ᠬᠥᠯᠥᠭ ᠪᠠᠭᠠᠲᠤᠷ ᠪᠤᠭᠤᠷᠴᠢ - ᠪ᠂ ᠦᠯᠵᠡᠢᠰᠦ᠋ᠷᠦᠩ <ᠳᠡᠳ᠋ ᠪᠦᠯᠦᠭ - ᠠᠷᠪᠠᠨ ᠨᠠᠢ᠍ᠮᠠ> Хүлэг баатар буурч - Б. Өлзийсүрэн <Дэд бүлэг-18>
54ᠥᠪᠡᠷ ᠦᠨ ᠵᠠᠮ ᠮᠥᠷ ᠢᠶᠡᠷ ᠲᠡᠮᠲᠡᠷᠢᠵᠦ ᠡᠷᠡ ᠬᠥᠮᠥᠨ ᠦ ᠡᠷᠴᠢ ᠬᠦᠴᠦ ᠶᠢ ᠣᠯᠵᠤ ᠬᠦᠷᠲᠡᠭᠰᠡᠨ ᠳᠡᠳ᠋ ᠪᠦᠯᠦᠭ
ᠠᠷᠪᠠᠨ ᠨᠠᠢ᠍ᠮᠠ
ᠠᠶᠠᠭᠠᠨ ᠤ᠋ ᠬᠠᠷᠢᠭᠤ ᠡᠳᠦᠷ ᠲᠡᠭᠡᠨ
ᠠᠭᠲᠠ ᠶ᠋ᠢᠨ ᠬᠠᠷᠢᠭᠤ ᠵᠢᠯ ᠳ᠋ᠡᠭᠡᠨ
ᠲᠡᠮᠦᠵᠢᠨ ᠲᠡᠷᠡ ᠭᠤᠷᠪᠠ ᠶ᠋ᠢ ᠲᠤᠭᠤᠷᠢᠯ ᠬᠠᠨ ᠳᠣᠲᠣᠨᠣᠴᠢᠯᠠᠨ ᠬᠦᠯᠢᠶᠡᠨ ᠠᠪᠴᠤ᠄
— ᠪᠢ ᠲᠡᠮᠦᠵᠢᠨ ᠴᠢᠮᠠᠲᠤ ᠪᠤᠲᠠᠷᠠᠭᠰᠠᠨ ᠤᠯᠤᠰ ᠢ᠋ ᠴᠢᠨᠢ ᠪᠤᠴᠠᠭᠠᠵᠤ ᠬᠤᠷᠢᠶᠠᠵᠤ ᠥᠭᠭᠦᠶᠡ᠃ ᠴᠠᠷ ᠨᠢ ᠴᠡᠭᠡᠵᠢᠨ ᠳ᠋ᠡᠭᠡᠨ᠂ ᠪᠥᠭᠡᠷᠡ ᠨᠢ ᠪᠥᠭᠰᠡᠨ ᠳ᠋ᠡᠭᠡᠨ ᠪᠠᠢᠭ! ᠭᠡᠵᠦ ᠨᠢᠳᠤᠨᠤᠨ ᠬᠡᠯᠡᠭᠡ ᠦᠭᠡᠢ ᠪᠢᠯᠢᠤ! ᠣᠳᠣ ᠲᠡᠢᠮᠦ ᠶᠠᠪᠤᠳᠠᠯ ᠪᠣᠯᠤᠭᠰᠠᠨ ᠠᠪᠠᠰᠤ ᠠᠯᠳᠠᠭᠳᠠᠭᠰᠠᠨ ᠡᠮᠡᠰ ᠬᠡᠦᠬᠡᠳ ᠢ᠋ ᠴᠢᠨᠢ ᠮᠡᠷᠭᠢᠳ ᠡᠴᠡ ᠡᠭᠡᠭᠦᠯᠵᠦ ᠠᠪᠴᠤ ᠥᠭᠭᠦᠨᠡ᠃ ᠲᠠ ᠨᠠᠷ ᠲᠠᠪᠠᠲᠠᠢ ᠮᠠᠨ ᠤ᠋ ᠳ᠋ᠤ᠌ ᠬᠣᠨᠣᠨ ᠥᠨᠵᠢᠨ ᠰᠠᠭᠠᠲᠠ᠃ ᠪᠢ ᠥᠪᠡᠷ ᠦ᠋ᠨ ᠰᠢᠳᠠᠷ ᠨᠣᠶᠠᠳ ᠲᠠᠢ ᠪᠠᠨ ᠬᠡᠯᠡᠯᠴᠡᠵᠦ ᠬᠡᠷᠬᠢᠨ ᠴᠡᠷᠢᠭ ᠶᠦ᠍ᠭᠡᠨ ᠪᠡᠯᠡᠳᠬᠡᠬᠦ ᠶ᠋ᠢ ᠵᠥᠪᠯᠡᠶᠡ ᠭᠡᠵᠡᠢ᠃ ᠬᠡᠳᠦ ᠬᠣᠨᠣᠭ ᠬᠦᠯᠢᠶᠡᠭᠰᠡᠨ ᠦ᠌ ᠡᠴᠦᠰ ᠲᠦ᠍ ᠲᠤᠭᠤᠷᠢᠯ ᠬᠠᠨ᠄
