ᠪᠠᠲᠤ ᠬᠠᠭᠠᠨ 2-07ᠳᠣᠯᠣᠳᠤᠭᠠᠷ ᠣᠳᠣ-ᠪᠠᠲᠤ ᠬᠠᠭᠠᠨ ᠥᠷᠥᠨᠡ ᠵᠦᠭ ᠲᠦ᠍ ᠬᠥᠳᠡᠯᠦᠯᠡ-Bat khaan Бат хаан-ᠷᠣᠮᠠᠨ
75ᠳᠣᠯᠣᠭᠠ ᠳᠣᠯᠣᠳᠤᠭᠠᠷ ᠣᠳᠣ
ᠲᠠᠲ᠋ᠠᠷ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ᠂ ᠠᠶᠠᠨ ᠲᠡᠢᠨ ᠳ᠋ᠦ᠍ ᠮᠣᠷᠳᠠᠬᠤ ᠳ᠋ᠤ᠌ ᠶᠦᠯᠳᠥ᠋ᠽ ᠢ᠋ ᠬᠠᠲᠤᠨ ᠠᠬᠠᠢ ᠤᠷᠢ— ᠥᠵᠢᠨ ᠦ᠌ ᠵᠠᠷᠯᠢᠭ ᠢ᠋ᠶ᠋ᠠᠷ ᠳᠠᠭᠠᠭᠤᠯᠤᠭᠰᠠᠨ ᠬᠢᠲᠠᠳ ᠰᠢᠪᠡᠭᠴᠢ ᠶ᠋ᠢᠨ ᠬᠠᠮᠲᠤ ᠳᠣᠯᠤᠭᠠᠳᠠᠬᠢ ᠲᠡᠮᠡᠭᠡᠨ ᠳ᠋ᠦ᠍ ᠰᠠᠭᠤᠯᠭᠠᠵᠠᠢ᠃
ᠶᠦᠯᠳᠥ᠋ᠽ ᠲᠣᠷᠭᠠᠨ ᠬᠥᠰᠢᠭᠡ ᠲᠡᠢ ᠰᠢᠭᠦᠷ ᠦ᠋ᠨ ᠳᠣᠲᠣᠷᠠ ᠠᠷᠤᠭ ᠳᠣᠲᠣᠷᠠ ᠰᠠᠭᠤᠵᠠᠢ᠃ ᠠᠶᠠᠨ ᠤ᠋ ᠬᠣᠶᠠᠳᠠᠬᠢ ᠡᠳᠦᠷ ᠭᠡᠨᠡᠳᠲᠡ ᠴᠣᠴᠢᠵᠤ᠂ ᠡᠳᠦᠷ ᠲᠤᠷᠰᠢ ᠨᠢᠭᠤᠷ ᠢ᠋ᠶ᠋ᠠᠨ ᠪᠦᠲᠡᠭᠡᠯᠭᠡ ᠪᠡᠷ ᠳᠠᠯᠳᠠᠯᠠᠨ ᠶᠠᠪᠤᠬᠤ ᠳ᠋ᠤ᠌᠂ ᠦᠳᠡᠰᠢ ᠰᠢᠪᠡᠭᠴᠢᠨ ᠳ᠋ᠦ᠍ ᠬᠡᠯᠡᠭᠰᠡᠨ ᠨᠢ᠄
— ᠬᠣᠶᠠᠷ ᠬᠥᠮᠦᠨ᠂ ᠡᠪᠦᠭᠡᠨ ᠳ᠋ᠸᠷᠸᠢᠱ ᠹᠡᠺᠢᠾ ᠲᠡᠮᠡᠭᠡ ᠤᠨᠤᠵᠤ ᠪᠢᠳᠡᠨ ᠡᠴᠡ ᠬᠣᠯᠠ ᠦᠭᠡᠢ ᠶᠠᠪᠤᠵᠤ ᠪᠠᠢᠨᠠ᠃ ᠲᠡᠳᠡ ᠬᠡᠷᠪᠡ ᠮᠢᠨᠦ ᠲᠤᠬᠠᠢ ᠠᠰᠠᠭᠤᠪᠠᠯ ᠬᠠᠷᠢᠭᠤᠯᠵᠤ ᠪᠣᠯᠬᠤ ᠦᠭᠡᠢ᠃ ᠨᠠᠮᠠᠶ᠋ᠢ ᠲᠡᠷᠡ ᠡᠪᠦᠭᠡᠨ ᠨᠢᠭᠡᠨᠲᠡ ᠵᠣᠪᠠᠯᠠᠩ ᠳ᠋ᠤ᠌ ᠤᠴᠠᠷᠠᠭᠤᠯᠤᠭᠰᠠᠨ᠃ ᠪᠢ ᠲᠡᠭᠦᠨ ᠡᠴᠡ ᠠᠶᠤᠨᠠ᠃ ᠨᠠᠮᠠᠶ᠋ᠢ ᠬᠡᠨ ᠳ᠋ᠦ᠍ ᠴᠦ᠍ ᠲᠠᠨᠢᠭᠳᠠᠰᠢ ᠦᠭᠡᠢ ᠪᠣᠯᠭᠠᠭᠲᠤᠨ᠁ ᠭᠡᠵᠡᠢ᠃
ᠡᠬᠡᠨᠡᠷ ᠬᠥᠮᠦᠨ ᠦ᠌ ᠠᠷᠭᠠ ᠮᠡᠬᠡᠨ ᠳ᠋ᠦ᠍ ᠳᠠᠳᠤᠭᠰᠠᠨ ᠬᠢᠲᠠᠳ ᠬᠡᠦᠬᠡᠨ᠂ ᠪᠠᠭᠤᠳᠠᠯ ᠳᠡᠭᠡᠷᠡ ᠶᠦᠯᠳᠥ᠋ᠽ ᠲᠦ᠍ ᠣ ᠲᠦᠷᠬᠢᠵᠦ᠂ᠡᠩᠭᠡᠰᠬᠡ ᠲᠠᠯᠪᠢᠨ ᠬᠥᠮᠥᠰᠬᠡ ᠶ᠋ᠢ ᠰᠠᠨᠴᠢᠭ ᠬᠦᠷᠲᠡᠯᠡ ᠤᠷᠲᠤᠰᠬᠠᠭᠠᠳ ᠶᠦᠯᠳᠥ᠋ᠽ ᠢ᠋ ᠥᠩᠭᠡᠯᠡᠭᠰᠡᠨ ᠮᠥᠩᠭᠥᠨ ᠲᠣᠯᠢᠨ ᠳ᠋ᠤ᠌ ᠥᠪᠡᠷ ᠦ᠋ᠨ ᠴᠢᠷᠠᠢ ᠶ᠋ᠢ ᠦᠵᠡᠭᠡᠳ ᠦᠯᠦ ᠲᠠᠨᠢᠬᠤ ᠪᠣᠯᠲᠠᠯᠠ ᠬᠤᠪᠢᠷᠠᠭᠠᠨ ᠪᠣᠳᠣᠵᠠᠢ᠃
