ᠪᠠᠲᠤ ᠬᠠᠭᠠᠨ 2-09ᠴᠢᠩᠭᠢᠰ ᠬᠠᠭᠠᠨ ᠤ᠋ ᠠᠴᠢ ᠦᠷᠡᠰ ᠦ᠋ᠨ ᠶᠡᠬᠡ ᠴᠢᠭᠤᠯᠭᠠᠨ-ᠪᠠᠲᠤ ᠬᠠᠭᠠᠨ ᠥᠷᠥᠨᠡ ᠵᠦᠭ ᠲᠦ᠍ ᠬᠥᠳᠡᠯᠦᠯᠡ-Bat khaan Бат хаан-ᠷᠣᠮᠠᠨ
170ᠶᠢᠰᠦ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠠᠴᠢ ᠦᠷᠡᠰ ᠦ᠋ᠨ ᠶᠡᠬᠡ ᠴᠢᠭᠤᠯᠭᠠᠨ
ᠠᠲᠠᠭᠠ ᠵᠠᠨᠤᠯ ᠬᠢᠯᠢᠩ ᠭᠤᠷᠪᠠ ᠡᠨᠡ ᠤᠯᠤᠰ ᠤ᠋ᠨ ᠠᠪᠤᠷᠢ ᠮᠥᠨ
(ᠷᠠᠰᠢᠳ᠋ ᠡᠳ᠋ ᠳ᠋ᠢᠨ)
ᠰᠠᠯᠬᠢ ᠦᠭᠡᠢ ᠨᠠᠮᠤᠭᠤᠬᠠᠨ ᠦᠳᠡᠰᠢ ᠪᠢᠯᠡ᠃ ᠤᠢᠳᠬᠠᠷᠯᠠᠭᠤᠯᠤᠭᠴᠢ ᠲᠣᠭᠣᠰᠣ ᠰᠢᠪᠡᠷ ᠪᠣᠷᠣᠭᠠᠨ ᠳ᠋ᠤ᠌ ᠳᠠᠷᠤᠭᠳᠠᠵᠤ᠂ ᠭᠠᠵᠠᠷ ᠰᠠᠢ ᠦᠭᠡᠢ ᠲᠦᠳᠡᠭ ᠳᠦᠷᠡᠯᠵᠡᠨ᠂ ᠬᠣᠨᠢ ᠶ᠋ᠢᠨ ᠰᠢᠷᠠᠭᠰᠠᠨ ᠥᠭᠡᠬᠦ ᠶ᠋ᠢᠨ ᠬᠡᠩᠰᠢᠭᠦᠦ ᠦᠨᠦᠷᠲᠦᠵᠦ ᠪᠠᠢᠯᠠ᠃
ᠬᠠᠭᠠᠳ ᠰᠣᠭᠲᠣᠭᠤ ᠪᠠᠷ ᠢᠨᠢᠶᠡᠨ᠂ ᠲᠡᠨᠡᠭ ᠪᠠᠷᠬᠢᠷᠠᠯᠳᠤᠨ ᠢᠷᠡᠵᠦ ᠠᠯᠲᠠᠯᠢᠭ ᠰᠢᠷᠠ ᠠᠰᠠᠷ ᠠ᠋ᠴᠠ ᠠᠷᠪᠠᠨ ᠠᠯᠬᠤᠮ ᠵᠠᠢᠲᠠᠢ ᠭᠠᠵᠠᠷ ᠮᠣᠷᠢ ᠪᠠᠨ ᠲᠠᠲᠠᠵᠤ ᠵᠣᠭᠰᠣᠭᠠᠵᠠᠢ᠃ ᠲᠠᠷᠭᠤᠨ ᠴᠡᠷᠢᠭ ᠬᠥᠨᠳᠡᠯᠢᠳᠴᠦ ᠵᠢᠳᠠ ᠪᠠᠷ ᠵᠠᠮ ᠢ᠋ ᠬᠠᠭᠠᠵᠤ ᠴᠠᠰᠢ ᠶᠠᠪᠤᠭᠤᠯᠤᠭᠰᠠᠨ ᠦᠭᠡᠢ᠃ ᠬᠠᠭᠠᠳ ᠠᠰᠠᠷ ᠤᠷᠤᠭᠤ ᠰᠢᠭᠤᠳ ᠣᠷᠣᠬᠤ ᠭᠡᠲᠡᠯᠡ ᠭᠤᠷᠪᠠᠨ ᠶᠡᠬᠡ ᠪᠥᠬᠡ ᠡᠮᠦᠨᠡ ᠨᠢ ᠵᠣᠭᠰᠣᠵᠠᠢ᠃
— ᠭᠠᠯ ᠤ᠋ᠨ ᠳᠤᠮᠳᠠᠭᠤᠷ ᠭᠠᠷᠭᠠᠭᠲᠤᠨ᠃ ᠪᠢᠳᠡ ᠠᠷᠢᠭᠤᠨ ᠤᠲᠤᠭᠠ ᠪᠠᠷ ᠠᠷᠢᠭᠤᠯᠠᠰᠤᠭᠠᠢ᠃ ᠡᠨᠡ ᠰᠠᠩ ᠵᠢᠷᠦᠬᠡᠨ ᠳ᠋ᠡᠬᠢ ᠬᠣᠣᠷᠲᠤ ᠰᠠᠨᠠᠭᠠ ᠶ᠋ᠢ ᠴᠢᠨᠢ ᠠᠷᠢᠯᠭᠠᠨ ᠮᠤᠩᠬᠠᠭ ᠬᠠᠷᠠᠩᠭᠤᠢ ᠶ᠋ᠢᠨ ᠬᠠᠷᠠ ᠰᠦᠨᠡᠰᠦ ᠶ᠋ᠢ ᠬᠥᠭᠡᠭᠡᠨᠡ ᠭᠡᠪᠡ᠃
ᠮᠠᠨᠠᠭᠠᠴᠢᠳ᠂ ᠠᠰᠠᠷ ᠲᠸ᠋ ᠣᠷᠣᠬᠤ ᠵᠠᠮ ᠤ᠋ᠨ ᠬᠣᠶᠠᠷ ᠬᠠᠵᠠᠭᠤ ᠳ᠋ᠤ᠌ ᠬᠣᠶᠠᠷ ᠡᠭᠡᠨᠡᠭᠡ ᠪᠡᠷ ᠵᠣᠭᠰᠣᠵᠠᠢ᠃ ᠬᠠᠭᠠᠳ᠂ ᠴᠡᠷᠢᠭ ᠦ᠋ᠨ ᠵᠠᠬᠢᠷᠤᠯ ᠤ᠋ᠳ ᠴᠢᠯᠠᠭᠤ ᠨᠠᠩᠭᠢ ᠰᠢᠷᠣᠢ ᠪᠠᠷ ᠬᠢᠭᠰᠡᠨ ᠨᠠᠢ᠍ᠮᠠᠨ ᠲᠠᠬᠢᠯ ᠤ᠋ᠨ ᠳᠡᠷᠭᠡᠳᠡ ᠵᠣᠭᠰᠣᠭᠠᠳ᠂ ᠠᠯᠭᠤᠷ ᠶᠠᠪᠤᠪᠠ᠃ ᠲᠡᠨᠳᠡ ᠣᠯᠠᠨ ᠲᠦᠳᠡᠭ ᠨᠣᠴᠣᠵᠤ ᠪᠠᠢᠯᠠ᠃ ᠪᠥᠬᠡ ᠨᠠᠷ ᠤᠲᠤᠭᠠ ᠶ᠋ᠢ ᠬᠠᠭᠠᠳ ᠤ᠋ᠨ ᠵᠦᠭ ᠴᠢᠭᠯᠡᠭᠦᠯᠬᠦ ᠭᠡᠵᠦ ᠤᠷᠤᠯᠳᠤᠨ᠂ ᠵᠡᠭᠡᠰᠦᠨ ᠳᠡᠪᠢᠭᠦᠷ ᠢ᠋ᠶ᠋ᠡᠷ ᠭᠠᠯ ᠢ᠋ ᠳᠡᠪᠢᠵᠦ ᠪᠢᠯᠡ᠃ ᠪᠤᠰᠤᠳ ᠨᠢ ᠬᠡᠩᠭᠡᠷᠭᠡ ᠴᠠᠩ ᠳᠡᠯᠡᠳᠦᠨ ᠬᠠᠭᠤᠴᠢᠨ ᠤ᠋ ᠤᠩᠰᠢᠯᠭᠠ ᠶ᠋ᠢ ᠤᠩᠰᠢᠵᠤ ᠪᠠᠢᠵᠠᠢ᠃ ᠠᠰᠠᠷ ᠤ᠋ᠨ ᠡᠭᠦᠳᠡᠨ ᠦ᠌ ᠬᠠᠷᠠᠭᠤᠯ ᠤ᠋ᠨ ᠬᠣᠶᠠᠷ ᠴᠡᠷᠢᠭ ᠬᠥᠰᠢᠭᠡ ᠶ᠋ᠢ ᠵᠢᠳᠠ ᠪᠠᠷ ᠡᠷᠭᠦᠵᠦ᠂ ᠣᠷᠣᠭᠴᠢᠳ ᠤ᠋ᠨ ᠬᠥᠯ ᠢ᠋ ᠠᠷᠢᠭᠤᠨ ᠪᠣᠱᠣᠭᠠᠨ ᠳ᠋ᠤ᠌ ᠭᠥᠷᠦᠭᠦᠯᠬᠦ ᠦᠭᠡᠢ ᠭᠡᠵᠦ ᠪᠥᠬᠥᠢᠨ ᠬᠠᠷᠠᠭᠠᠯᠵᠠᠵᠤ ᠪᠠᠢᠪᠠ᠃
ᠠᠰᠠᠷ ᠳᠣᠲᠣᠷᠠ ᠥᠨᠳᠥᠷ ᠬᠦᠷᠡᠯ ᠬᠠᠳᠬᠤᠭᠤᠷ ᠳᠡᠭᠡᠷᠡ ᠬᠦᠵᠢ ᠰᠢᠳᠡᠵᠦ ᠬᠦᠳᠡᠷ ᠦ᠋ᠨ ᠵᠢᠭᠠᠷ᠂ ᠠᠭᠠᠷᠤ ᠶ᠋ᠢᠨ ᠦᠨᠦᠷ ᠠᠩᠬᠢᠯᠵᠠᠢ᠃ ᠳᠡᠪᠢᠰᠦᠭᠰᠡᠨ ᠡᠷᠢᠶᠡᠨ ᠬᠡᠪᠢᠰᠦᠨ ᠳᠡᠭᠡᠭᠦᠷ ᠰᠠᠷᠢᠰᠤᠨ ᠪᠠ ᠲᠣᠷᠭᠠᠨ ᠣᠯᠪᠣᠭ ᠲᠣᠭᠣᠷᠢᠭᠤᠯᠤᠨ ᠲᠠᠯᠪᠢᠵᠠᠢ᠃ ᠠᠰᠠᠷ ᠤ᠋ᠨ ᠳᠣᠲᠣᠷᠠ ᠳᠡᠭᠡᠪᠦᠷ ᠡᠴᠡ ᠨᠢ ᠠᠯᠲᠠᠨ ᠱᠠ ᠪᠠᠷ ᠰᠢᠪᠠᠭᠤ᠂ ᠴᠡᠴᠡᠭ ᠣᠶᠣᠭᠰᠠᠨ ᠥᠷᠭᠡᠨ ᠶᠠᠭᠠᠨ ᠲᠣᠷᠭᠠᠨ ᠬᠥᠰᠢᠭᠡ ᠤᠨᠵᠢᠢᠵᠤ ᠠᠷᠤ ᠲᠤᠭᠤᠷᠭᠠ ᠶ᠋ᠢ ᠬᠠᠯᠬᠠᠯᠠᠵᠠᠢ᠃