— ᠪᠢᠳᠡ ᠳᠠᠢᠯᠠᠷᠠ ᠮᠣᠷᠳᠠᠬᠤ ᠳ᠋ᠤ᠌ ᠬᠣᠶᠠᠷ ᠲᠦᠮᠡᠨ ᠴᠡᠷᠢᠭ ᠭᠠᠷᠭᠠᠶᠠ ᠭᠡᠯᠴᠡᠯᠡ᠃ ᠲᠡᠮᠦᠵᠢᠨ ᠴᠢ ᠥᠪᠡᠷ ᠦ᠋ᠨ ᠲᠦᠮᠡᠨ ᠢ᠋ᠶ᠋ᠡᠨ ᠪᠡᠯᠡᠳᠭᠡ᠃ ᠡᠨᠡ ᠲᠡᠢᠨ ᠳ᠋ᠦ᠍ ᠵᠠᠮᠤᠬᠠ ᠳᠡᠭᠦᠦ ᠶ᠋ᠢ ᠣᠷᠣᠯᠴᠠᠭᠤᠯᠤᠶᠠ᠃ ᠭᠤᠷᠪᠠᠨ ᠮᠡᠷᠭᠢᠳ ᠬᠦᠴᠦᠷᠬᠡᠭ ᠤᠯᠤᠰ᠂ ᠭᠣᠣᠮᠠᠢ ᠬᠥᠳᠡᠯᠵᠦ ᠪᠣᠯᠬᠤ ᠦᠭᠡᠢ᠃ ᠬᠠᠷᠢᠨ ᠲᠡᠢᠨ ᠳ᠋ᠦ᠍ ᠬᠡᠵᠢᠶᠡ᠂ ᠬᠠᠮᠢᠭᠠ ᠠ᠋ᠴᠠ ᠬᠡᠷᠬᠢᠨ ᠣᠷᠣᠬᠤ ᠶ᠋ᠢ ᠵᠠᠮᠤᠬᠠ ᠮᠡᠳᠡᠭ᠃ ᠵᠠᠮᠤᠬᠠ ᠳ᠋ᠤ᠌ ᠣᠴᠢᠵᠤ ᠬᠡᠯᠡ ᠬᠦᠷᠭᠡ ! ᠭᠡᠯᠡ᠃ ᠲᠡᠮᠦᠵᠢᠨ ᠲᠡᠳᠡ ᠴᠦ᠍ ᠬᠡᠷᠡᠭ ᠪᠦᠲᠦᠬᠦ ᠲᠡᠰᠢ ᠶᠠᠪᠤᠵᠤ ᠪᠠᠢᠭᠠ ᠳ᠋ᠤ᠌ ᠪᠠᠶᠠᠷᠯᠠᠵᠤ ᠭᠤᠷᠪᠠᠭᠤᠯᠠ ᠪᠤᠴᠠᠬᠤ ᠵᠠᠮ ᠳ᠋ᠠᠭᠠᠨ ᠵᠥᠪᠯᠡᠯᠳᠦᠵᠦ ᠶᠡᠬᠡ ᠠᠬᠠ ᠲᠡᠮᠦᠵᠢᠨ ᠡᠢᠨᠬᠦ ᠰᠢᠢᠳᠪᠦᠷᠢ ᠭᠠᠷᠭᠠᠪᠠ᠃
— ᠲᠤᠭᠤᠷᠢᠯ ᠬᠠᠨ《ᠲᠦᠮᠡᠨ ᠴᠡᠷᠢᠭ ᠠᠪᠤᠭᠠᠳ》 ᠭᠡᠵᠦ ᠨᠠᠳᠠᠳᠤ ᠬᠡᠯᠡᠵᠦ ᠪᠠᠢᠨᠠ᠃ ᠲᠦᠮᠡ ᠪᠠᠢᠲᠤᠭᠠᠢ ᠵᠠᠭᠤᠨ ᠴᠡᠷᠢᠭ ᠭᠠᠷᠭᠠᠬᠤ ᠠᠮᠤᠷ ᠦᠭᠡᠢ ᠃ ᠢᠩᠭᠢᠬᠦᠯᠡᠷ《ᠲᠦᠮᠡ》 ᠭᠡᠳᠡᠭ ᠢ᠋《ᠪᠦᠬᠦ》 ᠭᠡᠰᠡᠨ ᠦᠭᠡ ᠭᠡᠵᠦ ᠣᠢᠯᠠᠭᠠᠶᠠ᠃ ᠲᠡᠳᠡ ᠴᠦ᠍ ᠲᠡᠢᠮᠦ ᠲᠦᠮᠡ ᠪᠡᠷ ᠨᠢ ᠵᠢᠭᠰᠠᠭᠠᠬᠤ ᠶᠠᠭᠤ ᠯᠠ ᠪᠣᠯ? ᠬᠡᠷᠪᠡ ᠲᠡᠢᠮᠦ ᠲᠦᠮᠡ ᠲᠦᠮᠡᠨ ᠴᠡᠷᠢᠭ ᠲᠡᠢ ᠶᠦᠮ ᠪᠣᠯ ᠮᠡᠷᠭᠢᠳ ᠢ᠋ ᠠᠯᠢ ᠬᠡᠳᠦᠢᠨᠡᠢ ᠴᠣᠬᠢᠭᠠᠳ ᠡᠷᠬᠡᠨ ᠳ᠋ᠡᠭᠡᠨ ᠣᠷᠣᠭᠤᠯᠴᠢᠬᠠᠬᠤ ᠪᠠᠢᠭᠰᠠᠨ ᠪᠢᠵᠡ᠃ ᠪᠠᠢᠩᠭᠤ ᠲᠡᠳᠡ ᠮᠥᠷᠭᠥᠯᠳᠦᠵᠦ ᠬᠡᠨ ᠨᠢ ᠴᠦ᠍ ᠳᠡᠢᠯᠦᠭᠰᠡᠨ ᠶᠠᠭᠤᠮᠠ ᠦᠭᠡᠢ ᠯᠡ ᠪᠠᠢᠨᠠ᠃ ᠲᠤᠭᠤᠷᠢᠯ ᠪᠠᠭᠠ ᠨᠠᠰᠤᠨ ᠳ᠋ᠠᠭᠠᠨ ᠮᠡᠷᠭᠢᠳ ᠲᠦ᠍ ᠣᠯᠵᠠᠯᠠᠭᠳᠠᠵᠤ ᠪᠣᠭᠣᠯᠴᠢᠯᠠᠭᠳᠠᠵᠤ ᠶᠠᠪᠤᠭᠰᠠᠨ ᠤ᠋ ᠦᠰ ᠬᠣᠨᠵᠢᠩ ᠪᠠᠢᠭᠠ᠃ ᠲᠡᠭᠡᠭᠡᠳ ᠴᠦ᠍ ᠦᠰ ᠢ᠋ᠶ᠋ᠡᠨ ᠠᠪᠴᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠭᠠ᠃
— ᠲᠡᠭᠡᠬᠦᠯᠡᠷ ᠪᠢᠳᠡ ᠶᠠᠭᠠᠬᠢᠬᠤ ᠪᠣᠢ?
— ᠲᠡᠭᠡᠬᠦᠯᠡᠷ ᠪᠢᠳᠡ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠤ᠋ᠨ ᠬᠥᠪᠡᠭᠦᠳ ᠨᠠᠰᠤ ᠪᠡᠶᠡ ᠥᠰᠴᠦ ᠡᠷᠡ ᠶ᠋ᠢᠨ ᠴᠢᠨᠡᠭᠡᠨ ᠳ᠋ᠦ᠍ ᠬᠦᠷᠦᠭᠰᠡᠨ ᠭᠡᠳᠡᠭ ᠢ᠋ᠶ᠋ᠡᠨ ᠬᠠᠷᠠᠭᠤᠯᠬᠤ ᠴᠠᠭ ᠪᠣᠯᠵᠠᠢ᠃ ᠪᠢᠳᠡ ᠭᠤᠷᠪᠠᠭᠤᠯᠠ ᠨᠥᠬᠥᠳ ᠴᠡᠷᠢᠭ ᠢ᠋ᠶ᠋ᠡᠨ ᠳᠠᠭᠠᠭᠤᠯᠤᠨ᠂ ᠡᠴᠢᠭᠡ ᠶ᠋ᠢᠨ ᠲᠤᠭ ᠰᠦᠯᠳᠡ ᠶ᠋ᠢ ᠵᠠᠯᠠᠨ ᠲᠠᠢᠴᠢᠭᠤᠳ ᠠ᠋ᠴᠠ ᠳᠠᠢᠵᠢᠵᠤ ᠰᠠᠷᠨᠢᠭᠰᠠᠨ ᠬᠢᠶᠠᠨ᠂ ᠪᠣᠷᠵᠢᠭᠢᠨ᠂ ᠪᠦᠭᠦᠨᠦᠳ᠂ ᠪᠣᠳᠣᠭᠤᠳ ᠂ ᠪᠠᠭᠠᠷᠵᠠ᠂ ᠬᠠᠴᠢᠭᠤᠨ ᠵᠡᠷᠭᠡ ᠬᠡᠷᠦᠯᠦᠨ ᠪᠠᠶᠠᠨ ᠤᠯᠠᠭᠠᠨ᠂ ᠰᠡᠩᠭᠦᠷ᠂ ᠬᠣᠷᠬᠣᠨᠠᠭ ᠤ᠋ᠨ ᠬᠥᠨᠳᠡᠢ᠂ ᠰᠢᠤᠰᠠ ᠶ᠋ᠢᠨ ᠭᠣᠣᠯ ᠢ᠋ᠶ᠋ᠠᠷ ᠨᠤᠲᠤᠭᠯᠠᠨ ᠪᠦᠬᠦᠢ ᠲᠠᠷᠠᠬᠠᠢ ᠪᠤᠲᠠᠷᠬᠠᠢ᠂ ᠰᠠᠷᠨᠢᠮᠠᠯ ᠣᠪᠣᠭ ᠠᠢᠮᠠᠭ ᠤ᠋ᠨ ᠬᠢᠨ ᠢ᠋ ᠥᠪᠡᠷ ᠲᠡᠭᠡᠨ ᠲᠠᠲᠠᠬᠤ ᠠᠵᠢᠯ ᠬᠢᠨᠡ᠃ ᠡᠬᠢᠨ ᠦ᠌ ᠡᠨᠡ ᠠᠯᠬᠤᠮ ᠠᠮᠵᠢᠯᠲᠠ ᠲᠠᠢ ᠪᠣᠯᠬᠤᠯᠠ ᠪᠢᠳᠡ ᠭᠠᠷ ᠮᠤᠬᠤᠷ ᠪᠢᠰᠢ ᠪᠣᠯᠤᠨᠠ᠃
