ᠬᠥᠯᠥᠭ ᠪᠠᠭᠠᠲᠤᠷ ᠪᠤᠭᠤᠷᠴᠢ - ᠪ᠂ ᠦᠯᠵᠡᠢᠰᠦ᠋ᠷᠦᠩ <ᠳᠡᠳ᠋ ᠪᠦᠯᠦᠭ - ᠠᠷᠪᠠᠨ ᠵᠢᠷᠭᠤᠭᠠ> Хүлэг баатар буурч - Б. Өлзийсүрэн <Дэд бүлэг-16>
85ᠥᠪᠡᠷ ᠦᠨ ᠵᠠᠮ ᠮᠥᠷ ᠢᠶᠡᠷ ᠲᠡᠮᠲᠡᠷᠢᠵᠦ ᠡᠷᠡ ᠬᠥᠮᠥᠨ ᠦ ᠡᠷᠴᠢ ᠬᠦᠴᠦ ᠶᠢ ᠣᠯᠵᠤ ᠬᠦᠷᠲᠡᠭᠰᠡᠨ ᠳᠡᠳ᠋ ᠪᠦᠯᠦᠭ
ᠠᠷᠪᠠᠨ ᠵᠢᠷᠭᠤᠭᠠ
ᠵᠣᠷᠢᠭᠲᠤ ᠥᠵᠢᠨ ᠦ᠌ ᠲᠡᠵᠢᠭᠡᠭᠰᠡᠨ ᠬᠥᠪᠡᠭᠦᠳ
ᠵᠠᠰᠠᠭᠲᠤ ᠡᠷᠡᠰ ᠪᠣᠯᠤᠨ ᠥᠰᠴᠦ
ᠵᠠᠮᠠᠭ ᠲᠠᠢ ᠤᠰᠤ ᠶ᠋ᠢ ᠱᠦᠭᠦᠷᠳᠡᠨ ᠪᠠᠢᠵᠤ
ᠵᠢᠭᠠᠰᠤ ᠵᠢᠷᠠᠭᠠᠬᠠᠢ ᠭᠥᠬᠢᠳᠡᠨ ᠪᠠᠢᠵᠤ
ᠵᠠᠶᠠᠭᠠᠲᠤ ᠡᠬᠡ ᠪᠡᠨ ᠲᠡᠵᠢᠭᠡᠬᠦ ᠪᠣᠯᠪᠠ
ᠪᠣᠭᠣᠷᠴᠢ ᠵᠣᠷᠢᠭᠰᠠᠨ ᠭᠠᠵᠠᠷ ᠢ᠋ᠶ᠋ᠠᠨ ᠢᠷᠡᠭᠡᠳ ᠭᠤᠷᠪᠠ ᠳᠥᠷᠪᠡ ᠬᠣᠨᠣᠯᠠ᠃ ᠢᠷᠡᠭᠰᠡᠨ ᠣᠷᠣᠢ ᠨᠢ ᠳᠠᠯᠠᠢ〈ᠳᠠᠬᠤᠯᠠᠢ〉ᠬᠤᠷᠠᠭᠠ ᠲᠥᠬᠥᠭᠡᠷᠴᠦ ᠳᠠᠢᠯᠠᠪᠠ᠃ ᠰᠢᠨᠡᠬᠡᠨ ᠤᠷᠭᠤᠭᠰᠠᠨ ᠭᠦᠵᠡᠯᠵᠡᠭᠡᠨᠡ᠂ ᠤᠯᠠᠭᠠᠨᠠ᠂ ᠪᠥᠭᠡᠷᠡᠯᠵᠡᠭᠡᠨᠡ᠂ ᠨᠠᠷᠠᠰᠤ ᠵᠡᠷᠭᠡ ᠶ᠋ᠢᠨ ᠡᠷᠲᠡ ᠭᠠᠷᠳᠠᠭ ᠵᠢᠮᠢᠰ ᠲᠠᠯᠪᠢᠭᠰᠠᠨ ᠨᠢ ᠶᠡᠬᠡ ᠰᠣᠨᠢᠨ᠂ ᠲᠠᠩᠰᠤᠭ ᠰᠠᠨᠠᠭᠳᠠᠪᠠ᠃ ᠥᠩᠭᠡᠷᠡᠭᠰᠡᠨ ᠨᠠᠮᠤᠷ ᠳᠠᠷᠤᠭᠰᠠᠨ ᠬᠠᠳ᠂ ᠦᠬᠡᠷ ᠦ᠋ᠨ ᠨᠢᠳᠦᠨ ᠦ᠌ ᠳᠠᠷᠠᠰᠤ᠂ ᠮᠣᠢᠯ ᠤ᠋ᠨ ᠠᠭᠠᠷᠤᠤᠯ᠂ ᠮᠡᠬᠡᠷ ᠦ᠋ᠨ ᠲᠣᠰᠣ ᠵᠡᠷᠭᠡ ᠬᠥᠪᠴᠢ ᠬᠠᠩᠭᠠᠢ ᠶ᠋ᠢᠨ ᠠᠮᠲᠠᠲᠠᠨ ᠢ᠋ ᠪᠣᠭᠤᠷᠴᠢ ᠲᠡᠳᠦᠢ ᠯᠡ ᠮᠡᠳᠡᠬᠦ ᠦᠭᠡᠢ ᠪᠢᠯᠡ᠃ ᠡᠢᠨᠬᠦ ᠨᠢᠭᠡᠨ ᠣᠷᠣᠢ ᠡᠯᠪᠡᠭ ᠪᠠᠶᠠᠯᠢᠭ ᠢᠳᠡᠭᠡ ᠴᠠᠭᠠ ᠪᠠᠷ ᠪᠢᠯᠬᠠᠬᠤ ᠨᠢ ᠭᠠᠢᠬᠠᠮᠰᠢᠭᠲᠠᠢ᠃ ᠭᠡᠪᠡᠴᠦ ᠮᠠᠷᠭᠠᠰᠢ ᠠ᠋ᠴᠠ ᠨᠢ ᠡᠬᠢᠯᠡᠭᠡᠳ ᠥᠭᠡᠷᠡ ᠪᠣᠯᠪᠠ᠃ ᠶᠡᠷᠦ ᠨᠢ ᠶᠠᠳᠠᠭᠤ ᠵᠦᠳᠡᠭᠦᠬᠡᠨ ᠬᠠᠷᠠ ᠪᠣᠷᠣ ᠠᠮᠢᠳᠤᠷᠠᠯ ᠲᠠᠢ ᠳᠥᠷᠪᠡᠨ ᠪᠦᠯᠢ ᠠᠢᠯ ᠶᠤᠮ᠃ ᠬᠠᠮᠤᠭ ᠤ᠋ᠨ ᠪᠠᠷᠠᠭᠤᠨ ᠲᠠᠯᠠ ᠶ᠋ᠢᠨ ᠰᠢᠨᠡᠬᠡᠨ ᠭᠡᠷ ᠲᠦ᠍ ᠲᠡᠮᠦᠵᠢᠨ ᠡᠬᠡᠨᠡᠷ ᠪᠥᠷᠲᠡᠬᠡᠯᠵᠢᠨ ᠭᠤᠸᠠ ᠶ᠋ᠢᠨ ᠬᠠᠮᠲᠤ ᠰᠠᠭᠤᠨᠠ᠃ ᠥᠩᠭᠡᠷᠡᠭᠰᠡᠨ ᠨᠠᠮᠤᠷ ᠡᠬᠡᠨᠡᠷ ᠢ᠋ᠶ᠋ᠡᠨ ᠠᠪᠴᠢᠷᠠᠵᠤ ᠬᠤᠷᠢᠮᠯᠠᠨ ᠠᠢᠯ ᠪᠣᠯᠤᠭᠠᠳ ᠪᠠᠢᠭᠠ ᠨᠢ ᠡᠨᠡ᠃ ᠡᠨᠡ ᠭᠡᠷ ᠦ᠋ᠨ ᠬᠣᠢᠮᠣᠷ ᠲᠤ᠌ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠤ᠋ᠨ ᠲᠤᠭ ᠰᠦᠯᠳᠡ᠂ ᠨᠤᠮᠤ ᠰᠤᠮᠤ᠂ ᠢᠯᠲᠠ ᠪᠠᠮᠪᠠᠢ᠂ ᠵᠢᠳᠠ ᠪᠤᠰᠤᠳ ᠪᠦᠬᠦ ᠯᠡ ᠬᠡᠷᠡᠭᠰᠡᠯ ᠢ᠋ ᠲᠢᠭ ᠲᠡᠢ ᠪᠠᠢᠷᠢᠯᠠᠭᠤᠯᠵᠠᠢ᠃ ᠪᠣᠭᠤᠷᠴᠢ ᠪᠦᠷᠲᠡᠭᠡᠯᠵᠢᠨ ᠢ᠋ ᠬᠠᠷᠠᠭᠠᠳ《ᠥᠨᠥᠬᠢ ᠬᠥᠭᠡᠷᠦᠬᠦᠨ ᠬᠡᠯᠡ ᠲᠡᠢ ᠬᠡᠦᠬᠡᠨ ᠨᠢ》 ᠭᠡᠵᠦ ᠢᠨᠢᠶᠡᠳᠦ ᠨᠢ ᠬᠦᠷᠦᠭᠰᠡᠨ ᠪᠤᠶᠤ᠃ ᠦᠨᠡᠬᠡᠷ ᠴᠦ᠍ ᠦᠵᠡᠰᠬᠦᠯᠡᠩ ᠭᠤᠸᠠ ᠠᠭᠠᠳ ᠠᠭᠠᠯᠢ ᠨᠠᠭᠠᠯᠢᠩᠬᠠᠢ᠂ ᠬᠠᠢᠯᠤᠭᠰᠠᠨ ᠲᠤᠭᠤᠯᠭᠠ ᠰᠢᠭ᠋ ᠠᠶᠠᠯᠢᠭ ᠠᠵᠢ᠃
ᠵᠡᠭᠦᠨ ᠲᠠᠯᠠ ᠳ᠋ᠤ᠌ ᠨᠢ ᠶᠡᠬᠡ ᠭᠡᠷ ᠬᠡᠮᠡᠬᠦ ᠶᠢᠰᠦᠭᠡᠢ ᠶ᠋ᠢᠨ ᠭᠡᠷ ᠥᠷᠥᠭᠡ᠂ ᠤᠭ ᠬᠡᠭᠡᠨᠴᠢᠷ ᠭᠠᠩᠭᠠᠩ ᠭᠡᠷ ᠪᠠᠢᠭᠰᠠᠨ ᠨᠢ ᠡᠳᠦᠭᠡ ᠶᠡᠬᠡᠳᠡ ᠬᠠᠭᠤᠴᠢᠷᠠᠵᠤ ᠭᠡᠮᠡᠷ ᠪᠣᠯᠵᠠᠢ᠃ ᠪᠠᠰᠠ ᠴᠠᠭ ᠲᠠᠭᠠᠨ ᠭᠣᠶᠣᠮᠰᠣᠭ ᠬᠢᠴᠡᠲᠡᠢ ᠡᠪᠬᠡᠳᠡᠭ ᠣᠷᠣ ᠪᠠᠢᠨᠠ᠃ ᠡᠨᠡ ᠭᠡᠷ ᠲᠦ᠍ ᠠᠪᠳᠠᠷᠠ ᠲᠠᠯᠪᠢᠭᠤᠷ᠂ ᠡᠷᠭᠢᠨᠡᠭ ᠡᠯᠭᠦᠭᠦᠷ᠂ ᠴᠠᠬᠤ ᠵᠡᠷᠭᠡ ᠬᠣᠭᠰᠢᠯ ᠪᠠᠢᠬᠤ ᠠᠵᠢ᠃ ᠬᠡᠦᠬᠡᠳ ᠦ᠋ᠳ ᠥᠪᠡᠷ ᠥᠪᠡᠷᠦᠨ ᠳᠡᠪᠢᠰᠬᠡᠷ ᠬᠤᠴᠢᠯᠭᠠ ᠪᠠᠨ ᠲᠡᠨᠢᠢᠯᠭᠡᠭᠡᠳ ᠤᠨᠲᠠᠨᠠ᠃ ᠥᠭᠡᠯᠦᠨ ᠡᠬᠡ᠂ ᠬᠠᠰᠠᠷ᠂ ᠬᠠᠴᠢᠭᠤᠨ᠂ ᠣᠳᠴᠢᠬᠢᠨ᠂ ᠲᠡᠮᠦᠯᠦᠨ ᠲᠠᠪᠤᠭᠤᠯᠠ ᠰᠠᠭᠤᠨᠠ᠃ ᠤᠳᠠᠭᠠᠬᠢ ᠭᠡᠷ ᠲᠦ᠍ ᠪᠡᠯᠭᠦᠳᠡᠢ᠂ ᠡᠬᠡ ᠰᠤᠴᠢᠭᠢᠯ ᠤ᠋ᠨ ᠬᠠᠮᠲᠤ ᠰᠠᠭᠤᠬᠤ ᠪᠥᠭᠡᠳ ᠬᠠᠮᠤᠭ ᠤ᠋ᠨ ᠵᠡᠭᠦᠨ ᠵᠠᠬᠠ ᠶ᠋ᠢᠨ ᠭᠡᠷ ᠲᠦ᠍ ᠵᠡᠯᠮᠡ᠂ ᠬᠤᠸᠬᠠᠴᠢᠨ ᠡᠮᠡᠭᠡᠨ ᠦ᠌ ᠬᠠᠮᠲᠤ ᠰᠠᠭᠤᠳᠠᠭ ᠠᠵᠢ᠃ ᠬᠤᠸᠠᠭᠴᠢᠨ ᠡᠮᠡᠭᠡᠨ ᠲᠠᠪᠢ ᠭᠠᠷᠤᠢ ᠨᠠᠰᠤᠲᠠᠢ᠂ ᠡᠨᠡ ᠪᠦᠯᠢ ᠶ᠋ᠢᠨ ᠬᠠᠮᠤᠭ ᠤ᠋ᠨ ᠠᠬᠠᠮᠠᠳ ᠨᠢ ᠪᠥᠭᠡᠳ ᠪᠦᠭᠦᠳᠡ ᠬᠦᠨᠳᠦᠯᠡᠨ《 ᠡᠮᠡᠭᠡ》 ᠭᠡᠬᠦ ᠪᠥᠭᠡᠳ ᠬᠠᠷᠢᠨ ᠲᠡᠷᠡ ᠪᠡᠷ ᠥᠭᠡᠯᠦᠨ ᠢ᠋《 ᠬᠠᠲᠤᠨ ᠠᠬᠠᠢ》 ᠭᠡᠮᠡᠨ ᠬᠦᠨᠳᠦᠯᠡᠬᠦ ᠪᠥᠯᠥᠭᠡ᠃
《ᠬᠠᠲᠤᠨ ᠠᠬᠠᠢ》 ᠬᠡᠮᠡᠬᠦ ᠥᠭᠡᠯᠦᠨ ᠡᠨᠡ ᠪᠦᠯᠢ ᠠᠢᠯ ᠢ᠋ ᠪᠦᠭᠦᠳᠡ ᠶ᠋ᠢ ᠵᠠᠬᠢᠷᠬᠤ ᠪᠣᠯᠠᠢ᠃ ᠡᠢᠮᠦ ᠠᠷᠪᠠᠨ ᠨᠢᠭᠡᠨ ᠠᠮᠠ ᠪᠦᠯᠢ ᠠᠢᠯ ᠡᠷᠦᠬᠡ ᠳᠡᠭᠡᠷᠡ ᠪᠣᠭᠤᠷᠴᠢ ᠠᠷᠪᠠᠨ ᠬᠣᠶᠠᠳᠠᠬᠢ ᠨᠢ ᠪᠣᠯᠤᠨ ᠨᠡᠮᠡᠭᠳᠡᠵᠡᠢ᠃ ᠪᠣᠭᠤᠷᠴᠢ ᠶ᠋ᠢ ᠬᠠᠮᠤᠭ ᠤ᠋ᠨ ᠪᠠᠷᠠᠭᠤᠨ ᠭᠡᠷ ᠦ᠋ᠨ ᠪᠠᠷᠠᠭᠤᠨ ᠲᠠᠯᠠ ᠳ᠋ᠤ᠌ ᠳᠣᠣᠷᠠ ᠪᠠᠨ ᠲᠤᠯᠭᠠᠭᠤᠷᠢ ᠬᠥᠯ ᠲᠡᠢ ᠪᠠᠨᠰᠠ ᠣᠷᠣᠨ ᠳᠡᠭᠡᠷᠡ ᠪᠠᠢᠷᠢᠯᠠᠭᠤᠯᠤᠭᠰᠠᠨ ᠨᠢ ᠶᠡᠬᠡᠬᠡᠨ ᠬᠦᠨᠳᠦᠳᠬᠡᠯ ᠶᠦᠮ᠃ ᠲᠡᠮᠦᠵᠢᠨ ᠪᠥᠷᠲᠡ ᠬᠣᠶᠠᠷ ᠤ᠋ᠨ ᠣᠷᠣ ᠪᠣᠭᠤᠷᠴᠢ ᠶ᠋ᠢᠨ ᠣᠷᠣ ᠲᠠᠢ ᠠᠪ ᠠᠳᠠᠯᠢᠬᠠᠨ᠂ ᠠᠷᠠᠢ ᠥᠷᠭᠡᠨ ᠪᠠᠢᠬᠤ ᠮᠠᠭᠠᠳ ᠦᠭᠡᠢ᠃ ᠮᠠᠯ ᠰᠦᠷᠦᠭ ᠦ᠋ᠨ ᠬᠤᠪᠢ ᠳ᠋ᠤ᠌ ᠴᠥᠭᠡᠨ᠂ ᠲᠡᠢᠮᠦ ᠡᠴᠡ ᠲᠠᠷᠴᠢᠭ ᠪᠠᠢᠬᠤ ᠠ᠋ᠴᠠ ᠠᠷᠭᠠ ᠦᠭᠡᠢ᠃ ᠭᠤᠷᠪᠠᠨ ᠭᠡᠭᠦᠦ ᠰᠠᠭᠠᠵᠤ ᠵᠢᠭᠠᠬᠠᠨ ᠠᠢᠷᠠᠭ ᠢᠰᠬᠡᠬᠦ᠃ ᠠᠷᠪᠠ ᠭᠠᠷᠤᠢ ᠠᠮᠠ ᠪᠦᠯᠢ ᠳ᠋ᠦ᠍ ᠡᠨᠡ ᠵᠢᠭᠠᠬᠠᠨ ᠠᠢᠷᠠᠭ ᠶᠠᠭᠤ ᠪᠣᠯᠬᠤ ᠪᠣᠢ? ᠣᠷᠣᠵᠤ ᠭᠠᠷᠬᠤ ᠭᠡᠢᠴᠢᠨ ᠵᠣᠴᠢᠨ ᠳ᠋ᠤ᠌ ᠵᠣᠷᠢᠭᠤᠯᠬᠤ ᠪᠠᠷ ᠥᠭᠡᠯᠦᠨ ᠡᠬᠡ ᠴᠠᠭᠠᠨᠠ ᠪᠠᠨ ᠵᠢᠭᠠᠬᠠᠨ ᠠᠢᠷᠠᠭ ᠰᠡᠯᠪᠢᠵᠦ ᠨᠥᠭᠡᠴᠡᠯᠡᠬᠦ ᠪᠠᠰᠠ ᠬᠡᠷᠡᠭᠲᠡᠢ᠃ ᠠᠷᠪᠠ ᠭᠠᠷᠤᠢ ᠮᠣᠷᠢᠳ ᠲᠠᠢ᠂ ᠪᠠᠭᠠ ᠨᠠᠰᠤᠨ ᠤ᠋ ᠥᠬᠢᠨ ᠳᠠᠭᠠ ᠰᠢᠳᠦᠯᠡᠩ ᠨᠡᠢᠯᠡᠭᠡᠳ ᠠᠳᠤᠭᠤ ᠨᠢ ᠬᠣᠷᠢ ᠬᠦᠷᠬᠦ ᠲᠡᠢ᠂ ᠦᠬᠡᠷ ᠲᠡᠢ ᠠᠵᠢ᠃ ᠳᠥᠷᠪᠡᠨ ᠲᠤᠭᠤᠯ ᠲᠠᠢ ᠦᠨᠢᠶᠡ᠂ ᠬᠣᠷᠢ ᠭᠠᠷᠤᠢ ᠬᠣᠨᠢ ᠢᠮᠠᠭᠠ ᠰᠠᠭᠠᠵᠤ ᠵᠢᠭᠠᠬᠠᠨ ᠴᠠᠭᠠᠨ ᠢᠳᠡᠭᠡ ᠠᠪᠤᠨᠠ᠃ ᠬᠠᠷᠢᠨ ᠨᠠᠢ᠍ᠮᠠᠨ ᠱᠠᠷ᠂ ᠳᠥᠨᠡ ᠭᠤᠨᠠ ᠲᠠᠢ ᠪᠠᠢᠯᠠ᠃ ᠡᠨᠡ ᠬᠡᠳᠦᠨ ᠦᠬᠡᠷ ᠲᠡᠭᠡᠨ ᠲᠣᠬᠢᠷᠠᠭᠰᠠᠨ ᠲᠡᠷᠭᠡ ᠲᠡᠢ᠂ ᠭᠡᠷ ᠬᠣᠭᠰᠢᠯ ᠢ᠋ᠶ᠋ᠠᠨ ᠠᠴᠢᠭᠠᠳ ᠬᠠᠮᠢᠭᠠ ᠠ᠋ᠴᠠ ᠬᠠᠮᠢᠭᠠ ᠯᠠ ᠪᠣᠯ ᠨᠡᠭᠦᠭᠡᠳ ᠠᠯᠠᠭᠠ ᠪᠣᠯᠳᠠᠭ ᠭᠡᠨᠡ᠃ ᠨᠢᠭᠡ ᠶᠣᠰᠣᠨ ᠳ᠋ᠠᠭᠠᠨ ᠲᠠᠩᠳᠠ ᠯᠠ ᠵᠢᠭᠤᠲᠠᠵᠤ᠂ ᠠᠮᠢ ᠪᠠᠨ ᠠᠷᠭᠠᠴᠠᠭᠠᠭᠰᠠᠨ ᠠᠮᠢᠲᠠᠳ ᠠᠵᠤᠭᠤ᠃ ᠢᠩᠭᠢᠭᠰᠡᠨ ᠢ᠋ᠶ᠋ᠡᠷ ᠬᠣᠭᠣᠯᠠᠨ ᠤ᠋ ᠭᠣᠣᠯ ᠶᠡᠷᠦᠳᠡᠭᠡᠨ ᠯᠡ ᠠᠩᠨᠠᠭᠤᠷ ᠤ᠋ᠨ ᠮᠢᠬᠠ᠃ ᠪᠤᠭᠤ᠂ ᠪᠣᠷᠣ ᠭᠥᠷᠥᠭᠡᠰᠦ᠂ ᠭᠠᠬᠠᠢ᠂ ᠴᠢᠨᠳᠠᠭᠠ᠂ ᠲᠠᠤᠯᠠᠢ᠂ ᠬᠡᠷᠡᠮᠦ᠂ ᠵᠢᠷᠭᠠ᠂ ᠲᠠᠷᠪᠠᠭᠠ᠂ ᠵᠤᠷᠠᠮᠠ᠂ ᠪᠦᠬᠦ ᠲᠥᠷᠥᠯ ᠦ᠋ᠨ ᠰᠢᠪᠠᠭᠤ᠂ ᠵᠢᠭᠠᠰᠤ ᠁ ᠠᠷᠠᠢᠬᠠᠨ ᠪᠠᠭᠠᠪᠠᠭᠠᠢ᠂ ᠬᠠᠨᠳᠠᠭᠠᠢ ᠳᠡᠢᠯᠬᠦ ᠦᠭᠡᠢ ᠪᠠᠢᠭᠠ ᠭᠡᠨᠡ᠃《 ᠲᠡᠭᠡᠪᠡᠯ ᠴᠦ᠍ ᠁ 》 ᠭᠡᠵᠦ ᠪᠠᠢᠬᠤ ᠶᠤᠮ᠃
ᠪᠣᠭᠣᠷᠴᠢ ᠠᠩ ᠤ᠋ᠨ ᠮᠢᠬᠠ ᠪᠠᠷ ᠬᠣᠭᠣᠯᠠᠯᠠᠵᠤ ᠰᠤᠷᠤᠭᠠ ᠦᠭᠡᠢ ᠨᠢ ᠬᠡᠴᠡᠭᠦᠦ ᠪᠠᠢᠪᠠ᠃ ᠡᠭᠦᠨ ᠢ᠋ ᠥᠭᠡᠯᠦᠨ ᠡᠬᠡ ᠠᠵᠢᠵᠤ ᠮᠡᠳᠡᠭᠡᠳ ᠲᠡᠭᠦᠨ ᠳ᠋ᠦ᠍ ᠲᠤᠰᠬᠠᠢ ᠬᠣᠭᠣᠯᠠ ᠬᠢᠵᠦ ᠥᠭᠭᠦᠭᠰᠡᠨ ᠨᠢ ᠰᠢᠪᠠᠭᠤ ᠵᠢᠭᠠᠰᠤᠨ ᠤ᠋ ᠮᠢᠬᠠᠨ ᠠ᠋ᠴᠠ ᠳᠣᠯᠣᠭᠠᠨ ᠳᠣᠣᠷᠠ ᠬᠦᠨᠳᠦ ᠬᠡᠴᠡᠭᠦᠦ ᠶᠠᠭᠤᠮᠠ ᠪᠣᠯᠪᠠ᠃ ᠤᠴᠢᠷ ᠨᠢ ᠡᠨᠡ ᠪᠦᠯᠢ ᠠᠢᠯ ᠶᠠᠭᠤ ᠪᠠᠢᠭᠠ ᠪᠠᠨ ᠪᠦᠭᠦᠳᠡ ᠠᠳᠠᠯᠢᠬᠠᠨ ᠢᠳᠡᠵᠦ ᠤᠤᠭᠤᠭᠠᠳ ᠢᠷᠡᠭᠰᠡᠨ ᠬᠥᠢᠯᠢᠭ (ᠬᠦᠢ ᠨᠢᠭᠡᠲᠡᠢ ) ᠠᠮᠢᠳᠤᠷᠠᠯ ᠲᠠᠢ ᠬᠥᠮᠦᠰ ᠲᠤᠯᠠ ᠪᠣᠭᠣᠷᠴᠢ ᠳ᠋ᠤ᠌ ᠲᠤᠰᠬᠠᠢ ᠬᠣᠭᠣᠯᠠ ᠬᠢᠯᠭᠡᠵᠦ ᠢᠳᠡᠬᠦ ᠨᠢ ᠲᠤᠩ ᠡᠪ ᠦᠭᠡᠢ ᠰᠠᠨᠠᠭᠳᠠᠵᠤ ᠥᠭᠡᠯᠦᠨ ᠡᠬᠡ ᠳ᠋ᠦ᠍᠄
— ᠨᠠᠳᠠ ᠪᠢᠲᠡᠭᠡᠢ ᠢᠩᠭᠢᠵᠦ ᠬᠣᠭᠣᠯᠠ ᠬᠢ᠂ ᠪᠢ ᠪᠦᠭᠦᠳᠡ ᠲᠡᠢ ᠠᠳᠠᠯᠢ ᠢᠳᠡᠵᠦ ᠤᠤᠭᠤᠨᠠ ᠭᠡᠵᠦ ᠭᠤᠶᠤᠪᠠ᠃
ᠲᠡᠮᠦᠵᠢᠨ ᠪᠣᠭᠣᠷᠴᠢ ᠬᠣᠶᠠᠷ ᠲᠠᠢ ᠬᠣᠶᠠᠷ ᠡᠳᠦᠷ ᠠᠭᠤᠯᠠ ᠬᠠᠳᠠ ᠪᠠᠷ ᠶᠠᠪᠤᠵᠤ ᠭᠠᠵᠠᠷ ᠤᠰᠤ ᠪᠠᠨ ᠨᠠᠷᠠᠯᠠᠨ ᠵᠢᠭᠠᠵᠤ᠄
— ᠮᠠᠨ ᠤ᠋ ᠡᠨᠡ ᠭᠠᠵᠠᠷ ᠤᠰᠤ ᠪᠣᠯ ᠭᠤᠷᠪᠠᠨ ᠭᠣᠣᠯ ᠤ᠋ᠨ ᠮᠣᠩᠭᠣᠯ᠂ ᠪᠣᠷᠵᠢᠭᠢᠨ ᠤ᠋ ᠭᠣᠣᠯ ᠨᠤᠲᠤᠭ᠃ ᠪᠣᠷᠵᠢᠭᠢᠨ ᠪᠣᠯ ᠮᠢᠨᠦ ᠡᠴᠢᠭᠡ ᠶ᠋ᠢᠨ ᠡᠪᠦᠭᠡ ᠳᠡᠭᠡᠳᠦᠰ ᠪᠥᠯᠥᠭᠡ᠃ ᠬᠡᠨᠲᠡᠢ ᠶᠡᠬᠡ ᠠᠭᠤᠯᠠ ᠶ᠋ᠢᠨ ᠭᠣᠣᠯ ᠣᠷᠭᠢᠯ ᠤ᠋ᠨ ᠵᠡᠭᠦᠨ ᠰᠤᠭᠤ ᠠ᠋ᠴᠠ ᠤᠨᠤᠨ᠂ ᠬᠡᠷᠦᠯᠦᠨ᠂ ᠲᠤᠤᠯᠠ ᠭᠣᠣᠯ ᠭᠠᠷᠴᠤ ᠭᠤᠷᠪᠠᠨ ᠵᠦᠭ ᠤᠷᠤᠰᠬᠤ ᠳ᠋ᠤ᠌ ᠡᠬᠢᠨ ᠦ᠌ ᠬᠡᠰᠡᠭ ᠲᠦ᠍ ᠲᠠᠢᠴᠢᠭᠤᠳ ᠪᠣᠷᠵᠢᠭᠢᠨ ᠭᠣᠣᠯᠯᠠᠭᠰᠠᠨ ᠠᠷᠠᠳ ᠤ᠋ᠳ ᠪᠠᠢᠵᠤ᠂ ᠲᠡᠳᠡᠨ ᠢ᠋ ᠮᠠᠨ ᠤ᠋ ᠡᠴᠢᠭᠡ ᠵᠠᠬᠢᠷᠴᠤ ᠪᠠᠢᠭᠠᠳ ᠲᠩᠷᠢ ᠳ᠋ᠦ᠍ ᠬᠠᠯᠢᠬᠤ ᠳ᠋ᠤ᠌ ᠡᠴᠢᠭᠡ ᠶ᠋ᠢᠨ ᠰᠢᠳᠠᠷ ᠲᠠᠷᠭᠤᠲᠠᠢ ᠬᠢᠷᠢᠯᠳᠣᠭ ᠬᠡᠮᠡᠭᠴᠢ ᠪᠡᠷ ᠪᠦᠬᠦ ᠠᠯᠪᠠᠲᠤ ᠢᠷᠭᠡᠳ ᠢ᠋ ᠤᠷᠪᠠᠭᠤᠯᠤᠨ ᠳᠠᠭᠠᠭᠤᠯᠵᠤ ᠪᠢᠳᠡᠨ ᠢ᠋ ᠴᠦ᠍ ᠳᠡᠭᠡᠷᠡᠮᠳᠡᠨ ᠲᠣᠨᠣᠭᠠᠳ ᠡᠬᠡ ᠳᠡᠭᠦᠦ ᠶ᠋ᠢᠨ ᠬᠠᠮᠲᠤ ᠬᠥᠯ ᠬᠥᠰᠡᠷ᠂ ᠭᠠᠷ ᠭᠠᠵᠠᠷ ᠬᠣᠭᠣᠰᠣᠨ ᠬᠠᠶᠠᠵᠤ ᠶᠠᠪᠤᠭᠠᠳ ᠣᠳᠣ ᠬᠡᠨᠲᠡᠢ ᠠᠭᠤᠯᠠ ᠶ᠋ᠢᠨ ᠠᠷᠤ ᠠ᠋ᠴᠠ ᠪᠠᠢᠭᠠᠯ ᠶᠡᠬᠡ ᠳᠠᠯᠠᠢ ᠬᠦᠷᠲᠡᠯᠡ ᠭᠠᠵᠠᠷ ᠨᠤᠲᠤᠭ ᠢ᠋ ᠡᠵᠡᠮᠰᠢᠨ ᠪᠠᠢᠭᠠ᠃ ᠵᠡᠷᠭᠡᠯᠡᠳᠡᠭᠡ ᠨᠢ ᠤᠷᠢᠶᠠᠩᠬᠠᠢ᠂ ᠵᠠᠯᠠᠢᠷ᠂ ᠪᠠᠷᠭᠤ ᠠᠢᠮᠠᠭ ᠤ᠋ᠳ ᠪᠠᠢᠳᠠᠭ᠃ ᠲᠡᠳᠡᠨ ᠦ᠌ ᠬᠢᠨ ᠦᠷᠭᠦᠯᠵᠢ ᠶ᠋ᠢᠨ ᠲᠡᠮᠡᠴᠡᠯ ᠲᠡᠢ ᠪᠠᠢᠳᠠᠭ ᠤᠴᠢᠷ ᠨᠠᠭᠠᠰᠢ ᠪᠠᠨ ᠢᠷᠡᠵᠦ ᠴᠢᠳᠠᠬᠤ ᠦᠭᠡᠢ ᠪᠠᠢᠭᠠ ᠶᠤᠮ᠃ ᠬᠤᠷᠢᠶᠠᠵᠤ ᠬᠤᠮᠢᠵᠤ ᠠᠪᠤᠶᠠ ᠭᠡᠪᠡᠯ ᠣᠷᠣᠭᠰᠢ ᠪᠠᠨ ᠬᠡᠷᠦᠯᠦᠨ ᠦ᠌ ᠰᠠᠪᠠ ᠪᠠᠷ ᠪᠣᠷᠵᠢᠭᠢᠨ ᠣᠯᠠᠨ ᠪᠣᠢ᠃ ᠲᠠᠨ ᠤ᠋ ᠠᠷᠤᠯᠠᠳ ᠴᠤ᠌ ᠣᠷᠣᠨᠠ᠃ ᠬᠠᠷᠢᠨ ᠬᠢᠷᠢᠯᠳᠣᠭ ᠨᠠᠮᠠ ᠶ᠋ᠢ ᠨᠢᠳᠤᠨᠤᠨ ᠵᠢᠯ ᠪᠠᠷᠢᠵᠤ ᠤᠰᠠᠳᠬᠠᠬᠤ ᠪᠠᠷ ᠠᠪᠠᠴᠢᠵᠤ ᠬᠣᠶᠠᠷ ᠰᠠᠷᠠ ᠲᠠᠮᠤᠯᠠᠭᠰᠠᠨ᠃ ᠰᠠᠢᠨ ᠬᠥᠮᠦᠨ ᠦ᠌ ᠠᠴᠢ ᠪᠠᠷ ᠪᠢ ᠠᠮᠢ ᠭᠠᠷᠤᠭᠠᠳ ᠶᠠᠪᠤᠵᠤ ᠪᠠᠢᠭᠠ᠃ ᠡᠨᠡ ᠪᠠᠷᠠᠭᠤᠨ᠂ ᠪᠠᠷᠠᠭᠤᠨ ᠣᠷᠣᠭᠰᠢ ᠲᠤᠤᠯᠠ ᠭᠣᠣᠯ ᠤ᠋ᠨ ᠰᠠᠪᠠ ᠳᠠᠭᠠᠤ ᠶᠡᠬᠡ ᠨᠤᠲᠤᠭ ᠲᠤ᠌ ᠬᠡᠷᠡᠢᠳ ᠤᠯᠤᠰ ᠣᠷᠣᠰᠢᠳᠠᠭ᠃ ᠬᠠᠨ ᠨᠢ ᠲᠤᠭᠤᠷᠢᠯ᠂ ᠲᠡᠳᠡ ᠪᠡᠷ ᠮᠢᠨᠦ ᠡᠴᠢᠭᠡ ᠲᠡᠢ ᠨᠥᠬᠥᠷᠰᠡᠭ ᠳᠣᠲᠣᠨᠣ ᠬᠠᠷᠢᠯᠴᠠᠵᠤ ᠲᠡᠷᠡ ᠴᠦ᠍ ᠪᠠᠢᠲᠤᠭᠠᠢ ᠠᠬᠠ ᠳᠡᠭᠦᠦ ᠨᠠᠷ ᠲᠠᠢ ᠪᠠᠨ ᠡᠪᠳᠡᠷᠡᠯᠴᠡᠨ ᠭᠠᠵᠠᠷ ᠨᠤᠲᠤᠭ ᠢ᠋ᠶ᠋ᠠᠨ ᠠᠯᠳᠠᠵᠤ ᠶᠠᠳᠠᠷᠠᠬᠤ ᠳ᠋ᠠᠭᠠᠨ ᠡᠴᠢᠭᠡ ᠡᠴᠡ ᠮᠢᠨᠢ ᠲᠤᠰᠠ ᠭᠤᠶᠤᠬᠤ ᠳ᠋ᠤ᠌ ᠨᠢ ᠡᠴᠢᠭᠡ ᠮᠠᠨᠢ ᠤᠯᠤᠰ ᠢ᠋ ᠨᠢ ᠬᠤᠷᠢᠶᠠᠵᠤ ᠥᠭᠭᠦᠭᠰᠡᠨ ᠲᠡᠦᠬᠡ ᠲᠡᠢ ᠃ ᠲᠡᠭᠡᠭᠡᠳ ᠪᠢ ᠲᠣᠭᠣᠷᠢᠯ ᠬᠠᠨ ᠳ᠋ᠤ᠌ ᠨᠢᠳᠤᠨᠤᠨ ᠨᠠᠮᠤᠷ ᠣᠴᠢᠵᠤ᠂ ᠭᠡᠷᠯᠡᠬᠦ ᠳ᠋ᠦ᠍ ᠢᠨᠵᠢ ᠳ᠋ᠦ᠍ ᠢᠷᠡᠭᠰᠡᠨ ᠪᠥᠷᠲᠡ ᠶ᠋ᠢᠨ ᠢ᠋ᠶ᠋ᠡᠨ ᠪᠤᠯᠠᠭᠠᠨ ᠳᠠᠬᠤ ᠶ᠋ᠢ ᠪᠠᠷᠢᠵᠤ᠂《ᠡᠪᠳᠡᠷᠡᠭᠰᠡᠨ ᠤᠯᠤᠰ ᠢ᠋ ᠮᠢᠨᠢ ᠡᠷᠭᠢᠭᠦᠯᠵᠦ ᠠᠯᠢ》 ᠭᠡᠵᠦ ᠭᠤᠶᠤᠭᠰᠠᠨ᠃ ᠲᠡᠷᠡ ᠪᠡᠷ ᠶᠡᠬᠡᠳᠡ ᠪᠠᠶᠠᠷᠯᠠᠨ᠂
ᠬᠠᠷᠠ ᠪᠤᠯᠠᠭᠠᠨ ᠳᠠᠬᠤ ᠶ᠋ᠢᠨ ᠴᠢᠨᠢ ᠬᠠᠷᠢᠭᠤ ᠳ᠋ᠤ᠌
ᠬᠠᠭᠠᠴᠠᠭᠰᠠᠨ ᠤᠯᠤᠰ ᠢ᠋ ᠴᠢᠨᠢ ᠬᠠᠮᠲᠤᠳᠬᠠᠵᠤ ᠥᠭᠭᠦᠶᠡ
ᠪᠤᠯᠠᠭᠠᠨ ᠳᠠᠬᠤ ᠶ᠋ᠢᠨ ᠴᠢᠨᠢ ᠬᠠᠷᠢᠭᠤ ᠳ᠋ᠤ᠌
ᠪᠤᠲᠠᠷᠠᠭᠰᠠᠨ ᠤᠯᠤᠰ ᠢ᠋ ᠴᠢᠨᠢ ᠴᠤᠭᠯᠠᠭᠤᠯᠵᠤ ᠥᠭᠭᠦᠶᠡ
ᠪᠥᠭᠡᠷᠡ ᠨᠢ ᠪᠥᠭᠰᠡᠨ ᠳ᠋ᠡᠭᠡᠨ ᠪᠠᠢᠭ
ᠴᠠᠷᠠ ᠨᠢ ᠴᠡᠭᠡᠵᠢᠨ ᠳ᠋ᠡᠭᠡᠨ ᠪᠠᠢᠭ ᠭᠡᠰᠡᠨ ᠪᠥᠯᠥᠭᠡ᠃
