ᠬᠥᠯᠥᠭ ᠪᠠᠭᠠᠲᠤᠷ ᠪᠤᠭᠤᠷᠴᠢ - ᠪ᠂ ᠦᠯᠵᠡᠢᠰᠦ᠋ᠷᠦᠩ <ᠲᠡᠷᠢᠭᠦᠨ ᠪᠦᠯᠦᠭ - ᠶᠢᠰᠦ> Хүлэг баатар буурч - Б. Өлзийсүрэн <Тэргүүн бүлэг-9>
61ᠬᠣᠷᠸᠠ ᠲᠠᠢ ᠤᠴᠠᠷᠠᠨ ᠲᠠᠨᠢᠯᠴᠠᠵᠤ ᠪᠠᠶᠠᠷ ᠭᠤᠨᠢᠭ ᠠᠮᠰᠠᠭᠰᠠᠨ ᠲᠡᠷᠢᠭᠦᠨ ᠪᠦᠯᠦᠭ
ᠶᠢᠰᠦ
ᠶᠢᠰᠦ
ᠬᠦᠯᠦᠭ ᠲᠡᠢ ᠪᠣᠯ
ᠬᠥᠯ ᠬᠦᠷᠬᠦ ᠦᠭᠡᠢ ᠭᠠᠵᠠᠷ ᠳᠡᠯᠡᠬᠡᠢ ᠭᠡᠵᠦ ᠦᠭᠡᠢ᠂
ᠬᠦᠦ ᠲᠡᠢ ᠪᠣᠯ
ᠬᠦᠴᠦᠷᠡᠬᠦ ᠦᠭᠡᠢ ᠳᠡᠢᠯᠬᠦ ᠦᠭᠡᠢ ᠳᠠᠢᠰᠤᠨ ᠭᠡᠵᠦ ᠦᠭᠡᠢ
— ᠪᠢ ᠬᠣᠶᠠᠷ ᠮᠣᠷᠢ ᠥᠨᠥ ᠰᠥᠨᠢ ᠤᠶᠠᠵᠤ ᠰᠢᠪᠬᠠᠷᠤᠭᠠᠳ ᠮᠠᠷᠭᠠᠰᠢ ᠡᠷᠲᠡᠬᠡᠨ ᠮᠣᠷᠳᠠᠵᠤ ᠪᠠᠷᠠᠭᠤᠨ ᠲᠡᠰᠢ《ᠭᠤᠷᠪᠠᠨ ᠲᠠᠷᠭᠤᠨ》 ᠬᠦᠷᠴᠦ ᠬᠦᠦ ᠪᠡᠨ ᠰᠤᠷᠠᠭᠯᠠᠳᠠᠭ ᠶᠤᠮ ᠪᠢᠯᠢᠤ ᠳᠠ᠃ ᠲᠡᠨᠳᠡ ᠯᠠ ᠨᠢᠭᠡ ᠰᠤᠷᠠᠭ ᠭᠠᠷᠴᠤ ᠮᠠᠭᠠᠳ ᠦᠭᠡᠢ ᠭᠡᠵᠦ ᠪᠣᠳᠣᠭᠳᠠᠭᠠᠳ ᠪᠠᠢᠬᠤ ᠶᠤᠮ᠃ ᠲᠠᠰᠢ ᠪᠠᠨ ᠰᠡᠳᠬᠢᠯ ᠤᠶᠠᠭᠠ ᠲᠠᠢ ᠪᠣᠯᠤᠭᠠᠳ ᠶᠠᠪᠤᠴᠢᠬᠠᠪᠠᠤ? ᠲᠡᠭᠡᠵᠡᠢ ᠭᠡᠬᠦ ᠳ᠋ᠦ᠍ ᠡᠳᠦᠢ ᠳ᠋ᠦ᠍ ᠬᠦᠷᠦᠭᠡᠳ ᠢᠷᠡᠮᠡᠷ ᠶᠦᠮ᠃
ᠡᠬᠡ ᠠᠯᠲᠠᠵᠢᠨ ᠤ᠋ ᠴᠢᠷᠠᠢ ᠳ᠋ᠤ᠌ ᠨᠢ ᠭᠡᠷᠡᠯ ᠭᠡᠭᠡ ᠲᠠᠲᠠᠵᠤ᠄
— ᠬᠦᠦ ᠮᠢᠨᠢ ᠲᠡᠢᠮᠦ ᠪᠣᠯ ᠠᠶᠠᠲᠠᠢ ᠤᠤ ᠳᠠ᠃ ᠮᠥᠩᠬᠡ ᠲᠩᠷᠢ ᠥᠷᠥᠰᠢᠶᠡᠵᠦ ᠰᠡᠳᠬᠢᠯ ᠵᠢᠷᠦᠬᠡ ᠶ᠋ᠢ ᠨᠢ ᠲᠡᠰᠢ ᠤᠶᠠᠭᠠ ᠲᠠᠢ ᠪᠣᠯᠭᠠᠭᠰᠠᠨ ᠪᠣᠯ ᠶᠠᠪᠤᠵᠤ ᠯᠠ ᠲᠠᠭᠠᠷᠠᠨᠠ ᠳᠠ᠁ ᠭᠡᠪᠡ᠃
ᠥᠷᠯᠥᠭᠡ ᠪᠣᠯᠤᠯᠠ᠃ ᠨᠠᠬᠤ ᠮᠣᠷᠢ ᠪᠠᠨ ᠡᠮᠡᠭᠡᠯᠯᠡᠵᠦ ᠤᠶᠠᠭᠠᠳ ᠭᠡᠷ ᠲᠡᠭᠡᠨ ᠣᠷᠣᠵᠤ ᠢᠷᠡᠨ ᠴᠠᠢ ᠠᠶᠠᠭᠠᠯᠠᠨ ᠣᠭᠣᠴᠢᠯᠠᠨ ᠠᠪᠠᠢ᠃ ᠭᠡᠷ ᠦ᠋ᠨ ᠵᠡᠭᠦᠨ ᠲᠠᠯᠠ ᠳ᠋ᠤ᠌ ᠠᠭᠠᠷᠴᠠ ᠪᠠᠵᠠᠭᠠᠵᠤ ᠠᠭᠠᠷᠤᠤᠯ ᠳᠡᠯᠭᠡᠴᠡᠨᠡ ᠳᠡᠯᠭᠡᠵᠦ ᠲᠠᠯᠪᠢᠵᠤ ᠰᠠᠭᠤᠭᠰᠠᠨ ᠠᠯᠲᠠᠵᠢᠨ᠄
— ᠶᠠᠪᠤᠬᠤ ᠭᠠᠵᠠᠷ ᠴᠢᠨᠢ ᠬᠢᠷᠢ ᠬᠣᠯᠠ ᠪᠣᠢ? ᠡᠪᠦᠭᠡᠨ ᠮᠢᠨᠢ ᠪᠤᠰᠢᠭᠤᠬᠠᠨ ᠴᠢᠬᠢᠨ ᠳ᠋ᠦ᠍ ᠴᠢᠮᠡᠭᠲᠡᠢ᠂ ᠴᠡᠭᠡᠵᠢᠨ ᠳ᠋ᠦ᠍ ᠪᠠᠶᠠᠷᠲᠠᠢ ᠦᠭᠡ ᠰᠣᠨᠣᠰᠬᠠᠬᠤ ᠶ᠋ᠢ ᠪᠣᠳᠣ ᠳᠠ᠃
— ᠬᠣᠯᠠ ᠠ᠋᠂ ᠬᠣᠯᠠ᠃150—160 ᠮᠣᠳᠣ ᠭᠠᠵᠠᠷ᠃ ᠣᠴᠢᠬᠤ ᠳ᠋ᠠᠭᠠᠨ ᠨᠢᠭᠡ ᠬᠣᠨᠣᠬᠤ᠂ ᠢᠷᠡᠬᠦ ᠳ᠋ᠡᠭᠡᠨ ᠪᠠᠰᠠ ᠨᠢᠭᠡ ᠬᠣᠨᠣᠬᠤ᠂ ᠭᠤᠷᠪᠠ ᠬᠣᠨᠣᠭ ᠠ᠋ᠴᠠ ᠨᠠᠭᠠᠰᠢ ᠴᠢᠮᠠ ᠳ᠋ᠠᠭᠠᠨ ᠬᠡᠯᠡ ᠳᠣᠭᠣᠯᠭᠠᠵᠤ ᠠᠮᠵᠢᠬᠤ ᠦᠭᠡᠢ ᠪᠣᠯᠪᠠᠤ᠃ ᠵᠠᠮ ᠳ᠋ᠠᠭᠠᠨ ᠵᠥᠷᠢᠴᠢᠬᠡᠵᠦ ᠮᠡᠳᠡᠬᠦ ᠶᠦᠮ᠃ ᠲᠡᠭᠡᠪᠡᠯ ᠴᠦ᠍ ᠶᠠᠭᠠᠬᠢᠬᠤᠪ᠂ ᠬᠦᠷᠦᠭᠡᠳ ᠯᠡ ᠢᠷᠡᠪᠡᠯ ᠭᠡᠯᠴᠡᠵᠦ ᠪᠠᠢᠲᠠᠯᠠ᠄
— ᠪᠣᠭᠣᠷᠴᠢ ᠢᠷᠡᠯᠡ! ᠭᠡᠰᠡᠨ ᠬᠡᠦᠬᠡᠳ ᠪᠠᠭᠠᠴᠤᠤᠯ ᠤ᠋ᠨ ᠳᠠᠭᠤ ᠱᠣᠣ ᠰᠣᠨᠣᠷ ᠲᠤ᠌ ᠬᠠᠲᠠᠯᠠ᠃ ᠡᠴᠢᠭᠡ ᠡᠬᠡ ᠬᠣᠶᠠᠷ ᠡᠨᠡ ᠠᠪᠢᠶᠠ ᠴᠢᠮᠡᠭᠡᠨ ᠢ᠋ᠶ᠋ᠡᠷ ᠬᠠᠭᠠᠯᠭᠠ ᠪᠠᠷ ᠴᠢᠬᠢᠯᠳᠦᠬᠦ ᠰᠢᠬᠠᠮ ᠭᠠᠷᠪᠠᠰᠤ ᠵᠡᠭᠦᠨ ᠡᠴᠡ ᠬᠡᠳᠦᠨ ᠰᠢᠷᠭᠠᠯ ᠠᠭᠲᠠ ᠬᠥᠭᠡᠭᠡᠭᠰᠡᠨ ᠬᠣᠶᠠᠷ ᠬᠥᠮᠦᠨ ᠢᠷᠡᠵᠦ ᠶᠠᠪᠤᠭᠠ ᠶ᠋ᠢᠨ ᠨᠢᠭᠡ ᠨᠢ ᠶᠠᠭᠠᠬᠢᠬᠤ ᠠᠷᠭᠠ ᠦᠭᠡᠢ ᠬᠦᠰᠡᠨ ᠬᠦᠯᠢᠶᠡᠭᠰᠡᠨ ᠬᠦᠦ ᠨᠢ ᠮᠥᠨ᠃
ᠬᠡᠳᠦᠨ ᠮᠣᠷᠢᠳ ᠢ᠋ᠶ᠋ᠠᠨ ᠭᠡᠷ ᠡᠴᠡ ᠥᠩᠭᠡᠷᠡᠭᠡᠵᠦ ᠪᠠᠷᠠᠭᠤᠨ ᠬᠣᠢᠰᠢ ᠵᠦᠭᠯᠡᠭᠦᠯᠦᠭᠡᠳ ᠲᠡᠳᠡ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠵᠠᠭᠠᠪᠠ᠃ ᠨᠢᠷᠤᠭᠤᠨ ᠳ᠋ᠠᠭᠠᠨ ᠨᠤᠮᠤ ᠰᠠᠭᠠᠳᠠᠭ ᠠᠭᠰᠠᠵᠤ᠂ ᠲᠠᠰᠢᠶᠠᠨ ᠳ᠋ᠠᠭᠠᠨ ᠰᠡᠯᠡᠮᠡ ᠵᠡᠭᠦᠭᠰᠡᠨ ᠵᠢᠭᠠᠬᠠᠨ ᠵᠠᠯᠠᠭᠤ ᠬᠦᠦ ᠬᠦᠦ ᠶ᠋ᠢᠨ ᠬᠢᠨᠢ ᠬᠠᠮᠲᠤ ᠢᠷᠡᠯᠡ᠃ ᠡᠬᠡ ᠠᠯᠲᠠᠵᠢᠨ ᠬᠦᠦ ᠤᠷᠤᠭᠤ ᠪᠠᠨ ᠭᠦᠶᠦᠨ ᠭᠦᠶᠦᠭᠡ ᠪᠡᠷ ᠢ᠋ᠶ᠋ᠡᠨ ᠣᠴᠢᠵᠤ ᠲᠠᠰᠤ ᠲᠡᠪᠡᠷᠢᠨ᠄
