ᠪᠠᠲᠤ ᠬᠠᠭᠠᠨ 2-03ᠬᠣᠴᠣᠷᠤᠭᠰᠠᠨ ᠬᠥᠮᠦᠨ ᠬᠣᠬᠢᠷᠠᠳᠠᠭ-ᠪᠠᠲᠤ ᠬᠠᠭᠠᠨ ᠥᠷᠥᠨᠡ ᠵᠦᠭ ᠲᠦ᠍ ᠬᠥᠳᠡᠯᠦᠯᠡ-Bat khaan Бат хаан-ᠷᠣᠮᠠᠨ
261ᠭᠤᠷᠪᠠ ᠬᠣᠴᠣᠷᠤᠭᠰᠠᠨ ᠬᠥᠮᠦᠨ ᠬᠣᠬᠢᠷᠠᠳᠠᠭ
《ᠨᠠᠳᠠᠳᠤ ᠣᠳᠣ ᠪᠤᠭᠤᠷᠤᠯ ᠠᠪᠤ᠂ ᠡᠮᠡᠭᠡᠨ ᠡᠵᠢ᠂ ᠭᠡᠷ ᠣᠷᠣᠨ ᠪᠠᠢᠬᠤ ᠦᠭᠡᠢ᠃ ᠠᠬᠠ᠂ ᠡᠭᠡᠴᠢ᠂ ᠳᠡᠭᠦᠦ ᠨᠠᠷ ᠪᠠᠢᠬᠤ ᠦᠭᠡᠢ᠃ ᠴᠥᠮ ᠬᠤᠢ ᠳ᠋ᠤ᠌ ᠬᠡᠢᠰᠬᠦ ᠰᠦᠷᠡᠯ ᠠᠳᠠᠯᠢ ᠦᠭᠡᠢ ᠪᠣᠯᠵᠠᠢ᠃ ᠮᠢᠨᠦ ᠭᠠᠭᠴᠠ ᠬᠠᠨᠢ ᠭᠡᠪᠡᠯ ᠮᠠᠭᠤ ᠡᠮᠡᠭᠡᠯᠲᠡᠢ᠂ ᠪᠠᠶᠠᠨᠳᠧᠷ ᠬᠠᠭᠠᠨ ᠤ᠋ ᠮᠣᠷᠢ ᠦᠯᠡᠳᠡᠵᠡᠢ᠃ ᠪᠢ ᠬᠥᠳᠡᠭᠡ ᠲᠠᠯᠠ ᠶ᠋ᠢᠨ ᠰᠠᠯᠬᠢᠨ ᠳ᠋ᠤ᠌ ᠰᠣᠬᠣᠷ ᠴᠢᠨᠣᠠ ᠮᠡᠲᠦ ᠲᠠᠭᠤᠭᠳᠠᠵᠤ ᠪᠠᠢᠨᠠ᠃ ᠶᠠᠮᠠᠷ ᠨᠢᠭᠡᠨ ᠴᠡᠷᠢᠭ ᠦ᠋ᠨ ᠪᠠᠭ ᠲᠤ᠌ ᠡᠯᠰᠡᠬᠦ ᠬᠡᠷᠡᠭᠲᠡᠢ ᠪᠠᠢᠨᠠ᠃ ᠭᠡᠲᠡᠯᠡ ᠨᠠᠮᠠᠶ᠋ᠢ ᠬᠡᠨ ᠴᠦ᠍ ᠠᠪᠬᠤ ᠪᠢᠯᠡ? ᠨᠠᠳᠠᠳᠤ ᠰᠡᠯᠡᠮᠡ ᠵᠢᠳᠠ ᠠᠯᠢ ᠨᠢ ᠴᠦ᠍ ᠦᠭᠡᠢ᠂ ᠵᠥᠪᠬᠡᠨ ᠢᠷᠯᠡᠭᠰᠡᠨ ᠬᠤᠭᠤᠷᠬᠠᠢ ᠬᠢᠲᠤᠭᠠ ᠠᠪᠴᠤ ᠭᠠᠷᠤᠯᠠ᠃ ᠬᠥᠮᠦᠰ ᠴᠥᠮ ᠲᠤᠰ ᠲᠤᠰ ᠤ᠋ᠨ ᠢ᠋ᠶ᠋ᠠᠨ ᠣᠪᠣᠭ ᠠᠢᠮᠠᠭ ᠢ᠋ᠶ᠋ᠠᠷ ᠶᠠᠪᠤᠵᠤ᠂ ᠭᠠᠳᠠᠨᠠ ᠶ᠋ᠢᠨ ᠬᠥᠮᠦᠨ ᠢ᠋ ᠴᠡᠷᠢᠭ ᠲᠡᠭᠡᠨ ᠶᠡᠷᠦ ᠣᠷᠣᠭᠤᠯᠳᠠᠭ ᠦᠭᠡᠢ᠃ ᠨᠠᠳᠠ ᠰᠢᠭ᠋ ᠪᠠᠢᠭᠠ ᠨᠢ ᠭᠤᠢᠯᠢᠨᠴᠢᠨ᠂ ᠳᠡᠭᠡᠷᠡᠮᠴᠢᠨ᠂ ᠬᠡᠭᠡᠷᠡ ᠶ᠋ᠢᠨ ᠬᠡᠷᠦᠮᠡᠯ ᠬᠥᠮᠦᠰ ᠪᠢᠵᠡ᠁
ᠶᠠᠮᠠᠷ ᠴᠥ᠍ ᠴᠡᠷᠢᠭ ᠨᠠᠮᠠᠶ᠋ᠢ ᠣᠯᠵᠠ ᠬᠠᠢᠭᠰᠠᠨ ᠮᠣᠷᠢᠨ ᠤ᠋ ᠬᠤᠯᠠᠭᠠᠢᠴᠢ ᠭᠡᠵᠦ ᠪᠤᠷᠤᠭᠤᠳᠬᠠᠵᠤ ᠮᠢᠨᠦ ᠬᠠᠷᠠ ᠮᠣᠷᠢ᠂ ᠡᠮᠡᠭᠡᠯ᠂ ᠪᠤᠯᠢᠭᠠᠷᠢ ᠪᠣᠭᠴᠣ ᠶ᠋ᠢ ᠪᠤᠯᠢᠶᠠᠨ ᠠᠪᠴᠤ ᠴᠢᠳᠠᠨᠠ᠁》
