ᠪᠠᠲᠤ ᠬᠠᠭᠠᠨ 1-12ᠴᠠᠭᠠᠨ ᠮᠣᠷᠢ Bat khaanБат хаан
247ᠠᠷᠪᠠᠨ ᠬᠣᠶᠠᠷ ᠴᠠᠭᠠᠨ ᠮᠣᠷᠢ
᠁ ᠬᠥᠩᠭᠡᠨ ᠲᠡᠮᠡᠦᠯᠬᠦ ᠮᠣᠷᠢ ᠨᠢ
ᠬᠥᠮᠦᠨ ᠦ᠌ ᠪᠣᠳᠣᠯ ᠠ᠋ᠴᠠ ᠳᠡᠯᠢᠮ ᠬᠤᠷᠳᠤᠨ᠂
ᠬᠤᠢ ᠰᠠᠯᠬᠢᠨ ᠠ᠋ᠴᠠ ᠠᠯᠲᠠ ᠬᠤᠷᠳᠤᠨ᠃
(ᠵᠠᠩᠭᠠᠷ)
ᠨᠣᠭᠣᠭᠠᠨ ᠲᠠᠯᠠ ᠳ᠋ᠤ᠌ ᠬᠡᠳᠦᠨ ᠮᠢᠩᠭᠠᠨ ᠠᠭᠲᠠ ᠰᠤᠯᠠ ᠪᠡᠯᠴᠢᠭᠡᠷᠯᠡᠨ᠂ ᠡᠮᠬᠢ ᠦᠭᠡᠢ ᠬᠤᠳᠬᠤᠯᠳᠤᠨ ᠦᠵᠡᠭᠳᠡᠯᠡ᠃ ᠭᠡᠲᠡᠯᠡ ᠲᠡᠭᠰᠢ ᠲᠠᠯᠠᠪᠠᠢ ᠪᠠᠷ ᠠᠯᠭᠤᠷ ᠬᠥᠳᠡᠯᠬᠦ ᠠᠳᠤᠭᠤ ᠶ᠋ᠢ ᠰᠦᠷᠦᠭ ᠰᠦᠷᠦᠭ ᠢ᠋ᠶ᠋ᠡᠷ ᠬᠤᠪᠢᠶᠠᠷᠢᠯᠠᠵᠤ᠂ ᠬᠣᠭᠣᠷᠣᠨᠳᠣ ᠨᠢ ᠨᠡᠢᠯᠡᠭᠦᠯᠬᠦ ᠦᠭᠡᠢ ᠶ᠋ᠢᠨ ᠲᠤᠯᠠ ᠠᠳᠤᠭᠤᠴᠢᠨ ᠨᠤᠭᠤᠳ ᠰᠡᠷᠭᠦᠯᠡᠩ ᠢ᠋ᠶ᠋ᠡᠷ ᠬᠠᠷᠠᠭᠠᠯᠵᠠᠨ ᠪᠠᠢᠯᠠ᠃ ᠰᠦᠷᠦᠭ ᠪᠦᠷᠢ ᠳ᠋ᠦ᠍ ᠬᠥᠭᠰᠢᠨ ᠭᠡᠭᠦᠦ ᠠᠷᠪᠠᠨ ᠲᠠᠪᠤ᠂ ᠬᠣᠷᠢᠭᠠᠳ ᠬᠦᠷᠡᠩ ᠪᠤᠶᠤ ᠵᠡᠭᠡᠷᠳᠡ ᠡᠰᠡᠬᠦᠯᠡ ᠬᠠᠯᠢᠭᠤᠨ᠂ ᠡᠰᠡᠬᠦᠯᠡ ᠬᠡᠭᠡᠷ ᠵᠡᠷᠭᠡ ᠶ᠋ᠢᠨ ᠨᠢᠭᠡᠨ ᠵᠢᠰᠦᠮ ᠦ᠋ᠨ ᠵᠠᠯᠠᠭᠤ ᠮᠣᠷᠢᠳ ᠪᠣᠢ᠃ ᠮᠠᠭᠤ ᠠᠭᠠᠰᠢᠲᠠᠢ ᠬᠥᠭᠰᠢᠨ ᠠᠵᠢᠷᠭᠠ ᠰᠦᠷᠦᠭ ᠢ᠋ᠶ᠋ᠡᠨ ᠬᠠᠮᠠᠭᠠᠯᠠᠨ ᠬᠣᠯᠠᠳᠠᠯ ᠦᠭᠡᠢ ᠶᠠᠪᠤᠳᠠᠭ ᠠᠵᠢ᠃
ᠪᠥᠭᠲᠥᠷᠭᠡᠲᠡᠢ ᠲᠤᠷᠠᠩᠬᠠᠢ ᠮᠣᠷᠢ ᠤᠨᠤᠭᠰᠠᠨ ᠠᠳᠤᠭᠤᠴᠢᠨ᠂ ᠰᠦᠷᠦᠭ ᠦ᠋ᠳ ᠦ᠋ᠨ ᠬᠣᠭᠣᠷᠣᠨᠳᠣᠭᠤᠷ ᠭᠤᠤᠭᠯᠠᠨ ᠳᠠᠪᠬᠢᠵᠤ᠂ ᠵᠢᠭᠤᠷᠠᠯᠳᠤᠨ ᠨᠣᠴᠣᠯᠳᠤᠬᠤ ᠠᠵᠢᠷᠭᠠ ᠨᠤᠭᠤᠳ( ᠢ᠋) ᠤᠷᠭᠠ ᠪᠠᠷ ᠰᠢᠯᠪᠢᠭᠦᠷᠳᠡᠨ ᠬᠢᠯᠪᠠᠷᠬᠠᠨ ᠰᠠᠯᠭᠠᠵᠤ ᠪᠠᠢᠯᠠ᠃
