ᠪᠠᠲᠤ ᠬᠠᠭᠠᠨ 3-06ᠷᠶᠡᠽᠡᠨ ᠦ᠌ ᠬᠤᠷᠠᠯ-ᠮᠣᠩᠭᠣᠯᠴᠤᠳ ᠣᠷᠣᠰ ᠲᠡᠰᠢ ᠬᠥᠳᠡᠯᠪᠡ-Bat khaan Бат хаан-ᠷᠣᠮᠠᠨ
68ᠵᠢᠷᠭᠤᠭᠠ ᠷᠶᠡᠽᠡᠨ ᠦ᠌ ᠬᠤᠷᠠᠯ
ᠴᠡᠴᠡᠭᠯᠡᠨ ᠪᠠᠢᠭᠰᠠᠨ ᠠᠯᠳᠠᠷ ᠤ᠋ᠨ ᠴᠢᠨᠢ ᠦᠶᠡ ᠬᠠᠮᠢᠭᠠ ᠣᠴᠢᠪᠠ? ᠴᠢᠨᠦ ᠳᠠᠭᠤ ᠨᠣᠶᠠᠨ ᠤ᠋ ᠲᠠᠰᠢᠭᠤᠷ᠂ ᠱᠤᠤᠭᠢᠶᠠᠨ ᠲᠠᠢ ᠬᠤᠷᠠᠯ ᠳᠡᠭᠡᠷᠡ
ᠵᠡᠰ ᠮᠡᠲᠦ ᠬᠠᠩᠭᠢᠨᠠᠵᠤ ᠪᠠᠢᠭᠰᠠᠨ ᠪᠢᠵᠡ? ᠳᠤᠭᠤᠯᠭᠠᠪᠤᠷᠢᠲᠠᠢ ᠬᠥᠪᠡᠭᠦᠳ ᠢ᠋ᠶ᠋ᠡᠨ ᠰᠢᠭᠦᠬᠦ ᠳ᠋ᠦ᠍ ᠳᠠᠭᠤᠳᠠᠪᠠᠤ᠂ ᠡᠰᠡᠬᠦᠯᠡ ᠴᠢᠰᠤᠲᠤ
ᠵᠣᠳᠣᠯᠳᠤᠭᠠᠨ ᠳ᠋ᠤ᠌ ᠳᠠᠭᠤᠳᠠᠪᠠᠤ? ᠠᠯᠢ ᠨᠢ ᠪᠣᠯᠬᠤ ᠶ᠋ᠢ ᠠᠭᠤᠤ ᠶᠡᠬᠡ ᠬᠣᠲᠠ ᠴᠢ ᠬᠠᠷᠢᠭᠤᠯᠵᠤ ᠠᠯᠢ!
(ᠳ᠂ ᠮ᠂ ᠸᠸᠨ᠋ᠸᠸᠢᠲ᠋ᠢᠺᠣᠸ)
ᠬᠤᠷᠠᠯ ᠤ᠋ᠨ ᠬᠤᠩᠬᠠ ᠥᠷᠯᠥᠭᠡᠭᠦᠷ ᠬᠠᠩᠭᠢᠨᠠᠵᠤ ᠠᠷᠠᠳ ᠤ᠋ᠳ ᠢ᠋( ᠤᠨ)ᠴᠤᠭᠯᠠᠷᠠᠬᠤ ᠶ᠋ᠢ ᠳᠠᠭᠤᠳᠠᠪᠠ᠃ ᠲᠣᠭᠲᠠᠭᠤᠬᠠᠨ ᠬᠦᠢᠲᠡᠨ ᠠᠭᠠᠷ ᠲᠸ᠋ ᠥᠳᠬᠡᠨ ᠤᠷᠲᠤ ᠲᠠᠲᠠᠭᠰᠠᠨ ᠳᠠᠭᠤ ᠲᠠᠢ ᠬᠤᠩᠬᠠ ᠣᠷᠴᠢᠨ ᠲᠣᠭᠣᠷᠢᠨ ᠢ᠋ ᠰᠣᠴᠢᠭᠠᠵᠤ ᠪᠠᠢᠯᠠ᠃ ᠬᠣᠯᠠ ᠬᠥᠳᠡᠭᠡ ᠬᠦᠷᠲᠡᠯᠡ ᠰᠣᠨᠣᠰᠤᠭᠳᠠᠭᠰᠠᠨ ᠲᠤᠯᠠ ᠬᠥᠮᠦᠰ ᠱᠠᠲᠤᠨ ᠳᠡᠭᠡᠷᠡ ᠭᠠᠷᠴᠤ ᠰᠣᠨᠣᠰᠤᠭᠠᠳ᠂ ᠳᠡᠪᠡᠯ ᠮᠠᠯᠠᠭᠠᠢ ᠪᠠᠨ ᠲᠦᠷᠭᠡᠨ ᠡᠮᠦᠰᠴᠦ ᠶᠠᠪᠤᠵᠠᠭᠠᠨᠠ᠃ ᠭᠣᠣᠯ ᠤ᠋ᠨ ᠬᠣᠶᠠᠷ ᠡᠷᠭᠢ ᠳᠠᠭᠠᠤ ᠴᠠᠰᠤᠨ ᠳᠡᠭᠡᠷᠡ ᠬᠣᠲᠠ ᠣᠷᠣᠬᠤ ᠪᠠᠷ ᠶᠠᠪᠤᠬᠤ ᠲᠠᠷᠢᠶᠠᠴᠢᠳ ᠦᠵᠡᠭᠳᠡᠵᠦ ᠪᠠᠢᠯᠠ᠃
— ᠬᠤᠷᠠᠯ ᠤ᠋ᠨ ᠬᠤᠩᠬᠠ ᠴᠣᠬᠢᠬᠤ ᠶ᠋ᠢ ᠰᠣᠨᠣᠰᠪᠠᠤ? ᠨᠢᠭᠡ ᠶᠠᠭᠤᠮᠠ ᠪᠣᠯᠵᠤ ᠳ᠋ᠠ ᠭᠡᠵᠦ ᠲᠠᠷᠢᠶᠠᠴᠢᠳ ᠬᠣᠭᠣᠷᠣᠨᠳᠣ ᠪᠠᠨ ᠶᠠᠷᠢᠯᠴᠠᠨ ᠶᠠᠪᠤᠨᠠ᠃
