ᠪᠠᠲᠤ ᠬᠠᠭᠠᠨ 1-08ᠬᠥᠶᠦᠭ ᠬᠠᠭᠠᠨ ᠤ᠋ ᠪᠠᠩᠵᠠ Бат хаан
304ᠨᠠᠢ᠍ᠮᠠ ᠬᠥᠶᠦᠭ ᠬᠠᠭᠠᠨ ᠤ᠋ ᠪᠠᠩᠵᠠ
ᠴᠢᠩᠭᠢᠰ ᠬᠠᠭᠠᠨ ᠤ᠋ ᠠᠴᠢ ᠪᠥᠭᠡᠳ ᠶᠡᠬᠡ ᠡᠵᠡᠨ ᠬᠠᠭᠠᠨ ᠥᠭᠡᠳᠡᠢ ᠶ᠋ᠢᠨ ᠬᠦᠦ ᠬᠣᠩ ᠲᠠᠢᠵᠢ ᠭᠦᠶᠦᠭ ᠬᠠᠭᠠᠨ ᠰᠢᠭᠨᠡᠺ ᠬᠣᠲᠠ ᠶ᠋ᠢᠨ ᠵᠠᠬᠢᠷᠤᠯ ᠤ᠋ᠨ ᠣᠷᠳᠣᠨ ᠠ᠋ᠴᠠ ᠭᠡᠨᠡᠳᠲᠡ ᠭᠠᠷᠴᠤ ᠬᠣᠲᠠ ᠠ᠋ᠴᠠ ᠬᠣᠯᠠ ᠬᠡᠭᠡᠷᠡ ᠲᠠᠯᠠ ᠶ᠋ᠢᠨ ᠳᠣᠪᠣᠴᠠᠭ ᠳᠡᠭᠡᠷᠡ ᠬᠠᠷᠠ ᠬᠦᠷᠡᠩ ᠠᠰᠠᠷ ᠢ᠋ᠶ᠋ᠠᠨ ᠪᠠᠷᠢᠭᠤᠯᠵᠠᠢ᠃ ᠠᠰᠠᠷ ᠳᠣᠲᠣᠷᠠ ᠠ᠋ᠴᠠ ᠴᠡᠷᠢᠭ ᠲᠠᠰᠤᠷᠠᠯᠲᠠ ᠦᠭᠡᠢ ᠴᠤᠪᠤᠷᠠᠨ ᠲᠤᠰ ᠲᠤᠰ ᠬᠦᠷᠢᠶᠡ ᠪᠠᠢᠭᠤᠯᠬᠤ ᠪᠠᠢᠳᠠᠯ ᠨᠢ ᠬᠥᠨᠳᠡᠢ ᠡᠴᠡ ᠢᠯᠡ ᠦᠵᠡᠭᠳᠡᠨᠡ᠃ ᠳᠣᠷᠣᠨᠠ ᠳ᠋ᠠᠬᠢᠨ ᠤ᠋ ᠲᠡᠦᠬᠡᠨ ᠳ᠋ᠦ᠍ ᠥᠭᠦᠯᠡᠭᠰᠡᠨ ᠨᠢ᠄ 《ᠡᠨᠡ ᠥᠷᠥᠨᠡ ᠵᠦᠭ ᠦ᠋ᠨ ᠠᠶᠠᠨ ᠲᠡᠢᠨ ᠳ᠋ᠦ᠍ ᠵᠢᠩᠬᠢᠨᠢ ᠮᠣᠩᠭᠣᠯ(ᠲᠣᠷᠭᠠᠨ ᠴᠡᠷᠢᠭ) ᠳᠥᠷᠪᠡᠨ ᠮᠢᠩᠭᠠ ᠣᠷᠴᠢᠮ᠂ ᠲᠠᠲ᠋ᠠᠷ ᠭᠤᠷᠪᠠᠨ ᠲᠦᠮᠡᠭᠡᠳ ᠣᠷᠴᠢᠮ ᠶᠠᠪᠤᠭᠰᠠᠨ ᠨᠢ ᠴᠡᠷᠢᠭ ᠦ᠋ᠨ ᠭᠣᠣᠯ ᠨᠢ ᠪᠣᠯᠬᠤ ᠮᠣᠩᠭᠣᠯ ᠲᠠᠲ᠋ᠠᠷ ᠬᠣᠶᠠᠷ ᠪᠥᠭᠡᠳ ᠴᠠᠰᠢ ᠶᠠᠪᠤᠬᠤ ᠳᠣᠳᠣᠮ ᠨᠡᠮᠡᠭᠳᠡᠨ ᠪᠠᠢᠭᠰᠠᠨ ᠪᠤᠰᠤᠳ ᠣᠪᠣᠭᠲᠠᠨ ᠤ᠋ ᠬᠣᠶᠠᠷ— ᠭᠤᠷᠪᠠᠨ ᠵᠠᠭᠤᠨ ᠮᠢᠩᠭᠠᠨ ᠮᠣᠷᠢᠲᠤ ᠴᠡᠷᠢᠭ ᠨᠡᠢᠯᠡᠵᠡᠢ᠃ ᠢᠯᠠᠩᠭᠤᠶᠠ ᠺᠢᠫᠴᠡᠺ ᠦ᠋ᠳ ᠣᠯᠠᠨ ᠪᠠᠢᠯᠠ᠃ ᠡᠨᠡ ᠨᠢ ᠣᠳᠣ ᠴᠠᠭ ᠤ᠋ᠨ ᠺᠠᠽᠠᠭ᠂ ᠺᠢᠷᠬᠢᠰ ᠵᠡᠷᠭᠡ ᠪᠤᠰᠤᠳ ᠲᠦᠷᠺ ᠦ᠋ᠨ ᠣᠪᠣᠭ ᠤ᠋ᠨ ᠨᠡᠭᠦᠳᠡᠯᠴᠢᠨ ᠠᠢᠮᠠᠭ ᠤ᠋ᠨ ᠡᠪᠦᠭᠡᠳ ᠳᠡᠭᠡᠳᠦᠰ ᠢ᠋ ᠨᠡᠷᠡᠯᠡᠵᠦ ᠪᠠᠢᠭᠰᠠᠨ ᠪᠣᠯᠤᠯᠲᠠᠢ》(ᠭᠡᠵᠡᠢ)᠃
ᠭᠦᠶᠦᠭ ᠬᠠᠭᠠᠨ ᠤ᠋ ᠠᠰᠠᠷ ᠢ᠋ ᠲᠣᠭᠣᠷᠢᠨ ᠳᠥᠷᠪᠡᠨ ᠵᠠᠭᠤᠨ ᠭᠡᠷ ᠨᠢᠭᠲᠠ ᠪᠦᠰᠡᠯᠡᠨ ᠬᠦᠷᠢᠶᠡᠯᠡᠵᠡᠢ᠃ ᠲᠡᠳᠡᠨ ᠦ᠌ ᠳᠣᠲᠣᠷᠠ ᠬᠡᠭᠡᠷᠡ ᠶ᠋ᠢᠨ ᠹᠧᠣᠳᠠᠯ ᠢᠵᠠᠭᠤᠷᠲᠠᠨ ᠤ᠋ ᠭᠠᠷᠤᠯ ᠲᠠᠢ ᠲᠣᠷᠭᠤᠳ ᠰᠢᠭᠰᠢᠮᠡᠯ ᠴᠡᠷᠢᠭ ᠣᠷᠣᠯᠴᠠᠵᠠᠢ᠃ ᠬᠠᠭᠠᠨ ᠤ᠋ ᠮᠣᠷᠢᠳ ᠡᠨᠡ ᠭᠡᠷ ᠦ᠋ᠨ ᠬᠦᠷᠢᠶᠡᠨ ᠳᠣᠲᠣᠷᠠ ᠪᠠᠢᠯᠠ᠂ ᠲᠡᠳᠡᠨ ᠢ᠋ ᠬᠢᠴᠢᠶᠡᠩᠭᠦᠢ ᠭᠠᠮᠨᠠᠨ ᠠᠷᠠᠴᠢᠯᠠᠵᠤ ᠰᠡᠭᠦᠯ ᠴᠢᠬᠢ ᠬᠣᠶᠠᠷ ᠠ᠋ᠴᠠ ᠪᠤᠰᠤᠳ ᠢ᠋ ᠨᠢ ᠦᠵᠡᠭᠳᠡᠬᠦ ᠦᠭᠡᠢ ᠪᠣᠯᠲᠠᠯᠠ ᠨᠡᠮᠨᠡᠨ ᠬᠤᠴᠢᠳᠠᠭ ᠪᠠᠢᠵᠠᠢ᠃ ᠭᠦᠶᠦᠭ ᠬᠠᠭᠠᠨ ᠠᠩ ᠠᠪᠠᠯᠠᠬᠤ ᠳ᠋ᠠᠭᠠᠨ ᠮᠣᠷᠢᠨ ᠤ᠋ ᠬᠤᠷᠳᠤ ᠭᠠᠪᠰᠢᠭᠠᠢ ᠴᠢᠳᠠᠯ ᠬᠣᠶᠠᠷ ᠢ᠋ ᠣᠨᠴᠣᠭᠣᠢ ᠡᠷᠬᠢᠮᠯᠡᠨᠡ᠃ ᠭᠦᠶᠦᠭ᠂ ᠡᠪᠦᠭᠡ ᠡᠴᠢᠭᠡ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠲᠣᠭᠲᠠᠭᠠᠭᠰᠠᠨ ᠲᠦᠭᠡᠮᠡᠯ ᠵᠢᠷᠤᠮ ᠢ᠋ ᠨᠢᠭᠡᠳ ᠨᠢᠭᠡᠨ ᠦᠭᠡᠢ ᠳᠠᠭᠤᠷᠢᠶᠠᠬᠤ ᠶ᠋ᠢ ᠡᠷᠡᠮᠡᠯᠵᠡᠨ ᠠᠰᠠᠷ ᠤ᠋ᠨ ᠢ᠋ᠶ᠋ᠠᠨ ᠳᠡᠷᠭᠡᠳᠡ ᠥᠨᠳᠥᠷ ᠡᠰᠢᠲᠡᠢ ᠲᠠᠪᠤᠨ ᠥᠨᠴᠥᠭᠲᠦ ᠬᠠᠷᠠ ᠲᠤᠭ ᠬᠠᠳᠬᠤᠭᠰᠠᠨ ᠤ᠋ ᠳᠡᠭᠡᠷᠡ ᠮᠣᠩᠭᠣᠯ ᠤ᠋ᠨ ᠠᠶᠠᠨ ᠲᠡᠢᠨ ᠦ᠌ ᠲᠣᠭᠰᠢᠨ ᠡᠵᠡᠨ ᠲᠡᠢᠨ ᠦ᠌ ᠰᠦᠯᠳᠡ ᠳᠡᠭᠡᠷᠡ ᠠᠳᠤᠭᠤᠰᠤ ᠲᠡᠷᠢᠭᠦᠲᠡᠢ ᠪᠥᠭᠡᠳ ᠮᠣᠷᠢ ᠤᠨᠤᠭᠰᠠᠨ ᠰᠠᠬᠢᠭᠤᠰᠤ ᠶ᠋ᠢ ᠠᠯᠲᠠᠨ ᠱᠠ ᠪᠠᠷ ᠤᠶᠠᠵᠠᠢ᠃ ᠪᠥᠬᠡ ᠨᠦ᠍ᠭᠦᠳ ᠦ᠋ᠨ ᠥᠭᠦᠯᠡᠳᠡᠭ ᠨᠢ ᠰᠦᠯᠳᠡ ᠲᠩᠷᠢ᠂ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠲᠡᠢᠨ ᠳ᠋ᠦ᠍ ᠮᠣᠷᠳᠠᠬᠤ ᠳ᠋ᠤ᠌ ᠬᠠᠭᠠᠴᠠᠯ ᠦᠭᠡᠢ ᠰᠠᠬᠢᠵᠤ ᠶᠢᠷᠲᠢᠨᠴᠦ ᠶ᠋ᠢ ᠳᠣᠩᠰᠣᠯᠤᠭᠤᠯᠬᠤ ᠢᠯᠠᠯᠲᠠ ᠳ᠋ᠤ᠌ ᠬᠦᠷᠭᠡᠳᠡᠭ᠃ ᠡᠭᠦᠨ ᠦ᠌ ᠤᠴᠢᠷ ᠬᠠᠷᠠ ᠨᠢᠳᠦ ᠲᠡᠢ ᠲᠤᠩ ᠴᠠᠭᠠᠨ ᠡᠮᠨᠢᠭ ᠠᠵᠢᠷᠭᠠ᠂ ᠴᠢᠩᠭᠢᠰ ᠬᠠᠭᠠᠨ ᠢ᠋ ᠦᠷᠭᠦᠯᠵᠢ ᠳᠠᠭᠠᠵᠤ ᠶᠠᠪᠤᠪᠠ ᠭᠡᠨᠡ᠃ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠠᠴᠢ ᠭᠦᠶᠦᠭ ᠬᠠᠭᠠᠨ ᠪᠠᠰᠠ ᠲᠡᠷᠡᠴᠢᠯᠡᠨ ᠠᠰᠠᠷ ᠤ᠋ᠨ ᠳᠡᠷᠭᠡᠳᠡ ᠡᠮᠨᠢᠭ ᠴᠠᠭᠠᠨ ᠠᠵᠢᠷᠭᠠ ᠶ᠋ᠢ ᠪᠠᠢᠯᠭᠠᠵᠤ ᠲᠡᠭᠦᠨ ᠢ᠋ ᠨᠢ ᠬᠣᠶᠠᠷ ᠪᠥᠬᠡ ᠢᠮᠠᠭᠲᠠ ᠠᠷᠠᠴᠢᠯᠠᠨ ᠮᠠᠯᠯᠠᠨᠠ᠃ ᠬᠠᠷᠠ ᠬᠦᠷᠡᠩ ᠠᠰᠠᠷ ᠤ᠋ᠨ ᠡᠮᠦᠨᠡ ᠬᠣᠶᠠᠷ ᠮᠥᠩᠬᠡ ᠲᠦᠳᠡᠭ ᠨᠣᠴᠣᠵᠤ ᠬᠤᠩᠬᠠ ᠵᠡᠭᠦᠭᠰᠡᠨ ᠪᠥᠬᠡ ᠨᠠᠷ ᠪᠥᠰᠡᠨ ᠳ᠋ᠡᠭᠡᠨ ᠢᠰᠡᠭᠡᠢ ᠬᠡᠦᠬᠡᠯᠳᠡᠢ ᠬᠠᠪᠴᠢᠭᠤᠯᠵᠤ ᠭᠠᠯ ᠢ᠋ ᠲᠣᠭᠣᠷᠢᠨ ᠳᠡᠪᠬᠡᠴᠡᠨ ᠴᠣᠪᠬᠣᠴᠢᠨ ᠬᠡᠩᠭᠡᠷᠭᠡ ᠳᠡᠯᠡᠳᠴᠦ ᠪᠠᠢᠵᠠᠢ᠃
ᠳᠥᠷᠪᠡᠨ ᠮᠣᠩᠭᠣᠯ ᠬᠥᠮᠦᠨ ᠲᠠᠪᠴᠠᠩ ᠥᠭᠡᠳᠡ ᠠᠯᠭᠤᠷ ᠥᠭᠰᠥᠨ ᠮᠠᠢᠭ ᠬᠥᠯ ᠢ᠋ᠶ᠋ᠡᠨ ᠠᠯᠴᠠᠭᠨᠠᠭᠤᠯᠤᠨ ᠠᠷᠤ ᠳ᠋ᠠᠭᠠᠨ ᠨᠤᠮᠤ ᠠᠭᠰᠠᠭᠠᠳ ᠪᠥᠬᠥᠢᠨ ᠶᠠᠪᠤᠪᠠ᠃ ᠲᠦᠳᠡᠭ ᠦ᠋ᠨ ᠳᠡᠷᠭᠡᠳᠡ ᠣᠴᠢᠮᠠᠭᠴᠠ ᠪᠥᠬᠡ ᠨᠠᠷ ᠲᠸ᠋ ᠲᠣᠯᠣᠭᠠᠢ ᠪᠠᠨ ᠲᠣᠩᠭᠣᠢᠵᠤ ᠮᠥᠷᠭᠥᠬᠦ ᠳ᠋ᠦ᠍ᠨᠢ ᠬᠠᠷᠠ ᠰᠠᠨᠠᠭᠠ ᠬᠣᠣᠷᠲᠤ ᠪᠣᠳᠣᠯᠭᠠ ᠶ᠋ᠢ ᠨᠢ ᠤᠲᠤᠭᠠᠨ ᠤ᠋ ᠬᠠᠮᠲᠤ ᠵᠠᠢᠯᠠᠭᠤᠯᠬᠤ ᠶ᠋ᠢᠨ ᠲᠤᠯᠠᠳᠠ ᠲᠡᠳᠡ ᠵᠠᠯᠪᠠᠷᠢᠯ ᠢ᠋ ᠴᠢᠩᠭᠠ ᠤᠩᠰᠢᠨ ᠰᠠᠩ ᠤ᠋ᠨ ᠤᠲᠤᠭᠠ ᠪᠠᠷ ᠠᠷᠢᠭᠤᠯᠠᠪᠠ᠃ ᠠᠰᠠᠷ ᠤ᠋ᠨ ᠡᠭᠦᠳᠡᠨ ᠳ᠋ᠦ᠍ ᠬᠣᠶᠠᠷ ᠲᠣᠷᠭᠤᠳ ᠵᠢᠳᠠ ᠶ᠋ᠢ ᠵᠥᠷᠢᠯᠳᠦᠭᠦᠯᠦᠨ ᠰᠠᠭᠤᠭᠠᠳ ᠣᠷᠤᠭᠴᠢᠳ ᠬᠥᠰᠢᠭᠡ ᠶ᠋ᠢ ᠰᠤᠮᠤ ᠪᠠᠷ ᠰᠡᠮᠬᠡᠨ ᠰᠡᠬᠦᠬᠦ᠂ ᠪᠣᠱᠣᠭᠠᠨ ᠳ᠋ᠤ᠌ ᠬᠥᠯ ᠢ᠋ᠶ᠋ᠡᠨ ᠬᠦᠷᠭᠡᠬᠦ ᠦᠭᠡᠢ ᠪᠠᠢᠬᠤ ᠶ᠋ᠢ ᠬᠠᠷᠠᠭᠠᠯᠵᠠᠨᠠ᠃ ᠡᠰᠡ ᠲᠡᠭᠡᠪᠡᠯ ᠲᠩᠷᠢ ᠬᠢᠯᠢᠩᠯᠡᠵᠦ ᠡᠭᠦᠯᠡ ᠶ᠋ᠢᠨ ᠴᠢᠨᠠᠳᠤᠬᠢ ᠲᠣᠭᠰᠢᠨ ᠰᠠᠬᠢᠭᠤᠰᠤ ᠴᠠᠬᠢᠯᠭᠠᠨ ᠴᠠᠬᠢᠯᠤᠭᠤᠯᠤᠨ ᠠᠰᠠᠷ ᠤ᠋ᠨ ᠡᠵᠡᠨ ᠳ᠋ᠦ᠍ ᠠᠶᠤᠩᠭᠠ ᠪᠠᠭᠤᠯᠭᠠᠵᠤ ᠪᠣᠯᠵᠣᠰᠢ ᠦᠭᠡᠢ᠃ ᠵᠥᠷᠢᠯᠳᠦᠭᠦᠯᠦᠭᠰᠡᠨ ᠵᠢᠳᠠᠨ ᠤ᠋ ᠳᠡᠭᠡᠭᠦᠷ ᠴᠡᠷᠢᠭ ᠳᠡᠰ ᠳᠠᠷᠠᠭᠠ ᠪᠠᠷ ᠠᠯᠬᠤᠯᠠᠵᠤ ᠡᠪᠦᠳᠦᠭ ᠰᠥᠬᠥᠷᠡᠨ ᠳᠡᠯᠭᠡᠭᠰᠡᠨ ᠴᠠᠭᠠᠨ ᠢᠰᠡᠭᠡᠢ ᠳ᠋ᠦ᠍ ᠡᠷᠡᠦ ᠪᠡᠨ ᠬᠦᠷᠭᠡᠭᠡᠳ᠂
— ᠡᠷᠬᠢᠮ ᠳᠡᠭᠡᠳᠦᠰ ᠦ᠋ᠨ ᠠᠯᠳᠠᠷ ᠳᠠᠭᠤᠷᠢᠰᠴᠤ ᠢᠯᠠᠵᠤ ᠲᠠᠢᠯᠤᠨ ᠤᠷᠲᠤ ᠨᠠᠰᠤᠲᠠᠢ ᠪᠣᠯᠲᠤᠭᠠᠢ! ᠭᠡᠵᠦ ᠠᠢᠯᠠᠳᠬᠠᠬᠤ ᠳ᠋ᠤ᠌ ᠬᠠᠷᠢᠭᠤ ᠳ᠋ᠤᠨᠢ᠄
