ᠬᠥᠯᠥᠭ ᠪᠠᠭᠠᠲᠤᠷ ᠪᠤᠭᠤᠷᠴᠢ - ᠪ᠂ ᠦᠯᠵᠡᠢᠰᠦ᠋ᠷᠦᠩ <ᠲᠡᠷᠢᠭᠦᠨ ᠪᠦᠯᠦᠭ - ᠵᠢᠷᠭᠤᠭᠠ> Хүлэг баатар буурч - Б. Өлзийсүрэн <Тэргүүн бүлэг-6>
87ᠬᠣᠷᠸᠠ ᠲᠠᠢ ᠤᠴᠠᠷᠠᠨ ᠲᠠᠨᠢᠯᠴᠠᠵᠤ ᠪᠠᠶᠠᠷ ᠭᠤᠨᠢᠭ ᠠᠮᠰᠠᠭᠰᠠᠨ ᠲᠡᠷᠢᠭᠦᠨ ᠪᠦᠯᠦᠭ
ᠵᠢᠷᠭᠤᠭᠠ᠂ ᠵᠣᠪᠠᠭᠰᠠᠨ ᠴᠠᠭ ᠤ᠋ᠨ ᠨᠥᠬᠥᠷ ᠵᠢᠩᠬᠢᠨᠢ ᠬᠠᠨᠢ᠂ᠵᠤᠯᠠᠵᠤ ᠲᠠᠷᠭᠤᠯᠠᠭᠰᠠᠨ ᠮᠣᠷᠢ ᠵᠢᠩᠬᠢᠨᠢ ᠤᠨᠤᠭᠠ
ᠨᠠᠬᠤ ᠶ᠋ᠢᠨ ᠬᠢ ᠶᠢᠰᠦᠨ ᠠᠵᠢᠷᠭᠠ ᠠᠳᠤᠭᠤ ᠲᠠᠢ ᠪᠠᠢᠵᠤ᠂ ᠰᠠᠶᠢᠬᠠᠨ ᠵᠦᠷᠬᠢᠨ ᠦ᠌ ᠬᠢᠨ ᠡᠴᠡ ᠠᠪᠴᠢᠷᠠᠭᠰᠠᠨ ᠪᠣᠷᠣ ᠠᠵᠢᠷᠭᠠᠨ ᠳ᠋ᠠᠭᠠᠨ ᠲᠠᠪᠤᠨ ᠭᠡᠭᠦᠦ ᠨᠡᠢᠯᠡᠭᠦᠯᠵᠦ ᠲᠠᠯᠪᠢᠭᠠᠳ ᠨᠠᠢ᠍ᠮᠠᠨ ᠭᠡᠭᠦᠦ ᠲᠡᠢ ᠨᠢᠭᠡ ᠰᠦᠷᠦᠭ ᠪᠣᠯᠭᠠᠪᠠ᠃ ᠬᠡᠳᠦᠨ ᠦᠷᠢᠶᠡ ᠮᠣᠷᠢᠳ ᠢᠵᠢᠯᠢᠳᠦᠭᠦᠯᠵᠦ ᠲᠠᠯᠪᠢᠭᠰᠠᠨ ᠢ᠋ᠶ᠋ᠠᠷ ᠠᠷᠪᠠᠨ ᠠᠵᠢᠷᠭᠠ ᠠᠳᠤᠭᠤ ᠲᠠᠢ ᠪᠣᠯᠵᠠᠢ᠃ ᠲᠠᠪᠤᠨ ᠭᠡᠭᠦᠦ ᠪᠠᠢᠳᠠᠰᠤ ᠪᠠᠨ ᠥᠭᠡᠷᠡ ᠠᠵᠢᠷᠭᠠᠨ ᠳ᠋ᠤ᠌ ᠭᠢᠰᠬᠢᠭᠦᠯᠬᠦ ᠦᠭᠡᠢ ᠶ᠋ᠢᠨ ᠲᠤᠯᠠᠳᠠ ᠬᠣᠨᠢ ᠮᠠᠯ ᠤ᠋ᠨ ᠬᠡᠦᠬᠡᠳ ᠪᠠᠭᠠᠴᠤᠳ ᠲᠤ᠌ ᠤᠨᠤᠭᠠ ᠪᠣᠯᠭᠠᠨ ᠦᠯᠡᠳᠡᠭᠡᠵᠦ᠂ ᠰᠣᠢᠵᠤ ᠪᠠᠢᠭᠠᠳ ᠰᠢᠨᠡ ᠠᠵᠢᠷᠭᠠᠨ ᠳ᠋ᠤ᠌ ᠨᠡᠢᠯᠡᠭᠦᠯᠦᠭᠰᠡᠨ ᠳ᠋ᠦ᠍ ᠲᠡᠷᠡ ᠨᠢ ᠬᠤᠷᠢᠶᠠᠭᠠᠳ ᠠᠪᠤᠭᠰᠠᠨ ᠪᠠᠢᠨᠠ᠃ ᠡᠳᠡᠨᠡᠢᠬᠢ ᠬᠣᠨᠢ ᠮᠠᠯ ᠤ᠋ᠨ ᠨᠡᠯᠢᠶᠡᠳ ᠬᠡᠳᠦᠨ ᠪᠦᠯᠢ ᠠᠢᠯ ᠲᠠᠢ᠂ ᠮᠠᠯ ᠣᠯᠠᠨ ᠤᠴᠢᠷ ᠪᠦᠭᠦᠳᠡ ᠶ᠋ᠢ ᠨᠢᠭᠡ ᠳᠣᠣᠷᠠ ᠬᠤᠷᠢᠶᠠᠬᠤ ᠠᠷᠭᠠ ᠦᠭᠡᠢ᠂ ᠠᠢᠯ ᠤ᠋ᠳ ᠲᠠᠷᠬᠠᠭᠠᠵᠤ ᠮᠠᠯᠯᠠᠭᠤᠯᠳᠠᠭ᠃ ᠠᠳᠤᠭᠤ ᠭᠡᠬᠦ ᠳ᠋ᠦ᠍ ᠯᠡ ᠳᠥᠷᠪᠡᠨ ᠠᠵᠢᠷᠭᠠ ᠶ᠋ᠢ ᠨᠢ ᠥᠭᠡᠷᠡ ᠭᠠᠵᠠᠷ ᠬᠥᠮᠦᠨ ᠮᠠᠯᠯᠠᠳᠠᠭ᠃ ᠬᠠᠷᠢᠨ ᠲᠠᠪᠤᠨ ᠠᠵᠢᠷᠭᠠ ᠠᠳᠤᠭᠤ ᠶ᠋ᠢ ᠭᠠᠳᠠᠭᠤᠷ ᠢ᠋ᠶ᠋ᠠᠨ ᠪᠠᠢᠯᠭᠠᠵᠤ ᠰᠦ ᠰᠠᠭᠠᠮᠠ ᠶ᠋ᠢ ᠨᠢ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠬᠡᠷᠡᠭᠯᠡᠬᠦ ᠠᠵᠤᠭᠤ᠃
ᠪᠣᠭᠣᠷᠴᠢ ᠵᠤᠨ ᠤ᠋ ᠰᠥᠨᠢ ᠰᠥᠨᠢ ᠬᠠᠭᠠᠰᠯᠠᠨ ᠪᠣᠰᠴᠤ ᠲᠠᠪᠤᠨ ᠠᠵᠢᠷᠭᠠ ᠠᠳᠤᠭᠤ ᠪᠠᠨ ᠱᠠᠩᠳᠠ ᠶ᠋ᠢᠨ ᠵᠡᠭᠦᠨ ᠡᠮᠦᠨᠡᠬᠢ ᠲᠠᠯᠠ ᠳ᠋ᠤ᠌ ᠭᠠᠷᠭᠠᠵᠤ᠂ ᠲᠠᠲᠠᠭᠰᠠᠨ ᠵᠠᠯᠠᠨ ᠳ᠋ᠠᠭᠠᠨ ᠤᠨᠠᠭᠠ ᠪᠠᠨ ᠪᠠᠷᠢᠵᠤ ᠤᠶᠠᠭᠠᠳ ᠨᠥᠮᠥᠷᠭᠡ ᠪᠡᠨ ᠨᠥᠮᠥᠷᠵᠦ ᠬᠡᠭᠡᠷᠡ ᠤᠨᠲᠠᠨᠠ᠃ ᠲᠡᠭᠡᠭᠡᠳ ᠥᠷᠯᠥᠭᠡ ᠨᠠᠷᠠᠨ ᠭᠠᠷᠬᠤ ᠰᠠᠴᠠᠭᠤ ᠰᠡᠷᠡᠵᠦ ᠭᠡᠭᠦᠦ ᠪᠡᠨ ᠰᠠᠭᠠᠵᠤ ᠬᠦᠬᠦᠷ ᠳᠦᠭᠦᠷᠡᠩ ᠰᠠᠭᠠᠮᠠ ᠠᠪᠴᠤ ᠭᠡᠷ ᠲᠡᠭᠡᠨ ᠢᠷᠡᠳᠡᠭ ᠪᠣᠯᠠᠢ᠃ ᠡᠨᠡ ᠠᠵᠢᠯ ᠳ᠋ᠠᠭᠠᠨ ᠣᠷᠣᠭᠠᠳ ᠪᠠᠢᠲᠠᠯᠠ ᠪᠠᠷᠠᠭᠤᠨ ᠬᠣᠢᠨᠠ ᠠ᠋ᠴᠠ ᠲᠠᠰᠤᠷᠬᠠᠢ ᠡᠩᠭᠡᠷᠯᠡᠨ ᠨᠢᠭᠡᠨ ᠮᠣᠷᠢᠲᠠᠨ ᠰᠠᠵᠢᠯᠠᠭᠤᠯᠤᠨ ᠢᠷᠡᠵᠦ ᠶᠠᠪᠤᠨᠠ᠃ ᠣᠢᠷᠠᠳᠬᠤ ᠲᠣᠰᠤᠮ ᠨᠤᠲᠤᠭ ᠤᠰᠤᠨ ᠤ᠋ ᠪᠤᠰᠤ ᠦᠯᠦ ᠲᠠᠨᠢᠬᠤ ᠬᠣᠯᠠ ᠶ᠋ᠢᠨ ᠬᠥᠮᠦᠨ ᠪᠣᠯᠬᠤ ᠨᠢ ᠢᠯᠭᠠᠷᠠᠨ ᠶᠠᠭᠤᠮᠠ ᠪᠦᠬᠦᠨ ᠨᠢ ᠲᠣᠳᠣᠷᠠᠨ ᠨᠤᠮᠤ ᠰᠠᠭᠠᠳᠠᠭ᠂ ᠵᠠᠷ ᠵᠡᠪᠰᠡᠭ ᠤᠨᠵᠢᠵᠤ ᠰᠠᠨᠵᠢᠵᠤ ᠦᠵᠡᠭᠳᠡᠨᠡ᠃ ᠬᠦᠷᠦᠭᠡᠳ ᠢᠷᠡᠯᠡ᠃ ᠥᠪᠡᠷᠦᠨ ᠬᠢᠨᠢ ᠠᠳᠠᠯᠢ ᠵᠢᠭᠠᠬᠠᠨ ᠵᠠᠯᠠᠭᠤ ᠬᠦᠦ ᠠᠵᠢ᠃ ᠲᠡᠷᠡ ᠪᠡᠷ ᠬᠦᠷᠴᠦ ᠢᠷᠡᠭᠡᠳ᠄
— ᠠᠮᠤᠷ ᠠᠮᠤᠭᠤᠯᠠᠩ ᠰᠠᠭᠤᠵᠤ ᠪᠠᠢᠨᠠ ᠤᠤ? ᠠᠳᠤᠭᠤ ᠮᠠᠯ ᠲᠠᠷᠭᠤᠨ ᠲᠠᠪᠠᠲᠠᠢ ᠤᠤ? ᠰᠠᠭᠠᠯᠢ ᠰᠦ ᠠᠷᠪᠢᠨ ᠤᠤ? ᠰᠠᠪᠠ ᠰᠠᠭᠤᠯᠠᠭᠠ ᠳᠦᠭᠦᠷᠡᠩ ᠤᠤ? ᠭᠡᠵᠦ ᠮᠡᠨᠳᠦᠯᠡᠬᠦᠢ ᠯᠤᠭᠠ ᠪᠣᠭᠣᠷᠴᠢ᠄
— ᠠᠮᠤᠭᠤᠯᠠᠩ᠂ ᠠᠮᠤᠭᠤᠯᠠᠩ᠁ ᠭᠡᠵᠦ ᠲᠣᠪᠴᠢᠬᠠᠨ ᠬᠠᠷᠢᠭᠤ ᠬᠡᠯᠡᠭᠡᠳ ᠰᠦᠷᠭᠦᠭᠦᠯᠵᠦ᠄
— ᠬᠡᠳᠦ ᠨᠤᠲᠤᠭ ᠬᠠᠮᠢᠭᠠ ᠪᠣᠢ? ᠬᠡᠨ ᠬᠥᠮᠦᠨ ᠦ᠌ ᠦᠷᠡ ᠪᠣᠢ? ᠠᠯᠢ ᠭᠠᠵᠠᠷ ᠢ᠋ ᠵᠣᠷᠢᠵᠤ ᠶᠠᠪᠤᠨᠠ ᠪᠣᠢ? ᠠᠯᠳᠠᠷ ᠨᠡᠷᠡ ᠬᠡᠨ ᠪᠣᠢ? ᠭᠡᠵᠦ ᠠᠰᠠᠭᠤᠪᠠ᠃
— ᠪᠢ ᠭᠡᠳᠡᠭ ᠬᠥᠮᠦᠨ ᠰᠡᠩᠭᠦᠮ ᠭᠣᠷᠣᠬᠠᠨ ᠤ᠋ ᠡᠬᠢ ᠵᠦᠷᠭᠢᠨ ᠦ᠌ ᠬᠥᠬᠡ ᠨᠠᠭᠤᠷ ᠲᠤ᠌ ᠨᠤᠲᠤᠭ ᠲᠠᠢ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠤ᠋ᠨ ᠬᠦᠦ ᠲᠡᠮᠦᠵᠢᠨ᠃ ᠨᠠᠢ᠍ᠮᠠᠨ ᠰᠢᠷᠭᠠ ᠠᠭᠲᠠ ᠪᠠᠨ ᠳᠡᠭᠡᠷᠡᠮᠴᠢᠨ ᠳ᠋ᠦ᠍ ᠬᠥᠭᠡᠭᠡᠯᠭᠡᠭᠡᠳ ᠠᠷᠤ ᠠ᠋ᠴᠠ ᠨᠢ ᠨᠡᠬᠡᠵᠦ ᠶᠠᠪᠤᠨᠠ ᠭᠡᠳ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠵᠤ ᠰᠠᠭᠤᠬᠤ ᠳ᠋ᠤ᠌ ᠨᠢ ᠪᠤᠭᠤᠷᠴᠢ ᠬᠠᠵᠠᠭᠤ ᠳ᠋ᠤᠨᠢ ᠣᠴᠢᠵᠤ ᠰᠠᠭᠤᠭᠠᠳ᠄
— ᠠ᠂ ᠲᠡᠷᠡ ᠨᠡᠬᠡᠵᠦ ᠶᠠᠪᠤᠭᠠ ᠮᠣᠷᠢᠳ ᠢ᠋ ᠴᠢᠨᠢ ᠥᠨᠥ ᠥᠷᠯᠥᠭᠡ ᠨᠠᠷᠠᠨ ᠭᠠᠷᠬᠤ ᠰᠠᠴᠠᠭᠤ ᠭᠤᠷᠪᠠᠨ ᠬᠥᠮᠦᠨ ᠬᠥᠭᠡᠭᠡᠭᠡᠳ ᠨᠠᠷᠠᠨ ᠰᠥᠷᠬᠦ ᠶᠠᠪᠤᠴᠢᠬᠠᠭᠰᠠᠨ᠃ ᠰᠢᠯᠢ ᠶ᠋ᠢ ᠨᠢ ᠳᠠᠷᠤᠵᠤ᠂ ᠮᠥᠷ ᠢ᠋ ᠨᠢ ᠮᠥᠰᠬᠢᠵᠦ ᠯᠡ ᠶᠠᠪᠤᠭᠠ ᠶᠤᠮ ᠪᠠᠢᠨᠠ ᠳᠠ᠃ ᠬᠣᠯᠠ ᠭᠠᠵᠠᠷ ᠮᠣᠩᠭᠢᠨᠠᠵᠤ ᠶᠠᠳᠠᠵᠤ ᠶᠠᠪᠤᠬᠤ ᠬᠡᠴᠡᠭᠦᠦ᠃ ᠡᠨᠳᠡ ᠵᠢᠭᠠᠬᠠᠨ ᠠᠢᠷᠠᠭ ᠤ᠋ᠨ ᠦᠯᠡᠳᠡᠭᠳᠡᠯ ᠪᠠᠢᠨᠠ᠃ ᠤᠤᠭᠤᠬᠤ ᠤᠤ?
— ᠤᠤᠭᠤᠶᠠ ᠭᠡᠵᠦ ᠲᠡᠮᠦᠵᠢᠨ ᠳᠤᠷᠠᠲᠠᠢᠶᠠ ᠬᠡᠯᠡᠵᠦ ᠵᠢᠵᠢᠭᠬᠡᠨ ᠲᠤᠯᠤᠮᠠᠨ ᠬᠦᠬᠦᠷ ᠡᠴᠡ ᠨᠢ《ᠭᠦᠳ᠂ ᠭᠦᠳ》 ᠵᠠᠯᠭᠢᠯᠠᠪᠠ᠃ ᠪᠤᠭᠤᠷᠴᠢ᠄
— ᠵᠠᠮ ᠳ᠋ᠠᠭᠠᠨ ᠠᠢᠯ ᠬᠤᠨᠠᠷ ᠢ᠋ᠶ᠋ᠠᠷ ᠣᠷᠣᠵᠤ ᠶᠠᠭᠤᠮᠠ ᠢᠳᠡᠵᠦ ᠤᠤᠭᠤᠵᠤ ᠶᠠᠪᠤᠭᠠ ᠤᠤ ᠳᠠ?
— ᠦᠭᠡᠢ ᠳᠡ᠃ ᠬᠡᠭᠡᠷᠡ ᠪᠡᠷ ᠭᠡᠷ ᠬᠢᠵᠦ᠂ ᠬᠡᠴᠡ ᠪᠡᠷ ᠳᠡᠷᠡ ᠬᠢᠵᠦ ᠯᠡ ᠶᠠᠪᠤᠨᠠ᠃ ᠭᠠᠭᠴᠠ ᠨᠢᠭᠡ ᠲᠠᠷᠪᠠᠭᠠ ᠮᠥᠨᠳᠥᠯ ᠱᠣᠭᠯᠠᠵᠤ ᠰᠢᠷᠠᠵᠤ ᠢᠳᠡᠭᠡᠳ᠂ ᠤᠰᠤ ᠤᠤᠭᠤᠵᠤ ᠭᠣᠣᠯ ᠵᠢᠭᠤᠵᠤ ᠶᠠᠪᠤᠨᠠ ᠳᠠ᠃ ᠲᠡᠷᠡ ᠪᠡᠷ ᠪᠤᠭᠤᠷᠴᠢ ᠶ᠋ᠢᠨ ᠥᠭᠭᠦᠭᠰᠡᠨ ᠵᠢᠭᠠᠬᠠᠨ ᠠᠭᠠᠷᠤᠤᠯ᠂ ᠬᠤᠷᠤᠳ ᠠ᠋ᠴᠠ ᠠᠪᠴᠤ ᠡᠪᠦᠷᠯᠡᠭᠡᠳ᠄
— ᠵᠠ ᠭᠢᠯᠠᠢᠯᠠ᠃ ᠰᠠᠢᠨ ᠨᠥᠬᠥᠷ ᠲᠦ᠍ ᠰᠠᠢᠨ ᠰᠠᠢᠬᠠᠨ ᠪᠦᠭᠦᠳᠡ ᠶ᠋ᠢ ᠢᠷᠥᠭᠡᠶᠡ ᠭᠡᠳ ᠬᠣᠯᠠ ᠶ᠋ᠢᠨ ᠭᠡᠢᠴᠢᠨ ᠢ᠋ ᠮᠣᠷᠳᠠᠬᠤ ᠭᠡᠲᠡᠯᠡ ᠪᠤᠭᠤᠷᠴᠢ᠄
— ᠮᠤᠩᠭᠢᠨᠠᠵᠦ ᠶᠠᠪᠤᠭᠠ ᠨᠥᠬᠥᠷ ᠲᠦ᠍ ᠲᠤᠰᠠᠯᠠᠶᠠ᠃ ᠮᠣᠷᠢ ᠴᠢᠨᠢ ᠭᠤᠨᠳᠠᠵᠤ ᠶᠠᠳᠠᠷᠠᠭᠰᠠᠨ ᠪᠠᠢᠨᠠ᠃ ᠡᠢᠮᠦ ᠤᠨᠤᠭᠠ ᠲᠠᠢ ᠶᠠᠪᠤᠵᠤ ᠪᠣᠯᠬᠤ ᠦᠭᠡᠢ᠃ ᠪᠢ ᠮᠣᠷᠢ ᠪᠠᠷᠢᠵᠤ ᠥᠭᠭᠦᠶᠡ ᠭᠡᠳ ᠠᠳᠤᠭᠤ ᠤᠷᠤᠭᠤ ᠣᠴᠢᠵᠤ ᠨᠢᠭᠡ ᠰᠠᠢᠬᠠᠨ ᠤᠷᠤᠭ ᠱᠤᠩᠬᠤᠯᠠᠨ ᠮᠣᠷᠢ ᠪᠠᠷᠢᠵᠤ ᠥᠭᠭᠦᠭᠡᠳ ᠪᠤᠭᠤᠷᠴᠢ᠄
— ᠰᠠᠶᠢᠬᠠᠨ ᠲᠦᠮᠡᠨ ᠲᠥᠪᠬᠥᠨ ᠦ᠌ ᠨᠠᠭᠠᠳᠤᠮ ᠳ᠋ᠤ᠌ ᠴᠡᠭᠡᠵᠢᠨ ᠳ᠋ᠦ᠍ ᠳᠠᠪᠬᠢᠭᠰᠠᠨ ᠮᠣᠷᠢ᠂ ᠳᠠᠢᠰᠤᠨ ᠠ᠋ᠴᠠ ᠵᠢᠭᠤᠲᠠᠬᠤ ᠳ᠋ᠤ᠌ ᠠᠪᠤᠭᠠᠳ ᠭᠠᠷᠴᠢᠬᠠᠨᠠ ᠭᠡᠵᠦ ᠬᠡᠯᠡᠯᠡ᠃ ᠲᠡᠮᠦᠵᠢᠨ ᠮᠣᠷᠢᠨ ᠤ᠋ ᠲᠣᠯᠣᠭᠠᠢ ᠶ᠋ᠢ ᠢᠯᠢᠵᠦ ᠵᠥᠭᠡᠯᠡᠨ ᠤᠷᠤᠭᠤᠯ ᠳ᠋ᠤᠨᠢ ᠬᠣᠰᠢᠭᠤ ᠪᠠᠨ ᠬᠦᠷᠭᠡᠵᠦ᠄ ᠬᠦᠯᠦᠭ ᠪᠠᠭᠠᠲᠤᠷ ᠡᠳ᠋ᠯᠡᠭᠦᠰᠢᠲᠡᠢ ᠬᠦᠴᠦᠲᠦ ᠰᠠᠢᠬᠠᠨ ᠬᠦᠯᠦᠭ ᠶᠦ᠍ᠭᠡᠨ ᠨᠠᠭᠠᠳᠤᠮ ᠤ᠋ᠨ ᠮᠠᠩᠯᠠᠢ ᠳ᠋ᠤ᠌ ᠬᠤᠷᠳᠤᠯᠠᠭᠰᠠᠨ ᠨᠠᠴᠢᠨ ᠱᠣᠩᠬᠣᠷ ᠠᠷᠭᠤᠮᠠᠭ ᠶᠤᠭᠠᠨ ᠵᠠᠮ ᠤ᠋ᠨ ᠬᠥᠮᠦᠨ ᠳ᠋ᠦ᠍ ᠪᠠᠷᠢᠵᠤ ᠥᠭᠭᠦᠭᠰᠡᠨ ᠵᠠᠩ ᠠᠭᠠᠯᠢ ᠳ᠋ᠤ᠌ ᠴᠢᠨᠢ ᠪᠢᠰᠢᠷᠡᠮᠦ ᠪᠢ ᠠᠴᠢ ᠲᠤᠰᠠ ᠶ᠋ᠢ ᠴᠢᠨᠢ ᠬᠠᠷᠢᠭᠤᠯᠬᠤ ᠪᠠᠨ ᠠᠯᠲᠠ ᠪᠡᠶᠡ ᠳ᠋ᠡᠭᠡᠨ ᠠᠨᠳᠠᠭᠠᠢᠯᠠᠨᠠᠮ ᠭᠡᠯᠡ᠃