— ᠠᠬᠠ ᠶ᠋ᠢᠨ ᠵᠥᠪ᠃ ᠪᠢᠳᠡ ᠬᠥᠳᠡᠯᠦᠶᠡ ᠭᠡᠵᠦ ᠪᠡᠯᠭᠦᠳᠡᠢ ᠬᠡᠯᠡᠯᠡ᠃ ᠲᠡᠮᠦᠵᠢᠨ ᠪᠣᠳᠣᠯᠭᠠᠰᠢᠷᠠᠨ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ᠄
— ᠡᠨᠡ ᠴᠦ᠍ ᠢᠩᠭᠢᠭᠡᠳ ᠪᠣᠯᠬᠤ ᠪᠤᠶᠤ᠃ ᠬᠠᠷᠢᠨ ᠪᠣᠭᠣᠷᠴᠢ ᠶ᠋ᠢ ᠪᠡᠨ ᠶᠠᠭᠠᠬᠢᠶᠠ ᠳᠠ ᠪᠠᠢᠵᠠ ᠭᠡᠬᠦ ᠳ᠋ᠦ᠍ ᠬᠣᠶᠠᠷ ᠳᠡᠭᠦᠦ ᠨᠢ᠄
— ᠪᠣᠭᠣᠷᠴᠢ ᠶᠠᠭᠠᠬᠢᠵᠤ ᠭᠡᠵᠦ? ᠭᠠᠢᠬᠠᠨ ᠠᠰᠠᠭᠤᠪᠠ᠃
— ᠪᠣᠭᠣᠷᠴᠢ ᠨᠠᠳᠠ ᠰᠢᠭ᠋ ᠵᠣᠪᠠᠯᠠᠩ ᠳ᠋ᠤ᠌ ᠤᠨᠠᠭᠰᠠᠨ ᠬᠥᠮᠦᠨ᠂ ᠮᠢᠨᠦᠬᠢ ᠠᠮᠢᠳᠤ᠂ ᠬᠥᠮᠦᠨ ᠦ᠌ ᠭᠠᠷ ᠠ᠋ᠴᠠ ᠪᠤᠴᠠᠭᠠᠵᠤ ᠠᠪᠬᠤ ᠲᠤᠬᠠᠢ ᠶᠠᠷᠢᠵᠤ ᠪᠠᠢᠨᠠ᠃ ᠲᠡᠭᠦᠨ ᠦ᠌ ᠬᠢ ᠲᠩᠷᠢ ᠶ᠋ᠢᠨ ᠣᠷᠣᠨ ᠳ᠋ᠤ᠌᠂ ᠪᠤᠴᠠᠭᠠᠵᠤ ᠠᠪᠬᠤ ᠠᠷᠭᠠ ᠦᠭᠡᠢ᠃ ᠰᠠᠨᠠᠭᠠ ᠰᠡᠳᠬᠢᠯ ᠢ᠋ ᠨᠢ ᠥᠭᠡᠳᠡ ᠲᠠᠲᠠᠬᠤ ᠬᠡᠷᠡᠭᠲᠡᠢ ᠪᠠᠢᠨᠠ᠃
ᠬᠣᠶᠠᠷ ᠳᠡᠭᠦᠦ ᠶ᠋ᠢᠨ ᠬᠢᠨᠢ ᠨᠢᠳᠦ ᠲᠣᠮᠣ ᠪᠣᠯᠵᠤ᠂ ᠠᠬᠠ ᠶ᠋ᠢ ᠪᠡᠨ ᠳᠦᠷᠯᠡᠢᠨ ᠬᠠᠷᠠᠪᠠ᠃ ᠲᠡᠮᠦᠵᠢᠨ ᠪᠠᠰᠠ ᠥᠭᠡᠳᠡ ᠡᠴᠡ ᠨᠢ ᠬᠠᠷᠠᠵᠤ᠄
— ᠶᠠᠩ ᠰᠠᠷᠢᠳᠠᠭ ᠤ᠋ᠨ ᠠᠷᠤ ᠤᠷᠤᠭᠤ ᠬᠡᠰᠡᠭ ᠠᠢᠯ ᠬᠢᠷᠢᠯᠳᠣᠭ ᠠ᠋ᠴᠠ ᠵᠠᠢ ᠪᠠᠷᠢᠵᠤ ᠲᠠᠰᠤᠷᠠᠨ ᠨᠤᠲᠤᠭᠯᠠᠵᠤ ᠰᠠᠭᠤᠭᠠ ᠭᠡᠰᠡᠨ᠃ ᠲᠠ ᠨᠠᠷ ᠶᠠᠭᠤᠮᠠ ᠲᠤᠭᠤᠯᠤᠭᠰᠠᠨ ᠤᠤ?
