ᠬᠥᠯᠥᠭ ᠪᠠᠭᠠᠲᠤᠷ ᠪᠤᠭᠤᠷᠴᠢ - ᠪ᠂ ᠦᠯᠵᠡᠢᠰᠦ᠋ᠷᠦᠩ <ᠳᠡᠳ᠋ ᠪᠦᠯᠦᠭ - ᠠᠷᠪᠠ ᠶᠢᠰᠦ> Хүлэг баатар буурч - Б. Өлзийсүрэн <Дэд бүлэг-19>
60ᠥᠪᠡᠷ ᠦᠨ ᠵᠠᠮ ᠮᠥᠷ ᠢᠶᠡᠷ ᠲᠡᠮᠲᠡᠷᠢᠵᠦ ᠡᠷᠡ ᠬᠥᠮᠥᠨ ᠦ ᠡᠷᠴᠢ ᠬᠦᠴᠦ ᠶᠢ ᠣᠯᠵᠤ ᠬᠦᠷᠲᠡᠭᠰᠡᠨ ᠳᠡᠳ᠋ ᠪᠦᠯᠦᠭ
ᠠᠷᠪᠠ ᠶᠢᠰᠦ
ᠠᠷᠪᠠ ᠶᠢᠰᠦ
ᠤᠶᠠᠭᠠ ᠵᠠᠩᠭᠢᠷᠠᠪᠠᠯ ᠤᠴᠢᠭ ᠢ᠋ ᠣᠯᠬᠤ ᠬᠡᠴᠡᠭᠦᠦ
ᠬᠡᠴᠡᠭᠦᠦ ᠭᠡᠳ ᠣᠷᠬᠢᠵᠤ ᠪᠣᠯᠬᠤ ᠦᠭᠡᠢ
ᠬᠡᠷᠦᠭᠡᠰᠦᠨ ᠦ᠌ ᠤᠴᠢᠷ ᠢ᠋ ᠣᠯᠬᠤ ᠯᠠ ᠬᠡᠷᠡᠭᠲᠡᠢ
ᠥᠷᠯᠥᠭᠡᠭᠦᠷ ᠲᠡᠮᠦᠵᠢᠨ᠂ ᠪᠣᠭᠣᠷᠴᠢ ᠬᠣᠶᠠᠷ ᠮᠣᠷᠳᠠᠨ ᠪᠠᠷᠠᠭᠤᠨ ᠬᠣᠢᠰᠢ ᠶᠠᠪᠤᠵᠤ ᠲᠠᠬᠢᠯᠲᠤ ᠬᠡᠮᠡᠬᠦ ᠨᠢᠭᠡᠨ ᠥᠨᠳᠥᠷᠯᠢᠭ ᠳᠡᠭᠡᠷᠡ ᠭᠠᠷᠪᠠ᠃ ᠣᠷᠣᠢ ᠳᠡᠭᠡᠷᠡᠬᠢ ᠴᠢᠯᠠᠭᠤᠨ ᠣᠪᠣᠭᠠ᠂ ᠶᠣᠳᠠᠷ ᠮᠣᠳᠣ᠂ ᠴᠠᠴᠤᠭ ᠶᠡᠨᠳᠡᠷ ᠭᠠᠩᠳᠠᠵᠤ ᠬᠥᠰᠡᠷᠡᠢᠰᠦᠭᠰᠡᠨ ᠨᠢ ᠣᠢᠷᠠ ᠳ᠋ᠤ᠌ ᠲᠡᠳᠦᠢ ᠯᠡ ᠲᠠᠬᠢᠵᠤ ᠲᠠᠢᠭᠠ ᠦᠭᠡᠢ ᠪᠣᠯᠪᠠᠤ ᠭᠡᠯᠲᠡᠢ᠃
ᠲᠡᠮᠦᠵᠢᠨ《ᠡᠨᠡ ᠤᠭ ᠨᠢ ᠰᠦᠯᠳᠡᠰᠦᠨ ᠦ᠌ ᠬᠢᠨ ᠦ᠌ ᠲᠠᠬᠢᠯᠭᠠ ᠰᠢᠦ ᠳᠡ᠃ ᠰᠣᠷᠬᠠᠨ ᠰᠢᠷᠠ ᠠᠬᠠᠢ᠂ ᠴᠢᠯᠠᠭᠤᠨ᠂ ᠬᠠᠲᠠᠭᠠᠨ᠁ ᠪᠢ ᠨᠢᠭᠡ ᠰᠡᠷᠭᠦᠭᠡᠶᠡ》 ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠪᠠᠷᠤᠭ ᠨᠢᠯᠪᠤᠰᠤ ᠲᠤᠰᠠᠯᠠᠭᠤᠯᠬᠤ ᠰᠢᠬᠠᠨ ᠵᠢᠰᠢᠭᠦᠦ ᠬᠠᠷᠠᠪᠠ᠃ ᠲᠡᠷᠡ ᠬᠢᠷᠠ ᠠ᠋ᠴᠠ ᠶᠡᠬᠡ ᠠᠯᠤᠰ ᠬᠣᠯᠠ ᠶ᠋ᠢ ᠦᠵᠡᠵᠦ ᠪᠣᠯᠬᠤ ᠠᠵᠢ᠃ ᠤᠮᠠᠷᠠ ᠶ᠋ᠢᠨ ᠨᠢᠳᠦᠨ ᠦ᠌ ᠦᠵᠦᠭᠦᠷ ᠲᠦ᠍ ᠬᠠᠷᠠᠭᠳᠠᠬᠤ ᠠᠭᠤᠯᠠᠰ ᠤ᠋ᠨ ᠣᠷᠣᠢ ᠨᠠᠷᠠᠨ ᠳ᠋ᠤ᠌ ᠭᠢᠯᠲᠠᠭᠠᠨᠠ ᠴᠠᠰᠤᠨ ᠨᠥᠮᠥᠷᠭᠡ ᠨᠢ ᠯᠠᠪᠲᠠᠢ ᠲᠠᠨᠢᠭᠳᠠᠨᠠ᠃ ᠪᠠᠷᠠᠭᠤᠨ ᠵᠦᠭ ᠲᠡᠭᠦᠨ ᠢ᠋ ᠪᠣᠳᠣᠪᠠᠯ ᠣᠢᠷᠠᠯᠴᠠᠭᠠ ᠴᠠᠰᠤᠲᠤ ᠴᠠᠭᠠᠨ ᠮᠠᠩᠨᠠᠢ ᠲᠠᠢ ᠠᠭᠤᠯᠠᠰ ᠭᠢᠯᠠᠯᠵᠠᠬᠤ ᠠᠪᠠᠢ᠃ ᠦᠨᠡᠨ ᠳ᠋ᠡᠭᠡᠨ ᠪᠣᠭᠣᠷᠴᠢ ᠵᠤᠨ ᠤ᠋ ᠴᠠᠭ ᠲᠤ᠌ ᠴᠠᠰᠤ ᠮᠥᠰᠥᠨ ᠣᠷᠣᠢ ᠲᠠᠢ ᠠᠭᠤᠯᠠᠰ ᠢ᠋ ᠠᠩᠬᠠ ᠤᠳᠠᠭᠠ ᠬᠠᠷᠠᠵᠤ ᠪᠠᠢᠭᠠ ᠤᠴᠢᠷ ᠰᠦᠷᠳᠡᠵᠦ ᠪᠢᠰᠢᠷᠡᠮᠡ᠃
ᠲᠡᠮᠦᠵᠢᠨ ᠪᠣᠭᠣᠷᠴᠢ ᠶ᠋ᠢᠨ ᠮᠥᠷᠦᠨ ᠡᠴᠡ ᠲᠦᠰᠢᠵᠦ᠄
— ᠲᠡᠷᠲᠡᠭᠡ ᠤᠮᠠᠷᠠ ᠶ᠋ᠢᠨ ᠠᠭᠤᠯᠠᠰ ᠪᠠᠢᠭᠠᠯ ᠳᠠᠯᠠᠢ ᠶ᠋ᠢᠨ ᠨᠠᠭᠠᠨᠠ ᠬᠢ ᠰᠢᠶᠠᠨ ᠤ᠋ ᠠᠭᠤᠯᠠᠰ ᠤ᠋ᠨ ᠬᠡᠰᠡᠭ ᠦᠵᠦᠭᠦᠷ᠃ ᠲᠡᠭᠦᠪᠡᠷ ᠮᠠᠨ ᠤ᠋ ᠳᠠᠢᠰᠤᠨ ᠲᠠᠷᠭᠤᠲᠠᠢ ᠬᠢᠷᠢᠯᠳᠣᠭ ᠠᠯᠪᠠᠲᠤ ᠬᠠᠷᠢᠶᠠᠲᠤ ᠨᠠᠷ ᠲᠠᠢ ᠪᠠᠨ ᠪᠠᠢᠭᠠ᠃ ᠲᠡᠭᠦᠨ ᠡᠴᠡ ᠪᠠᠷᠠᠭᠤᠨ ᠳᠠᠰᠢ ᠵᠠᠯᠭᠠᠭ ᠨᠢ ᠨᠥᠭᠦᠭᠡ ᠳᠠᠢᠰᠤᠨ ᠮᠡᠷᠭᠢᠳ᠃ ᠪᠢ ᠴᠢᠮᠠᠶ᠋ᠢ ᠠᠶᠤᠯᠲᠠᠢ ᠬᠣᠶᠠᠷ ᠳᠠᠢᠰᠤᠨ ᠤ᠋ ᠵᠦᠭ ᠶᠠᠪᠤᠭᠤᠯᠵᠤ ᠪᠠᠢᠨᠠ᠃ ᠲᠡᠭᠡᠬᠦ ᠳ᠋ᠡᠭᠡᠨ ᠴᠢᠮᠠᠲᠤ ᠬᠣᠣᠷ ᠠᠶᠤᠯ ᠤᠴᠠᠷᠠᠬᠤ ᠦᠭᠡᠢ ᠭᠡᠰᠡᠨ ᠢᠲᠡᠭᠡᠯᠲᠡᠢ ᠤᠴᠢᠷ ᠶᠠᠪᠤᠭᠤᠯᠵᠤ ᠪᠠᠢᠭᠠ ᠶᠤᠮ᠃ ᠪᠠᠷᠠᠭᠤᠨ ᠬᠣᠢᠰᠢ ᠪᠠᠨ ᠢᠩᠭᠢᠭᠡᠳ ᠶᠠᠪᠤᠪᠠᠯ ᠭᠡᠵᠦ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠵᠢᠭᠠᠨ᠄
— ᠲᠡᠷᠲᠡᠭᠡ ᠳᠥᠩᠭᠡᠭᠦᠷ ᠬᠥᠬᠡ ᠠᠭᠤᠯᠠ ᠶ᠋ᠢᠨ ᠠᠷᠤ ᠪᠠᠷ ᠣᠷᠣᠮᠠᠭᠴᠠ ᠵᠡᠭᠦᠨᠰᠢ ᠤᠷᠤᠰᠬᠤ ᠨᠠᠷᠢᠨ ᠭᠣᠣᠯ᠂ ᠤᠷᠲᠤ ᠬᠥᠨᠳᠡᠢ ᠬᠣᠭᠣᠯᠠᠢ ᠲᠠᠭᠠᠷᠠᠨᠠ᠃ ᠪᠤᠷᠭᠠᠰᠤ ᠬᠠᠢᠯᠠᠰᠤ ᠲᠠᠢ ᠭᠣᠣᠯ ᠤ᠋ᠨ ᠪᠠᠷᠠᠭᠤᠨ ᠪᠡᠶᠡ ᠶ᠋ᠢ ᠪᠠᠷᠢᠵᠤ ᠥᠭᠰᠥᠭᠡᠳ ᠶᠠᠪᠤᠨᠠ᠃ ᠲᠡᠭᠡᠲᠡᠯᠡ ᠭᠣᠣᠯ ᠤ᠋ᠨ ᠬᠥᠨᠳᠡᠢ ᠪᠡᠷ ᠠᠢᠯ᠂ ᠮᠠᠯ ᠦᠵᠡᠭᠳᠡᠵᠦ ᠪᠣᠯᠬᠤ᠃ ᠲᠡᠭᠡᠪᠡᠯ ᠵᠣᠷᠢᠭᠰᠠᠨ ᠠᠢᠯ ᠢ᠋ᠶ᠋ᠠᠨ ᠰᠤᠷᠠᠭᠯᠠᠭᠠᠳ ᠣᠯᠪᠠᠯ ᠠᠵᠢᠯ ᠪᠦᠲᠦᠨᠡ᠃ ᠲᠡᠭᠡᠭᠡᠳ ᠴᠠᠭᠠᠰᠢᠬᠢ ᠨᠢ ᠴᠢᠨᠦ ᠰᠡᠳᠬᠢᠯ ᠣᠶᠤᠨ᠂ ᠠᠪᠢᠶᠠᠰ ᠠᠪᠬᠠᠯᠵᠢ ᠮᠡᠳᠡᠭ ᠭᠡᠳ ᠬᠣᠶᠠᠭᠤᠯᠠ ᠲᠡᠪᠡᠷᠢᠯᠴᠡᠨ ᠮᠣᠷᠳᠠᠵᠤ ᠬᠣᠶᠠᠷ ᠲᠡᠰᠢ ᠰᠠᠯᠪᠠ᠃
ᠡᠵᠡᠨ ᠡᠴᠡ ᠪᠡᠨ ᠠᠩᠬᠠ ᠤᠳᠠᠭᠠ ᠳᠠᠭᠠᠭᠠᠯᠭᠠᠪᠤᠷᠢ ᠠᠪᠤᠭᠠᠳ ᠶᠠᠪᠤᠵᠤ ᠪᠠᠢᠭᠠ ᠪᠣᠭᠣᠷᠴᠢ ᠳ᠋ᠤ᠌ ᠠᠮᠠᠷᠬᠠᠨ ᠴᠤ᠌ ᠶᠤᠮ ᠰᠢᠭ᠋᠂ ᠬᠡᠴᠡᠭᠦᠦ ᠴᠦ᠍ ᠶᠦᠮ ᠰᠢᠭ᠂ ᠲᠡᠭᠦᠨ ᠦ᠌ ᠭᠠᠷ ᠲᠤ᠌ ᠤᠷᠲᠤᠬᠠᠨ ᠤᠷᠭᠠ᠂ ᠪᠦᠳᠦᠭᠦᠨ ᠮᠣᠨᠣᠰᠣᠨ ᠲᠠᠰᠢᠭᠤᠷ ᠬᠣᠶᠠᠷ ᠠ᠋ᠴᠠ ᠥᠭᠡᠷᠡ ᠶᠠᠭᠤ ᠴᠤ᠌ ᠦᠭᠡᠢ᠃ ᠠᠩᠬᠠ ᠭᠡᠷ ᠡᠴᠡ ᠪᠡᠨ ᠭᠠᠷᠤᠭᠰᠠᠨ ᠰᠢᠭ᠋ ᠢ᠋ᠶ᠋ᠡᠨ ᠪᠥᠭᠲᠥᠷ ᠬᠣᠩᠭᠣᠷ ᠢ᠋ᠶ᠋ᠠᠨ ᠤᠨᠤᠵᠤ᠂ ᠥᠷᠮᠥᠭ ᠨᠥᠮᠥᠷᠭᠡ ᠪᠡᠨ ᠡᠮᠡᠭᠡᠯ ᠳ᠋ᠡᠭᠡᠨ ᠪᠥᠭᠲᠦᠷᠴᠡᠢ᠃ ᠮᠣᠷᠢ ᠰᠢᠯᠢᠵᠦ ᠤᠨᠤᠭᠠᠳ ᠶᠠᠪᠤ ᠭᠡᠬᠦ ᠳ᠋ᠦ᠍ ᠨᠢ《ᠮᠢᠨᠦ ᠪᠥᠭᠡᠨ ᠬᠣᠩᠭᠣᠷ ᠨᠠᠮᠠ ᠶ᠋ᠢ ᠬᠠᠮᠢᠭᠠ ᠴᠤ᠌ ᠭᠠᠵᠠᠷᠳᠠᠭᠤᠯᠬᠤ ᠦᠭᠡᠢ》 ᠬᠡᠮᠡᠵᠡᠢ᠃ ᠲᠡᠮᠦᠵᠢᠨ ᠦ᠌ ᠬᠤᠪᠢ ᠳ᠋ᠤ᠌ ᠪᠤᠭᠤᠷᠴᠢ ᠲᠡᠭᠦᠨ ᠦ᠌ ᠠᠩᠬᠠᠨ ᠤ᠋ ᠡᠩᠬᠡ ᠶ᠋ᠢᠨ ᠡᠯᠴᠢ ᠲᠤᠯᠠ ᠲᠡᠷᠡ ᠵᠡᠪᠰᠡᠭ ᠦᠭᠡᠢ ᠡᠩ ᠦ᠋ᠨ ᠶᠠᠪᠤᠬᠤ ᠨᠢ ᠵᠥᠪ ᠭᠡᠵᠦ ᠡᠢᠨ ᠶᠠᠪᠤᠭᠤᠯᠵᠠᠢ᠃ ᠨᠢᠭᠡᠨᠲᠡ ᠵᠠᠮ ᠳ᠋ᠤ᠌ ᠭᠠᠷᠤᠭᠰᠠᠨ᠂ ᠶᠠᠪᠤᠭᠠᠳ ᠯᠠ ᠪᠠᠢᠬᠤ ᠠ᠋ᠴᠠ ᠥᠭᠡᠷᠡ ᠶᠠᠭᠠᠬᠢᠬᠤ ᠪᠣᠢ᠃ ᠭᠣᠣᠯ ᠲᠥᠯᠥᠪ ᠱᠣᠭᠰᠢᠭᠤᠯᠵᠤ ᠠᠶᠠᠲᠠᠢᠬᠠᠨ ᠴᠠᠭᠠᠨ ᠭᠠᠵᠠᠷ ᠶᠥᠷᠭᠡᠭᠦᠯᠵᠦ᠂ ᠬᠠᠲᠠᠷᠢᠭᠤᠯᠵᠤ ᠦᠵᠡᠯᠡ᠃ ᠭᠠᠵᠠᠷ ᠬᠣᠷᠣᠵᠤ ᠯᠠ ᠪᠣᠢ᠂ ᠦᠳᠡ ᠶ᠋ᠢᠨ ᠬᠠᠯᠠᠭᠤᠨ ᠨᠠᠷᠠ ᠴᠦ᠍ ᠰᠢᠷᠠᠵᠤ ᠯᠠ ᠪᠠᠢᠭᠠ᠃ ᠲᠦᠩᠬᠦᠭᠡᠷ ᠬᠥᠬᠡ ᠠᠭᠤᠯᠠ ᠴᠤ᠌ ᠬᠥᠬᠡ ᠯᠡ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠲᠦᠩᠬᠦᠢᠨᠡ᠃ ᠡᠨᠡ ᠭᠠᠵᠠᠷ ᠡᠵᠡᠭᠦᠢ ᠴᠦᠯ ᠭᠡᠯᠲᠡᠢ᠃ ᠭᠠᠵᠠᠷ ᠢ᠋ᠶ᠋ᠠᠷ ᠬᠤᠯᠤᠭᠠᠨᠠ ᠵᠤᠷᠠᠮᠠ ᠭᠦᠶᠦᠯᠳᠦᠬᠦ ᠨᠢ ᠬᠠᠶᠠ ᠬᠠᠶᠠ ᠦᠵᠡᠭᠳᠡᠨᠡ᠃ ᠳᠡᠭᠡᠭᠦᠷ ᠡᠯᠢᠶᠡ ᠪᠦᠷᠭᠦᠳ ᠪᠠᠰᠠ ᠡᠷᠭᠢᠯᠳᠦᠬᠦ ᠲᠡᠳᠦᠢ᠃ ᠬᠠᠶᠠ ᠴᠠᠷᠴᠠᠭᠠ ᠳᠤᠤᠭᠠᠷᠴᠤ ᠥᠪᠡᠷ ᠲᠡᠢ ᠮᠥᠷᠭᠥᠯᠳᠦᠭᠰᠡᠨ ᠨᠢᠭᠡ ᠨᠢ ᠭᠠᠵᠠᠷ ᠫᠢᠳ ᠬᠢᠨ ᠤᠨᠠᠵᠤ᠂ ᠬᠠᠷᠢᠨ ᠡᠷᠢᠶᠡᠨ ᠮᠡᠷᠢᠶᠡᠨ ᠡᠷᠪᠡᠬᠡᠢ ᠳᠠᠯᠪᠠᠯᠵᠠᠨ ᠨᠢᠰᠴᠦ ᠨᠢᠭᠡ ᠴᠡᠴᠡᠭ ᠡᠴᠡ ᠨᠥᠭᠦᠭᠡ ᠳ᠋ᠦ᠍ ᠰᠠᠭᠤᠬᠤ ᠠᠭᠠᠳ ᠪᠠᠰᠠ ᠬᠡᠳᠡᠭᠡᠨᠡ ᠵᠥᠭᠡᠢ ᠶ᠋ᠢᠨ ᠳᠠᠭᠤ ᠭᠠᠷᠴᠤ ᠮᠣᠷᠢ ᠰᠢᠷᠪᠠᠯᠵᠠᠬᠤ ᠠᠪᠠᠢ᠃
