ᠬᠥᠯᠥᠭ ᠪᠠᠭᠠᠲᠤᠷ ᠪᠤᠭᠤᠷᠴᠢ - ᠪ᠂ ᠦᠯᠵᠡᠢᠰᠦ᠋ᠷᠦᠩ <ᠲᠡᠷᠢᠭᠦᠨ ᠪᠦᠯᠦᠭ - ᠠᠷᠪᠠᠨ ᠭᠤᠷᠪᠠ > Хүлэг баатар буурч - Б. Өлзийсүрэн <Тэргүүн бүлэг-13>
82ᠬᠣᠷᠸᠠ ᠲᠠᠢ ᠤᠴᠠᠷᠠᠨ ᠲᠠᠨᠢᠯᠴᠠᠵᠤ ᠪᠠᠶᠠᠷ ᠭᠤᠨᠢᠭ ᠠᠮᠰᠠᠭᠰᠠᠨ ᠲᠡᠷᠢᠭᠦᠨ ᠪᠦᠯᠦᠭ
ᠠᠷᠪᠠᠨ ᠭᠤᠷᠪᠠ
ᠬᠣᠣᠷᠲᠤ ᠮᠠᠭᠤ ᠮᠣᠭᠠᠢ ᠬᠣᠢᠨᠠ ᠠ᠋ᠴᠠ ᠮᠥᠯᠬᠥᠨ ᠭᠡᠲᠡᠨᠡ
ᠬᠣᠣᠷᠤᠨ ᠮᠠᠭᠤ ᠰᠠᠨᠠᠭᠠ ᠬᠣᠷᠮᠣᠢ ᠳᠣᠣᠭᠤᠷ ᠰᠢᠷᠭᠤᠨᠠ
ᠲᠡᠮᠦᠷᠴᠢ ᠶ᠋ᠢᠨ ᠬᠢ ᠨᠢᠯᠬᠠ ᠬᠡᠦᠬᠡᠳ ᠲᠡᠢ ᠲᠤᠯᠠ ᠡᠪᠦᠯᠵᠢᠶᠡᠨ ᠳ᠋ᠡᠭᠡᠨ ᠤᠳᠠᠭᠠᠨ ᠰᠠᠭᠤᠵᠤ ᠬᠠᠪᠤᠷ ᠤ᠋ᠨ ᠰᠡᠭᠦᠯ ᠰᠠᠷᠠ ᠶ᠋ᠢᠨ ᠳᠤᠮᠳᠠᠭᠤᠷ ᠥᠩᠭᠡᠷᠡᠭᠰᠡᠨ ᠨᠠᠮᠤᠷ ᠨᠤᠲᠤᠭᠯᠠᠵᠤ ᠪᠠᠢᠭᠰᠠᠨ ᠠ᠋ᠴᠠ ᠪᠠᠨ ᠨᠡᠯᠢᠶᠡᠳ ᠪᠠᠷᠠᠭᠤᠨ ᠲᠡᠰᠢ ᠳᠠᠷᠠᠰᠤᠲᠤ ᠬᠣᠭᠣᠯᠠᠢ ᠶ᠋ᠢᠨ ᠪᠠᠷᠠᠭᠤᠨ ᠬᠤᠸᠠ ᠳ᠋ᠤ᠌ ᠪᠠᠭᠤᠪᠠ᠃ ᠲᠡᠳᠡᠨ ᠦ᠌ ᠬᠢ ᠶ᠋ᠢ ᠬᠢᠲᠠᠳ ᠰᠤᠨᠳᠠᠭ ᠳᠤᠷᠠᠨ ᠢ᠋ᠶ᠋ᠠᠷ ᠬᠣᠯᠠ ᠠ᠋ᠴᠠ ᠲᠠᠲᠠᠵᠤ ᠲᠠᠩᠳᠠᠳᠠᠭ ᠨᠢᠭᠡᠨ ᠠᠩᠭᠤᠴᠢᠨ ᠪᠣᠢ ᠪᠣᠯᠵᠠᠢ᠃ ᠲᠡᠷᠡ ᠳᠤᠷᠠᠨ ᠤ᠋ ᠬᠠᠷᠠᠭᠠᠨ ᠳ᠋ᠤ᠌ ᠠᠷᠤᠯᠠᠳ ᠤ᠋ᠨ ᠪᠢᠴᠢᠬᠠᠨ ᠡᠷᠡ ᠥᠷᠲᠥᠪᠡ᠃ ᠲᠡᠷᠡ ᠠᠩᠭᠤᠴᠢᠨ《ᠡᠨᠡ ᠪᠡᠯᠲᠡᠷᠭᠡ ᠪᠠᠰᠠ ᠬᠦᠷᠦᠭᠡᠳ ᠢᠷᠡᠳᠡᠭ ᠪᠠᠢᠨᠠ ᠰᠢᠦ᠂ ᠵᠤᠯᠵᠠᠭᠠ ᠲᠠᠢ ᠪᠣᠯᠤᠭᠰᠠᠨ ᠭᠡᠵᠦ ᠪᠠᠢᠭᠠ᠃ ᠬᠡ᠂ ᠬᠡ》 ᠭᠡᠮᠡᠨ ᠳᠣᠭᠣᠭᠢᠯᠠᠬᠤ ᠮᠠᠶᠢᠭᠲᠠᠢ ᠢᠨᠢᠶᠡᠪᠡ᠃ ᠲᠡᠷᠡ ᠳᠠᠷᠤᠢ ᠲᠡᠷᠡ ᠪᠡᠷ ᠪᠠᠴᠢ᠂ ᠬᠠᠴᠢ ᠬᠣᠶᠠᠷ ᠵᠠᠯᠠᠭᠤ ᠲᠠᠢ ᠠᠭᠤᠯᠵᠠᠵᠤ᠄
— ᠵᠠ᠂ ᠡᠷᠡ ᠤᠯᠤᠰ ᠲᠠ ᠬᠣᠶᠠᠷ ᠨᠠᠳᠠ ᠨᠢᠭᠡ ᠴᠢᠬᠤᠯᠠ ᠠᠵᠢᠯ ᠳ᠋ᠤ᠌ ᠬᠠᠨᠢ ᠪᠣᠯ! ᠪᠢ ᠲᠡᠷᠡ ᠠᠷᠤᠯᠠᠳ ᠵᠢᠭᠠᠯ ᠢ᠋ ᠬᠠᠰᠢᠷᠠᠭᠠᠭᠠᠳ ᠥᠭᠭᠦᠶᠡ᠃ ᠬᠠᠷᠠᠭᠰᠠᠭᠠᠷ ᠪᠠᠢᠵᠤ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠭᠠᠭᠴᠠ ᠰᠤᠷ ᠬᠡᠦᠬᠡᠨ ᠢ᠋ ᠬᠠᠷᠢ ᠳ᠋ᠤ᠌ ᠠᠯᠳᠠᠬᠤ ᠭᠡᠵᠦ ᠤᠤ? ᠬᠡᠢᠮᠣᠷᠢ ᠨᠢ ᠣᠷᠬᠢᠭᠰᠠᠨ ᠡᠷᠡᠴᠦᠦᠯ ᠭᠡᠵᠦ ᠪᠢᠳᠡᠨ ᠢ᠋ ᠭᠡᠰᠬᠡᠬᠦ ᠪᠤᠶᠤ ᠭᠡᠬᠦ ᠮᠡᠲᠦᠴᠢᠯᠡᠨ ᠶᠡᠬᠡ ᠤᠷᠠᠨ ᠴᠡᠴᠡᠨ ᠦᠭᠡ ᠤᠷᠤᠰᠬᠠᠵᠤ᠄
— ᠲᠠ ᠬᠣᠶᠠᠷ ᠲᠤ᠌ ᠨᠢᠭᠡ ᠨᠢᠭᠡ ᠮᠣᠷᠢ᠂ ᠭᠤᠷᠪᠠ ᠭᠤᠷᠪᠠᠨ ᠠᠯᠲᠠᠨ ᠵᠣᠭᠣᠰ ᠥᠭᠭᠦᠶᠡ ᠭᠡᠵᠡᠢ᠃
ᠲᠡᠳᠡ ᠴᠦ᠍ ᠵᠥᠪᠰᠢᠶᠡᠷᠡᠵᠦ ᠪᠦᠳᠦᠭᠦᠨ ᠬᠤᠸᠠ ᠶ᠋ᠢᠨ ᠬᠣᠢᠲᠤ ᠳᠣᠪᠣᠴᠠᠭ ᠲᠤ᠌ ᠢᠷᠡᠵᠦ ᠲᠠᠩᠳᠠᠬᠤ ᠨᠠᠷᠢᠨ ᠠᠵᠢᠯ ᠳ᠋ᠤ᠌ ᠣᠷᠣᠵᠤ᠂ ᠬᠢᠲᠠᠳ ᠬᠠᠷᠠ ᠠᠷᠢᠬᠢ ᠪᠠᠭᠠ ᠪᠠᠭᠠ ᠪᠠᠷ ᠰᠢᠮᠡᠵᠦ᠂ ᠴᠢᠯᠠᠭᠤ ᠲᠠᠰᠤᠳᠠᠬᠤ ᠲᠣᠭᠯᠠᠭᠠᠮ ᠢ᠋ᠶ᠋ᠠᠷ ᠵᠠᠪᠰᠠᠷ ᠲᠤ᠌ ᠨᠢ ᠵᠤᠭᠠᠯᠠᠵᠤ ᠴᠠᠭ ᠥᠩᠭᠡᠷᠡᠭᠡᠬᠦ ᠠᠵᠤᠭᠤ᠃ ᠭᠡᠬᠦ ᠳ᠋ᠡᠭᠡᠨ ᠬᠠᠷᠠᠭᠤᠯᠳᠠᠵᠤ ᠬᠠᠷᠠᠵᠤ ᠪᠠᠢᠭᠰᠠᠨ ᠵᠦᠢᠯ ᠢ᠋ᠶ᠋ᠡᠨ ᠮᠠᠷᠲᠠᠭᠰᠠᠨ ᠦᠭᠡᠢ᠃《ᠬᠡᠷᠦᠯᠳᠵᠢᠨ ᠬᠣᠨᠢ ᠤᠷᠤᠭᠤ ᠪᠠᠨ ᠣᠴᠢᠯᠠ᠃ ᠬᠣᠨᠢ ᠴᠦ᠍ ᠨᠡᠯᠢᠶᠡᠳ ᠬᠣᠯᠠ ᠶᠠᠪᠤᠴᠢᠬᠠᠵᠤ᠂ ᠲᠡᠷᠡ ᠪᠡᠷ ᠬᠣᠨᠢ ᠪᠠᠨ ᠬᠣᠲᠠᠯᠠᠭᠤᠯᠵᠤ ᠳᠠᠷᠠᠰᠤ ᠤᠷᠤᠭᠤ ᠣᠷᠣᠭᠤᠯᠤᠭᠠᠳ ᠬᠣᠨᠢᠨ ᠤ᠋ ᠪᠠᠨ ᠵᠠᠬᠠ ᠳ᠋ᠤ᠌ ᠪᠠᠭᠤᠵᠤ ᠪᠣᠢ ᠬᠠᠷᠠᠭᠳᠠᠨᠠ᠃ ᠳᠡᠭᠦᠦ ᠵᠢᠭᠠᠯ ᠨᠢ ᠪᠠᠷᠠᠭᠤᠨ ᠳᠠᠰᠢ ᠬᠡᠷᠦᠯᠦᠨ ᠳ᠋ᠦ᠍ ᠳᠠᠪᠬᠢᠪᠠ᠃ ᠲᠡᠷᠡ ᠵᠢᠭᠠᠯ ᠠᠳᠤᠭᠤᠨ ᠳ᠋ᠤ᠌ ᠯᠠ ᠶᠠᠪᠤᠵᠤ ᠲᠠᠭᠠᠷᠠᠯᠠ᠃ ᠡᠴᠢᠭᠡ ᠨᠢ ᠨᠡᠯᠢᠶᠡᠳ ᠡᠷᠲᠡ ᠭᠠᠷᠤᠭᠠᠳ ᠪᠠᠷᠠᠭᠤᠨ ᠳᠠᠰᠢ ᠵᠣᠷᠢᠭᠰᠠᠨ᠃ ᠡᠬᠡ ᠨᠢ ᠭᠡᠷ ᠡᠴᠡ ᠪᠡᠨ ᠬᠠᠶᠠ ᠭᠠᠷᠴᠤ ᠣᠷᠣᠵᠤ ᠬᠠᠷᠠᠭᠳᠠᠨᠠ᠃ ᠬᠠᠷᠢᠨ ᠠᠩᠨᠠᠬᠤ ᠭᠡᠰᠡᠨ ᠠᠯᠤᠰ ᠤ᠋ᠨ 《ᠪᠡᠯᠲᠡᠷᠭᠡ》 ᠪᠠᠷᠠ ᠰᠤᠷᠠᠭ ᠠᠯᠠᠭᠠ᠃ ᠶᠠᠪᠤᠭᠠᠳ ᠥᠭᠭᠦᠭᠰᠡᠨ ᠪᠢᠵᠡ》 ᠭᠡᠯᠴᠡᠨᠡ᠃
— ᠠᠩ ᠢ᠋ᠶ᠋ᠠᠨ ᠠᠯᠳᠠᠴᠢᠬᠠᠭᠰᠠᠨ ᠪᠣᠯᠬᠣᠷ ᠲᠠᠷᠬᠠᠬᠤ ᠤᠤ ᠳᠠ? ᠭᠡᠵᠦ ᠬᠠᠴᠢ ᠬᠡᠯᠡᠯᠡ᠃
— ᠶᠠᠭᠠᠬᠢᠯᠠ ᠭᠡᠵᠦ ᠲᠠᠷᠬᠠᠬᠤ ᠪᠣᠢ? ᠬᠡᠷᠦᠯᠳᠵᠢᠨ ᠬᠡᠦᠬᠡᠨ ᠢ᠋ ᠡᠳ᠋ᠯᠡᠶᠡ᠃
— ᠲᠡᠭᠦᠨ ᠢ᠋ ᠡᠳ᠋ᠯᠡᠬᠦ ᠭᠡᠰᠡᠨ ᠨᠢ ᠯᠡ ᠡᠳ᠋ᠯᠡᠳᠡᠭ ᠶᠦᠮ ᠪᠠᠢᠭᠠ ᠪᠢᠵᠡ? ᠲᠡᠭᠦᠨ ᠳ᠋ᠦ᠍ ᠭᠤᠷᠪᠠ ᠶ᠋ᠢᠨ ᠭᠤᠷᠪᠠᠨ ᠡᠷᠡ ᠳᠠᠷᠠᠯᠵᠠᠵᠤ ᠣᠴᠢᠬᠤ ᠬᠡᠷᠡᠭ ᠶᠠᠭᠤ ᠪᠠᠢᠭᠠ ᠪᠣᠢ? ᠣᠴᠢᠬᠤ ᠭᠡᠰᠡᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠴᠢ ᠯᠡ ᠣᠴᠢᠨᠠ ᠪᠢᠵᠡ!