ᠰᠥᠪᠡᠭᠡᠳᠡᠢ ᠪᠠᠭᠠᠲᠤᠷ᠂ ᠠᠯᠲᠠᠨ ᠬᠢᠯᠠᠪᠠᠯᠵᠠᠬᠤ ᠬᠢᠲᠠᠳ ᠶᠣᠰᠣᠯᠠᠯ ᠤ᠋ᠨ ᠬᠤᠪᠢᠰᠴᠤ ᠡᠮᠦᠰᠴᠦ᠂ ᠡᠭᠦᠳᠡᠨ ᠦ᠌ ᠳᠡᠷᠭᠡᠳᠡ ᠵᠣᠭᠰᠣᠭᠠᠳ᠂ ᠣᠷᠣᠭᠴᠢᠳ ᠢ᠋ ᠵᠡᠪᠰᠡᠭ ᠢ᠋ᠶ᠋ᠡᠨ ᠲᠠᠢᠯᠵᠤ ᠡᠭᠦᠳᠡᠨ ᠦ᠌ ᠲᠡᠨᠳᠡ ᠲᠠᠯᠪᠢᠭᠠᠳ᠂ ᠪᠠᠷᠠᠭᠤᠨ ᠡᠲᠡᠭᠡᠳ ᠲᠦ᠍ ᠰᠠᠭᠤᠵᠠᠭᠠ ᠭᠡᠵᠦ ᠤᠷᠢᠪᠠ᠃ ᠮᠥᠩᠬᠡ ᠬᠠᠭᠠᠨ᠂ ᠪᠠᠲᠤ ᠬᠠᠭᠠᠨ ᠤ᠋ ᠳᠥᠷᠪᠡᠨ ᠳᠡᠭᠦᠦ ᠵᠡᠭᠦᠨ ᠲᠠᠯᠠ ᠳ᠋ᠤ᠌ ᠰᠠᠭᠤᠪᠠ᠃ ᠬᠠᠭᠠᠳ ᠤ᠋ᠨ ᠳᠠᠷᠠᠭᠠ ᠴᠡᠷᠢᠭ ᠦ᠋ᠨ ᠵᠠᠩᠵᠤᠨ᠂ ᠶᠡᠬᠡᠬᠡᠨ ᠢᠵᠠᠭᠤᠷᠲᠤ ᠨᠣᠶᠠᠳ᠂ ᠪᠠᠭᠠᠲᠤᠷ ᠤ᠋ᠳ ᠰᠠᠭᠤᠵᠠᠢ᠃
ᠬᠥᠶᠦᠭ ᠬᠠᠭᠠᠨ ᠮᠠᠰᠢ ᠥᠨᠳᠥᠷ ᠲᠣᠪᠬᠤ ᠲᠠᠢ᠂ ᠤᠯᠠᠭᠠᠨ ᠰᠠᠷᠢᠰᠤᠨ ᠭᠤᠲᠤᠯ ᠡᠮᠦᠰᠴᠦ᠂ ᠣᠢᠷᠠ ᠣᠢᠷᠠᠬᠠᠨ ᠠᠯᠬᠤᠯᠠᠵᠤ᠂ ᠬᠠᠮᠤᠭ ᠤ᠋ᠨ ᠰᠡᠭᠦᠯ ᠳ᠋ᠦ᠍ ᠣᠷᠣᠵᠤ ᠢᠷᠡᠪᠡ᠃ ᠪᠦᠳᠦᠭᠦᠨ ᠬᠡᠪᠡᠯᠢ ᠪᠡᠷ ᠢ᠋ᠶ᠋ᠡᠨ ᠬᠣᠷᠭᠣᠢ ᠪᠦᠰᠡ ᠪᠦᠰᠡᠯᠡᠵᠦ᠂ ᠫᠢᠰᠦ ᠡᠰᠢᠲᠡᠢ ᠬᠢᠲᠠᠳ ᠺᠢᠨᠵᠢᠶᠡᠯ ᠬᠢᠲᠤᠭᠠ ᠬᠠᠪᠴᠢᠭᠤᠯᠵᠠᠢ᠃ ᠬᠥᠬᠡ ᠲᠣᠷᠭᠠᠨ ᠳᠡᠪᠡᠯ ᠢ᠋ ᠲᠣᠮᠣ ᠪᠠᠳᠮᠠᠷᠠᠭᠠ ᠲᠣᠪᠴᠢ ᠪᠠᠷ ᠲᠣᠪᠴᠢᠯᠠᠵᠤ᠂ ᠪᠠᠰᠠ ᠠᠯᠲᠠᠨ ᠯᠤᠤ ᠲᠠᠢ ᠶᠠᠭᠠᠨ ᠬᠠᠨᠵᠢᠶᠠᠷ ᠡᠮᠦᠰᠴᠡᠢ᠃
ᠬᠥᠶᠦᠭ ᠬᠠᠭᠠᠨ ᠲᠣᠭᠣᠮᠰᠠᠷ ᠦᠭᠡᠢ ᠢᠨᠢᠶᠡᠮᠰᠦᠭᠯᠡᠵᠦ᠂ ᠠᠰᠠᠷ ᠤ᠋ᠨ ᠬᠣᠢᠨᠠ ᠰᠠᠭᠤᠭᠠᠳ ᠢᠲᠡᠭᠡᠮᠵᠢ ᠦᠭᠡᠢ ᠶᠠᠩᠵᠤ ᠪᠠᠷ ᠪᠦᠭᠦᠳᠡ ᠶ᠋ᠢ ᠲᠣᠭᠣᠷᠢᠭᠤᠯᠤᠨ ᠬᠠᠷᠠᠪᠠ᠃ ᠪᠡᠶᠡ ᠬᠠᠮᠠᠭᠠᠯᠠᠭᠴᠢ ᠭᠤᠷᠪᠠᠨ ᠮᠣᠩᠭᠣᠯ ᠬᠣᠢᠨᠠ ᠠ᠋ᠴᠠ ᠨᠢ ᠣᠷᠣᠬᠤ ᠭᠡᠲᠡᠯᠡ ᠰᠥᠪᠡᠭᠡᠳᠡᠢ ᠪᠠᠭᠠᠲᠤᠷ᠂
— ᠬᠣᠢᠰᠢ ᠪᠠᠨ ᠪᠠᠢ᠂ ᠨᠣᠶᠠᠳ ᠴᠢᠭᠤᠯᠭᠠᠨ ᠳ᠋ᠤ᠌ ᠣᠷᠣᠬᠤ ᠵᠥᠪᠰᠢᠶᠡᠷᠡᠯ ᠢ᠋ ᠲᠠᠨᠠᠷ ᠲᠸ᠋ ᠬᠡᠨ ᠣᠯᠭᠣᠭᠰᠠᠨ ᠪᠣᠢ? ᠭᠡᠵᠦ ᠵᠠᠩᠳᠤᠷᠴᠠᠢ᠃
ᠭᠦᠶᠦᠭ ᠬᠠᠭᠠᠨ᠂ ᠬᠠᠵᠠᠭᠤ ᠠ᠋ᠴᠠ ᠨᠢ᠂
— ᠣᠷᠣᠲᠤᠭᠠᠢ! ᠬᠡᠷᠬᠢᠨ ᠵᠠᠬᠢᠷᠬᠤ ᠶᠣᠰᠣ ᠶ᠋ᠢ ᠰᠤᠷᠲᠤᠭᠠᠢ ᠭᠡᠬᠦ ᠳ᠋ᠦ᠍ ᠰᠥᠪᠡᠭᠡᠳᠡᠢ᠂
— ᠠᠷᠠᠫᠱᠠ! ᠡᠳᠡᠨ ᠢ᠋ ᠦᠯᠳᠡᠨ ᠵᠠᠢᠯᠠᠭᠤᠯᠤᠭᠲᠤᠨ ᠭᠡᠵᠦ ᠬᠠᠰᠬᠢᠷᠪᠠ᠃ ᠢᠷᠡᠭᠰᠡᠨ ᠮᠣᠩᠭᠣᠯᠴᠤᠳ ᠭᠦᠶᠦᠭ ᠬᠠᠭᠠᠨ ᠤᠷᠤᠭᠤ ᠲᠡᠮᠡᠦᠯᠬᠦ ᠳ᠋ᠦ᠍ ᠠᠷᠠᠫᠱᠠ ᠨᠢᠭᠡᠨ ᠢ᠋ ᠨᠢ ᠠᠷᠤ ᠠ᠋ᠴᠠ ᠰᠢᠭᠦᠷᠦᠨ ᠠᠪᠴᠤ ᠠᠰᠠᠷ ᠠ᠋ᠴᠠ ᠭᠠᠷᠭᠠᠪᠠ᠃ ᠪᠠᠲᠤ ᠬᠠᠭᠠᠨ ᠤ᠋ ᠳᠡᠭᠦᠦ ᠨᠠᠷ ᠪᠣᠰᠴᠤ᠂ ᠨᠥᠭᠦᠭᠡ ᠬᠣᠶᠠᠷ ᠢ᠋ ᠨᠢ ᠲᠦᠯᠬᠢᠵᠦ ᠪᠤᠴᠠᠭᠠᠵᠠᠢ᠃
ᠬᠢᠲᠠᠳ ᠥᠷᠭᠡᠨ ᠬᠤᠪᠴᠠᠰᠤ ᠲᠠᠢ ᠭᠤᠷᠪᠠᠨ ᠪᠣᠭᠣᠯ ᠬᠥᠭᠡᠰᠦᠷᠡᠭᠰᠡᠨ ᠴᠠᠭᠠᠨ ᠠᠢᠷᠠᠭ ᠲᠠᠢ ᠶᠡᠷᠦᠳᠡ ᠶ᠋ᠢᠨ ᠮᠣᠳᠣᠨ ᠠᠶᠠᠭᠠ ᠶ᠋ᠢ ᠤᠭᠠᠯᠵᠠ ᠲᠠᠢ ᠠᠯᠲᠠᠨ ᠲᠠᠯᠪᠢᠭᠤᠷ ᠳᠡᠭᠡᠷᠡ ᠲᠠᠯᠪᠢᠨ ᠠᠪᠴᠢᠷᠠᠵᠠᠢ᠃ ᠡᠨᠡ ᠮᠡᠷᠡᠭᠳᠡᠭᠰᠡᠨ ᠬᠥᠪᠡᠭᠡ ᠲᠡᠢ ᠪᠣᠷᠣ ᠠᠶᠠᠭᠠ ᠪᠠᠷ ᠤᠷᠢᠳᠤ ᠴᠠᠭ ᠲᠸ᠋ ᠴᠢᠩᠭᠢᠰ ᠬᠠᠭᠠᠨ ᠤᠤᠭᠤᠵᠤ ᠪᠠᠢᠭᠰᠠᠨ ᠪᠥᠭᠡᠳ ᠲᠡᠭᠦᠨ ᠢ᠋ ᠪᠠᠲᠤ ᠬᠠᠭᠠᠨ ᠬᠠᠳᠠᠭᠠᠯᠠᠵᠤ ᠪᠠᠢᠵᠠᠢ᠃ ᠶᠠᠳᠠᠭᠤ ᠠᠢᠯ ᠳ᠋ᠤ᠌ ᠦᠵᠡᠭᠳᠡᠳᠡᠭ ᠶᠡᠷᠦ ᠶ᠋ᠢᠨ ᠲᠡᠷᠡ ᠬᠠᠭᠤᠴᠢᠨ ᠠᠶᠠᠭᠠ ᠨᠤᠭᠤᠳ ᠢ᠋ ᠬᠥᠮᠦᠰ ᠴᠥᠮ ᠬᠦᠨᠳᠦᠳᠬᠡᠨ ᠬᠠᠷᠠᠪᠠ᠃ ᠴᠢᠩᠭᠢᠰ ᠦ᠋ᠨ ᠤᠳᠤᠮ ᠤ᠋ᠨ ᠬᠠᠭᠠᠳ ᠤ᠋ᠨ ᠲᠣᠭᠠ ᠪᠠᠷ ᠠᠷᠪᠠᠨ ᠨᠢᠭᠡᠨ ᠠᠶᠠᠭᠠ ᠪᠠᠢᠯᠠ᠃ ᠪᠣᠭᠣᠯᠴᠤᠳ ᠭᠠᠷ ᠢ᠋ᠶ᠋ᠠᠨ ᠰᠤᠩᠭᠠᠨ᠂ ᠲᠠᠯᠪᠢᠭᠤᠷ ᠢ᠋ ᠡᠷᠭᠦᠵᠦ ᠬᠥᠳᠡᠯᠦᠯ ᠦᠭᠡᠢ ᠵᠣᠭᠰᠣᠵᠠᠢ᠃
