ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ - ᠠᠮᠢᠳᠤᠷᠠᠯ ᠤᠨ ᠵᠠᠮ ᠂ ᠨᠢᠭᠡᠳᠦᠭᠡᠷ ᠪᠦᠯᠦᠭ 〔ᠬᠣᠷᠢᠨ ᠭᠤᠷᠪᠠ〕 Цаг төрийн үймээн – Д ᠂ Намдаг - Амьдралын зам ᠂ нэгдүгээр бүлэг - 23
162ᠬᠦᠨᠳᠦᠲᠦ ᠡᠮᠡᠭᠡᠨ
ᠱᠠᠪᠢ ᠭᠠᠳᠠᠨᠠ ᠠ᠋ᠴᠠ ᠮᠥᠰᠥ ᠣᠷᠣᠭᠤᠯᠵᠤ ᠢᠷᠡᠨ ᠴᠠᠢ ᠴᠢᠨᠠᠬᠤ ᠭᠡᠵᠦ ᠪᠡᠯᠡᠳᠬᠡᠪᠡ᠃ ᠪᠠᠯᠳᠠᠨᠴᠡᠷᠢᠩ ᠳᠣᠷᠣᠭᠰᠢ ᠰᠢᠷᠲᠡᠨ ᠭᠥᠯᠢᠷᠡᠭᠰᠡᠨ ᠴᠢᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠯᠡ ᠪᠠᠢᠯᠠ᠃ ᠰᠡᠳᠬᠢᠯ ᠳ᠋ᠦ᠍ᠨᠢ《ᠰᠦᠬᠡᠪᠠᠭᠠᠲᠤᠷ ᠤ᠋ᠨ ᠦᠢᠯᠡ ᠬᠡᠷᠡᠭ ᠢ᠋ ᠪᠦᠲᠦᠬᠦ ᠪᠣᠯᠪᠠ ᠤᠤ? ᠦᠭᠡᠢ ᠪᠣᠯᠪᠠ ᠤᠤ?》 ᠭᠡᠳᠡᠭ ᠠᠰᠠᠭᠤᠳᠠᠯ ᠨᠢᠭᠡ ᠬᠡᠰᠡᠭ ᠡᠷᠭᠢᠯᠳᠦᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠪᠠᠰᠠ ᠥᠨᠥ ᠬᠠᠢᠷᠠᠲᠤ ᠠᠮᠠᠷᠠᠭ ᠳᠡᠭᠡᠷᠡ ᠪᠡᠨ ᠰᠢᠯᠵᠢᠨ᠂ ᠲᠡᠭᠦᠨ ᠲᠡᠢ ᠪᠡᠨ ᠭᠡᠷ ᠪᠦᠯᠢ ᠪᠣᠯᠬᠤ᠂ ᠬᠥᠷᠥᠩᠭᠡ ᠮᠥᠩᠭᠥ ᠦᠭᠡᠢ ᠶᠠᠭᠠᠬᠢᠬᠤ ᠪᠢᠯᠡ ᠭᠡᠵᠦ ᠰᠡᠳᠬᠢᠯ ᠮᠤᠬᠤᠷᠳᠠᠨ ᠭᠣᠨᠢᠷᠬᠠᠵᠤ ᠡᠬᠢᠯᠡᠪᠡ᠃
ᠨᠠᠮᠰᠠᠷᠠᠢ ᠴᠠᠢ ᠪᠠᠨ ᠴᠢᠨᠠᠵᠤ ᠠᠭᠤᠳᠠᠯᠤᠭᠠᠳ ᠪᠠᠭᠰᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠵᠠᠭᠤ ᠳ᠋ᠤ᠌ ᠰᠢᠷᠡᠭᠡ ᠲᠠᠯᠪᠢᠨ ᠴᠠᠢ ᠠᠶᠠᠭᠠᠯᠠᠵᠤ᠄
— ᠲᠠ ᠵᠣᠭᠣᠭᠯᠠ ᠭᠡᠬᠦ ᠳ᠋ᠦ᠍᠂ ᠪᠠᠯᠳᠠᠨᠴᠡᠴᠢᠩ ᠳᠣᠷᠣᠭᠰᠢ ᠬᠠᠷᠠᠨ ᠭᠥᠯᠢᠷᠡᠨ ᠰᠠᠭᠤᠬᠤ ᠪᠠᠨ ᠪᠣᠯᠢᠪᠠ᠃ ᠭᠡᠯᠡ ᠴᠦ᠍ ᠰᠡᠳᠬᠢᠯ ᠡᠴᠡ ᠨᠢ᠂ ᠮᠥᠩᠭᠥ ᠶᠠᠩᠴᠢᠶᠠᠨ ᠤ᠋ ᠵᠦᠢᠯ ᠢ᠋ ᠬᠡᠷᠬᠢᠨ ᠣᠯᠬᠤ ᠪᠢᠯᠡ ᠭᠡᠳᠡᠭ ᠪᠣᠳᠣᠯ ᠰᠠᠯᠬᠤ ᠦᠭᠡᠢ ᠪᠠᠢᠯᠠ᠃
— ᠪᠠᠭᠰᠢ ᠠ᠋! ᠶᠠᠭᠤᠮᠠ ᠪᠠᠨ ᠶᠠᠭᠠᠬᠢᠬᠤ? ᠠᠯᠢ ᠲᠠ ᠵᠦᠭᠡᠷ ᠪᠠᠢᠭᠠ ᠭᠡᠵᠦ ᠪᠣᠳᠣᠨᠠ ᠤᠤ? ᠭᠡᠬᠦ ᠳ᠋ᠦ᠍᠄
— ᠵᠦᠭᠡᠷ ᠥᠩᠭᠡᠷᠡᠨᠡ ᠭᠡᠵᠦ ᠪᠣᠳᠣᠵᠤ ᠶᠠᠭᠠᠬᠢᠵᠤ ᠪᠣᠯᠬᠤ ᠪᠣᠢ? ᠵᠦᠭᠡᠷ ᠡᠷᠲᠡᠬᠡᠨ ᠶᠠᠩᠵᠤᠯᠠᠶᠠ ᠭᠡᠳ ᠴᠠᠢ ᠪᠠᠨ ᠶᠠᠭᠠᠷᠠᠨ ᠤᠤᠭᠤᠪᠠ᠃
ᠴᠠᠢ ᠪᠠᠨ ᠤᠤᠭᠤᠵᠤ ᠳᠠᠭᠤᠰᠤᠮᠠᠭᠴᠠ ᠬᠣᠶᠠᠭᠤᠯᠠ ᠪᠠᠨ ᠭᠠᠷᠴᠤ᠂ ᠡᠮᠡᠭᠡᠯ᠂ ᠬᠠᠵᠠᠭᠠᠷ᠂ ᠡᠪᠦᠯ ᠦ᠋ᠨ ᠳᠤᠯᠠᠭᠠᠨ ᠬᠤᠪᠴᠠᠰᠤ᠂ ᠬᠣᠭᠣᠯᠠ ᠬᠣᠱᠣᠣ ᠪᠠᠨ ᠪᠢᠴᠢᠬᠠᠨ ᠪᠠᠢᠰᠢᠩ ᠤ᠋ᠨ ᠢ᠋ᠶ᠋ᠠᠨ ᠱᠠᠯᠠ ᠶ᠋ᠢ ᠬᠣᠪᠬᠣᠯᠤᠨ ᠳᠣᠣᠷᠠᠲᠤ ᠬᠥᠨᠳᠡᠢ ᠳ᠋ᠦ᠍ᠨᠢ ᠬᠢᠨ ᠪᠠᠩᠵᠠ ᠨᠤᠭᠤᠳ ᠢ᠋ ᠡᠭᠡᠭᠦᠯᠦᠨ ᠬᠠᠳᠠᠪᠠ᠃ ᠭᠡᠪᠡᠴᠦ ᠭᠠᠮᠢᠩ ᠣᠷᠣᠵᠤ ᠢᠷᠡᠬᠦ ᠯᠡ ᠶᠦᠮ ᠪᠣᠯ ᠵᠠᠪᠠᠯ ᠨᠢᠭᠡ ᠶᠠᠭᠤᠮᠠ ᠠᠪᠬᠤ ᠠ᠋ᠴᠠ ᠨᠠᠭᠠᠰᠢ ᠰᠡᠳᠬᠢᠯ ᠨᠢ ᠠᠮᠠᠷᠠᠬᠤ ᠦᠭᠡᠢ ᠪᠠᠢᠵᠤ ᠮᠠᠭᠠᠳ ᠦᠭᠡᠢ ᠭᠡᠬᠦ ᠳ᠋ᠡᠭᠡᠨ ᠮᠣᠷᠢᠨ ᠠᠴᠢᠶᠠᠨ ᠤ᠋ ᠶᠠᠩᠭᠢᠶᠠ ᠭᠥᠯᠢᠮ ᠳᠥᠷᠥᠭᠡ ᠮᠡᠲᠦ ᠶ᠋ᠢ ᠤᠭᠰᠠᠷᠠᠨ ᠢᠯᠡ ᠲᠠᠯᠪᠢᠯᠠ᠃ ᠮᠥᠩᠭᠥ ᠶᠠᠩᠴᠢᠶᠠᠨ ᠪᠠ ᠮᠥᠩᠭᠦᠲᠦ ᠬᠡᠲᠡ ᠬᠢᠲᠤᠭᠠ ᠡᠨᠡ ᠲᠡᠷᠡ ᠪᠡᠨ ᠬᠠᠭᠤᠴᠢᠨ ᠲᠡᠮᠦᠷ ᠬᠤᠪᠢᠩ ᠳ᠋ᠤ᠌ ᠬᠢᠨ ᠳᠡᠭᠡᠷᠡ ᠨᠢ ᠦᠨᠡᠰᠦ ᠳᠦᠭᠦᠷᠭᠡᠵᠦ ᠭᠠᠳᠠᠨᠠ ᠬᠠᠶᠠᠭᠠᠨ ᠳ᠋ᠠᠭᠠᠨ ᠬᠠᠶᠠᠯᠠ᠃ ᠡᠭᠦᠨ ᠡᠴᠡ ᠴᠠᠭᠠᠰᠢ ᠡᠳᠡᠨ ᠦ᠌ ᠳ᠋ᠦ᠍ ᠣᠨᠴᠠ ᠶ᠋ᠢᠨ ᠭᠠᠷᠤᠵᠠᠳᠠᠬᠤ ᠶᠠᠭᠤᠮᠠ ᠦᠭᠡᠢ ᠪᠠᠢᠯᠠ᠃ ᠭᠡᠪᠡᠴᠦ ᠪᠠᠯᠳᠠᠨᠴᠡᠷᠢᠩ ᠥᠭᠡᠷᠡ ᠪᠤᠰᠤᠳ ᠤ᠋ᠨ ᠲᠥᠯᠥᠭᠡ ᠰᠡᠳᠬᠢᠯ ᠵᠣᠪᠠᠨᠠ᠃
— ᠨᠠᠮᠰᠠᠷᠠᠢ ᠮᠢᠨᠢ ᠪᠢᠳᠡ ᠴᠦ᠍ ᠶᠠᠭᠠᠬᠢᠬᠤ ᠪᠣᠢ᠂ ᠢᠩᠭᠢᠭᠡᠳ ᠪᠣᠯᠤᠯᠠ᠃ ᠪᠤᠰᠤᠳ ᠠᠢᠯ ᠤ᠋ᠳ ᠶᠠᠭᠠᠬᠢᠨᠠ ᠪᠣᠢ᠂ ᠭᠡᠬᠦ ᠳ᠋ᠦ᠍ ᠨᠠᠮᠰᠠᠷᠠᠢ᠂
— ᠪᠠᠭᠰᠢ ᠠ᠋! ᠪᠢ ᠪᠣᠳᠣᠪᠠᠯ ᠮᠥᠨ ᠯᠡ ᠮᠡᠳᠡᠭᠰᠡᠨ ᠪᠠᠷᠢᠯ ᠦᠭᠡᠢ᠃
— ᠠ᠋ ᠬᠠᠢ᠂ ᠮᠡᠳᠡᠬᠦ ᠦᠭᠡᠢ᠂ ᠴᠢ ᠶᠠᠪᠤᠨᠠ ᠪᠠᠢᠭᠠ᠂ ᠶᠠᠳᠠᠵᠤ ᠬᠠᠰᠢᠶᠠ ᠬᠠᠮᠠᠷ ᠤ᠋ᠨ ᠠᠢᠯ ᠤ᠋ᠳ ᠳᠤ ᠮᠡᠳᠡᠭᠳᠡᠶᠡ᠃
— ᠳᠡᠮᠡᠢ᠂ ᠪᠠᠭᠰᠢ ᠠ᠋! ᠲᠡᠭᠡᠵᠦ ᠶᠠᠪᠤᠵᠤ ᠭᠠᠮᠢᠩ ᠤ᠋ᠨ ᠲᠠᠩᠨᠠᠭᠤᠯ ᠤ᠋ᠳ ᠮᠡᠳᠡᠭᠳᠡᠵᠦ ᠣᠷᠬᠢᠬᠤ ᠶ᠋ᠢ ᠬᠡᠨ ᠪᠠᠢᠭ ᠭᠡᠬᠦ ᠪᠣᠢ?
