ᠬᠢᠯᠭᠠᠰᠤᠨ ᠳᠥᠷᠥᠭᠡᠨ ᠳᠡᠭᠡᠷᠡ – ᠬᠠᠰᠪᠤᠯᠠᠭ ᠵᠣᠬᠢᠶᠠᠪᠠ᠂ < ᠠᠷᠪᠠᠨ ᠳᠥᠷᠪᠡ > Хялгасан дөрөөн дээр – Хасвулаг зохиов <14>
485ᠬᠢᠯᠭᠠᠰᠤᠨ ᠳᠥᠷᠥᠭᠡᠨ ᠳᠡᠭᠡᠷᠡ - < ᠠᠷᠪᠠᠨ ᠳᠥᠷᠪᠡ >
ᠳᠠᠷᠠᠭᠠ ᠡᠳᠦᠷ ᠨᠢ᠂ ᠲᠦᠪᠰᠢᠨ ᠲᠡᠳᠡ ᠦᠳᠡ ᠶ᠋ᠢᠨ ᠠᠮᠠᠷᠠᠯᠲᠠ ᠪᠠᠨ ᠠᠰᠢᠭᠯᠠᠨ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠤ᠋ ᠡᠮᠴᠢ ᠸᠠᠩ ᠯᠠᠨ ᠬᠤᠸᠠ ᠶ᠋ᠢᠨ ᠳ᠋ᠦ᠍ ᠬᠦᠷᠴᠦ ᠢᠷᠡᠯᠡ᠃ ᠡᠭᠦᠳᠡ ᠶ᠋ᠢ ᠨᠢ ᠲᠣᠭᠰᠢᠬᠤ ᠳ᠋ᠤ᠌ ᠤᠳᠠᠭᠰᠠᠨ ᠦᠭᠡᠢ ᠡᠮᠴᠢ ᠶ᠋ᠢᠨ ᠴᠠᠭᠠᠨ ᠮᠠᠯᠠᠭᠠᠢ ᠬᠡᠯᠲᠡᠭᠡᠢ ᠵᠡᠭᠦᠭᠰᠡᠨ ᠳᠥᠴᠢᠭᠡᠳ ᠨᠠᠰᠤᠨ ᠤ᠋ ᠨᠢᠭᠡᠨ ᠡᠮᠡᠭᠲᠡᠢ ᠤᠭᠲᠤᠨ ᠭᠠᠷᠴᠤ ᠢᠷᠡᠯᠡ᠃ ᠡᠭᠦᠳᠡᠨ ᠭᠠᠳᠠᠨᠠ ᠨᠢ ᠦᠯᠦ ᠲᠠᠨᠢᠬᠤ ᠬᠥᠮᠦᠰ ᠪᠠᠢᠬᠤ ᠶ᠋ᠢ ᠦᠵᠡᠭᠡᠳ ᠲᠡᠷᠡ ᠰᠣᠴᠢᠰᠬᠢᠨ ᠡᠭᠦᠳᠡ ᠪᠡᠨ ᠳᠠᠬᠢᠭᠠᠳ ᠬᠠᠭᠠᠬᠤ ᠠ᠋ᠴᠠ ᠡᠪ ᠦᠭᠡᠢᠳᠡᠬᠦ ᠳ᠋ᠡᠭᠡᠨ ᠠᠷᠭᠠ ᠪᠠᠨ ᠪᠠᠷᠠᠨ ᠶᠠᠭᠤ ᠬᠡᠯᠡᠬᠦ ᠪᠡᠨ ᠣᠯᠵᠤ ᠶᠠᠳᠠᠵᠤ ᠵᠣᠭᠰᠣᠰᠬᠢᠭᠰᠡᠨ ᠢ᠋ᠶ᠋ᠡᠨ᠄
— ᠲᠠ ᠨᠠᠷ ᠬᠡᠨ ᠢ᠋ ᠡᠷᠢᠵᠦ ᠪᠠᠢᠨᠠ ᠭᠡᠯᠡ᠃
— ᠪᠢᠳᠡ ᠬᠣᠲᠠ ᠶ᠋ᠢᠨ ᠨᠢᠭᠡᠳᠦᠭᠡᠷ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠤ᠋ ᠸᠠᠩ ᠯᠠᠨ ᠬᠤᠸᠠ ᠨᠥᠬᠥᠷ ᠲᠡᠢ ᠠᠭᠤᠯᠵᠠᠬᠤ ᠰᠠᠨᠠᠭᠠ ᠲᠠᠢ᠃
— ᠲᠠᠨᠤᠰ ᠬᠠᠮᠢᠭᠠᠬᠢ ᠶ᠋ᠢᠨ᠁
— ᠪᠢᠳᠡ ᠪᠣᠯ ᠬᠣᠲᠠ ᠶ᠋ᠢᠨ ᠰᠢᠭᠦᠬᠦ ᠬᠣᠷᠢᠶᠠᠨ ᠤ᠋ ᠬᠢ᠃
— ᠵᠠ ᠲᠡᠭᠡᠪᠡᠯ ᠭᠡᠷ ᠲᠦ᠍ ᠣᠷᠣ᠃
ᠡᠨᠡ ᠡᠬᠡᠨᠡᠷ ᠡᠳᠡᠨ ᠢ᠋ ᠢᠩᠭᠢᠵᠦ ᠭᠡᠷ ᠲᠤ ᠪᠠᠨ ᠤᠷᠢᠵᠤ ᠣᠷᠣᠭᠤᠯᠤᠭᠠᠳ ᠥᠪᠡᠷ ᠢ᠋ᠶ᠋ᠡᠨ ᠡᠭᠦᠳᠡᠨ ᠦ᠌ ᠬᠠᠵᠠᠭᠤᠳᠠᠬᠢ ᠰᠠᠨᠳᠠᠯᠢ ᠳᠡᠭᠡᠷᠡ ᠰᠠᠭᠤᠮᠠᠭᠴᠠ᠄
— ᠮᠠᠨ ᠤ᠋ ᠡᠭᠦᠳᠡ ᠪᠡᠷ ᠵᠠᠰᠠᠭ ᠬᠠᠤᠯᠢ ᠶ᠋ᠢᠨ ᠺᠠᠳ᠋ᠷᠴᠤᠳ ᠠᠯᠪᠠᠨ ᠤᠴᠢᠷ ᠢ᠋ᠶ᠋ᠠᠷ ᠪᠠᠷᠤᠭ ᠢᠷᠡᠳᠡᠭ ᠦᠭᠡᠢ᠃ ᠪᠣᠳᠣᠬᠤ ᠳ᠋ᠤ᠌ ᠲᠠ ᠨᠠᠷ ᠥᠨᠥᠳᠥᠷ ᠡᠳᠦᠢ ᠲᠡᠳᠦᠢ ᠤᠴᠢᠷ ᠲᠠᠢ ᠢᠷᠡᠭᠰᠡᠨ ᠪᠢᠵᠡ ᠭᠡᠪᠡ᠃
— ᠲᠡᠢᠮᠦ ᠠ᠋᠂ ᠬᠡᠳᠦᠨ ᠰᠠᠷᠠ ᠶ᠋ᠢᠨ ᠡᠮᠦᠨᠡ ᠬᠣᠣᠷᠯᠠᠭᠳᠠᠭᠰᠠᠨ ᠦᠵᠡᠰᠬᠦᠯᠡᠩ ᠦ᠋ᠨ ᠪᠠᠢᠳᠠᠯ ᠢ᠋ ᠲᠠᠨ ᠠ᠋ᠴᠠ ᠪᠠᠭᠠ ᠰᠠᠭᠠ ᠣᠢᠯᠠᠭᠠᠬᠤ ᠰᠠᠨᠠᠭᠠ ᠲᠠᠢ ᠢᠷᠡᠯᠡ᠃
— ᠠ᠋᠂ ᠦᠵᠡᠰᠬᠦᠯᠡᠩ! ᠭᠡᠳ ᠲᠡᠭᠦᠨ ᠦ᠌ ᠴᠢᠷᠠᠢ ᠳᠣᠣᠷᠠ ᠨᠢ ᠨᠡᠯᠢᠶᠡᠳ ᠬᠤᠪᠢᠷᠠᠭᠰᠠᠨ ᠪᠣᠯᠪᠠᠴᠤ ᠦᠭᠡ ᠪᠡᠨ ᠵᠠᠯᠭᠠᠨ᠄
— ᠲᠠ ᠨᠠᠷ ᠴᠣᠬᠣᠮ ᠠᠯᠢ ᠲᠠᠯᠠ ᠪᠠᠷ ᠣᠢᠯᠠᠭᠠᠬᠤ ᠰᠠᠨᠠᠭᠠ ᠲᠠᠢ ᠪᠣᠯ? ᠪᠢ ᠮᠡᠳᠡᠬᠦ ᠪᠡᠨ ᠪᠣᠯ ᠶᠡᠷᠦ ᠨᠢᠭᠤᠵᠤ ᠳᠠᠯᠳᠠᠯᠠᠬᠤ ᠦᠭᠡᠢ ᠶᠦᠮ᠃ ᠶᠠᠭ ᠮᠡᠳᠡᠬᠦ ᠦᠭᠡᠢ ᠪᠣᠯ ᠶᠠᠭᠠᠬᠢᠨᠠ ᠳᠠ᠃ ᠲᠠᠨᠠᠷ ᠤ᠋ᠨ ᠱᠠᠭᠠᠷᠳᠠᠯᠭᠠ ᠶ᠋ᠢ ᠪᠡᠶᠡᠯᠡᠭᠦᠯᠵᠦ ᠳᠡᠢᠯᠬᠦ ᠦᠭᠡᠢ ᠯᠡ ᠪᠣᠯᠤᠨᠠ᠃
— ᠬᠠᠮᠢᠶᠠ ᠦᠭᠡᠢ᠂ ᠪᠢᠳᠡ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠰᠤᠯᠠ ᠶᠠᠷᠢᠯᠴᠠᠶᠠ᠃
— ᠲᠠ ᠨᠠᠷ ᠪᠣᠯᠣᠷᠴᠠᠭᠠᠨ ᠢ᠋ ᠠᠯᠠᠬᠤ ᠶ᠋ᠢ ᠬᠣᠢᠰᠢᠯᠠᠭᠤᠯᠤᠭᠰᠠᠨ ᠭᠡᠨᠡ ᠤᠤ? ᠲᠡᠭᠡᠵᠦ ᠭᠡᠭᠡᠨ ᠴᠠᠭᠠᠨ ᠡᠳᠦᠷ᠂ ᠭᠡᠷᠡᠯᠲᠦ ᠨᠠᠷᠠᠨ ᠤ᠋ ᠳᠣᠣᠷᠠ ᠡᠬᠡᠨᠡᠷ ᠲᠡᠭᠡᠨ ᠬᠣᠣᠷᠲᠤ ᠡᠮ ᠬᠡᠷᠡᠭᠯᠡᠵᠦ ᠠᠯᠠᠭᠰᠠᠨ ᠰᠠᠨᠠᠭᠠᠴᠢᠯᠠᠭᠠᠲᠤ ᠶᠠᠯᠠᠲᠠᠨ ᠪᠠᠰᠠ ᠠᠭᠤᠴᠢᠯᠠᠭᠳᠠᠬᠤ ᠭᠡᠵᠢ ᠤᠤ?
