ᠬᠢᠯᠭᠠᠰᠤᠨ ᠳᠥᠷᠥᠭᠡᠨ ᠳᠡᠭᠡᠷᠡ – ᠬᠠᠰᠪᠤᠯᠠᠭ ᠵᠣᠬᠢᠶᠠᠪᠠ᠂ <ᠳᠥᠷᠪᠡ> Хялгасан дөрөөн дээр – Хасвулаг зохиов <4>
15 — ᠰᠢᠭᠦᠭᠴᠢ ᠳᠠᠷᠤᠭᠠ ᠠ᠋! ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠤ᠋ ᠡᠪᠡᠳᠴᠢᠲᠡᠨ ᠦ᠌ ᠣᠷᠣ ᠳᠡᠭᠡᠷᠡ ᠪᠢ ᠠᠮᠢᠳᠤ ᠪᠠᠢᠬᠤ ᠪᠠᠨ ᠰᠡᠷᠡᠵᠦ ᠮᠡᠳᠡᠭᠡᠳ ᠠᠢᠬᠤᠪᠲᠤᠷ ᠰᠣᠴᠢᠯᠠ᠃ ᠠᠭᠱᠠᠨ ᠵᠠᠭᠤᠷᠠ᠂ ᠨᠠᠳᠠ ᠭᠠᠢᠬᠠᠬᠤ᠂ ᠠᠶᠤᠬᠤ᠂ ᠬᠠᠷᠠᠮᠰᠠᠬᠤ ᠡᠯᠳᠡᠪ ᠦ᠋ᠨ ᠪᠣᠳᠣᠯ ᠲᠥᠷᠥᠭᠳᠡᠪᠡ᠃ ᠣᠳᠣᠬᠠᠨ ᠰᠠᠶᠢ ᠪᠤᠰᠤᠳ ᠤ᠋ᠨ ᠶᠠᠷᠢᠶᠠᠨ ᠠ᠋ᠴᠠ ᠠᠯᠠᠬᠤ ᠡᠷᠡᠭᠦᠦ ᠬᠡᠷᠡᠭᠵᠢᠭᠦᠯᠬᠦ ᠴᠠᠭᠠᠵᠠ ᠶ᠋ᠢᠨ ᠲᠠᠯᠠᠪᠠᠢ ᠳᠡᠭᠡᠷᠡ ᠥᠪᠡᠷ ᠢ᠋ᠶ᠋ᠡᠨ ᠬᠢᠯᠢᠰ ᠬᠠᠰᠬᠢᠷᠤᠭᠠᠳ ᠮᠠᠨᠠᠷᠠᠵᠤ ᠫᠤᠤᠳᠠᠭᠳᠠᠭᠰᠠᠨ ᠦᠭᠡᠢ ᠪᠤᠴᠠᠭᠠᠭᠳᠠᠭᠰᠠᠨ ᠢ᠋ᠶ᠋ᠠᠨ ᠮᠡᠳᠡᠪᠡ᠃ ᠪᠢ ᠭᠡᠭᠴᠢ ᠳᠡ᠂ ᠨᠡᠭᠡᠷᠡᠨ ᠦᠭᠡᠨᠴᠡ ᠳᠣᠷᠣᠢ᠂ ᠠᠶᠤᠮᠠᠲᠠᠭᠠᠢ᠃ ᠶᠠᠭ ᠵᠠᠩᠭᠢᠯᠠᠭᠠ ᠶ᠋ᠢᠨ ᠦᠶᠡ ᠳ᠋ᠦ᠍ ᠮᠡᠳᠡᠷᠡᠯ ᠰᠠᠷᠠᠯ ᠢ᠋ᠶ᠋ᠠᠨ ᠵᠢᠯᠣᠭᠣᠳᠴᠤ ᠴᠢᠳᠠᠬᠤ ᠦᠭᠡᠢ ᠰᠣᠯᠢᠶᠠᠷᠠᠭᠰᠠᠨ ᠠᠮᠢᠲᠠᠨ᠃ ᠬᠡᠷᠡᠭ ᠢ᠋ᠶ᠋ᠡᠨ ᠬᠢᠵᠦ ᠴᠢᠳᠠᠭᠠᠳ ᠶᠠᠯᠠ ᠪᠠᠨ ᠡᠭᠦᠷᠴᠦ ᠴᠢᠳᠠᠬᠤ ᠦᠭᠡᠢ ᠵᠢᠷᠦᠬᠡ ᠪᠡᠨ ᠭᠡᠭᠡᠭᠰᠡᠨ ᠳᠠᠮᠰᠢᠭ᠃ ᠬᠡᠷᠪᠡ ᠪᠢ ᠬᠡᠳᠦᠨ ᠰᠧᠺᠦ᠋ᠨ᠋ᠳ᠋ ᠵᠣᠷᠢᠭ ᠢ᠋ᠶ᠋ᠠᠨ ᠪᠠᠷᠢᠭᠰᠠᠨ ᠪᠣᠯ ᠬᠡᠵᠢᠶᠡᠨ ᠦ᠌ ᠵᠣᠬᠢᠰᠲᠠᠢ ᠰᠢᠢᠳᠬᠡᠯ ᠢ᠋ᠶ᠋ᠡᠨ ᠣᠯᠵᠤ᠂ ᠲᠠ ᠨᠠᠷ ᠲᠤ᠌ ᠢᠩᠭᠢᠵᠦ ᠶᠠᠷᠰᠢᠭ ᠲᠦᠪᠡᠭ ᠪᠣᠯᠬᠤ ᠦᠭᠡᠢ ᠪᠠᠢᠭᠰᠠᠨ ᠶᠤᠮ᠃ ᠠᠢ᠂ ᠶᠠᠭᠤ ᠭᠡᠵᠦ ᠲᠠᠢᠯᠪᠤᠷᠢᠯᠠᠨᠠ ᠳᠠ᠃ ᠤᠤᠯ ᠡᠪᠬᠡᠮᠡᠯ ᠳ᠋ᠡᠬᠢ ᠭᠡᠷᠡᠴᠢ ᠪᠠᠷᠢᠮᠲᠠ ᠪᠣᠯᠤᠨ ᠠᠷᠠᠳ ᠤ᠋ᠨ ᠳᠡᠭᠡᠳᠦ ᠵᠡᠷᠭᠡ ᠶ᠋ᠢᠨ ᠰᠢᠭᠦᠬᠦ ᠬᠣᠷᠢᠶᠠᠨ ᠠ᠋ᠴᠠ ᠰᠢᠭᠦᠨ ᠲᠠᠰᠤᠯᠤᠯᠲᠠ ᠳᠤ ᠪᠠᠨ ᠲᠣᠭᠲᠠᠭᠠᠭᠰᠠᠨ ᠬᠡᠷᠡᠭ ᠶᠠᠪᠤᠳᠠᠯ ᠪᠣᠯ ᠪᠦᠷ ᠦᠨᠡᠨ ᠮᠠᠭᠠᠳ᠃ ᠨᠠᠳᠠ ᠳᠠᠬᠢᠨ ᠮᠠᠷᠭᠤᠵᠤ ᠬᠤᠪᠢᠷᠠᠭᠤᠯᠬᠤ ᠭᠠᠵᠠᠷ ᠠᠯᠠᠭᠠ᠃ ᠥᠨᠥᠳᠥᠷ ᠴᠠᠭᠠᠵᠠ ᠶ᠋ᠢᠨ ᠲᠠᠯᠠᠪᠠᠢ ᠳ᠋ᠤ᠌ ᠪᠢ ᠠᠶᠤᠬᠤ ᠳ᠋ᠠᠭᠠᠨ ᠮᠡᠳᠡᠷᠡᠯ ᠢ᠋ᠶ᠋ᠡᠨ ᠠᠯᠳᠠᠭᠠᠳ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠬᠢᠯᠢᠰ ᠭᠡᠮᠡᠨ ᠬᠠᠰᠬᠢᠷᠴᠢᠬᠠᠭᠰᠠᠨ ᠪᠣᠯᠤᠯᠲᠠᠢ᠃ ᠪᠢ ᠭᠡᠵᠦ ᠦᠨᠡᠬᠡᠷ ᠴᠦ᠍ ᠲᠠᠤᠯᠠᠢ ᠶ᠋ᠢᠨ ᠰᠥᠰᠥ ᠲᠡᠢ ᠠᠮᠢᠲᠠᠨ᠂ ᠣᠳᠣ ᠪᠢ ᠡᠭᠦᠨ ᠳᠦ ᠪᠡᠨ ᠰᠦᠷᠡᠬᠡᠢ ᠭᠡᠮᠰᠢᠨ ᠬᠠᠷᠠᠮᠰᠠᠵᠤ ᠪᠠᠢᠨᠠ᠃ ᠡᠨᠡ ᠳᠡᠯᠢᠮ ᠳᠦ ᠪᠡᠨ ᠲᠠ ᠨᠠᠷ ᠲᠤ᠌ ᠬᠦᠰᠡᠬᠦ ᠨᠢ ᠨᠠᠳᠠ ᠠᠷᠠᠳ ᠤ᠋ᠨ ᠳᠡᠭᠡᠳᠦ ᠵᠡᠷᠭᠡ ᠶ᠋ᠢᠨ ᠰᠢᠭᠦᠬᠦ ᠬᠣᠷᠢᠶᠠᠨ ᠤ᠋ ᠰᠢᠭᠦᠨ ᠲᠠᠰᠤᠯᠤᠯᠲᠠ ᠶ᠋ᠢ ᠦᠳᠲᠡᠷ ᠲᠦᠷᠭᠡᠨ ᠨᠥᠬᠥᠨ ᠬᠡᠷᠡᠭᠵᠢᠭᠦᠯᠬᠦ ᠪᠣᠯᠪᠠ ᠤᠤ?