— ᠨᠠᠰᠢ ᠪᠠᠨ ᠣᠢᠷᠠᠳᠤᠭᠲᠤᠨ ᠭᠡᠵᠦ ᠰᠣᠨᠣᠰᠤᠭᠳᠠᠯᠠ᠃ ᠴᠡᠷᠢᠭ ᠦ᠋ᠨ ᠡᠷᠡᠰ ᠡᠪᠦᠳᠦᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠣᠷᠣᠭᠰᠢ ᠮᠦᠯᠬᠦᠰᠬᠢᠨ ᠪᠣᠰᠴᠠᠭᠠᠯᠠ᠃ ᠠᠯᠲᠠ ᠶᠠᠰᠤ ᠬᠣᠶᠠᠷ ᠢ᠋ᠶ᠋ᠠᠷ ᠤᠭᠠᠯᠵᠠ ᠭᠠᠷᠭᠠᠭᠰᠠᠨ ᠨᠠᠮᠬᠠᠨ ᠥᠷᠭᠡᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠲᠣᠮᠣ ᠭᠡᠳᠡᠰᠦ ᠲᠡᠢ ᠴᠡᠯᠴᠡᠭᠡᠷ ᠵᠠᠯᠠᠭᠤ ᠡᠷᠡ ᠵᠠᠪᠢᠯᠠᠨ ᠰᠠᠭᠤᠵᠠᠢ᠃ ᠤᠯᠠᠪᠤᠷ ᠰᠢᠷᠠ ᠮᠠᠯᠠᠭᠠᠢ ᠶ᠋ᠢᠨ ᠳᠡᠭᠡᠷᠡ ᠨᠢ ᠠᠷᠢᠭᠤᠨ ᠴᠠᠬᠤᠯᠠᠢ ᠶ᠋ᠢᠨ ᠬᠡᠰᠡᠭ ᠰᠠᠭᠰᠠᠭᠠᠷ ᠴᠠᠭᠠᠨ ᠥᠳᠥ ᠪᠣᠢ᠃ ᠡᠨᠡ ᠪᠣᠯ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠤᠭᠰᠠᠭᠠ ᠶ᠋ᠢᠨ ᠠᠴᠢ ᠶ᠋ᠢᠨ ᠲᠡᠮᠳᠡᠭ᠃ ᠬᠠᠨᠴᠤᠢ ᠦᠭᠡᠢ᠂ ᠠᠯᠲᠠᠨ ᠯᠤᠤ ᠲᠠᠢ ᠬᠦᠷᠡᠩ ᠲᠣᠷᠭᠠᠨ ᠳᠡᠪᠡᠯ᠂ ᠥᠨᠳᠥᠷ ᠲᠠᠬᠢᠷ ᠲᠣᠪᠬᠤ ᠲᠠᠢ ᠤᠯᠠᠭᠠᠨ ᠰᠠᠷᠢᠰᠤᠨ ᠱᠠᠬᠠᠢ ᠡᠮᠦᠰᠴᠡᠢ᠃ ᠰᠢᠷᠡᠭᠡᠨ ᠦ᠌ ᠳᠡᠭᠡᠷᠡ ᠪᠠᠷᠠᠭᠤᠨ ᠬᠠᠵᠠᠭᠤ ᠳ᠋ᠤᠨᠢ ᠡᠵᠡᠨ ᠦ᠌ ᠲᠡᠮᠳᠡᠭ ᠠᠯᠲᠠᠨ ᠲᠣᠨᠣᠭ ᠲᠠᠢ ᠲᠡᠮᠦᠷ ᠰᠢᠲᠠᠮ᠂ ᠵᠡᠭᠦᠨ ᠡᠲᠡᠭᠡᠳ ᠲᠤᠨᠢ ᠵᠠᠭᠠᠨ ᠤ᠋ ᠰᠣᠶᠣᠭᠠᠨ ᠤᠷᠲᠤ ᠪᠠᠩᠵᠠ ᠪᠠᠢᠵᠠᠢ᠃ ᠬᠥᠶᠦᠭ ᠬᠠᠭᠠᠨ ᠣᠨᠢᠭᠠᠷ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠳᠥᠷᠪᠡᠨ ᠮᠣᠩᠭᠣᠯ ᠤ᠋ᠨ ᠨᠢᠭᠤᠷ ᠢ᠋ ᠠᠵᠢᠭᠯᠠᠵᠤ᠄
