ᠪᠠᠲᠤ ᠬᠠᠭᠠᠨ 1-04ᠳ᠋ᠵᠢᠬᠢᠲ ᠦ᠋ᠨ ᠠᠮᠢᠳᠤᠷᠠᠯ ᠤ᠋ᠨ ᠵᠠᠮ- Бат хаан
362 ᠠᠮᠢ ᠨᠠᠰᠤ ᠬᠣᠶᠠᠷ ᠢ᠋ᠶ᠋ᠠᠨ ᠵᠢᠳᠠᠨ ᠤ᠋ ᠪᠠᠨ ᠦᠵᠦᠭᠦᠷ ᠲᠦ᠍ ᠤᠶᠠᠭᠰᠠᠨ
(ᠵᠢᠩᠭᠠᠷ)
ᠴᠡᠷᠢᠭ ᠦ᠋ᠨ ᠵᠠᠯᠠᠭᠤ ᠡᠷᠡ ᠪᠥᠬᠥᠢᠵᠦ ᠣᠪᠣᠬᠠᠢ ᠶ᠋ᠢᠨ ᠳᠠᠪᠴᠢᠭᠤ ᠡᠭᠦᠳᠡ ᠪᠡᠷ ᠣᠷᠣᠭᠠᠳ ᠬᠠᠲᠠᠪᠴᠢᠨ ᠳ᠋ᠤ᠌ ᠰᠥᠬᠥᠷᠡᠨ ᠰᠠᠭᠤᠵᠤ ᠬᠠᠳ᠌ᠵᠢ ᠷᠠᠾᠢᠮ᠂ ᠭᠣᠯᠣᠮᠲᠠ ᠶ᠋ᠢᠨ ᠳᠡᠷᠭᠡᠳᠡᠬᠢ ᠡᠯᠡᠩᠬᠡᠢ ᠪᠢᠴᠢᠬᠠᠨ ᠬᠡᠪᠢᠰ ᠦ᠋ᠨ ᠳᠡᠭᠡᠷᠡ ᠰᠠᠭᠤᠵᠤ ᠬᠣᠶᠠᠭᠤᠯᠠ ᠠᠯᠠᠭᠠ ᠪᠠᠷ ᠢ᠋ᠶ᠋ᠠᠨ ᠬᠠᠷᠢᠯᠴᠠᠨ ᠬᠠᠴᠠᠷ ᠢ᠋ ᠢᠯᠪᠢᠭᠡᠳ ᠪᠡᠶᠡ ᠪᠡᠶᠡ ᠪᠡᠨ ᠬᠠᠷᠠᠨ ᠵᠠᠩᠰᠢᠯ ᠤ᠋ᠨ ᠶᠣᠰᠣᠭᠠᠷ ᠤᠳᠠᠲᠠᠯᠠ ᠳᠠᠭᠤ ᠦᠭᠡᠢ ᠪᠠᠢᠯᠠ᠃ ᠲᠡᠭᠡᠭᠡᠳ ᠹᠠᠺᠢᠾ ᠡᠨᠡ ᠨᠠᠰᠤᠨ ᠳ᠋ᠠᠭᠠᠨ ᠣᠯᠠᠨ ᠬᠥᠮᠦᠨ ᠢ᠋ ᠦᠵᠡᠵᠦ ᠬᠠᠰᠢᠷᠴᠢᠬᠠᠭᠰᠠᠨ ᠤᠢᠳᠬᠠᠷᠯᠠᠬᠤ ᠪᠠᠢᠳᠠᠯ ᠢ᠋ᠶ᠋ᠠᠷ ᠬᠤᠷᠤᠭᠤ ᠪᠠᠨ ᠰᠠᠯᠠᠭᠠᠪᠴᠢᠯᠠᠨ᠄
— ᠴᠢ ᠠᠯᠢ ᠣᠪᠣᠭ ᠤ᠋ᠨ ᠬᠡᠨ ᠭᠡᠭᠴᠢ ᠪᠣᠢ? ᠪᠤᠭᠤᠷᠤᠯ ᠰᠠᠬᠠᠯᠲᠤ ᠠᠪᠤ ᠴᠢᠨᠢ ᠴᠢᠮᠠᠲᠤ ᠶᠠᠮᠠᠷ ᠨᠡᠷᠡ ᠥᠭᠪᠡ? ᠠᠯᠢ ᠬᠣᠯᠠ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠠᠩᠬᠠ ᠨᠠᠷᠠᠨ ᠤ᠋ ᠭᠡᠷᠡᠯ ᠢ᠋ ᠬᠠᠷᠠᠪᠠ? ᠴᠢ ᠬᠡᠳᠦᠢ ᠪᠡᠷ ᠺᠢᠫᠴᠠᠺᠠ ᠬᠡᠯᠡ ᠪᠡᠷ ᠥᠭᠦᠯᠡᠪᠡᠴᠦ ᠬᠥᠳᠡᠯᠬᠦ ᠪᠠᠢᠳᠠᠯ᠂ ᠬᠤᠪᠴᠠᠰᠤ ᠶ᠋ᠢ ᠴᠢᠨᠢ ᠦᠵᠡᠬᠦ ᠳ᠋ᠦ᠍ ᠭᠠᠳᠠᠨᠠ ᠶ᠋ᠢᠨ ᠬᠥᠮᠦᠨ ᠭᠡᠵᠦ ᠲᠠᠨᠢᠭᠳᠠᠵᠤ ᠪᠠᠢᠨᠠ ᠭᠡᠬᠦ ᠳ᠋ᠦ᠍ ᠴᠡᠷᠢᠭ ᠦ᠋ᠨ ᠡᠷᠡ ᠭᠠᠷ ᠢ᠋ᠶ᠋ᠠᠨ ᠲᠣᠰᠣᠨ ᠡᠪᠲᠡᠢᠬᠡᠨ ᠬᠠᠨᠢᠶᠠᠭᠠᠳ ᠬᠣᠭᠣᠯᠠᠢ ᠪᠠᠨ ᠵᠠᠰᠠᠵᠤ ᠨᠠᠮ ᠵᠢᠭᠳᠡ ᠳᠠᠭᠤ ᠪᠠᠷ᠄
— ᠮᠢᠨᠦ ᠨᠡᠷᠡ ᠠᠷᠠᠫᠱᠠ᠂ ᠭᠡᠪᠡᠴᠦ ᠲᠡᠢᠨ ᠳ᠋ᠦ᠍ ᠤᠯᠠᠩᠭᠠᠰᠴᠤ ᠠᠭᠤᠷᠰᠠᠨ᠂ ᠬᠠᠮᠤᠭ ᠤ᠋ᠨ ᠠᠶᠤᠯᠲᠠᠢ ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠲᠡᠮᠡᠦᠯᠦᠨ ᠣᠷᠣᠵᠤ ᠳᠠᠢᠰᠤᠨ ᠢ᠋ ᠬᠥᠭᠡᠭᠡᠨ ᠵᠢᠭᠤᠳᠠᠭᠠᠯᠭᠠᠳᠠᠭ ᠭᠡᠯᠴᠡᠵᠦ ᠮᠢᠨᠦ ᠪᠠᠢᠯᠳᠤᠭᠠᠨ ᠤ᠋ ᠨᠥᠬᠥᠳ ᠨᠠᠮᠠᠶ᠋ᠢ ᠪᠠᠰᠠ《ᠠᠩ— ᠨᠠᠰᠢᠷ》( ᠢᠯᠠᠭᠴᠢ ) ᠭᠡᠵᠦ ᠳᠠᠭᠤᠳᠠᠨᠠ᠃ ᠮᠢᠨᠦ ᠨᠡᠷᠡ ᠠᠷᠠᠫᠱᠠ ᠭᠡᠵᠦ ᠲᠠᠨ ᠳ᠋ᠤ᠌ ᠥᠭᠦᠯᠡᠭᠰᠡᠨ ᠪᠣᠯᠪᠠᠴᠤ ᠮᠢᠨᠦ ᠥᠷᠥᠰᠢᠶᠡᠯᠲᠦ ᠡᠴᠢᠭᠡ ᠬᠡᠨ ᠭᠡᠵᠦ ᠨᠡᠷᠡᠯᠡᠵᠦ ᠪᠠᠢᠭᠰᠠᠨ ᠢ᠋ ( ᠂ ) ᠪᠢ ᠪᠠᠭᠠ ᠨᠠᠰᠤᠨ ᠳ᠋ᠠᠭᠠᠨ ᠬᠠᠮᠢᠭᠠ ᠪᠠᠢᠭᠰᠠᠨ ᠢ᠋ ᠦᠨᠡᠬᠡᠷ ᠮᠡᠳᠡᠬᠦ ᠦᠭᠡᠢ᠂ ᠣᠢ ᠳᠣᠲᠣᠷᠠ ᠨᠢᠭᠡᠨ ᠨᠠᠭᠤᠷ ᠤ᠋ᠨ ᠳᠡᠷᠭᠡᠳᠡ ᠣᠷᠣᠰᠢᠵᠤ ᠡᠴᠢᠭᠡ ᠶ᠋ᠢᠨ ᠬᠠᠮᠲᠤ ᠵᠠᠪᠢ ᠪᠠᠷ ᠬᠦᠪᠪᠦᠨ᠂ ᠡᠴᠢᠭᠡ ᠮᠢᠨᠢ ᠣᠯᠠᠨ ᠮᠥᠩᠭᠥᠯᠢᠭ ᠵᠢᠭᠠᠰᠤ ᠶ᠋ᠢ ᠲᠣᠣᠷ ᠠ᠋ᠴᠠ ᠪᠠᠨ ᠰᠠᠭᠰᠤ ᠤᠷᠤᠭᠤ ᠶᠡᠭᠦᠯᠡᠵᠦ ᠪᠠᠢᠭᠰᠠᠨ ᠨᠢ ᠪᠠᠷᠤᠭ ᠪᠦᠷᠦᠭ ᠰᠠᠨᠠᠭᠳᠠᠨᠠ᠃ ᠡᠵᠢ ᠶ᠋ᠢᠨ ᠡᠪᠦᠷ ᠳᠡᠭᠡᠷᠡ ᠬᠡᠪᠲᠡᠨ ᠳᠠᠭᠤᠤ ᠳᠠᠭᠤᠯᠠᠬᠤ ᠶ᠋ᠢ ᠨᠢ ᠴᠢᠩᠨᠠᠵᠤ ᠪᠠᠢᠬᠤ ᠳ᠋ᠤ᠌ ᠳᠤᠯᠠᠭᠠᠨ ᠰᠠᠢᠬᠠᠨ ᠪᠠᠢᠳᠠᠭ ᠰᠠᠨ᠃ ᠥᠬᠢᠨ ᠳᠡᠭᠦᠦ ᠮᠢᠨᠢ ᠮᠥᠨ ᠰᠠᠨᠠᠭᠳᠠᠨᠠ᠃ ᠡᠨᠡ ᠪᠦᠬᠦᠨ ᠴᠥᠮ ᠡᠴᠦᠰ ᠪᠣᠯᠵᠠᠢ᠃ ᠳᠡᠭᠡᠷᠡᠮᠴᠢᠳ ᠳᠠᠭᠠᠷᠢᠵᠤ ᠨᠠᠮᠠᠶ᠋ᠢ ᠥᠬᠢᠨ ᠳᠡᠭᠦᠦ ᠶ᠋ᠢᠨ ᠬᠠᠮᠲᠤ ᠶᠡᠬᠡ ᠬᠣᠲᠠ ᠳ᠋ᠤ᠌ ᠠᠪᠠᠴᠢᠭᠠᠳ ᠳᠠᠯᠪᠠᠭᠠᠲᠤ ᠣᠩᠭᠣᠴᠠᠨ ᠳᠡᠭᠡᠷᠡ ᠬᠤᠳᠠᠯᠳᠤᠪᠠ᠃ ᠲᠡᠷᠡ ᠣᠩᠭᠣᠴᠠ ᠳᠡᠭᠡᠷᠡ ᠬᠥᠪᠡᠭᠦᠳ᠂ ᠥᠬᠢᠳ ᠮᠠᠰᠢ ᠣᠯᠠᠨ ᠪᠠᠢᠭᠰᠠᠨ᠃ ᠣᠩᠭᠣᠴᠠᠨ ᠤ᠋ ᠡᠵᠡᠳ ᠪᠢᠳᠡᠨ ᠢ᠋ ᠲᠣᠮᠣ ᠴᠠᠭᠠᠨ ᠭᠠᠯᠠᠭᠤ ᠶ᠋ᠢᠨ ᠰᠦᠷᠦᠭ ᠦ᠋ᠨ ᠬᠠᠮᠲᠤ ᠣᠩᠭᠣᠴᠠᠨ ᠤ᠋ ᠢᠷᠣᠭᠠᠷ ᠤ᠋ᠨ ᠵᠠᠢ ᠳ᠋ᠤ᠌ ᠴᠢᠬᠢᠵᠦ ᠲᠦᠭᠵᠢᠬᠦ ᠳ᠋ᠦ᠍ ᠭᠠᠯᠠᠭᠤᠳ ᠪᠢᠳᠡᠨ ᠢ᠋ ᠬᠠᠵᠠᠵᠤ ᠳᠤᠩᠰᠢᠵᠤ ᠪᠠᠢᠯᠠ᠃ ᠣᠩᠭᠣᠴᠠ ᠥᠷᠭᠡᠨ ᠮᠥᠷᠡᠨ ᠢ᠋ᠶ᠋ᠡᠷ ᠳᠡᠮᠵᠢᠵᠦ ᠲᠠᠩᠭᠢᠰ ᠳᠤ ᠣᠷᠣᠯᠠ᠃ ᠣᠩᠭᠣᠴᠠᠨ ᠤ᠋ ᠡᠵᠡᠳ ᠵᠠᠬᠠ ᠵᠡᠭᠡᠯᠢ ᠳᠡᠭᠡᠷᠡ ᠬᠡᠦᠬᠡᠳ ᠢ᠋ ᠲᠠᠷᠬᠠᠭᠠᠨ ᠬᠤᠳᠠᠯᠳᠤᠭᠰᠠᠨ᠃ ᠲᠡᠭᠡᠭᠰᠡᠨ ᠡᠴᠡ ᠬᠣᠢᠰᠢ ᠪᠢ ᠲᠡᠳᠡ ᠪᠠ ᠳᠡᠭᠦᠦ ᠲᠡᠢ ᠪᠡᠨ ᠨᠢᠭᠡ ᠴᠥ᠍ ᠠᠭᠤᠯᠵᠠᠭᠠ ᠦᠭᠡᠢ᠃ ᠹᠡᠺᠢᠾ ᠰᠡᠭᠦᠷᠡᠰᠦᠨ ᠠᠯᠲᠠᠨ᠄
— ᠡᠨᠡ ᠶᠠᠪᠤᠳᠠᠯ ᠵᠥᠪᠬᠡᠨ ᠬᠤᠳᠠᠯᠳᠤᠭᠠᠴᠢᠨ ᠪᠠᠶᠠᠵᠢᠬᠤ ᠶ᠋ᠢᠨ ᠲᠤᠯᠠ ᠠᠮᠢ ᠲᠠᠯᠪᠢᠨ ᠤᠯᠠᠢᠬᠤ ᠶ᠋ᠢᠨ ᠬᠠᠷᠠᠭᠠ ᠪᠠᠷ ᠠᠯᠲᠠᠨ ᠤ᠋ ᠭᠡᠷᠡᠯ ᠳ᠋ᠦ᠍ ᠪᠠᠯᠠᠢᠷᠠᠭᠰᠠᠨ ᠬᠣᠪᠳᠣᠭ ᠬᠤᠳᠠᠯᠳᠤᠭᠠᠴᠢᠳ᠂ ᠭᠡᠮ ᠦᠭᠡᠢ ᠬᠡᠦᠬᠡᠳ ᠢ᠋ ᠪᠤᠯᠢᠶᠠᠨ ᠠᠪᠴᠤ ᠬᠠᠷᠢ ᠶ᠋ᠢᠨ ᠬᠣᠲᠠ ᠳ᠋ᠤ᠌ ᠣᠷᠬᠢᠬᠤ ᠳ᠋ᠤ᠌ ᠪᠦᠬᠦ ᠨᠠᠰᠤᠨ ᠳ᠋ᠠᠭᠠᠨ ᠪᠣᠭᠣᠯ ᠤ᠋ᠨ ᠵᠣᠪᠠᠯᠠᠩᠲᠤ ᠲᠠᠯᠬᠢᠭᠳᠠᠯ ᠢ᠋ᠶ᠋ᠠᠷ ᠰᠢᠨᠠᠯᠤᠨ ᠵᠣᠪᠠᠨᠠ ᠭᠡᠵᠦ ᠬᠡᠯᠡᠪᠡ᠃
ᠠᠷᠠᠫᠱᠠ ᠴᠠᠰᠢ ᠬᠡᠯᠡᠬᠦ ᠨᠢ᠄
— ᠪᠢ ᠮᠠᠭᠠᠳ ᠤᠮᠠᠷᠠ ᠵᠦᠭ ᠦ᠋ᠨ ᠠᠯᠢ ᠨᠢᠭᠡᠨ ᠣᠷᠣᠨ ᠮᠣᠷᠳᠡᠧ ᠪᠤᠶᠤ ᠰᠠᠺᠰᠢᠨ ᠡᠰᠡᠪᠡᠯ ᠣᠷᠣᠰ ᠣᠷᠣᠨ ᠤ᠋ ᠬᠥᠮᠦᠨ ᠪᠢᠵᠡ᠃ ᠶᠠᠭᠠᠬᠢᠭᠠᠳ ᠭᠡᠪᠡᠯ᠂ ᠪᠣᠭᠣᠯᠴᠤᠳ ᠢᠯᠠᠩᠭᠤᠶᠠ ᠣᠷᠣᠰ ᠬᠥᠮᠦᠰ ᠮᠢᠨᠦ ᠬᠦᠴᠦ ᠶ᠋ᠢ ᠮᠠᠭᠲᠠᠳᠠᠭ᠂ ᠦᠨᠡᠬᠡᠷ ᠨᠠᠳᠠᠳᠤ ᠠᠯᠯᠠᠾ ᠲᠩᠷᠢ ᠬᠠᠳᠠᠨ ᠴᠢᠨᠠᠷ ᠢ᠋ ᠰᠣᠶᠣᠷᠬᠠᠵᠠᠢ᠃ ᠨᠠᠮᠠᠶ᠋ᠢ ᠺᠡᠥ᠋ᠺᠠᠰ ᠤ᠋ᠨ ᠲᠡᠮᠦᠷ ᠬᠠᠭᠠᠯᠭᠠᠲᠤ ᠳ᠋ᠧᠷᠪᠧᠨ᠋ᠲ ᠬᠣᠲᠠ ᠳ᠋ᠠᠬᠢ ᠪᠣᠭᠣᠯ ᠤ᠋ᠨ ᠵᠡᠭᠡᠯᠢ ᠳᠡᠭᠡᠷᠡ ᠨᠢᠭᠡ ᠡᠵᠡᠨ ᠡᠴᠡ ᠨᠥᠭᠦᠭᠡ ᠳ᠋ᠦ᠍ ᠳᠠᠮᠵᠢᠨ ᠶᠠᠪᠤᠭᠠᠳ ᠥᠰᠬᠦ ᠴᠠᠭ ᠲᠤ᠌ ᠬᠠᠮᠤᠭ ᠤ᠋ᠨ ᠬᠦᠨᠳᠦ ᠬᠥᠳᠡᠯᠮᠦᠷᠢ ᠶ᠋ᠢ ᠬᠢᠯᠭᠡᠵᠦ ᠬᠤᠳᠳᠤᠭ ᠠ᠋ᠴᠠ ᠤᠰᠤ ᠠᠪᠬᠤ ᠳᠤᠭᠤᠢ ᠳ᠋ᠤ᠌᠂ ᠡᠯᠵᠢᠭᠡᠨ ᠦ᠌ ᠬᠠᠮᠲᠤ ᠬᠦᠵᠦᠭᠦᠨ ᠳ᠋ᠦ᠍ ᠳᠥᠩᠭᠡ ᠵᠡᠭᠦᠵᠦ ᠴᠢᠯᠠᠭᠤ ᠮᠡᠲᠦ ᠬᠠᠲᠠᠭᠰᠠᠨ ᠰᠢᠷᠣᠢ ᠶ᠋ᠢ ᠮᠠᠯᠲᠠᠭᠤᠯᠤᠨ ᠪᠠᠰᠠ ᠭᠤᠸᠠᠯᠢᠩ ᠮᠣᠳᠣ ᠶ᠋ᠢ ᠵᠥᠭᠡᠭᠡᠯᠭᠡᠳᠡᠭ ᠪᠢᠯᠡ᠃ ᠪᠣᠭᠣᠯ ᠶᠠᠪᠤᠬᠤ ᠴᠠᠭ ᠲᠤ᠌ ᠲᠩᠷᠢ ᠴᠦ᠍ ᠭᠡᠰᠡᠨ ᠮᠢᠨᠦ ᠤᠬᠤᠭᠰᠠᠨ ᠬᠠᠷᠢ ᠨᠤᠲᠤᠭ ᠤ᠋ᠨ ᠰᠢᠷᠣᠢ ᠮᠡᠲᠦ ᠬᠠᠭᠤᠷᠠᠢ ᠬᠠᠪ ᠬᠠᠷᠠ ᠰᠠᠨᠠᠭᠳᠠᠯᠠ ᠭᠡᠬᠦ ᠳ᠋ᠦ᠍ ᠬᠠᠳ᠌ᠵᠢ ᠷᠠᡁᠢᠮ ᠡᠮᠭᠡᠨᠢᠨ᠄ ᠣᠶᠤᠨ ᠪᠢᠯᠢᠭᠲᠦ ᠪᠣᠭᠣᠯ ᠠ᠋ᠴᠠ ᠪᠠᠨ ᠳᠥᠷᠪᠡᠨ ᠬᠥᠯᠲᠦ ᠠᠳᠤᠭᠤᠰᠤ ᠶ᠋ᠢ ᠤᠷᠢᠲᠠᠵᠤ ᠬᠠᠢᠷᠠᠯᠠᠳᠠᠭ ᠭᠡᠪᠡ᠃
ᠮᠢᠨᠦ ᠠᠮᠢᠳᠤᠷᠠᠯ ᠤ᠋ᠨ ᠵᠠᠮ ᠥᠭᠡᠷᠡ ᠲᠡᠰᠢ ᠡᠷᠭᠢᠬᠦ ᠳ᠋ᠦ᠍ ᠪᠢ ᠠᠷᠪᠠᠨ ᠳᠣᠯᠣᠭᠠᠨ ᠨᠠᠰᠤᠲᠠᠢ ᠪᠠᠢᠭᠰᠠᠨ᠃ ᠪᠢ ᠨᠢᠭᠡ ᠡᠳᠦᠷ ᠭᠠᠩᠭᠠᠳᠠᠢ ᠥᠨᠳᠥᠷ ᠠᠭᠤᠯᠠ ᠶ᠋ᠢᠨ ᠡᠩᠭᠡᠷ ᠳᠡᠭᠡᠷᠡ ᠠᠽᠧᠷᠪᠠᠢᠳ᠌ᠵᠢᠨ ᠤ᠋ ᠡᠵᠡᠨ ᠬᠠᠭᠠᠨ ᠤ᠋ ᠬᠣᠨᠢ ᠶ᠋ᠢ ᠬᠠᠷᠢᠭᠤᠯᠵᠤ ᠪᠠᠢᠬᠤ ᠳ᠋ᠤ᠌ ᠰᠠᠨᠠᠮᠰᠠᠷ ᠦᠭᠡᠢ ᠬᠠᠢᠰᠠᠨ ᠤ᠋ ᠳᠡᠭᠡᠭᠦᠷ ᠮᠣᠷᠢᠲᠠᠨ ᠤ᠋ ᠪᠠᠭ ᠭᠠᠷᠴᠤ ᠢᠷᠡᠪᠡ᠃ ᠰᠠᠢᠬᠠᠨ ᠬᠠᠷᠠ ᠮᠣᠷᠢ ᠤᠨᠤᠭᠰᠠᠨ ᠵᠠᠯᠠᠭᠤ ᠴᠡᠷᠢᠭ ᠦ᠋ᠨ ᠡᠷᠡ ᠲᠦᠷᠦᠭᠦᠨ ᠳ᠋ᠦ᠍ᠨᠢ ᠶᠠᠪᠤᠲᠠᠯᠠ ᠳᠣᠣᠷᠠᠬᠢ ᠪᠣᠷᠣᠭᠠᠨ ᠳ᠋ᠤ᠌ ᠳᠡᠪᠲᠦᠭᠰᠡᠨ ᠭᠠᠵᠠᠷ ᠭᠡᠨᠡᠳᠲᠡ ᠴᠥᠮᠥᠷᠡᠵᠦ ᠲᠡᠷᠡ ᠬᠥᠮᠦᠨ ᠬᠠᠪᠴᠢᠯ ᠤᠷᠤᠭᠤ ᠥᠩᠬᠥᠷᠢᠪᠡ᠃ ᠴᠡᠷᠢᠭ ᠦ᠋ᠨ ᠡᠷᠡ ᠮᠤᠤᠷ ᠰᠢᠭ᠋ ᠳᠡᠭᠦᠯᠢᠨ ᠨᠢᠭᠡ ᠪᠤᠲᠠ ᠠ᠋ᠴᠠ ᠵᠢᠭᠤᠷᠠᠬᠤ ᠳ᠋ᠤ᠌ ᠪᠢ ᠠᠷᠭᠠᠮᠵᠢ ᠶ᠋ᠢᠨ ᠦᠵᠦᠭᠦᠷ ᠢ᠋ ᠰᠢᠳᠡᠵᠦ ᠲᠡᠭᠦᠨ ᠢ᠋ ᠲᠡᠳᠡᠨ ᠭᠠᠷᠭᠠᠭᠠᠳ᠂ ᠴᠢᠨᠦ ᠮᠣᠷᠢ ᠶ᠋ᠢ ᠴᠥ᠍ ᠪᠢ ᠠᠪᠤᠷᠠᠨ ᠭᠠᠷᠭᠠᠵᠤ ᠴᠢᠳᠠᠨᠠ ᠭᠡᠬᠦ ᠳ᠋ᠦ᠍ ᠲᠡᠷᠡ ᠪᠠᠭᠠᠲᠤᠷ ᠡᠷᠡ᠂ ᠬᠡᠷᠪᠡ ᠮᠢᠨᠦ ᠬᠠᠷᠠ ᠮᠣᠷᠢ ᠶ᠋ᠢ ᠠᠪᠤᠷᠠᠵᠤ ᠴᠢᠳᠠᠪᠠᠯ ᠬᠦᠰᠡᠭᠰᠡᠨ ᠪᠦᠬᠦᠨ ᠢ᠋ᠶ᠋ᠡᠨ ᠨᠠᠳᠠ ᠠ᠋ᠴᠠ ᠭᠤᠶᠤᠵᠤ ᠪᠣᠯᠤᠨᠠ ᠭᠡᠪᠡ᠃ ᠳ᠋ᠵᠧᠬᠢᠲ ᠦ᠋ᠳ ᠬᠣᠶᠠᠷ ᠠᠷᠭᠠᠮᠵᠢ ᠪᠠᠭᠤᠯᠭᠠᠭᠰᠠᠨ ᠤ᠋ ᠨᠢᠭᠡ ᠶ᠋ᠢ ᠪᠢ ᠪᠦᠰᠡᠯᠡᠭᠦᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠤᠶᠠᠭᠠᠳ ᠳᠣᠭᠣᠭᠰᠢ ᠡᠷᠭᠢ ᠤᠷᠤᠭᠤ ᠮᠥᠯᠬᠥᠪᠡ᠃ ᠵᠢᠭ ᠪᠣᠯᠵᠤ ᠬᠠᠷᠠ ᠮᠣᠷᠢ ᠭᠠᠩᠭᠠᠨ ᠤ᠋ ᠠᠮᠠᠰᠠᠷ ᠳᠡᠭᠡᠷᠡ ᠲᠣᠭᠲᠠᠭᠠᠳ ᠨᠣᠭᠣᠭᠠ ᠢᠳᠡᠵᠦ ᠪᠠᠢᠨᠠ᠃ ᠠᠭᠠᠰᠢ ᠮᠠᠭᠤᠲᠠᠢ ᠠᠵᠢᠷᠭᠠ ᠨᠠᠮᠠᠶ᠋ᠢ ᠣᠢᠷᠠᠲᠤᠬᠤ ᠳ᠋ᠤ᠌ ᠲᠤᠷᠬᠢᠷᠠᠭᠰᠠᠨ ᠪᠣᠯᠪᠠᠴᠤ ᠠᠷᠭᠠᠮᠵᠢ ᠪᠠᠷ ᠣᠭᠣᠰᠣᠷᠯᠠᠬᠤ ᠳ᠋ᠤ᠌ ᠮᠢᠨᠢ ᠳ᠋ᠵᠢᠬᠢᠲ ᠦ᠋ᠳ ᠲᠠᠲᠠᠭᠠᠳ ᠵᠥᠷᠢᠭ ᠵᠠᠮ ᠳᠡᠭᠡᠷᠡ ᠭᠠᠷᠭᠠᠯᠠ᠃ ᠪᠤᠴᠠᠵᠤ ᠠᠪᠠᠷᠢᠬᠤ ᠳ᠋ᠤ᠌ ᠮᠢᠨᠢ ᠬᠥᠯ ᠦ᠋ᠨ ᠲᠤᠱᠠ ᠰᠠᠭᠠᠳ ᠪᠣᠯᠵᠤ ᠪᠡᠷᠬᠡᠲᠡᠢ ᠪᠠᠢᠯᠠ ᠭᠡᠬᠦ ᠳ᠋ᠦ᠍ ᠬᠠᠳ᠌ᠵᠢ ᠷᠠᡁᠢ᠍ᠮ᠄
