ᠪᠦᠯᠵᠢᠬᠢᠨ ᠬᠠᠲᠤᠨ– [ᠮᠣᠩᠭᠣᠯ] ᠳᠠᠮᠪᠠ ᠶᠢᠨ ᠲᠥᠷᠥᠪᠠᠲᠤ <ᠲᠠᠪᠤᠳᠤᠭᠠᠷ ᠪᠦᠯᠦᠭ 4-5> Бүлжхэн хатан– [монгол] Дамбын Төрбат <тавдугаар бүлэг 4-5>
77ᠪᠦᠯᠵᠢᠬᠢᠨ ᠬᠠᠲᠤᠨ– ᠲᠠᠪᠤᠳᠤᠭᠠᠷ ᠪᠦᠯᠦᠭ <4-5>
ᠬᠤᠲᠤᠭᠲᠤ ᠮᠣᠩᠬᠣᠷ ᠭᠠᠯ ᠲᠠᠢ ᠲᠤᠯᠭᠠᠨ ᠤ᠋ ᠲᠣᠲᠣᠭᠣ ᠪᠠᠵᠠᠭᠠᠳ ᠠᠪᠬᠤ ᠠ᠋ᠴᠠ ᠡᠰᠡ ᠪᠤᠴᠠᠵᠠᠢ᠃ ᠲᠡᠭᠦᠨ ᠦ᠌ ᠨᠢᠭᠤᠷ ᠮᠢᠨᠴᠢᠢᠨ ᠤᠯᠠᠢᠵᠤ᠂ ᠲᠠᠰᠤ ᠠᠳᠬᠤᠭᠰᠠᠨ ᠭᠠᠷ ᠤ᠋ᠨ ᠬᠢᠨᠢ ᠬᠥᠬᠡ ᠰᠤᠳᠠᠰᠤ ᠬᠦᠷᠡᠢᠨ ᠠᠢᠬᠤᠪᠲᠤᠷ ᠠᠭᠤᠷᠰᠠᠵᠤ᠂
— ᠴᠢ᠁ ᠴᠢ ᠬᠡᠴᠢᠨᠡᠭᠡᠨ ᠵᠢᠯ ᠠᠷᠭᠠᠳᠠᠬᠤ ᠭᠡᠰᠡᠨ ᠶᠦᠮ ᠪᠣᠢ? ᠨᠡᠷᠡ ᠲᠡᠢ ᠡᠴᠡ ᠬᠡᠦᠬᠡᠨ ᠢ᠋ᠶ᠋ᠡᠨ ᠲᠠᠯᠬᠢᠭᠤᠯᠵᠤ᠂ ᠬᠦᠯᠦᠭ ᠢ᠋ᠶ᠋ᠡᠨ ᠤᠨᠤᠭᠤᠯᠤᠶᠠ ᠭᠡᠵᠦ ᠬᠡᠯᠡᠲᠦᠭᠡᠢ! ᠭᠡᠮᠡᠨ ᠣᠪᠣᠯᠵᠠᠪᠠ᠃ ᠠᠮᠪᠠᠭᠠᠢ ᠬᠠᠭᠠᠨ ᠬᠠᠭᠤᠷᠠᠢ ᠮᠣᠳᠣᠨ ᠤ᠋ ᠮᠥᠴᠢᠷ ᠰᠢᠭ ᠳᠦᠷᠡᠯᠵᠡᠬᠦ ᠡᠷᠡ ᠶ᠋ᠢ ᠴᠢᠮᠡᠭᠡ ᠦᠭᠡᠢ ᠬᠠᠷᠠᠵᠤ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ᠂
— ᠡᠷᠬᠢᠮ ᠨᠣᠶᠠᠨ ᠲᠠ ᠥᠷᠥᠰᠢᠶᠡᠨ ᠰᠣᠶᠣᠷᠬᠠ᠃ ᠵᠥᠭᠡᠯᠡᠨ ᠨᠢ ᠬᠠᠲᠠᠭᠤ ᠪᠠᠨ ᠢᠳᠡᠳᠡᠭ ᠰᠠᠨ ᠪᠢᠯᠡ ᠭᠡᠬᠦ ᠳ᠋ᠦ᠍ ᠬᠤᠲᠤᠭᠲᠤ ᠮᠣᠩᠬᠣᠷ ᠨᠡᠭᠡᠭᠡᠯᠲᠡ ᠲᠡᠢ ᠡᠭᠦᠳᠡ ᠪᠡᠷ ᠱᠠᠭᠠᠯᠵᠠᠨ ᠪᠠᠢᠵᠤ ᠶᠠᠳᠠᠪᠠ᠃ ᠲᠡᠭᠦᠨ ᠦ᠌ ᠬᠦᠰᠡᠨ ᠬᠦᠯᠢᠶᠡᠭᠰᠡᠨ ᠨᠡᠭᠦᠳᠡᠯ ᠬᠥᠰᠬᠡ ᠪᠠᠰᠠ ᠯᠠ ᠠᠯᠠᠭᠠ ᠠᠵᠢ᠃ ᠳᠡᠮᠡᠢ ᠯᠡ ᠶᠢᠰᠦᠭᠡᠢ ᠲᠠᠢᠰᠢ ᠬᠠᠷᠠᠴᠠ ᠰᠢᠳᠡᠬᠦ ᠳ᠋ᠦ᠍ ᠠᠬᠠ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍ ᠴᠢᠴᠢᠭᠦᠯᠦᠭᠰᠡᠨ ᠵᠠᠯᠠᠭᠤ ᠡᠷᠡ ᠰᠢᠨᠡ ᠬᠠᠭᠠᠨ ᠤ᠋ ᠰᠦᠷ ᠲᠦ᠍ ᠳᠠᠷᠤᠭᠳᠠᠨ ᠪᠠᠬᠠᠨ ᠬᠤᠯᠴᠠᠢᠪᠠᠴᠤ᠂
— ᠬᠠᠭᠠᠨ ᠲᠠ ᠪᠣᠯᠭᠣᠭᠠ! ᠬᠠᠷᠠ ᠲᠡᠷᠭᠡᠲᠦ ᠰᠢᠪᠡᠢ(ᠰᠢᠪᠡᠭᠡ) ᠶ᠋ᠢᠨ ᠤᠳᠤᠮ ᠰᠤᠳᠤᠷ᠂ ᠡᠨᠡ ᠬᠠᠷᠠ ᠳ᠋ᠠᠳᠠᠨ ᠨᠠᠷ ᠲᠠᠩᠳᠠ ᠬᠠᠷᠠ ᠮᠥᠷ ᠲᠡᠢ ᠪᠠᠢᠭᠰᠠᠨ ᠪᠤᠰᠤ ᠤᠤ? ᠠᠩᠭᠠᠷ ᠮᠥᠷᠡᠨ ᠦ᠌ ᠠᠳᠠᠭ ᠠ᠋ᠴᠠ ᠢᠷᠡᠭᠰᠡᠨ ᠭᠡᠳᠡᠭ ᠪᠢᠵᠡ ᠳᠡ᠂ ᠬᠣᠷᠴᠢ ᠠ᠋? ᠭᠡᠬᠦ ᠳ᠋ᠦ᠍ ᠬᠥᠩᠬᠥᠷ ᠬᠣᠷᠴᠢ ᠪᠣᠱᠣᠭᠠᠨ ᠤ᠋ ᠰᠢᠷᠣᠢ ᠫᠣᠷ ᠬᠢᠯᠭᠡᠨ ᠤᠬᠤᠰᠬᠢᠵᠦ᠂
— ᠵᠠ᠂ ᠲᠡᠢᠮᠦ ᠠ᠋᠃ ᠳᠥᠷᠪᠡᠨ᠂ ᠰᠠᠯᠵᠢᠭᠤᠳ᠂ ᠬᠠᠲᠠᠭᠢᠨ ᠠᠢᠮᠠᠭ ᠲᠠᠢ ᠨᠡᠢᠯᠡᠵᠦ ᠨᠢᠭᠡᠳᠴᠦ ᠶᠠᠪᠤᠭᠰᠠᠨ ᠭᠡᠵᠦ ᠦᠶᠡ ᠦᠶᠡ ᠶ᠋ᠢᠨ ᠬᠣᠷᠴᠢ ᠨᠠᠷ ᠦᠦᠬᠡ ᠲᠡᠦᠬᠡᠨ ᠳ᠋ᠦ᠍ ᠦᠯᠡᠳᠡᠭᠡᠭᠰᠡᠨ ᠪᠢᠯᠡ ᠬᠡᠮᠡᠪᠡ᠃ ᠡᠢᠨ ᠬᠠᠷᠢᠭᠤᠯᠬᠤ ᠳ᠋ᠠᠭᠠᠨ ᠢᠰᠡᠭᠡᠢ ᠶ᠋ᠢ ᠪᠠᠰᠠ ᠬᠦ᠌ ᠳᠣᠲᠣᠷᠠ ᠪᠠᠨ ᠲᠣᠭᠣᠵᠤ《ᠪᠡᠶᠡ ᠲᠡᠢ ᠲᠥᠷᠥᠭᠰᠡᠨ ᠪᠢᠯᠢᠭᠲᠡᠨ ᠶᠦᠮ᠃ ᠠᠮᠪᠠᠭᠠᠢ ᠬᠠᠭᠠᠨ ᠤ᠋ ᠲᠥᠷᠥ ᠳ᠋ᠦ᠍ ᠲᠦᠰᠢᠮᠡᠯ ᠡᠷᠳᠡᠨᠢ ᠳᠤᠲᠠᠭᠤ ᠪᠢᠯᠡ᠃ ᠶᠢᠰᠦᠭᠡᠢ ᠬᠦᠦ ᠶ᠋ᠢ ᠲᠩᠷᠢ ᠵᠠᠶᠠᠭᠠᠬᠤ ᠨᠢ ᠶᠦᠮ ᠪᠣᠯᠪᠠ ᠤᠤ》 ᠭᠡᠵᠦ ᠪᠣᠳᠣᠯᠠ᠃ ᠶᠢᠰᠦᠭᠡᠢ ᠦᠭᠡ ᠪᠡᠨ ᠦᠷᠭᠦᠯᠵᠢᠯᠡᠭᠦᠯᠵᠦ᠂
— ᠬᠠᠭᠠᠨ ᠲᠠ ᠰᠣᠶᠣᠷᠬᠠᠪᠠᠯ ᠤᠭ ᠤᠳᠤᠮ ᠢ᠋ ᠨᠢ ᠪᠣᠳᠣᠵᠤ᠂ ᠤᠯᠤᠰ ᠠᠢᠮᠠᠭ ᠲᠤ᠌ ᠲᠠᠷᠢᠵᠤ ᠪᠣᠢ ᠤᠷᠰᠢᠭ ᠢ᠋ ᠰᠠᠨᠠᠵᠤ ᠴᠡᠷᠢᠭ ᠮᠣᠷᠳᠠᠭᠤᠯᠬᠤ ᠳ᠋ᠤ᠌ ᠪᠣᠯᠬᠤ ᠦᠭᠡᠢ ᠶᠠᠭᠤᠮᠠ ᠦᠭᠡᠢ ᠮᠡᠲᠦ ᠠ᠋ ᠭᠡᠪᠡᠯ ᠪᠠᠷᠠᠳᠠᠨᠪᠠᠭᠠᠲᠤᠷ ᠬᠦᠦ ᠪᠡᠨ ᠰᠠᠶᠢ ᠦᠵᠡᠵᠦ ᠪᠣᠢ ᠮᠡᠲᠦ ᠲᠣᠮᠣ ᠬᠠᠷᠠᠵᠤ᠂
— ᠵᠠᠯᠠᠭᠤ ᠪᠠᠢᠬᠤ ᠳ᠋ᠤ᠌ ᠲᠡᠢᠨ ᠡᠴᠡ ᠵᠠᠯᠬᠠᠳᠠᠭ ᠦᠭᠡᠢ᠃ ᠥᠲᠡᠯᠦᠭᠰᠡᠨ ᠬᠣᠢᠨᠠ ᠬᠠᠷᠢᠨ ᠭᠡᠮᠰᠢᠯ ᠲᠣᠭᠣᠷᠢᠳᠠᠭ ᠦᠭᠡᠢ ᠶᠦᠮ᠃ ᠠᠶᠤᠭᠰᠠᠨ ᠳ᠋ᠠᠭᠠᠨ ᠮᠢᠨᠦ ᠡᠴᠢᠭᠡ ᠠᠮᠤᠭᠤᠯᠠᠩ ᠰᠠᠭᠤᠭᠠ ᠦᠭᠡᠢ ᠪᠢᠯᠡ᠃ ᠤᠯᠠᠭᠠᠨ ᠴᠢᠰᠤ ᠪᠠᠨ ᠤᠷᠤᠰᠬᠠᠵᠤ ᠪᠢᠰᠢ᠂ ᠤᠬᠠᠭᠠᠨ ᠪᠣᠳᠣᠯ ᠢ᠋ᠶ᠋ᠠᠨ ᠠᠰᠬᠠᠷᠠᠭᠤᠯᠵᠤ ᠲᠡᠮᠡᠴᠡᠳᠡᠭ ᠪᠠᠢᠭᠰᠠᠨ ᠶᠤᠮ ᠭᠡᠪᠡᠯ ᠬᠤᠲᠤᠭᠲᠤ ᠮᠣᠩᠬᠣᠷ ᠦᠭᠡ ᠶ᠋ᠢ ᠨᠢ ᠲᠠᠰᠤ ᠳᠠᠭᠠᠷᠢᠨ᠂
— ᠠᠮᠪᠠᠭᠠᠢ ᠲᠠᠨ ᠢ᠋ ᠪᠢᠳᠡ ᠬᠠᠷᠠᠵᠤ ᠰᠠᠭᠤᠬᠤ ᠭᠡᠵᠦ ᠬᠠᠭᠠᠨ ᠪᠣᠯᠭᠠᠭᠠ ᠦᠭᠡᠢ ᠪᠢᠯᠡ᠃ ᠴᠢ ᠬᠠᠷᠠ! ᠭᠡᠰᠡᠨ ᠢ᠋ᠶ᠋ᠡᠨ ᠪᠣᠰᠤᠨ ᠬᠠᠷᠠᠢᠵᠤ ᠲᠤᠯᠭᠠ ᠲᠣᠭᠣᠭᠠ ᠲᠠᠲᠠᠬᠤ ᠠᠯᠲᠠᠨ ᠡᠭᠦᠳᠡ ᠤᠷᠤᠭᠤ ᠭᠦᠶᠦᠬᠦ ᠳ᠋ᠦ᠍ ᠪᠦᠭᠦᠳᠡ ᠮᠠᠯ ᠭᠠᠢᠬᠠᠵᠤ᠂ ᠨᠡᠭᠡᠭᠡᠯᠲᠡ ᠲᠡᠢ ᠬᠠᠭᠠᠯᠭᠠ ᠤᠷᠤᠭᠤ ᠬᠠᠷᠠᠴᠠ ᠪᠡᠯᠴᠢᠭᠡᠯᠡ᠃ ᠤᠷᠲᠤ ᠬᠥᠪᠡᠭᠡᠨ ᠳᠡᠭᠡᠭᠦᠷ ᠨᠡᠭᠦᠭᠡᠯᠲᠦᠭᠰᠡᠨ ᠬᠠᠷᠠ ᠶᠠᠭᠤᠮᠠ ᠠᠭᠠᠵᠢᠭᠤᠬᠠᠨ ᠲᠣᠳᠣᠷᠠᠨ ᠠᠢᠰᠤᠢ ᠶ᠋ᠢ ᠠᠩᠵᠠᠭᠠᠷᠠᠵᠤ᠂
— ᠨᠡᠭᠦᠳᠡᠯ ᠠᠢᠰᠤᠢ ᠤᠤ? ᠭᠡᠬᠦ ᠬᠠᠷᠯᠢ ᠺᠤ ᠡᠬᠡ ᠶ᠋ᠢᠨ ᠳᠠᠭᠤᠨ ᠢ᠋ᠶ᠋ᠠᠷ ᠪᠦᠭᠦᠳᠡ ᠤᠬᠤᠰᠬᠢᠨ ᠭᠠᠷᠤᠯᠠ᠃ ᠨᠠᠮᠤᠷ ᠤ᠋ᠨ ᠬᠠᠯᠠᠭᠤᠨ ᠳᠡᠭᠡᠷᠡ ᠥᠷᠳᠡᠭᠰᠡᠨ ᠭᠠᠯ ᠤ᠋ᠨ ᠢᠯᠴᠢ ᠨᠡᠮᠡᠵᠦ ᠶᠡᠬᠡᠰ ᠳᠡᠭᠡᠳᠦᠰ ᠶᠡᠬᠡᠳᠡ ᠬᠠᠯᠠᠭᠤᠴᠠᠵᠤ ᠪᠦᠭᠦᠳᠡ ᠶ᠋ᠢᠨ ᠬᠥᠯᠥᠰᠥ ᠪᠤᠷᠵᠢᠢᠨ᠂ ᠬᠡᠩᠬᠦᠳᠡᠭ ᠴᠡᠭᠡᠵᠢᠨ ᠡᠴᠡ ᠨᠢ ᠠᠭᠤᠷ ᠰᠠᠪᠰᠠᠵᠤ ᠪᠠᠢᠪᠠ᠃ ᠨᠣᠶᠠᠳ ᠤ᠋ᠨ ᠴᠢᠭᠤᠯᠭᠠᠨ ᠳ᠋ᠤ᠌ ᠦᠭᠡ ᠨᠡᠮᠡᠬᠦ ᠦᠭᠡᠢ ᠴᠦ᠍ ᠰᠡᠳᠬᠢᠯ ᠵᠣᠪᠠᠨᠢᠵᠤ ᠴᠢᠬᠢ ᠲᠠᠯᠪᠢᠨ ᠰᠠᠭᠤᠭᠰᠠᠨ ᠬᠠᠷᠯᠢ ᠺᠤ ᠡᠬᠡ ᠣᠭᠲᠣ ᠥᠭᠡᠷᠡ ᠶ᠋ᠢ ᠰᠠᠨᠠᠭᠠᠯᠵᠠᠨ ᠭᠠᠷ ᠲᠤ᠌ ᠲᠠᠭᠠᠷᠠᠯᠳᠤᠭᠰᠠᠨ ᠴᠤᠴᠠᠯᠢ ᠬᠢᠵᠦ᠂ ᠭᠠᠯ ᠥᠷᠳᠡᠭᠰᠡᠭᠡᠷ ᠪᠠᠢᠵᠤ ᠪᠢᠯᠡ᠃ ᠣᠳᠣ ᠴᠤ᠌ ᠰᠠᠨᠠᠭᠠ ᠨᠢ ᠬᠠᠷᠢ ᠥᠭᠡᠷᠡ ᠭᠠᠵᠠᠷ ᠲᠡᠨᠦᠭᠦᠴᠢᠯᠡᠵᠦ ᠶᠠᠪᠤᠪᠠ᠃《ᠥᠬᠢᠨᠪᠠᠷᠬᠠᠭ ᠮᠢᠨᠢ ᠠᠢᠰᠤᠢ ᠪᠢᠰᠢ ᠤᠤ》 ᠭᠡᠵᠦ ᠡᠬᠡ ᠶ᠋ᠢᠨ ᠵᠦᠩ ᠢ᠋ᠶ᠋ᠡᠷ ᠰᠠᠷᠬᠢᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠵᠠᠮ ᠤ᠋ᠨ ᠬᠠᠵᠠᠭᠤ ᠳ᠋ᠤ᠌ ᠪᠡᠯᠴᠢᠵᠦ ᠠᠭᠰᠠᠨ ᠲᠤᠭᠤᠯ ᠦᠷᠭᠦᠨ ᠣᠭᠣᠳᠣᠩᠨᠠᠵᠤ᠂ ᠰᠤᠪᠠᠢ ᠠᠳᠤᠭᠤ ᠬᠤᠢᠯᠠᠷᠠᠨ ᠲᠡᠷᠭᠡᠬᠦ ᠶ᠋ᠢ ᠦᠵᠡᠪᠡ᠃ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠰᠠᠵᠢᠭᠴᠢ ᠵᠦᠩ ᠲᠥᠷᠥᠵᠦ᠂ ᠳᠣᠣᠷᠠᠲᠤ ᠵᠣᠪᠬᠢ ᠲᠠᠲᠠᠬᠤ ᠰᠢᠭ᠋ ᠪᠣᠯᠬᠤ ᠳ᠋ᠤ᠌᠂
一 ᠶᠠᠭᠤᠨ ᠬᠥᠰᠬᠡ ᠪᠣᠢ? ᠭᠡᠯᠡ᠃
ᠶᠡᠷᠦ ᠬᠡᠦᠬᠡᠳ ᠲᠥᠷᠬᠦ ᠪᠡᠨ ᠠᠯᠳᠠᠭᠠ ᠦᠭᠡᠢ ᠨᠢᠭᠤᠷᠤᠨ ᠳ᠋ᠤᠨᠢ ᠭᠠᠢᠬᠠᠰᠢᠷᠠᠯ ᠲᠣᠳᠣᠷᠠᠭᠰᠠᠨ ᠶᠢᠰᠦᠭᠡᠢ᠂
一 ᠬᠠᠷᠢᠨ᠂ ᠨᠣᠬᠠᠳ ᠢ᠋ᠶ᠋ᠠᠨ ᠲᠠᠯᠪᠢᠭᠠᠳ ᠦᠵᠡᠪᠡᠯ ᠶᠠᠭᠠᠬᠢᠭᠰᠠᠨ ᠶᠤᠮ ᠪᠣᠢ? ᠭᠡᠯᠡ᠃ ᠬᠥᠩᠬᠥᠷ ᠬᠣᠷᠴᠢ《᠁ ᠲᠡᠷᠡ ᠠ᠋ ᠬᠥᠶᠢ᠂ ᠲᠥᠷᠥ ᠲᠦᠰᠢᠬᠦ ᠲᠦᠰᠢᠮᠡᠯ ᠤᠬᠠᠭᠠᠨ ᠲᠠᠢ ᠬᠦᠦ ᠶᠦᠮ᠃ ᠠᠮᠪᠠᠭᠠᠢ ᠬᠠᠭᠠᠨ ᠤ᠋ ᠲᠥᠷᠥ ᠲᠠᠪᠤᠨ ᠡᠷᠳᠡᠨᠢ ᠲᠡᠢ ᠰᠠᠨᠵᠠᠢ》 ᠭᠡᠮᠡᠨ ᠪᠣᠳᠣᠵᠤ ᠵᠣᠭᠰᠣᠯᠠ᠃ ᠵᠠᠷᠤᠴᠠ ᠰᠢᠪᠡᠭᠴᠢᠨ ᠨᠠᠷ ᠫᠡᠷ ᠫᠡᠷ ᠭᠦᠶᠦᠯᠳᠦᠨ ᠣᠴᠢᠵᠤ ᠤᠶᠠᠭᠠᠨ ᠳ᠋ᠠᠭᠠᠨ ᠠᠭᠰᠤᠴᠢᠨ ᠲᠡᠮᠡᠦᠯᠬᠦ ᠭᠠᠷᠵᠢ ᠨᠣᠬᠠᠳ ᠢ᠋ ᠭᠠᠷᠠᠬᠠᠨ ᠭᠢᠨᠵᠢᠨ ᠡᠴᠡ ᠨᠢ ᠮᠤᠯᠲᠤᠯᠤᠨ ᠲᠠᠯᠪᠢᠬᠤ ᠳ᠋ᠤ᠌ ᠬᠠᠷᠪᠤᠭᠰᠠᠨ ᠰᠤᠮᠤ ᠰᠢᠭ᠋ ᠳᠠᠪᠬᠢᠯᠳᠤᠨ ᠣᠳᠪᠠ᠃ ᠬᠠᠷᠯᠢ ᠺᠤ᠂
一 ᠮᠠᠭᠤ ᠬᠦᠦ ᠶ᠋ᠢ ᠮᠢᠨᠢ ᠤᠷᠠᠴᠢᠬᠠᠬᠤ ᠪᠣᠢ ᠳᠠ ᠭᠡᠬᠦ ᠳ᠋ᠦ᠍ ᠬᠤᠲᠤᠭᠲᠤ ᠮᠣᠩᠬᠣᠷ ᠰᠡᠳᠬᠢᠯ ᠡᠮᠲᠡᠷᠡᠨ ᠡᠷᠭᠢᠵᠦ ᠬᠠᠷᠠᠭᠠᠳ᠂
一 ᠬᠠᠲᠤᠨ ᠢᠵᠢᠢ ᠮᠢᠨᠢ᠂ ᠲᠠ ᠪᠣᠯᠭᠣᠭᠠᠵᠤ ᠦᠵᠡ᠂ ᠡᠨᠡ ᠡᠷᠡᠰ ᠦ᠋ᠨ ᠠᠵᠢᠯ ᠪᠢᠯᠡ ᠬᠡᠮᠡᠪᠡᠯ ᠢᠵᠢᠢ᠂
一 ᠬᠥᠪᠡᠭᠦᠨ ᠴᠢ᠂ ᠬᠤᠷᠠᠯᠲᠠᠢ ᠡᠷᠭᠦᠮᠵᠢᠯᠡᠵᠦ ᠠᠯᠲᠠᠨ ᠤᠷᠤᠭ ᠳᠡᠮᠵᠢᠭᠰᠡᠨ ᠠᠮᠪᠠᠭᠠᠢ ᠬᠠᠭᠠᠨ ᠤ᠋ ᠦᠭᠡᠨ ᠳ᠋ᠦ᠍ ᠶᠠᠭᠠᠬᠢᠭᠠᠳ ᠡᠰᠡ ᠣᠷᠣᠨᠠ ᠪᠣᠢ? ᠬᠥᠪᠡᠭᠦᠨ ᠴᠢ᠂ ᠠᠬᠠ ᠵᠠᠬᠠ ᠬᠥᠮᠦᠨ ᠢ᠋ ᠦᠭᠡ ᠬᠡᠯᠡ ᠪᠡᠷ ᠳᠠᠭᠠᠷᠢᠵᠤ᠂ ᠬᠠᠪᠤᠷ ᠤ᠋ᠨ ᠥᠯᠥᠨ ᠬᠠᠷᠴᠠᠭᠠᠢ ᠮᠡᠲᠦ ᠥᠷᠪᠥᠯᠵᠡᠨ ᠪᠠᠢᠬᠤ ᠳ᠋ᠤ᠌ ᠡᠬᠡ ᠪᠢ ᠶᠠᠭᠠᠬᠢᠵᠤ ᠠᠮᠤᠷ ᠰᠠᠭᠤᠨᠠ ᠪᠣᠢ? ᠭᠡᠳ ᠬᠠᠷᠢᠭᠤ ᠰᠣᠨᠣᠰᠬᠤ ᠶ᠋ᠢ ᠡᠰᠡ ᠬᠦᠰᠡᠨ ᠠᠢᠰᠤᠢ ᠪᠠᠷᠠ ᠶ᠋ᠢ ᠰᠢᠷᠳᠡᠪᠡ᠃ ᠭᠡᠲᠡᠯᠡ ᠬᠤᠢᠯᠠᠷᠠᠨ ᠱᠤᠤᠭᠢᠵᠤ ᠬᠦᠷᠦᠭᠰᠡᠨ ᠳᠥᠷᠪᠡᠨ ᠨᠢᠳᠦ ᠲᠡᠢ ᠬᠠᠯᠲᠠᠷ ᠨᠣᠬᠠᠳ ᠰᠠᠷᠢᠰᠤᠨ ᠬᠣᠩᠰᠢᠶᠠᠷ ᠳᠤᠮᠳᠠᠭᠤᠷ ᠢ᠋ᠶ᠋ᠠᠨ ᠴᠣᠬᠢᠭᠤᠯᠤᠭᠰᠠᠨ ᠮᠡᠲᠦ ᠬᠠᠩᠭᠢᠨᠠᠲᠠᠯᠠ ᠭᠠᠰᠠᠯᠤᠨ ᠡᠷᠭᠢᠵᠦ ᠱᠣᠭᠰᠢᠯᠠ᠃
— ᠬᠡᠨ ᠶᠦ᠍ᠮ ᠪᠣᠯ?
— ᠶᠠᠭᠤᠨ ᠠᠴᠢᠶᠠ ᠪᠠᠷᠠᠭᠠ ᠪᠢᠯᠡ᠃
— ᠬᠠᠭᠠᠨ ᠬᠦᠷᠢᠶᠡᠨᠡ ᠰᠢᠨᠡ ᠪᠡᠷ ᠢᠷᠡᠵᠦ ᠪᠠᠭᠤᠬᠤ ᠠᠯᠪᠠᠲᠤ ᠢᠷᠭᠡᠳ ᠴᠢᠨᠢ ᠶᠠᠭᠤ ᠪᠢᠯᠡ ᠭᠡᠯᠴᠡᠨ ᠳᠣᠣᠷᠠ ᠳᠣᠣᠷᠠ ᠪᠠᠨ ᠱᠤᠤᠭᠢᠯᠳᠤᠵᠤ ᠠᠭᠰᠠᠨ ᠨᠣᠶᠠᠳ ᠳᠡᠭᠡᠳᠦᠰ ᠠᠮᠠᠨ ᠳᠡᠭᠡᠷᠡ ᠪᠡᠨ ᠠᠯᠠᠭᠠᠳᠠᠭᠤᠯᠤᠭᠰᠠᠨ ᠮᠡᠲᠦ ᠲᠠᠭ ᠳᠠᠭᠤ ᠦᠭᠡᠢ ᠪᠣᠯᠪᠠ᠃ ᠠᠮᠪᠠᠭᠠᠢ ᠬᠠᠭᠠᠨ ᠪᠦᠭᠦᠳᠡ ᠶ᠋ᠢ ᠲᠣᠭᠣᠷᠢᠭᠤᠯᠤᠨ ᠬᠠᠷᠠᠵᠤ᠂ ᠪᠠᠷᠠᠳᠠᠨᠪᠠᠭᠠᠲᠤᠷ ᠣᠳᠣ ᠬᠢᠷᠢ ᠣᠮᠣᠭ ᠳᠦᠭᠦᠷᠡᠩ ᠴᠡᠭᠡᠵᠢ ᠨᠢ ᠲᠦᠬᠦᠯᠵᠡᠨ ᠵᠣᠭᠰᠣᠬᠤ ᠬᠤᠲᠤᠭᠲᠤ ᠮᠣᠩᠬᠣᠷ ᠠ᠋ᠴᠠ ᠠᠰᠠᠭᠤᠩᠭᠤᠢ ᠰᠢᠷᠲᠡᠪᠡ᠃ ᠶᠡᠷᠦ ᠶᠡᠬᠡ ᠦᠷᠭᠦᠭᠡᠨ ᠦ᠌ ᠭᠠᠳᠠᠨᠠ ᠠᠨᠢᠷ ᠭᠦᠮ ᠪᠣᠯᠤᠯᠠ᠃ ᠴᠢᠪ ᠴᠢᠮᠡᠭᠡ ᠦᠭᠡᠢ ᠶ᠋ᠢ ᠬᠠᠭᠰᠠᠭᠰᠠᠨ ᠲᠡᠷᠭᠡᠨ ᠦ᠌ ᠬᠢᠬᠤᠲᠤᠨᠠᠬᠤ ᠢᠷᠣᠠ ᠶ᠋ᠢᠨ ᠳᠠᠭᠤ ᠴᠢᠰᠤ ᠦᠭᠡᠢ ᠡᠪᠳᠡᠭᠰᠡᠭᠡᠷ ᠦᠨᠡᠰᠦᠨ ᠦ᠌ ᠴᠠᠭᠠᠬᠠᠨᠠ ᠢᠷᠡᠵᠦ ᠵᠣᠭᠰᠣᠬᠤ ᠳ᠋ᠤ᠌ ᠮᠠᠭᠤ ᠰᠤᠪᠢᠨ ᠳ᠋ᠤ᠌ ᠠᠪᠲᠠᠵᠤ ᠭᠦᠢᠴᠡᠭᠰᠡᠨ ᠬᠠᠷᠯᠢ ᠺᠤ ᠢᠵᠢᠢ᠂
— ᠠ᠋᠂ ᠲᠩᠷᠢ ᠮᠢᠨᠢ! ᠭᠡᠮᠡᠨ ᠳᠠᠭᠤ ᠠᠯᠳᠠᠵᠠᠢ᠃ ᠬᠤᠲᠤᠭᠲᠤ ᠮᠣᠩᠬᠣᠷ ᠢᠯᠠᠭᠰᠠᠨ ᠬᠥᠮᠦᠨ ᠦ᠌ ᠪᠠᠷᠳᠠᠮ ᠬᠠᠷᠠᠴᠠ ᠪᠠᠷ ᠪᠦᠭᠦᠳᠡ ᠶ᠋ᠢ ᠰᠢᠷᠪᠢᠭᠰᠡᠨ ᠢ᠋ᠶ᠋ᠡᠨ ᠮᠥᠨᠥ ᠬᠢ ᠢᠷᠣᠠ ᠠᠴᠢᠭᠰᠠᠨ ᠲᠡᠷᠭᠡ ᠤᠷᠤᠭᠤ ᠰᠢᠢᠳᠦᠮᠡᠭ ᠠᠯᠬᠤᠪᠠ᠃ ᠠᠮᠪᠠᠭᠠᠢ ᠬᠠᠭᠠᠨ᠂ ᠬᠦᠦ ᠬᠠᠲᠠᠭᠠᠨ ᠤᠷᠤᠭᠤ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠲᠦᠷᠢᠮᠡᠬᠡᠢ ᠡᠷᠡ ᠶ᠋ᠢᠨ ᠠᠷᠤ ᠠ᠋ᠴᠠ ᠠᠯᠬᠤᠬᠤ ᠳ᠋ᠤ᠌ ᠪᠦᠭᠦᠳᠡ ᠳᠠᠭᠠᠵᠠᠢ᠃ ᠮᠥᠨᠥᠬᠢ ᠲᠡᠷᠭᠡᠨ ᠦ᠌ ᠦᠨᠦᠷ ᠲᠠᠨᠤᠷ ᠠ᠋ᠴᠠ ᠳᠠᠢᠵᠢᠰᠭᠢᠵᠦ ᠡᠯᠵᠢᠭᠡᠳᠡᠢ ᠨᠣᠶᠠᠨ᠂ ᠮᠥᠨᠥᠬᠢ ᠬᠥᠲᠥᠴᠢ ᠡᠪᠦᠭᠡᠨ ᠬᠣᠶᠠᠷ ᠰᠠᠯᠬᠢᠨ ᠳᠡᠭᠡᠷᠡ ᠨᠢ ᠭᠠᠷᠴᠤ ᠵᠣᠭᠰᠣᠭᠠᠳ ᠬᠦᠯᠢᠶᠡᠵᠦ ᠪᠠᠢᠪᠠ᠃ ᠬᠤᠷᠠᠯᠲᠠᠢ ᠶ᠋ᠢᠨ ᠭᠡᠷ ᠡᠴᠡ ᠶᠡᠬᠡᠰ ᠨᠣᠶᠠᠳ ᠬᠣᠷᠭᠣᠢ ᠲᠣᠷᠭᠠ ᠪᠠᠷ ᠠᠯᠠᠭᠯᠠᠨ ᠴᠤᠪᠤᠬᠤ ᠳ᠋ᠤ᠌ ᠰᠦᠷᠳᠡᠭᠰᠡᠨ ᠡᠪᠦᠭᠡᠨ ᠲᠣᠳᠤᠭᠤᠰᠬᠢᠨ ᠰᠥᠭᠥᠳᠴᠦ᠂ ᠡᠯᠵᠢᠭᠡᠳᠡᠢ ᠨᠣᠶᠠᠨ ᠰᠤᠯᠠᠳᠠᠭᠰᠠᠨ ᠮᠣᠷᠢᠨ ᠤ᠋ ᠪᠠᠨ ᠴᠤᠯᠪᠤᠭᠤᠷ ᠰᠠᠪᠠᠨ ᠵᠣᠭᠰᠣᠵᠤ ᠠᠪᠠᠢ᠃ ᠬᠤᠲᠤᠭᠲᠤ ᠮᠣᠩᠬᠣᠷ ᠮᠥᠨᠥ ᠬᠢ ᠬᠣᠶᠠᠷ ᠢ᠋ ᠬᠥᠮᠦᠨ ᠴᠢᠨᠡᠭᠡ ᠲᠣᠭᠣᠭᠰᠠᠨ ᠦᠭᠡᠢ᠂ ᠰᠠᠯᠬᠢ ᠮᠡᠲᠦ ᠱᠤᠤᠭᠢᠨ ᠢᠷᠡᠵᠦ᠂ ᠪᠠᠭᠠᠷᠴᠠᠭᠯᠠᠨ ᠳᠦᠩᠭᠢᠨᠡᠬᠦ ᠢᠯᠠᠭᠠ ᠤᠷᠤᠭᠤ ᠱᠤᠩᠭᠤᠨ ᠣᠷᠣᠭᠰᠠᠨ ᠢ᠋ᠶ᠋ᠠᠨ ᠤᠩᠭᠤᠵᠤ ᠭᠠᠩᠳᠠᠭᠰᠠᠨ ᠳᠡᠪᠡᠯ ᠦ᠋ᠨ ᠲᠠᠮᠲᠤᠭ ᠢ᠋ ᠬᠠᠭᠤ ᠲᠠᠲᠠᠯᠠ᠃
— ᠠ᠋᠂ ᠲᠩᠷᠢ ᠮᠢᠨᠢ!
