ᠪᠠᠲᠤ ᠬᠠᠭᠠᠨ 5-01ᠰᠦᠬᠡ ᠨᠤᠭᠦᠳ ᠢ᠋ᠶ᠋ᠡᠨ ᠴᠢᠩᠭᠠ ᠪᠠᠷᠢᠵᠠᠭᠠᠭᠲᠤᠨ-ᠷᠶᠠᠽᠠᠨ ᠤ᠋ ᠭᠠᠵᠠᠷ ᠨᠤᠲᠤᠭ ᠰᠢᠲᠠᠵᠤ ᠪᠠᠢᠨᠠBat khaan Бат хаан-ᠷᠣᠮᠠᠨ
31 ᠲᠠᠪᠤᠳᠤᠭᠠᠷ ᠪᠦᠯᠦᠭ ᠷᠶᠠᠽᠠᠨ ᠤ᠋ ᠭᠠᠵᠠᠷ ᠨᠤᠲᠤᠭ ᠰᠢᠲᠠᠵᠤ ᠪᠠᠢᠨᠠ
᠁ ᠠᠢ᠂ ᠠᠷᠢᠭᠤᠨ ᠭᠡᠭᠡᠬᠡᠨ ᠣᠷᠣᠨ ᠤ᠋ ᠪᠠᠨ ᠠᠯᠳᠠᠷ ᠢ᠋ ᠬᠦᠰᠡᠵᠦ ᠢᠷᠥᠭᠡᠬᠦ ᠳ᠋ᠦ᠍ ᠬᠡᠨ ᠦ᠌ ᠵᠢᠷᠦᠬᠡ ᠴᠡᠴᠡᠷᠡᠬᠦ ᠦᠭᠡᠢ ᠪᠣᠢ?
(ᠵᠦᠺᠦᠸᠰᠺᠢ)
ᠨᠢᠭᠡ ᠰᠦᠬᠡ ᠨᠤᠭᠦᠳ ᠢ᠋ᠶ᠋ᠡᠨ ᠴᠢᠩᠭᠠ ᠪᠠᠷᠢᠵᠠᠭᠠᠭᠲᠤᠨ
ᠰᠡᠸᠸᠯᠢ ᠳ᠋ᠢᠺᠦᠷᠦᠰ ᠤᠮᠠᠷᠠᠲᠤ ᠵᠦᠭ ᠢ᠋ ᠴᠢᠭᠯᠡᠨ ᠡᠷᠭᠢᠵᠦ ᠷᠶᠠᠽᠡᠨ ᠳᠠᠰᠢ ᠰᠢᠢᠳᠪᠦᠷᠢ ᠲᠡᠢ ᠪᠡᠷ ᠠᠯᠬᠤᠯᠠᠨ ᠶᠠᠪᠤᠵᠤ ᠪᠠᠢᠬᠤ ᠳ᠋ᠤ᠌ ᠬᠤᠪᠠᠬᠠᠢᠷᠠᠭᠰᠠᠨ ᠰᠢᠭᠤᠢ ᠪᠤᠷᠭᠠᠰᠤ ᠪᠠ ᠴᠠᠰᠤ ᠪᠠᠷ ᠪᠦᠷᠬᠦᠭᠳᠡᠭᠰᠡᠨ ᠭᠣᠣ ᠵᠢᠯᠠᠭᠠ ᠪᠦᠬᠦᠢ ᠴᠠᠭᠠᠨ ᠲᠠᠯᠠ ᠬᠣᠭᠣᠰᠣᠨ ᠪᠠᠢᠯᠠ᠃ ᠵᠠᠷᠢᠮ ᠳ᠋ᠠᠭᠠᠨ ᠬᠠᠷᠠ ᠪᠠᠷᠠᠭᠠᠨ ᠲᠣᠯᠪᠣ ᠨᠤᠭᠤᠳ ᠡᠨᠳᠡ ᠲᠡᠨᠳᠡ ᠦᠵᠡᠭᠳᠡᠬᠦ ᠪᠥᠭᠡᠳ ᠡᠨᠡ ᠨᠢ ᠵᠣᠯ ᠵᠠᠶᠠᠭᠠ ᠪᠠᠷ ᠠᠮᠢᠳᠤ ᠦᠯᠡᠳᠡᠭᠰᠡᠨ ᠴᠥᠭᠡᠨ ᠲᠣᠭᠠᠨ ᠤ᠋ ᠷᠶᠠᠽᠠᠨ ᠤ᠋ ᠬᠥᠮᠦᠰ ᠪᠠᠢᠯᠠ᠃ ᠡᠳᠡ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠲᠥᠷᠥᠭᠰᠡᠨ ᠨᠤᠲᠤᠭ ᠲᠠᠰᠢ ᠪᠠᠨ ᠬᠠᠨᠳᠤᠨ ᠶᠠᠪᠤᠵᠤ ᠪᠠᠢᠨᠠ᠃ ᠤᠷᠢᠳᠤ ᠴᠠᠭ ᠲᠤ᠌ ᠡᠨᠳᠡ ᠵᠢᠵᠢᠭ ᠲᠣᠰᠬᠣᠨ ᠨᠤᠭᠤᠳ ᠪᠠᠢᠵᠤ ᠲᠠᠯᠠ ᠶ᠋ᠢᠨ ᠬᠥᠮᠦᠰ ᠲᠡᠢ ᠠᠷᠠᠯᠵᠢᠶᠠ ᠮᠠᠢᠮᠠᠢ ᠬᠢᠵᠦ ᠪᠠᠢᠭᠰᠠᠨ ᠶᠤᠮ᠃ ᠣᠳᠣ ᠡᠳᠡᠭᠡᠷ ᠦ᠋ᠳ ᠨᠢ ᠬᠣᠭᠣᠰᠣᠷᠠᠵᠤ ᠣᠩᠭᠣᠷᠬᠠᠢ ᠡᠭᠦᠳᠡ ᠬᠠᠭᠠᠯᠭᠠ ᠤ᠋ᠳ ᠢ᠋ ᠨᠢ ᠰᠠᠯᠬᠢ ᠢᠰᠬᠡᠷᠦᠨ ᠰᠠᠪᠠᠴᠢᠵᠤ ᠪᠠᠢᠪᠠ᠃
