ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ- ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ᠂ᠭᠤᠷᠪᠠᠳᠤᠭᠠᠷ ᠪᠦᠯᠦᠭ 〔ᠠᠷᠪᠠ ᠶᠢᠰᠦ〕 Цаг төрийн үймээн – Д ᠂ Намдаг - Цаг төрийн үймээн ᠂ гуравдугаар бүлэг -19
78ᠬᠤᠪᠢ ᠵᠠᠶᠠᠭᠠᠲᠠᠨ ᠤ ᠵᠠᠮ
(ᠳ᠋ᠠᠨᠽᠠᠨ ᠤ᠋ ᠶᠠᠪᠤᠳᠠᠯ)
ᠬᠠᠪᠤᠷ ᠤ᠋ᠨ ᠬᠠᠷᠠ ᠬᠠᠪᠰᠠᠷᠭᠠᠲᠤ ᠨᠢᠭᠡ ᠡᠳᠦᠷ ᠪᠠᠶᠠᠷ ᠬᠦᠩ ᠦ᠋ᠨ ᠠᠩᠭᠢ ᠪᠣᠭᠳᠠ ᠶ᠋ᠢᠨ ᠬᠦᠷᠢᠶᠡᠨ ᠡᠴᠡ ᠮᠣᠷᠳᠠᠵᠠᠢ᠃ ᠬᠦᠷᠬᠦ ᠭᠠᠵᠠᠷ ᠨᠢ ᠬᠢᠶᠠᠭᠲᠤ(ᠠᠯᠲᠠᠨᠪᠤᠯᠠᠭ) ᠵᠣᠷᠢᠭᠰᠠᠨ ᠬᠡᠷᠡᠭ ᠤᠯᠠᠭᠠᠨ ᠣᠷᠣᠰ ᠲᠠᠢ ᠳᠤᠷᠠ ᠮᠡᠳᠡᠨ ᠬᠤᠤᠪᠢᠯᠳᠤᠭᠴᠢ ᠠᠷᠠᠳ ᠤ᠋ᠨ ᠨᠠᠮ᠂ ᠰᠦᠬᠡᠪᠠᠭᠠᠲᠤᠷ ᠢ᠋ ᠪᠠᠷᠠ ᠰᠤᠷᠠᠭ ᠦᠭᠡᠢ ᠪᠣᠯᠭᠠᠰᠤᠭᠠᠢ ᠭᠡᠨᠡ᠃ ᠠᠷᠤ ᠠ᠋ᠴᠠ ᠨᠢ ᠬᠡᠳᠦᠨ ᠬᠣᠨᠣᠭ ᠤ᠋ᠨ ᠳᠠᠷᠠᠭᠠ ᠪᠠᠷᠤᠨ ᠤᠩᠬᠧᠷᠠᠨ ᠤ᠋ ᠶᠡᠬᠡ ᠴᠡᠷᠢᠭ ᠬᠡᠳᠦᠨ ᠠᠷᠪᠠᠨ ᠤ᠋ ᠭᠠᠵᠠᠷ ᠢ᠋ ᠳᠠᠮᠨᠠᠨ ᠬᠦᠪᠦᠷᠡᠯᠳᠦᠵᠦ ᠤᠯᠠᠭᠠᠨ ᠣᠷᠣᠰ ᠢ᠋ ᠣᠷᠴᠢᠯᠠᠩ ᠳᠡᠯᠡᠬᠡᠢ ᠡᠴᠡ ᠠᠷᠴᠢᠨ ᠰᠥᠨᠥᠭᠡᠰᠦᠭᠡᠢ ᠬᠡᠮᠡᠬᠦ ᠶ᠋ᠢ ᠥᠭᠦᠯᠡᠬᠦ ᠶᠠᠭᠤᠨ᠃
ᠥᠭᠦᠯᠡᠬᠦ ᠨᠢ᠄ ᠪᠠᠶᠠᠷ ᠬᠦᠩ ᠵᠠᠭᠤᠨ ᠲᠠᠪᠢᠨ ᠬᠥᠮᠦᠨ ᠦ᠌ ᠪᠦᠷᠢᠯᠳᠦᠬᠦᠨ ᠲᠡᠢ ᠠᠩᠭᠢ ᠶ᠋ᠢᠨ ᠢ᠋ᠶ᠋ᠡᠨ ᠮᠠᠩᠯᠠᠢ ᠳ᠋ᠤ᠌ ᠠᠷᠢᠶᠠᠲᠠᠨ ᠬᠡᠯᠪᠡᠷᠢᠲᠦ ᠶᠠᠬᠢᠷ ᠶᠠᠨᠳᠠᠩ ᠲᠤᠷᠠᠩᠬᠠᠢ ᠬᠡᠭᠡᠷ ᠮᠣᠷᠢᠨ ᠳᠡᠭᠡᠷᠡ ᠮᠢᠬᠠᠯᠢᠭ ᠥᠷᠭᠡᠨ ᠴᠡᠭᠡᠵᠢ ᠪᠡᠨ ᠭᠡᠳᠡᠢᠰᠬᠢᠯᠭᠡᠨ ᠲᠡᠰᠢᠶᠡ ᠲᠤᠯᠤᠨ ᠰᠠᠭᠤᠵᠤ ᠤᠷᠢᠳᠠᠬᠢ ᠵᠠᠮ ᠢ᠋ᠶ᠋ᠠᠨ ᠴᠢᠭ ᠰᠢᠷᠲᠡᠨ ᠶᠠᠪᠤᠨᠠ᠃ ᠤᠨᠤᠭᠰᠠᠨ ᠮᠣᠷᠢ ᠥᠩᠭᠡ ᠦᠵᠡᠮᠵᠢ ᠪᠡᠷ ᠬᠡᠳᠦᠢ ᠮᠠᠭᠤ ᠪᠣᠯᠪᠠᠴᠤ ᠡᠵᠡᠨ ᠰᠣᠯᠢᠭᠳᠠᠬᠤ ᠶ᠋ᠢ ᠦᠯᠦ ᠮᠡᠳᠡᠨᠡ᠃ ᠤᠷᠤᠭᠰᠢ ᠤᠬᠤᠰᠬᠢᠨ ᠤᠰᠤᠨ ᠲᠡᠯᠮᠡᠨ ᠵᠢᠷᠣᠭᠠ ᠪᠠᠷ ᠲᠣᠭᠣᠰᠣ ᠬᠠᠲᠠᠭᠠᠬᠤ ᠳ᠋ᠤᠨᠢ ᠠᠯᠳᠠᠷᠲᠤ ᠬᠤᠷᠳᠤᠨ ᠮᠣᠷᠢᠳ ᠪᠣᠯᠪᠠᠴᠤ ᠡᠰᠡ ᠭᠦᠢᠴᠡᠨᠡ᠃ ᠪᠠᠶᠠᠷ ᠬᠦᠩ ᠦ᠋ᠨ ᠪᠡᠶᠡ ᠪᠡᠷ ᠦᠵᠡᠵᠦ ᠲᠤᠭᠤᠯᠤᠭᠰᠠᠨ ᠲᠡᠢᠨ ᠲᠤᠯᠤᠯᠳᠤᠭᠠᠨ ᠤ᠋ ᠵᠠᠮ ᠢ᠋ ᠲᠣᠭᠠᠴᠢᠪᠠᠯ ᠦᠯᠢᠭᠡᠷ ᠳᠣᠮᠣᠭ ᠤ᠋ᠨ ᠶᠠᠭᠤᠮᠠ ᠪᠣᠯᠤᠨ ᠬᠤᠪᠢᠷᠠᠬᠤ ᠠᠵᠢ᠃ ᠳᠡᠭᠡᠷᠡ ᠨᠢ ᠶᠠᠪᠤᠭᠠ ᠡᠵᠡᠨ ᠨᠢ ᠥᠯᠥᠰᠬᠦ᠂ ᠴᠠᠩᠭᠠᠬᠤ ᠲᠠᠭᠠᠷᠠᠬᠤ᠂ ᠶᠠᠳᠠᠷᠠᠬᠤ᠂ ᠠᠶᠤᠬᠤ᠂ ᠰᠠᠨᠳᠤᠷᠬᠤ ᠪᠦᠬᠦᠨ ᠡᠴᠡ ᠭᠠᠳᠠᠭᠤᠷ ᠲᠥᠷᠥᠭᠰᠡᠨ ᠣᠨᠴᠠᠭᠠᠢ ᠬᠥᠮᠦᠨ᠃ ᠬᠠᠷᠢᠨ ᠬᠠᠶᠠ ᠨᠢᠭᠡ ᠡᠪᠦᠷ ᠲᠡᠭᠡᠨ ᠭᠠᠷ ᠢ᠋ᠶ᠋ᠠᠨ ᠬᠢᠵᠦ ᠨᠢᠭᠡ ᠵᠦᠢᠯ ᠢ᠋ ᠰᠠᠮ ᠭᠠᠷᠭᠠᠨ ᠠᠮᠠ ᠤᠷᠤᠭᠤ ᠪᠠᠨ ᠰᠢᠳᠡᠬᠦ ᠮᠥᠷᠲᠡᠭᠡᠨ ᠲᠦᠪᠦᠩᠬᠢ ᠪᠡᠨ ᠮᠠᠭᠠᠵᠢᠬᠤ ᠪᠠᠢᠳᠠᠯ ᠢ᠋ᠶ᠋ᠠᠷ ᠬᠡᠳᠦ ᠳᠠᠬᠢᠨ ᠳᠣᠷᠣᠭᠰᠢ ᠰᠢᠪᠲᠤᠷᠬᠤ ᠨᠢ ᠬᠠᠷᠠ ᠲᠠᠮᠠᠬᠢ᠃ ᠬᠥᠮᠦᠨ ᠬᠠᠷᠠ ᠲᠠᠮᠠᠬᠢ ᠶ᠋ᠢ ᠭᠠᠩᠰᠠ ᠪᠠᠷ ᠲᠠᠲᠠᠬᠤ᠂ ᠡᠰᠡᠬᠦᠯᠡ ᠮᠢᠬᠠ ᠴᠢᠰᠤ ᠤᠷᠤᠭᠤ ᠪᠠᠨ ᠭᠤᠤᠷᠰᠤᠲᠤ ᠵᠡᠭᠦᠦ ᠰᠢᠪᠠᠨ ᠳᠠᠮᠵᠢᠭᠤᠯᠤᠨ ᠬᠡᠷᠡᠭᠯᠡᠳᠡᠭ ᠪᠠᠢᠬᠤ ᠳ᠋ᠤ᠌᠂ ᠪᠠᠶᠠᠷ ᠬᠦᠩ ᠪᠢᠴᠢᠬᠠᠨ ᠷᠢᠯᠦ ᠬᠢᠨ ᠵᠠᠯᠭᠢᠨᠠ᠃ ᠡᠨᠡ ᠬᠥᠮᠦᠨ ᠳ᠋ᠦ᠍ ᠡᠴᠢᠭᠡ ᠠᠯᠠᠭᠠ᠂ ᠡᠬᠡ ᠠᠯᠠᠭᠠ᠂ ᠡᠬᠡᠨᠡᠷ ᠬᠡᠦᠬᠡᠳ ᠴᠦ᠍ ᠪᠠᠢᠬᠤ ᠦᠭᠡᠢ᠂ ᠤᠷᠤᠭ ᠲᠥᠷᠥᠯ ᠭᠡᠪᠡᠯ ᠡᠷᠬᠡ ᠦᠭᠡᠢ ᠥᠪᠥᠷ ᠮᠣᠩᠭᠣᠯ ᠴᠠᠬᠠᠷ ᠨᠤᠲᠤᠭ ᠲᠤᠨᠢ ᠪᠠᠢᠳᠠᠭ ᠯᠠ ᠪᠣᠢ ᠊ᠢᠠ᠃ ᠲᠡᠷᠡ ᠨᠤᠲᠤᠭ ᠠ᠋ᠴᠠ ᠪᠠᠨ ᠬᠣᠷᠢᠨ ᠬᠡᠳᠦᠨ ᠵᠢᠯ ᠦ᠋ᠨ ᠡᠮᠦᠨᠡ ᠮᠠᠨᠵᠤ— ᠬᠢᠲᠠᠳ ᠤ᠋ᠨ ᠬᠠᠷᠭᠢᠰᠯᠠᠯ ᠤ᠋ᠨ ᠡᠰᠡᠷᠭᠦ ᠪᠣᠰᠤᠯᠭᠠ ᠶ᠋ᠢᠨ ᠬᠢᠨ ᠲᠡᠢ ᠪᠠᠬᠠᠨ ᠲᠤᠯᠤᠯᠳᠤᠵᠤ ᠶᠠᠪᠤᠭᠠᠳ ᠲᠣᠭᠲᠠᠬᠤ ᠲᠠᠢᠵᠢ ᠲᠠᠢ ᠨᠡᠢᠯᠡᠨ ᠬᠠᠯᠬᠠ ᠮᠣᠩᠭᠣᠯ ᠳ᠋ᠤ᠌ ᠣᠷᠣᠵᠤ ᠢᠷᠡᠭᠰᠡᠨ᠂ ᠮᠥᠨ ᠮᠣᠩᠭᠣᠯ ᠠᠦ᠋ᠲ᠋ᠣᠨᠣᠮᠢᠲᠤ ᠲᠥᠷᠥ ᠳ᠋ᠦ᠍ ᠠᠮᠢ ᠪᠡᠶᠡ ᠪᠠᠨ ᠬᠠᠢᠷᠠ ᠦᠭᠡᠢ ᠵᠢᠳᠬᠦᠭᠰᠡᠨ ᠨᠢ ᠶᠡᠷᠦ ᠪᠠᠭᠠ ᠪᠢᠰᠢ᠃ ᠡᠢᠨᠬᠦ ᠠᠮᠤᠷ ᠵᠠᠶᠠᠭᠠ ᠦᠵᠡᠯ ᠦᠭᠡᠢ ᠶᠠᠪᠤᠭᠰᠠᠭᠠᠷ《ᠮᠠᠨᠠᠢᠬᠢ》 ᠭᠡᠳ ᠣᠷᠣᠬᠤ ᠣᠷᠣᠨ ᠭᠡᠷ ᠲᠡᠢ ᠴᠦ᠍ ᠪᠣᠯᠵᠤ ᠴᠢᠳᠠᠭᠰᠠᠨ ᠦᠭᠡᠢ᠂ ᠶᠣᠰᠣᠲᠠᠢ ᠭᠣᠣᠨᠢ ᠪᠡᠶᠡ ᠭᠣᠵᠣᠩ ᠲᠣᠯᠣᠭᠠᠢ ᠯᠠ ᠬᠡᠪ ᠢ᠋ᠶ᠋ᠡᠷ᠃ ᠥᠪᠡᠷ ᠦ᠋ᠨ ᠪᠣᠳᠣᠯ ᠳ᠋ᠤ᠌《ᠨᠠᠮᠠᠶ᠋ᠢ ᠲᠦᠰᠢᠬᠦ ᠲᠥᠷᠥ ᠲᠤᠯᠭᠠᠭᠤᠷᠢᠳᠠᠬᠤ ᠡᠵᠡᠨ ᠡᠨᠳᠡ ᠯᠡ ᠪᠠᠢᠨᠠ᠃ ᠲᠡᠷᠡ ᠨᠢ ᠠᠷᠤ ᠮᠣᠩᠭᠣᠯ ᠮᠥᠨ》 ᠭᠡᠨᠡ᠃ ᠲᠡᠭᠡᠭᠡᠳ ᠣᠳᠣ ᠲᠡᠷᠡ ᠦᠢᠯᠡ ᠬᠡᠷᠡᠭ ᠲᠡᠭᠡᠨ ᠵᠢᠳᠬᠦᠵᠦ ᠶᠠᠪᠤᠭᠠ ᠨᠢ ᠡᠨᠡ ᠪᠢᠯᠡ᠃ ᠶᠡᠷᠦ ᠪᠠᠶᠠᠷ ᠬᠦᠩ ᠦᠭᠡ ᠳᠠᠭᠤᠨ ᠴᠥᠭᠡᠨ ᠲᠡᠢ ᠪᠣᠯᠤᠭᠠᠳ ᠶᠡᠬᠡᠮᠰᠦᠭ᠃ ᠢᠯᠠᠩᠭᠤᠶᠠ ᠠᠩᠭᠢ ᠶ᠋ᠢᠨ ᠢ᠋ᠶ᠋ᠡᠨ ᠮᠠᠩᠯᠠᠢ ᠳ᠋ᠤ᠌ ᠶᠠᠪᠤᠵᠤ ᠪᠠᠢᠭᠠ ᠳ᠋ᠠᠭᠠᠨ ᠲᠠᠭ ᠳᠠᠭᠤ ᠦᠭᠡᠢ᠂ ᠶᠡᠬᠡᠪᠴᠢᠯᠡᠨ ᠤᠷᠢᠳᠠᠬᠢ ᠵᠠᠮ ᠢ᠋ᠶ᠋ᠠᠨ ᠡᠭᠴᠡᠯᠡᠨ ᠰᠢᠷᠳᠡᠨᠡ᠃ ᠬᠠᠶᠠ ᠨᠢᠭᠡ ᠠᠭᠤᠷ ᠲᠠᠢ ᠨᠢᠳᠦ ᠪᠡᠷ ᠡᠷᠭᠢᠨ ᠬᠠᠷᠠᠬᠤ ᠳ᠋ᠠᠭᠠᠨ ᠡᠨᠡ ᠲᠡᠷᠡ ᠶ᠋ᠢ ᠨᠡᠪᠲᠡ ᠰᠢᠪᠲᠤ ᠠᠵᠢᠨ ᠪᠦᠷᠢᠳᠬᠡᠭᠡᠳ ᠠᠯᠢ ᠨᠢᠭᠡ ᠰᠡᠳᠬᠢᠯ ᠰᠠᠨᠠᠭᠠᠨ ᠳ᠋ᠤᠨᠢ ᠲᠠᠭᠠᠰᠢᠶᠠᠭᠳᠠᠬᠤ ᠦᠭᠡᠢ ᠵᠦᠢᠯ ᠢ᠋ ᠲᠣᠭᠠᠲᠠᠢᠬᠠᠨ ᠦᠭᠡ ᠪᠡᠷ ᠲᠤᠰᠢᠶᠠᠯ ᠥᠭᠭᠦᠨ᠂ ᠲᠣᠯᠣᠭᠠᠢ ᠳᠤᠮᠳᠠᠭᠤᠷ ᠰᠢᠪ ᠪᠠᠭᠤᠯᠭᠠᠨ ᠣᠷᠢᠶᠠᠯᠭᠠᠨᠠ᠃ ᠡᠭᠦᠨ ᠡᠴᠡ ᠨᠢ ᠠᠶᠤᠨ ᠴᠡᠴᠡᠷᠡᠬᠦ ᠦᠭᠡᠢ ᠬᠡᠨ ᠪᠠᠢᠬᠤ ᠪᠢᠯᠡ᠃ ᠤᠨᠤᠭᠰᠠᠨ ᠮᠣᠷᠢ ᠨᠢ ᠪᠣᠯᠪᠠᠴᠤ ᠡᠩ ᠦ᠋ᠨ ᠦᠶᠡ ᠳ᠋ᠡᠭᠡᠨ ᠤᠨᠲᠠᠭᠠ ᠰᠡᠷᠢᠭᠡ ᠬᠣᠶᠠᠷ ᠤ᠋ᠨ ᠬᠣᠭᠣᠷᠣᠨᠳᠣ ᠰᠠᠵᠢᠯᠠᠨ ᠶᠠᠪᠤᠬᠤ ᠠᠲᠠᠯᠠ ᠬᠡᠵᠢᠶᠡ《ᠴᠥᠬᠥ》 ᠭᠡᠬᠦ ᠴᠠᠭ ᠲᠤᠨᠢ ᠣᠭᠯᠣ ᠦᠰᠦᠷᠦᠨ ᠬᠠᠷᠠᠢᠯᠭᠠᠨᠠ᠃ ᠭᠡᠪᠡᠴᠦ ᠴᠡᠷᠢᠭ ᠦ᠋ᠳ ᠲᠡᠭᠡᠨ ᠮᠠᠭᠤ ᠪᠢᠰᠢ᠂ ᠬᠤᠯᠠᠭᠠᠢ ᠬᠤᠳᠠᠯ ᠬᠣᠶᠠᠷ ᠢ᠋ ᠴᠢᠩᠳᠠᠯᠠᠨ ᠴᠠᠭᠠᠵᠠᠯᠠᠭᠰᠠᠨ ᠠᠲᠠᠯᠠ ᠪᠠᠷᠢᠶᠠ ᠪᠠᠷᠢᠬᠤ ᠨᠡᠷᠡᠢᠳᠦᠯ ᠢ᠋ᠶ᠋ᠡᠷ ᠪᠦᠯᠢᠶᠡᠨ ᠳᠡᠭᠡᠷᠡᠮᠳᠡᠬᠦ ᠳ᠋ᠦ᠍ ᠪᠦᠷᠢᠨ ᠴᠢᠯᠥᠭᠡ ᠣᠯᠭᠣᠨᠠ᠃ ᠡᠢᠮᠦ ᠳ᠋ᠦ᠍ ᠡᠳᠦᠭᠡ ᠴᠡᠷᠢᠭ ᠦ᠋ᠳ ᠨᠢ ᠵᠠᠮ ᠤ᠋ᠨ ᠭᠣᠳᠣᠰ ᠲᠤ᠌ ᠳᠠᠭᠠᠷᠢᠯᠳᠤᠭᠰᠠᠨ ᠠᠢᠯ ᠠᠮᠢᠲᠠᠨ ᠠ᠋ᠴᠠ ᠡᠮᠡᠭᠡᠯ ᠬᠠᠵᠠᠭᠠᠷ᠂ ᠬᠣᠭᠣᠯᠠ ᠬᠦᠨᠡᠰᠦ᠂ ᠳᠡᠪᠡᠯ ᠬᠤᠪᠴᠠᠰᠤ ᠶ᠋ᠢ ᠳᠤᠷᠠ ᠮᠡᠳᠡᠨ ᠪᠦᠯᠢᠶᠡᠨ ᠠᠪᠤᠨᠠ᠃ ᠡᠵᠡᠨ ᠬᠥᠮᠦᠨ ᠲᠡᠢ ᠨᠢ ᠮᠠᠷᠭᠤᠭᠠᠨ ᠲᠡᠮᠡᠴᠡᠭᠡᠨ ᠪᠣᠯᠵᠤ ᠪᠠᠢᠬᠤ ᠶ᠋ᠢ ᠬᠠᠷᠠᠪᠠᠯ ᠪᠠᠶᠠᠷ ᠬᠦᠩ ᠶᠠᠬᠢᠷ ᠶᠠᠨᠳᠠᠩ ᠮᠣᠷᠢᠨ ᠳᠡᠭᠡᠷᠡ ᠪᠡᠨ ᠲᠡᠰᠢᠶᠡ ᠲᠤᠯᠤᠨ ᠬᠥᠨᠳᠡᠯᠡᠨ ᠰᠠᠭᠤᠵᠤ ᠢᠳᠡ ᠪᠠᠬᠠ ᠲᠠᠪᠠ ᠪᠣᠯᠭᠠᠬᠤ ᠠ᠋ᠴᠠ ᠪᠢᠰᠢ ᠴᠡᠷᠢᠭ ᠦ᠋ᠳ ᠲᠦ᠍ ᠪᠤᠷᠤᠭᠤ ᠦᠯᠦ ᠥᠭᠭᠦᠨᠡ᠃ ᠵᠠᠷᠢᠮ ᠴᠡᠷᠢᠭ ᠦ᠋ᠳ ᠲᠡᠷᠡ ᠲᠠᠭᠠᠲᠠᠢ ᠪᠠᠢᠳᠠᠯ ᠢ᠋ ᠨᠢ ᠳᠠᠯᠢᠮᠳᠠᠭᠤᠯᠤᠨ ᠪᠤᠷᠬᠠᠨ ᠲᠠᠬᠢᠯ ᠤ᠋ᠨ ᠬᠡᠷᠡᠭᠯᠡᠯ᠂ ᠡᠬᠡᠨᠡᠷ ᠬᠡᠦᠬᠡᠳ ᠦ᠋ᠨ ᠵᠡᠭᠦᠯᠲᠡ ᠴᠢᠮᠡᠭᠯᠡᠯ ᠳ᠋ᠦ᠍ ᠬᠦᠷᠲᠡᠯᠡ ᠬᠠᠯᠳᠠᠨ ᠣᠷᠣᠵᠤ᠂ ᠡᠪᠦᠷ ᠲᠦᠷᠡᠢ ᠤᠷᠤᠭᠤ ᠪᠠᠨ ᠬᠢᠵᠦ ᠶᠠᠪᠤᠨᠠ᠃ ᠡᠳᠡᠨ ᠦ᠌ ᠳᠤᠮᠳᠠ ᠳ᠋ᠠᠨᠽᠠᠨ ᠶᠠᠪᠤᠭᠠ ᠪᠢᠯᠡ᠃ ᠲᠡᠷᠡ ᠨᠢᠭᠡ ᠡᠳᠦᠷ ᠪᠣᠭᠳᠠ ᠳ᠋ᠤ᠌ ᠮᠥᠷᠭᠥᠨ ᠵᠠᠷᠯᠢᠭ ᠯᠦᠩᠲᠠᠩ ᠬᠦᠷᠲᠡᠨ ᠤᠷᠭᠤᠨ ᠵᠠᠢᠯᠠᠬᠤ ᠪᠣᠳᠣᠯ ᠢ᠋ᠶ᠋ᠠᠨ ᠬᠣᠯᠠ ᠶ᠋ᠢᠨ ᠬᠣᠯᠠ ᠳ᠋ᠤ᠌ ᠲᠠᠶᠠᠭᠳᠠᠵᠤ᠂ ᠠᠴᠢᠲᠤ ᠪᠣᠭᠳᠠ ᠬᠠᠭᠠᠨᠲᠠᠨ ᠳ᠋ᠠᠭᠠᠨ ᠡᠨᠡ ᠶᠠᠪᠤᠭᠠ ᠪᠠ ᠬᠣᠢᠲᠤ ᠨᠠᠰᠤ ᠬᠣᠶᠠᠷ ᠢ᠋ᠶ᠋ᠠᠨ ᠵᠣᠷᠢᠭᠤᠯᠰᠤᠭᠠᠢ ᠭᠡᠵᠡᠢ᠃ ᠲᠡᠭᠡᠭᠡᠳ ᠣᠳᠣ ᠲᠥᠪ ᠲᠦᠪᠰᠢᠨ ᠢ᠋ ᠪᠠᠷᠢᠬᠤ ᠶ᠋ᠢ ᠬᠢᠴᠢᠶᠡᠩᠭᠦᠢᠯᠡᠨ ᠬᠠᠵᠠᠭᠤ ᠶ᠋ᠢᠨ ᠨᠥᠬᠥᠳ ᠦ᠋ᠨ ᠳᠣᠭᠰᠢᠨ ᠰᠢᠷᠦᠭᠦᠨ ᠠᠪᠤᠷᠢ ᠠᠭᠠᠰᠢ ᠶ᠋ᠢ ᠦᠯᠦ ᠳᠠᠭᠤᠷᠢᠶᠠᠨᠠ᠃ ᠠᠢᠯ ᠠᠮᠢᠲᠠᠨ ᠤ᠋ ᠶᠠᠭᠤᠮᠠ ᠶ᠋ᠢ ᠪᠦᠯᠢᠶᠡᠨ ᠳᠡᠭᠡᠷᠡᠮᠳᠡᠬᠦ ᠶ᠋ᠢ ᠪᠦᠷ ᠴᠦ᠍ ᠴᠡᠭᠡᠷᠯᠡᠨᠡ᠃ ᠥᠰᠴᠦ ᠲᠥᠷᠥᠭᠰᠡᠨ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠳᠤᠮᠳᠠᠭᠤᠷ ᠶᠠᠪᠤᠵᠤ ᠪᠠᠢᠬᠤ ᠳ᠋ᠠᠭᠠᠨ ᠴᠤ᠌ ᠣᠷᠣᠨ ᠭᠡᠷ ᠭᠡᠬᠦ ᠪᠡᠷ ᠶᠠᠭᠤᠮᠠ ᠦᠭᠡᠢ ᠪᠣᠯᠤᠭᠰᠠᠨ ᠢ᠋ ᠮᠡᠳᠡᠭᠰᠡᠨ ᠰᠢᠭ ᠶᠡᠷᠦ ᠠᠵᠢᠭ ᠦᠭᠡᠢ《ᠤᠴᠠᠷᠠᠬᠤ ᠳᠠᠢᠰᠤᠨ ᠢ᠋ ᠣᠷᠣ ᠮᠥᠷ ᠦᠭᠡᠢ ᠪᠣᠯᠭᠠᠨ᠂ ᠤᠯᠤᠰ ᠣᠷᠣᠨ ᠢ᠋ᠶ᠋ᠠᠨ ᠲᠦᠪᠰᠢᠳᠬᠡᠭᠰᠡᠨ ᠲᠡᠷᠡ ᠴᠠᠭ ᠲᠤ᠌ ᠠᠢ ᠳᠠ ᠠᠴᠢᠲᠤ ᠪᠤᠭᠤᠷᠤᠯ ᠡᠬᠡ᠂ ᠡᠨᠡᠷᠢᠯᠲᠦ ᠬᠥᠭᠡᠷᠦᠬᠦᠢ ᠡᠭᠡᠴᠢ ᠬᠣᠶᠠᠷ ᠲᠠᠢ ᠪᠠᠨ ᠠᠶᠠᠨᠳᠠᠭᠠᠨ ᠠᠭᠤᠯᠵᠠᠵᠤ ᠪᠠᠶᠠᠷ ᠤ᠋ᠨ ᠮᠠᠩᠨᠠᠢ ᠲᠡᠨᠢᠢᠬᠦ ᠪᠢᠵᠡ᠃ ᠲᠡᠷᠡ ᠴᠦ᠍ ᠪᠠᠢᠲᠤᠭᠠᠢ ᠵᠢᠷᠦᠬᠡᠨ ᠦ᠌ ᠤᠭ ᠲᠤ᠌ ᠪᠦᠬᠦᠨ ᠡᠴᠡ ᠨᠢᠭᠤᠴᠠ ᠬᠠᠳᠠᠭᠠᠰᠤ ᠲᠠᠢ ᠠᠮᠠᠷᠠᠭ ᠲᠠᠢ ᠪᠠᠨ ᠴᠤ᠌ ᠨᠡᠢᠯᠡᠨ ᠠᠵᠤ ᠲᠥᠷᠥᠨ ᠠᠮᠢᠳᠤᠷᠠᠬᠤ ᠪᠣᠯᠤᠨᠠ》 ᠭᠡᠳ ᠡᠪᠦᠷ ᠲᠡᠭᠡᠨ ᠶᠠᠪᠤᠬᠤ ᠬᠡᠳᠦᠨ ᠬᠣᠪ ᠠᠯᠲᠠᠨ ᠰᠢᠷᠠᠮᠠᠯ ᠡᠭᠡᠮᠦᠭ ᠵᠡᠷᠭᠡ ᠪᠡᠨ ᠭᠡᠭᠡᠴᠢᠬᠡᠬᠦ ᠦᠭᠡᠢ᠂ ᠠᠯᠳᠠᠴᠢᠬᠠᠬᠤ ᠦᠭᠡᠢ ᠶᠠᠪᠤᠬᠤ ᠶ᠋ᠢ ᠬᠢᠴᠢᠶᠡᠨᠡ᠃
