ᠪᠠᠲᠤ ᠬᠠᠭᠠᠨ 2-10ᠢᠵᠢᠯ ᠮᠥᠷᠡᠨ ᠦ᠌ ᠡᠷᠭᠢ ᠳᠡᠭᠡᠷᠡ-ᠪᠠᠲᠤ ᠬᠠᠭᠠᠨ ᠥᠷᠥᠨᠡ ᠵᠦᠭ ᠲᠦ᠍ ᠬᠥᠳᠡᠯᠦᠯᠡ-Bat khaan Бат хаан-ᠷᠣᠮᠠᠨ
112ᠠᠷᠪᠠ ᠢᠵᠢᠯ ᠮᠥᠷᠡᠨ ᠦ᠌ ᠡᠷᠭᠢ ᠳᠡᠭᠡᠷᠡ
ᠴᠠᠭ ᠪᠣᠯᠵᠤ ᠠᠭᠤᠷᠲᠤ ᠲᠠᠲ᠋ᠠᠷ᠂ ᠬᠠᠮᠠᠭᠠᠯᠠᠭᠴᠢ ᠠᠵᠢᠯ ᠤ᠋ᠨ ᠬᠢᠵᠠᠭᠠᠷ ᠢ᠋ ᠳᠠᠪᠠᠪᠠ
(ᠣᠷᠸᠰᠲ ᠮᠢᠯᠯᠸᠷ)
ᠰᠢᠭᠨᠡᠺ ᠡᠴᠡ ᠬᠠᠪᠤᠷ ᠡᠷᠲᠡ ᠭᠠᠷᠤᠭᠰᠠᠨ ᠮᠣᠩᠭᠣᠯ ᠴᠡᠷᠢᠭ ᠢᠵᠢᠯ ᠮᠥᠷᠡᠨ ᠦ᠌ ᠬᠥᠪᠡᠭᠡᠨ ᠳ᠋ᠦ᠍ ᠨᠠᠮᠤᠷ ᠣᠷᠣᠢ ᠬᠦᠷᠪᠡ᠃ ᠣᠷᠣᠰ᠂ ᠪᠣᠯᠭᠠᠷᠢ ᠵᠡᠷᠭᠡ ᠪᠤᠰᠤᠳ ᠡᠵᠡᠯᠡᠭᠳᠡᠭᠡ ᠦᠭᠡᠢ ᠤᠯᠤᠰ ᠤ᠋ᠨ ᠨᠤᠲᠤᠭ ᠤ᠋ᠨ ᠠᠩᠬᠠᠨ ᠤ᠋ ᠬᠢᠵᠠᠭᠠᠷ ᠭᠠᠵᠠᠷ ᠬᠦᠷᠲᠡᠯᠡ ᠬᠥᠳᠡᠭᠡ ᠲᠠᠯᠠ ᠪᠠᠷ ᠠᠶᠠᠯᠠᠬᠤ ᠳ᠋ᠤ᠌ ᠬᠠᠭᠠᠰ ᠵᠢᠯ ᠪᠣᠯᠤᠯᠠ᠃ ᠪᠠᠲᠤ ᠬᠠᠭᠠᠨ᠂ ᠮᠥᠨ ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ《ᠲᠡᠭᠦᠨ ᠦ᠌ ᠳᠥᠷᠥᠭᠡ ᠶ᠋ᠢ ᠲᠦᠰᠢᠵᠦ》ᠢᠵᠢᠯ ᠮᠥᠷᠡᠨ ᠦ᠌ ᠡᠷᠭᠢᠨ ᠳᠡᠭᠡᠷᠡ《ᠳᠠᠪᠠᠭᠳᠠᠰᠢ ᠦᠭᠡᠢ 》ᠲᠡᠷᠢᠭᠦᠨ ᠦ᠌ ᠮᠢᠩᠭᠠᠲᠤ ᠶ᠋ᠢ ᠲᠣᠯᠣᠭᠠᠢᠯᠠᠵᠤ ᠢᠷᠡᠬᠦ ᠳ᠋ᠦ᠍ ᠵᠤᠵᠠᠭᠠᠨ ᠲᠣᠭᠣᠰᠣᠨ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠮᠣᠷᠢᠲᠠᠨ᠂ ᠡᠮᠬᠢ ᠵᠢᠷᠤᠮ ᠢ᠋ᠶ᠋ᠠᠨ ᠮᠠᠷᠲᠠᠵᠤ᠂ ᠦᠯᠡᠮᠵᠢ ᠶᠡᠬᠡ ᠤᠰᠤ ᠶ᠋ᠢ ᠰᠠᠭᠠᠷ ᠦᠭᠡᠢ ᠤᠷᠤᠰᠬᠠᠬᠤ ᠰᠦᠷᠯᠢᠭ ᠬᠦᠴᠦᠲᠦ ᠮᠥᠷᠡᠨ ᠢ᠋ ᠭᠠᠢᠬᠠᠵᠤ᠂ ᠬᠥᠪᠡᠭᠡᠨ ᠳᠡᠭᠡᠷᠡᠬᠢ ᠡᠯᠡᠰᠦᠨ ᠬᠥᠲᠥᠯ ᠳᠡᠭᠡᠭᠦᠷ ᠰᠢᠪᠠᠷᠠᠯᠳᠤᠵᠠᠢ᠃ ᠬᠡᠷᠪᠡ ᠡᠭᠦᠨ ᠢ᠋ ᠬᠠᠭᠠᠬᠤ ᠶᠤᠮ ᠪᠣᠯ ᠤᠰᠤ ᠨᠢᠭᠡᠨ ᠡᠳᠦᠷ ᠦ᠋ᠨ ᠳᠣᠲᠣᠷᠠ ᠲᠡᠭᠷᠢ ᠳ᠋ᠦ᠍ ᠬᠦᠷᠬᠦ ᠪᠢᠵᠡ ᠭᠡᠵᠦ ᠮᠣᠩᠭᠣᠯᠴᠤᠳ ᠶᠠᠷᠢᠯᠴᠠᠪᠠ᠃ ᠤᠰᠤ ᠤᠷᠤᠭᠤ ᠲᠡᠮᠡᠦᠯᠵᠡᠭᠡᠬᠦ ᠬᠥᠯᠥᠰᠥ ᠲᠡᠢ ᠮᠣᠷᠢᠳ ᠢ᠋ᠶ᠋ᠠᠨ ᠠᠷᠠᠢᠬᠠᠨ ᠲᠣᠭᠲᠠᠭᠠᠨ ᠪᠠᠷᠢᠵᠤ ᠲᠡᠳᠡᠭᠡᠷ ᠳᠠᠢᠴᠢᠳ ᠳᠣᠪᠣ ᠳᠡᠭᠡᠷᠡ ᠪᠠᠢᠵᠠᠭᠠᠵᠤ ᠪᠠᠢᠯᠠ᠃
—ᠡᠨᠡ ᠪᠣᠯ ᠭᠠᠷᠠᠮ ᠢ᠋ᠶ᠋ᠠᠷ ᠭᠠᠲᠤᠯᠳᠠᠭ ᠮᠠᠨ ᠤ᠋ ᠭᠦᠨ ᠤᠰᠤᠲᠤ ᠬᠡᠷᠦᠯᠦᠨ᠂ ᠠᠯᠲᠠᠨ ᠤᠨᠤᠨ ᠬᠣᠶᠠᠷ ᠲᠠᠢ ᠠᠳᠠᠯᠢ ᠤᠰᠤ ᠣᠭᠲᠣ ᠪᠢᠰᠢ᠃
ᠡᠨᠡ ᠤᠰᠤ ᠶ᠋ᠢ ᠰᠡᠯᠢᠵᠦ ᠭᠠᠷᠬᠤ ᠪᠠᠷ ᠣᠷᠣᠯᠳᠣᠭᠠᠳ ᠦᠵᠡᠭᠲᠦᠨ᠃