《ᠳᠣᠯᠣᠭᠠᠨ ᠣᠳᠣᠨ 》 ᠭᠡᠭᠴᠢᠳ ᠠᠶᠠᠨ ᠵᠠᠮ ᠳ᠋ᠤ᠌ ᠲᠤᠰᠬᠠᠢ ᠬᠠᠷᠠᠭᠤᠯ ᠪᠦᠬᠦᠢ ᠠᠩᠭᠢ ᠳ᠋ᠤ᠌ ᠴᠤᠪᠤᠭᠠ ᠪᠠᠷ ᠶᠠᠪᠤᠭᠤᠯᠪᠠ᠃ ᠲᠦᠷᠦᠭᠦᠨ ᠦ᠌ ᠳᠥᠷᠪᠡᠨ ᠲᠡᠮᠡᠭᠡ ᠪᠡᠷ ᠳᠥᠷᠪᠡᠨ ᠮᠣᠩᠭᠣᠯ ᠠᠪᠠᠬᠠᠢ ᠶᠠᠪᠤᠵᠠᠢ᠃ ᠲᠡᠳᠡ ᠪᠣᠯ ᠨᠡᠭᠦᠳᠡᠯ ᠠᠢᠮᠠᠭ ᠤ᠋ᠨ ᠬᠠᠮᠤᠭ ᠤ᠋ᠨ ᠰᠤᠷᠪᠤᠯᠵᠢᠲᠤ ᠭᠡᠷ ᠦ᠋ᠨ ᠥᠬᠢᠳ ᠪᠥᠭᠡᠳ ᠪᠡᠶᠡ ᠪᠦᠳᠦᠭᠦᠨ ᠂ ᠭᠠᠵᠠᠷ ᠰᠢᠭᠦᠷᠡᠭᠰᠡᠨ ᠤᠷᠲᠤ ᠭᠡᠵᠢᠭᠡ ᠲᠡᠢ ᠪᠢᠯᠡ᠃ ᠳᠠᠷᠠᠭᠠ ᠨᠢ ᠬᠣᠶᠠᠷ ᠺᠢᠫᠴᠡᠺ ᠠᠪᠠᠬᠠᠢ ᠶᠠᠪᠤᠵᠤ ᠪᠠᠢᠪᠠ᠃ ᠨᠢᠭᠡ ᠨᠢ ᠪᠠᠶᠠᠨᠳᠧᠷ ᠬᠠᠭᠠᠨ ᠤ᠋ ᠥᠬᠢᠨ ᠠᠵᠢ᠃ ᠡᠨᠡ ᠬᠣᠶᠠᠷ ᠺᠢᠫᠴᠡᠺ ᠬᠠᠲᠤᠨ ᠶᠡᠬᠡᠪᠴᠢᠯᠡᠨ ᠨᠢᠭᠡᠨ ᠲᠡᠮᠡᠭᠡᠨ ᠳᠡᠭᠡᠷᠡ ᠨᠡᠢᠯᠡᠨ ᠰᠠᠭᠤᠵᠤ ᠡᠬᠢ ᠠᠳᠠᠭ ᠦᠭᠡᠢ ᠦᠭᠡ ᠴᠠᠯᠴᠢᠨ ᠢᠨᠢᠶᠡᠯᠴᠡᠳᠡᠭ ᠪᠥᠭᠡᠳ ᠨᠥᠭᠦᠭᠡ ᠲᠡᠮᠡᠭᠡᠨ ᠳᠡᠭᠡᠷᠡ ᠲᠡᠳᠡᠨ ᠦ᠌ ᠰᠢᠪᠡᠭᠴᠢᠳ ᠶᠠᠪᠤᠵᠤ ᠪᠠᠢᠯᠠ᠃ ᠨᠢᠭᠡᠨ ᠪᠠᠭᠤᠳᠠᠯ ᠳᠡᠭᠡᠷᠡ ᠲᠡᠳᠡ ᠶᠦᠯᠳᠥ᠋ᠽ ᠦ᠋ᠨ ᠳᠡᠷᠭᠡᠳᠡ ᠢᠷᠡᠵᠦ ᠶᠠᠷᠢᠯᠴᠠᠭᠠᠳ᠂ ᠲᠤᠰ ᠪᠦᠷᠢ ᠬᠤᠷᠳᠤᠨ ᠮᠣᠷᠢ ᠲᠠᠢ ᠬᠡᠮᠡᠵᠡᠭᠡᠵᠦ᠂ ᠴᠡᠩᠭᠡᠯ ᠦ᠋ᠨ ᠠᠪᠠ ᠬᠣᠮᠣᠷᠭᠠ ᠪᠠ ᠤᠷᠤᠯᠳᠤᠭᠠᠨ ᠳ᠋ᠤ᠌ ᠣᠷᠣᠯᠴᠠᠨᠠ ᠭᠡᠵᠦ ᠥᠭᠦᠯᠡᠯᠵᠡᠢ(ᠦᠭᠦᠯᠡᠯᠳᠦᠵᠡᠢ )᠃
— ᠴᠢ ᠪᠣᠯ ᠬᠠᠷᠠ ᠠᠵᠢᠯ ᠤ᠋ᠨ ᠡᠬᠡᠨᠡᠷ᠂ ᠴᠢᠮᠠᠲᠤ ᠮᠣᠷᠢ ᠪᠠᠢᠬᠤ ᠦᠭᠡᠢ᠃ ᠢᠨᠵᠢ ᠭᠡᠪᠡᠯ ᠤᠷᠢ— ᠦᠵᠢᠨ ᠦ᠌ ᠥᠭᠭᠦᠭᠰᠡᠨ ᠬᠤᠪᠴᠠᠰᠤ ᠴᠢᠮᠡᠭᠯᠡᠯ ᠯᠡ ᠪᠠᠢᠨᠠ᠃ ᠪᠠᠲᠤ ᠬᠠᠭᠠᠨ ᠴᠢᠮᠠᠶ᠋ᠢ ᠬᠠᠷᠠᠬᠤ ᠴᠥ᠍ ᠦᠭᠡᠢ᠃ ᠴᠢ ᠪᠣᠯ ᠪᠢᠳᠡᠨ ᠦ᠌ ᠤᠤᠭᠤᠳᠠᠭ ᠠᠶᠠᠭᠠᠨ ᠤ᠋ ᠰᠢᠪᠬᠠᠷᠤᠤ ᠶ᠋ᠢ ᠳᠣᠯᠢᠶᠠᠵᠤ ᠪᠠᠢᠬᠤ ᠪᠣᠯᠤᠨᠠ ᠭᠡᠪᠡ᠃
ᠶᠦᠯᠳᠥ᠋ᠽ᠂ ᠪᠡᠶᠡ ᠪᠡᠨ ᠬᠣᠷᠢᠶᠠᠨ ᠤᠬᠤᠷᠢᠵᠤ ᠬᠢᠲᠠᠳ ᠰᠢᠪᠡᠭᠴᠢᠨ ᠦ᠌ ᠵᠦᠭ ᠣᠢᠷᠠᠲᠤᠵᠤ᠂ ᠬᠥᠳᠡᠯᠭᠡᠭᠡ ᠦᠭᠡᠢ ᠪᠠᠷᠤᠢᠭᠰᠠᠨ ᠴᠢᠷᠠᠢ ᠪᠠᠷ ᠺᠢᠫᠴᠡᠺ ᠠᠪᠠᠬᠠᠢ ᠨᠠᠷ ᠢ᠋ ᠭᠥᠯᠢᠷᠡᠨ ᠰᠢᠷᠳᠡᠪᠡ᠃
