ᠪᠠᠲᠤ ᠬᠠᠭᠠᠨ 5-02ᠷᠶᠡᠽᠡᠨ ᠦ᠌ ᠬᠡᠷᠡᠮ ᠦ᠋ᠨ ᠳᠡᠭᠡᠷᠡ-ᠷᠶᠠᠽᠠᠨ ᠤ᠋ ᠭᠠᠵᠠᠷ ᠨᠤᠲᠤᠭ ᠰᠢᠲᠠᠵᠤ ᠪᠠᠢᠨᠠBat khaan Бат хаан-ᠷᠣᠮᠠᠨ
17ᠬᠣᠶᠠᠷ ᠷᠶᠡᠽᠡᠨ ᠦ᠌ ᠬᠡᠷᠡᠮ ᠦ᠋ᠨ ᠳᠡᠭᠡᠷᠡ
ᠨᠠᠢᠳᠠᠪᠤᠷᠢ ᠪᠣᠯ ᠲᠠᠢᠪᠤᠩ ᠴᠠᠭ ᠲᠸ᠋ ᠢᠷᠡᠳᠡᠭ ᠦᠭᠡᠢ᠂
ᠲᠡᠢᠨ ᠲᠡᠢ ᠴᠠᠭ ᠲᠸ᠋ ᠢᠷᠡᠳᠡᠭ ᠶᠤᠮ᠃
(ᠡᠷᠲᠡᠨ ᠦ᠌ ᠡᠮᠭᠡᠨᠢᠯᠲᠦ ᠵᠦᠴᠦᠭᠡ ᠡᠴᠡ)
ᠤᠺᠠ ᠮᠥᠷᠡᠨ ᠦ᠌ ᠴᠠᠪᠴᠢᠮᠠ ᠥᠨᠳᠥᠷ ᠡᠷᠭᠢᠨ ᠳᠡᠭᠡᠷᠡ ᠣᠷᠣᠰᠢᠬᠤ ᠷᠶᠡᠽᠡᠨ ᠬᠣᠲᠠ ᠢᠯᠠᠭᠳᠠᠰᠢ ᠦᠭᠡᠢ ᠦᠵᠡᠭᠳᠡᠨᠡ᠃ ᠲᠡᠭᠦᠨ ᠦ᠌ ᠰᠢᠪᠠᠷ ᠲᠤᠭᠤᠷᠭᠠ ᠨᠢ ᠲᠣᠮ ᠮᠣᠳᠣ ᠪᠠᠷ ᠬᠢᠭᠰᠡᠨ ᠱᠣᠩ ᠢ᠋ᠶ᠋ᠠᠷ ᠬᠦᠷᠢᠶᠡᠯᠡᠭᠳᠡᠭᠰᠡᠨ ᠠᠵᠢ᠃ ᠥᠨᠳᠥᠷ ᠲᠤᠭᠤᠷᠭᠠ ᠨᠤᠭᠤᠳ ᠤ᠋ᠨ ᠲᠠᠰᠢᠭᠤ ᠬᠠᠵᠠᠭᠤ᠂ ᠮᠥᠰᠥ ᠪᠡᠷ ᠪᠦᠷᠬᠦᠭᠳᠡᠭᠰᠡᠨ ᠲᠤᠯᠠ ᠳᠡᠭᠡᠭᠰᠢ ᠭᠠᠷᠬᠤ ᠳ᠋ᠤ᠌ ᠶᠠᠮᠠᠷ ᠴᠤ᠌ ᠪᠣᠯᠤᠯᠴᠠᠭᠠ ᠦᠭᠡᠢ ᠪᠠᠢᠯᠠ᠃ ᠬᠣᠲᠠ ᠶ᠋ᠢᠨ ᠪᠦᠬᠦ ᠠᠷᠠᠳ ᠢᠷᠭᠡᠳ ᠪᠠ ᠣᠢᠷᠠ ᠬᠠᠪᠢ ᠶ᠋ᠢᠨ ᠲᠣᠰᠬᠣᠨ ᠤ᠋ ᠢᠷᠭᠡᠳ ᠥᠪᠡᠷ ᠦ᠋ᠨ ᠷᠶᠡᠽᠡᠨ ᠢ᠋ ᠬᠠᠮᠠᠭᠠᠯᠠᠬᠤ ᠪᠠᠷ ᠴᠤᠭᠯᠠᠷᠠᠵᠠᠭᠠᠪᠠ᠃ ᠡᠳᠡᠭᠡᠷ ᠪᠠᠢᠯᠳᠤᠭᠴᠢ ᠨᠠᠷ ᠡᠷᠲᠡ ᠴᠠᠭ ᠲᠤ᠌ ᠲᠠᠯᠠ ᠭᠠᠵᠠᠷ ᠠ᠋ᠴᠠ ᠢᠷᠡᠭᠰᠡᠨ ᠫᠣᠯᠣᠸᠧᠼᠠ ᠤ᠋ᠳ ᠪᠠ ᠥᠪᠡᠷ ᠢ᠋ᠶ᠋ᠡᠨ ᠣᠷᠣᠰ ᠠᠬᠠ ᠳᠡᠭᠦᠦ ᠨᠠᠷ ᠢ᠋ ᠳᠡᠭᠡᠷᠡᠮᠳᠡᠵᠦ ᠪᠠᠢᠭᠰᠠᠨ ᠨᠢᠩᠵᠢᠨ ᠰᠡᠳᠬᠢᠯ ᠦᠭᠡᠢ ᠰᠦᠽᠳᠡᠯᠢᠴᠢᠳ ᠨᠠᠷ ᠲᠤᠰ ᠬᠣᠲᠠ ᠶ᠋ᠢ ᠬᠡᠷᠬᠢᠨ ᠪᠦᠰᠡᠯᠡᠵᠦ ᠪᠠᠢᠭᠰᠠᠨ ᠲᠤᠬᠠᠢ ᠲᠡᠦᠬᠡᠲᠦ ᠳᠣᠮᠣᠭ ᠦᠯᠢᠭᠡᠷ ᠦ᠋ᠳ ᠨᠡᠯᠢᠶᠡᠳ ᠢ᠋ ᠳᠤᠷᠠᠰᠤᠨ ᠶᠠᠷᠢᠵᠠᠭᠠᠵᠤ ᠪᠠᠢᠪᠠ᠃ ᠳᠡᠭᠡᠷᠡ ᠡᠴᠡ ᠨᠢ ᠬᠠᠯᠠᠭᠤᠨ ᠤᠰᠤ ᠪᠠ ᠪᠤᠴᠠᠯᠠᠮᠠᠭᠠᠢ ᠬᠠᠯᠠᠭᠤᠨ ᠳᠠᠪᠠᠷᠬᠠᠢ ᠠᠰᠬᠠᠷᠠᠵᠤ ᠪᠠᠢᠭᠠ ᠡᠨᠡ ᠡᠭᠴᠡ ᠬᠠᠨᠠ ᠨᠤᠭᠤᠳ ᠢ᠋ ᠢᠯᠠᠵᠤ ᠳᠠᠪᠠᠬᠤ ᠨᠢ ᠬᠢᠯᠪᠠᠷᠬᠠᠨ ᠬᠡᠷᠡᠭ ᠪᠢᠰᠢ ᠪᠠᠢᠪᠠ᠃ ᠳᠠᠢᠰᠤᠨ ᠲᠠᠢ ᠭᠠᠭᠴᠠᠬᠠᠨ ᠨᠢᠭᠲᠠᠷᠠᠭᠰᠠᠨ ᠬᠦᠴᠦ ᠪᠡᠷ ᠠᠭᠤᠯᠵᠠᠬᠤ ᠬᠡᠷᠡᠭᠲᠡᠢ ᠪᠣᠯᠵᠠᠢ᠃
