ᠪᠠᠲᠤ ᠬᠠᠭᠠᠨ 1-02ᠬᠠᠷᠠᠩᠭᠤᠢ ᠶ᠋ᠢᠨ ᠵᠣᠴᠢᠨ- Бат хаан
515ᠬᠣᠶᠠᠷ ᠬᠠᠷᠠᠩᠭᠤᠢ ᠶ᠋ᠢᠨ ᠵᠣᠴᠢᠨ
ᠲᠡᠭᠦᠨ ᠡᠴᠡ ᠹᠠᠺᠢᠾ ᠬᠠᠳ᠋ᠵᠢ ᠷᠠᠾᠢᠮ ᠳᠠᠬᠢᠨ ᠪᠣᠯᠢᠭᠠᠳ ᠬᠤᠯᠤᠰᠤᠨ ᠦᠵᠦᠭ ᠢ᠋ ᠵᠡᠰ ᠲᠠᠯᠪᠢᠭᠤᠷ ᠳᠡᠭᠡᠷᠡ ᠪᠣᠯᠭᠣᠮᠵᠢᠲᠠᠢ ᠪᠠᠷ ᠲᠠᠯᠪᠢᠭᠠᠳ ᠪᠤᠭᠤᠷᠤᠯ ᠰᠠᠬᠠᠯ ᠢ᠋ ᠠᠯᠠᠭᠠ ᠪᠠᠷ ᠢ᠋ᠶ᠋ᠠᠨ ᠢᠯᠢᠪᠡ᠃ ᠵᠢᠭᠳᠡ ᠳᠤᠰᠤᠯᠠᠬᠤ ᠪᠣᠷᠣᠭᠠᠨ ᠤ᠋ ᠳᠤᠰᠤᠯ ᠤ᠋ᠨ ᠴᠢᠮᠡᠭᠡᠨ ᠦ᠌ ᠬᠠᠵᠠᠭᠤ ᠪᠠᠷ ᠨᠢᠮᠭᠡᠨ ᠲᠤᠭᠤᠷᠭᠠᠨ ᠤ᠋ ᠴᠠᠭᠠᠨᠠ ᠠᠨᠢᠷ ᠭᠠᠷᠴᠤ ᠲᠣᠳᠣᠬᠠᠨ ᠰᠣᠨᠣᠰᠤᠭᠳᠠᠯᠠ᠃
《ᠨᠠᠮᠤᠷ ᠤ᠋ᠨ ᠰᠡᠷᠢᠭᠦᠨ ᠰᠥᠨᠢ ᠶ᠋ᠢᠨ ᠬᠠᠷᠠᠩᠭᠤᠢ ᠳ᠋ᠤ᠌ ᠬᠡᠨ ᠡᠨᠳᠡ ᠶᠠᠪᠤᠬᠤ ᠠᠵᠢ》
ᠭᠠᠭᠴᠠ ᠮᠠᠭᠤ ᠰᠠᠨᠠᠭᠠ ᠪᠠᠷ ᠬᠠᠳᠬᠤᠭᠳᠠᠭᠰᠠᠨ ᠬᠣᠣᠷᠲᠤ ᠡᠲᠡᠭᠡᠳ ᠡᠨᠡ ᠴᠢᠭᠢᠭᠲᠦ ᠪᠤᠳᠠᠩ ᠳ᠋ᠤ᠌ ᠲᠡᠨᠦᠭᠦᠴᠢᠯᠡᠬᠦ ᠪᠢᠵᠡ᠃ ᠬᠠᠭᠤᠴᠢᠷᠠᠭᠰᠠᠨ ᠪᠣᠳᠢ ᠨᠣᠮ ᠤ᠋ᠨ ᠳᠡᠭᠡᠳᠦᠬᠢ ᠰᠢᠪᠡᠷ ᠴᠥᠭᠥᠴᠡ ᠲᠡᠢ ᠳ᠋ᠧᠩ ᠦ᠋ᠨ ᠪᠦᠳᠡᠭᠢ ᠭᠡᠷᠡᠯ ᠲᠣᠷᠲᠣᠭ ᠰᠠᠭᠤᠭᠰᠠᠨ ᠲᠤᠭᠤᠷᠭᠠ᠂ ᠬᠠᠭᠤᠴᠢᠨ ᠬᠡᠪᠢᠰ᠂ ᠵᠦᠳᠡᠷᠡᠭᠰᠡᠨ ᠴᠢᠷᠠᠢ ᠲᠠᠢ ᠬᠥᠳᠡᠯᠭᠡᠭᠡ ᠦᠭᠡᠢ ᠡᠷᠳᠡᠮᠲᠡᠨ ᠳᠡᠭᠡᠷᠡ ᠲᠣᠰᠴᠤ ᠪᠠᠢᠯᠠ᠃ ᠨᠠᠷᠢᠨ ᠴᠣᠩᠬᠣ ᠶ᠋ᠢ ᠬᠠᠯᠬᠠᠯᠠᠭᠰᠠᠨ ᠥᠭᠡᠳᠡᠰᠦᠨ ᠡᠷᠢᠶᠡᠨ ᠪᠥᠰ ᠪᠢᠴᠢᠬᠠᠨ ᠬᠥᠳᠡᠯᠪᠡ᠃
ᠡᠭᠦᠳᠡᠨ ᠳ᠋ᠦ᠍ ᠴᠠᠭᠠᠷᠢᠭᠯᠠᠨ ᠬᠡᠪᠲᠡᠭᠰᠡᠨ ᠲᠣᠮᠣ ᠴᠠᠭᠠᠨ ᠨᠣᠬᠠᠢ ᠴᠢᠬᠢ ᠶ᠋ᠢ ᠰᠣᠷᠲᠣᠢᠯᠭᠠᠵᠤ ᠠᠷᠬᠢᠷᠠᠪᠠ᠃ ᠴᠣᠩᠬᠣ ᠪᠠᠷ ᠪᠣᠷᠣ ᠭᠠᠷ ᠣᠷᠣᠵᠤ ᠬᠥᠰᠢᠭᠡ ᠶ᠋ᠢᠨ ᠰᠡᠵᠢᠭᠦᠷ ᠢ᠋ ᠰᠡᠬᠦᠮᠡᠭᠴᠡ ᠭᠢᠯᠠᠢᠭᠰᠠᠨ ᠬᠠᠷᠠ ᠨᠢᠳᠦ ᠬᠠᠷᠠᠩᠭᠤᠢ ᠳ᠋ᠤ᠌ ᠬᠢᠯᠠᠰᠬᠢᠵᠡᠢ᠃ ᠬᠠᠳ᠋ᠵᠢ ᠷᠠᠾᠢᠮ— ᠬᠡᠨ ᠪᠣᠢ! ᠭᠡᠵᠦ ᠠᠰᠠᠭᠤᠭᠠᠳ ᠲᠡᠮᠡᠦᠯᠦᠨ ᠪᠠᠢᠭᠠ ᠨᠣᠬᠠᠢ ᠶ᠋ᠢᠨ ᠲᠣᠯᠣᠭᠠᠢ ᠳᠡᠭᠡᠷᠡ ᠭᠠᠷ ᠢ᠋ᠶ᠋ᠠᠨ ᠲᠠᠯᠪᠢᠨ ᠠᠺᠪᠠᠢ ᠬᠡᠪᠲᠡ! ᠭᠡᠪᠡ᠃
ᠲᠥᠭᠡᠷᠢᠭᠰᠡᠨ ᠬᠥᠮᠦᠨ ᠢ᠋ ᠳᠤᠯᠠᠭᠠᠴᠠᠭᠤᠯᠤᠭᠲᠤᠨ! ᠨᠣᠷᠤᠭᠰᠠᠨ ᠬᠤᠪᠴᠠᠰᠤ ᠪᠠᠨ ᠬᠠᠲᠠᠭᠠᠶᠠ! ᠭᠡᠵᠦ ᠦᠯᠦ ᠲᠠᠨᠢᠬᠤ ᠬᠥᠮᠦᠨ ᠳᠥᠩᠭᠡᠵᠢ ᠰᠣᠨᠣᠰᠳᠠᠬᠤ ᠪᠠᠷ ᠰᠢᠪᠡᠨᠡᠨ ᠬᠡᠯᠡᠪᠡ᠃
《ᠴᠢᠮᠡᠭᠡᠨ ᠡᠴᠡ ᠠᠶᠤᠬᠤ ᠮᠡᠲᠦ ᠥᠭᠦᠯᠡᠬᠦ ᠡᠢᠮᠦ ᠬᠥᠮᠦᠨ ᠢ᠋ ᠢᠲᠡᠭᠡᠮᠵᠢᠯᠡᠵᠦ ᠪᠣᠯᠬᠤ ᠤᠤ? 》 ᠭᠡᠵᠦ ᠹᠠᠺᠢᠾ ᠳᠣᠲᠣᠷᠠ ᠪᠠᠨ ᠰᠡᠳᠬᠢᠵᠡᠢ᠃
— ᠲᠠᠨ ᠳ᠋ᠤ᠌ ᠨᠣᠮ ᠰᠤᠳᠤᠷ ᠪᠠᠢᠬᠤ ᠶ᠋ᠢ ᠦᠵᠡᠵᠦ ᠪᠠᠢᠨᠠ᠃ ᠬᠠᠳ᠋ᠵᠢ ᠷᠠᠾᠢ᠍ᠮ ᠪᠠᠭᠰᠢ ᠲᠠ ᠪᠢᠰᠢ ᠤᠤ ᠭᠡᠬᠦ ᠳ᠋ᠦ᠍
