ᠪᠠᠲᠤ ᠬᠠᠭᠠᠨ 1-15ᠰᠢᠳᠤᠷᠭᠤ ᠰᠢᠭᠦᠭᠴᠢ-Bat khaan Бат хаан-ᠷᠣᠮᠠᠨ
190ᠠᠷᠪᠠᠨ ᠲᠠᠪᠤ ᠰᠢᠳᠤᠷᠭᠤ ᠰᠢᠭᠦᠭᠴᠢ
ᠺᠢᠽ— ᠲᠦᠭ᠌ᠮᠡᠰ ᠬᠥᠭᠰᠢᠨ ᠡᠷᠡ ᠶ᠋ᠢᠨ ᠢ᠋ᠶ᠋ᠡᠨ ᠢᠷᠡᠬᠦ ᠶ᠋ᠢ ᠬᠦᠯᠢᠶᠡᠨ᠂ ᠭᠡᠷ ᠡᠴᠡ ᠣᠯᠠᠨᠲᠠ ᠭᠠᠷᠴᠤ ᠵᠠᠮ ᠤ᠋ᠨ ᠵᠦᠭ ᠬᠠᠷᠠᠵᠤ ᠪᠢᠯᠡ᠃ ᠲᠡᠭᠡᠭᠡᠳ ᠶᠠᠳᠠᠷᠠᠨ᠂ ᠭᠡᠷ ᠦ᠋ᠨ ᠡᠭᠦᠳᠡᠨ ᠳ᠋ᠡᠬᠢ ᠬᠡᠪᠢᠰ ᠦ᠋ᠨ ᠲᠠᠰᠤᠷᠬᠠᠢ ᠳᠡᠭᠡᠷᠡ᠂ ᠡᠪᠦᠳᠦᠭ ᠢ᠋ᠶ᠋ᠡᠨ ᠰᠠᠯᠠᠭᠠᠪᠴᠢᠯᠠᠨ ᠰᠠᠭᠤᠵᠤ᠂ ᠵᠢᠵᠢᠭ ᠶᠠᠭᠠᠨ ᠴᠠᠷᠴᠠᠬᠠᠢ ᠡᠷᠭᠢᠯᠳᠦᠨ ᠪᠦᠬᠦᠢ ᠪᠣᠢᠳᠠ ᠬᠥᠲᠥᠯ ᠤᠷᠤᠭᠤ ᠳᠠᠭᠤ ᠦᠭᠡᠢ ᠬᠠᠷᠠᠪᠠ᠃
《ᠪᠢ᠂ ᠰᠠᠢᠨ ᠶᠠᠭᠤᠮᠠᠨ ᠳ᠋ᠤ᠌ ᠣᠳᠤᠭᠰᠠᠨ ᠪᠢᠰᠢ᠂ ᠵᠣᠪᠠᠯᠠᠩ ᠭᠠᠮᠰᠢᠭ ᠤᠴᠠᠷᠠᠨ(ᠤᠴᠠᠷᠠᠨᠠ ) ᠭᠡᠵᠦ ᠳᠣᠲᠣᠷᠠ ᠪᠠᠨ ᠵᠥᠩᠨᠡᠵᠦ᠂ ᠲᠡᠷᠡ ᠬᠥᠭᠰᠢᠨ ᠪᠣᠯᠤᠭᠠᠳ ᠶᠠᠭᠠᠬᠢᠨ ᠲᠡᠢᠨ ᠳ᠋ᠦ᠍ ᠮᠣᠷᠳᠠᠵᠤ ᠴᠢᠳᠠᠨᠠ? ᠰᠢᠭᠤᠳᠠᠢ ᠳ᠋ᠵᠤᠭᠠᠷ ᠢ᠋ ᠠᠰᠬᠠᠯ ᠦᠭᠡᠢ᠂ ᠭᠡᠷ ᠲᠡᠭᠡᠨ ᠠᠪᠴᠢᠷᠠᠵᠤ ᠦᠯᠦ ᠴᠢᠳᠠᠬᠤ ᠪᠠᠶ᠋ᠢᠳᠠᠯ (ᠪᠠᠢᠲᠠᠯᠠ ) ᠪᠠᠨ ᠬᠥᠭᠰᠢᠨ ᠤᠬᠤᠨᠠ ᠮᠡᠲᠦ ᠵᠥᠷᠢᠭᠦᠳ᠂ ᠢᠰᠢᠭᠡ ᠰᠢᠭ ᠰᠠᠪᠠᠭᠠ ᠦᠭᠡᠢᠳᠡᠵᠦ ᠪᠠᠢᠨᠠ》ᠭᠡᠵᠦ ᠰᠡᠳᠬᠢᠵᠡᠢ᠃
ᠦᠳᠡᠰᠢ ᠪᠣᠯᠬᠤ ᠳ᠋ᠤ᠌ ᠬᠠᠢᠷᠠᠲᠤ ᠬᠥᠪᠡᠭᠦᠨ ᠮᠦᠰᠦᠢ᠍ᠺ ᠢᠷᠡᠵᠦ ᠮᠣᠷᠢ ᠪᠠᠨ ᠴᠢᠳᠦᠷᠯᠡᠨ ᠲᠠᠯᠪᠢᠭᠠᠳ ᠤᠷᠠᠭᠳᠠᠭᠰᠠᠨ ᠳᠡᠪᠡᠯ ᠴᠠᠮᠴᠠ ᠪᠠᠨ ᠲᠠᠢᠯᠵᠤ᠂ ᠡᠬᠡ ᠶ᠋ᠢᠨ ᠡᠪᠦᠷ ᠳᠡᠭᠡᠷᠡ ᠬᠠᠶᠠᠨ᠂
— ᠨᠠᠳᠠᠳᠤ ᠡᠨᠡ ᠬᠢᠷᠢ ᠡᠬᠡᠨᠡᠷ ᠦᠭᠡᠢ᠂ ᠬᠡᠨ ᠮᠢᠨᠦ ᠬᠤᠪᠴᠠᠰᠤ ᠶ᠋ᠢ ᠣᠶᠣᠨᠠ? ᠮᠦᠰᠦᠢ᠍ᠺ ᠭᠠᠵᠠᠷ ᠬᠡᠪᠲᠡᠨ᠂ ᠨᠥᠬᠥᠭᠡᠰᠦ ᠶ᠋ᠢ ᠡᠪᠲᠡᠢᠬᠡᠨ ᠲᠠᠯᠪᠢᠵᠤ ᠪᠠᠢᠭᠠ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠭᠠᠷ ᠢ᠋ ᠬᠠᠷᠠᠵᠤ ᠤᠳᠠᠲᠠᠯᠠ ᠳᠠᠭᠤ ᠦᠭᠡᠢ ᠪᠠᠢᠭᠠᠳ᠂