ᠲᠡᠮᠦᠵᠢᠨ ᠦ᠌ ᠦᠭᠡ ᠶ᠋ᠢ ᠠᠩᠬᠠᠷᠤᠯ ᠲᠠᠢ ᠰᠣᠨᠣᠰᠴᠤ ᠠᠯᠤᠰ ᠤ᠋ᠨ ᠠᠭᠤᠯᠠᠰ ᠢ᠋ ᠰᠢᠷᠳᠡᠨ ᠰᠠᠭᠤᠭᠠ ᠪᠤᠭᠤᠷᠴᠢ ᠴᠢᠯᠠᠭᠤ ᠠᠪᠴᠤ ᠨᠢᠰᠠᠯᠤᠭᠠᠳ᠄
— ᠴᠢ ᠲᠡᠭᠡᠪᠡᠯ ᠬᠦᠴᠦᠲᠡᠢ ᠲᠦᠰᠢᠭ ᠲᠤᠯᠭᠠᠭᠤᠷᠢ ᠲᠠᠢ ᠶᠤᠮ ᠪᠠᠢᠨᠠ ᠭᠡᠵᠦ ᠤᠷᠮᠠ ᠥᠭᠪᠡ᠃ ᠲᠡᠮᠦᠵᠢᠨ᠄
— ᠲᠡᠢᠮᠦ ᠠ᠋᠂ ᠲᠡᠭᠡᠬᠦ ᠳ᠋ᠡᠭᠡᠨ ᠥᠪᠡᠷ ᠢ᠋ᠶ᠋ᠡᠨ ᠭᠠᠷ ᠮᠤᠬᠤᠷ ᠪᠠᠢᠵᠤ ᠪᠣᠯᠬᠤ ᠦᠭᠡᠢ᠃ ᠨᠥᠬᠥᠳ ᠴᠡᠷᠢᠭ ᠡᠯᠰᠡᠭᠦᠯᠵᠦ ᠴᠤᠭᠯᠠᠭᠤᠯᠤᠨ ᠰᠤᠷᠭᠠᠭᠤᠯᠢ ᠬᠢᠯᠭᠡᠵᠦ ᠪᠣᠢ᠃ ᠴᠢ ᠮᠠᠷᠭᠠᠰᠢ ᠦᠵᠡᠨᠡ ᠠ᠋ ᠭᠡᠳ ᠮᠣᠷᠳᠠᠨ ᠬᠣᠶᠠᠭᠤᠯᠠ ᠭᠡᠷ ᠦ᠋ᠨ ᠵᠦᠭ ᠵᠢᠯᠣᠭᠣ ᠵᠠᠯᠠᠪᠠ᠃
ᠮᠠᠷᠭᠠᠰᠢ ᠥᠷᠯᠥᠭᠡ ᠨᠢ ᠲᠡᠮᠦᠵᠢᠨ ᠪᠣᠭᠤᠷᠴᠢ ᠶ᠋ᠢ ᠳᠠᠭᠠᠭᠤᠯᠤᠨ ᠨᠥᠬᠥᠳ ᠴᠡᠷᠢᠭ ᠦ᠋ᠨ ᠰᠤᠷᠭᠠᠭᠤᠯᠢ ᠶ᠋ᠢᠨ ᠭᠠᠵᠠᠷ ᠣᠴᠢᠪᠠ᠃ ᠲᠡᠨᠳᠡ ᠭᠤᠴᠢ ᠬᠢᠷᠢ ᠶ᠋ᠢᠨ ᠬᠥᠮᠦᠰ ᠴᠤᠭᠯᠠᠷᠠᠵᠤ ᠰᠤᠷᠭᠠᠭᠤᠯᠢ ᠬᠢᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠠᠬᠠᠯᠠᠭᠴᠢ ᠪᠠᠨ ᠬᠠᠷᠠᠭᠠᠳ ᠳᠤᠭᠤᠢᠷᠠᠨ ᠵᠢᠭᠰᠠᠵᠤ᠂ ᠳᠤᠮᠳᠠ ᠠ᠋ᠴᠠ ᠨᠢ ᠵᠠᠯᠮᠠ ᠭᠠᠷᠴᠤ ᠢᠷᠡᠨ ᠵᠢᠷᠦᠬᠡᠨ ᠲᠤᠰ ᠭᠠᠷ ᠢ᠋ᠶ᠋ᠠᠨ ᠳᠠᠷᠤᠨ ᠲᠣᠯᠣᠭᠠᠢ ᠮᠡᠬᠦᠢᠨ ᠶᠣᠰᠣᠯᠠᠵᠤ᠂ ᠨᠥᠬᠥᠳ ᠴᠡᠷᠢᠭ ᠦ᠋ᠨ ᠠᠬᠠᠯᠠᠭᠴᠢ ᠲᠡᠮᠦᠵᠢᠨ ᠳ᠋ᠦ᠍ ᠮᠡᠳᠡᠭᠦᠯᠬᠦ ᠨᠢ᠄
— ᠨᠥᠬᠥᠳ ᠴᠡᠷᠢᠭ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠪᠡᠯᠡᠨ ᠭᠡᠵᠦ ᠢᠯᠡᠳᠬᠡᠬᠦᠢ ᠯᠤᠭᠠ ᠲᠡᠮᠦᠵᠢᠨ᠄
— ᠨᠥᠬᠥᠳ ᠴᠡᠷᠢᠭ ᠰᠠᠢᠨ ᠤᠤ? ᠭᠡᠵᠦ ᠮᠡᠨᠳᠦᠴᠢᠯᠡᠬᠦ ᠳ᠋ᠦ᠍ ᠲᠡᠳᠡ᠄
— ᠬᠤᠷᠤᠢ᠂ ᠬᠤᠷᠤᠢ᠂ ᠬᠤᠷᠤᠢ ᠭᠡᠵᠦ ᠳᠠᠭᠤ ᠨᠡᠢᠯᠡᠭᠦᠯᠦᠨ ᠰᠦᠷᠲᠡᠢ ᠶᠠ ᠬᠤᠷᠤᠢᠯᠠᠪᠠ᠃ ᠲᠡᠮᠦᠵᠢᠨ᠄
— ᠮᠢᠨᠦ ᠰᠠᠢᠨ ᠨᠥᠬᠥᠷ ᠠᠷᠤᠯᠠᠳ ᠤ᠋ᠨ ᠪᠣᠭᠤᠷᠴᠢ ᠮᠠᠨ ᠳ᠋ᠤ᠌ ᠡᠯᠰᠡᠨ ᠢᠷᠡᠭᠰᠡᠨ ᠪᠥᠯᠥᠭᠡ᠃ ᠲᠠᠨᠢᠯᠴᠠᠵᠠᠭᠠ᠃ ᠨᠥᠬᠥᠳ ᠴᠡᠷᠢᠭ ᠦ᠋ᠳ ᠠ᠋! ᠭᠡᠵᠦ ᠪᠣᠭᠤᠷᠴᠢ ᠶ᠋ᠢ ᠲᠠᠨᠢᠯᠴᠠᠭᠤᠯᠤᠭᠠᠳ ᠲᠡᠭᠦᠨ ᠢ᠋ ᠳᠠᠭᠠᠭᠤᠯᠤᠨ ᠵᠢᠭᠰᠠᠭᠠᠯ ᠤ᠋ᠨ ᠠᠷᠤ ᠳ᠋ᠤ᠌ ᠣᠴᠢᠵᠤ ᠵᠣᠭᠰᠣᠪᠠ᠃