ᠪᠤᠭᠤᠷᠴᠢ ᠮᠠᠰᠢᠳᠠ ᠶᠡᠬᠡ ᠪᠠᠶᠠᠷᠯᠠᠵᠤ᠂ ᠶᠡᠷᠦ ᠡᠴᠡ ᠪᠡᠨ ᠨᠥᠬᠥᠷ ᠦ᠋ᠨ ᠬᠠᠮᠲᠤ ᠶᠠᠪᠤᠵᠤ ᠲᠤᠰᠠᠯᠠᠶᠠ ᠭᠡᠳ ᠬᠤᠷᠳᠤᠨ ᠬᠣᠩᠭᠣᠷ ᠮᠣᠷᠢ ᠪᠠᠨ ᠪᠠᠷᠢᠵᠤ ᠤᠨᠤᠭᠠᠳ ᠬᠦᠬᠦᠷ ᠰᠠᠪᠠ᠂ ᠵᠡᠯᠡ ᠭᠠᠳᠠᠰᠤ ᠪᠠᠨ ᠬᠤᠷᠢᠶᠠᠵᠤ ᠴᠢᠯᠠᠭᠤ ᠪᠠᠷ ᠳᠠᠷᠤᠵᠤ ᠰᠢᠷᠣᠢ ᠪᠠᠷ ᠪᠤᠯᠠᠭᠠᠳ ᠨᠠᠷᠠᠨ ᠤᠷᠭᠤᠬᠤ ᠵᠦᠭ ᠢ᠋ ᠪᠠᠷᠢᠮᠵᠢᠶᠠᠯᠠᠨ ᠬᠠᠲᠠᠷᠢᠭᠤᠯᠤᠯᠠ᠃ ᠤᠳᠠᠯ ᠦᠭᠡᠢ ᠭᠣᠣᠯ ᠤ᠋ᠨ ᠣᠰᠤᠨᠠ ᠣᠴᠢᠵᠤ ᠮᠣᠷᠢᠳ ᠢ᠋ᠶ᠋ᠠᠨ ᠤᠰᠤᠯᠠᠬᠤ ᠳ᠋ᠤᠨᠢ ᠲᠡᠮᠦᠵᠢᠨ᠄
— ᠠᠯᠢ ᠶᠠᠮᠠᠷ ᠨᠤᠲᠤᠭ ᠤᠰᠤᠨ ᠳ᠋ᠤ᠌ ᠶᠠᠪᠤᠨᠠ ᠪᠣᠢ ᠴᠢ? ᠭᠡᠵᠦ ᠠᠰᠠᠭᠤᠯᠠ᠃ ᠪᠤᠭᠤᠷᠴᠢ᠄
— ᠮᠠᠨᠠᠢᠬᠢᠨ ᠢ᠋ ᠠᠷᠣᠯᠠᠳ ᠤ᠋ᠨ ᠬᠢᠨ ᠭᠡᠳᠡᠭ᠃ ᠪᠢᠳᠡᠨ ᠦ᠌ ᠮᠣᠷᠢ ᠤᠰᠤᠯᠠᠵᠤ ᠪᠠᠢᠭᠠ ᠡᠨᠡ ᠭᠣᠣᠯ ᠢ᠋ ᠳᠤᠮᠳᠠ ᠪᠦᠷᠢᠳᠦ ᠶ᠋ᠢᠨ ᠭᠣᠣᠯ ᠭᠡᠳᠡᠭ᠃ ᠡᠨᠡ ᠬᠣᠢᠲᠤ ᠬᠥᠨᠳᠡᠢ ᠶ᠋ᠢ ᠥᠭᠰᠥᠪᠡᠯ ᠳᠥᠴᠢ ᠭᠠᠷᠤᠢ ᠮᠣᠳᠣ ᠭᠠᠵᠠᠷ ᠶᠠᠪᠤᠭᠠᠳ ᠡᠬᠢᠨ ᠪᠦᠷᠢᠳᠦ ᠳ᠋ᠦ᠍ ᠣᠴᠢᠨᠠ᠃ ᠭᠤᠷᠪᠠᠨ ᠡᠢᠮᠦ ᠵᠢᠵᠢᠭ ᠪᠦᠷᠢᠳᠦ ᠡᠴᠡ ᠤᠰᠤ ᠣᠨᠳᠣᠷᠴᠤ ᠡᠬᠢᠨ᠂ ᠳᠤᠮᠳᠠ᠂ ᠠᠳᠠᠭ ᠪᠦᠷᠢᠳᠦ ᠬᠣᠭᠣᠷᠣᠨᠳᠣ ᠪᠠᠨ ᠵᠠᠯᠭᠠᠯᠳᠤᠨ ᠬᠡᠷᠦᠯᠦᠨ ᠮᠥᠷᠡᠨ ᠳ᠋ᠦ᠍ ᠴᠢᠳᠬᠤᠳᠠᠭ᠃
— ᠠ᠂ ᠮᠥᠨ ᠮᠥᠨ᠃ ᠬᠡᠷᠦᠯᠦᠨ ᠣᠢᠷᠠᠬᠠᠨ ᠪᠠᠢᠬᠤ ᠨᠢ ᠠ᠋᠃ ᠪᠢ ᠪᠠᠭᠠ ᠳ᠋ᠠᠭᠠᠨ ᠠᠪᠤ ᠲᠠᠢ ᠪᠠᠨ ᠬᠡᠷᠦᠯᠦᠨ ᠮᠥᠷᠡᠨ ᠢ᠋ ᠭᠠᠲᠤᠯᠵᠤ ᠬᠣᠩᠭᠢᠷᠠᠳ ᠠᠢᠮᠠᠭ ᠲᠤ᠌ ᠣᠴᠢᠵᠤ ᠪᠠᠢᠭᠰᠠᠨ᠃ ᠶᠡᠬᠡ ᠯᠡ ᠮᠥᠷᠡᠨ ᠪᠠᠢᠭᠰᠠᠨ ᠰᠠᠨᠠᠭᠳᠠᠨᠠ᠃ ᠬᠠᠷᠢᠨ ᠣᠳᠣ ᠦᠵᠡᠪᠡᠯ ᠶᠠᠮᠠᠷ ᠪᠣᠯ? ᠭᠡᠵᠦ ᠥᠪᠡᠷ ᠡᠴᠡ ᠪᠡᠨ ᠠᠰᠠᠭᠤᠬᠤ ᠰᠢᠭ᠋ ᠪᠣᠳᠣᠯᠭᠠᠰᠢᠷᠠᠭᠰᠠᠨ ᠢ᠋ᠶ᠋ᠠᠨ᠄ ᠲᠠᠨ ᠤ᠋ ᠨᠤᠲᠤᠭ ᠰᠣᠨᠢᠨ ᠰᠠᠢᠬᠠᠨ ᠭᠠᠵᠠᠷ ᠶᠤᠮ ᠠ᠋᠃ ᠮᠠᠨ ᠤ᠋ ᠲᠡᠨᠳᠡ ᠪᠣᠯ ᠠᠭᠤᠯᠠ᠂ ᠠᠭᠤᠯᠠᠨ ᠠ᠋ᠴᠠ ᠠᠭᠤᠯᠠ᠂ ᠪᠠᠰᠠ ᠴᠠᠭᠠᠨᠠ ᠨᠢ ᠠᠭᠤᠯᠠ᠃ ᠡᠢᠮᠦ ᠠᠭᠤᠵᠢᠮ ᠭᠠᠵᠠᠷ ᠨᠤᠲᠤᠭ ᠬᠠᠷᠠᠭᠳᠠᠬᠤ ᠨᠢ ᠬᠣᠪᠣᠷ ᠳᠠ᠃ ᠡᠨᠡ ᠣᠯᠠᠨ ᠱᠣᠪᠣᠭᠣᠷ ᠵᠢᠭᠠᠬᠠᠨ ᠠᠭᠤᠯᠠ ᠤ᠋ᠳ ᠪᠦᠭᠦᠳᠡ ᠯᠡ ᠨᠡᠷᠡ ᠲᠡᠢ ᠴᠣᠯᠠ ᠲᠠᠢ ᠪᠠᠢᠬᠠ ᠳᠠ ᠭᠡᠬᠦ ᠳ᠋ᠦ᠍ ᠪᠤᠭᠤᠷᠴᠢ ᠶᠡᠬᠡ ᠪᠠᠷᠳᠠᠮᠰᠠᠭ᠄