ᠬᠠᠷᠯᠢ ᠺᠤ ᠡᠢᠨ ᠥᠭᠦᠯᠡᠭᠡᠳ ᠨᠥᠮᠥᠷᠢ ᠲᠦᠰᠢᠭ ᠡᠷᠢᠬᠦ ᠮᠡᠲᠦ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠡᠢ ᠰᠠᠮᠤᠷᠳᠠᠬᠤ ᠳ᠋ᠤ᠌ ᠪᠦᠯᠵᠢᠭᠡᠨ ᠬᠠᠲᠤᠨ ᠳᠥᠰᠢᠨ ᠠᠪᠤᠯᠠ᠃ ᠲᠡᠭᠦᠨ ᠦ᠌ ᠴᠢᠷᠠᠢ ᠴᠣᠩᠬᠢᠢᠨ ᠴᠠᠢᠵᠤ《᠁ ᠡᠨᠡ᠁ᠡᠨᠡ ᠪᠣᠯ ᠪᠢᠴᠢᠬᠠᠨ ᠦᠭᠡ ᠨᠣᠶᠠᠨ ᠤ᠋ ᠬᠢᠭᠰᠡᠨ ᠠᠵᠢᠯ》 ᠭᠡᠮᠡᠨ ᠲᠡᠷᠭᠡᠨ ᠳᠡᠭᠡᠷᠡᠬᠢ ᠥᠳᠥ ᠢᠵᠠᠭᠠᠨᠠᠭᠰᠠᠨ ᠱᠠᠷᠢᠯ ᠢ᠋ ᠬᠠᠷᠠᠭᠠᠳ ᠯᠠ ᠪᠣᠳᠣᠵᠠᠢ᠃
ᠲᠡᠷᠡ ᠪᠡᠷ ᠦᠨᠦᠷ ᠲᠠᠨᠤᠷ᠂ ᠦᠢᠯᠡ ᠵᠣᠪᠠᠯᠠᠩ ᠠ᠋ᠴᠠ ᠬᠣᠯᠠᠳᠬᠤ ᠶ᠋ᠢᠨ ᠮᠥᠨ ᠪᠣᠯᠵᠤ ᠶᠡᠬᠡ ᠬᠠᠲᠤᠨ ᠢ᠋ ᠳᠥᠰᠢᠨ᠂
— ᠬᠠᠲᠤᠨ ᠲᠠ ᠦᠷᠭᠦᠭᠡᠨ ᠳ᠋ᠡᠭᠡᠨ ᠮᠣᠷᠢᠯᠠ᠁ ᠭᠡᠬᠦ ᠳ᠋ᠦ᠍ ᠬᠠᠷᠯᠢ ᠺᠤ ᠮᠥᠷᠥ ᠶ᠋ᠢ ᠨᠢ ᠳᠥᠰᠢᠨ ᠮᠡᠭᠰᠢᠵᠦ᠂
— ᠮᠢᠨᠦ ᠮᠠᠭᠤ ᠬᠦᠦ ᠶ᠋ᠢ ᠳᠠᠩᠴᠤ ᠳᠠ᠂ ᠳᠠᠩᠴᠤ ᠬᠡᠮᠡᠨᠡ᠃ ᠬᠣᠲᠣᠯᠠ ᠨᠣᠶᠠᠨ ᠢᠵᠢᠢ ᠪᠡᠨ ᠦᠷᠦ ᠡᠪᠡᠳᠴᠦ᠂ ᠲᠠᠲᠠᠪᠤᠷᠢ ᠡᠮᠡ ᠶ᠋ᠢᠨ ᠬᠡᠪᠡᠯᠢ ᠳ᠋ᠦ᠍ ᠲᠡᠢᠴᠢᠯᠡᠬᠦ ᠠᠯᠠᠭ ᠦᠷᠡ ᠪᠡᠨ ᠦᠬᠦᠯ ᠦ᠋ᠨ ᠰᠡᠭᠦᠳᠡᠷ ᠡᠴᠡ ᠬᠠᠷᠠᠮᠨᠠᠵᠤ᠂
— ᠲᠠ ᠬᠣᠶᠠᠷ ᠥᠷᠭᠥᠭᠡ ᠤᠷᠤᠭᠤ ᠣᠴᠢᠨᠠ ᠤᠤ ᠳᠠ ᠭᠡᠰᠡᠨ ᠢ᠋ᠶ᠋ᠡᠨ ᠪᠦᠭᠦᠳᠡ ᠳ᠋ᠦ᠍ ᠳᠤᠭᠤᠯᠳᠠᠬᠤᠢᠴᠠ ᠪᠠᠷ᠂
— ᠨᠣᠶᠠᠳ ᠠ᠋᠂ ᠬᠠᠲᠤᠳ ᠡᠮᠡᠰ ᠬᠢᠭᠡᠳ ᠨᠢᠯᠬᠠᠰ ᠠ᠋ᠴᠠ ᠬᠣᠯᠠᠳᠤᠭᠤᠯᠤᠶᠠ ᠳᠠ ᠭᠡᠯᠡ᠃ ᠭᠡᠲᠡᠯᠡ ᠬᠤᠲᠤᠭᠲᠤ ᠮᠣᠩᠬᠣᠷ ᠰᠢᠷᠲᠡᠰᠬᠢᠨ ᠬᠠᠷᠠᠵᠤ᠂
— ᠬᠣᠲᠣᠯᠠ! ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠬᠠᠭᠠᠨ ᠲᠥᠷᠥ ᠶ᠋ᠢᠨ ᠡᠮᠦᠨᠡ ᠴᠢ ᠭᠤᠷᠪᠠᠨ ᠬᠠᠷᠠ ᠨᠢᠭᠦᠯᠲᠡᠨ ᠪᠢᠯᠡ᠃ ᠨᠢᠭᠡᠨ ᠵᠦᠢᠯ᠂ ᠡᠷᠡ ᠶ᠋ᠢᠨ ᠲᠩᠷᠢ ᠬᠠᠶᠠᠭᠰᠠᠨ ᠴᠢ ᠠᠢᠯ ᠤ᠋ᠨ ᠲᠣᠭᠣᠭᠠ ᠥᠩᠭᠡᠢᠵᠦ ᠠᠮᠢ ᠵᠢᠭᠤᠬᠤ ᠶᠠᠯᠠ ᠶᠠᠩᠬᠠᠨ ᠲᠠᠢ ᠬᠣᠷᠮᠣᠢ ᠬᠣᠲᠣ ᠣᠷᠢᠶᠠᠴᠠᠯᠳᠠᠭᠤᠯᠵᠤ ᠬᠡᠢ ᠮᠣᠷᠢ ᠪᠤᠵᠠᠷᠯᠠᠭᠰᠠᠨ᠃ ᠲᠡᠷᠡ ᠡᠮᠡ ᠶ᠋ᠢᠨ ᠴᠢᠨᠢ ᠲᠡᠷᠰᠯᠡᠭᠦᠦ ᠦᠷᠡ ᠶ᠋ᠢᠨ ᠭᠠᠷ ᠲᠤ᠌ ᠮᠢᠨᠦ ᠠᠬᠠ ᠦᠷᠡᠭᠳᠡᠪᠡ᠃ ᠦᠵᠡ ᠴᠢ᠃ ᠪᠠᠰᠠ ᠨᠢᠭᠡ ᠵᠦᠢᠯ᠂ ᠬᠠᠨ ᠬᠥᠪᠡᠭᠦᠨ ᠪᠠᠢᠲᠠᠯᠠ ᠴᠢ ᠬᠠᠷᠠᠴᠤ ᠳᠣᠣᠷᠠᠳᠤᠰ ᠠ᠋ᠴᠠ ᠤᠪᠠᠢ ᠦᠭᠡᠢ ᠠᠭᠠᠰᠢᠯᠠᠭᠰᠠᠨ ᠤ᠋ ᠤᠯᠠᠮ ᠠ᠋ᠴᠠ ᠬᠠᠭᠠᠨ ᠡᠴᠢᠭᠡ ᠶᠡᠬᠡ ᠣᠷᠣ ᠰᠠᠭᠤᠬᠤ ᠬᠥᠮᠦᠨ ᠢ᠋ᠶ᠋ᠡᠷ ᠲᠠᠢᠴᠢᠭᠤᠳ ᠤ᠋ᠨ ᠠᠮᠪᠠᠭᠠᠢ ᠶ᠋ᠢ ᠨᠡᠷᠡ ᠴᠣᠬᠢᠭᠰᠠᠨ᠃ ᠡᠭᠦᠨ ᠦ᠌ ᠤᠴᠢᠷ ᠡᠭᠦᠯᠡᠨ ᠨᠡᠭᠦᠭᠰᠡᠨ ᠲᠩᠷᠢ ᠳᠣᠣᠷᠠ ᠪᠠᠨ ᠪᠢᠳᠡ ᠪᠠᠭᠲᠠᠬᠤ ᠦᠭᠡᠢ ᠳ᠋ᠦ᠍ ᠬᠦᠷᠴᠦ ᠪᠠᠢᠨᠠ᠃ ᠬᠠᠷᠠ ᠴᠢ! ᠨᠥᠭᠦᠭᠡ ᠨᠢᠭᠡᠨ ᠵᠦᠢᠯ᠂ ᠴᠠᠭ ᠤ᠋ᠨ ᠴᠠᠭ ᠲᠤ᠌ ᠬᠣᠲᠣᠯᠠ ᠴᠢ ᠴᠢᠷᠠᠢ ᠳᠠᠷᠤᠨ ᠬᠡᠢ ᠮᠣᠷᠢ ᠦᠭᠡᠢ ᠵᠠᠩᠨᠠᠵᠤ ᠠᠯᠲᠠᠨ ᠤᠯᠤᠰ ᠬᠢᠭᠡᠳ ᠶᠢᠰᠦᠨ ᠲᠠᠲ᠋ᠠᠷ ᠲᠤ᠌ ᠲᠠᠯᠠ ᠥᠭᠴᠦ ᠶᠠᠪᠤᠭᠰᠠᠨ ᠪᠢᠯᠡ᠃ ᠬᠣᠲᠣᠯᠠ ᠴᠢᠨᠦ ᠬᠣᠷᠮᠣᠢ ᠳ᠋ᠠᠭᠠᠨ ᠣᠷᠢᠶᠠᠴᠠᠯᠳᠤᠭᠰᠠᠨ ᠠᠵᠢᠯ ᠠᠬᠠ ᠶ᠋ᠢᠨ ᠮᠢᠨᠢ ᠠᠮᠢᠨ ᠳ᠋ᠤ᠌ ᠬᠦᠷᠦᠯᠡ᠁ ᠬᠡᠮᠡᠭᠡᠳ ᠰᠠᠷᠬᠢᠲᠠᠯᠠ ᠰᠡᠬᠦᠵᠦ ᠬᠠᠷᠠᠭᠤᠯᠤᠭᠰᠠᠨ ᠳᠡᠪᠡᠯ ᠦ᠋ᠨ ᠢ᠋ᠶ᠋ᠡᠨ ᠬᠣᠷᠮᠣᠢ ᠶ᠋ᠢ ᠬᠣᠷᠬᠢᠲᠠᠯᠠ ᠪᠤᠴᠠᠭᠠᠨ ᠬᠠᠶᠠᠬᠤ ᠳ᠋ᠤ᠌ ᠨᠢᠯ ᠬᠢᠭᠰᠡᠨ ᠦᠮᠡᠬᠡᠢ ᠦᠨᠦᠷ ᠬᠠᠮᠠᠷ ᠴᠣᠷᠭᠢᠨ ᠣᠭᠢᠭᠤᠳᠠᠰᠤ ᠬᠦᠷᠭᠡᠨ ᠠᠪᠠᠢ᠃ ᠬᠡᠨ ᠴᠦ᠍ ᠡᠰᠡ ᠳᠤᠤᠭᠠᠷᠪᠠ᠃ ᠪᠠᠷᠠᠳᠠᠨᠪᠠᠭᠠᠲᠤᠷ ᠬᠦᠷᠲᠡᠯᠡ ᠵᠤᠯᠠᠢ ᠭᠢᠰᠬᠢᠵᠦ ᠲᠥᠷᠥᠭᠰᠡᠨ ᠠᠬᠠ ᠶ᠋ᠢᠨ ᠥᠳᠥ ᠰᠢᠷᠭᠤᠯᠵᠢᠨ ᠳ᠋ᠤ᠌ ᠢᠳᠡᠭᠳᠡᠵᠦ ᠭᠦᠢᠴᠡᠭᠰᠡᠨ ᠴᠣᠭᠴᠠᠰ ᠢ᠋ ᠬᠠᠷᠠᠭᠠᠳ ᠪᠠᠯᠠᠮᠠᠭᠳᠠᠵᠤ ᠭᠦᠢᠴᠡᠵᠡᠢ᠃ ᠬᠠᠷᠯᠢ ᠺᠤ ᠬᠠᠲᠤᠨ ᠢ᠋ ᠲᠠᠯᠠ ᠲᠠᠯᠠ ᠠ᠋ᠴᠠ ᠨᠢ ᠳᠥᠰᠢᠨ᠂ ᠡᠮᠡᠰ ᠢᠯᠠᠭᠠ ᠳᠦᠩᠭᠢᠨᠡᠭᠰᠡᠨ ᠱᠠᠷᠢᠯ ᠲᠠᠢ ᠲᠡᠷᠭᠡᠨ ᠡᠴᠡ ᠠᠯᠭᠤᠷᠬᠠᠨ ᠬᠣᠯᠠᠳᠪᠠ᠃ ᠡᠷᠡᠴᠦᠦᠯ ᠲᠣᠯᠣᠭᠠᠢ ᠭᠠᠨᠵᠤᠭᠠᠯᠠᠨ ᠵᠣᠭᠰᠣᠬᠤ ᠨᠠᠮ ᠭᠦᠮ ᠳ᠋ᠦ᠍ ᠠᠬᠢᠭᠠᠳ ᠬᠤᠲᠤᠭᠲᠤ ᠮᠣᠩᠬᠣᠷ ᠤ᠋ᠨ ᠳᠠᠭᠤᠨ ᠬᠠᠲᠠᠵᠤ᠂
— ᠡᠴᠢᠭᠡ ᠶ᠋ᠢᠨ ᠲᠥᠷᠥ ᠶ᠋ᠢᠨ ᠰᠢᠭᠢᠷᠡ ᠬᠠᠲᠠᠭᠠᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠡᠮᠡ ᠶ᠋ᠢᠨ ᠬᠣᠷᠮᠣᠢ ᠰᠠᠬᠢᠵᠤ ᠰᠠᠭᠤᠭᠰᠠᠭᠠᠷ ᠡᠨᠡ ᠪᠣᠯᠪᠠ᠃ ᠱᠠᠷᠢᠯ ᠪᠣᠯᠵᠤ ᠢᠷᠡᠭᠰᠡᠨ ᠢ᠋ ᠨᠢ ᠲᠠ ᠨᠠᠷ ᠣᠩᠭᠣᠯᠠᠵᠤ ᠪᠠᠢ! ᠰᠢᠪᠠᠷ ᠬᠡᠷᠡᠮ ᠡᠴᠡ ᠣᠳᠣ ᠪᠢ ᠶᠠᠯᠠ ᠠᠰᠠᠭᠤᠨᠠ ᠭᠡᠰᠡᠨ ᠢ᠋ᠶ᠋ᠡᠨ ᠮᠥᠨᠥᠬᠢ ᠡᠪᠦᠭᠡᠨ ᠬᠥᠲᠥᠴᠢ ᠶ᠋ᠢᠨ ᠬᠡᠳᠦᠢᠨ ᠠᠪᠴᠢᠷᠠᠭᠰᠠᠨ ᠮᠣᠷᠢᠨ ᠤ᠋ ᠪᠠᠨ ᠴᠤᠯᠪᠤᠭᠤᠷ ᠢ᠋ ᠰᠤᠭᠤ ᠲᠡᠳᠡᠨ ᠠᠪᠴᠤ ᠠᠯᠠᠪᠬᠢᠨ ᠮᠣᠷᠳᠠᠯᠠ᠃ ᠠᠮᠪᠠᠭᠠᠢ ᠬᠠᠭᠠᠨ ᠠᠷᠭᠠ ᠲᠠᠰᠤᠷᠠᠨ᠂
— ᠬᠤᠲᠤᠭᠲᠤ ᠨᠣᠶᠠᠨ ᠲᠠ ᠲᠣᠭᠲᠠᠵᠤ ᠬᠠᠢᠷᠠᠯᠠ! ᠬᠠᠭᠠᠨ ᠤ᠋ ᠦᠷᠡ ᠲᠠ ᠭᠡᠳᠡᠭ ᠨᠢ ᠦᠨᠡᠨ ᠴᠦ᠍᠂ ᠬᠠᠭᠠᠨ ᠤ᠋ ᠣᠷᠣ ᠪᠢ ᠰᠠᠭᠤᠭᠰᠠᠨ ᠪᠢᠯᠡ᠃ ᠵᠠᠷᠯᠢᠭ ᠵᠠᠷᠯᠠᠭᠠ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠲᠡᠢᠨ ᠳ᠋ᠦ᠍ ᠮᠣᠷᠳᠠᠬᠤ ᠨᠢ ᠵᠦᠢ ᠳ᠋ᠦ᠍ ᠨᠡᠢᠴᠡᠬᠦ ᠪᠢᠯᠡ ᠤᠤ ᠬᠡᠮᠡᠬᠦ ᠳ᠋ᠦ᠍ ᠬᠤᠲᠤᠭᠲᠤ ᠮᠣᠩᠬᠣᠷ ᠡᠷᠭᠢᠴᠡᠨ ᠬᠣᠢᠷᠠᠭᠠᠨᠠᠬᠣ ᠳᠡᠯᠲᠦ ᠬᠦᠯᠦᠭ ᠦ᠋ᠨ ᠢ᠋ᠶ᠋ᠡᠨ ᠵᠣ ᠳᠡᠭᠡᠷᠡ ᠡᠴᠡ ᠲᠣᠩᠭᠣᠢᠨ ᠮᠠᠭᠤᠬᠠᠨ ᠮᠤᠰᠢᠯᠵᠠᠵᠤ᠂