ᠬᠡᠷᠢᠶᠡ ᠰᠢᠪᠠᠭᠤ ᠨᠤᠭᠤᠳ ᠡᠵᠡᠨ ᠦᠭᠡᠢ ᠬᠠᠰᠢᠶᠠᠨ ᠠ᠋ᠴᠠ ᠰᠦᠷᠦᠭ ᠢ᠋ᠶ᠋ᠡᠷ ᠨᠢᠰᠴᠦ ᠪᠠᠭᠤᠳᠠᠯᠯᠠᠨ᠂ ᠶᠠᠭᠤ ᠴᠤ᠌ ᠣᠯᠵᠤ ᠢᠳᠡᠰᠢᠯᠡᠯ ᠦᠭᠡᠢ ᠭᠣᠮᠣᠳᠠᠯ ᠲᠠᠢ ᠪᠠᠷ ᠪᠠᠷᠬᠢᠷᠠᠯᠳᠤᠨ ᠨᠢᠰᠴᠦ ᠶᠠᠪᠤᠨᠠ᠃ ᠰᠡᠸᠸᠯᠢ ᠵᠠᠮ ᠵᠠᠭᠤᠷᠠ ᠮᠣᠩᠭᠣᠯᠴᠤᠳ ᠲᠠᠢ ᠳᠠᠭᠠᠷᠢᠯᠳᠤᠭᠰᠠᠨ ᠦᠭᠡᠢ᠂《ᠮᠠᠭᠠᠳ᠂ ᠪᠠᠢᠯᠳᠤᠭᠠᠨ ᠤ᠋ ᠰᠡᠭᠦᠯ ᠳ᠋ᠦ᠍ ᠠᠮᠠᠷᠠᠵᠠᠭᠠᠵᠤ ᠥᠪᠡᠷᠰᠡᠳ ᠦ᠋ᠨ ᠰᠢᠷᠬᠠᠳᠤᠭᠴᠢᠳ ᠢ᠋ ᠴᠤᠭᠯᠠᠭᠤᠯᠤᠨ ᠠᠪᠴᠤ ᠪᠠᠢᠭᠠ ᠪᠤᠶᠤ ᠮᠠᠨ ᠤ᠋ ᠲᠠᠯᠠ ᠠ᠋ᠴᠠ ᠦᠬᠦᠭᠰᠡᠨ ᠬᠥᠮᠦᠰ ᠢ᠋ ᠳᠡᠭᠡᠷᠡᠮᠳᠡᠵᠦ ᠪᠠᠢᠭᠠ ᠪᠢᠵᠡ ? 》ᠭᠡᠵᠦ ᠰᠡᠳᠬᠢᠵᠦ ᠶᠠᠪᠤᠵᠠᠢ᠃
ᠰᠦᠯᠵᠢᠮᠡᠯ ᠪᠦᠬᠡᠭᠡᠭ ᠲᠡᠢ ᠨᠢᠭᠡᠨ ᠬᠡᠰᠡᠭ ᠴᠢᠷᠭᠠ ᠲᠠᠢ ᠬᠥᠮᠦᠰ ᠲᠡᠭᠦᠨ ᠢ᠋ ᠭᠦᠢᠴᠡᠵᠦ ᠢᠷᠡᠯᠡ᠃ ᠴᠢᠷᠭᠠᠨ ᠳ᠋ᠤ᠌ ᠣᠷᠣᠭᠤᠯᠤᠭᠰᠠᠨ ᠮᠣᠷᠢᠳ ᠨᠢ ᠦᠰᠦᠯᠢᠭ ᠪᠥᠭᠡᠳ ᠴᠢᠭᠢᠷᠠᠭ ᠪᠡᠶᠡ ᠲᠡᠢ ᠠᠵᠢ᠃ ᠴᠢᠷᠭᠠ ᠨᠤᠭᠤᠳ ᠤ᠋ᠨ ᠬᠣᠢᠨᠠ ᠠ᠋ᠴᠠ ᠦᠬᠡᠷ᠂ ᠬᠣᠨᠢ᠂ ᠲᠤᠭᠤᠯ᠂ ᠪᠢᠷᠠᠭᠤ ᠨᠤᠭᠤᠳ ᠴᠤᠪᠤᠷᠠᠨ ᠶᠠᠪᠤᠨᠠ᠃ ᠪᠦᠬᠡᠭᠡᠭ ᠦ᠋ᠳ ᠦ᠋ᠨ ᠳᠣᠲᠣᠷᠠ ᠠ᠋ᠴᠠ ᠬᠡᠦᠬᠡᠳ ᠦ᠋ᠨ ᠲᠣᠯᠣᠭᠠᠢ ᠨᠤᠭᠤᠳ ᠴᠤᠬᠤᠢᠵᠤ ᠦᠵᠡᠭᠳᠡᠨᠡ᠃ ᠡᠷᠡᠴᠦᠳ ᠪᠠ ᠡᠮᠡᠰ ᠥᠬᠢᠳ ᠨᠢ ᠬᠣᠢᠨᠠ ᠠ᠋ᠴᠠ ᠨᠢ ᠳᠠᠭᠠᠵᠤ ᠡᠴᠡᠵᠦ ᠵᠦᠳᠡᠷᠡᠭᠰᠡᠨ ᠦᠨᠢᠶᠡ᠂ ᠲᠤᠭᠤᠯ᠂ ᠬᠣᠨᠢ ᠮᠠᠯ ᠤ᠋ᠳ ᠢ᠋ ᠪᠤᠷᠭᠠᠰᠤᠨ ᠤ᠋ ᠮᠥᠴᠢᠷ ᠢ᠋ᠶ᠋ᠡᠷ ᠰᠢᠯᠪᠢᠭᠦᠷᠲᠡᠨ ᠲᠠᠭᠤᠵᠤ ᠶᠠᠪᠤᠵᠠᠭᠠᠨᠠ᠃
— ᠰᠠᠢᠨ ᠰᠠᠨᠠᠭᠠᠲᠤ ᠬᠥᠮᠦᠰ ᠠ᠋! ᠲᠠ ᠨᠠᠷ ᠬᠠᠮᠢᠭᠠ ᠠ᠋ᠴᠠ ᠶᠠᠪᠤᠭᠠ ᠪᠣᠢ?
— ᠪᠢᠳᠡ ᠫᠷᠤᠨᠰᠺᠢ ᠶ᠋ᠢᠨ ᠴᠠᠭᠠᠳᠤᠬᠢ ᠬᠠᠷᠠᠭᠤᠯ ᠠ᠋ᠴᠠ ᠶᠠᠪᠤᠨᠠ᠂ ᠴᠠᠭ ᠲᠤᠬᠠᠢ ᠳ᠋ᠤ᠌ ᠬᠥᠳᠡᠯᠵᠦ ᠲᠠᠯᠠ ᠶ᠋ᠢᠨ ᠬᠥᠮᠦᠰ ᠡᠴᠡ ᠠᠷᠠᠢᠬᠢᠵᠤ ᠤᠷᠢᠲᠠᠵᠤ ᠭᠠᠷᠤᠯᠠ᠃ ᠰᠥᠨᠢ ᠶ᠋ᠢᠨ ᠬᠠᠷᠠᠩᠭᠤᠢ ᠪᠠ ᠴᠠᠰᠤᠨ ᠰᠢᠭᠤᠷᠭᠠ ᠪᠢᠳᠡᠨ ᠢ᠋ ᠳᠠᠯᠳᠠᠯᠠᠨ ᠭᠠᠷᠭᠠᠪᠠ᠃ ᠪᠢᠳᠡ ᠷᠶᠡᠽᠡᠨ ᠬᠦᠷᠬᠦ ᠶ᠋ᠢ ᠶᠠᠭᠠᠷᠠᠨ ᠶᠠᠪᠤᠨᠠ᠃ ᠲᠡᠨᠳᠡ ᠪᠢᠳᠡᠨ ᠢ᠋ ᠬᠠᠮᠠᠭᠠᠯᠠᠨᠠ ᠪᠢᠵᠡ? ᠡᠨᠳᠡ ᠠᠶᠤᠯ ᠲᠠᠢ ᠪᠠᠢᠨᠠ᠃ ᠲᠠᠲ᠋ᠠᠷ ᠤ᠋ᠳ ᠬᠦᠷᠦᠯᠴᠡᠨ ᠢᠷᠡᠪᠡᠯ ᠪᠢᠳᠡ ᠨᠠᠷ ᠲᠤ᠌ ᠶᠢᠷᠲᠢᠨᠴᠦ ᠶ᠋ᠢ ᠦᠵᠡᠬᠦ ᠡᠴᠡ ᠪᠡᠨ ᠥᠩᠭᠡᠷᠡᠴᠢᠬᠡᠨᠡ! ᠠᠯᠠᠭᠴᠢᠨ ᠦᠨᠢᠶᠡ ᠮᠢᠨᠢ ᠶᠠᠪᠤᠭᠠᠷᠠᠢ᠂ ᠤᠯᠠᠭᠴᠢᠨ ᠬᠤᠴᠠ ᠮᠢᠨᠢ ᠣᠷᠣᠭᠰᠢ ᠪᠠᠨ ᠬᠤᠷᠳᠤᠨ ᠶᠠᠪᠤᠭᠠᠷᠠᠢ ᠭᠡᠵᠦ ᠮᠠᠯ ᠢ᠋ᠶ᠋ᠠᠨ ᠳᠠᠭᠤᠳᠠᠨ ᠶᠠᠪᠤᠨᠠ᠃
ᠰᠡᠸᠸᠯᠢ ᠴᠦ᠍ ᠣᠢ ᠮᠣᠳᠣᠨ ᠳᠣᠲᠣᠷᠠ ᠪᠤᠶᠤ ᠠᠨᠵᠢᠰᠤᠨ ᠤ᠋ ᠬᠣᠢᠨᠠ ᠠ᠋ᠴᠠ ᠶᠠᠪᠤᠵᠤ ᠰᠤᠷᠤᠭᠰᠠᠨ ᠲᠠᠢ ᠪᠠᠨ ᠠᠳᠠᠯᠢ ᠨᠢᠭᠡᠨ ᠵᠢᠭᠳᠡ ᠠᠯᠬᠤᠯᠠᠨ ᠶᠠᠪᠤᠵᠤ ᠪᠠᠢᠯᠠ᠃
ᠲᠡᠷᠡ ᠪᠠᠭᠠ ᠪᠠᠭᠠ ᠪᠠᠷ ᠠᠮᠠᠷᠠᠵᠤ᠂ ᠡᠳᠦᠷ ᠰᠥᠨᠢ ᠦᠭᠡᠢ ᠶᠠᠪᠤᠵᠤ ᠪᠠᠢᠬᠤ ᠳ᠋ᠠᠭᠠᠨ ᠳᠠᠬᠢᠨ ᠲᠠᠲ᠋ᠠᠷ ᠤ᠋ᠳ ᠲᠠᠢ ᠲᠠᠭᠠᠷᠠᠯᠳᠤᠬᠤ ᠠ᠋ᠴᠠ ᠠᠶᠤᠵᠤ ᠶᠠᠮᠠᠷ ᠨᠢᠭᠡᠨ ᠳᠠᠭᠤ ᠴᠢᠮᠡᠭᠡᠨ ᠳ᠋ᠦ᠍ ᠮᠠᠰᠢ ᠶᠡᠬᠡ ᠰᠡᠷᠡᠮᠵᠢᠲᠡᠢ ᠶᠠᠪᠤᠵᠠᠢ᠃ ᠲᠡᠢᠨᠬᠦ ᠶᠠᠪᠤᠭᠰᠠᠭᠠᠷ ᠡᠴᠦᠰ ᠲᠤᠨᠢ ᠨᠢᠭᠡᠨ ᠥᠷᠯᠥᠭᠡ ᠡᠷᠲᠡ ᠷᠶᠡᠽᠡᠨ ᠦ᠌ ᠴᠠᠰᠤ ᠪᠠᠷ ᠪᠦᠷᠬᠦᠭᠳᠡᠭᠰᠡᠨ ᠰᠢᠪᠡᠷ ᠲᠤᠭᠤᠷᠭᠠ ᠪᠠ ᠳ᠋ᠦᠨᠵᠡ ᠮᠣᠳᠣ ᠪᠠᠷ ᠬᠢᠭᠰᠡᠨ ᠥᠨᠳᠥᠷ ᠬᠡᠷᠡᠮ ᠢ᠋ ᠤᠨᠵᠢᠢᠭᠰᠠᠨ ᠡᠭᠦᠯᠡ ᠶ᠋ᠢᠨ ᠳᠣᠭᠤᠤᠷ ᠬᠠᠷᠠᠯᠠ᠃ ᠲᠡᠭᠦᠨ ᠦ᠌ ᠴᠠᠭᠠᠨᠠ ᠰᠦᠮᠡ ᠨᠤᠭᠦᠳ ᠦ᠋ᠨ ᠥᠩᠭᠡ ᠪᠦᠷᠢ ᠶ᠋ᠢᠨ ᠣᠷᠣᠢ ᠨᠤᠭᠤᠳ ᠬᠠᠷᠠᠭᠳᠠᠵᠤ ᠪᠠᠢᠯᠠ᠃ ᠬᠣᠲᠠ ᠶ᠋ᠢᠨ ᠣᠷᠴᠢᠮ ᠤ᠋ᠨ ᠪᠠᠢᠰᠢᠩ ᠤ᠋ᠳ ᠤ᠋ᠨ ᠳᠡᠭᠡᠭᠦᠷ ᠴᠡᠩᠬᠡᠷ ᠬᠥᠬᠡ ᠤᠲᠤᠭᠠ ᠮᠠᠨᠠᠨ ᠤᠨᠢᠶᠠᠷᠲᠤᠵᠤ ᠦᠰᠦᠲᠡᠢ ᠪᠣᠭᠣᠨᠢ ᠳᠡᠪᠡᠯ ᠲᠡᠢ ᠡᠮᠡᠰ ᠥᠬᠢᠳ ᠠᠳᠤᠭᠤ ᠮᠠᠯ ᠢ᠋ᠶ᠋ᠠᠨ ᠴᠤᠭᠤᠯᠭᠠ ᠠ᠋ᠴᠠ ᠤᠰᠤᠯᠬᠤ ᠪᠠᠷ ᠭᠣᠣᠯ ᠤ᠋ᠨ ᠡᠷᠭᠢ ᠳᠠᠰᠢ ᠲᠠᠭᠤᠵᠤ ᠶᠠᠪᠤᠵᠠᠭᠠᠬᠤ ᠨᠢ ᠦᠵᠡᠭᠳᠡᠯᠡ᠃ ᠡᠨᠡ ᠪᠦᠭᠦᠳᠡ ᠶ᠋ᠢ ᠬᠠᠷᠠᠬᠤ ᠳ᠋ᠤ᠌ ᠶᠠᠮᠠᠷ ᠴᠤ᠌ ᠠᠶᠤᠯ ᠲᠣᠬᠢᠶᠠᠯᠳᠤᠨ ᠤᠴᠠᠷᠠᠭᠠ ᠦᠭᠡᠢ ᠪᠠ ᠵᠡᠷᠯᠢᠭ ᠲᠠᠯᠠ ᠶ᠋ᠢᠨ ᠪᠠᠢᠯᠳᠤᠭᠠᠨ ᠴᠤ᠌ ᠪᠣᠯᠤᠭᠰᠠᠨ ᠦᠭᠡᠢ ᠮᠡᠲᠦ ᠴᠥᠮ ᠲᠠᠢᠪᠤᠩ ᠰᠠᠢᠬᠠᠨ ᠪᠠᠢᠵᠠᠢ᠃ ᠦᠰᠦᠲᠡᠢ ᠳᠡᠪᠡᠯ ᠦ᠋ᠨ ᠳᠡᠭᠡᠭᠦᠷ ᠲᠡᠮᠦᠷ ᠳᠤᠭᠤᠯᠠᠭᠠ ᠡᠮᠦᠰᠦᠭᠰᠡᠨ ᠮᠠᠨᠠᠭᠠᠨ ᠤ᠋ ᠬᠥᠮᠦᠰ ᠰᠡᠸᠧᠯᠢ ᠶ᠋ᠢ ᠬᠣᠲᠠ ᠶ᠋ᠢᠨ ᠬᠡᠷᠡᠮ ᠦ᠋ᠨ ᠨᠡᠭᠡᠭᠡᠯᠲᠡᠲᠡᠢ ᠬᠠᠭᠠᠯᠭᠠ ᠶ᠋ᠢᠨ ᠳᠡᠷᠭᠡᠳᠡ ᠵᠣᠭᠰᠣᠭᠠᠭᠠᠳ᠂
— ᠬᠡᠨ ᠪᠣᠢ? ᠬᠠᠮᠢᠭᠠ ᠠ᠋ᠴᠠ ᠪᠣᠢ? ᠶᠠᠮᠠᠷ ᠬᠡᠷᠡᠭ ᠢ᠋ᠶ᠋ᠡᠷ ᠷᠶᠡᠽᠡᠨ ᠳ᠋ᠦ᠍ ᠢᠷᠡᠪᠡ? ᠭᠡᠵᠦ ᠠᠰᠠᠭᠤᠵᠤ ᠢᠯᠳᠦ ᠪᠡᠨ ᠲᠤᠯᠵᠤ ᠬᠠᠭᠠᠯᠭᠠ ᠶ᠋ᠢ ᠬᠥᠨᠳᠡᠯᠢᠳᠦᠨ ᠵᠣᠭᠰᠣᠵᠠᠭᠠᠪᠠ᠃ ᠰᠡᠸᠧᠯᠢ ᠨᠢ ᠷᠶᠡᠽᠡᠨ ᠴᠡᠷᠢᠭ ᠦ᠋ᠨ ᠬᠣᠷᠢᠶᠠ ᠨᠤᠭᠤᠳ ᠢᠯᠠᠭᠳᠠᠵᠤ ᠳᠡᠢᠯᠦᠭᠳᠡᠭᠡᠳ ᠡᠵᠡᠭᠦᠢ ᠲᠠᠯᠠ ᠠ᠋ᠴᠠ ᠢᠷᠡᠭᠰᠡᠨ ᠪᠣᠯᠬᠤ ᠶ᠋ᠢ ᠲᠡᠷᠡ ᠮᠠᠨᠠᠭᠠᠨ ᠤ᠋ ᠬᠥᠮᠦᠰ ᠮᠡᠳᠡᠵᠦ ᠠᠪᠤᠭᠠᠳ ᠵᠠᠷᠯᠢᠭ ᠢ᠋ ᠳᠠᠭᠤᠳᠠᠵᠤ᠂ ᠰᠡᠸᠧᠯᠢ ᠶ᠋ᠢ ᠳᠠᠷᠤᠭᠠ ᠳ᠋ᠤ᠌ ᠬᠦᠷᠭᠡᠵᠦ ᠥᠭᠬᠦ ᠶ᠋ᠢ ᠲᠤᠰᠢᠶᠠᠪᠠ᠃ ᠬᠣᠲᠠ ᠶ᠋ᠢᠨ ᠭᠤᠳᠤᠮᠵᠢ ᠨᠤᠭᠤᠳ ᠢ᠋ᠶ᠋ᠠᠷ ᠲᠠᠷᠢᠶᠠ ᠪᠤᠳᠠᠭᠠ ᠪᠠ ᠲᠦᠯᠡᠭᠡ ᠲᠦᠯᠡᠰᠢ ᠠᠴᠢᠭᠰᠠᠨ ᠶᠡᠷᠦᠳᠡ ᠶ᠋ᠢᠨ ᠬᠥᠰᠬᠡ ᠲᠡᠷᠭᠡ ᠨᠤᠭᠦᠳ ᠪᠣᠯᠤᠨ ᠨᠡᠢᠰᠯᠡᠯ ᠬᠣᠲᠠ ᠶ᠋ᠢᠨ ᠬᠡᠷᠡᠮ ᠦ᠋ᠨ ᠴᠠᠭᠠᠨᠠ ᠠᠮᠢ ᠬᠣᠷᠭᠣᠳᠠᠬᠤ ᠶ᠋ᠢ ᠨᠠᠢᠳᠠᠵᠤ ᠣᠷᠣᠨ ᠨᠤᠲᠤᠭ ᠠ᠋ᠴᠠ ᠪᠠᠨ ᠵᠢᠭᠤᠲᠠᠵᠤ ᠢᠷᠡᠭᠰᠡᠨ ᠬᠥᠮᠦᠰ ᠦ᠋ᠨ ᠬᠣᠭᠰᠢᠯ ᠬᠥᠷᠥᠩᠭᠡ ᠶ᠋ᠢ ᠠᠴᠢᠭᠰᠠᠨ ᠬᠥᠰᠬᠡ ᠲᠡᠷᠭᠡ ᠨᠤᠭᠦᠳ ᠣᠯᠠᠨ ᠢ᠋ᠶ᠋ᠠᠷ ᠦᠵᠡᠭᠳᠡᠨᠡ᠃
ᠡᠪᠦᠭᠡᠨ ᠪᠤᠭᠤᠷᠤᠯ ᠳᠠᠷᠤᠭᠠ᠂ ᠳᠡᠪᠡᠯ ᠢ᠋ᠶ᠋ᠡᠨ ᠥᠷᠥᠭᠡᠰᠦᠨ ᠮᠥᠷᠦᠨ ᠳ᠋ᠡᠭᠡᠨ ᠨᠥᠮᠥᠷᠴᠦ ᠳ᠋ᠥ᠋ᠨᠵᠡᠨ ᠪᠠᠢᠰᠢᠩ ᠤ᠋ᠨ ᠱᠠᠲᠤᠨ ᠳᠡᠭᠡᠷᠡ ᠵᠣᠭᠰᠣᠵᠤ ᠲᠣᠯᠣᠭᠠᠢ ᠪᠠᠨ ᠤᠢᠳᠬᠠᠷ ᠲᠠᠢ ᠭᠠᠩᠬᠤᠯᠤᠨ ᠴᠡᠷᠢᠭ ᠦ᠋ᠨ ᠬᠡᠳᠦᠨ ᠬᠥᠮᠦᠰ ᠦ᠋ᠨ ᠬᠡᠯᠡᠬᠦ ᠶ᠋ᠢ ᠰᠣᠨᠣᠰᠴᠤ ᠪᠠᠢᠯᠠ᠃ ᠲᠡᠳᠡᠭᠡᠷ ᠴᠡᠷᠢᠭ ᠦ᠋ᠳ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠴᠢᠰᠤᠲᠠᠢ ᠳᠠᠪᠤᠤ ᠪᠠᠷ ᠥᠪᠡᠷᠰᠡᠳ ᠦ᠋ᠨ ᠰᠢᠷᠬᠠ ᠶ᠋ᠢ ᠪᠣᠭᠣᠭᠰᠠᠨ᠂ ᠵᠠᠷᠢᠮ ᠨᠢ ᠲᠣᠯᠣᠭᠠᠢ ᠳ᠋ᠠᠭᠠᠨ ᠰᠢᠷᠬᠠ ᠲᠠᠢ᠂ ᠵᠠᠷᠢᠮ ᠨᠢ ᠳᠠᠯᠤ ᠮᠥᠷᠥ ᠳ᠋ᠡᠭᠡᠨ ᠪᠤᠶᠤ ᠵᠠᠷᠢᠮ ᠨᠢ ᠬᠥᠯ ᠭᠠᠷ ᠲᠠᠭᠠᠨ ᠰᠢᠷᠬᠠ ᠲᠠᠢ ᠠᠵᠢ᠃
ᠬᠡᠴᠡᠭᠦᠦ ᠪᠡᠷᠬᠡ ᠪᠠᠢᠯᠠ ᠭᠡᠵᠦ ᠰᠠᠭᠰᠠᠢᠭᠰᠠᠨ ᠲᠣᠯᠣᠭᠠᠢ ᠪᠠᠨ ᠪᠣᠭᠣᠭᠰᠠᠨ ᠨᠢᠭᠡᠨ ᠨᠣᠣᠷᠠᠩᠬᠠᠢ ᠡᠷᠡ ᠶᠠᠷᠢᠵᠤ ᠪᠠᠢᠯᠠ᠃
— ᠪᠢᠳᠡ ᠴᠦ᠍ ᠶᠡᠬᠡᠯᠡ ᠰᠠᠢᠨ ᠪᠠᠢᠯᠳᠤᠭᠰᠠᠨ ᠶᠤᠮ᠃ ᠭᠡᠲᠡᠯᠡ ᠲᠠᠲ᠋ᠠᠷ ᠤ᠋ᠳ ᠬᠡᠲᠦᠷᠬᠡᠢ ᠣᠯᠠᠨ ᠪᠠᠢᠯᠠ᠃ ᠮᠠᠨ ᠤ᠋ ᠨᠢᠭᠡ ᠬᠥᠮᠦᠨ ᠢ᠋ ᠲᠡᠳᠡᠨ ᠦ᠌ ᠠᠷᠪᠠᠨ ᠬᠥᠮᠦᠨ ᠳᠠᠭᠠᠷᠢᠨ ᠢᠷᠡᠵᠦ ᠪᠠᠢᠪᠠ᠃ ᠲᠠᠢᠯᠵᠤ ᠣᠷᠬᠢᠭᠠᠳ ᠪᠢᠴᠢᠬᠠᠨ ᠠᠮᠠᠷᠠᠨᠠ ᠭᠡᠵᠦ ᠪᠣᠳᠣᠵᠤ ᠪᠠᠢᠲᠠᠯᠠ— ᠶᠠᠭᠤᠨ ᠠᠮᠠᠷᠠᠬᠤ— ᠦᠵᠡᠲᠡᠯᠡ ᠨᠥᠭᠦᠭᠡ ᠵᠣᠯᠢᠭ ᠤ᠋ᠳ ᠴᠢᠨᠢ ᠳᠠᠬᠢᠨ ᠳᠣᠪᠲᠣᠯᠵᠤ ᠢᠷᠡᠵᠡᠭᠡᠪᠡ᠃