— ᠴᠢ ᠡᠨᠳᠡᠭᠦᠷᠡᠭᠰᠡᠨ ᠦᠭᠡᠢ᠂ ᠦᠨᠡᠬᠡᠷ ᠪᠢ ᠮᠥᠨ ᠭᠡᠪᠡ᠃
— ᠲᠡᠢᠮᠦ ᠪᠣᠯ ᠨᠠᠮᠠᠶ᠋ᠢ ᠬᠤᠷᠳᠤᠨ ᠣᠷᠣᠭᠤᠯᠤᠭᠲᠤᠨ᠂ ᠶᠡᠬᠡ ᠪᠠᠭᠠᠲᠤᠷ ᠮᠠᠸᠸᠷᠠᠩᠭᠠᠷ ᠮᠠᠾᠮᠤᠳ᠋— ᠶᠠᠯᠸᠠᠴ ᠲᠠᠨ ᠤ᠋ ᠠᠮᠤᠷ ᠮᠡᠨᠳᠦ ᠶ᠋ᠢ ᠠᠰᠠᠭᠤᠯᠭᠠᠪᠠ ᠭᠡᠬᠦ ᠳ᠋ᠦ᠍ ᠬᠠᠷᠢᠭᠤ ᠳ᠋ᠤᠨᠢ᠄
— ᠪᠤᠰᠤᠳ ᠬᠥᠮᠦᠨ ᠣᠷᠣᠭᠤᠯᠳᠠᠭ ᠦᠭᠡᠢ ᠮᠢᠨᠦ ᠣᠪᠣᠬᠠᠢ ᠶ᠋ᠢᠨ ᠡᠭᠦᠳᠡ ᠶ᠋ᠢ ᠡᠨᠡ ᠨᠡᠷᠡ ᠨᠡᠭᠡᠭᠡᠪᠡ ᠭᠡᠳ ᠹᠠᠺᠢᠾ ᠮᠣᠳᠣᠨ ᠣᠨᠢᠰᠣ ᠶ᠋ᠢ ᠲᠠᠢᠯᠬᠤ ᠳ᠋ᠤ᠌ ᠦᠯᠦ ᠲᠠᠨᠢᠬᠤ ᠬᠥᠮᠦᠨ ᠪᠥᠬᠥᠢᠵᠦ ᠳᠣᠲᠣᠭᠰᠢ ᠣᠷᠣᠯᠠ᠃
ᠨᠠᠷᠠᠨ ᠳ᠋ᠤ᠌ ᠪᠣᠷᠣᠯᠠᠭᠰᠠᠨ ᠴᠢᠷᠠᠢ ᠲᠠᠢ᠂ ᠳᠠᠪᠠᠭᠭᠠᠷ ᠪᠡᠶᠡ ᠲᠡᠢ ᠮᠣᠩᠭᠣᠯ ᠬᠤᠪᠴᠠᠰᠤ ᠡᠮᠦᠰᠦᠭᠰᠡᠨ ᠲᠡᠷᠡ ᠬᠥᠮᠦᠨ ᠰᠢᠯᠤᠭᠤᠨ ᠵᠣᠭᠰᠣᠭᠠᠳ ᠡᠰᠢ ᠲᠠᠰᠢ ᠪᠠᠨ ᠬᠠᠷᠠᠪᠠ᠃ ᠬᠠᠳ᠋ᠵᠢ ᠷᠠᠾᠢ᠍ᠮ ᠠᠷᠬᠢᠷᠠᠨ ᠪᠠᠢᠭᠠ ᠨᠣᠬᠠᠢ ᠪᠠᠨ ᠪᠠᠷᠢᠭᠠᠳ ᠢᠷᠡᠭᠰᠡᠨ ᠬᠥᠮᠦᠨ ᠢ᠋ ᠠᠵᠢᠭᠯᠠᠪᠠ᠃ ᠲᠡᠭᠦᠨ ᠦ᠌ ᠢᠲᠡᠭᠡᠯᠲᠡᠢ ᠪᠠ ᠪᠦᠷ ᠡᠵᠡᠷᠬᠡᠭ ᠪᠠᠢᠳᠠᠯ ᠬᠥᠳᠡᠯᠭᠡᠭᠡᠨ ᠪᠦᠷᠢ ᠳ᠋ᠦ᠍ᠨᠢ ᠮᠡᠳᠡᠭᠳᠡᠯᠡ᠃
