ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ- ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ᠂ᠭᠤᠷᠪᠠᠳᠤᠭᠠᠷ ᠪᠦᠯᠦᠭ 〔ᠠᠷᠪᠠᠨ ᠨᠠᠢ᠍ᠮᠠ〕 Цаг төрийн үймээн – Д ᠂ Намдаг - Цаг төрийн үймээн ᠂ гуравдугаар бүлэг -18
66ᠰᠢᠳᠬᠡᠯ(ᠰᠢᠢᠳᠬᠡᠯ)
ᠬᠢᠶᠠᠭᠲᠤ ᠶ᠋ᠢ ᠴᠢᠯᠥᠭᠡᠯᠡᠭᠰᠡᠨ ᠢ᠋ᠶ᠋ᠡᠷ ᠬᠥᠮᠦᠰ ᠦ᠋ᠨ ᠰᠡᠳᠬᠢᠯ ᠶᠡᠬᠡᠳᠡ ᠬᠥᠬᠢᠨ ᠪᠠᠳᠠᠷᠠᠯᠠ᠃ ᠦᠨᠡᠨ ᠳ᠋ᠡᠭᠡᠨ ᠳᠠᠢᠰᠤᠨ ᠢ᠋ ᠡᠢᠮᠦ ᠠᠮᠠᠷᠬᠠᠨ ᠳᠡᠢᠯᠦᠨᠡ ᠭᠡᠵᠦ ᠪᠣᠳᠣᠭᠠ ᠦᠭᠡᠢ ᠪᠠᠢᠭᠰᠠᠨ ᠤᠴᠢᠷ ᠳᠠᠪᠠᠨ ᠲᠤᠭᠤᠯᠵᠤ ᠥᠩᠭᠡᠷᠡᠭᠦᠯᠦᠭᠰᠡᠨ ᠢ᠋ᠶ᠋ᠡᠨ ᠰᠠᠨᠠᠬᠤ ᠳ᠋ᠠᠭᠠᠨ ᠨᠢᠭᠡᠳ ᠨᠢᠭᠡ ᠦᠭᠡᠢ ᠬᠡᠯᠡᠯᠴᠡᠨ ᠱᠤᠤᠭᠢᠯᠳᠤᠨᠠ᠃ ᠲᠡᠷᠡ ᠪᠦᠷᠢ ᠶ᠋ᠢ ᠡᠨᠳᠡ ᠲᠣᠭᠠᠴᠠᠪᠠᠯ ᠡᠰᠡ ᠪᠠᠷᠠᠭᠳᠠᠬᠤ ᠨᠢ ᠮᠡᠳᠡᠭᠡᠵᠢ ᠶ᠋ᠢᠨ ᠬᠡᠷᠡᠭ᠃ ᠢᠩᠭᠢᠬᠦᠯᠡᠷ ᠵᠥᠪᠬᠡᠨ ᠣᠨᠴᠠᠯᠢᠭ ᠠ᠋ᠴᠠ ᠨᠢ ᠠᠪᠰᠤᠭᠠᠢ᠃
ᠨᠢᠭᠡᠳᠦᠭᠡᠷ ᠲᠦ᠍᠂ ᠬᠢᠶᠠᠭᠲᠤ ᠤᠷᠤᠭᠤ ᠠᠩᠬᠠ ᠣᠷᠣᠭᠰᠠᠨ ᠶᠠᠪᠤᠳᠠᠯ᠄ ᠤᠲᠤᠭᠠ ᠤᠨᠢᠶᠠᠷ ᠴᠠᠩ ᠬᠡᠦᠷᠡᠭ ᠲᠦ᠍ ᠳᠠᠷᠤᠭᠳᠠᠭᠰᠠᠨ ᠨᠠᠷᠢᠬᠠᠨ ᠭᠤᠳᠤᠮᠵᠢ ᠨᠤᠭᠤᠳ ᠬᠠᠷᠪᠤᠭᠰᠠᠨ ᠰᠤᠮᠤ ᠮᠡᠲᠦ ᠴᠢᠪᠬᠠᠳᠠᠨ ᠣᠷᠣᠬᠤ ᠳ᠋ᠤ᠌ ᠬᠥᠮᠦᠨ ᠳ᠋ᠦ᠍ ᠬᠠᠷᠠᠩᠭᠤᠢ ᠰᠥᠨᠢ ᠶ᠋ᠢᠨ ᠪᠠᠢᠳᠠᠯ ᠰᠠᠨᠠᠭᠳᠠᠭᠰᠠᠨ ᠠᠵᠢ᠃ ᠭᠡᠪᠡᠴᠦ ᠲᠡᠳᠡ ᠠᠶᠤᠮᠰᠢᠭ ᠦᠭᠡᠢ ᠬᠠᠰᠢᠶᠠ ᠬᠦᠷᠢᠶᠡ ᠪᠤᠯᠤᠩ ᠲᠣᠬᠣᠢ ᠨᠤᠭᠤᠳ ᠲᠤ᠌ ᠬᠣᠷᠭᠣᠳᠠᠭᠰᠠᠨ ᠭᠠᠮᠢᠩ ᠤ᠋ᠳ ᠳᠡᠭᠡᠷᠡ ᠭᠠᠷ ᠪᠥᠮᠪᠥᠭᠡ ᠰᠢᠳᠡᠯᠡᠨ ᠥᠩᠭᠡᠷᠡᠵᠦ ᠶᠠᠪᠤᠭᠰᠠᠨ ᠨᠢ ᠬᠥᠮᠦᠨ ᠪᠦᠷᠢ ᠶ᠋ᠢᠨ ᠰᠠᠨᠠᠭᠠᠨ ᠳ᠋ᠤ᠌ ᠲᠣᠳᠣᠬᠠᠨ ᠪᠥᠭᠡᠳ ᠡᠨᠡ ᠶᠠᠪᠤᠳᠠᠯ ᠬᠡᠵᠢᠶᠡ ᠴᠦ᠍ ᠮᠠᠷᠲᠠᠭᠳᠠᠰᠢ ᠦᠭᠡᠢ ᠤᠴᠢᠷ᠄
ᠰᠢᠪᠡᠭᠡ ᠬᠢᠶᠠᠭᠲᠤ ᠶ᠋ᠢ ᠠᠪᠬᠤ ᠳ᠋ᠤ᠌
ᠰᠢᠯᠦᠨ ᠳ᠋ᠧᠩᠯᠦ ᠬᠡᠷᠡᠭ ᠦᠭᠡᠢ
ᠰᠢᠲᠦᠭᠡᠳ ᠢᠷᠡᠭᠰᠡᠨ ᠭᠠᠮᠢᠩ ᠢ᠋
ᠰᠢᠷᠡᠮᠦᠨ ᠪᠥᠮᠪᠥᠭᠡ ᠪᠡᠷ ᠰᠥᠨᠥᠭᠡᠪᠡ ᠬᠦ ᠭᠡᠳ ᠨᠢᠭᠡᠨ ᠪᠠᠳᠠᠭ ᠰᠢᠯᠦᠭ ᠵᠣᠬᠢᠶᠠᠭᠳᠠᠨ ᠭᠠᠷᠤᠯᠠ᠃
ᠬᠣᠶᠠᠷ ᠲᠤ᠌᠂ ᠵᠠᠩᠵᠤᠨ ᠰᠦᠬᠡᠪᠠᠭᠠᠲᠤᠷ ᠲᠡᠷᠡ ᠠᠶᠤᠮᠰᠢᠭᠲᠤ ᠲᠤᠯᠤᠯᠳᠤᠭᠠᠨ ᠳᠤᠮᠳᠠᠭᠤᠷ ᠬᠤᠸᠠ ᠬᠣᠩᠭᠣᠷ ᠮᠣᠷᠢ ᠪᠠᠷ ᠲᠠᠰᠤᠷᠠᠯᠲᠠ ᠦᠭᠡᠢ ᠳᠠᠪᠬᠢᠨ ᠢᠯᠠᠨ ᠳᠡᠢᠯᠬᠦ ᠠᠷᠭᠠ ᠤᠬᠠᠭᠠᠨ ᠢ᠋ ᠲᠠᠨᠢᠭᠤᠯᠤᠨ ᠤᠳᠤᠷᠢᠳᠴᠤ ᠶᠠᠪᠤᠭᠰᠠᠨ ᠢ᠋ ᠬᠥᠮᠦᠨ ᠪᠦᠷᠢ ᠶᠡᠬᠡᠳᠡ ᠪᠠᠬᠠᠳᠤᠨ ᠱᠤᠤᠭᠢᠬᠤ ᠤᠴᠢᠷ᠄
ᠬᠤᠸᠠ ᠬᠣᠩᠭᠣᠷ ᠮᠣᠷᠢ ᠲᠠᠢ ᠬᠦ
ᠤᠯᠤᠰ ᠤ᠋ᠨ ᠶᠡᠬᠡ ᠵᠠᠩᠵᠤᠨ ᠠ ᠬᠥ
ᠤᠴᠢᠷ ᠤᠳᠬᠠ ᠪᠠᠷ ᠤᠬᠠᠭᠤᠯᠤᠭᠰᠠᠨ
ᠤᠬᠠᠭᠠᠨ ᠶᠡᠬᠡ ᠲᠡᠢ ᠵᠠᠩᠵᠤᠨ ᠠ ᠬᠥ ᠭᠡᠳᠡᠭ ᠬᠣᠶᠠᠳᠠᠬᠢ ᠪᠠᠳᠠᠭ ᠵᠣᠬᠢᠶᠠᠵᠠᠢ᠃
ᠭᠤᠷᠪᠠᠳᠠᠬᠢ ᠨᠢ᠂ ᠫᠤᠤᠳᠠᠬᠤ ᠰᠤᠮᠤ ᠦᠭᠡᠢ ᠬᠣᠲᠠ ᠠ᠋ᠴᠠ ᠤᠬᠤᠷᠢᠨ ᠪᠠᠷᠠᠭᠤᠨ ᠳᠡᠨᠵᠢ ᠳᠡᠭᠡᠷᠡ ᠨᠢ ᠭᠠᠷᠤᠨ ᠰᠠᠨᠳᠤᠷᠴᠤ ᠪᠠᠢᠲᠠᠯᠠ᠂ ᠰᠠᠨᠠᠮᠰᠠᠷ ᠦᠭᠡᠢ ᠰᠤᠮᠤ ᠵᠠᠯᠭᠠᠭᠳᠠᠵᠤ ᠳᠡᠨᠵᠢ ᠳᠡᠭᠡᠷᠡᠬᠢ ᠭᠡᠰᠡᠷ ᠰᠦᠮᠡ ᠶ᠋ᠢᠨ ᠡᠭᠦᠳᠡᠨ ᠡᠴᠡ ᠰᠤᠮᠤ ᠱᠦᠭᠦᠷ ᠬᠦᠷᠲᠡᠯᠡ ᠳᠤᠤᠭᠠᠷᠤᠭᠰᠠᠨ ᠶᠠᠪᠤᠳᠠᠯ ᠳ᠋ᠤ᠌᠄
ᠳᠥᠷᠪᠡᠯᠵᠢᠨ ᠰᠦᠮᠡ ᠶ᠋ᠢᠨ ᠡᠭᠦᠳᠡᠨ ᠳ᠋ᠦ᠍
ᠳᠥᠷᠪᠡᠨ ᠫᠦᠯᠧᠮᠶᠣᠲ ᠢ᠋ᠶ᠋ᠠᠨ ᠵᠤᠭᠤᠭᠠᠳ ᠠ᠋
ᠳᠥᠭᠥᠭᠡᠳ ᠢᠷᠡᠭᠰᠡᠨ ᠭᠠᠮᠢᠩ ᠢ᠋
ᠲᠦᠳᠡ ᠶ᠋ᠢᠨ ᠵᠠᠮ ᠢ᠋ᠶ᠋ᠠᠷ ᠨᠢ ᠲᠣᠨᠢᠯᠭᠠᠪᠠ ᠬᠦ ᠭᠡᠵᠦ ᠵᠣᠬᠢᠶᠠᠨᠠ᠃ ᠡᠢᠨᠬᠦ ᠦᠭᠡ ᠵᠣᠬᠢᠶᠠᠭᠳᠠᠬᠤ ᠶ᠋ᠢᠨ ᠵᠡᠷᠭᠡᠴᠡᠭᠡ ᠪᠡᠷ ᠠᠶᠠ ᠪᠠᠰᠠ ᠵᠣᠬᠢᠶᠠᠭᠳᠠᠵᠠᠢ᠃ ᠡᠪᠲᠡᠢᠬᠡᠨ ᠪᠣᠯᠣᠳ ᠬᠥᠩᠭᠡᠨ᠂ ᠦᠭᠡ ᠠᠶᠠᠯᠭᠤ ᠬᠣᠶᠠᠷ ᠨᠢ ᠶᠠᠪ ᠴᠠᠪ ᠲᠣᠬᠢᠷᠠᠭᠰᠠᠨ ᠢ᠋ ᠬᠥᠮᠦᠨ ᠪᠦᠷᠢ ᠰᠢᠮᠳᠠᠨ ᠰᠤᠷᠴᠤ ᠭᠠᠵᠠᠷ ᠰᠠᠢ ᠦᠭᠡᠢ ᠳᠠᠭᠤᠯᠠᠯᠳᠤᠨᠠ᠃ ᠡᠨᠡ ᠪᠣᠯ ᠭᠠᠮᠢᠩ ᠢ᠋ ᠬᠢᠶᠠᠭᠲᠤ ᠠ᠋ᠴᠠ ᠬᠥᠭᠡᠭᠡᠨ ᠴᠡᠪᠡᠷᠯᠡᠭᠰᠡᠨ ᠦ᠌ ᠳᠠᠷᠠᠭᠠᠴᠢ ᠶ᠋ᠢᠨ ᠳᠣᠯᠣᠭᠠᠨ ᠬᠣᠨᠣᠭ ᠪᠠᠢᠯᠠ᠃
