ᠬᠥᠯᠥᠭ ᠪᠠᠭᠠᠲᠤᠷ ᠪᠤᠭᠤᠷᠴᠢ - ᠪ᠂ ᠦᠯᠵᠡᠢᠰᠦ᠋ᠷᠦᠩ <ᠲᠡᠷᠢᠭᠦᠨ ᠪᠦᠯᠦᠭ - ᠳᠣᠯᠣᠭᠠ> Хүлэг баатар буурч - Б. Өлзийсүрэн <Тэргүүн бүлэг-7>
77ᠬᠣᠷᠸᠠ ᠲᠠᠢ ᠤᠴᠠᠷᠠᠨ ᠲᠠᠨᠢᠯᠴᠠᠵᠤ ᠪᠠᠶᠠᠷ ᠭᠤᠨᠢᠭ ᠠᠮᠰᠠᠭᠰᠠᠨ ᠲᠡᠷᠢᠭᠦᠨ ᠪᠦᠯᠦᠭ
ᠳᠣᠯᠣᠭᠠ᠂ ᠰᠠᠨᠠᠭᠰᠠᠨ ᠬᠥᠮᠦᠨ ᠦ᠌ ᠰᠡᠳᠬᠢᠯ ᠨᠢ ᠨᠢᠭᠡ ᠂ ᠰᠠᠭᠠᠳᠠᠭ ᠨᠣᠮᠣᠨ ᠤ᠋ ᠬᠥᠪᠴᠢ ᠨᠢ ᠨᠢᠭᠡ
ᠲᠡᠮᠦᠵᠢᠨ᠂ ᠪᠤᠭᠤᠷᠴᠢ ᠬᠣᠶᠠᠷ ᠬᠥᠪᠡᠭᠦᠨ ᠳᠤᠮᠳᠠ ᠪᠦᠷᠢᠳᠦ ᠡᠴᠡ ᠭᠠᠷᠤᠭᠰᠠᠨ ᠠ᠋ᠴᠠ ᠬᠣᠢᠰᠢᠬᠢ ᠭᠤᠷᠪᠠᠳᠠᠬᠢ ᠣᠷᠣᠢ ᠪᠠᠨ ᠶᠠᠪᠤᠭᠠ ᠨᠢ ᠡᠨᠡ ᠠᠵᠢ᠃
— ᠮᠠᠨ ᠤ᠋ ᠨᠠᠢ᠍ᠮᠠ᠁ ᠭᠡᠳ ᠲᠡᠮᠦᠵᠢᠨ ᠠᠳᠤᠭᠤᠨ ᠤ᠋ ᠵᠠᠬᠠ ᠤᠷᠤᠭᠤ ᠵᠢᠭᠠᠪᠠ᠃
— ᠶᠠᠭᠠᠬᠢᠬᠤ ᠪᠣᠢ? ᠬᠣᠶᠠᠭᠤᠯᠠ ᠳᠠᠭᠠᠷᠢᠬᠤ ᠤᠤ?
— ᠮᠢᠨᠦ ᠡᠮᠦᠨᠡ ᠡᠴᠡ ᠴᠢ ᠡᠷᠡᠰᠳᠡᠵᠦ ᠪᠣᠯᠬᠤ ᠦᠭᠡᠢ᠃ ᠴᠢ ᠡᠨᠳᠡ ᠪᠡᠨ ᠦᠯᠡᠳᠡᠵᠦ ᠪᠠᠢ᠃ ᠨᠠᠮᠠᠶ᠋ᠢ ᠪᠠᠷᠢᠭᠳᠠᠪᠠᠯ ᠵᠦᠭ ᠢ᠋ᠶ᠋ᠡᠨ ᠪᠤᠷᠤᠭᠤᠯᠠᠵᠤ ᠪᠤᠴᠠᠭᠠᠷᠠᠢ ᠭᠡᠰᠡᠨ ᠢ᠋ᠶ᠋ᠡᠨ ᠨᠤᠮᠤ ᠰᠠᠭᠠᠳᠠᠭ ᠢ᠋ᠶ᠋ᠠᠨ ᠪᠥᠰᠡᠨ ᠡᠴᠡ ᠪᠡᠨ ᠲᠠᠢᠯᠵᠤ ᠥᠭᠭᠦᠭᠡᠳ ᠲᠣᠭᠣᠰᠣ ᠲᠠᠲᠠᠭᠤᠯᠤᠨ ᠳᠠᠪᠬᠢᠭᠠᠳ ᠶᠠᠪᠤᠴᠢᠬᠠᠬᠤ ᠳ᠋ᠤᠨᠢ《ᠨᠠᠮᠠᠶ᠋ᠢ ᠵᠡᠪᠰᠡᠭᠯᠡᠯᠡ᠃ ᠨᠢᠭᠡᠯᠡ ᠤᠬᠠᠭᠠᠨ ᠪᠠᠢᠬᠠ》 ᠭᠡᠮᠡᠨ ᠭᠠᠢᠬᠠᠰᠬᠢᠨ ᠬᠣᠴᠣᠷᠪᠠ᠃
ᠠᠳᠤᠭᠤᠨ ᠳᠤᠮᠳᠠ ᠮᠣᠷᠢᠲᠠᠢ ᠶᠠᠪᠠᠭᠠᠨ ᠬᠥᠮᠦᠰ ᠦᠵᠡᠭᠳᠡᠨᠡ᠃ ᠭᠡᠪᠡᠴᠦ ᠲᠡᠮᠦᠵᠢᠨ ᠲᠡᠳᠡᠨ ᠢ᠋ ᠲᠣᠭᠣᠭᠰᠠᠨ ᠰᠢᠨᠵᠢ ᠦᠭᠡᠢ ᠠᠳᠤᠭᠤᠨ ᠤ᠋ ᠵᠠᠬᠠ ᠪᠠᠷ ᠳᠠᠪᠬᠢᠨ ᠣᠷᠣᠵᠤ ᠭᠡᠨᠡᠳᠲᠡ ᠡᠷᠭᠢᠭᠡᠳ ᠮᠣᠷᠢᠳ ᠢ᠋ᠶ᠋ᠠᠨ ᠲᠠᠰᠤᠯᠤᠨ ᠡᠯᠳᠡᠵᠦ᠂ ᠢᠰᠬᠢᠷᠦᠨ ᠭᠤᠤᠭᠯᠠᠬᠤ ᠳ᠋ᠤ᠌ ᠡᠵᠡᠨ ᠦ᠌ ᠪᠡᠨ ᠳᠠᠭᠤ ᠶ᠋ᠢ ᠲᠠᠨᠢᠭᠰᠠᠨ ᠨᠠᠢ᠍ᠮᠠᠨ ᠰᠢᠷᠭᠠ ᠴᠣᠢᠯᠤᠨ ᠳᠠᠪᠬᠢᠯᠳᠤᠵᠤ ᠲᠣᠭᠣᠰᠣ ᠬᠠᠲᠠᠭᠠᠨᠠ᠃ ᠠᠷᠤ ᠠ᠋ᠴᠠ ᠨᠢ ᠲᠠᠪᠤ ᠵᠢᠷᠭᠤᠭᠠᠨ ᠮᠣᠷᠢᠲᠠᠨ ᠭᠠᠷᠴᠤ ᠡᠯᠳᠡᠬᠦᠢ ᠯᠤᠭᠠ ᠪᠤᠭᠤᠷᠴᠢ ᠬᠣᠰᠢᠭᠤᠯᠳᠤᠨ ᠤᠭᠲᠤᠵᠤ ᠨᠡᠢᠯᠡᠪᠡ᠃
