ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ- ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ᠂ᠭᠤᠷᠪᠠᠳᠤᠭᠠᠷ ᠪᠦᠯᠦᠭ 〔ᠠᠷᠪᠠᠨ ᠭᠤᠷᠪᠠ〕 Цаг төрийн үймээн – Д ᠂ Намдаг - Цаг төрийн үймээн ᠂ гуравдугаар бүлэг -13
146ᠠᠷᠠᠳ ᠤ᠋ᠨ ᠵᠢᠷᠤᠮᠲᠤ ᠴᠡᠷᠢᠭ ᠠᠯᠲᠠᠨ ᠳ᠋ᠤ᠌
ᠡᠨᠡ ᠪᠣᠯ ᠠᠯᠲᠠᠨ ᠬᠡᠮᠡᠬᠦ ᠭᠠᠵᠠᠷ ᠪᠠᠢᠯᠠ᠃ ᠠᠯᠳᠠᠷ ᠨᠡᠷᠡ ᠨᠢ ᠠᠯᠤᠰ ᠤ᠋ᠨ ᠠᠯᠤᠰ ᠲᠤ᠌ ᠴᠤᠤᠷᠢᠶᠠᠲᠤᠨ ᠠᠮᠢᠲᠠᠨ ᠬᠥᠮᠦᠨ ᠢ᠋ ᠳᠠᠭᠤᠳᠠᠬᠤ ᠪᠣᠯᠪᠠᠴᠤ᠂ ᠤᠷᠢᠳᠤ ᠠ᠋ᠴᠠ ᠪᠠᠨ ᠡᠯᠡᠰᠦᠷᠬᠡᠭ ᠵᠢᠯᠠᠭᠠ ᠪᠣᠯᠬᠤ ᠠ᠋ᠴᠠ ᠥᠭᠡᠷᠡ ᠶᠠᠭᠤᠮᠠ ᠦᠭᠡᠢ᠃ ᠵᠢᠯᠠᠭᠠ ᠤᠷᠤᠭᠤᠳᠠᠭᠤᠯᠤᠨ ᠪᠠᠷᠢᠭᠰᠠᠨ ᠣᠷᠣᠨ ᠰᠠᠭᠤᠴᠠ ᠨᠤᠭᠤᠳ ᠨᠢ ᠬᠠᠭᠠᠰ ᠳᠤᠲᠠᠭᠤ ᠪᠦᠷᠢᠶᠡᠰᠦ ᠲᠡᠢ ᠭᠡᠷ ᠦ᠋ᠳ ᠠᠵᠢ᠃ ᠤᠲᠤᠭᠠᠨ ᠳ᠋ᠤ᠌ ᠢᠳᠡᠭᠳᠡᠭᠰᠡᠨ ᠤᠷᠠᠩᠬᠠᠢ ᠴᠣᠭᠣᠷᠣᠬᠠᠶ ᠮᠠᠢᠬᠠᠨ ᠨᠤᠭᠤᠳ᠂ ᠵᠤᠤᠭᠠᠷ᠂ ᠣᠷᠣᠴᠠ ᠣᠪᠣᠬᠠᠢ ᠮᠡᠲᠦ ᠶ᠋ᠢᠨ ᠶᠠᠭᠤᠮᠠᠰ ᠪᠠᠢᠯᠠ᠃ ᠪᠦᠬᠦ ᠬᠣᠶᠠᠷ ᠵᠠᠭᠤᠭᠠᠳ ᠴᠡᠷᠢᠭ ᠦ᠋ᠨ ᠳᠣᠲᠣᠷᠠ ᠣᠯᠢᠭ ᠲᠠᠢ ᠬᠤᠪᠴᠠᠰᠤ ᠡᠮᠦᠰᠦᠭᠰᠡᠨ ᠨᠢ ᠲᠤᠩ ᠬᠣᠪᠣᠷ᠃ ᠡᠳᠡᠨ ᠦ᠌ ᠳᠤᠮᠳᠠ ᠪᠤᠷᠢᠶᠠᠳ᠂ ᠴᠠᠬᠠᠷ᠂ ᠯᠠᠮᠠ ᠡᠪᠦᠭᠡᠳ᠂ ᠴᠠᠷᠢᠨᠳᠣᠷᠵᠢ ᠶ᠋ᠢᠨ ᠨᠠᠰᠤᠨ ᠤ᠋ ᠬᠡᠦᠬᠡᠳ ᠬᠦᠷᠲᠡᠯᠡ ᠪᠠᠢᠨᠠ᠃ ᠵᠢᠭᠰᠠᠭᠠᠯ ᠤ᠋ᠨ ᠠᠷᠤ ᠠ᠋ᠴᠠ ᠬᠦᠷᠡᠩ ᠥᠩᠭᠡ ᠶ᠋ᠢᠨ ᠲᠣᠷᠭᠠᠨ ᠳᠠᠯᠢᠩᠪᠤᠤ ᠳᠡᠪᠡᠯ ᠲᠡᠢ ᠵᠠᠯᠠᠭᠤᠬᠠᠨ ᠡᠷᠡ ᠭᠦᠶᠦᠨ ᠢᠷᠡᠵᠦ: ᠨᠥᠬᠥᠳ ᠰᠠᠢᠨ ᠬᠣᠨᠣᠵᠠᠭᠠᠭᠰᠠᠨ ᠤᠤ ᠭᠡᠵᠦ ᠮᠡᠨᠳᠦᠯᠡᠭᠰᠡᠨ ᠬᠥᠮᠦᠨ ᠢ᠋ ᠲᠡᠷᠡ ᠭᠤᠷᠪᠠ ᠶ᠋ᠢᠨ ᠬᠡᠨ ᠨᠢ ᠴᠦ᠍ ᠲᠠᠨᠢᠬᠤ ᠦᠭᠡᠢ ᠪᠣᠯᠪᠠᠴᠤ ᠤᠷᠢᠳ ᠰᠥᠨᠢ ᠶ᠋ᠢᠨ ᠤᠭᠲᠤᠨ ᠠᠪᠴᠤ ᠮᠠᠢᠬᠠᠨ ᠳ᠋ᠤ᠌ ᠣᠷᠣᠭᠤᠯᠤᠭᠰᠠᠨ ᠬᠥᠮᠦᠨ ᠮᠥᠨ ᠭᠡᠵᠦ ᠲᠤᠰ ᠪᠦᠷᠢ ᠪᠡᠨ ᠲᠠᠭᠠᠪᠤᠷᠢᠯᠠᠨᠠ᠃ ᠨᠡᠭᠡᠷᠡᠨ ᠴᠦ᠍ ᠮᠥᠨ ᠪᠠᠢᠭᠰᠠᠨ ᠪᠥᠭᠡᠳ ᠪᠦᠬᠦ ᠠᠷᠠᠳ ᠤ᠋ᠨ ᠵᠢᠷᠤᠮᠲᠤ ᠴᠡᠷᠢᠭ ᠦ᠋ᠨ ᠨᠣᠮ ᠤ᠋ᠨ ᠪᠠᠭᠰᠢ《ᠺᠣᠮᠢᠰᠰᠠᠷ》 ᠴᠣᠢᠪᠠᠯᠰᠠᠩ ᠭᠡᠭᠴᠢ ᠲᠡᠷᠡ ᠪᠠᠢᠵᠠᠶ᠃