— ᠬᠥᠶᠢ! ᠬᠥᠶᠢ! ᠣᠷᠣᠭᠰᠢ ᠪᠠᠨ ᠭᠡᠵᠦ ᠵᠢᠭᠲᠡᠢ ᠪᠡᠷ ᠬᠥᠮᠦᠨ ᠦ᠌ ᠪᠤᠰᠤ ᠳᠠᠭᠤ ᠪᠠᠷ ᠬᠠᠰᠬᠢᠷᠴᠠᠭᠠᠬᠤ ᠶᠤᠮ᠃ ᠪᠢᠳᠡ ᠣᠯᠠᠨ ᠢ᠋ ᠴᠠᠪᠴᠢᠯᠠᠨ ᠠᠯᠠᠭᠰᠠᠨ ᠪᠢᠯᠡ᠃ ᠮᠥᠨ ᠮᠠᠨ ᠤ᠋ ᠬᠢᠨ ᠴᠦ᠍ ᠦᠯᠡᠳᠡᠭᠰᠡᠨ ᠦᠭᠡᠢ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠲᠡᠨᠳᠡ ᠦᠬᠦᠵᠦ ᠬᠣᠴᠣᠷᠤᠯᠠ᠃ ᠪᠠᠰᠠ ᠮᠠᠨ ᠤ᠋ ᠨᠣᠶᠠᠨ ᠸᠠᠩ ᠶᠦᠷᠢ ᠢᠩᠭ᠌ᠸᠡᠷᠧᠸᠢᠴ ᠥᠪᠡᠷ ᠦ᠋ᠨ ᠲᠣᠯᠣᠭᠠᠢ ᠶ᠋ᠢ ᠵᠡᠷᠯᠢᠭ ᠲᠠᠯᠠ ᠳ᠋ᠤ᠌ ᠲᠠᠯᠪᠢᠯᠠ᠃
— ᠴᠢ ᠶᠠᠭᠠᠬᠢᠵᠤ ᠠᠮᠢ ᠭᠠᠷᠤᠭᠰᠠᠨ ᠪᠣᠢ?
— ᠰᠥᠨᠢ ᠪᠣᠯᠬᠤ ᠳ᠋ᠤ᠌ ᠲᠠᠲ᠋ᠠᠷ ᠤ᠋ᠳ ᠤ᠋ᠨ ᠴᠢᠮᠡᠭᠡ ᠨᠠᠮᠳᠠᠬᠤ ᠳ᠋ᠤ᠌ ᠪᠢ ᠵᠢᠯᠠᠭᠠᠨ ᠳ᠋ᠤ᠌ ᠣᠷᠣᠵᠤ ᠴᠠᠮᠴᠠ ᠪᠠᠷ ᠢ᠋ᠶ᠋ᠠᠨ ᠲᠣᠯᠣᠭᠠᠢ ᠪᠠᠨ ᠪᠣᠭᠣᠭᠠᠳ ᠴᠠᠰᠤᠨ ᠳᠣᠲᠣᠷᠠ ᠰᠢᠷᠭᠤᠵᠤ ᠬᠡᠪᠲᠡᠭᠰᠡᠨ ᠪᠢᠯᠡ᠃ ᠥᠷᠯᠥᠭᠡ ᠪᠣᠯᠣᠮᠠᠭᠴᠠ ᠴᠢᠨᠣᠠ ᠣᠯᠢᠵᠤ ᠪᠢ ᠤᠮᠠᠷᠠᠲᠤ ᠵᠦᠭ ᠴᠢᠭᠯᠡᠨ ᠫᠷᠣᠨᠰᠺᠢ ᠳ᠋ᠤ᠌ ᠣᠴᠢᠬᠤ ᠵᠠᠮ ᠢ᠋ ᠬᠣᠯᠠᠭᠤᠷ ᠲᠣᠭᠣᠷᠢᠨ ᠭᠠᠷᠴᠤ ᠶᠠᠪᠤᠲᠠᠯᠠ ᠵᠢᠭᠤᠲᠠᠵᠤ ᠶᠠᠪᠤᠭᠰᠠᠨ ᠬᠥᠮᠦᠰ ᠲᠡᠢ ᠲᠣᠬᠢᠶᠠᠯᠳᠤᠵᠤ ᠢᠷᠡᠯᠡ᠃ ᠳᠠᠷᠤᠭᠠ ᠦᠰᠦᠲᠡᠢ ᠮᠠᠯᠠᠭᠠᠢ ᠪᠠᠨ ᠠᠪᠴᠤ᠂ ᠶᠡᠬᠡ ᠰᠦᠮᠡ ᠶ᠋ᠢᠨ ᠠᠯᠲᠠᠨ ᠭᠠᠨᠵᠤᠤᠷ (ᠬᠡᠷᠡᠭᠡᠰᠦ) ᠲᠤ᠌ ᠶᠣᠰᠣᠯᠠᠨ ᠮᠥᠷᠭᠥᠭᠡᠳ᠂
— ᠲᠥᠷᠥᠭᠰᠡᠨ ᠨᠤᠲᠤᠭ ᠡᠬᠡ ᠣᠷᠣᠨ ᠤ᠋ ᠪᠠᠨ ᠲᠥᠯᠥᠭᠡᠨᠡ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠨᠠᠰᠤ ᠪᠠᠷᠠᠭᠰᠠᠨ ᠬᠥᠮᠦᠰ ᠦ᠋ᠨ ᠡᠭᠦᠷᠢᠳᠡ ᠶ᠋ᠢᠨ ᠳᠤᠷᠠᠰᠬᠠᠯ ᠪᠠᠲᠤ ᠣᠷᠣᠰᠢᠲᠤᠭᠠᠢ! ᠵᠡᠷᠯᠢᠭ ᠲᠠᠯᠠ ᠳ᠋ᠤ᠌ ᠠᠰᠬᠠᠷᠠᠭᠰᠠᠨ ᠲᠡᠷᠡ ᠶᠡᠬᠡ ᠴᠢᠰᠤ ᠶ᠋ᠢ ᠮᠠᠨ ᠤ᠋ ᠦᠷᠡ ᠠᠴᠢ ᠨᠠᠷ ᠬᠡᠵᠢᠶᠡ ᠴᠦ᠍ ᠮᠠᠷᠲᠠᠬᠤ ᠦᠭᠡᠢ᠃ ᠪᠢᠳᠡ ᠲᠠᠲ᠋ᠠᠷ ᠤ᠋ᠳ ᠢ᠋ ᠳᠣᠪᠲᠣᠯᠤᠭᠰᠠᠨ ᠪᠢᠰᠢ! ᠬᠠᠷᠢᠨ ᠲᠡᠳᠡ ᠨᠠᠷ ᠮᠠᠨ ᠤ᠋ ᠣᠷᠣᠨ ᠰᠠᠭᠤᠴᠠ ᠶ᠋ᠢ ᠰᠢᠲᠠᠭᠠᠵᠤ᠂ ᠮᠠᠨ ᠤ᠋ ᠠᠭᠲᠠ ᠮᠣᠷᠢᠳ ᠢ᠋ ᠳᠡᠭᠡᠷᠡᠮᠳᠡᠨ ᠠᠪᠬᠤ ᠪᠠᠷ ᠳᠣᠪᠲᠣᠯᠤᠨ ᠢᠷᠡᠭᠰᠡᠨ ᠶᠤᠮ᠃ ᠮᠥᠨ ᠯᠡ ᠲᠡᠳᠡᠨᠡᠷ ᠮᠠᠨ ᠤ᠋ ᠲᠠᠷᠢᠶᠠᠴᠢᠳ ᠢ᠋ ᠬᠢᠳᠤᠵᠤ ᠮᠠᠨ ᠤ᠋ ᠡᠮᠡᠰ ᠬᠡᠦᠬᠡᠳ ᠢ᠋ ᠬᠦᠴᠦᠷᠬᠡᠨ ᠪᠤᠵᠠᠷᠲᠤᠭᠤᠯᠬᠤ ᠶ᠋ᠢ ᠬᠦᠰᠡᠵᠦ ᠪᠠᠢᠨᠠ᠃ ᠠᠬᠠ ᠳᠡᠭᠦᠦ ᠨᠠᠷ ᠮᠢᠨᠢ ᠠ᠋!
— ᠪᠢᠳᠡ ᠲᠤᠯᠤᠯᠳᠤᠨᠠ ᠰᠢᠦ᠃ ᠪᠢᠳᠡ ᠲᠥᠷᠥᠭᠰᠡᠨ ᠣᠷᠣᠨ ᠨᠤᠲᠤᠭ ᠢ᠋ᠶ᠋ᠠᠨ ᠥᠭᠬᠦ ᠦᠭᠡᠢ ᠰᠢᠦ! ᠭᠡᠵᠦ ᠴᠢᠩᠭᠠ ᠪᠠᠷ ᠬᠡᠯᠡᠯᠡ᠃ ᠬᠥᠮᠦᠨ ᠪᠦᠬᠦᠨ ᠦ᠌ ᠴᠢᠷᠠᠢ ᠳ᠋ᠤ᠌ ᠬᠠᠲᠠᠭᠤ ᠵᠣᠷᠢᠭᠲᠤ ᠰᠢᠢᠳᠪᠦᠷᠢ ᠢᠯᠡᠷᠬᠡᠢ ᠪᠠᠢᠨᠠ᠃
—ᠪᠢᠳᠡ ᠪᠤᠴᠠᠵᠤ ᠨᠢᠴᠤᠬᠤ ᠦᠭᠡᠢ! ᠪᠢᠳᠡ ᠪᠠᠢᠯᠳᠤᠨᠠ! ᠭᠡᠵᠦ ᠨᠢᠭᠡ ᠬᠥᠮᠦᠨ ᠬᠡᠯᠡᠬᠦ ᠳ᠋ᠦ᠍᠂
— ᠪᠢᠳᠡᠨᠡᠷ ᠦᠬᠦᠪᠡᠴᠦ ᠪᠢᠳᠡᠨ ᠦ᠌ ᠦᠷᠡ ᠠᠴᠢᠨᠠᠷ ᠣᠢ ᠬᠥᠪᠴᠢ ᠳ᠋ᠦ᠍ ᠦᠯᠡᠳᠡᠵᠦ ᠬᠣᠴᠣᠷᠤᠭᠠᠳ ᠥᠰᠴᠦ ᠲᠣᠷᠨᠢᠭᠰᠠᠨ ᠬᠣᠢᠨᠠ ᠪᠠᠨ ᠪᠠᠲᠤ ᠬᠠᠭᠠᠨ ᠤ᠋ ᠬᠥᠪᠡᠭᠦᠳ ᠲᠤ᠌ ᠬᠠᠷᠢᠭᠤ ᠥᠭᠬᠦ ᠡᠭᠡᠯᠵᠢ ᠪᠣᠢ᠃ ᠪᠣᠳᠣᠪᠠᠯ ᠲᠠᠲ᠋ᠠᠷ ᠤ᠋ᠳ ᠮᠥᠳᠳᠥ ᠨᠡᠰᠢ ᠢᠷᠡᠵᠦ ᠷᠶᠡᠽᠡᠨ ᠦ᠌ ᠬᠡᠷᠡᠮ ᠢ᠋ ᠳᠣᠪᠲᠣᠯᠤᠨᠠ ᠪᠢᠵᠡ ᠠ᠋! ᠲᠡᠳᠡᠨᠡᠷ ᠬᠡᠷᠴᠡᠭᠡᠢ ᠪᠠ ᠲᠦᠷᠢᠮᠡᠬᠡᠢ ᠲᠤᠯᠠ ᠪᠠᠰᠠ ᠨᠡᠰᠢ ᠰᠦᠽᠳ᠋ᠠᠯᠢ᠂ ᠷᠣᠰᠲ᠋ᠣᠸ ᠪᠠ ᠨᠣᠸᠤᠭᠤᠷᠤᠳ᠋ ᠢ᠋ ᠴᠦ᠍ ᠳᠣᠪᠲᠣᠯᠬᠤ ᠪᠢᠵᠡ ᠠ᠋? ᠲᠡᠢᠮᠦ ᠪᠣᠯᠪᠠᠴᠤ ᠲᠡᠳᠡᠨᠡᠷ ᠲᠡᠨᠳᠡ ᠤᠳᠠᠭᠠᠨ ᠢ᠋ᠶ᠋ᠠᠷ ᠣᠷᠣᠰᠢᠵᠤ ᠰᠠᠭᠤᠬᠤ ᠪᠣᠯ ᠤᠤ ᠳ᠋ᠠ? ᠪᠢᠳᠡ ᠵᠡᠷᠯᠢᠭ ᠭᠠᠵᠠᠷ ᠢ᠋ ᠬᠠᠭᠠᠯᠵᠤ ᠨᠠᠮᠤᠭ ᠲᠠᠢ ᠭᠠᠵᠠᠷ ᠢ᠋ ᠬᠠᠲᠠᠭᠠᠭᠰᠠᠨ ᠪᠢᠯᠡ᠃