ᠠᠳᠤᠭᠤᠴᠢᠳ ᠤ᠋ᠨ ᠳᠣᠲᠣᠷᠠ ᠨᠠᠽᠠᠷ— ᠺᠢᠶᠠᠷᠢᠽᠧᠺ ᠦ᠋ᠨ ᠲᠠᠪᠤᠨ ᠬᠦᠦ ᠪᠣᠢ᠃ ᠤᠤᠭᠠᠨ ᠳ᠋ᠧᠮᠢᠷ ᠭᠤᠴᠢᠨ ᠨᠠᠰᠤᠲᠠᠢ᠂ ᠣᠳᠬᠣᠨ ᠮᠥᠰᠥ᠋ᠺ ᠠᠷᠪᠠᠨ ᠳᠣᠯᠣᠭᠠ ᠲᠠᠢ᠂ ᠲᠡᠳᠡ ᠠᠬᠠ ᠳᠡᠭᠦᠦ ᠨᠠᠷ ᠰᠢᠢᠳᠮᠡᠭᠡᠢ ᠤᠷᠭᠠᠴᠢᠨ᠂ ᠴᠢᠨᠣᠠ ᠶ᠋ᠢᠨ ᠠᠪᠠ ᠳ᠋ᠤ᠌ ᠭᠠᠭᠴᠠᠬᠠᠨ ᠲᠠᠰᠢᠭᠤᠷ ᠲᠠᠢ ᠪᠠᠷ ᠳᠠᠭᠠᠷᠢᠳᠠᠭ ᠠᠶᠤᠮᠰᠢᠭ ᠦᠭᠡᠢ ᠠᠩᠴᠢᠨ ᠭᠡᠵᠦ ᠠᠯᠳᠠᠷᠰᠢᠪᠠ᠃ ᠡᠪᠦᠯ ᠵᠤᠨ᠂ ᠡᠳᠦᠷ ᠰᠥᠨᠢ᠂ ᠴᠠᠰᠤ ᠪᠣᠷᠣᠭᠠᠨ ᠳ᠋ᠤ᠌ ᠪᠠᠶᠠᠨᠳ᠋ᠸᠷ ᠬᠠᠭᠠᠨ ᠤ᠋ ᠠᠳᠤᠭᠤ ᠶ᠋ᠢ ᠲᠣᠭᠣᠷᠢᠨ ᠶᠠᠪᠤᠵᠤ ᠬᠤᠯᠠᠭᠠᠢ ᠠᠷᠢᠶᠠᠲᠠᠨ ᠠ᠋ᠴᠠ ᠮᠠᠨᠠᠨ ᠬᠠᠮᠠᠭᠠᠯᠠᠳᠠᠭ ᠪᠠᠢᠵᠠᠢ᠃ ᠪᠠᠶᠠᠨᠳ᠋ᠸᠷ ᠦᠨᠡᠨᠴᠢ ᠮᠠᠨᠠᠭᠠᠴᠢ ᠳ᠋ᠠᠭᠠᠨ ᠬᠥᠯᠥᠰᠥ ᠱᠠᠩ ᠲᠡᠳᠦᠢ ᠯᠡ ᠥᠭᠬᠦ ᠦᠭᠡᠢ᠂ ᠭᠠᠭᠴᠠᠬᠠᠨ ᠬᠠᠭᠠᠨ ᠬᠥᠮᠦᠨ ᠦ᠌ ᠶᠣᠰᠣᠭᠠᠷ ᠬᠡᠰᠢᠭ ᠬᠦᠷᠲᠡᠭᠡᠨᠡ ᠭᠡᠵᠦ ᠠᠮᠠᠯᠠᠳᠠᠭ ᠪᠠᠢᠵᠠᠢ᠃ ᠭᠡᠲᠡᠯᠡ ᠠᠳᠤᠭᠤᠴᠢᠨ ᠨᠠᠷ ᠨᠢ ᠪᠡᠶᠡ ᠳ᠋ᠡᠭᠡᠨ ᠭᠠᠵᠠᠷ ᠮᠡᠲᠦ ᠭᠠᠩᠳᠠᠭᠰᠠᠨ ᠥᠭᠢᠷᠡ ᠨᠣᠣᠷᠠᠩᠬᠠᠢ ᠬᠤᠪᠴᠠᠰᠤ ᠲᠠᠢ᠂ ᠬᠥᠯ ᠳ᠋ᠡᠭᠡᠨ ᠵᠤᠷᠠᠮᠠ ᠶ᠋ᠢᠨ ᠡᠯᠳᠡᠭᠡ ᠦᠭᠡᠢ ᠠᠷᠠᠰᠤ ᠪᠠᠷ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠣᠶᠣᠭᠰᠠᠨ ᠪᠣᠢᠲᠣᠭ ᠲᠠᠢ᠂ ᠮᠠᠯᠠᠭᠠᠢ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠥᠪᠡᠷᠰᠡᠳ ᠦ᠋ᠨ ᠬᠢᠨᠢ ᠲᠠᠬᠢᠷᠠᠭᠰᠠᠨ ᠦᠰᠦ ᠨᠢ ᠪᠠᠢᠬᠤ ᠠᠵᠢ᠃ ᠲᠡᠳᠡ ᠨᠠᠷᠠᠨ ᠳ᠋ᠤ᠌ ᠲᠦᠯᠡᠭᠳᠡᠨ ᠬᠠᠷᠠᠯᠠᠵᠤ᠂ ᠠᠳᠤᠭᠤ ᠰᠠᠬᠢᠭᠰᠠᠭᠠᠷ ᠲᠣᠮᠣ ᠨᠣᠬᠠᠳ ᠮᠡᠲᠦ ᠬᠡᠭᠡᠷᠡ ᠲᠠᠯᠠ ᠳ᠋ᠤ᠌ ᠲᠡᠰᠴᠦ ᠡᠯᠡᠰᠦ ᠮᠠᠩᠬᠠ᠂ ᠳᠠᠷᠠᠰᠤᠲᠠᠢ ᠲᠠᠯᠠᠪᠠᠢ᠂ ᠡᠭᠦᠯᠡᠨ ᠦ᠌ ᠣᠷᠴᠢᠮ ᠨᠡᠭᠦᠬᠦ ᠰᠠᠯᠬᠢᠨ ᠤ᠋ ᠨᠢᠭᠡᠨ ᠬᠡᠰᠡᠭ ᠮᠡᠲᠦ ᠪᠣᠯᠵᠠᠢ᠃