— ᠬᠡᠷᠪᠡ ᠰᠠᠨᠠᠭᠰᠠᠨ ᠢ᠋ᠶ᠋ᠠᠨ ᠲᠠᠯᠪᠢᠳᠠᠭ ᠦᠭᠡᠢ ᠰᠦᠪᠡᠭᠡᠳᠡᠢ ᠬᠠᠭᠠᠰ ᠴᠡᠷᠢᠭ ᠢ᠋ᠶ᠋ᠡᠨ ᠵᠢᠪᠪᠦᠭᠦᠯᠵᠦ ᠠᠯᠠᠬᠤ ᠠ᠋ᠴᠠ ᠪᠤᠴᠠᠬᠤ ᠦᠭᠡᠢ᠂ ᠡᠨᠡ ᠤᠰᠤ ᠶ᠋ᠢ ᠭᠠᠲᠤᠯᠬᠤ ᠪᠠᠷ ᠰᠢᠢᠳᠪᠦᠷᠢᠯᠡᠭᠰᠡᠨ ᠪᠣᠯ ᠪᠢᠳᠡᠨ ᠢ᠋ ᠰᠡᠯᠢᠵᠦ ᠭᠠᠷᠬᠤ ᠳ᠋ᠤ᠌ ᠬᠦᠷᠭᠡᠬᠦ ᠪᠢᠵᠡ ? ᠭᠡᠵᠦ ᠶᠠᠷᠢᠯᠴᠠᠵᠠᠭᠠᠵᠤ ᠪᠠᠢᠪᠠ᠃ ᠲᠣᠭᠣᠰᠣᠨ ᠳ᠋ᠤ᠌ ᠳᠠᠷᠤᠭᠳᠠᠵᠤ ᠪᠣᠷᠣᠯᠠᠭᠰᠠᠨ ᠴᠠᠭᠠᠨ ᠠᠵᠢᠷᠭᠠ ᠪᠠᠨ ᠤᠨᠤᠵᠤ ᠠᠷᠠᠰᠤᠨ ᠮᠠᠯᠠᠭᠠᠢ ᠪᠠᠨ ᠡᠮᠦᠰᠦᠭᠡᠳ ᠨᠥᠮᠥᠷᠭᠡ ᠴᠤᠪᠠ ᠳᠠᠪᠬᠤᠴᠠᠭᠰᠠᠨ ᠪᠠᠲᠤ ᠬᠠᠭᠠᠨ ᠭᠣᠣᠯ ᠤ᠋ᠨ ᠡᠷᠭᠢ ᠳ᠋ᠦ᠍ ᠬᠦᠷᠴᠦ ᠢᠷᠡᠯᠡ᠃ ᠲᠠᠢᠪᠤᠩ ᠦᠭᠡᠢ ᠪᠠᠢᠭᠠ ᠪᠤᠭᠤᠷᠤᠯ ᠳᠣᠯᠭᠢᠰ ᠡᠯᠡᠰᠦᠨ ᠳᠡᠭᠡᠷᠡ ᠬᠠᠶᠠᠭᠳᠠᠨ᠂ ᠴᠡᠴᠡᠷᠭᠡᠨᠡᠭᠰᠡᠨ ᠬᠥᠭᠡᠰᠦ ᠪᠡᠨ ᠰᠠᠯᠬᠢᠨᠠ ᠲᠤᠷᠭᠢᠯᠠᠨ ᠂ ᠲᠤᠩ ᠬᠣᠷᠣᠬᠠᠢ ᠶ᠋ᠢᠨ ᠪᠥᠨᠲᠥᠭᠡᠷ ᠲᠣᠮᠣ ᠬᠠᠯᠢᠰᠤ ᠨᠤᠭᠤᠳ ᠢ᠋ ᠰᠢᠳᠡᠯᠡᠨ ᠪᠠᠢᠵᠠᠢ᠃
— ᠮᠠᠨ ᠤ᠋ ᠮᠣᠩᠭᠣᠯ ᠤ᠋ᠨ ᠲᠠᠯᠠ ᠡᠨᠳᠡ ᠳᠠᠭᠤᠰᠬᠤ ᠪᠠᠢᠵᠠᠢ᠃ ᠭᠣᠣᠯ ᠤ᠋ᠨ ᠲᠡᠷᠲᠡᠭᠡ ᠣᠭᠲᠣ ᠥᠭᠡᠷᠡ ᠪᠣᠯᠬᠤ ᠤᠴᠢᠷ ᠠ᠋ᠴᠠ ᠲᠡᠨᠳᠡ ᠮᠠᠨ ᠤ᠋ ᠠᠯᠳᠠᠷ ᠭᠢᠯᠠᠰᠬᠢᠬᠦ ᠪᠣᠯᠤᠨᠠ ᠭᠡᠵᠦ ᠳᠥᠩᠭᠡᠵᠢ ᠰᠠᠶᠢ ᠬᠦᠷᠴᠦ ᠢᠷᠡᠵᠦ ᠪᠠᠢᠭᠠ ᠰᠥᠪᠡᠭᠡᠳᠡᠢ ᠳ᠋ᠦ᠍ ᠬᠡᠯᠡᠨᠡ᠃ ᠭᠣᠣᠯ ᠤ᠋ᠨ ᠨᠥᠭᠦᠭᠡ ᠡᠷᠭᠢ ᠳ᠋ᠦ᠍ ᠪᠠᠢᠭᠠ ᠳᠣᠪᠣ ᠭᠦᠳᠦᠭᠦᠷ ᠦ᠋ᠳ ᠢ᠋ᠶ᠋ᠡᠷ ᠬᠡᠳᠦᠢᠨᠡᠢ ᠠᠯᠲᠠᠨ ᠨᠠᠮᠤᠷ ᠢ᠋ᠶ᠋ᠠᠷ ᠲᠠᠮᠠᠭᠠᠯᠠᠭᠳᠠᠭᠰᠠᠨ ᠣᠢ ᠮᠣᠳᠣ ᠪᠤᠷᠵᠠᠢᠨ ᠦᠵᠡᠭᠳᠡᠭᠡᠳ ᠳᠣᠪᠣ ᠳᠡᠭᠡᠷᠡ ᠮᠠᠨᠠᠭᠠᠨ ᠤ᠋ ᠬᠣᠶᠠᠷ ᠮᠣᠳᠣᠨ ᠴᠠᠢᠵᠠ ᠥᠨᠳᠥᠷᠯᠡᠨ ᠦᠵᠡᠭᠳᠡᠵᠦ ᠪᠠᠢᠯᠠ᠃ ᠡᠯᠡᠰᠦ ᠬᠠᠢᠷᠭᠤ ᠪᠣᠯᠤᠭᠰᠠᠨ ᠤᠷᠲᠤ ᠨᠠᠯᠠᠤ ᠡᠷᠭᠢ ᠨᠦ᠍ᠭᠦᠳ ᠨᠣᠭᠣᠭᠠᠨ ᠡᠷᠭᠢ ᠡᠴᠡ ᠪᠡᠨ ᠢᠯᠭᠠᠷᠠᠵᠤ ᠰᠢᠷᠠᠯᠠᠨ ᠬᠠᠷᠠᠭᠳᠠᠵᠤ ᠪᠠᠢᠯᠠ᠃ ᠭᠠᠯᠠᠭᠤ ᠨᠤᠭᠤᠰᠤ ᠪᠣᠯᠤᠨ ᠪᠠᠰᠠ ᠪᠤᠰᠤ ᠰᠢᠪᠠᠭᠤᠳ ᠰᠦᠷᠦᠭ ᠰᠦᠷᠦᠭ ᠢ᠋ᠶ᠋ᠡᠷ ᠦᠵᠡᠭᠳᠡᠵᠦ ᠪᠠᠢᠯᠠ᠃ ᠮᠥᠨ ᠲᠡᠨᠳᠡ ᠰᠦᠷᠡᠬᠡᠢ ᠬᠠᠳᠠ ᠬᠠᠯᠢᠯ ᠪᠣᠯᠤᠭᠰᠠᠨ ᠨᠢᠭᠡᠨ ᠪᠤᠭᠤᠷᠤᠯ ᠠᠭᠤᠯᠠ ᠭᠠᠭᠴᠠᠭᠠᠷ ᠬᠠᠷᠠᠭᠳᠠᠨ ᠴᠠᠰᠢ ᠭᠦᠨ ᠣᠢ ᠵᠠᠯᠭᠠᠵᠠᠢ᠃ ᠠᠭᠤᠯᠠ ᠳᠡᠭᠡᠷᠡ ᠬᠣᠭᠣᠷᠣᠨᠳᠣ ᠪᠠᠨ ᠬᠠᠴᠢᠨ ᠵᠢᠭᠲᠡᠢ ᠴᠠᠭᠠᠨ ᠴᠠᠭᠠᠨ ᠪᠠᠭᠠᠨᠠ ᠲᠠᠢ ᠲᠣᠮᠣ ᠨᠦᠬᠡ ᠨᠦ᠍ᠭᠦᠳ ᠪᠠᠷᠠᠭᠠᠯᠠᠨ ᠦᠵᠡᠭᠳᠡᠨᠡ᠃ ᠡᠷᠭᠢᠨ ᠳᠡᠭᠡᠭᠦᠷ ᠬᠡᠳᠦᠨ ᠦᠬᠡᠷ ᠵᠠᠯᠬᠠᠭᠤ ᠬᠦᠷᠦᠮᠡ ᠰᠠᠵᠢᠯᠠᠨ ᠶᠠᠪᠤᠲᠠᠯᠠ ᠠᠭᠤᠯᠠ ᠠ᠋ᠴᠠ ᠬᠣᠶᠠᠷ ᠪᠦᠰᠡᠭᠦᠢ ᠭᠦᠶᠦᠨ ᠢᠷᠡᠵᠦ ᠮᠣᠳᠣᠨ ᠤ᠋ ᠮᠥᠴᠢᠷ ᠢ᠋ᠶ᠋ᠡᠷ ᠰᠢᠪᠬᠠᠷᠳᠠᠨ ᠣᠢ ᠤᠷᠤᠭᠤ ᠬᠥᠭᠡᠭᠡᠨ ᠣᠳᠤᠯᠠ᠃