— ᠲᠤᠭᠤᠯᠤᠭᠰᠠᠨ᠃
— ᠲᠡᠷᠡ ᠳᠤᠮᠳᠠ ᠠᠪᠤ ᠶ᠋ᠢᠨ ᠬᠣᠷᠴᠢ ᠠᠭᠰᠠᠨ ᠰᠢᠯᠦᠬᠡᠢ ᠭᠤᠸᠠᠢ ᠶ᠋ᠢᠨ ᠬᠢ ᠪᠠᠢᠭᠠ ᠭᠡᠵᠦ ᠪᠢ ᠰᠣᠨᠣᠰᠤᠭᠰᠠᠨ᠃ ᠦᠨᠡᠨ ᠪᠣᠯᠪᠠᠤ? ᠬᠠᠰᠠᠷ ᠪᠡᠯᠭᠦᠳᠡᠢ ᠬᠣᠶᠠᠷ᠄
— ᠦᠨᠡᠨ᠂ ᠦᠨᠡᠨ ᠭᠡᠯᠴᠡᠯᠡ᠃ ᠲᠡᠮᠦᠵᠢᠨ᠄
— ᠲᠡᠭᠡᠪᠡᠯ ᠰᠠᠢᠨ ᠪᠠᠢᠨᠠ᠃ ᠲᠡᠳᠡᠨ ᠦ᠌ ᠲᠡᠭᠦᠰᠬᠡᠨ ᠲᠤᠩ ᠠᠶᠠᠲᠠᠢᠬᠠᠨ ᠬᠡᠦᠬᠡᠨ ᠪᠣᠯᠤᠭᠠ ᠳᠠ᠃ ᠬᠠᠷᠢᠨ ᠬᠠᠳᠠᠮ ᠤ᠋ᠨ ᠣᠴᠢᠬᠤ ᠪᠣᠯᠪᠠᠤ ? ᠦᠭᠡᠢ ᠤᠤ? ᠭᠡᠪᠡᠯ ᠬᠣᠶᠠᠷ ᠳᠡᠭᠦᠦ ᠨᠢ ᠢᠨᠢᠶᠡᠯᠳᠦᠨ᠄
— ᠦᠭᠡᠢ ᠠ᠋ ᠂ ᠭᠡᠷ ᠲᠡᠭᠡᠨ ᠪᠠᠢᠭᠠ ᠭᠡᠰᠡᠨ ᠭᠡᠪᠡ᠃ ᠲᠡᠮᠦᠵᠢᠨ᠄
— ᠶᠠᠭᠤᠨ ᠰᠠᠢᠨ ᠶᠤᠮ? ᠪᠤᠭᠤᠷᠴᠢ ᠶ᠋ᠢ ᠲᠡᠭᠦᠨ ᠦ᠌ ᠠᠬᠠ ᠳᠠᠷᠬᠢ ᠶ᠋ᠢ ᠳᠠᠭᠤᠳᠠᠬᠤ ᠨᠡᠷᠡ ᠪᠡᠷ ᠶᠠᠪᠤᠭᠤᠯᠤᠶᠠ ᠭᠡᠵᠦ ᠪᠣᠳᠣᠭᠰᠠᠨ ᠶᠤᠮ᠃ ᠳᠠᠷᠬᠢ ᠨᠠᠳᠠ ᠠ᠋ᠴᠠ ᠨᠢᠭᠡ ᠠᠬᠠ᠂ ᠪᠢᠳᠡ ᠬᠣᠶᠠᠷ ᠲᠣᠭᠯᠠᠵᠤ ᠥᠰᠦᠭᠰᠡᠨ᠃ ᠨᠠᠮᠠ ᠶ᠋ᠢ ᠢᠷᠡ ᠭᠡᠬᠦ ᠳ᠋ᠦ᠍ ᠢᠷᠡᠵᠦ ᠲᠠᠭᠠᠷᠠᠨᠠ᠃ ᠲᠡᠭᠡᠪᠡᠯ ᠪᠣᠭᠣᠷᠴᠢ ᠶ᠋ᠢ ᠶᠠᠪᠤᠭᠤᠯᠤᠨᠠ ᠭᠡᠪᠡ᠃ ᠨᠥᠭᠦᠭᠡ ᠬᠣᠶᠠᠷ ᠨᠢ ᠢᠨᠢᠶᠡᠯᠳᠦᠪᠡ᠃ ᠲᠡᠮᠦᠵᠢᠨ ᠴᠦ᠍ ᠢᠨᠢᠶᠡᠬᠦ ᠠᠶᠠᠳᠠᠭᠠᠳ᠄
— ᠵᠠ ᠵᠠ᠃ ᠢᠨᠢᠶᠡᠭᠡᠳ ᠪᠠᠢᠬᠤ ᠶᠠᠭᠤ ᠪᠠᠢᠭᠠ ᠶᠤᠮ ᠪᠣᠢ? ᠮᠣᠷᠳᠠᠶᠠ᠃ ᠬᠠᠷᠢᠵᠠᠭᠠᠶᠠ ᠳᠠ ᠭᠡᠯᠡ᠃