— ᠬᠦᠦ ᠮᠢᠨᠢ! ᠬᠦᠦ ᠮᠢᠨᠢ! ᠴᠢ ᠬᠠᠮᠢᠭᠠᠰᠢ ᠪᠠᠨ ᠠᠯᠠᠭᠠ ᠪᠣᠯᠵᠤ ᠡᠯᠢᠭᠡ ᠵᠢᠷᠦᠬᠡ ᠶ᠋ᠢ ᠮᠢᠨᠢ ᠡᠮᠲᠡᠯᠪᠡ ᠳᠡ? ᠭᠡᠮᠡᠨ ᠤᠬᠢᠯᠠᠨ ᠬᠠᠢᠯᠠᠨ ᠥᠭᠦᠯᠡᠪᠡ᠃
ᠬᠦᠦ ᠲᠡᠢ ᠨᠢ ᠢᠷᠡᠭᠰᠡᠨ ᠪᠤᠵᠠᠭᠠᠢ ᠴᠣᠪᠣᠭᠣ ᠬᠦᠦ ᠬᠡᠪᠯᠡᠭᠦᠬᠡᠨ ᠢ᠋ᠶ᠋ᠡᠷ ᠨᠠᠬᠤ ᠶ᠋ᠢᠨ ᠠᠮᠤᠷ ᠮᠡᠨᠳᠦ ᠶ᠋ᠢ ᠡᠷᠢᠵᠦ ᠵᠢᠷᠦᠬᠡᠨ ᠲᠤᠰ ᠭᠠᠵᠠᠷ ᠢ᠋ᠶ᠋ᠠᠨ ᠪᠠᠷᠠᠭᠤᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠳᠠᠷᠤᠵᠤ ᠮᠡᠬᠦᠢᠰᠬᠢᠨ ᠶᠣᠰᠣᠷᠬᠠᠭ ᠠᠭᠠᠰᠢᠯᠠᠬᠤᠢ ᠳ᠋ᠤᠨᠢ᠄
— ᠨᠢᠭᠤᠷᠤᠨ ᠳ᠋ᠠᠭᠠᠨ ᠭᠠᠯ ᠲᠠᠢ ᠨᠢᠳᠦᠨ ᠳ᠋ᠡᠭᠡᠨ ᠴᠣᠭᠲᠠᠢ ᠬᠦᠦ ᠬᠠᠮᠢᠭᠠ ᠠᠯᠢ ᠨᠤᠲᠤᠭ ᠤ᠋ᠨ ᠬᠡᠨ ᠦ᠌ ᠬᠡᠨ ᠭᠡᠳᠡᠭ ᠪᠣᠢ? ᠭᠡᠵᠦ ᠨᠠᠬᠤ ᠮᠡᠨᠳᠦᠯᠡᠨ ᠠᠰᠠᠭᠤᠪᠠ᠃
— ᠤᠨᠤᠨ ᠮᠥᠷᠡᠨ ᠦ᠌ ᠡᠬᠢ᠂ ᠬᠠᠨ ᠬᠡᠨᠲᠡᠢ ᠶ᠋ᠢᠨ ᠥᠪᠥᠷ᠂ ᠰᠡᠩᠭᠦᠷ ᠭᠣᠷᠣᠬᠠᠨᠠ ᠨᠤᠲᠤᠭᠲᠠᠢ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠠᠭᠰᠠᠨ ᠤ᠋ ᠬᠦᠦ ᠲᠡᠮᠦᠵᠢᠨ ᠭᠡᠵᠦ ᠬᠦᠦ ᠬᠠᠷᠢᠭᠤᠯᠪᠠ᠃
《ᠶᠢᠰᠦᠭᠡᠢ ᠪᠠᠭᠠᠲᠤᠷ》 ᠭᠡᠳᠡᠭ ᠡᠷᠬᠢᠮ ᠬᠥᠮᠦᠨ ᠢ᠋ ᠵᠢᠰᠦ ᠦᠵᠡᠵᠦ ᠨᠢᠭᠤᠷ ᠤᠴᠠᠷᠠᠭᠠᠳᠤᠢ ᠴᠤ᠌ ᠲᠦᠮᠡᠨᠲᠡ ᠰᠣᠨᠣᠰᠴᠤ ᠮᠢᠩᠭᠠᠨᠲᠠ ᠮᠡᠳᠡᠷᠡᠵᠦ ᠠᠭᠰᠠᠨ ᠡᠨᠡ ᠨᠡᠷᠡ ᠶ᠋ᠢ ᠰᠣᠨᠣᠰᠤᠭᠠᠳ ᠨᠠᠬᠤ ᠨᠢᠭᠡᠨ ᠵᠠᠭᠤᠷᠠ ᠪᠠᠯᠠᠮᠠᠭᠳᠠᠵᠤ᠄
— ᠠ᠂ ᠮᠥᠨ ᠠ᠋᠂ ᠮᠥᠨ ᠭᠡᠭᠰᠡᠭᠡᠷ ᠥᠭᠡᠷᠡ ᠦᠭᠡ ᠬᠡᠯᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ᠃
— ᠬᠡᠦᠬᠡᠳ ᠦ᠋ᠳ ᠣᠷᠣ ᠳᠠ ᠭᠡᠵᠦ ᠭᠡᠷ ᠤᠷᠤᠭᠤ ᠪᠠᠨ ᠤᠳᠤᠷᠢᠳᠤᠨ ᠣᠷᠣᠭᠤᠯᠪᠠ᠃ ᠨᠠᠬᠤ ᠬᠦᠦ ᠪᠡᠨ ᠲᠡᠪᠡᠷᠢᠵᠦ ᠠᠪᠤᠭᠠᠳ᠄
— ᠴᠢ ᠶᠠᠭᠠᠬᠢᠬᠤ ᠪᠠᠷ ᠢ᠋ᠶ᠋ᠠᠨ ᠬᠡᠯᠡ ᠴᠢᠮᠡᠭᠡ ᠦᠭᠡᠢ ᠠᠯᠠᠭᠠ ᠪᠣᠯᠪᠠ? ᠢᠷᠡᠭᠰᠡᠨ ᠨᠢ ᠰᠠᠢᠨ᠂ ᠶᠠᠪᠤᠬᠤ ᠳ᠋ᠠᠭᠠᠨ ᠬᠡᠯᠡᠳᠡᠭ ᠦᠭᠡᠢ᠃ ᠡᠬᠡ ᠶ᠋ᠢ ᠪᠡᠨ᠂ ᠪᠢᠳᠡᠨ ᠢ᠋ ᠴᠦ᠍ ᠬᠡᠴᠢᠨᠡᠨ ᠵᠣᠪᠠᠭᠠᠪᠠ? ᠭᠡᠵᠦ ᠬᠡᠯᠡᠪᠡᠯ ᠲᠡᠮᠦᠵᠢᠨ᠄
— ᠮᠢᠨᠦ ᠰᠠᠢᠨ ᠨᠠᠢᠵᠠ ᠪᠤᠭᠤᠷᠴᠢ ᠳ᠋ᠤ᠌ ᠪᠢᠲᠡᠭᠡᠢ ᠪᠤᠷᠤᠭᠤ ᠥᠭ ᠳᠡ᠃ ᠨᠠᠳᠠᠳᠤ ᠯᠠ ᠲᠤᠰᠠ ᠬᠢᠵᠦ ᠶᠠᠪᠤᠭᠰᠠᠨ ᠶᠤᠮ ᠭᠡᠪᠡ᠃ ᠪᠤᠭᠤᠷᠴᠢ᠄
— ᠮᠤᠩᠭᠠᠨᠢᠵᠤ ᠶᠠᠳᠠᠷᠠᠵᠤ ᠶᠠᠪᠤᠭᠠ ᠡᠨᠡ ᠨᠥᠬᠥᠷ ᠲᠡᠭᠡᠨ ᠲᠤᠰᠠᠯᠠᠶᠠ ᠭᠡᠵᠦ᠁ ᠡᠨᠡ ᠨᠥᠬᠥᠷ ᠦ᠋ᠨ ᠮᠠᠨᠢ ᠨᠠᠢ᠍ᠮᠠᠨ ᠰᠢᠷᠬᠠ ᠠᠭᠲᠠ ᠶ᠋ᠢ ᠳᠡᠭᠡᠷᠡᠮᠴᠢᠳ ᠬᠤᠯᠠᠭᠠᠢᠯᠠᠨ ᠬᠥᠭᠡᠭᠡᠵᠦ ᠠᠪᠠᠴᠢᠭᠰᠠᠨ ᠢ᠋ ᠠᠷᠤ ᠠ᠋ᠴᠠ ᠨᠢ ᠭᠤᠷᠪᠠ ᠬᠣᠨᠣᠭ ᠮᠥᠷ ᠮᠥᠰᠬᠢᠵᠦ ᠮᠥᠷ ᠨᠢ ᠴᠤᠴᠠᠵᠤ ᠥᠪᠡᠷ ᠢ᠋ᠶ᠋ᠡᠨ ᠴᠦ᠍ ᠵᠦᠳᠡᠷᠡᠵᠦ ᠶᠠᠪᠤᠬᠤ ᠳ᠋ᠤᠨᠢ ᠲᠤᠰᠠ ᠬᠦᠷᠭᠡᠬᠦ ᠯᠡ ᠭᠡᠵᠦ ᠪᠢ ᠬᠠᠮᠲᠤ ᠶᠠᠪᠤᠭᠰᠠᠨ᠃ ᠮᠥᠩᠬᠡ ᠲᠩᠷᠢ ᠢᠪᠡᠭᠡᠵᠦ ᠡᠰᠡᠨ ᠮᠡᠨᠳᠦ ᠢᠷᠡᠯᠡ᠃ ᠵᠦᠭᠡᠷ ᠴᠦ᠍ ᠰᠢᠯᠤᠭᠤᠨ ᠪᠢᠰᠢ᠂ ᠬᠠᠷᠪᠤᠵᠤ ᠬᠠᠳᠬᠤᠬᠤ ᠪᠣᠯᠬᠤ ᠳ᠋ᠤ᠌ ᠡᠨᠡ ᠰᠠᠢᠨ ᠨᠥᠬᠥᠷ ᠮᠢᠨᠢ ᠭᠠᠷᠮᠠᠭᠠᠢ ᠬᠠᠷᠪᠤᠭᠠᠴᠢ ᠶᠤᠮ᠃ ᠨᠡᠬᠡᠨ ᠬᠥᠭᠡᠭᠡᠭᠴᠢᠳ ᠦ᠋ᠨ ᠨᠢᠭᠡ ᠶ᠋ᠢ ᠨᠢ ᠭᠠᠭᠴᠠᠬᠠᠨ ᠰᠤᠮᠤ ᠪᠠᠷ ᠯᠠ᠂ ᠬᠡ᠂ ᠬᠡ᠃ ᠢᠩᠭᠢᠵᠦ ᠯᠡ ᠶᠠᠪᠤᠵᠤ ᠢᠷᠡᠯᠡ ᠳᠠ᠂ ᠠᠪᠤ ᠮᠢᠨᠢ᠂ ᠡᠵᠢ ᠮᠢᠨᠢ ᠭᠡᠯᠡ᠃
— ᠠ᠂ ᠮᠥᠩᠬᠡ ᠲᠩᠷᠢ ᠢᠪᠡᠭᠡᠵᠦ ᠳᠡ!