— ᠲᠥᠷᠥ ᠶ᠋ᠢᠨ ᠭᠠᠯ ᠢ᠋ ᠬᠠᠭᠠᠨ ᠰᠠᠬᠢᠳᠠᠭ᠂ ᠭᠡᠷ ᠦ᠋ᠨ ᠭᠠᠯ ᠢ᠋ ᠬᠠᠲᠤᠨ ᠰᠠᠬᠢᠳᠠᠭ ᠭᠡᠳᠡᠭ ᠪᠢᠯᠡ᠃ ᠬᠡᠨ ᠪᠣᠯᠬᠤ ᠪᠠᠨ ᠲᠠ ᠥᠪᠡᠷ ᠢ᠋ᠶ᠋ᠡᠨ ᠮᠡᠳᠡᠲᠦᠭᠡᠢ! ᠬᠡᠨ ᠲᠡᠢ ᠳᠠᠢᠳᠤᠬᠤ ᠪᠠᠨ ᠪᠢ ᠥᠪᠡᠷ ᠢ᠋ᠶ᠋ᠡᠨ ᠮᠡᠳᠡᠲᠦᠭᠡᠢ! ᠴᠦ ᠁ ᠭᠡᠳ ᠤᠯᠠᠭᠠᠨ ᠲᠣᠭᠣᠰᠣ ᠲᠠᠢ ᠪᠠᠨ ᠳᠣᠪᠲᠣᠯᠤᠨ ᠣᠳᠬᠤ ᠳ᠋ᠤ᠌ ᠬᠠᠭᠠᠨ ᠬᠦᠷᠢᠶᠡᠨ ᠡᠴᠡ ᠰᠠᠭᠠᠬᠠᠯᠲᠠ ᠬᠢᠷᠢ ᠶ᠋ᠢᠨ ᠠᠯᠤᠰ ᠲᠤ᠌ ᠮᠢᠶᠡᠭᠡᠨᠡᠨ ᠪᠥᠭᠡᠮᠨᠡᠵᠦ ᠠᠭᠰᠠᠨ ᠮᠣᠷᠢᠲᠠᠨ ᠰᠢᠳᠠᠷ ᠤ᠋ᠳ ᠲᠠᠭᠠᠨ ᠳᠠᠪᠬᠢᠯᠳᠤᠭᠰᠠᠭᠠᠷ ᠪᠠᠷᠠ ᠲᠠᠰᠤᠷᠠᠪᠠ᠃ ᠲᠡᠳᠡᠨ ᠢ᠋ ᠪᠠᠷᠠ ᠲᠠᠰᠤᠷᠠᠲᠠᠯᠠ ᠨᠢ ᠬᠠᠷᠠᠵᠤ ᠬᠠᠷᠠᠵᠤ ᠠᠮᠪᠠᠭᠠᠢ ᠬᠠᠭᠠᠨ᠂
— ᠬᠥᠮᠦᠨ ᠳᠡᠪᠡᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ᠂ ᠮᠠᠯ ᠬᠥᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠭᠡᠳᠡᠭ ᠰᠠᠨ᠃ ᠬᠤᠲᠤᠭᠲᠤ ᠨᠣᠶᠠᠨ ᠮᠢᠨᠦ ᠦᠭᠡ ᠶ᠋ᠢ ᠡᠰᠡ ᠰᠣᠨᠣᠰᠪᠠ᠃ ᠤᠭ ᠨᠢ ᠠᠯᠲᠠᠨ ᠤᠯᠤᠰ ᠤ᠋ᠨ ᠬᠥᠯ ᠳ᠋ᠦ᠍ ᠰᠠᠭᠤᠵᠤ᠂ ᠲᠠᠲ᠋ᠠᠷ ᠤᠯᠤᠰ ᠲᠠᠢ ᠡᠪ ᠰᠠᠬᠢᠵᠤ ᠶᠠᠪᠤᠪᠠᠯ ᠰᠠᠢᠨ ᠰᠠᠨ! ᠭᠡᠵᠦ ᠭᠤᠨᠢᠭ ᠲᠠᠢ ᠥᠭᠦᠯᠡᠪᠡ᠃ ᠬᠣᠲᠣᠯᠠ᠂ ᠶᠡᠬᠡ ᠣᠷᠣ ᠰᠠᠭᠤᠭᠰᠠᠨ ᠡᠷᠡ ᠳᠤᠮᠳᠠ ᠶ᠋ᠢᠨ ᠨᠠᠰᠤᠨ ᠤ᠋ ᠬᠠᠭᠠᠨᠲᠠᠨ ᠢ᠋ ᠬᠠᠷᠠᠵᠤ ᠬᠠᠷᠠᠵᠤ᠂
— ᠮᠠᠨ ᠤ᠋ ᠬᠤᠲᠤᠭᠲᠤ ᠴᠣᠴᠢᠮᠠᠭ ᠯᠠ ᠳᠠ ᠭᠡᠵᠦ ᠡᠶᠡ ᠵᠠᠰᠠᠩᠭᠤᠢ ᠬᠡᠯᠡᠭᠡᠳ ᠤᠶᠠᠭᠠ ᠱᠣᠩ ᠳᠡᠭᠡᠷᠡ ᠡᠴᠡ ᠮᠣᠷᠳᠠᠨ ᠣᠳᠬᠤ ᠬᠤᠯᠠᠨ ᠲᠡᠷᠢᠭᠦᠲᠡᠨ ᠢ᠋ ᠬᠠᠷᠠᠵᠤ᠂
— ᠨᠢᠭᠡ ᠬᠡᠪᠡᠯᠢ ᠡᠴᠡ ᠭᠠᠷᠤᠭᠰᠠᠨ ᠲᠠᠪᠤᠨ ᠬᠥᠪᠡᠭᠦᠨ ᠨᠢᠭᠡ ᠲᠩᠷᠢ ᠶ᠋ᠢᠨ ᠳᠣᠣᠷᠠ ᠪᠠᠭᠲᠠᠬᠤ ᠶ᠋ᠢ ᠪᠣᠯᠢᠵᠠᠢ ᠭᠡᠵᠦ ᠰᠢᠮᠰᠢᠷᠡᠨ ᠬᠡᠯᠡᠬᠦ ᠳ᠋ᠦ᠍ ᠪᠠᠷᠳᠠᠨᠪᠠᠭᠠᠲᠤᠷ ᠰᠠᠶᠢ ᠯᠠ ᠲᠡᠷᠭᠡ ᠲᠡᠢ ᠱᠠᠷᠢᠯ ᠠ᠋ᠴᠠ ᠬᠠᠷᠠᠭᠠ ᠰᠠᠯᠭᠠᠨ᠂
— ᠬᠥᠭᠡᠷᠦᠬᠦᠢ ᠶ᠋ᠢ ᠤᠳᠠᠭᠠᠭᠠᠳ ᠶᠠᠭᠠᠬᠢᠨᠠ ᠪᠢᠯᠡ᠃ ᠶᠡᠬᠡ ᠬᠣᠷᠢᠭ ᠲᠤ᠌ ᠣᠩᠭᠣᠯᠠᠶᠠ ᠳᠠ ᠭᠡᠪᠡ᠃ ᠴᠢᠩᠭᠢᠭᠰᠡᠨ ᠢ᠋ᠶ᠋ᠡᠨ ᠣᠳᠣ ᠬᠢᠷᠢ ᠬᠠᠱᠠᠩ ᠬᠡᠭᠡᠷ ᠮᠣᠷᠢ ᠪᠠᠨ ᠪᠠᠷᠢᠨ ᠵᠣᠭᠰᠣᠬᠤ ᠡᠯᠵᠢᠭᠡᠳᠡᠢ ᠨᠣᠶᠠᠨ ᠢ᠋ ᠬᠠᠷᠠᠵᠤ᠂
— ᠴᠢ ᠶᠠᠭᠤᠨ ᠬᠥᠮᠦᠨ ᠪᠢᠯᠡ? ᠭᠡᠪᠡᠯ ᠪᠤᠭᠤᠷᠤᠯ ᠲᠡᠷᠢᠭᠦᠨᠲᠦ ᠡᠷᠡ ᠦᠨᠡᠰᠦᠨ ᠦ᠌ ᠵᠠᠬᠠ ᠳ᠋ᠤ᠌ ᠰᠥᠭᠥᠳᠦᠨ᠂
— ᠪᠢ ᠠᠯᠲᠠᠨ ᠤᠯᠤᠰ ᠤ᠋ᠨ ᠲᠦᠰᠢᠮᠡᠯ ᠪᠢᠯᠡ ᠭᠡᠳ ᠠᠮᠪᠠᠭᠠᠢ ᠬᠠᠭᠠᠨ ᠠ᠋ᠴᠠ ᠨᠥᠮᠥᠷᠢ ᠨᠥᠭᠡᠯᠭᠡ ᠡᠷᠢᠬᠦ ᠮᠡᠲᠦ ᠬᠠᠷᠠᠵᠠᠢ᠃ ᠶᠡᠷᠦ ᠮᠣᠩᠭᠣᠯ ᠬᠡᠯᠡ ᠭᠠᠷᠭᠠᠭᠤᠳ ᠰᠤᠷᠭᠠᠭᠰᠠᠨ ᠠᠴᠢᠲᠠᠨ ᠨᠢ ᠢᠯᠮᠠ ᠬᠠᠲᠤᠨ ᠪᠢᠯᠡ᠃ ᠲᠡᠷᠢᠭᠦᠨ ᠭᠤᠸᠠ ᠲᠥᠷᠥᠭᠰᠡᠨ ᠬᠠᠲᠤᠨ ᠤ᠋ ᠮᠥᠩᠭᠥᠨ ᠬᠣᠩᠬᠣ ᠮᠡᠲᠦ ᠢᠷᠠᠭᠤ ᠳᠠᠭᠤᠨ ᠳ᠋ᠤ᠌ ᠤᠶᠠᠷᠠᠨ ᠪᠠᠢᠵᠤ ᠡᠯᠡ ᠬᠡᠯᠡ ᠶ᠋ᠢ ᠰᠤᠷᠤᠭᠰᠠᠨ ᠶᠤᠮ ᠰᠠᠨᠵᠠᠢ᠃ ᠪᠠᠷᠳᠠᠨᠪᠠᠭᠠᠲᠤᠷ᠂
— ᠲᠡᠷᠡ ᠠ᠋᠂ ᠬᠥᠶᠢ! ᠪᠢᠳᠡᠨ ᠦ᠌ ᠮᠠᠭᠤ ᠶ᠋ᠢ ᠰᠣᠨᠣᠰᠴᠤ ᠲᠦᠷᠦᠭᠦᠨ ᠡᠴᠡ ᠬᠣᠢᠰᠢ ᠪᠡᠭᠡᠪᠡᠢᠨ ᠵᠣᠭᠰᠣᠭᠰᠠᠨ ᠪᠠᠢᠬᠤ ᠨᠢ᠂ ᠨᠢᠳᠦᠨ ᠡᠴᠡ ᠳᠠᠯᠳᠠ ᠪᠣᠯᠭᠠ! ᠭᠡᠬᠦ ᠳ᠋ᠦ᠍ ᠡᠯᠵᠢᠭᠡᠳᠡᠢ ᠶ᠋ᠢᠨ ᠬᠡᠭᠡᠷᠡ ᠶ᠋ᠢᠨ ᠰᠠᠯᠬᠢᠨ ᠳ᠋ᠤ᠌ ᠤᠩᠭᠤᠵᠤ ᠭᠠᠩᠳᠠᠭᠰᠠᠨ ᠴᠠᠢᠪᠤᠷ ᠴᠢᠷᠠᠢ ᠪᠦᠷ ᠬᠤᠪᠠᠬᠠᠢ ᠴᠠᠢᠵᠤ᠂
— ᠶᠡᠬᠡ ᠨᠣᠶᠠᠨ ᠲᠠ ᠥᠷᠥᠰᠢᠶᠡ! ᠬᠠᠢᠷᠠ ᠰᠡᠳᠬᠢᠯ ᠳ᠋ᠡᠭᠡᠨ ᠰᠣᠬᠣᠷᠠᠭᠰᠠᠨ ᠠᠮᠢᠲᠠᠨ ᠬᠠᠷᠠᠩᠭᠤᠢ ᠮᠡᠲᠦ ᠣᠷᠴᠢᠯᠠᠩ ᠳ᠋ᠤ᠌ ᠲᠡᠨᠦᠵᠦ ᠶᠠᠪᠤᠭᠠ ᠪᠢᠯᠡ᠃ ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠬᠡᠷᠡᠭ ᠬᠢᠭᠡᠳ ᠬᠠᠭᠠᠨ ᠦᠵᠢᠮᠡᠢ ᠶ᠋ᠢᠨ ᠶᠠᠪᠤᠳᠠᠯ ᠨᠠᠳᠠ ᠣᠭᠲᠣ ᠬᠦᠷᠲᠡᠭᠡᠯ ᠦᠭᠡᠢ᠁ ᠭᠡᠮᠡᠨ ᠲᠣᠷᠵᠢᠭᠢᠨᠠᠭᠤᠯᠬᠤ ᠳ᠋ᠤ᠌ ᠬᠣᠲᠣᠯᠠ ᠨᠣᠶᠠᠨ᠂
— ᠴᠢᠨᠦ ᠬᠦᠷᠲᠡᠭᠡᠯ ᠦᠭᠡᠢ ᠨᠢ ᠬᠠᠮᠢᠶᠠ ᠠᠯᠠᠭᠠ᠃ ᠪᠢᠳᠡᠨ ᠦ᠌ ᠶᠠᠪᠤᠳᠠᠯ ᠳ᠋ᠤ᠌ ᠴᠢ ᠥᠪᠡᠷ ᠢ᠋ᠶ᠋ᠡᠨ ᠬᠦᠷᠲᠡᠭᠡᠯ ᠲᠡᠢ ᠪᠣᠯᠪᠠ ᠪᠤᠰᠤ ᠤᠤ? ᠨᠢᠳᠦᠨ ᠡᠴᠡ ᠳᠠᠯᠳᠠ ᠤᠷᠤᠭᠤᠯ! ᠭᠡᠯᠡ᠃ ᠠᠮᠪᠠᠭᠠᠢ ᠬᠠᠭᠠᠨ ᠠᠯᠲᠠᠨ ᠤᠯᠤᠰ ᠤ᠋ᠨ ᠲᠡᠨᠦᠭᠦᠯᠴᠢ ᠡᠷᠡ ᠶ᠋ᠢ ᠦᠷᠦ ᠡᠪᠡᠳᠦᠩᠭᠦᠢ ᠬᠠᠷᠠᠭᠰᠠᠨ ᠬᠡᠳᠦᠢ ᠴᠦ᠍ ᠥᠪᠡᠷ ᠦ᠋ᠨ ᠬᠢᠨᠢ ᠲᠦᠰᠢᠭ ᠲᠤᠯᠭᠠᠭᠤᠷᠢ ᠪᠣᠯᠵᠤ ᠶᠠᠪᠤᠳᠠᠭ ᠬᠠᠨ ᠬᠥᠪᠡᠭᠦᠳ ᠦ᠋ᠨ ᠦᠭᠡᠨ ᠡᠴᠡ ᠵᠥᠷᠢᠵᠦ ᠦᠯᠦ ᠴᠢᠳᠠᠨ᠂
— ᠨᠢᠳᠦᠨ ᠡᠴᠡ ᠳᠠᠯᠳᠠ ᠪᠣᠯᠭᠠ! ᠬᠡᠮᠡᠵᠡᠢ᠃ ᠮᠥᠨᠥᠬᠡᠨ ᠲᠡᠷᠭᠡ ᠲᠡᠢ ᠱᠠᠷᠢᠯ ᠢ᠋ ᠪᠦᠲᠡᠭᠡᠨ ᠬᠥᠲᠥᠯᠵᠦ ᠶᠠᠪᠤᠬᠤ ᠪᠠᠷ ᠵᠠᠪᠳᠤᠵᠤ ᠠᠭᠰᠠᠨ ᠬᠦᠷᠡᠯ ᠴᠢᠷᠠᠢᠲᠤ ᠭᠤᠷᠪᠠᠨ ᠡᠷᠡ ᠶ᠋ᠢᠨ ᠨᠢᠭᠡ ᠰᠡᠯᠡᠮᠡ ᠪᠡᠨ ᠬᠠᠷ ᠬᠢᠲᠡᠯᠡ ᠰᠤᠭᠤᠯᠤᠨ ᠡᠷᠭᠢᠲᠡᠯᠡ ᠬᠡᠪ ᠭᠡᠨᠡᠳᠲᠡ ᠬᠥᠩᠬᠥᠷ ᠬᠣᠷᠴᠢ᠂
— ᠲᠣᠭᠲᠠᠵᠤ ᠠᠢᠯᠠᠳ! ᠬᠡᠮᠡᠭᠰᠡᠨ ᠢ᠋ᠶ᠋ᠡᠨ ᠠᠮᠪᠠᠭᠠᠢ ᠬᠠᠭᠠᠨ ᠤ᠋ ᠬᠥᠯ ᠳ᠋ᠦ᠍ ᠰᠥᠭᠥᠳᠦᠨ᠂
— ᠬᠡᠭᠡᠷᠡ ᠶ᠋ᠢᠨ ᠲᠡᠨᠦᠭᠦᠯᠴᠢ ᠲᠡᠢ ᠬᠡᠳᠦᠨ ᠦᠭᠡ ᠰᠣᠯᠢᠬᠤ ᠰᠣᠶᠣᠷᠬᠠᠯ ᠬᠠᠢᠷᠠᠯᠠ ᠭᠡᠪᠡᠯ ᠲᠦᠷᠦᠭᠦᠨ ᠡᠴᠡ ᠬᠣᠢᠰᠢ ᠳᠠᠭᠤ ᠦᠭᠡᠢ ᠵᠣᠭᠰᠣᠭᠰᠠᠨ ᠠᠮᠪᠠᠭᠠᠢ ᠬᠠᠭᠠᠨ ᠤ᠋ ᠬᠠᠲᠠᠭᠠᠨ ᠬᠥᠪᠡᠭᠦᠨ᠂
— ᠬᠥᠩᠬᠥᠷ ᠬᠣᠷᠴᠢ ᠴᠠᠭ ᠤ᠋ᠨ ᠴᠠᠭ ᠲᠤ᠌ ᠲᠥᠷᠥ ᠶ᠋ᠢᠨ ᠲᠣᠪᠴᠢᠶᠠᠨ ᠪᠣᠯᠵᠤ ᠶᠠᠪᠤᠭᠰᠠᠨ ᠪᠤᠰᠤ ᠤᠤ? ᠦᠭᠡ ᠶ᠋ᠢ ᠨᠢ ᠰᠣᠨᠣᠰᠬᠤ ᠬᠥᠮᠦᠨ ᠦ᠌ ᠨᠢᠭᠡ ᠪᠢᠯᠡ ᠭᠡᠬᠦ ᠳ᠋ᠦ᠍ ᠬᠠᠭᠠᠨ ᠬᠦᠦ ᠶ᠋ᠢᠨ ᠲᠦᠰᠢᠭ ᠲᠦ᠍ ᠪᠠᠰᠠ ᠬᠦ᠌ ᠪᠠᠶᠠᠷᠯᠠᠨ᠂
— ᠬᠣᠷᠴᠢ ᠮᠢᠨᠢ᠂ ᠦᠦᠬᠡ ᠲᠡᠦᠬᠡᠨ ᠳ᠋ᠦ᠍ ᠥᠭᠦᠯᠡᠭᠰᠡᠨ ᠵᠦᠢᠯ ᠪᠠᠢᠳᠠᠭ ᠶᠤᠮ ᠰᠠᠨ ᠤᠤ? ᠭᠡᠪᠡᠯ ᠬᠥᠩᠬᠥᠷ ᠬᠣᠷᠴᠢ ᠬᠣᠭᠣᠯᠠᠢ ᠵᠠᠰᠠᠨ᠂
— ᠵᠠ᠂ ᠬᠠᠭᠠᠨ ᠰᠣᠶᠣᠷᠬᠠᠯ ᠢ᠋ᠶ᠋ᠠᠷ ᠣᠳᠣᠬᠠᠨ ᠡᠭᠡᠳᠡᠷᠡᠭᠰᠡᠨ ᠦᠢᠯᠡ ᠶ᠋ᠢᠨ ᠣᠴᠢᠭ ᠢ᠋ ᠣᠯᠰᠤ! ᠭᠡᠰᠡᠨ ᠢ᠋ᠶ᠋ᠡᠨ ᠡᠷᠬᠡᠪᠰᠢ ᠲᠠᠢᠪᠤᠰᠢᠷᠠᠯ ᠢ᠋ ᠣᠯᠤᠭᠰᠠᠨ ᠲᠡᠨᠦᠭᠦᠯᠴᠢ ᠨᠣᠶᠠᠨ ᠤᠷᠤᠭᠤ ᠬᠠᠷᠠᠵᠤ᠂
— ᠴᠢᠮᠠᠶ᠋ᠢ ᠬᠡᠨ ᠭᠡᠳᠡᠭ ᠪᠣᠢ? ᠬᠡᠮᠡᠪᠡᠯ᠂
— ᠡᠯᠵᠢᠭᠡᠳᠡᠢ ᠭᠡᠵᠦ ᠳᠠᠷᠤᠤᠬᠠᠨ ᠬᠡᠯᠡᠭᠡᠳ ᠠᠪᠤᠷᠠᠯ ᠤ᠋ᠨ ᠡᠵᠡᠨ ᠪᠣᠯᠵᠤ ᠬᠤᠪᠢᠷᠠᠭᠰᠠᠨ ᠦᠰᠦ ᠲᠡᠢ ᠳᠡᠪᠡᠯᠲᠦ᠂ ᠥᠯᠥᠨ ᠭᠬᠢᠷᠲᠦ ᠬᠥᠩᠬᠥᠷ ᠬᠣᠷᠴᠢ ᠶ᠋ᠢᠨ ᠡᠮᠦᠨᠡ ᠰᠥᠭᠥᠳᠴᠡᠢ᠃ ᠬᠣᠷᠴᠢ ᠶ᠋ᠢᠨ ᠲᠣᠭᠣᠰᠣ ᠳᠠᠷᠤᠭᠰᠠᠨ ᠴᠢᠷᠠᠢ ᠳ᠋ᠤ᠌ ᠵᠠᠮ ᠲᠠᠲᠠᠭᠤᠯᠤᠨ ᠤᠷᠤᠰᠬᠤ ᠬᠥᠯᠥᠰᠥᠨ ᠳᠤᠰᠤᠯ ᠬᠦᠷᠲᠡᠯᠡ ᠪᠠᠶᠠᠷ ᠤ᠋ᠨ ᠥᠩᠭᠡ ᠪᠡᠷ ᠭᠢᠯᠠᠯᠵᠠᠵᠤ᠂
— ᠮᠥᠨ ᠪᠠᠢᠬᠤ ᠨᠢ! ᠭᠡᠰᠡᠨ ᠢ᠋ᠶ᠋ᠡᠨ ᠠᠮᠪᠠᠭᠠᠢ ᠬᠠᠭᠠᠨ ᠳ᠋ᠤ᠌ ᠮᠡᠬᠦᠰᠬᠢᠨ᠂
— ᠡᠷᠬᠢᠮ ᠬᠠᠭᠠᠨ᠂ ᠬᠦᠨᠳᠦᠲᠦ ᠬᠠᠨ ᠬᠥᠪᠡᠭᠦᠳ ᠥᠷᠥᠰᠢᠶᠡᠨ ᠰᠣᠶᠣᠷᠬᠠ᠃ ᠣᠯᠠᠨ ᠵᠢᠯ ᠦ᠋ᠨ ᠡᠮᠦᠨᠡ ᠨᠠᠢ᠍ᠮᠠᠨ ᠠᠢᠮᠠᠭ ᠤ᠋ᠨ ᠬᠣᠷᠵᠠᠬᠤᠰ ᠪᠣᠶᠣᠷᠤᠭ ᠤ᠋ᠨ ᠢᠯᠮᠠ ᠬᠠᠲᠤᠨ᠂ ᠬᠦᠦ ᠲᠣᠷᠯᠣᠭ ᠲᠤᠭᠤᠷᠢᠯ ᠤ᠋ᠨ ᠬᠠᠮᠲᠤ ᠶᠢᠰᠦᠨ ᠲᠠᠲ᠋ᠠᠷ ᠲᠤ᠌ ᠣᠯᠵᠠᠯᠠᠭᠳᠠᠭᠰᠠᠨ ᠪᠢᠯᠡ ᠭᠡᠬᠦ ᠳ᠋ᠦ᠍ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠤ᠋ᠨ ᠴᠢᠷᠠᠢ ᠭᠡᠷᠡᠯᠲᠦᠨ᠂
— ᠲᠡᠭᠡᠭᠰᠡᠨ᠂ ᠲᠡᠭᠡᠭᠰᠡᠨ᠁ ᠭᠡᠪᠡᠯ ᠪᠠᠷᠳᠠᠨᠪᠠᠭᠠᠲᠤᠷ《ᠲᠡᠷᠡ ᠡᠷᠲᠡᠨ ᠦ᠌ ᠲᠡᠦᠬᠡ ᠶ᠋ᠢ ᠴᠢ ᠶᠠᠭᠠᠬᠢᠵᠤ ᠮᠡᠳᠡᠳᠡᠭ ᠶᠦᠮ ᠪᠣᠢ》 ᠭᠡᠰᠡᠨ ᠬᠠᠷᠠᠴᠠ ᠪᠠᠷ ᠬᠠᠷᠠᠬᠤ ᠳ᠋ᠤ᠌ ᠬᠥᠪᠡᠭᠦᠨ ᠨᠢ᠂
— ᠤᠷᠲᠤ ᠪᠠᠯᠭᠠᠰᠤᠨ ᠳ᠋ᠤ᠌ ᠪᠢ ᠬᠦᠷᠭᠡᠨ ᠥᠭᠭᠦᠭᠰᠡᠨ ᠪᠢᠯᠡ᠃ ᠬᠠᠨ ᠠᠪᠤ ᠮᠢᠨᠢ! ᠭᠡᠮᠡᠨ ᠬᠠᠷᠢᠭᠤ ᠥᠴᠢᠪᠡ᠃ ᠬᠥᠩᠬᠥᠷ ᠬᠣᠷᠴᠢ ᠵᠠᠯᠭᠠᠭᠤᠯᠤᠨ᠂
— ᠬᠠᠭᠠᠨ ᠡᠴᠢᠭᠡ ᠮᠢᠨᠢ᠂ ᠲᠡᠷᠡ ᠵᠣᠪᠠᠯᠠᠩᠲᠤ ᠦᠶᠡ ᠳ᠋ᠦ᠍᠂ ᠰᠢᠪᠠᠷ ᠬᠡᠷᠡᠮᠦᠨ ᠳ᠋ᠦ᠍ ᠰᠢᠪᠠᠭᠠᠷᠠᠯᠳᠤᠨ ᠰᠠᠭᠤᠭᠴᠢ ᠢᠷᠭᠡᠳ ᠡᠴᠡ ᠡᠯᠵᠢᠭᠡᠳᠡᠢ ᠨᠡᠷᠡᠲᠦ ᠨᠣᠶᠠᠨ ᠶᠡᠬᠡᠳᠡ ᠠᠰᠠᠷᠠᠨ ᠲᠡᠳᠬᠦᠵᠦ᠂ ᠠᠮᠠᠷᠠᠭᠯᠠᠨ ᠬᠠᠢᠷᠠᠯᠠᠵᠤ ᠪᠠᠢᠭᠰᠠᠨ ᠭᠡᠬᠦ ᠪᠢᠯᠡ ᠭᠡᠬᠦ ᠳ᠋ᠦ᠍ ᠶᠢᠰᠦᠭᠡᠢ ᠶᠡᠬᠡᠳᠡ ᠪᠡᠶᠡᠰᠦᠨ᠂
— ᠲᠦᠮᠡᠨ ᠦᠨᠡᠨ᠃ ᠡᠨᠡ ᠤᠴᠠᠷᠠᠯ ᠢ᠋ ᠢᠯᠮᠠ ᠬᠠᠲᠤᠨ ᠤ᠋ ᠳᠡᠷᠭᠡᠳᠡ ᠲᠣᠷᠯᠣᠭ ᠲᠤᠭᠤᠷᠢᠯ ᠤ᠋ᠨ ᠠᠮᠠᠨ ᠠ᠋ᠴᠠ ᠰᠣᠨᠣᠰᠤᠭᠰᠠᠨ ᠪᠢᠯᠡ ᠭᠡᠵᠡᠢ᠃ ᠠᠮᠪᠠᠭᠠᠢ ᠬᠠᠭᠠᠨ ᠤ᠋ ᠲᠠᠯᠪᠢᠭᠤᠨ ᠴᠢᠷᠠᠢ ᠳ᠋ᠤ᠌ ᠰᠡᠳᠬᠢᠯ ᠳ᠋ᠦ᠍ ᠵᠣᠬᠢᠰᠲᠤ ᠭᠡᠭᠡ ᠭᠡᠢᠵᠦ᠂
— ᠡᠯᠵᠢᠭᠡᠳᠡᠢ ᠲᠠ ᠲᠡᠭᠡᠪᠡᠯ ᠰᠠᠢᠨ ᠬᠥᠮᠦᠨ ᠰᠠᠨᠵᠠᠢ᠃ ᠪᠤᠷᠠᠨᠲᠠᠭ ᠮᠡᠲᠦ ᠬᠥᠲᠥᠯᠬᠦ ᠰᠡᠳᠬᠢᠯ ᠡᠷᠬᠢᠮ ᠶᠦᠮ᠃ ᠭᠡᠪᠡᠴᠦ ᠪᠣᠶᠣᠷᠤᠭ ᠲᠠᠨ ᠢ᠋ ᠬᠡᠷᠬᠢᠨ ᠤᠭᠲᠤᠬᠤ ᠶ᠋ᠢ ᠬᠡᠯᠡᠵᠦ ᠦᠯᠦ ᠴᠢᠳᠠᠨᠠᠮ ᠭᠡᠬᠦ ᠳ᠋ᠦ᠍ ᠡᠯᠵᠢᠭᠡᠳᠡᠢ᠂
— ᠢᠯᠮᠠ ᠬᠠᠲᠤᠨ ᠤ᠋ ᠬᠠᠶᠠᠭᠠ ᠪᠠᠷᠠᠳᠠᠪᠠᠯ ᠵᠠᠶᠠᠭᠠ ᠲᠡᠷᠡ ᠪᠢᠯᠡ ᠬᠡᠮᠡᠪᠡ᠃ ᠠᠮᠪᠠᠭᠠᠢ ᠬᠠᠭᠠᠨ᠂
— ᠡᠷᠡ ᠬᠥᠮᠦᠨ ᠦ᠌ ᠳᠣᠲᠣᠷᠠ ᠡᠮᠡᠭᠡᠯ ᠲᠡᠢ ᠬᠠᠵᠠᠭᠠᠷ ᠲᠠᠢ ᠮᠣᠷᠢ ᠪᠠᠭᠲᠠᠳᠠᠭ ᠶᠤᠮ ᠭᠠᠵᠠᠷ ᠳᠠ᠃ ᠲᠡᠷᠡ ᠲᠠᠨ ᠤ᠋ ᠬᠡᠷᠡᠭ᠃ ᠬᠠᠷᠢᠨ ᠮᠢᠨᠦ ᠬᠦᠷᠢᠶᠡᠨ ᠳ᠋ᠦ᠍ ᠣᠴᠢᠵᠤ ᠬᠤᠪᠴᠠᠰᠤ ᠪᠠᠨ ᠰᠣᠯᠢᠵᠤ᠂ ᠮᠣᠷᠢ ᠪᠠᠨ ᠶᠡᠭᠦᠯᠡᠵᠦ᠂ ᠵᠠᠮ ᠤ᠋ᠨ ᠬᠦᠨᠡᠰᠦ ᠪᠠᠵᠠᠭᠠᠨᠠ ᠪᠢᠵᠡ ᠭᠡᠳ ᠬᠣᠲᠣᠯᠠ᠂ ᠪᠠᠷᠠᠳᠠᠨᠪᠠᠭᠠᠲᠤᠷ ᠬᠣᠶᠠᠷ ᠤᠷᠤᠭᠤ《ᠵᠥᠪ ᠪᠢᠵᠡ 》 ᠭᠡᠬᠦ ᠠᠶᠠᠰ ᠢ᠋ᠶ᠋ᠠᠷ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠂
— ᠬᠠᠷᠢᠨ ᠬᠠᠭᠠᠨ ᠬᠦᠷᠢᠶᠡᠨ ᠡᠴᠡ ᠥᠭᠡᠷᠡ ᠭᠠᠵᠠᠷ ᠳᠣᠲᠣᠭᠠᠳᠤ ᠳ᠋ᠤ᠌ ᠪᠤᠤ ᠱᠠᠭᠠᠢ᠂ ᠲᠣᠢᠭᠲᠤ ᠳ᠋ᠤ᠌ ᠪᠤᠤ ᠬᠠᠷᠠᠭᠳᠠ! ᠡᠨᠡ ᠨᠢ ᠲᠠᠨ ᠤ᠋ ᠠᠮᠢ ᠨᠠᠰᠤᠨ ᠳ᠋ᠤ᠌ ᠥᠯᠵᠡᠢ ᠲᠡᠢ ᠪᠢᠵᠡ ᠬᠡᠮᠡᠪᠡ᠃ ᠡᠯᠵᠢᠭᠡᠳᠡᠢ ᠨᠣᠶᠠᠨ ᠶᠡᠬᠡᠳᠡ ᠰᠥᠰᠥᠯᠡᠨ᠂
— ᠬᠠᠭᠠᠨ ᠲᠠ ᠲᠦᠮᠡᠨ ᠨᠠᠰᠤᠯᠠᠲᠤᠭᠠᠢ! ᠭᠡᠳ ᠮᠡᠬᠦᠯᠵᠡᠨ ᠪᠥᠬᠥᠯᠵᠡᠨ ᠵᠠᠯᠪᠠᠷᠢᠭᠰᠠᠭᠠᠷ ᠮᠥᠨᠥᠬᠡᠨ ᠱᠠᠷᠢᠯ ᠠᠴᠢᠭᠰᠠᠨ ᠲᠡᠷᠭᠡ ᠳ᠋ᠡᠭᠡᠨ ᠣᠴᠢᠵᠤ ᠠᠪᠠᠢ᠃ ᠬᠠᠭᠠᠨ ᠠᠮᠪᠠᠭᠠᠢ᠂ ᠲᠣᠷᠣᠯᠵᠠᠨ ᠲᠣᠷᠣᠯᠵᠠᠨ ᠮᠥᠨᠥᠬᠡᠨ ᠶᠡᠬᠡ ᠢᠯᠠᠭᠠ ᠰᠢᠮᠠᠭᠤᠯ᠂ ᠦᠨᠦᠷ ᠲᠠᠨᠤᠷ ᠢ᠋ᠶ᠋ᠠᠨ ᠳᠠᠭᠠᠭᠤᠯᠤᠨ ᠬᠣᠯᠠᠳᠴᠤ ᠪᠣᠢ ᠪᠢᠴᠢᠬᠠᠨ ᠬᠥᠰᠬᠡ ᠶ᠋ᠢ ᠤᠳᠠᠭᠠᠨ ᠬᠠᠷᠠᠬᠤ ᠳ᠋ᠠᠭᠠᠨ ᠳᠡᠭᠡᠷᠡ ᠮᠡᠯᠲᠡᠢᠭᠴᠢ ᠲᠥᠷᠥ ᠶ᠋ᠢᠨ ᠬᠥᠬᠡ ᠲᠩᠷᠢ ᠳ᠋ᠦ᠍ ᠬᠡᠢᠮᠣᠷᠢ ᠶ᠋ᠢᠨ ᠶᠡᠬᠡ ᠡᠭᠦᠯᠡᠨ ᠵᠠᠩᠭᠢᠷᠠᠨ ᠬᠤᠷᠠᠯᠳᠤᠵᠤ ᠪᠠᠢᠭᠠ ᠶ᠋ᠢ ᠵᠦᠩ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠮᠡᠳᠡᠷᠡᠵᠡᠢ᠃ ᠴᠢᠩᠭᠢᠭᠡᠳ ᠬᠡᠨ ᠳ᠋ᠦ᠍ ᠴᠦ᠍ ᠬᠠᠨᠳᠤᠯ ᠦᠭᠡᠢ᠂
— ᠠᠭᠤᠤ ᠶᠡᠬᠡ ᠰᠦᠯᠳᠡ ᠬᠡᠢᠮᠣᠷᠢ ᠠᠢᠰᠤᠢ ᠶ᠋ᠢ ᠪᠢ ᠮᠡᠳᠡᠷᠡᠵᠦ ᠪᠠᠢᠨᠠ ᠭᠡᠵᠦ ᠠᠢᠯᠠᠳᠪᠠ᠃ ᠬᠣᠲᠣᠯᠠ ᠪᠠᠷᠠᠳᠠᠨᠪᠠᠭᠠᠲᠤᠷ ᠤᠷᠤᠭᠤ ᠬᠠᠷᠠᠵᠤ᠂
— ᠳᠤᠷᠠ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠲᠤᠷᠭᠢᠭᠴᠢ ᠬᠥᠮᠦᠨ ᠢ᠋ ᠨᠢᠭᠡᠨ ᠵᠢᠯᠤᠭᠤᠨ ᠳ᠋ᠤ᠌ ᠣᠷᠣᠭᠤᠯᠪᠠᠯ ᠶᠠᠭᠤᠲᠠᠢ ᠰᠠᠢᠨ ᠪᠢᠯᠡ ᠭᠡᠬᠦ ᠳ᠋ᠦ᠍ ᠵᠤᠯᠠᠢ ᠭᠢᠰᠬᠢᠵᠦ ᠲᠥᠷᠥᠭᠰᠡᠨ ᠠᠬᠠ ᠨᠢ᠂
— ᠬᠠᠮᠤᠭ ᠮᠣᠩᠭᠣᠯ ᠢ᠋ ᠲᠣᠬᠣᠨᠢᠭᠤᠯᠬᠤ ᠶᠡᠬᠡ ᠦᠢᠯᠡ ᠶ᠋ᠢ ᠬᠠᠶᠠᠭᠠᠨ ᠠ᠋ᠴᠠ ᠪᠠᠨ ᠡᠬᠢᠯᠡᠭᠦᠰᠢᠲᠡᠢ᠃ ᠮᠢᠨᠦ ᠪᠣᠳᠣᠬᠤ ᠳ᠋ᠤ᠌ ᠥᠬᠢᠨᠪᠠᠷᠬᠠᠭ ᠠᠬᠠ ᠪᠤᠷᠬᠠᠨ ᠪᠣᠯᠤᠭᠰᠠᠨ ᠨᠢ ᠪᠢᠳᠡᠨ ᠳ᠋ᠦ᠍ ᠵᠣᠯ ᠠᠵᠢ᠃ ᠲᠡᠭᠦᠨ ᠢ᠋ ᠳᠠᠭᠠᠨ ᠳᠠᠪᠬᠢᠯᠳᠤᠳᠠᠭ ᠠᠭᠰᠠᠨ ᠨᠣᠶᠠᠳ ᠡᠷᠬᠡᠪᠰᠢ ᠨᠣᠮᠣᠬᠠᠷᠠᠬᠤ ᠪᠢᠵᠡ! ᠬᠠᠷᠢᠨ ᠬᠤᠲᠤᠭᠲᠤ ᠮᠣᠩᠬᠣᠷ ᠢ᠋ ᠣᠳᠣ ᠬᠠᠵᠠᠭᠠᠷᠯᠠᠪᠠᠯ ᠶᠠᠮᠠᠷ ᠪᠣᠯ? ᠭᠡᠪᠡ᠃