ᠠᠷᠠᠫᠱᠠ ᠲᠠᠢᠪᠤᠩ ᠪᠡᠯᠴᠢᠭᠡᠷᠯᠡᠬᠦ ᠡᠨᠡ ᠠᠳᠤᠭᠤᠨ ᠤ᠋ ᠳᠣᠲᠣᠷᠠ ᠠᠺᠴᠢᠶᠠᠨ ᠭᠡᠵᠦ ᠥᠪᠡᠷ ᠦ᠋ᠨ ᠦᠵᠡᠰᠭᠦᠯᠡᠩᠲᠡᠢ ᠴᠠᠭᠠᠨ ᠠᠵᠢᠷᠭᠠ ᠪᠠᠨ ᠲᠠᠨᠢᠪᠠ᠃ ᠲᠡᠷᠡ ᠨᠢ ᠰᠦᠷᠦᠭ ᠦ᠋ᠳ ᠦ᠋ᠨ ᠳᠤᠮᠳᠠᠭᠤᠷ ᠨᠣᠮᠣᠬᠠᠷᠠᠭᠠ ᠦᠭᠡᠢ ᠠᠷᠢᠶᠠᠲᠠᠨ ᠰᠢᠭ᠋ ᠲᠠᠩᠬᠠᠢ ᠲᠣᠩᠭᠣᠴᠢᠨ ᠪᠤᠰᠤᠳ ᠠᠵᠢᠷᠭᠠ ᠲᠠᠢ ᠵᠣᠷᠢᠮᠠᠭ ᠢ᠋ᠶ᠋ᠠᠷ ᠬᠡᠮᠡᠯᠢᠯᠴᠡᠨ ᠪᠠᠢᠬᠤ ᠠᠵᠢ᠃ ᠠᠺᠴᠢᠶᠠᠨ ᠰᠦᠷᠡᠬᠡᠢ ᠴᠢᠷᠠᠯᠠᠨ ᠨᠢᠭᠡᠨ ᠵᠡᠭᠡᠷᠳᠡ ᠠᠵᠢᠷᠭᠠᠨ ᠤ᠋ ᠬᠦᠵᠦᠭᠦᠨ ᠡᠴᠡ ᠬᠠᠵᠠᠵᠤ ᠭᠠᠵᠠᠷ ᠰᠢᠳᠡᠮᠡᠭᠴᠡ ᠬᠠᠩᠭᠢᠨᠠᠨ ᠢᠨᠴᠠᠭᠠᠵᠤ ᠴᠠᠰᠢ ᠪᠠᠨ ᠲᠠᠯᠠ ᠤᠷᠤᠭᠤ ᠳᠠᠪᠬᠢᠨ ᠳᠡᠭᠳᠡᠬᠦ ᠳ᠋ᠦ᠍ ᠰᠠᠯᠬᠢ ᠳᠡᠯ ᠢ᠋ ᠨᠢ ᠬᠡᠢᠰᠬᠡᠪᠡ᠃ ᠠᠷᠠᠫᠱᠠ ᠢᠰᠬᠡᠷᠪᠡ᠂ ᠠᠺᠴᠢᠶᠠᠨ ᠵᠣᠭ ᠲᠣᠰᠴᠤ ᠴᠢᠬᠢ ᠪᠡᠨ ᠰᠣᠷᠲᠣᠯᠵᠠᠭᠤᠯᠪᠠ᠃
ᠬᠠᠷᠢᠭᠤ ᠢᠨᠴᠠᠭᠠᠬᠤ ᠨᠢ ᠰᠣᠨᠣᠰᠳᠠᠵᠤ ᠠᠺᠴᠢᠶᠠᠨ ᠬᠦᠵᠦᠭᠦᠦ ᠪᠡᠨ ᠪᠥᠬᠥᠢᠨ ᠨᠠᠷᠢᠨ ᠬᠥᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠥᠩᠭᠡᠨ ᠭᠢᠰᠬᠢᠯᠡᠵᠦ ᠡᠵᠡᠨ ᠦ᠌ ᠡᠮᠦᠨᠡ ᠡᠴᠡ ᠴᠣᠭᠭᠢᠭᠰᠠᠭᠠᠷ ᠠᠢᠰᠤᠢ᠃ ᠭᠡᠲᠡᠯᠡ ᠬᠡᠳᠦᠢᠨ ᠳᠠᠭᠠᠭᠰᠠᠨ ᠬᠣᠶᠠᠷ ᠠᠳᠤᠭᠤᠴᠢ ᠬᠥᠨᠳᠡᠯᠢᠳᠦᠨ ᠳᠠᠪᠬᠢᠵᠤ ᠪᠤᠭᠤᠢᠯᠢ ᠶ᠋ᠢ ᠵᠠᠳᠠᠯᠬᠤ ᠳ᠋ᠤ᠌ ᠠᠷᠠᠫᠱᠠ ᠮᠣᠷᠢᠨ ᠤ᠋ ᠵᠦᠭ ᠬᠠᠮᠤᠭ ᠴᠢᠳᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠭᠦᠶᠦᠪᠡᠴᠦ ᠬᠣᠵᠢᠮᠳᠠᠵᠤ᠂ ᠬᠦᠯᠦᠭ ᠦ᠋ᠨ ᠬᠦᠵᠦᠭᠦᠨ ᠳ᠋ᠦ᠍ ᠬᠣᠶᠠᠷ ᠪᠤᠭᠤᠢᠯᠢ ᠳᠠᠪᠬᠤᠷᠯᠠᠨ ᠣᠷᠣᠬᠤ ᠳ᠋ᠤ᠌ ᠠᠺᠴᠢᠶᠠᠨ ᠰᠤᠯᠠᠷᠠᠬᠤ ᠶ᠋ᠢ ᠴᠢᠷᠮᠠᠢᠨ ᠬᠠᠵᠠᠭᠤ ᠳᠠᠰᠢ ᠵᠢᠳᠬᠦᠵᠦ ᠵᠣᠭᠰᠣᠪᠠ᠃ ᠠᠷᠠᠫᠱᠠ᠄
— ᠪᠤᠯᠢᠭᠲᠤᠨ! ᠡᠨᠡ ᠮᠢᠨᠦ ᠮᠣᠷᠢ᠂ ᠮᠢᠨᠦ ᠡᠮᠡᠭᠡᠯ ᠲᠠᠢ ᠪᠠᠢᠨᠠ ᠭᠡᠵᠦ ᠬᠠᠰᠬᠢᠷᠬᠤ ᠳ᠋ᠤ᠌ ᠠᠳᠤᠭᠤᠴᠢᠳ᠄
— ᠬᠡᠭᠡᠷᠡ ᠶ᠋ᠢᠨ ᠲᠡᠨᠦᠭᠦᠯ᠂ ᠮᠣᠷᠢᠨ ᠤ᠋ ᠬᠤᠯᠠᠭᠠᠢᠴᠢ ᠮᠡᠨᠳᠦ ᠳᠡᠭᠡᠷᠡ ᠪᠡᠨ ᠡᠨᠳᠡ ᠡᠴᠡ ᠵᠠᠢᠯᠠ ᠭᠡᠵᠦ ᠬᠠᠰᠬᠢᠷᠬᠤ ᠳ᠋ᠤ᠌᠂ ᠨᠢᠭᠡ ᠨᠢ ᠮᠣᠷᠢᠨ ᠠ᠋ᠴᠠ ᠪᠠᠨ ᠦᠰᠦᠷᠦᠨ ᠪᠠᠭᠤᠵᠤ ᠠᠺᠴᠢᠶᠠᠨ ᠤ᠋ ᠴᠤᠯᠪᠤᠭᠤᠷ ᠠ᠋ᠴᠠ ᠵᠢᠭᠤᠷᠠᠨ
— ᠡᠨᠡ ᠪᠣᠯ ᠪᠠᠶᠠᠨᠳ᠋ᠸᠷ ᠬᠠᠭᠠᠨ ᠤ᠋ ᠭᠠᠵᠢᠭ ᠠᠯᠳᠠᠭᠤᠯ ᠮᠣᠷᠢ᠂ ᠬᠠᠭᠠᠨ ᠤ᠋ ᠣᠯᠵᠠ ᠪᠣᠯᠤᠨᠠ ᠭᠡᠬᠦ ᠳ᠋ᠦ᠍ ᠠᠷᠠᠫᠱᠠ ᠰᠡᠯᠡᠮᠡ ᠰᠤᠭᠤᠯᠤᠨ ᠮᠠᠰᠢ ᠠᠶᠤᠮᠰᠢᠭᠲᠠᠢ ᠬᠠᠰᠬᠢᠷᠤᠭᠰᠠᠨ ᠳ᠋ᠤ᠌ ᠠᠳᠤᠭᠤᠴᠢᠨ ᠭᠡᠳᠡᠷᠭᠦ ᠤᠬᠤᠷᠢᠪᠠ᠃
— ᠪᠠᠶᠠᠨᠳ᠋ᠸᠷ ᠤ᠋ᠨ ᠥᠴᠦᠬᠡᠨ ᠪᠣᠭᠣᠯᠴᠤᠳ ᠰᠣᠨᠣᠰ᠂ ᠲᠠ ᠨᠠᠷ ᠬᠠᠭᠠᠨ ᠤ᠋ ᠠᠳᠤᠭᠤᠴᠢᠨ ᠠᠲᠠᠯᠠ ᠪᠤᠰᠤᠳ ᠤ᠋ᠨ ᠮᠣᠷᠢ ᠶ᠋ᠢ ᠬᠤᠯᠠᠭᠠᠢᠯᠠᠵᠤ ᠪᠠᠢᠨᠠ ᠤᠤ? ᠲᠠᠨᠠᠷ ᠡᠨᠡ ᠰᠠᠢᠨ ᠢᠵᠠᠭᠤᠷᠲᠤ ᠮᠣᠷᠢᠨ ᠤ᠋ ᠮᠥᠩᠭᠥᠯᠢᠭ ᠠᠷᠠᠰᠤᠨ ᠳᠡᠭᠡᠷᠡ ᠪᠤᠵᠠᠷ ᠲᠠᠮᠠᠭᠠ ᠪᠠᠨ ᠳᠠᠷᠤᠬᠤ ᠰᠠᠨᠠᠭᠠ ᠲᠠᠢ ᠪᠠᠢᠨᠠ ᠤᠤ? ᠭᠡᠬᠦ ᠳ᠋ᠦ᠍ ᠨᠢᠭᠡᠨ ᠠᠳᠤᠭᠤᠴᠢ᠄
— ᠪᠠᠶᠠᠨᠳ᠋ᠸᠷ ᠬᠠᠭᠠᠨ ᠥᠪᠡᠷ ᠢ᠋ᠶ᠋ᠡᠨ ᠴᠢᠨᠦ ᠮᠠᠩᠨᠠᠢ ᠳᠡᠭᠡᠷᠡ ᠲᠠᠮᠠᠭᠠ ᠳᠠᠷᠤᠵᠤ ᠴᠢ ᠣᠪᠣᠭᠠ ᠰᠢᠷᠣᠢ ᠶ᠋ᠢᠨ ᠳᠡᠭᠡᠷᠡ ᠰᠡᠭ ᠪᠣᠯᠤᠨ ᠬᠡᠪᠲᠡᠨᠡ ᠭᠡᠳ ᠴᠡᠷᠢᠭ ᠦ᠋ᠨ ᠡᠷᠡ ᠠᠭᠤᠷᠰᠠᠵᠤ ᠢᠯᠳᠦ ᠳᠠᠯᠠᠢᠨ ᠤᠬᠤᠰᠭᠢᠬᠤ ᠳ᠋ᠤ᠌ ᠰᠠᠶᠢ ᠶ᠋ᠢᠨ ᠦᠭᠡ ᠬᠡᠯᠡᠭᠴᠢ ᠬᠠᠵᠠᠭᠤ ᠲᠡᠰᠢ ᠦᠰᠦᠷᠴᠦ ᠠᠷᠠᠢᠬᠢᠨ ᠵᠠᠢᠯᠠᠪᠠ᠃ ᠭᠡᠲᠡᠯᠡ ᠣᠪᠣᠬᠠᠢ ᠠ᠋ᠴᠠ ᠰᠠᠨᠠᠮᠰᠠᠷ ᠦᠭᠡᠢ ᠭᠦᠶᠦᠨ ᠭᠠᠷᠴᠤ ᠢᠷᠡᠭᠰᠡᠨ ᠨᠢᠭᠡᠨ ᠤᠷᠠᠩᠬᠠᠢ ᠴᠤᠪᠠ ᠲᠠᠢ ᠳᠡᠪᠬᠡᠬᠡᠷ ᠪᠣᠷᠣ ᠮᠣᠩᠭᠣᠯ ᠬᠥᠮᠦᠨ ᠠᠷᠠᠫᠱᠠ ᠶ᠋ᠢᠨ ᠵᠠᠮ ᠢ᠋ ᠪᠣᠭᠣᠵᠤ᠄