ᠪᠥᠰ ᠳᠡᠪᠡᠯ ᠢ᠋ᠶ᠋ᠡᠨ ᠲᠠᠢᠯᠤᠨ ᠮᠣᠳᠣᠨ ᠬᠠᠳᠠᠭᠠᠰᠤᠨ ᠳ᠋ᠤ᠌ ᠡᠯᠭᠦᠭᠡᠳ ᠨᠣᠷᠤᠭᠰᠠᠨ ᠰᠢᠷᠠ ᠭᠤᠲᠤᠯ ᠢ᠋ᠶ᠋ᠠᠨ ᠠᠷᠠᠢᠭᠡᠵᠦ ᠲᠠᠢᠯᠵᠤ ᠬᠠᠵᠠᠭᠤ ᠲᠡᠰᠢ ᠬᠠᠶᠠᠭᠠᠳ ᠤᠨᠲᠠᠷᠠᠵᠤ ᠪᠠᠢᠭᠠ ᠭᠠᠯ ᠤ᠋ᠨ ᠳᠡᠷᠭᠡᠳᠡᠬᠢ ᠬᠠᠭᠤᠴᠢᠨ ᠪᠢᠴᠢᠬᠠᠨ ᠬᠡᠪᠢᠰ ᠦ᠋ᠨ ᠳᠡᠭᠡᠷᠡ ᠰᠠᠭᠤᠵᠤ ᠭᠡᠷ ᠲᠡᠭᠡᠨ ᠪᠠᠢᠭᠠ ᠮᠡᠲᠦ ᠬᠡᠨᠡᠭ ᠦᠭᠡᠢ ᠪᠡᠷ ᠨᠣᠢᠲᠠᠨ ᠭᠠᠷ ᠢ᠋ᠶ᠋ᠠᠨ ᠬᠡᠪᠢᠰ ᠦ᠋ᠨ ᠳᠡᠭᠡᠷᠡ ᠪᠠᠢᠭᠠ ᠨᠡᠬᠡᠢ ᠳᠡᠪᠡᠯ ᠳ᠋ᠦ᠍ ᠠᠷᠴᠢᠭᠠᠳ
— ᠭᠠᠯ ᠤᠨᠲᠠᠷᠠᠭᠠᠬᠤ ᠬᠡᠷᠡᠭᠲᠡᠢ ᠭᠡᠳ ᠲᠡᠷᠡ ᠮᠣᠩᠭᠣᠯ ᠬᠥᠮᠦᠨ ᠰᠢᠪᠡᠷ ᠴᠥᠭᠥᠴᠡ ᠲᠡᠢ ᠳ᠋ᠧᠩ ᠦ᠋ᠨ ᠪᠠᠳᠮᠠᠯᠠᠭᠰᠠᠨ ᠭᠣᠣᠯ ᠢ᠋ ᠬᠤᠷᠤᠭᠤ ᠪᠠᠷ ᠴᠢᠮᠬᠢᠬᠦ ᠳ᠋ᠦ᠍ ᠬᠠᠪ ᠬᠠᠷᠠᠩᠭᠤᠢ ᠪᠣᠯᠤᠨ ᠭᠠᠭᠴᠠᠬᠠᠨ ᠬᠥᠰᠢᠭᠡ ᠶ᠋ᠢᠨ ᠵᠠᠪᠰᠠᠷ ᠢ᠋ᠶ᠋ᠠᠷ ᠴᠣᠩᠬᠣᠨ ᠤ᠋ ᠭᠡᠭᠡ ᠦᠵᠡᠭᠳᠡᠵᠦ ᠪᠠᠢᠯᠠ᠃
— ᠶᠠᠭᠤᠨ ᠳ᠋ᠤ᠌ ᠢᠩᠭᠢᠵᠦ ᠪᠠᠢᠨᠠ ᠭᠡᠵᠦ ᠹᠠᠺᠢᠾ ᠰᠢᠪᠡᠨᠡᠨ ᠠᠰᠠᠭᠤᠪᠠ᠃ ᠮᠢᠨᠦ ᠡᠴᠢᠭᠡ ᠶ᠋ᠢ ᠠᠯᠠᠭᠰᠠᠨ ᠵᠡᠪᠰᠡᠭᠲᠦ ᠬᠥᠮᠦᠰ ᠬᠣᠢᠨᠠ ᠠ᠋ᠴᠠ ᠮᠢᠨᠢ ᠨᠡᠬᠡᠵᠦ ᠶᠠᠪᠤᠨᠠ᠃ ᠲᠡᠳᠡ ᠨᠠᠮᠠᠶ᠋ᠢ ᠪᠠᠰᠠ ᠠᠯᠠᠬᠤ ᠰᠠᠨᠠᠭᠠ ᠲᠠᠢ ᠶᠤᠮ᠃ ᠲᠠᠨ ᠤ᠋ ᠭᠡᠷᠡᠯ ᠲᠡᠢ ᠴᠣᠩᠬᠣ ᠬᠣᠯᠠ ᠠ᠋ᠴᠠ ᠬᠠᠷᠠᠭᠳᠠᠨᠠ᠃ ᠰᠥᠨᠢ ᠬᠠᠷᠠᠩᠭᠤᠢ ᠪᠣᠯᠪᠠᠴᠤ ᠪᠢ ᠲᠠᠨ ᠢ᠋ ᠣᠯᠵᠤ ᠢᠷᠡᠯᠡ᠂ ᠨᠣᠬᠠᠢ ᠪᠠᠨ ᠭᠠᠷᠭᠠᠭᠲᠤᠨ!
—ᠡᠨᠡ ᠨᠣᠬᠠᠢ ᠮᠢᠨᠦ ᠭᠠᠭᠴᠠᠬᠠᠨ ᠬᠠᠮᠠᠭᠠᠯᠠᠭᠴᠢ ᠶᠤᠮ᠃
—ᠵᠠᠢᠯᠠᠭᠤᠯᠤᠭᠲᠤᠨ! ᠠᠷᠬᠢᠷᠠᠵᠤ ᠪᠦᠬᠦ ᠰᠢᠭ᠌ᠨᠡᠺ ᠢ᠋ᠶ᠋ᠡᠷ ᠳᠦᠭᠦᠷᠡᠩ ᠴᠢᠮᠡᠭᠡ ᠭᠠᠷᠭᠠᠨᠠ ᠭᠡᠬᠦ ᠳ᠋ᠦ᠍᠄
—ᠬᠠᠮᠠᠭᠠᠯᠠᠭᠴᠢ ᠠ᠋ᠴᠠ ᠪᠤᠤ ᠠᠶᠤᠭᠲᠤᠨ ᠭᠡᠪᠡ᠃
— ᠨᠣᠬᠠᠢ ᠪᠠᠢᠰᠢᠩ ᠤ᠋ᠨ ᠭᠠᠳᠠᠭᠤᠷ ᠶᠠᠪᠤᠵᠤ ᠬᠡᠷᠪᠡ ᠮᠠᠭᠤ ᠡᠲᠡᠭᠡᠳ ᠣᠢᠷᠠᠲᠤᠨ ᠢᠷᠡᠪᠡᠯ ᠪᠢᠳᠡᠨ ᠳ᠋ᠦ᠍ ᠮᠡᠳᠡᠭᠳᠡᠨᠡ᠃ ᠹᠠᠺᠢᠾ ᠡᠵᠡᠷᠬᠡᠭ ᠭᠡᠢᠴᠢᠨ ᠦ᠌ ᠦᠭᠡ ᠶ᠋ᠢ ᠠᠷᠭᠠ ᠦᠭᠡᠢ ᠠᠶᠠᠳᠠᠨ ᠳᠠᠭᠠᠵᠤ ᠡᠭᠦᠳᠡ ᠶ᠋ᠢ ᠨᠡᠭᠡᠭᠡᠨ ᠰᠡᠭᠰᠡᠭᠡᠷ ᠨᠣᠬᠠᠢ ᠪᠠᠨ ᠬᠠᠷᠠᠩᠭᠤᠢ ᠤᠷᠤᠭᠤ ᠲᠦᠯᠬᠢᠨ ᠭᠠᠷᠭᠠᠪᠠ᠃
ᠬᠠᠳ᠌ᠵᠢ ᠷᠠᠾᠢᠮ ᠵᠢᠭᠤᠲᠠᠪᠠᠯ ᠳᠡᠭᠡᠷᠡ ᠪᠢᠰᠢ ᠪᠣᠯᠪᠠ ᠤᠤ ᠭᠡᠵᠦ ᠲᠡᠭᠡᠨᠡᠭᠡᠯᠵᠡᠨ ᠵᠣᠭᠰᠣᠬᠤ ᠳ᠋ᠤ᠌ ᠬᠦᠴᠦᠲᠦ ᠭᠠᠷ ᠢ᠋ᠶ᠋ᠠᠨ ᠭᠡᠳᠡᠷᠭᠦ ᠲᠡᠳᠡᠨ ᠵᠣᠴᠢᠨ ᠥᠪᠡᠷ ᠢ᠋ᠶ᠋ᠡᠨ ᠡᠭᠦᠳᠡ ᠶ᠋ᠢ ᠣᠨᠢᠰᠤᠯᠠᠭᠠᠳ ᠹᠠᠺᠢᠾ ᠢ᠋ ᠲᠠᠯᠪᠢᠯ ᠦᠭᠡᠢ ᠬᠡᠪᠢᠰ ᠦ᠋ᠨ ᠳᠡᠪᠢᠰᠬᠡᠷ ᠳᠡᠭᠡᠷᠡ ᠬᠥᠲᠥᠯᠵᠦ ᠢᠷᠡᠨ ᠬᠠᠮᠲᠤ ᠰᠥᠬᠥᠷᠡᠨ ᠰᠠᠭᠤᠪᠠ᠃
ᠨᠢᠮᠭᠡᠨ ᠲᠤᠭᠤᠷᠭᠠᠨ ᠤ᠋ ᠴᠠᠭᠠᠨᠠ ᠨᠣᠬᠠᠢ ᠬᠦᠷᠬᠢᠷᠡᠬᠦ ᠳ᠋ᠦ᠍᠂ ᠦᠭᠡ ᠪᠡᠨ ᠲᠠᠰᠤᠳᠠᠨ ᠴᠢᠩᠨᠠᠵᠤ ᠠᠶᠠᠷᠬᠠᠨ ᠰᠢᠪᠡᠨᠡᠵᠦ᠄
