ᠬᠢᠯᠭᠠᠰᠤᠨ ᠳᠥᠷᠥᠭᠡᠨ ᠳᠡᠭᠡᠷᠡ – ᠬᠠᠰᠪᠤᠯᠠᠭ ᠵᠣᠬᠢᠶᠠᠪᠠ᠂ <ᠠᠷᠪᠠᠨ ᠨᠠᠢ᠍ᠮᠠ> Хялгасан дөрөөн дээр – Хасвулаг зохиов <18>
126ᠬᠢᠯᠭᠠᠰᠤᠨ ᠳᠥᠷᠥᠭᠡᠨ ᠳᠡᠭᠡᠷᠡ - <ᠠᠷᠪᠠᠨ ᠨᠠᠢ᠍ᠮᠠ>
ᠪᠣᠯᠤᠷᠴᠠᠭᠠᠨ ᠪᠠᠷᠢᠭᠳᠠᠭᠰᠠᠨ ᠤ᠋ ᠪᠠᠨ ᠳᠠᠷᠠᠭᠠ ᠡᠬᠢᠯᠡᠭᠰᠡᠭᠡᠷ ᠶᠠᠭᠤ ᠶᠠᠷᠢᠬᠤ ᠪᠠᠨ ᠣᠯᠵᠤ ᠶᠠᠳᠠᠵᠤ ᠪᠠᠢᠭᠰᠠᠨ ᠬᠥᠮᠦᠨ ᠮᠠᠷᠭᠠᠰᠢ ᠥᠷᠯᠥᠭᠡ ᠨᠢ ᠨᠢᠭᠡ ᠡᠮᠡᠭᠲᠡᠢ ᠲᠡᠢ ᠨᠢᠭᠤᠴᠠ ᠪᠠᠷ ᠠᠭᠤᠯᠵᠠᠭᠰᠠᠨ ᠠ᠋ᠴᠠ ᠬᠣᠢᠰᠢ ᠦᠨᠡᠨ ᠢ᠋ᠶ᠋ᠡᠨ ᠲᠤᠰᠢᠶᠠᠬᠤ ᠪᠣᠯᠤᠭᠰᠠᠨ ᠭᠡᠳᠡᠭ ᠶᠠᠷᠢᠶᠠ ᠶ᠋ᠢ ᠥᠩᠭᠡᠷᠡᠭᠰᠡᠨ ᠳ᠋ᠦ᠍ ᠮᠥᠷᠳᠡᠭᠴᠢᠳ ᠬᠡᠳᠦ ᠨᠡᠬᠡᠮᠵᠢᠯᠡᠭᠡᠳ ᠦᠷᠡ ᠳ᠋ᠦᠩ ᠦᠭᠡᠢ ᠬᠠᠶᠠᠴᠢᠬᠠᠭᠰᠠᠨ ᠪᠠᠢᠵᠠᠢ᠃
ᠲᠦᠪᠰᠢᠨ ᠬᠠᠷᠢᠨ ᠡᠨᠡ ᠶᠠᠷᠢᠶᠠ ᠶ᠋ᠢ ᠲᠡᠭᠡᠵᠦ ᠳᠥᠭᠥᠮ ᠲᠦᠳᠡᠬᠡᠨ ᠢ᠋ᠶ᠋ᠡᠷ ᠦᠵᠡᠭᠰᠡᠨ ᠦᠭᠡᠢ᠃ ᠬᠡᠷᠪᠡ ᠡᠢᠮᠦ ᠤᠴᠢᠷ ᠪᠠᠢᠪᠠᠯ ᠬᠠᠮᠢᠶᠠ ᠦᠭᠡᠢ ᠬᠠᠶᠠᠭᠠᠨ ᠳ᠋ᠤᠨᠢ ᠬᠠᠶᠠᠴᠢᠬᠠᠬᠤ ᠭᠡᠳᠡᠭ ᠴᠢᠨᠢ ᠨᠠᠭᠠᠳᠤᠮ ᠪᠢᠰᠢ ᠤᠤ? ᠭᠡᠵᠦ ᠪᠣᠳᠣᠬᠤ ᠳᠤ ᠪᠠᠨ ᠥᠨᠥᠳᠥᠷ ᠬᠥᠬᠡᠲᠤᠯᠢ ᠪᠠᠷ ᠲᠡᠷᠭᠡ ᠵᠢᠯᠣᠭᠣᠳᠤᠭᠤᠯᠤᠨ ᠮᠤᠷᠤᠢ ᠮᠤᠰᠢᠭᠠᠢ ᠠᠭᠤᠯᠠᠨ ᠵᠠᠮ ᠢ᠋ᠶ᠋ᠠᠷ ᠬᠣᠶᠠᠷ ᠴᠠᠭ ᠭᠠᠷᠤᠢ ᠶᠠᠪᠤᠭᠠᠳ 《ᠲᠡᠮᠡᠭᠡᠨ ᠪᠦᠭᠦᠳᠦ ᠠᠭᠤᠯᠠᠨ》 ᠳ᠋ᠠᠬᠢ ᠬᠥᠳᠡᠯᠮᠦᠷᠢ ᠪᠡᠷ ᠥᠭᠡᠷᠡᠴᠢᠯᠡᠬᠦ ᠲᠠᠯᠠᠪᠠᠢ ᠳ᠋ᠤ᠌ ᠬᠦᠷᠴᠦ ᠢᠷᠡᠯᠡ᠃ ᠲᠡᠷᠡ ᠬᠣᠶᠠᠷ ᠬᠡᠳᠦᠨ ᠰᠠᠷᠠ ᠶ᠋ᠢᠨ ᠡᠮᠦᠨᠡ ᠲᠦᠮᠡᠨᠨᠠᠰᠤᠲᠤ ᠬᠣᠲᠠ ᠶ᠋ᠢᠨ ᠭᠢᠨᠳᠠᠨ ᠳ᠋ᠤ᠌ ᠳᠠᠷᠤᠭᠳᠠᠵᠤ ᠪᠠᠢᠭᠠᠳ ᠡᠳᠦᠭᠡ ᠡᠨᠳᠡ ᠥᠭᠡᠷᠡᠴᠢᠯᠡᠭᠳᠡᠬᠦ ᠪᠡᠷ ᠢᠷᠡᠭᠰᠡᠨ ᠯᠢ ᠹᠧᠩ ᠮᠢᠩ ᠲᠡᠢ ᠠᠭᠤᠯᠵᠠᠬᠤ ᠪᠠᠷ ᠢᠷᠡᠵᠡᠢ᠃
ᠯᠠᠪᠯᠠᠵᠤ ᠠᠰᠠᠭᠤᠭᠰᠠᠨ ᠢ᠋ᠶ᠋ᠠᠷ ᠡᠨᠡ ᠶᠠᠯᠠᠲᠠᠨ ᠬᠠᠮᠤᠭ ᠤ᠋ᠨ ᠲᠦᠷᠦᠭᠦᠦ ᠪᠣᠯᠤᠷᠴᠠᠭᠠᠨ ᠢ᠋ ᠡᠢᠮᠦ ᠲᠡᠢᠮᠦ ᠬᠥᠮᠦᠨ ᠲᠡᠢ ᠠᠭᠤᠯᠵᠠᠯᠠ ᠭᠡᠵᠦ ᠶᠠᠷᠢᠶᠠ ᠲᠠᠷᠬᠠᠭᠠᠭᠰᠠᠨ ᠭᠡᠳᠡᠭ᠃
ᠠᠷᠠᠢ ᠠᠷᠪᠠᠭᠠᠳ ᠮᠢᠨᠦ᠋ᠲ ᠪᠣᠯᠤᠭᠰᠠᠨ ᠦᠭᠡᠢ ᠪᠡᠷ ᠲᠡᠷᠡ ᠬᠣᠶᠠᠭᠤᠯᠠ ᠶ᠋ᠢᠨ ᠡᠮᠦᠨᠡ ᠥᠪᠴᠢ ᠪᠡᠶᠡ ᠶᠠᠯᠠᠲᠠᠨ ᠤ᠋ ᠬᠤᠪᠴᠠᠰᠤ ᠡᠮᠦᠰᠦᠭᠰᠡᠨ ᠳᠤᠮᠳᠠ ᠨᠠᠰᠤᠨ ᠤ᠋ ᠨᠠᠪᠲᠠᠭᠠᠷ ᠬᠠᠷᠠ ᠬᠥᠮᠦᠨ ᠣᠷᠣᠵᠤ ᠢᠷᠡᠭᠡᠳ ᠨᠡᠯᠢᠶᠡᠳ ᠵᠠᠢᠲᠠᠢ ᠪᠥᠬᠦᠢᠨ ᠵᠣᠭᠰᠣᠪᠠ᠃ ᠡᠨᠡ ᠲᠠᠷᠢᠶᠠᠴᠢᠨ ᠡᠷᠡ ᠨᠠᠢ᠍ᠮᠠᠨ ᠰᠠᠷᠠ ᠶ᠋ᠢᠨ ᠡᠮᠦᠨᠡ ᠬᠦᠷᠢ ᠥᠬᠢᠨ ᠳᠡᠭᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠤᠷᠤᠭ ᠤ᠋ᠨ ᠬᠡᠷᠡᠭ ᠢ᠋ᠶ᠋ᠡᠷ ᠨᠠᠭᠠᠳᠤᠮ ᠬᠢᠵᠦ ᠠᠮᠢᠨ ᠬᠡᠷᠡᠭ ᠲᠦ᠍ ᠬᠣᠯᠪᠣᠭᠳᠠᠭᠠᠳ ᠠᠷᠪᠠᠨ ᠵᠢᠯ ᠦ᠋ᠨ ᠡᠷᠡᠭᠦᠦ ᠰᠢᠢᠳᠬᠡᠯ ᠠᠷᠠᠯᠵᠢᠨ ᠣᠯᠤᠭᠰᠠᠨ ᠭᠡᠳᠡᠭ ᠢ᠋ ᠲᠦᠪᠰᠢᠨ ᠨᠢᠭᠡᠨᠲᠡ ᠮᠡᠳᠡᠵᠡᠢ᠃