ᠠᠮᠪᠠᠭᠠᠢ ᠬᠠᠭᠠᠨ ᠭᠤᠷᠪᠠᠨ ᠪᠡᠶᠡ ᠶ᠋ᠢᠨ ᠰᠠᠨᠠᠭᠠ ᠲᠦᠮᠡᠨ ᠨᠠᠰᠤᠨ ᠬᠡ ᠮᠡᠲᠦ ᠭᠦᠶᠦᠳᠡᠯ ᠨᠡᠢᠯᠡᠵᠦ ᠪᠣᠢ ᠳ᠋ᠤ᠌ ᠪᠡᠶᠡᠰᠦᠨ ᠲᠠᠭᠠᠰᠢᠶᠠᠵᠤ᠂
— ᠪᠢᠳᠡ ᠭᠤᠷᠪᠠ ᠶ᠋ᠢᠨ ᠰᠠᠨᠠᠭᠠ ᠨᠢᠭᠡᠨ ᠬᠥᠮᠦᠨ ᠦ᠌ ᠬᠢ ᠮᠡᠲᠦ ᠠᠵᠢ᠃ ᠬᠥᠬᠡ ᠲᠩᠷᠢ ᠶ᠋ᠢᠨ ᠳᠣᠣᠷᠠ ᠣᠷᠣᠰᠢᠭᠴᠢ ᠬᠠᠮᠤᠭ ᠮᠣᠩᠭᠣᠯ ᠬᠠᠨᠯᠢᠭ ᠢ᠋ᠶ᠋ᠠᠨ ᠬᠦᠴᠦᠷᠬᠡᠭ ᠪᠠᠢᠯᠭᠠᠬᠤ ᠨᠢ ᠳᠣᠲᠣᠭᠠᠳᠤ ᠳ᠋ᠠᠭᠠᠨ ᠰᠠᠮᠠᠭᠤᠨ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠪᠣᠯᠠᠢ᠃ ᠭᠡᠲᠡᠯᠡ ᠰᠦᠷᠪᠦᠯᠵᠡᠨ ᠥᠷᠪᠥᠯᠵᠡᠬᠦ ᠮᠡᠷ ᠰᠡᠷ ᠪᠣᠢ ᠶ᠋ᠢ ᠬᠠᠷᠠᠪᠠ᠃ ᠪᠢ ᠶᠢᠰᠦᠨ ᠲᠠᠲ᠋ᠠᠷ ᠲᠤ᠌ ᠬᠠᠢᠷᠠᠲᠠᠢ ᠳ᠋ᠠᠭᠠᠨ ᠬᠠᠳᠠᠭᠠᠯᠠᠭᠠᠳ ᠪᠠᠢᠭᠠ ᠶᠤᠮ ᠪᠢᠰᠢ᠃ ᠠᠯᠠᠵᠤ ᠢᠳᠡᠬᠦ ᠬᠣᠨᠢ ᠶ᠋ᠢ ᠬᠥᠮᠦᠨ ᠲᠠᠷᠭᠤᠯᠠᠭᠤᠯᠳᠠᠭ ᠯᠤᠭᠠ ᠠᠳᠠᠯᠢ ᠶᠤᠮ᠃ ᠲᠡᠳᠡ ᠬᠣᠶᠠᠷ ᠨᠢᠭᠡᠨ ᠵᠢᠯ ᠳ᠋ᠡᠭᠡᠨ ᠠᠮᠤᠷ ᠪᠠᠢᠭ᠂ ᠭᠡᠮ ᠦᠭᠡᠢ᠃ ᠡᠨᠡ ᠵᠠᠭᠤᠷᠠ ᠪᠢᠳᠡ ᠴᠠᠭ ᠬᠣᠵᠢᠵᠤ ᠠᠢᠮᠠᠭ ᠭᠡᠷ ᠦ᠋ᠨ ᠳᠣᠲᠣᠭᠠᠳᠤ ᠶ᠋ᠢ ᠨᠢᠭᠡᠨ ᠵᠢᠯᠤᠭᠤᠨ ᠳ᠋ᠤ᠌ ᠣᠷᠣᠭᠤᠯᠵᠤ ᠠᠮᠵᠢᠬᠤ ᠪᠤᠰᠤ ᠤᠤ? ᠡᠢᠨ ᠵᠠᠩᠭᠢᠳᠤᠭᠰᠠᠨ ᠨᠢᠳᠤᠷᠭᠠ ᠮᠡᠲᠦ ᠪᠣᠯᠤᠭᠰᠠᠨ ᠴᠠᠭ ᠲᠤ᠌ ᠶᠢᠰᠦᠨ ᠲᠠᠲ᠋ᠠᠷ ᠴᠤ᠌᠂ ᠠᠯᠲᠠᠨ ᠤᠯᠤᠰ ᠴᠤ᠌ ᠪᠢᠳᠡᠨ ᠦ᠌ ᠥᠯᠮᠡᠢ ᠶ᠋ᠢᠨ ᠳᠣᠣᠷᠠ ᠰᠠᠶᠢ ᠶ᠋ᠢᠨ ᠡᠯᠵᠢᠭᠡᠳᠡᠢ ᠮᠡᠲᠦ ᠪᠣᠯᠠᠢ ᠭᠡᠮᠡᠨ ᠠᠢᠯᠠᠳᠪᠠ᠃ ᠪᠠᠷᠳᠠᠨᠪᠠᠭᠠᠲᠤᠷ ᠢᠨᠢᠶᠡᠮᠰᠦᠭᠯᠡᠵᠦ᠂ ᠬᠣᠲᠣᠯᠠ ᠨᠣᠶᠠᠨ ᠪᠡᠶᠡᠰᠴᠦ᠂ ᠶᠢᠰᠦᠭᠡᠢ᠂ ᠠᠮᠪᠠᠭᠠᠢ ᠶ᠋ᠢᠨ ᠬᠠᠲᠠᠭᠠᠨ ᠬᠣᠶᠠᠷ ᠪᠡᠶᠡ ᠪᠡᠶᠡ ᠶ᠋ᠢ ᠴᠣᠭ ᠵᠣᠯᠪᠣᠭᠠ ᠭᠡᠢᠭᠰᠡᠨ ᠬᠠᠷᠠᠴᠠ ᠪᠠᠷ ᠬᠠᠷᠠᠵᠤ ᠪᠢᠯᠡ᠃ ᠣᠨ ᠵᠢᠯ ᠦ᠋ᠳ ᠢ᠋ ᠲᠡᠭᠡᠭᠡᠵᠦ ᠢᠷᠡᠭᠴᠢ ᠬᠥᠬᠡ ᠮᠠᠩᠬᠠᠨ ᠲᠩᠷᠢ ᠶ᠋ᠢᠨ ᠭᠦᠨ ᠠᠯᠤᠰ ᠲᠤ᠌ ᠵᠥᠪᠬᠡᠨ ᠮᠣᠩᠭᠣᠯ ᠮᠠᠬᠠᠪᠣᠳ ᠲᠤ᠌ ᠬᠤᠪᠢᠷᠠᠨ ᠪᠡᠶᠡᠯᠡᠬᠦ ᠭᠡᠭᠡᠨ ᠬᠡᠢᠮᠣᠷᠢ ᠪᠦᠷᠢᠳᠦᠨ ᠪᠣᠢ ᠶ᠋ᠢᠨ ᠵᠦᠩ ᠰᠤᠪᠢᠨ ᠰᠢᠪᠡᠨᠡᠬᠦ ᠶ᠋ᠢ ᠬᠥᠩᠬᠥᠷ ᠬᠣᠷᠴᠢ ᠮᠡᠳᠡᠷᠡᠵᠦ ᠠᠪᠠᠢ᠃ ᠵᠣᠪᠠᠨ ᠵᠦᠳᠡᠨ ᠣᠷᠣᠰᠢᠭᠴᠢ ᠶᠡᠬᠡ ᠤᠯᠤᠰ ᠤ᠋ᠨ ᠢ᠋ᠶ᠋ᠠᠨ ᠮᠠᠨᠳᠤᠵᠤ᠂ ᠪᠠᠭᠤᠷᠠᠵᠤ ᠶᠠᠪᠤᠭᠰᠠᠨ ᠢ᠋ ᠮᠡᠳᠡᠬᠦ ᠪᠤᠭᠤᠷᠤᠯ ᠲᠡᠦᠬᠡ ᠶ᠋ᠢᠨ ᠡᠪᠦᠭᠡᠨ ᠬᠣᠷᠴᠢ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍ ᠨᠢᠯᠪᠤᠰᠤ ᠴᠢᠢᠯᠡᠭᠡᠨᠡᠨ ᠪᠠᠢᠯᠠ᠃ ᠭᠡᠪᠡᠴᠦ ᠬᠤᠪᠢ ᠵᠠᠶᠠᠭᠠ ᠬᠠᠮᠢᠭᠠᠰᠢ ᠪᠠᠨ ᠡᠷᠭᠢᠬᠦ ᠶ᠋ᠢ ᠬᠡᠨ ᠮᠡᠳᠡᠨᠡ᠃
5
ᠣᠨ ᠵᠢᠯ ᠦ᠋ᠳ ᠢ᠋ ᠲᠡᠭᠡᠭᠡᠵᠦ ᠢᠷᠡᠭᠴᠢ ᠪᠤᠭᠤᠷᠤᠯ ᠲᠩᠷᠢ ᠶ᠋ᠢᠨ ᠰᠠᠪᠰᠠᠯᠭᠠ ᠰᠦᠪᠡᠯᠡᠨ ᠪᠢᠴᠢᠬᠠᠨ ᠬᠥᠰᠬᠡ ᠭᠠᠷᠴᠤ ᠢᠷᠡᠬᠦ ᠶ᠋ᠢ ᠨᠡᠭᠦᠨ ᠲᠠᠢᠵᠢ ᠡᠬᠢᠯᠡᠭᠡᠳ ᠬᠠᠷᠠᠵᠠᠢ᠃ ᠲᠡᠭᠡᠭᠡᠳ ᠳᠡᠭᠦᠦ ᠪᠡᠨ ᠴᠠᠭᠠᠰᠢᠯᠠᠭᠤᠯᠬᠤ ᠬᠣᠷᠣᠬᠠᠢ ᠬᠦᠷᠴᠦ᠂
— ᠶᠢᠰᠦᠭᠡᠢ᠂ ᠴᠢᠨᠦ ᠬᠠᠲᠤᠨ ᠠᠢᠰᠤᠢ ᠭᠡᠬᠦ ᠳ᠋ᠦ᠍ ᠨᠠᠮᠨᠠᠭᠰᠠᠨ ᠴᠢᠨᠣᠠ ᠶ᠋ᠢᠨ ᠢ᠋ᠶ᠋ᠡᠨ ᠠᠷᠠᠰᠤ ᠶ᠋ᠢ ᠭᠠᠨᠵᠤᠭᠠᠯᠠᠵᠤ ᠵᠣᠭᠰᠣᠭᠰᠠᠨ ᠬᠥᠪᠡᠭᠦᠨ᠂
— ᠬᠠᠲᠤᠨ ᠪᠠᠭᠤᠯᠭᠠᠭᠰᠠᠨ ᠠ᠋ᠴᠠ ᠬᠣᠢᠰᠢ ᠲᠠ ᠰᠡᠪ ᠯᠠ ᠬᠢᠪᠡᠯ ᠥᠪᠡᠷ ᠦ᠋ᠨ ᠡᠮᠡ ᠪᠠᠢᠭᠰᠠᠭᠠᠷ ᠠᠲᠠᠯᠠ ᠥᠷᠥᠭᠡᠯ ᠦ᠋ᠨ ᠡᠮᠡ ᠶ᠋ᠢᠨ ᠲᠤᠬᠠᠢ ᠶᠠᠷᠢᠬᠤ ᠪᠣᠯᠵᠠᠢ᠃ ᠬᠠᠲᠤᠨ ᠭᠡᠳᠡᠭ ᠲᠡᠢᠮᠦ ᠰᠠᠢᠬᠠᠨ ᠡᠳ᠋ ᠤᠤ ᠭᠡᠵᠦ ᠬᠠᠷᠢᠭᠤ ᠲᠣᠭᠯᠠᠭᠠᠮ ᠢ᠋ᠶ᠋ᠠᠷ ᠥᠭᠦᠯᠡᠬᠦ ᠳ᠋ᠦ᠍᠂
— ᠪᠦᠯᠵᠢᠭᠡᠨ ᠬᠠᠲᠤᠨ ᠠ᠋ᠴᠠ ᠰᠠᠢᠬᠠᠨ ᠭᠡᠪᠡ᠃ ᠶᠢᠰᠦᠭᠡᠢ ᠴᠢᠬᠢ ᠪᠡᠨ ᠬᠦᠷᠲᠡᠯᠡ ᠤᠯᠠᠢᠵᠤ᠂
— ᠬᠠᠨ ᠠᠬᠠ ᠲᠠ ᠪᠠᠬᠠᠨ ᠶᠠᠪᠠᠭᠠᠨ ᠶᠠᠷᠢᠶᠠ ᠲᠠᠢ ᠪᠣᠯᠵᠠᠢ ᠳᠠ ᠬᠡᠮᠡᠪᠡᠯ ᠨᠡᠭᠦᠨ ᠲᠠᠢᠵᠢ ᠲᠩᠷᠢ ᠡᠴᠡ ᠲᠥᠷᠥᠭᠰᠡᠨ ᠮᠡᠲᠦ ᠠᠢᠰᠤᠬᠤ ᠪᠠᠷᠠ ᠶ᠋ᠢ ᠲᠣᠭᠲᠠᠭᠠᠨ ᠬᠠᠷᠠᠵᠤ ᠬᠠᠷᠠᠵᠤ᠂
— ᠶᠢᠰᠦᠭᠡᠢ ᠴᠢ ᠮᠣᠷᠳᠠ! ᠭᠡᠯᠡ᠃ ᠡᠨᠡ ᠦᠭᠡ ᠶ᠋ᠢ ᠪᠤᠴᠠᠬᠤ ᠭᠠᠵᠠᠷ ᠦᠭᠡᠢ ᠬᠡᠯᠡᠭᠰᠡᠨ ᠲᠤᠯᠠ ᠲᠣᠭᠯᠠᠭᠠᠮ ᠱᠣᠭᠯᠠᠭᠠᠮ ᠢ᠋ᠶ᠋ᠠᠨ ᠣᠷᠬᠢᠨ ᠮᠣᠷᠳᠠᠬᠤ ᠳ᠋ᠤ᠌ ᠣᠢᠷᠠ ᠬᠢ ᠮᠣᠳᠣᠳ ᠤ᠋ᠨ ᠰᠡᠭᠦᠳᠡᠷ ᠲᠦ᠍ ᠠᠯᠠᠭᠰᠠᠨ ᠬᠣᠢᠯᠣᠭ ᠤ᠋ᠨ ᠮᠢᠬᠠ ᠪᠠᠨ ᠬᠣᠳᠣᠭᠣᠳᠣᠨ ᠳ᠋ᠤᠨᠢ ᠴᠢᠬᠢᠵᠦ ᠪᠠᠢᠭᠰᠠᠨ ᠡᠷᠡᠰ ᠠᠵᠢᠯ ᠢ᠋ᠶ᠋ᠠᠨ ᠱᠠᠯᠠᠮᠠᠭᠠᠢᠯᠠᠨ ᠳᠠᠭᠤᠰᠬᠠᠵᠤ ᠳᠥᠷᠥᠭᠡ ᠰᠢᠭᠦᠷᠡᠨ ᠬᠥᠳᠡᠯᠵᠡᠢ᠃ ᠲᠡᠳᠡ ᠮᠥᠨᠥᠬᠢ ᠠᠯᠤᠰ ᠤ᠋ᠨ ᠪᠠᠷᠠ ᠶ᠋ᠢ ᠠᠮᠠᠳᠠᠨ ᠳᠣᠪᠲᠣᠯᠭᠠᠵᠤ ᠳᠥᠭᠥᠪᠡᠯ ᠮᠤᠬᠤᠯᠠᠭ ᠲᠡᠷᠭᠡ ᠬᠥᠲᠥᠯᠦᠭᠰᠡᠨ ᠮᠣᠷᠢᠲᠠᠢ ᠡᠷᠡ ᠬᠣᠯᠠᠭᠤᠷ ᠳᠠᠢᠯᠵᠤ ᠶᠠᠪᠤᠬᠤ ᠶ᠋ᠢ ᠴᠢᠷᠮᠠᠢᠬᠤ ᠠᠵᠢ᠃ ᠨᠡᠭᠦᠨ ᠲᠠᠢᠵᠢ᠂
— ᠮᠤᠬᠤᠯᠠᠭ ᠲᠡᠷᠭᠡᠨ ᠳ᠋ᠦ᠍ ᠡᠮᠡ ᠬᠥᠮᠦᠨ ᠮᠣᠷᠢᠯᠠᠬᠤ ᠪᠢᠵᠡ᠂ ᠮᠤᠬᠤᠷ ᠵᠠᠮ ᠤᠷᠤᠭᠤ ᠠᠶᠤᠭᠰᠠᠨ ᠬᠥᠮᠦᠨ ᠳᠤᠲᠠᠭᠠᠬᠤ ᠪᠢᠵᠡ᠃ ᠣᠷᠣ ᠣᠯᠵᠠ ᠥᠬᠡᠢ ᠪᠣᠯ ᠣᠯᠠᠨ ᠬᠥᠮᠦᠨ ᠦ᠌ ᠪᠠᠷᠠ ᠶ᠋ᠢ ᠬᠠᠷᠠᠵᠤ ᠪᠤᠷᠤᠭᠤᠯᠠᠬᠤ ᠨᠢ ᠶᠠᠭᠤ ᠪᠢᠯᠡ᠃ ᠬᠥᠭᠡᠭᠡᠵᠦ ᠭᠦᠢᠴᠡᠶᠡ ᠬᠡᠮᠡᠪᠡᠯ ᠲᠠᠷᠢᠳᠠᠢ ᠣᠳᠴᠢᠬᠢᠨ ᠰᠡᠷᠢᠭᠦᠨ ᠰᠠᠯᠬᠢᠨ ᠳ᠋ᠤ᠌ ᠰᠢᠩᠭᠡᠨ ᠳᠠᠭᠤ ᠬᠠᠲᠠᠭᠠᠨ᠂
— ᠭᠤᠸᠠ ᠪᠡᠷᠭᠡᠨ ᠲᠡᠢ ᠪᠣᠯ ᠭᠣᠶᠣ ᠰᠠᠨ! ᠴᠦ ᠬᠡᠮᠡᠵᠡᠢ᠃ ᠡᠢᠨ ᠳᠣᠪᠲᠣᠯᠭᠠᠭᠰᠠᠭᠠᠷ ᠤᠯᠠᠭᠠᠨ ᠵᠠᠮ ᠬᠥᠨᠳᠡᠯᠡᠨ ᠣᠭᠲᠣᠯᠤᠨ ᠣᠢᠷᠠᠳᠬᠤ ᠳ᠋ᠤ᠌ ᠮᠤᠬᠤᠯᠠᠭ ᠲᠡᠷᠭᠡ ᠬᠥᠲᠥᠯᠦᠭᠰᠡᠨ ᠵᠠᠯᠠᠭᠤ ᠡᠷᠡ ᠠᠷᠭᠠ ᠪᠤᠶᠤ ᠰᠢᠬᠠᠭᠳᠠᠨ ᠵᠣᠭᠰᠣᠪᠠ᠃
— ᠠᠮᠤᠷ ᠰᠠᠢᠨ ᠶᠠᠪᠤᠵᠤ ᠪᠠᠢᠨᠠ ᠤᠤ?
— ᠮᠡᠨᠳᠦ ᠠ᠋᠂ ᠲᠠ ᠪᠦᠭᠦᠳᠡ ᠮᠡᠨᠳᠦ ᠠᠮᠤᠷ ᠤᠤ?