ᠣᠨᠢᠰᠣ ᠶ᠋ᠢ ᠪᠤᠤ ᠲᠠᠢᠯᠤᠭᠲᠤᠨ᠂ ᠲᠡᠳᠡ ᠭᠡᠲᠡᠵᠦ ᠢᠷᠡᠭᠡᠳ ᠬᠠᠭᠠᠯᠭᠠᠨ ᠤ᠋ ᠠᠷᠤ ᠳ᠋ᠤ᠌ ᠤᠲᠤᠵᠤ ᠵᠣᠭᠰᠣᠵᠤ ᠮᠠᠭᠠᠳ ᠦᠭᠡᠢ᠃ ᠤᠷᠪᠠᠭᠰᠠᠨ ᠮᠠᠭᠤ ᠬᠤᠯᠠᠭᠠᠢ ᠨᠠᠷ ᠮᠢᠨᠦ ᠡᠴᠢᠭᠡ ᠶ᠋ᠢᠨ ᠨᠢᠷᠤᠭᠤ ᠶ᠋ᠢ ᠬᠤᠭᠤᠯᠤᠨ ᠠᠯᠠᠪᠠ᠃ ᠪᠢ ᠲᠡᠳᠡᠨ ᠢ᠋ ᠠᠮᠢᠳᠤ ᠪᠠᠷ ᠨᠢ ᠲᠣᠭᠣᠭᠠᠨ ᠳ᠋ᠤ᠌ ᠴᠢᠨᠠᠨᠠ᠃ ᠬᠥᠬᠡ ᠮᠥᠩᠬᠡ ᠲᠩᠷᠢ ᠶ᠋ᠢᠨ ᠡᠮᠦᠨᠡ ᠲᠠᠩᠭᠠᠷᠢᠭᠯᠠᠵᠤ ᠲᠡᠭᠡᠵᠦ ᠦᠢᠯᠡᠳᠰᠦᠭᠡᠢ᠃ ᠬᠡᠷᠪᠡ ᠲᠠ ᠡᠨᠳᠡ ᠡᠴᠡ ᠵᠢᠭᠤᠲᠠᠬᠤ ᠶ᠋ᠢ ᠵᠠᠪᠳᠤᠪᠠᠯ ᠪᠢ ᠲᠠᠨ ᠤ᠋ ᠪᠠᠭᠠᠯᠵᠤᠷ ᠢ᠋ ᠰᠢᠬᠠᠵᠤ ᠠᠯᠠᠨᠠ᠃ ᠦᠯᠦ ᠲᠠᠨᠢᠬᠤ ᠬᠥᠮᠦᠨ ᠶᠠᠮᠠᠷ ᠨᠢᠭᠡᠨ ᠦᠭᠡ ᠶ᠋ᠢ ᠬᠦᠩᠭᠢᠨᠡᠨ ᠬᠡᠯᠡᠭᠡᠳ ᠭᠡᠷ ᠦ᠋ᠨ ᠡᠵᠡᠨ ᠦ᠌ ᠭᠠᠷ ᠢ᠋ ᠬᠠᠯᠠᠭᠤᠨ ᠬᠤᠷᠤᠭᠤ ᠪᠠᠷ ᠴᠢᠩᠭᠠ ᠠᠳᠬᠤᠨ ᠡᠰᠡ ᠲᠠᠯᠪᠢᠵᠠᠢ᠃ ᠪᠡᠶᠡ ᠨᠢ ᠬᠠᠯᠠᠭᠤᠷᠠᠵᠤ ᠴᠡᠴᠡᠷᠡᠨ ᠪᠠᠢᠲᠠᠯᠠ ᠭᠡᠨᠡᠳᠲᠡ ᠤᠬᠤᠰᠬᠢᠨ ᠪᠣᠰᠴᠤ ᠴᠢᠩᠨᠠᠨ ᠲᠤᠭᠤᠷᠭᠠ ᠶ᠋ᠢ ᠨᠠᠯᠠᠪᠠ᠃
ᠲᠡᠳᠡ ᠢᠷᠡᠯᠡ᠂ ᠦᠬᠦᠯ ᠨᠠᠮᠠᠶ᠋ᠢ ᠭᠦᠢᠴᠡᠵᠦ ᠢᠷᠡᠵᠡᠢ᠃ ᠲᠠ ᠨᠠᠮᠠᠶ᠋ᠢ ᠪᠤᠤ ᠪᠠᠷᠢᠵᠤ ᠦᠭᠭᠥᠭᠳᠦᠨ ᠭᠡᠵᠦ ᠰᠢᠪᠡᠨᠡᠨᠡ᠃ ᠭᠠᠳᠠᠨᠠ ᠨᠣᠬᠠᠢ ᠠᠭᠤᠷᠲᠠᠢ ᠪᠠᠷ ᠬᠤᠴᠠᠵᠤ ᠨᠢᠭᠡᠨ ᠬᠥᠮᠦᠨ ᠢᠷᠡᠵᠦ ᠮᠠᠷᠭᠤᠯᠳᠤᠬᠤ ᠳᠠᠭᠤᠨ ᠰᠣᠨᠣᠰᠳᠠᠨ᠂ ᠬᠦᠴᠦᠲᠡᠢ ᠴᠣᠬᠢᠯᠲᠠ ᠲᠤᠭᠤᠷᠭᠠ ᠶ᠋ᠢ ᠳᠣᠩᠰᠣᠯᠭᠠᠨᠠ᠃