— ᠡᠷᠲᠡ ᠴᠠᠭ ᠤ᠋ᠨ ᠣᠢ ᠮᠣᠳᠣ ᠨᠤᠭᠤᠳ ᠪᠣᠯᠤᠨ ᠬᠡᠳᠦᠨ ᠵᠠᠭᠤᠨ ᠵᠢᠯ ᠦ᠋ᠨ ᠨᠠᠰᠤᠲᠠᠢ ᠤᠭ ᠦᠨᠳᠦᠰᠦ ᠨᠤᠭᠦᠳ ᠢ᠋ ᠮᠥᠨ ᠯᠡ ᠪᠢᠳᠡ ᠴᠠᠪᠴᠢᠵᠤ ᠴᠡᠪᠡᠷᠯᠡᠭᠰᠡᠨ ᠪᠢᠯᠡ᠃ ᠲᠠᠲ᠋ᠠᠷ ᠤ᠋ᠳ ᠲᠤ᠌ ᠡᠨᠳᠡ ᠲᠡᠳᠦᠢ ᠯᠡ ᠲᠠᠭᠠᠯᠠᠮᠵᠢᠲᠠᠢ ᠪᠢᠰᠢ ᠪᠣᠯᠤᠨᠠ ᠳ᠋ᠠ᠃ ᠲᠡᠳᠡᠨᠡᠷ ᠬᠤᠢ ᠰᠠᠯᠬᠢ ᠮᠡᠲᠦ ᠵᠠᠮ ᠢ᠋ᠶ᠋ᠠᠷ ᠳᠠᠪᠬᠢᠵᠠᠭᠠᠵᠤ ᠡᠮᠡᠰ ᠦ᠋ᠳ ᠦ᠋ᠨ ᠴᠡᠭᠡᠵᠢᠪᠴᠢ ᠳᠡᠪᠡᠯ ᠬᠤᠪᠴᠠᠰᠤ ᠶ᠋ᠢ ᠪᠤᠯᠢᠶᠠᠨ ᠠᠪᠤᠭᠠᠳ ᠳᠠᠷᠠᠭᠠ ᠳ᠋ᠤᠨᠢ ᠬᠡᠵᠢᠶᠡᠳᠡ ᠥᠪᠡᠷᠰᠡᠳ ᠦ᠋ᠨ ᠲᠠᠯᠠ ᠳ᠋ᠤ᠌ ᠡᠷᠭᠢᠵᠦ ᠪᠤᠴᠠᠨᠠ᠃ ᠲᠡᠳᠡᠨᠡᠷ ᠦ᠋ᠨ ᠮᠣᠷᠢᠳ ᠬᠥᠯ ᠬᠥᠩᠭᠡᠨ ᠲᠡᠢ ᠪᠠ ᠰᠢᠷᠠᠯᠵᠢ ᠡᠪᠡᠰᠦᠨ ᠳ᠋ᠦ᠍ ᠳᠠᠳᠤᠭᠰᠠᠨ ᠲᠤᠯᠠ ᠨᠠᠮᠤᠭᠲᠤ ᠭᠠᠵᠠᠷ ᠲᠤ᠌ ᠬᠠᠲᠠᠵᠤ ᠬᠤᠪᠠᠬᠠᠢᠷᠠᠨ ᠮᠠᠨ ᠤ᠋ ᠠᠮᠢᠳᠤᠷᠠᠯ ᠤ᠋ᠨ ᠭᠣᠣᠯ ᠪᠣᠯᠤᠭᠰᠠᠨ ᠠᠨᠵᠢᠰᠤ ᠶ᠋ᠢ ᠴᠢᠷᠴᠦ ᠴᠢᠳᠠᠬᠤ ᠦᠭᠡᠢ᠃ ᠠᠬᠠ ᠳᠡᠭᠦᠦ ᠨᠠᠷ ᠮᠢᠨᠢ ᠠ᠋! ᠨᠥᠬᠥᠳ ᠮᠢᠨᠢ! ᠭᠠᠷ ᠢ᠋ᠶ᠋ᠠᠨ ᠪᠤᠤ ᠰᠤᠯᠠᠷᠠᠭᠤᠯᠤᠭᠲᠤᠨ! ᠰᠦᠬᠡ ᠨᠦ᠍ᠭᠦᠳ ᠢ᠋ᠶ᠋ᠡᠨ ᠴᠢᠩᠭᠠ ᠪᠠᠷᠢᠭᠲᠤᠨ! ᠷᠶᠡᠽᠡᠨ ᠦ᠌ ᠬᠡᠷᠡᠮ ᠦ᠋ᠨ ᠳᠡᠭᠡᠷᠡ ᠭᠠᠷᠴᠠᠭᠠᠭᠲᠤᠨ! ᠪᠢᠳᠡ ᠰᠢᠷᠭᠠᠭᠤ ᠪᠠᠷ ᠪᠠᠢᠯᠳᠤᠵᠤ ᠴᠢᠳᠠᠨᠠ! ᠪᠢᠳᠡ ᠳᠠᠢᠰᠤᠨ ᠢ᠋ ᠨᠢᠴᠤᠭᠠᠵᠤ ᠴᠢᠳᠠᠨᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠠᠯᠲᠠᠨᠴᠢᠮᠡᠭ·ᠮᠡᠷᠭᠡᠨᠭᠣᠣᠠ· ᠵᠢᠩᠯᠢᠬᠤᠸᠠᠷ· ᠪᠠᠶᠠᠨᠴᠡᠴᠡᠭ
ᠬᠢᠨᠠᠭᠴᠢ᠄ ᠠᠯᠲᠠᠨᠴᠢᠮᠡᠭ᠂ ᠭᠡᠷᠡᠯ᠂ ᠠᠷᠢᠭᠤᠨ᠂ ᠪᠠᠶᠠᠨᠴᠡᠴᠡᠭ᠂ ᠠᠯᠲᠠᠨᠴᠢᠮᠡᠭ᠂ ᠠᠷᠢᠭᠤᠨ