ᠲᠦᠪᠰᠢᠨ ᠬᠠᠵᠠᠭᠤ ᠳ᠋ᠠᠬᠢ ᠰᠠᠨᠳᠠᠯᠢ ᠪᠠᠨ ᠵᠢᠭᠠᠨ ᠲᠡᠭᠦᠨ ᠢ᠋ ᠰᠠᠭᠤᠯᠭᠠᠭᠠᠳ᠂ ᠣᠪᠣᠭ ᠨᠡᠷᠡ ᠶ᠋ᠢ ᠨᠢ ᠠᠰᠠᠭᠤᠨ ᠢᠷᠡᠭᠰᠡᠨ ᠵᠣᠷᠢᠯᠭᠠ ᠪᠠᠨ ᠬᠡᠯᠡᠵᠦ᠂ ᠲᠡᠭᠦᠨ ᠢ᠋ ᠰᠠᠢᠲᠤᠷ ᠪᠣᠳᠣᠯᠬᠢᠯᠠᠵᠤ ᠪᠠᠢᠭᠠᠳ ᠦᠨᠡᠨᠴᠢ ᠪᠡᠷ ᠲᠤᠰᠬᠠᠬᠤ ᠶ᠋ᠢ ᠱᠠᠭᠠᠷᠳᠠᠭᠰᠠᠨ ᠤ᠋ ᠳᠠᠷᠠᠭᠠ᠂ ᠨᠢᠭᠡ ᠭᠣᠳᠣᠯᠢ ᠲᠠᠮᠠᠬᠢ ᠭᠠᠷᠭᠠᠵᠤ ᠨᠣᠴᠣᠭᠠᠭᠠᠳ᠂ ᠯᠢ ᠹᠧᠩ ᠮᠢᠩ ᠦ᠋ᠨ ᠴᠢᠷᠠᠢ ᠶ᠋ᠢ ᠴᠣᠭᠣᠷᠣᠲᠠᠯᠠ ᠰᠢᠷᠳᠡᠨ ᠲᠠᠮᠠᠬᠢ ᠪᠠᠨ ᠠᠭᠠᠵᠢᠭᠤᠬᠠᠨ ᠲᠠᠲᠠᠵᠤ ᠰᠠᠭᠤᠯᠠ᠃ ᠯᠢ ᠹᠧᠩ ᠮᠢᠩ ᠲᠦᠪᠰᠢᠨ ᠢ᠋ ᠦᠵᠡᠮᠡᠭᠴᠡ ᠲᠠᠨᠢᠵᠠᠢ᠃
ᠯᠢ ᠹᠧᠩ ᠮᠢᠩ ᠢ᠋ ᠲᠦᠮᠡᠨᠨᠠᠰᠤᠲᠤ ᠬᠣᠲᠠ ᠶ᠋ᠢᠨ ᠶᠡᠬᠡ ᠭᠢᠨᠳᠠᠨ ᠳ᠋ᠤ᠌ ᠪᠠᠢᠬᠤ ᠳ᠋ᠤ᠌ ᠡᠨᠡ ᠰᠢᠷᠠ ᠴᠢᠷᠠᠢᠲᠠᠢ ᠲᠢᠩᠬᠢᠮ ᠦ᠋ᠨ ᠳᠠᠷᠤᠭᠠ ᠬᠣᠷᠢᠭᠤᠯ ᠤ᠋ᠨ ᠭᠠᠵᠠᠷ ᠢ᠋ᠶ᠋ᠠᠷ ᠦᠷᠭᠦᠯᠵᠢ ᠢᠷᠡᠬᠦ ᠨᠢ ᠬᠠᠷᠠᠭᠳᠠᠳᠠᠭ᠃ ᠲᠡᠭᠦᠨ ᠦ᠌ ᠲᠤᠬᠠᠢ ᠡᠯᠳᠡᠪ ᠦ᠋ᠨ ᠦᠯᠢᠭᠡᠷ ᠶᠠᠯᠠᠲᠠᠨ ᠤ᠋ ᠳᠤᠮᠳᠠ ᠳᠡᠯᠭᠡᠷᠡᠵᠦ ᠪᠠᠢᠭᠰᠠᠨ᠃ ᠲᠡᠭᠡᠭᠡᠳ ᠰᠦᠷᠡᠬᠡᠢ ᠯᠡ ᠤᠪᠠᠳᠢᠰ ᠡᠷᠳᠡᠮ ᠲᠡᠢ ᠬᠥᠮᠦᠨ ᠭᠡᠮᠡᠨ ᠪᠢᠰᠢᠷᠡᠵᠡᠭᠡᠳᠡᠭ᠃ ᠥᠨᠥᠳᠥᠷ ᠲᠡᠷᠡ ᠲᠦᠪᠰᠢᠨ ᠢ᠋ ᠦᠵᠡᠮᠡᠭᠴᠡ ᠥᠪᠡᠷ ᠢ᠋ ᠪᠡᠨ ᠪᠠᠰᠠ ᠶᠠᠮᠠᠷ ᠨᠢᠭᠡᠨ ᠬᠡᠷᠡᠭ ᠲᠦ᠍ ᠬᠣᠯᠪᠣᠭᠳᠠᠭᠰᠠᠨ ᠪᠣᠯ? ᠭᠡᠵᠦ ᠬᠢᠷᠳ᠋ᠬᠢᠨ ᠰᠣᠴᠢᠵᠠᠢ᠃ ᠰᠣᠨᠣᠰᠬᠤ ᠳ᠋ᠤ᠌ ᠡᠨᠡ ᠳᠠᠷᠤᠭᠠ ᠬᠥᠩᠭᠡᠨ ᠶᠠᠯᠠᠲᠠᠨ ᠤ᠋ ᠬᠡᠷᠡᠭ ᠢ᠋ ᠶᠡᠷᠦ ᠡᠴᠡ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠭᠠᠷᠳᠠᠵᠤ ᠪᠠᠢᠴᠠᠭᠠᠳᠠᠭ ᠦᠭᠡᠢ ᠭᠡᠨᠡ ᠪᠢᠯᠡ᠃ ᠶᠠᠮᠠᠷ ᠬᠡᠷᠡᠭ ᠤᠴᠢᠷ ᠲᠤ᠌ ᠬᠣᠯᠪᠣᠭᠳᠠᠭᠰᠠᠨ ᠪᠣᠯ? ᠴᠣᠬᠣᠮ ᠠᠰᠢᠭ ᠲᠠᠢ ᠤᠤ ᠠᠰᠢᠭ ᠦᠭᠡᠢ ᠤᠤ? ᠭᠡᠵᠦ ᠰᠠᠨᠠᠭᠠᠰᠢᠷᠠᠯ ᠪᠣᠯᠪᠠ᠃ ᠬᠡᠳᠦᠨ ᠰᠠᠷᠠ ᠶ᠋ᠢᠨ ᠡᠮᠦᠨᠡ ᠭᠢᠨᠳᠠᠨ ᠳ᠋ᠤ᠌ ᠰᠠᠭᠤᠨ ᠰᠢᠭᠦᠨ ᠲᠠᠰᠤᠯᠤᠯᠲᠠ ᠪᠠᠨ ᠬᠦᠯᠢᠶᠡᠵᠦ ᠪᠠᠢᠭᠠ ᠦᠶᠡ ᠳ᠋ᠦ᠍᠂ ᠪᠣᠯᠤᠷᠴᠠᠭᠠᠨ ᠤ᠋ ᠲᠤᠬᠠᠢ ᠲᠠᠷᠬᠠᠭᠠᠭᠰᠠᠨ ᠦᠭᠡ ᠶᠠᠷᠢᠶᠠ ᠪᠠᠨ ᠳᠠᠷᠤᠵᠤ ᠨᠢᠭᠤᠬᠤ ᠰᠠᠨᠠᠭᠠ ᠯᠢ ᠹᠧᠩ ᠮᠢᠩ ᠳ᠋ᠦ᠍ ᠥᠴᠦᠬᠡᠨ ᠴᠦ᠍ ᠪᠠᠢᠭᠰᠠᠨ ᠦᠭᠡᠢ᠃
ᠬᠠᠷᠢᠨ ᠮᠡᠳᠡᠭᠰᠡᠨ ᠢ᠋ᠶ᠋ᠡᠨ ᠬᠡᠯᠡᠵᠦ ᠦᠵᠡᠭᠰᠡᠨ ᠢ᠋ᠶ᠋ᠡᠨ ᠶᠠᠷᠢᠬᠤ ᠳ᠋ᠤ᠌ ᠡᠷᠡᠭᠡᠯᠵᠡᠭᠡ ᠦᠭᠡᠢ ᠪᠠᠢᠯᠠ᠃