— ᠦᠭᠡᠢ ᠠ᠋᠃ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠣᠴᠢᠵᠤ ᠪᠣᠯᠬᠤ ᠦᠭᠡᠢ᠂ ᠪᠠᠷᠢᠵᠤ ᠥᠭᠬᠦ ᠬᠡᠷᠡᠭᠲᠡᠢ᠃ ᠪᠢ ᠥᠭᠬᠦ ᠭᠡᠰᠡᠨ ᠢ᠋ᠶ᠋ᠡᠨ ᠥᠭᠭᠦᠨᠡ᠃ ᠮᠣᠷᠢ ᠯᠠ ᠦᠯᠡᠳᠡᠭᠡᠳ ᠪᠠᠢᠭᠠ᠂ ᠪᠤᠰᠤᠳ ᠢ᠋ ᠨᠢ ᠥᠭᠭᠦᠭᠰᠡᠨ ᠰᠢᠦ ᠳᠡ᠃ ᠬᠠᠴᠢ ᠶᠡᠬᠡ ᠢᠨᠢᠶᠡᠵᠦ᠄
— ᠭᠤᠨᠵᠢᠨ ᠢᠩᠭᠡᠨ ᠳᠡᠭᠡᠷᠡ ᠬᠥᠭᠰᠢᠨ ᠪᠤᠤᠷᠠ ᠰᠠᠭᠤᠯᠭᠠᠵᠤ ᠪᠠᠷᠢᠵᠤ ᠥᠭᠳᠡᠭ ᠰᠢᠭ ᠶᠠᠭᠤᠮᠠ ᠪᠣᠯᠬᠤ ᠨᠢ ᠰᠢᠪ ᠳᠡ᠃ ᠬᠠ ᠬᠠ᠂ ᠬᠡ ᠬᠡ ᠭᠡᠳ᠄
— ᠵᠠ ᠶᠠᠷᠰᠢᠭ᠂ ᠡᠭᠦᠨ ᠢ᠋ ᠨᠢ ᠠᠪ! ᠪᠢ ᠯᠡ ᠯᠠᠪ ᠴᠢᠳᠠᠬᠤ ᠦᠭᠡᠢ ᠠᠵᠢᠯ ᠪᠠᠢᠨᠠ ᠭᠡᠳ ᠬᠠᠴᠢ ᠭᠤᠷᠪᠠᠨ ᠠᠯᠲᠠᠨ ᠵᠣᠭᠣᠰ ᠢ᠋ ᠡᠷᠭᠢᠭᠦᠯᠵᠦ ᠡᠵᠡᠨ ᠦ᠌ ᠬᠢᠨᠢ ᠠᠳᠬᠤᠨ ᠳ᠋ᠤ᠌ ᠬᠢᠭᠡᠳ ᠮᠣᠷᠳᠠᠭᠠᠳ ᠳᠠᠪᠬᠢᠴᠢᠬᠠᠪᠠ᠃
ᠦᠯᠡᠳᠡᠭᠰᠡᠨ ᠬᠣᠶᠠᠷ ᠦᠭᠡ ᠨᠢᠭᠡᠰᠦᠭᠡᠳ ᠬᠡᠭᠡᠷᠡ ᠶ᠋ᠢᠨ ᠭᠠᠭᠴᠠ ᠢᠵᠢᠯᠢ ᠡᠴᠡ ᠰᠠᠯᠤᠭᠰᠠᠨ ᠢᠨᠵᠠᠭᠠ ᠶ᠋ᠢ ᠬᠠᠷᠠᠭᠰᠠᠨ ᠬᠣᠶᠠᠷ ᠪᠣᠣᠬᠠᠢ ᠰᠢᠭ᠋ ᠬᠥᠪᠡᠭᠡ ᠰᠤᠳᠠᠭ ᠲᠠᠭᠠᠨ ᠭᠠᠵᠠᠷ ᠤ᠋ᠨ ᠦ ᠪᠡᠷ ᠨᠢᠭᠤᠭᠳᠠᠨ ᠮᠢᠷᠢᠶᠠᠨ ᠭᠡᠲᠡᠬᠦ ᠶ᠋ᠢ ᠬᠣᠨᠢᠨ ᠤ᠋ ᠪᠠᠨ ᠪᠠᠷᠠ ᠳ᠋ᠤ᠌ ᠳᠡᠷᠡᠰᠦᠨ ᠳᠤᠮᠳᠠ ᠮᠣᠷᠢ ᠪᠠᠨ ᠲᠤᠱᠠᠵᠤ ᠢᠳᠡᠭᠦᠯᠦᠭᠡᠳ ᠠᠶᠠᠭᠠᠨ ᠤ᠋ ᠤᠭᠤᠲᠠ ᠱᠠᠭᠯᠠᠨ ᠴᠢᠮᠡᠵᠦ ᠰᠠᠭᠤᠭᠠ ᠬᠡᠷᠦᠯᠳᠵᠢᠨ ᠪᠦᠰᠡᠭᠦᠢ ᠬᠠᠷᠠᠬᠠᠨ ᠶᠠᠭᠠᠬᠢᠵᠤ ᠮᠡᠳᠡᠬᠦ ᠪᠣᠢ? ᠲᠡᠷᠡ ᠤᠷᠠᠯᠠᠯ ᠨᠢ ᠡᠴᠦᠰ ᠲᠡᠭᠡᠨ ᠪᠤᠭᠤᠷᠴᠢ ᠳ᠋ᠤ᠌ ᠵᠣᠷᠢᠭᠤᠯᠤᠨ ᠪᠣᠢ ᠪᠥᠯᠥᠭᠡ᠃ ᠪᠤᠭᠤᠷᠴᠢ ᠶ᠋ᠢᠨ ᠡᠵᠢ ᠠᠯᠲᠠᠵᠢᠨ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠴᠠᠮᠴᠠᠨ ᠤ᠋ ᠡᠩᠭᠡᠷ ᠦ᠋ᠨ ᠴᠡᠴᠡᠭᠡᠨ ᠬᠠᠳᠬᠤᠭᠠᠰᠤ ᠶ᠋ᠢ ᠭᠡᠨᠡᠳᠲᠡ ᠠᠵᠢᠵᠤ ᠬᠠᠷᠠᠭᠠᠳ ᠪᠦᠷ ᠣᠢᠷᠠᠲᠤᠨ ᠢᠷᠡᠵᠦ ᠪᠠᠷᠢᠵᠤ ᠱᠠᠭᠠᠢᠵᠤ ᠦᠵᠡᠭᠡᠳ᠄
— ᠤᠷᠠᠨ ᠬᠥᠮᠦᠨ ᠦ᠌ ᠬᠠᠳᠬᠤᠭᠠᠰᠤ ᠪᠠᠢᠨᠠ᠃ ᠮᠢᠨᠦ ᠬᠦᠦ ᠳ᠋ᠦ᠍ ᠬᠡᠨ ᠢᠩᠭᠢᠵᠦ ᠣᠶᠣᠵᠤ ᠥᠭᠪᠡ? ᠭᠡᠬᠦ ᠳ᠋ᠦ᠍ᠨᠢ ᠪᠣᠭᠣᠷᠴᠢ ᠮᠢᠰᠢᠰᠬᠢᠨ ᠢᠨᠢᠶᠡᠵᠦ ᠬᠠᠷᠢᠭᠤ ᠳᠤᠤᠭᠠᠷᠤᠭᠠ ᠦᠭᠡᠢ ᠪᠢᠯᠡ᠃
ᠤᠷᠠ ᠦᠢᠯᠡ ᠳ᠋ᠡᠭᠡᠨ ᠮᠠᠬᠠᠷᠠᠵᠤ ᠰᠢᠨᠤᠭᠰᠠᠨ ᠪᠦᠰᠡᠭᠦᠢ ᠭᠡᠨᠡᠳᠲᠡ ᠮᠣᠷᠢᠳ ᠤ᠋ᠨ ᠲᠤᠭᠤᠷᠠᠢ ᠲᠠᠴᠢᠭᠢᠨᠠᠵᠤ ᠳᠡᠷᠡᠰᠦᠨ ᠳᠤᠮᠳᠠ ᠬᠣᠶᠠᠷ ᠬᠥᠮᠦᠨ ᠦ᠌ ᠲᠣᠯᠣᠭᠠᠢ ᠱᠣᠪᠣᠯᠵᠠᠬᠤ ᠯᠤᠭᠠ ᠴᠣᠴᠢᠨ ᠮᠡᠩᠳᠡᠵᠦ ᠣᠶᠣᠵᠤ ᠪᠠᠢᠭᠠ ᠶᠠᠭᠤᠮᠠ ᠪᠠᠨ ᠴᠦ᠍ ᠳᠠᠯᠳᠠ ᠬᠢᠵᠦ ᠠᠮᠵᠢᠭᠠ ᠦᠭᠡᠢ ᠪᠠᠢᠲᠠᠯᠠ ᠢᠷᠡᠳᠡᠭ ᠨᠢ ᠥᠨᠥᠬᠢ ᠪᠣᠷᠤᠤᠬᠠᠢᠳᠤ᠂ ᠨᠡᠷᠡ ᠥᠭᠡᠳᠡ ᠲᠡᠢ ᠪᠢᠰᠢ ᠪᠠᠴᠢ ᠬᠣᠶᠠᠷ ᠠᠵᠤᠭᠤ᠃
— ᠰᠠᠢᠨ ᠪᠠᠢᠨᠠ ᠤᠤ? ᠭᠡᠵᠦ ᠲᠡᠷᠡ ᠬᠣᠶᠠᠷ ᠤ᠋ᠨ ᠮᠡᠨᠳᠦᠯᠡᠬᠦ ᠳ᠋ᠦ᠍᠄
— ᠰᠠᠢᠨ᠂ ᠰᠠᠢᠨ ᠤᠤ? ᠭᠡᠵᠦ ᠬᠠᠷᠢᠭᠤ ᠮᠡᠨᠳᠦᠯᠡᠪᠡ᠃
— ᠶᠠᠮᠠᠷ ᠤᠷᠠ᠂ ᠬᠡᠨ ᠳ᠋ᠦ᠍ ᠵᠣᠷᠢᠭᠤᠯᠤᠭᠠ ᠪᠣᠢ?
— ᠲᠠ ᠨᠠᠷ ᠲᠤ᠌ ᠬᠠᠮᠢᠶᠠ ᠦᠭᠡᠢ᠃
ᠬᠡᠷᠦᠯᠦᠨᠵᠢᠨ ᠮᠣᠷᠢᠨ ᠤ᠋ ᠪᠠᠨ ᠲᠤᠱᠠ ᠶ᠋ᠢ ᠲᠠᠢᠯᠬᠤ ᠵᠠᠭᠤᠷᠠ ᠪᠣᠷᠣᠣᠬᠠᠢᠲᠤ ᠮᠣᠷᠢᠨ ᠠ᠋ᠴᠠ ᠪᠠᠨ ᠦᠰᠦᠷᠦᠨ ᠪᠠᠭᠤᠵᠤ ᠲᠡᠭᠦᠨ ᠢ᠋ ᠪᠠᠷᠢᠭᠠᠳ ᠠᠪᠬᠤ ᠭᠡᠲᠡᠯᠡ ᠪᠤᠯᠲᠠᠵᠤ ᠠᠮᠵᠢᠭᠠᠳ ᠤᠷᠢᠳᠠ ᠠ᠋ᠴᠠ ᠨᠢ ᠥᠷᠥᠨ ᠵᠣᠭᠰᠣᠵᠤ ᠬᠣᠶᠠᠷ ᠮᠥᠷᠦᠨ ᠡᠴᠡ ᠨᠢ ᠪᠠᠷᠢᠵᠤ ᠠᠪᠤᠭᠠᠳ ᠪᠠᠷᠠᠭᠤᠨ ᠲᠠᠰᠢᠶᠠᠨ ᠳᠡᠭᠡᠷᠡ ᠪᠡᠨ ᠲᠣᠩᠭᠣᠷᠴᠤ ᠭᠡᠳᠡᠷᠭᠦ ᠬᠠᠷᠠᠭᠤᠯᠤᠨ ᠤᠨᠤᠵᠤ ᠰᠠᠭᠤᠭᠠᠳ ᠡᠨᠳᠡ ᠲᠡᠨᠳᠡ ᠨᠢ ᠵᠠᠢ ᠵᠠᠪ ᠦᠭᠡᠢ ᠪᠠᠯᠪᠠᠬᠤ ᠳ᠋ᠤ᠌ ᠨᠢ ᠪᠠᠴᠢ ᠡᠯᠢᠭᠡ ᠪᠡᠨ ᠬᠥᠰᠢᠲᠡᠯᠡ ᠢᠨᠢᠶᠡᠬᠦ ᠳ᠋ᠦ᠍᠄
— ᠬᠥᠮᠦᠨ ᠳ᠋ᠦ᠍ ᠬᠠᠨᠢ ᠪᠣᠯᠵᠤ ᠢᠷᠡᠭᠡᠳ ᠠᠯᠠᠭᠤᠯᠬᠤ ᠭᠡᠵᠦ ᠪᠠᠢᠬᠤ ᠳ᠋ᠤ᠌ ᠢᠨᠢᠶᠡᠵᠦ ᠱᠣᠭᠯᠠᠭᠠᠳ ᠭᠡᠮᠡᠨ ᠪᠣᠷᠣᠣᠬᠠᠢᠲᠤ ᠤᠨᠲᠤᠭᠤᠴᠠᠬᠤᠢ ᠯᠤᠭᠠ ᠲᠡᠷᠡ ᠪᠡᠷ ᠨᠢᠭᠡ ᠶᠠᠭᠤᠮᠠ ᠰᠠᠨᠠᠬᠤ ᠪᠣᠯᠤᠯᠲᠠᠢ ᠬᠡᠷᠦᠯᠦᠨᠵᠢᠨ ᠦ᠌ ᠬᠣᠶᠠᠷ ᠪᠠᠭᠤᠤ ᠠ᠋ᠴᠠ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠭᠣᠭᠴᠤᠯᠳᠤᠨ ᠪᠠᠷᠢᠵᠤ ᠠᠷᠤ ᠳᠠᠰᠢ ᠨᠢ ᠲᠠᠲᠠᠪᠠᠰᠤ ᠪᠦᠰᠡᠭᠦᠢ ᠠᠷᠭᠠ ᠪᠤᠶᠤ ᠭᠡᠳᠡᠷᠭᠦ ᠬᠠᠷᠠᠨ ᠴᠢᠷᠦᠭᠳᠡᠵᠦ ᠪᠣᠷᠣᠬᠠᠢᠲᠤ ᠪᠣᠰᠤᠨ ᠬᠠᠷᠠᠢᠵᠤ ᠳᠡᠭᠡᠷᠡ ᠨᠢ ᠮᠣᠷᠳᠠᠬᠤ ᠴᠤ᠌ ᠪᠣᠯᠵᠤ ᠥᠮᠥᠳᠥ ᠲᠡᠢ ᠨᠢ ᠨᠣᠴᠣᠯᠳᠤᠪᠠ᠃
ᠬᠣᠶᠠᠷ ᠤ᠋ᠨ ᠬᠣᠶᠠᠷ ᠡᠷᠡ ᠶ᠋ᠢᠨ ᠡᠷᠬᠡᠨ ᠳ᠋ᠦ᠍ ᠣᠷᠣᠭᠰᠠᠨ ᠪᠦᠰᠡᠭᠦᠢ ᠨᠢᠯᠪᠤᠬᠤ᠂ ᠬᠠᠷᠢᠶᠠᠬᠤ᠂ ᠬᠠᠵᠠᠬᠤ ᠭᠡᠬᠦ ᠡᠴᠡ ᠥᠭᠡᠷᠡ ᠶᠠᠭᠤ ᠬᠢᠵᠦ ᠴᠢᠳᠠᠬᠤ ᠪᠢᠯᠡ? ᠨᠥᠭᠦᠭᠡ ᠪᠣᠷᠣᠣᠬᠠᠢᠲᠤ ᠢᠨᠴᠠᠭᠯᠠᠵᠤ᠂ ᠢᠷᠪᠠᠢᠵᠤ ᠨᠤᠬᠤᠴᠠᠨ ᠨᠤᠳᠤᠷᠤᠭᠠᠳ ᠴᠦ᠍ ᠨᠢᠭᠡ ᠪᠦᠲᠦᠬᠦ ᠠᠵᠢᠯ ᠮᠠᠭᠤ᠃ ᠪᠠᠴᠢ᠄
— ᠴᠢ ᠶᠡᠷᠦ ᠨᠢ ᠶᠠᠭᠤ ᠬᠢᠭᠡᠳ ᠪᠠᠢᠨᠠ? ᠨᠠᠭᠠᠳᠤᠬᠢ ᠴᠢᠨᠢ ᠪᠣᠰᠬᠤ ᠦᠭᠡᠢ ᠪᠠᠢᠭᠠ ᠶᠤᠮ ᠤᠤ? ᠡᠰᠡᠪᠡᠯ ᠴᠢᠳᠠᠬᠤ ᠦᠭᠡᠢ ᠪᠠᠢᠭᠠ ᠶᠤᠮ ᠤᠤ? ᠨᠠᠭᠠᠳᠤᠬᠢ ᠳᠣᠣᠷᠠ ᠴᠢᠨᠢ ᠪᠠᠢᠭᠠ ᠠᠮᠢᠲᠠᠨ ᠴᠢᠨᠢ ᠲᠡᠭᠡᠷᠡᠵᠦ ᠦᠬᠦᠬᠦ ᠨᠢ᠃ ᠶᠠᠷᠰᠢᠭ᠂ ᠪᠢ ᠲᠠᠯᠪᠢᠯᠠ ᠭᠡᠵᠦ ᠤᠴᠠᠭᠠᠷᠯᠠᠪᠠ᠃
— ᠲᠠᠯᠪᠢᠵᠤ ᠪᠣᠯᠬᠤ ᠦᠭᠡᠢ᠂ ᠪᠠᠷᠢᠵᠤ ᠪᠠᠢ᠃ ᠣᠳᠣ ᠪᠣᠯᠤᠯᠠ᠃
ᠴᠢᠩᠭᠢᠵᠦ ᠪᠠᠢᠵᠤ ᠨᠢᠭᠡ ᠶᠠᠭᠤᠮᠠ ᠳᠠᠭᠤᠰᠬᠤ ᠪᠣᠯᠵᠤ ᠪᠣᠷᠣᠣᠬᠠᠢᠲᠤ ᠪᠣᠰᠪᠠ᠃ ᠬᠡᠦᠬᠡᠨ ᠥᠮᠥᠳᠥ ᠪᠡᠨ ᠴᠦ᠍ ᠲᠠᠲᠠᠭᠰᠠᠨ ᠦᠭᠡᠢ᠂ ᠴᠣᠮᠴᠣᠢᠨ ᠰᠠᠭᠤᠵᠤ ᠬᠣᠶᠠᠷ ᠡᠪᠦᠳᠦᠭ ᠳᠡᠭᠡᠷᠡ ᠪᠡᠨ ᠳᠤᠬᠤ ᠪᠠᠨ ᠲᠠᠯᠪᠢᠨ ᠴᠤᠷᠬᠢᠷᠠᠨ ᠤᠬᠢᠯᠠᠬᠤ ᠨᠢ ᠭᠤᠨᠢᠭᠲᠠᠢ᠃ ᠪᠠᠴᠢ ᠶ᠋ᠢ ᠪᠣᠷᠣᠣᠬᠠᠢᠳᠣ᠄
— ᠴᠢ ᠦᠵᠡᠬᠦ ᠦᠭᠡᠢ ᠤᠤ? ᠭᠡᠬᠦ ᠳ᠋ᠦ᠍ ᠪᠠᠴᠢ᠄
— ᠦᠭᠡᠢ᠂ ᠦᠭᠡᠢ ᠭᠡᠪᠡ᠃ ᠪᠣᠷᠣᠣᠬᠠᠢᠳᠣ᠄
— ᠬᠠᠴᠢᠨ ᠰᠠᠢᠬᠠᠨ ᠶᠤᠮ᠃ ᠲᠠᠲᠠᠭᠠᠯᠵᠠᠬᠤ ᠭᠡᠵᠦ ᠤᠤ? ᠮᠠᠭᠤ ᠯᠠ ᠪᠠᠢᠨᠠ ᠳᠠ᠃
— ᠵᠠ᠂ ᠢᠯᠡᠭᠦᠦ ᠳᠤᠲᠠᠭᠤ ᠶᠠᠭᠤᠮᠠ ᠪᠦᠦ ᠶᠠᠷᠢ᠃ ᠪᠢ ᠴᠢᠮᠠ ᠲᠠᠢ ᠨᠥᠭᠥᠭᠡᠳᠦᠷ ᠠᠭᠤᠯᠵᠠᠨᠠ ᠭᠡᠳ ᠳᠠᠪᠬᠢᠭᠠᠳ ᠶᠠᠪᠤᠴᠢᠬᠠᠯᠠ᠃
ᠪᠣᠷᠣᠬᠠᠢᠳᠣ ᠬᠡᠷᠦᠯᠦᠨᠵᠢᠨ ᠢ᠋ ᠠᠷᠭᠠᠳᠠᠨ ᠬᠠᠵᠠᠭᠤ ᠳ᠋ᠤᠨᠢ ᠰᠠᠭᠤᠬᠤ ᠭᠡᠲᠡᠯᠡ ᠬᠡᠷᠦᠯᠦᠨᠵᠢᠨ ᠲᠦᠯᠬᠢᠭᠡᠳ ᠤᠨᠠᠭᠠᠴᠢᠬᠠᠪᠠ᠃ ᠪᠣᠷᠤᠤᠬᠠᠢᠲᠦ᠄
— ᠴᠢ ᠨᠠᠮᠠ ᠶ᠋ᠢ ᠲᠠᠩᠳᠠ ᠪᠠᠨ ᠡᠨᠳᠡ ᠦᠵᠡᠬᠦ᠃ ᠪᠢ ᠴᠢᠮᠠ ᠶ᠋ᠢ ᠬᠡᠴᠢᠨᠡᠨ ᠬᠦᠰᠡᠵᠦ᠂ ᠴᠢ ᠬᠢᠰᠠᠵᠤ ᠥᠨᠥ ᠬᠦᠷᠦᠯᠡ᠃ ᠦᠵᠡᠯᠡ᠃ ᠴᠢ ᠲᠡᠷᠡ ᠠᠷᠤᠯᠠᠳ ᠬᠥᠪᠡᠭᠦᠨ ᠲᠡᠢ ᠨᠥᠬᠥᠴᠡ ᠳᠡ᠃ ᠪᠢ ᠰᠠᠭᠠᠳ ᠪᠣᠯᠬᠤ ᠦᠭᠡᠢ ᠭᠡᠳ ᠲᠠᠪᠤᠨ ᠠᠯᠲᠠᠨ ᠵᠣᠭᠣᠰ ᠡᠪᠦᠷ ᠳᠡᠭᠡᠷᠡ ᠨᠢ ᠲᠠᠯᠪᠢᠭᠠᠳ ᠮᠣᠷᠳᠠᠬᠤ ᠳ᠋ᠤ᠌ ᠵᠣᠭᠣᠰ ᠢ᠋ ᠨᠢ ᠠᠷᠤ ᠠ᠋ᠴᠠ ᠨᠢ ᠰᠢᠳᠡᠴᠢᠬᠡᠪᠡ᠃ ᠲᠡᠷᠡ ᠬᠡᠳᠦᠨ ᠵᠣᠭᠣᠰ ᠲᠠᠬᠢᠷ ᠲᠠᠪᠤ ᠭᠡᠳᠡᠭ ᠣᠳᠣ ᠰᠢᠭ᠋ ᠭᠢᠯᠠᠢᠨ ᠬᠠᠷᠠᠭᠳᠠᠵᠤ᠂ ᠪᠣᠷᠣᠣᠬᠠᠢᠳᠣ᠄
— ᠴᠢ ᠮᠢᠨᠦ ᠶᠠᠭᠤᠮᠠ ᠶ᠋ᠢ ᠠᠪᠳᠠᠭ ᠦᠭᠡᠢ ᠴᠢᠨᠢ ᠪᠤᠷᠤᠭᠤ ᠳᠠ᠃ ᠨᠠᠭᠠᠳᠤᠬᠢ ᠴᠢᠨᠢ ᠤᠷᠢᠳᠤ ᠭᠠᠵᠠᠷ ᠨᠢᠭᠡ ᠨᠢ ᠢᠷᠭᠡ᠂ ᠮᠠᠨ ᠤ᠋ ᠡᠨᠳᠡ ᠪᠣᠯ ᠪᠤᠲᠠ ᠪᠣᠯᠳᠠᠭ ᠶᠤᠮ ᠰᠢᠦ᠃ ᠲᠡᠭᠦᠵᠦ ᠠᠪᠤᠭᠠᠷᠠᠢ ᠭᠡᠳ ᠶᠠᠪᠤᠵᠤ ᠳᠠᠯᠳᠠ ᠣᠷᠣᠯᠠ᠃
ᠬᠡᠷᠦᠯᠦᠨᠵᠢᠨ ᠤᠬᠢᠯᠠᠵᠤ᠂ ᠭᠤᠨᠢᠵᠤ᠂ ᠭᠤᠲᠤᠷᠠᠵᠤ ᠭᠦᠢᠴᠡᠯᠡ᠃ ᠪᠣᠰᠴᠤ ᠥᠮᠥᠳᠥ ᠪᠡᠨ ᠲᠠᠲᠠᠬᠤ ᠳ᠋ᠠᠭᠠᠨ ᠬᠥᠯᠥᠰᠥᠨ ᠦ᠌ ᠠᠯᠴᠢᠭᠤᠷ ᠢ᠋ᠶ᠋ᠠᠷ ᠳᠣᠣᠷᠠᠲᠤ ᠡᠷᠬᠡᠲᠡᠨ ᠢ᠋ᠶ᠋ᠡᠨ ᠠᠷᠴᠢᠲᠠᠯᠠ ᠡᠪ ᠦᠭᠡᠢ ᠮᠠᠭᠤᠬᠠᠢ ᠦᠨᠦᠷ ᠭᠠᠷᠪᠠ᠃
— ᠬᠥᠮᠦᠨ ᠡᠴᠡ ᠡᠢᠮᠦ ᠮᠠᠭᠤᠬᠠᠢ ᠦᠨᠦᠷ ᠭᠠᠷᠳᠠᠭ ᠢ᠋ ᠦᠵᠡᠭᠡ ᠦᠭᠡᠢ ᠯᠡ ᠶᠦ᠍ᠮ ᠪᠠᠢᠨᠠ᠃ ᠡᠨᠡ ᠮᠠᠭᠤ ᠴᠢᠨᠢ ᠬᠥᠮᠦᠨ ᠶᠦ᠍ᠮ ᠤᠤ? ᠶᠠᠭᠤ ᠶᠤᠮ ᠪᠣᠢ? ᠭᠡᠳ ᠠᠯᠴᠢᠭᠤᠷ ᠢ᠋ᠶ᠋ᠠᠨ ᠳᠠᠷᠠᠰᠤ ᠤᠷᠤᠭᠤ ᠰᠢᠳᠡᠵᠦ᠂ ᠳᠡᠷᠡᠰᠦᠨ ᠦ᠌ ᠶᠣᠵᠣᠭᠣᠷ ᠤ᠋ᠨ ᠴᠠᠰᠤ ᠪᠠᠷ ᠭᠠᠷ ᠢ᠋ᠶ᠋ᠠᠨ ᠤᠬᠢᠶᠠᠭᠠᠳ ᠮᠠᠯ ᠤᠷᠤᠭᠤ ᠪᠠᠨ ᠬᠡᠯᠲᠦᠷᠢᠯᠡ᠃ ᠬᠡᠷᠦᠯᠦᠨᠵᠢᠨ ᠪᠦᠰᠡᠭᠦᠢ ᠢᠩᠭᠢᠵᠦ ᠲᠣᠯᠣᠭᠠᠢ ᠪᠠᠨ ᠤᠨᠵᠢᠭᠤᠯᠤᠨ ᠰᠠᠵᠢᠯᠠᠬᠤ ᠭᠡᠳᠡᠭ ᠠᠮᠢᠳᠤᠷᠠᠯ ᠳ᠋ᠤᠨᠢ ᠠᠩᠬᠠ ᠤᠳᠠᠭᠠ ᠲᠣᠬᠢᠶᠠᠯᠳᠤᠭᠰᠠᠨ ᠶᠠᠪᠤᠳᠠᠯ ᠠᠵᠤᠭᠤ᠃ ᠬᠡᠢᠮᠣᠷᠯᠢᠭ᠌᠂ ᠴᠣᠭ ᠵᠣᠯᠪᠣᠭᠠᠲᠠᠢ ᠳᠠᠪᠬᠢᠳᠠᠭ ᠪᠢᠰᠢᠦ!