ᠢᠩᠭᠢᠵᠦ ᠶᠠᠪᠤᠭᠰᠠᠭᠠᠷ ᠡᠳᠦᠷ ᠦ᠋ᠨ ᠬᠤᠭᠤᠰ ᠢ᠋ ᠠᠷᠤ ᠳ᠋ᠠᠭᠠᠨ ᠬᠢᠵᠦ᠂ ᠲᠦᠩᠬᠦᠭᠡᠷ ᠬᠥᠬᠡ ᠠᠭᠤᠯᠠᠨ ᠳ᠋ᠤ᠌ ᠣᠢᠷᠠᠲᠤᠨ ᠣᠢᠷᠠᠳᠴᠤ᠂ ᠲᠡᠷᠡ ᠠᠭᠤᠯᠠ ᠨᠢᠭᠡ ᠬᠡᠰᠡᠭ ᠮᠣᠳᠣ᠂ ᠨᠥᠭᠦᠭᠡ ᠬᠡᠰᠡᠭ ᠬᠠᠳᠠ ᠠᠰᠬᠠ ᠬᠣᠯᠢᠯᠳᠤᠨ ᠢᠯᠭᠠᠷᠠᠭᠠᠳ ᠢᠷᠡᠬᠦ ᠪᠡᠷ ᠰᠠᠢᠬᠠᠨ ᠠᠭᠤᠯᠠ ᠠᠵᠢ᠃ ᠠᠷᠤ ᠬᠣᠷᠮᠣᠢ ᠪᠠᠷ ᠨᠢ ᠣᠷᠢᠶᠠᠭᠠᠳ ᠢᠷᠡᠲᠡᠯᠡ ᠪᠠᠷᠠᠭᠤᠨ ᠬᠣᠢᠨᠠ ᠠ᠋ᠴᠠ ᠨᠢ ᠤᠷᠤᠭᠤᠳᠠᠭᠰᠠᠨ ᠨᠠᠷᠢᠪᠲᠤᠷ ᠬᠣᠭᠣᠯᠠᠢ ᠳᠤᠮᠳᠠᠭᠤᠷ ᠭᠣᠣᠯ ᠤᠷᠤᠰᠤᠨ ᠵᠡᠭᠦᠨ ᠳᠠᠰᠢ ᠪᠠᠰᠠ ᠨᠢᠭᠡ ᠠᠭᠤᠯᠠ ᠶ᠋ᠢᠨ ᠠᠷᠤ ᠣᠷᠢᠶᠠᠨ ᠬᠠᠷᠠᠭᠳᠠᠬᠤ ᠦᠭᠡᠢ ᠪᠣᠯᠪᠠ᠃
ᠪᠣᠭᠣᠷᠴᠢ ᠭᠣᠣᠯ ᠤ᠋ᠨ ᠪᠠᠷᠠᠭᠤᠨ ᠬᠠᠶᠠᠯᠭᠠ ᠶ᠋ᠢ ᠪᠠᠷᠢᠭᠠᠳ ᠪᠦᠷ ᠶᠥᠷᠭᠡᠭᠦᠯᠵᠦ᠂ ᠬᠠᠲᠠᠷᠢᠭᠤᠯᠤᠨ ᠡᠬᠢᠯᠡᠯᠡ᠃ ᠲᠡᠷᠲᠡᠭᠡ ᠨᠢᠳᠦᠨ ᠦ᠌ ᠦᠵᠦᠭᠦᠷ ᠲᠦ᠍ ᠨᠢᠭᠡ ᠶᠠᠭᠤᠮᠠ ᠨᠠᠭᠠᠰᠢ ᠬᠥᠳᠡᠯᠵᠦ᠂ ᠬᠣᠶᠠᠷ ᠲᠠᠯᠠ ᠠ᠋ᠴᠠ ᠣᠢᠷᠠᠳᠬᠤ ᠪᠦᠷᠢ ᠯᠦᠭᠯᠦᠭᠡᠷ ᠠᠴᠢᠶᠠᠲᠠᠢ ᠬᠥᠰᠬᠡ ᠲᠡᠷᠭᠡ ᠪᠣᠯᠬᠤ ᠨᠢ ᠲᠠᠨᠢᠭᠳᠠᠪᠠ᠃ ᠡᠪᠡᠰᠦ ᠠᠴᠢᠭᠰᠠᠨ ᠭᠤᠷᠪᠠᠨ ᠦᠬᠡᠷ ᠲᠡᠷᠭᠡ ᠶ᠋ᠢ ᠬᠥᠲᠥᠯᠦᠭᠰᠡᠨ ᠢᠮᠠᠭᠠᠨ ᠰᠠᠬᠠᠯ ᠲᠠᠢ᠂ ᠥᠨᠳᠥᠷ ᠲᠤᠷᠠᠩᠬᠠᠢ᠂ ᠰᠡᠷᠪᠡᠭᠡ ᠪᠡᠷ ᠢ᠋ᠶ᠋ᠡᠨ ᠪᠥᠭᠲᠥᠷᠳᠡᠭᠦᠦ ᠡᠪᠦᠭᠡᠨ ᠪᠣᠭᠣᠷᠴᠢ ᠲᠠᠢ ᠲᠤᠯᠵᠤ ᠢᠷᠡᠭᠡᠳ᠄
— ᠨᠢᠭᠤᠷ ᠲᠠᠭᠠᠨ ᠭᠠᠯ ᠲᠠᠢ\
ᠨᠢᠳᠦᠨ ᠳ᠋ᠡᠭᠡᠨ ᠴᠣᠭ ᠲᠠᠢ\
ᠬᠡᠨ ᠬᠥᠮᠦᠨ ᠦ᠌ ᠦᠷᠡ ᠪᠣᠢ?\
ᠬᠡᠷᠡᠭ ᠵᠣᠷᠢᠭ ᠶᠠᠭᠤᠨ ᠳ᠋ᠤ᠌ ᠪᠣᠢ\
ᠬᠡᠳᠦ ᠨᠤᠲᠤᠭ ᠬᠠᠮᠢᠭᠠ ᠪᠣᠢ? ᠭᠡᠳ ᠯᠡ ᠶᠡᠬᠡ ᠤᠶᠠᠩᠭᠠᠯᠠᠭᠤᠯᠤᠨ ᠠᠰᠠᠭᠤᠬᠤ ᠳ᠋ᠤ᠌ ᠪᠣᠭᠣᠷᠴᠢ᠄
— ᠬᠣᠯᠠ ᠦᠭᠡᠢ᠂ ᠣᠢᠷᠠ\
ᠬᠣᠷᠬᠣᠨᠠᠭ ᠤ᠋ᠨ ᠬᠥᠨᠳᠡᠢ ᠪᠡᠷ ᠨᠤᠲᠤᠭ ᠲᠠᠢ\
ᠬᠣᠨᠢᠴᠢᠨ ᠨᠠᠬᠤ ᠶ᠋ᠢᠨ ᠬᠦᠦ\
ᠨᠠᠭᠠᠴᠤ ᠲᠥᠷᠥᠯ ᠢ᠋ᠶ᠋ᠡᠨ ᠰᠤᠷᠠᠭᠯᠠᠵᠤ ᠶᠠᠪᠤᠨᠠ ᠭᠡᠵᠦ ᠠᠳᠠᠯᠢᠬᠠᠨ ᠤᠶᠠᠩᠭᠠᠯᠠᠭᠤᠯᠬᠤ ᠳ᠋ᠤ᠌ ᠡᠪᠦᠭᠡᠨ ᠢᠨᠢᠶᠡᠵᠦ᠂ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠵᠤ ᠲᠡᠷᠡ ᠬᠣᠶᠠᠷ ᠨᠡᠯᠢᠶᠡᠳ ᠶᠠᠷᠢᠯᠴᠠᠨ ᠡᠪᠦᠭᠡᠨ ᠳᠡᠰ ᠳᠡᠰ ᠬᠥᠬᠥᠷᠡᠨ ᠢᠨᠢᠶᠡᠨᠡ᠃ ᠡᠪᠦᠭᠡᠨ ᠭᠣᠣᠯ ᠤ᠋ᠨ ᠪᠤᠷᠭᠠᠰᠤᠨ ᠳ᠋ᠤ᠌ ᠡᠪᠦᠯᠵᠢᠶᠡᠨ ᠳ᠋ᠡᠭᠡᠨ ᠡᠪᠡᠰᠦ ᠠᠪᠠᠴᠢᠵᠤ ᠪᠠᠭᠤᠯᠭᠠᠬᠤ ᠪᠠᠷ ᠶᠠᠪᠤᠭᠠ᠂ ᠤᠷᠢᠳᠤ ᠵᠠᠯᠠᠭᠤ ᠳ᠋ᠠᠭᠠᠨ ᠪᠡᠷᠲᠡᠨ ᠪᠠᠭᠠᠲᠤᠷ ᠠ᠋ᠴᠠ ᠡᠬᠢᠯᠡᠭᠡᠳ ᠶᠢᠰᠦᠭᠡᠢ ᠶ᠋ᠢᠨ ᠬᠠᠷᠢᠶᠠᠲᠤ ᠴᠡᠷᠢᠭ ᠡᠷᠡ ᠶᠠᠪᠤᠭᠰᠠᠨ᠂ ᠡᠳᠦᠭᠡ ᠲᠠᠷᠭᠤᠲᠠᠢ ᠬᠢᠷᠢᠯᠳᠣᠭ ᠠ᠋ᠴᠠ ᠳᠠᠢᠵᠢᠨ ᠠᠯᠤᠰ ᠲᠠᠭᠠᠨ ᠶᠢᠰᠦᠭᠡᠢ ᠶ᠋ᠢᠨ ᠶᠡᠬᠡ ᠬᠥᠪᠡᠭᠦᠨ ᠢ᠋ ᠪᠠᠷᠠᠭᠠᠳᠠᠬᠤ ᠪᠠᠷ ᠵᠠᠬᠠᠯᠠᠵᠤ ᠢᠷᠡᠭᠰᠡᠨ ᠬᠣᠷᠢ ᠭᠠᠷᠤᠢ ᠠᠢᠯ ᠤ᠋ᠳ ᠤ᠋ᠨ ᠲᠤᠬᠠᠢ ᠴᠤ᠌ ᠶᠠᠷᠢᠵᠤ ᠪᠤᠷᠠᠵᠤ ᠥᠭᠭᠦᠯᠡ᠃ ᠬᠠᠮᠤᠭ ᠭᠣᠣᠯ ᠨᠢ ᠰᠢᠯᠦᠬᠡᠢ ᠶ᠋ᠢᠨ ᠬᠢ ᠶ᠋ᠢ ᠮᠡᠳᠡᠵᠦ ᠠᠪᠤᠯᠠ᠃ ᠢᠩᠭᠢᠰᠬᠢᠵᠦ ᠭᠣᠣᠯ ᠢ᠋ᠶ᠋ᠠᠨ ᠥᠭᠰᠥᠭᠡᠳ ᠶᠠᠪᠤᠲᠠᠯᠠ ᠠᠭᠤᠯᠠ ᠶ᠋ᠢᠨ ᠠᠷᠤ ᠳ᠋ᠤ᠌ ᠬᠡᠰᠡᠭ ᠬᠣᠲᠠ ᠠᠢᠯ ᠪᠥᠭᠡᠮᠨᠡᠬᠦᠢ ᠪᠣᠢ ᠭᠡᠨᠡ᠃ ᠴᠠᠭᠠᠰᠢ ᠬᠣᠶᠠᠷ ᠠᠮᠠ ᠥᠩᠭᠡᠷᠡᠭᠡᠳ ᠣᠢᠷᠠᠬᠠᠨ ᠬᠣᠶᠠᠷ ᠠᠢᠯ ᠪᠣᠢ᠂ ᠲᠡᠭᠦᠨ ᠦ᠌ ᠪᠠᠷᠠᠭᠤᠨ ᠶᠡᠬᠡ ᠪᠠᠭᠠ ᠬᠣᠶᠠᠷ ᠭᠡᠷ ᠲᠡᠢ ᠠᠢᠯ ᠪᠣᠯ ᠰᠢᠯᠦᠬᠡᠢ ᠶ᠋ᠢᠨ ᠬᠢ ᠶᠦᠮ ᠪᠠᠢᠨᠠ᠃ ᠡᠪᠦᠭᠡᠨ᠄
— ᠮᠠᠨ ᠤ᠋ ᠡᠨᠡᠭᠦᠷ ᠰᠡᠭᠦᠯ ᠦᠭᠡᠢ ᠴᠢᠨᠣᠠ ᠭᠠᠷᠴᠢᠬᠠᠭᠠᠳ ᠠᠢᠯ ᠤ᠋ᠳ ᠪᠥᠭᠡᠮᠨᠡᠷᠡᠨ ᠪᠠᠭᠤᠬᠤ ᠪᠣᠯᠤᠭᠠᠳ ᠪᠠᠢᠭᠠ ᠶᠤᠮ᠃ ᠲᠡᠳᠡᠨ ᠦ᠌ ᠬᠢ ᠬᠠᠷᠢᠨ᠁ ᠭᠡᠵᠦ ᠡᠪᠦᠭᠡᠨ ᠢ᠋ ᠪᠢᠲᠡᠭᠦᠦ ᠬᠠᠲᠠᠭᠤ ᠦᠭᠡ ᠬᠡᠯᠡᠬᠦ ᠳ᠋ᠦ᠍ ᠪᠣᠭᠤᠷᠴᠢ᠍《ᠳᠡᠭᠡᠷᠡᠮᠴᠢᠨ ᠬᠤᠯᠠᠭᠠᠢᠴᠢ ᠲᠠᠢ ᠪᠣᠯᠤᠭᠰᠠᠨ ᠶᠤᠮ ᠪᠠᠢᠬᠠ》 ᠭᠡᠵᠦ ᠪᠣᠳᠣᠭᠠᠳ᠄
— ᠲᠡᠳᠡᠨ ᠢ᠋ ᠴᠠᠭᠠᠰᠢ ᠬᠠᠷᠠᠭᠤᠯᠴᠢᠬᠠᠬᠤ ᠵᠠᠯᠠᠭᠤᠰ ᠪᠠᠢᠳᠠᠭ ᠦᠭᠡᠢ ᠶᠦᠮ ᠤᠤ? ᠭᠡᠵᠦ ᠠᠰᠠᠭᠤᠪᠠ᠃ ᠡᠪᠦᠭᠡᠨ᠄
— ᠵᠠᠯᠠᠭᠤᠴᠤᠳ ᠴᠥᠭᠡᠨ᠃ ᠬᠢᠷᠢᠯᠳᠣᠭ ᠴᠡᠷᠢᠭ ᠲᠦ᠍ ᠲᠠᠲᠠᠭᠠᠳ ᠠᠪᠤᠭᠠᠳ ᠶᠠᠪᠤᠴᠢᠬᠠᠭᠰᠠᠨ᠃ ᠭᠠᠭᠴᠠ ᠬᠦᠦ ᠲᠡᠢ ᠶᠤᠮᠰᠠᠨ᠃ ᠥᠩᠭᠡᠷᠡᠭᠰᠡᠨ ᠬᠠᠪᠤᠷ ᠶᠠᠪᠤᠭᠠᠳ ᠲᠡᠨᠳᠡ ᠦᠷᠡᠭᠳᠡᠭᠰᠡᠨ ᠰᠤᠷᠠᠭ ᠲᠠᠢ ᠭᠡᠳ ᠳᠠᠭᠤ ᠨᠢ ᠬᠤᠪᠢᠷᠠᠯᠠ᠃ ᠴᠠᠭᠠᠰᠢ ᠶᠠᠭᠤᠮᠠ ᠠᠰᠠᠭᠤᠵᠤ ᠰᠢᠯᠭᠠᠬᠤ ᠠᠷᠭᠠ ᠴᠤ᠌ ᠦᠭᠡᠢ ᠪᠣᠯᠤᠭᠠᠳ ᠡᠪᠦᠭᠡᠨ ᠴᠦ᠍ ᠤᠷᠤᠭᠤ ᠴᠢᠷᠠᠢᠯᠠᠨ ᠮᠣᠷᠳᠠᠵᠤ᠂ ᠦᠬᠡᠷ ᠲᠡᠷᠭᠡ ᠪᠡᠨ ᠬᠥᠲᠥᠯᠦᠭᠡᠳ ᠬᠣᠶᠠᠷ ᠲᠡᠰᠢ ᠪᠣᠯᠪᠠ᠃
