ᠬᠥᠯᠥᠭ ᠪᠠᠭᠠᠲᠤᠷ ᠪᠤᠭᠤᠷᠴᠢ - ᠪ᠂ ᠦᠯᠵᠡᠢᠰᠦ᠋ᠷᠦᠩ <ᠲᠡᠷᠢᠭᠦᠨ ᠪᠦᠯᠦᠭ - ᠠᠷᠪᠠᠨ ᠨᠢᠭᠡ> Хүлэг баатар буурч - Б. Өлзийсүрэн <Тэргүүн бүлэг-11>
62ᠬᠣᠷᠸᠠ ᠲᠠᠢ ᠤᠴᠠᠷᠠᠨ ᠲᠠᠨᠢᠯᠴᠠᠵᠤ ᠪᠠᠶᠠᠷ ᠭᠤᠨᠢᠭ ᠠᠮᠰᠠᠭᠰᠠᠨ ᠲᠡᠷᠢᠭᠦᠨ ᠪᠦᠯᠦᠭ
ᠠᠷᠪᠠᠨ ᠨᠢᠭᠡ
ᠠᠷᠪᠠᠨ ᠨᠢᠭᠡ
ᠠᠮᠠᠷᠠᠭ ᠤ᠋ᠨ ᠰᠡᠳᠬᠢᠯ ᠠᠯᠲᠠᠨ ᠠ᠋ᠴᠠ ᠦᠨᠡᠲᠡᠢ
ᠬᠣᠩᠭᠣᠷ ᠤ᠋ᠨ ᠰᠡᠳᠬᠢᠯ ᠬᠣᠷᠭᠣᠢ ᠠ᠋ᠴᠠ ᠥᠩᠭᠡᠲᠡᠢ
ᠨᠠᠮᠤᠷ ᠤ᠋ᠨ ᠠᠯᠲᠠᠯᠢᠭ ᠰᠢᠷᠠ ᠥᠩᠭᠡ ᠲᠠᠯᠠ ᠬᠡᠭᠡᠷᠡ ᠶ᠋ᠢ ᠨᠥᠮᠥᠷᠴᠦ᠂ ᠲᠣᠭᠣᠰᠣᠨᠴᠢᠷ ᠰᠠᠷᠠᠯ ᠤᠨᠢᠶᠠᠷ ᠳᠤᠮᠳᠠ ᠬᠤᠸᠠ ᠬᠥᠪᠦᠭᠡᠳ ᠪᠦᠳᠡᠭᠢᠷᠡᠨ ᠠᠭᠠᠳ ᠠᠯᠤᠰ ᠤ᠋ᠨ ᠴᠡᠩᠬᠡᠷ ᠠᠭᠤᠯᠠᠰ ᠲᠩᠷᠢ ᠶ᠋ᠢᠨ ᠬᠠᠶᠠᠭᠠ ᠢᠯᠭᠠᠷᠠᠬᠤ ᠲᠡᠳᠦᠢ ᠦᠵᠡᠭᠳᠡᠨᠡ᠃ ᠪᠣᠭᠣᠷᠴᠢ ᠭᠡᠷ ᠡᠴᠡ ᠭᠠᠷᠴᠤ ᠡᠷᠳᠡᠨᠢ ᠠᠭᠤᠯᠠ ᠶ᠋ᠢᠨ ᠪᠠᠷᠠᠭᠤᠨ ᠬᠣᠢᠲᠤ ᠬᠤᠸᠠ ᠳ᠋ᠠᠬᠢ ᠲᠠᠨᠢᠳᠠᠭ ᠨᠥᠬᠥᠷ ᠦ᠋ᠨ ᠳ᠋ᠡᠭᠡᠨ ᠢᠷᠡᠵᠦ ᠬᠣᠨᠣᠭᠠᠳ《ᠠᠯᠳᠠᠭᠰᠠᠨ》 ᠬᠣᠶᠠᠷ ᠮᠣᠷᠢ ᠪᠠᠨ ᠠᠪᠴᠤ ᠬᠥᠲᠥᠯᠦᠨ ᠥᠷᠯᠥᠭᠡ ᠡᠷᠲᠡᠯᠡᠨ ᠬᠡᠷᠦᠯᠦᠨ ᠭᠣᠣᠯ ᠤ᠋ᠨ ᠬᠣᠢᠲᠤ ᠪᠡᠶᠡ ᠪᠠᠷᠢᠵᠤ ᠪᠠᠷᠠᠭᠤᠨ ᠵᠦᠭ ᠵᠠᠮᠨᠠᠭᠰᠠᠭᠠᠷ ᠭᠤᠷᠪᠠᠨ ᠲᠠᠷᠭᠤᠨ ᠠᠭᠤᠯᠠ ᠶ᠋ᠢᠨ ᠤᠮᠠᠷᠠ ᠡᠲᠡᠭᠡᠳ ᠦ᠋ᠨ ᠳᠠᠷᠠᠰᠤᠲᠤ ᠬᠥᠨᠳᠡᠢ ᠪᠡᠷ ᠠᠢᠯ ᠮᠠᠯ ᠤ᠋ᠨ ᠪᠠᠷᠠ ᠠᠵᠢᠨ ᠰᠠᠵᠢᠯᠠᠭᠤᠯᠤᠨ ᠭᠠᠯᠭᠢᠭᠤᠯᠤᠩᠬᠠᠨ ᠶᠠᠪᠤᠨᠠ᠃ ᠡᠳᠦᠭᠡ ᠵᠠᠯᠠᠭᠤ ᠡᠷᠡ ᠶ᠋ᠢᠨ ᠰᠡᠳᠬᠢᠯ ᠲᠡᠰᠴᠦ ᠶᠠᠳᠠᠨ ᠵᠣᠷᠢᠭᠰᠠᠨ ᠬᠡᠷᠡᠭ᠂ ᠬᠦᠰᠡᠭᠰᠡᠨ ᠬᠦᠰᠡᠯ ᠳ᠋ᠡᠭᠡᠨ ᠠᠪᠲᠠᠨᠠ᠃
ᠳᠡᠷᠡᠰᠦᠨ ᠦ᠌ ᠲᠣᠯᠣᠭᠠᠢ ᠨᠠᠢᠭᠤᠨ ᠶᠣᠵᠣᠭᠣᠷ ᠤ᠋ᠨ ᠰᠠᠬᠤᠯᠠᠭ ᠡᠪᠡᠰᠦ᠂ ᠭᠣᠣᠯ ᠤ᠋ᠨ ᠬᠥᠪᠡᠭᠡ ᠨᠣᠭᠣᠭᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠤᠯᠠ ᠲᠡᠭᠦᠪᠡᠷ ᠮᠠᠯ ᠣᠯᠠᠨ ᠪᠡᠯᠴᠢᠬᠦ ᠠᠵᠢ᠃
ᠳᠠᠷᠠᠰᠤ ᠪᠤᠲᠠ ᠥᠩᠭᠡᠷᠡᠬᠦ ᠬᠢᠲᠡᠯᠡ ᠣᠢᠷᠠᠬᠠᠨ ᠨᠢᠭᠡᠨ ᠠᠢᠯ ᠭᠡᠷ ᠨᠢᠳᠦᠨ ᠳ᠋ᠦ᠍ ᠲᠣᠰᠴᠤ ᠬᠦᠰᠡᠯ ᠰᠡᠳᠬᠢᠯ ᠦ᠋ᠨ ᠲᠠᠨᠢᠯ ᠳᠣᠲᠣᠨᠣ ᠥᠩᠭᠡ ᠳᠦᠷᠢ ᠦᠵᠡᠭᠳᠡᠵᠦ ᠰᠠᠨᠠᠭᠠ ᠠᠮᠠᠷᠠᠪᠠ᠃ ᠶᠠᠭᠠᠬᠢᠬᠤ ᠠᠷᠭᠠ ᠦᠭᠡᠢ ᠬᠡᠷᠦᠯᠳᠵᠢᠨ ᠦ᠌ ᠬᠢ᠃ ᠠᠳᠤᠭᠤ ᠨᠢ ᠶᠠᠭᠠᠬᠢᠬᠤ ᠠᠷᠭᠠ ᠦᠭᠡᠢ ᠶᠣᠰᠣᠭᠠᠷ᠂ ᠬᠣᠩᠭᠣᠷ ᠠᠵᠢᠷᠭᠠ ᠥᠭᠡᠳᠡ ᠡᠴᠡ ᠨᠢ ᠰᠣᠷᠲᠣᠢᠨ ᠬᠠᠷᠠᠵᠤ ᠬᠣᠯᠠ ᠶ᠋ᠢᠨ ᠲᠠᠨᠢᠯ ᠲᠠᠢ ᠪᠠᠨ ᠤᠴᠠᠷᠠᠨ ᠮᠡᠨᠳᠦᠯᠡᠬᠦ ᠯᠦ᠍ᠭᠡ ᠨᠢᠭᠡᠨ᠃ ᠪᠤᠭᠤᠷᠴᠢ《ᠰᠠᠢᠨ ᠪᠠᠢᠨᠠ ᠤᠤ? ᠬᠣᠩᠭᠣᠷ ᠠᠵᠢᠷᠭᠠ ᠮᠢᠨᠢ᠂ ᠰᠠᠭᠠᠷᠠᠯ ᠪᠠᠢᠳᠠᠰᠤ ᠴᠢᠨᠢ ᠴᠢᠮᠠ ᠶ᠋ᠢ ᠰᠠᠨᠠᠭᠠᠳ ᠯᠠ》 ᠭᠡᠵᠦ ᠠᠮᠠᠨ ᠳ᠋ᠠᠭᠠᠨ ᠱᠣᠭ ᠦᠭᠡ ᠬᠡᠯᠡᠵᠦ ᠬᠣᠱᠣᠩᠨᠠᠨ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠢᠨᠢᠶᠡᠪᠡ᠃
