ᠬᠥᠯᠥᠭ ᠪᠠᠭᠠᠲᠤᠷ ᠪᠤᠭᠤᠷᠴᠢ - ᠪ᠂ ᠦᠯᠵᠡᠢᠰᠦ᠋ᠷᠦᠩ <ᠲᠡᠷᠢᠭᠦᠨ ᠪᠦᠯᠦᠭ - ᠠᠷᠪᠠᠨ ᠬᠣᠶᠠᠷ> Хүлэг баатар буурч - Б. Өлзийсүрэн <Тэргүүн бүлэг-12>
109ᠬᠣᠷᠸᠠ ᠲᠠᠢ ᠤᠴᠠᠷᠠᠨ ᠲᠠᠨᠢᠯᠴᠠᠵᠤ ᠪᠠᠶᠠᠷ ᠭᠤᠨᠢᠭ ᠠᠮᠰᠠᠭᠰᠠᠨ ᠲᠡᠷᠢᠭᠦᠨ ᠪᠦᠯᠦᠭ
ᠠᠷᠪᠠᠨ ᠬᠣᠶᠠᠷ
ᠠᠯᠤᠰ ᠤ᠋ᠨ ᠬᠠᠷᠭᠤᠢ ᠵᠤᠷᠠᠢᠨᠠ ᠯᠠ᠂ᠵᠤᠷᠠᠢᠨᠠ᠂
ᠠᠭᠲᠠᠨ ᠤ᠋ ᠬᠤᠷᠳᠤᠨ ᠢ᠋ᠶ᠋ᠠᠨ ᠠᠭᠰᠢᠭᠠᠨᠠ ᠯᠠ᠂ ᠠᠭᠰᠢᠭᠠᠨᠠ ᠯᠠ
ᠠᠮᠠᠷᠠᠭ ᠲᠡᠷᠡ ᠮᠢᠨᠢ ᠪᠣᠳᠣᠭᠳᠠᠨᠠ ᠯᠠ᠂ ᠪᠣᠳᠣᠭᠳᠠᠨᠠ ᠯᠠ
ᠠᠯᠳ᠋ᠠᠬᠠᠨ ᠪᠡᠶᠡ ᠮᠢᠨᠢ ᠣᠢᠷᠠᠲᠤᠨᠠ ᠯᠠ᠂ ᠣᠢᠷᠠᠲᠤᠨᠠ ᠯᠠ
ᠡᠪᠦᠯ ᠦ᠋ᠨ ᠨᠢᠭᠡᠨ ᠰᠠᠷᠠ ᠳᠤᠮᠳᠠ ᠪᠠᠨ ᠣᠷᠣᠯᠠ᠂ ᠴᠠᠰᠤ ᠣᠷᠣᠵᠤ ᠠᠳᠤᠭᠤᠨ ᠤ᠋ ᠤᠮᠳᠠ ᠲᠠᠢ ᠪᠣᠯᠤᠯᠠ᠂《ᠳᠠᠷᠠᠭᠠ ᠶ᠋ᠢᠨ ᠳᠣᠯᠣᠭᠠ ᠬᠣᠨᠣᠭ ᠡᠴᠡ ᠣᠲᠣᠷ ᠲᠤ᠌ ᠪᠠᠨ ᠭᠠᠷᠤᠨᠠ》 ᠭᠡᠵᠦ ᠳᠠᠭᠠᠭᠠᠮᠠᠯ ᠬᠡᠯᠡᠪᠡ᠃ ᠳᠠᠭᠠᠭᠠᠮᠠᠯ ᠲᠡᠢᠷ ᠭᠤᠴᠢᠨ ᠲᠠᠪᠤ ᠵᠢᠷᠭᠤᠭᠠᠨ ᠨᠠᠰᠤᠨ ᠤ᠋ ᠪᠦᠷ ᠠᠷᠬᠠᠭ ᠠᠳᠤᠭᠤᠴᠢᠨ᠃ ᠡᠬᠡᠨᠡᠷ ᠬᠣᠶᠠᠷ ᠪᠢᠴᠢᠬᠠᠨ ᠬᠡᠦᠬᠡᠳ ᠲᠡᠢ ᠪᠡᠨ ᠶᠠᠪᠤᠭᠠ᠃ ᠡᠨᠡ ᠠᠳᠤᠭᠤᠴᠢᠨ ᠤ᠋ ᠪᠠᠭ ᠪᠣᠭᠣᠷᠴᠢ ᠠ᠋ᠴᠠ ᠭᠠᠳᠠᠨᠠ ᠬᠣᠷᠢ ᠬᠦᠷᠦᠭᠡ ᠦᠭᠡᠢ ᠬᠣᠶᠠᠷ ᠵᠠᠯᠠᠭᠤ ᠲᠠᠢ᠃ ᠢᠩᠭᠢᠭᠡᠳ ᠪᠦᠭᠦᠳᠡ ᠳᠣᠯᠣᠭᠠᠨ ᠠᠮᠠ ᠪᠦᠯᠢ᠃ ᠡᠷᠡ ᠪᠦᠷᠢ ᠠᠷᠪᠠᠨ ᠬᠡᠳᠦᠨ ᠠᠵᠢᠷᠭᠠ ᠠᠳᠤᠭᠤ ᠲᠠᠢ᠃ ᠪᠣᠭᠣᠷᠴᠢ ᠭᠡᠬᠦ ᠳ᠋ᠦ᠍ ᠯᠡ ᠥᠪᠡᠷᠦᠨ ᠠᠷᠪᠠ ᠳᠡᠭᠡᠷᠡ ᠠᠬᠠ ᠳᠡᠭᠦᠦ ᠶ᠋ᠢᠨ ᠲᠠᠪᠤ ᠨᠡᠮᠡᠭᠳᠡᠵᠦ ᠠᠳᠤᠭᠤᠴᠢᠳ ᠪᠦᠭᠦᠳᠡ ᠨᠡᠢᠯᠡᠭᠡᠳ ᠵᠢᠷᠠ ᠰᠢᠬᠠᠮ ᠠᠵᠢᠷᠭᠠ ᠠᠳᠤᠭᠤ ᠲᠠᠢ᠂ ᠮᠢᠩᠭᠠ ᠬᠣᠶᠠᠷ ᠵᠠᠭᠤ ᠭᠠᠷᠤᠢ ᠰᠦᠷᠦᠭ ᠲᠡᠢ ᠪᠠᠢᠯᠠ᠃
ᠡᠯᠡ ᠪᠠᠭ ᠬᠣᠶᠠᠷ ᠵᠢᠭᠠᠬᠠᠨ ᠭᠡᠷ ᠲᠡᠢ᠃ ᠨᠢᠭᠡ ᠳ᠋ᠦ᠍ᠨᠢ ᠳᠠᠭᠠᠭᠠᠮᠠᠯ ᠤ᠋ᠨ ᠬᠢ᠂ ᠨᠥᠭᠦᠭᠡ ᠳ᠋ᠦ᠍ᠨᠢ ᠭᠤᠷᠪᠠᠨ ᠪᠢᠴᠢᠬᠠᠨ ᠠᠷᠠ᠃ ᠬᠡᠳᠦᠨ ᠲᠡᠮᠡᠭᠡᠨ ᠲᠡᠷᠭᠡ ᠲᠡᠢ᠂ ᠣᠢᠷᠠ ᠣᠢᠷᠬᠠᠭ ᠨᠡᠭᠦᠭᠰᠡᠭᠡᠷ ᠵᠡᠭᠦᠨ ᠲᠡᠰᠢ ᠬᠦᠷᠡᠩ ᠰᠢᠯᠢ ᠬᠡᠮᠡᠬᠦ ᠵᠡᠯᠢᠭᠦᠳ᠂ ᠡᠪᠡᠰᠦ ᠶᠡᠬᠡᠲᠡᠢ ᠬᠤᠸᠠ ᠬᠥᠪᠡᠭᠡ ᠳᠤᠮᠳᠠ ᠡᠪᠦᠯᠵᠢᠬᠦ ᠠᠵᠢ᠃ ᠥᠩᠭᠡᠷᠡᠭᠰᠡᠨ ᠡᠪᠦᠯ ᠡᠨᠡ ᠳᠣᠯᠣᠭᠠ ᠢᠩᠭᠢᠵᠦ ᠶᠠᠪᠤᠵᠤ ᠢᠵᠢᠯᠢ ᠳᠠᠰᠤᠯ ᠪᠣᠯᠵᠠᠢ᠃ ᠪᠣᠭᠣᠷᠴᠢ ᠬᠣᠶᠠᠷ ᠲᠠᠬᠢ ᠵᠢᠯ ᠳ᠋ᠡᠭᠡᠨ ᠶᠠᠪᠤᠭᠠ ᠲᠤᠯᠠ ᠳᠣᠬᠢ ᠠᠳᠤᠭᠤᠴᠢᠨ ᠪᠣᠯᠵᠤ ᠪᠤᠰᠤᠳ ᠨᠢ ᠴᠦ᠍ ᠮᠥᠨ ᠠᠳᠠᠯᠢ᠃ ᠡᠳᠡ ᠢᠩᠭᠢᠵᠦ ᠶᠠᠪᠤᠬᠤ ᠵᠠᠭᠤᠷᠠ ᠴᠢᠨᠣᠠ᠂ ᠦᠨᠡᠭᠡ ᠪᠣᠯᠤᠨ ᠬᠡᠭᠡᠷᠡ ᠶ᠋ᠢᠨ ᠵᠢᠵᠢᠭ ᠠᠷᠢᠶᠠᠲᠠᠨ ᠠᠮᠢᠲᠠᠨ᠂ ᠴᠠᠭᠠᠨ ᠵᠡᠭᠡᠷᠡ ᠠᠩᠨᠠᠨᠠ᠃ ᠪᠦᠭᠦᠳᠡ ᠵᠠᠷ ᠵᠡᠪᠰᠡᠭ ᠲᠡᠢ᠃ ᠠᠩ ᠣᠯᠵᠠᠪᠤᠷᠢ ᠶ᠋ᠢᠨ ᠶᠠᠪᠤᠭᠤᠯ ᠤ᠋ᠨ ᠠᠶᠠᠨᠴᠢᠨ᠂ ᠵᠢᠩᠴᠢᠳ᠂ ᠬᠤᠳᠠᠯᠳᠤᠭᠠᠴᠢᠨ ᠮᠠᠢᠮᠠᠢᠴᠢᠨ ᠲᠠᠢ ᠠᠷᠠᠯᠵᠢᠶᠠ ᠬᠢᠴᠢᠬᠡᠨᠡ᠃
ᠰᠥᠨᠢ ᠶ᠋ᠢᠨ ᠵᠣᠭᠰᠣᠭᠠᠯ ᠳᠡᠭᠡᠷᠡ ᠰᠠᠭᠠᠵᠤ ᠰᠤᠷᠤᠭᠰᠠᠨ ᠭᠡᠭᠦᠦ ᠪᠡᠨ ᠬᠣᠶᠠᠷ ᠰᠠᠭᠠᠭᠠᠳ ᠰᠠᠭᠠᠮᠠ ᠠᠪᠤᠨᠠ᠃ ᠡᠨᠡ ᠠᠵᠢᠯ ᠢ᠋ ᠮᠠᠨᠠᠭᠠᠨ ᠳ᠋ᠤ᠌ ᠭᠠᠷᠤᠭᠰᠠᠨ ᠬᠡᠨ ᠪᠣᠯᠪᠠᠴᠤ ᠠᠮᠵᠢᠭᠤᠯᠬᠤ ᠶᠣᠰᠣᠲᠠᠢ ᠪᠥᠯᠥᠭᠡ᠃ ᠳᠥᠷᠪᠡᠨ ᠡᠷᠡ ᠡᠭᠡᠯᠵᠢᠯᠡᠨ ᠮᠠᠨᠠᠭᠠᠨ ᠳ᠋ᠤ᠌ ᠭᠠᠷᠬᠤ ᠨᠢ ᠭᠤᠷᠪᠠ ᠥᠨᠵᠢᠨᠡ ᠭᠡᠰᠡᠨ ᠦᠭᠡ᠃ ᠰᠢᠭᠤᠷᠭᠠ ᠲᠠᠢ ᠰᠥᠨᠢ ᠬᠣᠶᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ᠂ ᠭᠤᠷᠪᠠ ᠪᠠᠷ ᠢ᠋ᠶ᠋ᠠᠨ ᠭᠠᠷᠬᠤ ᠴᠤ᠌ ᠪᠣᠢ᠃ ᠠᠳᠤᠭᠤᠴᠢᠨ ᠬᠥᠮᠦᠨ ᠪᠣᠯ ᠭᠣᠣᠯ ᠲᠥᠯᠥᠪ ᠠᠳᠤᠭᠤᠨ ᠤ᠋ ᠮᠢᠬᠠᠨ ᠬᠣᠭᠣᠯᠠ ᠲᠠᠢ᠃ ᠮᠠᠨᠠᠭᠠᠨ ᠳ᠋ᠤ᠌ ᠭᠠᠷᠬᠤ ᠰᠥᠨᠢ ᠣᠮᠠᠰᠤ᠂ ᠬᠢᠲᠠᠢ ᠢᠳᠡᠪᠡᠯ ᠲᠠᠭᠠᠷᠠᠬᠤ ᠦᠭᠡᠢ᠂ ᠢᠯᠴᠢᠲᠡᠢ ᠭᠡᠬᠦ᠃ ᠭᠡᠬᠦ ᠳ᠋ᠡᠭᠡᠨ ᠲᠡᠳᠡ ᠪᠤᠰᠤᠳ ᠬᠦᠨᠡᠰᠦᠨ ᠦ᠌ ᠵᠦᠢᠯ ᠢ᠋ ᠬᠢᠷᠢ ᠬᠢᠷᠢ ᠪᠡᠷ ᠢ᠋ᠶ᠋ᠡᠨ ᠲᠡᠭᠡᠭᠡᠵᠦ ᠶᠠᠪᠤᠭᠠ ᠠᠵᠢ᠃ ᠴᠠᠭ ᠰᠠᠢᠬᠠᠨ᠂ ᠥᠩᠲᠡᠢ ᠪᠣᠯ ᠠᠳᠤᠭᠤᠴᠢᠨ ᠰᠢᠭ᠋ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠵᠢᠷᠭᠠᠯᠲᠠᠢ ᠠᠵᠢᠯ ᠦᠭᠡᠢ ᠠᠵᠤ᠃ ᠳᠠᠭᠠᠭᠠᠮᠠᠯ ᠲᠡᠢᠷ ᠠᠭᠤᠵᠢᠭᠤ ᠠᠮᠤᠭᠤᠯᠠᠩ ᠬᠥᠮᠦᠨ ᠤᠴᠢᠷ ᠭᠤᠷᠪᠠᠨ ᠴᠡᠷᠢᠭ ᠦ᠋ᠨ ᠢ᠋ᠶ᠋ᠡᠨ《ᠵᠣᠪᠠᠯᠠᠩ》 ᠢ᠋ ᠰᠠᠢᠲᠤᠷ ᠦᠵᠡᠵᠦ᠂ ᠮᠠᠨᠠᠭᠠᠨ ᠠ᠋ᠴᠠ ᠪᠠᠭᠤᠭᠰᠠᠨ ᠡᠳᠦᠷ ᠳᠤᠷᠠᠲᠠᠢ ᠵᠦᠭ ᠲᠦ᠍ ᠨᠢ ᠶᠠᠪᠤᠭᠤᠯᠤᠨᠠ᠃ ᠪᠣᠭᠤᠷᠴᠢ ᠶ᠋ᠢᠨ ᠶᠠᠪᠤᠬᠤ ᠭᠠᠵᠠᠷ ᠬᠣᠯᠠ᠂ ᠪᠤᠰᠤᠳ ᠤ᠋ᠨ ᠣᠢᠷᠠ ᠣᠢᠷᠠᠬᠠᠨ᠂ ᠨᠤᠲᠤᠭ ᠵᠠᠭᠤᠷᠠ ᠪᠠᠨ᠃ ᠲᠡᠭᠡᠬᠦ ᠳ᠋ᠡᠭᠡᠨ ᠨᠢᠭᠡ ᠶ᠋ᠢ ᠶᠠᠪᠤᠭᠤᠯᠵᠤ ᠬᠣᠶᠠᠷ ᠢ᠋ ᠦᠯᠡᠳᠡᠭᠡᠨᠡ᠃ ᠪᠣᠭᠤᠷᠴᠢ ᠶ᠋ᠢᠨ ᠶᠠᠪᠤᠬᠤ ᠬᠡᠷᠡᠭ ᠲᠦ᠍ ᠪᠣᠯ ᠬᠣᠶᠠᠷ ᠬᠣᠨᠣᠭ ᠶᠠᠪᠤᠬᠤ ᠶ᠋ᠢ ᠵᠥᠪᠰᠢᠶᠡᠷᠡᠵᠦ᠄
