ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ - ᠠᠮᠢᠳᠤᠷᠠᠯ ᠤᠨ ᠵᠠᠮ ᠂ ᠨᠢᠭᠡᠳᠦᠭᠡᠷ ᠪᠦᠯᠦᠭ 〔ᠬᠣᠷᠢᠨ ᠳᠥᠷᠪᠡ〕 Цаг төрийн үймээн – Д ᠂ Намдаг - Амьдралын зам ᠂ нэгдүгээр бүлэг - 24
161ᠤᠲᠠᠰᠤ ᠬᠠᠳᠬᠤᠯᠲᠠ
ᠨᠣᠶᠠᠳ ᠤ᠋ᠨ ᠬᠠᠲᠤᠳ ᠪᠣᠯᠪᠠᠴᠤ ᠬᠡᠲᠦᠷᠬᠡᠢ ᠶᠡᠬᠡ ᠶ᠋ᠢ ᠬᠦᠰᠡᠨ ᠰᠠᠨᠳᠤᠷᠴᠤ ᠮᠡᠲᠡᠭᠡᠭᠡᠳ ᠪᠠᠷᠠᠰᠢ ᠦᠭᠡᠢ ᠶᠡᠬᠡ ᠶ᠋ᠢ ᠦᠢᠯᠡᠴᠢᠨ ᠰᠦᠨᠴᠢᠨ ᠨᠦ᠍ᠭᠦᠳ ᠢ᠋ᠶ᠋ᠡᠷ ᠮᠡᠲᠡᠭᠡᠭᠦᠯᠦᠨ ᠲᠡᠪᠡᠳᠡᠭᠦᠯᠦᠨᠡ᠃ ᠶᠡᠷᠦ ᠬᠡᠨ ᠦ᠌ ᠳ᠋ᠦ᠍ ᠪᠣᠯᠪᠠᠴᠤ ᠶᠠᠭᠤᠮᠠ ᠶᠠᠭᠠᠬᠢᠭᠠ ᠴᠦ᠍ ᠦᠭᠡᠢ᠂ ᠪᠤᠷᠬᠠᠨ ᠳ᠋ᠤ᠌ ᠲᠠᠯᠪᠢᠬᠤ ᠤᠭᠤᠴᠠ ᠯᠠ ᠭᠡᠨᠡ᠂ ᠪᠢᠲᠡᠭᠦᠯᠡᠬᠦ ᠭᠡᠵᠦ ᠥᠭᠡᠷᠡ ᠨᠢᠭᠡ ᠬᠡᠷᠡᠭᠲᠡᠢ᠃ ᠪᠡᠯᠭᠡ ᠳᠡᠮᠪᠡᠷᠢᠯ ᠭᠡᠵᠦ ᠪᠣᠳᠣᠬᠤ ᠠ᠋ᠴᠠ ᠭᠠᠳᠠᠨᠠ ᠪᠡᠶᠡ ᠪᠡᠶᠡ ᠳ᠋ᠡᠭᠡᠨ ᠭᠠᠢᠬᠠᠭᠤᠯᠬᠤ ᠭᠡᠰᠡᠨ ᠬᠥᠮᠦᠰ ᠲᠦ᠍ ᠬᠣᠨᠢᠨ ᠲᠣᠭᠣᠭᠠ ᠭᠡᠵᠦ ᠨᠡᠷᠡᠯᠡᠭᠳᠡᠳᠡᠭ ᠬᠠᠮᠤᠭ ᠤ᠋ᠨ ᠲᠣᠮᠣ ᠲᠣᠭᠣᠭᠠᠨ ᠳ᠋ᠤ᠌ ᠪᠠᠭᠲᠠᠬᠤ ᠦᠭᠡᠢ ᠲᠣᠮᠣ ᠤᠭᠤᠴᠠ ᠪᠣᠯᠪᠠᠴᠤ ᠰᠡᠳᠬᠢᠯ ᠳ᠋ᠦ᠍ ᠴᠢᠮᠠᠯᠠᠭᠳᠠᠨᠠ᠃ ᠭᠠᠮᠢᠩ ᠤ᠋ᠨ ᠪᠠᠷᠢᠶᠠ ᠶᠠᠪᠤᠭᠰᠠᠨ ᠠ᠋ᠴᠠ ᠬᠣᠢᠰᠢ《ᠬᠦᠷᠢᠶᠡᠨ ᠳ᠋ᠦ᠍ ᠭᠠᠮᠢᠩ ᠬᠥᠮᠦᠨ ᠠᠮᠢᠲᠠᠨ ᠢ᠋ ᠲᠣᠨᠣᠨ ᠳᠡᠭᠡᠷᠡᠮᠳᠡᠬᠦ ᠨᠢ ᠵᠢᠭᠲᠡᠢᠬᠡᠨ》 ᠭᠡᠰᠡᠨ ᠶᠡᠬᠡ ᠱᠤᠤᠭᠢᠶᠠᠨ ᠵᠦᠭ ᠪᠣᠯᠭᠠᠨ ᠳᠠᠷᠬᠠᠨ᠂ ᠬᠥᠳᠡᠭᠡ ᠶ᠋ᠢᠨ ᠬᠥᠮᠦᠰ ᠬᠦᠷᠢᠶᠡ ᠣᠷᠣᠵᠤ ᠢᠷᠡᠬᠦ ᠨᠢ ᠴᠥᠭᠡᠷᠡᠭᠰᠡᠨ ᠤᠴᠢᠷ ᠮᠠᠯ ᠮᠢᠬᠠ ᠬᠣᠪᠣᠷᠳᠠᠭᠰᠠᠨ ᠢ᠋ ᠬᠡᠯᠡᠬᠦ ᠤᠤ? ᠬᠠᠮᠢᠭᠠ ᠯᠠ ᠪᠣᠯ ᠬᠠᠮᠢᠭᠠ ᠤᠭᠤᠴᠠᠨ ᠤ᠋ ᠡᠷᠢᠯ᠂ ᠡᠭᠦᠨ ᠡᠴᠡ ᠴᠠᠭᠠᠰᠢ ᠲᠠᠪᠠᠭ ᠲᠤ ᠬᠢᠬᠦ ᠨᠠᠷᠢᠨ ᠪᠣᠣᠪᠣ᠂ ᠰᠢᠬᠢᠷ ᠵᠢᠮᠢᠰ᠂ ᠠᠬᠠ ᠵᠠᠬᠠ ᠬᠥᠮᠦᠰ ᠢ᠋ ᠵᠣᠴᠢᠯᠠᠬᠤ ᠠᠷᠢᠬᠢ ᠳᠠᠷᠠᠰᠤ᠂ ᠶᠡᠷᠦ ᠬᠡᠷᠡᠭ ᠪᠣᠯᠭᠠᠨ ᠢ᠋ ᠬᠤᠷᠤᠭᠤ ᠳᠠᠷᠤᠨ ᠲᠣᠭᠠᠯᠠᠬᠤ ᠳᠣᠳᠣᠮ᠂ ᠳᠣᠣᠷᠠ ᠠ᠋ᠴᠠ ᠨᠡᠮᠡᠭᠳᠡᠨ ᠭᠠᠷᠴᠤ ᠢᠷᠡᠬᠦ ᠶ᠋ᠢ ᠶᠠᠭᠠᠬᠢᠯᠠ᠃ ᠬᠥᠳᠡᠭᠡ ᠶ᠋ᠢᠨ ᠮᠠᠯᠴᠢᠳ《ᠬᠦᠷᠢᠶᠡ ᠬᠥᠮᠦᠰ ᠣᠩᠭᠢᠷᠭᠠᠨ᠂ ᠴᠠᠭᠠᠨ ᠰᠠᠷᠠ ᠪᠣᠯᠬᠤ ᠳ᠋ᠤ᠌ ᠡᠳᠦᠢ ᠲᠡᠳᠦᠢ ᠥᠷᠢ ᠰᠢᠷᠢ ᠬᠢᠵᠦ ᠣᠷᠬᠢᠭᠠᠳ ᠥᠩᠭᠡᠷᠡᠮᠡᠭᠴᠡ ᠨᠢ ᠭᠡᠷ ᠢ᠋ᠶ᠋ᠡᠨ ᠬᠤᠳᠠᠯᠳᠤᠨ ᠲᠥᠯᠥᠳᠡᠭ ᠶᠦᠮ ᠭᠡᠨᠡ ᠪᠢᠯᠡ》 ᠴᠦ᠍ ᠭᠡᠬᠦ ᠰᠢᠭ᠂《ᠨᠢᠭᠡ ᠠᠢᠯ ᠪᠤᠷᠬᠠᠨ ᠳ᠋ᠠᠭᠠᠨ ᠲᠠᠯᠪᠢᠭᠰᠠᠨ ᠢᠳᠡᠭᠡᠨ ᠦ᠌ ᠪᠡᠨ ᠳᠣᠣᠷᠠ ᠬᠤᠸᠠᠩᠽᠢ ᠲᠠᠢ ᠴᠠᠢ ᠲᠠᠯᠪᠢᠭᠰᠠᠨ ᠢ᠋ ᠨᠢ ᠠᠯᠢ ᠢᠷᠡᠭᠰᠡᠨ ᠵᠣᠴᠢᠳ ᠠᠷᠢᠬᠢᠨ ᠳ᠋ᠤ᠌ ᠰᠣᠭᠲᠣᠨ ᠬᠤᠸᠠᠩᠽᠢ ᠶ᠋ᠢ ᠢᠰᠬᠦᠯᠬᠦ ᠳ᠋ᠦ᠍ ᠳᠣᠲᠣᠷᠠ ᠠ᠋ᠴᠠ ᠨᠢ ᠲᠤᠢᠫᠤᠤ ᠨᠤᠭᠤᠳ ᠦᠰᠦᠷᠦᠨ ᠭᠠᠷᠤᠭᠰᠠᠨ ᠭᠡᠨᠡ ᠪᠢᠯᠡ》 ᠭᠡᠬᠦᠴᠢᠯᠡᠨ ᠢ᠋ᠶ᠋ᠡᠷ ᠱᠣᠣᠯᠠᠨ ᠬᠡᠯᠡᠯᠴᠡᠬᠦ ᠨᠢ ᠦᠨᠡᠨ ᠲᠡᠢ ᠴᠦ᠍ ᠪᠠᠢᠵᠤ ᠮᠡᠳᠡᠨᠡ᠃ ᠶᠠᠭᠤ ᠴᠦ᠍ ᠠᠲᠤᠭᠠᠢ᠂ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠮᠥᠷ ᠳᠡᠭᠡᠷᠡ ᠡᠴᠡ ᠴᠥᠭᠡᠨ ᠦᠭᠡᠢ ᠭᠡᠷ ᠪᠦᠯᠢ ᠳ᠋ᠦ᠍ ᠠᠭᠤᠷ ᠪᠤᠬᠢᠨᠢᠳᠤᠯ᠂ ᠬᠡᠷᠡᠭᠦᠯ ᠬᠢᠮᠤᠷᠠᠯᠳᠤᠭᠠᠨ ᠤᠬᠢᠯᠠᠭᠠᠨ ᠤᠨᠵᠢᠭᠠᠨ ᠭᠠᠷᠤᠨᠠ᠃ ᠬᠠᠷᠢᠨ ᠬᠡᠦᠬᠡᠳ ᠪᠠᠭᠠᠴᠤᠳ ᠠᠮᠲᠠᠲᠤ ᠰᠠᠢᠨ ᠢ᠋ ᠬᠠᠨᠲᠠᠯᠠ ᠪᠠᠨ ᠢᠳᠡᠬᠦ᠂ ᠠᠢᠯ ᠭᠡᠷ ᠦ᠋ᠳ ᠢ᠋ᠶ᠋ᠡᠷ ᠡᠷᠡᠭᠡ᠂ ᠴᠡᠭᠡᠷ ᠦᠭᠡᠢ ᠴᠦ᠍ ᠭᠡᠰᠡᠨ ᠪᠡᠯᠡᠭ ᠰᠡᠯᠲᠡ ᠶ᠋ᠢ ᠠᠪᠤᠨᠠ ᠭᠡᠵᠦ ᠪᠠᠶᠠᠷᠯᠠᠬᠤ ᠳ᠋ᠠᠭᠠᠨ ᠥᠷᠯᠥᠭᠡ ᠪᠦᠷᠢ᠂ ᠬᠣᠨᠣᠭ ᠲᠣᠭᠠᠯᠠᠨ ᠬᠦᠯᠢᠶᠡᠨᠡ᠃