ᠵᠢᠷᠤᠮᠲᠤ ᠴᠡᠷᠢᠭ ᠦ᠋ᠨ ᠶᠠᠮᠤᠨ ᠳ᠋ᠤ᠌ ᠰᠦᠬᠡᠪᠠᠭᠠᠲᠤᠷ ᠠ᠋ᠴᠠ ᠳᠠᠮᠫᠢᠯ᠂ ᠳᠣᠷᠵᠢ ᠶ᠋ᠢ ᠳᠠᠭᠤᠳᠠᠵᠠᠢ᠃ ᠡᠳᠡᠨ ᠦ᠌ ᠪᠠᠢᠷᠢᠩᠨᠠᠵᠤ ᠪᠠᠢᠭᠠ ᠭᠠᠵᠠᠷ ᠬᠠᠭᠤᠴᠢᠨ ᠭᠠᠮᠢᠩ ᠤ᠋ᠨ ᠬᠤᠸᠠᠷᠠᠨ ᠪᠠᠢᠰᠢᠩ᠃ ᠲᠡᠨᠳᠡ ᠡᠴᠡ ᠳᠣᠷᠵᠢ ᠰᠤᠮᠤᠨ ᠳᠠᠷᠤᠭᠠ ᠪᠠᠨ ᠳ᠋ᠠᠭᠠᠨ ᠭᠠᠷᠪᠠ᠃ ᠵᠠᠩᠵᠤᠨ ᠤ᠋ ᠡᠮᠦᠨᠡ ᠣᠴᠢᠨᠠ ᠭᠡᠬᠦ ᠡᠴᠡ ᠰᠡᠳᠬᠢᠯ ᠬᠥᠭᠡᠷᠦᠨ ᠬᠥᠯ ᠬᠥᠩᠭᠡᠷᠡᠨᠡ᠃ ᠶᠡᠷᠦᠨᠢ ᠳᠣᠷᠵᠢ ᠥᠪᠡᠷ ᠢ᠋ ᠪᠡᠨ ᠪᠤᠰᠤᠳ ᠠ᠋ᠴᠠ ᠢᠯᠡᠭᠦᠦ ᠠᠵᠠ ᠬᠡᠢ ᠮᠣᠷᠢ ᠲᠠᠢ ᠶᠠᠪᠤᠭᠠ ᠭᠡᠵᠦ ᠪᠣᠳᠣᠨᠠ᠃ ᠶᠠᠭᠤᠨ ᠳ᠋ᠤ᠌ ᠲᠡᠷᠡ ᠪᠣᠢ ᠭᠡᠪᠡᠯ ᠨᠢᠭᠡ ᠳ᠋ᠦ᠍᠂ ᠥᠪᠡᠷ ᠦ᠋ᠨ ᠠᠮᠢ ᠪᠡᠶᠡ ᠡᠴᠡ ᠢᠯᠡᠭᠦᠦ ᠡᠷᠬᠢᠮᠯᠡᠨ ᠪᠣᠳᠣᠳᠠᠭ ᠬᠦᠷᠡᠯ ᠦ᠋ᠨ ᠬᠦᠦ ᠴᠡᠷᠢᠨᠳᠣᠷᠵᠢ ᠨᠢ ᠰᠠᠶᠢ ᠶ᠋ᠢᠨ ᠲᠡᠢᠨ ᠢ᠋ ᠡᠨᠳᠡᠭᠳᠡᠯ ᠦᠭᠡᠢ ᠲᠤᠭᠤᠯᠤᠭᠰᠠᠨ ᠢ᠋ᠶ᠋ᠠᠷ ᠪᠠᠷᠠᠬᠤ ᠦᠭᠡᠢ ᠴᠡᠷᠢᠭ ᠡᠷᠡ ᠶ᠋ᠢᠨ ᠢ᠋ᠶ᠋ᠡᠨ ᠡᠭᠦᠷᠭᠡ ᠶ᠋ᠢ ᠬᠡᠨ ᠡᠴᠡ ᠴᠦ᠍ ᠳᠤᠲᠠᠭᠤ ᠦᠭᠡᠢ ᠭᠦᠢᠴᠡᠳᠬᠡᠵᠡᠢ᠃ ᠬᠣᠶᠠᠷ ᠲᠤ᠌᠂ ᠥᠪᠡᠷ ᠢ᠋ᠶ᠋ᠡᠨ ᠮᠥᠨ ᠰᠠᠢᠨ ᠶᠠᠪᠤᠭᠰᠠᠨ ᠤ᠋ ᠳᠡᠭᠡᠷᠡ ᠠᠩᠬᠠᠨ ᠤ᠋ ᠳᠠᠭᠠᠷᠢᠯᠲᠠ ᠪᠠᠷ ᠡᠷᠡᠮᠡᠬᠡᠢ ᠮᠣᠷᠢᠨ ᠤ᠋ ᠡᠷᠴᠢ ᠪᠡᠷ ᠰᠠᠨᠠᠮᠰᠠᠷ ᠦᠭᠡᠢ ᠪᠤᠰᠤᠳ ᠠ᠋ᠴᠠ ᠲᠥᠷᠥᠭᠦᠯᠦᠭᠰᠡᠨ ᠢ᠋ ᠨᠢ ᠬᠥᠮᠦᠨ ᠪᠦᠷᠢ ᠥᠪᠡᠷ ᠦ᠋ᠨ ᠬᠢᠨᠢ ᠵᠣᠷᠢᠭ ᠵᠢᠷᠦᠬᠡ ᠭᠡᠵᠦ ᠦᠵᠡᠨ ᠬᠡᠳᠦᠨ ᠳᠠᠪᠬᠤᠷ ᠪᠠᠬᠠᠳᠤᠨ ᠱᠤᠤᠭᠢᠯᠳᠤᠳᠠᠭ ᠪᠥᠭᠡᠳ ᠣᠳᠣ ᠢᠩᠭᠢᠭᠡᠳ ᠰᠦᠬᠡᠪᠠᠭᠠᠲᠤᠷ ᠤ᠋ᠨ ᠳᠠᠭᠤᠳᠠᠭᠰᠠᠨ ᠢ᠋ ᠰᠠᠢᠰᠢᠶᠠᠬᠤ ᠪᠤᠶᠤ ᠡᠰᠡᠪᠡᠯ ᠴᠢᠬᠤᠯᠠ ᠬᠡᠷᠡᠭ ᠲᠦ᠍ ᠶᠠᠪᠤᠭᠤᠯᠬᠤ ᠭᠡᠵᠦ ᠪᠠᠢᠨᠠ᠃ ᠠᠶᠠ ᠦᠭᠡᠢ ᠪᠣᠯ ᠪᠣᠭᠳᠠ ᠶ᠋ᠢᠨ ᠬᠦᠷᠢᠶᠡ ᠤᠷᠤᠭᠤ ᠳᠠᠢᠰᠤᠨ ᠤ᠋ ᠪᠠᠢᠳᠠᠯ ᠢ᠋ ᠮᠡᠳᠡᠬᠦ ᠠᠵᠢᠯ ᠢ᠋ᠶ᠋ᠠᠷ ᠶᠠᠪᠤᠭᠤᠯᠬᠤ ᠭᠡᠵᠦ ᠪᠠᠢᠵᠤ ᠮᠠᠭᠠᠳ ᠦᠭᠡᠢ᠃ ᠬᠡᠷᠪᠡ ᠲᠡᠢᠮᠦ ᠪᠣᠯ ᠭᠡᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠳᠠᠭᠠᠷᠢᠬᠤ ᠶ᠋ᠢ ᠪᠣᠳᠣᠨᠠ᠃ ᠱᠲ᠋ᠠᠪ ᠲᠤ᠌ ᠰᠦᠬᠡᠪᠠᠭᠠᠲᠤᠷ᠂ ᠪᠠᠯᠳᠠᠨᠴᠡᠷᠢᠩ᠂ ᠥᠭᠡᠯᠦᠯᠭᠡ ᠭᠤᠷᠪᠠᠭᠤᠯᠠ ᠪᠠᠨ ᠪᠠᠷᠤᠨ ᠥᠩᠧᠷᠡᠨ ᠦ᠌ ᠡᠰᠡᠷᠭᠦ ᠲᠤᠩᠬᠠᠭ ᠪᠢᠴᠢᠭ ᠭᠠᠷᠭᠠᠬᠤ ᠠᠵᠢᠯ ᠬᠢᠵᠦ ᠪᠠᠢᠭᠰᠠᠨ ᠶᠤᠮ᠃ ᠳᠠᠮᠫᠢᠯ ᠳᠣᠷᠵᠢ ᠬᠣᠶᠠᠷ ᠤ᠋ᠨ ᠣᠷᠣᠵᠤ ᠢᠷᠡᠮᠡᠭᠴᠡ ᠤᠷᠢᠶᠠ ᠪᠠᠨ ᠵᠣᠭᠰᠣᠪᠠ᠃
ᠰᠦᠬᠡᠪᠠᠭᠠᠲᠤᠷ᠄
— ᠨᠥᠬᠥᠳ ᠰᠠᠭᠤᠴᠢᠬᠠ! ᠭᠡᠳ ᠲᠡᠳᠡᠨ ᠳ᠋ᠦ᠍ ᠶᠠᠷᠢᠬᠤ ᠵᠦᠢᠯ ᠢ᠋ᠶ᠋ᠡᠨ ᠪᠣᠳᠣᠪᠠ ᠪᠣᠯᠤᠯᠲᠠᠢ᠃ ᠨᠥᠭᠦᠭᠡ ᠬᠣᠶᠠᠷ ᠱᠠᠯᠠᠨ ᠳᠡᠭᠡᠷᠡ ᠡᠪᠦᠳᠦᠭ ᠨᠤᠭᠤᠯᠤᠨ ᠰᠠᠭᠤᠵᠤ ᠶᠠᠮᠠᠷ ᠨᠢᠭᠡ ᠰᠠᠢᠨ ᠲᠠᠯᠠ ᠶ᠋ᠢᠨ ᠶᠠᠭᠤᠮᠠ ᠲᠤᠭᠤᠯᠤᠨᠠ ᠭᠡᠵᠦ ᠭᠣᠷᠢᠳᠠᠨ ᠬᠦᠯᠢᠶᠡᠪᠡ᠃ ᠭᠡᠲᠡᠯᠡ ᠰᠦᠬᠡᠪᠠᠭᠠᠲᠤᠷ᠄
— ᠡᠷᠲᠡ ᠪᠡᠷ ᠲᠠᠨᠠᠷ ᠤ᠋ᠨ ᠭᠠᠮᠢᠩ ᠤ᠋ᠨ ᠨᠢᠭᠡᠳᠦᠭᠡᠷ ᠬᠠᠷᠠᠭᠤᠯ ᠢ᠋ ᠤᠰᠠᠳᠬᠠᠬᠤ ᠳ᠋ᠤ᠌ ᠲᠡᠨᠳᠡ ᠬᠡᠳᠦᠨ ᠭᠠᠮᠢᠩ ᠪᠠᠢᠭᠰᠠᠨ ᠪᠣᠢ?
— ᠠᠷᠪᠠᠨ ᠭᠤᠷᠪᠠ ᠭᠡᠵᠦ ᠳᠠᠮᠫᠢᠯ ᠶᠠᠭᠠᠷᠠᠨ ᠥᠨᠳᠡᠢᠨ ᠬᠠᠷᠢᠭᠤᠯᠪᠠ᠃
— ᠶᠠᠭᠠᠬᠢᠭᠠᠳ ᠠᠷᠪᠠᠨ ᠭᠤᠷᠪᠠ ᠪᠠᠢᠬᠤ ᠪᠢᠯᠡ? ᠤᠭ ᠨᠢ ᠨᠢᠭᠡ ᠪᠠᠭᠠ ᠳᠠᠷᠤᠭᠠ ᠲᠠᠢ ᠠᠷᠪᠠᠨ ᠨᠢᠭᠡ ᠯᠡ ᠪᠠᠢᠬᠤ ᠤᠴᠢᠷ ᠲᠠᠢ᠃
— ᠲᠡᠢᠮᠦ᠂ ᠠᠷᠪᠠᠨ ᠨᠢᠭᠡ᠂ ᠬᠣᠶᠠᠷ ᠤ᠋ᠨ ᠵᠡᠷᠭᠡ ᠡᠩ ᠦ᠋ᠨ ᠢᠷᠡᠭᠡᠳ ᠪᠠᠢᠭᠰᠠᠨ᠃
— ᠲᠡᠭᠡᠭᠡᠳ ᠲᠡᠷᠡ ᠢᠷᠡᠭᠡᠳ ᠢ᠋ ᠴᠢ ᠶᠠᠭᠠᠬᠢᠭᠰᠠᠨ ᠪᠣᠢ?
— ᠬᠠᠮᠲᠤ ᠳ᠋ᠤᠨᠢ ᠤᠰᠠᠳᠬᠠᠭᠰᠠᠨ ᠭᠡᠵᠦ ᠳᠠᠮᠫᠢᠯ ᠬᠡᠨᠡᠭ ᠦᠭᠡᠢ ᠬᠡᠯᠡᠪᠡ᠃
ᠰᠦᠬᠡᠪᠠᠭᠠᠲᠤᠷ ᠰᠣᠴᠢᠨ᠄
— ᠶᠠᠭᠠᠬᠢᠯᠠ ᠭᠡᠵᠦ?
— ᠶᠠᠭᠠᠬᠢᠬᠤᠪ? ᠭᠠᠮᠢᠩ ᠲᠠᠢ ᠨᠡᠢᠯᠡᠭᠰᠡᠨ ᠦ᠌ ᠬᠢᠨᠢ ᠬᠤᠪᠢ ᠳ᠋ᠤ᠌᠃
— ᠰᠠᠢᠨ ᠳᠤᠷᠠ ᠪᠠᠷ ᠨᠡᠢᠯᠡᠴᠡᠭᠰᠡᠨ ᠶᠦᠮ ᠭᠡᠵᠦ ᠤᠤ?