ᠵᠠᠩᠭᠢ᠂ ᠵᠡᠢᠰᠡᠭ ᠦ᠋ᠳ ᠰᠠᠢᠨ ᠳᠤᠷᠠ ᠶ᠋ᠢᠨ ᠴᠡᠷᠢᠭ ᠦ᠋ᠳ ᠢ᠋ ᠳᠠᠭᠤᠳᠠᠨ ᠴᠤᠭᠯᠠᠭᠤᠯᠬᠤ ᠶ᠋ᠢ ᠵᠣᠭᠰᠣᠭᠰᠠᠨ ᠪᠠᠢᠨᠠ᠃ ᠤᠴᠢᠷ ᠨᠢ ᠬᠣᠲᠠ ᠶ᠋ᠢᠨ ᠭᠤᠳᠤᠮᠵᠢ ᠬᠣᠷᠢᠶᠠ ᠪᠦᠷᠢ ᠳ᠋ᠦ᠍ ᠰᠠᠢᠨ ᠳᠤᠷᠠ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠠᠩᠭᠢ ᠨᠤᠭᠤᠳ ᠪᠣᠢ ᠪᠣᠯᠵᠤ᠂ ᠬᠥᠮᠦᠨ ᠪᠦᠷᠢ ᠴᠡᠷᠢᠭ ᠲᠦ᠍ ᠢᠷᠡᠬᠦ ᠳ᠋ᠡᠭᠡᠨ ᠰᠡᠯᠡᠮᠡ ᠢᠯᠳᠦ ᠵᠢᠳᠠ ᠪᠤᠶᠤ ᠡᠰᠡᠪᠡᠯ ᠬᠠᠲᠠᠭᠤ ᠨᠤᠮᠤ ᠰᠤᠮᠤ ᠶ᠋ᠢ ᠥᠪᠡᠷ ᠢ᠋ᠶ᠋ᠡᠨ ᠠᠪᠴᠢᠷᠠᠳᠠᠭ ᠪᠣᠯᠤᠯᠠ᠃ ᠡᠳᠦᠷ ᠰᠥᠨᠢ ᠶ᠋ᠢᠨ ᠴᠠᠭ ᠲᠤ᠌ ᠠᠯᠤᠬᠠ ᠳᠥᠰᠢ ᠶ᠋ᠢᠨ ᠳᠠᠭᠤ ᠲᠠᠰᠤᠷᠠᠯ ᠦᠭᠡᠢ᠃ ᠲᠡᠮᠦᠷᠴᠢᠳ ᠬᠥᠭᠡᠷᠭᠡ ᠶ᠋ᠢᠨ ᠭᠠᠯ ᠳ᠋ᠤ᠌ ᠲᠡᠮᠦᠷ ᠢ᠋ ᠤᠯᠠᠢᠰᠬᠠᠵᠤ ᠡᠷᠬᠢᠮ ᠰᠠᠢᠨ ᠭᠠᠩ ᠪᠣᠯᠣᠳ ᠰᠡᠯᠡᠮᠡ ᠨᠤᠭᠦᠳ ᠢ᠋ ᠳᠠᠪᠲᠠᠵᠤ ᠦᠢᠯᠡᠳᠪᠦᠷᠢᠯᠡᠨ ᠭᠠᠷᠭᠠᠵᠤ ᠪᠠᠢᠵᠠᠢ᠃ ᠴᠢᠳᠠᠪᠤᠷᠢ ᠪᠦᠬᠦᠢ ᠭᠠᠷ ᠤ᠋ᠨ ᠳᠠᠷᠬᠠᠴᠤᠳ ᠬᠤᠶᠠᠭ ᠳᠤᠭᠤᠯᠠᠭᠠ᠂ ᠰᠤᠮᠤ ᠵᠡᠪᠡ᠂ ᠪᠠᠮᠪᠠᠢ ᠵᠡᠷᠭᠡ ᠶ᠋ᠢ ᠪᠡᠯᠡᠳᠬᠡᠵᠦ ᠪᠠᠢᠵᠠᠢ᠃ ᠤᠳᠠᠭᠠᠨ ᠬᠤᠭᠤᠴᠠᠭᠠᠨ ᠤ᠋ ᠬᠡᠴᠡᠭᠦᠦ ᠪᠡᠷᠬᠡ ᠪᠦᠰᠡᠯᠡᠯᠲᠡ ᠳ᠋ᠦ᠍ ᠴᠥᠮ ᠪᠡᠯᠡᠳᠬᠡᠵᠦ ᠪᠠᠢᠯᠠ᠃ ᠬᠣᠲᠠ ᠶ᠋ᠢᠨ ᠬᠡᠷᠡᠮ ᠦ᠋ᠨ ᠳᠡᠭᠡᠷᠡ ᠰᠡᠸᠸᠯᠢ ᠳ᠋ᠢᠺᠦᠷᠦᠰ ᠦ᠋ᠨ ᠬᠠᠮᠠᠭᠠᠯᠠᠬᠤ ᠪᠠᠢᠷᠢ ᠶ᠋ᠢ ᠲᠣᠳᠣᠷᠬᠠᠢᠯᠠᠨ ᠲᠤᠰᠢᠶᠠᠵᠠᠢ᠃ ᠭᠣᠣᠯ ᠤ᠋ᠨ ᠡᠭᠴᠡ ᠡᠷᠭᠢ ᠶ᠋ᠢᠨ ᠴᠢᠭ ᠳᠠᠷᠤᠭᠠ ᠨᠢ ᠰᠡᠸᠸᠯᠢ ᠶ᠋ᠢ ᠲᠠᠪᠢᠨ ᠴᠡᠷᠢᠭ ᠦ᠋ᠨ ᠳᠠᠷᠤᠭᠠ ᠪᠠᠷ ᠲᠣᠮᠢᠯᠠᠵᠠᠢ᠃ ᠲᠡᠷᠡ᠂ ᠴᠠᠭ ᠢ᠋ ᠳᠡᠮᠡᠢ ᠥᠩᠭᠡᠷᠡᠭᠦᠯᠦᠭᠰᠡᠨ ᠦᠭᠡᠢ᠂ ᠴᠡᠷᠢᠭ ᠪᠦᠷᠢ ᠶ᠋ᠢᠨ ᠳᠡᠷᠭᠡᠳᠡ ᠲᠣᠮᠣ ᠲᠣᠮᠣ ᠴᠢᠯᠠᠭᠤ ᠣᠪᠣᠭᠠᠯᠠᠵᠤ ᠪᠡᠯᠡᠳᠬᠡᠨ ᠬᠠᠷᠪᠤᠭᠴᠢ ᠨᠠᠷ ᠢ᠋ ᠴᠤᠭᠯᠠᠭᠤᠯᠬᠤ ᠵᠡᠷᠭᠡ ᠠᠷᠭᠠ ᠬᠡᠮᠵᠢᠶᠡ ᠠᠪᠤᠯᠠ᠃ ᠪᠤᠰᠤᠳ ᠤ᠋ᠨ ᠬᠠᠮᠲᠤ ᠪᠠᠷ ᠭᠠᠵᠠᠷ ᠤᠬᠤᠵᠤ᠂ ᠲᠡᠭᠷᠢ ᠮᠠᠭᠤᠬᠠᠢ ᠡᠳᠦᠷ ᠪᠣᠯ ᠣᠷᠣᠬᠤ ᠨᠦᠬᠡᠨ ᠪᠠᠢᠷᠢ ᠶ᠋ᠢ ᠵᠠᠰᠠᠭᠠᠳ ᠬᠥᠮᠦᠨ ᠲᠣᠮᠣ ᠢᠯᠳᠦ ᠪᠠ ᠵᠢᠳᠠ ᠪᠣᠷᠣᠣᠬᠠᠢ ᠶ᠋ᠢ ᠣᠯᠵᠤ ᠠᠪᠴᠠᠢ᠃
