ᠪᠠᠲᠤ ᠬᠠᠭᠠᠨ 3-05ᠠᠷᠠᠳ ᠤ᠋ᠨ ᠬᠢᠯᠢᠩ-ᠮᠣᠩᠭᠣᠯᠴᠤᠳ ᠣᠷᠣᠰ ᠲᠡᠰᠢ ᠬᠥᠳᠡᠯᠪᠡ-Bat khaan Бат хаан-ᠷᠣᠮᠠᠨ
74ᠲᠠᠪᠤ ᠠᠷᠠᠳ ᠤ᠋ᠨ ᠬᠢᠯᠢᠩ
ᠡᠳᠦᠷ ᠳᠤᠮᠳᠠ ᠠ᠋ᠴᠠ ᠡᠮᠦᠨᠡ ᠫᠧᠷᠦ᠋ᠨᠦᠸ— ᠪᠣᠷ ᠠ᠋ᠴᠠ ᠭᠠᠷᠤᠭᠰᠠᠨ ᠡᠷᠡᠰ ᠶᠡᠷᠡᠰᠲ᠋ᠦᠧ ᠳ᠋ᠦ᠍ ᠮᠥᠷᠥᠮ ᠡᠴᠡ ᠷᠶᠠᠽᠠᠨ ᠬᠦᠷᠬᠦ ᠶᠡᠬᠡ ᠵᠠᠮ ᠳᠡᠭᠡᠷᠡ ᠬᠦᠷᠦᠯᠴᠡᠨ ᠢᠷᠡᠵᠡᠢ᠃ ᠤᠷᠢᠳᠤ ᠨᠢᠭᠡᠨ ᠡᠳᠦᠷ ᠪᠦᠭᠦᠳᠡᠭᠡᠷ ᠬᠠᠮᠲᠤ ᠡᠯᠪᠡᠵᠦ ᠪᠠᠷᠢᠭᠰᠠᠨ ᠬᠠᠷᠠ ᠮᠣᠳᠣᠨ ᠰᠦᠮᠡ ᠶ᠋ᠢ ᠲᠣᠭᠣᠷᠢᠨ ᠵᠠᠭᠠᠯᠮᠠᠢ ᠮᠣᠳᠣ ᠬᠦᠷᠢᠶᠡᠯᠡᠭᠦᠯᠦᠨ ᠬᠠᠳᠬᠤᠭᠰᠠᠨ ᠪᠤᠯᠠᠰᠢ ᠬᠠᠷᠠᠭᠳᠠᠨᠠ᠃ ᠵᠠᠭᠠᠯᠮᠠᠢ ᠨᠤᠭᠤᠳ ᠤ᠋ᠨ ᠳᠤᠮᠳᠠ ᠰᠡᠷᠡᠭᠡ ᠵᠢᠳᠠ ᠬᠠᠯᠬᠠᠪᠴᠢ ᠪᠠᠷᠢᠭᠰᠠᠨ ᠡᠷᠡᠴᠦᠳ ᠰᠢᠬᠠᠯᠴᠠᠯᠳᠤᠵᠤ ᠦᠵᠡᠭᠳᠡᠨᠡ᠃ ᠲᠡᠳᠡᠨ ᠦ᠌ ᠬᠠᠰᠬᠢᠷᠤᠯᠳᠤᠬᠤ ᠴᠢᠮᠡᠭᠡ ᠱᠤᠤᠭᠢᠶᠠᠨ ᠬᠣᠯᠠ ᠠ᠋ᠴᠠ ᠰᠣᠨᠣᠰᠳᠠᠨᠠ᠃ ᠮᠢᠩᠭᠠ ᠮᠢᠩᠭᠠᠨ ᠰᠢᠬᠠᠴᠠᠯᠲᠤᠭᠴᠢᠳ ᠤ᠋ᠨ ᠳᠡᠭᠡᠭᠦᠷ ᠭᠠᠤᠯᠢᠨ ᠬᠤᠩᠬᠠ ᠶ᠋ᠢᠨ ᠪᠠᠴᠢᠮᠳᠠᠨ ᠳᠤᠤᠭᠠᠷᠬᠤ ᠳᠠᠭᠤᠨ ᠰᠣᠨᠣᠰᠳᠠᠨᠠ᠃ ᠰᠦᠮᠡ ᠶ᠋ᠢᠨ ᠳᠣᠪᠣᠴᠠᠭ ᠢ᠋ ᠲᠣᠭᠣᠷᠢᠨ ᠪᠤᠯᠠᠭ ᠤ᠋ᠨ ᠤᠰᠤ ᠬᠣᠷᠴᠢᠭᠢᠨᠠᠵᠤ ᠡᠷᠭᠢ ᠶ᠋ᠢᠨ ᠴᠠᠰᠤᠨ ᠳᠣᠲᠣᠷᠠ ᠠ᠋ᠴᠠ ᠬᠠᠷᠠᠵᠠ ᠤᠰᠤ ᠨᠢ ᠬᠠᠷᠠᠯᠠᠨ ᠬᠠᠷᠠᠭᠳᠠᠨᠠ᠃ ᠡᠨᠳᠡ ᠤᠰᠤᠨ ᠤ᠋ ᠳᠡᠷᠭᠡᠳᠡ ᠣᠪᠣᠬᠠᠢ ᠮᠠᠢᠬᠠᠨ ᠨᠤᠭᠤᠳ ᠠᠯᠠᠭᠯᠠᠨ ᠬᠠᠷᠠᠭᠳᠠᠵᠤ ᠡᠨᠳᠡ ᠬᠠᠴᠢᠨ ᠬᠤᠪᠴᠠᠰᠤᠯᠠᠭᠰᠠᠨ ᠬᠡᠳᠦᠨ ᠵᠠᠭᠤᠨ ᠬᠥᠮᠦᠨ ᠦᠵᠡᠭᠳᠡᠬᠦ ᠪᠥᠭᠡᠳ ᠡᠷᠡᠴᠦᠳ ᠢᠰᠡᠭᠡᠢ ᠮᠠᠯᠠᠭᠠᠢ ᠶ᠋ᠢ ᠤᠯᠠᠭᠠᠨ ᠡᠮᠵᠢᠶᠡᠷᠢ ᠪᠡᠷ ᠡᠮᠵᠢᠵᠦ ᠪᠦᠰᠡᠭᠦᠢᠴᠦᠳ ᠬᠤᠷᠴᠠ ᠤᠯᠠᠭᠠᠨ ᠥᠩᠭᠡ ᠶ᠋ᠢᠨ ᠳᠡᠪᠡᠯ ᠡᠮᠦᠰᠴᠦ ᠰᠢᠷᠠ ᠪᠣᠷᠣ ᠨᠣᠭᠣᠭᠠᠨ ᠠᠯᠴᠢᠭᠤᠷ ᠪᠣᠭᠣᠭᠰᠠᠨ ᠪᠥᠭᠡᠳ ᠪᠠᠷᠤᠭ ᠨᠢᠴᠦᠭᠦᠨ ᠰᠢᠬᠠᠮ ᠬᠡᠦᠬᠡᠳ ᠦ᠋ᠳ ᠨᠢ ᠭᠠᠯ ᠤ᠋ᠨ ᠳᠡᠷᠭᠡᠳᠡ ᠬᠤᠮᠢᠷᠠᠨ ᠰᠠᠭᠤᠵᠠᠭᠠᠵᠤ ᠥᠩᠭᠡᠷᠡᠨ ᠶᠠᠪᠤᠭᠴᠢᠳ ᠢ᠋ ᠨᠡᠭᠦᠳᠡᠯᠴᠢᠨ ᠦ᠌ ᠳᠡᠷᠭᠡᠳᠡ ᠵᠣᠭᠰᠣᠬᠤ ᠳ᠋ᠤ᠌ ᠬᠡᠦᠬᠡᠳ ᠦ᠋ᠳ ᠭᠦᠶᠦᠯᠳᠦᠨ ᠢᠷᠡᠵᠦ᠂ ᠰᠠᠭᠠᠷᠢ ᠢᠳᠡᠭᠰᠡᠨ ᠨᠢᠴᠦᠭᠦᠨ ᠭᠠᠷ ᠢ᠋ᠶ᠋ᠠᠨ ᠰᠠᠷᠪᠠᠢᠵᠤ ᠡᠮᠡᠭᠲᠡᠢᠴᠦᠳ ᠨᠢ ᠮᠥᠯᠬᠥᠨ ᠢᠷᠡᠵᠦ᠂
— ᠲᠠᠯᠬᠠ ᠥᠭᠭᠦᠭᠡᠴᠢ᠂ ᠢᠳᠡᠬᠦ ᠶᠠᠭᠤᠮᠠ ᠥᠭᠭᠦᠭᠡᠴᠢ᠃ ᠮᠠᠨ ᠤ᠋ ᠪᠣᠯᠭᠠᠷᠢ ᠨᠤᠭᠤᠳ ᠢ᠋ ᠲᠠᠲ᠋ᠠᠷ ᠬᠢᠳᠤᠭᠰᠠᠨ ᠭᠡᠵᠦ ᠶᠠᠭᠤᠮᠠ ᠭᠣᠶᠣᠵᠠᠭᠠᠨᠠ᠃ ᠥᠩᠭᠡᠷᠡᠨ ᠶᠠᠪᠤᠭᠴᠢᠳ ᠵᠢᠵᠢᠭ ᠵᠣᠭᠣᠰ ᠥᠭᠬᠦ ᠪᠤᠶᠤ ᠡᠰᠡᠬᠦᠯᠡ ᠬᠡᠰᠡᠭ ᠲᠠᠯᠬᠠ ᠥᠭᠴᠦ ᠠᠯᠬᠤᠭᠠ ᠪᠠᠨ ᠬᠤᠷᠳᠤᠳᠬᠠᠨᠠ᠃
— ᠪᠠᠰᠠ ᠯᠠ ᠪᠣᠯᠭᠠᠷᠢ᠂ ᠪᠠᠰᠠ ᠯᠠ ᠪᠣᠯᠭᠠᠷᠢ᠂ ᠡᠳᠡ ᠬᠡᠴᠢᠨᠡᠨ ᠢ᠋ᠶ᠋ᠡᠷ ᠵᠢᠭᠤᠲᠠᠵᠤ ᠢᠷᠡᠭᠰᠡᠨ ᠶᠤᠮ ᠪᠣᠯ? ᠡᠳᠡ ᠨᠠᠷ ᠲᠤ᠌ ᠶᠠᠮᠠᠷ ᠵᠣᠪᠠᠯᠠᠩ ᠲᠣᠬᠢᠶᠠᠯᠳᠤᠬᠤ ᠨᠢ ᠡᠨᠡ ᠪᠣᠢ ᠭᠡᠨᠡ᠃ ᠰᠦᠮᠡ ᠶ᠋ᠢᠨ ᠱᠠᠲᠤᠨ ᠳᠡᠭᠡᠷᠡ ᠬᠥᠭᠰᠢᠨ ᠰᠠᠨᠸᠠᠷᠲᠠᠨ ᠦᠵᠡᠭᠳᠡᠬᠦ ᠪᠥᠭᠡᠳ ᠶᠠᠭᠠᠨ ᠳᠠᠪᠤᠤ ᠶ᠋ᠢ ᠪᠣᠯᠬᠢ ᠪᠠᠷ ᠪᠣᠳᠣᠵᠤ ᠳᠡᠭᠡᠷᠡ ᠨᠢ ᠰᠢᠷᠠ ᠡᠳ᠋ ᠢ᠋ᠶ᠋ᠡᠷ ᠵᠠᠭᠠᠯᠮᠠᠢ ᠣᠶᠣᠵᠤ ᠡᠮᠦᠰᠴᠡᠢ᠃ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠷ ᠲᠣᠮᠣ ᠭᠠᠤᠯᠢᠨ ᠵᠠᠭᠠᠯᠮᠠᠢ ᠶ᠋ᠢ ᠥᠨᠳᠥᠷ ᠡᠷᠭᠦᠵᠦ ᠠᠳᠢᠰ ᠲᠠᠯᠪᠢᠭᠠᠳ ᠬᠥᠨᠳᠡᠢ ᠲᠣᠮᠣ ᠳᠠᠭᠤ ᠪᠠᠷ ᠬᠡᠯᠡᠬᠦ ᠨᠢ᠄
