ᠬᠢᠯᠭᠠᠰᠤᠨ ᠳᠥᠷᠥᠭᠡᠨ ᠳᠡᠭᠡᠷᠡ – ᠬᠠᠰᠪᠤᠯᠠᠭ ᠵᠣᠬᠢᠶᠠᠪᠠ᠂ <ᠨᠠᠢ᠍ᠮᠠ> Хялгасан дөрөөн дээр – Хасвулаг зохиов <8>
168ᠬᠢᠯᠭᠠᠰᠤᠨ ᠳᠥᠷᠥᠭᠡᠨ ᠳᠡᠭᠡᠷᠡ - <ᠨᠠᠢ᠍ᠮᠠ>
ᠭᠠᠵᠠᠷ ᠤ᠋ᠨ ᠵᠢᠭᠤᠷᠠᠭᠠᠨ ᠳ᠋ᠤ᠌ ᠤᠷᠪᠠᠯᠭᠠ ᠡᠭᠦᠰᠴᠦ᠂ ᠡᠮᠡ ᠶ᠋ᠢᠨ ᠶᠠᠪᠤᠳᠠᠯ ᠳ᠋ᠤ᠌ ᠠᠮᠢᠨ ᠬᠡᠷᠡᠭ ᠭᠠᠷᠳᠠᠭ ᠦᠯᠢᠭᠡᠷ ᠳᠣᠮᠣᠭ ᠠᠯᠢ ᠡᠷᠲᠡᠨ ᠡᠴᠡ ᠪᠠᠢᠳᠠᠭ᠃
ᠤᠷᠤᠭ ᠤ᠋ᠨ ᠶᠠᠪᠤᠳᠠᠯ ᠰᠠᠢᠨ ᠳᠤᠷᠠ ᠠ᠋ᠴᠠ ᠪᠠᠨ ᠪᠣᠯᠤᠭᠰᠠᠨ ᠥᠨᠥᠳᠥᠷ ᠦ᠋ᠨ ᠬᠤᠪᠢ ᠳ᠋ᠤ᠌ ᠴᠦ᠍ ᠡᠨᠡ ᠦᠭᠡ ᠦᠨᠡᠮᠰᠢᠭᠦᠯᠬᠦ ᠬᠦᠴᠦ ᠪᠡᠨ ᠠᠯᠳᠠᠭᠠᠳᠤᠢ ᠪᠠᠢᠨᠠ᠃ ᠬᠠᠤᠯᠢ ᠶ᠋ᠢᠨ ᠪᠠᠢᠴᠠᠭᠠᠯᠲᠠ ᠳᠤᠮᠳᠠ ᠡᠮᠡᠰ ᠥᠬᠢᠳ ᠤᠷᠤᠭ ᠲᠥᠷᠥᠯ ᠦ᠋ᠨ ᠤᠷᠰᠢᠭ ᠢ᠋ᠶ᠋ᠠᠷ ᠡᠭᠦᠰᠦᠭᠰᠡᠨ ᠠᠮᠢᠨ ᠬᠡᠷᠡᠭ ᠠᠶᠤᠮᠠᠷ ᠥᠨᠳᠥᠷ ᠨᠣᠷᠮᠠ ᠲᠠᠢ ᠪᠠᠢᠳᠠᠭ ᠢ᠋ᠶ᠋ᠠᠷ ᠰᠢᠭᠦᠭᠴᠢ ᠨᠠᠷ ᠤ᠋ᠨ ᠰᠡᠳᠬᠢᠴᠡ ᠶ᠋ᠢᠨ ᠭᠦᠨ ᠳ᠋ᠦ᠍ ᠡᠢᠮᠦ ᠲᠠᠯᠠ ᠳ᠋ᠤ᠌ ᠬᠣᠯᠪᠣᠭᠳᠠᠭᠤᠯᠬᠤ ᠰᠡᠵᠢᠭᠯᠡᠯ ᠮᠠᠰᠢ ᠠᠷᠪᠢᠨ ᠪᠠᠢᠳᠠᠭ᠃
ᠪᠣᠯᠤᠷᠴᠠᠭᠠᠨ ᠤ᠋ ᠡᠬᠡᠨᠡᠷ ᠢ᠋ᠶ᠋ᠡᠨ ᠠᠯᠠᠭᠰᠠᠨ ᠬᠡᠷᠡᠭ ᠦ᠋ᠨ ᠡᠪᠬᠡᠮᠡᠯ᠂ ᠲᠦᠪᠰᠢᠨ ᠦ᠌ ᠰᠢᠷᠡᠭᠡᠨ ᠳᠡᠭᠡᠷᠡ ᠠᠩᠬᠠ ᠲᠠᠯᠪᠢᠭᠳᠠᠬᠤ ᠦᠶᠡ ᠳ᠋ᠦ᠍᠂ ᠡᠨᠡ ᠳᠠᠮᠰᠢᠭ ᠥᠭᠡᠷᠡ ᠨᠢᠭᠡ ᠡᠮᠡ ᠲᠡᠢ ᠬᠠᠷᠢᠴᠠᠭᠠ ᠲᠠᠢ ᠪᠠᠢᠭᠰᠠᠨ ᠠ᠋ᠴᠠ ᠪᠣᠯᠪᠠ ᠤᠤ ᠭᠡᠵᠦ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠪᠣᠳᠣᠵᠤ ᠠᠮᠵᠢᠵᠠᠢ᠃
ᠲᠦᠪᠰᠢᠨ ᠦ᠌ ᠡᠨᠡ ᠪᠣᠳᠣᠯ᠂ ᠬᠣᠵᠢᠮ ᠨᠢ ᠴᠦ᠍ ᠥᠷᠭᠡᠵᠢᠨ ᠨᠡᠮᠡᠭᠳᠡᠭᠰᠡᠭᠡᠷ ᠪᠠᠢᠪᠠ᠃
ᠦᠵᠡᠰᠬᠦᠯᠡᠩ ᠦ᠋ᠨ ᠬᠣᠣᠷᠳᠠᠭᠳᠠᠭᠰᠠᠨ ᠠᠯᠢ ᠣᠯᠠᠨ ᠦᠵᠡᠭᠳᠡᠯ᠂ ᠣᠷᠴᠢᠨ ᠠᠬᠤᠢ ᠠ᠋ᠴᠠ ᠪᠣᠯᠤᠷᠴᠠᠭᠠᠨ ᠰᠠᠨᠠᠭᠠᠴᠢᠯᠠᠭᠠ ᠲᠠᠢ᠂ ᠲᠥᠯᠥᠪᠯᠡᠭᠡ ᠲᠡᠢ ᠠᠷᠭᠠ ᠬᠡᠯᠪᠡᠷᠢ ᠪᠡᠷ ᠬᠥᠮᠦᠨ ᠠᠯᠠᠭᠰᠠᠨ ᠢ᠋ ᠪᠠᠲᠤᠯᠠᠵᠤ ᠪᠣᠯᠬᠤ ᠶᠤᠮ᠃ ᠪᠣᠯᠤᠷᠴᠠᠭᠠᠨ ᠵᠥᠪᠬᠡᠨ ᠦᠷᠡ ᠦᠨᠳᠦᠰᠦ ᠲᠠᠰᠤᠷᠠᠬᠤ ᠶᠠᠪᠤᠳᠠᠯ ᠭᠠᠷᠤᠭᠰᠠᠨ ᠠ᠋ᠴᠠ ᠢᠩᠭᠢᠵᠦ ᠬᠢᠯᠡ ᠭᠡᠬᠦ ᠨᠢ ᠬᠥᠮᠦᠨ ᠢ᠋ ᠢᠲᠡᠭᠡᠭᠦᠯᠬᠦ ᠬᠦᠴᠦᠨ ᠢ᠋ᠶ᠋ᠡᠷ ᠠᠨᠠᠢᠬᠠᠨ ᠰᠢᠭ᠋᠃ ᠬᠡᠷᠪᠡ ᠭᠠᠭᠴᠠᠬᠠᠨ ᠡᠨᠡ ᠬᠦ᠌ ᠠᠰᠢᠭ ᠬᠣᠣᠷ ᠤ᠋ᠨ ᠤᠴᠢᠷ ᠠ᠋ᠴᠠ ᠪᠣᠯᠤᠭᠰᠠᠨ ᠪᠣᠯ ᠤᠷᠤᠭ ᠰᠠᠯᠬᠤ ᠪᠠᠷ ᠰᠢᠭᠤᠳᠤᠭᠰᠠᠨ ᠴᠦ᠍ ᠦᠵᠡᠰᠬᠦᠯᠡᠩ ᠲᠡᠢᠮᠦ ᠤᠬᠠᠭᠠ ᠦᠭᠡᠢ ᠦᠬᠦᠨ ᠵᠢᠭᠤᠷᠠᠯᠳᠤᠮᠠᠷ ᠡᠮᠡᠭᠲᠡᠢ ᠪᠢᠰᠢ ᠶᠦᠮ ᠴᠢᠨᠢ ᠵᠠᠪᠠᠯ ᠬᠡᠷᠴᠡᠭᠡᠢ ᠪᠠᠯᠠᠮᠠᠳ ᠢ᠋ᠶ᠋ᠠᠷ ᠡᠬᠡᠨᠡᠷ ᠢ᠋ᠶ᠋ᠡᠨ ᠠᠯᠠᠬᠤ ᠨᠢ ᠦᠨᠡᠨ ᠳ᠋ᠡᠭᠡᠨ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠨ ᠦᠭᠡᠢᠬᠢᠵᠦ ᠪᠠᠢᠬᠤ ᠬᠡᠷᠡᠭ ᠪᠢᠰᠢ ᠤᠤ?
ᠪᠣᠯᠤᠷᠴᠠᠭᠠᠨ ᠨᠠᠭᠠᠳᠤ ᠵᠠᠬᠠ ᠳᠤ ᠪᠠᠨ ᠡᠢᠮᠦ ᠬᠡᠷᠡᠭ ᠦ᠋ᠨ ᠠᠰᠢᠭ ᠬᠣᠣᠷ ᠤ᠋ᠨ ᠦᠷᠡ ᠳ᠋ᠦᠩ ᠶᠠᠮᠠᠷ ᠪᠣᠯᠬᠤ ᠭᠡᠭᠴᠢ ᠶ᠋ᠢ ᠨᠡᠪᠲᠡᠷᠡᠲᠡᠯᠡ ᠣᠢᠯᠠᠭᠠᠬᠤ ᠶᠣᠰᠣᠲᠠᠢ ᠯᠠ ᠶᠤᠮ᠃
ᠬᠥᠮᠦᠨ ᠭᠡᠭᠴᠢ ᠨᠢᠭᠡ ᠴᠠᠭ ᠤ᠋ᠨ ᠠᠭᠤᠷ ᠤ᠋ᠨ ᠮᠤᠩᠬᠠᠭ ᠢ᠋ᠶ᠋ᠠᠷ ᠬᠥᠮᠦᠨ ᠠᠯᠠᠵᠤ ᠮᠡᠳᠡᠬᠦ ᠶᠦᠮ᠃ ᠲᠡᠭᠡᠬᠦ ᠪᠡᠷ ᠪᠣᠳᠣᠬᠤ ᠳ᠋ᠤ᠌ ᠲᠡᠷᠡ ᠶᠠᠭᠠᠬᠢᠭᠠᠳ ᠡᠬᠢᠨ ᠳᠦ ᠪᠡᠨ ᠶᠠᠯᠠ ᠪᠠᠨ ᠵᠥᠪᠰᠢᠶᠡᠷᠡᠬᠦ ᠦᠭᠡᠢ ᠪᠠᠢᠵᠤ᠂ ᠵᠠᠩᠭᠢᠯᠠᠭᠠ ᠶ᠋ᠢᠨ ᠦᠶᠡ ᠳ᠋ᠦ᠍ ᠬᠢᠯᠢᠰ ᠬᠠᠰᠬᠢᠷᠤᠭᠰᠠᠨ ᠪᠣᠢ? ᠡᠭᠦᠨ ᠦ᠌ ᠠᠷᠤ ᠳ᠋ᠤ᠌ ᠶᠠᠮᠠᠷ ᠨᠢᠭᠡᠨ ᠡᠭᠡᠳᠡᠷᠡᠭᠡᠨ ᠦᠭᠡᠢ ᠭᠡᠵᠢ ᠤᠤ? ᠲᠦᠪᠰᠢᠨ ᠭᠤᠸᠠᠢ ᠤᠳᠠᠭᠠᠨ ᠡᠳᠦᠷ ᠵᠤᠵᠠᠭᠠᠨ ᠬᠣᠨᠣᠭ ᠤ᠋ᠨ ᠲᠤᠷᠰᠢᠲᠠ ᠢᠩᠭᠢᠵᠦ ᠡᠯᠳᠡᠪᠴᠢᠯᠡᠨ ᠪᠣᠳᠣᠵᠤ ᠶᠠᠪᠤᠬᠤ ᠳᠤ ᠪᠠᠨ ᠰᠥᠨᠢ ᠶ᠋ᠢᠨ ᠨᠣᠢᠷ ᠢ᠋ᠶ᠋ᠠᠨ ᠣᠯᠠᠨᠲᠠ ᠭᠠᠷᠤᠵᠠᠳᠠᠭᠤᠯᠤᠭᠰᠠᠨ ᠪᠠᠢᠯᠠ᠃
ᠰᠠᠨᠠᠭᠠᠨ ᠠ᠋ᠴᠠ ᠭᠠᠳᠠᠨᠠ᠂ ᠡᠮᠦᠨᠡ ᠬᠣᠶᠠᠷ ᠡᠳᠦᠷ ᠲᠡᠷᠡ ᠪᠠᠢᠴᠠᠭᠠᠬᠤ ᠬᠣᠷᠢᠶᠠᠨ ᠤ᠋ ᠨᠢᠭᠡ ᠵᠠᠯᠠᠭᠤ ᠬᠠᠪᠰᠤᠷᠤᠭᠴᠢ ᠪᠣᠯᠤᠷᠴᠠᠭᠠᠨ ᠤ᠋ ᠬᠡᠷᠡᠭ ᠢ᠋ ᠭᠠᠷᠳᠠᠨ ᠪᠠᠢᠴᠠᠭᠠᠵᠤ ᠪᠠᠢᠬᠤ ᠳᠤ ᠪᠠᠨ ᠬᠢᠭᠰᠡᠨ ᠬᠣᠶᠠᠷ ᠬᠤᠪᠢ ᠡᠳᠦᠷ ᠦ᠋ᠨ ᠲᠡᠮᠳᠡᠭᠯᠡᠯ ᠢ᠋ ᠣᠯᠵᠤ ᠦᠵᠡᠭᠡᠳ ᠶᠡᠬᠡ ᠰᠣᠨᠢᠷᠬᠠᠵᠠᠢ᠃
ᠲᠡᠮᠳᠡᠭᠯᠡᠯ ᠳ᠋ᠡᠬᠢ ᠡᠨᠡ ᠬᠣᠶᠠᠷ ᠬᠡᠷᠡᠭ ᠨᠢ ᠭᠡᠷᠡᠴᠢ ᠪᠠᠷᠢᠮᠲᠠ ᠪᠠᠷ ᠲᠣᠳᠣᠷᠬᠠᠢᠯᠠᠭᠳᠠᠭᠰᠠᠨ ᠦᠭᠡᠢ ᠲᠤᠯᠠ ᠡᠪᠬᠡᠮᠡᠯ ᠳ᠋ᠦ᠍ ᠣᠷᠣᠭᠰᠠᠨ ᠦᠭᠡᠢ ᠪᠠᠢᠨᠠ᠃
ᠣᠷᠴᠢᠮ ᠤ᠋ᠨ ᠬᠣᠶᠠᠷ ᠵᠢᠯ ᠪᠣᠯᠤᠷᠴᠠᠭᠠᠨ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠤ᠋ ᠪᠠᠨ ᠡᠮ ᠲᠣᠬᠢᠷᠠᠭᠤᠯᠤᠭᠴᠢ ᠡᠮᠡᠭᠲᠡᠢ ᠲᠡᠢ ᠰᠦᠷᠡᠬᠡᠢ ᠨᠠᠭᠠᠯᠳᠤᠬᠤ ᠰᠢᠭ᠋ ᠪᠠᠢᠭᠰᠠᠨ ᠭᠡᠵᠦ ᠬᠠᠮᠲᠤ ᠠᠵᠢᠯᠯᠠᠭᠴᠢ ᠨᠢ ᠲᠤᠰᠬᠠᠵᠠᠢ᠃ ᠡᠨᠡ ᠬᠣᠶᠠᠷ ᠠᠵᠢᠯ ᠰᠡᠯᠡᠭᠦᠦ ᠡᠳᠦᠷ ᠪᠣᠯᠤᠩᠭᠤᠲᠠ ᠠᠯᠪᠠᠨ ᠭᠡᠷ ᠦ᠋ᠨ ᠡᠭᠦᠳᠡ ᠪᠡᠨ ᠵᠠᠪᠰᠠᠷ ᠦᠭᠡᠢ ᠳᠠᠷᠤᠭᠠᠳ ᠲᠤᠯᠤᠯᠴᠠᠨ ᠰᠠᠭᠤᠵᠤ ᠤᠳᠠᠲᠠᠯᠠ ᠬᠦᠦᠷᠨᠢᠨ ᠶᠠᠷᠢᠯᠴᠠᠬᠤ ᠳᠠᠭᠤ ᠨᠢ ᠵᠢᠭᠲᠡᠢ ᠨᠠᠭᠠᠯᠢᠩᠬᠠᠢ ᠪᠠᠢᠳᠠᠭ ᠭᠡᠨᠡ᠃
ᠨᠢᠭᠡ ᠤᠳᠠᠭᠠ ᠢᠯᠡᠭᠦᠦ ᠬᠡᠷᠡᠭ ᠲᠦ᠍ ᠳᠤᠷᠠᠲᠠᠢ ᠪᠣᠯᠤᠷᠴᠠᠭᠠᠨ ᠤ᠋ ᠱᠠᠪᠢ ᠬᠡᠦᠬᠡᠨ ᠴᠠᠭᠠᠳᠤᠬᠢ ᠭᠡᠷ ᠡᠴᠡ ᠨᠢ ᠴᠢᠩᠨᠠᠭᠰᠠᠨ ᠳ᠋ᠤ᠌ ᠳᠠᠭᠤ ᠨᠢ ᠥᠩᠭᠡᠷᠡᠦ ᠳᠣᠣᠷᠠ ᠪᠠᠢᠭᠰᠠᠨ ᠠ᠋ᠴᠠ ᠨᠢᠭᠡ ᠦᠭᠡ ᠴᠦ᠍ ᠣᠯᠵᠤ ᠰᠣᠨᠣᠰᠤᠭᠰᠠᠨ ᠦᠭᠡᠢ᠃ ᠲᠡᠭᠡᠭᠡᠳ ᠲᠡᠷᠡ ᠡᠭᠦᠳᠡᠨ ᠰᠢᠯ ᠦ᠋ᠨ ᠬᠢᠨᠢ ᠪᠦᠷᠬᠦᠭᠦᠯ ᠦ᠋ᠨ ᠴᠣᠭᠣᠷᠬᠠᠢ ᠪᠠᠷ ᠳᠣᠲᠣᠭᠰᠢ ᠰᠡᠮᠬᠡᠨ ᠱᠠᠭᠠᠢᠪᠠᠯ ᠪᠣᠯᠤᠷᠴᠠᠭᠠᠨ ᠤ᠋ ᠨᠢᠳᠦ ᠢᠯᠡᠷᠬᠡᠢ ᠵᠥᠭᠡᠯᠡᠨ ᠪᠣᠯᠵᠤ ᠤᠶᠠᠷᠠᠵᠤ ᠰᠢᠮᠰᠢᠷᠡᠭᠰᠡᠨ ᠪᠠᠢᠳᠠᠯ ᠲᠠᠢ ᠪᠠᠷ ᠲᠡᠷᠡ ᠡᠬᠡᠨᠡᠷ ᠢ᠋ ᠬᠠᠷᠠᠵᠤ ᠰᠠᠭᠤᠭᠰᠠᠨ ᠪᠥᠭᠡᠳ ᠲᠡᠷᠡ ᠡᠬᠡᠨᠡᠷ ᠦ᠋ᠨ ᠨᠢᠳᠦ ᠴᠦ᠍ ᠶᠠᠮᠠᠷ ᠨᠢᠭᠡᠨ ᠶᠠᠭᠤᠮᠠᠨ ᠳ᠋ᠤ᠌ ᠰᠢᠨᠤᠵᠤ ᠪᠠᠢᠭᠠ ᠰᠢᠭ᠋ ᠬᠠᠷᠠᠭᠳᠠᠵᠤ ᠭᠡᠨᠡ᠃
ᠡᠮ ᠲᠣᠬᠢᠷᠠᠭᠤᠯᠤᠭᠴᠢ ᠡᠮᠡᠭᠲᠡᠢ ᠶ᠋ᠢ ᠭᠠᠷᠤᠭᠰᠠᠨ ᠤ᠋ ᠬᠣᠢᠨᠠ ᠱᠠᠪᠢ ᠬᠡᠦᠬᠡᠨ ᠨᠡᠷᠡ ᠨᠢ ᠢᠯᠠᠭᠠᠭᠳᠠᠬᠤ ᠦᠭᠡᠢ ᠡᠪᠡᠳᠴᠢᠲᠡᠨ ᠦ᠌ ᠬᠦᠰᠦᠨᠦᠭ ᠠᠪᠴᠤ ᠣᠷᠣᠭᠠᠳ ᠪᠣᠯᠤᠷᠴᠠᠭᠠᠨ ᠠ᠋ᠴᠠ ᠠᠰᠠᠭᠤᠬᠤ ᠳ᠋ᠤ᠌ ᠲᠡᠷᠡ ᠠᠮᠠᠨ ᠠᠶᠠ ᠪᠠᠷ ᠹᠧᠩ ᠮᠧᠢ ᠭᠡᠳ ᠪᠤᠷᠤᠭᠤ ᠬᠡᠯᠡᠭᠰᠡᠨ ᠳᠦ ᠪᠡᠨ ᠬᠡᠴᠡᠭᠦᠦ ᠪᠠᠯᠠᠭ ᠠᠯᠳᠠᠵᠠᠢ᠃ ᠤᠤᠯ ᠨᠢ ᠡᠮ ᠲᠣᠬᠢᠷᠠᠭᠤᠯᠤᠭᠴᠢ ᠡᠮᠡᠭᠲᠡᠢ ᠶ᠋ᠢᠨ ᠨᠡᠷᠡ ᠨᠢ ᠡᠦ ᠹᠧᠩ ᠮᠧᠢ ᠭᠡᠳᠡᠭ᠃ ᠲᠡᠷᠡ ᠭᠤᠴᠢᠨ ᠵᠢᠷᠭᠤᠭᠠᠲᠠᠢ᠂ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠳᠤ ᠪᠠᠨ ᠬᠣᠣᠰ ᠦᠭᠡᠢ ᠭᠣᠶᠣ ᠬᠥᠮᠦᠨ ᠭᠡᠨᠡ᠃
ᠤᠳᠠᠭᠠᠨ ᠵᠢᠯ ᠦ᠋ᠨ ᠲᠤᠷᠰᠢ ᠡᠷᠡ ᠨᠥᠬᠥᠷ ᠲᠡᠢ ᠪᠡᠨ ᠬᠣᠶᠠᠷ ᠭᠠᠵᠠᠷ ᠠᠮᠢᠳᠤᠷᠠᠭᠰᠠᠨ ᠠ᠋ᠴᠠ ᠳᠡᠮᠡᠢ ᠰᠠᠢᠨ ᠬᠠᠢᠷᠠ ᠳᠤᠷᠠᠯᠠᠯ ᠦᠭᠡᠢ ᠪᠣᠯᠬᠤ ᠳ᠋ᠤ᠌ ᠬᠠᠵᠠᠭᠤ ᠶ᠋ᠢᠨ ᠬᠥᠮᠦᠰ ᠴᠦ᠍ ᠡᠦ ᠹᠧᠩ ᠮᠧᠢ ᠶ᠋ᠢᠨ ᠲᠤᠬᠠᠢ ᠡᠯᠳᠡᠪ ᠢ᠋ᠶ᠋ᠡᠷ ᠬᠡᠯᠡᠯᠴᠡᠳᠡᠭ ᠰᠠᠨᠵᠠᠢ᠃
ᠶᠠᠪᠤᠭᠰᠠᠭᠠᠷ ᠪᠠᠢᠵᠤ ᠪᠣᠯᠤᠷᠴᠠᠭᠠᠨ ᠴᠦ᠍ ᠳᠤᠮᠳᠠᠬᠢ ᠨᠢᠭᠡ ᠨᠢ ᠪᠣᠯᠵᠤ ᠲᠡᠭᠦᠨ ᠲᠡᠢ ᠰᠡᠮᠡᠬᠡᠷ ᠶᠠᠪᠤᠯᠴᠠᠬᠤ ᠪᠣᠯᠪᠠ᠃
ᠨᠢᠭᠡ ᠤᠳᠠᠭᠠ ᠡᠦ ᠹᠧᠩ ᠮᠧᠢ ᠭᠠᠷ ᠲᠤ ᠪᠠᠨ ᠨᠢᠭᠡ ᠬᠤᠪᠢ ᠵᠠᠬᠢᠳᠠᠯ ᠪᠠᠷᠢᠭᠠᠳ ᠳᠠᠩᠴᠤ ᠰᠠᠨᠳᠤᠷᠤᠩᠭᠤᠢ ᠪᠠᠢᠳᠠᠯ ᠲᠠᠢ ᠪᠠᠷ ᠪᠣᠯᠤᠷᠴᠠᠭᠠᠨ ᠤ᠋ ᠠᠯᠪᠠᠨ ᠭᠡᠷ ᠲᠦ᠍ ᠭᠦᠶᠦᠨ ᠣᠷᠣᠬᠤ ᠨᠢ ᠬᠠᠷᠠᠭᠳᠠᠵᠠᠢ᠃
ᠵᠣᠭᠣᠰ ᠦᠭᠡᠢ ᠡᠮ ᠠᠪᠬᠤ ᠭᠡᠳ ᠪᠦᠲᠦᠭᠰᠡᠨ ᠦᠭᠡᠢ ᠥᠰᠢᠶᠡ ᠪᠣᠳᠣᠭᠰᠠᠨ ᠨᠢᠭᠡ ᠰᠤᠪᠢᠯᠠᠭᠴᠢ ᠰᠠᠮ ᠰᠠᠮ ᠠᠯᠬᠤᠯᠠᠨ ᠡᠭᠦᠳᠡᠨ ᠳᠡᠷᠭᠡᠳᠡ ᠨᠢ ᠬᠦᠷᠦᠭᠡᠳ ᠰᠡᠮᠡᠬᠡᠷ ᠴᠢᠩᠨᠠᠪᠠᠯ ᠡᠦ ᠹᠧᠩ ᠮᠧᠢ ᠱᠣᠭ ᠱᠣᠭ ᠤᠬᠢᠯᠠᠵᠤ ᠪᠠᠢᠭᠠ ᠨᠢ ᠳᠤᠭᠤᠯᠳᠠᠵᠠᠢ᠃
