ᠬᠥᠯᠥᠭ ᠪᠠᠭᠠᠲᠤᠷ ᠪᠤᠭᠤᠷᠴᠢ - ᠪ᠂ ᠦᠯᠵᠡᠢᠰᠦ᠋ᠷᠦᠩ <ᠲᠡᠷᠢᠭᠦᠨ ᠪᠦᠯᠦᠭ - ᠠᠷᠪᠠᠨ ᠳᠥᠷᠪᠡ > Хүлэг баатар буурч - Б. Өлзийсүрэн <Тэргүүн бүлэг-14>
83ᠬᠣᠷᠸᠠ ᠲᠠᠢ ᠤᠴᠠᠷᠠᠨ ᠲᠠᠨᠢᠯᠴᠠᠵᠤ ᠪᠠᠶᠠᠷ ᠭᠤᠨᠢᠭ ᠠᠮᠰᠠᠭᠰᠠᠨ ᠲᠡᠷᠢᠭᠦᠨ ᠪᠦᠯᠦᠭ
ᠠᠷᠪᠠᠨ ᠳᠥᠷᠪᠡ
ᠠᠷᠪᠠᠨ ᠳᠥᠷᠪᠡ
ᠣᠷᠴᠢᠯᠠᠩ ᠤ᠋ᠨ ᠵᠢᠷᠭᠠᠯ ᠢ᠋
ᠣᠯᠵᠤ ᠡᠳ᠋ᠯᠡᠬᠦ ᠠᠮᠤᠷ ᠦᠭᠡᠢ᠂
ᠣᠯᠬᠤ ᠴᠤ᠌ ᠪᠣᠢ᠂ ᠠᠯᠳᠠᠬᠤ ᠴᠤ᠌ ᠪᠣᠢ
ᠣᠯᠳᠠᠬᠤ ᠠ᠋ᠴᠠ ᠪᠠᠨ ᠠᠯᠳᠠᠬᠤ ᠨᠢ ᠶᠡᠬᠡ
ᠳᠤᠮᠳᠠ ᠲᠠᠷᠭᠤᠨ ᠤ᠋ ᠬᠣᠢᠲᠤ ᠲᠤᠯᠤᠭᠠᠳ ᠤ᠋ᠨ ᠬᠠᠵᠠᠭᠤ ᠨᠠᠯᠠᠤ ᠡᠩᠭᠡᠷ ᠲᠦ᠍ ᠭᠠᠬᠠᠢ ᠴᠠᠭ ᠠ᠋ᠴᠠ ᠬᠤᠯᠤᠭᠠᠨᠠ ᠴᠠᠭ ᠰᠢᠯᠵᠢᠬᠦ ᠰᠥᠨᠢ ᠶ᠋ᠢᠨ ᠬᠠᠷᠠᠩᠭᠤᠢ ᠪᠠᠷ ᠭᠤᠷᠪᠠᠨ ᠲᠤᠯᠭᠠᠭᠤᠷᠢ ᠪᠠᠷ ᠪᠣᠰᠬᠠᠭᠰᠠᠨ ᠣᠷᠣᠴᠠ ᠮᠠᠶᠢᠭ ᠤ᠋ᠨ ᠣᠪᠣᠬᠠᠢ ᠳᠤᠮᠳᠠ ᠬᠠᠭᠤᠷᠠᠢ ᠠᠷᠭᠠᠯ᠂ ᠪᠤᠷᠭᠠᠰᠤ᠂ ᠮᠣᠳᠣ᠂ ᠬᠣᠯᠢᠨ ᠥᠷᠥᠵᠦ ᠠᠰᠠᠭᠠᠭᠰᠠᠨ ᠭᠠᠯ ᠣᠴᠢ ᠥᠰᠥᠷᠬᠡᠨ ᠴᠠᠳ᠋ ᠫᠠᠳ᠋ ᠬᠢᠨ ᠳᠦᠷᠡᠯᠵᠡᠨᠡ᠃ ᠥᠳᠬᠡᠨ ᠰᠠᠬᠠᠯ ᠦᠰᠦᠲᠡᠢ᠂ ᠳᠤᠮᠳᠠ ᠵᠡᠷᠭᠡ ᠶ᠋ᠢᠨ ᠨᠠᠰᠤᠨ ᠤ᠋ ᠶᠠᠩᠬᠢᠷᠳᠠᠭᠤ ᠡᠷᠡ ᠭᠠᠯ ᠲᠣᠭᠣᠷᠢᠨ ᠪᠥᠵᠢᠵᠦ ᠴᠠᠮᠨᠠᠬᠤ ᠳᠦᠷᠢ ᠦᠵᠡᠭᠦᠯᠦᠨ ᠡᠮᠦᠨᠡ ᠨᠢ ᠢᠷᠡᠵᠦ ᠪᠥᠬᠥᠢᠨ ᠶᠣᠰᠣᠯᠠᠭᠠᠳ ᠬᠠᠵᠠᠭᠤ ᠳ᠋ᠤᠨᠢ ᠲᠠᠯᠪᠢᠭᠰᠠᠨ ᠪᠣᠭᠣᠨᠢᠬᠠᠨ ᠳᠠᠮᠨᠠᠭᠤᠷᠭᠠ ᠲᠠᠢ ᠪᠥᠭᠡᠷᠡᠩᠬᠡᠢ ᠴᠠᠭᠠᠨ ᠶᠠᠭᠤᠮᠠ ᠨᠢᠭᠡᠨ ᠵᠠᠯᠠᠭᠤ ᠶ᠋ᠢᠨ ᠬᠠᠮᠲᠤ ᠬᠣᠶᠠᠷ ᠲᠠᠯᠠ ᠠ᠋ᠴᠠ ᠨᠢ ᠡᠷᠭᠦᠵᠦ ᠭᠠᠯ ᠤ᠋ᠨ ᠡᠮᠦᠨᠡ ᠪᠠᠢᠷᠢᠯᠠᠭᠤᠯᠤᠨ ᠦᠷᠦᠭᠰᠡᠨ ᠮᠣᠳᠣᠨ ᠲᠠᠪᠴᠠᠩ ᠳᠡᠭᠡᠷᠡ ᠲᠠᠯᠪᠢᠵᠤ ᠡᠨᠳᠡ ᠲᠡᠨᠳᠡ ᠨᠢ ᠪᠠᠷᠢᠵᠤ ᠲᠡᠮᠲᠡᠴᠢᠨ ᠦᠵᠡᠭᠡᠳ ᠬᠢᠲᠤᠭᠠ ᠪᠠᠷ ᠠᠶᠤᠮᠰᠢᠭᠲᠠᠢ ᠰᠡᠢᠴᠢᠨ ᠣᠭᠲᠣᠴᠢᠵᠤ᠂ ᠳᠦᠷᠡᠯᠵᠡᠨ ᠠᠰᠠᠵᠤ ᠪᠣᠢ ᠭᠠᠯ ᠤ᠋ᠨ ᠳᠤᠮᠳᠠ ᠰᠢᠷᠭᠤᠭᠤᠯᠤᠨ ᠳᠡᠭᠡᠷᠡ ᠡᠴᠡ ᠨᠢ ᠰᠢᠷᠠ ᠲᠣᠰᠣ ᠰᠠᠴᠤᠬᠤ ᠳ᠋ᠤ᠌ ᠭᠠᠯ ᠪᠦᠷ ᠰᠦᠷᠲᠡᠢ ᠳᠦᠷᠡᠯᠵᠡᠨ ᠪᠠᠳᠠᠷᠠᠬᠤ ᠠᠪᠠᠢ᠃
ᠳᠠᠪ ᠳᠠᠪ ᠭᠡᠰᠡᠨ ᠣᠭᠵᠣᠮ ᠬᠥᠳᠡᠯᠭᠡᠭᠡᠨ ᠲᠡᠢ᠂ ᠡᠨᠡ ᠬᠠᠷᠠ ᠬᠥᠮᠦᠨ ᠪᠣᠯ ᠨᠤᠲᠤᠭ ᠤ᠋ᠨ ᠶᠠᠰᠤᠴᠢᠨ᠃ ᠠᠮᠢᠳᠤ ᠠ᠋ᠴᠠ ᠦᠬᠦᠭᠰᠡᠨ ᠢ᠋ ᠵᠠᠢᠯᠠᠭᠤᠯᠵᠤ᠂ ᠨᠤᠲᠤᠭᠯᠠᠭᠤᠯᠵᠤ ᠪᠣᠳᠢ ᠶ᠋ᠢ ᠨᠢ ᠬᠥᠲᠥᠯᠳᠡᠭ ᠨᠢᠭᠡ ᠶᠣᠰᠣᠨ ᠤ᠋ ᠪᠥᠬᠡ ᠶᠦᠮ᠃ ᠲᠡᠭᠦᠨ ᠢ᠋ ᠬᠡᠷᠦᠯᠦᠨᠵᠢᠨ ᠦ᠌ ᠨᠠᠰᠤ ᠪᠠᠷᠠᠭᠰᠠᠨ ᠤ᠋ ᠮᠠᠷᠭᠠᠰᠢ ᠡᠳᠦᠷ ᠡᠴᠢᠭᠡ ᠨᠢ ᠶᠠᠪᠤᠵᠤ ᠵᠠᠯᠠᠵᠤ ᠢᠷᠡᠪᠡ᠃ ᠥᠩᠭᠡᠷᠡᠬᠦ ᠰᠥᠨᠢ ᠪᠣᠭᠣᠷᠴᠢ ᠵᠡᠭᠦᠨ ᠭᠡᠷ ᠲᠦ᠍ ᠵᠠᠯᠠᠭᠰᠠᠨ ᠴᠣᠭᠴᠠᠨ ᠤ᠋ ᠳᠡᠷᠭᠡᠳᠡ ᠬᠦᠵᠢ᠂ ᠠᠷᠴᠠ ᠠᠰᠠᠭᠠᠨ ᠰᠠᠬᠢᠵᠤ ᠬᠣᠨᠣᠭᠠᠳ ᠥᠷᠯᠥᠭᠡ ᠨᠢ ᠭᠠᠷᠴᠤ ᠭᠠᠳᠠᠭᠤᠷ ᠳᠣᠲᠣᠭᠤᠷ ᠬᠢ ᠠᠵᠢᠯ ᠶᠠᠪᠤᠳᠠᠯ ᠳ᠋ᠤ᠌ ᠣᠷᠣᠯᠴᠠᠨ ᠪᠠᠢᠪᠠ᠃ ᠶᠠᠰᠤᠴᠢᠨ ᠢᠷᠡᠮᠡᠭᠴᠡ ᠪᠦᠭᠦᠳᠡ ᠭᠡᠷ ᠲᠦ᠍ ᠴᠤᠭᠯᠠᠷᠠᠵᠤ᠂ ᠴᠠᠢ ᠬᠣᠭᠣᠯᠠ ᠢᠳᠡᠵᠦ ᠤᠤᠭᠤᠬᠤ ᠵᠠᠭᠤᠷᠠ ᠶᠠᠰᠤᠴᠢᠨ ᠲᠡᠷᠡ ᠬᠥᠮᠦᠨ ᠲᠠᠯᠢᠢᠭᠴᠢ ᠶ᠋ᠢᠨ ᠨᠠᠰᠤ᠂ ᠲᠥᠷᠥᠭᠰᠡᠨ ᠭᠠᠷᠠᠭ᠂ ᠪᠣᠷᠳᠣᠨ ᠢ᠋ ᠠᠰᠠᠭᠤᠵᠤ ᠥᠪᠡᠷᠦᠨ ᠮᠡᠷᠭᠡ ᠶ᠋ᠢᠨ ᠵᠢᠮᠰᠡᠭ ᠵᠣᠭᠣᠰ ᠭᠠᠷᠭᠠᠵᠤ ᠰᠢᠪᠰᠢᠨ ᠲᠠᠲᠠᠭᠠᠳ᠄