— ᠴᠢ ᠶᠠᠭᠤᠨ ᠬᠠᠷᠢᠭᠤ ᠦᠯᠦ ᠬᠡᠯᠡᠨᠡ? ᠰᠠᠭᠠᠯᠢᠴᠢᠨ ᠥᠬᠢᠨ ᠴᠢ ᠶᠠᠷᠢᠵᠤ ᠴᠢᠳᠠᠬᠤ ᠦᠭᠡᠢ ᠤᠤ? ᠲᠡᠢᠮᠦ ᠪᠣᠯ ᠮᠥᠭᠡᠷᠡᠭᠲᠦᠨ! ᠭᠡᠵᠡᠢ᠃
ᠶᠦᠯᠲᠥ᠋ᠽ ᠳᠣᠷᠣᠭᠰᠢ ᠬᠠᠷᠠᠭᠠᠳ᠂ ᠬᠠᠷᠢᠭᠤ ᠬᠡᠯᠡᠬᠦ ᠭᠡᠰᠡᠨ ᠪᠣᠯᠪᠠᠴᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠳᠤᠷᠳᠤᠮ ᠠᠯᠴᠢᠭᠤᠷ ᠢ᠋ᠶ᠋ᠠᠨ ᠠᠪᠴᠤ ᠰᠤᠷᠤᠮᠠᠭᠠᠢ ᠬᠥᠳᠡᠯᠦᠨ ᠠᠷᠴᠢᠵᠤ ᠬᠥᠳᠡᠭᠡ ᠶ᠋ᠢᠨ ᠥᠬᠢᠳ ᠦ᠋ᠨ ᠵᠠᠩᠰᠢᠯ ᠢ᠋ᠶ᠋ᠠᠷ ᠬᠡᠭᠡᠯᠲᠡᠢ ᠮᠡᠲᠦ ᠪᠣᠯᠭᠠᠵᠤ ᠰᠠᠶᠢ ᠬᠡᠯᠡᠭᠰᠡᠨ ᠨᠢ᠄
— ᠪᠢ ᠰᠠᠭᠠᠯᠢᠴᠢ ᠶᠤᠮ ᠪᠣᠯ ᠲᠠᠨᠠᠷ ᠵᠠᠢᠯᠠᠭᠲᠤᠨ᠂ ᠬᠡᠷᠪᠡ ᠡᠵᠡᠨ ᠲᠤᠰᠢᠶᠠᠪᠠᠯ ᠪᠢ ᠠᠶᠠᠭᠠ ᠤᠬᠢᠶᠠᠨᠠ᠃ ᠬᠡᠷᠪᠡ(ᠡᠵᠡᠨ ) ᠲᠤᠰᠢᠶᠠᠪᠠᠯ ᠰᠢᠯᠪᠢᠭᠦᠷ ᠢ᠋ᠶ᠋ᠡᠷ ᠲᠠᠨᠠᠷ ᠢ᠋ ᠦᠨᠢᠶᠡ ᠮᠡᠲᠦ ᠦᠯᠳᠡᠨ ᠬᠥᠭᠡᠭᠡᠨᠡ ᠭᠡᠵᠡᠢ᠃
— ᠤᠬᠠᠭᠠᠨ ᠣᠷᠣᠵᠤ ᠶᠠᠭᠠᠬᠢᠭᠠ ᠴᠤ᠌ ᠦᠭᠡᠢ ᠬᠡᠦᠬᠡᠳ ᠪᠠᠢᠨᠠ ᠭᠡᠵᠦ ᠨᠢᠭᠡ ᠨᠢ ᠬᠡᠯᠡᠵᠡᠢ᠃
— ᠪᠦᠬᠦᠢᠯᠡ ᠨᠠᠰᠤᠨ ᠳ᠋ᠠᠭᠠᠨ ᠲᠡᠨᠡᠭ ᠬᠡᠪ ᠢ᠋ᠶ᠋ᠡᠷ ᠪᠠᠢᠬᠤ ᠪᠣᠯᠤᠨᠠ ᠭᠡᠵᠦ ᠨᠥᠭᠦᠭᠡ ᠨᠢᠭᠡ ᠨᠢ ᠨᠡᠮᠡᠵᠦ ᠥᠭᠦᠯᠡᠭᠡᠳ ᠬᠣᠶᠠᠭᠤᠯᠠ ᠪᠠᠨ ᠢᠨᠢᠶᠡᠯᠳᠦᠨ ᠶᠠᠪᠤᠵᠤ ᠣᠳᠴᠠᠢ᠃
ᠮᠠᠷᠭᠠᠰᠢ ᠡᠳᠦᠷ ᠨᠢ ᠨᠢᠭᠡᠳᠦᠭᠡᠷ᠂ ᠬᠠᠮᠤᠭ ᠤ᠋ᠨ ᠡᠷᠬᠢᠮᠰᠦᠭ ᠪᠣᠷᠣᠭᠴᠢᠨ ᠬᠠᠲᠤᠨ ᠠ᠋ᠴᠠ ᠪᠤᠰᠤᠳ ᠮᠣᠩᠭᠣᠯ ᠬᠠᠲᠤᠳ ᠶᠦᠯᠳᠥ᠋ᠽ ᠤᠷᠤᠭᠤ ᠢᠷᠡᠭᠡᠳ ᠲᠡᠭᠦᠨ ᠳ᠋ᠦ᠍ ᠭᠠᠷ ᠬᠦᠷᠴᠦ ᠲᠤᠷᠠᠩᠬᠠᠢ ᠭᠠᠷ᠂ ᠳᠡᠪᠡᠯ ᠦ᠋ᠨ ᠡᠳ᠋ ᠢ᠋ ᠪᠠᠷᠢᠵᠤ ᠦᠵᠡᠨ᠂ ᠰᠢᠳᠦ ᠶ᠋ᠢ ᠨᠢ ᠬᠠᠷᠠᠪᠠ᠃
ᠶᠦᠯᠳᠥ᠋ᠽ᠂ ᠪᠡᠶᠡ ᠳ᠋ᠡᠭᠡᠨ ᠬᠦᠷᠬᠦ ᠳ᠋ᠦ᠍ ᠬᠦᠯᠢᠶᠡᠨ ᠳᠠᠭᠠᠵᠤ ᠢᠨᠢᠶᠡᠮᠰᠦᠭᠯᠡᠪᠡ᠃ ᠮᠣᠩᠭᠣᠯ ᠬᠡᠦᠬᠡᠨ ᠨᠦ᠍ᠭᠦᠳ ᠬᠠᠴᠠᠷ ᠳᠡᠭᠡᠷᠡᠬᠢ ᠬᠣᠩᠬᠣᠷ ᠢ᠋ ᠨᠢ ᠨᠢᠭᠡ ᠨᠢᠭᠡ ᠪᠡᠷ ᠳᠠᠷᠤᠵᠤ ᠦᠵᠡᠭᠡᠳ ᠢᠨᠢᠶᠡᠵᠡᠭᠡᠯᠡ᠃ ᠡᠭᠡᠴᠢᠮᠡᠳ ᠨᠢ ᠠᠩᠬᠠᠨ ᠳ᠋ᠠᠭᠠᠨ ᠶᠡᠬᠡᠮᠰᠦᠭ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠳᠠᠷᠠᠭᠠ ᠨᠢ ᠮᠥᠨ ᠯᠡ ᠢᠨᠢᠶᠡᠵᠡᠢ᠃ ᠬᠠᠲᠤᠳ ᠠᠯᠴᠢᠭᠤᠷ ᠢ᠋ᠶ᠋ᠠᠷ ᠬᠢᠭᠰᠡᠨ ᠬᠡᠦᠬᠡᠯᠳᠡᠢ ᠶ᠋ᠢ ᠪᠠᠷᠢᠵᠤ᠂ ᠬᠡᠦᠬᠡᠳ ᠢ᠋ ᠬᠡᠷᠬᠢᠨ ᠪᠦᠪᠡᠢᠯᠡᠬᠦ᠂ ᠬᠥᠬᠥᠭᠦᠯᠬᠦ ᠶ᠋ᠢ ᠵᠢᠭᠠᠵᠤ ᠦᠵᠡᠭᠦᠯᠪᠡ᠃ ᠲᠡᠭᠡᠭᠡᠳ ᠪᠣᠰᠴᠠᠭᠠᠵᠤ ᠡᠶᠡᠯᠳᠡᠭ ᠢ᠋ᠶ᠋ᠡᠷ ᠰᠠᠯᠬᠤ ᠶ᠋ᠢᠨ ᠶᠣᠰᠣ ᠶ᠋ᠢ ᠭᠦᠢᠴᠡᠳᠬᠡᠭᠡᠳ ᠶᠠᠪᠤᠵᠠᠢ᠃ ᠬᠠᠮᠤᠭ ᠤ᠋ᠨ ᠪᠠᠭᠠ ᠨᠢ ᠡᠷᠭᠢᠵᠦ ᠢᠷᠡᠭᠡᠳ᠂
— ᠮᠢᠨᠦ ᠳᠡᠷᠭᠡᠳᠡ ᠣᠴᠢᠵᠤ ᠳᠡᠮᠡᠢ ᠶᠠᠷᠢᠯᠴᠠᠭᠲᠤᠨ᠃ ᠪᠢ ᠳᠥᠷᠪᠡᠳᠦᠭᠡᠷ ᠲᠡᠮᠡᠭᠡ ᠪᠡᠷ ᠶᠠᠪᠤᠳᠠᠭ ᠭᠡᠯᠡ᠃ ᠶᠦᠯᠳᠥ᠋ᠽ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠬᠣᠴᠣᠷᠤᠭᠠᠳ᠂ ᠠᠯᠴᠢᠭᠤᠷ ᠰᠡᠭᠰᠦᠷᠦᠨ ᠵᠠᠳᠠᠯᠵᠤ᠂ ᠲᠣᠯᠣᠭᠠᠢ ᠪᠠᠨ ᠪᠦᠲᠡᠭᠡᠨ ᠤᠬᠢᠯᠠᠪᠠ᠃ ᠡᠴᠢᠭᠡ᠂ ᠠᠬᠠ ᠳ᠋ᠧᠮᠢᠷ ᠬᠣᠶᠠᠷ ᠨᠢ ᠲᠡᠭᠦᠨ ᠢ᠋ ᠪᠣᠭᠣᠯᠴᠤᠳ ᠤ᠋ᠨ ᠴᠤᠪᠤᠭᠠᠨ ᠳ᠋ᠤ᠌ ᠠᠪᠠᠴᠢᠨ ᠲᠣᠮᠣ ᠮᠠᠯᠠᠭᠠᠢ ᠲᠠᠢ ᠂ ᠰᠤᠳᠠᠯ ᠲᠠᠢ᠂ ᠤᠯᠠᠭᠠᠨ ᠲᠡᠷᠯᠢᠭ ᠲᠡᠢ᠂ ᠬᠠᠷᠠ ᠰᠠᠬᠠᠯ ᠲᠠᠢ ᠪᠥᠭᠡᠷᠡᠩᠬᠡᠢ ᠪᠠᠢᠼᠠᠢ ᠮᠡᠲᠦ ᠴᠦᠵᠡᠭᠡᠷ ᠬᠤᠳᠠᠯᠳᠤᠭᠠᠴᠢᠨ ᠳ᠋ᠤ᠌ ᠬᠤᠳᠠᠯᠳᠤᠭᠰᠠᠨ ᠠ᠋ᠴᠠ ᠬᠣᠢᠰᠢ᠂ ᠭᠠᠭᠴᠠ ᠪᠢᠰᠢ ᠣᠯᠠᠨ ᠤᠳᠠᠭᠠ ᠤᠬᠢᠯᠠᠭᠰᠠᠨ ᠪᠢᠯᠡ᠃ ᠬᠤᠳᠠᠯᠳᠤᠬᠤ ᠭᠡᠵᠦ ᠪᠠᠢᠭᠠ ᠬᠣᠨᠢ ᠮᠡᠲᠦ ᠪᠡᠷ ᠲᠡᠭᠦᠨ ᠢ᠋ ᠦᠵᠡᠭᠰᠡᠨ ᠳ᠋ᠦ᠍ ᠶᠡᠬᠡ ᠯᠡ ᠭᠣᠮᠣᠳᠠᠵᠠᠢ᠃ ᠶᠦᠯᠳᠥ᠋ᠽ ᠲᠦ᠍ ᠶᠠᠮᠠᠷ ᠪᠤᠷᠤᠭᠤ ᠪᠠᠢᠬᠤ ᠪᠣᠢ? ᠪᠤᠯᠠᠭ ᠤ᠋ᠨ ᠳᠡᠷᠭᠡᠳᠡ ᠬᠠᠮᠤᠭ ᠤ᠋ᠨ ᠶᠠᠳᠠᠭᠤ ᠰᠢᠷᠠ ᠢᠰᠡᠭᠡᠢ ᠭᠡᠷ ᠲᠦ᠍ ᠴᠦ᠍ ᠭᠡᠰᠡᠨ ᠣᠷᠣᠰᠢᠨ ᠰᠠᠭᠤᠬᠤ ᠪᠠ ᠮᠦᠰᠥ᠋ᠺ ᠦᠳᠡᠰᠢ ᠪᠦᠷᠢ ᠬᠡᠭᠡᠷ ᠮᠣᠷᠢ ᠪᠠᠨ ᠤᠨᠤᠨ ᠢᠷᠡᠵᠦ᠂ ᠠᠳᠤᠭᠤᠨ ᠳᠡᠭᠡᠷᠡ ᠶᠠᠭᠤ ᠪᠣᠯᠵᠤ ᠪᠠᠢᠭᠠ᠂ ᠠᠵᠢᠷᠭᠠ ᠬᠡᠷᠬᠢᠨ ᠬᠡᠮᠬᠡᠯᠴᠡᠳᠡᠭ᠂ ᠶᠠᠮᠠᠷ ᠶᠠᠮᠠᠷ ᠤᠨᠠᠭᠠ ᠭᠠᠷᠤᠭᠰᠠᠨ᠂ ᠭᠡᠲᠡᠵᠦ ᠢᠷᠡᠭᠰᠡᠨ ᠴᠢᠨᠣᠠ ᠶ᠋ᠢ ᠬᠡᠷᠬᠢᠨ ᠬᠥᠭᠡᠭᠡᠭᠰᠡᠨ ᠢ᠋ ᠶᠠᠷᠢᠵᠤ ᠪᠠᠢᠭᠠᠰᠠᠢ ᠭᠡᠵᠦ ᠬᠦᠰᠡᠳᠡᠭ ᠠᠵᠢ᠃
ᠲᠣᠬᠣᠢ ᠳ᠋ᠤᠨᠢ ᠶᠠᠮᠠᠷ ᠨᠢᠭᠡᠨ ᠬᠥᠮᠦᠨ᠂ ᠬᠤᠷᠤᠭᠤ ᠪᠠᠨ ᠵᠥᠭᠡᠯᠡᠨ ᠬᠦᠷᠭᠡᠵᠦ ᠨᠠᠷᠢᠨ ᠳᠠᠭᠤ ᠪᠠᠷ ᠰᠢᠪᠡᠨᠡᠨ᠂
— ᠣᠳᠣᠨ ᠮᠢᠨᠢ ᠶᠠᠭᠤᠨ ᠳ᠋ᠤ᠌ ᠤᠬᠢᠯᠠᠵᠤ ᠪᠠᠢᠨᠠ? ᠡᠨᠡ ᠪᠣᠯ ᠬᠠᠷᠠᠬᠠᠨ ᠵᠣᠪᠠᠯᠠᠩ ᠪᠢᠰᠢ᠂ ᠶᠡᠬᠡ ᠵᠣᠪᠠᠯᠠᠩ ᠳᠠᠷᠤᠢ ᠲᠣᠬᠢᠶᠠᠯᠳᠤᠨᠠ ᠭᠡᠪᠡ᠃ ᠡᠨᠡ᠂ ᠬᠢᠲᠠᠳ ᠰᠢᠪᠡᠭᠴᠢᠨ ᠢ ᠯᠡ ᠾᠧ ᠠᠵᠢ᠃ ᠶᠥ᠋ᠯᠳᠥ᠋ᠽ ᠦ᠋ᠨ ᠡᠮᠦᠨᠡ ᠡᠪᠦᠳᠦᠭ ᠳᠡᠭᠡᠷᠡ ᠪᠡᠨ ᠰᠥᠬᠥᠷᠡᠭᠡᠳ ᠠᠯᠠᠭᠠ ᠪᠠᠷ ᠬᠡᠪᠢᠰ ᠢ᠋ ᠳᠠᠷᠤᠵᠤ᠂ ᠵᠠᠩᠰᠢᠭᠰᠠᠨ ᠬᠦᠨᠳᠦᠳᠬᠡᠯ ᠢ᠋ᠶ᠋ᠡᠷ ᠬᠤᠷᠳᠤᠨᠠ ᠮᠥᠷᠭᠥᠪᠡ᠃
— ᠬᠡᠵᠢᠶᠡ ᠶᠡᠬᠡ ᠵᠣᠪᠠᠯᠠᠩ ᠢᠷᠡᠨᠡ?
— ᠴᠢᠨᠦ᠂ ᠬᠡᠦᠬᠡᠳ ᠢ᠋ᠶ᠋ᠡᠨ ᠦᠬᠦᠬᠦ ᠶ᠋ᠢ ᠦᠵᠡᠬᠦ ᠳ᠋ᠦ᠍ ᠲᠣᠬᠢᠶᠠᠯᠳᠤᠨᠠ ᠭᠡᠪᠡ᠃
— ᠴᠢ ᠶᠡᠬᠡ ᠵᠣᠪᠠᠯᠠᠩ ᠦᠵᠡᠭᠰᠡᠨ ᠤᠤ?
ᠬᠢᠲᠠᠳ ᠪᠦᠰᠡᠭᠦᠢ᠂ ᠤᠷᠤᠰᠬᠤ ᠨᠢᠯᠪᠤᠰᠤ ᠶ᠋ᠢ ᠠᠷᠴᠢᠬᠤ ᠭᠡᠰᠡᠨ ᠮᠡᠲᠦ ᠬᠠᠲᠠᠩᠭᠢᠷ ᠪᠢᠴᠢᠬᠠᠨ ᠭᠠᠷ ᠢ᠋ᠶ᠋ᠠᠷ ᠨᠢᠳᠦ ᠶ᠋ᠢ ᠢᠯᠪᠢᠭᠡᠳ ᠡᠷᠭᠢᠵᠦ ᠬᠠᠷᠠᠪᠠ᠃ ᠡᠷᠭᠢᠨ ᠲᠣᠭᠣᠷᠢᠨ ᠳ᠋ᠤ᠌ ᠲᠦᠳᠡᠭ ᠨᠣᠴᠣᠨ᠂ ᠬᠡᠪᠲᠡᠭᠡ ᠰᠠᠭᠤᠭᠠ ᠴᠡᠷᠢᠭ ᠦ᠋ᠳ ᠦ᠋ᠨ ᠳᠡᠭᠡᠷᠡ ᠬᠦᠷᠡᠩ ᠤᠯᠠᠭᠠᠨ ᠭᠡᠷᠡᠯ ᠲᠣᠰᠣᠨ ᠪᠠᠢᠪᠠ᠃ ᠬᠢᠲᠠᠳ ᠪᠦᠰᠡᠭᠦᠢ ᠶᠥ᠋ᠯᠳᠥ᠋ᠽ ᠬᠣᠶᠠᠷ ᠪᠢᠴᠢᠬᠠᠨ ᠬᠢᠯᠢᠩ ᠬᠡᠪᠢᠰᠦᠨ ᠳᠡᠭᠡᠷᠡ ᠪᠡᠶᠡ ᠪᠡᠶᠡ ᠳ᠋ᠡᠭᠡᠨ ᠰᠢᠬᠠᠨ ᠰᠠᠭᠤᠵᠠᠢ᠃ ᠡᠨᠡ ᠬᠣᠶᠠᠷ ᠥᠪᠡᠷᠰᠡᠳ ᠢ᠋ ᠪᠡᠨ᠂ ᠬᠦᠩᠭᠢᠨᠡᠨ ᠬᠠᠰᠬᠢᠷᠤᠨ ᠳᠠᠭᠤᠯᠠᠨ᠂ ᠵᠡᠪᠰᠡᠭ ᠬᠠᠩᠭᠢᠨᠠᠭᠤᠯᠤᠨ ᠪᠠᠢᠭᠠᠳ ᠣᠳᠣ ᠶᠠᠪᠤᠳᠠᠯ ᠳ᠋ᠤ᠌ ᠠᠯᠵᠢᠶᠠᠨ ᠠᠯᠭᠤᠷ ᠨᠠᠮᠵᠢᠵᠤ ᠤᠨᠲᠠᠨ ᠮᠠᠷᠲᠠᠭᠰᠠᠨ᠂ ᠠᠰᠤᠷᠤ ᠣᠯᠠᠨ ᠬᠥᠮᠦᠨ ᠦ᠌ ᠳᠤᠮᠳᠠ ᠬᠠᠶᠠᠭᠳᠠᠭᠰᠠᠨ ᠭᠡᠵᠦ ᠰᠠᠨᠠᠵᠠᠢ᠃