— ᠮᠡᠨᠳᠦ ᠰᠠᠢᠨ ᠳᠠ ᠭᠡᠰᠡᠨ ᠢ᠋ᠶ᠋ᠡᠨ ᠨᠡᠭᠦᠨ ᠲᠠᠢᠵᠢ᠂
— ᠬᠠᠮᠢᠭᠠ ᠠ᠋ᠴᠠ ᠬᠠᠮᠢᠭᠠ ᠶᠠᠪᠤᠨᠠ ᠳᠠ? ᠭᠡᠬᠦ ᠳ᠋ᠦ᠍ ᠮᠥᠨᠥᠬᠢ ᠬᠦᠳᠡᠷ ᠬᠦᠷᠡᠩ ᠡᠷᠡ ᠨᠣᠶᠠᠳ ᠤ᠋ᠨ ᠶᠠᠷᠢᠶᠠ ᠦᠯᠦ ᠰᠣᠨᠣᠰᠳᠠᠬᠤ ᠵᠠᠢ ᠳ᠋ᠤ᠌ ᠬᠦ ᠬᠤᠶᠠᠭ᠂ ᠢᠯᠳᠦ ᠪᠠᠮᠪᠠᠢ ᠬᠠᠷᠰᠢᠭᠤᠯᠤᠨ ᠵᠣᠭᠰᠣᠬᠤ ᠴᠡᠷᠢᠭ ᠡᠷᠡᠰ ᠦ᠋ᠨ ᠵᠦᠭ ᠬᠠᠷᠠᠴᠠ ᠪᠡᠯᠴᠢᠭᠡᠭᠰᠡᠨ ᠢ᠋ᠶ᠋ᠡᠨ᠂
— ᠣᠯᠬᠣᠨᠤᠳ ᠠᠢᠮᠠᠭ ᠠ᠋ᠴᠠ ᠶᠠᠪᠤᠵᠤ ᠪᠠᠢᠨᠠ ᠳᠠ ᠭᠡᠪᠡ᠃ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠮᠤᠬᠤᠯᠠᠭ ᠲᠡᠷᠭᠡᠨ ᠦ᠌ ᠱᠠ ᠲᠣᠷᠭᠠᠨ ᠬᠥᠰᠢᠭᠡ ᠶ᠋ᠢ ᠲᠠᠰᠢᠭᠤᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠡᠬᠦᠵᠦ ᠬᠠᠷᠠᠪᠠᠯ ᠵᠢᠰᠦᠨ ᠦ᠌ ᠬᠢᠨᠢ ᠭᠡᠷᠡᠯ ᠳ᠋ᠦ᠍ ᠵᠡᠭᠦᠦ ᠰᠦᠪᠡᠯᠡᠵᠦ ᠪᠣᠯᠤᠮᠠᠷ ᠭᠤᠸᠠ ᠰᠠᠢᠬᠠᠨ ᠪᠦᠰᠡᠭᠦᠢ ᠴᠡᠮᠴᠡᠢᠨ ᠰᠠᠭᠤᠬᠤ ᠠᠵᠢ᠃ ᠲᠡᠭᠦᠨ ᠦ᠌ ᠴᠢᠬᠢᠨ ᠳ᠋ᠦ᠍ ᠨᠡᠭᠦᠨ ᠲᠠᠢᠵᠢ ᠶ᠋ᠢᠨ《 ᠶᠢᠰᠦᠭᠡᠢ ᠴᠢᠨᠦ ᠬᠠᠲᠤᠨ ᠠᠢᠰᠤᠢ》 ᠭᠡᠵᠦ ᠥᠭᠦᠯᠡᠬᠦ ᠳᠠᠭᠤᠨ ᠰᠣᠨᠣᠰᠳᠠᠬᠤ ᠰᠢᠭ᠋ ᠪᠣᠯᠵᠠᠢ᠃
— ᠬᠡᠳᠦ ᠨᠤᠲᠤᠭ ᠬᠠᠮᠢᠭᠠ ᠪᠣᠢ?
— ᠪᠢ ᠮᠡᠷᠭᠢᠳ ᠦ᠋ᠨ ᠶᠡᠬᠡ ᠴᠢᠯᠡᠳᠦ ᠭᠡᠳᠡᠭ ᠪᠢᠯᠡ ᠬᠡᠮᠡᠭᠰᠡᠨ ᠳ᠋ᠦ᠍ ᠥᠭᠡᠷᠡ ᠶᠠᠷᠢᠬᠤ ᠶᠠᠭᠤᠮᠠ ᠦᠯᠦ ᠣᠯᠳᠠᠵᠤ᠂ ᠠᠬᠠ ᠳᠡᠭᠦᠦ ᠭᠤᠷᠪᠠ ᠪᠡᠶᠡ ᠪᠡᠶᠡ ᠪᠡᠨ ᠬᠡᠢ ᠳᠡᠮᠡᠢ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠳᠠᠭᠤ ᠱᠣᠣ ᠴᠤ᠌ ᠦᠭᠡᠢ ᠮᠣᠷᠢ ᠪᠠᠨ ᠳᠠᠪᠢᠷᠠᠨ ᠬᠥᠳᠡᠯᠵᠡᠢ᠃
ᠠᠩ ᠬᠣᠮᠣᠷᠭᠠᠨ ᠳ᠋ᠤ᠌ ᠮᠣᠷᠳᠠᠨ ᠠᠶᠠᠨᠰᠢᠵᠤ ᠶᠠᠳᠠᠷᠠᠭᠰᠠᠨ ᠭᠤᠷᠪᠠᠨ ᠮᠣᠷᠢ ᠥᠯᠥᠨ ᠲᠣᠭᠣᠰᠣ ᠫᠣᠷᠭᠢᠭᠤᠯᠤᠨ᠂ ᠤᠯᠠᠭᠠᠨ ᠬᠠᠯᠵᠠᠨ ᠵᠠᠮ ᠢ᠋ᠶ᠋ᠠᠷ ᠴᠠᠭᠠᠰᠢᠯᠠᠵᠤ ᠠᠪᠠᠢ᠃ ᠮᠥᠨᠥᠬᠡᠨ ᠮᠤᠬᠤᠯᠠᠭ ᠲᠡᠷᠭᠡᠨ ᠳ᠋ᠦ᠍ ᠴᠡᠮᠴᠡᠢᠨ ᠰᠠᠭᠤᠭᠰᠠᠨ ᠭᠤᠸᠠ ᠦᠵᠡᠰᠬᠦᠯᠡᠩᠲᠦ ᠵᠠᠯᠠᠭᠤ ᠬᠠᠲᠤᠨ ᠲᠦᠭᠰᠢᠭᠦᠷᠢᠲᠦ ᠨᠢᠳᠦ ᠪᠡᠷ ᠳᠠᠭᠠᠭᠤᠯᠤᠨ ᠰᠢᠷᠲᠡᠭᠰᠡᠭᠡᠷ ᠬᠠᠳᠠᠲᠤ ᠬᠣᠰᠢᠭᠤ ᠣᠷᠢᠶᠠᠵᠠᠢ᠃ ᠲᠡᠭᠦᠨ ᠦ᠌ ᠪᠢᠯᠵᠤᠤᠬᠠᠢ ᠮᠡᠲᠦ ᠪᠣᠷᠣᠬᠠᠨ ᠵᠢᠷᠦᠬᠡ ᠴᠡᠭᠡᠵᠢᠨ ᠡᠭᠦᠷᠦᠨ ᠳ᠋ᠡᠭᠡᠨ ᠪᠠᠭᠲᠠᠵᠤ ᠶᠠᠳᠠᠨ ᠪᠤᠯᠭᠢᠵᠤ᠂ ᠰᠠᠶᠢ ᠶ᠋ᠢᠨ ᠬᠡᠭᠡᠷᠡ ᠶ᠋ᠢᠨ ᠨᠠᠷᠠ ᠰᠠᠯᠬᠢ ᠦᠨᠦᠷᠲᠦᠭᠰᠡᠨ ᠬᠦᠳᠡᠷ ᠬᠦᠳᠡᠷ ᠡᠷᠡᠰ ᠦ᠋ᠨ ᠳᠡᠷᠭᠡᠳᠡ ᠶᠡᠬᠡ ᠴᠢᠯᠡᠳᠦ ᠬᠠᠷᠢᠭᠤ ᠦᠭᠡᠢ ᠪᠢᠳ ᠮᠠᠭᠤ ᠲᠠᠢ ᠰᠠᠨᠠᠭᠳᠠᠪᠠ᠃
ᠴᠢᠩᠭᠢᠭᠡᠳ ᠰᠡᠳᠬᠢᠯ ᠳᠣᠨᠣᠭᠣᠯᠵᠠᠨ ᠥᠨᠳᠡᠯᠵᠡᠵᠦ᠂ ᠶᠡᠬᠡ ᠴᠢᠯᠡᠳᠦ ᠶ᠋ᠢ ᠬᠠᠷᠠᠪᠠᠯ ᠨᠢᠳᠦᠨ ᠳ᠋ᠦ᠍ᠨᠢ ᠪᠠᠰᠠ ᠬᠦ᠌ ᠠᠶᠤᠭᠰᠠᠨ᠂ ᠲᠦᠭᠰᠢᠭᠰᠡᠨ ᠶᠠᠩᠵᠤ ᠢᠯᠡᠳᠲᠡ ᠠᠭᠤᠨ ᠡᠷᠬᠡᠪᠰᠢ ᠡᠷᠡ ᠬᠥᠮᠦᠨ ᠦ᠌ ᠰᠢᠭᠢᠷᠡ ᠵᠢᠭᠠᠨ ᠡᠬᠡᠨᠡᠷ ᠪᠣᠯᠬᠤ ᠥᠭᠡᠯᠦᠨ ᠡᠴᠡ ᠵᠣᠪᠠᠨᠢᠵᠤ ᠶᠠᠪᠤᠨᠠ ᠪᠣᠯᠤᠯᠲᠠᠢ᠃ ᠵᠠᠯᠠᠭᠤ ᠦᠵᠢᠨ ᠲᠦᠷᠦᠭᠦᠯᠡᠵᠦ ᠠᠮᠠ ᠨᠡᠭᠡᠭᠡᠬᠦ ᠡᠴᠡ ᠡᠮᠢᠶᠡᠨ᠂ ᠮᠤᠬᠤᠯᠠᠭ ᠲᠡᠷᠭᠡᠨ ᠦ᠌ ᠬᠥᠰᠢᠭᠡᠨ ᠵᠠᠪᠰᠠᠷ ᠠ᠋ᠴᠠ ᠶᠡᠬᠡ ᠴᠢᠯᠡᠳᠦ ᠶ᠋ᠢ ᠠᠵᠢᠭᠯᠠᠵᠤ ᠶᠠᠪᠤᠯᠠ᠃ ᠲᠡᠭᠦᠨ ᠦ᠌ ᠠᠶᠤᠨ ᠭᠡᠭᠡᠯᠵᠡᠵᠦ ᠪᠣᠢ ᠶ᠋ᠢ ᠡᠰᠡ ᠠᠩᠵᠠᠭᠠᠷᠠᠭᠰᠠᠨ ᠡᠷᠡ ᠠᠶᠤᠨ ᠰᠢᠷᠪᠡᠭᠡᠲᠦᠵᠦ᠂ ᠡᠮᠡᠭᠡᠯ ᠳᠡᠭᠡᠷᠡ ᠪᠡᠨ ᠥᠨᠳᠡᠯᠵᠡᠨ ᠦᠶᠡ ᠦᠶᠡᠬᠡᠨ ᠡᠷᠭᠢᠵᠦ ᠬᠠᠷᠠᠬᠤ ᠪᠥᠯᠥᠭᠡ᠃ ᠪᠠᠷᠠ ᠡᠰᠡ ᠬᠠᠷᠠᠭᠳᠠᠭᠰᠠᠨ ᠳ᠋ᠤ᠌ ᠵᠢᠭᠠᠯ ᠲᠠᠢᠪᠤᠰᠢᠷᠠᠪᠠ ᠪᠣᠯᠤᠯᠲᠠᠢ᠂ ᠴᠢᠯᠠᠭᠤ ᠲᠠᠢ ᠵᠠᠮ ᠢ᠋ᠶ᠋ᠠᠷ ᠣᠷᠣᠵᠤ ᠶᠠᠭᠠᠷᠠᠨ ᠳᠡᠷᠭᠡᠭᠦᠯᠪᠡ᠃ ᠭᠡᠪᠡᠴᠦ ᠥᠭᠡᠯᠦᠨ ᠥᠵᠢᠨ ᠮᠥᠨᠥᠬᠡᠨ ᠲᠠᠰᠢᠭᠤᠷ ᠤ᠋ᠨ ᠦᠵᠦᠭᠦᠷ ᠢ᠋ᠶ᠋ᠡᠷ ᠬᠥᠰᠢᠭᠡ ᠰᠡᠬᠦᠨ ᠱᠠᠭᠠᠢᠭᠴᠢ ᠡᠷᠡ ᠶ᠋ᠢᠨ ᠬᠦᠰᠡᠯ ᠭᠡᠷᠡᠯᠲᠦᠭᠰᠡᠨ ᠬᠠᠷᠠ ᠨᠢᠳᠦ ᠶ᠋ᠢ ᠮᠠᠷᠲᠠᠵᠤ ᠦᠯᠦ ᠴᠢᠳᠠᠨᠠ᠃ ᠥᠯᠥᠨ ᠪᠠᠷᠰ ᠤ᠋ᠨ ᠨᠢᠳᠦ ᠪᠡᠷ ᠴᠣᠭᠣ ᠰᠢᠷᠳᠡᠭᠰᠡᠨ ᠡᠷᠡ ᠣᠷᠬᠢᠭᠠᠳ ᠶᠠᠪᠤᠴᠢᠬᠠᠵᠤ ᠴᠢᠳᠠᠨᠠ ᠭᠡᠵᠦ ᠤᠤ? ᠭᠡᠮᠡᠨ ᠪᠣᠳᠣᠵᠤ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠡᠷᠭᠢᠨ ᠬᠠᠷᠠᠯᠠ᠃
ᠮᠤᠬᠤᠯᠠᠭ ᠲᠡᠷᠭᠡᠨ ᠦ᠌ ᠰᠢᠩᠭᠡᠨ ᠲᠣᠭᠣᠰᠣ ᠮᠠᠨᠠᠷᠠᠬᠤ ᠬᠠᠷᠭᠤᠢ ᠡᠯᠦᠢ ᠬᠤᠯᠤᠢ ᠠᠵᠤᠭᠤ᠃ ᠴᠢᠩᠭᠢᠲᠡᠯᠡ ᠭᠡᠨᠡᠳᠲᠡ ᠮᠣᠷᠢᠨ ᠲᠦᠪᠡᠷᠭᠡᠨ ᠠᠯᠤᠰ ᠠ᠋ᠴᠠ ᠲᠠᠴᠢᠭᠢᠨᠠᠨ ᠨᠠᠭᠠᠰᠢᠯᠠᠬᠤ ᠰᠢᠭ᠋ ᠪᠣᠯᠬᠤ ᠳ᠋ᠤ᠌ ᠥᠭᠡᠯᠦᠨ ᠵᠣᠪᠠᠯᠠᠩᠲᠤ ᠲᠣᠷᠭᠠᠨ ᠬᠥᠰᠢᠭᠡ ᠶ᠋ᠢ ᠪᠠᠵᠠᠨ ᠠᠪᠴᠤ᠂
— ᠲᠡᠷᠡ ᠭᠤᠷᠪᠠᠨ ᠬᠥᠮᠦᠨ ᠦ᠌ ᠤᠴᠢᠷ ᠢ᠋ ᠮᠡᠳᠡᠪᠡ ᠤᠤ᠂ ᠴᠢ? ᠲᠡᠳᠡᠨ ᠦ᠌ ᠴᠢᠷᠠᠢ ᠰᠡᠵᠢᠭᠯᠡᠮᠡᠷ ᠪᠠᠢᠨᠠ᠃ ᠴᠢᠨᠦ ᠠᠮᠢᠨ ᠳ᠋ᠤ᠌ ᠬᠣᠣᠷ ᠬᠦᠷᠭᠡᠵᠦ ᠪᠣᠯᠤᠨᠠ᠃ ᠠᠮᠢᠳᠤ ᠮᠡᠨᠳᠦ ᠦᠯᠡᠳᠡᠪᠡᠯ ᠡᠬᠡᠨᠡᠷ ᠢ᠋ ᠣᠯᠬᠤ ᠳ᠋ᠤ᠌ ᠪᠡᠷᠬᠡ ᠦᠭᠡᠢ᠂ ᠮᠤᠬᠤᠯᠠᠭ ᠳᠣᠳᠣᠮ ᠥᠬᠢᠳ ᠪᠣᠢ᠃ ᠲᠡᠷᠭᠡ ᠳᠣᠳᠣᠮ ᠬᠠᠲᠤᠳ ᠪᠣᠢ᠃ ᠬᠡᠷᠪᠡ ᠨᠠᠮᠠᠶ᠋ᠢ ᠰᠠᠨᠠᠪᠠᠯ ᠠᠬᠢᠨ ᠠᠪᠤᠭᠰᠠᠨ ᠭᠡᠷᠭᠡᠢ ᠶ᠋ᠢ ᠮᠢᠨᠦ ᠨᠡᠷᠡ ᠪᠡᠷ ᠨᠡᠷᠡᠯᠡᠭᠲᠦᠨ ᠭᠡᠳ ᠰᠠᠨᠳᠤᠷᠤᠨ ᠡᠷᠭᠢᠵᠦ ᠬᠠᠷᠠᠪᠠᠯ ᠪᠦᠰᠡᠭᠦᠢ ᠰᠤᠪᠢᠨ ᠠᠯᠳᠠᠭᠰᠠᠨ ᠦᠭᠡᠢ ᠠᠵᠢ᠃ ᠮᠥᠨᠥᠬᠢ ᠭᠤᠷᠪᠠᠨ ᠡᠷᠡ ᠬᠠᠳᠠᠲᠤ ᠬᠣᠰᠢᠭᠤ ᠶ᠋ᠢ ᠲᠣᠭᠣᠷᠢᠨ ᠨᠡᠬᠡᠵᠦ ᠠᠢᠰᠤᠢ᠃ ᠥᠭᠡᠯᠦᠨ᠂
— ᠣᠳᠣ ᠠᠮᠢ ᠪᠠᠨ ᠠᠷᠭᠠᠯᠠ᠃ ᠮᠢᠨᠦ ᠦᠨᠦᠷ ᠢ᠋ ᠦᠨᠦᠰᠴᠦ ᠶᠠᠪᠤ! ᠭᠡᠳ ᠱᠠᠩᠬᠤ ᠳᠠᠷᠤᠭᠤᠯᠵᠤ ᠪᠣᠭᠣᠭᠰᠠᠨ ᠠᠯᠴᠢᠭᠤᠷ ᠢ᠋ᠶ᠋ᠠᠨ ᠥᠭᠴᠢᠯᠭᠡᠵᠦ ᠠᠪᠠᠢ᠃ ᠶᠡᠬᠡ ᠴᠢᠯᠡᠳᠦ ᠶᠠᠭᠤ ᠴᠣ ᠡᠰᠡ ᠳᠤᠤᠭᠠᠷᠴᠤ ᠴᠢᠳᠠᠵᠠᠢ᠃ ᠲᠡᠭᠦᠨ ᠦ᠌ ᠨᠢᠳᠦ ᠪᠠᠷᠰ ᠮᠡᠲᠦ ᠳᠡᠭᠦᠯᠢᠵᠦ ᠠᠢᠰᠤᠬᠤ ᠭᠤᠷᠪᠠᠨ ᠮᠣᠷᠢᠲᠠᠨ ᠡᠷᠡ ᠡᠴᠡ ᠦᠯᠦ ᠰᠠᠯᠵᠤ᠂ ᠥᠭᠡᠯᠦᠨ ᠥᠵᠢᠨ ᠦ᠌ ᠭᠠᠷ ᠠ᠋ᠴᠠ ᠠᠯᠴᠢᠭᠤᠷ ᠢ᠋ ᠰᠢᠭᠦᠷᠡᠨ ᠠᠪᠤᠭᠠᠳ ᠬᠤᠷᠳᠤᠨ ᠬᠤᠸᠠ ᠮᠣᠷᠢ ᠪᠠᠨ ᠱᠠᠪ ᠬᠢᠲᠡᠯᠡ ᠲᠠᠰᠢᠭᠤᠷᠳᠠᠨ ᠤᠨᠤᠨ ᠮᠥᠷᠡᠨ ᠥᠭᠡᠳᠡ ᠶᠠᠭᠠᠷᠠᠨ ᠳᠤᠲᠠᠭᠠᠯᠠ᠃ ᠨᠡᠭᠦᠨ ᠲᠠᠢᠵᠢ ᠰᠦᠷ ᠨᠡᠮᠡᠵᠦ ᠭᠦᠦᠭᠡᠯᠡᠵᠦ ᠬᠠᠰᠬᠢᠷᠬᠤ ᠳ᠋ᠤ᠌ ᠶᠡᠬᠡ ᠴᠢᠯᠡᠳᠦ ᠶ᠋ᠢᠨ ᠬᠤᠷᠳᠤᠨ ᠬᠤᠸᠠ ᠮᠣᠷᠢ ᠭᠠᠵᠠᠷ ᠤ᠋ᠨ ᠴᠡᠭᠡᠵᠢᠨ ᠥᠭᠡᠳᠡ ᠰᠤᠨᠤᠨ ᠬᠠᠷᠠᠢᠯᠭᠠᠪᠠ᠃
ᠨᠡᠭᠦᠨ ᠲᠠᠢᠵᠢ ᠢᠨᠢᠶᠡᠳᠦ ᠠᠯᠲᠠᠨ ᠡᠷᠭᠢᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ
— ᠶᠢᠰᠦᠭᠡᠢ᠂ ᠮᠤᠬᠤᠯᠠᠭ ᠲᠡᠷᠭᠡ ᠪᠡᠨ ᠬᠠᠷᠠᠭᠲᠤᠨ! ᠮᠡᠷᠭᠢᠳ ᠦ᠋ᠨ ᠬᠡᠦᠬᠡᠳ ᠦ᠋ᠨ ᠮᠡᠨᠳᠦ ᠶ᠋ᠢ ᠮᠡᠳᠡᠴᠢᠬᠡᠭᠡᠳ ᠢᠷᠡᠰᠦ! ᠭᠡᠰᠡᠨ ᠢ᠋ᠶ᠋ᠡᠨ ᠲᠠᠷᠢᠳᠠᠢ ᠣᠳᠴᠢᠬᠢᠨ ᠲᠡᠷᠡ ᠬᠣᠶᠠᠷ ᠲᠣᠭᠣᠰᠣ ᠲᠠᠢ ᠪᠠᠨ ᠴᠢᠪᠬᠠᠳᠠᠨ ᠣᠳᠴᠠᠢ᠃ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠳᠥᠷᠥᠭᠡ ᠮᠤᠯᠲᠤᠯᠤᠨ ᠪᠠᠭᠤᠵᠤ ᠮᠤᠬᠤᠯᠠᠭ ᠲᠡᠷᠭᠡᠨ ᠦ᠌ ᠴᠣᠩᠬᠣ ᠪᠠᠷ ᠬᠠᠷᠠᠪᠠᠯ ᠭᠤᠸᠠ ᠦᠵᠡᠰᠬᠦᠯᠡᠩᠲᠦ ᠳᠠᠭᠢᠨᠢ ᠲᠠᠤᠯᠠᠢ ᠶ᠋ᠢᠨ ᠪᠥᠵᠥᠩ ᠰᠢᠭ ᠬᠢᠷᠦᠨ ᠠᠵᠠᠢ᠃
— ᠴᠢᠮᠠᠶ᠋ᠢ ᠬᠡᠨ ᠭᠡᠳᠡᠭ ᠪᠣᠢ?