ᠨᠣᠸᠣᠭᠤᠷᠤᠳ᠋ ᠤ᠋ᠨ ᠢᠷᠭᠡᠨ ᠵᠢᠸᠢᠯᠢ ᠶᠥ᠋ᠷᠶᠡᠲ᠋ᠢᠴᠡ ᠶ᠋ᠢᠨ ᠳᠡᠯᠭᠡᠭᠦᠷ ᠲᠡᠳᠦᠢ ᠯᠡ ᠬᠣᠯᠠ ᠦᠭᠡᠢ ᠪᠠᠢᠬᠤ ᠪᠥᠭᠡᠳ ᠲᠡᠨᠳᠡ ᠵᠥᠭᠡᠬᠡᠢ᠂ ᠲᠣᠰᠣ᠂ ᠳᠠᠪᠤᠰᠤ᠂ ᠲᠠᠯᠬᠠ ᠪᠣᠯᠤᠨ ᠪᠤᠰᠤᠳ ᠪᠠᠷᠠᠭᠠ ᠬᠠᠳᠠᠭᠠᠯᠠᠭᠳᠠᠵᠤ ᠪᠠᠢᠳᠠᠭ ᠠᠵᠢ᠃
ᠰᠡᠸᠸᠯᠢ ᠲᠡᠷᠡ ᠬᠤᠳᠠᠯᠳᠤᠭᠠᠴᠢᠨ ᠤ᠋ ᠭᠡᠷ ᠲᠦ᠍ ᠣᠴᠢᠵᠤ ᠰᠢᠷᠦᠭᠦᠨ ᠢ᠋ᠶ᠋ᠡᠷ ᠠᠰᠠᠭᠤᠪᠠ᠃
— ᠴᠢ ᠵᠢᠸᠢᠯᠢ ᠶᠥ᠋ᠷᠶᠡᠲ᠋ᠢᠴᠡ ᠳᠤᠯᠠᠭᠠᠬᠠᠨ ᠬᠡᠪᠲᠡᠷᠢ ᠳ᠋ᠡᠭᠡᠨ ᠬᠠᠯᠠᠭᠤᠴᠠᠵᠤ ᠬᠡᠪᠲᠡᠨᠡ ᠤᠤ? ᠶᠠᠭᠠᠬᠢᠭᠠᠳ ᠮᠠᠨ ᠤ᠋ ᠬᠡᠷᠡᠮ ᠦ᠋ᠨ ᠳᠡᠭᠡᠷᠡ ᠣᠴᠢᠵᠤ ᠦᠵᠡᠭᠰᠡᠨ ᠦᠭᠡᠢ ᠪᠣᠢ? ᠪᠢᠳᠡ ᠡᠳᠦᠷ ᠰᠥᠨᠢ ᠦᠭᠡᠢ ᠲᠡᠭᠷᠢ ᠪᠣᠷᠣᠭᠠᠨ ᠲᠠᠢ ᠴᠤ᠌ ᠪᠣᠯᠪᠠ᠂ᠬᠦᠢᠲᠡᠨ ᠳ᠋ᠦ᠍ ᠴᠦ᠍ ᠬᠦᠷᠦᠵᠦ᠂ ᠬᠠᠯᠠᠭᠤᠨ ᠳ᠋ᠤ᠌ ᠴᠤ᠌ ᠬᠠᠯᠠᠵᠤ ᠦᠷᠭᠦᠯᠵᠢ ᠮᠠᠨᠠᠭᠠᠨ ᠳ᠋ᠤ᠌ ᠵᠣᠭᠰᠣᠵᠤ ᠪᠠᠢᠨᠠ᠃ ᠭᠡᠳᠡᠰᠦ ᠳᠣᠲᠣᠷᠠ ᠪᠠᠨ ᠬᠢᠭᠰᠡᠨ ᠬᠠᠯᠠᠭᠤᠨ ᠬᠣᠭᠣᠯᠠ ᠴᠤ᠌ ᠦᠭᠡᠢ ᠬᠠᠯᠠᠭᠤᠨ ᠪᠦᠯᠢᠶᠡᠨ ᠤᠮᠳᠠ ᠴᠦ᠍ ᠠᠮᠰᠠᠯ ᠦᠭᠡᠢ ᠪᠠᠢᠵᠠᠭᠠᠨᠠ᠃ ᠴᠢ ᠪᠢᠳᠡᠨᠡᠷ ᠲᠦ᠍ ᠬᠡᠷᠬᠢᠨ ᠲᠤᠰᠠᠯᠠᠨᠠ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ ᠪᠣᠢ? ᠭᠡᠵᠦ ᠠᠰᠠᠭᠤᠭᠰᠠᠨ ᠳ᠋ᠤ᠌ ᠣᠷᠣᠯᠭᠠ ᠶᠡᠬᠡᠲᠡᠢ᠂ ᠥᠨᠳᠥᠷ ᠪᠡᠶᠡᠲᠡᠢ᠂ ᠦᠨᠡᠭᠡᠨ ᠳᠡᠪᠡᠯ ᠲᠡᠢ ᠲᠡᠷᠡ ᠬᠤᠳᠠᠯᠳᠤᠭᠠᠴᠢᠨ ᠳᠠᠯᠤ ᠮᠥᠷᠥ ᠪᠡᠨ ᠬᠠᠪᠴᠢᠵᠤ ᠤᠢᠳᠬᠠᠷ ᠲᠠᠢ ᠨᠠᠮᠤᠭᠤᠬᠠᠨ ᠳᠠᠭᠤ ᠪᠠᠷ᠄
— ᠪᠢ ᠴᠦ᠍ ᠡᠨᠳᠡᠬᠢ ᠶ᠋ᠢᠨ ᠬᠥᠮᠦᠨ ᠪᠢᠰᠢ ᠰᠢᠦ ᠳ᠋ᠠ᠃ ᠪᠢ ᠨᠤᠸᠣᠭᠣᠷᠣᠳ᠋ ᠤ᠋ᠨ ᠬᠥᠮᠦᠨ᠂ ᠶᠡᠷᠦ ᠳᠠᠪᠠᠷᠬᠠᠢ ᠲᠠᠢ ᠭᠠᠩ ᠤ᠋ᠳ ᠢ᠋ ᠥᠩᠬᠥᠷᠢᠭᠦᠯᠵᠦ ᠪᠠᠢᠭᠠᠳ ᠬᠦᠢᠰᠦ ᠪᠡᠨ ᠭᠡᠮᠲᠦᠭᠡᠭᠰᠡᠨ ᠮᠢᠨᠢ ᠣᠳᠣ ᠴᠤ᠌ ᠳᠣᠲᠣᠷᠠ ᠮᠢᠨᠢ ᠬᠣᠷᠣᠰᠴᠤ ᠪᠠᠢᠨᠠ᠃ ᠪᠢ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠵᠠᠷᠤᠴᠠ ᠵᠠᠯᠠᠭᠤᠰ ᠢ᠋ ᠬᠡᠷᠡᠮ ᠦ᠋ᠨ ᠳᠡᠭᠡᠷᠡ ᠶᠠᠪᠤᠭᠤᠯᠪᠠᠯ ᠳᠡᠭᠡᠷᠡ ᠪᠢᠵᠡ᠂ ᠭᠠᠭᠴᠠᠬᠠᠨ ᠠᠵᠢᠯ ᠲᠥᠷᠥᠯ ᠢ᠋ᠶ᠋ᠡᠨ ᠨᠢᠭᠡ ᠲᠡᠰᠢ ᠪᠣᠯᠭᠠᠭᠠᠳ ᠶᠠᠪᠤᠭᠤᠯᠤᠶᠠ᠃ ᠪᠢ ᠴᠡᠷᠢᠭ ᠦ᠋ᠨ ᠬᠡᠷᠡᠭᠴᠡᠭᠡᠨ ᠳ᠋ᠦ᠍ ᠵᠣᠷᠢᠭᠤᠯᠵᠤ ᠠᠷᠪᠠᠨ ᠵᠠᠪᠢ ᠲᠠᠷᠢᠶᠠ ᠶ᠋ᠢ ᠸᠠᠩ ᠶᠦᠷᠢ ᠢᠩᠭ᠌ᠸᠡᠷᠸᠸᠢᠴ ᠲᠦ᠍ ᠪᠡᠯᠡᠭᠯᠡᠭᠰᠡᠨ ᠪᠢᠯᠡ᠃ ᠣᠳᠣ ᠲᠠᠨᠠᠷ ᠢ᠋ ᠴᠦ᠍ ᠬᠣᠭᠣᠯᠠ ᠪᠠᠷ ᠬᠠᠩᠭᠠᠶᠠ᠃ ᠭᠡᠳᠡᠰᠦ ᠳᠣᠲᠣᠷ ᠢ᠋ᠶ᠋ᠠᠷ ᠬᠢᠭᠰᠡᠨ ᠬᠣᠭᠣᠯᠠ ᠨᠢᠭᠡ ᠬᠤᠪᠢᠩ ᠪᠠ ᠮᠥᠨ ᠠᠭᠰᠢᠭᠠᠭᠰᠠᠨ ᠪᠤᠳᠠᠭᠠ ᠨᠢᠭᠡ ᠬᠤᠪᠢᠩ ᠢ᠋ ᠴᠢᠨᠦ ᠴᠡᠷᠢᠭ ᠦ᠋ᠳ ᠲᠦ᠍ ᠡᠳᠦᠷ ᠪᠦᠷᠢ ᠥᠭᠴᠦ ᠪᠠᠢᠬᠤ ᠶ᠋ᠢ ᠥᠪᠡᠷ ᠦ᠋ᠨ ᠲᠣᠭᠣᠭᠠᠴᠢ ᠨᠠᠷ ᠲᠸ᠋ ᠡᠨᠡ ᠡᠳᠦᠷ ᠦ᠋ᠨ ᠳᠣᠲᠣᠷᠠ ᠲᠤᠰᠢᠶᠠᠶᠠ᠃ ᠠᠪᠤᠷᠠᠭᠴᠢ ᠲᠩᠷᠢ ᠮᠢᠨᠢ ᠨᠢᠭᠦᠯ ᠬᠢᠯᠢᠩᠴᠢᠳ ᠢ᠋ ᠮᠢᠨᠢ ᠥᠷᠥᠰᠢᠶᠡᠵᠦ ᠠᠭᠤᠴᠢᠯᠠᠬᠤ ᠪᠣᠯᠪᠠ ᠤᠤ? ᠭᠡᠵᠡᠢ᠃
ᠰᠡᠸᠸᠯᠢ ᠦᠰᠦᠲᠡᠢ ᠳᠡᠪᠡᠯ ᠳ᠋ᠡᠭᠡᠨ ᠣᠷᠣᠵᠤ ᠬᠡᠷᠡᠮ ᠤ᠋ᠨ ᠳᠡᠭᠡᠷᠡ ᠬᠣᠨᠣᠳᠠᠭ ᠪᠣᠯᠪᠠᠴᠤ ᠵᠢᠷᠦᠬᠡ ᠨᠢ ᠦᠷᠭᠦᠯᠵᠢ ᠲᠦᠭᠰᠢᠭᠦᠷᠢᠲᠡᠢ ᠪᠠᠢᠬᠤ ᠲᠤᠯᠠ ᠶᠡᠷᠦ ᠤᠨᠲᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠢᠯᠡ᠃ ᠰᠥᠨᠢ ᠳ᠋ᠡᠭᠡᠨ ᠣᠯᠠᠨ ᠪᠣᠰᠴᠤ ᠴᠢᠬᠢ ᠪᠡᠨ ᠲᠠᠯᠪᠢᠵᠤ ᠴᠢᠩᠨᠠᠬᠤ ᠪᠤᠶᠤ ᠲᠠᠲ᠋ᠠᠷ ᠤ᠋ᠨ ᠭᠠᠯ ᠦᠵᠡᠭᠳᠡᠬᠦ ᠡᠰᠡᠬᠦ ᠶ᠋ᠢ ᠬᠠᠷᠠᠵᠤ ᠠᠭᠤᠷ ᠮᠠᠨᠠᠨ ᠲᠠᠲᠠᠭᠰᠠᠨ ᠬᠣᠯᠠ ᠲᠠᠯᠠ ᠶ᠋ᠢ ᠰᠢᠷᠳᠡᠨ ᠰᠠᠭᠤᠳᠠᠭ ᠪᠠᠢᠵᠠᠢ᠃ ᠥᠷᠯᠥᠭᠡ ᠨᠢ ᠪᠠᠭᠠ ᠰᠢᠭ᠋ ᠪᠡᠶᠡᠲᠡᠢ ᠠᠯᠠᠭ ᠮᠣᠷᠢᠳ ᠤᠨᠤᠵᠤ ᠤᠯᠠᠭᠠᠨ ᠡᠮᠵᠢᠶᠡᠷᠢ ᠲᠡᠢ ᠬᠣᠪᠴᠠᠰᠤᠲᠠᠢ᠂ ᠦᠰᠦᠲᠡᠢ ᠡᠩᠭᠡᠷᠲᠡᠢ ᠥᠩᠭᠡ ᠶ᠋ᠢᠨ ᠬᠠᠨᠲᠠᠭᠠᠵᠠ ᠨᠥᠮᠥᠷᠦᠭᠰᠡᠨ ᠬᠣᠶᠠᠷ ᠺᠢᠫᠴᠠᠺ ᠢᠷᠡᠭᠡᠳ᠄
— ᠰᠡᠸᠸᠯᠢ ᠴᠢ ᠨᠠᠮᠠᠶ᠋ᠢ ᠲᠠᠨᠢᠬᠤ ᠦᠭᠡᠢ ᠴᠢᠷᠠᠢ ᠭᠠᠷᠭᠠᠵᠤ ᠪᠠᠢᠨᠠ ᠤᠤ? ᠭᠡᠵᠦ ᠨᠢᠭᠡ ᠨᠢ ᠳᠠᠭᠤᠳᠠᠬᠤ ᠳ᠋ᠤ᠌
— ᠺᠥ᠋ᠳ᠋ᠷᠶᠡᠱ ᠤᠤ? ᠴᠢ ᠶᠠᠭᠠᠬᠢᠵᠤ ᠲᠡᠢᠨᠬᠦ ᠬᠠᠴᠢᠨ ᠬᠤᠪᠴᠠᠰᠤᠯᠠᠭᠰᠠᠨ ᠪᠢᠯᠡ?