— ᠦᠨᠡᠨ ᠵᠢᠷᠤᠮᠲᠠᠨ ᠴᠤᠭᠯᠠᠷᠠᠭᠲᠤᠨ! ᠣᠷᠣᠰ ᠳᠸ᠋ ᠠᠶᠤᠯᠲᠤ ᠳᠠᠢᠰᠤᠨ ᠢᠷᠡᠵᠦ ᠶᠠᠪᠤᠨᠠ᠃ ᠡᠭᠦᠨ ᠦ᠌ ᠤᠳᠤᠷᠢᠳᠤᠭᠴᠢ ᠪᠣᠯ ᠲᠡᠷᠰ ᠨᠣᠮᠲᠠᠨ ᠮᠣᠩᠭᠣᠯ ᠤ᠋ᠨ ᠠᠳᠤᠭᠤᠴᠢᠨ ᠪᠠᠲᠤ ᠬᠠᠭᠠᠨ ᠭᠡᠭᠴᠢ ᠭᠡᠨᠡ᠃ ᠳᠠᠢᠰᠤᠨ ᠨᠤᠭᠤᠳ ᠵᠡᠷᠯᠢᠭ ᠲᠠᠯᠠ ᠳ᠋ᠤ᠌ ᠢᠷᠡᠵᠦ ᠸᠤᠷᠤᠨᠧᠵ ᠭᠣᠣᠯ ᠳ᠋ᠤ᠌ ᠪᠠᠭᠤᠳᠠᠯᠯᠠᠵᠠᠢ ᠭᠡᠬᠦ ᠳ᠋ᠦ᠍ᠨᠢ ᠡᠷᠡᠴᠦᠳ ᠠᠩᠬᠠᠷᠤᠯᠲᠠᠢ ᠪᠠᠷ ᠰᠣᠨᠣᠰᠪᠠ᠃ ᠰᠠᠨᠸᠠᠷᠲᠠᠨ ᠦᠷᠭᠦᠯᠵᠢᠯᠡᠨ ᠬᠡᠯᠡᠬᠦ ᠨᠢ᠂
— ᠸᠠᠩ ᠡᠴᠢᠭᠡ ᠢᠩᠬ᠌ᠸᠨᠷᠸᠸᠢᠴ ᠦ᠋ᠨ ᠬᠢ ᠶ᠋ᠢ ᠰᠣᠨᠣᠰᠤᠭᠲᠤᠨ! ᠦᠷᠦ ᠡᠪᠡᠳᠬᠦ ᠰᠡᠳᠬᠢᠯ ᠦᠭᠡᠢ ᠠᠳᠤᠭᠤᠴᠢᠨ ᠪᠠᠲᠤ ᠬᠠᠭᠠᠨ ᠮᠠᠨ ᠤ᠋ ᠷᠶᠠᠽᠠᠨ ᠭᠠᠵᠠᠷ ᠳᠡᠭᠡᠷᠡ ᠢᠷᠡᠵᠦ ᠪᠠᠢᠨᠠ᠃ ᠮᠠᠨ ᠤ᠋ ᠸᠠᠩ ᠥᠪᠡᠷ ᠦ᠋ᠨ ᠠᠬᠠ ᠳᠡᠭᠦᠦ ᠨᠠᠷ ᠲᠤ᠌ ᠡᠯᠴᠢ ᠶᠠᠪᠤᠭᠤᠯᠤᠭᠰᠠᠨ᠃ ᠮᠥᠷᠥᠮ ᠳ᠋ᠦ᠍᠂ᠺᠣᠯᠣᠮᠤᠨ ᠳ᠋ᠤ᠌᠂ ᠺᠷᠠᠰᠨᠢ ᠳ᠋ᠤ᠌᠂ ᠮᠥᠨ ᠥᠪᠡᠷ ᠦ᠋ᠨ ᠬᠥᠪᠡᠭᠦᠨ ᠹᠸᠤᠳ᠋ᠤᠷ ᠶᠦᠷᠢᠶᠧᠸᠢᠴ ᠲᠦ᠍᠂ ᠫᠷᠤᠨᠰᠺ ᠲᠸ᠋ ᠪᠠᠢᠭᠠ ᠥᠪᠡᠷ ᠦ᠋ᠨ ᠬᠥᠪᠡᠭᠦᠨ ᠸᠰᠧᠸᠦᠯᠦᠳ᠋ ᠶᠦᠷᠢᠶᠧᠸᠢᠴ ᠲᠦ᠍ ᠲᠤᠰ ᠲᠤᠰ ᠡᠯᠴᠢ ᠮᠣᠷᠳᠠᠭᠤᠯᠤᠭᠰᠠᠨ᠃ ᠪᠦᠬᠦ ᠸᠠᠩ ᠤ᠋ᠳ ᠣᠯᠠᠨ ᠴᠡᠷᠢᠭ ᠢ᠋ᠶ᠋ᠡᠷ ᠬᠦᠴᠦᠨ ᠲᠤᠰᠠᠯᠠᠨᠠ ᠭᠡᠵᠦ ᠬᠠᠷᠢᠭᠤᠯᠤᠭᠰᠠᠨ ᠪᠠᠢᠨᠠ᠃ ᠮᠠᠨ ᠤ᠋ ᠭᠠᠵᠠᠷ ᠢ᠋ ᠶᠠᠭᠠᠬᠢᠭᠰᠠᠨ ᠴᠤ᠌ ᠣᠷᠬᠢᠬᠤ ᠦᠭᠡᠢ᠂ ᠷᠶᠠᠽᠠᠨ ᠤ᠋ ᠬᠥᠮᠦᠰ ᠲᠡᠢ ᠮᠥᠷᠥ ᠵᠡᠷᠭᠡᠴᠡᠵᠦ ᠲᠤᠯᠤᠨᠠ ᠭᠡᠰᠡᠨ ᠪᠠᠢᠨᠠ ᠭᠡᠳ ᠰᠠᠨᠸᠠᠷᠲᠠᠨ ᠳᠠᠭᠤ ᠦᠭᠡᠢ ᠪᠣᠯᠤᠭᠰᠠᠨ ᠳ᠋ᠤ᠌᠂
— ᠲᠠᠯᠬᠠ ᠥᠭᠭᠦᠭᠡᠴᠢ᠂ ᠲᠠᠯᠬᠠ ᠥᠭᠭᠦᠭᠡᠴᠢ ᠭᠡᠵᠦ ᠪᠣᠯᠭᠠᠷᠢ ᠶ᠋ᠢᠨ ᠨᠡᠭᠦᠳᠡᠯᠴᠢᠨ ᠪᠠᠷᠬᠢᠷᠠᠯᠳᠤᠪᠠ᠃ ᠳ᠋ᠢᠺᠣᠷᠣᠰ ᠰᠢᠬᠠᠯᠴᠠᠯᠳᠤᠭᠠᠨ ᠳᠣᠲᠣᠷᠠ ᠵᠢᠳᠠ ᠪᠠᠨ ᠲᠤᠯᠤᠭᠠᠳ ᠵᠣᠭᠰᠣᠵᠤ ᠪᠠᠢᠯᠠ᠃ ᠲᠡᠭᠦᠨ ᠦ᠌ ᠬᠠᠵᠠᠭᠤ ᠳ᠋ᠤ᠌ ᠲᠣᠷᠣᠫᠺᠠ ᠵᠣᠭᠰᠣᠵᠤ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠨᠢᠭᠤᠷ ᠢ᠋ ᠰᠡᠮᠬᠡᠨ ᠰᠡᠮᠬᠡᠨ ᠠᠵᠢᠭᠯᠠᠪᠠᠯ ᠳ᠋ᠢᠺᠣᠷᠣᠰ ᠤ᠋ᠨ ᠨᠢᠳᠦᠨ ᠦ᠌ ᠬᠠᠷᠠᠴᠠ ᠰᠢᠷᠦᠭᠦᠨ ᠪᠥᠭᠡᠳ ᠭᠤᠨᠢᠭᠲᠠᠢ ᠪᠣᠳᠣᠯ ᠪᠣᠳᠣᠭᠰᠠᠨ ᠨᠢ ᠢᠯᠡᠳᠲᠡ ᠪᠠᠢᠯᠠ᠃
ᠲᠣᠷᠣᠫᠺᠠ ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠨᠴᠤᠢ ᠠ᠋ᠴᠠ ᠠᠶᠠᠷᠬᠠᠨ ᠳᠤᠭᠲᠤᠷᠴᠤ᠂
— ᠠᠪᠤ ᠠ᠋ ᠭᠡᠵᠦ ᠳᠠᠭᠤᠳᠠᠭᠠᠳ᠂
— ᠠᠳᠤᠭᠤᠴᠢᠨ ᠬᠥᠮᠦᠨ ᠮᠠᠨ ᠤ᠋ ᠵᠦᠭ ᠤᠷᠤᠭᠤ ᠢᠷᠡᠵᠦ ᠶᠠᠪᠤᠨᠠ ᠭᠡᠳᠡᠭ ᠦᠨᠡᠨ ᠤᠤ? ᠡᠰᠡᠪᠡᠯ ᠡᠨᠡ ᠬᠥᠭᠰᠢᠨ ᠳᠡᠮᠡᠢ ᠴᠠᠯᠴᠢᠵᠤ ᠪᠠᠢᠨᠠ ᠤᠤ? ᠭᠡᠪᠡ᠃
— ᠡᠭᠦᠨ ᠢ᠋ ᠬᠠᠷᠠᠵᠤ ᠰᠣᠨᠣᠰᠴᠤ ᠪᠠᠢᠵᠤ ᠪᠣᠯᠤᠶᠠ ᠭᠡᠵᠦ ᠳ᠋ᠢᠺᠦᠷᠤᠰ ᠬᠡᠯᠡᠭᠡᠳ᠂
— ᠺᠦᠳ᠋ᠷᠶᠠᠱ ᠴᠢ ᠶᠠᠭᠤ ᠬᠠᠷᠠᠭᠤᠯᠳᠠᠭᠠᠪᠠ ᠭᠡᠵᠦ ᠠᠰᠠᠭᠤᠬᠤ ᠳ᠋ᠤᠨᠢ ᠺᠦᠳ᠋ᠷᠶᠠᠱ ᠲᠣᠯᠣᠭᠠᠢ ᠪᠠᠨ ᠰᠡᠭᠰᠦᠷᠴᠦ᠂