ᠮᠥᠰᠥ᠋ᠺ ᠬᠢᠵᠠᠭᠠᠷ ᠦᠭᠡᠢ ᠲᠠᠯᠠ ᠶ᠋ᠢᠨ ᠳᠣᠪᠣᠴᠠᠭ ᠳᠡᠭᠡᠷᠡ ᠭᠤᠨᠢᠬᠠᠷᠠᠨ ᠰᠠᠭᠤᠵᠤ ᠲᠡᠭᠡᠵᠦ ᠪᠣᠳᠣᠯᠠ᠃ ᠳᠣᠣᠷᠠᠲᠤ ᠵᠢᠯᠠᠭᠠ ᠳ᠋ᠤ᠌ ᠬᠠᠲᠠᠵᠤ ᠪᠠᠢᠭᠠ ᠱᠠᠯᠪᠠᠭ ᠤ᠋ᠨ ᠳᠡᠷᠭᠡᠳᠡ ᠲᠤᠷᠠᠵᠤ ᠡᠴᠡᠭᠰᠡᠨ ᠬᠡᠭᠡᠷ ᠮᠣᠷᠢ ᠢᠳᠡᠰᠢᠯᠡᠵᠦ ᠪᠠᠢᠪᠠ᠃
ᠮᠥᠰᠥ᠋ᠺ ᠨᠡᠯᠢᠶᠡᠳ ᠬᠡᠳᠦᠨ ᠡᠳᠦᠷ ᠺᠢᠫᠴᠠᠺ ᠤ᠋ᠨ ᠲᠠᠯᠠ ᠶ᠋ᠢᠨ ᠨᠤᠲᠤᠭ ᠢ᠋ᠶ᠋ᠠᠷ ᠬᠡᠰᠦᠵᠦ᠂ ᠴᠡᠷᠢᠭ ᠲᠡᠭᠡᠨ ᠣᠷᠣᠭᠤᠯᠬᠤ ᠶ᠋ᠢ ᠭᠤᠶᠤᠭᠰᠠᠨ᠂ ᠭᠡᠲᠡᠯᠡ ᠶᠠᠷᠢᠬᠤ ᠴᠥ᠍ ᠬᠥᠮᠦᠨ ᠦᠯᠦ ᠣᠯᠳᠠᠪᠠ᠃《ᠪᠤᠯᠢᠶᠠᠨ ᠠᠪᠤᠭᠰᠠᠨ ᠲᠡᠢᠨ ᠦ᠌ ᠣᠯᠵᠠ ᠪᠠᠨ ᠴᠢᠮᠠ ᠲᠠᠢ ᠬᠤᠪᠢᠶᠠᠬᠤ ᠭᠡᠵᠢ ᠤᠤ? ᠲᠡᠭᠡᠵᠦ ᠨᠣᠪᠰᠢᠷᠠᠬᠤ ᠳ᠋ᠤ᠌ ᠬᠡᠨ ᠴᠦ᠍ ᠳᠤᠷᠠᠯᠠᠬᠤ ᠠᠵᠢ᠃ ᠴᠢᠨᠦ ᠣᠪᠣᠭ᠂ ᠲᠥᠷᠥᠯ᠂ ᠨᠤᠲᠤᠭ ᠴᠢᠨᠢ ᠬᠠᠮᠢᠭᠠ ᠪᠠᠢᠨᠠ? ᠴᠢ ᠯᠠᠪ ᠨᠢᠭᠡ ᠰᠢᠪᠰᠢᠭ ᠲᠡᠢ ᠬᠡᠷᠡᠭ ᠲᠠᠷᠬᠠᠭᠠᠭᠠᠳ ᠡᠷᠭᠢᠵᠦ ᠨᠢᠭᠤᠷ ᠢ᠋ᠶ᠋ᠠᠨ ᠬᠠᠷᠠᠭᠤᠯᠵᠤ ᠴᠢᠳᠠᠬᠤ ᠦᠭᠡᠢ ᠶᠠᠪᠤᠭᠠ ᠪᠢᠵᠡ?》ᠭᠡᠵᠡᠢ᠃
ᠨᠢᠭᠡᠨ ᠪᠠᠭᠤᠴᠠ ᠳ᠋ᠤ᠌ ᠲᠣᠬᠢᠶᠠᠯᠳᠤᠭᠰᠠᠨ ᠬᠠᠳ᠋ᠵᠢ ᠶ᠋ᠢᠨ ᠪᠣᠭᠣᠯᠲᠤ ᠪᠦᠬᠦᠢ ᠬᠤᠷᠠᠭᠠᠨ ᠮᠠᠯᠠᠭᠠᠢ ᠲᠠᠢ ᠲᠡᠷᠢᠭᠦᠯᠡᠭᠴᠢ ᠬᠥᠮᠦᠨ᠂ ᠴᠠᠭᠠᠨ ᠰᠡᠳᠬᠢᠯ ᠢ᠋ᠶ᠋ᠡᠷ ᠢᠨᠢᠶᠡᠵᠦ ᠡᠶᠡᠯᠳᠡᠭ ᠢ᠋ᠶ᠋ᠡᠷ ᠬᠡᠯᠡᠭᠰᠡᠨ ᠨᠢ᠄《ᠳ᠋ᠵᠢᠬᠠᠩᠭᠢᠷ ᠤ᠋ᠨ ᠴᠢᠩᠳᠠ ᠲᠤᠰᠢᠶᠠᠯ᠂ ᠠᠶᠠᠨ ᠲᠡᠢᠨ ᠳ᠋ᠦ᠍ ᠭᠠᠭᠴᠠᠬᠦ ᠮᠢᠩᠭᠠ᠂ ᠵᠠᠭᠤ᠂ ᠠᠷᠪᠠ ᠪᠠᠷ ᠬᠤᠪᠢᠶᠠᠷᠢᠯᠠᠭᠰᠠᠨ ᠪᠦᠬᠦᠢᠯᠡ ᠣᠪᠣᠭᠲᠠᠨ ᠠᠢᠮᠠᠭ ᠢ᠋ᠶ᠋ᠠᠷ ᠡᠯᠰᠡᠵᠦ ᠵᠢᠭᠢᠲ ᠪᠦᠬᠦᠨ ᠰᠠᠢᠨ ᠮᠣᠷᠢᠲᠠᠢ᠂ ᠪᠦᠷᠢᠨ ᠪᠦᠲᠦᠨ ᠵᠡᠪᠰᠡᠭ ᠲᠡᠢ ᠪᠠᠢᠰᠤᠭᠠᠢ ᠭᠡᠰᠡᠨ ᠢ᠋ ᠴᠢ ᠮᠠᠭᠠᠳ ᠮᠡᠳᠡᠨᠡ ᠪᠠᠢᠬᠠ᠂ ᠡᠰᠡ ᠲᠡᠭᠡᠪᠡᠯ ᠠᠶᠠᠨ ᠲᠡᠢᠨ ᠦ᠌ ᠴᠡᠷᠢᠭ ᠪᠢᠰᠢ᠂ ᠬᠠᠷᠢᠭᠤᠯᠤᠭᠴᠢ ᠦᠭᠡᠢ ᠳᠥᠷᠪᠡ ᠪᠣᠯᠤᠨᠠ᠁ ᠲᠡᠷᠡᠴᠢᠯᠡᠨ ᠪᠢᠳᠡ ᠲᠡᠨᠦᠮᠡᠯ ᠭᠠᠭᠴᠠ ᠡᠲᠡᠭᠡᠳ ᠢ᠋ ᠮᠣᠷᠢ ᠠ᠋ᠴᠠ ᠨᠢ ᠪᠠᠭᠤᠯᠭᠠᠭᠠᠳ ᠪᠠᠢᠴᠠᠭᠠᠨ ᠰᠢᠭᠦᠯ ᠦᠭᠡᠢ᠂ ᠵᠣᠳᠣᠵᠤ ᠵᠠᠨᠴᠢᠳᠠᠭ ᠢ᠋ ᠪᠠᠰᠠ ᠮᠡᠳᠡᠨᠡ᠃ ᠲᠡᠢᠮᠦ ᠲᠤᠰᠢᠶᠠᠯ ᠢ᠋ ᠴᠢ ᠰᠣᠨᠣᠰᠤᠭᠰᠠᠨ ᠤᠤ? ᠭᠡᠪᠡᠴᠦ ᠪᠢ ᠴᠢᠮᠠᠶ᠋ᠢ ᠦᠷᠦ ᠡᠪᠡᠳᠴᠦ ᠪᠠᠢᠨᠠ᠃ ᠬᠡᠷᠪᠡ ᠮᠠᠨ ᠤ᠋ ᠣᠪᠣᠭ ᠤ᠋ᠨ ᠬᠦᠢ᠂ ᠴᠢᠮᠠᠶ᠋ᠢ ᠬᠠᠷᠠᠵᠤ ᠡᠰᠡ ᠵᠠᠩᠳᠤᠷᠪᠠᠯ ᠪᠢ ᠴᠢᠮᠠᠶ᠋ᠢ ᠰᠤᠯᠠ ᠮᠣᠷᠢᠳ ᠢ᠋ ᠮᠠᠯᠯᠠᠬᠤ ᠠᠭᠲᠠᠴᠢ ᠪᠣᠯᠭᠠᠰᠤᠭᠠᠢ᠃ ᠪᠢ ᠲᠡᠭᠡᠭᠡᠳ ᠪᠠᠰᠠ ᠴᠥ᠍ ᠵᠡᠪᠰᠡᠭ ᠥᠭᠭᠦᠨᠡ᠃ ᠦᠵᠡᠪᠡᠯ ᠴᠢᠮᠠᠲᠤ ᠵᠡᠪᠰᠡᠭ ᠪᠠᠢᠬᠤ ᠦᠭᠡᠢ ᠠᠵᠤᠭᠤ᠃ ᠬᠠᠷᠢᠨ ᠲᠡᠭᠦᠨ ᠦ᠌ ᠬᠠᠷᠢᠭᠤ ᠳ᠋ᠤ᠌ ᠴᠢ᠂ ᠨᠠᠳᠠᠳᠤ ᠮᠣᠷᠢ ᠪᠠᠨ ᠦᠭᠭᠦᠭᠳᠦᠨ᠃ ᠡᠮᠢᠶᠡᠬᠦ ᠬᠡᠷᠡᠭ ᠦᠭᠡᠢ᠂ ᠪᠢ ᠴᠢᠮᠠᠲᠤ ᠥᠭᠡᠷᠡ ᠠᠷᠠᠢ ᠨᠣᠮᠣᠬᠠᠨ ᠮᠣᠷᠢ ᠥᠭᠰᠦᠭᠡᠢ᠃ ᠰᠡᠯᠡᠮᠡ ᠶ᠋ᠢᠨ ᠦᠨᠡ ᠳ᠋ᠦ᠍ ᠭᠤᠷᠪᠠᠨ ᠦᠬᠡᠷ᠂ ᠪᠠᠮᠪᠠᠢ ᠵᠢᠳᠠ ᠬᠣᠶᠠᠷ ᠤ᠋ᠨ ᠦᠨᠡ ᠳ᠋ᠦ᠍ ᠭᠤᠷᠪᠠᠨ ᠦᠬᠡᠷ᠂ ᠪᠣᠯᠣᠳ ᠳᠤᠭᠤᠯᠠᠭᠠ ᠶ᠋ᠢᠨ ᠦᠨᠡ ᠳ᠋ᠦ᠍ ᠭᠤᠷᠪᠠᠨ ᠦᠬᠡᠷ᠂ ᠰᠠᠭᠠᠳᠠᠭ ᠤ᠋ᠨ ᠦᠨᠡ ᠪᠠᠰᠠ ᠵᠢᠷᠭᠤᠭᠠᠨ ᠦᠬᠡᠷ᠂ ᠪᠦᠭᠦᠳᠡ ᠠᠷᠪᠠᠨ ᠲᠠᠪᠤᠨ ᠦᠬᠡᠷ ᠲᠠᠭᠤᠵᠤ ᠢᠷᠡᠭᠡᠷᠡᠢ᠃ ᠴᠢ ᠴᠢᠳᠠᠯ ᠲᠠᠢ ᠵᠢᠭᠢᠲ᠂ ᠠᠷᠪᠠ ᠭᠠᠷᠤᠢ ᠦᠬᠡᠷ ᠢ᠋ ᠲᠠᠭᠤᠵᠤ ᠢᠷᠡᠬᠦ ᠳ᠋ᠦ᠍ ᠶᠠᠭᠤᠨ ᠳ᠋ᠤ᠌ ᠵᠦᠳᠡᠷᠡᠬᠦ ᠠᠵᠢ ᠭᠡᠵᠡᠢ᠃ ᠮᠦᠰᠦᠢ᠍ᠺ ᠲᠣᠯᠣᠭᠠᠢ ᠪᠠᠨ ᠰᠠᠵᠢᠨ᠂