《ᠬᠡᠷᠦᠯᠳᠵᠢᠨ ᠪᠠᠢᠭᠠ ᠪᠣᠯᠪᠠᠤ?》 ᠭᠡᠳᠡᠭ ᠠᠰᠠᠭᠤᠯᠲᠠ ᠰᠡᠳᠬᠢᠯ ᠵᠣᠪᠠᠭᠠᠬᠤ ᠠᠵᠢ᠃《ᠪᠠᠢᠬᠤ ᠦᠭᠡᠢ ᠬᠠᠢᠴᠢᠬᠤ( ᠬᠠᠮᠢᠭᠠ ᠣᠴᠢᠬᠤ) ᠪᠣᠢ ᠳᠠ᠃ ᠤᠭ ᠨᠢ ᠬᠡᠭᠡᠷᠡ ᠬᠥᠳᠡᠭᠡ ᠣᠯᠵᠤ ᠠᠭᠤᠯᠵᠠᠶᠠ ᠭᠡᠵᠦ ᠪᠣᠳᠣᠭᠰᠠᠨ ᠶᠤᠮ᠃ ᠬᠠᠮᠢᠭᠠ ᠴᠤ᠌ ᠭᠡᠵᠦ ᠡᠷᠢᠵᠦ ᠶᠠᠪᠤᠬᠤ ᠪᠣᠢ? ᠭᠡᠷ ᠣᠷᠣᠨ ᠨᠢ ᠪᠠᠢᠵᠤ ᠪᠠᠢᠬᠤ ᠳ᠋ᠤ᠌᠁》 ᠭᠡᠵᠦ ᠵᠣᠷᠢᠭ ᠰᠢᠢᠳᠦᠨ ᠣᠴᠢᠪᠠ᠃ ᠡᠬᠡ ᠨᠢ ᠭᠡᠭᠦᠨ ᠵᠠᠯᠠᠨ ᠳᠡᠭᠡᠷᠡ ᠳᠡᠭᠦᠦ ᠲᠡᠢ ᠨᠢ ᠬᠣᠶᠠᠭᠤᠯᠠ ᠭᠡᠭᠦᠦ ᠪᠡᠨ ᠰᠠᠭᠠᠵᠤ ᠪᠠᠢᠪᠠ᠃ ᠬᠦᠷᠴᠦ ᠣᠴᠢᠵᠤ ᠮᠣᠷᠢᠨ ᠳᠡᠭᠡᠷᠡ ᠡᠴᠡ ᠪᠡᠨ ᠮᠡᠨᠳᠦᠯᠡᠪᠡ᠃ ᠬᠡᠷᠦᠯᠳᠵᠢᠨ ᠦ᠌ ᠡᠵᠢ ᠨᠠᠮᠤᠭᠤᠨ ᠰᠠᠷᠠᠪᠴᠢᠯᠠᠨ ᠬᠠᠷᠠᠭᠠᠳ ᠥᠭᠡᠳᠡ ᠡᠴᠡ ᠨᠢ ᠮᠡᠨᠳᠦᠯᠡᠵᠦ᠄
— ᠪᠣᠭᠣᠷᠴᠢ ᠤᠤ ᠳᠠ? ᠣᠷᠣ᠂ ᠣᠷᠣ᠂ ᠭᠡᠷ ᠲᠦ᠍ ᠣᠷᠣᠵᠤ ᠪᠠᠢ ᠬᠦᠦ ᠮᠢᠨᠢ᠃ ᠪᠢ ᠬᠣᠶᠠᠷ ᠭᠡᠭᠦᠦ ᠰᠠᠭᠠᠭᠠᠳ ᠣᠷᠣᠯᠠ ᠭᠡᠵᠦ ᠶᠡᠬᠡᠳᠡ ᠡᠯᠢᠭᠡᠰᠡᠭ ᠬᠡᠯᠡᠪᠡ᠃
ᠪᠣᠭᠣᠷᠴᠢ ᠭᠡᠷ ᠲᠦ᠍ ᠣᠷᠣᠯᠠ᠃ ᠬᠡᠷᠤᠯᠤᠨᠵᠢᠨ ᠤ᠋ ᠳ᠋ᠤ᠌ ᠵᠤᠨ ᠣᠢᠷᠠ ᠬᠡᠳᠦ ᠬᠣᠨᠣᠬᠤ ᠳ᠋ᠠᠭᠠᠨ ᠬᠣᠶᠠᠷ ᠤᠳᠠᠭᠠ ᠣᠷᠣᠭᠰᠠᠨ᠃ ᠡᠬᠢᠯᠡᠭᠡᠳ ᠬᠡᠷᠤᠯᠤᠨᠵᠢᠨ ᠨᠢᠭᠡ ᠡᠳᠦᠷ《ᠮᠠᠨᠠᠢᠬᠢ ᠪᠠᠷ ᠣᠷᠣ!》 ᠭᠡᠵᠦ ᠠᠪᠠᠴᠢᠭᠰᠠᠨ᠃ ᠲᠡᠷᠡ ᠨᠢ ᠡᠬᠡ ᠳ᠋ᠡᠭᠡᠨ ᠪᠣᠭᠤᠷᠴᠢ ᠶ᠋ᠢ ᠦᠵᠡᠭᠦᠯᠬᠦ ᠭᠡᠰᠡᠨ ᠰᠠᠨᠠᠭᠠ ᠪᠠᠢᠵᠠᠢ᠃ ᠳᠠᠷᠠᠭᠠ ᠨᠢ ᠬᠣᠶᠠᠷ ᠲᠡᠮᠡᠭᠡ ᠪᠡᠨ ᠲᠡᠳᠡᠨ ᠦ᠌ ᠦᠨᠡᠰᠦᠨ ᠳᠡᠭᠡᠷᠡ ᠪᠠᠢᠬᠤ ᠳ᠋ᠤ᠌ ᠨᠢ ᠣᠴᠢᠭᠠᠳ᠂ ᠬᠡᠷᠤᠯᠤᠨᠵᠢᠨ ᠴᠤ᠌ ᠲᠠᠯᠠᠯᠠᠨ ᠨᠢᠭᠡ ᠣᠷᠣᠭᠰᠠᠨ᠃ ᠡᠨᠡ ᠨᠢ ᠲᠡᠭᠦᠨ ᠳ᠋ᠦ᠍ ᠡᠨᠡ ᠭᠡᠷ ᠣᠷᠣᠨ ᠢ᠋ ᠲᠠᠨᠢᠯ ᠳᠣᠲᠣᠨᠣ ᠪᠣᠯᠭᠠᠵᠠᠢ᠃ ᠣᠳᠣ ᠪᠣᠯ ᠲᠤᠯᠭᠠᠨ ᠤ᠋ ᠬᠣᠢᠲᠤ ᠲᠠᠯᠠ ᠳ᠋ᠤ᠌ ᠸᠠᠭᠠᠷᠤᠨ ᠰᠠᠪᠠᠨ ᠳ᠋ᠤ᠌ ᠬᠢᠭᠰᠡᠨ ᠠᠢᠷᠠᠭ᠂ ᠵᠢᠵᠢᠭ ᠰᠢᠷᠭᠤᠭᠤᠯᠤᠭᠠ ᠳᠡᠭᠡᠭᠦᠷ ᠠᠶᠠᠭᠠ ᠱᠠᠭᠠᠵᠠᠩ ᠪᠠᠢᠨᠠ᠃ ᠪᠣᠭᠤᠷᠴᠢ ᠠᠶᠠᠭᠠ ᠠᠪᠴᠤ ᠠᠶᠠᠭᠠ ᠠᠢᠷᠠᠭ ᠠᠶᠠᠭᠠᠯᠠᠨ ᠤᠤᠭᠤᠵᠤ ᠰᠠᠭᠤᠲᠠᠯᠠ ᠬᠡᠷᠤᠯᠤᠨᠵᠢᠨ ᠤ᠋ ᠡᠵᠢ ᠣᠷᠣᠵᠤ ᠢᠷᠡᠭᠡᠳ᠄
— ᠠᠰᠢᠭᠦᠢ ᠳᠡ᠂ ᠠᠢᠷᠠᠭ ᠤᠤᠭᠤ᠂ ᠤᠤᠭᠤ᠃ ᠬᠣᠯᠠ ᠭᠠᠵᠠᠷ ᠠ᠋ᠴᠠ ᠥᠯᠥᠰᠴᠦ ᠤᠮᠳᠠᠭᠠᠰᠴᠤ ᠢᠷᠡᠭᠡ ᠪᠢᠵᠡ᠃ ᠪᠢ ᠮᠢᠬᠠ ᠴᠢᠨᠠᠵᠤ ᠥᠭᠭᠦᠶᠡ᠃ ᠥᠨᠥᠳᠥᠷ ᠮᠠᠨᠠᠢᠬᠢ ᠬᠣᠨᠢ ᠲᠥᠬᠥᠭᠡᠷᠦᠭᠰᠡᠨ᠃ ᠰᠠᠢᠨ ᠬᠥᠮᠦᠨ ᠦ᠌ ᠰᠠᠨᠠᠭᠠ ᠪᠠᠷ᠂ ᠬᠣᠭᠣᠯᠠ ᠲᠠᠢ ᠬᠦᠷᠦᠭᠡᠳ ᠢᠷᠡᠳᠡᠭ᠃
— ᠮᠢᠬᠠ ᠴᠢᠨᠠᠭᠠᠳ ᠬᠡᠷᠡᠭ ᠦᠭᠡᠢ᠃ ᠬᠠᠷᠢᠨ ᠡᠨᠡ ᠭᠡᠳᠡᠰᠦ ᠳᠣᠲᠣᠷᠠ ᠠ᠋ᠴᠠ ᠬᠡᠳᠦ ᠣᠭᠲᠣᠯᠤᠶᠠ᠃
— ᠶᠠᠭᠠᠬᠢᠵᠤ ᠪᠣᠯᠬᠤ ᠶᠤᠮ? ᠴᠠᠷᠴᠠᠭᠤ᠃ ᠱᠥᠯᠦᠨ ᠳ᠋ᠦ᠍ ᠬᠠᠯᠠᠭᠠᠭᠠᠳ ᠥᠭᠭᠦᠶᠡ᠃
ᠡᠢᠨᠬᠦ ᠬᠣᠭᠣᠯᠠᠯᠠᠵᠤ ᠤᠮᠳᠠᠯᠠᠬᠤ ᠵᠠᠭᠤᠷᠠ ᠪᠣᠭᠣᠷᠴᠢ ᠶᠡᠬᠡ ᠵᠢᠷᠦᠬᠡ ᠭᠠᠷᠭᠠᠵᠤ᠄
— ᠬᠡᠷᠦᠯᠳᠵᠢᠨ ᠬᠠᠮᠢᠭᠠ ᠶᠠᠪᠤᠪᠠ? ᠬᠡᠳᠦᠢ ᠳ᠋ᠦ᠍ ᠢᠷᠡᠬᠦ ᠪᠣᠢ? ᠭᠡᠵᠦ ᠠᠰᠠᠭᠤᠯᠠ᠃
— ᠬᠣᠯᠠ ᠦᠭᠡᠢ᠂ ᠭᠡᠬᠦ ᠳ᠋ᠡᠭᠡᠨ ᠯᠡ ᠣᠷᠣᠢᠬᠠᠨ ᠢᠷᠡᠬᠦ ᠪᠠᠢᠬᠠ᠃ ᠢᠰᠡᠭᠡᠢ ᠬᠢᠵᠦ ᠪᠠᠢᠭᠠ ᠠᠢᠯ ᠤᠷᠤᠭᠤ ᠶᠠᠪᠤᠭᠰᠠᠨ ᠭᠡᠬᠦ ᠳ᠋ᠦ᠍ ᠨᠢ《ᠶᠠᠭᠠᠬᠢᠨᠠ? ᠢᠷᠡᠲᠡᠯᠡ ᠨᠢ ᠬᠦᠯᠢᠶᠡᠬᠦ ᠤᠤ? ᠶᠠᠭᠤ ᠬᠢᠵᠦ ᠰᠠᠭᠤᠬᠤ ᠪᠣᠢ? ᠣᠴᠢᠬᠤ ᠤᠤ? ᠲᠠᠨᠢᠬᠤ ᠦᠭᠡᠢ᠂ ᠮᠡᠳᠡᠬᠦ ᠦᠭᠡᠢ ᠣᠯᠠᠨ ᠬᠥᠮᠦᠨ ᠳᠡᠭᠡᠷᠡ ᠶᠠᠭᠤ ᠬᠢᠵᠦ ᠣᠴᠢᠬᠤ ᠪᠣᠢ? ᠲᠡᠷᠡ ᠮᠠᠨᠢ ᠢᠴᠢᠬᠦ᠂ ᠪᠢ ᠴᠦ᠍ ᠭᠡᠰᠡᠨ ᠁ 》 ᠭᠡᠵᠦ ᠳᠡᠮᠡᠢ ᠯᠡ ᠲᠡᠷᠡ ᠪᠠᠷᠠᠭᠤᠨ ᠬᠤᠸᠠ ᠶ᠋ᠢᠨ ᠣᠯᠠᠨ ᠬᠥᠮᠦᠨ ᠮᠠᠯ ᠴᠤᠭᠯᠠᠷᠠᠵᠤ ᠪᠠᠭᠰᠢᠷᠠᠭᠰᠠᠨ ᠠᠢᠯ ᠤᠷᠤᠭᠤ ᠬᠠᠷᠠᠵᠤ《ᠲᠡᠷᠡ ᠪᠠᠢᠨᠠ ᠯᠠ ᠳᠠ 》 ᠭᠡᠮᠡᠨ ᠭᠠᠢᠬᠠᠨ ᠵᠣᠭᠰᠣᠪᠠ᠃ ᠭᠡᠷ ᠡᠴᠡ ᠡᠵᠢ ᠨᠢ ᠠᠷᠭᠠᠯ ᠤ᠋ᠨ ᠠᠪᠳᠠᠷᠠ ᠪᠠᠨ ᠪᠠᠷᠢᠵᠤ ᠭᠠᠷᠴᠤ ᠢᠷᠡᠭᠡᠳ ᠠᠷᠤᠭ ᠲᠠᠢ ᠠᠷᠭᠠᠯ ᠠ᠋ᠴᠠ ᠶᠡᠭᠦᠯᠡᠵᠦ ᠳᠦᠭᠦᠷᠭᠡᠭᠡᠳ᠂ ᠪᠣᠭᠣᠷᠴᠢ ᠶ᠋ᠢᠨ ᠠᠳᠠᠯᠢ ᠪᠠᠷᠠᠭᠤᠨᠠ ᠰᠢᠷᠲᠡᠨ ᠬᠠᠷᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠭᠡᠷ ᠲᠡᠬᠢ ᠬᠡᠦᠬᠡᠳ ᠢ᠋ ᠳᠠᠭᠤᠳᠠᠲᠠᠯᠠ ᠲᠡᠷᠡ ᠪᠡᠷ ᠭᠣᠳᠣ ᠦᠰᠦᠷᠦᠨ ᠭᠠᠷᠴᠤ ᠢᠷᠡᠬᠦ ᠳ᠋ᠦ᠍ᠨᠢ᠄
— ᠮᠢᠨᠦ ᠬᠦᠦ ᠮᠣᠷᠳᠠ᠃ ᠲᠡᠷᠡ ᠢᠰᠡᠭᠡᠢ ᠬᠢᠵᠦ ᠪᠠᠢᠭᠠ ᠠᠢᠯ ᠤᠷᠤᠭᠤ ᠣᠴᠢᠭᠠᠳ ᠡᠭᠡᠴᠢ ᠶ᠋ᠢ ᠪᠡᠨ《ᠬᠥᠮᠦᠨ ᠢᠷᠡᠯᠡ 》 ᠭᠡᠵᠦ ᠳᠠᠭᠠᠭᠤᠯᠤᠭᠠᠳ ᠢᠷᠡ ᠭᠡᠬᠦ ᠳ᠋ᠦ᠍ᠨᠢ ᠪᠣᠭᠣᠷᠴᠢ ᠶ᠋ᠢᠨ ᠳᠣᠲᠣᠷᠠ ᠨᠠᠷᠠᠨ ᠭᠡᠢᠬᠦ ᠯᠤᠭᠠ ᠨᠢᠭᠡᠨ ᠪᠣᠯᠪᠠ᠃ ᠬᠡᠦᠬᠡᠳ ᠴᠦ᠍ ᠮᠣᠷᠳᠠᠭᠠᠳ ᠲᠣᠭᠣᠰᠣ ᠮᠠᠨᠠᠷᠠᠭᠤᠯᠤᠨ ᠥᠰᠥᠷᠬᠡᠴᠢᠬᠡᠪᠡ᠃ ᠪᠣᠭᠣᠷᠴᠢ ᠭᠡᠷ ᠲᠦ᠍ ᠣᠷᠣᠵᠤ ᠨᠢᠭᠡ ᠠᠶᠠᠭᠠ ᠠᠢᠷᠠᠭ ᠤᠤᠭᠤᠭᠠᠳ ᠲᠡᠰᠬᠡᠯ ᠦᠭᠡᠢ ᠭᠠᠷᠴᠤ ᠪᠠᠷᠠᠭᠤᠨ ᠵᠦᠭ ᠬᠠᠷᠠᠭᠠ ᠰᠤᠩᠭᠠᠨ ᠰᠢᠷᠲᠡᠲᠡᠯᠡ ᠲᠡᠨᠳᠡ ᠡᠴᠡ ᠬᠣᠶᠠᠷ ᠶᠠᠭᠤᠮᠠ ᠪᠥᠷᠲᠥᠯᠵᠡᠨ ᠲᠠᠰᠤᠷᠠᠵᠤ ᠨᠠᠭᠠᠰᠢ ᠢᠷᠡᠬᠦ ᠶ᠋ᠢ ᠬᠠᠷᠠᠭᠠᠳ᠄
— ᠪᠢ ᠬᠡᠷᠦᠯᠦᠨᠵᠢᠨ ᠢ᠋ ᠲᠣᠰᠤᠯᠠ ᠭᠡᠪᠡᠰᠦ ᠲᠡᠭᠦᠨ ᠦ᠌ ᠡᠵᠢ ᠭᠡᠷ ᠡᠴᠡ᠄
— ᠲᠡᠭᠡ ᠳᠡ᠂ ᠬᠦᠦ ᠮᠢᠨᠢ ᠭᠡᠬᠦ ᠰᠣᠨᠣᠰᠳᠠᠵᠤ᠂ ᠲᠡᠷᠡ ᠪᠡᠷ ᠮᠣᠷᠳᠠᠨ ᠳᠠᠪᠬᠢᠪᠠ᠃ ᠣᠢᠷᠠᠲᠤᠨ ᠣᠢᠷᠠᠲᠤᠭᠰᠠᠭᠠᠷ ᠲᠡᠳᠡ ᠢᠨᠢᠶᠡᠯᠳᠦᠨ ᠠᠭᠤᠯᠵᠠᠵᠤ ᠪᠣᠭᠣᠷᠴᠢ ᠮᠣᠷᠢ ᠪᠠᠨ ᠡᠷᠭᠢᠭᠦᠯᠵᠦ ᠬᠡᠷᠦᠯᠦᠨᠵᠢᠨ ᠦ᠌ ᠵᠥᠪ ᠲᠠᠯᠠ ᠪᠠᠷ ᠣᠷᠣᠵᠤ ᠲᠡᠭᠦᠨ ᠦ᠌ ᠭᠤᠶᠠ ᠶ᠋ᠢ ᠠᠳᠬᠤᠬᠤ ᠳ᠋ᠤ᠌ ᠨᠥᠭᠥᠭᠡᠳᠡᠬᠢ ᠨᠢ ᠪᠠᠰᠠ ᠭᠤᠶᠠ ᠶ᠋ᠢ ᠨᠢ ᠴᠢᠩᠭᠠ ᠠᠳᠬᠤᠵᠤ ᠢᠨᠢᠶᠡᠯᠳᠦᠪᠡ᠃ ᠲᠡᠷᠡ ᠬᠣᠶᠠᠷ ᠮᠡᠨᠳᠦᠯᠡᠵᠦ ᠪᠠᠢᠭᠠ ᠨᠢ ᠡᠨᠡ᠃
ᠬᠡᠷᠦᠯᠳᠵᠢᠨ ᠳᠡᠭᠦᠦ ᠤᠷᠤᠭᠤ ᠪᠠᠨ ᠬᠠᠷᠠᠵᠤ᠄
— ᠴᠢ ᠬᠠᠷᠢᠵᠤ ᠪᠠᠢ᠃ ᠪᠢᠳᠡ ᠬᠣᠶᠠᠷ ᠭᠣᠣᠯ ᠤ᠋ᠨ ᠵᠠᠬᠠ ᠪᠠᠷ ᠶᠠᠪᠤᠵᠤ ᠮᠠᠯ ᠢ᠋ᠶ᠋ᠠᠨ ᠴᠤᠭᠯᠠᠭᠤᠯᠤᠭᠠᠳ ᠣᠷᠣᠢᠬᠠᠨ ᠣᠴᠢᠨᠠ ᠭᠡᠯᠡ᠃
ᠬᠡᠷᠦᠯᠦᠨ ᠭᠣᠣᠯ ᠤ᠋ᠨ ᠬᠥᠪᠡᠭᠡ ᠪᠡᠷ ᠡᠯᠢ ᠬᠤᠯᠤᠢ᠃ ᠡᠳᠡ ᠬᠣᠶᠠᠷ ᠡᠵᠡᠭᠦᠢ ᠬᠡᠭᠡᠷᠡ ᠶ᠋ᠢᠨ ᠪᠤᠷᠭᠠᠰᠤᠨ ᠳᠤᠮᠳᠠ ᠨᠢᠭᠤᠭᠳᠠᠵᠤ ᠲᠣᠭᠯᠠᠭᠠᠳ ᠤᠰᠤᠨ ᠤ᠋ ᠭᠦᠨ ᠳ᠋ᠡᠬᠢ ᠵᠢᠭᠠᠰᠤ ᠵᠢᠷᠠᠭᠠᠬᠠᠢ ᠰᠢᠭ᠋ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠠᠭᠠᠰᠢᠯᠠᠨ ᠨᠠᠮᠤᠭᠤᠬᠠᠨ ᠮᠡᠯᠲᠡᠭᠡᠨᠡᠬᠦ ᠭᠣᠣᠯ ᠤ᠋ᠨ ᠮᠠᠨᠳᠠᠯ ᠳᠡᠭᠡᠭᠦᠷ ᠬᠠᠪᠲᠠᠭᠠᠢ ᠴᠢᠯᠠᠭᠤ ᠰᠢᠲᠠᠨ ᠬᠠᠯᠲᠤᠷᠢᠭᠤᠯᠵᠤ ᠦᠰᠦᠴᠢᠭᠦᠯᠦᠨ ᠨᠠᠭᠠᠳᠪᠠ᠃