— ᠦᠭᠡᠢ᠂ ᠲᠡᠢᠮᠦ ᠪᠢᠰᠢ᠂ ᠲᠡᠭᠦᠨ ᠦ᠌ ᠶᠠᠯᠠᠲᠤ ᠠᠵᠢᠯᠯᠠᠭᠠ ᠳᠡᠭᠡᠷᠡ ᠡᠳᠦᠢ ᠲᠡᠳᠦᠢ ᠲᠣᠳᠣᠷᠬᠠᠢ ᠪᠤᠰᠤ ᠵᠦᠢᠯ ᠪᠠᠢᠨᠠ᠃ ᠡᠳᠦᠭᠡ ᠲᠠᠨᠠᠷ ᠠ᠋ᠴᠠ ᠠᠰᠠᠭᠤᠵᠤ ᠰᠤᠷᠠᠵᠤ ᠪᠠᠢᠬᠤ ᠨᠢ ᠦᠵᠡᠰᠬᠦᠯᠡᠩ ᠦ᠋ᠨ ᠬᠣᠣᠷᠯᠠᠭᠳᠠᠭᠰᠠᠨ ᠦᠨᠡᠨ ᠰᠢᠯᠲᠠᠭᠠᠨ ᠢ᠋ ᠨᠢ ᠤᠯᠠᠮ ᠨᠢᠭᠡ ᠠᠯᠬᠤᠮ ᠪᠦᠬᠦ ᠲᠠᠯᠠ ᠪᠠᠷ ᠲᠣᠳᠣᠷᠬᠠᠢ ᠣᠢᠯᠠᠭᠠᠵᠤ ᠪᠠᠢᠬᠤ ᠶᠠᠪᠤᠳᠠᠯ ᠶᠤᠮ᠃ ᠰᠣᠨᠣᠰᠬᠤ ᠳ᠋ᠤ᠌ ᠲᠠ ᠪᠣᠯ ᠦᠵᠡᠰᠬᠦᠯᠡᠩ ᠦ᠋ᠨ ᠤᠳᠠᠭᠠᠨ ᠵᠢᠯ ᠦ᠋ᠨ ᠰᠠᠢᠨ ᠨᠠᠢᠵᠠ ᠭᠡᠨᠡ᠃ ᠲᠠ ᠪᠢᠳᠡᠨ ᠳ᠋ᠦ᠍ ᠲᠡᠭᠦᠨ ᠦ᠌ ᠡᠩ ᠦ᠋ᠨ ᠦᠶᠡ ᠶ᠋ᠢᠨ ᠵᠠᠩ ᠪᠠᠢᠳᠠᠯ᠂ ᠵᠢᠴᠢ ᠲᠡᠭᠦᠨ ᠦ᠌ ᠠᠮᠢᠳᠤᠷᠠᠯ ᠤ᠋ᠨ ᠳᠤᠮᠳᠠ ᠲᠣᠬᠢᠶᠠᠯᠳᠤᠭᠰᠠᠨ ᠣᠨᠴᠠᠭᠠᠢ ᠤᠴᠢᠷ ᠤ᠋ᠳ ᠠ᠋ᠴᠠ ᠮᠡᠳᠡᠬᠦ ᠪᠡᠨ ᠶᠠᠷᠢᠭᠠᠳ ᠥᠭᠭᠦᠨᠡ ᠤᠤ?
ᠸᠠᠩ ᠯᠠᠨ ᠬᠤᠸᠠ ᠪᠠᠬᠠᠨ ᠪᠣᠳᠣᠯᠬᠢᠯᠠᠭᠠᠳ᠄
— ᠦᠵᠡᠰᠬᠦᠯᠡᠩ ᠪᠣᠯ ᠮᠡᠷᠭᠡᠵᠢᠯ ᠢ᠋ᠶ᠋ᠡᠷ ᠮᠠᠰᠢ ᠥᠨᠳᠥᠷ ᠡᠮᠴᠢ ᠶᠦᠮ᠃ ᠭᠠᠭᠴᠠ ᠵᠠᠩ ᠨᠢ ᠪᠣᠯ ᠳᠤᠭᠤᠢ ᠨᠣᠮᠣᠬᠠᠨ᠂ ᠵᠥᠷᠢᠭᠦᠳ ᠵᠣᠵᠢᠭ ᠰᠢᠭ᠋ ᠪᠠᠢᠳᠠᠭ᠃ ᠬᠥᠮᠦᠨ ᠪᠣᠯᠭᠠᠨ ᠲᠠᠢ ᠲᠡᠭᠡᠵᠦ ᠰᠠᠢᠨ ᠨᠠᠭᠠᠯᠳᠤᠵᠤ ᠨᠡᠢᠯᠡᠬᠦ ᠦᠭᠡᠢ᠂ ᠨᠡᠩ ᠴᠤ᠌ ᠢᠨᠢᠶᠡᠵᠦ ᠬᠥᠭᠡᠷᠬᠦ ᠨᠢ ᠳᠡᠮᠡᠢ ᠬᠠᠷᠠᠭᠳᠠᠬᠤ ᠦᠭᠡᠢ ᠪᠠᠢᠳᠠᠭ᠃ ᠭᠡᠲᠡᠯᠡ ᠶᠠᠮᠠᠷ ᠨᠢᠭᠡᠨ ᠵᠦᠢᠯ ᠦ᠋ᠨ ᠵᠣᠷᠢᠯᠭᠠ ᠳ᠋ᠠᠭᠠᠨ ᠬᠦᠷᠬᠦ ᠭᠡᠪᠡᠯ ᠡᠩ ᠦ᠋ᠨ ᠡᠷᠡᠭᠲᠡᠢᠴᠦᠳ ᠡᠴᠡ ᠴᠤ᠌ ᠳᠡᠭᠡᠷᠡᠳᠡᠬᠦ ᠪᠣᠢ᠃ ᠲᠡᠷᠡ ᠬᠡᠷᠪᠡ ᠶᠠᠮᠠᠷ ᠨᠢᠭᠡᠨ ᠬᠥᠮᠦᠨ ᠳ᠋ᠦ᠍ ᠶᠠᠮᠠᠷ ᠨᠢᠭᠡ ᠤᠴᠢᠷ ᠢ᠋ ᠪᠡᠶᠡᠯᠡᠭᠦᠯᠵᠦ ᠥᠭᠬᠦ ᠪᠡᠷ ᠵᠥᠪᠰᠢᠶᠡᠷᠡᠪᠡᠯ ᠰᠠᠨᠠᠭᠠ ᠠᠮᠤᠷ ᠪᠠᠢ᠂ ᠯᠠᠪᠲᠠᠢ ᠴᠢᠮᠠ ᠳ᠋ᠤ᠌ ᠪᠦᠲᠦᠭᠡᠵᠦ ᠥᠭᠬᠦ ᠶᠦᠮ᠃ ᠬᠡᠷᠪᠡ ᠲᠡᠷᠡ ᠳᠤᠷᠠ ᠦᠭᠡᠢ ᠪᠣᠯ ᠨᠠᠭᠠᠳᠤ ᠵᠠᠬᠠ ᠳᠤ ᠪᠠᠨ ᠴᠢᠮᠠ ᠳ᠋ᠤ᠌ ᠦᠭᠡ ᠴᠤ᠌ ᠳᠤᠤᠭᠠᠷᠬᠤ ᠦᠭᠡᠢ ᠪᠠᠢᠵᠤ ᠮᠡᠳᠡᠬᠦ ᠶᠦᠮ᠃ ᠡᠳᠡᠭᠡᠷ ᠵᠠᠩ ᠢ᠋ ᠨᠢ ᠪᠢ ᠮᠠᠰᠢ ᠬᠦᠨᠳᠦᠳᠬᠡᠨ ᠪᠢᠰᠢᠷᠡᠵᠦ ᠬᠠᠮᠤᠭ ᠠ᠋ᠴᠠ ᠢᠯᠡᠭᠦᠦ ᠪᠠᠬᠠᠷᠬᠠᠳᠠᠭ ᠲᠤ ᠪᠠᠨ ᠰᠠᠢᠨ ᠨᠠᠢᠵᠠ ᠪᠣᠯᠤᠯᠴᠠᠭᠰᠠᠨ ᠶᠤᠮ᠃ ᠪᠠᠰᠠ ᠬᠡᠯᠡᠪᠡᠯ ᠲᠡᠷᠡ ᠪᠣᠯ ᠳᠣᠲᠣᠭᠠᠳᠤ ᠰᠡᠳᠬᠢᠯ ᠢ᠋ᠶ᠋ᠡᠨ ᠠᠢᠬᠤᠪᠲᠤᠷ ᠳᠠᠷᠤᠵᠤ ᠴᠢᠳᠠᠳᠠᠭ ᠠᠮᠢᠲᠠᠨ ᠰᠢᠦ᠃
— ᠰᠣᠨᠣᠰᠬᠤ ᠳ᠋ᠤ᠌ ᠲᠡᠭᠦᠨ ᠦ᠌ ᠴᠠᠯᠢᠩ ᠢ᠋ ᠶᠡᠬᠡ ᠤᠳᠠᠭᠠᠨ ᠬᠤᠭᠤᠴᠠᠭᠠ ᠥᠰᠬᠡᠵᠦ ᠥᠭᠭᠦᠭᠰᠡᠨ ᠦᠭᠡᠢ ᠭᠡᠨᠡ᠃ ᠴᠣᠬᠣᠮ ᠶᠠᠮᠠᠷ ᠰᠢᠯᠲᠠᠭᠠᠨ ᠠ᠋ᠴᠠ ᠪᠣᠯᠤᠭᠰᠠᠨ ᠪᠣᠯ?
— ᠮᠢᠨᠦ ᠪᠣᠳᠣᠬᠤ ᠪᠠᠷ ᠲᠡᠭᠦᠨ ᠦ᠌ ᠵᠥᠷᠢᠭᠦᠳ ᠵᠠᠩ ᠠ᠋ᠴᠠ ᠪᠣᠯᠤᠭᠰᠠᠨ ᠪᠠᠢᠵᠤ ᠮᠡᠳᠡᠨᠡ᠃
— ᠦᠵᠡᠰᠬᠦᠯᠡᠩ ᠢ᠋ ᠲᠠᠨ ᠤ᠋ ᠬᠣᠷᠢᠶᠠᠨ ᠤ᠋ ᠵᠠᠷᠢᠮ ᠤᠳᠤᠷᠢᠳᠤᠯᠭᠠ ᠲᠠᠢ ᠡᠢᠮᠦ ᠲᠡᠢᠮᠦ ᠣᠨᠴᠠᠭᠠᠢ ᠬᠠᠷᠢᠴᠠᠭᠠ ᠲᠠᠢ ᠪᠤᠶᠤ ᠵᠥᠷᠢᠴᠡᠯ ᠲᠡᠢ ᠭᠡᠵᠦ ᠰᠣᠨᠣᠰᠤᠭᠰᠠᠨ᠃ ᠡᠨᠡ ᠨᠢ ᠦᠨᠡᠨ ᠪᠣᠯ ᠴᠣᠬᠣᠮ ᠶᠠᠮᠠᠷ ᠰᠢᠯᠲᠠᠭᠠᠨ ᠠ᠋ᠴᠠ ᠪᠣᠯᠤᠭᠰᠠᠨ ᠪᠣᠢ?