— ᠡᠨᠡ ᠲᠤᠬᠠᠢ ᠰᠠᠨᠠᠬᠤ ᠴᠤ᠌ ᠬᠡᠷᠡᠭ ᠦᠭᠡᠢ ᠭᠡᠬᠦ ᠳ᠋ᠦ᠍᠂
— ᠴᠢ ᠠᠶᠠᠨ ᠲᠡᠢᠨ ᠳ᠋ᠦ᠍ ᠭᠠᠭᠴᠠ ᠰᠡᠯᠡᠮᠡ ᠲᠡᠢ ᠶᠠᠪᠤᠵᠤ ᠪᠣᠯᠤᠨᠠ᠃ ᠪᠤᠰᠤᠳ ᠵᠡᠪᠰᠡᠭ ᠢ᠋ ᠬᠣᠵᠢᠮ ᠳᠠᠢᠰᠤᠨ ᠠ᠋ᠴᠠ ᠪᠤᠯᠢᠶᠠᠨ ᠠᠪᠤᠭᠲᠤᠨ᠃ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠬᠠᠷᠢᠭᠤ ᠲᠥᠯᠥᠭᠡᠰᠦ ᠪᠠᠢᠳᠠᠭ ᠦᠭᠡᠢ ᠭᠡᠯᠡ᠃
ᠮᠦᠰᠦᠢ᠍ᠺ ᠬᠡᠲᠦᠷᠬᠡᠢ ᠪᠠᠶᠠᠰᠤᠭᠴᠢ ᠲᠡᠷᠢᠭᠦᠯᠡᠭᠴᠢ ᠡᠴᠡ ᠲᠦᠷᠭᠡᠨᠡ ᠬᠣᠯᠠᠳᠠᠵᠤ᠂ ᠤᠷᠢᠳᠤ ᠬᠡᠪ ᠢ᠋ᠶ᠋ᠡᠷ ᠲᠠᠯᠠ ᠬᠡᠭᠡᠷᠡ ᠪᠡᠷ ᠲᠡᠨᠦᠭᠦᠴᠢᠯᠡᠵᠡᠢ᠃
ᠮᠠᠭᠤ ᠠᠵᠠᠲᠠᠨ ᠭᠠᠢ ᠪᠠᠷ ᠨᠡᠢᠯᠡᠳᠡᠭ᠃ ᠮᠦᠰᠦᠢ᠍ᠺ ᠠᠯᠤᠰ ᠡᠯᠡᠰᠦᠨ ᠮᠠᠩᠬᠠᠨ ᠤ᠋ ᠬᠣᠭᠣᠷᠣᠨᠳᠣ ᠳᠣᠯᠣᠭᠠᠨ ᠮᠣᠷᠢ ᠲᠠᠢ ᠬᠥᠮᠦᠨ ᠶᠠᠪᠤᠬᠤ ᠶ᠋ᠢ ᠬᠠᠷᠠᠪᠠ᠃ ᠠᠢ᠂ ᠶᠠᠮᠠᠷ ᠮᠣᠷᠢᠳ ᠪᠣᠢ?
ᠬᠥᠭᠰᠢᠨ ᠬᠠᠯᠴᠠᠷᠠᠭᠰᠠᠨ ᠠᠳᠠᠰᠬᠠ ᠠᠵᠢ᠃ ᠶᠣᠰᠣᠲᠤ ᠮᠦᠰᠦᠢ᠍ᠯᠢᠮᠲᠡᠨ ᠡᠢᠮᠦ ᠠᠳᠤᠭᠤᠰᠤ ᠶ᠋ᠢ ᠠᠭᠲᠠ ᠮᠣᠷᠢ ᠭᠡᠳᠡᠭ ᠡᠷᠬᠢᠮ ᠨᠡᠷᠡ ᠪᠡᠷ ᠨᠡᠷᠡᠯᠡᠬᠦ ᠴᠦ᠍ ᠦᠭᠡᠢ᠂ ᠲᠡᠳᠡᠨ ᠳ᠋ᠦ᠍ ᠪᠣᠯ ᠰᠦᠷᠡᠯ ᠬᠣᠭ ᠢ᠋ ᠵᠥᠭᠡᠭᠡᠬᠦ ᠠᠴᠢᠶᠠᠨ ᠤ᠋ ᠮᠠᠯ᠂ ᠶᠠᠰᠤᠨ ᠬᠡᠳᠡᠷᠭᠡ ᠪᠢᠯᠡ᠃