— ᠶᠦᠯᠳᠦ᠋ᠽ ᠬᠠᠮᠢᠭᠠᠰᠢ ᠪᠠᠨ ᠣᠴᠢᠭᠰᠠᠨ ᠪᠣᠢ? ᠭᠡᠪᠡᠯ ᠡᠬᠡ ᠨᠢ᠄《ᠬᠠᠮᠢᠭᠠᠰᠢ ᠪᠠᠨ ᠣᠴᠢᠳᠠᠭ ᠶᠤᠮ! ᠬᠡᠭᠡᠷᠡ ᠮᠠᠯ ᠬᠠᠷᠢᠭᠤᠯᠤᠭᠠᠳ ᠡᠷᠭᠢᠵᠦ ᠢᠷᠡᠭᠡ ᠦᠭᠡᠢ ᠪᠠᠢᠨᠠ ᠭᠡᠪᠡ᠃
ᠶᠥᠯᠳᠥ᠋ᠽ ᠡᠷᠭᠦᠮᠡᠯ ᠪᠢᠯᠡ᠃ ᠺᠢᠽ— ᠳᠦᠭᠮᠡᠰ ᠬᠡᠳᠦᠢᠪᠡᠷ《ᠥᠬᠢᠨ ᠦᠭᠡᠢ ᠪᠠᠢᠲᠤᠭᠠᠢ》ᠭᠡᠳᠡᠭ ᠪᠣᠯᠪᠠᠴᠤ ᠥᠬᠢᠨ ᠲᠡᠢ ᠪᠣᠯᠬᠤ ᠶ᠋ᠢ ᠬᠦᠰᠡᠭᠰᠡᠨ ᠦ᠌ ᠬᠠᠷᠠᠭᠠ ᠪᠠᠷ ᠦᠷᠡᠴᠢᠯᠡᠵᠡᠢ᠃ ᠲᠡᠷᠡ ᠥᠬᠢᠨ ᠡᠷᠡ ᠳ᠋ᠦ᠍ ᠭᠠᠷᠤᠨ᠂ ᠥᠭᠡᠷᠡ ᠭᠡᠷ ᠲᠦ᠍ ᠰᠠᠭᠤᠵᠤ ᠪᠠᠢᠪᠠᠴᠤ᠂ ᠬᠡᠵᠢᠶᠡᠳᠡ ᠡᠬᠡ ᠶ᠋ᠢᠨ ᠳᠡᠷᠭᠡᠳᠡ ᠬᠥᠳᠡᠯᠵᠦ ᠡᠬᠡ ᠳ᠋ᠦ᠍ ᠬᠥᠪᠡᠭᠦᠳ ᠡᠴᠡ ᠢᠯᠡᠭᠦᠦ ᠠᠰᠠᠷᠠᠮᠵᠢᠲᠠᠢ ᠪᠠᠢᠳᠠᠭ ᠪᠠᠢᠵᠠᠢ᠃
《ᠶᠥᠯᠳᠥ᠋ᠽ ᠢ᠋ ᠤᠳᠠᠯ ᠦᠭᠡᠢ ᠨᠢᠭᠡ ᠦᠨᠢᠶᠡ᠂ ᠨᠢᠭᠡ ᠮᠣᠷᠢ᠂ ᠨᠢᠭᠡ ᠲᠡᠮᠡᠭᠡ ᠪᠠᠭᠠ ᠦᠭᠡᠢ ᠰᠦᠢ ᠪᠡᠷ ᠮᠣᠷᠳᠠᠭᠤᠯᠬᠤ ᠪᠣᠯᠤᠨᠠ᠃ ᠶᠦᠯᠳᠥ᠋ᠽ ᠬᠥᠭᠵᠢᠯᠲᠡᠢ ᠢᠨᠢᠶᠡᠮᠰᠦᠭᠯᠡᠳᠡᠭ᠂ ᠭᠢᠯᠲᠠᠭᠠᠨᠠᠭᠰᠠᠨ ᠪᠠᠷᠠᠭᠠᠨ ᠨᠢᠳᠦᠲᠡᠢ ᠰᠠᠢᠬᠠᠨ ᠥᠬᠢᠨ᠂ ᠬᠤᠪᠴᠠᠰᠤ ᠮᠠᠭᠤᠲᠠᠢ᠂ ᠭᠡᠪᠡᠴᠦ ᠭᠠᠢᠭᠤᠢ᠃ ᠭᠢᠯᠲᠠᠭᠠᠨᠠᠭᠰᠠᠨ ᠬᠠᠷᠠ ᠦᠰᠦ ᠪᠡᠨ ᠬᠡᠵᠢᠶᠡᠳᠡ ᠠᠷᠪᠠᠨ ᠵᠢᠷᠭᠤᠭᠠᠨ ᠰᠠᠯᠠᠭᠠ ᠪᠠᠷ ᠬᠢᠴᠢᠶᠡᠩᠭᠦᠢ ᠰᠦᠯᠵᠢᠵᠦ᠂ ᠰᠢᠯ ᠦ᠋ᠨ ᠰᠤᠪᠤᠳ ᠢ᠋ᠶ᠋ᠠᠷ ᠳᠠᠷᠤᠭᠤᠯᠤᠭᠰᠠᠨ ᠪᠠᠢᠳᠠᠭ᠃ ᠬᠠᠷᠠᠵᠤ ᠮᠥᠷᠥᠭᠡᠳᠦᠭᠰᠡᠨ ᠵᠢᠬᠢᠲ ᠣᠯᠠᠨ》 ᠭᠡᠵᠡᠢ᠃
ᠮᠥᠰᠥ᠋ᠺ᠂ ᠶᠥᠯᠳᠥ᠋ᠽ ᠲᠦ᠍ ᠳᠤᠷᠠᠲᠠᠢ ᠶ᠋ᠢ ᠡᠬᠡ ᠨᠢ ᠮᠡᠳᠡᠳᠡᠭ ᠪᠠᠢᠵᠠᠢ᠃ ᠭᠠᠭᠴᠠᠬᠠᠨ ᠶᠠᠳᠠᠭᠤ ᠬᠥᠮᠦᠨ᠂ ᠥᠨᠥᠴᠢᠨ ᠵᠦᠳᠡᠭᠦᠦ ᠥᠬᠢᠨ ᠲᠡᠢ ᠭᠡᠷᠯᠡᠪᠡᠯ ᠬᠥᠭᠰᠢᠳ ᠲᠦ᠍ ᠶᠠᠮᠠᠷ ᠠᠰᠢᠭ ᠪᠣᠯᠬᠤ ᠪᠢᠯᠡ?