— ᠲᠠᠨᠠᠷ ᠪᠠᠰᠠ ᠯᠠ ᠭᠠᠯᠠᠭᠤ ᠠᠳᠠᠯᠢ ᠬᠣᠭᠣᠰᠣᠨ ᠰᠠᠪᠠᠷ ᠲᠠᠢ ᠢᠷᠡᠪᠡ ᠤᠤ? ᠪᠦᠰᠡ ᠨᠢ ᠬᠠᠮᠢᠭᠠ ᠪᠣᠢ? ᠮᠠᠯᠠᠭᠠᠢ ᠨᠢ ᠠᠯᠢ ᠪᠣᠢ? ᠪᠠᠳᠮᠠᠷᠠᠭᠠ ᠲᠣᠪᠴᠢ ᠨᠢ ᠬᠠᠮᠢᠭᠠ ᠪᠠᠢᠨᠠ? ᠶᠠᠰᠤᠨ ᠪᠠᠩᠵᠠ ᠶ᠋ᠢ ᠪᠠᠷᠢᠵᠤ ᠲᠡᠳᠡ ᠨᠠᠷ ᠤ᠋ᠨ ᠬᠠᠴᠠᠷ ᠤᠷᠤᠭᠤ ᠵᠠᠨᠴᠢᠪᠠ᠃ ᠲᠡᠳᠡᠨ ᠦ᠌ ᠴᠢᠷᠠᠢ ᠨᠢ ᠬᠥᠷᠯᠢᠢ᠍ᠭᠡᠳ ᠬᠥᠳᠡᠯᠦᠯ ᠦᠭᠡᠢ ᠪᠠᠲᠤ ᠵᠣᠭᠰᠣᠵᠠᠭᠠᠨ ᠴᠣᠬᠢᠬᠤ ᠪᠦᠷᠢ ᠲᠣᠯᠣᠭᠠᠢ ᠨᠢ ᠥᠷᠭᠡᠨ ᠮᠥᠷᠥ ᠤᠷᠤᠭᠤ ᠪᠠᠨ ᠯᠠᠪ ᠰᠢᠭᠢᠳᠦᠨ ᠣᠷᠣᠬᠤ ᠮᠡᠲᠦ ᠦᠵᠡᠭᠳᠡᠯᠡ᠃ ᠳᠡᠯᠡᠬᠡᠢ ᠶ᠋ᠢᠨ ᠡᠵᠡᠨ ᠪᠢᠳᠡᠨ ᠢ᠋ ᠥᠷᠥᠰᠢᠶᠡᠨᠡ ᠭᠡᠵᠦ ᠨᠢᠭᠡᠨ ᠵᠡᠷᠭᠡ ᠥᠭᠦᠯᠡᠵᠦ ᠳᠠᠬᠢᠨ ᠢᠰᠡᠭᠡᠢ ᠳᠡᠭᠡᠷᠡ ᠨᠢᠭᠤᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠮᠥᠷᠭᠥᠪᠡ᠃
ᠮᠥᠩᠬᠡ — ᠰᠠᠯ(ᠤᠬᠠᠭᠠᠨᠲᠤ) ᠴᠢ ᠡᠬᠢᠯᠡᠭᠡᠳ ᠬᠡᠯᠡᠭᠲᠦᠨ! ᠴᠢ ᠬᠠᠮᠤᠭ ᠤ᠋ᠨ ᠰᠡᠴᠡᠨ ᠨᠢ ᠪᠢᠯᠡ ᠭᠡᠬᠦ ᠳ᠋ᠦ᠍ ᠲᠡᠷᠡ ᠨᠢ᠄
— ᠡᠵᠡᠨ ᠮᠢᠨᠢ ᠪᠢ ᠵᠢᠭᠤᠲᠠᠰᠤᠭᠠᠢ᠂ ᠠᠯᠤᠰ ᠤ᠋ᠨ ᠣᠳᠣᠨ ᠤ᠋ ᠵᠦᠭ ᠭᠠᠷ ᠢ᠋ᠶ᠋ᠠᠨ ᠰᠠᠷᠪᠠᠢᠭᠰᠠᠨ ᠪᠠᠲᠤ ᠬᠠᠭᠠᠨ ᠰᠥᠪᠡᠭᠡᠳᠡᠢ ᠪᠠᠭᠠᠲᠤᠷ ᠠ᠋ᠴᠠ ᠰᠠᠯᠵᠤ ᠲᠠᠪᠤᠨ ᠲᠠᠩᠨᠠᠭᠤᠯ ᠤ᠋ᠨ ᠬᠠᠮᠲᠤ ᠰᠢᠭ᠌ᠨᠠᠺ ᠤᠷᠤᠭᠤ ᠳᠠᠪᠰᠢᠨ ᠣᠳᠤᠭᠰᠠᠨ ᠢ᠋ ᠰᠣᠨᠣᠰᠤᠯᠠ ᠭᠡᠪᠡ᠃
— ᠰᠥᠪᠡᠭᠡᠳᠡᠢ ᠪᠠᠭᠠᠲᠤᠷ ᠲᠠᠢ ᠭᠡᠷᠡᠯᠲᠦᠭᠡ ᠤᠤ?