ᠰᠦᠪᠡᠭᠡᠳᠡᠢ ᠠᠰᠠᠷ ᠤ᠋ᠨ ᠬᠣᠢᠮᠣᠷ ᠣᠴᠢᠵᠤ᠂ ᠠᠯᠲᠠᠨ ᠱᠠ ᠲᠠᠢ ᠶᠠᠭᠠᠨ ᠬᠥᠰᠢᠭᠡ ᠶ᠋ᠢ ᠬᠢᠴᠢᠶᠡᠩᠭᠦᠢ ᠪᠡᠷ ᠢᠷᠠᠬᠤ ᠳ᠋ᠤ᠌᠂ ᠠᠯᠲᠠᠨ ᠴᠢᠮᠡᠭ ᠲᠡᠢ ᠥᠷᠭᠡᠨ ᠨᠠᠮᠬᠠᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠬᠥᠳᠡᠯᠭᠡᠭᠡ ᠦᠭᠡᠢ ᠲᠣᠭᠰᠢᠨ ᠪᠠᠲᠤ ᠬᠠᠭᠠᠨ ᠰᠠᠭᠤᠵᠤ ᠪᠠᠢᠯᠠ᠃ ᠲᠤᠶᠠᠭᠠ ᠰᠠᠴᠤᠷᠠᠨ ᠭᠢᠯᠠᠯᠵᠠᠬᠤ ᠪᠣᠯᠣᠳ ᠬᠤᠶᠠᠭ᠂ ᠣᠷᠣᠢ ᠳᠡᠭᠡᠷᠡ ᠨᠢ ᠲᠠᠭᠲᠠᠭᠠᠨ ᠤ᠋ ᠥᠨᠳᠡᠭᠡᠨ ᠦ᠌ ᠬᠢᠷᠢ ᠲᠡᠢ ᠲᠣᠮᠣ ᠠᠯᠮᠠᠰ ᠰᠢᠭᠢᠳᠬᠡᠭᠰᠡᠨ ᠪᠥᠭᠡᠳ ᠪᠦᠴᠡ ᠲᠡᠢ ᠬᠢᠲᠠᠳ ᠠᠯᠲᠠᠨ ᠳᠤᠭᠤᠯᠠᠭᠠ ᠡᠮᠦᠰᠴᠡᠢ᠃ ᠳᠤᠭᠤᠯᠠᠭᠠᠨ ᠠ᠋ᠴᠠ ᠨᠢ ᠳᠥᠷᠪᠡᠨ ᠬᠠᠷᠠ ᠦᠨᠡᠭᠡᠨ ᠦ᠌ ᠰᠡᠭᠦᠯ ᠤᠨᠵᠢᠢᠵᠠᠢ᠃
ᠠᠯᠲᠠᠨ ᠣᠭᠣᠰᠣᠷ ᠲᠠᠢ ᠲᠣᠮᠣ ᠠᠯᠲᠠᠨ ᠲᠣᠯᠢ᠂ ᠤᠯᠠᠩᠭᠠᠰᠤᠭᠰᠠᠨ ᠪᠠᠷᠰ ᠤ᠋ᠨ ᠲᠣᠯᠣᠭᠠᠢ ᠲᠠᠢ ᠫᠠᠢᠰᠠ ᠪᠠᠲᠤ ᠬᠠᠭᠠᠨ ᠤ᠋ ᠡᠩᠭᠡᠷ ᠳᠡᠭᠡᠷᠡ ᠭᠢᠯᠠᠯᠵᠠᠨ ᠪᠠᠢᠪᠠ᠃ ᠡᠨᠡ ᠫᠠᠢᠰᠠ ᠶ᠋ᠢ ᠪᠠᠲᠤ ᠬᠠᠭᠠᠨ ᠤ᠋ ᠡᠴᠢᠭᠡ—ᠰᠢᠷᠦᠭᠦᠨ ᠵᠣᠷᠢᠭᠲᠤ ᠵᠥᠴᠢ ᠬᠠᠭᠠᠨ᠂ ᠴᠢᠩᠭᠢᠰ ᠬᠠᠭᠠᠨ ᠠ᠋ᠴᠠ ᠭᠠᠷᠳᠠᠵᠤ ᠠᠪᠤᠭᠰᠠᠨ ᠶᠤᠮ ᠪᠠᠢᠵᠠᠢ᠃ ᠪᠠᠷᠰ ᠤ᠋ᠨ ᠲᠣᠯᠣᠭᠠᠢ ᠨᠢ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠭᠡᠰᠡᠨ ᠲᠡᠮᠳᠡᠭ ᠪᠥᠭᠡᠳ《ᠪᠢᠳᠡ ᠥᠪᠡᠷᠰᠡᠳ ᠢ᠋ᠶ᠋ᠡᠨ᠂ ᠲᠤᠰᠢᠶᠠᠯ ᠤ᠋ᠨ ᠨᠢᠭᠡᠨ ᠠᠳᠠᠯᠢ ᠪᠠᠷ᠂ ᠡᠨᠡ ᠫᠠᠢᠰᠠ ᠶ᠋ᠢ ᠬᠠᠳᠠᠭᠠᠯᠠᠭᠴᠢᠳ ᠴᠥᠮ ᠵᠠᠬᠢᠷᠤᠭᠳᠠᠬᠤ ᠶᠣᠰᠣᠲᠠᠢ》ᠭᠡᠰᠡᠨ ᠤᠳᠬᠠ ᠲᠠᠢ ᠠᠵᠢ᠃ ᠪᠠᠲᠤ ᠬᠠᠭᠠᠨ᠂ ᠠᠯᠮᠠᠰ ᠭᠢᠯᠠᠪᠠᠯᠵᠠᠭᠰᠠᠨ ᠤᠷᠲᠤ ᠡᠰᠢᠲᠡᠢ ᠬᠢᠲᠠᠳ ᠰᠡᠯᠡᠮᠡ ᠶ᠋ᠢ ᠡᠪᠦᠳᠦᠭ ᠳᠡᠭᠡᠷᠡ ᠪᠡᠨ ᠪᠠᠷᠢᠵᠤ ᠪᠠᠢᠪᠠ᠃
ᠠᠶᠤᠮᠰᠢᠭᠲᠤ ᠳ᠋ᠵᠢᠬᠠᠩᠬᠢᠷ ᠢ᠋ ᠴᠥᠮ ᠰᠢᠷᠲᠡᠵᠦ ᠴᠢᠮᠡᠭᠡ ᠦᠭᠡᠢ ᠪᠣᠯᠵᠠᠢ᠃ ᠪᠠᠲᠤ ᠬᠠᠭᠠᠨ᠂ ᠬᠥᠮᠥᠰᠬᠡ ᠵᠠᠩᠭᠢᠳᠴᠤ᠂ ᠪᠠᠷᠤᠢᠭᠰᠠᠨ ᠴᠢᠷᠠᠢ ᠪᠠᠷ ᠶᠡᠷᠦᠳᠡ ᠶ᠋ᠢᠨ ᠶᠢᠷᠲᠢᠨᠴᠦ ᠡᠴᠡ ᠬᠣᠯᠠᠳᠠᠭᠰᠠᠨ ᠮᠡᠲᠦ ᠬᠥᠮᠦᠰ ᠦ᠋ᠨ ᠳᠡᠭᠡᠭᠦᠷ ᠬᠠᠷᠠᠵᠤ ᠪᠠᠢᠪᠠ᠃
ᠬᠥᠶᠦᠭ ᠬᠠᠭᠠᠨ᠂ ᠬᠥᠳᠡᠯᠦᠯ ᠦᠭᠡᠢ ᠲᠦᠷ ᠵᠠᠭᠤᠷᠠ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠳᠡᠷᠭᠡᠳᠡᠬᠢ ᠺᠦᠯᠢ ᠬᠠᠭᠠᠨ ᠤ᠋ ᠵᠦᠭ ᠡᠷᠭᠢᠵᠦ᠂ ᠪᠦᠭᠦᠳᠡᠭᠡᠷ ᠰᠣᠨᠣᠰᠬᠤᠢᠴᠠ ᠰᠢᠪᠡᠨᠡᠨ ᠬᠡᠯᠡᠭᠰᠡᠨ ᠨᠢ:
— ᠠᠷᠰᠯᠠᠨ ᠲᠠᠢ ᠠᠳᠠᠯᠢ ᠭᠡᠵᠦ ᠰᠠᠨᠠᠭᠴᠢ᠂ ᠬᠡᠭᠡᠷᠡ ᠶ᠋ᠢᠨ ᠬᠤᠯᠤᠭᠠᠨᠠ ᠪᠠᠢᠨᠠ! (ᠭᠡᠵᠡᠢ )᠃
ᠰᠦᠪᠡᠭᠡᠲᠡᠢ ᠪᠠᠭᠠᠲᠤᠷ ᠰᠢᠷᠡᠭᠡᠨ ᠦ᠌ ᠡᠮᠦᠨᠡ ᠰᠥᠭᠥᠳᠴᠦ᠄
— ᠡᠨᠡ ᠠᠶᠠᠨ ᠲᠡᠢᠨ ᠦ᠌ ᠳ᠋ᠵᠢᠬᠠᠩᠬᠢᠷ᠂ ᠪᠠᠲᠤ ᠬᠠᠭᠠᠨ ᠪᠣᠯᠤᠭᠰᠠᠨ ᠢ᠋ ᠲᠤᠩᠬᠠᠭᠯᠠᠵᠤ ᠪᠠᠢᠨᠠ᠃ ᠡᠨᠡ ᠪᠣᠯ ᠰᠢᠳᠤᠷᠭᠤ᠃ ᠪᠠᠲᠤ ᠵᠣᠷᠢᠭᠲᠠᠢ ᠡᠷᠡ ᠰᠠᠢᠨ ᠬᠠᠭᠠᠨ ᠭᠡᠵᠦ ᠡᠷᠭᠦᠮᠵᠢᠯᠡᠰᠦᠭᠡᠢ᠃ ᠬᠦᠴᠦᠲᠦ ᠴᠡᠭᠡᠵᠢᠨ ᠳᠡᠭᠡᠷᠡᠬᠢ ᠠᠯᠲᠠᠨ ᠫᠠᠢᠰᠠ ᠶ᠋ᠢ ᠨᠢ ᠲᠠᠨᠠᠷ ᠦᠵᠡᠵᠦ ᠪᠠᠢᠨᠠ᠃ ᠤᠯᠠᠩᠭᠠᠰᠤᠭᠰᠠᠨ ᠪᠠᠷᠰ ᠤ᠋ᠨ ᠲᠣᠯᠣᠭᠠᠢ ᠶᠠᠮᠠᠷ ᠤᠴᠢᠷ ᠲᠠᠢ ᠶ᠋ᠢ ᠮᠥᠨ ᠮᠡᠳᠡᠨᠡ᠃ ᠪᠣᠭᠳᠠ ᠡᠵᠡᠨ ᠦ᠌ ᠠᠳᠠᠯᠢ ᠪᠠᠷ ᠪᠠᠲᠤ ᠬᠠᠭᠠᠨ ᠢ᠋ ᠬᠦᠨᠳᠦᠯᠡᠭᠲᠦᠨ᠃ ᠬᠡᠷᠪᠡ ᠪᠦᠬᠦ ᠴᠡᠷᠢᠭ ᠶᠡᠬᠡ ᠡᠵᠡᠨ ᠳ᠋ᠦ᠍ ᠵᠠᠬᠢᠷᠤᠭᠳᠠᠭᠰᠠᠨ ᠤ᠋ ᠠᠳᠠᠯᠢ ᠪᠠᠷ ᠰᠠᠢᠨ ᠬᠠᠭᠠᠨ ᠳ᠋ᠤ᠌ ᠵᠠᠬᠢᠷᠤᠭᠳᠠᠪᠠᠯ ᠪᠦᠬᠦ ᠳᠡᠯᠡᠬᠡᠢ ᠮᠠᠨ ᠤ᠋ ᠮᠣᠷᠢᠨ ᠲᠤᠭᠤᠷᠠᠢ ᠶ᠋ᠢᠨ ᠳᠣᠣᠷᠠ ᠪᠠᠢᠬᠤ ᠪᠣᠯᠤᠨᠠ᠃ ᠳ᠋ᠵᠢᠬᠠᠩᠬᠢᠷ ᠤ᠋ᠨ ᠡᠮᠦᠨᠡ ᠰᠥᠭᠥᠳᠦᠭᠲᠦᠨ!