— ᠬᠥᠮᠦᠰ ᠢᠩᠭᠢᠵᠦ ᠬᠡᠯᠡᠯᠴᠡᠳᠡᠭ ᠪᠣᠯᠪᠠᠴᠤ ᠦᠨᠡᠨ ᠨᠢᠭᠡ ᠬᠣᠶᠠᠷ ᠭᠡᠳ ᠵᠢᠱ᠌ᠢᠶᠡ ᠲᠠᠢ ᠬᠡᠯᠡᠶᠡ ᠭᠡᠪᠡᠯ ᠶᠡᠷᠦ ᠬᠡᠯᠡᠬᠦ ᠶᠠᠭᠤᠮᠠ ᠣᠯᠳᠠᠬᠤ ᠦᠭᠡᠢ ᠰᠢᠭ ᠪᠠᠢᠳᠠᠭ᠃ ᠭᠡᠲᠡᠯᠡ᠁ ᠭᠡᠳ ᠳᠣᠷᠣᠭᠰᠢ ᠬᠠᠷᠠᠨ ᠴᠢᠷᠠᠢ ᠨᠢ ᠠᠢᠬᠤᠪᠲᠤᠷ ᠬᠤᠪᠢᠷᠠᠨ ᠦᠭᠡ ᠪᠡᠨ ᠲᠠᠰᠤᠯᠳᠠᠭᠤᠯᠪᠠ᠃
— ᠰᠣᠨᠣᠰᠬᠤ ᠳ᠋ᠤ᠌ ᠲᠡᠷᠡ ᠥᠪᠡᠷ ᠦ᠋ᠨ ᠪᠣᠳᠣᠭᠰᠠᠨ ᠰᠠᠨᠠᠭᠰᠠᠨ ᠢ᠋ᠶ᠋ᠠᠨ ᠭᠠᠭᠴᠠ ᠲᠠᠨ ᠳ᠋ᠤ᠌ ᠯᠠ ᠬᠡᠯᠡᠳᠡᠭ ᠭᠡᠨᠡ᠃ ᠡᠢᠮᠦ ᠪᠠᠢᠳᠠᠭ ᠪᠣᠯ ᠲᠠ ᠪᠢᠳᠡᠨ ᠳ᠋ᠦ᠍ ᠵᠢᠭᠠᠬᠠᠨ ᠪᠣᠳᠠᠲᠠᠢ ᠬᠡᠯᠡᠭᠡᠳ ᠥᠭᠭᠦᠨᠡ ᠤᠤ?
— ᠠᠢ᠂ ᠶᠠᠭᠤ ᠭᠡᠵᠦ ᠬᠡᠯᠡᠨᠡ ᠳᠡ᠂ ᠦᠨᠡᠨ ᠳᠦ ᠪᠡᠨ ᠪᠢᠳᠡ ᠬᠣᠶᠠᠭᠤᠯᠠ ᠦᠨᠡᠬᠡᠷ ᠰᠠᠢᠨ ᠨᠠᠢᠵᠠ ᠪᠠᠢᠭᠰᠠᠨ᠃ ᠣᠳᠣ ᠪᠣᠳᠣᠬᠤᠯᠠ ᠪᠢ ᠲᠡᠭᠦᠨ ᠳ᠋ᠦ᠍ ᠠᠷᠪᠢᠨ ᠭᠠᠵᠠᠷ ᠪᠤᠷᠤᠭᠤᠳᠠᠭᠰᠠᠨ ᠰᠢᠭ᠋ ᠰᠠᠨᠠᠭᠳᠠᠭᠠᠳ ᠪᠠᠢᠬᠤ ᠶᠤᠮ᠃
— ᠡᠭᠦᠨ ᠢ᠋ ᠶᠠᠭᠠᠬᠢᠵᠤ ᠲᠠᠢᠯᠪᠤᠷᠢᠯᠠᠨᠠ ᠪᠣᠢ?
— ᠪᠢ ᠦᠵᠡᠰᠬᠦᠯᠡᠩ ᠲᠡᠢ ᠰᠠᠢᠨ ᠨᠠᠢᠵᠠ ᠪᠣᠯᠪᠠᠴᠤ ᠲᠡᠭᠦᠨ ᠦ᠌ ᠵᠠᠷᠢᠮ ᠲᠠᠯᠠ ᠶ᠋ᠢ ᠨᠢ ᠭᠦᠢᠴᠡᠳ ᠣᠢᠯᠠᠭᠠᠵᠤ ᠵᠠᠪᠳᠤᠭᠰᠠᠨ ᠦᠭᠡᠢ᠂ ᠵᠠᠷᠢᠮ ᠲᠠᠯᠠ ᠪᠠᠷ ᠳᠡᠮᠵᠢᠵᠦ ᠪᠣᠯᠬᠤ ᠪᠠᠢᠭᠰᠠᠨ ᠴᠤ᠌ ᠣᠰᠣᠯᠳᠠᠭᠰᠠᠨ ᠪᠠᠢᠵᠤ ᠮᠡᠳᠡᠨᠡ᠃
— ᠲᠠ ᠡᠭᠦᠨ ᠢ᠋ᠶ᠋ᠡᠨ ᠪᠢᠳᠡᠨ ᠳ᠋ᠦ᠍ ᠪᠣᠳᠠᠲᠠᠢ ᠰᠢᠭ᠋ ᠶᠠᠷᠢᠪᠠᠯ ᠨᠡᠩ ᠰᠠᠢᠨ ᠪᠠᠢᠨᠠ᠃ ᠢᠩᠭᠢᠪᠡᠯ ᠪᠢᠳᠡᠨ ᠳ᠋ᠦ᠍ ᠶᠡᠬᠡ ᠲᠤᠰᠠ ᠪᠣᠯᠬᠤ ᠶᠤᠮ᠃
— ᠬᠡᠷᠪᠡ ᠲᠤᠰᠠ ᠲᠠᠢ ᠪᠣᠯ ᠪᠢ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠶᠠᠷᠢᠶᠠ᠃ ᠦᠭᠡᠢ ᠪᠣᠯ ᠪᠢ ᠡᠨᠡ ᠬᠠᠭᠠᠰ ᠵᠢᠯ ᠦ᠋ᠨ ᠲᠤᠷᠰᠢ ᠦᠵᠡᠰᠬᠦᠯᠡᠩ ᠦ᠋ᠨ ᠲᠤᠬᠠᠢ ᠪᠤᠰᠤᠳ ᠲᠠᠢ ᠶᠠᠷᠢᠯᠴᠠᠬᠤ ᠠ᠋ᠴᠠ ᠪᠠᠨ ᠬᠠᠯᠠᠰᠢᠷᠠᠬᠤ ᠪᠣᠯᠤᠭᠰᠠᠨ ᠶᠤᠮ᠃ ᠭᠡᠲᠡᠯᠡ ᠦᠭᠡ ᠶ᠋ᠢᠨ ᠤᠷᠢᠲᠠᠢ ᠨᠢ ᠰᠠᠢᠨ ᠭᠡᠭᠴᠢ ᠪᠡᠷ ᠮᠢᠨᠦ ᠬᠡᠯᠡᠭᠰᠡᠨ ᠢ᠋ ᠲᠠᠨᠠᠷ ᠵᠥᠪᠬᠡᠨ ᠬᠢᠨᠠᠯᠲᠠ ᠪᠣᠯᠭᠠᠵᠤ ᠪᠣᠯᠤᠨᠠ᠃ ᠬᠠᠷᠢᠨ ᠭᠡᠷᠡᠴᠢ ᠪᠠᠷᠢᠮᠲᠠ ᠪᠣᠯᠭᠠᠬᠤ ᠭᠡᠪᠡᠯ ᠪᠢ ᠥᠪᠡᠷ ᠢ᠋ᠶ᠋ᠡᠨ ᠴᠤ᠌ ᠬᠣᠵᠢᠮ ᠬᠡᠯᠡᠭᠰᠡᠨ ᠦᠭᠡᠨ ᠳᠦ ᠪᠡᠨ ᠡᠵᠡᠨ ᠰᠠᠭᠤᠬᠤ ᠦᠭᠡᠢ ᠪᠠᠢᠵᠤ ᠴᠤ᠌ ᠮᠡᠳᠡᠨᠡ᠃
— ᠲᠡᠷᠡ ᠬᠠᠮᠢᠶᠠ ᠦᠭᠡᠢ᠂ ᠲᠠ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠶᠠᠷᠢᠭᠠᠷᠠᠢ᠃
— ᠦᠵᠡᠰᠬᠦᠯᠡᠩ ᠭᠡᠭᠴᠢ ᠨᠢᠭᠡᠨ ᠬᠤᠪᠢ ᠮᠠᠭᠤᠲᠠᠢ ᠬᠥᠮᠦᠨ ᠶᠦᠮ᠃ ᠢᠯᠠᠩᠭᠤᠶᠠ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠳ᠋ᠤ᠌ ᠠᠵᠢᠯᠯᠠᠭᠰᠠᠨ ᠬᠣᠷᠢᠭᠠᠳ ᠵᠢᠯ ᠦ᠋ᠨ ᠲᠤᠷᠰᠢ ᠶᠠᠭ ᠯᠠ ᠶᠠᠮᠠᠷ ᠨᠢᠭᠡᠨ ᠬᠠᠷᠠ ᠰᠡᠭᠦᠳᠡᠷ ᠲᠡᠭᠦᠨ ᠢ᠋ ᠳᠠᠭᠠᠭᠠᠳ ᠬᠤᠪᠢ ᠤᠴᠠᠷᠠᠯ ᠲᠠᠢ ᠨᠢ ᠡᠰᠡᠷᠭᠦᠴᠡᠯᠳᠦᠭᠡᠳ ᠪᠠᠢᠬᠤ ᠰᠢᠭ᠋ ᠰᠠᠨᠠᠭᠳᠠᠳᠠᠭ᠃
— ᠴᠣᠬᠣᠮ ᠬᠡᠵᠢᠶᠡ ᠡᠴᠡ ᠶᠠᠮᠠᠷ ᠶᠠᠪᠤᠳᠠᠯ ᠠ᠋ᠴᠠ ᠲᠡᠢᠮᠦ ᠨᠢᠭᠡ ᠪᠠᠢᠳᠠᠯ ᠲᠠᠢ ᠪᠣᠯᠤᠭᠰᠠᠨ ᠪᠣᠢ?