— ᠡᠭᠦᠨ ᠢ᠋ ᠪᠢ ᠦᠯᠦ ᠰᠣᠨᠣᠰᠤᠯᠠ ᠭᠡᠪᠡ᠃
— ᠴᠣᠬᠣᠮ ᠬᠦ᠌ ᠮᠡᠳᠡᠪᠡᠯ ᠵᠣᠬᠢᠬᠤ ᠵᠦᠢᠯ ᠪᠠᠢᠯᠠ᠃ ᠲᠠ ᠨᠠᠷ ᠶᠠᠭᠠᠬᠢᠭᠠᠳ ᠡᠰᠡ ᠪᠠᠷᠢᠵᠤ ᠢᠷᠡᠪᠡ?
— ᠲᠡᠷᠡ ᠰᠢᠭᠤᠳ ᠠᠬᠠ ᠲᠠᠩᠭᠤᠳ ᠬᠠᠭᠠᠨ ᠤ᠋ ᠣᠷᠳᠣᠨ ᠳ᠋ᠤ᠌ ᠳᠠᠪᠬᠢᠨ ᠢᠷᠡᠭᠡᠳ ᠬᠣᠶᠠᠭᠤᠯᠠ ᠪᠠᠨ ᠶᠡᠬᠡᠳᠡ ᠮᠠᠷᠭᠤᠨ ᠮᠠᠭᠤᠬᠠᠢ ᠬᠠᠰᠬᠢᠷᠤᠯᠳᠤᠪᠠ᠃ ᠲᠠᠩᠭᠤᠳ ᠬᠠᠭᠠᠨ ᠰᠢᠳᠠᠷ ᠴᠡᠷᠢᠭ ᠢ᠋ ᠳᠠᠭᠤᠳᠠᠨ《ᠡᠭᠦᠨ ᠢ᠋ ᠠᠯᠠᠭᠲᠤᠨ》ᠭᠡᠬᠦ ᠳ᠋ᠦ᠍ ᠪᠠᠲᠤ ᠬᠠᠭᠠᠨ ᠠᠬᠠ ᠶ᠋ᠢ ᠪᠡᠨ ᠵᠠᠨᠤᠵᠤ ᠮᠣᠷᠢᠨ ᠳ᠋ᠠᠭᠠᠨ ᠦᠰᠦᠷᠦᠨ ᠮᠣᠷᠳᠠᠭᠠᠳ ᠳᠠᠪᠬᠢᠨ ᠵᠢᠭᠤᠲᠠᠪᠠ ᠭᠡᠪᠡ᠃
— ᠲᠠᠨᠠᠷ ᠨᠡᠬᠡᠪᠡ ᠤᠤ? ᠲᠡᠷᠡ ᠬᠠᠮᠢᠭᠠ ᠪᠣᠢ? ᠭᠡᠬᠦ ᠳ᠋ᠦ᠍ ᠮᠣᠩᠭᠣᠯᠴᠤᠳ ᠳᠠᠬᠢᠨ ᠢᠰᠡᠭᠡᠢ ᠳᠡᠭᠡᠷᠡ ᠤᠨᠠᠵᠠᠭᠠᠪᠠ᠃
ᠭᠦᠶᠦᠭ ᠬᠠᠭᠠᠨ ᠪᠠᠷᠬᠢᠷᠠᠨ ᠲᠠᠨᠠᠷ ᠴᠡᠷᠢᠭ ᠪᠢᠰᠢ᠂ ᠦᠬᠦᠭᠰᠡᠨ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠮᠢᠬᠠ ᠶ᠋ᠢ ᠢᠳᠡᠭᠰᠡᠨ ᠤᠰᠤᠨ ᠲᠡᠨᠡᠭ ᠦ᠋ᠳ᠂ ᠮᠤᠤᠰᠠᠢᠨ ᠳᠣᠭᠣᠯᠠᠩ ᠢᠮᠠᠭᠠ ᠨᠤᠭᠤᠳ ᠭᠡᠳ ᠢᠲᠡᠭᠡᠯ ᠦᠭᠡᠢ ᠭᠢᠯᠦᠢᠵᠦ ᠵᠦᠬᠡᠨ ᠰᠢᠪᠡᠨᠡᠵᠦ᠄
