ᠬᠢᠯᠭᠠᠰᠤᠨ ᠳᠥᠷᠥᠭᠡᠨ ᠳᠡᠭᠡᠷᠡ – ᠬᠠᠰᠪᠤᠯᠠᠭ ᠵᠣᠬᠢᠶᠠᠪᠠ᠂ <ᠬᠣᠶᠠᠷ> Хялгасан дөрөөн дээр – Хасвулаг зохиов <2>
185ᠬᠢᠯᠭᠠᠰᠤᠨ ᠳᠥᠷᠥᠭᠡᠨ ᠳᠡᠭᠡᠷᠡ - <ᠬᠣᠶᠠᠷ>
ᠲᠦᠮᠡᠨᠨᠠᠰᠤᠲᠤ ᠬᠣᠲᠠ ᠶ᠋ᠢᠨ ᠥᠷᠭᠡᠨ ᠠᠭᠤᠳᠠᠮ ᠭᠣᠣᠯ ᠵᠡᠭᠡᠯᠢ ᠶ᠋ᠢᠨ ᠬᠣᠶᠠᠷ ᠬᠠᠵᠠᠭᠤ ᠪᠠᠷ ᠬᠥᠮᠦᠰ ᠪᠠᠭᠰᠢᠷᠠᠲᠠᠯᠠ ᠪᠠᠨ ᠰᠢᠬᠠᠯᠳᠤᠨ ᠵᠣᠭᠰᠣᠵᠠᠢ᠃ ᠡᠮᠦᠨᠡ ᠨᠢ ᠵᠠᠮ ᠨᠡᠭᠡᠭᠡᠨ ᠠᠯᠭᠤᠷ ᠠᠭᠠᠵᠢᠮᠬᠠᠨ ᠶᠠᠪᠤᠬᠤ ᠴᠠᠭᠳᠠᠭᠠᠨ ᠲᠡᠷᠭᠡ ᠪᠠᠴᠢᠮ ᠣᠭᠵᠣᠮᠬᠠᠨ ᠳᠣᠬᠢᠶᠠᠨ ᠳᠠᠭᠤ ᠪᠠᠨ ᠲᠠᠰᠤᠷᠠᠯᠲᠠ ᠦᠭᠡᠢ ᠵᠢᠩᠭᠢᠰ ᠵᠢᠩᠭᠢᠰ ᠳᠤᠤᠭᠠᠷᠭᠠᠬᠤ ᠳ᠋ᠤ᠌ ᠬᠥᠮᠦᠰ ᠦ᠋ᠨ ᠰᠡᠳᠬᠢᠯ ᠰᠠᠨᠠᠭᠠ ᠮᠠᠰᠢ ᠲᠣᠭᠲᠠᠪᠤᠷᠢ ᠦᠭᠡᠢ ᠪᠠᠴᠢᠮ ᠪᠠᠢᠳᠠᠯ ᠲᠠᠢ ᠪᠣᠯᠵᠤ ᠪᠠᠢᠯᠠ᠃
ᠲᠡᠭᠦᠨ ᠦ᠌ ᠬᠣᠢᠨᠠ ᠠ᠋ᠴᠠ ᠭᠤᠷᠪᠠᠯᠵᠢᠯᠠᠨ ᠵᠢᠭᠰᠠᠭᠰᠠᠨ ᠮᠣᠲ᠋ᠣᠷ ᠲᠡᠷᠭᠡ ᠲᠡᠢ ᠴᠠᠭᠳᠠᠭᠠ ᠨᠠᠷ ᠵᠠᠢ ᠵᠠᠪᠰᠠᠷ ᠢ᠋ᠶ᠋ᠠᠨ ᠡᠪᠲᠡᠢ ᠰᠠᠢᠬᠠᠨ ᠵᠣᠬᠢᠴᠠᠭᠤᠯᠤᠨ ᠤᠷᠤᠭᠰᠢᠯᠠᠨᠠ᠃ ᠲᠡᠭᠦᠨ ᠦ᠌ ᠠᠷᠤ ᠠ᠋ᠴᠠ ᠵᠢᠴᠢᠶᠠᠩ ᠫᠤᠤ ᠲᠣᠬᠢᠷᠠᠭᠤᠯᠤᠭᠰᠠᠨ ᠶᠡᠬᠡ ᠲᠡᠷᠭᠡᠨ ᠳᠡᠭᠡᠷᠡ ᠶᠠᠯᠠᠲᠠᠨ ᠪᠣᠯᠤᠷᠴᠠᠭᠠᠨ ᠢ᠋ ᠬᠣᠶᠠᠷ ᠴᠠᠭᠳᠠᠭᠠ ᠮᠥᠷᠥ ᠡᠴᠡ ᠨᠢ ᠴᠢᠩᠭᠠᠬᠠᠨ ᠭᠡᠭᠴᠢ ᠪᠠᠵᠠᠭᠳᠠᠨ ᠪᠠᠷᠢᠭᠠᠳ ᠵᠣᠭᠰᠣᠭᠠᠵᠠᠢ᠃ ᠬᠠᠵᠠᠭᠤ ᠪᠠᠷ ᠨᠢ ᠠᠳᠠᠯᠢᠬᠠᠨ ᠮᠠᠶᠢᠭ ᠢ᠋ᠶ᠋ᠠᠷ ᠬᠤᠪᠴᠠᠰᠤᠯᠠᠨ ᠥᠪᠴᠢ ᠵᠡᠪᠰᠡᠭᠯᠡᠭᠰᠡᠨ ᠴᠠᠭᠳᠠᠭᠠ ᠨᠠᠷ ᠲᠦᠪ ᠵᠣᠭᠰᠣᠵᠠᠢ᠃
ᠦᠢᠮᠡᠯᠳᠦᠨ ᠱᠤᠤᠭᠢᠯᠳᠤᠭᠰᠠᠨ ᠬᠥᠮᠦᠨ ᠦ᠌ ᠤᠷᠤᠰᠬᠠᠯ ᠪᠣᠯᠤᠨ ᠬᠦᠩᠭᠢᠨᠡᠨ ᠳᠦᠩᠭᠢᠨᠡᠭᠰᠡᠨ ᠲᠡᠷᠭᠡᠨ ᠴᠤᠪᠤᠭᠠ ᠬᠣᠢᠨᠠ ᠬᠣᠢᠨᠠ ᠠ᠋ᠴᠠ ᠪᠠᠨ ᠡᠩᠨᠡᠷᠡᠵᠦ ᠴᠠᠭᠠᠵᠠ ᠶ᠋ᠢᠨ ᠲᠠᠯᠠᠪᠠᠢ ᠶ᠋ᠢ ᠴᠢᠭᠯᠡᠨᠡ᠃
ᠬᠣᠪᠣᠷ ᠲᠤᠭᠡᠶᠡᠯᠳᠤᠬᠤ ᠵᠦᠢᠯ ᠭᠠᠢᠬᠠᠭᠤᠰᠢᠲᠠᠢ ᠪᠠᠢᠳᠠᠭ ᠪᠠᠢᠨᠠ᠃
ᠬᠥᠮᠦᠨ ᠠᠯᠠᠬᠤ ᠶᠠᠪᠤᠳᠠᠯ ᠦᠷᠭᠦᠯᠵᠢ ᠭᠠᠷᠤᠭᠠᠳ ᠪᠠᠢᠳᠠᠭ ᠪᠢᠰᠢ᠂ ᠬᠠᠶᠠ ᠨᠢᠭᠡ ᠲᠣᠬᠢᠶᠠᠯᠳᠤᠬᠤ ᠪᠣᠯᠬᠣᠷ ᠬᠥᠮᠦᠰ ᠦ᠋ᠨ ᠭᠠᠢᠬᠠᠵᠤ ᠰᠣᠨᠢᠷᠬᠠᠬᠤ ᠨᠢ ᠪᠠᠭᠠ ᠦᠭᠡᠢ ᠶᠦᠮ᠃ ᠣᠷᠴᠢᠮ ᠤ᠋ᠨ ᠵᠢᠯ ᠦ᠋ᠳ ᠲᠦ᠍ ᠤᠳᠠᠭᠠ ᠪᠦᠷᠢ ᠲᠦᠮᠡᠨᠨᠠᠰᠤᠲᠤ ᠬᠣᠲᠠ ᠶ᠋ᠢᠨ ᠲᠡᠭᠦᠷᠭᠡ ᠳ᠋ᠦ᠍ ᠠᠯᠠᠭᠳᠠᠬᠤ ᠶᠠᠯᠠᠲᠠᠨ ᠭᠠᠷᠬᠤ ᠪᠦᠷᠢ ᠬᠥᠮᠦᠰ ᠦ᠋ᠨ ᠴᠤᠭᠯᠠᠭᠠᠨ ᠣᠷᠭᠢᠯ ᠳ᠋ᠠᠭᠠᠨ ᠬᠦᠷᠴᠦ᠂ ᠤᠬᠠᠮᠰᠠᠷ ᠠ᠋ᠴᠠ ᠪᠠᠨ ᠲᠥᠪᠯᠡᠷᠡᠬᠦ ᠬᠡᠮᠵᠢᠶᠡ ᠨᠢ ᠶᠠᠮᠠᠷ ᠨᠢᠭᠡ ᠬᠠᠲᠠᠭᠤ ᠴᠢᠩᠭᠠ ᠵᠠᠷᠯᠢᠭ ᠵᠠᠬᠢᠶᠠ ᠪᠠᠭᠤᠯᠭᠠᠵᠤ ᠴᠤᠭᠯᠠᠭᠤᠯᠤᠭᠰᠠᠨ ᠠ᠋ᠴᠠ ᠬᠣᠯᠠ ᠳᠠᠪᠠᠳᠠᠭ ᠪᠠᠢᠨᠠ᠃ ᠶᠠᠯᠠᠲᠠᠨ ᠲᠡᠭᠡᠭᠡᠭᠰᠡᠨ ᠶᠡᠬᠡ ᠲᠡᠷᠭᠡ ᠴᠠᠭᠠᠵᠠ ᠶ᠋ᠢᠨ ᠲᠠᠯᠠᠪᠠᠢ ᠳ᠋ᠤ᠌ ᠬᠦᠷᠬᠦ ᠳ᠋ᠦ᠍ ᠬᠡᠳᠦᠨ ᠲᠠᠯᠠ ᠳ᠋ᠠᠬᠢ ᠰᠡᠷᠭᠡᠢᠯᠡᠯᠲᠡ ᠶ᠋ᠢᠨ ᠱᠤᠭᠤᠮ ᠤ᠋ᠨ ᠭᠠᠳᠠᠭᠤᠷ ᠬᠥᠮᠦᠰ ᠣᠪᠣᠭᠠᠷᠠᠯᠳᠤᠭᠠᠳ ᠰᠠᠯᠬᠢ ᠨᠡᠪᠲᠡᠷᠡᠬᠦ ᠵᠠᠢ ᠵᠠᠪᠰᠠᠷ ᠦᠭᠡᠢ ᠪᠣᠯᠵᠤ᠂ ᠬᠠᠷᠪᠤᠯᠲᠠ ᠶ᠋ᠢᠨ ᠴᠡᠭ ᠥᠭᠡᠳᠡ ᠨᠢᠳᠦ ᠴᠠᠪᠴᠢᠯ ᠦᠭᠡᠢ ᠰᠢᠷᠳᠡᠵᠡᠭᠡᠨᠡ᠃
ᠶᠠᠯᠠᠲᠠᠨ ᠤ᠋ ᠦᠬᠦᠳᠡᠯ ᠢ᠋ ᠪᠤᠯᠠᠬᠤ ᠪᠠᠷ ᠠᠯᠢ ᠡᠷᠲᠡ ᠮᠠᠯᠲᠠᠵᠤ ᠪᠡᠯᠡᠳᠬᠡᠭᠰᠡᠨ ᠨᠦᠬᠡᠨ ᠦ᠌ ᠳᠡᠷᠭᠡᠳᠡ ᠴᠠᠭᠳᠠᠭᠠ ᠨᠠᠷ ᠪᠣᠯᠤᠷᠴᠠᠭᠠᠨ ᠢ᠋ ᠬᠠᠷᠠ ᠬᠦᠴᠦ ᠪᠡᠷ ᠲᠦᠯᠬᠢᠵᠦ ᠳᠤᠭᠲᠤᠷᠴᠤ ᠠᠪᠠᠴᠢᠭᠠᠳ ᠵᠠᠭᠠᠮᠠᠳᠠᠨ ᠰᠥᠭᠥᠳᠬᠡᠪᠡ᠃
ᠴᠢᠩᠭᠠ ᠰᠡᠷᠭᠡᠢᠯᠡᠯᠲᠡ ᠶ᠋ᠢᠨ ᠫᠤᠤ ᠭᠤᠷᠪᠠᠨᠲᠠ ᠳᠤᠤᠭᠠᠷᠴᠤ᠂ ᠳᠣᠬᠢᠶᠠᠨ ᠰᠤᠮᠤ ᠨᠣᠭᠣᠭᠠᠨ ᠤᠯᠠᠭᠠᠨ ᠰᠠᠴᠤᠷᠠᠭ ᠢ᠋ᠶ᠋ᠠᠨ ᠭᠡᠷᠡᠯᠲᠦᠭᠦᠯᠦᠨ ᠬᠥᠬᠡ ᠣᠭᠲᠠᠷᠭᠤᠢ ᠳ᠋ᠤ᠌ ᠰᠤᠭᠤᠨᠠᠭ ᠲᠡᠳᠡᠨ ᠵᠠᠳᠠᠷᠠᠬᠤ ᠳ᠋ᠤ᠌ ᠣᠢᠯᠤᠨ ᠪᠤᠴᠠᠯᠤᠭᠰᠠᠨ ᠬᠥᠮᠦᠰ ᠦ᠋ᠨ ᠦᠢᠮᠡᠭᠡᠨ ᠱᠤᠤᠭᠢᠶᠠᠨ ᠬᠣᠷᠣᠮᠬᠠᠨ ᠵᠠᠭᠤᠷᠠ ᠲᠠᠭ ᠲᠠᠰᠤᠷᠠᠵᠤ ᠂ ᠨᠠᠮ ᠵᠢᠮ ᠪᠣᠯᠤᠭᠠᠳ ᠳᠠᠷᠠᠭᠠᠴᠢ ᠶ᠋ᠢᠨ ᠫᠤᠤ ᠶ᠋ᠢᠨ ᠳᠠᠭᠤᠨ ᠢ᠋ ᠬᠦᠯᠢᠶᠡᠵᠡᠭᠡᠨᠡ᠃
ᠡᠨᠡ ᠬᠦ᠌ ᠠᠶᠤᠯᠲᠤ ᠬᠠᠷᠠ ᠨᠦᠬᠡᠨ ᠦ᠌ ᠬᠠᠵᠠᠭᠤ ᠳ᠋ᠤ᠌ ᠰᠥᠭᠥᠳᠦᠭᠰᠡᠨ ᠶᠠᠯᠠᠲᠠᠨ ᠳ᠋ᠤ᠌ ᠪᠠᠰᠠ ᠡᠳᠦᠢ ᠲᠡᠳᠦᠢ ᠭᠠᠷ ᠭᠦᠢᠴᠡᠳᠬᠡᠯ ᠬᠢᠬᠦ ᠥᠩᠭᠡᠷᠡᠯᠲᠡ ᠶᠠᠪᠤᠴᠠ ᠲᠠᠢ ᠶᠤᠮ ᠰᠠᠨᠵᠠᠢ᠃
ᠴᠠᠭᠠᠨ ᠬᠤᠪᠴᠠᠰᠤ ᠲᠠᠢ ᠮᠡᠷᠭᠡᠵᠢᠯᠲᠡᠨ ᠴᠠᠭᠳᠠᠭᠠ ᠨᠠᠷ ᠠᠯᠠᠬᠤ ᠡᠷᠡᠭᠦᠦ ᠶ᠋ᠢ ᠬᠡᠷᠡᠭᠵᠢᠭᠦᠯᠬᠦ ᠦᠶᠡ ᠶ᠋ᠢᠨ ᠦᠨᠡᠨ ᠪᠠᠢᠳᠠᠯ ᠢ᠋ ᠳᠤᠰᠬᠠᠭᠰᠠᠨ ᠵᠢᠷᠤᠭ ᠳᠦᠷᠰᠦ ᠶ᠋ᠢ ᠪᠠᠭᠤᠯᠭᠠᠬᠤ ᠪᠠᠷ ᠰᠥᠭᠥᠳᠴᠦ ᠪᠠᠢᠭᠠ ᠪᠣᠯᠤᠷᠴᠠᠭᠠᠨ ᠤ᠋ ᠲᠠᠯᠠ ᠪᠦᠷᠢ ᠡᠴᠡ ᠵᠢᠷᠤᠭ ᠤ᠋ᠨ ᠮᠠᠰᠢᠨ ᠤ᠋ ᠪᠠᠨ ᠵᠠᠮᠤᠭ ᠢ᠋ ᠲᠦᠷᠭᠡᠨ ᠲᠦᠷᠭᠡᠨ ᠳᠠᠷᠤᠵᠤ ᠲᠤᠬᠠᠢ ᠶ᠋ᠢᠨ ᠲᠠᠯᠠᠪᠤᠷ ᠢ᠋ ᠦᠯᠡᠳᠡᠭᠡᠵᠦ ᠠᠪᠬᠤ ᠭᠡᠵᠦ ᠶᠠᠭᠠᠷᠠᠯᠳᠤᠨᠠ᠃
ᠢᠩᠭᠢᠭᠡᠳ ᠥᠩᠭᠡᠷᠡᠩᠭᠦᠲᠡ ᠠᠮᠠᠪᠴᠢ ᠵᠡᠭᠦᠨ ᠬᠠᠪᠲᠠᠰᠤ ᠪᠠᠷᠢᠭᠰᠠᠨ ᠬᠠᠤᠯᠢ ᠶ᠋ᠢᠨ ᠡᠮᠴᠢ ᠶᠠᠯᠠᠲᠠᠨ ᠤ᠋ ᠨᠢᠷᠤᠭᠤᠨ ᠲᠠᠯᠠ ᠳ᠋ᠤᠨᠢ ᠬᠠᠭᠠᠰ ᠪᠥᠭᠴᠥᠢᠨ᠂ ᠬᠠᠭᠠᠰ ᠣᠴᠣᠢᠨ ᠵᠢᠷᠦᠬᠡ ᠲᠡᠢ ᠨᠢ ᠠᠰᠯᠠᠭᠰᠠᠨ ᠬᠡᠰᠡᠭ ᠲᠦ᠋ᠨᠢ ᠴᠠᠭᠠᠨ ᠡᠦ ᠪᠡᠷ ᠴᠠᠭᠠᠷᠢᠭ ᠵᠢᠷᠤᠵᠤ ᠴᠢᠭᠯᠡᠭᠦᠯᠦᠨ ᠫᠤᠤᠳᠠᠬᠤ ᠳ᠋ᠤ᠌ ᠪᠡᠯᠡᠳᠬᠡᠪᠡ᠃ ᠡᠨᠡ ᠨᠢ ᠬᠤᠷᠳᠤᠨ ᠮᠥᠷᠲᠡᠭᠡᠨ ᠪᠠᠲᠤᠯᠠᠭᠠ ᠲᠠᠢ ᠠᠯᠠᠬᠤ ᠶ᠋ᠢᠨ ᠲᠡᠮᠳᠡᠭ ᠪᠠᠢᠵᠠᠢ᠃
