ᠬᠥᠯᠥᠭ ᠪᠠᠭᠠᠲᠤᠷ ᠪᠤᠭᠤᠷᠴᠢ - ᠪ᠂ ᠦᠯᠵᠡᠢᠰᠦ᠋ᠷᠦᠩ <ᠳᠡᠳ᠋ ᠪᠦᠯᠦᠭ - ᠬᠣᠷᠢ> Хүлэг баатар буурч - Б. Өлзийсүрэн <Дэд бүлэг-20>
62ᠥᠪᠡᠷ ᠦᠨ ᠵᠠᠮ ᠮᠥᠷ ᠢᠶᠡᠷ ᠲᠡᠮᠲᠡᠷᠢᠵᠦ ᠡᠷᠡ ᠬᠥᠮᠥᠨ ᠦ ᠡᠷᠴᠢ ᠬᠦᠴᠦ ᠶᠢ ᠣᠯᠵᠤ ᠬᠦᠷᠲᠡᠭᠰᠡᠨ ᠳᠡᠳ᠋ ᠪᠦᠯᠦᠭ
ᠬᠣᠷᠢ
ᠠᠭᠤᠯᠠ ᠥᠨᠳᠥᠷ ᠪᠣᠯᠪᠠᠴᠤ ᠳᠠᠪᠠᠶᠠ ᠭᠡᠪᠡᠯ ᠳᠠᠪᠠᠨᠠᠮ
ᠤᠰᠤ ᠭᠦᠨ ᠪᠣᠯᠪᠠᠴᠤ ᠭᠠᠲᠤᠯᠤᠶᠠ ᠭᠡᠪᠡᠯ ᠭᠠᠲᠤᠯᠤᠨᠠᠮ
ᠦᠳᠡ ᠶ᠋ᠢᠨ ᠨᠠᠷᠠᠨ ᠰᠢᠷᠠᠬᠤ ᠰᠠᠴᠠᠭᠤ ᠪᠣᠭᠤᠷᠴᠢ ᠥᠨᠳᠥᠷ ᠰᠠᠷᠢᠳᠠᠭ ᠠᠭᠤᠯᠠ ᠶ᠋ᠢᠨ ᠳᠤᠮᠳᠠ ᠠ᠋ᠴᠠ ᠥᠩᠭᠡᠷᠡᠭᠰᠡᠨ ᠪᠠᠢᠪᠠ᠃ ᠨᠤᠷᠠᠩᠭᠢ ᠡᠯᠡᠰᠦ ᠬᠠᠢᠷᠭᠤ ᠣᠷᠣᠭᠰᠢ ᠠᠬᠢᠬᠤ ᠳ᠋ᠤ᠌ ᠳᠠᠩᠴᠤ ᠶᠠᠷᠳᠠᠭ᠃ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠵᠤ ᠬᠥᠲᠥᠯᠦᠨ ᠨᠠᠯᠠᠤ ᠡᠷᠭᠢ ᠬᠠᠵᠠᠭᠤᠯᠳᠠᠨ ᠵᠢᠳᠬᠦᠬᠦ ᠪᠦᠷᠢ ᠬᠥᠯᠥᠰᠥ ᠴᠦ᠍ ᠤᠷᠤᠰᠴᠤ ᠤᠰᠤᠨ ᠳ᠋ᠤ᠌ ᠨᠣᠷᠤᠭᠰᠠᠨ ᠪᠣᠯᠵᠣᠮᠣᠷ ᠰᠢᠭ᠋ ᠪᠣᠯᠪᠠ᠃ ᠶᠠᠭᠤᠨ ᠤ᠋ ᠲᠤᠯᠠ ᠢᠩᠭᠢᠵᠦ ᠶᠠᠪᠤᠭᠠ ᠪᠢᠯᠡ? ᠲᠡᠢᠮᠦ ᠠ᠋᠂《ᠠᠩᠬᠠᠨ ᠤ᠋ ᠳᠠᠭᠠᠭᠠᠯᠭᠠᠪᠤᠷᠢ!》 ᠶᠢᠰᠦᠭᠡᠢ ᠪᠠᠭᠠᠲᠤᠷ ᠤ᠋ᠨ ᠬᠦᠦ ᠲᠡᠮᠦᠵᠢᠨ ᠳ᠋ᠦ᠍ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠲᠤᠭ ᠰᠦᠯᠳᠡ ᠶ᠋ᠢ ᠡᠷᠭᠦᠵᠦ ᠲᠥᠷᠥ ᠤᠯᠤᠰ ᠢ᠋ᠶ᠋ᠠᠨ ᠪᠠᠢᠭᠤᠯᠬᠤ ᠳ᠋ᠤ᠌ ᠬᠦᠴᠦᠨ ᠢ᠋ᠶ᠋ᠡᠨ ᠥᠭᠴᠦ ᠵᠢᠳᠬᠦᠨᠡ ᠭᠡᠰᠡᠨ ᠲᠠᠩᠭᠠᠷᠢᠭ ᠲᠠᠢ ᠪᠢᠯᠡ ᠪᠢ᠃ ᠪᠤᠴᠠᠬᠤ ᠵᠠᠮ ᠪᠠᠢᠬᠤ ᠦᠭᠡᠢ᠃ ᠢᠩᠭᠢᠵᠦ ᠵᠢᠳᠬᠦᠨ ᠳᠡᠯᠡᠬᠡᠢ ᠨᠢ ᠵᠣᠭᠰᠣᠵᠤ᠂ ᠳᠡᠭᠡᠳᠦᠬᠢ ᠨᠢ ᠬᠥᠳᠡᠯᠵᠦ ᠪᠣᠢ ᠶ᠋ᠢᠨ ᠤᠴᠢᠷ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠣᠷᠣᠢ ᠳ᠋ᠤᠨᠢ ᠭᠠᠷᠪᠠ᠃ ᠰᠠᠷᠢᠳᠠᠭ ᠤ᠋ᠨ ᠴᠠᠭᠠᠨᠠ ᠰᠠᠷᠢᠳᠠᠭ᠃ ᠬᠠᠳᠠ ᠠᠰᠬᠠ ᠴᠤ᠌ ᠭᠡᠵᠦ ᠦᠨᠡᠬᠡᠷ ᠠᠶᠤᠮᠠᠷ᠃ ᠠᠶᠤᠮᠠᠷ ᠶᠠᠭᠤᠮᠠ ᠬᠠᠳᠠ ᠠᠰᠬᠠᠨ ᠳ᠋ᠠᠭᠠᠨ ᠪᠢᠰᠢ᠂《ᠮᠠᠩᠭᠤᠰ》 ᠨᠢ᠃ ᠪᠠᠭᠠ ᠴᠠᠭ ᠲᠤ᠌ ᠬᠠᠳᠠᠨ ᠤ᠋ ᠮᠠᠩᠭᠤᠰ ᠭᠡᠵᠦ ᠶᠠᠷᠢᠳᠠᠭ ᠰᠠᠨ᠃ ᠪᠠᠢᠳᠠᠭ ᠴᠤ᠌ ᠶᠤᠮ ᠤᠤ? ᠪᠠᠢᠳᠠᠭ ᠦᠭᠡᠢ ᠴᠤ᠌ ᠶᠤᠮ ᠤᠤ? ᠪᠤᠤ ᠮᠡᠳᠡ᠃ ᠣᠳᠣ ᠯᠠ ᠪᠣᠭᠤᠷᠴᠢ ᠲᠡᠭᠦᠨ ᠲᠡᠢ ᠤᠴᠠᠷᠠᠬᠤ ᠨᠢ ᠪᠣᠯᠤᠯᠲᠠᠢ᠃ ᠬᠢᠷᠠ ᠳ᠋ᠤ᠌ ᠰᠡᠷᠢᠭᠦᠨ ᠰᠠᠯᠬᠢ ᠲᠠᠢ ᠵᠣᠯᠭᠠᠵᠤ ᠬᠥᠯᠥᠰᠥ ᠬᠠᠲᠠᠵᠤ ᠡᠭᠰᠢᠭᠡᠳ᠂ ᠲᠡᠷᠡ《ᠮᠠᠩᠭᠤᠰ》 ᠲᠠᠢ ᠬᠠᠳᠠᠨ ᠳ᠋ᠤ᠌ ᠣᠴᠢᠬᠤ ᠶ᠋ᠢᠨ ᠲᠤᠯᠠ ᠬᠢᠷᠠ ᠳ᠋ᠠᠭᠠᠨ ᠶᠠᠪᠤᠬᠤ ᠨᠢ ᠵᠣᠬᠢᠮᠵᠢᠲᠠᠢ ᠭᠡᠪᠡᠴᠦ ᠲᠡᠷᠡ ᠬᠠᠷᠠᠭᠳᠠᠬᠤ ᠬᠠᠳᠠᠨ ᠳ᠋ᠤ᠌ ᠵᠣᠷᠢᠭᠰᠠᠨ ᠵᠣᠯᠢᠭ ᠤ᠋ᠳ ᠨᠢ ᠪᠠᠢᠭᠠ ᠶᠤᠮ ᠤᠤ? ᠵᠢᠳᠬᠦᠵᠦ ᠵᠢᠳᠬᠦᠵᠦ ᠣᠴᠢᠬᠤ ᠳ᠋ᠤᠨᠢ ᠦᠭᠡᠢ ᠪᠣᠯ ᠬᠠᠮᠢᠭᠠᠰᠢ ᠶᠠᠪᠤᠨᠠ? ᠭᠡᠭᠴᠢᠯᠡᠨ ᠪᠣᠳᠣᠭᠳᠠᠨᠠ᠃《ᠶᠠᠭᠤ ᠪᠣᠯᠪᠠᠴᠤ ᠣᠴᠢᠭᠠᠳ ᠯᠠ ᠦᠵᠡᠶᠡ》 ᠭᠡᠳ ᠠᠭᠤᠯᠠ ᠬᠢᠷᠠᠯᠠᠨ ᠬᠡᠰᠡᠭ ᠵᠠᠭᠤᠷᠠ ᠶᠠᠪᠤᠭᠠᠳ ᠳᠣᠲᠣᠭᠰᠢ ᠪᠠᠭᠤᠪᠠ᠃ ᠪᠠᠯ ᠳ᠋ᠤ᠌ ᠨᠠᠷᠵᠠ ᠭᠣᠷᠣᠬᠠ ᠤᠷᠤᠰᠴᠤ᠂ ᠮᠣᠷᠢ ᠪᠠᠨ ᠤᠰᠤᠯᠠᠵᠤ ᠥᠪᠡᠷ ᠢ᠋ᠶ᠋ᠡᠨ ᠬᠠᠨᠠᠲᠠᠯᠠ ᠪᠠᠨ ᠤᠤᠭᠤᠵᠤ ᠴᠡᠩᠭᠡᠯ ᠡᠳ᠋ᠯᠡᠯᠡ᠃ ᠲᠡᠭᠡᠲᠡᠯᠡ ᠰᠥᠭᠡᠭ ᠦ᠋ᠨ ᠴᠠᠭᠠᠳᠤ ᠳᠣᠣᠷᠠ ᠠ᠋ᠴᠠ ᠬᠥᠮᠦᠨ ᠦ᠌ ᠲᠣᠯᠣᠭᠠᠢ ᠱᠣᠪᠣᠯᠵᠠᠨ ᠨᠤᠮᠤ ᠰᠤᠮᠤ ᠠᠭᠰᠠᠵᠤ ᠰᠡᠯᠡᠮᠡ ᠵᠡᠭᠦᠭᠰᠡᠨ ᠮᠣᠷᠢᠲᠠᠢ ᠬᠥᠮᠦᠨ ᠭᠠᠷᠴᠤ ᠢᠷᠡᠭᠡᠳ ᠶᠠᠭᠤ ᠶᠠᠭᠤ ᠦᠭᠡᠢ ᠬᠠᠷᠪᠤᠬᠤ ᠪᠣᠯᠤᠯᠲᠠᠢ ᠨᠤᠮᠤ ᠰᠤᠮᠤ ᠪᠠᠨ ᠣᠨᠢᠯᠠᠵᠤ ᠬᠠᠷᠠᠭᠳᠠᠪᠠ᠃ ᠪᠣᠭᠣᠷᠴᠢ ᠭᠠᠷ ᠢ᠋ᠶ᠋ᠠᠨ ᠡᠷᠭᠦᠨ᠄
— ᠬᠡᠷᠡᠭ ᠦᠭᠡᠢ ᠠ᠋! ᠨᠠᠳᠠᠳᠤ ᠶᠠᠮᠠᠷᠴᠤ ᠵᠡᠪᠰᠡᠭ ᠠᠯᠠᠭᠠ᠃ ᠬᠦᠷᠦᠭᠡᠳ ᠢᠷᠡ! ᠭᠡᠵᠦ ᠬᠠᠰᠬᠢᠷᠪᠠ᠃
