ᠬᠢᠯᠭᠠᠰᠤᠨ ᠳᠥᠷᠥᠭᠡᠨ ᠳᠡᠭᠡᠷᠡ – ᠬᠠᠰᠪᠤᠯᠠᠭ ᠵᠣᠬᠢᠶᠠᠪᠠ᠂ <ᠨᠢᠭᠡ> Хялгасан дөрөөн дээр – Хасвулаг зохиов <1>
339ᠬᠢᠯᠭᠠᠰᠤᠨ ᠳᠥᠷᠥᠭᠡᠨ ᠳᠡᠭᠡᠷᠡ - <ᠨᠢᠭᠡ>
ᠨᠢᠭᠡ
ᠲᠡᠭᠦᠨ ᠢ᠋ ᠠᠬᠠᠰᠢᠷᠠᠭᠠ ᠨᠠᠰᠤᠨ ᠤ᠋ ᠵᠠᠰᠠᠪᠤᠷᠢ ᠦᠭᠡᠢ ᠡᠪᠡᠳᠴᠢᠨ ᠢ᠋ᠶ᠋ᠡᠷ ᠣᠨᠣᠰᠢᠯᠠᠭᠰᠠᠨ ᠪᠢᠰᠢ᠂ ᠬᠠᠷᠢᠨ ᠤᠯᠠᠭᠠᠨ ᠬᠠᠯᠵᠠᠨ ᠲᠠᠮᠠᠭᠠ ᠳᠠᠷᠤᠭᠰᠠᠨ᠂ ᠴᠠᠭᠠᠵᠠ ᠪᠠᠷ ᠠᠪᠠᠴᠢᠬᠤ ᠪᠢᠴᠢᠭ ᠢ᠋ᠶ᠋ᠡᠷ ᠡᠴᠦᠰ ᠦ᠋ᠨ ᠡᠳᠦᠷ ᠢ᠋ ᠨᠢ ᠢᠯᠳᠠᠷ ᠦᠭᠡᠢ ᠵᠢᠭᠠᠭᠰᠠᠨ ᠪᠠᠢᠯᠠ᠃
ᠥᠷᠭᠡᠨ ᠮᠠᠩᠨᠠᠢ ᠪᠣᠯᠤᠨ ᠨᠢᠳᠦᠨ ᠵᠣᠪᠬᠢ ᠪᠠᠷ ᠨᠢ ᠠᠲᠤᠷᠢᠶᠠ ᠣᠷᠣᠭᠠᠳᠤᠢ ᠡᠨᠡ ᠬᠥᠮᠦᠨ ᠵᠠᠭᠤᠢ ᠯᠠ ᠵᠣᠷᠢᠭ ᠲᠠᠢ ᠠᠪᠤ ᠶ᠋ᠢᠨ ᠬᠦᠦ ᠪᠣᠯᠤᠯᠲᠠᠢ᠃ ᠠᠮᠢ ᠪᠠᠨ ᠪᠦᠷᠢᠯᠭᠡᠬᠦ ᠭᠠᠷ ᠭᠦᠢᠴᠡᠳᠬᠡᠯ ᠬᠢᠬᠦ ᠭᠡᠭᠴᠢ ᠶᠣᠰᠣᠲᠠᠢ ᠯᠠ ᠠᠶᠤᠵᠤ ᠰᠦᠷᠳᠡᠨ᠂ ᠮᠥᠨ ᠮᠡᠳᠡᠷᠡᠯ ᠬᠡᠪ ᠢ᠋ᠶ᠋ᠡᠨ ᠠᠯᠳᠠᠮᠠᠷ ᠯᠠ ᠶᠠᠪᠤᠳᠠᠯ ᠪᠠᠢᠵᠤ ᠲᠠᠭᠠᠷᠠᠨᠠ᠃ ᠭᠡᠲᠡᠯᠡ ᠲᠡᠷᠡ ᠲᠡᠭᠰᠢᠬᠡᠨ ᠰᠠᠭᠤᠵᠤ ᠯᠠᠪᠳᠠᠭᠤᠨ ᠴᠢᠷᠠᠢᠯᠠᠨ ᠰᠢᠭᠦᠬᠦ ᠬᠣᠷᠢᠶᠠᠨ ᠤ᠋ ᠡᠴᠦᠰ ᠦ᠋ᠨ ᠰᠢᠭᠦᠯᠲᠡ ᠶ᠋ᠢ ᠤᠷᠤᠰᠤᠮᠠ ᠲᠣᠳᠣᠬᠠᠨ ᠬᠠᠷᠢᠭᠤᠯᠤᠭᠰᠠᠭᠠᠷ᠁
— ᠨᠡᠷᠡ ᠴᠢᠨᠢ?
— ᠪᠣᠯᠤᠷᠴᠠᠭᠠᠨ᠃
— ᠨᠠᠰᠤ ᠴᠢᠨᠢ?
— ᠭᠤᠴᠢᠨ ᠨᠠᠢ᠍ᠮᠠᠲᠠᠢ᠃
— ᠪᠠᠷᠢᠪᠴᠢᠯᠠᠭᠳᠠᠬᠤ ᠠ᠋ᠴᠠ ᠡᠮᠦᠨᠡ ᠶᠠᠮᠠᠷ ᠠᠵᠢᠯ ᠲᠠᠢ ᠪᠠᠢᠭᠰᠠᠨ ᠪᠣᠢ?
— ᠬᠣᠲᠠ ᠶ᠋ᠢᠨ ᠭᠤᠷᠪᠠᠳᠤᠭᠠᠷ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠤ᠋ ᠡᠮᠴᠢ᠃
— ᠶᠠᠮᠠᠷ ᠶᠠᠯᠠ ᠪᠠᠷ ᠪᠠᠷᠢᠪᠴᠢᠯᠠᠭᠳᠠᠭᠰᠠᠨ ᠪᠣᠢ?
— ᠬᠥᠮᠦᠨ ᠠᠯᠠᠭᠰᠠᠨ ᠶᠠᠯᠠ ᠪᠠᠷ᠃
— ᠬᠡᠵᠢᠶᠡ ᠬᠡᠨ ᠢ᠋ ᠶᠠᠭᠠᠬᠢᠵᠤ ᠠᠯᠠᠭᠰᠠᠨ ᠪᠣᠢ?
— ᠨᠢᠳᠤᠨᠤᠨ ᠵᠢᠯ ᠦ᠋ᠨ ᠠᠷᠪᠠᠨ ᠨᠢᠭᠡᠨ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠨᠠᠢ᠍ᠮᠠᠨ ᠤ᠋ ᠦᠳᠡᠰᠢ᠂ ᠡᠬᠡᠨᠡᠷ ᠢ᠋ᠶ᠋ᠡᠨ ᠬᠣᠣᠷᠲᠤ ᠡᠮ ᠢ᠋ᠶ᠋ᠡᠷ ᠠᠯᠠᠭᠰᠠᠨ᠃
— ᠡᠬᠡᠨᠡᠷ ᠦ᠋ᠨ ᠴᠢᠨᠢ ᠨᠡᠷᠡ ᠬᠡᠨ? ᠤᠤᠯ ᠳ᠋ᠠᠭᠠᠨ ᠶᠠᠭᠤ ᠬᠢᠵᠦ ᠪᠠᠢᠭᠰᠠᠨ ᠶᠤᠮ?