ᠨᠠᠭᠠᠳᠤᠮ ᠤ᠋ᠨ ᠮᠣᠷᠢᠳ ᠪᠠᠷᠢᠶᠠᠨ ᠳ᠋ᠤ᠌ ᠣᠷᠣᠬᠤ ᠰᠢᠭ᠋ ᠴᠤᠪᠤᠷᠠᠯᠳᠤᠨ᠂ ᠲᠤᠭᠤᠷᠠᠢ ᠲᠠᠴᠢᠭᠢᠨᠠᠨ ᠲᠣᠭᠣᠰᠣ ᠲᠠᠲᠠᠭᠤᠯᠤᠨ ᠬᠡᠭᠡᠷᠡ ᠲᠠᠯᠠ ᠶ᠋ᠢ ᠴᠣᠴᠢᠭᠠᠨᠠᠮᠠ ᠭᠡᠯᠲᠡᠢ᠃ ᠲᠡᠳᠡᠭᠡᠷ ᠡᠴᠡ ᠴᠠᠭᠠᠨ ᠮᠣᠷᠢᠲᠠᠢ ᠤᠯᠠᠭᠠᠨ ᠳᠡᠪᠡᠯ ᠲᠡᠢ ᠨᠢᠭᠡᠨ ᠢ᠋ᠶ᠋ᠡᠷ ᠲᠦᠷᠦᠭᠦᠯᠡᠵᠦ ᠲᠠᠰᠤᠷᠠᠭᠠᠳ ᠲᠤᠩ ᠣᠮᠣᠭᠯᠠᠩ᠃
— ᠴᠠᠭᠠᠨ ᠮᠣᠷᠢ ᠴᠤ᠌ ᠮᠣᠷᠢ ᠶᠤᠮ᠃ ᠤᠯᠠᠭᠠᠨ ᠳᠡᠪᠡᠯᠲᠦ ᠬᠢᠷᠢ ᠡᠷᠡ ᠪᠣᠯ? ᠦᠵᠡᠭᠡᠳ ᠠᠯᠳᠠᠶᠠ ᠭᠡᠮᠡᠨ ᠲᠡᠮᠦᠵᠢᠨ ᠪᠤᠭᠤᠷᠴᠢ ᠠ᠋ᠴᠠ ᠵᠡᠪᠰᠡᠭ ᠢ᠋ᠶ᠋ᠡᠨ ᠠᠪᠤᠭᠠᠳ᠄
— ᠴᠢ ᠬᠤᠷᠳᠤ ᠪᠠᠨ ᠰᠠᠭᠠᠷᠠᠭᠤᠯᠵᠤ ᠪᠣᠯᠬᠤ ᠦᠭᠡᠢ ᠰᠢᠦ ᠭᠡᠵᠦ ᠬᠠᠰᠬᠢᠷᠤᠭᠠᠳ ᠮᠣᠷᠢᠨ ᠤ᠋ ᠪᠠᠨ ᠠᠮᠠ ᠶ᠋ᠢ ᠲᠠᠲᠠᠵᠤ ᠬᠣᠴᠤᠷᠤᠰᠬᠢᠭᠡᠳ ᠪᠠᠢ ᠪᠠᠨ ᠨᠡᠯᠢᠶᠡᠳ ᠣᠢᠷᠠᠲᠤᠭᠤᠯᠤᠨ ᠬᠣᠷᠣᠮᠬᠠᠨ ᠵᠠᠭᠤᠷᠠ ᠨᠤᠮᠤ ᠪᠠᠨ ᠡᠪᠰᠢᠶᠡᠯᠭᠡᠨ ᠲᠠᠲᠠᠬᠤ ᠳ᠋ᠤ᠌ ᠰᠤᠮᠤ《ᠱᠣᠩ》 ᠭᠡᠳ ᠤᠯᠠᠭᠠᠨ ᠳᠡᠪᠡᠯᠲᠦ ᠨᠢᠷᠤᠭᠤ ᠪᠠᠨ ᠲᠤᠶᠠᠯᠵᠠᠭᠤᠯᠤᠨ ᠮᠣᠷᠢᠨ ᠤ᠋ ᠪᠠᠨ ᠬᠠᠵᠠᠭᠤ ᠤᠷᠤᠭᠤ ᠤᠨᠠᠵᠤ᠂ ᠠᠷᠤ ᠠ᠋ᠴᠠ ᠨᠢ ᠨᠥᠬᠥᠳ ᠨᠢ ᠢᠷᠡᠵᠦ ᠪᠦᠴᠢᠨ ᠪᠥᠭᠡᠮᠨᠡᠷᠡᠪᠡ᠃ ᠡᠨᠡ ᠬᠣᠭᠣᠷᠣᠨᠳᠣ ᠬᠥᠭᠡᠭᠡᠭᠴᠢ᠂ ᠬᠥᠭᠡᠭᠡᠭᠳᠡᠭᠴᠢ ᠬᠣᠯᠠ ᠲᠠᠰᠤᠷᠠᠵᠤ᠂ ᠬᠠᠷᠠᠩᠭᠤᠢ ᠪᠦᠷᠦᠩᠬᠦᠢ ᠪᠣᠯᠪᠠ᠃ ᠬᠣᠶᠠᠷ ᠬᠥᠪᠡᠭᠦᠨ ᠴᠦ᠍ ᠬᠤᠷᠳᠤ ᠦᠯᠦ ᠰᠠᠭᠠᠷᠠᠭᠤᠯᠤᠨ ᠳᠣᠪᠲᠣᠯᠭᠠᠭᠰᠠᠭᠠᠷ ᠯᠠᠪᠲᠠᠢᠶᠠ ᠬᠣᠷᠢᠨ ᠮᠣᠳᠣ ᠬᠣᠯᠠᠳᠠᠪᠠ᠃ ᠵᠡᠭᠦᠨ ᠡᠴᠡ ᠪᠠᠷᠠᠭᠤᠨᠰᠢ ᠤᠷᠤᠰᠬᠤ ᠭᠣᠣᠯ ᠲᠠᠭᠠᠷᠠᠵᠤ᠂ ᠤᠰᠤᠨ ᠳᠤᠮᠳᠠᠭᠤᠷ ᠱᠠᠯ ᠫᠠᠯ ᠬᠢᠯᠭᠡᠨ ᠤᠷᠤᠭᠤᠳᠠᠵᠤ ᠬᠣᠶᠠᠷ ᠮᠣᠳᠣ ᠭᠠᠵᠠᠷ ᠱᠣᠭᠰᠢᠭᠤᠯᠤᠨ ᠵᠦᠭ ᠪᠤᠷᠤᠭᠤᠯᠠᠵᠤ᠂ ᠮᠥᠷ ᠰᠠᠷᠨᠢᠭᠤᠯᠬᠤ ᠤᠬᠠᠭᠠᠨ ᠰᠡᠢᠯᠵᠦ ᠶᠠᠪᠤᠪᠠ᠃ ᠲᠦᠳᠡᠯ ᠦᠭᠡᠢ ᠤᠮᠠᠷᠠ ᠠ᠋ᠴᠠ ᠳᠠᠭᠤ ᠴᠠᠬᠢᠯᠭᠠᠨ ᠲᠠᠢ ᠠᠭᠠᠳᠠᠷ ᠪᠣᠷᠣᠭᠠᠨ ᠨᠥᠮᠥᠷᠴᠦ᠂ ᠬᠦᠴᠦᠲᠡᠢ ᠰᠠᠯᠬᠢᠯᠠᠨ ᠠᠶᠤᠮᠰᠢᠭ ᠲᠦᠷᠦᠭᠦᠯᠡᠯᠡ᠃
ᠭᠡᠰᠡᠨ ᠴᠦ᠍ ᠠᠵᠠ ᠪᠠᠷ ᠪᠣᠷᠣᠭᠠᠨ ᠤ᠋ ᠵᠠᠬᠠ ᠲᠠᠭᠠᠷᠠᠵᠤ ᠵᠢᠭᠠᠬᠠᠨ ᠴᠣᠬᠢᠭᠳᠠᠭᠠᠳ ᠥᠩᠭᠡᠷᠡᠪᠡ᠃ ᠲᠡᠷᠡ ᠬᠣᠶᠠᠷ《ᠮᠥᠩᠬᠡ ᠲᠩᠷᠢ ᠢᠪᠡᠭᠡᠪᠡ᠃ ᠬᠠᠷᠢᠨ ᠮᠥᠷᠳᠡᠨ ᠬᠥᠭᠡᠭᠡᠵᠦ ᠶᠠᠪᠤᠭᠠ ᠪᠣᠯ ᠲᠡᠳᠡ ᠱᠠᠯᠠᠪ ᠴᠣᠬᠢᠭᠤᠯᠤᠭᠰᠠᠨ ᠳᠠ》 ᠭᠡᠵᠦ ᠢᠨᠢᠶᠡᠯᠳᠦᠨ ᠭᠣᠣᠯ ᠠ᠋ᠴᠠ ᠭᠠᠷᠴᠤ᠂ ᠲᠡᠮᠦᠵᠢᠨ《ᠴᠢᠨᠳᠠᠭᠠ》 ᠭᠡᠵᠦ ᠲᠥᠰᠬᠡᠷᠬᠦ ᠳ᠋ᠦ᠍ ᠨᠢᠭᠡ ᠰᠢᠷᠭᠠ ᠰᠦᠯᠦᠯᠵᠡᠨ ᠡᠵᠡᠨ ᠨᠢ ᠮᠣᠷᠢᠨ ᠳᠡᠭᠡᠷᠡ ᠡᠴᠡ ᠣᠭᠣᠰᠣᠷᠯᠠᠵᠤ᠄
— ᠪᠣᠭᠣᠷᠴᠢ ᠠ᠋᠂ ᠮᠣᠷᠢ ᠪᠠᠨ ᠰᠣᠯᠢᠴᠢᠬᠠ ᠭᠡᠪᠡ᠃ ᠳᠠᠷᠠᠭᠠ ᠨᠢ《ᠰᠤᠰᠤᠷ》 ᠭᠡᠳ ᠥᠪᠡᠷ ᠢ᠋ᠶ᠋ᠡᠨ ᠰᠣᠯᠢᠵᠤ ᠴᠤᠴᠠᠭᠰᠠᠨ ᠮᠣᠷᠢᠳ ᠢ᠋ᠶ᠋ᠠᠨ ᠲᠠᠯᠪᠢᠭᠠᠳ ᠴᠠᠭᠠᠰᠢ ᠬᠤᠷᠳᠤᠯᠠᠪᠠ᠃ ᠲᠩᠷᠢ ᠴᠡᠯᠮᠡᠵᠦ ᠣᠳᠣᠳ ᠲᠦᠮᠡ ᠪᠤᠮ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠭᠢᠯᠠᠯᠵᠠᠨ ᠰᠡᠳᠬᠢᠯ ᠪᠠᠰᠠ ᠴᠡᠯᠮᠡᠯᠡ᠃ ᠲᠡᠮᠦᠵᠢᠨ᠄
— ᠵᠠ᠂ ᠳᠠᠢᠴᠢᠨ ᠡᠷᠡᠰ ᠦ᠋ᠨ ᠤᠨᠲᠠᠯᠭᠠ ᠪᠠᠷ ᠶᠠᠯᠢᠭᠦᠢ ᠵᠢᠭᠠᠬᠠᠨ ᠨᠣᠢᠷ ᠠᠪᠤᠶᠠ᠂ ᠬᠣᠶᠠᠭᠤᠯᠠ᠃ ᠪᠤᠭᠤᠷᠴᠢ ᠴᠢ ᠲᠠᠰᠢᠭᠤᠷ ᠤ᠋ᠨ ᠢ᠋ᠶ᠋ᠠᠨ ᠰᠠᠭᠠᠯᠳᠤᠷᠭᠠ ᠶ᠋ᠢ ᠡᠮᠡᠭᠡᠯ ᠦ᠋ᠨ ᠢ᠋ᠶ᠋ᠡᠨ ᠪᠦᠭᠦᠷᠭᠡᠨ ᠳ᠋ᠦ᠍ ᠤᠭᠯᠠᠵᠤ ᠳᠡᠭᠡᠭᠰᠢ ᠨᠢ ᠪᠣᠰᠬᠠᠵᠤ ᠪᠠᠷᠢᠭᠠᠳ ᠪᠠᠷᠠᠭᠤᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠦᠭᠦᠷᠭᠡ ᠪᠡᠨ ᠲᠠᠰᠢᠭᠤᠷ ᠲᠠᠢ ᠪᠠᠨ ᠳᠠᠪᠬᠤᠷ ᠠᠳᠬᠤᠨ ᠳᠡᠷᠡᠯᠡᠵᠦ ᠳᠤᠭᠬᠢ᠃ ᠲᠡᠭᠰᠢ ᠰᠠᠭᠤᠵᠤ ᠳᠥᠷᠥᠭᠡ ᠪᠡᠨ ᠵᠢᠭᠢ ᠭᠡᠵᠦ ᠵᠢᠭᠠᠪᠤᠷᠢᠯᠠᠪᠠ᠃ ᠬᠣᠶᠠᠷ ᠵᠠᠯᠠᠭᠤ ᠲᠡᠷᠡ ᠳᠣᠣᠷᠠ ᠪᠠᠨ ᠵᠡᠭᠦᠷᠮᠡᠭᠯᠡᠨ ᠮᠣᠷᠢᠳ ᠴᠤ᠌ ᠡᠵᠡᠨ ᠦ᠌ ᠪᠡᠨ ᠬᠦᠰᠡᠭᠰᠡᠨ ᠶᠣᠰᠣᠭᠠᠷ ᠰᠢᠷᠭᠤᠯᠵᠢᠨ ᠴᠤᠪᠤᠭᠠ ᠪᠠᠷ ᠵᠠᠷᠢᠮ ᠳ᠋ᠠᠭᠠᠨ ᠰᠡᠭᠦᠯ ᠬᠥᠳᠡᠯᠭᠡᠬᠦ ᠲᠡᠳᠦᠢ ᠱᠣᠭᠰᠢᠨ ᠭᠠᠵᠠᠷ ᠦᠨᠦᠷᠯᠡᠨ ᠳᠣᠷᠭᠢᠵᠤ ᠨᠤᠲᠤᠭ ᠤ᠋ᠨ ᠵᠦᠭ ᠱᠤᠭᠤᠮ ᠲᠡᠳᠡᠨ ᠠᠯᠬᠤᠭᠤᠯᠤᠨᠠ᠃
ᠦᠦᠷ ᠮᠠᠩᠬᠠᠢᠲᠠᠯᠠ ᠴᠠᠢᠵᠤ᠂ ᠬᠣᠶᠠᠷ ᠵᠠᠯᠠᠭᠤ ᠰᠡᠷᠢᠵᠦ ᠡᠪᠰᠢᠶᠡᠨ ᠰᠤᠨᠢᠶᠠᠬᠤ ᠵᠠᠭᠤᠷᠠ《ᠬᠠᠢᠷᠠᠨ!》 ᠭᠡᠵᠦ ᠬᠠᠷᠠᠮᠰᠠᠨ ᠱᠠᠭᠰᠢᠷᠠᠪᠠ᠃
— ᠶᠠᠭᠠᠬᠢᠭᠰᠠᠨ ᠪᠣᠢ? ᠵᠡᠭᠦᠳᠦ ᠤᠤ? ᠰᠠᠢᠬᠠᠨ ᠵᠡᠭᠦᠳᠦ ᠪᠢᠵᠡ!