ᠲᠡᠷᠡ ᠡᠲᠡᠭᠡᠳ ᠶᠡᠬᠡ ᠯᠡ ᠪᠣᠯᠭᠣᠮᠵᠢ ᠰᠡᠷᠡᠮᠵᠢ ᠲᠡᠢ ᠪᠡᠷ ᠣᠢᠷᠠᠲᠤᠨ ᠢᠷᠡᠪᠡᠰᠦ ᠦᠶᠡ ᠳᠠᠩ ᠤ᠋ᠨ ᠪᠠᠭᠠ ᠵᠠᠯᠠᠭᠤ ᠠᠵᠤ᠃ ᠲᠡᠳᠡ ᠮᠡᠨᠳᠦ ᠤᠰᠤ ᠪᠠᠨ ᠮᠡᠳᠡᠯᠴᠡᠨ ᠬᠡᠷᠡᠭ ᠵᠣᠷᠢᠭ ᠢ᠋ᠶ᠋ᠠᠨ ᠶᠠᠷᠢᠯᠴᠠᠪᠠᠯ ᠠᠭᠤᠯᠠ ᠶ᠋ᠢᠨ ᠣᠲᠣᠭ ᠤ᠋ᠨ ᠬᠢ ᠭᠡᠨᠡ᠃ ᠠᠭᠤᠯᠠ ᠶ᠋ᠢᠨ ᠣᠲᠣᠭ ᠤ᠋ᠨ ᠬᠢᠨ ᠦᠰᠦᠯᠢᠭ ᠦᠨᠡᠲᠦ ᠠᠩ ᠬᠦᠷᠦᠭᠡ ᠬᠢᠳᠡᠭ᠂ ᠨᠡᠷᠡ ᠪᠡᠨ ᠳᠠᠷᠬᠢ ᠭᠡᠵᠦ ᠬᠡᠯᠡᠯᠡ᠂ ᠪᠠᠰᠠ ᠲᠤᠩ ᠭᠡᠮ ᠦᠭᠡᠢ᠂ ᠵᠢᠷ ᠦ᠋ᠨ ᠠᠩᠴᠢᠳ ᠠᠵᠤ ᠲᠥᠷᠥᠳᠡᠭ ᠰᠢᠭ ᠶᠠᠷᠢᠪᠠ᠃ ᠠᠭᠤᠯᠠ ᠶ᠋ᠢᠨ ᠬᠢᠷᠠ ᠪᠠᠷ ᠮᠣᠷᠢᠲᠠᠢ ᠬᠥᠮᠦᠨ ᠶᠠᠪᠤᠵᠤ ᠪᠠᠢᠬᠤ ᠶ᠋ᠢ ᠬᠠᠷᠠᠭᠠᠳ ᠲᠤᠰᠠᠯᠠᠬᠤ ᠭᠡᠵᠦ ᠢᠷᠡᠭᠰᠡᠨ ᠭᠡᠨᠡ᠃ ᠬᠠᠷᠢᠭᠤ ᠳ᠋ᠤᠨᠢ ᠪᠣᠭᠣᠷᠴᠢ ᠥᠪᠡᠷ ᠦ᠋ᠨ ᠨᠡᠷᠡ ᠪᠡᠨ《ᠪᠤᠷᠭᠢ》 ᠭᠡᠳ ᠶᠢᠰᠦᠭᠡᠢ ᠶ᠋ᠢᠨ ᠬᠦᠦ ᠲᠡᠮᠦᠵᠢᠨ ᠦ᠌ ᠳᠠᠭᠠᠭᠠᠯᠭᠠᠪᠤᠷᠢ ᠪᠠᠷ ᠶᠠᠪᠤᠭᠠ ᠡᠯᠴᠢ᠂ ᠴᠢᠮᠠ ᠶ᠋ᠢ ᠠᠪᠠᠴᠢᠬᠤ᠂ ᠠᠭᠤᠯᠠ ᠶ᠋ᠢᠨ ᠣᠲᠣᠭ ᠤ᠋ᠨ ᠬᠢᠨ ᠲᠡᠢ ᠬᠡᠯᠡᠯᠴᠡᠭᠡᠷ ᠬᠢᠬᠦ ᠭᠡᠵᠦ ᠶᠠᠪᠤᠭᠠ ᠭᠡᠳ᠄
— ᠴᠢ ᠣᠳᠣ ᠨᠠᠳᠠᠲᠠᠢ ᠶᠠᠪᠤ᠃ ᠲᠡᠮᠦᠵᠢᠨ ᠤᠷᠤᠭᠤ ᠣᠴᠢᠶᠠ ᠬᠡᠮᠡᠪᠡᠰᠦ ᠲᠡᠷᠡ᠄
— ᠦᠭᠡᠢ᠂ ᠡᠵᠡᠨ ᠳ᠋ᠡᠭᠡᠨ ᠬᠡᠯᠡᠬᠦ ᠦᠭᠡᠢ ᠶᠠᠪᠤᠵᠤ ᠪᠣᠯᠬᠤ ᠦᠭᠡᠢ ᠭᠡᠪᠡ᠃ ᠪᠤᠭᠤᠷᠴᠢ᠄
— ᠲᠠᠨ ᠤ᠋ ᠡᠵᠡᠨ ᠴᠢᠨᠢ ᠬᠡᠨ ᠶᠦᠮ ᠪᠣᠢ? ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌ ᠳᠠᠷᠬᠢ᠄
— ᠬᠠᠷᠭᠢᠯ᠃ ᠡᠯᠴᠢ ᠲᠠ ᠴᠤ᠌ ᠭᠡᠰᠡᠨ ᠬᠠᠷᠭᠢᠯ ᠡᠵᠡᠨ ᠲᠡᠢ ᠣᠴᠢᠵᠤ ᠠᠭᠤᠯᠵᠠ ᠭᠡᠪᠡ᠃
ᠲᠡᠭᠡᠭᠡᠳ ᠠᠭᠤᠯᠠ ᠶ᠋ᠢᠨ ᠪᠠᠯ ᠢ᠋ᠶ᠋ᠠᠷ ᠥᠭᠡᠳᠡ ᠪᠡᠨ ᠡᠷᠭᠢᠵᠦ ᠵᠥᠷᠢᠭ ᠵᠠᠮ ᠢ᠋ᠶ᠋ᠠᠷ ᠥᠭᠰᠥᠨ ᠬᠠᠪᠴᠢᠯ ᠬᠦᠷᠴᠦ ᠠᠭᠤᠢ ᠶ᠋ᠢᠨ ᠠᠮᠠᠨ ᠳ᠋ᠤ᠌ ᠣᠴᠢᠲᠠᠯᠠ ᠬᠣᠶᠠᠷ ᠣᠪᠣᠬᠠᠢ ᠨᠠᠪᠰᠠᠢᠨ ᠰᠡᠪᠰᠡᠢᠨ ᠦᠵᠡᠭᠳᠡᠪᠡ᠃ ᠬᠣᠶᠠᠷ ᠨᠣᠬᠠᠢ ᠬᠤᠴᠠᠵᠤ ᠢᠷᠡᠭᠡᠳ ᠳᠠᠷᠬᠢ ᠵᠠᠩᠳᠤᠷᠤᠮᠠᠭᠴᠠ ᠰᠡᠭᠦᠯ ᠢ᠋ᠶ᠋ᠡᠨ ᠰᠢᠷᠪᠠᠭᠠᠳ ᠪᠤᠴᠠᠪᠠ᠃ ᠣᠪᠣᠬᠠᠢ ᠶ᠋ᠢᠨ ᠠᠷᠤ ᠠ᠋ᠴᠠ ᠦᠰᠦ ᠰᠠᠬᠠᠯ ᠥᠳᠬᠡᠨ ᠰᠡᠭᠰᠡᠭᠡᠷ᠂ ᠪᠦᠰᠡᠯᠡᠬᠦ ᠡᠴᠡ ᠪᠡᠨ ᠳᠣᠭᠣᠭᠰᠢ ᠬᠡᠰᠡᠭᠬᠡᠨ ᠪᠡᠶᠡ ᠳᠠᠯᠳᠠ᠂ ᠪᠤᠰᠤᠳ ᠨᠢ ᠨᠠᠷᠠ ᠰᠠᠯᠬᠢᠨ ᠳ᠋ᠤ᠌ ᠲᠦᠯᠡᠭᠳᠡᠵᠦ ᠪᠣᠷᠣᠯᠠᠭᠰᠠᠨ᠂ ᠨᠠᠰᠤ ᠪᠡᠶᠡ ᠭᠦᠢᠴᠡᠵᠦ ᠬᠦᠳᠡᠷᠵᠢᠭᠰᠡᠨ25—30 ᠣᠷᠴᠢᠮ ᠨᠠᠰᠤᠨ ᠤ᠋ ᠭᠤᠷᠪᠠᠨ ᠡᠷᠡ ᠨᠢᠳᠦ ᠰᠢᠲᠦ ᠨᠢ ᠭᠢᠯᠠᠯᠵᠠᠨ ᠢᠨᠢᠶᠡᠵᠦ ᠤᠭᠲᠤᠯᠠ᠃ ᠴᠠᠭᠠᠨᠠ ᠨᠢ ᠪᠠᠰᠠ ᠨᠢᠭᠡ ᠵᠠᠯᠠᠭᠤ ᠡᠮᠡ ᠨᠢᠮᠭᠡᠨ ᠳᠠᠩ ᠬᠤᠪᠴᠠᠰᠤ ᠪᠠᠷ ᠪᠡᠶᠡ ᠪᠡᠨ ᠬᠠᠯᠬᠠᠯᠠᠵᠠᠢ᠃
ᠪᠣᠭᠣᠷᠴᠢ ᠲᠡᠳᠡᠨ ᠲᠡᠢ ᠶᠡᠬᠡ ᠯᠡ ᠡᠶᠡᠯᠰᠡᠭ ᠶᠠᠩᠵᠤ ᠦᠵᠡᠭᠦᠯᠦᠨ ᠮᠡᠨᠳᠦᠯᠡᠵᠦ᠂ ᠲᠣᠯᠣᠭᠠᠢ ᠮᠡᠬᠦᠢᠨ ᠬᠦᠨᠳᠦᠯᠡᠪᠡ᠃ ᠲᠡᠳᠡᠨ ᠦ᠌ ᠠᠰᠠᠭᠤᠭᠰᠠᠨ ᠰᠣᠨᠢᠷᠬᠠᠭᠰᠠᠨ ᠳ᠋ᠤ᠌ ᠬᠠᠷᠢᠭᠤᠯᠵᠤ ᠬᠡᠯᠡᠶᠡ ᠭᠡᠰᠡᠨ ᠦᠭᠡ ᠪᠡᠨ ᠬᠡᠯᠡᠵᠦ ᠠᠮᠵᠢᠭᠠᠳ ᠠᠪᠤᠯᠠ᠃ ᠭᠡᠲᠡᠯᠡ ᠲᠡᠳᠡ᠄
— ᠲᠠᠯᠠ ᠶ᠋ᠢᠨ ᠬᠡᠳᠦᠨ ᠵᠢᠭᠠᠯ ᠤ᠋ᠳ ᠤᠯᠤᠰ ᠪᠠᠢᠭᠤᠯᠤᠨ ᠲᠣᠭᠯᠠᠵᠤ ᠪᠠᠢᠭᠠ ᠶᠤᠮ ᠪᠢᠵᠡ ᠳᠡ᠃ ᠬᠠ᠂ ᠬᠠ᠂ ᠬᠠ᠂ ᠡᠯᠴᠢ ᠨᠢ ᠡᠨᠡ ᠭᠡᠯᠴᠡᠨ ᠳᠣᠭᠣᠭᠢᠯᠠᠪᠠ᠃
ᠪᠣᠭᠣᠷᠴᠢ ᠶ᠋ᠢ ᠣᠴᠢᠬᠤ ᠳ᠋ᠤ᠌ ᠬᠡᠦᠬᠡᠨ ᠲᠣᠭᠣᠭᠠ ᠨᠡᠷᠡᠵᠦ ᠪᠠᠢᠪᠠ᠃ ᠢᠰᠬᠦᠯᠡᠩ ᠰᠠᠢᠬᠠᠨ ᠦᠨᠦᠷ ᠬᠠᠩᠬᠤᠯᠤᠨᠠ᠃ ᠵᠢᠮᠢᠰ ᠢᠰᠬᠡᠵᠦ ᠠᠷᠢᠬᠢ ᠨᠡᠷᠡᠳᠡᠭ ᠠᠵᠢ᠃ ᠠᠷᠢᠬᠢ ᠠᠭᠤᠳᠠᠯᠵᠤ ᠬᠦᠢᠲᠡᠨ ᠤᠰᠤᠨ ᠳ᠋ᠤ᠌ ᠰᠣᠢᠵᠤ ᠭᠠᠯ ᠳᠡᠭᠡᠷᠡ ᠮᠢᠬᠠ ᠴᠢᠨᠠᠬᠤ ᠪᠠᠷ ᠮᠢᠬᠠ ᠠᠪᠴᠢᠷᠠᠬᠤ ᠳ᠋ᠤᠨᠢ ᠪᠤᠭᠤᠷᠴᠢ ᠳ᠋ᠤ᠌《ᠨᠢᠭᠡᠯᠡ ᠪᠢᠰᠢ ᠮᠢᠬᠠ ᠪᠠᠢᠨᠠ ᠳᠠ》 ᠭᠡᠵᠦ ᠰᠡᠵᠢᠭ ᠲᠥᠷᠥᠪᠡ᠃ ᠲᠤᠩ ᠰᠢᠨᠡᠬᠡᠨ ᠪᠣᠯᠤᠯᠲᠠᠢ ᠬᠠᠷᠠᠭᠳᠠᠨᠠ᠃ ᠤᠰᠤᠨ ᠳ᠋ᠤ᠌ ᠰᠣᠢᠭᠰᠠᠨ ᠠᠷᠢᠬᠢ ᠪᠠᠨ ᠠᠪᠴᠢᠷᠠᠵᠤ ᠲᠣᠭᠣᠷᠢᠨ ᠰᠠᠭᠤᠭᠠᠳ ᠰᠥᠩᠨᠡᠵᠦ ᠪᠤᠭᠤᠷᠴᠢ ᠶ᠋ᠢ ᠴᠤ᠌ ᠠᠯᠤᠰᠯᠠᠯ ᠦᠭᠡᠢ ᠥᠭᠪᠡ᠃ ᠲᠡᠭᠦᠨ ᠢ᠋ ᠨᠢ ᠠᠪᠴᠤ ᠪᠠᠷᠢᠵᠤ ᠮᠥᠩᠬᠡ ᠲᠩᠷᠢ᠂ ᠠᠭᠤᠯᠠ ᠣᠪᠣᠭᠠ ᠨᠡᠷᠡᠯᠡᠨ ᠢᠨᠴᠠᠳᠠᠵᠤ ᠡᠷᠭᠦᠭᠡᠳ ᠡᠷᠭᠢᠭᠦᠯᠵᠦ ᠥᠭᠬᠦ ᠳ᠋ᠦ᠍᠄《ᠤᠤᠭᠤ》 ᠭᠡᠵᠦ ᠲᠤᠰᠢᠶᠠᠩᠭᠤᠢ ᠵᠠᠩᠳᠤᠷᠪᠠ᠃ ᠪᠤᠭᠤᠷᠴᠢ᠄《ᠤᠤᠭᠤᠳᠠᠭ ᠦᠭᠡᠢ》 ᠭᠡᠵᠦ ᠪᠤᠴᠠᠭᠠᠯᠠ᠃ ᠲᠡᠳᠡ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠪᠠᠯᠭᠤᠵᠤ᠂ ᠪᠥᠵᠢᠵᠦ ᠶᠡᠬᠡᠳᠡ ᠨᠠᠷᠭᠢᠬᠤ ᠶᠠᠩᠵᠤᠲᠠᠢ᠃ ᠪᠤᠭᠤᠷᠴᠢ《ᠲᠡᠷᠢᠭᠦᠨ》 ᠭᠡᠳ ᠪᠠᠢᠭᠠ ᠬᠠᠷᠭᠢᠯ ᠭᠡᠭᠴᠢ ᠡᠲᠡᠭᠡᠳ ᠲᠦ᠋ᠨᠢ ᠬᠠᠨᠳᠤᠵᠤ᠄