— ᠨᠠᠬᠤ ᠭᠤᠸᠠᠢ ᠶ᠋ᠢᠨ ᠠᠷᠳᠠᠭ ᠲᠠᠷᠭᠤᠨ ᠮᠣᠷᠢᠳ ᠢ᠋ ᠭᠠᠭᠴᠠ ᠬᠦᠦ ᠨᠢ ᠡᠰᠡ ᠡᠳ᠋ᠯᠡᠪᠡᠯ ᠬᠡᠨ ᠪᠠᠷᠠᠬᠤ ᠪᠣᠢ᠂ ᠬᠣᠶᠠᠷ ᠢ᠋ᠶ᠋ᠠᠷ᠂ ᠭᠤᠷᠪᠠ ᠪᠠᠷ ᠬᠣᠣᠰᠯᠠᠵᠤ ᠤᠨᠤᠭᠠᠳ ᠳᠠᠪᠬᠢ᠂ ᠳᠠᠪᠬᠢ ᠭᠡᠵᠦ ᠬᠣᠱᠣᠩᠨᠠᠨᠠ᠃ ᠢᠩᠭᠢᠵᠦ ᠠᠳᠤᠭᠤ ᠴᠤᠭᠯᠠᠷᠠᠭᠰᠠᠨ ᠴᠠᠭ ᠠ᠋ᠴᠠ ᠪᠣᠭᠤᠷᠴᠢ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠳᠠᠪᠬᠢᠵᠤ᠂
ᠴᠣᠬᠣᠷ ᠮᠣᠷᠢ ᠨᠢ ᠴᠣᠭᠬᠢᠶᠠᠲᠠᠢ
ᠴᠢᠨᠤᠨ ᠬᠥᠨᠵᠢᠯᠡ ᠳᠡᠯᠭᠡᠭᠡᠲᠡᠢ
ᠴᠣᠬᠣᠮ ᠬᠦ᠌ ᠰᠡᠳᠬᠢᠯ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠣᠯ
ᠴᠣᠯᠮᠣᠨ ᠭᠠᠷᠭᠠᠭᠠᠳ ᠮᠣᠷᠳᠠᠨᠠ ᠳᠠ
ᠦᠷᠢᠶᠡ ᠮᠣᠷᠢ ᠨᠢ ᠴᠣᠭᠭᠢᠶᠠ ᠲᠠᠢ
ᠦᠨᠡᠭᠡᠨ ᠬᠥᠨᠵᠢᠯᠡ ᠳᠡᠯᠭᠡᠭᠡᠲᠡᠢ
ᠦᠨᠡᠨᠬᠦ ᠰᠡᠳᠬᠢᠯ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠣᠯ
ᠦᠦᠷ ᠴᠠᠢᠯᠭᠠᠭᠠᠳ ᠮᠣᠷᠳᠠᠨᠠ ᠳᠠ ᠭᠡᠵᠦ ᠳᠠᠭᠤᠯᠠᠩᠬᠠᠨ ᠬᠠᠲᠠᠷᠢᠭᠤᠯᠵᠤ᠂ ᠡᠪᠦᠯ ᠦ᠋ᠨ ᠡᠬᠢᠨ ᠰᠠᠷᠠ ᠶ᠋ᠢᠨ ᠳᠤᠮᠳᠠᠭᠤᠷ ᠭᠤᠷᠪᠠᠳᠠᠬᠢ ᠪᠠᠨ ᠬᠡᠷᠦᠯᠳᠵᠢᠨ ᠳ᠋ᠦ᠍ ᠵᠣᠷᠢᠯᠠ᠃ ᠣᠴᠢᠬᠤ ᠪᠦᠷᠢ ᠬᠡᠷᠦᠯᠳᠵᠢᠨ ᠦ᠌ ᠬᠥᠯ ᠨᠢ ᠬᠦᠨᠳᠦᠷᠡᠴᠦ᠂ ᠪᠠᠷᠠ ᠨᠢ ᠥᠰᠦᠭᠡᠳ ᠦᠷᠡ ᠶ᠋ᠢᠨ ᠵᠤᠯᠠᠢ ᠦᠨᠦᠷᠯᠡᠬᠦ ᠵᠠᠯᠠᠭᠤ ᠡᠷᠡ ᠶ᠋ᠢᠨ ᠰᠡᠳᠬᠢᠯ ᠬᠥᠭᠡᠷᠦᠦ᠃
— ᠠᠳᠤᠭᠤᠴᠢᠳ ᠪᠢᠳᠡ ᠠᠳᠤᠭᠤ ᠪᠠᠨ ᠠᠪᠤᠭᠠᠳ ᠠᠯᠤᠰ ᠤ᠋ᠨ ᠣᠲᠣᠷ ᠲᠤ᠌ ᠳᠠᠷᠠᠭᠠ ᠶ᠋ᠢᠨ ᠳᠣᠯᠣᠭᠠ ᠬᠣᠨᠣᠭ ᠠ᠋ᠴᠠ ᠶᠠᠪᠤᠨᠠ ᠭᠡᠵᠦ ᠳᠠᠭᠠᠭᠠᠮᠠᠯ ᠮᠠᠨᠠᠢ ᠬᠡᠯᠡᠭᠰᠡᠨ᠃ ᠳᠠᠰᠢ ᠪᠠᠨ ᠬᠣᠯᠠ ᠶᠠᠪᠤᠴᠢᠬᠠᠬᠤ ᠪᠠᠷ ᠮᠠᠨᠠᠭᠠᠨ ᠤ᠋ ᠡᠭᠡᠯᠵᠢ ᠳᠤᠮᠳᠠ ᠪᠠᠭᠲᠠᠵᠤ ᠶᠠᠪᠤᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠬᠤ ᠨᠢ ᠭᠡᠵᠦ ᠪᠤᠭᠤᠷᠴᠢ ᠲᠡᠭᠦᠨ ᠳ᠋ᠡᠭᠡᠨ ᠭᠤᠨᠢᠭᠲᠠᠢ ᠤᠴᠢᠷᠯᠠᠨ ᠬᠡᠯᠡᠪᠡ᠃
— ᠵᠠ ᠶᠠᠭᠠᠬᠢᠬᠤᠪ ᠳᠠ᠃ ᠠᠵᠢᠯ ᠤ᠋ᠨ ᠪᠣᠯᠤᠮᠵᠢ᠂ ᠵᠠᠪ ᠴᠢᠯᠥᠭᠡ ᠲᠡᠢᠮᠦ ᠡᠴᠡ ᠬᠣᠢᠰᠢ ᠨᠢᠭᠡ ᠶᠡᠬᠡ ᠶᠠᠭᠠᠷᠠᠭᠠᠳ ᠶᠠᠭᠤ ᠬᠢᠬᠦᠪ᠃ ᠪᠢ ᠬᠡᠦᠬᠡᠳ ᠢ᠋ᠶ᠋ᠡᠨ ᠳᠦᠷᠦᠭᠦᠯᠦᠭᠡᠳ ᠭᠤᠷᠪᠠᠭᠤᠯᠠ ᠪᠠᠨ ᠪᠣᠯᠤᠭᠠᠳ ᠢᠷᠡᠬᠦ ᠶ᠋ᠢᠨ ᠴᠠᠭ ᠲᠤ᠌ ᠴᠢ ᠪᠢᠳᠡ ᠬᠣᠶᠠᠷ ᠤ᠋ᠨ ᠠᠮᠢᠳᠤᠷᠠᠯ ᠤ᠋ᠨ ᠵᠠᠮ ᠨᠢᠭᠡᠳᠬᠦ ᠪᠣᠢᠠ᠃ ᠲᠡᠷᠡ ᠴᠠᠭ ᠲᠤ᠌ ᠴᠢ ᠠᠪᠤ ᠡᠵᠢ ᠳ᠋ᠡᠭᠡᠨ ᠬᠡᠯᠡᠵᠦ ᠨᠠᠮᠠ ᠶ᠋ᠢ ᠠᠪᠠᠴᠢᠭᠠᠷᠠᠢ! ᠭᠡᠪᠡ᠃
ᠦᠦᠷ ᠦ᠋ᠨ ᠭᠡᠭᠡ ᠴᠤᠬᠤᠢᠬᠤ ᠲᠡᠳᠦᠢ ᠦᠨᠡᠭᠡᠨ ᠬᠠᠷᠠᠩᠭᠤᠢ ᠪᠠᠷ ᠮᠣᠷᠳᠠᠭᠠᠳ ᠵᠢᠷᠢᠢᠨ ᠲᠣᠷᠣᠢᠨ ᠦᠵᠡᠭᠳᠡᠬᠦ᠂ ᠦᠭᠡᠢ ᠲᠡᠳᠦᠢ ᠪᠤᠭᠤᠷᠴᠢ ᠶ᠋ᠢᠨ ᠠᠷᠤ ᠠ᠋ᠴᠠ ᠮᠣᠷᠳᠠᠭᠤᠯᠵᠤ ᠭᠠᠷᠭᠠᠭᠰᠠᠨ ᠬᠡᠷᠦᠯᠳᠵᠢᠨ ᠨᠢᠯᠪᠤᠰᠤ ᠳᠤᠰᠤᠯᠠᠭᠤᠯᠤᠨ ᠦᠯᠡᠳᠡᠪᠡ᠃ ᠰᠡᠳᠬᠢᠯ ᠦ᠋ᠨ ᠬᠣᠯᠪᠣᠭᠠᠲᠠᠢ ᠪᠣᠯᠤᠭᠰᠠᠨ ᠬᠠᠢᠷᠠᠲᠠᠢ ᠲᠣᠮᠣᠭᠠ ᠦᠭᠡᠢᠬᠡᠨ ᠬᠠᠷᠠ ᠬᠦᠦ ᠪᠡᠨ ᠰᠠᠨᠠᠵᠤ ᠲᠡᠷᠡ ᠪᠡᠷ ᠨᠠᠮᠤᠷ ᠬᠥᠳᠡᠭᠡ ᠬᠡᠭᠡᠷᠡ ᠶ᠋ᠢᠨ ᠪᠡᠯᠴᠢᠭᠡᠷ ᠲᠦ᠍ ᠬᠣᠨᠢ ᠮᠠᠯ ᠳ᠋ᠠᠭᠠᠨ ᠶᠠᠪᠤᠬᠤ ᠳ᠋ᠠᠭᠠᠨ ᠵᠡᠭᠦᠨ ᠬᠣᠢᠲᠤ ᠵᠦᠭ ᠢ᠋ ᠰᠢᠷᠳᠡᠨ᠂
ᠬᠠᠳᠠᠲᠤ ᠬᠤᠸᠠ ᠶ᠋ᠢᠨ ᠣᠷᠣᠢ ᠪᠠᠷ
ᠬᠠᠢᠯᠠᠰᠤ ᠶᠠᠭᠤᠨ ᠳ᠋ᠠᠭᠠᠨ ᠤᠷᠭᠤᠨᠠ ᠪᠣᠢ
ᠬᠠᠢᠷᠠᠲᠠᠢ ᠬᠣᠩᠭᠣᠷ ᠴᠢᠮᠠᠲᠠᠢ ᠪᠠᠨ
ᠬᠠᠪᠤᠷ ᠤ᠋ᠨ ᠰᠠᠷᠠ ᠳ᠋ᠠᠭᠠᠨ ᠠᠭᠤᠯᠵᠠᠨᠠ ᠳᠠ
ᠪᠦᠳᠦᠭᠦᠨ ᠮᠣᠳᠣᠨ ᠤ᠋ ᠮᠥᠴᠢᠷ ᠳᠡᠭᠡᠷᠡ
ᠪᠦᠷᠭᠦᠳ ᠰᠠᠭᠤᠭᠠᠳ ᠰᠦᠮᠡᠢᠵᠦ ᠪᠠᠢᠨᠠ