ᠲᠡᠭᠦᠨ ᠦ᠌ ᠡᠷᠭᠢᠴᠡᠭᠦᠯᠦᠯ ᠢ᠋ᠶ᠋ᠡᠷ ᠪᠣᠯ ᠬᠠᠭᠠᠰ ᠵᠢᠯ ᠦ᠋ᠨ ᠡᠮᠦᠨᠡᠬᠢ ᠨᠢᠭᠡ ᠦᠳᠡᠰᠢ ᠶ᠋ᠢᠨ ᠠᠷᠪᠠᠨ ᠴᠠᠭ ᠤ᠋ᠨ ᠦᠶᠡ ᠳ᠋ᠦ᠍ ᠬᠣᠷᠢᠭᠤᠯ ᠤ᠋ᠨ ᠭᠠᠵᠠᠷ ᠤ᠋ᠨ ᠶᠠᠯᠠᠲᠠᠨ ᠨᠤᠭᠤᠳ ᠢ᠋ ᠤᠨᠲᠠᠬᠤ ᠭᠡᠵᠦ ᠪᠠᠢᠲᠠᠯᠠ ᠪᠣᠯᠤᠷᠴᠠᠭᠠᠨ ᠭᠡᠭᠴᠢ ᠶᠠᠯᠠᠲᠠᠨ ᠢ᠋ ᠠᠪᠴᠢᠷᠠᠵᠤ ᠯᠢ ᠹᠧᠩ ᠮᠢᠩ ᠲᠡᠢ ᠬᠠᠮᠲᠤ ᠰᠠᠭᠤᠯᠭᠠᠵᠠᠢ᠃
ᠰᠢᠨᠡ ᠣᠷᠣᠵᠤ ᠢᠷᠡᠭᠰᠡᠨ ᠡᠨᠡ ᠬᠦ᠌ ᠥᠨᠳᠥᠷ ᠨᠠᠷᠢᠬᠠᠨ ᠡᠷᠡ ᠴᠣᠬᠣᠮ ᠶᠡᠷᠦ ᠡᠴᠡ ᠪᠡᠨ ᠦᠭᠡ ᠳᠠᠭᠤ ᠴᠥᠭᠡᠨ ᠬᠥᠮᠦᠨ ᠶᠦᠮ ᠤᠤ? ᠡᠰᠡᠪᠡᠯ ᠲᠡᠷᠡ ᠦᠳᠡᠰᠢ ᠬᠡᠷᠡᠭ ᠲᠦ᠍ ᠰᠠᠨᠠᠭᠠᠰᠢᠷᠠᠭᠠᠳ ᠳᠤᠤᠭᠠᠷᠠᠬᠤ ᠳᠤᠷᠠ ᠦᠭᠡᠢ ᠪᠠᠢᠭᠰᠠᠨ ᠶᠤᠮ ᠤᠤ? ᠳᠡᠮᠡᠢ ᠣᠯᠠᠨ ᠦᠭᠡ ᠬᠡᠯᠡᠬᠦ ᠦᠭᠡᠢ ᠪᠠᠢᠯᠠ᠃ ᠬᠣᠷᠢᠭᠤᠯ ᠤ᠋ᠨ ᠭᠠᠵᠠᠷ ᠤ᠋ᠨ ᠶᠠᠯᠠᠲᠠᠨ ᠨᠤᠭᠤᠳ ᠰᠢᠨᠡ ᠶᠠᠯᠠᠲᠠᠨ ᠢᠷᠡᠪᠡᠯ ᠲᠡᠭᠦᠨ ᠦ᠌ ᠬᠢᠭᠰᠡᠨ ᠶᠠᠯᠠ ᠶ᠋ᠢ ᠨᠢ ᠡᠯᠳᠡᠪ ᠦ᠋ᠨ ᠠᠷᠭᠠ ᠪᠠᠷ ᠠᠰᠠᠭᠤᠵᠤ ᠮᠡᠳᠡᠳᠡᠭ᠃ ᠡᠨᠡ ᠨᠢ ᠭᠣᠣᠯᠳᠠᠭᠤ ᠨᠢᠭᠡ ᠳ᠋ᠦ᠍ ᠬᠢᠳᠡᠯ ᠦᠭᠡᠢ᠂ ᠬᠣᠶᠠᠷ ᠲᠤ᠌ ᠰᠣᠨᠢᠷᠬᠠᠵᠤ ᠭᠠᠢᠬᠠᠬᠤ ᠠ᠋ᠴᠠ ᠪᠣᠯᠵᠠᠢ᠃ ᠪᠠᠰᠠ ᠵᠠᠷᠢᠮ ᠳᠤ ᠪᠠᠨ ᠨᠢᠭᠡ ᠨᠢᠭᠡᠨ ᠳᠦ ᠪᠡᠨ ᠶᠠᠯᠠ ᠶ᠋ᠢ ᠨᠢ ᠤᠷᠢᠳᠴᠢᠯᠠᠨ ᠲᠣᠭᠲᠠᠭᠠᠳᠠᠭ ᠪᠢᠯᠡ᠃ ᠰᠢᠨᠡ ᠢᠷᠡᠭᠰᠡᠨ ᠬᠥᠮᠦᠰ ᠬᠡᠷᠪᠡ ᠦᠨᠡᠨ ᠢ᠋ᠶ᠋ᠡᠨ ᠲᠤᠰᠢᠶᠠᠬᠤ ᠦᠭᠡᠢ᠂ ᠭᠡᠭᠰᠡᠨ ᠶᠠᠯᠠ ᠪᠠᠨ ᠬᠡᠯᠡᠬᠦ ᠦᠭᠡᠢ ᠪᠣᠯ ᠵᠣᠳᠣᠵᠤ ᠡᠯᠳᠡᠵᠦ ᠪᠠᠢᠭᠠᠳ ᠴᠦ᠍ ᠲᠤᠰᠢᠶᠠᠯᠭᠠᠨᠠ᠃ ᠭᠡᠲᠡᠯᠡ ᠲᠡᠷᠡ ᠪᠣᠯᠤᠷᠴᠠᠭᠠᠨ ᠠ᠋ᠴᠠ ᠳᠠᠬᠢᠨ ᠳᠠᠪᠲᠠᠨ ᠠᠰᠠᠭᠤᠭᠰᠠᠨ ᠴᠦ᠍ ᠬᠡᠯᠡᠬᠦ ᠦᠭᠡᠢ ᠮᠥᠷᠲᠡᠭᠡᠨ ᠨᠢᠭᠤᠷ ᠴᠢᠷᠠᠢ ᠨᠢ ᠶᠠᠭ ᠯᠠ ᠮᠡᠯᠡᠷᠡᠨ ᠲᠡᠨᠡᠭᠰᠢᠷᠡᠭᠰᠡᠨ ᠪᠠᠢᠳᠠᠯ ᠲᠠᠢ ᠪᠠᠢᠪᠠ᠃
ᠡᠨᠡ ᠦᠶᠡ ᠳ᠋ᠦ᠍ ᠨᠢᠭᠡᠨᠲᠡ ᠣᠷᠣᠢᠲᠠᠭᠰᠠᠨ ᠲᠤᠯᠠ ᠳᠠᠬᠢᠭᠠᠳ ᠤᠬᠤᠴᠢᠯᠠᠨᠰᠠᠨ ᠦᠭᠡᠢ ᠤᠨᠲᠠᠵᠠᠭᠠᠯᠠ᠃ ᠳᠡᠮᠡᠢ ᠤᠳᠠᠭᠰᠠᠨ ᠦᠭᠡᠢ ᠪᠣᠯᠤᠷᠴᠠᠭᠠᠨ ᠲᠡᠭᠦᠨ ᠲᠡᠢ ᠣᠷᠣ ᠪᠠᠨ ᠵᠡᠷᠭᠡᠴᠡᠭᠦᠯᠦᠨ ᠬᠡᠪᠲᠡᠭᠰᠡᠨ ᠪᠣᠯᠪᠠᠴᠤ ᠨᠠᠭᠠᠰᠢ ᠴᠠᠭᠠᠰᠢ ᠡᠷᠭᠢᠵᠦ ᠬᠥᠷᠪᠡᠭᠡᠳ ᠶᠡᠷᠦ ᠤᠨᠲᠠᠬᠤ ᠦᠭᠡᠢ ᠪᠠᠢᠯᠠ᠃ ᠦᠦᠷ ᠴᠠᠢᠬᠤ ᠶ᠋ᠢᠨ ᠦᠶᠡ ᠪᠡᠷ ᠪᠤᠰᠤᠳ ᠶᠠᠯᠠᠲᠠᠨ ᠨᠠᠷ ᠰᠡᠷᠡᠬᠦ ᠳ᠋ᠦ᠍ ᠲᠡᠷᠡ ᠪᠠᠰᠠ ᠤᠨᠲᠠᠭᠠᠳᠤᠢ ᠪᠠᠢᠬᠤ ᠰᠢᠭ᠋ ᠪᠠᠢᠪᠠ᠃
ᠯᠢ ᠹᠧᠩ ᠮᠢᠩ ᠲᠡᠭᠦᠨ ᠳ᠋ᠦ᠍ ᠣᠢᠷᠠᠲᠤᠨ᠄