ᠬᠠᠤᠯᠢ ᠶ᠋ᠢᠨ ᠡᠮᠴᠢ ᠶ᠋ᠢᠨ ᠡᠨᠡ ᠬᠦ᠌ ᠪᠡᠯᠡᠳᠬᠡᠯ ᠲᠡᠭᠦᠰᠬᠦ ᠲᠡᠢ ᠵᠡᠷᠭᠡ ᠳᠡᠷᠭᠡᠳᠡ ᠨᠢ ᠪᠠᠢᠭᠰᠠᠨ ᠴᠠᠭᠳᠠᠭᠠ ᠨᠠᠷ ᠪᠣᠯᠤᠨ ᠬᠠᠤᠯᠢ ᠶ᠋ᠢᠨ ᠠᠵᠢᠯᠲᠠᠳ ᠪᠠᠷᠤᠭ ᠯᠠ ᠬᠥᠳᠡᠯᠦᠯ ᠨᠢᠭᠡᠲᠡᠢ ᠪᠡᠷ ᠭᠡᠳᠡᠷᠭᠦ ᠵᠠᠢᠯᠠᠨ᠂ ᠠᠯᠠᠬᠤ ᠴᠠᠭ ᠠ᠋ᠴᠠ ᠠᠷᠪᠠᠨ ᠬᠡᠳᠦᠨ ᠮᠧᠲ᠋ᠷ ᠵᠠᠢᠲᠠᠢ ᠪᠠᠢᠭᠠ ᠳᠣᠲᠣᠭᠠᠳᠤ ᠰᠡᠷᠭᠡᠢᠯᠡᠯᠲᠡ ᠶ᠋ᠢᠨ ᠤᠲᠠᠰᠤᠨ ᠤ᠋ ᠭᠠᠳᠠᠨᠠ ᠭᠠᠷᠴᠤ ᠵᠣᠭᠰᠣᠵᠠᠭᠠᠪᠠ᠃
ᠭᠣᠣᠨᠢ ᠭᠠᠭᠴᠠᠭᠠᠷ ᠪᠥᠬᠥᠢᠨ ᠰᠥᠭᠥᠳᠦᠭᠰᠡᠨ ᠪᠣᠯᠤᠷᠴᠠᠭᠠᠨ ᠠ᠋ᠴᠠ ᠠᠯᠲᠠ ᠭᠠᠷᠤᠢ ᠵᠠᠢᠲᠠᠢ ᠭᠠᠵᠠᠷ ᠲᠤ᠌ ᠲᠦᠪᠰᠢᠨ ᠭᠤᠸᠠᠢ ᠬᠣᠶᠠᠷ ᠭᠠᠷ ᠲᠠᠭᠠᠨ ᠤᠯᠠᠭᠠᠨ ᠨᠣᠭᠣᠭᠠᠨ ᠥᠩᠭᠡ ᠲᠡᠢ ᠳᠣᠬᠢᠶᠠᠨ ᠲᠤᠭ ᠪᠠᠷᠢᠨ ᠵᠣᠭᠰᠣᠵᠠᠢ᠃ ᠲᠡᠭᠦᠨ ᠦ᠌ ᠳᠣᠬᠢᠶᠠᠨ ᠲᠤᠭ ᠤ᠋ᠨ ᠳᠣᠬᠢᠯᠲᠠ ᠪᠠᠷ ᠬᠣᠯᠠᠬᠠᠨ ᠵᠣᠭᠰᠣᠭᠰᠠᠨ ᠬᠣᠶᠠᠷ ᠴᠡᠷᠢᠭ ᠭᠠᠷ ᠲᠠᠭᠠᠨ ᠪᠦᠷᠢᠨ ᠠᠦᠲ᠋ᠣᠮᠠᠲ ᠤᠷᠲᠤ ᠫᠤᠤ ᠪᠠᠷᠢᠭᠠᠳ ᠪᠣᠰᠢᠭᠣ ᠰᠤᠷᠮᠠᠭᠠᠢ ᠪᠠᠷ ᠭᠦᠶᠦᠯᠳᠦᠨ ᠢᠷᠡᠵᠦ᠂ ᠶᠠᠯᠠᠲᠠᠨ ᠤ᠋ ᠠᠷᠤ ᠳ᠋ᠤ᠌ ᠵᠡᠷᠭᠡᠴᠡᠨ ᠵᠣᠭᠰᠣᠭᠠᠳ ᠬᠥᠳᠡᠯᠦᠯ ᠨᠢᠭᠡᠲᠡᠢ ᠪᠡᠷ ᠫᠤᠤ ᠶ᠋ᠢᠨ ᠰᠣᠢᠯᠲᠠ ᠶ᠋ᠢ ᠨᠡᠭᠡᠭᠡᠨ ᠵᠠᠮᠤᠭ ᠢ᠋ ᠨᠢ ᠬᠠᠷᠳ᠋ᠬᠢᠲᠠᠯᠠ ᠲᠡᠳᠡᠨ ᠰᠤᠮᠤ ᠪᠠᠨ ᠬᠡᠪᠲᠡᠰᠢᠨ ᠳ᠋ᠦ᠍ᠨᠢ ᠲᠦᠯᠬᠢᠨ ᠣᠷᠣᠭᠤᠯᠤᠭᠠᠳ ᠠᠮᠵᠢᠪᠠ᠃
