ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ- ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ᠂ᠭᠤᠷᠪᠠᠳᠤᠭᠠᠷ ᠪᠦᠯᠦᠭ 〔ᠠᠷᠪᠠᠨ ᠳᠣᠯᠣᠭᠠ〕 Цаг төрийн үймээн – Д ᠂ Намдаг - Цаг төрийн үймээн ᠂ гуравдугаар бүлэг -17
72ᠠᠩᠬᠠᠨ ᠤ᠋ ᠲᠤᠯᠤᠯᠳᠤᠭᠠᠨ
ᠣᠯᠠᠨ ᠬᠣᠨᠣᠭ ᠢ᠋ᠶ᠋ᠠᠷ ᠪᠠᠯᠪᠠᠭᠰᠠᠨ ᠬᠠᠪᠤᠷ ᠤ᠋ᠨ ᠬᠠᠷᠠ ᠬᠠᠪᠰᠠᠷᠭᠠ ᠭᠤᠷᠪᠠᠳᠤᠭᠠᠷ ᠰᠠᠷᠠ ᠶ᠋ᠢᠨ ᠳᠤᠮᠳᠠᠴᠢ ᠪᠠᠷ ᠲᠠᠲᠠᠷᠠᠪᠠ᠃ ᠡᠭᠦᠯᠡ ᠦᠭᠡᠢ ᠲᠩᠷᠢ ᠳ᠋ᠦ᠍ ᠠᠯᠳᠠᠩᠬᠠᠨ ᠨᠠᠷᠠ ᠬᠡᠳᠦᠨ ᠡᠳᠦᠷ ᠳᠠᠷᠠᠭᠠᠯᠠᠨ ᠭᠠᠷᠴᠤ ᠬᠥᠮᠦᠨ ᠮᠠᠯ ᠤ᠋ᠨ ᠪᠣᠷᠪᠢ ᠲᠡᠨᠡᠢᠬᠡᠨ ᠰᠡᠳᠬᠢᠯ ᠪᠠᠶᠠᠰᠬᠠᠪᠠᠴᠤ ᠵᠢᠷᠤᠮᠲᠤ ᠴᠡᠷᠢᠭ ᠦ᠋ᠳ ᠲᠦ᠍ ᠲᠡᠳᠦᠢ ᠯᠡ ᠲᠠᠪᠠᠲᠠᠢ ᠪᠢᠰᠢ᠂ ᠭᠣᠣᠯ ᠲᠥᠯᠥᠪ ᠡᠪᠦᠯ ᠦ᠋ᠨ ᠵᠤᠵᠠᠭᠠᠨ ᠳᠡᠪᠡᠯ ᠳ᠋ᠦ᠍ ᠳᠠᠷᠤᠭᠳᠠᠨ ᠪᠡᠶᠡ ᠨᠣᠵᠣᠭᠣᠷᠠᠨᠠ᠃
ᠲᠡᠷᠡ ᠨᠢᠭᠡ ᠡᠳᠦᠷ ᠪᠢᠯᠡ᠃ ᠡᠳᠦᠷ ᠦ᠋ᠨ ᠬᠣᠭᠣᠯᠠᠨ ᠤ᠋ ᠳᠠᠷᠠᠭᠠᠬᠠᠨ ᠲᠠᠢ ᠣᠢᠷᠠ ᠬᠠᠪᠢ ᠶ᠋ᠢᠨ ᠠᠷᠠᠳ ᠤ᠋ᠳ ᠠᠳᠤᠭᠤ ᠪᠠᠨ ᠬᠥᠭᠡᠭᠡᠨ ᠠᠪᠴᠢᠷᠠᠪᠠ᠃ ᠡᠨᠡ ᠨᠢ ᠴᠡᠷᠢᠭ ᠦ᠋ᠳ ᠲᠦ᠍ ᠤᠨᠤᠭᠠ ᠵᠠᠯᠭᠠᠬᠤ ᠭᠡᠰᠡᠨ ᠬᠡᠷᠡᠭ ᠪᠠᠢᠯᠠ᠃ ᠴᠡᠷᠢᠭ ᠦ᠋ᠳ ᠦᠢᠮᠡᠯᠳᠦᠨ ᠣᠷᠣᠨ ᠪᠠᠢᠷᠢ ᠠ᠋ᠴᠠ ᠪᠠᠨ ᠭᠠᠷᠪᠠ᠃ ᠠᠳᠤᠭᠤᠨ ᠤ᠋ ᠡᠵᠡᠳ ᠮᠣᠷᠢᠳ ᠢ᠋ ᠵᠠᠬᠠ ᠠ᠋ᠴᠠ ᠨᠢ ᠪᠠᠷᠢᠯᠠᠵᠤ ᠡᠬᠢᠯᠡᠬᠦ ᠳ᠋ᠦ᠍ ᠴᠡᠷᠢᠭ ᠦ᠋ᠳ ᠬᠣᠭᠣᠷᠣ ᠵᠠᠭᠤᠷᠠ ᠤᠷᠤᠯᠳᠤᠨ ᠭᠦᠶᠦᠯᠳᠦᠵᠦ ᠪᠠᠷᠢᠯᠠᠨ ᠠᠪᠬᠤ ᠪᠣᠯᠪᠠᠴᠤ ᠰᠡᠭᠦᠯ ᠰᠡᠭᠦᠯ ᠳ᠋ᠡᠭᠡᠨ ᠭᠣᠯᠣᠨ ᠰᠢᠯᠢᠬᠦ ᠪᠣᠯᠵᠤ᠂ ᠤᠷᠢᠳ ᠢ᠋ᠶ᠋ᠠᠷ ᠶᠠᠮᠠᠷ ᠮᠣᠷᠢ ᠪᠠᠷᠢᠭᠳᠠᠬᠤ ᠶ᠋ᠢ ᠠᠵᠢᠭᠯᠠᠬᠤ ᠪᠣᠯᠵᠠᠢ᠃ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠬᠢᠯᠢᠩ ᠬᠠᠷᠠ ᠵᠢᠰᠦᠮ ᠦ᠋ᠨ ᠠᠲᠠᠷ ᠲᠠᠷᠭᠤᠨ ᠮᠣᠷᠢ ᠪᠠᠷᠢᠭᠳᠠᠬᠤ ᠳᠤ ᠬᠥᠮᠦᠰ ᠶᠠᠭᠠᠷᠠᠨ ᠭᠦᠶᠦᠯᠳᠦᠭᠰᠡᠨ ᠢ᠋ᠶ᠋ᠡᠨ ᠲᠡᠷᠡ ᠮᠣᠷᠢᠨ ᠤ᠋ ᠬᠠᠮᠠᠷ ᠲᠠᠴᠢᠭᠢᠨᠠᠨ ᠵᠡᠷᠯᠢᠭ ᠠᠷᠢᠶᠠᠲᠠᠨ ᠰᠢᠭ᠋ ᠴᠣᠪᠬᠣᠴᠢᠵᠤ ᠭᠠᠷᠬᠤ ᠳ᠋ᠤ᠌ ᠬᠠᠯᠳᠠᠨ ᠪᠠᠷᠢᠵᠤ ᠠᠪᠬᠤ ᠬᠥᠮᠦᠨ ᠭᠠᠷᠤᠭᠰᠠᠨ ᠦᠭᠡᠢ᠃
ᠮᠣᠷᠢᠨ ᠤ᠋ ᠡᠵᠡᠨ᠄
— ᠬᠥᠶᠢ ᠲᠠ ᠮᠢᠨᠢ ᠡᠭᠦᠨ ᠢ᠋ ᠤᠨᠤᠬᠤ ᠬᠥᠮᠦᠨ ᠪᠠᠢᠨᠠ ᠤᠤ? ᠤᠭ ᠨᠢ ᠰᠠᠢᠨ ᠮᠣᠷᠢ ᠰᠢᠦ ᠭᠡᠵᠦ ᠬᠠᠰᠬᠢᠷᠪᠠᠴᠤ ᠬᠥᠮᠦᠰ ᠰᠦᠷᠳᠡᠬᠦ ᠠᠵᠢ᠃
— ᠪᠠᠢᠬᠤ ᠦᠭᠡᠢ ᠪᠣᠯ ᠲᠠᠯᠪᠢᠯᠠ ᠭᠡᠬᠦ ᠳ᠋ᠦ᠍ᠨᠢ᠂ ᠳᠣᠷᠵᠢ《ᠪᠢ》 ᠭᠡᠵᠦ ᠭᠦᠶᠦᠨ ᠣᠴᠢᠪᠠ᠃ ᠬᠠᠷᠠ ᠮᠣᠷᠢ ᠤᠷᠢᠳ ᠬᠣᠶᠠᠷ ᠬᠥᠯ ᠢ᠋ᠶ᠋ᠡᠨ ᠳᠡᠭᠡᠷᠡ ᠰᠠᠮᠠᠷᠳᠠᠨ ᠤᠯᠠᠮ ᠢ᠋ᠶ᠋ᠠᠷ ᠴᠣᠪᠬᠣᠴᠢᠪᠠᠴᠤ ᠳᠣᠷᠵᠢ ᠠᠶᠤᠮᠰᠢᠭ ᠦᠭᠡᠢ ᠬᠠᠯᠳᠠᠨ ᠣᠴᠢᠵᠤ ᠴᠢᠬᠢᠳᠡᠨ ᠠᠪᠤᠪᠠ᠃ ᠬᠠᠵᠠᠭᠠᠷᠯᠠᠵᠤ ᠠᠪᠤᠮᠠᠭᠴᠠ ᠮᠣᠷᠢᠨ ᠤ᠋ ᠡᠵᠡᠨ ᠤᠷᠭᠠ ᠪᠠᠨ ᠰᠠᠯᠠᠭᠠᠨ ᠠᠪᠴᠤ᠄
— ᠵᠠ ᠬᠦ ᠭᠤᠷᠪᠠᠨ ᠵᠢᠯ ᠡᠮᠡᠭᠡᠯ ᠲᠣᠬᠣᠭᠤᠯᠤᠭᠠ ᠦᠭᠡᠢ ᠶᠦᠮ ᠳ᠋ᠠᠭ᠂ ᠮᠣᠷᠳᠠᠬᠤ ᠳ᠋ᠠᠭᠠᠨ ᠮᠡᠳᠡᠰᠬᠢᠭᠡᠷᠡᠢ ᠭᠡᠵᠦ ᠵᠠᠬᠢᠪᠠ᠃ ᠲᠣᠭᠣᠷᠢᠨ ᠬᠠᠷᠠᠭᠴᠢᠳ《ᠮᠣᠷᠢ ᠴᠤ᠌ ᠮᠣᠷᠢ᠂ ᠠᠭᠠᠰᠢ ᠴᠤ᠌ ᠭᠡᠵᠦ ᠠᠳᠠᠰᠬᠠ ᠪᠠᠢᠨᠠ ᠳᠠ》 ᠭᠡᠨᠡ᠃ ᠳᠣᠷᠵᠢ ᠶ᠋ᠢᠨ ᠡᠮᠡᠭᠡᠯ ᠬᠠᠵᠠᠭᠠᠷ ᠰᠠᠢᠨ᠂ ᠰᠠᠶᠢᠬᠠᠨ ᠣᠷᠣᠨ ᠨᠤᠲᠤᠭ ᠤ᠋ᠨ ᠬᠢᠨ ᠡᠴᠡ ᠲᠤᠰᠠᠯᠠᠮᠠᠵᠢ ᠳ᠋ᠤ᠌ ᠢᠷᠡᠭᠰᠡᠨ ᠢ᠋ ᠳᠣᠷᠵᠢ ᠤᠯᠠᠮ ᠢ᠋ᠶ᠋ᠠᠷ ᠰᠠᠢᠵᠢᠷᠠᠭᠤᠯᠤᠨ ᠣᠯᠣᠩ ᠵᠢᠷᠢᠮ ᠢ᠋ ᠨᠢ ᠪᠥᠬᠡ ᠪᠠᠲᠤ ᠪᠣᠯᠭᠠᠨ ᠲᠢᠭᠯᠡᠵᠦ ᠠᠪᠴᠠᠢ᠃
ᠬᠥᠮᠦᠰ ᠲᠤᠰ ᠪᠦᠷᠢᠨᠡ ᠤᠨᠤᠭᠠ ᠮᠣᠷᠢ ᠲᠠᠢ ᠪᠣᠯᠤᠭᠰᠠᠨ ᠳ᠋ᠠᠭᠠᠨ ᠪᠠᠶᠠᠷᠯᠠᠯᠳᠤᠨᠠ᠃ ᠡᠨᠡ ᠬᠢᠷᠢ ᠵᠥᠪᠯᠡᠯᠲᠦ ᠣᠷᠣᠰ ᠤᠯᠤᠰ ᠠ᠋ᠴᠠ ᠢᠷᠡᠬᠦ ᠵᠡᠪᠰᠡᠭ ᠦ᠋ᠨ ᠲᠤᠰᠠᠯᠠᠮᠵᠢ ᠠᠷᠠᠢᠬᠠᠨ ᠬᠦᠷᠦᠯᠴᠡᠨ ᠢᠷᠡᠭᠡ ᠦᠭᠡᠢ ᠪᠠᠢᠭᠰᠠᠨ ᠤᠴᠢᠷ ᠬᠥᠮᠦᠰ ᠲᠦ᠍ ᠲᠠᠪᠤ ᠲᠠᠪᠤᠨ ᠰᠤᠮᠤ᠂ ᠳᠡᠭᠡᠳᠦ ᠵᠡᠷᠭᠡ ᠶ᠋ᠢᠨ ᠫᠤᠤᠳᠠᠭᠴᠢᠳ ᠲᠤ᠌ ᠠᠷᠪᠠ ᠠᠷᠪᠠᠨ ᠰᠤᠮᠤ ᠶ᠋ᠢ ᠲᠠᠷᠬᠠᠭᠠᠨ ᠲᠦᠭᠡᠭᠡᠵᠡᠢ᠃ ᠠᠯᠢ ᠥᠷᠯᠥᠭᠡ ᠡᠴᠡ ᠠᠪᠤᠨ ᠪᠢᠲᠡᠭᠦᠦ ᠪᠦᠷᠬᠦᠭᠰᠡᠨ ᠡᠭᠦᠯᠡ ᠮᠠᠨᠠᠨ ᠨᠡᠮᠡ ᠨᠡᠮᠡᠨ ᠵᠤᠵᠠᠭᠠᠷᠠᠭᠰᠠᠭᠠᠷ ᠡᠴᠦᠰ ᠲᠦ᠋ᠨᠢ ᠲᠣᠮᠣ ᠲᠣᠮᠣ ᠰᠢᠷᠬᠡᠭᠲᠦ ᠴᠠᠰᠤ ᠬᠠᠶᠠᠯᠠᠬᠤ ᠪᠣᠯᠵᠠᠢ᠃ ᠡᠨᠳᠡ ᠲᠡᠨᠳᠡ ᠪᠥᠭᠡᠮᠨᠡᠷᠡᠭᠦᠯᠦᠨ ᠤᠶᠠᠭᠰᠠᠨ ᠡᠮᠡᠭᠡᠯᠲᠦ ᠮᠣᠷᠢᠳ ᠤ᠋ᠨ ᠬᠣᠨᠳᠣᠯᠠᠢ ᠴᠠᠰᠤᠨ ᠳ᠋ᠤ᠌ ᠳᠠᠷᠤᠭᠳᠠᠨ ᠪᠤᠭᠤᠷᠤᠯᠲᠤᠨᠠ᠃ ᠲᠤᠩ ᠰᠠᠶᠢᠬᠠᠨ ᠦᠢᠮᠡᠨ ᠪᠤᠵᠢᠭᠢᠨᠠᠵᠤ ᠪᠠᠢᠭᠰᠠᠨ ᠡᠷᠡᠰ᠂ ᠲᠤᠰ ᠲᠤᠰ ᠤ᠋ᠨ ᠢ᠋ᠶ᠋ᠠᠨ ᠣᠷᠣᠨ ᠰᠠᠭᠤᠴᠠ ᠳ᠋ᠤ᠌ ᠣᠷᠣᠵᠤ ᠠᠨᠢᠷ ᠴᠢᠮᠡᠭᠡ ᠦᠭᠡᠢ ᠪᠣᠯᠤᠭᠰᠠᠨ ᠪᠠᠢᠲᠠᠯᠠ ᠭᠡᠨᠡᠳᠲᠡ ᠲᠤᠩ ᠪᠦᠷᠢᠨ ᠶᠠᠩᠰᠢᠵᠤ ᠳᠠᠬᠢᠨ ᠪᠤᠵᠢᠭᠢᠨᠠᠭᠠᠨ ᠪᠣᠯᠵᠤ᠂ ᠮᠣᠷᠢᠳ ᠤ᠋ᠨ ᠵᠦᠭ ᠭᠦᠶᠦᠯᠳᠦᠨᠡ᠃ ᠳᠡᠭᠡᠳᠦ ᠳᠠᠷᠤᠭᠠ ᠨᠠᠷ ᠤ᠋ᠨ ᠲᠤᠰᠢᠶᠠᠯ ᠢ᠋ᠶ᠋ᠠᠷ ᠬᠣᠶᠠᠷ ᠡᠩᠨᠡᠭᠡ ᠪᠣᠯᠤᠨ ᠲᠣᠭᠣᠷᠢᠨ ᠵᠣᠭᠰᠣᠬᠤ ᠳ᠋ᠤ᠌ ᠬᠣᠶᠠᠷ ᠮᠣᠷᠢ ᠲᠠᠢ ᠬᠥᠮᠦᠨ ᠳᠠᠪᠬᠢᠨ ᠢᠷᠡᠵᠡᠢ᠃ ᠲᠡᠳᠡᠨ ᠦ᠌ ᠨᠢᠭᠤᠷ ᠴᠢᠷᠠᠢ ᠠᠰᠬᠠᠷᠠᠨ ᠣᠷᠣᠵᠤ ᠪᠣᠢ ᠴᠠᠰᠤᠨ ᠳ᠋ᠤ᠌ ᠪᠠᠷᠤᠭ ᠪᠦᠷᠦᠭ ᠬᠠᠷᠠᠭᠳᠠᠬᠤ ᠪᠣᠯᠪᠠᠴᠤ ᠴᠡᠷᠢᠭ ᠦ᠋ᠳ ᠵᠠᠩᠵᠤᠨ ᠰᠦᠬᠡᠪᠠᠭᠠᠲᠤᠷ᠂ ᠨᠣᠮᠯᠠᠭᠴᠢ ᠴᠣᠢᠪᠠᠯᠰᠠᠩ ᠭᠡᠵᠦ ᠲᠠᠨᠢᠨ ᠰᠢᠪᠡᠨᠡᠯᠳᠦᠨᠡ᠃ ᠡᠨᠳᠡ ᠪᠠᠢᠭᠠ ᠪᠦᠬᠦ ᠴᠡᠷᠢᠭ ᠵᠠᠭᠤᠨ ᠲᠠᠪᠢ ᠰᠢᠬᠠᠮ᠂ ᠠᠭᠲᠠ ᠮᠣᠷᠢᠳ ᠤ᠋ᠨ ᠬᠠᠮᠲᠤ ᠭᠤᠷᠪᠠᠨ ᠵᠠᠭᠤ ᠭᠠᠷᠤᠢ ᠠᠮᠢ ᠪᠡᠶᠡ᠂ ᠵᠠᠩᠵᠤᠨ ᠰᠦᠬᠡᠪᠠᠭᠠᠲᠤᠷ ᠤ᠋ᠨ ᠠᠮᠠᠨ ᠠ᠋ᠴᠠ ᠶᠠᠭᠤ ᠭᠠᠷᠬᠤ ᠶ᠋ᠢ ᠬᠦᠯᠢᠶᠡᠵᠡᠢ᠃
ᠠᠷᠤ ᠳ᠋ᠤᠨᠢ ᠭᠠᠵᠢ ᠪᠤᠷᠤᠭᠤ ᠮᠠᠯ ᠤ᠋ᠨ ᠬᠥᠯ ᠦ᠋ᠨ ᠲᠦᠪᠡᠷᠭᠡᠨ ᠰᠣᠨᠣᠰᠳᠠᠭᠰᠠᠨ ᠢ᠋ ᠡᠷᠭᠢᠨ ᠬᠠᠷᠠᠬᠤ ᠳ᠋ᠤ᠌ ᠵᠠᠮᠴᠢ ᠳᠠᠷᠬᠠᠨ ᠳᠠᠯᠢᠤ ᠲᠣᠮᠣ ᠡᠪᠡᠷ ᠲᠡᠢ ᠬᠥᠬᠡ ᠬᠠᠢᠨᠤᠭ ᠤ᠋ᠨ ᠱᠠᠷ ᠤᠨᠤᠨ ᠬᠠᠲᠠᠷᠢᠭᠤᠯᠤᠨ ᠠᠢᠰᠤᠢ᠃ ᠳᠠᠷᠬᠠᠨ ᠤ᠋ ᠰᠦᠷᠡᠬᠡᠢ ᠶᠡᠬᠡ ᠰᠠᠬᠠᠯ ᠴᠠᠰᠤᠨ ᠳ᠋ᠤ᠌ ᠬᠤᠴᠢᠭᠳᠠᠭᠰᠠᠨ ᠨᠢ ᠡᠷᠡᠦ ᠳ᠋ᠡᠭᠡᠨ ᠢᠰᠡᠭᠡᠢ ᠬᠥᠭ ᠵᠡᠭᠦᠭᠰᠡᠨ ᠰᠢᠭ ᠦᠵᠡᠭᠳᠡᠨᠡ᠃ ᠳᠡᠪᠡᠯ ᠢ᠋ᠶ᠋ᠡᠨ ᠬᠠᠭᠤᠴᠢᠨ ᠶᠠᠩᠵᠤ ᠪᠠᠷ ᠶᠡᠬᠡᠳᠡ ᠬᠥᠭᠡᠷᠦᠬᠡᠨ ᠪᠦᠰᠡᠯᠡᠭᠡᠳ ᠲᠡᠭᠦᠨ ᠦ᠌ ᠪᠡᠨ ᠳᠡᠭᠡᠷᠡ ᠬᠡᠳᠦᠨ ᠲᠠᠢᠰᠠ ᠰᠤᠮᠤ ᠶ᠋ᠢ ᠬᠠᠩᠬᠠᠭᠠᠷ ᠴᠡᠭᠡᠵᠢᠨ ᠳ᠋ᠡᠭᠡᠨ ᠣᠷᠢᠶᠠᠨ ᠪᠢᠷᠲᠡᠩᠺᠡ ᠫᠤᠤ ᠡᠭᠦᠷᠦᠭᠰᠡᠨ ᠨᠢ ᠣᠳᠣ ᠬᠡᠦᠬᠡᠳ ᠪᠠᠭᠠᠴᠤᠳ ᠪᠠᠢᠲᠤᠭᠠᠢ ᠲᠣᠮᠣᠴᠤᠳ ᠪᠣᠯᠪᠠᠴᠤ ᠠᠶᠤᠨ ᠰᠣᠴᠢᠮᠠᠷ ᠪᠠᠷᠠ ᠰᠦᠷ ᠲᠡᠢ ᠪᠣᠯᠵᠠᠢ᠃
— ᠬᠥᠶᠢ ᠵᠠᠮᠴᠢ ᠭᠤᠸᠠᠢ ᠰᠠᠢᠨ ᠶᠠᠪᠤᠵᠤ ᠪᠠᠢᠨᠠ ᠤᠤ? ᠭᠡᠵᠦ ᠳᠣᠷᠵᠢ ᠶ᠋ᠢᠨ ᠠᠰᠠᠭᠤᠬᠤ ᠳ᠋ᠤ᠌ ᠸᠴᠢᠷ ᠸᠠᠨᠢ! ᠭᠡᠵᠦ ᠳᠠᠭᠤ ᠠᠯᠲᠠᠨ ᠳᠣᠷᠵᠢ ᠶ᠋ᠢ ᠠᠵᠢᠭᠯᠠᠭᠠᠳ᠂ ᠳᠣᠷᠵᠢ ᠤᠤ? ᠰᠠᠢᠨ᠂ ᠰᠠᠢᠨ᠂ ᠴᠠᠭᠠᠨᠠ ᠴᠢᠨᠢ ᠣᠳᠣ ᠴᠠᠭ ᠲᠤᠯᠭᠠᠷᠠᠯᠠ ᠰᠢᠦ ᠳᠡ᠃
— ᠲᠡᠢᠮᠦ ᠠ᠋᠂ ᠲᠤᠯᠭᠠᠷᠠᠭᠠᠳ ᠪᠠᠢᠨᠠ ᠭᠡᠳ ᠴᠠᠭᠠᠰᠢ ᠶᠠᠷᠢᠬᠤ ᠭᠡᠲᠡᠯᠡ ᠳᠠᠮᠫᠢᠯ ᠳᠠᠷᠤᠭᠠ《ᠴᠢᠮᠡᠭᠡ ᠪᠡᠨ!》 ᠭᠡᠵᠦ ᠬᠣᠷᠢᠭᠯᠠᠪᠠ᠃ ᠳᠠᠷᠬᠠᠨ ᠬᠠᠷᠢᠭᠤ ᠳ᠋ᠤᠨᠢ ᠬᠡᠳᠡᠷᠯᠡᠬᠦ ᠪᠣᠯᠤᠯᠲᠠᠢ᠄ ᠤᠤᠬᠠᠢ ᠡᠨᠳᠡ ᠬᠠ ᠬᠠ ᠳᠠᠮᠫᠢᠯ᠂ ᠵᠠ ᠬᠦ ᠵᠠᠩᠵᠤᠨ ᠬᠠᠮᠢᠭᠠ ᠶᠠᠪᠤᠨᠠ?
— ᠲᠠ ᠶᠠᠭᠠᠬᠢᠬᠤ ᠬᠡ ᠪᠣᠢ?
— ᠠᠭᠤᠯᠵᠠᠨᠠ᠃ ᠬᠠᠪᠤᠷ ᠤ᠋ᠨ ᠴᠠᠰᠤ ᠬᠠᠯᠲᠤᠷᠢᠭᠠ ᠲᠠᠢ ᠬᠠᠮᠢᠭᠠᠭᠤᠷ ᠶᠠᠪᠤᠪᠠᠯ ᠵᠣᠬᠢᠬᠤ ᠶ᠋ᠢ ᠵᠢᠭᠠᠨᠠ᠃
— ᠲᠠ ᠠᠶᠠᠷ ᠶᠠᠷᠢ! ᠵᠠᠩᠵᠤᠨ ᠲᠦᠷᠦᠭᠦᠨ ᠳ᠋ᠦ᠍ ᠶᠠᠪᠤᠭᠠ᠃
— ᠮᠡᠳᠡᠯᠡ᠂ ᠸᠴᠢᠷ ᠸᠠᠨᠢ᠃
ᠵᠠᠮᠴᠢ ᠨᠢᠭᠡ ᠶᠠᠭᠤᠮᠠ ᠪᠠᠷ ᠤᠨᠤᠵᠤ ᠶᠠᠪᠤᠭᠠ ᠬᠠᠢᠨᠤᠭ ᠢ᠋ᠶ᠋ᠠᠨ ᠰᠢᠪ ᠬᠢᠯᠭᠡᠨ ᠣᠷᠢᠶᠠᠯᠭᠠᠭᠰᠠᠨ ᠨᠢ ᠮᠠᠨᠢ ᠤᠩᠰᠢᠬᠤ ᠰᠤᠸᠠᠮᠫᠠᠨ ᠤ᠋ ᠡᠷᠢᠭᠡ ᠰᠢᠭ ᠲᠣᠮᠣ ᠲᠣᠮᠣ ᠡᠷᠢᠬᠡᠲᠤ ᠡᠷᠢᠭᠡ ᠪᠡᠷ ᠢ᠋ᠶ᠋ᠡᠨ ᠭᠤᠶᠠᠳᠠᠭᠰᠠᠨ ᠠᠵᠢ᠃ ᠲᠡᠷᠡ ᠳᠣᠣᠷᠠᠬᠠᠨ ᠢ᠋ᠶ᠋ᠠᠨ ᠣᠷᠣᠭᠰᠢ ᠭᠦᠶᠦᠯᠭᠡᠨ ᠠᠯᠠᠭᠠ ᠪᠣᠯᠪᠠ᠃
《ᠬᠠᠪᠤᠷ ᠤ᠋ᠨ ᠴᠠᠰᠤ ᠬᠠᠯᠲᠤᠷᠢᠭᠠ ᠲᠠᠢ》 ᠭᠡᠵᠦ ᠵᠠᠮᠴᠢ ᠳᠠᠷᠬᠠᠨ ᠤ᠋ ᠥᠭᠦᠯᠡᠳᠡᠭ ᠲᠤᠩ ᠦᠨᠡᠨ ᠠᠵᠢ᠃ ᠰᠥᠨᠢ ᠲᠤᠷᠰᠢ ᠶᠠᠪᠤᠬᠤ ᠳ᠋ᠠᠭᠠᠨ ᠳᠥᠩᠭᠡᠵᠦ ᠥᠷᠲᠡᠭᠡ ᠭᠠᠷᠤᠢᠬᠠᠨ ᠭᠠᠵᠠᠷ ᠢ᠋ ᠠᠷᠠᠢᠬᠠᠨ ᠠᠪᠴᠠᠢ᠃ ᠡᠨᠡ ᠵᠠᠭᠤᠷᠠ ᠬᠣᠶᠠᠷ ᠭᠤᠨᠠᠨ ᠫᠤᠤ ᠶ᠋ᠢᠨ ᠮᠣᠷᠢᠳ ᠡᠴᠡᠨ ᠠᠷᠤ ᠳ᠋ᠤ᠌ ᠬᠠᠶᠠᠭᠳᠠᠵᠠᠢ᠃ ᠠᠩᠬᠠ ᠴᠠᠰᠤ ᠣᠷᠣᠯᠲᠠ ᠪᠠᠷ ᠴᠡᠷᠢᠭ ᠦ᠋ᠳ ᠳᠡᠪᠡᠯ ᠬᠤᠪᠴᠠᠰᠤ ᠨᠣᠷᠤᠨ ᠴᠢᠭᠢᠭ ᠳᠠᠭᠠᠭᠠᠵᠤ ᠪᠠᠢᠭᠰᠠᠨ ᠨᠢ ᠰᠥᠨᠢ ᠶ᠋ᠢᠨ ᠬᠦᠢᠲᠡᠨ ᠳ᠋ᠦ᠍ ᠬᠥᠯᠳᠡᠵᠦ ᠲᠠᠭᠠᠷᠠᠨ ᠴᠡᠴᠡᠷᠡᠭᠦᠯᠬᠦ ᠳ᠋ᠦ᠍ ᠬᠦᠷᠴᠡᠢ᠃ ᠰᠥᠨᠢ ᠳᠤᠮᠳᠠ ᠶ᠋ᠢᠨ ᠬᠢᠷᠢ ᠪᠡᠷ ᠬᠥᠨᠳᠡᠯᠡᠨ ᠡᠴᠡ ᠦᠭᠡᠯᠦᠯᠭᠡ ᠨᠣᠶᠠᠨ ᠥᠪᠡᠷ ᠦ᠋ᠨ ᠬᠠᠷᠢᠶᠠᠲᠤ ᠲᠠᠪᠢᠨ ᠡᠷᠡ ᠴᠡᠷᠢᠭ ᠲᠡᠢ ᠢᠷᠡᠵᠦ ᠨᠡᠢᠯᠡᠪᠡ᠃ ᠭᠠᠵᠠᠷ ᠰᠠᠢᠨ ᠮᠡᠳᠡᠬᠦ ᠬᠥᠮᠦᠨ ᠦ᠌ ᠬᠡᠯᠡᠬᠦ ᠪᠡᠷ ᠪᠣᠯ ᠬᠢᠶᠠᠭᠲᠤ ᠬᠣᠲᠠ ᠲᠤᠩ ᠣᠢᠷᠠᠲᠤᠭᠰᠠᠨ ᠭᠡᠨᠡ᠃ ᠦᠷ ᠴᠠᠢᠨ ᠣᠢᠷᠠ ᠵᠠᠭᠤᠷᠠ ᠶ᠋ᠢᠨ ᠪᠠᠷᠠ ᠦᠵᠡᠭᠳᠡᠬᠦ ᠲᠡᠢ ᠪᠣᠯᠬᠤ ᠦᠶᠡ ᠪᠡᠷ ᠳᠠᠮᠫᠢᠯ ᠳᠠᠭᠤᠳᠠᠭᠳᠠᠨ ᠤᠷᠤᠭᠰᠢ ᠳᠠᠪᠰᠢᠨ ᠴᠣᠪᠤᠭᠠᠨ ᠤ᠋ ᠲᠦᠷᠦᠭᠦᠨ ᠳ᠋ᠦ᠍ ᠶᠠᠪᠤᠭᠠ ᠭᠤᠷᠪᠠᠨ ᠬᠥᠮᠦᠨ ᠳᠡᠭᠡᠷᠡ ᠣᠴᠢᠵᠠᠢ᠃ ᠲᠡᠳᠡᠨ ᠦ᠌ ᠨᠢᠭᠡ ᠨᠢ ᠰᠦᠬᠡᠪᠠᠭᠠᠲᠤᠷ᠂ ᠬᠣᠶᠠᠳᠠᠬᠢ ᠨᠢ ᠴᠣᠢᠪᠠᠯᠰᠠᠩ᠂ ᠭᠤᠷᠪᠠᠳᠠᠬᠢ ᠨᠢ ᠦᠭᠡᠯᠦᠯᠭᠡ᠃ ᠳᠠᠮᠫᠢᠯ ᠲᠡᠨᠳᠡ ᠡᠴᠡ ᠶᠠᠭᠠᠷᠠᠯᠲᠠᠢ ᠡᠷᠭᠢᠨ ᠢᠷᠡᠵᠦ ᠰᠤᠮᠤᠨ ᠠ᠋ᠴᠠ ᠪᠠᠨ ᠲᠠᠪᠢᠨ ᠬᠥᠮᠦᠨ ᠢ᠋ ᠭᠠᠷᠭᠠᠨ ᠠᠪᠴᠤ ᠪᠦᠬᠦ ᠴᠡᠷᠢᠭ ᠡᠴᠡ ᠲᠦᠷᠦᠭᠦᠯᠡᠨ ᠶᠠᠪᠤᠯᠠ᠃ ᠲᠡᠳᠡᠨ ᠦ᠌ ᠨᠢᠭᠡ ᠨᠢ ᠳᠣᠷᠵᠢ᠃ ᠳᠠᠮᠫᠢᠯ ᠲᠡᠳᠡᠨ ᠳ᠋ᠡᠭᠡᠨ᠄