— ᠲᠠ ᠮᠠᠨ ᠤ᠋ ᠡᠵᠡᠨ ᠳ᠋ᠦ᠍ ᠶᠠᠮᠠᠷ ᠬᠠᠷᠢᠭᠤ ᠥᠭᠬᠦ ᠪᠣᠢ? ᠳᠠᠷᠬᠢ ᠶ᠋ᠢ ᠨᠠᠳᠠᠲᠠᠢ ᠶᠠᠪᠤᠭᠤᠯᠬᠤ ᠤᠤ? ᠭᠡᠵᠦ ᠵᠣᠷᠢᠭᠤᠳᠠ ᠠᠰᠠᠭᠤᠪᠠ᠃ ᠬᠠᠷᠭᠢᠯ ᠬᠡᠮᠡᠭᠴᠢ ᠪᠡᠷ ᠳᠠᠷᠬᠢ ᠤᠷᠤᠭᠤ ᠬᠠᠷᠠᠵᠤ᠄
— ᠶᠠᠪᠤᠬᠤ ᠤᠤ? ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌ ᠴᠠᠭᠠᠳᠤᠬᠢ ᠨᠢ᠄
— ᠦᠭᠡᠢ ᠭᠡᠵᠦ ᠲᠣᠯᠣᠭᠠᠢ ᠰᠡᠭᠰᠦᠷᠪᠡ᠃ ᠬᠠᠷᠭᠢᠯ ᠶᠡᠬᠡᠳᠡ ᠮᠠᠭᠠᠳᠠᠢᠵᠤ᠄
— ᠡᠢᠮᠦ ᠯᠡ ᠪᠠᠢᠨᠠ᠃ ᠬᠠᠷᠠᠭᠠ ᠪᠢᠵᠡ? ᠭᠡᠪᠡ᠃ ᠪᠣᠭᠣᠷᠴᠢ ᠶᠡᠬᠡᠳᠡ ᠤᠷᠮᠠ ᠭᠤᠳᠤᠷᠠᠭᠰᠠᠨ ᠴᠢᠷᠠᠢ ᠭᠠᠷᠭᠠᠨ᠄
— ᠵᠠ᠂ ᠵᠠ᠂ ᠶᠠᠭᠠᠬᠢᠶᠠ ᠭᠡᠬᠦ ᠪᠣᠢ? ᠬᠠᠷᠢᠨ ᠲᠠ ᠮᠠᠨ ᠤ᠋ ᠡᠵᠡᠨ ᠳ᠋ᠦ᠍ ᠶᠠᠮᠠᠷ ᠦᠭᠡ ᠠᠢᠯᠠᠳᠬᠠᠬᠤ ᠰᠠᠨ ᠪᠣᠯ? ᠭᠡᠰᠡᠨ ᠳ᠋ᠦ᠍ ᠴᠠᠭᠠᠳᠤᠬᠢ ᠨᠢ ᠶᠡᠬᠡᠳᠡ ᠲᠣᠬᠣᠭᠤᠷᠬᠠᠭᠰᠠᠨ ᠪᠠᠢᠳᠠᠯ ᠲᠠᠢ ᠬᠥᠬᠡ ᠢᠨᠢᠶᠡᠳᠦ ᠪᠡᠷ᠄
— ᠲᠡᠷᠡ ᠲᠡᠮᠦᠵᠢᠨ ᠡᠵᠡᠨ ᠴᠢᠨᠢ ᠠᠭᠤᠯᠠ ᠶ᠋ᠢᠨ ᠡᠵᠡᠨ ᠨᠠᠳᠠ ᠳᠡᠭᠡᠷᠡ ᠥᠪᠡᠷ ᠢ᠋ᠶ᠋ᠡᠨ ᠢᠷᠡᠵᠦ ᠮᠥᠷᠭᠥᠨᠡ ᠪᠢᠵᠡ! ᠭᠡᠯᠡ᠃ ᠪᠣᠭᠣᠷᠴᠢ᠄
— ᠵᠠ᠂ ᠵᠠ ᠮᠡᠳᠡᠯᠡ᠃ ᠪᠢ ᠶᠠᠪᠤᠶᠠ ᠳᠠ ᠭᠡᠳ ᠪᠣᠰᠲᠠᠯᠠ ᠨᠥᠭᠦᠭᠡ ᠭᠤᠷᠪᠠᠨ ᠪᠠᠷᠭᠢᠯ ᠡᠷᠡ ᠪᠣᠰᠴᠤ ᠢᠷᠡᠭᠡᠳ ᠪᠠᠷᠢᠭᠠᠳ ᠠᠪᠴᠤ᠄
— ᠤᠶᠠᠭᠠ ᠠᠪᠴᠢᠷᠠ ᠭᠡᠵᠦ ᠬᠡᠨ ᠳ᠋ᠦ᠍ ᠴᠦ᠍ ᠶᠦᠮ ᠲᠤᠰᠢᠶᠠᠲᠠᠯᠠ ᠨᠥᠭᠦᠭᠡ ᠡᠮᠡ ᠰᠣᠷᠣᠨ ᠣᠭᠣᠰᠣᠷ ᠠᠪᠴᠢᠷᠠᠪᠠ᠃ ᠲᠡᠷᠡ ᠨᠢ ᠬᠥᠮᠦᠨ ᠳ᠋ᠦ᠍ ᠵᠣᠷᠢᠭᠤᠯᠤᠭᠰᠠᠨ ᠴᠢᠳᠥᠷ ᠲᠤᠱᠠ ᠭᠡᠯᠲᠡᠢ᠃ ᠬᠣᠶᠠᠷ ᠪᠤᠭᠤᠯᠠᠭᠠ ᠳ᠋ᠤᠨᠢ ᠣᠷᠢᠶᠠᠵᠤ ᠲᠠᠲᠠᠭᠠᠳ ᠠᠷᠤ ᠳ᠋ᠤ᠌ ᠨᠢ ᠤᠶᠠᠵᠤ ᠬᠥᠯ ᠢ᠋ ᠨᠢ ᠲᠤᠱᠠᠭᠠᠳ ᠪᠤᠭᠤᠯᠠᠭᠠᠨ ᠤ᠋ ᠤᠶᠠᠭᠠ ᠲᠠᠢ ᠨᠢ ᠬᠣᠯᠪᠣᠴᠢᠬᠠᠪᠠ᠃ ᠲᠡᠭᠡᠭᠡᠳ ᠵᠡᠭᠦᠨ ᠣᠪᠣᠬᠠᠢ ᠶ᠋ᠢᠨ ᠬᠠᠪᠴᠢᠰᠤᠨ ᠳ᠋ᠤ᠌ ᠪᠡᠯᠡᠳᠬᠡᠭᠰᠡᠨ ᠱᠣᠩ ᠳ᠋ᠤ᠌ ᠤᠶᠠᠴᠢᠬᠠᠯᠠ᠃ ᠢᠩᠭᠢᠭᠡᠳ ᠬᠠᠮᠢᠭᠠᠰᠢ ᠪᠠᠨ ᠴᠤ᠌ ᠦᠭᠡᠢ ᠪᠣᠯᠤᠭᠰᠠᠨ ᠪᠣᠯᠪᠠᠴᠤ ᠪᠣᠭᠣᠷᠴᠢ ᠮᠥᠴᠡᠭᠡ ᠪᠡᠨ ᠠᠯᠳᠠᠯ ᠦᠭᠡᠢ᠄
— ᠲᠠ ᠨᠠᠷ ᠠᠮᠢᠨ ᠠ᠋ᠴᠠ ᠪᠠᠨ ᠤᠢᠳᠤᠭᠰᠠᠨ ᠠᠮᠢᠲᠠᠳ ᠶᠤᠮ ᠤᠤ? ᠮᠠᠨ ᠤ᠋ ᠡᠵᠡᠨ ᠮᠢᠨᠦ ᠠᠷᠤ ᠠ᠋ᠴᠠ ᠢᠷᠡᠵᠦ ᠪᠦᠭᠦᠳᠡ ᠶ᠋ᠢ ᠴᠢᠨᠢ ᠬᠥᠨᠥᠭᠡᠨᠡ ᠭᠡᠪᠡ᠃ ᠲᠡᠳᠡ ᠢᠨᠢᠶᠡᠯᠳᠦᠨ ᠥᠨᠥ ᠬᠠᠷᠭᠢᠯ᠄
— ᠲᠡᠭᠡ᠂ ᠲᠡᠭᠡ᠃ ᠬᠡᠨ ᠨᠢ ᠬᠡᠨ ᠢ᠋ ᠪᠡᠨ ᠬᠥᠨᠥᠭᠡᠬᠦ ᠶ᠋ᠢ ᠲᠩᠷᠢ ᠮᠡᠳᠡᠨᠡ ᠠ᠋ ᠭᠡᠵᠦ ᠢᠨᠢᠶᠡᠯᠳᠦᠵᠡᠭᠡᠨᠡ᠃ ᠪᠣᠭᠣᠷᠴᠢ ᠴᠠᠭ ᠮᠥᠴᠡ ᠬᠦᠯᠢᠶᠡᠬᠦ ᠡᠴᠡ ᠥᠭᠡᠷᠡ ᠠᠷᠭᠠ ᠦᠭᠡᠢ ᠪᠣᠯᠤᠯᠠ᠃ ᠬᠠᠷᠠᠩᠭᠤᠢ ᠪᠣᠯᠵᠤ ᠲᠡᠳᠡ ᠴᠢᠨᠠᠭᠰᠠᠨ ᠮᠢᠬᠠ ᠪᠠᠨ ᠭᠠᠷᠭᠠᠵᠤ ᠠᠷᠢᠬᠢ ᠪᠠᠨ ᠤᠤᠭᠤᠨ ᠨᠠᠷᠭᠢᠯᠳᠤᠬᠤ ᠳ᠋ᠠᠭᠠᠨ ᠶᠡᠬᠡᠯᠡ ᠬᠥᠭᠵᠢᠶᠡᠨ ᠲᠡᠢ ᠪᠣᠯᠤᠯᠲᠠᠢ᠃
ᠨᠥᠭᠦᠭᠡ ᠬᠡᠦᠬᠡᠨ ᠨᠢ ᠴᠢᠨᠠᠭᠰᠠᠨ ᠬᠡᠰᠡᠭ ᠮᠢᠬᠠ ᠪᠠᠷᠢᠵᠤ ᠢᠷᠡᠵᠦ ᠪᠤᠭᠤᠷᠴᠢ ᠳ᠋ᠤ᠌ ᠥᠭᠬᠦ ᠳ᠋ᠦ᠍ ᠨᠢ ᠪᠤᠭᠤᠷᠴᠢ᠄
— ᠢᠳᠡᠬᠦ ᠦᠭᠡᠢ᠂ ᠢᠳᠡᠬᠦ ᠦᠭᠡᠢ ᠭᠡᠯᠡ᠃ ᠬᠡᠦᠬᠡᠨ ᠮᠢᠬᠠ ᠶ᠋ᠢ ᠬᠠᠵᠠᠭᠤ ᠳ᠋ᠤᠨᠢ ᠲᠠᠯᠪᠢᠴᠢᠬᠠᠭᠠᠳ ᠣᠴᠢᠵᠤ ᠲᠡᠳᠡᠨ ᠳ᠋ᠦ᠍ ᠪᠡᠨ ᠪᠤᠭᠤᠷᠴᠢ ᠶ᠋ᠢᠨ ᠬᠡᠯᠡᠭᠰᠡᠨ ᠢ᠋ ᠨᠢ ᠬᠡᠯᠡᠬᠦ ᠳ᠋ᠦ᠍ ᠡᠵᠡᠨ ᠬᠡᠮᠡᠭᠴᠢ ᠨᠢ᠄
— ᠶᠠᠭᠠᠬᠢᠬᠤᠪ᠂ ᠶᠠᠭᠠᠬᠢᠬᠤᠪ᠂ ᠲᠡᠷᠡ ᠲᠡᠢ ᠲᠡᠷᠡ ᠦᠭᠡᠢ ᠬᠣᠨᠣᠭ ᠤ᠋ᠨ ᠲᠣᠭᠠ ᠨᠢ ᠴᠥᠭᠡᠨ ᠦᠯᠡᠳᠡᠭᠰᠡᠨ ᠠᠮᠢᠲᠠᠨ᠂ ᠰᠢᠪᠬᠠᠷᠴᠤ ᠯᠠ ᠪᠠᠢᠭ ᠭᠡᠬᠦ ᠨᠢ ᠰᠣᠨᠣᠰᠳᠠᠪᠠ᠃
