ᠬᠢᠯᠭᠠᠰᠤᠨ ᠳᠥᠷᠥᠭᠡᠨ ᠳᠡᠭᠡᠷᠡ – ᠬᠠᠰᠪᠤᠯᠠᠭ ᠵᠣᠬᠢᠶᠠᠪᠠ᠂ <ᠬᠣᠷᠢ> Хялгасан дөрөөн дээр – Хасвулаг зохиов <20>
126ᠬᠢᠯᠭᠠᠰᠤᠨ ᠳᠥᠷᠥᠭᠡᠨ ᠳᠡᠭᠡᠷᠡ -<ᠬᠣᠷᠢ>
ᠡᠦ ᠹᠧᠩ ᠮᠧᠢ ᠭᠡᠨᠡᠳᠲᠡ ᠠᠯᠪᠠᠨ ᠭᠡᠷ ᠲᠦ᠋ᠨᠢ ᠬᠦᠷᠴᠦ ᠢᠷᠡᠭᠰᠡᠨ ᠶᠠᠪᠤᠳᠠᠯ ᠲᠦᠪᠰᠢᠨ ᠳ᠋ᠦ᠍ ᠶᠡᠬᠡ ᠰᠣᠨᠢᠨ ᠰᠠᠨᠠᠭᠳᠠᠵᠠᠢ᠃ ᠲᠢᠩᠬᠢᠮ ᠦ᠋ᠨ ᠳᠠᠷᠤᠭᠠ ᠶ᠋ᠢᠨ ᠠᠯᠪᠠᠨ ᠭᠡᠷ ᠲᠦ᠍ ᠡᠷᠡᠭᠲᠡᠢ ᠡᠮᠡᠭᠲᠡᠢ ᠵᠣᠴᠢᠳ ᠬᠠᠶᠠ ᠣᠷᠣᠵᠤ ᠭᠠᠷᠳᠠᠭ ᠨᠢ ᠰᠣᠨᠢᠨ ᠳ᠋ᠤ᠌ ᠲᠣᠭᠠᠴᠠᠭᠳᠠᠬᠤ ᠦᠭᠡᠢ ᠨᠢ ᠮᠡᠳᠡᠭᠡᠵᠢ ᠶ᠋ᠢᠨ ᠬᠡᠷᠡᠭ᠃ ᠭᠡᠪᠡᠴᠦ ᠦᠳᠡ ᠶ᠋ᠢᠨ ᠬᠣᠢᠨᠠ ᠶ᠋ᠢᠨ ᠴᠢᠯᠥᠭᠡ ᠪᠡᠷ ᠡᠦ ᠹᠧᠩ ᠮᠧᠢ ᠶ᠋ᠢ ᠡᠷᠢᠵᠦ ᠶᠠᠷᠢᠯᠴᠠᠬᠤ ᠪᠠᠷ ᠪᠣᠳᠣᠵᠤ ᠪᠠᠢᠲᠠᠯᠠ ᠥᠪᠡᠷ ᠢ᠋ᠶ᠋ᠡᠨ ᠬᠦᠷᠦᠭᠡᠳ ᠢᠷᠡᠭᠰᠡᠨ ᠳ᠋ᠦ᠍ ᠲᠦᠪᠰᠢᠨ ᠦ᠌ ᠳᠣᠲᠣᠷᠠ ᠵᠠ᠂ ᠶᠠᠭ ᠲᠠᠭᠠᠷᠠᠯᠠ ᠭᠡᠬᠦ ᠪᠣᠳᠣᠯ ᠣᠷᠣᠭᠰᠠᠨ ᠦᠭᠡᠢ᠃ ᠬᠠᠷᠢᠨ ᠠᠵᠢᠯ ᠲᠤᠬᠠᠢᠯᠠᠯ ᠤ᠋ᠨ ᠢ᠋ᠶ᠋ᠠᠨ ᠬᠡᠪᠰᠢᠭᠰᠡᠨ ᠵᠠᠩ ᠢ᠋ᠶ᠋ᠠᠷ ᠲᠡᠷᠡ ᠡᠦ ᠹᠧᠩ ᠮᠧᠢ ᠶ᠋ᠢᠨ ᠡᠨᠡ ᠢᠷᠡᠭᠰᠡᠨ ᠢ᠋ ᠰᠡᠵᠢᠭᠯᠡᠵᠦ ᠪᠠᠢᠯᠠ᠃
ᠭᠡᠲᠡᠯᠡ ᠡᠳᠡ ᠬᠣᠶᠠᠭᠤᠯᠠ ᠬᠡᠳᠦᠢ ᠳᠣᠲᠣᠷᠠ ᠪᠠᠨ ᠶᠠᠭᠤ ᠪᠣᠳᠣᠵᠤ᠂ ᠬᠣᠭᠣᠷᠣᠨᠳᠣ ᠪᠠᠨ ᠶᠠᠭᠠᠬᠢᠵᠤ ᠰᠡᠷᠡᠮᠵᠢᠯᠡᠵᠦ ᠪᠠᠢᠭᠰᠠᠨ ᠴᠤ᠌ ᠶᠠᠷᠢᠯᠴᠠᠭᠠ ᠨᠢ ᠶᠡᠬᠡ ᠲᠣᠭᠲᠠᠭᠤᠨ ᠮᠥᠷᠲᠡᠭᠡᠨ ᠡᠩ ᠦ᠋ᠨ ᠠᠭᠤᠷ ᠠᠮᠢᠰᠬᠤᠯ ᠳᠤᠮᠳᠠ ᠡᠬᠢᠯᠡᠵᠡᠢ᠃
— ᠠ᠋! ᠡᠦ ᠹᠧᠩ ᠮᠧᠢ ᠨᠥᠬᠥᠷ ᠠ᠋᠂ ᠲᠠᠨ ᠢ᠋ ᠡᠨᠳᠡ ᠢᠷᠡᠨᠡ ᠭᠡᠵᠦ ᠶᠠᠭ ᠪᠣᠳᠣᠵᠤ ᠣᠯᠤᠭᠰᠠᠨ ᠦᠭᠡᠢ᠃ ᠲᠠ ᠰᠠᠭᠤ ᠭᠡᠳ ᠲᠦᠪᠰᠢᠨ ᠲᠡᠭᠦᠨ ᠳ᠋ᠦ᠍ ᠴᠠᠢ ᠪᠠᠷᠢᠯᠠ᠃
— ᠪᠣᠳᠣᠬᠤ ᠳ᠋ᠤ᠌᠂ ᠮᠢᠨᠦ ᠢᠷᠡᠭᠰᠡᠨ ᠨᠢ ᠲᠠᠨ ᠤ᠋ ᠣᠴᠢᠵᠤ ᠡᠷᠢᠬᠦ ᠶ᠋ᠢ ᠳᠥᠭᠥᠮᠴᠢᠯᠡᠭᠰᠡᠨ ᠪᠢᠵᠡ᠃
— ᠡᠭᠦᠨ ᠢ᠋ ᠶᠠᠭᠠᠬᠢᠵᠤ ᠲᠠᠢᠯᠪᠤᠷᠢᠯᠠᠨᠠ ᠪᠣᠢ?