ᠪᠠᠯᠳᠠᠨᠴᠡᠷᠢᠩ ᠱᠠᠪᠢ ᠲᠠᠢ ᠪᠠᠨ ᠰᠡᠳᠬᠢᠯ ᠠᠮᠤᠷ ᠪᠠᠢᠪᠠ᠃ ᠠᠷᠢᠬᠢ ᠳᠡᠷᠡᠰᠦᠨ ᠦ᠌ ᠵᠦᠢᠯ ᠢ᠋ ᠨᠢᠭᠡ ᠶᠣᠰᠣᠨ ᠳ᠋ᠠᠭᠠᠨ ᠬᠣᠣᠷᠲᠤ ᠢᠳᠡᠭᠡᠨ ᠭᠡᠵᠦ ᠦᠵᠡᠳᠡᠭ ᠲᠤᠯᠠ ᠲᠡᠭᠦᠨ ᠦ᠌ ᠲᠤᠬᠠᠢ ᠪᠣᠳᠣᠬᠤ ᠶᠠᠭᠤᠮᠠ ᠠᠯᠠᠭᠠ᠃ ᠪᠤᠷᠬᠠᠨ ᠳ᠋ᠠᠭᠠᠨ ᠨᠢᠭᠡ ᠲᠠᠪᠠᠭ ᠢᠳᠡᠭᠡ᠂ ᠪᠢᠲᠡᠭᠦᠯᠭᠡ ᠶ᠋ᠢᠨ ᠮᠢᠬᠠ᠂ ᠬᠡᠳᠦᠨ ᠤᠳᠠᠭᠠ ᠴᠢᠨᠠᠬᠤ ᠪᠠᠩᠰᠢ ᠡᠳᠡᠭᠡᠷ ᠢ᠋ ᠪᠡᠯᠡᠳᠬᠡᠭᠰᠡᠨ ᠢ᠋ᠶ᠋ᠡᠷ ᠰᠡᠳᠬᠢᠯ ᠠᠮᠤᠷ ᠰᠠᠭᠤᠨᠠ᠃ ᠬᠠᠷᠢᠨ ᠥᠨᠥᠬᠢ ᠡᠮᠡᠭᠲᠡᠢ ᠶ᠋ᠢᠨ ᠲᠤᠬᠠᠢ ᠳ᠋ᠤ᠌ ᠭᠡᠪᠡᠯ᠂ ᠪᠠᠯᠳᠠᠨᠴᠡᠷᠢᠩ ᠡᠨᠡ ᠵᠠᠪᠰᠠᠷ ᠲᠡᠭᠦᠨ ᠦ᠌ ᠪᠡᠨ ᠨᠡᠷᠡ ᠶ᠋ᠢ ᠣᠶᠤᠨᠳᠠᠷᠢ ᠭᠡᠳᠡᠭ ᠢ᠋ ᠮᠡᠳᠡᠵᠡᠢ᠃ ᠣᠶᠣᠨᠳᠠᠷᠢ ᠭᠡᠳᠡᠭ ᠨᠡᠷᠡ ᠶ᠋ᠢ ᠪᠠᠯᠳᠠᠨᠴᠡᠷᠢᠩ ᠥᠪᠡᠷ ᠡᠴᠡ ᠨᠢ ᠠᠰᠠᠭᠤᠵᠤ ᠮᠡᠳᠡᠭᠰᠡᠨ ᠪᠢᠰᠢ᠂ ᠨᠢᠭᠡ ᠤᠳᠠᠭᠠ ᠵᠢᠯᠣᠭᠣᠴᠢ ᠲᠦᠪᠰᠢᠨ ᠦ᠌ ᠲᠡᠢᠨ ᠬᠦ᠌ ᠳᠠᠭᠤᠳᠠᠬᠤ ᠳ᠋ᠤᠨᠢ ᠮᠡᠳᠡᠵᠦ ᠠᠪᠴᠠᠢ᠃
ᠡᠴᠢᠭᠡ ᠨᠢ ᠪᠠᠯᠰᠠᠨᠵᠠᠪ ᠬᠡᠮᠡᠬᠦ ᠵᠢᠷ ᠦ᠋ᠨ ᠨᠢᠭᠡᠨ ᠪᠠᠶᠠᠨ ᠬᠥᠮᠦᠨ ᠪᠣᠯᠬᠤ ᠶ᠋ᠢ ᠰᠠᠮ ᠰᠤᠷᠪᠤᠯᠵᠢᠯᠠᠨ ᠮᠡᠳᠡᠭᠰᠡᠨ ᠪᠠᠢᠯᠠ᠃ ᠡᠭᠦᠨᠴᠢᠯᠡᠨ ᠣᠶᠤᠨᠳᠠᠷᠢ ᠪᠠᠯᠳᠠᠨᠴᠡᠷᠢᠩ ᠡᠴᠡ ᠨᠡᠷᠡ ᠶ᠋ᠢ ᠨᠢ ᠠᠰᠠᠭᠤᠭᠰᠠᠨ ᠤᠳᠠᠭᠠ ᠦᠭᠡᠢ ᠪᠣᠯᠪᠠᠴᠤ ᠪᠠᠰᠠ ᠯᠠ ᠠᠯᠢ ᠬᠡᠳᠦᠢᠨ ᠦ᠌ ᠣᠢᠯᠠᠭᠠᠭᠠᠳ ᠮᠡᠳᠡᠴᠢᠭᠰᠡᠨ ᠪᠠᠢᠯᠠ᠃
ᠣᠳᠣ ᠣᠶᠤᠨᠳᠠᠷᠢ ᠴᠠᠭᠠᠨ ᠰᠠᠷᠠ ᠪᠣᠯᠬᠤ ᠭᠡᠵᠦ ᠪᠠᠢᠭᠠ ᠳ᠋ᠤ᠌ ᠰᠡᠳᠬᠢᠯ ᠨᠢ ᠶᠣᠰᠣᠲᠠᠢ ᠭᠦᠨ ᠬᠥᠳᠡᠯᠵᠦ ᠪᠣᠢ ᠠᠵᠢ᠃ ᠡᠴᠢᠭᠡ ᠡᠴᠡ ᠪᠡᠨ ᠦᠢᠲᠠᠩ ᠬᠤᠸᠠᠷ ᠤ᠋ᠨ ᠳᠡᠪᠡᠯ᠂ ᠤᠲᠠᠰᠤ ᠬᠠᠳᠬᠤᠮᠠᠯ᠂ ᠭᠤᠲᠤᠯ᠂ ᠰᠤᠪᠤᠳ ᠤ᠋ᠨ ᠳᠠᠷᠤᠭᠤᠯᠤᠭᠠ᠂ ᠰᠢᠨᠠᠨ ᠤ᠋ ᠰᠠᠨᠵᠢᠭᠤᠷᠭᠠ᠂ ᠠᠯᠲᠠᠨ ᠡᠭᠡᠮᠦᠭ᠂ ᠰᠤᠤᠳᠤᠨ ᠴᠢᠬᠢᠲᠡᠢ ᠮᠢᠨᠵᠢᠨ ᠮᠠᠯᠠᠭᠠᠢ ᠭᠡᠬᠦᠴᠢᠯᠡᠨ ᠢ᠋ ᠠᠶᠤᠮᠰᠢᠭ ᠦᠭᠡᠢ ᠳᠤᠷᠠᠳᠤᠨ ᠱᠠᠭᠠᠷᠳᠠᠨᠠ᠃ ᠤᠷᠢᠳ ᠡᠮᠦᠨᠡ ᠣᠶᠤᠨᠳᠠᠷᠢ ᠢᠩᠭᠢᠳᠡᠭ ᠦᠭᠡᠢ ᠪᠠᠢᠭᠰᠠᠨ ᠤ᠋ ᠬᠤᠪᠢ ᠳ᠋ᠤ᠌ ᠡᠴᠢᠭᠡ ᠨᠢ ᠭᠠᠢᠬᠠᠨ ᠡᠬᠡᠨᠡᠷ ᠲᠡᠢ ᠪᠡᠨ ᠰᠠᠮ ᠶᠠᠷᠢᠯᠴᠠᠨᠠ᠃
— ᠠ ᠬᠥ ᠡᠬᠡᠨᠡᠷ ᠠ᠋᠂ ᠥᠬᠢᠨ ᠶᠠᠭᠤ ᠪᠣᠯᠬᠤ ᠨᠢ ᠡᠨᠡ ᠪᠣᠢ? ᠭᠤᠶᠤᠨ ᠭᠣᠣᠳᠠᠬᠤ ᠶ᠋ᠢ ᠮᠥᠷᠥᠭᠡᠳᠦᠨ ᠥᠨᠳᠥᠷ ᠦᠨᠡ ᠲᠡᠢ ᠪᠦᠬᠦᠨ ᠢ᠋ ᠨᠡᠬᠡᠨ ᠱᠠᠭᠠᠷᠳᠠᠭᠠᠳ ᠪᠣᠯᠬᠤ ᠪᠠᠨ ᠪᠣᠯᠢᠪᠠ᠃
— ᠡᠪᠦᠭᠡᠨ ᠮᠢᠨᠢ ᠣᠳᠣ ᠶᠠᠭᠠᠬᠢᠶᠠ ᠭᠡᠬᠦ ᠪᠣᠢ? ᠡᠮᠦᠰᠬᠦ ᠡᠳ᠋ᠯᠡᠬᠦ ᠬᠣᠶᠠᠷ ᠢ᠋ ᠬᠦᠰᠡᠳᠡᠭ ᠴᠠᠭ ᠨᠢ ᠪᠣᠯᠤᠭᠠᠳ ᠯᠠ ᠲᠡᠷᠡ ᠰᠢᠦ ᠳᠡ ᠠ᠋᠃
— ᠵᠠ ᠭᠡᠵᠦ ᠨᠥᠬᠥᠷ ᠨᠢ ᠠᠮᠠ ᠪᠠᠨ ᠠᠩᠭᠠᠢᠯᠭᠠᠨ ᠡᠬᠡᠨᠡᠷ ᠢ᠋ᠶ᠋ᠡᠨ ᠰᠢᠷᠳᠡᠭᠡᠳ᠄ ᠡᠨᠡ ᠴᠢᠨᠢ ᠴᠣᠬᠣᠮ ᠶᠠᠭᠤ ᠭᠡᠰᠡᠨ ᠦᠭᠡ ᠪᠠᠢᠨᠠ ᠳᠠ?
— ᠠ᠋᠂ ᠴᠢ ᠪᠣᠳᠣ᠂ ᠴᠢᠨᠠᠳᠤᠬᠢ ᠴᠢᠨᠢ ᠠᠷᠪᠠᠨ ᠶᠢᠰᠦ ᠬᠦᠷᠴᠦ ᠪᠠᠢᠭᠠ ᠪᠢᠰᠢ ᠤᠤ?
— ᠠᠷᠪᠠᠨ ᠶᠢᠰᠦ ᠬᠦᠷᠬᠦ ᠶᠠᠭᠤᠨ ᠤ᠋ ᠬᠠᠮᠢᠶᠠ᠂ ᠶᠠᠮᠠᠷ ᠪᠤᠰᠤᠳ ᠤ᠋ᠨ ᠥᠬᠢᠨ ᠲᠡᠢ ᠠᠳᠠᠯᠢ ᠭᠠᠳᠠᠭᠤᠷ ᠳᠣᠲᠣᠭᠤᠷ ᠶᠠᠪᠤᠨ ᠡᠨᠡ ᠲᠡᠷᠡ ᠬᠥᠮᠦᠨ ᠤᠷᠤᠭᠤ ᠲᠠᠲᠠᠭᠳᠠᠳᠠᠭ ᠪᠢᠰᠢ ᠰᠢᠦ ᠳᠡ ᠠ᠋᠃
— ᠬᠠᠷᠢᠨ ᠲᠡᠷᠡ ᠶᠠᠭᠤᠨ ᠤ᠋ ᠬᠠᠮᠢᠶᠠ᠃ ᠨᠠᠰᠤ ᠪᠡᠶᠡ ᠬᠣᠶᠠᠷ ᠭᠦᠢᠴᠡᠬᠦ ᠪᠡᠷ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠨᠢᠭᠡ ᠶ᠋ᠢ ᠬᠦᠰᠡᠨ ᠬᠣᠶᠠᠷ ᠢ᠋ ᠮᠥᠷᠥᠭᠡᠳᠦᠭᠦᠯᠬᠦ ᠰᠢᠦ ᠳᠡ᠃
— ᠵᠠ᠂ ᠲᠡᠭᠡᠪᠡᠯ ᠬᠡᠷᠡᠭ ᠶᠠᠪᠤᠳᠠᠯ ᠪᠦᠷ ᠪᠢᠰᠢᠳᠡᠬᠦ ᠨᠢ ᠪᠠᠢᠨᠠ ᠳᠠ᠃
— ᠦᠭᠡᠢ᠂ ᠴᠢ ᠪᠢᠰᠢᠳᠡᠬᠦ ᠨᠢ ᠭᠡᠵᠦ ᠴᠣᠬᠣᠮ ᠶᠠᠭᠤ ᠬᠡᠯᠡᠭᠡᠳ ᠪᠠᠢᠨᠠ ᠪᠣᠢ?
— ᠶᠠᠭᠠᠬᠢᠬᠤᠪ? ᠡᠨᠡ ᠡᠨᠡᠬᠡᠨ ᠱᠠᠭᠠᠷᠳᠠᠵᠤ ᠪᠠᠢᠭᠠ ᠶ᠋ᠢ ᠨᠢ ᠶᠠᠭᠤ ᠴᠦ᠍ ᠭᠡᠰᠡᠨ ᠡᠨᠡ ᠵᠢᠯ ᠳ᠋ᠡᠭᠡᠨ ᠠᠪᠴᠤ ᠥᠭᠬᠦ ᠶ᠋ᠢᠨ ᠬᠡᠷᠡᠭ ᠦᠭᠡᠢ ᠪᠢᠰᠢ ᠤᠤ?
ᠡᠬᠡᠨᠡᠷ ᠨᠢ ᠳᠥᠴᠢ ᠭᠠᠷᠤᠢ ᠨᠠᠰᠤᠲᠠᠢ᠂ ᠪᠡᠶᠡ ᠪᠢᠯᠳᠠᠷ ᠢ᠋ᠶ᠋ᠠᠷ ᠪᠦᠳᠦᠭᠦᠪᠲᠦᠷ᠂ ᠵᠢᠰᠦ ᠴᠢᠷᠠᠢ ᠲᠤᠩᠭᠠᠯᠠᠭ᠂ ᠰᠠᠨᠠᠨ ᠰᠡᠳᠬᠢᠬᠦ ᠪᠡᠷ ᠠᠷᠢᠭᠤᠨ ᠪᠣᠯᠣᠳ ᠠᠮᠤᠭᠤᠯᠠᠩ ᠠᠪᠠᠭᠠᠢ᠂ ᠡᠷᠡ ᠶ᠋ᠢᠨ ᠢ᠋ᠶ᠋ᠡᠨ ᠦᠭᠡ ᠶ᠋ᠢ ᠵᠥᠪ ᠴᠦ᠍ ᠶᠦᠮ ᠤᠤ ᠭᠡᠵᠦ ᠪᠣᠳᠣᠪᠠᠴᠤ ᠥᠪᠡᠷ ᠢ᠋ᠶ᠋ᠡᠨ ᠠᠷᠪᠠ ᠶᠢᠰᠦᠲᠡᠢ ᠪᠠᠢᠬᠤ ᠳ᠋ᠠᠭᠠᠨ ᠴᠣᠬᠣᠮ ᠶᠠᠭᠤ ᠶᠠᠭᠤᠨ ᠤ᠋ ᠬᠦᠰᠡᠯ ᠮᠥᠷᠥᠭᠡᠳᠦᠯ ᠪᠣᠯᠵᠤ ᠪᠠᠢᠭᠰᠠᠨ ᠢ᠋ ᠨᠢᠭᠡᠳ ᠨᠢᠭᠡ ᠦᠭᠡᠢ ᠡᠷᠭᠢᠴᠡᠭᠦᠯᠦᠨ ᠪᠣᠳᠣᠬᠤ ᠠᠵᠢ᠃
— ᠦᠭᠡᠢ ᠠᠪᠴᠤ ᠥᠭᠭᠦᠶᠡ᠃ ᠨᠢᠭᠡ ᠳ᠋ᠦ᠍ ᠴᠢᠨᠠᠳᠤᠬᠢ ᠴᠢᠨᠢ ᠭᠤᠨᠢᠨ ᠭᠤᠲᠤᠷᠠᠬᠤ ᠳ᠋ᠤ᠌ ᠬᠦᠷᠦᠨᠡ᠃ ᠬᠣᠶᠠᠷ ᠲᠤ ᠪᠡᠯᠡᠨ ᠪᠠᠢᠭᠠ ᠪᠤᠶᠠᠨ ᠢ᠋ ᠪᠢᠳᠡ ᠬᠡᠨ ᠳ᠋ᠡᠭᠡᠨ ᠭᠡᠵᠦ ᠬᠠᠪᠲᠠᠷᠠᠨ ᠰᠠᠭᠤᠬᠤ ᠪᠣᠢ? ᠣᠳᠣ ᠠ᠋ᠴᠠ ᠡᠬᠢᠯᠡᠨ ᠡᠳ᠋ᠯᠡᠭ᠂ ᠡᠳ᠋ᠯᠡᠭᠦᠯᠵᠦ ᠴᠦ᠍ ᠪᠠᠢᠯ ᠦᠭᠡᠢ ᠭᠣᠷᠢ ᠦᠭᠡᠢ ᠭᠡᠵᠦ ᠵᠢᠳᠬᠦᠨᠡ᠃
ᠤᠭ ᠨᠢ ᠶᠠᠭ ᠠᠷᠪᠠ ᠶᠢᠰᠦᠨ ᠨᠠᠰᠤᠨ ᠳᠡᠭᠡᠷᠡ ᠪᠡᠨ ᠴᠦ᠍ ᠪᠢᠰᠢ᠂ ᠬᠡᠵᠢᠶᠡ ᠨᠢᠭᠡ ᠢᠩᠭᠢᠵᠦ ᠭᠤᠶᠤᠵᠤ ᠭᠠᠩᠭᠠᠯᠠᠬᠤ ᠶ᠋ᠢ ᠬᠦᠰᠡᠬᠦ ᠪᠣᠯᠬᠤ᠂ ᠴᠣᠬᠣᠮ ᠲᠡᠷᠡ ᠴᠠᠭ ᠲᠠᠭᠠᠨ ᠥᠪᠡᠷ ᠦ᠋ᠨ ᠬᠢᠨᠢ ᠰᠠᠨᠠᠭᠰᠠᠨ ᠪᠣᠳᠣᠯ ᠢ᠋ ᠨᠢᠢ ᠨᠣᠤ ᠦᠭᠡᠢ ᠶᠠᠷᠢᠭᠠᠳ ᠪᠠᠰᠠ ᠲᠡᠷᠡ ᠪᠣᠳᠣᠯ ᠬᠦᠰᠡᠯ ᠨᠢ ᠥᠪᠡᠷᠰᠡᠳ ᠦ᠋ᠨ ᠬᠢᠨᠢ ᠪᠣᠳᠣᠵᠤ ᠰᠠᠨᠠᠳᠠᠭ ᠲᠠᠢ ᠤᠶᠠᠯᠳᠤᠪᠠᠯ ᠰᠠᠶᠢ ᠥᠬᠢᠨ ᠦ᠌ ᠪᠡᠨ ᠰᠢᠬᠠᠵᠤ ᠱᠠᠭᠠᠷᠳᠠᠵᠤ ᠪᠠᠢᠭᠠ ᠪᠠᠷ ᠪᠣᠯᠭᠠᠶᠠ ᠭᠡᠵᠦ ᠡᠴᠢᠭᠡ ᠡᠬᠡ ᠬᠣᠶᠠᠷ ᠨᠢ ᠪᠣᠳᠣᠵᠤ ᠪᠠᠢᠭᠰᠠᠨ ᠪᠠᠢᠵᠠᠢ᠃ ᠭᠡᠲᠡᠯᠡ ᠡᠬᠡ ᠳ᠋ᠦ᠍ᠨᠢ ᠥᠬᠢᠨ ᠦ᠌ ᠪᠡᠨ ᠡᠢᠨ ᠬᠦ᠌ ᠠᠭᠠᠰᠢᠯᠠᠬᠤ ᠪᠣᠯᠤᠭᠰᠠᠨ ᠨᠢ ᠮᠡᠳᠡᠵᠦ ᠪᠣᠯᠣᠰᠢ ᠦᠭᠡᠢ ᠨᠢᠭᠤᠴᠠ᠂ ᠮᠡᠳᠡᠯᠡ ᠴᠦ᠍ ᠲᠡᠭᠦᠨ ᠢ᠋ ᠪᠡᠨ ᠰᠠᠭᠤᠭᠰᠠᠨ ᠡᠷᠡ ᠳ᠋ᠡᠭᠡᠨ ᠬᠡᠯᠡᠯᠡ ᠭᠡᠳᠡᠭ ᠨᠢ ᠮᠢᠩᠭᠠᠨ ᠯᠠᠩ᠂ ᠠᠮᠠᠯᠠᠪᠠᠴᠤ ᠠᠮᠠᠨ ᠠ᠋ᠴᠠ ᠨᠢ ᠭᠠᠷᠴᠤ ᠪᠣᠯᠣᠰᠢ ᠦᠭᠡᠢ ᠰᠠᠨᠠᠭᠳᠠᠳᠠᠭ ᠪᠠᠢᠵᠠᠢ᠃
ᠡᠷᠡ ᠨᠢ ᠪᠣᠯ ᠮᠥᠨ ᠯᠡ ᠰᠠᠢᠬᠠᠨ ᠰᠠᠨᠠᠭᠠᠲᠤ ᠠᠮᠤᠭᠤᠯᠠᠩ ᠲᠠᠢᠪᠤᠩ ᠬᠥᠮᠦᠨ᠂ ᠪᠠᠭᠠ ᠨᠠᠰᠤᠨ ᠳ᠋ᠠᠭᠠᠨ ᠡᠴᠢᠭᠡ ᠶ᠋ᠢᠨ ᠱᠠᠭᠠᠷᠳᠠᠯᠭᠠ ᠪᠠᠷ ᠨᠣᠮ ᠰᠤᠷᠬᠤ ᠭᠡᠵᠦ ᠨᠡᠯᠢᠶᠡᠳ ᠣᠷᠣᠯᠳᠣᠭᠰᠠᠨ ᠪᠣᠯᠪᠠᠴᠤ ᠢᠳᠡᠪᠬᠢ ᠣᠷᠣᠯᠳᠣᠯᠭᠠ ᠮᠠᠭᠤᠲᠠᠢ ᠪᠣᠯᠤᠭᠠᠳ ᠭᠠᠪᠢᠭᠰᠠᠨ ᠦᠭᠡᠢ᠃ ᠣᠳᠣ ᠴᠦ᠍ ᠭᠡᠰᠡᠨ ᠨᠣᠮ ᠦᠵᠡᠬᠦ ᠪᠡᠷ ᠨᠢᠳᠦ ᠨᠢ ᠡᠷᠢᠶᠡᠯᠵᠢᠯᠡᠨ ᠨᠣᠢᠷ ᠨᠢ ᠬᠦᠷᠦᠨᠡ᠃ ᠡᠢᠮᠦ ᠪᠡᠷ ᠢ᠋ᠶ᠋ᠡᠨ ᠪᠠᠯᠰᠠᠨᠵᠠᠪ ᠭᠠᠭᠴᠠ ᠥᠬᠢᠨ ᠢ᠋ᠶ᠋ᠡᠨ ᠨᠣᠮ ᠪᠢᠴᠢᠭ ᠰᠤᠷᠭᠠᠬᠤ ᠶ᠋ᠢᠨ ᠲᠥᠯᠥᠭᠡ ᠪᠣᠳᠣᠮᠠ ᠦᠭᠡᠢ ᠪᠠᠢᠪᠠᠴᠤ ᠤᠷᠢᠲᠠᠢ ᠨᠢ ᠬᠣᠶᠠᠷ ᠬᠡᠦᠬᠡᠳ ᠲᠥᠷᠥᠨ ᠡᠨᠳᠡᠭᠰᠡᠨ ᠤᠴᠢᠷ ᠣᠶᠤᠨᠳᠠᠷᠢ ᠳᠡᠭᠡᠷᠡ ᠬᠥᠯ ᠬᠣᠷᠢᠨ ᠡᠩᠬᠦᠷᠡᠢᠯᠡᠭᠰᠡᠨ ᠪᠥᠭᠡᠳ ᠠᠷᠪᠠ ᠶᠢᠰᠦ ᠬᠦᠷᠦᠭᠡᠳ ᠭᠠᠳᠠᠭᠰᠢ ᠭᠠᠷᠬᠤ᠂ ᠪᠤᠰᠤᠳ ᠬᠡᠦᠬᠡᠳ ᠪᠠᠭᠠᠴᠤᠳ ᠲᠠᠢ ᠡᠷᠬᠡᠯᠡᠨ ᠲᠣᠭᠯᠠᠬᠤ ᠭᠡᠵᠦ ᠲᠡᠮᠡᠦᠯᠦᠭᠡᠳ ᠪᠣᠯᠬᠤ ᠦᠭᠡᠢ ᠪᠣᠯᠬᠤ ᠳ᠋ᠤᠨᠢ ᠨᠣᠮ ᠪᠠᠷᠢᠭᠤᠯᠤᠨ ᠬᠣᠷᠢᠭᠯᠠᠵᠤ ᠡᠬᠢᠯᠡᠭᠰᠡᠨ ᠠᠵᠢ᠃ ᠡᠢᠨ ᠬᠦ᠌ ᠪᠦᠷ ᠳᠡᠭᠡᠷᠡ ᠴᠠᠭ ᠠ᠋ᠴᠠ ᠬᠥᠯ ᠬᠣᠷᠢᠭᠰᠠᠨ ᠨᠢ ᠣᠳᠣ ᠴᠦ᠍ ᠪᠠᠷᠤᠭ ᠬᠡᠪ ᠢ᠋ᠶ᠋ᠡᠷ᠃ ᠲᠤᠰᠬᠠᠢᠯᠠᠨ ᠪᠠᠷᠢᠵᠤ ᠰᠠᠭᠤᠯᠭᠠᠭᠰᠠᠨ ᠭᠡᠷ ᠲᠦ᠋ᠨᠢ ᠡᠴᠢᠭᠡ᠂ ᠡᠬᠡ ᠠᠷᠤ ᠶ᠋ᠢᠨ ᠪᠠᠢᠰᠢᠩ ᠳ᠋ᠤ᠌ ᠰᠠᠭᠤᠳᠠᠭ ᠬᠢᠲᠠᠳ ᠲᠣᠭᠣᠭᠠᠴᠢ᠂ ᠮᠣᠷᠢ ᠲᠡᠷᠭᠡᠨ ᠦ᠌ ᠵᠢᠯᠣᠭᠣᠴᠢ ᠲᠦᠪᠰᠢᠨ ᠡᠨᠡ ᠳᠥᠷᠪᠡ ᠡᠴᠡ ᠥᠭᠡᠷᠡ ᠬᠥᠮᠦᠨ ᠣᠷᠣᠳᠠᠭ ᠦᠭᠡᠢ ᠪᠠᠢᠯᠠ᠃ ᠪᠠᠯᠰᠠᠨᠵᠠᠪ ᠤ᠋ᠨ ᠪᠣᠳᠣᠯ ᠢ᠋ᠶ᠋ᠠᠷ ᠪᠣᠯ ᠥᠬᠢᠨ ᠲᠤᠩ ᠨᠢᠯᠬᠠ᠂ ᠪᠠᠯᠴᠢᠷ ᠬᠡᠪ ᠢ᠋ᠶ᠋ᠡᠷ᠂ ᠲᠣᠮᠣ ᠪᠣᠯᠬᠤ ᠨᠢ ᠵᠠᠢᠯᠠᠰᠢ ᠦᠭᠡᠢ ᠴᠦ᠍ ᠭᠡᠰᠡᠨ ᠡᠭᠦᠷᠢᠳᠡ ᠳᠡᠷᠭᠡᠳᠡ ᠪᠡᠨ ᠬᠠᠷᠠᠵᠤ ᠰᠠᠭᠤᠬᠤ ᠶ᠋ᠢ ᠬᠦᠰᠡᠨᠡ᠃ ᠭᠡᠲᠡᠯᠡ ᠡᠬᠡ ᠨᠢ ᠣᠳᠣ ᠥᠬᠢᠨ ᠢ᠋ᠶ᠋ᠡᠨ ᠭᠣᠶᠣᠯᠠᠨᠠ ᠭᠣᠣᠳᠠᠨᠠ《ᠡᠳ᠋ᠯᠡᠬᠦ ᠪᠠ ᠡᠳ᠋ᠯᠡᠭᠦᠯᠬᠦ ᠴᠠᠭ ᠪᠣᠯᠤᠭᠰᠠᠨ》 ᠭᠡᠵᠦ ᠳᠠᠬᠢᠨ ᠳᠠᠪᠲᠠᠨ ᠤᠯᠢᠭᠯᠠᠬᠤ ᠶ᠋ᠢ ᠨᠢ ᠰᠣᠨᠣᠰᠬᠤ ᠳ᠋ᠤ᠌ ᠦᠨᠡᠬᠡᠷ ᠬᠦᠨᠳᠦ ᠠᠵᠢ᠃ ᠳᠠᠷᠠᠭᠠ ᠳ᠋ᠤᠨᠢ ᠡᠬᠡ ᠨᠢ ᠡᠷᠡ ᠨᠥᠬᠥᠷ ᠶᠦ᠍ᠭᠡᠨ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠢᠳᠬᠠᠨ ᠪᠠᠷᠠᠬᠤ ᠪᠠᠨ ᠪᠣᠯᠢᠬᠤ ᠪᠠᠷ ᠥᠬᠢᠨ ᠲᠡᠢ ᠰᠠᠨᠠᠯ ᠨᠢᠭᠡᠳᠦᠨ ᠬᠣᠶᠠᠷ ᠵᠡᠷᠭᠡ ᠰᠢᠬᠠᠨ ᠱᠠᠭᠠᠷᠳᠠᠭᠰᠠᠨ ᠢ᠋ ᠬᠡᠯᠡᠬᠦ ᠤᠤ᠂ ᠪᠠᠯᠰᠠᠨᠵᠠᠪ ᠶᠣᠰᠣᠲᠠᠢ ᠬᠣᠶᠠᠷ ᠬᠠᠳᠠᠨ ᠤ᠋ ᠬᠣᠭᠣᠷᠣᠨᠳᠣ ᠬᠠᠪᠴᠢᠭᠳᠠᠨ ᠰᠠᠨᠳᠤᠷᠤᠭᠠᠳ᠂ ᠥᠨᠥᠬᠢ ᠬᠦᠰᠡᠭᠰᠡᠨ ᠪᠦᠭᠦᠳᠡ ᠶ᠋ᠢ ᠨᠢ ᠶᠣᠰᠣᠭᠠᠷ ᠪᠣᠯᠭᠠᠨ ᠰᠠᠶᠢ ᠨᠢᠭᠡ ᠰᠡᠳᠬᠢᠯ ᠠᠮᠠᠷᠠᠵᠠᠢ᠃
ᠣᠶᠤᠨᠳᠠᠷᠢ ᠶ᠋ᠢᠨ ᠥᠪᠡᠷ ᠦ᠋ᠨ ᠪᠡᠶᠡ ᠶ᠋ᠢ ᠭᠤᠶᠤᠨ ᠴᠢᠮᠡᠬᠦ ᠤᠷᠤᠭᠤ ᠤᠬᠠᠭᠠᠨ ᠵᠢᠯᠣᠭᠣ ᠦᠭᠡᠢ ᠵᠢᠳᠬᠦᠭᠰᠡᠨ ᠨᠢ ᠵᠥᠪᠬᠡᠨ ᠪᠠᠯᠳᠠᠨᠴᠡᠷᠢᠩ ᠳ᠋ᠦ᠍ ᠭᠣᠶᠣ ᠰᠠᠢᠬᠠᠨ ᠦᠵᠡᠭᠳᠡᠵᠦ ᠰᠠᠨᠠᠭᠠ ᠰᠡᠳᠬᠢᠯ ᠢ᠋ ᠨᠢ ᠪᠠᠶᠠᠰᠬᠠᠬᠤ ᠶ᠋ᠢᠨ ᠲᠥᠯᠥᠭᠡ ᠪᠠᠢᠵᠠᠢ᠃ ᠣᠳᠣ ᠢᠩᠭᠢᠭᠡᠳ ᠡᠬᠡᠨᠡᠷ ᠨᠢ ᠪᠣᠯᠤᠨ ᠰᠠᠭᠤᠭᠰᠠᠭᠠᠷ ᠪᠦᠬᠦ ᠶᠠᠭᠤᠮᠠ ᠪᠠᠨ ᠥᠪᠡᠷ ᠦ᠋ᠨ ᠭᠠᠷ ᠢ᠋ᠶ᠋ᠠᠷ ᠣᠶᠣᠵᠤ ᠪᠠᠢᠬᠤ ᠪᠣᠯᠤᠨᠠ ᠭᠡᠬᠦ ᠳ᠋ᠦ᠍ ᠠᠪᠤ ᠶ᠋ᠢᠨ ᠬᠢᠨᠢ ᠠᠪᠴᠤ ᠥᠭᠭᠦᠭᠰᠡᠨ ᠦᠢᠲᠠᠩ ᠬᠤᠸᠠᠷ ᠢ᠋ ᠡᠬᠡ ᠲᠡᠢ ᠪᠡᠨ ᠪᠤᠯᠢᠶᠠᠯᠳᠤᠨ ᠡᠰᠬᠡᠵᠦ ᠡᠬᠢᠯᠡᠭᠡᠳ ᠣᠶᠣᠬᠤ ᠠᠵᠢᠯ ᠳ᠋ᠤ᠌ ᠢᠳᠡᠪᠬᠢᠯᠡᠨ ᠣᠷᠣᠭᠰᠠᠨ ᠪᠥᠭᠡᠳ ᠡᠴᠦᠰ ᠦ᠋ᠨ ᠲᠣᠪᠴᠢ ᠬᠠᠳᠠᠯᠲᠠ ᠶ᠋ᠢ ᠪᠣᠯᠪᠠᠴᠤ ᠥᠪᠡᠷ ᠦ᠋ᠨ ᠭᠠᠷ ᠢ᠋ᠶ᠋ᠠᠷ ᠦᠢᠯᠡᠳᠦᠨ ᠳᠠᠭᠤᠰᠬᠠᠪᠠ᠃
ᠤᠭ ᠴᠢᠨᠠᠳᠤ ᠤᠴᠢᠷ ᠢ᠋ ᠮᠡᠳᠡᠬᠦ ᠦᠭᠡᠢ ᠪᠠᠢᠭᠠ ᠡᠴᠢᠭᠡ ᠡᠬᠡ ᠬᠣᠶᠠᠷ ᠨᠢ ᠶᠡᠬᠡᠳᠡ ᠭᠠᠢᠬᠠᠨ ᠪᠠᠶᠠᠷᠯᠠᠪᠠ᠃
ᠶᠡᠷᠦ ᠣᠶᠤᠨᠳᠠᠷᠢ ᠶ᠋ᠢᠨ ᠪᠣᠳᠣᠯ ᠳ᠋ᠤ᠌ ᠤᠷᠢᠳᠤᠬᠢ ᠶᠠᠭᠤᠮᠠ ᠨᠢᠭᠡ ᠴᠦ᠍ ᠦᠭᠡᠢ ᠪᠣᠯᠵᠠᠢ᠃ ᠰᠢᠨᠡ ᠠᠮᠢᠳᠤᠷᠠᠯ᠂ ᠰᠠᠢᠬᠠᠨ ᠢᠷᠡᠭᠡᠳᠦᠢ᠂ ᠪᠦᠬᠦ ᠮᠡᠳᠡᠷᠡᠯ ᠢ᠋ ᠨᠢ ᠡᠵᠡᠯᠡᠨᠡ᠃《ᠬᠣᠢᠲᠤᠨ ᠵᠢᠯ ᠦ᠋ᠨ ᠴᠠᠭᠠᠨ ᠰᠠᠷᠠ ᠪᠠᠷ ᠡᠨᠳᠡ ᠪᠢᠰᠢ᠂ ᠡᠷᠡ ᠨᠥᠬᠥᠷ ᠦ᠋ᠨ ᠳ᠋ᠡᠭᠡᠨ ᠪᠠᠢᠨᠠ》 ᠭᠡᠬᠦ ᠡᠴᠡ ᠬᠣᠭᠣᠯᠠ ᠤᠮᠳᠠ ᠶ᠋ᠢ ᠬᠡᠷᠬᠢᠨ ᠬᠢᠬᠦ᠂ ᠶᠠᠭᠤ ᠶᠠᠭᠤ ᠪᠠᠷ ᠠᠮᠲᠠᠯᠠᠬᠤ ᠶ᠋ᠢ ᠮᠡᠳᠡᠬᠦ ᠴᠢᠬᠤᠯᠠ ᠠᠵᠢ᠃ ᠲᠡᠭᠡᠭᠡᠳ ᠲᠣᠭᠣᠭᠠᠴᠢ ᠶ᠋ᠢᠨ ᠬᠣᠭᠣᠯᠠ ᠬᠢᠬᠦ ᠶ᠋ᠢᠨ ᠬᠠᠵᠠᠭᠤ ᠪᠠᠷ ᠪᠠᠢᠨ ᠪᠠᠢᠨ ᠭᠦᠶᠦᠨ ᠣᠷᠣᠵᠤ ᠡᠯᠪᠡᠯᠴᠡᠨᠡ᠃ ᠡᠭᠦᠨ ᠳ᠋ᠦ᠍ᠨᠢ ᠲᠣᠭᠣᠭᠠᠴᠢ ᠪᠠᠶᠠᠷᠯᠠᠨᠠ᠃
ᠡᠭᠦᠨ ᠡᠴᠡ ᠴᠠᠭᠠᠰᠢ ᠣᠶᠤᠨᠳᠠᠷᠢ ᠳ᠋ᠤ᠌ ᠰᠠᠨᠠᠨ ᠲᠥᠯᠥᠪᠯᠡᠬᠦ ᠵᠦᠢᠯ ᠮᠠᠰᠢ ᠶᠡᠬᠡ᠂ ᠡᠷᠡ ᠨᠥᠬᠥᠷ ᠢ᠋ᠶ᠋ᠡᠨ ᠬᠡᠷᠬᠢᠨ ᠬᠦᠨᠳᠦᠳᠬᠡᠬᠦ᠂ ᠦᠷᠡ ᠬᠡᠦᠬᠡᠳ ᠢ᠋ ᠲᠥᠷᠥᠭᠦᠯᠦᠨᠡ ᠭᠡᠵᠦ ᠪᠠᠲᠤᠳᠠ ᠢᠲᠡᠭᠡᠬᠦ᠂ ᠲᠡᠭᠦᠨ ᠢ᠋ᠶ᠋ᠡᠨ ᠬᠡᠷᠬᠢᠨ ᠥᠰᠬᠡᠨ ᠪᠣᠢᠵᠢᠭᠤᠯᠬᠤ᠂ ᠴᠠᠭᠠᠨ ᠰᠠᠷᠠ ᠶ᠋ᠢ ᠬᠡᠷᠬᠢᠨ ᠰᠠᠢᠬᠠᠨ ᠢ᠋ᠶ᠋ᠠᠷ ᠥᠩᠭᠡᠷᠡᠭᠦᠯᠵᠦ ᠪᠠᠢᠬᠤ ᠶᠣᠰᠣᠲᠠᠢ ᠲᠦᠮᠡᠨ ᠵᠦᠢᠯ ᠢ᠋ ᠲᠠᠰᠤᠷᠠᠯᠲᠠ ᠦᠭᠡᠢ ᠰᠡᠳᠬᠢᠯ ᠳᠣᠲᠣᠷᠠ ᠪᠠᠨ ᠵᠣᠬᠢᠶᠠᠨ ᠪᠠᠢᠭᠤᠯᠵᠤ ᠪᠢᠰᠢᠯᠭᠠᠨᠠ᠃ ᠬᠠᠷᠢᠨ ᠨᠣᠮ ᠡᠷᠳᠡᠮ ᠦ᠋ᠨ ᠲᠤᠬᠠᠢ《ᠨᠢᠭᠡᠨᠲᠡ ᠪᠤᠰᠤᠳ ᠤ᠋ᠨ ᠡᠬᠡᠨᠡᠷ ᠪᠣᠯᠤᠭᠰᠠᠨ ᠬᠥᠮᠦᠨ ᠨᠣᠮ ᠪᠢᠴᠢᠭ ᠪᠠᠷᠢᠨ ᠰᠠᠭᠤᠬᠤ ᠶ᠋ᠢᠨ ᠬᠡᠷᠡᠭ ᠪᠠᠢᠬᠤ ᠤᠤ? ᠲᠡᠭᠦᠨ ᠳ᠋ᠦ᠍ ᠣᠷᠣᠪᠠᠯ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠠᠵᠢᠯ ᠢ᠋ ᠬᠢᠬᠦ ᠨᠢ ᠴᠢᠬᠤᠯᠠ ᠰᠢᠦ ᠳᠡ》 ᠭᠡᠵᠦ ᠪᠣᠳᠣᠭᠳᠠᠬᠤ ᠪᠣᠯᠤᠭᠰᠠᠨ ᠤᠴᠢᠷ ᠰᠣᠨᠢᠷᠬᠠᠯ ᠦᠭᠡᠢ ᠪᠣᠯᠵᠠᠢ᠃
ᠰᠠᠷᠠ ᠰᠢᠨᠡ ᠳᠥᠭᠥᠬᠦ ᠳᠣᠳᠣᠮ ᠣᠶᠤᠨᠳᠠᠷᠢ ᠮᠠᠰᠢ ᠣᠯᠠᠨ ᠢ᠋ ᠬᠢᠵᠦ ᠰᠤᠷᠬᠤ ᠳ᠋ᠤ᠌ ᠳᠠᠪᠲᠠᠵᠤ ᠪᠠᠢᠭᠠ ᠠ᠋ᠴᠠ ᠭᠠᠳᠠᠨᠠ᠂ ᠪᠠᠯᠳᠠᠨᠴᠡᠷᠢᠩ ᠳ᠋ᠦ᠍ ᠨᠢᠭᠡ ᠬᠣᠣᠰ ᠦᠭᠡᠢ ᠰᠠᠢᠬᠠᠨ ᠬᠥᠭᠡᠷᠦᠬᠦᠨ ᠲᠡᠯᠢᠩ ᠪᠡᠯᠡᠭᠯᠡᠬᠦ ᠪᠡᠷ ᠬᠢᠵᠦ ᠡᠬᠢᠯᠡᠭᠰᠡᠨ ᠪᠢᠯᠡ᠃ ᠲᠡᠭᠦᠨ ᠢ᠋ᠶ᠋ᠡᠨ ᠠᠪᠤ ᠡᠵᠢ ᠬᠣᠶᠠᠷ ᠲᠠᠭᠠᠨ ᠬᠡᠷᠬᠢᠪᠡᠴᠦ ᠮᠡᠳᠡᠭᠳᠡᠬᠦ ᠦᠭᠡᠢ ᠶ᠋ᠢ ᠬᠢᠴᠢᠶᠡᠬᠦ ᠳ᠋ᠡᠭᠡᠨ ᠵᠥᠪᠬᠡᠨ ᠰᠥᠨᠢ ᠪᠡᠷ ᠪᠦᠬᠦ ᠠᠮᠢᠲᠠᠨ ᠤᠨᠲᠠᠭᠰᠠᠨ ᠬᠣᠢᠨᠠ ᠤᠷᠲᠤ ᠭᠡᠭᠴᠢ ᠶ᠋ᠢᠨ ᠯᠡ ᠠᠰᠠᠭᠠᠨ ᠣᠶᠣᠵᠤ ᠡᠬᠢᠯᠡᠭᠡᠳ ᠥᠷᠯᠥᠭᠡ ᠦᠦᠷ ᠴᠠᠢᠬᠤ ᠤᠤ ᠦᠭᠡᠢ ᠤᠤ ᠬᠥᠮᠦᠨ ᠠᠮᠢᠲᠠᠨ ᠪᠣᠰᠬᠤ ᠪᠣᠯᠬᠤ ᠳ᠋ᠤ᠌ ᠵᠣᠭᠰᠣᠨᠠ᠃ ᠭᠡᠲᠡᠯᠡ ᠤᠲᠠᠰᠤ ᠣᠷᠢᠶᠠᠨ ᠵᠡᠭᠦᠦ ᠬᠠᠳᠬᠤᠨ ᠤᠷᠠᠨ ᠳᠦᠷᠰᠦ ᠶ᠋ᠢ ᠭᠠᠷᠭᠠᠬᠤ ᠲᠡᠢᠮᠦ ᠠᠮᠤᠷ ᠪᠢᠰᠢ᠂ ᠰᠥᠨᠢ ᠲᠤᠷᠰᠢ ᠬᠢᠭᠰᠡᠨ ᠢ᠋ᠶ᠋ᠡᠨ ᠬᠠᠨᠵᠠᠯᠠᠨ᠂ ᠳᠠᠬᠢᠨ ᠬᠠᠳᠬᠤᠬᠤ ᠨᠢ ᠣᠯᠠᠨᠲᠠ ᠲᠣᠬᠢᠶᠠᠯᠳᠤᠨᠠ᠃ ᠤᠨᠲᠠᠬᠤ ᠨᠣᠢᠷ ᠨᠢ ᠤᠳᠠᠭᠠ ᠳᠠᠷᠠᠭᠠᠯᠠᠨ ᠦᠭᠡᠢᠰᠴᠤ᠂ ᠵᠢᠰᠦ ᠴᠢᠷᠠᠢ ᠨᠢ ᠴᠣᠩᠬᠣᠢᠵᠤ ᠪᠠᠢᠯᠠ᠃ ᠬᠡᠦᠬᠡᠳ ᠪᠠᠭᠠᠴᠤᠳ ᠬᠤᠷᠤᠭᠤ ᠳᠠᠷᠤᠨ《ᠲᠠᠪᠤ》《ᠳᠥᠷᠪᠡ》《ᠭᠤᠷᠪᠠ》 ᠭᠡᠵᠦ ᠬᠣᠨᠣᠭ ᠲᠣᠭᠠᠯᠠᠨ ᠪᠠᠶᠠᠷᠯᠠᠯᠳᠤᠵᠤ ᠪᠠᠢᠬᠤ ᠳ᠋ᠤ᠌ ᠣᠶᠤᠨᠳᠠᠷᠢ ᠥᠷᠯᠥᠭᠡ ᠪᠦᠷᠢ《ᠡᠳᠦᠷ ᠬᠣᠨᠣᠭ ᠶᠠᠭᠤᠲᠠᠢ ᠨᠢᠰᠬᠦ ᠮᠡᠲᠦ ᠬᠤᠷᠳᠤᠨ ᠥᠩᠭᠡᠷᠡᠨᠡ ᠪᠣᠢ?》《ᠳᠠᠯᠢᠩ ᠮᠢᠨᠢ ᠶᠠᠭᠠᠬᠢᠭᠠ ᠴᠦ᠍ ᠦᠭᠡᠢ ᠪᠠᠢᠨᠠ》 ᠭᠡᠵᠦ ᠯᠡ ᠰᠡᠳᠬᠢᠯ ᠲᠦᠭᠰᠢᠨᠡ᠃
ᠪᠢᠲᠡᠭᠦᠨ ᠦ᠌ ᠡᠳᠦᠷ ᠪᠣᠯᠤᠯᠠ᠃ ᠡᠨᠡ ᠪᠣᠯ ᠣᠶᠤᠨᠳᠠᠷᠢ ᠶ᠋ᠢᠨ ᠴᠢᠬᠤᠯᠠᠴᠢᠯᠠᠵᠤ ᠪᠠᠢᠭᠠ ᠠᠵᠢᠯ ᠳ᠋ᠤ᠌ ᠭᠠᠭᠴᠠᠬᠠᠨ ᠰᠥᠨᠢ ᠦᠯᠡᠳᠡᠵᠦ ᠪᠠᠢᠭᠠ ᠨᠢ ᠲᠡᠷᠡ ᠪᠢᠯᠡ᠃ ᠦᠳᠡᠰᠢ ᠪᠣᠯᠣᠮᠠᠭᠴᠠ ᠪᠢᠲᠡᠭᠦᠯᠭᠡ ᠡᠬᠢᠯᠡᠨ ᠠᠪᠤ ᠡᠵᠢ ᠨᠠᠷ ᠤ᠋ᠨ ᠳᠡᠷᠭᠡᠳᠡ ᠪᠠᠢᠬᠤ ᠶᠣᠰᠣᠲᠠᠢ ᠪᠣᠯᠤᠯᠠ᠃ ᠤᠷᠤᠭ ᠲᠥᠷᠥᠯ ᠦ᠋ᠨ ᠬᠢᠨ ᠪᠠ ᠲᠠᠨᠢᠯ ᠲᠠᠯᠠ ᠶ᠋ᠢᠨ ᠬᠥᠮᠦᠰ ᠦᠷᠭᠦᠯᠵᠢᠯᠡᠨ ᠢᠷᠡᠭᠰᠡᠨ ᠪᠥᠭᠡᠳ ᠴᠠᠭ ᠮᠢᠨᠦ᠋ᠲ ᠥᠩᠭᠡᠷᠡᠬᠦ ᠳᠣᠳᠣᠮ ᠣᠶᠤᠨᠳᠠᠷᠢ ᠣᠶᠣᠬᠤ ᠶᠠᠭᠤᠮᠠᠨ ᠳ᠋ᠠᠭᠠᠨ ᠰᠡᠳᠬᠢᠯ ᠲᠠᠯᠪᠢᠨ᠂ ᠢᠷᠡᠭᠰᠡᠨ ᠪᠦᠬᠦᠨ ᠢ᠋ ᠳᠣᠲᠣᠷᠠ ᠪᠠᠨ ᠠᠳᠠ ᠦᠵᠡᠨ ᠪᠠᠢᠵᠤ ᠶᠠᠳᠠᠵᠤ ᠪᠠᠢᠯᠠ᠃ ᠰᠥᠨᠢ ᠳᠤᠮᠳᠠ ᠶ᠋ᠢᠨ ᠴᠠᠭ ᠰᠢᠬᠠᠵᠤ ᠭᠠᠳᠠᠨᠠ ᠶ᠋ᠢᠨ ᠬᠥᠯ ᠠᠶᠠᠨᠳᠠᠭᠠᠨ ᠲᠠᠰᠤᠷᠠᠬᠤ ᠳ᠋ᠤ᠌᠂ ᠣᠶᠤᠨᠳᠠᠷᠢ ᠭᠡᠷ ᠲᠡᠭᠡᠨ ᠣᠷᠣᠨ ᠠᠵᠢᠯ ᠳ᠋ᠠᠭᠠᠨ ᠣᠷᠣᠯᠠ᠃ ᠰᠡᠭᠦᠯᠴᠢ ᠶ᠋ᠢᠨ ᠬᠣᠨᠣᠭ ᠤ᠋ᠳ ᠲᠤ ᠲᠠᠩᠳᠠ ᠨᠣᠢᠷ ᠦᠭᠡᠢ ᠠᠵᠢᠯᠯᠠᠭᠰᠠᠭᠠᠷ ᠢᠷᠡᠭᠰᠡᠨ ᠪᠣᠯᠪᠠᠴᠤ ᠥᠨᠥ ᠰᠥᠨᠢ ᠶ᠋ᠢᠨ ᠬᠤᠪᠢ ᠳ᠋ᠤ᠌ ᠤᠨᠲᠠᠬᠤ ᠬᠦᠰᠡᠯ ᠥᠴᠦᠬᠡᠨ ᠴᠦ᠍ ᠦᠭᠡᠢ᠂ ᠤᠷᠲᠤ ᠪᠠᠨ ᠭᠤᠷᠪᠠᠨ ᠯᠠ ᠨᠢᠭᠡᠨ ᠵᠡᠷᠭᠡ ᠱᠣᠪᠣᠯᠵᠠᠨ ᠠᠰᠠᠵᠤ ᠪᠠᠢᠭᠠ ᠶ᠋ᠢᠨ ᠭᠡᠷᠡᠯ ᠳ᠋ᠦ᠍ ᠨᠠᠷᠢᠨ ᠵᠡᠭᠦᠦ ᠣᠴᠢ ᠰᠢᠭ᠋ ᠭᠢᠯᠠᠯᠵᠠᠨ ᠵᠠᠳᠠᠭᠠᠢ ᠮᠢᠨᠳᠠᠰᠤᠨ ᠤᠲᠠᠰᠤ ᠬᠤᠸᠠ ᠶᠠᠭᠠᠨ ᠫᠦᠰᠡᠨ ᠲᠡᠯᠢᠩ ᠦ᠋ᠨ ᠪᠤᠯᠤᠩ ᠳᠡᠭᠡᠷᠡ ᠤᠷᠠᠨ ᠬᠠᠳᠬᠤᠮᠠᠯ ᠪᠣᠯᠤᠨ ᠦᠯᠡᠳᠡᠨᠡ᠃ ᠶᠡᠷᠦ ᠶᠠᠭᠤᠮᠠ ᠪᠦᠬᠦᠨ ᠭᠠᠭᠴᠠ ᠬᠦ᠌ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠲᠥᠯᠥᠭᠡ ᠪᠣᠯᠵᠤ᠂ ᠣᠶᠤᠨ ᠤᠬᠠᠭᠠᠨ ᠤ᠋ ᠭᠦᠨ ᠨᠢ ᠴᠦ᠍᠂ ᠤᠷᠠᠨ ᠭᠠᠷ ᠤ᠋ᠨ ᠬᠥᠳᠡᠯᠬᠦ ᠨᠢ ᠴᠦ᠍ ᠢᠷᠡᠬᠦ ᠮᠢᠨᠦ᠋ᠲ᠂ ᠠᠪᠬᠤ ᠠᠮᠢᠰᠬᠤᠯ ᠴᠥᠮ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠲᠥᠯᠥᠭᠡ ᠪᠠᠢᠭᠰᠠᠨ ᠤᠴᠢᠷ ᠠᠵᠢᠯ ᠬᠡᠷᠡᠭ ᠨᠢ ᠪᠦᠲᠦᠮᠵᠢ ᠲᠡᠢ ᠪᠠᠢᠯᠠ᠃ ᠭᠡᠪᠡᠴᠦ ᠦᠦᠷ ᠦ᠋ᠨ ᠦᠨᠡᠭᠡᠨ ᠬᠠᠷᠠᠩᠭᠤᠢ ᠪᠠᠷ ᠡᠷᠦᠬᠡ ᠬᠣᠢᠰᠢ ᠲᠠᠲᠠᠬᠤ ᠳ᠋ᠤ᠌ ᠰᠡᠭᠦᠯᠴᠢ ᠶ᠋ᠢᠨ ᠬᠡᠳᠦᠨ ᠬᠠᠳᠬᠤᠯᠲᠠ ᠨᠢ ᠬᠠᠷᠠᠮᠰᠠᠯᠲᠠᠢ ᠨᠢ ᠠᠷᠭᠠ ᠦᠭᠡᠢ ᠳᠤᠲᠠᠭᠤ ᠪᠠᠢᠯᠠ᠃ ᠥᠷᠯᠥᠭᠡ ᠪᠦᠷᠢ ᠲᠣᠭᠣᠭᠠᠴᠢ ᠠᠪᠤᠭᠠᠢ ᠣᠷᠣᠵᠤ ᠢᠷᠡᠨ ᠭᠠᠯ ᠲᠦᠯᠡᠵᠦ ᠭᠡᠷ ᠳᠤᠯᠠᠭᠠᠴᠠᠭᠤᠯᠳᠠᠭ ᠲᠤᠯᠠ ᠣᠶᠤᠨᠳᠠᠷᠢ ᠬᠥᠨᠵᠢᠯᠡ ᠪᠡᠨ ᠶᠠᠭᠠᠷᠠᠨ ᠨᠥᠮᠥᠷᠴᠦ ᠬᠠᠵᠠᠭᠤ ᠲᠠᠢᠰᠢ ᠪᠠᠨ ᠤᠨᠠᠨ ᠤᠨᠲᠠᠵᠤ ᠪᠠᠢᠭᠠ ᠬᠥᠮᠦᠨ ᠪᠣᠯᠪᠠ᠃ ᠡᠯᠢᠭᠡᠨ ᠳ᠋ᠡᠭᠡᠨ ᠳᠠᠯᠢᠩ ᠢ᠋ᠶ᠋ᠠᠨ ᠲᠡᠪᠡᠷᠢᠭᠡᠳ ᠦᠯᠡᠳᠡᠭᠰᠡᠨ ᠬᠡᠳᠦᠨ ᠬᠠᠳᠬᠤᠯᠲᠠ ᠶ᠋ᠢ ᠬᠡᠷᠬᠢᠨ ᠭᠦᠢᠴᠡᠭᠡᠬᠦ ᠪᠠᠨ ᠯᠠ ᠪᠣᠳᠣᠨᠠ᠃
ᠲᠣᠭᠣᠭᠠᠴᠢ ᠠᠪᠤᠭᠠᠢ ᠭᠠᠯ ᠲᠦᠯᠡᠭᠡᠳ ᠭᠠᠷᠤᠮᠠᠭᠴᠠ ᠪᠣᠰᠤᠨ ᠬᠠᠷᠠᠢᠨ ᠰᠠᠭᠤᠵᠤ᠂ ᠨᠢᠭᠡ ᠬᠠᠳᠬᠤᠯᠠ᠂ ᠬᠣᠶᠠᠳᠠᠬᠢ ᠪᠠᠨ ᠬᠠᠳᠬᠤᠯᠠ᠂ ᠭᠤᠷᠪᠠ᠂ ᠳᠥᠷᠪᠡ ᠳᠡᠭᠡᠷᠡ ᠨᠢ ᠬᠥᠯ ᠦ᠋ᠨ ᠴᠢᠮᠡᠭᠡ ᠰᠣᠨᠣᠰᠤᠭᠳᠠᠪᠠ᠃ ᠣᠳᠣ ᠣᠶᠤᠨᠳᠠᠷᠢ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠢᠷᠡᠵᠦ ᠶᠠᠪᠤᠭᠠ ᠶ᠋ᠢ ᠲᠣᠳᠣᠷᠬᠠᠢ ᠮᠡᠳᠡᠨ ᠳᠠᠬᠢᠨ ᠬᠡᠪᠲᠡᠪᠡ᠃ ᠬᠠᠭᠠᠯᠭᠠ ᠨᠡᠭᠡᠭᠡᠭᠳᠡᠭᠡᠳ᠄
— ᠥᠬᠢᠨ ᠮᠢᠨᠢ ᠪᠣᠰ! ᠨᠠᠷᠠ ᠭᠠᠷᠬᠤ ᠶ᠋ᠢᠨ ᠡᠮᠦᠨᠡ ᠬᠤᠪᠴᠠᠰᠤᠯᠠᠬᠤ ᠪᠠᠨ ᠪᠣᠳᠣ! ᠭᠡᠬᠦ ᠳ᠋ᠦ᠍ᠨᠢ᠂
— ᠵᠠ ᠵᠠ ᠣᠳᠣᠬᠠᠨ ᠪᠣᠰᠤᠯᠠ᠃
— ᠦᠭᠡᠢ ᠡᠨᠡ ᠴᠢᠨᠢ ᠶᠠᠭᠤ ᠪᠣᠢ? ᠴᠢ ᠪᠦᠬᠦᠯᠢ ᠪᠡᠷ ᠢ᠋ᠶ᠋ᠡᠨ ᠤᠨᠲᠠᠭᠰᠠᠨ ᠰᠢᠭ᠋ ᠪᠠᠢᠬᠤ ᠨᠢ ᠶᠠᠭᠤ ᠪᠣᠢ? ᠭᠡᠵᠦ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠰᠣᠴᠢᠨ ᠬᠡᠯᠡᠬᠦ ᠳ᠋ᠦ᠍᠄ ᠬᠥᠨᠵᠢᠯᠡ ᠶ᠋ᠢ ᠮᠢᠨᠢ ᠲᠡᠳᠡᠨ ᠳᠠᠯᠢᠩ ᠢ᠋ ᠮᠢᠨᠢ ᠦᠵᠡᠬᠦ ᠪᠣᠢ ᠭᠡᠬᠦ ᠳ᠋ᠡᠭᠡᠨ ᠰᠦᠨᠡᠰᠦ ᠪᠡᠨ ᠭᠠᠷᠲᠠᠯᠠ ᠠᠶᠤᠯᠠ᠃
— ᠲᠡᠢᠮᠦ ᠠ᠋᠂ ᠡᠵᠢ ᠠ᠋! ᠥᠷᠯᠥᠭᠡ ᠪᠣᠰᠬᠤ ᠳ᠋ᠤ᠌ ᠠᠮᠠᠷ ᠢ᠋ ᠪᠣᠳᠣᠨ ᠪᠦᠬᠦᠯᠢ ᠪᠡᠷ ᠢ᠋ᠶ᠋ᠡᠨ ᠤᠨᠲᠠᠭᠰᠠᠨ ᠶᠤᠮ᠃
ᠡᠪᠡᠢ ᠮᠢᠨᠢ ᠪᠡᠶᠡ ᠨᠢ ᠠᠮᠤᠷ ᠦᠭᠡᠢ ᠪᠠᠢᠭᠠ ᠳᠠ᠂ ᠵᠠ ᠪᠣᠰ! ᠰᠢᠨᠡ ᠰᠠᠢᠬᠠᠨ ᠬᠤᠪᠴᠠᠰᠤ ᠨᠤᠭᠤᠳ ᠢ᠋ᠶ᠋ᠠᠨ ᠡᠮᠦᠰᠦᠨ ᠠᠪᠤ ᠡᠵᠢ ᠬᠣᠶᠠᠷ ᠲᠠᠢ ᠪᠠᠨ ᠵᠣᠯᠭᠠᠬᠤ ᠶ᠋ᠢ ᠪᠣᠳᠣ! ᠭᠡᠳ ᠭᠠᠷᠬᠤ ᠳ᠋ᠤᠨᠢ ᠶᠠᠭᠠᠷᠠᠨ ᠪᠣᠰᠪᠠ᠃ ᠭᠡᠪᠡᠴᠦ ᠣᠳᠣ ᠳᠠᠯᠢᠩ ᠢ᠋ᠶ᠋ᠠᠨ ᠳᠤᠲᠠᠭᠤ ᠬᠠᠳᠬᠤᠭᠠᠰᠤ ᠨᠤᠭᠤᠳ ᠢ᠋ ᠭᠦᠢᠴᠡᠭᠡᠬᠦ ᠨᠥᠬᠥᠴᠡᠯ ᠦᠭᠡᠢ ᠪᠣᠯᠤᠭᠰᠠᠨ ᠨᠢ ᠢᠯᠡᠷᠬᠡᠢ ᠪᠠᠢᠬᠤ ᠪᠥᠭᠡᠳ ᠶᠡᠷᠦ ᠲᠡᠷᠡ ᠳᠤᠲᠠᠭᠤ ᠴᠢᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠡᠯᠡᠭᠯᠡᠪᠡᠰᠦ ᠬᠠᠨᠢᠯᠠᠨ ᠰᠠᠭᠤᠭᠰᠠᠨ ᠬᠣᠢᠨᠠ ᠪᠠᠨ ᠭᠦᠢᠴᠡᠭᠡᠵᠦ ᠥᠭᠬᠦ ᠶ᠋ᠢᠨ ᠪᠡᠯᠭᠡ ᠳᠡᠮᠪᠡᠷᠢᠯ ᠪᠣᠯᠤᠨ ᠵᠣᠬᠢᠴᠠᠬᠤ ᠰᠢᠭ᠋ ᠰᠠᠨᠠᠭᠳᠠᠬᠤ ᠠᠵᠢ᠃
ᠤᠭ ᠳᠠᠯᠢᠩ ᠨᠢ ᠬᠤᠸᠠ ᠶᠠᠭᠠᠨ ᠫᠦᠰᠡᠲᠡᠢ ᠪᠥᠭᠡᠳ ᠬᠣᠶᠠᠷ ᠲᠠᠯᠠ ᠶ᠋ᠢᠨ ᠵᠠᠬᠠ ᠶ᠋ᠢ ᠬᠤᠷᠤᠭᠤ ᠥᠷᠭᠡᠨ ᠨᠣᠭᠣᠭᠠᠨ ᠬᠣᠷᠭᠣᠢ ᠪᠠᠷ ᠡᠮᠵᠢᠭᠰᠡᠨ ᠦ᠌ ᠪᠡᠨ ᠳᠡᠭᠡᠭᠦᠷ ᠠᠯᠲᠠᠨ ᠰᠠ ᠪᠥᠰ ᠢ᠋ᠶ᠋ᠡᠷ ᠬᠠᠪᠴᠢᠭᠤᠯᠤᠮᠠᠭᠴᠠ ᠳᠣᠷᠣᠭᠰᠢ ᠤᠨᠵᠢᠬᠤ ᠨᠢᠭᠡᠳᠦᠭᠡᠷ ᠨᠤᠭᠤᠷᠠᠭᠠᠨ ᠳ᠋ᠤᠨᠢ ᠬᠢᠲᠠᠳ ᠤ᠋ᠨ ᠦᠯᠢᠭᠡᠷ ᠲᠤᠭᠤᠵᠢᠨ ᠳ᠋ᠤ᠌ ᠭᠠᠷᠳᠠᠭ ᠡᠷᠲᠡᠨ ᠦ᠌ ᠳᠣᠮᠣᠭ《ᠮᠥᠩᠬᠡ ᠶ᠋ᠢᠨ ᠡᠪᠡᠰᠦ ᠬᠡᠮᠡᠭᠳᠡᠬᠦ ᠨᠣᠭᠣᠭᠠᠨ ᠨᠠᠪᠴᠢ ᠵᠠᠭᠤᠭᠰᠠᠨ ᠪᠤᠭᠤ ᠰᠤᠭᠤ ᠬᠣᠶᠠᠷ ᠢ᠋ ᠤᠷᠠᠯᠠᠨ ᠬᠠᠳᠬᠤᠵᠠᠢ᠃ ᠨᠥᠭᠦᠭᠡ ᠶ᠋ᠢᠨ ᠨᠢᠭᠡᠳᠦᠭᠡᠷ ᠨᠢᠭᠤᠷ ᠠ᠋ᠴᠠ ᠪᠠᠨ ᠭᠤᠷᠪᠠᠨ ᠬᠤᠷᠤᠭᠤ ᠢᠯᠡᠭᠦᠲᠡᠢ ᠳᠣᠷᠣᠭᠰᠢ ᠤᠨᠵᠢᠬᠤ ᠨᠤᠭᠤᠷᠭᠠᠨ ᠳᠡᠭᠡᠷᠡ ᠴᠣᠬᠣᠮ ᠶᠠᠭᠤ ᠪᠣᠯᠬᠤ ᠨᠢ ᠦᠯᠦ ᠮᠡᠳᠡᠭᠳᠡᠬᠦ ᠬᠡ ᠤᠭᠠᠯᠵᠠᠷᠤᠤ ᠶᠠᠭᠤᠮᠠ ᠶ᠋ᠢ ᠳᠠᠩ ᠤᠯᠠᠭᠠᠨ ᠤᠲᠠᠰᠤ ᠪᠠᠷ ᠬᠠᠳᠬᠤᠵᠠᠢ᠃ ᠡᠨᠡ ᠨᠢ ᠶᠠᠭᠤ ᠪᠣᠢ? ᠭᠡᠪᠡᠯ ᠡᠷᠲᠡᠨ ᠦ᠌ ᠮᠣᠩᠭᠣᠯ ᠤ᠋ᠨ ᠳᠥᠷᠪᠡᠯᠵᠢᠨ ᠦᠰᠦᠭ ᠢ᠋ᠶ᠋ᠡᠷ《ᠬᠦᠰᠡᠯ ᠪᠦᠬᠦᠨ ᠪᠡᠶᠡᠯᠡᠬᠦ ᠴᠠᠭ ᠲᠤ ᠭᠠᠯ ᠭᠣᠯᠣᠮᠲᠠ ᠪᠠᠳᠠᠷᠠᠨᠠ》 ᠭᠡᠰᠡᠨ ᠦᠭᠡ ᠪᠠᠢᠵᠠᠢ᠃ ᠢᠩᠭᠢᠬᠦ ᠳ᠋ᠦ᠍ ᠵᠥᠪᠬᠡᠨ ᠡᠴᠦᠰ ᠴᠠᠭ ᠲᠤᠨᠢ ᠬᠡᠳᠦᠬᠡᠨ ᠬᠠᠳᠬᠤᠭᠠᠰᠤ ᠳᠤᠲᠠᠭᠤ ᠪᠠᠢᠭᠠ ᠠᠵᠢ᠃ ᠣᠶᠤᠨᠳᠠᠷᠢ ᠭᠠᠷ ᠨᠢᠭᠤᠷ ᠢ᠋ᠶ᠋ᠠᠨ ᠤᠬᠢᠶᠠᠨ᠂ ᠬᠤᠪᠴᠠᠰᠤ ᠬᠤᠨᠠᠷ ᠢ᠋ᠶ᠋ᠠᠨ ᠡᠮᠦᠰᠦᠭᠡᠳ ᠪᠠᠷᠠᠭᠤᠨ ᠭᠡᠷ ᠲᠡᠭᠡᠨ ᠣᠷᠣᠬᠤ ᠳ᠋ᠤ᠌ ᠠᠪᠤ ᠡᠵᠢ ᠬᠣᠶᠠᠷ ᠤᠭᠲᠤᠨ ᠠᠪᠴᠤ ᠵᠣᠯᠭᠠᠨ ᠦᠨᠦᠰᠴᠦ ᠲᠠᠪᠤ ᠲᠠᠪᠤᠨ ᠶᠠᠩᠴᠢᠶᠠᠨ ᠪᠡᠯᠡᠭᠯᠡᠪᠡ᠃ ᠲᠡᠭᠦᠨ ᠢ᠋ ᠬᠦᠯᠢᠶᠡᠨ ᠠᠪᠬᠤ ᠳ᠋ᠤ᠌ ᠪᠠᠯᠳᠠᠨᠴᠡᠷᠢᠩ ᠦ᠋ᠨ᠄《ᠡᠨᠡ ᠮᠠᠨ ᠤ᠋ ᠬᠢ》 ᠭᠡᠵᠦ ᠪᠠᠭᠤᠳᠠᠭ ᠬᠠᠰᠢᠶᠠ ᠭᠠᠳᠠᠨᠠ ᠠ᠋ᠴᠠ ᠪᠠᠨ ᠦᠨᠡᠬᠡᠷ ᠶᠠᠳᠠᠭᠤᠪᠲᠤᠷ ᠦᠵᠡᠭᠳᠡᠳᠡᠭ ᠨᠢ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠨ᠂ ᠮᠥᠩᠭᠥ ᠶᠠᠩᠴᠢᠶᠠᠨ ᠳ᠋ᠤ᠌ ᠰᠢᠨᠤᠬᠠᠢᠷᠠᠬᠤ ᠰᠢᠨᠡ ᠪᠣᠳᠣᠯ ᠲᠥᠷᠥᠪᠡ᠃ ᠲᠡᠨᠳᠡ ᠡᠴᠡ ᠪᠡᠨ ᠭᠠᠷᠤᠭᠠᠳ ᠲᠣᠭᠣᠭᠠᠴᠢ ᠠᠪᠤᠭᠠᠢ ᠳᠡᠭᠡᠷᠡ ᠪᠡᠨ ᠣᠷᠣᠨ ᠵᠣᠯᠭᠠᠬᠤ ᠳ᠋ᠤ᠌ ᠨᠢᠭᠡ ᠶᠠᠩᠴᠢᠶᠠᠨ ᠪᠡᠯᠡᠭᠯᠡᠭᠰᠡᠨ ᠪᠥᠭᠡᠳ ᠪᠦᠭᠦᠳᠡ ᠠᠷᠪᠠᠨ ᠨᠢᠭᠡᠨ ᠶᠠᠩᠴᠢᠶᠠᠨ ᠲᠠᠢ ᠪᠣᠯᠤᠭᠰᠠᠨ ᠳ᠋ᠠᠭᠠᠨ ᠰᠡᠳᠬᠢᠯ ᠬᠥᠳᠡᠯᠦᠨ ᠪᠠᠶᠠᠷᠯᠠᠯᠠ᠃
ᠭᠡᠷ ᠦ᠋ᠨ ᠬᠢᠨᠢ ᠭᠠᠳᠠᠭᠠ᠂ ᠪᠠᠭᠰᠢ ᠳ᠋ᠤᠨᠢ ᠪᠠᠷᠠᠯᠠᠭᠤᠯᠬᠤ ᠮᠣᠷᠢ ᠲᠡᠷᠭᠡ ᠪᠡᠯᠡᠨ ᠪᠣᠯᠵᠤ ᠬᠦᠯᠢᠶᠡᠵᠦ ᠪᠠᠢᠯᠠ᠃ ᠲᠡᠭᠦᠨ ᠳᠡᠭᠡᠷᠡ ᠪᠡᠨ ᠣᠴᠢᠨ ᠵᠢᠯᠣᠭᠣᠴᠢ ᠲᠦᠪᠰᠢᠨ ᠲᠡᠢ ᠵᠣᠯᠭᠠᠬᠤ ᠳ᠋ᠤ᠌ ᠲᠡᠷᠡ ᠨᠢ ᠶᠠᠭᠤ ᠴᠦ᠍ ᠥᠭᠭᠦᠭᠰᠡᠨ ᠦᠭᠡᠢ ᠲᠤᠯᠠ ᠰᠡᠳᠬᠢᠯ ᠨᠢ ᠭᠣᠩᠰᠣᠢᠨ ᠭᠣᠮᠣᠳᠠᠬᠤ ᠰᠡᠳᠬᠢᠯ ᠲᠥᠷᠥᠪᠡ᠃ ᠭᠡᠪᠡᠴᠦ ᠲᠡᠷᠡ ᠳᠣᠣᠷᠠᠬᠠᠨ ᠢ᠋ᠶ᠋ᠠᠨ ᠬᠠᠳᠠᠭ ᠦᠭᠡᠢ ᠵᠣᠯᠭᠠᠭᠰᠠᠨ ᠠ᠋ᠴᠠ ᠡᠢᠮᠦ ᠪᠣᠯᠪᠠ ᠪᠣᠯᠤᠯᠲᠠᠢ ᠭᠡᠵᠦ ᠳᠣᠲᠣᠷᠠ ᠪᠠᠨ ᠪᠣᠳᠣᠨ ᠭᠡᠮᠰᠢᠪᠡ᠃ ᠭᠡᠷ ᠲᠡᠭᠡᠨ ᠣᠷᠣᠵᠤ ᠪᠠᠭᠰᠢ ᠳ᠋ᠠᠭᠠᠨ ᠪᠠᠷᠢᠵᠤ ᠵᠣᠯᠭᠠᠬᠤ ᠬᠠᠳᠠᠭ ᠠᠪᠬᠤ ᠳᠡᠯᠢᠮ ᠳ᠋ᠡᠭᠡᠨ ᠡᠳᠦᠷ ᠦ᠋ᠨ ᠲᠤᠷᠰᠢ ᠠᠢᠯ ᠬᠡᠰᠦᠬᠦ ᠪᠡᠷ ᠰᠢᠢᠳᠦᠨ ᠪᠦᠬᠦ ᠪᠣᠢ ᠬᠠᠳᠠᠭ ᠢ᠋ᠶ᠋ᠠᠨ ᠬᠣᠷᠢᠶᠠᠨ ᠠᠪᠴᠤ ᠡᠪᠦᠷᠯᠡᠪᠡ᠃
ᠲᠡᠷᠭᠡᠨ ᠳ᠋ᠡᠭᠡᠨ ᠰᠠᠭᠤᠨ ᠬᠠᠰᠢᠶᠠ ᠠ᠋ᠴᠠ ᠭᠠᠷᠤᠭᠠᠳ ᠪᠠᠯᠳᠠᠨᠴᠡᠷᠢᠩ ᠢ᠋ ᠣᠢᠷᠠ ᠵᠠᠭᠤᠷᠠ ᠪᠠᠢᠵᠤ ᠮᠠᠭᠠᠳ ᠦᠭᠡᠢ ᠭᠡᠵᠦ ᠪᠠᠷᠠᠭᠤᠨ ᠵᠡᠭᠦᠨ ᠢ᠋ ᠠᠵᠢᠭᠯᠠᠨᠠ᠃ ᠬᠡᠷᠪᠡ ᠪᠠᠢᠪᠠᠰᠤ ᠳᠠᠷᠤᠢ ᠡᠷᠭᠢᠨ ᠠᠪᠤ ᠡᠵᠢ ᠳᠡᠭᠡᠷᠡ ᠪᠡᠨ ᠣᠷᠣᠭᠤᠯᠤᠨ᠂ ᠪᠦᠬᠦ ᠨᠢᠭᠤᠴᠠ ᠶ᠋ᠢ ᠨᠢᠭᠡᠮᠦᠰᠦᠨ ᠮᠡᠳᠡᠭᠳᠡᠵᠦ ᠰᠡᠳᠬᠢᠯ ᠠᠮᠠᠷᠠᠬᠤ ᠶ᠋ᠢ ᠴᠢᠩ ᠰᠡᠳᠬᠢᠯ ᠡᠴᠡ ᠪᠡᠨ ᠵᠣᠷᠢᠭᠯᠠᠭᠰᠠᠨ ᠪᠢᠯᠡ᠃ ᠭᠡᠲᠡᠯᠡ ᠪᠠᠯᠳᠠᠨᠴᠡᠷᠢᠩ ᠡᠨᠳᠡ ᠪᠢᠰᠢ᠂ ᠤᠷᠢᠳᠤ ᠶ᠋ᠢᠨ ᠵᠠᠩᠰᠢᠯ ᠢ᠋ᠶ᠋ᠠᠷ ᠬᠦᠷᠢᠶᠡ ᠴᠢᠭᠯᠡᠭᠰᠡᠨ ᠭᠤᠳᠤᠮᠵᠢᠨ ᠤ᠋ ᠠᠮᠠᠨ ᠳ᠋ᠤ᠌ ᠬᠦᠯᠢᠶᠡᠵᠦ ᠪᠠᠢᠭᠠ ᠪᠥᠭᠡᠳ ᠣᠶᠤᠨᠳᠠᠷᠢ ᠶ᠋ᠢᠨ ᠭᠠᠷᠴᠤ ᠢᠷᠡᠬᠦ ᠶ᠋ᠢ ᠬᠠᠷᠠᠬᠤ ᠲᠠᠢ ᠵᠡᠷᠭᠡ ᠬᠡᠦᠬᠡᠳ ᠰᠢᠭ ᠭᠦᠶᠦᠨ ᠤᠭᠲᠤᠨ ᠠᠪᠤᠪᠠ᠃ ᠡᠨᠡ ᠪᠣᠯ ᠬᠠᠷᠢᠨ ᠬᠠᠮᠤᠭ ᠤ᠋ᠨ ᠶᠡᠬᠡ ᠵᠣᠷᠢᠭ ᠭᠠᠷᠭᠠᠵᠤ ᠪᠠᠢᠭᠠ ᠨᠢ ᠪᠠᠢᠯᠠ᠃
ᠲᠡᠷᠡ ᠬᠣᠶᠠᠷ ᠠᠭᠤᠯᠵᠠᠩᠭᠤᠲᠠ ᠭᠠᠷ ᠭᠠᠷ ᠠ᠋ᠴᠠ ᠪᠠᠨ ᠰᠢᠭᠦᠷᠡᠨ ᠠᠪᠤᠯᠴᠠᠭᠰᠠᠨ ᠪᠥᠭᠡᠳ ᠡᠨᠡ ᠨᠢ ᠪᠣᠯ ᠬᠠᠮᠤᠭ ᠠ᠋ᠴᠠ ᠬᠠᠯᠠᠭᠤᠨ ᠬᠠᠢᠷᠠ ᠳᠤᠷᠠᠯᠠᠯ ᠢ᠋ᠶ᠋ᠠᠨ ᠡᠷᠡᠭᠡ ᠴᠡᠭᠡᠷ ᠦᠭᠡᠢ ᠰᠣᠯᠢᠯᠴᠠᠵᠤ ᠪᠠᠢᠭᠠ ᠨᠢ ᠲᠡᠷᠡ ᠪᠠᠢᠯᠠ᠃
ᠣᠶᠤᠨᠳᠠᠷᠢ ᠭᠣᠴᠣ ᠰᠠᠢᠬᠠᠨ ᠢ᠋ ᠡᠮᠦᠰᠦᠨ ᠡᠯᠳᠡᠪ ᠡᠷᠳᠡᠨᠢ ᠶ᠋ᠢᠨ ᠦᠨᠡᠲᠦ ᠵᠦᠢᠯᠡᠰ ᠢ᠋ᠶ᠋ᠡᠷ ᠭᠠᠷ ᠬᠤᠷᠤᠭᠤ ᠲᠣᠯᠣᠭᠠᠢ ᠲᠦᠷᠦᠭᠦᠦ ᠪᠡᠨ ᠴᠢᠮᠡᠭᠯᠡᠭᠰᠡᠨ ᠢ᠋ ᠪᠠᠯᠳᠠᠨᠴᠡᠷᠢᠩ ᠦᠵᠡᠩᠭᠦᠲᠡ ᠪᠡᠨ ᠪᠡᠶᠡᠰᠦᠨ ᠪᠠᠬᠠᠷᠠᠭᠰᠠᠨ ᠪᠣᠯᠪᠠᠴᠤ ᠲᠡᠷᠡ ᠳᠣᠣᠷᠠᠬᠠᠨ ᠢ᠋ᠶ᠋ᠠᠨ᠄《ᠪᠢ ᠭᠣᠶᠣ ᠰᠠᠢᠨ ᠢ᠋ ᠡᠳ᠋ᠯᠡᠳᠡᠭ ᠡᠮᠡᠭᠲᠡᠢ ᠶ᠋ᠢ ᠡᠬᠡᠨᠡᠷ ᠪᠣᠯᠭᠠᠨ ᠠᠪᠤᠭᠠᠳ ᠡᠴᠦᠰ ᠲᠦ᠋ᠨᠢ ᠶᠠᠭᠤ ᠪᠠᠷ ᠢ᠋ᠶ᠋ᠠᠨ ᠭᠢᠯᠢᠢᠯᠭᠠᠨ ᠭᠡᠢᠭᠦᠯᠬᠦ ᠶᠦᠮ ᠪᠣᠢ?》 ᠭᠡᠵᠦ ᠪᠣᠳᠣᠮᠠᠭᠴᠠ ᠰᠡᠳᠬᠢᠯ ᠭᠣᠩᠰᠣᠢᠪᠠ᠃ ᠲᠡᠭᠦᠨ ᠦ᠌ ᠳᠡᠭᠡᠷᠡ ᠣᠶᠤᠨᠳᠠᠷᠢ ᠡᠮᠦᠰᠴᠦ ᠵᠡᠭᠦᠭᠰᠡᠨ ᠢ᠋ᠶ᠋ᠡᠨ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠨᠢᠳᠦᠨ ᠦ᠌ ᠡᠮᠦᠨᠡ ᠵᠣᠷᠢᠭᠤᠳᠠ ᠲᠤᠰᠬᠠᠨ ᠭᠢᠯᠠᠯᠵᠠᠭᠤᠯᠤᠭᠰᠠᠨ ᠢ᠋ ᠨᠢ ᠬᠡᠯᠡᠬᠦ ᠤᠤ? ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠰᠠᠨᠠᠭᠠ ᠠᠯᠳᠠᠬᠤ ᠭᠡᠰᠡᠨ ᠢ᠋ ᠤᠷᠢᠳᠴᠢᠯᠠᠨ ᠰᠡᠷᠭᠡᠢᠯᠡᠬᠦ ᠶ᠋ᠢᠨ ᠬᠦᠴᠦ ᠪᠡᠷ ᠠᠷᠠᠢᠬᠠᠨ ᠪᠠᠷᠢᠯᠠ᠃
ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠪᠡᠬᠢ ᠪᠠᠢᠳᠠᠭ ᠭᠠᠭᠴᠠ ᠭᠣᠣᠯ ᠤ᠋ᠨ ᠢ᠋ᠶ᠋ᠠᠨ ᠬᠤᠪᠴᠠᠰᠤ ᠶ᠋ᠢ ᠡᠮᠦᠰᠦᠭᠰᠡᠨ ᠲᠤᠬᠠᠢ ᠳ᠋ᠤ᠌ ᠣᠶᠤᠨᠳᠠᠷᠢ᠄《ᠡᠪᠡᠢ ᠡᠨᠡ ᠮᠢᠨᠢ ᠰᠠᠷᠠ ᠰᠢᠨᠡ ᠶ᠋ᠢᠨ ᠪᠡᠯᠡᠭ ᠪᠠᠢᠪᠠᠴᠤ ᠰᠣᠯᠢᠬᠤ ᠭᠣᠶᠣᠯ᠂ ᠰᠢᠨᠡᠴᠢᠯᠡᠬᠦ ᠴᠢᠨᠡᠭᠡ ᠠᠯᠢ ᠠᠯᠢᠨ ᠨᠢ ᠦᠭᠡᠢ ᠶᠦᠮ ᠪᠠᠢᠨᠠ ᠳᠠ》 ᠭᠡᠵᠦ ᠦᠷᠦ ᠡᠪᠡᠳᠴᠡᠢ᠃ ᠭᠠᠷ ᠢ᠋ᠶ᠋ᠠᠨ ᠡᠪᠦᠷ ᠲᠡᠭᠡᠨ ᠬᠢᠨ ᠪᠡᠯᠡᠭᠯᠡᠬᠦ ᠳᠠᠯᠢᠩ ᠳ᠋ᠠᠭᠠᠨ ᠪᠦᠬᠦ ᠶᠠᠩᠴᠢᠶᠠᠨ ᠢ᠋ᠶ᠋ᠠᠨ ᠰᠠᠮ ᠬᠢᠨ ᠬᠠᠨᠴᠤᠢ ᠤᠷᠤᠭᠤ ᠪᠠᠨ ᠰᠢᠷᠭᠤᠭᠤᠯᠪᠠ᠃ ᠲᠡᠭᠡᠭᠡᠳ ᠲᠡᠷᠡ ᠭᠠᠷ ᠢ᠋ᠶ᠋ᠠᠨ ᠪᠤᠴᠠᠭᠠᠨ ᠭᠠᠷᠭᠠᠵᠤ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠡᠪᠦᠷ ᠲᠦ᠍ ᠬᠢᠨ ᠴᠡᠭᠡᠵᠢ ᠶ᠋ᠢ ᠨᠢ ᠲᠦᠰᠢᠪᠡ᠃ ᠣᠯᠠᠨ ᠬᠣᠨᠣᠭ ᠬᠤᠯᠵᠢᠭᠰᠠᠨ ᠨᠣᠢᠷ ᠨᠢᠭᠡᠮᠦᠰᠦᠨ ᠢᠷᠡᠬᠦ ᠰᠢᠭ ᠨᠢᠳᠦ ᠨᠢ ᠠᠨᠢᠯᠳᠤᠨᠠ᠃ ᠤᠷᠳᠤᠭᠤᠷ ᠨᠢ ᠲᠠᠲᠠᠭᠰᠠᠨ ᠡᠷᠢᠶᠡᠨ ᠪᠦᠲᠡᠭᠡᠯᠭᠡ ᠡᠳᠦᠷ ᠦ᠋ᠨ ᠴᠠᠭᠠᠨ ᠭᠡᠷᠡᠯ ᠢ᠋ ᠬᠠᠯᠬᠠᠯᠠᠨᠠ᠃ ᠲᠡᠷᠭᠡᠨ ᠦ᠌ ᠵᠥᠭᠡᠯᠡᠨ ᠳᠣᠩᠰᠣᠯᠭᠠ ᠪᠡᠶᠡ ᠶ᠋ᠢ ᠨᠢ ᠪᠦᠦᠪᠡᠢᠯᠡᠬᠦ ᠰᠢᠭ ᠵᠠᠢᠮᠤᠷᠠᠭᠤᠯᠤᠨ ᠲᠤᠩ ᠠᠶᠠᠲᠠᠢᠬᠠᠨ ᠤᠨᠲᠠᠭᠤᠯᠵᠠᠢ᠃