ᠭᠡᠷ ᠲᠡᠭᠡᠨ ᠢᠷᠡᠲᠡᠯᠡ ᠡᠵᠢ ᠨᠢ ᠬᠠᠷᠠᠵᠤ ᠬᠠᠷᠠᠵᠤ᠄
— ᠮᠢᠨᠦ ᠬᠦᠦ ᠤᠬᠢᠯᠠᠭᠠ ᠤᠤ? ᠶᠠᠭᠠᠬᠢᠬᠤᠪ? ᠤᠨᠵᠢᠴᠢᠬᠠᠭᠠᠳ᠂ ᠥᠨᠥ ᠥᠷᠯᠥᠭᠡ ᠪᠣᠭᠣᠷᠴᠢ ᠲᠠᠢ ᠪᠠᠨ ᠮᠠᠭᠤᠳᠠᠯᠴᠠᠭᠰᠠᠨ ᠤᠤ? ᠭᠡᠪᠡᠯ ᠬᠡᠷᠦᠯᠦᠨᠵᠢᠨ᠄
— ᠦᠭᠡᠢ᠂ ᠦᠭᠡᠢ ᠭᠡᠪᠡ᠃
— ᠦᠭᠡᠢ ᠴᠦ᠍ ᠭᠡᠵᠦ ᠳᠡ᠃ ᠨᠢᠳᠦ ᠴᠢᠨᠢ ᠪᠥᠯᠴᠥᠢᠵᠦ ᠰᠦᠮᠡᠢᠭᠡᠳ᠃ ᠮᠢᠨᠦ ᠴᠤᠪᠤᠭᠠ ᠥᠬᠢᠨ ᠡᠢᠮᠦ ᠴᠦ᠍ ᠪᠠᠢᠳᠠᠭ ᠦᠭᠡᠢ ᠯᠡ ᠰᠠᠨ᠃ ᠪᠣᠭᠣᠷᠴᠢ ᠨᠢ ᠢᠷᠡᠭᠡᠳ ᠶᠠᠪᠤᠭᠰᠠᠨ᠃ ᠤᠯᠠᠮ ᠯᠠ ᠰᠡᠷᠭᠦᠯᠡᠩ ᠪᠠᠢᠮᠠᠷ ᠭᠡᠨᠡ᠃
ᠬᠡᠷᠦᠯᠦᠨᠵᠢᠨ᠂《 ᠮᠢᠨᠦ ᠭᠤᠨᠢᠭ ᠭᠤᠲᠤᠷᠠᠯ ᠢ᠋ ᠡᠵᠢ ᠠᠵᠢᠵᠤ ᠮᠡᠳᠡᠵᠡᠢ᠃ ᠭᠠᠢᠭᠤᠢ ᠶᠠᠪᠤᠶᠠ 》 ᠭᠡᠳ ᠡᠵᠢ ᠳ᠋ᠡᠭᠡᠨ᠄
— ᠥᠨᠥ ᠰᠥᠨᠢ᠂ ᠶᠡᠷᠦ ᠨᠢ ᠪᠢ ᠢᠯᠡᠭᠦᠦ ᠭᠡᠷ ᠲᠡᠭᠡᠨ ᠤᠨᠲᠠᠵᠤ ᠪᠠᠢᠶᠠ ᠭᠡᠯᠡ᠃ ᠥᠩᠭᠡᠷᠡᠬᠦ ᠬᠣᠶᠠᠷ ᠰᠥᠨᠢ ᠶ᠋ᠢ ᠪᠣᠭᠣᠷᠴᠢ ᠲᠠᠢ ᠪᠠᠨ ᠡᠨᠳᠡ ᠥᠩᠭᠡᠷᠡᠭᠡᠭᠰᠡᠨ᠃ ᠡᠵᠢ ᠨᠢ᠄《ᠲᠡᠭᠡᠪᠡᠯ ᠲᠡᠭᠡᠨᠡ ᠯᠡ ᠪᠢᠵᠡ ᠳᠡ》 ᠭᠡᠯᠡ᠃ ᠬᠡᠷᠦᠯᠦᠨᠵᠢᠨ ᠡᠨᠳᠡ ᠰᠥᠨᠢ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠵᠢᠭᠠᠬᠠᠨ ᠤᠬᠢᠶᠠᠯᠭᠠ ᠴᠡᠪᠡᠷᠯᠡᠭᠡ ᠬᠢᠶᠡ ᠭᠡᠰᠡᠨ ᠳ᠋ᠡᠭᠡᠨ ᠢᠩᠭᠢᠭᠰᠡᠨ ᠪᠠᠢᠵᠠᠢ᠃
ᠬᠡᠳᠦ ᠬᠣᠨᠣᠭ ᠥᠩᠭᠡᠷᠡᠯᠡ᠃ ᠲᠡᠭᠦᠨ ᠦ᠌ ᠭᠤᠲᠤᠷᠠᠯ ᠭᠠᠳᠠᠨᠠ ᠪᠠᠨ ᠢᠯᠡᠷᠡᠭᠡ ᠦᠭᠡᠢ ᠴᠦ᠍ ᠳᠣᠲᠣᠷᠠ ᠪᠠᠨ ᠪᠦᠷ ᠬᠡᠴᠡᠭᠦᠦ ᠪᠣᠯᠪᠠ᠃《ᠪᠣᠭᠣᠷᠴᠢ ᠶ᠋ᠢᠨ ᠢ᠋ᠶ᠋ᠡᠨ ᠨᠢᠭᠤᠷ ᠢ᠋ ᠶᠠᠭᠠᠬᠢᠵᠤ ᠬᠠᠷᠠᠬᠤ ᠪᠣᠢ? ᠬᠡᠯᠡᠬᠦ ᠤᠤ? ᠪᠣᠯᠢᠬᠤ ᠤᠤ? 》 ᠭᠡᠵᠦ ᠳᠤᠩᠰᠢᠵᠤ ᠬᠡᠳᠦ ᠬᠣᠨᠣᠭ ᠪᠣᠳᠣᠭᠠᠳ《ᠬᠡᠯᠡᠬᠦ ᠦᠭᠡᠢ ᠨᠢ ᠵᠥᠪ᠂ ᠬᠡᠯᠡᠪᠡᠯ ᠨᠠᠳᠠ ᠮᠠᠭᠤ ᠶᠠᠭᠤᠮᠠ ᠪᠣᠯᠬᠤ ᠠ᠋ᠴᠠ ᠪᠠᠨ ᠡᠷᠡᠴᠦᠳ ᠬᠣᠭᠣᠷᠣᠨᠳᠣ ᠪᠠᠨ ᠦᠰ ᠬᠣᠨᠵᠢᠩ ᠪᠣᠯᠵᠤ ᠮᠡᠳᠡᠨᠡ 》 ᠭᠡᠵᠦ ᠨᠢᠭᠤᠬᠤ ᠪᠠᠷ ᠰᠢᠢᠳᠯᠡ᠃
ᠠᠷᠪᠠᠭᠠᠳ ᠬᠣᠨᠣᠲᠠᠯᠠ ᠳᠣᠣᠷᠠᠲᠤ ᠡᠷᠬᠡᠲᠡᠨ ᠦ᠌ ᠠᠮᠠᠰᠠᠷ ᠵᠠᠭᠠᠲᠤᠨᠠᠵᠤ᠂ ᠳᠣᠲᠣᠷ ᠠ᠋ᠴᠠ ᠨᠢ ᠮᠠᠭᠤᠬᠠᠢ ᠢᠳᠡᠭᠡ ᠭᠠᠷᠴᠤ ᠬᠣᠷᠣᠰᠬᠤ ᠪᠣᠯᠤᠯᠠ᠃ ᠶᠣᠰᠣᠲᠠᠢ ᠭᠤᠲᠤᠮᠰᠢᠭ᠃ ᠡᠳᠦᠷ ᠬᠣᠨᠣᠭ ᠪᠦᠷᠢ ᠬᠡᠴᠡᠭᠦᠦ ᠬᠦᠨᠳᠦᠭᠦᠷᠢ᠂ ᠡᠪᠡᠳᠴᠢᠨ ᠣᠷᠣᠵᠤ᠂ ᠲᠡᠷᠡ ᠲᠣᠰᠤᠮ ᠢ᠋ᠶ᠋ᠠᠨ《ᠴᠢᠨᠣᠠ ᠳᠣᠲᠣᠷᠠᠲᠠᠢ ᠪᠣᠷᠣᠣᠬᠠᠢᠳᠤ ᠵᠣᠷᠢᠭᠤᠳᠠ ᠬᠣᠣᠷᠯᠠᠬᠤ ᠭᠡᠵᠦ ᠡᠪᠡᠳᠴᠢᠨ ᠢ᠋ᠶ᠋ᠡᠨ ᠨᠠᠳᠠ ᠥᠭᠭᠦᠭᠰᠡᠨ ᠪᠠᠢᠨᠠ᠃ ᠶᠠᠭᠠᠬᠢᠬᠤ ᠪᠣᠢ? ᠪᠢ ᠪᠣᠭᠣᠷᠴᠢ ᠲᠠᠢ ᠪᠠᠨ ᠠᠢᠯ ᠭᠡᠷ ᠪᠣᠯᠵᠤ ᠨᠡᠷᠡᠲᠦ ᠬᠣᠷᠸᠠ ᠳ᠋ᠤ᠌ ᠵᠢᠷᠭᠠᠬᠤ ᠠ᠋ᠴᠠ ᠥᠩᠭᠡᠷᠡᠵᠦ᠂ ᠵᠣᠪᠠᠬᠤ ᠴᠤ᠌ ᠥᠩᠭᠡᠷᠡᠵᠡᠢ᠃ ᠲᠡᠷᠡ ᠮᠢᠨᠦ ᠲᠡᠭᠦᠨ ᠢ᠋ ᠬᠡᠭᠡᠷᠡ ᠶᠠᠪᠠᠭᠠᠯᠠᠭᠰᠠᠨ ᠢ᠋ ᠰᠣᠨᠣᠰᠤᠭᠠᠳ〈ᠴᠢᠮᠠᠲᠤ ᠯᠠ ᠮᠠᠭᠤ ᠶᠠᠭᠤᠮᠠ ᠬᠢᠬᠦ ᠪᠠᠢᠬᠠ ᠳᠠ〉 ᠭᠡᠵᠦ ᠬᠡᠯᠡᠭᠰᠡᠨ ᠨᠢ ᠡᠷᠡ ᠬᠥᠮᠦᠨ ᠦ᠌ ᠠᠯᠤᠰ ᠤ᠋ᠨ ᠬᠠᠷᠠᠭᠠ ᠶᠤᠮ ᠪᠠᠢᠨᠠ᠃ ᠢᠳᠤᠭᠠᠨ ᠳ᠋ᠤ᠌ ᠣᠴᠢᠶᠠ᠃ ᠲᠡᠷᠡ ᠨᠢᠭᠡ ᠠᠷᠭᠠ ᠬᠢᠵᠦ ᠮᠠᠭᠠᠳ ᠦᠭᠡᠢ ᠭᠡᠵᠦ》 ᠬᠡᠷᠦᠯᠦᠨᠵᠢᠨ ᠪᠣᠳᠣᠯᠠ᠃ ᠲᠡᠭᠡᠭᠡᠳ ᠨᠤᠲᠤᠭ ᠤ᠋ᠨ ᠨᠡᠷᠡᠲᠡᠢ ᠢᠳᠤᠭᠠᠨ ᠳ᠋ᠤ᠌ ᠣᠴᠢᠪᠠ᠃
ᠲᠡᠷᠡ ᠠᠪᠠᠭᠠᠢ ᠦᠵᠡᠵᠦ ᠰᠣᠨᠣᠰᠤᠭᠠᠳ᠄
— ᠪᠦᠰᠡᠭᠦᠢ ᠮᠢᠨᠢ ᠬᠡᠴᠡᠭᠦᠦ ᠡᠪᠡᠳᠴᠢᠨ ᠲᠡᠢ ᠤᠴᠠᠷᠠᠵᠤ ᠳᠠ᠃ ᠮᠠᠨ ᠤ᠋ ᠨᠤᠲᠤᠭ ᠲᠤ᠌ ᠪᠠᠢᠳᠠᠭ ᠦᠭᠡᠢ᠂ ᠪᠠᠢᠪᠠᠴᠤ ᠲᠤᠩ ᠬᠣᠪᠣᠷ᠂ ᠬᠠᠮᠤᠭ ᠤ᠋ᠨ ᠮᠠᠭᠤ ᠡᠪᠡᠳᠴᠢᠨ᠃ ᠡᠮᠦᠨᠡ ᠵᠦᠭ ᠡᠴᠡ ᠯᠡ ᠢᠷᠡᠳᠡᠭ᠂ ᠳᠠᠨᠳᠠ ᠠ᠋ᠴᠠ ᠯᠠ ᠣᠯᠵᠤ ᠠᠪᠳᠠᠭ ᠲᠡᠮᠪᠦᠦ ᠭᠡᠭᠴᠢ᠃ ᠴᠢ ᠶᠠᠭᠠᠬᠢᠭᠠᠳ ᠣᠯᠵᠤ ᠠᠪᠳᠠᠭ ᠪᠢᠯᠡ? ᠰᠠᠶᠢᠬᠠᠨ ᠲᠥᠷᠥᠭᠰᠡᠨ ᠨᠢᠯᠬᠠ ᠬᠡᠦᠬᠡᠳ ᠲᠡᠢ ᠬᠡ ᠪᠢᠵᠡ ᠳᠡ? ᠭᠡᠵᠦ ᠭᠠᠢᠬᠠᠰᠢᠷᠠᠨ᠄
— ᠬᠡᠦᠬᠡᠳ ᠢ᠋ᠶ᠋ᠡᠨ ᠬᠥᠬᠥᠭᠦᠯᠬᠦ ᠬᠡᠷᠡᠭ ᠦᠭᠡᠢ ᠶᠦᠮ ᠳᠡ ᠭᠡᠪᠡ᠃ ᠬᠡᠷᠦᠯᠦᠨᠵᠢᠨ᠄
— ᠦᠭᠡᠢ᠂ ᠬᠡᠦᠬᠡᠳ ᠢ᠋ᠶ᠋ᠡᠨ ᠬᠥᠬᠥᠭᠦᠯᠳᠡᠭ ᠦᠭᠡᠢ᠂ ᠬᠥᠬᠥᠨ ᠡᠴᠡ ᠨᠢ ᠰᠠᠯᠭᠠᠴᠢᠬᠠᠭᠰᠠᠨ᠃
— ᠡᠨᠡ ᠡᠪᠡᠳᠴᠢᠨ ᠡᠴᠡ ᠪᠣᠯᠤᠭᠠᠳ ᠤᠤ?
— ᠦᠭᠡᠢ ᠠ᠋᠂ ᠰᠦ ᠮᠠᠭᠤᠲᠠᠢ᠂ ᠬᠥᠬᠥ ᠨᠢ ᠴᠠᠳᠬᠠᠬᠤ ᠦᠭᠡᠢ ᠪᠣᠯᠬᠣᠷ ᠡᠵᠢ ᠤᠯᠠᠭᠴᠢ ᠦᠨᠢᠶᠡᠨ ᠦ᠌ ᠰᠦ ᠪᠡᠷ ᠤᠭᠵᠢᠭᠠᠳ ᠬᠥᠬᠥᠨ ᠡᠴᠡ ᠨᠢ ᠰᠠᠯᠭᠠᠴᠢᠬᠠᠭᠰᠠᠨ᠃
— ᠶᠡᠬᠡ ᠵᠥᠪ ᠶᠠᠭᠤᠮᠠ ᠪᠣᠯᠵᠤ ᠳᠠ᠃ ᠡᠨᠡ ᠡᠪᠡᠳᠴᠢᠨ ᠬᠡᠵᠢᠶᠡᠨ ᠡᠴᠡ ᠶᠠᠭᠠᠬᠢᠵᠤ ᠡᠬᠢᠯᠡᠭᠰᠡᠨ ᠶᠦᠮ ᠪᠣᠢ?