— ᠲᠠ ᠨᠠᠷ ᠮᠢᠨᠦ ᠲᠤᠬᠠᠢ ᠪᠠᠢᠴᠠᠭᠠᠭᠠᠳ ᠣᠳᠣ ᠪᠠᠷᠤᠭ ᠭᠡᠷᠡᠴᠢ ᠪᠠᠷᠢᠮᠲᠠ ᠪᠠᠨ ᠪᠦᠷᠢᠳᠦᠭᠦᠯᠦᠭᠰᠡᠨ ᠪᠠᠢᠯᠭᠦᠢ᠃ ᠣᠳᠣ ᠥᠪᠡᠷ ᠢ᠋ᠶ᠋ᠡᠨ ᠢᠷᠡᠵᠦ ᠵᠠᠷᠢᠮ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠲᠤᠰᠢᠶᠠᠬᠤ ᠴᠠᠭ ᠪᠣᠯᠵᠤ ᠪᠠᠢᠨᠠ ᠭᠡᠵᠦ ᠪᠣᠳᠣᠭᠠᠳ ᠪᠢ ᠢᠷᠡᠭᠰᠡᠨ ᠶᠦᠮ᠃
ᠦᠵᠡᠰᠬᠦᠯᠡᠩ ᠢ᠋ ᠬᠣᠣᠷᠯᠠᠭᠳᠠᠬᠤ ᠶ᠋ᠢᠨ ᠡᠮᠦᠨᠡ ᠬᠣᠢᠨᠠ ᠪᠣᠯᠤᠷᠴᠠᠭᠠᠨ ᠲᠠᠢ ᠳᠠᠯᠳᠠᠭᠤᠷ ᠭᠠᠷ ᠬᠥᠯ ᠨᠡᠢᠯᠡᠳᠡᠭ ᠭᠤᠷᠪᠠᠳᠤᠭᠠᠷ ᠡᠲᠡᠭᠡᠳ ᠭᠡᠵᠦ ᠬᠥᠮᠦᠰ ᠲᠦ᠍ ᠬᠡᠯᠡᠭᠳᠡᠳᠡᠭ ᠡᠨᠡ ᠡᠮᠡᠭᠲᠡᠢ᠂ ᠪᠣᠯᠤᠷᠴᠠᠭᠠᠨ ᠢ᠋ ᠴᠠᠭᠠᠵᠠ ᠶ᠋ᠢᠨ ᠲᠠᠯᠠᠪᠠᠢ ᠠ᠋ᠴᠠ ᠪᠤᠴᠠᠭᠠᠭᠳᠠᠭᠰᠠᠨ ᠳᠠᠷᠤᠢ ᠳ᠋ᠤ᠌ ᠳ᠋ᠢᠶᠠᠩᠬᠤᠸᠠ ᠢᠷᠡᠭᠦᠯᠦᠭᠰᠡᠨ ᠨᠢ ᠲᠦᠪᠰᠢᠨ ᠳ᠋ᠦ᠍ ᠶᠡᠬᠡ ᠰᠡᠵᠢᠭ ᠲᠡᠢ ᠰᠠᠨᠠᠭᠳᠠᠵᠤ ᠪᠢᠯᠡ᠃
ᠬᠣᠵᠢᠮ ᠨᠢ ᠲᠦᠪᠰᠢᠨ ᠡᠨᠡ ᠡᠮᠡᠭᠲᠡᠢ ᠲᠡᠢ ᠠᠭᠤᠯᠵᠠᠵᠤ ᠶᠠᠷᠢᠯᠴᠠᠵᠤ ᠪᠠᠢᠭᠠᠳ᠂ ᠪᠣᠯᠤᠷᠴᠠᠭᠠᠨ ᠡᠨᠡ ᠬᠣᠶᠠᠷ ᠤ᠋ᠨ ᠳᠤᠮᠳᠠ ᠴᠣᠬᠣᠮ ᠲᠥᠪ ᠪᠤᠰᠤ ᠬᠠᠷᠢᠴᠠᠭᠠ ᠪᠠᠢᠨᠠ ᠤᠤ ᠦᠭᠡᠢ ᠤᠤ? ᠭᠡᠳᠡᠭ ᠢ᠋ ᠣᠯᠵᠤ ᠮᠡᠳᠡᠶᠡ ᠭᠡᠵᠦ ᠬᠦᠰᠡᠵᠦ ᠪᠠᠢᠪᠠ᠃ ᠭᠡᠲᠡᠯᠡ ᠢᠩᠭᠢᠭᠡᠳ ᠭᠡᠨᠡᠳᠲᠡᠬᠡᠨ ᠡᠮᠦᠨᠡ ᠨᠢ ᠢᠷᠡᠭᠡᠳ ᠰᠠᠭᠤᠴᠢᠬᠠᠬᠤᠯᠠᠷ ᠴᠣᠬᠣᠮ ᠬᠠᠮᠢᠭᠠ ᠠ᠋ᠴᠠ ᠨᠢ ᠡᠬᠢᠯᠡᠭᠦᠯᠬᠦ ᠪᠡᠨ ᠣᠯᠵᠤ ᠶᠠᠳᠠᠵᠠᠢ᠃
ᠲᠡᠭᠡᠭᠡᠳ ᠪᠠᠰᠠ ᠪᠠᠬᠠᠨ ᠡᠰᠡ ᠮᠡᠳᠡᠭᠴᠢ ᠳᠦᠷᠢ ᠭᠠᠷᠭᠠᠬᠤ ᠴᠢᠬᠤᠯᠠ ᠲᠠᠢ ᠭᠡᠵᠦ ᠲᠦᠪᠰᠢᠨ ᠳ᠋ᠦ᠍ ᠰᠠᠨᠠᠭᠳᠠᠨᠠ᠃ ᠡᠦ ᠹᠧᠩ ᠮᠧᠢ ᠴᠤ᠌ ᠰᠢᠭᠦᠬᠦ ᠬᠣᠷᠢᠶᠠᠨ ᠤ᠋ ᠪᠠᠢᠴᠠᠭᠠᠯᠲᠠ ᠶ᠋ᠢ ᠶᠡᠬᠡ ᠠᠩᠬᠠᠷᠤᠨ ᠰᠤᠷᠠᠭᠯᠠᠵᠤ ᠪᠠᠢᠳᠠᠭ ᠪᠣᠯᠤᠯᠲᠠᠢ᠃
ᠲᠡᠭᠦᠨ ᠦ᠌ ᠲᠤᠬᠠᠢ ᠪᠠᠢᠴᠠᠭᠠᠯᠲᠠ ᠪᠠᠨ ᠦᠨᠳᠦᠰᠦᠨ ᠳᠦ ᠪᠡᠨ ᠪᠠᠷᠠᠯᠠ ᠪᠢᠵᠡ ᠭᠡᠵᠦ ᠨᠢᠭᠤᠷ ᠨᠢᠳᠦ ᠦᠭᠡᠢ ᠲᠤᠯᠭᠠᠬᠤ ᠨᠢ ᠭᠡᠵᠦ ᠲᠦᠪᠰᠢᠨ ᠢ᠋ ᠡᠯᠳᠡᠪ ᠢ᠋ ᠪᠣᠳᠣᠵᠤ ᠪᠠᠢᠲᠠᠯᠠ ᠡᠦ ᠹᠧᠩ ᠮᠧᠢ᠄