— ᠵᠢᠷᠦᠬᠡ ᠲᠡᠢ ᠬᠥᠪᠡᠭᠦᠨ ᠴᠢᠮᠠᠶ᠋ᠢ ᠲᠩᠷᠢ ᠠᠪᠤᠷᠠᠵᠠᠢ ᠭᠡᠵᠦ ᠳᠠᠭᠤ ᠠᠯᠳᠠᠪᠠ᠃ ᠵᠠᠯᠠᠭᠤ ᠡᠷᠡ᠄
— ᠴᠡᠷᠢᠭ ᠦ᠋ᠨ ᠡᠷᠡ ᠨᠠᠳᠠ ᠠ᠋ᠴᠠ ᠵᠠᠮ ᠠᠰᠠᠭᠤᠭᠰᠠᠨ ᠳ᠋ᠤ᠌ ᠪᠢ ᠴᠤᠪᠤᠴᠠ ᠪᠦᠷᠢ ᠶ᠋ᠢ ᠵᠢᠭᠠᠭᠠᠳ ᠵᠠᠮ ᠶᠠᠪᠤᠭᠴᠢᠳ ᠢ᠋ ᠺᠦᠷᠳ᠋ ᠨᠠᠷ ᠪᠦᠭᠭᠦᠵᠦ ᠳᠡᠭᠡᠷᠡᠮᠳᠡᠳᠡᠭ ᠭᠠᠵᠠᠷ ᠢ᠋ ᠰᠠᠨᠠᠭᠤᠯᠵᠤ ᠲᠣᠭᠣᠷᠢᠬᠤ ᠰᠠᠢᠨ ᠵᠠᠮ ᠢ᠋ ᠵᠠᠬᠢᠵᠤ ᠬᠡᠯᠡᠪᠡ᠃
ᠲᠡᠭᠡᠬᠦ ᠳ᠋ᠦ᠍ ᠲᠡᠷᠡ᠂
— ᠵᠠ᠂ ᠴᠢ ᠣᠳᠣ ᠶᠠᠭᠤ ᠬᠦᠰᠡᠨᠡ ᠭᠡᠬᠦ ᠳ᠋ᠦ᠍᠂
— ᠪᠢ ᠡᠷᠬᠡ ᠴᠢᠯᠥᠭᠡ ᠲᠡᠢ ᠪᠣᠯᠬᠤ ᠶ᠋ᠢ ᠬᠦᠰᠡᠨᠡ ᠭᠡᠪᠡ᠃ ᠪᠠᠭᠠᠲᠤᠷ ᠡᠷᠡ ᠨᠠᠮᠠᠶ᠋ᠢ ᠳᠠᠭᠠᠵᠤ ᠢᠯᠳᠦ ᠪᠡᠷ ᠡᠷᠬᠡ ᠪᠡᠨ ᠣᠯᠲᠤᠭᠠᠢ ᠭᠡᠰᠡᠨ ᠳ᠋ᠦ᠍᠂ ᠲᠡᠷᠡ ᠴᠡᠷᠢᠭ ᠦ᠋ᠨ ᠡᠷᠡ ᠪᠣᠯ ᠮᠣᠩᠭᠣᠯᠴᠤᠳ ᠲᠠᠢ ᠪᠠᠢᠯᠳᠤᠬᠤ ᠠ᠋ᠴᠠ ᠦᠯᠦ ᠰᠢᠨᠲᠠᠷᠠᠨ ᠫᠸᠷᠸᠡᠨ ᠦ᠌ ᠳᠡᠷᠭᠡᠳᠡ ᠳᠡᠢᠯᠦᠭᠰᠡᠨ ᠠᠯᠳᠠᠷᠲᠤ ᠬᠡᠷᠦᠮᠡᠯ ᠬᠥᠮᠦᠨ ᠳ᠋ᠵᠸᠯᠠᠯᠢ ᠡᠳ᠋— ᠳ᠋ᠢᠨ ᠮᠥᠨ ᠠᠵᠢ᠃ ᠲᠡᠷᠡ ᠡᠳᠦᠷ ᠡᠴᠡ ᠡᠬᠢᠯᠡᠨ ᠪᠢ ᠲᠡᠭᠦᠨ ᠦ᠌ ᠴᠡᠷᠢᠭ ᠪᠣᠯᠤᠯᠠ᠃ ᠳ᠋ᠵᠸᠯᠠᠯᠢ ᠡᠳ᠋— ᠳ᠋ᠢᠨ ᠲᠠᠬᠢᠷ ᠰᠡᠯᠡᠮᠡ᠂ ᠪᠠᠢᠯᠳᠤᠭᠠᠨ ᠤ᠋ ᠮᠣᠷᠢ ᠶ᠋ᠢ ᠨᠠᠳᠠᠳᠤ ᠥᠭᠭᠦᠭᠰᠡᠨ ᠢ᠋ ᠪᠢ ᠥᠨᠥᠳᠥᠷ ᠢᠴᠢᠭᠦᠷᠢᠲᠡᠢ ᠤᠨᠲᠠᠵᠤ ᠬᠣᠴᠣᠷᠤᠨ ᠠᠯᠳᠠᠪᠠ ᠭᠡᠳ ᠳᠠᠬᠢᠨ ᠰᠠᠨᠠᠭᠠ ᠠᠯᠳᠠᠪᠠ᠃ ᠹᠡᠺᠢᠾ᠂
— ᠴᠠᠰᠢ ᠶᠠᠷᠢᠭᠲᠤᠨ᠂ ᠮᠣᠷᠢ ᠴᠢᠨᠢ ᠢᠷᠡᠨᠡ ᠭᠡᠪᠡ᠃
— ᠲᠡᠷᠡ ᠡᠳᠦᠷ ᠣᠮᠣᠭᠯᠠᠩ ᠮᠣᠷᠢ ᠤᠨᠤᠵᠤ ᠳᠤᠷᠠᠰᠬᠠᠯᠲᠤ ᠳ᠋ᠵᠸᠯᠡᠯᠢ ᠡᠳ᠋— ᠳ᠋ᠢᠨ ᠦ᠌ ᠪᠠᠭ ᠴᠡᠷᠢᠭ ᠦ᠋ᠨ ᠳᠤᠮᠳᠠ ᠡᠷᠬᠡ ᠴᠢᠯᠥᠭᠡ ᠲᠡᠢ ᠶᠠᠪᠤᠬᠤ ᠳ᠋ᠠᠭᠠᠨ ᠮᠢᠨᠦ ᠳᠡᠭᠡᠷᠡᠬᠢ ᠲᠩᠷᠢ ᠬᠠᠷᠠ ᠪᠢᠰᠢ᠂ ᠬᠠᠷᠢᠨ ᠮᠢᠨᠦ ᠡᠷᠲᠡ ᠪᠠᠭᠠ ᠨᠠᠰᠤᠨ ᠳ᠋ᠤ᠌ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠮᠲᠤ ᠣᠢ ᠳᠣᠲᠣᠷᠠᠬᠢ ᠨᠠᠭᠤᠷ ᠲᠤ᠌ ᠵᠠᠪᠢ ᠪᠠᠷ ᠬᠦᠪᠦᠬᠦ ᠴᠠᠭ ᠲᠤ᠌ ᠪᠠᠢᠭᠰᠠᠨ ᠰᠢᠭ᠋ ᠣᠭ᠌ᠶᠤ ᠮᠡᠲᠦ ᠴᠡᠩᠬᠡᠷ ᠢ᠋ᠶ᠋ᠡᠷ ᠳᠠᠬᠢᠨ ᠲᠤᠶᠠᠭᠠᠷᠠᠵᠤ ᠪᠠᠢᠬᠤ ᠶ᠋ᠢ ᠦᠵᠡᠯᠡ᠃ ᠲᠡᠭᠡᠬᠦ ᠳ᠋ᠦ᠍ ᠪᠢ ᠶᠢᠷᠲᠢᠨᠴᠦ ᠳ᠋ᠦ᠍ ᠡᠷᠬᠡ ᠴᠢᠯᠥᠭᠡᠨ ᠡᠴᠡ ᠢᠯᠡᠭᠦᠦ ᠰᠠᠢᠬᠠᠨ ᠶᠠᠭᠤᠮᠠ ᠦᠭᠡᠢ ᠶ᠋ᠢ ᠤᠬᠠᠮᠰᠠᠷᠯᠠᠪᠠ᠃ ᠪᠢ ᠭᠤᠷᠪᠠᠨ ᠵᠢᠯ ᠦ᠋ᠨ ᠲᠤᠷᠰᠢ ᠵᠣᠷᠢᠭᠲᠤ ᠵᠠᠩᠵᠤᠨ ᠢ᠋ ᠳᠠᠭᠠᠯᠳᠤᠨ ᠭᠠᠵᠠᠷ ᠪᠦᠬᠦᠨᠡ ᠲᠡᠢᠨ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠬᠠᠯᠬᠠᠯᠠᠨ ᠶᠠᠪᠤᠭᠠᠳ《ᠠᠩ— ᠨᠠᠰᠢᠷ》—( ᠢᠯᠠᠭᠴᠢ) ᠴᠣᠯᠠ ᠶ᠋ᠢ ᠣᠯᠤᠯᠠ᠃ ᠮᠣᠩᠭᠣᠯ ᠳ᠋ᠤ᠌ ᠪᠣᠭᠣᠯᠴᠢᠯᠠᠭᠳᠠᠭᠰᠠᠨ ᠬᠣᠷᠸᠰᠨᠠᠨᠯᠠᠮ ᠳ᠋ᠤ᠌ ᠰᠢᠳᠤᠷᠭᠤ ᠠᠷᠢᠭᠤᠨ ᠪᠦᠬᠦᠨ ᠦ᠌ ᠳᠡᠭᠡᠳᠦ ᠪᠥᠭᠡᠳ ᠦᠨᠡᠨ ᠵᠥᠪ ᠢ᠋ ᠡᠷᠢᠭᠴᠢ ᠡᠷᠳᠡᠮᠲᠡᠨ ᠹᠡᠺᠢᠾ᠂ ᠠᠯᠢ ᠪᠠᠭᠳᠠᠳᠢ ᠭᠡᠳᠡᠭ ᠴᠣᠯᠠ ᠲᠠᠢ ᠬᠠᠳ᠌ᠵᠢ ᠷᠠᡁᠢᠮ ᠢ᠋ ᠲᠠᠨᠢᠨᠠ ᠭᠡᠵᠦ ᠨᠠᠳᠠᠳᠤ ᠳ᠋ᠵᠸᠯᠠᠯᠢ ᠡᠳ᠋— ᠳ᠋ᠢᠨ ᠣᠯᠠᠨ ᠤᠳᠠᠭᠠ ᠳᠤᠷᠠᠰᠤᠭᠰᠠᠨ᠃ ᠬᠡᠷᠪᠡ ᠴᠢᠮᠠᠶ᠋ᠢ ᠵᠣᠪᠠᠯᠠᠩ ᠤ᠋ᠨ ᠬᠠᠷᠠ ᠡᠭᠦᠯᠡ ᠨᠡᠬᠡᠪᠡᠯ᠂ ᠲᠡᠭᠦᠨ ᠳ᠋ᠦ᠍ ᠮᠢᠨᠦ ᠨᠡᠷᠡ ᠶ᠋ᠢ ᠬᠡᠯᠡᠭᠲᠦᠨ᠂ ᠲᠡᠭᠡᠪᠡᠯ ᠴᠢᠮᠠᠲᠤ ᠬᠠᠢᠷᠠ ᠥᠷᠥᠰᠢᠶᠡᠯ ᠦ᠋ᠨ ᠭᠠᠷ ᠢ᠋ᠶ᠋ᠠᠨ ᠰᠤᠩᠭᠠᠨᠠ ᠭᠡᠯᠡ ᠭᠡᠪᠡ᠃ ᠬᠠᠳ᠌ᠵᠢ ᠷᠠᠾᠢᠮ ᠪᠣᠰᠴᠤ ᠠᠷᠠᠫᠱᠠ ᠤᠷᠤᠭᠤ ᠣᠴᠢᠭᠠᠳ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠨ ᠰᠤᠩᠭᠠᠵᠤ᠄
— ᠳ᠋ᠵᠸᠯᠠᠯᠢ ᠡᠳ᠋— ᠳ᠋ᠢᠨ ᠦ᠌ ᠨᠡᠷᠡ ᠨᠠᠳᠠᠳᠤ ᠬᠠᠷᠠᠩᠭᠤᠢ ᠰᠥᠨᠢ ᠶ᠋ᠢᠨ ᠭᠡᠭᠡᠨ ᠣᠳᠣᠨ ᠮᠡᠲᠦ ᠰᠠᠷᠠᠭᠤᠯ ᠰᠠᠨᠠᠭᠳᠠᠨᠠ᠃ ᠮᠢᠨᠦ ᠳᠡᠷᠭᠡᠳᠡ ᠰᠠᠭᠤᠭᠲᠤᠨ ᠭᠡᠪᠡ᠃ ᠹᠠᠺᠢᠾ ᠠᠷᠠᠫᠱᠠ ᠬᠣᠶᠠᠷ᠂ ᠭᠠᠷ ᠭᠠᠷ ᠠ᠋ᠴᠠ ᠪᠠᠨ ᠪᠠᠷᠢᠯᠴᠠᠨ ᠮᠥᠷᠥ ᠮᠥᠷᠥ ᠡᠴᠡ ᠪᠡᠨ ᠲᠦᠰᠢᠵᠦ ᠭᠣᠯᠣᠮᠲᠠ ᠶ᠋ᠢᠨ ᠳᠡᠷᠭᠡᠳᠡᠬᠢ ᠬᠠᠭᠤᠴᠢᠨ ᠬᠡᠪᠢᠰᠦᠨ ᠳᠡᠭᠡᠷᠡ ᠵᠡᠷᠭᠡᠴᠡᠨ ᠰᠠᠭᠤᠪᠠ᠃ ᠬᠠᠳ᠌ᠵᠢ ᠷᠠᠾᠢᠮ᠄
— ᠣᠳᠣ ᠮᠢᠨᠦ ᠵᠠᠯᠠᠭᠤ ᠨᠥᠬᠥᠷ ᠠᠷᠠᠫᠱᠠ ᠠᠩ— ᠨᠠᠰᠢᠷ ᠶᠠᠭᠠᠬᠢᠵᠤ ᠡᠷᠡᠯᠬᠡᠭ ᠳ᠋ᠵᠸᠯᠠᠯᠢ ᠡᠳ᠋— ᠳ᠋ᠢᠨ ᠡᠴᠡ ᠪᠡᠨ ᠰᠠᠯᠤᠭᠰᠠᠨ ᠪᠣᠢ? ᠥᠭᠦᠯᠡᠭᠲᠦᠨ᠃ ᠲᠡᠷᠡ ᠠᠮᠢᠳᠤ ᠤᠤ? ᠥᠷᠥᠰᠢᠶᠡᠯ ᠦᠭᠡᠢ ᠮᠣᠩᠭᠣᠯᠴᠤᠳ ᠤ᠋ᠨ ᠭᠠᠷ ᠲᠤ᠌ ᠣᠷᠣᠭᠰᠠᠨ ᠪᠢᠰᠢ ᠪᠢᠵᠡ? ᠭᠡᠨᠡᠳᠲᠡ ᠶ᠋ᠢᠨ ᠰᠠᠯᠬᠢ ᠬᠥᠮᠦᠨ ᠦ᠌ ᠠᠮᠢᠳᠤᠷᠠᠯ ᠢ᠋ ᠡᠷᠭᠢᠭᠦᠯᠬᠦ ᠣᠯᠠᠨ ᠪᠢᠰᠢ ᠤᠤ᠃ ᠵᠠᠷᠢᠮ ᠳ᠋ᠠᠭᠠᠨ ᠵᠣᠷᠢᠭᠲᠤ ᠴᠡᠷᠢᠭ ᠦ᠋ᠨ ᠡᠷᠡ ᠦᠨᠡᠨ ᠬᠦ᠋ ᠰᠠᠢᠨ ᠤ᠋ ᠲᠤᠢᠯ ᠳ᠋ᠤ᠌ ᠲᠤᠯᠤᠭᠰᠠᠨ ᠮᠡᠲᠦ ᠶᠠᠪᠤᠲᠠᠯᠠ ᠭᠡᠨᠡᠳᠲᠡ ᠭᠠᠢ ᠵᠣᠪᠠᠯᠠᠩ ᠤ᠋ᠨ ᠵᠢᠯᠠᠭᠠᠨ ᠳ᠋ᠤ᠌ ᠤᠨᠠᠭᠠᠳ ᠠᠩᠬᠠ ᠶᠠᠭᠤᠨ ᠠ᠋ᠴᠠ ᠡᠬᠢᠯᠡᠭᠰᠡᠨ ᠪᠥᠭᠡᠰᠦ ᠲᠡᠨᠳᠡ ᠪᠡᠨ ᠬᠦᠷᠳᠡᠭ᠁ ᠭᠡᠬᠦ ᠳ᠋ᠦ᠍ ᠵᠠᠯᠠᠭᠤ ᠡᠷᠡ᠄
— ᠪᠢ ᠲᠡᠢᠮᠦ ᠪᠣᠯᠵᠠᠢ᠃ ᠮᠣᠩᠭᠣᠯ ᠤ᠋ᠨ ᠪᠠᠭ ᠴᠡᠷᠢᠭ ᠲᠡᠢ ᠳ᠋ᠵᠧᠯᠡᠯᠢ ᠡᠳ᠋ — ᠳ᠋ᠢᠨ ᠦ᠌ ᠠᠮᠵᠢᠯᠲᠠ ᠦᠭᠡᠢ ᠲᠤᠯᠤᠯᠳᠤᠭᠰᠠᠨ ᠤ᠋ ᠳᠠᠷᠠᠭᠠ ᠵᠣᠯ ᠲᠠᠢ ᠡᠰᠡ ᠪᠠᠷᠢᠭᠳᠠᠪᠠ᠃ ᠲᠡᠷᠡ ᠦᠶᠡ ᠡᠴᠡ ᠡᠬᠢᠯᠡᠨ ᠪᠢ ᠥᠷᠥᠨᠡ ᠵᠦᠭ ᠲᠦ᠍ ᠠᠯᠤᠰ ᠣᠳᠤᠭᠰᠠᠨ ᠵᠣᠷᠢᠭᠲᠤ ᠥᠮᠥᠭᠯᠡᠭᠴᠢ ᠲᠡᠢ ᠶᠡᠷᠦ ᠠᠭᠤᠯᠵᠠᠯᠳᠤᠭᠠ ᠦᠭᠡᠢ᠂ ᠪᠢ ᠳᠣᠷᠣᠨᠠ ᠵᠦᠭ ᠲᠦ᠍ ᠠᠭᠤᠯᠠ ᠶ᠋ᠢᠨ ᠴᠤᠪᠤᠴᠠ ᠪᠠᠷ ᠶᠠᠪᠤᠨ᠂ ᠠᠭᠤᠯᠠ ᠶ᠋ᠢᠨ ᠵᠡᠷᠯᠢᠭ ᠲᠠᠢᠸᠠᠩ ᠨᠠᠷ ᠠ᠋ᠴᠠ ᠮᠤᠯᠲᠤᠷᠠᠵᠤ ᠭᠠᠷᠤᠭᠠᠳ ᠡᠴᠦᠰ ᠲᠡᠭᠡᠨ ᠬᠤᠷᠸᠰᠮ ᠳ᠋ᠤ᠌ ᠣᠳᠬᠤ ᠵᠢᠩᠴᠢᠨ ᠲᠡᠢ ᠨᠡᠢᠯᠡᠪᠡ᠃ ᠪᠢ ᠰᠢᠨᠡ ᠭᠠᠵᠠᠷ ᠦᠵᠡᠬᠦ ᠶ᠋ᠢ ᠮᠠᠰᠢ ᠬᠦᠰᠡᠭᠰᠡᠨ ᠤᠴᠢᠷ ᠬᠤᠳᠠᠯᠳᠤᠭᠠᠴᠢᠨ ᠲᠠᠢ ᠵᠢᠩ ᠢ᠋ ᠬᠠᠮᠠᠭᠠᠯᠠᠬᠤ ᠪᠠᠷ ᠬᠡᠯᠡᠯᠴᠡᠨ ᠲᠣᠭᠲᠠᠯᠠ᠃ ᠴᠦᠯ ᠳᠤᠮᠳᠠᠬᠢ ᠵᠠᠮ ᠵᠠᠭᠤᠷᠠ ᠪᠢᠳᠡᠨ ᠢ᠋ ᠳᠡᠭᠡᠷᠡᠮᠴᠢᠳ ᠳᠠᠭᠠᠷᠢᠭᠰᠠᠨ ᠳ᠋ᠤ᠌᠂ ᠪᠢ ᠤᠯᠠᠩᠭᠠᠰᠤᠨ ᠬᠥᠭᠡᠷᠴᠦ ᠬᠡᠳᠦᠨ ᠳᠠᠯᠠᠴᠢᠨ ᠢ᠋ ᠴᠠᠪᠴᠢᠨ ᠠᠯᠠᠵᠤ ᠪᠤᠰᠤᠳ ᠢ᠋ ᠵᠢᠭᠤᠲᠠᠭᠤᠯᠤᠭᠰᠠᠨ ᠶᠤᠮ᠃ ᠭᠡᠲᠡᠯᠡ ᠬᠤᠳᠠᠯᠳᠤᠭᠠᠴᠢᠳ ᠠᠰᠤᠷᠤ ᠰᠠᠢᠰᠢᠶᠠᠭᠰᠠᠨ ᠦᠭᠡᠢ᠂ ᠬᠤᠷᠸᠰᠮ ᠳ᠋ᠤ᠌ ᠡᠰᠡ ᠮᠡᠨᠳᠦ ᠬᠦᠷᠴᠦ ᠢᠷᠡᠬᠦ ᠳ᠋ᠦ᠍ ᠠᠪᠤᠷᠠᠭᠰᠠᠨ ᠤ᠋ ᠠᠴᠢ ᠳ᠋ᠤ᠌ ᠠᠷᠠᠢ ᠴᠢᠮᠠᠢ ᠥᠴᠦᠬᠡᠨ ᠱᠠᠩᠨᠠᠯ ᠥᠭᠪᠡ᠃ ᠠᠯᠯᠠᠾ ᠲᠡᠳᠡᠨ ᠢ᠋ ᠪᠤᠷᠤᠭᠤᠰᠢᠶᠠᠬᠤ ᠪᠣᠯᠲᠤᠭᠠᠢ᠃ ᠪᠢ ᠨᠠᠰᠢ ᠪᠠᠨ ᠰᠢᠭ᠌ᠨᠠᠺ ᠲᠤ᠌ ᠪᠡᠷᠬᠡ ᠲᠡᠢ ᠪᠡᠷ ᠢᠷᠡᠯᠡ᠃ ᠪᠢ ᠡᠨᠳᠡ ᠰᠡᠴᠡᠨ ᠮᠡᠷᠭᠡᠨ ᠦ᠌ ᠭᠡᠭᠡ᠂ ᠡᠷᠳᠡᠮ ᠮᠡᠳᠡᠯᠭᠡ ᠶ᠋ᠢᠨ ᠴᠠᠮᠬᠠᠭ ᠪᠣᠯᠤᠭᠰᠠᠨ ᠬᠦᠨᠳᠦᠲᠦ ᠬᠠᠳ᠌ᠵᠢ ᠷᠠᠾᠢᠮ ᠲᠠᠨ ᠢ᠋ ᠡᠷᠢᠬᠦ ᠭᠡᠵᠦ ᠰᠢᠢᠳᠦᠯᠡ᠃ ᠬᠠᠷᠢᠨ ᠥᠩᠭᠡᠷᠡᠭᠰᠡᠨ ᠰᠥᠨᠢ ᠲᠠᠨ ᠤ᠋ ᠭᠡᠷ ᠲᠦ᠍ ᠢᠷᠡᠲᠡᠯᠡ ᠬᠡᠳᠦᠨ ᠬᠥᠮᠦᠨ ᠬᠠᠷᠠᠩᠭᠤᠢ ᠳ᠋ᠤ᠌ ᠡᠭᠦᠳᠡ ᠶ᠋ᠢ ᠡᠪᠳᠡᠨ ᠪᠠᠢᠬᠤ ᠳ᠋ᠤ᠌ ᠪᠢ ᠲᠡᠳᠡᠨ ᠢ᠋ ᠤᠤᠬᠠᠢ ᠭᠡᠵᠦ ᠳᠠᠭᠠᠷᠢᠭᠠᠳ ᠭᠤᠷᠪᠠ ᠶ᠋ᠢ ᠨᠢ ᠰᠢᠷᠬᠠᠲᠤᠭᠤᠯᠤᠨ ᠨᠢᠭᠡᠨ ᠦ᠌ ᠴᠡᠭᠡᠵᠢ ᠶ᠋ᠢ ᠴᠠᠪᠴᠢᠬᠤ ᠳ᠋ᠤ᠌ ᠳᠡᠭᠡᠷᠡᠮᠴᠢᠨ ᠡᠷᠭᠢᠵᠦ ᠬᠠᠷᠠᠯ ᠦᠭᠡᠢ ᠵᠢᠭᠤᠲᠠᠪᠠ᠃
— ᠰᠢᠷᠬᠠᠳᠤᠭᠰᠠᠨ ᠠᠷᠢᠶᠠᠲᠠᠨ ᠮᠡᠲᠦ ᠬᠠᠰᠬᠢᠷᠤᠭᠴᠢ ᠴᠢ ᠤᠤ? ᠭᠡᠳ ᠡᠷᠳᠡᠮᠲᠡᠨ ᠲᠥᠯᠥᠪ ᠰᠠᠭᠤᠭᠠ ᠵᠠᠯᠠᠭᠤ ᠶ᠋ᠢ ᠭᠠᠢᠬᠠᠨ ᠬᠠᠷᠠᠪᠠ᠃
ᠲᠡᠭᠡᠵᠦ ᠵᠣᠳᠤᠯᠳᠤᠭᠠᠳ ᠡᠨᠳᠡ ᠦᠯᠡᠳᠡᠬᠦ ᠶ᠋ᠢ ᠴᠢ ᠬᠡᠷᠬᠢᠨ ᠰᠢᠢᠳᠪᠦᠷᠢᠯᠡᠵᠦ ᠪᠠᠢᠨᠠ᠃ ᠵᠢᠭᠤᠲᠠᠭᠴᠢᠳ ᠯᠠᠪ ᠮᠣᠩᠭᠣᠯᠴᠤᠳ ᠪᠠᠢᠬᠠ᠃ ᠲᠡᠳᠡ ᠳᠠᠷᠤᠭᠠ ᠳ᠋ᠠᠭᠠᠨ ᠣᠴᠢᠵᠤ ᠴᠢᠮᠠᠶ᠋ᠢ ᠬᠣᠪᠯᠠᠨ ᠮᠡᠳᠡᠭᠦᠯᠵᠦ ᠪᠠᠰᠠ ᠨᠠᠮᠠᠶ᠋ᠢ ᠬᠡᠯᠡᠬᠦ ᠳ᠋ᠦ᠍ ᠪᠢᠳᠡ ᠬᠣᠶᠠᠷ ᠢ᠋ ᠪᠠᠷᠢᠬᠤ ᠪᠠᠷ ᠪᠦᠲᠦᠨ ᠪᠠᠭ ᠴᠡᠷᠢᠭ ᠢᠯᠡᠭᠡᠬᠦ ᠪᠢᠵᠡ᠃ ᠶᠢᠷᠲᠢᠨᠴᠦ ᠶ᠋ᠢᠨ ᠰᠢᠨᠡ ᠡᠵᠡᠳ ᠦ᠋ᠨ ᠥᠭᠡᠳᠡ ᠡᠴᠡ ᠮᠡᠰᠡ ᠳᠠᠯᠠᠢᠭᠰᠠᠨ ᠭᠡᠵᠦ ᠴᠢᠮᠠᠶ᠋ᠢ ᠮᠣᠩᠭᠣᠯᠴᠤᠳ ᠲᠠᠷᠴᠢᠯᠠᠭᠠᠨ ᠠᠯᠠᠬᠤ ᠶ᠋ᠢ ᠪᠣᠳᠣᠨᠠ᠃ ᠪᠢᠳᠡ ᠣᠳᠣ ᠳᠠᠷᠤᠢ ᠵᠢᠭᠤᠲᠠᠬᠤ ᠬᠡᠷᠡᠭᠲᠡᠢ᠃ ᠴᠢ ᠢᠳᠡᠷ ᠲᠡᠩᠬᠡᠭᠡ ᠲᠡᠢ ( ᠂ ) ᠵᠢᠭᠤᠲᠠᠵᠤ ᠴᠢᠳᠠᠨᠠ᠃ ᠬᠠᠷᠢᠨ ᠡᠪᠦᠭᠡᠨ ᠳᠣᠷᠣᠢ ᠪᠢ ᠬᠡᠷᠬᠢᠨ ᠵᠢᠭᠤᠲᠠᠬᠤ ᠪᠣᠢ?