— ᠬᠣᠷᠢᠭᠠᠳ ᠬᠣᠨᠣᠵᠤ ᠪᠠᠢᠨᠠ᠃ ᠪᠣᠷᠣᠣᠬᠠᠢᠲᠤ ᠭᠡᠵᠦ ᠨᠢᠭᠡ ᠶᠠᠭᠤᠮᠠ ᠪᠣᠢ᠃ ᠳᠡᠷᠡᠨ ᠳ᠋ᠦ᠍ ᠬᠦᠴᠦᠨᠳᠡᠭᠦᠯᠦᠭᠰᠡᠨ᠃
— ᠪᠤᠵᠠᠷ ᠠᠮᠢᠲᠠᠨ! ᠲᠡᠷᠡ ᠤᠷᠲᠤ ᠠ᠋ᠴᠠ ᠣᠯᠵᠤ ᠢᠷᠡᠵᠦ ᠥᠬᠢᠳ ᠢ᠋ ᠮᠠᠨᠢ ᠪᠤᠵᠠᠷᠯᠠᠵᠤ ᠶᠠᠪᠤᠭᠠ ᠶᠤᠮ ᠪᠠᠢᠨᠠ᠃ ᠲᠡᠷᠡ ᠪᠠᠶᠠᠨ ᠨᠠᠢ᠍ᠮᠠᠭᠠᠴᠢᠨ ᠲᠠᠢᠰᠢ ᠪᠠᠨ ᠶᠠᠪᠤᠭᠠᠳ ᠡᠮᠴᠢᠯᠡᠭᠦᠯᠬᠦ ᠪᠢᠵᠡ᠃ ᠴᠢ ᠮᠢᠨᠢ ᠶᠠᠭᠠᠬᠢᠳᠠᠭ ᠶᠤᠮ ᠪᠢᠯᠡ ᠳᠠ? ᠪᠡᠶᠡ ᠮᠠᠬᠠᠪᠣᠳ ᠤ᠋ᠨ ᠭᠦᠨ ᠳ᠋ᠦ᠍ ᠨᠡᠪᠲᠡᠷᠡᠭᠰᠡᠨ ᠡᠪᠡᠳᠴᠢᠨ ᠪᠣᠯᠬᠣᠷ ᠳᠣᠲᠣᠷᠠ ᠭᠦᠨ ᠳ᠋ᠦ᠍ ᠨᠢ ᠯᠡ ᠡᠮᠴᠢᠯᠡᠬᠦ ᠶᠣᠰᠣᠲᠠᠢ᠃ ᠦᠰᠦ ᠤᠨᠠᠳᠠᠭ᠂ ᠴᠠᠪᠢᠨ ᠤ᠋ ᠪᠤᠯᠴᠢᠷᠬᠠᠢ ᠬᠠᠪᠤᠳᠠᠷ ᠲᠠᠢ᠂ ᠬᠠᠯᠠᠭᠤᠨ ᠲᠠᠢ ᠭᠡᠬᠦ᠃ ᠪᠢ ᠪᠣᠯ ᠠᠷᠭᠠᠯᠠᠵᠤ ᠴᠢᠳᠠᠬᠤ ᠦᠭᠡᠢ᠃ ᠰᠢᠷᠬᠠᠨ ᠳᠡᠭᠡᠷᠡ ᠪᠡᠨ ᠡᠭᠦᠨ ᠢ᠋ ᠲᠦᠷᠬᠢ ᠳᠡ᠃ ᠵᠠᠭᠠᠲᠤᠨᠠᠬᠤ ᠶ᠋ᠢ ᠯᠡ ᠳᠠᠷᠤᠬᠤ ᠲᠡᠳᠦᠢ᠃ ᠬᠠᠷᠢᠨ ᠰᠢᠷᠠ ᠣᠲᠠᠴᠢ ᠳ᠋ᠤ᠌ ᠣᠴᠢ ᠳᠠ᠃ ᠲᠡᠷᠡ ᠪᠣᠯ ᠤᠷᠲᠤ ᠭᠠᠵᠠᠷ ᠠ᠋ᠴᠠ ᠡᠮ ᠠᠪᠳᠠᠭ ᠡᠮ ᠦ᠋ᠨ ᠨᠠᠢ᠍ᠮᠠᠭᠠᠴᠢᠨ᠃ ᠣᠪᠣᠭᠠ ᠴᠤ᠌ ᠬᠥᠯᠵᠢᠵᠦ ᠶᠠᠪᠤᠭᠠ ᠶᠤᠮ᠃ ᠬᠥᠮᠦᠨ ᠳ᠋ᠦ᠍ ᠲᠤᠰᠠ ᠪᠣᠯᠵᠤ ᠪᠠᠢᠪᠠᠯ ᠲᠡᠷᠡ ᠨᠢ ᠶᠠᠭᠠᠬᠢᠬᠤᠪ ᠳᠠ᠃ ᠭᠦᠨᠴᠡᠯᠲᠦ ᠦᠷᠢᠯ᠂ ᠨᠢᠭᠡ ᠨᠢ ᠨᠢᠭᠡ ᠠᠯᠲᠠᠨ ᠵᠣᠭᠣᠰ ᠭᠡᠳᠡᠭ ᠶᠦᠮ ᠭᠡᠨᠡ ᠪᠢᠯᠡ᠂ ᠲᠡᠭᠦᠨ ᠳ᠋ᠦ᠍ ᠪᠣᠢ ᠭᠡᠰᠡᠨ ᠭᠡᠪᠡ᠃
ᠭᠡᠷ ᠲᠡᠭᠡᠨ ᠬᠠᠷᠢᠭᠠᠳ ᠢᠳᠤᠭᠠᠨ ᠤ᠋ ᠥᠭᠭᠦᠭᠰᠡᠨ ᠲᠣᠰᠣ ᠶ᠋ᠢ ᠭᠠᠷᠭᠠᠲᠠᠯᠠ ᠥᠨᠥᠬᠢ ᠪᠣᠷᠣᠣᠬᠠᠢᠳᠣ ᠶ᠋ᠢᠨ ᠪᠤᠵᠠᠷ ᠦᠨᠦᠷ᠃ ᠰᠥᠨᠢᠵᠢᠨ ᠪᠢᠴᠢᠬᠠᠨ ᠢᠯᠡᠭᠦᠦ ᠭᠡᠷ ᠲᠡᠭᠡᠨ ᠭᠤᠨᠢᠬᠠᠷᠠᠭᠰᠠᠨ ᠬᠡᠷᠦᠯᠦᠨᠵᠢᠨ᠄《ᠪᠢ ᠴᠦ᠍ ᠥᠩᠭᠡᠷᠡᠭᠰᠡᠨ ᠬᠥᠮᠦᠨ᠃ ᠡᠳᠡᠭᠡᠷᠡᠬᠦ ᠶᠡᠬᠡ ᠬᠣᠯᠠ᠃ ᠡᠨᠡ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠳᠠᠭᠤᠰᠬᠤ ᠤᠤ? ᠡᠷᠬᠡᠪᠰᠢ ᠠᠷᠭᠠᠯᠠᠬᠤ ᠭᠡᠵᠦ ᠣᠷᠣᠯᠳᠣᠬᠤ ᠤᠤ? ᠲᠡᠷᠡ ᠦᠷᠢᠯ ᠨᠢ ᠲᠤᠰᠠ ᠪᠣᠯᠳᠠᠭ ᠪᠣᠯᠪᠠ ᠤᠤ? ᠪᠣᠭᠣᠷᠴᠢ ᠶ᠋ᠢ ᠢᠷᠡᠲᠡᠯᠡ ᠡᠷᠭᠢᠵᠦ ᠡᠳᠡᠭᠡᠷᠡᠳᠡᠭ ᠪᠣᠯ ᠶᠠᠭᠤ ᠴᠤ᠌ ᠬᠠᠮᠢᠶᠠ ᠦᠭᠡᠢ᠂ ᠶᠠᠭᠠᠬᠢᠭᠰᠠᠨ ᠴᠤ᠌ ᠶᠠᠭᠠᠬᠢᠬᠤᠪ》 ᠭᠡᠭᠵᠢᠯᠡᠨ ᠪᠣᠳᠣᠭᠳᠠᠨᠠ᠃ ᠬᠦᠦ ᠨᠢ ᠤᠬᠢᠯᠠᠵᠤ᠂ ᠡᠵᠢ ᠨᠢ ᠪᠦᠪᠡᠢᠯᠡᠵᠦ ᠰᠦ ᠥᠭᠴᠦ ᠤᠨᠲᠠᠭᠤᠯᠬᠤ ᠰᠣᠨᠣᠰᠳᠠᠪᠠ᠃ ᠤᠯᠠᠢᠰᠤᠭᠰᠠᠨ ᠴᠢᠯᠠᠭᠤᠨ ᠳᠤᠮᠳᠠ ᠲᠣᠭᠣᠭᠠ ᠪᠠᠷ ᠪᠢᠲᠡᠭᠦᠦ ᠬᠥᠮᠥᠷᠢᠭᠡᠳ ᠲᠠᠯᠪᠢᠭᠰᠠᠨ ᠰᠠᠪᠠ ᠲᠠᠢ ᠰᠦ ᠨᠢ ᠪᠦᠯᠢᠶᠡᠨ ᠬᠠᠯᠠᠭᠤᠨ ᠪᠠᠢᠳᠠᠭ᠃ ᠡᠵᠢ ᠨᠢ ᠬᠦᠦ ᠶ᠋ᠢ ᠥᠰᠬᠡᠬᠦ ᠡᠯᠳᠡᠪ ᠠᠷᠭᠠ ᠤᠬᠠᠭᠠᠨ ᠵᠠᠷᠤᠬᠤ᠃ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠳᠠᠭᠤ ᠶ᠋ᠢ ᠰᠣᠨᠣᠰᠤᠭᠠᠳ ᠡᠬᠡ ᠪᠦᠷ ᠴᠦ᠍ ᠲᠡᠰᠴᠦ ᠶᠠᠳᠠᠨ ᠭᠦᠶᠦᠵᠦ ᠣᠴᠢᠭᠠᠳ ᠲᠡᠪᠡᠷᠢᠭᠡᠳ ᠠᠪᠤᠮᠠᠷ᠃ ᠭᠡᠲᠡᠯᠡ《ᠪᠢ ᠪᠣᠯ ᠲᠡᠪᠡᠷᠢᠬᠦ ᠪᠠᠢᠲᠤᠭᠠᠢ᠂ ᠠᠮᠢᠰᠬᠤᠭᠠ ᠪᠠᠨ ᠣᠢᠷᠠᠲᠤᠭᠤᠯᠬᠤ ᠠᠷᠭᠠ ᠦᠭᠡᠢ ᠪᠣᠯᠤᠭᠰᠠᠨ ᠪᠤᠵᠠᠷ ᠠᠮᠢᠲᠠᠨ᠂ ᠬᠦᠦ ᠮᠢᠨᠢ ᠶᠠᠭᠠᠬᠢᠭᠰᠠᠨ ᠰᠠᠢᠨ ᠡᠴᠢᠭᠡ ᠶ᠋ᠢᠨ ᠶᠠᠭᠠᠬᠢᠭᠰᠠᠨ ᠮᠠᠭᠤ ᠡᠬᠡ ᠶ᠋ᠢᠨ ᠬᠤᠪᠢ ᠦᠭᠡᠢ ᠦᠷᠡ ᠪᠣᠢ? ᠬᠤᠪᠢ ᠦᠭᠡᠢ ᠪᠢᠰᠢ ᠠ᠋᠂ ᠰᠠᠢᠨ ᠡᠴᠢᠭᠡ ᠶ᠋ᠢᠨ ᠬᠤᠪᠢ ᠶ᠋ᠢ ᠬᠦᠷᠲᠡᠵᠦ ᠯᠡ ᠲᠠᠭᠠᠷᠠᠨᠠ᠃ ᠵᠠ ᠶᠠᠭᠠᠬᠢᠬᠤᠪ᠂ ᠦᠬᠦᠬᠦ ᠰᠡᠬᠡᠬᠦ ᠪᠠᠨ ᠯᠠ ᠦᠵᠡᠶᠡ᠃ ᠨᠢᠭᠡᠨᠲᠡ ᠯᠡ ᠲᠣᠮᠣᠭᠠ ᠦᠭᠡᠢᠬᠡᠨ ᠬᠠᠷᠠ ᠬᠦᠦ ᠲᠡᠢ ᠪᠡᠨ ᠬᠠᠨᠢᠯᠠᠵᠤ ᠴᠢᠳᠠᠬᠤ ᠦᠭᠡᠢ ᠶᠦᠮ ᠪᠣᠯ ᠦᠬᠦᠭᠰᠡᠨ ᠨᠢ ᠳᠡᠭᠡᠷᠡ》 ᠭᠡᠵᠦ ᠬᠡᠷᠦᠯᠦᠨᠵᠢᠨ ᠪᠣᠳᠣᠨᠠ᠃
ᠥᠷᠯᠥᠭᠡ ᠪᠣᠯᠵᠠᠢ᠃ ᠨᠢᠭᠤᠷ ᠢ᠋ᠶ᠋ᠠᠨ ᠬᠦᠢᠲᠡᠨ ᠤᠰᠤ ᠪᠠᠷ ᠤᠬᠢᠶᠠᠭᠠᠳ ᠡᠵᠢ ᠳ᠋ᠡᠭᠡᠨ ᠵᠤᠲᠠᠷᠠᠭᠤ ᠬᠠᠷᠠᠭᠳᠠᠬᠤ ᠦᠭᠡᠢ᠂ ᠰᠡᠷᠭᠦᠯᠡᠩ ᠴᠣᠪᠣᠭᠣ ᠪᠠᠢᠬᠤ ᠶ᠋ᠢ ᠬᠢᠴᠢᠶᠡᠵᠦ ᠶᠠᠳᠠᠨ ᠣᠢᠷᠠᠳᠬᠤ ᠳ᠋ᠤ᠌《ᠴᠢᠮᠠ ᠠ᠋ᠴᠠ ᠶᠠᠭᠤ ᠦᠨᠦᠷᠲᠦᠨᠡ ᠪᠣᠢ?》 ᠭᠡᠵᠦ ᠠᠰᠠᠭᠤᠭᠰᠠᠨ ᠦᠭᠡᠢ᠃ ᠥᠨᠥᠬᠢ ᠦᠮᠡᠬᠡᠢ ᠲᠣᠰᠣ ᠪᠠᠨ ᠥᠴᠥᠭᠡᠳᠦᠷ ᠲᠦᠷᠬᠢᠵᠦ ᠳᠡᠭᠡᠷᠡ ᠨᠢ ᠳᠠᠷᠤᠭᠤᠯᠵᠤ ᠰᠣᠢᠭᠰᠠᠨ᠃ ᠬᠠᠪᠲᠠᠭᠠᠢ᠂ ᠱᠣᠪᠬᠣ ᠦᠵᠦᠭᠦᠷ ᠲᠡᠢ ᠬᠣᠶᠠᠷ ᠶᠠᠭᠤᠮᠠ ᠬᠠᠨᠴᠤᠢᠯᠠᠭᠠᠳ ᠳᠡᠷᠡᠰᠦᠨ ᠲᠠᠢᠰᠢ ᠣᠴᠢᠪᠠ᠃ ᠪᠣᠷᠤᠤᠬᠠᠢᠲᠤ᠂ ᠪᠠᠴᠢ ᠬᠣᠶᠠᠷ ᠲᠠᠢ ᠶᠠᠭᠠᠬᠢᠵᠤ ᠨᠣᠴᠣᠯᠳᠤᠭᠰᠠᠨ᠂ ᠶᠠᠭᠠᠬᠢᠭᠰᠠᠨ ᠡᠢᠭᠰᠡᠨ ᠪᠦᠬᠦᠨ ᠢ᠋ᠶ᠋ᠡᠨ ᠰᠠᠨᠠᠨ ᠠᠵᠢᠭᠯᠠᠨ ᠬᠡᠰᠡᠭ ᠵᠠᠭᠤᠷᠠ ᠰᠠᠭᠤᠵᠤ《ᠡᠨᠳᠡ ᠡᠴᠡ ᠪᠢ ᠲᠠᠢᠰᠢ ᠰᠢᠳᠡᠭᠰᠡᠨ᠂ ᠲᠡᠭᠡᠬᠦ ᠳ᠋ᠦ᠍ ᠲᠠᠬᠢᠷ ᠲᠠᠪᠤ ᠰᠢᠭ᠋ ᠲᠡᠭᠡᠵᠦ ᠬᠠᠷᠠᠭᠳᠠᠭᠰᠠᠨ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠴᠠᠰᠤ ᠲᠠᠢ ᠪᠠᠢᠭᠰᠠᠨ᠂ ᠵᠠᠷᠢᠮ ᠨᠢ ᠴᠠᠰᠤᠨ ᠳ᠋ᠤ᠌᠂ ᠵᠠᠷᠢᠮ ᠨᠢ ᠭᠠᠵᠠᠷ ᠳᠡᠭᠡᠷᠡ》 ᠭᠡᠬᠦ ᠮᠡᠲᠦᠴᠢᠯᠡᠨ ᠵᠠᠢ ᠬᠡᠮᠵᠢᠶᠡ ᠪᠠᠷᠢᠮᠵᠢᠶᠠᠯᠠᠵᠤ᠂ ᠬᠠᠮᠤᠭ ᠤ᠋ᠨ ᠪᠠᠷᠠᠭᠤᠨ ᠭᠡᠰᠡᠨ ᠢ᠋ ᠨᠢ ᠣᠴᠢᠵᠤ ᠬᠠᠳᠬᠤᠴᠢᠵᠤ ᠬᠠᠮᠤᠪᠠ᠃ ᠭᠠᠷᠤᠭᠠᠳ ᠢᠷᠡᠯᠡ᠃ ᠥᠨᠥᠬᠢ ᠴᠢᠨᠢ!《ᠪᠤᠰᠤᠳ ᠨᠢ ᠲᠡᠭᠡᠪᠡᠯ ᠣᠯᠳᠠᠨᠠ᠃ ᠪᠠᠢᠭᠠ ᠯᠠ ᠶᠤᠮ ᠪᠠᠢᠨᠠ》 ᠭᠡᠵᠦ ᠥᠪᠡᠷ ᠦ᠋ᠨ ᠰᠠᠭᠤᠵᠤ ᠪᠠᠢᠭᠰᠠᠨ ᠭᠠᠵᠠᠷ ᠢ᠋ᠶ᠋ᠠᠨ ᠣᠴᠢᠵᠤ ᠪᠠᠷᠢᠮᠵᠢᠶᠠᠯᠠᠵᠤ ᠪᠠᠢᠭᠠᠳ ᠣᠯᠤᠭᠠᠳ ᠠᠪᠤᠪᠠ᠃
ᠬᠡᠷᠦᠯᠦᠨᠵᠢᠨ ᠲᠡᠭᠡᠭᠡᠳ ᠰᠢᠷᠠ ᠣᠲᠠᠴᠢ ᠳ᠋ᠤ᠌ ᠣᠴᠢᠯᠠ᠃ ᠦᠵᠡᠭᠦᠯᠪᠡ᠃ ᠠᠰᠠᠭᠤᠭᠰᠠᠨ ᠳ᠋ᠤᠨᠢ ᠢᠳᠤᠭᠠᠨ ᠳ᠋ᠤ᠌ ᠶᠠᠷᠢᠭᠰᠠᠨ ᠢ᠋ᠶ᠋ᠠᠨ ᠯᠠ ᠶᠠᠷᠢᠯᠠ᠃ ᠥᠭᠡᠷᠡ ᠶᠠᠭᠤ ᠶᠠᠷᠢᠬᠤ ᠪᠢᠯᠡ? ᠦᠨᠡᠨ ᠨᠢ ᠲᠡᠷᠡ᠃ ᠰᠢᠷᠠ ᠣᠲᠠᠴᠢ᠄
— ᠲᠡᠮᠪᠦᠦ ᠭᠦᠨ ᠳ᠋ᠡᠭᠡᠨ ᠣᠷᠣᠵᠤ ᠬᠦᠨᠳᠦᠷᠡᠵᠡᠢ᠃ ᠤᠷᠢᠳᠤ ᠭᠠᠵᠠᠷ ᠪᠣᠯ ᠡᠮᠴᠢᠯᠡᠳᠡᠭ ᠯᠡ ᠶᠦᠮ᠃ ᠡᠨᠳᠡ ᠪᠣᠯ ᠪᠢ ᠯᠡ ᠣᠷᠣᠯᠳᠣᠪᠠᠯ ᠡᠳᠡᠭᠡᠵᠦ ᠪᠣᠯᠤᠨᠠ᠃ ᠡᠮ ᠬᠣᠪᠣᠷ ᠦᠨᠡᠲᠡᠢ ᠁
— ᠶᠠᠮᠠᠷ ᠦᠨᠡ ᠲᠡᠢ ᠪᠣᠢ?