— ᠦᠵᠡᠰᠬᠦᠯᠡᠩ ᠭᠡᠳᠡᠭ᠂ ᠬᠣᠲᠠ ᠶ᠋ᠢᠨ ᠨᠢᠭᠡᠳᠦᠭᠡᠷ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠤ᠋ ᠡᠮᠴᠢ᠃
ᠲᠦᠮᠡᠨᠨᠠᠰᠤᠲᠤ ᠬᠣᠲᠠ ᠶ᠋ᠢᠨ ᠠᠷᠠᠳ ᠤ᠋ᠨ ᠳᠤᠮᠳᠠ ᠵᠡᠷᠭᠡ ᠶ᠋ᠢᠨ ᠰᠢᠭᠦᠬᠦ ᠬᠣᠷᠢᠶᠠᠨ ᠤ᠋ ᠡᠷᠡᠭᠦᠦ ᠶ᠋ᠢᠨ ᠲᠢᠩᠬᠢᠮ ᠦ᠋ᠨ ᠳᠠᠷᠤᠭᠠ ᠲᠦᠪᠰᠢᠨ ᠭᠤᠸᠠᠢ᠂ ᠶᠠᠯᠠᠲᠠᠨ ᠪᠤᠯᠣᠷᠴᠠᠭᠠᠨ ᠠ᠋ᠴᠠ ᠢᠩᠭᠢᠵᠦ ᠳᠥᠭᠥᠮ ᠲᠦᠳᠡᠬᠡᠨ ᠬᠡᠳᠦᠨ ᠦᠭᠡ ᠪᠡᠷ ᠣᠪᠣᠭ ᠨᠡᠷᠡ᠂ ᠬᠢᠭᠰᠡᠨ ᠶᠠᠯᠠ ᠶ᠋ᠢ ᠨᠢ ᠠᠯᠪᠠᠨ ᠶᠣᠰᠣᠭᠠᠷ ᠤᠬᠤᠴᠢᠯᠠᠵᠤ ᠠᠰᠠᠭᠤᠭᠠᠳ ᠦᠭᠡ ᠪᠡᠨ ᠪᠠᠬᠠᠨ ᠵᠠᠪᠰᠠᠷᠯᠠᠯᠠ᠃
ᠦᠨᠡᠨ ᠳ᠋ᠡᠭᠡᠨ ᠲᠡᠷᠡ ᠡᠳᠡᠭᠡᠷ ᠢ᠋ ᠲᠣᠪ ᠲᠣᠳᠣᠷᠬᠠᠢ ᠮᠡᠳᠡᠵᠦ ᠪᠣᠢ᠃
ᠭᠡᠪᠡᠴᠦ ᠵᠠᠪᠠᠯ ᠢᠩᠭᠢᠵᠦ ᠳᠠᠪᠲᠠᠨ ᠠᠰᠠᠭᠤᠬᠤ ᠶᠣᠰᠣ ᠪᠠᠢᠳᠠᠭ ᠠᠵᠢ᠃
ᠲᠦᠪᠰᠢᠨ ᠭᠡᠵᠦ ᠳᠤᠮᠳᠠ ᠨᠠᠰᠤᠨ ᠳ᠋ᠠᠭᠠᠨ ᠶᠠᠪᠤᠭᠠ ᠮᠠᠷᠢᠶᠠᠯᠢᠭ ᠪᠡᠶᠡ ᠲᠡᠢ᠂ ᠴᠢᠷᠠᠢ ᠨᠢ ᠬᠠᠷᠠ ᠴᠦ᠍ ᠪᠢᠰᠢ᠂ ᠴᠠᠭᠠᠨ ᠴᠦ᠍ ᠪᠢᠰᠢ᠂ ᠰᠢᠷᠠ ᠯᠠ ᠬᠥᠮᠦᠨ᠃ ᠴᠣᠭ ᠲᠠᠢ ᠰᠢᠷᠠᠪᠲᠤᠷ ᠨᠢᠳᠦ ᠨᠢ ᠬᠥᠮᠦᠰ ᠲᠦ᠍ ᠰᠦᠷ ᠭᠡᠷᠡᠯ ᠲᠡᠢ ᠬᠠᠷᠠᠭᠳᠠᠳᠠᠭ ᠪᠢᠯᠡ᠃
ᠭᠠᠭᠴᠠ ᠬᠦ᠌ ᠡᠨᠡ ᠬᠥᠮᠦᠨ ᠦᠭᠡ ᠬᠡᠯᠡᠬᠦ ᠪᠣᠯᠭᠠᠨ ᠪᠠᠬᠠᠨ ᠢᠨᠢᠶᠡᠮᠰᠦᠭᠯᠡᠬᠦ ᠮᠠᠶᠢᠭ ᠤ᠋ᠨ ᠵᠥᠭᠡᠯᠡᠨ ᠠᠭᠠᠯᠢ ᠭᠠᠷᠭᠠᠬᠤ ᠨᠢ ᠠᠶᠠᠨᠳᠠᠭᠠᠨ ᠳᠠᠳᠬᠠᠯ ᠪᠣᠯᠤᠭᠠᠳ ᠨᠢᠭᠤᠷ ᠲᠤᠨᠢ ᠲᠣᠭᠲᠠᠪᠤᠷᠢᠵᠢᠭᠰᠠᠨ ᠬᠡᠪ ᠪᠣᠯᠤᠨ ᠬᠤᠪᠢᠷᠠᠭᠰᠠᠨ ᠠ᠋ᠴᠠ ᠨᠢᠳᠦᠨ ᠦ᠌ ᠬᠢᠨᠢ ᠣᠨᠴᠠᠯᠢᠭ ᠲᠠᠢ ᠵᠥᠷᠢᠴᠡᠯᠳᠦᠵᠦ᠂ ᠰᠦᠷ ᠦᠢᠯᠡᠳᠦᠯ ᠢ᠋ ᠨᠢ ᠭᠦᠢᠴᠡᠳ ᠪᠠᠳᠠᠷᠠᠭᠤᠯᠬᠤ ᠳ᠋ᠤ᠌ ᠵᠢᠭᠠᠬᠠᠨ ᠬᠠᠷᠰᠢ ᠪᠣᠯᠵᠠᠢ᠃
ᠬᠠᠷᠢᠨ ᠡᠨᠡ ᠠᠪᠤᠭᠠᠢ ᠳ᠋ᠤ᠌ ᠭᠠᠤᠯᠢᠨ ᠬᠣᠩᠬᠣ ᠭᠡᠮᠡᠷ ᠲᠣᠳᠣᠬᠠᠨ ᠴᠡᠪᠡᠷ ᠬᠣᠭᠣᠯᠠᠢ ᠲᠠᠢ᠃
ᠲᠡᠷᠡ ᠴᠣᠬᠣᠮ ᠳᠠᠭᠤᠤ ᠳᠠᠭᠤᠯᠠᠵᠤ ᠴᠢᠳᠠᠳᠠᠭ ᠡᠰᠡᠬᠦ ᠶ᠋ᠢ ᠨᠢ ᠮᠡᠳᠡᠬᠦ ᠦᠭᠡᠢ᠂ ᠬᠡᠨ ᠴᠦ᠍ ᠲᠡᠭᠦᠨ ᠦ᠌ ᠳᠠᠭᠤᠯᠠᠬᠤ ᠶ᠋ᠢ ᠰᠣᠨᠣᠰᠤᠭᠰᠠᠨ ᠦᠭᠡᠢ ᠭᠡᠨᠡ᠃
ᠭᠡᠲᠡᠯᠡ ᠣᠯᠠᠨ ᠨᠠᠢᠳᠠ ᠶ᠋ᠢᠨ ᠴᠤᠭᠯᠠᠭᠠᠨ ᠳᠡᠭᠡᠷᠡ ᠢᠯᠡ ᠰᠢᠭᠦᠯᠲᠡ ᠬᠢᠬᠦ᠂ ᠠᠰᠠᠭᠤᠵᠤ ᠯᠠᠪᠯᠠᠬᠤ᠂ ᠲᠠᠢᠯᠪᠤᠷᠢᠯᠠᠨ ᠲᠣᠲᠣᠷᠬᠠᠢᠯᠠᠬᠤ ᠦᠭᠡ ᠠᠶᠠᠯᠭᠤ ᠨᠢ ᠨᠡᠭᠡᠷᠡᠨ ᠢᠷᠠᠭᠤ ᠬᠥᠭᠵᠢᠮ ᠦ᠋ᠨ ᠠᠶᠠᠰ ᠰᠢᠭ᠋ ᠲᠡᠢᠮᠦ ᠯᠡ ᠲᠣᠳᠣ ᠮᠥᠷᠲᠡᠭᠡᠨ ᠥᠨᠳᠥᠷ ᠪᠣᠭᠣᠨᠢ᠂ ᠠᠢᠵᠠᠮ ᠴᠣᠬᠢᠯᠭᠠ ᠲᠠᠭᠠᠷᠠᠨ ᠢᠷᠠᠭᠤᠬᠠᠨ ᠬᠦᠩᠬᠢᠨᠡᠮᠡ ᠰᠣᠨᠣᠰᠳᠠᠬᠤ ᠠᠵᠢ᠃
ᠲᠦᠪᠰᠢᠨ ᠦ᠌ ᠪᠠᠭᠠ ᠶ᠋ᠢᠨ ᠨᠠᠢᠵᠠ᠂ ᠳᠣᠲᠣᠨᠣ ᠨᠥᠬᠥᠷ ᠬᠠᠨ ᠱᠧᠦ ᠵᠦᠩ ᠭᠡᠭᠴᠢ ᠡᠮᠨᠡᠯᠭᠡ ᠶ᠋ᠢᠨ ᠮᠡᠷᠭᠡᠵᠢᠯᠲᠡᠨ᠃ ᠲᠡᠭᠦᠨ ᠲᠡᠢ ᠭᠠᠢᠭᠤᠢ ᠦᠶᠡᠷᠬᠡᠵᠦ ᠶᠠᠷᠠ ᠡᠮᠵᠡᠭ ᠢ᠋ᠶ᠋ᠡᠨ ᠮᠠᠭᠠᠵᠢᠯᠴᠠᠨ ᠨᠢᠭᠤᠴᠠ ᠳᠠᠯᠳᠠ ᠪᠠᠨ ᠬᠦᠦᠷᠨᠢᠬᠦ ᠡᠷᠡᠭᠡ ᠵᠢᠷᠣᠭᠠ ᠦᠭᠡᠢ ᠬᠠᠷᠢᠴᠠᠭᠠ ᠲᠠᠢ ᠠ᠋ᠴᠠ ᠨᠠᠭᠠᠳᠤᠮ ᠬᠢᠨ᠄《ᠭᠠᠢᠬᠠᠯ ᠲᠦᠪᠰᠢᠨ ᠴᠢ ᠳᠡ᠂ ᠬᠥᠩᠬᠥᠷ ᠰᠢᠷᠠ ᠨᠢᠳᠦ᠂ ᠭᠦᠳᠦᠭᠦᠷ ᠰᠢᠷᠠ ᠴᠢᠷᠠᠢ᠂ ᠠᠷᠰᠠᠭᠠᠷ ᠰᠢᠷᠠ ᠰᠢᠲᠦ᠂ ᠨᠢᠭᠤᠷ ᠳᠦᠭᠦᠷᠡᠩ ᠰᠢᠷᠠᠯᠠᠭᠠᠳ ᠨᠢᠭᠡ ᠴᠦ᠍ ᠡᠭᠡᠯᠢᠲᠡᠢ ᠳᠤᠯᠠᠭᠠᠨ ᠬᠠᠷᠠᠭᠳᠠᠬᠤ ᠭᠠᠵᠠᠷ ᠦᠭᠡᠢ ᠶᠦᠮ᠃ ᠨᠡᠭᠡᠷᠡᠨ ᠪᠠᠯᠠᠷ ᠡᠷᠲᠡᠨ ᠦ᠌ ᠠᠯᠲᠠᠨ ᠰᠢᠷᠠ ᠦᠰᠦᠲᠦ ᠰᠠᠷᠮᠠᠭᠴᠢᠨ ᠠ᠋ᠴᠠ ᠬᠤᠪᠢᠯᠤᠭᠠᠳ ᠤᠳᠠᠭᠠᠳᠤᠢ ᠪᠣᠯᠪᠠ ᠤᠤ ᠭᠡᠮᠡᠷ ᠵᠣᠯᠢᠭ ᠳᠠ᠃ ᠭᠡᠲᠡᠯᠡ ᠶᠠᠭᠠᠬᠢᠭᠠᠳ ᠡᠢᠮᠦ ᠨᠢᠭᠡ ᠠᠯᠲᠠᠨ ᠭᠤᠷᠭᠤᠤᠯᠳᠠᠢ ᠳᠣᠩᠭᠣᠳᠬᠤ ᠰᠢᠭ᠋ ᠤᠶᠠᠬᠠᠨ ᠴᠡᠭᠡᠯ ᠬᠣᠭᠣᠯᠠᠢ ᠲᠠᠢ ᠪᠣᠯᠴᠢᠬᠠᠭᠰᠠᠨ ᠪᠣᠢ? ᠴᠢᠭᠢᠶᠡᠲᠦᠷᠦᠦ!》 ᠭᠡᠳᠡᠭ ᠭᠡᠨᠡ᠃
ᠲᠦᠪᠰᠢᠨ ᠭᠤᠸᠠᠢ ᠡᠮᠦᠨᠡ ᠨᠢ ᠰᠠᠭᠤᠭᠠ ᠪᠣᠯᠤᠷᠴᠠᠭᠠᠨ ᠢ᠋ ᠤᠳᠠᠲᠠᠯᠠ ᠬᠠᠷᠠᠭᠠᠳ᠄
— ᠣᠳᠣ ᠠᠷᠠᠳ ᠤ᠋ᠨ ᠳᠡᠭᠡᠳᠦ ᠵᠡᠷᠭᠡ ᠶ᠋ᠢᠨ ᠰᠢᠭᠦᠬᠦ ᠬᠣᠷᠢᠶᠠᠨ ᠠ᠋ᠴᠠ ᠴᠢᠮᠠ ᠳ᠋ᠤ᠌ ᠠᠯᠠᠬᠤ ᠡᠷᠡᠭᠦᠦ ᠬᠡᠷᠡᠭᠵᠢᠭᠦᠯᠬᠦ ᠪᠡᠷ ᠬᠢᠨᠠᠨ ᠲᠣᠭᠲᠠᠭᠠᠭᠰᠠᠨ ᠰᠢᠭᠦᠨ ᠲᠠᠰᠤᠯᠤᠯᠲᠠ ᠶ᠋ᠢ ᠨᠡᠢᠲᠡᠯᠡᠶᠡ ᠭᠡᠮᠡᠨ ᠤᠶᠠᠬᠠᠨ ᠲᠣᠳᠣ ᠳᠠᠭᠤᠨ ᠢ᠋ᠶ᠋ᠠᠷ ᠠᠶᠠᠯᠭᠤ ᠲᠠᠲᠠᠭᠤᠯᠤᠨ ᠬᠡᠯᠡᠭᠡᠳ ᠦᠭᠡ ᠪᠡᠨ ᠲᠠᠰᠤᠯᠪᠠ᠃
ᠲᠡᠷᠡ ᠳᠣᠷᠣᠭᠰᠢ ᠬᠠᠷᠠᠭᠰᠠᠨ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠨᠢᠳᠦᠨ ᠰᠢᠯ ᠢ᠋ᠶ᠋ᠡᠨ ᠠᠯᠭᠤᠷᠬᠠᠨ ᠠᠪᠴᠤ ᠨᠢᠮᠪᠠᠢ ᠯᠠᠪᠳᠠᠭᠤᠨ ᠵᠦᠯᠭᠦᠨ ᠵᠠᠰᠠᠵᠤ ᠵᠡᠭᠦᠭᠡᠳ ᠰᠠᠶ᠋ᠢ ᠡᠮᠦᠨᠡ ᠨᠢ ᠲᠠᠯᠪᠢᠭᠠᠰᠤᠲᠠᠢ ᠭᠢᠯᠠᠭᠠᠷ ᠬᠠᠲᠠᠭᠤ ᠴᠠᠭᠠᠨ ᠴᠠᠭᠠᠰᠤᠲᠠᠢ ᠲᠠᠮᠠᠭᠠ ᠰᠢᠭ᠋ ᠲᠣᠳᠣᠷᠬᠠᠢ ᠰᠢᠭᠦᠨ ᠲᠠᠰᠤᠯᠤᠯᠲᠠ ᠶ᠋ᠢᠨ ᠪᠢᠴᠢᠭ ᠢ᠋ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠷᠢᠭᠠᠳ ᠪᠣᠰᠴᠤ ᠵᠣᠭᠰᠣᠪᠠ᠃
— ᠶᠠᠯᠠᠲᠠᠨ ᠪᠣᠯᠣᠷᠴᠠᠭᠠᠨ ᠡᠬᠡᠨᠡᠷ ᠦᠵᠡᠰᠬᠦᠯᠡᠩ ᠲᠡᠢ ᠪᠡᠨ ᠤᠷᠲᠤ ᠬᠤᠭᠤᠴᠠᠭᠠ ᠪᠠᠷ ᠬᠠᠢᠷᠠ ᠳᠤᠷᠠᠯᠠᠯ ᠢ᠋ᠶ᠋ᠠᠨ ᠠᠯᠲᠠᠨ ᠡᠪᠳᠡᠷᠡᠯᠴᠡᠵᠦ᠂ ᠣᠯᠠᠨᠲᠠ ᠴᠣᠬᠢᠵᠤ ᠵᠣᠳᠣᠨ ᠰᠢᠷᠬᠠᠲᠤᠭᠤᠯᠤᠭᠰᠠᠨ ᠢ᠋ᠶ᠋ᠠᠷ ᠦᠯᠦ ᠪᠠᠷᠠᠨ ᠠᠯᠠᠬᠤ ᠰᠠᠨᠠᠭᠠ ᠲᠥᠷᠥᠵᠡᠢ᠃ ᠨᠢᠳᠤᠨᠤᠨ ᠵᠢᠯ ᠦ᠋ᠨ ᠠᠷᠪᠠᠨ ᠨᠢᠭᠡᠨ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠲᠠᠪᠤᠨ ᠤ᠋ ᠰᠥᠨᠢ᠂ ᠦᠵᠡᠰᠬᠦᠯᠡᠩ ᠪᠣᠯᠤᠷᠴᠠᠭᠠᠨ ᠳ᠋ᠤ᠌ ᠴᠣᠬᠢᠭᠳᠠᠨ ᠰᠢᠷᠬᠠᠲᠤᠭᠠᠳ ᠭᠡᠷ ᠲᠡᠭᠡᠨ ᠡᠪᠡᠳᠴᠢᠨ ᠢ᠋ᠶ᠋ᠡᠨ ᠰᠤᠪᠢᠯᠠᠵᠤ ᠪᠠᠢᠬᠤ ᠬᠤᠭᠤᠴᠠᠭᠠᠨ ᠳ᠋ᠤ᠌᠂ ᠪᠣᠯᠤᠷᠴᠠᠭᠠᠨ ᠡᠬᠡᠨᠡᠷ ᠢ᠋ᠶ᠋ᠡᠨ ᠠᠯᠠᠵᠤ ᠪᠣᠯᠬᠤ ᠰᠠᠢᠨ ᠲᠣᠬᠢᠶᠠᠯ ᠭᠡᠵᠦ ᠦᠵᠡᠭᠡᠳ ᠠᠷᠪᠠᠨ ᠨᠠᠢ᠍ᠮᠠᠨ ᠤ᠋ ᠦᠳᠡᠰᠢ ᠶ᠋ᠢᠨ ᠵᠢᠷᠭᠤᠭᠠᠨ ᠴᠠᠭ ᠭᠠᠷᠤᠢ ᠶ᠋ᠢᠨ ᠦᠶᠡ ᠪᠡᠷ ᠶᠠᠰᠤ ᠲᠣᠭᠲᠠᠪᠤᠷᠢᠵᠢᠭᠤᠯᠬᠤ B ᠵᠢᠷᠭᠤᠳᠤᠭᠠᠷ ᠨᠡᠷᠡᠮᠡᠯ ᠪᠣᠯᠤᠨ ᠲᠡᠭᠦᠨ ᠲᠡᠢ ᠤᠷᠪᠠᠯ ᠡᠭᠦᠰᠬᠦ ᠬᠣᠣᠷᠲᠤ ᠴᠢᠨᠠᠷ ᠤ᠋ᠨ ᠠᠮᠤᠷᠵᠢᠭᠤᠯᠬᠤ ᠡᠮ A ᠭᠤᠷᠪᠠᠳᠤᠭᠠᠷ ᠢ᠋ ᠬᠣᠯᠢᠨ ᠰᠤᠳᠠᠯ ᠳ᠋ᠤᠨᠢ ᠲᠠᠷᠢᠯᠭᠠ ᠬᠢᠭᠰᠡᠨ ᠳ᠋ᠦ᠍ ᠦᠵᠡᠰᠬᠦᠯᠡᠩ ᠳᠣᠣᠷᠠ ᠨᠢ ᠬᠣᠣᠷᠳᠠᠭᠠᠳ ᠦᠬᠦᠵᠡᠢ᠃
ᠳᠡᠭᠡᠷᠡᠬᠢ ᠬᠡᠷᠡᠭ ᠶᠠᠪᠤᠳᠠᠯ ᠦᠨᠡᠨ ᠮᠠᠭᠠᠳ᠂ ᠭᠡᠷᠡᠴᠢ ᠪᠠᠷᠢᠮᠲᠠ ᠲᠣᠳᠣᠷᠬᠠᠢ᠂ ᠶᠠᠯᠠᠲᠠᠨ ᠥᠪᠡᠷ ᠢ᠋ᠶ᠋ᠡᠨ ᠴᠦ᠍ ᠦᠨᠡᠨ ᠭᠡᠵᠦ ᠥᠴᠢᠭᠯᠡᠭᠰᠡᠨ ᠲᠤᠯᠠ ᠰᠠᠨᠠᠭᠠᠴᠢᠯᠠᠭᠠ ᠲᠠᠢ ᠪᠠᠷ ᠬᠥᠮᠦᠨ ᠠᠯᠠᠭᠰᠠᠨ ᠶᠠᠯᠠ ᠳ᠋ᠤ᠌ ᠬᠦᠷᠦᠭᠰᠡᠨ ᠪᠣᠯᠬᠣᠷ ᠡᠳᠦᠭᠡ ᠮᠠᠨ ᠤ᠋ ᠬᠣᠷᠢᠶᠠ ᠪᠦᠭᠦᠳᠡ ᠨᠠᠢᠷᠠᠮᠳᠠᠬᠤ ᠳᠤᠮᠳᠠᠳᠤ ᠠᠷᠠᠳ ᠤᠯᠤᠰ ᠤ᠋ᠨ ᠡᠷᠡᠭᠦᠦ ᠶ᠋ᠢᠨ ᠬᠠᠤᠯᠢ ᠶ᠋ᠢᠨ 132 ᠳ᠋ᠤᠭᠠᠷ ᠵᠤᠷᠪᠤᠰ ᠪᠣᠯᠤᠨ 53 ᠳ᠋ᠤᠭᠠᠷ ᠵᠤᠷᠪᠤᠰ ᠤ᠋ᠨ ᠲᠣᠭᠲᠠᠭᠠᠯ ᠶᠣᠰᠣᠭᠠᠷ ᠬᠥᠮᠦᠨ ᠠᠯᠠᠭᠰᠠᠨ ᠶᠠᠯᠠᠲᠠᠨ ᠪᠣᠯᠤᠷᠴᠠᠭᠠᠨ ᠢ᠋ ᠠᠯᠠᠬᠤ ᠶᠠᠯᠠ ᠪᠠᠷ ᠰᠢᠢᠳᠬᠡᠵᠦ ᠳᠣᠣᠷᠠ ᠨᠢ ᠬᠡᠷᠡᠭᠵᠢᠭᠦᠯᠦᠨ᠂ ᠤᠯᠤᠰ ᠲᠥᠷᠥ ᠶ᠋ᠢᠨ ᠡᠷᠬᠡ ᠶ᠋ᠢ ᠨᠢ ᠨᠠᠰᠤᠨ ᠲᠤᠷᠰᠢ ᠬᠠᠰᠤᠨᠠ᠃
ᠲᠢᠩᠬᠢᠮ ᠦ᠋ᠨ ᠳᠠᠷᠤᠭᠠ ᠲᠦᠪᠰᠢᠨ ᠢᠩᠭᠢᠵᠦ ᠲᠣᠳᠣᠬᠠᠨ ᠳᠠᠭᠤᠨ ᠢ᠋ᠶ᠋ᠠᠷ ᠰᠢᠭᠦᠨ ᠲᠠᠰᠤᠯᠤᠯᠲᠠ ᠶ᠋ᠢᠨ ᠪᠢᠴᠢᠭ ᠢ᠋ ᠤᠩᠰᠢᠵᠤ ᠪᠠᠷᠠᠭᠠᠳ ᠳᠡᠷᠭᠡᠳᠡᠬᠢ ᠪᠢᠴᠢᠭᠡᠴᠢ ᠬᠥᠬᠡᠲᠤᠯᠢ ᠳ᠋ᠤ᠌ ᠭᠠᠷᠳᠠᠭᠤᠯᠤᠭᠠᠳ ᠥᠪᠡᠷ ᠢ᠋ᠶ᠋ᠡᠨ ᠰᠠᠭᠤᠳᠠᠯ ᠳ᠋ᠠᠭᠠᠨ ᠰᠠᠭᠤᠴᠢᠬᠠᠯᠠ᠃
ᠲᠡᠷᠡ᠂ ᠶᠠᠯᠠᠲᠠᠨ ᠪᠣᠯᠤᠷᠴᠠᠭᠠᠨ ᠢ᠋ ᠬᠡᠳᠦᠨ ᠮᠢᠨᠦ᠋ᠲ ᠨᠢᠳᠦ ᠴᠠᠪᠴᠢᠯ ᠦᠭᠡᠢ ᠴᠣᠭᠣᠷᠣᠲᠠᠯᠠ ᠰᠢᠷᠳᠡᠨ ᠨᠢᠭᠡ ᠦᠭᠡ ᠴᠦ᠍ ᠬᠡᠯᠡᠭᠰᠡᠨ ᠦᠭᠡᠢ᠃
ᠡᠨᠡ ᠨᠢ ᠲᠡᠭᠦᠨ ᠦ᠌ ᠪᠡᠶᠡ ᠡᠴᠡ ᠶᠠᠮᠠᠷ ᠨᠢᠭᠡ ᠶᠠᠭᠤᠮᠠ ᠡᠷᠢᠵᠦ ᠪᠠᠢᠭᠠ ᠰᠢᠭ᠋ ᠪᠠᠢᠯᠠ᠃
ᠪᠣᠯᠤᠷᠴᠠᠭᠠᠨ ᠤ᠋ ᠴᠢᠷᠠᠢ ᠠᠭᠱᠠᠨ ᠵᠠᠭᠤᠷᠠ ᠬᠤᠵᠢᠢᠵᠤ ᠴᠠᠢᠷᠠᠭᠠᠳ ᠥᠨᠳᠥᠷ ᠨᠠᠷᠢᠬᠠᠨ ᠪᠡᠶᠡ ᠨᠢ ᠴᠦ᠍ ᠢᠳᠡᠭ ᠢᠳᠡᠭ ᠬᠠᠢᠪᠠᠯᠵᠠᠨ ᠲᠠᠢᠪᠠᠯᠵᠠᠨᠠ᠃
ᠬᠡᠳᠦᠨ ᠮᠢᠨᠦ᠋ᠲ ᠦ᠋ᠨ ᠳᠠᠷᠠᠭᠠ ᠲᠦᠪᠰᠢᠨ᠂ ᠪᠣᠯᠤᠷᠴᠠᠭᠠᠨ ᠢ᠋ ᠬᠠᠵᠠᠭᠤ ᠳ᠋ᠠᠬᠢ ᠰᠠᠨᠳᠠᠯᠢ ᠳᠡᠭᠡᠷᠡ ᠳᠣᠬᠢᠵᠤ ᠰᠠᠭᠤᠯᠭᠠᠭᠠᠳ᠄