ᠵᠣᠷᠢᠭᠰᠠᠨ ᠠᠢᠯ ᠤ᠋ᠨ ᠢ᠋ᠶ᠋ᠠᠨ ᠭᠠᠳᠠᠭᠠ ᠣᠴᠢᠪᠠ᠃ ᠶᠡᠬᠡ ᠪᠠᠭᠠ ᠬᠣᠶᠠᠷ ᠭᠡᠷ᠂ ᠬᠡᠳᠦᠨ ᠲᠡᠷᠭᠡ᠂ ᠪᠠᠰᠠ ᠴᠢᠩᠭᠡᠯᠢᠭ ᠲᠡᠷᠭᠡ᠂ ᠴᠡᠪᠡᠷᠬᠡᠨ ᠡᠮᠬᠢ ᠴᠡᠭᠴᠡ ᠲᠡᠢ ᠬᠠᠰᠢᠶᠠ᠂ ᠮᠣᠷᠢᠨ ᠤ᠋ ᠤᠶᠠᠭᠠ᠂ ᠭᠡᠷ ᠡᠴᠡ ᠵᠡᠭᠦᠨ ᠬᠣᠢᠰᠢ ᠨᠢᠭᠡ ᠠᠢᠯ᠂ ᠪᠠᠷᠠᠭᠤᠨ ᠬᠣᠢᠰᠢ ᠬᠡᠳᠦᠨ ᠤᠨᠠᠭᠠ ᠵᠡᠯᠡᠯᠡᠨ ᠤᠶᠠᠵᠠᠢ᠃ ᠲᠡᠳᠡᠨ ᠦ᠌ ᠬᠢ ᠡᠴᠡ ᠪᠠᠷᠠᠭᠤᠨ ᠢ᠋ᠶ᠋ᠠᠷ ᠨᠠᠷᠢᠬᠠᠨ ᠭᠣᠷᠣᠬᠠ ᠪᠤᠯᠠᠭ ᠬᠣᠢᠲᠤ ᠭᠣᠣᠯ ᠤᠷᠤᠭᠤ ᠨᠡᠢᠯᠡᠳᠡᠭ ᠪᠣᠯᠤᠯᠲᠠᠢ ᠤᠷᠤᠰᠤᠨᠠ᠃ ᠰᠢᠯᠦᠬᠡᠢ ᠶ᠋ᠢᠨ ᠠᠳᠤᠭᠤ ᠲᠡᠷᠡ ᠨᠠᠷᠢᠨ ᠭᠣᠷᠣᠬᠠ ᠳᠠᠭᠠᠤ ᠲᠠᠷᠬᠠᠵᠠᠢ᠃ ᠡᠳᠦᠷ ᠦ᠋ᠨ ᠬᠠᠯᠠᠭᠤᠨ ᠳ᠋ᠤ᠌ ᠬᠣᠷᠭᠣᠵᠤ ᠵᠠᠯᠠᠨ ᠳᠡᠭᠡᠷᠡ ᠵᠣᠭᠰᠣᠭᠠᠳ ᠰᠡᠷᠢᠭᠦᠨ ᠣᠷᠣᠬᠤ ᠪᠠᠷ ᠲᠠᠷᠬᠠᠭᠰᠠᠨ ᠨᠢ ᠲᠡᠷᠡ᠃ ᠮᠣᠷᠢ ᠲᠠᠢ ᠬᠥᠮᠦᠨ ᠣᠴᠢᠬᠤ ᠪᠠᠷ ᠵᠠᠷᠢᠮ ᠨᠢᠭᠡ ᠭᠡᠭᠦᠦ ᠤᠨᠠᠭᠠ ᠤᠷᠤᠭᠤ ᠪᠠᠨ ᠦᠦᠷᠰᠡᠨ ᠢᠷᠡᠬᠦ ᠨᠢ ᠤᠬᠠᠭᠠᠨ ᠳ᠋ᠠᠭᠠᠨ ᠤᠨᠠᠭᠠ ᠪᠠᠨ ᠬᠠᠷᠠᠮᠯᠠᠵᠤ ᠪᠣᠢ ᠲᠡᠷᠡ ᠠᠵᠢ᠃
ᠬᠣᠶᠠᠷ ᠨᠣᠬᠠᠢ ᠬᠤᠴᠠᠨ ᠢᠷᠡᠯᠡ᠃ ᠦᠨᠦᠷᠯᠡᠵᠦ ᠲᠣᠭᠣᠷᠢᠵᠤ ᠪᠣᠷᠭᠣᠬᠤ ᠠ᠋ᠴᠠ ᠪᠢᠰᠢ ᠠᠢᠬᠤᠪᠲᠤᠷ ᠵᠠᠭᠤᠮᠠᠬᠠᠢ ᠨᠣᠬᠠᠳ ᠪᠢᠰᠢ ᠠᠵᠢ᠃ ᠨᠣᠬᠠᠢ ᠶ᠋ᠢᠨ ᠴᠢᠮᠡᠭᠡ ᠪᠡᠷ ᠶᠡᠬᠡ ᠭᠡᠷ ᠡᠴᠡ ᠨᠢᠭᠡᠨ ᠵᠢᠪᠬᠤᠭᠠᠯᠢᠭ ᠪᠦᠰᠡᠭᠦᠢ ᠢᠨᠢᠶᠡᠭᠰᠡᠭᠡᠷ ᠭᠣᠳ ᠬᠢᠨ ᠭᠠᠷᠴᠤ ᠢᠷᠡᠭᠰᠡᠨ ᠢ᠋ᠶ᠋ᠡᠨ ᠲᠠᠨᠢᠬᠤ ᠦᠭᠡᠢ ᠬᠥᠮᠦᠨ ᠪᠣᠯᠬᠤ ᠶ᠋ᠢ ᠬᠠᠷᠠᠭᠠᠳ ᠴᠢᠷᠠᠢ ᠪᠠᠨ ᠲᠥᠪ ᠪᠣᠯᠭᠠᠨ ᠵᠣᠮᠪᠠᠢᠵᠤ ᠨᠣᠬᠠᠢ ᠪᠠᠨ ᠬᠣᠷᠢᠪᠠ᠃ ᠪᠣᠭᠤᠷᠴᠢ᠄
— ᠰᠢᠯᠦᠬᠡᠢ ᠭᠤᠸᠠᠢ ᠶ᠋ᠢᠨ ᠬᠢᠨ ᠮᠥᠨ ᠤᠤ? ᠭᠡᠵᠦ ᠯᠠᠪᠯᠠᠪᠠᠯ ᠲᠡᠷᠡ ᠪᠦᠰᠡᠭᠦᠢ᠄
— ᠮᠥᠨ ᠭᠡᠵᠦ ᠲᠣᠯᠣᠭᠠᠢ ᠳᠣᠬᠢᠯᠠ᠃
ᠪᠣᠭᠣᠷᠴᠢ ᠭᠡᠷ ᠲᠦ᠍ ᠣᠷᠣᠪᠠᠯ ᠪᠠᠷᠠᠭᠤᠨ ᠲᠠᠯᠠ ᠳ᠋ᠤ᠌ ᠭᠡᠷ ᠦ᠋ᠨ ᠡᠵᠡᠨ ᠴᠢᠳᠥᠷ ᠵᠠᠩᠭᠢᠳᠴᠤ᠂ ᠵᠡᠭᠦᠨ ᠬᠣᠢᠲᠤ ᠲᠠᠯᠠ ᠪᠠᠷ ᠨᠡᠯᠢᠶᠡᠳ ᠪᠦᠳᠦᠭᠦᠨ ᠠᠪᠠᠭᠠᠢ ᠨᠢᠭᠡ ᠶᠠᠭᠤᠮᠠ ᠳᠡᠯᠭᠡᠵᠦ ᠳᠡᠪᠡᠯ ᠡᠰᠬᠡᠬᠦ ᠭᠡᠵᠦ ᠪᠠᠢᠭᠠ ᠶᠤᠮ ᠪᠣᠯᠪᠠᠤ ᠭᠡᠯᠲᠡᠢ᠃ ᠪᠣᠭᠤᠷᠴᠢ ᠮᠡᠨᠳᠦᠯᠡᠭᠡᠳ ᠭᠡᠷ ᠦ᠋ᠨ ᠡᠵᠡᠨ ᠦ᠌ ᠳᠣᠣᠷᠠ ᠵᠡᠭᠦᠨ ᠡᠪᠦᠳᠦᠭ ᠢ᠋ᠶ᠋ᠡᠨ ᠨᠤᠭᠤᠯᠵᠤ ᠪᠠᠷᠠᠭᠤᠨ ᠬᠥᠯ ᠳᠡᠭᠡᠷᠡ ᠪᠡᠨ ᠴᠣᠮᠴᠣᠢᠨ ᠰᠠᠭᠤᠪᠠ᠃
ᠭᠡᠷ ᠦ᠋ᠨ ᠡᠵᠡᠨ ᠠᠯᠢ ᠠᠯᠢ ᠨᠤᠲᠤᠭ ᠤ᠋ᠨ᠂ ᠬᠡᠨ ᠦ᠌ ᠬᠡᠨ ᠭᠡᠭᠴᠢ᠂ ᠬᠠᠮᠢᠭᠠ ᠭᠠᠵᠠᠷ ᠵᠣᠷᠢᠵᠤ ᠶᠠᠪᠤᠭᠠ᠂ ᠬᠡᠷᠡᠭ ᠵᠣᠷᠢᠭ ᠢ᠋ ᠠᠰᠠᠭᠤᠯᠠ᠃ ᠪᠤᠭᠤᠷᠴᠢ᠄
— ᠬᠣᠷᠬᠣᠨᠠᠭ ᠤ᠋ᠨ ᠳᠡᠭᠡᠳᠦ ᠪᠡᠶᠡ ᠪᠡᠷ ᠨᠤᠲᠤᠭᠯᠠᠵᠤ ᠪᠠᠢᠭᠠ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠤ᠋ᠨ ᠬᠦᠦ ᠲᠡᠮᠦᠵᠢᠨ ᠦ᠌ ᠠᠯᠪᠠᠲᠤ ᠪᠠᠢᠨᠠ ᠪᠢ᠃ ᠲᠡᠭᠦᠨ ᠦ᠌ ᠵᠠᠷᠤᠯᠭᠠ ᠪᠠᠷ ᠡᠨᠡ ᠭᠠᠵᠠᠷ ᠢ᠋ ᠵᠣᠷᠢᠵᠤ ᠲᠠᠨ ᠤ᠋ ᠬᠢ ᠳ᠋ᠦ᠍ ᠬᠦᠷᠴᠦ ᠢᠷᠡᠯᠡ ᠭᠡᠬᠦ ᠳ᠋ᠦ᠍ ᠨᠢ ᠰᠢᠯᠦᠬᠡᠢ ᠬᠢᠵᠦ ᠰᠠᠭᠤᠭᠰᠠᠨ ᠠᠵᠢᠯ ᠢ᠋ᠶ᠋ᠠᠨ ᠣᠷᠬᠢᠵᠤ ᠰᠤᠷ ᠴᠢᠳᠥᠷ ᠢ᠋ᠶ᠋ᠡᠨ ᠬᠤᠮᠢᠵᠤ ᠲᠠᠯᠪᠢᠭᠠᠳ ᠰᠠᠭᠤᠳᠠᠯ ᠢ᠋ᠶ᠋ᠠᠨ ᠵᠠᠰᠠᠵᠤ᠄
— ᠵᠠ ᠬᠦ᠂ ᠲᠡᠮᠦᠵᠢᠨ ᠬᠥᠪᠡᠭᠦᠨ ᠭᠡᠨᠡ? ᠬᠠᠮᠢᠭᠠ ᠬᠦᠷᠲᠡᠯᠡ ᠠᠯᠢ ᠣᠪᠣᠭ ᠠᠢᠮᠠᠭ ᠤ᠋ᠨ ᠡᠵᠡᠨ ᠪᠣᠯᠤᠭᠠᠳ ᠪᠠᠢᠨᠠ ᠳᠠ? ᠭᠡᠬᠦ ᠳ᠋ᠦ᠍ ᠨᠢ ᠪᠤᠭᠤᠷᠴᠢ ᠶ᠋ᠢᠨ ᠳᠣᠲᠣᠷᠠ ᠲᠡᠮᠦᠵᠢᠨ ᠦ᠌《ᠬᠡᠷᠪᠡ ᠨᠠᠮᠠ ᠶ᠋ᠢ ᠠᠰᠠᠭᠤᠵᠤ ᠯᠠᠪᠯᠠᠪᠠᠯ ᠨᠡᠯᠢᠶᠡᠳ ᠥᠯᠥᠭ ᠳᠠᠪᠠᠭᠤ ᠬᠡᠯᠡᠭᠡᠷᠡᠢ》 ᠭᠡᠵᠦ ᠰᠠᠨᠠᠭᠤᠯᠤᠭᠰᠠᠨ ᠨᠢ ᠪᠤᠳᠤᠭᠳᠠᠨ᠄
— ᠰᠢᠣᠰᠠ ᠶ᠋ᠢᠨ ᠭᠣᠣᠯ᠂ ᠶᠡᠷᠦ ᠨᠢ ᠬᠡᠷᠦᠯᠦᠨ ᠡᠴᠡ ᠨᠠᠭᠠᠭᠤᠷ ᠢ᠋ᠶ᠋ᠠᠨ ᠪᠠᠶᠠᠨ ᠤᠯᠠᠭᠠᠨ ᠬᠦᠷᠲᠡᠯᠡᠬᠢ ᠭᠠᠵᠠᠷ ᠨᠤᠲᠤᠭ ᠤ᠋ᠨ ᠰᠠᠷᠨᠢᠮᠠᠯ ᠣᠪᠣᠭ ᠠᠢᠮᠠᠭ ᠤ᠋ᠳ᠂ ᠭᠣᠣᠯ ᠨᠢ ᠪᠣᠷᠵᠢᠭᠢᠨ᠂ ᠪᠦᠬᠦᠨᠤᠭᠦᠳ᠂ ᠪᠠᠭᠠᠲᠤᠳ ᠭᠡᠬᠦ ᠵᠡᠷᠭᠡ ᠨᠢᠭᠡᠳᠴᠦ ᠡᠵᠡᠨ ᠦ᠌ ᠬᠠᠷᠢᠶᠠ ᠮᠠᠲᠠᠯ ᠳ᠋ᠤ᠌ ᠨᠢ ᠪᠠᠭᠲᠠᠵᠤ ᠪᠠᠢᠭᠠ ᠭᠡᠪᠡᠯ ᠰᠢᠯᠦᠬᠡᠢ᠄
— ᠲᠡᠷᠡ ᠮᠠᠨ ᠤ᠋ ᠡᠨᠡ ᠬᠠᠪᠢ ᠶ᠋ᠢ ᠮᠡᠳᠡᠵᠦ ᠪᠠᠢᠭᠠ ᠪᠣᠯᠪᠠᠤ? ᠭᠡᠯᠡ᠃
— ᠮᠡᠳᠡᠵᠦ ᠪᠠᠢᠭᠠ ᠭᠡᠬᠦ ᠳ᠋ᠦ᠍ ᠲᠡᠷᠡ ᠪᠡᠷ᠄
— ᠲᠡᠭᠡᠭᠡᠳ ᠲᠠᠨ ᠢ᠋ ᠨᠠᠭᠠᠰᠢ ᠵᠠᠷᠤᠭᠠ ᠤᠤ? ᠭᠡᠪᠡ᠃
— ᠲᠠᠨ ᠤ᠋ ᠲᠤᠬᠠᠢ ᠶᠠᠷᠢᠵᠤ ᠪᠠᠢᠨᠠ ᠪᠢᠯᠡ᠃ ᠬᠠᠷᠢᠨ ᠲᠠᠨ ᠤ᠋ ᠬᠥᠪᠡᠭᠦᠨ ᠳᠠᠷᠬᠢ ᠶ᠋ᠢ ᠥᠪᠡᠷ ᠲᠡᠭᠡᠨ ᠢᠷᠡᠵᠦ ᠨᠥᠬᠥᠷᠯᠡᠨ ᠬᠦᠴᠦᠨ ᠲᠤᠰᠠᠯᠠᠯᠴᠠᠨᠠ ᠤᠤ? ᠭᠡᠵᠦ ᠨᠠᠮᠠ ᠶ᠋ᠢ ᠶᠠᠪᠤᠭᠤᠯᠤᠭᠰᠠᠨ ᠭᠡᠵᠦ ᠪᠤᠭᠤᠷᠴᠢ ᠬᠡᠯᠡᠭᠡᠳ ᠥᠪᠡᠷ ᠲᠦ᠍ ᠨᠢ ᠪᠠᠷᠢᠭᠰᠠᠨ ᠠᠶᠠᠭᠠ ᠲᠠᠢ ᠠᠢᠷᠠᠭ ᠢ᠋ ᠬᠡᠳᠦ ᠵᠠᠯᠭᠢᠪᠠ᠃ ᠭᠡᠷ ᠦ᠋ᠨ ᠡᠵᠡᠨ᠂ ᠡᠵᠡᠭᠲᠡᠢ ᠬᠣᠶᠠᠷ ᠤ᠋ᠨ ᠴᠢᠷᠠᠢ ᠨᠢᠭᠡᠯᠡ ᠥᠭᠡᠷᠡ ᠪᠣᠯᠵᠤ ᠰᠡᠭᠦᠷᠡᠰᠦ ᠠᠯᠲᠠᠨ ᠰᠤᠯᠠᠷᠠᠭᠠᠳ ᠶᠠᠪᠤᠴᠢᠬᠠᠪᠠ᠃ ᠪᠤᠭᠤᠷᠴᠢ《ᠰᠠᠶᠢᠬᠢ ᠡᠪᠦᠭᠡᠨ ᠦ᠌ ᠠᠳᠠᠯᠢ ᠡᠳᠡ ᠬᠦᠦ ᠪᠡᠨ ᠲᠠᠢᠴᠢᠭᠤᠳ ᠤ᠋ᠨ ᠴᠡᠷᠢᠭ ᠲᠦ᠍ ᠶᠠᠪᠤᠭᠤᠯᠤᠭᠠᠳ ᠪᠠᠰᠠ ᠦᠭᠡᠢ ᠪᠣᠯᠭᠠᠭᠰᠠᠨ ᠪᠣᠯᠪᠠᠤ?》 ᠭᠡᠵᠦ ᠪᠣᠳᠣᠭᠠᠳ ᠵᠢᠷᠦᠬᠡᠯᠡᠭᠰᠡᠨ ᠦᠭᠡᠢ᠂ ᠳᠣᠭᠣᠭᠰᠢ ᠬᠠᠷᠠᠨ ᠮᠥᠨ ᠯᠡ ᠠᠢᠷᠠᠭ ᠪᠠᠯᠭᠤᠨ ᠬᠡᠰᠡᠭ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ᠄
— ᠴᠡᠷᠢᠭ ᠲᠦ᠍ ᠶᠠᠪᠤᠭᠰᠠᠨ ᠤᠤ? ᠭᠡᠵᠦ ᠵᠣᠷᠢᠭ ᠭᠠᠷᠭᠠᠨ ᠠᠰᠠᠭᠤᠪᠠ᠃
— ᠦᠭᠡᠢ ᠠ᠋᠂ ᠦᠭᠡᠢ᠃ ᠥᠪᠡᠷ ᠢ᠋ᠶ᠋ᠡᠨ ᠯᠡ ᠠᠯᠠᠭᠠ ᠪᠣᠯᠤᠭᠰᠠᠨ᠃ ᠲᠡᠷᠡ ᠬᠥᠮᠦᠨ ᠬᠥᠮᠦᠨ ᠢ᠋ᠶ᠋ᠡᠨ ᠪᠠᠢᠵᠤ᠂ ᠰᠡᠭᠦᠯ ᠦᠭᠡᠢ ᠴᠢᠨᠣᠠ ᠲᠠᠢ ᠨᠡᠢᠯᠡᠵᠦ ᠠᠭᠤᠯᠠ ᠶ᠋ᠢᠨ ᠵᠡᠷᠯᠢᠭ ᠠᠷᠢᠶᠠᠲᠠᠨ ᠯᠤᠭᠠ ᠨᠢᠭᠡᠨ ᠪᠣᠯᠤᠭᠰᠠᠨ᠃ ᠲᠡᠮᠦᠵᠢᠨ ᠳ᠋ᠦ᠍ ᠲᠡᠭᠡᠵᠦ ᠠᠢᠯᠠᠳᠬᠠᠨᠠ ᠤᠤ ᠳᠠ?
