ᠪᠠᠲᠤ ᠬᠠᠭᠠᠨ 2-08ᠳ᠋ᠵᠢᠬᠠᠩᠬᠢᠷ ᠲᠠᠢ ᠶᠠᠷᠢᠯᠴᠠᠭᠰᠠᠨ ᠲᠤᠬᠠᠢ-ᠪᠠᠲᠤ ᠬᠠᠭᠠᠨ ᠥᠷᠥᠨᠡ ᠵᠦᠭ ᠲᠦ᠍ ᠬᠥᠳᠡᠯᠦᠯᠡ-Bat khaan Бат хаан-ᠷᠣᠮᠠᠨ
87ᠨᠠᠢ᠍ᠮᠠ ᠳ᠋ᠵᠢᠬᠠᠩᠬᠢᠷ ᠲᠠᠢ ᠶᠠᠷᠢᠯᠴᠠᠭᠰᠠᠨ ᠲᠤᠬᠠᠢ
ᠬᠠᠳ᠋ᠵᠢ ᠷᠠᠾᠢᠮ ᠪᠢᠴᠢᠭᠰᠡᠨ ᠨᠢ᠄ ᠲᠡᠭᠦᠨ ᠦ᠌ ᠶᠡᠷᠦ ᠪᠢᠰᠢ ᠶ᠋ᠢᠨ ᠶᠠᠪᠤᠳᠠᠯ ᠳ᠋ᠤ᠌ ᠲᠩᠷᠢ ᠲᠤᠰᠠᠯᠠᠲᠤᠭᠠᠢ᠃ ᠷᠧᠪᠢ ᠭᠡᠳᠡᠭ ᠬᠣᠶᠠᠳᠤᠭᠠᠷ (ᠵᠢᠷᠭᠤᠳᠤᠭᠠᠷ) ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠲᠠᠪᠤᠨ ᠤ᠋ ᠥᠷᠯᠥᠭᠡ ᠭᠡᠷᠡᠯᠲᠦ ᠡᠵᠡᠨ ᠠᠯᠲᠠᠨ ᠰᠢᠷᠠ ᠠᠰᠠᠷ ᠲᠠᠭᠠᠨ ᠬᠠᠳ᠋ᠵᠢ ᠷᠠᠾᠢᠮ ᠢ᠋ ᠳᠠᠭᠤᠳᠠᠭᠤᠯᠪᠠ᠃
ᠪᠠᠲᠤ ᠬᠠᠭᠠᠨ᠂ ᠫᠧᠷᠰ ᠬᠢᠯᠢᠩ ᠬᠡᠪᠢᠰᠦᠨ ᠳᠡᠭᠡᠷᠡ ᠲᠠᠯᠪᠢᠭᠰᠠᠨ ᠬᠡᠰᠡᠭᠬᠡᠨ ᠪᠣᠷᠣ ᠢᠰᠡᠭᠡᠢ ᠳᠡᠭᠡᠷᠡ ᠰᠠᠭᠤᠵᠤ ᠪᠠᠢᠪᠠ᠃ ᠳᠡᠷᠭᠡᠳᠡ ᠨᠢ ᠭᠤᠷᠪᠠᠨ ᠤᠯᠠᠭᠠᠨ ᠰᠤᠮᠤ ᠲᠠᠢ ᠰᠠᠭᠠᠳᠠᠭ ᠨᠤᠮᠤ᠂ ᠲᠠᠬᠢᠷ ᠰᠡᠯᠡᠮᠡ ᠬᠡᠪᠲᠡᠵᠦ᠂ ᠳᠡᠭᠡᠷᠡ ᠨᠢ ᠬᠦᠷᠡᠯ ᠪᠠᠮᠪᠠᠢ ᠳᠡᠭᠦᠵᠢᠯᠡᠵᠡᠢ᠃ ᠳ᠋ᠵᠢᠬᠠᠩᠭᠢᠷ ᠭᠠᠷ ᠢ᠋ᠶ᠋ᠠᠷ ᠳᠣᠬᠢᠵᠤ᠂ ᠹᠠᠺᠢᠾ ᠢ᠋ ᠳᠡᠷᠭᠡᠳᠡ ᠪᠡᠨ ᠰᠠᠭᠤ ᠭᠡᠬᠦ ᠳ᠋ᠦ᠍ ᠬᠠᠳ᠋ᠵᠢ ᠷᠠᠾᠢ᠍ᠮ᠂ ᠲᠡᠭᠦᠨ ᠦ᠌ ᠡᠮᠦᠨᠡᠬᠢ ᠭᠠᠵᠠᠷ ᠢ᠋ ᠦᠨᠦᠰᠴᠦ᠂ ᠡᠪᠦᠳᠦᠭ ᠳᠡᠭᠡᠷᠡ ᠪᠡᠨ ᠰᠥᠬᠥᠷᠡᠭᠡᠳ᠂ ᠶᠠᠭᠤ ᠰᠣᠨᠣᠰᠤᠭᠰᠠᠨ ᠢ᠋ᠶ᠋ᠠᠨ ᠪᠢᠴᠢᠬᠦ ᠪᠡᠷ ᠪᠡᠯᠡᠳᠬᠡᠪᠡ᠃
ᠳ᠋ᠵᠢᠬᠠᠩᠭᠢᠷ ᠰᠢᠪᠡᠨᠡᠨ ᠬᠡᠯᠡᠪᠡ᠃ ᠦᠭᠡ ᠨᠢ ᠵᠠᠷᠢᠮ ᠳ᠋ᠠᠭᠠᠨ ᠡᠮᠬᠢ ᠦᠭᠡᠢ᠂ ᠪᠢᠴᠢᠬᠦ ᠳ᠋ᠦ᠍ ᠲᠦᠪᠡᠭᠲᠡᠢ ᠮᠠᠰᠢ ᠬᠤᠷᠳᠤᠨ ᠪᠣᠯᠪᠠᠴᠤ ᠬᠠᠳ᠋ᠵᠢ ᠷᠠᠾᠢ᠍ᠮ ᠵᠢᠷᠦᠬᠡᠨ ᠳ᠋ᠡᠭᠡᠨ ᠲᠣᠭᠲᠠᠭᠠᠵᠤ ᠠᠪᠬᠤ ᠭᠡᠵᠦ ᠡᠷᠡᠮᠡᠯᠵᠡᠯᠡ᠃
—ᠥᠨᠥᠳᠥᠷ ᠬᠠᠭᠠᠳ ᠤ᠋ᠨ ᠶᠡᠬᠡ ᠴᠢᠭᠤᠯᠭᠠᠨ ᠪᠣᠯᠤᠨᠠ᠁ ᠮᠣᠩᠭᠣᠯᠴᠤᠳ ᠤᠯᠠᠢᠷᠠᠵᠤ᠂ ᠪᠡᠶᠡ ᠪᠡᠶᠡ ᠪᠡᠨ ᠴᠠᠪᠴᠢᠪᠠᠯ ᠴᠢᠰᠤᠨ ᠠᠰᠬᠠᠷᠠᠵᠤ ᠲᠡᠭᠦᠰᠴᠦ ᠮᠠᠭᠠᠳ ᠦᠭᠡᠢ᠁ ᠲᠡᠭᠡᠪᠡᠯ ᠤᠯᠤᠰ ᠤ᠋ᠨ ᠡᠭᠦᠳᠡᠨ ᠦ᠌ ᠴᠤᠪᠤᠴᠠ ᠳᠡᠭᠡᠷᠡ ᠰᠢᠨᠡ ᠬᠥᠬᠡ ᠣᠪᠣᠭᠠ ᠪᠣᠰᠤᠨᠠ᠃ ᠯᠠᠪ ᠲᠡᠭᠡᠨᠡ᠁ ᠮᠢᠨᠦ ᠡᠪᠦᠭᠡ —ᠳᠡᠢᠯᠦᠭᠳᠡᠰᠢ ᠦᠭᠡᠢ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠶᠡᠬᠡ ᠬᠤᠷᠠᠯᠳᠤᠭᠠᠨ ᠢ᠋ ᠰᠠᠨᠠᠵᠤ ᠪᠠᠢᠨᠠ ᠤᠤ ? ᠴᠢ ! ᠪᠢ ᠲᠡᠷᠡ ᠦᠶᠡ ᠳᠣᠯᠣᠭᠠᠨ ᠨᠠᠰᠤᠲᠠᠢ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠴᠥᠮ ᠮᠢᠨᠦ ᠰᠠᠨᠠᠭᠠᠨ ᠳ᠋ᠤ᠌ ᠲᠣᠳᠣᠷᠬᠠᠢ ᠪᠠᠢᠨᠠ᠁ ᠡᠬᠢᠯᠡᠭᠡᠳ᠂ ᠪᠣᠭᠳᠠ ᠡᠵᠡᠨ ᠬᠠᠶᠠ ᠬᠠᠶᠠ ᠦᠭᠡ ᠠᠰᠠᠭᠤᠬᠤ ᠳ᠋ᠤ᠌ ᠬᠠᠭᠠᠳ ᠴᠥᠮ ᠴᠢᠷᠮᠠᠢᠨ ᠰᠠᠨᠳᠤᠷᠴᠤ ᠬᠠᠷᠢᠯᠴᠠᠨ ᠲᠠᠰᠤᠯᠳᠠᠯ ᠦᠭᠡᠢ ᠬᠠᠷᠢᠭᠤᠯᠵᠤ᠂ ᠬᠥᠮᠦᠨ ᠪᠦᠷᠢ ᠬᠡᠯᠡᠭᠰᠡᠨ ᠦᠭᠡ ᠪᠡᠨ ᠪᠣᠯᠭᠣᠮᠵᠢᠯᠠᠨ ᠴᠢᠩᠨᠠᠵᠤ ᠪᠠᠢᠯᠠ᠃ ᠲᠡᠭᠡᠭᠡᠳ ᠳᠡᠯᠡᠬᠡᠢ ᠳ᠋ᠠᠬᠢᠨ ᠢ᠋ ᠡᠵᠡᠯᠡᠭᠴᠢ ᠵᠠᠷᠯᠢᠭ ᠪᠠᠭᠤᠯᠭᠠᠵᠤ ᠡᠬᠢᠯᠡᠬᠦ ᠳ᠋ᠦ᠍ ᠲᠡᠭᠦᠨ ᠦ᠌ ᠦᠭᠡ ᠵᠢᠷᠦᠬᠡᠨ ᠳ᠋ᠦ᠍ ᠴᠠᠬᠢᠯᠭᠠᠨ ᠪᠠᠭᠤᠬᠤ ᠮᠡᠲᠦ᠂ ᠰᠡᠯᠡᠮᠡ ᠶ᠋ᠢᠨ ᠴᠠᠪᠴᠢᠯᠲᠠ ᠮᠡᠲᠦ᠂ ᠬᠠᠷᠠᠩᠭᠤᠢ ᠬᠠᠪᠴᠢᠯ ᠳᠡᠭᠡᠭᠦᠷ ᠬᠠᠷᠠᠢᠬᠤ ᠮᠣᠷᠢᠨ ᠤ᠋ ᠬᠠᠷᠠᠢᠯᠲᠠ ᠮᠡᠲᠦ᠂ ᠡᠷᠭᠢᠵᠦ ᠦᠯᠦ ᠪᠤᠴᠠᠬᠤ ᠬᠠᠷᠠᠢᠯᠲᠠ ᠮᠡᠲᠦ ᠲᠣᠰᠤᠯᠠ᠃ ᠠᠶᠠᠨ ᠲᠡᠢᠨ ᠦ᠌ ᠠᠮᠵᠢᠯᠲᠠ ᠳ᠋ᠤ᠌ ᠡᠷᠡᠭᠡᠯᠵᠡᠬᠦ ᠦᠭᠡ ᠬᠡᠯᠡᠬᠦ ᠪᠤᠶᠤ ᠲᠠᠲᠠᠭᠠᠯᠵᠠᠬᠤ ᠡᠲᠡᠭᠡᠳ ᠨᠢᠭᠡ ᠴᠦ᠍ ᠦᠭᠡᠢ ᠪᠥᠯᠥᠭᠡ᠃ ᠣᠳᠣ ᠬᠠᠭᠠᠳ᠂ ᠰᠣᠳᠣ ᠮᠡᠷᠭᠡᠨ ᠦ᠌ ᠶᠡᠬᠡ ᠰᠤᠷᠭᠠᠯ ᠢ᠋ ᠮᠠᠷᠲᠠᠵᠠᠢ᠃ ᠲᠡᠳᠡ ᠨᠠᠷ ᠪᠣᠭᠳᠠ ᠡᠵᠡᠨ ᠴᠥᠮ ᠢ᠋ ᠬᠦᠴᠦᠲᠦ ᠭᠠᠷ ᠲᠠᠭᠠᠨ ᠠᠳᠬᠤᠬᠤ ᠶ᠋ᠢᠨ ᠤᠷᠢᠳ᠂ ᠮᠠᠨ ᠤ᠋ ᠮᠣᠩᠭᠣᠯ ᠤ᠋ᠨ ᠲᠠᠯᠠ ᠳᠡᠭᠡᠷᠡ ᠪᠠᠢᠭᠰᠠᠨ ᠤ᠋ ᠠᠳᠠᠯᠢ ᠪᠠᠷ ᠬᠣᠭᠣᠷᠣᠨᠳᠣ ᠪᠠᠨ ᠠᠳᠬᠤᠯᠴᠠᠯᠳᠤᠨ ᠲᠡᠮᠡᠴᠡᠯᠳᠦᠵᠦ ᠪᠠᠢᠨᠠ᠃ ᠮᠥᠩᠬᠡ ᠬᠠᠭᠠᠨ᠂ ᠮᠢᠨᠦ ᠳᠡᠭᠦᠦ ᠨᠠᠷ ᠠ᠋ᠴᠠ ᠪᠤᠰᠤᠳ ᠬᠠᠭᠠᠳ ᠴᠥᠮ ᠥᠨᠳᠥᠷ ᠶᠡᠬᠡ ᠴᠢᠭᠤᠯᠭᠠᠨ ᠳᠡᠭᠡᠷᠡ ᠨᠠᠮᠠᠶ᠋ᠢ ᠢᠴᠢᠭᠡᠵᠦ᠂ ᠰᠤᠮᠤ ᠰᠢᠭᠠᠭᠰᠠᠨ ᠪᠣᠳᠣᠩ ᠭᠠᠬᠠᠢ ᠮᠡᠲᠦ ᠵᠡᠭᠡᠰᠦ ᠤᠷᠤᠭᠤ ᠠᠶᠤᠨ ᠵᠢᠭᠤᠲᠠᠭᠤᠯᠬᠤ ᠶ᠋ᠢ ᠪᠣᠳᠣᠵᠤ ᠪᠠᠢᠨᠠ᠃ ᠲᠡᠭᠡᠬᠦ ᠦᠭᠡᠢ᠃ ᠡᠰᠡᠬᠦᠯᠡ ᠮᠢᠨᠦ ᠡᠮᠦᠨᠡᠬᠢ ᠭᠠᠵᠠᠷ ᠢ᠋ ᠦᠯᠦ ᠦᠨᠦᠰᠦᠭᠴᠢ ᠪᠦᠭᠦᠳᠡ ᠶ᠋ᠢ ᠪᠢ ᠰᠥᠨᠥᠭᠡᠨᠡ᠂ ᠡᠰᠡᠬᠦᠯᠡ ᠪᠢ ᠥᠪᠡᠷ ᠢ᠋ᠶ᠋ᠡᠨ ᠲᠠᠰᠤ ᠴᠠᠪᠴᠢᠭᠳᠠᠨ ᠦᠬᠦᠨᠡ᠃ ᠪᠢ ᠬᠡᠳᠦᠢᠨ ᠴᠥᠮ ᠦ᠋ᠨ ᠨᠢᠷᠤᠭᠤ ᠶ᠋ᠢ ᠬᠤᠭᠤ ᠲᠠᠲᠠᠬᠤ ᠪᠠᠢᠯᠠ᠃ ᠭᠡᠪᠡᠴᠦ ᠡᠪᠦᠭᠡᠨ ᠡᠴᠢᠭᠡ ᠶ᠋ᠢᠨ ᠭᠡᠷᠢᠶᠡᠰ —《ᠤᠭᠰᠠᠭᠠ ᠤᠳᠤᠮ ᠤ᠋ᠨ ᠳᠣᠲᠣᠷᠠ ᠦᠢᠮᠡᠭᠡᠨ ᠢ᠋ ᠪᠤᠤ ᠳᠡᠭᠳᠡᠭᠡ》ᠭᠡᠰᠡᠨ ᠢ᠋ ᠪᠣᠳᠣᠵᠤ ᠪᠠᠢᠨᠠ᠃ ᠳᠡᠯᠡᠬᠡᠢ ᠳ᠋ᠠᠬᠢᠨ ᠢ᠋ ᠡᠵᠡᠯᠡᠬᠦ ᠡᠷᠬᠡ ᠲᠡᠳᠡᠨ ᠦ᠌ ᠭᠠᠷ ᠲᠤ᠌ ᠪᠠᠢᠨᠠ ᠤᠤ? ᠶᠠᠭᠠᠬᠢᠭᠠᠳ ᠲᠡᠳᠡ᠂ ᠴᠢᠩᠭᠢᠰ ᠦ᠋ᠨ ᠬᠢᠨ ᠦ᠌ ᠤᠷᠤᠭ ᠤ᠋ᠨ ᠠᠰᠠᠷ ᠲᠤᠯᠤᠭᠰᠠᠨ ᠪᠠᠭᠠᠨᠠ ᠶ᠋ᠢ ᠭᠠᠩᠬᠤᠭᠤᠯᠵᠤ ᠴᠠᠪᠴᠢᠯᠠᠵᠤ ᠪᠠᠢᠨᠠ? ᠪᠢ ᠡᠪᠦᠭᠡ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠶᠢᠰᠦᠨ ᠰᠡᠭᠦᠯᠲᠦ ᠲᠤᠭ ᠢ᠋ ᠪᠠᠷᠢᠬᠤ ᠡᠷᠬᠡ ᠪᠣᠢ ᠡᠰᠡᠬᠦ ᠪᠡᠨ ᠪᠢ ᠥᠨᠥᠳᠥᠷ ᠲᠡᠳᠡᠨ ᠳ᠋ᠦ᠍ ᠦᠵᠡᠭᠦᠯᠰᠦᠭᠡᠢ!᠁ ᠭᠡᠵᠡᠢ᠃
ᠮᠣᠳᠣᠨ ᠬᠠᠭᠠᠯᠭᠠ ᠬᠥᠳᠡᠯᠵᠦ᠂ ᠲᠣᠮᠣ ᠳᠥᠷᠪᠡᠯᠵᠢᠨ ᠠᠶᠠᠭᠠ ᠲᠠᠢ ᠭᠠᠷ ᠣᠷᠣᠵᠤ ᠬᠠᠵᠠᠭᠤ ᠶ᠋ᠢᠨ ᠮᠣᠳᠣᠨ ᠪᠠᠭᠠᠨᠠ ᠶ᠋ᠢ ᠰᠢᠭᠦᠷᠡᠨ ᠪᠠᠷᠢᠵᠠᠢ᠃ ᠠᠭᠤᠷᠰᠠᠨ ᠬᠠᠰᠬᠢᠷᠬᠤ ᠴᠢᠮᠡᠭᠡ ᠭᠠᠷᠤᠯᠠ᠃
— ᠡᠨᠡ ᠭᠠᠳᠠᠨᠠ ᠶ᠋ᠢᠨ ᠬᠥᠮᠦᠨ ᠪᠠᠢᠨᠠ! ᠮᠠᠨ ᠤ᠋ ᠬᠢ ᠪᠢᠰᠢ! ᠭᠡᠵᠦ ᠪᠠᠲᠤ ᠬᠠᠭᠠᠨ ᠰᠢᠪᠡᠨᠡᠨ ᠬᠡᠯᠡᠭᠡᠳ ᠨᠤᠮᠤ ᠪᠠᠨ ᠣᠨᠢᠯᠠᠨ ᠲᠠᠲᠠᠭᠰᠠᠨ ᠳ᠋ᠤ᠌ ᠤᠯᠠᠭᠠᠨ ᠰᠤᠮᠤ ᠠᠯᠠᠭᠠ ᠶ᠋ᠢ ᠨᠡᠪᠲᠡᠯᠦᠨ ᠡᠭᠦᠳᠡᠨ ᠦ᠌ ᠮᠣᠳᠣᠨ ᠪᠠᠭᠠᠨᠠ ᠳ᠋ᠤ᠌ ᠰᠢᠭᠠᠵᠤ ᠴᠡᠴᠡᠷᠭᠡᠨᠡᠪᠡ᠃ ᠲᠡᠷᠡ ᠭᠠᠷ᠂ ᠰᠤᠮᠤ ᠶ᠋ᠢ ᠨᠢ ᠠᠪᠴᠤ ᠣᠳᠤᠯᠠ᠃
ᠬᠥᠮᠦᠰ ᠦ᠋ᠨ ᠳᠠᠭᠤ ᠨᠠᠮᠵᠢᠪᠠ᠃ ᠪᠠᠲᠤ ᠬᠠᠭᠠᠨ ᠲᠣᠭᠰᠢᠭᠤᠷ ᠢ᠋ᠶ᠋ᠠᠷ ᠬᠦᠷᠡᠩ ᠪᠠᠮᠪᠠᠢ ᠶ᠋ᠢ ᠴᠣᠬᠢᠬᠤ ᠳ᠋ᠤ᠌ ᠤᠷᠲᠤ ᠮᠣᠩᠭᠣᠯ ᠳᠡᠪᠡᠯ ᠲᠡᠢ᠂ ᠪᠦᠴᠡ ᠲᠡᠢ᠂ ᠬᠦᠳᠦᠰᠦᠨ ᠮᠠᠯᠠᠭᠠᠢ ᠲᠠᠢ᠂ ᠪᠣᠭᠣᠨᠢ ᠵᠢᠳᠠ ᠪᠠᠷᠢᠭᠰᠠᠨ ᠬᠠᠷᠠᠭᠤᠯ ᠤ᠋ᠨ ᠬᠥᠮᠦᠨ ᠣᠷᠣᠵᠤ ᠢᠷᠡᠪᠡ᠃
— ᠬᠡᠨ ᠨᠡᠰᠢ ᠣᠷᠣᠬᠤ ᠭᠡᠵᠦ ᠲᠡᠮᠡᠦᠯᠪᠡ?