— ᠴᠢᠮᠠᠶ᠋ᠢ ᠠᠯᠠᠬᠤ ᠶᠠᠯᠠ ᠪᠠᠷ ᠰᠢᠢᠳᠬᠡᠭᠰᠡᠨ ᠠᠷᠠᠳ ᠤ᠋ᠨ ᠳᠡᠭᠡᠳᠦ ᠵᠡᠷᠭᠡ ᠶ᠋ᠢᠨ ᠰᠢᠭᠦᠬᠦ ᠬᠣᠷᠢᠶᠠᠨ ᠤ᠋ ᠰᠢᠭᠦᠨ ᠲᠠᠰᠤᠯᠤᠯᠲᠠ ᠶ᠋ᠢ ᠣᠳᠣᠬᠠᠨ ᠨᠢᠭᠡᠨᠲᠡ ᠨᠡᠢᠲᠡᠯᠡᠪᠡ᠃ ᠥᠨᠥᠳᠥᠷ ᠦ᠋ᠨ ᠦᠳᠡ ᠶ᠋ᠢᠨ ᠡᠮᠦᠨᠡᠬᠢ ᠠᠷᠪᠠᠨ ᠴᠠᠭ ᠬᠠᠭᠠᠰ ᠲᠤ᠌ ᠭᠦᠢᠴᠡᠳᠬᠡᠨᠡ᠃ ᠮᠠᠨ ᠤ᠋ ᠬᠣᠷᠢᠶᠠ ᠠᠷᠠᠳ ᠤ᠋ᠨ ᠳᠡᠭᠡᠳᠦ ᠵᠡᠷᠭᠡ ᠶ᠋ᠢᠨ ᠰᠢᠭᠦᠬᠦ ᠬᠣᠷᠢᠶᠠᠨ ᠤ᠋ ᠬᠣᠷᠢᠶᠠᠨ ᠳᠠᠷᠤᠭᠠ ᠠ᠋ᠴᠠ ᠪᠠᠭᠤᠯᠭᠠᠭᠰᠠᠨ ᠠᠯᠠᠬᠤ ᠶᠠᠯᠠ ᠶ᠋ᠢ ᠭᠦᠢᠴᠡᠳᠬᠡᠬᠦ ᠵᠠᠷᠯᠢᠭ ᠵᠣᠰᠣᠭᠠᠷ ᠴᠢᠮᠠ ᠳ᠋ᠤ᠌ ᠰᠢᠭᠦᠨ ᠲᠠᠰᠤᠯᠤᠯᠲᠠ ᠶ᠋ᠢ ᠬᠡᠷᠡᠭᠵᠢᠭᠦᠯᠬᠦ ᠪᠣᠯᠤᠨᠠ᠃ ᠣᠳᠣ ᠪᠢᠳᠡ ᠮᠠᠨ ᠤ᠋ ᠤᠯᠤᠰ ᠤ᠋ᠨ ᠡᠷᠡᠭᠦᠦ ᠶ᠋ᠢᠨ ᠵᠠᠷᠭᠤ ᠶ᠋ᠢᠨ ᠬᠠᠤᠯᠢ ᠶ᠋ᠢᠨ 155 ᠳ᠋ᠤᠭᠠᠷ ᠵᠤᠷᠪᠤᠰ ᠤ᠋ᠨ ᠲᠣᠭᠲᠠᠭᠠᠯ ᠶᠣᠰᠣᠭᠠᠷ ᠠᠯᠠᠬᠤ ᠡᠷᠡᠭᠦᠦ ᠶ᠋ᠢ ᠬᠡᠷᠡᠭᠵᠢᠭᠦᠯᠬᠦ ᠡᠴᠡ ᠡᠮᠦᠨᠡᠬᠢ ᠬᠢᠪᠡᠰᠦ ᠵᠣᠬᠢᠬᠤ ᠭᠠᠷ ᠭᠦᠢᠴᠡᠳᠬᠡᠯ ᠢ᠋ ᠬᠢᠨᠡ᠃
᠁
— ᠴᠢᠮᠠᠲᠤ ᠲᠥᠷᠥᠯ ᠰᠠᠳᠤᠨ᠂ ᠨᠠᠢᠵᠠ ᠨᠥᠬᠥᠳ ᠲᠡᠭᠡᠨ ᠦᠯᠡᠳᠡᠭᠡᠬᠦ ᠰᠠᠨᠠᠯ ᠱᠠᠭᠠᠷᠳᠠᠯᠭᠠ᠂ ᠡᠳ᠋ ᠪᠣᠳᠠᠰ ᠤ᠋ᠨ ᠥᠭᠭᠦᠯ ᠠᠪᠤᠯ᠂ ᠨᠠᠢᠳᠠᠬᠤ ᠦᠭᠡ᠂ ᠵᠠᠬᠢᠬᠤ ᠭᠡᠷᠢᠶᠡᠰ ᠪᠠᠢᠨᠠ ᠤᠤ?
— ᠪᠠᠢᠬᠤ ᠦᠭᠡᠢ᠃
— ᠴᠢ ᠠᠷᠠᠳ ᠤ᠋ᠨ ᠳᠡᠭᠡᠳᠦ ᠵᠡᠷᠭᠡ ᠶ᠋ᠢᠨ ᠰᠢᠭᠦᠬᠦ ᠬᠣᠷᠢᠶᠠᠨ ᠤ᠋ ᠰᠢᠭᠦᠨ ᠲᠠᠰᠤᠯᠤᠯᠲᠠ ᠳ᠋ᠤ᠌ ᠰᠠᠨᠠᠯ ᠰᠡᠵᠢᠭᠯᠡᠯ ᠪᠠᠢᠨᠠ ᠤᠤ?
᠁
ᠪᠣᠯᠤᠷᠴᠠᠭᠠᠨ ᠤ᠋ ᠬᠠᠮᠤᠭ ᠰᠡᠭᠦᠯ ᠦ᠋ᠨ ᠠᠰᠠᠭᠤᠳᠠᠯ ᠳ᠋ᠤ᠌ ᠢᠯᠡᠷᠡᠭᠦᠯᠦᠭᠰᠡᠨ ᠡᠭᠡᠳᠡᠷᠡᠨ ᠲᠦᠪᠡᠭᠰᠢᠶᠡᠭᠰᠡᠨ ᠪᠠᠢᠳᠠᠯ ᠪᠣᠯᠤᠨ ᠰᠢᠭᠤᠳ ᠬᠠᠷᠢᠭᠤᠯᠤᠭᠰᠠᠨ ᠦᠭᠡᠢ ᠪᠠᠢᠳᠠᠯ ᠨᠢ ᠲᠦᠪᠰᠢᠨ ᠦ᠌ ᠠᠩᠬᠠᠷᠤᠯ ᠢ᠋ ᠣᠨᠴᠠ ᠲᠠᠲᠠᠭᠰᠠᠨ ᠪᠣᠯᠤᠯᠲᠠᠢ᠃
ᠣᠷᠣ ᠠ᠋ᠴᠠ ᠪᠠᠨ ᠪᠣᠰᠤᠭᠠᠳ ᠳᠡᠷᠭᠡᠳᠡᠭᠦᠷ ᠨᠢ ᠨᠠᠭᠠᠰᠢ ᠴᠠᠭᠠᠰᠢ ᠠᠯᠬᠤᠯᠠᠬᠤ ᠶ᠋ᠢᠨ ᠳᠠᠭᠠᠤ ᠲᠠᠬᠢᠵᠤ ᠯᠠᠪᠯᠠᠨ ᠠᠰᠠᠭᠤᠪᠠ᠃
ᠶᠠᠯᠠᠲᠠᠨ ᠪᠣᠯᠤᠷᠴᠠᠭᠠᠨ ᠲᠣᠯᠣᠭᠠᠢ ᠪᠠᠨ ᠤᠨᠵᠢᠭᠤᠯᠤᠨ ᠦᠭᠡ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃
ᠲᠡᠷᠡ ᠭᠠᠷᠳᠠᠵᠤ ᠠᠪᠤᠭᠰᠠᠨ ᠰᠢᠭᠦᠨ ᠲᠠᠰᠤᠯᠤᠯᠲᠠ ᠶ᠋ᠢᠨ ᠪᠢᠴᠢᠭ ᠢ᠋ᠶ᠋ᠡᠨ ᠲᠡᠮᠦᠷ ᠪᠠᠷᠢᠶᠠ ᠲᠠᠢ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠴᠡᠴᠡᠷᠬᠢᠯᠡᠨ ᠪᠠᠷᠢᠭᠰᠠᠭᠠᠷ ᠮᠡᠯᠡᠷᠡᠨᠡ᠃ ᠡᠢᠮᠦ ᠯᠡ ᠨᠢᠭᠡ ᠬᠡᠰᠡᠭ ᠭᠢᠯᠠᠭᠠᠷ ᠴᠠᠭᠠᠨ ᠶᠠᠯᠢᠮ ᠦᠭᠡᠢᠬᠡᠨ ᠴᠠᠭᠠᠰᠤᠨ ᠳᠡᠭᠡᠷᠡ ᠬᠣᠯᠠ ᠬᠣᠯᠠ ᠳᠠᠷᠤᠮᠠᠯᠯᠠᠭᠰᠠᠨ ᠬᠡᠳᠦᠨ ᠪᠢᠴᠢᠭ ᠡᠳᠦᠢ ᠴᠢᠨᠡᠭᠡᠨ ᠷᠢᠳᠢ ᠰᠢᠳᠢ ᠲᠡᠢ ᠪᠠᠢᠵᠤ᠂ ᠨᠡᠭᠡᠷᠡᠨ ᠤᠳᠠᠯ ᠦᠭᠡᠢ ᠲᠡᠭᠦᠨ ᠦ᠌ ᠠᠮᠢ ᠨᠠᠰᠤ ᠶ᠋ᠢ ᠳᠠᠭᠤᠰᠬᠠᠴᠢᠬᠠᠬᠤ ᠭᠡᠵᠢ ᠤᠤ?