ᠪᠠᠶᠠᠷ ᠬᠦᠩ ᠬᠢᠶᠠᠭᠲᠤ ᠬᠣᠶᠠᠷ ᠥᠷᠲᠡᠭᠡ ᠬᠢᠷᠢᠲᠡᠢ ᠣᠢᠷᠠᠲᠤᠨ ᠢᠷᠡᠭᠰᠡᠨ ᠢ᠋ᠶ᠋ᠡᠨ ᠵᠠᠮ ᠪᠤᠷᠤᠭᠤᠯᠠᠨ ᠵᠡᠭᠦᠨ ᠬᠣᠢᠰᠢ ᠴᠢᠭᠯᠡᠪᠡ᠃ ᠶᠡᠬᠡᠪᠴᠢᠯᠡᠨ ᠪᠢᠲᠡᠭᠦᠦ ᠰᠢᠭᠤᠢ ᠨᠠᠷᠠᠰᠤᠨ ᠣᠢ ᠳᠤᠮᠳᠠᠭᠤᠷ ᠵᠠᠮᠨᠠᠨ ᠶᠠᠪᠤᠨᠠ᠃ ᠵᠠᠭᠤᠷᠠ ᠬᠣᠨᠣᠭᠰᠠᠨ ᠤ᠋ ᠪᠠᠨ ᠮᠠᠷᠭᠠᠰᠢ ᠬᠢᠶᠠᠭᠲᠤ ᠬᠣᠲᠠ ᠶ᠋ᠢᠨ ᠵᠡᠭᠦᠨ ᠬᠣᠢᠲᠤᠬᠢ ᠪᠦᠷᠭᠦᠳ ᠲᠡᠢ ᠠᠭᠤᠯᠠ ᠶ᠋ᠢᠨ ᠵᠡᠭᠦᠨ ᠰᠤᠭᠤ ᠳ᠋ᠤ᠌ ᠢᠷᠡᠭᠰᠡᠨ ᠢ᠋ᠶ᠋ᠡᠨ ᠪᠠᠷᠠᠭᠤᠨ ᠲᠡᠢᠰᠢ ᠡᠷᠭᠢᠨ ᠮᠥᠨ ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠳ᠋ᠤ᠌ ᠭᠠᠷᠴᠠᠢ᠃ ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠠ᠋ᠴᠠ ᠠᠷᠤ ᠥᠪᠥᠷ ᠬᠣᠶᠠᠷ ᠬᠢᠶᠠᠭᠲᠤ ᠢᠪ ᠢᠯᠡᠬᠡᠨ᠂ ᠪᠠᠶᠠᠷ ᠬᠦᠩ ᠳᠣᠣᠷᠠᠲᠤ ᠬᠣᠶᠠᠷ ᠳᠠᠷᠤᠭᠠ ᠲᠠᠢ ᠪᠠᠨ ᠴᠡᠷᠢᠭ ᠦ᠋ᠳ ᠡᠴᠡ ᠪᠡᠨ ᠲᠦᠷᠦᠭᠦᠯᠡᠨ ᠭᠠᠷᠤᠭᠰᠠᠨ ᠢ᠋ᠶ᠋ᠠᠨ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠵᠤ᠂ ᠨᠣᠭᠣᠭᠠᠨ ᠰᠣᠷᠣᠭᠤᠯ ᠲᠠᠢ ᠭᠠᠩᠰᠠ ᠳ᠋ᠠᠭᠠᠨ ᠲᠠᠮᠠᠬᠢ ᠨᠠᠷᠠᠨ ᠲᠠᠲᠠᠵᠤ᠂ ᠬᠣᠶᠠᠷ ᠬᠢᠶᠠᠭᠲᠤ ᠶ᠋ᠢ ᠨᠠᠷᠢᠪᠴᠢᠯᠠᠨ ᠠᠵᠢᠭᠯᠠᠨᠠ᠃ ᠣᠨᠴᠠᠯᠠᠪᠠᠯ ᠥᠪᠥᠢ ᠬᠢᠶᠠᠭᠲᠤ ᠬᠥᠯ ᠬᠥᠳᠡᠯᠭᠡᠭᠡᠨ ᠦᠭᠡᠢ᠂ ᠡᠨᠳᠡ ᠴᠣᠬᠣᠮ ᠶᠠᠭᠤ ᠲᠠᠢ ᠪᠠᠨ ᠪᠠᠢᠯᠳᠤᠬᠤ ᠪᠢᠯᠡ ᠭᠡᠮᠡᠷ ᠬᠠᠷᠠᠭᠳᠠᠨᠠ᠃
— ᠦᠭᠡᠢ ᠡᠨᠳᠡ ᠴᠢᠨᠢ ᠴᠡᠷᠢᠭ ᠭᠡᠮᠡᠷ ᠶᠠᠭᠤᠮᠠ ᠦᠭᠡᠢ ᠰᠢᠪ ᠳᠡ ᠭᠡᠵᠦ ᠨᠢᠭᠡ ᠳᠠᠷᠤᠭᠠ ᠶ᠋ᠢᠨ ᠥᠭᠦᠯᠡᠬᠦ ᠳ᠋ᠦ᠍ ᠪᠠᠶᠠᠷ ᠬᠦᠩ᠄
— ᠪᠠᠢᠯᠭᠦᠢ ᠶᠠᠭᠠᠬᠢᠬᠤᠪ! ᠭᠡᠵᠦ ᠣᠭᠵᠣᠮ ᠬᠠᠷᠢᠭᠤᠯᠪᠠ᠃
ᠨᠥᠭᠦᠭᠡ ᠳᠠᠷᠤᠭᠠ ᠠ᠋ᠴᠠ᠄
— ᠳᠠᠭᠠᠷᠢᠨ ᠣᠷᠣᠪᠠᠯ ᠶᠠᠭᠠᠬᠢᠭᠰᠠᠨ ᠶᠤᠮ ᠪᠣᠢ? ᠭᠡᠰᠡᠨ ᠳ᠋ᠦ᠍᠄
— ᠬᠠᠰᠢᠷ ᠬᠡᠷᠡᠭᠲᠡᠢ! ᠭᠡᠳ ᠭᠠᠭᠴᠠ ᠨᠢᠳᠦᠨ ᠦ᠌ ᠳᠤᠷᠠᠨ ᠨᠢᠳᠦᠨ ᠳ᠋ᠡᠭᠡᠨ ᠠᠪᠠᠴᠢᠨ ᠰᠤᠩᠭᠠᠪᠠ᠃ ᠬᠣᠶᠠᠷ ᠳᠠᠷᠤᠭᠠ ᠶ᠋ᠢᠨ ᠰᠡᠳᠬᠢᠯ ᠳ᠋ᠦ᠍ ᠳᠠᠭᠠᠷᠢᠨ ᠣᠷᠣᠬᠤ ᠪᠣᠳᠣᠯ ᠭᠦᠨᠵᠡᠭᠡᠢᠷᠡᠨ ᠡᠷᠭᠢᠯᠳᠦᠵᠦ ᠪᠠᠢᠬᠤ ᠳ᠋ᠤ᠌ ᠪᠠᠶᠠᠷ ᠬᠦᠩ ᠬᠠᠰᠢᠷᠯᠠᠬᠤ ᠬᠡᠷᠡᠭᠲᠡᠢ! ᠭᠡᠵᠦ ᠳᠠᠪᠲᠠᠨ ᠥᠭᠦᠯᠡᠭᠡᠳ ᠲᠠᠪᠢᠨ ᠴᠡᠷᠢᠭ ᠥᠳᠥᠭᠡᠨ ᠲᠤᠷᠰᠢᠬᠤ ᠶ᠋ᠢ ᠲᠤᠰᠢᠶᠠᠪᠠ᠃
ᠬᠣᠶᠠᠷ ᠳᠠᠷᠤᠭᠠ ᠶ᠋ᠢᠨ ᠨᠢᠭᠡ ᠨᠢ ᠲᠤᠰᠢᠶᠠᠯ ᠭᠦᠢᠴᠡᠳᠬᠡᠬᠦ ᠪᠡᠷ ᠶᠠᠪᠤᠪᠠ᠃ ᠲᠠᠪᠢᠨ ᠴᠡᠷᠢᠭ ᠢ᠋ ᠶᠠᠪᠠᠭᠠᠯᠠᠨ ᠠᠭᠤᠯᠠᠨ ᠠ᠋ᠴᠠ ᠪᠠᠭᠤᠯᠭᠠᠵᠤ ᠫᠤᠤ ᠫᠠᠴᠢᠭᠢᠨᠠᠭᠤᠯᠤᠨ ᠲᠤᠷᠰᠢᠬᠤ ᠳ᠋ᠤ᠌ ᠬᠢᠶᠠᠭᠲᠤ ᠬᠣᠲᠠ ᠨᠠᠮ ᠲᠠᠢᠪᠤᠩ ᠢ᠋ᠶ᠋ᠠᠷ ᠪᠠᠢᠬᠤ ᠪᠣᠯᠪᠠᠴᠤ ᠬᠠᠰᠢᠶᠠ ᠬᠣᠷᠢᠶᠠᠨ ᠤ᠋ ᠵᠠᠪᠰᠠᠷ ᠵᠠᠭᠠᠯᠠᠬᠠᠢ ᠠ᠋ᠴᠠ ᠬᠠᠷᠢᠭᠤ ᠫᠤᠤᠳᠠᠬᠤ ᠠᠵᠢ᠃ ᠲᠡᠭᠦᠨ ᠢ᠋ ᠪᠠᠶᠠᠷ ᠬᠦᠩ ᠰᠢᠮᠳᠠᠭᠠᠢᠯᠠᠨ ᠠᠵᠢᠭᠯᠠᠭᠠᠳ᠄
— ᠪᠢᠳᠡᠨ ᠦ᠌ ᠢᠷᠡᠬᠦ ᠶ᠋ᠢ ᠠᠯᠢ ᠬᠡᠳᠦᠢᠨ ᠮᠡᠳᠡᠨ ᠬᠦᠯᠢᠶᠡᠵᠦ ᠪᠠᠢᠭᠠ ᠪᠢᠵᠡ ᠭᠡᠵᠦ ᠠᠮᠠᠨ ᠳ᠋ᠠᠭᠠᠨ ᠬᠦᠩᠭᠢᠨᠡᠭᠡᠳ ᠡᠰᠡᠷᠭᠦ ᠫᠤᠤᠳᠠᠬᠤ ᠫᠤᠤ ᠶ᠋ᠢᠨ ᠳᠠᠭᠤ ᠶ᠋ᠢ ᠴᠢᠬᠢ ᠲᠠᠯᠪᠢᠨ ᠴᠢᠩᠨᠠᠬᠤ ᠳ᠋ᠠᠭᠠᠨ᠂ ᠳᠠᠩ ᠣᠷᠣᠰ ᠸᠢᠨᠲ᠋ᠣᠸ ᠵᠡᠪᠰᠡᠭ ᠲᠡᠢ ᠤᠯᠤᠰ ᠪᠠᠢᠨᠠ ᠭᠡᠵᠦ ᠶᠠᠭ ᠬᠡᠯᠡᠪᠡ᠃ ᠡᠭᠦᠨᠴᠡ ᠭᠠᠳᠠᠨᠠ ᠪᠠᠶᠠᠷ ᠬᠦᠩ ᠬᠢᠶᠠᠭᠲᠤ ᠳ᠋ᠤ᠌ ᠪᠠᠢᠭᠠ ᠪᠦᠬᠦ ᠠᠭᠲᠠ ᠮᠣᠷᠢᠳ ᠢ᠋ ᠲᠣᠭᠠᠯᠠᠨᠠ᠃ ᠴᠣᠬᠣᠮ ᠬᠡᠴᠢᠨᠡᠭᠡᠨ ᠴᠡᠷᠢᠭ ᠪᠠᠢᠭᠠ ᠶ᠋ᠢ ᠮᠡᠳᠡᠬᠦ ᠭᠡᠬᠦ ᠳ᠋ᠡᠭᠡᠨ ᠪᠠᠶᠠᠷ ᠬᠦᠩ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠴᠡᠷᠢᠭ ᠦ᠋ᠳ ᠢ᠋ ᠨᠢᠭᠡ ᠳᠠᠪᠰᠢᠭᠤᠯᠵᠤ᠂ ᠨᠢᠭᠡ ᠤᠬᠤᠷᠢᠭᠤᠯᠵᠤ ᠲᠤᠷᠰᠢᠭᠠᠳ᠂ ᠵᠠᠭᠤᠨ ᠲᠠᠪᠢ ᠠ᠋ᠴᠠ ᠬᠡᠲᠦᠷᠡᠬᠦ ᠦᠭᠡᠢ ᠶ᠋ᠢ ᠮᠡᠳᠡᠵᠡᠢ᠃ ᠲᠡᠷᠡ ᠳᠤᠮᠳᠠ ᠨᠢᠭᠡ ᠬᠥᠮᠦᠨ ᠦ᠌ ᠬᠡᠳᠦ ᠳᠠᠬᠢᠨ ᠳᠠᠮᠵᠢᠨ ᠭᠦᠶᠦᠬᠦ ᠶ᠋ᠢ ᠠᠵᠢᠭᠠᠳ᠄
— ᠴᠢ ᠠᠵᠢᠭᠯᠠᠵᠤ ᠠᠪ! ᠲᠡᠷᠡ ᠪᠣᠯ ᠰᠦᠬᠡᠪᠠᠭᠠᠲᠤᠷ ᠭᠡᠪᠡ᠃
ᠬᠠᠵᠠᠭᠤ ᠶ᠋ᠢᠨ ᠳᠠᠷᠤᠭᠠ《ᠵᠠ》 ᠭᠡᠬᠦ ᠪᠣᠯᠪᠠᠴᠤ ᠣᠳᠣ ᠪᠠᠷ ᠨᠢᠳᠦᠨ ᠦ᠌ ᠬᠠᠷᠠᠭᠠ ᠬᠤᠷᠴᠠᠯᠢᠭ ᠨᠢᠳᠦᠯᠡᠵᠦ ᠴᠢᠳᠠᠬᠤ ᠦᠭᠡᠢ ᠳ᠋ᠡᠭᠡᠨ ᠬᠠᠷᠠᠮᠰᠠᠵᠤ᠄
— ᠲᠠ ᠲᠡᠷᠡ ᠬᠥᠮᠦᠨ ᠢ᠋ ᠰᠦᠬᠡᠪᠠᠭᠠᠲᠤᠷ ᠭᠡᠵᠦ ᠶᠠᠭᠠᠬᠢᠵᠤ ᠲᠠᠨᠢᠪᠠ?
— ᠪᠢ ᠬᠠᠭᠤᠴᠢᠨ ᠲᠠᠨᠢᠳᠠᠭ ᠶᠤᠮ᠃ ᠳᠡᠭᠡᠷᠡ ᠴᠠᠭ ᠲᠤ᠌ ᠬᠤᠵᠢᠷᠪᠤᠯᠤᠩ ᠳ᠋ᠤ᠌ ᠮᠢᠨᠦ ᠬᠣᠷᠢᠶᠠᠨ ᠳ᠋ᠤ᠌ ᠪᠠᠭᠠ ᠳᠠᠷᠤᠭᠠ ᠪᠠᠢᠭᠰᠠᠨ ᠶᠤᠮ ᠭᠡᠵᠦ ᠪᠠᠶᠠᠷ ᠬᠦᠩ ᠲᠡᠢᠮᠦ ᠴᠤᠤᠲᠠᠨ ᠡᠷᠡ ᠶ᠋ᠢ ᠵᠠᠬᠢᠷᠴᠤ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠪᠠᠬᠠᠷᠠᠯ ᠪᠣᠯᠭᠠᠬᠤ ᠮᠡᠲᠦ ᠢᠨᠢᠶᠡᠮᠰᠦᠭᠯᠡᠨ ᠥᠭᠦᠯᠡᠪᠡ᠃
— ᠲᠡᠭᠡᠪᠡᠯ ᠡᠨᠡ ᠬᠥᠮᠦᠨ ᠣᠳᠣ ᠲᠠᠨ ᠤ᠋ ᠭᠠᠷ ᠠ᠋ᠴᠠ ᠭᠠᠷᠬᠤ ᠦᠭᠡᠢ ᠳᠡ ᠭᠡᠬᠦ ᠳ᠋ᠦ᠍᠄
— ᠪᠢᠲᠡᠭᠡᠢ ᠪᠠᠰᠤ ᠭᠡᠵᠦ ᠤᠴᠠᠭᠠᠷᠯᠠᠭᠠᠳ᠄ ᠥᠨᠥᠳᠥᠷ ᠦ᠋ᠨ ᠬᠡᠷᠡᠭ ᠭᠦᠢᠴᠡᠯᠡ! ᠭᠡᠳ ᠲᠠᠢᠪᠤᠩ ᠢ᠋ᠶ᠋ᠠᠷ ᠪᠣᠰᠪᠠ᠃
ᠲᠡᠨᠳᠡ ᠡᠴᠡ ᠪᠠᠶᠠᠷ ᠬᠦᠩ ᠪᠦᠬᠦ ᠴᠡᠷᠢᠭ ᠢ᠋ᠶ᠋ᠡᠨ ᠲᠡᠳᠡᠨ ᠠᠪᠴᠤ ᠵᠡᠭᠦᠨ ᠤᠷᠤᠭᠰᠢ ᠴᠢᠭᠯᠡᠪᠡ᠃ ᠰᠠᠶᠢ ᠶ᠋ᠢᠨ ᠪᠣᠯᠤᠭᠰᠠᠨ ᠶᠠᠪᠤᠳᠠᠯ ᠲᠡᠭᠦᠨ ᠳ᠋ᠦ᠍ ᠶᠠᠭᠤ ᠴᠦ᠍ ᠪᠢᠰᠢ᠂ ᠶᠠᠰᠤᠨ ᠬᠡᠳᠡᠷᠭᠡ ᠨᠢᠷᠤᠭᠤ ᠲᠠᠢ ᠮᠣᠷᠢᠨ ᠳᠡᠭᠡᠷᠡ ᠪᠡᠨ ᠲᠠᠰᠢᠶᠠ ᠲᠤᠯᠤᠨ ᠰᠠᠭᠤᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠠᠭᠤᠨ ᠠᠮᠤᠭᠤᠯᠠᠩ ᠲᠠᠢᠪᠤᠩ ᠰᠠᠵᠢᠯᠠᠭᠤᠯᠤᠨᠠ᠃ ᠤᠷᠢᠳ ᠰᠥᠨᠢ ᠪᠠᠷᠤᠭ ᠨᠣᠢᠷ ᠦᠭᠡᠢ ᠬᠣᠨᠣᠭᠰᠠᠨ ᠳ᠋ᠠᠭᠠᠨ ᠪᠡᠶᠡ ᠴᠢᠯᠡᠭᠡᠷᠬᠡᠬᠦ ᠠᠵᠢ᠃ ᠠᠮᠠ ᠪᠠᠨ ᠨᠢᠭᠡᠨᠲᠡ ᠶᠡᠬᠡᠳᠡ ᠠᠩᠭᠠᠢᠯᠭᠠᠨ ᠲᠤᠬᠠᠲᠠᠢᠬᠠᠨ ᠡᠪᠰᠢᠶᠡᠯᠭᠡᠭᠰᠡᠨ ᠢ᠋ᠶ᠋ᠡᠨ ᠡᠪᠦᠷ ᠲᠡᠭᠡᠨ ᠭᠠᠷ ᠬᠢᠨ ᠲᠡᠮᠲᠡᠴᠢᠨᠡ᠃ ᠡᠨᠡ ᠨᠢ ᠬᠥᠬᠦᠦᠷ ᠦ᠋ᠨ ᠳᠠᠯᠢᠩ ᠳ᠋ᠤ᠌ ᠬᠢᠭᠰᠡᠨ ᠣᠯᠠᠨ ᠵᠢᠵᠢᠭ ᠬᠠᠷᠠ ᠲᠠᠮᠠᠬᠢ ᠶ᠋ᠢᠨ ᠷᠢᠯᠦ ᠨᠦ᠍ᠭᠦᠳ ᠡᠴᠡ ᠨᠢᠭᠡ ᠶ᠋ᠢ ᠠᠪᠤᠭᠰᠠᠨ ᠬᠡᠷᠡᠭ ᠪᠥᠭᠡᠳ ᠲᠡᠭᠦᠨ ᠢ᠋ᠶ᠋ᠡᠨ ᠠᠪᠤᠨ ᠳᠠᠬᠢᠨ ᠡᠪᠰᠢᠶᠡᠯᠭᠡᠬᠦ ᠳᠦᠷᠢᠮ ᠦᠵᠡᠭᠦᠯᠦᠩᠭᠦᠲᠡ ᠪᠡᠨ ᠠᠮᠠ ᠤᠷᠤᠭᠤ ᠪᠠᠨ ᠰᠢᠳᠡᠭᠡᠳ ᠬᠣᠢᠨᠠ ᠠ᠋ᠴᠠ ᠨᠢ ᠬᠣᠭᠣᠯᠠᠢ ᠪᠠᠨ ᠬᠡᠳᠦ ᠳᠠᠬᠢᠨ ᠳᠣᠷᠣᠭᠰᠢ ᠰᠢᠪᠲᠤᠷᠠᠨᠠ᠃ ᠬᠡᠳᠦᠨ ᠮᠢᠨᠦ᠋ᠲ ᠦ᠋ᠨ ᠳᠠᠷᠠᠭᠠ ᠬᠦᠴᠦ ᠲᠠᠮᠢᠷ ᠵᠠᠯᠭᠠᠬᠤ ᠠᠵᠢ᠃ ᠨᠢᠳᠦ ᠰᠡᠷᠭᠦᠨ ᠡᠮᠡᠭᠡᠯ ᠳᠡᠭᠡᠷᠡ ᠪᠡᠨ ᠥᠨᠳᠡᠢᠵᠦ ᠮᠢᠨᠦ ᠬᠣᠢᠨᠠ ᠠ᠋ᠴᠠ ᠬᠤᠷᠳᠤᠯᠠᠭᠠᠳ ᠭᠡᠵᠦ ᠬᠠᠰᠬᠢᠷᠤᠨ ᠮᠣᠷᠢ ᠳᠠᠪᠢᠷᠠᠨᠠ᠃
ᠡᠨᠡ ᠣᠷᠣᠢ ᠪᠠᠶᠠᠷ ᠬᠦᠩ ᠴᠡᠷᠢᠭ ᠦ᠋ᠳ ᠢ᠋ᠶ᠋ᠡᠨ ᠣᠢ ᠶ᠋ᠢᠨ ᠴᠤᠭᠤᠷᠬᠠᠢ ᠳ᠋ᠤ᠌ ᠠᠪᠠᠴᠢᠨ ᠪᠠᠭᠤᠳᠠᠯᠯᠠᠭᠤᠯᠵᠤ᠂ ᠬᠣᠭᠣᠯᠠ ᠤᠮᠳᠠ ᠶ᠋ᠢ ᠨᠢ ᠲᠠᠪᠠᠲᠠᠢ ᠢᠳᠡᠭᠦᠯᠵᠦ᠂ ᠡᠷᠲᠡ ᠤᠨᠲᠠᠭᠤᠯᠵᠤ ᠠᠮᠠᠷᠠᠭᠤᠯᠪᠠ᠃ ᠥᠷᠯᠥᠭᠡ ᠥᠪᠡᠷ ᠢ᠋ᠶ᠋ᠡᠨ ᠦᠷ ᠴᠥᠷ ᠢ᠋ᠶ᠋ᠡᠷ ᠪᠣᠰᠤᠨ ᠪᠦᠭᠦᠳᠡ ᠶ᠋ᠢ ᠰᠡᠷᠭᠦᠭᠡᠵᠦ ᠪᠤᠰᠬᠠᠪᠠ᠃ ᠥᠷᠯᠥᠭᠡᠨ ᠦ᠌ ᠤᠮᠳᠠ ᠤᠤᠭᠤᠬᠤ ᠶ᠋ᠢ ᠲᠠᠰᠤ ᠬᠣᠷᠢᠭᠯᠠᠨ ᠤᠯᠤᠰ ᠠᠮᠢᠲᠠᠨ ᠢ᠋ᠶ᠋ᠠᠨ ᠴᠤᠭᠯᠠᠭᠤᠯᠵᠤ᠂ ᠳᠠᠢᠰᠤᠨ ᠢ᠋ᠶ᠋ᠠᠨ ᠬᠡᠷᠬᠢᠨ ᠴᠣᠬᠢᠬᠤ ᠭᠡᠵᠦ ᠪᠠᠢᠭᠠ ᠪᠠᠨ ᠲᠠᠨᠢᠭᠤᠯᠤᠨ ᠥᠭᠦᠯᠡᠪᠡ᠃ ᠲᠡᠭᠦᠨ ᠦ᠌ ᠦᠭᠦᠯᠬᠦ ᠪᠡᠷ᠂ ᠳᠠᠢᠰᠤᠨ ᠢ᠋ ᠬᠢᠶᠠᠷ ᠴᠣᠬᠢᠬᠤ ᠨᠢ ᠶᠡᠷᠦ ᠲᠦᠪᠡᠭ ᠲᠡᠢ ᠪᠢᠰᠢ᠂ ᠡᠨᠳᠡ ᠡᠴᠡ ᠪᠥᠭᠡᠮ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠥᠳᠡᠯᠦᠨ ᠶᠡᠬᠡ ᠣᠢ ᠶ᠋ᠢᠨ ᠵᠠᠬᠠ ᠬᠦᠷᠦᠭᠡᠳ ᠲᠡᠨᠳᠡ ᠡᠴᠡ ᠨᠢᠭᠡᠳᠦᠭᠡᠷ ᠲᠠᠪᠢᠲᠤ ᠲᠠᠰᠤᠷᠠᠨ ᠪᠠᠷᠠᠭᠤᠨ ᠵᠦᠭ ᠴᠢᠭᠯᠡᠨ ᠬᠢᠶᠠᠭᠲᠤ ᠶ᠋ᠢᠨ ᠡᠮᠦᠨᠡ ᠬᠦᠷᠦᠭᠡᠳ ᠬᠣᠢᠰᠢ ᠡᠷᠭᠢᠨ ᠫᠤᠤᠳᠠᠨ ᠲᠠᠪᠰᠢᠵᠤ ᠰᠦᠬᠡᠪᠠᠭᠠᠲᠤᠷ ᠤ᠋ᠨ ᠴᠡᠷᠢᠭ ᠦ᠋ᠨ ᠠᠩᠬᠠᠷᠤᠯ ᠢ᠋ ᠥᠳᠥᠭᠡᠨ ᠲᠠᠲᠠᠬᠤ ᠭᠡᠨᠡ᠃ ᠡᠨᠡ ᠵᠠᠭᠤᠷᠠ ᠬᠣᠶᠠᠳᠤᠭᠠᠷ ᠲᠠᠪᠢᠲᠤ ᠪᠠᠷᠠᠭᠤᠨ ᠬᠣᠢᠲᠤ ᠶᠠᠪᠤᠨ ᠪᠦᠷᠭᠦᠳ ᠲᠡᠢ ᠠᠭᠤᠯᠠ ᠶ᠋ᠢᠨ ᠡᠩᠭᠡᠷ ᠬᠦᠷᠦᠭᠡᠳ ᠬᠣᠲᠠᠨ ᠤ᠋ ᠵᠡᠭᠦᠨ ᠬᠣᠢᠨᠠ ᠠ᠋ᠴᠠ ᠳᠠᠭᠠᠷᠢᠨ ᠣᠷᠣᠵᠤ ᠨᠡᠪᠲᠡᠷᠡᠨ ᠭᠠᠷᠤᠭᠠᠳ ᠳᠠᠷᠤᠢ ᠡᠷᠭᠢᠬᠦ ᠭᠡᠨᠡ᠃ ᠡᠨᠡ ᠳᠠᠷᠤᠢ ᠥᠪᠡᠷ ᠢ᠋ᠶ᠋ᠡᠨ ᠭᠤᠷᠪᠠᠳᠤᠭᠠᠷ ᠲᠠᠪᠢᠲᠤ ᠲᠠᠢ ᠵᠡᠭᠦᠨ ᠲᠠᠯᠠ ᠠ᠋ᠴᠠ ᠨᠢ ᠳᠠᠭᠠᠷᠢᠨ ᠨᠡᠪᠲᠡᠷᠡᠨ ᠭᠠᠷᠤᠭᠠᠳ ᠡᠷᠭᠢᠨᠡ ᠭᠡᠬᠦ ᠪᠥᠭᠡᠳ ᠢᠩᠭᠢᠬᠦ ᠳ᠋ᠦ᠍ ᠳᠠᠢᠰᠤᠨ ᠪᠦᠷᠢᠨ ᠠᠷᠴᠢᠭᠳᠠᠵᠤ ᠰᠦᠬᠡᠪᠠᠭᠠᠲᠤᠷ ᠬᠠᠨᠢ ᠨᠥᠬᠥᠳ ᠲᠡᠢ ᠪᠡᠨ ᠬᠠᠮᠲᠤ ᠠᠮᠢᠳᠤ ᠪᠠᠷ ᠢ᠋ᠶ᠋ᠠᠨ ᠪᠠᠷᠢᠭᠳᠠᠬᠤ ᠭᠡᠨᠡ᠃ ᠪᠠᠶᠠᠷ ᠬᠦᠩ ᠦ᠋ᠨ ᠡᠨᠡ ᠦᠭᠡᠨ ᠳ᠋ᠦ᠍ ᠢᠲᠡᠭᠡᠬᠦ ᠦᠭᠡᠢ ᠬᠥᠮᠦᠨ ᠨᠢᠭᠡᠴᠦ ᠠᠯᠠᠭᠠ᠃ ᠡᠴᠦᠰ ᠲᠦ᠋ᠨᠢ ᠪᠠᠶᠠᠷ ᠬᠦᠩ᠄ ᠡᠨᠡ ᠬᠡᠷᠡᠭ ᠡᠴᠡ ᠤᠬᠤᠷᠢᠭᠰᠠᠨ ᠵᠢᠭᠤᠲᠠᠭᠰᠠᠨ ᠬᠡᠨ ᠢ᠋ ᠪᠣᠯᠪᠠᠴᠤ ᠪᠢ ᠠᠭᠤᠴᠢᠯᠠᠬᠤ ᠦᠭᠡᠢ ᠭᠡᠵᠦ ᠵᠠᠨᠤᠯᠬᠢᠯᠠᠨ ᠥᠭᠦᠯᠡᠬᠦ ᠳ᠋ᠦ᠍ ᠠᠶᠤᠨ ᠰᠦᠷᠳᠡᠬᠦ ᠦᠭᠡᠢ ᠬᠥᠮᠦᠨ ᠬᠡᠨ ᠪᠠᠢᠬᠤ ᠪᠢᠯᠡ᠃《ᠳᠡᠭᠡᠳᠦ ᠲᠩᠷᠢ ᠳᠣᠣᠷᠠᠲᠤ ᠭᠠᠵᠠᠷ ᠬᠣᠶᠠᠷ ᠬᠠᠷᠠᠵᠤ ᠪᠠᠢᠨᠠ ᠰᠢᠦ》 ᠭᠡᠵᠦ ᠲᠠᠩᠭᠠᠷᠢᠭᠯᠠᠬᠤ ᠳ᠋ᠤᠨᠢ《ᠶᠠᠮᠠᠷ ᠪᠣᠯᠪᠠᠴᠤ ᠲᠤᠭᠤᠯᠤᠨ ᠭᠠᠷᠬᠤ ᠠ᠋ᠴᠠ ᠥᠭᠡᠷᠡ ᠵᠠᠮ ᠠᠯᠠᠭᠠ》 ᠭᠡᠵᠦ ᠪᠣᠳᠣᠵᠠᠭᠠᠬᠤ ᠠᠵᠢ᠃
ᠪᠦᠬᠦ ᠴᠡᠷᠢᠭ ᠶᠠᠭᠠᠷᠠᠨ ᠮᠣᠷᠳᠠᠬᠤ ᠪᠣᠯᠪᠠᠴᠤ ᠮᠣᠷᠢᠳ ᠢ᠋ᠶ᠋ᠠᠨ ᠬᠠᠢᠷᠠᠯᠠᠨ ᠠᠭᠠᠵᠢᠭᠤᠬᠠᠨ ᠶᠠᠪᠤᠨᠠ᠃ ᠦᠷ ᠦ᠋ᠨ ᠪᠠᠷᠠᠭᠠᠨ ᠵᠠᠮᠬᠠᠷᠠᠨ ᠠᠷᠢᠯᠵᠤ᠂ ᠥᠷᠯᠥᠭᠡ ᠶ᠋ᠢᠨ ᠨᠠᠷᠠ ᠮᠠᠨᠳᠤᠬᠤ ᠶ᠋ᠢᠨ ᠴᠠᠭ ᠲᠤ᠌ ᠬᠥᠪᠴᠢ ᠬᠠᠩᠭᠠᠢ ᠨᠣᠪ ᠨᠣᠭᠣᠭᠠᠨ ᠳᠡᠭᠡᠷᠡ ᠬᠥᠬᠥᠭᠡ ᠰᠢᠪᠠᠭᠤᠳ ᠤ᠋ᠨ ᠳᠣᠩᠭᠣᠳᠬᠤ ᠪᠠ ᠵᠠᠯᠠᠭᠤ ᠰᠠᠢᠬᠠᠨ ᠨᠠᠷᠠᠰᠤᠨ ᠮᠣᠳᠣ ᠪᠣᠯᠭᠠᠨ ᠢ᠋ᠶ᠋ᠠᠷ ᠤᠷᠲᠤ ᠤᠷᠲᠤ ᠰᠡᠭᠦᠳᠡᠷ ᠦ᠋ᠳ ᠢ᠋ ᠪᠠᠷᠠᠭᠤᠨᠠ ᠬᠠᠶᠠᠭᠰᠠᠨ ᠬᠢᠭᠡᠳ ᠲᠡᠷᠡ ᠲᠡᠷᠡ ᠰᠡᠭᠦᠳᠡᠷ ᠪᠣᠯᠭᠠᠨ ᠤ᠋ ᠳᠤᠮᠳᠠ ᠠ᠋ᠴᠠ ᠰᠢᠨᠡᠬᠡᠨ ᠤᠷᠭᠤᠭᠰᠠᠨ ᠥᠩᠭᠡ ᠪᠦᠷᠢ ᠶ᠋ᠢᠨ ᠨᠢᠯᠬᠠ ᠨᠣᠭᠣᠭᠠ ᠴᠡᠴᠡᠭ ᠨᠠᠪᠴᠢᠰ ᠡᠨᠡ ᠳᠡᠯᠡᠬᠡᠢ ᠶ᠋ᠢᠨ ᠭᠤᠸᠠ ᠰᠠᠢᠬᠠᠨ ᠢ᠋ ᠢᠯᠡᠴᠢᠯᠡᠬᠦ ᠮᠡᠲᠦ ᠠᠯᠠᠭᠯᠠᠬᠤ᠂ ᠡᠨᠡ ᠪᠦᠬᠦᠨ ᠲᠡᠢᠨ ᠢ᠋ ᠪᠢᠰᠢ᠂ ᠲᠠᠢᠪᠤᠩ ᠢ᠋ ᠦᠬᠦᠯ ᠮᠥᠬᠥᠯ ᠢ᠋ ᠪᠢᠰᠢ ᠠᠮᠢᠳᠤᠷᠠᠨ ᠬᠥᠭᠵᠢᠬᠦ ᠶ᠋ᠢ᠂ ᠠᠮᠢᠳᠤᠷᠠᠬᠤ᠂ ᠨᠠᠢᠷᠠᠮᠳᠠᠬᠤ᠂ ᠬᠠᠢᠷᠠᠯᠠᠬᠤ ᠡᠩᠬᠦᠷᠡᠢᠯᠡᠬᠦ ᠶ᠋ᠢᠨ ᠲᠥᠯᠥᠭᠡ ᠪᠠᠢᠭᠠ ᠨᠢ ᠲᠡᠷᠡ ᠬᠥᠮᠦᠰ ᠲᠦ᠍ ᠡᠷᠬᠡ ᠦᠭᠡᠢ ᠨᠢᠭᠡ ᠶ᠋ᠢ ᠪᠣᠳᠣᠭᠳᠠᠭᠤᠯᠤᠭᠰᠠᠨ ᠪᠣᠯ ᠤᠤ᠃
ᠠᠢ ᠬᠥᠭᠡᠷᠦᠬᠦᠢ ᠡᠢᠮᠦ ᠰᠠᠢᠬᠠᠨ ᠴᠠᠭ ᠲᠤ᠌ ᠳᠠᠢᠳᠤᠵᠤ ᠠᠮᠢ ᠴᠥᠯᠪᠡᠵᠦ ᠶᠠᠪᠤᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠠᠷᠤ ᠭᠡᠷ ᠲᠡᠭᠡᠨ ᠠᠪᠤ ᠡᠵᠢ᠂ ᠠᠮᠠᠷᠠᠭ ᠬᠠᠨᠢ᠂ ᠠᠯᠠᠭ ᠦᠷᠡ ᠶ᠋ᠢᠨ ᠢ᠋ᠶ᠋ᠡᠨ ᠳᠡᠷᠭᠡᠳᠡ ᠠᠳᠤᠭᠤ ᠮᠠᠯ ᠢ᠋ᠶ᠋ᠠᠨ ᠮᠠᠯᠵᠢᠨ ᠬᠠᠷᠠ ᠪᠣᠷᠣ ᠴᠤ᠌ ᠰᠡᠳᠬᠢᠯ ᠠᠮᠤᠷ ᠠᠵᠢᠯ ᠬᠢᠵᠦ ᠶᠠᠪᠤᠪᠠᠯ ᠬᠡᠴᠢᠨᠡᠭᠡᠨ ᠰᠠᠢᠬᠠᠨ᠂ ᠬᠡᠴᠢᠨᠡᠨ ᠵᠢᠷᠭᠠᠯᠲᠠᠢ ᠪᠠᠢᠬᠤ ᠰᠠᠨ ᠪᠢᠯᠡ᠃ ᠶᠠᠭᠤᠨ ᠳ᠋ᠤ᠌ ᠢᠩᠭᠢᠵᠦ ᠲᠡᠢᠨ ᠬᠢᠨᠡ ᠪᠣᠢ? ᠶᠠᠭᠤᠨ ᠤ᠋ ᠲᠤᠯᠠᠳᠠ ᠢᠩᠭᠢᠵᠦ ᠨᠢᠭᠡ ᠨᠢᠭᠡᠨ ᠦ᠌ ᠪᠡᠨ ᠥᠭᠡᠳᠡ ᠡᠴᠡ ᠫᠤᠤ ᠱᠠᠭᠠᠢᠵᠤ᠂ ᠰᠤᠮᠤ ᠲᠠᠯᠪᠢᠵᠤ᠂ ᠨᠢᠭᠡ ᠨᠢᠭᠡ ᠶ᠋ᠢ ᠪᠡᠨ ᠠᠯᠠᠨ ᠬᠢᠳᠤᠨᠠ ᠪᠣᠢ! ᠡᠷᠳᠡᠨᠢᠲᠦ ᠬᠥᠮᠦᠨ ᠦ᠌ ᠪᠡᠶᠡ ᠶ᠋ᠢ ᠣᠯᠤᠨ ᠲᠥᠷᠥᠭᠰᠡᠨ ᠡᠷᠡ ᠬᠥᠮᠦᠨ ᠦ᠌ ᠬᠤᠪᠢ ᠵᠠᠶᠠᠭᠠ ᠠᠯᠠᠯᠳᠤᠬᠤ ᠲᠡᠢᠨ ᠳ᠋ᠦ᠍ ᠠᠯᠲᠠᠨ ᠠᠮᠢ ᠪᠠᠨ ᠠᠯᠳᠠᠵᠤ ᠭᠡᠭᠡᠬᠦ ᠶ᠋ᠢᠨ ᠲᠥᠯᠥᠭᠡ ᠲᠥᠷᠥᠭᠰᠡᠨ ᠭᠡᠵᠦ ᠤᠤ? ᠢᠩᠭᠢᠭᠡᠳ ᠪᠣᠳᠣᠬᠤ ᠳ᠋ᠤ᠌ ᠲᠡᠢᠨ ᠭᠡᠭᠴᠢ ᠶᠠᠮᠠᠷ ᠪᠤᠵᠠᠷ᠂ ᠶᠠᠮᠠᠷ ᠮᠠᠭᠤᠬᠠᠢ ᠶ᠋ᠢ ᠬᠥᠮᠦᠨ ᠪᠦᠷᠢ ᠡᠨᠡ ᠴᠠᠭ ᠲᠤ᠌ ᠪᠣᠳᠣᠭᠰᠠᠨ ᠪᠠᠢᠯᠭᠦᠢ ᠶᠠᠭᠠᠬᠢᠬᠤᠪ᠃
ᠡᠨᠳᠡ ᠨᠡᠢᠲᠡ ᠦᠬᠦᠯ ᠢ᠋ ᠣᠯᠠᠨ ᠤ᠋ ᠡᠮᠦᠨᠡ ᠠᠶᠤᠮᠰᠢᠭ ᠪᠣᠯᠭᠠᠨ ᠲᠠᠯᠪᠢᠵᠤ ᠪᠠᠢᠭᠠ ᠪᠢᠰᠢ᠂ ᠪᠣᠯᠬᠤ ᠭᠡᠵᠦ ᠪᠣᠢ ᠲᠡᠢᠨ ᠳ᠋ᠦ᠍ ᠦᠷᠡᠭᠳᠡᠬᠦ ᠡᠨᠡ ᠣᠯᠠᠨ ᠨᠣᠮᠣᠬᠠᠨ ᠡᠪᠡᠢ ᠬᠥᠭᠡᠷᠦᠬᠦᠢ ᠳᠠᠢᠴᠢᠨ ᠬᠥᠮᠦᠨ ᠦ᠌ ᠲᠤᠬᠠᠢ ᠥᠭᠦᠯᠡᠵᠦ ᠪᠠᠢᠨᠠᠮ᠃ ᠶᠠᠭᠤᠨ ᠳ᠋ᠤ᠌ ᠲᠡᠳᠡᠨ ᠦ᠌ ᠲᠤᠬᠠᠢ ᠥᠭᠦᠯᠡᠨᠡᠮ ᠪᠣᠢ᠂ ᠡᠳᠡ ᠬᠥᠭᠡᠷᠦᠬᠦᠢ᠂ ᠥᠨᠥ ᠪᠠ ᠢᠷᠡᠭᠡᠳᠦᠢ ᠶ᠋ᠢᠨ ᠶᠠᠪᠤᠳᠠᠯ ᠴᠣᠬᠣᠮ ᠬᠦ᠌ ᠬᠡᠨ ᠦ᠌ ᠲᠥᠯᠥᠭᠡ ᠶᠠᠭᠤᠨ ᠳ᠋ᠤ᠌ ᠢᠩᠭᠢᠵᠦ ᠶᠠᠪᠤᠭᠠ ᠶ᠋ᠢᠨ ᠢ᠋ᠶ᠋ᠡᠨ ᠨᠠᠷᠢᠨ ᠤᠴᠢᠷ ᠢ᠋ ᠲᠠᠨᠢᠨ ᠲᠤᠩᠭᠠᠭᠠᠨ ᠪᠣᠳᠣᠵᠤ ᠮᠡᠳᠡᠬᠦ ᠦᠭᠡᠢ ᠶᠠᠪᠤᠭᠠ ᠳ᠋ᠤᠨᠢ ᠬᠥᠨᠳᠡᠯᠡᠨ ᠦ᠌ ᠬᠡᠨ ᠢ᠋ ᠴᠦ᠍ ᠪᠣᠯ ᠵᠢᠷᠦᠬᠡ ᠰᠡᠳᠬᠢᠯ ᠲᠡᠳᠡᠨ ᠦ᠌ ᠲᠥᠯᠥᠭᠡ ᠶᠠᠭᠠᠬᠢᠨ ᠡᠪᠡᠳᠬᠦ ᠦᠭᠡᠢ ᠪᠠᠢᠬᠤ ᠶᠤᠮ ᠪᠣᠢ? ᠢᠩᠭᠢᠵᠦ ᠴᠠᠭᠠᠰᠢ ᠥᠭᠦᠯᠡᠬᠦ ᠳ᠋ᠦ᠍ ᠬᠠᠷᠠ ᠲᠡᠢᠨ ᠵᠠᠪᠠᠯ ᠪᠣᠯᠬᠤ ᠶ᠋ᠢ ᠬᠠᠮᠢᠭᠠ ᠬᠡᠳᠦᠢ ᠳ᠋ᠦ᠍ ᠴᠦ᠍ ᠵᠠᠪᠠᠯ ᠦᠷᠡᠭᠳᠡᠬᠦ ᠡᠨᠡ ᠳᠠᠢᠴᠢᠨ ᠡᠷᠡᠰ ᠦ᠋ᠨ ᠠᠷᠤ ᠳ᠋ᠤ᠌ ᠶᠠᠭᠤ ᠪᠠᠢᠳᠠᠭ ᠪᠢᠯᠡ? ᠦᠷᠡ ᠬᠡᠦᠬᠡᠳ ᠪᠠᠢᠳᠠᠭ ᠪᠣᠯ ᠲᠡᠷᠡ ᠨᠢ ᠥᠨᠥᠴᠢᠷᠡᠨᠡ᠂ ᠡᠬᠡᠨᠡᠷ ᠲᠡᠢ ᠪᠠᠢᠭᠰᠠᠨ ᠪᠣᠯ ᠲᠡᠷᠡ ᠨᠢ ᠪᠡᠯᠪᠡᠰᠦᠷᠡᠨᠡ᠂ ᠡᠴᠢᠭᠡ ᠡᠬᠡ ᠲᠡᠢ ᠪᠠᠢᠭᠰᠠᠨ ᠪᠣᠯ ᠲᠡᠳᠡ ᠨᠢ ᠡᠭᠦᠷᠢᠳᠡ ᠭᠣᠣᠯ ᠬᠠᠷᠠᠯᠠᠨ ᠳᠤᠷᠠᠰᠴᠤ ᠪᠠᠢᠬᠤ ᠵᠠᠮ ᠳ᠋ᠤ᠌ ᠣᠷᠣᠨᠠ᠃ ᠡᠢᠮᠦ ᠳ᠋ᠦ᠍ ᠬᠥᠮᠦᠨ ᠪᠦᠷᠢ ᠠᠮᠢ ᠬᠠᠢᠷᠠᠯᠠᠬᠤ ᠨᠢ ᠵᠦᠢ ᠶ᠋ᠢᠨ ᠬᠡᠷᠡᠭ ᠪᠣᠯᠪᠠᠴᠤ ᠴᠣᠬᠣᠮ ᠶᠠᠭᠠᠬᠢᠭᠠᠳ ᠬᠥᠮᠦᠨ ᠲᠦᠷ ᠵᠠᠭᠤᠷᠠ ᠶ᠋ᠢᠨ ᠡᠢᠮᠦ ᠶᠠᠭᠤᠮᠠᠨ ᠳ᠋ᠤ᠌ ᠬᠠᠭᠤᠷᠲᠠᠭᠳᠠᠬᠤ ᠨᠢ ᠳᠠᠪᠠᠭᠤ ᠲᠠᠢ ᠪᠢᠯᠡ᠃ ᠴᠣᠬᠣᠮ ᠬᠦ᠌ ᠶᠠᠭ ᠡᠨᠡ ᠴᠠᠭ ᠲᠤ᠌ ᠳᠡᠭᠡᠷᠡᠬᠢ ᠣᠯᠠᠨ ᠡᠷᠡᠰ ᠢᠩᠭᠢᠵᠦ ᠶᠠᠪᠤᠭᠠᠳ ᠡᠴᠦᠰ ᠦ᠋ᠨ ᠡᠴᠦᠰ ᠲᠦ᠍ ᠡᠨᠡ ᠨᠠᠰᠤᠨ ᠳ᠋ᠠᠭᠠᠨ ᠭᠡᠮᠰᠢᠭᠡᠳ ᠪᠠᠷᠠᠰᠢ ᠦᠭᠡᠢ ᠶᠠᠮᠠᠷ ᠨᠢᠭᠡᠨ ᠬᠦᠨᠳᠦ ᠬᠡᠴᠡᠭᠦᠦ ᠶᠠᠭᠤᠮᠠᠨ ᠳ᠋ᠤ᠌ ᠣᠷᠣᠨᠠ ᠭᠡᠳᠡᠭ ᠢ᠋ᠶ᠋ᠡᠨ ᠴᠦ᠍ ᠮᠡᠳᠡᠭᠡ ᠦᠭᠡᠢ᠂ ᠤᠳᠤᠷᠢᠳᠴᠤ ᠶᠠᠪᠤᠭᠠ ᠬᠥᠮᠦᠰ ᠨᠡᠢᠭᠡᠮ ᠨᠢ ᠴᠦ᠍ ᠮᠡᠳᠡᠭᠦᠯᠬᠦ ᠦᠭᠡᠢ ᠶ᠋ᠢ ᠬᠦᠰᠡᠵᠦ ᠨᠢᠳᠦ ᠶ᠋ᠢ ᠨᠢ ᠬᠠᠷᠠ ᠶᠠᠭᠤᠮᠠ ᠪᠠᠷ ᠪᠣᠭᠣᠭᠠᠳ ᠴᠡᠭᠡᠵᠢ ᠶ᠋ᠢ ᠨᠢ ᠬᠦᠨᠳᠦ ᠴᠢᠯᠠᠭᠤ ᠪᠠᠷ ᠳᠠᠷᠤᠴᠢᠬᠠᠭᠠᠳ ᠪᠠᠢᠭᠠ ᠰᠢᠦ ᠳᠡ᠃
ᠬᠠᠮᠤᠭ ᠤ᠋ᠨ ᠰᠡᠭᠦᠯ ᠳ᠋ᠦ᠍ ᠶᠠᠪᠤᠭᠠ ᠭᠤᠷᠪᠠᠳᠤᠭᠠᠷ ᠲᠠᠪᠢᠲᠤ ᠶ᠋ᠢᠨ ᠡᠬᠢᠨ ᠦ᠌ ᠬᠡᠰᠡᠭ ᠲᠦ᠍ ᠳ᠋ᠠᠨᠽᠠᠨ ᠥᠪᠡᠷ ᠦ᠋ᠨ ᠢᠲᠡᠭᠡᠯᠲᠦ ᠵᠠᠬᠢᠷᠤᠯ ᠬᠦᠩ ᠪᠠᠶᠠᠷ ᠤ᠋ᠨ ᠠᠷᠤ ᠳ᠋ᠤ᠌ ᠶᠠᠪᠤᠯᠠ᠃ ᠰᠡᠳᠬᠢᠯ ᠳ᠋ᠦ᠍ᠨᠢ ᠢᠯᠠᠨᠠ ᠳᠡᠢᠯᠦᠨᠡ ᠭᠡᠳᠡᠭ ᠲᠦ᠍ ᠢᠲᠡᠭᠡᠯ ᠳᠦᠭᠦᠷᠡᠩ ᠪᠠᠢᠪᠠᠴᠤ ᠪᠠᠰᠠ ᠠᠯᠤᠰ ᠲᠡᠷᠲᠡᠭᠡᠬᠢ ᠬᠦᠷᠢᠶᠡᠨᠡ ᠵᠠᠯᠪᠠᠷᠢᠨ ᠰᠠᠭᠤᠭᠠ ᠠᠴᠢᠲᠤ ᠪᠣᠭᠳᠠ ᠡᠵᠡᠨ ᠬᠠᠭᠠᠨᠲᠠᠨ ᠤ᠋ ᠰᠠᠬᠢᠭᠤᠯᠰᠤᠨ ᠳ᠋ᠤ᠌ ᠢᠲᠡᠭᠡᠭᠰᠡᠨ ᠢᠲᠡᠭᠡᠯ ᠪᠢᠰᠢᠷᠡᠯ ᠮᠥᠨ ᠬᠡᠪ ᠢ᠋ᠶ᠋ᠡᠷ ᠪᠠᠢᠪᠠᠴᠤ ᠣᠳᠣ ᠪᠣᠯᠤᠭᠠᠳ ᠢᠷᠡᠬᠦ ᠳ᠋ᠦ᠍ ᠬᠠᠮᠤᠭ ᠶᠠᠭᠤᠮᠠ ᠨᠢᠭᠡ ᠯᠡ ᠪᠢᠰᠢ᠃ ᠤᠷᠢᠳᠠ ᠶᠠᠪᠤᠭᠠ ᠰᠢᠷᠦᠭᠦᠨ ᠪᠠᠭᠠᠲᠤᠷ ᠠᠯᠲᠠᠲᠤ ᠪᠠᠶᠠᠷ ᠬᠦᠩ ᠢ᠋ ᠬᠠᠷᠠᠬᠤ ᠳ᠋ᠤ᠌ ᠲᠡᠭᠦᠨ ᠦ᠌ ᠥᠷᠭᠡᠨ ᠴᠡᠭᠡᠵᠢ ᠤᠷᠤᠭᠰᠢᠯᠠᠬᠤ ᠵᠠᠮ ᠢ᠋ ᠲᠠᠭᠯᠠᠵᠤ ᠬᠡᠨᠡᠭ ᠦᠭᠡᠢᠬᠡᠨ ᠶᠠᠪᠤᠭᠠ ᠪᠠᠢᠳᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠢᠯᠠᠭᠳᠠᠰᠢ ᠦᠭᠡᠢ ᠪᠠᠭᠠᠲᠤᠷ ᠮᠥᠨ ᠭᠡᠵᠦ ᠪᠣᠳᠣᠭᠳᠠᠭᠤᠯᠤᠨᠠ᠃ ᠭᠡᠪᠡᠴᠦ ᠲᠡᠷᠡ ᠨᠢ ᠪᠠᠰᠠ ᠯᠠ ᠪᠢᠰᠢ᠃《ᠶᠠᠭᠤᠨ ᠳ᠋ᠤ᠌ ᠡᠨᠡ ᠪᠣᠢ?》᠂ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠰᠤᠨᠵᠢᠨ ᠰᠤᠳᠤᠯᠬᠤ ᠳ᠋ᠤ᠌ ᠠᠯᠬᠤᠬᠤ ᠳᠣᠳᠣᠮ ᠣᠢᠷᠠᠲᠤᠵᠤ ᠪᠠᠢᠭᠠ ᠡᠨᠡ ᠲᠡᠢᠨ ᠮᠣᠩᠭᠣᠯ ᠬᠥᠮᠦᠨ ᠮᠣᠩᠭᠣᠯ ᠲᠠᠢ ᠪᠠᠨ ᠤᠷᠠᠯᠴᠠᠨ ᠤᠯᠠᠭᠠᠨ ᠴᠢᠰᠤ ᠪᠠᠨ ᠬᠠᠨᠤᠯᠴᠠᠬᠤ ᠭᠡᠵᠦ ᠪᠠᠢᠭᠠ ᠶ᠋ᠢ ᠪᠣᠳᠣᠬᠤ ᠳ᠋ᠤ᠌ ᠲᠡᠭᠦᠨ ᠳ᠋ᠦ᠍ ᠲᠡᠭᠦᠨ ᠰᠢᠭ ᠠᠶᠠ ᠦᠭᠡᠢ ᠶᠠᠭᠤᠮᠠ ᠶᠡᠷᠦ ᠪᠣᠳᠣᠭᠳᠠᠬᠤ ᠦᠭᠡᠢ ᠪᠣᠯᠤᠯᠠ᠃ ᠲᠡᠭᠡᠭᠡᠳ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠪᠠᠢᠳᠠᠯ ᠢ᠋ ᠳᠡᠩᠳᠡᠭᠦᠦ ᠮᠠᠭᠤ ᠰᠠᠨᠠᠭᠠᠨ ᠤ᠋ ᠬᠢ ᠪᠣᠯᠵᠤ ᠪᠠᠢᠨᠠ ᠤᠤ ᠳᠠ ᠭᠡᠳ ᠪᠣᠳᠣᠬᠤ ᠳᠣᠳᠣᠮ ᠰᠡᠳᠬᠢᠯ ᠬᠦᠨᠳᠦᠷᠡᠨ ᠠᠮᠢᠰᠬᠤᠯ ᠳᠠᠪᠬᠤᠴᠠᠨᠠ᠃ ᠤᠭ ᠨᠢ ᠳ᠋ᠠᠨᠽᠠᠨ ᠡᠢᠮᠦ ᠡᠷᠡ ᠪᠢᠰᠢ᠂ ᠵᠠᠩᠵᠤᠨ ᠴᠣᠢᠷᠠ ᠶ᠋ᠢᠨ ᠪᠠᠢᠯᠳᠤᠭᠠᠨ ᠢ᠋ᠶ᠋ᠠᠷ ᠠᠷᠪᠠᠨ ᠬᠡᠳᠦᠨ ᠭᠠᠮᠢᠩ ᠤᠷᠤᠭᠤ ᠬᠡᠷᠡᠭᠯᠡᠵᠦ ᠰᠤᠷᠤᠭᠠ ᠦᠭᠡᠢ ᠰᠡᠯᠡᠮᠡᠨ ᠳ᠋ᠦ᠍ ᠣᠷᠣᠬᠤ ᠳ᠋ᠠᠭᠠᠨ ᠪᠠᠷᠢᠵᠤ ᠰᠤᠷᠤᠭᠰᠠᠨ ᠲᠠᠰᠢᠭᠤᠷ ᠳᠡᠭᠡᠷᠡ ᠭᠡᠵᠦ ᠪᠣᠳᠣᠨ ᠰᠡᠯᠡᠮᠡ ᠰᠤᠭᠤᠯᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠲᠠᠰᠢᠭᠤᠷ ᠳᠠᠯᠠᠢᠨ ᠭᠠᠭᠴᠠᠭᠠᠷ ᠳᠠᠪᠬᠢᠨ ᠣᠷᠣᠵᠤ ᠪᠠᠢᠭᠰᠠᠨ ᠨᠢ ᠲᠡᠷᠡ ᠴᠠᠭ ᠲᠠᠭᠠᠨ ᠢᠳᠡ ᠳᠦᠷᠡᠯᠵᠡᠬᠦ ᠭᠠᠯ ᠴᠣᠭ ᠪᠠᠢᠵᠠᠢ᠃
ᠣᠢ ᠶ᠋ᠢᠨ ᠵᠠᠬᠠ ᠳ᠋ᠤ᠌ ᠬᠦᠷᠦᠯᠴᠡᠨ ᠢᠷᠡᠵᠦ ᠶᠠᠪᠤᠲᠠᠯᠠ ᠪᠠᠷᠠᠭᠤᠨ ᠨᠢᠳᠦᠨ ᠦ᠌ ᠳᠡᠭᠡᠳᠦ ᠲᠠᠯᠠ ᠭᠡᠨᠡᠳᠲᠡ ᠴᠡᠴᠢᠬᠢᠨᠡᠨ ᠲᠠᠲᠠᠯᠳᠤᠪᠠ᠃《ᠵᠠ ᠪᠠᠢᠵᠠ ᠡᠨᠡ ᠴᠢᠨᠢ ᠶᠠᠭᠤᠨ ᠰᠣᠪᠢᠩ ᠪᠣᠢ? ᠪᠠᠷᠠᠭᠤᠨ ᠨᠢᠳᠦᠨ ᠦ᠌ ᠳᠡᠭᠡᠳᠦ ᠲᠠᠯᠠ ᠲᠠᠲᠠᠬᠤ ᠨᠢ ᠡᠷᠡᠭᠲᠡᠢ ᠬᠥᠮᠦᠨ ᠳ᠋ᠦ᠍ ᠰᠠᠢᠨ ᠪᠢᠯᠢᠤ? ᠠᠯᠢ ᠡᠮᠡᠭᠲᠡᠢ ᠪᠢᠯᠢᠤ?》 ᠭᠡᠵᠦ ᠰᠡᠳᠬᠢᠯ ᠦᠢᠮᠡᠷᠡᠭᠰᠡᠨ ᠨᠢ ᠳᠡᠭᠡᠷᠡᠬᠢ ᠬᠦᠨᠳᠦᠷᠡᠯ ᠢ᠋ ᠪᠠᠭᠠ ᠵᠡᠷᠭᠡ ᠮᠠᠷᠲᠠᠭᠳᠠᠭᠤᠯᠤᠨ ᠲᠠᠢᠪᠤᠰᠢᠷᠠᠭᠤᠯᠪᠠ᠃
ᠡᠨᠡ ᠦᠶᠡ ᠳ᠋ᠦ᠍ ᠪᠦᠬᠦ ᠠᠩᠭᠢ ᠪᠠᠷᠤᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠣᠢ ᠶ᠋ᠢᠨ ᠵᠠᠬᠠ ᠳ᠋ᠤ᠌ ᠭᠠᠷᠴᠤ ᠭᠦᠢᠴᠡᠭᠡᠳ ᠪᠠᠢᠭᠰᠠᠨ ᠪᠥᠭᠡᠳ ᠨᠢᠭᠡᠳᠦᠭᠡᠷ ᠲᠠᠪᠢᠲᠤ ᠳᠡᠭᠡᠷᠡ ᠪᠡᠨ ᠬᠡᠳᠦᠨ ᠰᠠᠢᠬᠠᠨ ᠬᠥᠭᠯᠡᠭᠡᠷ ᠨᠠᠷᠠᠰᠤ ᠴᠤᠪᠤᠷᠠᠭᠤᠯᠤᠨ ᠤᠷᠭᠤᠭᠤᠯᠤᠭᠰᠠᠨ ᠪᠢᠴᠢᠬᠠᠨ ᠬᠥᠪᠡᠭᠡ ᠶ᠋ᠢᠨ ᠡᠮᠦᠨᠡ ᠲᠤᠯᠤᠨ ᠵᠣᠭᠰᠣᠵᠤ ᠰᠡᠭᠦᠯᠴᠢ ᠶ᠋ᠢᠨ ᠬᠣᠶᠠᠷ ᠲᠠᠪᠢᠲᠤ ᠶ᠋ᠢ ᠬᠦᠯᠢᠶᠡᠬᠦ ᠠᠵᠢ᠃ ᠣᠳᠣ ᠡᠨᠳᠡ ᠡᠴᠡ ᠭᠤᠷᠪᠠᠨ ᠲᠠᠪᠢᠲᠤ ᠰᠠᠯᠤᠨ ᠲᠤᠰ ᠲᠤᠰ ᠤ᠋ᠨ ᠢ᠋ᠶ᠋ᠠᠨ ᠡᠭᠦᠷᠭᠡᠲᠦ ᠮᠥᠷ ᠢ᠋ ᠬᠥᠭᠡᠭᠡᠬᠦ ᠶᠣᠰᠣᠲᠠᠢ ᠭᠡᠨᠡ᠃ ᠬᠢᠶᠠᠭᠲᠤ ᠡᠨᠳᠡ ᠡᠴᠡ ᠲᠤᠩ ᠬᠣᠯᠠ ᠦᠭᠡᠢ᠂ ᠭᠠᠵᠠᠷ ᠰᠠᠢᠨ ᠮᠡᠳᠡᠬᠦ ᠬᠥᠮᠦᠨ ᠪᠣᠯᠭᠠᠨ ᠤ᠋ ᠰᠡᠳᠬᠢᠯ ᠳ᠋ᠦ᠍ ᠥᠷᠲᠡᠭᠡ ᠶ᠋ᠢ ᠭᠤᠷᠪᠠ ᠬᠤᠪᠢᠶᠠᠭᠰᠠᠨ ᠤ᠋ ᠨᠢᠭᠡ ᠡᠴᠡ ᠶᠠᠭᠠᠬᠢᠪᠠᠴᠤ ᠬᠡᠲᠦᠷᠡᠬᠦ ᠦᠭᠡᠢ ᠭᠡᠵᠦ ᠪᠠᠭᠤᠨᠠ᠃ ᠪᠠᠶᠠᠷ ᠬᠦᠩ ᠴᠦ᠍ ᠳᠠᠢᠰᠤᠨ ᠢ᠋ᠶ᠋ᠠᠨ ᠳᠠᠪᠠᠨ ᠲᠤᠭᠤᠯᠬᠤ ᠪᠠᠨ ᠪᠡᠯᠡᠳᠬᠡᠬᠦ ᠪᠣᠯᠤᠯᠲᠠᠢ ᠡᠪᠦᠷ ᠲᠡᠭᠡᠨ ᠭᠠᠷ ᠬᠢᠨ ᠥᠨᠥᠬᠢ ᠬᠠᠷᠠ ᠷᠢᠯᠦ ᠡᠴᠡ ᠪᠡᠨ ᠨᠢᠭᠡ ᠶ᠋ᠢ ᠠᠪᠤᠨ ᠠᠮᠠ ᠤᠷᠤᠭᠤ ᠪᠠᠨ ᠰᠢᠳᠡᠭᠡᠳ᠂ ᠳᠣᠣᠷᠠᠲᠤ ᠬᠣᠶᠠᠷ ᠳᠠᠷᠤᠭᠠ ᠳ᠋ᠠᠭᠠᠨ ᠲᠤᠰᠢᠶᠠᠯ ᠥᠭᠬᠦ ᠪᠡᠷ ᠣᠷᠣᠭᠰᠢ ᠤᠬᠤᠰᠬᠢᠲᠡᠯᠡ ᠰᠤᠮᠤ ᠱᠦᠭᠦᠷ ᠲᠠᠴᠢᠭᠢᠨᠠᠪᠠ᠃ ᠬᠠᠮᠢᠭᠠ ᠠ᠋ᠴᠠ ᠪᠣᠢ? ᠲᠡᠷᠡᠬᠡᠨ ᠬᠡᠳᠦᠬᠡᠨ ᠨᠠᠷᠠᠰᠤᠲᠤ ᠪᠢᠴᠢᠬᠠᠨ ᠬᠥᠪᠡᠭᠡᠨ ᠦ᠌ ᠢᠷᠮᠡᠭ ᠡᠴᠡ! ᠣᠨᠣᠭᠳᠠᠭᠰᠠᠨ ᠬᠥᠮᠦᠨ ᠤᠩᠬᠢᠯᠢᠳᠤᠨ ᠤᠨᠠᠨᠠ᠃ ᠣᠨᠣᠭᠳᠠᠭᠰᠠᠨ ᠮᠣᠷᠢᠳ ᠳᠡᠪᠬᠡᠷᠦᠨ ᠴᠣᠪᠬᠣᠷᠠᠵᠤ ᠲᠡᠷᠡᠢᠨ ᠪᠠᠭᠤᠨ ᠣᠢᠴᠢᠨᠠ᠃ ᠪᠤᠷᠬᠠᠨ ᠰᠠᠬᠢᠭᠤᠯᠰᠤᠨ ᠳ᠋ᠤ᠌ ᠵᠠᠯᠪᠠᠷᠢᠬᠤ᠂ ᠬᠠᠷᠢᠶᠠᠯ ᠵᠠᠨᠤᠯ ᠲᠠᠯᠪᠢᠬᠤ᠂《ᠠ ᠡᠵᠡᠨ ᠮᠢᠨᠢ!》 ᠭᠡᠬᠦ ᠬᠦᠷᠭᠡᠯ ᠰᠣᠨᠣᠰᠤᠭᠳᠠᠬᠤ ᠭᠱᠠᠨ ᠵᠠᠭᠤᠷᠠ ᠶ᠋ᠢᠨ ᠳᠣᠲᠣᠷᠠ ᠦᠢᠮᠡᠨ ᠰᠠᠨᠳᠤᠷᠤᠭᠠ ᠦᠭᠡᠢ ᠶᠠᠭᠤᠮᠠ ᠨᠢᠭᠡ ᠴᠦ᠍ ᠦᠭᠡᠢ ᠪᠣᠯᠵᠠᠢ᠃ ᠠᠷᠤ ᠳ᠋ᠤᠨᠢ ᠪᠠᠶᠠᠷ ᠬᠦᠩ ᠪᠠᠢᠭᠠ ᠪᠠᠷ ᠢ᠋ᠶ᠋ᠠᠨ ᠬᠣᠢᠰᠢ ᠤᠷᠤᠭᠰᠢ ᠬᠣᠶᠠᠷ ᠲᠠᠰᠤᠷᠠᠨ ᠵᠠᠢᠯᠠᠬᠤ ᠶ᠋ᠢ ᠲᠤᠰᠢᠶᠠᠨ ᠬᠠᠰᠬᠢᠷᠪᠠᠴᠤ ᠰᠣᠨᠣᠰᠬᠤ ᠬᠥᠮᠦᠨ ᠠᠯᠠᠭᠠ᠃ ᠠᠯᠢ ᠵᠦᠭ ᠬᠠᠷᠠᠵᠤ ᠪᠠᠢᠭᠰᠠᠨ ᠪᠣᠯ ᠲᠡᠷᠡ ᠯᠠ ᠵᠦᠭ ᠥᠭᠡᠳᠡ ᠪᠡᠨ ᠵᠢᠭᠤᠲᠠᠬᠤ ᠲᠤᠯᠠ ᠬᠡᠳᠦᠬᠡᠨ ᠮᠥᠴᠡ ᠶ᠋ᠢᠨ ᠳᠣᠲᠣᠷᠠ ᠦᠬᠦᠳᠡᠯ ᠬᠡᠭᠦᠷ ᠦᠯᠡᠳᠡᠨ ᠵᠠᠮᠬᠠᠷᠠᠪᠠ᠃