ᠪᠣᠯᠤᠷᠴᠠᠭᠠᠨ᠂ ᠴᠢᠩᠭᠠ ᠲᠥᠪᠯᠡᠭᠦᠨ ᠰᠢᠭᠦᠬᠦ ᠲᠠᠢᠰᠠᠨ ᠤ᠋ ᠡᠮᠦᠨᠡ᠂ ᠤᠤᠯ ᠬᠡᠷᠡᠭ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠳᠠᠬᠢᠨ ᠨᠢᠭᠡ ᠤᠳᠠᠭᠠ ᠨᠠᠷᠢᠨ ᠲᠣᠳᠣᠷᠬᠠᠢ ᠲᠤᠰᠢᠶᠠᠬᠤ ᠶ᠋ᠢ ᠱᠠᠭᠠᠷᠳᠠᠭᠰᠠᠨ ᠲᠦᠪᠰᠢᠨ ᠦ᠌ ᠬᠠᠷᠢᠭᠤ ᠳ᠋ᠤ᠌ ᠢᠩᠭᠢᠵᠦ ᠯᠡ ᠪᠡᠶᠡ ᠪᠡᠨ ᠵᠢᠮᠡᠯᠡᠨ᠂ ᠰᠢᠢᠳᠬᠡᠯ ᠢ᠋ᠶ᠋ᠡᠨ ᠬᠤᠷᠳᠤᠨ ᠣᠯᠬᠤ ᠬᠦᠰᠡᠯ ᠱᠠᠭᠠᠷᠳᠠᠯᠭᠠ ᠪᠠᠨ ᠲᠠᠯᠪᠢᠵᠠᠢ᠃
ᠪᠣᠯᠤᠷᠴᠠᠭᠠᠨ ᠥᠩᠭᠡᠷᠡᠦ ᠠᠶᠤᠵᠤ ᠰᠣᠴᠢᠭᠰᠠᠨ ᠠ᠋ᠴᠠ ᠪᠣᠯᠤᠭᠰᠠᠨ ᠶᠤᠮ ᠤᠤ? ᠡᠰᠡᠪᠡᠯ ᠰᠠᠶᠢᠬᠠᠨ ᠰᠡᠷᠭᠦᠭᠡᠳ ᠰᠡᠷᠡᠯᠲᠡ ᠮᠡᠳᠡᠷᠡᠯ ᠨᠢ ᠭᠦᠢᠴᠡᠳ ᠰᠠᠢᠵᠢᠷᠠᠵᠤ ᠴᠢᠳᠠᠭᠠᠳᠤᠢ ᠶᠤᠮ ᠤᠤ? ᠴᠢᠷᠠᠢ ᠶ᠋ᠢᠨ ᠬᠢᠨᠢ ᠪᠤᠯᠴᠢᠩ ᠲᠠᠲᠠᠪᠠᠯᠵᠠᠨ ᠬᠥᠳᠡᠯᠵᠦ᠂ ᠤᠷᠤᠭᠤᠯ ᠨᠢ ᠳᠠᠬᠢᠨ ᠳᠠᠬᠢᠨ ᠴᠡᠴᠡᠷᠬᠢᠯᠡᠵᠦ ᠪᠠᠢᠬᠤ ᠨᠢ ᠢᠯᠡᠬᠡᠨ ᠮᠡᠳᠡᠭᠳᠡᠨᠡ᠃
ᠬᠤᠵᠢᠢᠵᠤ ᠴᠠᠢᠷᠠᠭᠰᠠᠨ ᠴᠢᠷᠠᠢ ᠳᠡᠭᠡᠷᠡᠬᠢ ᠬᠣᠶᠠᠷ ᠨᠢᠳᠦᠨ ᠳ᠋ᠦ᠍ᠨᠢ ᠬᠡᠳᠦᠨ ᠴᠠᠭ ᠤ᠋ᠨ ᠡᠮᠦᠨᠡ ᠪᠣᠢ ᠪᠣᠯᠤᠭᠰᠠᠨ ᠰᠦᠷᠳᠡᠯ ᠡᠮᠢᠶᠡᠯ ᠦ᠋ᠨ ᠬᠠᠷᠠᠴᠠ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠠᠢᠬᠤ ᠰᠢᠭ᠋ ᠪᠠᠢᠯᠠ᠃
ᠲᠦᠪᠰᠢᠨ ᠭᠤᠸᠠᠢ᠂ ᠪᠣᠯᠤᠷᠴᠠᠭᠠᠨ ᠤ᠋ ᠤᠤᠯ ᠠᠮᠠᠨ ᠥᠴᠢᠭ ᠢ᠋ᠶ᠋ᠡᠨ ᠪᠠᠷᠢᠮᠲᠠᠯᠠᠨ ᠥᠴᠦᠬᠡᠨ ᠴᠦ᠍ ᠬᠤᠪᠢᠷᠠᠯᠲᠠ ᠡᠷᠭᠢᠯᠲᠡ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠠᠭᠤᠷᠯᠠᠭᠰᠠᠨ ᠦᠭᠡᠢ᠃ ᠨᠡᠩ ᠴᠢᠨᠠᠭᠰᠢ ᠵᠠᠩᠨᠠᠨ ᠰᠦᠷᠳᠡᠭᠦᠯᠵᠦ ᠠᠶᠤᠯᠭᠠᠭᠰᠠᠨ ᠦᠭᠡᠢ᠃
ᠬᠥᠮᠦᠰ ᠦ᠋ᠨ ᠬᠡᠯᠡᠬᠦ ᠪᠡᠷ ᠬᠠᠤᠯᠢ ᠶ᠋ᠢᠨ ᠠᠵᠢᠯᠲᠠᠳ ᠤ᠋ᠨ ᠵᠠᠩ ᠠᠭᠠᠰᠢ ᠬᠡᠳᠡᠷ ᠲᠣᠭᠰᠢᠨ ᠪᠠᠢᠳᠠᠭ ᠪᠥᠭᠡᠳ ᠬᠡᠯᠡᠭᠰᠡᠨ ᠢ᠋ᠶ᠋ᠡᠷ ᠨᠢ ᠬᠢᠬᠦ ᠦᠭᠡᠢ ᠪᠣᠯ ᠠᠭᠤᠷᠯᠠᠨ ᠵᠠᠩᠳᠤᠷᠬᠤ ᠨᠢ ᠬᠠᠮᠲᠤ ᠶ᠋ᠢᠨ ᠠᠭᠠᠰᠢ᠂ ᠲᠤᠬᠠᠢᠯᠠᠭᠰᠠᠨ ᠠᠵᠢᠯ ᠤ᠋ᠨ ᠬᠢᠨᠢ ᠬᠡᠪᠰᠢᠭᠰᠡᠨ ᠵᠠᠩᠰᠢᠯ ᠭᠡᠳᠡᠭ᠃
ᠭᠡᠲᠡᠯᠡ ᠲᠦᠪᠰᠢᠨ ᠡᠢᠮᠦ ᠦᠭᠡᠢ ᠠᠵᠢ᠃
ᠶᠡᠷᠦ ᠶ᠋ᠢᠨ ᠴᠠᠭ ᠲᠤ᠌ ᠲᠡᠷᠡ ᠥᠪᠡᠷ ᠦ᠋ᠨ ᠠᠵᠢᠯ ᠤ᠋ᠨ ᠲᠠᠯᠠ ᠪᠠᠷ ᠬᠢ ᠠᠷᠭᠠ ᠮᠠᠢᠭ ᠣᠪᠣᠷ ᠰᠤᠷᠲᠠᠯ ᠢ᠋ᠶ᠋ᠠᠨ ᠮᠠᠰᠢ ᠠᠩᠬᠠᠷᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ᠂ ᠪᠤᠰᠤᠳ ᠠᠵᠢᠯᠲᠠᠨ ᠤ᠋ ᠪᠣᠯᠪᠠᠰᠤᠨ ᠪᠤᠰᠤ ᠪᠦᠳᠦᠭᠦᠯᠢᠭ ᠠᠵᠢᠯᠯᠠᠭᠠ ᠶ᠋ᠢ ᠨᠢ ᠴᠦ᠍ ᠠᠩᠬᠠᠷᠤᠨ ᠬᠡᠯᠡᠵᠦ ᠵᠠᠯᠠᠷᠠᠭᠤᠯᠳᠠᠭ ᠪᠢᠯᠡ᠃
ᠰᠦᠷᠳᠡᠭᠦᠯᠦᠯ ᠡᠴᠡ ᠬᠠᠭᠤᠷᠮᠠᠭ ᠥᠴᠢᠭ ᠭᠠᠷᠴᠤ ᠴᠦ᠍ ᠮᠡᠳᠡᠨᠡ ᠭᠡᠵᠦ ᠦᠷᠭᠦᠯᠵᠢ ᠰᠡᠷᠡᠮᠵᠢᠯᠡᠨ ᠠᠵᠢᠯ ᠢ᠋ ᠶᠡᠬᠡ ᠯᠠᠪᠳᠠᠭᠤᠨ ᠪᠣᠯᠭᠣᠮᠵᠢᠲᠠᠢ ᠬᠢᠳᠡᠭ ᠨᠢ ᠲᠡᠭᠦᠨ ᠦ᠌ ᠳᠠᠳᠬᠠᠯ ᠪᠣᠯᠤᠭᠰᠠᠨ ᠪᠠᠢᠨᠠ᠃
ᠥᠨᠥᠳᠥᠷ ᠴᠦ᠍ ᠠᠳᠠᠯᠢᠬᠠᠨ᠂ ᠨᠢᠭᠤᠷ ᠲᠤᠨᠢ ᠦᠯᠦ ᠮᠡᠳᠡᠭ ᠢᠨᠢᠶᠡᠮᠰᠦᠭᠯᠡᠯ ᠲᠣᠳᠣᠷᠠᠭᠠᠳ ᠠᠭᠱᠠᠨ ᠵᠠᠭᠤᠷᠠ ᠠᠷᠢᠯᠵᠤ᠂ ᠬᠠᠷᠢᠨ ᠲᠠᠷᠢᠬᠢᠨ ᠳ᠋ᠤᠨᠢ ᠨᠢᠭᠡ ᠵᠦᠢᠯ ᠦ᠋ᠨ ᠪᠡᠶᠡ ᠪᠡᠨ ᠢᠲᠡᠭᠡᠬᠦ ᠪᠣᠳᠣᠯ ᠬᠢᠷᠳ᠋ᠬᠢᠨ ᠣᠷᠣᠵᠤ ᠢᠷᠡᠪᠡ᠃ ᠲᠡᠷᠡ ᠡᠨᠡ ᠬᠦ᠌ ᠰᠣᠨᠢᠬᠠᠨ ᠪᠣᠳᠣᠯ ᠤ᠋ᠨ ᠢ᠋ᠶ᠋ᠠᠨ ᠡᠰᠢ ᠪᠠᠷᠢᠮᠲᠠ ᠶ᠋ᠢ ᠮᠡᠳᠡᠬᠦ ᠦᠭᠡᠢ᠂ ᠶᠠᠭᠤᠨ ᠠ᠋ᠴᠠ ᠪᠣᠯᠤᠭᠰᠠᠨ ᠢ᠋ ᠥᠪᠡᠷ ᠢ᠋ᠶ᠋ᠡᠨ ᠲᠣᠳᠣᠷᠬᠠᠢ ᠬᠡᠯᠡᠵᠦ ᠭᠠᠷᠬᠤ ᠦᠭᠡᠢ ᠪᠠᠢᠯᠠ᠃