ᠬᠠᠭᠤᠴᠢᠨ ᠷᠶᠡᠽᠡᠨ᠂ ᠤᠺᠠ ᠭᠣᠣᠯ ᠤ᠋ᠨ ᠥᠨᠳᠥᠷ ᠡᠭᠴᠡ ᠡᠷᠭᠢᠨ ᠳᠡᠭᠡᠷᠡ ᠴᠠᠰᠤᠨ ᠳ᠋ᠤ᠌ ᠪᠤᠯᠠᠭᠳᠠᠭᠰᠠᠨ ᠲᠤᠯᠠ ᠮᠥᠩᠭᠥᠨ ᠥᠩᠭᠡᠲᠡᠢ ᠬᠠᠷᠠᠭᠳᠠᠨᠠ᠃ ᠥᠨᠳᠥᠷ ᠰᠢᠪᠡᠷ ᠬᠡᠷᠡᠮ ᠬᠣᠲᠠ ᠶ᠋ᠢ ᠲᠣᠭᠣᠷᠢᠨᠠ᠃ ᠬᠣᠲᠠ ᠶ᠋ᠢ ᠬᠦᠷᠢᠶᠡᠯᠡᠭᠰᠡᠨ ᠳᠣᠲᠣᠭᠠᠳᠤ ᠬᠡᠷᠡᠮ ᠢ᠋ ᠵᠠᠭᠤᠨ ᠵᠢᠯ ᠦ᠋ᠨ ᠴᠠᠷᠠᠰᠤ ᠮᠣᠳᠣ ᠪᠠᠷ ᠬᠠᠷᠠᠭᠤᠯ ᠤ᠋ᠨ ᠴᠠᠮᠬᠠᠭ ᠪᠡᠬᠢᠯᠡᠯᠲᠡ ᠶ᠋ᠢᠨ ᠬᠠᠮᠲᠤ ᠪᠠᠷᠢᠵᠤ ᠪᠤᠰᠬᠠᠭᠰᠠᠨ ᠲᠤᠯᠠ ᠷᠶᠡᠽᠡᠨ ᠰᠦᠷᠲᠡᠢ ᠪᠠᠲᠤ ᠴᠠᠢᠵᠠ ᠪᠠᠢᠵᠠᠢ᠃ ᠡᠨᠡ ᠷᠶᠡᠽᠡᠨ ᠬᠣᠲᠠ ᠶ᠋ᠢ ᠶᠠᠭᠤ ᠰᠦᠷᠳᠡᠭᠦᠯᠬᠦ ᠶᠤᠮ ᠪᠣᠢ? ᠶᠠᠭᠤᠨ ᠳ᠋ᠤ᠌ ᠢᠩᠭᠢᠵᠦ ᠬᠤᠷᠠᠯ ᠤ᠋ᠨ ᠭᠠᠤᠯᠢᠨ ᠬᠤᠩᠬᠠ ᠲᠠᠰᠤᠷᠠᠯᠲᠠ ᠦᠭᠡᠢ ᠳᠤᠤᠭᠠᠷᠤᠨᠠ ᠪᠣᠢ? ᠳᠠᠬᠢᠭᠠᠳ ᠸᠠᠩ ᠤ᠋ᠨ ᠪᠤᠳᠤᠯᠢᠶᠠᠨ ᠲᠠᠩᠳᠠᠪᠠᠤ? ᠳᠠᠬᠢᠭᠠᠳ ᠲᠠᠷᠢᠶᠠᠴᠢᠳ ᠢ᠋ ᠶᠠᠪᠤᠭᠤᠯᠵᠤ ᠨᠢᠭᠡ ᠨᠢᠭᠡᠨ ᠲᠡᠢ ᠨᠢ ᠠᠷᠪᠠᠨ ᠵᠢᠯ ᠦ᠋ᠨ ᠡᠮᠦᠨᠡ ᠯᠢᠫᠢᠼ ᠭᠣᠣᠯ ᠳᠡᠭᠡᠷᠡ ᠴᠣᠬᠢᠭᠤᠯᠤᠭᠰᠠᠨ ᠲᠠᠢ ᠠᠳᠠᠯᠢ ᠴᠣᠬᠢᠭᠤᠯᠬᠤ ᠭᠡᠪᠡ ᠤᠤ? ᠡᠨᠡ ᠪᠦᠬᠦᠨ ᠶᠠᠭᠤᠨ ᠤ᠋ ᠲᠥᠯᠥᠭᠡ ᠶᠤᠮ ᠪᠣᠢ? ᠥᠪᠡᠷ ᠦ᠋ᠨ ᠬᠦᠵᠦᠭᠦᠨ ᠳᠡᠭᠡᠷᠡ ᠡᠴᠡ ᠨᠢᠭᠡ ᠸᠠᠩ ᠢ᠋ ᠲᠦᠯᠬᠢᠵᠦ ᠤᠨᠠᠭᠠᠭᠠᠳ ᠳᠠᠬᠢᠭᠠᠳ ᠨᠢᠭᠡ ᠶ᠋ᠢ ᠰᠠᠭᠤᠯᠭᠠᠬᠤ ᠶ᠋ᠢᠨ ᠲᠤᠯᠠᠳᠠ ᠤᠤ? ᠸᠠᠩ ᠤ᠋ᠳ ᠬᠣᠭᠣᠷᠣᠨᠳᠣ ᠪᠠᠨ ᠵᠠᠨᠴᠢᠯᠳᠤᠪᠠᠯ ᠵᠠᠨᠴᠢᠯᠳᠤᠭ! ᠲᠠᠷᠢᠶᠠᠴᠢᠳ ᠢ᠋ ᠶᠠᠭᠠᠬᠢᠬᠤ ᠭᠡᠵᠦ ᠬᠢᠳᠤᠯᠭᠠ ᠶ᠋ᠢᠨ ᠭᠠᠵᠠᠷ ᠲᠠᠭᠤᠵᠤ ᠠᠪᠴᠢᠷᠠᠨᠠ ᠪᠣᠢ? ᠹᠤᠲ᠋ᠢᠶᠠᠨᠤᠸ ᠪᠠᠭᠠᠨᠠ ᠶ᠋ᠢᠨ ᠳᠡᠷᠭᠡᠳᠡᠬᠢ ᠰᠤᠺᠤᠯᠢᠶᠠᠢ ᠠᠭᠤᠯᠠ ᠳᠡᠭᠡᠷᠡᠬᠢ ᠲᠠᠯᠠᠪᠠᠢ ᠤᠷᠢᠳᠤ ᠵᠡᠭᠡᠯᠢ ᠶ᠋ᠢᠨ ᠶᠠᠮᠠᠷ ᠪᠠᠢᠳᠠᠭᠴᠢᠯᠠᠨ ᠲᠠᠷᠢᠶᠠ ᠭᠤᠷᠢᠯ( ᠭᠤᠯᠢᠷ)᠂ ᠬᠥᠯᠳᠡᠭᠰᠡᠨ ᠭᠠᠬᠠᠢ ᠪᠣᠯᠤᠨ ᠲᠤᠭᠤᠯ ᠤ᠋ᠨ ᠮᠢᠬᠠ᠂ ᠰᠢᠪᠠᠷ ᠰᠠᠪᠠ᠂ ᠮᠣᠳᠣᠨ ᠬᠤᠪᠢᠩ ᠪᠣᠯᠤᠨ ᠪᠤᠰᠤᠳ ᠶᠠᠭᠤᠮᠠᠰ ᠢ᠋ ᠠᠴᠢᠭᠰᠠᠨ ᠲᠠᠷᠢᠶᠠᠴᠢᠳ ᠤ᠋ᠨ ᠲᠡᠷᠭᠡ ᠪᠡᠷ ᠳᠦᠭᠦᠷᠡᠩ ᠪᠠᠢᠪᠠᠴᠤ ᠡᠨᠡ ᠡᠳᠦᠷ ᠵᠡᠭᠡᠯᠢ ᠶ᠋ᠢᠨ ᠲᠠᠯᠠᠪᠠᠢ ᠳ᠋ᠤ᠌ ᠴᠤᠭᠯᠠᠷᠠᠭᠰᠠᠨ ᠬᠥᠮᠦᠨ ᠨᠡᠩ ᠣᠯᠠᠨ ᠲᠤᠯᠠ ᠲᠠᠷᠢᠶᠠᠴᠢᠳ ᠤ᠋ᠨ ᠠᠵᠢᠯᠯᠠᠭᠠ ᠲᠠᠢ ᠲᠡᠷᠭᠡ ᠨᠦ᠍ᠭᠦᠳ ᠬᠠᠯᠬᠠᠯᠠᠭᠳᠠᠵᠤ ᠦᠵᠡᠭᠳᠡᠬᠦ ᠶ᠋ᠢ ᠪᠣᠯᠢᠵᠠᠢ᠃
ᠲᠠᠷᠢᠶᠠᠴᠢᠳ ᠪᠣᠯᠤᠨ ᠬᠣᠲᠠ ᠶ᠋ᠢᠨ ᠪᠦᠰᠡᠭᠦᠢᠴᠦᠳ ᠲᠠᠯᠠᠪᠠᠢ ᠶ᠋ᠢᠨ ᠵᠦᠭ ᠪᠦᠬᠦᠨ ᠡᠴᠡ ᠢᠷᠡᠵᠦ᠂ ᠬᠤᠷᠠᠯᠳᠤᠭᠠᠨ ᠤ᠋ ᠰᠦᠮᠡ ᠶ᠋ᠢᠨ ᠡᠮᠦᠨᠡ ᠠᠭᠤᠯᠵᠠᠭᠤᠷ ᠳᠡᠭᠡᠷᠡ ᠬᠦᠷᠦᠯᠴᠡᠨ ᠣᠴᠢᠭᠠᠳ ᠸᠠᠩ᠂ ᠬᠠᠲᠤᠨ ᠤ᠋ ᠬᠦᠷᠴᠦ ᠢᠷᠡᠳᠡᠭ ᠭᠠᠵᠠᠷ ᠣᠢᠷᠠᠲᠤᠬᠤ ᠶ᠋ᠢ ᠣᠷᠣᠯᠳᠣᠨᠠ᠃ ᠳ᠋ᠢᠺᠦᠷᠣᠰ ᠪᠠ ᠲᠡᠭᠦᠨ ᠦ᠌ ᠫᠸᠷᠦᠨᠣᠸ ᠣᠢ ᠠ᠋ᠴᠠ ᠬᠠᠮᠲᠤ ᠢᠷᠡᠭᠰᠡᠨ ᠬᠥᠮᠦᠰ ᠬᠠᠮᠤᠭ ᠤ᠋ᠨ ᠤᠷᠢᠳ ᠬᠦᠷᠴᠦ ᠢᠷᠡᠪᠡᠯ ᠬᠣᠶᠠᠷ ᠵᠠᠯᠠᠭᠤ ᠬᠥᠮᠦᠨ ᠮᠠᠯᠠᠭᠠᠢ ᠪᠠᠨ ᠭᠡᠳᠡᠷᠭᠦ ᠲᠠᠯᠪᠢᠵᠤ ᠳᠡᠪᠡᠯ ᠢ᠋ᠶ᠋ᠡᠨ ᠵᠠᠳᠠᠭᠠᠢᠯᠠᠭᠠᠳ ᠰᠦᠮᠡ ᠶ᠋ᠢᠨ ᠮᠣᠳᠣᠨ ᠪᠠᠭᠠᠨᠠ ᠠ᠋ᠴᠠ ᠪᠡᠬᠢᠯᠡᠭᠰᠡᠨ ᠲᠣᠮᠣ ᠭᠠᠤᠯᠢ ᠶ᠋ᠢᠨ ᠬᠣᠩᠬᠠᠨ ᠤ᠋ ᠲᠡᠮᠦᠷ ᠬᠡᠯᠡ ᠶ᠋ᠢ ᠵᠠᠢᠮᠤᠷᠠᠭᠤᠯᠤᠨ ᠬᠤᠩᠬᠠ ᠶ᠋ᠢ ᠳᠤᠤᠭᠠᠷᠭᠠᠵᠤ ᠪᠠᠢᠬᠤ ᠨᠢ ᠦᠵᠡᠭᠳᠡᠪᠡ᠃ ᠵᠢᠵᠢᠭ ᠬᠤᠩᠬᠠ ᠨᠤᠭᠤᠳ ᠤ᠋ᠨ ᠳᠠᠭᠤ ᠲᠠᠰᠤᠷᠠᠭᠰᠠᠨ ᠤ᠋ ᠳᠠᠷᠠᠭᠠ ᠰᠦᠮᠡ ᠳᠣᠲᠣᠷᠠ ᠠ᠋ᠴᠠ ᠭᠡᠵᠢᠭᠡ ᠪᠡᠨ ᠬᠦᠷᠦᠭᠰᠡᠨ ᠵᠠᠷᠤᠴᠠ ᠬᠡᠦᠬᠡᠨ ᠨᠦ᠍ᠭᠦᠳ ᠭᠦᠶᠦᠨ ᠭᠠᠷᠴᠤ ᠢᠷᠡᠭᠡᠳ ᠵᠠᠯᠠᠭᠤ ᠬᠣᠩᠬᠠᠴᠢᠨ ᠨᠤᠭᠤᠳ ᠲᠸ᠋ ᠤᠯᠠᠭᠠᠨ ᠠᠯᠴᠢᠭᠤᠷ ᠢ᠋ᠶ᠋ᠠᠷ ᠲᠣᠬᠢᠬᠤ ᠳ᠋ᠤ᠌ ᠬᠤᠩᠬᠠ ᠴᠣᠬᠢᠬᠤ ᠶ᠋ᠢ ᠪᠣᠯᠢᠵᠤ ᠲᠡᠳᠡ ᠮᠠᠩᠨᠠᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠥᠯᠥᠰᠥ ᠶ᠋ᠢ ᠠᠷᠴᠢᠪᠠ᠃
ᠣᠯᠠᠨ ᠬᠥᠮᠦᠰ ᠤᠯᠠᠮ ᠤᠷᠤᠭᠰᠢ ᠰᠢᠬᠠᠯᠴᠠᠯᠳᠤᠬᠣ ᠲᠤᠯᠠ ᠲᠠᠷᠢᠶᠠᠴᠢᠳ ᠠᠴᠢᠶᠠᠨ ᠳᠡᠭᠡᠷᠡ ᠭᠠᠷᠴᠤ ᠰᠠᠭᠤᠵᠠᠭᠠᠪᠠ᠃ ᠵᠠᠷᠢᠮ ᠨᠢ ᠮᠣᠷᠢᠨ ᠳᠡᠭᠡᠷᠡ ᠴᠥ᠍ ᠮᠣᠷᠳᠠᠬᠤ ᠦᠵᠡᠭᠳᠡᠨᠡ᠃ ᠶᠠᠭᠤᠨ ᠳ᠋ᠤ᠌ ᠠᠷᠠᠳ ᠣᠯᠠᠨ ᠢ᠋ ᠳᠠᠭᠤᠳᠠᠭᠰᠠᠨ ᠲᠤᠬᠠᠢ ᠴᠥᠮ ᠢ᠋ᠶ᠋ᠡᠷ ᠰᠣᠨᠢᠷᠬᠠᠨᠠ᠃ ᠰᠦᠮᠡ ᠡᠴᠡ ᠤᠷᠲᠤ ᠪᠠᠷ ᠲᠠᠲᠠᠭᠰᠠᠨ ᠠᠶᠠᠯᠭᠤ ᠲᠠᠢ ᠳᠠᠭᠤᠤ ᠪᠠᠨ ᠳᠠᠭᠤᠯᠠᠭᠰᠠᠨ ᠮᠥᠷᠭᠥᠯ ᠦ᠋ᠨ ᠳᠠᠭᠤᠴᠢᠳ ᠭᠠᠷᠴᠤ ᠢᠷᠡᠪᠡ᠃ ᠲᠡᠳᠡ ᠨᠠᠷ ᠤ᠋ᠨ ᠬᠣᠢᠨᠠ ᠠ᠋ᠴᠠ ᠳᠥᠷᠪᠡᠨ ᠬᠥᠮᠦᠨ ᠰᠠᠩ ᠤ᠋ᠨ ᠤᠲᠤᠭᠠ ᠰᠠᠪᠰᠠᠭᠤᠯᠤᠨ ᠶᠠᠪᠤᠨᠠ᠃ ᠲᠡᠭᠦᠨ ᠦ᠌ ᠳᠠᠷᠠᠭᠠ ᠪᠠᠷ ᠠᠯᠲᠠᠨ ᠨᠥᠮᠥᠷᠭᠡ ᠲᠡᠢ ᠠᠷᠪᠠᠨ ᠯᠠᠮᠠ ᠭᠠᠷ ᠲᠠᠭᠠᠨ ᠮᠥᠩᠭᠥᠨ ᠪᠤᠶᠤ ᠭᠠᠤᠯᠢᠨ ᠲᠣᠭᠣᠨᠣᠯᠵᠢᠨ ᠵᠠᠭᠠᠯᠮᠠᠢ ᠪᠠᠷᠢᠵᠤ ᠭᠠᠷᠴᠤ ᠢᠷᠡᠪᠡ᠃ ᠲᠡᠳᠡᠨ ᠦ᠌ ᠬᠣᠢᠨᠠ ᠠ᠋ᠴᠠ ᠬᠣᠶᠠᠷ ᠬᠡᠦᠬᠡᠳ ᠢ᠋ᠶ᠋ᠡᠷ ᠲᠦᠰᠢᠭᠦᠯᠦᠭᠰᠡᠨ ᠬᠠᠮᠪᠤ ᠯᠠᠮᠠ ᠭᠠᠷᠴᠤ ᠢᠷᠡᠯᠡ᠃