— ᠡᠨᠡᠬᠡᠨ ᠡᠷᠢᠶᠡᠨ ᠬᠠᠪᠢᠷᠭᠠ ᠶ᠋ᠢᠨ ᠬᠣᠩᠬᠣᠷ ᠤ᠋ᠨ ᠪᠠᠢᠰᠢᠩ ᠳ᠋ᠤ᠌ ᠪᠠᠢᠭᠠ ᠭᠠᠮᠢᠩ ᠤ᠋ᠨ ᠬᠠᠷᠠᠭᠤᠯ ᠢ᠋ ᠤᠰᠠᠳᠬᠠ ᠭᠡᠳ᠄ ᠮᠢᠨᠦ ᠬᠣᠢᠨᠠ ᠠ᠋ᠴᠠ! ᠭᠡᠵᠦ ᠲᠤᠰᠢᠶᠠᠵᠤ ᠮᠣᠷᠢᠨ ᠳ᠋ᠠᠭᠠᠨ ᠲᠠᠰᠢᠭᠤᠷ ᠥᠭᠭᠦᠨ ᠤᠬᠤᠰᠬᠢᠵᠡᠢ᠃ ᠠᠷᠤ ᠠ᠋ᠴᠠ ᠨᠢ ᠳᠣᠷᠵᠢ ᠶ᠋ᠢᠨ ᠮᠣᠷᠢ ᠣᠭᠯᠣ ᠦᠰᠦᠷᠦᠨ ᠮᠥᠷᠥ ᠵᠡᠷᠭᠡᠴᠡᠨ ᠣᠴᠢᠪᠠ᠃ ᠪᠤᠰᠤᠳ ᠨᠢ ᠬᠣᠢᠨᠠ ᠠ᠋ᠴᠠ ᠨᠢ ᠬᠤᠷᠳᠤᠯᠠᠪᠠᠴᠤ ᠠᠯᠤᠰᠯᠠᠭᠳᠠᠨ ᠬᠣᠴᠣᠷᠤᠨᠠ᠃ ᠲᠦᠷᠦᠭᠦᠯᠡᠭᠰᠡᠨ ᠬᠣᠶᠠᠷ ᠤ᠋ᠨ ᠮᠣᠷᠢᠳ ᠤᠯᠠᠮ ᠢ᠋ᠶ᠋ᠠᠷ ᠡᠷᠴᠢᠯᠡᠨ ᠬᠤᠷᠳᠤᠯᠠᠵᠤ᠂ ᠠᠷᠤ ᠳ᠋ᠤᠨᠢ ᠴᠠᠰᠤ ᠮᠠᠨᠠᠷᠠᠨ ᠪᠣᠰᠤᠨᠠ᠃ ᠲᠡᠳᠡ ᠳᠣᠣᠷᠠᠬᠠᠨ ᠢ᠋ᠶ᠋ᠠᠨ ᠭᠠᠮᠢᠩ ᠤ᠋ᠨ ᠬᠠᠷᠠᠭᠤᠯ ᠪᠠᠢᠭᠠ ᠬᠣᠩᠬᠣᠷ ᠤ᠋ᠨ ᠪᠠᠢᠰᠢᠩ ᠤᠷᠤᠭᠤ ᠣᠷᠣᠵᠤ ᠢᠷᠡᠪᠡ᠃ ᠱᠣᠪᠣᠭᠣᠷ ᠤ᠋ᠨ ᠮᠠᠨᠠᠭᠠ ᠭᠡᠨᠡᠳᠲᠡ ᠬᠠᠷᠠᠨ ᠫᠤᠤᠳᠠᠭᠰᠠᠨ ᠪᠣᠯᠪᠠᠴᠤ ᠳᠠᠪᠠᠭᠤᠯᠵᠤ ᠣᠷᠬᠢᠪᠠ᠃ ᠳᠠᠮᠫᠢᠯ ᠤ᠋ᠨ ᠭᠠᠷ ᠭᠢᠯᠠᠰᠬᠢᠨ ᠫᠤᠤ ᠪᠠᠨ ᠮᠤᠯᠲᠤᠯᠤᠨ ᠠᠪᠤᠩᠭᠤᠲᠠ ᠫᠤᠤᠳᠠᠬᠤ ᠳ᠋ᠠᠭᠠᠨ ᠳᠣᠣᠷᠠ ᠨᠢ ᠤᠨᠠᠭᠠᠪᠠ᠃ ᠡᠨᠡ ᠨᠢ ᠳᠣᠷᠵᠢ ᠳ᠋ᠤ᠌ ᠵᠡᠭᠦᠳᠦ ᠰᠢᠭ ᠰᠠᠨᠠᠭᠳᠠᠪᠠ᠃ ᠬᠣᠢᠲᠤ ᠲᠠᠯᠠ ᠳ᠋ᠠᠭᠠᠨ ᠤᠷᠲᠤ ᠰᠢᠪᠠᠷ ᠪᠠᠢᠰᠢᠩ ᠲᠠᠢ ᠥᠨᠳᠥᠷ ᠬᠠᠰᠢᠶᠠᠨ ᠤ᠋ ᠬᠠᠭᠠᠯᠭᠠ ᠶ᠋ᠢᠨ ᠡᠮᠦᠨᠡ ᠢᠷᠡᠬᠦ ᠲᠡᠢ ᠪᠡᠨ ᠵᠡᠷᠭᠡ ᠳᠠᠮᠫᠢᠯ《ᠮᠣᠷᠢ ᠠᠪᠤᠭᠠᠷᠠᠢ!》 ᠭᠡᠵᠦ ᠬᠡᠯᠡᠨ ᠦᠰᠦᠷᠦᠨ ᠪᠠᠭᠤᠪᠠ᠃ ᠰᠦᠬᠡᠪᠠᠭᠠᠲᠤᠷ ᠳᠥᠷᠥᠭᠡ ᠵᠢᠭᠢᠨ ᠡᠮᠡᠭᠡᠯ ᠳᠡᠭᠡᠷᠡ ᠪᠡᠨ ᠪᠣᠰᠴᠤ᠄
— ᠡᠪ ᠲᠠᠩᠭᠠᠷᠢᠭ ᠨᠢᠭᠡᠲᠦ ᠵᠢᠷᠤᠮ ᠤ᠋ᠨ ᠣᠯᠠᠨ ᠠᠬᠠ ᠳᠡᠭᠦᠦ ᠨᠠᠷ ᠠ᠋! ᠭᠡᠵᠦ ᠦᠭᠡ ᠪᠡᠨ ᠡᠬᠢᠯᠡᠨ ᠴᠠᠭᠠᠰᠢ ᠶᠠᠷᠢᠬᠤ ᠳ᠋ᠤ᠌ ᠴᠥᠮ ᠠᠮᠢᠰᠬᠤᠯ ᠬᠣᠷᠢᠶᠠᠨ ᠴᠢᠩᠨᠠᠭᠰᠠᠨ ᠪᠥᠭᠡᠳ ᠭᠠᠭᠴᠠᠬᠠᠨ ᠳᠣᠷᠵᠢ ᠶ᠋ᠢᠨ ᠮᠣᠷᠢ ᠲᠣᠭᠲᠠᠵᠤ ᠶᠠᠳᠠᠨ ᠲᠣᠩᠭᠣᠴᠢᠵᠤ ᠡᠵᠡᠨ ᠢ᠋ᠶ᠋ᠡᠨ ᠦᠢᠮᠡᠭᠦᠯᠪᠡ᠃《ᠪᠢᠳᠡ ᠣᠳᠣ ᠥᠰᠢᠶᠡᠲᠡᠨ ᠳᠠᠢᠰᠤᠨ ᠲᠠᠢ ᠡᠷᠡᠭᠴᠢᠨ ᠡᠮᠡᠭᠴᠢᠨ ᠢ᠋ᠶ᠋ᠡᠨ ᠦᠵᠡᠯᠴᠡᠬᠦ ᠴᠢᠬᠤᠯᠠ ᠴᠠᠭ ᠤ᠋ᠨ ᠡᠮᠦᠨᠡ ᠢᠷᠡᠯᠡ!》 ᠭᠡᠵᠦ ᠰᠦᠬᠡᠪᠠᠭᠠᠲᠤᠷ ᠤ᠋ᠨ ᠥᠭᠦᠯᠡᠬᠦ ᠶ᠋ᠢ ᠨᠢᠭᠡ ᠤᠳᠠᠭᠠ ᠣᠯᠵᠤ ᠰᠣᠨᠣᠰᠬᠤ ᠪᠣᠯᠪᠠᠴᠤ ᠬᠠᠷᠠ ᠮᠣᠷᠢ ᠳᠠᠬᠢᠨ ᠳᠡᠪᠬᠡᠴᠡᠵᠦ ᠪᠠᠰᠠ ᠦᠢᠮᠡᠭᠦᠯᠪᠡ᠃ ᠳᠠᠷᠠᠭᠠ ᠨᠢ ᠰᠦᠬᠡᠪᠠᠭᠠᠲᠤᠷ ᠬᠠᠷᠭᠢᠰ ᠭᠠᠮᠢᠩ ᠳᠣᠲᠣᠭᠠᠳᠤ ᠶ᠋ᠢᠨ ᠵᠠᠷᠢᠮ ᠳᠡᠭᠡᠳᠦ ᠯᠠᠮᠠ ᠨᠣᠶᠠᠳ ᠲᠠᠢ ᠬᠤᠤᠪᠢᠯᠳᠤᠨ ᠬᠠᠯᠬᠠ ᠣᠷᠣᠨ ᠢ᠋ ᠡᠵᠡᠯᠡᠨ ᠠᠷᠠᠳ ᠲᠦᠮᠡᠨ ᠳ᠋ᠦ᠍ ᠬᠡᠴᠢᠨᠡᠭᠡᠨ ᠶᠡᠬᠡ ᠬᠣᠣᠷ ᠬᠥᠨᠥᠭᠡᠯ ᠤᠴᠠᠷᠠᠭᠤᠯᠤᠭᠰᠠᠨ ᠢ᠋ ᠳᠤᠷᠠᠳᠤᠨ ᠲᠣᠭᠠᠴᠢᠬᠤ ᠶ᠋ᠢ ᠳᠣᠷᠵᠢ ᠣᠯᠵᠤ ᠰᠣᠨᠣᠰᠤᠯᠠ᠃ ᠡᠴᠦᠰ ᠲᠦ᠋ᠨᠢ《ᠣᠳᠣ ᠭᠠᠮᠢᠩ ᠢ᠋ ᠬᠥᠭᠡᠭᠡᠨ ᠵᠠᠢᠯᠠᠭᠤᠯᠬᠤ ᠠᠷᠢᠭᠤᠨ ᠬᠡᠷᠡᠭ ᠲᠦ᠍ ᠬᠠᠯᠠᠭᠤᠨ ᠠᠮᠢ ᠪᠦᠯᠢᠶᠡᠨ ᠴᠢᠰᠤ ᠪᠠᠨ ᠪᠢᠲᠡᠭᠡᠢ ᠬᠠᠢᠷᠠᠯᠠᠭᠲᠤᠨ!》 ᠭᠡᠵᠦ ᠭᠠᠷ ᠤ᠋ᠨ ᠢ᠋ᠶ᠋ᠠᠨ ᠲᠠᠰᠢᠭᠤᠷ ᠢ᠋ ᠴᠢᠩᠭᠠᠳᠠ ᠠᠳᠬᠤᠨ ᠳᠡᠭᠡᠷᠡ ᠡᠷᠭᠦᠨ ᠭᠢᠯᠠᠯᠵᠠᠭᠤᠯᠬᠤ ᠶ᠋ᠢ ᠣᠯᠵᠤ ᠬᠠᠷᠠᠯᠠ᠃
ᠲᠡᠳᠡ ᠡᠴᠡ ᠪᠦᠬᠦ ᠴᠡᠷᠢᠭ ᠤᠷᠲᠤ ᠴᠤᠪᠤᠭᠠ ᠪᠣᠯᠤᠨ ᠵᠡᠭᠦᠨ ᠵᠦᠭ ᠴᠢᠭᠯᠡᠪᠡ᠃ ᠥᠨᠳᠥᠷ ᠳᠠᠮᠫᠢᠯ ᠤ᠋ᠨ ᠰᠤᠮᠤ ᠲᠡᠷᠡ ᠴᠤᠪᠤᠭᠠ ᠶ᠋ᠢᠨ ᠰᠡᠭᠦᠯ ᠳ᠋ᠦ᠍ ᠣᠷᠣᠭᠰᠠᠨ ᠠᠵᠢ᠃ ᠴᠠᠰᠤᠨ ᠤ᠋ ᠣᠷᠣᠯᠲᠠ ᠦᠷᠭᠦᠯᠵᠢᠯᠡᠵᠦ ᠶᠠᠭᠤᠮᠠ ᠪᠦᠬᠦᠨ ᠲᠤᠩ ᠴᠠᠭᠠᠨ ᠪᠣᠯᠪᠠ᠃ ᠨᠠᠷᠠ ᠵᠢᠷᠭᠠᠨ ᠦᠳᠡᠰᠢ ᠪᠣᠯᠣᠮᠠᠭᠴᠠ ᠵᠢᠭᠰᠠᠭᠠᠯ ᠤ᠋ᠨ ᠲᠦᠷᠦᠭᠦᠴᠢ ᠦᠵᠡᠭᠳᠡᠬᠦ ᠪᠡᠨ ᠪᠠᠢᠪᠠ᠃ ᠳᠣᠷᠣᠭᠰᠢ ᠬᠠᠷᠠᠪᠠᠯ ᠤᠷᠢᠳᠠ ᠶᠠᠪᠤᠭᠠ ᠮᠣᠷᠢᠳ ᠤ᠋ᠨ ᠬᠥᠯ ᠢ᠋ᠶ᠋ᠡᠷ ᠴᠠᠰᠤ ᠵᠠᠮᠬᠠᠷᠠᠨ ᠭᠠᠵᠠᠷ ᠬᠠᠷᠠᠯᠠᠵᠤ ᠬᠠᠮᠤᠭ ᠤ᠋ᠨ ᠲᠡᠷᠢᠭᠦᠨ ᠶᠠᠪᠤᠭᠠ ᠣᠭᠲᠤᠷᠬᠠᠨ ᠲᠡᠮᠦᠷ ᠲᠡᠢ ᠬᠣᠶᠠᠷ ᠭᠤᠨᠠᠨ ᠫᠤᠤ ᠶ᠋ᠢᠨ ᠲᠡᠷᠭᠡᠨ ᠦ᠌ ᠮᠥᠷ ᠭᠠᠵᠠᠷ ᠰᠢᠭᠢᠳᠦᠨ ᠬᠣᠪᠢᠯᠲᠣᠭᠤᠯᠤᠭᠰᠡᠨ ᠨᠢ ᠶᠠᠭᠤ ᠶᠠᠭᠤᠨ ᠠ᠋ᠴᠠ ᠰᠣᠳᠣᠨ ᠦᠵᠡᠭᠳᠡᠨᠡ᠃ ᠡᠢᠨᠬᠦ ᠶᠠᠪᠤᠬᠤ ᠳ᠋ᠤ᠌ ᠳᠣᠷᠵᠢ ᠶ᠋ᠢᠨ ᠰᠡᠳᠬᠢᠯ ᠨᠢᠭᠡ ᠯᠡ ᠠᠶᠠᠭᠦᠢ᠃ ᠴᠣᠬᠣᠮ ᠶᠠᠭᠤᠨ ᠠ᠋ᠴᠠ ᠪᠣᠯᠵᠤ ᠰᠡᠳᠬᠢᠯ ᠨᠢ ᠲᠡᠢᠮᠦ ᠵᠡᠷᠮᠡᠭᠡᠷ ᠶᠠᠪᠤᠭᠠ ᠶ᠋ᠢ ᠥᠪᠡᠷ ᠢ᠋ᠶ᠋ᠡᠨ ᠴᠦ᠍ ᠦᠯᠦ ᠮᠡᠳᠡᠨᠡ᠃ ᠬᠠᠵᠠᠭᠤ ᠳ᠋ᠤ᠌ ᠶᠠᠪᠤᠭᠠ ᠨᠤᠲᠤᠭ ᠤ᠋ᠨ ᠨᠠᠢᠵᠢ ᠰᠠᠮᠪᠤᠤ ᠶ᠋ᠢ ᠬᠠᠷᠠᠪᠠᠯ ᠮᠥᠨ ᠯᠡ ᠲᠡᠢᠮᠦ ᠴᠦ᠍ ᠲᠠᠪᠠᠲᠠᠢ ᠪᠢᠰᠢ ᠪᠣᠯᠤᠯᠲᠠᠢ᠂ ᠮᠣᠷᠢᠨ ᠤ᠋ ᠪᠠᠨ ᠲᠣᠯᠣᠭᠠᠢ ᠶ᠋ᠢ ᠭᠥᠯᠢᠷᠡᠨ ᠰᠢᠷᠲᠡᠵᠡᠢ᠃ ᠲᠡᠭᠦᠨ ᠦ᠌ ᠵᠡᠭᠦᠨ ᠭᠠᠷ ᠲᠤ᠌ ᠴᠡᠷᠢᠨᠳᠣᠷᠵᠢ ᠠᠶᠠᠭᠦᠢᠴᠡᠬᠦ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠨᠢᠷᠤᠭᠤᠨ ᠳ᠋ᠠᠬᠢ ᠫᠤᠤ᠂ ᠲᠠᠰᠢᠶᠠᠨ ᠳ᠋ᠠᠬᠢ ᠰᠡᠯᠡᠮᠡ ᠳ᠋ᠡᠭᠡᠨ ᠰᠡᠳᠬᠢᠯ ᠬᠥᠭᠡᠷᠦᠨ ᠪᠠᠶᠠᠰᠤᠭᠰᠠᠨ ᠰᠢᠨᠵᠢ ᠲᠡᠢ ᠪᠠᠢᠨᠠ᠃ ᠳᠣᠷᠵᠢ ᠶ᠋ᠢᠨ ᠪᠠᠷᠠᠭᠤᠨ ᠭᠠᠷ ᠲᠤ᠌ ᠥᠨᠳᠥᠷ ᠳᠠᠮᠫᠢᠯ᠂ ᠰᠤᠮᠤ ᠶ᠋ᠢᠨ ᠢ᠋ᠶ᠋ᠡᠨ ᠮᠠᠩᠨᠠᠢ ᠪᠠᠷᠢᠨ ᠰᠣᠨᠳᠣᠭᠣᠢᠷᠠᠨ ᠶᠠᠪᠤᠨᠠ᠃ ᠲᠡᠭᠦᠨ ᠦ᠌ ᠪᠠᠢᠳᠠᠯ ᠬᠡᠨ ᠲᠡᠢ ᠴᠦ᠍ ᠠᠳᠠᠯᠢ ᠦᠭᠡᠢ᠃ ᠴᠡᠭᠡᠵᠢᠨ ᠪᠡᠶᠡ ᠳ᠋ᠡᠭᠡᠨ ᠳᠥᠷᠪᠡᠨ ᠲᠠᠢᠰᠠ ᠰᠤᠮᠤ ᠣᠷᠢᠶᠠᠵᠤ ᠪᠠᠰᠠ ᠭᠤᠷᠪᠠᠨ ᠵᠢᠵᠢᠭ ᠰᠢᠷᠠ ᠬᠠᠢᠷᠴᠠᠭ ᠰᠤᠮᠤ ᠲᠠᠢ ᠰᠤᠷᠠᠨ ᠪᠦᠰᠡ ᠶ᠋ᠢ ᠳᠠᠪᠬᠤᠷ ᠪᠦᠰᠡᠯᠡᠵᠡᠢ᠃ ᠡᠭᠦᠷᠦᠭᠰᠡᠨ ᠫᠤᠤ ᠣᠷᠣᠰ ᠮᠣᠷᠢᠨ ᠴᠡᠷᠢᠭ ᠦ᠋ᠨ ᠸᠸᠨ᠋ᠲ᠋ᠸ᠋ᠸ᠂ ᠡᠨᠳᠡ ᠲᠡᠨᠳᠡ ᠨᠢ ᠮᠥᠩᠭᠥ ᠪᠡᠷ ᠴᠢᠮᠡᠨ ᠭᠤᠶᠤᠭᠠᠳ ᠭᠣᠣᠯ ᠲᠡᠮᠦᠷ ᠦ᠋ᠨ ᠨᠢᠷᠤᠭᠤ ᠪᠠᠷ ᠨᠢ《ᠰᠡᠴᠡᠨ ᠪᠢᠯᠢᠭᠲᠦ》 ᠭᠡᠵᠦ ᠮᠥᠩᠭᠥ ᠳᠠᠪᠲᠠᠨ ᠨᠡᠷᠡ ᠰᠠᠭᠤᠯᠭᠠᠵᠠᠢ᠃ ᠲᠠᠰᠢᠶᠠᠨ ᠳ᠋ᠠᠬᠢ ᠰᠡᠯᠡᠮᠡ ᠶ᠋ᠢᠨ ᠬᠤᠢ ᠳ᠋ᠤ᠌ ᠮᠥᠨ ᠮᠥᠩᠭᠥ ᠣᠷᠣᠭᠤᠯᠤᠨ ᠴᠢᠮᠡᠭᠯᠡᠭᠰᠡᠨ ᠨᠢ ᠪᠦᠷ ᠶᠡᠬᠡ ᠪᠥᠭᠡᠳ ᠬᠡᠷᠪᠡ ᠤᠭ ᠰᠡᠯᠡᠮᠡ ᠶ᠋ᠢ ᠰᠤᠭᠤᠯᠤᠨ ᠦᠵᠡᠪᠡᠯ ᠪᠢᠯᠡᠭᠦᠳᠡᠨ ᠬᠤᠷᠴᠠᠯᠠᠭᠰᠠᠨ ᠨᠢ ᠵᠢᠭᠲᠡᠢᠬᠡᠨ᠂ ᠡᠳᠡᠭᠡᠷ ᠡᠴᠡ ᠭᠠᠳᠠᠨᠠ ᠭᠤᠲᠤᠯ ᠤ᠋ᠨ ᠳᠦᠷᠢ ᠳ᠋ᠦ᠍ ᠳᠤᠮᠳᠠ ᠭᠠᠷ ᠤ᠋ᠨ ᠪᠷᠸᠢᠨᠺ ᠬᠡᠮᠡᠬᠦ ᠮᠠᠰᠢ ᠳᠡᠭᠵᠢᠨ ᠬᠢᠴᠡᠲᠡᠢ ᠪᠢᠴᠢᠬᠠᠨ ᠬᠠᠷᠠ ᠫᠤᠤ ᠪᠠᠢᠨᠠ᠃ ᠥᠪᠡᠷ ᠦ᠋ᠨ ᠬᠢᠨᠢ ᠶᠠᠷᠢᠬᠤ ᠪᠠᠷ ᠪᠣᠯ᠂ ᠡᠨᠡ ᠵᠦᠢᠯ ᠠᠯᠤᠰ ᠢ᠋ ᠫᠤᠤᠳᠠᠬᠤ ᠳ᠋ᠤ᠌ ᠪᠢᠰᠢ᠂ ᠬᠡᠷᠪᠡ ᠳᠠᠢᠰᠤᠨ ᠳ᠋ᠤ᠌ ᠪᠠᠷᠢᠭᠳᠠᠬᠤ ᠳ᠋ᠤ᠌ ᠬᠦᠷᠪᠡᠯ ᠠᠯᠢ ᠲᠦᠷᠦᠭᠦᠯᠡᠵᠦ ᠢᠷᠡᠭᠰᠡᠨ ᠢ᠋ ᠫᠤᠤᠳᠠᠨ ᠠᠯᠠᠭᠠᠳ ᠡᠴᠦᠰ ᠦ᠋ᠨ ᠭᠠᠭᠴᠠ ᠰᠤᠮᠤ ᠪᠠᠷ ᠥᠪᠡᠷ ᠢ᠋ ᠪᠡᠨ ᠫᠤᠤᠳᠠᠬᠤ ᠵᠡᠪᠰᠡᠭ ᠶᠦᠮ ᠭᠡᠨᠡ᠃
ᠡᠨᠡ ᠪᠦᠬᠦᠨ ᠨᠢ ᠴᠥᠮ ᠠᠮᠢᠨ ᠤ᠋ ᠬᠢ ᠭᠡᠨᠡ᠃ ᠶᠡᠷᠦ ᠥᠨᠳᠥᠷ ᠳᠠᠮᠫᠢᠯ ᠳ᠋ᠤ᠌ ᠪᠤᠰᠤᠳ ᠠ᠋ᠴᠠ ᠪᠤᠶᠤ ᠤᠯᠤᠰ ᠠ᠋ᠴᠠ ᠬᠡᠷᠡᠭᠯᠡᠵᠦ ᠶᠠᠪᠤᠭᠠ ᠵᠦᠢᠯ ᠨᠢᠭᠡ ᠴᠦ᠍ ᠦᠭᠡᠢ᠃ ᠬᠠᠭᠤᠴᠢᠨ ᠠᠦ᠋ᠲ᠋ᠣᠨᠣᠮᠢᠲᠤ ᠶ᠋ᠢᠨ ᠴᠡᠷᠢᠭ ᠡᠴᠡ ᠪᠠᠭᠤᠬᠤ ᠳ᠋ᠠᠭᠠᠨ ᠡᠢᠮᠦ ᠵᠠᠷ ᠵᠡᠪᠰᠡᠭ ᠲᠡᠢ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠡᠳᠦᠢ ᠪᠣᠯᠲᠠᠯᠠ ᠬᠠᠳᠠᠭᠠᠯᠠᠭᠰᠠᠭᠠᠷ ᠢᠷᠡᠭᠰᠡᠨ ᠪᠠᠢᠪᠠ᠃ ᠣᠳᠣ ᠶ᠋ᠢᠨ ᠤᠨᠤᠵᠤ ᠶᠠᠪᠤᠭᠠ ᠮᠣᠷᠢ ᠨᠢ ᠴᠦ᠍ ᠠᠮᠢᠨ ᠤ᠋ ᠬᠢ᠃ ᠠᠷᠠᠳ ᠤ᠋ᠨ ᠵᠢᠷᠤᠮᠲᠤ ᠴᠡᠷᠢᠭ ᠲᠦ᠍ ᠠᠩᠬᠠ ᠡᠯᠰᠡᠬᠦ ᠳ᠋ᠡᠭᠡᠨ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠨᠢᠭᠡ ᠨᠥᠬᠥᠷ ᠲᠦ᠍ ᠮᠣᠷᠢ ᠪᠠᠨ ᠥᠭᠭᠦᠨ ᠣᠪᠢᠶᠠᠰᠤ ᠪᠠᠷ ᠲᠡᠵᠢᠭᠡᠯᠭᠡᠭᠡᠳ ᠥᠨᠥ ᠥᠷᠯᠥᠭᠡ ᠠᠪᠴᠢᠷᠠᠭᠤᠯᠵᠠᠢ᠃ ᠡᠭᠦᠨᠴᠡ ᠴᠠᠭᠠᠰᠢ ᠳᠠᠮᠫᠢᠯ ᠳ᠋ᠤ᠌ ᠬᠥᠷᠥᠩᠭᠡ ᠪᠠᠢᠬᠤ ᠦᠭᠡᠢ᠃ ᠭᠡᠷ ᠣᠷᠣᠨ ᠡᠴᠢᠭᠡ ᠡᠬᠡ᠂ ᠠᠬᠠ ᠳᠡᠭᠦᠦ ᠨᠠᠷ ᠨᠢ ᠠᠯᠢ ᠬᠡᠳᠦᠢᠨ ᠢᠯᠢ ᠲᠠᠷᠪᠠᠭᠠᠲᠠᠢ ᠳ᠋ᠤ᠌ ᠮᠠᠨᠵᠤ— ᠬᠢᠲᠠᠳ ᠤ᠋ᠨ ᠴᠡᠷᠢᠭ ᠲᠦ᠍ ᠰᠦᠢᠷᠡᠨ ᠪᠠᠯᠠᠷᠠᠭᠠᠳ ᠬᠣᠢᠰᠢᠳᠠ ᠪᠠᠨ ᠭᠠᠵᠠᠷ ᠳᠡᠭᠡᠷᠡ ᠭᠣᠣᠨᠢ ᠪᠡᠶᠡ ᠭᠣᠵᠣᠩ ᠲᠣᠯᠣᠭᠠᠢ᠂ ᠬᠠᠮᠢᠭᠠᠰᠢ ᠬᠡᠰᠬᠢᠨ ᠶᠠᠭᠤ ᠬᠢᠵᠦ ᠶᠠᠪᠤᠪᠠᠴᠤ ᠬᠠᠮᠢᠶᠠ ᠦᠭᠡᠢ ᠪᠣᠯᠤᠭᠰᠠᠨ ᠡᠷᠡ᠃ ᠭᠡᠪᠡᠴᠦ ᠳᠠᠮᠫᠢᠯ ᠠᠯᠢ ᠲᠡᠷᠡ ᠳᠡᠭᠡᠷᠡ ᠴᠠᠭ ᠠ᠋ᠴᠠ ᠡᠬᠢᠯᠡᠨ ᠦᠭᠡᠯᠦᠯᠭᠡ ᠨᠣᠶᠠᠨ ᠢ᠋ ᠰᠡᠭᠦᠳᠡᠷ ᠮᠡᠲᠦ ᠳᠠᠭᠠᠭᠰᠠᠨ ᠪᠥᠭᠡᠳ ᠪᠢᠰᠢᠷᠡᠨ ᠰᠦᠰᠦᠭᠯᠡᠬᠦ ᠪᠠ ᠠᠶᠤᠨ ᠡᠮᠢᠶᠡᠬᠦ ᠬᠥᠮᠦᠨ ᠨᠢ ᠭᠠᠭᠴᠠᠬᠠᠨ ᠲᠡᠷᠡ ᠪᠠᠢᠵᠠᠢ᠃ ᠨᠥᠭᠦᠭᠡ ᠲᠠᠯᠠ ᠪᠠᠷ ᠬᠦᠰᠡᠯ ᠪᠣᠳᠣᠯ ᠨᠢ ᠮᠣᠩᠭᠣᠯ ᠣᠷᠣᠨ᠂ ᠮᠣᠩᠭᠣᠯ ᠬᠥᠮᠦᠨ ᠶᠠᠮᠠᠷ ᠪᠣᠯᠪᠠᠴᠤ ᠬᠠᠷᠢ ᠣᠷᠣᠨ ᠳ᠋ᠤ᠌ ᠡᠵᠡᠯᠡᠭᠳᠡᠨ ᠵᠠᠬᠢᠷᠤᠭᠳᠠᠬᠤ ᠤᠴᠢᠷ ᠦᠭᠡᠢ ᠪᠥᠭᠡᠳ ᠡᠭᠦᠨ ᠦ᠌ ᠲᠥᠯᠥᠭᠡ ᠮᠣᠩᠭᠣᠯ ᠬᠥᠮᠦᠨ ᠵᠢᠳᠬᠦᠬᠦ ᠪᠡᠷ ᠦᠯᠦ ᠪᠠᠷᠠᠮ ᠦᠬᠦᠵᠦ ᠪᠠᠢᠬᠤ ᠪᠣᠯ ᠬᠤᠪᠢ ᠵᠠᠶᠠᠭᠠ ᠨᠢ ᠭᠡᠵᠦ ᠦᠵᠡᠨ᠂ ᠬᠢᠲᠠᠳ ᠬᠥᠮᠦᠨ ᠪᠦᠷᠢ ᠶ᠋ᠢ ᠥᠰᠢᠨ ᠵᠠᠨᠤᠳᠠᠭ ᠪᠠᠢᠵᠠᠢ᠃ ᠣᠳᠣ ᠵᠠᠢ ᠵᠠᠪᠰᠠᠷ ᠦᠭᠡᠢ ᠣᠷᠣᠵᠤ ᠪᠠᠢᠭᠠ ᠴᠠᠰᠤᠨ ᠪᠦᠷᠦᠩᠬᠦᠢ ᠳᠤᠮᠳᠠᠭᠤᠷ ᠠᠭᠠᠷᠴᠠᠭ ᠳᠦᠭᠦᠷᠡᠩ ᠲᠠᠷᠭᠤᠨ ᠬᠡᠭᠡᠷ ᠮᠣᠷᠢᠨ ᠳᠡᠭᠡᠷᠡ ᠭᠡᠳᠡᠢᠰᠬᠢᠨ ᠰᠠᠭᠤᠵᠤ ᠲᠡᠷᠲᠡᠭᠡᠬᠢ ᠬᠠᠷᠠᠩᠭᠤᠢ ᠶ᠋ᠢ ᠬᠤᠷᠴᠠ ᠨᠢᠳᠦ ᠪᠡᠷ ᠰᠢᠷᠲᠡᠨ ᠶᠠᠪᠤᠨᠠ᠃ ᠮᠣᠷᠢ ᠨᠢ ᠡᠵᠡᠨ ᠦ᠌ ᠪᠡᠨ ᠪᠠᠭᠤᠭᠰᠠᠨ ᠢ᠋ ᠦᠯᠦ ᠮᠡᠳᠡᠨ ᠳᠠᠪᠬᠢᠭᠰᠠᠨ ᠢ᠋ ᠳᠣᠷᠵᠢ ᠵᠢᠯᠣᠭᠣ ᠠ᠋ᠴᠠ ᠨᠢ ᠰᠢᠭᠦᠷᠦᠨ ᠠᠪᠴᠤ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠮᠣᠷᠢᠨ ᠤ᠋ ᠠᠮᠠ ᠶ᠋ᠢ ᠲᠡᠳᠡᠨ ᠠᠷᠠᠢᠬᠠᠨ ᠡᠷᠭᠢᠭᠦᠯᠵᠦ ᠠᠪᠤᠯᠠ᠃ ᠳᠠᠮᠫᠢᠯ ᠬᠠᠭᠠᠯᠭᠠ ᠶ᠋ᠢᠨ ᠬᠠᠵᠠᠭᠤ ᠳ᠋ᠤ᠌ ᠬᠠᠰᠢᠶᠠ ᠨᠠᠯᠠᠨ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠨᠢᠭᠡ ᠬᠥᠮᠦᠨ ᠦ᠌ ᠲᠣᠯᠣᠭᠠᠢ ᠴᠤᠬᠤᠰᠬᠢᠬᠦ ᠳ᠋ᠦ᠍ ᠡᠮᠦᠨᠡ ᠡᠴᠡ ᠨᠢ ᠣᠭᠲᠤᠭᠤᠯᠤᠨ ᠴᠣᠬᠢᠵᠤ ᠭᠡᠳᠡᠷᠭᠦ ᠤᠨᠠᠭᠠᠩᠭᠤᠲᠠ ᠤᠷᠲᠤ ᠭᠠᠷ ᠢ᠋ᠶ᠋ᠠᠨ ᠰᠤᠩᠭᠠᠨ ᠬᠥᠯ ᠡᠴᠡ ᠨᠢ ᠪᠠᠷᠢᠵᠤ ᠴᠢᠷᠦᠨ ᠭᠠᠷᠭᠠᠵᠤ ᠬᠠᠶᠠᠭᠠᠳ ᠳᠠᠬᠢᠨ ᠴᠣᠬᠢᠪᠠ᠃ ᠲᠡᠷᠡ ᠭᠠᠮᠢᠩ ᠬᠠᠷᠢᠭᠤ ᠬᠢᠬᠦ ᠪᠠᠢᠲᠤᠭᠠᠢ ᠳᠤᠤᠭᠠᠷᠴᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠨᠢᠭᠡ ᠬᠥᠮᠦᠨ ᠦ᠌ ᠠᠮᠢ ᠡᠢᠨᠬᠦ ᠥᠩᠭᠡᠷᠡᠳᠡᠭ ᠪᠠᠢᠵᠠᠢ᠃