ᠲᠡᠳᠡ ᠤᠨᠲᠠᠵᠤ ᠬᠡᠪᠲᠡᠬᠦ ᠶᠠᠭᠤᠮᠠ ᠪᠣᠯᠤᠯᠠ᠃ ᠬᠣᠶᠠᠷ ᠰᠡᠭᠰᠡᠭᠡᠷ ᠣᠷᠣᠵᠤ ᠢᠷᠡᠭᠡᠳ ᠪᠤᠭᠤᠷᠴᠢ ᠶ᠋ᠢ ᠤᠶᠠᠭᠠᠨ ᠠ᠋ᠴᠠ ᠨᠢ ᠭᠠᠷᠭᠠᠵᠤ ᠰᠢᠭᠡᠭᠡᠯᠭᠡᠳ ᠣᠪᠣᠬᠠᠢ ᠶ᠋ᠢᠨ ᠭᠣᠣᠯ ᠳ᠋ᠤ᠌ ᠭᠠᠵᠠᠷ ᠳᠡᠭᠡᠷᠡ ᠭᠡᠳᠡᠷᠭᠦ ᠬᠠᠷᠠᠭᠤᠯᠤᠨ ᠬᠡᠪᠲᠡᠭᠦᠯᠦᠭᠡᠳ ᠳᠡᠭᠡᠭᠦᠷ ᠨᠢ ᠡᠯᠳᠡᠵᠦ ᠵᠥᠭᠡᠯᠡᠷᠡᠭᠦᠯᠦᠭᠰᠡᠨ ᠭᠤᠷᠪᠠᠨ ᠬᠥᠮᠦᠨ ᠦ᠌ ᠠᠷᠠᠰᠤ ᠲᠠᠯᠪᠢᠭᠠᠳ᠂ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠬᠡᠪᠲᠡᠬᠦ ᠳᠡᠪᠢᠰᠬᠡᠷ ᠬᠣᠶᠠᠷ ᠢ᠋ ᠬᠣᠶᠠᠷ ᠲᠠᠯᠠ ᠪᠠᠷ ᠥᠨᠥᠬᠢ ᠭᠠᠷ ᠬᠥᠯ ᠦ᠋ᠨ ᠤᠷᠲᠤ ᠠᠷᠠᠰᠤᠨ ᠳᠡᠭᠡᠭᠦᠷ ᠳᠡᠪᠢᠰᠴᠦ ᠬᠣᠶᠠᠷ ᠲᠠᠯᠠ ᠠ᠋ᠴᠠ ᠨᠢ ᠰᠢᠬᠠᠵᠤ ᠬᠡᠪᠲᠡᠪᠡ᠃
ᠠᠷᠢᠬᠢ ᠬᠠᠩᠬᠤᠯᠬᠤ ᠬᠢᠭᠡᠳ ᠪᠤᠰᠤᠳ ᠦᠨᠦᠷ᠂ ᠢᠯᠠᠩᠭᠤᠶᠠ ᠲᠡᠳᠡᠨ ᠢ᠋ ᠰᠠᠶᠢᠬᠠᠨ ᠬᠥᠮᠦᠨ ᠦ᠌ ᠮᠢᠬᠠ ᠢᠳᠡᠭᠰᠡᠨ ᠭᠡᠵᠦ ᠪᠣᠳᠣᠬᠤ ᠠ᠋ᠴᠠ ᠣᠢ ᠭᠤᠲᠤᠮᠠ᠃ ᠪᠥᠭᠡᠯᠵᠢᠰᠦ ᠴᠢᠳᠬᠤᠨᠠ᠃ ᠨᠥᠭᠦᠭᠡ ᠳᠠᠷᠬᠢ ᠶ᠋ᠢ ᠮᠠᠨᠠᠭᠠᠨ ᠳ᠋ᠤ᠌ ᠭᠠᠷᠭᠠᠬᠤ ᠳ᠋ᠠᠭᠠᠨ᠄
— ᠠᠯᠤᠰ ᠤ᠋ᠨ ᠴᠢᠮᠡᠭᠡ ᠠᠪᠢᠶᠠ ᠴᠢᠩᠨᠠᠵᠤ ᠰᠡᠵᠢᠭ ᠭᠠᠷᠪᠠᠯ ᠪᠢᠳᠡᠨ ᠢ᠋ ᠰᠡᠷᠡᠭᠡ! ᠭᠡᠵᠦ ᠲᠤᠰᠢᠶᠠᠪᠠ᠃ ᠲᠡᠷᠡ ᠨᠢ ᠪᠦᠷᠢᠨ ᠵᠡᠪᠰᠡᠭᠯᠡᠭᠡᠳ ᠮᠠᠨᠠᠭᠠᠨ ᠤ᠋ ᠪᠠᠢᠷᠢ ᠤᠷᠤᠭᠤ ᠶᠠᠪᠤᠯᠠ᠃ ᠨᠠᠷᠢᠨ ᠵᠥᠷᠢᠭ ᠵᠠᠮ ᠢ᠋ᠶ᠋ᠠᠷ ᠵᠡᠭᠦᠨ ᠬᠢᠷᠠ ᠥᠭᠡᠳᠡ ᠭᠠᠷᠴᠤ ᠰᠠᠭᠤᠳᠠᠭ ᠲᠡᠢᠮᠦ ᠨᠢᠭᠡ ᠰᠠᠷᠠᠪᠴᠢᠯᠠᠬᠤ ᠶᠠᠭᠤᠮᠠ ᠶ᠋ᠢ ᠪᠤᠭᠤᠷᠴᠢ ᠬᠠᠷᠠᠵᠤ ᠠᠮᠵᠢᠭᠰᠠᠨ ᠪᠥᠯᠥᠭᠡ᠃ ᠲᠠᠢᠰᠢ ᠶᠠᠪᠤᠭᠤᠯᠬᠤ ᠳ᠋ᠠᠭᠠᠨ ᠥᠨᠥᠬᠢ 《ᠠᠭᠤᠯᠠ ᠶ᠋ᠢᠨ ᠡᠵᠡᠨ》᠄
— ᠮᠠᠨ ᠤ᠋ ᠬᠣᠶᠠᠷ ᠨᠣᠬᠠᠢ ᠠᠯᠤᠰ ᠤ᠋ᠨ ᠴᠢᠮᠡᠭᠡ ᠶ᠋ᠢ ᠴᠢᠮᠠ ᠠ᠋ᠴᠠ ᠢᠯᠡᠭᠦᠦ ᠮᠡᠳᠡᠷᠡᠵᠦ ᠴᠢᠳᠠᠬᠤ ᠪᠠᠢᠬᠠ ! ᠭᠡᠵᠦ ᠨᠣᠬᠠᠢ ᠳ᠋ᠠᠭᠠᠨ ᠶᠡᠬᠡ ᠨᠠᠢᠳᠠᠪᠤᠷᠢ ᠲᠠᠯᠪᠢᠵᠤ ᠮᠠᠨᠠᠭᠠᠴᠢᠨ ᠤ᠋ ᠤᠷᠮᠠ ᠶ᠋ᠢ ᠬᠤᠭᠤᠯᠪᠠ᠃
— ᠵᠠ᠂ ᠲᠡᠭᠡᠭᠡᠳ ᠪᠦᠭᠦᠳᠡ ᠣᠷᠣ᠂ ᠬᠡᠪᠲᠡᠷᠢ᠂ ᠪᠠᠢᠬᠤ ᠪᠠᠢᠷᠢ ᠪᠠᠨ ᠡᠵᠡᠯᠡᠵᠡᠭᠡᠵᠡᠢ᠃ ᠠᠷᠢᠬᠢᠨ ᠳ᠋ᠠᠭᠠᠨ ᠴᠣᠬᠢᠭᠤᠯᠤᠭᠰᠠᠨ ᠬᠠᠵᠠᠭᠤ ᠶ᠋ᠢᠨ ᠬᠣᠶᠠᠷ ᠲᠡᠭᠡᠰᠬᠢᠭᠡᠳ ᠬᠤᠷᠬᠢᠷᠠᠭᠠᠳ ᠥᠭᠴᠦ᠂ ᠪᠠᠷᠠᠭᠤᠨ ᠬᠣᠶᠠᠷ ᠵᠢᠭᠠᠰᠤ ᠨᠠᠭᠠᠯᠳᠤᠭᠤᠯᠤᠨ ᠵᠢᠷᠭᠠᠵᠤ ᠠᠯᠳᠠᠬᠤ ᠨᠢ ᠲᠡᠷᠡ᠃
ᠪᠣᠭᠣᠷᠴᠢ ᠶ᠋ᠢᠨ ᠨᠣᠢᠷ ᠶᠠᠭᠠᠬᠢᠯᠠ ᠭᠡᠵᠦ ᠬᠦᠷᠬᠦ ᠪᠣᠢ? ᠳᠣᠣᠷᠠ ᠠ᠋ᠴᠠ ᠰᠤᠷ ᠤ᠋ᠨ ᠵᠠᠩᠭᠢᠯᠠᠭᠠ ᠨᠤᠬᠤᠵᠤ᠂ ᠬᠦᠯᠢᠭᠲᠡᠢ ᠭᠠᠷ ᠬᠥᠯ ᠴᠢᠯᠡᠵᠦ ᠪᠠᠳᠠᠢᠷᠠᠨ᠂ ᠬᠥᠮᠦᠨ ᠦ᠌ ᠠᠷᠠᠰᠤᠨ ᠬᠤᠴᠢᠯᠭᠠᠨ ᠳ᠋ᠤ᠌ ᠳᠠᠷᠤᠭᠤᠯᠵᠤ ᠲᠠᠷᠴᠢᠯᠠᠬᠤ ᠶ᠋ᠢᠨ ᠶᠡᠬᠡᠪᠡᠷ ᠲᠠᠷᠴᠢᠯᠠᠵᠤ ᠬᠡᠪᠲᠡᠬᠦ ᠵᠠᠭᠤᠷᠠ ᠥᠪᠡᠷ ᠢ᠋ ᠪᠡᠨ ᠴᠢᠯᠥᠭᠡᠯᠡᠵᠦ ᠡᠳᠡᠨ ᠢ᠋ ᠲᠣᠨᠢᠯᠭᠠᠬᠤ ᠡᠯᠳᠡᠪ ᠶᠠᠭᠤᠮᠠ ᠪᠣᠳᠣᠭᠳᠠᠨᠠ᠃《ᠲᠡᠭᠦᠰᠬᠡᠨ ᠦ᠌ ᠦᠰᠦᠨ ᠳ᠋ᠦ᠍ᠨᠢ ᠬᠢᠵᠦ ᠥᠭᠭᠦᠭᠰᠡᠨ ᠬᠢᠲᠤᠭᠠ ᠯᠠ ᠭᠠᠭᠴᠠ ᠠᠪᠤᠷᠠᠬᠤ ᠵᠡᠪᠰᠡᠭ ᠮᠥᠨ》 ᠭᠡᠵᠦ ᠪᠣᠳᠣᠭᠳᠠᠨ ᠠᠪᠬᠤ ᠭᠡᠬᠦ ᠳ᠋ᠦ᠍ ᠠᠪᠬᠤ ᠠᠷᠭᠠ ᠠᠯᠠᠭᠠ᠃ ᠭᠡᠪᠡᠴᠦ ᠢᠩᠭᠢᠵᠦ ᠬᠡᠪᠲᠡᠵᠦ ᠪᠣᠯᠬᠤ ᠦᠭᠡᠢ᠃ ᠵᠣᠪᠠᠯᠠᠩ ᠢ᠋ ᠭᠡᠲᠦᠯᠵᠦ ᠯᠡ ᠠᠮᠢ ᠪᠠᠨ ᠠᠪᠤᠷᠠᠬᠤ ᠶᠣᠰᠣᠲᠠᠢ᠃ ᠡᠢᠨᠬᠦ ᠪᠤᠭᠤᠯᠠᠭᠠ ᠪᠠᠨ ᠣᠷᠢᠶᠠᠵᠤ ᠰᠣᠢᠭᠰᠠᠨ ᠰᠤᠷ ᠬᠥᠳᠡᠯᠬᠦ ᠪᠦᠷᠢ ᠴᠢᠩᠭᠠᠷᠠᠵᠤ ᠪᠤᠯᠴᠢᠩ ᠡᠪᠡᠳᠬᠡᠵᠦ ᠴᠢᠨᠦᠷᠡᠭᠦᠯᠪᠡᠴᠦ ᠨᠢᠭᠡ ᠭᠠᠷ ᠢ᠋ᠶ᠋ᠠᠨ ᠠᠮᠠᠨ ᠳ᠋ᠠᠭᠠᠨ ᠣᠢᠷᠠᠲᠤᠭᠤᠯᠵᠤ ᠨᠥᠭᠦᠭᠡ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠠᠲᠠᠵᠤ ᠰᠤᠷ ᠢ᠋ ᠠᠮᠠᠨ ᠳ᠋ᠠᠭᠠᠨ ᠣᠷᠣᠭᠤᠯᠵᠤ᠂ ᠠᠷᠠᠭᠠ ᠰᠣᠶᠣᠭᠠ ᠬᠣᠶᠠᠷ ᠤ᠋ᠨ ᠵᠠᠭᠠᠭ ᠲᠤ ᠵᠠᠭᠤᠵᠤ ᠠᠪᠤᠭᠠᠳ ᠬᠡᠪᠢᠵᠦ ᠦᠵᠡᠲᠡᠯᠡ ᠴᠣᠭᠣᠷᠠᠵᠤ ᠪᠠᠢᠭᠠ ᠪᠣᠯᠤᠯᠲᠠᠢ᠃ ᠤᠷᠮᠠ ᠵᠣᠷᠢᠭ ᠴᠤ᠌ ᠣᠷᠣᠵᠤ ᠠᠭᠠᠵᠢᠭᠤ ᠤᠳᠠᠭᠠᠨ ᠬᠡᠪᠢᠭᠡᠳ ᠪᠠᠢᠪᠠ᠃ ᠨᠢᠭᠡ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠠᠲᠠᠭᠠᠳ ᠯᠠ ᠬᠡᠪᠢᠬᠦ ᠳ᠋ᠦ᠍ ᠰᠦᠷᠡᠬᠡᠢ ᠰᠤᠨᠵᠤ ᠦᠨᠡᠬᠡᠷ ᠰᠡᠢᠮᠡᠢᠵᠦ ᠢᠷᠡᠭᠰᠡᠨ ᠢ᠋ᠶ᠋ᠡᠨ ᠲᠠᠰᠤᠷᠠᠯᠠ᠃ ᠭᠠᠷ ᠢ᠋ᠶ᠋ᠠᠨ ᠭᠠᠷᠭᠠᠵᠤ᠂ ᠬᠥᠳᠡᠯᠭᠡᠨ ᠪᠠᠵᠠᠯᠠᠵᠤ᠂ ᠦᠰᠦᠨ ᠡᠴᠡ ᠪᠡᠨ ᠬᠢᠲᠤᠭᠠ ᠪᠠᠨ ᠠᠪᠤᠪᠠ᠃ ᠬᠠᠵᠠᠭᠤ ᠶ᠋ᠢᠨ ᠨᠢᠭᠡ ᠵᠣᠯᠢᠭ ᠭᠡᠳᠡᠷᠭᠦ ᠪᠡᠨ ᠬᠠᠷᠠᠭᠠᠳ《ᠬᠣᠭᠣᠯᠠᠢ ᠪᠠᠨ ᠣᠭᠲᠣᠯᠤᠭᠤᠯᠬᠤ ᠳ᠋ᠤ᠌ ᠪᠡᠯᠡᠨ》 ᠭᠡᠰᠡᠨ ᠰᠢᠭ ᠬᠡᠪᠲᠡᠨᠡ᠃ ᠳᠡᠭᠡᠷᠡ ᠡᠴᠡ ᠳᠠᠷᠤᠭᠰᠠᠨ ᠬᠥᠮᠦᠨ ᠦ᠌ ᠠᠷᠠᠰᠤ ᠶ᠋ᠢ ᠵᠦᠰᠦᠵᠦ ᠴᠡᠭᠡᠵᠢᠨ ᠪᠡᠶᠡ ᠪᠡᠨ ᠴᠢᠯᠥᠭᠡᠯᠡᠭᠡᠳ ᠨᠥᠭᠥᠭᠡᠳᠡᠬᠢ ᠶ᠋ᠢᠨ ᠠᠮᠠᠨ ᠳᠡᠭᠡᠷᠡ ᠨᠢ ᠨᠢᠭᠡ ᠭᠠᠷ ᠢ᠋ᠶ᠋ᠠᠨ ᠣᠢᠷᠠᠲᠤᠭᠤᠯᠵᠤ᠂ ᠨᠥᠭᠦᠭᠡ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠭᠠᠯᠵᠤᠤᠷ ᠢ᠋ ᠨᠢ ᠬᠠᠮᠤᠭ ᠲᠡᠩᠬᠡᠭᠡ ᠪᠡᠷ ᠢ᠋ᠶ᠋ᠡᠨ ᠣᠭᠲᠣᠯᠤᠨ ᠠᠮᠠ ᠶ᠋ᠢ ᠨᠢ ᠳᠠᠷᠤᠪᠠ᠃ ᠲᠡᠳᠦᠢ ᠯᠡ ᠳᠠᠭᠤ ᠴᠢᠮᠡᠭᠡ ᠭᠠᠷᠤᠭᠰᠠᠨ ᠦᠭᠡᠢ《ᠬᠤᠷ᠂ ᠬᠤᠷ》 ᠭᠡᠬᠦ ᠠᠪᠢᠶᠠ ᠴᠠᠭᠠᠨ ᠮᠥᠭᠡᠷᠰᠦ ᠪᠡᠷ ᠨᠢ ᠭᠠᠷᠬᠤ ᠲᠡᠳᠦᠢ ᠠᠵᠢ᠃ ᠨᠥᠭᠥᠭᠡᠳᠡᠬᠢ ᠶ᠋ᠢᠨ ᠬᠢᠨᠢ ᠡᠭᠡᠯᠵᠢ᠃ ᠲᠡᠷᠡ ᠨᠢ ᠴᠠᠰᠢ ᠬᠠᠷᠠᠭᠠᠳ ᠠᠲᠤᠢᠵᠤ ᠲᠦᠭᠳᠦᠢᠨ ᠬᠡᠪᠲᠡᠬᠦ ᠲᠤᠯᠠ ᠬᠣᠭᠣᠯᠠᠢ ᠶ᠋ᠢ ᠨᠢ ᠰᠢᠭᠤᠳ ᠣᠭᠲᠣᠯᠬᠤ ᠠᠷᠭᠠ ᠦᠭᠡᠢ᠃ ᠵᠣᠷᠢᠭᠤᠳᠠ ᠬᠥᠨᠳᠡᠢᠷᠡᠬᠦ ᠮᠠᠶᠢᠭ ᠦᠵᠡᠭᠦᠯᠲᠡᠯᠡ ᠢᠷᠠᠭᠯᠠᠨ ᠡᠷᠭᠢᠬᠦ ᠰᠠᠴᠠᠭᠤ ᠥᠨᠥᠬᠢ ᠬᠡᠴᠡᠭᠦᠦ ᠦᠢᠯᠡᠳᠦᠯ ᠢ᠋ᠶ᠋ᠡᠨ ᠬᠢᠪᠡ᠃ ᠬᠠᠵᠠᠭᠤ ᠶ᠋ᠢᠨ ᠬᠣᠶᠠᠷ ᠦᠬᠦᠳᠡᠯ ᠪᠣᠯᠤᠭᠠᠳ ᠰᠤᠷ ᠰᠢᠭ᠋ ᠰᠤᠨᠵᠤ ᠬᠡᠪᠲᠡᠬᠦ ᠨᠢ ᠲᠡᠷᠡ᠃
ᠪᠣᠰᠤᠨ ᠰᠠᠭᠤᠵᠤ ᠬᠥᠰᠢᠭᠰᠡᠨ᠂ ᠴᠢᠯᠡᠭᠰᠡᠨ ᠪᠡᠶᠡ ᠪᠡᠨ ᠵᠢᠭᠠᠬᠠᠨ ᠶᠠᠩᠵᠤᠯᠠᠭᠠᠳ ᠪᠦᠰᠡ ᠪᠡᠨ ᠣᠯᠵᠤ᠂ ᠵᠢᠵᠢᠭ ᠬᠢᠲᠤᠭᠠ ᠪᠠᠨ ᠪᠥᠰᠡᠨ ᠳ᠋ᠡᠭᠡᠨ ᠵᠠᠩᠭᠢᠳᠴᠤ ᠬᠢᠮᠠᠭᠠᠳᠠᠨ᠂ ᠪᠦᠰᠡ ᠪᠡᠨ ᠪᠦᠰᠡᠯᠡᠨ ᠨᠢᠭᠡ ᠰᠡᠯᠡᠮᠡ ᠠᠪᠴᠤ ᠵᠡᠭᠦᠪᠡ᠃
《ᠣᠳᠣ ᠶᠠᠭᠠᠬᠢᠬᠤ ᠪᠣᠢ? ᠪᠠᠷᠠᠭᠤᠨ ᠬᠣᠶᠠᠷ ᠢ᠋ ᠳᠦᠭᠦᠷᠭᠡᠬᠦ ᠠᠮᠠᠷᠬᠠᠨ᠃ ᠭᠡᠪᠡᠴᠦ ᠡᠮᠡ ᠶ᠋ᠢ ᠨᠢ ᠠᠯᠠᠮᠠ ᠦᠭᠡᠢ ᠪᠠᠢᠨᠠ᠃ ᠡᠮᠡ ᠬᠥᠮᠦᠨ ᠢ᠋ᠶ᠋ᠡᠷ ᠭᠠᠷ ᠢ᠋ᠶ᠋ᠠᠨ ᠴᠢᠰᠤᠳᠠᠬᠤ ᠮᠠᠭᠤ ᠶᠣᠷᠣ᠃ ᠡᠨᠡ ᠡᠷᠡ ᠡᠴᠡ ᠥᠴᠢᠭ ᠠᠪᠤᠮᠠᠷ᠃ ᠲᠡᠭᠡᠬᠦᠯᠡᠷ ᠮᠠᠨᠠᠭᠠᠴᠢ ᠲᠠᠢ ᠤᠴᠢᠷ ᠢ᠋ᠶ᠋ᠠᠨ ᠣᠯᠤᠯᠴᠠᠮᠠᠷ᠃ ᠲᠡᠷᠡ ᠡᠳᠦᠢ ᠳ᠋ᠦ᠍ ᠳᠤᠭᠵᠢᠷᠠᠵᠤ ᠯᠠ ᠪᠠᠢᠭᠠ᠃ ᠪᠠᠰᠠ ᠨᠢᠭᠡ ᠬᠡᠴᠡᠭᠦᠦ ᠶᠠᠭᠤᠮᠠ ᠪᠣᠯ ᠬᠣᠶᠠᠷ ᠨᠣᠬᠠᠢ᠂ ᠠᠷᠭᠠᠯᠠᠨᠠ ᠳᠠ》 ᠭᠡᠮᠡᠨ ᠪᠣᠳᠣᠵᠤ ᠰᠢᠢᠳᠮᠡᠭᠡᠢᠬᠡᠨ ᠬᠢᠲᠤᠭᠠ ᠪᠠᠨ ᠰᠤᠭᠤᠯᠵᠤ ᠬᠣᠶᠠᠷ ᠦᠬᠦᠳᠡᠯ ᠦ᠋ᠨ ᠥᠭᠡᠵᠡᠭ ᠦ᠋ᠨ ᠵᠤᠵᠠᠭᠠᠨ ᠮᠢᠬᠠᠨ ᠠ᠋ᠴᠠ ᠪᠥᠭᠡᠮ ᠮᠢᠬᠠ ᠣᠭᠲᠣᠯᠵᠤ ᠨᠣᠬᠠᠢ ᠳ᠋ᠤ᠌ ᠱᠣᠭᠰᠢᠷᠠᠨ ᠳᠠᠭᠤᠳᠠᠵᠤ ᠥᠭᠭᠦᠭᠡᠳ ᠬᠠᠭᠠᠰ ᠢ᠋ ᠨᠢ ᠬᠣᠯᠠ ᠰᠢᠲᠦᠬᠦᠢ ᠳ᠋ᠦ᠍ ᠬᠣᠶᠠᠷ ᠨᠣᠬᠠᠢ ᠶ᠋ᠢᠨ ᠬᠣᠷᠣᠬᠠᠢ ᠬᠥᠳᠡᠯᠵᠦ ᠬᠣᠪᠳᠣᠭᠯᠠᠨ ᠡᠮᠬᠦᠯᠡᠪᠡ᠃
ᠨᠢᠭᠡ ᠳᠡᠪᠡᠯ᠂ ᠬᠡᠰᠡᠭ ᠰᠤᠷ ᠠᠪᠴᠤ ᠳᠡᠪᠡᠯ ᠡᠴᠡ ᠨᠢ ᠬᠡᠰᠡᠭ ᠳᠠᠪᠤᠤ ᠥᠮᠥᠯᠦᠨ ᠣᠭᠲᠣᠴᠢᠵᠤ ᠪᠠᠷᠢᠭᠰᠠᠭᠠᠷ᠂ ᠭᠤᠲᠤᠯ ᠢ᠋ᠶ᠋ᠠᠨ ᠲᠠᠢᠯᠵᠤ ᠵᠥᠪᠬᠡᠨ ᠣᠢᠮᠣᠰᠤ ᠪᠠᠷ ᠢ᠋ᠶ᠋ᠠᠨ ᠮᠠᠨᠠᠭᠠᠨ ᠤ᠋ ᠵᠥᠷᠢᠭ ᠵᠠᠮ ᠢ᠋ᠶ᠋ᠠᠷ ᠭᠡᠲᠡᠨ ᠥᠭᠰᠥᠵᠦ ᠣᠢᠷᠠᠳᠪᠠᠰᠤ ᠮᠠᠨᠠᠭᠠᠴᠢ ᠶ᠋ᠢᠨ ᠡᠭᠦᠷᠭᠡ ᠬᠦᠯᠢᠶᠡᠭᠰᠡᠨ ᠳᠠᠷᠬᠢ ᠰᠠᠨᠠᠭᠰᠠᠨ ᠶᠣᠰᠣᠭᠠᠷ ᠬᠤᠷᠬᠢᠷᠠᠵᠤ ᠪᠠᠢᠪᠠ᠃ ᠠᠷᠭᠠ ᠦᠭᠡᠢ ᠳᠡ᠂ ᠡᠵᠡᠨ ᠨᠢ ᠲᠡᠭᠦᠨ ᠡᠴᠡ ᠢᠯᠡᠭᠦᠦ ᠬᠣᠶᠠᠷ ᠨᠣᠬᠠᠢ ᠳ᠋ᠠᠭᠠᠨ ᠨᠠᠢᠳᠠᠪᠤᠷᠢ ᠲᠠᠯᠪᠢᠭᠰᠠᠨ ᠶᠤᠮ ᠴᠢᠨᠢ᠃