— ᠪᠢ ᠲᠠᠨᠠᠷ ᠲᠤ᠌ ᠪᠣᠳᠣᠭᠰᠠᠨ ᠦᠵᠡᠭᠰᠡᠨ ᠢ᠋ᠶ᠋ᠡᠨ ᠶᠠᠷᠢᠶᠠ᠃ ᠲᠠᠭᠠᠷᠠᠵᠤ ᠴᠤ᠌ ᠮᠡᠳᠡᠨᠡ ᠂ ᠲᠠᠭᠠᠷᠠᠬᠤ ᠦᠭᠡᠢ ᠪᠠᠢᠵᠤ ᠴᠤ᠌ ᠮᠡᠳᠡᠨᠡ᠃ ᠁ᠲᠠᠨᠠᠷ ᠨᠠᠷᠢᠨ ᠪᠣᠳᠣᠯᠬᠢᠯᠠᠵᠤ ᠦᠵᠡ ᠳᠡ᠁᠃ ᠁ ᠨᠠᠮᠠ ᠶᠢ ᠡᠨᠳᠡ ᠢᠷᠡᠭᠰᠡᠨ ᠦ᠌ ᠳᠥᠷᠪᠡᠨ ᠵᠢᠯ ᠳᠡᠭᠡᠷᠡ ᠦᠵᠡᠰᠬᠦᠯᠡᠩ ᠮᠠᠨ ᠤ᠋ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠳ᠋ᠤ᠌ ᠬᠤᠪᠢᠶᠠᠭᠳᠠᠵᠤ ᠢᠷᠡᠭᠰᠡᠨ ᠶᠦᠮ᠃ ᠁ᠲᠡᠷᠡ ᠦᠷᠭᠦᠯᠵᠢ ᠠᠯᠪᠠᠨ ᠭᠡᠷ ᠲᠤ ᠪᠠᠨ ᠰᠠᠭᠤᠭᠠᠳ ᠶᠡᠬᠡ ᠣᠷᠣᠢ ᠪᠣᠯᠲᠠᠯᠠ ᠰᠤᠷᠤᠯᠴᠠᠬᠤ ᠳᠤᠷᠠᠲᠠᠢ᠃ ᠁ᠲᠡᠭᠦᠨ ᠢ᠋ ᠢᠷᠡᠭᠰᠡᠨ ᠦ᠌ ᠳᠠᠷᠠᠭᠠ ᠵᠢᠯ ᠦ᠋ᠨ ᠨᠠᠮᠤᠷ ᠪᠠᠢᠭᠰᠠᠨ ᠰᠢᠭ᠋᠁᠃ ᠁ᠨᠢᠭᠡ ᠰᠥᠨᠢ ᠲᠡᠷᠡ ᠮᠥᠨ ᠤᠤᠯ ᠤ᠋ᠨ ᠵᠤᠷᠰᠢᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠯᠪᠠᠨ ᠭᠡᠷ ᠲᠦ ᠪᠡᠨ ᠰᠠᠭᠤᠵᠤ ᠪᠠᠢᠬᠤ ᠳ᠋ᠤ᠌ ᠪᠢ ᠬᠠᠵᠠᠭᠤ ᠶ᠋ᠢᠨ ᠭᠡᠷ ᠲᠦ᠋ᠨᠢ ᠰᠥᠨᠢ ᠶ᠋ᠢᠨ ᠵᠢᠵᠢᠭᠦᠷ ᠬᠢᠵᠦ ᠪᠠᠢᠭᠰᠠᠨ᠃ ᠁ᠪᠠᠷᠤᠭ ᠯᠠ ᠠᠷᠪᠠᠨ ᠨᠢᠭᠡᠨ ᠴᠠᠭ ᠤ᠋ᠨ ᠦᠶᠡ ᠪᠡᠷ ᠲᠡᠭᠦᠨ ᠦ᠌ ᠠᠯᠪᠠᠨ ᠭᠡᠷ ᠦ᠋ᠨ ᠳ᠋ᠢᠶᠠᠩᠬᠤᠸᠠ ᠶ᠋ᠢᠨ ᠬᠣᠩᠬᠣ ᠨᠢ ᠲᠡᠷᠴᠢᠭᠢᠨᠡᠨ ᠳᠤᠤᠭᠠᠷᠴᠤ ᠳᠡᠮᠡᠢ ᠤᠳᠠᠯ ᠦᠭᠡᠢ ᠪᠡᠷ ᠲᠡᠷᠡ ᠨᠢᠭᠡᠨ ᠬᠥᠮᠦᠨ ᠲᠡᠢ ᠳ᠋ᠢᠶᠠᠩᠬᠤᠸᠠ ᠪᠠᠷ ᠶᠠᠷᠢᠯᠴᠠᠬᠤ ᠨᠢ ᠪᠦᠦᠷ ᠲᠦᠦᠷ ᠰᠣᠨᠣᠰᠳᠠᠪᠠ᠃ ᠁ᠡᠨᠡ ᠨᠢ ᠨᠠᠳᠠ ᠶᠡᠬᠡ ᠰᠣᠨᠢᠨ ᠰᠠᠨᠠᠭᠳᠠᠭᠰᠠᠨ ᠲᠤᠯᠠ ᠡᠭᠦᠳᠡᠨ ᠦ᠌ ᠬᠢᠨᠢ ᠳᠡᠷᠭᠡᠳᠡ ᠬᠦᠷᠬᠦ ᠳ᠋ᠦ᠍ ᠦᠵᠡᠰᠬᠦᠯᠡᠩ ᠮᠢᠨᠦ ᠥᠭᠡᠳᠡ ᠡᠴᠡ ᠭᠠᠷᠴᠤ ᠢᠷᠡᠭᠡᠳ ᠲᠣᠯᠣᠭᠠᠢ ᠪᠠᠨ ᠳᠣᠬᠢᠰᠬᠢᠭᠡᠳ ᠠᠰᠠᠷ ᠳᠡᠭᠡᠷᠡ ᠭᠠᠷᠪᠠ᠃ ᠁ᠪᠠᠷᠤᠭ ᠯᠠ ᠬᠠᠭᠠᠰ ᠴᠠᠭ ᠭᠠᠷᠤᠢ ᠪᠣᠯᠤᠭᠠᠳ ᠲᠡᠷᠡ ᠠᠰᠠᠷ ᠠ᠋ᠴᠠ ᠮᠠᠰᠢ ᠶᠠᠭᠠᠷᠠᠤ ᠪᠠᠭᠤᠵᠤ ᠢᠷᠡᠯᠡ᠃ ᠁ᠪᠢ ᠴᠤ᠌ ᠰᠥᠨᠢ ᠶ᠋ᠢᠨ ᠠᠷᠪᠠᠨ ᠬᠣᠶᠠᠷ ᠴᠠᠭ ᠲᠤ᠌ ᠠᠵᠢᠯ ᠠ᠋ᠴᠠ ᠪᠠᠭᠤᠬᠤ ᠲᠠᠭᠠᠷᠠᠵᠤ ᠡᠮᠦᠨᠡ ᠡᠴᠡ ᠨᠢ ᠲᠣᠰᠴᠤ ᠣᠴᠢᠯᠠ᠃ ᠁ᠲᠡᠭᠦᠨ ᠦ᠌ ᠨᠢᠭᠤᠷ ᠴᠢᠷᠠᠢ ᠨᠢ ᠮᠢᠨᠴᠢᠢᠨ ᠤᠯᠠᠢᠵᠤ ᠠᠭᠤᠷᠯᠠᠵᠤ ᠪᠠᠴᠢᠮᠳᠠᠭᠰᠠᠨ ᠪᠠᠢᠳᠠᠯ ᠲᠠᠢ ᠪᠠᠢᠯᠠ᠃ ᠁ᠪᠢ ᠭᠠᠷ ᠠ᠋ᠴᠠ ᠨᠢ ᠬᠤᠷᠳᠤᠬᠠᠨ ᠠᠳᠬᠤᠵᠤ ᠠᠪᠤᠭᠠᠳ᠂ ᠠᠯᠢ ᠠᠯᠪᠠᠨ ᠭᠡᠷ ᠲᠦ᠍ ᠣᠴᠢᠭᠰᠠᠨ ᠪᠣᠢ? ᠶᠠᠮᠠᠷ ᠬᠥᠮᠦᠨ ᠶᠠᠭᠠᠬᠢᠭᠰᠠᠨ ᠪᠣᠢ? ᠭᠡᠵᠦ ᠬᠡᠳᠦ ᠤᠳᠠᠭᠠ ᠠᠰᠠᠭᠤᠭᠰᠠᠨ ᠴᠤ᠌ ᠲᠡᠷᠡ ᠶᠠᠭᠤ ᠴᠤ᠌ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃ ᠁ᠭᠠᠭᠴᠠ ᠬᠦ᠌ ᠨᠠᠮᠠ ᠶᠢ ᠭᠡᠷ ᠲᠦ ᠪᠡᠨ ᠬᠦᠷᠭᠡᠭᠡᠴᠢ ᠭᠡᠵᠦ ᠭᠤᠶᠤᠪᠠ᠁᠃ ᠁ᠪᠢ ᠲᠡᠭᠦᠨ ᠲᠡᠢ ᠬᠠᠮᠲᠤ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠤ᠋ ᠶᠡᠬᠡ ᠠᠰᠠᠷ ᠠ᠋ᠴᠠ ᠭᠠᠷᠤᠭᠠᠳ ᠡᠷᠭᠢᠵᠦ ᠬᠠᠷᠠᠬᠤᠯᠠ ᠬᠣᠶᠠᠷ ᠭᠤᠷᠪᠠᠳᠤᠭᠠᠷ ᠳᠠᠪᠬᠤᠷᠯᠢᠭ ᠳᠠᠬᠢ ᠬᠣᠷᠢᠶᠠ᠂ ᠰᠠᠯᠠᠭᠠᠨ ᠳᠠᠷᠤᠭᠠ ᠨᠠᠷ ᠤ᠋ᠨ ᠠᠯᠪᠠᠨ ᠭᠡᠷ ᠦ᠋ᠳ ᠬᠡᠳᠦ ᠨᠢ ᠯᠡ ᠳ᠋ᠧᠩ ᠲᠡᠢ ᠪᠠᠢᠯᠠ᠃ ᠁ᠦᠨᠡᠨ ᠳᠦ ᠪᠡᠨ ᠳᠡᠭᠡᠳᠦ ᠳᠠᠪᠬᠤᠷᠯᠢᠭ ᠤ᠋ᠨ ᠠᠯᠪᠠᠨ ᠭᠡᠷ ᠡᠴᠡ ᠳᠣᠣᠷᠠ ᠳᠠᠪᠬᠤᠷᠯᠢᠭ ᠤ᠋ᠨ ᠠᠯᠪᠠᠨ ᠭᠡᠷ ᠲᠦ᠍ ᠰᠢᠭᠤᠳ ᠳ᠋ᠢᠶᠠᠩᠬᠤᠸᠠ ᠪᠠᠷ ᠶᠠᠷᠢᠯᠴᠠᠳᠠᠭ ᠬᠥᠮᠦᠨ ᠦ᠌ ᠣᠯᠠᠩᠬᠢ ᠨᠢ ᠪᠦᠷ ᠶᠡᠬᠡ ᠪᠠᠭᠠ ᠳᠠᠷᠤᠭᠠ ᠨᠠᠷ ᠯᠠ ᠪᠢᠯᠡ᠃ ᠁ ᠪᠢ ᠡᠯᠳᠡᠪ ᠢ᠋ ᠰᠡᠵᠢᠭᠯᠡᠵᠦ ᠶᠠᠪᠤᠭᠰᠠᠨ ᠴᠤ᠌ ᠲᠠᠬᠢᠵᠤ ᠠᠮᠠ ᠨᠡᠭᠡᠭᠡᠵᠦ ᠠᠰᠠᠭᠤᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠁ᠡᠨᠡ ᠦᠶᠡ ᠳ᠋ᠦ᠍ ᠪᠢ ᠶᠠᠭᠠᠬᠢᠵᠤ ᠠᠰᠠᠭᠤᠭᠰᠠᠨ ᠴᠤ᠌ ᠦᠵᠡᠰᠬᠦᠯᠡᠩ ᠯᠠᠪ ᠶᠠᠭᠤᠮᠠ ᠬᠡᠯᠡᠬᠦ ᠦᠭᠡᠢ ᠶᠦᠮ᠃ ᠁ ᠵᠥᠪᠬᠡᠨ ᠲᠡᠭᠦᠨ ᠳ᠋ᠦ᠍ ᠶᠠᠮᠠᠷ ᠨᠢᠭᠡᠨ ᠶᠡᠷᠦ ᠪᠤᠰᠤ ᠶ᠋ᠢᠨ ᠬᠡᠷᠡᠭ ᠲᠣᠬᠢᠶᠠᠯᠳᠤᠭᠰᠠᠨ ᠭᠡᠵᠦ ᠯᠡ ᠪᠣᠳᠣᠵᠤ ᠶᠠᠪᠤᠯᠠ᠃ ᠁ᠪᠢ ᠲᠡᠭᠦᠨ ᠢ᠋ ᠭᠡᠷ ᠲᠦ᠋ᠨᠢ ᠬᠦᠷᠭᠡᠭᠡᠳ ᠪᠤᠴᠠᠬᠤ ᠳ᠋ᠤ᠌᠂ ᠲᠡᠷᠡ ᠮᠢᠨᠦ ᠭᠠᠷ ᠢ᠋ ᠴᠢᠩᠭᠠ ᠠᠳᠬᠤᠭᠠᠳ ᠵᠠᠮ ᠳᠤ ᠪᠠᠨ ᠰᠠᠢᠨ ᠬᠢᠴᠢᠶᠡ ᠭᠡᠪᠡ᠃ ᠁ᠪᠢ ᠲᠣᠯᠣᠭᠠᠢ ᠳᠣᠬᠢᠰᠬᠢᠭᠡᠳ ᠰᠠᠯᠵᠤ ᠶᠠᠪᠤᠯᠠ᠃ ᠁ᠶᠡᠬᠡ ᠵᠡᠭᠡᠯᠢ ᠶ᠋ᠢᠨ ᠦᠵᠦᠭᠦᠷ ᠬᠦᠷᠦᠭᠡᠳ ᠡᠷᠭᠢᠵᠦ ᠬᠠᠷᠠᠬᠤᠯᠠ ᠲᠡᠷᠡ ᠮᠥᠨ ᠡᠭᠦᠳᠡᠨ ᠦ᠌ ᠪᠡᠨ ᠳ᠋ᠧᠩ ᠦ᠋ᠨ ᠭᠡᠷᠡᠯ ᠳ᠋ᠦ᠍ ᠵᠣᠭᠰᠣᠭᠠᠳ ᠮᠢᠨᠦ ᠬᠣᠢᠨᠠ ᠠ᠋ᠴᠠ ᠬᠠᠷᠠᠵᠤ ᠪᠠᠢᠭᠰᠠᠨ᠃ ᠁ᠡᠳᠡᠭᠡᠷ ᠨᠢ ᠨᠠᠳᠠ ᠳᠠᠩᠴᠤ ᠬᠠᠴᠢᠨ ᠰᠣᠨᠢᠨ ᠰᠠᠨᠠᠭᠳᠠᠵᠤ ᠪᠢᠯᠡ᠃ ᠡᠭᠦᠨ ᠡᠴᠡ ᠬᠣᠢᠰᠢ ᠦᠵᠡᠰᠬᠦᠯᠡᠩ ᠠᠯᠪᠠᠨ ᠭᠡᠷ ᠲᠦ ᠪᠡᠨ ᠶᠡᠬᠡ ᠣᠷᠣᠢ ᠪᠣᠯᠲᠠᠯᠠ ᠰᠠᠭᠤᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠮᠥᠷᠲᠡᠭᠡᠨ ᠬᠡᠷᠡᠭ ᠦᠭᠡᠢ ᠪᠣᠯ ᠰᠥᠨᠢ ᠠᠯᠪᠠᠨ ᠭᠡᠷ ᠲᠦ ᠪᠡᠨ ᠢᠷᠡᠬᠦ ᠪᠡᠨ ᠴᠤ᠌ ᠪᠠᠢᠴᠢᠬᠠᠪᠠ ᠭᠡᠳ ᠲᠡᠷᠡ ᠬᠣᠭᠣᠯᠠᠢ ᠪᠠᠨ ᠵᠠᠰᠠᠭᠰᠠᠨ ᠢ᠋ᠶ᠋ᠠᠨ᠄
— ᠬᠠᠭᠠᠰ ᠵᠢᠯ ᠦ᠋ᠨ ᠳᠠᠷᠠᠭᠠ ᠪᠢ ᠦᠵᠡᠰᠬᠦᠯᠡᠩ ᠦ᠋ᠨ ᠭᠡᠷ ᠲᠦ᠍ ᠨᠢᠭᠡ ᠬᠦᠷᠬᠦ ᠳ᠋ᠦ᠍ ᠲᠡᠷᠡ ᠨᠢᠭᠡᠨᠲᠡ ᠵᠢᠷᠮᠦᠰᠦᠨ ᠪᠣᠯᠤᠭᠠᠳ ᠬᠡᠳᠦᠨ ᠰᠠᠷᠠ ᠪᠣᠯᠵᠤ ᠪᠠᠢᠭᠰᠠᠨ ᠪᠢᠯᠡ᠃ ᠲᠡᠭᠡᠭᠡᠳ ᠪᠢ ᠲᠡᠭᠦᠨ ᠢ᠋ ᠱᠣᠭᠯᠠᠨ ᠡᠨᠡ ᠬᠡᠦᠬᠡᠳ ᠪᠠᠷᠤᠭ ᠨᠢᠭᠡ ᠪᠦᠳᠦᠭᠦᠨ ᠨᠣᠶᠠᠨ ᠤ᠋ ᠬᠢ ᠪᠠᠢᠵᠤ ᠮᠡᠳᠡᠨᠡ ᠭᠡᠰᠡᠨ ᠳ᠋ᠦ᠍ ᠲᠡᠷᠡ ᠨᠠᠮᠠ ᠶᠢ ᠬᠦᠴᠦᠲᠡᠢ ᠭᠡᠭᠴᠢ ᠶᠣᠪᠣᠷᠤᠭᠰᠠᠨ ᠢ᠋ᠶ᠋ᠠᠨ ᠡᠮᠡᠭᠲᠡᠢ ᠬᠥᠮᠦᠨ ᠦ᠌ ᠣᠨᠴᠠᠭᠠᠢ ᠰᠡᠷᠡᠯᠲᠡ ᠪᠡᠷ ᠳᠤᠲᠠᠮᠠᠭ ᠠᠮᠢᠲᠠᠨ᠂ ᠴᠢ ᠲᠡᠢᠮᠦ ᠠᠳᠤᠭᠤᠰᠤ ᠪᠠᠷ ᠁ ᠭᠡᠳ ᠨᠡᠯᠢᠶᠡᠳ ᠳᠤᠭᠤᠢ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠳᠠᠬᠢᠭᠠᠳ ᠮᠠᠨ ᠤ᠋ ᠵᠠᠷᠢᠮ ᠳᠠᠷᠤᠭᠠ ᠨᠠᠷ ᠶᠣᠰᠣᠲᠠᠢ ᠤᠬᠤᠨᠠ ᠬᠤᠴᠠ ᠁ ᠭᠡᠳ ᠯᠡ ᠬᠡᠯᠡᠬᠦ ᠭᠡᠰᠡᠨ ᠦᠭᠡ ᠪᠡᠨ ᠬᠡᠯᠡᠨ ᠦ᠌ ᠪᠡᠨ ᠳᠣᠣᠷᠠ ᠳᠠᠷᠤᠴᠢᠬᠠᠪᠠ᠃
— ᠲᠡᠷᠡ ᠦᠷᠭᠦᠯᠵᠢ ᠠᠮᠠᠨ ᠠᠶᠠ ᠪᠠᠷ ᠬᠥᠮᠦᠨ ᠢ᠋ ᠠᠳᠤᠭᠤᠰᠤ ᠭᠡᠵᠦ ᠬᠠᠷᠢᠶᠠᠬᠤ ᠪᠤᠶᠤ ᠡᠰᠡᠬᠦᠯᠡ ᠡᠢᠮᠦ ᠦᠭᠡ ᠪᠡᠷ ᠨᠠᠭᠠᠳᠤᠮ ᠲᠣᠭᠯᠠᠭᠠᠮ ᠬᠢᠬᠦ ᠦᠵᠡᠭᠳᠡᠯ ᠪᠠᠢᠳᠠᠭ ᠤᠤ?
— ᠦᠭᠡᠢ᠂ ᠲᠡᠷᠡ ᠡᠩ ᠦ᠋ᠨ ᠴᠠᠭ ᠲᠤ᠌ ᠬᠥᠮᠦᠨ ᠢ᠋ ᠶᠡᠷᠦ ᠡᠴᠡ ᠪᠣᠯᠬᠢ ᠪᠦᠳᠦᠭᠦᠯᠢᠭ ᠢ᠋ᠶ᠋ᠡᠷ ᠬᠠᠷᠢᠶᠠᠳᠠᠭ ᠦᠭᠡᠢ᠃ ᠲᠡᠭᠦᠨ ᠦ᠌ ᠨᠠᠭᠠᠳᠤᠮ ᠲᠣᠭᠯᠠᠭᠠᠮ ᠤ᠋ᠨ ᠬᠠᠷᠢᠶᠠᠯ ᠢ᠋ ᠰᠣᠨᠣᠰᠳᠠᠭ ᠬᠥᠮᠦᠨ ᠮᠠᠨ ᠤ᠋ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠳ᠋ᠤ᠌ ᠪᠠᠷᠤᠭ ᠭᠠᠭᠴᠠᠬᠠᠨ ᠪᠢ ᠪᠠᠢᠵᠤ ᠮᠡᠳᠡᠨᠡ᠃
— ᠦ᠂ ᠲᠠ ᠵᠠᠯᠭᠠᠭᠠᠳ ᠶᠠᠷᠢᠯ ᠳᠠ᠃
— ᠲᠢᠩᠬᠢᠮ ᠦ᠋ᠨ ᠳᠠᠷᠤᠭᠠ ᠠ᠋ ᠂ ᠪᠢ ᠢᠩᠭᠢᠵᠦ ᠲᠠᠨ ᠳ᠋ᠤ᠌ ᠡᠯᠳᠡᠪ ᠢ᠋ ᠶᠠᠷᠢᠭᠠᠳ ᠶᠠᠮᠠᠷ ᠲᠤᠰᠠ ᠲᠠᠢ ᠶᠤᠮ ᠳᠠ᠃
ᠲᠦᠪᠰᠢᠨ ᠳᠣᠣᠷᠠ ᠨᠢ ᠦᠭᠡ ᠶ᠋ᠢ ᠨᠢ ᠡᠯᠭᠦᠵᠦ ᠠᠪᠤᠭᠠᠳ᠄
— ᠮᠠᠰᠢ ᠲᠤᠰᠠᠲᠠᠢ᠃ ᠲᠠ ᠮᠥᠨ ᠡᠨᠡ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠦᠷᠭᠦᠯᠵᠢᠯᠡᠨ ᠶᠠᠷᠢ ᠳᠠ ᠭᠡᠪᠡ᠃
— ᠲᠡᠭᠦᠨ ᠡᠴᠡ ᠬᠣᠢᠰᠢ ᠦᠵᠡᠰᠬᠦᠯᠡᠩ ᠦ᠋ᠨ ᠬᠤᠪᠢ ᠵᠠᠶᠠᠭᠠ ᠨᠢ ᠬᠠᠵᠠᠢᠭᠰᠠᠨ ᠰᠢᠭ᠋ ᠪᠣᠯᠪᠠ᠃ ᠁ᠢᠯᠠᠩᠭᠤᠶᠠ ᠲᠡᠭᠦᠨ ᠦ᠌ ᠴᠠᠯᠢᠩ ᠬᠥᠯᠥᠰᠥᠨ ᠥᠰᠦᠯᠲᠡ ᠳᠡᠭᠡᠷᠡ ᠶᠠᠮᠠᠷ ᠨᠢᠭᠡᠨ ᠬᠥᠮᠦᠨ ᠵᠣᠷᠢᠭᠤᠳᠠ ᠳᠠᠷᠤᠵᠤ ᠪᠠᠢᠬᠤ ᠰᠢᠭ᠋ ᠰᠠᠨᠠᠭᠳᠠᠭᠠᠳ ᠪᠠᠢᠳᠠᠭ᠃ ᠁ᠰᠣᠶᠣᠯ ᠤ᠋ᠨ ᠬᠤᠪᠢᠰᠬᠠᠯ ᠤ᠋ᠨ ᠡᠮᠦᠨᠡᠬᠢ ᠬᠡᠳᠦ ᠤᠳᠠᠭᠠᠨ ᠤ᠋ ᠴᠠᠯᠢᠩ ᠲᠠᠰ ᠥᠰᠬᠡᠬᠦ ᠳ᠋ᠦ᠍ ᠶᠣᠰᠣᠨ ᠳᠤ ᠪᠠᠨ ᠪᠣᠯ ᠲᠡᠷᠡ ᠬᠠᠮᠤᠭ ᠤ᠋ᠨ ᠡᠮᠦᠨᠡ ᠨᠢ ᠨᠥᠬᠥᠴᠡᠯ ᠦᠭᠡᠢ ᠠᠪᠤᠮᠠᠷ ᠶᠤᠮ᠃ ᠁ ᠭᠡᠲᠡᠯᠡ ᠰᠠᠨᠠᠭᠠᠨ ᠠ᠋ᠴᠠ ᠭᠠᠳᠠᠨᠠ ᠨᠢᠭᠡ ᠶᠠᠪᠤᠳᠠᠯ ᠭᠠᠷᠴᠢᠬᠠᠯᠠ᠃ ᠁ᠤᠤᠯ ᠨᠢ ᠬᠣᠲᠠ ᠶ᠋ᠢᠨ ᠭᠤᠷᠪᠠᠳᠤᠭᠠᠷ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠤ᠋ ᠨᠢᠭᠡ ᠡᠮᠡᠭᠲᠡᠢ ᠤᠷᠤᠭᠯᠠᠭᠠᠳ ᠤᠳᠠᠭᠠᠨ ᠵᠢᠯ ᠬᠡᠦᠬᠡᠳ ᠲᠥᠷᠥᠭᠰᠡᠨ ᠦᠭᠡᠢ ᠭᠡᠨᠡ᠃ ᠁ᠢᠩᠭᠢᠭᠡᠳ ᠲᠡᠷᠡ ᠮᠠᠨ ᠤ᠋ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠳ᠋ᠤ᠌ ᠢᠷᠡᠵᠦ ᠦᠵᠡᠰᠬᠦᠯᠡᠩ ᠢ᠋ᠶ᠋ᠡᠷ ᠪᠠᠢᠴᠠᠭᠠᠯᠭᠠᠭᠰᠠᠨ ᠳ᠋ᠤ᠌᠂ ᠦᠵᠡᠰᠬᠦᠯᠡᠩ ᠲᠡᠭᠦᠨ ᠢ᠋ ᠨᠢᠭᠡᠨᠲᠡ ᠲᠥᠷᠥᠵᠦ ᠥᠩᠭᠡᠷᠡᠭᠰᠡᠨ ᠭᠡᠵᠦ ᠲᠣᠳᠣᠯᠠᠭᠠᠳ᠂ ᠲᠡᠭᠦᠨ ᠦ᠌ ᠣᠳᠣ ᠲᠥᠷᠥᠬᠦ ᠦᠭᠡᠢ ᠪᠠᠢᠭᠠ ᠶ᠋ᠢᠨ ᠰᠢᠯᠲᠠᠭᠠᠨ ᠨᠢ ᠨᠢᠭᠡ ᠪᠣᠯ ᠠᠩᠬᠠ ᠤᠳᠠᠭᠠ ᠬᠥᠩᠭᠡᠵᠢᠬᠦ ᠳ᠋ᠡᠭᠡᠨ ᠬᠦᠴᠢᠷᠳᠡᠭᠡᠳ ᠭᠡᠮ ᠠᠷᠬᠠᠭ ᠦᠯᠡᠳᠡᠭᠰᠡᠨ᠂ ᠡᠰᠡᠪᠡᠯ ᠬᠣᠵᠢᠮ ᠨᠢ ᠬᠡᠪᠡᠯᠢ ᠪᠤᠵᠠᠷᠲᠤᠭᠰᠠᠨ ᠠ᠋ᠴᠠ ᠪᠣᠯᠤᠭᠰᠠᠨ ᠭᠡᠵᠦ ᠲᠣᠳᠣᠷᠬᠠᠢᠯᠠᠨ ᠬᠡᠯᠡᠵᠡᠢ᠃ ᠁ᠡᠨᠡ ᠬᠦ᠌ ᠪᠠᠢᠴᠠᠭᠠᠯᠲᠠ ᠶᠡᠬᠡ ᠶᠠᠷᠰᠢᠭ ᠲᠠᠷᠢᠯᠠ᠁᠃ ᠁ᠲᠡᠷᠡ ᠡᠬᠡᠨᠡᠷ᠂ ᠦᠵᠡᠰᠬᠦᠯᠡᠩ ᠦ᠋ᠨ ᠢᠩᠭᠢᠵᠦ ᠬᠡᠯᠡᠬᠦ ᠶ᠋ᠢ ᠰᠣᠨᠣᠰᠤᠮᠠᠭᠴᠠ ᠠᠭᠤᠷᠯᠠᠨ ᠬᠢᠯᠢᠩᠨᠡᠵᠦ ᠦᠰᠦᠷᠦᠨ ᠪᠣᠰᠤᠭᠠᠳ᠂ ᠴᠢ ᠶᠠᠭᠤᠨ ᠳ᠋ᠤ᠌ ᠢᠩᠭᠢᠵᠦ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠴᠠᠯᠴᠢᠬᠤ ᠪᠣᠢ? ᠪᠢ ᠬᠡᠵᠢᠶᠡ ᠲᠥᠷᠥᠭᠰᠡᠨ ᠪᠣᠢ? ᠶᠠᠭᠠᠬᠢᠬᠤ ᠳᠤ ᠪᠠᠨ ᠢᠩᠭᠢᠵᠦ ᠬᠤᠳᠠᠯ ᠬᠠᠭᠤᠷᠮᠠᠭ ᠱᠠᠯ ᠳᠡᠮᠡᠢ ᠪᠡᠷ ᠡᠪᠡᠳᠴᠢᠨ ᠲᠣᠳᠣᠯᠠᠬᠤ ᠪᠣᠢ? ᠭᠡᠵᠦ ᠠᠭᠰᠤᠷᠤᠨ ᠵᠠᠩᠨᠠᠪᠠᠯ ᠦᠵᠡᠰᠬᠦᠯᠡᠩ ᠳᠣᠣᠷᠠ ᠨᠢ ᠭᠡᠯᠮᠡᠭᠳᠡᠨ ᠰᠣᠴᠢᠵᠤ ᠨᠢᠭᠡ ᠴᠠᠭ ᠶᠠᠭᠤ ᠬᠡᠯᠡᠬᠦ ᠪᠡᠨ ᠴᠤ᠌ ᠣᠯᠵᠤ ᠶᠠᠳᠠᠵᠠᠢ᠃ ᠁ᠦᠵᠡᠰᠬᠦᠯᠡᠩ᠂ ᠲᠡᠷᠡ ᠡᠬᠡᠨᠡᠷ ᠢ᠋ᠶ᠋ᠡᠷ ᠬᠠᠷᠢᠶᠠᠯᠭᠠᠵᠤ ᠵᠠᠩᠨᠠᠭᠤᠯᠤᠭᠠᠳ ᠲᠡᠰᠴᠦ ᠶᠠᠳᠠᠬᠤ ᠳᠤ ᠪᠠᠨ᠂ ᠲᠠᠨ ᠳ᠋ᠤ᠌ ᠬᠡᠦᠬᠡᠳ ᠲᠥᠷᠥᠭᠰᠡᠨ ᠰᠢᠷᠬᠠ ᠰᠣᠷᠪᠢ ᠢᠪ ᠢᠯᠡᠷᠬᠡᠢ ᠪᠠᠢᠬᠤ ᠳ᠋ᠤ᠌ ᠶᠠᠭᠤᠨ ᠳ᠋ᠤ᠌ ᠵᠠᠪᠠᠯ ᠨᠢᠭᠤᠬᠤ ᠪᠣᠢ ᠭᠡᠪᠡ᠃ ᠁ᠲᠡᠷᠡ ᠡᠬᠡᠨᠡᠷ ᠨᠡᠩ ᠠᠭᠤᠷᠯᠠᠨ ᠡᠯᠳᠡᠪ ᠬᠣᠶᠠᠷ ᠢ᠋ᠶ᠋ᠠᠷ ᠬᠠᠷᠢᠶᠠᠵᠤ ᠡᠬᠢᠯᠡᠯᠡ᠁᠃ ᠁ᠴᠢᠮᠠ ᠰᠢᠭ᠋ ᠭᠠᠬᠠᠢ ᠶ᠋ᠢᠨ ᠲᠠᠷᠢᠬᠢ ᠲᠠᠢ ᠶᠠᠭᠤᠮᠠ ᠡᠮᠴᠢ ᠪᠣᠯᠤᠭᠠᠳ ᠶᠠᠭᠤ ᠬᠢᠬᠦ ᠪᠣᠢ? ᠤᠯᠤᠰ ᠤ᠋ᠨ ᠪᠤᠳᠠᠭᠠ ᠶ᠋ᠢ ᠰᠦᠢᠳᠬᠡᠭᠡᠳ᠂ ᠬᠠᠢᠷᠠᠨ ᠶᠠᠭᠤᠮᠠ᠃ ᠁ᠮᠠᠭᠤ ᠪᠤᠳᠠᠭᠠᠨ ᠲᠤᠯᠤᠮ᠃ ᠴᠢ ᠨᠡᠭᠡᠷᠡᠨ ᠬᠥᠮᠦᠨ ᠢ᠋ ᠴᠢᠰᠤ ᠦᠭᠡᠢ ᠪᠡᠷ ᠠᠯᠠᠵᠤ ᠪᠠᠢᠨᠠ᠃ ᠨᠠᠳᠠ ᠮᠠᠭᠤ ᠨᠡᠷᠡ ᠵᠡᠭᠦᠯᠭᠡᠬᠦ ᠳᠦ ᠪᠡᠨ᠃ ᠴᠢ᠁ ᠭᠡᠬᠦ ᠳᠦ ᠪᠡᠨ ᠪᠠᠷᠤᠭ ᠵᠣᠳᠣᠭᠠᠳ ᠠᠪᠤᠮᠠᠷ ᠪᠣᠯᠵᠤ ᠪᠠᠢᠪᠠ᠃ ᠁ ᠶᠠᠭ ᠡᠨᠡ ᠦᠶᠡ ᠳ᠋ᠦ᠍ ᠳᠡᠷᠭᠡᠳᠡ ᠨᠢ ᠪᠠᠢᠭᠰᠠᠨ ᠡᠷᠡ ᠨᠢ᠂ ᠡᠮᠴᠢ ᠠ᠋᠂ ᠲᠠ ᠪᠠᠷᠤᠭ ᠪᠤᠷᠤᠭᠤ ᠲᠣᠳᠣᠯᠠᠭᠰᠠᠨ ᠪᠠᠢᠬᠠ᠃ ᠪᠢᠳᠡᠨ ᠦ᠌ ᠤᠷᠤᠭᠯᠠᠬᠤ ᠦᠶᠡ ᠶ᠋ᠢᠨ ᠪᠣᠳᠠᠲᠠᠢ ᠪᠠᠢᠳᠠᠯ ᠠ᠋ᠴᠠ ᠬᠡᠯᠡᠪᠡᠯ ᠴᠢᠨᠦ ᠲᠣᠳᠣᠯᠠᠯᠲᠠ ᠪᠤᠷᠤᠭᠤ ᠪᠠᠢᠨᠠ ᠭᠡᠪᠡ᠃ ᠦᠵᠡᠰᠬᠦᠯᠡᠩ ᠡᠳᠡᠨ ᠲᠡᠢ ᠢᠩᠭᠢᠵᠦ ᠭᠡᠷᠡᠯᠲᠦᠨ ᠴᠤᠤᠭᠢᠬᠤ ᠨᠢ ᠢᠯᠡᠭᠦᠦ ᠬᠡᠷᠡᠭ ᠪᠠᠢᠨᠠ ᠭᠡᠵᠦ ᠪᠣᠳᠣᠬᠤ ᠳᠤ ᠪᠠᠨ ᠲᠣᠳᠣᠯᠠᠯᠲᠠ ᠶ᠋ᠢᠨ ᠭᠡᠷᠡᠴᠢ ᠳᠡᠭᠡᠷᠡ ᠪᠡᠨ 《ᠲᠥᠷᠥᠬᠦ ᠰᠢᠰᠲ᠋ᠧᠮ ᠨᠢ ᠡᠪᠳᠡᠷᠡᠭᠡᠳ ᠴᠢᠳᠠᠪᠤᠷᠢ ᠪᠠᠨ ᠠᠯᠳᠠᠵᠠᠢ》 ᠭᠡᠵᠦ ᠬᠠᠯᠠᠨ ᠪᠢᠴᠢᠯᠡ᠃ ᠁ᠡᠨᠡ ᠬᠣᠶᠠᠭᠤᠯᠠ ᠶ᠋ᠢ ᠶᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠ ᠦᠵᠡᠰᠬᠦᠯᠡᠩ ᠨᠠᠳᠠ᠂ ᠡᠨᠡ ᠡᠬᠡᠨᠡᠷ ᠨᠢᠭᠡᠨᠲᠡ ᠲᠥᠷᠥᠵᠦ ᠥᠩᠭᠡᠷᠡᠭᠰᠡᠨ ᠪᠠᠢᠭᠠᠳ ᠶᠠᠭᠤᠨ ᠳ᠋ᠤ᠌ ᠢᠩᠭᠢᠵᠦ ᠨᠢᠭᠤᠬᠤ ᠪᠣᠢ? ᠡᠷᠡ ᠨᠢ ᠪᠠᠰᠠ ᠨᠡᠢᠯᠡᠵᠦ ᠨᠢᠭᠤᠬᠤ ᠠ᠋ᠴᠠ ᠦᠵᠡᠬᠦ ᠳ᠋ᠦ᠍ ᠡᠳᠡ ᠬᠣᠶᠠᠭᠤᠯᠠ ᠤᠷᠤᠭᠯᠠᠬᠤ ᠠ᠋ᠴᠠ ᠡᠮᠦᠨᠡ ᠳᠡᠷᠡ ᠨᠡᠢᠯᠡᠭᠦᠯᠵᠦ ᠵᠢᠷᠮᠦᠰᠦᠨ ᠪᠣᠯᠤᠭᠰᠠᠨ ᠪᠠᠢᠬᠠ ᠭᠡᠵᠦ ᠳᠤᠷᠠᠮᠵᠢᠬᠠᠨ ᠬᠡᠯᠡᠵᠦ ᠪᠢᠯᠡ᠃ ᠁ᠲᠡᠷᠡ ᠪᠠᠰᠠ ᠪᠠᠬᠠᠨ ᠪᠣᠳᠣᠯᠬᠢᠯᠠᠭᠠᠳ᠂ ᠪᠢ ᠡᠨᠡ ᠡᠬᠡᠨᠡᠷ ᠢ᠋ ᠬᠠᠮᠢᠭᠠ ᠨᠢᠭᠡ ᠦᠵᠡᠭᠰᠡᠨ ᠰᠢᠭ ᠪᠠᠢᠨᠠ᠃ ᠁ᠨᠢᠭᠤᠷ ᠴᠢᠷᠠᠢ ᠨᠢ ᠶᠡᠬᠡ ᠳᠠᠰᠤᠯ ᠭᠡᠵᠦ ᠠᠮᠠᠨ ᠠᠶᠠ ᠪᠠᠷ ᠬᠡᠯᠡᠭᠡᠳ ᠭᠡᠨᠡᠳᠲᠡ ᠪᠣᠳᠣᠵᠤ ᠣᠯᠤᠭᠰᠠᠨ ᠪᠣᠯᠤᠯᠲᠠᠢ ᠳᠠᠭᠤ ᠨᠢ ᠥᠨᠳᠥᠷᠵᠢᠨ᠂ ᠦ᠂ ᠲᠡᠢᠮᠦ᠂ ᠡᠨᠡ ᠡᠬᠡᠨᠡᠷ ᠲᠡᠷᠡ ᠵᠢᠯ ᠨᠠᠳᠠ ᠲᠠᠢ ᠬᠠᠮᠲᠤ ᠁ ᠴᠢᠭᠢᠶᠡᠲᠦᠷᠦᠦ᠁ ᠰᠠᠢᠨ ᠰᠠᠨᠠᠭᠠ ᠶ᠋ᠢ ᠨᠢ ᠨᠣᠬᠠᠢ ᠳᠣᠯᠢᠶᠠᠭᠰᠠᠨ ᠵᠣᠯᠢᠭ᠃ ᠁ᠶᠠᠭ ᠯᠠ ᠲᠡᠷᠡ ᠮᠥᠨ ᠰᠢᠭ ᠪᠠᠢᠨᠠ ᠪᠢᠯᠡ᠃ ᠁ᠳᠠᠬᠢᠭᠠᠳ ᠵᠣᠯᠭᠠᠪᠠᠯ ᠴᠢᠮᠠ ᠶᠢ ᠁ ᠭᠡᠵᠦ ᠪᠠᠢᠯᠠ᠃ ᠁ᠡᠨᠡ ᠶᠠᠪᠤᠳᠠᠯ ᠶᠠᠪᠤᠭᠰᠠᠭᠠᠷ ᠪᠠᠢᠭᠠᠳ ᠬᠣᠷᠢᠶᠠᠨ ᠳᠠᠷᠤᠭᠠ ᠨᠠᠷ ᠤ᠋ᠨ ᠴᠢᠬᠢᠨ ᠳ᠋ᠦ᠍ ᠣᠷᠣᠭᠰᠠᠨ ᠳ᠋ᠤ᠌ ᠨᠢᠦ ᠬᠣᠷᠢᠶᠠᠨ ᠳᠠᠷᠤᠭᠠ ᠵᠠᠷᠢᠮ ᠬᠥᠮᠦᠨ ᠳ᠋ᠦ᠍᠂ ᠦᠵᠡᠰᠬᠦᠯᠡᠩ ᠨᠡᠭᠡᠷᠡᠨ ᠬᠣᠭᠣᠰᠣᠨ ᠫᠡᠢᠰᠡ ᠵᠡᠭᠦᠭᠰᠡᠨ ᠬᠥᠮᠦᠨ ᠶᠦᠮ ᠪᠠᠢᠨᠠ᠃ ᠨᠠᠭᠠᠳᠤ ᠵᠠᠬᠠ ᠳᠤ ᠪᠠᠨ ᠡᠢᠮᠦ ᠵᠢᠭᠠᠬᠠᠨ ᠡᠪᠡᠳᠴᠢᠨ ᠢ᠋ ᠴᠤ᠌ ᠵᠥᠪ ᠲᠣᠳᠣᠯᠠᠵᠤ ᠴᠢᠳᠠᠬᠤ ᠦᠭᠡᠢ ᠨᠢ᠃ ᠁ᠲᠡᠷᠡ ᠡᠬᠡᠨᠡᠷ ᠦ᠋ᠨ ᠨᠥᠬᠥᠷ ᠨᠢ ᠭᠡᠭᠴᠢ ᠰᠣᠨᠢᠨ ᠬᠥᠮᠦᠨ ᠪᠠᠢᠵᠤ ᠳᠠ᠂ ᠤᠷᠤᠭᠯᠠᠬᠤ ᠶ᠋ᠢᠨ ᠦᠶᠡ ᠶ᠋ᠢᠨ ᠪᠣᠳᠠᠲᠤ ᠪᠠᠢᠳᠠᠯ ᠢ᠋ᠶ᠋ᠠᠨ ᠬᠠᠮᠢᠶᠠ ᠦᠭᠡᠢ ᠬᠡᠯᠡᠴᠢᠬᠡᠭᠡᠳ ᠡᠬᠡᠨᠡᠷ ᠢ᠋ᠶ᠋ᠡᠨ ᠳᠠᠭᠠᠭᠤᠯᠤᠭᠠᠳ ᠶᠠᠪᠤᠴᠢᠬᠠᠵᠠᠢ᠃ ᠁ᠦᠭᠡᠢ ᠪᠣᠯ ᠡᠨᠡ ᠬᠡᠷᠡᠭ ᠶᠡᠬᠡᠳᠡᠪᠡᠯ ᠬᠥᠮᠦᠨ ᠦ᠌ ᠭᠡᠷ ᠪᠦᠯᠢ ᠶ᠋ᠢ ᠬᠠᠭᠠᠴᠠᠭᠤᠯᠬᠤ ᠪᠢᠰᠢ ᠶᠦᠮ ᠤᠤ? ᠭᠡᠵᠦ ᠰᠢᠭᠦᠮᠵᠢᠯᠡᠵᠦ ᠳᠣᠭᠣᠭᠢᠯᠠᠬᠤ ᠠᠶᠠᠰ ᠲᠠᠢ ᠬᠡᠯᠡᠵᠡᠢ᠃ ᠁ᠤᠳᠠᠭᠰᠠᠨ ᠦᠭᠡᠢ ᠨᠠᠮ ᠤ᠋ᠨ ᠬᠣᠷᠢᠶᠠ ᠠ᠋ᠴᠠ ᠴᠠᠯᠢᠩ ᠥᠰᠬᠡᠬᠦ ᠬᠥᠮᠦᠰ ᠦ᠋ᠨ ᠨᠡᠷᠡ ᠶ᠋ᠢ ᠲᠣᠭᠲᠠᠭᠠᠬᠤ ᠳ᠋ᠤ᠌ ᠦᠵᠡᠰᠬᠦᠯᠡᠩ ᠢ᠋ ᠭᠠᠷᠭᠠᠵᠤ ᠬᠠᠶᠠᠵᠠᠢ᠃ ᠁ᠬᠥᠮᠦᠰ ᠦ᠋ᠨ ᠳᠠᠮ ᠬᠡᠯᠡᠯᠴᠡᠬᠦ ᠪᠡᠷ ᠦᠵᠡᠰᠬᠦᠯᠡᠩ ᠦ᠋ᠨ ᠴᠠᠯᠢᠩ ᠥᠰᠴᠦ ᠳᠡᠢᠯᠦᠭᠰᠡᠨ ᠦᠭᠡᠢ ᠨᠢ ᠬᠥᠮᠦᠨ ᠦ᠌ ᠡᠪᠡᠳᠴᠢᠨ ᠳ᠋ᠦ᠍ ᠪᠤᠷᠤᠭᠤ ᠲᠣᠳᠣᠯᠠᠯᠲᠠ ᠬᠢᠭᠰᠡᠨ ᠡᠴᠡ ᠪᠣᠯᠤᠯᠠ ᠭᠡᠨᠡ᠃ ᠁ᠢᠩᠭᠢᠵᠦ ᠬᠢᠭᠰᠡᠨ ᠨᠢ ᠨᠠᠳᠠ ᠳᠠᠩᠴᠤ ᠭᠣᠣᠯᠴᠢ ᠪᠤᠰᠤ ᠰᠠᠨᠠᠭᠳᠠᠭᠰᠠᠨ ᠲᠤᠯᠠ ᠲᠡᠭᠦᠨ ᠢ᠋ ᠣᠯᠠᠨ ᠤᠳᠠᠭᠠ ᠵᠣᠷᠢᠭᠵᠢᠭᠤᠯᠵᠤ᠂ ᠳᠡᠭᠡᠳᠦ ᠱᠠᠲᠤᠨ ᠳ᠋ᠤ᠌ ᠪᠠᠢᠳᠠᠯ ᠢ᠋ᠶ᠋ᠠᠨ ᠬᠡᠯᠡ ᠭᠡᠯᠡ᠃ ᠁ ᠪᠢ ᠪᠠᠰᠠ ᠲᠡᠭᠦᠨ ᠳ᠋ᠦ᠍ ᠴᠢ ᠲᠡᠷᠡ ᠡᠮᠡᠭᠲᠡᠢ ᠶ᠋ᠢ ᠲᠠᠨᠢᠭᠰᠠᠨ ᠪᠣᠯ ᠲᠠᠬᠢᠵᠤ ᠳᠠᠭᠤᠳᠠᠵᠤ ᠠᠪᠴᠢᠷᠠᠭᠠᠳ ᠣᠯᠠᠨ ᠮᠡᠷᠭᠡᠵᠢᠯᠲᠡᠨ ᠨᠠᠷ ᠢ᠋ᠶ᠋ᠠᠷ ᠳᠠᠬᠢᠨ ᠪᠠᠢᠴᠠᠭᠠᠯᠭᠠᠭᠠᠳ ᠥᠪᠡᠷ ᠦ᠋ᠨ ᠨᠡᠷᠡ ᠠᠯᠳᠠᠷ ᠢ᠋ᠶ᠋ᠠᠨ ᠰᠡᠷᠭᠦᠭᠡᠵᠦ ᠠᠪ ᠭᠡᠵᠦ ᠢᠳᠬᠠᠯᠠ᠃ ᠁ᠲᠡᠭᠦᠨ ᠳ᠋ᠦ᠍ ᠶᠠᠭᠤ ᠭᠡᠵᠦ ᠬᠡᠯᠡᠭᠰᠡᠨ ᠴᠤ᠌ ᠲᠡᠷᠡ ᠲᠣᠯᠣᠭᠠᠢ ᠰᠡᠭᠰᠦᠷᠦᠭᠡᠳ ᠶᠡᠷᠦ ᠳᠤᠤᠭᠠᠷᠬᠤ ᠦᠭᠡᠢ ᠪᠠᠢᠯᠠ᠃ ᠁ᠵᠢᠯ ᠭᠠᠷᠤᠢ ᠶ᠋ᠢᠨ ᠳᠠᠷᠠᠭᠠ ᠳᠠᠬᠢᠭᠠᠳ ᠨᠢᠭᠡ ᠴᠠᠯᠢᠩ ᠥᠰᠬᠦ ᠳᠡᠭᠡᠷᠡ ᠪᠠᠰᠠ ᠬᠠᠰᠤᠭᠳᠠᠭᠰᠠᠨ ᠳ᠋ᠤ᠌᠂ ᠪᠢ ᠨᠠᠢᠵᠠ ᠶ᠋ᠢᠨ ᠢ᠋ᠶ᠋ᠡᠨ ᠲᠥᠯᠥᠭᠡ ᠳᠤᠭᠤᠢ ᠰᠠᠭᠤᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠤᠭᠠᠳ ᠬᠣᠲᠠ ᠶ᠋ᠢᠨ ᠡᠷᠡᠭᠦᠯ ᠬᠠᠮᠠᠭᠠᠯᠠᠯ ᠤ᠋ᠨ ᠲᠣᠪᠴᠢᠶᠠ ᠪᠣᠯᠤᠨ ᠬᠣᠷᠢᠶᠠᠨ ᠤ᠋ ᠠᠵᠢᠯᠲᠠᠨ ᠤ᠋ ᠰᠠᠯᠠᠭᠠᠨ ᠳ᠋ᠤ᠌ ᠬᠦᠷᠴᠦ ᠡᠨᠡ ᠪᠠᠢᠳᠠᠯ ᠢ᠋ ᠲᠤᠰᠬᠠᠵᠠᠢ᠃ ᠁ᠰᠡᠭᠦᠯᠡᠷ ᠨᠢ ᠦᠵᠡᠰᠬᠦᠯᠡᠩ ᠲᠤᠰᠬᠠᠢᠯᠠᠨ ᠮᠠᠨ ᠤ᠋ ᠳ᠋ᠤ᠌ ᠢᠷᠡᠭᠡᠳ ᠴᠢᠷᠠᠢ ᠨᠢ ᠨᠢᠭᠡ ᠯᠡ ᠣᠨᠳᠣᠣ ᠪᠣᠯᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠂ ᠮᠢᠨᠦ ᠴᠠᠯᠢᠩ ᠥᠰᠳᠡᠭ ᠦᠭᠡᠢ ᠶ᠋ᠢᠨ ᠰᠢᠯᠲᠠᠭᠠᠨ ᠢ᠋ ᠪᠤᠰᠤᠳ ᠬᠥᠮᠦᠨ ᠮᠡᠳᠡᠬᠦ ᠦᠭᠡᠢ ᠪᠠᠢᠵᠤ ᠮᠡᠳᠡᠨᠡ᠃ ᠁ᠭᠡᠲᠡᠯᠡ ᠴᠢ ᠪᠣᠯ ᠪᠠᠷᠤᠭᠯᠠᠬᠤ ᠯᠠ ᠶᠣᠰᠣᠲᠠᠢ ᠶᠤᠮ᠃ ᠠᠢ ᠴᠢ ᠳᠡ᠂ ᠪᠢ ᠴᠢᠮᠠ ᠳ᠋ᠤ᠌ ᠶᠠᠭᠤ ᠭᠡᠵᠦ ᠲᠣᠳᠣᠷᠬᠠᠢᠯᠠᠵᠤ ᠪᠢᠯᠡ ᠳᠠ᠃ ᠁ᠳᠡᠭᠡᠳᠦ ᠱᠠᠲᠤᠨ ᠳ᠋ᠤ᠌ ᠵᠠᠭᠠᠯᠳᠤᠬᠤ ᠪᠠᠢᠲᠤᠭᠠᠢ ᠲᠡᠭᠷᠢ ᠶ᠋ᠢᠨ ᠣᠷᠳᠣᠨ ᠳ᠋ᠤ᠌ ᠬᠦᠷᠦᠭᠰᠡᠨ ᠴᠤ᠌ ᠲᠤᠰᠠ ᠦᠭᠡᠢ ᠰᠢᠦ ᠭᠡᠳ ᠯᠡ ᠳᠤᠭᠤᠢ ᠪᠣᠯᠤᠭᠰᠠᠨ᠃ ᠁ᠮᠢᠨᠦ ᠵᠠᠭᠠᠯᠳᠤᠯᠭᠠ ᠬᠣᠵᠢᠮ ᠨᠢ ᠲᠡᠭᠦᠨ ᠳ᠋ᠦ᠍ ᠮᠠᠰᠢ ᠠᠷᠪᠢᠨ ᠶᠠᠷᠰᠢᠭ ᠲᠦᠪᠡᠭ ᠢ᠋ ᠤᠴᠠᠷᠠᠭᠤᠯᠵᠠᠢ᠃ ᠁ᠪᠢ ᠬᠠᠷᠠᠮᠰᠠᠵᠤ ᠭᠡᠮᠰᠢᠬᠦ ᠳᠦ ᠪᠡᠨ ᠲᠡᠭᠦᠨ ᠳ᠋ᠦ᠍ ᠪᠤᠷᠤᠭᠤ ᠮᠡᠳᠡᠬᠦ ᠪᠡᠷ ᠣᠴᠢᠬᠤ ᠳ᠋ᠤ᠌ ᠲᠡᠷᠡ ᠬᠠᠷᠢᠨ ᠨᠠᠮᠠ ᠶᠢ ᠵᠢᠭᠠᠬᠠᠨ ᠴᠤ᠌ ᠵᠢᠮᠡᠯᠡᠵᠦ ᠪᠤᠷᠤᠭᠤᠳᠬᠠᠭᠰᠠᠨ ᠦᠭᠡᠢ ᠪᠢᠯᠡ ᠁
ᠦᠳᠡ ᠶ᠋ᠢᠨ ᠠᠮᠠᠷᠠᠯᠲᠠ ᠶ᠋ᠢᠨ ᠬᠣᠶᠠᠷᠬᠠᠨ ᠴᠠᠭ ᠳᠠᠭᠤᠰᠴᠤ ᠲᠡᠳᠡᠨ ᠦ᠌ ᠶᠠᠷᠢᠯᠴᠠᠭᠠ ᠵᠠᠪᠰᠠᠷᠯᠠᠬᠤ ᠪᠣᠯᠤᠯᠠ᠃
ᠶᠠᠷᠢᠶᠠᠨ ᠦᠭᠡᠢ ᠲᠦᠪᠰᠢᠨ ᠪᠠᠰᠠ ᠣᠯᠠᠨ ᠶᠠᠭᠤᠮᠠ ᠠᠰᠠᠭᠤᠵᠤ ᠣᠢᠯᠠᠭᠠᠬᠤ ᠰᠠᠨᠠᠭᠠᠲᠠᠢ ᠪᠠᠢᠬᠤ ᠨᠢ ᠰᠢᠷᠠ ᠨᠢᠳᠦᠨ ᠡᠴᠡ ᠨᠢ ᠰᠠᠴᠤᠷᠠᠭᠰᠠᠨ ᠬᠦᠰᠡᠯ ᠦ᠋ᠨ ᠭᠡᠷᠡᠯ ᠡᠴᠡ ᠦᠵᠡᠵᠦ ᠭᠠᠷᠴᠤ ᠪᠣᠯᠤᠨᠠ᠃ ᠲᠡᠭᠡᠭᠡᠳ ᠲᠡᠷᠡ ᠰᠡᠭᠦᠯᠡᠷ ᠨᠢᠭᠡ ᠴᠢᠯᠥᠭᠡ ᠴᠠᠭ ᠣᠯᠵᠤ ᠸᠠᠩ ᠯᠠᠨ ᠬᠤᠸᠠ ᠲᠠᠢ ᠲᠠᠬᠢᠵᠤ ᠶᠠᠷᠢᠯᠴᠠᠬᠤ ᠪᠠᠷ ᠪᠣᠯᠵᠣᠭᠠ ᠲᠣᠭᠲᠠᠭᠠᠳ ᠭᠠᠷᠴᠤ ᠶᠠᠪᠤᠵᠠᠢ᠃
ᠤᠩᠰᠢᠭᠰᠠᠨ ᠨᠢ᠄ ᠴᠡᠴᠡᠭᠮᠠ