— ᠸᠠᠩ ᠹᠸᠤᠲᠣᠷ ᠤ᠋ᠨ ᠬᠡᠭᠦᠷ ᠢ᠋ ᠣᠯᠵᠤ ᠢᠷᠡᠭᠲᠦᠨ ᠭᠡᠵᠦ ᠳᠠᠷᠤᠭᠠ ᠠ᠋ᠴᠠ ᠲᠤᠰᠢᠶᠠᠭᠰᠠᠨ ᠤᠴᠢᠷ ᠨᠤᠲᠤᠭ ᠤ᠋ᠨ ᠨᠢᠭᠡ ᠺᠢᠫᠴᠠᠺ ᠲᠠᠢ ᠬᠠᠮᠲᠤ ᠪᠠᠷ ᠵᠡᠷᠯᠢᠭ ᠲᠠᠯᠠ ᠬᠦᠷᠬᠦ ᠪᠡᠷ ᠪᠣᠯᠤᠭᠠᠳ ᠪᠠᠢᠨᠠ᠃ ᠪᠢᠳᠡ ᠳ᠋ᠣᠷᠤᠨᠧᠵ ᠮᠥᠷᠡᠨ ᠢ᠋ ᠬᠦᠷᠲᠡᠯᠡ ᠶᠠᠪᠤᠵᠤ ᠪᠠᠲᠤ ᠬᠠᠭᠠᠨ ᠤ᠋ ᠪᠠᠭᠤᠳᠠᠯᠯᠠᠨ ᠪᠠᠢᠭᠰᠠᠨ ᠭᠠᠵᠠᠷ ᠣᠴᠢᠨᠠ᠃ ᠣᠳᠣ ᠲᠡᠨᠳᠡ ᠲᠠᠲ᠋ᠠᠷ ᠤ᠋ᠳ ᠪᠠᠢᠬᠤ ᠦᠭᠡᠢ᠂ ᠭᠠᠭᠴᠠᠬᠠᠨ ᠬᠡᠭᠡᠷᠡ ᠶ᠋ᠢᠨ ᠵᠢᠬᠡᠭᠦᠨ ᠰᠠᠯᠬᠢ ᠬᠡᠢᠰᠴᠦ ᠴᠢᠨᠣᠠ ᠨᠤᠭᠤᠳ ᠬᠡᠰᠦᠭᠦᠴᠢᠯᠡᠵᠦ ᠪᠠᠢᠭᠠ᠃ ᠪᠢᠳᠡ ᠬᠣᠶᠠᠷ᠂ ᠬᠥᠮᠦᠨ ᠠᠮᠢᠲᠠᠨ ᠶᠠᠪᠤᠳᠠᠭ ᠦᠭᠡᠢ ᠵᠠᠮ ᠲᠣᠭᠣᠷᠢᠭᠤ ᠪᠠᠷ (ᠲᠣᠭᠣᠷᠢᠭᠤ ᠵᠠᠮ ᠢ᠋ᠶ᠋ᠠᠷ)ᠶᠠᠪᠤᠵᠤ ᠬᠡᠭᠦᠷ ᠢ᠋ ᠽᠡᠷᠡᠢᠰᠺ ᠲᠦ᠍ ᠬᠦᠷᠭᠡᠵᠦ ᠠᠪᠴᠢᠷᠠᠨᠠ᠃ ᠲᠡᠭᠦᠨ ᠢ᠋ ᠥᠪᠡᠷ ᠦ᠋ᠨ ᠬᠢᠨᠢ ᠪᠢᠴᠢᠬᠠᠨ ᠬᠡᠦᠬᠡᠳ ᠪᠠ ᠡᠬᠡᠨᠡᠷ ᠶᠸᠧᠫᠷᠡᠺᠰᠧᠶᠥ᠋ᠱᠺᠠ ᠶ᠋ᠢᠨ ᠬᠢᠨᠢ ᠬᠠᠮᠲᠤ ᠣᠷᠣᠰᠢᠭᠤᠯᠤᠨᠠ ᠭᠡᠪᠡ᠃
ᠰᠡᠸᠧᠯᠢ ᠣᠷᠣᠢᠪᠴᠢ ᠮᠠᠯᠠᠭᠠᠢ ᠪᠠᠨ ᠠᠪᠴᠤ ᠵᠠᠯᠠᠮᠠᠭᠠᠢᠯᠠᠨ ᠮᠥᠷᠭᠥᠪᠡ᠃ ᠲᠡᠳᠡ ᠨᠠᠷ ᠤ᠋ᠨ ᠠᠷᠢᠭᠤᠨ ᠰᠦᠨᠡᠰᠦ ᠶ᠋ᠢ ᠪᠤᠷᠬᠠᠨ ᠬᠠᠷᠠᠲᠤᠭᠠᠢ ᠭᠡᠵᠦ ᠵᠠᠯᠪᠠᠷᠢᠭᠠᠳ᠂
— ᠺᠦᠳ᠋ᠷᠶᠠᠱ ᠠ᠋᠂ ᠴᠢ ᠳᠡᠮᠡᠢ ᠶᠠᠪᠤᠵᠤ ᠪᠠᠢᠨᠠ᠃ ᠲᠠᠲ᠋ᠠᠷ ᠤ᠋ᠳ ᠵᠠᠮ ᠪᠦᠷᠢ ᠪᠡᠷ ᠬᠡᠰᠦᠭᠦᠴᠢᠯᠡᠨ ᠣᠯᠵᠠ ᠠᠰᠢᠭ ᠢ᠋ ᠬᠠᠢᠵᠤ ᠶᠠᠪᠤᠵᠠᠭᠠᠨᠠ᠃ ᠪᠠᠲᠤ ᠬᠠᠭᠠᠨ᠂ ᠠᠴᠢᠶᠠ ᠬᠥᠰᠬᠡ ᠪᠣᠯᠤᠨ ᠠᠶᠤᠯ ᠬᠥᠨᠥᠭᠡᠯ ᠬᠢᠭᠡᠳ ᠭᠠᠯ ᠳᠥᠯᠥ ᠶ᠋ᠢᠨ ᠬᠠᠮᠲᠤ ᠨᠠᠰᠢ ᠪᠠᠨ ᠢᠷᠡᠵᠦ ᠶᠠᠪᠤᠭᠠ ᠶ᠋ᠢ ᠰᠣᠨᠣᠰᠤᠭᠰᠠᠨ ᠤᠤ? ᠲᠠᠲ᠋ᠠᠷ ᠤ᠋ᠳ ᠴᠢᠮᠠ ᠶ᠋ᠢ ᠪᠠᠷᠢᠵᠤ ᠠᠪᠤᠭᠠᠳ ᠠᠷᠠᠰᠤ ᠶ᠋ᠢ ᠴᠢᠨᠢ ᠠᠮᠢᠳᠤ ᠪᠠᠷ ᠥᠪᠴᠢᠵᠦ ᠣᠷᠬᠢᠨᠠ᠃
