ᠪᠦᠯᠵᠢᠬᠢᠨ ᠬᠠᠲᠤᠨ– [ᠮᠣᠩᠭᠣᠯ] ᠳᠠᠮᠪᠠ ᠶᠢᠨ ᠲᠥᠷᠥᠪᠠᠲᠤ <ᠳᠥᠲᠥᠭᠡᠷ ᠪᠦᠯᠦᠭ 3–4> Бүлжхэн хатан– [монгол] Дамбын Төрбат <дөтгөр бүлэг 3–4>
172 ᠲᠠᠢᠴᠢᠭᠤᠳ ᠤ᠋ᠨ ᠠᠮᠪᠠᠭᠠᠢ ᠬᠠᠭᠠᠨ ᠬᠡᠯᠡ ᠠᠪᠤᠭᠰᠠᠨ ᠡᠳᠦᠷ ᠢ᠋ᠶ᠋ᠡᠨ ᠶᠠᠭᠠᠷᠠᠪᠴᠢᠯᠠᠨ ᠡᠪᠦᠭᠡᠨ ᠠᠨᠳᠠ ᠶ᠋ᠢᠨ ᠥᠷᠭᠥᠭᠡ ᠲᠡᠢᠰᠢ ᠮᠣᠷᠳᠠᠵᠠᠢ᠃ ᠨᠠᠮᠤᠷ ᠤ᠋ᠨ ᠠᠳᠠᠭ ᠰᠠᠷᠠ ᠪᠠᠷ ᠠᠩ ᠬᠣᠮᠣᠷᠭᠠᠨ ᠳ᠋ᠤ᠌ ᠳᠥᠷᠥᠭᠡ ᠬᠠᠷᠰᠢᠭᠤᠯᠵᠤ ᠮᠣᠷᠳᠠᠵᠤ᠂ ᠵᠤᠨ ᠤ᠋ ᠳᠡᠯᠭᠡᠷ ᠴᠠᠭ ᠲᠤ᠌ ᠬᠠᠷᠠ ᠵᠢᠷᠦᠬᠡᠨ ᠦ᠌ ᠬᠥᠬᠡ ᠨᠠᠭᠤᠷ ᠤ᠋ᠨ ᠬᠦᠪᠡᠭᠡᠨᠡ ᠬᠠᠶᠠᠭᠠ ᠨᠡᠢᠯᠡᠨ ᠵᠤᠰᠠᠬᠤ ᠡᠪᠦᠭᠡᠨ ᠬᠠᠭᠠᠨ ᠴᠢᠯᠡᠭᠡᠷᠬᠡᠭᠰᠡᠨ ᠨᠢ ᠠᠮᠪᠠᠭᠠᠢ ᠶ᠋ᠢ ᠪᠠᠭᠠ ᠦᠭᠡᠢ ᠰᠠᠨᠳᠤᠷᠭᠠᠪᠠ᠃ ᠲᠡᠷᠡ ᠪᠡᠷ ᠵᠢᠯᠣᠭᠣ ᠲᠠᠲᠠᠯ ᠦᠭᠡᠢ ᠲᠡᠷᠭᠡᠭᠦᠯᠦᠭᠰᠡᠭᠡᠷ ᠬᠣᠶᠠᠳᠠᠬᠢ ᠡᠳᠦᠷ ᠦ᠋ᠨ ᠦᠳᠡ ᠬᠡᠯᠪᠡᠢᠭᠰᠡᠨ ᠬᠣᠢᠨᠠ ᠲᠦᠩᠬᠡᠯᠢᠭ ᠭᠣᠷᠣᠬᠠᠨ ᠤ᠋ ᠬᠥᠪᠡᠭᠡᠨ ᠳ᠋ᠦ᠍ ᠵᠤᠰᠠᠵᠤ ᠪᠣᠢ ᠬᠠᠭᠠᠨ ᠦᠷᠭᠦᠭᠡᠨ ᠦ᠌ ᠪᠠᠷᠠ ᠬᠠᠷᠠᠵᠠᠢ᠃ ᠨᠠᠢ᠍ᠮᠠᠨ ᠵᠣᠪᠬᠢᠰ ᠲᠤ᠌ ᠮᠣᠷᠢᠲᠠᠢ ᠬᠠᠷᠠᠭᠤᠯ ᠤ᠋ᠳ ᠬᠣᠷᠣᠮᠰᠠᠭᠠ ᠰᠤᠮᠤ ᠪᠠᠨ ᠰᠡᠷᠡᠯᠵᠡᠭᠦᠯᠦᠨ ᠬᠥᠯᠬᠢᠵᠦ᠂ ᠡᠷᠭᠢᠨ ᠲᠣᠭᠣᠷᠢᠨ ᠬᠠᠶᠠᠭᠠ ᠰᠢᠭᠤᠭᠰᠠᠨ ᠬᠠᠭᠠᠨ ᠴᠠᠭᠠᠨ ᠭᠡᠷ ᠦ᠋ᠨ ᠳᠥᠷᠪᠡᠨ ᠲᠠᠯᠠ ᠳ᠋ᠤ᠌ ᠮᠠᠢ ᠶ᠋ᠢᠨ ᠬᠥᠬᠡ ᠤᠲᠤᠭᠠ ᠰᠤᠭᠤᠨᠠᠭᠯᠠᠬᠤ ᠠᠵᠢ᠃ ᠬᠠᠷᠠᠭᠤᠯ ᠥᠩᠭᠡᠷᠡᠨ ᠮᠣᠷᠢᠨ ᠤ᠋ ᠵᠢᠯᠣᠭᠣ ᠲᠠᠲᠠᠵᠤ᠂ ᠵᠦᠩ ᠢ᠋ᠶ᠋ᠡᠷ ᠬᠡᠯᠲᠦᠷᠢᠨ ᠤᠶᠠᠭᠠ ᠱᠣᠩ ᠳᠡᠭᠡᠷᠡ ᠢᠷᠠ ᠵᠠᠭᠤᠵᠤ ᠪᠠᠭᠤᠪᠠ᠃ ᠬᠠᠭᠠᠨ ᠦᠷᠭᠦᠭᠡᠨ ᠦ᠌ ᠢᠰᠡᠭᠡᠢ ᠡᠭᠦᠳᠡ ᠶ᠋ᠢ ᠲᠣᠲᠣᠭᠣᠨ ᠳᠡᠭᠡᠷᠡ ᠪᠡᠨ ᠣᠷᠬᠢᠵᠠᠢ᠃ ᠭᠡᠷ ᠲᠦ᠍ ᠣᠯᠠᠨ ᠬᠥᠮᠦᠨ ᠪᠠᠢᠬᠤ ᠪᠣᠯᠤᠯᠲᠠᠢ᠃ ᠲᠡᠭᠦᠨ ᠦ᠌ ᠪᠠᠷᠠ ᠪᠣᠯᠣᠭᠰᠠᠳ ᠨᠢ ᠲᠣᠬᠣᠢ ᠲᠦᠰᠢᠨ ᠪᠠᠭᠤᠯᠭᠠᠬᠤ ᠦᠶᠡᠰ ᠲᠣᠳᠣᠢᠨ ᠣᠳᠴᠢᠬᠢᠨ ᠭᠣᠳᠬᠢᠨ ᠭᠠᠷᠴᠤ ᠢᠷᠡᠪᠡ᠃᠂ ᠲᠡᠭᠡᠭᠰᠡᠨ ᠢ᠋ᠶ᠋ᠡᠨ ᠬᠣᠲᠠ ᠠᠢᠯ ᠢ᠋ ᠡᠵᠡᠮᠳᠡᠨ ᠲᠦᠩᠰᠦᠢᠭᠰᠡᠨ ᠲᠦᠭᠰᠢᠭᠦᠷᠢᠲᠦ ᠨᠠᠮ ᠭᠦᠮ ᠢ᠋ ᠡᠪᠳᠡᠨ᠂
— ᠠᠮᠪᠠᠭᠠᠢ ᠬᠠᠨ ᠠᠬᠠᠳᠠᠨ ᠠᠢᠰᠤᠢ! ᠭᠡᠵᠦ ᠬᠠᠲᠠᠭᠠᠬᠤ ᠳ᠋ᠤ᠌ ᠬᠠᠷᠯᠢ ᠺᠤ ᠬᠠᠲᠤᠨ ᠭᠠᠷᠴᠤ ᠢᠷᠡᠭᠰᠡᠨ ᠢ᠋ᠶ᠋ᠡᠨ᠂
— ᠮᠢᠨᠦ ᠬᠦᠦ ᠴᠢᠮᠡᠭᠡ ᠦᠭᠡᠢ ᠭᠡᠯᠡ᠃ ᠠᠮᠪᠠᠭᠠᠢ ᠶᠡᠬᠡ ᠬᠠᠲᠤᠨ ᠲᠠᠢ ᠲᠣᠯᠣᠭᠠᠢ ᠳᠣᠬᠢᠵᠤ ᠮᠡᠨᠳᠦᠯᠡᠭᠡᠳ ᠭᠡᠷ ᠲᠦ᠍ ᠣᠷᠣᠪᠠᠯ ᠬᠠᠨ ᠬᠥᠪᠡᠭᠦᠳ ᠪᠦᠭᠦᠳᠡ ᠴᠤᠭᠯᠠᠵᠠᠢ᠃ ᠬᠠᠮᠤᠭ ᠤ᠋ᠨ ᠬᠣᠢᠮᠣᠷ ᠰᠠᠭᠤᠬᠤ ᠪᠠᠷᠳᠠᠨᠪᠠᠭᠠᠲᠤᠷ ᠤ᠋ᠨ ᠨᠢᠳᠦ ᠤᠯᠠᠢᠵᠤ᠂ ᠵᠣᠪᠬᠢ ᠪᠥᠯᠴᠡᠢᠨ ᠬᠠᠪᠤᠳᠤᠭᠰᠠᠨ ᠬᠠᠷᠠᠭᠳᠠᠨᠠ᠃ ᠬᠦᠷᠡᠯᠭᠡᠷ ᠬᠦᠷᠡᠩ ᠡᠷᠡ ᠬᠠᠮᠠᠷ ᠳᠣᠣᠷᠠ ᠪᠠᠨ ᠱᠤᠤᠬᠢᠲᠤᠨᠠᠨ᠂
— ᠲᠠ ᠨᠠᠭᠠᠰᠢ ᠪᠠᠨ ᠰᠠᠭᠤᠭᠠᠴᠢ ᠭᠡᠬᠦ ᠳ᠋ᠦ᠍ ᠬᠤᠲᠤᠭᠲᠤ ᠮᠣᠩᠬᠣᠷ ᠣᠯᠪᠣᠭ ᠠᠪᠴᠤ ᠳᠡᠪᠢᠰᠪᠡ᠃ ᠬᠤᠯᠠᠨ᠂ ᠬᠠᠭᠠᠨ ᠤ᠋ ᠬᠥᠯ ᠳ᠋ᠦ᠍ ᠰᠠᠭᠤᠵᠤ ᠬᠠᠯᠠᠭᠤᠨ ᠵᠤᠨ ᠢ᠋ᠶ᠋ᠠᠷ ᠪᠤᠯᠠᠭᠠᠨ ᠬᠥᠨᠵᠢᠯᠡ ᠪᠡᠷ ᠬᠤᠴᠢᠭᠰᠠᠨ ᠴᠤ᠌ ᠦᠯᠦ ᠳᠤᠯᠠᠭᠠᠴᠠᠬᠤ ᠬᠥᠯ ᠢ᠋ ᠨᠢ ᠠᠳᠬᠤᠯᠠᠬᠤ ᠠᠵᠢ᠃ ᠬᠣᠲᠣᠯᠠ ᠨᠣᠶᠠᠨ ᠴᠢᠰᠤ ᠦᠭᠡᠢ ᠮᠡᠲᠦ ᠴᠠᠢᠭᠰᠠᠨ ᠭᠠᠷ ᠢ᠋ ᠨᠢ ᠪᠠᠵᠠᠯᠠᠨᠠ᠃ ᠶᠡᠷᠦ ᠬᠠᠨ ᠬᠦᠦ ᠶ᠋ᠢᠨ ᠬᠠᠷᠠᠭᠤᠰᠤᠯ ᠭᠤᠨᠢᠭ ᠠ᠋ᠴᠠ ᠳᠤᠲᠠᠭᠤ ᠦᠭᠡᠢ ᠰᠡᠳᠬᠢᠯ ᠢ᠋ᠶ᠋ᠡᠷ ᠬᠥᠩᠬᠥᠷ ᠬᠣᠷᠴᠢ ᠬᠤᠨ ᠬᠤᠭᠤᠷ ᠤ᠋ᠨ ᠢ᠋ᠶ᠋ᠠᠨ ᠡᠮᠵᠡᠭ ᠴᠠᠪᠬᠠᠳᠠᠰᠤ ᠶ᠋ᠢ ᠪᠠᠵᠠᠯᠠᠨ ᠰᠠᠭᠤᠬᠤ ᠠᠵᠢ᠃ ᠭᠠᠳᠠᠨᠠ ᠪᠠᠨ ᠮᠠᠭᠤᠬᠠᠢ ᠴᠤ᠌ ᠳᠣᠲᠣᠷᠠ ᠪᠠᠨ ᠭᠡᠭᠡᠨ ᠠᠮᠢᠲᠠᠨ ᠠ᠋᠃ ᠭᠡᠷ ᠲᠦ᠍ ᠨᠠᠮ ᠭᠦᠮ ᠪᠣᠯᠪᠠ᠃ ᠡᠪᠡᠳᠴᠢᠨ ᠵᠣᠪᠠᠭᠤᠷᠢ ᠮᠡᠲᠦ ᠡᠯᠡ ᠳᠠᠭᠠ ᠦᠭᠡᠢ ᠪᠠᠢᠳᠠᠯ ᠠ᠋ᠴᠠ ᠬᠠᠯᠠᠰᠢᠷᠠᠭᠰᠠᠨ ᠬᠠᠷᠯᠢ ᠺᠤ ᠬᠠᠲᠤᠨ ᠬᠣᠯᠠ ᠶ᠋ᠢᠨ ᠵᠣᠴᠢᠨ ᠳ᠋ᠤ᠌ ᠴᠠᠢ ᠬᠢᠵᠦ ᠥᠭᠭᠦᠭᠡᠳ ᠭᠠᠷᠴᠤ ᠣᠳᠤᠯᠠ᠃ ᠲᠠᠯᠠ ᠰᠢᠭ᠋ ᠬᠠᠩᠬᠠᠢ ᠭᠡᠷ ᠲᠦ᠍ ᠠᠬᠢᠭᠠᠳ ᠯᠠ ᠴᠢᠮᠡᠭᠡ ᠠᠯᠳᠠᠷᠠᠪᠠ᠃ ᠬᠠᠪᠤᠯ ᠬᠠᠭᠠᠨ ᠨᠢᠳᠦ ᠪᠡᠨ ᠠᠨᠢᠨ ᠳᠡᠭᠡᠭᠰᠢ ᠬᠠᠷᠠᠵᠤ ᠬᠡᠪᠲᠡᠬᠦ ᠠᠭᠠᠳ ᠰᠤᠯᠠᠬᠠᠨ ᠠᠨᠢᠭᠰᠠᠨ ᠰᠣᠷᠮᠤᠤᠰᠤᠨ ᠤ᠋ ᠬᠢᠨᠢ ᠵᠠᠪᠰᠠᠷ ᠢ᠋ᠶ᠋ᠠᠷ ᠲᠤᠩᠭᠠᠯᠠᠭᠬᠠᠨ ᠨᠢᠯᠪᠤᠰᠤ ᠭᠢᠯᠠᠯᠵᠠᠨ ᠭᠠᠷᠴᠤ᠂ ᠰᠢᠨᠡ ᠶ᠋ᠢ ᠳᠠᠭᠠᠨ ᠠᠨᠢᠷ ᠦᠭᠡᠢ ᠤᠷᠤᠰᠴᠤ ᠪᠠᠢᠯᠠ᠃
— ᠠᠪᠤ ᠠ᠋᠂ ᠠᠮᠪᠠᠭᠠᠢ ᠨᠣᠶᠠᠨ ᠢᠷᠡᠯᠡ ᠭᠡᠵᠦ ᠬᠣᠲᠣᠯᠠ ᠠᠷᠭᠠᠳᠠᠩᠭᠤᠢ ᠥᠭᠦᠯᠡᠬᠦ ᠳ᠋ᠦ᠍ ᠡᠪᠦᠭᠡᠨ ᠬᠠᠭᠠᠨ ᠨᠢᠳᠦ ᠪᠡᠨ ᠬᠠᠭᠠᠰ ᠨᠡᠭᠡᠭᠡᠨ ᠬᠠᠷᠠᠴᠠ ᠪᠠᠷ ᠢ᠋ᠶ᠋ᠠᠨ ᠡᠷᠢᠬᠦ ᠮᠡᠲᠦ ᠭᠡᠷ ᠳᠣᠲᠣᠷᠠ ᠬᠢ ᠶ᠋ᠢ ᠲᠣᠭᠣᠷᠢᠭᠤᠯᠤᠨ ᠬᠠᠷᠠᠪᠠ᠃ ᠠᠮᠪᠠᠭᠠᠢ ᠮᠡᠬᠦᠢᠰᠬᠢᠨ᠂
— ᠬᠠᠭᠠᠨ ᠠᠬᠠ ᠶ᠋ᠢᠨ ᠵᠠᠷᠯᠢᠭ ᠢ᠋ᠶ᠋ᠠᠷ ᠪᠢ ᠢᠷᠡᠯᠡ ᠭᠡᠬᠦ ᠳ᠋ᠦ᠍ ᠰᠠᠶᠢ ᠣᠯᠵᠤ ᠬᠠᠷᠠᠨ ᠲᠠᠨᠢᠵᠤ ᠶᠠᠳᠠᠬᠤ ᠮᠡᠲᠦ ᠤᠳᠠᠭᠠᠨ ᠰᠢᠷᠲᠡᠵᠦ᠂
— ᠪᠢ ᠲᠠᠨᠢᠯᠠ ᠭᠡᠪᠡ᠃ ᠴᠢᠩᠭᠢᠭᠡᠳ ᠲᠣᠳᠣᠢᠨ ᠣᠳᠴᠢᠬᠢᠨ ᠤ᠋ ᠬᠠᠯᠠᠭᠤᠨ ᠠᠯᠠᠭᠠᠨ ᠠ᠋ᠴᠠ ᠲᠠᠮᠢᠷ ᠮᠠᠭᠤᠲᠠᠢ ᠭᠠᠷ ᠢ᠋ᠶ᠋ᠠᠨ ᠰᠤᠭᠤᠯᠤᠨ ᠠᠪᠴᠤ᠂
— ᠬᠥᠪᠡᠭᠦᠳ ᠮᠢᠨᠢ ᠲᠠ ᠨᠠᠷ ᠭᠠᠷᠴᠤ ᠪᠠᠢ! ᠬᠡᠮᠡᠪᠡ《ᠶᠠᠭᠤ ᠭᠡᠪᠡ ᠠ᠋》ᠭᠡᠬᠦ ᠰᠢᠭ ᠪᠠᠷᠳᠠᠨᠪᠠᠭᠠᠲᠤᠷ ᠳᠦᠷᠯᠡᠢᠭᠰᠡᠨ ᠤᠯᠠᠭᠠᠨ ᠨᠢᠳᠦ ᠪᠡᠷ ᠰᠢᠷᠲᠡᠰᠬᠢᠨ ᠨᠢᠭᠡ ᠶᠡᠬᠡ ᠲᠣᠮᠣ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠦᠷᠭᠦᠭᠰᠡᠨ ᠲᠣᠷᠣᠮ ᠰᠢᠭ᠋ ᠰᠦᠷ ᠫᠡᠷ ᠬᠢᠨ ᠪᠣᠰᠤᠭᠠᠳ ᠳᠡᠭᠦᠦ ᠨᠠᠷ ᠢ᠋ᠶ᠋ᠠᠨ ᠳᠠᠭᠠᠭᠤᠯᠤᠨ ᠭᠠᠷᠤᠯᠠ᠃
— ᠥᠬᠢᠨᠪᠠᠷᠬᠠᠭ ᠢ᠋ ᠮᠢᠨᠢ ᠲᠠᠲ᠋ᠠᠷ ᠤ᠋ᠳ ᠡᠰᠡ ᠥᠭᠴᠡᠢ᠃
— ᠪᠢ ᠲᠤᠭᠤᠯᠤᠭᠰᠠᠨ᠂ ᠬᠠᠭᠠᠨ ᠠᠬᠠ ᠮᠢᠨᠢ᠁
— ᠤᠤᠭᠠᠨ ᠬᠦᠦ ᠲᠡᠢ ᠪᠡᠨ ᠠᠭᠤᠯᠵᠠᠳᠠᠭ ᠵᠠᠶᠠᠭᠠ ᠲᠥᠭᠡᠷᠢᠪᠡ ᠪᠣᠯᠤᠯᠲᠠᠢ᠃ ᠲᠣᠢᠪᠤᠯᠠᠬᠤ ᠭᠡᠵᠦ ᠯᠡ ᠠᠪᠤᠪᠠ ᠭᠡᠵᠦ ᠳᠡ ᠲᠠᠲ᠋ᠠᠷ ᠤ᠋ᠳ᠂ ᠲᠣᠯᠣᠭᠠᠢ ᠶ᠋ᠢ ᠨᠢ ᠵᠠᠯᠭᠢᠬᠤ ᠭᠡᠵᠦ ᠠᠪᠤᠭᠠ ᠪᠢᠵᠡ ᠳᠡ᠁ ᠭᠡᠳ ᠤᠳᠠᠭᠠᠨ ᠶᠠᠷᠢᠭᠰᠠᠨ ᠳ᠋ᠠᠭᠠᠨ ᠲᠠᠮᠢᠷᠳᠠᠨ ᠨᠢᠭᠡᠨ ᠬᠣᠷᠣᠮ ᠰᠦᠷᠡᠬᠡᠢ ᠠᠮᠢᠰᠬᠤᠭᠠᠳᠠᠪᠠ᠃ ᠡᠢᠨ ᠬᠣᠷᠣᠮ ᠬᠢᠷᠢ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ᠂
— ᠠᠮᠪᠠᠭᠠᠢ ᠮᠢᠨᠢ! ᠰᠡᠩᠭᠦᠨ ᠪᠢᠯᠭᠡ ᠠᠪᠠᠭᠠ ᠶ᠋ᠢᠨ ᠬᠦᠦ ᠶᠦᠮ ᠴᠢ᠃ ᠮᠢᠨᠦ ᠦᠷᠡ ᠡᠴᠡ ᠢᠯᠭᠠᠭᠠ ᠶᠠᠭᠤᠨ ᠪᠠᠢᠬᠤ ᠪᠣᠢ᠃ ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠬᠤᠪᠢ ᠵᠠᠶᠠᠭᠠ ᠶ᠋ᠢ ᠴᠢ ᠳᠠᠭᠠᠭᠠᠵᠤ ᠦᠯᠡᠲᠡᠯᠡ ᠰᠢᠦ ᠭᠡᠬᠦ ᠳ᠋ᠦ᠍ ᠠᠮᠪᠠᠭᠠᠢ ᠣᠪᠤᠭᠤᠰᠬᠢᠲᠠᠯᠠ ᠴᠣᠴᠢᠨ ᠰᠠᠨᠳᠤᠷᠴᠤ᠂
— ᠬᠠᠭᠠᠨ ᠠᠬᠠ ᠲᠠ ᠶᠠᠭᠤ ᠶᠠᠷᠢᠨᠠ᠃ ᠠᠭᠤᠯᠠ ᠮᠡᠲᠦ ᠵᠢᠷᠭᠤᠭᠠᠨ ᠰᠠᠢᠬᠠᠨ ᠦᠷᠡ ᠲᠡᠢ ᠪᠠᠢᠵᠤ᠁ ᠭᠡᠪᠡᠯ ᠬᠠᠭᠠᠨ ᠡᠪᠦᠭᠡᠨ ᠦᠭᠡ ᠶ᠋ᠢ ᠨᠢ ᠲᠠᠰᠤᠯᠵᠤ᠂