— ᠮᠠᠨ ᠤ᠋ ᠬᠣᠭᠣᠯᠠ ᠪᠢᠳᠡᠨ ᠡᠴᠡ ᠵᠠᠢᠯᠠᠬᠤ ᠨᠢ ᠡᠨᠡ ᠳ᠋ᠠ ᠭᠡᠵᠦ ᠮᠣᠩᠭᠣᠯ ᠴᠡᠷᠢᠭ ᠦ᠋ᠨ ᠡᠷᠡ ᠬᠡᠯᠡᠯᠡ᠃ ᠠᠭᠤᠯᠠ ᠶ᠋ᠢᠨ ᠭᠤᠨᠢᠭᠲᠤ ᠣᠷᠣᠢ ᠪᠠᠷ ᠬᠥᠮᠦᠰ ᠪᠤᠵᠢᠭᠢᠨᠠᠬᠤ ᠨᠢ ᠠᠷᠠᠢᠬᠠᠨ ᠦᠵᠡᠭᠳᠡᠬᠦ ᠲᠡᠳᠦᠢ ᠪᠥᠭᠡᠳ ᠰᠢᠷᠭᠤᠯᠵᠢ ᠮᠡᠲᠦ ᠰᠠᠨᠠᠭᠳᠠᠨᠠ᠃ ᠰᠦᠷᠦᠭ ᠴᠠᠭᠠᠨ ᠴᠠᠬᠤᠯᠠᠢ ᠨᠢᠰᠦᠨ ᠭᠣᠣᠯ ᠳᠡᠭᠡᠭᠦᠷ ᠡᠷᠭᠢᠯᠳᠦᠵᠦ ᠤᠰᠤ ᠤᠷᠤᠭᠤ ᠪᠠᠭᠤᠭᠠᠳ ᠬᠥᠪᠬᠦ ᠭᠤᠸᠠᠯᠢᠩ ᠳᠡᠭᠡᠷᠡ ᠰᠠᠭᠤᠨ ᠬᠡᠷᠡᠭᠦᠯᠳᠡᠨ ᠴᠢᠷᠠᠯᠠᠨ ᠨᠢᠰᠬᠦ ᠵᠡᠷᠭᠡ ᠪᠡᠷ ᠳᠠᠬᠢᠨ ᠪᠠᠭᠤᠵᠤ ᠰᠠᠭᠤᠯᠠ᠃
—ᠡᠨᠡ ᠭᠤᠸᠠᠯᠢᠩ ᠪᠢᠰᠢᠭᠦᠢ ᠬᠥᠪᠴᠦ ᠶᠠᠪᠤᠨᠠ᠂ ᠦᠵᠡᠭᠲᠦᠨ!ᠠᠯᠠᠭᠳᠠᠭᠰᠠᠨ ᠪᠣᠯᠭᠠᠷᠢ ᠤ᠋ᠳ ᠪᠣᠯᠬᠤ ᠠ᠋ᠴᠠ ᠵᠠᠢᠯᠠᠬᠤ ᠦᠭᠡᠢ ᠪᠢᠵᠡ ?ᠱᠸᠢ᠍ᠢᠪᠠᠨᠢ ᠬᠠᠭᠠᠨ ᠤ᠋ ᠲᠥᠬᠥᠭᠡᠷᠦᠭᠰᠡᠨ ᠵᠦᠢᠯ ᠪᠣᠯᠬᠤ ᠠ᠋ᠴᠠ ᠵᠠᠢᠯᠠᠬᠤ ᠦᠭᠡᠢ ᠨᠢ᠂ ᠲᠡᠷᠡ ᠪᠣᠯᠭᠠᠷᠢ᠂ ᠮᠣᠩᠭᠣᠯ ᠤ᠋ᠨ ᠶᠣᠰᠣ ᠶ᠋ᠢ ᠳᠡᠯᠭᠡᠷᠡᠭᠦᠯᠵᠦ ᠪᠠᠢᠭᠠ ᠪᠣᠯᠤᠯᠲᠠᠢ ᠭᠡᠵᠦ ᠶᠠᠷᠢᠵᠠᠭᠠᠵᠤ ᠪᠠᠢᠪᠠ᠃ ᠬᠥᠮᠦᠨ ᠦ᠌ ᠬᠡᠭᠦᠷ ᠣᠯᠠᠨ ᠢ᠋ᠶ᠋ᠠᠷ ᠬᠥᠪᠴᠦ ᠪᠠᠢᠭᠰᠠᠭᠠᠷ᠂ ᠨᠢᠭᠡᠨ ᠭᠢᠯᠵᠢᠢᠭᠰᠡᠨ ᠬᠥᠬᠡ ᠴᠢᠷᠠᠢ ᠲᠠᠢ ᠬᠥᠭᠡᠭᠡᠵᠦ ᠲᠣᠮᠣᠷᠠᠭᠰᠠᠨ ᠬᠡᠭᠦᠷ ᠰᠠᠯᠬᠢ ᠤᠰᠤᠨ ᠤ᠋ ᠳᠡᠪᠠᠯᠭᠠᠨᠠ ᠬᠦᠪᠡᠭᠡᠭᠳᠡᠵᠦ ᠡᠷᠭᠢ ᠶ᠋ᠢᠨ ᠵᠦᠭ ᠠᠯᠭᠤᠷ ᠬᠥᠪᠴᠦ ᠶᠠᠪᠤᠭᠰᠠᠭᠠᠷ ᠭᠦᠶᠦᠬᠡᠨ ᠭᠠᠵᠠᠷ ᠢᠷᠡᠵᠦ ᠭᠠᠵᠠᠷᠳᠠᠨ ᠵᠣᠭᠰᠣᠪᠠ᠃ ᠭᠤᠷᠪᠠ ᠬᠣᠨᠣᠭ ᠪᠠᠭᠤᠳᠠᠯᠯᠠᠨᠠ ᠭᠡᠵᠦ ᠴᠡᠷᠢᠭ ᠦ᠋ᠳ ᠲᠦ᠍ ᠵᠠᠷᠯᠠᠭᠰᠠᠨ ᠲᠤᠯᠠ ᠬᠥᠨᠳᠡᠢ ᠳ᠋ᠦ᠍ ᠭᠠᠵᠠᠷ ᠪᠦᠬᠦᠨ ᠲᠦᠳᠡᠭ ᠦ᠋ᠨ ᠤᠲᠤᠭᠠ ᠮᠠᠨᠠᠷᠠᠨ ᠡᠬᠢᠯᠡᠯᠡ᠃
ᠳᠠᠷᠠᠭᠠ ᠡᠳᠦᠷ ᠵᠠᠭᠤᠨ ᠤ᠋ ᠳᠠᠷᠤᠭᠠ ᠠᠷᠠᠫᠱᠠ ᠮᠦᠰᠥ᠋ᠺ ᠲᠦ᠍ ᠬᠡᠯᠡᠭᠰᠡᠨ ᠨᠢ᠄
— ᠮᠢᠩᠭᠠᠨ ᠤ᠋ ᠵᠠᠬᠢᠷᠤᠯ ᠺᠦᠨᠳ᠋ᠵᠢ ᠶ᠋ᠢᠨ ᠲᠤᠰᠢᠶᠠᠯ ᠢ᠋ᠶ᠋ᠠᠷ ᠴᠢᠮᠠᠲᠤ ᠴᠢᠬᠤᠯᠠ ᠨᠢᠭᠡ ᠵᠦᠢᠯ ᠢ᠋ ᠳᠠᠭᠠᠭᠠᠯᠭᠠᠨᠠ᠃ ᠡᠷᠭᠢ ᠪᠡᠷ ᠣᠷᠣᠰᠢᠭᠴᠢᠳ ᠠ᠋ᠴᠠ ᠨᠢᠭᠡ ᠬᠥᠮᠦᠨ ᠢ᠋ ᠪᠠᠷᠢᠵᠤ ᠠᠪᠴᠢᠷᠠᠬᠤ ᠬᠡᠷᠡᠭᠲᠡᠢ᠃ ᠡᠨᠳᠡ ᠣᠯᠠᠨ ᠬᠥᠮᠦᠨ ᠵᠢᠭᠠᠰᠤ ᠠᠩᠨᠠᠵᠤ ᠲᠠᠷᠢᠶᠠ ᠲᠠᠷᠢᠳᠠᠭ ᠪᠣᠯᠬᠤ ᠶ᠋ᠢᠨ ᠳᠡᠭᠡᠷᠡ ᠤᠰᠤᠨ ᠤ᠋ ᠡᠷᠭᠢᠨ ᠳ᠋ᠦ᠍ ᠲᠣᠣᠷ ᠲᠠᠯᠪᠢᠭᠰᠠᠨ ᠪᠠᠢᠬᠤ ᠪᠠᠷ ᠦᠵᠡᠪᠡᠯ ᠬᠥᠮᠦᠨ ᠪᠠᠢᠬᠤ ᠨᠢ ᠮᠠᠭᠠᠳ ᠪᠣᠯᠤᠨᠠ᠃ ᠲᠡᠷᠲᠡᠭᠡ ᠡᠷᠭᠢᠨ ᠳᠡᠭᠡᠷᠡ ᠪᠠᠢᠭᠠ ᠨᠠᠷᠢᠨ ᠬᠠᠷᠠ ᠵᠠᠪᠢ ᠨᠤᠭᠤᠳ ᠢ᠋ ᠬᠠᠷᠠ᠂ ᠡᠨᠳᠡ ᠡᠴᠡ ᠪᠡᠨ ᠭᠣᠣᠯ ᠢ᠋ ᠥᠭᠰᠥᠵᠦ ᠶᠠᠪᠤᠭᠠᠳ ᠡᠷᠭᠢᠨ ᠳᠡᠭᠡᠷᠡ ᠭᠠᠷᠤᠭᠰᠠᠨ ᠵᠢᠭᠠᠰᠤᠴᠢᠨ ᠢ᠋ ᠪᠠᠷᠢᠭᠲᠤᠨ᠂ ᠪᠢ ᠴᠢᠮᠠᠲᠤ ᠨᠦᠬᠦᠷᠯᠡᠭᠴᠢᠳ ᠡᠴᠡ ᠪᠡᠨ ᠲᠤᠰᠠᠯᠠᠭᠤᠯᠤᠨᠠ ᠭᠡᠵᠡᠢ᠃