— ᠲᠩᠷᠢ ᠮᠢᠨᠢ᠂ ᠲᠩᠷᠢ ᠮᠢᠨᠢ! ᠪᠥᠬᠡ ᠬᠠᠷᠠᠴᠤ ᠭᠤᠸᠠᠢ ᠶ᠋ᠢᠨ ᠯᠡ ᠠᠴᠢ ᠭᠡᠯᠴᠡᠪᠡ᠃ ᠨᠠᠬᠤ ᠡᠴᠢᠭᠡ ᠰᠡᠳᠬᠢᠯ ᠨᠢ ᠶᠡᠬᠡᠳᠡ ᠠᠭᠤᠵᠢᠷᠠᠵᠤ᠄
— ᠵᠠ᠂ ᠬᠡᠦᠬᠡᠳ ᠲᠦ᠍ ᠬᠣᠭᠣᠯᠠ ᠤᠮᠳᠠ! ᠥᠯᠥᠰᠴᠦ ᠤᠮᠳᠠᠭᠠᠰᠤᠯᠠ ᠯᠠ ᠪᠢᠵᠡ᠃ ᠠᠢᠯ ᠢ᠋ᠶ᠋ᠠᠷ ᠣᠷᠣᠵᠤ ᠠᠮᠠ ᠬᠥᠳᠡᠯᠭᠡᠵᠦ ᠶᠠᠪᠤᠪᠠ ᠤᠤ? ᠭᠡᠬᠦ ᠳ᠋ᠦ᠍ ᠪᠣᠭᠣᠷᠴᠢ᠄
— ᠦᠭᠡᠢ ᠳᠡ᠂ ᠦᠭᠡᠢ᠃ ᠬᠡᠭᠡᠷᠡ ᠪᠡᠷ ᠭᠡᠷ ᠬᠢᠵᠦ᠂ ᠬᠡᠴᠡ ᠪᠡᠷ ᠳᠡᠷᠡ ᠬᠢᠵᠦ ᠯᠡ ᠶᠠᠪᠤᠯᠠ ᠭᠡᠵᠦ ᠲᠡᠮᠦᠵᠢᠨ ᠤᠷᠤᠭᠤ ᠬᠠᠷᠠᠵᠤ ᠢᠨᠢᠶᠡᠪᠡ᠃ ᠲᠡᠷᠡ ᠬᠣᠶᠠᠷ ᠢᠨᠢᠶᠡᠯᠳᠦᠨ ᠬᠣᠭᠣᠯᠠᠯᠠᠵᠤ ᠤᠮᠳᠠᠯᠠᠵᠤ ᠳᠠᠭᠤᠰᠤᠭᠠᠳ᠄
— ᠬᠦᠬᠦᠷ ᠰᠠᠪᠠ ᠪᠠᠨ ᠣᠯᠵᠤ ᠢᠷᠡᠶᠡ ᠭᠡᠳ ᠭᠠᠷᠬᠤ ᠭᠡᠲᠡᠯᠡ ᠲᠡᠮᠦᠵᠢᠨ᠄
— ᠪᠢ ᠬᠠᠮᠲᠤ ᠶᠠᠪᠤᠶᠠ ᠭᠡᠪᠡ᠃ ᠪᠣᠭᠣᠷᠴᠢ᠄
— ᠴᠢ ᠵᠢᠭᠠᠬᠠᠨ ᠠᠮᠠᠷᠠ᠃ ᠲᠡᠭᠡᠵᠦ ᠪᠠᠢᠭᠠᠳ ᠶᠠᠪᠤᠨᠠ ᠪᠢᠵᠡ ᠳᠡ?
— ᠲᠡᠭᠡᠨᠡ᠃ ᠭᠡᠬᠦ ᠳ᠋ᠡᠭᠡᠨ ᠠᠮᠠᠷᠠᠭᠠᠳ ᠪᠠᠢᠬᠤ ᠶᠠᠭᠤ ᠪᠠᠢᠬᠤ ᠪᠣᠢ? ᠡᠷᠭᠢᠵᠦ ᠢᠷᠡᠭᠡᠳ ᠯᠡ ᠶᠠᠪᠤᠶᠠ ᠭᠡᠵᠦ ᠳ᠋ᠦ᠍ ᠲᠡᠳᠡᠨ ᠦ᠌ ᠶᠠᠷᠢᠶᠠᠨ ᠳ᠋ᠤ᠌ ᠨᠠᠬᠤ ᠣᠷᠣᠯᠴᠠᠵᠤ᠄
— ᠥᠨᠥ ᠥᠨᠵᠢᠵᠦ ᠠᠮᠠᠷᠠᠭᠠᠳ ᠶᠠᠪᠤ ᠳᠠ᠂ ᠬᠦᠦ ᠮᠢᠨᠢ᠃ ᠪᠤᠴᠠᠬᠤ ᠵᠠᠮ ᠤ᠋ᠨ ᠬᠦᠨᠡᠰᠦ ᠨᠢᠭᠡ ᠳᠠᠬᠤᠯᠠᠢ ᠬᠤᠷᠠᠭᠠ ᠲᠥᠬᠥᠭᠡᠷᠴᠦ ᠰᠢᠷᠠᠵᠤ ᠥᠭᠭᠦᠨᠡ᠃ ᠲᠡᠭᠡᠭᠡᠳ ᠥᠷᠯᠥᠭᠡ ᠡᠷᠲᠡᠬᠡᠨ ᠮᠣᠷᠳᠠᠨᠠ ᠪᠢᠵᠡ ᠳᠡ᠃ ᠥᠨᠵᠢᠭᠡᠳ ᠭᠡᠷ ᠲᠡᠭᠡᠨ ᠬᠦᠷᠴᠦ ᠴᠢᠳᠠᠬᠤ ᠤᠤ? ᠭᠡᠪᠡ᠃
— ᠠᠷᠠᠢ ᠯᠠ ᠦᠭᠡᠢ ᠪᠣᠯᠪᠠ ᠤᠤ?
— ᠲᠡᠭᠡᠨᠡ ᠳᠡ᠂ ᠬᠣᠯᠠ ᠭᠠᠵᠠᠷ᠃ ᠪᠢ ᠪᠤᠷᠬᠠᠨ ᠬᠠᠯᠳᠤᠨ ᠠᠭᠤᠯᠠ ᠶ᠋ᠢᠨ ᠲᠠᠬᠢᠯᠭᠠ ᠳ᠋ᠤ᠌ ᠣᠴᠢᠵᠤ ᠪᠠᠢᠭᠰᠠᠨ᠃ ᠪᠠᠷᠤᠭᠯᠠᠵᠤ ᠪᠣᠳᠣᠬᠤ ᠳ᠋ᠤ᠌ ᠳᠣᠯᠣᠭᠠᠨ ᠵᠠᠭᠤ ᠰᠢᠬᠠᠭᠤ ᠮᠣᠳᠣ ᠭᠠᠵᠠᠷ ᠪᠢᠵᠡ᠃
ᠬᠣᠶᠠᠷ ᠵᠠᠯᠠᠭᠤ ᠰᠠᠪᠠ ᠰᠠᠭᠤᠯᠭᠠᠨ ᠳ᠋ᠠᠭᠠᠨ ᠮᠣᠷᠳᠠᠨ ᠶᠠᠪᠤᠯᠠ᠃
《ᠨᠠᠬᠤ ᠭᠤᠸᠠᠢ ᠶ᠋ᠢᠨ ᠳ᠋ᠦ᠍ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠤ᠋ᠨ ᠬᠦᠦ ᠲᠡᠮᠦᠵᠢᠨ ᠬᠡᠮᠡᠭᠴᠢ ᠢᠷᠡᠵᠦ ᠭᠡᠨᠡ》 ᠭᠡᠰᠡᠨ ᠶᠠᠷᠢᠶᠠ ᠲᠡᠷᠡ ᠳᠣᠣᠷᠠᠬᠠᠨ ᠢ᠋ᠶ᠋ᠠᠨ ᠡᠷᠭᠢᠨ ᠲᠣᠭᠣᠷᠢᠨ᠂ ᠣᠢᠷᠠ ᠬᠠᠪᠢ ᠳ᠋ᠤ᠌ ᠤᠰᠤᠨ ᠤ᠋ ᠳᠣᠯᠭᠢᠶᠠᠨ ᠮᠡᠲᠦ ᠲᠠᠷᠬᠠᠵᠠᠢ᠃
ᠰᠢᠲᠦᠭᠡᠨᠲᠦ ᠶ᠋ᠢᠨ ᠵᠡᠭᠦᠨ ᠰᠤᠭᠤ ᠳ᠋ᠤ᠌ ᠨᠤᠲᠤᠭᠯᠠᠵᠤ ᠪᠠᠢᠭᠰᠠᠨ ᠪᠣᠷᠴᠤ ᠪᠠᠭᠠᠲᠤᠷ ᠤ᠋ᠨ ᠳ᠋ᠤ᠌ ᠡᠨᠡ ᠰᠤᠷᠠᠭ ᠴᠢᠮᠡᠭᠡ ᠬᠦᠷᠴᠦ ᠢᠷᠡᠪᠡ᠃ ᠪᠣᠷᠴᠤ ᠬᠡᠮᠡᠭᠴᠢ ᠪᠡᠷ ᠵᠠᠯᠠᠭᠤ ᠨᠠᠰᠤᠨ ᠳ᠋ᠠᠭᠠᠨ ᠲᠡᠢᠨ ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠣᠯᠠᠨᠲᠠ ᠣᠷᠣᠯᠴᠠᠵᠤ ᠶᠠᠪᠤᠭᠰᠠᠨ ᠪᠠᠭᠠᠲᠤᠷ ᠭᠡᠯᠴᠡᠵᠦ ᠨᠤᠲᠤᠭ ᠣᠷᠣᠨ ᠳ᠋ᠠᠭᠠᠨ ᠶᠡᠬᠡᠳᠡ ᠬᠦᠨᠳᠦᠯᠡᠭᠳᠡᠳᠡᠭ ᠠᠵᠢ᠃ ᠲᠡᠷᠡ ᠪᠡᠷ ᠡᠨᠡ ᠴᠢᠮᠡᠭᠡ ᠶ᠋ᠢ ᠰᠣᠨᠣᠰᠤᠭᠠᠳ᠄
— ᠶᠢᠰᠦᠭᠡᠢ ᠪᠠᠭᠠᠲᠤᠷ ᠤ᠋ᠨ ᠬᠦᠦ ᠭᠡᠪᠡ ᠤᠤ?