— ᠶᠠᠭᠤ ᠬᠡᠯᠡᠬᠦ ᠪᠣᠢ ᠱᠠᠭᠰᠢᠷᠠᠬᠤ ᠳ᠋ᠤᠨᠢ᠄
— ᠬᠡᠯᠡᠯ ᠳᠡ ᠭᠡᠯᠡ᠃
— ᠲᠠᠨ ᠤ᠋ ᠬᠥᠪᠴᠢ ᠳ᠋ᠦ᠍ ᠶᠦᠮ ᠳᠡ᠃ ᠪᠢ ᠤᠷᠢᠳᠤ ᠬᠥᠪᠴᠢ ᠡᠴᠡ ᠮᠣᠳᠣ ᠲᠡᠭᠡᠭᠡᠵᠦ ᠶᠠᠪᠤᠭᠰᠠᠨ ᠯᠠ ᠳᠠ᠃ ᠶᠡᠬᠡ ᠥᠳᠬᠡᠨ ᠣᠢ ᠲᠠᠢ ᠠᠭᠤᠯᠠ ᠶ᠋ᠢᠨ ᠬᠢᠷᠠ ᠳ᠋ᠤ᠌ ᠭᠠᠷᠴᠠᠢ᠃ ᠶᠠᠭᠠᠬᠢᠵᠤ ᠭᠠᠷᠤᠭᠰᠠᠨ ᠢ᠋ᠶ᠋ᠠᠨ ᠮᠡᠳᠡᠭᠰᠡᠨ ᠦᠭᠡᠢ᠃ ᠲᠡᠷᠡ ᠬᠢᠷᠠ ᠳ᠋ᠤ᠌ ᠠᠶᠠᠭᠠᠨ ᠳ᠋ᠤ᠌ ᠬᠢᠭᠰᠡᠨ ᠷᠠᠰᠢᠶᠠᠨ ᠮᠡᠲᠦ ᠭᠦᠨ ᠴᠡᠩᠬᠡᠷ ᠨᠠᠭᠤᠷ ᠮᠡᠯᠲᠡᠯᠵᠡᠵᠦ ᠪᠠᠢᠬᠤ ᠶᠤᠮ᠃ ᠪᠢ ᠨᠠᠭᠤᠷ ᠤ᠋ᠨ ᠤᠰᠤᠨ ᠠ᠋ᠴᠠ ᠬᠦᠷᠲᠡᠵᠦ ᠬᠠᠷᠠᠲᠠᠯᠠ ᠡᠮᠦᠨᠡ ᠮᠢᠨᠢ ᠨᠢᠭᠡ ᠦᠵᠡᠰᠬᠦᠯᠡᠩᠲᠡᠢ ᠭᠤᠸᠠ ᠪᠦᠰᠡᠭᠦᠢ ᠨᠠᠳᠠ ᠤᠷᠤᠭᠤ ᠬᠠᠷᠠᠵᠤ ᠢᠨᠢᠶᠡᠮᠰᠦᠭᠯᠡᠨ ᠭᠠᠷ ᠢ᠋ᠶ᠋ᠠᠨ ᠰᠤᠩᠭᠠᠬᠤ ᠶᠤᠮ᠃ ᠬᠤᠷᠮᠤᠰᠲᠠ ᠶ᠋ᠢᠨ ᠳᠠᠭᠢᠨᠢ ᠭᠡᠳᠡᠭ ᠯᠡ ᠲᠡᠷᠡ ᠪᠠᠢᠬᠠ᠃ ᠪᠢ ᠪᠠᠶᠠᠷᠯᠠᠭᠠᠳ ᠭᠠᠷ ᠢ᠋ᠶ᠋ᠠᠨ ᠰᠤᠩᠭᠠᠯᠠ᠃ ᠬᠦᠷᠳᠡᠭ ᠦᠭᠡᠢ ᠠ᠋᠂ ᠶᠠᠭᠠᠬᠢᠭᠰᠠᠨ ᠴᠤ᠌ ᠬᠦᠷᠳᠡᠭ ᠦᠭᠡᠢ᠃ ᠵᠢᠳᠬᠦᠯᠡ᠂ ᠪᠠᠰᠠᠯᠠ ᠬᠦᠷᠳᠡᠭ ᠦᠭᠡᠢ᠃ ᠲᠤᠩ ᠴᠤ᠌ ᠣᠢᠷᠠᠬᠠᠨ᠃ ᠥᠰᠥᠷᠬᠡᠶᠡ ᠭᠡᠲᠡᠯᠡ ᠰᠡᠷᠡᠴᠢᠬᠡᠯᠡ᠃
— ᠬᠠᠢᠷᠠᠨ ᠪᠠᠢᠨᠠ! ᠪᠢ ᠴᠦ᠍ ᠭᠡᠰᠡᠨ ᠬᠠᠢᠷᠠᠨ! ᠭᠡᠳ ᠲᠡᠮᠦᠵᠢᠨ ᠢᠨᠢᠶᠡᠮᠰᠦᠭᠯᠡᠨ ᠲᠣᠯᠣᠭᠠᠢ ᠪᠠᠨ ᠡᠷᠭᠦᠵᠦ᠄
— ᠪᠥᠷᠲᠡ ᠲᠡᠢ ᠪᠡᠨ ᠨᠠᠷᠢᠨ ᠭᠣᠣᠯ ᠤ᠋ᠨ ᠡᠷᠭᠢ ᠳᠡᠭᠡᠷᠡ ᠥᠷᠭᠡᠰᠦᠨ ᠦ᠌ ᠮᠣᠷᠢ ᠤᠷᠤᠯᠳᠤᠭᠤᠯᠵᠤ ᠪᠠᠢᠬᠤ ᠶᠤᠮ᠃ ᠮᠢᠨᠦ ᠮᠣᠷᠢ ᠲᠦᠷᠦᠭᠦᠯᠡᠭᠡᠳ ᠢᠷᠡᠯᠡ᠃ ᠲᠡᠭᠡᠮᠡᠭᠴᠡ ᠥᠨᠥᠬᠢ ᠴᠢᠨᠢ ᠰᠢᠭᠦᠷᠴᠦ ᠠᠪᠤᠭᠠᠳ ᠵᠢᠭᠤᠲᠠᠯᠠ᠃ ᠪᠢ ᠬᠥᠭᠡᠭᠡᠳ ᠭᠦᠢᠴᠡᠳᠡᠭ ᠦᠭᠡᠢ᠃ ᠬᠡᠯᠡ ᠪᠡᠨ ᠭᠠᠷᠭᠠᠨ ᠡᠷᠭᠢᠵᠦ ᠬᠠᠷᠠᠨ ᠳᠣᠭᠣᠭᠢᠯᠠᠭᠠᠳ᠂ ᠪᠢ ᠴᠦ᠍ ᠠᠷᠤ ᠠ᠋ᠴᠠ ᠨᠢ ᠬᠣᠷᠣᠨ ᠳ᠋ᠠᠭᠠᠨ ᠭᠦᠢᠴᠡᠬᠦ ᠭᠡᠵᠦ ᠬᠥᠭᠡᠭᠡᠭᠡᠳ ᠠᠰᠢᠭᠦᠢ ᠭᠦᠢᠴᠡᠵᠦ ᠲᠡᠪᠡᠷᠢᠵᠦ ᠠᠪᠤᠭᠠᠳ᠄《ᠴᠢ ᠶᠠᠭᠠᠬᠢᠭᠰᠠᠨ ᠶᠡᠬᠡ ᠬᠡᠯᠡ ᠲᠡᠢ ᠬᠥᠮᠦᠨ ᠪᠣᠢ? ᠣᠳᠣ ᠭᠠᠷᠭᠠ᠃ ᠲᠠᠰᠤ ᠬᠠᠵᠠᠭᠠᠳ ᠥᠭᠭᠦᠶᠡ》 ᠭᠡᠲᠡᠯᠡ᠄《ᠲᠡᠭᠡ ᠯᠡ ᠳᠡ᠃ ᠪᠢᠲᠡᠭᠡᠢ ᠨᠢᠰᠠᠯᠠᠭᠠᠷᠠᠢ ᠡᠪᠡᠳᠬᠡᠭᠡᠷᠡᠢ!》 ᠭᠡᠳ ᠬᠡᠯᠡ ᠪᠡᠨ ᠭᠠᠷᠭᠠᠪᠠ᠃ ᠪᠢ ᠡᠮᠬᠦᠭᠡᠳ ᠠᠪᠬᠤ ᠭᠡᠲᠡᠯᠡ ᠰᠡᠷᠡᠴᠢᠬᠦ ᠨᠢ ᠲᠡᠷᠡ! ᠬᠠᠢᠷᠠᠨ ᠪᠠᠢᠭᠠ ᠪᠢᠵᠡ᠃
— ᠬᠠᠢᠷᠠᠨ! ᠴᠢ ᠲᠡᠭᠡᠭᠡᠳ ᠬᠠᠵᠠᠬᠤ ᠪᠠᠢᠭᠰᠠᠨ ᠤᠤ?