— ᠨᠢᠭᠡ ᠨᠢ ᠨᠢᠭᠡ ᠠᠯᠲᠠᠨ ᠵᠣᠭᠣᠰ᠂ ᠪᠤᠲᠠ ᠭᠡᠰᠡᠨ ᠦᠭᠡ᠃
— ᠲᠠᠪᠤ ᠶ᠋ᠢ ᠠᠪᠤᠶᠠ᠃ ᠠᠷᠪᠠ ᠬᠣᠨᠣᠭ ᠲᠤ᠌ ᠡᠳᠡᠭᠡᠬᠦ ᠤᠤ? ᠭᠡᠵᠦ ᠲᠠᠪᠤᠨ ᠠᠯᠲᠠᠨ ᠵᠣᠭᠣᠰ ᠢ᠋ᠶ᠋ᠠᠨ ᠭᠠᠷᠭᠠᠵᠤ ᠥᠭᠪᠡ᠃ ᠣᠲᠠᠴᠢ᠄
— ᠬᠣᠨᠣᠭ ᠬᠤᠭᠤᠴᠠᠭᠠ ᠪᠠᠷ ᠶᠠᠷᠢᠬᠤ ᠠᠷᠭᠠ ᠦᠭᠡᠢ᠃ ᠶᠠᠭᠤ ᠴᠦ᠍ ᠭᠡᠰᠡᠨ ᠳᠣᠯᠣᠭᠠᠨ ᠦᠷᠢᠯ ᠥᠭᠭᠦᠶᠡ᠃ ᠡᠳᠦᠷ ᠦ᠋ᠨ ᠨᠢᠭᠡ ᠶ᠋ᠢ ᠤᠤᠭᠤ ᠳᠠ᠃ ᠪᠢ ᠬᠠᠷᠢᠨ ᠬᠣᠶᠠᠷ ᠢ᠋ ᠢᠯᠡᠭᠦᠦ ᠥᠭᠭᠦᠯᠡ ᠰᠢᠦ᠃ ᠴᠠᠭᠠᠰᠢ ᠪᠠᠨ ᠵᠠᠪᠠᠯ ᠵᠣᠭᠣᠰ ᠭᠡᠬᠦ ᠦᠭᠡᠢ᠂ ᠪᠤᠲᠠ ᠪᠠᠷ ᠶᠠᠷᠢᠯᠴᠠᠵᠤ ᠪᠣᠯᠬᠤ ᠶᠤᠮ ᠰᠢᠦ᠃ ᠴᠠᠪᠢᠨ ᠤ᠋ ᠪᠠᠨ ᠬᠠᠪᠤᠳᠠᠷ ᠳᠡᠭᠡᠷᠡ ᠠᠩ ᠤ᠋ᠨ ᠶᠤᠮ ᠤᠤ? ᠬᠤᠷᠠᠭᠠ ᠢᠰᠢᠭᠡᠨ ᠦ᠌ ᠭᠣᠳᠣ ᠳᠡᠪᠲᠦᠭᠡᠭᠡᠳ ᠨᠠᠭᠠᠵᠤ ᠬᠥᠬᠥᠭᠦᠯᠵᠦ ᠪᠣᠯᠤᠨᠠ᠃ ᠲᠡᠭᠡᠪᠡᠯ ᠬᠠᠭᠠᠷᠠᠬᠤ ᠨᠢ ᠬᠤᠷᠳᠤᠰᠤᠨᠠ᠃ ᠭᠡᠬᠦ ᠳ᠋ᠡᠭᠡᠨ ᠲᠡᠢᠮᠦ ᠴᠦ᠍ ᠠᠮᠠᠷᠬᠠᠨ ᠪᠤᠰᠤ᠃ ᠬᠠᠭᠠᠷᠠᠪᠠᠯ ᠡᠪᠡᠳᠴᠢᠨ ᠨᠢ ᠭᠠᠳᠠᠭᠰᠢᠯᠠᠵᠤ ᠪᠠᠢᠭᠠ ᠶᠤᠮ᠃ ᠡᠪᠡᠳᠴᠢᠨ ᠦ᠌ ᠬᠣᠣᠷ ᠢ᠋ ᠪᠦᠷᠢᠮᠦᠰᠦᠨ ᠭᠠᠳᠠᠭᠰᠢ ᠬᠥᠭᠡᠭᠡᠬᠦ ᠶ᠋ᠢᠨ ᠲᠤᠯᠠ ᠲᠣᠢᠫᠤᠯᠢᠩ ᠤᠤᠭᠤᠬᠤ ᠰᠠᠷᠠ ᠶ᠋ᠢᠨ ᠠᠵᠢᠯ ᠪᠣᠢ᠃
ᠡᠨᠡ ᠣᠯᠠᠨ ᠦᠭᠡ᠂ ᠤᠷᠲᠤ ᠬᠤᠭᠤᠴᠠᠭᠠ ᠶ᠋ᠢ ᠪᠣᠳᠣᠬᠤ ᠠ᠋ᠴᠠ ᠳᠣᠲᠣᠷᠠ ᠬᠠᠷᠠᠩᠭᠤᠢᠯᠠᠨᠠ᠃ ᠪᠣᠭᠣᠷᠴᠢ ᠤᠳᠠᠬᠤ ᠦᠭᠡᠢ ᠢᠷᠡᠬᠦ ᠪᠠᠢᠬᠠ᠂ ᠢᠷᠡᠬᠦ ᠳ᠋ᠦ᠍ᠨᠢ ᠪᠢ ᠢᠳᠡᠭᠡ ᠪᠡᠭᠡᠷᠡᠨ ᠳ᠋ᠦ᠍ ᠪᠠᠷᠢᠭᠳᠠᠭᠠᠳ ᠪᠠᠢᠪᠠᠯ ᠰᠢᠪᠰᠢᠭ ᠭᠡᠵᠦ ᠪᠣᠳᠣᠵᠤ ᠭᠣᠨᠢᠷᠬᠠᠨ᠂ ᠰᠢᠷᠠ ᠣᠲᠠᠴᠢ ᠶ᠋ᠢᠨ ᠦᠷᠢᠯ ᠡᠴᠡ ᠬᠣᠶᠠᠷ ᠡᠳᠦᠷ ᠳᠠᠷᠠᠭᠠᠯᠠᠨ ᠨᠢᠭᠡ ᠨᠢᠭᠡ ᠶ᠋ᠢ ᠬᠦᠷᠲᠡᠪᠡ᠃ ᠭᠣᠳᠣ ᠠᠷᠠᠰᠤ ᠶ᠋ᠢ ᠴᠦ᠍ ᠴᠢᠨᠠᠯᠠ᠃ ᠥᠭᠡᠷᠡᠴᠢᠯᠡᠭᠳᠡᠭᠰᠡᠨ ᠴᠦ᠍ ᠶᠠᠭᠤᠮᠠ ᠠᠯᠠᠭᠠ᠃ ᠭᠤᠷᠪᠠᠳᠠᠬᠢ ᠡᠳᠦᠷ ᠨᠢ ᠡᠮ ᠢ᠋ ᠬᠣᠶᠠᠷ ᠢ᠋ᠶ᠋ᠠᠷ ᠨᠢ ᠤᠤᠭᠤᠯᠠ᠃ ᠪᠡᠶᠡ ᠢᠷᠪᠢᠭᠢᠨᠡᠵᠦ᠂ ᠨᠢᠳᠦ ᠡᠷᠢᠶᠡᠯᠵᠡᠯᠡᠬᠦ ᠵᠡᠷᠭᠡ ᠪᠣᠯᠤᠭᠠᠳ ᠯᠠ ᠥᠩᠭᠡᠷᠡᠪᠡ᠃
ᠵᠤᠨ ᠤ᠋ ᠡᠬᠢᠨ ᠰᠠᠷᠠ ᠶ᠋ᠢᠨ ᠰᠡᠭᠦᠯ ᠤᠷᠤᠭᠤ ᠪᠠᠨ ᠣᠷᠣᠭᠰᠠᠨ ᠦᠶᠡ᠃ ᠪᠣᠭᠣᠷᠴᠢ ᠶ᠋ᠢᠨ ᠬᠡᠯᠡᠭᠰᠡᠨ ᠢ᠋ᠶ᠋ᠡᠷ ᠪᠣᠯ ᠢᠷᠡᠬᠦ ᠨᠢ ᠣᠢᠷᠠᠲᠤᠭᠠᠳ ᠯᠠ ᠪᠠᠢᠬᠤ ᠶᠤᠮ᠃ ᠤᠷᠢᠳᠠ ᠨᠢ ᠪᠣᠯ《ᠢᠷᠡᠭᠡᠰᠡᠢ》 ᠭᠡᠵᠦ ᠬᠦᠰᠡᠵᠦ ᠰᠠᠨᠠᠨ ᠶᠠᠪᠤᠳᠠᠭ ᠬᠥᠮᠦᠨ ᠢ᠋ᠶ᠋ᠡᠨ ᠣᠳᠣ ᠪᠣᠯᠬᠣᠷ《ᠪᠠᠢᠵᠠᠨᠠᠭᠠᠰᠠᠢ》 ᠭᠡᠵᠦ ᠪᠣᠳᠣᠬᠤ ᠪᠣᠯᠤᠯᠠ᠃ ᠲᠡᠷᠡ ᠵᠠᠪᠰᠠᠷ ᠡᠳᠡᠭᠡᠷᠡᠵᠦ ᠡᠷᠡᠭᠦᠯ ᠪᠣᠯᠴᠢᠬᠠᠬᠤ ᠰᠠᠨᠠᠭᠠ ᠲᠥᠷᠥᠨᠡ᠃《ᠥᠨᠥᠳᠥᠷ ᠦᠯᠡᠳᠡᠭᠰᠡᠨ ᠭᠤᠷᠪᠠᠨ ᠦᠷᠢᠯ ᠢ᠋ᠶ᠋ᠡᠨ ᠤᠤᠭᠤᠴᠢᠬᠠᠶᠠ》 ᠭᠡᠵᠦ ᠰᠢᠲᠦᠭᠡᠳ ᠪᠠᠭᠠ ᠦᠳᠡ ᠶ᠋ᠢᠨ ᠦᠶᠡ ᠳ᠋ᠦ᠍ ᠵᠠᠯᠭᠢᠴᠢᠬᠠᠪᠠ᠃ ᠳᠥᠩᠭᠡᠵᠡᠢ ᠵᠠᠯᠭᠢᠭᠠᠳ ᠣᠷᠭᠢᠲᠠᠯᠠ ᠭᠠᠳᠠᠭᠠ ᠬᠥᠮᠦᠰ ᠢᠷᠡᠵᠦ ᠡᠵᠢ ᠲᠡᠢ ᠨᠢ ᠮᠡᠨᠳᠦᠯᠡᠬᠦ ᠨᠢ ᠨᠢᠭᠡᠯᠡ ᠶᠡᠷᠦ ᠪᠤᠰᠤ ᠶ᠋ᠢᠨ᠃ ᠨᠠᠬᠤ᠂ ᠪᠣᠭᠣᠷᠴᠢ᠂ ᠠᠷᠤ ᠠ᠋ᠴᠠ ᠨᠢ ᠡᠵᠢ ᠨᠢ ᠣᠷᠣᠭᠠᠳ ᠢᠷᠡᠯᠡ᠃ ᠨᠠᠬᠤ ᠲᠡᠮᠦᠷᠴᠢ ᠬᠣᠶᠠᠷ ᠪᠡᠶᠡ ᠪᠡᠶᠡ ᠪᠡᠨ ᠲᠠᠨᠢᠬᠤ ᠲᠤᠯᠠ ᠭᠠᠷ ᠵᠥᠷᠢᠭᠦᠯᠦᠨ ᠮᠡᠨᠳᠦᠯᠡᠭᠡᠳ ᠨᠠᠬᠤ ᠭᠡᠷ ᠦ᠋ᠨ ᠵᠡᠭᠦᠨ ᠬᠣᠢᠲᠤ ᠲᠠᠯᠠ᠂ ᠡᠵᠡᠨ ᠭᠡᠷ ᠦ᠋ᠨ ᠪᠠᠷᠠᠭᠤᠨ ᠬᠣᠢᠲᠤ ᠲᠠᠯᠠ ᠪᠠᠷᠢᠨ ᠰᠠᠭᠤᠵᠠᠭᠠᠵᠤ᠂ ᠭᠠᠵᠠᠷ ᠣᠷᠣᠨ᠂ ᠴᠠᠭ ᠠᠭᠠᠷ᠂ ᠠᠬᠤᠢ ᠠᠮᠢᠵᠢᠷᠭᠠᠨ ᠤ᠋ ᠬᠡᠪᠰᠢᠮᠡᠯ ᠶᠠᠷᠢᠶᠠ ᠰᠣᠯᠢᠯᠴᠠᠬᠤ ᠠᠪᠠᠢ᠃
ᠡᠨᠡ ᠵᠠᠪᠰᠠᠷ ᠡᠵᠢ ᠨᠠᠮᠤᠭᠤᠨ ᠴᠢ ᠢᠳᠡᠭᠡ ᠪᠡᠷ ᠵᠣᠴᠢᠳ ᠢ᠋ᠶ᠋ᠠᠨ ᠳᠠᠢᠯᠠᠯᠠ᠃ ᠨᠠᠬᠤ ᠬᠦᠦ ᠪᠡᠨ ᠳᠠᠭᠠᠭᠤᠯᠤᠨ ᠥᠴᠥᠭᠡᠳᠦᠷ ᠨᠤᠲᠤᠭ ᠠ᠋ᠴᠠ ᠭᠠᠷᠴᠤ ᠣᠷᠣᠢᠲᠠᠭᠠᠳ ᠲᠠᠨᠢᠳᠠᠭ ᠨᠥᠬᠥᠷ ᠦ᠋ᠨ ᠳ᠋ᠡᠭᠡᠨ ᠬᠣᠨᠣᠭᠯᠠᠭᠠᠳ ᠢᠷᠡᠵᠦ ᠪᠠᠢᠭᠠ ᠨᠢ ᠡᠨᠡ ᠠᠵᠢ᠃ ᠨᠢᠯᠬᠠ ᠬᠡᠦᠬᠡᠳ ᠲᠡᠢ᠂ ᠲᠡᠭᠡᠭᠡᠳ ᠪᠡᠷᠢ ᠭᠤᠶᠤᠬᠤ ᠠᠢᠯ ᠳ᠋ᠠᠭᠠᠨ ᠴᠠᠭ ᠮᠥᠴᠢ ᠲᠠᠭᠠᠷᠠᠭᠤᠯᠤᠨ ᠣᠴᠢᠬᠤ ᠶᠣᠰᠣ ᠵᠢᠷᠤᠮ ᠢ᠋ ᠰᠠᠬᠢᠬᠤ ᠨᠢ ᠵᠦᠢ᠃ ᠪᠣᠭᠤᠷᠴᠢ《ᠲᠦᠷᠦᠭᠦᠯᠡᠭᠡᠳ ᠣᠴᠢᠶᠠ》 ᠭᠡᠵᠦ ᠠᠪᠤ ᠠ᠋ᠴᠠ ᠪᠠᠨ ᠭᠤᠶᠤᠬᠤ ᠳ᠋ᠤ᠌《ᠪᠣᠯᠬᠤ ᠦᠭᠡᠢ》 ᠭᠡᠵᠡᠢ᠃