ᠲᠡᠳᠡ ᠮᠣᠷᠢ ᠲᠠᠢ ᠬᠥᠮᠦᠰ ᠢ᠋ ᠵᠡᠪᠰᠡᠭᠯᠡᠭᠰᠡᠨ ᠪᠥᠭᠡᠳ ᠬᠥᠮᠦᠨ ᠪᠦᠷᠢ ᠶ᠋ᠢᠨ ᠭᠠᠷ ᠲᠤ᠌ ᠨᠠᠷᠢᠨ ᠵᠢᠳᠠ ᠭᠤᠯᠵᠠᠯᠵᠠᠨ ᠪᠠᠢᠯᠠ᠃ ᠡᠢᠮᠦ ᠠᠮᠢᠲᠠᠳ ᠲᠠᠢ ᠴᠦᠯ ᠲᠠᠯᠠ ᠳ᠋ᠤ᠌ ᠤᠴᠠᠷᠠᠬᠤ ᠠᠶᠤᠯᠲᠠᠢ ᠬᠡᠷᠡᠭ᠃ ᠲᠡᠭᠡᠭᠡᠳ ᠮᠦᠰᠦᠢ᠍ᠺ ᠳᠣᠪᠣᠴᠠᠭ ᠠ᠋ᠴᠠ ᠪᠠᠭᠤᠨ ᠬᠡᠭᠡᠷ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠭᠠᠳ ᠬᠠᠵᠠᠭᠤ ᠲᠡᠰᠢ ᠵᠠᠢᠯᠠᠨ ᠶᠠᠪᠤᠵᠠᠢ᠃
ᠲᠡᠨᠳᠡ ᠡᠴᠡ ᠡᠯᠡᠰᠦᠨ ᠮᠠᠩᠬᠠ ᠶ᠋ᠢ ᠳᠠᠪᠠᠵᠤ ᠬᠠᠭᠠᠰ ᠲᠣᠭᠣᠷᠢᠭ ᠵᠠᠮ ᠢ᠋ᠶ᠋ᠠᠷ ᠲᠣᠭᠣᠷᠢᠭᠠᠳ ᠦᠵᠡᠲᠡᠯᠡ᠂ ᠳᠣᠯᠣᠭᠠᠨ ᠮᠣᠷᠢᠲᠠᠨ ᠪᠠᠰᠠ ᠯᠠ ᠡᠮᠦᠨᠡ ᠨᠢ ᠭᠠᠷᠴᠤ ᠢᠷᠡᠭᠡᠳ ᠨᠡᠩ ᠣᠢᠷᠠᠲᠤᠵᠠᠢ᠃ ᠲᠡᠭᠡᠭᠡᠳ ᠲᠡᠳᠡ ᠶᠠᠭᠤᠮᠠ ᠪᠠᠷ ᠤᠷᠤᠯᠳᠤᠵᠤ᠂ᠨᠠᠢ᠍ᠮᠠᠳᠠᠬᠢ ᠬᠥᠮᠦᠨ ᠨᠢ ᠬᠥᠲᠥᠯ ᠳᠡᠭᠡᠷᠡ ᠬᠠᠷᠠᠭᠤᠯ ᠬᠠᠷᠠᠨ ᠬᠡᠪᠲᠡᠵᠡᠢ᠃ ᠲᠡᠳᠡ ᠲᠡᠮᠡᠭᠡᠨ ᠦ᠌ ᠮᠢᠬᠠᠨ ᠳᠡᠭᠡᠷᠡ ᠡᠴᠡ ᠪᠥᠬᠡ ᠶ᠋ᠢᠨ ᠬᠢᠲᠤᠭᠠ ᠪᠠᠷᠢᠨ ᠠᠵᠢᠯᠯᠠᠵᠤ ᠨᠢᠭᠡᠨ ᠨᠢ ᠴᠢᠰᠤᠲᠠᠢ ᠭᠠᠷ ᠢ᠋ᠶ᠋ᠠᠷ ᠳᠠᠯᠠᠯᠤᠨ᠂
— ᠭᠠᠭᠴᠠ ᠴᠢᠨᠣᠠ᠂ ᠵᠣᠷᠢᠭᠲᠤ ᠪᠦᠷᠭᠦᠳ᠂ ᠲᠠᠴᠢᠶᠠᠳᠠᠭᠰᠠᠨ ᠪᠠᠷᠰ ᠴᠢ ᠰᠣᠨᠣᠰ ! ᠪᠢᠳᠡᠨ ᠦ᠌ ᠬᠠᠮᠲᠤ ᠢᠳᠡᠯᠴᠡᠬᠦ ᠳᠤᠷᠠᠲᠠᠢ ᠤᠤ ? ᠭᠡᠪᠡ᠃
ᠮᠦᠰᠥ᠋ᠺ ᠬᠣᠶᠠᠷ ᠬᠣᠨᠣᠭ ᠶᠠᠭᠤ ᠴᠥ᠍ ᠢᠳᠡᠭᠡ ᠦᠭᠡᠢ᠂ ᠤᠳᠠᠲᠠᠯᠠ ᠲᠦᠳᠡᠭᠡᠯᠵᠡᠭᠰᠡᠨ ᠦᠭᠡᠢ ᠮᠣᠷᠢ ᠪᠠᠨ ᠴᠢᠳᠥᠷᠯᠡᠭᠡᠳ ᠲᠡᠮᠡᠭᠡ ᠤᠷᠤᠭᠤ ᠣᠴᠢᠯᠠ᠃ ᠨᠢᠭᠡᠨ ᠬᠥᠮᠦᠨ᠂
—ᠲᠣᠯᠣᠭᠠᠢ ᠶ᠋ᠢ ᠠᠪᠤᠭᠲᠤᠨ᠃ ᠪᠢᠳᠡ ᠴᠥᠮ ᠢ᠋ ᠠᠪᠴᠤ ᠴᠢᠳᠠᠬᠤ ᠦᠭᠡᠢ ᠭᠡᠬᠦ ᠳ᠋ᠦ᠍᠂ ᠮᠦᠰᠥ᠋ᠺ《ᠲᠡᠳᠡ ᠭᠤᠢᠯᠢᠨᠴᠢᠨ ᠮᠡᠲᠦ 》ᠭᠡᠵᠦ ᠰᠡᠳᠬᠢᠪᠡᠴᠦ ᠥᠯᠥᠰᠬᠦ ᠨᠢ ᠬᠡᠴᠡᠭᠦᠦ ᠪᠠᠢᠪᠠ᠃
— ᠬᠡᠨ ᠦ᠌ ᠲᠡᠮᠡᠭᠡ ᠪᠣᠢ?