ᠭᠡᠷᠯᠡᠬᠦ ᠪᠡᠨ ᠠᠵᠠᠨᠠᠭᠠᠳ᠂ ᠬᠠᠷᠢᠨ ᠶᠥᠯᠳᠥ᠋ᠽ ᠢ᠋ ᠬᠥᠳᠡᠭᠡᠨ ᠦ᠌ ᠪᠠᠶᠠᠨ ᠪᠤᠶᠤ ᠨᠢᠭᠡᠨ ᠲᠦᠰᠢᠮᠡᠯ ᠳ᠋ᠦ᠍ ᠥᠭᠪᠡᠯ ᠳᠡᠭᠡᠷᠡ ᠪᠢᠰᠢ ᠤᠤ? ᠬᠠᠷᠢᠨ ᠺᠢᠽ— ᠲᠦᠭᠮᠡᠰ ᠡᠭᠦᠨ ᠦ᠌ ᠲᠤᠬᠠᠢ ᠦᠭᠡ ᠶᠡᠷᠦ ᠬᠡᠯᠡᠭᠡ ᠦᠭᠡᠢ᠂《ᠮᠥᠰᠥ᠋ᠺ ᠪᠣᠯ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠠᠳᠠᠯᠢ ᠵᠥᠷᠢᠭᠦᠳ᠂ ᠥᠪᠡᠷ ᠦ᠋ᠨ ᠳᠤᠷᠠ ᠪᠠᠷ ᠦᠢᠯᠡᠳᠳᠡᠭ᠂ ᠲᠡᠭᠡᠪᠡᠯ ᠪᠢᠳᠡ ᠦᠷᠭᠦᠯᠵᠢ ᠬᠣᠭᠣᠰᠣᠨ ᠶᠠᠳᠠᠭᠤ ᠶᠠᠪᠤᠨᠠ! 》ᠭᠡᠵᠦ ᠰᠡᠳᠬᠢᠵᠦ ᠰᠡᠭᠦᠷᠡᠰᠦ ᠠᠯᠳᠠᠵᠠᠢ᠃
ᠭᠡᠷ ᠦ᠋ᠨ ᠪᠣᠱᠣᠭᠠᠨ ᠳ᠋ᠤ᠌ ᠬᠡᠪᠲᠡᠭᠰᠡᠨ ᠨᠣᠬᠠᠢ᠂ ᠲᠣᠯᠣᠭᠠᠢ ᠪᠠᠨ ᠥᠨᠳᠡᠢᠵᠦ ᠠᠷᠬᠢᠷᠠᠵᠤ᠂ ᠴᠢᠩᠭᠠ ᠬᠤᠴᠠᠭᠰᠠᠭᠠᠷ ᠲᠠᠯᠠ ᠤᠷᠤᠭᠤ ᠭᠦᠶᠦᠪᠡ᠃ ᠬᠠᠵᠠᠭᠤ ᠨᠢᠭᠡ ᠨᠡᠭᠦᠳᠡᠯᠴᠢᠨ ᠬᠥᠮᠦᠨ᠂ ᠭᠠᠷ ᠢ᠋ᠶ᠋ᠠᠷ ᠬᠠᠵᠠᠭᠤ ᠲᠠᠰᠢ ᠪᠠᠨ ᠵᠢᠭᠠᠨ ᠬᠠᠰᠬᠢᠷᠴᠤ ᠵᠣᠭᠰᠣᠯ ᠦᠭᠡᠢ ᠴᠠᠰᠢ ᠥᠩᠭᠡᠷᠡᠨ ᠣᠳᠪᠠ᠃
ᠶᠦᠯᠳᠦ᠋ᠽ ᠢᠷᠡᠪᠡ ᠭᠡᠵᠦ ᠡᠬᠡ ᠨᠢ ᠬᠡᠯᠡᠪᠡ᠃
ᠬᠥᠲᠥᠯ ᠳᠡᠭᠡᠷᠡ ᠬᠤᠷᠠᠭᠠ ᠨᠤᠭᠤᠳ ᠦᠵᠡᠭᠳᠡᠨ᠂ ᠲᠣᠭᠣᠰᠣ ᠪᠤᠵᠢᠭᠢᠨᠠᠭᠤᠯᠵᠤ ᠵᠠᠮ ᠢ᠋ᠶ᠋ᠠᠷ ᠴᠤᠪᠤᠷᠠᠪᠠ᠃ ᠲᠡᠳᠡᠨ ᠦ᠌ ᠳᠤᠮᠳᠠ᠂ ᠨᠠᠷᠢᠬᠠᠨ ᠪᠡᠶᠡ ᠲᠡᠢ ᠨᠢᠭᠡᠨ ᠪᠦᠰᠡᠭᠦᠢ ᠬᠣᠴᠣᠷᠤᠭᠰᠠᠨ ᠬᠤᠷᠠᠭᠠ ᠶ᠋ᠢ ᠢᠰᠬᠡᠷᠦᠨ ᠲᠠᠭᠤᠬᠤ ᠳ᠋ᠤ᠌ ᠠᠢᠯ ᠤ᠋ᠨ ᠡᠬᠡᠨᠡᠷ ᠦ᠋ᠳ᠂ ᠳᠠᠭᠤ ᠪᠠᠷ ᠨᠢ ᠭᠠᠷᠴᠤ ᠬᠤᠷᠠᠭᠠᠨ ᠤ᠋ ᠵᠦᠭ ᠭᠦᠶᠦᠪᠡ᠃ ᠶᠦᠯᠳᠦ᠋ᠽ᠂ ᠲᠡᠪᠡᠷᠢᠵᠦ ᠢᠷᠡᠭᠰᠡᠨ ᠳᠣᠭᠣᠯᠠᠩ ᠬᠤᠷᠠᠭᠠ ᠶ᠋ᠢ ᠥᠭᠭᠦᠭᠡᠳ ᠭᠦᠶᠦᠵᠦ ᠬᠠᠷᠢᠬᠤ ᠳ᠋ᠠᠭᠠᠨ ᠮᠦᠰᠦ᠋ᠺ ᠥᠭᠡᠳᠡ ᠳᠣᠬᠢᠵᠤ᠂ ᠲᠦᠷᠭᠡᠨ ᠭᠡᠷ ᠲᠡᠭᠡᠨ ᠣᠷᠣᠭᠠᠳ ᠰᠠᠨᠳᠤᠷᠤᠨ ᠰᠢᠪᠡᠨᠡᠵᠦ᠂
— ᠮᠢᠨᠦ ᠳᠡᠷᠭᠡᠳᠡᠭᠦᠷ᠂ ᠨᠢᠭᠡᠨ ᠬᠥᠮᠦᠨ ᠥᠩᠭᠡᠷᠡᠬᠦ ᠳ᠋ᠡᠭᠡᠨ ᠮᠠᠨ ᠤ᠋ ᠭᠡᠭᠦᠦ ᠲᠠᠯᠠ ᠶ᠋ᠢᠨ ᠵᠠᠮ ᠤ᠋ᠨ ᠣᠢᠷᠠᠯᠴᠠᠭᠠ ᠡᠪᠡᠰᠦ ᠬᠠᠵᠠᠵᠤ᠂ ᠡᠮᠡᠭᠡᠯ ᠨᠢ ᠬᠠᠵᠠᠭᠤ ᠤᠷᠤᠭᠤ ᠪᠠᠨ ᠬᠥᠭᠯᠡᠷᠡᠵᠡᠢ ᠭᠡᠵᠦ ᠬᠡᠯᠡᠯᠡ᠃ ᠠᠪᠤ ᠳ᠋ᠤ᠌ ᠵᠣᠪᠠᠯᠠᠩ ᠤᠴᠠᠷᠠᠭᠰᠠᠨ ᠠᠵᠢ! ᠪᠢ᠂ ᠡᠵᠢ ᠳ᠋ᠦ᠍ ᠬᠡᠯᠡᠬᠦ ᠡᠴᠡ ᠠᠶᠤᠵᠤ ᠪᠠᠢᠨᠠ ᠭᠡᠵᠡᠢ᠃