ᠨᠠᠬᠤ ᠬᠦᠦ ᠳ᠋ᠡᠭᠡᠨ《ᠬᠣᠯᠪᠣᠭᠠ ᠪᠠᠨ》 ᠭᠡᠵᠦ ᠲᠣᠪᠴᠢᠬᠠᠨ ᠭᠠᠭᠴᠠ ᠦᠭᠡ ᠬᠡᠯᠡᠵᠦ ᠲᠣᠯᠣᠭᠠᠢ ᠰᠠᠵᠢᠬᠤᠢ ᠳ᠋ᠤ᠌ ᠲᠡᠷᠡ ᠪᠡᠷ ᠭᠠᠷᠴᠤ ᠭᠠᠨᠵᠤᠭᠠᠨ ᠤ᠋ ᠶᠠᠭᠤᠮᠠ ᠪᠠᠨ ᠠᠪᠴᠢᠷᠠᠵᠤ ᠠᠪᠤ ᠳ᠋ᠠᠭᠠᠨ ᠥᠭᠪᠡ᠃ ᠨᠠᠬᠤ ᠪᠣᠭᠴᠣ ᠪᠠᠨ ᠠᠭᠤᠳᠠᠯᠤᠨ ᠡᠪᠬᠡᠵᠦ ᠬᠢᠭᠰᠡᠨ ᠲᠣᠳᠣ ᠬᠡ ᠲᠡᠢ ᠳᠡᠪᠡᠯ ᠦ᠋ᠨ ᠲᠣᠷᠭᠠᠨ ᠳᠡᠭᠡᠷᠡ ᠲᠣᠮᠣ ᠴᠠᠭᠠᠨ ᠮᠥᠩᠭᠥᠨ ᠶᠤᠸᠠᠮᠪᠤᠤ ᠲᠠᠯᠪᠢᠵᠤ ᠪᠣᠰᠤᠨ᠄
ᠠᠷᠤᠯᠠᠳ ᠣᠪᠣᠭ ᠤ᠋ᠨ ᠨᠠᠬᠤ ᠪᠢ
ᠤᠷᠭᠠ ᠪᠠᠷᠢᠳᠠᠭ ᠭᠠᠭᠴᠠ ᠬᠦᠦ ᠲᠡᠢ
ᠤᠷᠠ ᠱᠠᠭᠯᠠᠳᠠᠭ ᠵᠠᠶᠠᠭᠠᠨ ᠤ᠋ ᠬᠠᠨᠢ ᠨᠢ
ᠤᠳᠤᠮ ᠰᠠᠢᠲᠠᠢ ᠭᠦᠭᠦᠢᠳ ᠲᠡᠮᠦᠷᠴᠢ ᠶ᠋ᠢᠨ
ᠦᠷᠡ ᠨᠢ ᠪᠣᠯᠵᠤ ᠦᠰᠦᠨ ᠪᠣᠢᠵᠢᠭᠠᠳ
ᠡᠷᠡ ᠨᠥᠬᠥᠷ ᠢ᠋ᠶ᠋ᠡᠨ ᠥᠪᠡᠷ ᠢ᠋ᠶ᠋ᠡᠨ ᠰᠣᠩᠭᠣᠵᠤ
ᠠᠴᠢ ᠶ᠋ᠢ ᠮᠢᠨᠢ ᠲᠥᠷᠥᠭᠦᠯᠦᠭᠰᠡᠨ ᠢ᠋ ᠨᠢᠳᠦ ᠪᠡᠷ ᠦᠵᠡᠭᠰᠡᠨ
ᠠᠵᠠ ᠵᠠᠶᠠᠭᠠᠨ ᠳ᠋ᠠᠭᠠᠨ ᠪᠠᠶᠠᠷᠯᠠᠵᠤ ᠪᠠᠷᠠᠰᠢ ᠦᠭᠡᠢ
ᠬᠦᠦ ᠥᠬᠢᠨ ᠬᠣᠶᠠᠷ ᠢ᠋ᠶ᠋ᠠᠨ ᠨᠡᠢᠯᠡᠭᠦᠯᠦᠭᠡᠳ
ᠬᠥᠬᠡ ᠮᠥᠩᠭᠥᠨ ᠲᠩᠷᠢ ᠶ᠋ᠢᠨ ᠢ᠋ᠶ᠋ᠡᠨ ᠳᠣᠣᠷᠠ
ᠲᠣᠭᠣᠨᠣᠲᠤ ᠭᠡᠷ ᠢ᠋ ᠨᠢ ᠪᠤᠰᠬᠠᠵᠤ ᠥᠭᠭᠦᠶᠡ
ᠲᠣᠭᠣᠭᠠ ᠲᠤᠯᠭᠠ ᠶ᠋ᠢ ᠨᠢ ᠲᠦᠰᠢᠵᠦ ᠥᠭᠭᠦᠶᠡ
ᠬᠦᠰᠡᠯ ᠵᠣᠷᠢᠯᠭᠠ ᠶ᠋ᠢ ᠮᠢᠨᠢ
ᠬᠦᠯᠢᠶᠡᠵᠦ ᠠᠪᠤᠨᠠ ᠤᠤ? ᠲᠡᠮᠦᠷᠴᠢ ᠲᠠ
ᠬᠣᠲᠠ ᠤᠷᠤᠭ ᠤ᠋ᠨ ᠪᠠᠷᠢᠯᠳᠤᠯᠭᠠᠲᠠᠨ ᠪᠣᠯᠵᠤ
ᠬᠣᠲᠠᠯᠠ ᠣᠯᠠᠨ ᠳ᠋ᠠᠭᠠᠨ ᠤᠳᠤᠮ ᠢ᠋ᠶ᠋ᠠᠨ ᠦᠯᠡᠳᠡᠭᠡᠶᠡ ᠭᠡᠵᠦ ᠲᠡᠮᠦᠷᠴᠢ ᠳ᠋ᠦ᠍ ᠪᠠᠷᠢᠬᠤ ᠳ᠋ᠤ᠌ ᠲᠡᠷᠡ ᠪᠡᠷ ᠰᠠᠭᠤᠳᠠᠯ ᠢ᠋ᠶ᠋ᠠᠨ ᠵᠠᠰᠠᠨ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠤᠰᠬᠤᠢ ᠳ᠋ᠤ᠌ ᠬᠡᠷᠦᠯᠤᠨᠵᠢᠨ᠄
— ᠠᠪᠴᠤ ᠪᠣᠯᠬᠤ ᠦᠭᠡᠢ᠂ ᠠᠪᠤ ᠠ᠋! ᠪᠢ ᠣᠴᠢᠵᠤ ᠴᠢᠳᠠᠬᠤ ᠦᠭᠡᠢ ᠭᠡᠵᠦ ᠬᠠᠴᠢᠨ ᠴᠡᠴᠡᠷᠬᠢᠯᠡᠭᠰᠡᠨ ᠬᠣᠭᠣᠯᠠᠢ ᠪᠠᠷ ᠬᠡᠯᠡᠭᠡᠳ ᠪᠣᠰᠴᠤ ᠰᠣᠭᠲᠣᠭᠤ ᠬᠥᠮᠦᠨ ᠰᠢᠭ ᠬᠥᠯ ᠨᠢ ᠰᠣᠯᠪᠢᠨ ᠨᠢᠭᠤᠷ ᠢ᠋ᠶ᠋ᠠᠨ ᠳᠠᠷᠤᠨ ᠤᠬᠢᠯᠠᠭᠰᠠᠭᠠᠷ ᠭᠠᠷᠴᠤ ᠣᠳᠪᠠ᠃
ᠲᠡᠮᠦᠷᠴᠢ ᠨᠠᠬᠤ ᠬᠣᠶᠠᠷ ᠤ᠋ᠨ ᠠᠯᠢ ᠠᠯᠢᠨ ᠨᠢ ᠴᠢᠷᠠᠢ ᠨᠢ ᠬᠠᠷᠠᠯᠠᠵᠤ ᠪᠠᠷᠤᠢᠭᠠᠳ ᠬᠡᠯᠡᠬᠦ ᠴᠦ᠍ ᠦᠭᠡ ᠦᠭᠡᠢ ᠪᠣᠯᠵᠤ᠂ ᠪᠣᠭᠣᠷᠴᠢ ᠶ᠋ᠢᠨ ᠲᠣᠯᠣᠭᠠᠢ ᠤᠷᠤᠭᠤ ᠤᠰᠤ ᠰᠠᠴᠤᠬᠤ ᠰᠢᠭ᠋᠂ ᠡᠨᠡ ᠭᠡᠷ ᠦ᠋ᠨ ᠳᠣᠲᠣᠷᠠᠬᠢ ᠪᠦᠯᠢᠶᠡᠨ ᠳᠤᠯᠠᠭᠠᠨ ᠠᠭᠤᠷ ᠠᠮᠢᠰᠬᠤᠯ ᠬᠥᠯᠳᠡᠭᠦᠦ ᠮᠥᠰᠥ ᠯᠦ᠋ᠭᠡ ᠨᠢᠭᠡᠨ ᠪᠣᠯᠵᠤ ᠬᠤᠪᠢᠰᠬᠤ ᠠᠵᠤᠭᠤ᠃ ᠨᠢᠯᠬᠠ ᠬᠦᠦ ᠥᠭᠡᠯᠦᠨ ᠢ᠋ ᠤᠭᠵᠢᠵᠤ ᠰᠠᠭᠤᠭᠠ ᠡᠬᠡ ᠨᠠᠮᠤᠭᠤᠨ᠄
— ᠬᠡᠷᠦᠯᠤᠨᠵᠢᠨ ᠠ᠋ ! ᠶᠠᠭᠠᠬᠢᠯᠠ ᠡᠢᠯᠡ? ᠶᠠᠭᠤ ᠪᠣᠯᠬᠤ ᠨᠢ ᠡᠨᠡ ᠪᠣᠢ?《ᠪᠣᠭᠣᠷᠴᠢ ᠮᠢᠨᠢ ᠢᠷᠡᠵᠦ ᠨᠠᠮᠠ ᠶ᠋ᠢ ᠠᠪᠠᠴᠢᠨᠠ》 ᠭᠡᠵᠦ ᠬᠥᠷ ᠪᠠᠶᠠᠷ ᠪᠣᠯᠵᠤ ᠶᠠᠪᠤᠭᠰᠠᠨ ᠪᠢᠰᠢᠦ? ᠶᠠᠭᠤ ᠪᠣᠯᠬᠤ ᠨᠢ ᠪᠣᠢ? ᠶᠠᠮᠠᠷ ᠭᠠᠢ ᠳᠠᠭᠠᠷᠢᠪᠠ ᠠ᠋? ᠬᠡᠷᠦᠯᠤᠨᠵᠢᠨ! ᠭᠡᠵᠦ ᠥᠭᠡᠯᠡᠬᠦ ᠡᠴᠡ ᠴᠠᠭᠠᠰᠢ ᠦᠭᠡᠢ᠃
ᠨᠠᠬᠤ ᠬᠦᠦ ᠳ᠋ᠡᠭᠡᠨ ᠲᠣᠯᠣᠭᠠᠢ ᠰᠠᠵᠢᠵᠤ《ᠬᠣᠢᠨᠠ ᠠ᠋ᠴᠠ ᠨᠢ ᠭᠠᠷ》 ᠭᠡᠰᠡᠨ ᠳᠣᠬᠢᠶᠠ ᠥᠭᠬᠦ ᠳ᠋ᠦ᠍ ᠪᠤᠭᠤᠷᠴᠢ ᠤᠬᠤᠰᠬᠢᠨ ᠭᠠᠷᠪᠠ᠃
ᠬᠡᠷᠦᠯᠤᠨᠵᠢᠨ ᠭᠡᠷ ᠡᠴᠡ ᠨᠡᠯᠢᠶᠡᠳ ᠵᠠᠢᠲᠠᠢ᠂ ᠬᠥᠯ ᠨᠢ ᠳᠦᠢᠪᠡᠨ ᠴᠠᠭᠠᠰᠢ ᠬᠠᠷᠠᠵᠤ ᠨᠢᠭᠤᠷ ᠢ᠋ᠶ᠋ᠠᠨ ᠳᠠᠷᠤᠨ ᠬᠥᠯ ᠰᠣᠯᠪᠢᠬᠤ ᠲᠡᠳᠦᠢ ᠦᠵᠡᠭᠳᠡᠪᠡ᠃ ᠪᠢᠴᠢᠬᠠᠨ ᠡᠷᠡ ᠭᠦᠶᠦᠨ ᠭᠦᠶᠦᠭᠰᠡᠭᠡᠷ ᠠᠷᠤ ᠠ᠋ᠴᠠ ᠨᠢ ᠣᠴᠢᠭᠠᠳ ᠰᠤᠭᠤᠳᠠᠵᠤ ᠠᠪᠤᠪᠠᠰᠤ ᠰᠠᠭᠤᠨ ᠲᠣᠰᠤᠭᠠᠳ ᠥᠭᠭᠦᠯᠡ᠃
— ᠬᠡᠷᠦᠯᠦᠨᠵᠢᠨ ᠠ᠋᠂ ᠶᠠᠭᠤ ᠪᠣᠯᠪᠠ?