— ᠡᠨᠡ ᠳᠡᠮᠡᠢ ᠦᠭᠡ᠃ ᠪᠠᠲᠤ ᠬᠠᠭᠠᠨ ᠪᠢᠲᠡᠭᠡᠢ ᠳᠡᠩᠳᠡᠭᠦᠦ ᠭᠠᠢᠬᠠᠭᠤᠯᠤᠭ! ᠪᠦᠳᠦᠷᠢᠵᠦ ᠤᠨᠠᠬᠤ ᠨᠢ ᠮᠠᠭᠠᠳ ᠦᠭᠡᠢ᠃ ᠲᠡᠷᠡ ᠨᠢ ᠬᠣᠶᠠᠷ ᠭᠠᠷ ᠲᠠᠢ ᠪᠣᠯᠪᠠᠴᠤ ᠮᠥᠨ ᠨᠠᠳᠠ ᠶ᠋ᠢ ᠥᠷᠥᠭᠡᠰᠦᠨ ᠭᠠᠷ ᠲᠠᠢ ᠡᠬᠡ ᠲᠥᠷᠥᠭᠦᠯᠦᠭᠡ ᠦᠭᠡᠢ ᠶᠤᠮ᠃ ᠥᠨᠥᠳᠥᠷ ᠲᠦᠷ ᠬᠦᠯᠢᠶᠡᠵᠡᠭᠡᠨᠡ᠃ ᠮᠠᠷᠭᠠᠰᠢ ᠶᠠᠭᠤ ᠪᠣᠯᠬᠤ ᠶ᠋ᠢ ᠬᠠᠷᠠᠶᠠ᠃ ᠨᠡᠪᠲᠡᠷᠡᠨ ᠭᠠᠷᠬᠤ ᠵᠠᠮ ᠦᠭᠡᠢ ᠪᠣᠯᠪᠠᠯ ᠵᠠᠯᠠᠭᠤ ᠡᠷᠡᠰ ᠢ᠋ ᠴᠤᠭᠯᠠᠭᠤᠯᠤᠨ ᠠᠪᠴᠤ ᠲᠠᠲ᠋ᠠᠷ᠂ ᠮᠣᠩᠭᠣᠯᠴᠤᠳ ᠤ᠋ᠨ ᠬᠣᠢᠨᠠ ᠠ᠋ᠴᠠ ᠮᠥᠷᠳᠡᠨ ᠶᠠᠪᠤᠵᠤ ᠲᠡᠳᠡᠭᠡᠷ ᠦ᠋ᠨ ᠬᠥᠯ ᠡᠴᠡ ᠴᠢᠩᠭᠠᠭᠠᠨᠠ᠃ ᠲᠡᠳᠡᠨᠡᠷ ᠢ᠋ ᠭᠠᠵᠠᠷ ᠲᠤ᠌ ᠤᠨᠠᠬᠤ ᠠ᠋ᠴᠠ ᠨᠡᠰᠢ ᠦᠭᠡᠢ ᠪᠣᠯ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠤᠨᠠᠵᠤ ᠦᠬᠦᠬᠦ ᠡᠴᠡ ᠨᠠᠰᠢ ᠠᠮᠤᠷ ᠵᠢᠷᠭᠠᠯ ᠢ᠋ ᠲᠡᠳᠡᠨ ᠳ᠋ᠦ᠍ ᠦᠵᠡᠭᠦᠯᠬᠦ ᠦᠭᠡᠢ ᠰᠢᠦ᠃ ᠰᠡᠸᠧᠯᠢ ᠨᠠᠳᠠᠲᠠᠢ ᠬᠠᠮᠲᠤ ᠶᠠᠪᠤᠶᠠ ᠭᠡᠵᠦ ᠺᠦᠳ᠋ᠷᠶᠠᠱ ᠬᠠᠷᠢᠭᠤᠯᠪᠠ᠃ ᠰᠡᠸᠧᠯᠢ ᠪᠣᠳᠣᠯᠭᠠ ᠪᠣᠳᠣᠨ ᠬᠣᠭᠣᠯᠠᠢ ᠪᠠᠨ ᠵᠠᠰᠠᠭᠠᠳ᠂
— ᠦᠭᠡᠢ! ᠺᠦᠳ᠋ᠷᠶᠠᠱ ᠮᠢᠨᠢ᠂ ᠳᠠᠷᠤᠭᠠ ᠨᠠᠮᠠᠶ᠋ᠢ ᠡᠨᠡ ᠬᠡᠷᠡᠮ ᠦ᠋ᠨ ᠳᠡᠭᠡᠷᠡ ᠪᠠᠢ ᠭᠡᠵᠦ ᠲᠣᠮᠢᠯᠠᠭᠰᠠᠨ᠃ ᠪᠢ ᠥᠪᠡᠷ ᠦ᠋ᠨ ᠳᠤᠷᠠ ᠵᠣᠷᠢᠭ ᠢ᠋ᠶ᠋ᠠᠷ ᠡᠨᠡ ᠪᠠᠢᠷᠢ ᠪᠠᠨ ᠣᠷᠬᠢᠵᠤ ᠶᠠᠪᠤᠬᠤ ᠦᠭᠡᠢ᠃ ᠴᠢ ᠮᠣᠷᠢ ᠲᠠᠢ ᠪᠠᠢᠨᠠ᠂ ᠪᠢ ᠰᠦᠬᠡ ᠲᠡᠢ ᠪᠠᠢᠨᠠ᠃ ᠬᠣᠶᠠᠭᠤᠯᠠ ᠪᠠᠨ ᠨᠢᠭᠡ ᠦᠢᠯᠡ ᠬᠡᠷᠡᠭ ᠢ᠋ ᠦᠢᠯᠡᠳᠦᠨᠡ ᠭᠡᠪᠡ᠃
— ᠵᠠ᠂ ᠲᠡᠢᠮᠦ ᠪᠣᠯᠲᠤᠭᠠᠢ᠁ ᠪᠠᠶᠠᠷᠲᠠᠢ ᠰᠠᠸᠸᠯᠢ ᠭᠡᠳ ᠺᠥ᠋ᠳ᠋ᠷᠶᠡᠱ ᠬᠡᠳᠦᠨ ᠠᠯᠬᠤᠮ ᠶᠠᠪᠤᠭᠠᠳ ᠪᠤᠴᠠᠵᠤ ᠢᠷᠡᠯᠡ᠃