— ᠲᠦᠪᠰᠢᠨ ᠳᠠᠷᠤᠭᠠ ᠠ᠋᠂ ᠨᠠᠷᠢᠨ ᠪᠣᠳᠣᠭᠠᠳ ᠪᠠᠢᠬᠤ ᠳ᠋ᠤ᠌ ᠲᠠᠨᠠᠷ ᠤ᠋ᠨ ᠬᠦᠴᠦ ᠲᠠᠯᠪᠢᠨ ᠪᠠᠢᠴᠠᠭᠠᠬᠤ ᠨᠢ ᠪᠤᠯᠤᠷᠴᠠᠭᠠᠨ ᠪᠢᠳᠡ ᠬᠣᠶᠠᠭᠤᠯᠠ ᠶ᠋ᠢᠨ ᠡᠩ ᠦ᠋ᠨ ᠦᠶᠡ ᠶ᠋ᠢᠨ ᠠᠮᠢᠳᠤᠷᠠᠯ ᠤ᠋ᠨ ᠰᠤᠷᠲᠠᠯ ᠤ᠋ᠨ ᠠᠰᠠᠭᠤᠳᠠᠯ ᠪᠠᠢᠬᠠ᠃ ᠡᠨᠡᠬᠡᠨ ᠬᠡᠷᠡᠭ ᠳᠡᠭᠡᠷᠡ ᠪᠢ ᠵᠠᠰᠠᠭ ᠬᠠᠤᠯᠢ ᠶ᠋ᠢᠨ ᠺᠠᠳ᠋ᠷᠴᠤᠳ ᠤ᠋ᠨ ᠬᠦᠴᠦ ᠲᠠᠮᠢᠷ ᠢ᠋ ᠪᠠᠷᠠᠬᠤ ᠳᠤᠷᠠ ᠦᠭᠡᠢ᠃ ᠥᠩᠭᠡᠷᠡᠭᠰᠡᠨ ᠳ᠋ᠦ᠍ ᠪᠢ ᠡᠨᠡ ᠶᠠᠪᠤᠳᠠᠯ ᠢ᠋ ᠦᠬᠦᠨ ᠨᠢᠭᠤᠵᠤ ᠳᠠᠷᠤᠭᠰᠠᠨ ᠨᠢ ᠭᠣᠣᠯᠳᠠᠭᠤ ᠨᠡᠷᠡ ᠨᠢᠭᠤᠷ ᠢ᠋ᠶ᠋ᠠᠨ ᠪᠣᠳᠣᠵᠤ ᠪᠠᠢᠭᠰᠠᠨ ᠶᠤᠮ᠃ ᠥᠨᠥᠳᠥᠷ ᠦ᠋ᠨ ᠬᠤᠪᠢ ᠳ᠋ᠤ᠌᠂ ᠪᠢ ᠥᠩᠭᠡᠷᠡᠭᠰᠡᠨ ᠳ᠋ᠦ᠍ ᠵᠠᠢᠳᠠᠩ ᠵᠠᠪᠬᠠᠢ ᠠ᠋ᠴᠠ ᠪᠠᠨ ᠪᠣᠯᠤᠭᠠᠳ ᠪᠣᠯᠤᠷᠴᠠᠭᠠᠨ ᠳ᠋ᠤ᠌ ᠤᠷᠰᠢᠭ ᠲᠠᠲᠠᠭᠰᠠᠨ ᠢ᠋ᠶ᠋ᠠᠨ ᠲᠡᠭᠡᠵᠦ ᠶᠡᠬᠡ ᠨᠢᠭᠤᠵᠤ ᠁
— ᠲᠠ ᠡᠭᠦᠨ ᠢ᠋ ᠬᠡᠯᠡᠭᠰᠡᠨ ᠦ᠌ ᠬᠡᠷᠡᠭ ᠦᠭᠡᠢ᠃ ᠬᠡᠯᠡᠯᠭᠡᠨ ᠦᠭᠡᠢ ᠪᠢᠳᠡᠨ ᠦ᠌ ᠪᠠᠢᠴᠠᠭᠠᠵᠤ ᠲᠣᠳᠣᠷᠬᠠᠢᠯᠠᠭᠰᠠᠨ ᠢ᠋ᠶ᠋ᠠᠷ ᠲᠠᠨ ᠤ᠋ ᠬᠣᠶᠠᠭᠤᠯᠠ ᠲᠥᠪ ᠪᠤᠰᠤ ᠬᠠᠷᠢᠴᠠᠭᠠ ᠲᠠᠢ ᠭᠡᠳᠡᠭ ᠪᠣᠯ ᠦᠨᠡᠨ ᠬᠡᠷᠡᠭ᠃ ᠲᠡᠷᠡᠴᠢᠯᠡᠨ ᠨᠡᠯᠢᠶᠡᠳ ᠤᠷᠲᠤ ᠤᠳᠠᠭᠠᠨ ᠬᠤᠭᠤᠴᠠᠭᠠᠨ ᠤ᠋ ᠲᠡᠦᠬᠡ ᠲᠡᠢ᠃ ᠭᠡᠲᠡᠯᠡ ᠪᠢᠳᠡ ᠡᠳᠡᠭᠡᠷ ᠢ᠋ ᠵᠠᠪᠠᠯ ᠴᠢᠮᠠ ᠠ᠋ᠴᠠ ᠴᠠᠭᠠᠷᠠᠲᠠᠯᠠ ᠮᠥᠷᠳᠡᠵᠦ ᠮᠥᠰᠬᠢᠬᠦ ᠴᠢᠬᠤᠯᠠ ᠦᠭᠡᠢ᠃ ᠤᠴᠢᠷ ᠨᠢ ᠲᠡᠷᠡ ᠶᠠᠭᠠᠬᠢᠯᠠ ᠴᠤ᠌ ᠭᠡᠳ ᠴᠢᠨᠦ ᠬᠤᠪᠢ ᠶ᠋ᠢᠨ ᠠᠮᠢᠳᠤᠷᠠᠯ ᠤ᠋ᠨ ᠠᠰᠠᠭᠤᠳᠠᠯ ᠪᠢᠯᠡ᠃ ᠬᠠᠷᠢᠨ ᠦᠵᠡᠰᠬᠦᠯᠡᠩ ᠦ᠋ᠨ ᠬᠣᠣᠷᠯᠠᠭᠳᠠᠭᠰᠠᠨ ᠬᠡᠷᠡᠭ ᠲᠡᠢ ᠬᠣᠯᠪᠣᠭᠳᠠᠭᠰᠠᠨ ᠪᠤᠶᠤ ᠬᠣᠯᠪᠣᠭᠳᠠᠮᠠᠷ ᠵᠦᠢᠯ ᠢ᠋ ᠶᠠᠷᠢᠪᠠᠯ ᠪᠢᠳᠡᠨ ᠳ᠋ᠦ᠍ ᠶᠡᠬᠡ ᠲᠤᠰᠠᠲᠠᠢ ᠰᠢᠦ᠃