ᠯᠠᠮᠠ ᠨᠠᠷ ᠤ᠋ᠨ ᠬᠣᠢᠨᠠ ᠠ᠋ᠴᠠ ᠰᠦᠮᠡ ᠳᠣᠲᠣᠷᠠ ᠠ᠋ᠴᠠ ᠷᠶᠡᠽᠡᠨ ᠦ᠌ ᠸᠠᠩ ᠶᠦᠷᠢ ᠢᠩᠭ᠌ᠸᠠᠷᠸᠸᠢᠴ ᠰᠤᠪᠤᠳ ᠪᠣᠯᠤᠨ ᠦᠨᠡᠲᠦ ᠡᠷᠳᠡᠨᠢᠰ ᠦ᠋ᠨ ᠴᠢᠯᠠᠭᠤ ᠬᠠᠳᠬᠤᠵᠤ ᠣᠶᠣᠭᠰᠠᠨ ᠤᠯᠠᠭᠠᠨ ᠨᠥᠮᠥᠷᠭᠡ ᠲᠡᠢ ᠭᠠᠷᠴᠤ ᠢᠷᠡᠬᠦ ᠳ᠋ᠦ᠍ ᠬᠣᠷᠢᠨ ᠨᠥᠬᠥᠳ ᠨᠢ ᠰᠢᠯᠤᠭᠤᠨ ᠰᠡᠯᠡᠮᠡ ᠪᠡᠨ ᠪᠠᠷᠢᠭᠠᠳ ᠮᠥᠷᠦᠨ ᠳᠡᠭᠡᠷᠡ ᠪᠡᠨ ᠲᠠᠯᠪᠢᠵᠤ ᠰᠢᠬᠠᠯᠳᠤᠭᠰᠠᠨ ᠣᠯᠠᠨ ᠤ᠋ ᠳᠤᠮᠳᠠᠭᠤᠷ ᠵᠠᠮ ᠲᠠᠯᠪᠢᠭᠤᠯᠤᠨ ᠸᠠᠩ ᠣᠨ ᠪᠡᠶᠡ ᠶ᠋ᠢ ᠬᠠᠮᠠᠭᠠᠯᠠᠨ ᠮᠥᠷᠭᠥᠯ ᠦ᠋ᠨ ᠪᠠᠨᠲᠠᠩ ᠳᠡᠭᠡᠷᠡ ᠬᠦᠷᠴᠦ ᠢᠷᠡᠲᠡᠯᠡ ᠡᠨᠡ ᠵᠠᠪᠰᠠᠷ ᠰᠢᠨᠡ ᠰᠢᠨᠡ ᠬᠥᠮᠦᠰ ᠭᠠᠷᠴᠤ ᠢᠷᠡᠬᠦ ᠪᠥᠭᠡᠳ ᠠᠭᠤᠤ ᠶᠡᠬᠡ ᠬᠠᠲᠤᠨ ᠠᠬᠷᠢᠫᠫᠢ᠍ᠨᠤᠢ ᠷᠤᠰᠲ᠋ᠢᠰᠯᠡᠸᠨᠤᠢ ᠥᠪᠡᠷ ᠦ᠋ᠨ ᠵᠠᠯᠠᠭᠤ ᠪᠡᠷᠢ ᠨᠦ᠍ᠭᠦᠳ ᠢ᠋ᠶ᠋ᠡᠷ ᠬᠦᠷᠢᠶᠡᠯᠡᠭᠦᠯᠦᠨ ᠬᠦᠷᠴᠦ ᠢᠷᠡᠪᠡ᠃ ᠮᠥᠨ ᠭᠠᠵᠠᠷ ᠤ᠋ᠨ ᠡᠵᠡᠳ ᠪᠣᠯᠤᠨ ᠸᠠᠩ ᠤ᠋ᠨ ᠠᠯᠳᠠᠷᠲᠠᠢ ᠰᠢᠳᠠᠷ ᠤ᠋ᠳ ᠴᠥᠮ ᠢᠷᠡᠵᠡᠢ᠃ ᠶᠦᠷᠢ ᠢᠩᠭ᠌ᠸᠡᠷᠸᠸᠢᠴ ᠬᠤᠷᠠᠯ ᠤ᠋ᠨ ᠬᠣᠩᠬᠠᠨ ᠣ ᠳᠡᠷᠭᠡᠳᠡᠬᠢ ᠴᠢᠯᠠᠭᠤᠨ ᠥᠨᠳᠥᠷᠯᠢᠭ ᠳᠡᠭᠡᠷᠡ ᠭᠠᠷᠴᠤ ᠪᠤᠰᠤᠳ ᠪᠡᠶᠡ ᠬᠠᠮᠠᠭᠠᠯᠠᠭᠴᠢᠳ ᠯᠠᠮᠠ ᠨᠠᠷ ᠲᠡᠭᠦᠨ ᠦ᠌ ᠣᠷᠴᠢᠮ ᠤ᠋ᠨ ᠪᠠᠨᠲᠠᠩ ᠳᠡᠭᠡᠷᠡ ᠵᠣᠭᠰᠣᠵᠠᠭᠠᠪᠠ᠃
ᠡᠭᠦᠨ ᠦ᠌ ᠨᠥᠭᠦᠭᠡ ᠦᠵᠦᠭᠦᠷ ᠲᠦ᠍ ᠬᠣᠲᠠ ᠶ᠋ᠢᠨ ᠣᠢᠷᠠ ᠬᠣᠯᠠ ᠶ᠋ᠢᠨ ᠦᠵᠦᠭᠦᠷ ᠦ᠋ᠳ ᠦ᠋ᠨ ᠠᠬᠠᠯᠠᠭᠴᠢᠳ ᠵᠣᠭᠰᠣᠵᠠᠢ᠃ ᠲᠡᠳᠡ ᠬᠣᠨᠢᠨ ᠤ᠋ ᠠᠷᠠᠰᠤᠨ ᠳᠡᠪᠡᠯ ᠲᠡᠢ ᠪᠤᠶᠤ ᠬᠤᠳᠠᠯᠳᠤᠭᠠᠴᠢᠨ ᠴᠠᠮᠪᠠᠨ ᠭᠠᠳᠠᠷ ᠲᠠᠢ ᠳᠡᠪᠡᠯ ᠡᠮᠦᠰᠴᠡᠭᠡᠭᠰᠡᠨ ᠳᠠᠷᠤᠤ ᠲᠥᠪ ᠪᠠᠢᠳᠠᠯᠲᠠᠢ ᠠᠵᠢ᠃