ᠮᠦᠰᠥ᠋ᠺ ᠲᠠᠪᠤᠨ ᠮᠣᠩᠭᠣᠯ ᠬᠥᠮᠦᠨ ᠦ᠌ ᠬᠠᠮᠲᠤ ᠭᠣᠣᠯ ᠠ᠋ᠴᠠ ᠵᠠᠢᠯᠠᠨ ᠳᠠᠷᠠᠰᠤ ᠲᠠᠢ ᠲᠠᠯᠠ ᠳ᠋ᠤ᠌ ᠭᠠᠷᠤᠮᠠᠭᠴᠠ ᠴᠤᠪᠤᠴᠠ ᠵᠠᠮ ᠢ᠋ ᠣᠯᠤᠭᠰᠠᠨ ᠪᠣᠯᠪᠠᠴᠤ ᠠᠷᠠᠢᠬᠠᠨ ᠨᠠᠮᠤᠭ ᠲᠤ᠌ ᠰᠢᠭᠢᠳᠦᠨ ᠦᠬᠦᠭᠰᠡᠨ ᠦᠭᠡᠢ᠂ ᠪᠡᠶᠡ ᠪᠡᠶᠡᠰ ᠢ᠋ ᠪᠤᠭᠤᠢᠯᠢ ᠪᠠᠷ ᠴᠢᠷᠦᠨ ᠭᠠᠷᠭᠠᠵᠤ᠂ ᠲᠡᠨᠳᠡ ᠡᠴᠡ ᠪᠡᠨ ᠳᠠᠬᠢᠨ ᠡᠷᠭᠢ ᠶ᠋ᠢᠨ ᠵᠦᠭ ᠣᠢᠷᠠᠲᠤᠵᠤ ᠮᠣᠷᠢᠳ ᠢ᠋ ᠬᠦᠲᠦᠯᠵᠡᠭᠡᠨ ᠨᠢᠭᠤᠭᠳᠠᠵᠤ ᠶᠠᠪᠤᠵᠠᠭᠠᠵᠠᠢ᠃ ᠵᠠᠪᠢ ᠬᠣᠶᠠᠷ ᠤᠳᠠᠭᠠ ᠡᠷᠭᠢᠨ ᠳ᠋ᠦ᠍ ᠣᠢᠷᠠᠲᠤᠵᠤ ᠦᠵᠡᠭᠳᠡᠭᠰᠡᠨ ᠦ᠌ ᠨᠢᠭᠡᠨ ᠳᠡᠭᠡᠷᠡ ᠤᠯᠠᠭᠠᠨ ᠡᠮᠵᠢᠶᠡᠷᠢ ᠲᠡᠢ ᠴᠠᠭᠠᠨ ᠬᠤᠪᠴᠠᠰᠤ ᠲᠠᠢ ᠬᠡᠦᠬᠡᠨ ᠬᠥᠮᠦᠨ᠂ ᠨᠥᠭᠦᠭᠡ ᠳᠡᠭᠡᠷᠡ ᠡᠪᠦᠭᠡᠨ ᠬᠦᠦ ᠬᠣᠶᠠᠷ ᠲᠤᠰ ᠲᠤᠰ ᠬᠦᠷᠵᠡ ᠮᠡᠲᠦ ᠪᠣᠭᠣᠨᠢ ᠰᠡᠯᠢᠭᠦᠷ ᠢ᠋ᠶ᠋ᠡᠷ ᠰᠡᠯᠢᠭᠦᠷᠳᠡᠨ ᠶᠠᠪᠤᠵᠤ ᠵᠠᠪᠢ ᠨᠢ ᠮᠠᠰᠢ ᠨᠠᠷᠢᠬᠠᠨ ᠪᠥᠭᠡᠳ ᠳᠣᠭᠰᠢᠷᠠᠨ ᠱᠠᠭᠢᠬᠤ ᠪᠤᠭᠤᠷᠤᠯ ᠳᠠᠪᠠᠯᠭᠠᠨ ᠳᠡᠭᠡᠷᠡ ᠲᠡᠭᠦᠨ ᠢ᠋ ᠬᠥᠮᠦᠷᠢᠭᠦᠯᠦᠯ ᠦᠭᠡᠢ ᠲᠣᠭᠲᠠᠭᠠᠬᠤ ᠳ᠋ᠤ᠌ ᠣᠨᠴᠣᠭᠣᠢ ᠡᠷᠳᠡᠮ ᠴᠢᠳᠠᠯ ᠬᠡᠷᠡᠭᠲᠡᠢ ᠶᠤᠮ ᠰᠢᠭ ᠰᠠᠨᠠᠭᠳᠠᠵᠠᠢ᠃ ᠮᠦᠰᠥ᠋ᠺ᠂ ᠬᠦᠦ ᠲᠡᠢ ᠡᠪᠦᠭᠡᠨ ᠢ᠋ ᠳᠡᠭᠡᠭᠡᠳᠡᠶᠡ ᠭᠡᠵᠦ ᠮᠣᠩᠭᠣᠯᠴᠤᠳ ᠲᠠᠢ ᠪᠠᠨ ᠪᠣᠯᠵᠣᠵᠤ ᠲᠡᠳᠡ ᠯᠠᠪ ᠪᠠᠭᠤᠳᠠᠯᠯᠠᠬᠤ ᠲᠣᠭᠲᠠᠮᠠᠯ ᠭᠠᠵᠠᠷ ᠲᠠᠢ ᠪᠠᠢᠬᠤ ᠭᠡᠵᠦ ᠶᠠᠷᠢᠯᠴᠠᠵᠠᠢ᠃ ᠨᠢᠭᠡᠨ ᠲᠠᠩᠨᠠᠭᠤᠯ ᠬᠥᠪᠡᠭᠡᠨ ᠦ᠌ ᠴᠠᠭᠠᠨᠠ ᠮᠣᠷᠢᠨ ᠳᠡᠭᠡᠷᠡ ᠪᠡᠨ ᠦᠯᠡᠳᠡᠵᠦ ᠪᠤᠰᠤᠳ ᠨᠢ ᠡᠷᠭᠢ ᠶ᠋ᠢᠨ ᠳᠠᠭᠠᠤ ᠪᠤᠲᠠ ᠶ᠋ᠢᠨ ᠠᠷᠤ ᠪᠠᠷ ᠨᠢᠭᠤᠭᠳᠠᠵᠤ ᠮᠦᠰᠥ᠋ᠺ ᠦ᠋ᠨ ᠳᠣᠬᠢᠶᠠ ᠶ᠋ᠢ ᠬᠦᠯᠢᠶᠡᠨ ᠶᠠᠪᠤᠵᠠᠭᠠᠪᠠ᠃
