ᠬᠥᠯᠥᠭ ᠪᠠᠭᠠᠲᠤᠷ ᠪᠤᠭᠤᠷᠴᠢ - ᠪ᠂ ᠦᠯᠵᠡᠢᠰᠦ᠋ᠷᠦᠩ <ᠳᠡᠳ᠋ ᠪᠦᠯᠦᠭ - ᠠᠷᠪᠠᠨ ᠲᠠᠪᠤ > Хүлэг баатар буурч - Б. Өлзийсүрэн <Дэд бүлэг-15>
40ᠥᠪᠡᠷ ᠦᠨ ᠵᠠᠮ ᠮᠥᠷ ᠢᠶᠡᠷ ᠲᠡᠮᠲᠡᠷᠢᠵᠦ ᠡᠷᠡ ᠬᠥᠮᠥᠨ ᠦ ᠡᠷᠴᠢ ᠬᠦᠴᠦ ᠶᠢ ᠣᠯᠵᠤ ᠬᠦᠷᠲᠡᠭᠰᠡᠨ ᠳᠡᠳ᠋ ᠪᠦᠯᠦᠭ
ᠠᠷᠪᠠᠨ ᠲᠠᠪᠤ
ᠡᠷᠡ ᠬᠥᠮᠦᠨ ᠵᠣᠷᠢᠭᠰᠠᠨ ᠳ᠋ᠠᠭᠠᠨ
ᠡᠮᠡᠭᠡᠯᠲᠦ ᠮᠣᠷᠢ ᠬᠠᠷᠠᠢᠭᠰᠠᠨ ᠳ᠋ᠠᠭᠠᠨ
ᠡᠷᠡ ᠬᠥᠮᠦᠨ ᠦ᠌ ᠨᠡᠷᠡ ᠤᠷᠲᠤ
ᠡᠮᠡᠭᠡᠯᠲᠦ ᠮᠣᠷᠢᠨ ᠤ᠋ ᠵᠢᠯᠣᠭᠣ ᠤᠷᠲᠤ
(ᠮᠣᠩᠭᠣᠯ ᠠᠷᠠᠳ ᠤ᠋ᠨ ᠵᠦᠢᠷ ᠰᠡᠴᠡᠨ ᠦᠭᠡᠰ)
ᠪᠣᠭᠣᠷᠴᠢ ᠭᠡᠷ ᠲᠡᠭᠡᠨ ᠢᠷᠡᠭᠡᠳ ᠭᠤᠷᠪᠠ ᠬᠣᠨᠣᠪᠠ᠃ ᠰᠡᠳᠬᠢᠯ ᠰᠠᠨᠠᠭᠠᠨ ᠤ᠋ ᠡᠪᠡᠳᠴᠢᠨ ᠲᠤᠰᠪᠠ ᠤᠤ? ᠭᠡᠯᠲᠡᠢ᠃ ᠦᠭᠡ ᠴᠦ᠍ ᠳᠤᠤᠭᠠᠷᠬᠤ ᠦᠭᠡᠢ᠂ ᠶᠠᠭᠤᠮᠠ ᠴᠤ᠌ ᠪᠠᠷᠤᠭ ᠢᠳᠡᠵᠦ ᠤᠤᠭᠤᠬᠤ ᠦᠭᠡᠢ᠃ ᠬᠣᠶᠠᠷ ᠥᠷᠯᠥᠭᠡ ᠠᠳᠤᠭᠤᠨ ᠳ᠋ᠠᠭᠠᠨ ᠮᠣᠷᠳᠠᠵᠤ᠂ ᠬᠤᠷᠢᠶᠠᠵᠤ ᠢᠷᠡᠭᠡᠳ ᠯᠡ ᠣᠷᠣᠨ ᠳᠡᠭᠡᠷᠡ ᠪᠡᠨ ᠭᠡᠳᠡᠷᠭᠦ ᠬᠠᠷᠠᠨ ᠲᠣᠯᠣᠭᠠᠢ ᠪᠠᠨ ᠰᠠᠯᠠᠭᠠᠪᠴᠢᠯᠠᠨ ᠬᠡᠪᠲᠡᠭᠡᠳ ᠱᠠᠯᠠᠮᠠᠭ ᠭᠣᠯᠮᠠᠭ᠂ ᠬᠥᠩᠭᠡᠨ ᠬᠥᠭᠡᠷᠦᠦ ᠪᠣᠭᠣᠷᠴᠢ ᠬᠥᠰᠢᠭᠦᠨ ᠬᠦᠨᠳᠦᠭᠦᠷᠢ ᠠᠮᠢᠲᠠᠨ ᠪᠣᠯᠵᠤ ᠬᠤᠪᠢᠷᠠᠵᠠᠢ᠃ ᠡᠵᠢ ᠨᠢ《ᠲᠡᠢᠮᠦ ᠰᠠᠢᠬᠠᠨ ᠬᠠᠨᠢ ᠠ᠋ᠴᠠ ᠪᠠᠨ ᠬᠠᠭᠠᠴᠠᠭᠰᠠᠨ ᠪᠣᠯᠬᠣᠷ ᠠᠷᠭᠠ ᠦᠭᠡᠢ᠃ ᠨᠢᠭᠤᠷ ᠵᠢᠰᠦ ᠶ᠋ᠢ ᠨᠢ ᠦᠵᠡᠭᠡ ᠦᠭᠡᠢ ᠴᠦ᠍ ᠲᠥᠷᠬᠦ ᠪᠠᠢᠳᠠᠯ ᠢ᠋ᠶ᠋ᠠᠷ ᠨᠢ ᠪᠣᠳᠣᠬᠤ ᠳ᠋ᠤ᠌ ᠬᠣᠣᠰ ᠦᠭᠡᠢ ᠬᠣᠪᠣᠷ ᠪᠦᠰᠡᠭᠦᠢ ᠪᠠᠢᠵᠤ ᠳᠠ᠃ ᠬᠦᠦ ᠮᠢᠨᠢ ᠬᠤᠪᠢ ᠦᠭᠡᠢ ᠶᠦᠮ ᠳᠡ》 ᠭᠡᠵᠦ ᠦᠷᠦ ᠡᠪᠡᠳᠦᠨ ᠬᠠᠢᠷᠠᠯᠠᠬᠤ ᠠ᠋ᠴᠠ ᠥᠭᠡᠷᠡ ᠶᠠᠭᠠᠬᠢᠬᠤ ᠴᠤ᠌ ᠪᠢᠯᠡ᠃ ᠡᠳᠦᠷ ᠲᠠᠢᠰᠢ ᠪᠠᠨ ᠪᠣᠯᠲᠠᠯᠠ ᠪᠣᠭᠣᠷᠴᠢ᠄
— ᠪᠢ ᠭᠠᠯ ᠤ᠋ᠨ ᠢ᠋ᠶ᠋ᠠᠨ ᠬᠢ ᠪᠡᠷ ᠣᠴᠢᠭᠠᠳ ᠢᠷᠡᠶᠡ᠃ ᠠᠭᠤᠯᠵᠠᠬᠤ ᠬᠡᠷᠡᠭ ᠪᠠᠢᠨᠠ ᠭᠡᠵᠦ ᠡᠵᠢ ᠳ᠋ᠡᠭᠡᠨ ᠬᠡᠯᠡᠭᠡᠳ ᠮᠣᠷᠳᠠᠵᠠᠢ᠃ ᠡᠴᠢᠭᠡ ᠨᠢ ᠡᠵᠡᠭᠦᠢ ᠪᠠᠢᠪᠠ᠃ ᠲᠡᠭᠡᠭᠡᠳ ᠪᠠᠷᠠᠭᠤᠨ ᠬᠣᠢᠰᠢ ᠶᠠᠪᠤᠵᠤ ᠪᠠᠢᠭᠠ ᠬᠠᠷᠠᠭᠳᠠᠪᠠ᠃ ᠮᠣᠷᠳᠠᠪᠠᠯ ᠯᠠ ᠵᠢᠯᠣᠭᠣ ᠲᠠᠲᠠᠬᠤ ᠦᠭᠡᠢ ᠳᠠᠪᠬᠢᠳᠠᠭ ᠬᠦᠦ ᠨᠢ ᠲᠣᠯᠣᠭᠠᠢ ᠪᠠᠨ ᠤᠨᠵᠢᠭᠤᠯᠤᠭᠠᠳ ᠭᠣᠣᠯ ᠭᠠᠷᠴᠤ ᠴᠠᠭᠠᠰᠢ ᠱᠣᠭᠰᠢᠬᠤ ᠲᠡᠳᠦᠢ ᠶᠠᠪᠤᠬᠤ ᠶ᠋ᠢ ᠨᠢ ᠬᠠᠷᠠᠭᠠᠳ ᠡᠬᠡ ᠠᠯᠲᠠᠵᠢᠨ《ᠬᠦᠦ ᠮᠢᠨᠢ ᠡᠢᠮᠦ ᠪᠣᠯᠴᠢᠬᠠᠬᠤ ᠭᠡᠵᠦ!》 ᠭᠡᠮᠡᠨ ᠨᠢᠯᠪᠤᠰᠤ ᠲᠤᠰᠠᠯᠠᠭᠤᠯᠤᠨ
《ᠴᠢᠯᠠᠭᠤ ᠬᠠᠲᠠᠭᠤ ᠪᠣᠯᠪᠠᠴᠤ\
ᠤᠰᠤᠨ ᠤ᠋ ᠤᠷᠤᠰᠬᠠᠯ ᠳ᠋ᠤ᠌ ᠡᠯᠳᠡᠭ\
ᠵᠣᠪᠠᠯᠠᠩ ᠬᠠᠲᠠᠭᠤ ᠪᠣᠯᠪᠠᠴᠤ\
ᠴᠠᠭ ᠤ᠋ᠨ ᠠᠶᠠᠰ ᠲᠤ᠌ ᠮᠠᠷᠲᠠᠭᠳᠠᠳᠠᠭ ᠭᠡᠰᠡᠨ ᠦᠭᠡ ᠪᠠᠢᠳᠠᠭ ᠶᠤᠮ ᠳᠠ᠃ ᠬᠦᠦ ᠮᠢᠨᠢ ᠰᠡᠷᠭᠦᠬᠦ ᠪᠠᠢᠬᠠ》 ᠭᠡᠵᠦ ᠠᠮᠠᠨ ᠳ᠋ᠠᠭᠠᠨ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠰᠢᠪᠡᠨᠡᠪᠡ᠃