ᠳᠠᠮᠫᠢᠯ ᠵᠢᠭᠠᠬᠠᠨ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ᠂
— ᠬᠡᠨ ᠮᠡᠳᠡᠯᠡ! ᠭᠡᠵᠦ ᠰᠤᠯᠠᠬᠠᠨ ᠬᠠᠷᠢᠭᠤᠯᠪᠠ᠃
ᠬᠡᠨ ᠴᠦ᠍ ᠮᠡᠳᠡᠭᠡᠵᠢ ᠶ᠋ᠢᠨ ᠡᠩ ᠦ᠋ᠨ ᠢᠷᠡᠭᠡᠳ ᠭᠠᠮᠢᠩ ᠤ᠋ᠳ ᠲᠠᠢ ᠰᠠᠢᠨ ᠳᠤᠷᠠ ᠪᠠᠷ ᠨᠡᠢᠯᠡᠬᠦ ᠦᠭᠡᠢ ᠭᠡᠵᠦ ᠰᠦᠬᠡᠪᠠᠭᠠᠲᠤᠷ ᠰᠢᠷᠦᠭᠦᠨ ᠢ᠋ᠶ᠋ᠡᠷ ᠥᠭᠦᠯᠡᠨ᠂ ᠳᠠᠮᠫᠢᠯ ᠢ᠋ ᠬᠦᠢᠲᠡᠨ ᠢ᠋ᠶ᠋ᠡᠷ ᠰᠢᠷᠳᠡᠪᠡ᠃ ᠳᠠᠮᠫᠢᠯ ᠭᠠᠢᠬᠠᠨ ᠰᠦᠬᠡᠪᠠᠭᠠᠲᠤᠷ ᠢ᠋ ᠠᠵᠢᠭᠰᠠᠨ ᠢ᠋ᠶ᠋ᠠᠨ ᠳᠠᠷᠤᠢ ᠳᠠᠯᠳᠢᠷᠠᠨ ᠳᠣᠷᠣᠭᠰᠢ ᠬᠠᠷᠠᠪᠠ᠃ ᠳᠣᠷᠵᠢ ᠡᠷᠬᠢᠮ ᠳᠠᠷᠤᠭᠠ ᠳ᠋ᠠᠭᠠᠨ ᠣᠳᠣ ᠵᠢᠮᠡᠯᠡᠯ ᠢᠷᠡᠬᠦ ᠭᠡᠵᠦ ᠪᠠᠢᠭᠠ ᠶ᠋ᠢ ᠮᠡᠳᠡᠭᠡᠳ ᠲᠡᠷᠡ ᠬᠡᠷᠡᠭ ᠢ᠋ ᠥᠪᠡᠷ ᠳᠡᠭᠡᠷᠡ ᠠᠪᠬᠤ ᠶ᠋ᠢ ᠪᠣᠳᠣᠵᠤ᠄
— ᠦᠭᠡᠢ ᠵᠠᠩᠵᠤᠨ ᠠ᠋! ᠲᠡᠷᠡ ᠬᠣᠶᠠᠷ ᠢᠷᠭᠡᠨ ᠢ᠋ ᠪᠢ ᠴᠠᠭᠠᠰᠢ ᠬᠠᠷᠠᠭᠤᠯᠤᠭᠰᠠᠨ ᠪᠢᠯᠡ᠃
— ᠤᠤᠬᠠᠢ! ᠶᠠᠭᠠᠬᠢᠵᠤ?
— ᠶᠡᠷᠦ ᠲᠠᠷᠴᠢᠯᠠᠭᠠ ᠦᠭᠡᠢ᠂ ᠪᠠᠢᠰᠢᠩ ᠠ᠋ᠴᠠ ᠲᠦᠯᠬᠢᠨ ᠭᠠᠷᠭᠠᠩᠭᠤᠲᠠ ᠠᠷᠤ ᠠ᠋ᠴᠠ ᠨᠢ ᠨᠢᠭᠡ ᠨᠢᠭᠡ ᠳᠠᠷᠤᠵᠤ ᠣᠷᠬᠢᠭᠰᠠᠨ᠃
ᠦᠭᠡᠯᠦᠯᠭᠡ ᠡᠳᠦᠢ ᠪᠣᠯᠲᠠᠯᠠ ᠲᠤᠩ ᠬᠥᠳᠡᠯᠭᠡᠭᠡᠨ ᠦᠭᠡᠢ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠳᠣᠷᠵᠢ ᠶ᠋ᠢ ᠢᠨᠢᠶᠡᠮᠰᠦᠭᠯᠡᠨ ᠠᠵᠢᠭᠯᠠᠵᠤ᠄
— ᠨᠠᠭᠠᠳᠤᠬᠢ ᠴᠢᠨᠢ ᠴᠢᠮᠠᠲᠤ ᠲᠤᠰᠢᠶᠠᠭᠰᠠᠨ ᠶᠤᠮ ᠪᠢᠰᠢᠦ? ᠳᠣᠷᠵᠢ ᠲᠦᠭᠳᠡᠷᠡᠪᠡ᠃ ᠲᠡᠢᠮᠦ ᠭᠡᠪᠡᠯ ᠳᠠᠷᠤᠭᠠ ᠰᠢᠳᠬᠡᠭᠦᠯᠬᠦ᠂ ᠦᠭᠡᠢ ᠬᠢᠴᠡᠪᠡᠯ ᠴᠡᠷᠢᠭ ᠢ᠋ᠶ᠋ᠡᠨ ᠵᠠᠬᠢᠷᠴᠤ ᠶᠠᠪᠤᠭᠠ ᠦᠭᠡᠢ ᠭᠡᠵᠦ ᠮᠥᠨ ᠰᠢᠳᠬᠡᠭᠦᠯᠬᠦ ᠪᠣᠯᠤᠨᠠ ᠭᠡᠵᠦ ᠪᠣᠳᠣᠨ ᠳᠠᠭᠤ ᠭᠠᠷᠴᠤ ᠴᠢᠳᠠᠬᠤ ᠪᠠᠨ ᠪᠣᠯᠢᠯᠠ᠃ ᠭᠡᠲᠡᠯᠡ ᠳᠠᠮᠫᠢᠯ ᠲᠣᠯᠣᠭᠠᠢ ᠪᠠᠨ ᠳᠡᠭᠡᠭᠰᠢ ᠡᠷᠭᠦᠨ
— ᠪᠢ ᠲᠤᠰᠢᠶᠠᠭᠰᠠᠨ! ᠭᠡᠵᠦ ᠵᠣᠷᠢᠮᠠᠭ ᠢ᠋ᠶ᠋ᠠᠷ ᠬᠡᠯᠡᠪᠡ᠃
ᠰᠦᠬᠡᠪᠠᠭᠠᠲᠤᠷ᠄
— ᠮᠥᠨ ᠳᠡ᠂ ᠡᠩ ᠦ᠋ᠨ ᠨᠣᠮᠣᠬᠠᠨ ᠢᠷᠡᠭᠡᠳ ᠢ᠋ ᠠᠯᠠᠬᠤ ᠡᠷᠬᠡ ᠶ᠋ᠢ ᠴᠢᠮᠠᠲᠤ ᠬᠡᠨ ᠣᠯᠭᠣᠭᠰᠠᠨ ᠬᠡᠷᠡᠭ ᠪᠣᠢ? ᠭᠡᠵᠦ ᠰᠢᠭᠤᠳ ᠠᠭᠠᠰᠢᠯᠠᠨ ᠬᠡᠯᠡᠯᠡ᠃
ᠳᠠᠮᠫᠢᠯ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠱᠣᠩᠨᠣᠢᠵᠤ ᠥᠪᠡᠷ ᠦ᠋ᠨ ᠡᠵᠡᠨ ᠨᠣᠶᠠᠨ ᠦᠭᠡᠯᠦᠯᠭᠡ ᠡᠷᠬᠡ ᠦᠭᠡᠢ ᠥᠮᠥᠭᠯᠡᠬᠦ ᠪᠣᠯ ᠤᠤ ᠭᠡᠵᠦ ᠭᠣᠷᠢᠳᠠᠨ ᠬᠠᠷᠠᠪᠠ᠃ ᠦᠭᠡᠯᠦᠯᠭᠡ ᠪᠣᠯ ᠳᠠᠮᠫᠢᠯ ᠳ᠋ᠤ᠌ ᠮᠠᠰᠢ ᠰᠠᠢᠨ᠃ ᠭᠠᠵᠠᠷ ᠳᠡᠭᠡᠷᠡ ᠭᠠᠭᠴᠠ ᠥᠮᠥᠭ ᠲᠦᠰᠢᠭ ᠪᠣᠯᠳᠠᠭ ᠬᠥᠮᠦᠨ ᠨᠢ ᠭᠡᠬᠦ ᠪᠣᠯᠪᠠᠴᠤ ᠡᠨᠡ ᠤᠳᠠᠭᠠ ᠶᠡᠷᠦ ᠨᠢᠭᠤᠷ ᠥᠭᠬᠦ ᠰᠢᠨᠵᠢ ᠦᠭᠡᠢ ᠬᠠᠷᠢᠨ ᠴᠦ᠍ ᠬᠦᠷᠡᠩ ᠪᠣᠷᠣ ᠴᠢᠷᠠᠢ ᠪᠠᠨ ᠬᠦᠷᠡᠢᠯᠭᠡᠨ ᠪᠦᠷᠭᠦᠳ ᠨᠢᠳᠦ ᠪᠡᠨ ᠴᠠᠪᠴᠢᠯᠭᠠ ᠦᠭᠡᠢ ᠪᠣᠯᠭᠠᠪᠠ᠃ ᠡᠢᠮᠦ ᠳ᠋ᠦ᠍ ᠳᠠᠮᠫᠢᠯ ᠥᠪᠡᠷ ᠢ᠋ᠶ᠋ᠡᠨ ᠥᠪᠡᠷ ᠢ᠋ ᠪᠡᠨ ᠥᠮᠥᠭᠯᠡᠬᠦ ᠡᠴᠡ ᠥᠭᠡᠷᠡ ᠵᠠᠮ ᠦᠭᠡᠢ ᠪᠣᠯᠵᠠᠢ᠃ ᠶᠡᠷᠦ ᠨᠢ ᠬᠣᠶᠠᠷ ᠮᠠᠭᠤ ᠬᠢᠲᠠᠳ ᠢ᠋ ᠠᠯᠠᠭᠰᠠᠨ ᠤ᠋ ᠪᠤᠷᠤᠭᠤ ᠶᠠᠭᠤ ᠪᠢᠯᠡ! ᠭᠡᠵᠦ ᠵᠣᠷᠢᠭ ᠣᠷᠣᠬᠤ ᠠᠵᠢ᠃
— ᠦᠭᠡᠢ ᠠ᠋᠂ ᠵᠠᠩᠵᠤᠨ ᠠ᠋! ᠶᠡᠷᠦᠨᠢ ᠲᠡᠷᠡ ᠬᠣᠶᠠᠷ ᠢ᠋ ᠠᠯᠠᠭᠰᠠᠨ ᠤ᠋ ᠪᠤᠷᠤᠭᠤ ᠶᠠᠭᠤ ᠪᠣᠢ? ᠪᠢ ᠣᠢᠯᠠᠭᠠᠬᠤ ᠦᠭᠡᠢ ᠪᠠᠢᠨᠠ᠃
— ᠬᠠᠷᠢᠨ ᠪᠢ ᠴᠢᠮᠠ ᠠ᠋ᠴᠠ ᠠᠰᠠᠭᠤᠶᠠ! ᠠᠯᠠᠭᠰᠠᠨ ᠤ᠋ ᠭᠠᠪᠢᠶᠠ ᠶᠠᠭᠤ ᠪᠣᠢ?
— ᠭᠠᠪᠢᠶᠠ ᠪᠠᠢᠬᠤ ᠦᠭᠡᠢ ᠪᠣᠯᠪᠠᠴᠤ᠂ ᠲᠡᠢᠨ ᠦ᠌ ᠦᠶᠡ᠃ ᠬᠥᠮᠦᠨ ᠬᠥᠮᠦᠨ ᠢ᠋ ᠢᠲᠡᠭᠡᠬᠦ ᠳ᠋ᠦ᠍ ᠪᠡᠷᠬᠡ ᠲᠡᠢ ᠴᠠᠭ ᠭᠡᠵᠦ ᠪᠤᠬᠢᠨᠢᠳᠤᠭᠰᠠᠨ ᠰᠢᠷᠦᠭᠦᠨ ᠠᠮᠢᠰᠬᠤᠯ ᠢ᠋ᠶ᠋ᠠᠷ ᠥᠭᠦᠯᠡᠪᠡ᠃
— ᠤᠤᠬᠠᠢ᠂ ᠴᠢᠨᠦ ᠪᠣᠳᠣᠯ ᠢ᠋ᠶ᠋ᠠᠷ ᠪᠣᠯ ᠪᠦᠬᠦ ᠬᠢᠲᠠᠳ ᠢᠷᠡᠭᠡᠳ ᠢ᠋ ᠬᠢᠳᠤᠬᠤ ᠬᠡᠷᠡᠭ ᠪᠣᠯᠬᠤ ᠨᠢ ᠤᠤ?