— ᠶᠠᠭᠠᠬᠢᠯᠠ ᠭᠡᠵᠦ? ᠲᠡᠷᠡ ᠬᠥᠭᠡᠷᠦᠬᠦᠨ ᠶᠠᠭᠤᠮᠠ ᠶ᠋ᠢ ᠭᠡᠳ ᠬᠣᠶᠠᠭᠤᠯᠠ ᠪᠠᠨ ᠢᠨᠢᠶᠡᠯᠳᠦᠯᠡ᠃
ᠨᠠᠷᠠ ᠭᠠᠷᠤᠯᠠ᠃ ᠨᠠᠷᠠᠳᠠᠭᠤᠯᠵᠤ ᠨᠢᠭᠡ ᠲᠠᠷᠪᠠᠭᠠ ᠭᠠᠨᠵᠤᠭᠠᠯᠠᠪᠠ᠃ ᠨᠠᠷᠠ ᠳᠡᠭᠡᠭᠰᠢ ᠬᠥᠭᠡᠷᠦᠨ ᠴᠢᠭᠢᠭ ᠲᠠᠲᠠᠷᠠᠯᠠ᠃ ᠵᠠᠮ ᠳ᠋ᠠᠭᠠᠨ ᠠᠷᠭᠠᠯ ᠰᠢᠭᠦᠷᠴᠦ ᠬᠣᠶᠠᠭᠤᠯᠠ ᠳᠥᠨᠳᠥᠢᠲᠡᠯᠡ ᠪᠣᠭᠣᠭᠠᠳ ᠲᠡᠷᠲᠡᠭᠡ ᠬᠠᠳᠠᠨ ᠬᠣᠰᠢᠭᠤ ᠬᠦᠷᠴᠦ ᠪᠣᠭᠣᠳᠠᠭ ᠢ᠋ᠶ᠋ᠠᠨ ᠬᠢᠶᠡ ᠭᠡᠯᠴᠡᠯᠡ᠃
ᠲᠡᠨᠳᠡ ᠲᠤᠩ ᠲᠠᠭᠠᠲᠠᠢ ᠭᠠᠵᠠᠷ ᠣᠯᠵᠠᠢ᠃ ᠬᠣᠶᠠᠷ ᠵᠠᠯᠠᠭᠤ ᠮᠡᠷᠭᠡᠵᠢᠵᠦ ᠰᠤᠷᠤᠭᠰᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠣᠭᠣᠯᠠ ᠪᠠᠨ ᠲᠤᠩ ᠬᠤᠷᠳᠤᠨ ᠠᠮᠵᠢᠭᠤᠯᠤᠯᠠ᠃ ᠬᠠᠳᠠᠨ ᠳᠡᠭᠡᠷᠡ ᠭᠠᠷᠴᠤ ᠠᠶᠠᠲᠠᠢ ᠲᠠᠪᠴᠠᠩ ᠳᠡᠭᠡᠷᠡ ᠪᠣᠭᠣᠳᠠᠭ ᠢ᠋ᠶ᠋ᠠᠨ ᠲᠠᠯᠪᠢᠭᠰᠠᠨ ᠨᠢ ᠪᠠᠰᠠ ᠠᠯᠤᠰ ᠤ᠋ᠨ ᠪᠠᠷᠠ ᠠᠵᠢᠵᠤ᠂ ᠲᠠᠪᠠ ᠲᠤᠬᠠᠲᠠᠢ ᠬᠣᠭᠣᠯᠠᠯᠠᠬᠤ ᠪᠣᠯᠤᠮᠵᠢ ᠶᠤᠮ᠃
ᠲᠡᠷᠡ ᠬᠣᠶᠠᠷ ᠨᠠᠰᠤ ᠪᠡᠶᠡ ᠭᠦᠢᠴᠡᠭᠰᠡᠨ ᠡᠷᠡᠴᠦᠦᠯ ᠰᠢᠭ ᠵᠠᠪᠢᠯᠠᠨ ᠰᠠᠭᠤᠵᠤ《ᠡᠷᠡ ᠬᠥᠮᠦᠨ ᠦ᠌ ᠵᠢᠷᠭᠠᠯ ᠡᠵᠡᠭᠦᠢ ᠬᠡᠭᠡᠷᠡ》 ᠭᠡᠵᠦ ᠶᠡᠬᠡ ᠦᠭᠡ ᠬᠡᠯᠡᠵᠦ ᠢᠨᠢᠶᠡᠯᠳᠦᠨ ᠲᠤᠬᠠᠲᠠᠢ ᠨᠢ ᠠᠷᠭᠠ ᠦᠭᠡᠢ ᠬᠣᠭᠣᠯᠠᠯᠠᠯᠠ᠃
ᠲᠡᠮᠦᠵᠢᠨ ᠶᠡᠬᠡ ᠯᠡ ᠪᠣᠳᠣᠯ ᠪᠣᠯᠤᠭᠰᠠᠨ ᠶᠠᠩᠵᠤᠲᠠᠢ ᠠᠯᠤᠰ ᠵᠡᠭᠦᠨ ᠡᠮᠦᠨᠡ ᠵᠦᠭ ᠢ᠋ ᠰᠢᠷᠲᠡᠨ ᠲᠡᠰᠢᠶᠡ ᠲᠤᠯᠤᠨ ᠰᠠᠭᠤᠬᠤᠢ ᠳ᠋ᠤ᠌ ᠪᠤᠭᠤᠷᠴᠢ᠄
— ᠴᠢ ᠴᠦ᠍ ᠡᠷᠡ ᠬᠥᠮᠦᠨ ᠪᠣᠯᠵᠤ᠂ ᠴᠠᠭᠠᠳᠤᠬᠢ ᠴᠢᠨᠢ ᠶᠡᠬᠡ ᠰᠠᠢᠬᠠᠨ ᠬᠡᠦᠬᠡᠨ ᠪᠣᠯᠤᠭᠠᠳ ᠴᠢᠮᠠ ᠶ᠋ᠢ ᠰᠠᠨᠠᠵᠤ ᠪᠠᠢᠭᠠ ᠶᠤᠮ ᠪᠠᠢᠨᠠ ᠳᠠ᠃ ᠲᠡᠭᠦᠨ ᠲᠡᠢ ᠪᠡᠨ ᠭᠡᠷᠯᠡᠨᠡ ᠪᠢᠵᠡ ᠳᠡ ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌ ᠨᠢ᠄
— ᠲᠡᠢᠮᠦ ᠠ᠋ ᠂ ᠪᠢ ᠶᠡᠬᠡ ᠰᠠᠨᠠᠳᠠᠭ᠃ ᠳᠣᠯᠣᠭᠠᠨ ᠵᠢᠯ ᠥᠩᠭᠡᠷᠡᠵᠡᠢ᠃ ᠣᠳᠣ ᠶᠠᠮᠠᠷ ᠬᠡᠦᠬᠡᠨ ᠪᠣᠯᠤᠭᠠ ᠪᠣᠯ? ᠤᠷᠲᠤ ᠰᠣᠷᠮᠤᠤᠰᠤ ᠲᠠᠢ᠂ ᠳᠠᠪᠬᠤᠷᠭᠠᠯᠢᠭ ᠣᠨᠢᠭᠠᠷ ᠪᠣᠷᠣ ᠨᠢᠳᠦ᠂ ᠵᠢᠵᠢᠭᠬᠡᠨ ᠵᠣᠮᠪᠣᠭᠣᠷ ᠤᠷᠤᠭᠤᠯ ᠢ᠋ᠶ᠋ᠠᠷ ᠵᠠᠯᠢᠲᠠᠢ ᠴᠢᠷᠠᠢ ᠭᠠᠷᠭᠠᠨ ᠦᠷᠭᠦᠯᠵᠢ ᠢᠨᠢᠶᠡᠮᠰᠦᠭᠯᠡᠬᠦ᠁ ᠲᠡᠷᠡ ᠪᠦᠷᠢ ᠬᠣᠶᠠᠷ ᠪᠣᠮᠪᠣᠭᠣᠷ ᠬᠠᠴᠠᠷ ᠨᠢ ᠬᠣᠩᠬᠣᠢᠵᠤ᠁ ᠬᠥᠭᠡᠷᠦᠬᠦᠨ ᠯᠡ ᠭᠡᠬᠦ ᠤᠤ ᠳᠠ᠁