— ᠠ ᠲᠡᠢᠮᠦ᠂ ᠲᠡᠷᠡ ᠴᠢᠨᠢ ᠴᠦ᠍ ᠪᠠᠰᠠ ᠯᠠ ᠰᠠᠨᠠᠳᠠᠭ ᠯᠠ ᠰᠠᠨᠠᠭᠠ᠃
ᠢᠩᠭᠢᠭᠡᠳ ᠲᠡᠳᠡ ᠲᠡᠷᠡ ᠰᠥᠨᠢ ᠶ᠋ᠢ ᠶᠡᠷᠦ ᠶ᠋ᠢᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠠᠮᠤᠭᠤᠯᠠᠩ ᠲᠠᠢᠪᠤᠩ ᠠᠪᠤᠭᠰᠠᠨ ᠪᠥᠭᠡᠳ ᠮᠠᠷᠭᠠᠰᠢ ᠨᠢ ᠨᠡᠯᠢᠶᠡᠳ ᠣᠷᠣᠢ ᠪᠣᠰᠪᠠ᠃ ᠭᠠᠮᠢᠩ ᠤ᠋ᠳ ᠢ᠋ ᠭᠠᠷᠴᠠᠭᠠ ᠦᠭᠡᠢ ᠢᠷᠡᠨᠡ ᠭᠡᠵᠦ ᠪᠣᠳᠣᠬᠤ ᠲᠤᠯᠠ ᠡᠭᠦᠳᠡ ᠬᠠᠭᠠᠯᠭᠠ ᠠ᠋ᠴᠠ ᠠᠪᠤᠭᠠᠳ ᠠᠪᠳᠠᠷᠠ ᠰᠠᠪᠠ ᠪᠣᠯᠭᠠᠨ ᠤ᠋ ᠳᠡᠭᠡᠭᠡ ᠲᠦᠭᠵᠢᠭᠡᠰᠦ ᠨᠦ᠍ᠭᠦᠳ ᠢ᠋ ᠰᠤᠯᠠᠯᠠᠭᠰᠠᠨ ᠪᠥᠭᠡᠳ ᠶᠡᠷᠦ ᠶᠠᠮᠠᠷ ᠨᠢᠭᠡᠨ ᠭᠠᠢ ᠪᠠᠷᠴᠢᠳ ᠢ᠋ ᠪᠢᠰᠢ ᠪᠠᠶᠠᠷ ᠴᠡᠩᠭᠡᠯ ᠪᠣᠯᠬᠤ ᠭᠡᠵᠦ ᠪᠠᠢᠭᠠ ᠰᠢᠭ᠋ ᠠᠮᠲᠠ ᠰᠢᠮᠲᠡᠲᠡᠢ ᠰᠠᠢᠬᠠᠨ ᠬᠣᠭᠣᠯᠠ ᠬᠢᠵᠦ ᠡᠬᠢᠯᠡᠵᠡᠢ᠃ ᠤᠷᠢᠳ ᠡᠮᠦᠨᠡ ᠨᠢ ᠬᠣᠭᠣᠯᠠ ᠤᠮᠳᠠ ᠶ᠋ᠢ ᠨᠠᠮᠰᠠᠷᠠᠢ ᠳᠠᠩ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠢᠳᠡᠭ ᠪᠠᠢᠭᠰᠠᠨ ᠪᠣᠯ ᠥᠨᠥᠳᠥᠷ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠭᠠᠷ ᠪᠡᠶᠡ ᠣᠷᠣᠯᠴᠠᠪᠠ᠃ ᠲᠡᠷᠡ ᠵᠠᠭᠤᠷᠠ ᠪᠠᠳᠢᠷᠴᠢᠨ ᠰᠢᠪᠠᠷᠴᠢᠨ ᠨᠤᠭᠤᠳ ᠤ᠋ᠨ ᠢᠨᠢᠶᠡᠳᠦᠮᠲᠦ ᠶᠠᠪᠤᠳᠠᠯ ᠤ᠋ᠳ ᠠ᠋ᠴᠠ ᠶᠠᠷᠢᠵᠤ ᠡᠬᠢᠯᠡᠭᠰᠡᠨ ᠢ᠋ ᠨᠠᠮᠰᠠᠷᠠᠢ ᠡᠯᠭᠦᠨ ᠠᠪᠴᠤ ᠨᠡᠮᠡᠨ ᠨᠡᠮᠡᠨ ᠶᠠᠷᠢᠭᠰᠠᠨ ᠢ᠋ ᠬᠡᠯᠡᠬᠦ ᠤᠤ᠂ ᠡᠳᠦᠷ ᠦ᠋ᠨ ᠡᠩ ᠢ᠋ᠶ᠋ᠡᠷ《ᠬᠠ ᠬᠠ᠂ ᠬᠢ᠂ ᠬᠢ》 ᠪᠣᠯᠪᠠ᠃ ᠥᠭᠡᠷᠡ ᠪᠡᠷ ᠬᠡᠯᠡᠬᠦ ᠳ᠋ᠦ᠍ ᠲᠡᠷᠡ ᠬᠣᠶᠠᠷ ᠨᠢᠭᠡ ᠨᠢ ᠪᠠᠭᠰᠢ ᠭᠡᠵᠦ ᠴᠢᠷᠮᠠᠢᠨ᠂ ᠨᠥᠭᠦᠭᠡ ᠨᠢ ᠱᠠᠪᠢ ᠭᠡᠵᠦ ᠴᠥᠮᠴᠥᠢᠨ ᠰᠠᠭᠤᠭᠰᠠᠨ ᠦᠭᠡᠢ᠂ ᠵᠦᠭᠡᠷ ᠡᠷᠬᠡ ᠰᠠᠴᠠᠭᠤᠬᠠᠨ ᠰᠢᠭ᠋ ᠯᠡ ᠪᠠᠢᠯᠠ᠃
ᠭᠡᠲᠡᠯᠡ ᠡᠨᠡ ᠡᠳᠦᠷ ᠭᠠᠢᠬᠠᠯ ᠭᠠᠮᠢᠩ ᠤ᠋ᠳ ᠠ᠋ᠴᠠ ᠢᠷᠡᠭᠰᠡᠨ ᠦᠭᠡᠢ ᠪᠢᠯᠡ᠃ ᠮᠠᠷᠭᠠᠰᠢ ᠨᠢ ᠡᠳᠦᠷ ᠳᠤᠮᠳᠠ ᠪᠣᠯᠲᠠᠯᠠ ᠬᠦᠯᠢᠶᠡᠬᠦ ᠳ᠋ᠦ᠍ ᠮᠥᠨ ᠯᠡ ᠢᠷᠡᠭᠰᠡᠨ ᠦᠭᠡᠢ ᠨᠢ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠰᠡᠳᠬᠢᠯ ᠢ᠋ ᠲᠦᠭᠰᠢᠭᠡᠪᠡ᠃《ᠥᠨᠥᠬᠢ ᠮᠠᠨᠢ ᠪᠠᠭᠰᠢ ᠳ᠋ᠠᠭᠠᠨ ᠪᠠᠷᠠᠯᠠᠭᠳᠠᠭ ᠡᠳᠦᠷ᠂ ᠪᠢ ᠵᠠᠪᠠᠯ ᠤᠭᠲᠤᠬᠤ ᠶᠣᠰᠣᠲᠠᠢ》 ᠭᠡᠬᠦ ᠡᠴᠡ ᠭᠠᠮᠢᠩ ᠤ᠋ᠳ ᠶᠠᠭ ᠲᠡᠷᠡ ᠦᠶᠡ ᠪᠡᠷ ᠨᠢ ᠢᠷᠡᠨ ᠭᠠᠢ ᠪᠣᠯᠬᠤ ᠭᠡᠵᠦ ᠪᠠᠢᠭᠠ ᠰᠢᠭ᠋ ᠰᠠᠨᠠᠭᠳᠠᠨ ᠲᠦᠭᠰᠢᠨᠡ᠃ ᠨᠠᠮᠰᠠᠷᠠᠢ ᠶ᠋ᠢ ᠭᠠᠳᠠᠭᠤᠷ ᠶᠠᠭᠤ ᠪᠣᠯᠵᠤ ᠪᠠᠢᠭᠠ ᠶ᠋ᠢ ᠮᠡᠳᠡᠭᠡᠳ ᠢᠷᠡ ᠭᠡᠵᠦ ᠶᠠᠪᠤᠭᠤᠯᠤᠭᠠᠳ ᠭᠡᠷ ᠲᠡᠭᠡᠨ ᠭᠠᠭᠴᠠᠭᠠᠷ ᠦᠯᠡᠳᠡᠪᠡ᠃ ᠴᠠᠭ ᠮᠥᠴᠡ ᠢᠷᠡᠬᠦ ᠳᠣᠳᠣᠮ ᠰᠡᠳᠬᠢᠯ ᠵᠣᠪᠠᠨᠢᠨ ᠶᠠᠳᠠᠵᠤ ᠪᠠᠢᠯᠠ᠃ ᠬᠠᠭᠠᠯᠭᠠ ᠵᠥᠭᠡᠯᠡᠨ ᠢ᠋ᠶ᠋ᠡᠷ ᠨᠡᠭᠡᠭᠡᠭᠳᠡᠬᠦ ᠳ᠋ᠦ᠍《ᠠᠰᠢᠭᠦᠢ ᠢᠷᠡᠵᠦ ᠪᠠᠢᠨᠠ ᠤᠤ?》 ᠭᠡᠵᠦ ᠪᠣᠳᠣᠨ ᠭᠡᠷ ᠡᠴᠡ ᠪᠡᠨ ᠱᠠᠭᠠᠢᠪᠠ᠃ ᠭᠡᠲᠡᠯᠡ ᠪᠢᠰᠢ᠂ ᠵᠢᠮᠡ ᠬᠡᠮᠡᠬᠦ ᠶᠠᠳᠠᠭᠤ ᠡᠮᠡᠭᠡᠨ ᠠᠵᠢ᠃ ᠡᠭᠦᠨ ᠢ᠋ ᠪᠠᠯᠳᠠᠨᠴᠡᠷᠢᠩ ᠰᠠᠢᠨ ᠲᠠᠨᠢᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ᠂ ᠴᠢᠩ ᠰᠡᠳᠬᠢᠯ ᠡᠴᠡ ᠪᠡᠨ ᠬᠦᠨᠳᠦᠳᠬᠡᠳᠡᠭ ᠪᠠᠢᠯᠠ᠃