ᠭᠠᠯ ᠪᠣᠯ ᠪᠣᠭᠤᠷᠴᠢ ᠲᠠᠢ ᠠᠳᠤᠭᠤᠨ ᠤ᠋ ᠣᠲᠣᠷ ᠲᠤ᠌ ᠴᠣᠭ ᠭᠠᠷᠳᠠᠭ ᠵᠠᠯᠠᠭᠤ᠃ ᠨᠠᠰᠤ ᠪᠠᠷ ᠨᠢᠭᠡ ᠠᠬᠠ᠃ ᠡᠬᠡ ᠳᠡᠭᠦᠦ ᠲᠡᠢ ᠪᠡᠨ ᠬᠠᠮᠲᠤ ᠭᠤᠷᠪᠠᠭᠤᠯᠠ ᠠᠵᠤ ᠲᠥᠷᠥᠳᠡᠭ᠃ ᠬᠣᠶᠠᠷ ᠵᠢᠯ ᠠᠳᠤᠭᠤᠨ ᠳ᠋ᠤ᠌ ᠶᠠᠪᠤᠵᠤ ᠬᠡᠳᠦᠨ ᠦᠷᠢᠶᠡ ᠪᠠᠢᠳᠠᠰᠤ ᠴᠤᠭᠯᠠᠭᠤᠯᠵᠤ ᠭᠠᠳᠠᠨᠠ ᠪᠠᠨ ᠬᠡᠳᠦᠨ ᠤᠨᠠᠭᠠ ᠤᠶᠠᠭᠠᠳ ᠰᠠᠭᠠᠵᠤ ᠪᠠᠢᠭᠠ ᠭᠡᠰᠡᠨ᠃ ᠴᠥᠭᠡᠨ ᠬᠡᠳᠦᠨ ᠬᠣᠨᠢ ᠦᠬᠡᠷ ᠲᠡᠢ᠃ ᠡᠬᠡᠨᠡᠷ ᠠᠪᠤᠭᠠ ᠦᠭᠡᠢ᠂ ᠣᠴᠢᠳᠠᠭ ᠨᠢᠭᠡ ᠬᠡᠦᠬᠡᠨ ᠪᠣᠢ᠃ ᠲᠡᠷᠡ ᠨᠢ ᠴᠠᠭᠠᠰᠢ ᠪᠠᠨ ᠭᠡᠳᠡᠭ ᠦᠭᠡᠢ ᠴᠦ᠍ ᠨᠠᠭᠠᠰᠢ ᠪᠠᠨ ᠬᠦᠷᠦᠭᠡᠳ ᠢᠷᠡᠳᠡᠭ ᠦᠭᠡᠢ᠃
ᠡᠢᠨᠬᠦ ᠬᠣᠶᠠᠷ ᠭᠡᠷ ᠦ᠋ᠨ ᠬᠣᠭᠣᠷᠣᠨᠳᠣ ᠡᠮᠡᠭᠡᠯ ᠢ᠋ᠶ᠋ᠡᠨ ᠡᠯᠡᠲᠡᠯᠡ ᠳᠠᠪᠬᠢᠵᠤ ᠶᠠᠪᠤᠭᠠ ᠨᠢᠭᠡᠨ᠃ ᠪᠣᠭᠤᠷᠴᠢ ᠬᠣᠶᠠᠷ ᠡᠳᠦᠷ ᠪᠣᠳᠣᠵᠤ ᠪᠣᠳᠣᠵᠤ ᠲᠡᠭᠦᠨ ᠢ᠋ ᠵᠣᠷᠢᠭᠰᠠᠨ ᠨᠢ《ᠬᠣᠶᠠᠭᠤᠯᠠ ᠪᠣᠷᠵᠢᠭᠢᠨ ᠣᠪᠣᠭ᠂ ᠲᠠᠢᠴᠢᠭᠤᠳ ᠠᠢᠮᠠᠭ ᠢ᠋ ᠵᠠᠬᠢᠷᠴᠤ ᠪᠠᠢᠭᠰᠠᠨ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠤ᠋ᠨ ᠬᠦᠦ ᠲᠡᠮᠦᠵᠢᠨ ᠳ᠋ᠦ᠍ ᠣᠴᠢᠵᠤ ᠨᠥᠬᠥᠷᠯᠡᠶᠡ᠃ ᠲᠡᠷᠡ ᠪᠡᠷ ᠶᠡᠬᠡ ᠬᠡᠷᠡᠭ ᠡᠭᠦᠰᠬᠡᠵᠦ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠵᠠᠬᠢᠷᠴᠤ ᠠᠭᠰᠠᠨ ᠬᠠᠮᠤᠭ ᠮᠣᠩᠭᠣᠯ ᠢ᠋ ᠵᠠᠬᠢᠷᠴᠤ ᠰᠡᠷᠭᠦᠭᠡᠬᠦ ᠬᠥᠮᠦᠨ᠃ ᠬᠣᠶᠠᠭᠤᠯᠠ ᠲᠡᠰᠢ ᠣᠴᠢᠵᠤ ᠡᠷᠡ ᠪᠣᠯᠵᠤ ᠲᠥᠷᠥᠭᠰᠡᠨ ᠦ᠌ ᠬᠡᠷᠡᠭ ᠢ᠋ ᠪᠦᠲᠦᠭᠡᠶᠡ᠃ ᠡᠷᠡ ᠬᠥᠮᠦᠨ ᠭᠡᠷ ᠲᠦ᠍ ᠲᠥᠷᠥᠵᠦ ᠬᠡᠭᠡᠷᠡ ᠦᠬᠦᠳᠡᠭ ᠭᠡᠯᠴᠡᠬᠦ》 ᠭᠡᠰᠡᠨ ᠰᠠᠨᠠᠭᠠ ᠶ᠋ᠢ ᠬᠡᠯᠡᠶᠡ ᠬᠡᠮᠡᠭᠰᠡᠨ ᠠᠪᠠᠢ᠃
ᠰᠡᠭᠦᠯ ᠣᠪᠣᠭᠠᠲᠤ ᠶ᠋ᠢᠨ ᠵᠡᠭᠦᠨ ᠢᠷᠣᠭᠠᠷ ᠢ᠋ᠶ᠋ᠠᠷ ᠡᠷᠳᠡᠨᠢᠴᠣᠭᠲᠤ ᠬᠡᠮᠡᠬᠦ ᠶᠡᠬᠡ ᠨᠡᠷᠡᠲᠡᠢ ᠪᠢᠴᠢᠬᠠᠨ ᠪᠠᠭᠠ ᠠᠭᠤᠯᠠ ᠴᠢᠭᠯᠡᠵᠦ ᠶᠠᠪᠤᠲᠠᠯᠠ ᠥᠭᠡᠳᠡ ᠡᠴᠡ ᠨᠢ ᠨᠢᠭᠡ ᠮᠣᠷᠢᠲᠠᠢ ᠬᠥᠮᠦᠨ ᠠᠢᠰᠤᠢ᠃ ᠲᠡᠷᠡ ᠪᠡᠷ ᠬᠤᠪᠴᠠᠰᠤ ᠬᠤᠨᠠᠷ ᠨᠢ ᠨᠢᠭᠡᠯᠡ ᠭᠠᠵᠢ᠂ ᠨᠤᠮᠤ ᠰᠤᠮᠤ ᠠᠭᠰᠠᠭᠰᠠᠨ᠃ ᠣᠢᠷᠠᠲᠤᠭᠠᠳ ᠢᠷᠡᠬᠦ ᠪᠡᠷ ᠨᠢ ᠦᠵᠡᠬᠦᠯᠡ ᠪᠡᠶᠡ ᠪᠠᠳᠠᠷᠢᠭᠤᠨ᠂ ᠨᠠᠰᠤ ᠪᠠᠭᠠ ᠵᠠᠯᠠᠭᠤ ᠡᠷᠡ ᠠᠵᠢ᠃ ᠮᠡᠨᠳᠦ ᠤᠰᠤ ᠪᠠᠨ ᠮᠡᠳᠡᠯᠴᠡᠵᠦ ᠬᠡᠷᠡᠭ ᠵᠣᠷᠢᠭ ᠢ᠋ ᠠᠰᠠᠭᠤᠪᠠᠯ ᠲᠡᠷᠡ ᠪᠡᠷ᠄
— ᠨᠠᠬᠤ ᠪᠠᠶᠠᠨ ᠤ᠋ ᠬᠢ ᠬᠠᠮᠢᠭᠠ ᠪᠣᠢ ? ᠣᠢᠷᠠᠳᠴᠤ ᠪᠠᠢᠨᠠ ᠤᠤ? ᠭᠡᠵᠦ ᠠᠰᠠᠭᠤᠯᠠ᠃
— ᠣᠢᠷᠠᠬᠠᠨ᠂᠂ ᠲᠡᠳᠡᠨᠡᠢᠬᠢ ᠪᠡᠷ ᠶᠠᠭᠠᠬᠢᠬᠤ ᠨᠢ ᠪᠣᠢ?
— ᠪᠣᠭᠣᠷᠴᠢ ᠭᠡᠳᠡᠭ ᠬᠦᠦ ᠲᠡᠢ ᠨᠢ ᠠᠭᠤᠯᠵᠠᠬᠤ ᠬᠡᠷᠡᠭ ᠲᠡᠢ᠃
— ᠲᠡᠭᠡᠪᠡᠯ ᠲᠡᠷᠡ ᠴᠢᠨᠢ ᠪᠢ ᠪᠠᠢᠨᠠ᠃
ᠬᠣᠶᠠᠭᠤᠯᠠ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠯᠠ᠃ ᠢᠷᠡᠭᠰᠡᠨ ᠭᠡᠢᠴᠢᠨ ᠰᠠᠭᠠᠳᠠᠭ ᠠ᠋ᠴᠠ ᠪᠠᠨ ᠨᠢᠭᠡ ᠰᠤᠮᠤ ᠠᠪᠴᠤ
— ᠡᠭᠦᠨ ᠢ᠋ ᠲᠠᠨᠢᠬᠤ ᠤᠤ? ᠭᠡᠪᠡ ᠃ ᠪᠤᠭᠤᠷᠴᠢ ᠦᠵᠡᠵᠦ᠄
— ᠲᠡᠢᠮᠦ ᠠ᠋᠂ ᠲᠡᠮᠦᠵᠢᠨ ᠠᠨᠳᠠ ᠶ᠋ᠢᠨ ᠨᠠᠳᠠ ᠦᠵᠡᠭᠦᠯᠵᠦ ᠶᠠᠪᠤᠭᠰᠠᠨ ᠲᠡᠮᠳᠡᠭᠲᠦ ᠰᠤᠮᠤ ᠪᠠᠢᠨᠠ᠃ ᠲᠡᠮᠦᠵᠢᠨ ᠰᠠᠢᠨ ᠤᠤ? ᠨᠠᠳᠠᠳᠤ ᠶᠠᠭᠤ ᠬᠡᠯᠡᠭᠦᠯᠦᠭᠡ ᠪᠣᠢ?