— ᠪᠠᠢᠯᠭᠦᠢ ᠶᠠᠭᠠᠬᠢᠬᠤᠪ᠂ ᠰᠣᠨᠣᠰᠤᠨᠠ ᠤᠤ? ᠴᠢ᠃
— ᠰᠣᠨᠣᠰᠤᠶᠠ᠃
— ᠵᠠ ᠪᠢ ᠬᠣᠢᠮᠣᠷ ᠠ᠋ᠴᠠ ᠨᠢ ᠡᠬᠢᠯᠡᠵᠦ ᠁ ᠭᠡᠵᠦ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠵᠢᠭᠠᠨ᠄
— ᠲᠤᠭᠤᠯᠭᠠ ᠠᠭᠤᠯᠠ᠂ ᠳᠤᠬᠤ ᠮᠠᠩᠨᠠᠢ᠂ ᠵᠡᠭᠦᠨ ᠲᠠᠰᠢ ᠪᠠᠨ ᠨᠠᠷᠠ ᠵᠥᠪ ᠲᠣᠭᠣᠷᠢᠭᠤᠯᠤᠨ ᠬᠠᠶᠠᠭᠠ ᠳᠡᠯᠭᠡᠷ ᠬᠠᠨ᠂ ᠬᠠᠷᠠᠵᠠ ᠶ᠋ᠢᠨ ᠬᠠᠷᠠᠵᠠᠨ ᠥᠨᠳᠥᠷ᠂ ᠬᠣᠰᠢᠨ ᠬᠠᠨ᠂ ᠬᠤᠰᠤᠲᠤ ᠰᠢᠲᠦᠭᠡᠨ᠂ ᠤᠷᠤᠭᠰᠢᠯᠠᠭᠠᠳ ᠶᠣᠯᠣ ᠶ᠋ᠢᠨ ᠥᠨᠳᠥᠷ᠂ ᠶᠣᠪᠰᠢᠯ ᠤᠯᠠᠭᠠᠨ ᠬᠠᠳᠠ᠂ ᠭᠤᠷᠪᠠᠨ ᠬᠠᠷᠠᠭᠠᠨᠠᠲᠠᠢ᠂ ᠵᠢᠰᠦᠨ ᠬᠦᠮᠦᠨᠲᠡᠢ᠂ ᠲᠠᠯᠠ ᠶ᠋ᠢᠨ ᠬᠥᠨᠳᠡᠯᠡᠨ᠂ ᠳᠠᠨᠵᠠᠭᠠᠷ ᠬᠠᠷᠠ ᠠᠭᠤᠯᠠᠰ᠂ ᠡᠨᠡᠦᠬᠡᠨ ᠤᠷᠢᠳᠤ ᠬᠠᠷᠠᠭᠳᠠᠵᠤ ᠪᠠᠢᠭᠠ ᠨᠣᠶᠠᠨ ᠬᠠᠲᠤᠨ᠂ ᠨᠣᠮᠣᠬᠠᠨ ᠪᠣᠷᠣ ᠣᠪᠣᠭᠠᠲᠤ᠂ ᠪᠠᠷᠠᠭᠤᠨᠰᠢᠯᠠᠭᠠᠳ ᠳᠠᠪᠬᠤᠷ᠂ ᠰᠡᠷᠪᠡᠩ᠂ ᠳᠠᠯᠠᠨ ᠪᠤᠯᠳᠤᠷᠤᠤ᠂ ᠪᠡᠷᠬᠡ ᠶ᠋ᠢᠨ ᠬᠠᠷᠠ ᠠᠭᠤᠯᠠᠰ᠂ ᠬᠠᠪᠴᠢᠭ᠂ ᠪᠤᠶᠠᠨᠲᠤ ᠶ᠋ᠢᠨ ᠳᠠᠪᠠᠭᠠ᠂ ᠬᠤᠲᠤᠭ ᠠᠭᠤᠯᠠ᠂ ᠬᠤᠰᠤᠲᠤ ᠮᠢᠩᠭᠠᠨ ᠲᠡᠷᠡ ᠬᠠᠷᠠᠭᠳᠠᠨᠠ᠃ ᠢᠩᠭᠢᠭᠡᠳ ᠬᠣᠯᠠ ᠶ᠋ᠢᠨ ᠠᠭᠤᠯᠠᠰ ᠳᠠᠭᠤᠰᠴᠤ ᠪᠠᠢᠭᠠ ᠶᠤᠮ ᠳᠠ ᠭᠡᠯᠡ᠃
ᠲᠡᠮᠦᠵᠢᠨ ᠠᠮᠠᠨ ᠳ᠋ᠠᠭᠠᠨ ᠶᠠᠭᠤᠮᠠ ᠬᠡᠯᠡᠵᠦ ᠪᠠᠢᠬᠤ ᠰᠢᠭ᠋ ᠤᠷᠤᠭᠤᠯ ᠬᠥᠳᠡᠯᠭᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠄
— ᠴᠢᠨᠦ ᠨᠡᠷᠡᠯᠡᠭᠰᠡᠨ ᠠᠭᠤᠯᠠ ᠣᠪᠣᠭᠠ ᠶ᠋ᠢ ᠪᠢ ᠨᠡᠷᠡᠯᠡᠵᠦ ᠦᠵᠡᠬᠦ ᠤᠤ? ᠲᠣᠭᠲᠠᠭᠠᠵᠤ ᠤᠤ? ᠦᠭᠡᠢ ᠤᠤ? ᠦᠵᠡᠶᠡ ᠭᠡᠬᠦ ᠳ᠋ᠦ᠍ᠨᠢ ᠪᠣᠭᠣᠷᠴᠢ᠄
–– ᠲᠡᠭᠡ ᠯᠡ ᠳᠡ᠃ ᠴᠢᠳᠠᠬᠤ ᠦᠭᠡᠢ ᠪᠣᠯ ᠶᠠᠭᠠᠬᠢᠬᠤ ᠪᠣᠢ!
— ᠳᠤᠬᠤᠨ ᠳᠡᠭᠡᠷᠡ ᠭᠤᠷᠪᠠ ᠨᠢᠰᠠᠯᠠᠭᠠᠷᠠᠢ᠃
— ᠲᠡᠭᠡᠪᠡᠯ ᠴᠢ ᠵᠥᠪ ᠲᠣᠭᠠᠯᠠᠵᠤ ᠴᠢᠳᠠᠪᠠᠯ ᠮᠢᠨᠦ ᠳᠤᠬᠤᠨ ᠳᠡᠭᠡᠷᠡ ᠭᠤᠷᠪᠠ ᠨᠢᠰᠠᠯᠠᠭᠠᠷᠠᠢ᠃
— ᠶᠠᠭᠠᠬᠢᠵᠤ ᠪᠠᠢᠭᠠ ᠨᠢ ᠲᠡᠷᠡ ᠪᠣᠢ?
— ᠮᠤᠷᠤᠢ ᠢᠵᠢᠯᠢ ᠥᠭᠭᠦᠭᠡ ᠠᠪᠤᠭᠠ ᠲᠠᠢ ᠪᠠᠢᠬᠤ ᠶᠣᠰᠣ ᠲᠠᠢ ᠪᠢᠵᠡ ᠳᠡ ᠭᠡᠵᠦ ᠪᠤᠭᠤᠷᠴᠢ ᠰᠦᠷᠭᠦᠬᠦ ᠳ᠋ᠦ᠍ᠨᠢ《ᠪᠣᠯᠤᠨᠠ᠂ ᠪᠣᠯᠤᠨᠠ》 ᠭᠡᠵᠦ ᠲᠡᠮᠦᠵᠢᠨ ᠬᠡᠯᠡᠭᠡᠳ᠄
— ᠵᠠ᠂ ᠲᠡᠭᠡᠪᠡᠯ ᠪᠢ ᠨᠡᠷᠡᠯᠡᠭᠡᠳ ᠦᠵᠡᠶᠡ ᠭᠡᠳ ᠪᠤᠭᠤᠷᠴᠢ ᠶ᠋ᠢᠨ ᠠᠳᠠᠯᠢ ᠤᠮᠠᠷᠠ ᠵᠦᠭ ᠵᠢᠭᠠᠵᠤ᠄
— ᠲᠤᠭᠤᠯᠭᠠ ᠠᠭᠤᠯᠠᠰ᠂ ᠳᠤᠬᠤ ᠮᠠᠩᠨᠠᠢ᠂ ᠬᠤᠲᠤᠭ ᠠᠭᠤᠯᠠ᠂ ᠬᠤᠰᠤᠲᠤ ᠮᠢᠩᠭᠠᠨ᠂ ᠭᠡᠵᠦ ᠨᠠᠷᠠ ᠵᠥᠪ ᠲᠣᠭᠣᠷᠢᠭᠤᠯᠵᠤ ᠶᠠᠭ ᠵᠥᠪ ᠨᠡᠷᠡᠯᠡᠪᠡ᠃ ᠪᠤᠭᠤᠷᠴᠢ《ᠶᠠᠮᠠᠷ ᠶᠡᠬᠡ ᠣᠢ ᠲᠠᠢ ᠶᠤᠮ ᠪᠣᠢ?》 ᠭᠡᠵᠦ ᠭᠠᠢᠬᠠᠨ᠄
— ᠵᠠ ᠵᠠ᠂ ᠵᠥᠪ ᠨᠠᠷᠠᠯᠠᠯᠠ᠃ ᠭᠠᠭᠴᠠᠬᠠᠨ《ᠨᠣᠶᠠᠨ ᠬᠠᠲᠤᠨ᠂ ᠨᠣᠮᠣᠬᠠᠨ ᠪᠣᠷᠣ ᠣᠪᠣᠭᠠᠲᠤ》 ᠭᠡᠬᠦ ᠶ᠋ᠢ《ᠨᠣᠮᠣᠬᠠᠨ ᠪᠤᠭᠤᠷᠴᠢ ᠵᠠᠩᠵᠤᠨ》 ᠭᠡᠰᠡᠨ᠃ ᠲᠡᠷᠡ ᠪᠣᠯ ᠲᠣᠭᠲᠠᠭᠠᠭᠠ ᠦᠭᠡᠢ ᠳ᠋ᠡᠭᠡᠨ ᠪᠢᠰᠢ᠂ ᠲᠣᠭᠯᠠᠭᠠᠮ ᠪᠣᠯᠭᠠᠵᠤ ᠲᠡᠭᠡᠵᠦ ᠬᠡᠯᠡᠵᠦ ᠪᠠᠢᠭᠠ ᠶᠤᠮ᠃ ᠲᠡᠷᠡ ᠢᠷᠦᠭᠡᠯ ᠢ᠋ᠶ᠋ᠡᠷ ᠪᠢ ᠵᠠᠩᠵᠤᠨ ᠪᠣᠯᠲᠤᠭᠠᠢ᠃ ᠨᠢᠰᠠᠯᠠ᠂ ᠨᠢᠰᠠᠯᠠ᠃ ᠠᠢᠬᠤᠪᠲᠤᠷ ᠴᠡᠭᠡᠵᠢ ᠲᠡᠢ ᠪᠠᠢᠨᠠ ᠠ᠋ ᠴᠢ ᠭᠡᠬᠦ ᠳ᠋ᠦ᠍ ᠲᠡᠮᠦᠵᠢᠨ ᠢᠨᠢᠶᠡᠵᠦ᠄
— ᠮᠥᠩᠬᠡ ᠲᠩᠷᠢ ᠶ᠋ᠢᠨ ᠳᠣᠣᠷᠠ ᠴᠢ ᠵᠠᠩᠵᠤᠨ ᠪᠣᠯᠲᠤᠭᠠᠢ ᠭᠡᠳ ᠳᠤᠬᠤ ᠤᠷᠤᠭᠤ ᠨᠢ ᠨᠢᠰᠠᠯᠠᠬᠤ ᠳᠦᠷᠢ ᠦᠵᠡᠭᠦᠯᠬᠦ ᠳ᠋ᠦ᠍ ᠪᠤᠭᠤᠷᠴᠢ ᠨᠢᠳᠦ ᠪᠡᠨ ᠲᠠᠰᠤ ᠠᠨᠢᠬᠤ ᠳ᠋ᠤᠨᠢ ᠳᠤᠬᠤᠨ ᠳ᠋ᠤᠨᠢ ᠬᠤᠷᠤᠭᠤ ᠬᠦᠷᠬᠦ ᠲᠡᠳᠦᠢ ᠢᠯᠢᠭᠡᠳ᠄
— ᠵᠠ᠂ ᠨᠢᠰᠠᠯᠠᠴᠢᠬᠠᠯᠠ᠂ ᠨᠢᠰᠠᠯᠠᠴᠢᠬᠠᠯᠠ ᠭᠡᠪᠡ᠃
ᠬᠣᠶᠠᠷ ᠵᠠᠯᠠᠭᠤ ᠬᠤᠸᠠ ᠬᠥᠪᠡᠭᠡ ᠬᠢᠵᠢᠨ ᠳᠠᠪᠠᠵᠤ ᠶᠡᠬᠡ ᠭᠠᠵᠠᠷ ᠲᠤᠭᠤᠯᠠᠯᠠ᠃ ᠬᠠᠷᠠᠵᠠ ᠶ᠋ᠢᠨ ᠭᠣᠣᠯ ᠭᠠᠷᠴᠤ ᠵᠡᠭᠦᠨ ᠬᠠᠷᠠᠭᠠᠨᠠᠲᠠᠢ ᠶ᠋ᠢᠨ ᠠᠷᠤ ᠶ᠋ᠢᠨ ᠶᠡᠬᠡ ᠬᠣᠭᠣᠯᠠᠢ ᠤᠷᠤᠭᠤ ᠣᠷᠣᠵᠤ ᠶᠠᠪᠤᠲᠠᠯᠠ ᠵᠢᠭᠠᠬᠠᠨ ᠭᠣᠷᠣᠬᠠ ᠤᠷᠤᠰᠴᠤ ᠪᠠᠢᠨᠠ᠃ ᠬᠦᠢᠲᠡᠨ ᠤᠰᠤᠨ ᠠ᠋ᠴᠠ ᠨᠢ ᠬᠡᠳᠦ ᠪᠠᠯᠭᠤᠭᠠᠳ ᠪᠤᠭᠤᠷᠴᠢ᠄