ᠡᠪᠦᠭᠡᠨ ᠦ᠌ ᠵᠠᠪᠢ ᠤᠷᠤᠰᠬᠠᠯ ᠰᠥᠷᠴᠦ ᠤᠳᠠᠭᠠᠨ ᠶᠠᠪᠤᠬᠤ ᠲᠤᠯᠠ ᠮᠦᠰᠥ᠋ᠺ ᠪᠣᠭᠣᠨᠢ ᠵᠢᠳᠠ ᠪᠠᠷᠢᠵᠤ ᠡᠷᠭᠢ ᠶ᠋ᠢᠨ ᠳᠠᠭᠠᠤ ᠮᠥᠨ ᠯᠡ ᠤᠳᠠᠲᠠᠯᠠ ᠮᠥᠯᠬᠥᠯᠡ᠃ ᠵᠠᠮ ᠳ᠋ᠤ᠌ ᠬᠣᠶᠠᠷ ᠭᠣᠣᠯ ᠲᠣᠬᠢᠶᠠᠯᠳᠤᠭᠰᠠᠨ ᠲᠤᠯᠠ ᠬᠦᠵᠦᠭᠦᠦ ᠪᠡᠷ ᠲᠠᠲᠠᠮᠠ ᠤᠰᠤ ᠲᠤᠭᠤᠯᠵᠤ ᠳᠣᠷᠣᠢ ᠲᠠᠢ ᠵᠡᠷᠯᠢᠭ ᠭᠠᠬᠠᠢ ᠶ᠋ᠢ ᠦᠷᠭᠦᠭᠡᠯᠡ᠃ ᠮᠦᠰᠥ᠋ᠺ᠂ ᠡᠪᠦᠭᠡᠨ ᠢ᠋ ᠬᠡᠳᠦ ᠬᠡᠳᠦᠨ ᠤᠳᠠᠭᠠ ᠬᠠᠷᠠᠭᠠᠨ ᠠ᠋ᠴᠠ ᠠᠯᠳᠠᠵᠤ ᠶᠠᠪᠤᠭᠰᠠᠭᠠᠷ ᠰᠡᠭᠦᠯ ᠳ᠋ᠡᠭᠡᠨ ᠲᠡᠷᠡ ᠵᠠᠪᠢ ᠡᠷᠭᠢ ᠡᠴᠡ ᠬᠣᠯᠠᠳᠠᠵᠤ ᠭᠣᠣᠯ ᠤ᠋ᠨ ᠳᠤᠮᠳᠠ ᠪᠠᠢᠭᠠ ᠠᠷᠠᠯ ᠤ᠋ᠨ ᠴᠢᠭ ᠲᠦ᠍ ᠶᠠᠪᠤᠵᠠᠢ᠃ ᠲᠡᠨᠳᠡ ᠡᠪᠦᠭᠡᠨ ᠵᠡᠭᠡᠰᠦᠨ ᠦ᠌ ᠳᠣᠲᠣᠷᠠ ᠤᠳᠠᠭᠠᠨ ᠢ᠋ᠶ᠋ᠠᠷ ᠠᠵᠢᠯᠯᠠᠵᠤ ᠲᠣᠣᠷ ᠢ᠋ ᠰᠠᠯᠭᠠᠨ ᠪᠠᠢᠭᠰᠠᠨ ᠵᠢᠭᠠᠰᠤ ᠶ᠋ᠢ ᠵᠠᠪᠢ ᠤᠷᠤᠭᠤ ᠬᠠᠶᠠᠯᠠᠵᠤ ᠪᠠᠢᠯᠠ᠃ ᠮᠦᠰᠥ᠋ᠺ ᠨᠡᠪᠲᠡ ᠨᠣᠷᠴᠤ ᠡᠯᠡᠰᠦᠨ ᠳᠡᠭᠡᠷᠡ ᠬᠡᠪᠲᠡᠨ ᠬᠦᠯᠢᠶᠡᠲᠡᠯᠡ ᠵᠠᠪᠢ ᠳᠠᠬᠢᠨ ᠡᠷᠭᠢ ᠶ᠋ᠢᠨ ᠵᠦᠭ ᠬᠥᠪᠴᠦ ᠤᠷᠤᠰᠬᠠᠯ ᠤ᠋ᠨ ᠳᠠᠭᠠᠤ ᠶᠠᠪᠤᠯᠠ᠃ ᠣᠳᠣ ᠬᠤᠷᠳᠤᠨ ᠶᠠᠪᠤᠬᠤ ᠲᠤᠯᠠ ᠲᠦᠳᠡ ᠦᠵᠡᠭᠳᠡᠬᠦ ᠦᠭᠡᠢ ᠪᠣᠯᠪᠠ᠃ ᠮᠦᠰᠥ᠋ᠺ ᠳᠠᠬᠢᠨ ᠥᠨᠥ ᠬᠣᠶᠠᠷ ᠨᠠᠮᠤᠭ ᠲᠠᠢ ᠭᠣᠣᠯ ᠢ᠋ ᠲᠤᠭᠤᠯᠵᠤ ᠡᠷᠭᠢᠨ ᠳᠡᠭᠡᠷᠡ ᠭᠠᠷᠲᠠᠯᠠ ᠲᠤᠩ ᠣᠢᠷᠠᠬᠠᠨ ᠬᠥᠮᠦᠨ ᠦ᠌ ᠳᠠᠭᠤᠨ ᠰᠣᠨᠣᠰᠳᠠᠭᠠᠳ᠂ ᠮᠡᠳᠡᠭᠳᠡᠬᠦ ᠦᠭᠡᠢ ᠶ᠋ᠢᠨ ᠲᠤᠯᠠᠳᠠ ᠴᠢᠳᠠᠬᠤ ᠴᠢᠨᠡᠭᠡ ᠪᠡᠷ ᠰᠡᠮᠬᠡᠨ ᠮᠥᠯᠬᠥᠯᠡ᠃ ᠲᠡᠭᠡᠵᠦ ᠶᠠᠪᠤᠭᠰᠠᠭᠠᠷ ᠠᠷᠠᠢᠬᠠᠨ ᠵᠡᠭᠡᠰᠦ ᠶ᠋ᠢᠨ ᠡᠰᠢ ᠳᠤᠮᠳᠠᠭᠤᠷ ᠱᠠᠭᠠᠢᠵᠤ ᠬᠠᠷᠠᠪᠠᠯ ᠪᠢᠴᠢᠬᠠᠨ ᠪᠤᠯᠤᠩ ᠪᠠᠢᠬᠤ ᠪᠥᠭᠡᠳ ᠬᠠᠷᠠ ᠵᠠᠪᠢ ᠶ᠋ᠢ ᠬᠢᠲᠦᠭᠡ ᠪᠡᠷ ᠡᠯᠡᠰᠦ ᠲᠡᠢ ᠡᠷᠭᠢ ᠥᠭᠡᠳᠡ ᠲᠡᠳᠡᠨ ᠲᠣᠷᠭᠣᠭᠠᠳ ᠡᠪᠦᠭᠡᠨ ᠬᠦᠦ ᠬᠣᠶᠠᠷ ᠲᠦᠳᠡᠭ ᠦ᠋ᠨ ᠳᠡᠷᠭᠡᠳᠡ ᠬᠡᠪᠲᠡᠵᠦ ᠪᠠᠢᠯᠠ᠃ ᠭᠠᠯ ᠳᠣᠲᠣᠷᠠ ᠬᠦ ᠲᠡᠢ ᠲᠣᠭᠣᠭᠠ ᠲᠠᠯᠪᠢᠭᠰᠠᠨ ᠨᠢ ᠲᠡᠭᠦᠨ ᠡᠴᠡ ᠵᠢᠭᠠᠰᠤᠨ ᠤ᠋ ᠰᠡᠭᠦᠯ ᠴᠤᠬᠤᠢᠨ ᠬᠠᠷᠠᠭᠳᠠᠭᠠᠳ ᠪᠤᠴᠠᠯᠤᠭᠰᠠᠨ ᠱᠥᠯᠥ ᠬᠥᠭᠡᠰᠦᠷᠡᠨ ᠬᠠᠯᠢᠵᠤ ᠪᠠᠢᠯᠠ᠃ ᠬᠥᠪᠡᠭᠦᠨ ᠭᠠᠯ ᠳ᠋ᠤ᠌ ᠬᠡᠳᠦᠨ ᠮᠥᠴᠢᠷ ᠢ᠋ ᠬᠠᠶᠠᠵᠤ ᠡᠪᠦᠭᠡᠨ ᠭᠠᠷ ᠢ᠋ᠶ᠋ᠠᠨ ᠳᠡᠷᠡᠯᠡᠨ ᠬᠡᠪᠲᠡᠬᠦ ᠲᠤᠯᠠ ᠪᠤᠭᠤᠷᠤᠯ ᠰᠠᠬᠠᠯ ᠨᠢ ᠥᠷᠪᠥᠢᠵᠦ ᠬᠠᠷᠠᠭᠳᠠᠪᠠ᠃ ᠲᠡᠷᠡ ᠨᠢ ᠤᠳᠠᠯ ᠦᠭᠡᠢ ᠨᠢᠳᠦ ᠪᠡᠨ ᠠᠨᠢᠵᠤ ᠬᠤᠷᠬᠢᠷᠠᠨ ᠤᠨᠲᠠᠭᠰᠠᠨ ᠲᠤᠯᠠ ᠨᠥᠬᠦᠭᠡᠰᠦᠲᠡᠢ ᠪᠥᠭᠡᠳ ᠡᠪᠦᠳᠦᠭ ᠬᠦᠷᠦᠭᠰᠡᠨ ᠵᠡᠪᠡᠬᠡᠢ ᠳᠠᠪᠤᠤ ᠴᠠᠮᠴᠠ ᠮᠥᠨ ᠡᠪᠦᠳᠦᠭ ᠨᠢ ᠴᠣᠭᠣᠷᠣᠭᠰᠠᠨ ᠥᠷᠭᠡᠨ ᠰᠠᠷᠢᠰᠤᠨ ᠥᠮᠥᠳᠥ᠂ ᠭᠣᠷᠭᠢ ᠲᠠᠢ ᠬᠠᠭᠤᠴᠢᠨ ᠰᠤᠷ ᠪᠦᠰᠡ᠂ ᠲᠡᠭᠦᠨ ᠳ᠋ᠦ᠍ ᠵᠡᠭᠦᠭᠰᠡᠨ ᠮᠣᠳᠣᠨ ᠬᠤᠢ ᠲᠠᠢ ᠬᠢᠲᠤᠭᠠ ᠴᠥᠮ ᠢᠯᠡᠬᠡᠨ ᠦᠵᠡᠭᠳᠡᠵᠦ ᠪᠠᠢᠯᠠ᠃ ᠭᠡᠨᠡᠳᠲᠡ ᠬᠦᠦ ᠰᠠᠨᠳᠤᠷᠤᠨ ᠡᠰᠢ ᠳᠠᠰᠢ ᠬᠠᠷᠠᠪᠠ᠃ ᠮᠦᠰᠦᠢ᠍ᠺ ᠵᠡᠭᠡᠰᠦ ᠬᠤᠭᠤ ᠳᠠᠭᠠᠷᠢᠵᠤ ᠤᠬᠤᠰᠬᠢᠨ ᠪᠣᠰᠤᠭᠠᠳ ᠡᠪᠦᠭᠡᠨ ᠦ᠌ ᠳᠡᠭᠡᠷᠡ ᠡᠴᠡ ᠪᠠᠭᠤᠲᠠᠯᠠ ᠬᠥᠪᠡᠭᠦᠨ ᠲᠣᠩᠭᠣᠷᠴᠠᠭᠯᠠᠨ ᠥᠩᠬᠥᠷᠢᠭᠰᠡᠭᠡᠷ ᠵᠠᠪᠢ ᠳ᠋ᠤ᠌ ᠬᠦᠷᠴᠦ ᠡᠷᠭᠢᠨ ᠡᠴᠡ ᠲᠦᠯᠬᠢᠨ ᠲᠡᠭᠦᠨ ᠳᠡᠭᠡᠷᠡ ᠭᠠᠪᠰᠢᠭᠠᠢ ᠪᠠᠷ ᠬᠠᠷᠠᠢᠨ ᠭᠠᠷᠤᠭᠠᠳ᠂ ᠡᠪᠦᠭᠡᠨ ᠠᠪᠤ ᠪᠠᠨ ᠨᠠᠰᠢ ᠪᠠᠨ ᠵᠠᠪᠢ ᠤᠷᠤᠭᠤ ᠪᠠᠨ ᠲᠦᠷᠭᠡᠨ ᠢᠷᠡᠭᠲᠦᠨ ᠭᠡᠵᠦ ᠬᠠᠰᠬᠢᠷᠪᠠ᠃ ᠮᠦᠰᠦᠢ᠍ᠺ ᠲᠤᠷᠠᠩᠬᠠᠢ ᠶᠠᠩᠭᠢᠷ ᠡᠪᠦᠭᠡᠨ ᠢ᠋ ᠳᠠᠪᠠᠬᠤ ᠳ᠋ᠤ᠌ ᠬᠢᠯᠪᠠᠷ ᠶᠤᠮᠰᠢᠭ᠋ ᠰᠠᠨᠠᠭᠳᠠᠭᠰᠠᠨ ᠲᠤᠯᠠ ᠬᠢᠲᠤᠭᠠ ᠤᠷᠤᠭᠤ ᠪᠠᠨ ᠰᠠᠷᠪᠠᠢᠭᠰᠠᠨ ᠭᠠᠷ ᠢ᠋ ᠨᠤᠭᠤᠯᠵᠤ ᠰᠤᠷ ᠢ᠋ᠶ᠋ᠠᠷ ᠬᠦᠯᠢᠬᠦ ᠶ᠋ᠢ ᠪᠣᠳᠣᠨ᠂ ᠳᠡᠭᠡᠷᠡ ᠡᠴᠡ ᠨᠢ ᠳᠠᠷᠤᠵᠤ ᠬᠡᠪᠲᠡᠪᠡ᠃ ᠭᠡᠲᠡᠯᠡ ᠡᠪᠦᠭᠡᠨ ᠮᠠᠰᠢ ᠲᠡᠩᠬᠡᠭᠡ ᠲᠡᠢ ᠪᠥᠭᠡᠳ ᠬᠠᠮᠤᠭ ᠴᠢᠳᠠᠯ ᠢ᠋ᠶ᠋ᠠᠷ ᠨᠣᠴᠣᠯᠳᠤᠨ ᠭᠠᠷ ᠢ᠋ᠶ᠋ᠠᠨ ᠰᠤᠭᠤ ᠲᠠᠲᠠᠮᠠᠭᠴᠠ ᠴᠢᠯᠠᠭᠤ ᠪᠠᠷ ᠮᠦᠰᠦᠢ᠍ᠺ ᠦ᠋ᠨ ᠨᠢᠳᠦᠨ ᠦ᠌ ᠲᠤᠰᠢᠶᠠ ᠴᠣᠬᠢᠯᠠ᠃ ᠲᠦᠳᠡᠭ ᠂ ᠵᠡᠭᠡᠰᠦ ᠂ ᠭᠣᠣᠯ ᠴᠥᠮ ᠲᠡᠷᠡᠬᠡᠨ ᠵᠠᠭᠤᠷᠠ ᠡᠷᠭᠢᠯᠳᠦᠵᠦ ᠮᠦᠰᠦᠢ᠍ᠺ《ᠬᠡᠯᠡ》 ᠶ᠋ᠢ ᠠᠮᠢᠳᠤ ᠪᠠᠷ ᠪᠠᠷᠢᠬᠤ ᠶ᠋ᠢ ᠪᠣᠳᠣᠨ ᠴᠠᠰᠢ ᠲᠡᠮᠡᠴᠡᠯᠳᠦᠪᠡ᠃ ᠡᠪᠦᠭᠡᠨ ᠵᠡᠷᠯᠢᠭ ᠠᠷᠢᠶᠠᠲᠠᠨ ᠰᠢᠭ᠋ ᠮᠦᠰᠦᠢ᠍ᠺ ᠦ᠋ᠨ ᠳᠤᠬᠤ ᠶ᠋ᠢ ᠬᠠᠵᠠᠨ ᠵᠣᠳᠣᠯᠳᠤᠵᠤ᠂《ᠮᠠᠭᠤᠬᠠᠢ ᠬᠠᠷᠠ ᠪᠣᠭᠣᠮᠠ᠂ ᠰᠢᠷᠠ ᠬᠣᠰᠢᠭᠤᠲᠤ ᠭᠥᠯᠥᠭᠡ ᠴᠢᠮᠠᠲᠤ ᠳᠠᠪᠠᠭᠳᠠᠬᠤ ᠪᠠᠢᠬᠤ 》ᠭᠡᠵᠦ ᠬᠠᠰᠬᠢᠷᠪᠠ᠃ ᠡᠪᠦᠭᠡᠨ ᠡᠷᠭᠢᠵᠦ ᠡᠪᠦᠳᠦᠭ ᠳᠡᠭᠡᠷᠡ ᠪᠣᠰᠬᠤ ᠭᠡᠬᠦ ᠳ᠋ᠦ᠍᠂ ᠮᠦᠰᠦᠢ᠍ᠺ ᠭᠠᠷ ᠢ᠋ ᠨᠢ ᠮᠤᠰᠬᠢᠵᠦ ᠳᠠᠷᠤᠭᠰᠠᠭᠠᠷ ᠪᠢᠯᠡ᠃ ᠲᠡᠳᠦᠢ ᠡᠪᠦᠭᠡᠨ ᠬᠦᠦ ᠳ᠋ᠡᠭᠡᠨ᠄《ᠺᠢᠷᠫᠠ! ᠪᠤᠤ ᠶᠠᠪᠤᠭᠲᠤᠨ᠂ ᠪᠢ ᠣᠳᠣ ᠡᠭᠦᠨ ᠢ᠋ ᠳᠠᠭᠤᠰᠬᠠᠴᠢᠬᠠᠬᠤ ᠨᠢ》ᠭᠡᠳ ᠮᠦᠰᠦᠢ᠍ᠺ ᠦ᠋ᠨ ᠭᠡᠳᠡᠰᠦ ᠤᠷᠤᠭᠤ ᠴᠢᠩᠭᠠ ᠴᠣᠬᠢᠬᠤ ᠳ᠋ᠤ᠌ ᠲᠡᠷᠡ ᠬᠠᠵᠠᠭᠤ ᠳᠠᠰᠢ ᠪᠠᠨ ᠣᠢᠴᠢᠵᠠᠢ᠃ᠮᠣᠩᠭᠣᠯᠴᠤᠳ ᠱᠤᠤᠭᠢᠶᠠᠨ ᠢ᠋ ᠰᠣᠨᠣᠰᠤᠨ ᠲᠡᠳᠡᠨ ᠦ᠌ ᠬᠣᠶᠠᠷ ᠨᠢ ᠡᠪᠦᠭᠡᠨ ᠮᠦᠰᠦᠢ᠍ᠺ ᠢ᠋ ᠵᠠᠢᠳᠠᠯᠠᠨ ᠰᠠᠭᠤᠵᠤ ᠬᠢᠲᠤᠭᠠ ᠪᠠᠨ ᠠᠪᠬᠤ ᠦᠶᠡ ᠳ᠋ᠦ᠍ ᠳᠠᠭᠠᠷᠢᠨ ᠬᠦᠷᠴᠦ ᠢᠷᠡᠵᠡᠢ᠃ ᠡᠪᠦᠭᠡᠨ᠂ ᠲᠠᠩᠨᠠᠭᠤᠯ ᠤ᠋ᠳ ᠲᠠᠢ ᠴᠢᠷᠠᠯᠠᠨ ᠨᠣᠴᠣᠯᠳᠤᠵᠤ ᠲᠡᠳᠡ ᠲᠡᠭᠦᠨ ᠢ᠋ ᠤᠨᠠᠭᠠᠵᠤ ᠭᠠᠷ ᠢ᠋ ᠰᠤᠷ ᠢ᠋ᠶ᠋ᠠᠷ ᠬᠦᠯᠢᠪᠡ᠃