ᠣᠢᠷᠠᠲᠤᠨ ᠣᠢᠷᠠᠲᠤᠭᠰᠠᠭᠠᠷ ᠳᠡᠪᠡᠯ ᠢ᠋ᠶ᠋ᠡᠷ ᠲᠣᠯᠣᠭᠠᠢ ᠶ᠋ᠢ ᠨᠢ ᠪᠢᠲᠡᠭᠦᠯᠡᠵᠦ ᠳᠠᠷᠤᠨ ᠠᠮᠠᠨ ᠳ᠋ᠤᠨᠢ ᠳᠠᠪᠤᠤ ᠴᠢᠬᠢᠵᠦ ᠬᠣᠶᠠᠷ ᠭᠠᠷ ᠢ᠋ ᠨᠢ ᠰᠤᠷ ᠢ᠋ᠶ᠋ᠠᠷ ᠡᠭᠡᠯᠳᠦᠷᠭᠡᠯᠡᠵᠦ ᠪᠣᠭᠣᠭᠠᠳ ᠰᠤᠷ ᠢ᠋ᠶ᠋ᠠᠨ ᠬᠣᠩᠭᠣᠨ ᠳᠣᠣᠭᠤᠷ ᠨᠢ ᠣᠷᠣᠭᠤᠯᠵᠤ ᠮᠥᠷᠦᠨ ᠦ᠌ ᠬᠢᠨᠢ ᠳᠣᠲᠣᠷᠠ ᠲᠠᠯᠠ ᠪᠠᠷ ᠨᠢ ᠬᠦᠵᠦᠭᠦᠨ ᠳᠡᠭᠡᠭᠦᠷ ᠨᠢ ᠲᠣᠬᠣᠵᠤ ᠳᠣᠭᠣᠭᠰᠢ ᠬᠣᠯᠪᠣᠭᠠᠳ ᠴᠢᠩᠭᠠᠬᠠᠨ ᠤᠶᠠᠯᠠ᠃ ᠪᠦᠲᠡᠭᠦᠯᠵᠦ ᠦᠬᠦᠭᠦᠯᠬᠦ ᠦᠭᠡᠢ ᠶ᠋ᠢᠨ ᠲᠤᠯᠠᠳᠠ ᠲᠣᠯᠣᠭᠠᠢ ᠶ᠋ᠢ ᠨᠢ ᠭᠠᠷᠭᠠᠵᠤ ᠬᠦᠯᠢᠭ ᠤᠶᠠᠭᠠ ᠶ᠋ᠢ ᠨᠢ ᠪᠡᠬᠢᠯᠡᠭᠡᠳ ᠮᠠᠨᠠᠭᠠᠨ ᠤ᠋ ᠣᠪᠣᠬᠠᠢ ᠳ᠋ᠤᠨᠢ ᠠᠷᠭᠠᠮᠵᠢᠵᠤ ᠣᠷᠬᠢᠪᠠ᠃ ᠣᠳᠣ《ᠠᠭᠤᠯᠠ ᠶ᠋ᠢᠨ ᠶᠡᠬᠡ ᠡᠵᠡᠨ》 ᠲᠡᠢ ᠤᠴᠠᠷᠠᠬᠤ ᠪᠣᠯᠤᠯᠠ᠃ ᠨᠠᠭᠠᠳᠤ ᠲᠠᠯᠠ ᠳ᠋ᠤ᠌ ᠰᠠᠢᠬᠠᠨ ᠳᠤᠭᠵᠢᠷᠠᠵᠤ ᠪᠠᠢᠨᠠ ᠥᠨᠥᠬᠢ ᠴᠢᠨᠢ᠃ ᠰᠡᠯᠡᠮᠡ ᠪᠡᠨ ᠬᠣᠶᠠᠷ ᠭᠠᠷ ᠲᠠᠭᠠᠨ ᠪᠠᠷᠢᠵᠤ ᠡᠷᠭᠦᠭᠡᠳ ᠴᠡᠭᠡᠵᠢ ᠤᠷᠤᠭᠤ ᠨᠢ ᠨᠡᠪᠲᠡ ᠰᠢᠭᠠᠪᠠ᠃ ᠲᠡᠷᠡ ᠶᠡᠬᠡ ᠬᠦᠴᠦᠷᠬᠡᠭ ᠡᠷᠡ ᠨᠢᠭᠡ ᠮᠠᠭᠤᠬᠠᠢ ᠳᠠᠭᠤ ᠠᠯᠳᠠᠭᠠᠳ ᠪᠣᠰᠬᠤ ᠭᠡᠰᠡᠨ ᠢ᠋ᠶ᠋ᠡᠨ ᠴᠢᠳᠠᠭᠰᠠᠨ ᠦᠭᠡᠢ᠃ ᠲᠡᠷᠡ ᠠᠩᠭᠠᠯᠵᠠᠨ ᠢᠷᠪᠠᠢᠵᠤ᠄
— ᠥᠨᠥᠬᠢ ᠲᠡᠮᠦᠵᠢᠨ ᠭᠡᠭᠴᠢ ᠨᠢ ᠢᠷᠡᠭᠡ ᠤᠤ? ᠭᠡᠵᠦ ᠳᠣᠷᠣᠢ ᠳᠠᠭᠤᠨ ᠢ᠋ᠶ᠋ᠠᠷ ᠠᠰᠠᠭᠤᠬᠤ ᠳ᠋ᠤ᠌ ᠪᠣᠭᠤᠷᠴᠢ᠄
— ᠲᠡᠢᠮᠦ ᠠ᠋᠂ ᠪᠢ ᠲᠡᠮᠦᠵᠢᠨ᠂ ᠴᠢᠮᠠ ᠲᠠᠢ ᠶᠠᠷᠢᠬᠤ ᠭᠡᠵᠦ ᠢᠷᠡᠯᠡ᠃ ᠠᠰᠠᠭᠤᠭᠰᠠᠨ ᠪᠦᠬᠦᠨ ᠢ᠋ ᠦᠨᠡᠨ ᠵᠥᠪ ᠬᠠᠷᠢᠭᠤᠯ᠃ ᠨᠢᠭᠡ ᠳ᠋ᠦ᠍᠂ ᠴᠢ ᠠᠯᠢ ᠨᠤᠲᠤᠭ ᠤ᠋ᠨ? ᠬᠡᠨ ᠭᠡᠭᠴᠢ ᠪᠣᠢ? ᠭᠡᠪᠡ᠃ ᠲᠡᠷᠡ ᠬᠠᠷᠭᠢᠯ ᠭᠡᠭᠴᠢ《ᠪᠢ᠂ ᠪᠢ ᠁》 ᠭᠡᠬᠦ ᠡᠴᠡ ᠢᠯᠡᠭᠦᠦ ᠦᠭᠡ ᠳᠤᠤᠭᠠᠷᠴᠤ ᠴᠢᠳᠠᠭᠰᠠᠨ ᠦᠭᠡᠢ᠂ ᠴᠡᠭᠡᠵᠢ ᠨᠢ ᠬᠡᠷᠴᠢᠭᠢᠨᠡᠨ ᠬᠣᠭᠣᠯᠠᠢ ᠨᠢ ᠰᠥᠭᠡᠩᠭᠢᠳᠡᠵᠦ ᠪᠦᠳᠡᠭᠢᠷᠡᠭᠡᠳ ᠶᠠᠭᠤᠨ ᠮᠡᠳᠡᠭᠦᠯᠭᠡ ᠥᠭᠬᠦ ᠲᠡᠢ᠂ ᠮᠠᠨᠲᠠᠢ᠂ ᠠᠮᠢᠰᠬᠤᠭᠠ ᠪᠠᠨ ᠬᠤᠷᠢᠶᠠᠴᠢᠬᠠᠬᠤ ᠨᠢ ᠲᠡᠷᠡ᠃ ᠬᠡᠦᠬᠡᠨ ᠢ᠋《ᠪᠣᠰ!》 ᠭᠡᠰᠡᠨ ᠳ᠋ᠦ᠍ ᠪᠣᠰᠤᠭᠰᠠᠨ ᠦᠭᠡᠢ᠂ ᠶᠠᠷᠳᠠᠭᠯᠠᠵᠤ ᠬᠡᠪᠲᠡᠭᠡᠳ ᠪᠠᠢᠬᠤᠯᠠᠷ ᠬᠤᠴᠢᠯᠭᠠ ᠶ᠋ᠢ ᠨᠢ ᠬᠣᠣ ᠲᠠᠲᠠᠵᠤ ᠬᠠᠶᠠᠭᠠᠳ ᠱᠠᠯᠳᠠᠩ ᠥᠭᠡᠵᠡᠭ ᠳᠡᠭᠡᠷᠡ ᠨᠢ ᠣᠷᠢᠶᠠᠯᠭᠠᠲᠠᠯᠠ ᠳᠠᠭᠤ ᠠᠯᠲᠠᠨ ᠠᠷᠭᠠ ᠪᠤᠰᠤ ᠪᠣᠰᠤᠭᠠᠳ ᠬᠤᠪᠴᠠᠰᠤ ᠪᠠᠨ ᠡᠮᠦᠰᠬᠦ ᠭᠡᠬᠦ ᠳ᠋ᠦ᠍ᠨᠢ《ᠲᠠᠰᠢ ᠪᠠᠨ ᠶᠠᠪᠤ !》 ᠭᠡᠵᠦ ᠵᠠᠩᠳᠤᠷᠤᠭᠠᠳ ᠱᠠᠯᠳᠠᠩ ᠨᠢᠴᠦᠭᠦᠨ ᠬᠡᠪ ᠢ᠋ᠶ᠋ᠡᠷ ᠨᠢ ᠬᠥᠭᠡᠭᠡᠵᠦ《ᠭᠠᠯ ᠨᠣᠴᠣᠭᠠ!》 ᠭᠡᠵᠦ ᠲᠤᠰᠢᠶᠠᠪᠠ᠃ ᠪᠡᠯᠡᠨ ᠴᠣᠭ ᠢ᠋ᠶ᠋ᠠᠷ ᠭᠠᠯ ᠴᠤ᠌ ᠶᠠᠳᠠᠬᠤ ᠶᠠᠭᠤᠮᠠ ᠦᠭᠡᠢ ᠠᠰᠠᠵᠤ᠂ ᠮᠣᠳᠣ ᠣᠪᠣᠭᠠᠯᠠᠭᠠᠳ ᠳᠦᠷᠡᠯᠵᠡᠭᠦᠯᠵᠦ ᠭᠤᠷᠪᠠᠨ ᠬᠡᠭᠦᠷ ᠢ᠋ ᠴᠢᠷᠦᠵᠦ ᠭᠠᠯ ᠳᠡᠭᠡᠷᠡ ᠬᠠᠶᠠᠯᠠ᠃ ᠳᠡᠭᠡᠷᠡ ᠡᠴᠡ ᠨᠢ ᠣᠪᠣᠬᠠᠢ ᠨᠢ ᠨᠤᠷᠠᠨ ᠣᠪᠣᠭᠠᠷᠠᠵᠤ《ᠴᠠᠳ᠂ ᠫᠢᠳ》 ᠬᠢᠨ ᠶᠡᠬᠡ ᠭᠠᠯ ᠳᠤᠮᠳᠠ ᠭᠤᠷᠪᠠᠨ ᠬᠡᠭᠦᠷ ᠵᠣᠳᠣᠯᠳᠤᠬᠤ ᠮᠠᠶᠢᠭ ᠦᠵᠡᠭᠦᠯᠦᠨ ᠥᠨᠳᠡᠢᠵᠦ ᠪᠡᠶᠡ ᠪᠡᠶᠡ ᠪᠡᠨ ᠨᠤᠳᠤᠷᠴᠤ ᠲᠡᠢᠴᠢᠬᠦ ᠳ᠋ᠦ᠍ ᠪᠣᠭᠤᠷᠴᠢ ᠢᠨᠢᠶᠡᠳᠦ ᠠᠯᠲᠠᠨ ᠬᠥᠭᠡᠷᠬᠦ ᠳ᠋ᠦ᠍ ᠬᠡᠦᠬᠡᠨ ᠭᠤᠨᠢᠭᠯᠠᠨ ᠤᠬᠢᠯᠠᠭᠰᠠᠨ ᠢ᠋ᠶ᠋ᠠᠨ᠄
— ᠴᠢ ᠮᠠᠭᠤᠬᠠᠢ ᠠᠮᠢᠲᠠᠨ ᠪᠠᠢᠨᠠ᠃ ᠠᠮᠢᠳᠤ ᠪᠠᠷ ᠨᠢ ᠰᠢᠲᠠᠭᠠᠯᠠ ᠰᠢᠦ ᠳᠡ ᠭᠡᠪᠡ᠃ ᠪᠣᠭᠤᠷᠴᠢ ᠬᠠᠷᠢᠭᠤ ᠳ᠋ᠤᠨᠢ᠄
— ᠲᠠ ᠨᠠᠷ ᠠ᠋ᠴᠠ ᠳᠣᠣᠷᠠ ᠭᠡᠵᠦ ᠤᠤ? ᠲᠠ ᠨᠠᠷ ᠬᠥᠮᠦᠨ ᠪᠠᠷᠢᠵᠤ ᠢᠳᠡᠳᠡᠭ ᠠᠷᠢᠶᠠᠲᠠᠨ᠃ ᠰᠡᠭᠦᠯ ᠦᠭᠡᠢ ᠴᠢᠨᠣᠠ ᠪᠢᠵᠡ ᠳᠡ! ᠭᠡᠳ
— ᠴᠢ ᠶᠡᠷᠦ ᠨᠢ ᠠᠯᠢ ᠨᠤᠲᠤᠭ? ᠶᠠᠭᠠᠬᠢᠵᠤ ᠡᠳᠡ ᠨᠠᠷ ᠲᠠᠢ ᠨᠡᠢᠯᠡᠭᠰᠡᠨ ᠪᠣᠢ? ᠭᠡᠵᠦ ᠠᠰᠠᠭᠤᠪᠠ᠃
— ᠪᠢ ᠬᠡᠷᠡᠢᠳ᠃ ᠲᠤᠤᠯᠠ ᠶ᠋ᠢᠨ ᠡᠬᠢ ᠪᠡᠷ ᠨᠤᠲᠤᠭᠯᠠᠳᠠᠭ᠃ ᠬᠠᠪᠤᠷ ᠬᠣᠨᠢ ᠬᠠᠷᠢᠭᠤᠯᠵᠤ ᠶᠠᠪᠤᠲᠠᠯᠠ ᠡᠨᠡ ᠬᠠᠷᠭᠢᠯ ᠣᠴᠢᠵᠤ ᠨᠠᠮᠠ ᠶ᠋ᠢ ᠪᠠᠷᠢᠵᠤ ᠠᠪᠴᠢᠷᠠᠵᠤ᠂ ᠠᠶᠤᠬᠤ ᠥᠯᠥᠰᠬᠦ ᠶ᠋ᠢᠨ ᠡᠷᠬᠡ ᠪᠡᠷ ᠡᠳᠡᠨ ᠲᠡᠢ ᠳᠠᠰᠤᠭᠰᠠᠨ ᠭᠡᠪᠡ᠃
— ᠪᠢ ᠴᠢᠮᠠᠶ᠋ᠢ ᠠᠮᠢᠳᠤ ᠦᠯᠡᠳᠡᠭᠡᠨᠡ᠃ ᠬᠣᠶᠠᠷ ᠨᠣᠬᠠᠢ ᠲᠠᠢ ᠯᠠ ᠬᠣᠴᠣᠷᠬᠤ ᠪᠠᠢᠬᠠ᠃ ᠳᠠᠷᠬᠢ ᠶ᠋ᠢ ᠪᠢ ᠠᠪᠠᠴᠢᠵᠤ ᠲᠡᠮᠦᠵᠢᠨ ᠳ᠋ᠦ᠍ ᠲᠤᠰᠢᠶᠠᠬᠤ ᠶᠣᠰᠣᠲᠠᠢ᠃ ᠬᠠᠷᠢᠨ ᠴᠢ ᠲᠤᠤᠯᠠ ᠶ᠋ᠢᠨ ᠡᠬᠢᠨ ᠳ᠋ᠦ᠍ (ᠨᠤᠲᠤᠭᠯᠠᠳᠠᠭ) ᠶᠤᠮ ᠪᠣᠯ ᠭᠡᠷ ᠣᠷᠣᠨ ᠢ᠋ᠶ᠋ᠠᠨ ᠪᠠᠷᠠᠭᠠᠳᠠᠵᠤ ᠬᠥᠮᠦᠨ ᠪᠣᠯᠵᠤ ᠦᠵᠡ᠃ ᠲᠡᠢᠮᠦ ᠴᠦ᠍ ᠬᠣᠯᠠ ᠪᠢᠰᠢ ᠪᠢᠵᠡ ᠭᠡᠬᠦ ᠳ᠋ᠦ᠍ ᠨᠥᠭᠦᠭᠡ ᠬᠡᠦᠬᠡᠨ᠄