— ᠴᠢ ᠶᠠᠮᠠᠷ ᠶᠠᠯᠠ ᠬᠢᠭᠰᠡᠨ ᠴᠦ᠍ ᠤᠨᠲᠠᠵᠤ ᠠᠮᠠᠷᠠᠨᠠ ᠰᠢᠲᠠ᠃ ᠤᠨᠲᠠᠬᠤ ᠦᠭᠡᠢ ᠪᠣᠯ ᠪᠡᠶᠡ ᠴᠢᠨᠢ ᠲᠡᠰᠬᠦ ᠦᠭᠡᠢ ᠰᠢᠦ ᠭᠡᠵᠡᠢ᠃ ᠪᠣᠯᠤᠷᠴᠠᠭᠠᠨ ᠳᠡᠷᠭᠡᠳᠡᠬᠢ ᠬᠥᠮᠦᠰ ᠢ᠋ᠶ᠋ᠡᠨ ᠬᠠᠷᠠᠰᠬᠢᠭᠡᠳ᠄ 《ᠪᠢ ᠶᠠᠮᠠᠷ ᠶᠠᠯᠠ ᠬᠢᠭᠰᠡᠨ ᠢ᠋ᠶ᠋ᠡᠨ ᠥᠪᠡᠷ ᠢ᠋ᠶ᠋ᠡᠨ ᠴᠦ᠍ ᠮᠡᠳᠡᠬᠦ ᠦᠭᠡᠢ ᠪᠠᠢᠨᠠ》 ᠭᠡᠵᠦ ᠤᠢᠳᠬᠠᠷᠲᠠᠢᠬᠠᠨ ᠬᠡᠯᠡᠪᠡ᠃ ᠲᠡᠭᠡᠬᠦ ᠳ᠋ᠦ᠍ ᠯᠢ ᠹᠧᠩ ᠮᠢᠩ ᠡᠨᠡ ᠴᠦ᠍ ᠶᠣᠰᠣᠲᠠᠢ ᠨᠢᠭᠡ ᠮᠤᠵᠢᠭᠤᠳᠠ ᠡᠷᠡ ᠪᠠᠢᠬᠠ᠃ ᠡᠭᠦᠨ ᠳ᠋ᠦ᠍ ᠵᠢᠭᠠᠬᠠᠨ ᠵᠡᠷᠯᠢᠭ ᠰᠤᠡᠭᠭᠢᠨᠠᠭ ᠢᠳᠡᠭᠦᠯᠵᠦ᠂ ᠦᠨᠡᠨ ᠢ᠋ ᠨᠢ ᠰᠣᠨᠣᠰᠤᠶᠠ ᠭᠡᠵᠦ ᠴᠦ᠍ ᠪᠣᠳᠣᠵᠤ ᠪᠠᠢᠪᠠ᠃ ᠦᠭᠡᠢ ᠪᠣᠯ ᠶᠠᠭᠤᠨ ᠳ᠋ᠤ᠌ ᠡᠢᠮᠦ ᠦᠭᠡ ᠬᠡᠯᠡᠵᠦ᠂ ᠡᠢᠮᠦ ᠣᠪᠣᠷ ᠠᠪᠬᠤ ᠪᠣᠢ? ᠭᠡᠵᠦ ᠪᠣᠳᠣᠵᠠᠢ᠃ ᠲᠦᠪᠰᠢᠨ ᠲᠠᠮᠠᠬᠢ ᠪᠠᠨ ᠲᠠᠲᠠᠬᠤ ᠶ᠋ᠢᠨ ᠳᠠᠭᠠᠤ ᠯᠢ ᠹᠧᠩ ᠮᠢᠩ ᠢ᠋ ᠨᠢᠳᠦ ᠰᠢᠯᠵᠢᠯ ᠦᠭᠡᠢ ᠬᠠᠷᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠭᠡᠨᠡᠳᠲᠡ᠄
— ᠪᠢᠳᠡᠨ ᠦ᠌ ᠣᠢᠯᠠᠭᠠᠭᠰᠠᠨ ᠢ᠋ᠶ᠋ᠠᠷ ᠪᠣᠯᠤᠷᠴᠠᠭᠠᠨ ᠢ᠋ ᠬᠣᠷᠢᠭᠤᠯ ᠤ᠋ᠨ ᠭᠠᠵᠠᠷ ᠲᠤ᠌ ᠢᠷᠡᠭᠰᠡᠨ ᠦ᠌ ᠮᠠᠷᠭᠠᠰᠢ ᠥᠷᠯᠥᠭᠡ ᠨᠢ ᠨᠢᠭᠡ ᠡᠮᠡᠭᠲᠡᠢ ᠲᠡᠭᠦᠨ ᠲᠡᠢ ᠠᠭᠤᠯᠵᠠᠵᠤ ᠶᠠᠷᠢᠯᠴᠠᠭᠰᠠᠨ ᠭᠡᠵᠦ ᠴᠢ ᠬᠥᠮᠦᠨ ᠳ᠋ᠦ᠍ ᠬᠡᠯᠡᠭᠰᠡᠨ ᠭᠡᠨᠡ᠃ ᠦᠨᠡᠨ ᠤᠤ? ᠭᠡᠵᠦ ᠠᠰᠠᠭᠤᠯᠲᠠ ᠪᠠᠨ ᠡᠬᠢᠯᠡᠭᠦᠯᠪᠡ᠃
— ᠲᠡᠷᠡ ᠪᠣᠯ ᠮᠢᠨᠦ ᠪᠣᠯᠭᠣᠮᠵᠢ ᠦᠭᠡᠢ ᠪᠡᠷ ᠬᠡᠯᠡᠭᠰᠡᠨ ᠬᠠᠷᠢᠭᠤᠴᠠᠯᠭᠠ ᠦᠭᠡᠢ ᠦᠭᠡ᠃ ᠵᠠᠰᠠᠭ ᠤ᠋ᠨ ᠭᠠᠵᠠᠷ ᠠ᠋ᠴᠠ ᠨᠠᠮᠠ ᠶᠢ ᠠᠭᠤᠴᠢᠯᠠᠬᠤ ᠶ᠋ᠢ ᠬᠦᠰᠡᠶᠡ᠃ ᠪᠢ ᠭᠡᠳᠡᠭ ᠠᠮᠢᠲᠠᠨ ᠯᠠ ᠠᠮᠠ ᠰᠤᠯᠠ ᠪᠠᠢᠳᠠᠭ᠃
— ᠪᠢᠳᠡ ᠴᠢᠮᠠ ᠠᠴᠠ ᠡᠭᠦᠨ ᠡᠴᠡ ᠬᠠᠷᠢᠭᠤᠴᠠᠯᠭᠠ ᠨᠡᠬᠡᠵᠦ ᠪᠠᠢᠬᠤ ᠪᠢᠰᠢ᠂ ᠴᠢ ᠶᠠᠭᠠᠬᠢᠭᠠᠳ ᠡᠢᠮᠦ ᠦᠭᠡ ᠬᠡᠯᠡᠶᠡ ᠭᠡᠵᠦ ᠪᠣᠳᠣᠭᠰᠠᠨ ᠢ᠋ ᠴᠢᠨᠢ ᠠᠰᠠᠭᠤᠵᠤ ᠪᠠᠢᠨᠠ᠃ ᠪᠢᠳᠡᠨ ᠳ᠋ᠦ᠍ ᠲᠣᠳᠣᠷᠬᠠᠢ ᠬᠡᠯᠡᠭᠡᠷᠡᠢ᠃
— ᠤᠤᠯ ᠨᠢ ᠡᠢᠮᠦ ᠶᠦᠮ᠃ ᠪᠣᠯᠤᠷᠴᠠᠭᠠᠨ ᠢ᠋ ᠢᠷᠡᠭᠰᠡᠨ ᠦ᠌ ᠳᠠᠷᠠᠭᠠ ᠥᠷᠯᠥᠭᠡ ᠶ᠋ᠢᠨ ᠬᠣᠭᠣᠯᠠ ᠪᠣᠯᠬᠤ ᠦᠶᠡ ᠳ᠋ᠦ᠍ ᠲᠣᠭᠣᠭᠠᠴᠢ ᠡᠪᠦᠭᠡᠨ ᠠᠷᠤ ᠴᠣᠩᠬᠣ ᠪᠠᠷ᠄《ᠭᠤᠷᠪᠠᠳᠤᠭᠠᠷ ᠭᠡᠷ ᠦ᠋ᠨ ᠯᠢ ᠹᠧᠩ ᠮᠢᠩ᠂ ᠪᠣᠯᠤᠷᠴᠠᠭᠠᠨ ᠬᠣᠶᠠᠭᠤᠯᠠ ᠪᠤᠳᠠᠭᠠ ᠵᠥᠭᠡᠭᠡᠬᠦ ᠪᠡᠷ ᠢᠷᠡ》 ᠭᠡᠵᠦ ᠲᠠᠭᠤᠲᠠᠯᠠ᠃ ᠡᠨᠡ ᠨᠢ ᠨᠠᠳᠠ ᠪᠠᠬᠠᠨ ᠬᠠᠴᠢᠨ ᠰᠠᠨᠠᠭᠳᠠᠭᠰᠠᠨ᠃ ᠲᠣᠭᠲᠠᠭᠰᠠᠨ ᠲᠠᠰ ᠳᠠᠷᠠᠭᠠᠯᠠᠯ ᠢ᠋ᠶ᠋ᠠᠷ ᠪᠣᠯ ᠲᠡᠷᠡ ᠥᠷᠯᠥᠭᠡ ᠲᠠᠪᠤᠳᠤᠭᠠᠷ ᠭᠡᠷ ᠦ᠋ᠨ ᠶᠠᠯᠠᠲᠠᠨ ᠨᠤᠭᠤᠳ ᠪᠤᠳᠠᠭᠠ ᠵᠥᠭᠡᠭᠡᠬᠦ ᠶᠣᠰᠣᠲᠠᠢ ᠶᠤᠮ᠃