— ᠪᠸᠺ ᠵᠢᠬᠢᠲ ᠬᠦᠯᠢᠶᠡᠭᠲᠦᠨ! ᠪᠦᠳᠦᠭᠦᠯᠢᠭ ᠡᠲᠡᠭᠡᠳ ᠢ᠋ ᠠᠷᠢᠭᠤᠨ ᠢᠯᠳᠦ ᠪᠡᠷ ᠲᠠᠰᠤ ᠴᠠᠪᠴᠢᠬᠤ ᠳ᠋ᠤ᠌ ᠬᠡᠵᠢᠶᠡ ᠴᠦ᠍ ᠠᠮᠵᠢᠨᠠ᠃ ᠤᠷᠢᠳᠠᠪᠡᠷ ᠮᠢᠨᠦ ᠥᠭᠦᠯᠡᠬᠦ ᠶ᠋ᠢ ᠰᠣᠨᠣᠰ! ᠴᠢᠨᠦ ᠮᠣᠷᠢ ᠨᠠᠳᠠ ᠠ᠋ᠴᠠ ᠦᠭᠡᠢ ᠪᠣᠯᠬᠤ ᠦᠭᠡᠢ ᠭᠡᠳ ᠭᠠᠷ ᠢ᠋ᠶ᠋ᠠᠷ ᠲᠣᠬᠢᠬᠤ ᠳ᠋ᠤ᠌᠂ ᠠᠳᠤᠭᠤᠴᠢᠨ ᠴᠠᠭᠠᠨ ᠠᠵᠢᠷᠭᠠᠨ ᠤ᠋ ᠬᠦᠵᠦᠭᠦᠨ ᠳ᠋ᠡᠬᠢ ᠤᠷᠠᠬᠠ ᠶ᠋ᠢ ᠲᠠᠯᠪᠢᠪᠠ᠃ ᠦᠭᠡ ᠶᠠᠷᠢᠭᠴᠢ᠂ ᠨᠠᠰᠤ ᠵᠠᠯᠠᠭᠤ᠂ ᠳᠡᠭᠡᠳᠦ ᠤᠷᠤᠭᠤᠯ ᠳᠡᠭᠡᠷᠡ ᠨᠢ ᠪᠢᠴᠢᠬᠠᠨ ᠰᠠᠬᠠᠯ ᠬᠠᠷᠠᠯᠠᠨ ᠪᠠᠢᠨᠠ᠃ ᠨᠡᠢᠯᠡᠭᠰᠡᠨ ᠬᠥᠮᠥᠰᠬᠡ ᠶ᠋ᠢᠨ ᠳᠣᠣᠷᠠ ᠠ᠋ᠴᠠ ᠰᠢᠯ ᠮᠡᠲᠦ ᠭᠢᠯᠲᠠᠭᠠᠨᠠᠬᠤ ᠵᠢᠷᠲᠠᠭᠠᠷ ᠨᠢᠳᠦᠨ ᠳ᠋ᠦ᠍ᠨᠢ ᠦᠯᠦ ᠰᠠᠨᠳᠤᠷᠬᠤ ᠨᠢᠭᠤᠴᠠ ᠳᠠᠯᠳᠠ ᠪᠣᠳᠣᠯᠭᠠ ᠪᠠᠢᠬᠤ ᠮᠡᠲᠦ ᠦᠵᠡᠭᠳᠡᠯᠡ᠃ ᠵᠠᠩ ᠠᠭᠠᠰᠢ ᠨᠢ ᠲᠦᠪᠰᠢᠨ ᠪᠥᠭᠡᠳ ᠭᠤᠢᠯᠢᠨᠴᠢ ᠶ᠋ᠢᠨ ᠭᠠᠩᠳᠠᠮᠠᠯ ᠨᠥᠮᠥᠷᠭᠡ ᠡᠮᠦᠰᠦᠭᠰᠡᠨ ᠨᠢ ᠵᠢᠭᠲᠡᠢ ᠪᠠᠢᠯᠠ᠃ ᠠᠷᠠᠫᠱᠠ ᠦᠯᠦ ᠲᠠᠨᠢᠬᠤ ᠬᠥᠮᠦᠨ ᠦ᠌ ᠡᠵᠡᠷᠬᠡᠭ ᠬᠠᠷᠠᠴᠠ ᠳ᠋ᠤ᠌ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠳᠠᠷᠤᠭᠳᠠᠵᠤ ᠵᠣᠭᠰᠣᠨ᠂ ᠬᠠᠳ᠋ᠵᠢ ᠷᠠᠾᠢ᠍ᠮ ᠤ᠋ᠨ ᠬᠡᠯᠡᠭᠰᠡᠨ(ᠢᠯᠡᠭᠦᠴᠡ ᠦᠰᠦᠭ) ᠄《ᠮᠣᠷᠢ ᠴᠢᠨᠢ ᠡᠷᠭᠢᠵᠦ ᠢᠷᠡᠨᠡ᠂ ᠲᠡᠭᠦᠨ ᠦ᠌ ᠣᠷᠣᠨ ᠳ᠋ᠤ᠌ ᠮᠢᠩᠭᠠᠨ ᠠᠳᠤᠭᠤ ᠥᠭᠴᠦ ᠴᠢᠳᠠᠬᠤ ᠶᠡᠷᠦ ᠶ᠋ᠢᠨ ᠪᠤᠰᠤ ᠬᠥᠮᠦᠨ ᠤᠨᠤᠭᠰᠠᠨ》 ᠭᠡᠵᠦ ᠬᠡᠯᠡᠭᠰᠡᠨ ᠦᠭᠡ ᠬᠡᠪ ᠭᠡᠨᠡᠳᠲᠡ ᠰᠠᠨᠠᠭᠠᠨ ᠳ᠋ᠤ᠌(ᠨᠢ) ᠣᠷᠣᠯᠠ᠃
— ᠴᠢᠨᠦ ᠠᠵᠢᠷᠭᠠᠨ ᠳ᠋ᠤ᠌ ᠬᠡᠨ ᠴᠦ᠍ ᠭᠠᠷ ᠬᠦᠷᠬᠦ ᠡᠷᠬᠡ ᠦᠭᠡᠢ᠂ ᠮᠢᠨᠦ ᠬᠣᠢᠨᠠ ᠠ᠋ᠴᠠ ᠳᠠᠢᠰᠤᠨ ᠨᠡᠬᠡᠮᠵᠢᠯᠡᠬᠦ ᠳ᠋ᠦ᠍ ᠪᠢ ᠲᠡᠭᠦᠨ ᠢ᠋ ᠣᠨᠣᠪᠠ᠃ ᠪᠢ ᠬᠤᠳᠠᠯᠳᠤᠨ ᠠᠪᠤᠨᠠ᠂ ᠬᠡᠴᠢᠨᠡᠨ ᠠᠯᠲᠠᠨ ᠳ᠋ᠢᠨᠠᠷ(ᠵᠣᠭᠣᠰ ) ᠢ᠋ᠶ᠋ᠠᠷ ᠴᠢ ᠥᠭᠬᠦ ᠪᠣᠢ? ᠭᠡᠵᠦ ᠵᠠᠯᠠᠭᠤ ᠮᠣᠩᠭᠣᠯ ᠬᠥᠮᠦᠨ ᠬᠡᠯᠡᠬᠦ ᠳ᠋ᠦ᠍ ᠠᠷᠠᠫᠱᠠ᠄