ᠰᠤᠪᠢᠯᠠᠭᠴᠢ ᠪᠤᠴᠠᠵᠤ ᠢᠷᠡᠮᠡᠭᠴᠡ ᠪᠡᠨ ᠬᠣᠪ ᠵᠢᠪ ᠲᠦ᠍ ᠳᠤᠷᠠᠲᠠᠢ ᠨᠢᠭᠡ ᠨᠠᠢᠵᠠ ᠳᠤ ᠪᠠᠨ ᠡᠦ ᠹᠧᠩ ᠮᠧᠢ ᠡᠷᠡ ᠲᠡᠢ ᠪᠡᠨ ᠤᠷᠤᠭ ᠰᠠᠯᠬᠤ ᠵᠠᠬᠢᠶᠠ ᠢᠯᠡᠭᠡᠭᠡᠳ ᠵᠥᠪᠰᠢᠶᠡᠷᠡᠭᠰᠡᠨ ᠦᠭᠡᠢ ᠪᠠᠢᠨᠠ᠃ ᠭᠣᠮᠣᠳᠠᠬᠤ ᠳᠤ ᠪᠠᠨ ᠪᠣᠯᠣᠷᠴᠠᠭᠠᠨ ᠤ᠋ ᠬᠦᠵᠦᠭᠦᠦ ᠪᠡᠷ ᠲᠡᠪᠡᠷᠢᠨ ᠮᠠᠭᠤᠵᠢᠷᠠᠲᠠᠯᠠ ᠤᠬᠢᠯᠠᠵᠤ ᠪᠠᠢᠨᠠ᠃ ᠢᠴᠢᠳᠡᠭ ᠴᠦ᠍ ᠦᠭᠡᠢ ᠠᠮᠢᠲᠠᠨ ᠭᠡᠵᠦ ᠬᠡᠯᠡᠵᠡᠢ᠃ ᠡᠭᠦᠨ ᠡᠴᠡ ᠬᠣᠢᠰᠢ ᠪᠣᠯᠤᠷᠴᠠᠭᠠᠨ ᠡᠷᠡ ᠡᠮᠡ ᠬᠣᠶᠠᠭᠤᠯᠠ ᠵᠠᠯᠭᠠᠭᠠ ᠭᠡᠷᠡᠯᠲᠦᠨ ᠵᠣᠳᠣᠯᠴᠠᠬᠤ ᠨᠢ ᠡᠳᠡᠭᠡᠷ ᠬᠣᠪ ᠶᠠᠷᠢᠶᠠᠨ ᠳ᠋ᠤ᠌ ᠲᠠᠰᠢᠭᠤᠷ ᠨᠡᠮᠡᠨ ᠳᠠᠯᠠᠪᠴᠢ ᠤᠷᠭᠤᠭᠤᠯᠤᠯᠠ᠃
ᠬᠡᠷᠡᠭ ᠭᠠᠷᠬᠤ ᠠ᠋ᠴᠠ ᠡᠮᠦᠨᠡ ᠬᠠᠪᠤᠷ ᠤ᠋ᠨ ᠨᠢᠭᠡᠨ ᠰᠥᠨᠢ ᠶ᠋ᠢᠨ ᠭᠤᠷᠪᠠᠨ ᠴᠠᠭ ᠤ᠋ᠨ ᠦᠶᠡ ᠪᠡᠷ ᠡᠦ ᠹᠧᠩ ᠮᠧᠢ ᠶ᠋ᠢᠨ ᠭᠡᠷ ᠡᠴᠡ ᠨᠢᠭᠡᠨ ᠡᠷᠡᠭᠲᠡᠢ ᠬᠥᠮᠦᠨ ᠰᠡᠮᠡᠬᠡᠷ ᠭᠠᠷᠴᠤ ᠢᠷᠡᠭᠡᠳ ᠱᠠᠲᠤ ᠪᠠᠷ ᠰᠢᠪᠲᠤᠷᠤᠨ ᠪᠠᠭᠤᠬᠤ ᠶ᠋ᠢ ᠵᠡᠷᠭᠡᠯᠡᠳᠡᠭᠡ ᠭᠡᠷ ᠦ᠋ᠨ ᠬᠢᠨᠢ ᠨᠢᠭᠡ ᠡᠬᠡᠨᠡᠷ ᠰᠥᠨᠢ ᠶ᠋ᠢᠨ ᠡᠭᠡᠯᠵᠢᠨ ᠳ᠋ᠦ᠍ ᠭᠠᠷᠬᠤ ᠳᠤ ᠪᠠᠨ ᠣᠯᠵᠤ ᠦᠵᠡᠵᠡᠢ᠃
ᠪᠠᠢᠴᠠᠭᠠᠬᠤ ᠬᠣᠷᠢᠶᠠᠨ ᠤ᠋ ᠮᠥᠷᠲᠡᠭᠴᠢᠳ ᠡᠨᠡ ᠬᠦ᠌ ᠶᠠᠪᠤᠳᠠᠯ ᠢ᠋ ᠦᠨᠡᠨ ᠭᠡᠷᠡᠴᠢ ᠪᠣᠯᠭᠠᠨ ᠡᠦ ᠹᠧᠩ ᠮᠧᠢ ᠡᠴᠡ ᠠᠰᠠᠭᠤᠬᠤ ᠳ᠋ᠤ᠌ ᠲᠡᠷᠡ ᠥᠯᠢᠢᠵᠦ ᠴᠦ᠍ ᠬᠠᠷᠠᠬᠤ ᠦᠭᠡᠢ ᠮᠥᠷᠲᠡᠭᠡᠨ ᠬᠠᠮᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠦᠢᠲᠡᠨ ᠢᠨᠢᠶᠡᠨ᠂ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠤ᠋ ᠠᠵᠢᠯᠲᠠᠨ ᠲᠠᠨ ᠤ᠋ ᠵᠠᠰᠠᠭ ᠵᠠᠬᠢᠷᠭᠠᠨ ᠤ᠋ ᠺᠠᠳ᠋ᠷ ᠤ᠋ᠳ ᠲᠠᠢ ᠠᠳᠠᠯᠢ ᠦᠭᠡᠢ ᠰᠢᠦ᠃ ᠵᠠᠷᠢᠮ ᠳᠤ ᠪᠠᠨ ᠰᠥᠨᠢ ᠶ᠋ᠢᠨ ᠬᠠᠭᠠᠰ ᠥᠩᠭᠡᠷᠡᠵᠦ ᠠᠵᠢᠯ ᠠ᠋ᠴᠠ ᠪᠠᠨ ᠪᠠᠭᠤᠨᠠ᠃ ᠵᠠᠮ ᠳᠤ ᠪᠠᠨ ᠠᠶᠤᠵᠤ ᠰᠣᠴᠢᠬᠤ ᠠ᠋ᠴᠠ ᠪᠠᠨ ᠪᠣᠯᠭᠣᠮᠵᠢᠯᠠᠨ ᠡᠷᠡᠭᠲᠡᠢ ᠬᠥᠮᠦᠨ ᠢ᠋ ᠭᠤᠶᠤᠨ ᠬᠦᠷᠭᠡᠭᠦᠯᠵᠦ ᠢᠷᠡᠬᠦ ᠶᠠᠪᠤᠳᠠᠯ ᠦᠷᠭᠦᠯᠵᠢ ᠭᠠᠷᠳᠠᠭ᠃ ᠶᠠᠮᠠᠷ ᠬᠥᠮᠦᠨ 《ᠰᠠᠢᠨ ᠰᠠᠨᠠᠭᠠ》 