ᠬᠠᠷᠠ ᠵᠠᠪᠢ ᠲᠠᠢ ᠬᠦᠦ ᠨᠠᠷᠠᠨ ᠣ ᠰᠠᠴᠤᠷᠠᠯ ᠢ᠋ᠶ᠋ᠠᠷ ᠨᠠᠭᠠᠳᠤᠨ ᠪᠠᠢᠭᠠ ᠭᠣᠣᠯ ᠤ᠋ᠨ ᠳᠤᠮᠳᠠ ᠤᠷᠤᠰᠬᠠᠯ ᠤ᠋ᠨ ᠳᠠᠭᠠᠤ ᠬᠤᠷᠳᠤᠨ ᠰᠡᠯᠢᠨ ᠳᠠᠯᠠᠢᠵᠠᠢ᠃
ᠮᠣᠩᠭᠣᠯᠴᠤᠳ ᠡᠪᠦᠭᠡᠨ ᠦ᠌ ᠠᠮᠠᠨ ᠳ᠋ᠤ᠌ ᠵᠡᠭᠡᠰᠦᠨ ᠦ᠌ ᠨᠠᠪᠴᠢ ᠴᠢᠬᠢᠵᠦ ᠨᠢᠭᠤᠷ ᠢ᠋ ᠨᠢ ᠪᠦᠰᠡ ᠪᠡᠷ ᠤᠶᠠᠪᠠ᠃ ᠳᠡᠭᠡᠷᠡ ᠡᠴᠡ ᠤᠷᠤᠰᠬᠠᠯ ᠤ᠋ᠨ ᠳᠠᠭᠠᠤ ᠪᠠᠰᠠ ᠨᠢᠭᠡ ᠲᠣᠮᠣ ᠵᠠᠪᠢ ᠬᠤᠷᠳᠤᠯᠠᠨ ᠢᠷᠡᠬᠦ ᠪᠥᠭᠡᠳ ᠳᠥᠷᠪᠡᠨ ᠰᠡᠯᠢᠭᠦᠷᠴᠢ ᠤᠷᠲᠤ ᠰᠡᠯᠢᠭᠦᠷ ᠢ᠋ᠶ᠋ᠡᠷ ᠤᠰᠤ ᠤᠷᠤᠭᠤ ᠴᠢᠩᠭᠠ ᠴᠣᠬᠢᠯᠠᠨᠠ᠃ ᠬᠢᠲᠦᠭᠡ ᠳᠡᠭᠡᠷᠡ ᠵᠠᠯᠠᠭᠤᠷ ᠢ᠋ ᠪᠠᠷᠢᠭᠰᠠᠨ ᠬᠥᠮᠦᠨ ᠨᠢ ᠠᠯᠲᠠᠨ ᠴᠡᠴᠡᠭ ᠬᠠᠳᠬᠤᠭᠰᠠᠨ ᠭᠦᠨ ᠶᠠᠭᠠᠨ ᠬᠢᠯᠢᠩ ᠬᠦᠷᠮᠡ ᠲᠡᠢ ᠲᠤᠯᠠ ᠬᠠᠷᠠᠪᠠᠯ ᠶᠡᠬᠡᠮᠰᠦᠭ ᠬᠥᠮᠦᠨ ᠰᠢᠭ᠌ ᠪᠠᠢᠵᠠᠢ᠃ ᠲᠡᠭᠦᠨ ᠦ᠌ ᠬᠥᠯ ᠳ᠋ᠦ᠍ ᠵᠠᠪᠢ ᠶ᠋ᠢᠨ ᠢᠷᠣᠭᠠᠷ ᠲᠤ᠌ ᠪᠥᠰᠡᠨ ᠳ᠋ᠡᠭᠡᠨ ᠤᠷᠲᠤ ᠬᠢᠲᠤᠭᠠ ᠪᠠᠨ ᠬᠠᠪᠴᠢᠭᠤᠯᠤᠭᠰᠠᠨ ᠬᠣᠶᠠᠷ ᠵᠠᠯᠠᠭᠤ ᠰᠠᠭᠤᠵᠠᠢ᠃
ᠵᠠᠪᠢ ᠡᠯᠡᠰᠦᠨ ᠡᠷᠭᠢ ᠤᠷᠤᠭᠤ ᠬᠣᠯᠠ ᠠ᠋ᠴᠠ ᠰᠢᠭᠠᠵᠤ ᠣᠷᠣᠬᠤ ᠳ᠋ᠤ᠌ ᠰᠡᠯᠢᠭᠦᠷᠴᠢᠳ ᠰᠡᠯᠢᠭᠦᠷ ᠢ᠋ ᠬᠤᠷᠢᠶᠠᠵᠤ ᠭᠠᠷ ᠲᠠᠭᠠᠨ ᠵᠢᠳᠠ ᠪᠠᠷᠢᠭᠰᠠᠭᠠᠷ ᠡᠯᠡᠰᠦᠨ ᠳᠡᠭᠡᠷᠡ ᠦᠰᠦᠷᠦᠨ ᠪᠠᠭᠤᠵᠠᠭᠠᠭᠠᠳ ᠵᠠᠪᠢ ᠶ᠋ᠢ ᠨᠡᠰᠢ ᠲᠠᠲᠠᠪᠠ᠃ ᠬᠢᠯᠢᠩ ᠬᠦᠷᠮᠡ ᠲᠡᠢ ᠬᠥᠮᠦᠨ ᠵᠠᠬᠢᠷᠤᠩᠭᠤᠢ ᠴᠢᠩᠭᠠ ᠳᠤᠤᠭᠠᠷᠤᠨ ᠲᠠᠲ᠋ᠠᠷ ᠬᠡᠯᠡ ᠪᠡᠷ᠂
— ᠭᠥᠷᠦᠭᠡᠴᠢᠳ ᠮᠡᠨᠳᠦ ᠰᠠᠢᠨ ᠤᠤ? ᠶᠠᠮᠠᠷ ᠠᠩ ᠪᠠᠷᠢᠪᠠ? ᠨᠢᠲᠤᠯᠬᠤ ᠪᠠᠨ ᠲᠦᠳᠡᠭᠡᠯᠵᠡᠭᠲᠦᠨ᠂ ᠡᠨᠡ ᠬᠥᠮᠦᠨ ᠡᠪᠦᠭᠡᠨ ᠨᠠᠰᠤ ᠪᠣᠯᠤᠭᠰᠠᠨ ᠤ᠋ ᠳᠡᠭᠡᠷᠡ ᠶᠡᠬᠡ ᠶᠠᠭᠤᠮᠠ ᠮᠡᠳᠡᠳᠡᠭ ᠬᠥᠮᠦᠨ᠂ ᠲᠡᠭᠡᠭᠡᠳ ᠴᠤ᠌ ᠮᠠᠨ ᠤ᠋ ᠬᠠᠮᠤᠭ ᠤ᠋ᠨ ᠰᠠᠢᠨ ᠵᠢᠭᠠᠰᠤᠴᠢ᠂ ᠵᠢᠭᠠᠰᠤ ᠲᠠᠢ ᠭᠠᠵᠠᠷ ᠢ᠋ ᠴᠥᠮ ᠢ᠋ ᠮᠡᠳᠡᠨᠡ᠃ ᠲᠠᠨᠠᠷ ᠶᠠᠭᠤᠨ ᠤ᠋ ᠬᠥᠮᠦᠰ᠂ ᠶᠠᠮᠠᠷ ᠣᠪᠣᠭᠲᠠᠨ ᠪᠣᠢ?
ᠮᠦᠰᠦᠢ᠍ᠺ ᠪᠣᠰᠴᠤ ᠶᠠᠳᠠᠨ ᠢᠷᠠᠭᠯᠠᠬᠤ ᠪᠥᠭᠡᠳ ᠨᠢᠳᠦ ᠶ᠋ᠢ ᠴᠢᠰᠤ ᠪᠦᠷᠬᠦᠭᠰᠡᠨ ᠲᠤᠯᠠ ᠨᠢᠭᠡ ᠮᠣᠩᠭᠣᠯ ᠬᠥᠮᠦᠨ ᠬᠠᠷᠢᠭᠤᠯᠤᠭᠰᠠᠨ ᠨᠢ᠄
— ᠪᠢ ᠳ᠋ᠵᠢᠬᠠᠩᠭᠢᠷ ᠪᠠᠲᠤ ᠬᠠᠭᠠᠨ ᠤ᠋ ᠳᠠᠭᠠᠭᠤᠯᠢ᠂ ᠴᠢ ᠶᠠᠮᠠᠷ ᠤᠴᠢᠷ ᠠ᠋ᠴᠠ ᠮᠠᠨ ᠤ᠋ ᠭᠥᠷᠦᠭᠡᠨ ᠦ᠌ ᠶᠠᠪᠤᠳᠠᠯ ᠳ᠋ᠤ᠌ ᠣᠷᠣᠯᠴᠠᠪᠠ?