— ᠡᠵᠡᠨ ᠨᠢ ᠬᠣᠯᠠ ᠪᠣᠢ! ᠴᠢᠮᠠ ᠠ᠋ᠴᠠ ᠠᠰᠠᠭᠤᠬᠤ ᠦᠭᠡᠢ ᠭᠡᠪᠡ᠃
ᠥᠨᠳᠥᠷ ᠲᠤᠷᠠᠩᠬᠠᠢ ᠬᠢᠯᠢ ᠶ᠋ᠢᠨ ᠵᠢᠬᠢᠲ ᠬᠢᠲᠤᠭᠠ ᠪᠠᠷ ᠬᠤᠷᠳᠤᠨ ᠣᠭᠲᠣᠴᠢᠨ ᠲᠡᠮᠡᠭᠡᠨ ᠦ᠌ ᠲᠣᠯᠣᠭᠠᠢ ᠶ᠋ᠢ ᠰᠠᠯᠭᠠᠵᠤ᠂
— ᠮᠠ ᠭᠡᠵᠦ ᠮᠦᠰᠥ᠋ᠺ ᠲᠦ᠍ ᠥᠭᠭᠦᠯᠡ᠃
ᠮᠦᠰᠥ᠋ᠺ ᠲᠠᠯᠠᠷᠬᠠᠵᠤ᠂ ᠲᠡᠮᠡᠭᠡᠨ ᠦ᠌ ᠲᠣᠯᠣᠭᠠᠢ ᠶ᠋ᠢ ᠠᠯᠴᠢᠭᠤᠷ ᠲᠤ᠌ ᠪᠣᠭᠣᠪᠠ᠃
— ᠲᠠᠨᠠᠷ ᠠᠯᠢ ᠪᠠᠭ ᠤ᠋ᠨ ᠬᠥᠮᠦᠰ ᠪᠣᠢ ᠭᠡᠪᠡᠯ᠂
—ᠳᠡᠭᠡᠳᠦ ᠵᠣᠷᠢᠭᠲᠤ ᠪᠠᠭᠠᠲᠤᠷ ᠪᠠᠢ᠍ᠢ᠍᠊ — ᠮᠣᠷᠠᠲ ᠤ᠋ᠨ ᠴᠡᠷᠢᠭ ᠭᠡᠪᠡ᠃
— ᠲᠠᠨ ᠤ᠋ ᠪᠠᠭ ᠶᠡᠬᠡ ᠤᠤ ?ᠭᠡᠪᠡᠯ᠂
— ᠶᠡᠬᠡ ᠪᠢᠰᠢ ᠪᠣᠯᠪᠠᠴᠤ ᠪᠠᠭᠠᠲᠤᠷᠯᠢᠭ᠂ ᠬᠡᠷᠪᠡ ᠴᠢ ᠨᠡᠮᠡᠵᠦ ᠣᠷᠣᠪᠠᠯ ᠶᠢᠰᠦ ᠪᠣᠯᠤᠨᠠ᠃ ᠡᠭᠡᠯᠢᠲᠡᠢ ᠲᠣᠭᠠ ᠭᠡᠯᠡ᠃
— ᠳ᠋ᠵᠢᠬᠠᠩᠬᠢᠷ ᠤ᠋ᠨ ᠴᠡᠷᠢᠭ ᠲᠡᠢ ᠬᠠᠮᠲᠤ ᠶᠠᠪᠤᠬᠤ ᠤᠤ?
— ᠶᠠᠭᠤᠨ ᠳ᠋ᠤ᠌ ᠡᠰᠡ ᠶᠠᠪᠤᠬᠤ ᠪᠢᠯᠡ! ᠴᠢᠨᠠᠭᠰᠢᠳᠠ ᠴᠢᠨᠦ ᠠᠳᠠᠯᠢ ᠲᠡᠨᠦᠭᠦᠴᠢᠯᠡᠭᠴᠢᠳ ᠲᠦ᠍ ᠴᠥᠭᠡᠨ ᠦᠭᠡᠢ ᠲᠣᠬᠢᠶᠠᠯᠳᠤᠬᠤ ᠳ᠋ᠤ᠌ ᠪᠢᠳᠡ ᠪᠠᠢ᠍ᠢ᠊ — ᠮᠣᠷᠠᠲ ᠤ᠋ᠨ ᠨᠣᠭᠣᠭᠠᠨ ᠲᠤᠭ ᠤ᠋ᠨ ᠳᠣᠣᠷᠠ ᠨᠢᠭᠡᠨ ᠪᠦᠲᠦᠨ ᠲᠦᠮᠡᠲᠦ ᠬᠤᠷᠠᠯᠳᠤᠭᠤᠯᠤᠨᠠ᠃
ᠬᠥᠲᠥᠯ ᠳᠡᠭᠡᠷᠡᠬᠢ ᠬᠠᠷᠠᠭᠤᠯ ᠬᠠᠰᠬᠢᠷᠤᠨ᠂
— ᠠᠯᠤᠰ ᠲᠤ᠌ ᠬᠥᠮᠦᠨ ᠦᠵᠡᠭᠳᠡᠵᠦ ᠪᠠᠢᠨᠠ᠃ ᠡᠵᠡᠨ ᠨᠢ ᠥᠯᠥᠰᠦᠭᠰᠡᠨ ᠵᠣᠴᠢᠳ ᠢ᠋ ᠠᠪᠴᠢᠷᠠᠵᠤ ᠪᠠᠢᠭᠠ ᠪᠣᠯᠤᠯᠲᠠᠢ ᠭᠡᠪᠡ᠃ ᠪᠦᠭᠦᠳᠡᠭᠡᠷ ᠰᠠᠨᠳᠤᠷᠴᠤ᠂ ᠭᠠᠷ ᠤ᠋ᠨ ᠴᠢᠰᠤ ᠶ᠋ᠢ ᠡᠯᠡᠰᠦ ᠪᠡᠷ ᠠᠷᠴᠢᠭᠠᠳ᠂ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠨ ᠶᠡᠬᠡ ᠵᠠᠮ ᠠ᠋ᠴᠠ ᠵᠠᠢᠯᠠᠵᠤ ᠴᠤᠪᠤᠭᠰᠠᠭᠠᠷ ᠶᠠᠭᠠᠷᠠᠨ ᠶᠠᠪᠤᠵᠠᠢ᠃