ᠪᠠᠲᠤ ᠬᠠᠭᠠᠨ ᠤ᠋ ᠳᠡᠭᠦᠦ ᠨᠠᠷ ᠪᠣᠰᠤᠭᠠᠳ᠂ ᠭᠠᠷ ᠢ᠋ᠶ᠋ᠠᠨ ᠴᠡᠭᠡᠵᠢᠨ ᠲᠤᠰᠢᠶᠠ ᠠᠪᠠᠴᠢᠵᠤ ᠳᠣᠷᠣᠭᠰᠢ ᠬᠠᠨᠳᠤᠨ ᠰᠥᠬᠥᠷᠡᠪᠡ᠃ ᠳᠠᠷᠠᠭᠠ ᠨᠢ ᠮᠥᠩᠬᠡ ᠬᠠᠭᠠᠨ᠂ ᠬᠡᠳᠦᠨ ᠡᠪᠦᠭᠡᠨ ᠵᠠᠩᠵᠤᠨ ᠪᠣᠰᠴᠤ ᠬᠡᠪᠢᠰ ᠢ᠋ ᠨᠢ ᠦᠨᠦᠰᠦᠨ ᠮᠥᠷᠭᠥᠪᠡ᠃ ᠬᠠᠭᠠᠨ ᠤ᠋ ᠳᠣᠯᠣᠭᠠᠨ ᠠᠴᠢ᠂ ᠬᠥᠶᠦᠭ ᠬᠠᠭᠠᠨ ᠤᠷᠤᠭᠤ ᠭᠢᠯᠦᠢᠵᠦ᠂ ᠬᠥᠳᠡᠯᠦᠯ ᠦᠭᠡᠢ ᠬᠣᠴᠣᠷᠪᠠ᠃
ᠪᠠᠲᠤ ᠬᠠᠭᠠᠨ ᠤ᠋ ᠤᠷᠤᠭᠤᠯ ᠪᠢᠴᠢᠬᠠᠨ ᠬᠥᠳᠡᠯᠵᠦ᠂
— ᠠᠶᠠᠭᠠ ᠶ᠋ᠢ ᠲᠦᠭᠡᠭᠡᠭᠲᠦᠨ! ᠭᠡᠪᠡ᠃
ᠰᠦᠪᠡᠭᠡᠲᠡᠢ ᠪᠡᠶᠡ ᠪᠡᠨ ᠬᠤᠷᠢᠶᠠᠵᠤ᠂ ᠤᠯᠠᠮ ᠪᠥᠭᠲᠥᠢᠭᠡᠳ ᠪᠣᠭᠣᠯᠴᠤᠳ ᠤ᠋ᠨ ᠵᠦᠭ ᠳᠣᠬᠢᠵᠠᠢ᠃ ᠲᠡᠳᠡ ᠴᠢᠩᠭᠢᠰ ᠦ᠋ᠨ ᠦᠷᠡ ᠠᠴᠢ ᠨᠠᠷ ᠲᠤ᠌ ᠠᠢᠷᠠᠭ ᠲᠠᠢ ᠬᠠᠭᠤᠴᠢᠨ ᠮᠣᠳᠣᠨ ᠠᠶᠠᠭᠠ ᠶ᠋ᠢ ᠴᠢᠮᠡᠭᠡ ᠦᠭᠡᠢ ᠲᠠᠷᠬᠠᠭᠠᠵᠤ ᠥᠭᠪᠡ᠃ ᠪᠠᠲᠤ ᠬᠠᠭᠠᠨ ᠪᠠᠰᠠ ᠡᠩ ᠦ᠋ᠨ ᠠᠶᠠᠭᠠ ᠠᠪᠴᠤ ᠡᠮᠦᠨᠡ ᠪᠡᠨ ᠪᠠᠷᠢᠭᠠᠳ᠂ ᠢᠷᠦᠭᠡᠯ ᠲᠠᠯᠪᠢᠬᠤ ᠪᠠᠷ ᠪᠡᠯᠡᠳᠬᠡᠵᠡᠢ᠃
ᠭᠦᠶᠦᠭ ᠬᠠᠭᠠᠨ ᠰᠠᠭᠠᠳ ᠪᠣᠯᠵᠤ ᠥᠪᠡᠷ ᠢ᠋ ᠪᠡᠨ ᠶᠡᠬᠡ ᠬᠠᠭᠠᠨ ᠰᠢᠷᠡᠭᠡ ᠶ᠋ᠢ ᠵᠠᠯᠭᠠᠮᠵᠢᠯᠠᠭᠴᠢ ᠪᠥᠭᠡᠳ ᠡᠨᠡ ᠬᠤᠷᠠᠯ ᠳᠡᠭᠡᠷᠡ ᠲᠦᠷᠦᠭᠦᠯᠡᠬᠦ ᠬᠠᠭᠠᠨ ᠭᠡᠵᠦ ᠦᠵᠡᠭᠦᠯᠬᠦ ᠭᠡᠵᠦ ᠪᠠᠲᠤ ᠬᠠᠭᠠᠨ ᠤ᠋ ᠦᠭᠡ ᠶ᠋ᠢ ᠲᠠᠰᠤᠯᠬᠤ ᠶ᠋ᠢ ᠪᠣᠳᠣᠵᠤ ᠶᠠᠭᠠᠷᠠᠨ ᠬᠡᠯᠡᠭᠰᠡᠨ ᠨᠢ᠄
— ᠡᠨᠡ ᠠᠷᠢᠭᠤᠨ ᠮᠣᠳᠣᠨ ᠠᠶᠠᠭᠠ ᠲᠠᠢ ᠠᠢᠷᠠᠭ ᠤ᠋ᠨ ᠠᠩᠬᠠᠳᠤᠭᠠᠷ ᠪᠠᠯᠭᠤ ᠶ᠋ᠢ ᠪᠢᠳᠡ ᠪᠦᠬᠦ ᠮᠣᠩᠭᠣᠯ ᠤ᠋ᠨ ᠶᠡᠬᠡ ᠡᠵᠡᠨ —ᠵᠠᠭᠤᠨ ᠳᠠᠯᠠᠨ ᠪᠤᠰᠤᠳ ᠦᠨᠳᠦᠰᠦᠲᠡᠨ ᠢ᠋ ᠵᠠᠬᠢᠷᠤᠭᠰᠠᠨ ᠪᠥᠭᠡᠳ ᠮᠥᠩᠬᠡ ᠬᠥᠬᠡ ᠲᠩᠷᠢ ᠪᠡᠷ ᠢᠪᠡᠭᠡᠭᠳᠡᠭᠰᠡᠨ ᠥᠭᠡᠳᠡᠢ ᠬᠠᠭᠠᠨ ᠤ᠋ ᠡᠷᠡᠭᠦᠯ ᠡᠩᠬᠡ᠂ ᠰᠦᠷ ᠵᠢᠪᠬᠤᠯᠠᠩ ᠲᠡᠭᠦᠯᠳᠡᠷ ᠪᠠᠢᠬᠤ ᠶ᠋ᠢ ᠢᠷᠥᠭᠡᠨ ᠤᠤᠭᠤᠰᠤᠭᠠᠢ ᠭᠡᠪᠡ᠃(ᠥᠭᠡᠳᠡᠢ ᠪᠣᠯ ᠭᠦᠶᠦᠭ ᠬᠠᠭᠠᠨ ᠤ᠋ ᠡᠴᠢᠭᠡ ᠪᠥᠭᠡᠳ ᠮᠣᠩᠭᠣᠯ ᠤ᠋ᠨ ᠶᠡᠬᠡ ᠡᠵᠡᠨ ᠬᠠᠭᠠᠨ ᠪᠢᠯᠡ᠃)
ᠵᠠᠷᠢᠮ ᠬᠠᠭᠠᠳ᠂ ᠠᠶᠠᠭᠠ ᠶ᠋ᠢ ᠤᠷᠤᠭᠤᠯ ᠳ᠋ᠤ᠌ ᠬᠦᠷᠭᠡᠨ ᠤᠤᠭᠤᠵᠤ᠂ ᠵᠠᠷᠢᠮ ᠨᠢ ᠪᠠᠲᠤ ᠬᠠᠭᠠᠨ ᠢ᠋ ᠬᠠᠷᠠᠨ ᠬᠦᠯᠢᠶᠡᠵᠡᠢ᠃ ᠪᠠᠲᠤ ᠬᠠᠭᠠᠨ ᠬᠥᠳᠡᠯᠦᠯ ᠦᠭᠡᠢ ᠪᠠᠢᠭᠠᠳ ᠴᠢᠮᠡᠭᠡ ᠨᠠᠮᠵᠢᠬᠤ ᠳ᠋ᠤ᠌ ᠨᠤᠷᠱᠤᠵᠤ ᠬᠡᠯᠡᠭᠰᠡᠨ ᠨᠢ᠄
— ᠮᠠᠨ ᠤ᠋ ᠠᠢᠷᠠᠭ ᠤ᠋ᠨ ᠠᠩᠬᠠᠳᠤᠭᠠᠷ ᠬᠤᠨᠳᠠᠭᠠ ᠶ᠋ᠢ ᠮᠠᠨ ᠠ᠋ᠴᠠ ᠬᠠᠭᠠᠴᠠᠵᠤ ᠡᠭᠦᠯᠡᠨ ᠦ᠌ ᠴᠠᠭᠠᠳᠤᠬᠢ ᠶᠢᠷᠲᠢᠨᠴᠦ ᠶ᠋ᠢ ᠵᠠᠬᠢᠷᠬᠤ ᠪᠠᠷ ᠣᠳᠤᠭᠰᠠᠨ ᠪᠥᠭᠡᠳ ᠮᠣᠩᠭᠣᠯ ᠭᠡᠳᠡᠭ ᠠᠶᠤᠮᠰᠢᠭᠲᠤ ᠨᠡᠷᠡ ᠶ᠋ᠢ ᠳᠡᠯᠡᠬᠡᠢ ᠶ᠋ᠢᠨ ᠵᠠᠬᠠ ᠬᠢᠵᠠᠭᠠᠷ ᠲᠸ᠋ ᠬᠦᠷᠲᠡᠯᠡ ᠠᠯᠳᠠᠷᠰᠢᠭᠤᠯᠬᠤ ᠪᠠᠷ ᠡᠨᠡ ᠠᠶᠠᠨ ᠲᠡᠢᠨ ᠢ᠋ ᠡᠬᠢᠯᠡᠭᠲᠦᠨ ᠭᠡᠵᠦ ᠵᠠᠷᠯᠢᠭ ᠪᠠᠭᠤᠯᠭᠠᠭᠰᠠᠨ ᠶᠡᠬᠡ ᠳᠠᠢᠴᠢᠨ ᠪᠣᠭᠳᠠ ᠡᠵᠡᠨ ᠢ᠋ ᠳᠤᠷᠠᠰᠤᠨ ᠤᠤᠭᠤᠵᠠᠭᠠᠶᠠ᠁ ᠭᠡᠪᠡ᠃
ᠪᠠᠲᠤ ᠬᠠᠭᠠᠨ ᠠᠶᠠᠭᠠ ᠲᠠᠢ ᠠᠢᠷᠠᠭ ᠢ᠋ ᠳᠠᠭᠤᠰᠲᠠᠯᠠ ᠠᠯᠭᠤᠷ ᠤᠤᠭᠤᠭᠠᠳ᠂ ᠦᠯᠡᠳᠡᠭᠰᠡᠨ ᠰᠢᠪᠬᠠᠷᠤᠤ ᠶ᠋ᠢ ᠠᠯᠠᠭᠠᠨ ᠳᠡᠭᠡᠷᠡ ᠪᠡᠨ ᠲᠤᠰᠬᠠᠵᠤ ᠬᠡᠩᠬᠦᠳᠡᠭ ᠢ᠋ᠶ᠋ᠡᠨ ᠠᠷᠴᠢᠪᠠ᠃ ᠬᠠᠭᠠᠨ ᠤ᠋ ᠠᠴᠢ ᠨᠠᠷ ᠴᠥᠮ ᠤᠷᠤᠭᠤᠯ ᠢ᠋ᠶ᠋ᠠᠨ ᠳᠠᠷᠤᠢ ᠠᠶᠠᠭᠠᠨ ᠳ᠋ᠤ᠌ ᠲᠥᠷᠥᠯᠡ᠃ ᠶᠡᠬᠡ ᠴᠢᠩᠭᠢᠰ ᠬᠠᠭᠠᠨ ᠢ᠋ ᠳᠤᠷᠠᠰᠤᠨ ᠤᠤᠭᠤᠬᠤ ᠴᠠᠭ ᠴᠠᠭᠠᠷᠠᠭᠤᠯᠵᠤ ᠪᠣᠯᠬᠤ ᠪᠤᠶᠤ᠃