ᠠᠷᠠᠫᠱᠠ ᠪᠣᠰᠴᠤ ᠪᠥᠰᠡᠨ ᠳ᠋ᠡᠭᠡᠨ ᠬᠠᠪᠴᠢᠭᠤᠯᠤᠭᠰᠠᠨ ᠲᠠᠰᠢᠭᠤᠷ ᠢ᠋ ᠵᠢᠭᠠᠵᠤ᠄
— ᠮᠢᠨᠦ ᠮᠣᠷᠢᠨ ᠠ᠋ᠴᠠ ᠦᠯᠡᠳᠡᠭᠰᠡᠨ ᠨᠢ ᠭᠠᠭᠴᠠ ᠡᠨᠡ ᠪᠠᠢᠨᠠ᠂ ᠮᠣᠷᠢ ᠦᠭᠡᠢ ᠪᠣᠯᠬᠤ ᠪᠠᠷ ᠪᠢ ᠪᠠᠰᠠ ᠬᠣᠯᠠ ᠣᠳᠬᠤ ᠦᠭᠡᠢ᠃ ᠬᠡᠳᠦᠢ ᠲᠡᠭᠡᠪᠡᠴᠦ ᠴᠠᠭᠠᠵᠠᠯᠠᠭᠳᠠᠬᠤ ᠶ᠋ᠢ ᠬᠦᠯᠢᠶᠡᠵᠦ ᠡᠨᠳᠡ ᠰᠠᠭᠤᠭᠰᠠᠨ ᠠ᠋ᠴᠠ ᠬᠣᠯᠠᠬᠠᠨ ᠵᠠᠢᠯᠠᠪᠠᠯ ᠳᠡᠭᠡᠷᠡ᠃ ᠡᠷᠬᠢᠮ ᠬᠠᠳ᠌ᠵᠢ ᠷᠠᠾᠢᠮ ᠲᠠᠨ ᠤ᠋ ᠪᠡᠶᠡ ᠳᠣᠷᠣᠢ ᠪᠣᠯᠪᠠᠴᠤ ᠳ᠋ᠧᠷᠸᠢᠱ ᠰᠢᠭ ᠬᠣᠯᠠᠬᠢ ᠵᠠᠮ ᠢ᠋ᠶ᠋ᠠᠷ ᠭᠡᠷᠦᠨ ᠶᠠᠪᠤᠵᠤ ᠰᠤᠷᠤᠭᠰᠠᠨ ᠪᠢᠵᠡ᠃ ᠡᠨᠳᠡ ᠡᠴᠡ ᠶᠠᠪᠤᠵᠤ ᠬᠥᠳᠡᠭᠡ ᠲᠠᠯᠠ ᠳ᠋ᠤ᠌ ᠣᠴᠢᠵᠤ ᠨᠡᠭᠦᠳᠡᠯᠴᠢᠨ ᠦ᠌ ᠳᠣᠲᠣᠷᠠ ᠨᠢᠭᠤᠭᠳᠠᠰᠤᠭᠠᠢ᠃ ᠬᠥᠳᠡᠯᠦᠯ ᠦᠭᠡᠢ ᠰᠠᠭᠤᠭᠴᠢ ᠶ᠋ᠢᠨ ᠵᠦᠭ ᠭᠠᠢ ᠵᠣᠪᠠᠯᠠᠩ ᠬᠢᠯᠢᠨᠴᠡᠲᠦ ᠬᠣᠷᠣᠬᠠᠢ ᠳᠥᠲᠡᠯᠡᠵᠦ ᠢᠷᠡᠳᠡᠭ ᠭᠡᠬᠦ ᠳ᠋ᠦ᠍ ᠹᠡᠺᠢᠾ᠄
— ᠴᠢ ᠶᠣᠰᠣᠲᠠᠢ ᠴᠡᠷᠢᠭ ᠡᠷᠡ ᠶ᠋ᠢᠨ ᠦᠭᠡ ᠶ᠋ᠢ ᠬᠡᠯᠡᠨᠡ᠃ ᠪᠢ ᠳᠠᠬᠢᠨ ᠲᠡᠮᠦᠷ ᠲᠣᠣᠷ ᠲᠤ᠌ ᠣᠷᠣᠬᠤ ᠦᠭᠡᠢ ᠶ᠋ᠢᠨ ᠲᠤᠯᠠᠳᠠ ᠴᠢᠨᠦ ᠬᠠᠮᠲᠤ ᠣᠳᠰᠤᠭᠠᠢ ᠭᠡᠳ ᠲᠤᠭᠤᠷᠭᠠᠨ ᠠ᠋ᠴᠠ ᠪᠠᠨ ᠳ᠋ᠧᠩᠯᠦ᠂ ᠭᠤᠸᠠ ᠪᠠᠳᠢᠷ ᠠᠶᠠᠭᠠ ᠶ᠋ᠢ ᠠᠪᠴᠤ ᠪᠥᠰᠡᠨ ᠳ᠋ᠡᠭᠡᠨ ᠬᠠᠪᠴᠢᠭᠤᠯᠪᠠ᠃ ᠳᠠᠯᠠᠢᠭᠰᠠᠨ ᠭᠡᠳᠡᠭ ᠴᠠᠭᠠᠨ ᠮᠠᠯᠠᠭᠠᠢ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠳ᠋ᠧᠷᠸᠢᠱ ᠦ᠋ᠨ ᠴᠠᠭᠠᠨ ᠪᠣᠭᠣᠳᠠᠯ ᠲᠠᠢ ᠪᠦᠷᠬᠦᠭᠦᠯ ᠢ᠋ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠡᠨ ᠲᠠᠯᠪᠢᠭᠠᠳ ᠬᠥᠯ ᠳ᠋ᠡᠭᠡᠨ ᠬᠠᠭᠤᠴᠢᠨ ᠱᠠᠬᠠᠢ ᠡᠮᠦᠰᠴᠦ ᠣᠪᠣᠬᠠᠢ ᠶ᠋ᠢᠨ ᠳᠤᠮᠳᠠ ᠵᠣᠭᠰᠣᠨ᠄
— ᠪᠢ ᠶᠢᠷᠲᠢᠨᠴᠦ ᠶ᠋ᠢᠨ ᠵᠠᠬᠠ ᠳ᠋ᠤ᠌ ᠬᠦᠷᠲᠡᠯᠡ ᠶᠠᠪᠤᠬᠤ ᠳ᠋ᠤ᠌ ᠪᠡᠯᠡᠬᠡᠨ᠂ ᠡᠨᠡ ᠨᠠᠰᠤᠨ ᠳ᠋ᠠᠭᠠᠨ ᠬᠥᠮᠦᠨ ᠳ᠋ᠦ᠍ ᠭᠡᠮ ᠬᠣᠣᠷ ᠬᠢᠭᠡ ᠦᠭᠡᠢ ᠪᠠᠢᠲᠠᠯᠠ ᠪᠠᠨ ᠬᠡᠷᠡᠭᠲᠡᠨ ᠮᠡᠲᠦ ᠣᠯᠠᠨ ᠵᠢᠯ ᠢ᠋ᠶ᠋ᠡᠷ ᠬᠡᠷᠦᠵᠦ ᠲᠡᠨᠦᠭᠦᠴᠢᠯᠡᠨᠡ᠃ ᠨᠠᠳᠠᠳᠤ ᠣᠳᠣ ᠳᠠᠬᠢᠨ ᠲᠡᠨᠦᠭᠦᠴᠢᠯᠡᠬᠦ ᠴᠠᠭ ᠢᠷᠡᠭᠰᠡᠨ ᠪᠠᠢᠵᠠᠢ᠃ ᠮᠢᠨᠦ ᠬᠠᠭᠤᠴᠢᠨ ᠴᠤᠪᠠ ᠦᠭᠡᠢ᠂ ᠰᠥᠨᠢ ᠶ᠋ᠢᠨ ᠵᠣᠴᠢᠨ ᠤ᠋ ᠣᠷᠬᠢᠭᠰᠠᠨ ᠬᠤᠪᠴᠠᠰᠤ ᠶ᠋ᠢ ᠡᠮᠦᠰᠬᠦ ᠡᠴᠡ ᠪᠢᠰᠢ ᠶᠠᠭᠠᠬᠢᠨᠠ ᠭᠡᠳ ᠮᠣᠩᠭᠣᠯ ᠬᠥᠬᠡ ᠳᠡᠪᠡᠯ ᠢ᠋ ᠠᠪᠴᠤ᠄