— ᠲᠩᠷᠢ ᠵᠠᠶᠠᠭᠠᠭᠰᠠᠨ ᠳᠣᠯᠣᠭᠠᠨ ᠰᠠᠢᠬᠠᠨ ᠬᠦᠦ ᠪᠣᠢ ᠨᠢ ᠪᠣᠢ᠃ ᠡᠨᠡ ᠬᠡᠳᠦ ᠡᠴᠡ ᠤᠯᠤᠰ ᠠᠪᠤᠭᠠᠳ ᠶᠠᠪᠤᠴᠢᠬᠤ ᠤᠬᠠᠭᠠᠨ ᠲᠡᠭᠰᠢ ᠬᠥᠮᠦᠨ ᠬᠣᠲᠣᠯᠠ ᠮᠢᠨᠢ ᠶᠦᠮ ᠰᠠᠨ᠁ ᠭᠡᠲᠡᠯᠡ ᠡᠷᠡ ᠬᠥᠮᠦᠨ ᠦ᠌ ᠬᠢᠳᠡᠭ ᠢ᠋ ᠬᠢᠭᠰᠡᠨ ᠡᠴᠡ ᠪᠣᠯᠵᠤ ᠡᠨᠡ ᠬᠡᠳᠦ ᠳ᠋ᠡᠭᠡᠨ ᠨᠡᠷᠡ ᠠᠯᠳᠠᠭᠠᠳ ᠪᠠᠢᠨᠠ᠂ ᠬᠦᠦ ᠮᠢᠨᠢ᠃ ᠵᠢᠷᠭᠤᠭᠠᠨ ᠬᠦᠦ ᠶ᠋ᠢᠨ ᠳᠤᠮᠳᠠ ᠭᠠᠷᠤᠭᠰᠠᠨ ᠠᠩ ᠴᠠᠪᠠ ᠶ᠋ᠢ ᠬᠠᠷᠠᠭᠰᠠᠭᠠᠷ ᠪᠠᠢᠵᠤ ᠶᠠᠰᠤ ᠬᠠᠶᠠᠵᠤ ᠪᠣᠢ ᠮᠡᠲᠦ ᠬᠣᠲᠣᠯᠠ ᠳ᠋ᠤ᠌ ᠬᠠᠭᠠᠨ ᠲᠠᠮᠠᠭᠠ ᠥᠭᠭᠦᠭᠡᠳ ᠶᠠᠭᠠᠬᠢᠬᠤ ᠪᠣᠢ ᠳᠠ᠃ ᠦᠷᠡᠰ ᠢ᠋ᠶ᠋ᠡᠨ ᠬᠢᠲᠤᠭᠠᠯᠠᠭᠰᠠᠨ ᠲᠠᠢ ᠠᠳᠠᠯᠢ ᠪᠣᠯᠤᠨᠠ᠁ ᠲᠡᠭᠦᠨ ᠦ᠌ ᠵᠠᠶᠠᠭᠠ ᠶ᠋ᠢ ᠴᠢ ᠮᠢᠨᠢ ᠳᠠᠭᠠᠭᠠᠵᠤ ᠦᠯᠡᠳᠡ᠁ ᠴᠠᠷᠬᠠᠢᠯᠢᠩᠬᠤᠸᠠ ᠶ᠋ᠢᠨ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠪᠠᠢᠭᠰᠠᠭᠠᠷ ᠠᠲᠠᠯᠠ ᠬᠠᠮᠤᠭ ᠮᠣᠩᠭᠣᠯ ᠣᠪᠣᠭ ᠲᠤ᠌ ᠬᠠᠭᠠᠨ ᠵᠢᠯᠣᠭᠣ ᠶ᠋ᠢ ᠨᠠᠳᠠ ᠳ᠋ᠤ᠌ ᠠᠳᠬᠤᠭᠤᠯᠤᠭᠰᠠᠨ ᠶᠤᠮ᠃ ᠬᠠᠭᠠᠨ ᠤ᠋ ᠠᠯᠪᠠ ᠬᠠᠯᠠᠭᠠ ᠲᠠᠢ᠂ ᠡᠵᠡᠨ ᠦ᠌ ᠠᠵᠢᠯ ᠡᠭᠡᠯᠵᠢ ᠲᠡᠢ᠂ ᠠᠮᠪᠠᠭᠠᠢ ᠮᠢᠨᠢ᠁ ᠲᠠᠢᠴᠢᠭᠤᠳ ᠲᠥᠷᠥ ᠪᠠᠷᠢᠬᠤ ᠴᠠᠭ ᠢᠷᠡᠪᠡ᠃ ᠭᠤᠷᠪᠠᠨ ᠭᠣᠣᠯ ᠳᠠᠶᠠᠭᠠᠷ᠂ ᠪᠤᠷᠬᠠᠨ ᠬᠠᠯᠳᠤᠨ ᠳᠠᠶᠠᠭᠠᠷ ᠠᠮᠪᠠᠭᠠᠢ ᠨᠣᠶᠠᠨ ᠲᠠᠨ ᠳ᠋ᠤ᠌ ᠲᠠᠯᠠ ᠲᠠᠢ ᠪᠠᠢᠳᠠᠭ ᠠᠯᠪᠠᠲᠤ ᠢᠷᠭᠡᠳ ᠢ᠋ᠶ᠋ᠡᠨ ᠵᠠᠬᠢᠷ! ᠭᠡᠪᠡ᠃ ᠴᠢᠩᠭᠢᠭᠡᠳ ᠠᠮᠢᠰᠬᠤᠭᠠᠳᠠᠨ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠂
— ᠮᠢᠨᠦ ᠬᠡᠯᠡᠬᠦ ᠦᠭᠡ ᠳᠠᠭᠤᠰᠪᠠ᠃ ᠬᠥᠪᠡᠭᠦᠳ ᠢ᠋ ᠤᠷᠤᠭᠤᠯ! ᠭᠡᠯᠡ᠃ ᠠᠮᠪᠠᠭᠠᠢ ᠨᠣᠶᠠᠨ ᠨᠡᠭᠡᠭᠡᠯᠲᠡ ᠲᠡᠢ ᠡᠭᠦᠳᠡ ᠪᠡᠷ ᠱᠠᠭᠠᠢᠨ᠂ — ᠬᠠᠨ ᠬᠥᠪᠡᠭᠦᠳ ᠢ᠋ ᠳᠠᠭᠤᠳᠠᠵᠤ ᠪᠠᠢᠨᠠ ᠭᠡᠬᠦ ᠳ᠋ᠦ᠍ ᠤᠶᠠᠭᠠ ᠱᠣᠩ ᠤ᠋ᠨ ᠳᠡᠷᠭᠡᠳᠡ ᠰᠢᠪᠠᠭᠠᠷᠠᠯᠳᠤᠨ ᠠᠮᠪᠠᠭᠠᠢ ᠶ᠋ᠢᠨ ᠬᠥᠪᠡᠭᠦᠨ ᠬᠠᠲᠠᠭᠠᠨ ᠬᠢᠭᠡᠳ ᠪᠠᠷᠠ ᠪᠣᠯᠤᠭᠠᠴᠢ ᠨᠠᠷ ᠲᠠᠢ ᠬᠠᠭᠠᠨ ᠡᠴᠢᠭᠡ ᠶ᠋ᠢᠨ ᠪᠡᠶᠡ ᠶ᠋ᠢᠨ ᠲᠠᠯᠠ ᠪᠠᠷ ᠨᠠᠮ ᠳᠠᠭᠤ ᠪᠠᠷ ᠶᠠᠷᠢᠯᠴᠠᠨ ᠠᠭᠰᠠᠨ ᠬᠥᠪᠡᠭᠦᠳ ᠳᠠᠷᠬᠢᠨ ᠨᠠᠭᠠᠰᠢᠯᠠᠪᠠ᠃ ᠠᠭᠤᠯᠠ ᠰᠢᠭ᠋ ᠬᠠᠩᠬᠠᠷ ᠬᠥᠪᠡᠭᠦᠳ ᠡᠭᠦᠳᠡ ᠪᠡᠷ ᠪᠠᠭᠲᠠᠵᠤ ᠶᠠᠳᠠᠨ ᠣᠷᠣᠵᠤ ᠢᠷᠡᠵᠦ ᠬᠥᠨᠳᠡᠯᠢᠳᠦᠨ ᠵᠣᠭᠰᠣᠬᠤ ᠳ᠋ᠤ᠌ ᠬᠠᠪᠤᠯ ᠬᠠᠭᠠᠨ᠂
— ᠬᠣᠲᠣᠯᠠ ᠴᠢ ᠨᠠᠭᠠᠰᠢ ᠢᠷᠡ ᠭᠡᠰᠡᠨ ᠢ᠋ᠶ᠋ᠡᠨ ᠬᠥᠪᠡᠭᠦᠨ ᠦ᠌ ᠪᠡᠨ ᠲᠣᠮᠣ ᠭᠠᠷ ᠢ᠋ ᠠᠶᠠᠷᠬᠠᠨ ᠠᠳᠬᠤᠵᠤ ᠳᠡᠷᠭᠡᠳᠡ ᠪᠡᠨ ᠰᠠᠭᠤᠯᠭᠠᠯᠠ᠃ ᠲᠡᠭᠡᠭᠡᠳ᠂
— ᠪᠠᠷᠳᠠᠨ ᠬᠥᠪᠡᠭᠦᠨ ᠮᠢᠨᠢ ᠲᠣᠯᠣᠭᠠᠢ ᠶ᠋ᠢ ᠮᠢᠨᠢ ᠲᠦᠰᠢᠭᠡᠳ ᠠᠯᠢ ᠳᠠ! ᠭᠡᠵᠦ ᠭᠤᠶᠤᠬᠤ ᠳ᠋ᠤ᠌ ᠰᠡᠷ ᠰᠡᠷ ᠵᠠᠩ ᠲᠠᠢ ᠤᠤᠭᠠᠨ ᠬᠦᠦ ᠪᠡᠨ ᠦᠭᠡᠢᠯᠡᠪᠡ ᠪᠣᠯᠤᠯᠲᠠᠢ ᠬᠣᠭᠣᠯᠠᠢ ᠨᠢ ᠵᠠᠩᠭᠢᠷᠠᠯᠠ᠃ ᠪᠠᠷᠳᠠᠨᠪᠠᠭᠠᠲᠤᠷ ᠬᠠᠭᠠᠨ ᠡᠴᠢᠭᠡ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢ ᠵᠥᠭᠡᠯᠡᠬᠡᠨ ᠡᠷᠭᠦᠵᠦ ᠡᠪᠦᠳᠦᠭ ᠢ᠋ᠶ᠋ᠡᠨ ᠳᠡᠷᠡᠯᠡᠭᠦᠯᠵᠦ᠂ ᠴᠡᠭᠡᠵᠢ ᠶ᠋ᠢ ᠨᠢ ᠰᠡᠭᠡᠢᠯᠭᠡᠨ ᠲᠦᠰᠢᠪᠡ᠃ ᠬᠤᠯᠠᠨ ᠬᠥᠯ ᠢ᠋ ᠪᠠᠷᠠᠳᠠᠨ ᠰᠠᠭᠤᠵᠤ᠂ ᠲᠣᠳᠣᠢᠨ ᠣᠳᠴᠢᠬᠢᠨ ᠡᠯᠡ ᠴᠢᠮᠡᠭᠡ ᠦᠭᠡᠢ ᠰᠦᠷᠯᠢᠭ ᠶᠣᠰᠣᠯᠠᠯ ᠠ᠋ᠴᠠ ᠡᠮᠢᠶᠡᠨ ᠬᠠᠷᠯᠢ ᠺᠤ ᠢᠵᠢᠢ ᠶ᠋ᠢᠨ ᠬᠣᠷᠮᠣᠢ ᠠ᠋ᠴᠠ ᠵᠠᠭᠤᠷᠠᠨ ᠪᠠᠢᠯᠠ᠃
ᠬᠠᠪᠤᠯ ᠬᠠᠭᠠᠨ ᠶᠡᠷᠦ ᠪᠤᠰᠤ ᠶ᠋ᠢᠨ ᠬᠤᠷᠴᠠ ᠨᠢᠳᠦ ᠪᠡᠷ ᠬᠥᠪᠡᠭᠦᠳ ᠢ᠋ᠶ᠋ᠡᠨ ᠴᠣᠭᠣ ᠰᠢᠷᠲᠡᠨ ᠤᠳᠠᠭᠠᠨ ᠳᠠᠭᠤ ᠦᠭᠡᠢ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ᠂