ᠲᠡᠭᠡᠭᠡᠳ ᠲᠡᠳᠡ ᠭᠡᠷ ᠲᠡᠭᠡᠨ ᠢᠷᠡᠯᠡ᠃
ᠪᠣᠭᠣᠷᠴᠢ᠂ ᠵᠠᠯᠮᠠ ᠬᠣᠶᠠᠷ ᠲᠡᠳᠡᠨ ᠢ᠋ ᠤᠭᠲᠤᠵᠤ᠂ ᠬᠢᠵᠦ ᠶᠠᠪᠤᠭᠤᠯᠤᠭᠰᠠᠨ ᠢ᠋ᠶ᠋ᠠᠨ ᠨᠢᠭᠡᠳ ᠨᠢᠭᠡ ᠦᠭᠡᠢ ᠶᠠᠷᠢᠵᠤ ᠢᠨᠢᠶᠡᠯᠳᠦᠨ ᠬᠥᠭᠵᠢᠯᠳᠦᠵᠦ《ᠶᠡᠬᠡ ᠰᠠᠢᠨ᠂ ᠶᠡᠬᠡ ᠰᠠᠢᠨ》 ᠭᠡᠵᠦ ᠲᠡᠮᠦᠵᠢᠨ ᠮᠠᠭᠲᠠᠭᠠᠳ᠄
— ᠪᠢᠳᠡ ᠴᠦ᠍ ᠭᠡᠰᠡᠨ ᠶᠡᠬᠡ ᠤᠷᠮᠠ ᠵᠣᠷᠢᠭᠲᠠᠢ ᠢᠷᠡᠯᠡ᠃ ᠲᠤᠭᠤᠷᠢᠯ ᠬᠠᠨ ᠪᠢᠳᠡᠨ ᠳ᠋ᠦ᠍ ᠲᠤᠰᠠᠯᠠᠨᠠ ᠭᠡᠰᠡᠨ᠃ ᠮᠡᠷᠭᠢᠳ ᠦ᠋ᠳ ᠲᠡᠢ ᠳᠠᠢᠳᠤᠬᠤ ᠯᠠ ᠪᠣᠯᠬᠤ ᠨᠢ᠃ ᠲᠡᠢᠨ ᠭᠡᠳᠡᠭ ᠲᠣᠭᠯᠠᠭᠠᠮ ᠨᠠᠭᠠᠳᠤᠮ ᠪᠢᠰᠢ᠃ ᠠᠮᠢ ᠨᠠᠰᠤᠨ ᠤ᠋ ᠥᠷᠢᠰᠦᠯᠳᠦᠭᠡᠨ᠃ ᠳᠠᠢᠳᠤᠬᠤ ᠶ᠋ᠢᠨ ᠲᠤᠯᠠ ᠶᠡᠬᠡ ᠠᠵᠢᠯ ᠪᠠᠢᠭᠠ᠃ ᠠᠵᠢᠯ ᠳ᠋ᠠᠭᠠᠨ ᠣᠷᠣᠵᠠᠭᠠᠨᠠ ᠳᠠ ᠭᠡᠯᠡ᠃
ᠲᠡᠭᠡᠰᠬᠢᠭᠡᠳ ᠲᠡᠮᠦᠵᠢᠨ ᠪᠣᠭᠣᠷᠴᠢ ᠶ᠋ᠢ ᠳᠠᠭᠠᠭᠤᠯᠤᠨ ᠬᠣᠢᠲᠤ ᠳᠣᠪᠣᠴᠠᠭ ᠳᠡᠭᠡᠷᠡ ᠭᠠᠷᠴᠤ ᠵᠠᠪᠢᠯᠠᠨ ᠰᠠᠭᠤᠵᠠᠭᠠᠪᠠ᠃ ᠲᠡᠮᠦᠵᠢᠨ ᠪᠣᠭᠣᠷᠴᠢ ᠤᠷᠤᠭᠤ ᠠᠷᠭᠠᠳᠠᠩᠭᠣᠢ ᠬᠠᠨᠳᠤᠵᠤ᠄
— ᠪᠣᠭᠣᠷᠴᠢ ᠠ᠋᠂ ᠪᠢ ᠴᠢᠮᠠᠶ᠋ᠢ ᠨᠢᠭᠡ ᠠᠵᠢᠯ ᠳ᠋ᠤ᠌ ᠲᠣᠬᠣᠭᠠᠵᠤ ᠶᠠᠪᠤᠭᠤᠯᠤᠮᠠᠷ ᠪᠠᠢᠨᠠ᠃ ᠤᠬᠠᠭᠠᠨ ᠳ᠋ᠠᠭᠠᠨ ᠠᠩᠬᠠᠨ ᠤ᠋ ᠳᠠᠭᠠᠭᠠᠯᠭᠠᠪᠤᠷᠢ ᠭᠡᠬᠦ ᠤᠤ ᠳᠠ ᠭᠡᠬᠦ ᠳ᠋ᠦ᠍ ᠪᠣᠭᠣᠷᠴᠢ ᠬᠦᠯᠢᠴᠡᠩᠭᠦᠢ ᠪᠡᠷ᠄