ᠲᠡᠭᠦᠨ ᠦ᠌ ᠪᠦᠬᠦ ᠰᠡᠳᠬᠢᠯᠭᠡ ᠶ᠋ᠢ ᠨᠢᠭᠡ ᠵᠦᠢᠯ ᠦ᠋ᠨ ᠠᠶᠠᠨᠳᠠᠭᠠᠨ ᠪᠣᠢ ᠪᠣᠯᠤᠭᠰᠠᠨ ᠠᠳᠠᠯᠢᠳᠬᠠᠨ ᠲᠥᠰᠥᠪᠯᠡᠬᠦ ᠪᠣᠳᠣᠯ ᠡᠵᠡᠮᠳᠡᠵᠡᠢ᠃ ᠣᠯᠠᠩᠬᠢ ᠠᠯᠠᠭᠳᠠᠬᠤ ᠶᠠᠯᠠᠲᠠᠨ ᠲᠡᠢᠮᠦ ᠲᠦᠮᠡᠨ ᠲᠦᠭᠰᠢᠭᠦᠷᠢᠲᠦ ᠴᠠᠭ ᠮᠥᠴᠡ ᠳ᠋ᠦ᠍ ᠪᠠᠷᠤᠭ ᠪᠦᠷ ᠪᠣᠳᠣᠯ ᠰᠡᠳᠬᠢᠯ ᠨᠢ ᠤᠷᠢᠳᠠᠪᠡᠷ ᠦᠬᠦᠵᠦ ᠮᠢᠨᠴᠦᠭᠦᠷᠡᠭᠡᠳ ᠳᠠᠷᠠᠭᠠ ᠨᠢ ᠪᠡᠶᠡ ᠶ᠋ᠢᠨ ᠡᠷᠬᠡᠲᠡᠨ ᠨᠢ ᠬᠠᠷᠪᠤᠭᠳᠠᠳᠠᠭ᠃ ᠣᠨᠴᠠᠭᠠᠢ ᠰᠢᠯᠲᠠᠭᠠᠨ ᠲᠣᠬᠢᠶᠠᠯᠳᠤᠭᠠᠳ ᠵᠠᠷᠢᠮ ᠶᠠᠯᠠᠲᠠᠨ ᠴᠠᠭᠠᠵᠠ ᠶ᠋ᠢᠨ ᠲᠠᠯᠠᠪᠠᠢ ᠠ᠋ᠴᠠ ᠠᠮᠢᠳᠤ ᠬᠠᠷᠢᠭᠰᠠᠨ ᠴᠦ᠍ ᠪᠠᠷᠤᠭ ᠪᠦᠷ ᠮᠡᠳᠡᠷᠡᠯ ᠦ᠋ᠨ ᠴᠢᠳᠠᠪᠤᠷᠢ ᠪᠠᠨ ᠠᠯᠳᠠᠭᠠᠳ ᠨᠠᠰᠤᠨ ᠤ᠋ ᠭᠠᠯᠵᠠᠭᠤ ᠰᠣᠯᠢᠶᠠᠲᠤ ᠪᠣᠯᠳᠠᠭ᠃
ᠭᠡᠲᠡᠯᠡ ᠡᠨᠡ ᠬᠦ᠌ ᠢᠳᠡᠷ ᠨᠠᠰᠤᠨ ᠤ᠋ ᠡᠮᠴᠢ ᠪᠣᠯᠤᠷᠴᠠᠭᠠᠨ ᠠᠮᠢ ᠨᠠᠰᠤ ᠪᠠᠨ ᠬᠢᠯᠭᠠᠰᠤᠨ ᠳ᠋ᠤ᠌ ᠡᠯᠭᠦᠭᠰᠡᠨ ᠡᠴᠦᠰ ᠦ᠋ᠨ ᠰᠧᠺᠦ᠋ᠨ᠋ᠳ᠋ ᠲᠦ᠍ ᠢᠯᠡ ᠲᠣᠳᠣᠷᠬᠠᠢ᠂ ᠳᠡᠰ ᠳᠠᠷᠠᠭᠠ ᠲᠠᠢ ᠬᠢᠯᠢᠰ ᠭᠡᠵᠦ ᠬᠠᠰᠬᠢᠷᠤᠭᠠᠳ ᠣᠳᠣ ᠴᠦ᠍ ᠰᠠᠷᠠᠯ ᠮᠡᠳᠡᠷᠡᠯ᠂ ᠪᠣᠳᠣᠯ ᠰᠠᠨᠠᠯ ᠤ᠋ᠨ ᠵᠦᠭ ᠴᠢᠭ ᠢ᠋ᠶ᠋ᠡᠨ ᠠᠯᠳᠠᠭᠠᠳᠤᠢ ᠪᠠᠢᠬᠤ ᠨᠢ ᠲᠦᠪᠰᠢᠨ ᠦ᠌ ᠪᠡᠶᠡ ᠪᠡᠨ ᠢᠲᠡᠭᠡᠬᠦ ᠪᠣᠳᠣᠯ ᠢ᠋ ᠤᠯᠠᠮ ᠯᠠᠪᠰᠢᠷᠠᠭᠤᠯᠤᠭᠰᠠᠨ ᠪᠠᠢᠯᠠ᠃ ᠲᠡᠷᠡ ᠨᠡᠯᠢᠶᠡᠳ ᠳᠤᠭᠤᠢ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠴᠢᠷᠠᠢ ᠪᠠᠨ ᠲᠣᠢᠪ ᠪᠣᠯᠭᠠᠵᠤ᠄
— ᠪᠣᠯᠤᠷᠴᠠᠭᠠᠨ᠂ ᠴᠢ ᠴᠠᠭᠠᠵᠠ ᠶ᠋ᠢᠨ ᠭᠠᠵᠠᠷ ᠠ᠋ᠴᠠ ᠨᠢᠭᠡᠨᠲᠡ ᠪᠤᠴᠠᠨ ᠢᠷᠡᠭᠰᠡᠨ ᠲᠤᠯᠠ ᠣᠳᠣ ᠡᠷᠡᠭᠦᠦ ᠶ᠋ᠢᠨ ᠬᠠᠤᠯᠢ ᠶ᠋ᠢᠨ ᠬᠠᠮᠢᠶᠠ ᠪᠦᠬᠦᠢ ᠲᠣᠭᠲᠠᠭᠠᠯ ᠵᠤᠷᠪᠤᠰ ᠢ᠋ᠶ᠋ᠠᠷ ᠤᠤᠯ ᠬᠡᠷᠡᠭ ᠢ᠋ ᠴᠢᠨᠢ ᠳᠠᠬᠢᠨ ᠨᠢᠭᠡ ᠤᠳᠠᠭᠠ ᠮᠥᠷᠳᠡᠨ ᠪᠠᠢᠴᠠᠭᠠᠬᠤ ᠪᠠᠷ ᠪᠢᠳᠡ ᠵᠣᠷᠢᠭ ᠰᠢᠭᠤᠳᠴᠠᠢ᠃ ᠡᠢᠮᠦ ᠡᠴᠡ ᠴᠢ ᠪᠢᠳᠡᠨ ᠦ᠌ ᠰᠢᠭᠦᠯᠲᠡ ᠳ᠋ᠦ᠍ ᠡᠬᠢᠨ ᠡᠴᠡ ᠨᠢ ᠠᠳᠠᠭ ᠲᠤᠨᠢ ᠲᠤᠯᠲᠠᠯᠠ ᠤᠤᠯ ᠬᠡᠷᠡᠭ ᠢ᠋ᠶ᠋ᠡᠨ ᠲᠠᠬᠢᠵᠤ ᠨᠢᠭᠡ ᠤᠳᠠᠭᠠ ᠦᠨᠡᠨ ᠰᠠᠨᠠᠭᠠᠨ ᠠ᠋ᠴᠠ ᠪᠠᠨ ᠲᠤᠰᠢᠶᠠᠬᠤ ᠬᠡᠷᠡᠭᠲᠡᠢ ᠭᠡᠪᠡ᠃
ᠪᠣᠯᠤᠷᠴᠠᠭᠠᠨ ᠲᠣᠯᠣᠭᠠᠢ ᠪᠠᠨ ᠲᠣᠬᠢᠰᠬᠢᠭᠠᠳ᠄
— ᠲᠤᠰᠢᠶᠠᠬᠤ ᠳ᠋ᠤ᠌ ᠶᠠᠮᠠᠷ ᠯᠠ ᠪᠡᠷᠬᠡ ᠪᠠᠢᠨᠠ ᠳᠠ᠃ ᠭᠡᠲᠡᠯᠡ ᠡᠨᠡ ᠨᠢ ᠵᠥᠪᠬᠡᠨ ᠤᠤᠯ ᠲᠤᠰᠢᠶᠠᠯᠲᠠ ᠪᠠᠨ ᠨᠤᠷᠰᠢᠵᠤ ᠲᠠᠨᠠᠷ ᠤ᠋ᠨ ᠴᠠᠭ ᠢ᠋ ᠪᠠᠷᠠᠵᠤ᠂ ᠠᠵᠢᠯ ᠢ᠋ ᠨᠥᠯᠥᠭᠡᠯᠡᠬᠦ ᠮᠥᠷᠲᠡᠭᠡᠨ ᠪᠢ ᠴᠦ᠍ ᠢᠯᠡᠭᠦᠦ ᠬᠡᠳᠦᠨ ᠡᠳᠦᠷ ᠵᠣᠪᠠᠯᠠᠩ ᠠᠮᠰᠠᠬᠤ ᠠ᠋ᠴᠠ ᠥᠭᠡᠷᠡ ᠶᠠᠮᠠᠷ ᠴᠦ᠍ ᠤᠳᠬᠠ ᠠᠭᠤᠯᠭᠠ ᠦᠭᠡᠢ ᠶᠦᠮ ᠭᠡᠴᠢᠬᠡᠭᠡᠳ ᠲᠣᠯᠣᠭᠠᠢ ᠪᠠᠨ ᠤᠨᠵᠢᠭᠤᠯᠤᠯᠠ᠃
ᠰᠢᠭᠦᠯᠲᠡ ᠡᠬᠢᠯᠡᠯᠡ᠃
ᠡᠢᠮᠦ ᠰᠢᠭᠦᠯᠲᠡ ᠲᠦᠪᠰᠢᠨ ᠦ᠌ ᠨᠢᠭᠡ ᠨᠠᠰᠤᠨ ᠳ᠋ᠤ᠌ ᠴᠦ᠍ ᠴᠥᠭᠡᠨ ᠲᠣᠬᠢᠶᠠᠯᠳᠤᠵᠤ ᠪᠠᠢᠭᠠ ᠶᠤᠮ᠃ ᠭᠡᠲᠡᠯᠡ ᠲᠡᠷᠡ ᠶᠡᠷᠦᠳᠡ ᠶ᠋ᠢᠨ ᠬᠢ ᠰᠢᠭ ᠢ᠋ᠶ᠋ᠡᠨ ᠲᠡᠭᠡᠵᠦ ᠣᠬᠣᠷ ᠲᠣᠳᠣ᠂ ᠡᠮᠬᠢ ᠳᠠᠷᠠᠭᠠ ᠲᠠᠢ ᠠᠰᠠᠭᠤᠵᠤ ᠰᠢᠭᠦᠭᠰᠡᠨ ᠦᠭᠡᠢ᠃
ᠬᠠᠷᠢᠨ ᠭᠡᠷ ᠪᠦᠯᠢ ᠶ᠋ᠢᠨ ᠬᠢᠨ ᠬᠣᠭᠣᠷᠣᠨᠳᠣ ᠪᠠᠨ ᠵᠣᠭᠣᠭ ᠳᠡᠯᠭᠡᠬᠦ ᠰᠢᠭ ᠲᠡᠭᠦᠨ ᠦ᠌ ᠤᠷᠤᠭ ᠤ᠋ᠨ ᠪᠦᠬᠦ ᠶᠠᠪᠤᠴᠠ ᠥᠩᠭᠡᠷᠡᠯᠲᠡ ᠶ᠋ᠢ ᠨᠠᠷᠢᠨ ᠭᠡᠭᠴᠢ ᠣᠢᠯᠠᠭᠠᠬᠤ ᠳ᠋ᠤ᠌᠂ ᠬᠠᠤᠯᠢ ᠶ᠋ᠢᠨ ᠪᠢᠴᠢᠭᠡᠴᠢ ᠬᠥᠬᠡᠲᠤᠯᠢ ᠲᠣᠯᠣᠭᠠᠢ ᠥᠨᠳᠡᠢᠯ ᠦᠭᠡᠢ ᠪᠡᠷ ᠳᠣᠪᠲᠣᠯᠭᠠᠨᠠ᠃