— ᠬᠥᠶᠦᠭ ᠬᠠᠭᠠᠨ ᠤ᠋ ᠡᠯᠴᠢ᠂ ᠨᠠᠮᠠᠶ᠋ᠢ ᠲᠦᠯᠬᠢᠵᠦ ᠤᠨᠠᠭᠠᠬᠤ ᠶ᠋ᠢ ᠵᠠᠪᠳᠤᠨ ᠠᠯᠲᠠᠨ ᠫᠠᠢᠵᠠ ᠦᠵᠡᠭᠦᠯᠵᠦ᠂ ᠠᠰᠠᠷ ᠲᠤ᠌ ᠵᠥᠪᠰᠢᠶᠡᠷᠡᠯ ᠦᠭᠡᠢ ᠣᠷᠣᠪᠠ᠃ ᠪᠢ ᠰᠡᠯᠡᠮᠡ ᠰᠤᠭᠤᠯᠵᠤ ᠪᠠᠷᠢᠭᠤᠯ ᠢ᠋ᠶ᠋ᠠᠷ ᠨᠢ ᠲᠡᠭᠦᠨ ᠦ᠌ ᠰᠢᠳᠦ ᠶ᠋ᠢ ᠴᠣᠬᠢᠯᠠ᠃ ᠬᠡᠷᠪᠡ ᠳᠠᠬᠢᠨ ᠨᠢᠭᠡᠨ ᠠᠯᠬᠤᠮ ᠬᠥᠳᠡᠯᠪᠡᠯ ᠮᠢᠨᠦ ᠰᠡᠯᠡᠮᠡ ᠬᠠᠪᠢᠰᠤᠨ ᠤ᠋ ᠳᠣᠭᠤᠤᠷ ᠴᠡᠭᠡᠵᠢ ᠶ᠋ᠢ ᠴᠢᠨᠢ ᠨᠡᠪᠲᠡ ᠰᠢᠭᠠᠨᠠ ᠭᠡᠵᠦ ᠪᠢ ᠬᠡᠯᠡᠭᠰᠡᠨ᠁ ᠭᠡᠬᠦ ᠳ᠋ᠦ᠍ ᠪᠠᠲᠤ ᠬᠠᠭᠠᠨ
— ᠴᠢ ᠵᠢᠩᠬᠢᠨᠢ ᠳᠠᠭᠠᠭᠤᠯᠢ ᠶ᠋ᠢᠨ ᠶᠣᠰᠣᠭᠠᠷ ᠬᠥᠳᠡᠯᠵᠡᠢ᠃ ᠪᠢ ᠴᠢᠮᠠᠶ᠋ᠢ ᠳᠡᠪᠰᠢᠭᠦᠯᠦᠨᠡ᠃ ᠵᠠᠭᠤᠲᠤ ᠶ᠋ᠢᠨ ᠳᠠᠷᠤᠭᠠ ᠠᠷᠠᠫ᠊ᠱᠠ ᠬᠠᠮᠢᠭᠠ ᠪᠠᠢᠨᠠ?
— ᠡᠯᠴᠢ ᠶ᠋ᠢ ᠭᠡᠷ ᠲᠡᠭᠡᠨ ᠠᠪᠠᠴᠢᠪᠠ᠃
— ᠶᠠᠭᠤᠨ ᠳ᠋ᠤ᠌?
— ᠵᠡᠭᠦᠨ ᠴᠢᠬᠢ ᠶ᠋ᠢ ᠨᠢ ᠣᠭᠲᠣᠯᠬᠤ ᠶ᠋ᠢᠨ ᠲᠤᠯᠠᠳᠠ᠁ ᠭᠡᠵᠡᠢ᠃ ᠪᠠᠲᠤ ᠬᠠᠭᠠᠨ ᠪᠣᠳᠣᠯᠭᠠᠰᠢᠷᠠᠨ᠂ ᠨᠢᠳᠦ ᠪᠡᠨ ᠭᠢᠯᠦᠢᠵᠦ ᠬᠠᠷᠠᠭᠠᠳ ᠵᠢᠴᠢ ᠢᠨᠢᠶᠡᠨ᠂
— ᠴᠢᠨᠦ ᠨᠡᠷᠡ ᠬᠡᠨ ᠪᠣᠢ?
— ᠮᠥᠰᠥᠢ᠍ᠺ᠃
— ᠪᠢ ᠴᠢᠮᠠᠶ᠋ᠢ ᠬᠠᠮᠢᠭᠠ ᠬᠠᠷᠠᠭᠰᠠᠨ ᠪᠢᠯᠡ?