ᠠᠷᠤ ᠳ᠋ᠤ᠌ ᠬᠣᠴᠣᠷᠤᠭᠰᠠᠨ ᠨᠥᠬᠥᠳ ᠬᠦᠷᠦᠯᠴᠡᠨ ᠢᠷᠡᠪᠡ᠃ ᠳᠠᠮᠫᠢᠯ ᠲᠡᠳᠡᠨ ᠳ᠋ᠦ᠍《ᠮᠢᠨᠦ ᠬᠣᠢᠨᠠ ᠠ᠋ᠴᠠ!》 ᠭᠡᠳ ᠬᠠᠰᠢᠶᠠᠨ ᠳ᠋ᠤ᠌ ᠣᠷᠣᠨ᠂ ᠴᠣᠩᠬᠣ ᠨᠤᠭᠤᠳ ᠢ᠋ ᠴᠥᠮ ᠴᠣᠬᠢᠨ ᠨᠢᠭᠡ ᠨᠢᠭᠡᠨ ᠰᠤᠮᠤ ᠲᠠᠯᠪᠢᠬᠤ ᠶ᠋ᠢ ᠨᠡᠮᠡᠨ ᠲᠤᠰᠢᠶᠠᠨ ᠥᠪᠡᠷ ᠢ᠋ᠶ᠋ᠡᠨ ᠬᠠᠭᠠᠯᠭᠠᠨ ᠳᠡᠭᠡᠷᠡ ᠵᠣᠭᠰᠣᠪᠠ᠃ ᠤᠷᠢᠳ ᠡᠮᠦᠨᠡ ᠡᠨᠡ ᠪᠠᠢᠰᠢᠩ ᠳ᠋ᠤ᠌ ᠳᠡᠯᠭᠡᠭᠦᠷ ᠬᠤᠳᠠᠯᠳᠤᠭᠠ ᠪᠠᠢᠬᠤ ᠳ᠋ᠤ᠌ ᠳᠠᠮᠫᠢᠯ ᠣᠯᠠᠨᠲᠠ ᠢᠷᠡᠵᠦ ᠪᠠᠢᠭᠰᠠᠨ ᠤᠴᠢᠷ ᠳᠣᠲᠣᠭᠠᠳᠤ ᠵᠣᠬᠢᠶᠠᠨ ᠪᠠᠢᠭᠤᠯᠤᠯᠲᠠ ᠶ᠋ᠢ ᠰᠠᠢᠨ ᠮᠡᠳᠡᠬᠦ ᠠᠵᠢ᠃ ᠴᠡᠷᠢᠭ ᠦ᠋ᠳ ᠨᠠᠷᠢᠨ ᠮᠣᠳᠣᠨ ᠰᠡᠷᠡᠯᠵᠢᠨ ᠴᠣᠩᠬᠣ ᠨᠤᠭᠤᠳ ᠢ᠋ ᠢᠪ ᠴᠣᠬᠢᠨ ᠫᠤᠤ ᠶ᠋ᠢᠨ ᠠᠮᠠ ᠣᠷᠣᠭᠤᠯᠤᠨ ᠫᠤᠤᠳᠠᠬᠤ ᠳ᠋ᠤ᠌ ᠳᠠᠮᠫᠢᠯ ᠳᠣᠲᠣᠭᠰᠢ ᠣᠷᠣᠨ᠂ ᠥᠭᠡᠳᠡ ᠥᠭᠡᠳᠡ ᠡᠴᠡ ᠪᠡᠨ ᠬᠠᠷᠠᠭᠰᠠᠨ ᠬᠣᠶᠠᠷ ᠬᠠᠭᠠᠯᠭᠠ ᠶ᠋ᠢᠨ ᠪᠠᠷᠠᠭᠤᠨ ᠤᠷᠤᠭᠤ ᠬᠥᠭᠡᠭᠡᠲᠤ ᠰᠤᠮᠤ ᠪᠠᠨ ᠳᠠᠭᠤᠰᠲᠠᠯᠠ ᠫᠤᠤᠳᠠᠭᠠᠳ ᠭᠡᠨᠡᠳᠲᠡ ᠣᠷᠣᠪᠠ᠃ ᠠᠷᠤ ᠳ᠋ᠤᠨᠢ ᠳᠣᠷᠵᠢ ᠶᠠᠪᠤᠭᠰᠠᠨ ᠪᠥᠭᠡᠳ ᠳᠤᠲᠠᠭᠤ ᠬᠠᠭᠠᠰ ᠬᠤᠪᠴᠠᠰᠤ ᠲᠠᠢ ᠵᠠᠷᠢᠮ ᠨᠢ ᠳᠣᠣᠭᠤᠷ ᠥᠮᠥᠳᠥ ᠴᠠᠮᠴᠠ ᠪᠠᠨ ᠴᠤ᠌ ᠡᠮᠦᠰᠴᠦ ᠠᠮᠵᠢᠭᠠ ᠦᠭᠡᠢ ᠭᠠᠮᠢᠩ ᠤ᠋ᠳ ᠱᠠᠯᠠ ᠳᠡᠭᠡᠷᠡ ᠰᠠᠨᠳᠤᠷᠤᠨ ᠮᠥᠯᠬᠦᠯᠳᠦᠵᠦ ᠪᠠᠢᠭᠠ ᠦᠵᠡᠭᠳᠡᠪᠡ᠃ ᠳᠠᠮᠫᠢᠯ ᠸᠸᠨ᠋ᠲ᠋ᠸ᠋ᠸ ᠢ᠋ᠶ᠋ᠡᠨ ᠬᠠᠶᠠᠨ ᠪᠢᠷᠳᠡᠩᠺᠡ ᠪᠡᠷ ᠢ᠋ᠶ᠋ᠡᠨ ᠫᠤᠤᠳᠠᠭᠰᠠᠨ ᠪᠥᠭᠡᠳ ᠠᠮᠠᠨ ᠳ᠋ᠠᠭᠠᠨ ᠦᠰᠦᠨ ᠪᠠᠷᠢᠭᠤᠯᠲᠤ ᠪᠠᠬᠢᠮ ᠬᠢᠲᠤᠭᠠ ᠪᠠᠨ ᠬᠥᠨᠳᠡᠯᠡᠨ ᠵᠠᠭᠤᠭᠰᠠᠨ ᠨᠢ ᠰᠤᠮᠤ ᠪᠠᠨ ᠳᠠᠭᠤᠰᠤᠮᠠᠭᠴᠠ ᠬᠡᠷᠡᠭᠯᠡᠬᠦ ᠳ᠋ᠦ᠍ ᠪᠡᠯᠡᠳᠬᠡᠵᠡᠢ᠃
ᠡᠢᠨᠬᠦ ᠭᠠᠮᠢᠩ ᠤ᠋ᠨ ᠨᠢᠭᠡᠳᠦᠭᠡᠷ ᠬᠠᠷᠠᠭᠤᠯ ᠤ᠋ᠨ ᠠᠷᠪᠠᠨ ᠨᠢᠭᠡᠨ ᠬᠥᠮᠦᠨ ᠭᠱᠠᠨ ᠵᠠᠭᠤᠷᠠ ᠶ᠋ᠢᠨ ᠳᠣᠲᠣᠷᠠ ᠤᠰᠠᠳᠬᠠᠭᠳᠠᠪᠠ᠃ ᠵᠡᠭᠦᠨ ᠲᠠᠰᠤᠯᠭᠠᠨ ᠳ᠋ᠤ᠌ ᠣᠷᠣᠭᠰᠠᠨ ᠬᠥᠮᠦᠰ ᠬᠣᠶᠠᠷ ᠬᠥᠭᠰᠢᠨ ᠯᠤᠤᠬᠠᠨ ᠢ᠋ ᠴᠢᠷᠴᠦ ᠭᠤᠯᠳᠤᠷᠤᠨ ᠠᠪᠴᠢᠷᠠᠪᠠ᠃ ᠦᠵᠡᠲᠡᠯᠡ ᠲᠡᠷᠡ ᠬᠣᠶᠠᠷ ᠭᠠᠮᠢᠩ ᠪᠢᠰᠢ᠂ ᠲᠣᠭᠣᠭᠠᠨ ᠤ᠋ ᠬᠥᠮᠦᠰ᠃ ᠭᠡᠯᠡ ᠴᠦ᠍ ᠳᠠᠮᠫᠢᠯ ᠲᠡᠳᠡᠨ ᠢ᠋ ᠦᠵᠡᠨ ᠶᠠᠳᠠᠨᠠ᠃ ᠨᠢᠭᠡ ᠨᠢ ᠭᠠᠷ ᠲᠠᠭᠠᠨ ᠭᠤᠷᠪᠠᠨ ᠶᠠᠩᠴᠢᠶᠠᠨ᠂ ᠨᠥᠭᠦᠭᠡ ᠨᠢ ᠳ᠋ᠦᠩᠵᠡᠨ ᠲᠠᠮᠠᠬᠢ ᠪᠠᠷᠢᠨ ᠠᠮᠢ ᠭᠤᠶᠤᠨ ᠰᠥᠭᠥᠳᠦᠨ ᠪᠠᠷᠬᠢᠷᠠᠯᠳᠤᠨᠠ᠃ ᠡᠢᠮᠦ ᠦᠶᠡ ᠳ᠋ᠦ᠍ ᠳᠠᠮᠫᠢᠯ ᠲᠡᠢᠮᠦ ᠬᠥᠮᠦᠰ ᠢ᠋ ᠴᠦ᠍ ᠥᠷᠥᠰᠢᠶᠡᠨ ᠥᠩᠭᠡᠷᠡᠭᠦᠯᠳᠡᠭ ᠦᠭᠡᠢ ᠡᠷᠡ ᠪᠠᠢᠵᠠᠢ᠃ ᠤᠬᠠᠭᠠᠨ ᠦᠭᠡᠢ ᠠᠶᠤᠨ ᠪᠠᠢᠰᠢᠩ ᠤ᠋ᠨ ᠱᠠᠯᠠ ᠶ᠋ᠢ ᠲᠦᠭ ᠲᠦᠭ ᠬᠢᠯᠭᠡᠨ ᠮᠥᠷᠭᠥᠵᠦ ᠪᠠᠢᠭᠠ ᠯᠤᠤᠬᠠᠨ ᠤ᠋ ᠤᠷᠢᠳ ᠢ᠋ᠶ᠋ᠠᠨ ᠪᠠᠷᠢᠭᠰᠠᠨ ᠭᠠᠷ ᠢ᠋ ᠢᠰᠬᠦᠯᠬᠦ ᠳ᠋ᠦ᠍ ᠭᠤᠷᠪᠠᠨ ᠶᠠᠩᠴᠢᠶᠠᠨ ᠳᠡᠭᠡᠭᠰᠢ ᠦᠰᠦᠷᠦᠨ ᠪᠠᠢᠰᠢᠩ ᠤ᠋ᠨ ᠳᠠᠭᠠᠵᠠᠨ ᠳ᠋ᠤ᠌ ᠬᠠᠩ ᠭᠡᠵᠦ ᠳᠤᠤᠭᠠᠷᠤᠭᠠᠳ ᠳᠣᠷᠣᠭᠰᠢ ᠤᠨᠠᠨ ᠳᠠᠮᠫᠢᠯ ᠳᠠᠷᠤᠭᠠ᠂ ᠳᠣᠣᠷᠠᠲᠤ ᠴᠡᠷᠢᠭ ᠲᠡᠭᠡᠨ ᠬᠣᠶᠠᠭᠤᠯᠠ ᠶ᠋ᠢ ᠫᠤᠤᠳᠠᠨ ᠠᠯᠠᠬᠤ ᠶ᠋ᠢ ᠲᠤᠰᠢᠶᠠᠪᠠ᠃ ᠳᠣᠷᠵᠢ ᠶ᠋ᠢᠨ ᠰᠡᠳᠬᠢᠯ ᠠᠶᠠ ᠦᠭᠡᠢ ᠪᠣᠯᠤᠨ᠄ ᠵᠠ ᠶᠠᠷᠰᠢᠭ ᠡᠳᠡᠨ ᠢ᠋ ᠤᠷᠭᠢᠶᠠ ᠭᠡᠬᠦ ᠳ᠋ᠦ᠍ ᠳᠠᠮᠫᠢᠯ᠄
— ᠴᠢ ᠶᠠᠭᠤ ᠶ᠋ᠢ ᠨᠢ ᠬᠠᠢᠷᠠᠯᠠᠨᠠ ᠪᠣᠢ? ᠡᠳᠡ ᠴᠢᠨᠢ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠮᠣᠩᠭᠣᠯ ᠢ᠋ ᠶᠠᠭᠠᠬᠢᠬᠤ ᠠ᠋ᠴᠠ ᠪᠤᠴᠠᠳᠠᠭ ᠦᠭᠡᠢ ᠤᠯᠤᠰ ᠭᠡᠳ ᠲᠦᠷᠦᠭᠦᠴᠢ ᠶ᠋ᠢᠨ ᠢ᠋ᠶ᠋ᠡᠨ ᠲᠤᠰᠢᠶᠠᠯ ᠢ᠋ ᠳᠣᠷᠵᠢ ᠳ᠋ᠤ᠌ ᠲᠤᠯᠭᠠᠪᠠ᠃ ᠢᠩᠭᠢᠭᠡᠳ ᠲᠡᠳᠡ ᠬᠣᠶᠠᠷ ᠤ᠋ᠨ ᠠᠮᠢ ᠴᠤ᠌ ᠥᠩᠭᠡᠷᠡᠯᠡ᠃