ᠬᠢᠯᠠᠷ ᠨᠢᠳᠦᠲᠦ ᠬᠥᠮᠦᠨ᠂ ᠮᠦᠰᠥ᠋ᠺ ᠲᠡᠢ ᠵᠡᠷᠭᠡᠴᠡᠨ᠂
— ᠪᠢᠳᠡᠨ ᠦ᠌ ᠬᠠᠮᠲᠤ ᠠᠮᠢ ᠵᠤᠯᠪᠠᠭᠲᠤᠨ᠂ ᠡᠵᠡᠨ ᠨᠢ ᠲᠡᠮᠡᠭᠡᠨ ᠦ᠌ ᠲᠣᠯᠣᠭᠠᠢ ᠶ᠋ᠢ ᠴᠢᠨᠦ ᠳᠡᠷᠭᠡᠳᠡ ᠡᠴᠡ ᠣᠯᠤᠭᠠᠳ᠂ ᠴᠢᠨᠦ ᠲᠣᠯᠣᠭᠠᠢ ᠶ᠋ᠢ ᠠᠪᠤᠨᠠ᠃ ᠪᠢ ᠲᠤᠰ ᠪᠠᠭ ᠴᠡᠷᠢᠭ ᠦ᠋ᠨ ᠵᠠᠬᠢᠷᠤᠯ ᠪᠠᠭᠠᠲᠤᠷ ᠪᠠᠢ᠍ᠢ᠊ — ᠮᠣᠷᠠᠲ ᠪᠠᠢᠨᠠ᠃ ᠴᠢᠮᠠᠶ᠋ᠢ ᠥᠪᠡᠷ ᠦ᠋ᠨ ᠲᠤᠰᠠᠯᠠᠬᠤ ᠪᠣᠯᠭᠠᠰᠤᠭᠠᠢ ᠭᠡᠪᠡ᠃
ᠮᠦᠰᠥ᠋ᠺ᠂《ᠳᠠᠭᠤᠳᠠᠭᠰᠠᠨ ᠬᠥᠮᠦᠨ ᠤᠷᠤᠭᠤ ᠣᠴᠢ 》ᠭᠡᠳᠡᠭ ᠺᠢᠫᠴᠠᠺ ᠤ᠋ᠨ ᠬᠠᠭᠤᠴᠢᠨ ᠦᠭᠡ ᠶ᠋ᠢ ᠰᠠᠨᠠᠵᠤ ᠪᠠᠢ᠍ᠢ᠊ — ᠮᠣᠷᠠᠲ ᠤ᠋ᠨ ᠬᠣᠢᠨᠠ ᠠ᠋ᠴᠠ ᠶᠠᠪᠤᠪᠠ᠃ ᠲᠡᠳᠡ ᠲᠠᠯᠠ ᠳᠡᠭᠡᠭᠦᠷ ᠤᠳᠠᠲᠠᠯᠠ ᠡᠷᠭᠢᠯᠳᠦᠨ ᠲᠡᠨᠦᠵᠦ ᠶᠠᠪᠤᠭᠠᠳ᠂ ᠪᠠᠢ᠍ᠢ᠊ — ᠮᠣᠷᠠᠲ ᠢᠰᠬᠡᠷᠬᠦ ᠰᠠᠴᠠᠭᠤ ᠶᠠᠪᠤᠭᠤᠯ ᠤ᠋ᠨ ᠬᠥᠮᠦᠰ᠂ ᠮᠦᠰᠥ᠋ᠺ ᠦ᠋ᠨ ᠵᠦᠭ ᠡᠷᠭᠢᠵᠦ ᠨᠢᠭᠡᠨ ᠵᠡᠷᠭᠡ ᠳᠠᠭᠠᠷᠢᠵᠤ ᠮᠣᠷᠢᠨ ᠠ᠋ᠴᠠ ᠨᠢ ᠤᠨᠠᠭᠠᠪᠠ᠃ ᠭᠡᠨᠡᠳᠡᠭᠴᠢ ᠲᠡᠷᠡ ᠡᠯᠡᠰᠦᠨ ᠳᠡᠭᠡᠷᠡ ᠬᠡᠪᠲᠡᠬᠦ ᠳ᠋ᠦ᠍ ᠬᠣᠶᠠᠷ ᠬᠥᠮᠦᠨ ᠴᠡᠭᠡᠵᠢ ᠶ᠋ᠢᠨ ᠬᠢᠨᠢ ᠲᠤᠰᠢᠶᠠ ᠵᠢᠳᠠ ᠲᠤᠯᠭᠠᠭᠠᠳ᠂
— ᠲᠠᠨᠤᠮᠠᠯ᠂ ᠣᠷᠭᠤᠳᠤᠤᠯ ᠬᠥᠳᠡᠯᠦᠯ ᠦᠭᠡᠢ ᠬᠡᠪᠲᠡ! ᠠᠯᠠᠬᠤ ᠳ᠋ᠤ᠌ ᠵᠠᠯᠪᠠᠷᠢᠭᠲᠤᠨ ᠭᠡᠪᠡ᠃
ᠪᠠᠢ᠍ᠢ᠊ — ᠮᠣᠷᠠᠲ᠂ ᠪᠤᠯᠢᠶᠠᠭᠰᠠᠨ ᠬᠡᠭᠡᠷ ᠮᠣᠷᠢ ᠶ᠋ᠢ ᠰᠡᠯᠭᠦᠵᠦ ᠤᠨᠤᠭᠠᠳ ᠣᠷᠣᠨ ᠳ᠋ᠤᠨᠢ ᠥᠪᠡᠷ ᠦ᠋ᠨ ᠶᠠᠰᠤᠨ ᠬᠡᠳᠡᠷᠭᠡ ᠪᠡᠨ ᠣᠷᠬᠢᠬᠤ ᠪᠢᠯᠡ ᠤᠤ ?ᠭᠡᠰᠡᠨ ᠶᠠᠩᠵᠤ ᠲᠠᠢ ᠡᠷᠡᠭᠡᠯᠵᠡᠭᠰᠡᠨ ᠢ᠋ᠶ᠋ᠡᠨ ᠴᠤᠯᠪᠤᠭᠤᠷ ᠢ᠋ ᠰᠢᠭᠤᠳ ᠪᠦᠭᠥᠷᠭᠡᠨ ᠳ᠋ᠡᠭᠡᠨ ᠤᠶᠠᠪᠠ᠃ ᠮᠦᠰᠥ᠋ᠺ ᠬᠠᠰᠬᠢᠷᠤᠨ᠂
