠠᠷ ᠠᠢᠯ ᠨᠡᠭᠦᠵᠦ ᠢᠷᠡᠨ ᠲᠡᠮᠦᠵᠢᠨ ᠦ᠌ ᠣᠲᠣᠭ ᠪᠦᠯᠢ ᠨᠡᠮᠡᠭᠳᠡᠭᠰᠡᠭᠡᠷ ᠪᠠᠢᠯᠠ᠃
ᠲᠡᠮᠦᠵᠢᠨ ᠬᠣᠷᠢ ᠭᠠᠷᠤᠢ ᠬᠣᠨᠣᠭ ᠶᠠᠪᠤᠵᠤ ᠢᠷᠡᠬᠦ ᠳ᠋ᠡᠭᠡᠨ ᠳᠠᠭᠠᠭᠤᠯᠵᠤ ᠶᠠᠪᠤᠭᠰᠠᠨ ᠴᠡᠷᠢᠭ ᠢ᠋ᠶ᠋ᠡᠨ ᠪᠦᠭᠦᠳᠡ ᠶ᠋ᠢ ᠰᠢᠨᠡ ᠴᠡᠷᠢᠭ ᠢ᠋ᠶ᠋ᠡᠷ ᠰᠣᠯᠢᠭᠰᠠᠨ ᠪᠠᠢᠯᠠ᠃ ᠲᠡᠮᠦᠵᠢᠨ᠂ ᠪᠣᠭᠣᠷᠴᠢ᠂ ᠵᠡᠯᠮᠡ ᠬᠣᠶᠠᠷ ᠢ᠋᠄
— ᠲᠠ ᠬᠣᠶᠠᠷ ᠶᠡᠬᠡ ᠰᠠᠢᠨ ᠠᠵᠢᠯ ᠬᠢᠭᠰᠡᠨ ᠪᠠᠢᠨᠠ ᠭᠡᠵᠦ ᠰᠠᠢᠰᠢᠶᠠᠨ᠂ ᠰᠢᠯᠦᠬᠡᠢ ᠶ᠋ᠢ ᠨᠡᠭᠦᠨ ᠢᠷᠡᠭᠰᠡᠨ ᠳ᠋ᠦ᠍ ᠪᠠᠶᠠᠷᠯᠠᠵᠤ᠂ ᠲᠡᠭᠦᠨ ᠢ᠋ ᠳᠠᠭᠤᠳᠠᠭᠤᠯᠤᠨ ᠶᠡᠬᠡᠳᠡ ᠬᠦᠨᠳᠦᠳᠬᠡᠨ ᠵᠣᠴᠢᠯᠠᠵᠤ᠄
— ᠲᠠᠨ ᠢ᠋ ᠡᠴᠢᠭᠡ ᠶ᠋ᠢᠨ ᠮᠢᠨᠢ ᠳᠣᠲᠣᠨᠣ ᠰᠢᠳᠠᠷ ᠬᠣᠷᠴᠢ ᠪᠠᠢᠭᠰᠠᠨ ᠪᠣᠯᠬᠣᠷ ᠨᠠᠭᠠᠰᠢ ᠢᠷᠡᠨᠡ ᠭᠡᠵᠦ ᠪᠢ ᠪᠠᠲᠤ ᠰᠠᠨᠠᠵᠤ ᠪᠠᠢᠭᠰᠠᠨ ᠪᠢᠯᠡ᠃ ᠪᠢᠳᠡ ᠬᠠᠷᠠ ᠨᠤᠲᠤᠭ ᠳᠡᠭᠡᠷᠡ ᠪᠡᠨ ᠬᠠᠶᠠᠭᠳᠠᠭᠰᠠᠨ ᠲᠡᠷᠡ ᠨᠢᠭᠡ ᠦᠶᠡ ᠪᠡᠨ ᠪᠣᠳᠣᠪᠠᠯ ᠰᠡᠷᠭᠦᠵᠦ᠂ ᠬᠡᠷᠦᠯᠦᠨ ᠦ᠌ ᠰᠠᠪᠠ ᠭᠠᠵᠠᠷ ᠢ᠋ᠶ᠋ᠠᠷ ᠪᠠᠢᠭᠠ ᠲᠠᠷᠬᠠᠮᠠᠯ ᠣᠪᠣᠭ ᠠᠢᠮᠠᠭ ᠢ᠋ ᠡᠴᠢᠭᠡ ᠶ᠋ᠢᠨ ᠲᠤᠭ ᠰᠦᠯᠲᠠᠨ ᠳᠣᠣᠷᠠ ᠨᠢᠭᠡᠳᠬᠡᠵᠦ ᠡᠮᠬᠢᠯᠡᠪᠡ᠃ ᠯᠠᠪᠲᠠᠢ ᠮᠢᠩᠭᠠ ᠭᠠᠷᠤᠢ ᠠᠢᠯ ᠡᠷᠦᠬᠡ ᠪᠠᠢᠨᠠ᠃ ᠨᠤᠲᠤᠭ ᠬᠡᠰᠡᠭ ᠲᠤᠨᠢ ᠠᠬᠠᠯᠠᠬᠤ ᠳᠠᠷᠤᠭᠠ᠂ ᠨᠣᠶᠠᠳ ᠲᠣᠮᠢᠯᠠᠯᠠ᠃ ᠢᠩᠭᠢᠬᠦ ᠪᠡᠷ ᠨᠡᠯᠢᠶᠡᠳ ᠲᠢᠭ ᠵᠢᠷᠤᠮ ᠲᠠᠢ ᠪᠣᠯᠤᠭᠰᠠᠨ ᠪᠤᠶᠤ᠃ ᠪᠠᠷᠠᠭᠤᠨ ᠲᠠᠯᠠ ᠳ᠋ᠤ᠌ ᠮᠠᠨᠢ ᠨᠠᠢᠳᠠᠪᠤᠷᠢ ᠲᠠᠢ ᠲᠦᠰᠢᠭ ᠲᠤᠯᠭᠠᠭᠤᠷᠢ ᠬᠡᠷᠡᠢᠳ ᠤᠯᠤᠰ ᠪᠠᠢᠭᠠ᠃ ᠬᠠᠨ ᠲᠤᠭᠤᠷᠢᠯ ᠡᠴᠢᠭᠡ ᠶ᠋ᠢᠨ ᠮᠢᠨᠢ ᠳᠣᠲᠣᠨᠣ ᠬᠥᠮᠦᠨ᠃ ᠣᠷᠣᠭᠰᠢ ᠪᠠᠨ ᠵᠦᠷᠬᠢᠨ ᠦ᠌ ᠬᠢᠨ ᠪᠠᠢᠭᠠ᠃ ᠲᠡᠳᠡᠨ ᠦ᠌ ᠤᠳᠤᠷᠢᠳᠤᠭᠴᠢ ᠰᠡᠴᠡ ᠪᠡᠬᠢ ᠮᠠᠨ ᠤ᠋ ᠣᠪᠣᠭ ᠲᠥᠷᠥᠯ᠂ ᠰᠠᠶᠢ ᠶᠠᠪᠤᠬᠤ ᠳ᠋ᠠᠭᠠᠨ ᠲᠡᠭᠦᠨ ᠲᠡᠢ ᠠᠭᠤᠯᠵᠠᠭᠰᠠᠨ᠃ ᠪᠢᠳᠡᠨ ᠳ᠋ᠦ᠍ ᠭᠠᠢ ᠪᠣᠯᠬᠤ ᠦᠭᠡᠢ᠂ ᠬᠠᠨᠢ ᠴᠤ᠌ ᠪᠣᠯᠬᠤ ᠦᠭᠡᠢ ᠭᠡᠳᠡᠭ ᠢ᠋ᠶ᠋ᠡᠨ ᠲᠡᠳᠡ ᠬᠡᠯᠡᠭᠰᠡᠨ᠃ ᠲᠡᠭᠦᠨ ᠡᠴᠡ ᠵᠡᠭᠦᠨ ᠢ᠋ᠶ᠋ᠡᠷ ᠬᠡᠷᠦᠯᠦᠨ ᠡᠴᠡ ᠣᠷᠣᠭᠰᠢ ᠲᠦᠮᠡᠨ ᠲᠦᠪᠭᠦᠨ ᠦ᠌ ᠬᠢᠨ ᠨᠤᠲᠤᠭᠯᠠᠳᠠᠭ᠃ ᠲᠡᠳᠡ ᠤᠯᠤᠰ ᠳᠣᠷᠣᠢ᠃ ᠵᠡᠭᠦᠨᠰᠢᠯᠡᠬᠦ ᠲᠣᠰᠤᠮ ᠬᠣᠩᠭᠢᠷᠠᠳ᠂ ᠬᠠᠲᠠᠭᠢᠨ᠂ ᠰᠠᠯᠵᠢᠭᠤᠳ ᠣᠳᠣᠬᠠᠨ ᠳ᠋ᠠᠭᠠᠨ ᠴᠢᠯᠥᠭᠡᠲᠡᠢ ᠪᠠᠢᠨᠠ᠃ ᠲᠡᠳᠡᠨ ᠢ᠋ ᠬᠥᠨᠳᠡᠵᠦ ᠬᠥᠳᠡᠯᠭᠡᠬᠦ ᠬᠡᠷᠡᠭ ᠦᠭᠡᠢ ᠭᠡᠵᠦ ᠪᠢ ᠪᠣᠳᠣᠵᠤ ᠪᠠᠢᠭᠠ᠃ ᠬᠠᠷᠢᠨ ᠤᠨᠤᠨ ᠤ᠋ ᠬᠣᠢᠭᠤᠷ ᠵᠠᠳᠠᠷᠠᠨ ᠠᠢᠮᠠᠭ ᠪᠠᠢᠭᠠ᠃ ᠲᠡᠳᠡᠨ ᠦ᠌ ᠲᠣᠯᠣᠭᠠᠢᠯᠠᠭᠴᠢ ᠵᠠᠮᠤᠬᠠ ᠮᠢᠨᠦ ᠠᠨᠳᠠ ᠨᠥᠬᠥᠷ᠂ ᠨᠠᠳᠠ ᠠ᠋ᠴᠠ ᠨᠢᠭᠡ ᠠᠬᠠ᠃ ᠲᠡᠭᠦᠨ ᠲᠡᠢ ᠪᠢ ᠨᠥᠬᠥᠷᠯᠡᠵᠦ᠂ ᠬᠠᠮᠲᠤᠷᠠᠵᠤ ᠠᠵᠢᠯᠯᠠᠬᠤ ᠰᠠᠨᠠᠭᠠ ᠪᠠᠢᠨᠠ᠃
ᠡᠨᠡ ᠪᠦᠬᠦ ᠶᠠᠷᠢᠶᠠ ᠶ᠋ᠢ ᠰᠢᠯᠦᠬᠡᠢ ᠨᠡᠯᠢᠶᠡᠳ ᠭᠠᠢᠬᠠᠰᠢᠷᠠᠭᠰᠠᠨ ᠶᠠᠩᠵᠤᠲᠠᠢ ᠰᠣᠨᠣᠰᠴᠤ ᠰᠠᠭᠤᠪᠠ᠃ ᠲᠡᠮᠦᠵᠢᠨ ᠰᠢᠯᠦᠬᠡᠢ ᠶ᠋ᠢ ᠬᠠᠷᠠᠵᠤ ᠢᠨᠢᠶᠡᠪᠬᠢᠯᠡᠨ᠄
— 《ᠲᠠ ᠬᠡᠳᠦᠨ ᠵᠠᠯᠠᠭᠤᠰ ᠲᠥᠷᠥ ᠪᠠᠷᠢᠵᠤ ᠲᠣᠭᠯᠠᠵᠤ ᠰᠠᠭᠤᠨᠠ》 ᠭᠡᠵᠦ ᠪᠣᠳᠣᠭᠠ ᠦᠭᠡᠢ ᠪᠢᠵᠡ! ᠭᠡᠵᠦ ᠠᠰᠠᠭᠤᠬᠤ ᠳ᠋ᠤᠨᠢ ᠰᠢᠯᠦᠬᠡᠢ ᠳᠠᠪ ᠬᠢᠨ ᠰᠣᠴᠢᠬᠤ ᠰᠢᠭ᠋ ᠪᠣᠯᠵᠤ᠂ ᠡᠭᠴᠡᠷᠡᠵᠦ ᠰᠠᠭᠤᠨ ᠳᠦᠷᠡᠯᠵᠡᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠄
— ᠦᠭᠡᠢ᠂ ᠦᠭᠡᠢ᠂ ᠶᠠᠭᠠᠬᠢᠯᠠ ᠭᠡᠵᠦ ᠲᠡᠭᠡᠵᠦ ᠪᠣᠳᠣᠬᠤ ᠪᠣᠢ? ᠬᠠᠷᠢᠨ ᠲᠠ ᠮᠣᠩᠭᠣᠯ ᠣᠪᠣᠭᠲᠠᠨ ᠢ᠋ ᠨᠢᠭᠡᠳᠬᠡᠵᠦ ᠵᠠᠬᠢᠷᠬᠤ ᠤᠴᠢᠷᠲᠠᠢ᠃ ᠬᠢᠬᠦ ᠶᠣᠰᠣ ᠲᠠᠢ ᠠᠵᠢᠯ ᠢ᠋ᠶ᠋ᠠᠨ ᠴᠢᠳᠠᠮᠠᠭ ᠰᠠᠢᠨ ᠬᠢᠵᠦ ᠯᠡ ᠶᠠᠪᠤᠭᠠ ᠶᠤᠮ ᠪᠠᠢᠨᠠ ᠭᠡᠪᠡ᠃
ᠪᠣᠭᠣᠷᠴᠢ ᠰᠢᠯᠦᠬᠡᠢ ᠳ᠋ᠦ᠍ ᠠᠢᠷᠠᠭ ᠠᠷᠢᠬᠢ ᠰᠥᠩᠨᠡᠬᠦ ᠳ᠋ᠦ᠍ ᠲᠡᠮᠦᠵᠢᠨ ᠲᠡᠭᠦᠨ ᠢ᠋ ᠵᠢᠭᠠᠵᠤ᠄
— ᠰᠢᠯᠦᠬᠡᠢ ᠠᠬᠠ ᠲᠠ ᠬᠠᠷᠠᠵᠤ ᠪᠠᠢᠭᠠ ᠪᠢᠵᠡ? ᠡᠨᠡ ᠮᠢᠨᠦ ᠬᠠᠮᠤᠭ ᠤ᠋ᠨ ᠶᠡᠬᠡ ᠰᠢᠳᠠᠷ ᠬᠥᠮᠦᠨ᠃ ᠳᠠᠷᠠᠭᠠ ᠨᠢ ᠵᠠᠷᠴᠢᠭᠤᠳᠠᠢ ᠡᠪᠦᠭᠡᠨ ᠦ᠌ ᠬᠦᠦ ᠵᠡᠯᠮᠡ᠂ ᠲᠡᠭᠡᠭᠡᠳ ᠮᠢᠨᠦ ᠳᠡᠭᠦᠦ ᠬᠠᠰᠠᠷ᠂ ᠪᠡᠯᠭᠦᠳᠡᠢ᠃ ᠪᠢᠳᠡ ᠲᠠᠪᠤ ᠯᠠ ᠵᠢᠭᠠᠬᠠᠨ ᠤᠯᠤᠰ ᠢ᠋ ᠵᠠᠰᠠᠵᠤ ᠪᠠᠢᠨᠠ᠃ ᠪᠢᠳᠡ ᠦᠨᠡᠬᠡᠷ ᠪᠠᠯᠴᠢᠷᠳᠠᠵᠤ ᠵᠢᠵᠢᠭᠳᠡᠵᠦ ᠪᠠᠢᠨᠠ ᠁ ᠢᠩᠭᠢᠬᠦ ᠪᠡᠷ ᠰᠢᠯᠦᠬᠡᠢ ᠠᠬᠠ ᠲᠠᠨ ᠢ᠋ ᠪᠢ ᠡᠨᠡ ᠵᠢᠭᠠᠬᠠᠨ ᠤᠯᠤᠰ ᠤ᠋ᠨ ᠠᠷᠠᠳ ᠢᠷᠭᠡᠳ ᠢ᠋ ᠵᠠᠰᠠᠬᠤ ᠵᠠᠬᠢᠷᠬᠤ ᠰᠢᠳᠠᠷ ᠲᠤ᠌ ᠲᠣᠬᠣᠭᠠᠨ ᠲᠣᠮᠢᠯᠠᠨᠠ ᠭᠡᠳ ᠲᠡᠭᠦᠨ ᠦ᠌ ᠨᠢᠭᠤᠷ ᠥᠭᠡᠳᠡ ᠡᠭᠴᠡᠯᠡᠨ ᠬᠠᠷᠠᠯᠠ᠃ ᠰᠢᠯᠦᠬᠡᠢ ᠤᠤᠯᠭᠠ ᠠᠯᠲᠠᠨ᠄
— ᠪᠢ ᠤᠤ ᠳᠠ? ᠲᠡᠢᠮᠦ ᠲᠣᠮᠣ ᠠᠯᠪᠠ ᠶ᠋ᠢ ᠪᠢ ᠴᠢᠳᠠᠬᠤ ᠤᠤ? ᠭᠡᠪᠡ᠃