ᠡᠨᠳᠡᠬᠢ ᠭᠠᠮᠢᠩ ᠤ᠋ᠳ ᠲᠤᠰ ᠪᠦᠷᠢ ᠪᠡᠨ ᠪᠦᠷᠢᠨ ᠵᠡᠪᠰᠡᠭ ᠲᠡᠢ᠂ ᠰᠤᠮᠤ ᠲᠠᠪᠤ ᠲᠠᠪᠤᠨ ᠵᠠᠭᠤ ᠠ᠋ᠴᠠ ᠳᠣᠷᠣᠭᠰᠢ ᠦᠭᠡᠢ᠃ ᠲᠡᠭᠦᠨ ᠢ᠋ ᠨᠢ ᠳᠠᠮᠫᠢᠯ ᠶᠡᠬᠡᠳᠡ ᠣᠯᠵᠠᠭᠤᠷᠬᠠᠨ ᠬᠣᠷᠢᠶᠠᠨ ᠠᠪᠴᠤ ᠴᠡᠷᠢᠭ ᠦ᠋ᠳ ᠢ᠋ᠶ᠋ᠡᠨ ᠵᠡᠪᠰᠡᠭᠯᠡᠪᠡ᠃ ᠬᠠᠷᠢᠨ ᠭᠤᠷᠪᠠᠨ ᠶᠠᠩᠴᠢᠶᠠᠨ ᠢ᠋ ᠠᠪᠤᠭᠰᠠᠨ ᠦᠭᠡᠢ᠃ ᠬᠡᠨ ᠳᠠᠢᠰᠤᠨ ᠤ᠋ ᠶᠠᠭᠤᠮᠠ ᠶ᠋ᠢ ᠠᠪᠤᠨ ᠡᠪᠦᠷᠯᠡᠪᠡᠯ ᠬᠠᠮᠤᠭ ᠤ᠋ᠨ ᠲᠦᠷᠦᠭᠦᠦ ᠳᠠᠢᠰᠤᠨ ᠤ᠋ ᠰᠤᠮᠤᠨ ᠳ᠋ᠤ᠌ ᠣᠨᠣᠭᠳᠠᠨ ᠥᠷᠭᠡᠳᠡᠬᠦ ᠭᠡᠨᠡ᠃ ᠴᠠᠭᠠᠰᠢ ᠪᠠᠰᠠ ᠵᠡᠪᠰᠡᠭ ᠬᠡᠷᠡᠭᠯᠡᠯ ᠪᠠᠢᠵᠤ ᠮᠠᠭᠠᠳ ᠦᠭᠡᠢ ᠭᠡᠵᠦ ᠡᠷᠢᠬᠦ ᠳ᠋ᠡᠭᠡᠨ ᠰᠠᠪᠠ ᠰᠠᠭᠤᠯᠠᠭᠠ ᠨᠤᠭᠤᠳ ᠢ᠋ ᠬᠡᠮᠬᠡ ᠪᠤᠲᠠ ᠴᠣᠬᠢᠨᠠ᠃ ᠶᠡᠷᠦ ᠳᠠᠮᠫᠢᠯ ᠤ᠋ᠨ ᠡᠮᠦᠨᠡ ᠡᠪᠳᠡᠷᠡᠨ ᠬᠡᠮᠬᠡᠷᠡᠬᠦ ᠦᠭᠡᠢ ᠶᠠᠭᠤᠮᠠ ᠠᠯᠠᠭᠠ᠃ ᠭᠠᠯ ᠵᠤᠤᠬᠠᠨ ᠳᠡᠭᠡᠷᠡ ᠵᠢᠩᠨᠡᠭᠳᠡᠵᠦ ᠪᠠᠢᠭᠠ ᠮᠠᠨᠲᠠᠤ ᠶ᠋ᠢᠨ ᠵᠢᠩᠨᠡᠭᠦᠷ ᠦ᠋ᠨ ᠳᠡᠭᠡᠳᠦ ᠳᠠᠪᠬᠤᠷ ᠢ᠋ ᠫᠤᠤ ᠶ᠋ᠢᠨ ᠵᠢᠳᠠ ᠪᠠᠷ ᠨᠡᠪᠲᠡ ᠰᠦᠯᠪᠡᠨ ᠬᠣᠯᠠ ᠲᠠᠶᠠᠭᠳᠠᠭᠠᠳ ᠲᠡᠷᠡ ᠮᠠᠨᠲᠠᠤ ᠠ᠋ᠴᠠ ᠠᠪᠴᠤ ᠡᠪᠦᠷᠯᠡᠬᠦ ᠳ᠋ᠡᠭᠡᠨ ᠬᠦᠷᠲᠡᠯᠡ ᠬᠢᠲᠤᠭᠠ ᠰᠢᠭᠠᠨ ᠠᠪᠤᠨᠠ᠃ ᠡᠭᠦᠨ ᠢ᠋ ᠨᠢ ᠴᠡᠷᠢᠭ ᠦ᠋ᠳ ᠲᠡᠢᠨ ᠦ᠌ ᠦᠶᠡ ᠳ᠋ᠦ᠍ ᠬᠥᠮᠦᠨ ᠢᠩᠭᠢᠵᠦ ᠶᠠᠪᠤᠬᠤ ᠶᠣᠰᠣᠲᠠᠢ ᠪᠠᠢᠵᠠᠢ ᠭᠡᠵᠦ ᠪᠣᠳᠣᠨ ᠦᠯᠢᠭᠡᠷ ᠵᠢᠱ᠌ᠢᠶᠡ ᠪᠣᠯᠭᠠᠨ ᠬᠡᠷᠡᠭᠯᠡᠨᠡ᠃ ᠦᠨᠡᠨ ᠴᠢᠨᠠᠷ ᠲᠠᠭᠠᠨ ᠭᠡᠪᠡᠯ ᠥᠨᠥᠬᠢ ᠠᠦ᠋ᠲ᠋ᠣᠨᠣᠮᠢᠲᠤ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠡᠢᠮᠦ ᠯᠡ ᠪᠠᠢᠭᠰᠠᠨ ᠠᠵᠢ᠃
ᠲᠡᠳᠡᠨ ᠡᠴᠡ ᠳᠠᠮᠫᠢᠯ ᠶᠡᠬᠡ ᠴᠡᠷᠢᠭ ᠢ᠋ᠶ᠋ᠡᠨ ᠤᠭᠲᠤᠨ ᠠᠪᠴᠤ ᠬᠢᠶᠠᠭᠲᠤ ᠶ᠋ᠢᠨ ᠵᠦᠭ ᠲᠠᠪᠰᠢᠯᠠ᠃ ᠲᠦᠷᠦᠭᠦᠴᠢ ᠶ᠋ᠢᠨ ᠫᠤᠤ ᠶ᠋ᠢᠨ ᠫᠠᠵᠢᠬᠢᠨᠠᠬᠦ ᠪᠡᠷ ᠬᠢᠶᠠᠭᠲᠤ ᠶ᠋ᠢᠨ ᠪᠠᠷᠠᠭᠤᠨ ᠬᠠᠵᠠᠭᠤ ᠳ᠋ᠠᠬᠢ ᠭᠠᠮᠢᠩ ᠤ᠋ᠨ ᠬᠣᠶᠠᠳᠤᠭᠠᠷ ᠬᠠᠷᠠᠭᠤᠯ ᠳᠣᠬᠢᠶᠠ ᠠᠪᠤᠨ ᠪᠡᠯᠡᠳᠬᠡᠨ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠠᠵᠢ᠃ ᠮᠥᠨ ᠬᠣᠲᠠ ᠶ᠋ᠢᠨ ᠪᠠᠷᠠᠭᠤᠨ ᠳ᠋ᠠᠬᠢ ᠪᠠᠭᠠᠰᠤᠲᠤ ᠬᠡᠮᠡᠬᠦ ᠭᠣᠣᠯ ᠤ᠋ᠨ ᠮᠥᠰᠥᠨ ᠳᠡᠭᠡᠷᠡ ᠬᠣᠶᠠᠷ ᠲᠠᠯᠠ ᠠ᠋ᠴᠠ ᠪᠠᠨ ᠠᠭᠤᠯᠵᠠᠨ ᠭᠠᠯ ᠨᠡᠭᠡᠭᠡᠪᠡ᠃ ᠭᠡᠪᠡᠴᠦ ᠲᠡᠳᠡ ᠬᠠᠷᠠᠭᠤᠯ ᠳᠣᠣᠷᠠᠬᠠᠨ ᠢ᠋ᠶ᠋ᠠᠨ ᠴᠣᠬᠢᠭᠳᠠᠨ ᠭᠡᠳᠡᠷᠭᠦ ᠵᠢᠭᠤᠳᠤᠨ ᠬᠣᠲᠠ ᠤᠷᠤᠭᠤ ᠣᠷᠣᠪᠠ᠃ ᠡᠨᠡ ᠦᠶᠡ ᠳ᠋ᠦ᠍ ᠦᠷ ᠪᠦᠷᠢᠨ ᠴᠠᠢᠵᠤ ᠨᠠᠷᠠ ᠭᠠᠷᠬᠤ ᠭᠡᠵᠦ ᠪᠠᠢᠪᠠᠴᠤ ᠬᠢᠶᠠᠭᠲᠤ ᠥᠷᠯᠥᠭᠡᠨ ᠦ᠌ ᠵᠢᠬᠡᠭᠦᠨ ᠵᠢᠪᠠᠷ᠂ ᠤᠲᠤᠭᠠ ᠤᠨᠢᠶᠠᠷ ᠬᠣᠶᠠᠷ ᠳᠠᠷᠤᠭᠳᠠᠨ ᠦᠳᠡᠰᠢ ᠶ᠋ᠢᠨ ᠪᠦᠷᠦᠩᠬᠦᠢ ᠳ᠋ᠦ᠍ ᠪᠠᠢᠭᠠ ᠮᠡᠲᠦ ᠪᠥᠷᠬᠦᠯᠵᠡᠨᠡ᠃ ᠲᠡᠷᠡ ᠳᠤᠮᠳᠠ ᠢᠮᠠᠭᠠᠨ ᠪᠦᠷᠢᠶᠡ ᠶᠠᠩᠭᠢᠨᠠᠨ《ᠳ᠋ᠣᠣ ᠸᠠ᠂ ᠳ᠋ᠣᠣ ᠸᠠ》 ᠭᠡᠵᠦ ᠬᠠᠰᠬᠢᠷᠬᠤ ᠠᠪᠢᠶᠠ ᠬᠡᠳᠦᠨ ᠠᠷᠪᠠᠨ ᠵᠡᠷᠭᠡ ᠪᠡᠷ ᠴᠤᠤᠷᠢᠶᠠᠲᠤᠨᠠ᠃ ᠲᠡᠭᠦᠨ ᠤᠷᠤᠭᠤ ᠠᠷᠠᠳ ᠤ᠋ᠨ ᠵᠢᠷᠤᠮᠲᠤ ᠴᠡᠷᠢᠭ ᠳᠠᠭᠠᠷᠢᠯᠲᠠ ᠬᠢᠬᠦ ᠪᠡᠷ ᠰᠢᠢᠳᠴᠡᠢ᠃ ᠬᠠᠮᠤᠭ ᠤ᠋ᠨ ᠲᠦᠷᠦᠭᠦᠨ ᠬᠣᠢᠲᠤ ᠵᠠᠬᠠ ᠶ᠋ᠢᠨ ᠦᠵᠦᠭᠦᠷ ᠡᠴᠡ ᠬᠢᠯᠢᠩ ᠬᠠᠷᠠ ᠮᠣᠷᠢ ᠲᠠᠢ ᠤᠯᠠᠭᠠᠨ ᠲᠣᠷᠭᠠᠨ ᠳᠡᠪᠡᠯ ᠳᠡᠭᠡᠷᠡ ᠪᠡᠨ ᠠᠯᠲᠠᠨ ᠰᠠ ᠡᠮᠵᠢᠶᠡᠷᠲᠦ ᠬᠠᠷᠠ ᠬᠣᠷᠭᠣᠢ ᠬᠠᠨᠲᠠᠭᠠᠰᠤ ᠲᠠᠢ ᠡᠷᠡ᠂ ᠮᠣᠷᠢᠨ ᠳ᠋ᠠᠭᠠᠨ ᠲᠠᠰᠢᠭᠤᠷ ᠥᠭᠭᠦᠨ ᠤᠬᠤᠰᠬᠢᠪᠡ᠃ ᠡᠨᠡ ᠪᠣᠯ ᠲᠡᠢᠨ ᠳ᠋ᠦ᠍ ᠳᠠᠳᠤᠯᠭᠠᠵᠢᠨ ᠳᠠᠢᠴᠢᠨ ᠪᠠᠭᠠᠲᠤᠷ ᠭᠡᠵᠦ ᠠᠯᠳᠠᠷᠰᠢᠭᠰᠠᠨ ᠥᠭᠡᠯᠦᠯᠭᠡ ᠨᠣᠶᠠᠨ ᠠᠵᠢ᠃ ᠠᠷᠤ ᠠ᠋ᠴᠠ ᠨᠢ ᠥᠪᠡᠷ ᠦ᠋ᠨ ᠬᠢᠨᠢ ᠬᠠᠢᠷᠠᠲᠤ ᠲᠠᠪᠢᠨ ᠡᠷᠡ ᠮᠣᠷᠢᠳ ᠤ᠋ᠨ ᠬᠤᠷᠳᠤ ᠮᠡᠳᠡᠨ ᠳᠠᠪᠬᠢᠯᠳᠤᠨᠠ᠃ ᠡᠳᠡᠨ ᠦ᠌ ᠮᠣᠷᠢᠳ ᠪᠦᠷ ᠲᠠᠷᠭᠤᠨ᠂ ᠮᠣᠷᠢᠳ ᠪᠦᠷᠢ ᠶ᠋ᠢᠨ ᠰᠡᠭᠦᠯ ᠢ᠋ ᠴᠠᠰᠤ ᠰᠢᠪᠡᠷ ᠡᠴᠡ ᠬᠠᠮᠠᠭᠠᠯᠠᠨ ᠳᠡᠭᠡᠭᠰᠢ ᠡᠵᠡᠨᠰᠢᠶᠡᠨ ᠪᠣᠭᠣᠭᠰᠠᠨ ᠪᠥᠭᠡᠳ ᠮᠥᠨ ᠮᠣᠷᠢᠳ ᠪᠦᠷᠢ ᠲᠡᠮᠦᠷ ᠲᠠᠬᠠ ᠲᠠᠢ ᠲᠤᠯᠠ ᠮᠥᠰᠥ ᠤᠰᠤᠨ ᠳᠡᠭᠡᠭᠦᠷ ᠬᠠᠯᠲᠤᠷᠢᠭᠠ ᠦᠭᠡᠢ ᠶᠠᠪᠤᠨᠠ᠃ ᠡᠷᠡᠰ ᠦ᠋ᠳ ᠦ᠋ᠨ ᠡᠮᠦᠰᠦᠭᠰᠡᠨ ᠳᠡᠪᠡᠯ ᠦ᠋ᠨ ᠥᠩᠭᠡ ᠨᠢᠭᠡ ᠵᠢᠭᠳᠡ ᠬᠥᠬᠡ ᠪᠥᠭᠡᠳ ᠬᠣᠷᠮᠣᠢ ᠪᠣᠭᠣᠨᠢ᠂ ᠤᠭ ᠠ᠋ᠴᠠ ᠬᠢᠯᠢ ᠬᠢᠵᠠᠭᠠᠷ ᠢ᠋ ᠬᠠᠷᠢᠭᠤᠴᠠᠨ ᠶᠠᠪᠤᠵᠠᠢ᠃ ᠡᠳᠡᠨ ᠦ᠌ ᠲᠠᠪᠰᠢᠬᠤ ᠶ᠋ᠢᠨ ᠵᠡᠷᠭᠡᠴᠡᠭᠡ ᠪᠡᠷ ᠪᠤᠰᠤᠳ ᠠᠩᠭᠢ ᠨᠢᠭᠡ ᠠᠳᠠᠯᠢ ᠳᠠᠪᠰᠢᠭᠰᠠᠨ ᠪᠢᠯᠡ᠃ ᠲᠡᠳᠡ ᠨᠢ ᠬᠠᠯᠬᠠ ᠨᠤᠭᠤᠳ ᠪᠣᠯᠪᠠᠴᠤ ᠪᠤᠷᠢᠶᠠᠳ᠂ ᠴᠠᠬᠠᠷ᠂ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠬᠢᠨ ᠪᠣᠢ᠃ ᠡᠢᠨᠬᠦ ᠳᠠᠮᠫᠢᠯ ᠳᠠᠷᠤᠭᠠ ᠬᠠᠮᠤᠭ ᠤ᠋ᠨ ᠲᠦᠷᠦᠭᠦᠨ ᠮᠣᠷᠢᠨ ᠳ᠋ᠠᠭᠠᠨ ᠲᠠᠰᠢᠭᠤᠷ ᠥᠭᠭᠦᠨ ᠣᠨᠴᠠᠭᠠᠢ ᠳ᠋ᠠᠭᠠᠨ ᠲᠦᠷᠦᠭᠦᠯᠡᠨ ᠭᠠᠷᠴᠠᠢ᠃《ᠦᠷᠡ!》 ᠬᠠᠰᠬᠢᠷᠤᠯᠳᠤᠨ ᠴᠢᠬᠢ ᠳᠦᠯᠡᠢᠷᠡᠮᠡ ᠴᠤᠤᠷᠢᠶᠠᠲᠤᠵᠤ ᠮᠣᠷᠢᠨ ᠲᠤᠭᠤᠷᠠᠢ ᠲᠠᠴᠢᠭᠢᠨᠠᠨ᠂ ᠳᠥᠷᠥᠭᠡ ᠬᠠᠪᠢᠷᠤᠯᠲᠠ ᠬᠠᠩ ᠶᠠᠩ ᠪᠠᠭᠤᠨᠠ᠃ ᠭᠱᠠᠨ ᠵᠠᠭᠤᠷᠠ ᠶ᠋ᠢᠨ ᠳᠣᠲᠣᠷᠠ ᠬᠣᠲᠠ ᠶ᠋ᠢᠨ ᠳᠡᠷᠭᠡᠳᠡ ᠢᠷᠡᠭᠡᠳ ᠨᠠᠷᠢᠬᠠᠨ ᠭᠤᠳᠤᠮᠵᠢ ᠪᠠᠷ ᠵᠤᠷᠭᠠᠨ ᠳ᠋ᠤᠨᠢ ᠲᠠᠯᠪᠢᠵᠤ ᠨᠥᠬᠥᠳ ᠡᠴᠡ ᠪᠡᠨ ᠬᠡᠳᠦᠨ ᠵᠠᠭᠤᠨ ᠠᠯᠬᠤᠮ ᠢ᠋ᠶ᠋ᠠᠷ ᠲᠦᠷᠦᠭᠦᠯᠡᠨ ᠣᠷᠣᠵᠠᠢ᠃