ᠠᠷᠪᠠᠨ ᠳᠣᠯᠣᠭᠠᠨ ᠵᠢᠯ ᠦ᠋ᠨ ᠡᠮᠦᠨᠡ ᠠᠵᠢᠯ ᠳ᠋ᠠᠭᠠᠨ ᠡᠷᠳᠡᠮ ᠴᠢᠳᠠᠪᠤᠷᠢ ᠪᠠᠷ ᠢ᠋ᠶ᠋ᠠᠨ ᠠᠩᠬᠠ ᠤᠳᠠᠭᠠ ᠴᠣᠯᠭᠣᠷᠠᠭᠰᠠᠨ ᠪᠣᠯᠤᠷᠴᠠᠭᠠᠨ ᠮᠥᠨ ᠲᠡᠭᠦᠨ ᠲᠡᠢ ᠠᠵᠢᠯ ᠨᠢᠭᠡᠲᠡᠢ ᠭᠢᠯᠠᠷᠠᠭᠤᠯᠵᠤ ᠶᠠᠪᠤᠭᠠ ᠵᠠᠯᠠᠭᠤ ᠬᠡᠦᠬᠡᠨ ᠦᠵᠡᠰᠬᠦᠯᠡᠩ ᠳ᠋ᠦ᠍ ᠰᠡᠳᠬᠢᠯ ᠲᠡᠢ ᠪᠣᠯᠵᠤ᠂ ᠬᠠᠭᠠᠰ ᠵᠢᠯ ᠬᠢᠷᠢᠲᠡᠢ ᠰᠢᠷᠢᠯᠳᠦᠨ ᠣᠷᠢᠶᠠᠯᠳᠤᠭᠰᠠᠨ ᠢᠨᠠᠭ ᠳᠤᠷᠠᠯᠠᠯ ᠤ᠋ᠨ ᠱᠠᠲᠤ ᠶ᠋ᠢ ᠥᠩᠭᠡᠷᠡᠭᠡᠭᠡᠳ ᠤᠷᠤᠭ ᠪᠠᠷᠢᠯᠳᠤᠵᠤ ᠪᠢᠯᠡ᠃
ᠢᠩᠭᠢᠭᠡᠳ ᠯᠡ ᠠᠵᠢᠯ ᠦᠢᠯᠡᠰ ᠦ᠋ᠨ ᠲᠠᠯᠠ ᠪᠠᠷ ᠦᠭᠡ ᠬᠡᠯᠡ ᠨᠢᠭᠡᠲᠡᠢ ᠪᠣᠯᠵᠤ ᠠᠵᠤ ᠠᠮᠢᠳᠤᠷᠠᠯ ᠤ᠋ᠨ ᠲᠠᠯᠠ ᠪᠠᠷ ᠠᠷᠪᠠᠨ ᠬᠤᠪᠢ ᠵᠣᠯ ᠵᠢᠷᠭᠠᠯᠲᠠᠢ ᠬᠠᠯᠠᠭᠤᠨ ᠳᠤᠯᠠᠭᠠᠨ ᠭᠡᠷ ᠪᠦᠯᠢ ᠪᠡᠨ ᠡᠬᠢᠯᠡᠵᠦ ᠪᠠᠢᠭᠤᠯᠵᠠᠢ᠃ ᠡᠢᠮᠦ ᠵᠠᠮ ᠱᠤᠭᠤᠮ ᠢ᠋ᠶ᠋ᠠᠷ ᠠᠢᠯ ᠪᠣᠯᠵᠤ ᠳᠡᠷᠡ ᠨᠢᠭᠡᠳᠬᠡᠭᠡᠳ ᠵᠢᠯ ᠦ᠋ᠨ ᠣᠢ ᠠᠷᠠᠢᠬᠠᠨ ᠪᠣᠯᠤᠭᠠᠳᠤᠢ ᠪᠠᠷ ᠦᠵᠡᠰᠬᠦᠯᠡᠩ ᠵᠢᠷᠮᠦᠰᠦᠨ ᠪᠣᠯᠵᠠᠢ᠃ ᠵᠠᠯᠠᠭᠤ ᠡᠮᠴᠢ ᠪᠣᠯᠤᠷᠴᠠᠭᠠᠨ ᠤ᠋ ᠬᠦᠦ ᠠᠪᠬᠤ ᠭᠡᠰᠡᠨ ᠰᠡᠳᠬᠢᠯ ᠨᠢ ᠢᠯᠡᠭᠦᠦ ᠨᠢᠭᠡ ᠬᠤᠪᠢ ᠬᠠᠢᠷᠠ ᠳᠤᠷᠠᠯᠠᠯ ᠢ᠋ ᠣᠷᠭᠢᠯᠤᠭᠤᠯᠤᠨ ᠲᠣᠭᠲᠠᠭᠤᠨ ᠳᠥᠯᠭᠡᠬᠡᠨ ᠦᠵᠡᠰᠬᠦᠯᠡᠩ ᠢ᠋ ᠡᠨᠡᠷᠢᠬᠦ ᠰᠡᠳᠬᠢᠯ ᠴᠠᠭᠠᠨᠠ ᠠ᠋ᠴᠠ ᠪᠠᠨ ᠤᠨᠳᠤᠷᠤᠭᠰᠠᠭᠠᠷ ᠪᠠᠢᠯᠠ᠃
ᠠᠷᠪᠠᠨ ᠰᠠᠷᠠ ᠶ᠋ᠢᠨ ᠨᠢᠭᠤᠷ ᠦᠵᠡᠬᠦ ᠳ᠋ᠦ᠍ ᠪᠣᠯᠤᠷᠴᠠᠭᠠᠨ ᠤ᠋ ᠦᠷᠡ ᠡᠬᠡ ᠶ᠋ᠢᠨ ᠬᠡᠪᠡᠯᠢ ᠡᠴᠡ ᠪᠡᠨ ᠴᠢᠷᠠᠯᠠᠨ ᠤᠨᠠᠵᠠᠢ᠃
ᠭᠡᠪᠡᠴᠦ ᠲᠣᠭᠣᠰᠣᠲᠤ ᠬᠣᠷᠸᠠ ᠪᠢᠴᠢᠬᠠᠨ ᠠᠮᠢᠲᠠᠨ ᠤ᠋ ᠬᠥᠮᠦᠨ ᠪᠣᠯᠬᠤ ᠬᠤᠪᠢ ᠶ᠋ᠢ ᠨᠢ ᠪᠠᠭᠲᠠᠭᠠᠭᠰᠠᠨ ᠦᠭᠡᠢ ᠪᠣᠯᠬᠣᠷ ᠭᠤᠷᠪᠠᠳᠤᠭᠠᠷ ᠡᠳᠦᠷ ᠲᠡᠭᠡᠨ ᠥᠭᠡᠷᠡ ᠲᠥᠷᠥᠯ ᠦ᠋ᠨ ᠡᠭᠦᠳᠡᠨ ᠳ᠋ᠦ᠍ ᠶᠠᠪᠤᠵᠠᠢ᠃
ᠭᠠᠭᠴᠠ ᠦᠯᠡᠳᠡᠭᠰᠡᠨ ᠬᠠᠷᠠᠮᠰᠠᠯᠲᠠᠢ ᠤᠴᠢᠷ ᠭᠡᠪᠡᠯ ᠡᠬᠡ ᠳ᠋ᠦ᠍ᠨᠢ ᠲᠥᠷᠥᠬᠦ ᠲᠡᠯᠡᠬᠦ ᠶ᠋ᠢᠨ ᠵᠣᠪᠠᠯ ᠳᠠᠩᠴᠤ ᠬᠠᠯᠠᠲᠠᠢ ᠲᠤᠰᠤᠭᠰᠠᠨ ᠠ᠋ᠴᠠ ᠰᠠᠪᠠ ᠬᠡᠪᠡᠯᠢ ᠨᠢ ᠡᠪᠳᠡᠷᠡᠵᠦ᠂ ᠡᠮᠡᠭᠲᠡᠢ ᠶ᠋ᠢᠨ ᠡᠪᠡᠳᠴᠢᠨ ᠪᠣᠯᠵᠤ ᠬᠤᠪᠢᠷᠠᠭᠠᠳ ᠲᠠᠬᠢᠵᠤ ᠬᠡᠦᠬᠡᠳ ᠠᠪᠬᠤ ᠴᠢᠳᠠᠪᠤᠷᠢ ᠪᠠᠨ ᠥᠨᠢᠳᠡ ᠠᠯᠳᠠᠭᠰᠠᠨ ᠪᠢᠯᠡ᠃
ᠣᠯᠤᠭᠰᠠᠨ ᠦᠷᠡ ᠪᠡᠨ ᠠᠯᠳᠠᠭᠰᠠᠨ ᠮᠥᠷᠲᠡᠭᠡᠨ ᠲᠠᠬᠢᠵᠤ ᠦᠷᠡ ᠠᠪᠴᠤ ᠴᠢᠳᠠᠬᠤ ᠦᠭᠡᠢ ᠪᠡᠨ ᠪᠣᠳᠣᠬᠤ ᠪᠣᠯᠭᠠᠨ ᠳ᠋ᠤ᠌ ᠦᠵᠡᠰᠬᠦᠯᠡᠩ ᠵᠣᠪᠠᠵᠤ ᠭᠤᠨᠢᠬᠤ ᠳ᠋ᠠᠭᠠᠨ ᠨᠢᠳᠦ ᠪᠡᠨ ᠬᠠᠪᠤᠳᠲᠠᠯᠠ ᠤᠬᠢᠯᠠᠳᠠᠭ ᠪᠠᠢᠯᠠ᠃
ᠭᠡᠰᠡᠨ ᠴᠦ᠍ ᠡᠨᠡ ᠶᠠᠪᠤᠳᠠᠯ ᠤ᠋ᠨ ᠤᠷᠰᠢᠭ ᠢ᠋ᠶ᠋ᠠᠷ ᠭᠡᠷ ᠪᠦᠯᠢ ᠶ᠋ᠢᠨ ᠡᠶᠡ ᠨᠠᠢᠷ ᠠᠷᠠᠢ ᠴᠦ᠍ ᠡᠪᠳᠡᠷᠡᠭᠡᠳᠦᠢ ᠪᠠᠢᠯᠠ᠃
ᠪᠣᠯᠤᠷᠴᠠᠭᠠᠨ ᠬᠡᠳᠦᠢ ᠪᠡᠷ ᠡᠮᠡ ᠪᠡᠨ ᠢᠯᠡᠷᠬᠡᠢ ᠠᠮᠢᠯᠠᠵᠤ ᠡᠨᠡᠷᠢᠬᠦ ᠨᠢ ᠤᠤᠯ ᠤ᠋ᠨ ᠬᠢ ᠳ᠋ᠡᠭᠡᠨ ᠬᠦᠷᠬᠦ ᠦᠭᠡᠢ ᠴᠦ᠍ ᠠᠯᠢ ᠣᠯᠠᠨ ᠳᠣᠲᠣᠭᠠᠳᠤ ᠲᠠᠮᠢᠷ ᠲᠠᠢ ᠡᠷᠡ ᠤᠯᠤᠰ ᠤ᠋ᠨ ᠠᠳᠠᠯᠢ ᠬᠠᠯᠠᠭᠤᠨ ᠬᠦᠢᠲᠡᠨ ᠨᠢ ᠭᠠᠳᠠᠨᠠ ᠪᠠᠨ ᠮᠡᠳᠡᠭᠳᠡᠬᠦ ᠦᠭᠡᠢ ᠪᠠᠢᠯᠠ᠃
ᠦᠵᠡᠰᠬᠦᠯᠡᠩ ᠴᠦ᠍ ᠰᠡᠳᠬᠢᠯ ᠦ᠋ᠨ ᠰᠦ ᠪᠡᠷ ᠢ᠋ᠶ᠋ᠡᠨ ᠪᠣᠯᠤᠷᠴᠠᠭᠠᠨ ᠳ᠋ᠤ᠌ ᠬᠠᠨᠳᠤᠵᠤ᠂ ᠨᠥᠬᠥᠷ ᠮᠢᠨᠢ ᠢᠳᠡᠷ ᠪᠣᠯᠬᠤ ᠳᠣᠳᠣᠮ ᠨᠠᠮᠠ ᠶᠢ ᠪᠠᠨ ᠡᠶᠡᠷᠭᠦ ᠪᠠᠢᠯ ᠦᠭᠡᠢ ᠭᠡᠵᠦ ᠰᠡᠳᠬᠢᠯ ᠢ᠋ᠶ᠋ᠡᠨ ᠰᠠᠭᠠᠲᠠᠭᠤᠯᠵᠤ ᠰᠠᠭᠤᠵᠠᠢ᠃
ᠡᠳᠦᠷ ᠦ᠋ᠨ ᠤᠳᠠᠭᠠᠨ ᠳ᠋ᠤ᠌ ᠲᠡᠳᠡᠨ ᠦ᠌ ᠬᠠᠷᠢᠴᠠᠭᠠ ᠶᠡᠷᠦ ᠯᠡ ᠨᠢᠭᠡ ᠪᠢᠰᠢ ᠪᠣᠯᠬᠤ ᠳ᠋ᠤ᠌ ᠪᠣᠯᠤᠷᠴᠠᠭᠠᠨ ᠤ᠋ ᠰᠡᠳᠬᠢᠯ ᠳ᠋ᠡᠬᠢ ᠤᠭᠰᠠᠭᠠ ᠲᠥᠷᠥᠯ ᠦ᠋ᠨ ᠦᠷᠡ ᠦᠨᠳᠦᠰᠦ ᠲᠠᠰᠤᠷᠠᠬᠤ ᠳ᠋ᠤ᠌ ᠭᠤᠨᠢᠵᠤ ᠣᠢᠳᠬᠠᠷᠯᠠᠬᠤ ᠰᠡᠳᠬᠢᠯ ᠦ᠋ᠨ ᠲᠡᠭᠡᠭᠡᠷᠡ ᠪᠤᠳᠤᠯᠢᠶᠠᠨᠲᠤ ᠪᠣᠳᠣᠯ ᠨᠢ ᠡᠨᠡ ᠬᠣᠶᠠᠷ ᠤ᠋ᠨ ᠠᠮᠢᠳᠤᠷᠠᠯ ᠤ᠋ᠨ ᠰᠠᠢᠨ ᠰᠠᠢᠬᠠᠨ ᠢ᠋ ᠵᠠᠪᠰᠠᠷᠳᠠᠭᠤᠯᠵᠤ ᠪᠠᠢᠬᠤ ᠶ᠋ᠢ ᠬᠠᠮᠤᠭ ᠠᠩᠬᠠ ᠡᠮᠡᠭᠲᠡᠢ ᠬᠥᠮᠦᠨ ᠦ᠌ ᠭᠢᠷᠠᠬᠠᠢ ᠨᠢᠳᠦ᠂ ᠬᠡᠴᠡᠭᠦᠦ ᠰᠡᠳᠬᠢᠯ ᠢ᠋ᠶ᠋ᠡᠷ ᠣᠰᠣᠯ ᠦᠭᠡᠢ ᠮᠡᠳᠡᠭᠰᠡᠨ ᠬᠥᠮᠦᠨ ᠪᠣᠯ ᠶᠠᠷᠢᠶᠠᠨ ᠦᠭᠡᠢ ᠦᠵᠡᠰᠬᠦᠯᠡᠩ ᠯᠡ ᠶᠦᠮ᠃
ᠭᠤᠨᠢᠵᠤ ᠵᠣᠪᠠᠭᠠᠳ ᠴᠦ᠍ ᠬᠠᠮᠢᠭᠠ ᠬᠦᠷᠦᠨᠡ ᠳᠡ᠂ ᠦᠵᠡᠰᠬᠦᠯᠡᠩ ᠡᠷᠡ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠰᠡᠳᠬᠢᠯ ᠦ᠋ᠨ ᠳᠠᠷᠤᠭᠠᠰᠤ ᠶ᠋ᠢ ᠭᠦᠢᠴᠡᠳ ᠣᠢᠯᠠᠭᠠᠭᠰᠠᠨ ᠤ᠋ ᠬᠤᠪᠢ ᠳ᠋ᠤ᠌ ᠨᠢᠭᠡ ᠪᠣᠯ ᠬᠣᠶᠠᠭᠤᠯᠠ ᠪᠠᠨ ᠵᠠᠯᠠᠭᠤ ᠳᠣᠷᠪᠢᠲᠠᠢ ᠳ᠋ᠠᠭᠠᠨ ᠰᠠᠯᠵᠤ ᠵᠠᠮ ᠵᠠᠮ ᠢ᠋ᠶ᠋ᠠᠨ ᠬᠥᠭᠡᠭᠡᠶᠡ᠃ ᠦᠭᠡᠢ ᠪᠣᠯ ᠪᠢᠳᠡ ᠬᠥᠮᠦᠨ ᠡᠴᠡ ᠬᠡᠦᠬᠡᠳ ᠦᠷᠡᠴᠢᠯᠡᠨ ᠲᠡᠵᠢᠭᠡᠶᠡ᠃ ᠥᠲᠡᠯᠦᠭᠰᠡᠨ ᠦ᠌ ᠬᠣᠢᠨᠠ ᠴᠦ᠍ ᠥᠮᠥᠭ ᠲᠦᠰᠢᠭ ᠪᠣᠯᠬᠤ ᠪᠠᠢ ᠯᠠ ᠦᠭᠡᠢ᠃ ᠡᠰᠡᠪᠡᠯ ᠬᠣᠶᠠᠭᠤᠯᠠ ᠪᠠᠨ ᠨᠢᠭᠡᠮᠦᠰᠦᠨ ᠵᠣᠷᠢᠭ ᠰᠢᠭᠤᠳᠤᠶᠠ᠃ ᠨᠠᠰᠤ ᠪᠠᠷ ᠢ᠋ᠶ᠋ᠠᠨ ᠦᠷᠡ ᠠᠴᠢᠷ ᠤ᠋ᠨ ᠳᠠᠷᠤᠭᠠᠰᠤ ᠦᠭᠡᠢ ᠰᠠᠢᠬᠠᠨ ᠠᠮᠢᠳᠤᠷᠠᠶᠠ᠃ ᠪᠢ ᠴᠢᠮᠠ ᠶᠢ ᠪᠠᠨ ᠬᠡᠵᠢᠶᠡᠳᠡ ᠭᠣᠮᠣᠳᠠᠭᠠᠬᠤ ᠦᠭᠡᠢ ᠪᠡᠷ ᠬᠠᠷᠠᠭᠠᠯᠵᠠᠵᠤ ᠶᠠᠪᠤᠶᠠ ᠭᠡᠵᠦ ᠣᠰᠣᠯ ᠬᠢᠭᠰᠡᠨ ᠬᠡᠦᠬᠡᠳ ᠰᠢᠭ ᠪᠣᠯᠤᠷᠴᠠᠭᠠᠨ ᠤ᠋ ᠴᠢᠷᠠᠢ ᠵᠥᠭᠡᠯᠡᠨ᠂ ᠠᠭᠠᠯᠢ ᠲᠣᠭᠲᠠᠭᠤᠨ ᠪᠠᠢᠬᠤ ᠳᠡᠯᠢᠮ ᠢ᠋ ᠲᠠᠭᠠᠷᠠᠭᠤᠯᠤᠨ ᠪᠣᠳᠣᠭᠰᠠᠨ ᠰᠠᠨᠠᠭᠰᠠᠨ ᠢ᠋ᠶ᠋ᠠᠨ ᠬᠡᠯᠡᠵᠦ ᠥᠩᠭᠡᠷᠡᠵᠡᠢ᠃
ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠲᠣᠭᠣᠵᠤ ᠰᠡᠳᠬᠢᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠳᠤᠷᠠᠯᠠᠨ ᠪᠠᠢᠵᠤ ᠠᠪᠤᠭᠰᠠᠨ ᠡᠬᠡᠨᠡᠷ ᠡᠴᠡ ᠪᠡᠨ ᠰᠠᠯᠬᠤ ᠰᠠᠨᠠᠭᠠ ᠪᠣᠯᠤᠷᠴᠠᠭᠠᠨ ᠳ᠋ᠤ᠌ ᠬᠠᠷᠠᠬᠠᠨ ᠪᠠᠢᠭᠰᠠᠨ ᠦᠭᠡᠢ᠃
ᠦᠷᠡ ᠬᠡᠦᠬᠡᠳ ᠦ᠋ᠨ ᠳᠠᠷᠤᠭᠳᠠᠯ ᠦᠭᠡᠢ ᠪᠡᠷ ᠰᠤᠯᠠ ᠰᠡᠯᠡᠭᠦᠨ ᠢ᠋ᠶ᠋ᠡᠷ ᠨᠠᠰᠤ ᠪᠠᠨ ᠡᠯᠡᠭᠡᠬᠦ ᠨᠢ ᠡᠷᠡ ᠬᠥᠮᠦᠨ ᠦ᠌ ᠮᠥᠷ᠂ ᠡᠩᠬᠡ ᠵᠢᠷᠭᠠᠯ ᠭᠡᠵᠦ ᠲᠡᠷᠡ ᠪᠠᠰᠠ ᠪᠣᠳᠣᠬᠤ ᠦᠭᠡᠢ ᠪᠠᠢᠯᠠ᠃ ᠬᠥᠮᠦᠨ ᠦ᠌ ᠬᠡᠦᠬᠡᠳ ᠢ᠋ ᠦᠷᠡᠴᠢᠯᠡᠬᠦ ᠭᠡᠭᠴᠢ ᠬᠠᠩᠬᠠᠭᠠᠷ ᠡᠷᠡᠭᠦᠯ ᠪᠡᠶᠡ ᠲᠡᠢ ᠬᠥᠮᠦᠨ ᠦ᠌ ᠬᠢᠬᠦ ᠬᠢᠳᠡᠯ ᠪᠢᠰᠢ ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠨᠢᠭᠡ ᠯᠡ ᠡᠶᠡ ᠡᠪ ᠦᠭᠡᠢ ᠰᠠᠨᠠᠭᠳᠠᠭᠠᠳ ᠪᠠᠢᠭᠰᠠᠨ ᠠ᠋ᠴᠠ ᠤᠳᠠᠭᠠ ᠪᠦᠷᠢ ᠬᠠᠷᠢᠭᠤ ᠶᠠᠭᠤ ᠴᠦ᠍ ᠳᠤᠤᠭᠠᠷᠤᠯ ᠦᠭᠡᠢ ᠳᠤᠭᠤᠢ ᠯᠠ ᠥᠩᠭᠡᠷᠡᠳᠡᠭ ᠪᠠᠢᠵᠠᠢ᠃
ᠭᠡᠨᠡᠨ ᠴᠠᠭᠠᠨ ᠵᠠᠩ ᠲᠠᠢ ᠦᠵᠡᠰᠬᠦᠯᠡᠩ ᠡᠷᠡ ᠶ᠋ᠢᠨ ᠢ᠋ᠶ᠋ᠡᠨ ᠡᠢᠮᠦ ᠬᠥᠢᠲᠡᠮᠰᠦᠭ ᠣᠪᠣᠷ ᠲᠤ᠌ ᠲᠦᠪᠡᠭᠰᠢᠶᠡᠨ ᠳᠠᠬᠢᠭᠠᠳ ᠢᠳᠬᠠᠵᠤ ᠵᠥᠪᠯᠡᠬᠦ ᠵᠢᠷᠦᠬᠡ ᠰᠡᠳᠬᠢᠯ ᠦᠭᠡᠢ ᠪᠣᠯᠵᠠᠢ᠃
ᠢᠩᠭᠢᠵᠦ ᠪᠠᠢᠲᠠᠯᠠ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠨᠠᠰᠤᠨ ᠭᠣᠣᠯ ᠤ᠋ᠨ ᠪᠣᠯᠵᠣᠭᠠᠲᠤ ᠳᠠᠪᠠᠭᠠ ᠭᠡᠳᠡᠭ ᠭᠤᠴᠢᠨ ᠲᠠᠪᠤᠨ ᠨᠠᠰᠤᠨ ᠳ᠋ᠤ᠌ ᠣᠰᠣᠯ ᠦᠭᠡᠢ ᠬᠦᠷᠴᠡᠢ᠃ ᠳᠠᠪᠠᠭᠠ ᠪᠠᠭᠤᠭᠰᠠᠨ ᠡᠬᠢᠨ ᠦ᠌ ᠵᠢᠯ ᠦ᠋ᠨ ᠨᠠᠮᠤᠷ ᠡᠳᠡᠨ ᠦ᠌ ᠠᠮᠢᠳᠤᠷᠠᠯ ᠨᠢ ᠨᠠᠮᠤᠭᠤᠬᠠᠨ ᠤᠷᠤᠰᠬᠤ ᠭᠣᠣᠯ ᠤ᠋ᠨ ᠤᠰᠤ ᠰᠢᠭ᠋ ᠨᠠᠮ ᠵᠢᠮ ᠲᠣᠭᠲᠠᠭᠤᠬᠠᠨ ᠪᠠᠢᠳᠠᠯ ᠢ᠋ᠶ᠋ᠠᠨ ᠠᠯᠳᠠᠵᠤ᠂ ᠭᠣᠣᠯ ᠦᠶᠡᠷᠯᠡᠵᠦ ᠰᠢᠷᠦᠭᠦᠨ ᠳᠠᠪᠠᠯᠭᠠᠨ ᠣᠢᠯᠣᠨ ᠪᠣᠰᠴᠤ ᠪᠢᠯᠡ᠃