— ᠡᠳᠦᠢ ᠴᠢᠨᠡᠭᠡᠨ ᠡᠳᠦᠷ ᠦ᠋ᠨ ᠲᠤᠷᠰᠢ᠂ ᠪᠢᠳᠡ ᠬᠣᠶᠠᠭᠤᠯᠠ ᠶ᠋ᠢᠨ ᠲᠥᠪ ᠪᠤᠰᠤ ᠬᠠᠷᠢᠴᠠᠭᠠ᠂ ᠪᠣᠯᠤᠷᠴᠠᠭᠠᠨ ᠤ᠋ ᠡᠬᠡᠨᠡᠷ ᠢ᠋ᠶ᠋ᠡᠨ ᠠᠯᠠᠭᠰᠠᠨ ᠨᠢᠭᠡ ᠵᠦᠢᠯ ᠦ᠋ᠨ ᠡᠯᠸᠮᠸ᠍ᠨ᠋ᠲ᠋ ᠪᠣᠯᠤᠭᠰᠠᠨ ᠪᠣᠯᠪᠠ ᠤᠤ ᠭᠡᠵᠦ ᠪᠢ ᠪᠣᠳᠣᠭᠠᠳ ᠪᠠᠢᠯᠠ᠃ ᠁ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠲᠡᠭᠦᠨ ᠦ᠌ ᠡᠬᠡᠨᠡᠷ ᠢ᠋ᠶ᠋ᠡᠨ ᠠᠯᠠᠭᠰᠠᠨ ᠤᠴᠢᠷ ᠢ᠋ ᠨᠢ ᠪᠢ ᠲᠠᠲᠠᠭᠰᠠᠨ ᠪᠢᠵᠡ ᠭᠡᠵᠦ ᠰᠠᠨᠠᠭᠠ ᠵᠣᠪᠠᠨᠠ᠃ ᠦᠨᠡᠨ ᠢ᠋ ᠬᠡᠯᠡᠪᠡᠯ ᠪᠢᠳᠡ ᠤᠷᠲᠤ ᠬᠤᠭᠤᠴᠠᠭᠠ ᠳᠣᠲᠣᠨᠣ ᠶᠠᠪᠤᠯᠴᠠᠬᠤ ᠳᠤᠮᠳᠠ ᠪᠠᠨ ᠬᠠᠮᠲᠤᠷᠠᠨ ᠠᠮᠢᠳᠤᠷᠠᠬᠤ ᠲᠤᠬᠠᠢ ᠣᠯᠠᠨ ᠤᠳᠠᠭᠠ ᠶᠠᠷᠢᠯᠴᠠᠵᠤ ᠰᠠᠨᠠᠯ ᠪᠣᠳᠣᠯ ᠢ᠋ᠶ᠋ᠠᠨ ᠡᠳᠦᠢ ᠲᠡᠳᠦᠢ ᠰᠣᠯᠢᠯᠴᠠᠵᠤ ᠥᠩᠭᠡᠷᠡᠭᠰᠡᠨ᠃ ᠡᠨᠡ ᠨᠢ ᠲᠡᠭᠦᠨ ᠦ᠌ ᠶᠠᠯᠠ ᠬᠢᠬᠦ ᠳ᠋ᠦ᠍ ᠶᠡᠬᠡ ᠨᠥᠯᠥᠭᠡ ᠪᠣᠯᠤᠭᠰᠠᠨ ᠪᠠᠢᠬᠠ᠃ ᠥᠨᠥᠳᠥᠷ ᠮᠢᠨᠦ ᠡᠳᠡᠭᠡᠷ ᠢ᠋ ᠬᠡᠯᠡᠳᠡᠭ ᠰᠠᠨᠠᠭᠠ ᠪᠣᠯ ᠬᠠᠤᠯᠢ ᠳ᠋ᠤ᠌ ᠵᠥᠪᠰᠢᠶᠡᠷᠡᠪᠡᠯ ᠪᠢ ᠲᠡᠭᠦᠨ ᠲᠡᠢ ᠡᠷᠡᠭᠦᠦ ᠰᠢᠢᠳᠬᠡᠯ ᠢ᠋ ᠬᠤᠪᠢᠶᠠᠵᠤ ᠬᠦᠯᠢᠶᠡᠶᠡ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ᠃
— ᠲᠠ ᠦᠨᠡᠬᠡᠷ ᠪᠣᠯᠤᠷᠴᠠᠭᠠᠨ ᠤ᠋ ᠬᠥᠮᠦᠨ ᠠᠯᠠᠭᠰᠠᠨ ᠨᠢ ᠡᠳᠡᠭᠡᠷ ᠡᠴᠡ ᠪᠡᠨ ᠪᠣᠯᠤᠭᠰᠠᠨ ᠮᠠᠭᠠᠳ ᠦᠭᠡᠢ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ ᠤᠤ?
— ᠲᠡᠢᠮᠦ ᠠ᠋᠂ ᠲᠡᠷᠡᠴᠢᠯᠡᠨ ᠲᠠᠨᠠᠷ ᠤ᠋ᠨ ᠪᠠᠢᠴᠠᠭᠠᠯᠲᠠ ᠴᠤ᠌ ᠡᠨᠡ ᠲᠤᠬᠠᠢ ᠪᠠᠢᠭᠰᠠᠨ᠃ ᠪᠢ ᠥᠪᠡᠷ ᠦ᠋ᠨ ᠬᠠᠷᠠ ᠤᠬᠠᠭᠠᠨ ᠢ᠋ᠶ᠋ᠠᠷ ᠪᠣᠳᠣᠭᠠᠳ ᠴᠤ᠌ ᠨᠢᠭᠡ ᠡᠬᠡᠨᠡᠷ ᠲᠡᠢ ᠬᠥᠮᠦᠨ ᠥᠭᠡᠷᠡ ᠨᠢᠭᠡ ᠡᠮᠡᠭᠲᠡᠢ ᠲᠡᠢ ᠬᠠᠯᠠᠭᠤᠨ ᠳᠣᠲᠣᠨᠣ ᠨᠢᠭᠤᠴᠠ ᠠᠮᠢᠳᠤᠷᠠᠯ ᠲᠠᠢ ᠪᠣᠯᠤᠭᠰᠠᠨ ᠬᠣᠢᠨᠠ ᠶᠠᠮᠠᠷ ᠵᠣᠷᠢᠯᠭᠠ ᠪᠠᠷ ᠡᠬᠡᠨᠡᠷ ᠢ᠋ᠶ᠋ᠡᠨ ᠠᠯᠠᠭᠰᠠᠨ ᠴᠤ᠌ ᠵᠠᠪᠠᠯ ᠬᠠᠷᠢᠯᠴᠠᠨ ᠬᠣᠯᠪᠣᠭᠳᠠᠬᠤ ᠪᠠᠢᠯᠭᠦᠢ᠃ ᠬᠡᠳᠦᠢᠪᠡᠷ ᠨᠠᠳᠠ ᠬᠠᠷᠠᠯᠠᠶᠠ ᠬᠣᠣᠷᠯᠠᠶᠠ ᠭᠡᠰᠡᠨ ᠰᠠᠨᠠᠭᠠ ᠡᠭᠦᠰᠦᠭᠰᠡᠨ ᠦᠭᠡᠢ ᠴᠤ᠌ ᠁