ᠪᠣᠭᠣᠯᠴᠤᠳ ᠠᠯᠲᠠᠨ ᠬᠤᠨᠳᠠᠭᠠ᠂ ᠵᠦᠢᠯ ᠪᠦᠷᠢ ᠶ᠋ᠢᠨ ᠠᠶᠠᠭᠠ ᠶ᠋ᠢ ᠲᠠᠯᠪᠢᠭᠰᠠᠨ ᠮᠥᠩᠭᠥᠨ ᠲᠠᠯᠪᠢᠭᠤᠷ ᠠᠪᠴᠢᠷᠠᠵᠤ᠂ ᠡᠭᠦᠳᠡᠨ ᠦ᠌ ᠳᠡᠷᠭᠡᠳᠡ ᠳᠡᠭᠦᠵᠢᠯᠡᠭᠰᠡᠨ ᠬᠦᠬᠦᠷ ᠲᠡᠢ ᠠᠢᠷᠠᠭ ᠠ᠋ᠴᠠ ᠳᠦᠭᠦᠷᠭᠡᠨ ᠬᠢᠪᠡ᠃ ᠮᠣᠩᠭᠣᠯ ᠭᠦᠷᠦᠨ ᠦ᠌ ᠶᠡᠬᠡ ᠵᠣᠬᠢᠶᠠᠨ ᠪᠠᠢᠭᠤᠯᠤᠭᠴᠢ ᠪᠠ ᠢᠷᠡᠭᠡᠳᠦᠢ ᠳ᠋ᠦ᠍ ᠢᠯᠠᠵᠤ ᠳᠡᠢᠯᠬᠦ ᠶ᠋ᠢᠨ ᠲᠥᠯᠥᠭᠡ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠤᠤᠭᠤᠵᠠᠭᠠᠪᠠ᠃
ᠪᠠᠲᠤ ᠬᠠᠭᠠᠨ ᠳᠠᠬᠢᠨ ᠠᠶᠠᠷᠬᠠᠨ ᠶᠠᠷᠢᠬᠤ ᠳ᠋ᠤ᠌ ᠴᠢᠩᠭᠢᠰ ᠦ᠋ᠨ ᠠᠴᠢ ᠨᠠᠷ ᠤ᠋ᠨ ᠴᠡᠭᠡᠵᠢᠨ ᠳᠣᠲᠣᠷᠠ ᠪᠤᠴᠠᠯᠤᠨ ᠪᠠᠢᠭᠠ ᠳᠠᠯᠳᠠ ᠲᠠᠴᠢᠶᠠᠳᠠᠬᠤ ᠬᠣᠣᠷᠲᠤ ᠰᠠᠨᠠᠯ ᠣᠳᠣ ᠳᠡᠯᠪᠡᠷᠡᠨ ᠭᠠᠷᠴᠤ ᠪᠣᠯᠵᠣᠰᠢ ᠦᠭᠡᠢ ᠭᠡᠵᠦ ᠴᠥᠮ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠥᠳᠡᠯᠭᠡᠭᠡ ᠦᠭᠡᠢ ᠰᠠᠭᠤᠭᠠ ᠠᠰᠠᠷ ᠳᠣᠲᠣᠷᠠ ᠪᠠᠲᠤ ᠶ᠋ᠢᠨ ᠦᠭᠡ ᠲᠣᠳᠣᠬᠠᠨ ᠰᠣᠨᠤᠰᠤᠭᠳᠠᠵᠠᠢ᠃
— ᠣᠳᠣ ᠪᠢᠳᠡ ᠡᠨᠡ ᠠᠶᠠᠨ ᠲᠡᠢᠨ ᠳ᠋ᠦ᠍ ᠶᠠᠭᠤ ᠲᠤᠰᠠᠲᠠᠢ ᠪᠣᠢ?ᠶᠠᠭᠤ ᠬᠡᠷᠡᠭ ᠦᠭᠡᠢ ᠪᠣᠢ ᠭᠡᠳᠡᠭ ᠢ᠋ ᠶᠠᠷᠢᠨᠠ᠃ ᠲᠠᠨᠠᠷ ᠲᠸ᠋ ᠰᠣᠨᠣᠰᠬᠠᠬᠤ ᠶ᠋ᠢ ᠬᠦᠰᠡᠵᠦ ᠪᠠᠢᠭᠠ ᠵᠦᠢᠯ ᠮᠢᠨᠢ᠁ ᠭᠡᠵᠦ ᠥᠭᠦᠯᠡᠲᠡᠯᠡ᠂ ᠬᠥᠶᠦᠭ ᠬᠠᠭᠠᠨ ᠰᠠᠭᠤᠳᠠᠯ ᠳᠡᠭᠡᠷᠡ ᠪᠡᠨ ᠳᠠᠪ ᠬᠢᠨ ᠂ᠬᠠᠵᠠᠭᠤ ᠳ᠋ᠠᠬᠢ ᠬᠣᠶᠠᠷ ᠬᠠᠭᠠᠨ ᠲᠠᠢ ᠰᠢᠪᠡᠨᠡᠯᠳᠦᠪᠡ᠃ ᠭᠦᠶᠦᠭ ᠬᠠᠭᠠᠨ᠂ ᠡᠳᠦᠷ ᠨᠢ ᠰᠠᠷᠬᠤᠳ ᠢ᠋ ᠬᠡᠲᠦᠷᠬᠡᠢ ᠶᠡᠬᠡ ᠤᠤᠭᠤᠭᠰᠠᠨ ᠪᠥᠭᠡᠳ ᠣᠳᠣ ᠨᠢᠳᠦ ᠨᠢ ᠤᠯᠠᠢᠵᠠᠢ᠃ ᠲᠡᠷᠡ ᠰᠥᠭᠡᠩᠭᠢ ᠬᠣᠭᠣᠯᠠᠢ ᠪᠠᠷ ᠰᠢᠮᠳᠠᠨ ᠬᠠᠰᠬᠢᠷᠴᠤ ᠬᠡᠯᠡᠭᠰᠡᠨ ᠨᠢ᠄
— ᠴᠢ ᠶᠠᠭᠤ ᠰᠣᠨᠣᠰᠬᠠᠬᠤ ᠭᠡᠰᠡᠨ ᠪᠣᠢ? ᠬᠡᠨ ᠴᠢᠨᠦ ᠦᠭᠡ ᠶ᠋ᠢ ᠰᠣᠨᠣᠰᠬᠤ ᠶ᠋ᠢ ᠬᠦᠰᠡᠵᠦ ᠪᠠᠢᠭᠠ ᠶᠤᠮ ᠪᠣᠢ? ᠴᠢ ᠬᠠᠭᠠᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠰᠠᠭᠤᠵᠤ ᠴᠡᠷᠢᠭ ᠢ᠋ ᠴᠢ ᠵᠠᠬᠢᠷᠬᠤ ᠭᠡᠵᠦ ᠤᠤ? ᠭᠡᠳ ᠬᠥᠶᠦᠭ ᠬᠠᠭᠠᠨ ᠢᠨᠢᠶᠡᠨ ᠭᠠᠩᠬᠤᠵᠤ ᠪᠤᠰᠤᠳ ᠬᠠᠭᠠᠳ ᠤ᠋ᠨ ᠵᠦᠭ ᠬᠠᠨᠳᠤᠵᠤ᠂
—ᠪᠠᠲᠤ ᠬᠠᠭᠠᠨ ᠰᠠᠬᠠᠯ ᠲᠠᠢ ᠠᠮᠠ ᠠ᠋ᠴᠠ ᠶᠡᠷᠦ ᠥᠭᠡᠷᠡ ᠴᠥ᠍ ᠦᠭᠡᠢ ᠂ ᠲᠡᠢᠮᠦ ᠪᠢᠵᠡ ᠳᠡ ? ᠪᠢ ᠬᠠᠮᠤᠭ ᠤ᠋ᠨ ᠳᠣᠷᠣᠢ ᠳᠠᠭᠠᠭᠤᠯᠢ ᠳ᠋ᠠᠭᠠᠨ ᠲᠡᠭᠦᠨ ᠢ᠋ ᠰᠢᠳᠠᠮ ᠢ᠋ᠶ᠋ᠠᠷ ᠵᠠᠨᠴᠢᠭᠲᠤᠨ ᠭᠡᠵᠦ ᠲᠤᠰᠢᠶᠠᠰᠤᠭᠠᠢ ᠭᠡᠵᠡᠢ᠃
ᠬᠥᠶᠦᠭ ᠬᠠᠭᠠᠨ ᠤ᠋ ᠳᠣᠲᠣᠨᠣ ᠵᠠᠩᠵᠤᠨ ᠪᠦᠷ ᠴᠢᠩᠭᠠ ᠳᠠᠭᠤ ᠪᠠᠷ᠄
—ᠬᠠ ᠬᠠ! ᠲᠡᠭᠡ ᠭᠡᠵᠦ ᠨᠠᠳᠠᠳᠤ ᠬᠡᠯᠡᠭᠡᠴᠢ! ᠪᠠᠲᠤ ᠬᠠᠭᠠᠨ ᠢ᠋ ᠪᠢ ᠥᠰᠥᠭᠡᠢ ᠪᠡᠷ ᠢ᠋ᠶ᠋ᠡᠨ ᠲᠦᠯᠬᠢᠨ ᠤᠨᠠᠭᠠᠵᠤ᠂ ᠪᠢᠴᠠ ᠭᠢᠰᠬᠢᠰᠦᠭᠡᠢ ᠭᠡᠯᠡ᠃
ᠬᠠᠨ ᠬᠥᠪᠡᠭᠦᠨ ᠭᠥᠯᠦᠭᠡᠨ ᠬᠠᠭᠠᠨ ᠢᠨᠢᠶᠡᠨ ᠰᠣᠭᠲᠣᠮᠠᠯ ᠢ᠋ᠶ᠋ᠠᠷ ᠴᠢᠷᠠᠯᠠᠵᠤ᠂ ᠲᠣᠭᠣᠷᠢᠨ ᠰᠠᠭᠤᠭᠰᠠᠨ ᠬᠠᠭᠠᠳ ᠤ᠋ᠨ ᠳᠡᠭᠡᠭᠦᠷ ᠠᠯᠬᠤᠵᠤ ᠭᠠᠷᠬᠤ ᠭᠡᠵᠦ ᠣᠷᠣᠯᠳᠣᠪᠠ᠃
— ᠡᠨᠡ ᠰᠠᠬᠠᠯ ᠲᠠᠢ ᠠᠮᠠᠨ ᠳ᠋ᠤ᠌ ᠮᠣᠳᠣᠨ ᠰᠡᠭᠦᠯ ᠬᠠᠳᠬᠤᠭᠲᠤᠨ! ᠨᠠᠮᠠᠶ᠋ᠢ ᠶᠠᠪᠤᠭᠤᠯ᠂ ᠪᠢ ᠭᠦᠢᠴᠡᠳᠬᠡᠰᠦᠭᠡᠢ ᠭᠡᠪᠡ᠃
ᠬᠥᠶᠦᠭ ᠲᠣᠬᠢᠮᠠᠭᠴᠠ᠂ ᠲᠡᠭᠦᠨ ᠦ᠌ ᠲᠠᠯᠠ ᠶ᠋ᠢᠨ ᠬᠥᠮᠦᠰ ᠴᠥᠮ ᠪᠣᠰᠤᠨ ᠬᠠᠷᠠᠢᠵᠤ ᠡᠪᠦᠷ ᠡᠴᠡ ᠪᠡᠨ ᠬᠢᠲᠤᠭᠠ ᠭᠠᠷᠭᠠᠨ ᠬᠠᠷᠢᠯᠴᠠᠨ ᠲᠦᠯᠬᠢᠯᠡᠭᠰᠡᠭᠡᠷ᠂ ᠬᠠᠭᠠᠨ ᠰᠢᠷᠡᠭᠡᠨ ᠦ᠌ ᠵᠦᠭ ᠤᠬᠤᠰᠬᠢᠪᠡ᠃