ᠬᠣᠶᠠᠭᠤᠯᠠ ᠪᠠᠨ ᠭᠣᠣᠯ ᠤ᠋ᠨ ᠡᠷᠭᠢ ᠳ᠋ᠡᠬᠢ ᠪᠦᠯᠢᠶᠡᠨ ᠴᠢᠯᠠᠭᠤ ᠰᠠᠨᠳᠠᠢᠯᠠᠨ ᠪᠡᠶᠡ ᠪᠡᠶᠡ ᠪᠡᠨ ᠨᠠᠯᠠᠨ ᠰᠠᠭᠤᠵᠤ ᠵᠢᠷᠭᠠᠯ ᠢ᠋ᠶ᠋ᠠᠨ ᠡᠳ᠋ᠯᠡᠨ ᠬᠦᠦᠷᠨᠢᠬᠦ ᠵᠠᠭᠤᠷᠠ ᠪᠣᠭᠣᠷᠴᠢ ᠨᠠᠭᠠᠳᠤᠮ ᠠ᠋ᠴᠠ ᠪᠤᠴᠠᠵᠤ ᠣᠴᠢᠭᠠᠳ ᠲᠡᠮᠦᠵᠢᠨ ᠲᠡᠢ ᠤᠴᠠᠷᠠᠵᠤ ᠨᠠᠢ᠍ᠮᠠᠨ ᠰᠢᠷᠭᠠ ᠶ᠋ᠢᠨ ᠬᠢᠨᠢ ᠬᠣᠢᠨᠠ ᠠ᠋ᠴᠠ ᠶᠠᠪᠤᠵᠤ ᠣᠯᠵᠤ ᠢᠷᠡᠭᠰᠡᠨ᠂ ᠭᠡᠷ ᠲᠡᠭᠡᠨ ᠢᠷᠡᠭᠡᠳ ᠪᠣᠯᠤᠭᠰᠠᠨ ᠪᠦᠬᠦᠨ ᠢ᠋ ᠶᠠᠷᠢᠵᠤ᠂ ᠴᠠᠭᠠᠳᠤᠬᠢ ᠨᠢ ᠶᠡᠬᠡ ᠰᠣᠨᠢᠭᠤᠴᠢᠷᠬᠠᠨ ᠱᠠᠭᠰᠢᠷᠠᠵᠤ᠂ ᠲᠡᠭᠦᠨ ᠢ᠋ ᠴᠢᠩᠭᠠ ᠲᠡᠪᠡᠷᠢᠨ ᠪᠡᠶᠡ ᠳ᠋ᠦ᠍ᠨᠢ ᠨᠠᠭᠠᠯᠳᠤᠬᠤ ᠪᠦᠷᠢ᠄
— ᠮᠤᠨᠳᠠᠭ ᠶᠤᠮ ᠠ᠋! ᠮᠤᠨᠳᠠᠭ ᠶᠤᠮ ᠭᠡᠵᠦ ᠤᠯᠠᠮ ᠬᠠᠯᠠᠭᠤᠨ ᠢᠯᠴᠢ ᠪᠡᠷ ᠢ᠋ᠶ᠋ᠡᠨ ᠲᠥᠭᠡᠨᠡᠵᠦ ᠪᠠᠢᠪᠠ᠃ ᠪᠣᠭᠣᠷᠴᠢ ᠬᠡᠷᠦᠯᠦᠨ ᠭᠣᠣᠯ ᠢ᠋ ᠥᠭᠰᠥᠭᠦᠯᠦᠨ ᠪᠠᠷᠠᠭᠤᠨ ᠵᠦᠭ ᠲᠠᠢᠰᠢ ᠬᠠᠷᠠᠵᠤ ᠲᠩᠷᠢ ᠶ᠋ᠢᠨ ᠬᠠᠶᠠᠭᠠ ᠦᠵᠡᠭᠳᠡᠬᠦ ᠲᠡᠳᠦᠢ ᠲᠣᠭᠣᠨᠣ ᠠᠭᠤᠯᠠ ᠶ᠋ᠢ ᠵᠢᠭᠠᠵᠤ᠄
— ᠴᠢ ᠪᠢᠳᠡ ᠬᠣᠶᠠᠷ ᠢ᠋ ᠤᠴᠠᠷᠠᠭᠤᠯᠵᠤ ᠢᠩᠭᠢᠵᠦ ᠰᠠᠭᠤᠬᠤ ᠲᠠᠪᠢᠯᠠᠩ ᠵᠠᠶᠠᠭᠠᠭᠰᠠᠨ ᠲᠣᠭᠣᠨᠣ ᠠᠭᠤᠯᠠ ᠶᠠᠮᠠᠷ ᠵᠢᠭᠠᠬᠠᠨ ᠬᠠᠷᠠᠭᠳᠠᠨᠠ ᠪᠣᠢ? ᠳᠡᠷᠭᠡᠳᠡ ᠨᠢ ᠣᠴᠢᠬᠤᠯᠠᠷ ᠪᠠᠰᠠ ᠴᠤ᠌ ᠲᠣᠮᠣ ᠠᠭᠤᠯᠠ ᠰᠢᠦ ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠨᠢ ᠬᠡᠷᠦᠯᠳᠵᠢᠨ ᠢᠨᠢᠶᠡᠪᠬᠢᠯᠡᠵᠦ᠄
— ᠪᠢ ᠪᠠᠰᠠ ᠴᠢᠮᠠ ᠶ᠋ᠢ ᠰᠠᠨᠠᠬᠤ ᠳ᠋ᠠᠭᠠᠨ ᠲᠠᠢᠰᠢ ᠪᠠᠨ ᠬᠠᠷᠠᠵᠤ᠂ ᠲᠡᠭᠡᠵᠦ ᠪᠣᠳᠣᠳᠠᠭ ᠶᠤᠮ ᠭᠡᠪᠡ᠃
— ᠪᠢ ᠪᠠᠰᠠ ᠴᠢᠮᠠ ᠶ᠋ᠢ ᠰᠠᠨᠠᠬᠤ ᠳ᠋ᠠᠭᠠᠨ 《ᠨᠠᠭᠠᠰᠢ ᠪᠠᠨ ᠶᠠᠭᠠᠬᠢᠵᠤ ᠭᠠᠷᠬᠤ ᠪᠣᠢ?》 ᠭᠡᠵᠦ ᠪᠣᠳᠣᠵᠤ ᠪᠣᠳᠣᠵᠤ ᠪᠦᠭᠦᠨᠦᠳ ᠦ᠋ᠨ ᠨᠢᠭᠡ ᠲᠠᠨᠢᠯ ᠵᠠᠯᠠᠭᠤ ᠳ᠋ᠠᠭᠠᠨ《ᠨᠠᠮᠠ ᠶ᠋ᠢ ᠣᠴᠢᠲᠠᠯᠠ ᠡᠨᠡ ᠬᠣᠶᠠᠷ ᠮᠣᠷᠢ ᠶ᠋ᠢ ᠰᠠᠢᠨ ᠬᠠᠳᠠᠭᠠᠯᠠᠵᠤ ᠪᠠᠢ᠃ ᠪᠢ ᠤᠳᠠᠬᠤ ᠦᠭᠡᠢ ᠣᠴᠢᠵᠤ ᠠᠪᠤᠨᠠ》 ᠭᠡᠵᠦ ᠥᠭᠴᠦ ᠶᠠᠪᠤᠭᠤᠯᠤᠭᠰᠠᠨ ᠶᠤᠮ᠃ ᠲᠡᠭᠡᠭᠡᠳ ᠠᠪᠤ ᠳ᠋ᠠᠭᠠᠨ《ᠠᠯᠳᠠᠭᠰᠠᠨ ᠬᠣᠶᠠᠷ ᠮᠣᠷᠢᠨ ᠤ᠋ ᠰᠤᠷᠠᠭ ᠭᠠᠷᠤᠯᠠ》 ᠭᠡᠵᠦ ᠬᠤᠳᠠᠯ ᠬᠡᠯᠡᠵᠦ ᠨᠠᠭᠠᠰᠢ ᠭᠠᠷᠤᠭᠰᠠᠨ᠃ ᠭᠠᠵᠠᠷ ᠤ᠋ᠨ ᠳᠤᠮᠳᠠ ᠠ᠋ᠴᠠ ᠨᠠᠭᠠᠰᠢ ᠪᠠᠨ ᠶᠤᠮ ᠠ᠋᠂ ᠲᠡᠨᠳᠡ ᠢᠷᠡᠵᠦ ᠬᠣᠨᠣᠭᠠᠳ ᠮᠣᠷᠢᠳ ᠢ᠋ᠶ᠋ᠠᠨ ᠠᠪᠴᠤ ᠥᠷᠯᠥᠭᠡ ᠡᠷᠲᠡᠯᠡᠨ ᠭᠠᠷᠤᠭᠠᠳ ᠰᠢᠷᠦᠭᠦᠬᠡᠨ ᠶᠠᠪᠤᠭᠰᠠᠨ᠃ ᠭᠠᠢᠭᠤᠢ ᠳᠣᠣᠷᠠᠬᠠᠨ ᠢ᠋ᠶ᠋ᠠᠨ ᠬᠦᠷᠦᠭᠡᠳ ᠢᠷᠡᠯᠡ᠃
— ᠠ ᠳᠠ᠃ ᠮᠢᠨᠦ ᠲᠣᠮᠣᠭᠠ ᠦᠭᠡᠢᠬᠡᠨ ᠬᠠᠷᠠ ᠬᠦᠦ᠂ ᠪᠠᠰᠠ ᠲᠡᠭᠡᠭᠡᠳ ᠵᠠᠯᠢᠲᠠᠢ ᠶᠤᠮ ᠠ᠋! ᠭᠡᠵᠦ ᠨᠢᠴᠦᠭᠦᠨ ᠭᠤᠶᠠᠨ ᠳᠡᠭᠡᠷᠡ ᠨᠢ ᠠᠯᠠᠭᠠᠳᠠᠭᠠᠳ᠄
— ᠠᠷᠠᠢ ᠴᠢᠩᠭᠠᠳᠠᠭᠤᠯᠴᠢᠬᠠᠪᠠᠤ? ᠭᠡᠵᠦ ᠵᠢᠭᠠᠬᠠᠨ ᠤᠯᠠᠢᠭᠰᠠᠨ ᠭᠠᠵᠠᠷ ᠢ᠋ ᠨᠢ ᠬᠣᠰᠢᠭᠤ ᠬᠦᠷᠭᠡᠨ ᠦᠨᠦᠰᠦᠨ ᠬᠡᠯᠡ ᠪᠡᠨ ᠱᠦᠷᠭᠦᠬᠦᠯᠵᠦ ᠬᠥᠬᠥᠵᠦ ᠭᠠᠷ ᠢ᠋ᠶ᠋ᠠᠨ ᠠᠷᠴᠢᠪᠠ᠃
ᠪᠣᠭᠣᠷᠴᠢ ᠢᠨᠢᠶᠡᠵᠦ ᠤᠷᠤᠭᠤᠯ ᠳᠡᠭᠡᠷᠡ ᠨᠢ ᠦᠨᠦᠰᠴᠦ ᠲᠡᠪᠡᠷᠢᠵᠦ ᠡᠩᠬᠦᠷᠡᠢᠯᠡᠨ᠄
— ᠮᠢᠨᠦ ᠵᠦᠭ ᠦᠭᠡᠢᠬᠡᠨ ᠪᠣᠷᠣ ᠬᠡᠦᠬᠡᠨ ᠶᠠᠮᠠᠷ ᠰᠣᠨᠢᠨ ᠲᠠᠢ᠂ ᠶᠠᠭᠠᠬᠢᠵᠤ ᠰᠠᠭᠤᠵᠤ ᠪᠠᠢᠨᠠ ᠳᠠ? ᠭᠡᠬᠦ ᠳ᠋ᠦ᠍ ᠬᠡᠷᠦᠯᠦᠨᠵᠢᠨ᠄
— ᠪᠢ ᠤᠤ?᠂ ᠪᠢ᠂ ᠪᠢ᠁ ᠠᠯᠢᠪ᠂ ᠨᠠᠭᠠᠳᠤ ᠭᠠᠷ ᠢ᠋ᠶ᠋ᠠᠨ ᠭᠡᠵᠦ ᠲᠠᠲᠠᠵᠤ ᠠᠪᠤᠭᠠᠳ ᠳᠣᠲᠤᠭᠣᠵᠢᠨ ᠤ᠋ ᠪᠠᠨ ᠳᠣᠣᠭᠤᠷ ᠰᠢᠷᠭᠤᠭᠤᠯᠵᠤ ᠨᠢᠴᠦᠭᠦᠨ ᠴᠠᠪᠢᠨ ᠲᠤᠰ ᠭᠠᠵᠠᠷ ᠢ᠋ᠶ᠋ᠠᠨ ᠳᠠᠷᠤᠵᠤ ᠥᠪᠡᠷ ᠢ᠋ᠶ᠋ᠡᠨ ᠳᠡᠭᠡᠷᠡ ᠡᠴᠡ ᠨᠢ ᠳᠠᠷᠤᠵᠤ᠄