— ᠪᠣᠭᠣᠷᠴᠢ ᠮᠢᠨᠢ᠂ ᠪᠤᠵᠠᠷ ᠡᠮᠡ ᠳ᠋ᠦ᠍ ᠬᠦᠷᠴᠦ ᠪᠣᠯᠬᠤ ᠦᠭᠡᠢ᠃ ᠪᠢ ᠪᠤᠵᠠᠷᠯᠠᠭᠳᠠᠭᠰᠠᠨ᠃ ᠬᠦᠴᠦᠨ ᠳ᠋ᠦ᠍ ᠠᠪᠲᠠᠵᠤ ᠁ ᠥᠨᠥᠬᠢ ᠴᠢᠨᠢ ᠁ ᠪᠠᠴᠢ ᠭᠡᠳᠡᠭ ᠠᠮᠢᠲᠠᠨ ᠥᠭᠡᠳᠡ ᠦᠭᠡᠢ ᠠᠮᠢᠲᠠᠨ ᠢ᠋ ᠬᠥᠯᠥᠰᠥ ᠪᠡᠷ ᠳᠠᠭᠠᠭᠤᠯᠵᠤ ᠢᠷᠡᠭᠡᠳ ᠰᠢᠦ᠃
ᠲᠡᠭᠦᠨ ᠦ᠌ ᠪᠡᠶᠡ ᠨᠢ ᠴᠡᠴᠡᠷᠡᠵᠦ᠂ ᠬᠡᠯᠡ ᠨᠢ ᠡᠭᠡᠳᠡᠷᠡᠵᠦ ᠡᠬᠢᠯᠡᠪᠡ᠃ ᠬᠡᠯᠡ ᠪᠡᠨ ᠡᠭᠡᠳᠡᠷᠡᠭᠦᠯᠦᠨ ᠡᠭᠡᠳᠡᠷᠡᠭᠦᠯᠦᠨ ᠴᠡᠴᠡᠷᠡᠵᠦ ᠶᠠᠭᠤ ᠪᠣᠯᠤᠭᠰᠠᠨ ᠢ᠋ ᠪᠦᠭᠦᠳᠡ ᠶ᠋ᠢ ᠬᠡᠯᠡᠯᠡ᠃ ᠪᠤᠭᠤᠷᠴᠢ᠄
— ᠲᠡᠷᠡ ᠰᠢᠷᠠ ᠣᠲᠠᠴᠢ ᠪᠠᠷ ᠡᠮᠴᠢᠯᠡᠭᠦᠯᠵᠦ ᠪᠣᠯᠬᠤ ᠪᠢᠰᠢᠦ?
— ᠲᠡᠷᠡ ᠥᠩᠭᠡᠷᠡᠭᠰᠡᠨ᠃ ᠠᠮᠢ ᠲᠡᠮᠡᠴᠡᠭᠡᠳ᠂ ᠬᠠᠮᠤᠭ ᠶᠠᠭᠤᠮᠠ ᠬᠠᠷᠠᠭᠳᠠᠬᠤ ᠪᠠᠨ ᠪᠣᠯᠢᠯᠠ᠃ ᠨᠠᠮᠠ ᠶ᠋ᠢ ᠪᠤᠰᠬᠠ᠃ ᠠᠪᠤ ᠡᠵᠢ ᠳ᠋ᠡᠭᠡᠨ ᠦᠵᠡᠭᠳᠡᠶᠡ᠃
ᠪᠣᠭᠣᠷᠴᠢ ᠬᠡᠷᠦᠯᠦᠨᠵᠢᠨ ᠢ᠋ ᠰᠤᠭᠤᠳᠠᠭᠠᠳ ᠲᠦᠰᠢᠵᠦ ᠪᠤᠰᠬᠠᠬᠤ ᠭᠡᠰᠡᠨ ᠨᠢ ᠪᠣᠰᠴᠤ ᠴᠢᠳᠠᠭᠰᠠᠨ ᠦᠭᠡᠢ᠂ ᠬᠥᠯ ᠨᠢ ᠨᠤᠭᠤᠷᠠᠵᠤ ᠤᠨᠠᠭᠠᠳ ᠁ ᠲᠡᠷᠡ ᠳᠣᠣᠷᠠ ᠨᠢ ᠬᠣᠶᠠᠷ ᠭᠠᠷ ᠳᠡᠭᠡᠷᠡ ᠪᠡᠨ ᠡᠷᠭᠦᠨ ᠭᠦᠶᠦᠵᠦ ᠭᠡᠷ ᠲᠦ᠍ ᠣᠷᠣᠪᠠ᠃ ᠲᠡᠳᠡ ᠪᠦᠬᠦᠨ ᠴᠣᠴᠢᠨ ᠰᠠᠨᠳᠤᠷᠴᠤ᠂ ᠬᠡᠷᠦᠯᠦᠨᠵᠢᠨ ᠢ᠋ ᠡᠵᠢ ᠶ᠋ᠢᠨ ᠬᠢᠨᠢ ᠳᠡᠭᠡᠳᠦ ᠲᠠᠯᠠ ᠳ᠋ᠤ᠌ ᠭᠠᠷᠭᠠᠵᠤ ᠰᠠᠭᠤᠯᠭᠠᠪᠠ᠃ ᠬᠡᠷᠤᠯᠤᠨᠵᠢᠨ ᠬᠣᠭᠣᠯᠠᠢ ᠨᠢ ᠪᠣᠭᠣᠵᠤ ᠪᠠᠢᠬᠤ ᠰᠢᠭ᠋ ᠬᠠᠬᠢᠷ ᠬᠠᠴᠢᠨ ᠳᠠᠭᠤ ᠪᠠᠷ᠄
— ᠠᠪᠤ᠂ ᠡᠵᠢ! ᠥᠬᠢᠨ ᠨᠢ᠁ ᠬᠠᠨᠢᠶᠠᠵᠤ ᠬᠠᠬᠢᠷᠤᠨ ᠬᠠᠮᠤᠭ ᠪᠡᠶᠡ ᠨᠢ ᠲᠣᠭᠲᠠᠵᠤ ᠶᠠᠳᠠᠨ ᠴᠡᠴᠡᠷᠡᠵᠦ᠂ ᠬᠦᠢᠲᠡᠨ ᠬᠥᠯᠥᠰᠥ ᠨᠢ ᠳᠠᠭᠠᠪᠤᠷᠯᠠᠨ᠄
— ᠬᠦᠦ ᠶ᠋ᠢᠨ ᠮᠢᠨᠢ ᠡᠴᠢᠭᠡ ᠡᠨᠡ ᠪᠤᠭᠤᠷᠴᠢ᠂ ᠡᠴᠢᠭᠡ ᠳ᠋ᠦ᠍ᠨᠢ ᠥᠭᠭᠦᠭᠡᠷᠡᠢ! ᠤᠳᠤᠮ ᠳᠠᠭᠠᠭ᠂ ᠪᠢ ᠪᠤᠭᠤᠷᠴᠢ ᠶ᠋ᠢᠨ ᠠᠪᠠᠯᠢ ᠡᠮᠡ᠃ ᠡᠬᠡᠨᠡᠷ ᠁ ᠪᠢ ᠁ ᠪᠢ ᠁ ᠭᠡᠳ ᠦᠭᠡ ᠪᠡᠨ ᠬᠡᠯᠡᠵᠦ ᠴᠢᠳᠠᠬᠤ ᠦᠭᠡᠢ᠂ ᠬᠠᠮᠤᠭ ᠮᠥᠴᠢ ᠪᠡᠶᠡ ᠨᠢ ᠲᠠᠲᠠᠵᠤ ᠠᠮᠢᠰᠬᠤᠭᠠ ᠨᠢ ᠶᠡᠬᠡᠰᠴᠦ ᠠᠮᠢ ᠨᠢ ᠲᠡᠮᠡᠴᠡᠨ᠄《ᠡᠵᠢ ᠠ᠋ !》 ᠭᠡᠵᠦ ᠳᠠᠭᠤᠳᠠᠨᠠ᠃
ᠭᠡᠷ ᠲᠦ᠍ ᠪᠠᠢᠭᠠ ᠪᠦᠭᠦᠳᠡ ᠬᠡᠷᠦᠯᠳᠵᠢᠨ ᠦ᠌ ᠬᠣᠶᠠᠷ ᠲᠠᠯᠠ ᠳ᠋ᠤᠨᠢ ᠰᠠᠭᠤᠵᠤ ᠭᠠᠷ ᠳᠡᠭᠡᠷᠡ ᠪᠡᠨ ᠡᠷᠭᠦᠵᠦ ᠠᠶᠠᠲᠠᠢ ᠪᠠᠢᠯᠭᠠᠬᠤ ᠶ᠋ᠢ ᠬᠢᠴᠢᠶᠡᠵᠦ ᠶᠠᠳᠠᠨᠠ᠃ ᠪᠦᠭᠦᠳᠡ ᠨᠢᠯᠪᠤᠰᠤ ᠮᠡᠯᠮᠡᠷᠡᠭᠦᠯᠦᠨ᠂ ᠡᠬᠡ ᠨᠠᠮᠤᠭᠤᠨ ᠠᠮᠠᠨ ᠳ᠋ᠤᠨᠢ ᠰᠦ ᠬᠠᠯᠪᠠᠭᠠᠳᠠᠨ ᠪᠠᠯᠭᠤᠭᠤᠯᠵᠤ᠂ ᠡᠨᠳᠡ ᠲᠡᠨᠳᠡ ᠨᠢ ᠢᠯᠢᠵᠦ ᠲᠠᠢᠪᠤᠰᠢᠷᠠᠭᠤᠯᠬᠤ ᠶ᠋ᠢ ᠪᠦᠭᠦᠳᠡ ᠯᠡ ᠴᠢᠷᠮᠠᠢᠪᠠᠴᠤ ᠲᠤᠰᠠ ᠪᠣᠯᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠨᠡᠯᠢᠶᠡᠳ ᠤᠳᠠᠪᠠ᠃ ᠠᠮᠢᠰᠬᠤᠭᠠ ᠨᠢ ᠪᠦᠷ ᠴᠦ᠍ ᠣᠪᠣᠯᠵᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠨᠠᠮᠳᠠᠬᠤ ᠪᠠᠢᠳᠠᠯ ᠲᠠᠢ ᠪᠣᠯᠵᠤ᠂ ᠬᠥᠯ ᠭᠠᠷ ᠨᠢ ᠶᠡᠬᠡ ᠬᠦᠴᠦᠲᠡᠢ ᠲᠠᠲᠠᠯᠳᠤᠨ ᠰᠤᠯᠠᠷᠠᠵᠤ ᠪᠠᠢᠯᠠ᠃ ᠢᠩᠭᠢᠭᠰᠡᠨ ᠬᠥᠮᠦᠨ ᠶᠠᠭᠠᠬᠢᠳᠠᠭ ᠢ᠋ ᠡᠨᠳᠡ ᠪᠠᠢᠭᠰᠠᠳ ᠪᠣᠭᠣᠷᠴᠢ ᠠ᠋ᠴᠠ ᠪᠤᠰᠤᠳ ᠨᠢ ᠪᠦᠷ ᠮᠡᠳᠡᠬᠦ ᠲᠤᠯᠠ ᠲᠤᠩ ᠵᠣᠪᠠᠭᠤᠷᠢᠯᠠᠵᠠᠭᠠᠨᠠ᠃ ᠪᠣᠭᠣᠷᠴᠢ ᠴᠤ᠌ ᠭᠡᠯᠡ ᠵᠦᠩ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠮᠡᠳᠡᠷᠡᠵᠦ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠨᠢᠯᠪᠤᠰᠤ ᠮᠡᠯᠮᠡᠷᠡᠭᠦᠯᠦᠨᠡ᠃ ᠬᠡᠷᠦᠯᠦᠨᠵᠢᠨ ᠦ᠌ ᠪᠡᠶᠡ ᠨᠢ ᠰᠤᠯᠠᠷᠠᠵᠤ ᠠᠮᠢᠰᠬᠤᠭᠠ ᠨᠢ ᠪᠣᠭᠣᠨᠢᠰᠴᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠨᠢᠭᠡ ᠶᠡᠬᠡ ᠤᠷᠲᠤ ᠲᠠᠰᠤᠯᠳᠠᠩᠭᠤᠢ ᠭᠤᠨᠢᠭᠲᠠᠢ ᠠᠮᠢᠰᠬᠤᠭᠠ ᠲᠠᠲᠠᠵᠤ ᠠᠭᠠᠵᠢᠭᠤᠬᠠᠨ ᠭᠠᠷᠭᠠᠭᠰᠠᠨ ᠢ᠋ᠶ᠋ᠠᠨ ᠳᠠᠬᠢᠨ ᠠᠮᠢᠰᠬᠤᠭᠰᠠᠨ ᠦᠭᠡᠢ᠂ ᠪᠦᠬᠦ ᠪᠡᠶᠡ ᠪᠡᠨ ᠰᠤᠯᠠ ᠲᠠᠯᠪᠢᠪᠠ᠃ ᠪᠦᠭᠦᠳᠡ ᠤᠬᠢᠯᠠᠯᠳᠤᠯᠠ᠃