— ᠲᠡᠢᠮᠦ ᠠ᠋᠂ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠤ᠋ᠨ ᠬᠦᠦ ᠲᠡᠮᠦᠵᠢᠨ ᠭᠡᠨᠡ᠃
— ᠲᠡᠢᠮᠦ ᠯᠡ ᠪᠠᠢᠬᠤ ᠶᠣᠰᠣᠲᠠᠢ ᠳᠠ᠃ ᠲᠡᠷᠡ ᠣᠳᠣ ᠥᠰᠴᠦ ᠲᠣᠷᠨᠢᠭᠠᠳ ᠨᠠᠰᠤᠨ ᠳ᠋ᠤ᠌ ᠬᠦᠷᠴᠦ ᠶᠠᠪᠤᠭᠠ ᠡᠷᠡ ᠪᠣᠯᠵᠤ ᠶᠠᠪᠤᠭᠠ ᠪᠠᠢᠬᠠ᠃ ᠲᠡᠭᠦᠨ ᠢ᠋ ᠰᠠᠶᠢᠬᠠᠨ ᠲᠠᠢᠴᠢᠭᠤᠳ ᠪᠠᠷᠢᠵᠤ ᠠᠪᠠᠴᠢᠭᠠᠳ ᠲᠠᠮᠤᠯᠠᠵᠤ ᠳᠠᠷᠤᠩᠭᠤᠢᠯᠠᠵᠤ ᠪᠠᠢᠨᠠ ᠭᠡᠵᠦ ᠰᠣᠨᠣᠰᠤᠭᠰᠠᠨ᠃ ᠲᠡᠨᠳᠡ ᠡᠴᠡ ᠠᠮᠢ ᠮᠡᠨᠳᠦ ᠭᠠᠷᠴᠤ ᠳᠠ᠃ ᠪᠢ ᠣᠴᠢᠵᠤ ᠶᠢᠰᠦᠭᠡᠢ ᠡᠵᠡᠨ ᠦ᠌ ᠬᠦᠦ ᠪᠠᠷᠠᠯᠬᠠᠨᠠ ᠭᠡᠵᠦ ᠰᠡᠳᠬᠢᠯ ᠬᠥᠭᠡᠷᠦᠨ᠂ ᠬᠤᠶᠠᠭ ᠳᠤᠭᠤᠯᠠᠭᠠ ᠪᠠᠨ ᠡᠮᠦᠰᠴᠦ ᠨᠤᠮᠤ ᠰᠠᠭᠠᠳᠠᠭ ᠢ᠋ᠶ᠋ᠠᠨ ᠠᠭᠰᠠᠵᠤ᠂ ᠰᠡᠯᠡᠮᠡ ᠪᠡᠨ ᠵᠡᠭᠦᠵᠦ᠂ ᠪᠠᠮᠪᠠᠢ ᠪᠠᠨ ᠲᠣᠬᠣᠢᠯᠳᠠᠵᠤ᠂ ᠪᠠᠢᠯᠳᠤᠨ ᠮᠣᠷᠳᠠᠬᠤ ᠴᠡᠷᠢᠭ ᠡᠷᠡ ᠶ᠋ᠢᠨ ᠲᠥᠷᠬᠦ ᠳ᠋ᠦ᠍ ᠣᠷᠣᠨ᠂ ᠮᠥᠨ ᠥᠪᠡᠷᠦᠨ ᠱᠠᠪᠢ ᠭᠡᠵᠦ ᠬᠥᠮᠦᠵᠢᠭᠦᠯᠵᠦ ᠪᠣᠢ ᠬᠣᠶᠠᠷ ᠵᠢᠭᠠᠬᠠᠨ ᠬᠦᠦ ᠶ᠋ᠢ ᠳᠠᠭᠠᠭᠤᠯᠤᠨ ᠨᠠᠬᠤ ᠶ᠋ᠢᠨ ᠤᠷᠤᠭᠤ ᠶᠠᠭᠠᠷᠠᠪᠴᠢᠯᠠᠨ ᠮᠣᠷᠳᠠᠪᠠ᠃ ᠲᠡᠭᠦᠨ ᠦ᠌ ᠬᠤᠶᠠᠭ ᠪᠠᠮᠪᠠᠢ ᠨᠢ ᠲᠡᠮᠡᠭᠡᠨ ᠦ᠌ ᠰᠢᠷᠢ ᠶ᠋ᠢ ᠨᠣᠢᠲᠠᠨ ᠳ᠋ᠤᠨᠢ ᠪᠡᠶᠡ ᠳ᠋ᠦ᠍ ᠲᠠᠭᠠᠷᠠᠭᠤᠯᠤᠨ ᠳᠠᠪᠬᠤᠷᠯᠠᠨ ᠡᠰᠬᠡᠵᠦ᠂ ᠲᠣᠪᠣᠷᠤᠤ ᠲᠡᠮᠦᠷ ᠲᠣᠨᠣᠭ ᠢ᠋ᠶ᠋ᠠᠷ ᠪᠡᠬᠢᠯᠡᠵᠦ ᠴᠢᠮᠡᠭᠰᠡᠨ᠂ ᠳᠡᠷᠡᠢᠭᠰᠡᠨ ᠬᠠᠲᠠᠭᠤ ᠴᠡᠭᠡᠵᠢᠪᠴᠢ᠂ ᠪᠠᠮᠪᠠᠢ ᠨᠢ ᠲᠠᠪᠠᠭ ᠮᠠᠶᠢᠭ ᠤ᠋ᠨ ᠡᠳ᠋ ᠪᠥᠭᠡᠳ ᠲᠡᠷᠡ ᠨᠢ ᠡᠨᠳᠡ ᠲᠡᠨᠳᠡ ᠪᠡᠨ ᠴᠣᠭᠣᠷᠠᠵᠤ ᠰᠡᠮᠡᠷᠡᠵᠦ ᠡᠯᠡᠭᠳᠡᠵᠦ ᠡᠮᠲᠡᠷᠡᠭᠰᠡᠨ ᠴᠦ᠍ ᠰᠦᠬᠡ ᠪᠡᠷ ᠴᠣᠬᠢᠬᠤ ᠳ᠋ᠤ᠌ ᠴᠦ᠍ ᠬᠣᠲᠣᠢᠬᠤ ᠦᠭᠡᠢ᠂ ᠵᠢᠳᠠ ᠪᠠᠷ ᠬᠠᠳᠬᠤᠬᠤ ᠳ᠋ᠤ᠌ ᠴᠤ᠌ ᠨᠡᠪᠲᠡᠷᠡᠬᠦ ᠦᠭᠡᠢ᠂ ᠣᠨ ᠵᠢᠯ ᠢ᠋ ᠲᠤᠭᠤᠯᠵᠤ ᠦᠩᠭᠡᠷᠡᠬᠦᠭᠰᠡᠨ ᠪᠠᠭᠠᠲᠤᠷ ᠳᠠᠢᠴᠢᠨ ᠡᠷᠡ ᠶ᠋ᠢᠨ ᠡᠳ᠋ᠯᠡᠯ ᠠᠵᠢ᠃
ᠡᠪᠦᠭᠡᠨ ᠪᠠᠭᠠᠲᠤᠷ ᠨᠠᠬᠤ ᠶ᠋ᠢᠨ ᠤᠷᠤᠭᠤ ᠵᠢᠪᠬᠤᠯᠠᠩᠲᠤ ᠶ᠋ᠢᠨ ᠭᠣᠵᠣᠭᠣᠷ ᠤ᠋ᠨ ᠥᠪᠥᠷ ᠢ᠋ᠶ᠋ᠡᠷ ᠬᠣᠶᠠᠷ ᠪᠢᠴᠢᠬᠠᠨ ᠪᠠᠭᠠᠲᠤᠷ ᠤ᠋ᠨ ᠢ᠋ᠶ᠋ᠠᠨ ᠬᠠᠮᠲᠤ ᠲᠣᠭᠣᠰᠣ ᠮᠠᠨᠠᠷᠠᠭᠠᠨ ᠢᠷᠡᠬᠦ ᠰᠠᠴᠠᠭᠤ ᠲᠡᠮᠦᠵᠢᠨ ᠪᠤᠭᠤᠷᠴᠢ ᠬᠣᠶᠠᠷ ᠪᠠᠰᠠ ᠪᠣᠯᠵᠣᠭᠰᠠᠨ ᠶᠤᠮ ᠰᠢᠭ᠋ ᠵᠡᠷᠭᠡ ᠢᠷᠡᠪᠡ᠃ ᠨᠠᠬᠤ ᠶ᠋ᠢᠨ ᠭᠠᠳᠠᠨᠠ ᠢᠷᠡᠮᠡᠭᠴᠡ ᠪᠡᠨ ᠡᠪᠦᠭᠡᠨ ᠪᠠᠭᠠᠲᠤᠷ᠄
— ᠶᠢᠰᠦᠭᠡᠢ ᠪᠠᠭᠠᠲᠤᠷ ᠤ᠋ᠨ ᠬᠦᠦ ᠢᠷᠡᠭᠰᠡᠨ ᠭᠡᠰᠡᠨ ᠤᠤ? ᠲᠡᠷᠡ ᠬᠠᠮᠢᠭᠠ ᠮᠣᠷᠢᠯᠠᠵᠤ ᠪᠠᠢᠨᠠ? ᠭᠡᠵᠦ ᠬᠠᠰᠬᠢᠷᠬᠤᠢ ᠳ᠋ᠤ᠌ ᠲᠡᠷᠡ ᠯᠠ ᠠᠢᠯ ᠬᠣᠲᠠᠨ ᠤ᠋ ᠪᠠᠷᠤᠭ ᠶᠡᠬᠡ ᠪᠠᠭᠠ ᠪᠦᠬᠦᠢ ᠯᠡ ᠬᠥᠮᠦᠰ ᠭᠠᠳᠠᠨᠠ ᠪᠠᠨ ᠭᠠᠷᠤᠨ ᠭᠠᠢᠬᠠᠵᠤ᠂ ᠠᠶᠤᠬᠤ ᠵᠡᠷᠭᠡᠴᠡᠨ᠄
— ᠢᠷᠡᠯᠡ ᠭᠡᠵᠦ ᠬᠣᠶᠠᠷ ᠬᠦᠦ ᠶ᠋ᠢ ᠵᠢᠭᠠᠬᠤᠢ ᠳ᠋ᠤ᠌ ᠡᠪᠦᠭᠡᠨ ᠪᠠᠭᠠᠲᠤᠷ ᠮᠣᠷᠢᠨ ᠠ᠋ᠴᠠ ᠪᠠᠨ ᠦᠰᠦᠷᠦᠨ ᠪᠠᠭᠤᠵᠤ ᠴᠤᠯᠪᠤᠭᠤᠷ ᠢ᠋ᠶ᠋ᠠᠨ ᠳᠠᠭᠠᠵᠤ ᠶᠠᠪᠤᠭᠠ ᠬᠥᠪᠡᠭᠦᠨ ᠤᠷᠤᠭᠤ ᠰᠢᠳᠡᠴᠢᠬᠡᠭᠡᠳ ᠥᠪᠡᠷ ᠢ᠋ᠶ᠋ᠡᠨ ᠭᠢᠯᠠᠯᠵᠠᠲᠠᠯᠠ ᠠᠯᠬᠤᠨ ᠲᠡᠮᠦᠵᠢᠨ ᠤᠷᠤᠭᠤ ᠣᠴᠢᠬᠤ ᠳ᠋ᠤ᠌ ᠴᠠᠭᠠᠳᠤ ᠬᠦᠦ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠵᠤ ᠲᠠᠭᠠᠷᠠᠪᠠ᠃ ᠡᠪᠦᠭᠡᠨ ᠪᠠᠭᠠᠲᠤᠷ ᠲᠡᠮᠦᠵᠢᠨ ᠦ᠌ ᠡᠮᠦᠨᠡ ᠣᠴᠢᠵᠤ ᠵᠡᠭᠦᠨ ᠡᠪᠦᠳᠦᠭ ᠢ᠋ᠶ᠋ᠡᠨ ᠨᠤᠭᠤᠯᠤᠨ ᠪᠠᠷᠠᠭᠤᠨ ᠭᠠᠷ ᠢ᠋ᠶ᠋ᠠᠨ ᠳᠡᠯᠭᠡᠨ ᠵᠢᠷᠦᠬᠡᠨ ᠲᠤᠰ ᠭᠠᠵᠠᠷ ᠢ᠋ᠶ᠋ᠠᠨ ᠳᠠᠷᠤᠵᠤ᠄