— ᠲᠡᠢᠮᠦ ᠠ᠋᠂ ᠶᠠᠭᠤᠨ ᠳ᠋ᠤ᠌ ᠭᠡᠪᠡᠯ ᠡᠨᠡ ᠮᠠᠭᠤᠰᠠᠢᠨ ᠬᠢᠲᠠᠳ ᠤ᠋ᠳ ᠮᠢᠨᠦ ᠣᠷᠣᠨ ᠭᠡᠷ᠂ ᠡᠴᠢᠭᠡ ᠡᠬᠡ᠂ ᠠᠬᠠ ᠳᠡᠭᠦᠦ ᠪᠢᠳᠡᠨ ᠢ᠋ ᠰᠦᠢᠳᠬᠡᠭᠰᠡᠨ᠂ ᠠᠷᠪᠠᠨ ᠭᠤᠷᠪᠠᠨ ᠨᠠᠰᠤᠲᠠᠢ ᠳ᠋ᠤᠨᠢ ᠰᠦᠢ ᠲᠠᠯᠪᠢᠭᠰᠠᠨ ᠠᠮᠠᠷᠠᠭ ᠢ᠋ ᠮᠢᠨᠢ ᠴᠦ᠍ ᠠᠯᠠᠭᠰᠠᠨ ᠭᠡᠵᠦ ᠳᠠᠮᠫᠢᠯ ᠬᠣᠭᠣᠯᠠᠢ ᠴᠡᠴᠡᠷᠡᠭᠦᠯᠦᠭᠡᠳ ᠳᠠᠷᠠᠭᠠ ᠨᠢ᠄ ᠡᠨᠡ ᠳᠡᠯᠡᠬᠡᠢ ᠳ᠋ᠦ᠍ ᠪᠢ ᠭᠠᠪ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠪᠣᠯᠤᠭᠰᠠᠨ ᠬᠥᠮᠦᠨ᠃ ᠵᠠᠷᠢᠮ ᠳ᠋ᠠᠭᠠᠨ ᠠᠮᠢᠳᠤᠷᠠᠨ ᠠᠮᠢᠳᠤ ᠶᠠᠪᠤᠬᠤ ᠶ᠋ᠢ ᠬᠦᠰᠡᠬᠦ ᠨᠢ ᠴᠣᠬᠣᠮ ᠶᠠᠭᠤᠨ ᠤ᠋ ᠲᠥᠯᠥᠭᠡ ᠪᠠᠢᠨᠠ ᠪᠣᠢ ᠭᠡᠵᠦ ᠥᠪᠡᠷ ᠡᠴᠡ ᠪᠡᠨ ᠠᠰᠠᠭᠤᠬᠤ ᠳ᠋ᠤ᠌ ᠠᠯᠠᠭᠳᠠᠭᠰᠠᠨ ᠬᠥᠮᠦᠰ ᠦ᠋ᠨ ᠥᠰᠢᠶᠡ ᠶ᠋ᠢ ᠠᠯᠠᠨ ᠬᠢᠳᠤᠬᠤ ᠪᠠᠷ ᠠᠪᠬᠤ ᠶ᠋ᠢᠨ ᠲᠥᠯᠥᠭᠡᠨ ᠳ᠋ᠦ᠍ ᠴᠦ᠍ ᠶᠤᠮ ᠰᠢᠭ᠋ ᠪᠠᠢᠳᠠᠭ ᠭᠡᠵᠦ ᠬᠡᠯᠡᠨ ᠨᠢᠳᠦᠨ ᠡᠴᠡ ᠪᠡᠨ ᠨᠢᠯᠪᠤᠰᠤ ᠳᠤᠰᠤᠯᠠᠭᠤᠯᠪᠠ᠃
ᠰᠦᠬᠡᠪᠠᠭᠠᠲᠤᠷ ᠳᠠᠮᠫᠢᠯ ᠤ᠋ᠨ ᠴᠢᠷᠠᠢ ᠶ᠋ᠢ ᠠᠵᠢᠭᠯᠠᠵᠤ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ᠄
— ᠡᠭᠦᠨ ᠦ᠌ ᠭᠠᠭᠴᠠ ᠪᠡᠶᠡ ᠪᠣᠯᠤᠭᠰᠠᠨ ᠭᠡᠳᠡᠭ ᠨᠢ ᠦᠨᠡᠨ ᠤᠤ ᠭᠡᠵᠦ ᠥᠭᠡᠯᠦᠯᠭᠡ ᠡᠴᠡ ᠰᠠᠮ ᠠᠰᠠᠭᠤᠬᠤ ᠳ᠋ᠤ᠌᠂
— ᠦᠨᠡᠨ ᠠ᠋᠂ ᠣᠷᠣᠨ ᠨᠤᠲᠤᠭ ᠲᠤᠨᠢ ᠪᠠᠢᠭᠰᠠᠨ ᠪᠦᠭᠦᠳᠡ ᠶ᠋ᠢ ᠨᠢ ᠭᠠᠮᠢᠩ ᠤ᠋ᠳ ᠬᠢᠳᠤᠴᠢᠬᠠᠭᠰᠠᠨ ᠶᠤᠮ ᠭᠡᠵᠦ ᠥᠭᠡᠯᠦᠯᠭᠡ ᠬᠠᠷᠢᠭᠤ ᠰᠢᠪᠡᠨᠡᠪᠡ᠃ ᠬᠠᠵᠠᠭᠤ ᠳ᠋ᠤᠨᠢ ᠳᠣᠷᠵᠢ ᠪᠦᠷ ᠤᠢᠮᠤᠵᠤ ᠣᠷᠬᠢᠪᠠ᠃ ᠤᠷᠢᠳᠤ ᠡᠮᠦᠨᠡ ᠳᠠᠷᠤᠭᠠ ᠪᠠᠨ ᠣᠯᠠᠨ ᠠ᠋ᠴᠠ ᠣᠨᠴᠠᠭᠠᠢ ᠴᠢᠯᠠᠭᠤᠨ ᠵᠢᠷᠦᠬᠡ ᠲᠡᠢ ᠲᠡᠮᠦᠷ ᠨᠢᠳᠦ ᠲᠡᠢ᠂ ᠳᠠᠢᠰᠤᠨ ᠤ᠋ ᠡᠮᠦᠨᠡ ᠰᠢᠷᠦᠭᠦᠨ ᠶᠠᠪᠤᠳᠠᠭ ᠡᠷᠡ ᠭᠡᠵᠦ ᠪᠣᠳᠣᠳᠠᠭ ᠪᠠᠢᠭᠰᠠᠨ ᠨᠢ ᠬᠠᠷᠢᠨ ᠲᠡᠢᠮᠦ ᠪᠢᠰᠢ ᠥᠰᠢᠶᠡ ᠬᠣᠷᠣᠰᠤᠯ ᠤ᠋ᠨ ᠭᠦᠨ ᠢ᠋ ᠡᠪᠦᠷᠯᠡᠭᠰᠡᠨ ᠳ᠋ᠡᠭᠡᠨ ᠲᠡᠢᠮᠦ ᠪᠣᠯᠤᠭᠰᠠᠨ ᠢ᠋ ᠨᠢ ᠮᠡᠳᠡᠨ ᠤᠯᠠᠮ ᠯᠠ ᠬᠠᠢᠷᠠᠯᠠᠨ ᠬᠦᠨᠳᠦᠳᠬᠡᠬᠦ ᠡᠴᠡ ᠥᠭᠡᠷᠡ ᠠᠷᠭᠠ ᠦᠭᠡᠢ ᠪᠣᠯᠪᠠ᠃ ᠰᠦᠬᠡᠪᠠᠭᠠᠲᠤᠷ᠂
— ᠲᠠᠢᠪᠤᠰᠢᠷᠠ᠃ ᠳᠠᠮᠫᠢᠯ ᠠ᠋ ᠲᠠᠢᠪᠤᠰᠢᠷᠠ! ᠭᠡᠵᠦ ᠠᠷᠭᠠᠳᠠᠨ ᠬᠡᠯᠡᠪᠡ᠃ ᠳᠠᠮᠫᠢᠯ ᠴᠦ᠍ ᠲᠠᠢᠪᠤᠰᠢᠷᠠᠬᠤ ᠶ᠋ᠢ ᠬᠢᠴᠢᠶᠡᠨ ᠪᠡᠶᠡ ᠪᠡᠨ ᠪᠠᠷᠢᠯᠠ᠂ ᠭᠡᠪᠡᠴᠦ᠄
— ᠡᠨᠡ ᠮᠠᠭᠤᠰᠠᠢᠨ ᠬᠢᠲᠠᠳ ᠤ᠋ᠳ ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠢ᠋ ᠪᠦᠭᠦᠳᠡ ᠶ᠋ᠢ ᠨᠢ ᠬᠡᠵᠢᠶᠡᠨᠡᠢ ᠡᠴᠡ ᠨᠠᠭᠠᠰᠢ ᠵᠠᠯᠬᠠᠭᠠᠨ ᠴᠡᠭᠡᠷᠯᠡᠭᠦᠯᠬᠦ᠂ ᠠᠶᠠ ᠦᠭᠡᠢ ᠪᠣᠯ ᠬᠦᠢᠰᠦ ᠲᠡᠮᠲᠡᠷᠢᠨ ᠤᠰᠠᠳᠬᠠᠬᠤ ᠶ᠋ᠢ ᠪᠣᠳᠣᠳᠠᠭ ᠤᠯᠤᠰ ᠤ᠋ᠳ ᠰᠢᠦ ᠵᠠᠩᠵᠤᠨ ᠠ᠋! ᠭᠡᠵᠦ ᠰᠠᠨᠠᠭᠤᠯᠤᠨ ᠢᠳᠬᠠᠬᠤ ᠶ᠋ᠢ ᠣᠷᠣᠯᠳᠣᠬᠤ ᠪᠠᠢᠳᠠᠯ ᠢ᠋ᠶ᠋ᠠᠷ ᠬᠡᠯᠡᠪᠡ᠃
— ᠬᠠᠷᠢᠭᠤ ᠳ᠋ᠤᠨᠢ ᠪᠢᠳᠡ ᠶᠠᠭᠠᠬᠢᠬᠤ ᠶᠣᠰᠣᠲᠠᠢ ᠪᠣᠢ? ᠭᠡᠵᠦ ᠠᠰᠠᠭᠤᠯᠲᠠ ᠭᠠᠷᠭᠠᠨ ᠥᠪᠡᠷ ᠢ᠋ᠶ᠋ᠡᠨ ᠬᠠᠷᠢᠭᠤᠯᠬᠤ ᠳ᠋ᠠᠭᠠᠨ᠄
— ᠠᠯᠠᠬᠤ ᠬᠡᠷᠡᠭᠲᠡᠢ! ᠥᠪᠡᠷᠰᠡᠳ ᠢ᠋ ᠨᠢ ᠬᠦᠢᠰᠦ ᠲᠡᠮᠲᠡᠷᠢᠬᠦ ᠬᠡᠷᠡᠭᠲᠡᠢ᠃
ᠤᠯᠤᠰ ᠣᠷᠣᠨ ᠤ᠋ ᠳᠣᠲᠣᠷᠠ ᠤᠯᠠ ᠱᠠᠬᠠᠢ ᠶ᠋ᠢᠨ ᠮᠥᠷ ᠢ᠋ ᠦᠵᠡᠭᠳᠡᠬᠦ ᠦᠭᠡᠢ ᠪᠣᠯᠭᠠᠬᠤ ᠬᠡᠷᠡᠭᠲᠡᠢ᠃ ᠳᠠᠮᠫᠢᠯ ᠳᠠᠬᠢᠨ ᠪᠤᠬᠢᠨᠢᠳᠤᠨ ᠥᠭᠦᠯᠡᠵᠦ ᠵᠠᠩᠭᠢᠳᠤᠭᠰᠠᠨ ᠭᠠᠷ ᠢ᠋ᠶ᠋ᠠᠷ ᠡᠪᠦᠳᠦᠭ ᠢ᠋ᠶ᠋ᠡᠨ ᠴᠣᠬᠢᠪᠠ᠃
ᠰᠦᠬᠡᠪᠠᠭᠠᠲᠤᠷ᠄
— ᠲᠠᠢᠪᠤᠰᠢᠷᠠ ᠳᠠᠮᠫᠢᠯ ᠠ᠋᠂ ᠲᠠᠢᠪᠤᠰᠢᠷᠠ! ᠭᠡᠵᠦ ᠳᠠᠬᠢᠨ ᠢᠳᠬᠠᠵᠤ ᠨᠢᠭᠡ ᠰᠢᠷᠬᠡᠭ ᠶᠠᠩᠵᠤᠤᠷ ᠥᠭᠭᠦᠭᠰᠡᠨ ᠢ᠋ ᠳᠠᠮᠫᠢᠯ ᠬᠡᠦᠬᠡᠳ ᠮᠡᠲᠦ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠷ ᠲᠣᠰᠣᠨ ᠠᠪᠴᠤ ᠠᠰᠠᠭᠠᠨ ᠶᠡᠬᠡ ᠶᠡᠬᠡ ᠪᠡᠷ ᠰᠣᠷᠣᠨ ᠤᠲᠤᠭᠠ ᠶ᠋ᠢ ᠨᠢ ᠬᠡᠳᠦ ᠳᠠᠬᠢᠨ ᠵᠠᠯᠭᠢᠵᠠᠢ᠃ ᠤᠭ ᠨᠢ ᠳᠠᠮᠫᠢᠯ ᠲᠠᠮᠠᠬᠢᠴᠢᠨ ᠪᠢᠰᠢ᠃ ᠵᠥᠪᠬᠡᠨ ᠡᠨᠡ ᠤᠳᠠᠭᠠ ᠲᠠᠲᠠᠪᠠ᠃ ᠶᠠᠭᠠᠬᠢᠭᠠᠳ ᠲᠡᠷᠡ ᠪᠣᠯ ᠭᠡᠪᠡᠯ ᠨᠢᠭᠡ ᠳ᠋ᠦ᠍ ᠰᠦᠬᠡᠪᠠᠭᠠᠲᠤᠷ ᠠ᠋ᠴᠠ ᠥᠭᠭᠦᠭᠰᠡᠨ ᠢ᠋ ᠬᠦᠨᠳᠦᠳᠬᠡᠨ᠂ ᠬᠣᠶᠠᠷ ᠲᠤ᠌᠂ ᠴᠡᠭᠡᠵᠢᠨ ᠳ᠋ᠡᠭᠡᠨ ᠪᠤᠴᠠᠯᠤᠭᠰᠠᠨ ᠪᠠᠭᠲᠠᠷᠠᠭᠠ ᠶ᠋ᠢ ᠳᠠᠷᠤᠬᠤ ᠶ᠋ᠢᠨ ᠲᠤᠯᠠᠳᠠ ᠲᠠᠲᠠᠵᠤ ᠪᠠᠢᠭᠠ ᠲᠤᠯᠠ ᠲᠣᠯᠣᠭᠠᠢ ᠨᠢ ᠮᠠᠩᠰᠢᠭᠤᠷᠠᠨ ᠨᠢᠳᠦ ᠡᠷᠢᠶᠡᠯᠵᠡᠯᠡᠬᠦ ᠨᠢ ᠳᠡᠷᠭᠡᠳᠡᠬᠢ ᠬᠥᠮᠦᠰ ᠲᠦ᠍ ᠮᠡᠳᠡᠭᠳᠡᠵᠦ ᠪᠠᠢᠯᠠ᠃ ᠭᠡᠪᠡᠴᠦ ᠳᠠᠮᠫᠢᠯ ᠶᠠᠩᠵᠤᠤᠷ ᠢ᠋ᠶ᠋ᠠᠨ ᠲᠠᠲᠠᠭᠰᠠᠭᠠᠷ ᠨᠢᠭᠡ ᠦᠶᠡ ᠴᠢᠪ ᠴᠢᠮᠡᠭᠡ ᠦᠭᠡᠢ᠂ ᠬᠥᠮᠦᠨ ᠪᠦᠷᠢ ᠳᠠᠮᠫᠢᠯ ᠤ᠋ᠨ ᠭᠠᠰᠠᠯᠠᠩᠲᠤ ᠠᠮᠢᠳᠤᠷᠠᠯ ᠤ᠋ᠨ ᠲᠤᠬᠠᠢ ᠪᠣᠳᠣᠵᠠᠢ᠃ ᠭᠠᠭᠴᠠᠬᠠᠨ ᠪᠠᠯᠳᠠᠨᠴᠡᠷᠢᠩ ᠡᠮᠦᠨᠡᠬᠢ ᠠᠵᠢᠯ ᠲᠤᠩᠬᠠᠭ ᠤ᠋ᠨ ᠡᠬᠢ ᠶ᠋ᠢ ᠵᠣᠬᠢᠶᠠᠬᠤ ᠳ᠋ᠠᠭᠠᠨ ᠤᠯᠠᠢᠷᠠᠨ ᠰᠠᠭᠤᠨᠠ᠃ ᠪᠢᠷ ᠦ᠋ᠨ ᠬᠢᠨᠢ ᠦᠵᠦᠭᠦᠷ ᠮᠣᠣᠲᠤᠤ ᠴᠠᠭᠠᠰᠤᠨ ᠳᠡᠭᠡᠷᠡ ᠭᠦᠶᠦᠨ ᠨᠢᠭᠡ ᠵᠢᠭᠳᠡ ᠶ᠋ᠢᠨ ᠠᠭᠰᠢᠭᠤᠨ ᠭᠣᠶᠣᠮᠰᠣᠭ ᠦᠰᠦᠭ ᠢ᠋ ᠳᠤᠷᠠᠢᠯᠭᠠᠨ ᠦᠯᠡᠳᠡᠭᠡᠭᠰᠡᠭᠡᠷ ᠯᠡ ᠪᠠᠢᠯᠠ᠃
ᠰᠦᠬᠡᠪᠠᠭᠠᠲᠤᠷ᠄
— ᠳᠠᠮᠫᠢᠯ ᠠ᠋᠂ ᠣᠳᠣ ᠬᠣᠶᠠᠭᠤᠯᠠ ᠪᠠᠨ ᠵᠢᠭᠠᠯ ᠵᠤᠭᠠ ᠶᠠᠷᠢᠯᠴᠠᠬᠤ ᠤᠤ?