— ᠲᠡᠭᠦᠨ ᠡᠴᠡ ᠲᠣᠮᠣ ᠠᠯᠪᠠ ᠶ᠋ᠢ ᠴᠢᠳᠠᠨᠠ ᠭᠡᠵᠦ ᠪᠢ ᠢᠲᠡᠭᠡᠵᠦ ᠪᠠᠢᠨᠠ᠃ ᠲᠡᠭᠡᠬᠦ ᠪᠡᠷ ᠲᠠ ᠬᠢᠴᠢᠶᠡᠵᠦ ᠦᠵᠡ ᠳᠡ ᠭᠡᠬᠦ ᠳ᠋ᠦ᠍ ᠰᠢᠯᠦᠬᠡᠢ᠄
— ᠵᠠ᠂ ᠲᠡᠮᠦᠵᠢᠨ ᠲᠠᠨ ᠤ᠋ ᠢᠲᠡᠭᠡᠯ᠂ ᠥᠨᠳᠥᠷ ᠶᠡᠬᠡ ᠬᠠᠢᠷᠠ ᠬᠡᠰᠢᠭ ᠦ᠋ᠨ ᠲᠥᠯᠥᠭᠡ ᠬᠢᠴᠢᠶᠡᠨ ᠵᠢᠳᠬᠦᠶᠡ ᠭᠡᠳ ᠪᠣᠰᠴᠤ ᠪᠠᠷᠠᠭᠤᠨ ᠭᠠᠷ ᠢ᠋ᠶ᠋ᠠᠨ ᠵᠢᠷᠦᠬᠡᠨ ᠲᠤᠰ ᠭᠠᠵᠠᠷ ᠲᠤ᠌ ᠬᠠᠪᠰᠤᠷᠴᠤ ᠮᠡᠬᠦᠢᠨ ᠰᠥᠭᠥᠳᠪᠡ᠃ ᠲᠡᠮᠦᠵᠢᠨ ᠰᠢᠯᠦᠬᠡᠢ ᠶ᠋ᠢ ᠰᠤᠭᠤᠨ ᠠ᠋ᠴᠠ ᠨᠢ ᠡᠷᠭᠦᠨ ᠪᠣᠰᠬᠠᠵᠤ᠂ ᠰᠠᠭᠤᠵᠠᠭᠠᠨ ᠨᠢᠭᠡ ᠨᠢᠭᠡ ᠰᠥᠩ ᠪᠠᠷᠢᠵᠤ᠄
— ᠲᠠ ᠮᠠᠷᠭᠠᠰᠢ ᠨᠡᠭᠦᠵᠦ ᠰᠡᠩᠭᠦᠷ ᠭᠣᠷᠣᠬᠠᠨ ᠤ᠋ ᠳᠤᠮᠳᠠ ᠬᠢᠷᠢ ᠪᠠᠭᠤᠬᠤ ᠬᠡᠷᠡᠭᠲᠡᠢ᠃ ᠪᠢ ᠵᠠᠯᠮᠠ ᠶ᠋ᠢ ᠳᠠᠭᠠᠭᠤᠯᠤᠨ ᠠᠷᠤ ᠠ᠋ᠴᠠ ᠴᠢᠨᠢ ᠣᠴᠢᠵᠤ᠂ ᠬᠡᠷᠦᠯᠦᠨ ᠦ᠌ ᠬᠥᠳᠡᠭᠡ ᠠᠷᠠᠯ ᠳ᠋ᠤ᠌ ᠪᠠᠢᠭᠠ ᠬᠢᠨᠠᠯᠲᠠ ᠶ᠋ᠢᠨ ᠪᠠᠭ ᠴᠡᠷᠢᠭ ᠤᠷᠤᠭᠤ ᠲᠠᠨ ᠢ᠋ ᠠᠪᠠᠴᠢᠵᠤ ᠲᠡᠨᠳᠡ ᠣᠲᠣᠭ ᠣᠪᠣᠭ ᠤ᠋ᠨ ᠪᠦᠬᠦ ᠳᠠᠷᠤᠭᠠ ᠨᠠᠷ ᠢ᠋ ᠴᠤᠭᠯᠠᠭᠤᠯᠤᠨ ᠬᠤᠷᠠᠯᠳᠤᠵᠤ ᠴᠢᠨᠠᠭᠰᠢᠳᠠ ᠶ᠋ᠢᠨ ᠲᠢᠭ ᠵᠢᠷᠤᠮ ᠢ᠋ᠶ᠋ᠠᠨ ᠲᠣᠭᠲᠠᠭᠠᠨᠠ᠃ ᠲᠡᠭᠡᠭᠡᠳ ᠲᠠ ᠲᠡᠨᠳᠡ ᠪᠦᠬᠦ ᠡᠷᠬᠡ ᠮᠠᠲᠠᠯ ᠢ᠋ ᠠᠪᠴᠤ ᠠᠵᠢᠯᠯᠠᠬᠤ ᠪᠣᠯᠠᠢ᠃ ᠲᠡᠭᠡᠬᠦ ᠪᠡᠷ ᠲᠠᠨ ᠤ᠋ ᠡᠭᠦᠷᠭᠡ ᠪᠣᠯ᠄ ᠨᠢᠭᠡ ᠳ᠋ᠦ᠍᠂ ᠨᠤᠲᠤᠭ ᠨᠤᠲᠤᠭ ᠤ᠋ᠨ ᠵᠠᠬᠢᠷᠭᠠ ᠶ᠋ᠢ ᠨᠢᠭᠡᠳᠬᠡᠨ ᠨᠢᠭᠡ ᠵᠠᠬᠢᠷᠭᠠᠨ ᠳ᠋ᠤ᠌ ᠪᠡᠬᠢᠵᠢᠭᠦᠯᠦᠨ ᠠᠮᠤᠭᠤᠯᠠᠩ ᠲᠠᠢᠪᠤᠩ ᠪᠠᠢᠳᠠᠯ ᠢ᠋ ᠰᠠᠬᠢᠵᠤ ᠴᠢᠨᠠᠭᠰᠢᠳᠠ ᠶ᠋ᠢᠨ ᠤᠯᠤᠰ ᠤ᠋ᠨ ᠰᠠᠭᠤᠷᠢ ᠶ᠋ᠢ ᠪᠠᠲᠤᠯᠠᠬᠤ᠃ ᠬᠣᠶᠠᠷ ᠲᠤ᠌᠂ ᠴᠡᠷᠢᠭ ᠦ᠋ᠨ ᠲᠣᠭᠠ᠂ ᠵᠠᠷ ᠵᠡᠪᠰᠡᠭ ᠢ᠋ ᠨᠡᠮᠡᠭᠳᠡᠭᠦᠯᠦᠨ ᠠᠶᠠᠨ ᠵᠠᠮ ᠤ᠋ᠨ ᠪᠡᠯᠡᠳᠬᠡᠯ ᠲᠡᠢ ᠪᠣᠯᠭᠠᠬᠤ᠃ ᠲᠡᠨᠳᠡ ᠮᠠᠨ ᠤ᠋ ᠪᠠᠭ ᠴᠡᠷᠢᠭ ᠢ᠋ ᠨᠢᠭᠡ ᠴᠡᠷᠢᠭ ᠠᠬᠠᠯᠠᠭᠠᠳ ᠡᠪᠦᠭᠡ ᠳᠡᠭᠡᠳᠦᠰ ᠦ᠋ᠨ ᠦᠶᠡ ᠳ᠋ᠦ᠍ ᠴᠡᠷᠢᠭ ᠠᠯᠪᠠᠨ ᠳ᠋ᠤ᠌ ᠬᠦᠴᠦ ᠪᠡᠨ ᠥᠭᠭᠦᠭᠰᠡᠨ ᠥᠨᠳᠥᠷ ᠨᠠᠰᠤ ᠲᠠᠢ ᠡᠪᠦᠭᠡᠨ ᠲᠡᠢ ᠬᠠᠮᠲᠤ ᠪᠠᠢᠭᠠ᠃ ᠪᠢ ᠲᠡᠷᠡ ᠡᠪᠦᠭᠡᠨ ᠲᠡᠢ ᠬᠣᠨᠣᠭᠤᠲᠠ ᠥᠨᠵᠢᠭᠦᠲᠡ ᠶᠠᠷᠢᠯᠴᠠᠵᠤ ᠶᠡᠬᠡ ᠦᠨᠡᠲᠡᠢ ᠰᠤᠷᠭᠠᠯ ᠠᠪᠤᠭᠰᠠᠨ᠃ ᠲᠠ ᠲᠡᠷᠡ ᠬᠥᠮᠦᠨ ᠢ᠋ ᠲᠠᠨᠢᠬᠤ ᠪᠠᠢᠬᠠ᠂ ᠵᠥᠪᠯᠡᠭᠴᠢ ᠪᠡᠨ ᠪᠣᠯᠭᠠᠭᠠᠷᠠᠢ᠃ ᠠᠮᠢᠳᠤᠷᠠᠯ ᠠᠬᠤᠢ ᠨᠢ ᠲᠡᠢᠮᠦ ᠴᠦ᠍ ᠬᠠᠩᠬᠤᠯᠤᠭᠤᠯᠤᠨ ᠪᠢᠰᠢ ᠪᠣᠯᠤᠯᠲᠠᠢ ᠪᠢᠯᠡ᠃ ᠲᠤᠰᠠᠯᠠᠮᠵᠢ ᠳᠡᠮᠵᠢᠯᠭᠡ ᠦᠵᠡᠭᠦᠯᠵᠦ ᠪᠠᠢᠭᠠᠷᠠᠢ᠃ ᠲᠡᠨᠳᠡᠬᠢ ᠴᠡᠷᠢᠭ ᠢ᠋ ᠵᠠᠬᠢᠷᠤᠭᠤᠯᠬᠤ ᠪᠠᠷ ᠪᠢ ᠵᠡᠯᠮᠡ ᠶ᠋ᠢ ᠠᠪᠠᠴᠢᠵᠤ ᠲᠠᠯᠪᠢᠨᠠ᠃ ᠨᠠᠮᠠ ᠶ᠋ᠢ ᠶᠠᠪᠤᠵᠤ ᠪᠠᠢᠬᠤ ᠳ᠋ᠤ᠌ ᠴᠡᠷᠢᠭ ᠦ᠋ᠨ ᠬᠡᠷᠡᠭᠴᠡᠭᠡᠨ ᠳ᠋ᠦ᠍ ᠵᠣᠷᠢᠭᠤᠯᠵᠤ ᠰᠠᠢᠨ ᠳᠤᠷᠠ ᠪᠠᠷ ᠣᠯᠠᠨ ᠮᠠᠯ ᠥᠭᠬᠦ ᠪᠣᠯᠤᠭᠰᠠᠨ᠃ ᠲᠡᠳᠡᠭᠡᠷ ᠢ᠋ ᠨᠤᠲᠤᠭ ᠤ᠋ᠨ ᠵᠠᠬᠢᠷᠤᠭᠴᠢᠳ ᠮᠡᠳᠡᠵᠦ ᠪᠠᠢᠭᠠ᠃ ᠲᠡᠷᠡ ᠮᠠᠯ ᠢ᠋ ᠴᠤᠭᠯᠠᠭᠤᠯᠵᠤ ᠰᠠᠢᠨ ᠬᠥᠮᠦᠰ ᠲᠦ᠍ ᠥᠭᠴᠦ ᠮᠠᠯᠯᠠᠭᠤᠯ᠃ ᠰᠠᠩ ᠤ᠋ᠨ ᠰᠦᠷᠦᠭ ᠪᠠᠢᠭᠤᠯᠵᠤ ᠥᠰᠬᠡᠬᠦ ᠳ᠋ᠦ᠍ ᠮᠠᠯ ᠢ᠋ ᠭᠣᠯᠣᠵᠤ ᠰᠢᠯᠢᠵᠦ ᠪᠣᠯᠬᠤ ᠦᠭᠡᠢ᠃ ᠬᠥᠯᠥᠰᠥ ᠬᠦᠴᠦ ᠪᠣᠯᠤᠭᠠᠳ ᠬᠡᠷᠬᠢᠨ ᠶᠠᠭᠠᠬᠢᠵᠤ ᠥᠰᠬᠡᠬᠦ᠂ ᠵᠠᠷᠤᠴᠠᠭᠤᠯᠬᠤ ᠵᠢᠷᠤᠮ ᠢ᠋ ᠲᠣᠭᠲᠠᠭᠠᠨᠠ᠃ ᠰᠠᠢᠨ ᠳᠤᠷᠠ ᠶ᠋ᠢ ᠬᠠᠷᠠᠭᠠᠯᠵᠠᠨ ᠤᠯᠠᠮ ᠥᠷᠭᠡᠳᠬᠡᠬᠦ ᠬᠡᠷᠡᠭᠲᠡᠢ᠃ ᠨᠣᠴᠢᠲᠠᠢ ᠬᠡᠷᠡᠭ ᠶᠠᠪᠤᠳᠠᠯ ᠢ᠋ ᠴᠠᠭ ᠠᠯᠳᠠᠯ ᠦᠭᠡᠢ ᠮᠡᠳᠡᠭᠳᠡᠵᠦ ᠪᠠᠢᠬᠤ ᠬᠡᠷᠡᠭᠲᠡᠢ᠃ ᠶᠡᠷᠦ ᠨᠢ ᠪᠢ ᠪᠣᠭᠤᠷᠴᠢ ᠶ᠋ᠢ ᠣᠢᠷᠠ ᠣᠢᠷᠠᠬᠠᠨ ᠶᠠᠪᠤᠭᠤᠯᠵᠤ ᠬᠣᠶᠠᠷ ᠲᠠᠯᠠ ᠶ᠋ᠢᠨ ᠮᠡᠳᠡᠭᠡ ᠰᠣᠯᠢᠯᠴᠠᠵᠤ ᠪᠠᠢᠬᠤ ᠪᠣᠯᠤᠨᠠ ᠭᠡᠬᠦ ᠮᠡᠲᠦ ᠪᠡᠷ ᠨᠠᠷᠢᠨ ᠵᠢᠭᠠᠪᠤᠷᠢ ᠥᠭᠭᠦᠯᠡ᠃
ᠡᠨᠡ ᠶᠠᠷᠢᠶᠠᠨ ᠤ᠋ ᠳᠠᠷᠠᠭᠠ ᠰᠢᠯᠦᠬᠡᠢ ᠥᠭᠡᠯᠦᠨ ᠡᠬᠡ ᠲᠡᠢ ᠵᠣᠯᠭᠠᠵᠤ ᠪᠠᠷᠠᠯᠠᠬᠨ ᠶᠠᠷᠢᠯᠴᠠᠵᠤ ᠲᠤᠭᠤᠯ ᠲᠠᠢ ᠦᠨᠢᠶᠡ ᠡᠷᠭᠦᠨ ᠪᠠᠷᠢᠵᠤ《ᠣᠷᠣᠢ ᠶᠠᠪᠤᠭᠤᠯᠤᠨᠠ》 ᠭᠡᠵᠡᠢ᠃
ᠲᠡᠷᠡ ᠳᠣᠣᠷᠠ ᠪᠠᠨ ᠲᠡᠮᠦᠵᠢᠨ ᠬᠠᠰᠠᠷ᠂ ᠪᠡᠯᠭᠦᠳᠡᠢ ᠬᠣᠶᠠᠷ ᠢ᠋ ᠳᠠᠭᠤᠳᠠᠵᠤ᠂ ᠲᠤᠭᠤᠷᠢᠯ ᠬᠠᠨ ᠤ᠋ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠵᠠᠮᠤᠬᠠ ᠳ᠋ᠤ᠌ ᠡᠯᠴᠢ ᠪᠣᠯᠭᠠᠨ ᠲᠣᠮᠢᠯᠠᠵᠤ᠂ ᠮᠡᠷᠭᠢᠳ ᠦ᠋ᠨ ᠡᠰᠡᠷᠭᠦ ᠳᠠᠵᠢᠨ ᠳ᠋ᠤ᠌ ᠬᠡᠵᠢᠶᠡ ᠬᠠᠮᠢᠭᠠ ᠬᠡᠷᠬᠢᠨ ᠣᠷᠣᠯᠴᠠᠬᠤ ᠪᠠᠨ ᠲᠣᠪᠯᠠᠵᠤ ᠢᠷᠡᠭᠦᠯ ᠭᠡᠮᠡᠨ ᠬᠡᠯᠡᠭᠦᠯᠵᠦ ᠲᠡᠳᠡ ᠬᠣᠶᠠᠷ ᠢ᠋《ᠮᠠᠷᠭᠠᠰᠢ ᠥᠷᠯᠥᠭᠡ ᠮᠣᠷᠳᠠ》 ᠭᠡᠯᠡ᠃ ᠢᠩᠭᠢᠵᠦ ᠮᠡᠷᠭᠢᠳ ᠲᠡᠢ ᠪᠠᠢᠯᠳᠤᠬᠤ ᠪᠠᠷ ᠨᠠᠮᠤᠷ ᠤ᠋ᠨ ᠬᠡᠳᠦᠨ ᠰᠠᠷᠠ ᠪᠡᠯᠡᠳᠬᠡᠯ ᠬᠢᠭᠰᠡᠨ ᠪᠥᠯᠥᠭᠡ᠃