ᠲᠡᠳᠡᠨ ᠦ᠌ ᠳᠣᠲᠣᠷᠠ ᠠ᠋ᠴᠠ ᠨᠢᠭᠡ ᠲᠥᠯᠥᠪ ᠪᠠᠢᠳᠠᠯ ᠲᠠᠢ᠂ ᠪᠤᠭᠤᠷᠤᠯ ᠰᠠᠬᠠᠯ ᠲᠠᠢ ᠳᠣᠣᠷᠠᠲᠤ ᠲᠤᠰᠢᠶᠠᠯ ᠤ᠋ᠨ ᠠᠬᠠᠯᠠᠭᠴᠢ ᠨᠠᠰᠤᠲᠠᠢ ᠬᠥᠭᠰᠢᠨ ᠬᠥᠮᠦᠨ ᠸᠠᠩ ᠪᠣᠯᠤᠨ ᠬᠠᠲᠤᠨ ᠨᠠᠷ ᠲᠤ᠌ ᠮᠡᠬᠦᠢᠰᠬᠢᠵᠦ ᠪᠤᠯᠠᠭᠠᠨ ᠮᠠᠯᠠᠭᠠᠢ ᠪᠠᠨ ᠠᠪᠴᠤ ᠴᠡᠭᠡᠵᠢᠨ ᠳ᠋ᠡᠭᠡᠨ ᠪᠠᠷᠢᠭᠠᠳ ᠴᠢᠩᠭᠠ ᠪᠠᠷ ᠥᠭᠦᠯᠡᠭᠰᠡᠨ ᠨᠢ᠄
— ᠮᠠᠨ ᠤ᠋ ᠡᠷᠬᠢᠮ ᠸᠠᠩ ᠶᠦᠷᠢ ᠢᠩᠭ᠌ᠸᠡᠷᠸᠸᠢᠴ ᠲᠠᠨ᠂ ᠬᠠᠲᠤᠨ ᠠᠭᠷᠢᠫᠫᠢᠨᠤᠢ ᠷᠤᠰᠲ᠋ᠢᠰᠯᠠᠸᠨᠤᠢ ᠶ᠋ᠢᠨ ᠬᠠᠮᠲᠤ ᠪᠠᠷ ᠡᠷᠡᠭᠦᠯ ᠡᠩᠬᠡ ᠪᠥᠭᠡᠳ ᠵᠣᠪᠠᠯᠠᠩ ᠦᠵᠡᠯ ᠦᠭᠡᠢ᠂ ᠥᠴᠦᠬᠡᠨ ᠪᠢᠳᠡᠨ ᠢ᠋ ᠮᠠᠷᠲᠠᠯ ᠦᠭᠡᠢ ᠤᠷᠲᠤ ᠨᠠᠰᠤᠯᠠᠬᠤ ᠪᠣᠯᠲᠤᠭᠠᠢ᠃ ᠲᠡᠭᠡᠭᠡᠳ ᠯᠠᠪᠯᠠᠬᠤ ᠨᠢᠭᠡᠨ ᠦᠭᠡ ᠶ᠋ᠢ ᠠᠭᠤᠴᠢᠯᠠᠨ ᠰᠣᠶᠣᠷᠬᠠᠨᠠ ᠤᠤ? ᠶᠠᠭᠤᠨ ᠳ᠋ᠤ᠌ ᠠᠷᠠᠳ ᠠᠯᠪᠠᠲᠤ ᠪᠠᠨ ᠴᠤᠭᠯᠠᠭᠤᠯᠪᠠ? ᠶᠠᠭᠤᠨ ᠳ᠋ᠤ᠌ ᠬᠤᠷᠠᠯᠳᠤᠭᠠᠨ ᠤ᠋ ᠭᠠᠵᠠᠷ ᠢᠷᠡᠬᠦ ᠲᠤᠰᠢᠶᠠᠯ ᠥᠭᠪᠡ? ᠷᠶᠠᠽᠠᠨ ᠤ᠋ ᠠᠷᠠᠳ ᠢᠷᠭᠡᠳ ᠡᠴᠡ ᠪᠡᠨ ᠶᠠᠭᠤ ᠶ᠋ᠢ ᠬᠦᠰᠡᠭᠰᠡᠨ ᠶᠤᠮ ᠪᠣᠯ? ᠭᠡᠪᠡ᠃
ᠸᠠᠩ ᠣᠯᠠᠨ ᠰᠢᠬᠠᠯᠴᠯᠲᠤᠭᠰᠠᠳ ᠤ᠋ᠨ ᠵᠦᠭ ᠬᠠᠷᠠᠵᠤ ᠪᠤᠭᠤᠷᠤᠯ ᠰᠠᠭᠤᠭᠰᠠᠨ ᠤᠷᠲᠤ ᠰᠠᠬᠠᠯ ᠢ᠋ᠶ᠋ᠠᠨ ᠢᠯᠪᠢᠵᠦ ᠴᠢᠮᠡᠭᠡ ᠦᠭᠡᠢ ᠪᠣᠯᠤᠭᠰᠠᠨ ᠣᠯᠠᠨ ᠤ᠋ ᠵᠦᠭ ᠭᠤᠷᠪᠠᠨ ᠡᠲᠡᠭᠡᠳ ᠮᠡᠬᠦᠢᠰᠬᠢᠨ ᠶᠣᠰᠣᠯᠠᠭᠠᠳ᠂
— ᠦᠨᠡᠨ ᠠᠯᠳᠠᠷᠲᠤ ᠶ᠋ᠢᠨ ᠱᠠᠰᠢᠨᠲᠠᠨ ᠰᠣᠨᠣᠰᠤᠭᠲᠤᠨ! ᠴᠢᠬᠤᠯᠠ ᠬᠡᠷᠡᠭ ᠦ᠋ᠨ ᠲᠥᠯᠥᠭᠡ ᠲᠠᠨᠠᠷ ᠢ᠋ ᠪᠢ ᠳᠠᠭᠤᠳᠠᠭᠰᠠᠨ ᠪᠢᠯᠡ᠃ ᠠᠶᠤᠯᠲᠤ ᠶᠠᠪᠤᠳᠠᠯ ᠤ᠋ᠨ ᠤᠷᠰᠢᠭ ᠦᠭᠡᠢ ᠪᠠᠢᠪᠠᠯ ᠥᠷᠯᠥᠭᠡᠨ ᠡᠴᠡ ᠡᠬᠢᠯᠡᠨ ᠬᠤᠷᠠᠯᠳᠤᠭᠠᠨ ᠤ᠋ ᠬᠤᠩᠬᠠ ᠳᠤᠤᠭᠠᠷᠬᠤ ᠦᠭᠡᠢ ᠪᠠᠢᠬᠤ ᠪᠢᠰᠢ ᠤᠤ? ᠪᠢᠳᠡ ᠨᠠᠷ ᠬᠣᠢᠰᠢ ᠲᠠᠯᠪᠢᠵᠤ ᠦᠯᠦ ᠪᠣᠯᠬᠤ ᠨᠢᠭᠡᠨ ᠶᠠᠭᠠᠷᠠᠯᠲᠠᠢ ᠬᠡᠷᠡᠭ ᠢ᠋ ᠡᠷᠡᠰ ᠲᠠᠰᠤ ᠰᠢᠢᠳᠪᠦᠷᠢᠯᠡᠬᠦ ᠬᠡᠷᠡᠭᠲᠡᠢ ᠪᠣᠯᠪᠠ᠃