— ᠪᠠᠭᠠᠲᠤᠷ ᠪᠠᠢ᠍ᠢ᠊ —ᠮᠤᠷᠠᠲ !ᠴᠢ ᠨᠠᠮᠠᠶ᠋ᠢ ᠪᠠᠭ ᠴᠡᠷᠢᠭ ᠲᠡᠭᠡᠨ ᠠᠪᠤᠨᠠ ᠭᠡᠰᠡᠨ ᠪᠢᠰᠢ ᠤᠤ? ᠬᠡᠯᠡᠭᠰᠡᠨ ᠦᠭᠡ ᠴᠢᠨᠢ ᠶᠠᠭᠠᠬᠢᠭᠰᠠᠨ ᠪᠣᠢ? ᠭᠡᠪᠡᠯ᠂
— ᠪᠢ ᠰᠠᠨᠠᠯ ᠢ᠋ᠶ᠋ᠠᠨ ᠥᠭᠡᠷᠡᠴᠢᠯᠡᠪᠡ᠂ ᠴᠢ ᠶᠠᠮᠠᠷ ᠬᠥᠮᠦᠨ ᠶᠤᠮ? ᠬᠡᠨ ᠮᠡᠳᠡᠨᠡ? ᠪᠢᠳᠡᠨ ᠦ᠌ ᠴᠥᠮ ᠦ᠋ᠨ ᠬᠣᠭᠣᠯᠠᠢ ᠶ᠋ᠢ ᠰᠥᠨᠢ ᠣᠭᠲᠣᠯᠵᠤ ᠴᠥ᠍ ᠮᠠᠭᠠᠳ ᠦᠭᠡᠢ ᠭᠡᠪᠡ᠃
ᠮᠥᠰᠥ᠋ᠺ ᠴᠡᠭᠡᠵᠢᠨ ᠦ᠌ ᠳᠡᠭᠡᠷᠡᠬᠢ ᠵᠢᠳᠠ ᠶ᠋ᠢᠨ ᠦᠵᠦᠭᠦᠷ ᠢ᠋ ᠰᠠᠨᠠᠨᠠ᠂ ᠮᠣᠷᠢ ᠲᠠᠢ ᠮᠢᠨᠢ ᠣᠷᠬᠢᠭᠲᠤᠨ! ᠭᠡᠳ ᠰᠠᠨᠠᠭᠠ ᠠᠯᠳᠠᠪᠠ᠃
ᠪᠠᠢ᠍ᠢ᠌᠊ — ᠮᠤᠷᠠᠲ ᠭᠡᠨᠡᠳᠲᠡ ᠰᠠᠨᠳᠤᠷᠤᠨ᠂
— ᠲᠦᠷᠭᠡᠨ ᠶᠠᠪᠤᠵᠠᠭᠠ! ᠭᠡᠵᠦ ᠬᠠᠰᠬᠢᠷᠪᠠ᠃
ᠮᠥᠰᠥ᠋ᠺ ᠬᠣᠯᠠᠳᠤᠨ ᠶᠠᠪᠤᠵᠤ ᠪᠠᠢᠭᠠ ᠮᠣᠷᠢᠨ ᠤ᠋ ᠲᠤᠭᠤᠷᠠᠢ ᠶ᠋ᠢᠨ ᠴᠢᠮᠡᠭᠡ ᠶ᠋ᠢ ᠰᠣᠨᠣᠰᠴᠠᠢ᠂ ᠨᠢᠭᠤᠷ ᠢ᠋ ᠠᠯᠠᠭᠠ ᠪᠠᠷ ᠢ᠋ᠶ᠋ᠠᠨ ᠪᠢᠲᠡᠭᠦᠯᠡᠨ᠂ ᠬᠥᠳᠡᠯᠦᠯ ᠦᠭᠡᠢ ᠬᠡᠪᠲᠡᠪᠡ᠃ ᠡᠷᠭᠢᠨ ᠲᠣᠭᠣᠷᠢᠭᠠᠳ ᠨᠢᠴᠦᠭᠦᠨ ᠪᠣᠢᠳᠠ ᠲᠠᠯᠠ᠂ ᠲᠡᠨᠦᠮᠡᠯ ᠬᠤᠯᠠᠭᠠᠢ ᠶ᠋ᠢᠨ ᠪᠦᠯᠦᠭ ᠂ ᠥᠯᠥᠨ ᠠᠷᠢᠶᠠᠲᠠᠨ᠁ ᠲᠤᠰᠠᠯᠠᠮᠵᠢ ᠭᠣᠷᠢᠳᠠᠬᠤ ᠶᠠᠭᠤᠮᠠ ᠦᠭᠡᠢ ᠪᠣᠯᠬᠤ ᠳ᠋ᠤ᠌᠂
— ᠵᠥᠪ ᠦᠢᠯᠡᠰ ᠲᠦ᠍ ᠡᠪᠦᠭᠡᠨ ᠭᠢᠽᠷ ᠨᠡᠰᠢ ᠢᠷᠡᠵᠦ ᠲᠤᠰᠠᠯᠠᠭᠠᠴᠢ! ᠠᠪᠤᠷᠠᠨ ᠠᠪᠤᠭᠲᠤᠨ! ᠴᠢᠮᠠᠲᠤ ᠲᠠᠷᠭᠤᠨ ᠬᠣᠨᠢ ᠭᠠᠷᠭᠠᠵᠤ ᠥᠭᠰᠦᠭᠡᠢ ! ᠭᠡᠵᠦ ᠳᠠᠭᠤᠳᠠᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠯ᠂ ᠬᠡᠷᠡᠢᠳ· ᠮᠥᠩᠬᠡᠨᠠᠰᠤᠨ᠂ ᠪᠠᠶᠠᠨᠴᠡᠴᠡᠭ᠂ ᠠᠯᠲᠠᠨᠴᠢᠮᠡᠭ
ᠬᠢᠨᠠᠭᠴᠢ᠄ ᠲ·ᠬᠦᠮᠦᠵᠢᠯᠲᠦ᠂ ᠪᠠᠯ᠂ ᠠᠷᠢᠭᠤᠨ᠂ ᠠᠯᠲᠠᠨᠴᠢᠮᠡᠭ