ᠮᠦᠰᠦ᠋ᠺ ᠭᠡᠷ ᠡᠴᠡ ᠰᠡᠮᠬᠡᠨ ᠭᠠᠷᠴᠤ᠂ ᠡᠬᠡ ᠶ᠋ᠢᠨ ᠠᠷᠤ ᠪᠠᠷ ᠮᠡᠳᠡᠭᠳᠡᠯ ᠦᠭᠡᠢ ᠭᠠᠷᠴᠤ᠂ ᠮᠣᠷᠢᠨ ᠳ᠋ᠠᠭᠠᠨ ᠬᠦᠷᠬᠦ ᠶ᠋ᠢ ᠵᠠᠪᠳᠤᠭᠰᠠᠨ ᠢ᠋ᠶ᠋ᠠᠨ ᠭᠡᠨᠡᠳᠲᠡ ᠵᠣᠭᠰᠣᠵᠠᠢ᠃ ᠬᠡᠭᠡᠷᠡ ᠤᠬᠢᠯᠠᠵᠤ ᠪᠠᠢᠭᠠ ᠰᠢᠩᠭᠡᠨ ᠳᠠᠭᠤ ᠰᠣᠨᠣᠰᠤᠭᠳᠠᠯᠠ᠃
《ᠳᠣᠷᠭᠠᠩ ᠪᠠᠢᠨᠠ!》
ᠬᠥᠪᠡᠭᠦᠨ᠂ ᠬᠥᠲᠥᠯ ᠳᠡᠭᠡᠷᠡ ᠭᠠᠷᠴᠤ ᠪᠦᠳᠦᠷᠢᠨ ᠭᠦᠶᠦᠵᠦ᠂ ᠬᠥᠯ ᠨᠢ ᠬᠥᠰᠢᠯᠳᠦᠨ ᠤᠨᠠᠵᠤ ᠪᠣᠰᠤᠭᠰᠠᠭᠠᠷ ᠴᠠᠰᠢ ᠶᠠᠪᠤᠵᠤ ᠳᠣᠷᠭᠠᠩ ᠢ᠋ ᠲᠣᠰᠣᠨ ᠲᠡᠪᠡᠷᠢᠵᠦ ᠠᠪᠬᠤ ᠳ᠋ᠤ᠌ ᠲᠡᠷᠡ᠂
— ᠠᠢ ᠠᠢ ᠭᠡᠵᠦ ᠤᠬᠢᠯᠠᠯᠠ᠃
ᠲᠡᠷᠡ ᠬᠥᠪᠡᠭᠦᠨ᠂ ᠦᠭᠡ ᠥᠭᠦᠯᠡᠵᠦ ᠴᠢᠳᠠᠬᠤ ᠦᠭᠡᠢ᠂ ᠡᠷᠡᠦ ᠨᠢ ᠴᠡᠴᠡᠷᠡᠨ᠂ ᠲᠣᠭᠣᠰᠣ ᠳᠠᠷᠤᠭᠰᠠᠨ ᠭ᠌ᠬᠢᠷᠲᠡᠢ ᠨᠢᠭᠤᠷ ᠳᠡᠭᠡᠷᠡ ᠨᠢ ᠨᠢᠯᠪᠤᠰᠤ ᠤᠷᠤᠰᠴᠠᠢ᠃
— ᠶᠠᠭᠤ ᠪᠣᠯᠪᠠ? ᠭᠡᠬᠦ ᠳ᠋ᠦ᠍
— ᠲᠡᠭᠦᠨ ᠢ᠋ ᠳᠡᠭᠦᠵᠢᠯᠡᠵᠦ ᠪᠠᠢᠨᠠ······ ᠭᠡᠪᠡ᠃
— ᠬᠡᠨ ᠢ᠋ ᠭᠡᠪᠡᠯ
— ᠡᠴᠢᠭᠡ ᠶ᠋ᠢ!
ᠮᠦᠰᠦ᠋ᠺ᠂ ᠳᠡᠭᠦᠦ ᠪᠡᠨ ᠭᠡᠷ ᠲᠦ᠍ ᠣᠷᠣᠭᠤᠯᠵᠤ᠂ ᠤᠰᠤ ᠤᠳᠬᠤᠭᠠᠳ ᠥᠭᠬᠦ ᠳ᠋ᠦ᠍ ᠰᠢᠲᠦ ᠨᠢ ᠮᠣᠳᠣᠨ ᠠᠶᠠᠭᠠᠨ ᠤ᠋ ᠠᠮᠠᠰᠠᠷ ᠢ᠋ ᠴᠣᠬᠢᠨ ᠳᠠᠭᠵᠢᠵᠤ ᠪᠠᠢᠪᠠ᠃
— ᠬᠣᠲᠠ ᠶ᠋ᠢᠨ ᠣᠢᠷᠠᠯᠴᠠᠭᠠ······ ᠠᠪᠤ ᠵᠠᠬᠠ ᠵᠡᠭᠡᠯᠢ ᠳ᠋ᠦ᠍ ᠣᠴᠢᠬᠤ ᠪᠠᠷ ᠶᠠᠪᠤᠭᠰᠠᠨ᠂ ᠵᠢᠬᠢᠲ ᠨᠠᠷ ᠪᠠᠷᠢᠵᠤ ᠣᠯᠣᠰᠣ ᠪᠠᠷ ᠬᠦᠯᠢᠨ ᠠᠪᠴᠤ ᠣᠳᠤᠯᠠ᠃ ᠪᠢ ᠠᠪᠤ ᠶ᠋ᠢᠨ ᠳᠡᠷᠭᠡᠳᠡ ᠣᠴᠢᠬᠤ ᠭᠡᠲᠡᠯᠡ ᠨᠠᠮᠠᠶ᠋ᠢ ᠤᠨᠠᠲᠠᠯᠠ ᠲᠦᠯᠬᠢᠯᠡ ᠭᠡᠬᠦ ᠳ᠋ᠦ᠍᠂
— ᠴᠠᠰᠢ ᠥᠭᠦᠯᠡ! ᠭᠡᠲᠡᠯᠡ
— ᠲᠡᠳᠡ ᠠᠪᠤ ᠶ᠋ᠢ ᠳᠡᠭᠡᠷᠡᠮᠴᠢᠨ ᠭᠡᠵᠦ ᠬᠠᠰᠬᠢᠷᠤᠯᠳᠤᠯᠠ᠃ ᠠᠪᠤ ᠳᠡᠭᠡᠷᠡᠮ ᠬᠢᠭᠡ ᠦᠭᠡᠢ᠂ ᠬᠠᠷᠢᠨ ᠠᠪᠤ ᠶ᠋ᠢ ᠬᠥᠮᠦᠨ ᠢᠮᠠᠭᠲᠠ ᠳᠡᠭᠡᠷᠡᠮᠳᠡᠳᠡᠭ······
— ᠬᠠᠮᠢᠭᠠ ᠲᠡᠭᠡᠪᠡ?