— ᠰᠣᠨᠣᠰᠤᠶᠠ᠂ ᠵᠠᠩᠵᠤᠨ ᠠ᠋!
— ᠪᠢᠳᠡ ᠳᠠᠢᠰᠤᠨ ᠢ᠋ ᠵᠠᠨᠤᠬᠤ ᠨᠢ ᠲᠤᠢᠯ ᠤ᠋ᠨ ᠵᠥᠪ᠂ ᠭᠡᠪᠡᠴᠦ ᠳᠠᠢᠰᠤᠨ ᠤ᠋ ᠳᠤᠮᠳᠠ ᠮᠠᠨ ᠤ᠋ ᠬᠠᠨᠢ ᠨᠥᠬᠥᠳ ᠪᠠᠢᠳᠠᠭ ᠢ᠋ ᠮᠡᠳᠡᠬᠦ ᠬᠡᠷᠡᠭᠲᠡᠢ᠃
— ᠶᠠᠭᠤ? ᠳᠠᠢᠰᠤᠨ ᠤ᠋ ᠳᠤᠮᠳᠠ ᠬᠠᠨᠢ ᠨᠥᠬᠥᠳ ᠪᠠᠰᠠ ᠪᠠᠢᠨᠠ ᠭᠡᠨᠡ ᠠ᠋ ᠭᠡᠵᠦ ᠥᠪᠡᠷ ᠦ᠋ᠨ ᠴᠢᠬᠢᠨ ᠳ᠋ᠦ᠍ ᠦᠯᠦ ᠢᠳᠡᠭᠡᠨ ᠠᠰᠠᠭᠤᠪᠠ᠃
— ᠲᠡᠢᠮᠦ᠂ ᠲᠡᠷᠡ ᠪᠣᠯ ᠠᠷᠠᠳ ᠲᠦᠮᠡᠨ ᠨᠢ᠃
— ᠲᠠ ᠬᠢᠲᠠᠳ ᠢᠷᠡᠭᠡᠳ ᠢ᠋ ᠬᠡᠯᠡᠵᠦ ᠪᠠᠢᠨᠠ ᠤᠤ?
— ᠲᠡᠢᠮᠦ ᠳᠡ᠂ ᠪᠢᠳᠡ ᠶᠡᠷᠦ ᠨᠢ ᠤᠯᠤᠰ ᠣᠷᠣᠨ ᠪᠦᠬᠦᠨ ᠦ᠌ ᠠᠷᠠᠳ ᠢᠷᠭᠡᠳ ᠢ᠋ ᠬᠠᠨᠢ ᠨᠥᠬᠥᠳ ᠢ᠋ᠶ᠋ᠡᠨ ᠭᠡᠵᠦ ᠦᠵᠡᠬᠦ ᠵᠣᠷᠢᠯᠭᠠ ᠲᠠᠢ᠃
— ᠪᠢ ᠢᠲᠡᠭᠡᠬᠦ ᠦᠭᠡᠢ ᠪᠠᠢᠨᠠ᠃ ᠢᠯᠠᠩᠭᠤᠶᠠ ᠬᠢᠲᠠᠳ ᠤ᠋ᠳ ᠢ᠋᠂ ᠡᠳᠡ ᠪᠣᠯ ᠮᠠᠨ ᠢ᠋ ᠡᠵᠡᠯᠡᠨ ᠪᠣᠭᠣᠯᠴᠢᠯᠠᠬᠤ ᠶ᠋ᠢ ᠬᠦᠰᠡᠳᠡᠭ ᠤᠯᠤᠰ᠃
— ᠲᠡᠷᠡ ᠪᠣᠯ ᠠᠷᠠᠳ ᠲᠦᠮᠡᠨ ᠦ᠌ ᠬᠦᠰᠡᠯ ᠪᠢᠰᠢ᠂ ᠵᠠᠰᠠᠭ ᠲᠥᠷᠥ ᠶ᠋ᠢᠨ ᠬᠢᠨᠢ ᠶᠠᠪᠤᠭᠤᠯᠤᠭᠠ᠃
— ᠬᠠᠷᠢᠨ ᠳᠠ᠂ ᠵᠠᠰᠠᠭ ᠲᠥᠷᠥ ᠨᠢ ᠪᠣᠳᠣᠯᠭᠠ ᠪᠠᠨ ᠠᠷᠠᠳ ᠲᠦᠮᠡᠨ ᠳ᠋ᠡᠭᠡᠨ ᠬᠦᠯᠢᠶᠡᠯᠭᠡᠨ ᠪᠡᠶᠡᠯᠡᠭᠦᠯᠳᠡᠭ ᠡᠴᠡ ᠬᠣᠢᠰᠢ ᠶᠠᠭᠠᠬᠢᠵᠤ ᠬᠠᠨᠢ ᠨᠥᠬᠥᠳ ᠪᠣᠯᠤᠯᠴᠠᠬᠤ ᠶᠤᠮ ᠪᠣᠢ?
— ᠵᠠᠰᠠᠭ ᠲᠥᠷᠥ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠷᠭᠢᠰ ᠪᠣᠳᠣᠯᠭᠠ ᠶ᠋ᠢ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠣᠢᠯᠠᠭᠠᠭᠰᠠᠨ ᠢ᠋ᠶ᠋ᠠᠷ ᠪᠢᠳᠡᠨ ᠦ᠌ ᠬᠠᠨᠢ ᠨᠥᠬᠥᠳ ᠪᠣᠯᠬᠤ ᠰᠢᠦ ᠳᠡ᠃
— ᠳᠡᠮᠡᠢ᠂ ᠵᠠᠩᠵᠤᠨ ᠠ᠋᠂ ᠲᠡᠷᠡ ᠲᠦᠮᠡ ᠵᠢᠸᠠ ᠬᠢᠲᠠᠳ ᠢ᠋ ᠲᠡᠭᠡᠵᠦ ᠰᠡᠩᠬᠡᠷᠡᠭᠦᠯᠬᠦ ᠶᠠᠭᠤᠮᠠ ᠡᠨᠡ ᠳᠡᠯᠡᠬᠡᠢ ᠳ᠋ᠦ᠍ ᠶᠠᠭᠠᠬᠢᠪᠠᠴᠤ ᠪᠠᠢᠬᠤ ᠦᠭᠡᠢ᠃
— ᠪᠣᠢ᠃
— ᠬᠠᠮᠢᠭᠠ?
— ᠬᠣᠢᠨᠠ! ᠬᠢᠲᠠᠳ ᠤ᠋ᠨ ᠠᠷᠠᠳ ᠲᠦᠮᠡᠨ ᠪᠣᠯ ᠪᠢᠳᠡᠨ ᠦ᠌ ᠠᠳᠠᠯᠢ ᠭᠠᠳᠠᠭᠠᠳᠤ ᠳᠣᠲᠣᠭᠠᠳᠤ ᠶ᠋ᠢᠨ ᠡᠵᠡᠷᠬᠡᠭ ᠲᠦᠷᠢᠮᠡᠬᠡᠢ ᠨᠠᠷ ᠲᠤ᠌ ᠬᠡᠳᠦᠨ ᠳᠠᠪᠬᠤᠷ ᠮᠥᠯᠵᠢᠭᠳᠡᠨ ᠳᠠᠷᠤᠯᠠᠭᠳᠠᠵᠤ ᠪᠠᠢᠭᠠ ᠠᠷᠠᠳ ᠲᠦᠮᠡᠨ ᠰᠢᠦ! ᠲᠡᠳᠡᠨ ᠢ᠋ ᠯᠧᠨᠢᠨ ᠦ᠌ ᠰᠤᠷᠭᠠᠯ᠂ ᠤᠺᠲ᠋ᠢᠶᠠᠪᠠᠷ ᠤ᠋ᠨ ᠬᠤᠪᠢᠰᠬᠠᠯ ᠤ᠋ᠨ ᠠᠭᠤᠤ ᠭᠠᠢᠬᠠᠮᠰᠢᠭᠲᠤ ᠨᠥᠯᠥᠭᠡ ᠰᠡᠩᠬᠡᠷᠡᠭᠦᠯᠦᠨ ᠪᠢᠳᠡᠨ ᠲᠡᠢ ᠬᠠᠨᠢ ᠨᠥᠬᠥᠳ ᠪᠣᠯᠭᠠᠵᠤ ᠴᠢᠳᠠᠨᠠ᠃
ᠳᠣᠷᠵᠢ ᠳᠣᠲᠣᠷᠠ ᠪᠠᠨ《ᠶᠠᠭᠤᠲᠠᠢ ᠰᠠᠢᠬᠠᠨ ᠬᠡᠷᠡᠭ ᠪᠣᠢ》 ᠭᠡᠵᠦ ᠪᠣᠳᠣᠬᠤ ᠶ᠋ᠢᠨ ᠢ᠋ᠶ᠋ᠡᠨ ᠵᠡᠷᠭᠡᠴᠡᠭᠡ ᠪᠡᠷ ᠬᠢᠲᠠᠳ ᠤ᠋ᠨ ᠠᠷᠠᠳ ᠲᠦᠮᠡᠨ ᠲᠡᠢ ᠬᠠᠨᠢ ᠨᠥᠬᠥᠳ ᠪᠣᠯᠤᠯᠴᠠᠭᠰᠠᠨ ᠲᠡᠷᠡ ᠴᠠᠭ ᠲᠤ᠌ ᠬᠡᠴᠢᠨᠡᠭᠡᠨ ᠠᠮᠤᠭᠤᠯᠠᠩ ᠲᠠᠢᠪᠤᠩ ᠰᠠᠢᠬᠠᠨ ᠴᠠᠭ ᠪᠣᠯᠬᠤ ᠪᠣᠯ ᠭᠡᠵᠦ ᠱᠣᠬᠣᠭᠣᠷᠬᠠᠪᠠ᠃ ᠰᠦᠬᠡᠪᠠᠭᠠᠲᠤᠷ ᠦᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠲᠡᠭᠦᠰᠬᠡᠯ ᠳ᠋ᠦ᠍᠄
— ᠡᠭᠦᠨ ᠢ᠋ ᠨᠥᠬᠥᠷ ᠴᠣᠢᠪᠠᠯᠰᠠᠩ ᠲᠠ ᠨᠠᠷ ᠲᠤ᠌ ᠲᠠᠨᠢᠭᠤᠯᠵᠤ ᠪᠠᠢᠭᠰᠠᠨ ᠦᠭᠡᠢ ᠭᠡᠵᠢ ᠤᠤ?