— ᠴᠢᠮᠠᠲᠤ ᠬᠡᠭᠡᠷ ᠠᠵᠢᠷᠭᠠ ᠪᠠᠷᠢᠵᠤ ᠥᠭᠬᠦ ᠳ᠋ᠦ᠍ ᠨᠠᠮᠠᠶ᠋ᠢ ᠦᠵᠡᠭᠰᠡᠨ᠃ ᠣᠳᠣ ᠲᠡᠷᠡ ᠠᠵᠢᠷᠭᠠ ᠶ᠋ᠢ ᠵᠠᠭᠤᠲᠤ ᠶ᠋ᠢᠨ ᠳᠠᠷᠤᠭᠠ ᠠᠷᠠᠫ᠊ᠱᠠ ᠤᠨᠤᠵᠤ ᠪᠠᠢᠨᠠ᠃ ᠲᠡᠷᠡ ᠨᠠᠮᠠᠶ᠋ᠢ ᠵᠠᠭᠤᠲᠤ ᠳ᠋ᠠᠭᠠᠨ ᠠᠪᠤᠯᠠ ᠭᠡᠪᠡ᠃
—ᠠᠷᠠᠫ᠊ᠱᠠ ᠶ᠋ᠢ ᠮᠡᠳᠡᠨᠡ᠂ ᠲᠡᠭᠦᠨ ᠦ᠌ ᠵᠠᠮ ᠳ᠋ᠤ᠌ ᠰᠠᠭᠠᠳ ᠬᠢᠭᠰᠡᠨ ᠬᠥᠮᠦᠨ ᠳ᠋ᠦ᠍ ᠮᠠᠭᠤ ᠪᠣᠯᠤᠨᠠ᠂ ᠬᠠᠷᠢᠨ ᠲᠤᠰᠠ ᠪᠣᠯᠤᠭᠰᠠᠨ ᠬᠥᠮᠦᠨ ᠢ᠋ ᠲᠡᠷᠡ ᠮᠠᠷᠲᠠᠬᠤ ᠦᠭᠡᠢ᠃
—ᠵᠠ᠂ ᠶᠠᠪᠤ ᠭᠡᠵᠡᠢ᠃
ᠬᠠᠷᠠᠭᠤᠯ ᠤ᠋ᠨ ᠬᠥᠮᠦᠨ ᠭᠠᠷᠪᠠ᠃ ᠪᠠᠲᠤ ᠬᠠᠭᠠᠨ ᠳᠠᠬᠢᠨ ᠬᠠᠳ᠋ᠵᠢ ᠷᠡᠾᠢ᠍ᠮ ᠦ᠋ᠨ ᠵᠦᠭ ᠬᠠᠨᠳᠤᠵᠤ᠂
—ᠪᠢ ᠥᠷᠥᠨᠡ ᠵᠦᠭ ᠲᠦ᠍ ᠴᠡᠷᠢᠭ ᠮᠣᠷᠳᠠᠭᠤᠯᠬᠤ ᠪᠥᠭᠡᠳ ᠲᠡᠨᠳᠡ ᠶᠠᠭᠤ ᠲᠠᠢ ᠤᠴᠠᠷᠠᠬᠤ ᠪᠠᠨ ᠮᠡᠳᠡᠵᠦ ᠪᠠᠢᠨᠠ᠃ ᠣᠷᠣᠰ ᠭᠠᠵᠠᠷ ᠮᠢᠨᠦ ᠶᠠᠪᠤᠭᠤᠯᠤᠭᠰᠠᠨ ᠲᠠᠩᠨᠠᠭᠤᠯᠴᠢᠨ ᠬᠤᠳᠠᠯᠳᠤᠭᠠᠴᠢᠨ ᠴᠥᠮ ᠨᠠᠳᠠ ᠳ᠋ᠤ᠌ ᠶᠠᠷᠢᠭᠰᠠᠨ᠁ ᠣᠷᠣᠰ᠂ ᠲᠡᠭᠦᠨ ᠦ᠌ ᠴᠠᠭᠠᠨᠠ ᠣᠷᠣᠰᠢᠬᠤ ᠤᠯᠤᠰ ᠤ᠋ᠳ ᠢ᠋ ᠪᠢ ᠡᠵᠡᠯᠡᠨᠡ᠃ ᠣᠢ ᠶ᠋ᠢᠨ ᠪᠠᠭᠠᠪᠠᠭᠠᠢ ᠣᠷᠣᠰ ᠤ᠋ᠳ ᠢ᠋ ᠳᠠᠭᠠᠭᠤᠯᠤᠨ ᠡᠵᠡᠯᠡᠬᠦ ᠳ᠋ᠦ᠍ ᠬᠡᠴᠡᠭᠦᠦ ᠪᠢᠰᠢ᠂ ᠴᠥᠮ ᠪᠢᠴᠢᠬᠠᠨ ᠣᠪᠣᠭ ᠠᠢᠮᠠᠭ ᠢ᠋ᠶ᠋ᠠᠷ ᠲᠠᠰᠤᠷᠠᠵᠤ᠂ ᠬᠠᠭᠠᠨ ᠸᠠᠩ ᠤ᠋ᠳ ᠨᠢ ᠪᠡᠶᠡ ᠪᠡᠶᠡ ᠪᠡᠨ ᠦᠵᠡᠨ ᠶᠠᠳᠠᠳᠠᠭ ᠪᠠᠢᠨᠠ᠃ ᠪᠦᠭᠦᠳᠡ ᠶ᠋ᠢ ᠨᠢᠭᠡᠳᠬᠡᠨ᠂ ᠨᠢᠭᠡᠨ ᠤᠯᠤᠰ ᠰᠢᠭ᠋ ᠪᠣᠯᠭᠠᠭᠰᠠᠨ ᠴᠢᠩᠭᠢᠰ ᠰᠢᠭ ᠬᠥᠮᠦᠨ ᠲᠡᠳᠡᠨ ᠳ᠋ᠦ᠍ ᠣᠳᠣ ᠬᠦᠷᠲᠡᠯᠡ ᠭᠠᠷᠤᠭᠠ ᠦᠭᠡᠢ᠃ ᠪᠢ ᠲᠡᠳᠡᠨ ᠢ᠋ ᠬᠣᠲᠠ ᠳ᠋ᠤ᠌ ᠠᠯᠪᠠᠨ ᠭᠤᠪᠴᠢᠭᠤᠷ ᠬᠤᠷᠢᠶᠠᠬᠤ ᠲᠥᠯᠥᠭᠡᠨ ᠦ᠌ ᠲᠦᠰᠢᠮᠡᠯ ᠢ᠋ ᠰᠠᠭᠤᠯᠭᠠᠭᠠᠳ᠂ ᠲᠣᠬᠢᠶᠠᠯᠳᠤᠭᠰᠠᠨ ᠤᠯᠤᠰ ᠢ᠋ ᠮᠣᠷᠢᠨ ᠤ᠋ ᠪᠠᠨ ᠲᠤᠭᠤᠷᠠᠢ ᠳᠣᠣᠷᠠ ᠴᠤᠭᠯᠠᠭᠤᠯᠬᠤ ᠪᠠᠷ ᠡᠴᠦᠰ ᠦ᠋ᠨ ᠲᠠᠩᠭᠢᠰ ᠬᠦᠷᠲᠡᠯᠡ ᠥᠪᠡᠷ ᠢ᠋ᠶ᠋ᠡᠨ ᠴᠠᠰᠢ ᠶᠠᠪᠤᠰᠤᠭᠠᠢ᠃ ᠲᠡᠭᠡᠭᠡᠳ ᠪᠦᠬᠦ ᠳᠡᠯᠡᠬᠡᠢ ᠮᠣᠩᠭᠣᠯ ᠤ᠋ᠨ ᠠᠳᠬᠤᠨ ᠳ᠋ᠤ᠌ ᠣᠷᠣᠨᠠ ᠭᠡᠪᠡ᠃
ᠲᠣᠮᠣ᠂ ᠯᠤᠲᠤ ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ ᠠᠰᠠᠷ ᠲᠸ᠋ ᠴᠢᠮᠡᠭᠡ ᠦᠭᠡᠢ ᠣᠷᠣᠭᠠᠳ ᠣᠭᠵᠣᠮ ᠡᠷᠭᠢᠵᠦ᠂ ᠭᠠᠷ ᠢ᠋ᠶ᠋ᠠᠨ ᠡᠷᠭᠦᠨ ᠲᠣᠮᠣ ᠴᠢᠬᠢ ᠶ᠋ᠢᠨ ᠢ᠋ᠶ᠋ᠠᠨ ᠲᠤᠰᠢᠶᠠ ᠠᠪᠠᠴᠢᠵᠤ ᠰᠠᠢᠲᠤᠷ ᠴᠢᠩᠨᠠᠪᠠ᠃ ᠭᠠᠭᠴᠠᠬᠦ ᠲᠣᠰᠣᠨ ᠲᠣᠯᠪᠣ ᠲᠠᠢ ᠬᠠᠭᠤᠴᠢᠨ ᠬᠥᠬᠡ ᠲᠣᠷᠭᠠᠨ ᠳᠡᠪᠡᠯ ᠲᠡᠢ ᠪᠥᠭᠲᠥᠷ ᠳᠤᠭᠤᠢ ᠨᠢᠷᠤᠭᠤ ᠨᠢ ᠦᠵᠡᠭᠳᠡᠵᠦ ᠪᠠᠢᠯᠠ᠃ ᠲᠡᠭᠡᠭᠡᠳ ᠬᠠᠳ᠋ᠵᠢ ᠷᠠᠾᠢ᠍ᠮ ᠤᠷᠤᠭᠤ ᠭᠢᠯᠦᠢᠵᠦ ᠬᠠᠷᠠᠭᠠᠳ᠂ ᠮᠠᠢᠭ᠋ ᠬᠥᠯ ᠢ᠋ᠶ᠋ᠡᠨ ᠴᠢᠷᠦᠭᠰᠡᠭᠡᠷ ᠪᠠᠲᠤ ᠬᠠᠭᠠᠨ ᠤ᠋ ᠳᠡᠷᠭᠡᠳᠡ ᠬᠦᠷᠴᠦ ᠢᠷᠠᠭᠯᠠᠨ ᠮᠡᠬᠦᠢᠵᠦ ᠭᠠᠵᠠᠷ ᠱᠦᠷᠭᠦᠲᠡᠯᠡ ᠰᠥᠭᠥᠳᠪᠡ᠃ ᠪᠠᠲᠤ ᠬᠠᠭᠠᠨ ᠲᠡᠭᠦᠨ ᠦ᠌ ᠮᠥᠷᠭᠥᠬᠦ ᠶᠣᠰᠣ ᠭᠦᠢᠴᠡᠭᠡᠬᠦ ᠶ᠋ᠢ ᠬᠦᠯᠢᠶᠡᠭᠡᠳ᠂ ᠡᠪᠦᠭᠡᠨ ᠵᠠᠩᠵᠤᠨ ᠢ᠋ ᠬᠠᠵᠠᠭᠤ ᠳ᠋ᠠᠭᠠᠨ ᠰᠠᠭᠤᠯᠭᠠᠪᠠ᠃
ᠰᠦᠪᠡᠭᠡᠳᠠᠢ ᠬᠠᠳ᠋ᠵᠢ ᠷᠠᠾᠢ᠍ᠮ ᠤᠷᠤᠭᠤ ᠳᠠᠬᠢᠨ ᠮᠠᠭᠤᠬᠠᠢ ᠬᠠᠷᠠᠵᠤ ᠬᠦᠩᠭᠢᠨᠡᠨ ᠰᠠᠨᠠᠭᠠ ᠠᠯᠳᠠᠪᠠ᠃