— ᠨᠠᠳᠠᠳᠤ ᠮᠣᠷᠢ ᠴᠤ᠌ ᠪᠣᠢ ᠯᠠ ᠳᠠ᠃ ᠬᠠᠪᠴᠢᠯ ᠤ᠋ᠨ ᠪᠤᠯᠠᠭ ᠲᠤ᠂ ᠣᠢᠷᠠᠬᠠᠨ ᠬᠣᠶᠠᠷ ᠮᠣᠷᠢ ᠬᠠᠰᠢᠶᠠᠨ ᠳ᠋ᠤ᠌ ᠪᠣᠢ᠃ ᠲᠡᠨᠳᠡ ᠪᠡᠨ ᠴᠦ᠍ ᠢᠳᠡᠬᠦ ᠡᠪᠡᠰᠦ ᠲᠡᠢ᠃ ᠳᠡᠭᠡᠷᠡ ᠨᠢ ᠡᠪᠡᠰᠦ ᠬᠠᠳᠤᠵᠤ ᠬᠠᠶᠠᠳᠠᠭ᠃ ᠳᠠᠩᠴᠤ ᠣᠴᠢᠬᠤ ᠭᠠᠵᠠᠷ ᠣᠷᠣᠨ ᠪᠠᠢᠬᠤ ᠦᠭᠡᠢ᠃ ᠠᠢᠯ ᠤ᠋ᠨ ᠵᠠᠷᠤᠴᠠ᠂ ᠥᠨᠥᠴᠢᠨ ᠶᠠᠳᠠᠭᠤ ᠬᠥᠮᠦᠨ᠃ ᠲᠡᠭᠡᠭᠡᠳ ᠴᠦ᠍ ᠠᠢᠯ ᠤ᠋ᠨ ᠬᠣᠨᠢ ᠶᠠᠭᠤ ᠪᠣᠯᠤᠭᠰᠠᠨ ᠪᠣᠯ? ᠪᠤᠤ ᠮᠡᠳᠡ᠃ ᠡᠢᠮᠦ ᠡᠴᠡ ᠴᠢ ᠯᠡ ᠨᠠᠮᠠ ᠶ᠋ᠢ ᠠᠪᠴᠤ ᠶᠠᠪᠤᠵᠤ᠂ ᠪᠣᠭᠣᠯ ᠵᠠᠷᠤᠴᠠ ᠪᠠᠨ ᠪᠣᠯᠭᠠᠨᠠ ᠤᠤ? ᠪᠣᠷᠣᠭᠴᠢᠨ ᠰᠢᠪᠡᠭᠴᠢᠨ ᠢ᠋ᠶ᠋ᠡᠨ ᠪᠣᠯᠭᠠᠨᠠ ᠤᠤ? ᠥᠪᠡᠷ ᠢ᠋ᠶ᠋ᠡᠨ ᠯᠡ ᠮᠡᠳᠡ᠃ ᠡᠬᠡᠨᠡᠷ ᠴᠢᠨᠢ ᠪᠣᠯᠳᠠᠭ ᠪᠣᠯ? ᠭᠡᠵᠦ ᠰᠥᠬᠥᠷᠦᠨ ᠭᠤᠶᠤᠯᠠ᠃ ᠪᠣᠭᠣᠷᠴᠢ ᠬᠦᠢᠲᠡᠨ ᠢ᠋ᠶ᠋ᠡᠷ ᠢᠨᠢᠶᠡᠵᠦ᠄
— ᠡᠬᠡᠨᠡᠷ ᠭᠡᠨᠡ? ᠴᠢ ᠨᠠᠮᠠ ᠶ᠋ᠢ ᠨᠢᠭᠡᠯᠡ ᠡᠳᠦᠷ ᠢᠳᠡᠴᠢᠬᠡᠨᠡ ᠰᠢᠦ ᠳᠡ᠃ ᠠᠯᠢ ᠨᠢ ᠴᠦ᠍ ᠨᠠᠳᠠᠳᠤ ᠬᠡᠷᠡᠭ ᠦᠭᠡᠢ᠃ ᠴᠢ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠯᠡ ᠠᠶᠠ ᠶ᠋ᠢ ᠪᠣᠳᠣ᠃ ᠬᠠᠷᠢᠨ ᠣᠳᠣ ᠬᠤᠪᠴᠠᠰᠤ ᠪᠠᠨ ᠡᠮᠦᠰ ᠭᠡᠯᠡ᠃
ᠲᠡᠭᠡᠭᠡᠳ ᠲᠡᠭᠦᠨ ᠦ᠌ ᠬᠣᠶᠠᠷ ᠪᠤᠭᠤᠯᠠᠭᠠ ᠶ᠋ᠢ ᠠᠷᠤ ᠳ᠋ᠤᠨᠢ ᠰᠣᠢᠵᠤ᠂ ᠲᠤᠱᠠᠵᠤ ᠬᠦᠯᠢᠭᠡᠳ ᠥᠨᠥᠬᠢ ᠥᠪᠡᠷ ᠢ᠋ ᠨᠢ ᠤᠶᠠᠭᠰᠠᠨ ᠱᠣᠩ ᠠ᠋ᠴᠠ ᠨᠢ ᠤᠶᠠᠭᠠᠳ᠂ ᠬᠣᠶᠠᠷ ᠮᠣᠷᠢ ᠪᠠᠷᠢᠵᠤ ᠢᠷᠡᠬᠦ ᠪᠡᠷ ᠶᠠᠪᠤᠬᠤ ᠳ᠋ᠠᠭᠠᠨ ᠭᠡᠨᠡᠳᠲᠡ ᠪᠣᠳᠣᠭᠰᠠᠨ ᠨᠢ《ᠶᠡᠷᠦ ᠨᠢ ᠳᠠᠷᠬᠢ ᠶ᠋ᠢ ᠠᠪᠴᠤ ᠶᠠᠪᠤᠬᠤ ᠶ᠋ᠢ ᠪᠣᠯᠢᠶᠠ᠃ ᠲᠡᠮᠦᠵᠢᠨ ᠳ᠋ᠦ᠍ ᠮᠢᠬᠠᠴᠢᠨ ᠨᠥᠬᠥᠷ ᠴᠡᠷᠢᠭ ᠬᠡᠷᠡᠭ ᠦᠭᠡᠢ᠃ ᠡᠨᠡ ᠬᠣᠶᠠᠷ ᠢ᠋ ᠦᠯᠡᠳᠡᠭᠡᠶᠡ 》 ᠭᠡᠵᠦ ᠪᠣᠳᠣᠪᠠ᠃ ᠲᠡᠭᠡᠭᠡᠳ ᠵᠥᠪᠬᠡᠨ ᠥᠪᠡᠷ ᠢ᠋ᠶ᠋ᠡᠨ ᠪᠥᠭᠲᠥᠷ ᠬᠣᠩᠭᠣᠷ ᠢ᠋ᠶ᠋ᠠᠨ ᠪᠠᠷᠢᠵᠤ ᠡᠮᠡᠭᠡᠯᠯᠡᠭᠡᠳ ᠲᠡᠳᠡ ᠬᠣᠶᠠᠷ ᠲᠤ ᠭᠠᠭᠴᠠ ᠨᠤᠮᠤ᠂ ᠬᠡᠳᠦᠨ ᠰᠤᠮᠤ᠂ ᠨᠢᠭᠡ ᠰᠡᠯᠡᠮᠡ ᠦᠯᠡᠳᠡᠭᠡᠭᠡᠳ ᠪᠤᠰᠤᠳ ᠵᠡᠪᠰᠡᠭ ᠢ᠋ ᠨᠢ ᠭᠠᠯ ᠳᠡᠭᠡᠭᠦᠷ ᠬᠡᠳᠦᠨᠲᠡ ᠬᠤᠷᠤᠢᠯᠠᠨ ᠠᠷᠢᠭᠤᠯᠠᠵᠤ ᠪᠠᠭᠯᠠᠵᠤ ᠬᠦᠯᠢᠭᠡᠳ ᠠᠪᠴᠤ ᠶᠠᠪᠤᠬᠤ ᠪᠠᠷ ᠪᠡᠯᠡᠳᠬᠡᠪᠡ᠃ ᠮᠣᠷᠳᠠᠬᠤ ᠶ᠋ᠢᠨ ᠢ᠋ᠶ᠋ᠡᠨ ᠡᠮᠦᠨᠡ ᠬᠡᠦᠬᠡᠨ ᠦ᠌ ᠭᠠᠷ ᠤ᠋ᠨ ᠬᠦᠯᠢᠶᠡ ᠶ᠋ᠢ ᠰᠤᠯᠠᠷᠠᠭᠤᠯᠵᠤ ᠬᠦᠯᠢᠶᠡ ᠲᠣᠣᠷᠯᠠᠭᠠᠰᠤ ᠪᠠᠨ ᠲᠠᠢᠯᠬᠤ ᠪᠣᠯᠤᠯᠴᠠᠭᠠ ᠲᠠᠢ ᠪᠣᠯᠭᠠᠴᠢᠬᠠᠭᠠᠳ᠄
— ᠢᠩᠭᠢᠬᠦ ᠳ᠋ᠦ᠍ ᠴᠢᠨᠦ ᠨᠡᠷᠡ ᠬᠡᠨ ᠪᠣᠢ? ᠭᠡᠵᠦ ᠠᠰᠠᠭᠤᠪᠠᠯ ᠬᠡᠦᠬᠡᠨ᠄
— ᠪᠣᠷᠣᠬᠠᠨ ᠭᠡᠵᠦ ᠬᠠᠷᠢᠭᠤᠯᠪᠠ᠃
— ᠭᠤᠷᠪᠠᠨ ᠮᠣᠷᠢ᠂ ᠬᠣᠶᠠᠷ ᠨᠣᠬᠠᠢ᠂ ᠠᠩ ᠤ᠋ᠨ ᠦᠰᠦ ᠠᠷᠠᠰᠤ ᠭᠡᠳ ᠪᠠᠰᠠ ᠴᠤ᠌ ᠡᠳ᠋ ᠬᠣᠭᠰᠢᠯ ᠲᠠ ᠬᠣᠶᠠᠷ ᠲᠤ᠌ ᠦᠯᠡᠲᠡᠯᠡ᠃ ᠬᠥᠮᠦᠨ ᠢᠳᠡᠬᠦ ᠪᠡᠨ ᠪᠣᠯᠢᠵᠤ᠂ ᠬᠥᠮᠦᠨ ᠦ᠌ ᠠᠳᠠᠯᠢ ᠠᠮᠢᠳᠤᠷᠠᠬᠤ ᠶ᠋ᠢ ᠪᠣᠳᠣᠭᠠᠷᠠᠢ ᠭᠡᠵᠦ ᠬᠡᠯᠡᠭᠡᠳ ᠪᠣᠭᠤᠷᠴᠢ ᠪᠤᠴᠠᠬᠤ ᠪᠠᠷ ᠬᠥᠳᠡᠯᠪᠡ᠃ ᠦᠦᠷ ᠮᠠᠩᠬᠠᠢᠲᠠᠯᠠ ᠴᠠᠢᠵᠤ ᠪᠠᠢᠯᠠ᠃ ᠠᠭᠤᠯᠠ ᠲᠠᠢ ᠭᠠᠵᠠᠷ ᠱᠣᠭᠰᠢᠭᠤᠯᠤᠰᠬᠢᠨ ᠴᠠᠭᠠᠨ ᠭᠠᠵᠠᠷ ᠬᠠᠲᠠᠷᠢᠭᠤᠯᠤᠭᠰᠠᠭᠠᠷ ᠦᠳᠡ ᠡᠴᠡ ᠬᠣᠢᠰᠢ ᠬᠦᠷᠦᠭᠡᠳ ᠢᠷᠡᠯᠡ᠃
ᠪᠣᠭᠣᠷᠴᠢ ᠶᠠᠪᠤᠭᠰᠠᠨ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠨᠢᠭᠡᠳ ᠨᠢᠭᠡ ᠦᠭᠡᠢ ᠲᠣᠭᠠᠴᠢᠨ ᠶᠠᠷᠢᠪᠠᠯ ᠲᠡᠮᠦᠵᠢᠨ᠄
— ᠵᠠ᠂ ᠮᠥᠨ᠂ ᠦ᠂ ᠤᠤᠬᠠᠢᠰ ᠭᠡᠵᠦ ᠤᠷᠮᠠᠰᠢᠭᠤᠯᠤᠨ ᠨᠠᠷᠢᠪᠴᠢᠯᠠᠨ ᠠᠰᠠᠭᠤᠵᠤ᠂ ᠶᠠᠷᠢᠶᠠ ᠲᠠᠰᠤᠯᠤᠭᠰᠠᠨ ᠦᠭᠡᠢ ᠰᠣᠨᠣᠰᠪᠠ᠃ ᠲᠡᠭᠡᠭᠡᠳ ᠶᠠᠷᠢᠶᠠ ᠳᠠᠭᠤᠰᠤᠮᠠᠭᠴᠠ᠄