ᠪᠠᠲᠤ ᠬᠠᠭᠠᠨ ᠤ᠋ ᠲᠣᠯᠣᠭᠠᠢ᠂ ᠮᠥᠷᠥ ᠤᠷᠤᠭᠤ ᠪᠠᠨ ᠰᠢᠭᠢᠳᠴᠦ᠂ ᠰᠢᠳᠦ ᠵᠠᠭᠤᠨ᠂ ᠨᠢᠳᠦ ᠪᠡᠨ ᠠᠨᠢᠭᠰᠠᠨ ᠢ᠋ᠶ᠋ᠠᠨ ᠭᠡᠨᠡᠳᠲᠡ ᠪᠣᠰᠤᠨ ᠰᠡᠯᠡᠮᠡ ᠪᠡᠨ ᠬᠠᠵᠠᠭᠤ ᠳᠠᠰᠢ ᠬᠠᠶᠠᠵᠤ ᠲᠦᠷᠡᠢ ᠡᠴᠡ ᠪᠡᠨ ᠪᠣᠭᠣᠨᠢ ᠲᠠᠰᠢᠭᠤᠷ ᠭᠠᠷᠭᠠᠭᠠᠳ ᠳᠠᠪᠰᠢᠯᠠᠭᠰᠠᠨ ᠬᠠᠭᠠᠳ ᠤ᠋ᠨ ᠲᠣᠯᠣᠭᠠᠢ ᠤᠷᠤᠭᠤ ᠳᠠᠯᠠᠢᠨ ᠴᠣᠬᠢᠯᠠ᠃
—ᠠᠶᠠᠨ ᠲᠡᠢᠨ ᠳ᠋ᠦ᠍ ᠳ᠋ᠵᠢᠬᠠᠩᠬᠢᠷ ᠲᠸ᠋ ᠦᠯᠦ ᠵᠠᠬᠢᠷᠤᠭᠳᠠᠬᠤ ᠡᠲᠡᠭᠡᠳ ᠢ᠋ ᠪᠢ ᠶᠡᠬᠡᠳᠡ ᠵᠠᠨᠤᠵᠤ ᠲᠡᠮᠳᠡᠭᠯᠡᠨᠡ᠃ ᠲᠠᠬᠢᠶᠠ ᠡᠭᠦᠯᠡᠨ ᠦ᠌ ᠳᠡᠭᠡᠭᠦᠷ ᠦᠯᠦ ᠨᠢᠰᠬᠦ ᠲᠡᠢ ᠠᠳᠠᠯᠢ᠂ ᠬᠥᠶᠦᠭ ᠴᠢ ᠶᠡᠬᠡ ᠬᠠᠭᠠᠨ ᠰᠠᠭᠤᠵᠤ ᠡᠰᠡ ᠴᠢᠳᠠᠨᠠ᠃ ᠬᠣᠢᠰᠢ ᠪᠠᠨ ᠪᠠᠢ! ᠰᠥᠭᠥᠳᠦᠭᠲᠦᠨ! ᠭᠡᠵᠡᠢ᠃
ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ ᠤ᠋ᠨ ᠰᠥᠭᠡᠩᠭᠢ ᠳᠠᠭᠤ ᠭᠡᠨᠡᠳᠲᠡ ᠰᠢᠮᠳᠠᠨ ᠬᠦᠷᠴᠢᠭᠢᠨᠡᠵᠦ᠂
— ᠠᠢ ᠦᠷᠶᠠᠩᠾ— ᠭᠠᠳᠠᠩ! 《ᠭᠠᠯᠵᠠᠭᠤᠴᠤᠳ 》ᠪᠠ《ᠦᠯᠦ ᠳᠡᠢᠯᠦᠭᠳᠡᠭᠴᠢᠳ 》ᠢ᠋ ᠳᠠᠭᠤᠳᠠᠭᠲᠤᠨ ᠭᠡᠬᠦ ᠳ᠋ᠦ᠍ ᠵᠠᠯᠠᠭᠤ ᠬᠥᠮᠦᠨ ᠦ᠌ ᠳᠠᠭᠤ ᠲᠡᠭᠦᠨ ᠢ᠋ ᠳᠠᠪᠲᠠᠵᠤ᠂
—《ᠦᠯᠦ ᠳᠡᠢᠯᠦᠭᠳᠡᠭᠴᠢᠳ 》《ᠭᠠᠯᠵᠠᠭᠤᠴᠤᠳ》ᠢᠷᠡᠵᠡᠭᠡ ᠭᠡᠪᠡ᠃ ᠬᠥᠰᠢᠭᠡ ᠶ᠋ᠢᠨ ᠠᠷᠤ ᠪᠠ ᠰᠢᠷᠢᠨ ᠠᠪᠳᠠᠷᠠ᠂ ᠬᠤᠢᠯᠠᠭᠰᠠᠨ ᠬᠡᠪᠢᠰ ᠦ᠋ᠨ ᠳᠣᠲᠣᠷᠠ ᠠ᠋ᠴᠠ ᠮᠣᠩᠭᠣᠯ ᠴᠡᠷᠢᠭ ᠦ᠋ᠳ ᠭᠱᠠᠨ ᠵᠠᠭᠤᠷᠠ ᠭᠠᠷᠴᠠᠭᠠᠨ ᠪᠠᠲᠤ ᠬᠠᠭᠠᠨ ᠤ᠋ ᠵᠦᠭ ᠤᠬᠤᠰᠬᠢᠵᠦ᠂ ᠲᠡᠭᠦᠨ ᠢ᠋ ᠭᠠᠷ ᠳᠡᠭᠡᠷᠡ ᠪᠡᠨ ᠡᠷᠭᠦᠨ ᠠᠪᠤᠭᠠᠳ ᠠᠰᠠᠷ ᠤ᠋ᠨ ᠴᠠᠭᠠᠳᠤ ᠤᠷᠤᠭᠤ ᠠᠯᠠᠭᠠ ᠪᠣᠯᠪᠠ᠃
ᠪᠤᠰᠤᠳ ᠴᠡᠷᠢᠭ ᠦ᠋ᠳ ᠬᠠᠭᠠᠳ ᠤ᠋ᠨ ᠨᠢᠭᠤᠷ ᠤᠷᠤᠭᠤ ᠨᠢᠳᠤᠷᠭᠠ ᠪᠠᠷ ᠴᠣᠬᠢᠨ ᠤᠨᠠᠭᠠᠵᠤ᠂ ᠬᠥᠯ ᠡᠴᠡ ᠨᠢ ᠴᠢᠷᠴᠦ ᠠᠰᠠᠷ ᠠ᠋ᠴᠠ ᠭᠠᠷᠭᠠᠪᠠ᠃
ᠬᠦᠵᠢ ᠰᠢᠲᠠᠭᠠᠭᠰᠠᠨ ᠬᠦᠷᠡᠯ ᠬᠠᠳᠬᠤᠭᠤᠷ᠂ ᠵᠣᠳᠣᠯᠳᠤᠨ ᠪᠠᠢᠭᠠ ᠬᠠᠭᠠᠳ ᠤ᠋ᠨ ᠳᠡᠭᠡᠷᠡ ᠡᠴᠡ ᠤᠨᠠᠭᠠᠳ᠂ ᠠᠰᠠᠷ ᠳᠣᠲᠣᠷᠠ ᠬᠠᠷᠠᠩᠭᠤᠢ ᠪᠣᠯᠪᠠ᠃ ᠬᠠᠭᠠᠳ ᠨᠣᠶᠠᠳ ᠤ᠋ᠨ ᠰᠡᠭᠦᠯᠴᠢ ᠨᠢ ᠡᠭᠦᠳᠡᠨ ᠦ᠌ ᠵᠦᠭ ᠮᠥᠯᠬᠥᠬᠦ ᠭᠡᠵᠦ ᠣᠷᠣᠯᠳᠣᠯᠠ᠃
ᠬᠠᠭᠠᠳ᠂ ᠰᠢᠳᠠᠷᠴᠤᠳ ᠠᠭᠤᠷᠰᠠᠨ ᠬᠡᠷᠡᠯᠳᠦᠭᠡᠳ᠂ ᠪᠠᠰᠠ ᠯᠠ ᠲᠦᠭ ᠲᠦᠭ ᠭᠡᠲᠡᠯᠡ ᠴᠣᠬᠢᠯᠠᠵᠤ᠂ ᠬᠠᠭᠠᠷᠠᠭᠰᠠᠨ ᠰᠠᠪᠠ ᠰᠠᠭᠤᠯᠠᠭᠠ ᠬᠠᠷᠴᠢᠭᠢᠨᠠᠭᠰᠠᠭᠠᠷ᠂ ᠠᠰᠠᠷ ᠤ᠋ᠨ ᠳᠡᠷᠭᠡᠳᠡ ᠴᠤᠭᠯᠠᠷᠠᠵᠠᠢ᠃ ᠤᠷᠠᠭᠳᠠᠭᠰᠠᠨ ᠬᠤᠪᠴᠠᠰᠤ ᠲᠠᠢ ᠵᠠᠷᠢᠮ ᠨᠢ ᠨᠢᠭᠤᠷ ᠤ᠋ᠨ ᠢ᠋ᠶ᠋ᠠᠨ ᠴᠢᠰᠤ ᠶ᠋ᠢ ᠭᠠᠷ ᠢ᠋ᠶ᠋ᠠᠷ ᠠᠷᠴᠢᠨ᠂ ᠠᠰᠠᠷ ᠲᠤ᠌ ᠪᠤᠴᠠᠵᠤ ᠡᠭᠡᠬᠦ ᠶ᠋ᠢ ᠵᠠᠪᠳᠤᠭᠰᠠᠨ ᠪᠢᠯᠡ᠃ ᠭᠡᠲᠡᠯᠡ ᠬᠠᠷᠠᠭᠤᠯ ᠤ᠋ᠨ ᠳᠣᠭᠰᠢᠨ ᠬᠥᠮᠦᠰ ᠵᠢᠳᠠ ᠪᠠᠷ ᠵᠣᠷᠢᠮᠠᠭ ᠲᠦᠯᠬᠢᠵᠦ ᠡᠰᠡ ᠣᠷᠣᠭᠤᠯᠪᠠ᠃
ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ᠂ ᠪᠠᠲᠤ ᠬᠠᠭᠠᠨ ᠤ᠋ ᠣᠷᠬᠢᠭᠰᠠᠨ᠂ ᠲᠡᠭᠦᠨ ᠦ᠌ ᠠᠯᠮᠠᠰ ᠡᠰᠢᠲᠡᠢ ᠲᠠᠬᠢᠷ ᠰᠡᠯᠡᠮᠡ ᠶ᠋ᠢ ᠭᠠᠮ ᠲᠠᠢ ᠪᠠᠷ ᠪᠠᠷᠢᠵᠤ ᠠᠰᠠᠷ ᠤ᠋ᠨ ᠬᠠᠵᠠᠭᠤ ᠶ᠋ᠢᠨ ᠪᠠᠨᠲᠠᠩ ᠳᠣᠣᠷᠠ ᠠ᠋ᠴᠠ ᠭᠠᠷᠴᠤ ᠢᠷᠡᠬᠦ ᠳ᠋ᠦ᠍《ᠭᠠᠯᠵᠠᠭᠤᠴᠤᠳ 》《ᠦᠯᠦ ᠳᠡᠢᠯᠦᠭᠳᠡᠭᠴᠢᠳ 》ᠰᠦᠪᠡᠭᠡᠳᠡᠢ ᠶ᠋ᠢᠨ ᠳᠡᠷᠭᠡᠳᠡ ᠨᠢᠭᠲᠠ ᠡᠩᠨᠡᠨ ᠵᠢᠭᠰᠠᠵᠤ᠂ ᠪᠦᠬᠦ ᠰᠢᠨᠡ ᠳᠠᠭᠠᠭᠤᠯᠢ ᠨᠤᠭᠤᠳ ᠭᠦᠶᠦᠵᠦ ᠢᠷᠡᠵᠡᠭᠡᠪᠡ᠃