— ᠲᠡᠷᠡ ᠭᠣᠣᠯ ᠤᠷᠤᠭᠤᠳᠠᠭᠠᠳ ᠢᠷᠡᠵᠦ ᠶᠠᠪᠤᠭᠠ ᠪᠣᠯᠭᠠᠷᠢ ᠨᠤᠭᠤᠳ ᠢ᠋ ᠬᠠᠷᠠᠯᠠ᠃ ᠤᠷᠢᠳᠤ ᠪᠣᠯᠭᠠᠷᠢ ᠬᠥᠮᠦᠰ ᠴᠥᠮ ᠰᠠᠪᠢᠬᠢᠨ ᠭᠤᠲᠤᠯ ᠡᠮᠦᠰᠴᠦ ᠰᠡᠦᠬᠡ ᠲᠡᠷᠭᠡᠨ ᠳᠡᠭᠡᠷᠡ ᠰᠠᠭᠤᠭᠠᠳ᠂ ᠪᠢᠳᠡᠨ ᠳ᠋ᠦ᠍ ᠵᠣᠴᠢᠨ ᠪᠣᠯᠵᠤ ᠢᠷᠡᠳᠡᠭ ᠪᠠᠢᠯᠠ᠃ ᠭᠠᠵᠠᠷ ᠠ᠋ᠴᠠ ᠨᠢᠴᠦᠭᠦᠨ ᠱᠠᠯᠳᠠᠩ ᠵᠢᠭᠤᠲᠠᠬᠤ ᠶᠠᠪᠤᠳᠠᠯ ᠪᠢᠳᠡᠨ ᠳ᠋ᠦ᠍ ᠡᠨᠡ ᠮᠡᠲᠦ ᠪᠡᠷ ᠲᠣᠬᠢᠶᠠᠯᠳᠤᠬᠤ ᠪᠣᠯ ᠤᠤ? ᠭᠡᠵᠦ ᠪᠣᠳᠣᠭᠳᠠᠯᠠ᠃ᠲᠡᠭᠡᠪᠡᠯ ᠬᠠᠮᠢᠭᠠ ᠵᠢᠭᠤᠲᠠᠬᠤ ᠶᠤᠮ ᠪᠢᠯᠡ? ᠭᠡᠪᠡ᠃
— ᠦᠨᠡᠨ ᠵᠢᠷᠤᠮᠲᠠᠨ᠂ ᠴᠤᠭᠯᠠᠷᠠᠭᠲᠤᠨ! ᠬᠡᠷᠴᠡᠭᠡᠢ ᠪᠠᠲᠤ ᠬᠠᠭᠠᠨ ᠳ᠋ᠤ᠌ ᠣᠷᠣᠰ ᠤ᠋ᠨ ᠭᠠᠵᠠᠷ ᠢ᠋ ᠪᠤᠤ ᠵᠠᠬᠢᠷᠤᠭᠤᠯᠤᠭᠲᠤᠨ! ᠪᠦᠭᠦᠳᠡᠭᠡᠷ ᠸᠠᠩ ᠶᠥᠷᠢ ᠢᠩᠭ᠌ᠸᠠᠷᠸᠸᠢᠴ ᠦ᠋ᠨ ᠶᠡᠬᠡ ᠴᠡᠷᠢᠭ ᠲᠦ᠍ ᠡᠯᠰᠡᠭᠳᠡᠭᠲᠦᠨ ᠭᠡᠵᠦ ᠶᠠᠷᠢᠶᠠ ᠪᠠᠨ ᠦᠷᠭᠦᠯᠵᠢᠯᠡᠭᠦᠯᠪᠡ᠃
— ᠲᠡᠢᠮᠦ ᠪᠣᠯ ᠬᠠᠮᠢᠭᠠᠰᠢ ᠣᠴᠢᠬᠤ ᠶᠤᠮ ᠪᠣᠢ? ᠬᠠᠮᠢᠭᠠ ᠴᠤᠭᠯᠠᠷᠠᠵᠤ ᠪᠠᠢᠭᠠ ᠶᠤᠮ ᠪᠣᠢ? ᠭᠡᠵᠦ ᠳ᠋ᠢᠺᠦᠷᠤᠰ ᠳᠤᠤᠭᠠᠷᠪᠠ᠃ ᠲᠡᠳᠦᠢ ᠣᠯᠠᠨ ᠤ᠋ ᠳᠣᠲᠣᠷᠠ ᠠ᠋ᠴᠠ᠂
— ᠬᠠᠮᠢᠭᠠ ᠴᠤᠭᠯᠠᠷᠠᠵᠤ ᠪᠠᠢᠭᠠ ᠶᠤᠮ ᠪᠣᠢ? ᠬᠡᠨ ᠠᠪᠴᠤ ᠶᠠᠪᠤᠬᠤ ᠶᠤᠮ ᠪᠣᠢ? ᠭᠡᠵᠦ ᠳᠠᠭᠤᠳᠠᠨ ᠠᠰᠠᠭᠤᠵᠠᠭᠠᠭᠰᠠᠨ ᠳ᠋ᠤ᠌᠂
— ᠣᠳᠣ ᠲᠠᠨᠠᠷ ᠲᠸ᠋ ᠷᠶᠡᠽᠡᠨ ᠦ᠌ ᠴᠡᠷᠢᠭ ᠦ᠋ᠨ ᠡᠷᠬᠢᠮ ᠡᠷᠡ ᠶᠸᠸᠫᠠᠲ ᠺᠣᠯᠤᠸᠷᠠᠲ ᠦᠭᠡ ᠬᠡᠯᠡᠨᠡ ᠭᠡᠵᠦ ᠰᠠᠨᠸᠠᠷᠲᠠᠨ ᠬᠠᠷᠢᠭᠤᠯᠤᠭᠠᠳ ᠭᠠᠤᠯᠢᠨ ᠵᠠᠭᠠᠯᠮᠠᠢ ᠪᠠᠨ ᠡᠪᠦᠷᠲᠦᠯᠡᠵᠦ ᠭᠠᠷ ᠢ᠋ᠶ᠋ᠠᠨ ᠡᠷᠭᠦᠨ ᠬᠠᠨᠴᠤᠢ ᠳᠣᠲᠣᠷᠠ ᠪᠠᠨ ᠬᠢᠪᠡ᠃ ᠲᠡᠳᠦᠢ ᠪᠣᠭᠣᠨᠢ ᠦᠰᠦ ᠲᠡᠢ ᠳᠡᠪᠡᠯ ᠲᠡᠢ᠂ ᠲᠡᠮᠦᠷ ᠮᠠᠯᠠᠭᠠᠢ ᠲᠠᠢ᠂ᠴᠢᠩᠭᠠ ᠪᠦᠰᠡᠯᠡᠭᠰᠡᠨ ᠰᠤᠷ ᠤ᠋ᠨ ᠪᠥᠰᠡᠨ ᠳ᠋ᠡᠭᠡᠨ ᠤᠷᠲᠤ ᠲᠠᠬᠢᠷ ᠬᠤᠢ ᠲᠠᠢ ᠰᠡᠯᠡᠮᠡ ᠵᠡᠭᠦᠭᠰᠡᠨ ᠥᠨᠳᠥᠷ ᠪᠡᠶᠡ ᠲᠡᠢ ᠪᠠᠢᠯᠳᠤᠭᠴᠢ ᠪᠠᠢᠯᠳᠤᠭᠠᠨ ᠤ᠋ ᠠᠯᠲᠠᠨ ᠵᠢᠷᠤᠭᠠᠰᠤᠲᠤ ᠰᠦᠬᠡ ᠪᠠᠷᠢᠨ ᠭᠠᠷᠴᠤ ᠢᠷᠡᠭᠡᠳ᠂ ᠪᠡᠶᠡ ᠪᠡᠨ ᠳᠡᠭᠡᠭᠰᠢᠯᠡᠭᠦᠯᠵᠦ ᠣᠯᠠᠨ ᠤ᠋ ᠵᠦᠭ ᠬᠥᠭᠵᠢᠯᠲᠡᠢ ᠬᠠᠷᠠᠴᠠ ᠪᠠᠷ ᠬᠠᠷᠠᠮᠠᠭᠴᠠ ᠭᠤᠷᠪᠠᠨ ᠵᠦᠭ ᠳᠠᠰᠢ ᠮᠡᠬᠦᠢᠰᠬᠢᠨ ᠶᠣᠰᠣᠯᠠᠭᠠᠳ ᠬᠡᠯᠡᠭᠰᠡᠨ ᠨᠢ᠄
— ᠬᠦᠴᠦᠲᠦ ᠪᠠᠢᠯᠳᠤᠭᠴᠢᠳ᠂ ᠪᠠᠭᠠᠪᠠᠭᠠᠢ ᠶ᠋ᠢᠨ ᠠᠩᠴᠢᠳ᠂ ᠵᠣᠷᠢᠭᠲᠤ ᠠᠷᠠᠳ ᠤ᠋ᠳ᠂ ᠰᠡᠷᠭᠦᠯᠡᠩ ᠢ᠋ᠶ᠋ᠡᠷ ᠬᠥᠮᠦᠵᠢᠭᠰᠡᠨ ᠷᠶᠠᠽᠠᠨ ᠤ᠋ ᠬᠥᠮᠦᠰ ᠨᠠᠳᠠᠳᠤ ᠦᠭᠡ ᠬᠡᠯᠡᠬᠦ ᠵᠥᠪᠰᠢᠶᠡᠷᠡᠯ ᠣᠯᠭᠣᠭᠲᠤᠨ᠃ ᠲᠠᠨᠠᠷ ᠲᠸ᠋ ᠪᠢ ᠮᠡᠬᠦᠢᠨ ᠰᠥᠭᠥᠳᠴᠦ ᠬᠡᠯᠡᠶᠡ ᠭᠡᠬᠦ ᠳ᠋ᠦ᠍᠄
— ᠬᠡᠯᠡ᠂ ᠬᠡᠯᠡ! ᠶᠧᠸᠫᠡᠲ᠂ ᠪᠢᠳᠡ ᠰᠣᠨᠣᠰᠤᠨᠠ ᠭᠡᠬᠦ ᠬᠠᠷᠢᠭᠤ ᠰᠣᠨᠣᠰᠳᠠᠪᠠ᠃
—ᠡᠨᠡ ᠠᠳᠤᠭᠤᠴᠢᠨ ᠲᠠᠲ᠋ᠠᠷ ᠤ᠋ᠳ ᠬᠡᠨ ᠪᠣᠯᠬᠤ ᠶ᠋ᠢ ᠪᠢ ᠮᠡᠳᠡᠨᠡ᠃ ᠥᠪᠡᠷ ᠦ᠋ᠨ ᠨᠢᠳᠦ ᠪᠡᠷ ᠲᠡᠳᠡᠨ ᠢ᠋ ᠦᠵᠡᠭᠰᠡᠨ᠂ ᠥᠪᠡᠷ ᠦ᠋ᠨ ᠭᠠᠷ ᠢ᠋ᠶ᠋ᠠᠷ ᠲᠡᠳᠡᠨ ᠢ᠋ ᠲᠡᠮᠲᠡᠷᠢᠭᠰᠡᠨ᠂ ᠪᠡᠬᠢᠯᠡᠯᠲᠡ ᠶ᠋ᠢ ᠨᠢ ᠥᠪᠡᠷ ᠢ᠋ᠶ᠋ᠡᠨ ᠡᠪᠳᠡᠭᠰᠡᠨ᠃ ᠲᠡᠢᠮᠦ ᠤᠴᠢᠷ ᠠ᠋ᠴᠠ ᠲᠡᠳᠡᠨ ᠮᠢᠨᠦ ᠴᠡᠭᠡᠵᠢᠨ ᠳ᠋ᠦ᠍ ᠪᠠᠭᠠ ᠪᠤᠰᠤ ᠰᠣᠷᠪᠢ ᠦᠯᠡᠳᠡᠭᠡᠭᠰᠡᠨ! ᠡᠨᠡ ᠲᠡᠮᠦᠷ ᠮᠠᠯᠠᠭᠠᠢ ᠪᠣᠯᠤᠨ ᠲᠠᠬᠢᠷ ᠰᠡᠯᠡᠮᠡ ᠶ᠋ᠢ ᠠᠯᠠᠭᠳᠠᠭᠰᠠᠨ ᠲᠠᠲ᠋ᠠᠷ ᠤ᠋ᠨ ᠬᠠᠭᠠᠨ ᠠ᠋ᠴᠠ ᠠᠪᠤᠭᠰᠠᠨ ᠶᠤᠮ ᠭᠡᠬᠦ ᠳ᠋ᠦ᠍ᠨᠢ᠂