ᠡᠨᠡ ᠭᠡᠷ ᠲᠦ᠍ ᠭᠡᠨᠡᠳᠲᠡ ᠪᠠᠢᠭᠰᠠᠭᠠᠷ ᠶᠠᠮᠠᠷ ᠡᠨᠳᠡ ᠴᠢᠳᠬᠥᠷ ᠪᠣᠰᠤᠭᠰᠠᠨ ᠢ᠋ ᠪᠤᠤ ᠮᠡᠳᠡ᠃ ᠢᠳᠡᠷ ᠨᠠᠰᠤᠨ ᠤ᠋ ᠪᠣᠯᠤᠷᠴᠠᠭᠠᠨ ᠪᠠᠢᠨ ᠪᠠᠢᠭᠰᠠᠭᠠᠷ ᠬᠡᠷᠡᠭᠦᠯ ᠢ᠋ᠶ᠋ᠡᠷ ᠠᠮᠢᠰᠬᠤᠵᠤ ᠨᠢᠳᠤᠷᠭᠠᠨ ᠢᠳᠡ ᠪᠡᠷ ᠢ᠋ᠶ᠋ᠡᠨ ᠮᠠᠨᠴᠤᠷᠭᠠᠳᠠᠨ᠂ ᠬᠥᠯ ᠦ᠋ᠨ ᠢ᠋ᠶ᠋ᠡᠨ ᠲᠦᠷᠪᠢ ᠪᠡᠷ ᠢᠰᠬᠦᠯᠬᠦ ᠪᠣᠯᠵᠤ᠂ ᠦᠵᠡᠰᠬᠦᠯᠡᠩ ᠦ᠋ᠨ ᠠᠷᠠᠰᠤ ᠮᠢᠬᠠ ᠨᠢ ᠰᠢᠯᠪᠤᠷᠠᠨ᠂ ᠤᠯᠠᠭᠠᠨ ᠴᠢᠰᠤ ᠬᠥᠰᠡᠷ ᠬᠠᠨᠠ ᠪᠠᠷ ᠪᠢᠯᠳᠠᠭᠳᠠᠵᠤ᠂ ᠮᠠᠭᠤᠬᠠᠢ ᠵᠢᠬᠡᠭᠦᠨ ᠴᠢᠷᠠᠯᠠᠯᠲᠠ ᠨᠢ ᠠᠢᠯ ᠠᠢᠮᠠᠭ ᠢ᠋ᠶ᠋ᠠᠨ ᠦᠢᠮᠡᠭᠦᠯᠬᠦ ᠪᠣᠯᠵᠠᠢ᠃ ᠦᠭᠡᠢ ᠶᠡᠷᠦ ᠨᠢ ᠬᠡᠷᠡᠭᠦᠯᠴᠢ ᠭᠡᠷ ᠦ᠋ᠨ ᠲᠣᠭᠠᠴᠠᠯ ᠨᠢᠮᠭᠡᠨ᠂ ᠬᠡᠪ ᠲᠡᠢ ᠠᠢᠯ ᠤ᠋ᠨ ᠳᠠᠩᠰᠠ ᠵᠤᠵᠠᠭᠠᠨ ᠭᠡᠭᠴᠢ ᠣᠷᠣ ᠲᠠᠢ ᠯᠠ ᠦᠭᠡ ᠪᠠᠢᠵᠤ ᠳᠠ᠃
ᠠᠷᠪᠠᠨ ᠳᠣᠯᠣᠭᠠᠨ ᠵᠢᠯ ᠦ᠋ᠨ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠪᠣᠯᠤᠷᠴᠠᠭᠠᠨ ᠤ᠋ ᠪᠣᠳᠣᠯ ᠳ᠋ᠤ᠌ ᠪᠣᠯᠵᠤ ᠪᠠᠢᠭᠰᠠᠨ ᠬᠠᠷᠠ ᠬᠣᠣᠷ ᠤ᠋ᠨ ᠳᠠᠩᠰᠠ ᠳᠠᠩᠴᠤ ᠵᠤᠵᠠᠭᠠᠷᠠᠵᠤ ᠪᠠᠢᠭᠰᠠᠨ ᠪᠣᠯᠪᠠ ᠤᠤ ᠭᠡᠮᠡᠷ ᠲᠡᠳᠡᠨ ᠦ᠌ ᠵᠣᠳᠣᠯᠴᠠᠬᠤ ᠬᠠᠷᠢᠶᠠᠯᠴᠠᠬᠤ ᠶ᠋ᠢᠨ ᠲᠣᠭᠠ ᠤᠯᠠᠮ ᠣᠯᠠᠰᠢᠷᠠᠵᠤ ᠪᠠᠢᠯᠠ᠃
ᠠᠩᠬᠠ ᠤᠳᠠᠭᠠ ᠨᠢ ᠠᠢᠯ ᠠᠢᠮᠠᠭ ᠤ᠋ᠨ ᠬᠣᠷᠢᠭᠯᠠᠬᠤ ᠶ᠋ᠢᠨ ᠰᠠᠢᠨ ᠢ᠋ᠶ᠋ᠠᠷ ᠵᠣᠳᠣᠭᠠᠨ ᠨᠦᠳᠦᠭᠡᠨ ᠨᠢ ᠳᠤᠲᠠᠭᠤ ᠰᠠᠯᠤᠯᠴᠠᠵᠤ᠂ ᠬᠣᠶᠠᠳᠤᠭᠠᠷ ᠤᠳᠠᠭᠠ ᠨᠢ ᠦᠵᠡᠰᠬᠦᠯᠡᠩ ᠬᠤᠷᠴᠠ ᠬᠢᠲᠤᠭᠠᠨ ᠠ᠋ᠴᠠ ᠨᠢ ᠪᠤᠯᠲᠠᠨ ᠠᠷᠠᠢ ᠯᠠ ᠠᠮᠢ ᠪᠠᠨ ᠠᠪᠴᠤ ᠭᠡᠷ ᠡᠴᠡ ᠪᠡᠨ ᠳᠤᠲᠠᠭᠠᠨ ᠭᠠᠷᠴᠤ ᠢᠷᠡᠵᠡᠢ᠃
ᠭᠤᠷᠪᠠᠳᠤᠭᠠᠷ ᠤᠳᠠᠭᠠᠨ ᠤ᠋ ᠬᠡᠷᠡᠭᠦᠯ ᠦ᠋ᠨ ᠳᠠᠭᠤᠨ ᠳ᠋ᠤ᠌ ᠠᠢᠯ ᠠᠢᠮᠠᠭ ᠤ᠋ᠨ ᠬᠢᠨ ᠨᠢ ᠪᠠᠰᠠ ᠭᠦᠶᠦᠯᠳᠦᠨ ᠬᠦᠷᠬᠦ ᠳ᠋ᠦ᠍ ᠦᠵᠡᠰᠬᠦᠯᠡᠩ ᠬᠡᠵᠢᠶᠡᠨ ᠦ᠌ ᠬᠥᠯ ᠢ᠋ᠶ᠋ᠡᠨ ᠬᠤᠭᠤ ᠢᠰᠬᠦᠯᠦᠭᠳᠡᠨ ᠬᠥᠰᠡᠷ ᠤᠨᠠᠭᠰᠠᠨ ᠪᠠᠢᠯᠠ᠃
ᠡᠨᠡ ᠨᠢ ᠵᠥᠪᠬᠡᠨ ᠦᠵᠡᠰᠬᠦᠯᠡᠩ ᠦ᠋ᠨ ᠬᠣᠣᠷᠯᠠᠭᠳᠠᠬᠤ ᠤᠷᠢᠳᠠᠯ ᠨᠥᠬᠥᠴᠡᠯ ᠯᠡ ᠪᠠᠢᠵᠠᠢ᠃ ᠬᠣᠶᠠᠷ ᠡᠳᠦᠷ ᠦ᠋ᠨ ᠬᠢᠨᠢ ᠳᠠᠷᠠᠭᠠ ᠪᠣᠯᠤᠷᠴᠠᠭᠠᠨ ᠡᠮᠴᠢ ᠶ᠋ᠢᠨ ᠢ᠋ᠶ᠋ᠡᠨ ᠳᠥᠭᠥᠮ ᠢ᠋ ᠠᠰᠢᠭᠯᠠᠨ᠂ ᠬᠡᠪᠲᠡᠷᠢ ᠳ᠋ᠡᠭᠡᠨ ᠪᠠᠢᠭᠠ ᠦᠵᠡᠰᠬᠦᠯᠡᠩ ᠳ᠋ᠦ᠍ ᠬᠣᠣᠷᠲᠤ ᠨᠡᠷᠡᠮᠡᠯ ᠲᠠᠷᠢᠭᠰᠠᠨ ᠠ᠋ᠴᠠ ᠡᠮᠡᠭᠲᠡᠢ ᠶ᠋ᠢᠨ ᠰᠠᠯᠠᠭᠠᠨ ᠳ᠋ᠤ᠌ ᠠᠵᠢᠯᠯᠠᠵᠤ ᠪᠠᠢᠭᠠ ᠣᠶᠤᠲᠠᠨ ᠭᠠᠷᠤᠯ ᠲᠠᠢ ᠡᠮᠴᠢ ᠦᠵᠡᠰᠬᠦᠯᠡᠩ ᠬᠣᠷᠸᠠ ᠠ᠋ᠴᠠ ᠥᠨᠢᠳᠡ ᠠᠩᠭᠢᠵᠢᠷᠠᠪᠠ᠃
ᠨᠠᠰᠤ ᠭᠤᠴᠢᠨ ᠳᠣᠯᠣᠭᠠᠲᠠᠢ᠃
ᠬᠥᠮᠦᠨ ᠠᠯᠠᠭᠰᠠᠨ ᠶᠠᠯᠠᠲᠠᠨ ᠪᠣᠯᠤᠷᠴᠠᠭᠠᠨ ᠬᠢᠭᠰᠡᠨ ᠬᠡᠷᠡᠭ ᠢ᠋ᠶ᠋ᠡᠨ ᠬᠠᠵᠠᠢᠯ ᠦᠭᠡᠢ ᠬᠠᠷᠢᠭᠤᠴᠠᠳᠠᠭ ᠡᠷᠡ ᠪᠣᠯᠤᠯᠲᠠᠢ᠃ ᠲᠦᠪᠰᠢᠨ ᠦ᠌ ᠰᠢᠭᠦᠯᠲᠡ ᠶ᠋ᠢᠨ ᠡᠮᠦᠨᠡ ᠭᠡᠷ ᠪᠦᠯᠢ ᠶ᠋ᠢᠨ ᠢ᠋ᠶ᠋ᠡᠨ ᠪᠠᠢᠳᠠᠯ ᠢ᠋ ᠡᠬᠢᠨ ᠡᠴᠡ ᠨᠢ ᠠᠪᠤᠭᠠᠳ ᠡᠴᠦᠰ ᠲᠦ᠋ᠨᠢ ᠲᠤᠯᠲᠠᠯᠠ ᠥᠴᠦᠬᠡᠨ ᠴᠦ᠍ ᠨᠢᠭᠤᠯ ᠦᠭᠡᠢ ᠲᠤᠰᠢᠶᠠᠵᠠᠢ᠃
ᠰᠣᠨᠣᠰᠤᠭᠠᠳ ᠪᠠᠢᠬᠤ ᠳ᠋ᠤ᠌ ᠪᠣᠯᠤᠷᠴᠠᠭᠠᠨ ᠬᠣᠣᠷᠯᠠᠭᠰᠠᠨ ᠡᠬᠡᠨᠡᠷ ᠢ᠋ᠶ᠋ᠡᠨ ᠮᠠᠭᠤᠯᠠᠵᠤ ᠭᠦᠳᠬᠡᠬᠦ᠂ ᠥᠪᠡᠷ ᠦ᠋ᠨ ᠶᠠᠯᠠ ᠪᠠᠨ ᠥᠮᠥᠭᠯᠡᠵᠦ ᠵᠥᠪᠲᠥᠭᠡᠬᠦ ᠦᠭᠡ ᠨᠢᠭᠡ ᠴᠦ᠍ ᠬᠡᠯᠡᠬᠦ ᠦᠭᠡᠢ ᠪᠠᠢᠯᠠ᠃
ᠭᠡᠲᠡᠯᠡ ᠬᠢᠯᠢᠰ ᠬᠠᠰᠬᠢᠷᠤᠭᠰᠠᠨ ᠣᠨᠢᠰᠣᠭᠠ ᠶ᠋ᠢ ᠶᠠᠭᠠᠬᠢᠭᠰᠠᠨ ᠴᠦ᠍ ᠳᠠᠢᠯᠤᠭᠤᠯᠤᠶᠠ ᠭᠡᠰᠡᠨ ᠪᠣᠳᠣᠯ ᠢ᠋ᠶ᠋ᠠᠷ ᠲᠦᠪᠰᠢᠨ ᠲᠡᠭᠦᠨ ᠳ᠋ᠦ᠍ ᠬᠠᠨᠳᠤᠬᠤ ᠠᠷᠭᠠ ᠮᠠᠶᠢᠭ ᠢ᠋ᠶ᠋ᠠᠨ ᠥᠭᠡᠷᠡᠴᠢᠯᠡᠨ ᠠᠰᠠᠭᠤᠵᠤ ᠡᠬᠢᠯᠡᠯᠡ᠃