- ᠲᠠ ᠨᠠᠭᠠᠰᠢ ᠪᠠᠨ ᠢᠷᠡ ᠭᠡᠵᠦ ᠳᠠᠭᠠᠭᠤᠯᠤᠨ ᠶᠠᠪᠤᠵᠤ ᠨᠢᠭᠡ ᠭᠡᠷ ᠲᠦ᠍ ᠣᠷᠣᠭᠤᠯᠤᠨ ᠨᠡᠷᠡ ᠣᠪᠣᠭ᠂ ᠠᠢᠮᠠᠭ᠂ ᠬᠣᠰᠢᠭᠤ ᠲᠡᠳᠦᠢᠬᠡᠨ ᠢ᠋ ᠯᠠᠪᠯᠠᠨ ᠪᠢᠴᠢᠵᠦ ᠠᠪᠤᠭᠠᠨ ᠲᠡᠳᠡᠨ ᠢ᠋ ᠳᠠᠭᠠᠭᠤᠯᠤᠨ ᠭᠠᠷᠴᠤ ᠲᠣᠭᠣᠨᠣ ᠨᠢ ᠲᠣᠮᠣᠳᠠᠭᠰᠠᠨ ᠨᠡᠪᠰᠡᠭᠡᠷ ᠬᠠᠷᠠ ᠭᠡᠷ ᠲᠦ᠍ ᠣᠷᠣᠪᠠ᠃ ᠲᠡᠨᠳᠡ ᠬᠥᠯ ᠭᠢᠰᠬᠢᠬᠦ ᠵᠠᠢ ᠦᠭᠡᠢ᠂ ᠬᠥᠮᠦᠰ ᠴᠢᠬᠢᠴᠢᠡᠯᠳᠦᠨᠠ᠃ ᠭᠣᠯᠣᠮᠲᠠ ᠠ᠋ᠴᠠ ᠨᠢ ᠨᠣᠢᠲᠠᠨ ᠬᠤᠰᠤ ᠮᠣᠳᠣᠨ ᠤ᠋ ᠭᠠᠰᠢᠭᠤᠨ ᠬᠠᠷᠠ ᠤᠲᠤᠭᠠ ᠰᠠᠪᠰᠠᠵᠤ᠂ ᠨᠢᠭᠡ ᠲᠠᠯᠠ ᠶ᠋ᠢᠨ ᠬᠠᠶᠠᠭᠠᠨ ᠤ᠋ ᠬᠥᠮᠦᠨ᠂ ᠨᠥᠭᠦᠭᠡ ᠲᠠᠯᠠ ᠶ᠋ᠢᠨ ᠬᠢ ᠳ᠋ᠦ᠍ᠨᠢ ᠬᠠᠭᠠᠰ ᠬᠤᠭᠤᠰ ᠬᠠᠷᠠᠭᠳᠠᠨᠠ᠃ ᠡᠢᠮᠦ ᠪᠠᠢᠳᠠᠯ ᠲᠠᠢ ᠠᠵᠤ ᠲᠥᠷᠥᠵᠦ ᠰᠠᠭᠤᠭᠠ ᠬᠥᠮᠦᠰ ᠳᠤᠮᠳᠠ ᠥᠨᠥ ᠭᠤᠷᠪᠠ ᠶ᠋ᠢ ᠳᠠᠭᠠᠭᠤᠯᠤᠨ ᠣᠷᠣᠵᠤ ᠢᠷᠡᠭᠰᠡᠨ ᠴᠣᠢᠪᠠᠯᠰᠠᠩ:
- ᠳᠠᠮᠫᠢᠯ ᠭᠤᠸᠠᠢ ᠪᠠᠢᠨᠠ ᠤᠤ? ᠦᠭᠡᠢ ᠲᠠ ᠮᠢᠨᠢ ᠴᠢᠮᠡᠭᠡ ᠪᠡᠨ! ᠭᠡᠵᠦ ᠬᠠᠰᠬᠢᠷᠪᠠ᠃
ᠵᠡᠭᠦᠨ ᠬᠣᠢᠮᠤᠷ ᠠ᠋ᠴᠠ ᠨᠢᠭᠡ ᠬᠥᠮᠦᠨ ᠬᠠᠷᠢᠭᠤ ᠳᠤᠤᠭᠠᠷᠤᠨ ᠡᠭᠦᠯᠡ ᠮᠠᠨᠠᠨ ᠠ᠋ᠴᠠ ᠳᠡᠭᠡᠭᠰᠢ ᠠᠰᠠᠬᠤ ᠮᠡᠲᠦ ᠬᠦᠪᠦᠷᠡᠯᠳᠦᠨ ᠪᠣᠰᠤᠯᠠ᠃ ᠡᠨᠡ ᠬᠥᠮᠦᠨ ᠥᠷᠯᠥᠭᠡ ᠵᠢᠬᠡᠭᠦᠨ ᠵᠢᠪᠠᠷ ᠢ᠋ᠶ᠋ᠠᠷ ᠮᠠᠢᠬᠠᠨ ᠤ᠋ ᠡᠭᠦᠳᠡ ᠪᠡᠷ ᠱᠠᠭᠠᠢᠭᠰᠠᠨ ᠬᠥᠮᠦᠨ ᠮᠥᠨ᠃ ᠲᠣᠯᠣᠭᠠᠢ ᠪᠠᠨ ᠣᠨᠢᠨ ᠳ᠋ᠤ᠌ ᠲᠤᠯᠭᠠᠨ ᠪᠡᠶᠡ ᠨᠤᠮᠤᠯᠠᠨ ᠵᠣᠭᠰᠣᠵᠤ᠄
- ᠪᠢ ᠲᠠᠨ ᠳ᠋ᠤ᠌ ᠭᠤᠷᠪᠠᠨ ᠬᠥᠮᠦᠨ ᠠᠪᠴᠢᠷᠠᠯᠠ ᠭᠡᠬᠦ ᠳ᠋ᠦ᠍ ᠣᠷᠣᠭᠰᠢ ᠳᠥᠭᠥᠨ ᠠᠵᠢᠵᠤ᠄
- ᠦᠭᠡᠢ ᠲᠠ ᠮᠢᠨᠢ ᠢᠨᠠᠳᠤ ᠬᠣᠶᠠᠷ ᠨᠢ ᠴᠦ᠍ ᠶᠠᠭᠠᠬᠢᠬᠤᠪ᠂ ᠴᠢᠨᠠᠳᠤ ᠵᠢᠭᠠᠯ ᠨᠢ ᠶᠠᠭᠤ ᠪᠣᠢ?