ᠰᠦᠪᠡᠭᠡᠲᠡᠢ ᠪᠠᠭᠠᠲᠤᠷ᠂ ᠨᠣᠴᠣᠯᠳᠤᠨ ᠪᠠᠢᠭᠠ ᠬᠥᠶᠦᠭ ᠢ᠋ ᠬᠥᠪᠡᠭᠦᠨ ᠦᠷᠶᠠᠩᠾ— ᠭᠠᠳᠠᠩ ᠪᠤᠰᠤᠳ ᠴᠡᠷᠢᠭ ᠦ᠋ᠨ ᠬᠠᠮᠲᠤ ᠭᠠᠷᠭᠠᠨ ᠠᠪᠴᠢᠷᠠᠬᠤ ( ᠶ᠋ᠢ )ᠲᠠᠢᠪᠤᠩ ᠬᠦᠯᠢᠶᠡᠭᠡᠳ ᠮᠠᠢᠭ ᠬᠥᠯ ᠢ᠋ᠶ᠋ᠡᠨ ᠡᠭᠡᠯᠵᠢᠯᠡᠨ ᠭᠢᠰᠬᠢᠵᠦ᠂ ᠣᠢᠷᠠᠲᠤᠭᠠᠳ ᠬᠠᠰᠬᠢᠷᠤᠨ ᠳᠤᠤᠭᠠᠷᠴᠤ᠂ ᠭᠠᠵᠠᠷ ᠬᠦᠷᠲᠡᠯᠡ ᠪᠥᠬᠥᠢᠨ ᠰᠥᠬᠥᠷᠡᠵᠦ᠂ ᠳᠤᠬᠤ ᠪᠠᠨ ᠭᠠᠵᠠᠷ ᠲᠤ᠌ ᠬᠦᠷᠭᠡᠪᠡ᠃ ᠭᠦᠶᠦᠭ ᠤᠯᠠᠭᠠᠨ ᠰᠠᠷᠢᠰᠤᠨ ᠭᠤᠲᠤᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠦᠪᠡᠭᠡᠲᠡᠢ ᠶ᠋ᠢᠨ ᠨᠢᠭᠤᠷ ᠤᠷᠤᠭᠤ ᠢᠰᠬᠦᠯᠬᠦ ᠭᠡᠰᠡᠨ ᠪᠣᠯᠪᠠᠴᠤ ᠮᠣᠩᠭᠣᠯᠴᠤᠳ᠂ ᠲᠡᠭᠦᠨ ᠢ᠋ ᠭᠡᠳᠡᠷᠭᠦ ᠲᠠᠲᠠᠯᠠ᠃
ᠰᠦᠪᠡᠭᠡᠳᠡᠢ ᠪᠣᠰᠴᠤ ᠵᠣᠭᠰᠣᠭᠠᠳ᠂
— ᠳᠡᠭᠡᠳᠦᠰ ᠦ᠋ᠨ ᠬᠥᠪᠡᠭᠦᠳ ᠠᠩᠬᠠᠷᠤᠨ ᠳᠠᠭᠠᠭᠲᠤᠨ! ᠰᠢᠳᠤᠷᠭᠤ ᠪᠣᠭᠣᠯ ᠳ᠋ᠤ᠌ ᠶᠠᠮᠠᠷ ᠲᠤᠰᠢᠶᠠᠯ ᠥᠭᠬᠦ ᠪᠣᠢ? ᠭᠡᠬᠦ ᠳ᠋ᠦ᠍
— ᠲᠡᠷᠡ ᠬᠠᠮᠢᠭᠠ ᠪᠠᠢᠨᠠ? ᠪᠢ ᠠᠷᠠᠰᠤ ᠶ᠋ᠢ ᠨᠢ ᠥᠪᠴᠢᠰᠦᠭᠡᠢ᠃ ᠲᠡᠷᠡ ᠴᠢᠨᠦ ᠳ᠋ᠵᠢᠬᠠᠩᠬᠢᠷ ᠪᠢᠰᠢ᠂ ᠮᠣᠳᠣᠨ ᠰᠡᠭᠦᠯᠲᠦ ᠭᠡᠵᠦ ᠭᠦᠶᠦᠭ ᠳᠠᠬᠢᠨ ᠬᠠᠰᠬᠢᠷᠪᠠ᠃
ᠰᠦᠪᠡᠭᠡᠳᠡᠢ ᠤᠯᠠᠭᠠᠨ ᠨᠢᠳᠦ ᠪᠡᠨ ᠣᠨᠢᠯᠭᠠᠵᠤ(ᠣᠨᠢᠢᠯᠭᠠᠵᠤ)᠄
— ᠪᠣᠭᠳᠠ ᠡᠵᠡᠨ᠂ ᠶᠠᠭᠠᠷᠠᠨ ᠲᠤᠶᠠᠭᠠᠷᠠᠭᠴᠢ ᠡᠭᠦᠯᠡᠨ ᠦ᠌ ᠴᠠᠭᠠᠳᠤᠬᠢ ᠲᠡᠭᠷᠢ ᠨᠠᠷᠠ ᠲᠠᠢ ᠣᠳᠣ ᠶᠠᠷᠢᠯᠴᠠᠵᠤ ᠪᠠᠢᠨᠠ᠃ ᠲᠡᠷᠡ ᠲᠡᠨᠳᠡ ᠡᠴᠡ ᠠᠶᠠᠨ ᠲᠡᠢᠨ ᠬᠢᠷᠢ ᠵᠡᠷᠭᠡ ᠣᠯᠵᠠ ᠣᠮᠣᠭᠲᠠᠢ ᠶᠠᠪᠤᠭᠠ ᠦᠯᠦ ᠳᠡᠢᠯᠦᠭᠳᠡᠬᠦ ᠮᠣᠩᠭᠣᠯ ᠴᠡᠷᠢᠭ ᠥᠷᠥᠨᠡ ᠵᠦᠭ ᠲᠦ᠍ ᠬᠡᠷᠬᠢᠨ ᠬᠥᠳᠡᠯᠵᠦ ᠪᠠᠢᠭᠠ ᠶ᠋ᠢ ᠬᠠᠷᠠᠨᠠ᠃ ᠬᠠᠷᠢᠨ ᠠᠴᠢ ᠨᠢ ᠶᠠᠭᠠᠬᠢᠵᠤ ᠪᠠᠢᠨᠠ ᠲᠡᠭᠦᠨ ᠦ᠌ ᠪᠠᠭᠠᠲᠤᠷ ᠤ᠋ᠳ ᠬᠣᠭᠣᠷᠣᠨᠳᠣ ᠪᠠᠨ ᠬᠡᠷᠡᠯᠳᠦᠬᠦ ᠳᠠᠢᠰᠤᠩᠨᠠᠬᠤ ᠶᠣᠰᠣ ᠦᠭᠡᠢ᠂ ᠴᠥᠮ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠭᠦᠨ ᠣᠢ ᠶ᠋ᠢᠨ ᠮᠣᠳᠣ ᠮᠡᠲᠦ ᠨᠢᠭᠲᠠ᠂ ᠴᠢᠨᠣᠠ ᠶ᠋ᠢᠨ ᠰᠦᠷᠦᠭ ᠮᠡᠲᠦ ᠡᠪᠲᠡᠢ ᠪᠠᠢᠪᠠᠯ ᠵᠣᠬᠢᠨᠠ᠃ ᠲᠡᠭᠡᠭᠡᠳ ᠡᠪᠲᠡᠢ ᠪᠠᠢᠭᠲᠤᠨ! ᠭᠡᠵᠦ ᠰᠥᠪᠡᠭᠡᠳᠡᠢ᠂ ᠰᠡᠭᠦᠯ ᠦ᠋ᠨ ᠢ᠋ᠶ᠋ᠡᠨ ᠦᠭᠡ ᠶ᠋ᠢ ᠠᠷᠢᠶᠠᠲᠠᠨ ᠮᠡᠲᠦ ᠰᠦᠷᠡᠯᠬᠡᠭ ᠪᠠᠷᠬᠢᠷᠠᠵᠠᠢ᠃
ᠰᠥᠪᠡᠭᠡᠳᠡᠢ ᠶ᠋ᠢᠨ ᠦᠭᠡ ᠶ᠋ᠢ ᠴᠢᠩᠨᠠᠭᠰᠠᠨ ᠬᠠᠭᠠᠳ ᠪᠦᠭᠦᠳᠡᠭᠡᠷ ᠴᠢᠮᠡᠭᠡ ᠦᠭᠡᠢ ᠪᠣᠯᠵᠤ ᠭᠦᠶᠦᠭ ᠣᠳᠣ ᠥᠷᠥᠭᠡᠰᠦᠨ ᠨᠢᠳᠦᠲᠦ ᠡᠪᠦᠭᠡᠨ ᠲᠡᠢ ᠡᠰᠡᠷᠭᠦᠴᠡᠯᠳᠡᠬᠦ ᠨᠢ ᠠᠶᠤᠯᠲᠠᠢ ᠭᠡᠵᠦ ᠮᠡᠳᠡᠮᠡᠭᠴᠡ᠂ ᠲᠡᠮᠡᠴᠡᠬᠦ ᠦᠭᠡᠢ ᠨᠣᠮᠣᠬᠠᠷᠠᠵᠠᠢ᠃ ᠰᠥᠪᠡᠭᠡᠳᠡᠢ᠂
—《ᠦᠯᠦ ᠳᠡᠢᠯᠦᠭᠳᠡᠭᠴᠢᠳ》 ᠪᠡᠯᠡᠳᠴᠡᠭᠡ ᠭᠡᠵᠦ ᠬᠠᠰᠬᠢᠷᠪᠠ᠃
ᠨᠥᠬᠥᠷᠯᠡᠭᠴᠢᠳ᠂ ᠲᠠᠬᠢᠷ ᠰᠡᠯᠡᠮᠡ ᠶ᠋ᠢᠨ ᠡᠰᠢ ᠶ᠋ᠢ ᠠᠯᠠᠭᠠᠳᠠᠨ᠂ ᠰᠤᠭᠤ ᠲᠠᠲᠠᠬᠤ ᠳ᠋ᠤ᠌ ᠰᠥᠪᠡᠭᠡᠳᠡᠢ᠂ ᠬᠥᠶᠦᠭ ᠤᠷᠤᠭᠤ ᠳᠠᠪᠰᠢᠭᠰᠠᠭᠠᠷ ᠪᠠᠢᠭᠠᠳ᠂
— ᠳᠡᠢᠯᠦᠭᠳᠡᠰᠢ ᠦᠭᠡᠢ ᠶᠡᠬᠡ ᠴᠡᠷᠢᠭ ᠢ᠋ ᠳᠠᠢᠴᠢᠨ ᠪᠣᠭᠳᠠ ᠶ᠋ᠢᠨ ᠲᠣᠮᠢᠯᠠᠭᠰᠠᠨ ᠳ᠋ᠵᠢᠬᠠᠩᠭᠢᠷ ᠪᠠᠲᠤ ᠬᠠᠭᠠᠨ ᠤᠳᠤᠷᠢᠳᠴᠤ᠂ ᠭᠦᠶᠦᠭ ᠬᠠᠭᠠᠨ ᠴᠢᠮᠠᠶ᠋ᠢ ᠣᠳᠣ ᠳᠠᠷᠤᠢᠬᠠᠨ ᠢᠵᠢᠯ ᠮᠥᠷᠡᠨ ᠦ᠌ ᠬᠥᠪᠡᠭᠡᠨ ᠳ᠋ᠦ᠍ ᠣᠴᠢᠵᠤ ᠲᠡᠭᠦᠨ ᠳ᠋ᠦ᠍ ᠴᠢᠳᠬᠤᠭᠰᠠᠨ ᠶᠧᠷᠥ᠋ᠰᠯᠡᠩ ᠭᠣᠣᠯ ᠤ᠋ᠨ ᠪᠡᠯᠴᠢᠭᠡᠷ ᠳᠡᠭᠡᠷᠡ ᠬᠦᠯᠢᠶᠡᠲᠦᠭᠡᠢ ᠭᠡᠵᠦ ᠲᠤᠰᠢᠶᠠᠪᠠ ᠭᠡᠬᠦ ᠳ᠋ᠦ᠍ ᠬᠥᠶᠦᠭ ᠳᠠᠬᠢᠨ ᠠᠭᠤᠷ ᠪᠠᠳᠠᠷᠠᠵᠤ᠂