ᠵᠠᠯᠮᠠ᠂ ᠨᠥᠬᠥᠳ ᠴᠡᠷᠢᠭ ᠦ᠋ᠨ ᠵᠢᠭᠰᠠᠭᠠᠯ ᠤ᠋ᠨ ᠡᠬᠢᠨ ᠡᠴᠡ ᠴᠤᠪᠤᠷᠠᠭᠠ ᠪᠠᠷ ᠢ᠋ᠶ᠋ᠠᠨ᠁ ᠭᠡᠵᠦ ᠲᠤᠰᠢᠶᠠᠯ ᠥᠭᠬᠦ ᠳ᠋ᠦ᠍ ᠲᠡᠳᠡ ᠡᠬᠢᠨ ᠡᠴᠡ ᠪᠡᠨ ᠳᠤᠭᠤᠢ ᠵᠠᠮ ᠢ᠋ᠶ᠋ᠠᠷ ᠴᠤᠪᠤᠷᠠᠨ ᠱᠣᠭᠰᠢᠭᠤᠯᠤᠯᠠ᠃ ᠪᠠᠭᠤᠵᠤ ᠮᠣᠷᠳᠠᠭᠠᠳ! ᠭᠡᠰᠡᠨ ᠲᠤᠰᠢᠶᠠᠯ ᠢ᠋ᠶ᠋ᠠᠷ ᠪᠦᠬᠦ ᠴᠡᠷᠢᠭ ᠮᠣᠷᠢᠨ ᠠ᠋ᠴᠠ ᠪᠠᠨ ᠦᠰᠦᠷᠦᠨ ᠪᠠᠭᠤᠵᠤ ᠦᠰᠦᠷᠦᠨ ᠮᠣᠷᠳᠠᠬᠤ ᠳ᠋ᠤ᠌ ᠪᠣᠭᠤᠷᠴᠢ ᠲᠡᠭᠦᠨ ᠢ᠋ ᠳᠠᠭᠤᠷᠢᠶᠠᠨ ᠬᠡᠵᠢᠶᠡ ᠶᠡᠵᠢᠶᠡᠨ ᠦ᠌ ᠴᠡᠷᠢᠭ ᠡᠷᠡ ᠰᠢᠭ ᠬᠢᠵᠦ ᠪᠠᠢᠯᠠ᠃ ᠳᠠᠷᠠᠭᠠ ᠨᠢ ᠮᠣᠷᠢᠨ ᠳᠡᠭᠡᠷᠡ ᠡᠴᠡ ᠴᠢᠯᠠᠭᠤ ᠰᠢᠭᠦᠷᠦᠨ ᠪᠠᠢ ᠳ᠋ᠤ᠌ ᠰᠢᠳᠡᠬᠦ᠂ ᠵᠢᠳᠠ ᠰᠢᠳᠡᠬᠦ᠂ ᠰᠡᠯᠡᠮᠡ ᠡᠷᠭᠢᠭᠦᠯᠬᠦ ᠵᠡᠷᠭᠡ ᠣᠯᠠᠨ ᠦᠢᠯᠡᠳᠦᠯ ᠮᠣᠷᠢ ᠲᠠᠢ ᠬᠢᠬᠦ᠂ ᠶᠠᠪᠠᠭᠠᠨ ᠢ᠋ᠶ᠋ᠠᠷ ᠬᠠᠷᠠᠢᠬᠤ᠂ ᠱᠠᠲᠤ ᠳᠠᠪᠠᠬᠤ ᠮᠡᠲᠦ ᠶ᠋ᠢᠨ ᠣᠯᠠᠨ ᠵᠦᠢᠯ ᠳ᠋ᠦ᠍ ᠣᠷᠣᠯᠴᠠᠬᠤ ᠳ᠋ᠤ᠌ ᠰᠡᠯᠡᠮᠡ ᠵᠢᠳᠠᠨ ᠳ᠋ᠤ᠌ ᠯᠠ ᠪᠣᠭᠤᠷᠴᠢ ᠪᠠᠷᠤᠭᠲᠠᠢᠬᠠᠨ ᠴᠤ᠌ ᠪᠠᠰᠠ ᠠᠮᠠᠷᠬᠠᠨ ᠡᠪᠰᠢᠵᠦ ᠪᠠᠢᠯᠠ᠃ ᠡᠳᠦᠷ ᠠᠩ ᠤ᠋ᠨ ᠮᠢᠬᠠ ᠱᠥᠯᠥ ᠪᠡᠷ ᠨᠥᠬᠥᠳ ᠴᠡᠷᠢᠭ ᠢ᠋ ᠬᠣᠭᠣᠯᠠᠯᠠᠨ᠂ ᠴᠡᠷᠢᠭ ᠦ᠋ᠳ ᠦ᠋ᠨ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠭᠡᠷ ᠡᠴᠡ ᠪᠡᠨ ᠠᠪᠴᠢᠷᠠᠭᠰᠠᠨ ᠠᠢᠷᠠᠭ ᠢ᠋ ᠤᠤᠭᠤᠵᠤ᠂ ᠳᠠᠷᠠᠭᠠ ᠨᠢ ᠲᠣᠭᠣᠷᠢᠨ ᠪᠥᠵᠢᠭ ᠬᠢᠭᠡᠳ ᠢᠷᠡᠬᠦ ᠳᠣᠯᠣᠭᠠᠨ ᠬᠣᠨᠣᠭ ᠤ᠋ᠨ ᠮᠥᠨ ᠡᠳᠦᠷ ᠴᠤᠭᠯᠠᠷᠠᠬᠤ ᠪᠠᠷ ᠲᠠᠷᠬᠠᠪᠠ᠃
ᠲᠡᠮᠦᠵᠢᠨ᠂ ᠵᠠᠯᠮᠠ᠂ ᠪᠡᠯᠭᠦᠳᠡᠢ ᠭᠤᠷᠪᠠ ᠪᠣᠭᠤᠷᠴᠢ ᠶ᠋ᠢ《ᠴᠢ ᠶᠡᠬᠡ ᠠᠪᠢᠶᠠᠰᠲᠠᠢ ᠴᠡᠷᠢᠭ ᠡᠷᠡ ᠪᠠᠢᠨᠠ》 ᠭᠡᠵᠦ ᠮᠠᠭᠲᠠᠵᠤ ᠲᠡᠷᠡ ᠣᠷᠣᠢ ᠦᠯᠢᠭᠡᠷ ᠳᠣᠮᠣᠭ ᠶᠠᠷᠢᠯᠴᠠᠨ ᠭᠡᠷ ᠭᠡᠷ ᠲᠡᠭᠡᠨ ᠣᠷᠣᠨ ᠤᠨᠲᠠᠵᠠᠭᠠᠪᠠ᠃
— ᠣᠯᠠᠨ ᠮᠣᠷᠢᠨ ᠲᠦᠪᠡᠷᠭᠡᠨ ᠭᠠᠵᠠᠷ ᠬᠠᠭᠠᠷᠠᠮᠠ ᠰᠣᠨᠣᠰᠳᠠᠵᠤ ᠶᠡᠬᠡ ᠴᠡᠷᠢᠭ ᠢᠷᠡᠵᠦ ᠶᠠᠪᠤᠨᠠ᠃ ᠪᠣᠰᠤᠭᠠᠷᠠᠢ᠂ ᠪᠣᠰᠴᠠᠭᠠᠭᠠᠷᠠᠢ! ᠭᠡᠵᠦ ᠬᠤᠸᠠᠭᠴᠢᠨ ᠡᠮᠡᠭᠡᠨ ᠬᠠᠰᠬᠢᠷᠤᠨ᠂ ᠥᠭᠡᠯᠦᠨ ᠡᠬᠡ ᠴᠦ᠍ ᠬᠡᠦᠬᠡᠳ ᠦ᠋ᠳ ᠢ᠋ᠶ᠋ᠡᠨ ᠳᠠᠭᠤᠳᠠᠪᠠ᠃ ᠭᠠᠳᠠᠭᠠ ᠭᠠᠷᠤᠭᠠᠳ ᠭᠠᠵᠠᠷ ᠬᠡᠪᠲᠡᠨ ᠴᠢᠩᠨᠠᠪᠠᠰᠤ ᠦᠨᠡᠬᠡᠷ ᠶᠡᠬᠡ ᠲᠦᠪᠡᠷᠭᠡᠨ ᠪᠠᠷᠠᠭᠤᠨ ᠵᠦᠭ ᠡᠴᠡ ᠣᠢᠷᠠᠲᠤᠨ ᠠᠢᠰᠤᠢ᠃ ᠪᠦᠭᠦᠳᠡ ᠯᠡ ᠰᠠᠨᠳᠤᠷᠤᠨ ᠳᠡᠪᠲᠦᠨ ᠮᠣᠷᠢᠳ ᠢ᠋ᠶ᠋ᠠᠨ ᠡᠮᠡᠭᠡᠯᠯᠡᠵᠦ᠂ ᠡᠴᠢᠭᠡ ᠶ᠋ᠢᠨ ᠰᠦᠯᠳᠡ ᠲᠠᠬᠢᠯᠭᠠ ᠪᠣᠯᠤᠨ ᠣᠢᠷᠠ ᠵᠠᠭᠤᠷᠠ ᠶ᠋ᠢᠨ ᠶᠠᠭᠤᠮᠠ ᠪᠠᠨ ᠠᠪᠠᠴᠠᠭᠠᠵᠤ ᠮᠣᠷᠳᠠᠨ ᠰᠢᠭᠤᠢ ᠶ᠋ᠢᠨ ᠭᠦᠨ ᠤᠷᠤᠭᠤ ᠣᠷᠣᠵᠤ ᠨᠢᠭᠤᠭᠳᠠᠪᠠ᠃ ᠳᠠᠢᠰᠤᠨ ᠲᠡᠳᠡᠨ ᠦ᠌ ᠬᠢ ᠶ᠋ᠢ ᠦᠦᠷ ᠭᠡᠭᠡᠷᠡᠬᠦ ᠰᠠᠴᠠᠭᠤ ᠨᠥᠮᠥᠷᠦᠨ ᠢᠷᠡᠬᠦ ᠨᠢ ᠮᠣᠳᠣᠨ ᠤ᠋ ᠰᠡᠢᠮᠡᠬᠡᠢ ᠪᠡᠷ ᠬᠠᠷᠠᠭᠳᠠᠨᠠ᠃ ᠵᠢᠭᠤᠳᠠᠭᠰᠠᠳ ᠪᠥᠭᠡᠮᠨᠡᠷᠡᠪᠡᠰᠦ ᠪᠦᠷᠲᠡᠭᠡᠯᠵᠢᠨ᠂ ᠰᠤᠴᠢᠭᠡᠯ᠂ ᠬᠤᠸᠬᠠᠵᠢᠨ ᠡᠮᠧ ᠭᠤᠷᠪᠠ ᠪᠠᠢᠬᠤ ᠦᠭᠡᠢ᠂ ᠪᠣᠳᠣᠪᠠᠯ ᠲᠡᠳᠡ ᠮᠣᠷᠢ ᠣᠯᠵᠤ ᠤᠨᠤᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠪᠣᠯᠤᠯᠲᠠᠢ᠃
ᠲᠡᠮᠦᠵᠢᠨ ᠶᠡᠬᠡᠳᠡ ᠬᠠᠷᠠᠮᠰᠠᠨ᠂《ᠰᠤᠨᠳᠠᠯᠠᠶᠠ ᠭᠡᠳ ᠳᠥᠷᠥᠭᠡ ᠥᠭᠬᠦ ᠳ᠋ᠦ᠍᠂ ᠦᠭᠡᠢ ᠠ᠋᠂ ᠴᠢ ᠪᠣᠰᠢᠭᠣ ᠶᠠᠪᠤ! ᠴᠢᠮᠠᠲᠤ ᠯᠠ ᠳᠠᠢᠰᠤᠨ ᠬᠠᠯᠠᠭᠠᠲᠠᠢ᠃ ᠪᠢ ᠠᠷᠭᠠ ᠪᠠᠨ ᠣᠯᠬᠤ ᠪᠠᠢᠬᠠ ᠭᠡᠰᠡᠨ᠃ ᠰᠢᠭᠦᠷᠡᠴᠦ ᠠᠪᠤᠭᠠᠳ ᠯᠠ ᠵᠢᠭᠤᠲᠠᠳᠠᠭ ᠪᠠᠢᠵᠤ 》 ᠭᠡᠵᠦ ᠬᠠᠯᠬᠠᠯᠠᠨᠠ᠃ ᠵᠢᠭᠤᠳᠠᠭᠰᠠᠳ ᠭᠠᠵᠠᠷ ᠢ᠋ᠶ᠋ᠠᠨ ᠮᠡᠳᠡᠬᠦ ᠲᠤᠯᠠ ᠰᠢᠭᠤᠢ ᠳᠣᠲᠣᠷᠠᠬᠢ ᠰᠡᠢᠮᠡᠬᠡᠢ ᠶ᠋ᠢ ᠰᠦᠯᠵᠢᠨ ᠦᠯᠡᠮᠵᠢ ᠶᠡᠬᠡ ᠨᠠᠮᠤᠭ ᠱᠠᠯᠪᠠᠭ ᠤ᠋ᠨ ᠳᠡᠭᠡᠷᠡ ᠭᠠᠷᠴᠤ ᠪᠠᠢᠬᠤ ᠭᠠᠵᠠᠷ ᠢ᠋ᠶ᠋ᠠᠨ ᠣᠯᠤᠭᠰᠠᠨ ᠠᠵᠢ᠃
ᠳᠠᠢᠰᠤᠨ ᠨᠤᠭᠤᠳ ᠨᠠᠮᠤᠭ ᠪᠠᠯᠴᠢᠭ ᠲᠤ᠌ ᠣᠷᠣᠵᠤ᠂ ᠪᠡᠶᠡ ᠪᠡᠶᠡ ᠪᠡᠨ ᠲᠠᠲᠠᠵᠤ ᠭᠠᠷᠭᠠᠨ ᠨᠢᠭᠡ ᠬᠡᠰᠡᠭ ᠰᠠᠨᠳᠤᠷᠪᠠ᠃ ᠲᠡᠭᠡᠭᠡᠳ ᠳᠠᠢᠰᠤᠨ ᠨᠤᠭᠤᠳ ᠴᠤᠭᠯᠠᠷᠠᠨ᠄
— ᠵᠠ᠂ ᠡᠨᠡ ᠤᠳᠠᠭᠠ ᠳ᠋ᠤ᠌ ᠲᠡᠮᠦᠵᠢᠨ ᠦ᠌ ᠡᠬᠡᠨᠡᠷ ᠢ᠋ ᠣᠯᠵᠠᠯᠠᠵᠤ ᠠᠪᠤᠭᠰᠠᠨ ᠠ᠋ᠴᠠ ᠬᠣᠢᠰᠢ ᠪᠣᠯᠤᠯᠠ᠃ ᠪᠤᠴᠠᠶᠠ᠃ ᠥᠭᠡᠯᠦᠨ ᠢ᠋ ᠡᠷᠲᠡ ᠴᠠᠭ ᠲᠤ᠌ ᠪᠤᠯᠢᠶᠠᠭᠳᠠᠭᠰᠠᠨ ᠤ᠋ ᠬᠠᠷᠢᠭᠤ ᠶ᠋ᠢ ᠠᠪᠤᠯᠠ ᠭᠡᠯᠴᠡᠭᠡᠳ ᠪᠤᠴᠠᠵᠠᠢ᠃
ᠡᠢᠨᠬᠦ ᠡᠨᠡ ᠪᠦᠯᠢ ᠠᠢᠯ ᠳ᠋ᠤ᠌ ᠬᠠᠷᠠ ᠭᠤᠨᠢᠭ ᠨᠥᠮᠥᠷᠴᠦ᠂ ᠮᠡᠷᠭᠢᠳ ᠦ᠋ᠳ ᠲᠡᠢ ᠥᠰᠢᠨ ᠲᠡᠮᠡᠴᠡᠬᠦ ᠣᠴᠢ ᠠᠰᠠᠵᠤ ᠳᠥᠯᠥ ᠪᠤᠲᠠᠷᠠᠵᠠᠢ᠃