— ᠵᠠ᠂ ᠪᠣᠭᠣᠷᠴᠢ ᠴᠢ ᠡᠷᠡ ᠵᠣᠷᠢᠭ ᠭᠠᠷᠭᠠᠵᠤ ᠬᠣᠣᠰ ᠦᠭᠡᠢ ᠭᠠᠪᠢᠶᠠ ᠪᠠᠢᠭᠤᠯᠵᠤ ᠯᠠ ᠳᠠ᠃ ᠲᠡᠷᠡ ᠠᠷᠤ ᠶ᠋ᠢᠨ ᠬᠢᠨ ᠡᠴᠡ ᠬᠣᠷᠢᠭᠠᠳ ᠵᠡᠪᠰᠡᠭᠯᠡᠭᠰᠡᠨ ᠡᠷᠡᠰ ᠭᠠᠷᠴᠤ ᠲᠡᠳᠡᠭᠡᠷ ᠳᠠᠢᠰᠤᠨ ᠢ᠋ ᠤᠰᠠᠳᠬᠠᠴᠢᠬᠠᠨᠠ ᠭᠡᠬᠦ ᠳ᠋ᠦ᠍ ᠡᠷᠡᠭᠡᠯᠵᠡᠭᠡ ᠲᠡᠢ ᠮᠥᠷᠲᠡᠭᠡᠨ ᠬᠠᠷᠢᠨ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠶᠡᠬᠡ ᠬᠣᠬᠢᠷᠠᠯ ᠠᠮᠰᠠᠵᠤ ᠮᠡᠳᠡᠬᠦ ᠠᠶᠤᠯᠲᠠᠢ ᠳᠠᠢᠰᠤᠨ ᠢ᠋ ᠴᠢ ᠤᠷᠠᠨ ᠠᠷᠭᠠ᠂ ᠠᠶᠤᠮᠰᠢᠭ ᠦᠭᠡᠢ ᠵᠣᠷᠢᠭ ᠭᠠᠷᠭᠠᠵᠤ᠂ ᠪᠠᠰᠠ ᠲᠡᠷᠡ ᠲᠡᠭᠦᠰᠬᠡᠨ ᠦ᠌ ᠤᠷᠠᠨ ᠤᠬᠠᠭᠠᠨ ᠲᠠᠢ ᠬᠣᠣᠰᠯᠠᠭᠤᠯᠤᠨ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠳᠠᠷᠤᠵᠤ ᠴᠢᠳᠠᠭᠰᠠᠨ ᠨᠢ ᠪᠠᠬᠠᠷᠬᠠᠮᠠ ᠶᠤᠮ᠃ ᠭᠡᠪᠡᠴᠦ ᠴᠢᠮᠠᠶ᠋ᠢ ᠪᠢ ᠰᠠᠢᠰᠢᠶᠠᠬᠤ ᠪᠢᠰᠢ᠂ ᠬᠠᠷᠢᠨ ᠵᠢᠮᠡᠯᠡᠬᠦ ᠶ᠋ᠢᠨ ᠶᠡᠬᠡ ᠪᠡᠷ ᠵᠢᠮᠡᠯᠡᠵᠦ ᠬᠠᠲᠠᠭᠤᠬᠠᠨ ᠳᠣᠩᠭᠣᠳᠤᠨᠠ᠃ ᠴᠢ ᠳᠤᠷᠠ ᠵᠣᠷᠢᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠭᠠᠪ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠠᠮᠢ ᠪᠡᠶᠡ ᠲᠥᠷᠢᠨ ᠶᠠᠪᠤᠭᠰᠠᠨ ᠴᠢᠨᠢ ᠪᠤᠷᠤᠭᠤ᠃ ᠬᠥᠮᠦᠨ ᠳ᠋ᠦ᠍ ᠠᠮᠢᠨ ᠠ᠋ᠴᠠ ᠢᠯᠡᠭᠦᠦ ᠦᠨᠡ ᠲᠡᠢ ᠶᠠᠭᠤᠮᠠ ᠶᠠᠭᠤ ᠪᠠᠢᠬᠤ ᠪᠢᠯᠡ? ᠴᠢᠮᠠᠶ᠋ᠢ ᠦᠷᠡᠭᠳᠡᠪᠡᠯ ᠪᠢ ᠶᠠᠭᠠᠬᠢᠬᠤ ᠪᠣᠢ? ᠲᠡᠷᠡ ᠰᠠᠢᠬᠠᠨ ᠠᠪᠤ ᠡᠵᠢ ᠶ᠋ᠢᠨ ᠴᠢᠨᠢ ᠨᠢᠭᠤᠷ ᠢ᠋ ᠶᠠᠭᠠᠬᠢᠵᠤ ᠬᠠᠷᠠᠵᠤ᠂ ᠶᠠᠭᠤ ᠬᠡᠯᠡᠬᠦ ᠪᠣᠢ? ᠡᠨᠡ ᠪᠣᠯ ᠰᠠᠨᠠᠭᠠᠨ ᠳ᠋ᠤ᠌ ᠪᠠᠭᠲᠠᠬᠤ ᠦᠭᠡᠢ ᠬᠡᠷᠡᠭ᠃ ᠴᠢᠨᠦ ᠡᠨᠡ ᠶᠠᠪᠤᠳᠠᠯ ᠠ᠋ᠴᠠ ᠨᠠᠳᠠᠳᠤ ᠲᠣᠭᠲᠠᠭᠠᠬᠤ ᠴᠢᠬᠤᠯᠠ ᠲᠠᠢ ᠨᠢᠭᠡ ᠵᠢᠷᠤᠮ ᠰᠠᠨᠠᠭᠳᠠᠯᠠ᠃ ᠮᠠᠲᠠᠪᠠᠤ?
— ᠮᠡᠳᠡᠯᠡ ᠭᠡᠳ ᠢᠨᠢᠶᠡᠪᠡ᠃ ᠬᠣᠶᠠᠭᠤᠯᠠ ᠵᠢᠭᠠᠬᠠᠨ ᠢᠨᠢᠶᠡᠯᠳᠦᠭᠡᠳ ᠲᠡᠮᠦᠵᠢᠨ᠄
— ᠵᠠ᠂ ᠪᠣᠭᠣᠷᠴᠢ ᠮᠢᠨᠢ ᠴᠢ ᠢᠷᠡᠯᠡ᠃ ᠴᠢᠮᠠᠶ᠋ᠢ ᠬᠦᠯᠢᠶᠡᠵᠦ ᠤᠳᠠᠪᠠᠯ ᠬᠣᠢᠨᠠ ᠠ᠋ᠴᠠ ᠴᠢᠨᠢ ᠶᠠᠪᠤᠬᠤ ᠪᠠᠢᠭᠰᠠᠨ᠃ ᠢᠷᠡᠯᠡ᠂ ᠣᠳᠣ ᠳᠠᠷᠠᠭᠠ ᠶ᠋ᠢᠨ ᠢ᠋ᠶ᠋ᠡᠨ ᠠᠵᠢᠯ ᠳ᠋ᠤ᠌ ᠶᠠᠭᠠᠷᠠᠪᠴᠢᠯᠠᠬᠤ ᠬᠡᠷᠡᠭᠲᠡᠢ ᠪᠣᠯᠤᠯᠠ᠃ ᠬᠠᠰᠠᠷ᠂ ᠪᠡᠯᠭᠦᠳᠡᠢ ᠪᠢᠳᠡ ᠭᠤᠷᠪᠠ ᠪᠠᠭ ᠴᠡᠷᠢᠭ ᠠᠪᠤᠭᠠᠳ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠲᠤᠭ ᠰᠦᠯᠳᠡ ᠶ᠋ᠢ ᠵᠠᠯᠠᠵᠤ ᠣᠪᠣᠭ ᠠᠢᠮᠠᠭ ᠤ᠋ᠳ ᠤ᠋ᠨ ᠲᠠᠷᠬᠠᠵᠤ ᠪᠤᠲᠠᠷᠠᠭᠰᠠᠨ ᠠᠢᠯ ᠬᠣᠲᠠᠯᠠ ᠪᠠᠷ ᠯᠠᠪᠲᠠᠢ ᠠᠷᠪᠠᠨ ᠬᠡᠳᠦ ᠬᠣᠨᠣᠭ ᠶᠠᠪᠤᠨᠠ᠃ ᠢᠯᠡᠭᠦᠦ ᠴᠦ᠍ ᠬᠤᠭᠤᠴᠠᠭᠠ ᠡᠵᠡᠯᠡᠵᠦ ᠪᠣᠯᠤᠨᠠ᠃ ᠡᠨᠳᠡ ᠠᠷᠪᠠ ᠭᠠᠷᠤᠢ ᠴᠡᠷᠢᠭ ᠦᠯᠡᠳᠡᠭᠡᠨᠡ᠃ ᠪᠢᠳᠡᠨ ᠦ᠌ ᠡᠵᠡᠭᠦᠢ ᠳ᠋ᠦ᠍ ᠴᠢ ᠠᠬᠠᠯᠠᠵᠤ ᠴᠢᠨᠦ ᠲᠤᠰᠠᠯᠠᠬᠤ ᠪᠠᠷ ᠵᠠᠯᠮᠠ ᠪᠠᠢᠬᠤ ᠪᠣᠯᠤᠨᠠ ᠭᠡᠵᠦ ᠵᠢᠭᠠᠪᠤᠷᠢᠯᠠᠪᠠ᠃ ᠪᠠᠰᠠ ᠲᠡᠮᠦᠵᠢᠨ ᠬᠡᠰᠡᠭ ᠵᠠᠭᠤᠷᠠ ᠪᠣᠳᠣᠯᠬᠢᠯᠠᠭᠰᠠᠨ ᠢ᠋ᠶ᠋ᠠᠨ᠄
— ᠴᠢ ᠮᠠᠷᠭᠠᠰᠢ ᠠᠷᠤ ᠶ᠋ᠢᠨ ᠬᠢᠨ ᠤᠷᠤᠭᠤ ᠪᠠᠨ ᠪᠤᠴᠠᠵᠤ ᠣᠴᠢ᠃ ᠴᠠᠭᠠᠳᠤ ᠲᠡᠭᠦᠰᠬᠡᠨ ᠴᠢᠨᠢ ᠥᠨᠥᠳᠥᠷ ᠴᠢᠨᠦ ᠲᠥᠯᠥᠭᠡ ᠰᠢᠨᠠᠯᠵᠤ ᠰᠠᠭᠤᠭᠠ᠃ ᠲᠡᠭᠦᠨ ᠳ᠋ᠡᠭᠡᠨ ᠣᠴᠢᠵᠤ ᠠᠯᠳᠠᠷ ᠭᠠᠪᠢᠶᠠ᠂ ᠠᠮᠢᠳᠤ ᠮᠡᠨᠳᠦ ᠪᠡᠨ ᠦᠵᠡᠭᠦᠯ᠃ ᠬᠠᠷᠢᠨ ᠭᠤᠷᠪᠠᠨ ᠴᠡᠷᠢᠭ ᠳᠠᠭᠠᠭᠤᠯᠵᠤ ᠶᠠᠪᠤ ᠭᠡᠬᠦ ᠳ᠋ᠦ᠍ ᠪᠣᠭᠣᠷᠴᠢ᠄
— ᠴᠡᠷᠢᠭ ᠢ᠋ᠶ᠋ᠡᠷ ᠶᠠᠭᠠᠬᠢᠬᠤ ᠪᠣᠢ? ᠭᠡᠪᠡᠯ ᠲᠡᠮᠦᠵᠢᠨ᠄
— ᠴᠢ ᠨᠠᠳᠠᠲᠠᠢ ᠲᠡᠷᠰᠡᠯᠳᠦᠬᠦ ᠨᠢ ᠤᠤ? ᠳᠠᠭᠠᠭᠤᠯᠵᠤ ᠶᠠᠪᠤ! ᠭᠡᠵᠦ ᠪᠢ ᠬᠡᠯᠡᠵᠦ ᠪᠠᠢᠨᠠ᠃ ᠴᠢᠨᠦ ᠠᠮᠢ ᠨᠠᠳᠠᠳᠤ ᠶᠡᠬᠡ ᠦᠨᠡᠲᠡᠢ᠃ ᠬᠤᠭᠤᠴᠠᠭᠠ ᠪᠠᠭᠠ ᠴᠤ᠌ ᠭᠡᠰᠡᠨ ᠴᠢᠨᠦ ᠢᠷᠡᠭᠰᠡᠨ ᠵᠠᠪᠰᠠᠷ ᠶᠠᠭᠤᠮᠠ ᠥᠭᠡᠷᠡᠴᠢᠯᠡᠭᠳᠡᠭᠰᠡᠨ ᠪᠠᠢᠵᠤ ᠪᠣᠯᠤᠨᠠ᠃ ᠦᠭᠡᠢ ᠴᠦ᠍ ᠪᠠᠢᠵᠤ ᠪᠣᠯᠤᠨᠠ ᠭᠡᠳ ᠳᠣᠷᠣᠭᠰᠢ ᠬᠠᠷᠠᠨ ᠪᠣᠳᠣᠯᠬᠢᠯᠠᠨ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠪᠣᠭᠣᠷᠴᠢ ᠶ᠋ᠢᠨ ᠰᠡᠷᠪᠡᠭᠡᠨ ᠳᠡᠭᠡᠭᠦᠷ ᠭᠠᠷ ᠢ᠋ᠶ᠋ᠠᠨ ᠲᠠᠯᠪᠢᠭᠠᠳ᠄
— ᠴᠢ ᠮᠢᠨᠦ ᠦᠭᠡᠨ ᠳ᠋ᠦ᠍ ᠣᠷᠣ! ᠭᠡᠯᠡ᠃
— ᠵᠠ᠂ ᠵᠠ ᠮᠡᠳᠡᠯᠡ ᠭᠡᠵᠦ ᠪᠣᠭᠣᠷᠴᠢ ᠬᠠᠷᠢᠭᠤ ᠥᠭᠪᠡ᠃