ᠬᠣᠲᠠ ᠶ᠋ᠢᠨ ᠳᠡᠭᠡᠭᠦᠷ ᠥᠷᠯᠥᠭᠡᠨ ᠦ᠌ ᠴᠠᠩ ᠬᠡᠦᠷᠡᠭ ᠲᠡᠢ ᠬᠣᠯᠢᠯᠳᠤᠭᠰᠠᠨ ᠤᠲᠤᠭᠠ ᠤᠨᠢᠶᠠᠷ ᠢᠳᠡ ᠲᠠᠲᠠᠵᠤ ᠪᠠᠢᠭᠰᠠᠨ ᠪᠥᠭᠡᠳ ᠳᠣᠲᠣᠷᠠ ᠨᠢ ᠣᠷᠣᠬᠤ ᠪᠠᠷ ᠦᠷ ᠰᠥᠨᠢ ᠶ᠋ᠢᠨ ᠵᠠᠪᠰᠠᠷ ᠰᠢᠭ᠋ ᠪᠥᠷᠬᠦᠯᠵᠡᠨᠡ᠃ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠳᠣᠷᠵᠢ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ᠃ ᠤᠷᠢᠳᠠ ᠲᠠᠯᠠ ᠳ᠋ᠤᠨᠢ ᠭᠠᠮᠢᠩ ᠤ᠋ᠳ ᠬᠣᠶᠠᠷ ᠭᠤᠷᠪᠠ ᠪᠠᠷ ᠢ᠋ᠶ᠋ᠠᠨ᠂ ᠲᠠᠪᠤᠭᠤᠯᠠ ᠵᠢᠷᠭᠤᠭᠠᠭᠤᠯᠠ ᠪᠠᠨ ᠳᠠᠭᠠᠷᠢᠯᠳᠤᠬᠤ ᠪᠣᠯᠪᠠᠴᠤ ᠭᠡᠨᠡᠳᠲᠡ ᠲᠤᠯᠭᠠᠮᠳᠠᠭᠰᠠᠨ ᠳ᠋ᠠᠭᠠᠨ ᠰᠠᠨᠳᠤᠷᠤᠨ ᠲᠣᠯᠣᠭᠠᠢ ᠳᠠᠷᠤᠨ ᠭᠠᠵᠠᠷ ᠬᠡᠪᠲᠡᠭᠰᠡᠭᠡᠷ ᠥᠩᠭᠡᠷᠡᠭᠦᠯᠬᠦ ᠠᠵᠢ᠃ ᠨᠢᠭᠡ ᠤᠳᠠᠭᠠ ᠪᠦᠷ ᠵᠢᠭᠳᠡᠷᠡᠨ ᠵᠢᠭᠰᠠᠵᠤ ᠪᠠᠢᠭᠰᠠᠨ ᠪᠥᠭᠡᠮ ᠭᠠᠮᠢᠩ ᠳᠠᠭᠠᠷᠢᠯᠳᠤᠭᠰᠠᠨ ᠨᠢ ᠬᠦᠷᠲᠡᠯᠡ ᠬᠣᠶᠠᠷ ᠲᠡᠢᠰᠢ ᠢᠷᠡᠠᠭᠳᠠᠨ ᠬᠠᠰᠢᠶᠠ ᠨᠠᠯᠠᠵᠠᠢ᠃ ᠳᠣᠷᠵᠢ ᠥᠪᠡᠷ ᠦ᠋ᠨ ᠤᠬᠠᠭᠠᠨ ᠦᠭᠡᠢ ᠳᠠᠯᠠᠢᠭᠰᠠᠨ ᠰᠡᠯᠡᠮᠡ ᠪᠡᠨ ᠵᠡᠭᠦᠨ ᠪᠠᠷᠠᠭᠤᠨ ᠢ᠋ ᠲᠠᠰᠤᠷᠠᠯᠲᠠ ᠦᠭᠡᠢ ᠡᠷᠭᠢᠭᠦᠯᠬᠦ ᠪᠣᠯᠪᠠᠴᠤ ᠲᠡᠭᠦᠨ ᠳ᠋ᠦ᠍ᠨᠢ ᠳᠠᠭᠠᠷᠢᠭᠳᠠᠨ ᠴᠠᠪᠴᠢᠭᠳᠠᠭᠰᠠᠨ ᠶᠠᠭᠤ ᠴᠣ ᠦᠭᠡᠢ᠃ ᠭᠡᠪᠡᠴᠦ ᠠᠷᠤ ᠠ᠋ᠴᠠ ᠢᠷᠡᠬᠦ ᠬᠥᠮᠦᠰ ᠲᠡᠭᠡᠨ ᠮᠠᠰᠢ ᠲᠠᠭᠠᠲᠠᠢ ᠪᠣᠯᠤᠮᠵᠢ ᠥᠭᠴᠦ ᠶᠠᠪᠤᠵᠠᠢ᠃ ᠬᠣᠲᠠ ᠶ᠋ᠢᠨ ᠨᠢᠭᠡ ᠵᠠᠬᠠ ᠠ᠋ᠴᠠ ᠨᠥᠭᠦᠭᠡ ᠵᠠᠬᠠ ᠶ᠋ᠢ ᠨᠡᠪᠲᠡ ᠭᠠᠷᠤᠭᠰᠠᠨ ᠬᠣᠢᠨᠠ ᠪᠠᠨ ᠳᠣᠷᠵᠢ ᠰᠠᠶᠢ ᠥᠪᠡᠷ ᠢ᠋ᠶ᠋ᠡᠨ ᠤᠬᠠᠭᠠᠨ ᠠᠪᠤᠭᠠᠳ ᠳᠠᠷᠤᠢ ᠡᠷᠭᠢᠨ ᠳᠠᠬᠢᠨ ᠳᠠᠭᠠᠷᠢᠯᠲᠠ ᠬᠢᠪᠡ᠃ ᠡᠭᠦᠨ ᠳ᠋ᠡᠭᠡᠨ ᠬᠠᠷᠢᠨ ᠴᠡᠷᠢᠭ ᠡᠷᠡ ᠶ᠋ᠢᠨ ᠡᠭᠦᠷᠭᠡ ᠶ᠋ᠢ ᠨᠡᠷᠡ ᠲᠥᠷᠥ ᠲᠡᠢ ᠪᠡᠶᠡᠯᠡᠭᠦᠯᠦᠭᠰᠡᠨ ᠠᠵᠢ᠃
ᠭᠠᠮᠢᠩ ᠤ᠋ᠳ ᠬᠣᠲᠠ ᠠ᠋ᠴᠠ ᠵᠠᠢᠯᠠᠨ ᠵᠡᠭᠦᠨ ᠤᠷᠲᠤ ᠳᠡᠨᠵᠢ ᠳᠡᠭᠡᠷᠡ ᠭᠠᠷᠴᠠᠢ᠃ ᠲᠡᠳᠡ ᠨᠢᠭᠡ ᠦᠶᠡ ᠦᠢᠮᠡᠨ ᠰᠠᠨᠳᠤᠷᠤᠭᠰᠠᠨ ᠢ᠋ᠶ᠋ᠠᠨ ᠡᠮᠬᠢᠷᠡᠵᠦ ᠠᠪᠤᠭᠠᠳ ᠰᠢᠷᠦᠭᠦᠨ ᠭᠠᠯ ᠨᠡᠭᠡᠭᠡᠵᠦ ᠡᠬᠢᠯᠡᠪᠡ᠃ ᠬᠠᠷᠢᠭᠤ ᠳ᠋ᠤᠨᠢ ᠵᠢᠷᠤᠮᠲᠤ ᠴᠡᠷᠢᠭ ᠦ᠋ᠳ ᠫᠤᠤᠳᠠᠬᠤ ᠰᠤᠮᠤ ᠠᠯᠠᠭᠠ᠃ ᠬᠣᠢᠰᠢ ᠤᠬᠤᠷᠢᠨ ᠬᠣᠲᠠ ᠠ᠋ᠴᠠ ᠭᠠᠷᠪᠠ᠃ ᠭᠠᠮᠢᠩ ᠬᠣᠶᠠᠷ ᠲᠠᠰᠤᠷᠠᠨ ᠨᠢᠭᠡ ᠬᠡᠰᠡᠭ ᠨᠢ ᠬᠣᠲᠠ ᠶ᠋ᠢ ᠡᠵᠡᠯᠡᠪᠡ᠃ ᠨᠥᠭᠦᠭᠡ ᠬᠡᠰᠡᠭ ᠨᠢ ᠳᠡᠨᠵᠢ ᠳᠡᠭᠡᠷᠡ ᠵᠤᠵᠠᠭᠠᠨ ᠤᠨᠠᠭᠰᠠᠨ ᠴᠠᠰᠤᠨ ᠳᠤᠮᠳᠠ ᠬᠡᠰᠡᠭ ᠬᠡᠰᠡᠭ ᠢ᠋ᠶ᠋ᠡᠷ ᠵᠢᠭᠰᠠᠨ ᠴᠠᠭᠠᠰᠢ ᠨᠠᠭᠠᠰᠢ ᠬᠣᠯᠬᠢᠨᠠ᠃ ᠬᠣᠲᠠ ᠶ᠋ᠢ ᠠᠪᠤᠭᠰᠠᠨ ᠬᠡᠰᠡᠭ ᠨᠢ ᠤᠯᠠᠮ ᠵᠣᠷᠢᠭ ᠲᠠᠢ ᠭᠠᠯᠯᠠᠵᠤ ᠵᠢᠷᠤᠮᠲᠤ ᠴᠡᠷᠢᠭ ᠦ᠋ᠳ ᠦ᠋ᠨ ᠡᠮᠦᠨᠡᠬᠢ ᠭᠠᠵᠠᠷ ᠤ᠋ᠨ ᠬᠥᠷᠥᠰᠥ ᠶ᠋ᠢ ᠪᠤᠳᠠᠭᠠ ᠬᠠᠭᠤᠷᠬᠤ ᠰᠢᠭ᠋ ᠪᠤᠵᠢᠭᠢᠨᠠᠭᠤᠯᠪᠠ᠃ ᠬᠥᠮᠦᠰ ᠬᠠᠷᠢᠭᠤ ᠫᠤᠤᠳᠠᠬᠤ ᠰᠤᠮᠤ ᠦᠭᠡᠢ ᠳ᠋ᠡᠭᠡᠨ ᠪᠤᠬᠢᠨᠢᠳᠤᠨᠠ᠃ ᠭᠡᠪᠡᠴᠦ ᠦᠢᠯᠡᠰ ᠬᠠᠵᠠᠢᠬᠤ ᠤᠴᠢᠷ ᠦᠭᠡᠢ᠃ ᠬᠢᠯᠢ ᠶ᠋ᠢᠨ ᠴᠠᠭᠠᠨᠠ ᠠ᠋ᠴᠠ ᠬᠣᠶᠠᠷ ᠮᠣᠷᠢᠨ ᠲᠡᠷᠭᠡ ᠰᠤᠮᠤ ᠬᠦᠷᠦᠯᠴᠡᠨ ᠢᠷᠡᠪᠡ᠃ ᠪᠠᠰᠠ ᠠᠷᠤ ᠳ᠋ᠤ᠌ ᠬᠣᠴᠣᠷᠤᠭᠰᠠᠨ ᠬᠣᠶᠠᠷ ᠭᠤᠨᠠᠨ ᠫᠤᠤ ᠮᠥᠨ ᠢᠷᠡᠪᠡ᠃ ᠢᠩᠭᠢᠭᠡᠳ ᠰᠤᠮᠤ ᠱᠦᠭᠦᠷ(ᠫᠦᠯᠧᠮᠶᠣᠲ) ᠬᠦᠷᠲᠡᠯᠡ ᠦᠶᠡ ᠦᠶᠡ ᠲᠠᠴᠢᠭᠢᠨᠠᠵᠤ᠂ ᠬᠣᠶᠠᠷ ᠭᠤᠨᠠᠨ ᠫᠤᠤ ᠨᠢᠭᠡ ᠵᠡᠷᠭᠡ ᠲᠦᠰ ᠫᠢᠰ ᠪᠠᠭᠤᠵᠤ ᠲᠡᠷᠲᠡᠭᠡᠬᠢ ᠡᠩᠭᠡᠷ ᠦ᠋ᠨ ᠭᠠᠮᠢᠩ ᠤ᠋ᠨ ᠳᠡᠭᠡᠷᠡ ᠪᠠᠭᠤᠨᠠ᠃ ᠭᠠᠮᠢᠩ ᠤ᠋ᠳ ᠳᠠᠬᠢᠨ ᠵᠠᠮᠪᠠᠷᠠᠭᠠ ᠪᠠᠨ ᠠᠯᠳᠠᠯᠠ᠃ ᠭᠡᠲᠡᠯᠡ ᠴᠠᠭᠠᠨᠠ ᠠ᠋ᠴᠠ ᠨᠢ ᠬᠢᠷᠭᠠᠨ ᠬᠠᠷᠠᠭᠤᠯ ᠬᠡᠮᠡᠬᠦ ᠡᠴᠡ ᠮᠣᠷᠳᠠᠭᠰᠠᠨ ᠮᠥᠨ ᠬᠣᠶᠠᠷ ᠵᠠᠭᠤᠭᠠᠳ ᠵᠢᠷᠤᠮᠲᠤ ᠴᠡᠷᠢᠭ ᠬᠦᠷᠦᠯᠴᠡᠨ ᠢᠷᠡᠵᠦ ᠳᠣᠪᠲᠣᠯᠤᠭᠰᠠᠨ ᠠᠵᠢ᠃ ᠤᠭ ᠨᠢ ᠡᠨᠡ ᠠᠩᠭᠢ ᠠᠯᠲᠠᠨ ᠠ᠋ᠴᠠ ᠮᠣᠷᠳᠠᠭᠰᠠᠳ ᠤ᠋ᠨ ᠠᠳᠠᠯᠢ ᠦᠷ ᠢ᠋ᠶ᠋ᠡᠷ ᠡᠨᠳᠡ ᠢᠷᠡᠨ ᠬᠠᠪᠴᠢᠨ ᠪᠠᠢᠯᠳᠤᠬᠤ ᠶᠣᠰᠣᠲᠠᠢ ᠪᠠᠢᠭᠰᠠᠨ ᠠᠲᠠᠯᠠ ᠵᠠᠮ ᠤ᠋ᠨ ᠪᠡᠷᠬᠡ ᠴᠠᠰᠤ ᠤᠰᠤᠨ ᠤ᠋ ᠬᠠᠯᠲᠤᠷᠢᠭᠠᠨ ᠳ᠋ᠤ᠌ ᠰᠠᠭᠠᠳᠠᠨ ᠬᠣᠵᠢᠮᠳᠠᠵᠠᠢ᠃ ᠭᠡᠪᠡᠴᠦ ᠡᠨᠡ ᠨᠢ ᠶᠡᠷᠦ ᠮᠠᠭᠤ ᠪᠣᠯᠤᠭᠰᠠᠨ ᠦᠭᠡᠢ᠂ ᠬᠠᠷᠢᠨ ᠴᠣ ᠬᠠᠮᠤᠭ ᠤ᠋ᠨ ᠵᠣᠬᠢᠰ ᠲᠠᠢ ᠦᠶᠡ ᠪᠡᠨ ᠣᠯᠤᠭᠰᠠᠨ ᠬᠡᠷᠡᠭ ᠪᠣᠯᠪᠠ᠃ ᠭᠠᠮᠢᠩ ᠤ᠋ᠳ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠬᠣᠶᠠᠷ ᠲᠠᠯᠠ ᠠ᠋ᠴᠠ ᠪᠠᠨ ᠬᠠᠪᠴᠢᠭᠳᠠᠨ ᠴᠣᠬᠢᠭᠳᠠᠵᠤ ᠤᠷᠲᠤ ᠵᠦᠭ ᠢ᠋ ᠪᠠᠷᠢᠨ ᠤᠬᠠᠭᠠᠨ ᠵᠢᠯᠣᠭᠣ ᠦᠭᠡᠢ ᠵᠢᠭᠤᠲᠠᠨ ᠲᠣᠨᠢᠯᠪᠠ᠃