— ᠬᠥᠭᠡᠷᠦᠬᠦᠨ ᠯᠡ ᠪᠠᠢᠵᠤ ᠲᠠᠭᠠᠷᠠᠨᠠ᠃ ᠬᠡᠦᠬᠡᠨ ᠶᠦᠮ ᠴᠢᠨᠢ ᠭᠡᠵᠦ ᠪᠣᠭᠤᠷᠴᠢ ᠨᠥᠬᠥᠷ ᠲᠡᠭᠡᠨ ᠤᠷᠮᠠ ᠥᠭᠪᠡ᠃
— ᠲᠡᠷᠡ ᠨᠠᠳᠠ ᠠ᠋ᠴᠠ ᠨᠢᠭᠡ ᠨᠠᠰᠤ ᠢᠯᠡᠭᠦᠦ᠃ ᠲᠡᠷᠡ ᠨᠢ ᠶᠡᠬᠡ ᠬᠥᠭᠡᠷᠦᠬᠦᠨ᠂ ᠡᠭᠡᠴᠢ ᠶᠦᠮ ᠪᠣᠯᠬᠣᠷ ᠶᠠᠭᠤᠮᠠ ᠶᠠᠭᠤᠮᠠ ᠵᠢᠭᠠᠬᠤ ᠭᠡᠨᠡ᠃ ᠲᠡᠷᠡ ᠨᠢ ᠪᠠᠰᠠ ᠬᠥᠭᠡᠷᠦᠬᠦᠨ᠃
— ᠣᠳᠣ ᠠᠪᠴᠢᠷᠠᠬᠤ ᠯᠠ ᠁
— ᠲᠡᠢᠮᠦ ᠠ᠋᠂ ᠡᠨᠡ ᠬᠡᠳᠦᠨ ᠮᠣᠷᠢᠳ ᠢ᠋ᠶ᠋ᠠᠨ ᠠᠪᠠᠴᠢᠭᠠᠳ ᠲᠠᠢᠰᠢ ᠪᠠᠨ ᠶᠠᠪᠤᠨᠠ᠃ ᠡᠬᠡᠨᠡᠷ ᠢ᠋ᠶ᠋ᠡᠨ ᠠᠪᠴᠢᠷᠠᠵᠤ ᠡᠷᠦᠬᠡ ᠭᠡᠷ ᠢ᠋ᠶ᠋ᠡᠨ ᠪᠤᠰᠬᠠᠨᠠ᠃ ᠲᠡᠷᠡ ᠪᠣᠯ ᠮᠢᠨᠦ ᠡᠬᠢᠨ ᠦ᠌ ᠠᠯᠬᠤᠮ᠃
— ᠳᠠᠷᠠᠭᠠᠬᠢ ᠨᠢ?
— ᠡᠴᠢᠭᠡ ᠶ᠋ᠢᠨ ᠵᠠᠬᠢᠷᠴᠤ ᠪᠠᠢᠭᠰᠠᠨ ᠤᠯᠤᠰ ᠭᠡᠷ ᠢ᠋ ᠲᠡᠭᠦᠨ ᠦ᠌ ᠲᠤᠭ ᠰᠦᠯᠳᠡ ᠶ᠋ᠢᠨ ᠳᠣᠣᠷᠠ ᠨᠢᠭᠡᠳᠬᠡᠬᠦ᠃ ᠡᠨᠡ ᠪᠣᠯ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠤ᠋ᠨ ᠬᠦᠦ ᠶ᠋ᠢᠨ ᠡᠭᠦᠷᠭᠡ᠃ ᠳᠠᠢᠴᠢᠨ ᠨᠥᠬᠥᠳ ᠢ᠋ᠶ᠋ᠡᠷ ᠴᠡᠷᠢᠭ ᠪᠠᠢᠭᠤᠯᠵᠤ ᠲᠠᠷᠭᠤᠲᠠᠢ ᠬᠢᠷᠢᠯᠲᠤᠭ ᠤ᠋ᠨ ᠲᠠᠷᠢᠬᠢᠨ ᠳᠡᠭᠡᠷᠡ ᠴᠠᠬᠢᠭᠤᠷ ᠬᠠᠭᠠᠯᠬᠤ! ᠭᠡᠳ ᠲᠡᠮᠦᠵᠢᠨ ᠣᠭᠯᠣ ᠦᠰᠦᠷᠦᠨ ᠪᠣᠰᠴᠤ ᠵᠡᠭᠦᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠡᠯᠡᠮᠡ ᠶ᠋ᠢᠨ ᠭᠡᠷ ᠢ᠋ ᠠᠳᠬᠤᠨ ᠨᠥᠭᠦᠭᠡ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠡᠯᠡᠮᠡ ᠪᠡᠨ ᠳᠤᠲᠠᠭᠤ ᠰᠤᠭᠤᠯᠵᠤ ᠲᠡᠰᠬᠢᠲᠡᠯᠡ ᠬᠤᠢ ᠳ᠋ᠤᠨᠢ ᠬᠠᠭᠠᠭᠠᠳ ᠨᠢᠳᠤᠷᠭᠠ ᠪᠠᠨ ᠴᠢᠩᠭᠠ ᠠᠳᠬᠤᠵᠤ ᠳᠡᠭᠡᠭᠰᠢ ᠡᠷᠭᠦᠨ᠄
— ᠡᠨᠡ ᠪᠣᠯ ᠲᠠᠩᠭᠠᠷᠢᠭ! ᠭᠡᠯᠡ᠃