— ᠥᠨᠳᠥᠷ ᠤᠯᠢᠶᠠᠰᠤ ᠲᠠᠢ ᠶᠡᠬᠡ ᠬᠠᠭᠠᠯᠭᠠᠨ ᠤ᠋ ᠲᠡᠨᠳᠡ ᠭᠡᠵᠡᠢ᠃
ᠮᠦᠰᠦ᠋ᠺ ᠬᠠᠭᠤᠴᠢᠨ ᠬᠠᠷᠠᠪᠲᠤᠷ ᠬᠤᠢ ᠲᠠᠢ ᠲᠠᠬᠢᠷ ᠰᠡᠯᠡᠮᠡ ᠪᠡᠨ ᠬᠠᠨᠠ ᠠ᠋ᠴᠠ ᠰᠢᠭᠦᠷᠡᠨ ᠠᠪᠴᠤ᠂ ᠴᠠᠮᠴᠠ ᠦᠭᠡᠢ ᠨᠢᠴᠦᠭᠦᠨ ᠬᠡᠪ ᠢ᠋ᠶ᠋ᠡᠷ ᠮᠣᠷᠢ ᠤᠷᠤᠭᠤ ᠭᠦᠶᠦᠨ ᠣᠴᠢᠮᠠᠭᠴᠠ᠂ ᠴᠢᠳᠥᠷ ᠢ᠋ ᠠᠪᠴᠤ ᠬᠠᠶᠠᠭᠠᠳ ᠮᠣᠷᠳᠠᠪᠠ᠃
— ᠶᠦᠯᠳᠦ᠋ᠽ᠂ ᠳᠤᠷᠭᠠᠩ ᠲᠠ ᠬᠣᠶᠠᠷ ᠲᠠᠯᠠ ᠤᠷᠤᠭᠤ ᠭᠦᠶᠦ᠂ ᠭᠡᠭᠦᠦ ᠪᠡᠨ ᠡᠷᠢᠭᠲᠦᠨ᠂ ᠪᠢ ᠠᠪᠤ ᠶ᠋ᠢ ᠠᠪᠤᠷᠠᠬᠤ ᠪᠠᠷ ᠳᠠᠪᠬᠢᠰᠤᠭᠠᠢ ᠭᠡᠪᠡ᠃
ᠰᠢᠭ᠌ᠨᠠᠺ ᠬᠣᠲᠠ ᠶ᠋ᠢᠨ ᠬᠠᠭᠠᠯᠭᠠᠨ ᠤ᠋ ᠳᠡᠷᠭᠡᠳᠡᠬᠢ ᠬᠥᠭᠰᠢᠨ ᠥᠨᠳᠥᠷ ᠬᠠᠢᠯᠠᠰᠤᠨ ᠤ᠋ ᠳᠡᠷᠭᠡᠳᠡ ᠣᠯᠠᠨ ᠬᠥᠮᠦᠨ ᠴᠤᠭᠯᠠᠷᠠᠵᠠᠢ᠃
ᠪᠦᠳᠦᠭᠦᠨ ᠮᠥᠴᠢᠷ ᠡᠴᠡ ᠬᠡᠳᠦ ᠬᠡᠳᠦᠨ ᠬᠥᠮᠦᠨ ᠢ᠋ ᠳᠡᠭᠦᠵᠢᠯᠡᠭᠰᠡᠨ ᠦ᠌ ᠨᠢᠴᠦᠭᠦᠨ ᠬᠥᠯ ᠨᠢ ᠲᠠᠲᠠᠯᠳᠤᠨ ᠠᠲᠤᠷᠢᠵᠤ ᠨᠢᠭᠤᠷ ᠨᠢ ᠠᠶᠤᠮᠰᠢᠭᠲᠠᠢ ᠶᠠᠷᠪᠠᠢᠬᠰᠠᠨ ᠦᠵᠡᠭᠳᠡᠪᠡ ᠃ ᠬᠣᠶᠠᠷ ᠬᠠᠷᠠᠭᠤᠯᠴᠢᠨ᠂ ᠮᠣᠳᠣᠨ ᠥᠭᠡᠳᠡ ᠱᠠᠲᠤ ᠪᠣᠰᠬᠠᠨ᠂ ᠪᠤᠰᠤᠳ ᠬᠥᠮᠦᠰ ᠦ᠋ᠨ ᠬᠦᠵᠦᠭᠦᠨ ᠳ᠋ᠦ᠍ ᠤᠷᠠᠬᠠ ᠬᠢᠵᠦ ᠪᠠᠢᠯᠠ᠃ ᠭᠠᠷ ᠢ᠋ ᠨᠢ ᠠᠷᠤ ᠳ᠋ᠤᠨᠢ ᠬᠦᠯᠢᠭᠰᠡᠨ ᠨᠣᠣᠷᠠᠬᠠᠢ ᠬᠣᠪᠴᠠᠰᠤᠲᠠᠢ ᠬᠡᠳᠦᠨ ᠺᠢᠫᠴᠡᠺ ᠬᠥᠮᠦᠨ᠂ ᠴᠢᠷᠠᠢ ᠨᠢ ᠵᠠᠪᠬᠠᠢᠷᠠᠵᠤ(ᠵᠢᠪᠡᠬᠡᠢᠷᠡᠵᠦ ) ᠴᠡᠴᠡᠷᠡᠨ᠂ ᠮᠣᠳᠣᠨ ᠤ᠋ ᠢᠷᠣᠭᠠᠷ ᠲᠸ᠋ ᠶᠠᠪᠠᠭᠠᠨ ᠰᠠᠭᠤᠵᠠᠢ᠃
ᠬᠥᠭᠰᠢᠨ ᠴᠠᠭᠠᠨ ᠮᠣᠷᠢ ᠤᠨᠤᠭᠰᠠᠨ᠂ ᠶᠡᠬᠡᠮᠰᠦᠭ ᠳᠦᠷᠢᠲᠡᠢ ᠲᠦᠰᠢᠮᠡᠯ ᠥᠨᠳᠥᠷ ᠳᠡᠭᠡᠷᠡ ᠡᠴᠡ ᠵᠠᠷᠯᠢᠭ ᠤ᠋ᠨ ᠪᠢᠴᠢᠭ ᠢ᠋ ᠴᠢᠩᠭᠠ ᠪᠠᠷ ᠤᠩᠰᠢᠯᠠ᠃
— ᠮᠣᠵᠢ ᠶ᠋ᠢᠨ ᠵᠠᠬᠢᠷᠤᠯ ᠲᠤᠰᠢᠶᠠᠵᠤ ᠪᠠᠢᠨᠠ᠂ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠠᠩᠬᠠᠷᠤᠨ ᠰᠣᠨᠣᠰᠤᠭᠲᠤᠨ!