ᠪᠣᠭᠣᠷᠴᠢ ᠶᠡᠷᠦ ᠡᠨᠡ ᠦᠭᠡ ᠶ᠋ᠢ ᠣᠢᠯᠠᠭᠠᠭᠰᠠᠨ ᠦᠭᠡᠢ᠂ ᠨᠢᠭᠡᠯᠡ ᠪᠢᠲᠡᠭᠦᠦ ᠬᠠᠲᠠᠭᠤ ᠶᠠᠭᠤᠮᠠ᠃ ᠡᠬᠡ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍ ᠨᠢᠯᠪᠤᠰᠤ ᠴᠡᠢᠯᠡᠭᠡᠨᠡᠵᠦ ᠬᠠᠴᠠᠷ ᠢ᠋ᠶ᠋ᠠᠨ ᠳ᠋ᠠᠭᠠᠨ ᠪᠥᠮᠪᠥᠷᠢᠬᠦ ᠬᠠᠷᠠᠭᠳᠠᠨᠠ᠃
— ᠡᠯᠴᠢ ᠬᠦᠦ ᠲᠠ᠂ ᠥᠨᠥ ᠣᠷᠣᠢ ᠪᠣᠯᠵᠤ᠂ ᠥᠨᠵᠢᠭᠡᠳ ᠶᠠᠪᠤᠨᠠ ᠪᠢᠵᠡ᠃ ᠬᠣᠭᠣᠯᠠ ᠬᠢᠵᠦ ᠥᠭᠭᠦᠶᠡ ᠳᠡ᠃ ᠲᠡᠭᠦᠰᠬᠡᠨ ᠴᠢ ᠰᠡᠷᠡᠯᠵᠢᠨ ᠴᠢᠩᠭᠡᠯᠢᠭ ᠡᠴᠡ ᠣᠳᠤᠭᠰᠠᠨ ᠬᠠ ᠠᠪᠤᠭᠠᠳ ᠢᠷᠡ ᠭᠡᠵᠦ ᠡᠴᠢᠭᠡ ᠬᠡᠯᠡᠬᠦ ᠳ᠋ᠦ᠍ ᠪᠦᠰᠡᠭᠦᠢ ᠭᠣᠳ ᠦᠰᠦᠷᠦᠨ ᠭᠠᠷᠪᠠ᠃ ᠲᠡᠭᠦᠰᠬᠡᠨ ᠬᠠ ᠪᠠᠷᠢᠵᠤ ᠢᠷᠡᠮᠡᠭᠴᠡ ᠡᠴᠢᠭᠡ ᠬᠡᠳᠦᠨ ᠬᠡᠰᠡᠭ ᠪᠣᠯᠭᠠᠭᠠᠳ ᠥᠭᠴᠦ ᠡᠬᠡ ᠨᠢ᠄
— ᠮᠢᠨᠦ ᠬᠦᠦ ᠵᠡᠭᠦᠨ ᠭᠡᠷ ᠲᠦ᠍ ᠪᠠᠭᠠ ᠲᠣᠭᠣᠭᠠᠨ ᠳ᠋ᠠᠭᠠᠨ ᠴᠢᠨᠠᠴᠢᠬᠠ ᠭᠡᠵᠦ ᠪᠤᠪᠠᠲᠤᠨᠠᠪᠠ᠃ ᠣᠷᠣᠢ ᠶ᠋ᠢᠨ ᠠᠵᠢᠯ ᠥᠷᠨᠢᠵᠦ ᠭᠡᠭᠦᠦ ᠪᠡᠨ ᠰᠠᠭᠠᠬᠤ ᠭᠡᠬᠦ ᠳ᠋ᠦ᠍ᠨᠢ ᠪᠤᠭᠤᠷᠴᠢ᠄
— ᠪᠢ ᠤᠨᠠᠭᠠ ᠲᠠᠲᠠᠵᠤ ᠥᠭᠭᠦᠶᠡ ᠭᠡᠪᠡᠰᠦ ᠡᠴᠢᠭᠡ᠄
— ᠵᠠ ᠲᠡᠭᠡ ᠳᠡ᠃ ᠤᠭ ᠨᠢ ᠡᠯᠴᠢ ᠵᠣᠴᠢᠨ ᠬᠥᠮᠦᠨ ᠢ᠋ ᠲᠡᠭᠡᠵᠦ ᠵᠠᠷᠤᠬᠤ ᠶᠣᠰᠣ ᠦᠭᠡᠢ ᠳᠡ᠃ ᠪᠠᠭᠠ ᠬᠥᠮᠦᠨ ᠪᠠᠢᠨᠠ᠃ ᠮᠢᠨᠦ ᠬᠦᠦ ᠬᠠᠮᠲᠤ ᠶᠠᠪᠤᠭᠠᠳ ᠭᠡᠭᠦᠦ ᠪᠡᠨ ᠰᠠᠭᠠᠭᠠᠳ ᠢᠷᠡ ᠭᠡᠪᠡ᠃ ᠢᠩᠭᠢᠭᠡᠳ ᠭᠡᠭᠦᠦ ᠶ᠋ᠢᠨ ᠵᠡᠯᠡ ᠤᠷᠤᠭᠤ ᠲᠡᠭᠦᠰᠬᠡᠨ ᠲᠡᠢ ᠬᠠᠮᠲᠤ ᠶᠠᠪᠤᠬᠤ ᠰᠢᠯᠲᠠᠭ ᠭᠠᠷᠴᠤ᠂ ᠲᠡᠷᠡ ᠪᠦᠰᠡᠭᠦᠢ ᠲᠡᠮᠦᠵᠢᠨ ᠦ᠌ ᠬᠢᠨ ᠢ᠋ ᠰᠤᠷᠠᠭᠯᠠᠵᠤ ᠪᠦᠭᠦᠳᠡ ᠶ᠋ᠢ ᠨᠡᠷᠡ ᠵᠢᠰᠦ ᠪᠡᠷ ᠨᠢ ᠨᠡᠷᠡᠯᠡᠵᠦ᠂ ᠰᠠᠯᠵᠤ ᠨᠡᠭᠦᠬᠦ ᠦᠶᠡ ᠳ᠋ᠦ᠍ ᠥᠪᠡᠷ ᠢ᠋ᠶ᠋ᠡᠨ ᠨᠠᠢ᠍ᠮᠠᠨ ᠨᠠᠰᠤ ᠲᠠᠢ ᠪᠠᠢᠭᠰᠠᠨ ᠭᠡᠪᠡ᠃ ᠲᠡᠮᠦᠵᠢᠨ᠂ ᠪᠡᠯᠭᠦᠳᠡᠢ᠂ ᠬᠠᠰᠠᠷ ᠢ᠋ ᠡᠬᠡᠨᠡᠷ ᠠᠪᠤᠭᠰᠠᠨ ᠤᠤ? ᠭᠡᠬᠦ ᠵᠡᠷᠭᠡ ᠶᠡᠷᠦ ᠠᠮᠠ ᠬᠠᠭᠤᠷᠠᠢ ᠪᠠᠢᠬᠤ ᠦᠭᠡᠢ ᠱᠤᠯᠤᠭᠠᠨᠠᠭᠠᠳ ᠰᠢᠯᠭᠠᠭᠠᠳ᠁ ᠲᠡᠭᠡᠵᠦ ᠲᠡᠭᠡᠵᠦ ᠨᠢᠭᠡ ᠵᠠᠪ ᠲᠤᠨᠢ ᠪᠣᠭᠣᠷᠴᠢ᠄
— ᠲᠠᠨ ᠤ᠋ ᠠᠬᠠ ᠬᠠᠮᠢᠭᠠ ᠶᠠᠪᠤᠭᠰᠠᠨ ᠬᠥᠮᠦᠨ ᠪᠣᠢ? ᠭᠡᠵᠦ ᠠᠰᠠᠭᠤᠯᠠ᠃
— ᠮᠠᠨ ᠤ᠋ ᠠᠬᠠ ᠤᠤ? ᠬᠡᠯᠡᠬᠦ ᠳ᠋ᠦ᠍ ᠬᠡᠴᠡᠭᠦᠦ᠃ ᠵᠠ ᠶᠠᠭᠠᠬᠢᠪᠠ᠂ ᠬᠡᠯᠡᠵᠦ ᠥᠭᠭᠦᠨᠡ᠃
— ᠵᠠ ᠰᠣᠨᠣᠰᠤᠶᠠ᠃ ᠬᠡᠯᠡᠭᠡᠴᠢ ᠳᠡ᠂
— ᠴᠢᠮᠠᠲᠤ ᠲᠡᠢᠮᠦ ᠴᠢᠬᠤᠯᠠ ᠤᠤ?
— ᠴᠢᠬᠤᠯᠠ᠂ ᠲᠡᠮᠦᠵᠢᠨ ᠡᠵᠡᠨ ᠦ᠌ ᠳᠠᠭᠠᠭᠠᠯᠭᠠᠪᠤᠷᠢ᠂ ᠮᠡᠳᠡᠵᠦ ᠣᠴᠢᠬᠤ ᠶᠣᠰᠣᠲᠠᠢ ᠰᠢᠦ ᠳᠡ᠃
— ᠵᠠ᠂ ᠵᠠ᠃ ᠲᠡᠭᠡᠵᠦ ᠪᠠᠢᠭᠠᠳ ᠬᠡᠯᠡᠵᠦ ᠥᠭᠭᠦᠨᠡ᠃
ᠢᠩᠭᠢᠵᠦ ᠬᠥᠩᠬᠥᠷ ᠭᠠᠩᠭᠠᠷ ᠭᠡᠵᠦ ᠪᠠᠢᠲᠠᠯᠠ ᠵᠢᠷᠭᠤᠭᠠᠬᠠᠨ ᠭᠡᠭᠦᠦ ᠳᠣᠣᠷᠠᠬᠠᠨ ᠢ᠋ᠶ᠋ᠠᠨ ᠰᠠᠭᠠᠵᠤ ᠪᠠᠷᠠᠭᠠᠳ ᠪᠤᠴᠠᠬᠤ ᠪᠣᠯᠪᠠ᠃ ᠭᠡᠷ ᠲᠦ᠍ ᠣᠷᠣᠵᠤ ᠪᠦᠭᠦᠳᠡ ᠴᠤᠭᠯᠠᠷᠠᠵᠤ ᠬᠣᠭᠣᠯᠠ ᠢᠳᠡᠬᠦ ᠪᠣᠯᠵᠤ ᠪᠣᠭᠣᠷᠴᠢ ᠳ᠋ᠤ᠌ ᠳᠠᠯᠤ᠂ ᠳᠥᠷᠪᠡᠨ ᠥᠨᠳᠥᠷ ᠲᠠᠯᠪᠢᠵᠤ ᠬᠦᠨᠳᠦᠯᠡᠪᠡ᠃ ᠪᠣᠭᠣᠷᠴᠢ ᠭᠠᠢᠬᠠᠵᠤ ᠮᠢᠬᠠᠨ ᠳ᠋ᠤ᠌ ᠭᠠᠷ ᠬᠦᠷᠴᠦ ᠴᠢᠳᠠᠬᠤ ᠦᠭᠡᠢ ᠬᠠᠷᠠᠭᠠᠳ ᠰᠠᠭᠤᠵᠤ ᠪᠠᠢᠲᠠᠯᠠ ᠭᠡᠷ ᠦ᠋ᠨ ᠡᠵᠡᠨ᠄
— ᠲᠠ ᠬᠣᠭᠣᠯᠠ ᠪᠠᠨ ᠵᠣᠭᠣᠭᠯᠠ ᠭᠡᠵᠦ ᠭᠡᠷ ᠳᠡᠯᠭᠡᠨ ᠶᠣᠰᠣᠷᠬᠠᠪᠠ᠃
— ᠠᠪᠤ ᠰᠢᠭ᠋ ᠢ᠋ᠶ᠋ᠡᠨ ᠬᠥᠮᠦᠨ ᠦ᠌ ᠳᠡᠷᠭᠡᠳᠡ ᠳᠠᠯᠤ ᠪᠠᠷᠢᠵᠤ ᠶᠠᠭᠠᠬᠢᠵᠤ ᠪᠣᠯᠬᠤ ᠪᠣᠢ? ᠭᠡᠵᠦ ᠪᠣᠭᠣᠷᠴᠢ ᠶ᠋ᠢ ᠬᠡᠯᠡᠬᠦ ᠳ᠋ᠦ᠍ ᠰᠢᠯᠦᠬᠡᠢ《ᠬᠡ᠂ ᠬᠡ》 ᠭᠡᠵᠦ ᠢᠨᠢᠶᠡᠭᠡᠳ᠄
— ᠲᠠᠨ ᠢ᠋ ᠳᠡᠭᠡᠳᠦ ᠡᠵᠡᠨ ᠦ᠌ ᠵᠣᠴᠢᠨ ᠭᠡᠰᠡᠨ ᠶᠦᠮ ᠳᠡ᠃ ᠵᠠ ᠶᠠᠭᠠᠬᠢᠬᠤᠪ᠂ ᠪᠢ ᠭᠦᠨᠳᠡᠭᠡᠳ ᠥᠭᠭᠦᠶᠡ ᠭᠡᠵᠦ ᠭᠡᠷ ᠦ᠋ᠨ ᠡᠵᠡᠨ ᠳᠠᠯᠤ ᠶ᠋ᠢ ᠠᠪᠴᠤ ᠬᠣᠶᠠᠷ ᠲᠠᠯᠠ ᠠ᠋ᠴᠠ ᠨᠢ ᠵᠦᠰᠦᠵᠦ ᠠᠮᠰᠠᠨ ᠬᠠᠭᠤᠳᠠᠰᠤᠨ ᠳᠠᠭᠠᠤ ᠨᠢᠮᠭᠡᠨ ᠡᠯᠡᠵᠦ ᠣᠭᠲᠣᠯᠵᠤ ᠠᠪᠤᠭᠠᠳ ᠪᠣᠭᠣᠷᠴᠢ᠂ ᠭᠡᠷᠭᠡᠢ᠂ ᠥᠬᠢᠨ ᠭᠤᠷᠪᠠ ᠳ᠋ᠠᠭᠠᠨ ᠬᠤᠪᠢᠶᠠᠵᠤ ᠥᠭᠭᠦᠭᠡᠳ᠄
— ᠵᠠ᠂ ᠣᠳᠣ ᠪᠣᠯᠤᠨᠠ᠂ ᠬᠦᠦ ᠮᠢᠨᠢ ᠢᠳᠡ᠂ ᠢᠳᠡ ᠭᠡᠬᠦ ᠳ᠋ᠦ᠍ ᠪᠣᠭᠣᠷᠴᠢ ᠮᠢᠬᠠ ᠶ᠋ᠢ ᠨᠢᠮᠭᠡᠨ ᠨᠢᠮᠭᠡᠨ ᠡᠯᠡᠵᠦ ᠢᠳᠡᠵᠦ ᠡᠬᠢᠯᠡᠪᠡ᠃ ᠡᠨᠡ ᠲᠡᠷᠡᠬᠡᠨ ᠶᠠᠷᠢᠵᠤ᠂ ᠲᠡᠭᠦᠰᠬᠡᠨ ᠭᠡᠷ ᠦ᠋ᠨ ᠬᠣᠢᠭᠤᠷ ᠵᠠᠰᠠᠭᠰᠠᠨ ᠬᠥᠯ ᠲᠡᠢ ᠣᠷᠣ ᠰᠠᠨᠳᠠᠢᠯᠠᠨ ᠪᠠᠷᠤᠭ ᠪᠣᠭᠣᠷᠴᠢ ᠶ᠋ᠢᠨ ᠠᠷᠤ ᠳ᠋ᠤ᠌ ᠰᠠᠭᠤᠵᠤ ᠪᠠᠢᠲᠠᠯᠠ ᠡᠵᠡᠭᠲᠡᠢ ᠡᠷᠭᠢᠨᠡᠭ ᠦ᠋ᠨ ᠳᠡᠭᠡᠭᠦᠷ ᠭᠠᠷ ᠢ᠋ᠶ᠋ᠠᠨ ᠶᠠᠪᠤᠭᠤᠯᠵᠤ ᠸᠠᠭᠠᠷ ᠰᠠᠪᠠ ᠲᠠᠢ ᠶᠠᠭᠤᠮᠠ ᠭᠠᠷᠭᠠᠵᠤ ᠬᠣᠶᠠᠷ ᠮᠥᠩᠭᠥᠨ ᠠᠶᠠᠭᠠᠨ ᠳ᠋ᠤ᠌ ᠰᠥᠩᠨᠡᠵᠦ ᠨᠢᠭᠡ ᠶ᠋ᠢ ᠨᠢ ᠨᠥᠬᠥᠷ ᠲᠡᠭᠡᠨ᠂ ᠨᠥᠭᠦᠭᠡ ᠶ᠋ᠢ ᠨᠢ《ᠪᠣᠭᠣᠷᠴᠢ ᠳ᠋ᠤ᠌ ᠥᠭ》 ᠭᠡᠵᠦ ᠲᠡᠭᠦᠰᠬᠡᠨ ᠳ᠋ᠦ᠍ ᠬᠡᠯᠡᠬᠦ ᠳ᠋ᠦ᠍ ᠲᠡᠷᠡ ᠪᠡᠷ ᠤᠬᠤᠰᠬᠢᠨ ᠪᠣᠰᠴᠤ ᠴᠡᠯᠡᠯᠵᠡᠲᠡᠯᠡ ᠬᠢᠭᠰᠡᠨ ᠰᠠᠷᠬᠤᠳ ᠡᠮᠦᠨᠡ ᠨᠢ ᠢᠷᠡᠵᠦ ᠪᠠᠷᠢᠪᠠᠰᠤ ᠳᠣᠲᠣᠷᠠ ᠨᠢ ᠪᠦᠰᠡᠭᠦᠢ ᠶ᠋ᠢᠨ ᠢᠨᠢᠶᠡᠮᠰᠦᠭᠯᠡᠭᠰᠡᠨ ᠳᠦᠷᠢ ᠲᠣᠳᠣ ᠲᠣᠰᠣᠨ ᠬᠠᠷᠠᠭᠳᠠᠵᠤ᠂ ᠲᠡᠭᠦᠨ ᠢ᠋ ᠲᠣᠰᠣᠨ ᠠᠪᠤᠭᠠᠳ ᠪᠠᠯᠭᠤᠬᠤ ᠳ᠋ᠤ᠌ ᠲᠡᠷᠲᠡᠭᠡ ᠨᠢᠭᠡᠨ ᠵᠡᠭᠦᠳᠦ ᠰᠠᠨᠠᠭᠠᠨ ᠳ᠋ᠤᠨᠢ ᠣᠷᠣᠵᠠᠢ᠃ ᠠᠪᠤᠭᠠᠳ ᠬᠠᠷᠠᠲᠠᠯᠠ ᠥᠪᠡᠷ ᠦ᠋ᠨ ᠬᠢᠨᠢ ᠳᠦᠷᠰᠦ ᠲᠣᠰᠴᠢᠬᠠᠪᠠ᠃ ᠪᠣᠭᠣᠷᠴᠢ ᠪᠠᠭᠠ ᠪᠠᠭᠠ ᠰᠢᠮᠡᠨ ᠤᠤᠭᠤᠵᠤ ᠪᠠᠢᠲᠠᠯᠠ ᠠᠷᠤ ᠳ᠋ᠤᠨᠢ ᠰᠠᠭᠤᠭᠠ ᠲᠡᠭᠦᠰᠬᠡᠨ ᠥᠪᠡᠷ ᠲᠡᠢ ᠨᠢ ᠵᠡᠷᠭᠡᠴᠡᠨ ᠦᠵᠡᠭᠳᠡᠬᠦ ᠨᠢ ᠠᠷᠢᠬᠢ ᠶ᠋ᠢ ᠪᠦᠷ ᠠᠮᠲᠠ ᠣᠷᠣᠭᠤᠯᠴᠢᠬᠠᠬᠤ ᠰᠢᠭ᠋᠃ ᠪᠣᠭᠣᠷᠴᠢ ᠪᠦᠷ ᠵᠣᠷᠢᠭ ᠣᠷᠣᠨ ᠬᠥᠨᠲᠥᠷᠴᠢᠬᠡᠯᠡ᠃ ᠳᠣᠲᠣᠷᠠ ᠬᠠᠯᠠᠭᠤ ᠰᠢᠲᠠᠭᠠᠳ ᠮᠠᠨᠠᠯᠵᠠᠭᠠᠳ ᠲᠤᠩ ᠴᠤ᠌ ᠰᠣᠨᠢᠨ ᠠᠵᠤᠭᠤ᠃