ᠲᠡᠭᠦᠨ ᠦ᠌ ᠬᠠᠷᠠᠴᠠ ᠶᠡᠬᠡ ᠯᠡ ᠰᠢᠷᠦᠭᠦᠨ ᠠᠭᠠᠳ ᠵᠣᠷᠪᠣᠭᠣᠷ ᠣᠨᠢᠭᠠᠷ ᠨᠢᠳᠦ ᠨᠢ ᠬᠠᠷᠢᠶᠠᠴᠠᠢ ᠶ᠋ᠢᠨ ᠳᠠᠯᠢ ᠠᠳᠠᠯᠢ ᠠᠲᠤᠷᠢᠭᠰᠠᠨ ᠬᠥᠮᠥᠰᠬᠡ ᠳᠣᠣᠷᠠ ᠪᠠᠨ ᠭᠢᠯᠠᠯᠵᠠᠨ ᠬᠡᠦᠬᠡᠳ ᠦ᠋ᠨ ᠪᠤᠯᠪᠠᠷᠠᠢ ᠪᠣᠮᠪᠣᠭᠣᠷ ᠬᠠᠴᠠᠷ ᠨᠢ ᠵᠠᠭᠤᠭᠰᠠᠨ ᠲᠦᠭᠦᠰᠢ ᠯᠦ᠍ᠭᠡ ᠭᠦᠷᠡᠯᠵᠡᠬᠦ ᠨᠢ ᠬᠦᠳᠡᠷ ᠡᠷᠡ ᠮᠡᠲᠦ ᠶᠡᠬᠡ ᠯᠡ ᠰᠦᠷᠯᠢᠭ ᠠᠵᠢ᠃
ᠪᠣᠭᠣᠷᠴᠢ ᠰᠦᠷᠳᠡᠨ ᠪᠢᠰᠢᠷᠡᠵᠦ ᠡᠪᠦᠳᠦᠭ ᠰᠥᠭᠥᠳᠦᠨ᠄
— ᠴᠢᠨᠦ ᠲᠥᠷᠥ ᠶ᠋ᠢᠨ ᠰᠦᠯᠳᠡ ᠳᠣᠣᠷᠠ ᠴᠢᠮᠠᠲᠤ ᠬᠦᠴᠦ ᠪᠡᠨ ᠡᠷᠭᠦᠬᠦ ᠶ᠋ᠢ ᠪᠢ ᠪᠠᠰᠠ ᠠᠨᠳᠠᠭᠠᠢᠯᠠᠶᠠ ᠭᠡᠬᠦ ᠳ᠋ᠦ᠍ ᠲᠡᠮᠦᠵᠢᠨ ᠭᠠᠷ ᠠ᠋ᠴᠠ ᠨᠢ ᠥᠭᠡᠳᠡ ᠲᠠᠲᠠᠵᠤ ᠪᠣᠰᠬᠠᠭᠠᠳ ᠬᠣᠶᠠᠷ ᠵᠠᠯᠠᠭᠤ ᠥᠭᠡᠳᠡ ᠥᠭᠡᠳᠡ ᠡᠴᠡ ᠪᠡᠨ ᠬᠠᠷᠢᠯᠴᠠᠨ ᠵᠡᠭᠦᠨ ᠭᠠᠷ ᠢ᠋ᠶ᠋ᠠᠷ ᠲᠠᠰᠢᠶᠠ ᠲᠤᠯᠤᠨ᠂ ᠪᠠᠷᠠᠭᠤᠨ ᠭᠠᠷ ᠢ᠋ᠶ᠋ᠠᠨ ᠵᠥᠷᠢᠭᠦᠯᠵᠦ ᠠᠳᠬᠤᠨ ᠲᠩᠷᠢ ᠥᠭᠡᠳᠡ ᠡᠷᠭᠦᠭᠡᠳ᠄《ᠲᠠᠩᠭᠠᠷᠢᠭ! ᠲᠠᠩᠭᠠᠷᠢᠭ! ᠲᠠᠩᠭᠠᠷᠢᠭ!》 ᠭᠡᠮᠡᠨ ᠬᠠᠳᠠ ᠴᠤᠤᠷᠢᠶᠠᠳᠠᠲᠠᠯᠠ ᠬᠠᠰᠬᠢᠷᠪᠠ᠃
ᠬᠣᠶᠠᠷ ᠵᠠᠯᠠᠭᠤ ᠶᠡᠬᠡ ᠪᠣᠳᠣᠯ ᠳ᠋ᠤ᠌ ᠣᠷᠣᠭᠰᠠᠨ ᠶᠠᠩᠵᠤᠲᠠᠢ ᠬᠠᠳᠠᠨ ᠠ᠋ᠴᠠ ᠪᠠᠭᠤᠵᠤ᠂ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠭᠠᠳ ᠢᠰᠭᠢᠷᠴᠤ ᠮᠣᠷᠢᠳ ᠢ᠋ᠶ᠋ᠠᠨ ᠬᠥᠭᠡᠭᠡᠨ ᠬᠠᠲᠠᠷᠢᠭᠤᠯᠤᠯᠠ᠃ ᠨᠡᠯᠢᠶᠡᠳ ᠴᠦ᠍ ᠬᠣᠯᠠ ᠶᠠᠪᠤᠴᠢᠬᠠᠭᠰᠠᠨ ᠪᠥᠭᠡᠳ ᠦᠳᠡ ᠶ᠋ᠢᠨ ᠬᠠᠯᠠᠭᠤᠨ ᠴᠤ᠌ ᠪᠣᠯᠤᠯᠠ᠃ ᠲᠡᠮᠦᠵᠢᠨ᠄
— ᠪᠣᠭᠣᠷᠴᠢ ᠠ᠋᠂ ᠬᠣᠶᠠᠭᠤᠯᠠ ᠰᠡᠭᠦᠳᠡᠷ ᠭᠠᠵᠠᠷ ᠪᠠᠷᠠᠳᠠᠵᠤ ᠬᠡᠳᠦᠨ ᠮᠣᠷᠢᠳ ᠢ᠋ᠶ᠋ᠠᠨ ᠬᠣᠷᠭᠤᠭᠠᠭᠠᠳ ᠵᠢᠭᠠᠬᠠᠨ ᠨᠣᠢᠷ ᠠᠪᠬᠤ ᠤᠤ? ᠭᠡᠪᠡᠯ᠄
— ᠲᠡᠭᠡᠪᠡᠯ ᠴᠦ᠍ ᠳᠡᠭᠡᠷᠡ ᠭᠡᠵᠦ ᠪᠣᠭᠤᠷᠴᠢ ᠬᠡᠯᠡᠯᠡ᠃
— ᠲᠡᠷᠡ ᠬᠣᠶᠠᠷ ᠬᠠᠲᠠᠲᠠᠢ ᠠᠷᠤ ᠬᠤᠰᠢᠭᠤᠨ ᠳ᠋ᠤ᠌ ᠣᠴᠢᠵᠤ ᠮᠣᠷᠢᠳ ᠢ᠋ᠶ᠋ᠠᠨ ᠬᠣᠷᠭᠣᠭᠠᠭᠠᠳ ᠪᠣᠭᠣᠳᠠᠭ ᠤ᠋ᠨ ᠢ᠋ᠶ᠋ᠠᠨ ᠦᠯᠡᠳᠡᠭᠳᠡᠯ ᠢ᠋ ᠢᠳᠡᠵᠦ᠂ ᠴᠤᠯᠪᠤᠭᠤᠷ ᠢ᠋ᠶ᠋ᠠᠨ ᠠᠳᠬᠤᠵᠤ ᠠᠷᠤ ᠵᠣ ᠪᠠᠨ ᠨᠡᠢᠯᠡᠭᠦᠯᠦᠨ ᠪᠡᠶᠡ ᠪᠡᠶᠡ ᠪᠡᠨ ᠨᠠᠯᠠᠨ ᠨᠣᠢᠷᠰᠤᠯᠠ᠃ ᠦᠳᠡ ᠶ᠋ᠢᠨ ᠬᠠᠯᠠᠭᠤᠨ ᠥᠩᠭᠡᠷᠡᠵᠦ ᠣᠷᠣᠢ ᠶ᠋ᠢᠨ ᠰᠡᠷᠢᠭᠦᠨ ᠣᠷᠣᠬᠤ ᠶ᠋ᠢᠨ ᠰᠠᠴᠠᠭᠤ ᠲᠡᠷᠡ ᠬᠣᠶᠠᠷ ᠵᠠᠮ ᠳ᠋ᠠᠭᠠᠨ ᠭᠠᠷᠤᠯᠠ᠃ ᠨᠠᠷᠠ ᠵᠢᠷᠭᠠᠬᠤ ᠰᠠᠴᠠᠭᠤ ᠰᠦᠷᠡᠬᠡᠢ ᠡᠯᠪᠡᠭ ᠤᠰᠤ ᠲᠠᠢ ᠭᠣᠣᠯ ᠳᠡᠭᠡᠷᠡ ᠢᠷᠡᠬᠦ ᠳ᠋ᠦ᠍《ᠬᠠᠷᠠᠵᠠ ᠶ᠋ᠢᠨ ᠭᠣᠣᠯ》 ᠭᠡᠵᠦ ᠪᠣᠭᠤᠷᠴᠢ ᠬᠡᠯᠡᠪᠡ᠃ ᠬᠣᠶᠠᠭᠤᠯᠠ ᠡᠨᠳᠡ ᠪᠠᠭᠤᠵᠤ ᠬᠤᠪᠴᠠᠰᠤ ᠬᠤᠨᠠᠷ ᠢ᠋ᠶ᠋ᠠᠨ ᠳᠠᠢᠴᠢᠨ ᠭᠣᠣᠯ ᠤ᠋ᠨ ᠤᠰᠤᠨ ᠳ᠋ᠤ᠌ ᠣᠷᠣᠵᠤ ᠭᠬᠢᠷ ᠬᠥᠯᠥᠰᠥ ᠪᠡᠨ ᠬᠥᠩᠭᠡᠯᠡᠯᠡ᠃ ᠴᠠᠮᠴᠠ ᠥᠮᠥᠳᠥ ᠪᠡᠨ ᠬᠦᠷᠲᠡᠯᠡ ᠤᠬᠢᠶᠠᠵᠤ ᠵᠢᠭᠠᠬᠠᠨ ᠡᠪᠡᠷᠡᠭᠡᠭᠡᠳ ᠡᠮᠦᠰᠴᠢᠬᠡᠯᠡ᠃
— ᠦᠳᠡ ᠶ᠋ᠢᠨ ᠬᠠᠯᠠᠭᠤᠨ ᠳ᠋ᠤ᠌ ᠯᠠ ᠣᠷᠣᠵᠤ ᠪᠠᠢᠪᠠᠯ ᠲᠠᠭᠠᠷᠠᠬᠤ ᠪᠠᠢᠵᠠᠢ᠃ ᠭᠡᠬᠦ ᠳ᠋ᠡᠭᠡᠨ ᠶᠠᠭᠠᠬᠢᠬᠤᠪ᠂ ᠨᠥᠬᠥᠭᠡᠳ ᠰᠡᠷᠢᠭᠦᠴᠡᠵᠡᠭᠡᠶᠠ ᠭᠡᠯᠴᠡᠨ ᠬᠣᠶᠠᠭᠤᠯᠠ ᠢᠨᠢᠶᠡᠯᠳᠦᠪᠡ᠃ ᠦᠳᠡᠰᠢ ᠶ᠋ᠢᠨ ᠪᠦᠷᠦᠢ ᠶ᠋ᠢ ᠭᠣᠣᠯ ᠳᠡᠭᠡᠷᠡ ᠥᠩᠭᠡᠷᠡᠭᠡᠳ ᠬᠥᠳᠡᠯᠪᠡ᠃ ᠰᠥᠨᠢ ᠱᠣᠭᠰᠢᠭᠤᠯᠵᠤ ᠦᠷᠭᠡᠯᠡᠬᠦ ᠭᠠᠵᠠᠷ ᠨᠢ ᠦᠷᠭᠡᠯᠡᠭᠡᠳ ᠦᠦᠷ ᠴᠠᠢᠭᠠᠳ ᠢᠷᠡᠯᠡ᠂ ᠨᠠᠷᠠ ᠭᠠᠷᠬᠤ ᠨᠢ᠃ ᠪᠣᠭᠤᠷᠴᠢ᠄
— ᠬᠦᠷᠦᠭᠡᠳ ᠢᠷᠡᠯᠡ ᠳᠠ᠃ ᠡᠨᠡ ᠱᠣᠪᠬᠣ ᠥᠨᠳᠥᠷ ᠦ᠋ᠨ ᠤᠷᠢᠳᠤᠭᠤᠷ ᠳᠠᠪᠠᠭᠠᠳ ᠯᠠ ᠣᠷᠣᠴᠢᠬᠠᠨᠠ ᠭᠡᠬᠦ ᠳ᠋ᠦ᠍ ᠲᠡᠮᠦᠵᠢᠨ᠄
— ᠰᠠᠢᠨ ᠨᠥᠬᠥᠷ ᠴᠢᠨᠦ ᠠᠴᠢ ᠪᠠᠷ ᠬᠡᠳᠦᠨ ᠮᠣᠷᠢᠳ ᠢ᠋ᠶ᠋ᠠᠨ ᠳᠡᠭᠡᠷᠡᠮᠴᠢᠳ ᠦ᠋ᠨ ᠭᠠᠷ ᠠ᠋ᠴᠠ ᠰᠠᠯᠭᠠᠵᠤ ᠠᠪᠤᠯᠠ᠃ ᠴᠢ ᠦᠭᠡᠢ ᠪᠣᠯ ᠪᠢ ᠨᠢᠭᠡ ᠴᠦ᠍ ᠮᠣᠷᠢ ᠦᠭᠡᠢ ᠬᠣᠴᠣᠷᠬᠤ ᠪᠠᠢᠯᠠ᠃ ᠴᠢ ᠬᠡᠳᠦ ᠶ᠋ᠢ ᠨᠢ ᠠᠪᠬᠤ ᠪᠣᠢ?
— ᠶᠠᠭᠠᠬᠢᠯᠠ ᠭᠡᠵᠦ ᠳᠡ᠃ ᠨᠢᠭᠡ ᠴᠦ᠍ ᠮᠣᠷᠢ ᠠᠪᠬᠤ ᠦᠭᠡᠢ᠃ ᠶᠠᠳᠠᠷᠠᠭᠰᠠᠨ ᠰᠠᠢᠨ ᠨᠥᠬᠥᠷ ᠲᠦ᠍ ᠲᠤᠰᠠᠯᠠᠶᠠ ᠭᠡᠰᠡᠨ ᠡᠴᠡ ᠪᠢᠰᠢ ᠪᠢ ᠣᠯᠵᠠ ᠬᠠᠢᠵᠤ ᠶᠠᠪᠤᠭᠠ ᠦᠭᠡᠢ᠃ ᠮᠢᠨᠦ ᠡᠴᠢᠭᠡ ᠶ᠋ᠢᠨ ᠬᠤᠷᠢᠶᠠᠭᠰᠠᠨ ᠵᠥᠭᠡᠭᠡᠭᠰᠡᠨ ᠬᠥᠷᠥᠩᠭᠡ ᠬᠦᠷᠦᠯᠴᠡᠭᠡ ᠲᠡᠢ᠃ ᠪᠢ ᠪᠣᠯ ᠨᠠᠬᠤ ᠪᠠᠶᠠᠨ ᠤ᠋ ᠭᠠᠭᠴᠠ ᠬᠦᠦ ᠰᠢᠦ ᠳᠡ ᠭᠡᠯᠡ᠃
ᠲᠡᠮᠦᠵᠢᠨ ᠲᠦᠳᠡᠯ ᠦᠭᠡᠢ ᠬᠥᠲᠥᠯ ᠳᠡᠭᠡᠷᠡ ᠭᠠᠷᠲᠠᠯᠠ ᠬᠡᠰᠡᠭ ᠪᠦᠯᠦᠭ ᠠᠢᠯ ᠤ᠋ᠨ ᠪᠠᠷᠠ ᠬᠠᠷᠠᠭᠳᠠᠬᠤ ᠳ᠋ᠤ᠌ ᠪᠣᠭᠤᠷᠴᠢ᠄
— ᠮᠠᠨᠠᠢᠬᠢᠨ ᠭᠡᠪᠡ᠃ ᠶᠡᠬᠡ ᠣᠯᠠᠨ ᠮᠠᠯ ᠲᠠᠢ ᠨᠦᠰᠡᠷ ᠠᠢᠯ ᠠᠵᠢ᠃