— ᠲᠡᠮᠦᠵᠢᠨ ᠰᠠᠢᠨ᠃ ᠴᠢᠮᠠᠶ᠋ᠢ ᠥᠪᠡᠷ ᠲᠡᠢ ᠨᠢ ᠢᠷᠡᠵᠦ ᠨᠥᠬᠥᠷᠯᠡᠨᠡ ᠤᠤ? ᠭᠡᠵᠦ ᠨᠠᠮᠠ ᠶ᠋ᠢ ᠶᠠᠪᠤᠭᠤᠯᠤᠭᠰᠠᠨ᠃ ᠪᠢ ᠳᠡᠭᠦᠦ ᠨᠢ ᠪᠡᠯᠭᠦᠳᠡᠢ᠃
— ᠲᠡᠢᠮᠦ ᠠ᠋᠃ ᠪᠡᠯᠭᠦᠳᠡᠢ ᠶ᠋ᠢᠨ ᠲᠤᠬᠠᠢ ᠨᠠᠳᠠ ᠶᠠᠷᠢᠵᠤ ᠪᠠᠢᠭᠰᠠᠨ᠃ ᠠᠬᠠ ᠠ᠋ᠴᠠ ᠪᠠᠨ ᠲᠣᠮᠣ ᠡᠷᠡ ᠪᠠᠢᠨᠠ ᠳᠠ᠃
ᠲᠡᠷᠡ ᠬᠣᠶᠠᠷ ᠣᠢᠷᠠ ᠵᠠᠭᠤᠷᠠ ᠶᠠᠭᠤᠮᠠ ᠶᠠᠷᠢᠵᠤ ᠡᠨᠡ ᠥᠨᠳᠥᠷ ᠳᠡᠭᠡᠷᠡ ᠥᠩᠭᠡᠷᠡᠭᠰᠡᠨ ᠵᠤᠨ ᠲᠡᠮᠦᠵᠢᠨ ᠢ᠋ ᠭᠠᠷᠭᠠᠵᠤ ᠥᠭᠭᠦᠭᠰᠡᠨ ᠭᠡᠳ ᠥᠪᠡᠷ ᠦ᠋ᠨ ᠨᠤᠲᠤᠭ ᠣᠷᠣᠨ᠂᠂ ᠠᠭᠤᠯᠠ ᠤᠰᠤᠨ ᠤ᠋ ᠲᠤᠬᠠᠢ ᠪᠡᠯᠭᠦᠳᠡᠢ ᠳ᠋ᠦ᠍ ᠶᠠᠷᠢᠵᠤ ᠥᠭᠭᠦᠭᠡᠳ᠄
— ᠪᠢ ᠰᠠᠢᠨ ᠨᠥᠬᠥᠷ ᠢ᠋《ᠢᠷᠡ》 ᠭᠡᠵᠦ ᠪᠠᠢᠬᠤ ᠳ᠋ᠤ᠌ ᠤᠴᠢᠯ ᠦᠭᠡᠢ ᠶᠠᠭᠠᠬᠢᠪᠠ? ᠣᠳᠣ ᠶᠠᠪᠤᠶᠠ ᠭᠡᠳ ᠮᠣᠷᠳᠠᠬᠤ ᠳ᠋ᠤ᠌ ᠪᠡᠯᠭᠦᠳᠡᠢ᠄
— ᠭᠡᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠣᠷᠣᠨᠠ ᠪᠢᠵᠡ ᠳᠡ᠃ ᠮᠠᠷᠭᠠᠰᠢ ᠶᠠᠪᠤᠵᠤ ᠪᠣᠯᠤᠨᠠ ᠰᠢᠦ ᠳᠡ᠃ ᠪᠢ ᠴᠢᠮᠠᠶ᠋ᠢ ᠶᠠᠭᠠᠷᠠᠭᠤᠯᠬᠤ ᠦᠭᠡᠢ᠁
— ᠦᠭᠡᠢ ᠠ᠋᠂ ᠪᠢ ᠭᠡᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠣᠷᠣᠬᠤ ᠦᠭᠡᠢ᠃ ᠠᠪᠤ ᠶᠠᠪᠤᠭᠤᠯᠬᠤ ᠦᠭᠡᠢ᠂᠂ ᠬᠠᠷᠢᠨ ᠪᠢ ᠭᠡᠷ ᠲᠡᠭᠡᠨ ᠬᠡᠯᠡᠭᠦᠯᠴᠢᠬᠡᠭᠡᠳ ᠶᠠᠪᠤᠨᠠ᠃ ᠣᠢᠷᠠᠬᠠᠨ ᠮᠢᠨᠦ ᠨᠢᠭᠡ ᠨᠠᠢᠵᠠ ᠨᠥᠬᠥᠷ ᠪᠣᠢ ᠃ ᠲᠡᠭᠦᠨ ᠢ᠋ ᠠᠪᠤ ᠡᠵᠢ ᠳ᠋ᠦ᠍ ᠣᠴᠢᠵᠤ ᠬᠡᠯᠡ ᠥᠭᠭᠦᠶᠡ᠃
— ᠤᠬᠠᠭᠠᠨ ᠳ᠋ᠠᠭᠠᠨ ᠭᠡᠷ ᠡᠴᠡ ᠪᠡᠨ ᠤᠷᠭᠤᠬᠤ ᠶᠠᠭᠤᠮᠠ ᠪᠣᠯᠵᠤ ᠪᠠᠢᠨᠠ ᠤᠤ ᠳᠠ? ᠲᠡᠮᠦᠵᠢᠨ ᠠᠬᠠ ᠴᠢᠮᠠ ᠶ᠋ᠢ ᠶᠡᠬᠡ ᠪᠠᠬᠠᠷᠬᠠᠵᠤ ᠶᠠᠷᠢᠳᠠᠭ᠃ ᠤᠷᠭᠤᠵᠤ ᠬᠠᠮᠲᠤ ᠶᠠᠪᠤᠭᠰᠠᠨ ᠭᠡᠰᠡᠨ᠃ ᠪᠠᠰᠠ ᠤᠷᠭᠤᠬᠤ᠃ ᠴᠢ ᠴᠦ᠍ ᠰᠠᠢᠨ ᠣᠷᠭᠣᠳᠤᠤᠯ ᠶᠤᠮ ᠠ᠋ ᠃ ᠵᠠ ᠶᠠᠭᠠᠬᠢᠬᠤ ᠪᠣᠢ᠂ ᠴᠢᠨᠦ ᠯᠡ ᠮᠡᠳᠡᠬᠦ ᠬᠡᠷᠡᠭ᠃ ᠢᠩᠭᠢᠭᠡᠳ ᠬᠣᠶᠠᠭᠤᠯᠠ ᠮᠣᠷᠳᠠᠬᠤ ᠤᠤ? ᠭᠡᠪᠡ᠃
ᠤᠳᠠᠯ ᠦᠭᠡᠢ ᠭᠠᠯ ᠤ᠋ᠨ ᠳ᠋ᠤ᠌ ᠣᠴᠢᠯᠠ᠃ ᠭᠠᠯ ᠪᠣᠭᠣᠷᠴᠢ ᠬᠣᠶᠠᠷ ᠣᠢᠷᠠ ᠳ᠋ᠤ᠌ ᠠᠭᠤᠯᠵᠠᠭᠠ ᠦᠭᠡᠢ ᠴᠦ᠍ ᠨᠠᠢᠵᠠ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠤᠴᠠᠷᠠᠭᠰᠠᠨ ᠵᠣᠪᠠᠯᠠᠩ ᠢ᠋ ᠲᠤᠭᠤᠯᠤᠭᠰᠠᠨ ᠪᠠᠢᠯᠠ᠃ ᠠᠯᠤᠰ ᠬᠣᠯᠠ ᠶ᠋ᠢᠨ ᠰᠦᠷᠡᠬᠡᠢ ᠵᠣᠴᠢᠨ ᠲᠠᠢ ᠣᠷᠣᠵᠤ ᠢᠷᠡᠬᠦ ᠳ᠋ᠦ᠍ ᠤᠳᠤᠮ ᠤ᠋ᠨ ᠨᠡᠷᠡ ᠰᠦᠷ ᠢ᠋ᠶ᠋ᠡᠷ ᠨᠢ ᠪᠢᠰᠢᠷᠡᠵᠦ ᠬᠦᠨᠳᠦᠯᠡᠯᠡ᠃ ᠠᠢᠷᠠᠭ ᠴᠠᠭᠠ ᠲᠠᠯᠪᠢᠯᠠ᠃ ᠰᠠᠶᠢᠬᠠᠨ ᠲᠥᠬᠥᠭᠡᠷᠦᠭᠰᠡᠨ ᠳᠠᠭᠠ ᠶ᠋ᠢᠨ ᠮᠢᠬᠠ ᠴᠢᠨᠠᠵᠤ ᠵᠣᠴᠢᠯᠠᠬᠤ ᠪᠣᠯᠪᠠ᠃ ᠪᠣᠭᠣᠷᠴᠢ ᠭᠠᠯ ᠢ᠋《ᠠᠭᠤᠯᠵᠠᠶᠠ》 ᠭᠡᠵᠦ ᠠᠪᠴᠤ ᠭᠠᠷᠬᠤᠢ ᠯᠤᠭᠠ ᠠᠯᠤᠰ ᠵᠠᠮ ᠳ᠋ᠤ᠌ ᠠᠯᠵᠢᠶᠠᠭᠰᠠᠨ ᠪᠡᠯᠭᠦᠳᠡᠢ ᠦᠷᠭᠡᠯᠡᠨ ᠬᠠᠵᠠᠭᠤᠯᠠᠵᠤ ᠤᠨᠲᠠᠭᠠᠳ ᠥᠭᠭᠦᠯᠡ᠃ ᠪᠣᠭᠣᠷᠴᠢ ᠭᠠᠯ ᠳ᠋ᠤ᠌᠄
— ᠪᠢ ᠤᠭ ᠨᠢ ᠴᠢᠮᠠ ᠶ᠋ᠢ ᠬᠠᠨᠢᠰᠠᠵᠤ ᠲᠡᠮᠦᠵᠢᠨ ᠳ᠋ᠦ᠍ ᠣᠴᠢᠵᠤ ᠨᠡᠢᠯᠡᠶᠡ ᠭᠡᠬᠦ ᠭᠡᠰᠡᠨ ᠶᠦᠮ᠃ ᠭᠡᠲᠡᠯᠡ ᠨᠠᠮᠠ ᠶ᠋ᠢ ᠳᠠᠭᠤᠳᠠᠭᠤᠯᠬᠤ ᠪᠠᠷ ᠳᠡᠭᠦᠦ ᠪᠡᠨ ᠶᠠᠪᠤᠭᠤᠯᠵᠠᠢ᠃ ᠴᠢ ᠮᠢᠨᠦ ᠰᠠᠨᠠᠯ ᠢ᠋ ᠠᠪᠬᠤ ᠪᠠᠢᠭᠰᠠᠨ ᠤᠤ? ᠦᠭᠡᠢ ᠤᠤ? ᠲᠡᠷᠡ ᠨᠢ ᠶᠠᠭᠠᠬᠢᠬᠤᠪ᠃ ᠪᠢ ᠲᠠᠢᠰᠢ ᠪᠠᠨ ᠶᠠᠪᠤᠵᠤ ᠪᠠᠢᠨᠠ᠃ ᠴᠢ ᠡᠴᠢᠭᠡ ᠡᠬᠡ ᠬᠣᠶᠠᠷ ᠲᠤ᠌ ᠥᠨᠥ ᠣᠷᠣᠢ ᠣᠴᠢᠭᠠᠳ ᠨᠠᠮᠠ ᠶ᠋ᠢ ᠲᠡᠮᠦᠵᠢᠨ ᠤᠷᠤᠭᠤ ᠶᠠᠪᠤᠯᠠ ᠭᠡᠳᠡᠭ ᠢ᠋ ᠲᠤᠭᠤᠯᠭᠠ᠃ ᠴᠢᠮᠠ ᠠ᠋ᠴᠠ ᠡᠭᠦᠨ ᠢ᠋ ᠬᠦᠰᠡᠶᠡ ᠭᠡᠪᠡ᠃
— ᠦᠭᠡᠢ ᠠ᠋᠂ ᠪᠣᠭᠣᠷᠴᠢ ᠮᠢᠨᠢ᠂ ᠴᠢ ᠶᠠᠭᠤ ᠶᠠᠷᠢᠵᠤ ᠪᠠᠢᠨᠠ? ᠨᠠᠰᠤ ᠠᠬᠢᠵᠤ ᠶᠠᠪᠤᠭᠠ ᠡᠴᠢᠭᠡ ᠡᠬᠡ ᠪᠡᠨ ᠬᠠᠶᠠᠴᠢᠬᠠᠭᠠᠳ ᠰᠡᠯᠡᠮᠡ ᠶ᠋ᠢᠨ ᠢᠷ᠂ ᠮᠡᠰᠡ ᠶ᠋ᠢᠨ ᠦᠵᠦᠭᠦᠷ ᠤᠷᠤᠭᠤ ᠶᠠᠪᠤᠨᠠ ᠭᠡᠰᠡᠨ ᠴᠢᠨᠢ ᠶᠠᠭᠤ ᠭᠡᠰᠡᠨ ᠦᠭᠡ ᠪᠣᠢ? ᠭᠡᠵᠦ ᠭᠠᠯ ᠵᠢᠮᠡᠯᠡᠯᠡ᠃ ᠪᠣᠭᠣᠷᠴᠢ ᠥᠭᠡᠳᠡ ᠡᠴᠡ ᠨᠢ᠄
— ᠡᠷᠡ ᠬᠥᠮᠦᠨ ᠵᠣᠷᠢᠪᠠᠯ ᠡᠷᠭᠢᠵᠦ ᠪᠤᠴᠠᠬᠤ ᠵᠠᠮ ᠦᠭᠡᠢ᠂ ᠡᠷᠭᠢ ᠨᠢᠭᠡ ᠨᠤᠷᠠᠪᠠᠯ ᠡᠷᠭᠢᠵᠦ ᠪᠣᠰᠬᠤ ᠪᠡᠶᠡ ᠦᠭᠡᠢ ᠭᠡᠰᠡᠨ ᠦᠭᠡ ᠪᠠᠢᠳᠠᠭ᠃ ᠭᠠᠯ ᠮᠢᠨᠢ᠂ ᠪᠢ ᠨᠢᠭᠡᠨᠲᠡ ᠰᠢᠢᠳᠦᠭᠰᠡᠨ ᠭᠡᠯᠡ᠃ ᠢᠩᠭᠢᠭᠡᠳ ᠪᠡᠯᠭᠦᠳᠡᠢ ᠶ᠋ᠢᠨ ᠬᠠᠮᠲᠤ ᠠᠯᠤᠰ ᠤ᠋ᠨ ᠵᠠᠮ ᠳ᠋ᠤ᠌ ᠮᠣᠷᠳᠠᠭᠰᠠᠨ ᠪᠥᠯᠥᠭᠡ᠃
ᠭᠠᠯ ᠬᠡᠴᠡᠭᠦᠦ ᠠᠯᠪᠠᠨ ᠳ᠋ᠤ᠌ ᠣᠨᠣᠭᠳᠠᠵᠤ ᠨᠠᠬᠤ ᠭᠤᠸᠠᠢ ᠶ᠋ᠢᠨ ᠤᠷᠤᠭᠤ ᠵᠢᠷᠦᠬᠡ ᠰᠢᠮᠰᠢᠷᠡᠨ ᠠᠯᠬᠤᠯᠠ᠃ ᠠᠯᠲᠠᠵᠢᠨ ᠡᠵᠢ᠄
— ᠪᠣᠭᠣᠷᠴᠢ ᠴᠢᠮᠠᠲᠠᠢ ᠠᠭᠤᠯᠵᠠᠨᠠ ᠭᠡᠳ ᠡᠳᠦᠷ ᠮᠣᠷᠳᠠᠭᠰᠠᠨ᠃ ᠦᠵᠡᠭᠳᠡᠪᠡᠦ? ᠭᠡᠵᠦ ᠠᠰᠠᠭᠤᠯᠠ ᠃ ᠭᠠᠯ ᠄
— ᠦᠵᠡᠭᠳᠡᠭᠰᠡᠨ ᠁ ᠭᠡᠵᠦ ᠲᠦᠭᠳᠡᠷᠡᠪᠡ᠃
— ᠲᠡᠭᠡᠭᠡᠳ ᠬᠠᠢᠴᠢᠭᠠ(ᠬᠠᠮᠢᠭᠠ ᠣᠴᠢᠭᠠ) ᠶᠤᠮ ᠪᠣᠯ?