ᠪᠠᠭᠠ ᠵᠢᠭᠠᠬᠠᠨ ᠶᠠᠷᠢᠶᠠ ᠬᠥᠭᠡᠷᠦᠭᠡ ᠪᠣᠯᠵᠤ ᠲᠡᠭᠡᠰᠬᠢᠭᠡᠳ ᠤᠨᠲᠠᠵᠤ ᠬᠡᠪᠲᠡᠬᠦ ᠪᠣᠯᠤᠭᠠᠳ ᠲᠡᠭᠦᠰᠬᠡᠨ ᠥᠪᠡᠷ ᠦ᠋ᠨ ᠰᠠᠨᠳᠠᠢᠯᠠᠵᠤ ᠰᠠᠭᠤᠭᠰᠠᠨ ᠣᠷᠣᠨ ᠳ᠋ᠤ᠌ ᠬᠣᠨᠣᠴᠠ ᠳ᠋ᠤ᠌ ᠣᠷᠣ ᠵᠠᠰᠠᠯᠠ᠃ ᠭᠡᠷ ᠦ᠋ᠨ ᠡᠵᠡᠨ ᠬᠣᠨᠣᠴᠠ ᠶ᠋ᠢ ᠳᠠᠭᠠᠭᠤᠯᠤᠨ ᠭᠠᠷᠴᠤ ᠭᠡᠷ ᠡᠴᠡ ᠣᠷᠣᠭᠰᠢ ᠵᠠᠢᠳᠠᠭᠤᠬᠠᠨ ᠶᠠᠪᠤᠵᠤ ᠪᠡᠶᠡ ᠬᠥᠩᠭᠡᠯᠡᠭᠦᠯᠦᠭᠡᠳ ᠣᠷᠣᠵᠤ ᠢᠷᠡᠬᠦ ᠳ᠋ᠦ᠍ ᠪᠠᠷᠠᠭᠤᠨ ᠵᠡᠭᠦᠨ ᠣᠷᠣ ᠴᠤ᠌ ᠵᠠᠰᠠᠭᠳᠠᠵᠠᠢ᠃ ᠬᠣᠶᠠᠷ ᠡᠷᠡ ᠨᠢᠭᠡ ᠨᠢᠭᠡ ᠣᠷᠣ ᠡᠵᠡᠯᠡᠨ ᠬᠡᠪᠲᠡᠭᠡᠳ ᠠᠪᠤᠯᠠ᠃ ᠡᠬᠡ ᠥᠬᠢᠨ ᠬᠣᠶᠠᠷ ᠭᠠᠷᠴᠤ ᠣᠷᠣᠨ ᠣᠷᠣᠢ ᠶ᠋ᠢᠨ ᠰᠦ ᠰᠠᠭᠠᠯᠢ ᠶ᠋ᠢᠨ ᠠᠵᠢᠯ ᠢ᠋ ᠠᠮᠵᠢᠭᠤᠯᠵᠤ᠂ ᠪᠣᠭᠣᠷᠴᠢ ᠪᠢᠴᠢᠬᠠᠨ ᠠᠷᠢᠬᠢᠨ ᠳ᠋ᠠᠭᠠᠨ ᠪᠡᠶᠡ ᠪᠠᠳᠠᠢᠷᠠᠰᠬᠢᠵᠤ ᠴᠢᠮᠡᠭᠡ ᠴᠢᠩᠨᠠᠨ ᠵᠡᠭᠦᠷᠮᠡᠭᠯᠡᠵᠦ ᠪᠠᠢᠲᠠᠯᠠ ᠭᠡᠷᠡᠯ ᠤᠨᠲᠠᠷᠠᠵᠤ ᠡᠬᠡ ᠡᠷᠡ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠬᠠᠵᠠᠭᠤ ᠪᠠᠷ᠂ ᠥᠬᠢᠨ ᠵᠡᠭᠦᠨ ᠣᠷᠣ ᠤᠷᠤᠭᠤ ᠣᠷᠣᠭᠰᠠᠨ ᠵᠡᠷᠭᠡ ᠶ᠋ᠢ ᠮᠡᠳᠡᠷᠡᠵᠦ ᠬᠡᠪᠲᠡᠲᠡᠯᠡ᠁
ᠬᠠᠷᠠᠩᠭᠤᠢ! ᠬᠠᠷᠠᠩᠭᠤᠢ ᠶ᠋ᠢᠨ ᠳᠤᠮᠳᠠ
ᠬᠠᠮᠢᠭᠠ ᠨᠢᠭᠡᠲᠡᠢ ᠭᠡᠷᠡᠯ ᠪᠠᠢᠨᠠ ᠤᠤ?
ᠬᠠᠯᠠᠭᠤᠨ ᠢᠯᠴᠢ ᠲᠥᠭᠡᠨᠡᠭᠡᠳ ᠪᠠᠢᠨᠠ
ᠣᠯᠳᠠᠭ ᠬᠡᠷᠡᠭ ᠠ᠋! ᠣᠯᠳᠠᠭ ᠬᠡᠷᠡᠭ
ᠣᠢᠷᠠᠳᠬᠤ ᠲᠣᠰᠤᠮ ᠬᠠᠯᠠᠭᠤᠨ ᠪᠠᠢᠨᠠ
ᠣᠪᠣᠯᠵᠠᠬᠤ ᠵᠢᠷᠦᠬᠡ ᠬᠠᠯᠠᠰᠢᠷᠠᠭᠠᠳ ᠪᠠᠢᠨᠠ
ᠬᠠᠵᠠᠭᠤ ᠳ᠋ᠤᠨᠢ ᠣᠴᠢᠬᠤ ᠴᠤ᠌ ᠣᠴᠢᠯᠠ
ᠬᠠᠯᠠᠭᠤᠨ ᠴᠤ᠌ ᠶᠤᠮ ᠰᠢᠭ᠋᠂
ᠬᠠᠯᠠᠲᠠᠢ ᠴᠤ᠌ ᠶᠤᠮ ᠰᠢᠭ᠋
ᠬᠠᠳᠬᠤᠭᠠᠳ ᠠᠪᠬᠤ ᠪᠣᠯᠪᠠᠤ?
ᠬᠠᠵᠠᠭᠠᠳ ᠠᠪᠬᠤ ᠪᠣᠯᠪᠠᠤ?
ᠶᠠᠭᠠᠬᠢᠳᠠᠭ ᠪᠣᠯ?
ᠬᠥᠨᠵᠢᠯᠡ ᠶ᠋ᠢᠨ ᠰᠡᠵᠢᠭᠦᠷ ᠢ᠋ ᠨᠢ ᠰᠡᠬᠦᠯᠡ
ᠬᠥᠬᠢᠭᠦᠨ ᠠᠮᠢᠰᠬᠤᠭᠠ ᠤᠭᠲᠤᠯᠠ
ᠡᠪᠦᠷ ᠲᠦ᠍ ᠨᠢ ᠣᠷᠣᠬᠤ ᠶ᠋ᠢᠨ ᠴᠠᠭ ᠲᠤ᠌
ᠣᠩᠭᠣᠨ ᠪᠡᠶᠡ ᠨᠢ ᠭᠠᠢᠬᠠᠮᠰᠢᠭ
ᠡᠵᠡᠯᠡᠭᠡᠳ ᠠᠪᠬᠤ ᠶ᠋ᠢᠨ ᠴᠠᠭ ᠲᠤ᠌
ᠡᠨᠡ ᠬᠣᠷᠸᠠ ᠮᠢᠨᠦᠬᠢ! ᠨᠢᠭᠡ ᠮᠡᠳᠡᠭᠰᠡᠨ ᠨᠢ ᠥᠷᠯᠥᠭᠡ ᠪᠣᠯᠤᠭᠠᠳ ᠨᠠᠷᠠ ᠭᠠᠷᠤᠭᠰᠠᠨ ᠪᠠᠢᠵᠠᠢ᠃ ᠪᠤᠭᠤᠷᠴᠢ ᠥᠨᠳᠡᠢᠵᠦ ᠭᠠᠷᠪᠠᠯ ᠭᠡᠷ ᠲᠦ᠍ ᠬᠥᠮᠦᠨ ᠠᠯᠠᠭᠠ᠂ ᠭᠠᠭᠴᠠᠭᠠᠷ ᠦᠯᠡᠳᠡᠵᠡᠢ᠃
ᠪᠣᠰᠤᠨ ᠬᠠᠷᠠᠢᠵᠤ ᠬᠤᠪᠴᠠᠰᠤᠯᠠᠭᠠᠳ ᠭᠠᠳᠠᠭᠰᠢ ᠭᠠᠷᠬᠤ ᠳ᠋ᠠᠭᠠᠨ ᠢᠴᠢᠬᠦ ᠶ᠋ᠢᠨ ᠶᠡᠬᠡ ᠪᠡᠷ ᠢᠴᠢᠪᠡ᠃ ᠡᠬᠡ ᠥᠬᠢᠨ ᠪᠣᠯᠤᠨ ᠬᠣᠢᠲᠤ ᠭᠡᠷ ᠦ᠋ᠨ ᠬᠡᠦᠬᠡᠳ ᠭᠤᠷᠪᠠ ᠦᠨᠢᠶᠡᠨ ᠵᠠᠯᠠᠨ ᠳᠡᠭᠡᠷᠡ ᠬᠠᠷᠠᠭᠳᠠᠨᠠ᠃ ᠬᠣᠨᠢ ᠵᠡᠭᠦᠨ ᠡᠮᠦᠨᠡ ᠵᠦᠭ ᠪᠡᠯᠴᠢᠭᠡᠷᠯᠡᠨ ᠭᠠᠷᠴᠤ᠂ ᠡᠴᠢᠭᠡ ᠠᠳᠤᠭᠤ ᠪᠠᠨ ᠬᠣᠷᠢᠶᠠᠨ ᠢᠷᠡᠵᠦ ᠠᠪᠠᠢ᠃ ᠪᠤᠭᠤᠷᠴᠢ ᠭᠡᠭᠦᠦ ᠶ᠋ᠢᠨ ᠵᠡᠯᠡ ᠲᠠᠢᠰᠢ ᠣᠴᠢᠵᠤ ᠡᠴᠢᠭᠡ ᠲᠡᠢ ᠨᠢ ᠬᠠᠮᠵᠢᠯᠴᠠᠨ ᠤᠨᠠᠭᠠ ᠪᠠᠷᠢᠯᠴᠠᠨ ᠤᠶᠠᠭᠠᠳ ᠭᠡᠷ ᠲᠦ᠍ ᠣᠷᠣᠪᠠ᠃ ᠲᠤᠯᠭᠠᠨ ᠤ᠋ ᠬᠣᠢᠲᠤ ᠬᠢ ᠨᠠᠮᠬᠠᠨ ᠲᠠᠯᠪᠢᠭᠤᠷ ᠳᠡᠭᠡᠷᠡ ᠳᠣᠮᠪᠣ ᠲᠠᠢ ᠴᠠᠢ ᠠ᠋ᠴᠠ ᠠᠭᠤᠷ ᠰᠠᠪᠰᠠᠵᠤ᠂ ᠠᠶᠠᠭᠠᠨ ᠳ᠋ᠤ᠌ ᠬᠢᠵᠦ ᠲᠠᠯᠪᠢᠭᠰᠠᠨ ᠥᠷᠥᠮᠡ ᠲᠡᠢ ᠬᠤᠳᠬᠤᠰᠢ ᠡᠵᠡᠨ ᠢ᠋ᠶ᠋ᠡᠨ ᠬᠦᠯᠢᠶᠡᠨ ᠪᠠᠢᠨᠠ᠃ ᠶᠡᠬᠡ ᠪᠠᠭᠠ ᠬᠣᠶᠠᠷ ᠡᠷᠡ ᠴᠠᠢ ᠠᠶᠠᠭᠠᠯᠠᠨ ᠤᠤᠭᠤᠵᠤ ᠰᠠᠭᠤᠲᠠᠯᠠ ᠡᠬᠡ ᠥᠬᠢᠨ ᠬᠣᠶᠠᠷ ᠴᠤ᠌ ᠣᠷᠣᠵᠤ ᠢᠷᠡᠯᠡ᠃ ᠪᠦᠭᠦᠳᠡ ᠴᠤᠭᠯᠠᠷᠠᠵᠤ ᠴᠠᠢ ᠤᠤᠭᠤᠵᠤ ᠰᠠᠭᠤᠬᠤ ᠵᠠᠭᠤᠷᠠ ᠰᠢᠯᠦᠬᠡᠢ᠄
— ᠡᠯᠴᠢ ᠬᠦᠦ ᠥᠨᠥ ᠶᠠᠪᠤᠬᠤ ᠤᠤ? ᠥᠨᠵᠢᠬᠦ ᠤᠤ? ᠭᠡᠳ ᠪᠣᠳᠣᠯᠭᠠᠰᠢᠷᠠᠨ《ᠲᠡᠷᠡ ᠲᠡᠮᠦᠵᠢᠨ ᠡᠨᠡ ᠬᠦᠦ ᠶ᠋ᠢ ᠡᠢᠰᠢ ᠶᠠᠪᠤᠭᠤᠯᠳᠠᠭ ᠨᠢ ᠨᠢᠭᠡ ᠯᠡ ᠤᠴᠢᠷ ᠪᠣᠢ᠃ ᠮᠠᠨ ᠤ᠋ ᠬᠦᠦ ᠶ᠋ᠢᠨ ᠲᠤᠬᠠᠢ ᠮᠡᠳᠡᠭᠰᠡᠨ ᠴᠦ᠍ ᠪᠠᠢᠵᠤ ᠪᠣᠯᠤᠨᠠ᠃ ᠦᠭᠡᠢ ᠴᠦ᠍ ᠪᠠᠢᠵᠤ ᠪᠣᠯᠤᠨᠠ᠃ ᠲᠡᠷᠡ ᠶᠠᠭᠠᠬᠢᠬᠤ ᠪᠣᠢ? ᠡᠨᠡ ᠬᠦᠦ ᠨᠢᠭᠡ ᠯᠡ ᠤᠴᠢᠷ ᠲᠠᠢ ᠢᠷᠡᠭᠰᠡᠨ ᠪᠠᠢᠵᠤ ᠲᠠᠭᠠᠷᠠᠨᠠ》 ᠭᠡᠵᠦ ᠪᠣᠳᠣᠭᠠᠳ᠄
— ᠥᠨᠵᠢ᠂ ᠥᠨᠵᠢ᠃ ᠮᠠᠨ ᠤ᠋ ᠥᠬᠢᠨ ᠲᠡᠢ ᠭᠣᠣᠯ ᠤ᠋ᠨ ᠪᠠᠷᠠᠭᠤᠨ ᠠᠭᠤᠯᠠ ᠠᠷᠤᠯᠠᠵᠤ ᠶᠠᠪᠤ᠃ ᠪᠣᠷᠣ ᠲᠣᠪᠴᠠᠭ ᠳᠡᠭᠡᠷᠡ ᠭᠠᠷᠲᠠᠯᠠ ᠠᠢᠯ ᠤ᠋ᠳ ᠪᠠᠷᠤᠭ ᠯᠠ ᠪᠦᠭᠦᠳᠡ ᠬᠠᠷᠠᠭᠳᠠᠨᠠ᠃ ᠲᠡᠭᠦᠰᠬᠡᠨ ᠴᠢ ᠬᠡᠯᠡᠵᠦ ᠥᠭ᠃ ᠲᠡᠭᠡᠭᠡᠳ ᠲᠠ ᠬᠣᠶᠠᠷ ᠭᠣᠣᠯ ᠤᠷᠤᠭᠤ ᠣᠷᠣᠵᠤ ᠮᠣᠢᠯ᠂ ᠪᠠᠵᠠᠭᠤᠨᠠ᠂ ᠮᠡᠬᠡᠷ ᠲᠡᠭᠦ ᠯᠡ ᠳᠡ᠃ ᠮᠠᠨ ᠤ᠋ ᠥᠬᠢᠨ ᠬᠠᠨᠢ ᠡᠷᠢᠭᠡᠳ ᠯᠡ ᠭᠣᠣᠯ ᠤᠷᠤᠭᠤ ᠶᠠᠪᠤᠵᠤ ᠴᠢᠳᠠᠬᠤ ᠦᠭᠡᠢ᠁ ᠭᠡᠪᠡ᠃ ᠲᠡᠭᠦᠰᠬᠡᠨ ᠡᠨᠡ ᠦᠭᠡ ᠶ᠋ᠢ ᠡᠴᠢᠭᠡ ᠡᠴᠡ ᠰᠣᠨᠣᠰᠤᠭᠠᠳ ᠢᠴᠢᠬᠦ᠂ ᠪᠠᠶᠠᠷᠯᠠᠬᠤ ᠵᠡᠷᠭᠡᠴᠡᠨ ᠨᠢᠷᠤᠭᠤ ᠪᠠᠷ ᠨᠢ ᠬᠥᠯᠥᠰᠥ ᠳ᠋ᠡᠭᠠᠨ ᠭᠦᠶᠦᠬᠦ ᠰᠢᠭ ᠪᠣᠯᠪᠠ᠃ ᠡᠴᠢᠭᠡ᠄
— ᠵᠠ᠂ ᠪᠢ ᠮᠣᠷᠳᠠᠯᠠ᠃ ᠨᠠᠮᠠ ᠶ᠋ᠢ ᠳᠠᠭᠤᠳᠠᠭᠤᠯᠤᠭᠰᠠᠨ ᠪᠠᠢᠨᠠ᠃ ᠲᠠ ᠬᠣᠶᠠᠷ ᠲᠡᠭᠡᠰᠬᠢᠭᠡᠳ ᠶᠠᠪᠤ ᠳᠠ᠃ ᠲᠦᠳᠡᠯ ᠦᠭᠡᠢ ᠲᠡᠳᠡ ᠬᠣᠶᠠᠷ ᠮᠣᠷᠳᠠᠯᠠ᠃ ᠳᠠᠪᠬᠢᠬᠤ ᠳ᠋ᠠᠭᠠᠨ ᠳᠠᠪᠬᠢᠵᠤ ᠰᠠᠵᠢᠯᠠᠬᠤ ᠳ᠋ᠠᠭᠠᠨ ᠰᠠᠵᠢᠯᠠᠵᠤ ᠶᠠᠪᠤᠬᠤ ᠳ᠋ᠠᠭᠠᠨ ᠲᠡᠭᠦᠰᠬᠡᠨ ᠨᠢᠳᠦᠨ ᠳ᠋ᠦ᠍ ᠥᠷᠲᠥᠬᠦ ᠬᠠᠷᠠᠭᠳᠠᠬᠤ ᠠᠢᠯ᠂ ᠭᠠᠵᠠᠷ ᠤᠰᠤ ᠶ᠋ᠢ ᠨᠢᠭᠡᠳ ᠨᠢᠭᠡ ᠦᠭᠡᠢ ᠨᠡᠷᠡᠯᠡᠵᠦ ᠬᠡᠯᠡᠵᠦ ᠶᠠᠪᠤᠨᠠ᠃ ᠪᠣᠭᠣᠷᠴᠢ ᠴᠤ᠌ ᠯᠠᠪᠯᠠᠵᠤ ᠠᠰᠠᠭᠤᠨ ᠲᠣᠭᠲᠠᠭᠠᠵᠤ ᠠᠪᠬᠤ ᠶ᠋ᠢ ᠴᠢᠷᠮᠠᠢᠨ ᠶᠠᠪᠤᠭᠰᠠᠭᠠᠷ ᠠᠭᠤᠯᠠ ᠶ᠋ᠢᠨ ᠦᠵᠦᠭᠦᠷ ᠦ᠋ᠨ ᠳᠣᠪᠣᠴᠠᠭ ᠳᠡᠭᠡᠷᠡ ᠭᠠᠷᠴᠤ ᠬᠣᠶᠠᠭᠤᠯᠠ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠪᠠ᠃ ᠪᠠᠷᠠᠭᠤᠨ᠂ ᠪᠠᠷᠠᠭᠤᠨ ᠬᠣᠢᠰᠢ ᠭᠠᠵᠠᠷ ᠲᠡᠯᠡᠵᠦ ᠠᠯᠤᠰ ᠤ᠋ᠨ ᠠᠢᠯ ᠬᠣᠲᠠᠯᠠ ᠶ᠋ᠢ ᠰᠠᠢᠲᠤᠷ ᠬᠠᠷᠠᠵᠤ᠂ ᠲᠡᠭᠦᠰᠬᠡᠨ ᠭᠣᠣᠯ ᠤ᠋ᠨ ᠬᠣᠢᠲᠤ ᠠᠯᠤᠰ ᠤ᠋ᠨ ᠠᠭᠤᠯᠠᠰ ᠢ᠋ ᠨᠡᠷᠡᠯᠡᠨ ᠪᠣᠭᠣᠷᠴᠢ ᠶ᠋ᠢᠨ ᠣᠢ ᠲᠣᠢᠨ ᠳ᠋ᠤ᠌ ᠶᠡᠬᠡ ᠣᠯᠠᠨ ᠢ᠋ ᠮᠡᠳᠡᠭᠦᠯᠵᠦ ᠥᠭᠭᠦᠭᠡᠳ ᠡᠮᠦᠨᠡ ᠵᠦᠭ ᠦ᠋ᠨ ᠨᠡᠯᠢᠶᠡᠳ ᠠᠯᠤᠰ ᠲᠤ᠌ ᠬᠠᠷᠠᠭᠳᠠᠬᠤ ᠬᠠᠳᠠ ᠬᠢᠰᠠᠭᠠᠲᠤ ᠠᠭᠤᠯᠠᠰ ᠢ᠋ ᠠᠵᠢᠭᠯᠠᠨ ᠰᠠᠨᠠᠭᠠ ᠠᠯᠳᠠᠵᠤ᠄
— ᠲᠡᠷᠡ ᠥᠭᠡᠳᠡ ᠯᠡ ᠮᠠᠨ ᠤ᠋ ᠮᠠᠭᠤ ᠠᠬᠠ ᠪᠠᠢᠭᠠ ᠶᠤᠮ ᠤᠤ ᠳᠠ? ᠭᠡᠬᠦ ᠳ᠋ᠦ᠍ ᠪᠣᠭᠣᠷᠴᠢ ᠶᠡᠬᠡᠳᠡ ᠱᠣᠬᠣᠭᠣᠷᠬᠠᠨ《ᠣᠳᠣ ᠯᠠ ᠬᠡᠯᠡᠨᠡ ᠭᠡᠰᠡᠨ ᠢ᠋ᠶ᠋ᠡᠨ ᠬᠡᠯᠡᠬᠦ ᠨᠢ》 ᠭᠡᠰᠡᠨ ᠰᠢᠭ᠄
— ᠲᠡᠷᠡ ᠲᠡᠭᠡᠭᠡᠳ ᠲᠡᠨᠳᠡ᠁ ᠭᠡᠪᠡᠯ ᠲᠡᠭᠦᠰᠬᠡᠨ᠄
— ᠲᠡᠨᠳᠡ ᠤᠤ? ᠬᠡᠯᠡᠬᠦ ᠳ᠋ᠦ᠍ ᠬᠡᠴᠡᠭᠦᠦ ᠯᠡ ᠶᠦᠮ ᠭᠡᠳ ᠨᠢᠳᠦᠨ ᠡᠴᠡ ᠨᠢ ᠨᠢᠯᠪᠤᠰᠤ ᠪᠥᠮᠪᠥᠷᠢᠨ ᠪᠣᠭᠣᠷᠴᠢ ᠴᠤ᠌ ᠰᠡᠳᠬᠢᠯ ᠵᠣᠪᠠᠨᠢᠵᠤ᠄《ᠬᠡᠯᠡᠵᠦ ᠪᠣᠯᠳᠠᠭ ᠦᠭᠡᠢ᠂ ᠶᠠᠭᠤ ᠭᠡᠭᠴᠢ ᠪᠣᠯᠤᠭᠰᠠᠨ ᠶᠤᠮ ᠪᠣᠯ ᠳᠠ?》 ᠭᠡᠵᠦ ᠭᠠᠢᠬᠠᠰᠢᠷᠠᠨ ᠲᠡᠭᠦᠨ ᠦ᠌ ᠠᠮᠠ ᠶ᠋ᠢ ᠬᠠᠷᠠᠵᠤ ᠰᠠᠭᠤᠪᠠ᠃ ᠲᠡᠭᠦᠰᠬᠡᠨ ᠰᠠᠨᠠᠭᠠ ᠠᠯᠳᠠᠵᠤ ᠨᠢᠯᠪᠤᠰᠤ ᠪᠠᠨ ᠭᠠᠷ ᠤ᠋ᠨ ᠠᠯᠠᠭᠠ ᠪᠠᠷ ᠢ᠋ᠶ᠋ᠠᠨ ᠢᠯᠢᠵᠦ ᠠᠷᠴᠢᠭᠠᠳ᠄
— ᠲᠡᠷᠡ᠂ ᠬᠥᠮᠦᠨ ᠢᠳᠡᠳᠡᠭ ᠮᠢᠬᠠᠴᠢᠨ ᠨᠤᠭᠤᠳ ᠲᠠᠢ ᠨᠡᠢᠯᠡᠭᠰᠡᠨ ᠭᠡᠨᠡ ᠭᠡᠪᠡ᠃ ᠪᠣᠭᠣᠷᠴᠢ ᠶ᠋ᠢᠨ ᠳᠣᠲᠣᠷᠠ ᠰᠡᠷᠰ ᠬᠢᠨ ᠰᠣᠴᠢᠵᠤ᠄
— ᠶᠠᠭᠠᠬᠢᠭᠰᠠᠨ ᠬᠠᠴᠢᠨ ᠶᠠᠭᠤᠮᠠ ᠪᠣᠢ? ᠲᠡᠭᠡᠵᠦ ᠪᠣᠯᠤᠨᠠ ᠭᠡᠵᠦ ᠤᠤ? ᠲᠡᠢᠮᠦ ᠶᠠᠭᠤᠮᠠ ᠪᠠᠢᠵᠤ ᠲᠠᠭᠠᠷᠠᠬᠤ ᠦᠭᠡᠢ ᠭᠡᠵᠦ ᠭᠠᠢᠬᠠᠰᠢᠷᠠᠨ ᠱᠠᠭᠰᠢᠷᠠᠪᠠ᠃
— ᠪᠠᠢᠳᠠᠭ ᠶᠤᠮ ᠪᠠᠢᠨᠠ᠃ ᠪᠠᠢᠬᠤ ᠪᠠᠢᠬᠤ ᠳ᠋ᠠᠭᠠᠨ ᠮᠠᠨ ᠤ᠋ ᠠᠬᠠ᠁ ᠭᠡᠬᠦ ᠳ᠋ᠦ᠍ ᠪᠣᠭᠣᠷᠴᠢ ᠦᠭᠡ ᠶ᠋ᠢ ᠨᠢ ᠲᠠᠰᠤᠯᠤᠨ᠄ ᠵᠠ᠂ ᠵᠠ ᠭᠡᠵᠦ ᠰᠤᠯᠠᠬᠠᠨ ᠰᠢᠭ᠋ ᠬᠡᠯᠡᠭᠡᠳ《ᠶᠠᠭᠠᠬᠢᠭᠠᠳ ᠲᠡᠭᠡᠳᠡᠭ ᠶᠦᠮ ᠪᠣᠯ ᠳᠠ? ᠪᠢ ᠲᠡᠮᠦᠵᠢᠨ ᠳ᠋ᠦ᠍ ᠶᠠᠭᠤ ᠶᠠᠭᠤ ᠬᠡᠯᠡᠵᠦ ᠣᠴᠢᠨᠠ ᠪᠣᠢ? 》 ᠭᠡᠳ ᠠᠭᠤᠯᠠᠰ ᠤ᠋ᠨ ᠵᠦᠭ ᠬᠠᠷᠠᠪᠠ᠃
ᠪᠠᠷᠠᠭᠤᠨ ᠡᠮᠦᠨᠡᠲᠦ ᠠᠯᠤᠰ ᠲᠤ᠌ ᠴᠠᠢᠷᠠᠨ ᠬᠠᠷᠠᠭᠳᠠᠬᠤ ᠴᠠᠰᠤᠲᠤ ᠬᠠᠢᠷᠬᠠᠨ ᠲᠦᠩᠬᠦᠢᠨ᠂ ᠲᠡᠭᠦᠨ ᠡᠴᠡ ᠵᠡᠭᠦᠨ ᠢ᠋ᠶ᠋ᠡᠷ ᠦᠵᠡᠭᠳᠡᠬᠦ ᠰᠡᠷᠪᠡᠭᠡᠷ ᠰᠡᠷᠲᠡᠩ ᠬᠠᠷᠠ ᠠᠭᠤᠯᠠᠰ ᠬᠣᠶᠠᠷ ᠥᠩᠭᠡ ᠵᠢᠰᠦ ᠢᠯᠭᠠᠷᠠᠨ᠂ ᠡᠷᠡᠰ ᠲᠠᠰᠤ ᠠᠵᠤᠭᠤ᠃ ᠪᠣᠭᠣᠷᠴᠢ《ᠠᠢ ᠶᠠ! ᠡᠨᠡ ᠬᠠᠷᠠ ᠴᠠᠭᠠᠨ ᠤ᠋ ᠵᠠᠪᠰᠠᠷ ᠶᠡᠬᠡ ᠶᠠᠭᠤᠮᠠ ᠪᠠᠭᠲᠠᠬᠤ ᠠᠵᠤ᠃ ᠬᠥᠮᠦᠨ ᠬᠥᠮᠦᠨ ᠢ᠋ᠶ᠋ᠡᠨ ᠢᠳᠡᠬᠦ ᠭᠡᠵᠦ ᠶᠠᠭᠤ ᠭᠡᠰᠡᠨ ᠦᠭᠡ ᠪᠣᠢ? ᠦᠯᠢᠭᠡᠷ ᠲᠦ᠍ ᠮᠠᠩᠭᠤᠰ᠂ ᠮᠢᠬᠠᠴᠢᠨ ᠭᠡᠵᠦ ᠶᠠᠷᠢᠳᠠᠭ᠃ ᠠᠢ ᠶᠠ》 ᠭᠡᠵᠦ ᠪᠣᠳᠣᠯᠬᠢᠯᠠᠨ ᠬᠡᠰᠡᠭ ᠵᠠᠭᠤᠷᠠ ᠰᠠᠭᠤᠭᠠᠳ ᠲᠡᠭᠦᠰᠬᠡᠨ ᠢ᠋ ᠬᠠᠷᠠᠲᠠᠯᠠ ᠲᠡᠷᠡ ᠨᠢ ᠶᠡᠬᠡ ᠯᠡ ᠥᠷᠥᠪᠳᠦᠯᠲᠡᠢ᠂ ᠭᠤᠨᠢᠭᠲᠠᠢ᠃
ᠪᠣᠭᠣᠷᠴᠢ ᠰᠢᠭᠤᠳ ᠪᠣᠰᠴᠤ ᠲᠡᠭᠦᠰᠬᠡᠨ ᠢ᠋ ᠳᠠᠯᠤ ᠮᠥᠷᠦᠨ ᠡᠴᠡ ᠨᠢ ᠲᠡᠮᠲᠡᠷᠢᠵᠦ ᠳᠣᠭᠣᠭᠰᠢ ᠢᠯᠢᠭᠡᠳ᠄
— ᠪᠣᠰ ᠳᠠ᠂ ᠬᠣᠶᠠᠭᠤᠯᠠ ᠶᠠᠪᠤᠶᠠ ᠭᠡᠵᠦ ᠠᠷᠭᠠᠳᠠᠩᠭᠤᠢ ᠬᠡᠯᠡᠬᠦ ᠳ᠋ᠦ᠍ ᠴᠠᠭᠠᠳᠤᠬᠢ ᠨᠢ ᠪᠣᠰᠴᠤ ᠮᠣᠷᠳᠠᠨ ᠠᠭᠤᠯᠠ ᠶ᠋ᠢᠨ ᠤᠷᠤᠭᠤ ᠬᠡᠯᠲᠦᠷᠢᠭᠦᠯᠦᠨ ᠳᠣᠷᠣᠭᠰᠢ ᠪᠠᠭᠤᠪᠠ᠃
ᠨᠠᠮ ᠳ᠋ᠤ᠌ ᠣᠷᠣᠭᠠᠳ ᠰᠠᠵᠢᠯᠠᠭᠤᠯᠠᠩᠬᠠᠨ ᠭᠣᠣᠯ ᠤ᠋ᠨ ᠵᠦᠭ ᠬᠣᠶᠠᠭᠤᠯᠠ ᠳᠤᠭᠤᠢᠬᠠᠨ ᠬᠡᠯᠲᠦᠷᠢᠨᠡ᠃ ᠲᠡᠭᠦᠰᠬᠡᠨ ᠴᠤᠯᠪᠤᠭᠤᠷ ᠢ᠋ᠶ᠋ᠠᠨ ᠪᠠᠵᠠᠵᠤ ᠢᠮᠢᠴᠡᠨ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ᠄
— ᠪᠢᠩᠭᠡᠷᠡᠭᠦ ᠡᠪᠦᠯ ᠦ᠋ᠨ ᠡᠬᠢᠨ ᠰᠠᠷᠠ ᠳ᠋ᠤ᠌ ᠲᠠᠷᠭᠤᠲᠠᠢ ᠡᠵᠡᠨ ᠡᠴᠡ ᠬᠡᠳᠦ ᠬᠡᠳᠦᠨ ᠡᠯᠴᠢ ᠢᠷᠡᠵᠦ ᠡᠨᠡ ᠬᠠᠪᠢ ᠶ᠋ᠢᠨ ᠠᠢᠯ ᠠ᠋ᠴᠠ ᠵᠠᠯᠠᠭᠤᠰ ᠢ᠋ ᠴᠡᠷᠢᠭ ᠲᠦ᠍ ᠲᠠᠲᠠᠵᠤ᠂ ᠠᠯᠪᠠᠨ ᠲᠠᠲᠠᠪᠤᠷᠢ ᠮᠠᠯ ᠠᠪᠤᠭᠰᠠᠨ᠃ ᠮᠠᠨ ᠤ᠋ ᠠᠬᠠ ᠲᠡᠭᠦᠨ ᠳ᠋ᠦ᠍ ᠥᠷᠲᠥᠵᠦ ᠴᠡᠷᠢᠭ ᠲᠦ᠍ ᠶᠠᠪᠤᠬᠤ ᠪᠣᠯᠵᠤ ᠬᠥᠮᠦᠨ ᠮᠠᠯ ᠪᠥᠭᠡᠮᠨᠡᠷᠡᠬᠦ ᠦᠶᠡ ᠳ᠋ᠦ᠍ ᠣᠷᠭᠣᠴᠢᠬᠠᠭᠰᠠᠨ ᠶᠤᠮ ᠭᠡᠨᠡ ᠯᠡ᠃ ᠬᠣᠢᠨᠠ ᠠ᠋ᠴᠠ ᠨᠢ ᠡᠨᠡ ᠬᠠᠪᠢ ᠶ᠋ᠢᠨ ᠠᠭᠤᠯᠠ ᠬᠠᠳᠠ ᠪᠠᠷ ᠡᠷᠢᠵᠦ ᠣᠯᠤᠭᠠ ᠦᠭᠡᠢ ᠪᠤᠴᠠᠬᠤ ᠳ᠋ᠠᠭᠠᠨ ᠮᠠᠨ ᠤ᠋ ᠬᠢᠨ ᠡᠴᠡ ᠬᠡᠳᠦᠨ ᠮᠠᠯ ᠨᠡᠮᠡᠵᠦ ᠠᠪᠤᠭᠠᠳ ᠶᠠᠪᠤᠭᠰᠠᠨ᠃ ᠲᠡᠭᠡᠭᠡᠳ ᠯᠡ ᠠᠬᠠ ᠮᠢᠨᠢ ᠠᠯᠠᠭᠠ ᠪᠣᠯᠤᠭᠰᠠᠨ ᠶᠤᠮ ᠭᠡᠪᠡ᠃ ᠪᠣᠭᠣᠷᠴᠢ᠄
— ᠲᠡᠭᠡᠯᠡ ᠭᠡᠳ ᠮᠢᠬᠠᠴᠢᠨ ᠪᠣᠯᠬᠤ ᠭᠡᠵᠦ ᠪᠣᠢ? ᠭᠡᠬᠦ ᠳ᠋ᠦ᠍ ᠲᠡᠭᠦᠰᠬᠡᠨ᠄