— ᠪᠤᠩᠬᠤᠯᠠᠬᠤ᠂ ᠠᠪᠰᠠᠯᠠᠬᠤ᠂ ᠴᠢᠨᠳᠠᠷᠯᠠᠬᠤ᠂ ᠢᠯᠡ ᠵᠠᠳᠠᠭᠠᠢ ᠲᠠᠯᠪᠢᠬᠤ ᠣᠯᠠᠨ ᠶᠣᠰᠣ ᠪᠠᠢᠳᠠᠭ᠃ ᠡᠨᠡ ᠥᠬᠢᠨ ᠢ᠋ ᠭᠠᠯ ᠳ᠋ᠤ᠌ ᠡᠷᠭᠦᠵᠦ ᠴᠢᠨᠳᠠᠷᠯᠠᠬᠤ ᠨᠢ ᠵᠣᠬᠢᠰᠲᠠᠢ ᠭᠡᠵᠦ ᠮᠢᠨᠦ ᠳᠥᠯᠭᠡᠨ ᠳ᠋ᠦ᠍ ᠪᠠᠭᠤᠪᠠ᠃ ᠶᠠᠭᠠᠬᠢᠬᠤ ᠪᠣᠢ? ᠪᠣᠯᠬᠤ ᠤᠤ? ᠭᠡᠮᠡᠨ ᠠᠰᠠᠭᠤᠪᠠ᠃
— ᠪᠣᠯᠤᠯ ᠦᠭᠡᠢ ᠶᠠᠭᠠᠬᠢᠬᠤᠪ᠂ ᠪᠣᠯᠤᠯ ᠦᠭᠡᠢ ᠶᠠᠭᠠᠬᠢᠬᠤᠪ ᠭᠡᠵᠦ ᠡᠴᠢᠭᠡ ᠡᠬᠡ ᠵᠡᠷᠭᠡ ᠬᠡᠯᠡᠭᠡᠳ ᠡᠬᠡ ᠨᠠᠮᠤᠭᠤᠨ᠄
— ᠬᠥᠭᠡᠷᠦᠬᠦᠢ ᠮᠠᠭᠤ ᠥᠬᠢᠨ ᠮᠢᠨᠢ ᠬᠤᠪᠢ ᠵᠠᠶᠠᠭᠠᠲᠠᠢ ᠬᠥᠮᠦᠨ ᠪᠠᠢᠵᠤ ᠳᠠ᠂ ᠭᠠᠯ ᠬᠦᠯᠦᠭᠯᠡᠨ ᠮᠥᠩᠬᠡ ᠲᠩᠷᠢ ᠳ᠋ᠡᠭᠡᠨ ᠣᠴᠢᠬᠤ ᠭᠡᠳᠡᠭ ᠬᠥᠮᠦᠨ ᠪᠦᠷᠢ ᠳ᠋ᠦ᠍ ᠲᠣᠬᠢᠶᠠᠯᠳᠤᠬᠤ ᠦᠭᠡᠢ ᠪᠢᠵᠡ ᠳᠡ ᠭᠡᠪᠡ᠃
ᠶᠠᠰᠤᠴᠢᠨ᠄
— ᠪᠢ ᠲᠡᠮᠦᠷᠴᠢ ᠲᠡᠢ ᠶᠠᠪᠤᠵᠤ ᠭᠠᠵᠠᠷ ᠦᠵᠡᠵᠦ ᠴᠢᠯᠠᠭᠤ ᠲᠠᠯᠪᠢᠨᠠ᠃ ᠬᠣᠶᠠᠷ ᠭᠤᠷᠪᠠᠨ ᠬᠥᠮᠦᠨ ᠪᠢᠳᠡ ᠬᠣᠶᠠᠷ ᠲᠠᠢ ᠶᠠᠪᠤᠵᠤ᠂ ᠦᠬᠡᠷ ᠦ᠋ᠨ ᠬᠤᠷ ᠠᠷᠭᠠᠯ ᠭᠤᠷᠪᠠᠨ ᠰᠢᠭᠤᠳᠠᠢ᠂ ᠬᠠᠲᠠᠭᠰᠠᠨ ᠪᠤᠷᠭᠠᠰᠤ ᠳᠥᠷᠪᠡ ᠡᠴᠡ ᠲᠠᠪᠤᠨ ᠰᠢᠭᠤᠳᠠᠢ ᠠᠪᠠᠴᠢᠵᠤ ᠪᠠᠭᠤᠯᠭᠠ᠃ ᠬᠦᠷᠵᠡ ᠠᠪᠴᠤ ᠶᠠᠪᠤᠭᠠᠷᠠᠢ ᠭᠡᠵᠦ ᠵᠢᠭᠠᠪᠤᠷᠢᠯᠠᠭᠠᠳ ᠲᠡᠳᠡ ᠶᠠᠪᠤᠵᠠᠭᠠᠯᠠ᠃
ᠲᠡᠳᠡ ᠡᠢᠨᠬᠦ ᠲᠠᠪᠤᠭᠤᠯᠠ ᠶᠠᠪᠤᠭᠰᠠᠨ ᠤ᠋ ᠳᠣᠲᠣᠷᠠ ᠪᠣᠭᠤᠷᠴᠢ ᠣᠷᠣᠯᠴᠠᠵᠠᠢ᠃ ᠬᠥᠮᠦᠨ ᠨᠤᠲᠤᠭᠯᠠᠭᠤᠯᠳᠠᠭ ᠵᠡᠯᠢᠭᠦᠳ ᠲᠡᠷᠡ ᠭᠠᠵᠠᠷ ᠶᠠᠰᠤᠴᠢᠨ ᠳᠠᠯᠠᠢᠭᠴᠢ ᠶ᠋ᠢᠨ ᠡᠴᠢᠭᠡ ᠲᠡᠢ ᠨᠢ ᠬᠣᠢᠲᠤ ᠤᠷᠢᠳᠤ ᠠᠭᠤᠯᠠ ᠣᠪᠣᠭᠠ᠂ ᠣᠨᠢ ᠬᠥᠲᠥᠯ ᠢ᠋ ᠰᠢᠨᠵᠢᠯᠡᠨ ᠶᠠᠷᠢᠵᠤ ᠬᠡᠯᠡᠯᠴᠡᠭᠡᠳ ᠨᠢᠭᠡᠨ ᠭᠠᠵᠠᠷ ᠢ᠋ ᠰᠣᠩᠭᠣᠵᠤ ᠲᠡᠨᠳᠡ ᠥᠩᠭᠡᠷᠡᠭᠰᠡᠨ ᠵᠢᠯ ᠦ᠋ᠨ ᠥᠯᠥᠨ ᠴᠠᠭᠠᠨ ᠡᠪᠡᠰᠦ ᠶ᠋ᠢ ᠬᠠᠮᠤᠵᠤ᠂ ᠭᠡᠷ ᠦ᠋ᠨ ᠪᠠᠭᠤᠷᠢ ᠬᠡᠯᠪᠡᠷᠢ ᠶ᠋ᠢᠨ ᠳᠤᠭᠤᠢ ᠲᠣᠭᠣᠷᠢᠭ ᠭᠠᠷᠭᠠᠵᠤ ᠴᠡᠪᠡᠷᠯᠡᠨ ᠬᠠᠷᠠ ᠬᠥᠷᠥᠰᠥ ᠶ᠋ᠢ ᠨᠢ ᠢᠯᠡ ᠭᠠᠷᠭᠠᠪᠠ᠃
— ᠭᠤᠷᠪᠠᠨ ᠴᠢᠯᠠᠭᠤ ᠣᠯᠵᠤ ᠢᠷᠡ ᠭᠡᠵᠦ ᠬᠡᠮᠵᠢᠶᠡ ᠬᠡᠴᠡ ᠶ᠋ᠢ ᠨᠢ ᠵᠢᠭᠠᠵᠤ ᠥᠭᠭᠦᠭᠡᠳ ᠵᠠᠯᠠᠭᠤᠴᠤᠳ ᠢ᠋ ᠮᠣᠷᠳᠠᠭᠤᠯᠪᠠᠯ ᠲᠡᠳᠡ ᠲᠦᠳᠡᠯ ᠦᠭᠡᠢ ᠴᠢᠯᠠᠭᠤ ᠣᠯᠵᠤ ᠢᠷᠡᠭᠰᠡᠨ ᠳ᠋ᠦ᠍ ᠪᠠᠭᠤᠷᠢ ᠶ᠋ᠢᠨ ᠭᠣᠣᠯ ᠳ᠋ᠤ᠌ ᠠᠢᠯ ᠤ᠋ᠨ ᠭᠠᠯ ᠭᠣᠯᠣᠮᠲᠠ ᠮᠠᠶᠢᠭ ᠢ᠋ᠶ᠋ᠠᠷ ᠪᠠᠢᠷᠢᠯᠠᠭᠤᠯᠵᠤ ᠰᠤᠯᠠ ᠡᠪᠡᠰᠦ᠂ ᠠᠷᠭᠠᠯ᠂ ᠪᠤᠷᠭᠠᠰᠤ ᠵᠡᠷᠭᠡ ᠲᠦᠯᠡᠰᠢ ᠳᠡᠭᠡᠷᠡ ᠨᠢ ᠠᠶᠠᠲᠠᠢᠬᠠᠨ ᠥᠷᠥᠵᠦ ᠪᠠᠢᠷᠢᠯᠠᠭᠤᠯᠤᠭᠠᠳ ᠶᠠᠰᠤᠴᠢᠨ ᠤ᠋ ᠠᠵᠢᠯ ᠳᠠᠭᠤᠰᠴᠤ ᠡᠴᠢᠭᠡ ᠲᠡᠮᠦᠷᠴᠢ ᠶ᠋ᠢᠨ ᠬᠠᠮᠲᠤ ᠪᠠᠷ ᠪᠤᠴᠠᠵᠤ ᠦᠯᠡᠳᠡᠭᠰᠡᠨ ᠵᠠᠯᠠᠭᠤᠰ ᠲᠡᠳᠡᠨ ᠦ᠌ ᠵᠢᠭᠠᠭᠰᠠᠨ ᠶᠣᠰᠣᠭᠠᠷ ᠲᠦᠯᠡᠰᠢ ᠠᠪᠴᠢᠷᠠᠪᠠ᠃ ᠲᠡᠷᠡ ᠴᠦ᠍ ᠨᠢᠭᠡ ᠶᠡᠬᠡ ᠲᠦᠳᠡᠵᠦ ᠤᠳᠠᠭᠰᠠᠨ ᠦᠭᠡᠢ ᠪᠤᠴᠠᠵᠠᠭᠠᠯᠠ᠃
ᠪᠦᠭᠦᠳᠡ ᠪᠤᠴᠠᠵᠤ ᠢᠷᠡᠯᠡ᠃ ᠠᠬᠠ ᠳᠡᠭᠦᠦ ᠨᠢ ᠪᠠᠷᠤᠭ ᠢᠷᠡᠵᠦ᠂ ᠲᠡᠳᠡ ᠢᠳᠡᠭᠡ ᠪᠤᠳᠠᠭᠠ᠂ ᠠᠢᠷᠠᠭ ᠴᠠᠭᠠ ᠠᠪᠴᠢᠷᠠᠨ ᠪᠢᠯᠬᠠᠵᠠᠢ᠃