ᠵᠢᠷᠤᠮᠲᠤ ᠴᠡᠷᠢᠭ ᠬᠣᠲᠠ ᠶ᠋ᠢ ᠡᠵᠡᠯᠡᠨ ᠠᠪᠴᠤ ᠨᠠᠮ ᠲᠠᠢᠪᠤᠩ ᠪᠣᠯᠭᠠᠵᠤ ᠠᠪᠤᠮᠠᠭᠴᠠ ᠠᠷᠤ ᠬᠢᠶᠠᠭᠲᠤ ᠠ᠋ᠴᠠ ᠬᠡᠳᠦᠨ ᠮᠣᠷᠢ ᠲᠠᠢ ᠬᠥᠮᠦᠨ ᠶᠡᠷᠦ ᠶᠠᠭᠠᠷᠠᠯ ᠦᠭᠡᠢ ᠰᠠᠵᠢᠯᠠᠭᠤᠯᠤᠨ ᠢᠷᠡᠪᠡ᠃ ᠡᠨᠡ ᠪᠣᠯ ᠠᠷᠠᠳ ᠤ᠋ᠨ ᠨᠠᠮ᠂ ᠲᠡᠭᠦᠨ ᠦ᠌ ᠲᠦᠷ ᠵᠠᠰᠠᠭ ᠤ᠋ᠨ ᠭᠠᠵᠠᠷ ᠥᠪᠡᠷ ᠦ᠋ᠨ ᠲᠥᠷᠥᠯᠬᠢ ᠡᠬᠡ ᠣᠷᠣᠨ ᠤ᠋ ᠪᠠᠨ ᠭᠠᠵᠠᠷ ᠰᠢᠷᠣᠢ ᠶ᠋ᠢᠨ ᠳᠡᠭᠡᠷᠡ ᠨᠡᠭᠦᠳᠡᠯᠯᠡᠨ ᠢᠷᠡᠵᠦ ᠪᠠᠢᠭᠠ ᠬᠡᠷᠡᠭ ᠪᠠᠢᠵᠠᠢ᠃ ᠲᠡᠷᠡ ᠳᠤᠮᠳᠠ ᠪᠠᠯᠳᠠᠨᠴᠡᠷᠢᠩ ᠡᠪᠦᠷ ᠲᠡᠭᠡᠨ ᠪᠢᠷ ᠶᠠᠩᠲᠠᠢ ᠠᠷᠤ ᠳ᠋ᠠᠭᠠᠨ ᠸᠠᠳᠠᠩ ᠲᠠᠢ ᠪᠢᠴᠢᠭ ᠬᠡᠷᠡᠭ ᠪᠦᠰᠡᠯᠡᠵᠡᠢ᠃ ᠬᠢᠲᠠᠳ ᠢᠷᠭᠡᠳ ᠦ᠋ᠨ ᠰᠠᠭᠤᠬᠤ ᠭᠣᠣᠯ ᠬᠡᠰᠡᠭ ᠦ᠋ᠨ ᠵᠡᠭᠦᠨ ᠳ᠋ᠡᠬᠢ ᠬᠡᠰᠡᠭ ᠬᠠᠰᠢᠶᠠ ᠬᠦᠷᠢᠶᠡᠨ ᠦ᠌ ᠳᠤᠮᠳᠠᠬᠠᠨ ᠬᠠᠪᠢ ᠳ᠋ᠤ᠌ ᠪᠠᠢᠭᠠ ᠬᠣᠶᠠᠷ ᠥᠷᠥᠭᠡ ᠳ᠋ᠦᠩᠵᠡᠨ ᠪᠠᠢᠰᠢᠩ ᠳ᠋ᠤ᠌ ᠲᠥᠪ ᠬᠣᠷᠢᠶᠠ᠂ ᠵᠠᠰᠠᠭ ᠤ᠋ᠨ ᠭᠠᠵᠠᠷ᠂ ᠴᠡᠷᠢᠭ ᠦ᠋ᠨ ᠶᠠᠮᠤᠨ ᠪᠦᠭᠦᠳᠡ ᠣᠷᠣᠬᠤ ᠶᠣᠰᠣᠲᠠᠢ ᠪᠣᠯᠤᠭᠰᠠᠨ ᠢ᠋ᠶ᠋ᠠᠷ ᠦᠯᠦ ᠪᠠᠷᠠᠮ ᠡᠷᠬᠡ ᠶ᠋ᠢ ᠪᠠᠷᠢᠬᠤ ᠬᠥᠮᠦᠰ ᠴᠦ᠍ ᠮᠥᠨ ᠪᠠᠭᠲᠠᠨ ᠰᠠᠭᠤᠬᠤ ᠶᠣᠰᠣᠲᠠᠢ ᠪᠣᠯᠵᠠᠢ᠃ ᠪᠠᠯᠳᠠᠨᠴᠡᠷᠢᠩ ᠨᠥᠬᠥᠳ ᠦ᠋ᠨ ᠬᠠᠮᠲᠤ ᠨᠢᠭᠡ ᠥᠷᠥᠭᠡᠨ ᠳ᠋ᠦ᠍ ᠣᠷᠣᠵᠤ ᠸᠠᠳᠠᠩ ᠲᠠᠢ ᠠᠯᠪᠠᠨ ᠬᠡᠷᠡᠭ ᠢ᠋ᠶ᠋ᠡᠨ ᠲᠠᠯᠪᠢᠭᠠᠳ ᠨᠥᠭᠦᠭᠡ ᠥᠷᠥᠭᠡᠨ ᠳ᠋ᠦ᠍ ᠠᠯᠪᠠᠨ ᠬᠡᠷᠡᠭ ᠢ᠋ᠶ᠋ᠡᠨ ᠢᠳᠡ ᠬᠥᠲᠥᠯᠦᠨ ᠶᠠᠪᠤᠭᠤᠯᠵᠤ ᠪᠠᠢᠭᠠ ᠴᠡᠷᠢᠭ ᠦ᠋ᠨ ᠶᠠᠮᠤᠨ ᠤ᠋ ᠨᠥᠬᠥᠳ ᠳᠡᠭᠡᠷᠡ ᠣᠷᠣᠵᠠᠢ᠃
ᠲᠡᠳᠡ ᠪᠠᠢᠯᠳᠤᠭᠠᠨ ᠢ᠋ᠶ᠋ᠠᠨ ᠠᠮᠵᠢᠯᠲᠠ ᠲᠠᠢ ᠳᠠᠭᠤᠰᠬᠠᠭᠰᠠᠨ ᠴᠡᠷᠢᠭ ᠦ᠋ᠨ ᠳᠡᠭᠡᠳᠦ ᠳᠠᠷᠤᠭᠠ ᠨᠠᠷ ᠭᠠᠮᠢᠩ ᠬᠤᠪᠴᠠᠰᠤ ᠲᠠᠢ ᠨᠢᠭᠡ ᠬᠥᠮᠦᠨ ᠦ᠌ ᠶᠠᠷᠢᠶᠠ ᠶ᠋ᠢ ᠠᠩᠬᠠᠷᠤᠨ ᠴᠢᠩᠨᠠᠵᠤ ᠰᠠᠭᠤᠨᠠ᠃ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠣᠷᠣᠵᠤ ᠢᠷᠡᠬᠦ ᠳ᠋ᠦ᠍ ᠲᠡᠳᠡ ᠬᠥᠮᠦᠨ ᠦ᠌ ᠡᠷᠭᠢᠨ ᠬᠠᠷᠠᠬᠤ ᠶ᠋ᠢ ᠦᠵᠡᠪᠡᠯ ᠥᠪᠡᠷ ᠦ᠋ᠨ ᠤᠷᠪᠠᠭᠰᠠᠨ ᠱᠠᠪᠢ ᠨᠠᠮᠰᠠᠷᠠᠢ ᠪᠠᠢᠵᠠᠢ᠃ ᠪᠠᠯᠳᠠᠨᠴᠡᠷᠢᠩ ᠨᠢᠳᠦᠨ ᠳ᠋ᠡᠭᠡᠨ ᠢᠲᠡᠭᠡᠵᠦ ᠴᠢᠳᠠᠬᠤ ᠦᠭᠡᠢ ᠪᠣᠯᠤᠨ ᠵᠣᠭ ᠲᠤᠰᠪᠠ᠃ ᠨᠠᠮᠰᠠᠷᠠᠢ ᠪᠠᠯᠳᠠᠨᠴᠡᠷᠢᠩ ᠢ᠋ ᠨᠢᠳᠤᠨᠤᠨ ᠭᠠᠮᠢᠩ ᠳ᠋ᠤ᠌ ᠪᠠᠢᠵᠠᠭᠠᠭᠳᠠᠨ ᠰᠠᠨᠳᠤᠷᠴᠤ ᠰᠠᠭᠤᠬᠤ ᠳ᠋ᠤ᠌ ᠣᠷᠣᠵᠤ ᠢᠷᠡᠨ ᠨᠢᠳᠦ ᠭᠦᠢᠯᠭᠡᠨᠡᠭᠦᠯᠦᠭᠰᠡᠨ ᠰᠢᠭ ᠢ᠋ᠶ᠋ᠡᠨ ᠭᠥᠯᠢᠭᠡᠨᠡᠭᠦᠯᠦᠨ ᠪᠣᠰᠤᠨ ᠬᠠᠷᠠᠢᠵᠤ ᠠᠮᠤᠷ ᠡᠷᠢᠨ ᠵᠣᠯᠭᠠᠬᠤ ᠭᠡᠬᠦ ᠳ᠋ᠦ᠍ᠨᠢ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠠᠭᠤᠷ ᠲᠦᠷᠦᠰᠭᠢᠨ ᠬᠠᠴᠠᠷ ᠳᠡᠭᠡᠷᠡ ᠨᠢ ᠳᠡᠰ ᠪᠠᠭᠤᠯᠭᠠᠨ ᠠᠯᠠᠭᠠᠳᠠᠪᠠ᠃《ᠪᠠᠭᠰᠢ ᠠ᠋ ᠪᠠᠢᠶᠠ!》 ᠭᠡᠵᠦ ᠪᠠᠷᠠᠭᠤᠨ ᠲᠠᠢᠰᠢ ᠬᠠᠵᠠᠢᠬᠤ ᠳ᠋ᠤᠨᠢ ᠳᠠᠬᠢᠨ ᠠᠯᠠᠭᠠᠳᠠᠬᠤ ᠳ᠋ᠤ᠌ ᠪᠠᠰᠠ ᠯᠠ《ᠪᠠᠭᠰᠢ ᠠ᠋ ᠪᠠᠢᠶᠠ!》 ᠭᠡᠵᠦ ᠪᠡᠶᠡ ᠨᠢ ᠲᠡᠭᠰᠢᠷᠡᠭᠰᠡᠨ ᠪᠥᠭᠡᠳ ᠬᠥᠮᠦᠰ ᠭᠠᠢᠬᠠᠨ ᠰᠠᠨᠳᠤᠷᠴᠤ ᠪᠣᠰᠴᠠᠭᠠᠵᠠᠢ᠃ ᠭᠤᠷᠪᠠ ᠳᠠᠬᠢᠨ ᠠᠯᠠᠭᠠᠳᠠᠬᠤ ᠭᠡᠲᠡᠯᠡ ᠰᠦᠬᠡᠪᠠᠭᠠᠲᠤᠷ ᠬᠣᠭᠣᠷᠣᠨᠳᠣᠭᠤᠷ ᠨᠢ ᠣᠷᠣᠵᠤ᠄
— ᠦᠭᠡᠢ ᠭᠦᠩᠲᠡᠨ ᠠ᠋! ᠶᠠᠭᠤ ᠪᠣᠯᠪᠠ? ᠦᠭᠡᠢ ᠶᠠᠭᠤᠨ ᠳ᠋ᠤ᠌᠁ ᠭᠡᠬᠦ ᠳ᠋ᠦ᠍ᠨᠢ᠄
— ᠡᠨᠡ ᠤᠤ? ᠤᠷᠪᠠᠭᠴᠢ! ᠠᠮᠢᠳᠤ ᠪᠠᠷ ᠢ᠋ᠶ᠋ᠠᠨ ᠮᠢᠨᠦ ᠨᠢᠳᠦᠨ ᠳ᠋ᠦ᠍ ᠦᠵᠡᠭᠳᠡᠵᠦ ᠦᠯᠦ ᠪᠣᠯᠬᠤ ᠪᠤᠵᠠᠷ ᠤᠷᠪᠠᠭᠴᠢ ᠦᠬᠦᠭᠡᠷ!
— ᠦᠭᠡᠢ᠂ ᠲᠠ ᠪᠠᠢᠵᠠ! ᠬᠠᠷᠢᠨ ᠡᠨᠡ ᠴᠢᠨᠢ ᠮᠠᠨ ᠤ᠋ ᠬᠥᠮᠦᠨ᠃ ᠬᠠᠮᠤᠭ ᠤ᠋ᠨ ᠬᠦᠨᠳᠦ ᠬᠠᠮᠤᠭ ᠤ᠋ᠨ ᠴᠢᠬᠤᠯᠠ ᠶ᠋ᠢ ᠭᠦᠢᠴᠡᠳᠬᠡᠵᠦ ᠪᠠᠢᠭᠰᠠᠨ ᠰᠠᠢᠨ ᠡᠷᠡ᠃
ᠪᠠᠯᠳᠠᠨᠴᠡᠷᠢᠩ ᠣᠳᠣ ᠤᠴᠢᠷ ᠢ᠋ ᠣᠢᠯᠠᠭᠠᠯᠠ᠃ ᠠᠭᠤᠷ ᠨᠢ ᠲᠡᠷᠡ ᠳᠣᠣᠷᠠᠬᠠᠨ ᠢ᠋ᠶ᠋ᠠᠨ ᠵᠠᠮᠬᠠᠷᠠᠪᠠ᠃ ᠭᠡᠪᠡᠴᠦ ᠨᠢᠭᠡᠨᠲᠡ ᠳᠡᠭᠡᠷᠡ ᠬᠥᠭᠡᠷᠦᠭᠰᠡᠨ ᠠᠮᠢᠰᠬᠤᠯ ᠬᠡᠪ ᠢ᠋ᠶ᠋ᠡᠷ ᠪᠥᠭᠡᠳ ᠲᠡᠷᠡ ᠠᠮᠢᠰᠬᠤᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠯᠳᠠᠨᠴᠡᠷᠢᠩ᠄
— ᠲᠡᠷᠡ ᠨᠢ ᠶᠠᠭᠠᠬᠢᠬᠤᠪ ᠵᠠᠩᠵᠤᠨ ᠠ᠋! ᠵᠦᠭᠡᠷ ᠡᠨᠡ ᠲᠡᠷᠡ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠨᠠᠳᠠ ᠠ᠋ᠴᠠ ᠨᠢᠭᠤᠭᠰᠠᠨ ᠡᠲᠡᠭᠡᠳ ᠪᠠᠢᠭᠠ ᠶᠤᠮ ᠭᠡᠵᠦ ᠳᠠᠬᠢᠨ ᠤᠬᠤᠰᠬᠢᠪᠡ᠃ ᠡᠨᠡ ᠨᠢ ᠦᠨᠡᠨ ᠳ᠋ᠡᠭᠡᠨ ᠬᠠᠭᠤᠷᠮᠠᠴᠢ ᠬᠡᠲᠦᠷᠬᠡᠢ ᠢᠳᠡᠭᠦᠯᠦᠭᠰᠡᠨ ᠢ᠋ᠶ᠋ᠡᠨ ᠣᠯᠠᠨ ᠠ᠋ᠴᠠ ᠨᠢᠭᠤᠨ ᠲᠠᠷᠢᠬᠤ ᠭᠡᠰᠡᠨ ᠬᠡᠷᠡᠭ᠃ ᠨᠥᠭᠦᠭᠡ ᠬᠢ ᠨᠢ《ᠠ᠂ ᠪᠠᠭᠰᠢ ᠠ᠋᠂ ᠪᠠᠢᠶᠠ》 ᠭᠡᠵᠦ ᠪᠡᠶᠡ ᠬᠤᠮᠢᠨ ᠰᠦᠬᠡᠪᠠᠭᠠᠲᠤᠷ ᠤ᠋ᠨ ᠠᠷᠤ ᠪᠠᠷ ᠣᠷᠣᠪᠠ᠃
— ᠦᠭᠡᠢ ᠲᠡᠭᠡᠭᠡᠳ ᠡᠨᠡ ᠡᠬᠢ ᠵᠠᠬᠠ ᠪᠠᠨ ᠠᠯᠳᠠᠭᠰᠠᠨ ᠠᠮᠢᠲᠠᠨ ᠬᠡᠵᠢᠶᠡ ᠡᠨᠳᠡ ᠢᠷᠡᠪᠡ ᠪᠣᠢ? ᠭᠡᠬᠦ ᠳ᠋ᠦ᠍ ᠰᠦᠬᠡᠪᠠᠭᠠᠲᠤᠷ᠄
— ᠡᠨᠡ ᠤᠤ? ᠪᠠᠷᠠᠭᠤᠨ ᠠ᠋ᠴᠠ ᠭᠠᠮᠢᠩ ᠤ᠋ᠳ ᠲᠠᠢ ᠵᠢᠭᠤᠲᠠᠵᠤ ᠢᠷᠡᠭᠡᠳ ᠤᠲᠠᠰᠤᠨ ᠤ᠋ ᠬᠣᠷᠢᠶᠠᠨ ᠳ᠋ᠤ᠌᠁
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠪᠠᠭᠠᠲᠤᠷ