ᠪᠠᠲᠤ ᠬᠠᠭᠠᠨ 2-01ᠴᠡᠷᠢᠭ ᠮᠣᠷᠳᠠᠯᠠ-ᠪᠠᠲᠤ ᠬᠠᠭᠠᠨ ᠥᠷᠥᠨᠡ ᠵᠦᠭ ᠲᠦ᠍ ᠬᠥᠳᠡᠯᠦᠯᠡ-Bat khaan Бат хаан-ᠷᠣᠮᠠᠨ
120ᠬᠣᠶᠠᠳᠤᠭᠠᠷ ᠪᠦᠯᠦᠭ ᠪᠠᠲᠤ ᠬᠠᠭᠠᠨ ᠥᠷᠥᠨᠡ ᠵᠦᠭ ᠲᠦ᠍ ᠬᠥᠳᠡᠯᠦᠯᠡ
᠁ ᠮᠣᠩᠭᠣᠯ ᠤ᠋ᠨ ᠳᠣᠪᠲᠣᠯᠭᠠ ᠶ᠋ᠢ ᠠᠽᠢ ᠲᠢᠪ ᠦ᠋ᠨ ᠡᠮᠬᠢ ᠦᠭᠡᠢ ᠳᠡᠭᠡᠷᠡᠮᠴᠢᠨ ᠪᠦᠯᠦᠭ ᠦ᠋ᠨ ᠤᠴᠢᠷ ᠤᠳᠬᠠ ᠦᠭᠡᠢ ᠲᠦᠷᠢᠨ ᠣᠷᠣᠭᠰᠠᠨ ᠶᠠᠪᠤᠳᠠᠯ ᠭᠡᠵᠦ ᠪᠣᠳᠣᠬᠤ ᠳᠡᠮᠡᠢ᠂ ᠲᠡᠷᠡ ᠪᠣᠯ ᠴᠡᠷᠢᠭ ᠦ᠋ᠨ ᠪᠠᠢᠭᠤᠯᠤᠯᠲᠠ ᠨᠢ ᠳᠠᠢᠰᠤᠨ ᠤ᠋ ᠴᠡᠷᠢᠭ ᠡᠴᠡ ᠶᠡᠬᠡ ᠯᠡ ᠢᠯᠡᠭᠦᠦ ᠪᠠᠢᠭᠰᠠᠨ ᠪᠥᠭᠡᠳ ᠭᠦᠨᠡ ᠬᠢᠨᠠᠵᠤ ᠪᠣᠳᠣᠭᠰᠠᠨ ᠴᠡᠷᠢᠭ ᠦ᠋ᠨ ᠲᠠᠪᠰᠢᠯᠲᠠ ᠪᠢᠯᠡ᠃
(ᠨᠠᠫᠤᠯᠢᠶᠤᠨ)
ᠨᠢᠭᠡ ᠴᠡᠷᠢᠭ ᠮᠣᠷᠳᠠᠯᠠ
ᠡᠪᠦᠭᠡᠨ ᠨᠠᠽᠠᠷ— ᠺᠢᠶᠠᠷᠢᠽᠸᠺ᠂ ᠠᠵᠢᠷᠭᠠᠨ ᠲᠠᠬᠢᠶᠠ ᠶ᠋ᠢ ᠤᠯᠠᠭᠠᠨ ᠸᠠᠳᠠᠩ ᠳ᠋ᠤ᠌ ᠪᠣᠭᠣᠵᠤ ᠮᠣᠩᠭᠣᠯ ᠤ᠋ᠨ ᠰᠢᠷᠦᠭᠦᠨ ᠵᠠᠩᠵᠤᠨ ᠤ᠋ ᠭᠡᠷ ᠲᠦ᠍ ᠠᠪᠴᠢᠷᠠᠨ ᠲᠠᠯᠪᠢᠭᠰᠠᠨ ᠡᠳᠦᠷ ᠡᠴᠡ ᠡᠬᠢᠯᠡᠨ ᠹᠠᠺᠢᠾ ᠬᠠᠳ᠌ᠵᠢ ᠷᠠᠾᠢᠮ ᠪᠣᠯ ᠥᠷᠥᠭᠡᠰᠦᠨ ᠨᠢᠳᠦᠲᠦ ᠤᠳᠤᠷᠢᠳᠤᠭᠴᠢ ᠰᠦᠪᠡᠭᠡᠲᠡᠢ ᠪᠠᠭᠠᠲᠤᠷ ᠤ᠋ᠨ ᠳ᠋ᠤ᠌ ᠪᠦᠷᠢᠨᠡ ᠣᠯᠵᠠᠯᠠᠭᠳᠠᠮᠠᠯ ᠪᠠᠢᠳᠠᠯ ᠲᠠᠢ ᠪᠣᠯᠵᠠᠢ᠃ ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ ᠨᠤᠯᠮᠤᠬᠤ ᠮᠡᠲᠦ ᠳᠣᠷᠭᠢᠨ ᠬᠡᠯᠡᠭᠰᠡᠨ ᠨᠢ᠄
— ᠶᠡᠬᠡ ᠳ᠋ᠵᠢᠬᠠᠩᠬᠢᠷ ᠪᠠᠲᠤ ᠬᠠᠭᠠᠨ᠂ ᠡᠷᠳᠡᠮᠲᠡᠨ ᠪᠠᠭᠰᠢ ᠴᠢᠮᠠᠶ᠋ᠢ ᠬᠡᠵᠢᠶᠡᠳᠡ ᠳᠡᠷᠭᠡᠳᠡ ᠪᠡᠨ ᠪᠠᠢᠯᠭᠠ ᠭᠡᠵᠦ ᠲᠤᠰᠢᠶᠠᠭᠰᠠᠨ᠃ ᠴᠢᠮᠠᠶ᠋ᠢ
ᠭᠡᠷᠡᠯᠲᠦ ᠂ ᠳᠡᠯᠡᠬᠡᠢ ᠳ᠋ᠠᠬᠢᠨ ᠳ᠋ᠤ᠌ ᠳᠣᠪᠲᠣᠯᠬᠤ ᠠᠶᠠᠨ ᠲᠡᠢᠨ ᠢ᠋ ᠬᠢᠴᠢᠶᠡᠩᠭᠦᠢ᠂ ᠮᠠᠰᠢ ᠬᠢᠴᠢᠶᠡᠩᠭᠦᠢ ᠲᠣᠳᠣᠷᠬᠠᠢᠯᠠᠨ ᠪᠢᠴᠢᠭᠲᠦᠨ ᠭᠡᠯᠡ᠃ ᠵᠠ! ᠴᠢᠮᠠᠲᠤ ᠴᠠᠭᠠᠰᠤ ᠪᠡᠬᠡ ᠡᠯᠪᠡᠭ ᠥᠭᠴᠦ ᠡᠳᠦᠷ ᠲᠦ᠍ ᠬᠣᠶᠠᠷ ᠤᠳᠠᠭᠠ ᠲᠤᠲᠤᠷᠭᠠ ᠠᠭᠰᠢᠮᠠᠯ ᠪᠠ ᠮᠢᠬᠠ ᠢᠳᠡᠭᠦᠯ ᠭᠡᠪᠡ᠃ ᠴᠢᠮᠠᠲᠤ ᠪᠦᠭᠦᠳᠡ ᠶ᠋ᠢ ᠥᠭᠭᠦᠨᠡ᠃ ᠮᠢᠨᠦ ᠦᠭᠡ ᠴᠠᠬᠢᠭᠤᠷ ᠮᠡᠲᠦ ᠬᠠᠲᠠᠭᠤ᠂ ᠡᠨᠡ ᠮᠡᠬᠡᠲᠡᠢ ᠡᠪᠦᠭᠡᠨ ᠴᠢᠮᠠᠶ᠋ᠢ ᠰᠤᠪᠢᠯᠠᠨᠠ᠂ ᠴᠢᠮᠠᠶ᠋ᠢ ᠤᠷᠭᠤᠭᠤᠯᠬᠤ ᠦᠭᠡᠢ᠃ ᠵᠠ! ᠴᠢᠮᠠᠶ᠋ᠢ ᠰᠠᠮᠭᠠᠷᠳᠠᠭᠰᠠᠨ ᠳᠠᠭᠠᠭᠤᠯᠢ ᠮᠡᠲᠦ ᠡᠮᠨᠢᠭ ᠮᠣᠷᠢ ᠤᠨᠤᠨ ᠳᠠᠪᠬᠢᠭᠤᠯᠬᠤ ᠦᠭᠡᠢ᠂ ᠲᠤᠯᠤᠯᠳᠤᠬᠤ ᠦᠶᠡ ᠳ᠋ᠦ᠍ ᠴᠢ ᠦᠵᠦᠭ ᠴᠠᠭᠠᠰᠤ ᠪᠠᠷ ᠤᠷᠤᠯᠳᠤᠵᠤ ᠰᠠᠭᠤᠨᠠ᠃ ᠵᠠ! ᠴᠢ ᠲᠡᠩᠬᠡᠭᠡ ᠲᠡᠢ ᠲᠠᠩᠭᠤᠳ ᠲᠡᠮᠡᠭᠡ ᠪᠡᠷ ᠶᠠᠪᠤᠨᠠ᠃ ᠲᠡᠭᠦᠨ ᠢ᠋ᠶ᠋ᠡᠷ ᠲᠠ ᠬᠣᠶᠠᠭᠤᠯᠠ ᠪᠠᠨ ᠮᠢᠨᠦ ᠬᠣᠢᠨᠠ ᠠ᠋ᠴᠠ ᠳᠠᠭᠠᠬᠤ ᠪᠣᠯᠤᠨᠠ᠃ ᠬᠡᠷᠪᠡ ᠡᠨᠡ ᠡᠷᠳᠡᠮᠲᠡᠨ ᠰᠤᠳᠤᠷ ᠴᠤ᠌ ᠪᠢᠴᠢᠬᠦ ᠶ᠋ᠢ ᠵᠠᠯᠬᠠᠭᠤᠷᠠᠬᠤ ᠪᠤᠶᠤ ᠵᠢᠭᠤᠲᠠᠵᠤ ᠤᠷᠭᠤᠬᠤ ᠭᠡᠪᠡᠯ ᠮᠢᠨᠦ ᠳᠠᠭᠠᠭᠤᠯᠢ ᠨᠤᠭᠤᠳ᠂ ᠲᠠᠬᠢᠶᠠᠨ ᠤ᠋ ᠡᠪᠦᠭᠡᠨ ᠴᠢᠮᠠ ᠲᠠᠢ ᠶᠠᠷᠢᠯᠴᠠᠵᠤ᠂ ᠴᠢᠨᠦ ᠵᠢᠷᠠᠨ ᠵᠢᠯ ᠬᠤᠷᠠᠮᠳᠤᠭᠤᠯᠤᠭᠰᠠᠨ ᠲᠣᠭᠣᠰᠣ ᠶ᠋ᠢ ᠭᠦᠪᠢᠵᠦ ᠥᠭᠭᠦᠨᠡ᠃ ᠪᠤᠤ ᠮᠠᠷᠭᠤᠴᠠᠯᠳᠤ᠂ ᠪᠢᠲᠡᠭᠡᠢ ᠬᠠᠷᠢᠭᠤᠴᠠ! ᠳ᠋ᠵᠢᠬᠠᠩᠬᠢᠷ ᠢᠩᠭᠢᠵᠦ ᠲᠤᠰᠢᠶᠠᠭᠰᠠᠨ ᠶᠣᠰᠣᠭᠠᠷ ᠪᠣᠯᠤᠨᠠ᠃ ᠮᠥᠨ ᠡᠭᠦᠨ ᠡᠴᠡ ᠭᠠᠳᠠᠨᠠ ᠡᠪᠦᠭᠡᠨ ᠴᠢᠮᠠᠶ᠋ᠢ᠂ ᠰᠡᠷᠢᠭᠡᠬᠦ ᠲᠠᠬᠢᠶᠠᠨ ᠤ᠋ ᠮᠠᠨᠠᠭᠠᠴᠢᠨ ᠢ᠋ᠶ᠋ᠠᠷ ᠲᠣᠮᠢᠯᠠᠰᠤᠭᠠᠢ᠂ ᠶᠠᠪᠤᠵᠤ ᠪᠣᠯᠤᠨᠠ ᠭᠡᠵᠡᠢ᠃
ᠲᠡᠭᠡᠭᠡᠳ ᠰᠦᠪᠡᠭᠡᠳᠡᠢ᠂ ᠹᠡᠺᠢᠾ ᠢ᠋ ᠮᠠᠷᠲᠠᠭᠰᠠᠨ ᠮᠡᠲᠦ ᠪᠤᠷᠤᠭᠤ ᠬᠠᠨᠳᠤᠵᠠᠢ᠃ ᠬᠣᠶᠠᠷ ᠮᠣᠩᠭᠣᠯ ᠬᠥᠮᠦᠨ ᠬᠠᠳ᠋ᠵᠢ ᠷᠠᠾᠢᠮ ᠢ᠋ ᠰᠤᠭᠤᠳᠠᠨ ᠬᠥᠲᠥᠯᠵᠦ᠂ ᠨᠢᠭᠡ ᠮᠠᠰᠢ ᠲᠣᠮᠣ ᠬᠠᠷᠠ ᠪᠣᠷᠣ ᠲᠡᠮᠡᠭᠡᠨ ᠦ᠌ ᠳᠡᠷᠭᠡᠳᠡ ᠠᠪᠠᠴᠢᠯᠠ᠃ ᠰᠡᠭᠰᠡᠭᠡᠷ ᠪᠦᠬᠦ ᠶ᠋ᠢᠨ ᠬᠢᠨᠢ ᠬᠣᠶᠠᠷ ᠬᠠᠵᠠᠭᠤ ᠳ᠋ᠤ᠌ ᠮᠣᠳᠣᠨ ᠱᠠᠲᠤ ᠲᠠᠢ ᠰᠦᠷᠡᠯ ᠬᠣᠮ ᠳᠡᠭᠡᠷᠡ ᠣᠷᠢᠶᠠᠩᠭᠤ ᠪᠠᠷ ᠰᠦᠯᠵᠢᠭᠰᠡᠨ ᠨᠢᠵᠡᠭᠡᠳ ᠠᠷᠤᠭ ᠪᠠᠢᠪᠠ᠃ ᠲᠡᠮᠡᠭᠡ ᠪᠤᠢᠯᠠᠨ ᠡᠪᠦᠳᠦᠭ ᠳᠡᠭᠡᠷᠡ ᠪᠡᠨ ᠰᠥᠬᠥᠷᠡᠬᠦ ᠳ᠋ᠦ᠍ ᠮᠣᠩᠭᠣᠯᠴᠤᠳ ᠬᠠᠳ᠋ᠵᠢ ᠷᠠᠾᠢᠮ ᠢ᠋ ᠠᠷᠤᠭ ᠳᠣᠲᠣᠷᠠ ᠰᠠᠭᠤᠯᠭᠠᠵᠠᠢ᠃ ᠠᠷᠤᠭ ᠨᠢ ᠡᠷᠡᠦ ᠡᠪᠦᠳᠦᠭ ᠨᠡᠢᠯᠡᠬᠦ ᠪᠡᠷ ᠳᠠᠪᠴᠢᠭᠤ ᠶᠠᠭᠤᠮᠠ ᠪᠠᠢᠪᠠ᠃
ᠨᠠᠽᠠᠷ—ᠺᠢᠶᠡᠷᠢᠽᠧᠺ᠂ ᠨᠥᠭᠦᠭᠡ ᠲᠠᠯᠠ ᠶ᠋ᠢᠨ ᠠᠷᠤᠭ ᠳᠣᠲᠣᠷᠠ ᠣᠷᠣᠵᠤ᠂ ᠰᠡᠭᠦᠷᠡᠰᠦ ᠠᠯᠲᠠᠨ᠄《ᠪᠠᠢᠯᠳᠤᠭᠠᠨ ᠤ᠋ ᠮᠣᠷᠢ ᠤᠨᠤᠪᠠᠯ ᠨᠠᠳᠠᠳᠤ ᠳᠡᠭᠡᠷᠡ ᠪᠠᠢᠭᠰᠠᠨ ᠪᠢᠯᠡ᠃ ᠡᠪᠦᠭᠡᠨ ᠴᠡᠷᠢᠭ ᠰᠠᠭᠰᠤ ᠳᠣᠲᠣᠷᠠ ᠰᠠᠭᠤᠪᠠᠯ ᠲᠠᠭᠠᠷᠠᠨᠠ ᠭᠡᠵᠢ ᠤᠤ? 》ᠭᠡᠵᠦ ᠳᠤᠷᠠ ᠦᠭᠡᠢᠬᠡᠨ ᠬᠦᠩᠭᠢᠨᠡᠵᠦ ᠬᠡᠯᠡᠯᠡ᠃
ᠲᠡᠭᠡᠭᠡᠳ ᠠᠵᠢᠷᠭᠠᠨ ᠲᠠᠬᠢᠶᠠ ᠪᠠᠨ ᠨᠣᠢᠲᠠᠨ ᠪᠠᠲ᠋ᠷᠠᠰᠢ ᠡᠪᠡᠰᠦ ᠪᠡᠷ ᠰᠦᠯᠵᠢᠨ ᠰᠠᠭᠰᠤᠨ ᠳ᠋ᠤ᠌ ᠰᠠᠢᠲᠤᠷ ᠤᠶᠠᠵᠠᠢ᠃ ᠲᠡᠮᠡᠭᠡ ᠶ᠋ᠢ ᠨᠢ ᠬᠠᠵᠠᠭᠤ ᠳᠠᠰᠢ ᠬᠥᠲᠥᠯᠦᠨ᠂ ᠭᠡᠷ ᠪᠠᠷᠠᠭᠠ ᠠᠴᠢᠭᠰᠠᠨ ᠪᠤᠰᠤᠳ ᠲᠡᠮᠡᠭᠡᠳ ᠦ᠋ᠨ ᠳᠡᠷᠭᠡᠳᠡ ᠬᠡᠪᠲᠡᠭᠦᠯᠬᠦ ᠳ᠋ᠦ᠍ ᠨᠠᠽᠠᠷ— ᠺᠢᠶᠠᠷᠢᠽᠸᠺ᠂ ᠪᠣᠳᠣᠯ ᠪᠣᠯᠤᠨ ᠰᠠᠭᠤᠭᠠ ᠹᠠᠺᠢᠾ ᠲᠤ᠌ ᠰᠢᠪᠡᠨᠡᠨ᠂
— ᠲᠠᠬᠢᠷ ᠬᠤᠯᠠᠭᠠᠢᠴᠢ ᠶ᠋ᠢᠨ ᠬᠡᠯᠡᠭᠰᠡᠨ ᠵᠦᠢᠯᠡᠰ ᠨᠢᠭᠡ ᠡᠴᠡ ᠪᠤᠰᠤᠳ ᠨᠢ ᠴᠥᠮ ᠪᠦᠲᠦᠨᠡ᠃ ᠬᠣᠭᠣᠯᠠ ᠬᠦᠨᠡᠰᠦ ᠶ᠋ᠢ ᠪᠢᠳᠡ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠠᠷᠭᠠᠴᠠᠬᠤ ᠪᠣᠯᠤᠨᠠ ᠪᠢᠵᠡ᠂ ᠦᠷᠭᠦᠯᠵᠢ ᠥᠯᠥᠰᠴᠦ ᠶᠠᠪᠤᠳᠠᠭ ᠮᠣᠩᠭᠣᠯᠴᠤᠳ ᠪᠢᠳᠡᠨ ᠳ᠋ᠦ᠍ ᠰᠢᠷᠬᠡᠭ ᠴᠦ᠍ ᠲᠤᠲᠤᠷᠭᠠ ᠦᠭᠭᠦᠯ ᠦᠭᠡᠢ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠴᠢᠬᠢᠯᠡᠨᠡ᠃ ᠰᠢᠷᠦᠭᠦᠨ ᠳᠠᠷᠤᠭᠠ ᠶ᠋ᠢᠨ ᠲᠣᠭᠣᠭᠠᠴᠢ ᠲᠠᠢ ᠠᠭᠤᠯᠵᠠᠵᠤ ᠨᠥᠬᠥᠷᠯᠡᠬᠦ ᠶ᠋ᠢ ᠪᠤᠳᠤᠰᠤᠭᠠᠢ᠁ ᠲᠡᠭᠡᠪᠡᠯ ᠪᠢᠳᠡᠨ ᠳ᠋ᠦ᠍ ᠢᠳᠡᠬᠦ ᠶᠠᠭᠤᠮᠠ ᠣᠯᠤᠨᠠ ᠭᠡᠵᠡᠢ᠃
ᠡᠪᠦᠭᠡᠨ ᠠᠷᠤᠭ ᠠ᠋ᠴᠠ ᠴᠤᠬᠤᠢᠭᠰᠠᠨᠠ᠂ ᠳᠠᠬᠢᠨ ᠨᠢᠭᠤᠭᠳᠠᠯᠠ᠃
ᠬᠠᠳ᠋ᠵᠢ ᠷᠠᠾᠢᠮ᠂ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡᠨ ᠦ᠌ ᠦᠢᠮᠡᠭᠡᠨ ᠱᠤᠤᠭᠢᠶᠠᠨ ᠢ᠋ ᠠᠵᠢᠭᠯᠠᠪᠠ᠃ ᠴᠡᠷᠢᠭ ᠦ᠋ᠳ ᠭᠦᠶᠦᠨ ᠬᠠᠰᠬᠢᠷᠤᠯᠳᠤᠵᠤ ᠪᠡᠶᠡ ᠪᠡᠶᠡ ᠪᠡᠨ ᠶᠠᠭᠠᠷᠠᠭᠤᠯᠵᠤ ᠪᠠᠢᠯᠠ᠃ ᠰᠦᠪᠡᠭᠡᠲᠡᠢ ᠪᠠᠭᠠᠲᠤᠷ ᠮᠣᠷᠢ ᠪᠠᠨ ᠠᠪᠴᠢᠷᠠ ᠭᠡᠯᠡ᠃ ᠺᠢᠫᠴᠠᠺ ᠪᠦᠰᠡᠭᠦᠢᠴᠦᠳ ᠬᠠᠩᠭᠢᠨᠠᠲᠠᠯᠠ ᠳᠠᠭᠤᠯᠠᠨ ᠭᠡᠷ ᠢ᠋ ᠪᠠᠭᠤᠯᠭᠠᠵᠤ ᠢᠰᠡᠭᠡᠢ ᠶ᠋ᠢ ᠬᠤᠢᠯᠠᠨ ᠬᠠᠨᠠ ᠶ᠋ᠢ ᠡᠪᠬᠡᠵᠦ᠂ ᠬᠦᠷᠡᠯ ᠲᠣᠭᠣᠭᠠ ᠲᠡᠮᠦᠷ ᠲᠤᠯᠭᠠ ᠠᠴᠢᠮᠠᠭ ᠤ᠋ᠳ ᠢ᠋ ᠲᠡᠮᠡᠭᠡᠨ ᠳ᠋ᠦ᠍ ᠠᠴᠢᠶᠠᠯᠠᠪᠠ᠃ ᠳᠠᠭᠠᠭᠤᠯᠢ ᠨᠠᠷ᠂ ᠭᠤᠯᠢᠷ ᠪᠤᠳᠠᠭᠠ ᠲᠠᠢ ᠡᠷᠢᠶᠡᠨ ᠰᠢᠭᠤᠳᠠᠢ ᠴᠢᠷᠴᠦ ᠬᠣᠨᠢ ᠡᠪᠡᠷᠳᠡᠨ ᠬᠥᠲᠥᠯᠦᠭᠡᠳ᠂ ᠰᠤᠯᠠ ᠮᠣᠷᠢᠨ ᠳᠡᠭᠡᠷᠡ ᠬᠡᠪᠢᠰ ᠱᠤᠤᠮᠠᠰᠠ ᠲᠠᠩᠨᠠᠨ ᠰᠤᠷ ᠢ᠋ᠶ᠋ᠠᠷ ᠲᠠᠲᠠᠵᠤ᠂ ᠲᠡᠭᠰᠢ ᠲᠠᠯᠠᠪᠠᠢ ᠳ᠋ᠤ᠌ ᠴᠤᠭᠯᠠᠷᠠᠭᠰᠠᠨ ᠴᠡᠷᠢᠭ ᠦ᠋ᠨ ᠵᠦᠭ ᠴᠣᠭᠭᠢᠵᠤ ᠨᠡᠢᠯᠡᠴᠢᠬᠡᠵᠡᠢ (ᠨᠡᠢᠯᠡᠵᠡᠭᠡᠵᠡᠢ )᠃
ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ ᠢᠷᠠᠭᠯᠠᠵᠤ ᠬᠠᠵᠠᠭᠠᠨᠠᠨ᠂ ᠰᠢᠲᠠᠨ ᠭᠦᠢᠴᠡᠵᠦ ᠪᠠᠢᠭᠠ ᠲᠦᠳᠡᠭ ᠳᠡᠭᠡᠷᠡ ᠣᠴᠢᠪᠠ᠃ ᠳᠡᠷᠭᠡᠳᠡ ᠳ᠋ᠦ᠍ᠨᠢ ᠨᠢᠭᠡ ᠬᠥᠭᠰᠢᠨ ᠪᠤᠭᠤᠷᠤᠯ ᠂ ᠬᠡᠳᠦᠨ ᠵᠠᠯᠠᠭᠤ ᠪᠥᠬᠡ ᠨᠠᠷ ᠢᠷᠡᠵᠦ᠂ ᠬᠡᠩᠭᠡᠷᠭᠡ ᠳᠡᠯᠡᠳᠦᠨ ᠬᠤᠩᠬᠠ ᠬᠠᠩᠭᠢᠨᠠᠭᠤᠯᠵᠤ ᠰᠢᠪᠰᠢᠨ ᠳᠠᠭᠤᠳᠠᠬᠤ ᠳ᠋ᠤ᠌ ᠰᠦᠪᠡᠭᠡᠳᠡᠢ ᠪᠦᠯᠲᠡᠭᠡᠷ ᠨᠢᠳᠦ ᠪᠡᠷ ᠭᠠᠯ ᠤᠷᠤᠭᠤ ᠰᠢᠷᠲᠡᠵᠦ ᠬᠣᠣᠷᠲᠤ ᠰᠤᠮᠤ᠂ ᠮᠠᠭᠤ ᠨᠢᠳᠦᠨ ᠡᠴᠡ ᠵᠠᠢᠯᠠᠭᠤᠯᠬᠤ ᠤᠩᠰᠢᠯᠭᠠ ᠶ᠋ᠢ ᠰᠢᠪᠡᠨᠡᠨ ᠤᠩᠰᠢᠪᠠ᠃ ᠰᠠᠯᠬᠢᠨ ᠳ᠋ᠤ᠌ ᠰᠠᠷᠠᠯ ᠤᠲᠤᠭᠠ ᠡᠷᠭᠢᠯᠳᠦᠨ ᠣᠴᠢ ᠦᠰᠦᠷᠦᠭᠦᠯᠵᠦ ᠰᠦᠪᠡᠭᠡᠲᠡᠢ ᠶ᠋ᠢ ᠪᠦᠷᠬᠦᠪᠡ᠃
ᠲᠣᠭᠣᠷᠢᠨ ᠰᠢᠬᠠᠴᠠᠯᠳᠤᠭᠰᠠᠨ ᠮᠣᠩᠭᠣᠯᠴᠤᠳ᠄《ᠰᠠᠢᠨ ᠢᠷᠣᠠ ᠪᠣᠯᠪᠠ ! ᠤᠲᠤᠭᠠ ᠭᠠᠢ ᠭᠠᠮᠰᠢᠭ ᠢ᠋ ᠠᠷᠢᠯᠭᠠᠵᠤ ᠠᠷᠢᠭᠤᠨ ᠣᠴᠢ ᠴᠣᠭ ᠵᠠᠯᠢ ᠶ᠋ᠢ ᠳᠡᠯᠭᠡᠷᠡᠭᠦᠯᠳᠡᠭ 》 ᠭᠡᠯᠴᠡᠯᠡ᠃
ᠤᠷᠤᠭᠤ ᠪᠠᠢᠳᠠᠯ ᠲᠠᠢ ᠪᠥᠭᠡᠳ ᠬᠥᠳᠡᠯᠦᠭᠡ ᠦᠭᠡᠢ ᠪᠥᠭᠲᠥᠷ ᠰᠦᠪᠡᠭᠡᠲᠡᠢ ᠭᠦᠨᠡ ᠪᠣᠳᠣᠯᠭᠠ ᠪᠣᠳᠣᠨ ᠢᠷᠡᠭᠡᠳᠦᠢ ᠶ᠋ᠢᠨ ᠲᠡᠢᠨ᠂ ᠠᠶᠤᠨ ᠳᠦᠷᠪᠡᠬᠦ ᠠᠮᠢᠲᠠᠳ᠂ ᠳᠡᠯᠡᠬᠡᠢ ᠳ᠋ᠠᠬᠢᠨ ᠢ᠋ ᠡᠵᠡᠯᠡᠬᠦ ᠥᠪᠡᠷ ᠦ᠋ᠨ ᠬᠥᠮᠦᠵᠢᠭᠴᠢ ᠪᠠᠲᠤ ᠬᠠᠭᠠᠨ ᠤ᠋ ᠪᠠᠢᠯᠳᠤᠭᠠᠨ ᠤ᠋ ᠳᠠᠭᠤᠷᠢᠰᠤᠯ ᠤ᠋ᠨ ᠮᠠᠨᠳᠤᠬᠤ ᠨᠠᠷᠠᠨ ᠢ᠋ ᠡᠮᠦᠨᠡ ᠪᠡᠨ ᠦᠵᠡᠵᠦ ᠪᠠᠢᠭᠠ ᠮᠡᠲᠦ ᠤᠳᠠᠲᠠᠯᠠ ᠵᠣᠭᠰᠣᠵᠠᠢ᠃
ᠭᠡᠲᠡᠯᠡ ᠪᠠᠲᠤ ᠬᠠᠭᠠᠨ ᠭᠣᠶᠣᠮᠰᠣᠭ ᠴᠠᠭᠠᠨ ᠠᠵᠢᠷᠭᠠ ᠤᠨᠤᠨ ᠢᠷᠡᠬᠦ ᠳ᠋ᠦ᠍ ᠠᠷᠤ ᠠ᠋ᠴᠠ ᠶᠢᠰᠦᠨ ᠰᠢᠳᠠᠷ ᠴᠡᠷᠢᠭ ᠭᠤᠷᠪᠠᠨ ᠡᠩᠨᠡᠭᠡ ᠪᠣᠯᠤᠨ ᠳᠠᠭᠠᠵᠠᠢ᠃ ᠲᠦᠷᠦᠭᠦᠨ ᠦ᠌ ᠬᠥᠮᠦᠨ ᠬᠤᠯᠤᠰᠤᠨ ᠡᠰᠢ ᠲᠡᠢ ᠨᠠᠷᠢᠨ ᠦᠵᠦᠭᠦᠷ ᠨᠢ ᠰᠠᠯᠬᠢᠨ ᠳ᠋ᠤ᠌ ᠳᠡᠷᠪᠡᠬᠦ ᠲᠠᠪᠤᠨ ᠥᠨᠴᠥᠭᠲᠦ ᠲᠤᠭ ᠪᠠᠷᠢᠨ ᠬᠡᠢᠰᠬᠡᠵᠡᠢ᠃ ᠲᠡᠷᠡ ᠲᠤᠭ ᠤ᠋ᠨ ᠳᠡᠭᠡᠷᠡ ᠪᠣᠷᠣ ᠬᠠᠷᠴᠠᠭᠠᠢ᠂ ᠰᠠᠪᠠᠷ ᠲᠠᠭᠠᠨ ᠬᠠᠷᠠ ᠬᠡᠷᠢᠶᠡ ᠪᠠᠵᠠᠭᠰᠠᠨ ᠰᠠᠷᠠᠯ ᠰᠡᠷ ᠰᠢᠪᠠᠭᠤ ᠶ᠋ᠢ ᠲᠣᠷᠭᠠ ᠪᠠᠷ ᠣᠶᠣᠵᠠᠢ᠃(ᠴᠢᠩᠭᠢᠰ ᠦ᠋ᠨ ᠡᠪᠦᠭᠡ ᠶᠠᠳᠠᠭᠤ ᠪᠣᠳᠤᠨᠴᠢᠷ᠂ ᠰᠤᠷᠭᠠᠭᠰᠠᠨ ᠭᠠᠭᠴᠠ ᠰᠡᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠠᠩ ᠬᠢᠵᠦ ᠠᠮᠢᠳᠤᠷᠠᠳᠠᠭ ᠪᠠᠢᠭᠰᠠᠨ ᠤᠴᠢᠷ ᠬᠠᠷᠠ ᠬᠡᠷᠢᠶᠡ ᠰᠢᠭᠦᠷᠦᠭᠰᠡᠨ ᠰᠠᠷᠠᠯ ᠰᠡᠷ ᠢ᠋ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠤᠭᠰᠠᠭᠠᠨ ᠤ᠋ ᠰᠦᠯᠳᠡ ᠭᠡᠳᠡᠭ ᠪᠠᠢᠵᠠᠢ ᠃ ) ᠪᠠᠲᠤ ᠬᠠᠭᠠᠨ ᠮᠥᠩᠭᠥᠯᠢᠭ ᠴᠠᠬᠤᠯᠠᠢ ᠶ᠋ᠢᠨ ᠴᠠᠭᠠᠨ ᠥᠳᠥ ᠪᠡᠷ ᠴᠢᠮᠡᠭᠯᠡᠭᠰᠡᠨ ᠬᠥᠩᠭᠡᠨ ᠰᠠᠪᠢᠬᠢᠨ ᠳᠤᠭᠤᠯᠠᠭᠠ ᠡᠮᠦᠰᠴᠡᠢ᠃ ᠰᠠᠬᠠᠯ ᠦᠭᠡᠢ ᠴᠢᠷᠠᠢ ᠨᠢ ᠭᠠᠩᠳᠠᠭᠰᠠᠨ᠂ ᠰᠠᠮᠪᠠᠭᠠ ᠲᠠᠢ ᠬᠥᠳᠡᠯᠬᠦ ᠪᠢᠴᠢᠬᠠᠨ ᠬᠠᠷᠠ ᠨᠢᠳᠦ ᠲᠡᠢ᠂ ᠮᠣᠯᠣᠷ ᠲᠣᠪᠴᠢ ᠲᠠᠢ ᠬᠥᠬᠡ ᠲᠣᠷᠭᠠᠨ ᠳᠡᠪᠡᠯ ᠡᠮᠦᠰᠦᠭᠡᠳ᠂ ᠲᠡᠮᠡᠦᠯᠦᠨ ᠲᠣᠭᠲᠠᠵᠤ ᠶᠠᠳᠠᠭᠴᠢ ᠮᠣᠷᠢᠨ ᠳᠡᠭᠡᠷᠡ ᠲᠣᠭᠲᠠᠪᠤᠷᠢ ᠲᠠᠢ ᠰᠠᠭᠤᠵᠠᠢ᠃ ᠵᠡᠭᠦᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠯᠲᠠᠨ ᠲᠣᠪᠣᠷᠤᠤ ᠲᠠᠢ ᠵᠢᠯᠣᠭᠣ ᠶ᠋ᠢ ᠲᠠᠲᠠᠵᠤ᠂ ᠪᠠᠷᠠᠭᠤᠨ ᠭᠠᠷ ᠲᠠᠭᠠᠨ ᠪᠣᠭᠣᠨᠢᠬᠠᠨ ᠬᠠᠷᠠ ᠲᠠᠰᠢᠭᠤᠷ ᠪᠠᠷᠢᠵᠠᠢ᠃
— ᠪᠢ ᠪᠡᠯᠡᠬᠡᠨ ᠪᠠᠢᠨᠠᠮ ! ᠴᠡᠷᠢᠭ ᠪᠠᠢᠷᠢᠨ ᠠ᠋ᠴᠠ ᠬᠥᠳᠡᠯᠪᠡ ! ᠮᠢᠨᠦ ᠴᠡᠷᠢᠭ᠂ ᠡᠮᠢᠶᠡᠨ ᠴᠡᠴᠡᠷᠡᠬᠦ ᠣᠯᠠᠨ ᠣᠪᠣᠭᠲᠠᠨ ᠤᠷᠤᠭᠤ ᠳᠠᠭᠠᠷᠢᠨ ᠣᠷᠣᠬᠤ ᠶ᠋ᠢᠨ ᠲᠤᠯᠠ ᠢᠵᠢᠯ ᠮᠥᠷᠡᠨ ᠢ᠋ ( ᠳ᠋ᠦ᠍ ) ᠬᠦᠷᠬᠦ ᠪᠡᠷ ᠶᠠᠭᠠᠷᠠᠨ ᠮᠣᠷᠳᠠᠵᠤ ᠪᠠᠢᠬᠤ ᠶ᠋ᠢ ᠬᠠᠷᠠᠭᠲᠤᠨ !