— ᠠᠺᠴᠢᠶᠠᠨ ᠢ᠋ᠶ᠋ᠠᠨ ᠬᠤᠳᠠᠯᠳᠤᠬᠤ ᠭᠡᠵᠢ ᠤᠤ? ᠮᠣᠷᠢ ᠪᠠᠨ(ᠪᠣᠯ ) ᠵᠣᠷᠢᠭᠲᠤ ᠵᠢᠭᠢᠲ ᠲᠦ᠍ ᠳᠡᠭᠡᠳᠦ ᠬᠠᠨᠢ᠂ ᠬᠠᠨᠢ ᠪᠠᠨ ᠬᠤᠳᠠᠯᠳᠤᠬᠤ ᠶᠣᠰᠣ ᠪᠠᠢᠬᠤ ᠭᠡᠵᠢ ᠤᠤ? ᠭᠡᠬᠦ ᠳ᠋ᠦ᠍ ᠦᠯᠦ ᠲᠠᠨᠢᠬᠤ ᠬᠥᠮᠦᠨ ᠬᠠᠷᠢᠭᠤᠯᠤᠨ᠄
— ᠴᠢ ᠵᠥᠪ ᠦᠭᠡ ᠬᠡᠯᠡᠵᠦ ᠪᠠᠢᠨᠠ᠂ ᠡᠨᠡ ᠰᠠᠢᠨ ᠢᠵᠠᠭᠤᠷᠲᠤ ᠮᠣᠷᠢ ᠰᠤᠯᠲᠠᠨ ᠬᠠᠭᠠᠨ ᠡᠰᠡᠬᠦᠯᠡ ᠶᠡᠬᠡ ᠬᠠᠭᠠᠨ ᠳ᠋ᠤ᠌ ᠤᠨᠤᠭᠤᠯᠬᠤ ᠶ᠋ᠢᠨ ᠲᠤᠯᠠ ᠲᠥᠷᠥᠵᠡᠢ᠃ ᠬᠠᠷᠢᠨ ᠵᠣᠷᠢᠭᠲᠠᠢ ᠪᠣᠯᠪᠠᠴᠤ ᠡᠩ ᠦ᠋ᠨ ᠨᠢᠭᠡᠨ ᠵᠢᠭᠢᠲ ᠴᠢᠮᠠᠲᠤ ᠡᠢᠮᠦ ᠮᠣᠷᠢ ᠶᠠᠮᠠᠷ ᠬᠡᠷᠡᠭ ᠲᠡᠢ ᠪᠣᠢ? ᠴᠢᠮᠠᠲᠤ ᠠᠷᠪᠠᠨ ᠰᠠᠢᠨ ᠮᠣᠷᠢ᠂ ᠲᠣᠷᠭᠠᠨ ᠬᠤᠪᠴᠠᠰᠤ ᠬᠤᠳᠠᠯᠳᠤᠨ ᠠᠪᠴᠤ ᠪᠣᠯᠬᠤᠢᠴᠠ ᠦᠨᠡ ᠪᠡᠷ ᠠᠪᠰᠤᠭᠠᠢ ᠂ ᠮᠣᠷᠢᠨ ᠤ᠋ ᠦᠨᠡ ᠳ᠋ᠦ᠍ ᠴᠢ ᠶᠠᠭᠤ ᠠᠪᠬᠤ ᠪᠠᠨ ᠬᠡᠯᠡᠭᠲᠦᠨ! ᠭᠡᠬᠦ ᠳ᠋ᠦ᠍ ᠠᠷᠠᠫᠱᠠ᠄
— ᠨᠠᠳᠠᠳᠤ ᠶᠠᠭᠤ ᠴᠤ᠌ ᠬᠡᠷᠡᠭ ᠦᠭᠡᠢ᠂ ᠪᠢ ᠡᠭᠦᠨ ᠢ᠋ ᠠᠷᠠᠢ ᠭᠡᠵᠦ ᠰᠠᠶᠢ ᠣᠯᠤᠯᠠ᠃ ᠨᠠᠳᠠᠳᠤ ᠲᠥᠷᠥᠭᠰᠡᠨ ᠨᠤᠲᠤᠭ ᠭᠡᠷ ᠣᠷᠣᠨ᠂ ᠪᠤᠭᠤᠷᠤᠯ ᠠᠪᠤ ᠪᠤᠶᠤ ᠵᠣᠷᠢᠭᠲᠤ ᠠᠬᠠ ᠳᠡᠭᠦᠦ ᠨᠠᠷ ᠪᠠᠢᠬᠤ ᠦᠭᠡᠢ᠂ ᠮᠢᠨᠦ ᠪᠦᠬᠦ ᠬᠥᠷᠥᠩᠭᠡ ᠰᠡᠯᠡᠮᠡ ᠮᠣᠷᠢ ᠬᠣᠶᠠᠷ ᠶᠤᠮ᠃ ᠴᠢ ᠡᠭᠦᠨ ᠢ᠋ ᠶᠠᠭᠤᠨ ᠳ᠋ᠤ᠌ ᠰᠠᠯᠭᠠᠬᠤ ᠭᠡᠨᠡ? ᠨᠠᠮᠠᠶ᠋ᠢ ᠲᠤᠯᠤᠯᠳᠤᠭᠠᠨ ᠤ᠋ ᠭᠠᠯ ᠠᠶᠤᠯ ᠤ᠋ᠨ ᠠᠮᠠᠰᠠᠷ ᠠ᠋ᠴᠠ ᠬᠡᠨ ᠭᠠᠷᠭᠠᠬᠤ ᠪᠣᠢ? ᠪᠢ ᠡᠭᠦᠨ ᠢ᠋ ᠥᠭᠬᠦ ᠦᠭᠡᠢ᠃
— ᠡᠨᠡ ᠴᠠᠭᠠᠨ ᠮᠣᠷᠢ ᠨᠠᠳᠠᠳᠤ ᠬᠡᠷᠡᠭ ᠲᠡᠢ᠃ ᠣᠷᠣᠨ ᠳ᠋ᠤᠨᠢ ᠪᠢ ᠴᠢᠮᠠᠲᠤ ᠡᠨᠡ ᠰᠦᠷᠦᠭ ᠠᠳᠤᠭᠤᠨ ᠠ᠋ᠴᠠ ᠳᠡᠭᠡᠳᠦ ᠮᠣᠷᠢ ᠶ᠋ᠢ ᠥᠭᠰᠦᠭᠡᠢ᠂ ᠪᠣᠯᠬᠤ ᠤᠤ?
ᠠᠷᠠᠫᠱᠠ᠂ ᠨᠢᠳᠦ ᠨᠢ ᠡᠷᠭᠢᠯᠳᠦᠨ᠂ ᠠᠭᠤᠷ ᠨᠢ ᠪᠤᠴᠠᠯᠪᠠ᠃ ᠠᠭᠤᠷ ᠬᠦᠷᠪᠡᠴᠦ ᠬᠠᠳ᠋ᠵᠢ ᠷᠠᠾᠢᠮ ᠤ᠋ᠨ ᠦᠭᠡ ᠳᠠᠬᠢᠨ ᠰᠠᠨᠠᠭᠳᠠᠵᠠᠢ᠃ ᠲᠡᠳᠦᠢ ᠭᠱᠠᠨ ᠵᠠᠭᠤᠷᠠ ᠪᠣᠳᠣᠭᠠᠳ ᠪᠤᠷᠵᠢᠭᠢᠷ ᠬᠠᠷᠠ ᠦᠰᠦ ᠪᠡᠨ ᠰᠡᠭᠰᠦᠷᠦᠨ᠄
— ᠬᠡᠷᠪᠡ ᠮᠢᠨᠦ ᠮᠣᠷᠢ᠂ ᠴᠢᠮᠠᠲᠤ ᠬᠣᠷᠭᠣᠢ ᠭᠥᠯᠢᠮ ᠲᠣᠬᠣᠵᠤ ᠵᠠᠬᠠ ᠵᠡᠭᠡᠯᠢ ᠪᠡᠷ ᠠᠮᠢᠲᠠᠨ ᠳ᠋ᠤ᠌ ᠭᠠᠢᠬᠠᠭᠤᠯᠬᠤ ᠶ᠋ᠢᠨ ᠲᠤᠯᠠᠳᠠ ᠪᠤᠰᠤ᠂ ᠲᠡᠢᠨ ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠶᠠᠪᠤᠬᠤ ᠳ᠋ᠤ᠌ ᠬᠡᠷᠡᠭ ᠲᠡᠢ ᠶᠤᠮ ᠪᠣᠯ ᠪᠢ ᠴᠢᠮᠠᠲᠤ ᠪᠡᠯᠡᠭ ᠪᠣᠯᠭᠠᠰᠤᠭᠠᠢ᠃ ᠴᠢ ᠲᠡᠭᠦᠨ ᠢ᠋ ᠤᠨᠤᠵᠤ ᠠᠯᠤᠰ ᠰᠦᠮᠡᠯᠵᠡᠬᠦ ᠣᠳᠣᠨ ᠳ᠋ᠤ᠌ ᠬᠦᠷᠦᠨᠡ᠃ ᠡᠨᠡ ᠴᠢᠨᠢ ᠢᠯᠠᠭᠴᠢ ᠶ᠋ᠢᠨ ᠮᠣᠷᠢ ᠪᠣᠯᠵᠤ ᠴᠢᠮᠠᠲᠤ ᠲᠤᠰᠠᠯᠠᠨᠠ ᠭᠡᠪᠡ᠃ ᠤᠷᠠᠩᠬᠠᠢ ᠨᠥᠮᠥᠷᠭᠡ ᠲᠡᠢ ᠦᠯᠦ ᠲᠠᠨᠢᠬᠤ ᠬᠥᠮᠦᠨ ᠰᠣᠴᠢᠵᠤ ᠨᠢᠳᠦ ᠨᠢ ᠬᠣᠷᠣᠮᠬᠠᠨ ᠵᠠᠭᠤᠷᠠ ᠠᠷᠠᠫᠱᠠ ᠳᠡᠭᠡᠷᠡ ᠲᠣᠰᠴᠤ ᠰᠢᠯᠭᠠᠨ ᠬᠠᠷᠠᠭᠠᠳ ᠠᠳᠤᠭᠤᠴᠢᠨ ᠤ᠋ ᠵᠦᠭ ᠬᠠᠨᠳᠤᠵᠤ ᠲᠣᠭᠯᠠᠭᠠᠮ ᠤ᠋ᠨ ᠪᠠᠢᠳᠠᠯ ᠢ᠋ᠶ᠋ᠠᠷ᠄
— ᠴᠢᠳᠠᠯ ᠲᠠᠢ ᠰᠠᠢᠨ ᠡᠷᠡᠴᠦᠳ ᠠ᠋! ᠮᠢᠨᠦ ᠰᠢᠯᠢᠵᠦ ᠠᠪᠬᠤ ᠮᠣᠷᠢ ᠶ᠋ᠢ ᠲᠠᠨᠠᠷ ᠨᠠᠳᠠᠳᠤ ᠬᠤᠳᠠᠯᠳᠤᠵᠤ ᠴᠢᠳᠠᠬᠤ ᠤᠤ? ᠭᠡᠬᠦ ᠳ᠋ᠦ᠍ ᠠᠳᠤᠭᠤᠴᠢᠨ ᠪᠡᠶᠡ ᠪᠡᠶᠡ ᠪᠡᠨ ᠬᠠᠷᠠᠨ ᠬᠣᠭᠣᠷᠣᠨᠳᠣ ᠪᠠᠨ ᠰᠢᠪᠡᠨᠡᠯᠳᠦᠵᠦ ᠭᠠᠩᠳᠠᠭᠰᠠᠨ ᠠ᠋ᠴᠠ ᠴᠣᠬᠣ ᠬᠣᠷᠣᠬᠠᠢ ᠮᠡᠲᠦ ᠬᠠᠷᠠᠯᠠᠭᠰᠠᠨ ᠬᠠᠮᠤᠭ ᠤ᠋ᠨ ᠵᠠᠯᠠᠭᠤ ᠨᠢ᠄