— ᠬᠠᠷᠠᠪᠠ ᠤᠤ᠂ ᠮᠠᠨ ᠤ᠋ ᠶᠧᠸᠫᠡᠲ ᠢ᠋ ᠭᠡᠬᠦ ᠦᠭᠡ ᠣᠯᠠᠨ ᠤ᠋ ᠳᠤᠮᠳᠠ ᠠ᠋ᠴᠠ ᠰᠣᠨᠣᠰᠳᠠᠪᠠ᠃
ᠺᠣᠯᠣᠸᠷᠠᠲ ᠳᠠᠬᠢᠨ ᠬᠡᠯᠡᠭᠰᠡᠨ ᠨᠢ᠄
—ᠠᠷᠪᠠᠨ ᠬᠣᠶᠠᠷ ᠵᠢᠯ ᠦ᠋ᠨ ᠡᠮᠦᠨᠡ ᠲᠠᠨᠠᠷ ᠤ᠋ᠨ ᠣᠯᠠᠩᠬᠢ ᠨᠢ ᠡᠭᠦᠨ ᠢ᠋ ᠰᠠᠨᠠᠵᠤ ᠪᠠᠢᠭᠠ ᠪᠢᠵᠡ? ᠷᠣᠰᠲ᠋ᠣᠸ ᠤ᠋ᠨ ᠴᠡᠷᠢᠭ ᠦ᠋ᠨ ᠬᠠᠮᠲᠤ ᠮᠢᠨᠦ ᠪᠡᠶᠡ ᠡᠨᠡ ᠲᠠᠲ᠋ᠠᠷ ᠤ᠋ᠳ ᠲᠠᠢ ᠡᠰᠡᠷᠭᠦᠴᠡᠨ ᠶᠠᠪᠤᠵᠤ ᠪᠢᠳᠡᠨᠡᠷ ᠬᠣᠯᠠ ᠶ᠋ᠢᠨ ᠬᠥᠬᠡ ᠳᠠᠯᠠᠢ ᠳ᠋ᠤ᠌ ᠬᠦᠷᠴᠦ᠂ ᠲᠠᠲ᠋ᠠᠷ ᠤ᠋ᠨ ᠴᠡᠷᠢᠭ ᠲᠡᠢ ᠤᠴᠠᠷᠠᠭᠰᠠᠨ ᠪᠢᠯᠡ᠃ ᠲᠡᠭᠡᠬᠦ ᠳ᠋ᠦ᠍ ᠪᠢᠳᠡ ᠠᠩᠬᠠᠳᠤᠭᠠᠷ ᠤᠳᠠᠭᠠ ᠲᠡᠳᠡ ᠨᠠᠷ ᠤ᠋ᠨ ᠶᠠᠭᠠᠬᠢᠵᠤ ᠳᠠᠭᠠᠷᠢᠨ ᠳᠣᠪᠲᠣᠯᠳᠠᠭ ᠢ᠋ ᠦᠵᠡᠭᠰᠡᠨ ᠶᠤᠮ᠃ ᠲᠡᠳᠡ ᠪᠠᠢᠯᠳᠤᠵᠤ ᠪᠠᠢᠭᠠᠳ ᠭᠡᠨᠡᠳᠲᠡ ᠡᠷᠭᠢᠵᠦ ᠪᠢᠳᠡᠨᠡᠷ ᠡᠴᠡ ᠠᠶᠤᠭᠰᠠᠨ ᠶᠤᠮ ᠰᠢᠭ᠋ ᠵᠢᠭᠤᠲᠠᠭᠠᠳ ᠮᠠᠨ ᠢ᠋ ᠥᠪᠡᠷ ᠦ᠋ᠨ ᠪᠦᠭᠭᠦᠭᠰᠡᠨ ᠴᠡᠷᠢᠭ ᠳᠡᠭᠡᠷᠡ ᠠᠪᠠᠴᠢᠬᠤ ᠶ᠋ᠢ ᠨᠢ ᠦᠵᠡᠭᠰᠡᠨ ᠶᠤᠮ᠃ ᠲᠡᠳᠡ ᠶᠡᠷᠦᠨᠢ ᠰᠦᠷᠡᠬᠡᠢ ᠪᠠᠢᠯᠳᠤᠨᠠ᠃ ᠭᠡᠰᠡᠨ ᠴᠥ᠍ ᠲᠣᠭᠲᠠᠪᠤᠷᠢ ᠮᠠᠭᠤᠲᠠᠢ᠂ ᠥᠴᠦᠬᠡᠨ ᠲᠡᠳᠦᠢ ᠪᠣᠯᠤᠮᠵᠢ ᠦᠭᠡᠢ ᠶᠠᠪᠤᠳᠠᠯ ᠪᠣᠯᠪᠠᠯ ᠡᠷᠭᠢᠵᠦ ᠬᠠᠷᠠᠯ ᠦᠭᠡᠢ ᠵᠢᠭᠤᠲᠠᠭᠠᠳ ᠬᠣᠯᠠ ᠣᠴᠢᠵᠤ ᠳᠠᠬᠢᠨ ᠭᠠᠷᠴᠤ ᠢᠷᠡᠨᠡ ᠭᠡᠪᠡ᠃
ᠺᠦᠳ᠋ᠷᠶᠡᠱ᠂ ᠳ᠋ᠢᠺᠣᠷᠣᠰ ᠤ᠋ᠨ ᠬᠠᠵᠠᠭᠤ ᠠ᠋ᠴᠠ ᠲᠦᠯᠬᠢᠵᠦ᠄
— ᠰᠣᠨᠣᠰᠪᠠ ᠤᠤ᠂ ᠲᠠᠲ᠋ᠠᠷ ᠤ᠋ᠳ ᠶᠠᠭᠤ ᠬᠢᠳᠡᠭ ᠪᠠᠢᠨᠠ? ᠪᠢᠳᠡᠨᠡᠷ ᠲᠦ᠍ ᠲᠡᠢᠮᠦ ᠠᠮᠠᠷᠬᠠᠨ ᠵᠠᠵᠢᠯᠠᠭᠳᠠᠬᠤ ᠦᠭᠡᠢ ᠪᠣᠯᠤᠯᠲᠠᠢ ᠭᠡᠪᠡ᠃