ᠤᠷᠲᠤ ᠫᠤᠤ ᠶ᠋ᠢᠨ ᠠᠮᠠᠰᠠᠷ ᠨᠢ ᠪᠦᠷ ᠲᠡᠷᠡ ᠬᠦ᠌ ᠬᠤᠪᠴᠠᠰᠤᠨ ᠤ᠋ ᠠᠷᠤ ᠳ᠋ᠠᠬᠢ ᠵᠢᠷᠦᠬᠡ ᠶ᠋ᠢ ᠨᠢ ᠲᠡᠮᠳᠡᠭᠯᠡᠨ ᠵᠢᠷᠤᠭᠰᠠᠨ ᠴᠠᠭᠠᠷᠢᠭ ᠲᠠᠢ ᠠᠰ ᠴᠢᠭᠯᠡᠵᠦ᠂ ᠫᠤᠤᠳᠠᠭᠴᠢ ᠨᠠᠷ ᠤ᠋ᠨ ᠨᠢᠳᠦ ᠳᠣᠬᠢᠶᠠᠨ ᠲᠤᠭ ᠢ᠋ ᠠᠩᠬᠠᠷᠤᠨ ᠬᠠᠷᠠᠵᠠᠭᠠᠨᠠ᠃ ᠲᠡᠷᠡ ᠬᠦ᠌ ᠲᠤᠭ ᠳᠣᠷᠣᠭᠰᠢ ᠲᠣᠬᠢᠮᠠᠭᠴᠠ ᠡᠬᠢᠯᠡᠨ ᠬᠠᠷᠪᠤᠵᠤ᠂ ᠪᠣᠯᠤᠷᠴᠠᠭᠠᠨ ᠤ᠋ ᠠᠮᠢ ᠨᠠᠰᠤ ᠳᠠᠷᠤᠢ ᠡᠴᠦᠰᠯᠡᠬᠦ ᠪᠣᠯᠤᠨᠠ᠃ ᠠᠮᠢ ᠨᠠᠰᠤᠨ ᠤ᠋ ᠬᠢᠨᠢ ᠡᠴᠦᠰ ᠦ᠋ᠨ ᠮᠥᠴᠡ ᠨᠢᠭᠡᠨᠲᠡ ᠢᠷᠡᠬᠦ ᠰᠢᠬᠠᠭᠰᠠᠨ ᠢ᠋ ᠮᠡᠳᠡᠭᠰᠡᠨ ᠪᠣᠯᠤᠷᠴᠠᠭᠠᠨ ᠭᠡᠨᠡᠳᠲᠡ ᠭᠠᠵᠠᠷ ᠡᠯᠢᠭᠡᠳᠡᠨ ᠤᠨᠠᠭᠠᠳ᠄
— ᠬᠢᠯᠢᠰ᠁ ᠬᠢᠯᠢᠰ᠁ ᠪᠢ ᠬᠢᠯᠢᠰᠳᠡᠵᠡᠢ᠁ ᠭᠡᠵᠦ ᠲᠠᠰᠤᠯᠳᠠᠭᠤᠯᠤᠨ ᠬᠠᠰᠬᠢᠷᠤᠯᠠ᠃ ᠢᠳᠡᠷ ᠨᠠᠰᠤᠨ ᠤ᠋ ᠪᠣᠯᠤᠷᠴᠠᠭᠠᠨ ᠤ᠋ ᠢᠩᠭᠢᠵᠦ ᠪᠦᠬᠦ ᠬᠦᠴᠦ ᠪᠡᠨ ᠰᠢᠪᠬᠠᠨ ᠬᠡᠭᠦᠷ ᠢ᠋ ᠨᠢ ᠪᠤᠯᠠᠬᠤ ᠨᠦᠬᠡᠨ ᠦ᠌ ᠳᠡᠷᠭᠡᠳᠡ ᠪᠠᠭᠯᠠᠭᠠᠰᠤ ᠪᠠᠷᠢᠶᠠ ᠲᠠᠢ ᠪᠠᠨ ᠲᠡᠢᠴᠢᠭᠢᠨᠡᠨ᠂ ᠬᠣᠭᠣᠯᠠᠢ ᠶ᠋ᠢᠨ ᠢ᠋ᠶ᠋ᠡᠨ ᠲᠡᠩᠬᠡᠭᠡ ᠪᠡᠷ ᠣᠷᠢᠯᠠᠨ ᠪᠠᠷᠬᠢᠷᠠᠬᠤ ᠳᠠᠭᠤᠨ ᠠ᠋ᠴᠠ ᠭᠠᠰᠠᠯᠤᠯ ᠰᠢᠨᠠᠯᠤᠯ ᠤ᠋ᠨ ᠠᠶᠠ ᠰᠣᠨᠣᠰᠳᠠᠬᠤ ᠳ᠋ᠤ᠌ ᠰᠦᠷᠡᠬᠡᠢ ᠶᠠᠭᠤᠮᠠ ᠦᠵᠡᠬᠦ ᠭᠡᠵᠦ ᠨᠠᠮ ᠵᠢᠮᠬᠡᠨ ᠵᠣᠭᠰᠣᠭᠰᠠᠨ ᠲᠦᠮᠡ ᠮᠢᠩᠭᠠᠨ ᠦᠵᠡᠭᠴᠢᠳ ᠰᠣᠴᠢᠰᠬᠢᠵᠦ᠂ ᠶᠠᠭᠤ ᠪᠣᠯᠤᠭᠰᠠᠨ ᠲᠤᠬᠠᠢ ᠬᠡᠯᠡᠯᠴᠡᠨ ᠦᠢᠮᠡᠯᠡ᠃
ᠲᠦᠪᠰᠢᠨ ᠭᠤᠸᠠᠢ ᠪᠣᠯᠤᠷᠴᠠᠭᠠᠨ ᠤ᠋ ᠳᠡᠷᠭᠡᠳᠡ ᠪᠠᠷᠤᠭ ᠯᠠ ᠦᠰᠦᠷᠦᠮᠡ ᠰᠢᠬᠠᠮ ᠣᠴᠢᠭᠠᠳ ᠭᠠᠷ ᠤ᠋ᠨ ᠠᠶᠠ ᠪᠠᠷ ᠳᠣᠬᠢᠶᠠᠨ ᠲᠤᠭ ᠢ᠋ᠶ᠋ᠠᠨ ᠬᠤᠷᠢᠶᠠᠭᠠᠳ ᠫᠤᠤᠳᠠᠭᠴᠢᠳ ᠢ᠋ ᠵᠠᠷᠯᠢᠭᠳᠠᠨ ᠭᠡᠳᠡᠷᠭᠦ ᠤᠬᠤᠷᠢᠭᠤᠯᠵᠤ᠂ ᠬᠣᠶᠠᠷ ᠴᠠᠭᠳᠠᠭᠠ ᠳᠠᠭᠤᠳᠠᠨ ᠢᠷᠡᠭᠦᠯᠦᠭᠡᠳ᠂ ᠭᠤᠯᠳᠤᠢᠨ ᠤᠨᠠᠭᠰᠠᠨ ᠪᠣᠯᠤᠷᠴᠠᠭᠠᠨ ᠢ᠋ ᠡᠷᠭᠦᠵᠦ ᠪᠣᠰᠬᠠᠬᠤ ᠳ᠋ᠤ᠌᠂ ᠲᠡᠷᠡ ᠨᠢᠭᠡᠨᠲᠡ ᠮᠠᠨᠠᠷᠠᠵᠤ ᠬᠠᠷᠠᠯᠠᠭᠰᠠᠨ ᠪᠠᠢᠯᠠ᠃
ᠬᠣᠶᠠᠷ ᠴᠠᠭᠳᠠᠭᠠ ᠬᠡᠳᠦᠨᠲᠡ ᠰᠠᠵᠢᠭᠰᠠᠨ ᠪᠣᠯᠪᠠᠴᠤ ᠰᠡᠷᠭᠦᠭᠰᠡᠨ ᠦᠭᠡᠢ᠂ ᠲᠦᠪᠰᠢᠨ ᠱᠠᠯᠠᠪᠬᠠᠨ ᠭᠡᠭᠴᠢ ᠪᠡᠷ ᠶᠡᠬᠡ ᠲᠡᠷᠭᠡᠨ ᠦ᠌ ᠣᠷᠣᠢ ᠳᠡᠭᠡᠷᠡ ᠭᠠᠷᠴᠤ ᠲᠣᠭᠣᠷᠢᠨ ᠵᠣᠭᠰᠣᠭᠰᠠᠨ ᠬᠥᠮᠦᠰ ᠦ᠋ᠨ ᠵᠦᠭ᠄
— ᠶᠠᠯᠠᠲᠠᠨ ᠪᠣᠯᠣᠷᠴᠠᠭᠠᠨ ᠠᠯᠠᠬᠤ ᠡᠷᠡᠭᠦᠦ ᠶ᠋ᠢ ᠬᠡᠷᠡᠭᠵᠢᠭᠦᠯᠬᠦ ᠶ᠋ᠢᠨ ᠡᠮᠦᠨᠡ ᠬᠢᠯᠢᠰ ᠬᠠᠰᠬᠢᠷᠤᠭᠠᠳ ᠮᠠᠭᠤᠵᠢᠷᠠᠨ ᠤᠨᠠᠪᠠ᠃ ᠡᠳᠦᠭᠡ ᠪᠢ ᠮᠠᠨ ᠤ᠋ ᠤᠯᠤᠰ ᠤ᠋ᠨ ᠡᠷᠡᠭᠦᠦ ᠶ᠋ᠢᠨ ᠵᠠᠷᠭᠤ ᠶ᠋ᠢᠨ ᠬᠠᠤᠯᠢ ᠶ᠋ᠢᠨ 155 ᠳ᠋ᠤᠭᠠᠷ ᠵᠤᠷᠪᠤᠰ ᠳᠠᠬᠢ ᠠᠯᠠᠬᠤ ᠶ᠋ᠢᠨ ᠡᠮᠦᠨᠡ ᠶᠠᠯᠠᠲᠠᠨ ᠬᠡᠷᠪᠡ ᠬᠢᠯᠢᠰ ᠬᠠᠰᠬᠢᠷᠪᠠᠯ ᠳᠠᠬᠢᠨ ᠠᠰᠠᠭᠤᠵᠤ ᠪᠠᠢᠴᠠᠭᠠᠬᠤ ᠲᠣᠭᠲᠠᠭᠠᠯ ᠶᠣᠰᠣᠭᠠᠷ ᠥᠨᠥᠳᠥᠷ ᠪᠣᠯᠤᠷᠴᠠᠭᠠᠨ ᠢ᠋ ᠠᠯᠠᠬᠤ ᠶ᠋ᠢ ᠬᠣᠢᠰᠢᠯᠠᠭᠤᠯᠵᠤ ᠴᠠᠭᠠᠵᠠ ᠶ᠋ᠢᠨ ᠲᠠᠯᠠᠪᠠᠢ ᠠ᠋ᠴᠠ ᠪᠤᠴᠠᠭᠠᠨ ᠠᠪᠠᠴᠢᠵᠤ ᠳᠠᠪᠲᠠᠨ ᠪᠠᠢᠴᠠᠭᠠᠨᠠ᠃ ᠢᠩᠭᠢᠭᠡᠳ ᠰᠢᠭᠦᠨ ᠲᠣᠳᠣᠷᠬᠠᠢᠯᠠᠭᠰᠠᠨ ᠤ᠋ ᠳᠠᠷᠠᠭᠠ ᠠᠯᠠᠬᠤ ᠡᠰᠡᠬᠦ ᠶ᠋ᠢ ᠲᠠᠬᠢᠵᠤ ᠨᠡᠢᠲᠡᠯᠡᠨᠡ ᠭᠡᠵᠦ ᠵᠠᠷᠯᠠᠪᠠ᠃
ᠢᠩᠭᠢᠵᠦ ᠵᠠᠷᠯᠠᠬᠤ ᠶ᠋ᠢ ᠰᠣᠨᠣᠰᠤᠭᠠᠳ ᠲᠣᠭᠣᠷᠢᠵᠤ ᠵᠣᠭᠰᠣᠭᠰᠠᠨ ᠬᠥᠮᠦᠰ ᠶᠠᠭ ᠯᠠ ᠦᠶᠡᠷ ᠦ᠋ᠨ ᠤᠰᠤ ᠬᠣᠷᠢᠭᠠ ᠪᠠᠨ ᠰᠡᠲᠡᠯᠬᠦ ᠠᠳᠠᠯᠢ ᠳᠥᠷᠪᠡᠨ ᠵᠦᠭ ᠲᠦ᠍ ᠪᠤᠲᠠᠷᠠᠪᠠ᠃ ᠴᠠᠭᠳᠠᠭᠠ ᠨᠠᠷ ᠴᠤ᠌ ᠪᠠᠭᠯᠠᠭᠠᠰᠤ ᠳ᠋ᠠᠭᠠᠨ ᠠᠲᠤᠷᠢᠭᠠᠳ ᠬᠥᠰᠢᠵᠦ ᠮᠠᠨᠠᠷᠠᠭᠰᠠᠨ ᠪᠣᠯᠤᠷᠴᠠᠭᠠᠨ ᠢ᠋ ᠲᠡᠷᠭᠡᠨ ᠳ᠋ᠦ᠍ ᠠᠪᠴᠤ ᠭᠠᠷᠭᠠᠭᠠᠳ᠂ ᠣᠯᠠᠨ ᠤ᠋ ᠬᠥᠯ ᠡᠴᠡ ᠳᠡᠭᠳᠡᠭᠰᠡᠨ ᠣᠭᠲᠠᠷᠭᠤᠢ ᠲᠤᠯᠤᠮᠠ ᠤᠯᠠᠭᠠᠨ ᠲᠣᠭᠣᠰᠣᠨ ᠤ᠋ ᠳᠤᠮᠳᠠᠭᠤᠷ ᠴᠠᠭᠠᠵᠠ ᠶ᠋ᠢᠨ ᠲᠠᠯᠠᠪᠠᠢ ᠠ᠋ᠴᠠ ᠰᠠᠯᠪᠠ᠃
ᠤᠩᠰᠢᠭᠰᠠᠨ ᠨᠢ ᠄ ᠴᠡᠴᠡᠭᠮᠡ