- ᠵᠦᠭᠡᠷ᠂ ᠡᠨᠡ ᠬᠦᠦ ᠤᠳᠠᠬᠤ ᠦᠭᠡᠢ ᠲᠠᠨ ᠲᠠᠢ ᠠᠳᠠᠯᠢᠬᠠᠨ ᠥᠨᠳᠥᠷ ᠪᠣᠯᠤᠨᠠ ᠭᠡᠵᠦ ᠵᠠᠯᠠᠭᠤ ᠡᠷᠡ ᠶ᠋ᠢᠨ ᠬᠡᠯᠡᠬᠦ ᠳ᠋ᠦ᠍ ᠴᠡᠷᠢᠭ ᠦ᠋ᠳ ᠢᠨᠢᠶᠡᠯᠳᠦᠪᠡ᠃
- ᠢᠷᠡᠭᠡᠳᠦᠢ ᠳ᠋ᠦ᠍ ᠲᠡᠷᠡ ᠨᠠᠳᠠ ᠰᠢᠭ᠋ ᠪᠠᠶᠲᠤᠭᠠᠶ ᠠᠭᠤᠯᠠ ᠰᠢᠭ᠋ ᠴᠦ᠍ ᠥᠨᠳᠥᠷ ᠡᠷᠡ ᠪᠣᠯᠣᠯᠭᠦᠢ ᠯᠡ ᠶᠠᠭᠠᠬᠢᠬᠤᠪ ᠯᠠ ᠳᠠ᠂ ᠥᠨᠥᠳᠥᠷ ᠦ᠋ᠨ ᠬᠤᠪᠢ ᠳ᠋ᠤ᠌ ᠭᠡᠪᠡᠯ ᠨᠠᠳᠠ ᠬᠣᠨᠢ ᠬᠠᠷᠢᠭᠤᠯᠬᠤ ᠬᠡᠦᠬᠡᠳ ᠪᠢᠰᠢ᠂ ᠬᠣᠮᠣᠬᠠᠢ ᠳᠠᠢᠰᠤᠨ ᠲᠠᠢ ᠪᠠᠶᠢᠯᠳᠤᠬᠤ ᠡᠷᠡ ᠬᠡᠷᠡᠭᠲᠡᠢ ᠰᠢᠦ ᠳᠡ᠂ ᠴᠣᠢᠪᠠᠯᠰᠠᠩ ᠠ᠋! ᠭᠡᠲᠡᠯᠡ᠄
- ᠮᠡᠳᠡᠭᠡᠵᠢ ᠶ᠋ᠢᠨ ᠬᠡᠷᠡᠭ ᠡᠨᠡ ᠬᠦᠦ ᠴᠦ᠍ ᠬᠣᠨᠢ ᠬᠠᠷᠢᠭᠤᠯᠬᠤ ᠲᠡᠳᠦᠢ ᠪᠢᠰᠢ ᠳᠠᠢᠰᠤᠨ ᠲᠠᠢ ᠪᠠᠢᠯᠳᠤᠬᠤ ᠦᠵᠡᠯᠴᠡᠬᠦ ᠭᠡᠵᠦ ᠪᠡᠶᠡ ᠵᠣᠷᠢᠭᠤᠯᠤᠨ ᠢᠷᠡᠭᠰᠡᠨ ᠡᠴᠡ ᠬᠣᠢᠰᠢ ᠲᠠ ᠯᠠ ᠵᠠᠮ ᠢ᠋ ᠬᠥᠲᠥᠯᠬᠦ ᠪᠣᠯᠤᠨᠠ ᠳᠠ ᠭᠡᠵᠦ ᠵᠠᠯᠠᠭᠤ ᠡᠷᠡ ᠢᠨᠢᠶᠡᠮᠰᠦᠭᠯᠡᠨ ᠥᠭᠦᠯᠡᠭᠡᠳ ᠭᠡᠳᠡᠷᠭᠦ ᠡᠭᠡᠨ ᠭᠠᠷᠪᠠ᠃ᠥᠨᠳᠥᠷ ᠬᠥᠮᠦᠨ ᠭᠤᠨᠢᠭᠲᠠᠢ ᠴᠢᠷᠠᠢ ᠭᠠᠷᠭᠠᠨ ᠦᠯᠡᠳᠡᠭᠡᠳ ᠰᠢᠨᠡ ᠡᠯᠰᠡᠭᠰᠡᠳ ᠢ᠋ ᠬᠣᠢᠰᠢ ᠭᠠᠷᠭᠠᠨ ᠴᠠᠢ ᠤᠤᠭᠤᠵᠠᠭᠠ ᠭᠡᠪᠡ᠃《ᠠᠶᠠᠭᠠ ᠪᠠᠢᠨᠠ ᠤᠤ?》 ᠭᠡᠳ《ᠪᠠᠢᠬᠤ ᠦᠭᠡᠢ》 ᠭᠡᠬᠦ ᠳ᠋ᠦ᠍᠄
- ᠮᠥᠨ ᠳᠡ ᠵᠥᠪᠬᠡᠨ ᠲᠣᠯᠣᠭᠠᠢ ᠪᠠᠨ ᠴᠢᠷᠴᠦ ᠢᠷᠡᠭᠰᠡᠨ ᠡᠴᠡ ᠥᠭᠡᠷᠡ ᠶᠠᠭᠤ ᠴᠦ᠍ ᠦᠭᠡᠢ ᠬᠤᠪᠠᠬᠠᠢ ᠲᠠᠶᠠᠭ ᠨᠤᠭᠤᠳ! ᠭᠡᠳ ᠤᠷᠲᠤ ᠬᠥᠯ ᠢ᠋ᠶ᠋ᠡᠨ ᠬᠥᠮᠦᠰ ᠦ᠋ᠨ ᠮᠥᠷᠥ ᠳᠡᠭᠡᠭᠦᠷ ᠳᠠᠪᠠᠭᠤᠯᠵᠤ ᠭᠢᠰᠬᠢᠯᠡᠨ ᠭᠠᠷᠪᠠ᠃ ᠤᠳᠠᠵᠤ ᠲᠦᠳᠡᠭᠰᠡᠨ ᠴᠦ᠍ ᠦᠭᠡᠢ ᠭᠤᠷᠪᠠᠨ ᠲᠣᠮᠣ ᠲᠠᠩᠬᠤᠭᠠᠷ ᠮᠣᠳᠣᠨ ᠠᠶᠠᠭᠠ ᠠᠪᠴᠢᠷᠠᠵᠤ ᠲᠤᠰ ᠪᠦᠷᠢ ᠶ᠋ᠢᠨ ᠡᠪᠦᠷ ᠳᠡᠭᠡᠷᠡ ᠬᠠᠶᠠᠨ᠂ ᠬᠠᠶᠠᠭᠰᠠᠨ ᠪᠠᠢᠪᠠᠯ ᠤᠤ? ᠰᠠᠢᠬᠠᠨ ᠮᠡᠳᠡᠭᠡᠷᠡᠢ! ᠱᠠᠬᠠᠢᠳᠠᠬᠤ ᠶᠤᠮ ᠬᠣᠨᠳᠠ ᠭᠡᠵᠦ ᠠᠬᠠᠷᠬᠠᠵᠤ ᠵᠠᠬᠠᠷᠬᠠᠨ ᠬᠡᠯᠡᠪᠡ᠃
ᠳᠣᠷᠵᠢ 《ᠡᠨᠡ ᠴᠢᠨᠢ ᠬᠠᠷᠢᠨ ᠨᠢᠷᠤᠭᠤᠨ ᠠ᠋ᠴᠠ ᠪᠠᠨ ᠳᠠᠪᠠᠬᠤ ᠰᠢᠵᠢᠶᠡᠷ ᠦᠭᠡᠢ ᠡᠳ᠋ ᠪᠠᠢᠨᠠ ᠳᠠ》 ᠭᠡᠵᠦ ᠳᠣᠲᠣᠷᠠ ᠪᠠᠨ ᠵᠢᠪᠡᠭᠦᠴᠡᠪᠡ᠃ ᠴᠠᠷᠢᠨᠳᠤᠷᠵᠢ ᠠᠶᠤᠨ ᠰᠦᠷᠳᠡᠬᠦ ᠳ᠋ᠡᠭᠡᠨ ᠠᠯᠢ ᠪᠣᠯᠬᠣᠷ ᠬᠣᠯᠠ ᠪᠠᠢᠬᠤ ᠶ᠋ᠢ ᠬᠢᠴᠢᠶᠡᠨ ᠬᠣᠢᠰᠢ ᠬᠣᠯᠬᠢᠨᠠ᠃ ᠭᠤᠷᠪᠠᠳᠠᠬᠢ ᠨᠥᠬᠥᠷ ᠨᠢ ᠬᠠᠭᠤᠷᠮᠠᠴᠢ ᠪᠠᠷ ᠢᠨᠢᠶᠡᠮᠰᠦᠭᠯᠡᠨ ᠬᠠᠯᠠᠭᠤᠨ ᠬᠠᠷᠠ ᠴᠠᠢ ᠠᠶᠠᠭᠠᠯᠠᠨ ᠠᠪᠴᠤ ᠤᠤᠭᠤᠭᠠᠳ ᠠᠯᠢ ᠨᠢᠭᠡᠲᠡᠢ ᠡᠴᠡ ᠢᠳᠡᠬᠦ ᠶᠦᠮ ᠮᠠᠢ ᠭᠡᠵᠦ ᠰᠠᠷᠪᠠᠢᠬᠤ ᠠᠮᠢᠲᠠᠨ ᠪᠠᠢᠳᠠᠭ ᠦᠭᠡᠢ ᠶᠦᠮ ᠪᠣᠯ ᠤᠤ ᠭᠡᠵᠦ ᠪᠣᠳᠣᠨ ᠪᠠᠢᠲᠠᠯᠠ ᠲᠤᠩ ᠤ᠋ᠨ ᠳᠠᠭᠤ ᠶᠣᠭᠰᠢᠨ ᠴᠤᠤᠷᠢᠶᠠᠲᠤᠪᠠ᠃ ᠡᠨᠡ ᠨᠢ ᠳᠠᠬᠢᠨ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠭᠠᠷᠬᠤ ᠶ᠋ᠢᠨ ᠳᠣᠬᠢᠶᠠ ᠪᠠᠢᠯᠠ᠃ ᠬᠥᠮᠦᠰ ᠶᠠᠭᠠᠷᠠᠨ ᠪᠣᠰᠴᠤ᠂ ᠬᠠᠨᠠ ᠶ᠋ᠢᠨ ᠲᠣᠯᠣᠭᠠᠢ ᠳ᠋ᠤ᠌ ᠡᠯᠭᠦᠭᠰᠡᠨ ᠫᠤᠤ ᠰᠡᠯᠡᠮᠡ ᠪᠡᠨ ᠠᠪᠤᠨ ᠴᠢᠬᠢᠴᠡᠯᠳᠦᠨ ᠭᠠᠷᠪᠠ᠃ ᠮᠠᠨᠠᠢ ᠭᠤᠷᠪᠠ ᠴᠦ᠍ ᠭᠡᠷ ᠲᠦ᠍ ᠦᠯᠡᠳᠡᠵᠦ ᠦᠯᠦ ᠪᠣᠯᠬᠤ ᠶ᠋ᠢ ᠮᠡᠳᠡᠨ ᠤᠤᠭᠤᠵᠤ ᠪᠠᠢᠭᠠ ᠴᠠᠢ ᠪᠠᠨ ᠭᠣᠯᠣᠮᠳᠠᠨ ᠤ᠋ ᠵᠠᠬᠠ ᠤᠷᠤᠭᠤ ᠰᠠᠴᠤᠨ ᠠᠶᠠᠭᠠ ᠪᠠᠨ ᠡᠪᠦᠷᠯᠡᠵᠦ ᠳᠠᠭᠠᠯᠳᠤᠨ ᠭᠠᠷᠪᠠ᠃