— ᠲᠠ ᠲᠠᠭᠠᠮᠠᠭᠯᠠᠯ ᠢ᠋ᠶ᠋ᠠᠨ ᠶᠠᠷᠢᠭᠠᠳ ᠡᠷᠡᠭᠦᠦ ᠶ᠋ᠢᠨ ᠬᠠᠷᠢᠭᠤᠴᠠᠯᠭᠠ ᠭᠤᠶᠤᠵᠤ ᠬᠦᠯᠢᠶᠡᠮᠡᠷ ᠪᠠᠢᠬᠤ ᠨᠢ ᠭᠠᠢᠬᠠᠯᠲᠠᠢ ᠪᠠᠢᠨᠠ᠃ ᠮᠢᠨᠦ ᠪᠣᠳᠣᠬᠤ ᠪᠠᠷ ᠶᠠᠮᠠᠷ ᠨᠢᠭᠡ ᠬᠥᠮᠦᠨ ᠲᠠᠨ ᠢ᠋ ᠠᠯᠪᠠ ᠪᠠᠷ ᠳᠣᠬᠢᠵᠤ ᠢᠷᠡᠭᠦᠯᠦᠭᠡᠳ ᠢᠩᠭᠢᠵᠦ ᠬᠡᠯᠡᠭᠦᠯᠦᠨ ᠮᠢᠨᠦ ᠣᠪᠣᠷ ᠢ᠋ ᠣᠢᠯᠠᠭᠠᠬᠤ ᠭᠡᠰᠡᠨ ᠰᠢᠭ᠃ ᠦᠭᠡᠢ ᠪᠣᠯ ᠲᠠ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠥᠩᠭᠡᠷᠡᠭᠡᠭᠰᠡᠨ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠴᠣᠬᠣᠮ ᠶᠠᠮᠠᠷ ᠬᠡᠮᠵᠢᠶᠡᠨ ᠳ᠋ᠦ᠍ ᠬᠦᠷᠦᠨᠡ ᠭᠡᠳᠡᠭ ᠲᠦ᠍ ᠶᠡᠬᠡ ᠲᠥᠯᠥᠪ ᠲᠣᠭᠠᠲᠠᠢ ᠪᠠᠢᠬᠤ ᠶᠣᠰᠣᠲᠠᠢ᠃ ᠶᠠᠭᠤᠨ ᠳ᠋ᠤ᠌ ᠬᠠᠷᠠ ᠠᠯᠪᠠ ᠪᠠᠷ ᠪᠡᠶᠡ ᠳ᠋ᠡᠭᠡᠨ ᠡᠢᠮᠦ ᠲᠡᠢᠮᠦ ᠵᠦᠢᠴᠢᠯᠡᠯ ᠲᠠᠭᠠᠮᠠᠭᠯᠠᠯ ᠬᠢᠭᠡᠳ ᠬᠡᠷᠡᠭ ᠡᠭᠦᠷᠬᠦ ᠭᠡᠵᠦ ᠳᠤᠷᠠᠯᠠᠬᠤ ᠪᠣᠢ? ᠴᠣᠬᠣᠮ ᠶᠠᠮᠠᠷ ᠬᠥᠮᠦᠨ ᠴᠢᠮᠠ ᠶᠢ ᠡᠨᠡ ᠬᠦ᠌ ᠠᠰᠠᠭᠤᠳᠠᠯ ᠳ᠋ᠤ᠌ ᠢᠩᠭᠢᠵᠦ ᠬᠠᠨᠳᠤᠨ᠂ ᠢᠩᠭᠢᠵᠦ ᠰᠢᠢᠳᠪᠦᠷᠢᠯᠡᠬᠦ ᠶ᠋ᠢ ᠬᠦᠰᠡᠬᠦ ᠪᠣᠯᠭᠠᠭᠰᠠᠨ ᠪᠣᠯ?
— ᠬᠥᠮᠦᠨ ᠦ᠌ ᠡᠷᠢᠶᠡᠨ ᠳᠣᠲᠣᠷᠠ ᠪᠠᠨ ᠭᠡᠳᠡᠭ ᠰᠢᠳᠡ᠃ ᠮᠢᠨᠦ ᠪᠣᠳᠣᠬᠤ ᠪᠠᠷ ᠲᠡᠷᠡ ᠨᠠᠳᠠ ᠲᠠᠢ ᠠᠮᠢᠳᠤᠷᠠᠶᠠ ᠭᠡᠰᠡᠨ ᠪᠣᠳᠣᠯ ᠡᠭᠦᠰᠦᠭᠡᠳ᠂ ᠲᠡᠨᠡᠭ ᠪᠠᠯᠠᠮᠠᠳ ᠢ᠋ᠶ᠋ᠠᠷ ᠡᠬᠡᠨᠡᠷ ᠦ᠋ᠨ ᠢ᠋ᠶ᠋ᠡᠨ ᠠᠮᠢᠨ ᠳ᠋ᠤ᠌ ᠬᠦᠷᠦᠭᠰᠡᠨ ᠪᠠᠢᠵᠤ ᠮᠡᠳᠡᠨᠡ᠃ ᠲᠦᠪᠰᠢᠨ ᠦ᠌ ᠴᠢᠷᠠᠢ ᠠᠶᠤᠮᠠᠷ ᠲᠦᠪᠰᠢᠷᠡᠨ ᠬᠦᠢᠲᠡᠨ ᠢ᠋ᠶ᠋ᠡᠷ ᠢᠨᠢᠶᠡᠭᠡᠳ᠄
— ᠢᠩᠭᠢᠭᠡᠳ ᠲᠠ ᠬᠠᠷᠢᠨ ᠲᠡᠭᠦᠨ ᠲᠡᠢ ᠠᠮᠢᠨ ᠬᠡᠷᠡᠭ ᠬᠤᠪᠢᠶᠠᠯᠴᠠᠨ ᠬᠠᠷᠢᠭᠤᠴᠠᠬᠤ ᠪᠣᠳᠣᠯ ᠲᠥᠷᠥᠭᠳᠡᠭᠰᠡᠨ ᠭᠡᠵᠢ ᠤᠤ? ᠡᠦ ᠹᠧᠩ ᠮᠧᠢ ᠨᠥᠬᠥᠷ ᠠ᠋᠂ ᠬᠡᠷᠪᠡ ᠠᠰᠠᠭᠤᠳᠠᠯ ᠢ᠋ ᠪᠢᠳᠡ ᠢᠩᠭᠢᠵᠦ ᠰᠢᠢᠳᠪᠦᠷᠢᠯᠡᠬᠦ ᠪᠣᠯᠤᠯᠴᠠᠭᠠ ᠲᠠᠢ ᠭᠡᠵᠦ ᠦᠵᠡᠪᠡᠯ ᠲᠤᠩ ᠵᠣᠬᠢᠰ ᠦᠭᠡᠢ ᠪᠠᠢᠨᠠ᠃ ᠪᠣᠯᠤᠷᠴᠠᠭᠠᠨ ᠢ᠋ ᠶᠠᠭᠠᠬᠢᠵᠤ ᠬᠡᠯᠡᠭᠰᠡᠨ ᠴᠤ᠌ ᠠᠷᠠᠢ ᠲᠡᠢᠮᠦ ᠲᠡᠨᠡᠭ ᠪᠦᠳᠦᠭᠦᠯᠢᠭ ᠬᠥᠮᠦᠨ ᠪᠢᠰᠢ ᠭᠡᠵᠦ ᠪᠢ ᠦᠵᠡᠨᠡ᠃ ᠬᠡᠷᠪᠡ ᠲᠡᠷᠡ ᠦᠨᠡᠨ ᠴᠢᠮᠠ ᠳ᠋ᠤ᠌ ᠪᠤᠶᠤ ᠥᠭᠡᠷᠡ ᠨᠢᠭᠡ ᠡᠮᠡᠭᠲᠡᠢ ᠲᠡᠢ ᠨᠢᠭᠡᠳᠬᠦ ᠵᠣᠷᠢᠯᠭᠠ ᠲᠠᠢ ᠪᠠᠢᠭᠰᠠᠨ ᠪᠣᠯ ᠡᠬᠡᠨᠡᠷ ᠢ᠋ᠶ᠋ᠡᠨ ᠢᠯᠡ ᠪᠡᠷ ᠬᠣᠣᠷᠯᠠᠨ ᠠᠯᠠᠭᠠᠳ ᠦᠬᠦᠬᠦ ᠵᠠᠮ ᠢ᠋ᠶ᠋ᠠᠨ ᠡᠷᠢᠬᠦ ᠭᠡᠵᠢ ᠤᠤ? ᠡᠨᠡ ᠨᠢ ᠲᠡᠭᠦᠨ ᠳ᠋ᠦ᠍ ᠶᠠᠮᠠᠷ ᠤᠳᠬᠠ ᠠᠭᠤᠯᠭᠠ ᠪᠠᠢᠬᠤ ᠪᠣᠢ? ᠲᠠ ᠪᠣᠳᠣᠯᠬᠢᠯᠠᠵᠤ ᠥᠩᠭᠡᠷᠡᠭᠰᠡᠨ ᠦᠭᠡᠢ ᠤᠤ? ᠮᠢᠨᠦ ᠪᠣᠳᠣᠬᠤ ᠪᠠᠷ᠂ ᠲᠠ ᠪᠣᠯᠤᠷᠴᠠᠭᠠᠨ ᠤ᠋ ᠵᠠᠩ ᠰᠤᠷᠲᠠᠯ᠂ ᠬᠥᠮᠦᠵᠢᠯ ᠪᠣᠯᠪᠠᠰᠤᠷᠠᠯ ᠢ᠋ ᠨᠢ ᠪᠢᠳᠡᠨ ᠡᠴᠡ ᠢᠯᠡᠭᠦᠦ ᠣᠢᠯᠠᠭᠠᠬᠤ ᠪᠠᠢᠬᠠ᠃ ᠲᠡᠷᠡ ᠴᠢᠨᠦ ᠲᠥᠯᠥᠭᠡ ᠡᠬᠡᠨᠡᠷ ᠢ᠋ᠶ᠋ᠡᠨ ᠠᠯᠠᠯᠠ ᠭᠡᠪᠡᠯ ᠲᠠ ᠦᠨᠡᠬᠡᠷ ᠢᠲᠡᠭᠡᠨᠡ ᠭᠡᠵᠢ ᠤᠤ?
— ᠦᠭᠡᠢ᠂ ᠪᠢ ᠨᠠᠭᠠᠨᠠ ᠴᠠᠭᠠᠨᠠᠬᠢ ᠡᠳᠦᠢ ᠣᠯᠠᠨ ᠶᠠᠪᠤᠳᠠᠯ ᠢ᠋ ᠪᠣᠳᠣᠯᠬᠢᠯᠠᠵᠤ ᠥᠩᠭᠡᠷᠡᠭᠰᠡᠨ ᠦᠭᠡᠢ᠃ ᠭᠡᠲᠡᠯᠡ ᠮᠢᠨᠦ ᠥᠩᠭᠡᠷᠡᠦ ᠬᠠᠵᠠᠭᠠᠢ ᠬᠥᠭᠡᠭᠡᠴᠡᠯᠳᠦᠭᠰᠡᠨ ᠳᠤᠷᠠᠰᠢᠯ ᠲᠡᠭᠦᠨ ᠦ᠌ ᠶᠠᠯᠠ ᠬᠢᠬᠦ ᠳ᠋ᠦ᠍ ᠰᠢᠭᠤᠳ ᠨᠥᠯᠥᠭᠡ ᠤᠴᠠᠷᠠᠭᠤᠯᠤᠭᠰᠠᠨ ᠴᠤ᠌ ᠶᠤᠮ ᠤᠤ ᠭᠡᠵᠦ ᠪᠣᠳᠣᠬᠤ ᠶᠤᠮ᠃ ᠪᠢ ᠶᠡᠬᠡ ᠭᠤᠨᠢᠵᠤ ᠤᠢᠳᠴᠤ ᠪᠠᠢᠨᠠ᠃
— ᠡᠦ ᠹᠧᠩ ᠮᠧᠢ ᠨᠥᠬᠥᠷ ᠠ᠋᠂ ᠪᠣᠯᠤᠷᠴᠠᠭᠠᠨ ᠤ᠋ ᠬᠡᠷᠡᠭ ᠦ᠋ᠨ ᠦᠨᠡᠨ ᠳᠦᠷᠢ ᠭᠦᠢᠴᠡᠳ ᠢᠯᠡᠷᠡᠬᠦ ᠡᠴᠡ ᠡᠮᠦᠨᠡ ᠪᠢᠳᠡ ᠶᠠᠮᠠᠷ ᠨᠢᠭᠡᠨ ᠣᠪᠣᠷ ᠦᠵᠡᠯᠲᠡ ᠪᠡᠨ ᠢᠯᠡᠳᠬᠡᠬᠦ ᠶ᠋ᠢᠨ ᠠᠷᠭᠠ ᠦᠭᠡᠢ᠃ ᠬᠡᠷᠪᠡ ᠥᠩᠭᠡᠷᠡᠭᠰᠡᠨ ᠦ᠌ ᠪᠤᠷᠤᠭᠤ ᠪᠠᠨ ᠮᠡᠳᠡᠷᠡᠵᠦ᠂ ᠤᠬᠠᠭᠠᠷᠠᠵᠤ ᠰᠡᠬᠡᠭᠡᠷᠡᠭᠰᠡᠨ ᠪᠣᠯ ᠲᠡᠷᠡ ᠨᠢ ᠶᠠᠷᠢᠶᠠᠨ ᠦᠭᠡᠢ ᠲᠠᠨ ᠤ᠋ ᠲᠠᠪᠰᠢᠯᠲᠠ ᠪᠣᠯᠤᠨᠠ ᠰᠢᠦ᠃
— ᠁
— ᠡᠦ ᠹᠧᠩ ᠮᠧᠢ ᠨᠥᠬᠥᠷ ᠠ᠋᠂ ᠪᠢᠳᠡ ᠲᠠᠨ ᠠ᠋ᠴᠠ ᠬᠣᠶᠠᠷ ᠤᠴᠢᠷ ᠢ᠋ ᠠᠰᠠᠭᠤᠬᠤ ᠰᠠᠨᠠᠭᠠᠲᠠᠢ᠃ ᠲᠠ ᠪᠢᠳᠡᠨ ᠳ᠋ᠦ᠍ ᠬᠠᠩᠭᠠᠮᠵᠢ ᠲᠠᠢ ᠬᠠᠷᠢᠭᠤᠯᠵᠤ ᠥᠭᠭᠦᠨᠡ ᠤᠤ?