ᠡᠴᠦᠰ ᠲᠦ᠋ᠨᠢ ᠪᠠᠶᠠᠷ ᠬᠦᠩ ᠯᠡ ᠦᠯᠡᠳᠡᠵᠡᠢ᠃ ᠲᠦᠷᠭᠡᠬᠡᠨ ᠰᠢᠭ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠵᠤ ᠭᠠᠵᠠᠷ ᠡᠯᠢᠭᠡᠯᠡᠨ ᠬᠡᠪᠲᠡᠭᠡᠳ ᠫᠤᠤᠳᠠᠬᠤ ᠭᠡᠰᠡᠨ ᠪᠣᠯᠪᠠᠴᠤ ᠨᠢᠳᠦᠨ ᠳ᠋ᠦ᠍ᠨᠢ ᠬᠡᠨ ᠴᠦ᠍ ᠬᠠᠷᠠᠭᠳᠠᠭᠰᠠᠨ ᠦᠭᠡᠢ᠂ ᠡᠴᠦᠰ ᠲᠦ᠋ᠨᠢ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠦᠯᠡᠳᠡᠭᠰᠡᠨ ᠢ᠋ᠶ᠋ᠡᠨ ᠮᠡᠳᠡᠨ ᠪᠣᠰᠤᠨ ᠬᠠᠷᠠᠢᠵᠤ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠬᠤ ᠭᠡᠲᠡᠯᠡ ᠢᠷᠮᠡᠭ ᠳᠡᠭᠡᠷᠡ ᠥᠨᠳᠥᠷ ᠪᠡᠶᠡ ᠲᠡᠢ ᠡᠷᠡ ᠭᠡᠨᠡᠳᠲᠡ ᠭᠠᠷᠴᠤ ᠢᠷᠡᠨ ᠫᠤᠤᠳᠠᠪᠠ᠃ ᠡᠨᠡ ᠬᠥᠮᠦᠨ ᠰᠦᠬᠡᠪᠠᠭᠠᠲᠤᠷ(ᠰᠦᠬᠡᠪᠠᠭᠠᠲᠤᠷ ᠪᠠᠶᠠᠷ ᠬᠦᠩ ᠢ᠋ ᠶᠠᠭᠤ ᠶᠠᠭᠤ ᠦᠭᠡᠢ ᠠᠯᠳᠠᠬᠤ ᠳ᠋ᠤ᠌ ᠬᠦᠷᠦᠭᠰᠡᠨ ᠤᠴᠢᠷ ᠥᠪᠡᠷ ᠢ᠋ᠶ᠋ᠡᠨ ᠫᠤᠤᠳᠠᠭᠰᠠᠨ ᠭᠡᠳᠡᠭ)᠂ ᠪᠠᠶᠠᠷ ᠬᠦᠩ ᠦ᠋ᠨ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠬᠤ ᠪᠠᠷ ᠳᠥᠷᠥᠭᠡᠯᠡᠭᠰᠡᠨ ᠬᠥᠯ ᠭᠤᠶᠠ ᠪᠠᠷ ᠢ᠋ᠶ᠋ᠠᠨ ᠰᠢᠷᠬᠠᠳᠤᠭᠰᠠᠨ ᠤᠴᠢᠷ ᠬᠥᠯ ᠠᠯᠲᠠᠨ ᠳᠣᠷᠣᠭᠰᠢ ᠤᠨᠠᠪᠠ᠃
ᠮᠣᠷᠢ ᠨᠢ ᠡᠵᠡᠨ ᠢ᠋ᠶ᠋ᠡᠨ ᠠᠪᠤᠷᠠᠬᠤ ᠭᠡᠵᠦ ᠤᠬᠠᠭᠠᠨ ᠦᠭᠡᠢ ᠳᠣᠭᠳᠣᠯᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠤᠬᠤᠰᠬᠢᠨ ᠨᠢᠵᠢᠭᠢᠨᠡᠨ ᠠᠯᠠᠭᠠ ᠪᠣᠯᠪᠠ᠃ ᠡᠭᠦᠨ ᠢ᠋ ᠬᠡᠨ ᠬᠠᠷᠠᠪᠠ? ᠳ᠋ᠠᠨᠽᠠᠨ᠃ ᠲᠦᠷᠦᠭᠦᠨ ᠬᠡᠷᠡᠭ ᠪᠢᠰᠢᠳᠡᠮᠡᠭᠴᠡ ᠬᠣᠢᠰᠢ ᠡᠷᠭᠢᠨ ᠣᠢ ᠶ᠋ᠢᠨ ᠵᠠᠬᠠ ᠶ᠋ᠢᠨ ᠬᠡᠳᠦᠨ ᠮᠣᠳᠣ ᠶ᠋ᠢ ᠪᠠᠷᠠᠳᠠᠵᠤ ᠠᠮᠵᠢᠭᠰᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠣᠳᠣᠷᠬᠠᠢ ᠬᠠᠷᠠᠭᠰᠠᠨ ᠪᠥᠭᠡᠳ ᠡᠴᠦᠰ ᠲᠦ᠋ᠨᠢ ᠪᠠᠭᠠᠲᠤᠷ ᠡᠵᠡᠨ ᠢ᠋ᠶ᠋ᠡᠨ ᠠᠪᠰᠤᠭᠠᠢ ᠭᠡᠬᠦ ᠡᠴᠡ ᠥᠭᠡᠷᠡ ᠶᠠᠭᠤ ᠴᠦ᠍ ᠦᠭᠡᠢ ᠪᠣᠯᠵᠤ ᠳᠡᠷᠭᠡᠳᠡᠬᠢ ᠬᠣᠶᠠᠷ ᠬᠥᠮᠦᠨ ᠦ᠌ ᠪᠡᠨ ᠬᠠᠮᠲᠤ ᠭᠦᠶᠦᠪᠡ᠃ ᠭᠤᠷᠪᠠᠨ ᠫᠤᠤ ᠪᠠᠨ ᠵᠥᠷᠢᠭᠦᠯᠦᠨ ᠪᠠᠷᠢᠵᠤ ᠳᠠᠮᠨᠠᠭᠤᠷ ᠪᠣᠯᠭᠠᠨ ᠪᠠᠶᠠᠷ ᠬᠦᠩ ᠢ᠋ ᠰᠠᠭᠤᠯᠭᠠᠨ ᠭᠦᠶᠦᠵᠦ ᠶᠠᠪᠤᠬᠤ ᠳ᠋ᠤ᠌ ᠰᠦᠬᠡᠪᠠᠭᠠᠲᠤᠷ ᠴᠡᠷᠢᠭ ᠦ᠋ᠳ ᠲᠡᠢ ᠪᠡᠨ ᠪᠡᠶᠡ ᠠᠮᠤᠷ ᠪᠠᠢᠭᠰᠠᠨ ᠮᠣᠷᠢᠳ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠥᠰᠥᠷᠬᠡᠨ ᠢᠷᠡᠵᠦ ᠨᠥᠮᠥᠷᠦᠨ ᠠᠪᠤᠯᠠ᠃ ᠬᠠᠷᠢᠭᠤ ᠳ᠋ᠤᠨᠢ ᠨᠥᠭᠥᠭᠡᠳᠦᠭᠦᠯᠡ ᠶᠠᠭᠠᠬᠢᠵᠤ ᠴᠦ᠍ ᠠᠮᠵᠢᠭᠰᠠᠨ ᠦᠭᠡᠢ᠃ ᠪᠠᠶᠠᠷ ᠬᠦᠩ ᠢ᠋ ᠳᠣᠷᠣᠭᠰᠢ ᠲᠠᠯᠪᠢᠨ ᠵᠥᠪᠬᠡᠨ ᠬᠡᠷᠬᠢᠬᠦ ᠶ᠋ᠢ ᠨᠢ ᠬᠦᠯᠢᠶᠡᠵᠦ ᠠᠪᠴᠠᠢ᠃ ᠰᠦᠬᠡᠪᠠᠭᠠᠲᠤᠷ ᠤ᠋ᠨ ᠴᠡᠷᠢᠭ ᠦ᠋ᠳ ᠮᠣᠷᠢᠳ ᠠ᠋ᠴᠠ ᠪᠠᠨ ᠪᠠᠭᠤᠨ ᠬᠠᠷᠡᠢᠯᠴᠠᠵᠤ ᠵᠥᠪᠬᠡᠨ ᠪᠠᠶᠠᠷ ᠬᠦᠩ ᠢ᠋ ᠱᠣᠬᠣᠭᠣᠷᠬᠠᠨ ᠰᠢᠪᠠᠪᠠ᠃ ᠲᠡᠷᠡ ᠳᠤᠮᠳᠠ ᠰᠦᠬᠡᠪᠠᠭᠠᠲᠤᠷ《ᠬᠥᠶᠢ᠂ ᠨᠥᠬᠥᠳ ᠬᠣᠢᠰᠢ ᠪᠠᠨ! ᠡᠨᠡ ᠬᠥᠮᠦᠨ ᠳ᠋ᠦ᠍ ᠠᠭᠠᠷ ᠲᠠᠯᠪᠢᠵᠤ ᠥᠭ》 ᠭᠡᠵᠦ ᠥᠭᠦᠯᠡᠨ ᠬᠥᠮᠦᠰ ᠢ᠋ᠶ᠋ᠡᠨ ᠬᠣᠯᠠᠳᠠᠭᠠᠪᠠ᠃ ᠲᠡᠷᠡ ᠳᠤᠮᠳᠠ ᠪᠠᠶᠠᠷ ᠬᠦᠩ ᠰᠠᠨᠠᠭᠠ ᠦᠭᠡᠢ ᠲᠠᠯᠠ ᠪᠠᠷ ᠢ᠋ᠶ᠋ᠠᠨ ᠰᠡᠯᠡᠮᠡᠨ ᠳ᠋ᠦ᠍ ᠴᠣᠬᠢᠭᠳᠠᠭᠰᠠᠨ ᠢ᠋ᠶ᠋ᠠᠨ ᠪᠠᠬᠠᠷᠳᠠᠨ ᠮᠠᠭᠤᠵᠢᠷᠠᠭᠰᠠᠨ ᠪᠠᠢᠯᠠ᠃ ᠤᠭ ᠤ᠋ᠨ ᠮᠢᠬᠠᠯᠢᠭ ᠨᠢᠭᠤᠷ ᠲᠤᠨᠢ ᠬᠠᠮᠤᠭ ᠴᠢᠰᠤ ᠨᠢ ᠬᠤᠷᠠᠯᠳᠤᠵᠤ ᠬᠦᠷᠡᠩ ᠬᠠᠷᠠ ᠪᠣᠯᠵᠤ ᠳᠡᠭᠡᠳᠦ ᠤᠷᠤᠭᠤᠯ ᠤ᠋ᠨ ᠬᠢᠨᠢ ᠰᠢᠷᠦᠭᠦᠨ ᠬᠠᠷᠠ ᠰᠠᠬᠠᠯ ᠵᠠᠷᠠᠭᠠ ᠶ᠋ᠢᠨ ᠬᠢ ᠰᠢᠭ ᠪᠣᠯᠤᠭᠰᠠᠨ ᠢ᠋ ᠨᠢ ᠠᠵᠢᠪᠠᠯ ᠯᠠᠨᠲᠤᠤ ᠪᠠᠷ ᠴᠣᠬᠢᠪᠠᠴᠤ ᠦᠯᠦ ᠬᠡᠮᠬᠡᠷᠡᠬᠦ ᠰᠢᠷᠡᠮᠦᠨ ᠲᠣᠯᠣᠭᠠᠢ ᠰᠢᠭ᠋ ᠪᠣᠯᠵᠠᠢ᠃ ᠬᠥᠮᠦᠰ ᠦ᠋ᠨ ᠵᠠᠢ ᠲᠠᠯᠪᠢᠵᠤ ᠠᠭᠠᠷ ᠣᠷᠣᠭᠤᠯᠵᠤ ᠥᠭᠭᠦᠭᠰᠡᠨ ᠦ᠌ ᠬᠤᠪᠢ ᠳ᠋ᠤ᠌ ᠠᠮᠰᠢᠬᠤᠯ ᠠᠪᠤᠨ ᠤᠬᠠᠭᠠᠨ ᠣᠷᠣᠵᠤ ᠡᠨᠡ ᠲᠡᠷᠡ ᠶ᠋ᠢ ᠨᠢᠭᠡ ᠠᠵᠢᠭᠰᠠᠨ ᠢ᠋ᠶ᠋ᠠᠨ ᠳᠠᠷᠤᠢ ᠲᠥᠷᠥᠭᠦᠯᠭᠡ ᠪᠡᠨ ᠬᠠᠷᠠᠨ ᠡᠯᠡᠰᠦᠷᠬᠡᠭ ᠭᠠᠵᠠᠷ ᠤ᠋ᠨ ᠲᠡᠷᠡ ᠵᠥᠭᠡᠯᠡᠨ ᠬᠥᠷᠥᠰᠥᠨ ᠳ᠋ᠦ᠍ ᠨᠢᠭᠤᠷ ᠢ᠋ᠶ᠋ᠠᠨ ᠰᠢᠭᠢᠳᠬᠡᠪᠡ᠃ ᠢᠩᠭᠢᠭᠡᠳ ᠦᠬᠦᠬᠦ ᠶ᠋ᠢ ᠪᠣᠳᠣᠪᠠᠴᠤ ᠨᠡᠮᠡᠷᠢ ᠠᠯᠠᠭᠠ᠃ ᠬᠥᠮᠦᠰ ᠲᠡᠭᠦᠨ ᠢ᠋ ᠭᠡᠳᠡᠷᠭᠦ ᠬᠠᠷᠠᠭᠤᠯᠤᠨ ᠠᠮᠠ ᠬᠠᠮᠠᠷ ᠲᠤᠨᠢ ᠴᠢᠬᠢᠭᠳᠡᠭᠰᠡᠨ ᠰᠢᠪᠡᠷ ᠰᠢᠷᠣᠢ ᠶ᠋ᠢ ᠠᠷᠢᠯᠭᠠᠨᠠ᠃ ᠲᠡᠷᠡ ᠪᠠᠢᠲᠤᠭᠠᠢ ᠳᠥᠷᠪᠡᠨ ᠳᠤᠭᠤᠢ ᠲᠠᠢ ᠮᠣᠷᠢᠨ ᠲᠡᠷᠭᠡ ᠠᠪᠴᠢᠷᠠᠨ ᠲᠠᠪᠰᠢᠨ ᠳ᠋ᠤᠨᠢ ᠡᠪᠡᠰᠦ ᠲᠠᠯᠪᠢᠨ ᠵᠥᠭᠡᠯᠡᠯᠡᠵᠦ ᠬᠡᠪᠲᠡᠭᠦᠯᠦᠨ ᠠᠪᠤᠨ ᠶᠠᠪᠤᠯᠠ᠃
ᠡᠳᠦᠢ ᠪᠣᠯᠲᠠᠯᠠ ᠨᠥᠭᠦᠭᠡ ᠭᠤᠷᠪᠠ ᠶ᠋ᠢ ᠨᠢ ᠠᠩᠬᠠᠷᠬᠤ ᠬᠥᠮᠦᠨ ᠠᠯᠠᠭᠠ ᠠ᠋᠃ ᠲᠡᠳᠡ ᠳᠡᠮᠡᠢ ᠭᠠᠢᠬᠠᠬᠤ ᠳ᠋ᠠᠭᠠᠨ ᠮᠣᠷᠢᠳ ᠢ᠋ᠶ᠋ᠠᠨ ᠠᠪᠴᠢᠷᠠᠨ ᠮᠥᠷᠳᠡᠵᠦ ᠳᠥᠷᠪᠡᠨ ᠳᠤᠭᠤᠢ ᠲᠠᠢ ᠲᠡᠷᠭᠡᠨ ᠳᠡᠭᠡᠷᠡ ᠨᠢᠳᠦ ᠠᠨᠢᠨ ᠶᠠᠪᠤᠭᠠ ᠡᠵᠡᠨ ᠢ᠋ᠶ᠋ᠡᠨ ᠪᠠᠷᠠᠳᠠᠨ ᠶᠠᠪᠤᠨᠠ᠃ ᠤᠭ ᠨᠢ ᠡᠳᠡ ᠲᠦᠷᠦᠭᠦᠨ《ᠵᠠ ᠪᠢᠳᠡ ᠪᠠᠷᠢᠭᠳᠠᠯᠠ ᠠᠮᠢᠳᠤ ᠭᠠᠷᠤᠨᠠ ᠭᠡᠳᠡᠭ ᠴᠦ᠍ ᠦᠭᠡᠢ ᠰᠢᠦ ᠳᠡ》 ᠭᠡᠵᠦ ᠪᠣᠳᠣᠭᠰᠠᠨ ᠨᠢ ᠣᠳᠣ ᠲᠠᠯᠠᠭᠠᠷ ᠪᠣᠯᠤᠨ ᠤᠴᠢᠷ ᠨᠢ ᠣᠯᠳᠠᠬᠤ ᠪᠠᠨ ᠪᠠᠢᠵᠠᠢ᠃
ᠬᠢᠶᠠᠭᠲᠤ ᠳ᠋ᠤ᠌ ᠢᠷᠡᠭᠡᠳ ᠠᠷᠠᠳ ᠤ᠋ᠨ ᠨᠠᠮ ᠤ᠋ᠨ ᠬᠢᠨ ᠪᠠᠶᠠᠷ ᠬᠦᠩ ᠢ᠋ ᠲᠤᠰᠬᠠᠢ ᠭᠡᠷ ᠲᠦ᠍ ᠣᠷᠣᠭᠤᠯᠤᠭᠠᠳ ᠬᠣᠢᠨᠠ ᠠ᠋ᠴᠠ ᠨᠢ ᠰᠦᠬᠡᠪᠠᠭᠠᠲᠤᠷ ᠪᠤᠰᠤᠳ ᠤᠳᠤᠷᠢᠳᠬᠤ ᠨᠥᠬᠥᠳ ᠲᠡᠢ ᠪᠡᠨ ᠣᠷᠣᠪᠠ᠃ ᠬᠠᠮᠲᠤ ᠢᠷᠡᠭᠰᠡᠨ ᠴᠡᠷᠢᠭ ᠦ᠋ᠳ ᠨᠢ ᠣᠷᠣᠨ ᠪᠠᠢᠷᠢ ᠤᠷᠤᠭᠤ ᠪᠠᠨ ᠶᠠᠪᠤᠬᠤ ᠳ᠋ᠤ᠌ ᠨᠥᠭᠦᠭᠡ ᠭᠤᠷᠪᠠ ᠮᠥᠨ ᠯᠡ ᠤᠴᠢᠷ ᠢ᠋ᠶ᠋ᠠᠨ ᠣᠯᠬᠤ ᠦᠭᠡᠢ ᠬᠡᠪ ᠢ᠋ᠶ᠋ᠡᠷ ᠭᠡᠷ ᠦ᠋ᠨ ᠬᠠᠶᠠᠭᠠᠨᠠ ᠰᠠᠬᠢᠬᠤ ᠮᠠᠨᠠᠭᠠ ᠰᠢᠭ᠋ ᠦᠯᠡᠳᠡᠪᠡ᠃ ᠳᠣᠲᠣᠭᠠᠳᠤ ᠰᠡᠳᠬᠢᠯ ᠨᠢ ᠢᠵᠢᠯᠢ ᠳ᠋ᠡᠭᠡᠨ ᠢᠵᠢᠯᠢ᠂ ᠲᠡᠢᠨ ᠳ᠋ᠦ᠍ ᠢᠯᠠᠭᠳᠠᠭᠰᠠᠨ ᠠ᠋ᠴᠠ ᠪᠠᠨ ᠢᠯᠡᠭᠦᠦ ᠲᠡᠷᠢᠭᠦᠯᠡᠭᠴᠢ ᠵᠠᠩᠵᠤᠨ ᠢ᠋ᠶ᠋ᠠᠨ ᠪᠠᠷᠢᠭᠳᠠᠭᠤᠯᠤᠭᠰᠠᠨ ᠳ᠋ᠠᠭᠠᠨ ᠭᠣᠣᠯ ᠬᠠᠷᠠᠯᠠᠨᠠ᠃ ᠭᠡᠷ ᠲᠡᠬᠢ ᠬᠥᠮᠦᠰ ᠪᠠᠶᠠᠷ ᠬᠦᠩ ᠡᠴᠡ ᠦᠶᠡ ᠦᠶᠡ ᠶᠠᠭᠤᠮᠠ ᠠᠰᠠᠭᠤᠬᠤ ᠰᠢᠭ᠋ ᠪᠣᠯᠵᠤ ᠪᠠᠢᠬᠤ ᠳ᠋ᠤ᠌ ᠬᠠᠷᠢᠭᠤ ᠠᠯᠠᠭᠠ᠃ ᠭᠠᠭᠴᠠᠬᠠᠨ ᠤᠳᠠᠭᠠ《ᠠ᠋ ᠪᠢ ᠡᠵᠡᠨ ᠬᠠᠭᠠᠨ ᠤ᠋ ᠲᠥᠷᠥ ᠶ᠋ᠢᠨ ᠲᠥᠯᠥᠭᠡ ᠳᠠᠯᠠᠨ ᠬᠡᠳᠦ ᠤᠳᠠᠭᠠ ᠲᠡᠢᠨ ᠳ᠋ᠦ᠍ ᠣᠷᠣᠭᠰᠠᠨ᠂ ᠡᠢᠮᠦ ᠲᠩᠷᠢ ᠨᠢ ᠬᠠᠶᠠᠭᠰᠠᠨ ᠲᠡᠢᠨ ᠦᠵᠡᠭᠡ ᠦᠭᠡᠢ᠂ ᠵᠠᠯᠠᠭᠤ ᠵᠠᠩᠵᠤᠨ ᠴᠢ ᠨᠠᠳᠠ ᠭᠠᠭᠴᠠ ᠰᠤᠮᠤ ᠬᠠᠢᠷᠠᠯᠠ!》 ᠭᠡᠵᠦ ᠪᠦᠳᠦᠭᠦᠨ ᠢ᠋ᠶ᠋ᠡᠷ ᠤᠨᠵᠢᠷᠠᠭᠤᠯᠤᠨ ᠥᠭᠦᠯᠡᠭᠡᠳ ᠬᠣᠢᠨᠠ ᠠ᠋ᠴᠠ ᠨᠢ ᠶᠣᠰᠣᠲᠠᠢ ᠬᠠᠪᠬᠠᠨ ᠳ᠋ᠤ᠌ ᠣᠷᠣᠭᠰᠠᠨ ᠴᠢᠨᠣᠠ ᠶ᠋ᠢᠨ ᠠᠪᠢᠶᠠ ᠪᠠᠷ ᠶᠠᠩᠭᠢᠨᠠᠭᠤᠯᠤᠨ ᠤᠬᠢᠯᠠᠪᠠ᠃ ᠡᠨᠡ ᠨᠢ ᠳ᠋ᠠᠨᠽᠠᠨ ᠳ᠋ᠤ᠌ ᠮᠠᠰᠢ ᠬᠠᠷᠠᠭᠤᠰᠠᠯᠲᠠᠢ᠃《ᠠ ᠳᠠ ᠰᠤᠮᠤ ᠯᠠ ᠪᠢᠲᠡᠭᠡᠢ ᠥᠭᠭᠦᠭᠡᠰᠠᠢ ᠪᠢᠯᠡ》 ᠭᠡᠵᠦ ᠠᠮᠠᠨ ᠳ᠋ᠠᠭᠠᠨ ᠥᠭᠦᠯᠡᠨ ᠮᠠᠩᠨᠨᠠᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠥᠯᠥᠰᠥ ᠶ᠋ᠢ ᠠᠷᠴᠢᠨᠠ᠃ ᠰᠦᠬᠡᠪᠠᠭᠠᠲᠤᠷ ᠨᠥᠬᠥᠳ ᠲᠡᠢ ᠪᠡᠨ ᠭᠡᠷ ᠡᠴᠡ ᠭᠠᠷᠴᠤ ᠣᠳᠪᠠ᠃ ᠠᠷᠤ ᠳ᠋ᠤᠨᠢ ᠫᠤᠤ ᠳᠤᠤᠭᠠᠷᠬᠤ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠳ᠋ᠠᠨᠽᠠᠨ ᠠᠱ᠌ᠢᠭᠦᠢ ᠰᠤᠮᠤ ᠥᠭᠭᠦᠭᠡ ᠦᠭᠡᠢ ᠪᠠᠢᠵᠤ ᠭᠡᠵᠦ ᠰᠡᠳᠬᠢᠯ ᠲᠠᠢᠪᠤᠰᠢᠷᠠᠨᠠ᠃ ᠦᠶᠡ ᠦᠶᠡ ᠬᠦᠨᠳᠦ ᠪᠡᠷ ᠰᠠᠨᠠᠭᠠ ᠠᠯᠳᠠᠬᠤ ᠰᠣᠨᠣᠰᠳᠠᠬᠤ ᠳ᠋ᠤ᠌ ᠠᠮᠢᠳᠤ ᠪᠠᠢᠨᠠ ᠭᠡᠵᠦ ᠪᠠᠶᠠᠷᠯᠠᠨᠠ᠃ ᠨᠢᠭᠡ ᠬᠥᠮᠦᠨ ᠳᠡᠷᠭᠡᠳᠡ ᠢᠷᠡᠵᠦ《ᠵᠡᠪᠰᠡᠭ ᠢ᠋ᠶ᠋ᠡᠨ ᠬᠤᠷᠢᠶᠠᠯᠭᠠᠵᠠᠭᠠ!》 ᠭᠡᠰᠡᠨ ᠳ᠋ᠦ᠍ ᠳ᠋ᠠᠨᠽᠠᠨ ᠤ᠋ ᠬᠠᠵᠠᠭᠤ ᠠ᠋ᠴᠠ《ᠶᠠᠭᠤᠨ ᠳ᠋ᠤ᠌ ᠲᠡᠷᠡ ᠪᠢᠯᠡ ᠠ᠋!》 ᠭᠡᠪᠡ᠃
ᠬᠠᠷᠢᠭᠤ ᠳ᠋ᠤᠨᠢ᠄ ᠦᠭᠡᠢ ᠲᠠ ᠨᠠᠷ ᠴᠢᠨᠢ ᠡᠨᠡ ᠪᠠᠶᠠᠷ ᠬᠦᠩ ᠦ᠋ᠨ ᠬᠢᠨ ᠪᠠᠢᠭᠠ ᠪᠢᠵᠡ ᠳᠡ ᠭᠡᠬᠦ ᠳ᠋ᠦ᠍ᠨᠢ ᠬᠡᠨ ᠨᠢ ᠴᠦ᠍ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠭᠡᠷ ᠲᠦᠰᠢᠭᠦᠯᠦᠨ ᠲᠠᠯᠪᠢᠭᠰᠠᠨ ᠭᠤᠷᠪᠠᠨ ᠫᠤᠤ ᠤᠨᠤᠭᠠ ᠮᠣᠷᠢᠳ ᠤ᠋ᠨ ᠬᠠᠮᠲᠤ ᠦᠭᠡᠢ ᠪᠣᠯᠤᠭᠰᠠᠨ ᠪᠠᠢᠯᠠ᠃ ᠥᠨᠥᠬᠢ ᠬᠥᠮᠦᠨ ᠠᠪᠤᠭᠠᠳ ᠶᠠᠪᠤᠵᠠᠢ᠃ ᠭᠡᠲᠡᠯᠡ ᠲᠡᠷᠡ ᠬᠥᠮᠦᠨ ᠪᠡᠶᠡ ᠳ᠋ᠦ᠍ ᠪᠦᠰᠡᠯᠡᠭᠰᠡᠨ ᠲᠠᠢᠵᠠ ᠲᠠᠢ ᠰᠤᠮᠤ ᠶ᠋ᠢ ᠠᠪᠤᠭᠠ ᠦᠭᠡᠢ ᠨᠢ ᠡᠳᠡ ᠫᠤᠤ ᠦᠭᠡᠢ ᠪᠡᠷ ᠠᠶᠤᠯ ᠭᠠᠷᠭᠠᠬᠤ ᠦᠭᠡᠢ ᠭᠡᠰᠡᠨ ᠡᠴᠡ ᠪᠤᠶᠤ ᠡᠰᠡᠪᠡᠯ ᠬᠥᠮᠦᠨ ᠦ᠌ ᠪᠡᠶᠡ ᠳ᠋ᠦ᠍ ᠬᠠᠯᠳᠠᠬᠤ ᠠ᠋ᠴᠠ ᠪᠠᠨ ᠵᠣᠪᠠᠭᠰᠠᠨ ᠴᠤ᠌ ᠪᠠᠢᠵᠤ ᠮᠡᠳᠡᠨᠡ᠃
ᠨᠢᠭᠡ ᠬᠥᠮᠦᠨ ᠬᠤᠪᠢᠩ ᠲᠠᠢ ᠬᠣᠭᠣᠯᠠ ᠪᠠᠷᠢᠨ ᠢᠷᠡᠵᠦ ᠭᠡᠷ ᠲᠦ᠍ ᠣᠷᠣᠬᠤ ᠳ᠋ᠤ᠌ ᠳ᠋ᠠᠨᠽᠠᠨ ᠭᠡᠳᠡᠰᠦ ᠥᠯᠥᠰᠴᠦ ᠪᠠᠢᠭᠠ ᠪᠠᠨ ᠰᠠᠨᠠᠨ ᠶᠠᠭᠤᠮᠠ ᠣᠯᠵᠤ ᠢᠳᠡᠬᠦ ᠪᠡᠷ ᠶᠠᠪᠤᠯᠠ᠃ ᠴᠡᠷᠢᠭ ᠦ᠋ᠳ ᠦ᠋ᠨ ᠣᠷᠣᠨ ᠪᠠᠢᠷᠢ ᠶ᠋ᠢᠨ ᠬᠠᠪᠢ ᠪᠠᠷ ᠶᠠᠪᠤᠬᠤ ᠳ᠋ᠤ᠌ ᠮᠥᠨ ᠯᠡ ᠬᠠᠢᠬᠤᠷᠬᠤ ᠬᠥᠮᠦᠨ ᠠᠯᠠᠭᠠ᠃ ᠡᠮᠦᠰᠦᠭᠰᠡᠨ ᠬᠤᠪᠴᠠᠰᠤ ᠦᠯᠦ ᠢᠯᠭᠠᠭᠳᠠᠬᠤ ᠪᠠᠢᠭᠰᠠᠨ ᠠ᠋ᠴᠠ ᠴᠤ᠌ ᠪᠠᠢᠵᠤ ᠮᠡᠳᠡᠨᠡ᠃ ᠲᠤᠩ ᠳᠤᠤᠭᠠᠷᠴᠤ ᠴᠡᠷᠢᠭ ᠦ᠋ᠳ ᠬᠣᠭᠣᠯᠠᠨ ᠳ᠋ᠠᠭᠠᠨ ᠣᠷᠣᠬᠤ ᠳ᠋ᠤ᠌ ᠨᠥᠭᠦᠭᠡ ᠭᠤᠷᠪᠠ ᠶᠠᠭᠤᠮᠠ ᠭᠣᠷᠢᠳᠠᠨ ᠬᠣᠢᠨᠠ ᠠ᠋ᠴᠠ ᠨᠢ ᠣᠷᠣᠭᠰᠠᠨ ᠪᠣᠯᠪᠠᠴᠤ ᠮᠥᠨ ᠬᠠᠢᠬᠤᠷᠬᠤ ᠬᠥᠮᠦᠨ ᠳᠠᠩᠴᠤ ᠦᠭᠡᠢ ᠶ᠋ᠢ ᠳᠠᠯᠢᠮᠳᠠᠭᠤᠯᠤᠨ ᠪᠦᠬᠦᠯᠢ ᠮᠢᠬᠠ ᠬᠤᠪᠢᠶᠠᠵᠤ ᠪᠠᠢᠭᠠ ᠭᠠᠯᠴᠢ ᠶ᠋ᠢᠨ ᠡᠮᠦᠨᠡ ᠣᠴᠢᠨ ᠭᠠᠷ ᠲᠤᠰᠪᠠ᠃ ᠲᠡᠭᠡᠭᠡᠳ ᠲᠤᠰ ᠪᠦᠷᠢ ᠪᠡᠨ ᠬᠡᠰᠡᠭ ᠮᠢᠬᠠ ᠬᠦᠯᠢᠶᠡᠨ ᠠᠪᠴᠤ ᠢᠳᠡᠭᠡᠳ ᠳᠠᠷᠠᠭᠠ ᠨᠢ ᠱᠥᠯᠦᠨ ᠳ᠋ᠦ᠍ᠨᠢ ᠴᠢᠨᠠᠭᠰᠠᠨ ᠰᠢᠷᠠ ᠪᠤᠳᠠᠭᠠ ᠪᠠᠷ ᠭᠡᠳᠡᠰᠦ ᠪᠡᠨ ᠲᠦᠩᠬᠦᠢᠯᠭᠡᠵᠦ ᠠᠪᠤᠭᠠᠳ ᠪᠤᠴᠠᠪᠠ᠃
ᠥᠨᠥᠬᠢ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠬᠠᠶᠠᠭᠠᠨ ᠳ᠋ᠤ᠌ ᠢᠷᠡᠭᠡᠳ ᠮᠥᠨ ᠯᠡ ᠮᠠᠨᠠᠭᠠ ᠰᠢᠭ᠋ ᠰᠠᠭᠤᠵᠠᠭᠠᠵᠤ ᠪᠠᠢᠲᠠᠯᠠ ᠨᠢᠭᠡ ᠬᠥᠮᠦᠨ ᠳᠡᠷᠭᠡᠳᠡ ᠨᠢ ᠢᠷᠡᠨ ᠪᠠᠬᠠᠨ ᠠᠵᠢᠭᠯᠠᠬᠤ ᠰᠢᠭ᠋ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ᠄
— ᠴᠢ ᠴᠢᠨᠢ ᠣᠳᠣ ᠮᠠᠨ ᠤ᠋ ᠨᠤᠲᠤᠭ ᠤ᠋ᠨ ᠳ᠋ᠠᠨᠽᠠᠨ ᠬᠦᠦ ᠮᠥᠨ ᠤᠤ ᠳᠠ ᠭᠡᠬᠦ ᠳ᠋ᠦ᠍ᠨᠢ ᠳ᠋ᠠᠨᠽᠠᠨ ᠲᠣᠯᠣᠭᠠᠢ ᠡᠷᠭᠦᠨ ᠬᠠᠷᠠᠪᠠ᠃ ᠨᠢᠳᠦᠨ ᠳ᠋ᠦ᠍ᠨᠢ ᠬᠡᠵᠢᠶᠡᠨᠡᠢ ᠲᠠᠨᠢᠯ ᠪᠠᠭᠠᠰᠠᠩ᠂ ᠠᠷᠤ ᠳ᠋ᠤᠨᠢ ᠬᠦᠷᠡᠯ ᠦ᠋ᠨ ᠬᠦᠦ ᠴᠡᠷᠢᠨᠳᠤᠷᠵᠢ ᠬᠠᠷᠠᠭᠳᠠᠪᠠᠴᠤ ᠳ᠋ᠠᠨᠽᠠᠨ ᠳ᠋ᠤ᠌ ᠳᠤᠤᠭᠠᠷᠬᠤ ᠬᠦᠰᠡᠯ ᠠᠯᠠᠭᠠ᠃ ᠬᠠᠷᠢᠨ ᠰᠡᠳᠬᠢᠯ ᠳ᠋ᠦ᠍ᠨᠢ ᠬᠥᠭᠡᠷᠦᠬᠦᠢ ᠬᠥᠮᠦᠨ ᠬᠦᠷᠡᠯ ᠪᠣᠳᠣᠭᠳᠠᠨ ᠬᠠᠷᠠᠰᠠᠭᠳᠠᠨᠠ᠃ ᠨᠥᠭᠦᠭᠡ ᠬᠣᠶᠠᠷ ᠪᠠᠰᠠ ᠪᠠᠬᠠᠨ ᠠᠵᠢᠭᠯᠠᠨ ᠵᠣᠭᠰᠣᠭᠰᠠᠨ ᠢ᠋ᠶ᠋ᠠᠨ᠄
— ᠴᠢ ᠴᠦ᠍ ᠳ᠋ᠠᠨᠽᠠᠨ ᠮᠥᠨ ᠯᠡ ᠪᠠᠢᠨᠠ ᠯᠠ ᠳᠠ᠂ ᠪᠢ ᠴᠢᠮᠠᠶ᠋ᠢ ᠲᠠᠨᠢᠵᠤ ᠪᠠᠢᠨᠠ᠃ ᠲᠡᠷᠡ ᠵᠢᠯ ᠦ᠋ᠨ ᠴᠢᠨᠢ ᠬᠠᠮᠲᠤ ᠵᠢᠩ ᠲᠡᠭᠡᠭᠡᠵᠦ ᠭᠠᠷᠤᠭᠰᠠᠨ ᠳᠣᠷᠵᠢ ᠡᠪᠦᠯ ᠢᠷᠡᠭᠰᠡᠨ᠂ ᠲᠡᠭᠦᠨ ᠦ᠌ ᠶᠠᠷᠢᠭᠰᠠᠨ ᠠ᠋ᠴᠠ ᠦᠵᠡᠬᠦ ᠳ᠋ᠦ᠍ ᠴᠢ ᠡᠳᠦᠢ ᠳ᠋ᠦ᠍ ᠬᠠᠮᠢᠭᠠ ᠴᠦ᠍ ᠪᠠᠢᠮᠠ ᠦᠭᠡᠢ ᠪᠢᠯᠡ᠃ ᠭᠡᠲᠡᠯᠡ ᠡᠨᠳᠡ ᠶᠠᠪᠤᠵᠤ ᠪᠠᠢᠬᠤ ᠨᠢ ᠶᠠᠭᠤ ᠪᠣᠢ? ᠶᠠᠭᠠᠬᠢᠭᠠᠳ ᠡᠨᠡ ᠪᠣᠢ?
— ᠠ ᠶᠠᠭᠤ ᠭᠡᠨᠡ ᠠ᠋? ᠦᠭᠡᠢ ᠲᠡᠭᠡᠭᠡᠳ ᠲᠡᠷᠡ ᠳᠣᠷᠵᠢ ᠣᠳᠣ ᠬᠠᠮᠢᠭᠠ ᠶᠠᠪᠤᠨᠠ ᠪᠣᠢ? ᠭᠡᠵᠦ ᠳ᠋ᠠᠨᠽᠠᠨ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠳᠠᠭᠤ ᠠᠯᠲᠠᠨ ᠠᠰᠠᠭᠤᠬᠤ ᠳ᠋ᠤ᠌ ᠪᠠᠭᠠᠰᠠᠩ᠄
— ᠤᠭ ᠨᠢ ᠡᠨᠳᠡ ᠯᠡ ᠳᠡ᠃ ᠬᠠᠷᠢᠨ ᠶᠠᠭ ᠣᠳᠣᠬᠠᠨ ᠳ᠋ᠠᠭᠠᠨ ᠪᠠᠢᠬᠤ ᠦᠭᠡᠢ᠂ ᠪᠠᠷᠠᠭᠤᠨ ᠲᠠᠢᠰᠢ ᠲᠠᠨ ᠤ᠋ ᠬᠢᠨ ᠦ᠌ ᠴᠠᠭᠠᠨᠲᠠᠨ ᠨᠤᠭᠤᠳ ᠢ᠋ ᠬᠥᠭᠡᠭᠡᠬᠦ ᠪᠡᠷ ᠶᠠᠪᠤᠴᠢᠬᠠᠭᠰᠠᠨ᠃
ᠳ᠋ᠠᠨᠽᠠᠨ ᠳᠠᠬᠢᠨ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠂ ᠨᠥᠭᠦᠭᠡ ᠬᠣᠶᠠᠷ ᠨᠢ ᠲᠡᠭᠦᠨ ᠦ᠌ ᠳᠤᠤᠭᠠᠷᠬᠤ ᠳᠤᠷᠠ ᠦᠭᠡᠢ ᠪᠠᠢᠭᠠ ᠶ᠋ᠢ ᠮᠡᠳᠡᠭᠡᠳ ᠶᠠᠪᠤᠴᠢᠬᠠᠯᠠ᠃
ᠰᠥᠨᠢ ᠲᠡᠷᠡ ᠭᠤᠷᠪᠠ ᠮᠥᠨ ᠭᠡᠷ ᠦ᠋ᠨ ᠬᠠᠶᠠᠭᠠᠨᠠ ᠤᠨᠲᠠᠬᠤ ᠪᠠᠷ ᠬᠡᠪᠲᠡᠪᠡ᠃ ᠳᠡᠷᠡ ᠳᠡᠪᠢᠰᠬᠡᠷ ᠦᠭᠡᠢ ᠬᠡᠪᠲᠡᠭᠰᠡᠨ ᠲᠡᠳᠡᠨ ᠦ᠌ ᠳᠣᠣᠷᠠ ᠠ᠋ᠴᠠ ᠨᠣᠢᠲᠠᠨ ᠭᠠᠵᠠᠷ ᠤ᠋ᠨ ᠴᠢᠭᠢᠭ ᠬᠠᠷᠪᠤᠨ ᠵᠢᠩᠳᠡᠬᠦ ᠨᠢ ᠶᠠᠭᠤ ᠴᠦ᠍ ᠪᠢᠰᠢ᠂ ᠳᠡᠭᠡᠷᠡ ᠨᠢ ᠬᠠᠷᠢᠨ ᠲᠩᠷᠢ ᠴᠡᠯᠢᠢᠬᠦ ᠪᠡᠷ ᠢ᠋ᠶ᠋ᠡᠨ ᠨᠢᠭᠡ ᠴᠡᠯᠢᠢᠵᠤ ᠪᠠᠢᠬᠤ ᠨᠢ ᠠᠶᠠᠲᠠᠢ᠃
ᠳ᠋ᠠᠨᠽᠠᠨ ᠨᠥᠭᠦᠭᠡ ᠬᠣᠶᠠᠷ ᠤ᠋ᠨ ᠳᠤᠮᠳᠠ ᠬᠡᠪᠲᠡᠭᠰᠡᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠠᠷᠠᠭᠤᠨ ᠲᠠᠢᠰᠢ ᠡᠷᠭᠢᠨ ᠵᠢᠭᠠᠯ ᠵᠤᠭᠠ ᠶᠠᠷᠢᠯᠴᠠᠬᠤ ᠭᠡᠬᠦ ᠳ᠋ᠦ᠍ ᠲᠡᠷᠡ ᠨᠢ ᠭᠤᠨᠢᠭ ᠭᠤᠲᠤᠷᠠᠯ ᠪᠣᠯᠤᠨ ᠲᠡᠳᠦᠢ ᠯᠡ ᠳᠤᠤᠭᠠᠷᠴᠤ ᠥᠭᠬᠦ ᠦᠭᠡᠢ ᠪᠠᠢᠯᠠ᠃ ᠬᠠᠷᠢᠨ ᠵᠡᠭᠦᠨ ᠲᠠᠯᠠ ᠶ᠋ᠢᠨ ᠬᠢᠨᠢ ᠰᠠᠢᠨ ᠪᠡᠢᠰᠡ ᠶ᠋ᠢᠨ ᠬᠤᠰᠢᠭᠤᠨ ᠤ᠋ ᠳᠣᠪᠳᠤᠨ ᠭᠡᠭᠴᠢ᠄
— ᠬᠥᠶᠢ ᠳ᠋ᠠᠨᠽᠠᠨ ᠠ᠋! ᠭᠡᠵᠦ ᠰᠠᠮ ᠰᠢᠪᠡᠨᠡᠭᠡᠳ᠄ ᠪᠢᠳᠡ ᠥᠨᠥᠳᠥᠷ ᠶᠠᠭᠠᠬᠢᠭᠠᠳ ᠡᠢᠮᠦ ᠠᠮᠠᠷᠬᠠᠨ ᠵᠣᠬᠢᠬᠳᠠᠭᠰᠡᠨ ᠦ᠌ ᠤᠴᠢᠷ ᠢ᠋ ᠴᠢ ᠮᠡᠳᠡᠵᠦ ᠪᠠᠢᠨᠠ ᠤᠤ?
— ᠣᠳᠣ ᠶᠠᠭᠠᠬᠢᠶᠠ ᠭᠡᠬᠦ ᠪᠣᠢ? ᠭᠠᠭᠴᠠᠬᠠᠨ ᠲᠡᠷᠡ ᠭᠠᠢ ᠲᠠᠢ ᠰᠤᠮᠤ ᠱᠦᠭᠦᠷ ᠡᠴᠡ ᠯᠡ᠁
— ᠦᠭᠡᠢ᠂ ᠲᠡᠷᠡ ᠰᠤᠮᠤ ᠱᠦᠭᠦᠷ ᠶᠠᠭᠠᠬᠢᠬᠤᠪ᠂ ᠭᠠᠭᠴᠠᠬᠠᠨ ᠠᠩᠬᠠᠨ ᠤ᠋ ᠮᠣᠷᠳᠠᠬᠤ ᠠ᠋ᠴᠠ ᠯᠠ ᠬᠠᠵᠠᠭᠠᠢ ᠪᠠᠢᠭᠰᠠᠨ ᠠ᠋ᠴᠠ᠁
— ᠮᠣᠷᠳᠠᠬᠤ ᠶ᠋ᠢᠨ ᠬᠠᠵᠠᠭᠠᠢ ᠪᠠᠢᠭᠰᠠᠨ ᠭᠡᠵᠦ ᠤᠤ?
— ᠲᠡᠭᠡᠬᠦ ᠦᠭᠡᠢ ᠶᠠᠭᠠᠬᠢᠬᠤᠪ᠂ ᠮᠠᠨ ᠤ᠋ ᠪᠠᠭᠠᠲᠤᠷ ᠡᠳᠡᠨ ᠢ᠋ ᠲᠡᠷᠡ ᠢᠷᠮᠡᠭ ᠳᠡᠭᠡᠷᠡ ᠢᠷᠡᠨ ᠪᠡᠯᠡᠳᠬᠡᠭᠰᠡᠨ ᠪᠠᠢᠨᠠ ᠭᠡᠵᠦ ᠣᠭᠲᠣ ᠰᠠᠨᠠᠭᠠ ᠦᠭᠡᠢ ᠡᠴᠡ ᠯᠡ᠁
— ᠠ᠋᠂ ᠨᠡᠭᠡᠷᠡᠨ ᠲᠡᠭᠡᠵᠦ ᠰᠢᠦ ᠭᠡᠵᠦ ᠳ᠋ᠠᠨᠽᠠᠨ ᠠᠮᠠ ᠪᠠᠷᠢᠨ ᠭᠠᠰᠠᠯᠤᠭᠠᠳ᠄ ᠦᠭᠡᠢ ᠬᠦ᠂ ᠤᠭ ᠨᠢ ᠮᠠᠨ ᠤ᠋ ᠪᠠᠭᠠᠲᠤᠷ ᠡᠳᠡᠨ ᠢ᠋ ᠳᠡᠢᠯᠬᠦ ᠤᠬᠠᠭᠠᠨ ᠢ᠋ᠶ᠋ᠠᠨ ᠮᠥᠨ ᠰᠠᠢᠬᠠᠨ ᠬᠢᠭᠰᠡᠨ ᠳᠡ᠃
— ᠢᠱ᠌ᠢ ᠲᠡᠢᠮᠦ᠂ ᠭᠠᠭᠴᠠᠬᠠᠨ ᠲᠡᠷᠡ ᠭᠠᠢ ᠲᠠᠢ ᠢᠷᠮᠡᠭ! ᠦᠭᠡᠢ ᠬᠦ ᠪᠢᠳᠡ ᠢᠷᠮᠡᠭ ᠲᠦ᠍ ᠮᠡᠨᠳᠦ ᠲᠤᠯᠵᠤ ᠴᠢᠳᠠᠭᠰᠠᠨ ᠰᠠᠨ ᠪᠣᠯ ᠡᠳᠦᠢ ᠳ᠋ᠦ᠍ ᠡᠨᠡ ᠬᠢᠶᠠᠭᠲᠤ ᠳ᠋ᠤ᠌ ᠵᠠᠩᠵᠤᠨ ᠰᠠᠭᠤᠬᠤ ᠪᠠᠢᠯᠠ ᠰᠢᠦ ᠳᠡ᠃
ᠴᠣᠬᠣᠮ ᠬᠡᠯᠡᠭᠡᠳ ᠶᠠᠭᠠᠬᠢᠬᠤᠪ᠃ ᠡᠢᠨᠬᠦ ᠲᠡᠷᠡ ᠬᠣᠶᠠᠷ ᠵᠥᠨᠥᠲᠦᠭ ᠶᠠᠷᠢᠯᠴᠠᠬᠤ ᠳ᠋ᠠᠭᠠᠨ ᠠᠮᠠ ᠪᠠᠨ ᠪᠠᠷᠢᠨ ᠭᠠᠰᠠᠯᠤᠭᠰᠠᠨ ᠨᠢ ᠮᠠᠰᠢ ᠣᠯᠠᠨ᠃ ᠭᠡᠪᠡᠴᠦ ᠲᠡᠷᠡ ᠶᠠᠷᠢᠶᠠᠨ ᠳ᠋ᠠᠭᠠᠨ ᠰᠣᠭᠲᠣᠭᠤᠷᠠᠨ ᠰᠡᠳᠬᠢᠯ ᠠᠮᠠᠷᠠᠨ ᠨᠠᠮ ᠤᠨᠲᠠᠴᠢᠬᠠᠭᠰᠠᠨ ᠪᠠᠢᠪᠠ᠃ ᠥᠷᠯᠥᠭᠡ ᠰᠡᠷᠡᠬᠦ ᠳ᠋ᠦ᠍ ᠪᠠᠷᠠᠭᠤᠨ ᠲᠠᠯᠠ ᠳ᠋ᠤ᠌ ᠤᠨᠲᠠᠭᠰᠠᠨ ᠨᠢ ᠠᠯᠠᠭᠠ᠃
— ᠬᠥᠶᠢ ᠥᠨᠥᠬᠢ ᠮᠠᠨᠢ ᠬᠠᠮᠢᠭᠠ ᠣᠴᠢᠪᠠ?
— ᠠᠯᠠᠭᠠ᠂ ᠣᠷᠭᠣᠭᠠᠳ ᠶᠠᠪᠤᠵᠠᠢ᠃
— ᠣᠳᠣ ᠪᠢᠳᠡᠨ ᠢ᠋ ᠪᠡᠨ ᠬᠠᠶᠠᠭᠠᠳ ᠤᠤ?
— ᠪᠢᠳᠡᠨ ᠢ᠋ ᠪᠡᠨ ᠪᠠᠢᠲᠤᠭᠠᠢ ᠬᠥᠮᠦᠨ ᠦ᠌ ᠭᠠᠷ ᠲᠤ᠌ ᠰᠢᠷᠬᠠᠲᠤᠨ ᠪᠠᠷᠢᠭᠳᠠᠭᠰᠠᠨ ᠪᠠᠭᠠᠲᠤᠷ ᠠ᠋ᠴᠠ ᠪᠠᠨ ᠴᠤ᠌ ᠬᠠᠭᠠᠴᠠᠨ᠂ ᠬᠠᠶᠠᠭᠠᠳ ᠭᠡᠴᠢ᠃
— ᠠ ᠨᠣᠪᠰᠢ! ᠲᠡᠷᠡ ᠢᠩᠭᠢᠭᠰᠡᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠥᠭᠡᠳᠡᠯᠡᠬᠦ ᠦᠭᠡᠢ᠃ ᠴᠣᠬᠣᠮ ᠵᠠᠶᠠᠭᠠ ᠨᠢ ᠦᠭᠡᠢ᠃
— ᠮᠡᠳᠡᠭᠡᠵᠢ ᠶ᠋ᠢᠨ ᠬᠡᠷᠡᠭ᠂ ᠡᠢᠮᠦ ᠴᠠᠭ ᠲᠤ᠌ ᠡᠵᠡᠨ ᠢ᠋ᠶ᠋ᠡᠨ᠂ ᠡᠷᠡ ᠨᠥᠬᠥᠷ ᠢ᠋ᠶ᠋ᠡᠨ ᠬᠠᠶᠠᠨ ᠵᠢᠭᠤᠲᠠᠭᠰᠠᠨ ᠬᠥᠮᠦᠨ ᠦ᠌ ᠦᠢᠯᠡᠰ ᠬᠡᠵᠢᠶᠡᠳᠡ ᠬᠠᠵᠠᠭᠠᠢ ᠶᠠᠪᠤᠨᠠ᠃
— ᠲᠡᠭᠡᠨᠡ᠂ ᠶᠣᠰᠣᠲᠠᠢ ᠲᠡᠭᠡᠨᠡ᠂ ᠴᠢ ᠬᠠᠷᠠᠭᠠᠳ ᠯᠠ ᠪᠠᠢᠭᠠᠷᠠᠢ!
ᠵᠢᠷᠤᠮᠲᠤ ᠴᠡᠷᠢᠭ ᠦ᠋ᠳ ᠦ᠋ᠨ ᠥᠷᠯᠥᠭᠡ ᠶ᠋ᠢᠨ ᠴᠠᠢ ᠶ᠋ᠢᠨ ᠲᠤᠩ ᠲᠠᠲᠠᠬᠤ ᠳ᠋ᠤ᠌ ᠬᠣᠶᠠᠭᠤᠯᠠ ᠤᠴᠢᠷ ᠮᠡᠳᠡᠨ ᠭᠦᠶᠦᠨ ᠬᠦᠷᠪᠡ᠃ ᠬᠥᠮᠦᠰ ᠬᠤᠷᠢᠶᠠᠯᠲᠠ ᠲᠠᠢ ᠳᠣᠩᠬᠣᠷ ᠲᠣᠮᠣ ᠮᠣᠳᠣᠨ ᠠᠶᠠᠭᠠ ᠠ᠋ᠴᠠ ᠠᠪᠤᠨ ᠭᠠᠯᠴᠢ ᠶ᠋ᠢᠨ ᠡᠮᠦᠨᠡ ᠣᠴᠢᠬᠤ ᠶ᠋ᠢ ᠲᠡᠳᠡ ᠣᠯᠵᠤ ᠬᠠᠷᠠᠩᠭᠤᠲᠠ ᠪᠠᠨ ᠳᠠᠭᠤᠷᠢᠶᠠᠪᠠ᠃ ᠬᠥᠮᠦᠨ ᠳᠣᠳᠣᠮ ᠳ᠋ᠤ᠌ ᠪᠣᠯᠤᠭᠰᠠᠨ ᠭᠤᠯᠢᠷ ᠬᠣᠭᠣᠯᠠᠨ ᠤ᠋ ᠬᠠᠯᠪᠠᠭᠠ ᠪᠠᠷ ᠨᠢᠭᠡ ᠣᠨᠣᠭᠳᠠᠳᠠᠭ ᠪᠠᠢᠵᠠᠢ᠃
ᠬᠣᠶᠠᠭᠤᠯᠠ ᠭᠤᠯᠢᠷ ᠲᠠᠢ ᠪᠣᠯᠵᠤ ᠠᠪᠤᠭᠠᠳ ᠣᠯᠠᠨ ᠠ᠋ᠴᠠ ᠣᠨᠴᠠᠭᠠᠢ ᠪᠠᠢᠰᠢᠩ ᠤ᠋ᠨ ᠪᠤᠯᠤᠩ ᠪᠠᠷᠠᠳᠠᠨ ᠰᠠᠭᠤᠪᠠ᠃ ᠭᠡᠲᠡᠯᠡ ᠳᠣᠪᠳᠤᠨ ᠭᠤᠯᠢᠷ ᠳᠡᠭᠡᠷᠡ ᠪᠠᠰᠠ ᠱᠠᠬᠠᠢ ᠶ᠋ᠢᠨ ᠴᠢᠨᠡᠭᠡᠨ ᠥᠭᠡᠬᠦᠨ ᠲᠣᠰᠣ ᠲᠠᠯᠪᠢᠵᠤ ᠥᠭᠭᠦᠭᠰᠡᠨ ᠢ᠋ ᠣᠯᠵᠤ ᠬᠠᠷᠠᠨ ᠶᠠᠭᠠᠷᠠᠨ ᠪᠣᠰᠴᠤ᠂ ᠭᠠᠯᠴᠢ ᠶ᠋ᠢᠨ ᠡᠮᠦᠨᠡ ᠣᠴᠢᠨ ᠲᠣᠰᠣ ᠨᠡᠬᠡᠪᠡ᠃ ᠥᠭᠡᠳᠡ ᠡᠴᠡ ᠨᠢ ᠭᠠᠯᠴᠢ《ᠴᠢ ᠲᠦᠷᠦᠭᠦᠨ ᠠᠪᠤᠭᠰᠠᠨ ᠪᠠᠢᠯᠭᠦᠢ ᠶᠠᠭᠠᠬᠢᠬᠤᠪ》 ᠭᠡᠰᠡᠨ ᠡᠴᠡ ᠳᠤᠪᠳᠤᠨ ᠮᠠᠷᠭᠤᠭᠠᠨ ᠡᠭᠦᠰᠬᠡᠪᠡ᠃ ᠲᠡᠷᠡ ᠳᠣᠣᠷᠠᠬᠠᠨ ᠢ᠋ᠶ᠋ᠠᠨ ᠬᠠᠷᠢᠯᠴᠠᠨ ᠳᠠᠭᠤ ᠴᠢᠩᠭᠠᠷᠠᠵᠤ ᠭᠤᠢᠯᠢᠨᠴᠢᠨ ᠲᠦᠢ᠍ᠯᠡᠨᠴᠢᠨ ᠯᠤᠢᠪᠠᠷᠴᠢᠨ ᠳ᠋ᠠᠭᠠᠨ ᠬᠦᠷᠴᠦ ᠶᠠᠪᠤᠴᠢᠬᠠᠬᠤ ᠳ᠋ᠤ᠌ ᠳ᠋ᠡᠨᠽᠠᠨ ᠣᠴᠢᠵᠤ ᠨᠥᠬᠥᠷ ᠢ᠋ᠶ᠋ᠡᠨ ᠬᠣᠢᠰᠢ ᠲᠠᠲᠠᠵᠤ ᠠᠪᠠᠴᠢᠯᠠ᠃
— ᠵᠣᠯᠢᠭ ᠮᠢᠨᠢ ᠠ᠋᠂ ᠴᠢ ᠵᠦᠭᠡᠷ ᠭᠤᠯᠢᠷ ᠣᠯᠳᠠᠭᠰᠠᠨ ᠢ᠋ᠶ᠋ᠠᠨ ᠶᠠᠭᠠᠮᠠᠢ ᠭᠡᠵᠦ ᠵᠠᠯᠪᠠᠷᠢᠨ ᠭᠥᠷᠳᠡ! ᠭᠡᠬᠦ ᠳ᠋ᠦ᠍ ᠳᠤᠪᠳᠤᠨ᠄
— ᠦᠭᠡᠢ ᠶᠠᠭᠤ ᠭᠡᠰᠡᠨ ᠦᠭᠡ ᠪᠣᠢ? ᠲᠡᠨᠳᠡ ᠬᠥᠮᠦᠨ ᠪᠦᠷᠢ ᠲᠣᠰᠣ ᠲᠠᠢ ᠭᠤᠯᠢᠷ ᠢᠳᠡᠵᠦ ᠪᠠᠢᠬᠤ ᠳ᠋ᠤ᠌ ᠪᠢᠳᠡ ᠬᠣᠶᠠᠷ ᠡᠨᠳᠡ ᠵᠠᠪᠠᠭᠠᠨ ᠭᠤᠯᠢᠷ᠁
— ᠵᠠ ᠶᠠᠷᠰᠢᠭ! ᠡᠳᠡ ᠴᠢᠨᠢ ᠡᠨᠳᠡᠬᠢ ᠶ᠋ᠢᠨ ᠡᠵᠡᠳ᠂ ᠪᠢᠳᠡ ᠬᠣᠶᠠᠷ ᠭᠡᠪᠡᠯ ᠶᠠᠭᠤ ᠪᠢᠯᠡ᠂ ᠲᠡᠭᠦᠨ ᠢ᠋ᠶ᠋ᠡᠨ ᠪᠣᠳᠣ!
— ᠭᠡᠯᠡ ᠴᠦ᠍ ᠳᠡ᠂ ᠡᠳᠡ ᠪᠢᠳᠡᠨ ᠢ᠋ ᠨᠢᠭᠡᠨᠲᠡᠶᠡ ᠠᠯᠠᠭᠠ ᠦᠭᠡᠢ ᠡᠴᠡ ᠬᠣᠢᠰᠢ ᠬᠣᠭᠣᠯᠠ ᠵᠠᠯᠭᠠᠬᠤ ᠶᠣᠰᠣᠲᠠᠢ!
— ᠶᠣᠰᠣᠲᠠᠢ ᠭᠡᠨᠡ? ᠬᠡᠨ ᠬᠡᠯᠡᠵᠦ ᠪᠠᠢᠭᠠ ᠦᠭᠡ ᠪᠣᠢ?
— ᠪᠢ᠂ ᠪᠢ ᠬᠡᠯᠡᠵᠦ ᠪᠠᠢᠨᠠ᠃
— ᠡᠪᠡᠳᠴᠢᠲᠡᠨ ᠮᠢᠨᠢ ᠪᠣᠯᠢ᠂ ᠴᠠᠭᠠᠰᠢ ᠪᠠᠨ!
ᠠᠶᠠᠭᠠ ᠲᠠᠢ ᠭᠤᠯᠢᠷ ᠢ᠋ᠶ᠋ᠠᠨ ᠬᠠᠯᠠᠭᠤᠨ ᠬᠠᠷᠠ ᠴᠠᠢ ᠪᠠᠷ ᠵᠢᠭᠤᠷᠠᠨ ᠢᠳᠡᠵᠦ᠂ ᠳᠠᠭᠤᠰᠤᠨ ᠳᠠᠭᠤᠰᠲᠠᠯᠠ ᠲᠡᠷᠡ ᠬᠣᠶᠠᠷ ᠪᠡᠶᠡ ᠪᠡᠶᠡ ᠤᠷᠤᠭᠤ ᠪᠠᠨ ᠭᠢᠯᠠᠯᠵᠠᠨ ᠰᠠᠮ ᠭᠡᠷᠡᠯᠲᠦᠪᠡ᠃ ᠭᠡᠪᠡᠴᠦ ᠲᠡᠨᠳᠡ ᠡᠴᠡ ᠭᠠᠷᠤᠩᠭᠤᠲᠠ ᠪᠠᠨ ᠵᠦᠭᠡᠷ᠄
— ᠬᠣᠶᠠᠭᠤᠯᠠ ᠪᠠᠨ ᠵᠢᠭᠠᠯ ᠵᠤᠭᠠ ᠭᠠᠳᠠᠭᠤᠷ ᠶᠠᠪᠤᠬᠤ ᠤᠤ?
— ᠲᠡᠭᠡᠶᠡ᠂ ᠶᠡᠷᠦ ᠨᠢ ᠡᠨᠳᠡ ᠶᠠᠭᠤ ᠶᠠᠭᠤ ᠪᠠᠢᠳᠠᠭ ᠢ᠋ ᠦᠵᠡᠶᠡ᠃ ᠡᠬᠢᠯᠡᠭᠡᠳ ᠲᠡᠷᠡ ᠬᠣᠶᠠᠷ ᠠᠩᠬᠠᠨ ᠤ᠋ ᠲᠡᠢᠨ ᠦ᠌ ᠳᠠᠷᠠᠭᠠᠬᠠᠨ ᠲᠠᠢ ᠭᠡᠨᠡᠳᠲᠡ ᠭᠠᠯ ᠤ᠋ᠨ ᠠᠶᠤᠯ ᠳ᠋ᠤ᠌ ᠠᠪᠲᠠᠭᠳᠠᠨ ᠰᠢᠲᠠᠭᠰᠠᠨ ᠬᠡᠳᠦᠨ ᠬᠤᠳᠠᠯᠳᠤᠭᠠ ᠶ᠋ᠢᠨ ᠰᠠᠭᠤᠷᠢᠨ ᠳᠡᠭᠡᠭᠦᠷ ᠬᠣᠭ ᠰᠢᠩᠰᠢᠯᠡᠬᠦ ᠮᠡᠲᠦ ᠪᠠᠬᠠᠨ ᠶᠠᠪᠤᠯᠠ᠃ ᠳᠠᠷᠠᠭᠠ ᠨᠢ ᠠᠯᠬᠤᠬᠤ ᠭᠢᠰᠬᠢᠬᠦ ᠶ᠋ᠢᠨ ᠢ᠋ᠶ᠋ᠡᠨ ᠰᠤᠷᠭᠠᠭᠤᠯᠢ ᠬᠢᠵᠦ ᠪᠠᠢᠭᠠ ᠬᠡᠰᠡᠭ ᠴᠡᠷᠢᠭ ᠦ᠋ᠳ ᠳᠡᠭᠡᠷᠡ ᠣᠴᠢᠨ ᠳᠠᠭᠤᠤ ᠳᠠᠭᠤᠯᠠᠬᠤ ᠶ᠋ᠢ ᠰᠣᠨᠢᠷᠬᠠᠪᠠ᠃
ᠰᠢᠪᠡᠭᠡ ᠬᠢᠶᠠᠭᠲᠤ ᠶ᠋ᠢ ᠠᠪᠬᠤ ᠳ᠋ᠤ᠌ ᠰᠢᠯᠦᠨ ᠳ᠋ᠸᠡᠭᠯᠤ ᠶᠠᠭᠤ ᠭᠡᠨᠡ ᠪᠣᠢ? ᠭᠡᠵᠦ ᠳ᠋ᠠᠨᠽᠠᠨ ᠤ᠋ ᠠᠰᠠᠭᠤᠬᠤ ᠳ᠋ᠤ᠌ ᠳᠤᠪᠳᠤᠨ᠄
— ᠰᠢᠯᠦᠨ ᠳ᠋ᠧᠩᠯᠦ ᠬᠡᠷᠡᠭ ᠦᠭᠡᠢ ᠭᠡᠨᠡ ᠭᠡᠳ ᠱᠣᠣᠯᠠᠨ ᠢᠨᠢᠶᠡᠪᠡ᠃ ᠳᠠᠷᠠᠭᠠ ᠶ᠋ᠢᠨ ᠪᠠᠳᠠᠭ ᠢ᠋ ᠳ᠋ᠠᠨᠽᠠᠨ ᠠᠩᠬᠠᠷᠤᠨ ᠴᠡᠭᠡᠵᠢᠯᠡᠭᠰᠡᠨ ᠢ᠋ᠶ᠋ᠡᠨ᠄
— ᠵᠠ ᠴᠢ ᠳᠤᠭᠤᠯᠪᠠ ᠤᠤ? ᠡᠳᠡᠨ ᠦ᠌ ᠵᠠᠩᠵᠤᠨ ᠰᠦᠬᠡᠪᠠᠭᠠᠲᠤᠷ ᠬᠤᠸᠠ ᠬᠣᠩᠭᠣᠷ ᠮᠣᠷᠢ ᠲᠠᠢ ᠬᠥᠮᠦᠨ ᠪᠠᠢᠬᠤ ᠨᠢ ᠪᠠᠢᠨᠠ ᠰᠢᠦ ᠭᠡᠬᠦ ᠳ᠋ᠦ᠍᠂
— ᠲᠡᠷᠡ ᠬᠤᠳᠠᠯ᠂ ᠥᠴᠥᠭᠡᠳᠦᠷ ᠳᠠᠪᠬᠢᠭᠠᠳ ᠢᠷᠡᠬᠦ ᠶ᠋ᠢ ᠨᠢ ᠬᠠᠷᠠᠬᠤ ᠳ᠋ᠤ᠌ ᠬᠡᠭᠡᠷ ᠮᠣᠷᠢ ᠲᠠᠢ ᠯᠠ ᠶᠠᠪᠤᠭᠰᠠᠨ ᠳ᠋ᠠᠭ᠃
— ᠵᠠ ᠶᠠᠷᠰᠢᠭ᠂ ᠬᠤᠸᠠ ᠬᠣᠩᠭᠣᠷ ᠮᠣᠷᠢ ᠪᠠᠨ ᠬᠠᠢᠷᠠᠯᠠᠨ ᠠᠭᠲᠠ ᠳ᠋ᠠᠭᠠᠨ ᠲᠠᠯᠪᠢᠴᠢᠬᠠᠭᠰᠠᠨ ᠪᠠᠢᠵᠤ ᠪᠣᠯᠬᠤ ᠪᠤᠰᠤ ᠤᠤ᠃
— ᠲᠡᠷᠡ ᠴᠦ᠍ ᠲᠡᠢᠮᠦ᠃
ᠲᠡᠨᠳᠡ ᠡᠴᠡ ᠪᠡᠨ ᠬᠣᠯᠠᠳᠠᠨ ᠬᠠᠰᠢᠶᠠ ᠬᠣᠷᠢᠶᠠ ᠪᠠᠷ ᠶᠠᠪᠤᠯᠠ᠃ ᠨᠢᠭᠡ ᠬᠠᠰᠢᠶᠠᠨ ᠤ᠋ ᠳᠡᠷᠭᠡᠳᠡ ᠢᠷᠡᠭᠡᠳ ᠳ᠋ᠠᠨᠽᠠᠨ ᠳᠣᠲᠣᠷᠠ ᠨᠢ ᠶᠠᠭᠤ ᠪᠠᠢᠬᠤ ᠶ᠋ᠢ ᠰᠣᠨᠢᠷᠬᠠᠨ ᠠᠵᠢᠬᠤ ᠳ᠋ᠠᠭᠠᠨ ᠭᠤᠷᠪᠠᠨ ᠫᠤᠤ ᠬᠠᠷᠠᠨ ᠰᠣᠴᠢᠵᠤ᠄
— ᠬᠥᠶᠢ ᠴᠢ ᠬᠠᠷᠠᠭᠠᠴᠢ! ᠡᠨᠳᠡ ᠬᠣᠶᠠᠷ ᠦᠬᠡᠷ ᠫᠤᠤ ᠪᠠᠢᠨᠠ᠃
— ᠦᠬᠡᠷ ᠫᠤᠤ ᠭᠡᠨᠡ? ᠳᠤᠪᠳᠤᠨ ᠵᠣᠭ ᠲᠣᠰᠣᠨ ᠰᠤᠷᠭᠠᠭ ᠬᠠᠰᠢᠶᠠᠨ ᠤ᠋ ᠵᠠᠪᠰᠠᠷ ᠢ᠋ᠶ᠋ᠠᠷ ᠠᠵᠢᠭᠰᠠᠨ ᠢ᠋ᠶ᠋ᠠᠨ᠄
— ᠠ᠋᠂ ᠡᠨᠡ ᠤᠤ? ᠣᠳᠣ ᠪᠣᠳᠣᠬᠤ ᠳ᠋ᠤ᠌ ᠪᠢᠳᠡ ᠡᠳᠡᠨ ᠢ᠋ ᠶᠠᠭᠠᠬᠢᠪᠠᠴᠤ ᠳᠡᠢᠯᠬᠦ ᠦᠭᠡᠢ ᠪᠠᠢᠵᠠᠢ᠃
— ᠦᠬᠦᠭᠰᠡᠨ᠃ ᠡᠨᠡ ᠮᠠᠭᠤ ᠭᠤᠨᠠᠨ ᠫᠤᠤ ᠴᠢᠨᠢ ᠱᠠᠯ ᠳᠡᠮᠡᠢ ᠡᠳ᠋ ᠪᠠᠢᠭᠠ ᠶᠤᠮ᠃
— ᠵᠠ ᠲᠡᠭᠡᠪᠡᠯ ᠲᠡᠢᠮᠦ ᠯᠡ ᠪᠠᠢᠳᠠᠭ ᠪᠠᠢᠵᠠᠢ᠃ ᠡᠭᠦᠨᠴᠢᠯᠡᠨ ᠢ᠋ᠶ᠋ᠡᠷ ᠲᠡᠷᠡ ᠬᠡᠷᠡᠭ ᠪᠣᠢ?
— ᠡᠪᠦᠯ ᠳ᠋ᠡᠭᠡᠨ᠂ ᠬᠦᠷᠢᠶᠡᠨ ᠡᠴᠡ ᠭᠠᠮᠢᠩ ᠢ᠋ ᠬᠥᠭᠡᠭᠡᠬᠦ ᠳ᠋ᠦ᠍ ᠠᠭᠠᠷ ᠲᠤ ᠰᠤᠮᠤ ᠨᠢ ᠬᠤᠷ ᠬᠤᠷ ᠳᠤᠤᠭᠠᠷᠤᠨ ᠶᠠᠪᠤᠬᠤ ᠶ᠋ᠢ ᠨᠢ ᠰᠣᠨᠣᠰᠬᠤ ᠳ᠋ᠤ᠌ ᠠ᠋ ᠳᠠ ᠡᠨᠡ ᠴᠦ᠍ ᠣᠳᠣ ᠰᠦᠢᠳ ᠬᠢᠨᠡ ᠰᠢᠦ ᠳᠡ ᠭᠡᠮᠡᠷ ᠪᠠᠢᠪᠠᠴᠤ ᠭᠠᠵᠠᠷ ᠪᠠᠭᠤᠭᠰᠠᠨ ᠬᠣᠢᠨᠠ ᠪᠠᠨ ᠲᠡᠰᠦᠷᠡᠬᠦ ᠡᠴᠡ ᠲᠡᠰᠦᠷᠡᠬᠦ ᠦᠭᠡᠢ ᠨᠢ ᠣᠯᠠᠨ᠃
— ᠵᠠ ᠲᠡᠭᠡᠪᠡᠯ ᠲᠡᠢᠮᠦ ᠯᠡ ᠪᠠᠢᠳᠠᠭ ᠪᠠᠢᠵᠠᠢ᠃ ᠡᠭᠦᠨᠴᠢᠯᠡᠨ ᠢ᠋ᠶ᠋ᠡᠷ ᠲᠡᠷᠡ ᠬᠣᠶᠠᠷ ᠪᠢᠴᠢᠬᠠᠨ ᠬᠣᠲᠠ ᠶ᠋ᠢ ᠪᠦᠷᠢᠨ ᠨᠡᠩᠵᠢᠵᠦ ᠭᠦᠢᠴᠡᠭᠡᠳ ᠦᠳᠡ ᠡᠴᠡ ᠬᠣᠢᠰᠢ ᠬᠣᠭᠣᠯᠠᠨ ᠤ᠋ ᠲᠤᠩ ᠲᠠᠲᠠᠬᠤ ᠳ᠋ᠤ᠌ ᠲᠡᠷᠡ ᠵᠦᠭ ᠶᠠᠭᠠᠷᠠᠨ ᠭᠦᠶᠦᠪᠡ᠃ ᠬᠣᠭᠣᠯᠠᠨ ᠤ᠋ ᠳᠠᠷᠠᠭᠠ ᠥᠨᠥᠬᠢ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠭᠠᠳᠠᠭᠠ ᠢᠷᠡᠵᠦ ᠡᠷᠭᠢᠨ ᠲᠣᠭᠣᠷᠢᠨ ᠢ᠋ ᠴᠢᠯᠥᠭᠡ ᠲᠡᠢ ᠠᠵᠢᠨ ᠰᠠᠭᠤᠨᠠ᠃ ᠰᠦᠬᠡᠪᠠᠭᠠᠲᠤᠷ ᠤ᠋ᠨ ᠢᠷᠡᠬᠦ ᠳ᠋ᠦ᠍ ᠬᠣᠶᠠᠭᠤᠯᠠ ᠬᠦᠨᠳᠦᠳᠬᠡᠨ ᠪᠣᠰᠴᠤ ᠠᠮᠤᠷ ᠢᠷᠡᠪᠡ᠃
— ᠵᠠ ᠮᠠᠷᠲᠠᠭᠰᠠᠨ ᠠ᠋ᠴᠠ ᠲᠠ ᠨᠠᠷ ᠬᠣᠭᠣᠯᠠ ᠤᠮᠳᠠᠨ ᠤ᠋ ᠵᠦᠢᠯ ᠢ᠋ ᠶᠠᠭᠠᠬᠢᠵᠤ ᠠᠷᠭᠠᠯᠠᠵᠤ ᠪᠠᠢᠭᠠ ᠪᠢᠯᠡ? ᠭᠡᠬᠦ ᠳ᠋ᠦ᠍ᠨᠢ
— ᠵᠠ ᠵᠠᠩᠵᠤᠨ ᠠ᠋ ᠵᠦᠭᠡᠷ! ᠪᠢᠳᠡ ᠪᠡᠶᠡ ᠡᠴᠡ ᠪᠡᠨ ᠪᠤᠷᠤᠭᠤᠯᠠᠭᠠᠳ ᠯᠠ ᠪᠠᠢᠭᠠ ᠰᠢᠦ ᠭᠡᠵᠦ ᠬᠣᠶᠠᠭᠤᠯᠠ ᠪᠠᠨ ᠬᠠᠷᠢᠭᠤᠯᠪᠠ᠃ ᠭᠡᠷ ᠲᠦ᠍ ᠣᠷᠣᠭᠠᠳ ᠶᠠᠭᠤ ᠶᠠᠷᠢᠬᠤ ᠶ᠋ᠢ ᠨᠢ ᠳ᠋ᠠᠨᠽᠠᠨ ᠣᠯᠵᠤ ᠰᠣᠨᠣᠰᠬᠤ ᠶ᠋ᠢ ᠬᠢᠴᠢᠶᠡᠨ ᠬᠠᠨᠠ ᠨᠡᠢᠯᠡᠨ ᠰᠠᠭᠤᠵᠤ ᠴᠢᠬᠢ ᠲᠠᠯᠪᠢᠨ ᠴᠢᠩᠨᠠᠪᠠ᠃《ᠵᠠ ᠲᠠᠨ ᠤ᠋ ᠪᠡᠶᠡ ᠶᠠᠭᠠᠬᠢᠵᠤ ᠪᠠᠢᠨᠠ᠃ ᠳᠠᠮ ᠰᠣᠨᠣᠰᠪᠠᠯ ᠬᠠᠯᠠᠭᠤᠨ ᠶᠡᠬᠡ ᠲᠡᠢ ᠪᠠᠢᠨᠠ ᠭᠡᠰᠡᠨ ᠦᠨᠡᠨ ᠤᠤ?》 ᠭᠡᠵᠦ ᠰᠦᠬᠡᠪᠠᠭᠠᠲᠤᠷ ᠤ᠋ᠨ ᠠᠰᠠᠭᠤᠬᠤ ᠳ᠋ᠤ᠌ ᠬᠠᠷᠢᠭᠤ ᠠᠯᠠᠭᠠ᠃《ᠶᠠᠮᠠᠷ ᠪᠣᠯᠪᠠᠴᠤ ᠪᠢᠳᠡ ᠲᠠᠨ ᠢ᠋ ᠡᠳᠡᠭᠡᠷᠡᠭᠦᠯᠬᠦ ᠶ᠋ᠢ ᠪᠣᠳᠣᠨ᠂ ᠡᠨᠡ ᠠᠷᠤ ᠬᠢᠶᠠᠭᠲᠤ ᠳ᠋ᠤ᠌ ᠣᠷᠣᠰ ᠡᠮᠨᠡᠯᠭᠡ ᠶ᠋ᠢᠨ ᠭᠠᠵᠠᠷ ᠪᠠᠢᠳᠠᠭ᠂ ᠣᠳᠣ ᠲᠠᠨ ᠢ᠋ ᠲᠡᠨᠳᠡ ᠯᠠ ᠠᠪᠠᠴᠢᠬᠤ ᠠ᠋ᠴᠠ ᠥᠭᠡᠷᠡ ᠠᠷᠭᠠ ᠦᠭᠡᠢ ᠪᠠᠢᠨᠠ᠃ ᠲᠡᠷᠡ ᠭᠠᠵᠠᠷ ᠤ᠋ᠨ ᠡᠮᠴᠢ ᠲᠡᠢ ᠨᠢ ᠴᠦ᠍ ᠶᠠᠷᠢᠯᠴᠠᠭᠰᠠᠨ》 ᠭᠡᠬᠦ ᠳ᠋ᠦ᠍ ᠪᠠᠶᠠᠷ ᠬᠦᠩ ᠠᠩᠬᠠ ᠤᠳᠠᠭᠠ ᠪᠠᠨ ᠳᠤᠤᠭᠠᠷᠪᠠ ᠪᠣᠯᠤᠯᠲᠠᠢ᠄ ᠬᠡᠵᠢᠶᠡ ᠠᠪᠠᠴᠢᠬᠤ ᠪᠣᠢ?
— ᠮᠠᠷᠭᠠᠰᠢ᠃
ᠢᠩᠭᠢᠭᠡᠳ ᠶᠠᠷᠢᠶᠠ ᠲᠠᠰᠤᠷᠠᠯᠠ᠃ ᠭᠡᠲᠡᠯᠡ ᠴᠣᠬᠣᠮ ᠬᠡᠨ ᠴᠦ᠍ ᠦᠭᠡᠢ ᠮᠡᠲᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠪᠠᠶᠠᠷ ᠬᠦᠩ ᠦ᠋ᠨ ᠳᠠᠭᠤ ᠡᠬᠢᠯᠡᠨ ᠰᠣᠨᠣᠰᠳᠠᠪᠠ᠃
—《ᠥᠴᠥᠭᠡᠳᠦᠷ ᠲᠠ ᠨᠠᠷ ᠨᠠᠳᠠ ᠠ᠋ᠴᠠ ᠪᠠᠷᠤᠨ ᠵᠠᠩᠵᠤᠨ ᠤ᠋ ᠲᠤᠬᠠᠢ ᠲᠤᠩ ᠶᠡᠬᠡ ᠶ᠋ᠢ ᠮᠡᠳᠡᠬᠦ ᠶ᠋ᠢ ᠬᠦᠰᠡᠨ ᠡᠷᠭᠢᠯᠳᠦᠭᠦᠯᠦᠭᠡᠳ ᠪᠠᠢᠭᠰᠠᠨ᠃ ᠪᠢ ᠳᠤᠤᠭᠠᠷᠤᠭᠠ ᠦᠭᠡᠢ᠃ ᠶᠠᠭᠤᠨ ᠳ᠋ᠤ᠌ ᠭᠡᠪᠡᠯ ᠪᠢ ᠲᠡᠷᠡ ᠲᠤᠬᠠᠢ ᠶ᠋ᠢᠨ ᠶᠠᠭᠤᠮᠠ ᠶ᠋ᠢ ᠲᠠ ᠨᠠᠷ ᠲᠤ ᠳᠤᠤᠭᠠᠷᠬᠤ ᠡᠭᠦᠷᠭᠡ ᠲᠡᠢ ᠬᠥᠮᠦᠨ ᠪᠢᠰᠢ᠂ ᠬᠠᠷᠢᠨ ᠳᠤᠤᠭᠠᠷᠬᠤ ᠦᠭᠡᠢ ᠲᠠᠩᠭᠠᠷᠢᠭ ᠲᠠᠢ᠃ ᠡᠭᠦᠨ ᠢ᠋ ᠴᠢ ᠴᠡᠷᠢᠭ ᠦ᠋ᠨ ᠬᠥᠮᠦᠨ ᠪᠣᠯᠬᠣᠷ ᠶᠠᠭᠤᠨ ᠳ᠋ᠤ᠌ ᠠᠨᠳᠠᠬᠤ ᠪᠣᠢ᠃ ᠭᠡᠪᠡᠴᠦ ᠪᠢ ᠣᠳᠣ ᠳᠤᠤᠭᠠᠷᠤᠶᠠ᠃ ᠪᠠᠷᠤᠨ ᠵᠠᠩᠵᠤᠨ ᠬᠡᠳᠦᠨ ᠮᠢᠩᠭᠠᠨ ᠴᠡᠷᠢᠭ ᠲᠡᠢ ᠠᠢᠰᠤᠢ ᠶᠠᠪᠤᠭᠠ ᠴᠣᠬᠣᠮ ᠬᠡᠳᠦᠨ ᠮᠢᠩᠭᠠ ᠲᠠᠢ ᠬᠡᠵᠢᠶᠡ ᠬᠡᠳᠦᠢ ᠳ᠋ᠦ᠍ ᠬᠠᠮᠢᠭᠠᠭᠤᠷ ᠣᠷᠣᠵᠤ ᠢᠷᠡᠬᠦ ᠶ᠋ᠢ ᠪᠢ ᠮᠡᠳᠡᠬᠦ ᠦᠭᠡᠢ᠂ ᠢᠷᠡᠬᠦ ᠳ᠋ᠦ᠍ ᠯᠡ ᠢᠷᠡᠨᠡ᠃ ᠢᠩᠭᠢᠭᠡᠳ ᠦᠨᠡᠨ ᠢ᠋ ᠬᠡᠯᠡᠬᠦ ᠳ᠋ᠦ᠍ ᠵᠠᠯᠠᠭᠤ ᠵᠠᠩᠵᠤᠨ ᠴᠢ ᠰᠠᠢᠨ ᠪᠠᠢᠨᠠ᠃ ᠲᠡᠢᠨ ᠦ᠌ ᠴᠢᠨᠢ ᠣᠳᠣ ᠢᠳᠡ ᠰᠠᠢᠬᠠᠨ ᠣᠷᠣᠢ ᠳᠡᠭᠡᠷᠡ ᠴᠢᠨᠢ ᠭᠢᠯᠠᠯᠵᠠᠵᠤ ᠶᠠᠪᠤᠭᠠ ᠶᠤᠮ ᠪᠠᠢᠨᠠ᠃ ᠠᠷᠤ ᠠ᠋ᠴᠠ ᠴᠢᠨᠢ ᠤᠯᠠᠭᠠᠨ ᠣᠷᠣᠰ ᠲᠤᠰᠠᠯᠠᠬᠤ ᠯᠠ ᠪᠢᠵᠡ᠃ ᠭᠡᠯᠡ ᠴᠦ᠍ ᠴᠢ ᠳᠡᠢᠯᠬᠦ ᠤᠤ? ᠬᠠᠢ ᠪᠢ ᠢᠲᠡᠭᠡᠬᠦ ᠦᠭᠡᠢ ᠪᠠᠢᠨᠠ᠃ ᠪᠠᠷᠤᠨ ᠵᠠᠩᠵᠤᠨ ᠪᠣᠯ ᠦᠬᠦᠬᠦ ᠡᠴᠡ ᠪᠤᠰᠤᠳ ᠦᠢᠯᠡ ᠪᠦᠬᠦᠨ ᠢ᠋ ᠦᠵᠡᠭᠰᠡᠭᠡᠷ ᠶᠠᠪᠤᠭᠠᠳ ᠡᠴᠦᠰ ᠲᠦ᠋ᠨᠢ ᠰᠢᠳᠢ ᠶ᠋ᠢ ᠣᠯᠤᠭᠰᠠᠨ ᠤ᠋ ᠠᠳᠠᠯᠢ ᠰᠦᠷᠡᠬᠡᠢ ᠪᠣᠯᠤᠭᠰᠠᠨ ᠬᠥᠮᠦᠨ》 ᠭᠡᠳ ᠪᠠᠶᠠᠷ ᠬᠦᠩ ᠦᠭᠡ ᠪᠡᠨ ᠲᠠᠰᠤᠯᠪᠠ᠃ ᠡᠨᠡ ᠳᠠᠷᠤᠢ ᠴᠢᠮᠡᠭᠡ ᠲᠠᠭ ᠲᠠᠰᠤᠷᠠᠪᠠ᠃ ᠳᠠᠬᠢᠨ ᠪᠠᠶᠠᠷ ᠬᠦᠩ ᠳᠤᠤᠭᠠᠷᠤᠭᠰᠠᠨ ᠨᠢ᠄
— ᠮᠢᠨᠦ ᠮᠣᠷᠢ ᠶᠠᠭᠠᠬᠢᠭᠰᠠᠨ ᠪᠣᠢ?