ᠥᠨᠳᠥᠷ ᠬᠥᠮᠦᠨ᠂ ᠰᠤᠮᠤᠨ ᠳᠠᠷᠤᠭᠠ ᠳᠠᠮᠫᠢᠯ ᠭᠡᠭᠴᠢ ᠪᠠᠢᠵᠠᠶ᠃ ᠳᠣᠣᠷᠠ ᠪᠠᠨ ᠰᠠᠯᠠᠭᠠ ᠲᠠᠰᠤᠭ ᠤ᠋ᠨ ᠳᠠᠷᠤᠭᠠ ᠨᠠᠷ ᠲᠠᠢ ᠪᠣᠯᠪᠠᠴᠤ ᠨᠥᠭᠦᠭᠡ ᠭᠤᠷᠪᠠ ᠶ᠋ᠢ ᠥᠪᠡᠷ ᠳᠡᠭᠡᠷᠡ ᠪᠡᠨ ᠠᠪᠤᠨ ᠲᠤᠰᠬᠠᠢ ᠳ᠋ᠤᠨᠢ ᠰᠤᠷᠭᠠᠭᠤᠯᠢ ᠬᠢᠯᠭᠡᠬᠦ ᠪᠡᠷ ᠰᠢᠢᠳᠴᠠᠶ᠃ ᠫᠤᠤ ᠵᠡᠪᠰᠡᠭ ᠣᠯᠭᠣᠭᠰᠠᠨ ᠨᠢ ᠥᠴᠥᠭᠡᠳᠦᠷ ᠦ᠋ᠨ ᠵᠠᠮᠴᠢ ᠳᠠᠷᠬᠠᠨ ᠤ᠋ ᠠᠪᠴᠢᠷᠠᠭᠰᠠᠨ ᠪᠢᠷᠲᠡᠩᠭᠡ᠂ ᠬᠤᠢ ᠪᠠᠷᠢᠭᠤᠯ ᠢ᠋ ᠰᠢᠨᠡᠳᠬᠡᠨ ᠰᠡᠯᠪᠢᠭᠰᠡᠨ ᠰᠡᠯᠡᠮᠡ ᠪᠠᠢᠯᠠ᠃ ᠳᠠᠷᠤᠭᠠ ᠳᠠᠮᠫᠢᠯ ᠨᠥᠭᠥᠭᠡᠳᠦᠭᠦᠯᠡ ᠶ᠋ᠢ ᠳᠡᠨᠵᠢ ᠳᠡᠭᠡᠷᠡ ᠠᠪᠠᠴᠢᠨ ᠡᠷᠭᠢᠴᠡᠭᠦᠯᠦᠨ ᠵᠣᠭᠰᠣᠭᠠᠵᠤ 《ᠭᠡᠭᠡᠮ ᠭᠡᠭ ! ᠨᠣᠮᠣᠬᠠᠨ! ᠬᠠᠷᠠᠭᠠ ᠵᠡᠭᠦᠨ ᠪᠠᠷᠠᠭᠤᠨ ᠳᠠᠰᠢ! ᠠᠯᠬᠤᠭᠠᠳ! 》 ᠭᠡᠬᠦ ᠨᠢ ᠲᠡᠢᠮᠦ ᠴᠦ᠍ ᠠᠮᠤᠷ ᠦᠭᠡᠢ ᠬᠡᠷᠡᠭ ᠪᠣᠯᠵᠤ ᠡᠬᠢᠯᠡᠪᠡ᠃ ᠳᠠᠷᠤᠭᠠ ᠳᠠᠮᠫᠢᠯ ᠳᠠᠬᠢᠨ ᠳᠠᠪᠲᠠᠨ ᠲᠠᠨᠢᠭᠤᠯᠪᠠᠴᠤ ᠲᠡᠷᠡ ᠭᠤᠷᠪᠠ ᠪᠤᠳᠤᠯᠢᠨᠠ᠃ ᠢᠯᠠᠩᠭᠤᠶᠠ ᠴᠠᠷᠢᠨᠳᠣᠷᠵᠢ ᠳᠠᠮᠫᠢᠯ ᠤ᠋ᠨ ᠨᠢᠷᠤᠭᠤᠨ ᠤ᠋ ᠥᠨᠳᠥᠷ᠂ ᠳᠠᠭᠤᠨ ᠤ᠋ ᠬᠢᠨᠢ ᠰᠢᠷᠦᠭᠦᠨ᠂ ᠶᠡᠷᠦ ᠶᠠᠭᠤᠮᠠ ᠪᠦᠬᠦᠨ ᠦ᠌ ᠬᠢᠨᠢ ᠣᠨᠴᠠᠯᠢᠭ ᠠ᠋ᠴᠠ ᠰᠦᠷᠳᠡᠬᠦ ᠳ᠋ᠡᠭᠡᠨ ᠲᠡᠪᠡᠳᠡᠨ ᠮᠣᠩᠭᠠᠢᠨᠠ᠃ ᠳᠠᠮᠫᠢᠯ ᠴᠦ᠍ ᠠᠭᠤᠷᠯᠠᠨ᠄