— ᠶᠠᠭᠤᠮᠠ ᠢᠳᠡᠮᠡᠷ ᠯᠡ ᠪᠠᠢᠨᠠ᠃ ᠥᠯᠥᠰᠬᠦ ᠨᠢ ᠭᠡᠪᠡᠰᠦ ᠲᠡᠮᠦᠵᠢᠨ᠄
–– ᠲᠡᠷᠡ ᠪᠠᠷᠠᠭᠤᠨ ᠤᠷᠢᠳᠤ ᠬᠣᠭᠣᠯᠠ ᠴᠤ᠌ ᠪᠠᠢᠨᠠ ᠯᠠ ᠳᠠ᠃ ᠣᠢᠷᠠᠲᠤᠭᠤᠯᠬᠤ ᠦᠭᠡᠢ ᠪᠠᠢᠬᠠ ᠯᠠ ᠳᠠ ᠭᠡᠵᠦ ᠪᠠᠬᠠᠨ ᠪᠡᠯᠴᠢᠵᠦ ᠶᠠᠪᠤᠭᠠ ᠴᠠᠭᠠᠨ ᠵᠡᠭᠡᠷᠡ ᠤᠷᠤᠭᠤ ᠵᠢᠭᠠᠪᠠ᠃ ᠪᠣᠭᠤᠷᠴᠢ᠄
— ᠦ᠂ ᠨᠡᠭᠡᠷᠡᠨ ᠲᠡᠢᠮᠦ ᠯᠡ ᠳᠡ᠃ ᠪᠢ ᠲᠠᠭᠤᠭᠠᠳ ᠢᠷᠡᠶᠡ᠃
— ᠲᠠᠭᠤᠭᠠᠳ ᠠ᠋? ᠭᠡᠵᠦ ᠲᠡᠮᠦᠵᠢᠨ ᠭᠠᠢᠬᠠᠰᠬᠢᠨ ᠢᠨᠢᠶᠡᠭᠡᠳ᠄
— ᠵᠠ ᠶᠠᠭᠠᠬᠢᠬᠤᠪ᠂ ᠦᠵᠡᠭᠡᠳ ᠠᠯᠳᠠᠶᠠ᠃ ᠬᠣᠶᠠᠭᠤᠯᠠ ᠮᠣᠷᠳᠠᠬᠤ ᠤᠤ?
— ᠦᠭᠡᠢ᠂ ᠴᠢ ᠡᠨᠡ ᠬᠠᠪᠢ ᠳ᠋ᠠᠭᠠᠨ ᠪᠠᠢᠵᠤ ᠪᠠᠢ᠃ ᠪᠢ ᠬᠥᠭᠡᠭᠡᠭᠡᠳ ᠢᠷᠡᠨᠡ ᠠ᠋ ᠭᠡᠳ ᠲᠡᠮᠦᠵᠢᠨ ᠦ᠌ ᠮᠣᠷᠢ ᠶ᠋ᠢ ᠬᠥᠲᠥᠯᠦᠭᠡᠳ ᠪᠠᠷᠤᠭ ᠪᠤᠴᠠᠭᠠᠳ ᠶᠠᠪᠤᠴᠢᠬᠠᠯᠠ᠃ ᠲᠡᠭᠡᠭᠰᠡᠨ ᠢ᠋ᠶ᠋ᠡᠨ ᠭᠥᠷᠥᠭᠡᠰᠦ ᠤᠷᠤᠭᠤ ᠡᠷᠭᠢᠵᠦ ᠣᠢᠷᠠᠲᠤᠲᠠᠯᠠ ᠵᠡᠷᠯᠢᠭ ᠰᠣᠷᠭᠣᠭ ᠠᠮᠢᠲᠠᠳ ᠡᠰᠢ ᠲᠡᠰᠢ ᠦᠰᠦᠴᠢᠨ ᠨᠠᠭᠠᠳᠴᠤ ᠪᠣᠭᠤᠷᠴᠢ ᠪᠠᠷ ᠲᠣᠭᠯᠠᠭᠠᠮ ᠲᠣᠬᠣᠭᠤ ᠬᠢᠵᠦ ᠪᠠᠢᠨᠠ ᠤᠤ? ᠭᠡᠯᠲᠡᠢ᠃ ᠲᠡᠭᠡᠲᠡᠯᠡ ᠬᠡᠰᠡᠭ ᠵᠡᠭᠡᠷᠡ ᠶᠡᠬᠡ ᠰᠦᠷᠦᠭ ᠡᠴᠡ ᠲᠠᠰᠤᠷᠠᠭᠠᠳ ᠨᠠᠰᠢ ᠳᠠᠪᠬᠢᠨ ᠪᠣᠭᠤᠷᠴᠢ ᠶ᠋ᠢ ᠴᠠᠭᠠᠰᠢ ᠶᠠᠪᠤᠬᠤ ᠳᠣᠳᠣᠮ ᠨᠠᠭᠠᠰᠢ ᠪᠠᠨ ᠡᠷᠭᠢᠵᠦ ᠴᠠᠭᠠᠰᠢ ᠨᠠᠭᠠᠰᠢ ᠪᠠᠨ ᠬᠡᠷᠦᠵᠦ ᠬᠡᠷᠦᠯᠳᠦᠭᠰᠡᠭᠡᠷ ᠰᠢᠭᠤᠳᠬᠠᠨ ᠲᠡᠮᠦᠵᠢᠨ ᠤᠷᠤᠭᠤ ᠬᠦᠷᠦᠭᠡᠳ ᠢᠷᠡᠪᠡ᠃ ᠲᠡᠷᠡ ᠪᠡᠷ ᠥᠭᠡᠳᠡ ᠡᠴᠡ ᠨᠢ ᠨᠤᠮᠤ ᠪᠠᠨ ᠪᠡᠯᠡᠳᠬᠡᠵᠦ ᠪᠠᠭᠠᠪᠲᠤᠷ ᠨᠢᠭᠡ ᠵᠡᠭᠡᠷᠡ ᠤᠷᠤᠭᠤ ᠰᠤᠮᠤ ᠪᠠᠨ ᠲᠠᠯᠪᠢᠬᠤ ᠳ᠋ᠤ᠌ ᠭᠥᠷᠥᠭᠡᠰᠦ ᠴᠦ᠍ ᠲᠡᠢᠴᠢᠯᠡᠭᠡᠳ ᠤᠨᠠᠯᠠ᠃ ᠭᠥᠷᠥᠭᠡᠰᠦ ᠨᠦ᠍ᠭᠦᠳ ᠨᠢᠭᠡ ᠦᠷᠭᠦᠵᠦ ᠰᠣᠴᠢᠨ ᠴᠠᠭᠠᠰᠢ ᠴᠣᠢᠯᠤᠭᠰᠠᠨ ᠢ᠋ᠶ᠋ᠠᠨ ᠡᠷᠭᠢᠵᠦ ᠬᠠᠷᠠᠭᠠᠳ ᠲᠡᠷᠭᠡᠢᠯᠳᠤᠨ ᠵᠣᠭᠰᠣᠪᠠ᠃ ᠲᠡᠮᠦᠵᠢᠨ ᠠᠩᠨᠠᠭᠰᠠᠨ ᠠᠩ ᠢ᠋ᠶ᠋ᠠᠨ ᠠᠪᠬᠤ ᠪᠠᠷ ᠭᠦᠶᠦᠲᠡᠯᠡ ᠵᠡᠭᠡᠷᠡ ᠨᠦ᠍ᠭᠦᠳ ᠪᠦᠷ ᠬᠥᠨᠳᠡᠯᠡᠨ ᠳᠠᠰᠢ ᠳᠠᠪᠬᠢᠯᠳᠤᠨ᠂ ᠡᠨᠡ ᠵᠠᠭᠤᠷᠠ ᠪᠣᠭᠤᠷᠴᠢ ᠳᠠᠪᠬᠢᠨ ᠢᠷᠡᠵᠦ ᠬᠣᠶᠠᠭᠤᠯᠠ ᠬᠣᠭᠣᠯᠠ ᠲᠠᠢ ᠪᠣᠯᠤᠭᠰᠠᠨ ᠳ᠋ᠠᠭᠠᠨ ᠪᠡᠶᠡᠰᠦᠨ ᠴᠢᠯᠠᠭᠤ᠂ ᠠᠷᠭᠠᠯ ᠬᠣᠷᠭᠣᠯ ᠲᠡᠭᠦᠵᠦ ᠭᠠᠯ ᠨᠣᠴᠣᠭᠠᠨ ᠵᠡᠭᠡᠷᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠣᠶᠠᠷ ᠭᠤᠶᠠ ᠶ᠋ᠢ ᠬᠥᠰᠬᠥᠯᠡᠵᠦ ᠬᠣᠳᠣᠭᠣᠳᠣᠨ ᠳ᠋ᠤᠨᠢ ᠤᠯᠠᠢᠰᠤᠭᠰᠠᠨ ᠴᠢᠯᠠᠭᠤ ᠲᠠᠢ ᠬᠢᠵᠦ ᠭᠠᠳᠠᠨᠠ ᠠ᠋ᠴᠠ ᠨᠢ ᠪᠠᠭᠠ ᠵᠡᠷᠭᠡ ᠰᠢᠷᠠᠵᠤ ᠪᠣᠯᠭᠣᠭᠠᠳ ᠬᠣᠶᠠᠭᠤᠯᠠ ᠲᠤᠬᠠᠲᠠᠢᠬᠠᠨ ᠬᠣᠭᠣᠯᠠᠯᠠᠪᠠ᠃ ᠡᠨᠡ ᠵᠠᠭᠤᠷᠠ ᠦᠯᠡᠳᠡᠭᠰᠡᠨ ᠮᠢᠬᠠ ᠶ᠋ᠢ ᠨᠢ ᠤᠯᠠᠢᠰᠤᠭᠰᠠᠨ ᠴᠢᠯᠠᠭᠤᠨ ᠳᠡᠭᠡᠷᠡ ᠲᠠᠯᠪᠢᠵᠤ ᠡᠷᠭᠢᠭᠦᠯᠦᠨ ᠭᠠᠯ ᠨᠡᠮᠡᠵᠦ ᠰᠢᠷᠠᠵᠤ ᠪᠣᠯᠭᠣᠭᠠᠭᠠᠳ ᠰᠠᠶᠢᠬᠢ ᠬᠣᠳᠣᠭᠣᠳᠣᠨ ᠳ᠋ᠤᠨᠢ ᠬᠢᠵᠦ ᠴᠠᠭᠠᠰᠢ ᠠᠯᠤᠰ ᠤ᠋ᠨ ᠵᠠᠮ ᠳ᠋ᠠᠭᠠᠨ ᠬᠥᠳᠡᠯᠬᠦ ᠳ᠋ᠦ᠍ ᠡᠯᠳᠡᠪ ᠲᠣᠮᠣ ᠪᠠᠭᠠ ᠰᠢᠪᠠᠭᠤᠳ ᠵᠡᠭᠡᠷᠡ ᠶ᠋ᠢᠨ ᠵᠢᠭᠠᠬᠠᠨ ᠶᠠᠰᠤ᠂ ᠭᠡᠳᠡᠰᠦ᠂ ᠦᠯᠡᠳᠡᠭᠳᠡᠯ ᠳᠡᠭᠡᠷᠡ ᠨᠠᠢᠷᠯᠠᠬᠤ ᠪᠠᠷ ᠴᠤᠭᠯᠠᠷᠠᠪᠠ᠃ ᠬᠣᠶᠠᠷ ᠵᠠᠯᠠᠭᠤ ᠠᠩᠴᠢᠨ ᠠᠩ ᠤ᠋ᠨ ᠢ᠋ᠶ᠋ᠠᠨ ᠠᠷᠠᠰᠤ ᠶ᠋ᠢ ᠳᠡᠯᠭᠡᠨ ᠲᠣᠯᠣᠭᠠᠢ ᠶ᠋ᠢ ᠨᠢ ᠳᠡᠭᠡᠷᠡ ᠨᠢ ᠬᠣᠢᠰᠢ ᠬᠠᠷᠠᠭᠤᠯᠵᠤ ᠲᠠᠯᠪᠢᠭᠠᠳ ᠮᠣᠷᠳᠠᠪᠠ᠃ ᠲᠡᠮᠦᠵᠢᠨ ᠶᠡᠬᠡᠳᠡ ᠭᠠᠢᠬᠠᠵᠤ᠄
— ᠴᠢ ᠨᠡᠭᠡᠷᠡᠨ ᠵᠡᠭᠡᠷᠡ ᠲᠡᠢ ᠶᠠᠷᠢᠳᠠᠭ ᠶᠤᠮ ᠰᠢᠭ᠋ ᠨᠡᠭᠡᠷᠡᠨ ᠯᠡ ᠲᠠᠭᠤᠭᠠᠳ ᠢᠷᠡᠯᠡ᠂ ᠬᠠᠴᠢᠨ ᠶᠤᠮ ᠭᠡᠬᠦ ᠳ᠋ᠦ᠍ᠨᠢ ᠪᠤᠭᠤᠷᠴᠢ᠄
— ᠡᠨᠡ ᠴᠠᠭᠠᠨ ᠵᠡᠭᠡᠷᠡ ᠭᠡᠳᠡᠭ ᠴᠢᠨᠢ ᠶᠡᠬᠡ ᠬᠡᠷᠡᠭᠦᠯᠴᠢ ᠠᠮᠢᠲᠠᠨ᠃ ᠲᠠᠩᠳᠠ ᠳᠠᠢᠰᠤᠨ ᠤ᠋ ᠪᠠᠨ ᠤᠷᠢᠳᠤᠭᠤᠷ ᠬᠥᠨᠳᠡᠯᠡᠨ ᠬᠡᠷᠦᠵᠦ ᠭᠠᠷᠬᠤ ᠭᠡᠵᠦ ᠳᠠᠪᠬᠢᠳᠠᠭ ᠶᠤᠮ᠃ ᠲᠡᠭᠦᠨ ᠢ᠋ ᠨᠢ ᠡᠪᠲᠡᠢᠬᠡᠨ ᠠᠰᠢᠭᠯᠠᠵᠤ ᠪᠠᠢᠭᠠ ᠨᠢ ᠡᠨᠡ᠃
— ᠠᠯᠢᠪᠠ ᠶᠠᠭᠤᠮᠠᠨ ᠤ᠋ ᠠᠷᠭᠠ ᠶ᠋ᠢ ᠣᠯᠬᠤ ᠭᠡᠳᠡᠭ ᠡᠨᠡ ᠶᠦᠮ ᠪᠢᠵᠡ ᠳᠡ᠃ ᠠᠷᠠᠨᠰᠢᠨ ᠠ᠋ᠴᠠ ᠪᠠᠨ ᠪᠣᠯᠵᠤ ᠦᠬᠦᠯ ᠤᠷᠤᠭᠤ ᠢᠷᠡᠳᠡᠭ᠁ ᠮᠥᠨ ᠴᠦ᠍ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠠᠷᠠᠨᠰᠢᠨ ᠪᠠᠢᠳᠠᠭ ᠪᠠᠢᠨᠠ ᠰᠢᠦ ᠭᠡᠵᠦ《ᠴᠥᠬᠥ》 ᠭᠡᠳ ᠲᠡᠳᠡ ᠬᠤᠷᠳᠤᠯᠠᠪᠠ᠃