— ᠪᠣᠢ! ᠲᠠᠨ ᠤ᠋ ᠮᠣᠷᠢ ᠶ᠋ᠢ ᠮᠠᠨᠠᠢᠬᠢᠨ ᠪᠠᠷᠢᠵᠤ ᠠᠪᠴᠢᠷᠠᠭᠠᠳ ᠠᠭᠲᠠ ᠳ᠋ᠤ᠌ ᠲᠠᠯᠪᠢᠵᠤ ᠬᠠᠳᠠᠭᠠᠯᠠᠵᠤ ᠪᠠᠢᠭᠠ᠃
— ᠵᠠ ᠪᠣᠯᠵᠠᠢ᠃ ᠨᠠᠳᠠ ᠠᠷᠪᠠᠨ ᠬᠡᠳᠦᠨ ᠵᠢᠯ ᠬᠠᠨᠢ ᠪᠣᠯᠤᠭᠰᠠᠨ ᠶᠤᠮ᠃ ᠠᠶᠠᠨ ᠲᠡᠢᠨ ᠳ᠋ᠦ᠍ ᠶᠠᠪᠤᠵᠤ ᠪᠠᠢᠬᠤ ᠳ᠋ᠤ᠌ ᠠᠮᠢᠨ ᠳ᠋ᠤ᠌ ᠣᠷᠣᠭᠰᠠᠨ᠂ ᠢᠯᠠᠨ ᠳᠡᠢᠯᠬᠦ ᠳ᠋ᠦ᠍ ᠲᠤᠰᠠ ᠳᠥᠭᠥᠮ ᠦᠵᠡᠭᠦᠯᠦᠭᠰᠡᠨ ᠡᠨᠡ ᠪᠦᠬᠦᠨ ᠢ᠋ ᠨᠢ ᠲᠣᠭᠠᠯᠠᠵᠤ ᠪᠠᠷᠠᠰᠢ ᠦᠭᠡᠢ᠃ ᠣᠳᠣ ᠥᠲᠡᠯᠵᠦ ᠶᠠᠪᠤᠭᠠ ᠶᠤᠮ ᠳ᠋ᠠᠭ᠃ ᠭᠡᠯᠡ ᠴᠦ᠍ ᠬᠣᠶᠠᠷ ᠵᠢᠯ ᠦ᠋ᠨ ᠡᠳ᠋ᠯᠡᠭᠡ ᠪᠣᠢ᠃ ᠲᠡᠭᠦᠨ ᠢ᠋ ᠮᠢᠨᠢ ᠴᠢ ᠥᠪᠡᠷ ᠲᠡᠭᠡᠨ ᠠᠪᠴᠤ ᠦᠵᠡ! ᠲᠡᠭᠡᠭᠡᠳ ᠶᠠᠭᠤᠮᠠ ᠶ᠋ᠢ ᠶᠠᠭᠠᠬᠢᠵᠤ ᠮᠡᠳᠡᠬᠦ ᠪᠣᠢ᠂ ᠬᠡᠷᠪᠡ ᠴᠢ ᠡᠨᠡ ᠪᠣᠳᠣᠯ ᠰᠠᠨᠠᠭᠠ ᠪᠠᠨ ᠪᠡᠶᠡᠯᠡᠭᠦᠯᠵᠦ ᠴᠢᠳᠠᠭᠰᠠᠨ ᠪᠠᠢᠪᠠᠯ ᠲᠡᠷᠡ ᠮᠣᠷᠢ ᠶ᠋ᠢ ᠮᠢᠨᠢ ᠵᠦᠭᠡᠷ ᠵᠦᠩ ᠳ᠋ᠦ᠍ᠨᠢ ᠲᠠᠯᠪᠢᠨ ᠥᠪᠡᠷ ᠦ᠋ᠨ ᠦᠬᠦᠯ ᠢ᠋ᠶ᠋ᠡᠷ ᠨᠢ ᠦᠬᠦᠭᠦᠯᠵᠦ ᠦᠵᠡᠭᠡᠷᠡᠢ᠃ ᠭᠤᠶᠤᠬᠤ ᠶᠠᠭᠤᠮᠠ ᠶᠡᠷᠦ ᠳ᠋ᠡᠭᠡᠨ ᠯᠡ ᠡᠨᠡ᠃
— ᠦᠭᠡᠢ ᠪᠠᠶᠠᠷ ᠬᠦᠩ ᠲᠠ ᠶᠠᠭᠤᠨ ᠳ᠋ᠤ᠌ ᠳᠡᠮᠡᠢ ᠶᠠᠭᠤᠮᠠ ᠪᠣᠳᠣᠨ ᠪᠡᠶᠡ ᠴᠢᠯᠡᠭᠡᠨᠡ ᠪᠣᠢ? ᠲᠠ ᠭᠠᠢᠭᠤᠢ ᠡᠳᠡᠭᠡᠷᠡᠨᠡ᠃ ᠮᠠᠷᠭᠠᠰᠢ ᠪᠢᠳᠡ ᠲᠠᠨ ᠢ᠋ ᠣᠷᠣᠰ ᠡᠮᠨᠡᠯᠭᠡ ᠳ᠋ᠦ᠍ ᠠᠪᠠᠴᠢᠬᠤ ᠭᠡᠵᠦ ᠪᠠᠢᠭᠠ ᠰᠢᠦ ᠳᠡ᠃
— ᠵᠠ ᠰᠠᠢᠨ ᠪᠠᠢᠨᠠ᠂ ᠪᠢ ᠲᠠ ᠪᠦᠬᠦᠨ ᠦ᠌ ᠡᠨᠡ ᠡᠨᠡᠷᠢᠩᠭᠦᠢ ᠰᠠᠢᠬᠠᠨ ᠰᠡᠳᠬᠢᠯ ᠢ᠋ ᠶᠠᠭᠠᠬᠢᠪᠠᠴᠤ ᠮᠠᠷᠲᠠᠬᠤ ᠦᠭᠡᠢ ᠭᠡᠳ ᠨᠢᠭᠡ ᠬᠡᠰᠡᠭ ᠳᠤᠭᠤᠢ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠂ ᠦᠭᠡᠢ ᠴᠠᠭᠠᠨᠠ ᠴᠢᠨᠢ ᠨᠠᠮᠠᠶ᠋ᠢ ᠳᠠᠭᠠᠵᠤ ᠢᠷᠡᠭᠰᠡᠨ ᠴᠡᠷᠢᠭ ᠦ᠋ᠳ ᠡᠴᠡ ᠪᠠᠢᠨᠠ ᠤᠤ?
— ᠪᠠᠢᠨᠠ᠃ ᠨᠢᠭᠡ ᠨᠢ ᠤᠷᠢᠳ ᠰᠥᠨᠢ ᠠᠯᠠᠭᠠ ᠪᠣᠯᠤᠭᠰᠠᠨ ᠪᠠᠢᠨᠠ ᠪᠢᠯᠡ᠃ ᠬᠣᠶᠠᠷ ᠨᠢ ᠭᠠᠳᠠᠭᠠ ᠰᠠᠭᠤᠵᠤ ᠪᠠᠢᠨᠠ᠃ ᠶᠡᠷᠦ ᠨᠢ ᠦᠷᠭᠦᠯᠵᠢ ᠯᠡ ᠰᠠᠭᠤᠵᠤ ᠪᠠᠢᠳᠠᠭ ᠶᠤᠮ᠃
— ᠠ ᠬᠥᠭᠡᠷᠦᠬᠦᠢᠰ ᠮᠢᠨᠢ᠂ ᠵᠠ ᠴᠢ ᠲᠡᠳᠡᠨ ᠢ᠋ ᠮᠢᠨᠢ ᠨᠠᠳᠠ ᠳᠡᠭᠡᠷᠡ ᠨᠢᠭᠡ ᠣᠷᠣᠭᠤᠯᠵᠤ ᠥᠭᠪᠡᠯ ᠪᠠᠰᠠ ᠶᠡᠬᠡ ᠪᠠᠶᠠᠷᠯᠠᠬᠤ ᠪᠠᠢᠨᠠ᠃
— ᠲᠡᠷᠡ ᠪᠣᠯᠣᠯᠭᠦᠢ ᠶᠠᠭᠠᠬᠢᠬᠤᠪ᠃ ᠭᠠᠭᠴᠠᠬᠠᠨ ᠲᠠ ᠰᠡᠳᠬᠢᠯ ᠢ᠋ᠶ᠋ᠡᠨ ᠠᠭᠤᠵᠢᠮ ᠳᠡᠯᠪᠢ!
ᠰᠦᠬᠡᠪᠠᠭᠠᠲᠤᠷ ᠤ᠋ᠨ《ᠣᠷᠣ!》 ᠭᠡᠵᠦ ᠳᠥᠩᠭᠡᠵᠦ ᠥᠭᠦᠯᠡᠮᠡᠭᠴᠡ ᠳᠤᠪᠳᠤᠨ ᠳ᠋ᠠᠨᠽᠠᠨ ᠬᠣᠶᠠᠷ ᠶᠠᠭᠠᠷᠠᠨ ᠣᠷᠣᠪᠠ᠃ ᠪᠠᠶᠠᠷ ᠬᠦᠩ ᠮᠣᠳᠣᠨ ᠬᠠᠰᠢᠯᠭᠠᠲᠤ ᠲᠣᠬᠢᠯᠢᠭ ᠣᠷᠣᠨ ᠳᠡᠭᠡᠷᠡ ᠪᠤᠷᠤᠭᠤ ᠬᠠᠷᠠᠨ ᠬᠡᠪᠲᠡᠨᠡ᠃《ᠵᠠ ᠪᠢᠳᠡ ᠢᠷᠡᠯᠡ》 ᠭᠡᠬᠦ ᠳ᠋ᠦ᠍ ᠠᠯᠭᠤᠷ ᠬᠥᠨᠳᠡᠯᠡᠨ ᠡᠷᠭᠢᠬᠦ ᠶ᠋ᠢ ᠦᠵᠡᠬᠦ ᠳ᠋ᠦ᠍ ᠪᠠᠭᠠ ᠵᠡᠷᠭᠡ ᠰᠢᠨᠠᠯᠤᠭᠰᠠᠨ ᠰᠢᠨᠵᠢ ᠲᠡᠢ ᠪᠣᠯᠪᠠᠴᠤ ᠮᠠᠰᠢ ᠲᠠᠢᠪᠤᠩ᠂ ᠨᠢᠳᠦᠨ ᠦ᠌ ᠰᠢᠷᠦᠭᠦᠨ ᠬᠠᠷᠠᠴᠠ ᠨᠢ ᠨᠠᠮᠤᠭᠤᠨ᠂ ᠰᠢᠷᠦᠭᠦᠨ ᠬᠠᠷᠠ ᠰᠠᠬᠠᠯ ᠨᠢ ᠪᠣᠯᠪᠠᠴᠤ ᠵᠥᠭᠡᠯᠡᠨ ᠰᠢᠭ᠃ ᠶᠡᠷᠦ ᠬᠥᠮᠦᠨ ᠪᠣᠯᠤᠭᠰᠠᠭᠠᠷ ᠡᠢᠮᠦ ᠠᠮᠤᠭᠤᠯᠠᠩ ᠲᠠᠢᠪᠤᠩ ᠪᠠᠢᠭᠠ ᠦᠭᠡᠢ ᠪᠣᠯ ᠤᠤ ᠭᠡᠯᠲᠡᠢ᠃
— ᠵᠠ ᠲᠠ ᠪᠢᠳᠡᠨ ᠳ᠋ᠦ᠍ ᠶᠠᠭᠤ ᠠᠢᠯᠦᠨᠬᠠᠬᠤ ᠰᠠᠨ ᠪᠣᠯ? ᠭᠡᠬᠦ ᠳ᠋ᠦ᠍᠄
— ᠵᠠ ᠭᠡᠵᠦ ᠠᠮᠠ ᠨᠡᠭᠡᠭᠡᠨ ᠪᠣᠳᠣᠯᠬᠢᠯᠠᠭᠠᠳ᠄
— ᠪᠢ ᠲᠠ ᠨᠠᠷ ᠤ᠋ᠨ ᠬᠤᠪᠢ ᠵᠠᠶᠠᠭᠠ ᠶ᠋ᠢ ᠠᠪᠴᠤ ᠶᠠᠪᠤᠵᠤ ᠴᠢᠳᠠᠭᠰᠠᠨ ᠦᠭᠡᠢ᠂ ᠬᠣᠢᠰᠢᠳᠠ ᠪᠠᠨ ᠪᠦᠷ ᠴᠦ᠍ ᠦᠭᠡᠢ᠃ ᠣᠳᠣ ᠥᠪᠡᠷᠰᠡᠳ ᠦ᠋ᠨ ᠢ᠋ᠶ᠋ᠡᠨ ᠬᠤᠪᠢ ᠵᠠᠶᠠᠭᠠ ᠶ᠋ᠢ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠰᠢᠢᠳᠪᠦᠷᠢᠯᠡ! ᠭᠡᠵᠦ ᠨᠠᠮ ᠳᠠᠭᠤ ᠪᠠᠷ ᠥᠭᠦᠯᠡᠭᠡᠳ᠄ ᠵᠠ ᠶᠠᠪᠤᠵᠠᠭᠠ᠂ ᠨᠠᠳᠠ ᠲᠠᠢ ᠳᠠᠬᠢᠨ ᠠᠭᠤᠯᠵᠠᠨᠠ ᠭᠡᠵᠦ ᠪᠢᠲᠡᠭᠡᠢ ᠪᠣᠳᠣᠭᠠᠷᠠᠢ! ᠭᠡᠳ ᠴᠠᠭᠠᠰᠢ ᠡᠷᠭᠢᠨ ᠪᠤᠷᠤᠭᠤ ᠬᠠᠷᠠᠪᠠ᠃
ᠰᠥᠨᠢ ᠳ᠋ᠡᠭᠡᠨ ᠳ᠋ᠠᠨᠽᠠᠨ ᠨᠥᠬᠥᠷ ᠲᠡᠢ ᠪᠡᠨ ᠮᠥᠨ ᠯᠡ ᠭᠠᠳᠠᠭᠠ᠃ ᠡᠬᠢᠯᠡᠭᠡᠳ ᠲᠡᠷᠡ ᠮᠠᠷᠭᠠᠰᠢ ᠪᠠᠶᠠᠷ ᠬᠦᠩ ᠢ᠋ ᠠᠷᠤ ᠬᠢᠶᠠᠭᠲᠤ ᠶ᠋ᠢᠨ ᠡᠮᠨᠡᠯᠭᠡ ᠶ᠋ᠢᠨ ᠭᠠᠵᠠᠷ ᠬᠡᠪᠲᠡᠬᠦ᠂ ᠲᠡᠭᠡᠭᠡᠳ ᠡᠳᠡᠭᠡᠷᠡᠨᠡ ᠭᠡᠵᠦ ᠶᠠᠷᠢᠯᠴᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠢᠯᠠᠭᠳᠠᠭᠰᠠᠨ ᠲᠡᠢᠨ ᠦ᠌ ᠪᠡᠨ ᠲᠤᠬᠠᠢ ᠳ᠋ᠤ᠌ ᠣᠷᠣᠯᠠ᠃ ᠲᠡᠭᠦᠨ ᠳ᠋ᠡᠭᠡᠨ ᠥᠪᠡᠷᠰᠡᠳ ᠦ᠋ᠨ ᠪᠣᠯᠤᠭᠠᠳ ᠪᠤᠰᠤᠳ ᠤ᠋ᠨ ᠦᠢᠮᠡᠭᠰᠡᠨ ᠰᠠᠨᠳᠤᠷᠤᠭᠰᠠᠨ᠂ ᠦᠷᠡᠭᠳᠡᠭᠰᠡᠨ᠂ ᠵᠢᠭᠤᠲᠠᠭᠰᠠᠨ ᠪᠦᠬᠦᠨ ᠢ᠋ ᠪᠠᠬᠠᠨ ᠳᠡᠯᠭᠡᠬᠦ ᠳ᠋ᠦ᠍ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠢᠯᠠᠭᠳᠠᠬᠤ ᠠ᠋ᠴᠠ ᠥᠭᠡᠷᠡ ᠵᠠᠮ ᠪᠠᠢᠭᠠ ᠦᠭᠡᠢ ᠶ᠋ᠢ ᠣᠢᠯᠠᠭᠠᠪᠠ᠃ ᠡᠴᠦᠰ ᠲᠦ᠋ᠨᠢ ᠲᠡᠷᠡ ᠬᠣᠶᠠᠷ ᠰᠦᠬᠡᠪᠠᠭᠠᠲᠤᠷ ᠤ᠋ᠨ ᠴᠢᠩ ᠵᠣᠷᠢᠭᠲᠤ ᠪᠠᠭᠠᠲᠤᠷ ᠦᠢᠯᠡᠰ᠂ ᠠᠷᠢᠭᠤᠨ ᠰᠢᠳᠤᠷᠭᠤ ᠡᠨᠡᠷᠢᠩᠭᠦᠢ ᠰᠠᠢᠬᠠᠨ ᠰᠡᠳᠬᠢᠯ ᠰᠠᠨᠠᠭᠠᠨ ᠳ᠋ᠤᠨᠢ ᠣᠷᠣᠭᠰᠠᠨ ᠪᠥᠭᠡᠳ ᠴᠢᠩ ᠰᠡᠳᠬᠢᠯ ᠡᠴᠡ ᠪᠡᠨ ᠲᠡᠭᠦᠨ ᠢ᠋ ᠬᠦᠦᠷᠨᠢᠭᠰᠡᠭᠡᠷ ᠳᠡᠭᠡᠷᠡ ᠣᠷᠣᠢ ᠪᠣᠯᠲᠠᠯᠠ ᠲᠠᠭ ᠤᠨᠲᠠᠵᠤ ᠣᠷᠬᠢᠵᠠᠢ᠃《ᠬᠥᠶᠢ ᠲᠠ ᠨᠠᠷ ᠴᠢᠨᠢ ᠪᠣᠰ ᠶᠠᠭᠠᠬᠢᠴᠢᠬᠰᠡᠨ ᠤᠯᠤᠰ ᠪᠣᠢ᠂ ᠡᠳᠦᠢ ᠪᠣᠯᠲᠠᠯᠠ ᠪᠣᠰᠳᠠᠭ ᠦᠭᠡᠢ》 ᠭᠡᠵᠦ ᠨᠢᠭᠡ ᠬᠥᠮᠦᠨ ᠦ᠌ ᠰᠡᠷᠢᠭᠡᠭᠰᠡᠨ ᠳ᠋ᠦ᠍ ᠲᠡᠳᠡ ᠬᠠᠷᠠᠢᠪᠠ᠃ ᠥᠷᠯᠥᠭᠡ ᠪᠣᠯᠬᠣᠷ ᠦᠯᠦ ᠪᠠᠷᠠᠮ᠂ ᠨᠠᠷᠠ ᠳᠡᠭᠡᠷᠡ ᠬᠥᠭᠡᠷᠦᠭᠰᠡᠨ ᠦᠵᠡᠭᠳᠡᠨᠡ᠃ ᠭᠡᠷ ᠦ᠋ᠨ ᠡᠭᠦᠳᠡᠨ ᠳ᠋ᠦ᠍ ᠲᠠᠪᠤ ᠵᠢᠷᠭᠤᠭᠠᠨ ᠬᠥᠮᠦᠨ ᠰᠢᠪᠠᠷ ᠠᠪᠢᠷ ᠶᠠᠷᠢᠯᠴᠠᠬᠤ ᠠ᠋ᠴᠠ ᠨᠢ ᠰᠣᠨᠣᠰᠪᠠᠯ᠄ ᠦᠬᠦᠵᠡᠢ᠂ ᠠᠮᠢ ᠪᠠᠨ ᠬᠣᠣᠷᠯᠠᠵᠠᠢ᠂ ᠡᠪᠦᠷ ᠲᠡᠭᠡᠨ ᠪᠠᠢᠭᠰᠠᠨ ᠪᠦᠬᠦ ᠬᠠᠷᠠ ᠲᠠᠮᠠᠬᠢ ᠶ᠋ᠢ ᠨᠢᠭᠡᠮᠦᠰᠦᠨ ᠢᠳᠡᠵᠦ ᠬᠣᠣᠷᠳᠠᠭᠰᠠᠨ ᠪᠣᠯᠤᠯᠲᠠᠢ! ᠭᠡᠰᠡᠨ ᠳ᠋ᠦ᠍ ᠳ᠋ᠠᠨᠽᠠᠨ ᠤ᠋ ᠳᠣᠲᠣᠷᠠ ᠫᠠᠯ ᠬᠢᠵᠦ《ᠦᠭᠡᠢ ᠬᠡᠨ ᠪᠣᠢ? ᠬᠡᠨ ᠠᠮᠢ ᠪᠠᠨ ᠬᠣᠣᠷᠯᠠᠪᠠ?》 ᠭᠡᠬᠦ ᠳ᠋ᠦ᠍ ᠬᠥᠮᠦᠰ ᠦ᠋ᠨ ᠨᠢᠭᠡ ᠨᠢ᠄《ᠲᠠᠨ ᠤ᠋ ᠬᠦᠩ ᠪᠠᠶᠠᠷ》 ᠭᠡᠵᠦ ᠴᠢᠬᠢᠨ ᠳ᠋ᠦ᠍ᠨᠢ ᠬᠡᠯᠡᠪᠡ᠃
ᠳ᠋ᠠᠨᠽᠠᠨ ᠤ᠋ ᠨᠢᠳᠦ ᠬᠠᠷᠠᠩᠭᠤᠢᠯᠠᠪᠠ᠃ ᠨᠢᠯᠪᠤᠰᠤ ᠦᠭᠡᠢ ᠬᠠᠭᠤᠷᠠᠢ ᠪᠠᠢᠬᠤ ᠪᠣᠯᠪᠠᠴᠤ ᠪᠦᠬᠦ ᠣᠷᠴᠢᠨ ᠨᠢᠭᠡ ᠦᠶᠡ ᠬᠠᠪ ᠬᠠᠷᠠᠩᠭᠤᠢ᠃ ᠬᠠᠵᠠᠭᠤ ᠳ᠋ᠤᠨᠢ ᠳᠤᠪᠳᠤᠨ ᠳᠡᠰ ᠥᠭᠡᠷᠡ᠂ ᠭᠠᠭᠴᠠᠬᠠᠨ ᠤᠳᠠᠭᠠ ᠰᠠᠨᠠᠭᠠ ᠠᠯᠳᠠᠭᠠᠳ᠄ ᠵᠠ ᠶᠠᠭᠠᠬᠢᠬᠤᠪ᠂ ᠣᠷᠴᠢᠯᠠᠩ ᠳ᠋ᠤ᠌ ᠮᠥᠩᠬᠡ ᠶ᠋ᠢᠨ ᠤᠰᠤ ᠤᠤᠭᠤᠬᠤ ᠬᠡᠨ ᠯᠡ ᠪᠠᠢᠳᠠᠭ ᠪᠢᠯᠡ ᠭᠡᠬᠦ ᠨᠢ ᠳ᠋ᠠᠨᠽᠠᠨ ᠳ᠋ᠤ᠌ ᠡᠭᠳᠡᠭᠦᠦ ᠲᠡᠢ ᠰᠣᠨᠣᠰᠳᠠᠬᠤ ᠪᠣᠯᠪᠠᠴᠤ ᠳᠤᠪᠳᠤᠨ ᠪᠠᠶᠠᠷ ᠬᠦᠩ ᠳ᠋ᠦ᠍ ᠮᠠᠭᠤ ᠳ᠋ᠠᠭᠠᠨ ᠪᠢᠰᠢ᠂ ᠰᠡᠳᠬᠢᠯ ᠦ᠋ᠨ ᠵᠣᠪᠠᠭᠤᠷᠢ ᠰᠢᠯᠤᠭᠤᠳᠤᠭᠰᠠᠨ ᠳ᠋ᠠᠭᠠᠨ ᠲᠡᠷᠡ ᠪᠠᠢᠵᠠᠢ᠃
ᠣᠷᠣᠰᠢᠭᠤᠯᠬᠤ ᠶᠠᠪᠤᠳᠠᠯ ᠢ᠋ ᠲᠡᠷᠡ ᠬᠣᠶᠠᠷ ᠭᠦᠢᠴᠡᠳᠬᠡᠬᠦ ᠪᠡᠷ ᠪᠣᠯᠪᠠ᠃ ᠨᠢᠭᠡ ᠮᠣᠷᠢᠨ ᠲᠡᠷᠭᠡ ᠢᠷᠡᠭᠰᠡᠨ ᠨᠢ ᠵᠢᠭᠲᠡᠢᠬᠡᠨ ᠮᠠᠭᠤ᠂ ᠭᠠᠵᠢᠭᠰᠠᠨ ᠬᠣᠶᠠᠷ ᠳᠤᠭᠤᠢ ᠨᠢ ᠬᠠᠢᠪᠠᠭᠠᠨᠠᠨ ᠬᠢᠬᠤᠲᠤᠨᠠᠨᠠ᠃ ᠮᠣᠷᠢᠨ ᠤ᠋ ᠭᠡᠳᠡᠰᠦ ᠬᠡᠩᠭᠡᠷᠭᠡ ᠰᠢᠭ ᠲᠣᠮᠣ ᠠᠲᠠᠯᠠ ᠶᠠᠰᠤᠨ ᠬᠡᠳᠡᠷᠭᠡ ᠲᠤᠷᠠᠩᠬᠠᠢ ᠤᠷᠤᠭᠰᠢ ᠭᠢᠰᠬᠢᠬᠦ ᠳᠤᠷᠠ ᠦᠭᠡᠢ ᠶᠣᠰᠣᠲᠠᠢ ᠦᠰᠦ ᠲᠡᠢ ᠬᠠᠳᠠ᠃ ᠲᠠᠯᠢᠢᠭᠴᠢ ᠪᠠᠨ ᠲᠡᠷᠭᠡᠨ ᠦ᠌ ᠳᠠᠪᠰᠢᠨ ᠳ᠋ᠤ᠌ ᠲᠠᠯᠪᠢᠨ ᠵᠡᠭᠦᠨ ᠲᠠᠢᠰᠢ ᠪᠦᠷᠭᠦᠳ ᠲᠡᠢ ᠠᠭᠤᠯᠠ ᠶ᠋ᠢᠨ ᠡᠩᠭᠡᠷ ᠪᠠᠷᠢᠨ ᠬᠥᠳᠡᠯᠪᠡ᠃ ᠬᠥᠯᠦᠭᠰᠡᠨ ᠮᠣᠷᠢ ᠬᠣᠶᠠᠷ ᠡᠷᠡ ᠳ᠋ᠦ᠍ ᠬᠦᠴᠦᠯᠡᠭᠳᠡᠨ ᠬᠥᠲᠥᠯᠦᠭᠳᠡᠬᠦ ᠶ᠋ᠢᠨ ᠡᠷᠬᠡ ᠪᠡᠷ ᠣᠷᠣᠭᠰᠢ ᠭᠢᠰᠬᠢᠯᠡᠨ ᠶᠠᠪᠤᠨᠠ᠃ ᠬᠣᠲᠠ ᠠ᠋ᠴᠠ ᠭᠠᠷᠤᠩᠭᠤᠲᠠ ᠬᠠᠰᠢᠩᠨᠠᠨ ᠪᠦᠷ ᠶᠠᠪᠤᠬᠤ ᠪᠠᠨ ᠪᠣᠯᠢᠪᠠ᠃ ᠪᠠᠯᠪᠠᠨ ᠲᠠᠰᠢᠭᠤᠷᠳᠠᠬᠤ ᠠ᠋ᠴᠠ ᠪᠠᠨ ᠲᠡᠳᠡ ᠡᠪ ᠦᠭᠡᠢᠴᠡᠨᠡ᠃ ᠬᠠᠷᠢᠶᠠᠯ ᠦᠭᠡᠰ ᠪᠠᠢᠨ ᠪᠠᠢᠨ ᠠᠮᠠᠨ ᠳᠡᠭᠡᠷᠡ ᠭᠠᠷᠴᠤ ᠢᠷᠡᠬᠦ ᠶ᠋ᠢ ᠤᠷᠤᠭᠤᠯ ᠵᠢᠮᠢᠢᠨ ᠲᠡᠪᠴᠢᠨᠡ᠃ ᠳ᠋ᠠᠨᠽᠠᠨ ᠲᠡᠷᠭᠡᠨ ᠦ᠌ ᠠᠷᠤ ᠳ᠋ᠤ᠌ ᠭᠠᠷᠤᠨ ᠬᠣᠢᠨᠠ ᠠ᠋ᠴᠠ ᠨᠢ ᠲᠦᠷᠢᠵᠦ ᠡᠬᠢᠯᠡᠪᠡ᠃ ᠤᠷᠢᠳ ᠨᠢ ᠳᠤᠪᠳᠤᠨ ᠴᠤᠯᠪᠤᠭᠤᠷ ᠲᠡᠳᠡᠨ ᠵᠢᠳᠬᠦᠬᠦ ᠪᠡᠷ ᠢ᠋ᠶ᠋ᠡᠨ ᠵᠢᠳᠬᠦᠨᠡ᠃ ᠦᠨᠡᠨ ᠳ᠋ᠡᠭᠡᠨ ᠲᠡᠳᠡ ᠮᠣᠷᠢᠨ ᠲᠡᠷᠭᠡ ᠪᠡᠷ ᠬᠥᠮᠦᠨ ᠣᠷᠣᠰᠢᠭᠤᠯᠬᠤ ᠪᠢᠰᠢ᠂ ᠮᠣᠷᠢ ᠶ᠋ᠢ ᠴᠦ᠍ ᠪᠣᠯᠪᠠ ᠲᠡᠷᠭᠡᠨ ᠳᠡᠭᠡᠷᠡ ᠲᠠᠯᠪᠢᠨ ᠶᠠᠭᠤᠲᠠᠢ ᠬᠡᠦᠳᠡᠢ ᠴᠢᠷᠴᠦ ᠶᠠᠪᠤᠭᠠ ᠲᠠᠢ ᠠᠳᠠᠯᠢ ᠪᠠᠢᠨᠠ᠃ ᠭᠡᠯᠡ ᠴᠦ᠍ ᠲᠡᠳᠡ ᠭᠤᠲᠤᠷᠠᠯ ᠦᠭᠡᠢ᠂ ᠡᠷᠡᠯᠬᠡᠭ ᠡᠵᠡᠨ ᠳ᠋ᠡᠭᠡᠨ ᠡᠴᠦᠰ ᠦ᠋ᠨ ᠬᠦᠨᠳᠦᠳᠬᠡᠯ ᠭᠦᠢᠴᠡᠳᠬᠡᠵᠦ ᠶᠠᠪᠤᠭᠠ ᠪᠠᠨ ᠪᠣᠳᠣᠨ ᠰᠡᠳᠬᠢᠯ ᠲᠠᠯᠪᠢᠭᠠᠳ ᠶᠠᠪᠤᠨᠠ᠃ ᠦᠳᠡ ᠶ᠋ᠢᠨ ᠨᠠᠷᠠ ᠳᠡᠭᠡᠷᠡ ᠡᠴᠡ ᠴᠣᠨᠣᠨ ᠡᠷᠡ ᠪᠡᠶᠡ ᠶ᠋ᠢᠨ ᠲᠠᠮᠢᠷ ᠢ᠋ ᠪᠠᠷᠠᠭᠳᠠᠭᠤᠯᠤᠨ ᠮᠠᠩᠨᠠᠢ ᠶ᠋ᠢᠨ ᠬᠥᠯᠥᠰᠥ ᠶ᠋ᠢ ᠲᠣᠰᠣᠯᠠᠭᠤᠯᠵᠤ ᠪᠠᠢᠪᠠᠴᠤ ᠠᠵᠢᠭ ᠦᠭᠡᠢ ᠵᠢᠳᠬᠦᠨᠡ᠃ ᠭᠠᠰᠠᠯᠠᠩ ᠲᠠᠢ ᠠ᠋ᠴᠠ ᠭᠠᠭᠴᠠᠬᠠᠨ ᠲᠡᠷᠭᠡᠨ ᠦ᠌ ᠳᠤᠭᠤᠢ ᠡᠷᠭᠢᠬᠦ ᠪᠦᠷᠢ ᠳ᠋ᠡᠭᠡᠨ ᠬᠣᠶᠠᠷ ᠲᠠᠢᠰᠢ ᠬᠠᠢᠪᠠᠭᠠᠨᠠᠨ ᠭᠠᠰᠠᠯᠠᠩ ᠤ᠋ᠨ ᠳᠠᠭᠤᠨ ᠢ᠋ᠶ᠋ᠠᠷ ᠬᠢᠬᠤᠲᠤᠨᠠᠨᠠ᠃
— ᠵᠠ ᠬᠦ ᠡᠨᠳᠡ ᠣᠷᠣᠰᠢᠭᠤᠯᠬᠤ ᠤᠤ ᠳᠠ? ᠭᠡᠵᠦ ᠳᠤᠪᠳᠤᠨ ᠤ᠋ ᠥᠭᠦᠯᠡᠬᠦ ᠳ᠋ᠦ᠍ ᠳ᠋ᠠᠨᠽᠠᠨ ᠲᠦᠷ ᠵᠣᠭᠰᠣᠨ ᠣᠷᠴᠢᠨ ᠢ᠋ ᠠᠵᠢᠭᠰᠠᠨ ᠢ᠋ᠶ᠋ᠠᠨ᠄
— ᠡᠨᠳᠡ ᠳᠡᠮᠡᠢ᠂ ᠬᠣᠲᠠ ᠳ᠋ᠤ᠌ ᠳᠡᠩᠳᠡᠭᠦᠦ ᠣᠢᠷᠠ ᠪᠠᠢᠨᠠ᠃
ᠴᠠᠭᠠᠰᠢ ᠬᠥᠳᠡᠯᠪᠡ᠃ ᠦᠳᠡ ᠶ᠋ᠢᠨ ᠨᠠᠷᠠ ᠤᠯᠠᠮ ᠴᠤ᠌ ᠴᠣᠨᠣᠵᠤ ᠤᠷᠤᠭᠰᠢ ᠦᠭᠡᠢ ᠮᠣᠷᠢ ᠪᠦᠷ ᠴᠦ᠍ ᠬᠥᠳᠡᠯᠬᠦ ᠳᠤᠷᠠ ᠦᠭᠡᠢ ᠪᠠᠢᠪᠠᠴᠤ ᠴᠠᠭᠠᠰᠢ ᠶᠠᠪᠤᠯᠠ᠃ ᠠᠮᠠᠨ ᠳ᠋ᠠᠭᠠᠨ ᠮᠠᠨᠢ ᠤᠩᠰᠢᠨ ᠲᠡᠷᠭᠡᠨ ᠦ᠌ ᠪᠡᠨ ᠳᠤᠭᠤᠢ ᠶ᠋ᠢ ᠬᠢᠬᠤᠲᠤᠨᠠᠭᠤᠯᠤᠭᠰᠠᠭᠠᠷ ᠯᠠ ᠪᠠᠢᠪᠠ᠃
— ᠵᠠ ᠣᠳᠣ ᠡᠨᠳᠡ ᠤᠤ?