— ᠲᠡᠷᠡ ᠴᠦ᠍ ᠪᠠᠢᠲᠤᠭᠠᠢ ᠪᠣᠯᠤᠷᠴᠠᠭᠠᠨ ᠰᠢᠭ᠋ ᠰᠢᠨᠡ ᠶᠠᠯᠠᠲᠠᠨ ᠢ᠋ ᠡᠩ ᠦ᠋ᠨ ᠪᠠᠢᠳᠠᠯ ᠳᠣᠣᠷᠠ ᠪᠤᠳᠠᠭᠠ ᠵᠥᠭᠡᠭᠡᠯᠭᠡᠬᠦ ᠦᠭᠡᠢ ᠪᠠᠢᠳᠠᠭ ᠶᠤᠮ᠃ ᠬᠡᠵᠢᠶᠡ ᠶᠠᠯᠠ ᠨᠢ ᠲᠣᠳᠣᠷᠬᠠᠢ ᠪᠣᠯᠪᠠᠯ ᠰᠠᠶᠢ ᠨᠠᠭᠠᠰᠢ ᠴᠠᠭᠠᠰᠢ ᠶᠠᠪᠤᠭᠤᠯᠵᠤ ᠪᠣᠯᠳᠠᠭ᠃
— ᠪᠢᠳᠡ ᠬᠣᠶᠠᠭᠤᠯᠠ ᠪᠤᠳᠠᠭᠠ ᠵᠥᠭᠡᠭᠡᠬᠦ ᠪᠡᠷ ᠶᠠᠪᠤᠬᠤ ᠬᠣᠭᠣᠷᠣᠨᠳᠣ ᠪᠢ ᠳᠣᠲᠣᠷᠠ ᠪᠠᠨ᠂ ᠲᠣᠭᠣᠭᠠᠴᠢ ᠡᠪᠦᠭᠡᠨ ᠰᠠᠷᠠ ᠬᠢᠷᠢᠲᠡᠢ ᠪᠣᠯᠤᠭᠰᠠᠨ ᠬᠣᠢᠨᠠ ᠰᠠᠶᠢ ᠪᠢᠳᠡᠨ ᠦ᠌ ᠨᠡᠷᠡ ᠶ᠋ᠢ ᠴᠡᠭᠡᠵᠢᠯᠡᠵᠦ ᠠᠪᠳᠠᠭ ᠶᠤᠮ᠃
— ᠥᠴᠥᠭᠡᠳᠦᠷ ᠠᠵᠢᠯ ᠪᠠᠭᠤᠭᠰᠠᠨ ᠤ᠋ ᠳᠠᠷᠠᠭᠠ ᠢᠷᠡᠭᠰᠡᠨ ᠶᠠᠯᠠᠲᠠᠨ ᠤ᠋ ᠨᠡᠷᠡ ᠶ᠋ᠢ ᠲᠡᠷᠡ ᠡᠢᠮᠦ ᠲᠣᠳᠣᠷᠬᠠᠢ ᠮᠡᠳᠡᠵᠦ ᠪᠠᠢᠬᠤ ᠠ᠋ᠴᠠ ᠦᠵᠡᠪᠡᠯ᠂ ᠠᠩᠬᠠᠨ ᠳ᠋ᠠᠭᠠᠨ ᠯᠠᠪ ᠰᠠᠢᠨ ᠲᠠᠨᠢᠯ ᠪᠤᠶᠤ ᠰᠠᠳᠤᠨ ᠲᠥᠷᠥᠯ ᠦ᠋ᠨ ᠬᠠᠷᠢᠴᠠᠭᠠ ᠲᠠᠢ ᠪᠠᠢᠵᠤ᠂ ᠥᠨᠥ ᠥᠷᠯᠥᠭᠡ ᠪᠤᠳᠠᠭᠠ ᠵᠥᠭᠡᠭᠡᠯᠭᠡᠬᠦ ᠪᠡᠷ ᠰᠢᠯᠲᠠᠭ ᠪᠣᠯᠭᠠᠵᠤ ᠵᠠᠬᠢᠵᠤ ᠨᠠᠢᠳᠠᠬᠤ ᠦᠭᠡ ᠪᠡᠨ ᠬᠡᠯᠡᠬᠦ ᠭᠡᠰᠡᠨ ᠪᠠᠢᠬᠠ ᠭᠡᠵᠦ ᠪᠣᠳᠣᠪᠠ᠃ ᠁ᠮᠢᠨᠦ ᠪᠣᠳᠣᠭᠰᠠᠨ ᠠ᠋ᠴᠠ ᠭᠠᠷᠤᠭᠰᠠᠨ ᠦᠭᠡᠢ᠁᠃
— ᠪᠤᠳᠠᠭᠠ ᠠᠪᠬᠤ ᠴᠣᠩᠬᠣᠨ ᠳᠡᠷᠭᠡᠳᠡ ᠬᠦᠷᠬᠦ ᠳ᠋ᠦ᠍ ᠲᠣᠭᠣᠭᠠᠨ ᠭᠡᠷ ᠦ᠋ᠨ ᠳᠣᠲᠣᠷᠠ ᠴᠣᠩᠬᠣᠨ ᠠ᠋ᠴᠠ ᠳᠡᠮᠡᠢ ᠬᠣᠯᠠ ᠦᠭᠡᠢ ᠨᠢᠭᠡ ᠵᠠᠯᠠᠭᠤ ᠡᠮᠡᠭᠲᠡᠢ ᠵᠣᠭᠰᠣᠵᠤ ᠪᠠᠢᠯᠠ᠃ ᠁ ᠡᠨᠡ ᠡᠮᠡᠭᠲᠡᠢ ᠪᠣᠯᠤᠷᠴᠠᠭᠠᠨ ᠢ᠋ ᠠᠯᠳᠠᠯ ᠦᠭᠡᠢ ᠮᠡᠯᠡᠷᠡᠨ ᠰᠢᠷᠳᠡᠬᠦ ᠪᠥᠭᠡᠳ ᠰᠢᠮᠰᠢᠷᠡᠨ ᠵᠣᠪᠠᠨᠢᠬᠤ ᠪᠠᠢᠳᠠᠯ ᠨᠢᠭᠤᠷ ᠲᠤᠨᠢ ᠢᠯᠡᠬᠡᠨ ᠬᠠᠷᠠᠭᠳᠠᠵᠤ ᠪᠠᠢᠭᠰᠠᠨ᠃
— ᠪᠢ ᠡᠬᠢᠯᠡᠭᠰᠡᠭᠡᠷ ᠡᠨᠡ ᠯᠠᠪ ᠪᠣᠯᠤᠷᠴᠠᠭᠠᠨ ᠤ᠋ ᠡᠬᠡᠨᠡᠷ ᠨᠢ ᠪᠠᠢᠬᠠ᠂ ᠥᠨᠥᠳᠥᠷ ᠲᠣᠭᠣᠭᠠᠴᠢ ᠡᠪᠦᠭᠡᠨ ᠢ᠋ ᠭᠤᠶᠤᠵᠤ ᠡᠷᠡ ᠳᠦ ᠪᠡᠨ ᠵᠣᠯᠭᠠᠨ ᠬᠡᠳᠦᠨ ᠦᠭᠡ ᠬᠡᠯᠡᠬᠦ ᠭᠡᠰᠡᠨ ᠪᠠᠢᠯᠭᠦᠢ ᠭᠡᠵᠦ ᠪᠣᠳᠣᠭᠰᠠᠨ᠃ ᠁ᠢᠩᠭᠢᠭᠡᠳ ᠪᠢ ᠨᠢᠭᠡ ᠰᠠᠭᠤᠯᠠᠭᠠ ᠪᠤᠳᠠᠭᠠ ᠪᠠᠨ ᠳᠡᠭᠦᠵᠢᠯᠡᠭᠡᠳ ᠤᠷᠢᠲᠠᠢ ᠨᠢ ᠶᠠᠪᠤᠯᠠ᠃ ᠁ᠨᠡᠯᠢᠶᠡᠳ ᠤᠳᠠᠭᠠᠳ ᠪᠣᠯᠣᠷᠴᠠᠭᠠᠨ ᠬᠣᠶᠠᠷ ᠪᠢᠴᠢᠬᠠᠨ ᠰᠠᠭᠤᠯᠠᠭᠠ ᠪᠤᠳᠠᠭᠠ ᠳᠡᠭᠦᠵᠢᠯᠡᠭᠡᠳ ᠶᠠᠭ ᠯᠠ ᠤᠨᠠᠮᠠᠷ ᠶᠠᠩᠵᠤ ᠲᠠᠢ ᠪᠤᠴᠠᠵᠤ ᠢᠷᠡᠪᠡ᠃ ᠁ᠲᠡᠭᠦᠨ ᠢ᠋ ᠠᠵᠢᠭᠯᠠᠬᠤ ᠳ᠋ᠤ᠌ ᠴᠢᠷᠠᠢ ᠨᠢ ᠠᠢᠬᠤᠪᠲᠤᠷ ᠵᠢᠪᠡᠬᠡᠢᠷᠡᠨ᠂ ᠪᠦᠬᠦ ᠪᠡᠶᠡ ᠨᠢ ᠨᠠᠢᠭᠤᠯᠵᠠᠨ ᠴᠡᠴᠡᠷᠬᠢᠯᠡᠨᠡ᠃ ᠁ᠪᠢ ᠭᠠᠢᠬᠠᠬᠤ ᠳᠤ ᠪᠠᠨ ᠬᠦᠢ᠂ ᠴᠢ ᠶᠠᠭᠠᠬᠢᠭᠰᠠᠨ ᠶᠤᠮ ᠭᠡᠵᠦ ᠠᠰᠠᠭᠤᠭᠰᠠᠨ ᠳ᠋ᠤ᠌᠂ ᠲᠠ ᠮᠢᠨᠦ ᠣᠷᠣᠨ ᠳ᠋ᠤ᠌ ᠣᠯᠠᠨ ᠳ᠋ᠤ᠌ ᠪᠤᠳᠠᠭᠠ ᠬᠤᠪᠢᠶᠠᠭᠠᠳ ᠥᠭᠭᠦᠭᠡᠴᠢ᠂ ᠮᠢᠨᠦ ᠲᠣᠯᠣᠭᠠᠢ ᠡᠷᠭᠢᠭᠡᠳ ᠤᠨᠠᠮᠠᠷ ᠪᠠᠢᠨᠠ ᠭᠡᠵᠦ ᠲᠡᠷᠡ ᠨᠠᠮᠠ ᠶᠢ ᠭᠤᠶᠤᠪᠠ᠃ ᠁ᠪᠢ ᠲᠡᠭᠦᠨ ᠢ᠋ ᠶᠠᠭᠠᠷᠠᠤ ᠮᠡᠩᠳᠡᠭᠦᠦ ᠲᠦᠰᠢᠨ ᠠᠪᠴᠤ ᠣᠷᠣᠨ ᠳ᠋ᠤᠨᠢ ᠬᠡᠪᠲᠡᠭᠦᠯᠪᠡ᠃ ᠁ ᠨᠠᠮᠠ ᠶᠢ ᠪᠤᠳᠠᠭᠠ ᠬᠤᠪᠢᠶᠠᠵᠤ ᠪᠠᠷᠠᠭᠠᠳ ᠪᠤᠴᠠᠵᠤ ᠢᠷᠡᠬᠦ ᠳ᠋ᠦ᠍ ᠲᠡᠷᠡ ᠭᠡᠷ ᠦ᠋ᠨ ᠠᠲᠠᠷ ᠬᠠᠷᠠᠨ ᠮᠡᠯᠡᠷᠡᠨ ᠬᠡᠪᠲᠡᠵᠦ ᠪᠠᠢᠯᠠ᠃ ᠁ᠪᠢᠳᠡᠨᠦᠰ ᠲᠡᠭᠦᠨ ᠢ᠋ ᠪᠤᠳᠠᠭᠠ ᠢᠳᠡ ᠭᠡᠵᠦ ᠱᠠᠭᠠᠷᠳᠠᠭᠰᠠᠨ ᠳ᠋ᠤ᠌ ᠲᠡᠷᠡ ᠳᠤᠰᠤᠯ ᠰᠥᠮᠥᠰᠦ᠂ ᠮᠥᠬᠥᠯᠢᠭ ᠪᠤᠳᠠᠭᠠ ᠴᠦ᠍ ᠠᠮᠠᠨ ᠳᠤ ᠪᠠᠨ ᠣᠢᠷᠠᠲᠤᠭᠤᠯᠤᠭᠰᠠᠨ ᠦᠭᠡᠢ᠃ ᠁ᠪᠠᠭᠠ ᠦᠳᠡ ᠳ᠋ᠦ᠍ ᠶᠠᠯᠠᠲᠠᠨ ᠨᠤᠭᠤᠳ ᠢ᠋ ᠨᠠᠷᠠᠨ ᠳ᠋ᠤ᠌ ᠭᠠᠷᠭᠠᠬᠤ ᠦᠶᠡ ᠳ᠋ᠦ᠍ ᠲᠡᠷᠡ ᠭᠡᠨᠡᠳᠲᠡ ᠬᠠᠷᠠᠭᠤᠯ ᠤ᠋ᠨ ᠴᠡᠷᠢᠭ ᠲᠦ᠍ ᠱᠠᠭᠠᠷᠳᠠᠯᠭᠠ ᠭᠠᠷᠭᠠᠨ ᠶᠠᠯᠠ ᠪᠠᠨ ᠴᠠᠭᠠᠪᠤᠷᠯᠠᠬᠤ ᠪᠠᠷ ᠭᠤᠶᠤᠴᠢᠯᠠᠪᠠ᠃
— ᠲᠡᠭᠦᠨ ᠢ᠋ ᠨᠢᠭᠡ ᠡᠮᠡᠭᠲᠡᠢ ᠲᠡᠢ ᠠᠭᠤᠯᠵᠠᠯᠠ ᠭᠡᠵᠦ ᠴᠢ ᠬᠡᠨ ᠳ᠋ᠦ᠍ ᠬᠡᠯᠡᠭᠰᠡᠨ ᠶᠦᠮ ᠭᠡᠵᠦ ᠲᠦᠪᠰᠢᠨ ᠢ᠋ ᠠᠰᠠᠭᠤᠬᠤ ᠳ᠋ᠤ᠌᠄
— ᠪᠢ ᠭᠡᠳᠡᠭ ᠬᠥᠮᠦᠨ ᠠᠮᠠ ᠬᠤᠷᠳᠤᠨ ᠪᠠᠢᠳᠠᠭ ᠲᠤᠯᠠ ᠪᠤᠳᠠᠭᠠ ᠪᠠᠨ ᠠᠪᠴᠢᠷᠠᠮᠠᠭᠴᠠ ᠮᠠᠨ ᠤ᠋ ᠭᠡᠷ ᠦ᠋ᠨ ᠬᠡᠳᠦᠨ ᠶᠠᠯᠠᠲᠠᠨ ᠳ᠋ᠤ᠌ ᠪᠣᠯᠤᠷᠴᠠᠭᠠᠨ ᠳᠠᠭᠢᠨᠢ ᠰᠢᠭ᠋ ᠰᠠᠢᠬᠠᠨ ᠨᠢᠭᠡᠨ ᠡᠮᠡᠭᠲᠡᠢ ᠲᠡᠢ ᠠᠭᠤᠯᠵᠠᠯᠠ ᠭᠡᠳ ᠪᠠᠷᠬᠢᠷᠠᠭᠰᠠᠨ ᠨᠢ ᠶᠠᠷᠰᠢᠭ ᠪᠣᠯᠵᠤ ᠪᠢᠯᠡ᠃ ᠁ ᠪᠤᠰᠤᠳ ᠶᠠᠯᠠᠲᠠᠨ ᠨᠤᠭᠤᠳ ᠮᠢᠨᠦ ᠦᠭᠡ ᠪᠡᠷ ᠪᠣᠯᠤᠷᠴᠠᠭᠠᠨ ᠤ᠋ ᠵᠣᠷᠢᠭ ᠰᠦᠯᠳᠡ ᠶ᠋ᠢᠨ ᠬᠤᠪᠢᠷᠠᠯᠲᠠ ᠲᠠᠢ ᠨᠢ ᠬᠣᠯᠪᠣᠭᠳᠠᠭᠤᠯᠤᠨ ᠳᠡᠭᠡᠷᠡ ᠨᠢ ᠳᠡᠯ᠂ ᠳᠣᠣᠷᠠ ᠨᠢ ᠰᠡᠭᠦᠯ ᠨᠡᠮᠡᠭᠡᠳ ᠶᠡᠬᠡ ᠯᠡ ᠦᠢᠮᠡᠭᠡᠨ ᠱᠤᠤᠭᠢᠶᠠᠨ ᠪᠣᠯᠭᠠᠨᠰᠠᠨ ᠶᠤᠮ᠃ ᠪᠢ ᠠᠩᠬᠠᠨ ᠳᠤ ᠪᠠᠨ ᠡᠨᠡ ᠡᠮᠡᠭᠲᠡᠢ ᠪᠣᠯ ᠪᠣᠯᠤᠷᠴᠠᠭᠠᠨ ᠤ᠋ ᠡᠬᠡᠨᠡᠷ ᠨᠢ ᠭᠡᠵᠦ ᠲᠠᠭᠠᠮᠠᠭᠯᠠᠭᠰᠠᠨ ᠨᠢ ᠪᠤᠷᠤᠭᠤᠳᠴᠠᠢ᠃ ᠬᠡᠳᠦᠨ ᠡᠳᠦᠷ ᠦ᠋ᠨ ᠬᠢᠨᠢ ᠳᠠᠷᠠᠭᠠ ᠪᠢᠳᠡ ᠰᠠᠶᠢ ᠲᠡᠷᠡ ᠪᠣᠯ ᠡᠬᠡᠨᠡᠷ ᠢ᠋ᠶ᠋ᠡᠨ ᠠᠯᠠᠭᠰᠠᠨ ᠶᠠᠯᠠᠲᠠᠨ ᠪᠣᠯᠬᠤ ᠶ᠋ᠢ ᠮᠠᠲᠡᠭᠰᠠᠨ᠃
— ᠲᠡᠷᠡ ᠥᠷᠯᠥᠭᠡ ᠲᠣᠭᠣᠭᠠᠨ ᠭᠡᠷ ᠦ᠋ᠨ ᠴᠣᠩᠬᠣᠨ ᠳᠡᠷᠭᠡᠳᠡ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠡᠮᠡᠭᠲᠡᠢ ᠴᠣᠬᠣᠮ ᠶᠠᠮᠠᠷ ᠰᠢᠭ᠋ ᠲᠥᠷᠬᠦ ᠪᠠᠢᠳᠠᠯ ᠲᠠᠢ ᠪᠣᠢ?