ᠬᠢᠲᠠᠳ ᠪᠦᠰᠡᠭᠦᠢ ᠬᠡᠯᠡᠭᠰᠡᠨ ᠨᠢ᠄
— ᠥᠩᠭᠡᠷᠡᠭᠰᠡᠨ ᠵᠣᠪᠠᠯᠠᠩ ᠢ᠋ ᠰᠠᠨᠠᠬᠤ ᠳ᠋ᠤ᠌᠂ ᠮᠢᠨᠦ ᠵᠢᠷᠦᠬᠡ ᠡᠮᠲᠡᠷᠡᠵᠦ ᠪᠠᠢᠨᠠ᠃ ᠭᠡᠰᠡᠨ ᠴᠦ᠍ ᠰᠣᠨᠣᠰ! ᠪᠢ ᠥᠭᠦᠯᠡᠰᠦᠭᠡᠢ᠃ ᠶᠡᠬᠡ ᠪᠠᠭᠠ ᠠᠯᠢ ᠴᠤ᠌ ᠵᠣᠪᠠᠯᠠᠩ ᠢ᠋ ᠮᠢᠨᠦ ᠬᠥᠭᠡᠷᠦᠬᠦᠢ ᠨᠢᠳᠦ ᠦᠵᠡᠯᠡ᠃
ᠠᠩᠬᠠ ᠡᠴᠢᠭᠡ ᠶ᠋ᠢᠨ ᠭᠡᠷ ᠲᠦ᠍ ᠰᠠᠨᠠᠭᠠ ᠵᠣᠪᠠᠬᠤ ᠶᠠᠭᠤᠮᠠ ᠦᠭᠡᠢ᠂ ᠵᠢᠷᠭᠠᠯᠠᠩᠲᠠᠢ ᠠᠮᠢᠳᠤᠷᠠᠵᠤ ᠪᠠᠢᠯᠠ᠃ ᠮᠢᠨᠦ ᠡᠴᠢᠭᠡ ᠣᠳᠣᠨ ᠪᠦᠬᠦᠨ ᠦ᠌ ᠤᠳᠬᠠ ᠴᠢᠨᠠᠷ ᠢ᠋ ᠣᠢᠯᠠᠭᠠᠵᠤ᠂ᠲᠡᠳᠡᠨ ᠦ᠌ ᠬᠥᠳᠡᠯᠭᠡᠭᠡ ᠪᠡᠷ ᠬᠥᠮᠦᠨ ᠦ᠌ ᠢᠷᠡᠭᠡᠳᠦᠢ ᠶ᠋ᠢ ᠤᠷᠢᠳ ᠠ᠋ᠴᠠ ᠥᠭᠦᠯᠡᠳᠡᠭ ᠪᠥᠯᠥᠭᠡ᠃ ᠲᠡᠷᠡ᠂ ᠰᠥᠨᠢ ᠪᠦᠷᠢ ᠶ᠋ᠢ ᠤᠯᠤᠰ ᠤ᠋ᠨ ᠡᠵᠡᠨ ᠬᠠᠭᠠᠨ ᠤ᠋ ᠣᠷᠳᠣᠨ ᠤ᠋ ᠳᠡᠭᠡᠪᠦᠷ ᠳᠡᠭᠡᠷᠡ ᠥᠩᠭᠡᠷᠡᠭᠡᠵᠦ᠂ ᠣᠳᠣᠨ ᠤ᠋ ᠬᠥᠳᠡᠯᠭᠡᠭᠡ ᠵᠥᠷᠢᠯᠲᠡ ᠪᠡᠷ ᠮᠡᠳᠡᠭᠰᠡᠨ ᠵᠦᠢᠯ ᠪᠦᠬᠦᠨ ᠢ᠋ ᠲᠣᠮᠣ ᠳᠡᠪᠲᠡᠷ ᠲᠦ᠍ ᠪᠢᠴᠢᠭᠡᠳ ᠣᠷᠳᠣᠨ ᠤ᠋ ᠶᠡᠷᠦᠩᠬᠡᠢ ᠳᠠᠭᠠᠭᠠᠮᠠᠯ ᠳ᠋ᠤ᠌ ᠥᠷᠯᠥᠭᠡ ᠦᠵᠡᠭᠦᠯᠬᠦ ᠳ᠋ᠦ᠍ ᠠᠯᠢ ᠴᠢᠬᠤᠯᠠ ᠶ᠋ᠢ ᠨᠢ ᠬᠢᠲᠠᠳ ᠢ᠋ ᠵᠠᠬᠢᠷᠤᠭᠴᠢ ᠡᠵᠡᠨ ᠳ᠋ᠦ᠍ ᠮᠡᠳᠡᠭᠦᠯᠳᠡᠭ ᠪᠠᠢᠪᠠ᠃ ᠡᠴᠢᠭᠡ ᠮᠢᠨᠢ ᠨᠠᠮᠠᠶ᠋ᠢ ᠥᠰᠬᠦ ᠳ᠋ᠦ᠍ ᠬᠣᠶᠠᠷ ᠵᠠᠭᠤᠨ ᠲᠠᠪᠢᠨ ᠮᠣᠷᠢᠲᠠᠨ ᠤ᠋ ᠳᠠᠷᠤᠭᠠ ᠪᠥᠭᠡᠳ ᠢᠵᠠᠭᠤᠷᠲᠠᠢ᠂ ᠬᠦᠭᠵᠢᠭᠡᠨᠲᠡᠢ ᠨᠢᠭᠡ ᠬᠥᠮᠦᠨ ᠲᠡᠢ ᠰᠠᠭᠤᠯᠭᠠᠭᠰᠠᠨ ᠶᠤᠮ᠃ ᠲᠡᠷᠡ ᠨᠠᠳᠠ ᠠ᠋ᠴᠠ ᠬᠣᠷᠢᠨ ᠨᠠᠰᠤ ᠠᠬᠠ ᠪᠣᠯᠪᠠᠴᠤ ᠪᠢᠳᠡ ᠵᠢᠷᠭᠠᠯᠲᠠᠢ ᠠᠮᠢᠳᠤᠷᠠᠨ᠂ ᠬᠣᠶᠠᠷ ᠰᠠᠢᠬᠠᠨ ᠬᠡᠦᠬᠡᠳ ᠲᠡᠢ ᠪᠠᠢᠪᠠ᠃ ᠪᠢᠳᠡ ᠯᠢᠩᠬᠤᠠ ᠴᠡᠴᠡᠭ ᠤᠷᠭᠤᠳᠠᠭ᠂ ᠠᠯᠲᠠᠨ ᠵᠢᠭᠠᠰᠤ ᠬᠦᠪᠪᠦᠳᠡᠭ ᠴᠥᠭᠥᠷᠥᠮ ᠪᠠ ᠴᠡᠴᠡᠷᠯᠢᠭ ᠲᠡᠢ ᠪᠢᠴᠢᠬᠠᠨ ᠪᠠᠢᠰᠢᠩ ᠳ᠋ᠤ᠌ ᠣᠷᠣᠰᠢᠨ ᠰᠠᠭᠤᠵᠤ ᠪᠠᠢᠯᠠ᠃ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠮᠣᠩᠭᠣᠯ ᠴᠡᠷᠢᠭ᠂ ᠲᠤᠰ ᠬᠣᠲᠠ ᠳ᠋ᠤ᠌ ᠭᠡᠨᠡᠳᠲᠡ ᠳᠠᠪᠬᠢᠵᠤ ᠢᠷᠡᠭᠰᠡᠨ ᠪᠥᠭᠡᠳ ᠲᠡᠳᠡᠨ ᠢ᠋ ᠬᠡᠨ ᠴᠦ᠍ ᠬᠦᠰᠡᠨ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠦᠭᠡᠢ᠃ ᠣᠳᠣ ᠪᠠᠲᠤ ᠬᠠᠭᠠᠨ ᠠ᠋ᠴᠠ ᠦᠯᠦ ᠰᠠᠯᠤᠭᠴᠢ᠂ ᠥᠷᠥᠭᠡᠰᠦᠨ ᠨᠢᠳᠦᠲᠦ ᠵᠠᠩᠵᠤᠨ ᠮᠣᠩᠭᠣᠯ ᠴᠡᠷᠢᠭ ᠢ᠋ ᠲᠦᠷᠦᠭᠦᠯᠡᠨ ᠪᠠᠢᠪᠠ᠃ ᠮᠢᠨᠦ ᠨᠥᠬᠥᠷ᠂ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠤᠨ ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠮᠣᠷᠳᠠᠭᠠᠳ ᠡᠷᠭᠢᠵᠦ ᠢᠷᠡᠭᠰᠡᠨ ᠦᠭᠡᠢ᠃ ᠮᠣᠩᠭᠣᠯᠴᠤᠳ ᠮᠢᠨᠦ ᠡᠬᠡ ᠶ᠋ᠢ ᠠᠯᠠᠭᠠᠳ ᠬᠡᠦᠬᠡᠳ ᠢ᠋ ᠮᠢᠨᠢ ᠠᠪᠴᠤ ᠣᠳᠤᠭᠰᠠᠨ ᠶᠤᠮ᠃ ᠬᠡᠷᠴᠡᠭᠡᠢ ᠠᠶᠤᠮᠰᠢᠭᠲᠤ ᠨᠢᠭᠡᠨ ᠮᠣᠩᠭᠣᠯ ᠵᠠᠭᠤᠲᠤ ᠶ᠋ᠢᠨ ᠳᠠᠷᠤᠭᠠ ᠨᠠᠮᠠᠶ᠋ᠢ ᠰᠢᠪᠡᠭᠴᠢᠨ ᠪᠣᠯᠭᠠᠨ ᠠᠪᠤᠪᠠ᠃ ᠪᠢ ᠴᠢᠳᠠᠬᠤ ᠶᠠᠳᠠᠬᠤ ᠪᠠᠷ ᠢ᠋ᠶ᠋ᠠᠨ ᠲᠡᠭᠦᠨ ᠢ᠋ ᠠᠷᠭᠠᠳᠠᠨ ᠵᠢᠰᠤᠷᠳᠠᠵᠤ ᠬᠡᠦᠬᠡᠳ ᠢ᠋ᠶ᠋ᠡᠨ ᠡᠷᠢᠵᠦ ᠣᠯᠤᠨ ᠠᠪᠤᠷᠠᠬᠤ ᠶ᠋ᠢᠨ ᠲᠤᠯᠠ ᠠᠮᠢᠳᠤ ᠶᠠᠪᠤᠬᠤ ᠶᠤᠮᠰᠠᠨ ᠭᠡᠵᠦ ᠬᠦᠰᠡᠯᠡ᠃
ᠮᠢᠨᠦ ᠰᠢᠨᠡ ᠨᠣᠶᠠᠨ ᠪᠠᠯ ᠲᠠᠢ ᠪᠣᠭᠣᠷᠰᠣᠭ᠂ ᠮᠣᠳᠣᠨ ᠤ᠋ ᠮᠥᠭᠥ ᠲᠡᠢ ᠬᠤᠤᠱᠤᠤᠷ ᠲᠸ᠋ ᠲᠠᠭᠠᠯᠠᠳᠠᠭ ᠪᠢᠯᠡ᠃ ᠨᠠᠮᠠᠶ᠋ᠢ ᠳᠡᠷᠭᠡᠳᠡ ᠪᠡᠨ ᠪᠠᠢᠯᠭᠠᠵᠤ ᠪᠠᠢᠭᠠᠳ ᠦᠳᠲᠡᠷ ᠰᠤᠯᠠᠯᠠᠨ ᠴᠢᠯᠥᠭᠡᠯᠡᠬᠦ ᠶ᠋ᠢ ᠡᠰᠡ ᠵᠥᠪᠰᠢᠶᠡᠷᠡᠪᠡ᠃ ᠲᠡᠭᠡᠭᠡᠳ ᠨᠠᠮᠠᠶ᠋ᠢ ᠬᠠᠲᠤᠨ ᠤᠷᠢ— ᠦᠵᠢᠨ ᠡᠬᠡ ᠳ᠋ᠦ᠍ ᠪᠡᠯᠡᠭᠯᠡᠭᠰᠡᠨ ᠳ᠋ᠦ᠍᠂ ᠪᠢ ᠲᠡᠭᠦᠨ ᠦ᠌ ᠠᠰᠠᠷ ᠲᠸ᠋ ᠬᠡᠯᠡᠪᠡ᠃ ᠣᠳᠣ ᠴᠢᠮᠠᠲᠤ ᠶᠠᠪᠤᠬᠤ᠂ ᠮᠥᠷᠭᠥᠬᠦ᠂ ᠨᠠᠷᠢᠨ ᠬᠣᠭᠣᠯᠠᠢ ᠪᠠᠷ ᠢ᠋ᠶ᠋ᠠᠨ ᠶᠠᠷᠢᠬᠤ᠂ ᠡᠪᠲᠡᠢᠬᠡᠨ ᠬᠥᠳᠡᠯᠵᠦ ᠴᠠᠢ ᠠᠶᠠᠭᠠᠯᠠᠬᠤ ᠲᠡᠷᠢᠭᠦᠲᠡᠨ ᠢ᠋ ᠣᠷᠳᠣᠨ ᠤ᠋ ᠢᠵᠠᠭᠤᠷᠲᠠᠨ ᠬᠡᠦᠬᠡᠨ ᠨᠦ᠍ᠭᠦᠳ ᠦ᠋ᠨ ᠠᠳᠠᠯᠢ ᠪᠠᠷ ᠰᠤᠷᠭᠠᠬᠤ ᠶ᠋ᠢᠨ ᠲᠤᠯᠠ ᠨᠠᠮᠠᠶ᠋ᠢ ᠴᠢᠨᠦ ᠳᠡᠷᠭᠡᠳᠡ ᠰᠠᠭᠤᠯᠭᠠᠪᠠ᠃ ᠴᠢ ᠰᠤᠷᠬᠤ ᠶ᠋ᠢ ᠳᠤᠷᠠᠯᠠᠵᠤ ᠪᠠᠢᠬᠤ ᠤᠤ ? ᠭᠡᠪᠡ᠃
