ᠬᠢᠯᠭᠠᠰᠤᠨ ᠳᠥᠷᠥᠭᠡᠨ ᠳᠡᠭᠡᠷᠡ – ᠬᠠᠰᠪᠤᠯᠠᠭ <ᠣᠷᠣᠰᠢᠯ ᠤᠨ ᠣᠷᠣᠨ ᠳᠤ– ᠮ᠂ ᠬᠠᠰᠪᠠᠭᠠᠨᠠ> Хялгасан дөрөөн дээр – Хасвулаг <оршлын оронд– М᠂ Хасбагана>
302ᠵᠣᠬᠢᠶᠠᠭᠴᠢ ᠬᠠᠰᠪᠤᠯᠠᠭ ᠬᠢᠭᠡᠳ ᠲᠡᠭᠦᠨ ᠦ ᠵᠣᠬᠢᠶᠠᠯ ᠪᠦᠲᠦᠭᠡᠯ
ᠮ ᠂ ᠬᠠᠰᠪᠠᠭᠠᠨᠠ
1979 ᠣᠨ ᠤ᠋ ᠡᠪᠦᠯ ᠪᠢᠯᠡ ᠤᠤ ᠳᠠ᠂ ᠶᠡᠬᠡ ᠵᠣᠣ ᠠᠢᠮᠠᠭ ᠤ᠋ᠨ ᠤᠳᠬᠠ ᠵᠣᠬᠢᠶᠠᠯ ᠤᠷᠠᠯᠢᠭ ᠤ᠋ᠨ ᠬᠢᠨ ᠦ᠌ ᠬᠣᠯᠪᠣᠭᠠ ᠪᠦᠬᠦ ᠠᠢᠮᠠᠭ ᠤ᠋ᠨ ᠢ᠋ᠶ᠋ᠠᠨ ᠶᠠᠭᠤᠮᠠ ᠪᠢᠴᠢᠳᠡᠭ ᠬᠥᠮᠦᠰ ᠢ᠋ ᠴᠤᠭᠯᠠᠭᠤᠯᠵᠤ ᠬᠣᠷᠢᠭᠠᠳ ᠬᠣᠨᠣᠭ ᠤ᠋ᠨ ᠰᠤᠷᠤᠯᠭᠠ ᠬᠢᠭᠰᠡᠨ ᠪᠥᠭᠡᠳ ᠡᠭᠦᠨ ᠳ᠋ᠡᠭᠡᠨ ᠨᠠᠮᠠᠶ᠋ᠢ ᠬᠥᠳᠡᠭᠡ ᠡᠴᠡ ᠳᠠᠭᠤᠳᠠᠵᠤ ᠢᠷᠡᠭᠦᠯᠦᠭᠰᠡᠨ ᠪᠠᠢᠪᠠ᠃ ᠲᠡᠭᠡᠭᠡᠳ ᠨᠠᠮ ᠤ᠋ᠨ ᠰᠤᠷᠭᠠᠭᠤᠯᠢ ᠶ᠋ᠢᠨ ᠠᠰᠠᠷ ᠲᠤ᠌ ᠪᠤᠵᠢᠭᠢᠨᠠᠯᠳᠤᠵᠤ ᠣᠯᠠᠨ ᠨᠥᠬᠥᠳ ᠲᠡᠢ ᠲᠠᠨᠢᠯᠴᠠᠵᠤ ᠶᠠᠪᠤᠯᠠ᠃ ᠡᠨᠡ ᠣᠯᠠᠨ ᠲᠠᠨᠢᠯᠴᠠᠭᠰᠠᠨ ᠨᠥᠬᠥᠳ ᠦ᠋ᠨ ᠮᠠᠨᠢ ᠳᠤᠮᠳᠠ ᠴᠡᠷᠢᠭ ᠦ᠋ᠨ ᠨᠣᠭᠣᠭᠠᠨ ᠳ᠋ᠠᠴᠠᠩ ᠡᠮᠦᠰᠦᠭᠰᠡᠨ ᠨᠠᠷᠢᠪᠲᠤᠷ ᠪᠣᠷᠣ ᠵᠠᠯᠠᠭᠤ ᠪᠠᠢᠯᠴᠠᠭᠰᠠᠨ ᠮᠥᠷᠲᠡᠭᠡᠨ ᠡᠨᠡ ᠬᠣᠲᠠ ᠶ᠋ᠢᠨ ᠬᠢ ᠭᠡᠵᠦ᠂ ᠢᠷᠡᠵᠦ ᠶᠠᠪᠤᠬᠤ ᠳ᠋ᠠᠭᠠᠨ ᠰᠢᠨᠡᠬᠡᠨ ᠰᠢᠭ ᠳᠤᠭᠤᠢ ᠣᠨᠣᠴᠢᠬᠠᠭᠰᠠᠨ ᠪᠠᠢᠳᠠᠭ ᠪᠥᠭᠡᠳ ᠠᠵᠢᠯ ᠨᠢ ᠶᠠᠭᠠᠷᠠᠤ ᠲᠥᠯᠥᠪᠲᠡᠢ ᠬᠤᠷᠳᠤᠨ ᠬᠤᠷᠳᠤᠨ ᠠᠯᠬᠤᠯᠠᠳᠠᠭ ᠬᠥᠮᠦᠨ ᠪᠠᠢᠭᠰᠠᠨ ᠨᠢ ᠨᠥᠬᠥᠷ ᠬᠠᠰᠪᠤᠯᠠᠭ ᠪᠠᠢᠪᠠ᠃ ᠪᠢᠳᠡ ᠬᠣᠶᠠᠭᠤᠯᠠ ᠶ᠋ᠢᠨ ᠬᠣᠪᠢᠨ ᠳ᠋ᠤ᠌ ᠠᠪᠴᠤ ᠬᠡᠯᠡᠪᠡᠯ ᠨᠠᠰᠤ ᠴᠤ᠌ ᠪᠣᠯ ᠰᠢᠷᠳ᠋ ᠭᠡᠰᠡᠨ ᠰᠠᠢᠬᠠᠨ ᠵᠠᠯᠠᠭᠤ ᠨᠠᠰᠤ ᠪᠠᠢᠭᠰᠠᠨ ᠳᠠ᠂ ᠭᠡᠬᠦᠯᠡᠷ ᠵᠣᠬᠢᠶᠠᠯ ᠪᠦᠲᠦᠭᠡᠯ ᠨᠢ ᠴᠤ᠌ ᠮᠥᠨ ᠵᠠᠯᠠᠭᠤ ᠬᠥᠮᠦᠨ ᠦ᠌ ᠭᠡᠨᠡᠨ ᠴᠠᠢᠯᠭᠠᠨ ᠦᠶᠡ ᠪᠡᠨ ᠳᠠᠭᠤᠷᠢᠶᠠᠵᠤ᠂ ᠳᠡᠮᠡᠢ ᠬᠡᠳᠦᠨ ᠵᠣᠬᠢᠶᠠᠯ ᠨᠡᠢᠲᠡᠯᠡᠭᠦᠯᠦᠭᠰᠡᠨ ᠦᠭᠡᠢ ᠰᠢᠨᠡᠬᠡᠨ ᠭᠠᠷ ᠪᠠᠢᠵᠠᠭᠠᠪᠠ᠃ ᠲᠡᠷᠡ ᠮᠥᠷᠲᠡᠭᠡᠨ ᠤᠷᠠᠨ ᠵᠣᠬᠢᠶᠠᠯ ᠢ᠋ᠶ᠋ᠠᠷ ᠲᠠᠨᠢᠯᠴᠠᠵᠤ᠂ ᠤᠷᠠᠨ ᠵᠣᠬᠢᠶᠠᠯ ᠢ᠋ᠶ᠋ᠠᠷ ᠨᠠᠢᠵᠠᠯᠠᠵᠤ ᠶᠠᠪᠤᠬᠤ ᠶ᠋ᠢᠨ ᠢᠷᠦᠭᠡᠯ ᠲᠡᠢ ᠪᠠᠢᠪᠠ ᠤᠤ ᠳᠠ ᠭᠡᠮᠡᠷ ᠨᠢᠭᠡ ᠡᠳᠦᠷ ᠴ᠂ ᠬᠠᠰᠪᠢᠯᠢᠭ᠌ᠲᠦ ᠭᠤᠸᠠᠢ ᠮᠠᠨ ᠤ᠋ ᠬᠣᠶᠠᠭᠤᠯᠠ ᠶ᠋ᠢ ᠳᠠᠭᠤᠳᠠᠵᠤ᠄ 《ᠵᠠ᠂ ᠡᠢᠮᠦ ᠪᠠᠢᠨᠠ᠂ ᠵᠣᠬᠢᠶᠠᠯ ᠪᠢᠴᠢᠳᠡᠭ ᠬᠥᠮᠦᠨ ᠪᠢᠴᠢᠭᠰᠡᠨ ᠵᠣᠬᠢᠶᠠᠯ ᠢ᠋ᠶ᠋ᠠᠨ ᠨᠢᠭᠡ ᠨᠢᠭᠡᠨ ᠳ᠋ᠡᠭᠡᠨ ᠦᠵᠡᠭᠦᠯᠵᠦ᠂ ᠬᠠᠷᠢᠯᠴᠠᠨ ᠰᠠᠨᠠᠯ ᠢᠶᠠᠨ ᠳᠤᠷᠠᠳᠤᠯᠴᠠᠪᠠᠯ ᠵᠣᠬᠢᠶᠠᠯ ᠪᠦᠲᠦᠭᠡᠯ ᠦ᠋ᠨ ᠴᠢᠨᠠᠷ ᠴᠢᠨᠰᠠᠭᠠ ᠳᠡᠭᠡᠭᠰᠢᠯᠡᠳᠡᠭ ᠶᠦᠮ᠃ ᠲᠡᠭᠡᠬᠦᠯᠡᠷ ᠲᠠ ᠬᠣᠶᠠᠭᠤᠯᠠ ᠪᠦᠷ ᠥᠭᠦᠯᠡᠯᠭᠡ ᠪᠢᠴᠢᠳᠡᠭ ᠬᠥᠮᠦᠰ ᠪᠣᠯᠬᠣᠷ ᠵᠣᠬᠢᠶᠠᠯ ᠢ᠋ᠶ᠋ᠠᠨ ᠬᠠᠷᠢᠯᠴᠠᠨ ᠦᠵᠡᠵᠡᠭᠡᠵᠦ ᠡᠨᠡ ᠰᠤᠷᠤᠯᠭᠠ ᠲᠡᠭᠦᠰᠬᠦ ᠳ᠋ᠦ᠍ ᠨᠢᠭᠡ ᠥᠭᠡᠳᠡᠳᠡᠢᠬᠡᠨ ᠰᠢᠭ ᠵᠣᠬᠢᠶᠠᠯ ᠦᠯᠡᠳᠡᠭᠡᠴᠢᠬᠡᠭᠡᠳ ᠶᠠᠪᠤᠬᠤ ᠯᠠ ᠪᠢᠵᠡ 》ᠭᠡᠵᠦ ᠰᠠᠨᠠᠭᠤᠯᠭᠠ ᠪᠣᠯᠪᠠ᠃ ᠲᠡᠭᠡᠭᠡᠳ ᠮᠠᠨ ᠤ᠋ ᠬᠣᠶᠠᠭᠤᠯᠠ ᠵᠢᠩᠬᠢᠨᠢ ᠲᠠᠨᠢᠯᠴᠠᠭᠰᠠᠨ ᠤᠬᠠᠭᠠᠨ ᠲᠠᠢ᠃ ᠲᠠᠨᠢᠬᠤ ᠬᠥᠮᠦᠨ ᠡᠨᠡ ᠨᠠᠷᠢᠪᠲᠤᠷ ᠪᠣᠷᠣ ᠵᠠᠯᠠᠭᠤ ᠮᠠᠨᠢ ᠦᠦᠰᠢᠨ ᠨᠤᠲᠤᠭ ᠲᠠᠢ ᠦᠦᠰᠢᠨᠵᠣᠤ ᠶ᠋ᠢᠨ ᠬᠥᠮᠦᠨ᠂ 19 ᠨᠠᠰᠤᠨ ᠳ᠋ᠠᠭᠠᠨ ᠡᠷᠡ ᠴᠡᠷᠢᠭ ᠦ᠋ᠨ ᠠᠯᠪᠠ ᠬᠠᠭᠠᠵᠤ ᠬᠠᠯᠠ ᠦᠵᠡᠨ ᠬᠠᠯᠠᠭᠤᠨ ᠴᠢᠯᠠᠭᠤ ᠳᠣᠯᠢᠶᠠᠵᠤ ᠶᠠᠪᠤᠭᠰᠠᠨ ᠪᠥᠭᠡᠳ ᠣᠳᠣ ᠬᠠᠤᠯᠢ ᠳ᠋ᠤ᠌ ᠠᠵᠢᠯ ᠲᠠᠢ᠂ ᠠᠵᠢᠯ ᠰᠦᠷᠡᠬᠡᠢ ᠶᠠᠭᠠᠷᠠᠤ᠂ ᠡᠨᠡ ᠤᠳᠠᠭᠠ ᠶ᠋ᠢᠨ ᠰᠤᠷᠤᠯᠭᠠ ᠳ᠋ᠤ᠌ ᠬᠠᠭᠠᠰ ᠡᠳᠦᠷ ᠲᠦ᠍ ᠨᠢᠭᠡ ᠡᠳᠦᠷ ᠦ᠋ᠨ ᠠᠵᠢᠯ ᠢ᠋ᠶ᠋ᠠᠨ ᠬᠢᠴᠢᠬᠡᠭᠡᠳ ᠬᠠᠭᠠᠰ ᠡᠳᠦᠷ ᠢᠷᠡᠵᠦ ᠪᠠᠢᠨᠠ ᠭᠡᠵᠦ ᠬᠡᠯᠡᠯᠴᠡᠭᠡᠳ ᠥᠩᠭᠡᠷᠡᠪᠡ᠃