— ᠲᠠ ᠠᠰᠠᠭᠤ ᠳᠠ᠃ ᠪᠢ ᠯᠠᠪ ᠦᠨᠡᠨ ᠢ᠋ᠶ᠋ᠡᠨ ᠬᠡᠯᠡᠨᠡ᠃
— ᠪᠤᠯᠤᠷᠴᠠᠭᠠᠨ ᠢ᠋ ᠪᠠᠷᠢᠭᠳᠠᠭᠰᠠᠨ ᠤ᠋ ᠳᠠᠷᠠᠭᠠ᠂ ᠲᠠ ᠲᠡᠭᠦᠨ ᠲᠡᠢ ᠬᠠᠮᠤᠭ ᠤ᠋ᠨ ᠠᠩᠬᠠ ᠤᠳᠠᠭᠠ ᠨᠢ ᠬᠡᠵᠢᠶᠡ ᠠᠭᠤᠯᠵᠠᠭᠰᠠᠨ ᠪᠣᠢ?
— ᠪᠢ ᠠᠭᠤᠯᠵᠠᠵᠤ ᠥᠩᠭᠡᠷᠡᠭᠰᠡᠨ ᠦᠭᠡᠢ᠃ ᠬᠣᠶᠠᠷ ᠰᠠᠷᠠ ᠶ᠋ᠢᠨ ᠳᠠᠷᠠᠭᠠ ᠲᠡᠭᠦᠨ ᠢ᠋ ᠢᠯᠡ ᠪᠡᠷ ᠰᠢᠭᠦᠬᠦ ᠲᠡᠷᠡ ᠡᠳᠦᠷ᠂ ᠪᠢ ᠬᠣᠲᠠ ᠶ᠋ᠢᠨ ᠶᠣᠰᠣᠯᠠᠯ ᠤ᠋ᠨ ᠲᠢᠩᠬᠢᠮ ᠦ᠋ᠨ ᠡᠭᠦᠳᠡᠨ ᠳᠡᠷᠭᠡᠳᠡ ᠨᠢᠭᠤᠷ ᠦᠵᠡᠯᠴᠡᠭᠰᠡᠨ ᠪᠣᠯᠪᠠᠴᠤ ᠬᠣᠯᠠ ᠰᠢᠭ᠋ ᠪᠠᠢᠭᠰᠠᠨ ᠪᠣᠯᠬᠣᠷ ᠦᠭᠡ ᠶᠠᠷᠢᠯᠴᠠᠭᠰᠠᠨ ᠦᠭᠡᠢ᠃
— ᠮᠥᠨ ᠡᠨᠡ ᠨᠢᠭᠡ ᠤᠳᠠᠭᠠ ᠭᠡᠵᠢ ᠤᠤ?
— ᠲᠡᠢᠮᠦ ᠠ᠋!
— ᠲᠡᠭᠡᠪᠡᠯ ᠲᠠᠨ ᠤ᠋ ᠬᠣᠶᠠᠭᠤᠯᠠ ᠶ᠋ᠢᠨ ᠲᠥᠪ ᠪᠤᠰᠤ ᠬᠠᠷᠢᠴᠠᠭᠠ ᠶ᠋ᠢ ᠨᠢᠭᠡ ᠬᠥᠮᠦᠨ ᠶᠡᠬᠡ ᠡᠷᠲᠡ ᠮᠡᠳᠡᠭᠰᠡᠨ ᠪᠢᠵᠡ᠃
— ᠦᠭᠡᠢ᠂ ᠡᠢᠮᠦ ᠤᠴᠢᠷ ᠣᠭᠲᠣ ᠦᠭᠡᠢ᠃ ᠥᠨᠥᠳᠥᠷ ᠪᠢ ᠯᠡ ᠲᠠᠨᠠᠷ ᠲᠤ᠌ ᠡᠬᠢᠯᠡᠵᠦ ᠬᠡᠯᠡᠵᠦ ᠪᠠᠢᠬᠤ ᠨᠢ ᠡᠨᠡ ᠰᠢᠦ᠃ ᠬᠡᠷᠪᠡ ᠶᠠᠮᠠᠷ ᠨᠢᠭᠡᠨ ᠬᠥᠮᠦᠨ ᠨᠢᠭᠡᠨᠲᠡ ᠮᠡᠳᠡᠭᠰᠡᠨ ᠪᠣᠯ ᠪᠢ ᠠᠩᠬᠠᠨ ᠳᠤ ᠪᠠᠨ ᠲᠡᠭᠡᠵᠦ ᠨᠢᠭᠤᠬᠤ ᠦᠭᠡᠢ᠃
— ᠡᠦ ᠹᠧᠩ ᠮᠧᠢ ᠨᠥᠬᠥᠷ ᠠ᠋᠂ ᠪᠢᠳᠡ ᠴᠢᠮᠠ ᠶᠢ ᠠᠯᠪᠠᠳᠠᠵᠤ ᠰᠢᠬᠠᠮᠳᠠᠭᠤᠯᠬᠤ ᠦᠭᠡᠢ᠃ ᠭᠡᠲᠡᠯᠡ ᠲᠠ ᠪᠢᠳᠡᠨ ᠡᠴᠡ ᠮᠠᠰᠢ ᠠᠷᠪᠢᠨ ᠴᠢᠬᠤᠯᠠ ᠤᠴᠢᠷ ᠢ᠋ ᠨᠢᠭᠤᠵᠤ ᠪᠡᠢᠨᠡ᠃ ᠢᠩᠭᠢᠵᠦ ᠠᠮᠠ ᠮᠠᠯᠵᠢᠨ ᠨᠢᠭᠤᠬᠤ ᠨᠢ ᠪᠢᠳᠡᠨ ᠦ᠌ ᠠᠯᠢᠨ ᠳ᠋ᠤᠨᠢ ᠴᠤ᠌ ᠶᠡᠬᠡ ᠠᠰᠢᠭ ᠦᠭᠡᠢ ᠭᠡᠳᠡᠭ ᠢ᠋ ᠲᠠ ᠪᠣᠳᠣᠯᠬᠢᠯᠠᠵᠤ ᠦᠵᠡᠪᠡ ᠤᠤ?