— ᠲᠡᠢᠮᠦ ᠯᠡ ᠳᠡ᠃ ᠮᠠᠨ ᠤ᠋ ᠬᠢᠨ ᠴᠦ᠍ ᠲᠡᠭᠡᠵᠦ ᠶᠠᠷᠢᠳᠠᠭ ᠪᠠᠢᠭᠰᠠᠨ᠃ ᠬᠠᠪᠤᠷ ᠠ᠋ᠴᠠ《ᠠᠮᠢᠳᠤ ᠶᠠᠪᠤᠨᠠ᠃ ᠲᠡᠷᠡ ᠰᠡᠭᠦᠯ ᠦᠭᠡᠢ ᠴᠢᠨᠣᠠ ᠲᠠᠢ ᠨᠡᠢᠯᠡᠵᠡᠢ》 ᠭᠡᠬᠦ ᠶᠠᠷᠢᠶᠠ ᠭᠠᠷᠤᠭᠰᠠᠨ᠃ ᠲᠡᠭᠡᠲᠡᠯᠡ ᠵᠤᠨ ᠤ᠋ ᠡᠬᠢᠨ ᠰᠠᠷᠠ ᠳ᠋ᠤ᠌ ᠨᠢᠭᠡ ᠡᠳᠦᠷ ᠡᠵᠢ ᠪᠢᠳᠡ ᠬᠣᠶᠠᠷ ᠭᠡᠷ ᠲᠡᠭᠡᠨ ᠪᠠᠢᠲᠠᠯᠠ ᠭᠡᠨᠡᠳᠲᠡ ᠣᠷᠣᠭᠠᠳ ᠢᠷᠡᠭᠰᠡᠨ᠃ ᠶᠣᠰᠣᠲᠠᠢ ᠠᠶᠤᠮᠠᠷ ᠠᠮᠢᠲᠠᠨ! ᠡᠵᠢ《 ᠮᠢᠨᠦ ᠬᠦᠦ!》 ᠭᠡᠳ ᠲᠡᠪᠡᠷᠢᠭᠡᠳ ᠠᠪᠬᠤ ᠭᠡᠲᠡᠯᠡ ᠥᠭᠡᠳᠡ ᠡᠴᠡ ᠨᠢ ᠲᠦᠯᠬᠢᠭᠡᠳ《ᠦᠭᠡᠢ ᠠ᠋᠂ ᠨᠠᠳᠠᠳᠤ ᠪᠢᠲᠡᠭᠦᠦ ᠣᠢᠷᠠᠲᠤ !》 ᠭᠡᠬᠦ ᠡᠴᠡ ᠥᠭᠡᠷᠡ ᠶᠠᠭᠤ ᠴᠤ᠌ ᠬᠡᠯᠡᠭᠡ ᠦᠭᠡᠢ᠃ ᠡᠵᠢ ᠪᠢᠳᠡ ᠬᠣᠶᠠᠷ ᠤᠬᠢᠯᠠᠭᠰᠠᠨ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠰᠠᠭᠭᠠᠯᠲᠠ ᠠᠢᠯ ᠳ᠋ᠤ᠌ ᠲᠣᠭᠯᠠᠵᠤ ᠰᠠᠭᠤᠭᠰᠠᠨ ᠠᠪᠤ ᠮᠢᠨᠢ《ᠬᠦᠦ ᠴᠢᠨᠢ ᠢᠷᠡᠯᠡ》 ᠭᠡᠬᠦ ᠴᠢᠮᠡᠭᠡᠨ ᠢ᠋ᠶ᠋ᠡᠷ ᠶᠠᠭᠠᠷᠠᠨ ᠢᠷᠡᠪᠡ᠃ ᠬᠥᠮᠦᠰ ᠲᠠᠨᠢᠵᠤ ᠬᠠᠷᠠᠵᠤ ᠯᠠ ᠳᠠ᠃ ᠠᠪᠤ ᠣᠷᠣᠵᠤ ᠢᠷᠡᠭᠡᠳ《ᠬᠦᠦ ᠮᠢᠨᠢ᠂ ᠰᠠᠢᠨ ᠶᠠᠪᠤᠨᠠ ᠤᠤ? ᠬᠠᠮᠢᠭᠠ ᠶᠠᠭᠠᠬᠢᠵᠤ ᠯᠠ ᠶᠠᠪᠤᠨᠠ ᠳᠠ?》 ᠭᠡᠰᠡᠨ᠃ ᠲᠡᠷᠡ ᠤᠷᠢᠳᠤ ᠠ᠋ᠴᠠ ᠨᠢ ᠮᠠᠭᠤᠬᠠᠢ ᠬᠠᠷᠠᠵᠤ《ᠲᠠᠨ ᠳ᠋ᠤ᠌ ᠬᠠᠮᠢᠶᠠ ᠦᠭᠡᠢ ᠠ᠋》 ᠭᠡᠬᠦ ᠡᠴᠡ ᠥᠭᠡᠷᠡ ᠶᠠᠭᠤ ᠴᠤ᠌ ᠬᠡᠯᠡᠭᠡ ᠦᠭᠡᠢ᠃ ᠡᠵᠢ ᠲᠡᠭᠦᠨ ᠳ᠋ᠦ᠍ ᠦᠨᠢᠶᠡᠨ ᠦ᠌ ᠠᠢᠷᠠᠭ ᠠᠶᠠᠭᠠᠯᠠᠵᠤ ᠥᠭᠬᠦ ᠳ᠋ᠦ᠍ ᠦᠭᠡ ᠦᠭᠡᠢ ᠵᠠᠯᠭᠢᠯᠠᠵᠤ᠂ ᠢᠳᠡᠬᠦ ᠶᠠᠭᠤᠮᠠ ᠶ᠋ᠢ ᠪᠥᠭᠡᠮ ᠪᠥᠭᠡᠮ ᠢ᠋ᠶ᠋ᠡᠷ ᠨᠢ ᠡᠮᠬᠦᠯᠡᠵᠦ᠂ ᠶᠡᠬᠡᠯᠡ ᠬᠣᠪᠳᠣᠭ ᠬᠠᠷᠠᠭᠳᠠᠭᠰᠠᠨ ᠳᠠ᠃ ᠭᠠᠭᠴᠠᠬᠠᠨ ᠬᠡᠯᠡᠭᠰᠡᠨ ᠦᠭᠡ ᠨᠢ《ᠬᠤᠪᠴᠠᠰᠤ》 ᠭᠡᠵᠦ ᠬᠡᠰᠡᠭ ᠬᠤᠪᠴᠠᠰᠤ ᠠᠪᠴᠤ ᠶᠠᠪᠤᠬᠤ ᠳ᠋ᠤᠨᠢ《ᠢᠷᠡᠬᠦ ᠤᠤ?》 ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌《ᠮᠡᠳᠡᠬᠦ ᠦᠭᠡᠢ》 ᠭᠡᠬᠦ ᠡᠴᠡ ᠥᠭᠡᠷᠡ ᠶᠠᠭᠤ ᠴᠤ᠌ ᠬᠡᠯᠡᠭᠡ ᠦᠭᠡᠢ᠃ ᠲᠡᠭᠡᠭᠰᠡᠨ ᠨᠢ ᠪᠦᠷ ᠭᠠᠢ ᠳᠠᠭᠠᠷᠢᠵᠤ ᠮᠠᠨ ᠤ᠋ ᠬᠢᠨ ᠦ᠌ ᠡᠨᠡ ᠴᠢᠭ ᠦ᠋ᠨ ᠮᠠᠯ ᠳ᠋ᠤ᠌ ᠶᠠᠪᠤᠭᠰᠠᠨ ᠠᠷᠪᠠᠨ ᠬᠡᠳᠦ ᠲᠡᠢ ᠬᠦᠦ ᠶ᠋ᠢ ᠠᠪᠤᠭᠠᠳ ᠶᠠᠪᠤᠴᠢᠬᠠᠭᠰᠠᠨ ᠭᠡᠯᠴᠡᠵᠦ᠂ ᠲᠡᠷᠡ ᠬᠦᠦ ᠶ᠋ᠢᠨ ᠮᠣᠷᠢ ᠡᠮᠡᠭᠡᠯ ᠬᠠᠵᠠᠭᠠᠷ ᠲᠠᠢ ᠪᠠᠨ ᠠᠳᠤᠭᠤᠨ ᠠ᠋ᠴᠠ ᠪᠠᠨ ᠢᠷᠡᠭᠰᠡᠨ ᠭᠡᠰᠡᠨ᠃ ᠲᠡᠭᠦᠨ ᠡᠴᠡ ᠬᠣᠢᠰᠢ ᠣᠢᠷᠠ ᠬᠠᠪᠢ ᠶ᠋ᠢᠨ ᠠᠢᠯ ᠮᠠᠨ ᠤ᠋ ᠬᠢᠨ ᠡᠴᠡ ᠳᠠᠢᠴᠢᠨ ᠨᠡᠭᠦᠵᠦ ᠮᠠᠨ ᠤ᠋ ᠬᠠᠶᠠᠭᠠ ᠶ᠋ᠢ ᠰᠠᠬᠢᠳᠠᠭ ᠶᠠᠳᠠᠭᠤᠬᠠᠨ ᠠᠢᠯ ᠯᠠ ᠦᠯᠡᠳᠡᠭᠡᠳ ᠪᠠᠢᠨᠠ ᠳᠠ ᠭᠡᠪᠡ᠃
ᠲᠡᠷᠡ ᠬᠣᠶᠠᠷ ᠡᠳᠦᠷᠵᠢᠨ ᠭᠣᠣᠯ ᠢ᠋ᠶ᠋ᠠᠷ ᠶᠠᠪᠤᠵᠤ ᠶᠡᠬᠡ ᠴᠦ᠍ ᠵᠢᠮᠢᠰ ᠲᠡᠭᠦᠯᠡ᠃ ᠲᠡᠷᠡ ᠬᠣᠶᠠᠷ ᠤ᠋ᠨ ᠠᠳᠠᠯᠢ ᠵᠢᠮᠢᠰ ᠨᠣᠭᠣᠭᠠᠨ ᠤ᠋ ᠡᠷᠢᠯᠴᠢᠳ ᠪᠠᠰᠠ ᠦᠵᠡᠭᠳᠡᠭᠰᠡᠨ ᠴᠦ᠍ ᠲᠡᠳᠡᠨ ᠲᠡᠢ ᠠᠭᠤᠯᠵᠠᠵᠤ ᠶᠠᠷᠢᠯᠴᠠᠭᠰᠠᠨ ᠦᠭᠡᠢ᠃ ᠣᠷᠣᠢᠬᠠᠨ ᠲᠡᠷᠡ ᠬᠣᠶᠠᠷ ᠪᠤᠴᠠᠵᠤ ᠢᠷᠡᠯᠡ᠃ ᠪᠤᠭᠤᠷᠴᠢ ᠶ᠋ᠢᠨ ᠰᠡᠳᠬᠢᠯ ᠳ᠋ᠦ᠍ ᠡᠳᠦᠷ ᠡᠴᠡ ᠬᠣᠢᠰᠢ《ᠲᠡᠷᠡ ᠠᠭᠤᠯᠠ ᠶ᠋ᠢᠨ ᠬᠥᠮᠦᠰ ᠳᠡᠭᠡᠷᠡ ᠨᠢ ᠣᠴᠢᠪᠠᠯ ᠪᠠᠭᠤᠯᠭᠠᠭᠠᠳ ᠠᠪᠴᠢᠬᠠᠵᠤ ᠪᠣᠯᠬᠤ ᠪᠣᠯᠪᠠᠤ? ᠲᠡᠷᠡ ᠴᠢᠨᠢ ᠦᠭᠡ ᠬᠡᠯᠡ ᠲᠡᠢ ᠬᠥᠮᠦᠰ ᠰᠢᠦ ᠳᠡ᠃ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠤ᠋ᠨ ᠬᠦᠦ ᠲᠡᠮᠦᠵᠢᠨ ᠦ᠌ ᠠᠯᠪᠠᠲᠤ ᠡᠯᠴᠢ ᠭᠡᠵᠦ ᠲᠡᠷᠡ ᠳᠠᠷᠬᠢ ᠳ᠋ᠤ᠌ ᠪᠠᠭᠠ ᠶ᠋ᠢᠨ ᠶᠠᠪᠤᠳᠠᠯ ᠢ᠋ ᠨᠢ ᠰᠠᠨᠠᠭᠤᠯᠪᠠᠯ ᠲᠡᠳᠡᠨ ᠳᠤᠷᠠᠲᠠᠶᠠ ᠬᠡᠯᠡᠯᠴᠡᠭᠡᠷ ᠲᠣᠬᠢᠷᠠᠵᠤ ᠪᠣᠯᠬᠤ ᠶᠤᠮ᠃ ᠦᠵᠡᠭᠡᠳ ᠠᠯᠳᠠᠶᠠ᠂ ᠪᠠᠢᠵᠠ》 ᠪᠣᠳᠣᠭᠳᠠᠨᠠ᠃ ᠣᠷᠣᠢ ᠲᠡᠳᠡᠨ ᠦ᠌ ᠬᠠᠶᠠᠭᠠᠨ ᠳ᠋ᠤ᠌ ᠢᠷᠡᠬᠦ ᠳ᠋ᠦ᠍ ᠪᠣᠭᠤᠷᠴᠢ᠄
— ᠮᠠᠷᠭᠠᠰᠢ ᠥᠷᠯᠥᠭᠡ ᠡᠷᠲᠡᠬᠡᠨ ᠪᠤᠴᠠᠨᠠ ᠠ᠋ ᠭᠡᠵᠦ ᠲᠡᠭᠦᠰᠬᠡᠨ ᠳ᠋ᠦ᠍ ᠬᠡᠯᠡᠬᠦ ᠳ᠋ᠡᠭᠡᠨ ᠡᠨᠡ ᠪᠣᠳᠣᠯ ᠢ᠋ᠶ᠋ᠠᠨ ᠬᠡᠯᠡᠬᠦ ᠭᠡᠰᠡᠨ ᠢ᠋ᠶ᠋ᠡᠨ ᠠᠮᠠᠨ ᠳ᠋ᠠᠭᠠᠨ ᠲᠡᠪᠴᠢᠵᠦ ᠦᠯᠡᠳᠡᠭᠡᠪᠡ᠃ ᠲᠡᠷᠡ ᠬᠣᠶᠠᠷ ᠮᠠᠯ ᠬᠣᠲᠠᠯᠠᠭᠠᠳ ᠦᠳᠡᠰᠢ ᠶ᠋ᠢᠨ ᠪᠦᠷᠦᠢ ᠪᠡᠷ ᠭᠠᠳᠠᠭᠤᠷ ᠬᠠᠨᠢᠰᠠᠨ ᠦᠶᠡᠷᠬᠡᠵᠦ ᠡᠨᠡ ᠲᠡᠷᠡᠬᠡᠨ ᠢ᠋ ᠶᠠᠷᠢᠵᠤ᠂ ᠡᠴᠢᠭᠡ ᠡᠬᠡ ᠶ᠋ᠢ ᠪᠡᠨ ᠤᠨᠲᠠᠭᠰᠠᠨ ᠬᠣᠢᠨᠠ ᠵᠡᠭᠦᠨ ᠭᠡᠷ ᠲᠦ᠍ ᠣᠷᠣᠵᠤ ᠬᠣᠶᠠᠭᠤᠯᠠ ᠣᠷᠣ ᠵᠠᠰᠠᠵᠤ ᠡᠪᠦᠷ ᠲᠡᠭᠡᠨ ᠣᠷᠣᠭᠠᠳ ᠲᠡᠪᠡᠷᠢᠯᠳᠦᠨ ᠴᠡᠩᠭᠡᠯᠡ᠃ ᠥᠷᠯᠥᠭᠡ ᠲᠡᠷᠡ ᠬᠣᠶᠠᠷ ᠨᠠᠷᠠ ᠬᠠᠨᠠ ᠶ᠋ᠢᠨ ᠲᠣᠯᠣᠭᠠᠢ ᠰᠢᠭᠦᠷᠡᠵᠦ ᠰᠡᠷᠡᠭᠡᠳ ᠬᠡᠯᠡ ᠪᠡᠨ ᠭᠠᠷᠭᠠᠯᠴᠠᠨ ᠪᠣᠰᠴᠤ ᠢᠨᠢᠶᠡᠯᠳᠦᠯᠡ᠃ ᠲᠡᠭᠡᠲᠡᠯᠡ ᠡᠬᠡ ᠨᠢ ᠣᠷᠣᠵᠤ ᠢᠷᠡᠭᠡᠳ᠄
— ᠲᠠ ᠬᠣᠶᠠᠷ ᠪᠠᠷᠠᠭᠤᠨ ᠭᠡᠷ ᠲᠦ᠍ ᠣᠷᠣ᠃ ᠪᠣᠭᠤᠷᠴᠢ ᠳ᠋ᠠᠭᠠᠨ ᠴᠠᠢ ᠠᠶᠠᠭᠠᠯᠠᠵᠤ ᠥᠭ! ᠭᠡᠯᠡ᠃ ᠡᠴᠢᠭᠡ ᠨᠢ ᠠᠳᠤᠭᠤ ᠪᠠᠨ ᠠᠪᠴᠢᠷᠠᠵᠤ᠂ ᠡᠬᠡ ᠨᠢ ᠰᠦ ᠰᠠᠭᠠᠯᠢ ᠶ᠋ᠢᠨ ᠠᠵᠢᠯ ᠲᠠᠢ ᠵᠡᠭᠦᠨ ᠭᠡᠷ ᠲᠦ᠍ ᠲᠤᠯᠠ ᠲᠡᠷᠡ ᠬᠣᠶᠠᠷ ᠶᠠᠷᠢᠬᠤ ᠴᠢᠯᠥᠭᠡ ᠵᠠᠪ ᠲᠠᠢ ᠪᠠᠢᠪᠠ᠃ ᠲᠡᠭᠦᠰᠬᠡᠨ᠄
— ᠡᠷᠲᠡ ᠬᠠᠷᠢᠴᠢᠬᠠᠬᠤ ᠶᠤᠮ ᠪᠠᠢᠭᠠ ᠪᠢᠵᠡ ᠳᠡ ᠭᠡᠬᠦ ᠳ᠋ᠦ᠍ ᠪᠣᠭᠤᠷᠴᠢ᠄
— ᠰᠢᠭᠤᠳ ᠶᠠᠪᠤᠪᠠᠯ ᠴᠤ᠌ ᠲᠡᠭᠡᠨᠡ ᠯᠡ ᠳᠡ᠃ ᠬᠠᠷᠢᠨ ᠪᠢ ᠲᠡᠷᠡ ᠠᠭᠤᠯᠠ ᠶ᠋ᠢᠨ ᠬᠥᠮᠦᠰ ᠲᠡᠢ ᠬᠡᠯᠡᠯᠴᠡᠭᠡᠷ ᠬᠢᠵᠦ ᠪᠤᠴᠠᠨᠠ ᠭᠡᠪᠡ᠃