ᠪᠦᠷᠢᠨ ᠡᠷᠬᠡᠲᠦ ᠴᠢᠮᠠ ᠲᠠᠢ ᠪᠠᠨ
ᠪᠦᠭᠦᠳᠡ ᠶ᠋ᠢ ᠵᠥᠪᠯᠡᠭᠡᠳ ᠶᠠᠷᠢᠮᠠᠷ ᠪᠠᠢᠨᠠ ᠭᠡᠵᠦ ᠠᠶᠠᠯᠠᠭᠤᠯᠤᠨ ᠶᠠᠪᠤᠭᠰᠠᠨ ᠨᠢ ᠰᠠᠨᠠᠭᠳᠠᠵᠤ᠂《ᠬᠠᠷᠢᠨ ᠴᠤ᠌ ᠪᠣᠭᠣᠷᠴᠢ ᠮᠢᠨᠢ ᠲᠡᠷᠡ ᠬᠣᠯᠠ ᠭᠠᠵᠠᠷ ᠠ᠋ᠴᠠ ᠨᠠᠮᠤᠷ᠂ ᠡᠪᠦᠯ ᠬᠡᠳᠦ ᠬᠡᠳᠦ ᠴᠦ᠍ ᠢᠷᠡᠴᠢᠬᠡᠯᠡ᠃ ᠬᠠᠷᠢᠨ ᠪᠢ ᠬᠡᠦᠬᠡᠳ ᠢ᠋ᠶ᠋ᠡᠨ ᠲᠥᠷᠥᠭᠦᠯᠵᠦ ᠪᠡᠶᠡ ᠪᠡᠨ ᠬᠥᠩᠭᠡᠷᠡᠭᠦᠯᠦᠭᠡᠳ ᠬᠣᠶᠠᠷ ᠮᠣᠷᠢ ᠬᠣᠣᠰᠯᠠᠨ ᠳᠠᠪᠬᠢᠵᠤ᠂ ᠲᠡᠷᠡ ᠭᠤᠷᠪᠠᠨ ᠪᠦᠷᠢᠳᠦ ᠶ᠋ᠢᠨ ᠳᠤᠮᠳᠠ ᠪᠦᠷᠢᠳᠦ ᠳ᠋ᠦ᠍ ᠨᠤᠲᠤᠭᠲᠠᠢ ᠨᠠᠬᠤ ᠶ᠋ᠢᠨ ᠬᠢ ᠶ᠋ᠢ ᠰᠤᠷᠠᠭᠯᠠᠭᠠᠳ ᠨᠢᠭᠡ ᠡᠳᠦᠷ ᠳᠠᠪᠬᠢᠭᠠᠳ ᠣᠴᠢᠬᠤ ᠶᠤᠮᠰᠠᠨ᠃ ᠲᠡᠭᠡᠪᠡᠯ ᠪᠤᠭᠤᠷᠴᠢ ᠶ᠋ᠢᠨ ᠠᠪᠤ ᠡᠵᠢ ᠬᠣᠶᠠᠷ ᠨᠢ ᠶᠠᠭᠤ ᠭᠡᠬᠦ ᠪᠣᠯ?》 ᠭᠡᠵᠦ ᠪᠣᠳᠣᠭᠳᠠᠨ ᠰᠡᠳᠬᠢᠯ ᠠᠭᠤᠵᠢᠷᠠᠨ ᠢᠨᠢᠶᠡᠮᠰᠦᠭᠯᠡᠪᠡ᠃ ᠪᠤᠭᠤᠷᠴᠢ ᠴᠦ᠍ ᠦᠨᠡᠭᠡᠨ ᠬᠠᠷᠠᠩᠭᠤᠢ ᠶ᠋ᠢᠨ ᠳᠤᠮᠳᠠ ᠠᠯᠢ ᠲᠦᠷᠦᠭᠦᠦ ᠤᠮᠪᠠᠨ ᠠᠯᠠᠭᠠ ᠪᠣᠯᠤᠭᠰᠠᠨ ᠪᠢᠯᠡ᠃ ᠦᠦᠷ ᠦ᠋ᠨ ᠵᠢᠪᠠᠷ ᠲᠤ᠌ ᠵᠢᠬᠡᠭᠦᠴᠡᠭᠰᠡᠨ ᠬᠡᠷᠤᠯᠦᠨᠵᠢᠨ ᠭᠡᠷ ᠲᠦ᠍ ᠪᠡᠨ ᠣᠷᠣᠯᠠ᠃