ᠡᠷᠲᠡ ᠤᠷᠢᠳᠤ ᠶ᠋ᠢᠨ ᠴᠠᠭ ᠲᠤ ᠡᠨᠡ ᠵᠢᠮᠡ᠂ ᠪᠠᠯᠳᠠᠨᠴᠡᠷᠢᠩ ᠢ᠋ ᠪᠠᠷᠤᠭ ᠴᠤ᠌ ᠳᠥᠷᠥᠭᠡ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠪᠢᠵᠡ᠂ ᠴᠢᠭᠤᠯᠭᠠᠨ ᠳᠠ ᠬᠡᠮᠡᠬᠦ ᠠᠢᠮᠠᠭ ᠤ᠋ᠨ ᠬᠡᠷᠡᠭ ᠢ᠋ ᠭᠠᠷ ᠲᠠᠭᠠᠨ ᠠᠪᠤᠭᠰᠠᠨ ᠨᠢᠭᠡᠨ ᠲᠣᠮᠣ ᠲᠦᠰᠢᠮᠡᠳ ᠦ᠋ᠨ ᠡᠬᠡᠨᠡᠷ ᠪᠠᠢᠵᠠᠢ᠃ ᠲᠡᠭᠡᠭᠡᠳ ᠮᠠᠨᠵᠤ ᠬᠠᠭᠠᠨ ᠳ᠋ᠤ᠌ ᠵᠢᠯ ᠦ᠋ᠨ ᠵᠢᠯ ᠳ᠋ᠦ᠍ ᠡᠷᠭᠦᠳᠡᠭ ᠶᠡᠬᠡ ᠮᠥᠩᠭᠥᠨ ᠦ᠌ ᠠᠯᠪᠠ ᠶ᠋ᠢ ᠳᠣᠣᠷᠠᠲᠤ ᠬᠣᠰᠢᠭᠤᠳ ᠤ᠋ᠨ ᠢ᠋ᠶ᠋ᠠᠨ ᠵᠠᠷᠢᠮ ᠲᠦᠰᠢᠮᠡᠯ ᠦ᠋ᠳ ᠲᠡᠢ ᠰᠠᠨᠠᠯ ᠨᠡᠢᠯᠡᠨ《ᠠᠷᠠᠳ ᠲᠦᠮᠡᠨ ᠦᠭᠡᠢᠷᠡᠨ ᠬᠣᠭᠣᠰᠣᠷᠠᠪᠠ》 ᠭᠡᠳᠡᠭ ᠢ᠋ᠶ᠋ᠡᠷ ᠰᠢᠯᠲᠠᠭ ᠬᠢᠨ ᠭᠤᠷᠪᠠᠨ ᠵᠢᠯ ᠳᠠᠷᠠᠭᠠᠯᠠᠨ ᠬᠠᠭᠠᠰ ᠪᠠᠷᠢᠭᠠᠳ ᠴᠥᠮ ᠪᠠᠷᠢᠭᠳᠠᠨ ᠶᠠᠯᠠ ᠰᠢᠳᠬᠡᠭᠦᠯᠦᠭᠰᠡᠨ ᠪᠥᠭᠡᠳ ᠵᠢᠮᠡ ᠶ᠋ᠢᠨ ᠡᠷᠡ ᠬᠡᠷᠡᠭ ᠲᠣᠯᠣᠭᠠᠢᠯᠠᠭᠰᠠᠨ ᠤᠴᠢᠷ ᠴᠥᠯᠡᠭᠳᠡᠭᠰᠡᠨ ᠠᠵᠢ᠃
ᠲᠡᠷᠡ ᠴᠠᠭ ᠲᠤ ᠬᠥᠮᠦᠰ ᠴᠥᠯᠡᠭᠳᠡᠯᠲᠡ ᠶ᠋ᠢᠨ ᠲᠤᠬᠠᠢ ᠬᠡᠯᠡᠬᠦ ᠳ᠋ᠡᠭᠡᠨ ᠤᠷᠲᠤ ᠶ᠋ᠢᠨ ᠤᠷᠲᠤ ᠵᠦᠭ ᠲᠦ᠍ ᠤᠴᠢᠷ ᠳᠦᠷᠰᠦ ᠪᠡᠨ ᠠᠯᠳᠠᠭᠰᠠᠨ ᠬᠠᠯᠠᠭᠤᠨ ᠭᠠᠵᠠᠷ᠂ ᠭᠣᠣᠯ ᠳ᠋ᠠᠭᠠᠨ ᠲᠣᠭᠣᠭᠠ ᠰᠢᠭ᠋ ᠶᠡᠬᠡ ᠬᠣᠩᠬᠣᠷ ᠲᠠᠢ ᠡᠯᠡᠰᠦᠨ ᠮᠠᠩᠬᠠᠨ ᠳᠠᠯᠠᠢ ᠪᠠᠢᠳᠠᠭ ᠭᠡᠨᠡ ᠪᠢᠯᠡ ᠭᠡᠳ ᠴᠠᠭᠠᠰᠢ ᠬᠡᠯᠡᠬᠦ ᠳ᠋ᠡᠭᠡᠨ ᠴᠥᠯᠡᠭᠳᠡᠭᠰᠡᠨ ᠢ᠋ ᠲᠡᠨᠳᠡ ᠠᠪᠠᠴᠢᠨ ᠳᠣᠷᠣᠭᠰᠢ ᠥᠩᠬᠥᠷᠢᠭᠦᠯᠬᠦ ᠳ᠋ᠦ᠍ ᠢᠷᠣᠭᠠᠷ ᠲᠤᠨᠢ ᠭᠦᠷᠦᠨ ᠲᠣᠭᠲᠠᠬᠤ ᠪᠥᠭᠡᠳ ᠲᠡᠨᠳᠡ ᠡᠴᠡ ᠭᠠᠷᠴᠤ ᠴᠢᠳᠠᠪᠠᠯ ᠶᠠᠯᠠ ᠦᠭᠡᠢ ᠪᠣᠯᠳᠠᠭ ᠶᠤᠮ ᠭᠡᠨᠡ ᠪᠢᠯᠡ ᠭᠡᠵᠦ ᠬᠡᠯᠡᠯᠴᠡᠨᠡ᠃《ᠦᠭᠡᠢ ᠲᠡᠭᠡᠭᠡᠳ ᠬᠥᠮᠦᠨ ᠶᠠᠭᠠᠬᠢᠭᠠᠳ ᠭᠠᠷᠳᠠᠭ ᠦᠭᠡᠢ ᠶᠦᠮ ᠪᠣᠢ?》 ᠭᠡᠪᠡᠯ᠄ ᠬᠥᠮᠦᠨ ᠬᠡᠴᠢᠨᠡᠭᠡᠨ ᠵᠢᠳᠬᠦᠪᠡᠴᠦ ᠬᠠᠯᠠᠭᠤᠨ ᠨᠤᠷᠮᠠᠨ ᠡᠯᠡᠰᠦ ᠨᠢ ᠭᠠᠷ ᠬᠥᠯ ᠦ᠋ᠨ ᠠᠶᠠᠰ ᠢ᠋ᠶ᠋ᠠᠷ ᠳᠣᠷᠣᠭᠰᠢ ᠨᠤᠷᠠᠨ ᠢᠷᠣᠭᠠᠷ ᠲᠤᠨᠢ ᠪᠤᠴᠠᠭᠠᠳᠠᠭ ᠶᠤᠮ ᠭᠡᠨᠡ ᠭᠡᠵᠦ ᠲᠠᠢᠯᠪᠤᠷᠢᠯᠠᠳᠠᠭ ᠪᠠᠢᠯᠠ᠃
ᠤᠭ ᠨᠢ ᠡᠨᠡ ᠶᠠᠷᠢᠶᠠ ᠶ᠋ᠢ ᠪᠦᠷ ᠳᠡᠭᠡᠷᠡ ᠴᠠᠭ ᠲᠤ ᠮᠣᠩᠭᠣᠯ ᠣᠷᠣᠨ ᠳᠠᠶᠠᠭᠠᠷ ᠢ᠋ᠶ᠋ᠠᠨ ᠬᠦᠴᠦᠲᠡᠢ ᠡᠰᠡᠷᠭᠦᠴᠡᠵᠦ ᠪᠠᠢᠬᠤ ᠳ᠋ᠤ᠌ ᠬᠡᠨ ᠨᠢᠭᠡ ᠨᠢ ᠡᠰᠡᠷᠭᠦᠴᠡᠯ ᠢ᠋ ᠤᠯᠠᠮ ᠰᠢᠷᠦᠭᠦᠰᠬᠡᠬᠦ ᠪᠡᠷ ᠣᠷᠣᠯᠳᠣᠳᠠᠭ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠵᠢᠷᠦᠬᠡ ᠵᠣᠷᠢᠭ ᠢ᠋ ᠮᠣᠬᠣᠭᠠᠨ ᠰᠢᠨᠲᠠᠷᠠᠭᠤᠯᠬᠤ ᠶᠠᠮᠠᠷ ᠴᠦ᠍ ᠤᠳᠬᠠ ᠤᠴᠢᠷ ᠦᠭᠡᠢ ᠳᠡᠮᠡᠢ ᠵᠦᠢᠯ ᠪᠣᠯᠤᠨ ᠬᠤᠪᠢᠷᠠᠳᠠᠭ ᠪᠠᠢᠵᠠᠢ᠃ ᠲᠡᠷᠡ ᠳᠤᠮᠳᠠ ᠠ᠋ᠴᠠ ᠡᠷᠡ ᠶᠦ᠍ᠭᠡᠨ ᠴᠥᠯᠡᠭᠦᠯᠦᠭᠰᠡᠨ ᠵᠢᠮᠡ ᠳ᠋ᠦ᠍ ᠬᠡᠴᠢᠨᠡᠭᠡᠨ ᠠᠶᠤᠮᠰᠢᠭᠲᠠᠢ ᠪᠣᠯᠬᠤ ᠶ᠋ᠢ ᠡᠨᠳᠡ ᠳᠤᠷᠠᠳᠬᠤ ᠳ᠋ᠤ᠌ ᠪᠡᠷᠬᠡ᠃ ᠬᠠᠢᠷᠠᠲᠤ ᠡᠷᠡ ᠶ᠋ᠢᠨ ᠤᠨᠠᠬᠤ ᠡᠯᠡᠰᠦᠨ ᠮᠠᠩᠬᠠᠨ ᠲᠣᠭᠣᠭᠠ ᠶ᠋ᠢ ᠡᠷᠭᠢᠨ ᠨᠤᠷᠠᠬᠤ᠂ ᠶᠠᠭᠤᠮᠠ ᠦᠭᠡᠢ ᠪᠣᠯᠲᠠᠯᠠ ᠨᠢ ᠬᠤᠷᠠ ᠪᠣᠷᠣᠭᠠᠨ ᠣᠷᠣᠭᠤᠯᠤᠶᠠ ᠭᠡᠬᠦ ᠳ᠋ᠡᠭᠡᠨ ᠠᠯᠳᠠᠷᠲᠤ ᠰᠦᠮᠡ ᠬᠡᠢᠳ ᠦ᠋ᠳ ᠢ᠋ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠬᠡᠰᠦᠨ ᠮᠥᠷᠭᠥᠬᠦ ᠪᠡᠷ ᠰᠢᠢᠳᠴᠡᠢ᠃ ᠲᠡᠷᠡ ᠴᠠᠭ ᠳᠤ ᠨᠠᠰᠤ ᠬᠣᠷᠢᠨ ᠲᠠᠪᠤ᠂ ᠭᠤᠸᠠ ᠦᠵᠡᠰᠬᠦᠯᠡᠩ ᠲᠡᠭᠦᠯᠳᠡᠷ᠂ ᠡᠷᠬᠢᠮᠰᠦᠭ ᠶᠡᠬᠡ ᠬᠠᠲᠤᠨ ᠪᠣᠯᠪᠠᠴᠤ ᠬᠠᠵᠠᠭᠤ ᠳ᠋ᠠᠭᠠᠨ ᠳᠠᠭᠠᠭᠤᠯᠢ ᠦᠭᠡᠢ ᠭᠠᠭᠴᠠ ᠪᠡᠶᠡ ᠭᠠᠷᠤᠯᠠ᠃
ᠬᠣᠢᠰᠢ ᠴᠢᠭᠯᠡᠨ ᠶᠠᠭᠤ ᠪᠣᠯᠤᠭᠰᠠᠨ ᠢ᠋ ᠨᠢ ᠨᠤᠲᠤᠭ ᠤ᠋ᠨ ᠬᠥᠮᠦᠰ ᠲᠡᠷᠡ ᠴᠠᠭ ᠳᠤ ᠦᠯᠦ ᠮᠡᠳᠡᠨᠡ᠃ ᠡᠴᠦᠰ ᠬᠣᠢᠲᠤ ᠳ᠋ᠤᠨᠢ ᠣᠷᠣ ᠰᠤᠷᠠᠭ ᠦᠭᠡᠢ ᠮᠠᠷᠲᠠᠭᠰᠠᠨ ᠪᠥᠭᠡᠳ ᠭᠠᠭᠴᠠ ᠬᠦ᠌ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠡᠪᠦᠭᠡᠨ ᠪᠠᠭᠰᠢ ᠡᠷᠡ ᠨᠥᠬᠥᠷ ᠲᠡᠢ ᠨᠢ ᠲᠡᠮᠡᠴᠡᠯ ᠦ᠋ᠨ ᠬᠡᠷᠡᠭ ᠲᠦ᠍ ᠣᠷᠣᠯᠴᠠᠭᠰᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠦᠷᠭᠦᠯᠵᠢᠯᠡᠨ ᠰᠤᠷᠠᠭᠯᠠᠵᠤ ᠪᠠᠢᠭᠠᠳ ᠠᠷᠪᠠᠨ ᠲᠠᠪᠤᠨ ᠵᠢᠯ ᠪᠣᠯᠤᠭᠰᠠᠨ ᠤ᠋ ᠬᠣᠢᠨᠠ ᠪᠣᠭᠳᠠ ᠶ᠋ᠢᠨ ᠬᠦᠷᠢᠶᠡ ᠣᠷᠴᠢᠮ ᠣᠪᠣᠬᠠᠢ ᠲᠠᠢ ᠪᠠᠢᠭᠠ ᠪᠣᠯᠤᠯᠲᠠᠢ ᠭᠡᠳᠡᠭ ᠰᠤᠷᠠᠭ ᠢ᠋ ᠠᠩᠬᠠ ᠰᠣᠨᠣᠰᠴᠠᠢ᠃ ᠳᠠᠷᠠᠭᠠ ᠨᠢ ᠵᠢᠷᠭᠤᠭᠠᠨ ᠵᠢᠯ ᠦ᠋ᠨ ᠬᠣᠢᠰᠢ ᠪᠠᠯᠳᠠᠨᠴᠡᠷᠢᠩ ᠢ᠋ ᠠᠦ᠋ᠲ᠋ᠣᠨᠣᠮᠢᠲᠤ ᠲᠥᠷᠥ ᠶ᠋ᠢᠨ ᠠᠯᠪᠠᠨᠠ ᠮᠣᠷᠳᠠᠬᠤ ᠳ᠋ᠤ᠌ ᠡᠪᠦᠭᠡᠨ ᠪᠠᠭᠰᠢ᠂ ᠵᠢᠮᠡ ᠶ᠋ᠢᠨ ᠪᠦᠬᠦ ᠶᠠᠪᠤᠳᠠᠯ ᠢ᠋ ᠲᠣᠳᠣᠷᠬᠠᠢᠯᠠᠨ᠂ ᠣᠯᠵᠤ ᠠᠭᠤᠯᠵᠠᠨ᠂ ᠡᠭᠦᠷᠢᠳᠡ ᠡᠷᠭᠢᠵᠦ ᠬᠠᠷᠠᠵᠤ ᠶᠠᠪᠤᠬᠤ ᠶ᠋ᠢ ᠳᠠᠭᠠᠭᠠᠯᠭᠠᠭᠰᠠᠨ ᠠᠵᠢ᠃
ᠵᠢᠮᠡ ᠭᠡᠪᠡᠯ᠄ ᠠᠩᠬᠠ ᠭᠡᠷ ᠡᠴᠡ ᠭᠠᠷᠤᠭᠠᠳ ᠡᠷᠳᠡᠨᠢ ᠵᠣᠣ᠂ ᠡᠷᠳᠡᠨᠢ ᠵᠣᠣ ᠠ᠋ᠴᠠ ᠪᠠᠨ ᠥᠨᠳᠥᠷ ᠭᠡᠭᠡᠨ ᠦ᠌ ᠬᠡᠢᠳ᠂ ᠲᠡᠨᠳᠡ ᠡᠴᠡ ᠪᠡᠨ ᠪᠣᠭᠳᠠ ᠶ᠋ᠢᠨ ᠬᠦᠷᠢᠶᠡ ᠴᠢᠭᠯᠡᠭᠰᠡᠨ ᠪᠣᠯᠪᠠᠴᠤ ᠬᠡᠵᠢᠶᠡ ᠬᠡᠷᠬᠢᠨ ᠣᠷᠣᠵᠤ ᠢᠷᠡᠭᠰᠡᠨ ᠢ᠋ᠶ᠋ᠡᠨ ᠥᠪᠡᠷ ᠢ᠋ᠶ᠋ᠡᠨ ᠴᠦ᠍ ᠦᠯᠦ ᠮᠡᠳᠡᠬᠦ ᠪᠢᠯᠡ᠃ ᠶᠠᠭᠤᠨ ᠳ᠋ᠤ᠌ ᠭᠡᠪᠡᠯ᠄ ᠶᠠᠪᠤᠭᠰᠠᠨ ᠭᠠᠵᠠᠷ ᠪᠣᠯᠭᠠᠨ ᠳ᠋ᠤᠨᠢ ᠰᠠᠨᠠᠭᠠᠨ ᠳ᠋ᠤ᠌ ᠪᠠᠭᠲᠠᠰᠢ ᠦᠭᠡᠢ ᠬᠣᠪ ᠬᠠᠭᠤᠷᠠᠢ᠂ ᠬᠤᠷᠴᠠ ᠨᠠᠷᠠ ᠳᠡᠭᠡᠷᠡ ᠡᠴᠡ ᠲᠥᠭᠡᠨᠡᠬᠦ ᠪᠤᠶᠤ ᠡᠰᠡᠬᠦᠯᠡ ᠬᠦᠴᠦᠲᠦ ᠬᠠᠯᠠᠭᠤᠨ ᠰᠠᠯᠬᠢ ᠳᠡᠭᠳᠡᠨ ᠭᠠᠵᠠᠷ ᠤ᠋ᠨ ᠬᠥᠷᠥᠰᠥ ᠶ᠋ᠢ ᠬᠥᠳᠡᠯᠭᠡᠨ ᠤᠯᠠᠭᠠᠨ ᠰᠢᠷᠣᠢ ᠶ᠋ᠢ ᠮᠠᠨᠠᠷᠠᠭᠠᠨ ᠪᠤᠰᠬᠠᠨᠠ᠃ ᠲᠡᠭᠦᠨ ᠦ᠌ ᠳᠤᠮᠳᠠ ᠶᠠᠪᠤᠵᠤ ᠪᠠᠢᠭᠠ ᠳ᠋ᠠᠭᠠᠨ ᠵᠢᠮᠡ᠄《ᠣᠳᠣ ᠯᠠ ᠡᠷᠡ ᠨᠥᠬᠥᠷ ᠮᠢᠨᠢ ᠡᠯᠡᠰᠦᠨ ᠮᠠᠩᠬᠠᠨ ᠲᠣᠭᠣᠭᠠ ᠶ᠋ᠢᠨ ᠢᠷᠣᠭᠠᠷ ᠲᠤ ᠬᠠᠳᠠᠨ ᠦᠬᠦᠵᠦ ᠪᠠᠢᠭᠠ》 ᠭᠡᠵᠦ ᠪᠤᠷᠬᠠᠨ ᠲᠩᠷᠢ ᠳ᠋ᠦ᠍ ᠮᠥᠷᠭᠥᠨ᠂ ᠬᠤᠷᠠ ᠪᠣᠷᠣᠭᠠᠨ ᠭᠤᠶᠤᠨᠠ᠃ ᠵᠠᠷᠢᠮ ᠡᠳᠦᠷ ᠨᠡᠪᠰᠡᠢᠭᠰᠡᠨ ᠪᠣᠷᠣ ᠡᠭᠦᠯᠡ᠂ ᠲᠩᠷᠢ ᠶ᠋ᠢ ᠪᠢᠲᠡᠭᠦᠦ ᠪᠦᠷᠬᠦᠬᠦ ᠳ᠋ᠦ᠍《ᠣᠳᠣ ᠯᠠ ᠬᠤᠷᠠ ᠪᠣᠷᠣᠭᠠᠨ ᠣᠷᠣᠨ ᠬᠠᠢᠷᠠᠲᠤ ᠡᠷᠡ ᠶ᠋ᠢ ᠮᠢᠨᠢ ᠠᠪᠤᠷᠠᠬᠤ ᠨᠢ》 ᠭᠡᠵᠦ ᠪᠠᠶᠠᠷᠯᠠᠵᠤ ᠮᠥᠨ ᠯᠡ ᠮᠥᠷᠭᠥᠨᠡ᠃ ᠭᠡᠲᠡᠯᠡ ᠶᠠᠭᠠᠬᠢᠯᠠ ᠴᠦ᠍ ᠭᠡᠰᠡᠨ ᠪᠣᠷᠣᠭᠠᠨ ᠣᠷᠣᠳᠠᠭ ᠦᠭᠡᠢ ᠪᠠᠢᠯᠠ᠃ ᠲᠣᠮᠣ ᠰᠢᠷᠬᠡᠭ ᠳᠤᠰᠤᠯ ᠬᠡᠳᠦᠬᠡᠨ ᠪᠠᠭᠤᠬᠤ ᠲᠠᠢ ᠨᠢ ᠵᠡᠷᠭᠡ᠂ ᠬᠤᠢ ᠰᠠᠯᠬᠢ ᠳᠣᠣᠷᠠ ᠠ᠋ᠴᠠ ᠳᠡᠭᠳᠡᠨ ᠳᠡᠭᠡᠷᠡᠬᠢ ᠡᠭᠦᠯᠡ ᠶ᠋ᠢ ᠲᠠᠯᠠ ᠲᠠᠯᠠ ᠲᠡᠢᠰᠢ ᠵᠠᠳᠠ ᠬᠡᠢᠰᠬᠡᠳᠡᠭ ᠪᠠᠢᠯᠠ᠃ ᠡᠳᠦᠷ ᠦ᠋ᠨ ᠲᠤᠷᠰᠢ ᠳ᠋ᠤ᠌ ᠶᠠᠪᠤᠭᠰᠠᠭᠠᠷ ᠰᠥᠨᠢ ᠬᠣᠶᠠᠷ ᠬᠥᠯ ᠦ᠋ᠨ ᠢ᠋ᠶ᠋ᠡᠨ ᠰᠣᠯᠪᠢᠬᠤ ᠪᠠᠨ ᠪᠣᠯᠢᠬᠤ ᠳ᠋ᠤ᠌ ᠬᠠᠵᠠᠭᠤ ᠲᠡᠢᠰᠢ ᠶᠦᠮ ᠤᠤ᠂ ᠡᠰᠡᠬᠦᠯᠡ ᠴᠢᠭ ᠲᠥᠷᠥᠭᠦᠯᠭᠡ ᠪᠡᠨ ᠤᠨᠠᠨᠠ᠃ ᠥᠷᠯᠥᠭᠡ ᠰᠡᠷᠡᠬᠦ ᠶ᠋ᠢᠨ ᠡᠮᠦᠨᠡ᠂ ᠲᠠᠩᠳᠠ ᠯᠠ ᠡᠷᠡ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠬᠠᠯᠠᠭᠤᠨ ᠡᠯᠡᠰᠦᠨ ᠲᠣᠭᠣᠭᠠ ᠶ᠋ᠢᠨ ᠢᠷᠣᠭᠠᠷ ᠲᠤ ᠴᠠᠪᠴᠢᠯᠭᠠ ᠦᠭᠡᠢ ᠪᠣᠯᠤᠭᠰᠠᠨ ᠨᠢᠳᠦ ᠪᠡᠷ ᠲᠩᠷᠢ ᠰᠢᠷᠲᠡᠨ《ᠤᠰᠤ! ᠤᠰᠤ!》 ᠭᠡᠵᠦ ᠠᠮᠠ ᠨᠢ ᠠᠩᠭᠠᠯᠵᠠᠨ ᠪᠠᠢᠬᠤ ᠶ᠋ᠢ ᠦᠵᠡᠨ ᠵᠡᠭᠦᠳᠦᠯᠡᠨᠡ᠃ ᠢᠩᠭᠢᠭᠡᠳ ᠯᠡ ᠵᠢᠮᠡ ᠥᠨᠳᠥᠷ ᠭᠡᠭᠡᠨ ᠦ᠌ ᠬᠡᠢᠳ ᠡᠴᠡ ᠪᠣᠭᠳᠠ ᠶ᠋ᠢᠨ ᠬᠦᠷᠢᠶᠡ ᠤᠷᠤᠭᠤ ᠶᠠᠪᠤᠵᠤ ᠪᠠᠢᠬᠤ ᠵᠠᠭᠤᠷᠠ ᠪᠠᠨ ᠭᠠᠯᠵᠠᠭᠤᠷᠠᠭᠰᠠᠨ ᠪᠠᠢᠵᠠᠢ᠃
ᠡᠷᠡᠭᠦᠯ ᠤᠬᠠᠭᠠᠨ ᠲᠠᠢ ᠪᠠᠢᠬᠤ ᠳ᠋ᠠᠭᠠᠨ ᠦᠰᠦ ᠲᠣᠯᠣᠭᠠᠢ ᠶ᠋ᠢᠨ ᠢ᠋ᠶ᠋ᠡᠨ ᠵᠠᠰᠠᠯ ᠴᠢᠮᠡᠭᠯᠡᠯ ᠦ᠋ᠨ ᠵᠦᠢᠯ ᠢ᠋ ᠰᠦᠮᠡ ᠬᠡᠢᠳ ᠲᠦ᠍ ᠡᠷᠭᠦᠨ ᠪᠠᠷᠢᠵᠤ ᠳᠠᠭᠤᠰᠤᠭᠰᠠᠨ ᠪᠥᠭᠡᠳ ᠬᠤᠷᠤᠭᠤᠨ ᠳ᠋ᠠᠭᠠᠨ ᠦᠯᠡᠳᠡᠭᠡᠭᠰᠡᠨ ᠬᠣᠶᠠᠷ ᠪᠥᠭᠡᠵᠢ ᠪᠡᠷ ᠣᠨᠢ᠂ ᠲᠣᠭᠣᠨᠣ᠂ ᠰᠢᠷᠠ ᠢᠰᠡᠭᠡᠢ᠂ ᠨᠠᠪᠲᠠᠰᠤ ᠮᠡᠲᠦ ᠶ᠋ᠢ ᠠᠪᠴᠤ ᠣᠷᠣᠴᠠ ᠪᠣᠰᠬᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠳᠠᠮ ᠲᠣᠮ ᠮᠡᠳᠡᠨᠡ᠃ ᠥᠪᠡᠷ ᠦ᠋ᠨ ᠬᠢᠨᠢ ᠤᠬᠠᠭᠠᠨ ᠬᠡᠴᠢᠨᠡᠭᠡᠨ ᠡᠯᠡᠢ ᠪᠠᠯᠠᠢ ᠪᠠᠢᠯᠠ ᠴᠦ᠍ ᠭᠡᠰᠡᠨ ᠡᠷᠡᠭᠦᠯ ᠮᠥᠷᠭᠥᠯ ᠬᠢᠬᠦ ᠪᠡᠨ ᠣᠷᠬᠢᠭᠰᠠᠨ ᠤᠳᠠᠭᠠ ᠦᠭᠡᠢ᠃ ᠪᠠᠰᠠ ᠥᠯᠥᠰᠦᠨ ᠴᠠᠩᠭᠠᠬᠤ ᠶ᠋ᠢᠨ ᠠᠶᠤᠯ ᠬᠡᠴᠢᠨᠡᠭᠡᠨ ᠶᠡᠬᠡ ᠲᠣᠬᠢᠶᠠᠯᠳᠤᠪᠠᠴᠤ《ᠲᠦᠮᠡᠨ ᠶᠠᠭᠤᠮᠠ ᠬᠠᠢᠷᠠᠯᠠᠨ!》 ᠭᠡᠵᠦ ᠠᠯᠠᠭᠠ ᠲᠣᠰᠣᠨ ᠭᠣᠶᠣᠯᠭᠠ ᠭᠤᠶᠤᠭᠰᠠᠨ ᠦᠭᠡᠢ᠂ ᠠᠢᠯ ᠤ᠋ᠨ ᠡᠭᠦᠳᠡᠨ ᠳᠡᠭᠡᠷᠡ ᠣᠴᠢᠭᠠᠳ ᠤᠯᠠᠭᠠᠨ ᠡᠯᠢᠭᠡ ᠪᠡᠷ ᠢ᠋ᠶ᠋ᠡᠨ ᠫᠠᠰ ᠭᠡᠲᠡᠯᠡ ᠭᠠᠵᠠᠷ ᠤᠨᠠᠨ ᠬᠡᠳᠦ ᠳᠠᠬᠢᠨ ᠮᠥᠷᠭᠥᠮᠡᠭᠴᠡ ᠬᠥᠮᠦᠨ ᠠᠮᠢᠲᠠᠨ ᠠᠶᠠᠨᠳᠠᠭᠠᠨ ᠭᠡᠷ ᠡᠴᠡ ᠪᠡᠨ ᠭᠠᠷᠴᠤ ᠢᠷᠡᠨ ᠶᠠᠭᠤᠮᠠ ᠥᠭᠳᠡᠭ ᠪᠠᠢᠯᠠ᠃
