ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ - ᠠᠮᠢᠳᠤᠷᠠᠯ ᠤᠨ ᠵᠠᠮ ᠂ ᠨᠢᠭᠡᠳᠦᠭᠡᠷ ᠪᠦᠯᠦᠭ 〔ᠠᠷᠪᠠᠨ ᠳᠣᠯᠣᠭᠠ〕 Цаг төрийн үймээн – Д ᠂ Намдаг - Амьдралын зам ᠂ нэгдүгээр бүлэг - 17
151ᠠᠶᠤᠮᠰᠢᠭ᠍ᠲᠦ ᠳᠠᠢᠨ
ᠬᠥᠪᠡᠭᠡᠨ ᠳᠡᠭᠡᠷᠡ ᠭᠠᠷᠴᠤ ᠢᠷᠡᠬᠦ ᠳ᠋ᠦ᠍ ᠶᠣᠰᠣᠲᠠᠢ ᠪᠥᠭᠡᠮ ᠪᠤᠵᠢᠭᠢᠨᠠᠭᠠᠨ᠂ ᠨᠠᠭᠠᠰᠢ ᠴᠠᠭᠠᠰᠢ ᠶᠠᠭᠠᠷᠠᠨ᠂ ᠲᠣᠭᠣᠷᠢᠨ ᠭᠦᠶᠦᠬᠦ ᠦᠭᠡᠢ ᠠᠮᠢᠲᠠᠨ ᠨᠢᠭᠡ ᠴᠦ᠍ ᠠᠯᠠᠭᠠ᠃ ᠮᠠᠢᠬᠠᠨ ᠨᠤᠭᠤᠳ ᠤ᠋ᠨ ᠵᠠᠷᠢᠮ ᠳ᠋ᠤᠨᠢ ᠭᠠᠯ ᠠᠪᠤᠯᠴᠠᠨ ᠤᠨᠠᠵᠤ ᠪᠠᠢᠭᠠ ᠦᠵᠡᠭᠳᠡᠨᠡ᠃ ᠲᠡᠷᠲᠡᠭᠡ ᠵᠡᠭᠦᠨ ᠳᠣᠣᠷᠠ ᠪᠠᠢᠭᠠ ᠲᠠᠷᠢᠶᠠᠴᠢᠨ ᠠᠢᠯ ᠤ᠋ᠳ ᠤ᠋ᠨ ᠣᠷᠣᠨ ᠪᠠᠢᠰᠢᠩ ᠤ᠋ᠳ ᠪᠠᠭᠠᠭᠢᠭᠰᠠᠨ ᠬᠠᠷᠠ ᠤᠲᠤᠭᠠᠨ ᠤ᠋ ᠳᠣᠣᠷᠠ ᠰᠢᠲᠠᠵᠤ ᠪᠠᠢᠨᠠ᠃ ᠭᠠᠵᠠᠷ ᠤ᠋ᠨ ᠨᠠᠮ ᠳ᠋ᠤ᠌ ᠪᠠᠭᠤᠭᠠᠳ ᠪᠠᠬᠠᠨ ᠭᠠᠮᠢᠩ ᠤ᠋ᠳ ᠤ᠋ᠨ ᠵᠣᠭᠰᠣᠭᠰᠠᠨ ᠤ᠋ ᠬᠠᠵᠠᠭᠤ ᠪᠠᠷ ᠥᠩᠭᠡᠷᠡᠬᠦ ᠭᠡᠲᠡᠯᠡ ᠲᠡᠷᠡ ᠪᠠᠰᠠ ᠵᠦᠭᠡᠷ ᠵᠣᠭᠰᠣᠵᠤ ᠪᠠᠢᠭᠠ ᠪᠢᠰᠢ ᠠᠵᠢ᠃ ᠬᠣᠷᠢᠭᠠᠳ ᠰᠢᠬᠠᠮ ᠤ᠋ᠨ ᠢ᠋ᠶ᠋ᠠᠨ ᠭᠠᠷ ᠢ᠋ ᠠᠷᠤ ᠳ᠋ᠤᠨᠢ ᠬᠦᠯᠢᠨ᠂ ᠲᠣᠮᠣ ᠨᠦᠬᠡᠨ ᠦ᠌ ᠠᠮᠠᠰᠠᠷ ᠳᠡᠭᠡᠷᠡ ᠰᠥᠭᠦᠳᠦᠭᠦᠯᠦᠨ ᠰᠠᠭᠤᠯᠭᠠᠵᠠᠢ᠃ ᠲᠡᠭᠡᠭᠡᠳ ᠣᠯᠠᠨ ᠠ᠋ᠴᠠ ᠣᠨᠴᠠᠭᠠᠢ ᠵᠣᠭᠰᠣᠭᠰᠠᠨ ᠨᠣᠶᠠᠨ ᠤ᠋ ᠨᠢᠭᠡ ᠦᠭᠡ ᠬᠠᠰᠬᠢᠷᠤᠨ ᠥᠩᠭᠡ ᠭᠢᠯᠠᠯᠵᠠᠭᠰᠠᠨ ᠨᠠᠷᠢᠬᠠᠨ ᠴᠠᠭᠠᠨ ᠰᠡᠯᠡᠮᠡ ᠪᠡᠨ ᠳᠡᠭᠡᠭᠰᠢ ᠡᠷᠭᠦᠨ ᠪᠠᠭᠤᠯᠭᠠᠬᠤ ᠳ᠋ᠤ᠌ ᠬᠡᠳᠦᠨ ᠠᠷᠪᠠᠨ ᠫᠤᠤ ᠨᠢᠷ ᠬᠢᠵᠦ ᠬᠦᠯᠢᠶᠡᠲᠡᠢ ᠪᠦᠬᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠤᠷᠢᠳᠤᠬᠢ ᠨᠦᠬᠡ ᠤᠷᠤᠭᠤ ᠪᠠᠨ ᠣᠩᠬᠣᠯᠢᠳᠤᠨ ᠤᠨᠠᠪᠠ᠃ ᠵᠢᠩᠴᠢᠳ ᠡᠢᠮᠦ ᠠᠶᠤᠮᠰᠢᠭᠲᠠᠢ ᠶᠠᠭᠤᠮᠠ ᠶ᠋ᠢ ᠦᠵᠡᠬᠦ ᠪᠠᠢᠲᠤᠭᠠᠢ ᠵᠡᠭᠦᠳᠦᠯᠡᠭᠡ ᠴᠦ᠍ ᠦᠭᠡᠢ ᠳ᠋ᠡᠭᠡᠨ ᠨᠢᠳᠦ ᠬᠠᠯᠲᠤᠷᠢᠨ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠥᠭᠡᠷᠡ ᠲᠡᠢᠰᠢ ᠬᠠᠷᠠᠯᠠ᠃ ᠭᠡᠯᠡ ᠴᠦ᠍ ᠨᠢᠭᠡᠨᠲᠡ ᠨᠢᠳᠦᠨ ᠳ᠋ᠦ᠍ ᠲᠣᠰᠣᠨ ᠵᠢᠷᠦᠬᠡ ᠳᠣᠩᠰᠣᠯᠤᠭᠤᠯᠤᠭᠰᠠᠨ ᠲᠡᠷᠡ ᠵᠦᠢᠯ ᠬᠠᠮᠠᠷ ᠤ᠋ᠨ ᠦᠵᠦᠭᠦᠷ ᠲᠦ᠍ ᠨᠠᠭᠠᠯᠳᠤᠭᠰᠠᠨ ᠰᠢᠭ᠋ ᠴᠢᠰᠤ᠂ ᠳᠠᠷᠢ ᠬᠣᠶᠠᠷ ᠤ᠋ᠨ ᠦᠨᠦᠷ ᠬᠠᠩᠬᠤᠯᠤᠨᠠ᠃ ᠭᠡᠲᠡᠯᠡ ᠪᠠᠰᠠ ᠤᠷᠢᠲᠤ ᠨᠢ ᠬᠡᠰᠡᠭ ᠭᠠᠮᠢᠩ ᠭᠠᠵᠠᠷ ᠤᠬᠤᠵᠤ ᠪᠠᠢᠯᠠ᠃ ᠣᠪᠣᠭᠠᠯᠠᠭᠰᠠᠨ ᠠᠴᠢᠶᠠ ᠲᠠᠢ ᠭᠤᠷᠪᠠᠨ ᠯᠠᠭᠤᠰᠠ ᠲᠡᠷᠭᠡ ᠢᠷᠡᠭᠰᠡᠨ ᠢ᠋ ᠨᠥᠭᠥᠭᠡᠳᠦᠭᠦᠯᠡ ᠤᠭᠲᠤᠨ ᠠᠪᠴᠤ ᠪᠦᠲᠡᠭᠡᠯᠭᠡ ᠶ᠋ᠢ ᠨᠢ ᠬᠠᠭᠤᠯᠤᠨ ᠬᠠᠶᠠᠬᠤ ᠶ᠋ᠢ ᠨᠢ ᠠᠵᠢᠬᠤ ᠳ᠋ᠤ᠌ ᠬᠥᠯ ᠲᠣᠯᠣᠭᠠᠢ ᠶ᠋ᠢ ᠨᠢ ᠵᠥᠷᠢᠭᠦᠯᠦᠨ ᠠᠴᠢᠭᠰᠠᠨ ᠬᠥᠮᠦᠰ ᠦ᠋ᠨ ᠬᠡᠭᠦᠷ ᠪᠠᠢᠯᠠ᠃ ᠲᠡᠳᠡᠨ ᠦ᠌ ᠭᠣᠣᠯ ᠲᠥᠯᠥᠪ ᠨᠢ ᠴᠡᠭᠡᠵᠢ ᠪᠡᠨ ᠪᠤᠶᠤ ᠲᠣᠯᠣᠭᠠᠢ ᠪᠠᠨ ᠫᠤᠤᠳᠠᠭᠤᠯᠤᠭᠰᠠᠨ ᠪᠠᠢᠬᠤ ᠪᠥᠭᠡᠳ ᠬᠣᠶᠠᠷ ᠬᠥᠮᠦᠨ ᠡᠷᠭᠦᠨ ᠠᠪᠴᠤ ᠨᠦᠬᠡᠨ ᠳ᠋ᠦ᠍ ᠰᠢᠲᠦᠬᠦ ᠵᠠᠭᠤᠷᠠ ᠴᠢᠰᠤ ᠰᠡᠪᠡᠷᠡᠨ ᠭᠠᠵᠠᠷ ᠲᠤᠰᠤᠨᠠ᠂ ᠵᠠᠷᠢᠮ ᠤ᠋ᠨ ᠬᠢᠨᠢ ᠭᠠᠷ ᠬᠥᠯ᠂ ᠬᠤᠪᠴᠠᠰᠤ ᠲᠠᠢ ᠪᠠᠨ ᠲᠠᠰᠤᠷᠠᠭᠠᠳ᠂ ᠶᠠᠮᠠᠷ ᠨᠢᠭᠡᠨ ᠰᠤᠳᠠᠰᠤ ᠰᠢᠷᠪᠦᠰᠦᠨ ᠳ᠋ᠡᠭᠡᠨ ᠵᠡᠭᠦᠭᠳᠡᠨ ᠰᠠᠨᠵᠢᠭᠢᠨᠠᠵᠤ ᠦᠵᠡᠭᠳᠡᠨᠡ᠃ ᠡᠨᠡ ᠪᠠᠢᠲᠤᠭᠠᠢ ᠣᠷᠣ ᠲᠠᠰᠤ ᠲᠣᠯᠣᠭᠠᠢ ᠦᠭᠡᠢ ᠮᠤᠬᠤᠷ ᠴᠡᠭᠡᠵᠢᠨ ᠪᠡᠶᠡ ᠬᠦᠷᠲᠡᠯᠡ ᠪᠠᠢᠭᠠ ᠠᠵᠢ᠃ ᠠᠴᠢᠶᠠ ᠪᠠᠭᠤᠯᠭᠠᠬᠤ ᠭᠠᠵᠠᠷ ᠤ᠋ᠨ ᠡᠮᠦᠨᠡ ᠢᠷᠡᠬᠦ ᠳ᠋ᠦ᠍ ᠤᠷᠢᠳ ᠡᠮᠦᠨᠡ ᠠᠭᠤᠯᠠ ᠣᠪᠣᠭᠠ ᠪᠣᠯᠲᠠᠯᠠ ᠨᠢ ᠬᠤᠷᠢᠶᠠᠭᠠᠳ ᠪᠠᠢᠭᠰᠠᠨ ᠰᠤᠮᠤ ᠬᠡᠷᠡᠭᠯᠡᠯ ᠠᠯᠠᠭᠠ ᠪᠠᠢᠯᠠ᠃ ᠲᠡᠭᠦᠨ ᠢ᠋ ᠨᠢ ᠣᠳᠣ ᠡᠳᠡᠨ ᠢ᠋ ᠲᠣᠭᠣᠷᠢᠨ ᠫᠢᠵᠢᠭᠢᠨᠡᠵᠦ ᠪᠠᠢᠭᠠ ᠠᠶᠤᠮᠰᠢᠭᠲᠤ ᠲᠤᠯᠤᠯᠳᠤᠭᠠᠨ ᠬᠣᠭᠣᠰᠣᠯᠠᠭᠰᠠᠨ ᠨᠢ ᠢᠯᠡᠷᠬᠡᠢ ᠪᠥᠭᠡᠳ ᠣᠳᠣ ᠠᠴᠢᠶᠠ ᠶ᠋ᠢ ᠳᠥᠩᠭᠡᠵᠦ ᠪᠠᠭᠤᠯᠭᠠᠮᠠᠭᠴᠠ ᠲᠡᠷᠡ ᠤᠷᠢᠲᠤ ᠠ᠋ᠴᠠ ᠬᠡᠳᠦᠨ ᠠᠷᠪᠠᠨ ᠯᠠᠭᠤᠰᠠ ᠲᠡᠷᠭᠡ ᠬᠦᠨᠳᠦ ᠳᠤᠭᠤᠢ ᠪᠠᠷ ᠢ᠋ᠶ᠋ᠠᠨ ᠭᠠᠵᠠᠷ ᠤ᠋ᠨ ᠬᠥᠷᠥᠰᠥ ᠤᠩᠬᠢᠯᠠᠨ ᠳᠠᠪᠬᠢᠨ ᠢᠷᠡᠵᠦ ᠪᠤᠯᠢᠶᠠᠯᠳᠤᠨ ᠠᠴᠢᠨᠠ᠃ ᠬᠣᠢᠨᠠ ᠠ᠋ᠴᠠ ᠨᠢ ᠬᠡᠳᠦᠨ ᠮᠣᠷᠢ ᠲᠠᠢ ᠬᠥᠮᠦᠰ ᠳᠠᠪᠬᠢᠯᠳᠤᠨ ᠢᠷᠡᠯᠡ᠃ ᠳᠤᠮᠳᠠ ᠨᠢ ᠶᠠᠪᠤᠭᠠ ᠨᠢ ᠪᠠᠰᠠ ᠯᠠ ᠨᠢᠭᠡ ᠨᠣᠶᠠᠨ᠂ ᠨᠢᠳᠦᠨ ᠳ᠋ᠡᠭᠡᠨ ᠬᠦᠷᠢᠶᠡ ᠦᠭᠡᠢ ᠴᠠᠭᠠᠨ ᠰᠢᠯ ᠲᠡᠢ᠂ ᠮᠠᠯᠠᠭᠠᠢ ᠨᠢ ᠠᠯᠲᠠᠨ ᠱᠠ ᠡᠮᠵᠢᠶᠡᠷᠢ ᠲᠡᠢ᠂ ᠭᠠᠷ ᠲᠠᠭᠠᠨ ᠲᠤᠩ ᠴᠠᠭᠠᠨ ᠪᠡᠭᠡᠯᠡᠢ ᠵᠡᠭᠦᠭᠰᠡᠨ ᠠᠬᠢᠮᠠᠭ ᠨᠠᠰᠤᠲᠠᠨ᠃ ᠡᠨᠡ ᠪᠣᠯ ᠳᠠᠩᠵᠢᠶᠠᠳ ᠴᠠᠭᠠᠨᠳᠠᠯᠠᠢ ᠶ᠋ᠢᠨ ᠪᠢᠯᠳᠠᠤᠴᠢᠯᠠᠭᠰᠠᠨ ᠵᠣᠣ ᠴᠢ ᠮᠢᠨ ᠭᠡᠭᠴᠢ ᠪᠠᠢᠵᠠᠢ᠃ ᠠᠷᠤ ᠥᠪᠥᠷ ᠲᠡᠭᠡᠨ ᠬᠣᠶᠠᠷ ᠬᠣᠶᠠᠷ ᠬᠢᠶᠡ ᠪᠡᠷ ᠬᠠᠮᠠᠭᠠᠯᠠᠭᠤᠯᠤᠭᠰᠠᠨ ᠢ᠋ ᠨᠢ ᠬᠡᠯᠡᠬᠦ ᠤᠤ᠂ ᠪᠠᠷᠠ ᠶ᠋ᠢᠨ ᠭᠠᠵᠠᠷ ᠠ᠋ᠴᠠ ᠬᠠᠷᠠᠭᠰᠠᠨ ᠪᠦᠬᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠡᠶᠡ ᠪᠡᠨ ᠪᠠᠷᠢᠨ ᠨᠣᠮᠣᠬᠠᠨ ᠵᠣᠭᠰᠣᠨᠠ᠃ ᠵᠣᠣ ᠴᠢ ᠮᠢᠨ ᠨᠣᠶᠠᠨ ᠤ᠋ ᠮᠣᠷᠢᠨ ᠤ᠋ ᠪᠠᠨ ᠠᠮᠠ ᠶ᠋ᠢ ᠲᠡᠳᠡᠨ ᠵᠣᠭᠰᠣᠮᠠᠭᠴᠠ ᠳᠥᠷᠪᠡᠨ ᠳᠠᠭᠠᠭᠤᠯᠢ ᠨᠢ ᠨᠢᠭᠡᠨ ᠵᠡᠷᠭᠡ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠨ ᠬᠠᠷᠠᠢᠭᠠᠳ ᠠᠷᠤ ᠶ᠋ᠢᠨ ᠬᠢᠨᠢ ᠬᠣᠶᠠᠷ ᠭᠦᠶᠦᠨ ᠢᠷᠡᠵᠦ ᠰᠤᠭᠤᠳᠠᠨ ᠪᠠᠭᠤᠯᠭᠠᠨᠠ᠃ ᠮᠣᠷᠢ ᠪᠠᠨ ᠬᠠᠶᠠᠭᠠᠳ ᠠᠯᠲᠠᠨ ᠪᠠᠷᠢᠭᠤᠯᠲᠤ ᠭᠢᠯᠤᠩ ᠴᠠᠭᠠᠨ ᠰᠡᠯᠡᠮᠡ ᠪᠡᠨ ᠭᠠᠵᠠᠷ ᠢ᠋ᠶ᠋ᠠᠷ ᠴᠢᠷᠦᠭᠦᠯᠦᠨ ᠣᠷᠣᠭᠰᠢ ᠶᠠᠪᠤᠬᠤ ᠳ᠋ᠤ᠌ ᠨᠥᠭᠦᠭᠡ ᠬᠣᠶᠠᠷ ᠨᠢ ᠰᠡᠭᠦᠳᠡᠷ ᠮᠡᠲᠦ ᠳᠠᠭᠠᠬᠤ ᠪᠥᠭᠡᠳ ᠬᠡᠳᠦᠨ ᠦᠭᠡ ᠬᠡᠯᠡᠬᠦ ᠳ᠋ᠦ᠍ᠨᠢ ᠰᠸᠯᠸᠳᠢᠲᠦ ᠨᠣᠶᠠᠨ ᠣᠭᠯᠣ ᠦᠰᠦᠷᠦᠨ ᠡᠮᠦᠨᠡ ᠨᠢ ᠣᠴᠢᠭᠠᠳ᠂ ᠰᠢᠨᠠ ᠳ᠋ᠠᠭᠠᠨ ᠨᠠᠮᠠᠨᠴᠢᠯᠠᠨ ᠱᠣᠩ ᠤ᠋ᠨ ᠮᠣᠳᠣ ᠰᠢᠭ᠋ ᠭᠣᠵᠣᠢᠨ ᠵᠣᠭᠰᠣᠯᠠ᠃ ᠬᠠᠷᠢᠭᠤ ᠳ᠋ᠤᠨᠢ ᠵᠣᠣ ᠴᠢ ᠮᠢᠨ ᠨᠣᠶᠠᠨ ᠨᠠᠮᠠᠨᠴᠢᠯᠠᠭᠰᠠᠨ ᠴᠦ᠍ ᠦᠭᠡᠢ ᠪᠦᠬᠦ ᠲᠡᠩᠬᠡ ᠪᠡᠷ ᠢ᠋ᠶ᠋ᠡᠨ ᠬᠠᠰᠬᠢᠷᠤᠨ ᠵᠠᠨᠤᠵᠤ ᠪᠠᠢᠨ ᠪᠠᠢᠨ ᠳᠠᠪᠰᠢᠯᠠᠪᠠ᠃ ᠰᠸᠯᠸᠳᠢᠲᠦ ᠨᠣᠶᠠᠨ ᠪᠣᠯ ᠥᠪᠡᠷ ᠢ᠋ᠶ᠋ᠡᠨ ᠴᠠᠭ ᠢᠮᠠᠭᠲᠠ ᠪᠤᠰᠤᠳ ᠢ᠋ ᠠᠭᠠᠰᠢᠯᠠᠨ ᠠᠶᠤᠯᠭᠠᠨ ᠰᠦᠷᠳᠡᠭᠦᠯᠵᠦ ᠶᠠᠪᠤᠳᠠᠭ ᠬᠡᠴᠡᠭᠦᠦ ᠡᠷᠡ ᠠᠲᠠᠯᠠ ᠪᠠᠨ ᠲᠡᠭᠦᠨ ᠦ᠌ ᠡᠮᠦᠨᠡ ᠭᠠᠭᠴᠠ ᠴᠦ᠍ ᠦᠭᠡ ᠦᠭᠡᠢ᠂ ᠵᠥᠪᠬᠡᠨ ᠰᠦᠷ ᠪᠠᠷᠠ ᠪᠠᠨ ᠠᠯᠲᠠᠨ ᠰᠤᠯᠪᠠᠢᠨ ᠵᠣᠭᠰᠣᠨᠠ᠃ ᠳ᠋ᠠᠨᠽᠠᠨ ᠲᠡᠷᠡ ᠪᠠᠢᠳᠠᠯ ᠢ᠋ ᠨᠠᠷᠢᠪᠴᠢᠯᠠᠨ ᠠᠵᠢᠭᠯᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠄
— ᠦᠭᠡᠢ ᠲᠠ ᠮᠢᠨᠢ ᠲᠡᠭᠦᠨ ᠢ᠋ ᠬᠠᠷᠠᠭᠠᠴᠢ! ᠡᠨᠡ ᠴᠦ᠍ ᠯᠠᠪ ᠪᠦᠭᠦᠳᠡ ᠶ᠋ᠢᠨ ᠨᠣᠶᠠᠨ ᠪᠠᠢᠬᠠ ᠠ᠋ ᠭᠡᠵᠦ ᠨᠥᠬᠥᠳ ᠲᠡᠭᠡᠨ ᠰᠢᠪᠡᠨᠡᠪᠡ᠃ ᠳᠣᠷᠵᠢ ᠶᠡᠬᠡ ᠨᠣᠶᠠᠨ ᠠ᠋ᠴᠠ ᠠᠶᠤᠨ ᠰᠦᠷᠳᠡᠭᠰᠡᠨ ᠵᠦᠢᠯ ᠦᠭᠡᠢ᠂ ᠭᠠᠭᠴᠠ ᠬᠦ᠌ ᠰᠸᠯᠸᠳᠢ ᠲᠡᠢ ᠨᠣᠶᠠᠨ ᠢ᠋ ᠳᠠᠪᠠᠯᠠᠨ᠂ ᠬᠠ ᠬᠠ ᠢᠨᠢᠶᠡᠨ᠂
— ᠵᠠ ᠬᠠᠷᠢᠨ ᠪᠣᠯᠵᠤ ᠪᠠᠢᠨᠠ ᠳᠠ ᠭᠡᠪᠡ᠃ ᠬᠦᠷᠡᠯ ᠨᠢᠳᠦ ᠪᠡᠨ ᠲᠣᠮᠣ ᠪᠣᠯᠭᠠᠨ ᠰᠣᠴᠢᠵᠤ᠂ ᠳᠣᠷᠵᠢ ᠶ᠋ᠢ ᠲᠣᠬᠣᠢ ᠪᠠᠷ ᠢ᠋ᠶ᠋ᠠᠨ ᠶᠣᠪᠣᠷᠵᠤ᠄
— ᠠ᠋᠂ ᠴᠢ ᠢᠨᠠᠳᠤ ᠠᠮᠠ ᠪᠠᠨ! ᠡᠢᠮᠦ ᠶᠡᠬᠡ ᠨᠣᠶᠠᠨ ᠤ᠋ ᠳᠡᠷᠭᠡᠳᠡ ᠢᠩᠭᠢᠵᠦ ᠢᠨᠢᠶᠡᠵᠦ ᠶᠠᠭᠠᠬᠢᠵᠤ ᠪᠣᠯᠬᠤ ᠪᠣᠢ? ᠭᠡᠵᠦ ᠠᠶᠤᠭᠰᠠᠨ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠨᠣᠶᠠᠨ ᠢ᠋ ᠰᠢᠷᠳᠡᠪᠡ᠃
— ᠵᠠ ᠶᠠᠭᠤᠨ ᠤ᠋ ᠬᠠᠮᠢᠶᠠ! ᠡᠨᠡ ᠨᠣᠶᠠᠨ ᠬᠡᠴᠢᠨᠡᠨ ᠶᠡᠬᠡ ᠪᠣᠯᠪᠠᠴᠤ ᠶᠠᠮᠠᠷ ᠪᠢᠳᠡᠨ ᠦ᠌ ᠨᠣᠶᠠᠨ ᠪᠢᠰᠢ ᠭᠡᠵᠦ ᠳᠣᠷᠵᠢ ᠶ᠋ᠢᠨ ᠤᠴᠠᠭᠠᠷᠯᠠᠨ ᠬᠡᠯᠡᠬᠦ ᠳ᠋ᠦ᠍᠂ ᠬᠦᠷᠡᠯ ᠰᠠᠨᠳᠤᠷᠤᠨ ᠴᠢᠬᠢᠨ ᠳ᠋ᠦ᠍ᠨᠢ ᠣᠢᠷᠠᠲᠤᠵᠤ᠄