— ᠵᠠ᠂ ᠪᠡᠶᠡᠯᠡᠭᠦᠯᠦᠶᠡ ᠭᠡᠪᠡ᠃ ᠲᠡᠮᠦᠵᠢᠨ ᠨᠢᠭᠡ ᠴᠢᠯᠠᠭᠤ ᠠᠯᠠᠭᠠᠨ ᠳᠡᠭᠡᠷᠡ ᠪᠡᠨ ᠪᠥᠮᠪᠥᠷᠢᠭᠦᠯᠦᠨ ᠤᠷᠤᠯᠳᠤᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠭᠠᠷ ᠢ᠋ᠶ᠋ᠠᠨ ᠡᠷᠭᠦᠵᠦ ᠪᠠᠷᠠᠭᠤᠨ ᠬᠣᠢᠲᠤ ᠵᠦᠭ ᠵᠢᠭᠠᠵᠤ᠄
— ᠬᠡᠨᠲᠡᠢ ᠨᠢᠷᠤᠭᠤᠨ ᠤ᠋ ᠶᠠᠩ ᠰᠠᠷᠢᠳᠠᠭ ᠤ᠋ᠨ ᠠᠷᠤ ᠪᠠᠷ ᠬᠡᠰᠡᠭ ᠪᠤᠰᠠᠭ ᠠᠢᠯ ᠥᠩᠭᠡᠷᠡᠭᠰᠡᠨ ᠨᠠᠮᠤᠷ ᠲᠠᠷᠭᠤᠲᠠᠢ ᠬᠢᠷᠢᠯᠳᠣᠭ ᠠ᠋ᠴᠠ ᠬᠣᠯᠠᠳᠠᠵᠤ ᠨᠠᠭᠠᠰᠢᠯᠠᠵᠤ ᠶᠠᠪᠤᠭᠠ ᠭᠡᠰᠡᠨ ᠰᠤᠷᠠᠭ ᠪᠠᠢᠭᠠ ᠶᠤᠮ᠃ ᠲᠡᠳᠡᠨ ᠳᠤᠮᠳᠠ ᠮᠠᠨ ᠤ᠋ ᠠᠪᠤ ᠶ᠋ᠢᠨ ᠬᠣᠷᠴᠢ ᠬᠠᠷᠪᠤᠭᠠᠴᠢ ᠠᠭᠰᠠᠨ ᠰᠢᠯᠦᠬᠡᠢ ᠶ᠋ᠢᠨ ᠬᠢ ᠪᠠᠢᠭᠠ ᠳᠤᠭᠤᠯᠳᠠᠨᠠ᠃ ᠲᠡᠳᠡᠨ ᠦ᠌ ᠬᠥᠪᠡᠭᠦᠨ ᠲᠠᠷᠢᠬᠢ ᠲᠠᠢ ᠪᠢ ᠪᠠᠭᠠ ᠳ᠋ᠠᠭᠠᠨ ᠴᠢᠯᠠᠭᠤᠨ ᠲᠣᠭᠯᠠᠭᠠᠮ ᠢ᠋ᠶ᠋ᠠᠷ ᠲᠣᠭᠯᠠᠳᠠᠭ᠂ ᠲᠡᠷᠡ ᠬᠠᠪᠴᠢᠶᠠᠬᠠᠢ ᠪᠠᠷ ᠶᠡᠬᠡ ᠮᠡᠷᠭᠡᠨ ᠬᠠᠷᠪᠤᠳᠠᠭ ᠬᠡᠦᠬᠡᠳ ᠪᠠᠢᠭᠰᠠᠨ᠃ ᠨᠠᠳᠠ ᠠ᠋ᠴᠠ ᠨᠠᠰᠤ ᠪᠠᠷ ᠨᠢᠭᠡ ᠠᠬᠠ᠂ ᠨᠠᠳᠠ ᠨᠥᠬᠥᠷ ᠪᠣᠯᠬᠤ ᠶᠣᠰᠣᠲᠠᠢ ᠬᠥᠮᠦᠨ᠃ ᠲᠡᠭᠦᠨ ᠢ᠋ ᠣᠯᠵᠤ ᠢᠷᠡᠬᠦ ᠡᠭᠦᠷᠭᠡ ᠴᠢᠮᠠᠲᠤ ᠣᠨᠣᠭᠠᠵᠤ ᠪᠠᠢᠨᠠ᠃ ᠲᠡᠷᠡ ᠨᠠᠭᠠᠰᠢ ᠢᠷᠡᠬᠦ ᠡᠴᠡ ᠳᠤᠷᠠ ᠦᠭᠡᠢᠴᠡᠵᠦ ᠪᠣᠯᠤᠨᠠ᠃ ᠲᠡᠭᠡᠪᠡᠯ ᠠᠯᠪᠠᠳᠠᠬᠤ ᠬᠡᠷᠡᠭ ᠦᠭᠡᠢ᠃ ᠣᠷᠭᠢ᠂ ᠬᠡᠷᠪᠡ ᠲᠡᠷᠡ ᠢᠷᠡᠬᠦ ᠡᠴᠡ ᠲᠠᠲᠠᠭᠠᠯᠵᠠᠪᠠᠯ ᠲᠡᠷᠡ ᠬᠠᠪᠢ ᠶ᠋ᠢᠨ ᠠᠢᠯ ᠬᠡᠨ ᠦ᠌ ᠬᠢ᠂ ᠬᠠᠮᠢᠭᠠᠭᠤᠷ ᠰᠠᠭᠤᠭᠠ ᠶ᠋ᠢ ᠮᠡᠳᠡ᠃ ᠭᠡᠬᠦ ᠳ᠋ᠡᠭᠡᠨ ᠠᠢᠯ ᠢ᠋ᠶ᠋ᠠᠷ ᠣᠷᠣᠬᠤ᠂ ᠬᠡᠰᠦᠬᠦ ᠬᠡᠷᠡᠭ ᠦᠭᠡᠢ᠃ ᠵᠥᠪᠬᠡᠨ ᠰᠢᠯᠦᠬᠡᠢ ᠶ᠋ᠢᠨ ᠬᠡᠨ ᠨᠢᠭᠡᠨ ᠡᠴᠡ ᠯᠡ ᠠᠰᠠᠭᠤᠵᠤ ᠮᠡᠳᠡᠵᠦ ᠪᠣᠯᠬᠤ ᠪᠣᠢ᠃ ᠲᠡᠳᠡᠨ ᠦ᠌ ᠬᠢᠨ ᠴᠢᠮᠠᠶ᠋ᠢ ᠬᠦᠨᠳᠦᠯᠡᠵᠦ ᠬᠦᠯᠢᠶᠡᠨ ᠠᠪᠬᠤ ᠪᠠᠢᠬᠠ᠃ ᠮᠠᠨ ᠤ᠋ ᠡᠴᠢᠭᠡ ᠶ᠋ᠢᠨ ᠰᠢᠳᠠᠷ᠂ ᠲᠡᠭᠡᠭᠡᠳ ᠴᠦ᠍ ᠨᠠᠮᠠ ᠶ᠋ᠢ ᠪᠠᠭᠠ ᠳ᠋ᠤ᠌ ᠨᠠᠳᠠᠳᠤ ᠶᠡᠬᠡ ᠰᠠᠢᠨ᠂ ᠡᠷᠬᠡᠯᠡᠭᠦᠯᠳᠡᠭ ᠪᠠᠢᠭᠰᠠᠨ᠃ ᠪᠣᠯᠣᠮᠵᠢᠲᠠᠢ ᠰᠠᠨᠠᠭᠳᠠᠪᠠᠯ ᠲᠡᠨᠳᠡ ᠰᠠᠭᠠᠲᠠᠵᠤ ᠴᠤ᠌ ᠪᠣᠯᠤᠨᠠ᠃ ᠲᠡᠭᠡᠬᠦ ᠳ᠋ᠡᠭᠡᠨ ᠳᠣᠯᠣᠭᠠ ᠬᠣᠨᠣᠭ ᠁ ᠢᠯᠡᠭᠦᠦ ᠤᠳᠠᠪᠠᠯ ᠪᠢᠳᠡ ᠰᠠᠨᠳᠤᠷᠬᠤ ᠪᠤᠶᠤ᠃
ᠪᠢ ᠲᠠᠢᠴᠢᠭᠤᠳ ᠲᠤ᠌ ᠪᠠᠷᠢᠭᠳᠠᠭᠠᠳ ᠣᠴᠢᠬᠤ ᠪᠤᠴᠠᠬᠤ ᠵᠠᠮ ᠳ᠋ᠠᠭᠠᠨ ᠪᠠᠢᠭᠰᠠᠨ ᠭᠠᠵᠠᠷ᠃ 50 — 60 ᠮᠣᠳᠣ ᠬᠢᠷᠢ᠃ ᠤᠭ ᠨᠢ ᠰᠢᠷᠦᠭᠦᠬᠡᠨ ᠶᠠᠪᠤᠪᠠᠯ ᠡᠳᠦᠷ ᠦ᠋ᠨ ᠬᠤᠭᠤᠰ ᠤ᠋ᠨ ᠭᠠᠵᠠᠷ᠃ ᠮᠠᠷᠭᠠᠰᠢ ᠥᠷᠯᠥᠭᠡ ᠡᠷᠲᠡᠬᠡᠨ ᠰᠢᠭ ᠮᠣᠷᠳᠠ᠃ ᠪᠢ ᠴᠢᠮᠠᠶ᠋ᠢ ᠭᠠᠷᠭᠠᠵᠤ᠂ ᠥᠨᠳᠥᠷᠯᠢᠭ ᠳᠡᠭᠡᠷᠡ ᠡᠴᠡ ᠭᠠᠵᠠᠷ ᠵᠢᠭᠠᠵᠤ ᠥᠭᠭᠦᠨᠡ ᠭᠡᠯᠡ᠃