— ᠬᠥᠶᠢ! ᠭᠡᠷ ᠦ᠋ᠨ ᠡᠵᠡᠨ ᠡᠭᠦᠳᠡ ᠪᠡᠨ ᠨᠡᠭᠡᠭᠡᠭᠲᠦᠨ ᠭᠡᠬᠦ ᠳ᠋ᠦ᠍ ᠬᠠᠳ᠌ᠵᠢ ᠷᠠᠾᠢ᠍ᠮ᠂
— ᠲᠣᠭᠣᠷᠢᠭ ᠤ᠋ᠨ ᠳᠠᠷᠤᠭᠠ ᠶ᠋ᠢᠨ ᠪᠢᠴᠢᠭᠡᠴᠢ ᠨᠠᠮᠠᠶ᠋ᠢ᠂ ᠰᠥᠨᠢ ᠶ᠋ᠢᠨ ᠴᠠᠭ ᠳᠤ ᠬᠡᠨ ᠦᠢᠮᠡᠭᠦᠯᠵᠦ ᠪᠠᠢᠨᠠ ᠭᠡᠵᠦ ᠬᠠᠷᠢᠭᠤᠯᠪᠠ᠃
—ᠲᠦᠷᠭᠡᠨ ᠣᠩᠭᠣᠢᠯᠭᠠᠭᠲᠤᠨ᠂ ᠡᠰᠡ ᠲᠡᠭᠡᠪᠡᠯ ᠴᠢᠨᠦ ᠢᠴᠡᠭᠡ ᠶ᠋ᠢ ᠵᠠᠳᠠ ᠲᠡᠳᠡᠨ ᠰᠦᠢᠳᠬᠡᠨᠡ᠃ ᠪᠢᠳᠡ ᠤᠷᠭᠤᠭᠰᠠᠨ ᠬᠡᠷᠡᠭᠲᠡᠨ ᠢ᠋ ᠡᠷᠢᠵᠦ ᠶᠠᠪᠤᠨᠠ ᠭᠡᠪᠡ᠃
—ᠪᠢ ᠬᠣᠶᠠᠷ ᠬᠣᠨᠣᠭ ᠡᠪᠡᠳᠴᠢᠨ ᠲᠡᠢ ᠬᠡᠪᠲᠡᠵᠦ ᠪᠠᠢᠨᠠ᠃ ᠨᠠᠳᠠᠳᠤ ᠭᠠᠯ ᠨᠣᠴᠣᠭᠠᠨ ᠤᠰᠤ ᠬᠠᠯᠠᠭᠠᠵᠤ ᠥᠭᠬᠦ ᠬᠥᠮᠦᠨ ᠶᠡᠷᠦ ᠢᠷᠡᠭᠡ ᠦᠭᠡᠢ᠃ ᠬᠡᠷᠡᠭᠲᠡᠨ ᠬᠥᠮᠦᠨ ᠢ᠋ ᠨᠣᠮ ᠰᠤᠳᠤᠷ ᠬᠠᠭᠤᠯᠤᠨ ᠪᠢᠴᠢᠬᠦ ᠡᠩ ᠦ᠋ᠨ ᠨᠣᠮᠣᠬᠠᠨ ᠢᠷᠭᠡᠨ ᠦ᠌ ᠭᠡᠷ ᠲᠦ᠍ ᠡᠷᠢᠭᠡᠳ ᠶᠠᠭᠠᠬᠢᠬᠤ ᠶᠤᠮ ᠪᠣᠢ? ᠵᠡᠭᠡᠰᠦᠨ ᠳᠣᠲᠣᠭᠤᠷ ᠡᠷᠢᠭᠲᠦᠨ! ᠭᠡᠪᠡ᠃ ᠰᠢᠷᠦᠭᠦᠨ ᠳᠠᠭᠤᠨ ᠭᠠᠷᠴᠤ ᠮᠠᠷᠭᠤᠴᠠᠯᠳᠣᠬᠰᠠᠭᠠᠷ ᠡᠭᠦᠳᠡ ᠶ᠋ᠢ ᠬᠥᠮᠦᠨ ᠲᠣᠭᠰᠢᠪᠠ᠃ ᠭᠡᠨᠡᠳᠲᠡ ᠰᠢᠷᠬᠠᠳᠤᠭᠰᠠᠨ ᠠᠷᠢᠶᠠᠲᠠᠨ ᠪᠠᠷᠬᠢᠷᠠᠬᠤ ᠮᠡᠲᠦ ᠴᠢᠮᠡᠭᠡ ᠱᠤᠤᠭᠢᠶᠠᠨ ᠢ᠋ ᠳᠠᠷᠤᠭᠠᠳ ᠬᠥᠮᠦᠨ ᠦ᠌ ᠶᠠᠷᠬᠢᠯᠠᠬᠤ᠂ ᠶᠣᠢᠯᠠᠬᠤ ᠰᠣᠨᠣᠰᠳᠠᠨ ᠤᠯᠠᠮ ᠤᠯᠠᠮ ᠬᠣᠯᠠᠳᠠᠭᠰᠠᠭᠠᠷ ᠨᠠᠮᠵᠢᠪᠠ᠃ ᠬᠠᠳ᠌ᠵᠢ ᠷᠠᠾᠢ᠍ᠮ ᠦᠭᠡ ᠬᠡᠯᠡᠬᠦ ᠭᠡᠲᠡᠯᠡ ᠭᠡᠢᠴᠢᠨ ᠦ᠌ ᠭᠠᠷ ᠲᠡᠭᠦᠨ ᠦ᠌ ᠠᠮᠠ ᠶ᠋ᠢ ᠲᠠᠭᠯᠠᠭᠰᠠᠨ᠃
—ᠲᠡᠳᠡᠨ ᠦ᠌ ᠪᠠᠰᠢᠷ ᠠᠷᠭᠠ ᠶ᠋ᠢ ᠲᠠ ᠮᠡᠳᠡᠬᠦ ᠦᠭᠡᠢ᠂ ᠲᠡᠳᠡ ᠵᠣᠷᠢᠭᠤᠳᠠ ᠢᠩᠭᠢᠵᠦ ᠪᠠᠢᠨᠠ᠃ ᠵᠠᠷᠢᠮ ᠨᠢ ᠨᠢᠭᠤᠭᠳᠠᠨ ᠤᠲᠤᠬᠤ ᠪᠠᠷ ᠣᠳᠴᠤ᠂ ᠵᠠᠷᠢᠮ ᠨᠢ ᠬᠠᠭᠠᠯᠭᠠᠨ ᠤ᠋ ᠴᠠᠭᠠᠨᠠ ᠮᠢᠷᠢᠶᠠᠨ ᠵᠣᠭᠰᠣᠵᠤ ᠪᠠᠢᠵᠤ ᠮᠠᠭᠠᠳ ᠦᠭᠡᠢ᠃ ᠲᠤᠯᠤᠯᠳᠤᠬᠤ ᠳ᠋ᠤ᠌ ᠪᠡᠯᠡᠳᠬᠡᠵᠦ ᠬᠦᠯᠢᠶᠡᠬᠦ ᠬᠡᠷᠡᠭᠲᠡᠢ ᠭᠡᠵᠦ ᠴᠢᠬᠢᠨ ᠳ᠋ᠦ᠍ᠨᠢ ᠰᠢᠪᠡᠨᠡᠨ ᠬᠡᠯᠡᠵᠡᠢ᠃ ᠨᠠᠷᠢᠨ ᠴᠣᠩᠬᠣᠨ ᠤ᠋ ᠳᠡᠷᠭᠡᠳᠡ ᠬᠣᠶᠠᠭᠤᠯᠠ ᠣᠴᠢᠭᠠᠳ ᠰᠥᠨᠢ ᠶ᠋ᠢᠨ ᠬᠠᠷᠠᠩᠭᠤᠢ ᠳ᠋ᠤ᠌ ᠶᠠᠭᠤᠮᠠ ᠬᠠᠷᠠᠬᠤ ᠶ᠋ᠢ ᠴᠢᠷᠮᠠᠢᠨ ᠠᠮᠢᠰᠬᠤᠯ ᠢ᠋ᠶ᠋ᠠᠨ ᠳᠠᠷᠤᠨ ᠵᠣᠭᠰᠣᠬᠤ ᠳ᠋ᠤ᠌᠂ ᠲᠣᠳᠣᠷᠬᠠᠢ ᠪᠢᠰᠢ ᠴᠢᠮᠡᠭᠡ ᠰᠡᠷᠴᠢᠭᠢᠨᠡᠨ᠂ ᠵᠠᠷᠢᠮ ᠳ᠋ᠠᠭᠠᠨ ᠰᠢᠪᠡᠷᠡᠭᠡ ᠪᠣᠷᠣᠭᠠ ᠨᠠᠪᠴᠢᠨ ᠤ᠋ ᠳᠡᠭᠡᠷᠡ ᠱᠠᠭᠢᠨ ᠣᠷᠣᠵᠤ ᠪᠠᠢᠯᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠠᠯᠲᠠᠨᠴᠢᠮᠡᠭ᠂ ᠪᠠᠯ
ᠬᠢᠨᠠᠭᠴᠢ᠄ ᠲ· ᠬᠦᠮᠦᠵᠢᠯᠲᠦ᠂ ᠪᠠᠯ᠂ ᠠᠷᠢᠭᠤᠨ᠂ ᠠᠯᠲᠠᠨᠴᠢᠮᠡᠭ᠂ ᠪᠠᠶᠠᠨᠴᠡᠴᠡᠭ