ᠠᠷᠪᠠᠨ ᠬᠡᠳᠦᠨ ᠵᠢᠯ ᠦ᠋ᠨ ᠳᠠᠷᠠᠭᠠ ᠬᠠᠰᠪᠤᠯᠠᠭ ᠮᠠᠨᠢ ᠣᠯᠠᠨ ᠰᠠᠢᠬᠠᠨ ᠪᠦᠲᠦᠭᠡᠯ ᠲᠡᠢ ᠵᠣᠬᠢᠶᠠᠯᠴᠢ ᠪᠣᠯᠪᠠ᠃ ᠴᠠᠭ ᠮᠥᠴᠡ ᠭᠡᠭᠴᠢ ᠶ᠋ᠢ ᠨᠢᠭᠡ ᠪᠣᠳᠣᠪᠠᠯ ᠪᠠᠰᠠ ᠢᠨᠢᠶᠡᠳᠦ ᠲᠡᠢ ᠴᠤ᠌ ᠶᠦᠮ ᠤᠤ ? ᠠᠷᠪᠠᠨ ᠬᠡᠳᠦᠨ ᠵᠢᠯ ᠦ᠋ᠨ ᠡᠮᠦᠨᠡ ᠰᠢᠨᠡᠬᠡᠨ ᠭᠠᠷ ᠪᠠᠢᠵᠠᠭᠠᠵᠤ᠂ ᠨᠣᠮ ᠲᠠᠢ ᠪᠣᠯᠬᠤ ᠶ᠋ᠢ ᠪᠠᠢᠲᠤᠭᠠᠢ ᠨᠢᠭᠡ ᠥᠭᠦᠯᠡᠯᠭᠡ ᠪᠡᠨ ᠶᠠᠭᠠᠬᠢᠵᠤ ᠨᠡᠢᠲᠡᠯᠡᠭᠦᠯᠬᠦ ᠴᠤ᠌ ᠶᠦᠮ ᠪᠢᠯᠡ ᠭᠡᠵᠦ ᠪᠤᠳᠤᠵᠠᠭᠠᠵᠤ ᠪᠠᠢᠭᠰᠠᠨ ᠬᠥᠮᠦᠰ ᠣᠳᠣ ᠨᠢᠭᠡ ᠨᠢᠭᠡᠨ ᠦ᠌ ᠪᠡᠨ ᠨᠣᠮ ᠳ᠋ᠤ᠌ ᠣᠷᠣᠰᠢᠯ ᠪᠢᠴᠢᠨᠡ ᠭᠡᠵᠦ ᠰᠠᠭᠤᠬᠤ ᠳ᠋ᠤ᠌ ᠴᠠᠭ ᠮᠥᠴᠡ ᠢᠨᠢᠶᠡᠳᠦ ᠲᠡᠢ ᠪᠢᠰᠢ ᠬᠠᠷᠢᠨ ᠬᠠᠲᠠᠭᠤ ᠴᠢᠩᠭᠠ ᠬᠠᠤᠯᠢ ᠪᠠᠢᠵᠤ᠂ ᠰᠢᠷᠭᠠᠭᠤ ᠤᠷᠣᠯᠳᠤᠭᠰᠠᠳ ᠢ᠋ ᠥᠷᠥᠰᠢᠶᠡᠵᠦ᠂ ᠰᠢᠷᠭᠢᠵᠦ ᠰᠠᠭᠤᠭᠰᠠᠳ ᠢ᠋ ᠰᠢᠢᠳᠬᠡᠳᠡᠭ ᠲᠠᠯᠠ ᠥᠩᠭᠡ ᠬᠠᠷᠠᠳᠠᠭ ᠦᠭᠡᠢ ᠶᠡᠬᠡ ᠡᠷᠡ ᠪᠠᠢᠵᠠᠢ ᠭᠡᠰᠡᠨ ᠢ᠋ ᠤᠬᠠᠭᠠᠷᠠᠵᠤ ᠪᠠᠢᠨᠠ᠃
ᠬᠠᠰᠪᠤᠯᠠᠭ ᠮᠠᠨᠢ ᠰᠢᠷᠭᠠᠭᠤ ᠣᠷᠣᠯᠳᠣᠳᠠᠭ ᠬᠥᠮᠦᠨ᠂ ᠰᠢᠷᠭᠢᠵᠦ ᠰᠠᠭᠤᠳᠠᠭ ᠬᠥᠮᠦᠨ ᠪᠤᠰᠤ! ᠲᠡᠭᠦᠨ ᠦ᠌ ᠠᠵᠢᠯ ᠲᠥᠷᠥᠯ ᠢ᠋ᠶ᠋ᠡᠷ ᠦᠵᠡᠪᠡᠯ ᠲᠡᠷᠡ ᠵᠣᠬᠢᠶᠠᠯ ᠣᠷᠣᠯᠳᠣᠬᠤ ᠬᠥᠮᠦᠨ ᠪᠢᠰᠢ᠃ ᠬᠠᠤᠯᠢ ᠶ᠋ᠢᠨ ᠲᠡᠩᠨᠡᠭᠦᠷ ᠢ᠋ ᠪᠠᠷᠢᠭᠰᠠᠨ ᠬᠥᠮᠦᠨ ᠦ᠌ ᠠᠵᠢᠯ ᠳᠠᠩᠴᠤ ᠶᠠᠭᠠᠷᠠᠤ᠃ ᠡᠳᠦᠷ ᠲᠦ᠍ ᠬᠡᠷᠡᠭ ᠵᠠᠷᠭᠤ ᠶ᠋ᠢᠨ ᠳᠤᠮᠳᠠ ᠬᠤᠳᠬᠤᠵᠤ᠂ ᠶᠡᠬᠡ ᠡᠴᠡ ᠠᠮᠢᠨ ᠬᠡᠷᠡᠭ᠂ ᠠᠵᠤ ᠠᠬᠤᠢ ᠶ᠋ᠢᠨ ᠬᠡᠴᠢᠨᠡᠭᠡᠨ ᠠᠷᠪᠠᠨ ᠲᠦᠮᠡ᠂ ᠵᠠᠭᠤᠨ ᠲᠦᠮᠡ᠂ ᠮᠢᠩᠭᠠᠨ ᠲᠦᠮᠡᠨ ᠵᠣᠭᠣᠰᠤᠨ ᠤ᠋ ᠤᠴᠢᠷ᠂ ᠪᠠᠭᠠ ᠠ᠋ᠴᠠ ᠠᠢᠯ ᠭᠡᠷ ᠦ᠋ᠨ ᠡᠮᠡᠰ ᠬᠡᠦᠬᠡᠳ ᠦ᠋ᠨ ᠵᠣᠳᠣᠯᠴᠠᠭᠰᠠᠨ ᠶᠠᠪᠤᠳᠠᠯ᠂ ᠡᠷᠡ ᠡᠮᠡ ᠶ᠋ᠢᠨ ᠰᠠᠯᠵᠤ ᠰᠠᠷᠨᠢᠬᠤ ᠬᠡᠷᠡᠭ ᠁ ᠡᠨᠡ ᠲᠡᠷᠡ ᠭᠡᠵᠦ ᠵᠠᠷᠭᠤ ᠪᠠᠨ ᠣᠯᠬᠤ ᠭᠡᠵᠦ ᠤᠯᠠᠢᠯᠴᠠᠭᠰᠠᠨ ᠬᠥᠮᠦᠰ ᠦ᠋ᠨ ᠬᠤᠳᠠᠯ ᠦᠨᠡᠨ ᠦᠭᠡ ᠶ᠋ᠢ ᠨᠢᠭᠡ ᠨᠢᠭᠡ ᠪᠡᠷ ᠴᠠᠢᠷᠠᠭᠤᠯᠵᠤ ᠪᠠᠢᠳᠠᠭ ᠠᠵᠢᠯ᠃ ᠶᠣᠰᠣᠨ ᠳᠡᠭᠡᠷᠡ ᠪᠡᠨ ᠪᠣᠯ ᠨᠠᠢ᠍ᠮᠠᠨ ᠴᠠᠭ ᠤ᠋ᠨ ᠠᠵᠢᠯ ᠢ᠋ᠶ᠋ᠠᠨ ᠬᠢᠴᠢᠬᠡᠪᠡᠯ ᠤᠯᠤᠰ ᠤ᠋ᠨ ᠡᠭᠦᠷᠭᠡ ᠭᠦᠢᠴᠡᠵᠦ᠂ ᠦᠳᠡ ᠣᠷᠣᠢ ᠶ᠋ᠢᠨ ᠴᠠᠭ ᠬᠠᠰᠪᠤᠯᠠᠭ ᠤ᠋ᠨ ᠬᠢ ᠪᠠᠢᠪᠠᠯ ᠳᠠᠭᠠᠷᠠᠳᠠᠭ ᠬᠠᠤᠯᠢ ᠲᠠᠢ ᠪᠣᠯᠪᠠᠴᠤ ᠲᠡᠭᠦᠨ ᠳ᠋ᠦ᠍ ᠲᠡᠢᠮᠦ ᠪᠤᠶᠠᠨ ᠦᠭᠡᠢ᠃ ᠵᠠᠷᠭᠤ ᠬᠥᠭᠡᠭᠡᠴᠡᠯᠳᠦᠭᠰᠡᠳ ᠭᠡᠷ ᠲᠦ᠋ᠨᠢ ᠡᠷᠢᠭᠡᠳ ᠢᠷᠡᠨᠡ᠃ ᠨᠠᠢᠷ ᠲᠠᠯᠠ ᠬᠡᠯᠡᠭᠰᠡᠳ ᠭᠡᠷ ᠲᠦ᠋ᠨᠢ ᠵᠠᠯᠠᠷᠠᠭᠠᠳ ᠪᠠᠭᠤᠨᠠ᠃ ᠲᠡᠭᠡᠭᠡᠳ ᠨᠢᠭᠡ ᠢᠷᠡᠴᠢᠬᠡᠪᠡᠯ ᠶᠠᠪᠤᠬᠤ ᠪᠠᠨ ᠮᠠᠷᠲᠠᠴᠢᠬᠠᠳᠠᠭ᠃ ᠡᠷᠢᠵᠦ ᠢᠷᠡᠭᠰᠡᠳ ᠳᠣᠯᠣᠭᠠᠨ ᠪᠤᠯᠴᠢᠷᠬᠠᠢ ᠪᠠᠨ ᠲᠣᠭᠠᠴᠢᠬᠤ ᠪᠢᠰᠢ ᠪᠣᠯ ᠶᠢᠰᠦᠨ ᠵᠣᠷ ᠤ᠋ᠨ ᠠᠷᠭᠠ ᠬᠡᠷᠡᠭᠯᠡᠵᠦ ᠪᠠᠢᠳᠠᠭ ᠢ᠋ ᠶᠠᠭᠠᠬᠢᠨᠠ ᠭᠡᠬᠦ ⁈ ᠨᠢᠭᠡ ᠤᠳᠠᠭᠠ ᠬᠠᠰᠪᠤᠯᠠᠭ ᠨᠠᠳᠠ ᠢᠩᠭᠢᠵᠦ ᠬᠡᠯᠡᠪᠡ᠄《ᠮ᠂ ᠬᠠ᠂ ᠴᠢ ᠮᠢᠨᠦ ᠵᠣᠪᠠᠯᠠᠩ ᠢ᠋ ᠪᠠᠰᠠ ᠮᠡᠳᠡᠬᠦ ᠬᠡᠷᠡᠭᠲᠡᠢ᠃ ᠨᠠᠳᠠ ᠭᠠᠭᠴᠠᠬᠠᠨ ᠨᠢᠭᠡ ᠳᠤᠷᠠ ᠰᠢᠨᠤᠯ ᠪᠠᠢᠳᠠᠭ᠂ ᠲᠡᠷᠡ ᠨᠢ ᠳᠠᠷᠤᠢ ᠵᠣᠬᠢᠶᠠᠯ ᠪᠢᠴᠢᠬᠦ᠃ ᠨᠢᠭᠡ ᠶᠠᠭᠤᠮᠠ ᠪᠢᠴᠢᠬᠦ ᠭᠡᠳ ᠯᠡ ᠪᠢᠷ ᠢ᠋ᠶ᠋ᠡᠨ ᠠᠪᠬᠤ ᠳ᠋ᠤ᠌ ᠪᠡᠶᠡ ᠬᠥᠩᠭᠡᠷᠡᠭᠡᠳ ᠶᠠᠪᠤᠴᠢᠬᠠᠨᠠ᠃ ᠲᠡᠭᠡᠭᠡᠳ ᠪᠢᠴᠢᠭᠡᠳ ᠡᠬᠢᠯᠡᠪᠡᠯ ᠳᠤᠷᠠ ᠲᠠᠢ ᠭᠠᠵᠠᠷ ᠢ᠋ᠶ᠋ᠠᠨ ᠶᠠᠪᠤᠵᠤ᠂ ᠲᠠᠭᠠᠲᠠᠢ ᠬᠥᠮᠦᠰ ᠲᠡᠭᠡᠨ ᠵᠣᠯᠭᠠᠵᠤ ᠪᠠᠢᠬᠤ ᠰᠢᠭ᠋ ᠰᠠᠨᠠᠭᠳᠠᠳᠠᠭ᠃ ᠢᠩᠭᠢᠵᠦ ᠪᠠᠢᠲᠠᠯᠠ ᠡᠭᠦᠳᠡ ᠲᠣᠭᠰᠢᠬᠤ ᠶᠤᠮ ᠤᠤ᠂ ᠳ᠋ᠢᠶᠠᠩᠬᠤᠸᠠ ᠳᠤᠤᠭᠠᠷᠪᠠᠯ ᠳᠣᠲᠣᠷᠠ ᠰᠦᠷᠡᠬᠡᠢ ᠨᠢᠭᠡ ᠰᠢᠷᠳ᠋ ᠭᠡᠵᠦ᠂ ᠶᠠᠭᠠᠬᠢᠵᠤ ᠠᠭᠤᠷ ᠬᠦᠷᠳᠡᠭ ᠢ᠋ ᠴᠢ ᠮᠡᠳᠡᠬᠦ ᠦᠭᠡᠢ᠃ ᠪᠢ ᠬᠡᠦᠬᠡᠳ ᠲᠡᠭᠡᠨ ᠬᠤᠳᠠᠯ ᠪᠢᠲᠡᠭᠡᠢ ᠬᠡᠯᠡ ᠭᠡᠵᠦ ᠣᠯᠠᠨ ᠰᠤᠷᠭᠠᠭᠰᠠᠨ ᠬᠥᠮᠦᠨ ᠳᠡ᠃ ᠭᠡᠬᠦᠯᠡᠷ ᠡᠨᠡ ᠦᠶᠡ ᠳ᠋ᠦ᠍ ᠬᠡᠦᠬᠡᠳ ᠲᠡᠭᠡᠨ᠄ <ᠠᠪᠠᠢ ᠭᠡᠷ ᠲᠦ᠍ ᠪᠠᠢᠬᠤ ᠦᠭᠡᠢ ᠭᠡᠵᠦ ᠬᠡᠯᠡ!> ᠭᠡᠵᠦ ᠬᠤᠳᠠᠯ ᠬᠡᠯᠡᠬᠦ ᠶ᠋ᠢ ᠵᠢᠭᠠᠭᠰᠠᠨ ᠬᠥᠮᠦᠨ ᠰᠢᠦ ! ᠠᠷᠭᠠ ᠦᠭᠡᠢ ᠳ᠋ᠡᠭᠡᠨ》 ᠭᠡᠯᠡ ᠃