— ᠲᠠᠨᠤᠰ ᠠᠷᠪᠠ ᠭᠠᠷᠤᠢ ᠵᠢᠯ ᠠᠮᠢᠳᠤᠷᠠᠭᠠᠳ ᠶᠡᠷᠦ ᠬᠡᠷᠡᠭᠦᠯ ᠵᠣᠳᠣᠭᠠᠨ ᠬᠢᠭ᠍ᠰᠠᠨ ᠦᠭᠡᠢ ᠮᠥᠷᠲᠡᠭᠡᠨ ᠦᠵᠡᠰᠬᠦᠯᠡᠩ ᠪᠠᠰᠠ ᠴᠢᠮᠠ ᠶᠢ ᠨᠠᠰᠤ ᠪᠠᠷ ᠢ᠋ᠶ᠋ᠠᠨ ᠭᠣᠮᠣᠳᠠᠭᠠᠬᠤ ᠦᠭᠡᠢ ᠭᠡᠰᠡᠨ ᠪᠢᠰᠢ ᠤᠤ? ᠮᠢᠨᠦ ᠲᠤᠷᠰᠢᠯᠭᠠ ᠪᠠᠷ ᠪᠣᠯ ᠡᠢᠮᠦ ᠥᠷᠢ ᠲᠡᠢ ᠰᠡᠳᠬᠢᠯ ᠡᠪᠦᠷᠯᠡᠭᠰᠡᠨ ᠡᠮᠡᠭᠲᠡᠢᠴᠦᠳ ᠶᠡᠷᠦ ᠨᠢ ᠡᠷᠡᠭᠲᠡᠢ ᠳ᠋ᠡᠭᠡᠨ ᠣᠨᠴᠠᠭᠠᠢ ᠯᠠ ᠬᠠᠯᠠᠭᠤᠮᠰᠤᠭ ᠪᠠᠢᠵᠤ ᠬᠤᠪᠢ ᠶ᠋ᠢᠨ ᠭᠠᠳᠠᠨᠠ ᠪᠠᠰᠠ ᠬᠠᠷᠠᠭᠠᠯᠵᠠᠯ ᠪᠠᠢᠳᠠᠭ ᠰᠢᠦ ᠳᠡ᠃ ᠢᠩᠭᠢᠬᠦ ᠳ᠋ᠦ᠍ ᠲᠠᠨᠠᠷ ᠤ᠋ᠨ ᠵᠣᠳᠣᠯᠴᠠᠬᠤ ᠬᠡᠷᠡᠯᠳᠦᠬᠦ ᠨᠢ ᠨᠡᠭᠡᠷᠡᠨ ᠣᠢᠯᠠᠭᠠᠭᠳᠠᠰᠢ ᠦᠭᠡᠢ ᠰᠢᠭ ᠰᠠᠨᠠᠭᠳᠠᠬᠤ ᠶᠤᠮ᠃
— ᠦᠵᠡᠰᠬᠦᠯᠡᠩ ᠨᠠᠳᠠ ᠶᠡᠬᠡ ᠰᠠᠢᠨ ᠪᠠᠢᠭᠰᠠᠨ ᠨᠢ ᠦᠨᠡᠨ᠃ ᠰᠡᠭᠦᠯ ᠦ᠋ᠨ ᠦᠶᠡ ᠶ᠋ᠢᠨ ᠬᠡᠷᠡᠭᠦᠯ ᠵᠣᠳᠣᠭᠠᠨ ᠴᠦ᠍ ᠪᠦᠷ ᠶᠠᠯᠢᠮ ᠦᠭᠡᠢᠬᠡᠨ ᠬᠡᠷᠡᠭ ᠦ᠋ᠳ ᠳᠡᠭᠡᠷᠡ ᠡᠭᠦᠰᠦᠭᠰᠡᠨ ᠶᠦᠮ᠃ ᠠᠩᠬᠠ ᠤᠳᠠᠭᠠ ᠨᠢ ᠲᠡᠷᠡ ᠨᠢᠭᠡ ᠰᠥᠨᠢ ᠶᠡᠬᠡ ᠣᠷᠣᠢ ᠬᠠᠷᠢᠵᠤ ᠢᠷᠡᠭᠰᠡᠨ ᠡᠴᠡ ᠵᠣᠳᠣᠯᠴᠠᠵᠠᠢ᠃ ᠳᠠᠷᠠᠭᠠ ᠤᠳᠠᠭᠠ ᠨᠢ ᠁ ᠳᠠᠷᠠᠭᠠ ᠤᠳᠠᠭᠠ ᠲᠡᠷᠡ ᠶᠠᠮᠠᠷ ᠴᠦ᠍ ᠨᠥᠬᠥᠴᠡᠯ ᠰᠢᠯᠲᠠᠭᠠᠨ ᠦᠭᠡᠢ ᠪᠡᠷ ᠴᠠᠯᠢᠩ ᠢ᠋ᠶ᠋ᠠᠨ ᠬᠣᠶᠠᠷ ᠲᠠᠰ ᠥᠰᠬᠡᠵᠦ ᠠᠪᠤᠭᠰᠠᠨ ᠮᠥᠷᠲᠡᠭᠡᠨ ᠪᠠᠰᠠ ᠶᠡᠬᠡ ᠠᠷᠪᠢᠨ ᠪᠡᠯᠡᠨ ᠵᠣᠭᠣᠰ ᠭᠡᠷ ᠲᠦ᠍ ᠠᠪᠴᠢᠷᠠᠭᠠᠳ ᠪᠠᠢᠬᠤ ᠳ᠋ᠤᠨᠢ ᠪᠢ ᠰᠡᠵᠢᠭᠯᠡᠭᠡᠳ ᠵᠣᠳᠣᠯᠴᠠᠵᠠᠢ᠃ ᠰᠡᠭᠦᠯ ᠦ᠋ᠨ ᠤᠳᠠᠭᠠ ᠨᠢ᠁ ᠲᠡᠷᠡ ᠨᠠᠮᠠ ᠶᠢ ᠭᠦᠳᠬᠡᠨ ᠭᠦᠵᠢᠷᠯᠡᠵᠦ ᠬᠡᠯᠡᠭᠰᠡᠨ ᠳ᠋ᠦ᠍ ᠪᠢ ᠠᠭᠤᠷᠯᠠᠬᠤ ᠳᠤ ᠪᠠᠨ ᠵᠣᠳᠣᠭᠠᠳ ᠬᠥᠯ ᠢ᠋ ᠨᠢ ᠢᠰᠬᠦᠯᠵᠦ ᠬᠤᠭᠤᠯᠤᠭᠰᠠᠨ᠃
— ᠴᠢ ᠡᠬᠡᠨᠡᠷ ᠲᠡᠢ ᠪᠡᠨ ᠵᠣᠳᠣᠯᠴᠠᠬᠤ ᠪᠣᠯᠭᠠᠨ ᠠᠯᠠᠵᠤ ᠪᠤᠯᠠᠬᠤ ᠪᠠᠷ ᠣᠷᠣᠯᠳᠣᠳᠠᠭ ᠤᠤ?
— ᠦᠭᠡᠢ᠃ ᠭᠡᠲᠡᠯᠡ ᠠᠭᠤᠷ ᠤ᠋ᠨ ᠮᠤᠩᠬᠠᠭ ᠲᠠᠭᠠᠨ ᠪᠣᠣᠳᠤᠤ ᠳᠠᠯᠠᠢᠨ ᠠᠶᠤᠯᠭᠠᠨ ᠰᠦᠷᠳᠡᠭᠦᠯᠵᠦ ᠥᠩᠭᠡᠷᠡᠭᠰᠡᠨ᠃
— ᠰᠡᠭᠦᠯᠡᠷ ᠨᠢ ᠶᠠᠭᠠᠬᠢᠭᠠᠳ ᠠᠯᠠᠬᠤ ᠰᠠᠨᠠᠭᠠ ᠡᠭᠦᠰᠦᠭᠰᠡᠨ ᠪᠣᠢ?
— ᠪᠢ ᠤᠤᠯ ᠠ᠋ᠴᠠ ᠪᠠᠨ ᠲᠡᠭᠦᠨ ᠦ᠌ ᠬᠡᠦᠬᠡᠳ ᠲᠥᠷᠥᠬᠦ ᠦᠭᠡᠢ ᠪᠣᠯᠤᠭᠰᠠᠨ ᠳ᠋ᠤᠨᠢ ᠳᠤᠷᠠ ᠦᠭᠡᠢᠴᠡᠭᠰᠡᠭᠡᠷ ᠢᠷᠡᠭᠰᠡᠨ ᠶᠦᠮ᠃ ᠳᠡᠭᠡᠷᠡ ᠡᠴᠡ ᠨᠢ ᠲᠡᠭᠦᠨ ᠦ᠌ ᠦᠢᠯᠡ ᠶᠠᠪᠤᠳᠠᠯ᠂ ᠣᠷᠣᠯᠭᠠ ᠵᠠᠷᠤᠯᠭᠠ ᠨᠢ ᠮᠠᠰᠢ ᠰᠡᠵᠢᠭᠯᠡᠯᠲᠡᠢ ᠪᠣᠯᠬᠤ ᠳᠣᠳᠣᠮ ᠤᠯᠠᠮ ᠬᠣᠷᠣᠰᠤᠨ ᠠᠯᠠᠴᠢᠬᠠᠶᠠ ᠭᠡᠵᠦ ᠪᠣᠳᠣᠵᠠᠢ᠃ ᠲᠡᠭᠡᠭᠡᠳ ᠲᠡᠭᠦᠨ ᠢ᠋ ᠰᠢᠷᠬᠠᠳᠤᠭᠰᠠᠨ ᠤ᠋ ᠭᠤᠷᠪᠠᠳᠤᠭᠠᠷ ᠡᠳᠦᠷ ᠨᠢ ᠪᠢ ᠬᠣᠣᠷᠲᠤ ᠡᠮ ᠲᠠᠷᠢᠭᠠᠳ ᠠᠯᠠᠴᠢᠬᠠᠭᠰᠠᠨ᠃
— ᠬᠠᠢᠷᠠ ᠳᠤᠷᠠᠯᠠᠯ ᠦᠭᠡᠢ ᠪᠣᠯ ᠰᠠᠯᠵᠤ ᠪᠣᠯᠤᠨᠠ ᠪᠢᠵᠡ᠃ ᠡᠬᠡᠨᠡᠷ ᠴᠢᠨᠢ ᠴᠦ᠍ ᠥᠩᠭᠡᠷᠡᠭᠰᠡᠨ ᠳ᠋ᠦ᠍ ᠰᠠᠯᠬᠤ ᠲᠤᠬᠠᠢ ᠪᠠᠨ ᠴᠢᠮᠠ ᠳ᠋ᠤ᠌ ᠳᠤᠷᠠᠳᠤᠭᠰᠠᠨ ᠪᠢᠰᠢ ᠤᠤ?
— ᠳᠤᠷᠠᠳᠴᠠᠢ᠃ ᠭᠡᠲᠡᠯᠡ ᠦᠨᠡᠬᠡᠷ ᠰᠠᠯᠬᠤ ᠭᠡᠬᠦᠯᠡᠷ ᠲᠡᠷᠡ ᠰᠠᠯᠬᠤ ᠦᠭᠡᠢ ᠪᠠᠢᠭᠰᠠᠨ᠃ ᠠᠮᠠᠨ ᠳᠤ ᠪᠠᠨ ᠬᠡᠯᠡᠬᠦ ᠡᠴᠡ ᠪᠢᠰᠢ ᠠᠵᠢᠯᠯᠠᠭᠠ ᠳᠤ ᠪᠠᠨ ᠬᠢᠬᠦ ᠦᠭᠡᠢ ᠶᠦᠮ ᠴᠢᠨᠢ᠃
— ᠭᠡᠰᠡᠨ ᠴᠦ᠍ ᠠᠯᠠᠵᠤ ᠪᠤᠯᠠᠬᠤ ᠥᠰᠢᠶᠡ ᠦᠭᠡᠢ ᠪᠢᠵᠡ? ᠡᠭᠦᠨ ᠡᠴᠡ ᠥᠭᠡᠷᠡ ᠲᠠ ᠬᠣᠶᠠᠭᠤᠯᠠ ᠶ᠋ᠢᠨ ᠳᠤᠮᠳᠠ ᠶᠠᠮᠠᠷ ᠨᠢᠭᠡᠨ ᠠᠰᠢᠭ ᠬᠣᠣᠷ ᠤ᠋ᠨ ᠬᠠᠷᠢᠴᠠᠭᠠ ᠬᠣᠯᠪᠣᠭᠠ ᠪᠠᠢᠨᠠ ᠤᠤ?
— ᠪᠠᠢᠬᠤ ᠦᠭᠡᠢ᠃
— ᠴᠢ ᠲᠡᠷᠡ ᠬᠣᠣᠷᠲᠤ ᠡᠮ ᠢ᠋ ᠬᠠᠮᠢᠭᠠ ᠠ᠋ᠴᠠ ᠠᠪᠤᠭᠰᠠᠨ ᠪᠣᠢ?