ᠵᠢᠯᠣᠭᠣᠴᠢ ᠲᠦᠪᠰᠢᠨ ᠲᠡᠷᠡ ᠬᠣᠶᠠᠷ ᠤ᠋ᠨ ᠬᠠᠮᠲᠤ ᠶᠠᠪᠤᠬᠤ ᠪᠦᠷᠢ ᠳ᠋ᠦ᠍ ᠰᠡᠳᠬᠢᠯ ᠲᠡᠨᠢᠢᠨ ᠪᠠᠶᠠᠷᠯᠠᠳᠠᠭ ᠪᠥᠭᠡᠳ ᠥᠨᠥᠳᠥᠷ ᠦ᠋ᠨ ᠬᠤᠪᠢ ᠳ᠋ᠤ᠌ ᠪᠦᠷ ᠣᠨᠴᠠ ᠪᠠᠶᠠᠷ ᠪᠠᠬᠠᠳᠤᠯ ᠪᠣᠯᠤᠨ ᠶᠠᠪᠤᠯᠠ᠃ ᠭᠠᠭᠴᠠ ᠬᠦ᠌ ᠬᠠᠷᠠᠮᠰᠠᠯᠲᠠᠢ ᠨᠢ ᠰᠠᠷᠠ ᠶ᠋ᠢᠨ ᠡᠳᠦᠷ ᠠᠩᠬᠠ ᠵᠣᠷᠢᠨ ᠭᠠᠷᠤᠭᠰᠠᠨ ᠢ᠋ᠶ᠋ᠠᠨ ᠵᠠᠮ ᠬᠠᠵᠠᠢᠯ ᠦᠭᠡᠢ ᠬᠦᠷᠬᠦ ᠶᠣᠰᠣᠲᠠᠢ ᠶ᠋ᠢ ᠳᠣᠲᠣᠷᠠ ᠪᠠᠨ ᠰᠠᠨᠠᠨᠠ᠃
ᠣᠶᠤᠨᠳᠠᠷᠢ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠡᠪᠦᠷ ᠳᠡᠭᠡᠷᠡ ᠡᠭᠡᠭᠡ ᠯᠡ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠭᠠᠷ ᠳᠡᠭᠡᠷᠡ ᠬᠡᠪᠲᠡᠭᠰᠡᠨ ᠨᠢᠯᠬᠠ ᠬᠡᠦᠬᠡᠳ ᠠᠳᠠᠯᠢ ᠤᠨᠲᠠᠭᠰᠠᠭᠠᠷ ᠪᠠᠢᠯᠠ᠃ ᠲᠡᠷᠭᠡ ᠬᠦᠷᠬᠦ ᠭᠠᠵᠠᠷ ᠢ᠋ᠶ᠋ᠠᠨ ᠡᠷᠢᠨ ᠵᠣᠭᠰᠣᠬᠤ ᠳ᠋ᠤ᠌ ᠪᠠᠯᠳᠠᠨᠴᠡᠷᠢᠩ ᠰᠣᠴᠢᠭᠠᠬᠤ ᠦᠭᠡᠢ ᠶ᠋ᠢ ᠬᠢᠴᠢᠶᠡᠨ ᠠᠶᠠᠷᠬᠠᠨ ᠥᠨᠳᠡᠢᠯᠭᠡᠪᠡ᠃ ᠣᠶᠤᠨᠳᠠᠷᠢ ᠰᠡᠷᠡᠩᠭᠦᠲᠡ ᠪᠡᠨ ᠨᠣᠢᠷᠮᠤᠭ ᠨᠢᠳᠦ ᠪᠡᠨ ᠲᠣᠮᠣ ᠪᠣᠯᠭᠠᠨ᠄
— ᠦᠭᠡᠢ ᠪᠢᠳᠡ ᠬᠠᠮᠢᠭᠠ ᠢᠷᠡᠪᠡ?
— ᠪᠠᠭᠰᠢ ᠶ᠋ᠢᠨ ᠴᠢᠨᠢ ᠡᠭᠦᠳᠡᠨ ᠳᠡᠭᠡᠷᠡ᠃
ᠣᠶᠤᠨᠳᠠᠷᠢ ᠡᠰᠡ ᠦᠨᠡᠮᠰᠢᠬᠦ ᠮᠡᠲᠦ ᠬᠠᠯᠬᠠᠪᠴᠢ ᠶ᠋ᠢᠨ ᠵᠠᠪᠰᠠᠷ ᠢ᠋ᠶ᠋ᠠᠷ ᠱᠠᠭᠠᠢᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠄
— ᠬᠣᠶᠠᠭᠤᠯᠠ ᠪᠠᠨ ᠪᠠᠷᠠᠯᠬᠠᠶᠠ ᠭᠡᠵᠦ ᠡᠷᠭᠢᠨ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠭᠠᠷ ᠢ᠋ ᠰᠢᠭᠦᠷᠡᠨ ᠠᠪᠤᠪᠠ᠃ ᠡᠨᠡ ᠨᠢ ᠪᠠᠯᠳᠠᠨᠴᠡᠷᠢᠩ ᠲᠡᠢ ᠰᠡᠳᠬᠢᠯ ᠦ᠋ᠨ ᠭᠦᠨ ᠬᠣᠯᠪᠣᠭᠠ ᠲᠠᠢ ᠪᠠᠨ ᠪᠠᠭᠰᠢ ᠳ᠋ᠠᠭᠠᠨ ᠮᠡᠳᠡᠭᠳᠡᠬᠦ ᠭᠡᠰᠡᠨ ᠬᠡᠷᠡᠭ ᠪᠥᠭᠡᠳ ᠶᠡᠷᠦ ᠣᠶᠤᠨᠳᠠᠷᠢ ᠳ᠋ᠤ᠌ ᠡᠴᠢᠭᠡ᠂ ᠡᠬᠡ᠂ ᠪᠠᠭᠰᠢ᠂ ᠤᠷᠤᠭ ᠲᠥᠷᠥᠯ ᠦ᠋ᠨ ᠬᠥᠮᠦᠰ ᠪᠦᠭᠦᠳᠡ ᠳ᠋ᠦ᠍ ᠮᠡᠳᠡᠭᠳᠡᠬᠦ ᠰᠠᠨ ᠭᠡᠰᠡᠨ ᠬᠦᠰᠡᠯ ᠣᠷᠭᠢᠯᠤᠨ ᠪᠠᠳᠠᠷᠠᠵᠤ ᠪᠠᠢᠭᠠ ᠠᠵᠢ᠃ ᠬᠠᠷᠢᠨ ᠪᠠᠯᠳᠠᠨᠴᠡᠷᠢᠩ ᠳ᠋ᠦ᠍ ᠪᠣᠯ ᠶᠡᠷᠦ ᠡᠢᠮᠦ ᠪᠢᠰᠢ᠃ ᠬᠠᠨᠢᠯᠠᠨ ᠰᠠᠭᠤᠬᠤ ᠶ᠋ᠢ ᠬᠦᠰᠡᠭᠴᠢᠳ ᠨᠢᠭᠡᠨ ᠭᠡᠷ ᠲᠦ᠍ ᠣᠷᠣᠨ ᠰᠠᠭᠤᠬᠤ ᠪᠠᠨ ᠬᠦᠷᠲᠡᠯᠡ ᠬᠡᠨ ᠪᠦᠬᠦᠨ ᠦ᠌ ᠡᠮᠦᠨᠡ ᠮᠠᠰᠢ ᠨᠢᠭᠤᠴᠠ ᠪᠠᠢᠬᠤ ᠶᠣᠰᠣᠲᠠᠢ ᠶ᠋ᠢ ᠪᠠᠷᠢᠮᠲᠠᠯᠠᠬᠤ ᠶ᠋ᠢᠨ ᠳᠡᠭᠡᠷᠡ ᠢᠴᠢᠨ ᠵᠣᠪᠠᠬᠤ ᠨᠢ ᠬᠡᠳᠦ ᠪᠠᠢᠵᠠᠢ᠃
— ᠦᠭᠡᠢ᠂ ᠴᠢ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠪᠠᠷᠠᠯᠬᠠ᠂ ᠪᠢ ᠶᠠᠮᠠᠷ ᠱᠠᠪᠢ ᠨᠢ ᠪᠢᠰᠢ᠃
— ᠲᠠ ᠲᠡᠭᠡᠭᠡᠳ ᠡᠨᠳᠡ ᠡᠴᠡ ᠪᠡᠨ ᠬᠠᠮᠢᠭᠠ ᠣᠴᠢᠬᠤ ᠭᠡᠵᠦ ᠪᠠᠢᠨᠠ ᠪᠣᠢ?
— ᠪᠢ ᠨᠢᠭᠡ ᠡᠮᠡᠭᠡᠨ ᠳ᠋ᠦ᠍ ᠣᠴᠢᠵᠤ ᠵᠣᠯᠭᠠᠨᠠ᠃
— ᠲᠡᠭᠡᠪᠡᠯ ᠬᠦᠯᠢᠶᠡ᠂ ᠪᠢ ᠬᠠᠮᠲᠤ ᠣᠴᠢᠶᠠ᠃
— ᠬᠣᠩᠭᠣᠷ ᠮᠢᠨᠢ ᠳᠡᠮᠡᠢ᠂ ᠨᠢᠭᠡ ᠮᠠᠭᠤ ᠣᠪᠣᠬᠠᠢ ᠳ᠋ᠤ᠌ ᠰᠠᠭᠤᠳᠠᠭ ᠶᠠᠳᠠᠭᠤ ᠡᠮᠡᠭᠡᠨ ᠪᠠᠢᠭᠠ ᠶᠤᠮ᠃
— ᠲᠡᠷᠡ ᠶᠠᠮᠠᠷ ᠬᠠᠮᠢᠶᠠ᠂ ᠲᠠ ᠯᠠ ᠣᠴᠢᠵᠤ ᠵᠣᠯᠭᠠᠳᠠᠭ ᠠ᠋ᠴᠠ ᠬᠣᠢᠰᠢ᠂ ᠪᠢ ᠮᠥᠨ ᠵᠣᠯᠭᠠᠳᠠᠭ ᠪᠠᠢᠬᠤ ᠶᠣᠰᠣᠲᠠᠢ ᠪᠢᠰᠢ ᠤᠤ?
— ᠲᠡᠷᠡ ᠴᠦ᠍ ᠲᠡᠢᠮᠦ᠂ ᠭᠡᠪᠡᠴᠦ ᠡᠨᠡ ᠵᠢᠯ ᠳ᠋ᠡᠭᠡᠨ ᠪᠠᠢᠭ᠂ ᠬᠠᠷᠢᠨ ᠬᠣᠢᠲᠤᠨ ᠵᠢᠯ! ᠵᠠ ᠮᠡᠳᠡᠪᠡ ᠤᠤ?
— ᠵᠠ ᠭᠡᠳᠡᠭ ᠦᠭᠡ ᠶ᠋ᠢ ᠣᠶᠤᠨᠳᠠᠷᠢ ᠲᠤᠩ ᠤᠷᠮᠠ ᠦᠭᠡᠢ ᠬᠡᠯᠡᠨ ᠲᠡᠷᠭᠡᠨ ᠡᠴᠡ ᠪᠠᠭᠤᠨ ᠪᠠᠭᠰᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠰᠢᠶᠠᠨ ᠳ᠋ᠤ᠌ ᠣᠷᠣᠯᠠ᠃
ᠪᠠᠯᠳᠠᠨᠴᠡᠷᠢᠩ ᠲᠡᠷᠭᠡᠨ ᠦ᠌ ᠨᠥᠭᠦᠭᠡ ᠲᠠᠯᠠ ᠤᠷᠤᠭᠤ ᠪᠠᠭᠤᠨ ᠵᠢᠮᠡ ᠡᠮᠡᠭᠡᠨ ᠦ᠌ ᠪᠠᠢᠳᠠᠭ ᠭᠠᠵᠠᠷ ᠢ᠋ ᠴᠢᠭᠯᠡᠨ ᠶᠠᠪᠤᠯᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠳᠠᠪᠰᠢᠯᠲᠦ