- ᠴᠢ ᠮᠡᠳᠡᠵᠦ ᠪᠠᠢᠨᠠ ᠤᠤ? ᠳᠠᠢᠰᠤᠨ ᠴᠢᠮᠠᠶ᠋ᠢ ᠡᠢᠮᠦ ᠪᠠᠢᠯᠠ ᠭᠡᠵᠦ ᠬᠠᠢᠷᠠᠯᠠᠬᠤ ᠦᠭᠡᠢ ᠬᠠᠮᠤᠭ ᠤ᠋ᠨ ᠲᠦᠷᠦᠭᠦᠦ ᠬᠠᠮᠠᠷ ᠳᠡᠭᠡᠷᠡ ᠴᠢᠨᠢ ᠨᠢᠰᠠᠯᠤᠨᠠ ᠭᠡᠵᠦ ᠵᠠᠩᠳᠤᠷᠤᠨ《ᠭᠡᠭᠡᠮ ᠭᠡᠭ ! ᠠᠯᠬᠤᠭᠠᠳ ᠮᠠᠷᠱᠢ! ᠦᠭᠡᠢ ᠵᠣᠭᠰᠣ! ᠪᠠᠷᠠᠭᠤᠨ ᠬᠥᠯ ᠡᠴᠡ ᠪᠡᠨ ᠡᠬᠢᠯᠡ᠂ ᠪᠢ ᠬᠡᠴᠢᠨᠡᠭᠡᠨ ᠬᠡᠯᠡᠬᠦ ᠶᠣᠰᠣᠲᠠᠢ ᠪᠠᠢᠨᠠ ᠪᠣᠢ》 ᠭᠡᠵᠦ ᠬᠠᠰᠬᠢᠷᠤᠨᠠ᠃
ᠡᠢᠨᠬᠦ ᠡᠷᠭᠢᠵᠦ ᠪᠤᠴᠠᠭᠰᠠᠭᠠᠷ ᠡᠳᠦᠷ ᠦ᠋ᠨ ᠶᠡᠬᠡᠩᠬᠢ ᠶ᠋ᠢ ᠠᠪᠤᠪᠠ᠃ ᠲᠤᠩ ᠤ᠋ᠨ ᠳᠠᠭᠤ ᠳᠤᠤᠭᠠᠷᠬᠤ ᠳ᠋ᠤ᠌ ᠰᠠᠶᠢ ᠰᠤᠷᠭᠠᠭᠤᠯᠢ ᠪᠠᠭᠤᠪᠠ᠃ᠬᠤᠸᠠᠷᠠᠩᠨᠠᠭᠰᠠᠨ ᠪᠠᠢᠷᠢ ᠨᠤᠭᠤᠳ ᠤ᠋ᠨ ᠭᠠᠳᠠᠨᠠ ᠭᠠᠵᠠᠷ ᠵᠣᠭᠣᠵᠤ ᠰᠠᠭᠤᠯᠭᠠᠭᠰᠠᠨ ᠲᠣᠮᠣ ᠲᠣᠭᠣᠭᠠᠨ ᠳ᠋ᠤ᠌ ᠬᠣᠮᠬᠣᠷᠤᠰᠤᠲᠤ ᠰᠢᠷᠠ ᠪᠤᠳᠠᠭᠠ ᠪᠤᠵᠢᠭᠢᠨᠠᠨ ᠪᠣᠴᠯᠠᠵᠤ ᠪᠦᠬᠦ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠭᠠᠷᠤᠭᠰᠠᠳ ᠢ᠋ ᠬᠦᠯᠢᠶᠡᠨᠡ᠃ ᠴᠡᠷᠢᠭ ᠦ᠋ᠳ ᠦ᠋ᠨ ᠢᠳᠡᠬᠦ ᠵᠦᠢᠯ ᠠᠷᠠᠢ ᠴᠦ᠍ ᠡᠨᠡ ᠳᠠᠩ ᠢ᠋ᠶ᠋ᠠᠷ ᠪᠢᠰᠢ᠂ ᠲᠤᠷᠠᠩᠬᠠᠢ ᠴᠦ᠍ ᠪᠣᠯ ᠦᠬᠡᠷ ᠦ᠋ᠨ ᠶᠠᠰᠤ ᠲᠠᠢ ᠮᠢᠬᠠ ᠨᠢᠭᠡ ᠨᠢᠭᠡᠨ ᠰᠢᠷᠬᠡᠭ ᠣᠨᠣᠭᠳᠠᠨᠠ᠃ ᠴᠠᠭ ᠤ᠋ᠨ ᠶᠠᠭᠤᠮᠠ ᠴᠠᠭ ᠲᠠᠭᠠᠨ᠂ ᠴᠠᠭ ᠦᠶᠡ ᠳ᠋ᠦ᠍ᠨᠢ ᠪᠠᠰᠠ ᠠᠵᠠ ᠵᠠᠪᠰᠢᠶᠠᠨ ᠭᠡᠵᠦ ᠪᠠᠢᠳᠠᠭ᠃ ᠲᠡᠷᠡ ᠶᠣᠰᠣᠭᠠᠷ ᠶᠠᠰᠤ ᠨᠢ ᠪᠠᠭᠠ᠂ ᠮᠢᠬᠠ ᠪᠠᠷ ᠠᠷᠪᠢᠨ ᠵᠦᠢᠯ ᠣᠨᠣᠭᠳᠠᠪᠠᠯ ᠲᠡᠷᠡ ᠬᠥᠮᠦᠨ ᠥᠪᠡᠷ ᠢ᠋ ᠪᠡᠨ ᠠᠵᠠ ᠲᠠᠢ ᠭᠡᠵᠦ ᠪᠠᠶᠠᠷᠯᠠᠨᠠ᠃ ᠭᠡᠯᠡ ᠴᠦ᠍ ᠬᠥᠮᠦᠰ ᠶᠠᠭᠤᠨ ᠤ᠋ ᠤᠷᠢᠳ ᠰᠢᠷᠠ ᠪᠤᠳᠠᠭᠠ ᠪᠠᠷ ᠭᠡᠳᠡᠰᠦ ᠪᠡᠨ ᠳᠦᠭᠦᠷᠭᠡᠵᠦ ᠠᠪᠬᠤ ᠶ᠋ᠢ ᠬᠢᠴᠢᠶᠡᠨᠡ᠃ ᠡᠳᠦᠷ ᠰᠥᠨᠢ ᠶ᠋ᠢᠨ ᠬᠣᠷᠢᠨ ᠳᠥᠷᠪᠡᠨ ᠴᠠᠭ ᠭᠠᠭᠴᠠᠬᠠᠨ ᠤᠳᠠᠭᠠ ᠲᠣᠬᠢᠶᠠᠯᠳᠤᠬᠤ ᠬᠣᠭᠣᠯᠠᠨ ᠤ᠋ ᠮᠢᠬᠠᠨ ᠤ᠋ ᠬᠠᠭᠠᠰ ᠢ᠋ ᠦᠯᠡᠳᠡᠭᠡᠵᠦ ᠮᠠᠷᠭᠠᠰᠢ ᠶ᠋ᠢᠨ ᠴᠠᠢ ᠳᠡᠭᠡᠷᠡ ᠢᠳᠡᠬᠦ ᠶᠠᠭᠤᠮᠠ ᠲᠠᠢ ᠪᠠᠢᠨᠠ᠃ ᠬᠣᠭᠣᠯᠠᠨ ᠤ᠋ ᠳᠠᠷᠠᠭᠠ ᠪᠠᠰᠠ ᠯᠠ ᠰᠤᠷᠭᠠᠭᠤᠯᠢ᠂ ᠰᠢᠨᠡ ᠢᠷᠡᠭᠰᠡᠨ ᠬᠥᠮᠦᠰ ᠲᠦᠷᠦᠭᠦᠴᠢ ᠶ᠋ᠢᠨ ᠬᠢ ᠳ᠋ᠡᠭᠡᠨ ᠳᠠᠰᠤᠭᠠ ᠦᠭᠡᠢ ᠪᠠᠢᠭᠠ ᠪᠣᠯᠪᠠᠴᠤ ᠳᠠᠮᠫᠢᠯ ᠲᠡᠳᠡᠨ ᠳ᠋ᠦ᠍ ᠫᠤᠤ ᠱᠠᠭᠠᠢᠬᠤ᠂ ᠮᠥᠯᠬᠥᠨ ᠳᠠᠪᠰᠢᠬᠤ᠂ ᠪᠡᠶᠡ ᠬᠠᠮᠠᠭᠠᠯᠠᠬᠤ᠂ ᠨᠦᠬᠡ ᠮᠠᠯᠲᠠᠬᠤ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠣᠷᠣᠪᠠ᠃ ᠡᠳᠦᠷ ᠦ᠋ᠨ ᠰᠢᠪᠲᠤᠷᠠᠭᠠᠨ ᠳ᠋ᠤ᠌ ᠨᠥᠭᠦᠭᠡ ᠭᠤᠷᠪᠠ ᠦᠨᠡᠬᠡᠷ ᠶᠠᠳᠠᠷᠠᠨ ᠬᠦᠨᠳᠦ ᠪᠢᠷᠲᠡᠩᠭᠡ ᠫᠤᠤ ᠳ᠋ᠤ᠌ ᠨᠢᠷᠤᠭᠤ ᠨᠢ ᠲᠠᠷᠣᠭᠳᠠᠨ᠂ ᠬᠥᠯ ᠳᠡᠭᠡᠷᠡ ᠪᠡᠨ ᠳᠥᠩᠭᠡᠨ ᠲᠠᠩᠭᠠᠨ ᠰᠠᠵᠢᠯᠠᠨ ᠢᠷᠡᠪᠡ᠃ ᠭᠡᠷ ᠲᠦ᠍ ᠣᠷᠣᠵᠤ ᠢᠷᠡᠬᠦ ᠳ᠋ᠦ᠍ ᠮᠥᠨ ᠰᠤᠷᠭᠠᠭᠤᠯᠢ ᠠ᠋ᠴᠠ ᠰᠠᠶᠢᠬᠠᠨ ᠪᠠᠭᠤᠭᠰᠠᠨ ᠬᠥᠮᠦᠰ ᠪᠠᠭᠲᠠᠵᠤ ᠶᠠᠳᠠᠨ ᠴᠢᠬᠢᠴᠡᠯᠳᠦᠨᠡ᠃ ᠲᠡᠳᠡ ᠰᠢᠨᠡ ᠢᠷᠡᠭᠰᠡᠳ ᠢ᠋ ᠪᠣᠳᠣᠪᠠᠯ ᠡᠳᠦᠷ ᠳᠣᠳᠣᠮ ᠤ᠋ᠨ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠪᠡᠶᠡ ᠳᠠᠰᠤᠨ ᠴᠠᠭᠠᠷᠠᠭᠰᠠᠨ ᠤᠯᠤᠰ ᠪᠣᠯᠬᠣᠷ ᠠᠮᠠ ᠠᠮᠠᠨ ᠳ᠋ᠠᠭᠠᠨ ᠡᠯᠳᠡᠪ ᠰᠣᠨᠢᠨ ᠢ᠋ ᠥᠭᠦᠯᠡᠯᠳᠦᠨ 《ᠬᠠ ᠬᠠ᠂ ᠬᠡ ᠬᠡ ᠬᠥᠭᠵᠢᠯᠳᠦᠨᠡ᠃ ᠡᠨᠡ ᠨᠢ ᠶᠡᠬᠡᠳᠡ ᠶᠠᠳᠠᠷᠠᠭᠰᠠᠨ ᠬᠥᠮᠦᠰ ᠲᠦ᠍ ᠶᠠᠭᠠᠬᠢᠨ ᠲᠠᠭᠠᠲᠠᠢ ᠪᠠᠢᠬᠤ ᠪᠢᠯᠡ᠃《ᠳᠤᠭᠤᠢ ᠪᠠᠢᠭᠠᠳ ᠥᠭᠭᠦᠭᠡᠴᠢ》 ᠭᠡᠵᠦ ᠬᠠᠰᠬᠢᠷᠤᠮᠠᠷ ᠪᠣᠳᠣᠭᠳᠠᠨᠠ᠃