ᠲᠡᠭᠡᠭᠰᠡᠨ ᠳ᠋ᠡᠭᠡᠨ ᠬᠠᠰᠪᠤᠯᠠᠭ ᠤ᠋ᠨ ᠠᠵᠢᠯ᠂ ᠵᠣᠬᠢᠶᠠᠯ ᠣᠷᠣᠯᠳᠣᠳᠠᠭ ᠠᠵᠢᠯ ᠪᠢᠰᠢ ᠭᠡᠵᠦ ᠪᠠᠢᠭᠠ ᠮᠠᠨᠢ ᠡᠨᠡ᠃ ᠭᠡᠬᠦᠯᠡᠷ ᠬᠠᠰᠪᠤᠯᠠᠭ ᠮᠠᠨᠢ ᠵᠣᠬᠢᠶᠠᠯ ᠪᠢᠴᠢᠭᠰᠡᠨ ᠢ᠋ᠶ᠋ᠡᠷ ᠵᠣᠭᠰᠣᠬᠤ ᠦᠭᠡᠢ᠂ ᠶᠡᠬᠡ ᠣᠯᠠᠨ ᠵᠣᠬᠢᠶᠠᠯ ᠪᠢᠴᠢᠭᠰᠡᠨ ᠢ᠋ ᠶᠠᠭᠠᠬᠢᠨᠠ ᠭᠡᠬᠦ᠃ ᠠᠩᠬᠠᠯᠠᠭᠰᠠᠭᠠᠷ ᠥᠭᠦᠯᠡᠯᠭᠡ ᠭᠡᠭᠴᠢ ᠶ᠋ᠢ ᠠᠷᠪᠢᠨ ᠪᠢᠴᠢᠳᠡᠭ ᠪᠠᠢᠯᠠ᠃ ᠲᠡᠭᠡᠨ ᠪᠠᠢᠲᠠᠯᠠ ᠠᠷᠪᠠᠭᠠᠳ ᠲᠦᠮᠡᠨ ᠦᠰᠦᠭ ᠦ᠋ᠨ ᠲᠣᠮᠣᠬᠠᠨ ᠲᠣᠭᠣᠵᠢ ᠭᠤᠷᠪᠠ ᠶ᠋ᠢ ᠪᠢᠴᠢᠵᠦ ᠣᠷᠣᠨ ᠤ᠋ ᠨᠥᠯᠥᠭᠡ ᠶᠡᠬᠡ ᠲᠡᠢ ᠰᠡᠳᠬᠦᠯ ᠪᠤᠶᠤ ᠠᠷᠠᠳ ᠤ᠋ᠨ ᠬᠡᠪᠯᠡᠯ ᠦ᠋ᠨ ᠬᠣᠷᠢᠶᠠᠨ ᠤ᠋ ᠭᠠᠷᠭᠠᠭᠰᠠᠨ ᠲᠣᠭᠣᠵᠢ ᠶ᠋ᠢᠨ ᠰᠣᠩᠭᠣᠮᠠᠯ ᠤ᠋ᠳ ᠢ᠋ᠶ᠋ᠠᠷ ᠨᠡᠢᠲᠡᠯᠡᠭᠦᠯᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠭᠡᠨᠡᠳᠲᠡᠬᠡᠨ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠯᠡ 《ᠬᠥᠬᠡᠮᠳᠦᠭ ᠬᠤᠷᠠᠬᠤ》ᠭᠡᠬᠦ 46 ᠲᠦᠮᠡᠨ ᠦᠰᠦᠭ ᠦ᠋ᠨ ᠲᠣᠮᠣ ᠷᠣᠮᠠᠨ ᠪᠦᠲᠦᠭᠡᠯ ᠢ᠋ᠶ᠋ᠡᠨ ᠬᠡᠪᠯᠡᠯ ᠳ᠋ᠦ᠍ ᠳᠡᠪᠰᠢᠭᠦᠯᠵᠦ᠂ 《ᠬᠠᠰᠪᠤᠯᠠᠭ ᠤ᠋ᠨ ᠥᠭᠦᠯᠡᠯᠭᠡ ᠲᠣᠭᠣᠵᠢ ᠶ᠋ᠢᠨ ᠲᠡᠭᠦᠪᠦᠷᠢ》 ᠭᠡᠬᠦ 20 ᠲᠦᠮᠡᠨ ᠦᠰᠦᠭ ᠦ᠋ᠨ ᠲᠡᠭᠦᠪᠦᠷᠢ ᠪᠡᠨ ᠬᠡᠪᠯᠡᠯ ᠳ᠋ᠦ᠍ ᠲᠤᠰᠢᠶᠠᠵᠤ᠂ ᠡᠨᠡ ᠭᠠᠷᠬᠤ ᠭᠡᠵᠦ ᠪᠠᠢᠭᠠ 《ᠡᠴᠦᠰ ᠦ᠋ᠨ ᠮᠢᠨᠦ᠋ᠲ》 ᠢ᠋ᠶ᠋ᠡᠨ ᠴᠤ᠌ ᠬᠡᠪᠯᠡᠯ ᠳ᠋ᠦ᠍ ᠲᠤᠰᠢᠶᠠᠴᠢᠬᠠᠯᠠ᠃ ᠲᠡᠭᠡᠭᠡᠳ ᠡᠳᠡᠭᠡᠷ ᠨᠣᠮ ᠨᠢ ᠪᠠᠰᠠ ᠨᠢᠭᠡᠨᠲᠡ ᠬᠡᠪᠯᠡᠭᠳᠡᠭᠰᠡᠨ ᠪᠤᠶᠤ ᠦᠷᠭᠦᠯᠵᠢᠯᠡᠨ ᠨᠡᠢᠲᠡᠯᠡᠭᠦᠯᠵᠦ ᠳᠠᠷᠠᠭᠠ ᠨᠢ ᠬᠡᠪᠯᠡᠭᠳᠡᠨ ᠨᠣᠮ ᠪᠣᠯᠬᠤ ᠭᠡᠵᠦ ᠪᠠᠢᠭᠠ ᠪᠢᠯᠡ᠃ ᠬᠠᠰᠪᠤᠯᠠᠭ ᠢ᠋ ᠨᠡᠯᠢᠶᠡᠳ ᠮᠡᠳᠡᠬᠦ ᠬᠥᠮᠦᠨ ᠬᠢᠷᠢ ᠨᠢ ᠲᠡᠭᠦᠨ ᠦ᠌ ᠥᠭᠦᠯᠡᠯᠭᠡ ᠲᠣᠭᠣᠵᠢ ᠤᠷᠤᠯᠳᠤᠵᠤ ᠪᠠᠢᠭᠰᠠᠨ ᠢ᠋ ᠨᠢ ᠮᠡᠳᠡᠬᠦ ᠡᠴᠡ ᠪᠢᠰᠢ᠂ ᠲᠡᠢᠮᠦ ᠶᠠᠭᠠᠷᠠᠤ ᠬᠥᠮᠦᠨ ᠬᠠᠷᠢᠨ ᠲᠣᠮᠣ ᠷᠣᠮᠠᠨ ᠪᠢᠴᠢᠨᠡ ᠭᠡᠵᠦ ᠪᠣᠳᠣᠭᠠ ᠴᠤ᠌ ᠦᠭᠡᠢ ᠭᠠᠵᠠᠷ ᠳᠠ᠃ ᠭᠡᠬᠦᠯᠡᠷ ᠪᠢ ᠮᠠᠲᠠᠵᠤ ᠪᠠᠢᠭᠰᠠᠨ᠂ 《ᠴᠢ ᠡᠢᠮᠦ ᠶᠠᠭᠠᠷᠠᠤ ᠬᠥᠮᠦᠨ᠂ ᠠᠯᠢ ᠴᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠷᠣᠮᠠᠨ ᠪᠢᠴᠢᠳᠡᠭ ᠶᠦᠮ ?》 ᠭᠡᠵᠦ ᠠᠰᠠᠭᠤᠪᠠᠯ ᠲᠡᠷᠡ ᠠᠷᠭᠠ ᠪᠠᠷᠠᠭᠳᠠᠭᠰᠠᠨ ᠪᠤᠶᠤ ᠠᠯᠢᠶᠠᠷᠬᠠᠭᠰᠠᠨ ᠢᠨᠢᠶᠡᠳᠦ ᠬᠣᠣᠰᠯᠠᠭᠤᠯᠵᠤ : 《ᠠᠯᠢ ᠴᠠᠭ ᠭᠡᠵᠦ ᠬᠡᠯᠡᠬᠦ ᠪᠣᠢ ᠳᠠ᠂ ᠠᠮᠵᠢᠪᠠᠯ ᠯᠠ ᠪᠢᠴᠢᠭᠡᠳ ᠪᠠᠢᠳᠠᠭ᠃ ᠪᠠᠰᠠ ᠨᠢᠭᠡ ᠬᠡᠯᠡᠪᠡᠯ ᠭᠠᠷᠠᠭ ᠤ᠋ᠨ ᠡᠳᠦᠷ ᠪᠤᠶᠤ ᠰᠥᠨᠢ ᠶ᠋ᠢᠨ ᠵᠢᠭᠠᠬᠠᠨ ᠴᠠᠭ ᠢ᠋ ᠯᠡ ᠠᠰᠢᠭᠯᠠᠭᠰᠠᠨ ᠶᠠᠪᠤᠳᠠᠯ ᠰᠢᠲᠠ》 ᠭᠡᠵᠦ ᠬᠡᠯᠡᠵᠦ ᠪᠢᠯᠡ᠃
ᠥᠭᠡᠷᠡ ᠦᠢᠯᠡᠰ ᠪᠦᠲᠦᠭᠡᠭᠴᠢᠳ ᠢ᠋ ᠪᠢ ᠰᠠᠢᠨ ᠮᠡᠳᠡᠬᠦ ᠦᠭᠡᠢ᠃ ᠭᠡᠬᠦᠯᠡᠷ ᠵᠣᠬᠢᠶᠠᠯ ᠣᠷᠣᠯᠳᠣᠬᠤ ᠬᠥᠮᠦᠨ ᠪᠣᠯ ᠥᠪᠡᠷ ᠦ᠋ᠨ ᠠᠪᠢᠶᠠᠰ ᠣᠨᠴᠠᠯᠢᠭ ᠤ᠋ᠨ ᠢ᠋ᠶ᠋ᠠᠨ ᠳᠡᠭᠡᠷᠡ ᠰᠢᠷᠭᠠᠭᠤ ᠬᠥᠳᠡᠯᠮᠦᠷᠢ ᠪᠡᠨ ᠨᠡᠮᠡᠵᠦ ᠨᠢᠭᠡ ᠨᠢᠭᠡ ᠦᠰᠦᠭ᠂ ᠨᠢᠭᠡ ᠨᠢᠭᠡ ᠥᠭᠦᠯᠡᠪᠦᠷᠢ ᠪᠡᠷ ᠲᠡᠦᠬᠡᠨ ᠳ᠋ᠦ᠍ ᠪᠠᠰᠠ ᠨᠢᠭᠡ ᠶᠠᠭᠤᠮᠠ ᠦᠯᠡᠳᠡᠴᠢᠬᠡᠬᠦ ᠪᠡᠷ ᠶᠠᠪᠤᠳᠠᠯ ᠬᠢᠳᠡᠭ ᠭᠡᠰᠡᠨ ᠢ᠋ ᠪᠢ ᠮᠡᠳᠡᠨᠡ᠃ ᠲᠠᠷᠢᠬᠢ ᠨᠤᠭᠤᠰᠤᠨ ᠳ᠋ᠠᠭᠠᠨ ᠭᠡᠮ ᠬᠡᠨᠡᠭᠡ ᠦᠭᠡᠢ ᠬᠥᠮᠦᠨ ᠪᠦᠬᠦᠨ ᠠᠪᠢᠶᠠᠰ ᠪᠢᠯᠢᠭ ᠦᠭᠡᠢ ᠪᠢᠰᠢ᠂ ᠰᠢᠷᠭᠠᠭᠤ ᠬᠥᠳᠡᠯᠮᠦᠷᠢᠯᠡᠵᠦ ᠪᠠᠰᠠ ᠴᠢᠳᠠᠨᠠ᠃ ᠭᠡᠬᠦᠯᠡᠷ ᠰᠢᠷᠭᠠᠭᠤ ᠬᠥᠳᠡᠯᠮᠦᠷᠢ ᠵᠣᠷᠢᠭ ᠲᠤ᠌ ᠲᠦᠰᠢᠭᠯᠡᠨᠡ᠃ ᠲᠡᠭᠡᠪᠡᠯ ᠵᠣᠷᠢᠭ ᠬᠠᠮᠢᠭᠠ ᠠ᠋ᠴᠠ ᠢᠷᠡᠳᠡᠭ ᠶᠦᠮ ? ᠵᠣᠷᠢᠭ ᠬᠥᠮᠦᠨ ᠦ᠌ ᠪᠡᠶᠡ ᠳ᠋ᠦ᠍ ᠲᠥᠷᠥᠯᠬᠢ ᠪᠠᠢᠳᠠᠭ ᠪᠢᠰᠢ᠂ ᠬᠠᠷᠢᠨ ᠡᠨᠡ ᠬᠣᠷᠸᠠ ᠶ᠋ᠢᠨ ᠡᠷᠢᠶᠡᠨ ᠠᠯᠠᠭ ᠲᠤ᠌ ᠲᠠᠪᠲᠠᠭᠳᠠᠵᠤ ᠪᠣᠢ ᠪᠣᠯᠳᠠᠭ ᠪᠠᠢᠵᠢ ᠳᠠ᠃ ᠨᠢᠭᠡ ᠤᠳᠠᠭᠠ ᠬᠠᠰᠪᠤᠯᠠᠭ ᠮᠠᠨ ᠤ᠋ ᠬᠣᠶᠠᠭᠤᠯᠠ ᠰᠤᠯᠠ ᠶᠠᠷᠢᠯᠴᠠᠵᠤ ᠪᠠᠢᠭᠠᠳ ᠲᠡᠷᠡ : 《ᠮᠠᠨᠤᠰ ᠤ᠋ᠨ ᠲᠡᠷᠡ ᠦᠶᠡᠰ ᠦ᠋ᠨ ᠠᠮᠢᠳᠤᠷᠠᠯ ᠢ᠋ ᠶᠠᠮᠠᠷ ᠠᠮᠢᠳᠤᠷᠠᠯ ᠭᠡᠵᠦ ᠬᠡᠯᠡᠬᠦ ᠪᠣᠢ᠃ ᠪᠢ ᠠᠬᠠ ᠳᠡᠭᠦᠦ ᠠᠷᠪᠢᠨ ᠬᠥᠮᠦᠨ᠂ ᠳᠡᠭᠡᠷᠡ ᠡᠴᠡ ᠨᠢ ᠭᠡᠷ ᠦ᠋ᠨ ᠠᠵᠤ ᠠᠮᠢᠳᠤᠷᠠᠯ ᠴᠤ᠌ ᠬᠦᠴᠢᠷᠲᠡᠢ᠃ ᠪᠠᠭᠠ ᠰᠤᠷᠭᠠᠭᠤᠯᠢ ᠶ᠋ᠢᠨ ᠬᠡᠳᠦᠨ ᠵᠢᠯ ᠢ᠋ ᠴᠣᠬᠣᠮ ᠴᠤ᠌ ᠦᠢᠯᠡ ᠪᠡᠨ ᠦᠵᠡᠵᠦ ᠥᠩᠭᠡᠷᠡᠭᠡᠭᠰᠡᠨ᠃ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠣᠷᠣᠬᠤ ᠳ᠋ᠤ᠌ ᠥᠪᠡᠷ ᠢ᠋ᠶ᠋ᠡᠨ ᠪᠠᠰᠠ ᠵᠢᠭᠠᠬᠠᠨ ᠴᠢᠳᠠᠯ ᠲᠡᠩᠬᠡᠭᠡ ᠲᠡᠢ ᠪᠣᠯᠴᠢᠬᠠᠭᠰᠠᠨ ᠶᠤᠮ ᠪᠢᠵᠡ᠂ ᠰᠤᠷᠭᠠᠭᠤᠯᠢ ᠶ᠋ᠢᠨ ᠰᠤᠷᠤᠯᠭᠠ ᠶ᠋ᠢᠨ ᠰᠦᠢᠳᠬᠡᠯ᠂ ᠡᠩ ᠦ᠋ᠨ ᠵᠠᠷᠤᠬᠤ ᠵᠣᠭᠣᠰ ᠢ᠋ᠶ᠋ᠠᠨ ᠭᠠᠷᠠᠭ ᠤ᠋ᠨ ᠡᠳᠦᠷ ᠲᠦᠯᠡᠭᠡ ᠮᠣᠳᠣ ᠲᠡᠭᠦᠬᠦ ᠰᠢᠭ᠂ ᠲᠡᠭᠦᠨ ᠢ᠋ᠶ᠋ᠡᠨ ᠬᠤᠳᠠᠯᠳᠤᠬᠤ ᠰᠢᠭ᠋ ᠠᠷᠭᠠᠴᠠᠭᠠᠳᠠᠭ ᠪᠠᠢᠭᠰᠠᠨ᠃ ᠰᠡᠭᠦᠯ ᠳᠦ᠋ᠨᠢ ᠪᠠᠭᠰᠢ ᠶ᠋ᠢᠨ ᠠᠩᠭᠢ ᠳ᠋ᠤ᠌ ᠰᠢᠯᠭᠠᠭᠳᠠᠨ ᠣᠷᠣᠯᠠ᠃ ᠲᠡᠭᠡᠬᠦ ᠳ᠋ᠦ᠍ ᠨᠡᠩ ᠴᠢᠳᠠᠯ ᠣᠷᠣᠴᠢᠬᠠᠵᠤ᠂ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠨ ᠥᠪᠡᠷ ᠢ᠋ᠶ᠋ᠡᠨ ᠲᠡᠵᠢᠭᠡᠴᠢᠬᠡᠳᠡᠭ ᠪᠣᠯᠤᠭᠰᠠᠨ᠃ ᠪᠠᠭᠰᠢ ᠶ᠋ᠢᠨ ᠰᠤᠷᠭᠠᠭᠤᠯᠢ ᠪᠠᠨ ᠲᠡᠭᠦᠰᠦᠭᠡᠳ ᠨᠤᠲᠤᠭ ᠲᠠᠭᠠᠨ ᠬᠠᠷᠢᠵᠤ ᠪᠠᠭᠠ ᠰᠤᠷᠭᠠᠭᠤᠯᠢ ᠶ᠋ᠢᠨ ᠪᠠᠭᠰᠢ ᠪᠣᠯᠤᠭᠰᠠᠨ᠃ ᠲᠡᠷᠡ ᠰᠤᠷᠭᠠᠭᠤᠯᠢ ᠨᠢ ᠴᠤ᠌ ᠪᠠᠰᠠ ᠬᠦᠴᠢᠷᠳᠡᠯᠲᠡᠢ ᠭᠠᠵᠠᠷ᠃ ᠲᠡᠷᠡ ᠵᠢᠭᠠᠬᠠᠨ ᠵᠢᠭᠠᠬᠠᠨ ᠠᠮᠢᠲᠠᠳ ᠢ᠋ ᠳᠠᠭᠠᠭᠤᠯᠤᠭᠠᠳ ᠲᠦᠯᠡᠭᠡ ᠮᠣᠳᠣᠨ ᠳ᠋ᠤ᠌ ᠶᠠᠪᠤᠬᠤ᠃ ᠪᠢ ᠨᠢᠭᠡ ᠠᠩᠭᠢ ᠰᠤᠷᠤᠭᠴᠢᠳ ᠤ᠋ᠨ ᠢ᠋ᠶ᠋ᠠᠨ ᠲᠦᠯᠡᠭᠡ ᠶ᠋ᠢ ᠨᠢ ᠪᠠᠭᠯᠠᠵᠤ ᠥᠭᠴᠦ ᠪᠠᠷᠢᠭᠠᠳ ᠭᠠᠷ ᠬᠡᠴᠢᠨᠡᠭᠡᠨ ᠤᠳᠠᠭᠠ ᠬᠠᠭᠠᠷᠠᠴᠢᠬᠠᠭᠰᠠᠨ ᠢ᠋ ᠮᠡᠳᠡᠬᠦ ᠦᠭᠡᠢ᠃ ᠳᠠᠷᠠᠭᠠ ᠪᠠᠷ ᠨᠢ ᠴᠡᠷᠢᠭ ᠲᠦ᠍ ᠶᠠᠪᠤᠯᠠ᠃ ᠴᠡᠷᠢᠭ ᠦ᠋ᠨ ᠠᠮᠢᠳᠤᠷᠠᠯ ᠨᠡᠩ ᠰᠦᠷᠡᠬᠡᠢ᠃ ᠪᠣᠯᠪᠠᠰᠤᠷᠠᠯ ᠰᠤᠷᠭᠠᠭᠤᠯᠢᠯᠠᠯ ᠭᠡᠳ ᠪᠠᠷᠤᠭ ᠬᠠᠭᠠᠰ ᠵᠢᠯ ᠬᠥᠯᠥᠰᠥ ᠴᠢᠰᠤ ᠪᠠᠨ ᠤᠷᠤᠰᠬᠠᠭᠰᠠᠨ ᠤ᠋ ᠳᠠᠷᠠᠭᠠ ᠳᠠᠢᠨ ᠳ᠋ᠤ᠌ ᠪᠡᠯᠡᠳᠬᠡᠬᠦ ᠶ᠋ᠢᠨ ᠬᠡᠷᠡᠭᠴᠡᠭᠡ ᠪᠡᠷ ᠠᠭᠤᠯᠠ ᠭᠡᠭᠴᠢ ᠶ᠋ᠢ ᠬᠥᠨᠳᠡᠢᠯᠡᠵᠦ ᠯᠡ ᠮᠡᠳᠡᠭᠰᠡᠨ᠃ ᠬᠠᠳᠠ ᠴᠢᠯᠠᠭᠤ ᠲᠠᠢ ᠵᠣᠳᠣᠯᠴᠠᠪᠠ ᠭᠡᠭᠴᠢ ᠨᠢ ᠰᠦᠷᠡᠬᠡᠢ ᠶᠠᠭᠤᠮᠠ ᠪᠠᠢᠨᠠ ᠪᠢᠯᠡ᠃ ᠳᠠᠬᠢᠪᠠᠯ ᠴᠠᠬᠢᠯᠭᠠᠨ ᠤᠲᠠᠰᠤᠨ ᠨᠦᠬᠡ ᠮᠠᠯᠲᠠᠬᠤ᠂ ᠠᠭᠤᠷᠬᠠᠢ ᠨᠡᠭᠡᠭᠡᠬᠦ ᠭᠡᠬᠦ ᠮᠡᠲᠦ ᠶ᠋ᠢᠨ ᠬᠦᠨᠳᠦ ᠰᠢᠷᠦᠭᠦᠨ ᠠᠵᠢᠯ ᠢ᠋ ᠬᠢᠵᠦ ᠯᠡ ᠮᠡᠳᠡᠭᠰᠡᠨ᠃ ᠴᠡᠷᠢᠭ ᠭᠡᠳᠡᠭ ᠶᠠᠭᠤᠮᠠ ᠠᠯᠢ ᠬᠠᠭᠤᠴᠢᠷᠠᠬᠤ ᠳ᠋ᠤ᠌ ᠠᠯᠢ ᠬᠥᠩᠭᠡᠷᠡᠳᠡᠭ ᠦ᠋ᠨ ᠬᠠᠤᠯᠢ ᠪᠠᠷ ᠰᠡᠭᠦᠯᠳᠡᠵᠦ ᠢᠷᠡᠬᠦ ᠳ᠋ᠦ᠍ ᠬᠠᠷᠢᠨ ᠵᠢᠭᠠᠬᠠᠨ ᠭᠠᠢᠭᠤᠢ ᠪᠣᠯᠵᠤ᠂ ᠮᠠᠨᠤᠰ ᠤ᠋ᠨ ᠨᠢᠭᠡ ᠪᠦᠯᠦᠭ ᠬᠠᠭᠤᠴᠢᠨ ᠴᠡᠷᠢᠭ ᠢ᠋ ᠮᠣᠷᠢ᠂ ᠭᠠᠬᠠᠢ ᠲᠡᠵᠢᠭᠡᠬᠦ ᠮᠡᠲᠦ ᠶ᠋ᠢᠨ ᠬᠥᠩᠭᠡᠨ ᠠᠵᠢᠯ ᠳ᠋ᠤ᠌ ᠲᠣᠬᠢᠷᠠᠭᠤᠯᠤᠭᠰᠠᠨ ᠨᠢ ᠲᠡᠷᠡ ᠦᠶᠡᠰ ᠲᠡᠭᠡᠨ ᠪᠣᠯ ᠮᠠᠯᠠᠭᠠᠢ ᠪᠦᠰᠡ ᠦᠭᠡᠢ ᠵᠢᠷᠭᠠᠭᠰᠠᠨ ᠰᠢᠭ᠋ ᠰᠠᠨᠠᠭᠳᠠᠵᠤ ᠪᠠᠢᠭᠰᠠᠨ》 ᠭᠡᠵᠦ ᠬᠡᠯᠡᠭᠰᠡᠨ ᠪᠢᠯᠡ᠃ ᠬᠠᠰᠪᠤᠯᠠᠭ ᠬᠠᠷᠠ ᠪᠠᠭᠠ ᠠ᠋ᠴᠠ ᠪᠠᠨ ᠵᠣᠷᠢᠭ ᠤ᠋ᠨ ᠶᠡᠬᠡ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠰᠠᠭᠤᠴᠢᠬᠠᠭᠰᠠᠨ ᠬᠥᠮᠦᠨ ᠪᠠᠢᠵᠠᠢ᠃ ᠡᠨᠡ ᠬᠣᠷᠸᠠ ᠶ᠋ᠢᠨ ᠡᠷᠢᠶᠡᠨ ᠠᠯᠠᠭ ᠠᠮᠢᠳᠤᠷᠠᠯ ᠲᠡᠭᠦᠨ ᠢ᠋ ᠰᠦᠷᠡᠬᠡᠢ ᠵᠣᠷᠢᠭᠲᠠᠢ ᠪᠣᠯᠭᠠᠨ ᠳᠠᠪᠲᠠᠵᠤ᠂ ᠡᠨᠡ ᠵᠣᠷᠢᠭ᠂ ᠰᠢᠷᠭᠠᠭᠤ ᠬᠥᠳᠡᠯᠮᠦᠷᠢ ᠶ᠋ᠢ ᠪᠦᠲᠦᠭᠡᠵᠦ᠂ ᠰᠢᠷᠭᠠᠭᠤ ᠬᠥᠳᠡᠯᠮᠦᠷᠢ ᠶ᠋ᠢᠨ ᠳᠡᠭᠡᠷᠡ ᠠᠪᠢᠶᠠᠰ ᠪᠢᠯᠢᠭ ᠨᠢ ᠨᠡᠮᠡᠭᠳᠡᠵᠦ ᠡᠢᠮᠦ ᠲᠣᠮᠣᠬᠠᠨ ᠪᠦᠲᠦᠭᠡᠯ ᠦ᠋ᠳ ᠢ᠋ ᠭᠠᠷᠭᠠᠨ ᠬᠠᠨᠠᠨ ᠲᠣᠯᠣᠭᠠᠢ ᠠ᠋ᠴᠠ ᠪᠠᠨ ᠠᠷᠪᠠᠨ ᠲᠠᠪᠤᠨ ᠭᠦᠵᠡᠭᠡ ᠰᠢᠷᠠ ᠲᠣᠰᠣ ᠡᠯᠭᠦᠴᠢᠬᠡᠭᠰᠡᠨ ᠪᠠᠶᠠᠨ ᠡᠷᠡ ᠰᠢᠭ ᠦᠨᠡᠨ ᠥᠪ ᠲᠡᠢ ᠬᠠᠩᠬᠠᠯᠵᠠᠭᠠᠳ ᠶᠠᠪᠤᠳᠠᠭ ᠪᠠᠢᠵᠢ ᠳᠠ᠃
ᠡᠨᠡ ᠪᠣᠯ ᠬᠠᠰᠪᠤᠯᠠᠭ᠃
ᠣᠳᠣ ᠬᠠᠰᠪᠤᠯᠠᠭ ᠤ᠋ᠨ ᠵᠣᠬᠢᠶᠠᠯ ᠪᠦᠲᠦᠭᠡᠯ ᠢ᠋ ᠠᠮᠲᠠᠷᠬᠠᠵᠤ ᠰᠣᠨᠢᠷᠬᠠᠭᠰᠠᠨ ᠤ᠋ ᠬᠤᠪᠢ ᠳ᠋ᠤ᠌ ᠥᠪᠡᠷ ᠦ᠋ᠨ ᠮᠥᠴᠢᠳᠬᠡᠨ ᠦᠵᠡᠯᠲᠡ ᠪᠡᠨ ᠬᠡᠯᠡᠶᠡ᠃ ᠭᠡᠬᠦᠯᠡᠷ ᠬᠠᠮᠤᠭ ᠲᠦᠷᠦᠭᠦᠨ ᠳ᠋ᠦ᠍ ᠬᠡᠯᠡᠬᠦ ᠡᠴᠡ ᠲᠤᠰ ᠬᠥᠮᠦᠨ ᠤᠷᠠᠨ ᠵᠣᠬᠢᠶᠠᠯ ᠤ᠋ᠨ ᠥᠭᠦᠯᠡᠮᠵᠢ ᠬᠢᠬᠦ ᠳ᠋ᠡᠭᠡᠨ ᠠᠨᠠᠢᠬᠠᠨ᠂ ᠣᠨᠣᠯ ᠶᠣᠰᠣ ᠶ᠋ᠢ ᠮᠡᠳᠡᠭᠰᠡᠨ ᠨᠢ ᠴᠤ᠌ ᠠᠯᠠᠭ ᠪᠤᠯᠠᠭ᠃ ᠲᠡᠭᠡᠬᠦᠯᠡᠷ ᠪᠣᠳᠣᠭᠰᠠᠨ ᠰᠠᠨᠠᠭᠰᠠᠨ ᠢ᠋ᠶ᠋ᠠᠨ ᠬᠡᠯᠡᠬᠦ ᠡᠴᠡ ᠴᠠᠭᠠᠰᠢ ᠦᠭᠡᠢ ᠪᠠᠢᠬᠤ ᠪᠢᠵᠡ᠃
ᠬᠠᠰᠪᠤᠯᠠᠭ ᠤ᠋ᠨ ᠵᠣᠬᠢᠶᠠᠯ ᠪᠦᠲᠦᠭᠡᠯ ᠦ᠋ᠨ ᠬᠡᠪ ᠨᠠᠮᠪᠠ ᠮᠠᠨ ᠤ᠋ ᠣᠷᠳᠣᠰ ᠤ᠋ᠨ ᠮᠣᠩᠭᠣᠯ ᠵᠣᠬᠢᠶᠠᠯᠴᠢᠳ ᠪᠠᠢᠲᠤᠭᠠᠢ᠂ ᠣᠷᠣᠨ ᠤ᠋ ᠮᠣᠩᠭᠣᠯ ᠵᠣᠬᠢᠶᠠᠯᠴᠢᠳ ᠤ᠋ᠨ ᠳᠣᠲᠣᠷᠠ ᠴᠤ᠌ ᠬᠣᠪᠣᠷᠬᠠᠨ ᠬᠠᠷᠠᠭᠳᠠᠨᠠ᠃ ᠡᠨᠡ ᠨᠢ ᠲᠡᠭᠦᠨ ᠦ᠌ ᠠᠵᠢᠯ ᠤ᠋ᠨ ᠲᠥᠷᠥᠯ ᠵᠦᠢᠯ ᠲᠡᠢ ᠬᠣᠯᠪᠣᠭᠳᠠᠬᠤ ᠮᠠᠭᠠᠳ ᠦᠭᠡᠢ ᠴᠤ᠌᠂ ᠳᠠᠬᠢᠭᠠᠳ ᠨᠢᠭᠡ ᠬᠡᠯᠡᠪᠡᠯ ᠲᠡᠭᠦᠨ ᠦ᠌ ᠥᠪᠡᠷ ᠦ᠋ᠨ ᠪᠡᠶᠡ ᠳ᠋ᠡᠭᠡᠨ ᠥᠪᠡᠷ ᠢ᠋ᠶ᠋ᠡᠨ ᠡᠵᠡᠨ ᠰᠠᠭᠤᠬᠤ ᠭᠡᠳᠡᠭ ᠵᠠᠩ ᠴᠢᠨᠠᠷ ᠠ᠋ᠴᠠ ᠰᠢᠯᠲᠠᠭᠠᠯᠠᠵᠤ᠂ ᠥᠪᠡᠷᠮᠢᠴᠡ ᠬᠡᠪ ᠨᠠᠮᠪᠠ ᠪᠠᠨ ᠪᠣᠢ ᠪᠣᠯᠭᠠᠭᠰᠠᠨ ᠭᠡᠯᠲᠡᠢ᠃ ᠲᠡᠭᠦᠨ ᠦ᠌ ᠵᠣᠬᠢᠶᠠᠯ ᠤ᠋ᠨ ᠣᠯᠠᠩᠬᠢ ᠨᠢ ᠬᠡᠷᠡᠭ ᠵᠠᠷᠭᠤ᠂ ᠲᠠᠩᠨᠠᠨ ᠮᠥᠷᠳᠡᠯ᠂ ᠬᠠᠤᠯᠢ ᠴᠠᠭᠠᠵᠠ ᠪᠠᠷ ᠰᠦᠪᠡᠭᠴᠢ ᠪᠡᠨ ᠪᠣᠯᠭᠠᠭᠰᠠᠨ ᠪᠠᠢᠳᠠᠭ᠃ ᠭᠡᠬᠦᠯᠡᠷ ᠲᠡᠷᠡ ᠳᠠᠩ ᠴᠤᠯᠭᠤᠢ ᠬᠠᠤᠯᠢ ᠴᠠᠭᠠᠵᠠ᠂ ᠲᠡᠩᠨᠡᠯ ᠮᠥᠷᠳᠡᠯ᠂ ᠬᠡᠷᠡᠭ ᠵᠠᠷᠭᠤ ᠶ᠋ᠢ ᠯᠡ ᠪᠢᠴᠢᠭᠰᠡᠨ ᠪᠢᠰᠢ᠂ ᠬᠠᠷᠢᠨ ᠡᠭᠦᠨ ᠢ᠋ᠶ᠋ᠡᠷ ᠳᠠᠮᠵᠢᠭᠤᠯᠵᠤ ᠪᠠᠢᠭᠠᠳ ᠬᠥᠮᠦᠨ ᠦ᠌ ᠠᠮᠢᠳᠤᠷᠠᠯ ᠤ᠋ᠨ ᠪᠤᠳᠤᠯᠢᠶᠠᠨ ᠪᠤᠯᠠᠩᠭᠢᠷ᠂ ᠨᠡᠢᠭᠡᠮ ᠦ᠋ᠨ ᠡᠷᠢᠶᠡᠨ ᠠᠯᠠᠭ ᠵᠢᠴᠢ ᠬᠠᠤᠯᠢ ᠴᠠᠭᠠᠵᠠ ᠪᠣᠯᠤᠨ ᠪᠤᠰᠤᠳ ᠠᠮᠢᠲᠠᠳ ᠠ᠋ᠴᠠ ᠢᠯᠭᠠᠭᠳᠠᠬᠤ ᠬᠥᠮᠦᠨ ᠭᠡᠰᠡᠨ ᠣᠶᠤᠨ ᠤᠬᠠᠭᠠᠨ ᠨᠢ ᠬᠥᠭᠵᠢᠭᠰᠡᠨ ᠠᠮᠢᠲᠠᠨ ᠤ᠋ ᠨᠢᠩᠵᠢᠨ ᠰᠡᠳᠬᠢᠯ ᠦ᠋ᠨ ᠵᠥᠷᠢᠴᠡᠯ ᠮᠥᠷᠭᠥᠯᠳᠦᠭᠡᠨ ᠢ᠋ ᠬᠠᠷᠠᠭᠤᠯᠤᠭᠰᠠᠨ ᠪᠠᠢᠳᠠᠭ ᠢ᠋ ᠳᠤᠷᠠᠳᠤᠭᠤᠰᠢᠲᠠᠢ᠃ ᠡᠭᠦᠨ ᠳ᠋ᠦ᠍ 《ᠨᠣᠷᠮᠠ ᠪᠡᠶᠡᠯᠡᠭᠦᠯᠬᠦ ᠡᠳᠦᠷ ᠦ᠋ᠳ ᠲᠦ᠍》 (ᠨᠥᠭᠦᠭᠡ ᠲᠡᠭᠦᠪᠦᠷᠢ ᠳ᠋ᠦ᠍ ᠣᠷᠣᠵᠠᠢ)᠂ 《ᠦᠷᠡ ᠳ᠋ᠡᠭᠡᠨ ᠲᠡᠮᠡᠦᠯᠦᠭᠰᠡᠨ ᠶᠠᠯᠠ ᠲᠠᠢ ᠬᠥᠮᠦᠨ》 (ᠲᠤᠰ ᠲᠡᠭᠦᠪᠦᠷᠢ ᠳ᠋ᠦ᠍) ᠂ 《ᠥᠨᠳᠥᠷ ᠠᠰᠠᠷ ᠤ᠋ᠨ ᠫᠤᠤ ᠶ᠋ᠢᠨ ᠳᠠᠭᠤᠨ》 (ᠨᠥᠭᠦᠭᠡ ᠲᠡᠭᠦᠪᠦᠷᠢ ᠳ᠋ᠦ᠍)᠂ 《ᠬᠣᠷᠢᠭᠤᠯ ᠳᠣᠲᠣᠷᠠᠬᠢ ᠬᠣᠷᠢᠭᠠ ᠦᠭᠡᠢ ᠬᠠᠢᠷᠠ》 (ᠲᠤᠰ ᠲᠡᠭᠦᠪᠦᠷᠢ ᠳ᠋ᠦ᠍) ᠪᠤᠶᠤ ᠲᠣᠭᠣᠵᠢ 《ᠣᠩᠭᠣᠨ ᠬᠠᠢᠯᠠᠰᠤᠨ ᠦᠢᠮᠡᠭᠡᠨ》 (ᠨᠥᠭᠦᠭᠡ ᠲᠡᠭᠦᠪᠦᠷᠢ ᠳ᠋ᠦ᠍)᠁ ᠭᠡᠬᠦ ᠮᠡᠲᠦ ᠶ᠋ᠢᠨ ᠵᠣᠬᠢᠶᠠᠯ ᠵᠢᠱ᠌ᠢᠶᠡᠯᠡᠭᠳᠡᠨᠡ᠃ ᠡᠳᠡᠭᠡᠷ ᠵᠣᠬᠢᠶᠠᠯ ᠤ᠋ᠳ ᠤ᠋ᠨ ᠭᠣᠣᠯ ᠪᠠᠭᠠᠲᠤᠷ ᠨᠢ ᠠᠰᠪᠤᠷ ᠴᠠᠭᠠᠪᠤᠷ ᠬᠠᠤᠯᠢᠴᠢ ᠪᠤᠶᠤ ᠠᠯᠠᠬᠤ ᠶᠠᠯᠠ ᠪᠠᠷ ᠰᠢᠢᠳᠬᠡᠭᠳᠡᠭᠰᠡᠨ ᠶᠠᠯᠠᠲᠠᠳ᠂ ᠡᠰᠡᠬᠦᠯᠡ ᠬᠣᠷᠢᠬᠤ ᠶᠠᠯᠠ ᠪᠠᠷ ᠰᠢᠭᠢᠳᠬᠡᠭᠳᠡᠭᠡᠳ ᠬᠣᠷᠢᠭᠤᠯ ᠠ᠋ᠴᠠ ᠪᠠᠨ ᠳᠤᠲᠠᠭᠠᠭᠰᠠᠨ ᠣᠷᠭᠣᠳᠠᠭᠤᠯ ᠪᠤᠶᠤ ᠶᠠᠯᠠ ᠨᠢ ᠨᠢᠭᠡᠨᠲᠡ ᠠᠯᠠᠬᠤ ᠪᠤᠶᠤ ᠬᠣᠷᠢᠭᠳᠠᠬᠤ ᠶᠠᠯᠠ ᠳ᠋ᠤ᠌ ᠬᠦᠷᠦᠭᠰᠡᠨ ᠪᠣᠯᠪᠠᠴᠤ ᠬᠠᠤᠯᠢ ᠶ᠋ᠢᠨ ᠲᠣᠣᠷ ᠲᠤ᠌ ᠣᠷᠣᠭᠠ ᠦᠭᠡᠢ ᠬᠥᠮᠦᠰ ᠪᠠᠢᠳᠠᠭ᠃ ᠶᠠᠯᠠ ᠬᠢᠪᠡᠯ ᠬᠠᠤᠯᠢ ᠶ᠋ᠢᠨ ᠲᠣᠣᠷ ᠲᠤ᠌ ᠤᠨᠠᠬᠤ᠂ ᠬᠠᠤᠯᠢᠴᠢ ᠨᠢ ᠬᠠᠤᠯᠢ ᠶ᠋ᠢᠨ ᠶᠣᠰᠣᠭᠠᠷ ᠰᠢᠢᠳᠬᠡᠪᠡᠯ ᠵᠣᠬᠢᠳᠠᠭ ᠨᠢ ᠡᠩ ᠦ᠋ᠨ ᠶᠣᠰᠣ ᠪᠣᠯᠪᠠᠴᠤ (ᠵᠠᠷᠢᠮ ᠵᠣᠬᠢᠶᠠᠯ ᠳ᠋ᠤ᠌ ᠴᠤ᠌ ᠢᠩᠭᠢᠵᠦ ᠪᠢᠴᠢᠳᠡᠭ) ᠬᠠᠰᠪᠤᠯᠠᠭ ᠤ᠋ᠨ ᠵᠣᠬᠢᠶᠠᠯ ᠳ᠋ᠤ᠌ ᠡᠢᠮᠦᠷᠬᠦᠦ ᠲᠦᠭᠡᠮᠡᠯ ᠲᠣᠮᠢᠶᠠᠯᠠᠯ ᠪᠢᠰᠢ ᠪᠠᠢᠵᠤ᠂ ᠬᠥᠮᠦᠨ ᠦ᠌ ᠠᠮᠢᠳᠤᠷᠠᠯ ᠤ᠋ᠨ ᠵᠦᠢ ᠪᠣᠯᠤᠨ ᠬᠠᠤᠯᠢ ᠶ᠋ᠢᠨ ᠬᠣᠭᠣᠷᠣᠨᠳᠣ ᠵᠥᠷᠢᠴᠡᠯ ᠵᠥᠷᠢᠶᠡ ᠡᠭᠦᠰᠴᠦ ᠬᠥᠮᠦᠨ ᠢ᠋ ᠭᠦᠨ ᠰᠡᠳᠬᠢᠭᠦᠯᠬᠦ ᠳ᠋ᠦ᠍ ᠬᠦᠷᠦᠭᠦᠯᠳᠡᠭ ᠪᠢᠯᠡ᠃ 《ᠬᠣᠷᠢᠭᠤᠯ ᠳᠣᠲᠣᠷᠠᠬᠢ ᠬᠣᠷᠢᠭᠠ ᠦᠭᠡᠢ ᠬᠠᠢᠷᠠ》 ᠶ᠋ᠢᠨ ᠳᠣᠲᠣᠷᠠᠬᠢ ᠲᠡᠭᠦᠰ ᠪᠣᠯ ᠨᠢᠭᠡ ᠴᠢᠬᠤᠯᠠ ᠵᠢᠷᠤᠭ ᠲᠥᠯᠥᠪᠯᠡᠭᠡ ᠪᠡᠨ ᠭᠡᠭᠡᠭᠡᠳ ᠬᠠᠤᠯᠢ ᠳ᠋ᠤ᠌ ᠬᠠᠯᠳᠠᠵᠤ ᠬᠥᠳᠡᠯᠮᠦᠷᠢ ᠪᠡᠷ ᠥᠭᠡᠷᠡᠴᠢᠯᠡᠭᠳᠡᠵᠦ ᠪᠠᠢᠭᠠ ᠶᠠᠯᠠᠲᠠᠨ ᠪᠢᠯᠡ᠃ ᠭᠡᠲᠡᠯᠡ ᠲᠡᠷᠡ ᠬᠥᠳᠡᠯᠮᠦᠷᠢ ᠪᠡᠷ ᠥᠭᠡᠷᠡᠴᠢᠯᠡᠭᠳᠡᠵᠦ ᠨᠡᠭᠦᠷᠡᠰᠦ ᠰᠠᠪᠠᠯᠠᠵᠤ ᠪᠠᠢᠬᠤ ᠶ᠋ᠢᠨ ᠳᠤᠮᠳᠠ ᠪᠠᠨ ᠨᠢᠭᠡ ᠬᠡᠦᠬᠡᠨ ᠦ᠌ ᠨᠡᠭᠦᠷᠡᠰᠦ ᠰᠠᠪᠠᠯᠠᠨ ᠵᠣᠭᠣᠰ ᠣᠯᠬᠤ ᠭᠡᠵᠦ ᠳᠣᠯᠣᠭᠠᠨ ᠰᠦᠪᠡ ᠪᠡᠷ ᠢ᠋ᠶ᠋ᠡᠨ ᠬᠡᠢ ᠭᠠᠷᠲᠠᠯᠠ ᠦᠢᠯᠡ ᠦᠵᠡᠵᠦ ᠪᠠᠢᠭᠠ ᠶ᠋ᠢ ᠦᠵᠡᠭᠡᠳ᠂ ᠦᠷᠦ ᠡᠪᠡᠳᠬᠦ ᠵᠢᠴᠢ ᠣᠯᠠᠨ ᠬᠣᠨᠣᠭ ᠡᠮᠡ ᠥᠬᠢᠳ ᠦ᠋ᠨ ᠪᠠᠷᠠ ᠦᠵᠡᠭᠡ ᠦᠭᠡᠢ ᠡᠴᠡ ᠪᠣᠯᠵᠤ ᠳᠤᠷᠠᠯᠠᠵᠤ ᠲᠠᠴᠢᠶᠠᠬᠤ ᠰᠡᠳᠬᠢᠯ ᠲᠥᠷᠥᠭᠳᠡᠵᠦ ᠠᠯᠢ ᠠᠯᠢ ᠪᠠᠷ ᠲᠡᠭᠦᠨ ᠢ᠋ ᠬᠠᠪᠰᠤᠷᠳᠠᠭ ᠪᠣᠯᠪᠠ᠃ ᠲᠡᠭᠡᠵᠦ ᠪᠠᠢᠲᠠᠯᠠ ᠡᠯᠢᠶᠡᠲᠦ ᠶ᠋ᠢᠨ ᠬᠠᠪᠴᠢᠯ ᠤ᠋ᠨ ᠬᠥᠳᠡᠯᠮᠦᠷᠢ ᠪᠡᠷ ᠥᠭᠡᠷᠡᠴᠢᠯᠡᠬᠦ ᠭᠠᠵᠠᠷ ᠤ᠋ᠨ ᠢ᠋ᠶ᠋ᠠᠨ ᠣᠢᠷᠠ ᠣᠷᠴᠢᠨ ᠳ᠋ᠠᠭᠠᠨ ᠪᠠᠰᠠ ᠨᠢᠭᠡ ᠨᠡᠭᠦᠷᠡᠰᠦᠨ ᠠᠭᠤᠷᠬᠠᠢ ᠡᠷᠢᠵᠦ ᠣᠯᠬᠤ ᠬᠡᠷᠡᠭᠴᠡᠭᠡ ᠲᠡᠢ ᠪᠣᠯᠵᠤ᠂ ᠡᠨᠡ ᠡᠭᠦᠷᠭᠡ ᠲᠡᠭᠦᠰ ᠦ᠋ᠨ ᠮᠥᠷᠦᠨ ᠳᠡᠭᠡᠷᠡ ᠲᠠᠯᠪᠢᠭᠳᠠᠭᠰᠠᠨ ᠪᠥᠭᠡᠳ ᠲᠡᠷᠡ ᠡᠨᠡ ᠡᠭᠦᠷᠭᠡ ᠶ᠋ᠢ ᠪᠡᠶᠡᠯᠡᠭᠦᠯᠪᠡᠯ᠂ ᠭᠢᠨᠳᠠᠨ ᠠ᠋ᠴᠠ ᠪᠠᠨ ᠤᠷᠢᠳᠴᠢᠯᠠᠨ ᠭᠠᠷᠴᠤ ᠳᠡᠢᠯᠬᠦ ᠮᠥᠷᠲᠡᠭᠡᠨ ᠭᠢᠨᠳᠠᠨ ᠠ᠋ᠴᠠ ᠭᠠᠷᠤᠭᠰᠠᠨ ᠤ᠋ ᠳᠠᠷᠠᠭᠠ ᠳ᠋ᠤᠨᠢ ᠬᠡᠷᠡᠭᠯᠡᠵᠦ ᠬᠦᠷᠬᠦᠢᠴᠡ ᠵᠣᠭᠣᠰ ᠮᠥᠩᠭᠥ ᠲᠡᠢ ᠪᠣᠯᠬᠤ 《ᠲᠡᠭᠷᠢ ᠡᠴᠡ ᠵᠠᠶᠠᠭᠠᠭᠰᠠᠨ ᠲᠣᠬᠢᠶᠠᠯ》 ᠳ᠋ᠤ᠌ ᠤᠴᠠᠷᠠᠭᠰᠠᠨ ᠪᠠᠢᠳᠠᠭ᠃ ᠲᠡᠭᠦᠰ ᠡᠨᠡ ᠡᠭᠦᠷᠭᠡ ᠶ᠋ᠢ ᠪᠡᠶᠡᠯᠡᠭᠦᠯᠬᠦ ᠶ᠋ᠢᠨ ᠳᠤᠮᠳᠠ ᠪᠠᠨ ᠭᠡᠨᠡᠳᠲᠡᠬᠡᠨ ᠲᠡᠭᠦᠨ ᠦ᠌ ᠣᠯᠵᠤ ᠠᠪᠤᠭᠰᠠᠨ ᠣᠬᠢ ᠰᠠᠢᠨ ᠨᠡᠭᠦᠷᠡᠰᠦ ᠲᠡᠢ ᠳᠣᠪᠣ ᠨᠢ ᠨᠥᠭᠦᠭᠡ ᠬᠡᠦᠬᠡᠨ ᠦ᠌ ᠬᠤᠪᠢᠶᠠᠭᠳᠠᠭᠰᠠᠨ ᠪᠡᠯᠴᠢᠭᠡᠷ ᠲᠦ᠍ ᠪᠠᠢᠭᠰᠠᠨ ᠢ᠋ ᠮᠡᠳᠡᠭᠰᠡᠨ ᠪᠥᠭᠡᠳ ᠨᠥᠭᠦᠭᠡ ᠬᠡᠦᠬᠡᠨ ᠡᠪᠡᠳᠴᠢᠲᠡᠢ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠲᠥᠯᠥᠭᠡ ᠨᠡᠭᠦᠷᠡᠰᠦ ᠰᠠᠪᠠᠯᠠᠵᠤ ᠪᠠᠢᠳᠠᠭ ᠢ ᠮᠡᠳᠡᠭᠰᠡᠨ ᠦ ᠳᠠᠷᠠᠭᠠ ᠲᠡᠷᠡ ᠬᠦ᠌ 《ᠲᠡᠭᠷᠢ ᠡᠴᠡ ᠵᠠᠶᠠᠭᠠᠭᠰᠠᠨ ᠲᠣᠬᠢᠶᠠᠯ》 ᠢᠶᠠᠨ ᠬᠠᠶᠠᠵᠤ ᠰᠢᠨᠵᠢᠯᠡᠵᠦ ᠮᠡᠳᠡᠭᠰᠡᠨ ᠵᠦᠢᠯ ᠢᠶᠡᠨ ᠬᠡᠦᠬᠡᠨ ᠳᠦ ᠵᠠᠳᠠᠷᠠᠭᠤᠯᠤᠭᠠᠳ ᠶᠠᠯᠠ ᠶᠢᠨ ᠢᠶᠡᠨ ᠳᠡᠭᠡᠷᠡ ᠡᠴᠡ ᠶᠠᠯᠠ ᠨᠡᠮᠡᠴᠢᠭᠡᠭᠡᠳ ᠲᠠᠬᠢᠭᠠᠳ ᠬᠥᠳᠡᠯᠮᠦᠷᠢ ᠪᠡᠷ ᠥᠭᠡᠷᠡᠴᠢᠯᠡᠬᠦ ᠭᠠᠵᠠᠷ ᠣᠴᠢᠭᠰᠠᠨ ᠪᠠᠢᠳᠠᠭ᠃ ᠬᠥᠮᠦᠨ ᠳᠦᠷᠢ ᠶ᠋ᠢᠨ ᠬᠤᠪᠢ ᠳ᠋ᠤ᠌ ᠠᠪᠴᠤ ᠬᠡᠯᠡᠪᠡᠯ ᠲᠡᠭᠦᠰ ᠪᠣᠯ ᠶᠠᠯᠠᠲᠠᠨ᠂ ᠡᠮᠡ ᠬᠡᠦᠬᠡᠨ ᠳ᠋ᠦ᠍ ᠲᠠᠴᠢᠶᠠᠭᠰᠠᠨ ᠡᠷᠡ ᠬᠥᠮᠦᠨ᠂ ᠥᠯᠥᠰᠬᠦ ᠳ᠋ᠡᠭᠡᠨ ᠥᠭᠡᠷᠡ ᠪᠤᠰᠤᠳ ᠢ᠋ ᠬᠠᠪᠰᠤᠷᠴᠤ ᠪᠠᠢᠭᠠᠳ ᠬᠦᠨᠡᠰᠦ ᠶ᠋ᠢ ᠨᠢ ᠬᠤᠪᠢᠶᠠᠵᠤ ᠢᠳᠡᠳᠡᠭ ᠬᠥᠭᠡᠷᠦᠬᠦᠢ ᠬᠥᠮᠦᠨ᠂ ᠶᠠᠯᠠ ᠪᠠᠨ ᠭᠠᠪᠢᠶᠠ ᠪᠠᠷ ᠳᠡᠢᠯᠵᠦ ᠥᠷᠥᠰᠢᠶᠡᠯ ᠦᠵᠡᠬᠦ ᠭᠡᠳᠡᠭ ᠦᠭᠡᠨᠴᠡ ᠬᠥᠮᠦᠨ᠃ ᠭᠡᠬᠦᠯᠡᠷ ᠡᠴᠦᠰ ᠰᠡᠭᠦᠯ ᠳ᠋ᠡᠭᠡᠨ ᠬᠣᠷᠢᠭᠠᠨ ᠳ᠋ᠤ᠌ ᠬᠣᠷᠢᠭᠳᠠᠬᠤ ᠦᠭᠡᠢ ᠬᠠᠢᠷᠠ ᠪᠠᠷ ᠢ᠋ᠶ᠋ᠠᠨ ᠵᠣᠪᠠᠯᠠᠩ ᠦᠵᠡᠭᠰᠡᠨ ᠬᠥᠮᠦᠨ ᠢ᠋ ᠬᠠᠢᠷᠠᠯᠠᠳᠠᠭ᠂ ᠵᠠᠯᠠᠭᠤ ᠬᠡᠦᠬᠡᠨ ᠢ᠋ ᠬᠠᠢᠷᠠᠯᠠᠳᠠᠭ᠂ ᠡᠨᠡ ᠬᠠᠢᠷᠠ ᠶ᠋ᠢᠨ ᠢ᠋ᠶ᠋ᠡᠨ ᠲᠥᠯᠥᠭᠡ᠂ ᠶᠠᠯᠠ ᠶ᠋ᠢᠨ ᠢ᠋ᠶ᠋ᠡᠨ ᠳᠡᠭᠡᠷᠡ ᠶᠠᠯᠠ ᠨᠡᠮᠡᠳᠡᠭ ᠶᠡᠬᠡ ᠡᠷᠡ ᠪᠣᠯᠤᠨ ᠬᠤᠪᠢᠷᠠᠵᠤ ᠵᠣᠬᠢᠶᠠᠯ ᠨᠢ ᠬᠥᠮᠦᠨ ᠦ᠌ ᠳᠦᠷᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠤᠪᠢᠷᠠᠯᠲᠠ ᠪᠠᠷ ᠥᠨᠳᠥᠷ ᠲᠡᠢᠰᠢ ᠪᠡᠨ ᠬᠥᠭᠵᠢᠵᠦ᠂ ᠤᠩᠰᠢᠭᠴᠢᠳ ᠲᠤ᠌ ᠬᠡᠯᠡᠬᠦ ᠭᠡᠬᠦᠯᠡᠷ ᠶᠠᠭᠤ ᠶ᠋ᠢ ᠨᠢ ᠬᠡᠯᠡᠬᠦ ᠶᠦᠮ ᠪᠢᠯᠡ᠂ ᠬᠡᠯᠡᠬᠦ ᠦᠭᠡᠢ ᠭᠡᠬᠦᠯᠡᠷ ᠴᠠᠭᠠᠨᠠ ᠨᠢ ᠨᠢᠭᠡ ᠶᠠᠭᠤᠮᠠ ᠰᠢᠪᠡᠨᠡᠭᠡᠳ ᠪᠠᠢᠳᠠᠭ ᠲᠥᠷᠥᠭᠳᠡᠯ ᠢ᠋ ᠣᠯᠭᠣᠭᠰᠠᠨ ᠪᠠᠢᠳᠠᠭ᠃ ᠡᠨᠡ ᠪᠣᠯ ᠵᠣᠬᠢᠶᠠᠯᠴᠢ ᠶ᠋ᠢᠨ ᠥᠪᠡᠷᠮᠢᠴᠡ ᠬᠡᠪ ᠨᠠᠮᠪᠠ ᠶ᠋ᠢᠨ ᠨᠢᠭᠡ᠃
ᠬᠠᠰᠪᠤᠯᠠᠭ ᠵᠠᠷᠢᠮ ᠵᠣᠬᠢᠶᠠᠯ ᠢ᠋ ᠣᠬᠣᠷ ᠠᠪᠰᠠᠷᠬᠠᠨ ᠪᠢᠴᠢᠳᠡᠭ ᠪᠣᠯᠪᠠᠴᠤ ᠵᠣᠬᠢᠶᠠᠯ ᠤ᠋ᠨ ᠦᠢᠯᠡ ᠶᠠᠪᠤᠳᠠᠯ ᠨᠢ ᠬᠠᠷᠢᠨ ᠨᠠᠷᠢᠨ ᠪᠤᠳᠤᠯᠢᠶᠠᠨᠲᠠᠢ ᠪᠠᠢᠳᠠᠭ᠃ ᠲᠡᠭᠦᠨ ᠦ᠌ ᠵᠣᠬᠢᠶᠠᠯ ᠨᠢ ᠡᠭᠦᠳᠡ ᠪᠡᠷ ᠨᠢ ᠣᠷᠣᠮᠠᠭᠴᠠ ᠮᠤᠬᠤᠷ ᠨᠢ ᠦᠵᠡᠭᠳᠡᠴᠢᠬᠡᠳᠡᠭ ᠪᠢᠰᠢ᠂ ᠬᠠᠷᠢᠨ ᠲᠥᠭᠡᠷᠢᠯ ᠣᠷᠳᠣᠨ ᠰᠢᠭ᠋ ᠥᠷᠥᠭᠡ ᠰᠤᠮᠤ ᠳᠠᠯᠳᠠ ᠢᠯᠡ ᠪᠡᠷ ᠳᠦᠭᠦᠷᠴᠦ᠂ ᠵᠣᠬᠢᠶᠠᠯ ᠢ᠋ ᠨᠢ ᠦᠵᠡᠵᠦ ᠪᠠᠷᠠᠭᠰᠠᠨ ᠤ᠋ ᠳᠠᠷᠠᠭᠠ ᠰᠠᠢ ᠤᠴᠢᠷ ᠤᠬᠠᠭᠠᠨ ᠢ᠋ ᠨᠢ ᠣᠯᠵᠤ ᠳᠡᠢᠯᠳᠡᠭ ᠶᠦᠮ᠃ 《ᠠᠭᠠᠯᠵᠢᠨ ᠲᠣᠣᠷ ᠳᠣᠲᠣᠷᠠᠬᠢ ᠠᠮᠢ ᠨᠠᠰᠤ》 (ᠡᠨᠡ ᠲᠡᠭᠦᠪᠦᠷᠢ ᠳ᠋ᠦ᠍) 《ᠡᠴᠦᠰ ᠦ᠋ᠨ ᠮᠢᠨᠦ᠋ᠲ》 ᠭᠡᠬᠦ ᠭᠠᠷᠴᠠᠭ ᠢ᠋ᠶ᠋ᠠᠷ ᠲᠡᠭᠦᠪᠦᠷᠢᠯᠡᠭᠳᠡᠪᠡ) ᠭᠡᠬᠦ ᠲᠣᠭᠣᠵᠢ ᠨᠢ ᠡᠨᠡ ᠲᠠᠯᠠ ᠶ᠋ᠢᠨ ᠣᠨᠴᠠᠯᠢᠭ ᠢ᠋ ᠶᠡᠬᠡ ᠬᠠᠳᠠᠭᠠᠯᠠᠭᠰᠠᠨ ᠬᠠᠷᠠᠭᠳᠠᠨᠠ᠃ ᠲᠤᠰ ᠵᠣᠬᠢᠶᠠᠯ ᠡᠬᠢᠯᠡᠬᠦ ᠳ᠋ᠦ᠍ ᠲᠦᠮᠡᠨᠨᠠᠰᠤᠲᠤ ᠬᠣᠲᠠ ᠶ᠋ᠢᠨ ᠠᠷᠠᠳ ᠤ᠋ᠨ ᠰᠢᠭᠦᠬᠦ ᠬᠣᠷᠢᠶᠠ ᠨᠢ ᠡᠬᠡᠨᠡᠷ ᠢ᠋ᠶ᠋ᠡᠨ ᠬᠣᠣᠷᠲᠤ ᠡᠮ ᠢ᠋ᠶ᠋ᠡᠷ ᠬᠣᠣᠷᠳᠠᠭᠤᠯᠤᠨ ᠠᠯᠠᠭᠰᠠᠨ ᠪᠣᠯᠣᠷᠴᠠᠭᠠᠨ ᠢ᠋ ᠴᠠᠭᠠᠵᠠ ᠶ᠋ᠢᠨ ᠲᠠᠯᠠᠪᠠᠢ ᠤᠷᠤᠭᠤ ᠠᠯᠠᠬᠤ ᠪᠠᠷ ᠠᠪᠠᠴᠢᠵᠤ ᠪᠠᠢᠭᠠ ᠶ᠋ᠢ ᠪᠢᠴᠢᠭᠰᠡᠨ ᠪᠥᠭᠡᠳ ᠪᠤᠯᠤᠷᠴᠠᠭᠠᠨ ᠤ᠋ ᠡᠬᠡᠨᠡᠷ ᠲᠡᠢ ᠪᠡᠨ ᠡᠶᠡ ᠡᠪᠳᠡᠷᠡᠵᠦ ᠥᠪᠡᠷ ᠦ᠋ᠨ ᠡᠮᠴᠢ ᠶ᠋ᠢᠨ ᠮᠡᠷᠭᠡᠵᠢᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠣᠶᠠᠷ ᠵᠦᠢᠯ ᠦ᠋ᠨ ᠤᠷᠪᠠᠯ ᠡᠭᠦᠰᠬᠦ ᠡᠮ ᠢ᠋ ᠨᠡᠢᠯᠡᠭᠦᠯᠦᠨ ᠵᠠᠷᠤᠵᠤ ᠬᠣᠣᠷᠯᠠᠭᠰᠠᠨ ᠤᠴᠢᠷ ᠢ᠋ ᠳᠥᠭᠥᠮ ᠲᠤᠰᠢᠶᠠᠭᠰᠠᠨ ᠪᠠᠢᠳᠠᠭ᠃ ᠠᠪᠤᠨ ᠦᠵᠡᠬᠦ ᠳ᠋ᠦ᠍ ᠡᠨᠡ ᠬᠡᠷᠡᠭ ᠲᠤᠩ ᠳᠥᠬᠥᠮᠬᠡᠨ ᠮᠥᠷᠲᠡᠭᠡᠨ ᠲᠦᠪᠰᠢᠨ ᠳᠠᠷᠤᠭᠠ ᠶ᠋ᠢᠨ ᠭᠠᠷ ᠳᠠᠬᠢ ᠲᠤᠭ ᠲᠣᠬᠢᠰᠬᠢᠬᠤ ᠲᠠᠢ ᠯᠠ ᠵᠡᠷᠭᠡ ᠫᠤᠤ ᠳᠤᠤᠭᠠᠷᠴᠤ ᠶᠠᠯᠠᠲᠠᠨ ᠬᠠᠷᠠ ᠨᠦᠬᠡᠨ ᠳ᠋ᠡᠭᠡᠨ ᠤᠨᠠᠪᠠᠯ ᠪᠦᠬᠦ ᠵᠣᠬᠢᠶᠠᠯ ᠣᠷᠭᠢᠯ ᠳ᠋ᠠᠭᠠᠨ ᠲᠤᠯᠤᠮᠠᠷ ᠪᠠᠢᠲᠠᠯᠠ ᠶᠠᠯᠠᠲᠠᠨ ᠪᠣᠯᠤᠷᠴᠠᠭᠠᠨ ᠡᠴᠦᠰ ᠦ᠋ᠨ ᠮᠢᠨᠦ᠋ᠲ ᠲᠦ᠍ ᠭᠡᠨᠡᠳᠲᠡ ᠬᠢᠯᠢᠰ ᠬᠠᠰᠬᠢᠷᠤᠨ ᠮᠠᠨᠠᠷᠠᠨ ᠤᠨᠠᠭᠠᠳ ᠵᠣᠬᠢᠶᠠᠯ ᠲᠡᠭᠦᠰᠦᠭᠰᠡᠨ ᠪᠢᠰᠢ ᠬᠠᠷᠢᠨ ᠡᠬᠢᠯᠡᠳᠡᠭ ᠪᠢᠯᠡ᠃ ᠡᠨᠡ ᠨᠢᠭᠡ 《ᠬᠠᠰᠬᠢᠷᠤᠯ》 ᠶᠡᠬᠡ ᠠᠷᠪᠢᠨ ᠬᠥᠮᠦᠨ᠂ ᠦᠢᠯᠡ ᠶᠠᠪᠤᠳᠠᠯ ᠢ᠋ 《ᠬᠠᠰᠬᠢᠷᠤᠨ》 ᠭᠠᠷᠭᠠᠵᠤ᠂ ᠭᠠᠭᠴᠠᠬᠠᠨ ᠬᠠᠤᠯᠢᠴᠢ ᠲᠦᠪᠰᠢᠨ᠂ ᠠᠯᠠᠬᠤ ᠶᠠᠯᠠᠲᠠᠨ ᠪᠣᠯᠤᠷᠴᠠᠭᠠᠨ ᠪᠢᠰᠢ᠂ ᠬᠠᠷᠢᠨ ᠲᠡᠭᠦᠨ ᠦ᠌ ᠠᠷᠤ ᠠ᠋ᠴᠠ ᠡᠦ ᠹᠧᠩ ᠮᠧᠢ᠂ ᠠᠯᠠᠭᠳᠠᠭᠰᠠᠨ ᠬᠥᠮᠦᠨ ᠦᠵᠡᠰᠬᠦᠯᠡᠩ ᠵᠢᠴᠢ ᠸᠠᠩ ᠯᠠᠨ ᠬᠤᠸᠠ᠁ ᠭᠡᠬᠦ ᠮᠡᠲᠦ ᠶ᠋ᠢᠨ ᠬᠥᠮᠦᠰ ᠵᠣᠬᠢᠶᠠᠯ ᠤ᠋ᠨ ᠦᠢᠯᠡ ᠬᠡᠷᠡᠭ ᠲᠦ᠍ ᠬᠣᠯᠪᠣᠨᠲᠠᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ᠂ ᠬᠥᠮᠦᠨ ᠬᠥᠮᠦᠨ ᠦ᠌ ᠬᠣᠭᠣᠷᠣᠨᠳᠣᠬᠢ ᠨᠠᠷᠢᠨ ᠪᠤᠳᠤᠯᠢᠶᠠᠨᠲᠤ ᠬᠠᠷᠢᠴᠠᠭᠠ᠂ ᠵᠥᠷᠢᠴᠡᠯ ᠮᠥᠷᠭᠥᠯᠳᠦᠭᠡᠨ ᠢ᠋ᠶ᠋ᠡᠷ ᠳᠦᠭᠦᠷᠵᠦ᠂ ᠶᠠᠭ ᠦᠨᠡᠨ ᠠᠭᠠᠯᠵᠢᠨ ᠲᠣᠣᠷ ᠰᠢᠭ᠋ ᠢ᠋ᠶ᠋ᠡᠨ ᠰᠦᠯᠵᠢᠯᠳᠦᠨ ᠬᠡᠯᠬᠢᠶᠡᠷᠡᠵᠦ ᠬᠥᠮᠦᠰ ᠤᠬᠠᠭᠠᠨ ᠲᠥᠬᠥᠭᠡ ᠶ᠋ᠢ ᠨᠢ ᠣᠯᠬᠤ ᠦᠭᠡᠢ ᠲᠥᠭᠡᠷᠢᠭᠳᠡᠨ᠂ ᠤᠬᠠᠭᠠᠨ ᠲᠥᠬᠥᠭᠡ ᠶ᠋ᠢ ᠨᠢ ᠣᠯᠬᠤ ᠶ᠋ᠢᠨ ᠲᠥᠯᠥᠭᠡ ᠵᠣᠬᠢᠶᠠᠯ ᠳ᠋ᠤ᠌ ᠬᠥᠲᠥᠯᠦᠭᠳᠡᠨ ᠴᠠᠭᠠᠰᠢ ᠨᠢ ᠪᠠᠷᠠᠲᠠᠯᠠ ᠤᠩᠰᠢᠬᠤ ᠬᠡᠮᠵᠢᠶᠡᠨ ᠳ᠋ᠦ᠍ ᠬᠦᠷᠭᠡᠭᠰᠡᠨ ᠪᠠᠢᠳᠠᠭ᠃ ᠨᠡᠩ ᠢᠯᠠᠩᠭᠤᠶᠠ ᠡᠨᠡ ᠡᠷᠡᠭᠦᠦ ᠶ᠋ᠢᠨ ᠬᠡᠷᠡᠭ ᠨᠢ ᠳᠠᠩ ᠴᠤᠯᠭᠤᠢ ᠡᠷᠡ ᠡᠮᠡ ᠶ᠋ᠢᠨ ᠡᠪ ᠨᠠᠢᠷ ᠡᠪᠳᠡᠷᠡᠵᠦ ᠬᠥᠮᠦᠨ ᠠᠯᠠᠭᠰᠠᠨ ᠬᠡᠷᠡᠭ ᠪᠢᠰᠢ᠂ ᠬᠠᠷᠢᠨ ᠡᠨᠡ ᠬᠡᠷᠡᠭ ᠦ᠋ᠨ ᠴᠠᠭᠠᠨᠠ ᠭᠤᠸᠠᠨ ᠢᠦᠢ ᠱᠠᠨ (ᠡᠨᠡ ᠬᠥᠮᠦᠨ ᠵᠣᠬᠢᠶᠠᠯ ᠤ᠋ᠨ ᠡᠬᠢᠨ ᠳ᠋ᠦ᠍ ᠶᠡᠷᠦ ᠭᠠᠷᠳᠠᠭ ᠦᠭᠡᠢ) ᠭᠡᠬᠦ ᠲᠣᠮᠣ ᠹᠧᠣᠳᠠᠯ᠂ ᠲᠣᠮᠣ ᠢᠯᠵᠠᠷᠠᠮᠠᠯ ᠡᠲᠡᠭᠡᠳ᠂ ᠡᠷᠬᠡ ᠪᠡᠨ ᠠᠰᠢᠭᠯᠠᠵᠤ ᠬᠡᠷᠡᠭ ᠦᠢᠯᠡᠳᠦᠭᠴᠢ᠂ ᠲᠣᠮᠣ ᠯᠤᠢᠪᠠᠷᠴᠢᠨ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠡᠷᠬᠡ ᠪᠡᠨ ᠠᠰᠢᠭᠯᠠᠵᠤ ᠮᠡᠬᠡᠯᠡᠨ ᠮᠥᠯᠵᠢᠵᠦ᠂ ᠡᠮᠡᠰ ᠬᠡᠦᠬᠡᠳ ᠢ᠋ ᠮᠡᠬᠡᠯᠡᠨ ᠨᠠᠭᠠᠳᠴᠤ᠂ ᠡᠴᠦᠰ ᠰᠡᠭᠦᠯ ᠳ᠋ᠡᠭᠡᠨ ᠥᠪᠡᠷ ᠦ᠋ᠨ ᠦᠨᠳᠦᠰᠦ ᠪᠡᠨ ᠵᠠᠯᠭᠠᠮᠵᠢᠯᠠᠬᠤ ᠶ᠋ᠢᠨ ᠲᠤᠰᠠᠳᠠ ᠥᠭᠡᠷᠡ ᠬᠥᠮᠦᠨ ᠦ᠌ ᠭᠡᠳᠡᠰᠦ ᠶ᠋ᠢ ᠵᠢᠭᠡᠯᠡᠵᠦ ᠬᠡᠦᠬᠡᠳ ᠠᠪᠬᠤ ᠶ᠋ᠢᠨ ᠲᠥᠯᠥᠭᠡ ᠡᠮᠦᠨᠡ ᠬᠣᠢᠨᠠ ᠭᠤᠷᠪᠠᠨ ᠬᠥᠮᠦᠨ ᠦ᠌ ᠠᠮᠢᠨ ᠳ᠋ᠤ᠌ ᠬᠦᠷᠦᠭᠰᠡᠨ ᠶᠠᠯᠠᠲᠤ ᠠᠵᠢᠯᠯᠠᠭᠠ ᠶ᠋ᠢ ᠢᠯᠡᠴᠢᠯᠡᠭᠰᠡᠨ ᠪᠥᠭᠡᠳ ᠡᠮᠴᠢ ᠶ᠋ᠢᠨ ᠮᠡᠷᠭᠡᠵᠢᠯ ᠥᠨᠳᠥᠷ ᠪᠣᠯᠪᠠᠴᠤ ᠬᠠᠤᠯᠢ ᠶ᠋ᠢᠨ ᠪᠠᠯᠠᠢ ᠪᠣᠯᠤᠷᠴᠠᠭᠠᠨ᠂ ᠬᠡᠦᠬᠡᠨ ᠪᠡᠶᠡ ᠪᠡᠨ ᠬᠥᠮᠦᠨ ᠢ᠋ᠶ᠋ᠡᠷ ᠪᠤᠵᠠᠷᠯᠠᠭᠤᠯᠵᠤ᠂ ᠬᠥᠮᠦᠨ ᠦ᠌ ᠦᠷᠡ ᠶ᠋ᠢ ᠭᠡᠳᠡᠰᠦᠨ ᠳ᠋ᠡᠭᠡᠨ ᠳᠡᠭᠡᠬᠡᠨ ᠦᠷᠡ ᠬᠡᠦᠬᠡᠳ ᠲᠡᠢ ᠪᠣᠯᠤᠭᠰᠠᠨ ᠪᠣᠯᠪᠠᠴᠤ ᠡᠭᠦᠨ ᠢ᠋ᠶ᠋ᠡᠨ ᠬᠡᠯᠡᠵᠦ ᠪᠠᠰᠠ ᠴᠢᠳᠠᠳᠠᠭ ᠦᠭᠡᠢ᠂ ᠬᠡᠦᠬᠡᠳ ᠢ᠋ᠶ᠋ᠡᠨ ᠭᠠᠷᠤᠭᠰᠠᠨ ᠴᠠᠭ ᠠ᠋ᠴᠠ ᠪᠠᠨ ᠬᠣᠢᠰᠢ ᠦᠵᠡᠵᠦ ᠳᠡᠢᠯᠦᠭᠡ ᠦᠭᠡᠢ ᠦᠭᠡᠨᠴᠡ ᠨᠣᠮᠣᠢ ᠡᠦ ᠹᠧᠩ ᠮᠧᠢ ᠳ᠋ᠦ᠍ ᠬᠢᠯᠢᠰ ᠢ᠋ ᠨᠢ ᠴᠠᠭᠠᠳᠬᠠᠵᠤ ᠥᠭᠭᠦᠭᠰᠡᠨ ᠪᠠᠢᠳᠠᠭ᠃ 《ᠣᠩᠭᠣᠨ ᠬᠠᠢᠯᠠᠰᠤᠨ ᠤ᠋ ᠦᠢᠮᠡᠭᠡᠨ》᠂ 《ᠴᠢᠰᠤ ᠦᠭᠡᠢ ᠰᠣᠷᠪᠢ》 (ᠪᠦᠷ ᠨᠥᠭᠦᠭᠡ ᠲᠡᠭᠦᠪᠦᠷᠢ ᠳ᠋ᠦ᠍) ᠭᠡᠬᠦ ᠲᠤᠭᠤᠵᠢ ᠨᠤᠭᠤᠳ ᠴᠤ᠌ ᠡᠭᠦᠨ ᠳᠦ ᠵᠢᠱ᠌ᠢᠶᠡᠯᠡᠭᠳᠡᠨᠡ᠃ ᠡᠨᠡ ᠪᠣᠯ ᠵᠣᠬᠢᠶᠠᠯᠴᠢ ᠶ᠋ᠢᠨ ᠬᠡᠪ ᠨᠠᠮᠪᠠ ᠶ᠋ᠢᠨ ᠬᠣᠶᠠᠷ᠃