— ᠲᠠᠨᠢᠭᠤᠯᠤᠭᠰᠠᠨ᠃ ᠭᠡᠪᠡᠴᠦ ᠪᠢᠳᠡ ᠡᠨᠡ ᠶᠠᠷᠢᠶᠠ ᠶ᠋ᠢ ᠰᠢᠭᠤᠳ ᠪᠠᠷᠢᠮᠲᠠᠯᠠᠬᠤ ᠭᠡᠵᠢ ᠤᠤ ᠭᠡᠳ ᠳᠠᠮᠫᠢᠯ ᠢ᠋ ᠰᠦᠬᠡᠪᠠᠭᠠᠲᠤᠷ ᠢ᠋ ᠨᠢᠳᠦ ᠴᠠᠪᠴᠢᠯ ᠦᠭᠡᠢ ᠰᠢᠷᠳᠡᠯᠡ᠃
ᠰᠦᠬᠡᠪᠠᠭᠠᠲᠤᠷ ᠥᠭᠡᠳᠡ ᠡᠴᠡ ᠨᠢ᠄
— ᠲᠠ ᠡᠭᠦᠨ ᠡᠴᠡ ᠥᠭᠡᠷᠡ ᠶᠠᠭᠤ ᠪᠠᠷᠢᠮᠲᠠᠯᠠᠬᠤ ᠬᠡ ᠪᠣᠢ?
— ᠮᠡᠳᠡᠬᠦ ᠦᠭᠡᠢ ᠶᠦᠮ ᠳᠡ ᠭᠡᠳ ᠳᠠᠮᠫᠢᠯ ᠳᠣᠷᠣᠭᠰᠢ ᠬᠠᠷᠠᠨ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ᠄ ᠪᠢ ᠪᠣᠳᠣᠯᠭᠠ ᠪᠠᠨ ᠬᠡᠯᠡᠶᠡ᠃ ᠲᠠᠨ ᠳ᠋ᠤ᠌ ᠡᠰᠡ ᠬᠡᠯᠡᠭᠡᠳ ᠥᠭᠡᠷᠡ ᠬᠡᠨ ᠳ᠋ᠦ᠍ ᠬᠡᠯᠡᠬᠦ ᠪᠢᠯᠡ᠃ ᠬᠥᠮᠦᠨ ᠡᠷᠢᠶᠡᠨ ᠳᠣᠲᠣᠷᠠ ᠪᠠᠨ᠂ ᠮᠣᠭᠠᠢ ᠶ᠋ᠢᠨ ᠡᠷᠢᠶᠡᠨ ᠭᠠᠳᠠᠨᠠ ᠪᠠᠨ ᠭᠡᠭᠴᠢ ᠪᠡᠷ ᠲᠥᠷᠥ ᠶ᠋ᠢᠨ ᠬᠡᠷᠡᠭ ᠮᠥᠨ ᠲᠡᠢᠮᠦ ᠪᠠᠢᠳᠠᠭ ᠪᠢᠰᠢᠦ᠃ ᠪᠢ ᠥᠪᠡᠷ ᠦ᠋ᠨ ᠨᠢᠳᠦ ᠪᠡᠷ ᠨᠢᠭᠡ ᠪᠤᠰᠤ ᠤᠳᠠᠭᠠ ᠦᠵᠡᠯᠡ ᠵᠠᠩᠵᠤᠨ ᠠ᠋᠃
ᠣᠷᠣᠰ ᠤ᠋ᠨ ᠬᠠᠭᠠᠨᠲᠤ ᠵᠠᠰᠠᠭ ᠮᠠᠨ ᠤ᠋ ᠤᠯᠤᠰ ᠢ᠋ ᠡᠨᠡᠷᠢᠨ ᠲᠡᠳᠬᠦᠵᠦ ᠡᠷᠬᠡ ᠮᠠᠲᠠᠯ ᠣᠯᠤᠭᠠᠳ ᠬᠥᠭᠵᠢᠭᠦᠯᠦᠨᠡ ᠭᠡᠵᠦ ᠪᠠᠢᠭᠠᠳ ᠶᠠᠭᠤ ᠪᠠᠷ ᠭᠡᠢᠭᠦᠯᠦᠯᠡ᠃ ᠤᠯᠤᠰ ᠣᠷᠣᠨ ᠢ᠋ ᠮᠠᠨᠢ ᠠᠪᠤᠨ ᠵᠠᠯᠭᠢᠬᠤ ᠠᠷᠭᠠ ᠮᠡᠬᠡ ᠵᠣᠬᠢᠶᠠᠵᠤ ᠪᠠᠢᠭᠰᠠᠨ ᠨᠢ ᠥᠨᠥ ᠦᠶᠡ ᠳ᠋ᠦ᠍ ᠪᠠᠢᠲᠤᠭᠠᠢ᠂ ᠲᠡᠷᠡ ᠦᠶᠡ ᠳ᠋ᠡᠭᠡᠨ ᠮᠡᠳᠡᠭᠳᠡᠵᠦ ᠪᠠᠢᠭᠰᠠᠨ ᠭᠡᠳᠡᠭ ᠪᠢᠰᠢ ᠤᠤ᠂ ᠴᠣᠬᠣᠮ ᠮᠢᠨᠦ ᠮᠡᠳᠡᠬᠦ ᠡᠴᠡ ᠭᠡᠪᠡᠯ᠂ ᠣᠷᠣᠨ ᠨᠤᠲᠤᠭ ᠢ᠋ᠶ᠋ᠠᠨ ᠬᠠᠮᠠᠭᠠᠯᠠ ᠭᠡᠵᠦ ᠠᠯᠢ ᠴᠦ᠍ ᠤᠯᠤᠰ ᠲᠤ᠌ ᠬᠡᠷᠡᠭᠯᠡᠭᠳᠡᠬᠦ ᠪᠡᠨ ᠪᠣᠯᠢᠭᠰᠠᠨ ᠪᠢᠷᠲᠡᠩᠺᠠ ᠫᠤᠤ ᠶ᠋ᠢ ᠥᠭᠴᠦ ᠪᠠᠢᠯᠠ᠃ ᠬᠥᠭᠡᠷᠦᠬᠦᠢ ᠪᠢᠳᠡ ᠲᠡᠭᠦᠨ ᠢ᠋ ᠪᠡᠨ ᠡᠭᠦᠷᠭᠡᠯᠡᠨ ᠳᠠᠢᠰᠤᠨ ᠤ᠋ ᠡᠯᠡᠭ ᠳᠣᠭᠣᠭᠢ ᠪᠣᠯᠤᠨ ᠶᠠᠪᠤᠵᠤ ᠯᠠ ᠪᠠᠢᠯᠠ᠃ ᠦᠬᠡᠷ ᠫᠤᠤ᠂ ᠫᠦᠯᠧᠮᠶᠣᠲ ᠮᠡᠲᠦ ᠶ᠋ᠢ ᠨᠢᠭᠡ ᠬᠣᠶᠠᠷ ᠤ᠋ᠨ ᠲᠡᠳᠦᠢ ᠥᠭᠴᠦ ᠪᠠᠢᠭᠰᠠᠨ ᠨᠢ ᠴᠢᠩ ᠰᠠᠨᠠᠭᠠᠨ ᠤ᠋ ᠬᠡᠷᠡᠭ ᠪᠢᠰᠢ᠂ ᠵᠥᠪᠬᠡᠨ ᠥᠪᠡᠷᠰᠡᠳ ᠦ᠋ᠨ ᠢ᠋ᠶ᠋ᠡᠨ ᠬᠤᠷᠴᠠ ᠵᠡᠪᠰᠡᠭ ᠲᠡᠢ ᠪᠣᠯᠬᠤ ᠪᠠᠨ ᠭᠠᠢᠬᠠᠭᠤᠯᠤᠨ ᠪᠢᠳᠡᠨ ᠢ᠋ ᠪᠢᠰᠢᠷᠡᠭᠦᠯᠦᠨ ᠰᠦᠷᠳᠡᠭᠦᠯᠬᠦ ᠯᠡ ᠭᠡᠰᠡᠨ ᠬᠡᠷᠡᠭ᠃ ᠡᠭᠦᠨᠴᠢᠯᠡᠨ ᠭᠠᠮᠢᠩ᠂ ᠬᠠᠯᠬᠠ ᠮᠣᠩᠭᠣᠯ ᠲᠠᠨᠠᠷ ᠢ᠋ ᠬᠠᠢᠷᠠᠯᠠᠨ ᠬᠠᠮᠠᠭᠠᠯᠠᠵᠤ ᠬᠥᠭᠵᠢᠭᠡᠨ ᠪᠠᠳᠠᠷᠠᠭᠤᠯᠤᠨᠠ ᠭᠡᠵᠦ ᠣᠷᠣᠵᠤ ᠢᠷᠡᠭᠰᠡᠨ ᠡᠴᠡ ᠪᠢᠰᠢ ᠠᠪᠤᠨᠠ ᠵᠠᠯᠭᠢᠨᠠ ᠭᠡᠵᠦ ᠣᠷᠣᠵᠤ ᠢᠷᠡᠭᠡ ᠦᠭᠡᠢ ᠪᠢᠯᠡ᠃ ᠨᠢᠭᠡᠨᠲᠡ ᠭᠠᠳᠠᠭᠠᠳᠤ ᠭᠦᠷᠦᠨ ᠨᠦ᠍ᠭᠦᠳ ᠡᠢᠮᠦ ᠳᠠᠪᠬᠤᠷ ᠪᠣᠳᠣᠯᠭᠠ ᠲᠠᠢ ᠪᠠᠢᠳᠠᠭ ᠪᠣᠯᠬᠣᠷ ᠪᠢᠳᠡᠨ ᠦ᠌ ᠬᠠᠨᠢ ᠨᠥᠬᠥᠳ ᠪᠣᠯᠤᠯᠴᠠᠨᠠ ᠭᠡᠳᠡᠭ ᠦᠭᠡ ᠮᠥᠨ ᠲᠡᠳᠡᠨ ᠦ᠌ ᠬᠢ ᠰᠢᠭ ᠴᠢᠩ ᠰᠠᠨᠠᠭᠠ ᠪᠢᠰᠢ᠂ ᠮᠥᠨ ᠵᠥᠪᠬᠡᠨ ᠭᠠᠳᠠᠨᠠᠬᠢ ᠥᠩᠭᠡ ᠪᠠᠢᠬᠤ ᠶᠣᠰᠣᠲᠠᠢ ᠭᠡᠵᠦ ᠪᠣᠳᠣᠨᠠ ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ᠨᠢ ᠳᠣᠷᠵᠢ《ᠠᠢ ᠳᠠ ᠮᠠᠨ ᠤ᠋ ᠳᠠᠷᠤᠭᠠ ᠲᠤᠩ ᠵᠥᠪ ᠬᠡᠯᠡᠪᠡ》 ᠭᠡᠵᠦ ᠳᠣᠲᠣᠷᠠ ᠪᠠᠨ ᠪᠢᠰᠢᠷᠡᠪᠡ᠃ ᠭᠡᠲᠡᠯᠡ ᠰᠦᠬᠡᠪᠠᠭᠠᠲᠤᠷ《ᠬᠠᠮᠢᠭᠠ ᠠ᠋ᠴᠠ》 ᠭᠡᠵᠦ ᠰᠣᠴᠢᠨ ᠬᠡᠯᠡᠪᠡ᠃
— ᠲᠠ ᠡᠵᠡᠷᠬᠡᠭ ᠲᠦᠷᠢᠮᠡᠬᠡᠢ ᠤᠯᠤᠰ ᠤ᠋ᠨ ᠰᠢᠨᠵᠢ ᠴᠢᠨᠠᠷ ᠤ᠋ᠨ ᠲᠤᠬᠠᠢ ᠳ᠋ᠤ᠌ ᠭᠡᠪᠡᠯ ᠮᠠᠰᠢ ᠦᠨᠡᠨ ᠢ᠋ ᠬᠡᠯᠡᠯᠡ᠃ ᠬᠠᠷᠢᠨ ᠣᠳᠣ ᠶ᠋ᠢᠨ ᠤᠯᠠᠭᠠᠨ ᠣᠷᠣᠰ ᠪᠣᠯ ᠡᠢᠮᠦ ᠪᠢᠰᠢ᠃ ᠪᠦᠬᠦ ᠳᠡᠯᠡᠬᠡᠢ ᠶ᠋ᠢᠨ ᠳᠠᠷᠤᠯᠠᠭᠳᠠᠭᠰᠠᠨ ᠣᠯᠠᠨ ᠲᠦᠮᠡᠨ ᠦ᠌ ᠡᠮᠦᠨᠡ ᠴᠢᠩ ᠰᠢᠳᠤᠷᠭᠤ ᠶ᠋ᠢ ᠪᠠᠷᠢᠮᠲᠠᠯᠠᠨ ᠲᠡᠳᠡᠨ ᠦ᠌ ᠪᠡᠨ ᠲᠥᠯᠥᠭᠡ ᠴᠢᠩ ᠰᠢᠳᠤᠷᠭᠤ ᠪᠠᠷ ᠲᠡᠮᠡᠴᠡᠨᠡ᠃ ᠡᠢᠮᠦ ᠳ᠋ᠦ᠍ ᠪᠢᠳᠡ ᠮᠥᠨ ᠲᠡᠢᠮᠦ ᠪᠠᠢᠬᠤ ᠶᠣᠰᠣᠲᠠᠢ ᠪᠠᠷ ᠦᠯᠦ ᠪᠠᠷᠠᠮ ᠲᠡᠢᠮᠦ ᠪᠠᠢᠪᠠᠯ ᠰᠠᠶᠢ ᠢᠯᠠᠨ ᠲᠠᠢᠯᠵᠤ ᠡᠩᠬᠡᠵᠢᠨ ᠵᠢᠷᠭᠠᠬᠤ ᠴᠠᠭ ᠢ᠋ ᠦᠵᠡᠨᠡ᠃ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠬᠠᠭᠤᠷᠮᠠᠴᠢ ᠶᠠᠭᠤᠮᠠ ᠪᠣᠯ ᠬᠡᠵᠢᠶᠡᠳᠡ ᠬᠠᠭᠤᠷᠮᠠᠴᠢ ᠪᠠᠷ ᠢ᠋ᠶ᠋ᠠᠨ ᠬᠥᠮᠦᠨ ᠲᠡᠭᠦᠨ ᠢ᠋ ᠬᠡᠵᠢᠶᠡ ᠴᠦ᠍ ᠪᠢᠰᠢᠷᠡᠨ ᠰᠦᠰᠦᠭᠯᠡᠬᠦ ᠦᠭᠡᠢ ᠪᠣᠯᠬᠣᠷ ᠪᠢᠳᠡ ᠭᠠᠳᠠᠭᠠᠳᠤ ᠳᠣᠲᠣᠭᠠᠳᠤ ᠠᠯᠢ ᠴᠦ᠍ ᠠᠷᠠᠳ ᠲᠦᠮᠡᠨ ᠢ᠋ ᠬᠠᠭᠤᠷᠤᠨ ᠮᠡᠬᠡᠯᠡᠬᠦ ᠲᠡᠢᠮᠦ ᠪᠤᠵᠠᠷ ᠪᠣᠳᠣᠯᠭᠠ ᠶ᠋ᠢ ᠬᠡᠷᠬᠢᠪᠡᠴᠦ ᠶᠠᠪᠤᠭᠤᠯᠬᠤ ᠦᠭᠡᠢ᠃ ᠡᠨᠡ ᠪᠣᠯ ᠮᠠᠨ ᠤ᠋ ᠬᠤᠪᠢᠰᠬᠠᠯ ᠤ᠋ᠨ ᠭᠣᠣᠯ ᠵᠣᠷᠢᠯᠭᠠ ᠭᠡᠰᠡᠨ ᠳ᠋ᠦ᠍ ᠳᠣᠷᠵᠢ᠂ ᠳᠠᠮᠫᠢᠯ ᠤ᠋ᠨ ᠦᠭᠡ ᠶ᠋ᠢ ᠵᠥᠪᠰᠢᠶᠡᠷᠡᠭᠰᠡᠨ ᠡᠴᠡ ᠪᠡᠨ ᠡᠷᠭᠢᠨ ᠰᠦᠬᠡᠪᠠᠭᠠᠲᠤᠷ ᠤ᠋ᠨ ᠦᠭᠡ ᠶ᠋ᠢ ᠪᠠᠬᠠᠳᠤᠬᠤ ᠶ᠋ᠢᠨ ᠢ᠋ᠶ᠋ᠡᠨ ᠵᠡᠷᠭᠡᠴᠡᠭᠡ ᠪᠡᠷ《ᠨᠡᠭᠡᠷᠡᠨ ᠮᠠᠨ ᠤ᠋ ᠳ᠋ᠤ᠌ ᠨᠢᠭᠡ ᠮᠠᠰᠢ ᠰᠠᠢᠬᠠᠨ ᠴᠠᠭ ᠢᠷᠡᠬᠦ ᠨᠢ!》 ᠭᠡᠵᠦ ᠪᠣᠳᠣᠨ ᠪᠠᠶᠠᠷᠯᠠᠪᠠ᠃ ᠭᠡᠲᠡᠯᠡ ᠳᠠᠮᠫᠢᠯ᠄
— ᠪᠢ ᠢᠲᠡᠭᠡᠬᠦ ᠦᠭᠡᠢ ᠪᠠᠢᠨᠠ! ᠭᠡᠵᠦ ᠲᠣᠯᠣᠭᠠᠢ ᠰᠡᠭᠰᠦᠷᠦᠨ ᠰᠦᠬᠡᠪᠠᠭᠠᠲᠤᠷ ᠢ᠋ ᠬᠠᠷᠠᠬᠤ ᠵᠠᠭᠤᠷᠠ ᠦᠭᠡᠯᠦᠯᠭᠡ ᠶ᠋ᠢ ᠠᠵᠢᠪᠠ᠃ ᠦᠭᠡᠯᠦᠯᠭᠡ ᠨᠢ ᠠᠯᠢ ᠲᠦᠷᠦᠭᠦᠴᠢ ᠡᠴᠡ ᠠᠪᠤᠨ ᠥᠪᠡᠷ ᠦ᠋ᠨ ᠬᠢᠨᠢ ᠡᠮᠦᠨᠡ ᠡᠴᠡ ᠵᠣᠪᠠᠨᠢᠨ ᠨᠢᠭᠤᠷ ᠤᠯᠠᠢᠨ ᠮᠠᠭᠤᠬᠠᠢ ᠬᠠᠷᠠᠵᠤ ᠪᠠᠢᠵᠠᠢ᠃ ᠳᠠᠮᠫᠢᠯ ᠲᠡᠭᠦᠨ ᠢ᠋ ᠨᠢ ᠰᠠᠶᠢ ᠣᠯᠵᠤ ᠬᠠᠷᠠᠨ ᠰᠡᠳᠬᠢᠯ ᠲᠦᠭᠰᠢᠪᠡ᠃ ᠶᠠᠮᠠᠷ ᠪᠣᠯᠪᠠᠴᠤ ᠲᠠ ᠨᠠᠮᠠᠶ᠋ᠢ ᠢᠲᠡᠭᠡᠭᠡᠷᠡᠢ! ᠪᠢ ᠨᠢᠭᠡ ᠵᠢᠷ ᠦ᠋ᠨ ᠳᠣᠣᠷᠠᠲᠤ ᠠᠷᠠᠳ᠂ ᠤᠷᠢᠳᠤ ᠠ᠋ᠴᠠ ᠪᠠᠨ ᠤᠯᠤᠰ ᠢ᠋ᠶ᠋ᠠᠨ ᠭᠡᠵᠦ ᠵᠢᠳᠬᠦᠬᠦ ᠬᠦᠰᠡᠯ ᠲᠡᠢ᠃ ᠡᠨᠡ ᠤᠴᠢᠷ ᠠ᠋ᠴᠠ ᠲᠡᠷᠡ ᠤᠯᠤᠰ ᠲᠥᠷᠥ ᠶ᠋ᠢᠨ ᠨᠠᠷᠢᠨ ᠶᠠᠪᠤᠳᠠᠯ ᠤ᠋ᠨ ᠤᠴᠢᠷ ᠢ᠋ ᠮᠡᠳᠡᠬᠦ ᠬᠡᠷᠡᠭ ᠶᠠᠭᠤ ᠪᠠᠢᠭᠠ ᠠᠵᠢ᠃ ᠵᠦᠭᠡᠷ ᠲᠠ ᠪᠣᠯᠣᠳ ᠲᠠᠨ ᠤ᠋ ᠵᠢᠭᠠᠪᠤᠷᠢ ᠶ᠋ᠢ ᠯᠡ ᠡᠭᠦᠷᠢᠳᠡ ᠳ᠋ᠡᠭᠡᠨ ᠵᠢᠳᠬᠦᠬᠦ ᠪᠡᠨ ᠮᠡᠳᠡᠶᠡ᠃
ᠳᠣᠷᠵᠢ《ᠨᠡᠭᠡᠷᠡᠨ ᠲᠡᠢᠮᠦ᠂ ᠨᠠᠳᠠ ᠴᠦ᠍ ᠥᠭᠡᠷᠡ ᠴᠦ᠍ ᠦᠭᠡᠢ ᠳᠡ》 ᠭᠡᠵᠦ ᠪᠣᠳᠣᠪᠠ᠃
ᠰᠦᠬᠡᠪᠠᠭᠠᠲᠤᠷ᠄ ᠤᠭ ᠨᠢ ᠮᠡᠳᠡᠬᠦ ᠯᠡ ᠶᠣᠰᠣᠲᠠᠢ ᠰᠠᠨ ᠳᠠ ᠭᠡᠵᠦ ᠢᠨᠢᠶᠡᠮᠰᠦᠭᠯᠡᠭᠰᠡᠨ ᠢ᠋ᠶ᠋ᠡᠨ ᠵᠠ ᠶᠠᠭᠠᠬᠢᠬᠤᠪ ᠡᠨᠡ ᠤᠳᠠᠭᠠ ᠪᠢ ᠲᠠᠨ ᠤ᠋ ᠡᠨᠳᠡᠭᠦᠷᠡᠯ ᠢ᠋ ᠡᠷᠭᠢᠭᠦᠯᠵᠦ ᠴᠢᠳᠠᠭᠰᠠᠨ ᠦᠭᠡᠢ᠃ ᠭᠡᠪᠡᠴᠦ ᠪᠢ ᠲᠠᠨ ᠢ᠋ ᠶᠠᠪᠠᠭᠠᠨ ᠳ᠋ᠠᠭᠠᠨ ᠣᠢᠯᠠᠭᠠᠬᠤ ᠪᠢᠵᠡ ᠭᠡᠵᠦ ᠢᠲᠡᠭᠡᠨᠡ᠃ ᠣᠳᠣ ᠢᠩᠭᠢᠭᠡᠳ ᠡᠨᠡ ᠲᠤᠬᠠᠢ ᠶᠠᠷᠢᠶᠠ ᠶ᠋ᠢ ᠣᠷᠬᠢᠨ ᠡᠳᠦᠭᠦᠯᠦᠭᠰᠡᠨ ᠭᠡᠮᠲᠦ ᠬᠡᠷᠡᠭ ᠦ᠋ᠨ ᠴᠢᠨᠢ ᠲᠤᠬᠠᠢ ᠶᠠᠷᠢᠶᠠ᠃
ᠳᠠᠮᠫᠢᠯ ᠰᠣᠴᠢᠨ ᠥᠨᠳᠡᠰᠬᠢᠨ᠄
— ᠶᠠᠮᠠᠷ?
— ᠲᠠ ᠡᠩ ᠦ᠋ᠨ ᠬᠣᠶᠠᠷ ᠢᠷᠭᠡᠨ ᠦ᠌ ᠠᠮᠢ ᠶ᠋ᠢ ᠰᠦᠢᠳᠬᠡᠭᠰᠡᠨ ᠰᠢᠦ ᠳᠡ᠃ ᠡᠨᠡ ᠴᠢᠨᠢ ᠲᠡᠢᠮᠦ ᠪᠠᠭᠠ ᠬᠡᠷᠡᠭ ᠪᠢᠰᠢ ᠭᠡᠵᠦ ᠰᠦᠬᠡᠪᠠᠭᠠᠲᠤᠷ ᠴᠣᠬᠣᠮ ᠬᠡᠷᠬᠢᠨ ᠰᠢᠳᠬᠡᠬᠦ ᠪᠡᠨ ᠣᠯᠬᠤ ᠦᠭᠡᠢ ᠪᠠᠢᠭᠠ ᠳ᠋ᠠᠭᠠᠨ ᠦᠭᠡ ᠪᠡᠨ ᠤᠨᠵᠢᠷᠠᠭᠤᠯᠤᠨ ᠠᠶᠠᠷᠬᠠᠨ ᠬᠡᠯᠡᠪᠡ᠃ ᠳᠠᠮᠫᠢᠯ ᠴᠦ᠍ ᠰᠡᠳᠬᠢᠯ ᠵᠣᠪᠠᠨᠢᠨ ᠬᠡᠷᠬᠢᠬᠦ ᠤᠬᠠᠭᠠᠨ ᠢ᠋ᠶ᠋ᠠᠨ ᠣᠯᠬᠤ ᠦᠭᠡᠢ ᠪᠣᠯᠵᠠᠢ᠃ ᠬᠠᠵᠠᠭᠤ ᠶ᠋ᠢᠨ ᠬᠥᠮᠦᠰ ᠢ᠋ ᠡᠷᠬᠡ ᠦᠭᠡᠢ ᠥᠮᠥᠭᠯᠡᠬᠦ ᠪᠣᠯᠪᠠ ᠤᠤ ᠭᠡᠵᠦ ᠭᠣᠷᠢᠳᠠᠬᠤ ᠳ᠋ᠠᠭᠠᠨ ᠨᠢᠳᠦ ᠪᠦᠯᠲᠡᠯᠵᠡᠭᠦᠯᠦᠨ ᠠᠵᠢᠪᠠ᠃ ᠡᠨᠡ ᠵᠠᠭᠤᠷᠠ ᠪᠠᠯᠳᠠᠨᠴᠡᠷᠢᠩ ᠬᠦᠩ ᠪᠢᠴᠢᠭ ᠦ᠋ᠨ ᠢ᠋ᠶ᠋ᠡᠨ ᠠᠵᠢᠯ ᠢ᠋ ᠬᠣᠢᠰᠢ ᠲᠠᠯᠪᠢᠨ ᠳᠠᠮᠫᠢᠯ ᠢ᠋ ᠰᠣᠨᠢᠷᠬᠠᠨ ᠠᠵᠢᠬᠤ ᠳ᠋ᠠᠭᠠᠨ ᠳᠠᠮᠫᠢᠯ ᠢ᠋ ᠬᠠᠢᠷᠠᠯᠠᠵᠤ ᠪᠠᠢᠭᠰᠠᠨ ᠠᠵᠢ᠃
— ᠡᠨᠡ ᠳᠠᠷᠤᠭᠠ ᠂ ᠴᠡᠷᠢᠭ ᠬᠣᠶᠠᠷ ᠲᠤᠩ ᠪᠠᠵᠠᠭᠠᠬᠤ ᠦᠭᠡᠢ ᠶᠠᠭᠤᠮᠠ ᠬᠢᠵᠦ ᠳᠡ᠃ ᠭᠡᠪᠡᠴᠦ ᠡᠳᠡ ᠲᠡᠢᠨ ᠳᠣᠯᠣᠭᠠᠨ ᠤ᠋ ᠦᠶᠡ ᠪᠠᠢᠭᠰᠠᠨ ᠠ᠋ᠴᠠ ᠯᠠ ᠲᠡᠷᠡ ᠪᠣᠯᠤᠭᠰᠠᠨ ᠪᠣᠢ᠂ ᠭᠡᠵᠦ ᠰᠦᠬᠡᠪᠠᠭᠠᠲᠤᠷ ᠲᠤ᠌ ᠠᠶᠠ ᠵᠠᠰᠠᠨ ᠬᠡᠯᠡᠪᠡ᠃
ᠰᠦᠬᠡᠪᠠᠭᠠᠲᠤᠷ᠄
— ᠲᠡᠢᠮᠦ᠂ ᠢᠳᠡ ᠲᠡᠢᠨ ᠦ᠌ ᠦᠶᠡ ᠪᠠᠢᠭᠰᠠᠨ᠃ ᠭᠡᠲᠡᠯᠡ ᠤᠭ ᠬᠡᠷᠡᠭ ᠬᠥᠮᠦᠨ ᠦ᠌ ᠠᠮᠢ ᠭᠡᠵᠦ ᠪᠣᠳᠣᠯᠬᠢᠯᠠᠨ ᠥᠭᠦᠯᠡᠭᠡᠳ ᠦᠭᠡᠯᠦᠯᠭᠡ ᠤᠷᠤᠭᠤ ᠬᠠᠨᠳᠤᠨ᠂ ᠢᠩᠭᠢᠬᠦ ᠳ᠋ᠦ᠍ ᠶᠠᠭᠠᠬᠢᠪᠠᠯ ᠲᠠᠭᠠᠷᠠᠨᠠ ᠪᠣᠢ? ᠠᠩᠬᠠ ᠤᠳᠠᠭᠠ ᠶ᠋ᠢᠨ ᠬᠡᠷᠡᠭ ᠭᠡᠵᠦ ᠦᠵᠡᠨ ᠰᠠᠨᠠᠭᠤᠯᠤᠭᠠᠳ ᠣᠷᠬᠢᠬᠤ ᠤᠤ?