— ᠬᠠᠮᠤᠭ ᠤ᠋ᠨ ᠴᠢᠬᠤᠯᠠ ᠶ᠋ᠢ ᠴᠢᠮᠠᠲᠤ ᠬᠡᠯᠡᠬᠦ ᠪᠡᠨ ᠮᠠᠷᠲᠠᠯᠠ᠃ ᠪᠢ ᠴᠢᠨᠦ ᠳᠣᠷᠤᠫᠺᠡ ᠶ᠋ᠢ ᠬᠠᠷᠠᠭᠰᠠᠨ ᠰᠢᠦ᠃ ᠲᠡᠷᠡ ᠴᠢᠨᠢ ᠠᠮᠢᠳᠤ ᠪᠠᠢᠨᠠ᠃ ᠲᠠᠲ᠋ᠡᠷ ᠦ᠋ᠨ ᠮᠣᠷᠢ ᠶ᠋ᠢ ᠤᠨᠤᠵᠤ ᠣᠯᠵᠠᠯᠠᠯᠲᠠ ᠠ᠋ᠴᠠ ᠵᠢᠭᠤᠲᠠᠵᠤ ᠭᠠᠷᠤᠭᠰᠠᠨ᠃ ᠲᠡᠭᠦᠨ ᠦ᠌ ᠮᠣᠷᠢ ᠨᠢ ᠬᠠᠮᠤᠭ ᠤ᠋ᠨ ᠰᠢᠯᠢᠳᠡᠭ ᠰᠠᠢᠨ ᠮᠣᠷᠢ ᠶᠤᠮ᠂ ᠲᠡᠭᠦᠨ ᠦ᠌ ᠳᠠᠪᠬᠢᠭᠠᠨ ᠳ᠋ᠤᠨᠢ ᠭᠠᠵᠠᠷ ᠤ᠋ᠨ ᠬᠥᠷᠥᠰᠥ ᠳᠣᠭᠳᠣᠯᠵᠤ ᠴᠢᠬᠢ ᠪᠠ ᠬᠠᠮᠠᠷ ᠠ᠋ᠴᠠ ᠨᠢ ᠤᠲᠤᠭᠠ ᠮᠠᠨᠠᠨ ᠰᠠᠴᠤᠷᠠᠨ ᠣᠷᠬᠢᠨᠠ ᠭᠡᠬᠦ ᠳ᠋ᠦ᠍ᠨᠢ ᠰᠡᠸᠸᠯᠢ ᠭᠦᠶᠦᠨ ᠣᠴᠢᠭᠠᠳ ᠺᠥ᠋ᠳ᠋ᠷᠶᠡᠱ ᠢ᠋ ᠪᠠᠷᠢᠵᠤ ᠠᠪᠤᠭᠠᠳ᠂
— ᠦᠨᠡᠨ ᠢ᠋ ᠬᠡᠯᠡ᠂ ᠬᠤᠳᠠᠯ ᠬᠡᠯᠡᠵᠦ ᠪᠠᠢᠭᠠ ᠦᠭᠡᠢ ᠪᠢᠵᠡ? ᠨᠠᠮᠠᠶ᠋ᠢ ᠬᠠᠭᠤᠷᠴᠤ ᠰᠡᠳᠬᠢᠯ ᠢ᠋ ᠮᠢᠨᠢ ᠲᠠᠢᠳᠬᠤᠷᠠᠭᠤᠯᠬᠤ ᠭᠡᠪᠡ ᠤᠤ? ᠴᠢ᠂
— ᠦᠭᠡᠢ ᠦᠭᠡᠢ᠂ ᠪᠢ ᠬᠤᠳᠠᠯ ᠬᠡᠯᠡᠭᠡ ᠦᠭᠡᠢ᠂ ᠸᠠᠩ ᠫᠷᠤᠡᠰᠺ ᠦ᠋ᠨ ᠡᠯᠴᠢ ᠪᠡᠷ ᠲᠣᠷᠤᠫᠺᠡ ᠡᠨᠳᠡ ᠪᠢᠴᠢᠭ ᠬᠦᠷᠭᠡᠵᠦ ᠢᠷᠡᠭᠡᠳ ᠪᠤᠴᠠᠵᠤ ᠶᠠᠪᠤᠭᠰᠠᠨ ᠰᠢᠦ᠃ ᠪᠢ ᠲᠡᠭᠦᠨ ᠲᠡᠢ ᠳᠥᠩᠭᠡᠵᠢ ᠠᠭᠤᠯᠵᠠᠭᠰᠠᠨ᠃ 《ᠬᠡᠷᠪᠡ ᠠᠪᠤ ᠰᠡᠸᠸᠯᠢ ᠮᠢᠺᠢᠲ᠋ᠢᠴ ᠲᠡᠢ ᠠᠭᠤᠯᠵᠠᠪᠠᠯ ᠮᠢᠨᠦ ᠮᠡᠨᠳᠦ ᠶ᠋ᠢ ᠬᠦᠷᠭᠡᠭᠡᠷᠡᠢ᠃ ᠪᠢ ᠲᠠᠲ᠋ᠠᠷ ᠤ᠋ᠳ ᠲᠤ᠌ ᠬᠥᠯ ᠦ᠋ᠨ ᠢ᠋ᠶ᠋ᠡᠨ ᠤᠯᠠ ᠶ᠋ᠢ ᠦᠵᠡᠭᠦᠯᠵᠦ ᠥᠪᠡᠷ ᠦ᠋ᠨ ᠠᠷᠢᠭᠤᠨ ᠨᠡᠷᠡ ᠶ᠋ᠢ ᠪᠤᠵᠠᠷᠯᠠᠬᠤ ᠦᠭᠡᠢ ᠰᠢᠦ᠃ ᠪᠢ ᠨᠢᠭᠡ ᠤᠳᠠᠭᠠ ᠲᠡᠲ᠋ᠠᠷ ᠨᠠᠷ ᠲᠤ᠌ ᠪᠠᠷᠢᠭᠳᠠᠵᠤ ᠲᠡᠳᠡᠨ ᠦ᠌ ᠳᠠᠷᠤᠯᠠᠭᠳᠠᠯ ᠢ᠋ ᠪᠡᠶᠡ ᠪᠡᠷ ᠲᠤᠭᠤᠯᠵᠤ ᠭᠠᠷᠤᠭᠰᠠᠨ ᠲᠤᠯᠠ ᠣᠳᠣ ᠨᠠᠮᠠᠶ᠋ᠢ ᠳᠠᠬᠢᠨ ᠪᠠᠷᠢᠬᠤ ᠦᠭᠡᠢ ᠰᠢᠦ᠁ 》ᠭᠡᠵᠦ ᠨᠠᠳᠠᠳᠤ ᠬᠡᠯᠡᠭᠰᠡᠨ᠃