— ᠪᠢᠳᠡᠨ ᠦ᠌ ᠬᠢ ᠪᠢᠰᠢ᠂ ᠪᠠᠶᠠᠨᠳ᠋ᠸᠷ ᠬᠠᠭᠠᠨ ᠤ᠋ ᠠᠳᠤᠭᠤ᠂ ᠬᠠᠷᠢᠨ ᠬᠠᠭᠠᠨ ᠠᠯᠳᠠᠯ ᠳ᠋ᠤ᠌ ᠳᠤᠷᠠᠲᠠᠢ ᠲᠤᠯᠠ ᠬᠡᠷᠪᠡ ᠴᠢ ᠰᠢᠭ᠌ᠨᠠᠺ ᠤ᠋ᠨ ᠵᠠᠬᠠ ᠵᠡᠭᠡᠯᠢ ᠶ᠋ᠢᠨ ᠬᠤᠳᠠᠯᠳᠤᠭᠠᠴᠢᠨ ᠤ᠋ ᠲᠥᠯᠥᠬᠦ ᠡᠴᠡ ᠪᠠᠭᠠ ᠦᠭᠡᠢ ᠦᠨᠡ ᠥᠭᠪᠡᠯ ᠴᠢᠨᠦ ᠬᠡᠷᠡᠭ ᠲᠡᠢ ᠮᠣᠷᠢ ᠶ᠋ᠢ ᠬᠤᠳᠠᠯᠳᠤᠵᠤ ᠪᠣᠯᠤᠨᠠ᠃ ᠴᠢ ᠪᠢᠳᠡᠨ ᠳ᠋ᠦ᠍ ᠬᠣᠷᠢᠨ ᠲᠠᠪᠤᠨ ᠠᠯᠲᠠᠨ ᠳ᠋ᠢᠨᠡᠷ ᠥᠭᠬᠦ ᠤᠤ? ᠲᠡᠭᠡᠪᠡᠯ ᠴᠢᠨᠦ ᠵᠢᠭᠠᠭᠰᠠᠨ ᠠᠵᠢᠷᠭᠠ ᠶ᠋ᠢ ᠪᠠᠷᠢᠰᠤᠭᠠᠢ᠃ ᠬᠠᠷᠢᠨ ᠪᠢᠳᠡᠨ ᠦ᠌ ᠰᠠᠢᠨ ᠰᠡᠳᠬᠢᠯ ᠦ᠋ᠨ ᠲᠤᠯᠠᠳᠠ ᠪᠠᠰᠠ ᠨᠡᠮᠡᠵᠦ ᠥᠭᠪᠡᠯ ᠴᠢᠨᠦ ᠨᠢᠳᠦᠨ ᠦ᠌ ᠡᠮᠦᠨᠡ ᠲᠡᠷᠡ ᠮᠣᠷᠢ ᠶ᠋ᠢ ᠰᠤᠷᠭᠠᠰᠤᠭᠠᠢ ᠭᠡᠬᠦ ᠳ᠋ᠦ᠍᠂ ᠲᠡᠷᠡ ᠵᠢᠭᠲᠡᠢ ᠮᠣᠩᠭᠣᠯ ᠬᠥᠮᠦᠨ᠂
— ᠪᠢ ᠫᠠᠨᠽᠠᠴᠢᠨ ᠪᠢᠰᠢ ᠦᠨᠡ ᠪᠤᠯᠢᠶᠠᠯᠳᠤᠬᠤ ᠦᠭᠡᠢ᠂ ᠬᠠᠷᠢᠨ ᠠᠪᠬᠤ ᠳᠤᠷᠠᠲᠠᠢ ᠪᠠᠨ ᠠᠪᠤᠨᠠ᠃ ᠲᠠᠨᠠᠷ ᠲᠸ᠋ ᠭᠤᠶᠤᠭᠰᠠᠨᠴᠢᠯᠠᠨ ᠥᠭᠬᠦ ᠶ᠋ᠢᠨ ᠳᠡᠭᠡᠷᠡ ᠲᠤᠰ ᠪᠦᠷᠢ ᠳ᠋ᠦ᠍ ᠨᠢᠵᠡᠭᠡᠳ ᠳ᠋ᠢᠨᠠᠷ(ᠵᠣᠭᠣᠰ) ᠨᠡᠮᠡᠰᠦᠭᠡᠢ ᠭᠡᠲᠡᠯᠡ᠂ ᠠᠳᠤᠭᠤᠴᠢᠨ
— ᠮᠢᠩᠭᠠ ᠨᠠᠰᠤᠯᠠᠲᠤᠭᠠᠢ ᠲᠦᠷᠭᠡᠨ ᠵᠢᠭᠠᠭᠲᠤᠨ! ᠭᠡᠵᠡᠭᠡᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠡᠷᠳᠡᠨᠢᠭᠣᠸᠠ᠂ ᠪᠠᠯ᠂ ᠠᠯᠲᠠᠨᠴᠢᠮᠡᠭ᠂ ᠵᠢᠩᠯᠢᠬᠤᠸᠠᠷ
ᠬᠢᠨᠠᠭᠴᠢ᠄ ᠠᠯᠲᠠᠨᠴᠢᠮᠡᠭ᠂ ᠠᠷᠢᠭᠤᠨ