ᠣᠷᠣᠢ ᠦᠳᠡᠰᠢ ᠪᠣᠯᠣᠮᠠᠭᠴᠠ ᠶᠠᠰᠤᠴᠢᠨ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠭᠡᠷ ᠲᠦ᠍ ᠣᠷᠣᠵᠤ ᠴᠣᠭᠴᠠᠰ ᠢ᠋ ᠨᠤᠲᠤᠭᠯᠠᠭᠤᠯᠬᠤ ᠪᠡᠯᠡᠳᠬᠡᠯ ᠬᠢᠪᠡ᠃ ᠶᠠᠰᠤᠴᠢᠨ ᠭᠠᠷᠴᠤ ᠢᠷᠡᠬᠦ ᠪᠡᠷ ᠪᠦᠬᠦ ᠬᠥᠮᠦᠰ ᠭᠡᠷ ᠢ᠋ ᠡᠷᠭᠦᠵᠦ ᠵᠠᠢᠯᠠᠭᠤᠯᠬᠤ ᠳ᠋ᠤ᠌ ᠭᠡᠷ ᠦ᠋ᠨ ᠪᠠᠷᠠᠭᠤᠨ ᠲᠠᠯᠠ ᠳ᠋ᠤ᠌ ᠤᠷᠢᠳᠴᠢᠯᠠᠨ ᠪᠡᠯᠡᠳᠬᠡᠭᠰᠡᠨ ᠰᠠᠭᠤᠷᠢ ᠳᠠᠮᠨᠠᠭᠤᠷᠭᠠ ᠳᠡᠭᠡᠷᠡ ᠪᠢᠴᠢᠬᠠᠨ ᠪᠥᠭᠡᠷᠡᠩᠬᠡᠢ ᠴᠠᠭᠠᠨ ᠶᠠᠭᠤᠮᠠ ᠪᠦᠷᠦᠢ ᠶ᠋ᠢᠨ ᠬᠠᠷᠠᠩᠭᠤᠢ ᠳ᠋ᠤ᠌ ᠰᠦᠮᠡᠢᠨ ᠦᠵᠡᠭᠳᠡᠨᠡ᠃ ᠲᠡᠷᠡ ᠪᠣᠯ ᠬᠥᠭᠡᠷᠦᠬᠦᠢ ᠬᠡᠷᠦᠯᠦᠨᠵᠢᠨ ᠢ᠋ ᠬᠣᠶᠠᠷ ᠠᠯᠠᠭᠠ ᠶ᠋ᠢ ᠨᠢ ᠬᠠᠴᠠᠷ ᠲᠤ᠌ ᠨᠢ ᠬᠠᠪᠰᠤᠷᠭᠠᠵᠤ᠂ ᠡᠬᠡ ᠶ᠋ᠢᠨ ᠬᠡᠪᠡᠯᠢ ᠳ᠋ᠦ᠍ ᠠᠮᠢᠯᠠᠵᠤ ᠣᠷᠣᠰᠢᠭᠰᠠᠨ ᠬᠡᠯᠪᠡᠷᠢ ᠳ᠋ᠦ᠍ ᠣᠷᠣᠭᠤᠯᠵᠤ ᠪᠣᠭᠣᠵᠤ ᠲᠠᠯᠪᠢᠭᠰᠠᠨ ᠪᠡᠶᠡ ᠴᠣᠭᠴᠠᠰ ᠪᠥᠯᠥᠭᠡ᠃
ᠬᠣᠶᠠᠷ ᠵᠠᠯᠠᠭᠤ ᠶ᠋ᠢ ᠮᠣᠷᠢᠨ ᠳ᠋ᠤ᠌ ᠮᠣᠷᠳᠠᠭᠤᠯᠤᠭᠠᠳ ᠶᠠᠰᠤᠴᠢᠨ ᠥᠪᠡᠷ ᠢ᠋ᠶ᠋ᠡᠨ ᠨᠢᠭᠡ ᠵᠠᠯᠠᠭᠤ ᠲᠠᠢ ᠴᠣᠭᠴᠠᠰ ᠢ᠋ ᠡᠷᠭᠦᠵᠦ ᠬᠣᠶᠠᠷ ᠲᠠᠯᠠ ᠠ᠋ᠴᠠ ᠨᠢ ᠳᠠᠮᠨᠠᠭᠤᠯᠤᠨ ᠪᠠᠷᠢᠭᠤᠯᠤᠭᠠᠳ ᠪᠠᠭᠠ ᠵᠡᠷᠭᠡ ᠠᠢᠷᠠᠭ ᠴᠠᠭᠠ ᠠᠪᠴᠤ ᠭᠠᠨᠵᠤᠭᠠᠯᠠᠭᠠᠳ ᠮᠣᠷᠳᠠᠪᠠ᠃ ᠲᠡᠳᠡᠨ ᠢ᠋ ᠪᠣᠭᠣᠷᠴᠢ ᠰᠤᠯᠠ ᠳ᠋ᠠᠭᠠᠨ ᠢᠩᠭᠢᠭᠡᠳ ᠳᠥᠷᠪᠡᠭᠦᠯᠡ ᠴᠣᠭᠴᠠᠰ ᠢ᠋ ᠲᠡᠭᠡᠭᠡᠵᠦ ᠶᠠᠪᠤᠯᠠ᠃ ᠲᠡᠳᠡ ᠢᠷᠡᠬᠦ ᠳ᠋ᠡᠭᠡᠨ ᠰᠠᠵᠢᠯᠠᠵᠤ ᠬᠠᠶᠠ ᠵᠠᠷᠢᠮ ᠳ᠋ᠠᠭᠠᠨ ᠱᠣᠭᠰᠢᠨ ᠶᠠᠪᠤᠭᠰᠠᠭᠠᠷ ᠶᠠᠪᠤᠭᠰᠠᠭᠠᠷ ᠰᠥᠨᠢ ᠨᠤᠲᠤᠭᠯᠠᠭᠤᠯᠬᠤ ᠭᠠᠵᠠᠷ ᠢ᠋ᠶ᠋ᠠᠨ ᠢᠷᠡᠭᠰᠡᠨ ᠨᠢ ᠡᠨᠡ ᠪᠢᠯᠡ᠃