— ᠬᠠᠷᠢᠨ ᠨᠠᠮᠠ ᠶ᠋ᠢ ᠁ ᠲᠠᠨᠠᠷ ᠲᠤ᠌ ᠬᠡᠯᠡ! ᠭᠡᠵᠦ ᠁ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠤ᠋ᠨ ᠬᠦᠦ ᠲᠡᠮᠦᠵᠢᠨ ᠲᠡᠢ ᠨᠥᠬᠥᠷᠯᠡᠬᠦ ᠪᠡᠷ ᠶᠠᠪᠤᠯᠠ ᠭᠡᠰᠡᠨ ᠃ ᠡᠬᠡ ᠨᠢ ᠳᠠᠭᠤ ᠠᠯᠳᠠᠵᠤ:
— ᠲᠡᠭᠡᠭᠡᠳ ᠶᠠᠪᠤᠭᠠᠳ ᠥᠭᠭᠦᠯᠡ ᠭᠡᠵᠦ ᠤᠤ? ᠬᠦᠦ ᠮᠢᠨᠢ᠂ ᠬᠦᠦ ᠮᠢᠨᠢ ᠠ᠋ ᠭᠡᠳ ᠤᠨᠠᠴᠢᠬᠠᠪᠠ᠃ ᠡᠴᠢᠭᠡ ᠨᠢ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠂ ᠬᠦᠷᠡᠯᠡᠢᠵᠦ ᠪᠠᠷᠤᠢᠭᠠᠳ᠄
— ᠶᠠᠭᠤ ᠭᠡᠰᠡᠨ ᠦᠭᠡ ᠪᠣᠢ? ᠰᠡᠯᠡᠮᠡ ᠶ᠋ᠢᠨ ᠢᠷ᠂ ᠵᠡᠪᠡ ᠶ᠋ᠢᠨ ᠦᠵᠦᠭᠦᠷ ᠤᠷᠤᠭᠤ ᠶᠠᠪᠤᠵᠤ ᠪᠠᠢᠭᠠ ᠯᠠ ᠭᠡᠰᠡᠨ ᠦᠭᠡ᠃ ᠵᠠ ᠶᠠᠭᠠᠬᠢᠬᠤᠪ᠂ ᠬᠦᠦ ᠦᠭᠡᠢ ᠯᠡ ᠪᠣᠯᠵᠤ ᠳᠠ ᠭᠡᠳ ᠬᠡᠰᠡᠭ ᠵᠠᠭᠤᠷᠠ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠵᠢᠵᠢᠭ ᠰᠢᠷᠭᠤᠯᠤᠭᠠ ᠠ᠋ᠴᠠ ᠨᠢᠭᠡ ᠶᠠᠭᠤᠮᠠ ᠠᠪᠴᠤ ᠠᠯᠳᠠᠵᠢᠨ ᠤᠷᠤᠭᠤ ᠣᠴᠢᠵᠤ ᠦᠨᠦᠷᠲᠦᠭᠦᠯᠦᠨ ᠲᠣᠯᠣᠭᠠᠢ ᠶ᠋ᠢ ᠨᠢ ᠲᠦᠰᠢᠨ᠂ ᠡᠨᠳᠡ ᠲᠡᠨᠳᠡ ᠨᠢ ᠪᠠᠷᠢᠵᠤ ᠢᠯᠢᠯᠭᠡ ᠬᠢᠪᠡ᠃ ᠭᠠᠳᠠᠨᠠ ᠠ᠋ᠴᠠ ᠬᠣᠲᠠᠨ ᠤ᠋ ᠬᠢᠨᠢ ᠴᠤᠭᠯᠠᠷᠠᠨ《ᠶᠠᠭᠠᠬᠢᠬᠤ ᠪᠢᠯᠡ? ᠶᠠᠭᠠᠬᠢᠬᠤ ᠪᠢᠯᠡ?》 ᠭᠡᠯᠴᠡᠨᠡ᠃ ᠨᠢᠭᠡ ᠬᠠᠰᠢᠷ ᠡᠮᠡᠭᠡᠨ᠄
— ᠭᠡᠵᠢᠭᠡᠨ ᠦ᠌ ᠬᠢᠨᠢ ᠦᠵᠦᠭᠦᠷ ᠢ᠋ ᠲᠦᠯᠡᠵᠦ ᠦᠨᠦᠷᠲᠦᠭᠦᠯᠦᠨ ᠭᠡᠪᠡ᠃ ᠦᠨᠡᠬᠡᠷ ᠲᠡᠭᠦᠨ ᠡᠴᠡ ᠪᠣᠯᠤᠭᠰᠠᠨ ᠤᠤ? ᠥᠭᠡᠷᠡ ᠬᠦᠴᠦᠨ ᠵᠦᠢᠯ ᠡᠴᠡ ᠤᠤ? ᠠᠯᠳᠠᠵᠢᠨ ᠬᠡᠰᠡᠭ ᠵᠠᠭᠤᠷᠠ ᠤᠨᠠᠭᠠᠳ ᠰᠡᠷᠭᠦᠵᠦ ᠢᠷᠡᠯᠡ᠃ ᠡᠳᠡᠨ ᠦ᠌ ᠬᠢᠨ ᠳ᠋ᠦ᠍ ᠬᠦᠨᠳᠦ ᠣᠢ ᠭᠠᠰᠢᠭᠤ ᠲᠣᠬᠢᠶᠠᠯᠳᠤᠵᠤ᠂ ᠨᠠᠬᠤ ᠠᠭᠤᠵᠢᠭᠤ ᠰᠡᠳᠬᠢᠯ ᠭᠠᠷᠭᠠᠨ:
— ᠶᠠᠪᠤᠭᠰᠠᠨ ᠬᠥᠮᠦᠨ ᠢᠷᠡᠳᠡᠭ᠂ ᠢᠷᠡᠭᠰᠡᠨ ᠰᠢᠪᠠᠭᠤ ᠪᠤᠴᠠᠳᠠᠭ ᠭᠡᠰᠡᠨ ᠦᠭᠡ ᠪᠣᠢ᠃ ᠬᠥᠭᠰᠢᠨ ᠮᠢᠨᠢ ᠳᠡ᠂ ᠬᠥᠬᠡ ᠮᠥᠩᠭᠥᠨ ᠲᠡᠭᠷᠢ ᠳ᠋ᠡᠭᠡᠨ ᠵᠠᠯᠪᠠᠷᠢᠵᠤ᠂ ᠰᠦ ᠰᠠᠴᠤᠯᠢ ᠪᠠᠨ ᠡᠷᠭᠦᠭᠡᠳ ᠰᠦᠰᠦᠭᠯᠡᠵᠦ ᠭᠤᠶᠤᠭᠠᠳ ᠯᠠ ᠪᠠᠢᠶᠠ ᠳᠠ ᠭᠡᠯᠡ᠃
ᠪᠡᠯᠭᠦᠳᠡᠢ ᠪᠣᠭᠣᠷᠴᠢ ᠬᠣᠶᠠᠷ ᠰᠥᠨᠢᠵᠢᠨ ᠶᠠᠪᠤᠯᠠ᠃ ᠬᠣᠯᠠ ᠶ᠋ᠢᠨ ᠵᠠᠮ ᠳ᠋ᠤ᠌ ᠮᠣᠷᠢᠳ ᠢ᠋ᠶ᠋ᠠᠨ ᠭᠠᠮᠨᠠᠵᠤ ᠱᠣᠭᠰᠢᠬᠤ ᠲᠡᠳᠦᠢ᠃ ᠬᠠᠶᠠ ᠵᠠᠷᠢᠮ ᠳ᠋ᠠᠭᠠᠨ ᠴᠠᠭᠠᠨ ᠭᠠᠵᠠᠷ ᠶᠥᠷᠭᠡᠭᠦᠯᠦᠨᠡ᠃ ᠲᠡᠳᠦᠢ ᠯᠡ ᠶᠡᠬᠡ ᠶᠠᠷᠢᠭᠰᠠᠨ ᠦᠭᠡᠢ᠂ ᠭᠡᠬᠦ ᠳ᠋ᠡᠭᠡᠨ ᠪᠠᠰᠠ ᠳᠤᠭᠤᠢ ᠶᠠᠪᠤᠭᠰᠠᠨ ᠦᠭᠡᠢ᠃ ᠦᠦᠷ ᠴᠠᠢᠬᠤ ᠦᠶᠡ ᠪᠡᠷ ᠨᠢᠭᠡ ᠠᠶᠠᠲᠠᠢ ᠬᠠᠭᠤᠷᠠᠢ ᠡᠭᠡᠪᠦᠷ ᠭᠠᠵᠠᠷ ᠪᠠᠭᠤᠵᠤ᠂ ᠮᠣᠷᠢᠳ ᠤ᠋ᠨ ᠢ᠋ᠶ᠋ᠠᠨ ᠡᠮᠡᠭᠡᠯ ᠢ᠋ ᠠᠪᠴᠤ ᠨᠢᠷᠤᠭᠤ ᠶ᠋ᠢ ᠨᠢ ᠠᠮᠠᠷᠠᠭᠠᠬᠤ ᠪᠠᠷ ᠴᠢᠳᠥᠷᠯᠡᠵᠦ ᠲᠠᠯᠪᠢᠭᠠᠳ᠂ ᠲᠣᠬᠣᠮ ᠢ᠋ᠶ᠋ᠠᠨ ᠳᠡᠪᠢᠰᠦᠨ ᠬᠡᠪᠲᠡᠵᠦ᠂ ᠬᠣᠶᠠᠭᠤᠯᠠ ᠰᠦᠷᠡᠬᠡᠢ ᠤᠨᠲᠠᠵᠤ ᠨᠣᠢᠷ ᠠᠪᠤᠯᠠ᠃ ᠨᠠᠷᠠ ᠭᠠᠷᠤᠭᠠᠳ ᠳᠡᠭᠡᠭᠰᠢ ᠬᠥᠭᠡᠷᠬᠦ ᠰᠠᠴᠠᠭᠤ ᠰᠡᠷᠡᠵᠦ ᠮᠣᠷᠳᠠᠯᠠ᠃ ᠥᠷᠯᠥᠭᠡᠭᠦᠷ ᠨᠢᠭᠡ ᠲᠠᠷᠪᠠᠭᠠ ᠱᠣᠭᠯᠠᠯᠠ᠃ ᠴᠠᠭᠠᠰᠢ ᠨᠡᠯᠢᠶᠡᠳ ᠶᠠᠪᠤᠵᠤ ᠦᠳᠡ ᠪᠣᠯᠬᠤ ᠰᠠᠴᠠᠭᠤ ᠪᠣᠷᠣᠭᠠᠰᠢᠵᠤ᠂ ᠡᠨᠳᠡ ᠲᠡᠨᠳᠡ ᠳᠠᠭᠤ ᠴᠠᠬᠢᠯᠭᠠᠨ ᠲᠠᠢ ᠪᠣᠷᠣᠭᠠᠨ ᠣᠷᠣᠪᠠᠴᠤ ᠲᠡᠷᠡ ᠬᠣᠶᠠᠷ ᠠ᠋ᠴᠠ ᠵᠠᠢᠳᠠᠭᠤ ᠥᠩᠭᠡᠷᠡᠭᠡᠳ ᠪᠠᠢᠪᠠ᠃ ᠪᠣᠭᠣᠷᠴᠢ᠄《ᠡᠨᠡ ᠪᠡᠯᠭᠦᠳᠡᠢ ᠪᠣᠷᠣᠭᠠᠨ ᠬᠥᠭᠡᠭᠡᠳᠡᠭ ᠷᠢᠳᠢ ᠰᠢᠳᠢ ᠲᠡᠢ᠂ ᠤᠩᠰᠢᠯᠭᠠ ᠲᠠᠢ ᠤᠷᠢᠯᠭᠠ ᠲᠠᠢ ᠶᠤᠮ ᠪᠣᠯᠪᠠᠤ?》 ᠭᠡᠵᠦ ᠪᠣᠳᠣᠵᠤ ᠶᠠᠪᠤᠬᠤ ᠳ᠋ᠤ᠌ ᠨᠥᠭᠥᠭᠡᠳᠡᠬᠢ ᠨᠢ ᠪᠠᠰᠠ《ᠡᠨᠡ ᠪᠣᠭᠣᠷᠴᠢ ᠯᠠ ᠪᠣᠷᠣᠭᠠ ᠵᠠᠢᠯᠠᠭᠤᠯᠤᠭᠠᠳ ᠪᠠᠢᠨᠠ ᠤᠤ ᠳᠠ?》 ᠭᠡᠵᠦ ᠭᠠᠢᠬᠠᠵᠤ ᠶᠠᠪᠤᠪᠠ᠃ ᠣᠷᠣᠢ ᠪᠣᠯᠵᠤ ᠬᠠᠷᠠᠩᠭᠤᠢ ᠨᠥᠮᠥᠷᠦᠯᠡ᠃ ᠪᠣᠷᠣᠭᠠ ᠣᠢᠷᠠᠲᠤᠭᠠᠳ ᠯᠠ᠂ ᠰᠢᠷᠦᠭᠦᠨ ᠪᠣᠷᠣᠭᠠ ᠲᠠᠢ ᠤᠴᠠᠷᠠᠬᠤ ᠳᠠ᠃ ᠨᠢᠭᠡ ᠤᠳᠠᠭᠠ ᠴᠠᠬᠢᠯᠭᠠᠨ ᠴᠠᠬᠢᠯᠬᠤ ᠵᠠᠭᠤᠷᠠ ᠭᠠᠭᠴᠠ ᠠᠢᠯ ᠬᠠᠷᠠᠭᠳᠠᠪᠠ᠃ ᠨᠣᠬᠠᠢ ᠨᠢ ᠴᠦ᠍ ᠬᠤᠴᠠᠵᠤ ᠪᠠᠢᠨᠠ᠃ ᠪᠡᠯᠭᠦᠳᠡᠢ᠄
— ᠠᠢᠯ ᠳ᠋ᠤ᠌ ᠣᠷᠣᠵᠤ ᠬᠣᠨᠣᠭᠯᠠᠶᠠ᠃ ᠨᠤᠲᠤᠭ ᠤ᠋ᠨ ᠲᠠᠨᠢᠳᠠᠭ ᠠᠢᠯ ᠪᠠᠢᠵᠤ ᠪᠣᠯᠤᠨᠠ᠃ ᠤᠭ ᠨᠢ ᠮᠠᠨᠠᠢᠬᠢ ᠣᠢᠷᠠᠳᠴᠤ ᠪᠠᠢᠨᠠ ᠯᠠ ᠳᠠ᠃ ᠪᠣᠷᠣᠭᠠᠨ ᠳ᠋ᠤ᠌ ᠱᠠᠯᠠᠪ ᠴᠣᠬᠢᠭᠤᠯᠤᠭᠠᠳ ᠶᠠᠭᠠᠬᠢᠬᠤ? ᠡᠨᠡ ᠠᠢᠯ ᠳ᠋ᠤ᠌ ᠣᠴᠢᠶᠠ ᠭᠡᠬᠦ ᠳ᠋ᠦ᠍ᠨᠢ ᠪᠣᠭᠣᠷᠴᠢ ᠲᠠᠲᠠᠭᠠᠯᠵᠠᠭᠰᠠᠨ ᠦᠭᠡᠢ᠄
— ᠲᠡᠭᠡᠶᠡ ᠭᠡᠪᠡ᠃
ᠨᠣᠬᠠᠢ ᠨᠢ ᠰᠦᠷᠡᠬᠡᠢ ᠵᠠᠭᠤᠮᠠᠬᠠᠢ ᠶᠤᠮ᠃ ᠬᠣᠶᠠᠷ ᠨᠣᠬᠠᠢ ᠪᠣᠷᠭᠣᠵᠤ ᠲᠣᠭᠣᠷᠢᠬᠤ ᠠᠵᠢ᠃ ᠭᠠᠳᠠᠭᠠ ᠨᠢ ᠣᠴᠢᠭᠠᠳ《ᠨᠣᠬᠠᠢ ᠬᠣᠷᠢ!》 ᠭᠡᠵᠦ ᠲᠠᠭᠤᠲᠠᠯᠠ᠃ ᠨᠡᠯᠢᠶᠡᠳ ᠤᠳᠠᠵᠤ ᠨᠢᠭᠡ ᠪᠠᠭᠠᠬᠠᠨ ᠪᠦᠰᠡᠭᠦᠢ ᠭᠠᠷᠴᠤ ᠢᠷᠡᠭᠡᠳ ᠨᠣᠬᠠᠢ ᠪᠠᠨ《ᠵᠣᠪ》 ᠭᠡᠵᠦ ᠵᠠᠢᠯᠠᠭᠤᠯᠤᠯᠠ᠃ ᠲᠡᠳᠡ ᠭᠡᠷ ᠲᠦ᠍ ᠣᠷᠣᠪᠠᠯ ᠨᠢᠭᠡ ᠠᠬᠢᠮᠠᠭ ᠨᠠᠰᠤᠨ ᠤ᠋ ᠬᠥᠭᠰᠢᠨ ᠵᠡᠭᠦᠨ ᠣᠷᠣᠨ ᠳᠡᠭᠡᠷᠡ ᠬᠡᠪᠲᠡᠵᠦ ᠪᠠᠢᠪᠠ᠃ ᠬᠣᠶᠠᠷ ᠵᠠᠯᠠᠭᠤ ᠲᠡᠭᠦᠨ ᠲᠡᠢ ᠮᠡᠨᠳᠦᠯᠡᠭᠡᠳ ᠰᠠᠭᠤᠵᠠᠭᠠᠪᠠ᠃ ᠪᠦᠰᠡᠭᠦᠢ ᠣᠷᠣᠵᠤ ᠢᠷᠡᠭᠡᠳ ᠬᠠᠲᠠᠪᠴᠢᠨ ᠳ᠋ᠠᠭᠠᠨ ᠵᠣᠭᠰᠣᠬᠤ ᠨᠢ ᠨᠡᠯᠢᠶᠡᠳ ᠵᠢᠬᠢᠷᠬᠢᠵᠦ ᠪᠠᠢᠭᠠ ᠶᠠᠩᠵᠤᠲᠠᠢ᠃ ᠠᠪᠠᠭᠠᠢ ᠲᠡᠳᠡᠨ ᠢ᠋ ᠬᠠᠮᠢᠭᠠ ᠠ᠋ᠴᠠ ᠬᠠᠮᠢᠭᠠ ᠬᠦᠷᠴᠦ ᠶᠠᠪᠤᠭᠠ ᠶ᠋ᠢ ᠪᠠᠢᠴᠠᠭᠠᠬᠤ ᠳ᠋ᠤ᠌ ᠪᠡᠯᠭᠦᠳᠡᠢ᠄
— ᠮᠠᠨᠠᠢᠬᠢ ᠬᠣᠯᠠ ᠦᠭᠡᠢ᠃ ᠬᠣᠷᠬᠣᠨᠠᠭ ᠵᠥᠪᠦᠷ ᠦ᠋ᠨ ᠴᠡᠭᠡᠵᠢᠨ ᠳ᠋ᠦ᠍᠃ ᠪᠣᠷᠣᠭᠠ ᠣᠷᠣᠵᠤ ᠮᠠᠭᠠᠳ ᠦᠭᠡᠢ ᠪᠠᠢᠬᠤ ᠲᠤᠯᠠ ᠬᠣᠨᠣᠭᠠᠳ ᠶᠠᠪᠤᠪᠠᠯ ᠪᠣᠯᠬᠤ ᠤᠤ? ᠭᠡᠬᠦ ᠳ᠋ᠦ᠍ ᠡᠮᠡᠭᠡᠨ᠄
— ᠲᠡᠭᠡ ᠯᠡ ᠳᠡ ᠭᠡᠯᠡ᠃
ᠲᠡᠷᠡ ᠬᠣᠶᠠᠷ ᠪᠦᠰᠡᠭᠦᠢ ᠶ᠋ᠢᠨ ᠬᠠᠮᠲᠤ ᠭᠠᠷᠴᠤ ᠮᠣᠷᠢᠳ ᠢ᠋ᠶ᠋ᠠᠨ ᠬᠡᠷᠦᠵᠦ ᠲᠠᠯᠪᠢᠭᠠᠳ ᠡᠮᠡᠭᠡᠯ᠂ ᠵᠠᠷ ᠵᠡᠪᠰᠡᠭ ᠢ᠋ᠶ᠋ᠡᠨ ᠭᠡᠷ ᠲᠦ᠍ ᠣᠷᠣᠭᠤᠯᠪᠠ᠃ ᠪᠦᠰᠡᠭᠦᠢ ᠲᠡᠳᠡᠨ ᠦ᠌ ᠲᠠᠷᠠᠭ᠂ ᠥᠷᠥᠮᠡ ᠥᠭᠭᠦᠭᠰᠡᠨ ᠳ᠋ᠦ᠍ ᠲᠡᠳᠡ ᠲᠠᠯᠠᠷᠬᠠᠨ ᠢᠳᠡᠵᠦ ᠤᠤᠭᠤᠭᠠᠳ ᠤᠨᠲᠠᠬᠤ ᠬᠡᠪᠲᠡᠬᠦ ᠪᠣᠯᠤᠯᠠ᠃ ᠭᠡᠷ ᠦ᠋ᠨ ᠬᠣᠢᠭᠤᠷ ᠬᠣᠶᠠᠷ ᠵᠣᠴᠢᠨ ᠳ᠋ᠠᠭᠠᠨ ᠳᠡᠪᠢᠰᠬᠡᠷ ᠳᠡᠪᠢᠰᠴᠦ ᠬᠤᠴᠢᠯᠭᠠ ᠲᠠᠯᠪᠢᠯᠠ᠃ ᠪᠣᠷᠣᠭᠠ ᠣᠷᠣᠨᠠ ᠭᠡᠵᠦ ᠡᠷᠦᠬᠡ ᠪᠦᠲᠡᠭᠡᠭᠰᠡᠨ ᠲᠤᠯᠠ ᠬᠠᠷᠠᠩᠭᠤᠢ ᠴᠤ᠌ ᠭᠡᠵᠦ ᠬᠠᠴᠢᠨ᠃ ᠪᠣᠷᠣᠭᠠ ᠴᠤ᠌ ᠣᠷᠣᠯᠠ᠃ ᠬᠠᠶᠠ ᠰᠢᠷᠦᠭᠦᠰᠴᠦ᠂ ᠬᠠᠶᠠ ᠲᠠᠰᠤᠷᠠᠵᠤ ᠠᠮᠢᠰᠬᠤᠭᠠ ᠠᠪᠴᠤ ᠪᠠᠢᠭᠠ ᠴᠤ᠌ ᠶᠤᠮ ᠤᠤ? ᠭᠡᠯᠲᠡᠢ᠃ ᠲᠦᠳᠡᠯ ᠦᠭᠡᠢ ᠪᠡᠯᠭᠦᠳᠡᠢ ᠮᠥᠯᠬᠥᠭᠡᠳ ᠶᠠᠪᠤᠴᠢᠬᠠᠯᠠ᠃ ᠴᠠᠭᠠᠳᠤᠬᠢ ᠨᠢ ᠴᠠᠭᠠᠷᠢᠭᠯᠠᠭᠰᠠᠨ ᠦᠭᠡᠢ᠃ ᠪᠣᠭᠣᠷᠴᠢ《ᠪᠣᠯᠵᠤ ᠳᠠ》 ᠭᠡᠵᠦ ᠪᠣᠳᠣᠭᠠᠳ ᠲᠦᠳᠡᠯ ᠦᠭᠡᠢ ᠨᠠᠮ ᠤᠨᠲᠠᠵᠠᠢ᠃ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠥᠷᠯᠥᠭᠡ ᠨᠠᠷᠠ ᠲᠣᠭᠣᠨᠣ ᠪᠠᠨ ᠬᠤᠷᠤᠭᠤ ᠳᠠᠪᠠᠵᠤ ᠪᠠᠢᠯᠠ᠃ ᠭᠡᠷ ᠦ᠋ᠨ ᠭᠠᠳᠠᠭᠠ ᠬᠣᠶᠠᠷ ᠬᠥᠮᠦᠨ ᠳᠤᠤᠭᠠᠷᠤᠯᠳᠤᠨᠠ᠃ ᠪᠡᠯᠭᠦᠳᠡᠢ ᠲᠤᠩ ᠴᠤ᠌ ᠪᠥᠬᠡ ᠪᠠᠲᠤ ᠤᠨᠲᠠᠵᠤ ᠪᠠᠢᠨᠠ᠃ ᠥᠮᠥᠳᠥ ᠭᠤᠲᠤᠯ ᠵᠡᠷᠭᠡ ᠨᠢ ᠣᠷᠬᠢᠭᠰᠠᠨ ᠪᠠᠢᠷᠢᠨ ᠳ᠋ᠠᠭᠠᠨ ᠪᠠᠢᠬᠤᠯᠠᠷ ᠲᠡᠭᠦᠨ ᠢ᠋ ᠨᠢ ᠣᠢᠷᠠᠲᠤᠭᠤᠯᠵᠤ ᠲᠠᠯᠪᠢᠯᠠ᠃ ᠠᠪᠠᠭᠠᠢ ᠣᠷᠣᠵᠤ ᠢᠷᠡᠵᠦ ᠥᠷᠯᠥᠭᠡᠨ ᠦ᠌ ᠮᠡᠨᠳᠦ ᠮᠡᠳᠡᠯᠴᠡᠨ ᠪᠣᠭᠣᠷᠴᠢ ᠭᠠᠷᠤᠯᠠ᠃ ᠲᠩᠷᠢ ᠴᠡᠯᠮᠡᠵᠡᠢ᠃ ᠮᠣᠷᠢᠳ ᠨᠢ ᠣᠢᠷᠠᠬᠠᠨ ᠬᠠᠷᠠᠭᠳᠠᠨᠠ᠃ ᠪᠣᠭᠣᠷᠴᠢ ᠮᠣᠷᠢᠳ ᠢ᠋ᠶ᠋ᠠᠨ ᠪᠠᠷᠢᠬᠤ ᠪᠠᠷ ᠭᠡᠷ ᠲᠦ᠍ ᠣᠷᠣᠵᠤ ᠨᠣᠭᠲᠣ ᠬᠠᠵᠠᠭᠠᠷ ᠢ᠋ᠶ᠋ᠠᠨ ᠠᠪᠴᠤ ᠭᠠᠷᠬᠤ ᠳ᠋ᠤ᠌ ᠭᠠᠳᠠᠭᠠ ᠪᠠᠢᠭᠰᠠᠨ ᠪᠦᠰᠡᠭᠦᠢ ᠭᠦᠶᠦᠵᠦ ᠢᠷᠡᠭᠡᠳ᠄
— ᠠᠬᠠ ᠠ᠋᠂ ᠪᠢ ᠮᠣᠷᠢᠳ ᠪᠠᠷᠢᠭᠠᠳ ᠢᠷᠡᠶᠡ᠃ ᠨᠣᠭᠣᠭᠠ ᠶᠡᠬᠡ ᠨᠣᠢᠲᠠᠨ ᠪᠠᠢᠨᠠ ᠭᠡᠵᠦ ᠬᠠᠵᠠᠭᠠᠷ ᠢ᠋ ᠨᠢ ᠰᠢᠭᠦᠷᠡᠨ ᠠᠪᠤᠯᠠ᠃
ᠪᠣᠭᠣᠷᠴᠢ ᠬᠠᠷᠠᠪᠠᠯ ᠲᠡᠷᠡ ᠪᠦᠰᠡᠭᠦᠢ ᠬᠥᠯ ᠨᠢᠴᠦᠭᠦᠨ᠂ ᠥᠮᠥᠳᠥᠨ ᠦ᠌ ᠪᠡᠨ ᠰᠢᠷᠬᠤᠨᠠᠭ ᠢ᠋ ᠡᠷᠭᠢᠭᠦᠯᠵᠦ ᠳᠡᠭᠡᠭᠰᠢ ᠨᠤᠭᠤᠯᠵᠠᠢ᠃ ᠰᠢᠭᠤᠮᠠᠭ ᠠ᠋ᠴᠠ ᠨᠢ ᠳᠣᠣᠭᠤᠷ ᠫᠠᠯᠲᠠᠭᠠᠷ ᠮᠢᠬᠠᠯᠢᠭ ᠲᠠᠪᠠᠬᠠᠢ᠂ ᠪᠤᠯᠴᠢᠩᠯᠢᠭ ᠭᠠᠩᠳᠠᠮᠠᠯ ᠬᠦᠷᠡᠩ ᠰᠢᠯᠪᠢ ᠬᠠᠷᠠᠭᠳᠠᠨᠠ᠃ ᠪᠦᠬᠦᠯᠢ ᠪᠡᠶᠡ ᠴᠣᠭᠴᠠᠰ ᠨᠢ ᠵᠣᠬᠢᠴᠠᠭᠰᠠᠨ᠃ ᠢᠨᠢᠶᠡᠮᠰᠦᠭᠯᠡᠭᠰᠡᠨ ᠣᠨᠢᠭᠠᠷ ᠨᠢᠳᠦᠨ ᠡᠴᠡ ᠨᠢ ᠭᠠᠯ ᠴᠣᠭ ᠪᠠᠳᠠᠷᠠᠬᠤ ᠮᠡᠲᠦ ᠠᠪᠠᠢ᠃
ᠪᠣᠭᠣᠷᠴᠢ ᠭᠡᠷ ᠲᠦ᠍ ᠣᠷᠣᠭᠠᠳ ᠪᠡᠯᠭᠦᠳᠡᠢ ᠶ᠋ᠢ ᠰᠡᠷᠡᠭᠡᠬᠦ ᠰᠠᠨᠠᠭᠠᠲᠠᠢ ᠴᠢᠮᠡᠭᠡ ᠥᠭᠴᠦ ᠦᠵᠡᠯᠡ᠃ ᠰᠡᠷᠡᠳᠡᠭ ᠦᠭᠡᠢ ᠠ᠋ ᠃ ᠭᠡᠷ ᠦ᠋ᠨ ᠡᠵᠡᠭᠲᠡᠢ ᠠᠪᠠᠭᠠᠢ ᠴᠠᠢ ᠠᠶᠠᠭᠠᠯᠠᠵᠤ ᠥᠭᠭᠦᠭᠡᠳ ᠡᠮᠦᠨᠡᠬᠢ ᠪᠢᠴᠢᠬᠠᠨ ᠲᠠᠯᠪᠢᠭᠤᠷ ᠳᠡᠭᠡᠷᠡ ᠲᠠᠪᠠᠭ ᠲᠠᠢ ᠥᠷᠥᠮᠡ ᠠᠭᠠᠷᠤᠤᠯ ᠲᠠᠯᠪᠢᠯᠠ᠃ ᠮᠣᠳᠣᠨ ᠳᠣᠮᠪᠣ ᠲᠠᠢ ᠴᠠᠢ ᠬᠠᠯᠠᠭᠤᠨ ᠠᠭᠠᠳ ᠪᠣᠭᠤᠷᠴᠢ ᠰᠡᠷᠡᠬᠦ ᠳ᠋ᠦ᠍ ᠭᠠᠯ ᠳᠡᠭᠡᠷᠡ ᠪᠤᠴᠠᠯᠵᠤ ᠪᠠᠢᠭᠰᠠᠨ ᠲᠣᠭᠣᠭᠠ ᠲᠠᠢ ᠶᠠᠭᠤᠮᠠ《ᠱᠣᠷ ᠱᠣᠷ》 ᠪᠤᠴᠠᠯᠤᠭᠰᠠᠭᠠᠷ ᠪᠣᠷᠴᠠᠨ ᠤ᠋ ᠦᠨᠦᠷ ᠬᠠᠮᠠᠷ ᠴᠣᠷᠭᠢᠨᠠ᠃ ᠲᠡᠭᠡᠲᠡᠯᠡ ᠪᠡᠯᠭᠦᠳᠡᠢ ᠰᠡᠷᠡᠵᠦ ᠭᠡᠷ ᠲᠡᠭᠡᠨ ᠪᠠᠢᠭᠠ ᠶᠤᠮ ᠰᠢᠭ᠋ ᠰᠤᠨᠢᠶᠠᠭᠠᠳ ᠬᠠᠵᠠᠭᠤ ᠳ᠋ᠠᠬᠢ ᠬᠤᠪᠴᠠᠰᠤ ᠪᠠᠨ ᠡᠮᠦᠰᠴᠦ᠂ ᠬᠥᠭᠰᠢᠨ ᠲᠡᠢ ᠥᠷᠯᠥᠭᠡᠨ ᠦ᠌ ᠮᠡᠨᠳᠦ ᠮᠡᠳᠡᠯᠴᠡᠭᠡᠳ ᠭᠠᠷᠪᠠ᠃ ᠲᠡᠷᠡ ᠪᠡᠷ ᠭᠠᠳᠠᠭᠠ ᠭᠠᠷᠤᠭᠠᠳ ᠮᠣᠷᠢ ᠪᠠᠷᠢᠵᠤ ᠢᠷᠡᠵᠦ ᠶᠠᠪᠤᠭᠠ ᠪᠦᠰᠡᠭᠦᠢ ᠲᠡᠢ ᠬᠥᠬᠢᠭᠦᠨ ᠢ᠋ᠶ᠋ᠡᠷ ᠶᠠᠷᠢᠵᠤ ᠢᠨᠢᠶᠡᠯᠳᠦᠬᠦ ᠨᠢ ᠰᠣᠨᠣᠰᠳᠠᠪᠠ᠃ ᠲᠡᠭᠡᠭᠡᠳ ᠨᠡᠯᠢᠶᠡᠳ ᠤᠳᠠᠵᠤ ᠪᠠᠢᠵᠤ ᠣᠷᠣᠵᠤ ᠢᠷᠡᠯᠡ᠃