— ᠬᠣᠲᠠ ᠶ᠋ᠢ ᠲᠣᠭᠣᠷᠢᠨ ᠳᠠᠪᠬᠢᠵᠤ ᠮᠢᠨᠦ ᠬᠣᠷᠣᠰᠤᠯᠳᠤ ᠳᠠᠢᠰᠤᠨ ᠢ᠋ ᠡᠷᠢᠭᠲᠦᠨ᠃ ᠵᠢᠷᠭᠤᠭᠠᠬᠠᠨ ᠪᠠᠳᠮᠠᠷᠠᠭᠠ ᠲᠣᠪᠴᠢ ᠲᠠᠢ᠂ ᠬᠥᠬᠡ ᠳᠡᠪᠡᠯ ᠲᠡᠢ ᠶᠠᠪᠤᠭᠠ ᠲᠡᠭᠦᠨ ᠦ᠌ ᠪᠠᠭᠠᠯᠵᠤᠤᠷ ᠢ᠋ ᠰᠢᠬᠠᠨ ᠠᠯᠠᠪᠠᠯ ᠲᠠᠨᠠᠷ ᠵᠠᠭᠤᠲᠤ ᠶ᠋ᠢᠨ ᠳᠠᠷᠤᠭᠠ ᠪᠣᠯᠤᠨᠠ᠂ ᠮᠢᠩᠭᠠᠨ ᠤ᠋ ᠳᠠᠷᠤᠭᠠ ᠴᠤ᠌ ᠪᠣᠯᠤᠨᠠ᠃ ᠬᠠᠷᠢᠨ ᠭᠠᠷ ᠬᠣᠭᠣᠰᠣᠨ ᠡᠷᠭᠢᠵᠦ ᠢᠷᠠᠪᠠᠰᠤ ᠬᠡᠷᠪᠡ ᠲᠡᠷᠡ ᠪᠠᠷᠳᠠᠮ ᠠᠮᠢᠲᠠᠨ ᠵᠢᠯᠣᠭᠣᠳᠤᠭᠴᠢ ᠳ᠋ᠵᠢᠬᠠᠩᠭᠢᠷ ᠪᠣᠯᠪᠠᠯ ᠲᠠᠨᠠᠷ ᠦᠬᠦᠯ ᠡᠴᠡ ᠵᠠᠢᠯᠠᠬᠤ ᠦᠭᠡᠢ᠃ ᠴᠠᠭᠠᠵᠠᠯᠠᠭᠴᠢᠳ ᠲᠠᠨᠠᠷ ᠤ᠋ᠨ ᠴᠢᠬᠢ ᠶ᠋ᠢ ᠣᠭᠲᠣᠯᠤᠨ᠂ ᠤᠭᠤᠴᠠ ᠶ᠋ᠢ ᠬᠤᠭᠤᠯᠤᠨᠠ᠂ ᠮᠡᠳᠡᠪᠡ ᠤᠤ ᠪᠤᠰᠢᠭᠤᠬᠠᠨ! ᠭᠡᠬᠦ ᠳ᠋ᠦ᠍ ᠮᠣᠩᠭᠣᠯ ᠴᠡᠷᠢᠭ ᠦ᠋ᠳ ᠭᠡᠳᠡᠷᠭᠦ ᠤᠬᠤᠷᠢᠨ ᠮᠥᠯᠬᠥᠵᠦ ᠮᠥᠩᠭᠥᠨ ᠱᠠ ᠪᠠᠷ ᠦᠷᠦᠪᠳᠡᠰᠦ ᠬᠠᠳᠬᠤᠭᠰᠠᠨ ᠬᠠᠷᠠ ᠡᠭᠦᠳᠡᠨ ᠦ᠌ ᠭᠠᠳᠠᠨᠠ ᠭᠠᠷᠤᠯᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠶᠠᠨᠴᠡᠴᠡᠭ᠂ ᠠᠯᠲᠠᠨᠴᠢᠮᠡᠭ᠂ ᠵᠢᠩᠯᠢᠬᠤᠸᠠᠷ
ᠬᠢᠨᠠᠭᠴᠢ᠄ ᠪᠠᠶᠠᠨᠴᠡᠴᠡᠭ᠂ ᠠᠯᠲᠠᠨᠴᠢᠮᠡᠭ᠂ ᠠᠷᠢᠭᠤᠨ