— ᠦᠭᠡᠢ ᠴᠢ ᠶᠠᠮᠠᠷ ᠪᠣᠯᠪᠠᠴᠤ ᠡᠨᠡ ᠣᠯᠠᠨ ᠤ᠋ ᠠᠶᠤᠨ ᠰᠦᠷᠳᠡᠵᠦ ᠪᠠᠢᠭᠠ ᠶ᠋ᠢ ᠬᠠᠷᠠ ᠭᠡᠯᠡ᠃ ᠦᠨᠡᠬᠡᠷ ᠣᠷᠴᠢᠨ ᠲᠣᠭᠣᠷᠢᠨ ᠤ᠋ ᠣᠯᠠᠨ ᠢ᠋ ᠠᠵᠢᠬᠤ ᠳ᠋ᠤ᠌ ᠠᠶᠤᠨ ᠰᠦᠷᠳᠡᠭᠡ ᠦᠭᠡᠢ ᠶᠠᠭᠤᠮᠠ ᠨᠢᠭᠡ ᠴᠦ᠍ ᠠᠯᠠᠭᠠ ᠭᠠᠭᠴᠠ ᠬᠦ᠌ ᠵᠣᠷᠢᠭ ᠲᠡᠭᠦᠯᠳᠡᠷ ᠪᠠᠢᠬᠤ ᠠ᠋ᠴᠠ ᠦᠷᠭᠦᠯᠵᠢᠯᠡᠨ ᠨᠦᠵᠢᠭᠢᠨᠡᠵᠦ ᠪᠠᠢᠭᠠ ᠦᠬᠡᠷ ᠫᠤᠤ ᠬᠠᠷᠢᠨ ᠴᠦ᠍《ᠣᠳᠣ ᠪᠢ ᠴᠢᠮᠠ ᠲᠠᠢ ᠶᠠᠷᠢᠶᠠ ᠲᠠᠢ ᠳᠠ》 ᠭᠡᠵᠦ ᠬᠡᠳᠡᠷᠯᠡᠬᠦ ᠮᠡᠲᠦ ᠤᠯᠠᠮ ᠢ᠋ᠶ᠋ᠠᠷ ᠴᠢᠩᠭᠠᠷᠠᠨ ᠳᠤᠤᠭᠠᠷᠴᠤ ᠪᠠᠢᠭᠰᠠᠨ ᠪᠥᠭᠡᠳ ᠭᠡᠨᠡᠳᠲᠡ ᠠᠭᠠᠷ ᠳᠣᠩᠰᠣᠯᠤᠨ ᠭᠢᠩᠰᠢᠨ ᠣᠯᠢᠬᠤ ᠴᠢᠮᠡᠭᠡ ᠭᠠᠷᠤᠭᠰᠠᠨ ᠢ᠋ᠶ᠋ᠠᠨ ᠫᠢᠩ ᠪᠠᠭᠤᠨ ᠴᠢᠬᠢ ᠳᠦᠯᠡᠢᠷᠡᠪᠡ᠃ ᠢᠩᠭᠢᠬᠦ ᠳ᠋ᠦ᠍ ᠠᠶᠤᠨ ᠰᠣᠴᠢᠬᠤ ᠦᠭᠡᠢ ᠠᠮᠢᠲᠠᠨ ᠶᠣᠰᠣᠲᠠᠢ ᠦᠭᠡᠢ ᠪᠢᠯᠡ᠃ ᠡᠪᠬᠡᠷᠡᠨ ᠬᠡᠪᠲᠡᠵᠦ ᠪᠠᠢᠭᠰᠠᠨ ᠲᠡᠮᠡᠭᠡ ᠬᠦᠷᠲᠡᠯᠡ᠂ ᠭᠠᠪ ᠭᠠᠪ ᠭᠤᠪ ᠳᠤᠤᠭᠠᠷᠤᠨ ᠪᠣᠰᠤᠨ ᠬᠠᠷᠠᠢᠯᠠ᠃ ᠭᠤᠷᠪᠠᠨ ᠵᠡᠷᠭᠡ ᠣᠨᠢ ᠬᠣᠯᠪᠣᠨ ᠫᠤᠤᠳᠠᠭᠰᠠᠨ ᠦᠬᠡᠷ ᠫᠤᠤ ᠶ᠋ᠢᠨ ᠰᠤᠮᠤ ᠣᠢᠷᠠᠬᠠᠨ ᠰᠠᠭᠠᠬᠠᠯᠲᠠ ᠶ᠋ᠢᠨ ᠭᠠᠵᠠᠷ ᠪᠠᠢᠭᠰᠠᠨ ᠬᠡᠰᠡᠭ ᠬᠥᠮᠦᠰ ᠳᠡᠭᠡᠷᠡ ᠪᠠᠭᠤᠭᠰᠠᠨ ᠠᠵᠢ᠃ ᠤᠭ ᠭᠠᠵᠠᠷ ᠤ᠋ᠨ ᠰᠢᠷᠣᠢ ᠣᠷᠭᠢᠯᠤᠭᠰᠠᠨ ᠬᠠᠷᠠ ᠤᠲᠤᠭᠠ ᠲᠠᠢ ᠬᠣᠯᠢᠯᠳᠤᠨ ᠳᠡᠭᠡᠭᠰᠢ ᠰᠢᠢᠳᠦᠭᠳᠡᠬᠦ ᠳ᠋ᠦ᠍ ᠳᠣᠣᠷᠠ ᠨᠢ ᠤᠨᠠᠭᠰᠠᠨ᠂ ᠮᠥᠯᠬᠥᠭᠰᠡᠨ᠂ ᠵᠢᠭᠤᠲᠠᠭᠰᠠᠨ᠂ ᠵᠢᠭᠤᠲᠠᠭᠠᠳ ᠣᠩᠬᠣᠯᠢᠳᠤᠨ ᠤᠨᠠᠵᠤ ᠪᠠᠢᠭᠠ ᠬᠥᠮᠦᠰ ᠡᠳᠦᠢ ᠲᠡᠳᠦᠢ ᠪᠡᠷ ᠦᠵᠡᠭᠳᠡᠯᠡ᠃ ᠶᠡᠷᠦ ᠡᠨᠡ ᠬᠡᠷᠡᠭ ᠶᠡᠬᠡ ᠨᠣᠶᠠᠨ ᠤ᠋ ᠦᠢᠯᠡ ᠠᠵᠢᠯᠯᠠᠭᠠ ᠲᠠᠢ ᠬᠡᠴᠢᠨᠡᠨ ᠬᠣᠯᠪᠣᠭᠳᠠᠯ ᠲᠠᠢ ᠪᠣᠯᠬᠤ ᠶ᠋ᠢ ᠬᠡᠨ ᠮᠡᠳᠡᠯᠡ᠃ ᠮᠣᠷᠢᠨ ᠳ᠋ᠠᠭᠠᠨ ᠤᠬᠤᠰᠬᠢᠨ ᠭᠠᠷᠤᠭᠠᠳ ᠠᠷᠤ ᠥᠪᠥᠷ ᠦ᠋ᠨ ᠢ᠋ᠶ᠋ᠡᠨ ᠳᠠᠭᠠᠭᠤᠯᠢ ᠨᠤᠭᠤᠳ ᠢ᠋ ᠬᠣᠢᠨᠠ ᠪᠠᠨ ᠬᠠᠶᠠᠨ ᠳᠠᠪᠬᠢᠪᠠ᠃ ᠤᠷᠢᠲᠤ ᠲᠠᠯᠠ ᠳ᠋ᠤᠨᠢ ᠬᠣᠶᠠᠳᠠᠬᠢ ᠤᠳᠠᠭᠠ ᠶ᠋ᠢᠨ ᠰᠤᠮᠤ ᠪᠠᠭᠤᠨ ᠳᠡᠯᠪᠡᠷᠡᠬᠦ ᠳ᠋ᠦ᠍ ᠨᠣᠶᠠᠨ ᠠᠵᠢᠭ ᠦᠭᠡᠢ ᠳᠠᠭᠠᠷᠢᠨ ᠭᠠᠷᠪᠠ᠃ ᠳᠣᠷᠵᠢ ᠲᠡᠭᠦᠨ ᠢ᠋ ᠨᠢᠳᠦ ᠰᠠᠯᠭᠠᠯ ᠦᠭᠡᠢ ᠰᠢᠷᠲᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠄
— ᠠ ᠳᠠ ᠡᠨᠡ ᠴᠦ᠍ ᠶᠣᠰᠣᠲᠠᠢ ᠨᠢᠭᠡ ᠨᠣᠶᠠᠨ ᠪᠠᠢᠨᠠ ᠳᠠ ᠭᠡᠵᠦ ᠪᠠᠬᠠᠳᠤᠨ ᠢᠨᠢᠶᠡᠪᠡ᠃
— ᠲᠡᠢᠮᠦ ᠠ᠋᠂ ᠨᠣᠶᠠᠨ ᠪᠣᠯᠬᠤ ᠶ᠋ᠢ ᠪᠣᠯᠪᠠ᠂ ᠡᠢᠮᠦ ᠨᠣᠶᠠᠨ ᠪᠣᠯᠪᠠᠯ ᠵᠦᠭᠡᠷ ᠪᠠᠢᠨᠠ ᠰᠢᠦ ᠭᠡᠵᠦ ᠳ᠋ᠠᠨᠽᠠᠨ ᠮᠥᠨ ᠢᠨᠢᠶᠡᠯᠡ᠃
ᠨᠣᠶᠠᠨ ᠤ᠋ ᠬᠣᠢᠨᠠ ᠠ᠋ᠴᠠ ᠯᠠᠭᠤᠰᠠᠨ ᠲᠡᠷᠭᠡ ᠨᠦ᠍ᠭᠦᠳ ᠬᠠᠭᠠᠰ ᠬᠤᠭᠤᠰ ᠠᠴᠢᠶᠠ ᠲᠠᠢ ᠤᠬᠠᠭᠠᠨ ᠵᠢᠯᠣᠭᠣ ᠦᠭᠡᠢ ᠳᠠᠪᠬᠢᠯᠳᠤᠪᠠ᠃ ᠭᠡᠲᠡᠯᠡ ᠰᠸᠯᠸᠳᠢᠲᠦ ᠨᠣᠶᠠᠨ ᠰᠠᠶᠢᠬᠠᠨ ᠤ᠋ ᠶᠡᠬᠡ ᠨᠣᠶᠠᠨ ᠳ᠋ᠤ᠌ ᠲᠠᠷᠢᠬᠢ ᠪᠠᠨ ᠡᠷᠭᠢᠲᠡᠯᠡ ᠵᠠᠩᠨᠠᠭᠤᠯᠤᠭᠰᠠᠨ ᠳ᠋ᠠᠭᠠᠨ ᠬᠣᠷᠣᠰᠬᠤ ᠮᠡᠲᠦ《ᠺᠤᠸᠠᠢ᠂ ᠺᠤᠸᠠᠢ ᠭᠡᠳᠡᠭ ᠢ᠋ᠶ᠋ᠡᠨ ᠬᠠᠷᠠ ᠲᠡᠩᠬᠡᠭᠡ ᠪᠡᠷ ᠢ᠋ᠶ᠋ᠡᠨ ᠬᠠᠰᠬᠢᠷᠤᠨ᠂ ᠲᠠᠰᠢᠭᠤᠷ ᠭᠢᠯᠠᠯᠵᠠᠭᠤᠯᠵᠤ ᠳᠠᠭᠠᠯᠳᠤᠨ ᠶᠠᠪᠤᠳᠠᠭ ᠬᠥᠮᠦᠰ ᠢ᠋ᠶ᠋ᠡᠨ ᠲᠡᠮᠡᠭᠡ ᠤᠷᠤᠭᠤ ᠭᠦᠶᠦᠯᠭᠡᠪᠡ᠃ ᠵᠢᠩᠴᠢᠳ ᠲᠡᠢ ᠳᠣᠬᠢᠶᠠ ᠪᠠᠷ ᠶᠠᠷᠢᠯᠴᠠᠳᠠᠭ ᠢ᠋ᠶ᠋ᠠᠨ ᠮᠠᠷᠲᠠᠨ ᠰᠢᠭᠤᠳ ᠬᠢᠲᠠᠳ ᠢ᠋ᠶ᠋ᠠᠷ ᠵᠠᠩᠳᠦᠴᠢᠨᠠ᠃ ᠡᠢᠨ ᠬᠦ᠌ ᠶᠡᠬᠡ ᠪᠠᠭᠠ ᠨᠣᠶᠠᠨ ᠤ᠋ ᠤᠬᠠᠭᠠᠨ ᠵᠢᠯᠣᠭᠣ ᠦᠭᠡᠢ ᠰᠠᠨᠳᠤᠷᠤᠭᠰᠠᠨ ᠨᠢ ᠰᠤᠮᠤ ᠬᠡᠷᠡᠭᠯᠡᠯ ᠲᠠᠲᠠᠭᠳᠠᠭᠰᠠᠨ ᠠ᠋ᠴᠠ ᠪᠣᠯᠵᠤ ᠪᠠᠢᠭᠠ ᠨᠢ ᠲᠣᠳᠣᠷᠬᠠᠢ ᠪᠠᠢᠭᠰᠠᠨ ᠪᠢᠯᠡ᠃ ᠵᠢᠩᠴᠢᠳ ᠲᠤᠰ ᠪᠦᠷᠢ ᠶ᠋ᠢᠨ ᠢ᠋ᠶ᠋ᠡᠨ ᠤᠨᠤᠭᠠ ᠲᠡᠮᠡᠭᠡ ᠶ᠋ᠢ ᠶᠠᠭᠠᠷᠠᠨ ᠬᠡᠪᠲᠡᠭᠦᠯᠵᠦ ᠲᠡᠭᠡᠭᠡᠰᠢ ᠪᠡᠨ ᠪᠠᠭᠤᠯᠭᠠᠵᠤ ᠬᠠᠶᠠᠭᠠᠳ ᠶᠠᠭᠠᠷᠠᠨ ᠪᠣᠰᠬᠠᠵᠤ᠂ ᠪᠦᠬᠦ ᠲᠡᠮᠡᠭᠡ ᠪᠡᠨ ᠬᠠᠢᠷᠠ ᠨᠠᠢᠷ ᠦᠭᠡᠢ ᠰᠢᠪᠬᠠᠳᠠᠨ ᠭᠦᠶᠦᠯᠭᠡᠪᠡ᠃ ᠤᠷᠢᠳᠤᠬᠢ ᠬᠥᠪᠡᠭᠡ ᠶ᠋ᠢ ᠬᠦᠷᠬᠦ ᠵᠠᠭᠤᠷᠠ ᠥᠨᠥᠬᠢ ᠠᠶᠤᠮᠰᠢᠭᠲᠤ ᠢᠷᠭᠠᠯ ᠤ᠋ᠨ ᠰᠤᠮᠤ ᠨᠤᠭᠤᠳ ᠡᠨᠳᠡ ᠲᠡᠨᠳᠡ ᠦᠭᠡᠢ ᠪᠠᠭᠤᠨ᠂ ᠭᠠᠵᠠᠷ ᠤ᠋ᠨ ᠬᠥᠷᠥᠰᠥ ᠶ᠋ᠢ ᠳᠣᠩᠰᠣᠯᠭᠠᠨ ᠳᠠᠷᠭᠢᠯᠤᠭᠤᠯᠤᠭᠰᠠᠭᠠᠷ ᠪᠠᠢᠪᠠ᠃ ᠬᠥᠪᠡᠭᠡᠨ ᠳᠡᠭᠡᠷᠡ ᠭᠠᠷᠤᠨ ᠡᠴᠦᠰ ᠦ᠋ᠨ ᠤᠳᠠᠭᠠ ᠡᠷᠭᠢᠨ ᠬᠠᠷᠠᠬᠤ ᠳ᠋ᠤ᠌ ᠠᠴᠢᠶᠠ ᠪᠠᠭᠤᠯᠭᠠᠵᠤ ᠪᠠᠢᠭᠰᠠᠨ ᠭᠠᠵᠠᠷ ᠤ᠋ᠨ ᠰᠢᠷᠣᠢ ᠰᠢᠳᠡᠭᠳᠡᠨ ᠮᠠᠨᠠᠷᠠᠵᠤ ᠪᠣᠢ ᠦᠵᠡᠭᠳᠡᠨᠡ᠃ ᠡᠢᠮᠦ ᠳ᠋ᠦ᠍ ᠬᠥᠮᠦᠨ ᠪᠦᠷᠢ ᠲᠡᠨᠳᠡ ᠡᠴᠡ ᠶᠠᠭᠠᠷᠠᠨ ᠬᠥᠳᠡᠯᠦᠭᠰᠡᠨ ᠳ᠋ᠡᠭᠡᠨ ᠪᠠᠶᠠᠷᠯᠠᠪᠠ᠃ ᠬᠥᠪᠡᠭᠡᠨ ᠦ᠌ ᠴᠢᠨᠠᠳᠤ ᠤᠷᠤᠭᠤ ᠣᠷᠣᠬᠤ ᠳ᠋ᠤ᠌ ᠰᠡᠳᠬᠢᠯ ᠬᠡᠳᠦᠢᠨ ᠲᠠᠢᠪᠤᠰᠢᠷᠠᠭᠰᠠᠨ ᠪᠣᠯᠪᠠᠴᠤ ᠥᠨᠥᠬᠢ ᠵᠢᠷᠦᠬᠡ ᠨᠢ ᠮᠥᠨ ᠠᠮᠠ ᠪᠠᠷ ᠭᠠᠷᠬᠤ ᠭᠡᠵᠦ ᠪᠠᠢᠨᠠ ᠶᠤᠮ ᠰᠢᠭ᠋ ᠣᠪᠣᠯᠵᠠᠭᠰᠠᠭᠠᠷ ᠪᠠᠢᠯᠠ᠃
ᠭᠡᠲᠡᠯᠡ ᠰᠸᠯᠸᠳᠢᠲᠦ ᠨᠣᠶᠠᠨ ᠶᠠᠭᠠᠷᠠᠭᠰᠠᠭᠠᠷ ᠠᠵᠢ᠃
《ᠺᠤᠸᠠᠢ᠂ ᠺᠤᠸᠠᠢ》 ᠬᠠᠰᠬᠢᠷᠬᠤ ᠨᠢ ᠦᠷᠭᠦᠯᠵᠢᠯᠡᠭᠰᠡᠭᠡᠷ ᠪᠠᠢᠯᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠡᠭᠷᠢ ᠡᠵᠢ