— ᠶᠠᠭᠤ ᠦᠵᠡᠭᠳᠡᠨᠡ ᠪᠣᠢ? ᠭᠡᠯᠡ᠃
— ᠶᠠᠭᠤᠮᠠ ᠶᠠᠭᠤᠮᠠᠬᠠᠨ᠂ ᠬᠥᠭᠡᠷᠦᠬᠦᠨ ᠬᠥᠭᠡᠷᠦᠬᠦᠨ ᠶᠠᠭᠤᠮᠠ ᠨᠤᠭᠤᠳ ᠦᠵᠡᠭᠳᠡᠵᠦ ᠯᠡ ᠪᠠᠢᠨᠠ ᠭᠡᠳ ᠰᠢᠭᠡᠵᠡᠢ ᠢᠳᠠᠮ ᠬᠤᠷᠤᠭᠤ ᠪᠠᠨ ᠬᠥᠳᠡᠯᠭᠡᠪᠡ᠃
— ᠵᠠ᠂ ᠪᠢᠲᠡᠭᠡᠢ ᠲᠡᠨᠡᠭᠯᠡᠭᠡᠳ ᠪᠠᠢ᠂ ᠨᠠᠭᠠᠳᠤ ᠠᠯᠠᠭᠠᠨ ᠳᠣᠣᠷᠠ ᠴᠢᠨᠢ?
— ᠨᠡᠭᠡᠷᠡᠨ ᠨᠢᠭᠡ ᠯᠡ ᠶᠠᠭᠤᠮᠠ ᠪᠠᠢᠨᠠ ᠳᠠ᠂ ᠬᠥᠳᠡᠯᠦᠭᠡᠳ ᠴᠦ᠍ ᠪᠠᠢᠬᠤ ᠰᠢᠭ᠋᠂ ᠬᠥᠯᠪᠡᠷᠢᠭᠡᠳ ᠴᠦ᠍ ᠪᠠᠢᠬᠤ ᠰᠢᠭ᠋᠂ ᠰᠤᠳᠠᠰᠤ ᠰᠢᠭ᠋ ᠯᠦᠭ᠂ ᠯᠦᠭ ᠴᠣᠬᠢᠯᠠᠵᠤ ᠪᠠᠢᠨᠠ ᠤᠤ ᠳᠠ? ᠶᠠᠭᠤ ᠪᠠᠢᠭᠠ ᠶᠤᠮ ᠪᠣᠢ?
— ᠴᠢᠨᠦ ᠯᠡ ᠨᠢᠭᠡ ᠦᠯᠡᠳᠡᠭᠡᠭᠰᠡᠨ ᠶᠠᠭᠤᠮᠠ ᠪᠠᠢᠭᠠ ᠭᠡᠬᠦ ᠳ᠋ᠦ᠍ ᠪᠣᠭᠣᠷᠴᠢ ᠪᠢᠲᠡᠭᠦᠦ ᠳ᠋ᠡᠭᠡᠨ ᠬᠡᠨ ᠭᠤᠸᠠᠢ ᠶ᠋ᠢ ᠨᠢ ᠮᠡᠳᠡᠭᠡᠳ ᠢᠨᠢᠶᠡᠵᠦ
— ᠲᠡᠭᠡᠪᠡᠯ ᠪᠢ ᠦᠨᠦᠰᠦᠶᠡ ᠭᠡᠪᠡ᠃
— ᠭᠠᠷᠤᠭᠠᠳ ᠢᠷᠡᠬᠦ ᠪᠡᠷ ᠨᠢ ᠦᠨᠦᠰᠦᠭᠡᠷᠡᠢ᠃
— ᠬᠡᠳᠦᠢ ᠳ᠋ᠦ᠍ ᠭᠠᠷᠬᠤ ᠪᠣᠢ?
— ᠡᠵᠢ ᠶ᠋ᠢᠨ ᠬᠡᠯᠡᠬᠦ ᠨᠢ ᠴᠠᠭᠠᠨ ᠰᠠᠷᠠ ᠠ᠋ᠴᠠ ᠬᠣᠢᠰᠢ ᠤᠳᠠᠬᠤ ᠦᠭᠡᠢ ᠪᠠᠢᠬᠠ ᠭᠡᠰᠡᠨ᠃
— ᠵᠠ᠂ ᠵᠠ ᠲᠡᠭᠡᠪᠡᠯ ᠪᠢᠳᠡ ᠭᠤᠷᠪᠠᠭᠤᠯᠠ ᠪᠣᠯᠤᠭᠰᠠᠨ ᠭᠡᠰᠡᠨ ᠦᠭᠡ ᠤᠤ? ᠡᠵᠢ ᠨᠢ ᠲᠡᠭᠡᠭᠡᠳ ᠶᠠᠭᠤ ᠭᠡᠵᠦ ᠪᠠᠢᠨᠠ ᠪᠣᠢ? ᠮᠢᠨᠦ ᠮᠠᠭᠤ ᠠᠮᠢᠲᠠᠨ ᠢ᠋ ᠵᠢᠮᠡᠯᠡᠭᠡ ᠦᠭᠡᠢ ᠪᠢᠵᠡ?
— ᠦᠭᠡᠢ ᠠ᠋᠂ ᠦᠭᠡᠢ᠂ ᠬᠠᠷᠢᠨ《ᠬᠡᠨ ᠦ᠌ ᠦᠷᠡ ᠶᠦᠮ ᠪᠣᠢ?》 ᠭᠡᠵᠦ ᠠᠰᠠᠭᠤᠭᠰᠠᠨ᠃ ᠪᠢ ᠴᠢᠨᠦᠬᠢ ᠭᠡᠰᠡᠨ᠃ ᠡᠵᠢ ᠪᠣᠳᠣᠵᠤ ᠪᠣᠳᠣᠵᠤ《ᠬᠣᠯᠠ ᠶ᠋ᠢᠨ ᠬᠥᠮᠦᠨ ᠭᠡᠰᠡᠨ᠂ ᠮᠢᠨᠦ ᠥᠬᠢᠨ ᠦᠷᠡ ᠬᠣᠯᠠ ᠶ᠋ᠢᠨ ᠬᠥᠮᠦᠨ ᠳ᠋ᠦ᠍ ᠣᠴᠢᠬᠤ ᠨᠢ ᠳᠡ᠃ ᠵᠠ᠂ ᠶᠠᠭᠠᠬᠢᠬᠤᠪ ᠶᠠᠭᠠᠬᠢᠬᠤᠪ᠃ ᠬᠠᠵᠠᠭᠤ ᠭᠠᠵᠠᠷ ᠤᠷᠭᠤᠭᠰᠠᠨ ᠨᠢ ᠪᠣᠯ ᠬᠠᠢᠯᠠᠰᠤ ᠮᠣᠳᠣᠨ ᠤ᠋ ᠵᠢᠮᠡ ᠶᠦᠮ ᠠ᠋ ᠬᠦᠢ᠂ ᠬᠠᠷᠢ ᠶ᠋ᠢᠨ ᠭᠠᠵᠠᠷ ᠣᠴᠢᠳᠠᠭ ᠨᠢ ᠪᠣᠯ ᠪᠦᠰᠡᠭᠦᠢ ᠬᠥᠮᠦᠨ ᠦ᠌ ᠵᠠᠶᠠᠭᠠ ᠶᠤᠮ ᠬᠦᠢ》 ᠭᠡᠵᠦ ᠬᠡᠯᠡᠭᠰᠡᠨ ᠳᠡ᠃ ᠪᠣᠭᠣᠷᠴᠢ᠄
ᠲᠡᠭᠡᠪᠡᠯ ᠮᠠᠨ ᠤ᠋ ᠨᠤᠲᠤᠭ ᠲᠤ᠌
ᠤᠷᠤᠭᠤ ᠭᠠᠵᠠᠷ ᠤᠷᠭᠤᠨᠠ ᠭᠡᠳᠡᠭ ᠪᠣᠯ
ᠤᠯᠢᠶᠠᠰᠤ ᠮᠣᠳᠣᠨ ᠤ᠋ ᠵᠢᠮᠡ ᠶᠦᠮ ᠠ᠋ ᠬᠦᠢ
ᠤᠷᠤᠭ ᠤ᠋ᠨ ᠭᠠᠵᠠᠷ ᠣᠴᠢᠨᠠ ᠭᠡᠳᠡᠭ ᠪᠣᠯ
ᠪᠦᠰᠡᠭᠦᠢ ᠬᠥᠮᠦᠨ ᠦ᠌ ᠵᠠᠶᠠᠭᠠ ᠶᠤᠮ ᠠ᠋ ᠬᠦᠢ ᠭᠡᠵᠦ ᠳᠠᠭᠤᠯᠠᠳᠠᠭ ᠶᠤᠮ ᠭᠡᠵᠦ ᠬᠡᠯᠡᠭᠡᠳ ᠬᠣᠶᠠᠭᠤᠯᠠ ᠪᠠᠨ ᠲᠡᠪᠡᠷᠢᠯᠳᠦᠪᠡ᠃ ᠬᠡᠷᠦᠯᠳᠵᠢᠨ᠄
— ᠮᠢᠨᠦ ᠲᠣᠮᠣᠭᠠ ᠦᠭᠡᠢᠬᠡᠨ ᠨᠤᠲᠤᠭ ᠲᠠᠭᠠᠨ ᠣᠴᠢᠭᠠᠳ ᠬᠢᠷᠢ ᠲᠣᠮᠣᠭᠠ ᠥᠬᠡᠢᠳᠡᠪᠡ ᠳᠡ? ᠭᠡᠬᠦ ᠳ᠋ᠦ᠍᠄
— ᠦᠭᠡᠢ ᠰᠢᠦ᠂ ᠶᠠᠭᠠᠬᠢᠯᠠ ᠭᠡᠵᠦ᠃ ᠴᠢᠮᠠᠶ᠋ᠢ ᠪᠠᠨ ᠣᠯᠵᠤ ᠠᠪᠤᠭᠰᠠᠨ ᠬᠥᠮᠦᠨ ᠢᠯᠡᠭᠦᠦ ᠳᠤᠲᠠᠭᠤ ᠵᠠᠩ ᠭᠠᠷᠭᠠᠵᠤ ᠪᠣᠯᠬᠤ ᠦᠭᠡᠢ᠃ ᠭᠤᠷᠪᠠᠭᠤᠯᠠ ᠪᠠᠨ ᠴᠤ᠌ ᠪᠣᠯᠬᠤ ᠨᠢ᠃ ᠪᠤᠭᠤᠷᠴᠢ ᠶ᠋ᠢᠨ ᠬᠢ ᠭᠡᠳᠡᠭ ᠠᠢᠯ ᠭᠤᠷᠪᠠᠨ ᠪᠦᠷᠢᠳᠦᠨ ᠳ᠋ᠦ᠍ ᠲᠣᠭᠣᠨᠣ ᠪᠠᠨ ᠲᠤᠯᠬᠤ ᠨᠢ ᠯᠡ ᠪᠠᠢᠨᠠ᠃ ᠬᠠᠷᠢᠨ ᠮᠢᠨᠦ ᠵᠦᠭ ᠦᠭᠡᠢ ᠪᠣᠷᠣᠬᠠᠨ ᠨᠠᠮᠠ ᠶ᠋ᠢ ᠱᠣᠭᠯᠠᠳᠠᠭ ᠰᠢᠭ᠋ ᠢ᠋ᠶ᠋ᠡᠨ ᠠᠷᠠᠢ ᠬᠥᠮᠦᠨ ᠠᠮᠢᠲᠠᠨ ᠱᠣᠭᠯᠠᠭᠠ ᠦᠭᠡᠢ ᠪᠢᠵᠡ ᠳᠡ?