— ᠵᠠ ᠵᠠ ᠸᠠᠩ ᠲᠠᠨ᠂ ᠠᠢᠯᠠᠳᠤᠭᠠᠷᠠᠢ! ᠪᠢᠳᠡ ᠰᠠᠨᠠᠯ ᠢ᠋ᠶ᠋ᠠᠨ ᠬᠡᠯᠡᠶᠡ ᠭᠡᠬᠦ ᠳᠠᠭᠤᠨ ᠰᠣᠨᠣᠰᠳᠠᠪᠠ᠃
— ᠬᠡᠳᠦᠨ ᠬᠠᠪᠤᠷ ᠠ᠋ᠴᠠ ᠡᠬᠢᠯᠡᠨ ᠵᠡᠷᠯᠢᠭ ᠲᠠᠯᠠ ᠠ᠋ᠴᠠ ᠰᠠᠢᠨ ᠦᠭᠡᠢ ᠮᠡᠳᠡᠭᠡᠨ ᠢᠷᠡᠳᠡᠭ ᠪᠠᠢᠯᠠ᠃ ᠫᠤᠯᠤᠸᠧᠼᠠ ᠶ᠋ᠢᠨ ᠬᠠᠭᠠᠳ ᠤ᠋ᠳ ᠠᠶᠤᠵᠤ ᠰᠠᠨᠳᠤᠷᠴᠤ ᠪᠠᠢᠨᠠ᠃ ᠸᠠᠤᠯᠠᠭᠠ ᠮᠥᠷᠡᠨ ᠦ᠌ ᠴᠠᠭᠠᠨᠠ ᠠ᠋ᠴᠠ ᠬᠣᠯᠠ ᠠ᠋ᠴᠠ ᠢᠷᠡᠭᠰᠡᠨ ᠲᠠᠨᠢᠭᠳᠠᠭᠠ ᠦᠭᠡᠢ ᠤᠯᠤᠰ ᠲᠠᠢ ᠫᠤᠯᠤᠸᠧᠼᠠ ᠶ᠋ᠢᠨ ᠴᠡᠷᠢᠭ ᠦ᠋ᠳ ᠪᠠᠢᠯᠳᠤᠵᠤ ᠪᠠᠢᠨᠠ ᠭᠡᠳᠡᠭ ᠪᠠᠢᠯᠠ᠃ ᠡᠨᠡ ᠤᠯᠤᠰ ᠬᠡᠷᠴᠡᠭᠡᠢ ᠬᠦᠴᠦᠲᠡᠢ ᠪᠣᠯᠤᠭᠠᠳ ᠫᠤᠯᠤᠸᠧᠼᠠ ᠶ᠋ᠢᠨ ᠬᠠᠭᠠᠳ ᠢ᠋ ᠪᠤᠲᠠ ᠴᠣᠬᠢᠵᠤ ᠪᠦᠬᠦ ᠵᠡᠷᠯᠢᠭ ᠲᠠᠯᠠ ᠠ᠋ᠴᠠ ᠨᠢ ᠬᠥᠭᠡᠭᠡᠵᠦ ᠭᠠᠷᠭᠠᠭᠠᠳ ᠲᠡᠳᠡᠨ ᠦ᠌ ᠥᠮᠴᠢ ᠶ᠋ᠢ ᠢᠷᠣᠭᠠᠯ ᠰᠢᠪᠬᠠᠨ ᠳᠡᠭᠡᠷᠡᠮᠳᠡᠭᠰᠡᠨ ᠭᠡᠨᠡ᠃
— ᠦᠨᠡᠨ ᠠᠯᠳᠠᠷᠲᠠᠢ ᠶ᠋ᠢᠨ ᠱᠠᠰᠢᠨᠲᠠᠨ ᠬᠥᠮᠦᠰ ᠰᠣᠨᠣᠰᠤᠭᠲᠤᠨ! ᠶᠠᠮᠠᠷ ᠤᠯᠤᠰ ᠪᠣᠢ ᠪᠣᠯᠤᠭᠰᠠᠨ ᠢ᠋ ᠮᠡᠳᠡᠭᠲᠦᠨ! ᠡᠳᠡᠨ ᠦ᠌ ᠬᠠᠮᠤᠭ ᠤ᠋ᠨ ᠠᠯᠳᠠᠷᠲᠠᠢ ᠬᠠᠭᠠᠳ ᠢ᠋ ᠨᠢ ᠵᠡᠷᠯᠢᠭ ᠤᠯᠤᠰ ᠬᠠᠪᠴᠢᠵᠤ ᠳᠠᠷᠤᠭᠠᠳ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠠᠳᠤᠭᠤ ᠬᠠᠷᠢᠭᠤᠯᠳᠠᠭ ᠠᠯᠪᠠᠲᠤ ᠪᠣᠭᠣᠯ ᠪᠣᠯᠭᠠᠭᠰᠠᠨ ᠭᠡᠨᠡ᠃
— ᠡᠨᠡ ᠶᠠᠮᠠᠷ ᠶᠠᠩᠵᠤ ᠶ᠋ᠢᠨ ᠤᠯᠤᠰ ᠪᠣᠢ? ᠡᠳᠡ ᠨᠠᠷ ᠢ᠋ ᠶᠠᠭᠤ ᠭᠡᠵᠦ ᠨᠡᠷᠡᠯᠡᠳᠡᠭ ᠶᠤᠮ ᠪᠣᠢ? ᠡᠳᠡ ᠨᠠᠷ ᠮᠥᠨ ᠠᠳᠤᠭᠤᠴᠢᠨ ᠤᠯᠤᠰ ᠤᠤ?