—《ᠳᠡᠢᠯᠦᠭᠳᠡᠰᠢ ᠦᠭᠡᠢ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠢᠷᠡᠭᠰᠡᠨ ᠲᠤᠬᠠᠢ ᠳ᠋ᠤ᠌ ᠵᠠᠷᠯᠠᠭᠰᠠᠨ ᠠᠯᠪᠠᠨ ᠲᠠᠲᠠᠪᠤᠷᠢ ᠶ᠋ᠢ ᠲᠥᠯᠥᠬᠦ ᠡᠴᠡ ᠵᠠᠢᠯᠠᠰᠬᠢᠨ᠂ ᠪᠠᠰᠠ ᠵᠣᠷᠢᠭᠲᠤ ᠴᠡᠷᠢᠭ ᠦ᠋ᠳ ᠦ᠋ᠨ ᠬᠣᠭᠣᠯᠠ ᠬᠦᠨᠡᠰᠦᠨ ᠳ᠋ᠦ᠍ ᠬᠡᠷᠡᠭᠯᠡᠬᠦ ᠲᠠᠷᠢᠶᠠ᠂ ᠭᠤᠯᠢᠷ ᠢ᠋ ᠳᠠᠷᠤᠭᠳᠠᠭᠤᠯᠤᠭᠰᠠᠨ ᠤ᠋ ᠲᠤᠯᠠ ᠰᠢᠭ᠌ᠨᠠᠺ ᠬᠣᠲᠠ ᠶ᠋ᠢᠨ ᠵᠠᠯᠢᠬᠠᠢ ᠮᠠᠢᠮᠠᠢᠴᠢᠨ ᠢ᠋ ᠴᠠᠭᠠᠵᠠ ᠪᠠᠷ ᠠᠪᠠᠴᠢᠰᠤᠭᠠᠢ᠁》 ᠭᠡᠵᠡᠢ᠃
ᠱᠤᠤᠭᠢᠶᠠᠨ ᠴᠢᠮᠡᠭᠡᠨ ᠡᠴᠡ ᠪᠣᠯᠵᠤ ᠲᠦᠰᠢᠮᠡᠯ ᠵᠣᠭᠰᠣᠵᠤ᠂ ᠵᠢᠷᠤᠮ ᠢ᠋ ᠲᠡᠷᠰᠯᠡᠭᠴᠢᠳ ᠦ᠋ᠨ ᠵᠦᠭ ᠰᠦᠷᠲᠡᠢ ᠬᠠᠷᠠᠪᠠ᠃ ᠭᠤᠷᠪᠠᠨ ᠮᠣᠷᠢᠲᠠᠢ ᠬᠥᠮᠦᠨ᠂ ᠳᠣᠬᠢᠶᠠᠯᠳᠤᠭᠴᠢᠳ ᠢ᠋ ᠲᠠᠰᠢᠭᠤᠷ ᠢ᠋ᠶ᠋ᠠᠷ ᠰᠢᠪᠬᠠᠷᠳᠠᠨ ᠣᠯᠠᠨ ᠤ᠋ ᠳᠤᠮᠳᠠᠭᠤᠷ ᠵᠢᠳᠬᠦᠵᠦ ᠨᠡᠪᠲᠡᠷᠡᠪᠡ᠃ᠲᠦᠷᠦᠭᠦᠨ ᠳ᠋ᠦ᠍ᠨᠢ ᠵᠠᠷᠢᠮᠳᠠᠭ ᠨᠢᠴᠦᠭᠦᠨ ᠵᠠᠯᠠᠭᠤ ᠵᠢᠭᠢᠲ ᠲᠠᠬᠢᠷ ᠰᠡᠯᠡᠮᠡ ᠳᠠᠯᠠᠢᠵᠤ᠂ ᠵᠣᠷᠢᠮᠠᠭ ᠢ᠋ᠶ᠋ᠠᠷ ᠬᠠᠰᠬᠢᠷᠤᠨ ᠪᠠᠢᠯᠠ᠃
ᠲᠦᠰᠢᠮᠡᠯ ᠵᠢᠭᠢᠲ ᠢ᠋ ᠬᠠᠷᠠᠭᠠᠳ᠂ ᠳᠠᠷᠤᠢ ᠮᠣᠷᠢᠨ ᠠ᠋ᠴᠠ ᠪᠠᠭᠤᠵᠠᠢ᠃
ᠣᠯᠠᠨ ᠤ᠋ ᠳᠤᠮᠳᠠ ᠠ᠋ᠴᠠ᠄《ᠡᠷᠭᠢᠭᠦᠦ ᠠᠮᠢᠲᠠᠨ! ᠶᠠᠭᠤ ᠬᠢᠵᠦ ᠪᠠᠢᠨᠠ? ᠴᠢ ᠮᠣᠵᠢ ᠶ᠋ᠢᠨ ᠵᠠᠬᠢᠷᠤᠯ ᠤ᠋ᠨ ᠲᠤᠰᠢᠶᠠᠯ ᠢ᠋ ᠡᠰᠡᠷᠭᠦᠴᠡᠵᠦ ᠪᠠᠢᠨᠠ ᠤᠤ? ᠭᠡᠬᠦ ᠳ᠋ᠦ᠍ ᠵᠢᠬᠢᠲ᠂
—ᠲᠠᠨ ᠤ᠋ ᠲᠤᠰᠢᠶᠠᠯ ᠢ᠋ ᠨᠣᠬᠠᠢ ᠳᠣᠯᠢᠶᠠᠭ! ᠵᠡᠭᠡᠯᠢ ᠶ᠋ᠢᠨ ᠬᠤᠯᠠᠭᠠᠢᠴᠢᠨ ᠤ᠋ ᠣᠷᠣᠨ ᠳ᠋ᠤ᠌ ᠪᠡᠶᠡᠨᠳᠧᠷ ᠬᠠᠭᠠᠨ ᠤ᠋ ᠵᠣᠷᠢᠭᠲᠤ ᠴᠡᠷᠢᠭ ᠦ᠋ᠳ ᠢ᠋ ᠳᠡᠭᠦᠵᠢᠯᠡᠵᠦ ᠪᠠᠢᠨᠠ! ᠣᠳᠣ ᠲᠡᠷᠡ ᠥᠪᠡᠷ ᠢ᠋ᠶ᠋ᠡᠨ ᠵᠢᠬᠢᠲ ᠨᠠᠷ ᠢ᠋ ᠳᠠᠭᠠᠭᠤᠯᠤᠨ ᠳᠠᠬᠢᠵᠤ ᠢᠷᠡᠭᠡᠳ ᠲᠠ ᠴᠥᠮ ᠢ᠋ ᠰᠦᠷᠡᠯ ᠮᠡᠲᠦ ᠴᠠᠪᠴᠢᠨᠠ ᠭᠡᠵᠦ ᠵᠠᠩᠳᠤᠷᠴᠠᠢ᠃
ᠵᠢᠬᠢᠲ᠂ ᠴᠥᠬᠥᠷᠡᠯᠲᠡ ᠦᠭᠡᠢ ᠨᠣᠴᠣᠯᠳᠤᠬᠤ ᠨᠢᠭᠡᠨ ᠡᠪᠦᠭᠡᠨ ᠢ᠋ ᠣᠯᠣᠰᠣ ᠪᠠᠨ ᠲᠠᠲᠠᠵᠤ ᠮᠣᠳᠣᠨ ᠤ᠋ ᠪᠦᠳᠦᠭᠦᠨ ᠮᠥᠴᠢᠷ ᠳᠡᠭᠡᠷᠡ ᠰᠠᠭᠤᠭᠠ ᠮᠠᠨᠠᠭᠠᠴᠢᠳ ᠤ᠋ᠨ ᠤᠷᠤᠭᠤ ᠣᠴᠢᠮᠠᠭᠴᠠ᠂ ᠰᠡᠯᠡᠮᠡ ᠪᠡᠷ ᠣᠯᠣᠰᠣ ᠶ᠋ᠢ ᠵᠢᠰᠢᠭᠦᠦ ᠴᠠᠪᠴᠢᠬᠤ ᠳ᠋ᠤ᠌ ᠬᠣᠶᠠᠷ ᠵᠠᠨᠳᠠᠯᠴᠢᠨ ᠮᠣᠳᠣᠨ ᠳᠡᠭᠡᠷᠡ ᠡᠴᠡ ᠤᠨᠠᠵᠠᠢ᠃
—ᠡᠪᠦᠭᠡᠨ ᠦ᠌ ᠭᠠᠷ ᠢ᠋ ᠲᠠᠢᠯᠤᠭᠲᠤᠨ! ᠡᠰᠡ ᠲᠡᠭᠡᠪᠡᠯ ᠪᠢ ᠲᠠᠨᠠᠷ ᠤ᠋ᠨ ᠲᠣᠯᠣᠭᠠᠢ ᠶ᠋ᠢ ᠠᠪᠤᠨᠠ! ᠭᠡᠯᠡ᠃ ᠬᠠᠷᠠᠭᠴᠢᠳ᠂ ᠬᠡᠪᠲᠡᠭᠡ ᠡᠪᠦᠭᠡᠨ ᠦ᠌ ᠬᠦᠯᠢᠭᠡ ᠶ᠋ᠢ ᠲᠠᠢᠯᠬᠤ ᠳ᠋ᠤ᠌ ᠡᠯᠪᠡᠯᠴᠡᠵᠦ ᠡᠷᠭᠦᠨ ᠪᠤᠰᠬᠠᠵᠠᠢ᠃
ᠵᠢᠬᠢᠲ᠂ ᠮᠣᠷᠢᠨ ᠠ᠋ᠴᠠ ᠪᠠᠭᠤᠨ ᠬᠠᠷᠠᠢᠵᠤ᠂
— ᠠᠪᠤ ᠨᠠᠽᠠᠷ— ᠺᠢᠶᠡᠷᠢᠽᠧᠺ ᠠᠮᠤᠷ ᠪᠠᠢᠨᠠ ᠤᠤ? ᠪᠤᠰᠢᠭᠤ ᠮᠢᠨᠦ ᠮᠣᠷᠢ ᠶ᠋ᠢ ᠤᠨᠤᠭᠲᠤᠨ! ᠠᠯᠠᠯᠾ ᠲᠩᠷᠢ ᠶ᠋ᠢᠨ ᠴᠡᠴᠡᠷᠯᠢᠭ ᠲᠦ᠍ ᠴᠡᠩᠭᠡᠬᠦ ᠪᠡᠷ ᠬᠡᠲᠦᠷᠬᠡᠢ ᠡᠷᠲᠡ ᠨᠠᠮᠠᠶ᠋ᠢ ᠣᠷᠬᠢᠨ ᠣᠳᠬᠤ ᠭᠡᠪᠡ ᠭᠡᠵᠦ ᠥᠭᠦᠯᠡᠵᠦ ᠮᠣᠷᠢ ᠠ᠋ᠴᠠ ᠪᠠᠨ ᠦᠰᠦᠷᠦᠨ ᠪᠠᠭᠤᠪᠠ᠃
— ᠬᠥᠪᠡᠭᠦᠨ ᠮᠥᠰᠥ᠋ᠺ ᠵᠠᠪᠳᠤᠵᠤ ᠢᠷᠡᠪᠡ᠃ ᠡᠨᠡ ᠬᠣᠨᠢᠨ ᠲᠣᠯᠣᠭᠠᠢ ᠨᠤᠭᠤᠳ ᠨᠥᠭᠡᠴᠡ ᠪᠡᠨ ᠳᠠᠯᠳᠠᠯᠠᠭᠰᠠᠨ ᠬᠡᠳᠦᠨ ᠪᠠᠶᠠᠨ ᠬᠤᠳᠠᠯᠳᠤᠭᠠᠴᠢᠨ ᠢ᠋ ᠳᠡᠭᠦᠵᠢᠯᠡᠬᠦ ᠶᠣᠰᠣᠲᠠᠢ ᠪᠢᠯᠡ᠃ ᠭᠡᠲᠡᠯᠡ ᠰᠢᠭᠦᠭᠴᠢ ᠨᠠᠷ ᠬᠤᠳᠠᠯᠳᠤᠭᠠᠴᠢᠳ ᠠ᠋ᠴᠠ ᠬᠠᠬᠤᠤᠯᠢ ᠢᠳᠡᠭᠡᠳ᠂ ᠣᠳᠣ ᠵᠠᠮ ᠳ᠋ᠤ᠌ ᠲᠣᠬᠢᠶᠠᠯᠳᠤᠭᠰᠠᠨ ᠶᠠᠳᠠᠭᠤᠴᠤᠳ ᠢ᠋ ᠪᠠᠷᠢᠨ ᠠᠪᠴᠤ ᠬᠤᠳᠠᠯᠳᠤᠭᠠᠴᠢᠳ ᠤ᠋ᠨ ᠣᠷᠣᠨ ᠳ᠋ᠤ᠌ ᠳᠡᠭᠦᠵᠢᠯᠡᠭᠦᠯᠪᠡ᠃ ᠨᠠᠮᠠᠶ᠋ᠢ ᠪᠠᠰᠠ ᠳᠡᠭᠦᠵᠢᠯᠡᠬᠦ ᠭᠡᠯᠡ! ᠪᠤᠵᠠᠷ ᠴᠢᠨᠣᠠ ᠨᠤᠭᠤᠳ ᠪᠠᠢᠵᠠᠭᠠᠷᠠᠢ! ᠨᠠᠳᠠᠳᠤ ᠲᠠᠪᠤᠨ ᠬᠥᠪᠡᠭᠦᠨ ᠵᠢᠬᠢᠲ ( ᠲᠡᠢ)᠂ ᠵᠦᠭᠡᠷ ᠪᠠᠢᠭᠠ ᠪᠢᠰᠢ ᠰᠢᠦ! ᠪᠡᠶᠡᠨᠳᠧᠷ ᠬᠠᠭᠠᠨ ᠳ᠋ᠤ᠌ ᠪᠠᠷᠠᠭᠠᠯᠬᠠᠰᠤᠭᠠᠢ! ᠲᠠᠨᠠᠷ ᠤ᠋ᠨ ᠲᠣᠯᠣᠭᠠᠢ ᠶ᠋ᠢ ᠲᠡᠷᠡ ᠬᠤᠭᠤ ᠮᠤᠰᠬᠢᠨᠡ᠁ ᠭᠡᠪᠡ᠃
ᠣᠯᠠᠨ ᠬᠥᠮᠦᠨ ᠱᠤᠤᠭᠢᠯᠳᠤᠨ᠂ ᠣᠢᠷᠠᠬᠢ ᠠᠮᠢᠲᠠᠨ ᠴᠤᠭᠯᠠᠷᠠᠵᠤ᠂ ᠱᠤᠤᠭᠢᠶᠠᠨ ᠤᠯᠠᠮ ᠶᠡᠬᠡ ᠪᠣᠯᠬᠤ ᠳ᠋ᠤ᠌ ᠲᠦᠰᠢᠮᠡᠯ ᠬᠣᠷᠮᠣᠢ ᠪᠠᠨ ᠰᠢᠭᠤᠨ ᠭᠦᠶᠦᠵᠡᠢ᠃ ᠬᠣᠢᠨᠠ ᠠ᠋ᠴᠠ ᠨᠢ ᠮᠠᠨᠠᠭᠠᠴᠢ ᠨᠠᠷ ᠲᠠᠭᠠᠨ ᠬᠠᠷᠠᠢᠬᠤ ᠳ᠋ᠤ᠌᠂ ᠬᠥᠮᠦᠰ ᠵᠠᠨᠳᠠᠯᠴᠢᠨ ᠤ᠋ ᠬᠣᠢᠨᠠ ᠠ᠋ᠴᠠ ᠪᠥᠭᠡᠮ ᠰᠢᠪᠠᠷ ᠢ᠋ᠶ᠋ᠠᠷ ᠰᠢᠳᠡᠯᠡᠵᠡᠢ᠃
ᠮᠦᠰᠦ᠋ᠺ᠂ ᠡᠴᠢᠭᠡ ᠪᠡᠨ ᠳᠥᠰᠢᠨ ᠮᠣᠷᠳᠠᠭᠤᠯᠤᠭᠠᠳ᠂
— ᠪᠢ ᠲᠠᠨᠢᠯ ᠬᠣᠶᠠᠷ ᠮᠠᠯᠴᠢᠨ ᠲᠠᠢ ᠠᠭᠤᠯᠵᠠᠵᠤ᠂ ᠲᠤᠰᠠᠯᠠᠯᠴᠠᠬᠤ ᠶ᠋ᠢ ᠭᠤᠶᠤᠪᠠ᠃ ᠵᠠᠪᠰᠢᠶᠠᠨ ᠳ᠋ᠤ᠌ ᠪᠢᠳᠡ ᠬᠣᠵᠢᠮᠳᠠᠭᠰᠠᠨ ᠦᠭᠡᠢ ᠭᠡᠪᠡᠯ᠂
— ᠵᠣᠯ ᠢ᠋ᠶ᠋ᠠᠷ ᠮᠢᠨᠦ ᠬᠦᠵᠦᠭᠦᠦ ᠪᠡᠬᠢ ᠪᠠᠢᠯᠠ! ᠡᠪᠦᠭᠡᠨ ᠨᠠᠽᠠᠷ— ᠺᠢᠶᠠᠷᠢᠽᠸᠺ ᠪᠦᠬᠦᠯᠢ ᠮᠢᠬᠠ ᠮᠡᠲᠦ ᠣᠩᠰᠣᠢᠨ᠂ ᠪᠦᠬᠦ ᠵᠡᠭᠡᠯᠢ ᠪᠡᠷ ᠰᠢᠪᠰᠢᠭ ᠪᠣᠯᠬᠤ ᠠᠮᠢᠲᠠᠨ ᠪᠢᠰᠢ᠂ ᠣᠳᠣ ᠲᠡᠢᠨ ᠳ᠋ᠦ᠍ ᠮᠣᠷᠳᠠᠵᠤ ᠳᠠᠭᠤᠷᠢᠰᠤᠯᠲᠤ ᠪᠠᠭᠠᠲᠤᠷ ᠪᠣᠯᠤᠨ ᠰᠦᠷᠦᠭ ᠠᠳᠤᠭᠤ ᠲᠠᠭᠤᠵᠤ ᠢᠷᠡᠨᠡ!᠁ ᠭᠡᠵᠡᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠠᠷᠢᠭᠤᠨ᠂ ᠡᠷᠳᠡᠨᠢᠭᠣᠸᠠ᠂ ᠠᠯᠲᠠᠨᠴᠢᠮᠡᠭ᠂ ᠪᠠᠯ᠂ ᠪᠠᠶᠠᠨᠴᠡᠴᠡᠭ
ᠬᠢᠨᠠᠭᠴᠢ᠄ ᠪᠠᠶᠠᠨᠴᠡᠴᠡᠭ᠂ ᠠᠯᠲᠠᠨᠴᠢᠮᠡᠭ᠂ ᠠᠷᠢᠭᠤᠨ