— ᠪᠢ ᠬᠡᠯᠡᠶᠡ ᠭᠡᠰᠡᠨ ᠢ᠋ᠶ᠋ᠡᠨ ᠪᠦᠭᠦᠳᠡ ᠶ᠋ᠢ ᠬᠡᠯᠡᠴᠢᠬᠡᠯᠡ᠃ ᠲᠠᠨ ᠤ᠋ ᠬᠡᠯᠡᠭᠰᠡᠨ ᠨᠢ ᠨᠠᠳᠠ ᠶᠡᠬᠡ ᠰᠡᠩᠬᠡᠷᠡᠭᠦᠯᠦᠯ ᠪᠣᠯᠵᠤ ᠪᠠᠢᠨᠠ᠃ ᠪᠢ ᠬᠠᠷᠢᠭᠰᠠᠨ ᠤ᠋ ᠳᠠᠷᠠᠭᠠ ᠲᠠᠨ ᠤ᠋ ᠬᠡᠯᠡᠭᠰᠡᠨ ᠢ᠋ ᠳᠠᠬᠢᠨ ᠨᠠᠷᠢᠨ ᠨᠢᠭᠲᠠ ᠪᠣᠳᠣᠯᠬᠢᠯᠠᠵᠤ ᠦᠵᠡᠶᠡ᠃ ᠪᠣᠳᠣᠬᠤ ᠳ᠋ᠤ᠌ ᠶᠡᠬᠡ ᠣᠯᠤᠯᠲᠠ ᠲᠠᠢ ᠪᠠᠢᠵᠤ ᠮᠡᠳᠡᠨᠡ᠃
— ᠡᠨᠡ ᠬᠡᠷᠡᠭ ᠦᠭᠡᠢ᠃ ᠵᠠᠷᠢᠮ ᠦᠶᠡ ᠳ᠋ᠦ᠍ ᠪᠤᠰᠤᠳ ᠤ᠋ᠨ ᠶᠠᠷᠢᠶᠠ ᠲᠤᠰᠬᠠᠯ᠂ ᠬᠥᠮᠦᠨ ᠦ᠌ ᠪᠣᠳᠣᠯ ᠰᠡᠳᠬᠢᠯ ᠳ᠋ᠦ᠍ ᠡᠰᠡᠷᠭᠦ ᠦᠢᠯᠡᠳᠦᠯ ᠦᠵᠡᠭᠦᠯᠳᠡᠭ ᠶᠦᠮ᠃ ᠬᠡᠷᠪᠡ ᠵᠥᠪ ᠲᠠᠯᠠ ᠤᠷᠤᠭᠤ ᠵᠢᠯᠣᠭᠣᠳᠴᠤ ᠴᠢᠳᠠᠪᠠᠯ ᠪᠠᠶᠠᠷᠯᠠᠭᠤᠰᠢᠲᠠᠢ ᠬᠡᠷᠡᠭ᠃ ᠭᠡᠲᠡᠯᠡ ᠬᠡᠨ ᠴᠤ᠌ ᠪᠤᠷᠤᠭᠤ ᠣᠢᠯᠠᠭᠠᠬᠤ ᠦᠭᠡᠢ ᠭᠡᠵᠦ ᠪᠠᠲᠤᠯᠠᠵᠤ ᠴᠢᠳᠠᠬᠤ ᠪᠣᠢ?
ᠡᠨᠡ ᠬᠣᠶᠠᠷ ᠤ᠋ᠨ ᠶᠠᠷᠢᠶᠠ ᠡᠢᠮᠦ ᠯᠡ ᠦᠷᠡ ᠳ᠋ᠦᠩ ᠢ᠋ᠶ᠋ᠡᠷ ᠲᠡᠭᠦᠰᠦᠯᠡ᠃
ᠴᠢᠨᠠᠭᠰᠢ ᠪᠠᠨ ᠬᠠᠨᠳᠤᠭᠠᠳ ᠵᠣᠷᠢᠭ ᠮᠠᠭᠤᠲᠠᠢᠬᠠᠨ ᠠᠯᠬᠤᠯᠠᠬᠤ ᠡᠦ ᠹᠧᠩ ᠮᠧᠢ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠲᠦᠪᠰᠢᠨ ᠭᠤᠸᠠᠢ ᠤᠳᠠᠲᠠᠯᠠ ᠬᠠᠷᠠᠵᠤ ᠵᠣᠭᠰᠣᠪᠠ᠃
ᠡᠨᠡ ᠡᠮᠡᠭᠲᠡᠢ ᠳ᠋ᠦ᠍ ᠡᠯᠳᠡᠪ ᠲᠠᠭᠠᠮᠠᠭᠯᠠᠯ ᠳᠤᠷᠠᠳᠤᠨ ᠪᠣᠯᠤᠷᠴᠠᠭᠠᠨ ᠲᠠᠢ ᠠᠮᠢᠨ ᠬᠡᠷᠡᠭ ᠦ᠋ᠨ ᠬᠠᠷᠢᠭᠤᠴᠠᠯᠭᠠ ᠬᠤᠪᠢᠶᠠᠯᠴᠠᠬᠤ ᠭᠡᠨᠡᠨ ᠰᠡᠳᠬᠢᠯᠭᠡ ᠶ᠋ᠢ ᠶᠠᠮᠠᠷ ᠬᠦᠴᠦᠨ ᠣᠯᠭᠣᠭᠰᠠᠨ ᠪᠣᠯ? ᠭᠡᠲᠡᠯᠡ ᠶᠠᠭ ᠦᠨᠡᠨ ᠮᠠᠭᠠᠳ ᠬᠡᠷᠡᠭ ᠢ᠋ ᠨᠢ ᠲᠤᠯᠭᠠᠨ ᠠᠰᠠᠭᠤᠬᠤ ᠳ᠋ᠤ᠌ ᠴᠢᠨᠡᠭᠡ ᠪᠡᠷ ᠢ᠋ᠶ᠋ᠡᠨ ᠪᠠᠯᠠᠯᠵᠤ ᠨᠢᠭᠤᠬᠤ ᠨᠢ ᠪᠠᠰᠠ ᠶᠠᠮᠠᠷ ᠰᠦᠷᠳᠡᠭᠦᠯᠦᠯ ᠡᠷᠡᠭᠡᠯᠵᠡᠯ ᠡᠴᠡ ᠪᠣᠯᠵᠤ ᠪᠠᠢᠭᠠ ᠪᠣᠯ?
ᠡᠨᠡ ᠬᠦ᠌ ᠵᠥᠷᠢᠴᠡᠯ ᠪᠤᠳᠤᠯᠢᠶᠠᠨ ᠢ᠋ᠶ᠋ᠠᠷ ᠳᠦᠭᠦᠷᠦᠭᠰᠡᠨ ᠲᠠᠢᠯᠪᠤᠷᠢᠯᠠᠵᠤ ᠣᠢᠯᠠᠭᠠᠬᠤ ᠳ᠋ᠤ᠌ ᠪᠡᠷᠬᠡ ᠪᠣᠳᠣᠯ ᠲᠦᠪᠰᠢᠨ ᠦ᠌ ᠲᠠᠷᠢᠬᠢᠨ ᠳ᠋ᠤ᠌ ᠬᠣᠴᠣᠷᠪᠠ᠃
ᠤᠩᠰᠢᠭᠰᠠᠨ ᠨᠢ ᠄ ᠴᠡᠴᠡᠭᠮᠡ