ᠭᠠᠯ ᠤ᠋ᠨ ᠡᠷᠴᠢ ᠶ᠋ᠢ ᠨᠠᠮᠵᠢᠭᠤᠯ ᠦᠭᠡᠢ ᠰᠡᠯᠪᠢᠵᠦ᠂ ᠥᠷᠳᠡᠪᠡᠴᠦ ᠤᠭ ᠠ᠋ᠴᠠ ᠨᠣᠢᠲᠠᠨ ᠴᠣᠭᠴᠠᠰ ᠤᠳᠠᠭᠠᠨ ᠰᠢᠲᠠᠵᠤ ᠪᠥᠭᠡᠷᠡᠩᠬᠡᠢ ᠬᠠᠷᠠ ᠶᠠᠭᠤᠮᠠ ᠪᠣᠯᠤᠭᠠᠳ ᠭᠣᠣᠯ ᠳ᠋ᠤᠨᠢ ᠦᠯᠡᠳᠡᠭᠰᠡᠭᠡᠷ ᠲᠤᠯᠠ ᠶᠠᠰᠤᠴᠢᠨ ᠤᠷᠲᠤ ᠮᠣᠳᠣ ᠪᠠᠷ ᠡᠲᠡᠵᠦ ᠬᠥᠳᠡᠯᠭᠡᠨ ᠳᠡᠭᠡᠷᠡ ᠡᠴᠡ ᠨᠢ ᠰᠢᠷᠠ ᠲᠣᠰᠣ ᠬᠢᠵᠦ ᠭᠠᠯ ᠢ᠋ ᠤᠯᠠᠮ ᠤᠯᠠᠮ ᠪᠠᠳᠠᠷᠭᠠᠨ ᠵᠠᠳᠠᠯᠵᠤ᠂ ᠲᠡᠷᠡ ᠲᠣᠰᠤᠮ ᠢ᠋ᠶ᠋ᠠᠨ ᠬᠡᠳᠦᠨ ᠬᠡᠰᠡᠭ ᠪᠣᠯᠤᠨ ᠱᠠᠵᠢᠭᠢᠨᠠᠭᠰᠠᠭᠠᠷ ᠦᠵᠡᠭᠳᠡᠬᠦ ᠬᠠᠷᠠᠭᠳᠠᠬᠤ ᠪᠡᠶᠡ ᠦᠭᠡᠢ ᠪᠣᠯᠤᠯᠠ᠃ ᠲᠦᠯᠡᠰᠢ ᠴᠦ᠍ ᠳᠠᠭᠤᠰᠪᠠ᠃ ᠶᠠᠰᠤᠴᠢᠨ ᠡᠯᠡ ᠠᠵᠢᠯ ᠳ᠋ᠠᠭᠠᠨ ᠳᠠᠳᠴᠤ ᠰᠤᠷᠤᠭᠰᠠᠨ ᠨᠢ ᠶᠡᠬᠡ ᠲᠤᠯᠠ ᠶᠠᠭᠤᠮᠠ ᠪᠦᠷᠢ ᠵᠣᠬᠢᠴᠠᠨ ᠲᠠᠭᠠᠷᠠᠵᠤ ᠪᠠᠢᠯᠠ᠃ᠲᠡᠳᠡ ᠪᠦᠭᠦᠳᠡᠭᠡᠷ ᠪᠠᠭᠤᠷᠢ ᠶ᠋ᠢᠨ ᠬᠣᠢᠮᠣᠷ ᠲᠠᠯᠠ ᠶ᠋ᠢ ᠪᠠᠷᠢᠵᠤ ᠰᠠᠭᠤᠨ ᠢᠳᠡᠭᠡ ᠴᠠᠭᠠ ᠪᠠᠨ ᠠᠮᠰᠠᠵᠤ ᠭᠠᠯ ᠳ᠋ᠠᠭᠠᠨ ᠡᠷᠭᠦᠵᠦ ᠶᠣᠰᠣᠯᠠᠭᠠᠳ ᠦᠯᠡᠳᠡᠭᠰᠡᠨ ᠵᠦᠢᠯ ᠢ᠋ᠶ᠋ᠡᠨ ᠲᠩᠷᠢ ᠳ᠋ᠦ᠍ ᠴᠠᠴᠤᠵᠤ᠂ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠭᠠᠳ ᠪᠠᠭᠤᠷᠢ ᠪᠠᠨ ᠨᠠᠷᠠ ᠵᠥᠪ ᠡᠷᠭᠢᠭᠡᠳ ᠪᠤᠴᠠᠬᠤ ᠵᠠᠮ ᠳ᠋ᠠᠭᠠᠨ ᠡᠷᠭᠢᠵᠦ ᠬᠠᠲᠠᠷᠢᠭᠤᠯᠤᠨ ᠨᠠᠷᠠ ᠭᠠᠷᠬᠤ ᠰᠠᠴᠠᠭᠤ ᠬᠡᠷᠦᠯᠦᠨ ᠭᠣᠣᠯ ᠭᠠᠷᠪᠠ᠃
ᠢᠩᠭᠢᠭᠡᠳ ᠲᠡᠳᠡᠨ ᠢ᠋ ᠢᠷᠡᠬᠦ ᠳ᠋ᠦ᠍ ᠨᠠᠷᠠ ᠬᠠᠨᠠ ᠶ᠋ᠢᠨ ᠲᠣᠯᠣᠭᠠᠢ ᠱᠦᠭᠦᠷᠡᠵᠦ ᠪᠠᠢᠪᠠ᠃ ᠬᠡᠷᠦᠯᠦᠨᠵᠢᠨ ᠢ᠋ ᠲᠩᠷᠢ ᠳ᠋ᠦ᠍ ᠦᠳᠡᠬᠦ ᠶᠣᠰᠣᠯᠠᠯ ᠤ᠋ᠨ ᠠᠵᠢᠯ ᠲᠡᠳᠦᠢ ᠯᠡ ᠤᠳᠠᠭᠰᠠᠨ ᠦᠭᠡᠢ᠃ ᠡᠯᠪᠡᠭ ᠪᠠᠶᠠᠨ ᠠᠢᠷᠠᠭ ᠴᠠᠭᠠ᠂ ᠢᠳᠡᠭᠡ ᠪᠤᠳᠠᠭᠠᠨ ᠳ᠋ᠤ᠌ ᠬᠡᠰᠡᠭ ᠵᠠᠭᠤᠷᠠ ᠤᠮᠪᠠᠭᠠᠳ ᠭᠡᠷ ᠭᠡᠷ ᠵᠦᠭ ᠢ᠋ᠶ᠋ᠡᠨ ᠮᠣᠷᠳᠠᠬᠤ ᠪᠣᠯᠪᠠ᠃ ᠮᠢᠬᠠᠨ ᠬᠣᠭᠣᠯᠠ ᠪᠠᠢᠭᠰᠠᠨ ᠦᠭᠡᠢ᠃ ᠪᠤᠰᠤᠳ ᠢᠳᠡᠭᠡ ᠴᠠᠭᠠ ᠡᠯᠪᠡᠭ ᠠᠵᠤᠭᠤ᠃
ᠭᠡᠷ ᠦ᠋ᠨ ᠡᠵᠡᠨ ᠲᠡᠮᠦᠷᠴᠢ ᠢᠷᠡᠭᠰᠡᠨ ᠠᠬᠠ ᠳᠡᠭᠦᠦ ᠪᠡᠨ ᠲᠠᠯᠠᠷᠬᠠᠯ ᠤ᠋ᠨ ᠦᠭᠡ ᠬᠡᠯᠡᠵᠦ᠂ ᠶᠠᠰᠤᠴᠢᠨ ᠳ᠋ᠤ᠌ ᠬᠥᠭᠡᠷᠭᠡᠨ ᠦ᠌ ᠳᠠᠯᠢᠩ ᠳᠡᠭᠡᠷᠡ ᠤᠯᠠᠭᠠᠨ ᠤᠲᠠᠰᠤ ᠰᠦᠪᠡᠯᠡᠵᠦ ᠣᠷᠢᠶᠠᠭᠰᠠᠨ ᠵᠡᠭᠦᠦ ᠲᠠᠯᠪᠢᠵᠤ ᠪᠠᠷᠢᠬᠤ ᠳ᠋ᠠᠭᠠᠨ᠄
— ᠲᠠᠨ ᠳ᠋ᠤ᠌ ᠮᠣᠷᠢ ᠪᠠᠷᠢᠶᠠ᠃ ᠭᠠᠳᠠᠭᠠ ᠤᠶᠠᠭᠠᠨ ᠳᠡᠭᠡᠷᠡ ᠪᠠᠢᠭᠠ᠃ ᠬᠥᠲᠥᠯᠦᠭᠡᠳ ᠶᠠᠪᠤᠭᠠᠷᠠᠢ ᠳᠠ ᠭᠡᠪᠡ᠃
ᠳᠠᠷᠠᠭᠠ ᠨᠢ ᠨᠠᠬᠤ ᠬᠣᠲᠠ ᠳ᠋ᠤ᠌ ᠮᠥᠨ ᠤᠯᠠᠭᠠᠨ ᠤᠲᠠᠰᠤ ᠲᠠᠢ ᠵᠡᠭᠦᠦ ᠪᠡᠨ ᠬᠥᠭᠡᠷᠭᠡᠨ ᠦ᠌ ᠲᠡᠯᠢᠩ ᠳᠡᠭᠡᠷᠡ ᠲᠠᠯᠪᠢᠵᠤ ᠪᠠᠷᠢᠯᠠ᠃ ᠡᠬᠡ ᠨᠠᠮᠤᠭᠤᠨ ᠪᠤᠭᠤᠷᠴᠢ ᠳ᠋ᠤ᠌ ᠰᠢᠨᠡᠬᠡᠨ ᠣᠶᠣᠭᠰᠠᠨ ᠠᠶᠠᠭᠠᠨ ᠤ᠋ ᠤᠭᠤᠲᠠ᠂ ᠲᠠᠯᠢᠢᠭᠴᠢ ᠶ᠋ᠢᠨ ᠡᠮᠦᠰᠴᠦ ᠪᠠᠢᠭᠰᠠᠨ ᠴᠠᠮᠴᠠ ᠳᠡᠭᠡᠷᠡ ᠤᠯᠠᠭᠠᠨ ᠤᠲᠠᠰᠤ ᠵᠡᠭᠦᠦ ᠪᠡᠨ ᠲᠠᠯᠪᠢᠵᠤ ᠪᠠᠷᠢᠭᠠᠳ ᠪᠤᠰᠤᠳ ᠠᠬᠠ ᠳᠡᠭᠦᠦ ᠳ᠋ᠡᠭᠡᠨ ᠡᠷᠡ ᠡᠮᠡ ᠳ᠋ᠦ᠍ ᠲᠠᠭᠠᠷᠠᠭᠤᠯᠤᠨ ᠤᠲᠠᠰᠤ ᠵᠡᠭᠦᠦ᠂ ᠪᠡᠯᠡᠭ ᠦ᠋ᠨ ᠵᠦᠢᠯ ᠪᠠᠷᠢᠪᠠ᠃ ᠣᠷᠰᠢᠭᠤᠯᠭᠠᠨ ᠳ᠋ᠤ᠌ ᠶᠠᠪᠤᠭᠰᠠᠨ ᠬᠣᠶᠠᠷ ᠵᠠᠯᠠᠭᠤ ᠪᠣᠯ ᠨᠢᠭᠡ ᠨᠢ ᠲᠡᠮᠦᠷᠴᠢ ᠶ᠋ᠢᠨ᠂ ᠨᠥᠭᠦᠭᠡ ᠨᠢ ᠨᠠᠮᠤᠭᠤᠨ ᠤ᠋ ᠠᠬᠠ ᠳᠡᠭᠦᠦ ᠶᠦᠮ᠃ ᠲᠡᠷᠡ ᠬᠣᠶᠠᠷ ᠶᠠᠰᠤ ᠪᠠᠷᠢᠭᠰᠠᠨ ᠤ᠋ ᠲᠤᠯᠠ ᠨᠢᠭᠡ ᠨᠢᠭᠡ ᠬᠣᠨᠢ ᠨᠡᠷᠡᠯᠡᠪᠡ᠃