— ᠥᠬᠢᠨᠪᠠᠷᠬᠠᠭ ᠦᠷᠡ ᠮᠢᠨᠢ ᠠᠯᠠᠭᠠ ᠪᠠᠢᠨᠠ᠃ ᠬᠠᠲᠠᠭᠠᠨ ᠦᠷᠡ ᠮᠢᠨᠢ ᠠᠯᠠᠭᠠ ᠪᠠᠢᠨᠠ᠃ ᠪᠠᠷᠠᠳᠠᠨ ᠬᠦᠦ ᠮᠢᠨᠢ ᠴᠢ ᠳᠡᠭᠦᠦ ᠨᠠᠷ ᠢ᠋ᠶ᠋ᠠᠨ ᠠᠬᠠᠯᠠᠬᠤ ᠴᠠᠭ ᠢᠷᠡᠪᠡ᠃ ᠶᠠᠭᠤᠮᠠᠨ ᠤ᠋ ᠲᠦᠷᠦᠭᠦᠨ ᠳ᠋ᠦ᠍ ᠰᠦᠷ ᠰᠡᠷ ᠬᠢᠬᠦ ᠪᠡᠨ ᠪᠣᠯᠢᠭᠲᠤᠨ! ᠬᠥᠮᠦᠨ ᠪᠦᠬᠦᠨ ᠥᠪᠡᠷ ᠦ᠋ᠨ ᠳᠤᠷᠠ ᠪᠠᠷ ᠪᠤᠤ ᠲᠣᠩᠭᠣᠴᠢ! ᠣᠯᠠᠨ ᠲᠣᠯᠣᠭᠠᠢ ᠲᠠᠢ ᠮᠣᠭᠠᠢ ᠶ᠋ᠢᠨ ᠦᠯᠢᠭᠡᠷ ᠪᠣᠯᠬᠤ ᠮᠡᠲᠦ᠃ ᠨᠢᠭᠡ ᠲᠣᠯᠣᠭᠠᠢ ᠲᠠᠢ᠂ ᠣᠯᠠᠨ ᠰᠡᠭᠦᠯ ᠲᠡᠢ ᠮᠣᠭᠠᠢ ᠮᠡᠲᠦ ᠶᠠᠪᠤᠪᠠᠯ ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠬᠠᠪᠤᠯ ᠬᠠᠭᠠᠨ ᠮᠢᠨᠦ ᠪᠡᠶᠡ ᠶᠠᠰᠤ ᠠᠮᠤᠷ ᠨᠣᠢᠷᠰᠤᠬᠤ ᠪᠢᠯᠡ᠃ ᠲᠠᠩᠭᠠᠷᠢᠭᠯᠠ! ᠬᠡᠮᠡᠬᠦ ᠳ᠋ᠦ᠍ ᠭᠡᠷ ᠲᠦ᠍ ᠨᠠᠮ ᠭᠦᠮ ᠠᠭᠠᠳ ᠬᠠᠷᠯᠢ ᠺᠤ ᠬᠠᠲᠤᠨ ᠯᠠ ᠮᠡᠭᠰᠢᠬᠦ ᠠᠪᠠᠢ᠃ ᠬᠥᠪᠡᠭᠦᠳ ᠪᠡᠶᠡ ᠪᠡᠶᠡ ᠪᠡᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠪᠠᠷᠳᠠᠨᠪᠠᠭᠠᠲᠤᠷ᠂ ᠳᠠᠷᠠᠭᠠ ᠨᠢ ᠬᠤᠲᠤᠭᠲᠤ ᠮᠣᠩᠬᠣᠷ ᠵᠥᠪ ᠭᠠᠷ ᠢ᠋ᠶ᠋ᠠᠨ ᠡᠷᠭᠦᠬᠦ ᠳ᠋ᠦ᠍ ᠬᠥᠪᠡᠭᠦᠳ ᠳᠠᠭᠠᠯᠳᠤᠨ ᠡᠷᠭᠦᠵᠡᠢ᠃ ᠡᠪᠦᠭᠡᠨ ᠬᠠᠭᠠᠨ ᠤᠷᠲᠤ ᠪᠠᠷ ᠰᠠᠨᠠᠭᠠ ᠠᠯᠲᠠᠨ᠂
— ᠰᠡᠳᠬᠢᠯ ᠠᠮᠤᠷ ᠡᠪᠦᠭᠡᠳ ᠦ᠋ᠨ ᠠᠷᠤ ᠠ᠋ᠴᠠ ᠣᠴᠢᠵᠤ ᠪᠣᠯᠬᠤ ᠲᠠᠢ ᠪᠣᠯᠪᠠ ᠭᠡᠳ ᠬᠣᠲᠣᠯᠠ ᠶ᠋ᠢᠨ ᠭᠠᠷ ᠢ᠋ ᠲᠠᠯᠪᠢᠵᠤ᠂ ᠰᠠᠭᠤᠳᠠᠯ ᠢ᠋ᠶ᠋ᠠᠨ ᠵᠠᠰᠠᠨ ᠥᠨᠳᠡᠢᠵᠦ ᠢᠷᠡᠭᠰᠡᠨ ᠢ᠋ᠶ᠋ᠡᠨ᠂
— ᠲᠠ ᠪᠦᠭᠦᠳᠡ ᠮᠡᠳᠡᠲᠦᠭᠡᠢ! ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠬᠠᠭᠠᠨ᠂ ᠲᠠᠢᠴᠢᠭᠤᠳ ᠤ᠋ᠨ ᠠᠮᠪᠠᠭᠠᠢ ᠰᠡᠴᠡᠨ᠁ ᠭᠡᠬᠦ ᠳ᠋ᠦ᠍ ᠬᠠᠭᠠᠨ ᠦᠷᠭᠦᠭᠡᠨ ᠳ᠋ᠦ᠍ ᠡᠰᠡ ᠴᠢᠮᠡᠭᠡ ᠭᠠᠷᠪᠠ᠃ ᠴᠢᠷᠠᠢ ᠳᠠᠷᠤᠤ᠂ ᠬᠤᠪᠴᠠᠰᠤ ᠭᠤᠨᠳᠠᠭᠤ ᠬᠥᠩᠬᠥᠷ ᠬᠣᠷᠴᠢ ᠶ᠋ᠢᠨ ᠨᠢᠯᠪᠤᠰᠤ ᠲᠤᠰᠬᠤ ᠭᠡᠮ ᠢ᠋ᠶ᠋ᠡᠷ ᠬᠤᠨ ᠬᠤᠭᠤᠷ ᠤ᠋ᠨ ᠴᠢᠪᠬᠠᠳᠠᠰᠤ ᠲᠤᠩ ᠲᠤᠩ ᠬᠢᠨ ᠳᠤᠤᠭᠠᠷᠬᠤ ᠪᠥᠯᠥᠭᠡ᠃ ᠨᠢᠯᠪᠤᠰᠤ ᠲᠠᠢ ᠤᠷᠤᠰᠬᠤ ᠡᠯᠡ ᠠᠶᠠᠯᠭᠤ ᠬᠡᠵᠢᠶᠡ ᠨᠢᠭᠡᠨ ᠴᠠᠭ ᠲᠤ᠌ ᠳᠣᠮᠣᠭ ᠲᠠᠢ ᠨᠡᠢᠯᠡᠵᠦ ᠤᠷᠤᠰᠤᠨᠠ ᠠᠪᠠᠢ᠃ ᠬᠠᠷᠢᠨ ᠲᠦᠳᠡᠬᠡᠨ ᠬᠠᠭᠠᠨ ᠪᠠᠮᠪᠠᠷ ᠪᠠᠷᠢᠭᠰᠠᠨ ᠮᠣᠷᠢᠲᠠᠨ ᠡᠯᠴᠢᠰ ᠵᠦᠭ ᠵᠦᠭ ᠲᠡᠢᠰᠢ ᠬᠠᠷᠪᠤᠭᠰᠠᠨ ᠰᠤᠮᠤ ᠰᠢᠭ᠋ ᠳᠣᠪᠲᠣᠯᠭᠠᠵᠤ ᠬᠠᠮᠤᠭ ᠮᠣᠩᠭᠣᠯ ᠬᠢᠭᠡᠳ ᠲᠠᠢᠴᠢᠭᠤᠳ᠂ ᠬᠣᠩᠭᠢᠷᠠᠳ᠂ ᠣᠯᠬᠣᠨᠤᠳ ᠠᠢᠮᠠᠭ ᠤ᠋ᠨ ᠨᠤᠲᠤᠭ ᠳᠠᠶᠠᠭᠠᠷ ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠬᠠᠪᠤᠯ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠢ᠋ ᠬᠠᠤᠯᠢᠴᠢᠯᠠᠨ ᠲᠤᠩᠬᠠᠭᠯᠠᠵᠤ ᠠᠪᠠᠢ᠃ ᠡᠢᠨ ᠭᠠᠯᠲᠤ ᠵᠠᠷᠯᠢᠭ ᠢᠰᠦᠯᠳᠦᠨ ᠠᠭᠰᠠᠨ ᠪᠠᠮᠪᠠᠷᠲᠤ ᠰᠥᠨᠢ ᠬᠠᠪᠤᠯ ᠬᠠᠭᠠᠨ ᠲᠩᠷᠢ ᠪᠣᠯᠪᠠ᠃
4
ᠬᠣᠷᠵᠠᠬᠤᠰ ᠪᠣᠶᠤᠷᠤᠭ ᠤ᠋ᠨ ᠭᠡᠷᠡᠯ ᠰᠠᠴᠤᠷᠠᠭᠰᠠᠨ ᠴᠠᠭᠠᠨ ᠣᠷᠳᠣᠨ ᠤ᠋ ᠪᠠᠷᠠ ᠬᠣᠯᠠ ᠠ᠋ᠴᠠ ᠨᠣᠭᠣᠭᠠᠨ ᠲᠠᠯᠠ ᠳ᠋ᠤ᠌ ᠰᠢᠭᠢᠳᠬᠡᠭᠰᠡᠨ ᠰᠤᠪᠤᠳ ᠮᠡᠲᠦ ᠴᠠᠢᠷᠠᠨ ᠦᠵᠡᠭᠳᠡᠪᠡ᠃ ᠤᠷᠲᠤ ᠪᠠᠯᠭᠠᠰᠤᠨ ᠤ᠋ ᠪᠠᠷᠠ ᠬᠠᠷᠠᠭᠰᠠᠨ ᠲᠣᠷᠯᠣᠭ ᠲᠤᠭᠤᠷᠢᠯ ᠰᠡᠳᠬᠢᠯ ᠬᠥᠳᠡᠯᠵᠦ᠂