— ᠡᠳᠡ ᠨᠠᠷ ᠢ᠋ ᠪᠤᠷᠤᠩᠬᠤᠢ ᠮᠣᠩᠭᠣᠯ ᠲᠠᠲ᠋ᠠᠷ ᠤ᠋ᠳ ᠭᠡᠵᠦ ᠨᠡᠷᠡᠯᠡᠳᠡᠭ ᠭᠡᠨᠡ᠃
— ᠡᠳᠡ ᠨᠠᠷ ᠫᠤᠯᠤᠸᠧᠼᠠ ᠶ᠋ᠢᠨ ᠠᠰᠠᠷ ᠤ᠋ᠳ ᠢ᠋ ᠰᠦᠢᠳᠯᠡᠨ ᠲᠡᠯᠡᠵᠦ᠂ ᠦᠬᠡᠷ ᠬᠣᠨᠢ ᠶ᠋ᠢ ᠨᠢ ᠠᠯᠠᠵᠤ ᠢᠳᠡᠭᠡᠳ ᠣᠳᠣ ᠮᠠᠨ ᠤ᠋ ᠵᠦᠭ ᠬᠥᠳᠡᠯᠵᠦ ᠸᠤᠷᠦᠨᠧᠵ ᠭᠣᠣᠯ ᠳ᠋ᠠᠬᠢ ᠮᠠᠨ ᠤ᠋ ᠬᠠᠷᠠᠭᠤᠯ ᠳ᠋ᠤ᠌ ᠣᠢᠷᠠᠬᠠᠨ ᠢᠷᠡᠵᠡᠢ᠃ ᠦᠵᠡᠲᠡᠯᠡ ᠪᠢᠳᠡᠨ ᠲᠡᠢ ᠪᠠᠢᠯᠳᠤᠬᠤ ᠪᠠᠷ ᠢᠷᠡᠬᠦ ᠭᠡᠵᠦ ᠬᠦᠰᠡᠵᠦ ᠪᠠᠢᠭᠠ ᠪᠣᠯᠤᠯᠲᠠᠢ᠃ ᠲᠠᠲ᠋ᠠᠷ ᠤ᠋ᠳ ᠮᠠᠨ ᠤ᠋ ᠳ᠋ᠤ᠌ ᠡᠯᠴᠢ ᠢᠯᠡᠭᠡᠭᠰᠡᠨ ᠪᠠᠢᠨᠠ᠃ ᠲᠡᠳᠡ ᠨᠠᠷ ᠤ᠋ᠨ ᠬᠣᠶᠠᠷ ᠨᠢ ᠡᠷᠡ᠂ ᠨᠢᠭᠡ ᠨᠢ ᠡᠮᠡ᠂ ᠲᠡᠳᠡ ᠨᠠᠷ ᠶᠠᠭᠤᠮᠠ ᠪᠦᠷᠢ ᠶ᠋ᠢᠨ ᠲᠤᠬᠠᠢ ᠠᠰᠠᠭᠤᠵᠤ ᠶᠠᠭᠤᠮᠠ ᠪᠦᠬᠦᠨ ᠢ᠋ ᠮᠡᠳᠡᠬᠦ ᠶ᠋ᠢ ᠬᠦᠰᠡᠵᠦ ᠪᠠᠢᠨᠠ ᠭᠡᠬᠦ ᠳ᠋ᠦ᠍ᠨᠢ ᠴᠤᠭᠯᠠᠷᠠᠭᠴᠢᠳ ᠬᠡᠯᠡᠪᠡ᠃
— ᠲᠡᠳᠡ ᠨᠠᠷ ᠢ᠋ ᠨᠠᠰᠢ ᠪᠠᠨ ᠠᠯᠢ᠂ ᠪᠢᠳᠡ ᠲᠡᠳᠡ ᠨᠠᠷ ᠢ᠋ ᠴᠢᠨᠢ ᠬᠠᠷᠠᠶᠠ᠂ ᠲᠡᠭᠡᠭᠡᠳ ᠲᠡᠷᠡ ᠡᠷᠬᠢᠮ ᠦ᠋ᠳ ᠬᠡᠷᠬᠢᠨ ᠶᠠᠮᠠᠷ ᠵᠠᠮ ᠢ᠋ᠶ᠋ᠠᠷ ᠡᠭᠡᠵᠦ ᠬᠠᠷᠢᠬᠤ ᠲᠤᠬᠠᠢ ᠬᠡᠯᠡᠵᠦ ᠥᠭᠭᠦᠶᠡ᠃
— ᠠ᠋᠂ ᠬᠦ ᠲᠠᠲ᠋ᠠᠷ ᠤ᠋ᠨ ᠡᠯᠴᠢᠨ ᠨᠠᠷ ᠢ᠋ ᠨᠠᠰᠢ ᠪᠠᠨ ᠠᠪᠴᠢᠷᠠ ᠭᠡᠵᠦ ᠸᠠᠩ ᠠ᠋ᠴᠠ ᠰᠢᠳᠠᠷ ᠴᠡᠷᠢᠭ ᠦ᠋ᠳ ᠲᠡᠭᠡᠨ ᠲᠤᠰᠢᠶᠠᠭᠠᠳ ᠬᠡᠯᠡᠭᠰᠡᠨ ᠨᠢ᠂
— ᠲᠡᠳᠡ ᠨᠠᠷ ᠢ᠋ ᠥᠪᠡᠷᠰᠡᠳ ᠦ᠋ᠨ ᠨᠢᠳᠦ ᠰᠢᠭ ᠢ᠋ᠶ᠋ᠡᠷ ᠬᠠᠮᠠᠭᠠᠯᠠᠭᠲᠤᠨ! ᠮᠠᠨ ᠤ᠋ ᠵᠠᠯᠠᠭᠤᠰ ᠡᠳᠡ ᠨᠠᠷ ᠲᠠᠢ ᠦᠢᠮᠡᠭᠡᠨ ᠭᠠᠷᠭᠠᠵᠤ ᠶᠠᠭᠤ ᠮᠠᠭᠠᠳ᠂ ᠪᠢᠳᠡ ᠶᠠᠮᠠᠷ ᠲᠡᠳᠡᠨ ᠢ᠋ ᠠᠭᠤᠷᠯᠠᠭᠤᠯᠬᠤ ᠠᠯᠪᠠ ᠲᠠᠢ ᠪᠢᠰᠢ᠂ ᠶᠠᠮᠠᠷ ᠴᠥ᠍ ᠭᠡᠰᠡᠨ ᠲᠡᠳᠡᠨᠡᠷ ᠲᠠᠲ᠋ᠠᠷ ᠤ᠋ᠨ ᠬᠦᠴᠦᠷᠬᠡᠭ ᠬᠠᠭᠠᠨ ᠪᠠᠲᠤ ᠶ᠋ᠢᠨ ᠡᠯᠴᠢ ᠨᠠᠷ ᠶᠤᠮ ᠰᠢᠦ ᠭᠡᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠠᠯᠲᠠᠨᠴᠢᠮᠡᠭ᠂ ᠪᠠᠯ᠂ ᠬᠡᠷᠡᠢᠳ· ᠮᠥᠩᠬᠡᠨᠠᠰᠤᠨ᠂ ᠪᠠᠶᠠᠨᠴᠡᠴᠡᠭ
ᠬᠢᠨᠠᠭᠴᠢ᠄ ᠲ· ᠬᠦᠮᠦᠵᠢᠯᠲᠦ᠂ ᠠᠷᠢᠭᠤᠨ᠂ ᠪᠠᠯ᠂ ᠠᠯᠲᠠᠨᠴᠢᠮᠡᠭ