— ᠨᠠᠳᠠ ᠤᠤᠯ ᠠ᠋ᠴᠠ ᠪᠠᠨ ᠪᠠᠢᠭᠰᠠᠨ᠃ ᠴᠣᠬᠣᠮ ᠠᠯᠢ ᠵᠢᠯ ᠡᠮ ᠦ᠋ᠨ ᠭᠡᠷ ᠡᠴᠡ ᠠᠪᠤᠭᠰᠠᠨ ᠢ᠋ᠶ᠋ᠠᠨ ᠮᠠᠷᠲᠠᠴᠢᠬᠠᠵᠠᠢ᠃
— ᠴᠢ ᠣᠳᠣ ᠲᠡᠷᠡ ᠡᠳᠦᠷ ᠬᠣᠣᠷᠲᠤ ᠡᠮ ᠵᠠᠷᠤᠭᠰᠠᠨ ᠪᠠᠢᠳᠠᠯ ᠢ᠋ᠶ᠋ᠠᠨ ᠲᠣᠳᠣᠷᠬᠠᠢ ᠲᠤᠰᠢᠶᠠ!
— ᠲᠡᠷᠡ ᠡᠳᠦᠷ ᠦ᠋ᠨ ᠣᠷᠣᠢ ᠦᠵᠡᠰᠬᠦᠯᠡᠩ ᠳ᠋ᠦ᠍ ᠵᠡᠭᠦᠦ ᠴᠣᠬᠢᠬᠤ ᠴᠠᠭ ᠪᠣᠯᠬᠤ ᠳ᠋ᠤ᠌ ᠪᠢ ᠤᠷᠢᠳᠠᠪᠡᠷ ᠵᠡᠭᠦᠦ ᠡᠨᠡ ᠲᠡᠷᠡ ᠪᠡᠨ ᠴᠡᠪᠡᠷᠯᠡᠬᠦ ᠪᠠᠢᠳᠠᠯ ᠭᠠᠷᠭᠠᠵᠤ ᠪᠠᠢᠭᠠᠳ ᠬᠣᠣᠷᠲᠤ ᠡᠮ ᠢ᠋ᠶ᠋ᠡᠨ ᠰᠠᠪᠠᠯᠠᠵᠤ ᠠᠪᠤᠭᠰᠠᠨ᠃ ᠲᠡᠭᠡᠭᠡᠳ ᠯᠡ ᠬᠡᠷᠡᠭᠯᠡᠬᠦ ᠡᠮ ᠲᠡᠢ ᠨᠢ ᠬᠣᠯᠢᠨ ᠦᠵᠡᠰᠬᠦᠯᠡᠩ ᠳ᠋ᠦ᠍ ᠲᠠᠷᠢᠭᠰᠠᠨ ᠶᠤᠮ᠃
— ᠦᠵᠡᠰᠬᠦᠯᠡᠩ ᠡᠮ ᠲᠠᠷᠢᠭᠰᠠᠨ ᠤ᠋ ᠳᠠᠷᠠᠭᠠ ᠬᠡᠳᠦᠢ ᠤᠳᠠᠭᠠᠳ ᠦᠬᠦᠭᠰᠡᠨ ᠪᠣᠢ?
— ᠪᠠᠷᠤᠭᠯᠠᠪᠠᠯ ᠬᠣᠷᠢᠭᠠᠳ ᠮᠢᠨᠦ᠋ᠲ᠂ ᠬᠡᠲᠦᠷᠡᠬᠦ ᠳ᠋ᠡᠭᠡᠨ ᠬᠠᠭᠠᠰ ᠴᠠᠭ ᠁
— ᠴᠢᠮᠠ ᠳ᠋ᠤ᠌ ᠦᠵᠡᠰᠬᠦᠯᠡᠩ ᠢ᠋ ᠳᠣᠣᠷᠠ ᠨᠢ ᠦᠬᠦᠨᠡ ᠭᠡᠰᠡᠨ ᠪᠠᠲᠤᠯᠠᠭᠠ ᠪᠠᠢᠪᠠ ᠤᠤ?
— ᠴᠠᠭ ᠢ᠋ ᠨᠢ ᠣᠨᠣᠪᠴᠢᠲᠠᠢ ᠪᠠᠲᠤᠯᠠᠵᠤ ᠴᠢᠳᠠᠬᠤ ᠦᠭᠡᠢ ᠴᠦ᠍ ᠳᠡᠮᠡᠢ ᠤᠳᠠᠵᠤ ᠴᠢᠳᠠᠬᠤ ᠦᠭᠡᠢ ᠭᠡᠳᠡᠭ ᠲᠦ᠍ ᠪᠠᠲᠤᠯᠠᠭᠠ ᠪᠠᠢᠭᠰᠠᠨ᠃
— ᠶᠠᠭᠠᠬᠢᠭᠠᠳ?
— ᠬᠣᠣᠷᠲᠤ ᠴᠢᠨᠠᠷ ᠤ᠋ᠨ ᠠᠮᠤᠷᠵᠢᠭᠤᠯᠬᠤ ᠡᠮ A ᠭᠤᠷᠪᠠᠳᠤᠭᠠᠷ ᠪᠣᠯᠤᠨ ᠦᠵᠡᠰᠬᠦᠯᠡᠩ ᠳ᠋ᠦ᠍ ᠤᠤᠯ ᠠ᠋ᠴᠠ ᠪᠠᠨ ᠬᠡᠷᠡᠭᠯᠡᠵᠦ ᠪᠠᠢᠭᠰᠠᠨ ᠶᠠᠰᠤ ᠲᠣᠭᠲᠠᠪᠤᠷᠢᠵᠢᠭᠤᠯᠬᠤ B ᠵᠢᠷᠭᠤᠳᠤᠭᠠᠷ ᠬᠣᠶᠠᠷ ᠨᠡᠢᠯᠡᠪᠡᠯ ᠴᠢᠩᠭᠠ ᠤᠷᠪᠠᠯ ᠡᠭᠦᠰᠴᠦ ᠬᠥᠮᠦᠨ ᠦ᠌ ᠠᠮᠢᠨ ᠳ᠋ᠤ᠌ ᠬᠦᠷᠬᠦ ᠶᠦᠮ᠃
— ᠡᠮ ᠦ᠋ᠨ ᠬᠡᠮᠵᠢᠶᠡ ᠴᠢᠨᠢ ᠬᠡᠳᠦᠢ ᠪᠣᠢ?
— A ᠭᠤᠷᠪᠠᠳᠤᠭᠠᠷ ᠳᠥᠷᠪᠡᠨ ᠮᠢᠯᠢᠯᠢᠲ᠋ᠷ᠂ B ᠵᠢᠷᠭᠤᠳᠤᠭᠠᠷ ᠴᠦ᠍ ᠳᠥᠷᠪᠡᠨ ᠮᠢᠯᠢᠯᠢᠲ᠋ᠷ᠃ ᠨᠠᠢᠳᠠ ᠨᠠᠢ᠍ᠮᠠᠨ ᠮᠢᠯᠢᠯᠢᠲ᠋ᠷ᠃ ᠡᠨᠡ ᠨᠢ ᠬᠥᠮᠦᠨ ᠳ᠋ᠦ᠍ ᠡᠩ ᠦ᠋ᠨ ᠬᠡᠷᠡᠭᠯᠡᠬᠦ ᠬᠡᠮᠵᠢᠶᠡᠨ ᠡᠴᠡ ᠨᠢᠭᠡ ᠳᠠᠬᠢᠨ ᠳᠠᠪᠠᠭᠰᠠᠨ ᠶᠤᠮ᠃
— ᠴᠢ ᠡᠬᠡᠨᠡᠷ ᠢ᠋ᠶ᠋ᠡᠨ ᠬᠣᠣᠷᠯᠠᠭᠰᠠᠨ ᠤ᠋ ᠳᠠᠷᠠᠭᠠ ᠦᠬᠦᠳᠡᠯ ᠢ᠋ ᠨᠢ ᠶᠠᠭᠠᠬᠢᠵᠤ ᠰᠢᠳᠪᠦᠷᠢᠯᠡᠬᠦ ᠲᠤᠬᠠᠢ ᠪᠣᠳᠣᠯᠬᠢᠯᠠᠭᠰᠠᠨ ᠤᠤ?
— ᠦᠭᠡᠢ᠃
— ᠲᠡᠭᠡᠪᠡᠯ ᠴᠢ ᠵᠣᠷᠢᠯᠭᠠ ᠲᠠᠢ ᠪᠠᠷ ᠡᠬᠡᠨᠡᠷ ᠲᠡᠭᠡᠨ ᠬᠣᠣᠷᠲᠤ ᠡᠮ ᠲᠠᠷᠢᠭᠠᠳ ᠶᠠᠭ ᠦᠬᠦᠮᠡᠷ ᠪᠣᠯᠬᠤ ᠳ᠋ᠤ᠌ ᠶᠠᠭᠤᠨ ᠳ᠋ᠤ᠌ ᠪᠠᠰᠠ ᠲᠡᠭᠡᠵᠦ ᠶᠡᠬᠡ ᠰᠣᠴᠢᠮᠠᠭᠳᠠᠨ ᠪᠠᠷᠬᠢᠷᠠᠵᠤ ᠠᠢᠯ ᠠᠢᠮᠠᠭ ᠢ᠋ᠶ᠋ᠠᠨ ᠳᠠᠭᠤᠳᠠᠭᠰᠠᠨ ᠪᠣᠢ?
— ᠪᠢ᠁ ᠪᠢ᠁
— ᠶᠠᠭᠠᠬᠢᠭᠠᠳ?
— ᠪᠢ᠁ ᠪᠢ ᠶᠡᠷᠦ ᠡᠴᠡ ᠪᠡᠨ᠁ ᠶᠡᠬᠡ ᠠᠶᠤᠮᠠᠲᠠᠭᠠᠢ ᠂ ᠲᠡᠭᠦᠨ ᠢ᠋ ᠠᠮᠢ ᠲᠡᠮᠡᠴᠡᠨ ᠰᠠᠨᠳᠤᠷᠬᠤ ᠳ᠋ᠤᠨᠢ ᠪᠢ ᠠᠶᠤᠵᠤ ᠪᠠᠯᠢᠳᠠᠬᠤ ᠳᠤ ᠪᠠᠨ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠬᠠᠰᠬᠢᠷᠴᠢᠬᠠᠭᠰᠠᠨ᠃ ᠥᠨᠥᠳᠥᠷ ᠴᠦ᠍ ᠠᠳᠠᠯᠢ ᠠᠶᠤᠵᠤ᠂ ᠮᠡᠳᠡᠷᠡᠯ ᠢ᠋ᠶ᠋ᠡᠨ ᠵᠢᠯᠤᠭᠤᠳᠤᠵᠤ ᠲᠡᠢᠯᠬᠦ ᠦᠭᠡᠢ ᠭᠡᠯᠢᠰ ᠬᠠᠰᠭᠡᠷᠴᠢᠬᠠᠬᠰᠠᠨ᠃
— ᠳᠡᠭᠡᠷᠡ ᠬᠡᠯᠡᠭᠰᠡᠨ ᠴᠢᠨᠢ ᠪᠦᠷ ᠦᠨᠡᠨ ᠤᠤ?
— ᠪᠦᠷ ᠦᠨᠡᠨ᠃ ᠥᠴᠦᠬᠡᠨ ᠴᠦ᠍ ᠬᠤᠳᠠᠯ ᠦᠭᠡᠢ ᠃ ᠪᠢ ᠤᠤᠯ ᠠ᠋ᠴᠠ ᠪᠠᠨ ᠦᠨᠡᠨᠴᠢ ᠰᠢᠳᠤᠷᠭᠤ ᠪᠠᠷ ᠴᠠᠭᠠᠪᠤᠷᠯᠠᠭᠰᠠᠭᠠᠷ ᠢᠷᠡᠭᠰᠡᠨ ᠪᠢᠯᠡ ᠁
ᠰᠢᠭᠦᠯᠲᠡ ᠢᠩᠭᠢᠭᠡᠳ ᠲᠡᠭᠦᠰᠦᠯᠡ᠃ ᠬᠣᠶᠠᠷ ᠴᠠᠭᠳᠠᠭᠠ ᠪᠣᠯᠤᠷᠴᠠᠭᠠᠨ ᠢ᠋ ᠤᠤᠯ ᠤ᠋ᠨ ᠠᠳᠠᠯᠢ ᠭᠠᠪᠠᠯᠠᠵᠤ ᠠᠪᠤᠭᠠᠳ ᠬᠣᠷᠢᠭᠤᠯ ᠤ᠋ᠨ ᠭᠠᠵᠠᠷ ᠤᠷᠤᠭᠤ ᠲᠠᠭᠤᠵᠤ ᠶᠠᠪᠤᠯᠠ᠃