— ᠱᠣᠭᠯᠠᠭᠰᠠᠨ᠃
— ᠶᠠᠭᠠᠬᠢᠵᠤ ᠪᠠᠢᠬᠤ ᠨᠢ ᠲᠡᠷᠡ ᠪᠣᠢ? ᠭᠡᠵᠦ ᠪᠤᠭᠤᠷᠴᠢ ᠬᠡᠷᠦᠯᠳᠵᠢᠨ ᠤᠷᠤᠭᠤ ᠰᠦᠷᠡᠬᠡᠢ ᠳᠦᠷᠯᠡᠢᠨ ᠬᠠᠷᠠᠪᠠ᠃
— ᠶᠠᠭᠠᠬᠢᠳᠠᠭ ᠶᠤᠮ? ᠠᠲᠠᠷᠬᠠᠨ ᠤ᠋ ᠨᠢᠭᠡ ᠮᠠᠭᠤ ᠠᠮᠢᠲᠠᠨ᠂ ᠪᠣᠷᠣᠬᠠᠢᠲᠦ ᠭᠡᠳᠡᠭ ᠶᠦᠮ᠃ ᠴᠢ ᠰᠠᠨᠠᠵᠤ ᠪᠠᠢᠨᠠ ᠤᠤ? ᠲᠦᠮᠡᠨ ᠲᠦᠪᠬᠦᠨ ᠦ᠌ ᠨᠠᠭᠠᠳᠤᠮ ᠳᠡᠭᠡᠷᠡ ᠴᠢ ᠪᠢᠳᠡ ᠬᠣᠶᠠᠷ ᠤ᠋ᠨ ᠤᠷᠢᠳᠤᠭᠤᠷ ᠬᠡᠭᠡᠷ ᠮᠣᠷᠢᠲᠠᠢ᠂ ᠴᠡᠩᠬᠡᠷ ᠳᠠᠪᠠᠯᠲᠠᠢ ᠬᠥᠯᠴᠥᠭᠦᠦ ᠨᠢᠭᠡ ᠶᠠᠭᠤᠮᠠ ᠬᠥᠨᠳᠡᠯᠢᠰᠴᠦ ᠪᠠᠢᠭᠰᠠᠨ ᠢ᠋ ᠭᠡᠬᠦ ᠳ᠋ᠦ᠍ ᠡᠨᠡ ᠶᠠᠪᠤᠳᠠᠯ ᠦᠨᠡᠬᠡᠷ ᠪᠤᠭᠤᠷᠴᠢ ᠶ᠋ᠢᠨ ᠰᠠᠨᠠᠭᠠᠨ ᠳ᠋ᠤ᠌ ᠪᠠᠭᠤᠵᠤ᠄
— ᠲᠡᠢᠮᠦ᠂ ᠲᠡᠢᠮᠦ᠃ ᠲᠡᠷᠡ ᠶᠠᠭᠠᠬᠢᠪᠠ?
— ᠴᠢᠮᠠ ᠶ᠋ᠢ ᠨᠤᠲᠤᠭ ᠪᠤᠴᠠᠭᠰᠠᠨ ᠤ᠋ ᠳᠠᠷᠠᠭᠠ ᠬᠡᠳᠦ ᠬᠣᠨᠣᠭᠠᠳ ᠪᠠᠢᠲᠠᠯᠠ ᠥᠨᠥᠬᠢ ᠴᠢᠨᠢ ᠮᠠᠨ ᠤ᠋ ᠳ᠋ᠤ᠌ ᠢᠷᠡᠵᠦ ᠬᠣᠨᠣᠪᠠ᠃ ᠰᠥᠨᠢ ᠨᠠᠮᠠ ᠶ᠋ᠢ ᠣᠷᠣᠯᠳᠣᠭᠠᠳ ᠰᠠᠯᠳᠠᠭ ᠦᠭᠡᠢ ᠨᠣᠢᠲᠠᠨ ᠬᠠᠮᠠᠭᠤ ᠴᠢᠨᠢ᠃ ᠲᠡᠭᠡᠬᠦ ᠪᠡᠷ ᠨᠢ ᠪᠢ ᠠᠷᠭᠠ ᠪᠠᠨ ᠪᠠᠷᠠᠭᠠᠳ ᠠᠪᠤ ᠡᠵᠢ ᠶ᠋ᠢ ᠪᠡᠨ ᠳᠠᠭᠤᠳᠠᠵᠤ ᠰᠡᠷᠡᠭᠡᠨ ᠬᠥᠭᠡᠭᠡᠵᠦ ᠶᠠᠪᠤᠭᠤᠯᠤᠭᠰᠠᠨ ᠶᠤᠮ᠃ ᠲᠡᠭᠡᠭᠡᠳ ᠪᠠᠰᠠ ᠪᠣᠯᠤᠭᠠ ᠦᠭᠡᠢ ᠠ᠋᠃ ᠮᠠᠨ ᠤ᠋ ᠨᠠᠭᠠᠴᠤ ᠠᠬᠠ᠂ ᠡᠵᠢ ᠶ᠋ᠢᠨ ᠲᠥᠷᠥᠭᠰᠡᠨ ᠠᠬᠠ ᠶ᠋ᠢᠨ ᠬᠡᠦᠬᠡᠳ ᠨᠢ ᠭᠡᠷᠯᠡᠵᠦ ᠪᠢ ᠬᠤᠷᠢᠮ ᠳ᠋ᠤᠨᠢ ᠣᠴᠢᠪᠠ᠃ ᠲᠡᠨᠳᠡ ᠥᠨᠥᠬᠢ ᠴᠢᠨᠢ ᠦᠵᠡᠭᠳᠡᠵᠦ ᠪᠠᠰᠠ ᠨᠠᠮᠠ ᠶ᠋ᠢ ᠳᠠᠭᠠᠵᠤ ᠨᠡᠬᠡᠬᠦ ᠰᠠᠨᠠᠭᠠᠲᠠᠢ᠂ ᠪᠢ ᠴᠦ᠍ ᠠᠬᠠ ᠳᠡᠭᠦᠦ ᠶ᠋ᠢᠨ ᠳᠤᠮᠳᠠ ᠲᠠᠤᠯᠠᠢ ᠰᠢᠭ᠋ ᠰᠢᠷᠭᠤᠨ ᠪᠠᠢᠪᠠᠯ ᠲᠡᠷᠡ ᠴᠦ᠍ ᠦᠵᠡᠭᠳᠡᠬᠦ ᠦᠭᠡᠢ ᠯᠡ ᠪᠣᠯᠪᠠ᠃ ᠪᠢ ᠬᠣᠨᠣᠭᠤᠲᠠ ᠥᠨᠵᠢᠭᠦᠲᠡ ᠪᠠᠢᠭᠠᠳ ᠮᠠᠷᠭᠠᠰᠢ ᠨᠢ ᠭᠡᠷ ᠵᠦᠭ ᠢ᠋ᠶ᠋ᠡᠨ ᠪᠤᠴᠠᠵᠤ ᠶᠠᠪᠤᠲᠠᠯᠠ ᠶᠠᠭᠠᠬᠢᠬᠤ ᠠᠷᠭᠠ ᠦᠭᠡᠢ ᠡᠵᠡᠭᠦᠢ ᠬᠡᠭᠡᠷᠡ ᠥᠨᠥᠬᠢ ᠴᠢᠨᠢ ᠥᠭᠡᠳᠡ ᠡᠴᠡ ᠤᠭᠲᠤᠨ ᠢᠷᠡᠳᠡᠭ ᠪᠠᠢᠭᠠ᠃ ᠪᠢ ᠠᠶᠤᠯ᠃《ᠠᠷᠠᠢ ᠴᠣ ᠠᠯᠠᠬᠤ ᠦᠭᠡᠢ ᠯᠡ ᠪᠠᠢᠬᠠ᠃ ᠡᠵᠡᠭᠦᠢ ᠬᠡᠭᠡᠷᠡ ᠡᠯᠡᠭ ᠪᠠᠷᠢᠵᠤ ᠡᠵᠡᠮᠳᠡᠬᠦ ᠰᠠᠨᠠᠭᠠᠲᠠᠢ ᠪᠢᠵᠡ᠂ ᠡᠨᠡᠨ ᠳ᠋ᠦ᠍ ᠡᠯᠡᠭ ᠪᠠᠷᠢᠭᠤᠯᠬᠤ ᠦᠭᠡᠢ》 ᠭᠡᠵᠦ ᠪᠣᠳᠣᠯᠠ᠃
— ᠲᠡᠭᠡᠭᠡᠳ?
— ᠲᠡᠭᠡᠭᠡᠳ ᠲᠡᠷᠡ《ᠴᠢ ᠨᠠᠮᠠ ᠶ᠋ᠢ ᠪᠢᠲᠡᠭᠡᠢ ᠠᠳᠠ ᠦᠵᠡ᠃ ᠪᠢ ᠴᠢᠮᠠᠶ᠋ᠢ ᠶᠡᠬᠡ ᠬᠦᠰᠡᠳᠡᠭ᠃ ᠮᠢᠨᠦ ᠡᠬᠡᠨᠡᠷ ᠪᠣᠯ᠃ ᠪᠢ ᠴᠢᠮᠠᠶ᠋ᠢ ᠭᠠᠴᠢᠭᠠᠬᠤ ᠦᠭᠡᠢ᠂ ᠳᠤᠲᠠᠭᠠᠬᠤ ᠦᠭᠡᠢ᠃ ᠲᠣᠷᠭᠠ ᠪᠠᠷ ᠣᠷᠢᠶᠠᠵᠤ ᠡᠷᠳᠡᠨᠢᠰ ᠢ᠋ᠶ᠋ᠡᠷ ᠴᠢᠮᠡᠵᠦ᠂ ᠠᠮᠲᠠᠲᠠᠨ ᠢ᠋ ᠡᠮᠦᠨᠡ ᠴᠢᠨᠢ ᠥᠷᠥᠵᠦ᠂ ᠠᠯᠲᠠ ᠶ᠋ᠢ ᠠᠪᠳᠠᠷᠠᠨ ᠳ᠋ᠤ᠌ ᠴᠢᠨᠢ ᠳᠦᠭᠦᠷᠭᠡᠨᠡ》 ᠭᠡᠨᠡ᠃ ᠪᠢ ᠳᠤᠤᠭᠠᠷᠬᠤ ᠦᠭᠡᠢ ᠯᠡ᠁ ᠲᠡᠭᠡᠭᠰᠡᠨ ᠴᠢᠨᠢ ᠡᠪᠦᠷ ᠡᠴᠡ ᠪᠡᠨ ᠠᠯᠲᠠ ᠯᠠ ᠶᠤᠮ ᠪᠠᠢᠯᠭᠦᠢ᠂ ᠰᠢᠷᠠ ᠡᠭᠡᠮᠦᠭ ᠪᠥᠭᠡᠵᠢ ᠭᠠᠷᠭᠠᠵᠤ ᠥᠭᠴᠦ ᠪᠠᠢᠨᠠ᠃ ᠪᠢ ᠠᠪᠤᠭᠰᠠᠨ ᠦᠭᠡᠢ᠃ ᠡᠪᠦᠷ ᠤᠷᠤᠭᠤ ᠬᠢᠬᠦ ᠳ᠋ᠦ᠍ ᠨᠢ ᠪᠢ ᠭᠠᠷᠭᠠᠭᠠᠳ ᠰᠢᠳᠡᠴᠢᠬᠡᠭᠰᠡᠨ᠃ ᠲᠡᠭᠡᠭᠰᠡᠨ ᠴᠢᠨᠢ ᠴᠤᠯᠪᠤᠭᠤᠷᠳᠠᠭᠠᠳ ᠠᠪᠤᠯᠠ᠃ ᠪᠢ ᠴᠤᠯᠪᠤᠭᠤᠷ ᠢ᠋ᠶ᠋ᠠᠨ ᠠᠪᠬᠤ ᠭᠡᠰᠡᠨ ᠴᠢᠨᠢ ᠥᠭᠭᠦᠭᠰᠡᠨ ᠦᠭᠡᠢ᠂ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠭᠠᠳ ᠬᠣᠢᠲᠤ ᠣᠯᠣᠩ ᠢ᠋ ᠲᠠᠢᠯᠬᠤ ᠳ᠋ᠤᠨᠢ ᠪᠢ ᠦᠰᠦᠷᠦᠭᠡᠳ ᠥᠪᠡᠷ ᠦ᠋ᠨ ᠮᠣᠷᠢᠨ ᠳᠡᠭᠡᠷᠡ ᠮᠣᠷᠳᠠᠵᠤ᠂ ᠭᠠᠷ ᠬᠤᠷᠤᠭᠤ ᠶ᠋ᠢ ᠨᠢ ᠬᠠᠢᠷᠠ ᠨᠠᠢᠷ ᠦᠭᠡᠢ ᠲᠠᠰᠢᠭᠤᠷᠳᠠᠵᠤ ᠥᠪᠡᠷᠦᠨ ᠦ᠌᠂ ᠬᠥᠮᠦᠨ ᠦ᠌ ᠮᠣᠷᠢᠨ ᠤ᠋ ᠴᠤᠯᠪᠤᠭᠤᠷ ᠢ᠋ ᠨᠢ ᠰᠠᠯᠭᠠᠵᠤ ᠠᠪᠤᠭᠠᠳ ᠵᠠᠢᠯᠠᠵᠤ ᠣᠳᠤᠭᠰᠠᠨ᠃ ᠤᠷᠢᠳᠤ ᠣᠯᠣᠩ ᠲᠠᠢᠯᠵᠤ ᠠᠮᠵᠢᠭᠠ ᠦᠭᠡᠢ ᠶᠦᠮ᠃ ᠪᠢ ᠯᠠᠪ ᠬᠣᠶᠠᠷ ᠭᠤᠷᠪᠠᠨ ᠮᠣᠳᠣ ᠭᠠᠵᠠᠷ ᠣᠴᠢᠵᠤ ᠲᠡᠭᠦᠨ ᠦ᠌ ᠡᠮᠡᠭᠡᠯ ᠢ᠋ ᠨᠢ ᠠᠪᠴᠤ ᠬᠠᠶᠠᠭᠠᠳ᠂ ᠵᠢᠯᠣᠭᠣ ᠴᠤᠯᠪᠤᠭᠤᠷ ᠢ᠋ ᠨᠢ ᠤᠨᠵᠢᠭᠤᠯᠤᠭᠠᠳ ᠮᠣᠷᠢ ᠶ᠋ᠢ ᠨᠢ ᠰᠤᠯᠠ ᠲᠠᠯᠪᠢᠵᠤ ᠣᠷᠬᠢᠭᠰᠠᠨ᠃ ᠥᠯ ᠮᠠᠭᠤᠲᠠᠢ ᠶᠠᠪᠤᠭᠰᠠᠨ ᠮᠣᠷᠢ ᠢᠳᠡᠭᠡᠳ ᠬᠣᠴᠣᠷᠤᠭᠰᠠᠨ᠃ ᠮᠣᠷᠢ ᠪᠠᠨ ᠪᠠᠷᠢᠵᠤ ᠤᠨᠤᠭᠰᠠᠨ ᠪᠣᠯ ᠵᠣᠯ᠂ ᠴᠢᠳᠠᠭᠠ ᠦᠭᠡᠢ ᠪᠣᠯ ᠬᠣᠬᠢ ᠨᠢ᠂ ᠡᠮᠡᠭᠡᠯ ᠢ᠋ᠶ᠋ᠡᠨ ᠡᠭᠦᠷᠦᠭᠡᠳ ᠶᠠᠪᠤᠭᠰᠠᠨ ᠪᠢᠵᠡ!
— ᠪᠣᠯᠵᠤ ᠭᠡᠰᠡᠨ ᠢ᠋ᠶ᠋ᠡᠨ ᠪᠣᠭᠤᠷᠴᠢ ᠪᠣᠳᠣᠯᠬᠢᠯᠠᠨ᠂ ᠴᠢᠮᠠᠶ᠋ᠢ ᠵᠣᠪᠠᠭᠠᠬᠤ ᠪᠠᠢᠬᠠ ᠳᠠ᠂ ᠲᠡᠷᠡ ᠮᠠᠭᠤ ᠴᠢᠨᠢ᠃ ᠦᠰ ᠬᠣᠨᠵᠢᠩ ᠡᠪᠦᠷᠯᠡᠵᠦ ᠶᠠᠪᠤᠭᠠ ᠪᠣᠢ ᠭᠡᠪᠡ᠃ ᠬᠡᠷᠦᠯᠳᠵᠢᠨ᠄
— ᠪᠢ ᠲᠡᠭᠦᠨ ᠳ᠋ᠦ᠍《ᠬᠥᠮᠦᠨ ᠲᠡᠢ᠂ ᠬᠡᠯᠡᠯᠴᠡᠵᠦ ᠶᠠᠷᠢᠭᠰᠠᠨ ᠨᠥᠬᠥᠷ ᠪᠣᠢ》 ᠭᠡᠬᠦ ᠳ᠋ᠦ᠍《ᠠᠷᠤᠯᠠᠳ ᠤ᠋ᠨ ᠮᠠᠭᠤ ᠵᠤᠯᠳᠠᠷᠠᠢ ᠵᠢᠭᠠᠯ ᠤᠤ?》 ᠭᠡᠰᠡᠨ᠃ ᠲᠡᠭᠡᠬᠦ ᠳ᠋ᠦ᠍ᠨᠢ ᠪᠢ《ᠴᠢᠮᠠᠲᠤ ᠬᠠᠮᠢᠶᠠ ᠦᠭᠡᠢ》 ᠭᠡᠵᠦ ᠬᠡᠯᠡᠭᠰᠡᠨ ᠭᠡᠪᠡ᠃ ᠪᠣᠭᠤᠷᠴᠢ᠄
— ᠲᠡᠷᠡ ᠲᠡᠭᠡᠭᠡᠳ ᠬᠠᠮᠢᠭᠠ ᠶᠠᠪᠤᠨᠠ ᠪᠣᠢ? ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌ ᠬᠡᠷᠦᠯᠦᠨᠵᠢᠨ᠄
— ᠣᠷᠣᠭᠰᠢ ᠪᠠᠨ ᠬᠢᠲᠠᠳ ᠤᠷᠤᠭᠤ ᠶᠠᠪᠤᠴᠢᠬᠠᠭᠰᠠᠨ ᠭᠡᠨᠡ ᠪᠢᠯᠡ᠃ ᠲᠡᠰᠢ ᠶᠠᠪᠤᠵᠤ ᠮᠠᠢᠮᠠᠢ ᠬᠢᠳᠡᠭ᠂ ᠬᠡᠳᠦᠨ ᠰᠠᠷᠠ ᠪᠠᠷ ᠶᠠᠪᠤᠴᠢᠬᠠᠳᠠᠭ ᠨᠢ ᠲᠠᠭᠠᠷᠠᠭᠰᠠᠨ᠂ ᠢᠷᠡᠬᠦ ᠡᠳᠦᠷ ᠪᠢᠵᠡ᠃