— ᠶᠢᠰᠦᠭᠡᠢ ᠪᠠᠭᠠᠲᠤᠷ ᠤ᠋ᠨ ᠬᠦᠦ ᠲᠡᠮᠦᠵᠢᠨ ᠴᠢᠨᠦ ᠡᠮᠦᠨᠡ ᠡᠴᠢᠭᠡ ᠡᠪᠦᠭᠡ ᠶ᠋ᠢᠨ ᠴᠢᠨᠢ ᠴᠡᠷᠢᠭ ᠶᠠᠪᠤᠵᠤ ᠣᠯᠠᠨ ᠲᠡᠢᠨ ᠳ᠋ᠦ᠍ ᠣᠷᠣᠯᠴᠠᠵᠤ ᠶᠠᠪᠤᠭᠰᠠᠨ ᠤ᠋ ᠲᠤᠯᠠ ᠡᠪᠦᠭᠡᠨ ᠪᠤᠷᠴᠦ ᠰᠥᠬᠥᠷᠡᠨ ᠮᠥᠷᠭᠥᠰᠦ ᠭᠡᠬᠦ ᠳ᠋ᠦ᠍ ᠲᠡᠮᠦᠵᠢᠨ ᠡᠮᠦᠨᠡ ᠡᠴᠡ ᠨᠢ ᠥᠪᠡᠷᠦᠨ ᠬᠢᠨᠢ ᠠᠳᠠᠯᠢ ᠡᠪᠦᠳᠦᠭ ᠨᠤᠭᠤᠯᠵᠤ ᠶᠣᠰᠣᠯᠠᠭᠠᠳ ᠡᠪᠦᠭᠡᠨ ᠢ᠋ ᠥᠭᠡᠳᠡ ᠲᠡᠳᠡᠨ ᠪᠤᠰᠬᠠᠬᠤ ᠳ᠋ᠤ᠌ ᠡᠪᠦᠭᠡᠨ ᠳᠠᠢᠴᠢᠨ ᠪᠣᠰᠴᠤ ᠭᠠᠷ ᠵᠥᠷᠢᠭᠦᠯᠦᠨ ᠦᠨᠦᠰᠴᠦ᠄
— ᠲᠣᠮᠣ ᠡᠷᠡ ᠪᠣᠯᠵᠠᠢ ᠭᠡᠵᠦ ᠣᠯᠵᠠᠭᠤᠷᠬᠠᠨ《ᠬᠠ᠂ ᠬᠠ》 ᠭᠡᠵᠦ ᠢᠨᠢᠶᠡᠬᠦ ᠠᠪᠠᠢ᠃
ᠲᠡᠭᠡᠭᠡᠳ ᠭᠡᠷ ᠲᠦ᠍ ᠮᠣᠷᠢᠯᠠᠨ ᠣᠷᠣᠵᠤ ᠴᠠᠢ ᠢᠳᠡᠭᠡ ᠪᠤᠳᠠᠭᠠ ᠪᠠᠷ ᠵᠣᠴᠢᠯᠠᠭᠤᠯᠪᠠ᠃ ᠲᠡᠳᠡᠨᠡᠢᠬᠢ ᠬᠦᠦ ᠪᠡᠨ ᠢᠷᠡᠯᠡ ᠭᠡᠵᠦ ᠬᠣᠨᠢ ᠲᠥᠬᠥᠭᠡᠷᠦᠭᠡᠳ ᠰᠢᠨᠡ ᠰᠢᠭᠦᠰᠦ ᠴᠦ᠍ ᠪᠡᠯᠡᠨ ᠪᠠᠢᠭᠰᠠᠨ ᠲᠤᠯᠠ ᠨᠠᠬᠤ᠂ ᠡᠪᠦᠭᠡᠨ ᠳᠠᠢᠴᠢᠨ ᠳ᠋ᠤ᠌ ᠰᠢᠭᠦᠰᠦ ᠲᠠᠯᠪᠢᠨ ᠬᠠᠲᠠᠭᠤᠬᠠᠨ ᠰᠠᠷᠬᠤᠳ ᠬᠤᠨᠳᠠᠭᠠᠯᠠᠬᠤ ᠪᠠᠨ ᠴᠤ᠌ ᠮᠠᠷᠲᠠᠭᠰᠠᠨ ᠦᠭᠡᠢ᠃
ᠨᠠᠬᠤ ᠶ᠋ᠢᠨ ᠳ᠋ᠦ᠍ ᠪᠣᠯᠵᠤ ᠪᠠᠢᠭᠠ ᠣᠨᠴᠠᠭᠠᠢ ᠶᠠᠪᠤᠳᠠᠯ ᠳ᠋ᠤ᠌ ᠲᠠᠲᠠᠭᠳᠠᠭᠰᠠᠨ ᠣᠷᠣᠭᠴᠢᠨ᠂ ᠭᠠᠷᠤᠭᠴᠢᠨ ᠣᠯᠠᠨ ᠶᠡᠷᠦ ᠨᠢ ᠯᠡ ᠬᠥᠯ ᠬᠥᠳᠡᠯᠭᠡᠭᠡᠨ ᠶᠡᠬᠡᠲᠡᠢ ᠪᠠᠢᠯᠠ᠃ ᠡᠪᠦᠭᠡᠨ ᠳᠠᠢᠴᠢᠨ᠄
— ᠨᠠᠮᠠ ᠶ᠋ᠢ ᠳᠥᠴᠢᠨ ᠲᠠᠪᠤᠲᠠᠢ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠤ᠋ᠨ ᠴᠡᠷᠢᠭ ᠪᠠᠢᠬᠤ ᠦᠶᠡ ᠳ᠋ᠦ᠍ ᠡᠨᠡ ᠬᠦᠦ ᠮᠡᠨᠳᠦᠯᠡᠭᠰᠡᠨ ᠶᠦᠮ᠃ ᠲᠡᠷᠡ ᠴᠠᠭ ᠲᠤ᠌ ᠲᠠᠲ᠋ᠠᠷ ᠤ᠋ᠳ ᠪᠠᠯᠵᠢ ᠶ᠋ᠢᠨ ᠠᠳᠠᠭ ᠢ᠋ᠶ᠋ᠠᠷ ᠳᠣᠪᠲᠣᠯᠤᠨ ᠮᠠᠨᠠᠢᠬᠢᠨ ᠬᠠᠷᠢᠭᠤ ᠪᠠᠷᠢᠵᠤ᠂ ᠲᠡᠳᠡᠨ ᠦ᠌ ᠤᠳᠤᠷᠢᠳᠤᠭᠴᠢ ᠲᠡᠮᠦᠵᠢᠨ ᠦᠭᠡ᠂ ᠬᠣᠷᠢ ᠪᠤᠬᠠ ᠬᠣᠶᠠᠷ ᠢ᠋ ᠪᠠᠷᠢᠪᠴᠢᠯᠠᠵᠤ ᠪᠤᠰᠤᠳ ᠨᠢ ᠵᠢᠭᠤᠲᠠᠭᠰᠠᠨ᠃ ᠲᠡᠭᠡᠭᠡᠳ ᠡᠴᠢᠭᠡ ᠨᠢ ᠲᠡᠷᠡ ᠢᠯᠠᠯᠲᠠ ᠪᠠᠨ ᠲᠡᠮᠳᠡᠭᠯᠡᠭᠡᠳ ᠰᠠᠶᠢ ᠲᠥᠷᠥᠭᠰᠡᠨ ᠬᠦᠦ ᠳ᠋ᠡᠭᠡᠨ ᠲᠡᠮᠦᠵᠢᠨ ᠨᠡᠷᠡ ᠥᠭᠴᠦ᠂ ᠲᠡᠳᠡᠨ ᠢ᠋ ᠲᠣᠨᠢᠯᠭᠠᠭᠰᠠᠨ ᠶᠤᠮ ᠳᠠ᠃
— ᠶᠠᠭᠠᠬᠢᠵᠤ ᠲᠡᠷᠡ ᠬᠣᠶᠠᠷ ᠢ᠋ ᠠᠰᠢᠭᠦᠢ ᠪᠠᠷᠢᠪᠠ? ᠬᠢᠶᠠᠷᠠ ᠴᠣᠬᠢᠭᠰᠠᠨ ᠶᠤᠮ ᠤᠤ? ᠭᠡᠵᠦ ᠨᠢᠭᠡ ᠨᠢ ᠠᠰᠠᠭᠤᠪᠠ᠃
— ᠨᠢᠭᠡ ᠶᠡᠬᠡ ᠬᠢᠶᠡᠷᠠ ᠴᠣᠬᠢᠭᠰᠠᠨ ᠴᠤ᠌ ᠶᠠᠭᠤᠮᠠ ᠦᠭᠡᠢ᠃ ᠬᠠᠷᠢᠨ ᠲᠡᠳᠡᠨ ᠦ᠌ ᠤᠳᠤᠷᠢᠳᠤᠭᠴᠢ ᠶ᠋ᠢ ᠲᠣᠨᠣᠭ ᠡᠳ᠋ᠯᠡᠯ ᠢ᠋ᠶ᠋ᠡᠷ ᠨᠢ ᠲᠠᠨᠢᠵᠤ ᠪᠠᠭᠠᠲᠤᠷ ᠮᠠᠨᠢ ᠪᠢᠳᠡᠨ ᠦ᠌ ᠬᠡᠳᠦᠨ ᠨᠥᠬᠥᠳ ᠢ᠋ ᠳᠠᠭᠠᠭᠤᠯᠵᠤ ᠰᠢᠭᠤᠳ ᠳᠣᠪᠲᠣᠯᠵᠤ ᠰᠣᠷᠣᠨ ᠴᠠᠯᠮᠠ ᠬᠠᠶᠠᠭᠠᠳ ᠲᠡᠷᠡ ᠬᠣᠶᠠᠷ ᠢ᠋ ᠣᠭᠣᠰᠣᠷᠯᠠᠨ ᠤᠨᠠᠭᠠᠭᠰᠠᠨ᠃ ᠳᠠᠭᠠᠭᠤᠯ ᠤ᠋ᠳ ᠨᠢ ᠬᠠᠮᠠᠭᠠᠯᠠᠬᠤ ᠭᠡᠳ ᠵᠠᠷᠢᠮ ᠨᠢ ᠠᠯᠠᠭᠳᠠᠭᠰᠠᠨ᠃ ᠲᠡᠭᠡᠭᠡᠳ ᠯᠡ ᠲᠣᠯᠣᠭᠠᠢ ᠦᠭᠡᠢ ᠪᠣᠯᠤᠭᠰᠠᠨ ᠳᠠᠢᠰᠤᠨ ᠨᠤᠭᠤᠳ ᠰᠡᠭᠦᠯ ᠢ᠋ᠶ᠋ᠡᠨ ᠬᠠᠪᠴᠢᠭᠰᠠᠨ ᠴᠢᠨᠣᠠ ᠰᠢᠭ᠋ ᠵᠢᠭᠤᠲᠠᠵᠤ ᠪᠢᠯᠡ᠃ ᠶᠡᠷᠦ ᠨᠢ ᠤᠳᠤᠷᠢᠳᠤᠯᠭᠠ ᠦᠭᠡᠢ ᠪᠣᠯᠤᠭᠰᠠᠨ ᠴᠡᠷᠢᠭ ᠪᠣᠯ ᠡᠵᠡᠨ ᠦᠭᠡᠢ ᠬᠣᠨᠢ ᠯᠠ ᠭᠡᠰᠡᠨ ᠦᠭᠡ ᠭᠡᠳ ᠡᠪᠦᠭᠡᠨ ᠪᠠᠭᠠᠲᠤᠷ ᠬᠠᠬᠠᠯᠠᠪᠠ᠃ ᠰᠣᠨᠣᠰᠴᠤ ᠪᠠᠢᠭᠰᠠᠨ ᠬᠥᠮᠦᠰ ᠨᠢ ᠪᠠᠰᠠ᠄ ᠬᠠ᠂ ᠬᠠ᠂ ᠬᠡ᠂ ᠬᠡ ᠪᠣᠯᠪᠠ᠃
ᠡᠪᠦᠭᠡᠨ ᠪᠠᠭᠠᠲᠤᠷ ᠨᠡᠯᠢᠶᠡᠳ ᠪᠣᠳᠣᠯᠭᠠᠰᠢᠷᠠᠨ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠄
— ᠡᠨᠡ ᠬᠦᠦ ᠶ᠋ᠢ ᠲᠥᠷᠥᠭᠰᠡᠨ ᠦ᠌ ᠳᠠᠷᠠᠭᠠᠬᠢ ᠵᠢᠯ ᠪᠠᠭᠠᠲᠤᠷ ᠮᠠᠨᠢ《ᠴᠢ ᠪᠣᠯ ᠪᠠᠷᠤᠭ ᠭᠤᠴᠢ ᠰᠢᠬᠠᠮ ᠵᠢᠯ ᠴᠡᠷᠢᠭ ᠦ᠋ᠨ ᠠᠯᠪᠠᠨᠠ ᠪᠢᠳᠡᠨ ᠳ᠋ᠦ᠍ ᠰᠢᠳᠠᠷᠯᠠᠨ ᠵᠢᠳᠬᠦᠵᠦ ᠶᠡᠬᠡ ᠭᠠᠪᠢᠶᠠ ᠪᠠᠢᠭᠤᠯᠤᠭᠰᠠᠨ ᠪᠠᠭᠠᠲᠤᠷ ᠳᠠᠢᠴᠢᠨ ᠡᠷᠡ᠃ ᠴᠢᠮᠠᠶ᠋ᠢ ᠬᠦᠰᠡᠪᠡᠯ ᠴᠡᠷᠢᠭ ᠡᠴᠡ ᠴᠢᠯᠥᠭᠡᠯᠡᠵᠦ ᠦᠯᠡᠳᠡᠭᠰᠡᠨ ᠨᠠᠰᠤ ᠪᠠᠨ ᠬᠠᠨᠢ ᠢᠵᠢᠯᠢ᠂ ᠦᠷᠡ ᠬᠡᠦᠬᠡᠳ ᠲᠡᠢ ᠪᠡᠨ ᠲᠠᠪᠠ ᠲᠤᠬᠠᠲᠠᠢ ᠠᠮᠢᠳᠤᠷᠠᠭ ᠳᠠ ᠭᠡᠵᠦ ᠪᠣᠳᠣᠬᠤ ᠶᠤᠮ》 ᠭᠡᠬᠦ ᠳ᠋ᠦ᠍ᠨᠢ ᠪᠢ《ᠲᠡᠭᠡᠶᠡ》 ᠴᠦ᠍ ᠭᠡᠰᠡᠨ ᠦᠭᠡᠢ《ᠦᠭᠡᠢ》 ᠴᠦ᠍ ᠭᠡᠰᠡᠨ ᠦᠭᠡᠢ᠂ ᠵᠥᠪᠬᠡᠨ ᠲᠣᠯᠣᠭᠠᠢ ᠳᠣᠬᠢᠵᠤ ᠪᠢᠯᠡ᠃ ᠨᠢᠳᠦᠨ ᠡᠴᠡ ᠥᠪᠡᠷᠦᠨ ᠡᠷᠬᠡ ᠦᠭᠡᠢ ᠨᠢᠯᠪᠤᠰᠤ ᠭᠠᠷᠴᠤ ᠪᠠᠢᠭᠰᠠᠨ ᠰᠢᠦ᠃ ᠲᠡᠭᠡᠭᠡᠳ ᠨᠠᠳᠠᠳᠤ ᠠᠵᠢᠷᠭᠠ ᠠᠳᠤᠭᠤ᠂ ᠭᠡᠷ ᠥᠭᠭᠦᠭᠰᠡᠨ ᠶᠦᠮ ᠳᠡ᠂ ᠥᠨᠥ ᠪᠠᠭᠠᠲᠤᠷ ᠮᠢᠨᠢ ᠪᠠᠢᠭᠰᠠᠨ ᠪᠣᠯ ᠳᠥᠴᠢᠨ ᠳᠥᠷᠪᠡ ᠲᠠᠪᠤᠨ ᠨᠠᠰᠤᠲᠠᠢ ᠪᠠᠢᠬᠤ ᠶᠣᠰᠣᠲᠠᠢ᠃ ᠳᠡᠩᠳᠡᠭᠦᠦ ᠡᠷᠲᠡ ᠲᠠᠲ᠋ᠠᠷ ᠤ᠋ᠳ ᠲᠤ᠌ ᠬᠣᠣᠷᠯᠠᠭᠳᠠᠭᠰᠠᠨ ᠳᠠ᠃ ᠬᠠᠢᠷᠠᠨ ᠬᠥᠮᠦᠨ᠃ ᠲᠡᠷᠡ ᠬᠥᠮᠦᠨ ᠡᠴᠡ ᠬᠣᠢᠰᠢ ᠬᠠᠮᠤᠭ ᠮᠣᠩᠭᠣᠯ ᠲᠠᠷᠬᠠᠵᠤ ᠪᠤᠲᠠᠷᠠᠭᠠᠳ ᠁ ᠲᠡᠷᠡ ᠬᠥᠮᠦᠨ ᠪᠣᠯ ᠭᠠᠢᠬᠠᠮᠰᠢᠭᠲᠠᠢ ᠪᠠᠭᠠᠲᠤᠷ᠂ ᠲᠡᠭᠡᠭᠡᠳ ᠯᠡ ᠬᠣᠲᠠᠯᠠ ᠬᠠᠨ ᠤ᠋ ᠳᠠᠷᠠᠭᠠ ᠬᠠᠮᠤᠭ ᠮᠣᠩᠭᠣᠯ ᠢ᠋ ᠵᠠᠬᠢᠷᠤᠭᠰᠠᠨ ᠬᠠᠨ᠃
ᠡᠪᠦᠭᠡᠨ ᠡᠮᠦᠨᠡᠬᠢ ᠬᠤᠨᠳᠠᠭᠠ ᠲᠠᠢ ᠰᠠᠷᠬᠤᠳ ᠠ᠋ᠴᠠ ᠵᠢᠭᠠᠬᠠᠨ ᠰᠢᠮᠡᠵᠦ ᠪᠠᠯᠭᠤᠪᠠ᠃ ᠴᠤᠭᠯᠠᠷᠠᠭᠰᠠᠨ ᠬᠥᠮᠦᠰ ᠨᠠᠮ ᠭᠦᠮ᠂ ᠵᠥᠪᠬᠡᠨ ᠪᠠᠭᠠᠲᠤᠷ ᠤ᠋ᠨ ᠳᠠᠭᠤ ᠯᠠ ᠳᠦᠩᠭᠢᠨᠡᠬᠦ ᠠᠵᠢ᠃
— ᠪᠠᠭᠠ ᠨᠠᠰᠤᠨ ᠠ᠋ᠴᠠ ᠪᠠᠨ ᠶᠠᠮᠠᠷ ᠶᠡᠬᠡ ᠭᠠᠢᠬᠠᠮᠰᠢᠭᠲᠠᠢ ᠡᠷᠡ ᠴᠢᠳᠠᠯ ᠢ᠋ᠶ᠋ᠠᠨ ᠦᠵᠡᠭᠦᠯᠦᠭᠰᠡᠨ ᠢ᠋ ᠨᠢ ᠪᠣᠳᠣ ᠯᠠ ᠳᠠ᠃ ᠭᠤᠴᠢᠨ ᠨᠢᠭᠡᠨ ᠵᠢᠯ ᠦ᠋ᠨ ᠡᠮᠦᠨᠡ ᠨᠠᠮᠠ ᠶ᠋ᠢ ᠭᠤᠴᠢᠨ ᠨᠠᠰᠤ ᠬᠦᠷᠴᠦ ᠪᠠᠢᠬᠤ ᠳ᠋ᠤ᠌ ᠲᠡᠷᠡ ᠪᠡᠷ ᠠᠷᠪᠠᠨ ᠭᠤᠷᠪᠠ ᠳᠦᠷᠪᠡᠭᠡᠨ ᠨᠠᠰᠤᠲᠠᠢ ᠳ᠋ᠠᠭᠠᠨ ᠠᠯᠲᠠᠨ ᠤᠯᠤᠰ ᠲᠠᠢ ᠠᠮᠪᠠᠭᠠᠢ ᠬᠠᠭᠠᠨ ᠤ᠋ ᠦᠰ ᠢ᠋ ᠠᠪᠬᠤ ᠪᠠᠷ ᠬᠠᠭᠠᠨ ᠤ᠋ ᠪᠠᠢᠯᠳᠤᠭᠰᠠᠨ ᠶᠡᠬᠡ ᠲᠣᠮᠣ ᠪᠠᠢᠯᠳᠤᠭᠠᠨ ᠪᠣᠯᠬᠤ ᠴᠠᠭ ᠲᠤ᠌ ᠳᠠᠢᠰᠤᠨ ᠤ᠋ ᠴᠡᠷᠢᠭ ᠦ᠋ᠨ ᠨᠢᠭᠡ ᠨᠣᠶᠠᠨ ᠤ᠋ ᠨᠢᠷᠤᠭᠤ ᠶ᠋ᠢ ᠨᠡᠪᠲᠡ ᠬᠠᠷᠪᠤᠵᠤ᠂ ᠮᠣᠷᠢ ᠶ᠋ᠢ ᠨᠢ ᠠᠪᠤᠭᠠᠳ ᠢᠷᠡᠵᠦ ᠪᠠᠢᠭᠰᠠᠨ᠃ ᠥᠰᠴᠦ ᠨᠠᠰᠤ ᠪᠡᠶᠡ ᠭᠦᠢᠴᠡᠭᠡᠳ ᠴᠠᠭᠯᠠᠰᠢ ᠦᠭᠡᠢ ᠵᠣᠷᠢᠭᠲᠠᠢ᠂ ᠬᠦᠴᠦᠲᠡᠢ ᠪᠠᠭᠠᠲᠤᠷ ᠪᠣᠯᠵᠤ ᠬᠣᠲᠠᠯᠠ ᠬᠠᠭᠠᠨ ᠤ᠋ ᠵᠣᠴᠢ ᠲᠡᠷᠡᠮᠡᠯᠡ᠂ ᠬᠢᠷᠮᠠᠴᠤ᠂ ᠠᠯᠲᠠᠨ ᠭᠤᠷᠪᠠᠨ ᠬᠥᠪᠡᠭᠦᠳ ᠪᠠᠢᠭᠰᠠᠭᠠᠷ ᠠᠲᠠᠯᠠ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠮᠠᠨᠢ ᠠᠪᠠᠭᠠ ᠠᠬᠠ ᠶ᠋ᠢᠨ ᠢ᠋ᠶ᠋ᠡᠨ ᠣᠷᠣ ᠶ᠋ᠢ ᠵᠠᠯᠭᠠᠮᠵᠢᠯᠠᠨ ᠰᠠᠭᠤᠭᠰᠠᠨ ᠶᠤᠮ ᠭᠡᠵᠦ ᠡᠪᠦᠭᠡᠨ ᠪᠠᠭᠠᠲᠤᠷ ᠦᠷᠭᠦᠯᠵᠢᠯᠡᠭᠦᠯᠦᠨ ᠬᠦᠦᠷᠨᠢᠬᠦ ᠳ᠋ᠦ᠍ ᠴᠤᠭᠯᠠᠷᠠᠭᠰᠠᠨ ᠣᠯᠠᠨ ᠶᠡᠬᠡᠳᠡ ᠲᠠᠭᠠᠰᠢᠶᠠᠵᠤ ᠱᠠᠭᠰᠢᠷᠠᠬᠤ ᠠᠪᠢᠶᠠ ᠭᠠᠷᠴᠤ᠂ ᠡᠪᠦᠭᠡᠨ ᠪᠠᠭᠠᠲᠤᠷ ᠲᠡᠳᠡᠨ ᠢ᠋ ᠬᠡᠰᠡᠭ ᠵᠠᠭᠤᠷᠠ ᠠᠵᠢᠨ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ᠄