— ᠴᠢ ᠬᠠᠭᠠᠨ ᠤ᠋ ᠠᠯᠲᠠᠨ ᠰᠢᠷᠡᠭᠡᠨ ᠳ᠋ᠦ᠍ ᠰᠠᠭᠤᠬᠤ ᠨᠠᠳᠠᠲᠠᠢ ᠢᠩᠭᠢᠵᠦ ᠶᠠᠷᠢᠯᠴᠠᠬᠤ ᠡᠷᠬᠡ ᠦᠭᠡᠢ᠂ ᠴᠢ ᠪᠣᠯ ᠮᠢᠨᠦ ᠡᠪᠦᠭᠡ ᠡᠴᠢᠭᠡ ᠶ᠋ᠢᠨ ᠡᠷᠭᠦᠮᠵᠢᠯᠡᠭᠰᠡᠨ ᠲᠡᠨᠦᠮᠡᠯ ᠮᠠᠯᠴᠢᠨ᠂ ᠮᠢᠨᠦ ᠵᠠᠷᠤᠴᠠ ᠭᠢᠯᠦᠷ ᠨᠢᠳᠦᠲᠦ ᠡᠷᠡᠮᠳᠡᠭ ᠴᠢ᠂ ᠳᠤᠭᠤᠢ ᠪᠠᠢ ᠭᠡᠪᠡ᠃
ᠰᠥᠪᠡᠭᠡᠳᠡᠢ ᠠᠭᠠᠰᠢᠯᠠᠨ ᠱᠤᠤᠬᠢᠨᠠᠵᠤ᠂ ᠳᠣᠣᠷᠠ ᠪᠠᠨ ᠴᠣᠪᠬᠣᠴᠢᠪᠠ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠠᠭᠤᠷᠰᠠᠭᠰᠠᠨ ᠰᠥᠪᠡᠭᠡᠳᠡᠢ ᠶ᠋ᠢᠨ ᠤᠯᠠᠭᠠᠨ ᠨᠢᠳᠦ᠂ ᠤᠯᠠᠢᠳᠬᠠᠭᠰᠠᠨ ᠬᠠᠳᠠᠭᠠᠰᠤ ᠮᠡᠲᠦ ᠴᠣᠷᠭᠢᠨ ᠲᠦᠯᠡᠮᠡᠷ ᠳᠦᠷᠡᠯᠵᠡᠵᠦ ᠪᠠᠢᠯᠠ ᠭᠡᠵᠦ ᠨᠥᠬᠥᠷᠯᠡᠭᠴᠢᠳ ᠬᠣᠵᠢᠮ ᠥᠭᠦᠯᠡᠵᠡᠢ᠃ ᠡᠪᠦᠭᠡᠨ ᠠᠶᠠᠷᠬᠠᠨ ᠢ᠋ᠶ᠋ᠠᠷ᠂
—ᠲᠡᠢᠮᠦ ᠪᠢ ᠨᠥᠬᠥᠷ᠂ ᠪᠢ ᠪᠦᠭᠦᠳᠡ ᠶ᠋ᠢ ᠵᠠᠬᠢᠷᠤᠭᠴᠢ ᠭᠠᠭᠴᠠ ᠳ᠋ᠵᠢᠬᠠᠩᠬᠢᠷ ᠪᠠᠲᠤ ᠬᠠᠭᠠᠨ ᠤ᠋ ᠰᠠᠨᠠᠯ ᠢ᠋ ᠭᠦᠢᠴᠡᠳᠬᠡᠨᠡ᠃ ᠪᠢ ᠲᠡᠭᠦᠨ ᠦ᠌ ᠨᠥᠬᠥᠷ᠂ ᠪᠣᠭᠣᠯ ᠮᠥᠨ᠃ ᠬᠡᠨ ᠮᠠᠷᠭᠤᠪᠠᠯ᠂ ᠲᠡᠭᠦᠨ ᠢ᠋ ᠵᠠᠮ ᠠ᠋ᠴᠠ ᠦᠯᠳᠡᠨ ᠵᠠᠢᠯᠠᠭᠤᠯᠤᠨᠠ᠃ ᠬᠡᠨ ᠲᠤᠰᠢᠶᠠᠯ ᠢ᠋ ᠡᠰᠡ ᠳᠠᠭᠠᠪᠠᠯ ᠲᠡᠭᠦᠨ ᠢ᠋ ᠶᠢᠰᠦᠨ ᠬᠡᠰᠡᠭ ᠪᠣᠯᠭᠠᠵᠤ ᠴᠠᠪᠴᠢᠨᠠ᠃ ᠠᠢ᠂《ᠦᠯᠦ ᠳᠡᠢᠯᠦᠭᠳᠡᠭᠴᠢᠳ 》ᠨᠢᠭᠡᠳᠦᠭᠡᠷ ᠠᠷᠪᠠᠲᠤ ᠶ᠋ᠢᠨ ᠴᠡᠷᠢᠭ ᠦ᠋ᠳ ᠠ᠋! ᠬᠥᠯᠴᠥᠭᠦᠦ ᠬᠥᠶᠦᠭ ᠬᠠᠭᠠᠨ ᠢ᠋ ᠮᠣᠷᠳᠠᠭᠤᠯᠵᠤ ᠲᠣᠬᠣᠢ ᠶ᠋ᠢ ᠨᠢ ᠬᠠᠨᠲᠠᠢᠷᠠᠭᠲᠤᠨ᠃ ᠳᠡᠩᠳᠡᠭᠦᠦ ᠵᠠᠯᠠᠭᠤ ᠪᠠᠢᠨᠠ᠂ ᠰᠠᠷᠬᠤᠳ ᠲᠸ᠋ ᠴᠣᠬᠢᠭᠳᠠᠵᠠᠢ᠃ ᠵᠠᠯᠠᠭᠤ ᠬᠠᠭᠠᠨ ᠢ᠋ ᠳᠠᠷᠤᠢ ᠲᠦᠷᠭᠡᠨ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡᠨ ᠳ᠋ᠦ᠍ ᠬᠦᠷᠭᠡᠵᠦ ᠪᠣᠷᠣᠨᠲᠠᠢ ᠨᠣᠶᠠᠨ ᠤ᠋ ᠭᠡᠷ ᠲᠦ᠍ ᠲᠤᠰᠢᠶᠠᠭᠠᠳ ᠳᠠᠷᠤᠢ ᠪᠤᠴᠠᠵᠤ ᠢᠷᠡᠵᠡᠭᠡ᠃ ᠨᠠᠮᠠᠶ᠋ᠢ ᠡᠨᠳᠡ ᠪᠠᠢᠬᠤ ᠦᠭᠡᠢ ᠪᠣᠯ ᠭᠦᠢᠴᠡᠵᠦ ᠣᠴᠢᠲᠤᠭᠠᠢ᠃ ᠣᠷᠣᠭᠰᠢ ᠪᠠᠨ! ᠬᠤᠷᠤᠢ ᠬᠤᠷᠤᠢ! ᠭᠡᠪᠡ ᠃
ᠭᠦᠶᠦᠭ ᠬᠠᠭᠠᠨ ᠢ᠋ ᠪᠠᠷᠢᠭᠰᠠᠨ ᠳᠠᠭᠠᠭᠤᠯᠢ ᠨᠤᠭᠤᠳ ᠭᠠᠷ ᠢ᠋ ᠨᠢ ᠠᠷᠤ ᠳ᠋ᠤᠨᠢ ᠬᠦᠯᠢᠭᠡᠳ᠂ ᠮᠣᠷᠢ ᠤᠷᠤᠭᠤ ᠠᠪᠴᠤ ᠣᠴᠢᠪᠠ᠃ ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ ᠤ᠋ᠨ ᠡᠷᠭᠢᠵᠦ ᠬᠠᠷᠠᠬᠤ ᠳ᠋ᠤ᠌ ᠳᠠᠭᠠᠭᠤᠯᠢ ᠨᠤᠭᠤᠳ ᠪᠠᠷᠠᠭᠤᠨ ᠮᠥᠷᠦᠨ ᠳᠡᠭᠡᠷᠡ ᠪᠡᠨ ᠭᠢᠯᠠᠪᠠᠯᠵᠠᠭᠤᠯᠤᠭᠰᠠᠨ ᠰᠡᠯᠡᠮᠡ ᠶ᠋ᠢ ᠲᠠᠯᠪᠢᠭᠠᠳ ᠴᠢᠯᠠᠭᠤ ᠮᠡᠲᠦ ᠵᠣᠭᠰᠣᠪᠠ᠃ ᠬᠠᠭᠠᠳ᠂ ᠨᠣᠶᠠᠳ ᠬᠣᠭᠣᠷᠣᠨᠳᠣ ᠪᠠᠨ ᠠᠶᠠᠷᠬᠠᠨ ᠶᠠᠷᠢᠯᠴᠠᠭᠰᠠᠭᠠᠷ ᠬᠣᠯᠠᠳᠠᠵᠤ ᠣᠳᠤᠯᠠ᠃ ᠰᠦᠪᠡᠭᠡᠳᠠᠢ ᠴᠢᠷᠠᠢ ᠪᠠᠨ ᠪᠠᠷᠤᠢᠯᠭᠠᠨ ᠪᠦᠭᠦᠳᠡ ᠶ᠋ᠢ ᠲᠠᠢᠪᠤᠩ ᠠᠵᠢᠭᠯᠠᠵᠤ ᠪᠠᠢᠭᠠ ᠠᠷᠠᠫ᠊ᠱᠠ ᠶ᠋ᠢ ᠳᠠᠭᠤᠳᠠᠵᠤ᠂ 《ᠳ᠋ᠵᠢᠬᠠᠩᠬᠢᠷ ᠬᠠᠮᠢᠭᠠ ᠪᠠᠢᠨᠠ? 》ᠭᠡᠬᠦ ᠳ᠋ᠦ᠍᠂
— ᠪᠢᠳᠡ᠂ ᠴᠢᠨᠦ ᠠᠰᠠᠷ ᠲᠸ᠋ ᠣᠷᠣᠭᠤᠯᠤᠯᠠ᠃ ᠬᠠᠷᠠᠭᠤᠯ ᠢ᠋ ᠨᠡᠮᠡᠭᠳᠡᠭᠦᠯᠪᠡ ᠭᠡᠪᠡ᠃
— ᠵᠥᠪ ᠬᠢᠵᠡᠢ᠃ ᠳᠠᠬᠢᠨ ᠳᠠᠭᠠᠷᠢᠬᠤ ᠪᠢᠵᠡ ᠠ᠋ ? ᠪᠦᠷᠢᠶᠡᠴᠢᠨ ᠬᠡᠩᠭᠡᠷᠭᠡᠴᠢᠨ ᠳ᠋ᠦ᠍ ᠲᠠᠬᠢᠶᠠᠨ ᠤ᠋ ᠲᠦᠷᠦᠭᠦᠴᠢ ᠶ᠋ᠢᠨ ᠳᠠᠭᠤ ᠪᠠᠷ ᠴᠡᠷᠢᠭ ᠢ᠋ ᠪᠣᠰᠬᠠᠨ ᠬᠥᠳᠡᠯᠭᠡ ᠭᠡᠵᠦ ᠲᠤᠰᠢᠶᠠᠭᠲᠤᠨ ᠭᠡᠵᠡᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠬᠡᠷᠡᠢᠳ·ᠮᠥᠩᠬᠡᠨᠠᠰᠤᠨ᠂ ᠠᠯᠲᠠᠨᠴᠢᠮᠡᠭ᠂ ᠭᠡᠷᠡᠯ᠂ ᠡᠷᠳᠡᠨᠢᠭᠣᠸᠠ᠂ ᠪᠠᠶᠠᠨᠴᠡᠴᠡᠭ
ᠬᠢᠨᠠᠭᠴᠢ᠄ ᠪᠠᠯ᠂ ᠲ· ᠬᠦᠮᠦᠵᠢᠯᠲᠦ᠂ ᠪᠠᠶᠠᠨᠴᠡᠴᠡᠭ᠂ ᠠᠯᠲᠠᠨᠴᠢᠮᠡᠭ᠂ ᠠᠷᠢᠭᠤᠨ