— ᠶᠠᠭᠤᠨ ᠠᠭᠤᠯᠠ ᠶ᠋ᠢᠨ ᠬᠥᠮᠦᠰ? ᠬᠠᠮᠢᠭᠠ ᠪᠠᠢᠳᠠᠭ ᠶᠤᠮ ᠪᠣᠢ? ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌ ᠪᠣᠭᠤᠷᠴᠢ᠄
— ᠲᠠ ᠨᠠᠷ ᠤ᠋ᠨ ᠶᠠᠷᠢᠭᠠᠳ ᠪᠠᠢᠭᠠ《ᠰᠡᠭᠦᠯ ᠦᠭᠡᠢ ᠴᠢᠨᠣᠠ》 ᠰᠢᠲᠠ ᠭᠡᠪᠡ᠃ ᠲᠡᠭᠦᠰᠬᠡᠨ ᠪᠦᠷ ᠴᠣᠴᠢᠵᠤ᠄
— ᠶᠠᠭᠤ? ᠶᠠᠭᠠᠬᠢᠵᠤ ᠪᠣᠯᠳᠠᠭ ᠶᠤᠮ ᠪᠣᠢ? ᠲᠡᠳᠡ ᠴᠢᠨᠢ ᠬᠥᠮᠦᠨ ᠪᠢᠰᠢ᠂ ᠬᠥᠮᠦᠨ ᠦ᠌ ᠲᠣᠭᠠᠨ ᠠ᠋ᠴᠠ ᠭᠠᠷᠤᠭᠰᠠᠨ ᠠᠷᠢᠶᠠᠲᠠᠨ ᠨᠤᠭᠤᠳ ᠰᠢᠦ ᠳᠡ ᠭᠡᠬᠦ ᠳ᠋ᠦ᠍ ᠪᠣᠭᠤᠷᠴᠢ᠄
— ᠲᠡᠳᠡᠨ ᠳ᠋ᠦ᠍ ᠶᠠᠷᠢᠳᠠᠭ ᠬᠡᠯᠡ᠂ ᠰᠣᠨᠣᠰᠳᠠᠭ ᠴᠢᠬᠢ᠂ ᠪᠣᠳᠣᠳᠠᠭ ᠲᠣᠯᠣᠭᠠᠢ ᠨᠢ ᠪᠠᠢᠭᠠ ᠰᠢᠦ ᠳᠡ ᠭᠡᠵᠦ ᠪᠠᠢᠲᠠᠯᠠ ᠲᠡᠭᠦᠰᠬᠡᠨ ᠦ᠌ ᠡᠴᠢᠭᠡ ᠡᠬᠡ ᠨᠢ ᠣᠷᠣᠭᠠᠳ ᠢᠷᠡᠵᠦ ᠶᠠᠷᠢᠶᠠ ᠲᠠᠰᠤᠯᠤᠭᠳᠠᠪᠠ᠄ ᠰᠢᠯᠦᠬᠡᠢ ᠡᠪᠦᠭᠡᠨ ᠴᠠᠢ ᠠᠶᠠᠭᠠᠯᠠᠵᠤ ᠠᠪᠤᠭᠠᠳ᠄
— ᠵᠠ᠂ ᠬᠦᠦ ᠣᠳᠣ ᠶᠠᠪᠤᠬᠤ ᠭᠡᠵᠦ ᠪᠠᠢᠨᠠ ᠤᠤ? ᠲᠡᠮᠦᠵᠢᠨ ᠳ᠋ᠦ᠍ ᠮᠢᠨᠦ ᠮᠡᠨᠳᠦ ᠶ᠋ᠢ ᠬᠦᠷᠭᠡᠭᠡᠷᠡᠢ᠃ ᠪᠢᠳᠡ᠂ ᠮᠠᠨ ᠤ᠋ ᠠᠷᠤ ᠶ᠋ᠢᠨ ᠬᠢᠨ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠤ᠋ᠨ ᠠᠯᠪᠠᠲᠤ ᠭᠡᠳᠡᠭ ᠢ᠋ᠶ᠋ᠡᠨ ᠮᠠᠷᠲᠠᠭᠠ ᠦᠭᠡᠢ ᠰᠢᠦ ᠭᠡᠭᠡᠷᠡᠢ ᠭᠡᠪᠡ ᠃ ᠪᠤᠭᠤᠷᠴᠢ᠄
— ᠵᠠ᠂ ᠵᠠ ᠪᠢ ᠤᠯᠠᠮᠵᠢᠯᠠᠵᠤ ᠠᠢᠯᠠᠳᠬᠠᠨᠠ ᠠ᠋ ᠭᠡᠪᠡ᠃ ᠲᠡᠭᠦᠰᠬᠡᠨ᠄
— ᠪᠢ ᠪᠤᠭᠤᠷᠴᠢ ᠶ᠋ᠢ ᠭᠠᠷᠭᠠᠵᠤ ᠥᠭᠭᠦᠭᠡᠳ ᠢᠷᠡᠶᠡ ᠭᠡᠬᠦ ᠳ᠋ᠦ᠍ ᠡᠴᠢᠭᠡ ᠡᠬᠡ ᠬᠣᠶᠠᠷ ᠨᠢ᠄
— ᠲᠡᠭᠡ ᠯᠡ ᠳᠡ ᠭᠡᠵᠦ ᠵᠥᠪᠰᠢᠶᠡᠷᠡᠨ ᠰᠢᠯᠦᠬᠡᠢ᠄
— ᠪᠢᠲᠡᠭᠡᠢ ᠶᠡᠬᠡ ᠬᠣᠯᠠ ᠶᠠᠪᠤᠭᠠᠷᠠᠢ ᠭᠡᠬᠦ ᠳ᠋ᠦ᠍ᠨᠢ ᠥᠬᠢᠨ᠄
— ᠵᠠ ᠭᠡᠯᠡ᠃
ᠲᠡᠭᠡᠭᠡᠳ ᠲᠡᠷᠡ ᠬᠣᠶᠠᠭᠤᠯᠠ ᠮᠥᠷᠳᠡᠵᠦ ᠰᠠᠵᠢᠯᠠᠭᠤᠯᠤᠨ ᠶᠠᠪᠤᠬᠤ ᠳ᠋ᠠᠭᠠᠨ ᠶᠠᠷᠢᠯᠴᠠᠭᠰᠠᠨ ᠨᠢ᠄
— ᠡᠭᠦᠯᠡᠨ ᠴᠢᠯᠥᠭᠡᠨ ᠦ᠌ ᠨᠠᠷᠠ ᠰᠢᠭ ᠦᠵᠡᠭᠳᠡᠭᠡᠳ ᠥᠩᠭᠡᠷᠡᠬᠦ ᠬᠥᠮᠦᠨ ᠪᠠᠢᠵᠠᠢ᠂ ᠴᠢ ᠮᠠᠨᠢ ᠭᠡᠳ ᠲᠡᠭᠦᠰᠬᠡᠨ ᠤᠬᠢᠯᠠᠴᠢᠬᠠᠪᠠ᠃
— ᠦᠭᠡᠢ ᠳᠡ᠂ ᠪᠢ ᠢᠷᠡᠨᠡ᠃
— ᠴᠢᠮᠠ ᠶ᠋ᠢ ᠡᠷᠭᠢᠭᠡᠳ ᠢᠷᠡᠨᠡ ᠭᠡᠰᠡᠨ ᠪᠣᠯᠬᠣᠷ ᠪᠢ ᠬᠦᠯᠢᠶᠡᠭᠡᠳ ᠯᠡ ᠵᠡᠭᠦᠨ ᠤᠷᠤᠭᠰᠢ ᠪᠠᠨ ᠨᠢᠳᠦ ᠬᠠᠷᠠᠭᠤᠯᠳᠠᠭᠠᠳ ᠯᠠ ᠪᠠᠢᠶᠠ ᠭᠡᠵᠦ ᠬᠡᠴᠢᠨᠡᠭᠡᠨ ᠪᠠᠶᠠᠷᠯᠠᠯᠠ ᠳᠠ ᠭᠡᠵᠦ ᠭᠤᠨᠢᠭᠲᠠᠢ ᠬᠡᠯᠡᠭᠡᠳ ᠵᠢᠭᠠᠬᠠᠨ ᠪᠣᠳᠣᠯᠭᠠᠰᠢᠷᠠᠨ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠭᠡᠨᠡᠳᠲᠡ ᠨᠢᠳᠦ ᠨᠢ ᠰᠡᠷᠭᠦᠵᠦ᠄
— ᠪᠢ ᠬᠠᠮᠲᠤ ᠶᠠᠪᠤᠶᠠ᠂ ᠬᠣᠶᠠᠭᠤᠯᠠ ᠣᠴᠢᠪᠠᠯ ᠮᠠᠨ ᠤ᠋ ᠠᠬᠠ ᠰᠢᠭ᠋ ᠶᠠᠭᠤᠮᠠ ᠪᠠᠢᠭᠠ ᠪᠣᠯᠬᠣᠷ ᠠᠷᠠᠢ ᠴᠢᠮᠠᠶ᠋ᠢ ᠬᠣᠣᠷᠯᠠᠬᠤ ᠦᠭᠡᠢ ᠪᠠᠢᠬᠠ᠃
— ᠬᠠᠷᠢᠨ ᠪᠦᠷ ᠳᠣᠣᠷᠠ ᠨᠢ ᠠᠯᠠᠨᠠ ᠭᠡᠴᠢ᠃ ᠴᠢᠨᠦ ᠨᠥᠬᠥᠷ ᠢ᠋ ᠤᠰᠠᠳᠬᠠᠵᠤ ᠴᠢᠮᠠᠶ᠋ᠢ ᠠᠪᠴᠤ ᠦᠯᠡᠳᠡᠨᠡ᠃ ᠲᠡᠳᠡᠨ ᠳ᠋ᠦ᠍ ᠡᠮᠡ ᠬᠥᠮᠦᠨ ᠬᠡᠷᠡᠭᠲᠡᠢ ᠰᠢᠦ ᠳᠡ᠃
— ᠨᠡᠭᠡᠷᠡᠨ ᠲᠡᠢᠮᠦ ᠯᠡ ᠶᠦᠮ ᠳᠡ ᠭᠡᠳ ᠲᠡᠭᠦᠰᠬᠡᠨ ᠦᠭᠡ ᠪᠡᠨ ᠦᠷᠭᠦᠯᠵᠢᠯᠡᠭᠦᠯᠵᠦ᠄
— ᠬᠣᠶᠠᠭᠤᠯᠠ ᠪᠠᠨ ᠪᠠᠭᠤᠵᠤ ᠵᠢᠭᠠᠬᠠᠨ ᠰᠠᠭᠤᠶᠠ ᠳᠠ ᠭᠡᠵᠦ ᠠᠷᠭᠠᠳᠠᠩᠭᠤᠢ ᠬᠡᠯᠡᠵᠦ ᠪᠠᠭᠤᠪᠠ᠃ ᠲᠡᠷᠡ ᠬᠣᠶᠠᠷ ᠪᠡᠶᠡ ᠪᠡᠶᠡ ᠪᠡᠨ ᠲᠦᠰᠢᠯᠴᠡᠨ ᠰᠠᠭᠤᠵᠤ᠂ ᠲᠡᠭᠦᠰᠬᠡᠨ᠄
— ᠪᠥᠰᠡᠨ ᠳ᠋ᠡᠭᠡᠨ ᠵᠡᠭᠦᠭᠰᠡᠨ ᠬᠢᠲᠤᠭᠠ᠂ ᠰᠢᠯᠪᠢᠭᠦᠷ ᠤᠷᠭᠠ ᠬᠣᠶᠠᠷ ᠠ᠋ᠴᠠ ᠥᠭᠡᠷᠡ ᠶᠠᠭᠤᠮᠠ ᠦᠭᠡᠢ ᠭᠠᠷ ᠮᠤᠬᠤᠷ ᠬᠥᠮᠦᠨ ᠢ᠋ ᠵᠡᠪᠰᠡᠭᠯᠡᠭᠰᠡᠨ ᠮᠠᠭᠤᠬᠠᠢ ᠠᠷᠢᠶᠠᠲᠠᠨ ᠤᠷᠤᠭᠤ ᠣᠴᠢᠨᠠ ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠮᠢᠨᠦ ᠠᠢᠳᠠᠰ ᠬᠦᠷᠴᠦ᠂ ᠭᠠᠢᠬᠠᠰᠢ ᠲᠥᠷᠥᠬᠦ ᠶᠦᠮ᠃
— ᠲᠡᠳᠡᠨ ᠲᠡᠢ ᠭᠠᠭᠴᠠ ᠪᠢ ᠬᠡᠴᠢᠨᠡᠭᠡᠨ ᠵᠡᠪᠰᠡᠭ ᠲᠡᠢ ᠪᠠᠢᠭᠠᠳ ᠶᠠᠭᠠᠬᠢᠵᠤ ᠳᠡᠢᠯᠬᠦ ᠪᠣᠢ? ᠬᠠᠷᠢᠨ ᠬᠠᠭᠤᠷᠴᠤ ᠮᠡᠬᠡᠯᠡᠬᠦ᠂ ᠠᠶᠤᠯᠭᠠᠨ ᠰᠦᠷᠳᠡᠭᠦᠯᠵᠦ᠂ ᠲᠤᠯᠭᠠᠬᠤ ᠵᠡᠷᠭᠡ ᠠᠷᠭᠠ ᠪᠠᠷ ᠳᠡᠢᠯᠬᠦ ᠰᠠᠨᠠᠭᠠ ᠪᠠᠢᠨᠠ᠃
— ᠡᠷᠡ ᠬᠥᠮᠦᠨ ᠦ᠌ ᠵᠣᠷᠢᠭ ᠪᠣᠳᠣᠯ ᠢ᠋ ᠡᠮᠡ ᠪᠢ ᠮᠣᠬᠣᠭᠠᠬᠤ ᠨᠢ ᠪᠤᠷᠤᠭᠤ ᠯᠠ ᠳᠠ᠃ ᠡᠷᠡ ᠬᠥᠮᠦᠨ ᠦ᠌ ᠠᠷᠪᠠᠨ ᠭᠤᠷᠪᠠᠨ ᠮᠡᠬᠡ ᠭᠡᠵᠦ ᠪᠠᠢᠳᠠᠭ ᠭᠡᠯᠴᠡᠳᠡᠭ᠃ ᠰᠢᠢᠳᠦᠭᠰᠡᠨ ᠵᠣᠷᠢᠭᠰᠠᠨ ᠳ᠋ᠠᠭᠠᠨ ᠶᠠᠪᠤ ᠳᠠ᠃ ᠪᠢ ᠲᠡᠷᠲᠡᠭᠡᠬᠢ ᠬᠡᠨᠲᠡᠢ ᠬᠠᠢᠷᠬᠠᠨ ᠳ᠋ᠠᠭᠠᠨ ᠮᠥᠷᠭᠥᠵᠦ᠂ ᠳᠡᠭᠡᠷᠡᠬᠢ ᠬᠥᠬᠡ ᠲᠩᠷᠢ ᠳ᠋ᠡᠭᠡᠨ ᠵᠠᠯᠪᠠᠷᠢᠭᠠᠳ ᠰᠦ ᠪᠡᠨ ᠡᠷᠭᠦᠨ ᠭᠤᠶᠤᠬᠤ ᠠ᠋ᠴᠠ ᠥᠭᠡᠷᠡ ᠶᠠᠭᠠᠬᠢᠬᠤ ᠪᠢᠯᠡ! ᠭᠡᠳ ᠡᠪᠦᠷ ᠡᠴᠡ ᠪᠡᠨ ᠪᠢᠴᠢᠬᠠᠨ ᠡᠪᠬᠡᠮᠡᠯ ᠨᠢᠮᠭᠡᠨ ᠰᠤᠮᠤᠴᠢ ᠭᠠᠷᠭᠠᠨ᠄
— ᠡᠭᠦᠨ ᠢ᠋ ᠦᠰᠦᠨ ᠳ᠋ᠦ᠍ ᠴᠢᠨᠢ ᠨᠢᠭᠤᠵᠤ ᠥᠭᠭᠦᠶᠡ ᠳᠡ ᠭᠡᠪᠡ᠃ ᠬᠣᠶᠠᠷ ᠬᠤᠷᠤᠭᠤ ᠬᠢᠷᠢ ᠱᠣᠪᠬᠣ ᠬᠤᠷᠴᠠ ᠦᠵᠦᠭᠦᠷ ᠢᠷ ᠲᠡᠢ ᠮᠣᠩᠭᠣᠯ ᠳᠠᠷᠬᠠᠨ ᠬᠥᠮᠦᠨ ᠦ᠌ ᠬᠢᠭᠰᠡᠨ ᠬᠥᠭᠡᠷᠦᠬᠦᠨ ᠪᠠᠭᠠᠵᠢ ᠶᠤᠮ᠃
— ᠶᠠᠭᠠᠬᠢᠬᠤᠪ ᠳᠠ᠂ ᠠᠷᠠᠰᠤ ᠬᠥᠷᠥᠰᠥ ᠨᠢᠮᠭᠡᠯᠡᠨ ᠡᠯᠡᠬᠦ᠂ ᠰᠠᠢᠷ ᠰᠠᠷᠢᠰᠤ᠂ ᠢᠯᠭᠡ ᠪᠡᠷ ᠤᠭᠠᠯᠵᠠ ᠤᠬᠤᠵᠤ ᠰᠡᠢᠯᠬᠦ ᠳ᠋ᠦ᠍ ᠬᠡᠷᠡᠭᠯᠡᠳᠡᠭ ᠮᠢᠨᠦ ᠪᠠᠭᠠᠵᠢ ᠶᠤᠮ ᠳᠠ᠃ ᠡᠷᠡ ᠬᠥᠮᠦᠨ ᠳ᠋ᠦ᠍ ᠡᠷᠡᠬᠡᠢ ᠭᠤᠷᠪᠠ ᠣᠷᠢᠶᠠᠬᠤ ᠰᠤᠷ ᠬᠡᠷᠡᠭ ᠪᠣᠯᠳᠠᠭ ᠭᠡᠯᠴᠡᠳᠡᠭ ᠁ ᠭᠡᠵᠦ ᠲᠡᠭᠦᠰᠬᠡᠨ ᠬᠡᠯᠡᠭᠡᠳ ᠦᠰᠦᠨ ᠳ᠋ᠦ᠍ᠨᠢ ᠬᠢᠵᠦ ᠨᠢᠭᠤᠴᠠᠯᠠᠪᠠ᠃