ᠨᠢ ᠬᠡᠲᠦᠷᠡᠬᠦ ᠳᠦ ᠪᠡᠨ ᠤᠨᠲᠠᠬᠤ ᠨᠣᠢᠷ ᠢ᠋ᠶ᠋ᠠᠨ ᠬᠠᠶᠠᠭᠠᠳ ᠮᠢᠨᠦ ᠡᠭᠦᠳᠡ ᠶ᠋ᠢ ᠮᠢᠷᠢᠶᠠᠵᠤ ᠰᠠᠭᠤᠳᠠᠭ ᠪᠣᠯ? ᠲᠡᠷᠡ ᠴᠦ᠍ ᠪᠠᠢᠲᠤᠭᠠᠢ ᠦᠨᠡᠬᠡᠷ ᠨᠢᠭᠡ ᠡᠷᠡ ᠬᠥᠮᠦᠨ ᠨᠠᠳᠠ ᠲᠠᠢ ᠬᠣᠨᠣᠭᠠᠳ ᠭᠠᠷᠤᠭᠰᠠᠨ ᠴᠦ᠍ ᠶᠠᠭᠠᠮᠠᠢ! ᠬᠡᠲᠦᠷᠡᠬᠦ ᠳᠦ ᠪᠡᠨ ᠡᠦ ᠹᠧᠩ ᠮᠧᠢ ᠶ᠋ᠢ ᠱᠠᠯᠢᠭ ᠵᠠᠪᠬᠠᠢ ᠠᠮᠢᠲᠠᠨ ᠭᠡᠵᠦ ᠬᠡᠯᠡᠬᠦ ᠪᠢᠵᠡ᠃ ᠵᠠᠪᠠᠯ ᠪᠣᠯᠤᠷᠴᠠᠭᠠᠨ ᠲᠠᠢ ᠬᠣᠯᠪᠣᠭᠳᠠᠭᠤᠯᠬᠤ ᠨᠢ ᠢᠯᠡᠭᠦᠦ ᠶᠠᠭᠤᠮᠠ ᠰᠢᠭ᠋ ᠰᠠᠨᠠᠭᠳᠠᠬᠤ ᠶᠤᠮ᠃ ᠬᠠᠤᠯᠢ ᠴᠠᠭᠠᠵᠠ ᠶ᠋ᠢᠨ ᠺᠠᠳ᠋ᠷᠴᠤᠳ ᠵᠢᠯ ᠥᠩᠭᠡᠷᠡᠭᠰᠡᠨ ᠦ᠌ ᠳᠠᠷᠠᠭᠠ ᠡᠢᠮᠦ ᠬᠠᠷᠢᠭᠤᠴᠠᠯᠭᠠ ᠨᠡᠬᠡᠮᠵᠢᠯᠡᠬᠦ ᠶ᠋ᠢ ᠮᠡᠳᠡᠭᠰᠡᠨ ᠪᠣᠯ ᠢᠷᠡᠭᠰᠡᠨ ᠡᠷᠡ ᠬᠥᠮᠦᠨ ᠢ᠋ᠶ᠋ᠡᠨ ᠪᠦᠷ ᠨᠢᠭᠡ ᠨᠢᠭᠡ ᠪᠡᠷ ᠲᠡᠮᠳᠡᠭᠯᠡᠭᠡᠳ ᠲᠠᠯᠪᠢᠵᠤ ᠪᠠᠢᠭᠰᠠᠨ ᠪᠣᠯ ᠲᠠᠭᠠᠷᠠᠬᠤ ᠪᠠᠢᠵᠤ ᠳᠠ ᠭᠡᠵᠦ ᠪᠠᠰᠤᠵᠤ ᠭᠠᠷᠤᠯᠠ᠃
ᠡᠨᠡ ᠰᠦᠪᠡᠭᠴᠢ ᠢᠩᠭᠢᠭᠡᠳ ᠵᠠᠯᠠᠭᠤ ᠪᠠᠢᠴᠠᠭᠠᠭᠴᠢ ᠶ᠋ᠢᠨ ᠡᠳᠦᠷ ᠦ᠋ᠨ ᠲᠡᠮᠳᠡᠭᠯᠡᠯ ᠳ᠋ᠦ᠍ ᠦᠯᠡᠳᠡᠵᠡᠢ᠃
ᠪᠠᠰᠠ ᠨᠢᠭᠡ ᠵᠦᠢᠯ ᠢ᠋ ᠲᠡᠮᠳᠡᠭᠯᠡᠭᠰᠡᠨ ᠪᠠᠢᠨᠠ᠃
ᠬᠡᠯᠡᠪᠡᠯ ᠪᠠᠰᠠ ᠰᠣᠨᠢᠨ ᠶᠤᠮ᠃ ᠪᠣᠯᠤᠷᠴᠠᠭᠠᠨ ᠢ᠋ ᠪᠠᠷᠢᠭᠳᠠᠭᠰᠠᠨ ᠤ᠋ ᠬᠡᠳᠦᠨ ᠡᠳᠦᠷ ᠦ᠋ᠨ ᠳᠠᠷᠠᠭᠠ ᠬᠣᠷᠢᠭᠤᠯ ᠤ᠋ᠨ ᠭᠠᠵᠠᠷ ᠶᠠᠯᠠᠲᠠᠨ ᠨᠤᠭᠤᠳ ᠤ᠋ᠨ ᠳᠣᠲᠣᠷᠠ ᠪᠠᠰᠠ ᠡᠨᠡ ᠲᠤᠬᠠᠢ ᠶᠠᠷᠢᠶᠠ ᠳᠡᠯᠭᠡᠷᠡᠭᠰᠡᠨ ᠪᠠᠢᠯᠠ᠃
ᠬᠣᠷᠢᠭᠤᠯ ᠳ᠋ᠠᠬᠢ ᠶᠠᠯᠠᠲᠠᠨ ᠨᠤᠭᠤᠳ ᠤ᠋ᠨ ᠬᠡᠯᠡᠯᠴᠡᠬᠦ ᠪᠡᠷ ᠪᠣᠯᠤᠷᠴᠠᠭᠠᠨ ᠪᠠᠷᠢᠭᠳᠠᠭᠰᠠᠨ ᠤ᠋ ᠪᠠᠨ ᠳᠠᠷᠠᠭᠠ ᠥᠷᠯᠥᠭᠡ ᠨᠢᠭᠡ ᠮᠠᠰᠢ ᠵᠢᠰᠦᠷᠬᠡᠭ ᠡᠮᠡᠭᠲᠡᠢ ᠲᠡᠢ ᠬᠣᠭᠣᠯᠠᠨ ᠭᠡᠷ ᠦ᠋ᠨ ᠴᠣᠩᠬᠣ ᠪᠠᠷ ᠠᠭᠤᠯᠵᠠᠨ ᠦᠭᠡ ᠶᠠᠷᠢᠯᠴᠠᠭᠰᠠᠨ ᠭᠡᠨᠡ᠃
ᠲᠡᠭᠦᠨ ᠲᠡᠢ ᠠᠭᠤᠯᠵᠠᠵᠤ ᠶᠠᠷᠢᠯᠴᠠᠭᠰᠠᠨ ᠠ᠋ᠴᠠ ᠬᠣᠢᠰᠢ ᠪᠣᠯᠤᠷᠴᠠᠭᠠᠨ ᠬᠡᠰᠡᠭ ᠲᠤ ᠪᠠᠨ ᠮᠡᠳᠡᠭᠡ ᠠᠯᠲᠠᠨ ᠮᠠᠨᠠᠷᠠᠬᠤ ᠰᠢᠬᠠᠵᠤ᠂ ᠵᠠᠷᠢᠮ ᠳᠤ ᠪᠠᠨ ᠬᠡᠪᠲᠡᠭᠰᠡᠨ ᠣᠷᠣ ᠠ᠋ᠴᠠ ᠪᠠᠨ ᠦᠰᠦᠷᠦᠨ ᠪᠠᠭᠤᠭᠠᠳ ᠶᠠᠯᠠ ᠪᠠᠨ ᠴᠠᠭᠠᠪᠤᠷᠯᠠᠬᠤ ᠪᠠᠷ ᠭᠣᠶᠣᠳᠠᠭ ᠭᠡᠨᠡ᠃
ᠡᠨᠡ ᠬᠦ᠌ ᠣᠯᠳᠠᠰᠢ ᠦᠭᠡᠢ ᠰᠦᠪᠡᠭᠴᠢ ᠰᠡᠵᠢᠭ ᠢ᠋ᠶ᠋ᠡᠷ ᠪᠢᠳᠡ ᠭᠢᠨᠳᠠᠨ ᠳ᠋ᠤ᠌ ᠣᠴᠢᠵᠤ ᠬᠡᠳᠦᠨ ᠶᠠᠯᠠᠲᠠᠨ ᠠ᠋ᠴᠠ ᠮᠥᠷᠳᠡᠵᠦ ᠨᠡᠬᠡᠮᠵᠢᠯᠡᠬᠦ ᠳ᠋ᠦ᠍ ᠬᠡᠨ ᠨᠢ ᠴᠦ᠍ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠦᠵᠡᠭᠰᠡᠨ ᠦᠭᠡᠢ ᠭᠡᠵᠦ ᠨᠢᠭᠡ ᠨᠢᠭᠡᠨ ᠳᠦ ᠪᠡᠨ ᠲᠦᠯᠬᠢᠵᠦ ᠨᠥᠮᠥᠷᠭᠡᠭᠰᠡᠭᠡᠷ ᠡᠴᠦᠰ ᠲᠤ ᠪᠠᠨ ᠰᠠᠷᠠ ᠶ᠋ᠢᠨ ᠡᠮᠦᠨᠡ ᠨᠢᠭᠡᠨᠲᠡ ᠬᠠᠤᠯᠢ ᠪᠠᠷ ᠰᠢᠢᠳᠬᠡᠭᠳᠡᠭᠡᠳ ᠲᠡᠮᠡᠭᠡᠨ ᠪᠦᠭᠦᠳᠦ ᠶ᠋ᠢᠨ ᠬᠥᠳᠡᠯᠮᠦᠷᠢ ᠪᠡᠷ ᠥᠭᠡᠷᠡᠴᠢᠯᠡᠬᠦ ᠲᠠᠯᠠᠪᠠᠢ ᠳ᠋ᠤ᠌ ᠬᠦᠷᠭᠡᠭᠳᠡᠭᠰᠡᠨ ᠯᠢ ᠹᠧᠩ ᠮᠢᠨ ᠭᠡᠭᠴᠢ ᠶᠠᠯᠠᠲᠠᠨ ᠳ᠋ᠤ᠌ ᠲᠦᠯᠬᠢᠭᠳᠡᠨ ᠬᠠᠶᠠᠭᠳᠠᠪᠠ᠃
ᠭᠡᠲᠡᠯᠡ ᠬᠣᠷᠢᠭᠤᠯ ᠤ᠋ᠨ ᠬᠠᠵᠠᠷ ᠤ᠋ᠨ ᠬᠠᠷᠠᠭᠤᠯ ᠪᠠ ᠤᠷᠢᠳᠴᠢᠯᠠᠨ ᠰᠢᠭᠦᠬᠦ ᠠᠵᠢᠯᠲᠠᠳ ᠪᠣᠯᠤᠷᠴᠠᠭᠠᠨ ᠪᠠᠷᠢᠭᠳᠠᠭᠰᠠᠨ ᠤ᠋ ᠪᠠᠨ ᠳᠠᠷᠠᠭᠠ ᠥᠷᠯᠥᠭᠡ ᠶ᠋ᠢᠨ ᠠᠷᠪᠠᠨ ᠴᠠᠭ ᠤ᠋ᠨ ᠦᠶᠡ ᠪᠡᠷ ᠥᠪᠡᠷ ᠢ᠋ᠶ᠋ᠡᠨ ᠱᠠᠭᠠᠷᠳᠠᠯᠭᠠ ᠭᠠᠷᠭᠠᠨ ᠶᠠᠯᠠ ᠪᠠᠨ ᠲᠤᠰᠢᠶᠠᠬᠤ ᠠ᠋ᠴᠠ ᠡᠮᠦᠨᠡ ᠬᠣᠷᠢᠭᠤᠯ ᠤ᠋ᠨ ᠭᠠᠵᠠᠷ ᠠ᠋ᠴᠠ ᠭᠠᠷᠤᠭᠰᠠᠨ ᠦᠭᠡᠢ ᠮᠥᠷᠲᠡᠭᠡᠨ ᠶᠠᠮᠠᠷ ᠴᠦ᠍ ᠬᠥᠮᠦᠨ ᠲᠡᠢ ᠠᠭᠤᠯᠵᠠᠭᠰᠠᠨ ᠦᠭᠡᠢ ᠭᠡᠵᠦ ᠪᠠᠲᠤ ᠲᠠᠢ ᠬᠡᠯᠡᠵᠡᠭᠡᠵᠦ ᠪᠠᠢᠪᠠ᠃ ᠪᠢᠳᠡ ᠦᠷᠭᠦᠯᠵᠢᠯᠡᠨ ᠮᠥᠷᠳᠡᠬᠦ ᠴᠢᠬᠤᠯᠠ ᠦᠭᠡᠢ ᠪᠣᠯᠤᠭᠰᠠᠨ ᠲᠤᠯᠠ ᠪᠠᠢᠴᠠᠭᠠᠬᠤ ᠪᠠᠨ ᠲᠦᠷ ᠵᠣᠭᠰᠣᠪᠠ᠃
ᠪᠠᠢᠴᠠᠭᠠᠬᠤ ᠬᠣᠷᠢᠶᠠᠨ ᠤ᠋ ᠵᠠᠯᠠᠭᠤ ᠪᠠᠢᠴᠠᠭᠠᠭᠴᠢ ᠡᠳᠦᠷ ᠦ᠋ᠨ ᠲᠡᠮᠳᠡᠭᠯᠡᠯ ᠢ᠋ᠶ᠋ᠡᠨ ᠬᠤᠷᠢᠶᠠᠵᠤ ᠠᠪᠬᠤ ᠳ᠋ᠤ᠌ ᠤᠷᠮᠠ ᠨᠢ ᠶᠡᠬᠡ ᠬᠤᠭᠤᠷᠠᠭᠰᠠᠨ ᠪᠠᠢᠪᠠ᠃