ᠠᠯᠠᠬᠤ ᠶᠠᠯᠠᠲᠠᠨ ᠳ᠋ᠤ᠌ ᠡᠷᠡᠭᠦᠦ ᠶ᠋ᠢᠨ ᠰᠢᠢᠳᠬᠡᠯ ᠢ᠋ ᠬᠡᠷᠡᠭᠵᠢᠭᠦᠯᠬᠦ ᠡᠴᠡ ᠡᠮᠦᠨᠡ᠂ ᠪᠡᠶᠡ ᠶ᠋ᠢ ᠨᠢ ᠪᠠᠢᠴᠠᠭᠠᠨ ᠲᠣᠳᠣᠯᠠᠵᠤ᠂ ᠭᠡᠷᠢᠶᠡᠰ ᠨᠠᠢᠳᠠᠯᠭᠠ ᠦᠯᠡᠳᠡᠭᠡᠬᠦ ᠡᠰᠡᠬᠦ ᠶ᠋ᠢ ᠯᠠᠪᠯᠠᠵᠤ ᠠᠰᠠᠭᠤᠬᠤ ᠨᠢ ᠤᠯᠤᠰ ᠤ᠋ᠨ ᠬᠠᠤᠯᠢ ᠳ᠋ᠤ᠌ ᠪᠠᠲᠤᠯᠠᠭᠳᠠᠭᠰᠠᠨ ᠵᠤᠷᠪᠤᠰ ᠪᠣᠯᠪᠠᠴᠤ ᠨᠢᠭᠡ ᠶᠣᠰᠣᠨ ᠳ᠋ᠠᠭᠠᠨ ᠬᠡᠳᠦᠢ ᠳᠥᠭᠥᠮ ᠬᠢᠪᠡᠯ ᠲᠡᠳᠦᠢ ᠳᠥᠭᠥᠮ ᠲᠦᠳᠡ ᠭᠠᠷ ᠭᠦᠢᠴᠡᠳᠬᠡᠯ ᠶᠦᠮ᠃
ᠲᠡᠷᠡᠴᠢᠯᠡᠨ ᠪᠣᠯᠤᠷᠴᠠᠭᠠᠨ ᠳ᠋ᠤ᠌ ᠶᠠᠮᠠᠷ ᠴᠦ᠍ ᠪᠢᠴᠢᠵᠦ ᠲᠡᠮᠳᠡᠭᠯᠡᠮᠡᠷ ᠰᠠᠨᠠᠯ ᠱᠠᠭᠠᠷᠳᠠᠯᠭᠠ ᠥᠬᠡᠢ᠃ ᠬᠦᠯᠢᠶᠡᠵᠦ ᠬᠤᠷᠢᠶᠠᠬᠤ᠂ ᠦᠯᠡᠳᠡᠭᠡᠵᠦ ᠳᠠᠩᠰᠠᠯᠠᠮᠠᠷ ᠡᠳ᠋ ᠪᠣᠳᠠᠰ ᠤ᠋ᠨ ᠥᠭᠭᠦᠯ ᠠᠪᠤᠯ᠂ ᠲᠤᠰᠢᠶᠠᠵᠤ ᠨᠠᠢᠳᠠᠬᠤ ᠵᠦᠢᠯ ᠴᠦ᠍ ᠠᠯᠠᠭᠠ᠃
ᠵᠥᠪᠬᠡᠨ ᠡᠨᠡ ᠲᠡᠷᠡ ᠬᠦᠰᠦᠨᠦᠭ ᠭᠦᠢᠴᠡᠳᠬᠡᠯ ᠳ᠋ᠦ᠍ ᠬᠡᠳᠦ ᠤᠳᠠᠭᠠ ᠬᠤᠷᠤᠭᠤᠨ ᠣᠷᠣᠮ ᠢ᠋ᠶ᠋ᠠᠨ ᠤᠯᠠᠯᠵᠠᠭᠤᠯᠤᠨ ᠳᠠᠷᠤᠭᠠᠳ ᠦᠯᠡᠳᠡᠭᠡᠬᠦ ᠲᠡᠳᠦᠢ ᠯᠡ ᠶᠦᠮ᠃
ᠪᠣᠯᠤᠷᠴᠠᠭᠠᠨ ᠳᠠᠬᠢᠭᠠᠳ ᠦᠭᠡ ᠳᠤᠤᠭᠠᠷᠬᠤ ᠦᠭᠡᠢ ᠪᠣᠯᠬᠤ ᠳ᠋ᠤ᠌ ᠲᠦᠪᠰᠢᠨ ᠴᠦ᠍ ᠲᠠᠬᠢᠵᠤ ᠯᠠᠪᠯᠠᠬᠤ ᠴᠢᠬᠤᠯᠠ ᠦᠭᠡᠢ ᠭᠡᠮᠡᠨ ᠰᠠᠨᠠᠭᠠᠳ ᠭᠠᠷ ᠭᠦᠢᠴᠡᠳᠬᠡᠯ ᠳᠠᠭᠤᠰᠤᠭᠰᠠᠨ ᠢ᠋ᠶ᠋ᠠᠨ ᠨᠡᠢᠲᠡᠯᠡᠵᠦ᠂ ᠬᠦᠰᠦᠨᠦᠭ ᠡᠨᠡ ᠲᠡᠷᠡ ᠪᠡᠨ ᠳᠡᠷᠭᠡᠳᠡ ᠨᠢ ᠲᠥᠪ ᠵᠣᠭᠰᠣᠨ ᠵᠠᠷᠯᠢᠭ ᠬᠦᠯᠢᠶᠡᠵᠦ ᠪᠠᠢᠭᠠ ᠴᠠᠭᠳᠠᠭᠠ ᠨᠠᠷ ᠲᠠᠭᠠᠨ ᠲᠤᠰᠢᠶᠠᠪᠠ᠃
ᠳᠠᠮ ᠲᠠᠢ ᠦᠢᠯᠡ ᠳ᠋ᠡᠭᠡᠨ ᠲᠡᠰᠴᠦ ᠴᠠᠭᠠᠷᠠᠪᠠᠯ ᠲᠠᠪᠤᠨ ᠬᠤᠷᠤᠭᠤᠨ ᠳ᠋ᠤᠨᠢ ᠰᠢᠳᠢ ᠣᠷᠣᠰᠢᠳᠠᠭ ᠭᠡᠭᠴᠢ ᠪᠡᠷ ᠲᠤᠬᠠᠢᠯᠠᠭᠰᠠᠨ ᠠᠵᠢᠯ ᠳ᠋ᠠᠭᠠᠨ ᠰᠦᠷᠡᠬᠡᠢ ᠭᠠᠷᠮᠠᠭᠠᠢ ᠴᠠᠭᠳᠠᠭᠠ ᠨᠠᠷ ᠠᠷᠠᠢ ᠭᠤᠷᠪᠠᠨ ᠮᠢᠨᠦ᠋ᠲ ᠪᠣᠯᠤᠯ ᠦᠭᠡᠢ ᠪᠡᠷ ᠪᠣᠯᠤᠷᠴᠠᠭᠠᠨ ᠤ᠋ ᠳᠥᠷᠪᠡᠨ ᠲᠠᠯᠠ ᠠ᠋ᠴᠠ ᠬᠣᠮᠣᠷᠣᠨ ᠣᠴᠢᠵᠤ ᠢᠰᠬᠦᠯᠦᠨ ᠰᠥᠭᠥᠳᠬᠡᠭᠡᠳ ᠭᠠᠷ ᠬᠥᠯ ᠳ᠋ᠡᠬᠢ ᠭᠢᠨᠵᠢ ᠲᠤᠱᠠᠭᠠ ᠶ᠋ᠢ ᠨᠢ ᠰᠤᠯᠠᠯᠠᠨ ᠠᠯᠳᠠᠷᠠᠭᠠᠵᠤ᠂ ᠳᠠᠬᠢᠭᠠᠳ ᠨᠠᠷᠢᠨ ᠪᠥᠬᠡᠯᠢᠭ ᠣᠯᠣᠰᠣᠨ ᠳᠡᠭᠡᠰᠦ ᠪᠡᠷ ᠠᠲᠤᠷᠢᠲᠠᠯᠠ ᠠᠷᠤᠭᠴᠢᠯᠠᠨ ᠪᠠᠭᠯᠠᠴᠢᠬᠠᠯᠠ᠃
ᠠᠯᠳᠠᠷᠲᠤ ᠡᠮᠴᠢ ᠪᠣᠯᠤᠷᠴᠠᠭᠠᠨ ᠤ᠋ ᠠᠮᠢ ᠨᠠᠰᠤᠨ ᠤ᠋ ᠡᠴᠦᠰ ᠦ᠋ᠨ ᠴᠠᠭ ᠮᠥᠴᠡ ᠢᠩᠭᠢᠵᠦ ᠯᠡ ᠬᠦᠷᠴᠦ ᠢᠷᠡᠭᠰᠡᠨ ᠪᠠᠢᠵᠠᠢ᠃