ᠳ᠋ᠠᠨᠽᠠᠨ ᠳᠠᠬᠢᠨ ᠣᠷᠴᠢᠨ ᠢ᠋ ᠠᠵᠢᠭᠰᠠᠨ ᠢ᠋ᠶ᠋ᠠᠨ᠄
— ᠦᠭᠡᠢ ᠡᠨᠳᠡ ᠳᠡᠮᠡᠢ᠂ ᠬᠠᠰᠢ ᠬᠠᠰᠢ ᠠᠭᠤᠯᠠᠨ ᠳ᠋ᠤ᠌ ᠢᠯᠡ ᠡᠢᠮᠦ ᠭᠠᠵᠠᠷ ᠢ᠋ ᠳᠡᠮᠡᠢ ᠭᠡᠳᠡᠭ ᠠ᠋᠃
ᠴᠠᠭᠠᠰᠢ ᠬᠥᠳᠡᠯᠪᠡ᠃ ᠣᠳᠣ ᠪᠣᠯᠬᠣᠷ《ᠮᠠᠨᠢ》ᠴᠤ᠌ ᠠᠯᠠᠭᠠ᠂ ᠲᠡᠭᠦᠨ ᠦ᠌ ᠣᠷᠣᠨ ᠳ᠋ᠤ᠌ ᠪᠦᠬᠦ ᠬᠦᠴᠦ ᠪᠡᠨ ᠳᠠᠢᠴᠢᠯᠠᠨ ᠵᠢᠳᠬᠦᠬᠦ ᠬᠡᠷᠡᠭᠲᠡᠢ ᠪᠣᠯᠵᠠᠢ᠃ ᠬᠠᠷᠢᠨ ᠲᠡᠷᠭᠡᠨ ᠦ᠌ ᠳᠤᠭᠤᠢ ᠳᠠᠩ ᠢ᠋ᠶ᠋ᠠᠷ ᠬᠢᠬᠤᠲᠤᠨᠠᠨᠠ᠃
ᠡᠢᠨᠬᠦ ᠶᠠᠪᠤᠬᠤ ᠳᠣᠳᠣᠮ ᠭᠠᠵᠠᠷ ᠬᠣᠯᠠᠳᠠᠭᠰᠠᠭᠠᠷ ᠡᠷᠭᠢᠶᠡ ᠭᠡᠲᠡᠯᠡ ᠶᠣᠰᠣᠨ ᠳ᠋ᠤ᠌ ᠦᠯᠦ ᠨᠡᠢᠴᠡᠬᠦ ᠠᠮᠢᠳᠤ ᠶ᠋ᠢᠨ ᠬᠠᠷᠠ ᠨᠢᠭᠦᠯ᠃ ᠲᠡᠭᠡᠭᠡᠳ ᠬᠠᠮᠢᠭᠠ ᠣᠷᠣᠰᠢᠭᠤᠯᠪᠠ? ᠭᠡᠪᠡᠯ ᠤᠷᠵᠢᠳᠤᠷ ᠤ᠋ᠨ ᠲᠡᠳᠡᠨ ᠦ᠌ ᠪᠤᠲᠠ ᠨᠦᠬᠡᠭᠦᠯᠦᠭᠰᠡᠨ ᠲᠡᠢᠨ ᠦ᠌ ᠲᠠᠯᠠᠪᠠᠢ᠃ ᠥᠨᠥᠳᠥᠷ ᠦ᠋ᠨ ᠡᠯᠢᠶᠡ ᠰᠢᠪᠠᠭᠤᠳ ᠤ᠋ᠨ ᠢᠳᠡᠨ ᠣᠪᠣᠯᠵᠠᠬᠤ ᠭᠠᠵᠠᠷ ᠤ᠋ᠨ ᠳᠤᠮᠳᠠ ᠲᠡᠳᠡ ᠦᠬᠦᠭᠰᠡᠨ ᠠᠮᠢᠳᠤ ᠬᠣᠶᠠᠷ ᠶᠠᠰᠤ ᠰᠠᠯᠵᠠᠢ᠃
ᠬᠢᠶᠠᠭᠲᠤ ᠬᠣᠲᠠ ᠳ᠋ᠤ᠌ ᠡᠷᠭᠢᠵᠦ ᠢᠷᠡᠬᠦ ᠳ᠋ᠦ᠍ᠨᠢ ᠠᠷᠠᠳ ᠤ᠋ᠨ ᠵᠢᠷᠤᠮᠲᠤ ᠴᠡᠷᠢᠭ ᠦ᠋ᠨ ᠳᠡᠳ᠋ ᠵᠠᠩᠵᠤᠨ ᠪᠢᠯᠢᠩᠰᠠᠢᠬᠠᠨ ᠬᠦᠩ ᠭᠡᠭᠴᠢ ᠲᠡᠳᠡᠨ ᠢ ᠳᠠᠭᠤᠳᠠᠭᠤᠯᠵᠠᠢ᠃ ᠣᠴᠢᠪᠠᠯ ᠲᠡᠷᠡ ᠬᠥᠮᠦᠨ ᠪᠡᠶᠡ ᠪᠡᠷ ᠨᠠᠮᠬᠠᠨ᠂ ᠴᠢᠷᠠᠢ ᠵᠥᠭᠡᠯᠡᠨ᠂ ᠵᠢᠷ ᠦ᠋ᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠠᠮᠤᠷ ᠮᠡᠨᠳᠦ ᠮᠡᠳᠡᠨ ᠬᠦᠯᠢᠶᠡᠵᠦ ᠠᠪᠤᠭᠠᠳ᠂ ᠲᠤᠰ ᠪᠦᠷᠢ ᠶ᠋ᠢᠨ ᠠᠢᠮᠠᠭ ᠬᠣᠰᠢᠭᠤ ᠨᠡᠷᠡ ᠠᠯᠳᠠᠷ᠂ ᠪᠠᠷᠤᠨ ᠤ᠋ ᠴᠡᠷᠢᠭ ᠲᠦ᠍ ᠬᠡᠵᠢᠶᠡ ᠬᠡᠷᠬᠢᠨ ᠣᠷᠣᠭᠰᠠᠨ ᠵᠡᠷᠭᠡ ᠶ᠋ᠢ ᠠᠰᠠᠭᠤᠨ ᠯᠠᠪᠯᠠᠪᠠ᠃ ᠳᠠᠷᠠᠭᠠ ᠨᠢ ᠢᠩᠭᠢᠬᠦ ᠳ᠋ᠦ᠍ ᠣᠳᠣ ᠲᠠ ᠨᠠᠷ ᠮᠠᠨ ᠤ᠋ ᠠᠷᠠᠳ ᠤ᠋ᠨ ᠨᠠᠮ᠂ ᠵᠢᠷᠤᠮᠲᠤ ᠴᠡᠷᠢᠭ ᠦ᠋ᠨ ᠡᠰᠡᠷᠭᠦ ᠳᠠᠢᠳᠤᠬᠤ ᠭᠡᠵᠦ ᠶᠠᠪᠤᠬᠤ ᠶ᠋ᠢᠨ ᠤᠴᠢᠷ ᠶᠠᠭᠤ ᠪᠢᠯᠡ ᠳᠠ? ᠭᠡᠵᠦ ᠢᠨᠢᠶᠡᠮᠰᠦᠭᠯᠡᠬᠦ ᠳ᠋ᠦ᠍ᠨᠢ ᠨᠥᠭᠦᠭᠡ ᠬᠣᠶᠠᠷ ᠪᠡᠶᠡ ᠪᠡᠶᠡ ᠪᠡᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠳᠤᠪᠳᠤᠨ ᠨᠢ᠄ ᠤᠯᠤᠰ ᠣᠷᠣᠨ ᠳ᠋ᠤ᠌ ᠲᠤᠰᠠᠭᠠᠷ ᠲᠣᠭᠲᠠᠨᠢᠯ᠂ ᠡᠩᠬᠡ ᠠᠮᠤᠭᠤᠯᠠᠩ ᠢ᠋ ᠬᠦᠰᠡᠬᠦ ᠳ᠋ᠡᠭᠡᠨ ᠯᠡ ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ᠨᠢ ᠳ᠋ᠠᠨᠽᠠᠨ᠂ ᠪᠢ ᠴᠦ᠍ ᠪᠠᠰᠠ ᠲᠡᠢᠮᠦ ᠳᠡ ᠭᠡᠪᠡ᠃
— ᠪᠢᠳᠡ ᠴᠤ᠌ ᠪᠠᠰᠠ ᠲᠡᠭᠦᠨ ᠦ᠌ ᠲᠥᠯᠥᠭᠡ ᠭᠡᠳ ᠪᠢᠯᠢᠩᠰᠠᠢᠬᠠᠨ ᠢᠯᠭᠠᠭᠠ ᠶ᠋ᠢ ᠭᠠᠷᠭᠠᠵᠤ ᠠᠷᠠᠳ ᠲᠦᠮᠡᠨ ᠳ᠋ᠦ᠍ ᠡᠷᠬᠡ ᠴᠢᠯᠥᠭᠡ ᠶ᠋ᠢ ᠣᠯᠭᠣᠵᠤ ᠬᠥᠮᠦᠨ ᠬᠥᠮᠦᠨ ᠢ᠋ᠶ᠋ᠡᠨ ᠳᠠᠷᠤᠯᠠᠨ ᠮᠥᠯᠵᠢᠬᠦ ᠶᠣᠰᠣ ᠶ᠋ᠢ ᠵᠣᠭᠰᠣᠭᠠᠬᠤ ᠲᠤᠬᠠᠢ ᠥᠭᠦᠯᠡᠭᠡᠳ ᠴᠠᠭᠠᠰᠢ ᠪᠠᠰᠠ ᠬᠤᠪᠢᠰᠬᠠᠯ᠂ ᠯᠧᠨᠢᠨ᠂ ᠤᠯᠠᠭᠠᠨ ᠣᠷᠣᠰ ᠤᠯᠤᠰ᠂ ᠲᠡᠳᠡᠨ ᠦ᠌ ᠵᠣᠷᠢᠯᠭᠠ ᠪᠠ ᠲᠤᠰᠠᠯᠠᠮᠵᠢ ᠶ᠋ᠢᠨ ᠲᠤᠬᠠᠢ ᠶᠠᠷᠢᠪᠠ᠃
ᠡᠨᠡ ᠵᠦᠢᠯ ᠳᠤᠪᠳᠤᠨ ᠳ᠋ᠤ᠌ ᠲᠡᠳᠦᠢ ᠯᠡ ᠣᠢᠯᠠᠭᠠᠮᠵᠢ ᠲᠠᠢ ᠪᠢᠰᠢ᠂ ᠣᠢᠯᠠᠭᠠᠪᠠᠴᠤ ᠲᠡᠷᠡ ᠡᠷᠡᠭᠡᠯᠵᠡᠨᠡ᠃《ᠠ ᠳᠠ ᠦᠨᠡᠨ ᠪᠣᠯ ᠤᠤ》᠃ ᠦᠭᠡ ᠬᠡᠯᠡ ᠴᠦ᠍ ᠶᠠᠭᠠᠬᠢᠬᠤᠪ᠂ ᠦᠢᠯᠡ ᠶᠠᠪᠤᠳᠠᠯ ᠨᠢ ᠯᠡ ᠦᠨᠡᠨ ᠬᠤᠳᠠᠯ ᠢ᠋ ᠬᠡᠷᠴᠢᠯᠡᠬᠦ ᠰᠢᠦ ᠳᠡ ᠭᠡᠵᠦ ᠳᠣᠲᠣᠷᠠ ᠪᠠᠨ ᠪᠠᠬᠠᠨ ᠦᠢᠮᠡᠷᠡᠨ ᠰᠠᠭᠤᠨᠠ᠃ ᠳ᠋ᠠᠨᠽᠠᠨ ᠳ᠋ᠤ᠌ ᠭᠡᠪᠡᠯ ᠲᠡᠢᠮᠦ ᠪᠢᠰᠢ᠂ ᠥᠩᠭᠡᠷᠡᠭᠰᠡᠨ ᠵᠢᠯ ᠬᠢᠲᠠᠳ ᠴᠡᠷᠢᠭ ᠦ᠋ᠳ ᠦ᠋ᠨ ᠭᠠᠷ ᠠ᠋ᠴᠠ ᠵᠢᠭᠤᠲᠠᠬᠤ ᠳ᠋ᠤ᠌ ᠲᠠᠭᠠᠷᠠᠯᠳᠤᠭᠰᠠᠨ ᠵᠣᠷᠢᠭᠲᠤ ᠵᠠᠯᠠᠭᠤ ᠨᠠᠢᠵᠢ᠂ ᠲᠡᠭᠦᠨ ᠦ᠌ ᠬᠦᠩ ᠴᠡᠨ ᠳ᠋ᠠᠩ ᠭᠡᠮᠡᠨ ᠮᠠᠰᠢ ᠰᠠᠢᠬᠠᠨ ᠢ᠋ ᠶᠠᠷᠢᠭᠰᠠᠨ ᠨᠢ ᠰᠠᠶᠢ ᠣᠢᠯᠠᠭᠠᠭᠳᠠᠬᠤ ᠪᠠᠢᠭᠠ ᠪᠥᠭᠡᠳ᠂ ᠠᠱ᠌ᠢᠭᠦᠢ ᠡᠨᠡ ᠠᠷᠠᠳ ᠤ᠋ᠨ ᠨᠠᠮ ᠲᠡᠷᠡ ᠬᠦᠩ ᠴᠡᠨ ᠳ᠋ᠠᠩ ᠲᠠᠢ ᠨᠥᠬᠥᠷᠯᠡᠵᠡᠢ ᠭᠡᠵᠦ ᠪᠠᠶᠠᠷᠯᠠᠪᠠ᠃
ᠪᠢᠯᠢᠩᠰᠠᠢᠬᠠᠨ ᠶᠠᠷᠢᠶᠠᠨ ᠤ᠋ ᠪᠠᠨ ᠲᠡᠭᠦᠰᠬᠡᠯ ᠳ᠋ᠦ᠍ ᠪᠷᠤᠨ ᠤᠩᠬᠧᠷᠠᠨ ᠤ᠋ ᠬᠣᠣᠷ ᠬᠥᠨᠥᠭᠡᠯ ᠢ᠋ ᠲᠠᠨᠢᠯᠴᠠᠭᠤᠯᠤᠭᠠᠳ᠂ ᠣᠳᠣ ᠲᠠ ᠨᠠᠷ ᠮᠠᠨ ᠤ᠋ ᠠᠷᠠᠳ ᠤ᠋ᠨ ᠵᠢᠷᠤᠮᠲᠤ ᠴᠡᠷᠢᠭ ᠲᠦ᠍ ᠡᠯᠰᠡᠨᠡ ᠤᠤ᠂ ᠶᠠᠭᠠᠬᠢᠨᠠ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠪᠣᠯ᠃ ᠭᠠᠭᠴᠠᠬᠠᠨ ᠵᠠᠬᠢᠬᠤ ᠶᠠᠭᠤᠮᠠ᠂ ᠬᠠᠨᠢ ᠳᠠᠢᠰᠤᠨ ᠬᠣᠶᠠᠷ ᠢ᠋ᠶ᠋ᠠᠨ ᠲᠠᠨᠢᠵᠤ ᠴᠢᠩ ᠰᠢᠳᠤᠷᠭᠤ ᠶ᠋ᠢ ᠯᠡ ᠪᠠᠷᠢᠭᠠᠷᠠᠢ! ᠭᠡᠯᠡ᠃
ᠨᠥᠭᠦᠭᠡ ᠬᠣᠶᠠᠷ ᠨᠢᠭᠡ ᠬᠡᠰᠡᠭ ᠲᠡᠭᠡᠨ ᠳᠠᠭᠤ ᠦᠭᠡᠢ ᠰᠠᠭᠤᠪᠠ᠃ ᠳ᠋ᠠᠨᠽᠠᠨ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠠᠮᠠ ᠶ᠋ᠢ ᠬᠠᠷᠠᠪᠠ᠃ ᠨᠥᠬᠥᠷ ᠨᠢ ᠬᠠᠷᠢᠭᠤ ᠬᠠᠷᠠᠬᠤ ᠲᠤᠯᠠ᠄
— ᠵᠠ ᠪᠢ ᠴᠡᠷᠢᠭ ᠲᠦ᠍ ᠡᠯᠰᠡᠶᠡ᠃ ᠭᠠᠭᠴᠠᠬᠠᠨ ᠭᠤᠶᠤᠬᠤ ᠶᠠᠭᠤᠮᠠ ᠲᠠ ᠲᠡᠢᠨ ᠳᠠᠭᠤᠰᠤᠮᠠᠭᠴᠠ ᠨᠠᠮᠠᠶ᠋ᠢ ᠰᠤᠯᠠᠯᠠᠵᠤ ᠦᠵᠡᠭᠡᠷᠡᠢ!
— ᠲᠡᠷᠡ ᠪᠣᠯᠤᠨᠠ᠃
— ᠪᠢ ᠬᠠᠷᠢᠬᠤ ᠶ᠋ᠢ ᠬᠦᠰᠡᠵᠦ ᠪᠠᠢᠨᠠ ᠭᠡᠵᠦ ᠳᠤᠪᠳᠤᠨ ᠥᠭᠦᠯᠡᠨ ᠠᠮᠢᠰᠬᠤᠭᠠᠳᠠᠭᠰᠠᠨ ᠢ᠋ᠶ᠋ᠠᠨ᠂ ᠣᠷᠣᠨ ᠭᠡᠷ ᠮᠠᠨᠢ ᠬᠣᠯᠠ᠂ ᠡᠪᠦᠯ ᠮᠠᠰᠢ ᠬᠠᠲᠠᠭᠤ ᠥᠩᠭᠡᠷᠡᠵᠦ ᠬᠡᠳᠦᠨ ᠮᠠᠯ ᠢ᠋ᠶ᠋ᠠᠨ ᠪᠠᠷᠠᠭᠰᠠᠨ᠃ ᠲᠡᠳᠡᠨ ᠢ᠋ ᠪᠡᠨ ᠡᠷᠲᠡᠬᠡᠨ ᠣᠴᠢᠵᠤ ᠬᠤᠳᠠᠯ ᠦᠭᠡᠢ ᠲᠤᠩ ᠪᠣᠯᠬᠤ ᠦᠭᠡᠢ ᠪᠠᠢᠨᠠ᠃
— ᠲᠡᠷᠡ ᠴᠦ᠍ ᠪᠣᠯᠤᠨᠠ᠃ ᠭᠠᠭᠴᠠᠬᠠᠨ ᠴᠢ ᠡᠨᠳᠡ ᠡᠴᠡ ᠭᠠᠷᠤᠭᠰᠠᠭᠠᠷ ᠪᠠᠷᠤᠨ ᠤ᠋ ᠬᠢᠨ ᠳ᠋ᠦ᠍ ᠪᠠᠷᠢᠭᠳᠠᠨ ᠨᠢᠭᠡ ᠪᠣᠯ ᠠᠯᠠᠭᠳᠠᠭᠠ ᠡᠰᠡᠪᠡᠯ ᠳᠠᠬᠢᠨ ᠪᠢᠳᠡᠨ ᠲᠡᠢ ᠲᠤᠯᠤᠯᠳᠤᠬᠤ ᠪᠠᠷ ᠢᠷᠡᠬᠦ ᠳ᠋ᠦ᠍ ᠬᠦᠷᠬᠦ ᠪᠢᠰᠢ ᠤᠤ?
— ᠠ ᠡᠵᠡᠨᠲᠡᠨ ᠮᠢᠨᠢ ᠪᠢ ᠪᠠᠷᠢᠭᠳᠠᠬᠤ ᠦᠭᠡᠢ᠂ ᠦᠨᠡᠨ ᠢ᠋ ᠬᠡᠯᠡᠬᠦ ᠳ᠋ᠦ᠍ ᠪᠢ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠭᠦᠶᠦᠯᠭᠡᠨ ᠭᠠᠵᠠᠷ ᠨᠤᠲᠤᠭ ᠪᠣᠯᠭᠠᠨ ᠢ᠋ᠶ᠋ᠠᠷ ᠰᠥᠨᠢ ᠡᠳᠦᠷ ᠦᠭᠡᠢ ᠶᠠᠪᠤᠵᠤ ᠰᠤᠷᠤᠭᠰᠠᠨ ᠬᠥᠮᠦᠨ᠃
— ᠦᠭᠡᠢ ᠲᠡᠭᠡᠪᠡᠯ ᠴᠢ ᠡᠨᠳᠡ ᠡᠴᠡ ᠳᠥᠩᠭᠡᠵᠦ ᠭᠠᠷᠤᠩᠭᠤᠲᠠ ᠠᠮᠢᠲᠠᠨ ᠤ᠋ ᠮᠣᠷᠢᠳ ᠳᠣᠭᠰᠢᠨ ᠭᠠᠢ ᠳᠠᠷᠢᠨ ᠶᠠᠪᠤᠬᠤ ᠬᠥᠮᠦᠨ ᠰᠢᠪ? ᠭᠡᠵᠦ ᠰᠣᠴᠢᠨ ᠥᠭᠦᠯᠡᠬᠦ ᠳ᠋ᠦ᠍᠄
— ᠠᠱ᠌ᠢ ᠡᠵᠡᠨ ᠮᠢᠨᠢ ᠦᠭᠡᠢ᠂ ᠶᠡᠷᠦᠨᠢ ᠬᠣᠢᠰᠢᠳᠠ ᠪᠠᠨ ᠵᠦᠭᠡᠷ ᠮᠥᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠶᠠᠪᠤᠳᠠᠭ ᠬᠥᠮᠦᠨ ᠪᠣᠯᠬᠤ ᠪᠠᠨ ᠲᠠᠩᠭᠠᠷᠢᠭᠯᠠᠶᠠ᠃ ᠭᠠᠭᠴᠠᠬᠠᠨ ᠲᠠ ᠣᠳᠣ ᠮᠢᠨᠦ ᠡᠮᠡᠭᠡᠯ ᠬᠠᠵᠠᠭᠠᠷᠲᠤ ᠮᠣᠷᠢ ᠶ᠋ᠢ ᠵᠢᠰᠦᠮ ᠢ᠋ᠶ᠋ᠡᠷ ᠨᠢ ᠣᠯᠭᠣᠵᠤ ᠬᠠᠢᠷᠠᠯᠠ!
— ᠲᠡᠷᠡ ᠴᠦ᠍ ᠪᠣᠯᠤᠨᠠ᠃ ᠭᠠᠭᠴᠠᠬᠠᠨ ᠵᠠᠬᠢᠬᠤ ᠮᠢᠨᠢ᠂ ᠠ᠋ ᠳᠠ ᠨᠥᠬᠥᠳ ᠬᠠᠨᠢ ᠳᠠᠢᠰᠤᠨ ᠬᠣᠶᠠᠷ ᠢ᠋ᠶ᠋ᠠᠨ ᠲᠠᠨᠢᠬᠤ᠂ ᠲᠦᠪᠰᠢᠨ ᠰᠢᠳᠤᠷᠭᠤ ᠶ᠋ᠢ ᠪᠠᠷᠢᠬᠤ ᠡᠨᠡ ᠬᠣᠶᠠᠷ ᠯᠠ ᠪᠠᠢᠨᠠ ᠰᠢᠦ ᠳᠡ᠃
ᠬᠣᠶᠠᠭᠤᠯᠠ ᠪᠠᠨ ᠲᠡᠨᠳᠡ ᠡᠴᠡ ᠭᠠᠷᠪᠠ᠃
ᠳ᠋ᠠᠨᠽᠠᠨ ᠴᠡᠷᠢᠭ ᠦ᠋ᠨ ᠪᠠᠢᠷᠢ ᠤᠷᠤᠭᠤ ᠶᠠᠪᠤᠯᠠ᠃ ᠰᠡᠳᠬᠢᠯ ᠦ᠋ᠨ ᠪᠠᠢᠳᠠᠯ ᠶᠡᠷᠦ ᠲᠠᠪᠠᠲᠠᠢ ᠪᠢᠰᠢ᠂ ᠳᠤᠪᠳᠤᠨ ᠤ᠋ ᠪᠠᠨ ᠬᠠᠮᠲᠤ ᠴᠡᠷᠢᠭ ᠲᠦ᠍ ᠡᠯᠰᠡᠨᠡ ᠪᠠᠢᠬᠤ ᠭᠡᠵᠦ ᠢᠲᠡᠭᠡᠭᠰᠡᠨ ᠢᠲᠡᠭᠡᠯ ᠲᠠᠯᠠᠭᠠᠷ ᠪᠣᠯᠤᠭᠰᠠᠨ ᠤ᠋ ᠳᠡᠭᠡᠷᠡ ᠣᠳᠣ ᠢᠩᠭᠢᠭᠡᠳ ᠲᠠᠭ ᠲᠠᠨᠢᠬᠤ ᠦᠭᠡᠢ ᠬᠥᠮᠦᠰ ᠦ᠋ᠨ ᠳᠤᠮᠳᠠ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠣᠷᠣᠬᠤ ᠪᠣᠯᠤᠯᠠ ᠰᠢᠪ ᠳᠡ ᠭᠡᠰᠡᠨ ᠪᠣᠳᠣᠯ ᠳ᠋ᠤ᠌ ᠳᠠᠷᠤᠭᠳᠠᠬᠤ ᠠᠵᠢ᠃ ᠬᠠᠵᠠᠭᠤ ᠳ᠋ᠤᠨᠢ ᠳᠤᠪᠳᠤᠨ ᠪᠠᠰᠠ ᠴᠤ᠌ ᠲᠠᠪᠠᠲᠠᠢ ᠪᠢᠰᠢ᠂ ᠨᠥᠬᠥᠷ ᠦ᠋ᠨ ᠴᠢᠷᠠᠢ ᠭᠣᠮᠣᠳᠠᠭᠰᠠᠨ ᠭᠤᠳᠤᠷᠠᠭᠰᠠᠨ ᠬᠣᠶᠠᠷ ᠲᠤ ᠢᠯᠡᠳᠲᠡ ᠳᠠᠷᠤᠭᠳᠠᠭᠰᠠᠨ ᠳ᠋ᠤ᠌ ᠵᠣᠪᠠᠭᠤᠷᠢᠯᠠᠨᠠ᠃
— ᠨᠥᠬᠥᠷ ᠮᠢᠨᠢ ᠪᠢ ᠨᠥᠭᠦᠭᠡ ᠮᠠᠭᠤ ᠨᠥᠬᠥᠷ ᠦ᠋ᠨ ᠠᠳᠠᠯᠢ ᠴᠢᠮᠠᠶ᠋ᠢ ᠬᠠᠶᠠᠨ ᠠᠯᠠᠭᠠ ᠪᠣᠯᠵᠤ ᠪᠠᠢᠭᠠ ᠪᠢᠰᠢ᠂ ᠰᠢᠷᠦᠭᠦᠨ ᠪᠠᠭᠠᠲᠤᠷ ᠲᠠᠯᠢᠢᠭᠴᠢ ᠪᠠᠨ ᠴᠦ᠍ ᠴᠢᠮᠠ ᠲᠠᠢ ᠬᠠᠮᠲᠤ ᠰᠠᠢᠬᠠᠨ ᠣᠷᠣᠰᠢᠭᠤᠯᠤᠭᠰᠠᠨ᠃ ᠢᠩᠭᠢᠬᠦᠯᠡᠷ ᠴᠢ ᠨᠠᠳᠠ ᠭᠣᠮᠣᠳᠠᠬᠤ ᠶᠠᠪᠤᠳᠠᠯ ᠦᠭᠡᠢ ᠪᠢᠵᠡ ᠳᠡ ᠭᠡᠬᠦ ᠳ᠋ᠦ᠍ᠨᠢ ᠳ᠋ᠠᠨᠽᠠᠨ ᠡᠰᠡ ᠳᠤᠤᠭᠠᠷᠪᠠ᠃
— ᠪᠢ ᠴᠢᠮᠠ ᠲᠠᠢ ᠠᠳᠠᠯᠢ ᠡᠳᠡᠨ ᠦ᠌ ᠴᠡᠷᠢᠭ ᠲᠦ᠍ ᠡᠯᠰᠡᠪᠡᠯ ᠡᠯᠰᠡᠮᠡᠷ ᠯᠡ ᠪᠠᠢᠨᠠ᠃ ᠭᠠᠭᠴᠠᠬᠠᠨ ᠪᠢ ᠭᠡᠷ ᠲᠡᠭᠡᠨ ᠨᠢᠭᠡ ᠠᠢᠯ ᠤ᠋ᠨ ᠬᠡᠦᠬᠡᠨ ᠪᠤᠰᠬᠠᠨ ᠠᠪᠴᠢᠷᠠᠭᠠᠳ ᠲᠡᠭᠦᠨ ᠢ᠋ᠶ᠋ᠡᠨ ᠲᠠᠪᠠᠲᠠᠢ ᠡᠪᠦᠷᠯᠡᠨ ᠤᠨᠲᠠᠵᠤ ᠴᠤ᠌ ᠠᠮᠵᠢᠯ ᠦᠭᠡᠢ ᠪᠠᠷᠤᠨ ᠤ᠋ ᠴᠡᠷᠢᠭ ᠲᠦ᠍ ᠪᠠᠷᠢᠭᠳᠠᠭᠰᠠᠨ ᠬᠥᠮᠦᠨ ᠰᠢᠦ᠃ ᠦᠭᠡᠢ ᠶᠠᠳᠠᠵᠤ ᠮᠢᠨᠦ ᠡᠵᠢ ᠭᠡᠵᠦ ᠠᠷᠪᠠᠨ ᠠᠮᠠᠳᠠᠨ ᠭᠡᠵᠦ ᠠᠯᠳᠠᠷᠰᠢᠭᠰᠠᠨ ᠨᠢᠭᠡ ᠠᠢᠬᠤᠪᠲᠤᠷ ᠴᠢᠪᠠᠭᠠᠨᠴᠠ ᠪᠠᠢᠳᠠᠭ ᠢ᠋ ᠶᠠᠭᠠᠬᠢᠨᠠ᠃
ᠳ᠋ᠠᠨᠽᠠᠨ ᠮᠥᠨ ᠯᠡ ᠳᠤᠤᠭᠠᠷᠤᠯ ᠦᠭᠡᠢ ᠶᠠᠪᠤᠭᠰᠠᠭᠠᠷ ᠴᠡᠷᠢᠭ ᠦ᠋ᠨ ᠪᠠᠢᠷᠢᠨ ᠤ᠋ ᠳᠡᠷᠭᠡᠳᠡ ᠢᠷᠡᠭᠡᠳ᠂
— ᠵᠠ ᠴᠢ ᠪᠤᠴᠠ᠂ ᠲᠡᠷᠡ ᠡᠮᠡᠭᠡᠯ ᠬᠠᠵᠠᠭᠠᠷᠲᠤ ᠮᠣᠷᠢ ᠪᠠᠨ ᠡᠷᠲᠡᠬᠡᠨ ᠣᠯᠵᠤ ᠠᠪᠤᠭᠠᠳ ᠶᠠᠪᠤᠬᠤ ᠵᠠᠮ ᠢ᠋ᠶ᠋ᠠᠨ ᠬᠥᠬᠡᠭᠡ! ᠭᠡᠬᠦ ᠳ᠋ᠦ᠍ ᠳᠤᠪᠳᠤᠨ《ᠵᠠ》 ᠭᠡᠳ ᠪᠦᠰᠡᠯᠡᠭᠰᠡᠨ ᠳ᠋ᠠᠢᠵᠠ ᠲᠠᠢ ᠰᠤᠮᠤ ᠪᠠᠨ ᠠᠪᠤᠨ ᠡᠮᠦᠨᠡ ᠨᠢ ᠪᠠᠷᠢᠵᠤ《ᠮᠠᠢ᠂ ᠣᠳᠣ ᠡᠨᠡ ᠯᠡ ᠴᠢᠮᠠ ᠳ᠋ᠤ᠌ ᠬᠡᠷᠡᠭᠲᠡᠢ》 ᠭᠡᠪᠡ᠃