ᠬᠠᠰᠪᠤᠯᠠᠭ ᠮᠠᠨᠢ ᠬᠠᠷᠠ ᠪᠠᠭᠠ ᠠ᠋ᠴᠠ ᠪᠠᠨ ᠠᠮᠢᠳᠤᠷᠠᠯ ᠤ᠋ᠨ ᠦᠢᠯᠡ ᠬᠠᠯᠠ ᠶ᠋ᠢ ᠦᠵᠡᠵᠦ ᠶᠠᠪᠤᠭᠰᠠᠨ ᠪᠠ ᠰᠡᠭᠦᠯ ᠦ᠋ᠨ ᠦᠶᠡ ᠳ᠋ᠦ᠍ ᠬᠠᠤᠯᠢ ᠶ᠋ᠢᠨ ᠠᠵᠢᠯ ᠢ᠋ ᠣᠯᠠᠨ ᠵᠢᠯ ᠬᠢᠵᠦ ᠠᠯᠪᠠᠨ ᠨᠣᠶᠠᠨ ᠠ᠋ᠴᠠ ᠡᠬᠢᠯᠡᠭᠡᠳ᠂ ᠠᠷᠠᠳ ᠢᠷᠭᠡᠳ᠂ ᠰᠢᠷᠡᠭᠡᠨ ᠯᠠᠮᠠ ᠠ᠋ᠴᠠ ᠡᠬᠢᠯᠡᠭᠡᠳ ᠰᠢᠷᠳᠡᠭ ᠦ᠋ᠨ ᠪᠠᠨᠳᠢ ᠬᠦᠷᠲᠡᠯᠡ ᠬᠠᠷᠢᠯᠴᠠᠵᠤ ᠤᠷᠤᠯᠳᠤᠵᠤ ᠪᠠᠢᠭᠰᠠᠨ ᠪᠣᠯᠬᠣᠷ ᠠᠮᠢᠳᠤᠷᠠᠯ ᠢ᠋ᠶ᠋ᠠᠷ ᠡᠯᠪᠡᠭ ᠵᠤᠵᠠᠭᠠᠨ ᠵᠣᠬᠢᠶᠠᠯᠴᠢ ᠪᠢᠯᠡ᠃ ᠡᠨᠡ ᠣᠨᠴᠠᠯᠢᠭ ᠨᠢ ᠲᠡᠭᠦᠨ ᠦ᠌ ᠣᠯᠠᠨ ᠵᠣᠬᠢᠶᠠᠯ ᠳ᠋ᠤ᠌ ᠲᠣᠳᠣᠷᠠᠨ ᠬᠠᠷᠠᠭᠳᠠᠳᠠᠭ ᠪᠥᠭᠡᠳ ᠨᠡᠩ ᠢᠯᠠᠩᠭᠤᠶᠠ ᠲᠡᠭᠦᠨ ᠦ᠌ ᠲᠣᠮᠣᠬᠠᠨ ᠪᠦᠲᠦᠭᠡᠯ ᠪᠣᠯᠬᠤ 《ᠬᠥᠬᠡᠮᠳᠦᠭ ᠬᠤᠷᠠᠬᠤ》 (ᠦᠨᠳᠦᠰᠦᠲᠡᠨ ᠦ᠌ ᠬᠡᠪᠯᠡᠯ ᠦ᠋ᠨ ᠬᠣᠷᠢᠶᠠ ᠬᠡᠪᠯᠡᠭᠦᠯᠪᠡ) ᠭᠡᠬᠦ ᠷᠣᠮᠠᠨ ᠳ᠋ᠤ᠌ ᠨᠡᠩ ᠲᠣᠳᠣᠷᠬᠠᠢ ᠮᠡᠳᠡᠭᠳᠡᠳᠡᠭ ᠪᠢᠯᠡ᠃ ᠲᠤᠰ ᠷᠣᠮᠠᠨ ᠣᠯᠠᠨ ᠵᠢᠯ ᠦ᠋ᠨ ᠤᠴᠢᠷ᠂ ᠣᠯᠠᠨ ᠬᠥᠮᠦᠨ ᠦ᠌ ᠦᠢᠯᠡ ᠶᠠᠪᠤᠳᠠᠯ ᠢ᠋ ᠪᠢᠴᠢᠳᠡᠭ ᠪᠣᠯᠪᠠᠴᠤ ᠵᠣᠬᠢᠶᠠᠯ ᠤ᠋ᠨ ᠪᠠᠭᠠᠲᠤᠷ ᠨᠢ ᠲᠤᠰ ᠲᠤᠰ ᠲᠠᠭᠠᠨ ᠥᠪᠡᠷᠮᠢᠴᠡ ᠣᠨᠴᠠᠯᠢᠭ ᠲᠠᠢ᠂ ᠦᠭᠡ ᠬᠡᠯᠡ ᠲᠡᠢ᠂ ᠠᠭᠠᠰᠢ ᠠᠷᠠᠨᠰᠢᠨ ᠲᠠᠢ ᠪᠠᠢᠳᠠᠭ ᠢ᠋ᠶ᠋ᠠᠷ ᠪᠠᠷᠠᠬᠤ ᠦᠭᠡᠢ᠂ ᠡᠮᠦᠰᠦᠭᠰᠡᠨ ᠵᠡᠭᠦᠭᠰᠡᠨ᠂ ᠡᠳ᠋ᠯᠡᠭᠰᠡᠨ ᠬᠡᠷᠡᠭᠯᠡᠭᠰᠡᠨ᠂ ᠤᠨᠤᠭᠰᠠᠨ ᠬᠥᠲᠥᠯᠦᠭᠰᠡᠨ ᠨᠢ ᠬᠦᠷᠲᠡᠯᠡ ᠣᠭᠲᠣ ᠳᠠᠪᠬᠤᠷᠯᠠᠳᠠᠭ ᠦᠭᠡᠢ ᠮᠥᠷᠲᠡᠭᠡᠨ ᠦᠢᠯᠡ ᠶᠠᠪᠤᠳᠠᠯ ᠨᠢ ᠬᠦᠷᠲᠡᠯᠡ ᠠᠰ ᠠᠰ ᠲᠠᠭᠠᠨ ᠪᠠᠢᠳᠠᠭ᠃ ᠨᠡᠩ ᠦᠨᠡᠯᠡᠭᠦᠰᠢᠲᠡᠢ ᠨᠢ ᠲᠤᠰ ᠷᠣᠮᠠᠨ ᠳ᠋ᠤ᠌ ᠬᠦᠴᠦ ᠪᠡᠷ ᠰᠢᠬᠠᠵᠤ ᠣᠷᠣᠭᠤᠯᠤᠭᠰᠠᠨ ᠦᠢᠯᠡ ᠶᠠᠪᠤᠳᠠᠯ ᠥᠴᠥᠬᠡᠨ ᠴᠤ᠌ ᠮᠡᠳᠡᠭᠳᠡᠳᠡᠭ ᠦᠭᠡᠢ ᠪᠥᠭᠡᠳ ᠬᠠᠷᠢᠨ ᠠᠯᠢᠪᠠ ᠬᠡᠷᠡᠭ ᠨᠢ ᠪᠦᠷ ᠠᠶᠠᠨᠳᠠᠭᠠᠨ ᠪᠣᠯᠤᠭᠰᠠᠨ ᠪᠤᠶᠤ ᠬᠡᠷᠡᠭ ᠦᠭᠡᠢ ᠵᠦᠢᠯ ᠳ᠋ᠦ᠍ ᠠᠯᠢ ᠪᠣᠯᠬᠤ ᠪᠠᠷ ᠪᠢᠷ ᠪᠡᠬᠡ ᠪᠡᠨ ᠬᠠᠷᠠᠮᠨᠠᠭᠰᠠᠨ ᠪᠠᠢᠳᠠᠯ ᠲᠣᠳᠣᠷᠬᠠᠢ ᠬᠠᠷᠠᠭᠳᠠᠵᠤ ᠪᠠᠢᠳᠠᠭ᠃ ᠡᠨᠡ ᠨᠢ ᠲᠡᠭᠦᠨ ᠦ᠌ ᠠᠮᠢᠳᠤᠷᠠᠯ ᠡᠯᠪᠡᠭ ᠢ᠋ ᠬᠠᠷᠠᠭᠤᠯᠵᠤ᠂ ᠤᠩᠰᠢᠭᠴᠢᠳ ᠲᠤ᠌ ᠦᠨᠡᠨᠴᠢ ᠪᠠᠢᠬᠤ ᠶ᠋ᠢᠨ ᠢᠯᠡᠷᠡᠯ ᠪᠠᠢᠵᠠᠢ᠃ ᠪᠢ ᠨᠢᠭᠡ ᠤᠳᠠᠭᠠ ᠵᠣᠬᠢᠶᠠᠯᠴᠢ ᠲᠠᠢ ᠨᠢ ᠲᠡᠭᠦᠨ ᠦ᠌ 《ᠬᠥᠬᠡᠮᠳᠦᠭ ᠬᠤᠷᠠᠬᠤ》 ᠶ᠋ᠢᠨ ᠲᠤᠬᠠᠢ ᠬᠡᠯᠡᠯᠴᠡᠵᠦ ᠪᠠᠢᠭᠠᠳ᠂ ᠢᠰᠢ᠂ ᠴᠢ ᠵᠠᠷᠢᠮ ᠶᠠᠭᠤᠮᠠ ᠶ᠋ᠢ ᠬᠡᠳᠦᠬᠡᠨ ᠦᠭᠡ ᠪᠡᠷ ᠲᠤᠰᠢᠶᠠᠭᠠᠳ ᠵᠣᠭᠰᠣᠴᠢᠬᠠᠯᠠ᠃ ᠲᠡᠭᠦᠨ ᠢ᠋ ᠴᠠᠭᠠᠰᠢ ᠨᠢ ᠳᠡᠯᠭᠡᠷᠡᠭᠦᠯᠦᠭᠰᠡᠨ ᠪᠣᠯ ᠪᠠᠰᠠ ᠴᠤ᠌ ᠰᠠᠢᠬᠠᠨ ᠶᠠᠭᠤᠮᠠ ᠭᠠᠷᠴᠤ ᠢᠷᠡᠬᠦ ᠪᠠᠢᠭᠰᠠᠨ᠃ ᠴᠢᠨᠦ ᠡᠨᠡ 《ᠬᠥᠬᠡᠮᠳᠦᠭ ᠬᠤᠷᠠᠬᠤ》 ᠴᠤ᠌ ᠪᠣᠯ ᠭᠤᠯᠢᠷ ᠨᠢ ᠨᠢᠮᠭᠡᠨ ᠮᠢᠬᠠ ᠴᠠᠳᠬᠤᠯᠠᠩ ᠪᠤᠤᠰᠠ ᠪᠣᠯᠤᠭᠰᠠᠨ ᠶᠤᠮ ᠭᠡᠪᠡᠯ ᠬᠠᠰᠪᠤᠯᠠᠭ ᠮᠠᠨᠢ ᠲᠡᠢᠮᠦ ᠪᠤᠤᠰᠠ ᠠᠮᠲᠠᠲᠠᠢ ᠪᠠᠢᠳᠠᠭ ᠪᠢᠰᠢ ᠤᠤ? ᠭᠡᠰᠡᠨ ᠪᠢᠯᠡ᠃ ᠦᠨᠡᠨ ᠳ᠋ᠡᠭᠡᠨ ᠡᠨᠡ ᠪᠣᠯ ᠲᠡᠭᠦᠨ ᠦ᠌ ᠥᠪᠡᠷᠮᠢᠴᠡ ᠬᠡᠪ ᠨᠠᠮᠪᠠ ᠶ᠋ᠢᠨ ᠭᠤᠷᠪᠠᠳᠤᠭᠠᠷ ᠪᠤᠶᠤ᠃
ᠵᠣᠬᠢᠶᠠᠯᠴᠢ ᠬᠠᠰᠪᠤᠯᠠᠭ ᠭᠤᠸᠠᠢ ᠮᠠᠨᠢ ᠡᠨᠡ ᠣᠯᠠᠨ ᠵᠣᠬᠢᠶᠠᠯ ᠢ᠋ᠶ᠋ᠠᠨ ᠲᠡᠭᠦᠪᠦᠷᠢᠯᠡᠵᠦ ᠬᠡᠪᠯᠡᠭᠦᠯᠵᠦ ᠪᠠᠢᠬᠤ ᠶᠡᠬᠡ ᠶᠠᠭᠠᠷᠠᠭᠠᠨ ᠤ᠋ ᠪᠠᠨ ᠳᠤᠮᠳᠠ ᠪᠠᠰᠠ ᠨᠢᠭᠡ ᠷᠣᠮᠠᠨ ᠲᠤᠭᠤᠷᠪᠢᠨ ᠪᠢᠴᠢᠭᠡᠳ ᠪᠠᠷᠤᠭ ᠭᠠᠷ ᠠ᠋ᠴᠠ ᠰᠠᠯᠤᠮᠠᠷ ᠪᠠᠢᠭᠠ ᠶ᠋ᠢ ᠪᠢ ᠰᠤᠷᠪᠤᠯᠵᠢᠯᠠᠨ ᠮᠡᠳᠡᠭᠰᠡᠨ ᠪᠥᠭᠡᠳ ᠡᠨᠡ ᠷᠣᠮᠠᠨ ᠡᠷᠲᠡᠬᠡᠨ ᠭᠠᠷᠴᠤ ᠢᠷᠡᠨ᠂ ᠨᠠᠮᠠᠶ᠋ᠢ ᠪᠠᠭᠲᠠᠭᠠᠭᠰᠠᠨ ᠣᠯᠠᠨ ᠤᠩᠰᠢᠭᠴᠢᠳ ᠲᠤ᠌ ᠬᠦᠷᠲᠡᠭᠡᠯ ᠪᠣᠯᠬᠤ ᠶ᠋ᠢ ᠪᠡᠯᠭᠡᠳᠡᠨ ᠪᠢᠷ ᠢ᠋ᠶ᠋ᠡᠨ ᠴᠢᠯᠡᠭᠡᠵᠦ ᠪᠠᠢᠨᠠ᠃ ᠮᠠᠨ ᠤ᠋ ᠦᠢᠯᠡᠰ ᠭᠢᠯᠠᠯᠵᠠᠬᠤ ᠪᠣᠯᠲᠤᠭᠠᠢ!
ᠣᠩᠰᠢᠭᠰᠠᠨ ᠨᠢ᠄ ᠴᠡᠴᠡᠭᠮᠡ