— ᠵᠠ᠂ ᠪᠠᠶᠠᠷᠲᠠᠢ! ᠰᠡᠸᠸᠯᠢ ᠪᠢᠳᠡ ᠬᠣᠶᠠᠷ ᠳᠠᠬᠢᠨ ᠠᠭᠤᠯᠵᠠᠬᠤ ᠡᠰᠡᠬᠦ ᠶ᠋ᠢ ᠪᠤᠷᠬᠠᠨ ᠲᠩᠷᠢ ᠮᠡᠳᠡᠲᠦᠭᠡᠢ᠃ ᠴᠠᠭ ᠴᠥᠮ ᠡᠢᠮᠦ ᠪᠣᠯᠵᠠᠢ ᠭᠡᠳ ᠵᠠᠯᠠᠭᠤ ᠺᠥ᠋ᠳ᠋ᠷᠶᠡᠱ ᠮᠣᠷᠢ ᠪᠠᠨ ᠲᠠᠰᠢᠭᠤᠷᠳᠠᠵᠤ ᠬᠠᠮᠲᠤ ᠶᠠᠪᠤᠭᠠ ᠺᠢᠫᠴᠡᠺ ᠬᠥᠮᠦᠨ ᠲᠡᠢ ᠳᠠᠪᠬᠢᠵᠤ ᠣᠳᠤᠯᠠ᠃ ᠰᠡᠸᠸᠯᠢ ᠡᠷᠭᠢᠵᠦ ᠬᠡᠷᠡᠮ ᠦ᠋ᠨ ᠳᠡᠭᠡᠷᠡ ᠭᠠᠷᠤᠯᠠ᠃ ᠲᠡᠷᠡ ᠥᠪᠡᠷ ᠦ᠋ᠨ ᠬᠦᠦ ᠶ᠋ᠢᠨ ᠠᠮᠢᠳᠤ ᠪᠠᠢᠬᠤ ᠶ᠋ᠢ ᠰᠣᠨᠣᠰᠴᠤ ᠶᠡᠬᠡᠳᠡ ᠪᠠᠶᠠᠰᠤᠭᠰᠠᠨ ᠠ᠋ᠴᠠ ᠪᠣᠯᠵᠤ ᠶᠠᠭᠤᠮᠠ ᠪᠦᠬᠦᠨ ᠴᠥᠮ ᠭᠡᠷᠡᠯ ᠣᠷᠣᠭᠰᠠᠨ ᠮᠡᠲᠦ ᠰᠠᠨᠠᠭᠳᠠᠵᠤ ᠴᠠᠰᠤ ᠴᠥ᠍ ᠤᠯᠠᠮ ᠴᠠᠭᠠᠨ ᠤᠨᠢᠶᠠᠷ ᠮᠠᠨᠠᠨ ᠲᠠᠲᠠᠭᠰᠠᠨ ᠬᠣᠯᠠ ᠶ᠋ᠢᠨ ᠭᠠᠵᠠᠷ ᠴᠥ᠍ ᠥᠭᠡᠷᠡ ᠪᠣᠯᠤᠭᠰᠠᠨ ᠮᠡᠲᠦ ᠦᠵᠡᠭᠳᠡᠯᠡ᠃ ᠰᠡᠸᠸᠯᠢ ᠬᠡᠷᠡᠮ ᠦ᠋ᠨ ᠱᠠᠲᠤᠨ ᠳᠡᠭᠡᠷᠡ ᠭᠠᠷᠴᠤ ᠰᠢᠨᠡ ᠲᠤᠯᠵᠤ ᠰᠠᠭᠤᠬᠤ ᠳ᠋ᠤᠨᠢ ᠬᠥᠪᠡᠭᠦᠨ ᠲᠤᠷᠤᠫᠺᠠ ᠶ᠋ᠢᠨ ᠬᠥᠬᠡ ᠠᠯᠠᠭ ᠨᠢᠳᠦ ᠨᠢ ᠡᠷᠭᠢᠯᠳᠦᠨ ᠬᠠᠷᠠᠵᠤ ᠪᠦᠳᠡᠭᠢ ᠲᠤᠷᠠᠩᠬᠠᠢᠪᠲᠤᠷ ᠴᠢᠷᠠᠢ ᠨᠢ ᠢᠨᠢᠶᠡᠮᠰᠦᠭᠯᠡᠨ ᠦᠵᠡᠭᠳᠡᠬᠦ ᠶ᠋ᠢ ᠪᠣᠯᠢᠯᠠ᠃《ᠣᠲᠣ ᠲᠤᠷᠤᠫᠺᠠ ᠮᠢᠨᠢ ᠭᠠᠪᠰᠢᠭᠠᠢ ᠰᠠᠢᠨ ᠡᠷᠡ ᠪᠣᠯᠵᠤ ᠰᠠᠢᠬᠠᠨ ᠮᠣᠷᠢ ᠶ᠋ᠢ ᠤᠨᠤᠵᠤ ᠶᠠᠪᠤᠭᠠ ᠨᠢ ᠪᠠᠭᠠᠲᠤᠷ ᠵᠣᠷᠢᠭᠲᠠᠢ ᠶᠸᠭᠤᠷᠢ ᠥᠪᠡᠷ ᠢ᠋ᠶ᠋ᠡᠨ ᠰᠢᠭ᠌ ᠪᠣᠯᠵᠠᠢ》ᠭᠡᠵᠦ ᠰᠡᠸᠸᠯᠢ ᠪᠣᠳᠣᠯ ᠪᠣᠯᠤᠨ ᠰᠠᠭᠤᠯᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠮᠡᠷᠭᠡᠨᠭᠣᠣᠠ᠂ ᠠᠯᠲᠠᠨᠴᠢᠮᠡᠭ᠂ ᠵᠢᠩᠯᠢᠬᠤᠸᠠᠷ᠂ ᠪᠠᠶᠠᠨᠴᠡᠴᠡᠭ
ᠬᠢᠨᠠᠭᠴᠢ᠄ ᠠᠯᠲᠠᠨᠴᠢᠮᠡᠭ᠂ ᠠᠷᠢᠭᠤᠨ