ᠬᠥᠮᠦᠰ ᠲᠠᠷᠬᠠᠯᠠ᠃ ᠭᠡᠬᠦ ᠳ᠋ᠡᠭᠡᠨ ᠭᠠᠭᠴᠠ ᠨᠢᠭᠡ ᠬᠥᠮᠦᠨ ᠭᠠᠳᠠᠭᠤᠷ ᠳᠣᠲᠣᠭᠤᠷ ᠦᠯᠡᠳᠡᠵᠡᠢ᠃ ᠨᠠᠬᠤ ᠴᠤ᠌ ᠨᠤᠲᠤᠭ ᠵᠦᠭ ᠢ᠋ᠶ᠋ᠡᠨ ᠬᠠᠷᠢᠬᠤ ᠪᠠᠨ ᠬᠡᠯᠡᠵᠦ᠂《ᠪᠢᠳᠡ ᠤᠭ ᠠ᠋ᠴᠠ ᠬᠣᠲᠠ ᠤᠷᠤᠭ ᠤ᠋ᠨ ᠪᠠᠷᠢᠯᠳᠤᠯᠭᠠ᠂ ᠦᠷᠡ ᠬᠣᠯᠪᠣᠭᠠᠲᠠᠢ ᠪᠣᠯᠤᠭᠰᠠᠨ ᠬᠥᠮᠦᠰ ᠲᠤᠯᠠ ᠪᠢ ᠠᠪᠴᠢᠷᠠᠭᠰᠠᠨ ᠪᠡᠯᠡᠭ ᠢ᠋ᠶ᠋ᠡᠨ ᠦᠯᠡᠳᠡᠭᠡᠵᠦ ᠠᠮᠠᠯᠠᠭᠰᠠᠨ ᠭᠤᠷᠪᠠᠨ ᠶᠢᠰᠦᠨ ᠦ᠌ ᠲᠣᠭᠠᠨ ᠤ᠋ ᠮᠠᠯ ᠰᠦᠷᠦᠭ ᠢ᠋ᠶ᠋ᠡᠨ ᠬᠡᠪ ᠢ᠋ᠶ᠋ᠡᠷ ᠲᠠ ᠨᠠᠷ ᠲᠠᠭᠠᠨ ᠥᠭᠭᠦᠨᠡ᠃ ᠲᠠ ᠨᠠᠷ ᠴᠤ᠌ ᠲᠠᠲᠠᠭᠠᠯᠵᠠᠬᠤ ᠤᠴᠢᠷ ᠦᠭᠡᠢ》 ᠭᠡᠪᠡ᠃ ᠡᠭᠦᠨ ᠦ᠌ ᠬᠠᠷᠢᠭᠤ ᠳ᠋ᠤ᠌ ᠨᠠᠮᠤᠭᠤᠨ ᠡᠵᠢ᠄
ᠪᠢᠳᠡ ᠴᠦ᠍ ᠭᠡᠰᠡᠨ ᠡᠬᠡ ᠶ᠋ᠢᠨ ᠬᠢᠨᠢ ᠭᠡᠷᠢᠶᠡᠰᠦ ᠶᠣᠰᠣᠭᠠᠷ᠂
ᠥᠭᠡᠯᠡᠨ ᠬᠦᠦ ᠪᠡᠨ ᠥᠭᠴᠦ
ᠥᠨᠳᠥᠷ ᠤᠭᠰᠠᠭᠠ ᠶ᠋ᠢ ᠨᠢ ᠲᠦᠰᠢᠭᠦᠯᠦᠨᠡ
ᠡᠳᠦᠷ ᠦ᠋ᠨ ᠰᠠᠢᠨ ᠢ᠋ ᠥᠨᠵᠢᠨ ᠬᠦᠯᠢᠶᠡᠵᠦ
ᠰᠠᠷᠠ ᠶ᠋ᠢᠨ ᠰᠠᠢᠨ ᠢ᠋ ᠰᠣᠩᠭᠣᠨ ᠬᠦᠯᠢᠶᠡᠵᠦ
ᠪᠣᠷᠣ ᠬᠣᠭᠣᠯᠠ ᠳ᠋ᠤ᠌ ᠣᠷᠣᠭᠠᠳ ᠢᠷᠡᠬᠦᠯᠡᠷ ᠨᠢ
ᠪᠣᠷᠪᠢ ᠰᠢᠷᠪᠥᠰᠥ ᠨᠢ ᠳᠡᠩᠬᠡᠢᠭᠡᠳ ᠢᠷᠡᠬᠦᠯᠡᠷ
ᠤᠯᠠᠭᠴᠢ ᠦᠨᠢᠶᠡ ᠪᠡᠨ ᠬᠥᠲᠥᠯᠦᠭᠡᠳ
ᠤᠭᠵᠢ ᠰᠠᠪᠠ ᠶ᠋ᠢ ᠨᠢ ᠲᠡᠭᠡᠭᠡᠭᠡᠳ
ᠤᠭᠰᠠᠭᠠ ᠤᠳᠤᠮ ᠳ᠋ᠤᠨᠢ ᠬᠦᠷᠭᠡᠵᠦ ᠥᠭᠭᠦᠨᠡ
ᠤᠷᠤᠭ ᠲᠥᠷᠥᠯ ᠢ᠋ᠶ᠋ᠡᠨ ᠰᠠᠬᠢᠵᠤ ᠶᠠᠪᠤᠭ ᠠ᠋ ᠭᠡᠪᠡ᠃
ᠢᠩᠭᠢᠭᠡᠳ ᠨᠠᠬᠤ ᠬᠦᠦ ᠪᠤᠭᠤᠷᠴᠢ ᠶ᠋ᠢᠨ ᠬᠠᠮᠲᠤ ᠮᠣᠷᠳᠠᠵᠤ ᠭᠡᠷ ᠦ᠋ᠨ ᠵᠦᠭ ᠵᠣᠷᠢᠯᠠ᠃