— ᠭᠠᠳᠠᠨᠠ ᠠ᠋ᠴᠠ ᠨᠢ ᠦᠵᠡᠬᠦ ᠳ᠋ᠦ᠍ ᠬᠣᠷᠢᠨ ᠬᠡᠳᠦ ᠣᠷᠴᠢᠮ ᠤ᠋ᠨ ᠨᠠᠰᠤᠲᠠᠢ᠃ ᠴᠠᠭᠠᠪᠲᠤᠷ ᠵᠤᠤᠪᠠᠩ ᠴᠢᠷᠠᠢ ᠲᠠᠢ᠂ ᠮᠠᠰᠢ ᠵᠢᠰᠦᠷᠬᠡᠭ᠂ ᠡᠮᠦᠰᠴᠦ ᠵᠡᠭᠦᠭᠰᠡᠨ ᠨᠢ ᠰᠦᠷᠡᠬᠡᠢ ᠶᠠᠩᠵᠤᠲᠠᠢᠬᠠᠨ ᠪᠠᠢᠭᠰᠠᠨ᠃
— ᠴᠢ ᠲᠡᠳᠡᠨ ᠦ᠌ ᠶᠠᠭᠤ ᠶᠠᠷᠢᠯᠴᠠᠭᠰᠠᠨ ᠢ᠋ ᠨᠢᠭᠡ ᠦᠭᠡ ᠴᠦ᠍ ᠣᠯᠵᠤ ᠰᠣᠨᠣᠰᠤᠭᠰᠠᠨ ᠦᠭᠡᠢ ᠤᠤ?
— ᠲᠣᠭᠣᠭᠠᠴᠢ ᠡᠪᠦᠭᠡᠨ ᠤᠷᠢᠳ ᠢ᠋ᠶ᠋ᠠᠷ ᠨᠠᠳᠠ ᠪᠤᠳᠠᠭᠠᠨ ᠰᠠᠭᠤᠯᠠᠭᠠ ᠭᠠᠷᠳᠠᠭᠤᠯᠤᠭᠰᠠᠨ ᠪᠣᠯᠬᠣᠷ ᠪᠢ ᠬᠦᠯᠢᠶᠡᠵᠦ ᠵᠣᠭᠰᠣᠬᠤ ᠴᠢᠬᠤᠯᠠ ᠦᠭᠡᠢ ᠃ ᠲᠡᠷᠡᠴᠢᠯᠡᠨ ᠪᠣᠯᠤᠷᠴᠠᠭᠠᠨ ᠢ᠋ ᠳᠠᠭᠤᠳᠠᠵᠤ ᠪᠤᠳᠠᠭᠠ ᠵᠥᠭᠡᠭᠡᠯᠭᠡᠭᠰᠡᠨ ᠨᠢ ᠡᠨᠡ ᠡᠬᠡᠨᠡᠷ ᠲᠡᠢ ᠵᠣᠯᠭᠠᠭᠤᠯᠵᠤ ᠶᠠᠷᠢᠯᠴᠠᠭᠤᠯᠬᠤ ᠤᠴᠢᠷ ᠲᠠᠢ ᠪᠠᠢᠬᠤ ᠭᠡᠵᠦ ᠪᠢ ᠲᠠᠭᠠᠮᠠᠭᠯᠠᠵᠤ ᠪᠠᠢᠭᠰᠠᠨ ᠪᠣᠯᠬᠣᠷ ᠬᠤᠷᠳᠤᠬᠠᠨ ᠶᠠᠪᠤᠭᠰᠠᠨ ᠶᠤᠮ᠃ ᠢᠩᠭᠢᠭᠡᠳ ᠪᠢ ᠲᠡᠳᠡᠨ ᠦ᠌ ᠶᠠᠷᠢᠯᠴᠠᠭᠠ ᠶ᠋ᠢ ᠨᠢᠭᠡ ᠦᠭᠡ ᠴᠦ᠍ ᠰᠣᠨᠣᠰᠴᠤ ᠵᠠᠪᠳᠤᠭᠰᠠᠨ ᠦᠭᠡᠢ᠃ ᠴᠣᠬᠣᠮ ᠶᠠᠷᠢᠯᠴᠠᠭᠰᠠᠨ ᠡᠰᠡᠬᠦ ᠶ᠋ᠢ ᠨᠢ ᠮᠡᠳᠡᠬᠦ ᠦᠭᠡᠢ᠂ ᠵᠥᠪᠬᠡᠨ ᠲᠡᠷᠡ ᠡᠮᠡᠭᠲᠡᠢ ᠪᠣᠯᠤᠷᠴᠠᠭᠠᠨ ᠤᠷᠤᠭᠤ ᠨᠢᠭᠡ ᠯᠡ ᠵᠢᠭᠲᠡᠢ ᠬᠠᠷᠠᠵᠤ ᠪᠠᠢᠭᠰᠠᠨ ᠨᠢ ᠬᠠᠷᠠᠭᠳᠠᠭᠰᠠᠨ᠃
— ᠬᠣᠵᠢᠮ ᠨᠢ ᠪᠣᠯᠤᠷᠴᠠᠭᠠᠨ ᠲᠠᠢ ᠲᠡᠷᠡ ᠡᠮᠡᠭᠲᠡᠢ ᠶ᠋ᠢᠨ ᠲᠤᠬᠠᠢ ᠶᠠᠷᠢᠯᠴᠠᠭᠰᠠᠨ ᠤᠤ?
— ᠶᠠᠷᠢᠯᠴᠠᠭᠰᠠᠨ᠃ ᠬᠡᠳᠦᠨ ᠡᠳᠦᠷ ᠦ᠋ᠨ ᠳᠠᠷᠠᠭᠠ ᠪᠢᠳᠡ ᠨᠢᠭᠡᠨᠲᠡ ᠪᠣᠯᠤᠷᠴᠠᠭᠠᠨ ᠪᠣᠯ ᠡᠬᠡᠨᠡᠷ ᠢ᠋ᠶ᠋ᠡᠨ ᠠᠯᠠᠭᠠᠳ ᠪᠠᠷᠢᠪᠴᠢᠯᠠᠭᠳᠠᠭᠰᠠᠨ ᠢ᠋ ᠮᠡᠳᠡᠭᠰᠡᠨ ᠪᠣᠯᠬᠣᠷ ᠪᠢ ᠬᠥᠮᠦᠨ ᠦ᠌ ᠡᠬᠡᠨᠡᠷ ᠢ᠋ ᠠᠨᠳᠠᠭᠤ ᠲᠥᠰᠦᠪᠯᠡᠭᠰᠡᠨ ᠢ᠋ᠶ᠋ᠡᠨ ᠮᠡᠳᠡᠵᠦ᠂ ᠳᠠᠬᠢᠭᠠᠳ ᠠᠰᠠᠭᠤᠬᠤ ᠡᠪ ᠦᠭᠡᠢ ᠪᠣᠯᠤᠯᠠ᠃ ᠁ ᠬᠥᠮᠦᠨ ᠠᠯᠠᠭᠰᠠᠨ ᠶᠠᠯᠠᠲᠠᠨ ᠠ᠋ᠴᠠ ᠪᠣᠯ ᠪᠢᠳᠡ ᠪᠦᠷ ᠠᠶᠤᠵᠤ᠂ ᠵᠣᠳᠣᠵᠤ᠂ ᠨᠦᠳᠦᠵᠦ᠂ ᠰᠠᠷᠢᠮᠰᠠᠭ ᠠᠮᠰᠠᠭᠤᠯᠵᠤ ᠴᠢᠳᠠᠳᠠᠭ ᠦᠭᠡᠢ ᠶᠦᠮ᠃ ᠁ ᠰᠡᠭᠦᠯ ᠳᠦ ᠪᠡᠨ ᠪᠢᠳᠡ ᠮᠠᠰᠢ ᠰᠠᠢᠬᠠᠨ ᠳᠠᠰᠤᠯᠴᠠᠯᠠ᠃ ᠨᠢᠭᠡ ᠤᠳᠠᠭᠠ ᠪᠢ ᠲᠡᠭᠦᠨ ᠡᠴᠡ ᠲᠡᠷᠡ ᠡᠮᠡᠭᠲᠡᠢ ᠶ᠋ᠢᠨ ᠲᠤᠬᠠᠢ ᠠᠰᠠᠭᠤᠬᠤ ᠳ᠋ᠤ᠌᠂ ᠪᠣᠯᠤᠷᠴᠠᠭᠠᠨ ᠰᠣᠴᠢᠨ ᠭᠠᠢᠬᠠᠭᠠᠳ ᠨᠡᠯᠢᠶᠡᠳ ᠤᠳᠠᠭᠰᠠᠨ ᠢ᠋ᠶ᠋ᠠᠨ᠂ ᠲᠡᠷᠡ ᠡᠮᠡᠭᠲᠡᠢ ᠶ᠋ᠢ ᠪᠢ ᠴᠦ᠍ ᠲᠠᠨᠢᠬᠤ ᠦᠭᠡᠢ᠃ ᠁ ᠪᠠᠷᠤᠭ ᠲᠣᠭᠣᠭᠠᠴᠢ ᠡᠪᠦᠭᠡᠨ ᠦ᠌ ᠬᠠᠪᠰᠤᠷᠤᠭᠴᠢ ᠨᠢ ᠪᠠᠢᠬᠠ ᠭᠡᠵᠦ ᠬᠡᠯᠡᠭᠰᠡᠨ᠃ ᠁ ᠲᠡᠷᠡ ᠡᠮᠡᠭᠲᠡᠢ ᠴᠢᠮᠠ ᠶᠢ ᠴᠣᠬᠣᠮ ᠨᠢᠭᠡ ᠬᠠᠷᠠᠵᠤ ᠪᠠᠢᠭᠰᠠᠨ ᠰᠢᠳᠡ ᠭᠡᠵᠦ ᠨᠠᠮᠠ ᠶᠢ ᠬᠡᠯᠡᠬᠦᠯᠡᠷ ᠡᠷᠬᠡ ᠴᠢᠯᠥᠭᠡᠲᠦ ᠬᠥᠮᠦᠨ ᠶᠠᠯᠠᠲᠠᠳ ᠢ᠋ ᠦᠵᠡᠪᠡᠯ ᠶᠡᠷᠦ ᠨᠢ ᠠᠢᠬᠤᠪᠲᠤᠷ ᠰᠣᠨᠢᠷᠬᠠᠨ ᠬᠠᠷᠠᠳᠠᠭ ᠪᠠᠢᠯᠭᠦᠢ ᠭᠡᠵᠦ ᠪᠣᠯᠤᠷᠴᠠᠭᠠᠨ ᠬᠡᠯᠡᠵᠦ ᠪᠠᠢᠭᠰᠠᠨ᠃ ᠁ᠪᠢ ᠳᠠᠬᠢᠭᠠᠳ ᠡᠨᠡ ᠬᠦ᠌ ᠤᠴᠢᠷ ᠢ᠋ ᠳᠤᠷᠠᠳᠬᠤ ᠨᠢ ᠢᠯᠡᠭᠦᠴᠡ ᠬᠡᠷᠡᠭ ᠪᠣᠯᠤᠨᠠ ᠭᠡᠵᠦ ᠪᠣᠳᠣᠪᠠ᠃
᠁ ᠥᠩᠭᠡᠷᠡᠭᠰᠡᠨ ᠳ᠋ᠦ᠍ ᠲᠣᠭᠣᠭᠠᠴᠢ ᠡᠪᠦᠭᠡᠨ ᠦᠷᠭᠦᠯᠵᠢ ᠦᠯᠦ ᠲᠠᠨᠢᠬᠤ ᠡᠬᠡᠨᠡᠷ ᠬᠡᠦᠬᠡᠨᠴᠦᠳ ᠪᠣᠯᠤᠨ ᠠᠵᠢᠯ ᠠ᠋ᠴᠠ ᠪᠠᠨ ᠠᠮᠠᠷᠠᠭᠰᠠᠨ ᠡᠪᠦᠭᠡᠴᠦᠳ ᠢ᠋ ᠨᠢᠭᠡ ᠬᠣᠶᠠᠷ ᠡᠳᠦᠷ ᠢ᠋ᠶ᠋ᠡᠷ ᠬᠥᠯᠥᠰᠥᠯᠡᠨ ᠪᠤᠳᠠᠭᠠ ᠴᠢᠨᠠᠭᠤᠯᠳᠠᠭ ᠶᠤᠮ᠃ ᠁ᠢᠩᠭᠢᠭᠡᠳ ᠪᠢ ᠪᠣᠯᠭᠣᠮᠵᠢ ᠦᠭᠡᠢ ᠪᠡᠷ ᠬᠥᠮᠦᠰ ᠲᠦ᠍ ᠲᠡᠢᠮᠦ ᠦᠭᠡ ᠬᠡᠯᠡᠭᠰᠡᠨ ᠳᠦ ᠪᠡᠨ ᠰᠦᠷᠡᠬᠡᠢ ᠭᠡᠮᠰᠢᠪᠡ᠃ ᠁ᠭᠡᠪᠡᠴᠦ ᠠᠮᠠ ᠠᠯᠳᠠᠪᠠᠯ ᠪᠠᠷᠢᠵᠤ ᠪᠣᠯᠬᠤ ᠦᠭᠡᠢ ᠶ᠋ᠢᠨ ᠬᠣᠢᠨᠠ ᠳᠠ᠃ ᠨᠡᠭᠡᠷᠡᠨ ᠲᠠᠨᠠᠷ ᠲᠤ᠌ ᠢᠯᠡᠭᠦᠦ ᠶᠠᠪᠤᠳᠠᠯ ᠨᠡᠮᠡᠵᠡᠢ᠃
— ᠪᠣᠯᠤᠷᠴᠠᠭᠠᠨ ᠲᠠᠨᠠᠷ ᠲᠤ ᠡᠬᠡᠨᠡᠷ ᠢ᠋ᠶ᠋ᠡᠨ ᠶᠠᠭᠠᠬᠢᠵᠤ ᠬᠣᠣᠷᠯᠠᠭᠰᠠᠨ ᠲᠤᠬᠠᠢ ᠬᠡᠯᠡᠵᠦ ᠥᠩᠭᠡᠷᠡᠭᠰᠡᠨ ᠤᠤ?
— ᠲᠡᠷᠡ ᠶᠡᠷᠦ ᠡᠴᠡ ᠪᠡᠨ ᠡᠨᠡ ᠲᠤᠬᠠᠢ ᠬᠠᠮᠲᠤ ᠬᠤᠷᠢᠭᠳᠠᠭᠰᠠᠳ ᠲᠤ ᠪᠠᠨ ᠬᠡᠯᠡᠳᠡᠭ ᠦᠭᠡᠢ᠃
— ᠪᠢᠳᠡ ᠥᠨᠥᠳᠥᠷ ᠡᠨᠳᠡ ᠬᠦᠷᠲᠡᠯᠡ ᠶᠠᠷᠢᠯᠴᠠᠶᠠ᠃
— ᠵᠠ᠃
ᠲᠡᠨᠳᠡ ᠡᠴᠡ ᠭᠠᠷᠬᠤ ᠳ᠋ᠤ᠌ ᠲᠦᠪᠰᠢᠨ ᠦ᠌ ᠴᠢᠷᠠᠢ ᠳ᠋ᠤᠨᠢ ᠭᠦᠨ ᠪᠣᠳᠣᠯᠭᠠᠰᠢᠷᠠᠯ ᠤ᠋ᠨ ᠶᠠᠩᠵᠤ ᠢᠯᠡᠷᠡᠨ᠂ ᠬᠥᠬᠡᠳᠤᠯᠢ ᠲᠠᠢ ᠨᠢᠭᠡ ᠦᠭᠡ ᠴᠦ᠍ ᠶᠠᠷᠢᠯᠴᠠᠯ ᠦᠭᠡᠢ ᠶᠠᠪᠤᠵᠠᠢ᠃
ᠤᠩᠰᠢᠭᠰᠠᠨ ᠨᠢ ᠄ ᠴᠡᠴᠡᠭᠮᠡ