ᠪᠠᠲᠤ ᠬᠠᠭᠠᠨ ᠢᠩᠭᠢᠵᠦ ᠬᠡᠯᠡᠭᠡᠳ᠂ ᠲᠠᠰᠢᠭᠤᠷ ᠢ᠋ᠶ᠋ᠠᠷ ᠪᠠᠷᠠᠭᠤᠨ ᠲᠡᠰᠢ ᠵᠢᠭᠠᠪᠠ᠃ ᠬᠥᠲᠥᠯ ᠳᠡᠭᠡᠷᠡ ᠡᠴᠡ ᠬᠠᠪᠲᠠᠭᠠᠢᠷᠠᠭᠰᠠᠨ ᠲᠡᠭᠰᠢ ᠭᠠᠵᠠᠷ ᠠᠯᠤᠰ ᠦᠵᠡᠭᠳᠡᠵᠦ᠂ ᠮᠣᠷᠢᠲᠤ ᠴᠡᠷᠢᠭ ᠵᠥᠷᠢᠭ ᠵᠠᠮ ᠪᠦᠷᠢ ᠪᠡᠷ ᠴᠤᠪᠤᠷᠠᠯᠳᠤᠨ ᠥᠷᠥᠨᠡ ᠵᠦᠭ ᠲᠦ᠍ ᠬᠥᠳᠡᠯᠵᠡᠢ᠃
ᠰᠦᠪᠡᠭᠡᠳᠠᠢ ᠳᠠᠪ ᠬᠢᠨ ᠪᠠᠲᠤ ᠬᠠᠭᠠᠨ ᠤᠷᠤᠭᠤ ᠡᠷᠭᠢᠵᠦ᠂ ᠢᠷᠠᠭᠯᠠᠨ ᠪᠥᠬᠥᠢᠵᠦ ᠴᠣᠬᠣᠷ ᠬᠤᠷᠤᠭᠤ ᠪᠠᠷ ᠢ᠋ᠶ᠋ᠠᠨ ᠭᠠᠵᠠᠷ ᠱᠦᠷᠭᠦᠭᠡᠪᠡ᠃
— ᠪᠢ ᠬᠡᠳᠦᠢᠨ ᠪᠡᠯᠡᠬᠡᠨ ᠪᠣᠯᠪᠠ᠃ ᠡᠢᠮᠦ ᠴᠡᠷᠢᠭ ᠲᠡᠢ ᠲᠠᠨ ᠤ᠋ ᠶᠢᠷᠲᠢᠨᠴᠦ ᠳ᠋ᠦ᠍ ᠪᠤᠭᠤᠢᠯᠢ ᠬᠠᠶᠠᠨᠠ ᠭᠡᠭᠴᠢ ᠵᠥᠪ ᠦᠭᠡ! ᠭᠡᠯᠡ᠃
ᠰᠦᠪᠡᠭᠡᠳᠠᠢ ᠪᠠᠲᠤ ᠬᠠᠭᠠᠨ ᠤ᠋ ᠳᠡᠷᠭᠡᠳᠡ ᠲᠤᠯᠵᠤ ᠣᠴᠢᠭᠠᠳ ᠰᠢᠪᠡᠨᠡᠨ᠄ ᠨᠠᠳᠠ ᠠ᠋ᠴᠠ ᠨᠢᠭᠡ ᠠᠯᠬᠤᠮ ᠴᠤ᠌ ᠪᠤᠤ ᠬᠣᠯᠠᠳᠠᠭᠲᠤᠨ! ᠠᠶᠤᠯ ᠵᠠᠨᠤᠯ ᠥᠷᠥᠨᠡ ᠡᠴᠡ ᠪᠢᠰᠢ ᠬᠠᠷᠢᠨ ᠡᠨᠳᠡ᠂ ᠲᠠᠨ ᠳ᠋ᠤ᠌ ᠨᠦᠬᠡ ᠮᠠᠯᠲᠠᠭᠰᠠᠨ᠂ ᠨᠠᠭᠠᠯᠢᠩᠬᠠᠢ ᠢᠨᠢᠶᠡᠭᠴᠢ ᠤᠷᠪᠠᠭᠴᠢᠳ ᠤ᠋ᠨ ᠳᠣᠲᠣᠷᠠ ᠪᠣᠢ ᠶ᠋ᠢ ᠪᠤᠤ ᠮᠠᠷᠲᠠ!
ᠪᠠᠲᠤ ᠬᠠᠭᠠᠨ ᠴᠢᠷᠠᠢ ᠪᠠᠨ ᠪᠠᠷᠤᠢᠯᠭᠠᠨ᠂ ᠠᠮᠠ ᠪᠠᠨ ᠮᠤᠷᠤᠢᠵᠤ ᠲᠠᠰᠢᠭᠤᠷ ᠢ᠋ᠶ᠋ᠠᠷ ᠰᠠᠪᠠᠴᠢᠪᠠ᠃
— ᠲᠡᠳᠡ ᠬᠠᠰᠢᠷᠠᠯᠲᠠᠢ ᠪᠠᠢᠨᠠ᠃ ᠪᠢᠳᠡ ᠢᠵᠢᠯ ᠮᠥᠷᠡᠨ ᠦ᠌ ᠴᠠᠭᠠᠳᠤᠬᠢ ᠺᠢᠫᠴᠠᠺ ᠤ᠋ᠨ ᠳᠠᠷᠠᠰᠤᠲᠤ ᠲᠠᠯᠠ ᠬᠥᠨᠳᠡᠢ ᠳ᠋ᠦ᠍ ᠤᠳᠠᠬᠤ ᠦᠭᠡᠢ ᠬᠦᠷᠬᠦ ᠪᠤᠶᠤ ᠬᠣᠩᠭᠣᠷ ᠰᠠᠯᠬᠢ ᠨᠠᠮᠠᠶ᠋ᠢ ᠡᠨᠡ ᠪᠦᠬᠦ ᠤᠷᠪᠠᠬᠤ ᠬᠠᠭᠤᠷᠮᠠᠭᠯᠠᠬᠤ ᠠᠲᠠᠭᠠ ᠲᠡᠮᠡᠴᠡᠯ᠂ ᠵᠢᠰᠤᠷ ᠵᠠᠯᠢᠬᠠᠢ ᠪᠠᠷ ᠪᠤᠷᠲᠠᠬᠯᠠᠬᠳᠠᠬᠰᠠᠨ ᠭᠠᠵᠠᠷ ᠠ᠋ᠴᠠ ᠵᠠᠢᠯᠠᠭᠤᠯᠤᠨᠠ ᠭᠡᠳ ᠨᠠᠮ ᠳᠠᠭᠤ ᠪᠠᠷ ᠴᠠᠰᠢ ᠬᠡᠯᠡᠬᠦ ᠳ᠋ᠡᠭᠡᠨ᠂
— ᠪᠢ ᠡᠷᠭᠢᠵᠦ ᠬᠠᠷᠢᠯ ᠦᠭᠡᠢ ᠶᠠᠪᠤᠭᠠᠳ᠂ ᠡᠨᠳᠡ ᠶᠡᠷᠦ ᠪᠤᠴᠠᠵᠤ ᠢᠷᠡᠬᠦ ᠦᠭᠡᠢ᠂ ᠲᠡᠨᠳᠡᠬᠢ ᠶ᠋ᠢᠨ ᠤᠯᠤᠰ ᠤ᠋ᠳ ᠢ᠋ ᠳᠠᠭᠠᠭᠤᠯᠤᠨ ᠡᠵᠡᠯᠡᠵᠦ᠂ ᠤᠷᠢᠳᠤ ᠦᠵᠡᠭᠳᠡᠭᠡ ᠦᠭᠡᠢ ᠰᠢᠨᠡ ᠭᠦᠷᠦᠨ ᠢ᠋ ᠲᠣᠭᠲᠠᠭᠠᠬᠤ ᠳ᠋ᠤ᠌ ᠬᠠᠷᠠ ᠬᠣᠷᠣᠨ ᠤ᠋ ᠰᠠᠪᠠᠷ ᠬᠦᠷᠴᠦ ᠴᠢᠳᠠᠬᠤ ᠦᠭᠡᠢ! ᠭᠡᠬᠦ ᠳ᠋ᠦ᠍ ᠰᠦᠪᠡᠭᠡᠳᠠᠢ᠂
— ᠵᠠ᠂ ᠵᠠ ᠭᠡᠵᠦ ᠥᠭᠦᠯᠡᠵᠦ᠂ ᠣᠢᠷᠠᠯᠴᠠᠭᠠ ᠵᠣᠭᠰᠣᠭᠰᠠᠨ ᠮᠣᠩᠭᠣᠯᠴᠤᠳ ᠤ᠋ᠨ ᠵᠦᠭ ᠭᠢᠯᠦᠢᠵᠦ ᠬᠠᠷᠠᠪᠠ᠃
ᠪᠥᠬᠡ ᠨᠠᠷ᠂ ᠭᠠᠯ ᠳ᠋ᠤ᠌ ᠪᠥᠭᠡᠮ ᠬᠠᠭᠤᠷᠠᠢ ᠠᠭᠢ ᠬᠢᠬᠦ ᠳ᠋ᠦ᠍ ᠰᠢᠷᠠ ᠳᠥᠯᠥ ᠪᠠᠳᠠᠷᠠᠵᠤ ᠣᠴᠢ ᠪᠤᠵᠢᠭᠢᠨᠠᠪᠠ᠃
ᠰᠥᠪᠡᠭᠡᠳᠠᠢ᠂ ᠪᠦᠳᠦᠭᠦᠨ ᠬᠥᠯ ᠲᠡᠢ ᠵᠢᠷᠣᠭᠠ ᠬᠣᠯᠠ ᠮᠣᠷᠢ ᠤᠨᠤᠵᠤ ᠪᠠᠲᠤ ᠬᠠᠭᠠᠨ ᠤ᠋ ᠬᠣᠢᠨᠠ ᠠ᠋ᠴᠠ ᠰᠢᠷᠦᠭᠦᠯᠡᠨ ᠴᠢᠷᠠᠢ ᠪᠠᠨ ᠪᠠᠷᠤᠢᠯᠭᠠᠨ ᠶᠠᠪᠤᠪᠠ᠃ ᠮᠣᠩᠭᠣᠯᠴᠤᠳ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠵᠤ᠂ ᠰᠡᠭᠦᠯ ᠦ᠋ᠨ ᠲᠣᠭᠣᠭᠠ ᠶ᠋ᠢ ᠲᠡᠩᠨᠡᠪᠡ᠃ ᠵᠢᠩ ᠦ᠋ᠨ ᠤᠷᠲᠤ ᠴᠣᠪᠣᠭᠣ ᠬᠥᠲᠥᠯ ᠳᠡᠭᠡᠷᠡ ᠡᠴᠡ ᠪᠣᠷᠣ ᠡᠭᠦᠯᠡ ᠪᠠᠭᠰᠢᠷᠠᠨ ᠪᠠᠢᠭᠠ ᠬᠠᠷᠢ ᠶ᠋ᠢᠨ ᠥᠷᠥᠨᠡ ᠵᠦᠭ ᠲᠦ᠍ ᠴᠤᠪᠤᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠠᠯᠲᠠᠨᠴᠢᠮᠡᠭ᠂ ᠪᠠᠶᠠᠨᠴᠡᠴᠡᠭ᠂ ᠠᠷᠢᠭᠤᠨ᠂ ᠬᠡᠷᠡᠢᠳ· ᠮᠥᠩᠬᠡᠨᠠᠰᠤᠨ
ᠬᠢᠨᠠᠭᠴᠢ᠄ ᠪᠠᠶᠠᠨᠴᠡᠴᠡᠭ᠂ ᠠᠷᠢᠭᠤᠨ᠂ ᠠᠯᠲᠠᠨᠴᠢᠮᠡᠭ᠂ ᠲ· ᠬᠦᠮᠦᠵᠢᠯᠲᠦ᠂ ᠪᠠᠯ