ᠠᠯᠢᠪᠠ ᠶᠠᠭᠤᠮᠠᠨ ᠳ᠋ᠤ᠌ ᠡᠷᠬᠡ ᠦᠭᠡᠢ ᠡᠯᠡᠭᠳᠡᠯ ᠬᠠᠭᠤᠴᠢᠷᠠᠯ ᠪᠠᠢᠳᠠᠭ ᠶᠣᠰᠣᠭᠠᠷ ᠵᠢᠮᠡ ᠶ᠋ᠢᠨ ᠭᠠᠯᠵᠠᠭᠤᠷᠠᠯ ᠡᠮᠡᠭᠡᠨ ᠪᠠᠭᠤᠷᠠᠢ ᠪᠣᠯᠵᠤ ᠢᠷᠡᠬᠦ ᠳ᠋ᠦ᠍ᠨᠢ ᠠᠶᠠᠨᠳᠠᠭᠠᠨ ᠡᠳᠡᠭᠡᠷᠡᠭᠰᠡᠨ ᠪᠢᠯᠡ᠃ ᠢᠩᠭᠢᠬᠦ ᠳ᠋ᠦ᠍ ᠵᠢᠮᠡ ᠥᠪᠡᠷ ᠦ᠋ᠨ ᠪᠡᠶᠡ ᠶ᠋ᠢ ᠥᠭᠡᠳᠡ ᠲᠠᠲᠠᠬᠤ ᠶ᠋ᠢ ᠳᠠᠩᠴᠤ ᠪᠣᠳᠣᠭᠰᠠᠨ ᠦᠭᠡᠢ᠂ ᠳᠠᠬᠢᠨ ᠬᠤᠪᠴᠠᠰᠤ ᠬᠤᠨᠠᠷ ᠢ᠋ᠶ᠋ᠠᠨ ᠬᠠᠯᠠᠨ ᠰᠣᠯᠢᠬᠤ ᠪᠠᠢᠲᠤᠭᠠᠢ ᠭᠠᠷ ᠨᠢᠭᠤᠷ ᠤ᠋ᠨ ᠢ᠋ᠶ᠋ᠠᠨ ᠬᠭᠢᠷ ᠪᠤᠷᠲᠠᠭ ᠢ᠋ ᠴᠦ᠍ ᠤᠬᠢᠶᠠᠵᠤ ᠴᠡᠪᠡᠷᠯᠡᠭᠰᠡᠨ ᠦᠭᠡᠢ᠂《ᠥᠨᠥᠬᠢ ᠮᠠᠨᠢ ᠴᠦ᠍ ᠡᠳᠦᠢ ᠳ᠋ᠦ᠍ ᠠᠯᠢ ᠬᠡᠳᠦᠢᠨ ᠦ᠌ ᠥᠩᠭᠡᠷᠡᠭᠰᠡᠨ ᠰᠢᠦ ᠳᠡ᠂ ᠡᠨᠡ ᠶᠠᠪᠤᠭᠠ ᠪᠡᠶᠡ ᠮᠢᠨᠢ ᠴᠦ᠍ ᠢᠩᠭᠢᠭᠡᠳ ᠥᠩᠭᠡᠷᠡᠳᠡᠭ ᠪᠠᠢᠵᠠᠢ᠃ ᠬᠠᠷᠢᠨ ᠬᠣᠢᠲᠤ ᠨᠠᠰᠤ ᠪᠠᠨ ᠯᠠ ᠪᠣᠳᠣᠬᠤ ᠨᠢ ᠴᠢᠬᠤᠯᠠ》 ᠭᠡᠬᠦ ᠳ᠋ᠡᠭᠡᠨ ᠡᠳᠦᠷ ᠪᠦᠷᠢ ᠬᠦᠷᠢᠶᠡ᠂ ᠭᠠᠨᠳᠠᠩ ᠬᠣᠶᠠᠷ ᠢ᠋ ᠡᠷᠭᠢᠨ ᠮᠥᠷᠭᠥᠬᠦ ᠶ᠋ᠢ ᠴᠢᠬᠤᠯᠠᠴᠢᠯᠠᠨᠠ᠃ ᠲᠡᠷᠡ ᠳᠡᠯᠢᠮ ᠳ᠋ᠡᠭᠡᠨ ᠶᠠᠮᠠᠷ ᠨᠢᠭᠡ ᠠᠢᠯ ᠤ᠋ᠨ ᠡᠭᠦᠳᠡᠨ ᠳᠡᠭᠡᠷᠡ ᠣᠴᠢᠨ ᠮᠥᠷᠭᠥᠨᠡ᠃ ᠬᠡᠷᠪᠡ ᠬᠥᠮᠦᠨ ᠡᠰᠡ ᠭᠠᠷᠴᠤ ᠢᠷᠡᠪᠡᠯ ᠳᠣᠯᠣᠭᠠ᠂ ᠲᠡᠭᠡᠭᠡᠳ ᠡᠰᠡ ᠭᠠᠷᠴᠤ ᠢᠷᠡᠪᠡᠯ᠂ ᠭᠤᠷᠪᠠᠨ ᠳᠣᠯᠣᠭᠠ ᠬᠣᠷᠢᠨ ᠨᠢᠭᠡ ᠮᠥᠷᠭᠥᠭᠡᠳ ᠬᠡᠨ ᠴᠦ᠍ ᠦᠭᠡᠢ ᠪᠠᠢᠪᠠᠰᠤ《ᠥᠨᠥᠳᠥᠷ ᠦ᠋ᠨ ᠬᠤᠪᠢ ᠮᠠᠴᠤᠭ ᠪᠠᠷᠢᠵᠠᠢ》 ᠭᠡᠵᠦ ᠵᠠᠯᠪᠠᠷᠢᠨ ᠣᠪᠣᠬᠠᠢ ᠤᠷᠤᠭᠤ ᠪᠠᠨ ᠬᠡᠯᠲᠦᠷᠢᠨᠡ᠃ ᠡᠨᠡ ᠨᠢ ᠶᠠᠪᠤᠭᠠᠨ ᠳ᠋ᠠᠭᠠᠨ ᠪᠦᠬᠦ ᠬᠦᠷᠢᠶᠡᠨ ᠦ᠌ ᠬᠢᠨ ᠳ᠋ᠦ᠍ ᠲᠣᠳᠣᠷᠬᠠᠢ ᠪᠣᠯᠵᠤ᠂ ᠬᠥᠮᠦᠰ ᠶᠠᠳᠠᠭᠤ ᠭᠤᠢᠯᠢᠨᠴᠢᠨ ᠡᠮᠡᠭᠡᠨ ᠭᠡᠵᠦ ᠦᠵᠡᠬᠦ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠶᠠᠮᠠᠷ ᠨᠢᠭᠡᠨ ᠳᠠᠭᠢᠨᠢ ᠶ᠋ᠢᠨ ᠪᠦᠷᠢᠯᠸᠠ ᠭᠡᠵᠦ ᠳᠦᠷᠬᠢᠷᠡᠨ ᠱᠤᠤᠭᠢᠬᠤ ᠪᠣᠯᠵᠤ ᠲᠤᠩ ᠶᠡᠬᠡ ᠶᠠᠭᠤᠮᠠ ᠥᠭᠴᠦ ᠪᠠᠶᠠᠷᠯᠠᠭᠤᠯᠬᠤ ᠶ᠋ᠢ ᠪᠣᠳᠣᠨᠠ᠃ ᠭᠡᠲᠡᠯᠡ ᠵᠢᠮᠡ ᠡᠳ᠋ ᠠᠭᠤᠷᠠᠰᠤ ᠪᠠ ᠶᠠᠩᠴᠢᠶᠠᠨ ᠤ᠋ ᠵᠦᠢᠯ ᠢ᠋ ᠨᠢᠭᠦᠯ ᠦ᠋ᠨ ᠶᠠᠭᠤᠮᠠᠨ ᠳ᠋ᠤ᠌ ᠪᠣᠳᠣᠨ ᠠᠪᠬᠤ ᠶ᠋ᠢ ᠴᠡᠭᠡᠷᠯᠡᠨᠡ᠃ ᠠᠪᠳᠠᠭ ᠨᠢ ᠭᠡᠪᠡᠯ᠄ ᠥᠭᠡᠬᠦ ᠲᠣᠰᠣ᠂ ᠡᠯᠳᠡᠪ ᠴᠠᠭᠠᠨ ᠢᠳᠡᠭᠡ᠂ ᠪᠣᠯᠤᠭᠰᠠᠨ ᠲᠦᠭᠦᠬᠡᠢ ᠪᠤᠳᠠᠭᠠ᠂ ᠭᠤᠯᠢᠷ ᠪᠥᠭᠡᠳ ᠲᠡᠭᠦᠨ ᠢ᠋ᠶ᠋ᠡᠨ ᠭᠠᠭᠴᠠ ᠬᠦ᠌ ᠡᠪᠦᠷ ᠤᠷᠤᠭᠤ ᠪᠠᠨ ᠴᠢᠬᠢᠨ ᠬᠢᠬᠦ ᠲᠤᠯᠠ ᠡᠪᠦᠷ ᠨᠢ ᠮᠠᠰᠢ ᠲᠣᠮᠣ ᠪᠣᠯᠤᠭᠠᠳ ᠪᠥᠭᠡᠮ ᠬᠠᠷᠠ ᠬᠬᠢᠷ ᠪᠤᠷᠲᠠᠭ ᠶᠠᠪᠤᠨᠠ᠃ ᠡᠢᠮᠦ ᠳ᠋ᠦ᠍ ᠬᠥᠮᠦᠰ ᠵᠢᠮᠡ ᠤᠷᠤᠭᠤ ᠬᠡᠳᠦᠢᠪᠡᠷ ᠮᠤᠬᠤᠷ ᠰᠦᠰᠦᠭ ᠢ᠋ ᠪᠠᠷᠢᠨ ᠪᠢᠰᠢᠷᠡᠨ ᠬᠠᠨᠳᠤᠬᠤ ᠪᠣᠯᠪᠠᠴᠤ᠂ ᠬᠭᠢᠷ ᠪᠤᠷᠲᠠᠭ ᠠ᠋ᠴᠠ ᠰᠡᠵᠢᠭᠯᠡᠨ ᠣᠪᠣᠬᠠᠢ ᠳ᠋ᠤ᠌ ᠣᠢᠷᠠᠲᠤᠳᠠᠭ ᠦᠭᠡᠢ ᠪᠠᠢᠨᠠ᠃ ᠦᠨᠡᠨ ᠳ᠋ᠡᠭᠡᠨ ᠣᠢᠷᠠᠲᠤᠶᠠ ᠭᠡᠪᠡᠴᠦ ᠡᠩᠬᠦᠷᠡᠢᠯᠡᠨ ᠲᠡᠵᠢᠭᠡᠭᠰᠡᠨ ᠣᠯᠠᠨ ᠲᠦᠮᠡᠨ ᠨᠣᠬᠠᠳ ᠨᠢ ᠬᠠᠶᠠᠭᠠᠨ ᠠ᠋ᠴᠠ ᠨᠢ ᠪᠣᠰᠤᠨ ᠬᠠᠷᠠᠢᠵᠤ ᠤᠷᠠᠨ ᠲᠠᠰᠤᠳᠠᠬᠤ ᠭᠡᠵᠦ ᠲᠠᠭᠠᠷᠢᠨᠠ᠃ ᠶᠡᠷᠦ ᠲᠡᠷᠡ ᠣᠪᠣᠬᠠᠢ ᠶ᠋ᠢᠨ ᠠᠩᠬᠠ ᠣᠪᠣᠢᠨ ᠤᠲᠤᠭᠠ ᠭᠠᠷᠤᠭᠰᠠᠨ ᠴᠠᠭ ᠠ᠋ᠴᠠ ᠠᠪᠤᠭᠠᠳ ᠡᠳᠦᠭᠡ ᠬᠦᠷᠬᠦ ᠵᠠᠭᠤᠷᠠ ᠣᠷᠣᠭᠰᠠᠨ ᠬᠥᠮᠦᠨ ᠭᠡᠪᠡᠯ ᠭᠠᠭᠴᠠᠬᠠᠨ ᠪᠠᠯᠳᠠᠨᠴᠡᠷᠢᠩ ᠪᠢᠯᠡ᠃ ᠪᠠᠭᠰᠢ ᠶ᠋ᠢᠨ ᠳᠠᠭᠠᠭᠠᠯᠭᠠᠪᠤᠷᠢ ᠪᠠᠷ ᠡᠷᠢᠯ ᠰᠤᠷᠠᠯ ᠪᠣᠯᠤᠨ ᠶᠠᠪᠤᠵᠤ ᠠᠩᠬᠠ ᠤᠳᠠᠭᠠ ᠣᠷᠣᠭᠰᠠᠨ ᠠ᠋ᠴᠠ ᠪᠠᠨ ᠬᠣᠢᠰᠢ ᠵᠢᠯ ᠪᠦᠷᠢ ᠶ᠋ᠢᠨ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠨᠢᠭᠡᠨ ᠳ᠋ᠦ᠍ ᠥᠷᠯᠥᠭᠡ ᠣᠴᠢᠨ ᠵᠣᠯᠭᠠᠨᠠ᠃ ᠰᠢᠨᠡ ᠶ᠋ᠢᠨ ᠬᠣᠶᠠᠷ ᠲᠤ ᠵᠢᠮᠡ ᠣᠴᠢᠬᠤ ᠪᠣᠯᠪᠠᠴᠤ ᠡᠭᠦᠳᠡᠨ ᠳᠡᠭᠡᠷᠡ ᠨᠢ ᠢᠷᠡᠨ ᠭᠤᠷᠪᠠᠨ ᠳᠣᠯᠣᠭᠠ ᠬᠣᠷᠢᠨ ᠨᠢᠭᠡ ᠮᠥᠷᠭᠥᠨ ᠲᠣᠲᠣᠭᠣ ᠠ᠋ᠴᠠ ᠨᠢ ᠠᠳᠢᠰ ᠠᠪᠤᠭᠠᠳ ᠨᠢᠭᠡ ᠲᠠᠪᠠᠭ ᠢᠳᠡᠭᠡ᠂ ᠵᠢᠭᠠᠯ ᠵᠤᠭᠠ ᠪᠡᠯᠡᠭ ᠲᠡᠢ ᠥᠭᠬᠦ ᠶ᠋ᠢ ᠬᠦᠯᠢᠶᠡᠨ ᠠᠪᠴᠤ ᠡᠪᠦᠷᠯᠡᠭᠡᠳ ᠦᠭᠡ ᠳᠠᠭᠤᠨ ᠦᠭᠡᠢ ᠪᠤᠴᠠᠨᠠ᠃ ᠡᠴᠦᠰ ᠦ᠋ᠨ ᠪᠦᠯᠦᠭ ᠲᠦ᠍ ᠨᠢᠭᠡ ᠲᠣᠮᠣᠬᠠᠨ ᠥᠭᠡᠷᠡᠴᠢᠯᠡᠯᠲᠡ ᠭᠠᠷᠤᠭᠰᠠᠨ ᠨᠢ ᠰᠤᠪᠤᠷᠭᠠᠨ ᠳᠡᠭᠡᠷᠡ ᠦᠬᠦᠯᠦᠭᠦᠲᠡ ᠬᠡᠪᠲᠡᠭᠰᠡᠨ ᠡᠷᠡ ᠶ᠋ᠢ ᠣᠪᠣᠬᠠᠢ ᠳ᠋ᠠᠭᠠᠨ ᠠᠪᠠᠴᠢᠨ ᠭᠡᠪᠲᠡᠭᠦᠯᠦᠭᠰᠡᠨ ᠶᠠᠪᠤᠳᠠᠯ ᠶᠤᠮ᠃ ᠶᠠᠰᠤ ᠠᠷᠠᠰᠤ ᠬᠣᠶᠠᠷ ᠠ᠋ᠴᠠ ᠥᠭᠡᠷᠡ ᠶᠠᠭᠤ ᠴᠦ᠍ ᠦᠭᠡᠢ ᠪᠣᠯᠤᠭᠰᠠᠨ ᠲᠤᠷᠠᠩᠬᠠᠢ ᠪᠡᠶᠡ᠂ ᠬᠣᠬᠢᠩᠬᠢ ᠴᠠᠢᠪᠤᠷ ᠥᠩᠭᠡ ᠲᠡᠢ ᠨᠢᠭᠤᠷ ᠴᠢᠷᠠᠢ᠂ ᠴᠠᠪᠴᠢᠯᠭᠠ ᠪᠠᠨ ᠠᠯᠳᠠᠭᠰᠠᠨ ᠬᠣᠬᠢᠮᠠᠢ ᠶ᠋ᠢᠨ ᠨᠢᠳᠦ᠂ ᠬᠠᠮᠬᠢᠬᠤ ᠲᠡᠩᠬᠡᠯ ᠢ᠋ᠶ᠋ᠡᠨ ᠪᠠᠷᠠᠭᠰᠠᠨ ᠨᠢᠮᠭᠡᠨ ᠤᠷᠤᠭᠤᠯ ᠡᠳᠡ ᠪᠦᠭᠦᠳᠡ ᠨᠢ ᠵᠢᠮᠡ ᠳ᠋ᠦ᠍ ᠡᠷᠲᠡ ᠤᠷᠢᠳᠤ ᠶ᠋ᠢᠨ ᠵᠡᠭᠦᠳᠦ᠂ ᠡᠷᠡ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠡᠯᠡᠰᠦᠨ ᠬᠣᠩᠬᠣᠷ ᠤ᠋ᠨ ᠢᠷᠣᠭᠠᠷ ᠲᠤ ᠬᠠᠳᠠᠨ ᠦᠬᠦᠵᠦ ᠪᠠᠢᠭᠠ ᠪᠠᠷ ᠦᠵᠡᠭᠰᠡᠨ ᠲᠡᠢ ᠨᠢ ᠶᠠᠭ ᠠᠳᠠᠯᠢ ᠪᠠᠢᠵᠠᠢ᠃《ᠡᠷᠡ ᠨᠥᠬᠥᠷ ᠮᠠᠨᠢ ᠠᠯᠢ ᠬᠡᠳᠦᠢᠨ ᠦ᠌ ᠦᠬᠦᠵᠦ ᠦᠷᠡᠭᠳᠡᠨ᠂ ᠲᠥᠷᠥᠯ ᠠᠷᠠᠯᠵᠢᠭᠰᠠᠨ ᠪᠣᠯᠪᠠᠴᠤ ᠡᠷᠭᠦᠯ ᠮᠥᠷᠭᠥᠯ ᠬᠢᠭᠰᠡᠨ ᠦ᠌ ᠮᠢᠨᠢ ᠠᠴᠢ ᠪᠠᠷ ᠡᠭᠡᠯ ᠬᠥᠮᠦᠨ ᠪᠣᠯᠵᠤ ᠲᠥᠷᠥᠭᠡᠳ ᠡᠢᠨ ᠬᠦ᠌ ᠮᠢᠨᠦ ᠭᠠᠷ ᠳᠡᠭᠡᠷᠡ ᠰᠡᠩᠬᠡᠷᠡᠬᠦ ᠬᠤᠪᠢ ᠢᠷᠦᠭᠡᠯ ᠪᠠᠢᠭᠰᠠᠨ ᠠ᠋ᠴᠠ ᠡᠨᠡ ᠪᠠᠢᠵᠢ》 ᠭᠡᠵᠦ ᠪᠣᠳᠣᠬᠤ ᠳ᠋ᠠᠭᠠᠨ ᠵᠢᠮᠡ ᠣᠷᠴᠢᠯᠠᠩ ᠬᠣᠷᠸᠠ ᠳ᠋ᠤ᠌ ᠵᠦᠢ ᠶᠣᠰᠣᠨ ᠤ᠋ ᠠᠮᠢᠳᠤᠷᠠᠯ ᠳ᠋ᠤ᠌ ᠣᠷᠣᠬᠤ ᠶ᠋ᠢ ᠡᠷᠡᠮᠡᠯᠵᠡᠬᠦ ᠳ᠋ᠦ᠍ ᠬᠦᠷᠦᠭᠰᠡᠨ ᠪᠠᠢᠯᠠ᠃
ᠣᠳᠣ ᠦᠵᠡᠪᠡᠯ ᠵᠢᠮᠡ ᠭᠠᠷ ᠨᠢᠭᠤᠷ ᠠᠷᠢᠭᠤᠨ ᠲᠤᠩᠭᠠᠯᠠᠭ᠂ ᠬᠤᠪᠴᠠᠰᠤ ᠬᠤᠨᠠᠷ ᠴᠡᠪᠡᠷ ᠲᠣᠬᠢᠯᠢᠭ ᠪᠥᠭᠡᠳ ᠪᠠᠯᠳᠠᠨᠴᠡᠷᠢᠩ ᠭᠡᠷ ᠡᠴᠡ ᠪᠡᠨ ᠱᠠᠭᠠᠢᠨ ᠬᠠᠷᠠᠬᠤ ᠲᠠᠢ ᠪᠠᠨ ᠵᠡᠷᠭᠡ《ᠦᠭᠡᠢ ᠡᠨᠡ ᠴᠢᠨᠢ ᠬᠡᠨ ᠪᠣᠢ? ᠥᠨᠥᠬᠢ ᠵᠢᠮᠡ ᠡᠮᠡᠭᠡᠨ ᠤᠤ?》 ᠭᠡᠵᠦ ᠳᠣᠲᠣᠷᠠ ᠪᠠᠨ ᠭᠠᠢᠬᠠᠭᠰᠠᠨ ᠢ᠋ᠶ᠋ᠠᠨ ᠤᠭᠲᠤᠨ ᠣᠴᠢᠵᠤ ᠠᠮᠤᠷ ᠡᠷᠢᠪᠡ᠃ ᠵᠢᠮᠡ ᠴᠦ᠍ ᠤᠷᠢᠳᠤ ᠶ᠋ᠢᠨ ᠢ᠋ᠶ᠋ᠡᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠪᠣᠱᠣᠭᠠᠨ ᠤ᠋ ᠥᠯᠥᠩ ᠳᠡᠭᠡᠷᠡ ᠡᠯᠢᠭᠡ ᠪᠡᠷ ᠢ᠋ᠶ᠋ᠡᠨ ᠤᠨᠠᠨ ᠮᠥᠷᠭᠥᠵᠦ ᠪᠤᠴᠠᠭᠰᠠᠨ ᠦᠭᠡᠢ ᠭᠡᠷ ᠲᠦ᠋ᠨᠢ ᠣᠷᠣᠪᠠ᠃