ᠡᠬᠡᠨᠡᠷ ᠢ᠋ᠶ᠋ᠡᠨ ᠠᠯᠠᠭᠰᠠᠨ ᠬᠠᠷᠢᠭᠤ ᠲᠥᠯᠥᠪᠦᠷᠢ ᠳ᠋ᠦ᠍ ᠪᠣᠯᠤᠷᠴᠠᠭᠠᠨ ᠣᠷᠴᠢᠯᠠᠩ ᠶᠢᠷᠲᠢᠨᠴᠦ ᠳ᠋ᠦ᠍ ᠭᠤᠴᠢᠨ ᠨᠠᠢ᠍ᠮᠠᠬᠠᠨ ᠵᠢᠯ ᠠᠮᠢᠳᠤᠷᠠᠬᠤ ᠵᠠᠭᠤᠷᠮᠠᠭ ᠬᠤᠪᠢ ᠲᠠᠢ ᠰᠠᠨᠵᠠᠢ᠃
ᠬᠠᠤᠯᠢ ᠭᠡᠭᠴᠢ ᠬᠥᠮᠦᠰ ᠦ᠋ᠨ ᠰᠡᠳᠬᠢᠯ ᠳ᠋ᠡᠬᠢ 《ᠲᠥᠪ ᠭᠣᠣᠯᠴᠢ》 ᠶ᠋ᠢᠨ ᠪᠠᠲᠤᠶᠤᠰᠤ᠃ ᠬᠡᠷᠪᠡ ᠲᠡᠭᠦᠨ ᠦ᠌ ᠲᠥᠪ ᠭᠣᠣᠯᠴᠢ ᠶ᠋ᠢᠨ ᠦᠨᠡ ᠥᠷᠲᠡᠭ ᠨᠢ ᠬᠢᠭᠰᠡᠨ ᠬᠡᠷᠡᠭ ᠲᠡᠢ ᠨᠢ ᠲᠣᠬᠢᠷᠠᠭᠰᠠᠨ ᠰᠢᠢᠳᠬᠡᠯ ᠣᠯᠭᠣᠬᠤ ᠳ᠋ᠤ᠌ ᠪᠠᠢᠳᠠᠭ ᠪᠣᠯ ᠨᠡᠩ ᠴᠦ᠍ ᠠᠮᠢ ᠶ᠋ᠢ ᠠᠮᠢ ᠪᠠᠷ ᠨᠢ ᠲᠥᠯᠥᠬᠦ ᠡᠴᠡ ᠢᠯᠡᠭᠦᠦ ᠣᠨᠣᠪᠴᠢᠲᠠᠢ ᠬᠡᠷᠡᠭ ᠡᠨᠡ ᠶᠢᠷᠲᠢᠨᠴᠦ ᠳ᠋ᠦ᠍ ᠥᠭᠡᠷᠡ ᠶᠠᠭᠤ ᠪᠠᠢᠬᠤ ᠪᠣᠢ? ᠬᠠᠷᠠᠮᠰᠠᠯᠲᠠᠢ ᠨᠢ ᠪᠣᠯᠤᠷᠴᠠᠭᠠᠨ ᠤ᠋ ᠠᠵᠢᠯ᠂ ᠲᠤᠬᠠᠢᠯᠠᠪᠠᠯ ᠡᠮᠴᠢ ᠭᠡᠳᠡᠭ ᠡᠨᠡ ᠬᠦ᠌ ᠡᠷᠬᠢᠮ ᠨᠡᠷᠡ ᠲᠡᠢ ᠨᠢ ᠠᠳᠠᠯᠢᠳᠬᠠᠨ ᠬᠠᠷᠢᠴᠠᠭᠤᠯᠪᠠᠯ ᠬᠤᠪᠢ ᠵᠠᠶᠠᠭᠠ ᠲᠡᠭᠦᠨ ᠳ᠋ᠦ᠍ ᠳᠠᠩᠴᠤ ᠭᠣᠣᠯᠴᠢ ᠪᠤᠰᠤ ᠪᠣᠯᠵᠠᠢ᠃
ᠬᠣᠷᠢᠭᠠᠳ ᠵᠢᠯ ᠦ᠋ᠨ ᠲᠤᠷᠰᠢ ᠲᠡᠷᠡ ᠲᠣᠭᠠ ᠦᠭᠡᠢ ᠣᠯᠠᠨ ᠪᠠᠴᠢᠮ ᠡᠪᠡᠳᠴᠢᠲᠡᠨ ᠲᠡᠢ ᠤᠴᠠᠷᠠᠨ ᠪᠦᠬᠦ ᠡᠷᠳᠡᠮ ᠴᠢᠳᠠᠪᠤᠷᠢ ᠪᠠᠷ ᠢ᠋ᠶ᠋ᠠᠨ ᠠᠪᠤᠷᠠᠵᠤ ᠡᠮᠴᠢᠯᠡᠳᠡᠭ ᠪᠠᠢᠭᠰᠠᠨ᠃
ᠲᠡᠷᠡᠴᠢᠯᠡᠨ ᠦᠵᠡᠲᠡᠯᠡ ᠠᠮᠢ ᠨᠠᠰᠤ ᠪᠠᠨ ᠠᠯᠳᠠᠮᠠᠷ ᠪᠠᠢᠭᠠ ᠬᠥᠮᠦᠨ ᠢ᠋ ᠴᠦ᠍ ᠠᠮᠠ ᠬᠡᠯᠡ ᠪᠡᠷ ᠠᠷᠭᠠᠳᠠᠨ ᠵᠣᠷᠢᠭᠵᠢᠭᠤᠯᠵᠤ᠂ ᠬᠤᠳᠠᠯ ᠦᠭᠡ ᠬᠠᠭᠤᠷᠮᠠᠭ ᠠᠭᠠᠰᠢ ᠪᠠᠷ ᠴᠦ᠍ ᠪᠣᠯᠤᠭ᠂ ᠲᠠᠢᠳᠬᠤᠷᠠᠭᠤᠯᠤᠨ ᠲᠣᠬᠣᠨᠢᠭᠤᠯᠵᠤ ᠬᠣᠪᠣᠷ ᠨᠠᠨᠳᠢᠨ ᠠᠮᠢ ᠨᠠᠰᠤ ᠶ᠋ᠢ ᠨᠢ ᠥᠴᠦᠬᠡᠨ ᠴᠦ᠍ ᠪᠣᠯᠤᠭ ᠤᠷᠲᠤᠳᠬᠠᠬᠤ ᠪᠠ ᠰᠡᠳᠬᠢᠯ ᠰᠠᠨᠠᠭᠠ ᠶ᠋ᠢ ᠨᠢ ᠪᠠᠶᠠᠷᠯᠠᠭᠤᠯᠵᠤ ᠪᠠᠢᠬᠤ ᠶ᠋ᠢ ᠴᠠᠭᠠᠨᠠ ᠠ᠋ᠴᠠ ᠪᠠᠨ ᠬᠦᠰᠡᠳᠡᠭ ᠮᠥᠷᠲᠡᠭᠡᠨ ᠢᠩᠭᠢᠵᠦ ᠴᠦ᠍ ᠬᠢᠭᠰᠡᠭᠡᠷ ᠢᠷᠡᠵᠡᠢ᠃ ᠲᠡᠭᠦᠨ ᠦ᠌ ᠠᠵᠢᠯ ᠤ᠋ᠨ ᠣᠷᠴᠢᠨ ᠲᠣᠭᠣᠷᠢᠨ ᠳ᠋ᠤ᠌ ᠪᠣᠯᠤᠭᠰᠠᠨ᠂ ᠡᠳᠦᠷ ᠲᠡᠭᠡᠨ ᠲᠣᠬᠢᠶᠠᠯᠳᠤᠬᠤ ᠡᠢᠮᠦᠷᠬᠦᠦ ᠬᠤᠳᠠᠯ ᠬᠠᠭᠤᠷᠮᠠᠭ ᠶᠠᠪᠤᠳᠠᠯ ᠤ᠋ᠳ ᠬᠣᠷᠣᠮᠬᠠᠨ ᠵᠠᠭᠤᠷᠠ ᠳ᠋ᠤ᠌ ᠬᠠᠷᠢᠨ ᠬᠥᠮᠦᠨᠴᠢ ᠰᠤᠷᠲᠠᠯ᠂ ᠪᠣᠯᠪᠠᠰᠤᠨ ᠵᠦᠢᠯ ᠪᠣᠯᠤᠨ ᠬᠤᠪᠢᠷᠠᠵᠤ᠂ ᠲᠣᠮᠣ ᠰᠢᠬᠦᠷ ᠦ᠋ᠨ ᠳᠣᠣᠷᠠ ᠪᠡᠶᠡ ᠶ᠋ᠢᠨ ᠰᠡᠭᠦᠳᠡᠷ ᠳᠠᠷᠤᠭᠳᠠᠵᠤ᠂ ᠴᠠᠭᠠᠨ ᠭᠡᠷᠡᠯ ᠦ᠋ᠨ ᠭᠢᠯᠪᠠᠭᠠᠨ ᠳ᠋ᠤ᠌ ᠬᠠᠷᠠ ᠲᠣᠯᠪᠣ ᠪᠠᠯᠠᠷᠠᠳᠠᠭ ᠰᠢᠭ᠋ ᠪᠣᠯᠳᠠᠭ ᠪᠢᠯᠡ᠃