— ᠬᠠᠷᠢᠨ ᠲᠡᠷᠡ ᠪᠠᠢᠯᠳᠤᠭᠠᠨ ᠪᠣᠯ ᠮᠢᠨᠦ ᠣᠷᠣᠯᠴᠠᠭᠰᠠᠨ ᠬᠠᠮᠤᠭ ᠲᠣᠮᠣ ᠪᠠᠢᠯᠳᠤᠭᠠᠨ ᠨᠢ ᠶᠦᠮ᠃ ᠠᠯᠲᠠᠨ ᠤᠯᠤᠰ ᠲᠣᠮᠣ ᠬᠦᠴᠦᠷᠬᠡᠭ ᠭᠦᠷᠦᠨ᠃ ᠴᠠᠭᠠᠨᠠ ᠪᠠᠨ ᠬᠢᠲᠠᠳ ᠢ᠋ ᠳᠣᠪᠲᠣᠯᠵᠤ ᠳᠠᠷᠤᠩᠭᠤᠢᠯᠠᠨ᠂ ᠪᠠᠰᠠ ᠳᠣᠲᠣᠷᠠ ᠨᠢ ᠰᠠᠮᠠᠭᠤᠨ ᠦᠢᠮᠡᠭᠡᠨ ᠲᠠᠰᠤᠷᠠᠬᠤ ᠦᠭᠡᠢ ᠲᠤᠯᠠ ᠨᠠᠭᠠᠰᠢ ᠪᠠᠨ ᠨᠢᠭᠡ ᠶᠡᠬᠡ ᠬᠥᠳᠡᠯᠵᠦ ᠴᠢᠳᠠᠳᠠᠭ ᠦᠭᠡᠢ᠃ ᠲᠡᠷᠡ ᠲᠡᠢᠨ ᠳ᠋ᠦ᠍ ᠮᠣᠩᠭᠣᠯ ᠣᠯᠠᠨ ᠠᠢᠮᠠᠭ ᠨᠢᠭᠡᠳᠴᠦ ᠣᠷᠣᠭᠰᠠᠨ᠃ ᠪᠢ ᠶᠢᠰᠦᠭᠡᠢ ᠶ᠋ᠢᠨ ᠡᠴᠢᠭᠡ ᠪᠠᠷᠳᠠᠨ ᠪᠠᠭᠠᠲᠤᠷ ᠤ᠋ᠨ ᠰᠢᠳᠠᠷ ᠴᠡᠷᠢᠭ ᠶᠠᠪᠤᠭᠰᠠᠨ ᠶᠤᠮ᠃ ᠬᠡᠳᠦᠨ ᠡᠳᠦᠷ ᠲᠤᠯᠵᠤ ᠲᠡᠷᠡ ᠨᠢ ᠢᠯᠡᠭᠦᠦ ᠢᠯᠠᠴᠢᠬᠠᠯᠠ ᠭᠡᠬᠦ ᠶᠠᠭᠤᠮᠠ ᠦᠭᠡᠢ ᠪᠤᠬᠠ ᠰᠢᠭ᠋ ᠭᠦᠷᠳᠡᠢᠵᠦ᠂ ᠪᠤᠤᠷᠠ ᠰᠢᠭ᠋ ᠱᠠᠪᠵᠤ ᠯᠠ ᠁ ᠬᠠᠷᠢᠨ ᠮᠠᠨ ᠤ᠋ ᠲᠤᠷᠰᠢᠭᠤᠯ ᠳᠠᠢᠰᠤᠨ ᠢ᠋《ᠪᠥᠭᠡᠮᠨᠡᠷᠡᠯᠡ》 ᠭᠡᠰᠡᠨ ᠮᠡᠳᠡᠭᠡ ᠦᠭᠭᠦᠮᠡᠭᠴᠡ ᠮᠠᠨ ᠤ᠋ ᠲᠡᠷᠢᠭᠦᠨ ᠨᠦ᠍ᠭᠦᠳ《ᠣᠳᠣ ᠯᠠ ᠳᠠᠭᠠᠵᠤ ᠤᠭᠤᠲᠠᠯᠠᠵᠤ ᠠᠪᠤᠶᠠ》 ᠭᠡᠯᠴᠡᠭᠰᠡᠨ ᠶᠦᠮ᠃ ᠲᠡᠭᠡᠭᠡᠳ ᠠᠮᠪᠠᠭᠠᠢ ᠬᠠᠭᠠᠨ ᠤ᠋ ᠬᠦᠦ ᠬᠠᠲᠠᠭᠠᠨ ᠲᠠᠢᠵᠢ ᠪᠠᠷ ᠲᠣᠯᠣᠭᠠᠢᠯᠠᠭᠤᠯᠤᠭᠰᠠᠨ ᠶᠡᠬᠡ ᠴᠡᠷᠢᠭ ᠠᠭᠲᠠ ᠮᠣᠷᠢᠳ ᠵᠠᠷ ᠵᠡᠪᠰᠡᠭ ᠢ᠋ᠶ᠋ᠡᠨ ᠨᠤᠮᠤ ᠬᠡᠯᠪᠡᠷᠢ ᠪᠡᠷ ᠳᠠᠢᠰᠤᠨ ᠤᠷᠤᠭᠤ ᠬᠣᠶᠠᠷ ᠬᠢᠴᠢᠷ ᠢ᠋ ᠨᠢ ᠳᠣᠲᠣᠭᠰᠢ ᠬᠠᠷᠠᠭᠤᠯᠵᠤ ᠪᠠᠢᠷᠢᠯᠠᠭᠤᠯᠤᠭᠠᠳ ᠬᠣᠲᠠᠯᠠ ᠬᠠᠭᠠᠨ ᠥᠪᠡᠷ ᠢ᠋ᠶ᠋ᠡᠨ ᠬᠠᠮᠤᠭ ᠤ᠋ᠨ ᠬᠦᠴᠦᠲᠡᠢ ᠬᠡᠰᠡᠭ ᠢ᠋ᠶ᠋ᠡᠨ ᠠᠪᠴᠤ ᠰᠤᠮᠤ ᠬᠡᠯᠪᠡᠷᠢ ᠪᠡᠷ ᠳᠠᠢᠰᠤᠨ ᠤᠷᠤᠭᠤ ᠮᠠᠰᠢ ᠬᠤᠷᠳᠤ ᠲᠠᠢ ᠳᠣᠪᠲᠣᠯᠤᠭᠰᠠᠨ᠃ ᠲᠡᠭᠡᠬᠦ ᠳ᠋ᠦ᠍ ᠪᠢ ᠪᠠᠷᠳᠠᠨ ᠪᠠᠭᠠᠲᠤᠷ ᠤ᠋ᠨ ᠤᠳᠤᠷᠢᠳᠤᠯᠭᠠ ᠳ᠋ᠤ᠌ ᠪᠠᠷᠠᠭᠤᠨ ᠭᠠᠷ ᠲᠤᠨᠢ ᠶᠠᠪᠤᠭᠰᠠᠨ᠃ ᠲᠦᠳᠡᠯ ᠦᠭᠡᠢ ᠭᠣᠣᠯ ᠬᠡᠰᠡᠭ ᠤᠬᠤᠷᠢᠵᠤ᠂ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠪᠢᠳᠡ ᠴᠦ᠍ ᠲᠡᠯᠡᠬᠦ ᠮᠠᠶᠢᠭ ᠢ᠋ᠶ᠋ᠠᠷ ᠬᠠᠵᠠᠭᠤ ᠲᠡᠰᠢ ᠵᠢᠳᠬᠦᠭᠰᠡᠨ᠃ ᠨᠥᠭᠦᠭᠡ ᠵᠡᠭᠦᠨ ᠭᠠᠷ ᠴᠦ᠍ ᠪᠠᠰᠠ ᠲᠡᠭᠡᠵᠦ ᠯᠡ ᠳᠡ᠃ ᠳᠠᠢᠰᠤᠨ ᠶᠡᠬᠡ ᠣᠮᠣᠭᠰᠢᠵᠤ ᠰᠢᠬᠠᠨ ᠬᠥᠭᠡᠭᠡᠵᠦ᠂ ᠣᠷᠣᠢ ᠶ᠋ᠢᠨ ᠨᠠᠷᠠ ᠵᠢᠷᠭᠠᠬᠤ ᠲᠡᠰᠢ ᠪᠣᠯᠬᠤ ᠳ᠋ᠤ᠌ ᠮᠠᠨᠠᠢᠬᠢᠨ ᠠᠷᠤ ᠳ᠋ᠤ᠌ ᠦᠯᠡᠳᠡᠭᠰᠡᠨ ᠨᠤᠮᠤ ᠲᠠᠢ ᠪᠠᠨ ᠤᠴᠠᠷᠠᠵᠤ᠂ ᠳᠠᠢᠰᠤᠨ ᠢ᠋ ᠳᠤᠮᠳᠠ ᠪᠠᠨ ᠣᠷᠣᠭᠤᠯᠤᠭᠠᠳ ᠵᠢᠭᠤᠲᠠᠨ ᠢᠷᠡᠭᠰᠡᠨ ᠪᠢᠳᠡ ᠮᠣᠷᠢ ᠵᠡᠪᠰᠡᠭ ᠢ᠋ᠶ᠋ᠡᠨ ᠰᠡᠯᠪᠢᠭᠡᠳ ᠳᠠᠢᠰᠤᠨ ᠢ᠋ ᠣᠷᠢᠶᠠᠨ ᠠᠪᠴᠤ᠂ ᠬᠠᠷᠤᠢ ᠪᠦᠷᠦᠢ ᠪᠣᠯᠣᠮᠠᠭᠴᠠ ᠭᠠᠯᠲᠤ ᠪᠠᠮᠪᠠᠷ ᠢ᠋ᠶ᠋ᠠᠷ ᠬᠠᠷᠪᠤᠵᠤ ᠰᠠᠨᠳᠤᠷᠭᠠᠨ ᠬᠢᠶᠠᠷᠠ ᠴᠣᠬᠢᠭᠰᠠᠨ ᠶᠤᠮ᠃ ᠡᠨᠡ ᠪᠣᠯ ᠠᠯᠲᠠᠨ ᠤᠯᠤᠰ ᠤ᠋ᠨ ᠬᠠᠭᠠᠨ ᠢ᠋ ᠰᠣᠴᠢᠭᠠᠨ ᠠᠶᠤᠯᠭᠠᠵᠤ ᠪᠠᠭᠤᠯᠲᠠ ᠬᠢᠬᠦ ᠳ᠋ᠦ᠍ ᠬᠦᠷᠭᠡᠭᠰᠡᠨ ᠪᠠᠢᠯᠳᠤᠭᠠᠨ ᠪᠥᠭᠡᠳ ᠡᠨᠡ ᠪᠠᠢᠯᠳᠤᠭᠠᠨ ᠤ᠋ ᠳᠠᠷᠠᠭᠠ ᠠᠯᠲᠠᠨ ᠤᠯᠤᠰ ᠮᠠᠨ ᠤ᠋ ᠬᠠᠭᠠᠨ ᠲᠠᠢ ᠬᠡᠯᠡᠯᠴᠡᠭᠡᠷ ᠬᠢᠵᠦ᠂ ᠠᠳᠤᠭᠤ ᠮᠠᠯ᠂ ᠠᠯᠪᠠ ᠲᠥᠯᠥᠭᠡᠰᠦ ᠥᠭᠴᠦ ᠬᠡᠳᠦᠨ ᠵᠢᠯ ᠨᠠᠮᠤᠭᠤᠨ ᠪᠠᠢᠭᠰᠠᠨ ᠳᠠ ᠭᠡᠪᠡ᠃
— ᠲᠠ ᠡᠨᠡ ᠣᠯᠠᠨ ᠵᠢᠯ ᠪᠠᠢᠯᠳᠤᠬᠤ ᠳ᠋ᠠᠭᠠᠨ ᠰᠢᠷᠠᠭᠳᠤᠭᠰᠠᠨ ᠤᠤ? ᠭᠡᠵᠦ ᠠᠰᠠᠭᠤᠪᠠᠰᠤ᠄