— ᠦᠭᠡᠯᠦᠯᠭᠡ᠄
— ᠰᠠᠨᠠᠭᠤᠯᠬᠤ ᠶ᠋ᠢ? ᠦᠭᠡᠢ ᠠ᠋! ᠡᠨᠡ ᠨᠣᠬᠠᠢ ᠡᠨᠳᠡ ᠡᠴᠡ ᠭᠠᠷᠤᠭᠰᠠᠭᠠᠷ ᠯᠠ ᠮᠠᠷᠲᠠᠨᠠ ᠭᠡᠵᠦ ᠰᠢᠢᠳᠮᠡᠭᠡᠢ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ ᠳᠠᠮᠫᠢᠯ ᠢ᠋ ᠵᠠᠨᠤᠯᠬᠢᠯᠠᠨ ᠬᠠᠷᠠᠵᠤ᠂ ᠶᠡᠷᠦᠨᠢ ᠮᠠᠨ ᠤ᠋ ᠡᠨᠡ ᠬᠡᠵᠢᠶᠡᠨ ᠦ᠌ ᠪᠣᠯᠳᠠᠭ ᠦᠭᠡᠢ ᠨᠣᠬᠠᠢ ᠭᠡᠪᠡ᠃
ᠰᠦᠬᠡᠪᠠᠭᠠᠲᠤᠷ ᠳᠠᠮᠫᠢᠯ ᠢ᠋ ᠡᠯᠢᠭᠡᠰᠡᠭ ᠢ᠋ᠶ᠋ᠡᠷ ᠬᠠᠷᠠᠨ ᠢᠨᠢᠶᠡᠮᠰᠦᠭᠯᠡᠭᠰᠡᠨ ᠢ᠋ᠶ᠋ᠡᠨ ᠡᠷᠭᠢᠨ᠄ ᠲᠠᠨ ᠤ᠋ ᠪᠣᠳᠣᠯ ᠢ᠋ᠶ᠋ᠠᠷ ᠶᠠᠮᠠᠷ ᠪᠠᠢᠨᠠ? ᠭᠡᠵᠦ ᠦᠭᠡᠯᠦᠯᠭᠡ ᠡᠴᠡ ᠠᠰᠠᠭᠤᠭᠰᠠᠨ ᠳ᠋ᠤ᠌᠄
— ᠲᠠ ᠣᠷᠭᠢ᠂ ᠪᠢ ᠵᠦᠭᠡᠷ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠮᠡᠳᠡᠳᠡᠭ ᠢ᠋ᠶ᠋ᠡᠷ ᠡᠭᠦᠷᠢᠳᠡ ᠮᠠᠷᠲᠠᠭᠳᠠᠬᠤ ᠵᠠᠮ ᠢ᠋ ᠨᠢ ᠵᠢᠭᠠᠭᠠᠳ ᠥᠭᠭᠦᠶᠡ ᠭᠡᠵᠦ ᠬᠠᠷᠢᠭᠤᠯᠪᠠ᠃ ᠳᠠᠮᠫᠢᠯ ᠴᠢᠷᠠᠢ ᠪᠠᠷᠤᠢᠯᠭᠠᠨ ᠠᠮᠢᠰᠬᠤᠭᠠᠳᠠᠨ ᠰᠠᠭᠤᠵᠤ ᠪᠠᠢᠯᠠ᠃ ᠦᠭᠡᠯᠦᠯᠭᠡ《ᠶᠠᠭᠠᠬᠢᠭᠰᠠᠨ ᠠᠭᠤᠷ ᠲᠠᠢ ᠨᠣᠶᠠᠨ ᠪᠣᠢ》 ᠭᠡᠵᠦ ᠪᠣᠳᠣᠨ ᠵᠢᠭᠰᠢᠪᠡ᠃ ᠭᠡᠲᠡᠯᠡ ᠦᠭᠡᠯᠦᠯᠭᠡ ᠥᠪᠡᠷ ᠤᠷᠤᠭᠤ ᠨᠢ ᠰᠦᠷᠳᠡᠮᠡᠷ ᠰᠢᠷᠦᠭᠦᠨ ᠬᠠᠷᠠᠨ᠄
— ᠬᠠᠷᠢᠨ ᠴᠢ ᠬᠠᠮᠢᠶᠠ ᠦᠭᠡᠢ ᠳᠠᠷᠤᠭᠠ ᠶ᠋ᠢᠨ ᠢ᠋ᠶ᠋ᠡᠨ ᠲᠤᠰᠢᠶᠠᠯ ᠢ᠋ ᠭᠦᠢᠴᠡᠳᠬᠡᠭᠰᠡᠨ ᠴᠢᠨᠢ ᠰᠠᠢᠨ᠂ ᠬᠣᠢᠰᠢᠳᠠ ᠮᠥᠨ ᠡᠢᠮᠦ ᠪᠠᠢᠬᠤ ᠨᠢ ᠴᠢᠬᠤᠯᠠ᠂ ᠣᠳᠣ ᠪᠤᠴᠠ!
ᠳᠣᠷᠵᠢ ᠵᠠ ᠭᠡᠬᠦ ᠪᠠᠢᠲᠤᠭᠠᠢ ᠲᠣᠯᠣᠭᠠᠢ ᠴᠦ᠍ ᠲᠣᠬᠢᠯ ᠦᠭᠡᠢ ᠭᠠᠷᠤᠯᠠ᠃ ᠠᠷᠤ ᠳ᠋ᠤᠨᠢ ᠳᠠᠮᠫᠢᠯ ᠴᠢᠷᠠᠢ ᠲᠦᠩᠰᠦᠢᠯᠭᠡᠨ ᠠᠮᠢᠰᠬᠤᠭᠠᠳᠠᠨ ᠬᠡᠪ ᠢ᠋ᠶ᠋ᠡᠷ ᠬᠣᠴᠣᠷᠵᠠᠢ᠃
ᠳᠣᠷᠵᠢ ᠪᠠᠢᠷᠢ ᠤᠷᠤᠭᠤ ᠪᠠᠨ ᠬᠣᠶᠠᠷ ᠬᠥᠯ ᠢ᠋ᠶ᠋ᠡᠨ ᠤᠷᠮᠠ ᠦᠭᠡᠢ ᠰᠣᠯᠪᠢᠭᠤᠯᠤᠨ ᠳᠠᠷᠤᠭᠠ ᠶ᠋ᠢᠨ ᠢ᠋ᠶ᠋ᠡᠨ ᠲᠤᠬᠠᠢ ᠵᠣᠪᠠᠨᠢᠨ ᠶᠠᠪᠤᠨᠠ᠃ ᠪᠠᠢᠷᠢᠨ ᠳ᠋ᠠᠭᠠᠨ ᠣᠴᠢᠨ ᠴᠠᠭ ᠬᠢᠷᠢ ᠲᠡᠢ ᠪᠣᠯᠤᠭᠰᠠᠨ ᠳᠠᠷᠠᠭᠠ ᠳᠠᠮᠫᠢᠯ ᠰᠢᠲᠦ ᠵᠠᠭᠤᠨ ᠢᠷᠪᠠᠢᠰᠬᠢᠨ ᠤᠷᠲᠤ ᠬᠥᠯ ᠢ᠋ᠶ᠋ᠡᠨ ᠠᠶᠠᠷᠬᠠᠨ ᠢ᠋ᠶ᠋ᠠᠷ ᠵᠥᠭᠡᠭᠡᠨ ᠲᠠᠯᠪᠢᠭᠰᠠᠭᠠᠷ ᠢᠷᠡᠪᠡ᠃ ᠳᠣᠷᠵᠢ ᠲᠡᠭᠦᠨ ᠢ᠋ ᠤᠭᠲᠤᠨ ᠠᠪᠤᠩᠭᠤᠲᠠ ᠪᠠᠨ
— ᠶᠠᠭᠤ ᠪᠣᠯᠪᠠ ᠳᠠᠷᠤᠭᠠ ᠠ᠋? ᠭᠡᠰᠡᠨ ᠳ᠋ᠦ᠍ ᠳᠠᠮᠫᠢᠯ᠄ ᠶᠠᠭᠤ ᠪᠣᠯᠬᠤ ᠶᠠᠭᠤ ᠪᠠᠢᠬᠤ ᠪᠣᠢ᠂ ᠪᠠᠩᠵᠠᠳᠠᠭᠤᠯᠤᠯᠠ ᠯᠠ ᠪᠢᠵᠡ ᠭᠡᠵᠦ ᠢᠨᠴᠠᠭᠯᠠᠨ ᠬᠡᠯᠡᠪᠡ᠃
— ᠬᠡᠳᠦ?
— ᠵᠢᠷᠠ᠂ ᠭᠠᠢ ᠲᠠᠢ ᠬᠣᠶᠠᠷ ᠬᠢᠲᠠᠳ ᠤ᠋ᠨ ᠬᠡᠷᠡᠭ ᠲᠦ᠍ ᠳᠥᠴᠢ᠂ ᠵᠠᠩᠵᠤᠨ ᠤ᠋ ᠦᠭᠡ ᠶ᠋ᠢ ᠡᠰᠡ ᠬᠦᠨᠳᠦᠳᠬᠡᠨ ᠪᠡᠶᠡ ᠪᠡᠨ ᠲᠣᠭᠣᠨ ᠮᠠᠷᠭᠤᠭᠰᠠᠨ ᠭᠡᠵᠦ ᠬᠣᠷᠢ ᠭᠡᠳ ᠳᠠᠮᠫᠢᠯ ᠨᠠᠭᠠᠷᠠᠨ ᠣᠷᠣᠨ ᠳᠡᠭᠡᠷᠡ ᠲᠥᠷᠥᠭᠦᠯᠭᠡ ᠪᠡᠨ ᠬᠠᠷᠠᠨ ᠤᠨᠠᠪᠠ᠃
ᠲᠡᠭᠦᠨᠴᠡ ᠬᠣᠢᠰᠢ ᠳᠠᠮᠫᠢᠯ ᠶᠠᠯᠠ ᠰᠢᠢᠳᠬᠡᠯ ᠬᠦᠯᠢᠶᠡᠭᠰᠡᠨ ᠳ᠋ᠡᠭᠡᠨ ᠭᠣᠮᠣᠳᠠᠨ ᠭᠤᠳᠤᠷᠠᠭᠰᠠᠨ ᠵᠦᠢᠯ ᠥᠴᠦᠬᠡᠨ ᠴᠦ᠍ ᠦᠭᠡᠢ ᠵᠥᠪᠬᠡᠨ ᠵᠠᠭᠤᠷᠠ ᠵᠠᠭᠤᠷᠠ ᠬᠡᠲᠦᠷᠬᠡᠢ ᠭᠦᠵᠢᠷᠮᠡᠭ ᠵᠠᠩ ᠭᠠᠷᠭᠠᠳᠠᠭ ᠨᠢ ᠳᠠᠷᠤᠭᠳᠠᠭᠠᠳ ᠴᠡᠷᠢᠭ ᠦ᠋ᠳ ᠠ᠋《ᠪᠥᠭᠰᠡ ᠴᠢᠨᠢ ᠵᠠᠭᠠᠲᠤᠨᠠᠭᠠ ᠦᠭᠡᠢ ᠪᠣᠯ ᠡᠩ ᠦ᠋ᠨ ᠬᠢᠲᠠᠳ ᠲᠤ᠌ ᠪᠤᠤ ᠬᠠᠯᠳᠠ!》 ᠭᠡᠵᠦ ᠵᠠᠬᠢᠬᠤ ᠪᠣᠯᠵᠠᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠳᠠᠪᠰᠢᠯᠲᠦ