—ᠡᠨᠡ ᠪᠦᠭᠦᠳᠡ ᠬᠡᠷᠡᠭ ᠲᠡᠢ ᠶᠤᠮ ᠪᠣᠯ ᠪᠢ ᠴᠥᠮ ᠰᠤᠷᠰᠤᠭᠠᠢ ᠭᠡᠵᠦ ᠶᠦᠯᠳᠥ᠋ᠽ ᠬᠠᠷᠢᠭᠤᠯᠪᠠ᠃
— ᠲᠡᠭᠦᠨ ᠢ᠋ᠶ᠋ᠡᠷ ᠦᠯᠦ ᠪᠠᠷᠠᠮ ᠪᠢ ᠴᠢᠮᠠᠲᠤ ᠰᠣᠨᠢᠨ᠂ ᠠᠶᠤᠮᠰᠢᠭᠲᠠᠢ ᠬᠥᠭᠵᠢᠭᠡᠨᠲᠡᠢ ᠦᠯᠢᠭᠡᠷ ᠶᠠᠷᠢᠵᠤ ᠰᠤᠷᠭᠠᠨᠠ᠃ ᠲᠡᠭᠡᠬᠦ ᠳ᠋ᠦ᠍ ᠡᠵᠡᠨ ᠰᠣᠨᠣᠰᠬᠤ ᠪᠠᠷ ᠦᠷᠭᠦᠯᠵᠢ ᠴᠢᠨᠦ ᠳᠡᠷᠭᠡᠳᠡ ᠢᠷᠡᠨᠡ᠃ ᠲᠡᠭᠡᠭᠡᠳ ᠲᠡᠷᠡ᠂ ᠴᠢᠨᠦ ᠭᠤᠶᠤᠭᠰᠠᠨ ᠪᠦᠬᠦᠨ ᠢ᠋ ᠪᠦᠲᠦᠭᠡᠬᠦ ᠪᠣᠯᠤᠨᠠ᠃ ᠬᠠᠷᠢᠶᠠᠴᠠᠢ ᠬᠥᠯᠦᠭᠰᠡᠨ ᠲᠡᠷᠭᠡᠨ ᠳ᠋ᠦ᠍ ᠰᠠᠭᠤᠵᠤ ᠣᠭᠲᠠᠷᠭᠤᠢ ᠳ᠋ᠤ᠌ ᠶᠠᠪᠤᠭᠴᠢ ᠬᠥᠮᠦᠰ ᠦ᠋ᠨ ᠦᠯᠢᠭᠡᠷ᠂ ᠬᠣᠲᠠ ᠶ᠋ᠢ ᠯᠤᠤ ᠪᠠᠷ ᠪᠠᠷᠢᠭᠤᠯᠤᠭᠰᠠᠨ ᠶᠠᠳᠠᠭᠤ ᠮᠠᠯᠴᠢᠨ ᠤ᠋ ᠦᠯᠢᠭᠡᠷ᠂ ᠲᠡᠷᠡ ᠬᠣᠲᠠᠨ ᠤ᠋ ᠬᠥᠮᠦᠰ ᠤᠬᠢᠯᠠᠳᠠᠭ ᠦᠭᠡᠢ ᠲᠤᠬᠠᠢ ᠪᠠᠰᠠ ᠪᠤᠰᠤ ᠣᠯᠠᠨ ᠢ᠋ ᠪᠢ ᠴᠢᠮᠠᠲᠤ ᠶᠠᠷᠢᠰᠤᠭᠠᠢ ᠭᠡᠵᠡᠢ᠃
ᠶᠦᠯᠳᠥ᠋ᠽ ᠲᠡᠭᠦᠨ ᠡᠴᠡ ᠬᠣᠢᠰᠢ᠂ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠭᠡᠵᠦ ᠵᠣᠪᠠᠬᠤ ᠦᠭᠡᠢ ᠪᠣᠯᠤᠭᠠᠳ᠂ ᠬᠢᠲᠠᠳ ᠪᠦᠰᠡᠭᠦᠢ ᠶ᠋ᠢ ᠥᠪᠡᠷ ᠦ᠋ᠨ ᠥᠮᠥᠭᠯᠡᠭᠴᠢ ᠭᠡᠵᠦ ᠦᠵᠡᠵᠦ᠂ ᠡᠵᠡᠨ ᠢ᠋ ᠤᠴᠠᠷᠠᠬᠤ ᠪᠠᠷ ᠢᠷᠡᠬᠦ ᠳ᠋ᠦ᠍ ᠦᠵᠡᠰᠬᠦᠯᠡᠩᠲᠡᠢ ᠪᠥᠭᠡᠳ ᠡᠶᠡᠯᠳᠡᠭ ᠢ᠋ᠶ᠋ᠡᠷ ᠬᠦᠯᠢᠶᠡ ᠳᠠᠢᠯᠠᠬᠤ᠂ ᠤᠢᠳᠬᠠᠷ ᠢ᠋ ᠰᠡᠷᠭᠦᠭᠡᠬᠦ ᠳ᠋ᠦ᠍ ᠬᠡᠷᠡᠭ ᠪᠣᠯᠬᠤ ᠵᠢᠭᠠᠭᠰᠠᠨ ᠰᠠᠨᠠᠭᠤᠯᠤᠭᠰᠠᠨ ᠵᠦᠢᠯ ᠢ᠋ ᠨᠢ ᠳᠠᠭᠠᠵᠤ᠂ ᠦᠯᠢᠭᠡᠷ ᠰᠣᠨᠣᠰᠳᠠᠭ ᠪᠣᠯᠵᠠᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠶᠠᠨᠴᠡᠴᠡᠭ᠂ ᠠᠯᠲᠠᠨᠴᠢᠮᠡᠭ᠂ ᠬᠡᠷᠡᠢᠳ·ᠮᠥᠩᠬᠡᠨᠠᠰᠤᠨ
ᠬᠢᠨᠠᠭᠴᠢ᠄ ᠲ᠂ ᠬᠦᠮᠦᠵᠢᠯᠲᠦ᠂ ᠪᠠᠯ᠂ ᠠᠷᠢᠭᠤᠨ᠂ ᠠᠯᠲᠠᠨᠴᠢᠮᠡᠭ