ᠡᠨᠡ ᠬᠣᠶᠠᠷ ᠤ᠋ᠨ ᠡᠢᠨ ᠶᠠᠷᠢᠵᠤ ᠰᠠᠭᠤᠬᠤ ᠵᠠᠭᠤᠷᠠ ᠨᠠᠷᠠ ᠠᠭᠤᠯᠠ ᠶ᠋ᠢᠨ ᠲᠣᠯᠣᠭᠠᠢ ᠤᠷᠤᠭᠤ ᠲᠡᠰᠢᠵᠦ᠂ ᠲᠡᠳᠡ ᠮᠣᠷᠳᠠᠨ ᠮᠠᠯ ᠢ᠋ᠶ᠋ᠠᠨ ᠴᠤᠭᠯᠠᠭᠤᠯᠬᠤ ᠪᠠᠷ ᠶᠠᠪᠤᠯᠠ᠃
ᠣᠷᠣᠢ ᠦᠳᠡᠰᠢ ᠶ᠋ᠢᠨ ᠠᠵᠢᠯ ᠢ᠋ ᠬᠣᠣᠰ ᠬᠣᠶᠠᠷ ᠬᠣᠯᠪᠣᠭᠠᠲᠠᠢ ᠶᠠᠪᠤᠵᠤ ᠳᠠᠭᠤᠰᠬᠠᠭᠠᠳ ᠡᠬᠡᠨᠡᠷ ᠨᠥᠬᠥᠷ ᠪᠣᠯᠬᠤ ᠡᠷᠡ ᠡᠮᠡ ᠶ᠋ᠢᠨ ᠨᠢᠭᠡᠨ ᠳᠡᠷᠡ ᠶ᠋ᠢᠨ ᠵᠢᠷᠭᠠᠯ ᠢ᠋ ᠡᠳ᠋ᠯᠡᠨ ᠴᠡᠩᠭᠡᠪᠡ᠃ ᠲᠡᠷᠡ ᠬᠣᠶᠠᠷ ᠮᠠᠷᠭᠠᠰᠢ ᠡᠳᠦᠷ ᠦ᠋ᠨ ᠠᠵᠢᠯ ᠢ᠋ ᠬᠡᠷᠬᠢᠬᠦ ᠪᠡᠨ ᠦᠳᠡᠰᠢ ᠭᠠᠳᠠᠭᠤᠷ ᠶᠠᠪᠤᠬᠤ ᠳ᠋ᠠᠭᠠᠨ ᠴᠤ᠌ ᠮᠠᠷᠲᠠᠭᠰᠠᠨ ᠦᠭᠡᠢ᠃ ᠪᠣᠭᠤᠷᠴᠢ᠄
— ᠬᠣᠶᠠᠭᠤᠯᠠ ᠭᠣᠣᠯ ᠤ᠋ᠨ ᠵᠠᠬᠠ ᠪᠠᠷ ᠬᠡᠳᠦᠨ ᠦᠷᠢᠶᠡ ᠳᠠᠭᠠ ᠰᠢᠷᠭᠤᠭᠤᠯᠵᠤ ᠲᠣᠭᠯᠠᠬᠤ ᠤᠤ? ᠭᠡᠬᠦ ᠳ᠋ᠦ᠍ ᠬᠡᠷᠦᠯᠦᠨᠵᠢᠨ᠄
— ᠶᠠᠭᠤ ᠭᠡᠰᠡᠨ ᠦᠭᠡ ᠪᠣᠢ? ᠶᠠᠭᠠᠬᠢᠵᠤ ᠪᠣᠯᠳᠠᠭ ᠶᠤᠮ? ᠮᠢᠨᠦ ᠲᠣᠮᠣᠭᠠ ᠦᠭᠡᠢ ᠲᠣᠮᠣᠭᠠ ᠣᠷᠣᠬᠤ ᠪᠣᠯᠤᠭᠠ ᠦᠭᠡᠢ ᠯᠡ ᠪᠠᠢᠨᠠ ᠳᠠ ᠭᠡᠵᠦ ᠢᠨᠢᠶᠡᠬᠦ ᠳ᠋ᠦ᠍ ᠪᠣᠭᠤᠷᠴᠢ᠄
— ᠨᠡᠭᠡᠷᠡᠨ ᠲᠡᠢᠮᠦ ᠯᠡ ᠳᠡ ᠭᠡᠵᠦ ᠨᠢᠭᠡ ᠶᠠᠭᠤᠮᠠ ᠰᠠᠨᠠᠪᠠ ᠪᠣᠯᠤᠯᠲᠠᠢ᠃
— ᠪᠢ ᠮᠠᠷᠭᠠᠰᠢ ᠡᠵᠢ ᠳ᠋ᠡᠭᠡᠨ ᠠᠷᠭᠠᠯ ᠲᠡᠭᠦᠵᠦ ᠥᠭᠭᠦᠨᠡ ᠭᠡᠰᠡᠨ ᠶᠦᠮ᠃ ᠬᠣᠶᠠᠷ ᠴᠢᠩᠭᠡᠯᠢᠭ ᠲᠡᠷᠭᠡ ᠠᠪᠤᠭᠠᠳ ᠬᠣᠶᠠᠭᠤᠯᠠ ᠠᠷᠭᠠᠯ ᠲᠡᠭᠦᠶᠡ ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠬᠡᠷᠤᠯᠤᠨᠵᠢᠨ᠄
— ᠲᠡᠭᠡᠶᠡ᠂ ᠲᠡᠭᠡᠶᠡ᠃ ᠶᠣᠰᠣᠲᠠᠢ ᠵᠤᠭᠠᠲᠠᠢ ᠠᠵᠢᠯ ᠪᠠᠢᠨᠠ ᠭᠡᠪᠡ᠃
ᠦᠨᠡᠬᠡᠷ ᠴᠦ᠍ ᠵᠤᠭᠠᠲᠠᠢ᠂ ᠮᠠᠯ ᠤ᠋ᠨ ᠪᠡᠯᠴᠢᠭᠡᠷ ᠳᠠᠭᠠᠰᠬᠢᠭᠠᠳ ᠨᠠᠮᠤᠷ ᠤ᠋ᠨ ᠦᠬᠡᠷ ᠦ᠋ᠨ ᠬᠠᠲᠠᠭᠰᠠᠨ ᠠᠷᠭᠠᠯ ᠡᠯᠪᠡᠭ ᠠᠭᠠᠳ ᠲᠡᠭᠦᠵᠦ ᠶᠠᠳᠠᠬᠤ ᠴᠤ᠌ ᠶᠠᠭᠤᠮᠠ ᠦᠭᠡᠢ᠂ ᠬᠣᠶᠠᠭᠤᠯᠠ ᠳᠣᠣᠷᠠᠬᠠᠨ ᠢ᠋ᠶ᠋ᠠᠨ ᠬᠣᠶᠠᠷ ᠴᠢᠩᠭᠡᠯᠢᠭ ᠢ᠋ᠶ᠋ᠡᠨ ᠳᠦᠭᠦᠷᠭᠡᠴᠢᠬᠡᠭᠡᠳ ᠬᠡᠭᠡᠷᠡ ᠵᠢᠭᠠᠯ ᠬᠥᠭᠡᠷᠴᠦ ᠶᠠᠷᠢᠵᠤ ᠡᠳᠦᠷ ᠢ᠋ ᠥᠩᠭᠡᠷᠡᠭᠡᠬᠦ ᠳ᠋ᠦ᠍᠂ ᠪᠣᠭᠣᠷᠴᠢ ᠡᠪᠦᠯ ᠦ᠋ᠨ ᠠᠳᠤᠭᠤ ᠣᠲᠣᠷᠯᠠᠨ ᠠᠯᠤᠰ ᠬᠣᠯᠠ ᠶᠠᠪᠤᠳᠠᠭ ᠲᠤᠬᠠᠢ᠂ ᠬᠡᠷᠤᠯᠤᠨᠵᠢᠨ《ᠭᠤᠷᠪᠠᠨ ᠲᠠᠷᠭᠤᠨ》 ᠵᠤᠨ ᠡᠬᠢᠯᠡᠭᠡᠳ ᠪᠣᠷᠣᠭᠠ ᠬᠤᠷᠠ ᠲᠠᠢ ᠪᠠᠢᠭᠰᠠᠨ ᠴᠤ᠌ ᠰᠡᠭᠦᠯ ᠳ᠋ᠡᠭᠡᠨ ᠭᠠᠩᠳᠠᠵᠤ ᠭᠠᠵᠠᠷ ᠤ᠋ᠨ ᠭᠠᠷᠤᠴᠠ ᠮᠠᠭᠤ ᠲᠤᠯᠠ ᠬᠡᠷᠦᠯᠦᠨ ᠦ᠌ ᠬᠣᠢᠲᠤ ᠲᠠᠯᠠ ᠪᠠᠷ ᠨᠠᠮᠤᠷᠵᠢᠭᠠᠳ ᠳᠤᠯᠠᠭᠠᠨ ᠤ᠋ ᠠᠭᠤᠯᠠ ᠭᠡᠳᠡᠭ ᠭᠠᠵᠠᠷ ᠡᠪᠦᠯᠵᠢᠨᠡ ᠭᠡᠵᠦ ᠮᠠᠨᠠᠢᠬᠢᠨ ᠶᠠᠷᠢᠳᠠᠭ ᠭᠡᠪᠡ᠃
ᠡᠨᠡ ᠨᠢ ᠪᠤᠭᠤᠷᠴᠢ ᠳ᠋ᠤ᠌ ᠲᠤᠩ ᠬᠡᠷᠡᠭ ᠲᠡᠢ ᠦᠭᠡ ᠪᠠᠢᠪᠠ᠃ ᠪᠤᠭᠤᠷᠴᠢ ᠠᠳᠤᠭᠤᠨ ᠤ᠋ ᠮᠠᠨᠠᠭᠠᠨ ᠳ᠋ᠤ᠌ ᠭᠠᠷᠤᠭᠠᠳ ᠬᠣᠯᠠ ᠶ᠋ᠢᠨ ᠣᠲᠣᠷ ᠲᠤ᠌ ᠶᠠᠪᠤᠬᠤ ᠠ᠋ᠴᠠ ᠪᠠᠨ ᠡᠮᠦᠨᠡ ᠬᠡᠷᠦᠯᠦᠨᠵᠢᠨ ᠦ᠌ ᠳ᠋ᠦ᠍ ᠢᠷᠡᠨᠡ ᠭᠡᠵᠦ ᠪᠣᠳᠣᠵᠤ ᠪᠠᠢᠭᠰᠠᠨ᠃ ᠲᠡᠭᠡᠭᠡᠳ ᠴᠦ᠍ ᠪᠦᠷ ᠣᠢᠷᠠᠳᠬᠤ ᠶᠤᠮ ᠪᠠᠢᠨᠠ ᠭᠡᠮᠡᠨ ᠪᠠᠶᠠᠷᠯᠠᠵᠤ ᠪᠠᠷᠠᠰᠢ ᠦᠭᠡᠢ ᠪᠥᠯᠥᠭᠡ᠃