— ᠬᠠᠲᠤᠨ ᠢᠵᠢᠢ ᠮᠢᠨᠢ᠂ ᠶᠠᠭ ᠶᠠᠪᠠᠭᠠᠨ ᠤ᠋ ᠭᠣᠣᠯ ᠳ᠋ᠠᠭᠠᠨ ᠱᠤᠮᠪᠠᠬᠤ ᠴᠠᠭ ᠢᠷᠡᠪᠡ ᠪᠢᠰᠢ ᠤᠤ ᠭᠡᠮᠡᠨ ᠬᠠᠰᠬᠢᠷᠬᠤ ᠳ᠋ᠤ᠌ ᠢᠯᠮᠠ ᠬᠠᠲᠤᠨ ᠮᠤᠬᠤᠯᠠᠭ ᠲᠡᠷᠭᠡᠨ ᠦ᠌ ᠰᠡᠬᠡᠭᠡᠪᠴᠢ ᠪᠡᠷ ᠴᠤᠬᠤᠢᠨ ᠬᠠᠷᠠᠵᠤ᠂
— ᠶᠢᠰᠦᠭᠡᠢ ᠪᠠᠭᠠᠲᠤᠷ ᠠᠨᠳᠠ ᠳ᠋ᠠᠭᠠᠨ ᠵᠠᠯᠪᠠᠷᠢ! ᠭᠡᠵᠡᠢ᠃ ᠲᠣᠷᠯᠣᠭ ᠲᠣᠭᠣᠷᠢᠯ ᠴᠡᠭᠡᠵᠢ ᠳᠦᠭᠦᠷᠡᠩ ᠠᠮᠢᠰᠬᠤᠯᠯᠠᠵᠤ᠂
— ᠠᠨᠳᠠ ᠮᠢᠨᠢ᠂ ᠠᠯᠲᠠᠨ ᠤᠯᠤᠰ ᠤ᠋ᠨ ᠭᠠᠷ ᠠ᠋ᠴᠠ ᠰᠠᠯᠭᠠᠵᠤ ᠥᠭᠭᠦᠭᠰᠡᠨ ᠠᠴᠢ ᠭᠠᠪᠢᠶᠠ ᠶ᠋ᠢ ᠲᠠᠨᠢ ᠶᠢᠰᠦᠨ ᠦᠶᠡ ᠳ᠋ᠡᠭᠡᠨ ᠵᠠᠬᠢᠨᠠ ᠪᠢ᠁ ᠭᠡᠳ ᠮᠣᠷᠢᠨ ᠠ᠋ᠴᠠ ᠠᠯᠠᠪᠬᠢᠨ ᠪᠠᠭᠤᠵᠤ ᠪᠦᠰᠡ ᠪᠡᠨ ᠲᠠᠢᠯᠤᠨ᠂
— ᠶᠢᠰᠦᠭᠡᠢ᠂ ᠪᠠᠭᠠᠲᠤᠷ ᠡᠷᠡ ᠶ᠋ᠢᠨ ᠬᠡᠢ ᠮᠣᠷᠢ ᠪᠦᠰᠡ ᠪᠡᠨ ᠰᠣᠯᠢᠵᠤ ᠪᠦᠰᠡᠯᠡᠶᠡ᠃ ᠳᠡᠪᠡᠯ ᠲᠡᠢ ᠲᠥᠷᠥᠭᠰᠡᠨ ᠠᠬᠠ ᠳᠡᠭᠦᠦᠰ ᠪᠣᠯᠲᠤᠭᠠᠢ᠂ ᠠᠨᠳᠠ ᠮᠢᠨᠢ᠃ ᠤᠨᠠᠭᠠᠨ ᠰᠠᠢᠨ ᠬᠦᠯᠦᠭ ᠢ᠋ᠶ᠋ᠡᠨ ᠰᠣᠯᠢᠵᠤ ᠤᠨᠤᠶᠠ᠃ ᠤᠷᠤᠭ ᠤ᠋ᠨ ᠤᠷᠤᠭ ᠲᠤ᠌ ᠵᠠᠬᠢᠵᠤ ᠤᠳᠤᠮ ᠰᠤᠳᠤᠷ ᠪᠠᠷᠢᠲᠤᠭᠠᠢ! ᠭᠡᠪᠡ᠃ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠶᠣᠰᠣ ᠪᠠᠷ ᠪᠣᠯᠵᠤ ᠠᠯᠲᠠᠨ ᠲᠣᠪᠣᠷᠤᠤ ᠲᠠᠢ ᠰᠣᠷᠣᠨ ᠪᠦᠰᠡ ᠪᠡᠨ ᠰᠣᠯᠢᠭᠠᠳ᠂ ᠡᠴᠢᠭᠡ ᠶ᠋ᠢᠨ ᠬᠠᠢᠷᠠᠲᠠᠢ ᠰᠡᠷᠪᠡᠩ ᠬᠡᠭᠡᠷ ᠮᠣᠷᠢ ᠪᠠᠨ ᠪᠠᠭᠤᠵᠤ ᠥᠭᠭᠦᠯᠡ᠃ ᠡᠨᠡ ᠦᠶᠡᠰ ᠶᠢᠰᠦᠭᠡᠢ ᠶ᠋ᠢᠨ ᠲᠣᠷᠭᠠᠨ ᠵᠠᠭᠤᠲᠤ ᠲᠡᠷᠢᠭᠦᠯᠡᠭᠰᠡᠨ ᠴᠤᠮᠯᠤᠷ ᠪᠠᠭᠠᠲᠤᠷ᠂
— ᠶᠢᠰᠦᠭᠡᠢ ᠬᠠᠨ ᠮᠢᠨᠢ᠂ ᠲᠣᠰᠤᠭᠤᠯ ᠠᠢᠰᠤᠢ ᠭᠡᠵᠦ ᠥᠭᠦᠯᠡᠭᠡᠳ ᠠᠯᠤᠰ ᠢ᠋ ᠲᠣᠭᠲᠠᠭᠤᠬᠠᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠂
— ᠬᠤᠷᠵᠠᠬᠤᠰ ᠪᠣᠶᠤᠷᠤᠭ ᠬᠠᠲᠤᠨ ᠬᠦᠦ ᠬᠣᠶᠠᠷ ᠢ᠋ᠶ᠋ᠠᠨ ᠣᠭᠲᠣ ᠭᠡᠮᠡᠨ ᠢᠯᠡᠭᠡᠭᠰᠡᠨ ᠪᠢᠵᠡ ᠭᠡᠯᠡ᠃ ᠨᠠᠮᠤᠷ ᠤ᠋ᠨ ᠠᠶᠠᠰ ᠣᠷᠣᠭᠰᠠᠨ ᠤᠨᠢᠶᠠᠷ ᠲᠤ᠌ ᠠᠭᠤᠵᠢᠮ ᠪᠠᠯ ᠢ᠋ᠶ᠋ᠠᠷ ᠲᠤᠭ ᠰᠦᠯᠳᠡ ᠱᠣᠪᠣᠯᠵᠠᠨ ᠤᠯᠠᠮ ᠢ᠋ᠶ᠋ᠠᠷ ᠳᠤᠭᠤᠯᠠᠭᠠᠨ ᠤ᠋ ᠣᠷᠣᠢ ᠭᠢᠯᠠᠯᠵᠠᠨ ᠭᠠᠷᠴᠤ ᠢᠷᠡᠭᠡᠳ ᠲᠦᠷᠭᠡᠨ ᠵᠠᠭᠤᠷᠠ ᠵᠢᠯᠣᠭᠣ ᠲᠡᠳᠡᠨ ᠬᠠᠷᠠᠴᠠ ᠪᠡᠯᠴᠢᠭᠡᠭᠰᠡᠨ ᠢ᠋ᠶ᠋ᠡᠨ ᠰᠢᠭᠤᠳ ᠴᠢᠭᠯᠡᠨ ᠳᠠᠪᠬᠢᠪᠠ᠃ ᠴᠥᠭᠡᠪᠦᠷᠢ ᠴᠡᠷᠢᠭ ᠦ᠋ᠨ ᠮᠠᠩᠯᠠᠢ ᠳ᠋ᠤ᠌ ᠬᠦᠳᠡᠷ ᠴᠢᠬᠢᠷᠡᠭ ᠬᠣᠶᠠᠷ ᠪᠠᠭᠠᠲᠤᠷ ᠳᠣᠪᠲᠣᠯᠭᠠᠨ ᠢᠷᠡᠭᠰᠡᠨ ᠢ᠋ᠶ᠋ᠡᠨ ᠦᠰᠦᠷᠦᠨ ᠪᠠᠭᠤᠵᠤ᠂
— ᠲᠣᠷᠯᠣᠭ ᠲᠤᠭᠤᠷᠢᠯ ᠠᠬᠠ ᠠᠮᠤᠭᠤᠯᠠᠩ ᠮᠣᠷᠢᠯᠠᠵᠤ ᠶᠠᠪᠤᠨᠠ ᠤᠤ? ᠭᠡᠮᠡᠨ ᠴᠡᠭᠡᠵᠢᠨ ᠲᠤᠰ ᠳᠠᠷᠤᠨ ᠮᠡᠬᠦᠰᠬᠢᠨ ᠶᠣᠰᠣ ᠦᠢᠯᠡᠳᠪᠡ᠃ ᠮᠤᠬᠤᠯᠠᠭ ᠲᠡᠷᠭᠡᠨ ᠡᠴᠡ ᠢᠯᠮᠠ ᠬᠠᠲᠤᠨ ᠴᠤᠬᠤᠢᠨ᠂
— ᠲᠠᠢ ᠲᠡᠮᠦᠷ ᠤᠤ᠂ ᠠᠯᠢ ᠪᠣᠢ᠂ ᠦᠨᠦᠰᠦᠶᠡ ᠭᠡᠬᠦ ᠳ᠋ᠦ᠍ ᠬᠡᠦᠬᠡᠳ ᠵᠠᠩ ᠢ᠋ᠶ᠋ᠠᠨ ᠬᠠᠷᠠᠬᠠᠨ ᠬᠡᠭᠡᠭᠡ ᠦᠭᠡᠢ ᠬᠣᠶᠠᠷ ᠬᠥᠪᠡᠭᠦᠨ ᠤᠷᠤᠯᠳᠤᠨ ᠭᠦᠶᠦᠵᠦ ᠣᠴᠢᠵᠤ ᠬᠠᠴᠠᠷ ᠢ᠋ᠶ᠋ᠠᠨ ᠥᠭᠭᠦᠯᠡ᠂ ᠢᠯᠮᠠ ᠬᠠᠲᠤᠨ ᠳᠣᠲᠣᠷᠠ ᠭᠠᠵᠠᠷ ᠤ᠋ᠨ ᠠᠩᠬᠢᠯᠤᠭᠤᠨ ᠲᠠᠩᠰᠤᠭ ᠢ᠋ ᠦᠨᠦᠷᠲᠦᠭᠦᠯᠵᠦ ᠳᠤᠬᠤᠨ ᠳᠡᠭᠡᠷᠡ ᠨᠢ ᠦᠨᠦᠰᠦᠭᠡᠳ᠂
— ᠪᠤᠬᠠ ᠲᠡᠮᠦᠷ ᠲᠩᠷᠢ ᠶ᠋ᠢᠨ ᠪᠠᠭᠠᠨᠠ ᠪᠣᠯᠵᠠᠢ ᠭᠡᠮᠡᠨ ᠥᠬᠥᠭᠡᠷᠳᠡᠪᠡᠴᠦ ᠨᠢᠳᠦ ᠨᠢ ᠣᠭᠲᠣ ᠥᠭᠡᠷᠡ ᠶ᠋ᠢ ᠥᠭᠦᠯᠡᠵᠦ ᠪᠠᠢᠪᠠ᠃ ᠲᠣᠷᠯᠣᠭ ᠲᠤᠭᠤᠷᠢᠯ ᠠ᠋ᠴᠠ ᠭᠤᠷᠪᠠ ᠬᠢᠷᠢ ᠳᠡᠭᠦᠦᠮᠡᠳ ᠡᠨᠡ ᠬᠦ᠌ ᠡᠷᠡᠰ ᠪᠣᠯ ᠬᠣᠷᠵᠠᠬᠣᠰ ᠪᠣᠶᠣᠷᠣᠭ ᠤ᠋ᠨ ᠪᠠᠭᠠ ᠬᠠᠲᠤᠨ ᠤ᠋ ᠬᠥᠪᠡᠭᠦᠳ ᠶᠦᠮ᠃
— ᠬᠠᠭᠠᠨ ᠡᠴᠢᠭᠡ ᠨᠢ ᠤᠷᠲᠤ ᠪᠠᠯᠭᠠᠰᠤᠨ ᠳ᠋ᠤ᠌ ᠤᠤ?