ᠲᠡᠷᠡ ᠪᠣᠯᠤᠷᠴᠠᠭᠠᠨ ᠤ᠋ ᠡᠬᠡᠨᠡᠷ ᠢ᠋ᠶ᠋ᠡᠨ ᠠᠯᠠᠭᠰᠠᠨ ᠴᠠᠭᠠᠳᠤᠬᠢ ᠵᠣᠷᠢᠯᠭᠠ ᠶ᠋ᠢ ᠨᠢ ᠣᠯᠬᠤ ᠪᠠᠷ ᠶᠡᠬᠡ ᠴᠢᠷᠮᠠᠢᠭᠰᠠᠨ ᠪᠠᠢᠨᠠ᠃ ᠪᠠᠢᠴᠠᠭᠠᠯᠲᠠ ᠶ᠋ᠢᠨ ᠳᠤᠮᠳᠠ ᠲᠡᠭᠦᠨ ᠳ᠋ᠦ᠍ ᠶᠠᠮᠠᠷ ᠨᠢᠭᠡᠨ ᠡᠭᠡᠳᠡᠷᠡᠭᠡᠨ ᠪᠤᠳᠤᠯᠢᠶᠠᠨᠲᠠᠢ ᠬᠡᠷᠡᠭ ᠨᠢᠭᠤᠭᠳᠠᠵᠤ ᠪᠠᠢᠬᠤ ᠰᠢᠭ᠋ ᠰᠠᠨᠠᠭᠳᠠᠭᠰᠠᠨ ᠪᠣᠯᠪᠠᠴᠤ ᠲᠣᠳᠣᠷᠬᠠᠢᠯᠠᠵᠤ ᠲᠠᠢᠯᠤᠮᠠᠷ ᠭᠡᠷᠡᠴᠢ ᠦᠭᠡᠢ ᠲᠤᠯᠠ ᠰᠢᠭᠦᠬᠦ ᠬᠣᠷᠢᠶᠠᠨ ᠳ᠋ᠤ᠌ ᠡᠪᠬᠡᠮᠡᠯ ᠢ᠋ᠶ᠋ᠡᠨ ᠰᠢᠯᠵᠢᠭᠦᠯᠬᠦ ᠳ᠋ᠡᠭᠡᠨ ᠶᠡᠬᠡ ᠬᠠᠷᠠᠮᠰᠠᠵᠠᠢ᠃
ᠭᠡᠲᠡᠯᠡ ᠪᠤᠰᠤᠳ ᠪᠠᠢᠴᠠᠭᠠᠭᠴᠢ ᠨᠠᠷ ᠢᠩᠭᠢᠵᠦ ᠦᠵᠡᠭᠰᠡᠨ ᠪᠢᠰᠢ᠂ ᠬᠠᠷᠢᠨ ᠬᠥᠮᠦᠨ ᠠᠯᠠᠭᠰᠠᠨ ᠬᠡᠷᠡᠭ ᠨᠢ ᠦᠨᠡᠨ ᠪᠣᠳᠠᠲᠤ ᠭᠡᠷᠡᠴᠢ ᠪᠠᠷᠢᠮᠲᠠ ᠪᠠᠷ ᠭᠦᠢᠴᠡᠳ ᠪᠣᠯᠤᠭᠰᠠᠨ ᠪᠣᠯ ᠲᠡᠭᠦᠨ ᠦ᠌ ᠬᠥᠮᠦᠨ ᠠᠯᠠᠬᠤ ᠦᠶᠡ ᠳ᠋ᠡᠭᠡᠨ ᠴᠠᠭᠠᠨᠠ ᠪᠠᠨ ᠶᠠᠭᠤ ᠪᠣᠳᠣᠵᠤ ᠪᠠᠢᠭᠰᠠᠨ ᠪᠠ ᠡᠰᠡᠪᠡᠯ ᠶᠠᠮᠠᠷ ᠨᠢᠭᠡᠨ ᠬᠡᠯᠡᠵᠦ ᠪᠣᠯᠣᠰᠢ ᠦᠭᠡᠢ ᠰᠡᠳᠬᠢᠯ ᠦ᠋ᠨ ᠨᠢᠭᠤᠴᠠ ᠳᠠᠯᠳᠠ ᠰᠦᠯᠪᠡᠭᠡ ᠪᠠᠢᠬᠤ ᠪᠣᠯᠤᠯᠴᠠᠭᠠ ᠲᠠᠢ ᠴᠦ᠍ ᠭᠡᠰᠡᠨ ᠥᠪᠡᠷ ᠦ᠋ᠨ ᠰᠠᠨᠠᠭᠠᠴᠢᠯᠠᠭᠠ ᠠ᠋ᠴᠠ ᠪᠠᠨ ᠲᠤᠰᠢᠶᠠᠬᠤ ᠦᠭᠡᠢ ᠪᠣᠯ ᠵᠠᠪᠠᠯ ᠠᠯᠪᠠ ᠪᠠᠷ ᠮᠥᠷᠳᠡᠬᠦ ᠴᠢᠬᠤᠯᠠ ᠦᠭᠡᠢ ᠭᠡᠵᠦ ᠦᠵᠡᠵᠡᠭᠡᠵᠡᠢ᠃
ᠲᠦᠪᠰᠢᠨ ᠥᠨᠥ ᠰᠥᠨᠢ ᠴᠦ᠍ ᠡᠨᠡ ᠤᠴᠢᠷ ᠢ᠋ ᠪᠣᠳᠣᠭᠰᠠᠭᠠᠷ ᠪᠢᠯᠡ᠃
ᠦᠨᠡᠬᠡᠷ ᠶᠠᠮᠠᠷ ᠨᠢᠭᠡᠨ ᠡᠮᠡᠭᠲᠡᠢ ᠪᠣᠯᠤᠷᠴᠠᠭᠠᠨ ᠤ᠋ ᠬᠡᠷᠡᠭ ᠲᠦ᠍ ᠬᠣᠯᠪᠣᠭᠳᠠᠬᠤ ᠭᠡᠵᠢ ᠤᠤ? ᠲᠡᠭᠡᠪᠡᠯ ᠲᠡᠷᠡ ᠡᠮᠡᠭᠲᠡᠢ ᠶᠠᠭᠠᠬᠢᠭᠠᠳ ᠪᠤᠰᠤᠳ ᠲᠤ᠌ ᠥᠴᠦᠬᠡᠨ ᠴᠦ᠍ ᠰᠡᠷᠡᠭᠳᠡᠬᠦ ᠦᠭᠡᠢ ᠪᠡᠷ ᠬᠣᠷᠢᠭᠤᠯ ᠤ᠋ᠨ ᠳᠣᠲᠣᠷᠠ ᠣᠷᠣᠵᠤ ᠣᠴᠢᠭᠰᠠᠨ ᠪᠣᠢ?
ᠲᠡᠷᠡ ᠡᠯᠳᠡᠪ ᠢ᠋ ᠪᠣᠳᠣᠭᠰᠠᠭᠠᠷ ᠮᠣᠳᠣᠨ ᠣᠷᠣ ᠪᠠᠨ ᠵᠢᠷᠵᠢᠬᠢᠨᠡᠭᠦᠯᠲᠡᠯᠡ ᠡᠷᠭᠢᠬᠦ ᠳ᠋ᠦ᠍ ᠦᠦᠷ ᠦ᠋ᠨ ᠴᠣᠯᠮᠣᠨ ᠶᠡᠬᠡ ᠳᠡᠭᠡᠷᠡ ᠭᠠᠷᠤᠭᠰᠠᠨ ᠨᠢ ᠴᠣᠩᠬᠣᠨ ᠰᠢᠯ ᠢ᠋ᠶ᠋ᠡᠷ ᠬᠠᠷᠠᠭᠳᠠᠵᠠᠢ᠃
ᠤᠩᠰᠢᠭᠰᠠᠨ ᠨᠢ᠄ ᠴᠡᠴᠡᠭᠮᠡ