— ᠵᠠ ᠲᠡᠭᠡᠭᠡᠳ ᠡᠮᠡᠭᠡᠨ ᠦ᠌ ᠪᠡᠶᠡ ᠡᠷᠡᠭᠦᠯ ᠮᠡᠨᠳᠦ ᠰᠠᠢᠨ ᠪᠢᠵᠡ ᠳᠡ ᠭᠡᠵᠦ ᠴᠠᠢ ᠢᠳᠡᠭᠡ ᠪᠡᠷ ᠢ᠋ᠶ᠋ᠡᠨ ᠵᠣᠴᠢᠯᠠᠬᠤ ᠵᠠᠭᠤᠷᠠ ᠪᠠᠨ ᠳᠠᠬᠢᠨ ᠯᠠᠪᠯᠠᠬᠤ ᠳ᠋ᠤ᠌᠄
— ᠠ᠂ ᠰᠠᠢᠨ ᠬᠦᠦ ᠮᠢᠨᠢ᠂ ᠪᠤᠷᠬᠠᠨ ᠭᠤᠨᠴᠤᠭᠰᠦᠮᠠ ᠳ᠋ᠠᠭᠠᠨ ᠵᠠᠯᠪᠠᠷᠢᠬᠤ ᠶ᠋ᠢᠨ ᠬᠦᠴᠦ ᠪᠡᠷ ᠬᠦᠦ ᠪᠢᠳᠡ ᠬᠣᠶᠠᠷ ᠬᠣᠶᠠᠭᠤᠯᠠ ᠪᠠᠨ ᠭᠡᠵᠦ ᠬᠠᠷᠢᠭᠤᠯᠪᠠ᠃
— ᠠᠰᠢᠭᠦᠢ ᠳᠡ᠂ ᠪᠢ ᠪᠣᠳᠣᠪᠠᠯ ᠲᠠ ᠢᠷᠡᠭᠡᠳᠦᠢ ᠳ᠋ᠡᠭᠡᠨ ᠪᠦᠷ ᠠᠮᠤᠷ ᠵᠢᠷᠭᠠᠯ ᠢ᠋ ᠡᠳ᠋ᠯᠡᠨᠡ ᠪᠠᠢᠬᠠ᠃
— ᠠ ᠲᠡᠢᠮᠦ᠂ ᠪᠢ ᠴᠦ᠍ ᠪᠠᠰᠠ ᠢᠲᠡᠭᠡᠨᠡ᠃ ᠭᠡᠲᠡᠯᠡ ᠮᠠᠨ ᠤ᠋ ᠣᠷᠣᠨ ᠳ᠋ᠤ᠌ ᠭᠠᠮᠢᠩ ᠭᠡᠵᠦ ᠨᠢᠭᠡ ᠠᠢᠬᠤᠪᠲᠤᠷ ᠨᠢᠭᠦᠯ ᠲᠡᠢ ᠠᠮᠢᠲᠠᠨ ᠪᠣᠢ ᠪᠣᠯᠤᠭᠰᠠᠨ ᠪᠠᠢᠬᠤ ᠴᠢᠨᠢ ᠶᠠᠭᠤ ᠪᠣᠢ? ᠡᠳᠡ ᠨᠠᠷ ᠯᠠ ᠪᠢᠳᠡ ᠪᠦᠬᠦᠨ ᠳ᠋ᠦ᠍ ᠠᠮᠤᠷ ᠵᠠᠶᠠᠭᠠ ᠦᠵᠡᠭᠦᠯᠬᠦ ᠦᠭᠡᠢ ᠪᠠᠢᠵᠤ ᠮᠠᠭᠠᠳ ᠦᠭᠡᠢ ᠰᠢᠭ ᠪᠠᠢᠨᠠ ᠰᠢᠦ ᠳᠡ᠃
— ᠦᠭᠡᠢ᠂ ᠬᠦᠦ ᠮᠢᠨᠢ ᠲᠡᠭᠡᠵᠦ ᠪᠣᠯᠬᠤ ᠦᠭᠡᠢ ᠪᠠᠢᠨᠠ᠃ ᠥᠴᠥᠭᠡᠳᠦᠷ ᠬᠦᠷᠢᠶᠡ ᠬᠣᠷᠢᠶᠠ ᠪᠠᠷ ᠲᠡᠨᠦᠵᠦ ᠠᠢᠯ ᠣᠯᠠᠨ ᠤ᠋ ᠶᠠᠭᠤᠮᠠ ᠶ᠋ᠢ ᠪᠦᠯᠢᠶᠡᠨ ᠳᠡᠭᠡᠷᠡᠮᠳᠡᠵᠦ ᠰᠦᠢᠳ ᠬᠢᠯᠡ᠂ ᠠᠰᠢᠭᠦᠢ ᠲᠠᠨ ᠤ᠋ ᠡᠭᠦᠨ ᠢ᠋ᠶ᠋ᠡᠷ ᠶᠠᠪᠤᠭᠰᠠᠨ ᠦᠭᠡᠢ ᠤᠤ?
— ᠦᠭᠡᠢ᠂ ᠶᠠᠭᠤᠮᠠ ᠯᠠ ᠶᠠᠪᠤᠭᠰᠠᠨ ᠦᠭᠡᠢ᠃
— ᠮᠠᠨ ᠤ᠋ ᠬᠦᠦ ᠶᠠᠭ ᠲᠡᠷᠡ ᠦᠶᠡ ᠪᠡᠷ ᠨᠢ ᠵᠠᠬᠠ ᠠ᠋ᠴᠠ ᠬᠡᠳᠦᠨ ᠬᠣᠨᠢ ᠠᠪᠴᠤ ᠪᠤᠴᠠᠵᠤ ᠶᠠᠪᠤᠭᠠᠳ ᠲᠡᠷᠡ ᠭᠠᠢᠬᠠᠯ ᠤ᠋ᠳ ᠲᠠᠢ ᠴᠢᠨᠢ ᠳᠠᠭᠠᠷᠢᠯᠳᠤᠵᠤ ᠪᠦᠭᠦᠳᠡ ᠶ᠋ᠢ ᠠᠪᠤᠭᠤᠯᠴᠢᠬᠠᠭᠰᠠᠨ ᠪᠠᠢᠬᠤ ᠶᠤᠮ᠃
— ᠠ᠋᠂ ᠬᠠᠷᠠᠯᠠ᠂ ᠶᠠᠭᠠᠬᠢᠭᠰᠠᠨ ᠲᠣᠭᠠ ᠦᠭᠡᠢ ᠬᠡᠷᠡᠭ ᠪᠣᠢ?
ᠡᠨᠡ ᠦᠭᠡ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠴᠢᠬᠢᠨ ᠳ᠋ᠦ᠍ ᠲᠤᠩ ᠠᠶᠠ ᠦᠭᠡᠢ ᠰᠣᠨᠣᠰᠤᠭᠳᠠᠪᠠ᠃ ᠭᠡᠪᠡᠴᠦ ᠡᠪᠦᠭᠡᠨ ᠪᠠᠭᠰᠢ ᠨᠢ ᠵᠢᠮᠡ ᠡᠮᠡᠭᠡᠨ ᠢ᠋ ᠡᠭᠦᠷᠢᠳᠡ ᠬᠠᠷᠠᠨ ᠲᠡᠳᠬᠦᠵᠦ ᠶᠠᠪᠤ ᠭᠡᠵᠦ ᠵᠠᠬᠢᠭᠰᠠᠨ ᠦᠭᠡ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠬᠤ ᠠᠵᠢ᠃
— ᠵᠠ᠂ ᠵᠠ ᠳᠤᠭᠤᠯᠤᠯᠠ᠃ ᠪᠢ ᠲᠤᠰᠠᠯᠠᠶᠠ᠃ ᠴᠣᠬᠣᠮ ᠬᠡᠳᠦᠢ ᠬᠢᠷᠢ ᠲᠡᠢ ᠶᠠᠭᠤᠮᠠ ᠬᠡᠷᠡᠭᠲᠡᠢ ᠪᠣᠯ?
— ᠬᠠᠷᠢᠨ ᠳᠠ᠃ ᠪᠢ ᠴᠦ᠍ ᠡᠨᠡ ᠲᠠᠯᠠ ᠶ᠋ᠢᠨ ᠶᠠᠭᠤᠮᠠ ᠮᠡᠳᠡᠬᠦ ᠦᠭᠡᠢ ᠬᠥᠮᠦᠨ ᠰᠢᠦ ᠳᠡ ᠬᠦᠦ ᠮᠢᠨᠢ ᠵᠦᠭᠡᠷ ᠥᠪᠡᠷ ᠢ᠋ᠶ᠋ᠡᠨ ᠯᠡ ᠮᠡᠳᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ ᠄ ᠪᠠᠭᠠᠲᠤᠷ