ᠭᠡᠷ ᠦ᠋ᠨ ᠡᠵᠡᠭᠲᠡᠢ ᠬᠣᠶᠠᠷ ᠵᠣᠴᠢᠨ ᠳ᠋ᠠᠭᠠᠨ ᠢᠯᠵᠠ ᠴᠢᠨᠠᠭᠰᠠᠨ ᠡᠪᠦᠯ ᠦ᠋ᠨ ᠦᠬᠡᠷ ᠦ᠋ᠨ ᠪᠣᠷᠴᠠᠨ ᠤ᠋᠂ ᠨᠢᠭᠡ ᠨᠢᠭᠡ ᠬᠠᠪᠢᠷᠭᠠ ᠲᠠᠯᠪᠢᠵᠤ ᠰᠢᠷᠠ ᠪᠤᠳᠠᠭᠠ ᠬᠠᠶᠠᠭᠰᠠᠨ ᠱᠥᠯᠥ ᠠᠶᠠᠭᠠᠯᠠᠵᠤ ᠥᠭᠪᠡ᠃ ᠰᠢᠷᠭᠠᠯᠲᠤᠭᠰᠠᠨ ᠲᠣᠰᠣ ᠲᠠᠢ ᠪᠤᠳᠠᠭᠠ ᠵᠥᠭᠡᠯᠡᠷᠡᠭᠰᠡᠨ ᠪᠣᠷᠴᠠᠨ ᠤ᠋ ᠠᠮᠲᠠ ᠴᠤ᠌ ᠭᠡᠵᠦ ᠵᠢᠭᠲᠡᠢᠬᠡᠨ᠃ ᠬᠣᠶᠠᠭᠤᠯᠠ ᠲᠦᠰᠦᠢᠲᠡᠯᠡ ᠬᠣᠭᠣᠯᠠᠯᠠᠭᠠᠳ ᠮᠣᠷᠳᠠᠬᠤ ᠪᠣᠯᠪᠠ᠃
ᠪᠦᠰᠡᠭᠦᠢ ᠪᠡᠯᠭᠦᠳᠡᠢ ᠶ᠋ᠢᠨ ᠴᠤᠯᠪᠤᠭᠤᠷ ᠠ᠋ᠴᠠ ᠳᠠᠪᠬᠤᠷ ᠠᠳᠬᠤᠯᠴᠠᠭᠠᠳ ᠵᠣᠭᠰᠣᠬᠤ ᠨᠢ《ᠶᠠᠪᠤᠭᠤᠯᠬᠤ ᠦᠭᠡᠢ》 ᠭᠡᠰᠡᠨ ᠰᠢᠭ᠃ ᠪᠣᠭᠤᠷᠴᠢ ᠮᠣᠷᠳᠠᠭᠠᠳ ᠰᠠᠵᠢᠯᠠᠭᠤᠯᠤᠩᠬᠠᠨ ᠬᠡᠰᠡᠭ ᠶᠠᠪᠤᠭᠠᠳ ᠡᠷᠭᠢᠵᠦ ᠬᠠᠷᠠᠪᠠᠰᠤ ᠨᠥᠭᠦᠭᠡ ᠬᠣᠶᠠᠷ ᠮᠣᠷᠢ ᠪᠠᠨ ᠬᠥᠲᠥᠯᠦᠭᠡᠳ ᠭᠡᠷ ᠡᠴᠡ ᠨᠡᠯᠢᠶᠡᠳ ᠵᠠᠢᠳᠠᠭᠤ ᠠᠯᠬᠤᠵᠤ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠪᠡᠯᠭᠦᠳᠡᠢ ᠮᠣᠷᠳᠠᠵᠤ ᠠᠷᠤ ᠠ᠋ᠴᠠ ᠨᠢ ᠳᠠᠪᠬᠢᠨ ᠢᠷᠡᠪᠡ᠃ ᠪᠣᠭᠤᠷᠴᠢ ᠪᠡᠯᠭᠦᠳᠡᠢ ᠡᠴᠡ᠄
— ᠲᠠᠨᠢᠳᠠᠭ ᠪᠦᠰᠡᠭᠦᠢ ᠤᠤ? ᠭᠡᠵᠦ ᠠᠰᠠᠭᠤᠪᠠᠯ ᠴᠠᠭᠠᠳᠤᠬᠢ ᠨᠢ᠄
— ᠦᠭᠡᠢ ᠠ᠋᠂ ᠦᠭᠡᠢ ᠭᠡᠵᠦ ᠬᠠᠷᠢᠭᠤᠯᠬᠤ ᠳ᠋ᠤ᠌᠄
— ᠲᠠᠨᠢᠯᠴᠠᠪᠠᠤ?
— ᠲᠠᠨᠢᠯᠴᠠᠯᠠ᠃
— ᠬᠡᠨ ᠭᠡᠳᠡᠭ ᠶᠦᠮ ᠪᠣᠢ?
— ᠦ ᠵᠣᠯᠢᠭ᠂ ᠨᠡᠷᠡ ᠶ᠋ᠢ ᠨᠢ ᠠᠰᠠᠭᠤᠭᠠ ᠦᠭᠡᠢ ᠯᠡ ᠳᠡ᠃
— ᠡᠷᠭᠢᠵᠦ ᠢᠷᠡᠵᠦ ᠠᠰᠠᠭᠤᠬᠤ ᠬᠡᠷᠡᠭᠲᠡᠢ ᠶᠦᠮ ᠪᠠᠢᠨᠠ ᠳᠠ᠃
— ᠲᠡᠭᠡᠬᠦ ᠯᠡ ᠬᠡᠷᠡᠭ ᠭᠠᠷᠴᠤ ᠳᠠ ᠭᠡᠯᠴᠡᠨ ᠲᠡᠳᠡ ᠢᠨᠢᠶᠡᠯᠳᠦᠭᠡᠳ ᠬᠠᠲᠠᠷᠢᠭᠤᠯᠪᠠ᠃ ᠭᠡᠷ ᠣᠢᠷᠠᠬᠠᠨ ᠪᠣᠯᠤᠭᠰᠠᠨ ᠲᠤᠯᠠ ᠮᠣᠷᠢ ᠬᠠᠢᠷᠠᠯᠠᠬᠤ ᠶᠠᠪᠤᠳᠠᠯ ᠦᠭᠡᠢ ᠴᠦ᠍ ᠪᠠᠷᠲᠠᠭᠠᠲᠤᠬᠤ ᠭᠠᠵᠠᠷ ᠪᠣᠯᠬᠣᠷ ᠰᠢᠷᠦᠭᠦᠨ ᠶᠠᠪᠤᠵᠤ ᠪᠣᠯᠬᠤ ᠦᠭᠡᠢ᠂ ᠳ᠋ᠡᠭᠡᠨ ᠢᠩᠭᠢᠨ ᠶᠠᠪᠤᠲᠠᠯᠠ ᠦᠳᠡ ᠪᠣᠯᠪᠠ᠃ ᠨᠢᠭᠡᠨ ᠬᠥᠲᠥᠯ ᠳᠡᠭᠡᠷᠡ ᠭᠠᠷᠲᠠᠯᠠ ᠬᠡᠰᠡᠭ ᠪᠦᠯᠢ ᠠᠢᠯ ᠬᠠᠷᠠᠭᠳᠠᠪᠠ᠃
— ᠮᠠᠨᠠᠢᠬᠢ ᠭᠡᠳᠡᠭ ᠲᠡᠷᠡ ᠳᠠ᠃ ᠢᠷᠡᠯᠡ ᠭᠡᠵᠦ ᠪᠡᠯᠭᠦᠳᠡᠢ ᠬᠡᠯᠡᠪᠡ᠃ ᠤᠷᠤᠭᠤ ᠭᠠᠵᠠᠷ ᠲᠤᠯᠠ ᠬᠣᠶᠠᠭᠤᠯᠠ ᠶᠥᠷᠭᠡᠭᠦᠯᠦᠯᠡ᠃ ᠣᠢᠷᠠᠲᠤᠯᠠ ᠭᠡᠷ ᠡᠴᠡ ᠨᠢᠭᠡ ᠬᠥᠮᠦᠨ ᠮᠣᠷᠳᠠᠭᠠᠳ ᠤᠭᠲᠤᠨ ᠳᠠᠪᠬᠢᠬᠤ ᠨᠢ ᠲᠡᠮᠦᠵᠢᠨ ᠠᠵᠢ᠃
ᠲᠡᠮᠦᠵᠢᠨ ᠢᠨᠢᠶᠡᠭᠰᠡᠭᠡᠷ ᠤᠭᠲᠤᠵᠤ ᠢᠷᠡᠯᠡ᠃ ᠲᠡᠮᠦᠵᠢᠨ ᠪᠣᠭᠤᠷᠴᠢ ᠬᠣᠶᠠᠷ ᠮᠣᠷᠢᠨ ᠠ᠋ᠴᠠ ᠪᠠᠨ ᠦᠰᠦᠷᠦᠯᠳᠦᠨ ᠪᠠᠭᠤᠵᠤ ᠲᠡᠪᠡᠷᠢᠯᠴᠡᠨ ᠳᠠᠯᠤ ᠮᠥᠷᠥ ᠪᠡᠨ ᠠᠯᠠᠭᠠᠳᠠᠯᠴᠠᠨ ᠮᠡᠨᠳᠦᠯᠡᠪᠡ᠃
— ᠮᠠᠨᠠᠢᠬᠢ ᠭᠡᠳᠡᠭ ᠡᠨᠡ ᠳᠡ᠃ ᠶᠠᠳᠠᠷᠠᠪᠠᠤ? ᠴᠢᠮᠠᠶ᠋ᠢ ᠢᠷᠡᠨᠡ ᠭᠡᠵᠦ ᠪᠠᠲᠤ ᠢᠲᠡᠭᠡᠵᠦ᠂ ᠶᠡᠬᠡ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠭᠡᠵᠦ ᠲᠡᠮᠦᠵᠢᠨ ᠬᠡᠯᠡᠯᠡ᠃