ᠤᠨᠲᠠᠬᠤ ᠶ᠋ᠢᠨ ᠴᠠᠭ ᠲᠤ᠌ ᠳᠡᠷᠡ ᠳᠡᠪᠢᠰᠬᠡᠷ ᠭᠠᠷᠭᠠᠨ ᠪᠡᠯᠡᠳᠬᠡᠬᠦ ᠬᠥᠮᠦᠨ ᠬᠡᠨ ᠴᠦ᠍ ᠦᠭᠡᠢ᠃ ᠭᠤᠲᠤᠯ ᠢ᠋ᠶ᠋ᠠᠨ ᠲᠠᠢᠯᠵᠤ ᠳᠡᠷᠡ ᠬᠢᠭᠡᠳ ᠪᠦᠰᠡ ᠲᠠᠢᠯᠤᠨ ᠳᠡᠪᠡᠯ ᠨᠥᠮᠥᠷᠴᠦ ᠵᠠᠢ ᠵᠠᠪᠰᠠᠷ ᠦᠭᠡᠢ ᠴᠢᠭᠢᠵᠡᠭᠡᠨᠡ᠃ ᠭᠠᠯ ᠤᠨᠲᠠᠷᠠᠬᠤ ᠲᠠᠢ ᠵᠡᠷᠭᠡ ᠵᠢᠬᠡᠭᠦᠨ ᠵᠢᠪᠠᠷ ᠤᠷᠠᠩᠬᠠᠢ ᠢᠰᠡᠭᠡᠢ ᠪᠦᠷᠬᠦᠭᠡᠰᠦ ᠶ᠋ᠢᠨ ᠴᠤᠭᠤᠷᠬᠠᠢ ᠪᠠᠷ ᠰᠡᠩᠭᠢᠨᠡᠬᠦ ᠠᠲᠠᠯᠠ᠂ ᠠᠭᠠᠷ ᠬᠦᠨᠳᠦᠷᠡᠨ ᠠᠮᠢᠰᠬᠤᠯ ᠳᠠᠷᠤᠨᠠ᠃ ᠶᠡᠷᠦ ᠨᠢ ᠬᠥᠮᠦᠨ ᠡᠨᠳᠡ ᠢᠳᠡᠭᠡᠰᠢᠬᠦ ᠨᠥᠬᠥᠴᠡᠯ ᠦᠭᠡᠢ᠃ ᠢᠳᠡᠵᠦ ᠪᠠᠢᠭᠠ ᠬᠣᠭᠣᠯᠠ᠂ ᠰᠠᠭᠤᠵᠤ ᠪᠠᠢᠭᠠ ᠣᠷᠣᠨ ᠪᠠᠢᠷᠢ᠂ ᠡᠳᠦᠷ ᠳᠣᠳᠣᠮ ᠤ᠋ᠨ ᠰᠤᠷᠭᠠᠭᠤᠯᠢ ᠶ᠋ᠢᠨ ᠬᠦᠨᠳᠦ᠂ ᠬᠠᠵᠠᠭᠤ ᠪᠠᠷ ᠨᠢ ᠬᠠᠪᠤᠷ ᠤ᠋ᠨ ᠬᠠᠷᠠ ᠬᠠᠪᠰᠠᠷᠭᠠ᠂ ᠬᠠᠪᠢ ᠤᠢᠷᠡ ᠡᠴᠡ ᠲᠤᠰᠠᠯᠠᠨ ᠲᠡᠳᠬᠦᠵᠦ ᠪᠠᠢᠭᠠ ᠠᠢᠯ ᠠᠮᠢᠲᠠᠳ ᠤ᠋ᠨ ᠮᠠᠯ ᠤ᠋ᠨ ᠡᠴᠡᠵᠦ ᠵᠤᠳᠠᠷᠠᠭᠰᠠᠨ ᠨᠢ ᠴᠥᠮ ᠬᠠᠪᠴᠢᠨ ᠬᠢᠬᠠᠨᠠ᠃ ᠭᠡᠪᠡᠴᠦ ᠡᠨᠡ ᠪᠦᠬᠦᠨ ᠢ᠋ ᠬᠠᠷᠠᠭᠰᠠᠭᠠᠷ ᠮᠡᠳᠡᠭᠰᠡᠭᠡᠷ ᠨᠢᠴᠤᠬᠤ᠂ ᠰᠣᠴᠢᠬᠤ ᠬᠡᠨ ᠴᠦ᠍ ᠦᠭᠡᠢ ᠠᠵᠢ᠃ ᠲᠡᠳᠡᠨ ᠦ᠌ ᠭᠠᠭᠴᠠ ᠴᠢᠩ ᠬᠦᠰᠡᠯ ᠨᠢ ᠳᠠᠢᠰᠤᠨ ᠢ᠋ ᠢᠯᠠᠨ ᠲᠠᠢᠯᠵᠤ᠂ ᠤᠯᠤᠰ ᠣᠷᠣᠨ ᠢ᠋ᠶ᠋ᠠᠨ ᠲᠣᠭᠣᠨᠢᠭᠤᠯᠬᠤ ᠯᠠ ᠶᠠᠪᠤᠳᠠᠯ ᠠᠵᠢ᠃ ᠡᠳᠡᠨ ᠦ᠌ ᠳᠤᠮᠳᠠ ᠳᠣᠷᠵᠢ᠂ ᠰᠠᠮᠪᠤᠤ᠂ ᠴᠠᠷᠢᠨᠳᠤᠷᠵᠢ ᠭᠤᠷᠪᠠ ᠴᠦ᠍ ᠥᠭᠡᠷᠡ ᠴᠦ᠍ ᠦᠭᠡᠢ ᠰᠠᠨᠠᠨᠠ ᠰᠢᠯᠤᠭᠤᠳᠤᠭᠰᠠᠨ ᠤᠯᠤᠰ ᠪᠣᠯᠪᠠ᠃