— ᠪᠠᠭᠠ ᠬᠠᠲᠤᠨ ᠤ᠋ ᠳ᠋ᠠᠭᠠᠨ ᠮᠣᠷᠢᠯᠠᠨ ᠪᠣᠢ᠃
— ᠪᠠᠰᠠ ᠪᠠᠭᠠ ᠬᠠᠲᠤᠨ ᠲᠠᠢ ᠪᠣᠯᠤᠭᠠᠳ ᠠᠪᠴᠠᠢ ᠭᠡᠬᠦ ᠳ᠋ᠦ᠍ ᠢᠯᠮᠠ ᠬᠠᠲᠤᠨ ᠤ᠋ ᠳᠠᠭᠤᠨ ᠳ᠋ᠤ᠌ ᠠᠷᠭᠠ ᠪᠠᠨ ᠪᠠᠷᠠᠭᠰᠠᠨ ᠠᠶᠠᠰ ᠰᠣᠨᠣᠰᠳᠠᠵᠤ ᠠᠪᠠᠢ᠃ ᠲᠡᠷᠡ ᠡᠯᠵᠢᠭᠡᠳᠡᠢ ᠨᠣᠶᠠᠨ ᠳ᠋ᠤ᠌ ᠬᠠᠢᠷᠠ ᠪᠠᠨ ᠥᠭᠭᠦᠭᠰᠡᠨ ᠢ᠋ᠶ᠋ᠡᠨ ᠡᠨᠡᠬᠡᠨ ᠵᠠᠭᠤᠷᠠ ᠳᠠᠪᠲᠠᠨ ᠪᠣᠳᠣᠵᠤ《ᠵᠠ᠂ ᠴᠢ ᠬᠠᠷᠠᠪᠠ ᠤᠤ》 ᠭᠡᠰᠡᠨ ᠬᠠᠷᠠᠴᠠ ᠪᠠᠷ ᠲᠣᠷᠯᠣᠭ ᠲᠤᠭᠤᠷᠢᠯ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠰᠢᠪᠬᠠᠷᠠᠭᠠᠳ ᠠᠪᠴᠤ ᠠᠮᠵᠢᠪᠠ᠃ ᠶᠢᠰᠦᠭᠡᠢ ᠶᠠᠭᠤ ᠴᠣ ᠡᠰᠡ ᠬᠡᠯᠡᠵᠦ᠂
— ᠬᠥᠷ ᠬᠠᠭᠠᠨ ᠬᠠᠮᠢᠭᠠ ᠵᠠᠯᠠᠷᠠᠵᠤ ᠪᠣᠢ ᠪᠣᠯ ᠭᠡᠬᠦ ᠳ᠋ᠦ᠍ ᠲᠡᠢ ᠲᠡᠮᠦᠷ᠂
— ᠬᠠᠷᠠ ᠪᠤᠷᠭᠠᠰᠤᠨ ᠤ᠋ ᠣᠷᠳᠣᠨ ᠳ᠋ᠤ᠌ ᠮᠣᠷᠢᠯᠠᠭᠰᠠᠨ ᠬᠡᠮᠡᠵᠡᠢ᠃ ᠡᠨᠡ ᠬᠢᠷᠢ ᠲᠣᠰᠤᠭᠤᠯ ᠴᠡᠷᠢᠭ ᠦ᠋ᠨ ᠬᠥᠰᠬᠡ ᠢᠷᠡᠵᠦ᠂ ᠬᠠᠳᠠᠨ ᠴᠣᠬᠢᠶᠠᠲᠤ ᠠᠭᠤᠯᠠᠰ ᠤᠨ ᠪᠠᠯ ᠪᠠᠷᠠᠳᠠᠭᠤᠯᠤᠨ ᠡᠷᠢᠶᠡᠨ ᠠᠰᠠᠷ ᠪᠣᠰᠬᠠᠵᠤ᠂ ᠬᠣᠶᠠᠷ ᠠᠢᠮᠠᠭ ᠤ᠋ᠨ ᠴᠡᠷᠢᠭ ᠴᠠᠴᠠᠷ ᠮᠠᠢᠬᠠᠨ ᠢ᠋ᠶ᠋ᠠᠨ ᠳᠡᠷᠪᠡᠭᠦᠯᠦᠨ ᠬᠠᠶᠠᠭᠠ ᠨᠡᠢᠯᠡᠨ ᠪᠠᠭᠤᠪᠠ᠃ ᠲᠠᠢ ᠲᠡᠮᠦᠷ᠂ ᠪᠤᠬᠠ ᠲᠡᠮᠦᠷ ᠬᠣᠶᠠᠷ ᠡᠴᠢᠭᠡ ᠨᠢᠭᠡ ᠲᠡᠢ ᠠᠬᠠ ᠪᠠᠨ ᠬᠠᠷᠢ ᠶ᠋ᠢᠨ ᠳᠠᠢᠰᠤᠨ ᠤ᠋ ᠣᠯᠵᠠᠨ ᠠ᠋ᠴᠠ ᠢᠷᠡᠪᠡ ᠭᠡᠮᠡᠨ ᠬᠡᠭᠡᠷᠡ ᠶ᠋ᠢᠨ ᠵᠣᠭᠣᠭ ᠪᠠᠷᠢᠨ ᠬᠥᠭᠵᠢᠯᠳᠦᠨ ᠬᠣᠨᠣᠵᠤ ᠠᠪᠠᠢ᠃ ᠬᠠᠷᠢᠨ ᠢᠯᠮᠠ ᠬᠠᠲᠤᠨ ᠮᠤᠬᠤᠯᠠᠭ ᠲᠡᠷᠭᠡᠨ ᠡᠴᠡ ᠭᠠᠷᠤᠭᠰᠠᠨ ᠦᠭᠡᠢ ᠳᠡᠷᠡ ᠲᠣᠬᠣᠢᠯᠳᠠᠨ ᠭᠦᠨ ᠪᠣᠳᠣᠯ ᠳ᠋ᠤ᠌ ᠠᠪᠲᠠᠵᠠᠢ᠃ ᠲᠡᠭᠦᠨ ᠦ᠌ ᠡᠮᠦᠨᠡ ᠬᠢ ᠪᠢᠴᠢᠬᠠᠨ ᠰᠢᠷᠡᠭᠡᠨᠡ ᠴᠢᠨᠠᠵᠤ ᠲᠠᠯᠪᠢᠭᠰᠠᠨ ᠲᠠᠷᠭᠤᠨ ᠮᠢᠬᠠᠨ ᠳ᠋ᠤ᠌ ᠠᠮᠠ ᠬᠦᠷᠦᠭᠰᠡᠨ ᠶᠠᠩᠵᠤ ᠦᠭᠡᠢ ᠠᠭᠠᠳ ᠬᠢᠲᠤᠭᠠ ᠨᠢ ᠲᠣᠰᠣ ᠴᠤ᠌ ᠪᠣᠯᠤᠭᠠ ᠦᠭᠡᠢ ᠭᠢᠯᠠᠯᠵᠠᠨᠠ᠃ ᠢᠯᠮᠠ ᠬᠠᠲᠤᠨ ᠥᠰᠴᠦ ᠲᠣᠷᠨᠢᠭᠰᠠᠨ ᠨᠤᠲᠤᠭ ᠢ᠋ᠶ᠋ᠠᠨ ᠬᠠᠷᠠᠭᠠᠳ ᠡᠷᠬᠡᠪᠰᠢ ᠰᠡᠳᠬᠢᠯ ᠨᠢᠯᠬᠠᠮᠰᠠᠵᠤ᠂ ᠭᠤᠨᠢᠭ ᠭᠤᠲᠤᠷᠠᠯ ᠥᠷᠯᠥᠭᠡᠨ ᠦ᠌ ᠮᠠᠨᠠᠨ ᠮᠡᠲᠦ ᠰᠡᠮᠡᠷᠡᠨ ᠰᠠᠷᠨᠢᠵᠤ ᠪᠠᠢᠭᠰᠠᠨ ᠶᠤᠮ ᠰᠠᠨᠵᠠᠢ᠃ ᠴᠢᠩᠭᠢᠲᠡᠯᠡ ᠬᠣᠷᠵᠠᠬᠤᠰ ᠪᠣᠶᠣᠷᠤᠭ ᠠᠬᠢᠨ ᠪᠠᠭᠠ ᠬᠠᠲᠤᠨ ᠠᠪᠴᠤ᠂ ᠲᠡᠭᠦᠨ ᠲᠡᠢ ᠠᠩᠬᠠ ᠳᠡᠷᠡ ᠨᠡᠢᠯᠡᠭᠰᠡᠨ ᠭᠣᠩᠰᠤᠳᠠᠨ ᠵᠠᠩᠰᠤᠳᠠᠨ ᠤ᠋ ᠤᠷᠲᠤ ᠤᠷᠤᠭᠤ ᠣᠳᠤᠭᠰᠠᠨ ᠰᠤᠷᠠᠭ ᠪᠦᠰᠡᠭᠦᠢ ᠶ᠋ᠢᠨ ᠰᠡᠳᠬᠢᠯ ᠢ᠋ ᠡᠪᠳᠡᠴᠢᠨ ᠬᠡᠮᠬᠡᠴᠢᠵᠦ ᠭᠦᠢᠴᠡᠪᠡ᠃ ᠡᠢᠨ ᠭᠠᠭᠴᠠᠭᠠᠷᠳᠠᠬᠤ ᠶ᠋ᠢᠨ ᠴᠠᠭ ᠲᠤ᠌ ᠡᠯᠵᠢᠭᠡᠳᠡᠢ ᠨᠣᠶᠠᠨ ᠤ᠋ ᠦᠨᠡᠨ ᠦᠭᠡ᠂ ᠲᠠᠬᠢᠮᠳᠠᠭᠤ ᠵᠠᠩ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠦᠭᠡᠢᠯᠡᠭᠳᠡᠬᠦ ᠪᠢᠯᠡ᠃ ᠬᠥᠪᠡᠭᠦᠨ ᠲᠡᠢ ᠪᠡᠨ ᠬᠥᠳᠡᠯᠦᠯᠴᠡᠨ ᠤᠷᠭᠤᠭᠰᠠᠨ ᠲᠦᠭᠰᠢᠭᠦᠷᠢᠲᠦ ᠬᠠᠷᠠᠩᠭᠤᠢ ᠰᠥᠨᠢ ᠰᠢᠪᠠᠷ ᠬᠡᠷᠡᠮ ᠦ᠋ᠨ ᠪᠤᠯᠤᠩ ᠲᠣᠬᠣᠢ ᠳ᠋ᠤ᠌ ᠨᠢᠭᠤᠭᠳᠠᠵᠤ᠂ ᠰᠢᠪᠠᠭᠠᠷᠠᠯᠳᠤᠨ ᠰᠠᠭᠤᠭᠴᠢ ᠰᠠᠭᠤᠷᠢᠨ ᠠᠮᠢᠳᠤᠷᠠᠯ ᠠ᠋ᠴᠠ ᠬᠣᠯᠠᠳᠤᠭᠰᠠᠨ ᠤ᠋ ᠲᠠᠪᠤᠳᠠᠬᠢ ᠬᠣᠨᠣᠭ ᠤ᠋ᠨ ᠰᠥᠨᠢ ᠶᠦᠮ ᠰᠠᠨ᠃ ᠲᠤᠢᠯᠳᠠᠵᠤ ᠶᠠᠳᠠᠷᠠᠭᠰᠠᠨ ᠢᠵᠢᠢ ᠡᠷᠭᠢᠨ ᠬᠥᠷᠪᠡᠵᠦ᠂ ᠡᠳᠦᠷ ᠦ᠋ᠨ ᠠᠯᠵᠢᠶᠠᠯ ᠳ᠋ᠠᠭᠠᠨ ᠳᠠᠷᠤᠭᠳᠠᠨ ᠬᠤᠷᠬᠢᠷᠠᠬᠤ ᠬᠦᠦ ᠪᠡᠨ ᠡᠷᠡ ᠶ᠋ᠢᠨ ᠬᠤᠭᠤᠷᠬᠠᠢ ᠭᠡᠮᠡᠨ ᠥᠬᠥᠭᠡᠷᠳᠡᠨ ᠬᠠᠷᠠᠵᠤ ᠬᠡᠪᠲᠡᠪᠡ᠃ ᠠᠨᠢᠪᠴᠢᠨ ᠭᠢᠯᠠᠯᠵᠠᠬᠤ ᠣᠳᠣᠳ ᠠ᠋ᠴᠠ ᠰᠤᠷᠠᠭ ᠰᠣᠨᠣᠰᠴᠤ ᠪᠣᠯᠬᠤ ᠨᠠᠮ ᠬᠦᠮᠬᠡᠨ ᠰᠥᠨᠢ ᠶᠦᠮ᠃ ᠪᠥᠷᠲᠡ ᠰᠠᠷᠠᠨ ᠤ᠋ ᠴᠠᠪᠢᠳᠠᠷ ᠲᠤᠶᠠᠭᠠ ᠬᠠᠪᠢ ᠣᠷᠴᠢᠨ ᠢ᠋ ᠭᠡᠢᠭᠦᠯᠦᠭᠰᠡᠨ ᠡᠢᠮᠦ ᠰᠥᠨᠢ ᠦᠵᠢᠮᠡᠢ ᠬᠠᠭᠠᠨ ᠤ᠋ ᠠᠩᠬᠢᠯᠤᠭᠤᠨ ᠴᠡᠴᠡᠷᠯᠢᠭ ᠲᠦ᠍ ᠡᠯᠵᠢᠭᠡᠳᠡᠢ ᠨᠣᠶᠠᠨ ᠤ᠋ ᠴᠡᠭᠡᠵᠢᠨ ᠦ᠌ ᠨᠥᠮᠥᠷᠢ ᠪᠠᠷᠠᠳᠠᠨ ᠰᠠᠭᠤᠭᠰᠠᠨ ᠨᠢ ᠣᠯᠠᠨ ᠪᠢᠯᠡ᠃ ᠲᠡᠭᠦᠨ ᠦ᠌ ᠶᠠᠷᠢᠶᠠ ᠨᠠᠮᠳᠠᠭᠤ᠂ ᠤᠳᠬᠠ ᠭᠦᠨ ᠠᠭᠠᠳ ᠬᠠᠷᠢ ᠨᠤᠲᠤᠭ ᠤ᠋ᠨ ᠣᠯᠵᠠᠨ ᠤ᠋ ᠬᠥᠮᠦᠨ ᠭᠡᠮᠡᠨ ᠡᠯᠡᠭ ᠪᠠᠷᠢᠬᠤ ᠨᠢ ᠦᠭᠡᠢ ᠶᠦᠮ᠃ ᠶᠡᠷᠦ ᠨᠢ ᠡᠨᠡ ᠣᠪᠢᠳᠠᠰ ᠢ᠋ᠶ᠋ᠠᠷ ᠢᠯᠮᠠ ᠬᠠᠲᠤᠨ ᠤ᠋ ᠰᠡᠳᠬᠢᠯ ᠢ᠋ ᠪᠠᠢᠯᠳᠤᠨ ᠳᠠᠭᠠᠭᠤᠯᠤᠭᠰᠠᠨ ᠪᠠᠢᠵᠤ ᠴᠤ᠌ ᠮᠡᠳᠡᠨᠡ᠃ ᠲᠡᠷᠡ ᠬᠦ᠌ ᠰᠡᠷᠢᠭᠦᠬᠡᠨ ᠴᠡᠩᠬᠡᠷ ᠰᠥᠨᠢ ᠬᠦᠷᠲᠡᠯᠡ ᠵᠢᠷᠦᠬᠡᠨ ᠳ᠋ᠦ᠍ᠨᠢ ᠠᠮᠢᠯᠠᠨ ᠳᠠᠭᠠᠭᠤᠯᠤᠭᠠᠳ ᠶᠠᠪᠤᠴᠢᠬᠠᠬᠤ ᠪᠠᠨ ᠠᠯᠳᠠᠵᠤ ᠪᠢᠯᠡ᠃ ᠳᠡᠷᠡᠰᠦᠨ ᠦ᠌ ᠨᠥᠮᠥᠷᠢ ᠪᠠᠷᠠᠳᠠᠨ ᠠᠲᠤᠷᠢᠵᠤ ᠬᠡᠪᠲᠡᠭᠰᠡᠨ ᠠᠯᠠᠭ ᠦᠷᠡ ᠪᠡᠨ ᠤᠨᠲᠠᠭᠠ ᠪᠠᠷ ᠨᠢ ᠤᠷᠭᠢᠶᠠ ᠭᠡᠮᠡᠨ ᠪᠠᠷᠤᠭ ᠰᠢᠢᠳᠦᠭᠰᠡᠨ ᠨᠢ ᠪᠣᠢ᠃ ᠠᠯᠲᠠᠨ ᠤᠯᠤᠰ ᠤ᠋ᠨ ᠠᠷᠠᠭᠠ ᠰᠢᠳᠦᠨ ᠡᠴᠡ ᠭᠠᠷᠪᠠ ᠭᠡᠵᠦ ᠥᠪᠡᠷ ᠢ᠋ ᠪᠡᠨ ᠲᠠᠢᠳᠬᠤᠷᠠᠭᠤᠯᠵᠤ ᠬᠣᠷᠢ ᠳᠥᠭᠥᠵᠦ ᠶᠠᠪᠤᠭᠠ ᠡᠷᠡ ᠳ᠋ᠦ᠍ ᠢᠵᠢᠢ ᠶ᠋ᠢᠨ ᠲᠦᠰᠢᠭ ᠶᠠᠭᠤ ᠪᠠᠢᠬᠤ ᠪᠣᠢ ᠳᠠ ᠭᠡᠵᠦ ᠪᠡᠶᠡ ᠪᠡᠨ ᠵᠣᠷᠢᠭᠵᠢᠭᠤᠯᠤᠨ ᠥᠨᠳᠡᠢᠵᠦ ᠠᠪᠠᠢ᠃ ᠡᠢᠨ ᠴᠢᠮᠡᠭᠡ ᠦᠭᠡᠢ ᠴᠠᠭᠠᠨ ᠰᠥᠨᠢ᠂ ᠴᠢᠮᠡᠭᠡ ᠦᠭᠡᠢ ᠬᠠᠷᠠ ᠬᠤᠪᠴᠠᠰᠤ ᠪᠠᠨ ᠡᠮᠦᠰᠴᠦ᠂ ᠴᠢᠮᠡᠭᠡ ᠦᠭᠡᠢ ᠴᠡᠩᠬᠡᠷ ᠢᠷᠭᠤᠢ ᠪᠠᠷᠠᠳᠠᠨ ᠭᠡᠲᠡᠵᠦ ᠬᠣᠯᠠᠳᠲᠠᠯᠠ ᠨᠢᠭᠡᠨ ᠪᠦᠷᠭᠦᠳ ᠰᠢᠭᠦᠷᠡᠭᠡᠳ ᠠᠪᠬᠤ ᠰᠢᠭ᠋ ᠪᠣᠯᠵᠠᠢ᠃ ᠡᠨᠡ ᠰᠠᠴᠠᠭᠤ ᠮᠣᠷᠢᠨ ᠲᠦᠪᠡᠷᠭᠡᠨ ᠲᠠᠴᠢᠭᠢᠨᠠᠵᠤ᠂ ᠥᠨᠥᠴᠢᠨ ᠪᠤᠲᠠᠨ ᠤ᠋ ᠥᠪᠥᠷ ᠡᠴᠡ ᠥᠷᠪᠥᠢᠲᠡᠯᠡ ᠪᠣᠰᠴᠤ ᠢᠷᠡᠭᠰᠡᠨ ᠮᠠᠭᠤ ᠬᠦᠦ ᠶ᠋ᠢ ᠨᠢ ᠰᠢᠭᠦᠷᠡᠭᠡᠳ ᠳᠡᠭᠦᠷᠴᠢᠬᠡᠵᠡᠢ᠃ ᠴᠢᠩᠭᠢᠭᠡᠳ ᠠᠯᠠᠭᠠ ᠶ᠋ᠢᠨ ᠴᠢᠨᠡᠭᠡᠨ ᠬᠠᠷᠠᠯᠠᠭ ᠪᠤᠲᠠ ᠲᠠᠢ ᠰᠢᠷᠠᠯᠠᠭ ᠲᠠᠯᠠ ᠪᠠᠷ ᠦᠷ ᠴᠠᠢᠲᠠᠯᠠ ᠳᠣᠪᠲᠣᠯᠭᠠᠭᠰᠠᠨ ᠠᠷᠪᠠᠭᠠᠳ ᠮᠣᠷᠢᠲᠠᠨ ᠡᠯᠡᠰᠦᠨ ᠲᠣᠪᠴᠠᠭ ᠤ᠋ᠨ ᠳᠤᠮᠳᠠ ᠠᠯᠠᠭᠠᠨ ᠤ᠋ ᠬᠣᠩᠬᠣᠷ ᠰᠢᠭ᠋ ᠨᠢᠭᠤᠴᠠᠭᠠᠢᠬᠠᠨ ᠭᠠᠵᠠᠷ ᠲᠤ᠌ ᠪᠠᠷᠢᠭᠰᠠᠨ ᠴᠠᠴᠠᠷ ᠮᠠᠢᠬᠠᠨ ᠤ᠋ ᠭᠠᠳᠠᠨᠠ ᠢᠷᠡᠭᠰᠡᠨ ᠠᠪᠠᠢ᠃ ᠲᠡᠳᠡ ᠮᠠᠭᠤ ᠬᠦᠦ ᠶ᠋ᠢ ᠨᠢ ᠠᠮᠢ ᠦᠭᠡᠢ ᠵᠣᠪᠠᠯᠭᠠ ᠠᠴᠢᠵᠤ ᠢᠷᠡᠭᠰᠡᠨ ᠮᠡᠲᠦ ᠡᠯᠡᠰᠦᠨ ᠳᠡᠭᠡᠷᠡ ᠫᠦᠳ᠋ ᠬᠢᠲᠡᠯᠡ ᠬᠠᠶᠠᠴᠢᠬᠠᠵᠠᠢ᠃ ᠰᠠᠨᠠᠭᠠ ᠵᠣᠪᠠᠭᠰᠠᠨ ᠢᠵᠢᠢ《ᠬᠥᠶᠢ ᠠ᠋》 ᠭᠡᠬᠦ ᠶ᠋ᠢᠨ ᠵᠠᠪᠳᠤᠯ ᠦᠭᠡᠢ ᠥᠪᠡᠷ ᠢ᠋ ᠨᠢ ᠴᠦ᠍ ᠮᠥᠨ ᠰᠢᠳᠡᠴᠢᠬᠡᠪᠡ᠃ ᠰᠦᠯᠵᠢᠶᠡ ᠨᠢ ᠵᠠᠳᠠᠷᠠᠵᠤ ᠰᠡᠭᠰᠡᠢᠭᠰᠡᠨ ᠦᠰᠦ ᠪᠡᠨ ᠰᠠᠵᠢᠯᠠᠨ ᠪᠣᠰᠴᠤ ᠢᠷᠡᠲᠡᠯᠡ᠂ ᠴᠠᠴᠠᠷ ᠤ᠋ᠨ ᠬᠡ ᠲᠡᠢ ᠡᠭᠦᠳᠡ ᠶ᠋ᠢ ᠲᠠᠯᠤᠨ ᠳ᠋ᠠᠭᠠᠨ ᠬᠦᠷᠭᠡᠯ ᠦᠭᠡᠢ ᠰᠢᠳᠡᠵᠦ ᠬᠦᠳᠡᠷ ᠡᠷᠡ ᠭᠠᠷᠴᠤ ᠢᠷᠡᠯᠡ᠃ ᠲᠡᠷᠡ ᠪᠡᠷ ᠨᠠᠷᠠ ᠰᠠᠯᠬᠢᠨ ᠳ᠋ᠤ᠌ ᠤᠩᠭᠤᠵᠤ ᠪᠣᠷᠣᠯᠠᠭᠰᠠᠨ ᠵᠦᠯᠭᠦᠮᠡᠯ ᠬᠦᠷᠡᠩ ᠴᠢᠷᠠᠢ ᠲᠠᠢ᠂ ᠪᠤᠯᠠᠭ ᠤ᠋ᠨ ᠤᠰᠤᠨ ᠳ᠋ᠤ᠌ ᠤᠬᠢᠶᠠᠭᠰᠠᠭᠠᠷ ᠥᠩᠭᠡ ᠵᠠᠰᠠᠭᠰᠠᠨ ᠬᠢᠯ ᠬᠠᠷᠠ ᠦᠰᠦ ᠲᠡᠢ ᠶᠦᠮ᠃ ᠶᠡᠷᠦ ᠬᠡᠢᠮᠣᠷᠢ ᠵᠢᠪᠬᠤᠭᠠ ᠲᠡᠭᠦᠰ ᠨᠢᠭᠡᠨ ᠠᠵᠢ᠃ ᠣᠨ ᠵᠢᠯ ᠦ᠋ᠨ ᠪᠤᠳᠠᠩ ᠠᠯᠭᠤᠷ ᠰᠠᠷᠨᠢᠵᠤ ᠲᠣᠷᠯᠣᠭ ᠲᠣᠭᠣᠷᠢᠯ ᠤ᠋ᠨ ᠨᠢᠳᠦᠨᠡ ᠬᠠᠭᠠᠨ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠷᠠ ᠲᠣᠯᠣᠭᠠᠢ ᠶ᠋ᠢ ᠲᠠᠰᠤ ᠲᠡᠪᠡᠷᠢᠭᠡᠳ ᠬᠠᠳᠠ ᠴᠢᠯᠠᠭᠤᠨ ᠳ᠋ᠤ᠌ ᠪᠦᠳᠦᠴᠢᠨ ᠥᠭᠰᠥᠵᠦ ᠠᠭᠰᠠᠨ ᠵᠢᠭᠠᠯ ᠬᠦᠦ ᠲᠣᠳᠣᠷᠠᠭᠠᠳ ᠢᠷᠡᠪᠡ᠃ ᠬᠠᠷᠠᠩᠭᠤᠲᠠ ᠯᠠ ᠲᠠᠨᠢᠵᠠᠢ᠃ ᠲᠡᠮᠦᠵᠢᠨ ᠦᠭᠡ ᠨᠣᠶᠠᠨ ᠤ᠋ ᠢᠯᠳᠦᠨ ᠢᠷ ᠲᠦ᠍ ᠢᠪᠡᠬᠦ ᠲᠣᠯᠣᠭᠠᠢ ᠪᠠᠢᠵᠠᠢ ᠭᠡᠮᠡᠨ ᠭᠤᠨᠢᠭ ᠲᠠᠢ ᠪᠣᠳᠣᠪᠠ᠃
— ᠡᠨᠡ ᠶᠠᠭᠤᠨ ᠤᠯᠤᠰ ᠪᠣᠢ?
— ᠣᠯᠵᠠᠨ ᠤ᠋ ᠬᠢᠨ᠃
— ᠬᠠᠮᠢᠭᠠ ᠠ᠋ᠴᠠ ᠣᠯᠪᠠ? ᠶᠠᠭᠤᠨ ᠳ᠋ᠤ᠌ ᠠᠪᠴᠢᠷᠠᠪᠠ?
— ᠪᠤᠲᠠᠨ ᠤ᠋ ᠨᠥᠮᠥᠷᠢ ᠳ᠋ᠦ᠍ ᠪᠥᠵᠥᠩ ᠮᠡᠲᠦ ᠤᠨᠲᠠᠵᠤ ᠠᠬᠤᠢ ᠳ᠋ᠤᠨᠢ ᠣᠯᠵᠠᠯᠠᠵᠤ ᠢᠷᠡᠪᠡ᠂ ᠪᠢᠳᠡ ᠭᠡᠵᠦ ᠮᠥᠨᠥᠬᠡᠨ ᠪᠠᠭᠠ ᠴᠡᠷᠢᠭ ᠦ᠋ᠨ ᠲᠡᠷᠢᠭᠦᠨ ᠪᠠᠭᠠᠲᠤᠷ ᠬᠦᠯᠢᠴᠡᠩᠭᠦᠢ ᠥᠭᠦᠯᠡᠬᠦ ᠳ᠋ᠦ᠍ ᠬᠡᠢᠮᠣᠷᠢᠯᠢᠭ ᠡᠷᠡ ᠢᠯᠮᠠ ᠬᠠᠲᠤᠨ ᠤ᠋ ᠬᠥᠯ ᠡᠴᠡ ᠲᠣᠯᠣᠭᠠᠢ ᠬᠦᠷᠲᠡᠯᠡ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ
— ᠲᠠ ᠬᠡᠨ ᠪᠣᠢ? ᠭᠡᠯᠡ᠃ ᠲᠡᠭᠦᠨ ᠦ᠌ ᠦᠭᠡ ᠲᠣᠪᠴᠢ᠂ ᠬᠠᠷᠠᠴᠠ ᠰᠢᠷᠦᠭᠦᠨ ᠨᠢᠭᠡᠨ ᠠᠵᠢ᠃
— ᠪᠢ ᠬᠡᠷᠡᠢᠳ ᠦ᠋ᠨ ᠬᠣᠷᠵᠠᠬᠤᠰ ᠪᠣᠶᠣᠷᠣᠭ ᠤ᠋ᠨ ᠶᠡᠬᠡ ᠬᠠᠲᠤᠨ ᠪᠢᠯᠡ ᠭᠡᠬᠦ ᠳ᠋ᠦ᠍ ᠮᠥᠨᠥᠬᠢ ᠡᠷᠡ ᠶ᠋ᠢᠨ ᠴᠢᠷᠠᠢ ᠳ᠋ᠤ᠌ ᠵᠢᠪᠡᠭᠦᠨ ᠬᠥᠬᠡ ᠢᠨᠢᠶᠡᠳᠦ ᠲᠣᠳᠣᠷᠠᠵᠤ᠂ ᠨᠢᠳᠦᠨ ᠳ᠋ᠦ᠍ᠨᠢ ᠴᠢᠨᠣᠠ ᠶ᠋ᠢᠨ ᠭᠦᠶᠦᠳᠡᠯᠲᠦ ᠬᠦᠢᠲᠡᠨ ᠬᠠᠷᠠᠴᠠ ᠲᠣᠳᠣᠷᠠᠭᠠᠳ ᠢᠷᠡᠪᠡ᠃
— ᠢᠯᠮᠠ ᠬᠠᠲᠤᠨ ᠤᠤ?
— ᠵᠠ᠂ ᠲᠡᠢᠮᠦ ᠠ᠋!
— ᠡᠨᠡ ᠲᠣᠷᠯᠣᠭ ᠲᠣᠭᠣᠷᠢᠯ ᠬᠠᠨ ᠤᠤ?
— ᠲᠠ ᠲᠠᠨᠢᠪᠠ᠂ ᠡᠷᠬᠢᠮ ᠠ᠋ ᠭᠡᠬᠦ ᠳ᠋ᠦ᠍ ᠵᠠᠯᠠᠭᠤ ᠪᠠᠭᠠᠲᠤᠷ ᠤ᠋ᠨ ᠴᠢᠷᠠᠢ ᠳ᠋ᠤ᠌ ᠭᠦᠨ ᠬᠠᠷᠠᠭᠤᠰᠤᠯ ᠲᠣᠳᠣᠷᠠᠵᠤ᠂ ᠬᠣᠯᠠ ᠶ᠋ᠢᠨ ᠬᠥᠬᠡ ᠠᠭᠤᠯᠠᠰ ᠤ᠋ᠨ ᠭᠡᠭᠡᠨ ᠵᠤᠯᠠᠢ ᠰᠢᠷᠳᠡᠨ ᠪᠣᠳᠣᠯᠭᠠᠰᠢᠷᠠᠵᠤ ᠪᠢᠯᠡ᠃ ᠲᠣᠷᠯᠣᠭ ᠲᠤᠭᠤᠷᠢᠯ ᠬᠥᠪᠡᠭᠦᠨ ᠦ᠌ ᠪᠣᠳᠣᠯ ᠦᠨᠡᠨ ᠪᠣᠯᠵᠤ ᠲᠠᠭᠠᠷᠠᠪᠠ᠃ ᠡᠨᠡ ᠬᠢᠷᠢ ᠴᠠᠷᠺᠢᠯ ᠨᠣᠳᠣᠢ ᠶ᠋ᠢ ᠴᠠᠭᠠᠵᠠᠯᠠᠬᠤ ᠳ᠋ᠤ᠌ ᠰᠣᠨᠣᠰᠳᠠᠵᠤ ᠠᠭᠰᠠᠨ ᠬᠠᠳᠠ ᠬᠠᠩ ᠬᠢᠲᠡᠯᠡ ᠴᠠᠪᠴᠢᠬᠤ ᠢᠯᠳᠦᠨ ᠦ᠌ ᠳᠠᠭᠤ ᠬᠠᠮᠢᠭᠠ ᠬᠣᠯᠠ ᠠ᠋ᠴᠠ ᠴᠤᠤᠷᠢᠶᠠᠲᠤᠵᠤ ᠰᠣᠨᠣᠰᠳᠠᠵᠠᠢ᠃ ᠭᠡᠲᠡᠯᠡ ᠶᠡᠷᠦ ᠳᠡᠷᠭᠡᠳᠡ ᠡᠴᠡ᠂
— ᠠᠴᠢᠶᠠᠯᠠ! ᠭᠡᠳ ᠥᠭᠡᠷᠡ ᠶᠠᠭᠤ ᠴᠤ᠌ ᠡᠰᠡ ᠳᠤᠤᠭᠠᠷᠤᠨ ᠬᠥᠮᠥᠯᠳᠥᠷᠭᠡ ᠲᠡᠢ ᠵᠠᠭᠠᠯ ᠮᠣᠷᠢᠨ ᠳ᠋ᠤ᠌ ᠠᠯᠠᠪᠬᠢᠨ ᠮᠣᠷᠳᠠᠭᠠᠳ ᠲᠣᠭᠣᠰᠣ ᠮᠠᠨᠠᠷᠠᠭᠠᠨ ᠳᠣᠪᠲᠣᠯᠵᠤ ᠣᠳᠬᠤ ᠳ᠋ᠤ᠌ ᠡᠯᠡᠰᠦᠨ ᠳᠣᠪᠣᠴᠠᠭ ᠤ᠋ᠨ ᠴᠢᠨᠠᠳᠤ ᠭᠠᠵᠠᠷ ᠲᠤᠷᠭᠢᠬᠤ ᠰᠢᠭ᠋ ᠪᠣᠯᠤᠭᠰᠠᠨ ᠨᠢ ᠴᠡᠷᠢᠭ ᠬᠥᠳᠡᠯᠦᠭᠰᠡᠨ ᠬᠡᠷᠡᠭ ᠪᠠᠢᠵᠠᠢ᠃ ᠵᠠᠯᠠᠭᠤ ᠵᠠᠩᠵᠤᠨ ᠤ᠋ ᠰᠦᠷ ᠲᠦ᠍ ᠳᠠᠷᠤᠭᠳᠠᠨ ᠨᠣᠮᠣᠬᠠᠷᠠᠭᠰᠠᠨ ᠪᠠᠭᠠ ᠴᠡᠷᠢᠭ ᠦ᠋ᠨ ᠠᠬᠠᠯᠠᠭᠴᠢ ᠠ᠋ᠴᠠ᠂
— ᠬᠡᠨ ᠭᠡᠳᠡᠭ ᠬᠥᠮᠦᠨ ᠪᠢᠯᠡ ᠭᠡᠬᠦ ᠳ᠋ᠦ᠍ ᠮᠥᠨᠥᠬᠡᠨ ᠴᠡᠷᠢᠭ ᠢᠯᠮᠠ ᠬᠠᠲᠤᠨ ᠤᠷᠤᠭᠤ ᠴᠣᠴᠢᠮᠠᠭ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠂
— ᠶᠢᠰᠦᠨ ᠲᠠᠲ᠋ᠠᠷ ᠤ᠋ᠨ ᠲᠡᠮᠦᠵᠢᠨ ᠦᠭᠡ ᠨᠣᠶᠠᠨ᠁ ᠭᠡᠳ ᠵᠠᠷᠯᠢᠭ ᠬᠦᠯᠢᠶᠡᠵᠦ ᠵᠣᠭᠰᠣᠬᠤ ᠴᠡᠷᠢᠭ ᠡᠷᠡᠰ ᠲᠡᠭᠡᠨ《ᠠᠴᠢᠶᠠᠯᠠ》 ᠭᠡᠮᠡᠨ ᠬᠠᠰᠬᠢᠷᠴᠠᠢ᠃ ᠡᠢᠨ ᠠᠷᠰᠯᠠᠨ ᠤ᠋ ᠠᠮᠠᠨ ᠠ᠋ᠴᠠ ᠭᠠᠷᠴᠤ ᠪᠠᠷᠰ ᠤ᠋ᠨ ᠠᠮᠠᠨ ᠳ᠋ᠤ᠌ ᠣᠷᠣᠭᠰᠠᠨ ᠶᠤᠮ᠃ ᠲᠠᠲ᠋ᠠᠷ ᠡᠷᠡᠰ ᠦ᠋ᠨ ᠳᠤᠮᠳᠠ ᠡᠯᠵᠢᠭᠡᠳᠡᠢ ᠨᠣᠶᠠᠨ ᠰᠢᠭ᠋ ᠲᠠᠬᠢᠮᠳᠠᠭᠤ ᠬᠥᠮᠦᠨ ᠡᠰᠡ ᠭᠠᠷᠪᠠ᠃ ᠶᠡᠷᠦ ᠰᠦᠷ ᠰᠡᠷ ᠬᠢᠭᠰᠡᠨ ᠬᠦᠯᠦᠭ ᠪᠠᠭᠠᠲᠤᠷ ᠤ᠋ᠳ ᠣᠯᠠᠨ ᠠᠭᠠᠳ ᠬᠡᠷᠡᠢᠳ ᠢ᠋ ᠳᠠᠢᠰᠤᠨ ᠢ᠋ᠶ᠋ᠠᠨ ᠭᠡᠮᠡᠨ ᠲᠣᠭᠠᠴᠠᠬᠤ ᠲᠤᠯᠠ ᠨᠢᠭᠤᠷ ᠦᠯᠦ ᠥᠭᠭᠦᠨᠡ᠃ ᠡᠨᠡ ᠦᠶᠡ ᠳ᠋ᠦ᠍ ᠯᠡ ᠴᠣᠬᠣᠮ ᠬᠣᠷᠵᠠᠬᠤᠰ ᠪᠣᠶᠣᠷᠣᠭ ᠢ᠋ ᠤᠴᠢᠷ ᠦᠭᠡᠢ ᠦᠭᠡᠢᠯᠡᠭᠰᠡᠨ ᠨᠢ ᠪᠣᠢ᠃
ᠡᠨᠡ ᠬᠢᠷᠢ ᠮᠤᠬᠤᠯᠠᠭ ᠲᠡᠷᠭᠡᠨ ᠦ᠌ ᠱᠠ ᠲᠣᠷᠭᠠᠨ ᠬᠥᠰᠢᠭᠡᠨ ᠴᠠᠭᠠᠭᠤᠷ ᠬᠡᠨ ᠨᠢᠭᠡᠨ ᠦ᠌ ᠰᠡᠭᠦᠳᠡᠷ ᠰᠡᠭᠦᠳᠡᠭᠡᠨᠡᠬᠦ ᠰᠢᠭ ᠪᠣᠯᠬᠤ ᠳ᠋ᠤ᠌ ᠢᠯᠮᠠ ᠬᠠᠲᠤᠨ ᠰᠣᠴᠢᠨ ᠰᠠᠨᠳᠤᠷᠴᠤ᠂
— ᠬᠡᠨ ᠪᠣᠢ? ᠭᠡᠪᠡᠯ᠂
— ᠪᠢ ᠪᠠᠢᠨᠠ᠁ ᠭᠡᠮᠡᠨ ᠲᠠᠨᠢᠯ ᠳᠠᠭᠤ ᠭᠠᠷᠴᠤ᠂ ᠲᠣᠮᠣ ᠫᠠᠷᠪᠠᠭᠠᠷ ᠭᠠᠷ ᠨᠢᠮᠭᠡᠨ ᠲᠣᠷᠭᠠᠨ ᠬᠥᠰᠢᠭᠡ ᠶ᠋ᠢ ᠬᠤᠮᠢᠨ ᠪᠠᠵᠠᠵᠤ ᠱᠠᠭᠠᠢᠬᠤ ᠨᠢ ᠬᠣᠷᠵᠠᠬᠤᠰ ᠪᠣᠶᠣᠷᠤᠭ ᠪᠠᠢᠯᠠ᠃ ᠲᠡᠷᠡ ᠪᠡᠷ ᠨᠢᠭᠡ ᠮᠠᠭᠤ ᠢᠨᠢᠶᠡᠬᠦᠢᠴᠡ ᠪᠡᠨ ᠠᠶᠠᠳᠠᠨ᠂
— ᠰᠠᠢᠨ ᠤᠤ? ᠭᠡᠬᠦ ᠳ᠋ᠦ᠍ ᠢᠯᠮᠠ ᠬᠠᠲᠤᠨ ᠳᠤᠤᠭᠠᠷᠴᠤ ᠡᠰᠡ ᠴᠢᠳᠠᠨ ᠵᠦᠭᠡᠷ ᠯᠡ ᠲᠣᠯᠣᠭᠠᠢ ᠳᠣᠬᠢᠵᠠᠢ᠃
~ ᠦᠷᠭᠦᠯᠵᠢᠯᠡᠯ ᠪᠣᠢ ~