— ᠪᠠᠳᠮᠠᠷᠠᠭᠠ ᠰᠢᠭ᠋ ᠤᠯᠠᠭᠠᠨ ᠴᠢᠯᠠᠭᠤᠨ ᠵᠢᠷᠭᠤᠭᠠᠨ ᠲᠣᠪᠴᠢ ᠲᠠᠢ ᠡᠢᠮᠦ ᠰᠠᠢᠬᠠᠨ ᠬᠤᠪᠴᠠᠰᠤ ᠨᠠᠳᠠᠳᠤ ᠶᠡᠷᠦ ᠪᠠᠢᠭᠠ ᠦᠭᠡᠢ᠃ ᠪᠢ ᠡᠨᠳᠡ ᠶᠠᠭᠤᠮᠠ ᠪᠠᠨ ᠴᠥᠮ ᠢ᠋ ᠣᠷᠬᠢᠨᠠ᠂ ᠭᠠᠭᠴᠠᠬᠠᠨ ᠤᠯᠠᠭᠠᠨ ᠰᠠᠬᠠᠯᠲᠤ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠪᠠᠢᠯᠳᠤᠨ ᠳᠣᠪᠲᠣᠯᠬᠤ ᠦᠶᠡᠰ ᠬᠣᠷᠸᠰᠮ ᠳ᠋ᠤ᠌ ᠡᠭᠦᠰᠦᠭᠰᠡᠨ ᠶᠡᠷᠦ ᠪᠤᠰᠤ ᠶ᠋ᠢᠨ ᠶᠠᠪᠤᠳᠠᠯ ᠤ᠋ᠨ ᠲᠤᠬᠠᠢ ᠪᠢᠴᠢᠭᠰᠡᠨ ᠨᠣᠮ ᠢ᠋ᠶ᠋ᠠᠨ ᠣᠷᠬᠢᠬᠤ ᠳ᠋ᠤ᠌ ᠬᠠᠢᠷᠠᠨ ᠰᠠᠨᠠᠭᠳᠠᠵᠤ ᠪᠠᠢᠨᠠ ᠭᠡᠬᠦ ᠳ᠋ᠦ᠍᠂
ᠠᠷᠠᠫᠱᠠ ᠶᠠᠭᠠᠷᠠᠨ᠄
— ᠪᠤᠤ ᠭᠠᠰᠠᠯᠤᠭᠲᠤᠨ ᠭᠡᠳ ᠬᠠᠳ᠌ᠵᠢ ᠷᠠᠾᠮ ᠤ᠋ᠨ ᠭᠠᠷ ᠢ᠋ ᠬᠦᠨᠳᠦᠳᠬᠡᠨ ᠡᠷᠭᠦᠵᠦ ᠬᠦᠰᠡᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠲᠡᠭᠦᠨ ᠦ᠌ ᠮᠶᠤᠢ᠍ᠷᠢᠳ ᠪᠣᠯᠤᠭᠰᠠᠨ ᠲᠡᠮᠳᠡᠭ ᠪᠣᠯᠭᠠᠵᠤ ᠨᠢᠳᠦᠨ ᠦ᠌ ᠳᠡᠭᠡᠭᠦᠷ ᠢᠯᠢᠪᠡ᠃
— ᠣᠳᠣ ᠠ᠋ᠴᠠ ᠡᠬᠢᠯᠡᠨ ᠲᠠᠨ ᠳ᠋ᠤ᠌ ᠱᠠᠪᠢ ᠣᠷᠣᠵᠤ ᠢᠮᠠᠭᠲᠠ ᠲᠠᠨ ᠢ᠋ ᠳᠠᠭᠠᠨ᠂ ᠰᠠᠶᠢ ᠬᠡᠯᠡᠭᠰᠡᠨ ᠨᠣᠮ ᠢ᠋ ᠴᠢᠨᠢ ᠠᠪᠴᠤ ᠶᠠᠪᠤᠬᠤ ᠶ᠋ᠢ ᠵᠥᠪᠰᠢᠶᠡᠷᠡᠨᠡ ᠤᠤ? ᠪᠢ ᠪᠣᠭᠴᠣᠨ ᠳ᠋ᠠᠭᠠᠨ ᠠᠭᠤᠯᠰᠤᠭᠠᠢ ᠭᠡᠬᠦ ᠳ᠋ᠦ᠍ ᠹᠠᠺᠢᠾ᠂
— ᠴᠢ ᠰᠠᠢᠨ ᠦᠭᠡ ᠬᠡᠯᠡᠪᠡ ᠭᠡᠳ ᠬᠦᠳᠦᠰᠦᠨ ᠪᠠᠷᠢᠨᠲᠠᠭ ᠲᠠᠢ ᠲᠣᠮᠣ ᠰᠤᠳᠤᠷ ᠪᠢᠴᠢᠭ ᠦ᠋ᠨ ᠳᠤᠷᠠᠰᠬᠠᠯ ᠤ᠋ᠨ ᠵᠡᠰ ᠬᠠᠢᠷᠴᠠᠭ ᠢ᠋ ᠥᠭᠭᠦᠭᠡᠳ ᠬᠡᠳᠦᠨ ᠵᠢᠯ ᠰᠠᠭᠤᠭᠰᠠᠨ ᠣᠪᠣᠬᠠᠢ ᠪᠠᠨ ᠭᠣᠨᠢᠷᠬᠠᠯᠲᠠᠢ ᠪᠠᠷ ᠲᠣᠭᠣᠷᠢᠭᠤᠯᠤᠨ ᠬᠠᠷᠠᠪᠠ᠃
— ᠣᠳᠣ ᠲᠦᠷᠭᠡᠨ ᠶᠠᠪᠤᠰᠤᠭᠠᠢ!
ᠬᠣᠶᠠᠭᠤᠯᠠ ᠣᠪᠣᠬᠠᠢ ᠠ᠋ᠴᠠ ᠭᠠᠷᠬᠤ ᠳ᠋ᠤ᠌ ᠬᠠᠳ᠋ᠵᠢ ᠷᠠᠾᠢ᠍ᠮ ᠡᠭᠦᠳᠡ ᠶ᠋ᠢ ᠮᠣᠳᠣᠨ ᠲᠦᠭᠵᠢᠶᠡ ᠪᠡᠷ ᠣᠨᠢᠰᠤᠯᠠᠭᠠᠳ ᠨᠣᠬᠠᠢ ᠶ᠋ᠢᠨ ᠵᠦᠭ᠄
— ᠠᠺᠪᠠᠢ ᠭᠡᠵᠦ ᠱᠣᠭᠰᠢᠷᠠᠵᠤ᠂ ᠴᠢ ᠭᠡᠷ ᠢ᠋ᠶ᠋ᠡᠨ ᠰᠠᠬᠢᠨᠠ᠃ ᠡᠵᠡᠨ ᠴᠢᠨᠢ ᠳᠠᠬᠢᠵᠤ ᠢᠷᠡᠬᠦ ᠪᠣᠯᠪᠠ ᠤᠤ ᠳᠠ ᠭᠡᠪᠡ᠃ ᠬᠥᠭᠰᠢᠨ ᠴᠠᠭᠠᠨ ᠨᠣᠬᠠᠢ ᠵᠥᠷᠢᠴᠡᠯ ᠦᠭᠡᠢ ᠣᠪᠣᠬᠠᠢ ᠶ᠋ᠢᠨ ᠪᠣᠱᠣᠭᠠᠨ ᠳ᠋ᠤ᠌ ᠬᠡᠪᠲᠡᠭᠡᠳ ᠴᠦᠯ ᠲᠠᠯᠠ ᠶ᠋ᠢᠨ ᠵᠠᠮ ᠢ᠋ᠶ᠋ᠠᠷ ᠬᠤᠷᠳᠤᠪᠴᠢᠯᠠᠨ ᠠᠯᠬᠤᠯᠠᠬᠤ ᠬᠣᠶᠠᠷ ᠵᠢᠭᠤᠯᠴᠢᠨ ᠤ᠋ ᠬᠣᠢᠨᠠ ᠠ᠋ᠴᠠ ᠲᠣᠯᠣᠭᠠᠢ ᠶ᠋ᠢ( ᠪᠡᠨ) ᠡᠷᠭᠦᠨ ᠤᠯᠠᠭᠠᠨ ᠨᠢᠳᠦ ᠪᠡᠷ ᠭᠠᠢᠬᠠᠭᠰᠠᠨ ᠪᠠᠢᠳᠠᠯ ᠲᠠᠢ ᠬᠠᠷᠠᠯᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠠᠯᠲᠠᠨᠴᠢᠮᠡᠭ᠂ ᠠᠷᠢᠭᠤᠨ᠂ ᠪᠠᠯ᠂ ᠳ᠂ ᠣᠶᠤᠨᠪᠢᠯᠢᠭ᠌᠂ ᠵᠢᠩᠯᠢᠬᠤᠸᠠᠷ᠂ ᠪᠠᠶᠠᠨᠴᠡᠴᠡᠭ
ᠬᠢᠨᠠᠭᠴᠢ᠄ ᠠᠷᠢᠭᠤᠨ᠂ ᠠᠯᠲᠠᠨᠴᠢᠮᠡᠭ᠂ ᠪᠠᠶᠠᠨᠴᠡᠴᠡᠭ