ᠪᠣᠯᠤᠷᠴᠠᠭᠠᠨ ᠳᠠᠯᠳᠠ ᠪᠦᠷᠬᠦᠪᠴᠢ ᠲᠡᠢ ᠠᠭᠤᠷ ᠠᠮᠢᠰᠬᠤᠯ᠂ ᠠᠮᠢᠳᠤᠷᠠᠯ ᠤ᠋ᠨ ᠠᠬᠤᠢ ᠳ᠋ᠤ᠌ ᠳᠠᠩᠴᠤ ᠰᠦᠷᠡᠬᠡᠢ ᠲᠡᠰᠴᠦ ᠰᠤᠷᠴᠠᠢ᠃ ᠭᠡᠲᠡᠯᠡ ᠬᠠᠤᠯᠢ ᠭᠡᠭᠴᠢ ᠶᠠᠮᠠᠷ ᠴᠦ᠍ ᠬᠠᠭᠤᠷᠮᠠᠭ ᠠᠭᠠᠰᠢ ᠬᠤᠳᠠᠯ ᠠᠷᠭᠠᠳᠠᠯ ᠪᠠᠢᠬᠤ ᠦᠭᠡᠢ ᠪᠡᠷ ᠳᠣᠣᠷᠠ ᠨᠢ ᠵᠦᠭ ᠢ᠋ ᠨᠢ ᠵᠢᠭᠠᠵᠤ᠂ ᠴᠠᠭ ᠢ᠋ ᠨᠢ ᠲᠣᠭᠲᠠᠭᠠᠭᠠᠳ ᠴᠢᠪᠴᠢᠷᠲᠡᠯᠡ ᠪᠠᠭᠯᠠᠨ ᠢᠰᠬᠦᠯᠵᠦ ᠰᠥᠭᠥᠳᠬᠡᠭᠡᠳ ᠠᠯᠠᠵᠤ ᠣᠷᠬᠢᠬᠤ ᠪᠣᠯᠤᠨᠠ᠃
ᠪᠣᠯᠤᠷᠴᠠᠭᠠᠨ ᠣᠳᠣ ᠶᠠᠭᠤ ᠪᠠᠨ ᠪᠣᠳᠣᠵᠤ᠂ ᠠᠯᠢᠨ ᠢ᠋ᠶ᠋ᠠᠨ ᠬᠠᠷᠢᠴᠠᠭᠤᠯᠬᠤ ᠪᠢᠯᠡ? ᠪᠦᠷ ᠴᠦ᠍ ᠵᠠᠪᠳᠤᠬᠤ ᠦᠭᠡᠢ ᠪᠣᠯᠵᠠᠢ᠃ ᠵᠥᠪᠬᠡᠨ ᠴᠢᠬᠢ ᠨᠢ ᠱᠤᠤᠭᠢᠨ ᠲᠣᠯᠣᠭᠠᠢ ᠨᠢ ᠲᠦᠨᠡᠷᠡᠨᠡ᠃ ᠠᠮᠢ ᠨᠠᠰᠤ ᠭᠡᠭᠴᠢ ᠬᠥᠮᠦᠰ ᠲᠦ᠍ ᠨᠢᠭᠡ ᠯᠡ ᠤᠳᠠᠭᠠ ᠣᠯᠳᠠᠳᠠᠭ ᠬᠣᠪᠣᠷ ᠨᠠᠨᠳᠢᠨ ᠵᠦᠢᠯ ᠶᠦᠮ᠃ ᠬᠥᠮᠦᠨ ᠪᠦᠬᠦᠨ ᠡᠭᠡᠭᠡ ᠠᠳᠠᠯᠢᠬᠠᠨ ᠬᠦᠰᠡᠯ ᠡᠷᠡᠮᠡᠯᠵᠡᠯ ᠦᠭᠡᠢ ᠪᠠᠢᠵᠤ ᠮᠡᠳᠡᠨᠡ᠃
ᠭᠠᠭᠴᠠ ᠬᠦ᠌ ᠠᠮᠢ ᠨᠠᠰᠤ ᠪᠠᠨ ᠡᠷᠬᠢᠮᠯᠡᠵᠦ ᠠᠮᠢᠳᠤ ᠡᠷᠡᠭᠦᠯ ᠢ᠋ ᠬᠥᠭᠡᠭᠡᠴᠡᠯᠳᠦᠬᠦ ᠨᠢ ᠯᠠᠪᠲᠠᠢ ᠬᠥᠮᠦᠨ ᠪᠦᠭᠦᠳᠡ ᠶ᠋ᠢᠨ ᠬᠠᠮᠲᠤ ᠶ᠋ᠢᠨ ᠡᠷᠡᠮᠡᠯᠵᠡᠯ ᠪᠠᠢᠬᠤ ᠶᠣᠰᠣᠲᠠᠢ ᠶᠤᠮ᠃
ᠶᠠᠭ ᠯᠠ ᠤᠰᠤ ᠦᠷᠭᠦᠯᠵᠢ ᠳᠣᠷᠣᠭᠰᠢ ᠤᠷᠤᠰᠤᠨ᠂ ᠤᠷᠭᠤᠮᠠᠯ ᠵᠠᠪᠠᠯ ᠳᠡᠭᠡᠭᠰᠢ ᠰᠣᠶᠣᠭᠠᠯᠠᠬᠤ ᠰᠢᠭ᠋ ᠮᠥᠩᠬᠡ ᠶ᠋ᠢᠨ ᠵᠤᠷᠰᠢᠯ ᠪᠠᠢᠬᠠ᠃ ᠭᠡᠲᠡᠯᠡ ᠡᠨᠡ ᠬᠦ᠌ ᠴᠣᠷ ᠤ᠋ᠨ ᠭᠠᠭᠴᠠ ᠬᠦᠰᠡᠯ ᠡᠷᠡᠮᠡᠯᠵᠡᠯ ᠳᠠᠭᠤᠰᠬᠤ ᠶ᠋ᠢᠨ ᠡᠮᠦᠨᠡ ᠪᠣᠯᠤᠷᠴᠠᠭᠠᠨ ᠤ᠋ ᠴᠢᠷᠠᠢ ᠠ᠋ᠴᠠ ᠬᠠᠷᠢᠨ ᠶᠠᠮᠠᠷ ᠴᠦ᠍ ᠣᠨᠴᠠᠭᠠᠢ ᠢᠯᠡᠷᠡᠯ ᠬᠠᠷᠠᠭᠳᠠᠬᠤ ᠦᠭᠡᠢ ᠪᠠᠢᠭᠰᠠᠭᠠᠷ᠃ ᠳᠡᠭᠡᠷᠡ ᠪᠡᠶᠡ ᠨᠢ ᠴᠢᠩᠭᠠ ᠪᠡᠬᠡᠯᠢᠭ ᠪᠠᠭᠯᠠᠭᠠᠰᠤ ᠳ᠋ᠤ᠌ ᠪᠠᠷᠢᠭᠳᠠᠨ ᠠᠲᠤᠷᠢᠵᠤ ᠴᠢᠨᠡᠭᠡ ᠪᠡᠷ ᠢ᠋ᠶ᠋ᠡᠨ ᠠᠮᠢᠰᠬᠤᠯᠯᠠᠬᠤ ᠶ᠋ᠢ ᠳᠠᠭᠠᠨ ᠪᠡᠶᠡ ᠨᠢ ᠬᠦᠴᠢᠷᠲᠡᠢᠬᠡᠨ ᠴᠡᠴᠡᠷᠬᠢᠯᠡᠨ ᠬᠥᠳᠡᠯᠬᠦ ᠨᠢ ᠨᠢᠭᠡ ᠤᠳᠠᠭᠠ ᠴᠦ᠍ ᠪᠣᠯᠤᠭ ᠴᠡᠪᠡᠷ ᠠᠷᠢᠭᠤᠨ ᠠᠭᠤᠷ ᠠᠮᠢᠰᠬᠤᠯ ᠢ᠋ ᠢᠯᠡᠭᠦᠦ ᠬᠦᠷᠲᠡᠬᠦ ᠶ᠋ᠢ ᠬᠦᠰᠡᠮᠵᠢᠯᠡᠵᠦ ᠪᠠᠢᠬᠤ ᠰᠢᠭ᠋ ᠪᠠᠢᠯᠠ᠃
ᠲᠡᠷᠡ ᠮᠡᠳᠡᠭᠡ ᠲᠡᠢ ᠮᠡᠳᠡᠭᠡ ᠦᠭᠡᠢ ᠬᠠᠢᠪᠠᠯᠵᠠᠨ ᠲᠦᠯᠬᠢᠭᠳᠡᠭᠰᠡᠭᠡᠷ ᠴᠠᠭᠠᠵᠠ ᠶ᠋ᠢᠨ ᠲᠠᠯᠠᠪᠠᠢ ᠳ᠋ᠤ᠌ ᠬᠦᠷᠭᠡᠬᠦ ᠶᠡᠬᠡ ᠲᠡᠷᠭᠡᠨ ᠳ᠋ᠦ᠍ ᠭᠠᠷᠪᠠ᠃
ᠤᠩᠰᠢᠭᠰᠠᠨ ᠨᠢ᠄ ᠴᠡᠴᠡᠭᠮᠠ