— ᠪᠢᠳᠡᠨ ᠣ ᠡᠨᠡ ᠪᠠᠢᠯᠳᠤᠭᠠᠨ ᠤ᠋ ᠤᠳᠤᠷᠢᠳᠤᠭᠴᠢ ᠪᠠᠷ ᠮᠠᠨ ᠤ᠋ ᠪᠠᠭᠠᠪᠠᠭᠠᠢ ᠠᠩᠨᠠᠭᠴᠢ ᠶᠧᠸᠫᠡᠲ ᠮᠡᠲᠦ ᠶ᠋ᠢᠨ ᠬᠥᠮᠦᠨ ᠶᠠᠪᠤᠵᠤ ᠲᠠᠲ᠋ᠠᠷ ᠦ᠋ᠳ ᠲᠡᠢ ᠪᠠᠢᠯᠳᠤᠪᠠᠯ ᠰᠠᠢᠨ ᠶᠤᠮ ᠰᠠᠨ ᠭᠡᠪᠡ᠃ ᠶᠸᠸᠫᠡᠲ ᠪᠠᠰᠠ ᠬᠡᠳᠦᠨ ᠬᠠᠯᠠᠭᠤᠨ ᠦᠭᠡ ᠬᠡᠯᠡᠵᠦ ᠪᠦᠭᠦᠳᠡ ᠶ᠋ᠢ ᠷᠶᠡᠽᠡᠨ ᠳᠠᠰᠢ ᠸᠠᠩ ᠤ᠋ᠨ ᠬᠠᠰᠢᠶᠠᠨ ᠳ᠋ᠤ᠌ ᠣᠴᠢᠬᠤ ᠶ᠋ᠢ ᠤᠷᠢᠶᠠᠯᠠᠭᠠᠳ᠂ ᠲᠡᠨᠳᠡ ᠡᠴᠡ ᠶᠡᠬᠡ ᠴᠡᠷᠢᠭ ᠲᠡᠢ ᠨᠡᠢᠯᠡᠨᠡ ᠭᠡᠪᠡ᠃
ᠲᠡᠭᠡᠭᠡᠳ ᠱᠠᠲᠤᠨ ᠳᠡᠭᠡᠷᠡ ᠡᠴᠡ ᠲᠦᠷᠭᠡᠨ ᠪᠠᠭᠤᠵᠤ ᠰᠢᠬᠠᠯᠴᠠᠯᠳᠤᠭᠰᠠᠨ ᠣᠯᠠᠨ ᠤ᠋ ᠳᠤᠮᠳᠠ ᠣᠷᠣᠲᠠᠯᠠ ᠳ᠋ᠢᠺᠤᠷᠤᠰ ᠢ᠋ ᠦᠵᠡᠪᠡ᠃
— ᠰᠠᠢᠨ ᠤᠤ? ᠰᠡᠸᠸᠯᠢ᠂ ᠠᠷᠭᠠ ᠦᠭᠡᠢ ᠯᠡ ᠪᠠᠢᠯᠳᠤᠬᠤ ᠪᠠᠷ ᠪᠡᠯᠡᠳᠬᠡᠪᠡ ᠤᠤ ᠳ᠋ᠠ? ᠭᠡᠪᠡ᠃
— ᠬᠦᠦ ᠪᠡᠨ ᠪᠠᠰᠠ ᠬᠠᠮᠲᠤ ᠠᠪᠴᠤ ᠶᠠᠪᠤᠨᠠ᠃ ᠠᠢᠯ ᠤ᠋ᠨ ᠬᠢᠨ ᠮᠠᠨᠢ ᠴᠤ᠌ ᠶᠠᠪᠤᠨᠠ᠃ ᠴᠢᠨᠦ ᠣᠲ᠋ᠷᠢᠶᠠᠳ᠋ ᠲᠤ᠌ ᠬᠠᠮᠲᠤ ᠶᠠᠪᠤᠵᠤ ᠪᠠᠢᠯᠳᠤᠬᠤ ᠶ᠋ᠢ ᠬᠦᠰᠡᠨᠡ ᠭᠡᠪᠡ᠃
— ᠠᠸᠨᠠ᠂ ᠠᠸᠨᠠ᠂ ᠪᠤᠰᠢᠭᠤᠬᠠᠨ ᠷᠶᠠᠽᠠᠨ ᠳ᠋ᠤ᠌ ᠣᠴᠢᠭᠲᠤᠨ! ᠨᠠᠳᠠᠲᠠᠢ ᠸᠠᠩ ᠤ᠋ᠨ ᠬᠠᠰᠢᠶᠠᠨ ᠳ᠋ᠤ᠌ ᠠᠭᠤᠯᠵᠠᠵᠤ ᠪᠣᠯᠤᠨᠠ᠃ ᠭᠡᠲᠡᠯᠡ ᠬᠣᠶᠠᠷ ᠳᠠᠭᠠᠯᠲᠠ ᠨᠢ ᠠᠭᠰᠤᠮ ᠮᠣᠷᠢ ᠶ᠋ᠢ ᠨᠢ ᠠᠪᠴᠢᠷᠠᠪᠠ᠃ ᠶᠸᠸᠫᠡᠲ ᠲᠡᠭᠦᠨ ᠳᠡᠭᠡᠷᠡ ᠮᠥᠷᠳᠡᠵᠦ ᠷᠶᠡᠽᠡᠨ ᠦ᠌ ᠵᠦᠭ ᠳᠠᠪᠬᠢᠨ ᠣᠳᠤᠯᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠭᠡᠷᠡᠯ᠂ ᠬᠡᠷᠡᠢᠳ· ᠮᠥᠩᠬᠡᠨᠠᠰᠤᠨ
ᠬᠢᠨᠠᠭᠴᠢ᠄ ᠲ· ᠬᠦᠮᠦᠵᠢᠯᠲᠦ᠂ ᠠᠷᠢᠭᠤᠨ᠂ ᠠᠯᠲᠠᠨᠴᠢᠮᠡᠭ