— ᠰᠢᠷᠠᠭᠳᠤᠯ ᠦᠭᠡᠢ ᠶᠠᠭᠠᠬᠢᠬᠤᠪ ᠳᠠ᠂ ᠬᠠᠮᠤᠭ ᠤ᠋ᠨ ᠢᠯᠡ ᠨᠢ ᠬᠠᠴᠠᠷ ᠤ᠋ᠨ ᠬᠠᠵᠠᠭᠤ ᠰᠤᠮᠤ ᠱᠦᠷᠭᠦᠭᠰᠡᠨ ᠶᠦᠮ᠃ ᠳᠠᠯᠳᠠ ᠪᠣᠯ ᠥᠴᠢᠨᠡᠨ ᠲᠥᠴᠢᠨᠡᠨ ᠴᠢᠰᠤ ᠦᠭᠡᠢ᠂ ᠦᠬᠦᠯ ᠦᠭᠡᠢ ᠲᠡᠢᠨ ᠭᠡᠵᠦ ᠶᠠᠭᠤ ᠪᠠᠢᠬᠤᠪ! ᠬᠠᠷᠢᠨ ᠪᠢ ᠦᠬᠦᠭᠡ ᠦᠭᠡᠢ ᠯᠡ ᠶᠦᠮ᠃ ᠳᠠᠢᠰᠤᠨ ᠢ᠋ ᠭᠡᠨᠡᠳᠡᠭᠦᠯᠦᠨ ᠳᠠᠭᠠᠷᠢᠵᠤ ᠨᠡᠪᠲᠡ ᠬᠠᠷᠪᠤᠬᠤ ᠶ᠋ᠢ ᠰᠠᠮᠨᠠᠬᠤ ᠭᠡᠳᠡᠭ᠃ ᠨᠢᠭᠡ ᠰᠠᠮᠨᠠᠬᠤ ᠲᠡᠢᠨ ᠳ᠋ᠦ᠍ ᠭᠤᠷᠪᠠ ᠨᠡᠪᠲᠡ ᠬᠠᠷᠪᠣᠭᠤᠯᠵᠤ᠂ ᠪᠢ ᠨᠥᠭᠥᠭᠡᠳᠡᠬᠢ ᠶ᠋ᠢ ᠴᠠᠪᠴᠢᠵᠤ ᠠᠮᠵᠢᠭᠰᠠᠨ᠃ ᠵᠢᠳᠠ ᠶ᠋ᠢ ᠨᠢ ᠰᠠᠯᠭᠠᠵᠤ ᠴᠢᠳᠠᠯ ᠦᠭᠡᠢ ᠰᠦᠯᠪᠡᠬᠡᠷᠲᠠᠢ ᠬᠣᠳᠣᠭᠣᠳᠣ ᠰᠢᠭ᠋ ᠨᠢᠭᠡ ᠶᠠᠭᠤᠮᠠ ᠢᠷᠡᠵᠦ᠂ ᠨᠥᠬᠥᠳ ᠮᠢᠨᠢ ᠨᠠᠮᠠ ᠶ᠋ᠢ ᠤᠷᠢᠯᠠᠭᠤᠯᠤᠨ ᠭᠠᠰᠠᠯᠤᠭᠤᠯᠤᠨ ᠪᠠᠢᠵᠤ ᠵᠢᠳᠠ ᠶ᠋ᠢ ᠰᠠᠯᠭᠠᠭᠠᠳ ᠲᠦᠯᠡᠵᠦ ᠪᠣᠭᠣᠵᠤ ᠪᠢᠯᠡ᠃ ᠪᠢᠳᠡᠨ ᠦ᠌ ᠤᠤᠭᠤᠬᠤ ᠡᠮ ᠡᠬᠢᠯᠡᠭᠡᠳ ᠲᠣᠭᠣᠭᠠᠨ ᠤ᠋ ᠬᠦ᠂ ᠬᠣᠢᠯᠣᠭ ᠤ᠋ᠨ ᠮᠢᠬᠠ᠂ ᠶᠣᠯᠣ ᠶ᠋ᠢᠨ ᠬᠣᠳᠣᠭᠣᠳᠣ᠂ ᠴᠢᠨᠣᠠ ᠶ᠋ᠢᠨ ᠡᠯᠢᠭᠡ᠁ ᠲᠡᠭᠡᠭᠡᠳ ᠯᠡ ᠶᠠᠪᠤᠵᠤ ᠪᠠᠢᠭᠠ ᠨᠢ ᠡᠨᠡ ᠭᠡᠵᠦ ᠡᠪᠦᠭᠡᠨ ᠪᠠᠭᠠᠲᠤᠷ ᠶᠠᠷᠢᠨᠠ᠃ ᠲᠡᠭᠡᠭᠰᠡᠨ ᠢ᠋ᠶ᠋ᠡᠨ ᠡᠪᠦᠭᠡᠨ ᠨᠢᠭᠡ ᠶᠠᠭᠤᠮᠠ ᠰᠠᠨᠠᠬᠤ ᠰᠢᠭ᠋᠄
— ᠵᠠ᠂ ᠬᠡᠦᠬᠡᠳ ᠦ᠋ᠳ ᠠ᠋! ᠦᠭᠡ ᠣᠯᠠᠳᠠᠵᠤ ᠡᠳᠦᠷ ᠬᠡᠪᠡᠢᠬᠦ ᠰᠢᠪ ᠳᠡ᠃ ᠥᠨᠳᠥᠷᠯᠡᠶᠡ ᠭᠡᠯᠡ᠃
ᠨᠠᠬᠤ ᠠᠪᠤ ᠬᠦᠨᠳᠦᠲᠡᠢ ᠵᠣᠴᠢᠨ ᠤ᠋ ᠪᠠᠨ ᠡᠮᠦᠨᠡ ᠰᠥᠭᠥᠳᠦᠨ ᠰᠠᠭᠤᠵᠤ ᠬᠤᠨᠳᠠᠭᠠ ᠡᠷᠭᠦᠨ᠄
— ᠥᠨᠥᠳᠥᠷ ᠶᠡᠬᠡ ᠪᠡᠯᠭᠡ ᠲᠡᠢ ᠰᠠᠢᠨ ᠡᠳᠦᠷ᠃ ᠲᠩᠷᠢ ᠵᠠᠶᠠᠭᠠᠲᠤ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠤ᠋ᠨ ᠬᠦᠦ᠂ ᠡᠷᠡᠯᠬᠡᠭ ᠳᠠᠢᠴᠢᠨ ᠪᠠᠭᠠᠲᠤᠷ ᠲᠠ ᠬᠣᠶᠠᠷ ᠥᠴᠦᠬᠡᠨ ᠮᠠᠨ ᠤ᠋ ᠭᠡᠷ ᠲᠦ᠍ ᠤᠴᠠᠷᠠᠵᠤ ᠲᠣᠬᠢᠶᠠᠪᠠ᠃ ᠲᠡᠭᠡᠭᠡᠳ ᠲᠠ ᠥᠩᠭᠡᠷᠡᠭᠰᠡᠨ ᠦᠦᠬᠡ ᠲᠡᠦᠬᠡ ᠶᠠᠷᠢᠵᠤ ᠪᠢᠳᠡ ᠪᠦᠬᠦᠨ ᠢ᠋ ᠶᠡᠬᠡᠳᠡ ᠪᠠᠶᠠᠷᠯᠠᠭᠤᠯᠪᠠ᠃ ᠡᠢᠮᠦ ᠳ᠋ᠦ᠍ ᠥᠴᠦᠬᠡᠨ ᠠᠯᠪᠠᠲᠤ ᠪᠢ ᠪᠡᠷ ᠪᠠᠶᠠᠷᠯᠠᠵᠤ ᠪᠠᠷᠠᠰᠢ ᠦᠭᠡᠢ᠃ ᠪᠢᠳᠡᠨ ᠢ᠋ ᠪᠡᠨ ᠥᠮᠥᠭᠯᠡᠨ ᠬᠠᠮᠠᠭᠠᠯᠠᠵᠤ ᠢᠷᠡᠭᠰᠡᠨ ᠲᠠᠨ ᠳ᠋ᠠᠭᠠᠨ ᠨᠢᠭᠡ ᠮᠣᠷᠢ ᠵᠢᠰᠦᠯᠡᠨ ᠪᠠᠷᠢᠶᠠ᠃ ᠲᠠᠨ ᠤ᠋ ᠥᠰᠬᠡᠨ ᠬᠥᠮᠦᠵᠢᠭᠦᠯᠵᠦ ᠪᠠᠢᠭᠠ ᠬᠣᠶᠠᠷ ᠵᠢᠭᠠᠬᠠᠨ ᠳᠠᠢᠴᠢᠨ ᠳ᠋ᠤ᠌ ᠨᠢᠭᠡ ᠨᠢᠭᠡ ᠳᠠᠭᠠ ᠥᠭᠭᠦᠶᠡ᠃ ᠬᠦᠯᠦᠭ ᠪᠣᠯᠭᠠᠵᠤ ᠤᠨᠤᠭᠠᠳ ᠬᠦᠴᠦᠲᠦ ᠪᠠᠭᠠᠲᠤᠷ ᠪᠣᠯᠤᠭᠠᠷᠠᠢ ᠭᠡᠪᠡ᠃
ᠡᠪᠦᠭᠡᠨ ᠳᠠᠢᠴᠢᠨ ᠪᠣᠷᠴᠤ ᠶᠡᠬᠡᠳᠡ ᠪᠠᠶᠠᠷᠯᠠᠵᠤ᠄
— ᠡᠨᠡ ᠬᠤᠨᠳᠠᠭᠠ ᠶ᠋ᠢ ᠲᠣᠭᠲᠠᠭᠠᠶᠠ᠃ ᠥᠭᠭᠢᠶᠡᠮᠦᠷ ᠰᠡᠳᠬᠢᠯᠲᠦ ᠨᠠᠬᠤ ᠳᠡᠭᠦᠦ ᠴᠢᠮᠠᠲᠠᠭᠠᠨ᠂ ᠮᠠᠯ ᠰᠦᠷᠦᠭ ᠴᠢᠨᠢ ᠳᠡᠯᠡᠬᠡᠢ ᠶ᠋ᠢ ᠪᠦᠷᠬᠦᠵᠦ᠂ ᠦᠷᠡ ᠠᠴᠢ ᠨᠠᠷ ᠴᠢᠨᠢ ᠥᠨᠳᠥᠷ ᠳᠡᠭᠡᠳᠦ ᠰᠠᠭᠤᠷᠢ ᠡᠵᠡᠯᠡᠲᠦᠭᠡᠢ! ᠭᠡᠵᠦ ᠢᠷᠥᠭᠡᠶᠡ ᠭᠡᠯᠡ᠃ ᠴᠤᠭᠯᠠᠷᠠᠭᠰᠠᠨ ᠪᠦᠬᠦᠨ᠄
— ᠲᠡᠷᠡ ᠢᠷᠦᠭᠡᠯ ᠪᠠᠲᠤ ᠣᠷᠣᠰᠢᠲᠤᠭᠠᠢ! ᠬᠤᠷᠤᠢ᠂ ᠬᠤᠷᠤᠢ᠂ᠬᠤᠷᠤᠢ! ᠭᠡᠯᠴᠡᠨ ᠭᠠᠷ ᠳᠠᠯᠠᠯᠬᠤ ᠠᠪᠠᠢ᠃
ᠡᠪᠦᠭᠡᠨ ᠪᠠᠭᠠᠲᠤᠷ ᠣᠭᠵᠣᠮ ᠣᠭᠵᠣᠮ ᠬᠥᠳᠡᠯᠵᠦ ᠳᠠᠪ ᠲᠣᠪ ᠭᠢᠰᠬᠢᠭᠰᠡᠭᠡᠷ ᠭᠠᠷᠴᠤ ᠨᠠᠬᠤ ᠭᠡᠭᠦᠨ ᠵᠠᠯᠠᠨ ᠳᠡᠭᠡᠷᠡ ᠪᠡᠨ ᠣᠴᠢᠵᠤ ᠲᠡᠳᠡᠨ ᠳ᠋ᠦ᠍ ᠥᠭᠬᠦ ᠮᠣᠷᠢ᠂ ᠳᠠᠭᠠ ᠪᠠᠨ ᠵᠢᠰᠦᠯᠡᠨ ᠦᠭᠬᠦᠢ ᠳ᠋ᠦ᠍ ᠡᠪᠦᠭᠡᠨ ᠪᠠᠭᠠᠲᠤᠷ᠄
— ᠬᠦᠯᠦᠭ ᠲᠡᠢ ᠪᠣᠯ ᠬᠥᠯ ᠬᠦᠷᠬᠦ ᠦᠭᠡᠢ ᠭᠠᠵᠠᠷ ᠳᠡᠯᠡᠬᠡᠢ ᠭᠡᠵᠦ ᠦᠭᠡᠢ᠃ ᠨᠠᠬᠤ ᠮᠢᠨᠢ ᠤᠷᠲᠤ ᠨᠠᠰᠤᠯᠠ᠂ ᠤᠳᠠᠭᠠᠨ ᠵᠢᠷᠭᠠ ᠭᠡᠵᠦ ᠥᠭᠡᠯᠡᠨ ᠦᠭᠡᠯᠡᠭᠰᠡᠭᠡᠷ᠄
— ᠥᠨᠥ ᠰᠦᠷᠦᠭ ᠲᠤᠨᠢ ᠤᠷᠭᠢᠶᠠ᠃ ᠤᠳᠠᠬᠤ ᠦᠭᠡᠢ ᠪᠢᠳᠡ ᠭᠤᠷᠪᠠ ᠨᠣᠭᠲᠣ ᠰᠤᠷ ᠲᠠᠢ ᠢᠷᠡᠵᠦ ᠠᠪᠤᠶᠠ ᠭᠡᠳ ᠮᠣᠷᠢᠨ ᠳ᠋ᠠᠭᠠᠨ ᠦᠰᠦᠷᠦᠨ ᠮᠣᠷᠳᠠᠵᠤ ᠬᠣᠶᠠᠷ ᠵᠢᠭᠠᠬᠠᠨ《ᠴᠡᠷᠢᠭ》 ᠢ᠋ᠶ᠋ᠡᠨ ᠳᠠᠭᠠᠭᠤᠯᠤᠨ ᠳᠠᠪᠬᠢᠵᠤ ᠣᠳᠪᠠ᠃