— ᠥᠭᠡᠯᠦᠨ᠃
— ᠠᠯᠢ ᠠᠢᠮᠠᠭ ᠤ᠋ᠨ ᠬᠥᠮᠦᠨ ᠪᠣᠢ᠂ ᠣᠯᠬᠣᠨᠤᠳ ᠤᠤ?
— ᠵᠠ ᠲᠡᠢᠮᠦ ᠠ᠋᠂ ᠣᠯᠬᠣᠨᠤᠳ ᠁ ᠭᠡᠬᠦ ᠳ᠋ᠦ᠍ ᠵᠠᠯᠠᠭᠤ ᠶᠢᠰᠦᠭᠡᠢ ᠳᠣᠭᠳᠣᠯᠵᠤ ᠲᠡᠮᠡᠦᠯᠦᠭᠰᠡᠨ ᠬᠠᠷᠠᠴᠠ ᠪᠠᠷ ᠰᠢᠷᠲᠡᠨ᠂
— ᠪᠢ ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠬᠠᠪᠤᠯ ᠬᠠᠭᠠᠨ ᠤ᠋ ᠣᠮᠪᠣᠯ ᠬᠦᠦ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠁ ᠬᠡᠮᠡᠵᠡᠢ᠃ ᠶᠠᠭᠠᠬᠢᠭᠠᠳ ᠴᠣ ᠶᠤᠮ ᠪᠣᠢ᠂ ᠭᠤᠸᠠ ᠦᠵᠡᠰᠬᠦᠯᠡᠩᠲᠦ ᠥᠵᠢᠨ ᠬᠥᠬᠡ ᠲᠩᠷᠢ ᠶ᠋ᠢᠨ ᠴᠠᠬᠢᠯᠭᠠᠨ ᠦᠵᠡᠭᠰᠡᠨ ᠮᠡᠲᠦ ᠨᠠᠪᠲᠠᠰᠬᠢᠪᠡ᠃ ᠶᠡᠷᠦ ᠨᠡᠬᠡᠵᠦ ᠪᠣᠳᠣᠪᠠᠯ ᠬᠥᠪᠡᠭᠦᠨ ᠦ᠌ ᠴᠣᠯᠠ ᠭᠣᠩᠰᠢᠨ ᠶᠡᠬᠡ ᠯᠡ ᠰᠦᠷ ᠰᠦᠯᠳᠡ ᠲᠡᠭᠦᠰ ᠰᠣᠨᠣᠰᠳᠠᠭᠰᠠᠨ ᠬᠡᠷᠡᠭ ᠶᠦᠮ᠃ ᠲᠠᠤᠯᠠᠢ ᠶ᠋ᠢᠨ ᠪᠥᠵᠥᠩ ᠰᠢᠭ ᠵᠢᠭᠠᠬᠠᠨ ᠪᠦᠰᠡᠭᠦᠢ ᠶ᠋ᠢᠨ ᠭᠡᠷᠡᠯ ᠰᠠᠴᠤᠷᠠᠭᠰᠠᠨ ᠲᠥᠷᠬᠦ ᠡᠴᠡ ᠨᠢᠳᠦ ᠰᠠᠯᠭᠠᠵᠤ ᠡᠰᠡ ᠴᠢᠳᠠᠨ ᠪᠠᠢᠲᠠᠯᠠ ᠮᠣᠷᠢᠨ ᠲᠦᠪᠡᠷᠭᠡᠨ ᠲᠠᠴᠢᠭᠢᠨᠠᠵᠤ᠂ ᠲᠦᠳᠡᠬᠡᠨ ᠤᠯᠠᠭᠠᠨ ᠲᠣᠭᠣᠰᠣ ᠨᠢ ᠨᠥᠮᠥᠷᠦᠨ ᠨᠡᠭᠦᠨ ᠲᠠᠢᠵᠢ ᠢᠷᠡᠵᠦ ᠵᠣᠭᠰᠣᠭᠰᠠᠨ ᠢ᠋ᠶ᠋ᠠᠨ᠂
— ᠳᠣᠯᠣᠭᠠᠨ ᠳᠣᠪᠣ ᠶ᠋ᠢᠨ ᠴᠠᠭᠠᠨᠠ᠂ ᠲᠣᠭᠰᠢᠨ ᠰᠠᠬᠢᠭᠤᠯᠰᠤᠨ ᠳᠣᠣᠷᠠ ᠵᠠᠯᠠᠴᠢᠬᠠᠭᠠᠳ ᠢᠷᠡᠪᠡ ᠭᠡᠬᠦ ᠳ᠋ᠦ᠍ ᠥᠭᠡᠯᠦᠨ ᠥᠵᠢᠨ᠂
ᠮᠢᠨᠦ ᠡᠷᠡ ᠴᠢᠯᠡᠳᠦ
ᠰᠡᠷᠢᠭᠦᠨ ᠰᠠᠯᠬᠢᠨ ᠳ᠋ᠤ᠌
ᠰᠡᠪᠡᠯᠭᠡ ᠦᠰᠦ ᠪᠡᠨ ᠬᠡᠢᠰᠬᠡᠵᠦ
ᠬᠡᠭᠡᠷᠡ ᠬᠥᠳᠡᠭᠡ
ᠭᠡᠳᠡᠰᠦ ᠪᠡᠨ ᠥᠯᠦᠰᠬᠡᠵᠦ
ᠶᠠᠭᠠᠬᠢᠨ ᠵᠣᠪᠠᠬᠤ ᠪᠣᠯᠪᠠ᠃
ᠣᠳᠣ ᠪᠢ ᠬᠣᠶᠠᠷ ᠰᠡᠪᠡᠯᠭᠡ ᠦᠰᠦ ᠪᠡᠨ ᠬᠣᠢᠰᠢ ᠣᠷᠣᠭᠰᠢ ᠤᠨᠵᠢᠭᠤᠯᠵᠤ ᠶᠠᠭᠠᠬᠢᠨ ᠣᠳᠤᠨᠠ? ᠭᠡᠵᠦ ᠶᠡᠬᠡ ᠤᠨᠤᠨ ᠢ᠋ ᠴᠠᠯᠭᠢᠲᠠᠯᠠ ᠡᠬᠡᠷ ᠲᠡᠳᠡᠨ ᠤᠬᠢᠯᠠᠵᠤ᠂ ᠣᠢ ᠰᠢᠭᠤᠢ ᠥᠳᠬᠡᠨ ᠨᠠᠪᠴᠢᠰ ᠢ᠋ᠶ᠋ᠠᠨ ᠰᠢᠯᠭᠡᠭᠡᠲᠡᠯᠡ ᠤᠷᠢ ᠳᠠᠭᠤ ᠲᠠᠯᠪᠢᠵᠠᠢ᠃ ᠲᠠᠷᠢᠲᠡᠢ ᠣᠳᠴᠢᠬᠢᠨ᠂
一 ᠢ᠂ ᠡᠭᠡᠴᠢ ᠮᠢᠨᠢ
ᠲᠡᠪᠡᠷᠢᠬᠦ ᠬᠠᠢᠷᠠᠲᠤ ᠡᠷᠡ ᠴᠢᠨᠢ
ᠲᠡᠷᠲᠡᠭᠡ ᠳᠠᠪᠠᠭᠠ ᠶ᠋ᠢ ᠳᠠᠪᠠᠪᠠ
ᠤᠬᠢᠯᠠᠨ ᠰᠠᠨᠠᠬᠤ ᠡᠷᠡ ᠴᠢᠨᠢ
ᠤᠰᠤ ᠣᠯᠠᠨ ᠢ᠋ ᠭᠡᠲᠦᠯᠪᠡ
ᠬᠠᠢᠯᠵᠤ ᠤᠬᠢᠯᠠᠪᠠᠴᠤ
ᠬᠠᠷᠢᠨ ᠴᠢᠮᠠᠶ᠋ᠢ ᠦᠵᠡᠬᠦ ᠦᠭᠡᠢ
ᠬᠠᠢᠵᠤ ᠡᠷᠢᠪᠡᠴᠦ
ᠬᠠᠭᠠᠯᠭᠠ ᠵᠠᠮ ᠨᠢ ᠣᠯᠳᠠᠬᠤ ᠦᠭᠡᠢ ᠁
ᠳᠠᠭᠤ ᠦᠭᠡᠢ ᠪᠠᠢ! ᠭᠡᠵᠦ ᠢᠳᠬᠠᠪᠠ᠃ ᠥᠭᠡᠯᠦᠨ ᠭᠤᠸᠠ ᠮᠤᠬᠤᠯᠠᠭ ᠲᠡᠷᠭᠡᠨ ᠦ᠌ ᠮᠤᠬᠤᠷ ᠲᠤ᠌ ᠰᠢᠬᠠᠭᠳᠠᠭᠰᠠᠨ ᠥᠨᠥᠴᠢᠨ ᠢᠨᠵᠠᠭᠠ ᠰᠢᠭ᠋ ᠪᠥᠮᠪᠥᠭᠡᠨᠡᠲᠡᠯᠡ ᠴᠡᠴᠡᠷᠡᠵᠦ ᠶᠠᠪᠤᠬᠤ ᠳ᠋ᠤ᠌ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠲᠡᠮᠡᠭᠡᠨ ᠦ᠌ ᠪᠤᠷᠠᠨᠲᠠᠭ ᠬᠥᠲᠥᠯᠵᠦ᠂
ᠳᠡᠯᠭᠡᠭᠦᠯᠵᠦ ᠤᠷᠤᠰᠬᠤ ᠤᠨᠤᠨ ᠮᠢᠨᠢ
ᠲᠡᠷᠢᠭᠦᠨ ᠤᠷᠤᠰᠬᠠᠯ ᠲᠠᠨᠢ ᠬᠠᠮᠢᠭᠠ ᠬᠦᠷᠦᠭᠡ ᠪᠣᠯ
ᠲᠦᠭᠦᠴᠢᠭᠡᠯᠡᠵᠦ ᠨᠡᠭᠦᠬᠦ ᠲᠩᠷᠢ ᠮᠢᠨᠢ
ᠲᠦᠷᠦᠭᠦᠦ ᠡᠭᠦᠯᠡᠰ ᠲᠠᠨᠢ ᠬᠠᠮᠢᠭᠠ ᠣᠴᠢᠭᠠ ᠪᠣᠯ ᠭᠡᠮᠡᠨ ᠬᠠᠩᠭᠢᠨᠠᠲᠠᠯᠠ ᠳᠠᠭᠤᠯᠠᠵᠤ ᠪᠢᠯᠡ᠃ ᠲᠠᠷᠢᠲᠠᠢ ᠣᠳᠴᠢᠬᠢᠨ ᠲᠡᠷᠭᠡᠨ ᠳ᠋ᠦ᠍ ᠬᠥᠯᠯᠡᠭᠰᠡᠨ ᠲᠡᠮᠡᠭᠡ ᠶ᠋ᠢ ᠭᠢᠯᠢᠨ᠂
— ᠭᠦᠦᠭ᠂ ᠬᠥᠭᠡᠵᠢ᠁ ᠬᠡᠮᠡᠬᠦ ᠵᠠᠭᠤᠷᠠ ᠪᠠᠨ ᠬᠥᠬᠡ ᠲᠩᠷᠢ ᠡᠴᠡ ᠵᠠᠶᠠᠭᠠᠭᠰᠠᠨ ᠬᠥᠬᠡ ᠴᠢᠨᠣᠠ ᠶ᠋ᠢᠨ ᠳᠠᠭᠤᠳᠠᠯᠭᠠ ᠮᠡᠲᠦ ᠤᠷᠲᠤ ᠪᠠᠷ ᠰᠢᠷᠤᠩᠬᠠᠢ ᠬᠠᠲᠠᠭᠠᠨ ᠲᠦᠷᠢᠵᠦ ᠪᠥᠯᠥᠭᠡ᠃ ᠶᠡᠬᠡ ᠬᠡᠷᠡᠭ ᠢ᠋ ᠲᠡᠷᠢᠭᠦᠯᠡᠵᠦ ᠪᠦᠲᠦᠭᠡᠭᠰᠡᠨ ᠨᠡᠭᠦᠨ ᠲᠠᠢᠵᠢ᠂ ᠡᠮᠡᠭᠡᠯ ᠳᠡᠭᠡᠷᠡ ᠪᠡᠨ ᠪᠠᠭᠲᠠᠵᠤ ᠶᠠᠳᠠᠨ ᠬᠠᠩᠬᠠᠯᠵᠠᠵᠤ᠂
ᠪᠢᠯᠢᠭᠦᠨ ᠤᠷᠤᠰᠬᠤ ᠤᠨᠤᠨ ᠮᠥᠷᠡᠨ ᠦ᠌
ᠲᠡᠷᠢᠭᠦᠨ ᠤᠷᠤᠰᠬᠠᠯ ᠲᠩᠷᠢ ᠳ᠋ᠦ᠍ ᠪᠣᠢ
ᠮᠡᠯᠲᠡᠯᠵᠡᠬᠦ ᠤᠰᠤᠨ ᠨᠤᠲᠤᠭ ᠢ᠋ᠶ᠋ᠠᠨ ᠰᠠᠨᠠᠬᠤ ᠪᠠᠷ
ᠮᠡᠯᠮᠡᠷᠡᠲᠡᠯᠡ ᠤᠬᠢᠯᠠᠨ ᠱᠠᠭᠠᠬᠢᠭᠠᠳ ᠢᠷᠡᠳᠡᠭ ᠠ᠋!
ᠲᠦᠭᠦᠴᠢᠭᠡᠯᠡᠵᠦ ᠨᠡᠭᠦᠬᠦ ᠬᠥᠬᠡ ᠡᠭᠦᠯᠡᠰ ᠦ᠋ᠨ
ᠲᠦᠷᠦᠭᠦᠴᠢ ᠶ᠋ᠢᠨ ᠪᠦᠯᠦᠭ ᠨᠠᠷᠠᠨ ᠳ᠋ᠤ᠌ ᠪᠣᠢ
ᠮᠢᠶᠡᠭᠡᠨᠢᠬᠦ ᠡᠭᠦᠯᠡᠰ ᠠᠭᠤᠯᠠᠰ ᠢ᠋ᠶ᠋ᠠᠨ ᠰᠠᠨᠠᠬᠤ ᠪᠠᠷ
ᠮᠡᠨᠳᠦ ᠶ᠋ᠢᠨ ᠰᠠᠯᠬᠢ ᠪᠠᠷ ᠨᠡᠭᠦᠭᠡᠳ ᠢᠷᠡᠳᠡᠭ ᠠ᠋! ᠭᠡᠮᠡᠨ ᠨᠠᠮᠤᠭᠤᠬᠠᠨ ᠡᠪᠯᠢᠭ ᠬᠣᠭᠣᠯᠠᠢ ᠪᠠᠷ ᠨᠠᠮᠪᠠᠯᠢᠭᠬᠠᠨ ᠠᠶᠠᠯᠵᠠᠢ᠃ ᠴᠡᠭᠡᠵᠢ ᠳᠦᠭᠦᠷᠡᠩ ᠬᠥᠷ ᠲᠡᠢ ᠭᠤᠷᠪᠠᠨ ᠡᠷᠡᠰ ᠦ᠋ᠨ ᠣᠳᠣ ᠭᠡᠷᠡᠯᠲᠦᠭᠰᠡᠨ ᠲᠡᠨᠢᠭᠡᠷ ᠮᠠᠩᠨᠠᠢ ᠳᠡᠭᠡᠷᠡ ᠬᠥᠬᠡ ᠡᠭᠦᠯᠡᠰ ᠠᠯᠤᠰ ᠪᠠᠶᠠᠷ ᠤ᠋ᠨ ᠰᠤᠪᠢᠨ ᠰᠢᠪᠡᠨᠡᠨ ᠨᠡᠭᠦᠵᠦ ᠪᠠᠢᠯᠠ᠃
~ ᠦᠷᠭᠦᠯᠵᠢᠯᠡᠯ ᠪᠤᠢ ~