—ᠠᠶᠤᠯ ᠦᠭᠡᠢ᠂ ᠴᠥᠮ ᠢ᠋ ᠬᠡᠯᠡᠭᠲᠦᠨ! ᠮᠢᠨᠦ ᠪᠠᠭᠰᠢ ᠨᠠᠳᠠᠳᠤ ᠰᠢᠳᠤᠷᠭᠤ᠂ ᠵᠠᠮ ᠤ᠋ᠨ ᠬᠠᠵᠠᠭᠤ ᠳ᠋ᠠᠬᠢ ᠴᠢᠯᠠᠭᠤ ᠮᠡᠲᠦ ᠳᠤᠭᠤᠢ ᠬᠥᠮᠦᠨ᠃
— ᠮᠢᠨᠦ ᠤᠷᠢᠳ ᠥᠭᠦᠯᠡᠭᠰᠡᠨ ᠦᠨᠡᠨ ᠪᠣᠯᠪᠠ᠃ ᠭᠦᠶᠦᠭ ᠬᠠᠭᠠᠨ ᠮᠠᠨ ᠤ᠋ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠤᠷᠤᠭᠤ ᠮᠢᠩᠭᠠᠲᠤ ᠪᠠᠨ ᠠᠪᠴᠢᠷᠠᠵᠠᠢ᠃ ᠬᠠᠮᠠᠭᠠᠯᠠᠬᠤ ᠶ᠋ᠢ ᠬᠦᠴᠦᠲᠡᠢ ᠪᠣᠯᠭᠠᠨ ᠨᠡᠮᠡᠭᠳᠡᠭᠦᠯᠵᠦ᠂ ᠨᠢᠭᠡ ᠴᠦ᠍ ᠬᠥᠮᠦᠨ ᠢ᠋ ᠪᠤᠤ ᠣᠢᠷᠠᠲᠤᠭᠤᠯ ᠭᠡᠵᠦ ᠪᠢ ᠲᠤᠰᠢᠶᠠᠭᠰᠠᠨ᠃ ᠪᠤᠰᠤᠳ ᠬᠠᠭᠠᠳ ᠲᠤᠰᠢᠶᠠᠯ ᠢ᠋ ᠵᠥᠷᠢᠴᠡᠨ ᠬᠡᠳᠦ ᠬᠡᠳᠦᠨ ᠵᠠᠭᠤᠨ ᠬᠥᠮᠦᠨ ᠲᠡᠢ ᠪᠠᠭ ᠴᠡᠷᠢᠭ ᠲᠠᠢ ᠪᠡᠷ ᠮᠥᠨ ᠢᠷᠡᠵᠡᠢ᠃ ᠲᠡᠳᠡᠨ ᠦ᠌ ᠲᠣᠮᠣᠬᠠᠨ ᠠᠩᠭᠢ ᠨᠤᠭᠤᠳ ᠨᠢ ᠬᠣᠯᠠ ᠪᠢᠰᠢ ᠭᠠᠵᠠᠷ ᠪᠣᠢ᠂ ᠬᠡᠷᠪᠡ ᠬᠠᠭᠠᠳ ᠲᠦᠭᠰᠢᠭᠦᠷᠢᠲᠡᠢ ᠪᠠᠢᠳᠠᠯ ᠡᠭᠦᠰᠬᠡᠪᠡᠯ᠂ ᠴᠡᠷᠢᠭ ᠨᠡᠩ ᠳᠠᠷᠤᠢ ᠬᠦᠷᠦᠯᠴᠡᠨ ᠢᠷᠡᠵᠦ ᠴᠢᠳᠠᠨᠠ ᠭᠡᠪᠡ᠃
— ᠶᠠᠭᠠᠬᠢᠬᠤ ᠪᠣᠢ? ᠦᠵᠡᠯᠴᠡᠬᠦ ᠤᠤ?
— ᠬᠡᠷᠬᠢᠬᠦ ᠨᠢ ᠡᠨᠡ ᠦᠳᠡᠰᠢ ᠮᠡᠳᠡᠭᠳᠡᠨᠡ᠃《ᠭᠠᠯᠵᠠᠭᠤᠴᠤᠳ》᠂《ᠳᠡᠢᠯᠦᠭᠳᠡᠰᠢᠭᠦᠢᠴᠦᠳ》 ᠬᠣᠶᠠᠷ ᠪᠡᠯᠡᠬᠡᠨ ᠪᠠᠢᠨᠠ᠁ ᠭᠡᠵᠡᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠶᠠᠨᠴᠡᠴᠡᠭ᠂ ᠠᠷᠢᠭᠤᠨ᠂ ᠠᠯᠲᠠᠨᠴᠢᠮᠡᠭ᠂ ᠬᠡᠷᠡᠢᠳ· ᠮᠥᠩᠬᠡᠨᠠᠰᠤᠨ
ᠬᠢᠨᠠᠭᠴᠢ᠄ ᠪᠠᠶᠠᠨᠴᠡᠴᠡᠭ᠂ ᠲ· ᠬᠦᠮᠦᠵᠢᠯᠲᠦ᠂ ᠠᠷᠢᠭᠤᠨ᠂ ᠠᠯᠲᠠᠨᠴᠢᠮᠡᠭ