—ᠪᠢ ᠷᠶᠠᠽᠨᠢᠰᠺᠢ ᠣᠪᠣᠭᠲᠠᠨ ᠤ᠋ ᠡᠯᠴᠢᠨ ᠰᠠᠢᠳ ᠬ᠌ᠯᠢᠪ ᠸᠯᠠᠳ᠋ᠢᠮᠢᠷᠤᠸᠢᠴ ᠨᠣᠶᠠᠨ᠂ ᠲᠠᠨ ᠤ᠋ ᠶᠡᠬᠡ ᠬᠠᠭᠠᠨ ᠤ᠋ ᠠᠮᠤᠷ ᠢ᠋ ᠡᠷᠢᠵᠦ ᠣᠯᠠᠨ ᠵᠢᠯ ᠬᠠᠭᠠᠨ ᠰᠠᠭᠤᠵᠤ ᠴᠣᠭ ᠵᠠᠯᠢ ᠨᠢ ᠳᠡᠯᠭᠡᠷᠡᠬᠦ ᠶ᠋ᠢ ᠢᠷᠥᠭᠡᠬᠦ ᠪᠡᠷ ᠶᠠᠪᠤᠨᠠ᠂ ᠡᠨᠳᠡ ᠡᠴᠡ ᠴᠠᠰᠢ ᠪᠠᠨ ᠬᠣᠯᠠ ᠤᠤ? ᠭᠡᠵᠦ ᠠᠰᠠᠭᠤᠪᠠ᠃
— ᠬᠡᠷᠪᠡ ᠪᠢᠳᠡᠨ ᠦ᠌ ᠬᠠᠮᠲᠤ ᠤᠳᠠᠭᠠᠨ ᠶᠠᠪᠤᠪᠠᠯ ᠪᠠᠲᠤ ᠬᠠᠭᠠᠨ ᠤ᠋ ᠳ᠋ᠤ᠌ ᠭᠤᠷᠪᠠ ᠬᠣᠨᠣᠵᠤ ᠬᠦᠷᠦᠨᠡ᠃ ᠬᠡᠷᠪᠡ ᠬᠤᠷᠳᠤᠨ ᠳᠠᠪᠬᠢᠬᠤ ᠶ᠋ᠢ ᠬᠦᠰᠡᠪᠡᠯ ᠵᠠᠭᠤᠨ ᠬᠣᠨᠣᠭ ᠶᠠᠪᠤᠭᠠᠳ ᠲᠡᠭᠦᠨ ᠲᠡᠢ ᠠᠭᠤᠯᠵᠠᠯ ᠦᠭᠡᠢ ᠬᠠᠷᠢᠨ ᠭᠤᠷᠪᠠᠨ ᠵᠠᠮ ᠤ᠋ᠨ ᠪᠡᠯᠴᠢᠭᠡᠷ ᠳᠡᠭᠡᠷᠡ ᠨᠠᠰᠤ ᠪᠠᠷᠠᠨᠠ ᠭᠡᠪᠡ᠃
—ᠲᠡᠢᠮᠦ ᠪᠣᠯ ᠪᠢ ᠲᠠᠨ ᠤ᠋ ᠬᠠᠮᠲᠤ ᠶᠠᠪᠤᠶᠠ᠂ ᠵᠠᠮ ᠤᠳᠤᠷᠢᠳᠴᠤ ᠥᠭᠭᠦᠭᠲᠤᠨ᠂ ᠪᠢ ᠲᠠᠨ ᠢ᠋ ᠬᠣᠬᠢᠷᠠᠭᠤᠯᠬᠤ ᠦᠭᠡᠢ ᠭᠡᠪᠡ᠃
ᠮᠦᠰᠥ᠋ᠺ ᠰᠡᠭᠡᠭᠡ ᠣᠷᠣᠵᠤ ᠤᠰᠤᠨ ᠳ᠋ᠤ᠌ ᠰᠢᠷᠬᠠ ᠪᠠᠨ ᠤᠬᠢᠶᠠᠭᠠᠳ ᠴᠠᠮᠴᠠ ᠪᠠᠨ ᠤᠷᠠᠵᠤ ᠲᠣᠯᠣᠭᠠᠢ ᠪᠠᠨ ᠪᠣᠭᠣᠪᠠ᠃ ᠣᠳᠣ ᠵᠠᠪᠢᠨ ᠳᠡᠭᠡᠷᠡ ᠰᠠᠭᠤᠭᠠ ᠬᠡᠷᠬᠡᠮ ᠲᠡᠢ ᠬᠥᠮᠦᠨ ᠢ᠋ ᠬᠠᠷᠠᠵᠤ ᠴᠢᠳᠠᠬᠤ ᠪᠣᠯᠵᠠᠢ᠃
ᠲᠡᠷᠡ ᠵᠠᠯᠠᠭᠤ ᠪᠤᠰᠤ᠂ ᠨᠡᠯᠢᠶᠡᠳ ᠪᠤᠭᠤᠷᠤᠯᠳᠠᠭᠰᠠᠨ ᠬᠠᠷᠠ ᠰᠠᠬᠠᠯ ᠨᠢ ᠥᠷᠭᠡᠨ ᠬᠡᠩᠬᠦᠳᠡᠭ ᠤᠷᠤᠭᠤ ᠪᠠᠨ ᠤᠨᠵᠢᠢᠵᠤ ᠮᠢᠨᠵᠢ ᠪᠡᠷ ᠬᠥᠪᠡᠭᠡᠯᠡᠭᠰᠡᠨ ᠬᠢᠯᠢᠩ ᠮᠠᠯᠠᠭᠠᠢ ᠨᠢ ᠶᠡᠬᠡ ᠯᠡ ᠭᠠᠩᠳᠠᠵᠤ ᠬᠠᠭᠤᠴᠢᠷᠠᠵᠠᠢ᠃ ᠮᠥᠨ ᠰᠠᠢᠬᠠᠨ ᠴᠡᠴᠡᠭ ᠲᠡᠢ ᠬᠦᠷᠮᠡ ᠨᠢ ᠴᠦ᠍ ᠡᠯᠡᠭᠳᠡᠭᠡᠳ ᠲᠣᠭᠰᠢᠨ ᠴᠢᠷᠠᠢ᠂ ᠴᠣᠭᠣ ᠰᠢᠢᠳᠡᠭᠰᠡᠨ ᠬᠠᠷᠠ ᠨᠢᠳᠦ ᠨᠢ ᠪᠠᠶᠠᠰᠬᠤᠯᠠᠩᠲᠠᠢ ᠪᠤᠰᠤ ᠦᠵᠡᠭᠳᠡᠵᠡᠢ᠃ ᠡᠨᠡ ᠬᠥᠮᠦᠨ ᠨᠢᠭᠡ ᠴᠠᠭ ᠲᠤ᠌ ᠰᠦᠷᠡᠬᠡᠢ ᠳᠤᠷᠠ ᠮᠡᠳᠡᠨ ᠵᠠᠩᠨᠠᠵᠤ ᠶᠠᠪᠤᠭᠠᠳ ᠡᠯᠳᠡᠪ ᠢ᠋ ᠦᠵᠡᠵᠦ ᠠᠮᠢᠳᠤᠷᠠᠯ ᠨᠢ ᠶᠡᠬᠡᠬᠡᠨ ᠤᠷᠪᠠᠵᠤ ᠬᠥᠷᠪᠡᠭᠰᠡᠨ ᠪᠠᠢᠳᠠᠯ ᠲᠠᠢ ᠪᠠᠢᠯᠠ᠃ ᠲᠡᠷᠡ ᠨᠣᠶᠠᠨ ᠮᠣᠩᠭᠣᠯᠴᠤᠳ ᠲᠠᠢ ᠬᠡᠷᠬᠢᠨ ᠶᠠᠪᠤᠬᠤ ᠲᠤᠬᠠᠢ ᠤᠳᠠᠲᠠᠯᠠ ᠮᠠᠷᠭᠤᠯᠴᠠᠵᠤ ᠡᠴᠦᠰ ᠲᠤᠨᠢ ᠡᠷᠬᠢᠮ ᠡᠯᠴᠢᠨ ᠵᠠᠪᠢ ᠪᠠᠷ ᠡᠷᠭᠢᠨ ᠳ᠋ᠦ᠍ ᠣᠢᠷᠠᠬᠠᠨ ᠬᠥᠪᠴᠦ ᠠᠯᠳᠠᠭᠠᠳ ᠮᠣᠩᠭᠣᠯᠴᠤᠳ ᠮᠣᠷᠢ ᠪᠠᠷ ᠡᠷᠭᠢ ᠡᠴᠡ ᠬᠣᠯᠠᠳᠠᠯ ᠦᠭᠡᠢ ᠶᠠᠪᠤᠵᠠᠭᠠᠬᠤ ᠪᠠᠷ ᠲᠣᠭᠲᠠᠵᠠᠢ᠃
ᠠᠮᠢᠳᠤ ᠶ᠋ᠢᠨ ᠲᠡᠳᠦᠢ ᠮᠦᠰᠥ᠋ᠺ ᠢ᠋ ᠮᠣᠷᠢᠨ ᠳᠡᠭᠡᠷᠡ ᠰᠠᠭᠤᠯᠭᠠᠭᠠᠳ ᠠᠮᠠᠨ ᠳ᠋ᠠᠭᠠᠨ ᠴᠢᠭᠵᠢᠬᠡᠰᠦ ᠲᠡᠢ ᠬᠦᠵᠦᠭᠦᠨ ᠳ᠋ᠡᠭᠡᠨ ᠤᠷᠠᠬᠠ ᠲᠠᠢ ᠪᠠᠷᠢᠭᠳᠠᠭᠰᠠᠨ ᠡᠪᠦᠭᠡᠨ ᠢ᠋ ᠲᠦᠷᠦᠭᠦᠨ ᠦ᠌ ᠲᠠᠩᠨᠠᠭᠤᠯ ᠤ᠋ᠨ ᠳᠥᠷᠦᠭᠡᠨ ᠦ᠌ ᠣᠷᠴᠢᠮ ᠠᠪᠴᠤ ᠶᠠᠪᠤᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠬᠡᠷᠡᠢᠳ· ᠮᠥᠩᠬᠡᠨᠠᠰᠤᠨ᠂ ᠪᠠᠯ᠂ ᠠᠯᠲᠠᠨᠴᠢᠮᠡᠭ᠂ ᠪᠠᠶᠠᠨᠴᠡᠴᠡᠭ᠂ ᠠᠷᠢᠭᠤᠨ
ᠬᠢᠨᠠᠭᠴᠢ᠄ ᠲ· ᠬᠦᠮᠦᠵᠢᠯᠲᠦ᠂ ᠪᠠᠶᠠᠨᠴᠡᠴᠡᠭ᠂ ᠠᠷᠢᠭᠤᠨ᠂ ᠠᠯᠲᠠᠨᠴᠢᠮᠡᠭ